Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» COV ZAJ NYEEM NRUAB LIS PIAM XYOO I 2016-2017
by Mim 24th February 2017, 7:54 pm

» COV ZAJ NYEEM HNUB CHIV XYOO A 2016-2017
by NrhiavTswvNtuj 23rd February 2017, 8:50 am

» XH.Zoov Ntxheb Yaj Nthuav Ntawv Ntshiab.
by Maiv Tooj 23rd February 2017, 8:42 am

» TP.Txhiaj Foom lub TSEV Ntawv
by Maiv Tooj 21st February 2017, 8:04 am

» Xib Hwb Thoj Xyooj lub neej
by Maiv Tooj 13th February 2017, 11:15 am

» Tshuaj NTSUAB
by Lajpovyaj 12th February 2017, 8:54 am

» COV ZAJ NYEEM RAU TEJ HNUB TSHWJ XEEB
by Mim 24th January 2017, 5:06 pm

» Hmoob Guyane
by Yaj Suav Nus 21st January 2017, 6:59 am

» XH. Yaj Zoov Ntxheb lub Tsev THOOB TSIB
by Maiv Tooj 19th January 2017, 10:10 am

» Tswv Ntuj txoj kev HLUB. Cob Tsib teb.
by NrhiavTswvNtuj 17th January 2017, 11:45 pm

» HMOOB CATHOLIC NYOB COB TSIB TEB (Hmong Catholic Vietnam)
by Maiv Tooj 17th January 2017, 11:19 pm

» Nos Hes lub nkoj = L'Arche de Noé = Noah's Ark
by NrhiavTswvNtuj 13th January 2017, 9:53 am

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM XYOO I 2016-2017

    Share

    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    COV ZAJ NYEEM NRUAB LIS PIAM XYOO I 2016-2017

    Post  Mim on 2nd December 2016, 1:33 pm

    TIM 28 LUB 11 HLIS 2016

    Hnub Ob Lis Piam Ib Caij Tos Huab Tais Xyoo A Nruab Lis Piam Xyoo I

    Zaj Nyeem Ib: HIS XAIS 4: 2-6


    2 Hnub ntawd, HUAB TAIS tus ceg ntoo yuav zoo nkauj thiab nto koob meej, cov txiv ntoo hauv lub teb chaws yuav ua kom cov His Xas Lais uas dim txoj sia tau ntsej muag thiab muaj meej mom. 3 Cov uas tseem nyob hauv Xis Yoos, thiab cov uas tseem nyob hauv Yes Lus Xas Les, mas luag yuav hu lawv ua cov ntshiab: yog txhua leej uas luag sau npe tseg tias yuav nyob hauv Yes Lus Xas Les.
    4 Huab Tais yuav xub tshuab ib pa hluav taws kub los txiav txim ntxuav cov ntxhais Xis Yoos tej txhaum qias neeg pov tseg, thiab yaug cov ntshav nrog nyob hauv Yes Lus Xas Les pov tseg. 5 Thaum tas lawm, Huab Tais yuav tsim ib tw huab los vov lub roob Xis Yoos thiab vov cov neeg sib txoos nyob ntawd thaum yav nruab hnub, nws yuav tsim ib co pa taws cig cig pom kev lug thaum yav tsaus ntuj. 6 Vim Huab Tais lub hwj chim yuav ua lub kaus roos thiab thaiv lawv, yuav ua ntxoov ntxoo roos tshav ntuj kub thaum nruab hnub, yuav ua chaw nkaum cua hlob thiab nkaum nag rau lawv.

    NPN 122: 1-2, 3-4B, 4CD-5, 6-7, 8-9

    Txais: Tuaj peb zoo siab hlo mus pem Huab Tais tsev

    Kuv zoo siab vim lawv hais rau kuv tias:.
    "Peb yuav nce mus lawm pem Huab Tais tsev.”
    Yes Lus Xas Les, nim no, peb txhais taw
    tau tsuj koj cov rooj loog lawm.

    Txais…

    Yes Lus Xas Les, luag txhim zoo li ib lub nroog
    Uas zoo tau xwm yeem.
    Cov xeem neeg nce mus pem nws,
    Yog Huab Tais cov xeem neeg

    Txais…

    Lawv nce mus raws li txoj cai qhia rau His Xas Lais,
    Kom tau cav txog Huab Tais lub Npe.
    Nyob ntawd muaj ib co rooj txiav txim teeb tau tseg,
    Yog cov rooj cia rau Das Vis tsev neeg.

    Txais…

    Nej thov ntuj rau Yes Lus Xas Les kom muaj kev thaj yeeb!
    Kom cov neeg uas nyiam koj tsuas muaj kev vam meej!
    Kom kev thaj yeeb nyob hauv koj cov ntsa loog,
    Kom kev vam meej nyob hauv koj cov vaj tsev.

    Txais…

    Vim kuv cov txheeb ze thiab cov phooj ywg,
    kuv yuav foom rau koj: “Kom kev thaj yeeb nyob hauv koj!”
    Vim muaj Huab Tais peb tus Tswv Ntuj lub tsev,
    Kuv yuav thov ntuj kom koj tsuas tau kev zoo.

    Txais…

    As Les Lus Yas: NPN 80: 4

    Txais: As les lus yas, as les lus yas.

    Thov koj tuaj cawm peb, Huab Tais, peb tus Tswv Ntuj;
    Cia koj lub ntsej muag ci tuaj rau saum peb, ces peb yuav tau txais kev cawm.

    Txais: As les lus yas, as les lus yas.

    Ntawv Moo Zoo: MT 8: 5-11

    5 Thaum Yes Xus mus hauv Kas Fas Naus, ib tug xab txheeb txav los ze Yes Xus, nws thov tias : 6 "Huab Tais, kuv tus tub txib pw tom tsev, nws tes taw tuag tas. Nws mob heev kawg." 7 Yes Xus teb tias : "Kuv yuav mus kho nws kom zoo." 8 Tus xab txheeb hais ntxiv tias : "Huab Tais, kuv tsis tsim nyog koj chaws los hauv kuv lub qab ru tsev, tsuav yog koj hais ib lo lus xwb ces kuv tus tub txib yeej yuav zoo hlo. 9 Vim kuv kuj yog ib tug neeg zwm rau tus hlob thiab, kuv muaj ib co tub rog zwm rau kuv thiab. Yog kuv hais rau ib tug tias : 'Koj mus !' nws cia li mus, kuv ho hais rau lwm tus tias : 'Koj los,' nws kuj cia li los. Kuv hais rau kuv tus tub txib tias : 'Koj ua qhov no !' nws cia li ua." 10 Yes Xus hnov nws hais li ntawd, Yes Xus qhuas kawg. Nws hais rau cov neeg raws nws tias : "Kuv hais tseeb rau nej tias, kuv tsis tau pom dua ib tug neeg uas yuav ntseeg npaum li ntawd nyob hauv cov His Xas Lais. 11 Kuv hais rau nej, yuav muaj neeg coob tuaj Toob Fab thiab Xib Fab tuaj nrog Has Nplas Has, His Xas Has thiab Yas Kos zaum noj rooj qav hauv Ntuj lub Ceeb Tsheej.”



    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 2nd December 2016, 1:36 pm

    TIM      29     LUB     11     HLIS      2016

    Hnub Peb Lis Piam Ib Caij Tos Huab Tais Xyoo A Nruab Lis Piam Xyoo I

    Zaj Nyeem Ib:      HIS XAIS  11:   1-10


    Hnub ntawd,
    1 Ib tug ceg yuav hlav ntawm Yes Xes lub hauv paus los, ib tug ntsuag yuav ncau ntawm Yes Xes cov cag tuaj. 2 HUAB TAIS lub tswv yim yuav nyob rawv saum nws. Yog ib lub tswv yim thoob tsib thiab muaj kev to taub, ib lub tswv yim pab xav tom ntej tom qab thiab muaj zog, ib lub tswv yim paub txuj thiab hwm HUAB TAIS. 3 Nws txoj kev zoo siab yog kev hwm HUAB TAIS. Nws yuav tsis txiav txim raws li qhov muag pom sab nraud, nws yuav tsis xaiv kev taug raws li hnov lus moo cua hais. 4 Nws yuav txiav txim ncaj rau cov tsis muaj zog, nws yuav muab ib lub txim ncaj rau cov neeg tsis muaj hwj chim hauv lub teb chaws.  Nws siv rab pas ntawm nws lub ncauj los ntaus lub teb chaws, nws siv cov pa ntawm nws di ncauj los tua cov lim hiam. 5 Kev ncaj yuav yog nws txoj siv sia duav, kev pheej xeeb yuav yog nws txoj siv sia ntawm ntsag. 6 Tus hma yuav nrog tus thav yaj nyob ua ke, tus tsov pom txwv yuav nrog tus thav tshis pw. Tus xyuas nyuj, tus thav tsov ntxhuav, thiab tus tsiaj rog yuav mus ua ke; ib tug me nyuam yuav ua lawv ntej. 7 Tus nyuj thiab tus dais nog zaub, nkawd cov me nyuam yuav pw ua ke, tus tsov ntxhuav yuav noj quav nyab xws li tus heev nyuj. 8 Tus me nyuam mos yuav ua si nyob ntawm nab qhov chaw, tus me nyuam me yuav cev tes rau hauv nab muaj taug lub qhov.  9 Yuav tsis muaj ua phem tsis muaj sib tua nyob saum tas kuv lub roob ntshiab, vim kev paub HUAB TAIS yuav nyob puv teb chaws, ib yam li dej puv lub hiav txwv.
    10 Txog hnub ntawd, Yes Xes tus cag yuav sawv zoo li ib lub cim rau cov haiv neeg; cov kuj cuab yuav tuaj nrhiav nws; nws lub vaj tse yuav nto moo lug.

    NPN      72:   1-2, 7-8, 12-13, 17

    xais: Lub caij nws ua vaj, kev ncaj yuav tawg paj, yuav muaj kev thaj yeeb lug tsis txawj kawg.

    Tswv Ntuj, pub koj txoj kev haum pheej rau tus vaj,
    Thiab pub koj txoj kev ncaj rau vaj ntxwv tus tub;
    Nws yuav tswj koj haiv neeg raws kev ncaj
    thiab cov neeg me raws kev haum pheej.

    Txais: Lub caij nws ua vaj, kev ncaj yuav tawg paj, yuav muaj kev thaj yeeb lug tsis txawj kawg.

    Kev ncaj yuav tawg paj lub caij nws ua vaj,
    thiab yuav muaj kev thaj yeeb lug mus txog thaum tsis muaj lub hli ntxiv.
    Thov kom nws tswj ib lub hiav txwv mus dhau ib lub hiav txwv,
    Thiaj txij tus niam dej mus txog npoo ntiaj teb.

    Txais: Lub caij nws ua vaj, kev ncaj yuav tawg paj, yuav muaj kev thaj yeeb lug tsis txawj kawg.

    Nws yuav cawm tus pluag uas hu txog nws,
    thiab yuav npo tus txom nyem uas tsis muaj chaw khaub zig.
    Nws yuav hlub tus neeg me thiab tus neeg pluag;
    Nws yuav cawm cov pluag txoj sia.

    Txais: Lub caij nws ua vaj, kev ncaj yuav tawg paj, yuav muaj kev thaj yeeb lug tsis txawj kawg.

    Thov kom nws lub npe nto moo mus li;
    Kom nws lub npe nyob ntev npaum lub hnub.
    Nyob hauv nws, txhua xeem neeg nyob ntiaj teb yuav tau hmoov zoo;
    txhua haiv neeg yuav tshaj tawm nws txoj kev zoo siab.

    Txais: Lub caij nws ua vaj, kev ncaj yuav tawg paj, yuav muaj kev thaj yeeb lug tsis txawj kawg..

    As Les Lus Yas

    Txais:   As les lus yas, as les lus yas.

    Peb tus Huab Tais yuav tuaj nrog kev muaj hwj huam;
    Nws yuav ua kom nws cov tub txib qhov muag pom kev.

    Txais: As les lus yas, As les lus yas

    Ntawv Moo Zoo:      LK  10:   21-24

    21 Yes Xus zoo siab nyob hauv Leej Ntuj Plig Ntshiab, nws hais tias : "Leej Txiv, kuv cav lus zoo txog koj, Huab Tais kav lub ntuj lub teb, koj tau zais tej ntawd rau cov neeg thoob tsib thiab cov neeg ntse, tiam sis koj qhib rau cov neeg me coj li tus me nyuam paub. Leej Txiv, vim koj yeej nyiam ua li ntawd. 22 Kuv Txiv muab tas ib puas tsav yam rau kuv. Tsis muaj leej twg paub tias Leej Tub yog tus twg, kawg yog Leej Txiv thiaj paub. Tsis muaj leej twg paub tias Leej Txiv yog tus twg, kawg yog Leej Tub thiaj paub, thiab kawg yog tus uas Leej Tub xav qhia rau kom paub." 23 Yes Xus tig los rau nws cov thwj tim, nws hais twj ywm rau lawv tias : "Ob lub qhov muag uas pom tej yam nej pom no tau txoj hmoov zoo ! 24 Kuv hais rau nej tias coob tus yaj saub thiab coob tus vaj xav pom qhov uas nej pom, tab sis lawv tsis tau pom, xav hnov tej uas nej hnov, tab sis tsis tau hnov."[/b][/b]

    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 2nd December 2016, 1:41 pm

    TIM 30 LUB 11 HLIS 2016

    Hnub Plaub Lis Piam Ib Caij Tos Huab Tais Xyoo A Nruab Lis Piam Xyoo I

    Hwm LN As Nres, ua Hauv Paus Xa Lus

    Zaj Nyeem Ib: LOS MAS 10: 9-18


    9 Yog koj di ncauj lees tias Yes Xus yog Huab Tais, thiab koj lub siab ntseeg tias Tswv Ntuj tau tsa Yes Xus tuag sawv rov los, mas koj yuav txais kev cawm neeg. 10 Vim lub siab uas ntseeg tiag tau kev ncaj ua nws tug, lub ncauj uas lees ntseeg tau txais kev cawm. Muaj ntawv sau cia tias : ‘Tus ntseeg txog nws, yuav tsis poob ntsej muag.’ 12 Li ntawd, txhob hais tias cov Yus Das thiab cov Hes Las sib txawv, sawv daws muaj ib tug Huab Tais xwb, yog tus Huab Tais pub paj tshab ntau rau cov neeg hu txog nws. 13 Vim Ntawv yeej sau cia tias : ‘Leej twg hu txog Huab Tais lub npe, nws yuav ntsib kev cawm neeg.’ 14 Cov uas tsis tau ntseeg txog Huab Tais, mas lawv yuav ua cas hu txog nws ? Cov tsis tau hnov Huab Tais lo lus, mas lawv yuav ua cas ntseeg ? Yog tsis muaj neeg tshaj Ntuj lus, luag yuav ua li cas hnov tau Ntuj lo lus ? 15 Yog tsis muaj tus xa yus mus tshaj Ntuj lus mas yus yuav ua li cas tshaj ? Ntawv sau cia tias : ‘Cov neeg xa moo zoo, mas lawv ko taw zoo nkauj.’ 16 Tab sis tsis yog sawv daws tau mloog lub moo zoo. Vim His Xais hais tias : ‘Huab Tais, leej twg mloog cov lus peb tshaj ?’ 17 Li ntawd, kev ntseeg yug ntawm kev tshaj Ntuj lus los. Kev tshaj Ntuj lus yog kev tshaj Leej Pleev lo lus. 18 Ces kuv nug tias : ‘Tej zaus, cov His Xas Lais tsis tau hnov Ntuj Lo Lus ? Tab sis Ntawv hais tias : ‘Cov tub tshaj Ntuj lus lub suab ntxhe mus thoob ntiaj teb. Lawv cov lus nrov mus txog tim npoo ntuj.’

    Nkauj Paj Nruag 19: 8, 9, 10, 11

    Txais: (10) Huab Tais cov kev txiav txim yog qhov tseeb, txhua yam yog ncaj ncees..
    los:
    Txais: (Zam 6:63) Koj cov lus, Huab Tais, yog ntsuj plig thiab yog txoj sia.

    HUAB TAIS txoj cai zoo tas nrho,
    nws ntxiv siav rau ntsuj plig;
    HUAB TAIS tus txhooj yog qhov tseeb,
    nws ua kom tus neeg ruam thoob tsib tuaj.

    Txais: (10) Huab Tais cov kev txiav txim yog qhov tseeb, txhua yam yog ncaj ncees..
    los:
    Txais: (Zam 6:63) Koj cov lus, Huab Tais, yog ntsuj plig thiab yog txoj sia.

    HUAB TAIS cov lus qhuab qhia yog lus ncaj
    ua kom neeg lub siab kaj.
    HUAB TAIS lo lus qhia ntshiab si,
    ua kom neeg pom kev.

    Txais: (10) Huab Tais cov kev txiav txim yog qhov tseeb, txhua yam yog ncaj ncees..
    los:
    Txais: (Zam 6:63) Koj cov lus, Huab Tais, yog ntsuj plig thiab yog txoj sia.

    Kev hwm HUAB TAIS yog kev dawb huv,
    kev hwm Huab Tais yuav nyob mus li.
    HUAB TAIS cov lus txiav txim yog lus tseeb,
    yog lus ncaj ncees.

    Txais: (10) Huab Tais cov kev txiav txim yog qhov tseeb, txhua yam yog ncaj ncees..
    los:
    Txais: (Zam 6:63) Koj cov lus, Huab Tais, yog ntsuj plig thiab yog txoj sia.

    HUAB TAIS cov lus tsim nyog ntshaw dua kub,
    los ib txhab tseem kub,
    qab dua zib ntab,
    los zib nas muv.

    Txais: (10) Huab Tais cov kev txiav txim yog qhov tseeb, txhua yam yog ncaj ncees..
    los:
    Txais: (Zam 6:63) Koj cov lus, Huab Tais, yog ntsuj plig thiab yog txoj sia.

    As Les Lus Yas MT 4: 19

    Txais: As les lus yas, as les lus yas.

    Huab Tais hais tias: Nej raws kuv mus,
    Kuv yuav tsa nej ua cov tub puav neeg.

    Txais: As les lus yas, as les lus yas.

    Ntawv Moo Zoo: MT 4: 18-22

    18 Yes Xus mus ko taw taug ntug dej ntuj Nkas Lis Lais, nws pom ob kwv tij : Xis Moos uas hu ua Pob Zeb, thiab nws tus kwv As Nres. Nkawd tseem tab tom pov vas ntses rau hauv dej ntuj, vim nkawd yog tub puav ntses. 19 Yes Xus hais rau nkawd tias : "Neb raws kuv mus, kuv yuav tsa neb ua tub puav neeg." 20 Nkawd tso plhuav cov vas ntses tam sis ntawd, nkawd raws Yes Xus mus. 21 Yes Xus mus ntxiv, nws ho pom ob kwv tij ntxiv : Yas Kos, uas yog Ntxes Npes Dais tus tub, thiab Zam uas yog Yas Kos tus kwv, nkawd nrog nkawd txiv Ntxes Npes Dais nyob hauv nkoj, lawv tseem tab tom ntxiv lawv cov vas ntses. Yes Xus hu nkawd. 22 Tam sis ntawd, nkawd tso plhuav lub nkoj thiab nkawd txiv tseg, nkawd raws Yes Xus mus.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 2nd December 2016, 2:05 pm

    TIM 1 LUB 12 HLIS 2016

    Hnub Tsib Lis Piam Ib Caij Tos Huab Tais Xyoo A Nruab Lis Piam Xyoo I

    Zaj Nyeem Ib: HIS XAIS 26: 1-6


    1 Hnub ntawd, nyob Yus Das teb lawv yuav hu zaj nkauj li no : "Peb muaj ib lub tsheej ruaj khov; nws xav txuag peb, nws tsa ntsa zeb thiab phab ntsa siab thaiv. 2 Nej qhib cov rooj loog mas ! Cia haiv neeg siab ncaj nkag los, haiv neeg uas muaj kev ntseeg. 3 Muaj ib lub hom phiaj zoo li no tseg lawm: koj yuav ua kom muaj kev thaj yeeb, koj yog tus saib xyuas txog kev thaj yeeb. 4 Nej tso siab rau HUAB TAIS tas mus li! Vim HUAB TAIS yog lub tsua uas nyob ib txhiab ib txhis. 5 Nws yog tus ua kom cov nyob saum tej chaw siab poob rau qhov chaw qis; lub tsheej uas nyob saum qhov siab, nws ua kom poob nthav rau qhov qis, vau hlo rau hauv av, yaj ntshis ua plua tshauv tas. 6 Nws yuav raug cov neeg txom nyem muab ko taw tsuj thiab raug cov neeg me tshais ruam tsuj nws."

    NPN 118:1 + 8-9, 19-21, 25-27A

    Txais: (26a) Tus tuaj ntawm Huab Tais lub npe tuaj nws nto koob meej.

    Nej cav lus zoo txog HUAB TAIS, vim nws siab zoo,
    nws hlub peb tas ib txhiab ib txhis.
    Khiav los nkaum hauv HUAB TAIS, zoo dua tso siab rau neeg !
    Khiav los nkaum hauv HUAB TAIS, zoo dua tso siab rau cov muaj peev xwm.

    Txais: (26a) Tus tuaj ntawm Huab Tais lub npe tuaj nws nto koob meej.

    Nej qhib cov rooj vag mus hauv txoj kev nca rau kuv,
    kuv yuav chaws mus, kuv yuav ua HUAB TAIS tsaug.
    Ntawm no yog HUAB TAIS lub rooj vag;
    cov neeg ncaj yuav nkag nov mus.
    Kuv yuav ua koj tsaug, vim koj tau teb kuv, koj yog tus cawm kuv.

    Txais: (26a) Tus tuaj ntawm Huab Tais lub npe tuaj nws nto koob meej.

    HUAB TAIS, thov pub kev cawm rau peb!
    HUAB TAIS, thov pub kev yeej rau peb!
    Tus tuaj ntawm HUAB TAIS lub npe tuaj, nws nto koob meej.
    Peb nyob hauv HUAB TAIS tsev foom koob hmoov rau nej.
    HUAB TAIS yog Tswv Ntuj, nws pub qhov pom kev rau peb..

    Txais: (26a) Tus tuaj ntawm Huab Tais lub npe tuaj nws nto koob meej.

    As Les Lus Yas (His Xais 55:6)

    Txais: As les lus yas, As les lus yas

    Nrhiav HUAB TAIS thaum nej tseem nrhiav tau nws;
    hu nws thaum nws tseem nyob ze.

    Txais: As les lus yas, As les lus yas

    Zaj Ntawv Moo Zoo: Mas Tais 7: 21, 24-27

    21 “Tsis yog cov hu kuv tias : "Huab Tais, Huab Tais," thiaj yuav tau mus hauv Ntuj lub Ceeb Tsheej. Tiam sis yog cov ua raws li kuv Txiv nyob saum ntuj lub siab nyiam. 24 Leej twg mloog cov lus uas kuv nyuam qhuav hais, thiab ua raws li cov lus no, mas tus neeg ntawd piv tau rau ib tug neeg xyuam xim uas nws txhim tsev rau saum tsua. 25 Thaum los nag hlob, dej sab siv huam, cua tshuab ntsawj lub tsev, tab sis tsev tsis vau, vim lub tsev cog rau saum tsua. 26 Hos leej twg hnov cov lus kuv nyuam qhuav hais, tab sis nws tsis ua raws li cov lus ntawd, tus neeg ntawd piv tau rau ib tug neeg ruam txhim tsev rau saum av xuab zeb. 27 Thaum los nag hlob, dej sab siv huam, cua tshuab ntsawj lub tsev, ces lub tsev vau. Nws raug xwv txheej loj.”


    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 2nd December 2016, 2:08 pm

    TIM 2 LUB 12 HLIS 2016

    Thawj Hnub Rau Lis Piam Ib Caij Tos Huab Tais Xyoo A Nruab Lis Piam Xyoo I

    Zaj Nyeem Ib: His Xais 29: 17-24


    17 Puas muaj tseeb tias tshuav tsis ntev ntxiv, ces teb chaws Lis Npaas yuav rov hloov ua ib lub vaj txiv ntoo zoo heev, zoo cuag li yog ib lub hav zoov nuj txeeg? 18 Hnub ntawd, cov neeg lag ntseg yuav hnov cov lus nyob hauv phau ntawv, cov dig muag qhov muag yuav pom kev, yuav dim ntawm qhov tsaus ntuj dub nciab. 19 Cov neeg me yuav zoo siab loj nyob hauv HUAB TAIS, cov pluag tshaj tej yuav dhia zoo siab nyob hauv His Xas Lais tus Ntshiab. 20 Tus neeg siab phem yuav tsis muaj ntxiv, tus thuam luag yuav ploj ntais, cov neeg nyas ntshis ua kev phem yuav raug tshem tawm tas: 21 Yog cov neeg uas hais lus kom luag raug txim, cov neeg cuab ntxiab rau tus txiav txim nyob ntawm lub rooj loog, thiab nrhiav kev ua kom tus siab ncaj txhob tau kev txiav txim ncaj ncees. 22 Vim li ntawd, HUAB TAIS, Yas Kos tsev neeg tus Tswv Ntuj, tus cawm Has Nplas Has dim nws hais li no : Txij no mus, Yas Kos yuav tsis raug kev txaj muag ntxiv, yuav tsis ua ntsej muag puas nyas ntxiv. 23 Vim thaum nws pom nws cov me nyuam, uas yog kuv ob txhais tes tsim, nyob hauv nws tsev, nws yuav cav txog kuv lub npe ntshiab. Nws yuav tshaj tias Yas Kos tus Ntshiab yeej Ntshiab tiag. Nws yuav hwm His Xas Lais tus Tswv Ntuj . 24 Cov neeg tswv yim yuam kev yuav rov muaj kev to taub. Cov neeg yws taus yuav mloog lus qhuab qhia.

    NPN 27: 1, 4, 13-14

    Txais: Huab Tais yog kuv qhov pom kev thiab kuv txoj kev cawm.

    Huab Tais yog kuv qhov pom kev thiab kuv txoj kev cawm;
    Kuv yuav ntshau leej twg?
    Huab Tais yog kuv qhov chaw nkaum hauv kuv lub neej,
    Kuv yuav ntshai leej twg?

    txais....

    Kuv tsuas thov ib yam ntawm Huab Tais; qhov kuv nrhiav yog:
    kom tau nyob hauv Huab Tais lub tsev niaj hnub hauv kuv lub neej;
    Kom kuv tau ntsia ntsoov Huab Tais txoj kev zoo thiab tau pom nws lub tuam tsev.

    Txais…

    Kuv ntseeg hais tias kuv yuav tau pom Huab Tais txoj kev nplua mias nyob hauv cov neeg ciaj sia lub teb chaws.
    Ua siab loj tos ntsoov Huab Tias;
    ua siab tawv qhawv tos ntsoov Huab Tais.

    Txais…

    As Les Lus Yas

    Txais: As les lus yas, As les lus yas.

    Ntsia saib, peb tus Huab Tais yuav tuaj muaj hwj huam ntxiag;
    nws yuav ua kom nws cov tub txib qhov muag pom kev

    Txais: As les lus, As les lus yas.

    Ntawv Moo Zoo: Mas Tais 9: 27-31

    27 Thaum Yes Xus tawm ntawm qhov chaw ntawd mus, muaj ob tug neeg dig muag raws nws qab. Nkawd qw qw hais tias : "Das Vis Leej Tub, thov koj khuv leej wb." 28 Thaum Yes Xus los txog hauv tsev, ob tug dig muag los ze Yes Xus, ces Yes Xus hais rau nkawd tias : "Neb puas ntseeg tias kuv ua tau qhov ntawd ?" Nkawd teb tias : “Huab Tais, wb ntseeg.” 29 Ces Yes Xus kov nkawd qhov muag, nws hais tias : "Xav kom muaj tuaj rau neb raws li neb ntseeg." 30 Ces nkawd qhov muag qhib plho. Yes Xus txwv nkawd nruj nruj tias : "Neb ceev faj ! Kom txhob muaj neeg paub txog!" 31 Tab sis, thaum nkawd tawm mus lawm, nkawd tshaj rau ib cheeb tsam ntawd paub tas huv si.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 2nd December 2016, 2:09 pm

    TIM 3 LUB 12 HLIS 2016

    Thawj Hnub Xya Lis Piam Ib Caij Tos Huab Tais Xyoo A Nruab Lius Piam Xyoo I

    Hwm LN Francis Xavier, ua Leej Choj

    Zaj Nyeem Ib: His Xais 30: 19-21, 23-26


    19 Muaj tseeb, Xis Yoos tsoom neeg uas nyob Yes Lus Xas Les, nej yuav tsis quaj ntxiv : vim nws yuav ua zoo rau nej thaum nws hnov nej lub suab quaj. Nws hnov kiag nej hu, ces nws yuav teb ntua tam sid. 20 Huab Tais yuav muab cov mov txhawj xeeb thiab cov dej iab dej daw rau nej, tiam sis tus qhuab qhia nej yuav tsis nyob deb nej ntxiv, nej qhov muag yuav pom tus qhuab qhia nej. 21 Nej pob ntseg yuav hnov ib lo lus ntawm nej nraub qaum tuaj tias : "Ntawm no yog txoj kev, nej taug mus, txawm nej mus sab xis los sab laug kuj tau." 23 Nws yuav pub nag los ywg cov noob qoob nej tseb rau hauv av. Ces cov mov uas tawm hauv av los yuav qab rog thiab zoo yug nej lub cev. Hnub ntawd, nej cov tsiaj yuav nog zaub hauv tej lub tiaj zaub dav. 24 Cov heev nyuj thiab cov luj uas ua txoj hauj lwm laij teb yuav noj cov zaub uas yog xuas duav hlau thiab duav nkaug daus rau noj. 25 Saum tej toj roob ntseg ntsees thiab tej pov roob siab, yuav muaj dej txhawv thiab dej ntws sis lug, yog txog hnub sib tua loj thiab cov vaj loog zeb yuav vau tas. 26 Ces lub hli yuav ci pom kev npaum lub hnub hos lub hnub yuav ci pom kev tshaj xya npaug ntxiv, ib yam li yog xya hnub qhov pom kev ua ib hnub ci, hnub ntawd HUAB TAIS yuav qhwv nws haiv neeg cov qhov txhab thiab yuav kho lawv cov nqaij ntuag uas yog raug luag nplawm.

    NPN 147:1-2, 3-4, 5-6

    Txais: (His Xais 30:18d) Txhua tus uas tos Huab Tais tau txoj hmoov zoo.

    Nej cav txog Huab Tais, vim nws siab zoo
    nej hu nkauj cav txog peb tus Tswv Ntuj, vim nws hlub neeg;
    tsim nyog peb cav txog nws.
    HUAB TAIS rov tsa Yes Lus Xas Les;
    nws sau His Xas Lais cov neeg tawg tas rov los ua ke.

    Txais…

    Nws kho cov neeg mob siab mob ntsws
    thiab qhwv lawv tej qhov txhab.
    Nws suav cov hnub qub;
    nws tis lawv cov npe ib lub zuj zus.

    Txais…

    Peb tus HUAB TAIS loj thiab muaj hwj huam tas nrho;
    nws txoj kev thoob tsib tsis muaj qhov txawj tag.
    HUAB TAIS tsa cov neeg me cai;
    nws thawb cov siab phem ntog hauv av.

    Txais…


    As Les Lus Yas (His Xai 33: 22)

    Txais: As les lus yas, As les lus yas

    HUAB TAIS yog tus txiav txim rau peb, yog tus kav peb, yog peb tus vaj; nws yog tus yuav cawm peb dim.
    .
    Txais: As les lus yas, As les lus yas

    Zaj Ntawv Moo Zoo: Mas Tais 9: 35-10:1, 5A, 6-8

    35 Yes Xus mus ncig txhua cov nroog thiab cov zos huv si, nws qhia sawv daws nyob hauv cov tsev txoos, nws tshaj lub Moo Zoo txog Ntuj lub Ceeb Tsheej, nws tseem kho sawv daws tej txiab xeeb thiab tej mob nkeeg tas huv si. 36 Yes Xus pom tsoom pej xeem, nws hlub lawv, vim lawv sawv daws sab thiab qaug zog zoo li ib co yaj tsis muaj tsw zov. 37 Yes Xus thiaj hais rau nws cov thwj tim tias : "Qoob loo ntau kawg, tab sis cov tub zog tsawg. 38 Nej thov tus tswv qoob kom nws xa ib co tub zog tuaj sau nws cov qoob."
    10 1 Yes Xus hu nws kaum ob leeg thwj tim los cuag nws. Nws muab hwj huam kom lawv ntiab tau dab tawm, thiab kho tau tej txiab xeeb thiab tej mob nkeeg kom thim. 5 Yes Xus xa kaum ob leeg no mus tshaj lub Moo Zoo, nws qhia lawv tias : 6 “Nej xub mus cuag cov yaj ploj hauv haiv His Xas Lais. 7 Thaum nej mus kev, nej ceeb toom tias Ntuj lub Ceeb Tsheej tuaj txog ze lawm.
    8 Nej kho cov mob kom zoo, nej tsa cov tuag kom ciaj rov los, nej kho cov mob ruas kom huv, nej ntiab dab kom khiav. Nej tau txais dawb, nej yuav pub dawb.”


    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 5th December 2016, 7:15 am

    TIM 5 LUB 12 HLIS 2016

    Hnub Ob Lis Piam Ob Caij Tos Huab Tais Xyoo A Nruab Lis Piam Xyoo I

    Zaj Nyeem Ib: HIS XAIS 35: 1-10


    1 Cov teb chaws suab puam thiab tej teb av qhuav yuav dhia zoo siab; lub teb chaws av phem yuav zoo siab thiab tawg paj. 2 Lawv yuav tawg paj ncw nra paug thiab yuav hu tej zaj nkauj zoo siab; lawv yuav tau txais Lis Npas lub koob meej thiab roob Kas Mes thiab Sas Los qhov zoo nkauj. Lawv yuav pom HUAB TAIS lub hwj chim, uas yog peb tus Tswv Ntuj lub meej mom ci ntsa iab. 3 Nej ua kom cov tuag tes rov muaj zog, kom cov hauv caug ntshaus raws rov khov tuaj. 4 Nej hais rau cov siab me tias : "Nej ua siab loj ! Nej txhob ntshai ! Ntsia saib, nej tus Tswv Ntuj tuaj lawm ! Nws tuaj hais qhov ncaj kom peb muaj ntsej muag, nws nqa paj tshab saum ntuj tuaj, nws tuaj cawm peb. 5 Ces cov dig muag ob lub qhov muag yuav rua hlo, cov lag ntseg ob lub pob ntseg yuav qhib plho. 6 Tus neeg ceg tawv yuav dhia nrawm xws tus muas lwj, tus nplaig txhav yuav hu tau nkauj. Ib co dej yuav txhawv tawm hauv cov teb chaws suab puam los, tej tus dej loj yuav ntws tawm hauv cov teb chaws av qhuav los. 7 Thaj av suab puam kub lug yuav hloov ua pas dej, lub teb chaws tshaib dej yuav txhawv dej ntws lug tawm los; thaj chaw uas hma nyob yuav hloov ua hav iav muaj tauj deg thiab muaj ncaug ua ntawv. 8 Nyob ntawd, yuav muaj ib txog kev rau lawv taug, ib txog kev loj tis npe hu ua "txoj Kev Ntshiab." Tus neeg tsis huv yuav mus tsis tau txoj kev ntawd, tsuas yog Nws xwb thiaj yuav taug txoj kev ntawd pub rau nws haiv neeg; cov neeg vwm yuav tsis yuam kev mus taug txoj kev ntawd. 9 Yuav tsis muaj tsov, tsis muaj tsiaj tsiv tsaim nyob ntawd, yuav tsis pom ib tug nyob ntawd li, tsuas yog cov uas Ntuj tau txhiv lawv thiaj tau taug xwb. 10 Vim cov neeg uas HUAB TAIS txhiv yuav rov qab los, lawv yuav chaws mus hauv Xis Yoos thiab nqua suab zoo siab ntag yees, ib txog kev zoo siab mus ib txhiab ib txhis nyob saum lawv taub hau. Kev zoo siab thiab luag ntxhwb ntxhi yuav nrog lawv nraim, kev tu siab thiab quaj ntsuag yuav ploj ntais mus.

    Nkauj Paj Nruag 85: 9AB + 10, 11-12, 13-14

    Txais: (H X 35:4f) Peb tus Tswv Ntuj yuav tuaj cawm peb!

    Kuv mloog saib Tswv Ntuj hais dab tsi.
    Huab Tais nws tshaj txog kev thaj yeeb rau nws haiv neeg,
    Nws txoj kev cawm los txog ze ze cov hwm nws lawm,
    nws lub hwj chim nyob txawm hauv peb lub teb chaws.

    Txais: (H X 35:4f) Peb tus Tswv Ntuj yuav tuaj cawm peb!

    Kev ua zoo thiab kev tseeb yuav sib ntsib,
    kev ncaj thiaj kev thaj Yeeb yuav los sib puag.
    Kev Tseeb yuav nthaw kaus tawm hauv ntiaj teb los,
    kev Haum Pheej yuav dauv muag saum ntuj los.

    Txais: (H X 35:4f) Peb tus Tswv Ntuj yuav tuaj cawm peb!

    HUAB TAIS yuav pub txiaj ntsim puv npo,
    peb cov av yuav ntsu qoob loo ntau tshaj qub.
    Kev Haum Pheej yuav mus ua nws ntej,
    Kev cawm yuav mus raws txoj kev nws hneev taw rhawv.

    Txais: (H X 35:4f) Peb tus Tswv Ntuj yuav tuaj cawm peb!

    As Les Lus Yas

    Txais: As les lus yas, as les lus yas.

    Tus vaj yuav tuaj, yog tus Huab Tais kav ntiaj teb,
    nws yuav daws lub nra uas zoj peb.

    Txais: As les lus yas, as les lus yas.

    Ntawv Moo Zoo: LK 5: 17-26

    17 Tseem muaj ib hnub, thaum Yes Xus tab tom qhia sawv daws, muaj ib cov Fas Lis Xais thiab ib co Kws Txoj Cai tuaj ntawm tej lub zos hauv xeev Nkas Lis Lais, xeev Yus Das, thiab tuaj Yes Lus Xas Les tuaj. Lawv sawv daws zaum nyob ntawd. Huab Tais lub hwj huam ua kom Yes Xus kho tau cov neeg mob zoo. 18 Muaj ib pab neeg kwv ib tug tuag ceg saum ib lub txaj tuaj. Lawv nrhiav kev nqa tus tuag ceg mus hauv tsev, coj nws mus tso ntawm Yes Xus xub ntiag. 19 Tab sis lawv tsis tau kev nqa tus tuag ceg mus rau sab hauv, vim neeg coob dhau. Ces lawv nce mus saum ru tsev, lawv dawj cov thwv cib vov tsev, lawv dauv tus tuag ceg pw hauv nws lub txaj nqes mus hauv nruab nrab, rau ntawm Yes Xus xub ntiag. 20 Yes Xus pom lawv ntseeg, nws hais tias : "Ntawm koj, mas koj cov txhaum daws tas lawm." 21 Cov Kws Ntawv Ntshiab thiab cov Fas Lis Xais xav twj ywm rau nruab siab tias : "Tus neeg ntawd yog leej twg, nws thiaj thuam Ntuj ? Leej twg yuav daws txhaum tau ? Kawg yog Tswv Ntuj tib leeg xwb." 22 Yes Xus twb paub qhov lawv xav hauv nruab siab lawm, nws hais rau lawv tias : "Vim li cas nej thiaj xav tej zaj tswv yim li ntawd hauv nej siab ? 23 Lo lus twg yog lo hais yooj yim dua, lo lus tias : 'Koj cov txhaum daws tas lawm,' los yog lo lus tias : 'Koj sawv, koj mus kev ?' 24 Ua li mas, kom nej paub tias Neeg Leej Tub muaj hwj huam daws txhaum tau nyob ntiaj teb,” ces Yes Xus hais rau tus tuag ceg tias : “Kuv hais rau koj : koj sawv, koj nqa koj lub txaj, koj rov mus tsev." 25 Tam sis ntawd, tus tuag ceg sawv tsees ntawm sawv daws xub ntiag, nws nqa lub txaj uas thaum tuaj nws pw, nws rov mus tsev, nws cav txog Tswv Ntuj. 26 Sawv daws yoob tas, lawv cav txog Tswv Ntuj. Lawv ntshai kawg, lawv hais tias : "Hnub no, peb pom tej yam txawv kawg nkaus !"



    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 5th December 2016, 8:12 am

    TIM 6 LUB 12 HLIS 2016

    Hnub Peb Lias Piam Ob Caij Tos Huab Tais Xyoo A Nruab Lis piam Xyoo I

    Hwm LN Niv Kos Las (Nicholas)

    Zaj Nyeem Ib: HIS XAIS 40: 1-11


    1 Nej tus Tswv Ntuj hais tias : "Nej nplij kuv haiv neeg, nej nplij lawv mas ! 2 Nej hais lus rau hauv Yes Lus Xas Les nruab siab, nej qw nrov nrov rau nws tias nws lub caij ua dej num tiav lawm, nws them txim txhaum txaus lawm; vim cov kev nyob txim uas nws txais ntawm HUAB TAIS txhais tes los them nws cov txhaum twb tshaj ob npaug lawm." 3 Muaj ib lub suab qw tias : "Nej npaj ib txog kev hauv teb chaws suab puam rau HUAB TAIS taug. Nej ncaws ib txog kev ncaj hauv cov teb chaws quav poj rau peb tus Tswv Ntuj. 4 Nej txhub cov hav tob rau, nej ua kom cov roob siab thiab cov pov roob cia li qis tuaj, kom cov tiaj muaj av siab av qis hloov ua hav tiaj tus yees, kom cov toj ntxhab hloov ua vos hav dav fo. 5 Ces HUAB TAIS lub hwj chim yuav tawm plaws los rau txhua tus tib neeg ib txhij pom, vim HUAB TAIS lub ncauj tau hais li.
    6 Ib lub suab nrov tuaj tias : "Koj qw mas !" Kuv teb tias : "Kuv yuav qw hais dab tsi ?" -"Tas nrho tib neeg zoo li nroj tsuag, hos lawv kev zoo nkauj zoo li lub paj nroj tom tej nras. 7 Thaum HUAB TAIS tshuab pa tuaj rau saum lawv mas tsob nroj qhuav, lub paj ntsws; (vim yog tias, tsoom pej xeem ces yog nroj tsuag). 8 Tsob nroj qhuav, lub paj ntsws, tab sis peb tus Tswv Ntuj lo lus yuav nyob mus li."
    9 “Koj nce mus saum ib lub roob siab, tus tshaj xo Xis Yoos aw, koj tsa suab qw kom nrov npaum li nrov tau mog, tus tshaj xo Yes Lus Xas Les! Koj txhob ntshai cuab suab qw rau cov nroog Yus Das tias : ‘ Ntawm no yog nej tus Tswv Ntuj! 10 Ntawm no yog HUAB TAIS Tswv Ntuj, nws tuaj txog muaj hwj huam loj, nws txhais npab muaj zog ua tswv kav sawv daws. Nws nqa nws cov paj tshab nrog nws, hos nws tus nqe zog ua nws ntej. 11 Nws zoo li ib tug tswv zov yaj muab zaub rau nws pab yaj noj; nws khaws cov me nyuam yaj nqa ntawm nws ob txhais npab, puag lawv rau hauv nws xub ntiag, nws maj mam ua zoo coj cov maum yaj.

    NPN 96:1-2, 3+10AC, 11-12, 13

    Txais: (saib HX40:10ab) Huab Tais peb tus Tswv Ntuj tuaj muaj hwj huam.

    Nej hu ib zaj nkauj tshiab rau HUAB TAIS;
    txhua lub teb chaws, nej hu nkauj rau HUAB TAIS.
    Nej hu nkauj rau HUAB TAIS, nej foom lus zoo cav txog nws lub npe;
    nej tshaj tawm txog nws txoj kev cawm seej, hnub dhau hnub.

    Txais…

    Nej piav txog nws lub hwj chim rau txhua haiv neeg
    nej piav nws tej hauj lwm txaus qhuas rau txhua xeem neeg.
    Hais rau txhua haiv neeg tias: HUAB TAIS yog vaj ntxwv;
    Nws tswj tsoom pej xeem raws kev ncaj ncees.

    Txais…

    Kom lub ntuj zoo siab, lub ntiaj teb hom khaj;
    kom dej hiav txwv thiab txhua yam nyob hauv tsa suab nrov nrov;
    kom cov tiaj nras thiab txhua yam nyob hauv luag ntxhi!
    Thiab kom txhua tus ntoo hauv tej hav zoov zoo siab.

    Txais…

    Lawv yuav dhia zoo siab ntawm HUAB TAIS xub ntiag,
    vim nws tuaj txog lawm, nws tuaj kav lub ntiaj teb.
    Nws yuav tswj lub ntiaj teb raws kev ncaj ncees,
    thiab cov haiv neeg raws kev pheej xeeb.

    Txais…

    As Les Lus Yas

    Txais: As les lus yas, As les lus yas.

    Huab Tais hnub tuaj txog ze lawm.
    Ntsias saib, nws tuaj cawm peb.

    Txais: As les lus yas, As les lus yas

    Zaj Ntawv Moo Zoo Mas Tais 18: 12-14

    Yes Xus hais rau nws cov thwj tim tias:
    12 “Raws li nej xav, yog ib tug neeg muaj ib puas tus yaj, ib tug mus poob zoo lawm, nws puas yuav tsis tso cuaj caum cuaj tug ntawd cia saum roob, mus nrhiav tus uas poob zoo lawd ? 13 Kuv hais tseeb rau nej, thaum nws nrhiav tau tus yaj poob zoo, mas nws zoo siab rau tus ntawd tshaj rau cuaj caum cuaj tug uas tsis tau poob zoo. 14 Nej Txiv nyob saum ntuj kuj zoo ib yam li ntawd thiab : nws tsis xav kom ib tug me nyuam no ploj li.”



    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 7th December 2016, 5:06 am

    TIM 7 LUB 12 HLIS 2016

    Hnub Plaub Lis Piam Ob Caij Tos Huab Tais Xyoo A Nruab Lis Piam Xyoo I

    Hwm LN Ambrose, ua Tswv Qhia thiab Kws Txuj Kev Ntseeg

    Zaj Nyeem Ib: His Xais 40: 25-31


    25 Tus Ntshiab Dawb Huv hais tias : “Nej yuav muab kuv piv rau leej twg tias kuv loj ib yam li ntawd ? 26 Nej tsa muag ntsia puag saum qhov siab ces nej yuav pom tias yog leej twg tau tsim tej ntawd. Nws ua kom lawv tshwm tawm los nyias nyob nyias chaw zoo li tej pab peeb zeej, nws tuav lawv npe hu ib yam zuj zus. Vim nws lub hwj huam loj tas nrho, nws lub zog hnyav kawg nkaus, yeej tsis muaj ib yam uas yuav tsis tawm los nyob. 27 Yas Kos, vim li cas koj hais tau li no, His Xas Lais, vim li cas koj thiaj hais tsis tseg tias : ‘Kuv txoj kev nyob nraim ntawm HUAB TAIS nws tsis pom, kuv tus Tswv Ntuj tsis quav ntsej txog tias kuv muaj cai dab tsi’ ? 28 Puas yog koj tseem tsis tau paub? Puas yog koj tseem tsis tau hnov txog? HUAB TAIS yog tus Tswv Ntuj nyob mus ib txhiab ib txhis, nws tsim cov npoo ntiaj teb kawg. Nws tsis qaug zog tsis sab. Neeg tsom tsis tau nws txoj kev ntse. 29 Tswv Ntuj ntxiv zog rau tus neeg qaug zog, nws ntxiv zog ntau npaug rau tus zog tab. 30 Txawm cov tub hluas txawj tsaus muag txawj qaug zog, cov tiav hluas mus kev qaug zuj zis thiab txawj ntog, 31 los cov neeg uas cia siab rau HUAB TAIS yuav rov muaj zog ntsos tuaj, lawv yuav muaj tis ya siab xws li dav, lawv khiav los tsis paub sab, lawv mus kev los tsis paub tsaus muag.

    NPN 103:1-2, 3-4, 8-10

    Txais: (1) Kuv tus ntsuj plig, koj cia li cav txog Huab Tais!

    Kuv tus ntsuj plig, cia li cav txog HUAB TAISs,;
    tas nrho kuv tus kheej, cia li cav txog nws lub npe ntshiab.
    Kuv tus ntsuj plig, cia li cav txog HUAB TAISs,
    thiab tsis txhob hnov qab nws tej txiaj ntsim koob hmoov.

    Txais…

    Nws zam tas nrho koj cov txhaum rau koj,
    nws kho tas koj tej mob nkeeg kom zoo.
    Nws txhiv koj txoj sia ntawm lub qhov tuag los,
    nws muab nws txoj kev hlub thiab nws lub siab muag roos koj.

    Txais…

    HUAB TAIS khuv leej thiab hlub neeg,
    nws npau taws qeeb, nws muaj kev hlub loj.
    Nws tsis ua rau peb kom phim peb tej txhaum,
    nws tsis ua pauj kom phim peb txoj kev ua phem.

    Txais…

    As Les Lus Yas

    Txais: As les lus yas, As les lus yas

    Nej ntsia, Huab Tais tuaj cawm nws haiv neeg;
    cov uas npaj rawv tos yuav ntsib nws, lawv txoj hmoov zoo.

    Txais: As les lus yas, As les lus yas

    Ntawv Moo Zoo: Mas Tais 11: 28-30

    Yes Xus hais rau cov neeg coob coob tias:
    28 “Tas nej sawv daws uas nej khwv thiab ris nra hnyav, nej tuaj cuag kuv mog ! Kuv yuav cia nej so los siav. 29 Nej txais kuv tus quab mus kwv, nej kawm ntawm kuv, vim kuv siab zoo, kuv tsis muab hlob, nej tus plig yuav nrhiav tau chaw so los siav. 30 Vim kuv tus quab kwv yooj yim, thiab kuv lub nra sib.”


    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 7th December 2016, 5:08 am

    Tim 8 lub 12 hlis 2016

    Hnub Tsib Lis Piam Ob Caij Tos Huab Tais Xyoo A Nruab Lis Piam Xyoo II

    Ua koob tsheej txog Niam Mab Liab Xeeb los tsis lo txhaum
    Nyob As Mes Lis Kas teb, peb yuav tsum mus koom Thaj Txi Ntuj ib yam li yog Hnub Chiv




    Zaj Nyeem 1 :  HAUV PAUS 3:9-15, 20


    9 HUAB TAIS Tswv Ntuj hu tus txiv neej hais tias : "Koj nyob qhov twg ?" 10 Tus txiv neej teb tias : "Kuv hnov koj tshais ruam hauv lub vaj. Kuv ntshai vim kuv liab qab, kuv thiaj khiav tsiv nraim." 11 Tswv Ntuj rov hais ntxiv tias : "Leej twg qhia koj tias koj liab qab ? Yog koj noj lub txiv uas kuv txwv tsis pub noj lawm puas yog ?" 12 Tus txiv neej teb tias : "Yog tus poj niam uas koj tso nyob ze kuv, muab lub txiv rau kuv, ces kuv thiaj noj !" 13 HUAB TAIS Tswv Ntuj hais rau tus poj niam tias : "Koj ua dab tsi li ntawd ?" Tus poj niam teb tias : "Yog niag nab ntxias kuv, kuv thiaj noj." 14 Ces HUAB TAIS Tswv Ntuj hais rau tus nab hais tias : "Vim koj tau ua li ntawd, koj txoj hmoov yuav phem tshaj ib tsoom tsiaj nyeg thiab tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej. 15 Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws."
    20 Tus txiv neej tis npe rau nws poj niam hu ua Es Vas, vim nws yog ib tsoom neeg muaj txoj sia leej niam.

    NPN   98:1, 2-3AB, 3CD-4

    Txais: (1) Nej hu ib zaj nkauj tshiab rau Huab Tais, vim nws tau ua tej yam txaus qhuas

    Nej hu ib zaj nkauj tshiab rau Huab Tais, vim nws tau ua tej yam txaus qhuas;
    Nws txhais tes xis tau ua  kom nws muaj yeej, nws txhais npab dawb huv tau ua.

    Txais…

    HUAB TAIS tau qhia nws txoj kev cawm seej rau sawv daws paub;
    nws tau qhia nws txoj kev ncaj rau cov haiv neeg pom.      
    Nws tau nco qab txog nws lub siab zoo thiab nws lub siab pheej xeeb
    rau His Xas Lais tsev neeg.

    Txais...

    Tim daim npoo ntiaj teb txhua qhov tau pom
    peb tus Tswv Ntuj txoj kev cawm seej lawm.  
    Tas cov teb chaws, nej hu nkauj luag ntxhi rau HUAB TAIS;
    Cia li seev suab hu nkauj, cia li hu nkauj qhuas nws.  

    Txais…

    Zaj Nyeem  2     ES FES XOS 1:3-6, 11-12

    Paj Lug sau ntawv tias:
    3 Kuv cav lus zoo txog Tswv Ntuj, peb tus Huab Tais Yes Xus Pleev Leej Txiv, tus uas tau foom txhua yam txiaj ntsim koob hmoov nyob saum ntuj pub rau peb, nyob hauv Leej pleev. 4 Thaum tseem tsis tau tsim lub ntuj lub teb, Tswv Ntuj twb xaiv peb nyob hauv Leej Pleev lawm, kom peb ntshiab huv, tsis muaj chaw xyeej rau ntawm nws xub ntiag nyob hauv txoj kev nyiam, 5 nws yeej xub npaj peb los ua nws cov tub sau ntxhais sau nyob hauv Yes Xus Pleev thaum ntxov lawm. Nws lub siab nyiam yeej xav kom ua zoo li ntawd, 6 kom tau cav txog nws lub txiaj ntsim koob meej, uas yog yam khoom plig nws pub dawb rau peb nyob hauv leej Zoo Nyiam.
    11 Kuj yog nyob hauv nws, peb raug xaiv cia ua ntej, muab txhem rau ib cag, raws li tus uas coj tas txhua yam haum li nws siab nyiam tus txheej txheem,  12 kom peb ua cov uas xub tso siab rau Leej Pleev ua ntej kom tau cav txog nws lub koob meej.

    As Les Lus Yas  (LK  1:   28)

    Txais: As les lus yas, As les lus yas.
    Koj nyob zoo, Mab Liab, koj tau txiaj ntsim puv siab, Huab Tais Ntuj nrog koj nyob;
    koj tau koob tau hmoov tshaj ib tsoom poj niam tib si.

    Txais: As les lus yas, As les lus yas.

    Zaj Ntawv Moo Zoo  LUS KAS 1:26-38

    26 Lub rau hli, Tswv Ntuj xa tus Tshiab Nkas Nplias mus cuag ib tug ntxhais hauv ib lub zos nyob Nkas Lis Lais. Lub zos ntawd hu ua Nas Xas Les. 27 Tus ntxhais ntawd, lawv muab qhaib rau ib tug txiv neej hu ua Yos Xes, caj ces Das Vis lawm. Hos tus ntxhais lub npe hu ua Mab Liab. 28 Tus Tshiab chaws mus hauv Mab Liab tsev, nws hais rau Mab Liab tias : "Koj nyob kaj lug, tus tau txiaj ntsim puv siab ! Huab Tais nrog koj nyob." 29 Mab Liab hnov lo lus ntawd, nws lub siab nphau npog, nws xav hauv nruab siab tias lo lus hawm ntawd yog dab tsi. 30 Tus Tshiab hais rau Mab Liab tias : "Mab Liab, koj tsis txhob ntshai. Tswv Ntuj saib koj ntxim Tswv Ntuj siab. 31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus. 32 Nws yuav yog ib tug loj, luag yuav hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws. 33 Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg." 34 Mab Liab hais rau tus Tshiab tias : "Qhov ntawd yuav muaj tuaj zoo li cas, vim kuv tsis paub ib tug txiv neej." 35 Tus Tshiab teb rau Mab Liab tias : "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub. 36 Saib ! Es Lis Xas Npes, tus uas txheeb koj, luag hu nws ua pog khoom, nws hnub nyoog laus lawm, tab sis nws kuj xeeb tub lawm thiab. Lub hlis no, nws xeeb tub tau rau hli lawm. Vim tias, tsis muaj ib yam uas Tswv Ntuj ua tsis tau." 38 Ces Mab Liab hais tias : "Kuv yog Huab Tais tus ntxhais txib. Kuv xav kom muaj raws li koj hais." Tus Tshiab thiaj tso Mab Liab tseg.


    Last edited by Mim on 8th December 2016, 5:43 am; edited 2 times in total

    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 8th December 2016, 5:41 am

    Tim 9 lub 12 Hlis 2016

    Hnub Rau Lis Piam Ob Caij Tos Huab Tais Xyoo I

    Hwm LN Juan Diego

    Zaj Nyeeem Ib: HIS XAIS 48: 17-19


    17 HUAB TAIS, tus txhiv koj thiab His Xas Lais tus Ntshiab, nws hais li no : "Kuv yog koj tus HUAB TAIS, koj tus Tswv Ntuj, kuv qhia yam yuav zoo rau koj kom koj paub, thiab kuv coj koj mus taug txoj kev koj yuav tsum taug. 18 Kheev lam koj muab siab rau mloog kuv cov lus qhia, mas koj txoj kev zoo siab yuav ntws lug xws li ib tug dej thiab koj txoj kev ncaj yuav ntas ntua zoo li cov dej nyob hauv hiav txwv. 19 Koj caj ces yuav ntau npaum li cov suab zeb, cov tawm hauv koj los yuav coob npaum li cov tsig zeb. Lawv lub npe yuav tsis raug muab txiav tawm los tshem tawm ntawm kuv mus li.

    NPN 1: 1-2, 3, 4 + 6

    Txais: (Zam 8: 12) Cov uas raws koj qab, Huab Tais, lawv yuav muaj kev kaj lub neej.

    Muaj hmoov zoo yog tus uas tsis coj raws tus neeg phem zaj tswv yim,
    los taug cov neeg txhaum txoj kev,
    los zaum nrog cov neeg saib tsis taus luag tej,
    tiam sis nws zoo siab hlo coj HUAB TAIS txoj cai,
    thiab nws xav ntsoov HUAB TAIS txoj cai nruab hnub hmo ntuj.

    Txais: (Zam 8: 12) Cov uas raws koj qab, Huab Tais, lawv yuav muaj kev kaj lub neej.

    Nws zoo li ib tsob ntoo cog nyob ze cov dej ntws,
    nws txi txiv raws caij raws nyoog,
    thiab nws tej nplooj tsis txawj zeeg li.
    Nws ua yam twg tau yam ntawd.

    Txais: (Zam 8: 12) Cov uas raws koj qab, Huab Tais, lawv yuav muaj kev kaj lub neej.

    Tus neeg phem tsis zoo li ntawd,
    lawv zoo li cov npluag nplej uas cua muab nplawm tawm mus.
    Vim HUAB TAIS saib ntsoov tus neeg ncaj txoj kev,
    hos tus neeg phem txoj kev yaj ntshis mus.

    Txais: (Zam 8: 12) Cov uas raws koj qab, Huab Tais, lawv yuav muaj kev kaj lub neej.

    As Les Lus Yas

    Txais: As les lus yas, as les lus yas.

    Huab Tais yuav tuaj, kav tsij tawm mus ntsib nws!
    Nws yog tus vaj muaj kev thaj yeeb.

    Txais: As les lus yas, as les lus yas.

    Ntawv Moo Zoo: MT 11: 16-19

    Yes Xus hais tias:
    16 “Kuv yuav muab tiam neeg no piv rau leej twg ned ? Tiam neeg no zoo li ib pab me nyuam yaus zaum tom tshav puam, lawv rov sib hu tias : 17 ‘Peb twb tshuab raj rau nej, nej tsis dhia li! Peb cuab suab nqua nkauj tuag, los nej tsis nyiav li !’ 18 Zam tuaj, nws tsis noj mov, tsis haus cawv, lawv hais tias : ‘Nws raug dab !’ 19 Neeg Leej Tub tuaj, nws noj mov haus cawv, lawv hais tias : ‘Saib tus ntawd ! Nws hu dab thiab quav cawv, nws nrog cov sau se thiab cov neeg txhaum ua phooj ywg !’ Tab sis, kev Thoob Tsib cov hauj lwm ua kom kev Thoob Tsib tau txais kev ncaj ncees lawm.”


    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th December 2016, 6:17 am

    TIM 10 LUB 12 HLIS 2016

    Hnub Xya Lis Piam Ob Caij Tos Huab Tais Xyoo A Nruab Lis Piam Xyoo I

    Zaj Nyeem Ib: Npes Xis Las 48: 1-4, 9-11


    1 Ces tus Yaj Saub Es Lias sawv tsees xws li ib co hluav taws, nws lo lus kub cuag li ib teg tsau.
    2 Nws ua kom kev tshaib plab tuaj raug lawv, nws lub siab kub ua kom lawv tau kev txom nyem.
    3 Nws hais Huab Tais lo lus los muab cov dej nag saum ntuj kaw cia.
    Nws kuj ua hluav taws nqes saum ntuj los peb zaug.
    4 Es Lias, koj cov hwj huam yees ntxwv ua kom koj muaj koob meej loj.
    Leej twg yuav khav tau tias nws loj ib yam li koj ?
    9 Ib lub khaub zeeg hluav taws nqa koj mus lawm, koj caij ib lub tsheb uas yog ib co nees hluav taws luab.
    10 Ntuj xaiv koj ua tus yuav rov los thaum ua ntej lub caij kawg; Ntuj yuav npau taws, koj yuav ua kom Ntuj siab nqig; koj yog tus coj phaj txiv lub siab rov los npuab phaj tub; koj yuav rov tuaj tsav cov xeem Yas Kos.
    11 Cov neeg uas yuav pom koj, lawv txoj hmoov zoo; cov neeg uas tuag nyob hauv kev sib hlub lawv txoj hmoov kuj yuav zoo, vim peb kuj yuav muaj txoj sia nyob thiab.

    NPN 80: 2AC + 3B, 15-16, 18-19

    Txais: (4) HUAB TAIS, thov koj tig peb lub siab rov los npuab koj;
    koj pub koj lub ntsej muag rau peb pom ces peb yuav txais kev cawm.

    His Xas Lais tus tswv zov yaj e, thov cuab pob ntseg mloog.
    Tus zaum saum cov tshiab kes lus npis, thov koj ci ntsa tuaj.
    Koj tsa koj lub hwj huam kom tsim dheev.

    Txais…

    HUAB TAIS kav ib tsoom tshiab,
    thov koj rov dauv muag saum ntuj los ntsia.
    Thov koj los tu tsob txiv cawv no,
    thov koj txuag yam uas koj txhais tes xis tau cog,
    neeg tus tub uas koj tau ua kom muaj zog.

    Txais…

    Thov koj tsa tes tuaj pab tus neeg uas yog koj sab tes xis,
    tus neeg leej tub uas koj tau ua kom muaj zog.
    Ces peb thiaj yuav tsis ncaim deb ntawm koj ntxiv.
    Thov koj muab txoj sia tshiab rau peb, peb yuav vam txog koj lub npe.

    Txais…

    As Les Lus Yas: LUS KAS 3: 4, 6

    Txais: As les lus yas, As les lus yas

    Nej npaj txoj kev rau Huab Tais, nej ua kom nws txoj kev ncaj.
    Txhua leej neeg yuav pom Tswv Ntuj txoj kev cawm seej.

    Txais: As les lus yas, As les lus yas

    Ntawv Moo Zoo : Mas Tais 17: 9a, 10-13

    9 Thaum lawv nqes saum roob los,
    10 cov thwj tim nug Yes Xus li no : "Ua cas cov Kws Ntawv Ntshiab hais tias Es Lias yuav xub los tso ?"
    11 Yes Xus teb tias : "Yog. Es Lias yeej yuav los, nws yuav kho ib puas tsav yam kom zoo.
    12 Tiam sis kuv hais rau nej : Es Lias twb los lawm, tab sis lawv zeem tsis tau nws, lawv ua lwj ua liam rau nws raws lawv siab. Neeg Leej Tub kuj yuav raug lawv tsim ib yam nkaus."
    13 Ces cov thwj tim thiaj to taub tias Yes Xus hais txog Zam Ntxuav Plig.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 12th December 2016, 6:16 am

    TIM  12  LUB  12  HLIS   2016

    Hnub Ob Lis Piam Peb Caij Tos Huab Tais Xyoo A Nruab Xyoo I

    Hwm Leej Niam nyob Nkuas Das Lus Pes (Guadalupe)




    Zaj Nyeem Ib:  Xaiv:  

    Ntxes Kas Lias 2: 14-17


    14 Leej Ntxhais Xis Yoos, koj hu nkauj, koj zoo siab mog ! Koj ntsia kuv tuaj lawm,  kuv tuaj nyob hauv koj: HUAB TAIS hais li ntawd.  15 Hnub ntawd, ntau haiv neeg yuav mus koom nrog HUAB TAIS; lawv yuav yog nws haiv neeg. Lawv yuav tuaj nyob hauv koj ces koj yuav paub tias tus HUAB TAIS kav tsoom tshiab xa kuv tuaj rau koj. 16 Huab Tais yuav tau Yus Das los ua nws tug nyob hauv lub teb chaws ntshiab thiab nws yuav rov xaiv Yes Lus Xas Les. 17 Txhua tus muaj lub cev nqaij, nej nyob ntsiag to ntawm HUAB TAIS xub ntiag, vim nws nti sawv los nyob hauv nws lub tsev ntshiab.

    Los     Qhib Yav Tom Ntej 11: 19a; 12: 1-6a, 10ab

    19 Ces Tswv Ntuj lub Tuam Tsev nyob saum ntuj qhib plho, pom lub Xab Cog Lus tshwm los nyob hauv lub tuam tsev.
    12  1 Muaj ib lub cim loj tas nrho tshwm nyob saum ntuj : yog ib tug Poj Niam hnav lub hnub. Lub hli nyob hauv nws qab xib taws. Nws ntoo kaum ob lub hnub qub saum taub hau zoo li ib lub mom teev kub. 2 Tus Poj Niam ntawd xeeb tub lawm. Nws ntsaj mob, vim nws tab tom daws cev. 3 Tseem muaj dua ib lub cim tshwm tuaj nyob saum ntuj : ib tug niag Zaj loj kawg, liab ploog cuag hluav taws, nws muaj xya lub taub hau thiab kaum tus kub. Txhua lub taub hau ntoo ib lub mom kub.  4 Nws tus ko tw cheb cov hnub qub saum ntuj tas lawm ib feem peb. Nws muab pov los rau hauv ntiaj teb. Ces tus Zaj mus sawv ntsug ntawm tus poj niam uas tab tom daws cev xub ntiag, npaj nqos tus me nyuam uas tus poj niam yuav yug. 5 Tus Poj Niam yug tau ib tug me tub : yog tus yuav tuav ib rab cwj hlau coj tas txhua haiv neeg. Luag nqa tus me nyuam mus rau saum Tswv Ntuj, nyob ze ntawm Tswv Ntuj lub theej kiab lawm. 6 Hos tus Poj Niam khiav mus nyob hauv teb chaws suab puam : nws mus nyob hauv qhov chaw uas Tswv Ntuj npaj rau nws lawm.
    10 Ces kuv hnov ib lub suab nrov saum ntuj tuaj tias : “Zaum no, kev yeej, kev muaj hwj huam thiab kev ua vaj poob rau peb tus Tswv Ntuj ua nws tug, thiab nws Leej Pleev tau txais lub hwj chim lawm.”

    NPN:       YUS DIS  13:   18BCDE, 19

    Txais:  (15:9d) Koj yog tus ua kom luag muab peb haiv neeg saib rau qhov siab tshaj plaws.

    Me ntxhais, thov kom Tswv Ntuj tus Nyob Siab  foom koob hmoov rau koj
    ntau tshaj tas ib tsoom poj niam nyob ntiaj teb no.
    Kom txhua leej cav txog HUAB TAIS Tswv Ntuj
    tus tsim lub ntuj thiab lub ntiaj teb.  

    Txais…

    Txoj kev tso siab rau Ntuj koj tau qhia rau peb
    yuav tsis ploj ntawm tib neeg lub tswv yim mus li,
    lawv yuav nco ntsoov txog Tswv Ntuj lub hwj huam loj.

    Txais…

    As Les Lus Yas

    Txais: As les lus yas,  As les lus yas

    Koj tau txais koob hmoov ntau, leej Ntshiab Mab Liab,
    nkauj tsim txiaj dawb huv, tus tsim nyog txhua leej qhuas;  
    lub Hnub pub kev ncaj ncees tawm ntawm koj tuaj,
    yog Leej Pleev peb tus Tswv Ntuj.

    Txais: As les lus yas,  As les lus yas

    Ntawv Moo Zoo    Xaiv:

    Lus Kas 1: 26-38


    26 Lub rau hli, Tswv Ntuj xa tus Tshiab Nkas Nplias mus cuag ib tug ntxhais hauv ib lub zos nyob Nkas Lis Lais. Lub zos ntawd hu ua Nas Xas Les. 27 Tus ntxhais ntawd, lawv muab qhaib rau ib tug txiv neej hu ua Yos Xes, caj ces Das Vis lawm. Tus ntxhais lub npe hu ua Mab Liab. 28 Tus Tshiab chaws mus hauv Mab Liab tsev, nws hais rau Mab Liab tias : "Koj nyob kaj lug, tus tau txiaj ntsim puv siab ! Huab Tais nrog koj nyob." 29 Mab Liab hnov lo lus ntawd, nws lub siab nphau npog, nws xav hauv nruab siab tias lo lus hawm ntawd yog dab tsi. 30 Tus Tshiab hais rau Mab Liab tias : "Mab Liab, koj tsis txhob ntshai. Tswv Ntuj saib koj ntxim Tswv Ntuj siab. 31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus. 32 Nws yuav yog ib tug loj, luag yuav hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws. 33 Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg." 34 Mab Liab hais rau tus Tshiab tias : "Qhov ntawd yuav muaj tuaj zoo li cas, vim kuv tsis paub ib tug txiv neej." 35 Tus Tshiab teb rau Mab Liab tias : "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub. 36 Saib ! Es Lis Xas Npes, tus uas txheeb koj, luag hu nws ua pog khoom, nws hnub nyoog laus lawm, tab sis nws kuj xeeb tub lawm thiab. Lub hlis no, nws xeeb tub tau rau hli lawm. Vim tias, tsis muaj ib yam uas Tswv Ntuj ua tsis tau." 38 Ces Mab Liab hais tias : "Kuv yog Huab Tais tus ntxhais txib. Kuv xav kom muaj raws li koj hais." Tus Tshiab thiaj tso Mab Liab tseg.

    Los     Lus Kas 1: 39-47

    39 Tau ob peb hnub, ces Mab Liab sawv kev mus, nws rau siab ntso mus pem toj siab, rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 41 Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. 42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas Ntuj thiaj pub kom kuv tus Huab Tais leej niam tuaj xyuas kuv ? 44 Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. 45 Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo !" 46 Ces Mab Liab hais tias : "Kuv tus plig cav txog Huab Tais lub hwj chim, 47 kuv lub tswv yim hom khaj nyob hauv Tswv Ntuj, tus Cawm kuv.

    Thov nej rov mus nyeem zaj tshwm sim no:
    http://hmongcatholique.forumdediscussions.com/t206-niam-mab-liab-guadalupe-tshwm-sim-nyob-mexico

    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 12th December 2016, 1:53 pm

    TIM 13 LUB 12 HLIS 2016

    Hnub Peb Lis Piam Peb Caij Tos Huab Tais Xyoo A Nruab Lis Piam Xyoo I

    Hwm LN Lws Xim (Lucy), Nkauj Dawb Huv ua Tim Khawv

    Zaj Nyeem Ib: Xos Fos Nias 3: 1-2, 9-13


    HUAB TAIS hais li no:
    1 Hmoov phem rau lub nroog ntxeev siab, lub nroog vuab tsuab, nroog quab yuam tib neeg! 2 Nws tsis tau mloog lub suab hu nws, nws tsis tau nyo hau mloog lo lus qhuab qhia, nws tsis tau tso siab rau HUAB TAIS, tsis tau txav los ze nws tus Tswv Ntuj.
    9 Yog li kuv yuav ntxuav cov haiv neeg di ncauj kom dawb huv, kom lawv tau hu txog HUAB TAIS lub npe thiab tsob hwb nws raws tib tug cai. 10 Cov neeg hwm kuv yuav hla cov dej nyob Es Thos Pias teb sab tim ub tuaj, lawv yuav nqa txim tuaj txi rau kuv. 11 Hnub ntawd koj yuav tsis txaj muag ntxiv rau koj tej kev phem koj tau ntxeev siab ua rau kuv, vim kuv yuav ntiab cov neeg muab hlob khav theeb tawm hauv koj mus; koj yuav tseg tsis ua tus muaj plhus ntxiag saum kuv lub roob ntshiab ntxiv. 12 Cov neeg seem kuv yuav cia nyob hauv koj lub loog yog ib haiv neeg tsis muab hlob, tsis khav theeb; lawv yuav nrhiav chaw vam khom nyob hauv HUAB TAIS lub npe: 13 yog pab seem His Xas Lais; lawv yuav tsis coj kev nkhaus, lawv yuav tsis hais lus dag ntxiv lawm; yuav tsis pom ib tug nplaig dag nyob hauv lawv ntxiv. Lawv yuav tau kev nog zaub tau kev so, tsis muaj leej twg yuav ua ntxhov lawv siab.

    NPN 34: 2-3, 6-7, 17-18, 19+23

    Txais: (7a) Huab Tais mloog cov pluag lub suab quaj.

    Kuv yuav cav txog HUAB TAIS txhua lub sij hawm;
    nws lub koob meej yuav nyob rawv ntawm kuv lub ncauj.
    Kuv tus plig tau koob meej nyob hauv HUAB TAIS;
    tus neeg me yuav hnov kuv thiab zoo siab.

    Txais…

    Tig koj ntsej muag mus rau HUAB TAIS, koj ntsej muag yuav ci ntsa iab,
    koj ntsej muag yuav tsis liab ploog vim kev txaj muag.
    Thaum tus pluag hu, HUAB TAIS mloog
    thiab yuav cawm nws dim ntawm nws tej kev nyuaj ntxhov.

    Txais…

    HUAB TAIS tig ntsej muag mus tiv cov neeg phem,
    nws rhuav kom txhob muaj chaw nco txog lawv nyob ntiaj teb ntxiv.
    Thaum cov neeg ncaj hu, HUAB TAIS mloog lawv,
    thiab npo lawv dim ntawm tas lawv txoj kev nyuaj siab.

    Txais…

    HUAB TAIS nyob ze ze tus neeg muaj kev tu siab;
    nws pab cov neeg tag kev cia siab.
    HUAB TAIS cawm nws cov tub txib txoj sia;
    Tsis muaj ib tug uas vam khom nws yuav raug txim.

    Txais…

    As Les Lus Yas

    Txais: As les lus yas, As les lus yas.

    Huab Tais, tsuag tsuag tuaj, tsis txhob ncua ntev;
    Thov koj zam txhaum rau koj haiv neeg.

    Txais: As les lus yas, As les lus yas.

    Ntawv Moo Zoo Mas Tais 21: 28-32

    Yes Xus hais rau cov thawj leej choj thiab cov thawj coj tias:
    28 “Nej hais saib nej xav li cas. Ib tug neeg muaj ob tug tub. Nws hais rau thawj tug tias : “Me tub, hnub no koj mus ua num tom teb txiv cawv.” 29 Tus tub ntawd teb tias : “Kuv tsis xav mus.” Tab sis, ib me ntsis, nws hloov siab, ces nws cia li mus ua teb. 30 Leej txiv kuj hais rau lwm tus tub ib yam li rau thawj tug thiab. Tus tub ntawd teb tias : “Huab tais, kuv mam li mus.” Tab sis nws tsis mus. 31 Ob tug tub no, tus twg tau ua raws li leej txiv xav kom ua ? Lawv teb tias : “Yog thawj tug.” Yes Xus hais rau lawv tias : “Kuv hais tseeb rau nej, cov sau se thiab cov niam ntiav xub mus hauv Ntuj lub Ceeb Tsheej dua nej. 32 Vim tias, Zam tuaj qhia Txoj Kev ncaj rau nej, tab sis nej tsis ntseeg nws. Hos cov sau se, thiab cov niam ntiav ntseeg nws. Tab txawm nej pom lawv tus qauv zoo, tom qab no, nej kuj tsis hloov siab los ntseeg nws li.”



    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 13th December 2016, 3:57 pm

    TIM 14 LUB 12 HLIS 2016

    Hnub Plaub Lis Piam Peb Caij Tos Huab Tais Xyoo A Nruab Lis Piam Xyoo I

    Hwm LN John of the Cross/Jean de la Crix

    Zaj Nyeem Ib: HIS XAIS 45:6C-8, 18, 21B-25


    6c Kuv yog HUAB TAIS, tsis muaj dua lwm tus ntxiv. 7 Kuv puab qhov pom kev, kuv tsim qhov tsaus ntuj, kuv tsim kev noj qab nyob zoo, kuv tsim kev txom nyem. Kuv, HUAB TAIS, tsim tag txhua yam ntawd. 8 Cuaj txheej ntuj, nej tso txoj kev ncaj nqes txheej saud los xws li cov lwg, kom cov huab tso nws poob los xws li dej nag; kom lub ntiaj teb av tawg pleb, ces txoj kev cawm neeg yuav hlav tawm tuaj, thiab kev ncaj yuav nthaw kaus; kuv HUAB TAIS, tau tsim tej no los.
    18 HUAB TAIS tus tsim cuaj txheej ntuj nws hais tias, leej twg yog Tswv Ntuj, leej twg puab thiab tsim lub ntiaj teb, leej twg txawb lub ntiaj teb kom ruaj khov, tsis tsim kom yog ib qho chaw ntxhov tiam sis yog ib qho chaw xis nyob. Kuv yog HUAB TAIS, tsis muaj dua lwm tus ntxiv.
    21b Leej twg tau hais txog tej no yav thaum ub? Leej twg tau tshaj tawm txog yav thaum i ? Puas yog kuv, uas yog HUAB TAIS? Tsis muaj lwm tus tswv ntuj dua kuv lawm, uas yog ib tug Tswv Ntuj ncaj ncees thiab tus cawm neeg; tsis muaj dua lwm tus ntxiv kuv lawm. 22 Cov npoo ntiaj teb, nej tig los rau kuv, nej thiaj yuav dim! Vim kuv yog Tswv Ntuj, tsis muaj dua lwm tus ntxiv. 23 Kuv cog lus rau kuv tus kheej tias : lo lus kuv lub ncauj hais tawm los yog lo lus tseeb tiag, yog ib lo lus uas thim tsis tau. Txhua lub hauv caug yuav txhos nyob ntawm kuv xub ntiag, txhua xeem lus yuav tuav txog kuv lub npe los cog lus li no : 24 ‘Tsuas yog nyob hauv HUAB TAIS thiaj muaj kev yeej thiab kev muaj zog.’ Cov uas yav tas lawv npau taws rau nws, lawv puav leej tuaj cuag nws, lawv txaj muag tas nrho. 25 Tas His Xas Lais tsoom xeeb ntxwv yuav yeej thiab yuav nto koob meej nyob hauv HUAB TAIS.

    NPN 85: 9AB+10, 11-12, 13-14

    Txais: (HX 45: 8 ) Kom cov huab tso tus Siab Ncaj poob los li nag, thiab kom lub ntiaj teb nti tus Cawm Seej tawm los.

    Kuv yuav hnov Tswv Ntuj tshaj tawm txog dab tsi;
    Huab Tais, nws tshaj tawm txog kev thaj yeeb rau nws haiv neeg.
    Cov neeg hwm HUAB TAIS tau nws txoj kev cawm nyob ze ze lawv,
    nws lub hwj chim yuav nyob txawm hauv peb lub teb chaws.

    Txais: (HX 45: 8 ) Kom cov huab tso tus Siab Ncaj poob los li nag, thiab kom lub ntiaj teb nti tus Cawm Seej tawm los.

    Kev siab zoo thiab thiab kev tseeb yuav tuaj sib ntsib,
    kev ncaj thiab kev thaj yeeb yuav los sib puag.
    Kev tseeb yuav txhawv hauv av los,
    thiab kev ncaj yuav dauv muag ntsia saum ntuj los

    Txais: (HX 45: 8 ) Kom cov huab tso tus Siab Ncaj poob los li nag, thiab kom lub ntiaj teb nti tus Cawm Seej tawm los.

    HUAB TAIS yuav pub txoj kev nplua nuj,
    hos peb lub teb chaws yuav ntsu qoob.
    Kev ncaj yuav taug kev ua nws ntej,
    kev cawm yuav taug raws nws txoj lw.

    Txais: (HX 45: 8 ) Kom cov huab tso tus Siab Ncaj poob los li nag, thiab kom lub ntiaj teb nti tus Cawm Seej tawm los.

    As Les Lus yas HIS XAIS 40: 9-10

    Txais: As les lus yas, as les lus yas.

    Nej qw suab nrov nrov tshaj lub Moo Zoo;
    ntsia saib, peb tus HUAB TAIS Tswv Ntuj tuaj muaj hwj huam loj.

    Txais: As les lus yas, as les lus yas.

    Ntawv Moo Zoo LK 7: 18B-23

    18b Ces Zam hu nws ob leeg thwj tim los, 19 nws xa nkawd mus nug Huab Tais tias : "Koj puas yog tus yuav tuaj, los peb yuav tos dua lwm tus ?" 20 Thaum ob tug thwj tim tuaj txog ntawm Yes Xus, nkawd hais tias : "Zam Ntxuav Plig xa wb tuaj nug koj tias : "Koj puas yog tus yuav tuaj, los peb yuav tos dua lwm tus ?" 21 Lub sij hawm ntawd, Yes Xus nyuam qhuav kho coob leej muaj txiab nkeeg, raug mob, raug dab phem, thiab nws ua kom ntau tus dig muag rov pom kev. 22 Ces Yes Xus teb rau ob tug uas Zam xa tuaj tias : " Neb rov mus qhia Zam txog qhov neb tau pom thiab tau hnov : Cov dig muag rov pom kev, cov tuag ceg mus taus kev, cov mob ruas rov huv, cov lag ntseg hnov lus tuaj, cov tuag sawv rov los, hos lub Moo Zoo tuaj txog cov neeg pluag. 23 Tus uas nws tsis ntog vim kuv, mas nws txoj hmoov zoo."



    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 14th December 2016, 6:45 am

    TIM 15 LUB 12 HLIS 2016

    Hnub Tsib Lis Piam Peb Caij Tos Huab Tais Xyoo A Nruab Lis Piam Xyoo

    Zaj Nyeem Ib: HIS XAIS 54: 1-10


    1 Tus tsis muaj tub ki tsis yug me nyuam, koj cia li nqua suab zoo siab,
    cia li qw nrov nrov, koj tus uas tsis tau mob plab!
    Vim tus niam uas luag muab tso pov tseg muaj tub coob dua tus muaj txiv.
    HUAB TAIS hais li ntawd.
    2 Koj ua koj lub tsev tsam phooj kom dav tuaj mas !
    Koj nthuav koj cov ntaub kom ntau txhob cuaj khaum,
    koj txuas koj cov hlua kom ntev, koj npuj koj cov tswg kom khov khov,
    3 vim koj yuav coob nchuav ntws mus rau sab xis thiab sab laug;
    koj caj ces yuav mus txeeb ib tsoom kuj cuab ua lawv tug,
    lawv yuav mus nyob puv hauv tej nroog uas luag tau muab tso tseg.
    4 Koj tsis txhob txhawj, koj yuav tsis ntsib kev txaj muag,
    koj tsis txhob ntshai, koj yuav tsis poob ntsej muag.
    Koj yuav tsis nco qab txog txoj kev txaj muag thaum koj yav hluas ntxiv,
    koj yuav tsis nco txog txoj kev poob tsim thaum koj ua poj ntsuam ntxiv.
    5 Vim koj tus txiv yog tus tsim koj. Nws lub npe yog tus HUAB TAIS Nyob Siab.
    Tus txhiv koj yog His Xas Lais tus Ntshiab, nws hu ua Tswv Ntuj kav tas lub ntiaj teb.
    6 Koj tus plig nyob hauv txoj kev lwj siab xws li tus poj niam uas luag tso pov tseg;
    HUAB TAIS hu koj rov los, zoo li tus poj niam uas nws yuav thaum hluas
    thiab tau muab ntiab mus lawm; koj tus Tswv Ntuj hais li ntawd.
    7 Kuv tau tso koj tseg ib nyuag pliag, tab sis kuv lub siab hlub koj heev, kuv rov sau koj los.
    8 Kuv tau npau taws heev rau koj, kuv thiaj nraim kuv lub ntsej muag ib nyuag chim,
    tab sis kuv lub siab hlub koj mus tas ib txhis, kuv khuv leej koj.
    Tus HUAB TAIS txhiv koj, nws hais li ntawd.
    9 Yuav zoo ib yam li thaum lub caij Nos Hes nyob, kuv tau cog lus tias dej yuav tsis nyab ntiaj teb ib zaug ntxiv;
    nyem no, kuv cog lus tias kuv yuav tsis npau taws rau koj ntxiv, kuv yuav tsis tso hem thawj rau koj lawm.
    10 Txawm tias cov toj roob txawj txav mus, cov hauv pes txawj ua zog koog,
    los kuv lub siab hlub koj yuav tsis nrug deb ntawm koj, kuv txoj kev cog lus pub kev thaj yeeb yuav tsis hloov.
    Tus HUAB TAIS khuv leej koj nws hais li ntawd."

    NPN 30: 2+4, 5-6, 11-12A+13B

    Txais: (2a) Kuv yuav cav txog koj, Huab Tais, vim koj tau cawm kuv.

    HUAB TAIS kuv cav lus zoo txog koj, vim koj rub kuv sawv rov los,
    koj tsis cia kuv ua yeeb ncuab lub chaw zoo siab.
    HUAB TAIS koj rub kuv tus plig tawm hauv ntuj txias teb tsaus los,
    kuv nrog lawv nqes hauv qhov av, koj ua kom kuv rov muaj sia tuaj.

    Txais: (2a) Kuv yuav cav txog koj, Huab Tais, vim koj tau cawm kuv.

    Cov ntseeg HUAB TAIS, nej hu nkauj cav txog nws,
    nej ua nws tsaug cav txog nws lub npe ntshiab :
    Nws npau taws, tsuas npau ib pliag, nws hlub neeg, nws hlub tas ib sid.
    Hmo ntuj kua muag poob tsis tu, tab sis kaj ntug txoog rov muaj kev zoo siab.

    Txais: (2a) Kuv yuav cav txog koj, Huab Tais, vim koj tau cawm kuv.

    Thov koj mloog kuv, HUAB TAIS, thov khuv leej kuv;
    HUAB TAIS, thov koj ua tus pab kuv.
    Koj tau muab kuv lub caij quaj nyiav lhloov ua caij dhia lom zem,
    HUAB TAIS, kuv tus Tswv Ntuj, kuv yuav ua koj tsaug mus li.

    Txais: (2a) Kuv yuav cav txog koj, Huab Tais, vim koj tau cawm kuv.

    As Les Lus Yas: LK 3: 4, 6

    Txais: As les lus yas, as les lus yas.

    Nej npaj kev rau Huab Tais, nej ua kom nws txoj lw ncaj tuaj:
    Ces tas ib tsoom muaj lub cev nqaij yuav pom Tswv Ntuj txoj kev cawm.

    Txais: As les lus yas, as les lus yas.

    Ntawv Moo Zoo: LK 7: 24-30

    24 Thaum ob tug thwj tim Zam xa tuaj rov mus lawm, Yes Xus thiaj pib hais txog Zam rau tsoom sid tias : "Nej tawm mus saib dab tsi hauv teb chaws suab puam ? Puas yog nej mus nuam ib tsob tauj raug cua tshuab co ntuj nto? 25 Nej mus xyuas dab tsi ? Nej puas mus xyuas ib tug neeg hnav tsoos tsuj tsoos npuag laim txias? Tab sis cov neeg hnav zoo thiab noj qab, mas lawv nyob hauv cov tuam tsev vaj ntxwv xwb. 26 Ua li nej mus xyuas dab tsi tiag? Puas yog nej mus xyuas ib tug yaj saub ? Muaj tseeb. Kuv hais rau nej, nws tseem loj dua ib tug yaj saub. 27 Nws yog tus uas Ntawv sau tseg tias : ‘Ntsia saib, kuv xa kuv tus tub tshaj xo mus ua koj ntej, nws yuav npaj koj txoj kev rau koj.’ 28 Kuv hais rau nej tias : tas cov me nyuam uas yug ntawm tsoom poj niam los, tsis muaj ib tug loj dua Zam. Tsis kav tus me tshaj hauv Tswv Ntuj lub Ceeb Tsheej tseem loj dua Zam thiab.”
    29 Tas tsoom neeg uas tuaj mloog, tab yog cov neeg sau se uas tau txais kab ke ntxuav ntawm Zam, sawv daws lees tias Tswv Ntuj yog tus ncaj. 30 Tiam sis cov Fas Lis Xais thiab cov Kws Lij Choj uas lawv tsis kam txais Zam cov kab ke ntxuav, lawv muab Tswv Ntuj zaj tswv yim uas nws npaj rau lawv xyeeb pov tseg.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 15th December 2016, 9:59 am

    TIM 16 LUB 12 HLIS 2016

    Hnub Rau Lis Piam Peb Caij Tos Huab Tais Nruab Lis Piam Xyoo I

    Zaj Nyeem Ib: HIS XAIS 56: 1-3A, 6-8


    1 HUAB TAIS hais li no : "Nej coj raws qhov ncaj, nej ua raws qhov yog, vim kuv txoj kev cawm neeg tuaj yuav txog, kuv txoj kev ncaj yuav tawm tuaj rau nej pom xyeem. 2 Tus neeg coj raws li ntawd,nws txoj hmoov zoo, neeg leej tub uas nyob khov kho hauv txoj kev ntawd kuj hmov zoo, vim nws hwm thiab nws tsis ua txhaum rau hnub xas npas tos, nws cheem nws txhais tes kom txhob ua ib yam hauj lwm phem. 3 Kom tus pej kum neeg uas tau los ntseeg Huab Tais lawm txhob hais tias : 'HUAB TAIS yuav ntiab kuv tawm hauv nws haiv neeg xwb !'
    6 Cov pej kum neeg uas lawv tuaj cuag HUAB TAIS, lawv tsob hwb HUAB TAIS, lawv nyiam HUAB TAIS lub npe, thiab lawv ciaj ua HUAB TAIS cov tub txib, tas txhua tus uas caiv hnub Xas Npas Tos, thiab lawv nyob khov kho hauv txoj kev nrog kuv cog lus, 7 mas kuv yuav coj lawv mus saum kuv lub roob Ntshiab, kuv yuav ua kom lawv zoo siab nyob hauv kuv lub tsev teev hawm Ntuj. Kuv yuav zoo siab txais lawv cov thaj hlawv tsiaj thiab thaj txi Ntuj nyob saum kuv lub thaj txi Ntuj. Vim kuv lub tsev yuav hu ua txhua haiv neeg lub tsev teev hawm Ntuj. 8 Tus HUAB TAIS Tswv Ntuj uas rov sau cov His Xas Lais tawg mus lawm rov los, nws ceeb toom tias : "Kuv yuav sau dua ib co los ntxiv rau cov uas kuv twb sau tau lawm."

    NPN 67: 2-3, 5, 7-8

    Txais: (4) Tswv Ntuj, cia tas txhua haiv neeg cav txog koj!
    los: Alleluia.

    Thov kom Tswv Ntuj hlub peb thiab foom hmoov zoo rau peb,
    kom nws ua nws lub ntsej muag ci tuaj rau saum peb,
    Kom lub ntiaj teb thiaj yuav paub koj tej kev,
    cov kuj cuab thiaj yuav paub koj txoj kev cawm neeg.

    Txais: (4) Tswv Ntuj, cia tas txhua haiv neeg cav txog koj!
    los: Alleluia.

    Kom cov kuj cuab hom khaj thiab qw zoo siab,
    vim koj kav cov haiv neeg raws kev ncaj,
    koj ua tus coj cov kuj cuab nyob ntiaj teb.

    Txais: (4) Tswv Ntuj, cia tas txhua haiv neeg cav txog koj!
    los: Alleluia.

    Lub ntiaj teb twb txi txiv lawm:
    Yog Tswv Ntuj, peb tus Tswv Ntuj foom koob hmoov rau peb.
    Thov kom Tswv Ntuj foom lus zoo rau peb,
    kom tas npoo ntuj npoo ntiaj teb hwm nws!

    Txais: (4) Tswv Ntuj, cia tas txhua haiv neeg cav txog koj!
    los: Alleluia.

    As Les Lus yas


    Txais: As les lus yas, as les lus yas

    Huab Tais, koj tuaj mas, coj koj txoj kev thaj yeeb tuaj rau peb
    Kom peb muaj ib lub siab puv npo zoo siab luag ntxhi nyob ntawm koj.

    Txais: As les lus yas, as les lus yas

    Ntawv Moo Zoo: ZAM 5: 33-36

    Yes Xus hais tias:
    33 Nej tau xa ib co tub coj xo mus cuag Zam, Zam tau ua tim khawv txog qhov tseeb.
    34 Kuv mas kuv tsis txais lus zeem tseeb ntawm ib tug neeg, tiam sis kuv hais tej no kom nej tau txais kev cawm.
    35 Zam yog lub teeb cig cig thiab ci tuaj, nej tau muaj kev zoo siab ib ntus nyob hauv nws qhov pom kev.
    36 Tiam sis kuv cov lus ua tim khawv loj dua Zam cov. Cov hauj lwm Leej Txiv muab rau kuv ua, cov hauj lwm uas kuv niaj hnub ua no rov ua tim khawv txog kuv, thiab ua tim khawv tias yog Leej Txiv xa kuv tuaj.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 16th December 2016, 11:50 am

    TUM 17 LUB 12 HLIS 2016

    Hnub Xya Lis Piam Peb Caij Tos Huab Tais Nruab Lis Piam Xyoo I

    Zaj Nyeem Ib: HP 49: 2, 8-10


    1 Yas Kos hu nws cov tub los, nws hais rau lawv tias : 2 “Nej sib sau ua ke ntawm no, nej mloog, Yas Kos cov tub, nej mloog nej txiv His Xas Lais hais.
    8 Yus Das, koj cov kwv tij yuav cav txog koj, koj txhais tes yuav ntsiab rawv koj cov yeeb ncuab lub xwb qwb, hos koj txiv cov tub yuav khoov cev hawm koj. 9 Yus Das zoo li ib tug thav tsov. Me tub, koj mus caum nqaij , koj rov qab nce los. Nws los zaum quav ceg thiab pw zoo li ib tug tsov, zoo li ib tug maum tsov, leej twg yuav muaj cuab kav tsa nws ? 10 Tus cwj ua vaj yuav tsis ncaim ntawm Yus Das txhais tes li, rab pas tswj luag yuav tsis txav ntawm nws ko taw, mus txog thaum lawv nqa paj tshab tuaj rau nws, thiab thaum cov haiv neeg mloog nws lus.

    NPN 72:1-2, 3-4AB, 7-8, 17

    Txais: (7) Txoj kev ncaj yuav tawg paj lub caij nws ua vaj thiab kev thaj yeeb yuav nyob mus li.

    Tswv Ntuj, thov koj pub txoj kev txawj txiav txim rau tus vaj,
    thiab txoj kev ncaj ncees rau vaj tus tub.
    Nws thiaj yuav tswj koj haiv neeg raws kev ncaj ncees
    thiab yuav txawj txiav txim ncaj rau koj cov neeg me.

    Txais…

    Cov roob siab thiab cov pov roob
    nej muab kev thaj yeeb rau tsoom pej xeem,
    Nws yuav txiav txim ncaj rau cov pluag hauv tsoom pej xeem,
    nws yuav cawm cov txom nyem tej me nyuam.

    Txais…

    Kev ncaj ncees yuav tawg paj lub caij nws ua vaj,
    thiab yuav muaj kev thaj yeeb lug mus txog thaum tsis muaj lub hli ntxiv.
    Thov kom nws kav txij ib lub hiav txwv mus rau lwm lub,
    txij tus niam dej mus txog tim npoo ntiaj teb.

    Txais…

    Thov kom nws lub npe nto moo lug mus li,
    kom nws lub npe nyob ntev npaum lub hnub.
    Nyob hauv nws txhua haiv neeg nyob ntiaj teb yuav tau hmoov zoo,
    txhua teb chaws yuav cav txog nws lub koob meej.

    Txais..

    As Les Lus Yas

    Txais: As les lus yas, As les lus yas

    Peb tus Tswv Ntuj nyob siab txoj kev Thoob Tsib,
    koj hwj tas txhua yam koj lub hwj huam thiab kev hlub tau tsim los,
    thov koj tuaj qhia txoj kev txawj ntse rau peb!

    Txais: As les lus yas, As les lus yas

    Ntawv Moo Zoo MAS TAIS 1:1-17

    1 Phau ntawv qhia txog Yes Xus Pleev lub keeb, uas yog Das Vis leej tub thiab yog Has Nplas Has leej tub : 2 Has Nplas Has yug Is Xas Has, Is Xas Has yug Yas Kos, Yas Kos yug Yus Das thiab nws cov kwv tij. 3 Yus Das poj niam hu ua Thas Mas yug Fas Les thiab Ntxas Las. Fas Les yug Es Xas Los, Es Xas Los yug As Las, 4 As Las yug As Mis Nas Das, As Mis Nas Das yug Nas As Xoos, Nas As Xoos yug Xas Moos, 5 Xas Moos poj niam hu ua Las Has yug Npuag Oos, Npuag Oos poj niam hu ua Luv yug Os Npes, Os Npes yug Yes Xes, 6 Yes Xes yug tus vaj Das Vis. Das Vis yuav Us Lis tus poj niam, nws yug Xas Los Moos, 7 Xas Los Moos yug Los Npuag, Los Npuag yug As Npias, As Npias yug As Xas, 8 As Xas yug Yos Xa Fas, Yos Xas Fas yug Yos Las, Yos Las yug Os Xias, 9 Os Xias yug Yos As Thas, Yos As Thas yug As Kas, As Kas yug Es Xes Kias, 10 Es Xes Kias yug Mas Nas Xes, Mas Nas Xes yug As Moos, As Moos yug Yos Xias, 11 Yos Xias yug Yes Kos Nias thiab Yes Kos Nias cov kwv tij. Thaum ntawd yog lub caij raug txim nyob Npas Npis Los. 12 Dhau lub caij raug txim nyob Npas Npis Los lawm, Yes Kos Nias yug Xas Las Thias, Xas Las Thias yug Ntxos Los Npas Npes, 13 Ntxos Los Npas Npes yug As Npis Yus, As Npis Yus yug Es Lias Kis, Es Lias Kis yug As Ntxos, 14 As Ntxos yug Xas Dos, Xas Dos yug As Khis, As Khis yug Es Lis Us, 15 Es Lis Us yug Es Les As Ntxas, Es Les As Ntxas yug Mas Thas, Mas Thas yug Yas Kos, 16 Yas Kos yug Yos Xes uas yog Mab Liab tus txiv. Mab Liab yug Yes Xus, uas luag hu nws ua Leej Pleev. 17 Tas cov tiam neeg huv tib si : txij Has Nplas Has los txog Das Vis, muaj kaum plaub tiam ; txij Das Vis los txog lub caij raug txim nyob Npas Npis Los, muaj kaum plaub tiam ; txij lub caij raug txim nyob Npas Npis Los txog lub caij Leej Pleev tuaj, muaj kaum plaub tiam.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 18th December 2016, 2:16 pm

    TIM 19 LUB 12 HLIS 2016

    Hnub Ob Lis Piam Plaub Caij Tos Huab Tais Xyoo A Nruab Lis Piam Xyoo I

    Zaj Nyeem Ib: TLTTH 13: 2-7, 24-25A


    2 Muaj ib tug txiv neej xeem Daas nyob Kos Les As, nws hu ua Mas Nos As. Nws poj niam lub cev tsis xeeb tub ces nws yug tsis tau me nyuam li. 3 HUAB TAIS ib tug Tshiab tuaj xyuas tus poj niam thiab hais rau nws tias : "Koj tsis tau muaj dua me nyuam thiab yug tsis tgau tub li, 4 tab sis, nyem no, koj yuav xeeb tub thiab yuav yug ib tug tub. Txij no mus koj yuav ceev faj, tsis txhob haus cawv txiv ntoo los cawv daw, tsis txhob noj tej yam tsis huv. 5 Koj yuav xeeb tub thiab yuav yug ib tug tub. Koj tsis txhob cia rab chais chwv nws taub hau ib zaug li, vim tus me nyuam ntawd, txij nruab thiab los, nws yuav ua Tswv Ntuj ib tug Nas Ntxis. Nws yog tus yuav cawm cov His Xas Lais ntawm cov Fis Lis Tis lub zog."
    6 Tus poj niam thiaj mus hais rau nws tus txiv tias : "Tswv Ntuj ib tug neeg tau hais lus rau kuv. Zoo li yog ib tug Tshiab, vim nws tus yam ntxwv muaj hwj chim txaus ntshai kawg li. Kuv tsis tau nug nws tias nws tuaj qhov twg tuaj. Nws tsis tau qhia nws npe rau kuv paub. 7 Tab sis nws hais rau kuv tias : ‘Koj yuav xeeb tub, koj yuav yug ib tug tub. Mas koj yuav txhob haus cawv txiv ntoo los cawv daw li, tsis txhob noj tej yam tsis huv li. Koj tus me nyuam, txij nruab thiab los, nws yuav ua Tswv Ntuj ib tug Nas Ntxis mus txog hnub tuag !’ “
    24 Tus poj niam yug tau ib tug tub, nws tis npe rau hu ua Xas Xoos. Tus tub hlob zuj zus, HUAB TAIS pub txoj hmoov zoo rau nws. 25 HUAB TAIS lub tswv yim tuaj tshoj nws.
    from the power of the Philistines.”

    NPN 71: 3-4A, 5-6AB, 16-17

    Txais: (Cool Kuv lub ncauj yuav puv nkaus cov lus qhuas txog koj
    thiab kuv yuav hu nkauj cav txog koj lub koob meej !

    Thov koj ua lub tsua rau kuv ua chaw nkaum,
    ua lub yeej khov kho thaiv kuv,
    vim koj yog kuv lub tsua thiab kuv lub yeej ntsa zeb.
    Kuv tus Tswv Ntuj, thov cawm kuv ntawm tus phem txhais tes.

    Txais…

    Huab Tais, koj yog kuv lub chaw vam khom,
    Tswv Ntuj, koj yog kuv lub chaw cia siab txij thaum hluas los.
    Txij thaum kuv yug los kuv vam koj ib leeg;
    thaum kuv tseem nyob hauv kuv niam plab, koj yeej yog kuv lub zog lawm.

    Txais…

    Kuv yuav qhuas txog HUAB TAIS cov hauj lwm muaj hwj huam;
    Tswv Ntuj, kuv yuav qhia txog koj txoj kev ncaj ncees uas yog txoj tseem.
    Tswv Ntuj, koj tau qhuab qhia kuv txij thaum hluas los lawm
    txog zwj ceeb no kuv tseem cav txog koj cov hauj lwm muaj hwj huam.

    Txais…

    As Les Lus Yas

    Txais: As les lus yas, As les lus yas.

    Yes Xes lub hauv paus tuaj cag, koj yog lub cim qhia txog
    Tswv Ntuj txoj kev hlub nws haiv neeg,
    thov tsuag tsuag tuaj cawm peb tsis txhob ncua ntxiv!

    Txais: As les lus yas, As les lus yas.

    Ntawv Moo Zoo LUS KAS 1:5-25

    Lub zim txwv Hes Los ua vaj kav Yus Das teb, muaj ib tug Leej Choj hu ua Ntxas Kas Lias, nws yog phiaj Leej Choj As Npias. Nws poj niam hu ua Es Lis Xas Npes, yog As Loos ib tug ntxhais xeeb ntxwv. 6 Nkawd ob niam txiv yog neeg ncaj nyob ntawm Tswv Ntuj xub ntiag. Nkawd ua raws nraim li Huab Tais cov lus qhia thiab cov cai tas huv si, tsis muaj ib qho xyeej. 7 Nkawd tsis muaj me nyuam li, vim Es Lis Xas Npes xeeb tub tsis tau, thiab nkawd hnub nyug kuj laus lawm. 8 Muaj ib hnub, Ntxas Kas Lias tab tom leg Leej Choj txoj kab xwm nyob ntawm Tswv Ntuj xub ntiag, vim txog lub caij nws phiaj Leej Choj rov leg kab xwm lawm. 9 Lawv ntaus txheeb raws li cov Leej Choj kev cai ua kam, ces Ntxas Kas Lias raug ua tus chaws mus hlawv xyab hauv Huab Tais Kem Ntshiab. 10 Lub caij hlawv xyab, tas tsoom pej xeem teev Ntuj nyob sab nraud. 11 Huab Tais tus Tshiab tawm tuaj sawv ntsug nyob ntawm lub thaj hlawv xyab sab xis rau nws pom. 12 Ntxas Kas Lias pom dheev, nws ua siab nphau npog, nws ntshai kawg. 13 Tab sis tus Tshiab hais rau Ntxas Kas Lias tias :"Ntxas Kas Lias, koj txhob ntshai, vim Ntuj mloog koj cov lus thov lawm. Koj poj niam Es Lis Xas Npes yuav yug ib tug tub rau koj, koj yuav tis nws npe hu ua Zam. 14 Nws yuav ua kom koj kaj siab thiab zoo siab tas nrho. Thaum nws yug los, coob leej kuj yuav zoo siab. 15 Vim nws yuav yog ib tug loj nyob ntawm Huab Tais xub ntiag. Nws yuav tsis haus kua txiv cawv, tsis haus cawv ntsim. Txij nruab thiab los, Leej Ntuj Plig Ntshiab yuav nyob puv hauv nws. 16 Nws yuav coj coob leej tub His Xas Lais rov los rau Huab Tais, lawv tus Tswv Ntuj. 17 Nws yuav taug kev mus ntawm Huab Tais hauv ntej. Nws yuav tau Es Lias lub tswv yim thiab lub hwj huam, kom nws coj cov ua txiv lub siab rov los rau lawv cov me nyuam, coj cov neeg qig lus rov los taug cov neeg ncaj txoj kev thoob tsib. Nws yuav npaj ib haiv neeg qhib siab lug tos Huab Tais.
    18 Ntxas Kas Lias hais rau tus Tshiab tias :"Dab tsi yuav ua kom kuv paub tias yuav muaj tuaj li ntawd ? Vim kuv yog ib tug neeg laus, hos kuv poj niam kuj muaj hnub nyoog lawm thiab." 19 Tus Tshiab teb tias :"Kuv yog Nkas Nplias. Kuv sawv nraim ntawm Tswv Ntuj xub ntiag. Nws xa kuv tuaj hais lus rau koj thiab fi tsab xov zoo no rau koj. 20 Vim koj tsis ntseeg kuv cov lus uas yuav tsheej xeeb tuaj thaum txog sij hawm, mas koj yuav nyob ntsiag to hais tsis tau lus mus txog hnub tej xwm ntawd tshwm sim tuaj."
    21 Tsoom pej xeem tos Ntxas Kas Lias, lawv xav tsis thoob tias vim li cas Ntxas Kas Lias thiaj nyob ntev hauv kem ntshiab. 22 Thaum nws tawm los, nws hais tsis tau lus rau lawv, ces lawv to taub tias nyob hauv kem ntshiab nws tau pom ib yam yees tawm tuaj. Ntxas Kas Lias piav tes rau lawv, nws hais tsis tau lus. 23 Thaum tas nws lub sij hawm leg kab xwm lawm, ces nws rov mus tsev. 24 Tsis ntev tom qab, Ntxas Kas Lias poj niam Es Lis Xas Npes xeeb tub. Es Lis Xas Npes tsiv nraim nyob hauv tsev tau tsib hlis. Nws hais tias :25 "Huab Tais ua qhov no rau kuv, yog lub caij nws pom zoo thau kuv txoj kev txaj muag ntawm zeej tsoom xub ntiag mus."



    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 19th December 2016, 9:20 am

    TIM      20     LUB     12     HLIS      2016

    Hnub Peb Lis Piam Plaub Caij Tos Huab Tais Xyoo A Nruab Lis Piam Xyoo I

    Zaj Nyeem Ib  HIS XAIS 7:10-14


    10 HUAB TAIS rov mus hais rau As Kas tias : 11 "Koj thov HUAB TAIS koj tus Tswv Ntuj kom nws ua ib lub cim rau koj paub; kom ua lub cim ntawd nyob puag hauv qab ntuj txias teb tsaus, los nyob puag saum cov chaw siab, puag saum ntuj." 12 As Kas hais tias : "Kuv yuav tsis thov. Kuv yuav tsis sim HUAB TAIS." 13 Ces His Xais hais tias : "Das Vis tsev neeg, nej mloog mas ! Nej ua kom tej tib neeg ceeb laj tas nrho, los tsis txaus nej siab ! Nej tseem yuav ua kom Tswv Ntuj ceeb laj thiab lod? 14 Vim li ntawd, Huab Tais yuav pub ib lub cim rau nej:  Nej ntsia saib ! Tus ntxhais nkauj xwb yuav xeeb tub, nws yuav yug ib tug tub. Nws yuav tis npe rau hu ua Es Mas Nus Es.”

    NPN       24:   1-2, 3-4AB, 5-6

    Txais:  (7c+10b) Nej cia HUAB TAIS nkag los; nws yog tus vaj muaj koob meej.

    Lub ntiaj teb thiab tas puas tsav yam nyob hauv yog HUAB TAIS li,
    ntiaj teb neeg thiab tas txhua leej nyob hauv yog nws tug.  
    Nws yog tus txawb lub ntiaj teb rau saum cov hiav txwv,
    thiab yog tus muab tso rau saum cov niam dej.

    Txais…

    Leej twg thiaj muaj cuab kav nce tau saum HUAB TAIS lub roob?
    Leej twg thiaj sawv taus hauv nws thaj chaw ntshiab?
    Yog tus uas txhais tes tsis ua txhaum, tus muaj lub siab dawb huv,
    thiab tsis ntshaw tej yam tsis muaj nqes.

    Txais…

    Nws yuav tau txais HUAB TAIS txoj koob hmoov,
    yog ib qhov paj tshab tuaj ntawm Tswv Ntuj nws tus  cawm seej tuaj.
    Ua li no thiaj phim haiv neeg uas nrhiav HUAB TAIS,
    phim cov uas nrhiav Yas Kos tus Tswv Ntuj lub ntsej muag.

    Txais…

    As Les Lus Yas

    Txais: As les lus yas, As les lus yas

    Das Vis tus yawm sij, koj yog tus qhib lub rooj vag nkag mus
    hauv Tswv Ntuj lub Ceeb Tsheej tsis muaj caij kawg,
    thov koj tuaj txhiv cov neeg raug kaw nyob hauv kev tsaus ntuj!

    Txais: As les lus yas, As les lus yas

    Ntawv Moo Zoo:       LUS KAS  1:   26-38

    26 Lub rau hli, Tswv Ntuj xa tus Tshiab Nkas Nplias mus cuag ib tug ntxhais nyob hauv ib lub zos nyob Nkas Lis Lais; lub zos hu ua Nas Xas Les. 27 Tus ntxhais ntawd, lawv muab qhaib rau ib tug txiv neej hu ua Yos Xes, caj ces Das Vis lawm; tus ntxhais lub npe hu ua Mab Liab. 28 Tus Tshiab chaws mus hauv Mab Liab tsev, nws hais rau Mab Liab tias : "Koj nyob kaj lug, tus tau txiaj ntsim puv siab ! Huab Tais nrog koj nyob." 29 Mab Liab hnov lo lus ntawd, nws lub siab nphau npog, nws xav hauv nruab siab tias lo lus hawm ntawd yog dab tsi. 30 Tus Tshiab hais rau Mab Liab tias : "Mab Liab, koj tsis txhob ntshai. Tswv Ntuj saib koj ntxim Tswv Ntuj siab. 31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus. 32 Nws yuav yog ib tug loj, luag yuav hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws. 33 Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg." 34 Mab Liab hais rau tus Tshiab tias : "Qhov ntawd yuav muaj tuaj zoo li cas, vim kuv tsis paub ib tug txiv neej?" 35 Tus Tshiab teb rau Mab Liab tias : "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub. 36 Saib ! Es Lis Xas Npes, tus uas txheeb koj, luag hu nws ua pog khoom, nws hnub nyoog laus lawm, tab sis nws kuj xeeb tub lawm thiab. Lub hlis no, nws xeeb tub tau rau hli lawm. Vim tias, tsis muaj ib yam uas Tswv Ntuj ua tsis tau." 38 Ces Mab Liab hais tias : "Kuv yog Huab Tais tus ntxhais txib. Kuv xav kom muaj raws li koj hais." Tus Tshiab thiaj tso Mab Liab tseg.

    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 20th December 2016, 12:04 pm

    TIM 21 LUB 12 HLIS 2016

    Hnub Plaub Lis Piam Plaub Caij Tos Huab tais Xyoo A Nruab Lis PIam Xyoo I

    Hwm Leej Ntshiab Peter Canisius

    Zaj Nyeem Ib: KWV TXHIAJ 2: 8-14


    8 Kuv hnov tus kuv hlub. Nws tuaj lawm, nws dhia hla toj roob hauv pes khiav tuaj. 9 Tus kuv hlub zoo puav tam li tus kauv, puav tam li tus muas lwj. Ntsia saib ! Nws tuaj sawv nraum ntsa loog. Nws xauj nraum qhov rai tuaj, nws nyob nraum laj kab ntsia ntsoov tuaj. 10 Tus kuv hlub tsa suab hais rau kuv tias : "Koj sawv tsees los os, kuv tus hlub, kuv tus neeg zoo nkauj, los ntawm no mas. 11 Nyem no lub caij ntuj no dhau lawm, ntuj nag twb tu lawm, tsis muaj nag ntxiv. 12 Paj tawg puv tas lub teb chaws. Yog lub caij seev lus paj lus taum lom zem, tus nquab tsug twb pib quaj hauv peb lub teb chaws. 13 Cov txiv cev ua cos ntsuab vog, cov paj txiv cawv tsw qab ntxiag. Sawv tsees los mas, kuv tus hlub, kuv tus neeg zoo nkauj, los ntawm no! 14 Kuv me nkauj nquab, koj nkaum hauv tej qhov tsua, hauv tej ntsa zeb. Cev koj lub ntsej muag los rau kuv pom yuad ! Pub kuv hnov koj lub suab mas ! Vim koj lub suab zoo mloog, koj lub ntsej muag zoo nyiam !"

    Los: XOS FOS NIAS 3:14-18A

    14 Leej me ntxhais Xis Yoos, koj cia li seev suab qw zoo siab! Tsoom His Xas Lais, nej cia li qw lom zem ! Me ntxhais Yes Lus Xas Les, koj cia li zoo siab, cia li dhia hom khaj tas koj lub siab ntsws! 15 HUAB TAIS tshem koj lub txim lawm: nws ntiab koj cov yeeb ncuab kom khiav mus deb. Huab Tais, His Xas Lais tus vaj tuaj nyob nruab nrab hauv koj, koj yuav tsis ntshai raug kev txom nyem ntxiv. 16 Txog hnub ntawd, Yes Lus Xas Les yuav hnov cov lus no : “Xis Yoos, koj txhob ntshai, txhob ua koj ob txhais tes tuag tas ! 17 HUAB TAIS koj tus Tswv Ntuj nyob nruab nrab hauv koj, nws yog tus muaj hwj huam cawm koj. Nws yuav zoo siab tas nrho vim koj. Nws txoj kev hlub yuav ua kom koj rov tshiab tuaj. Nws yuav hu nkauj zoo siab vim koj, 18 xws li luag hu nkauj thaum txog hnub ua kev lom zem.”

    NPN: 33: 2-3, 11-12, 20-21

    Txais: (1a; 3a) Cia li zoo siab nyob hauv Huab Tais, nej cov ua ncaj! Nej hu ib zaj nkauj tshiab rau nws.

    Nej ntaus nkauj nog ncas ua HUAB TAIS tsaug.
    Nej ntaus kauj ncas kaum txoj hlua rau nws!
    Nej hu ib zag nkauj tshiab rau nws,
    nej muab siab rau qoj cov hlua ncas nrog suab qw zoo siab.

    Txais: (1a; 3a) Cia li zoo siab nyob hauv Huab Tais, nej cov ua ncaj! Nej hu ib zaj nkauj tshiab rau nws.

    Tej yam HUAB TAIS npaj nyob mus li,
    Yam nws lub siab xav ua nyob txheej dhau txheej.
    Haiv neeg uas tau HUAB TAIS los uaTswv Ntuj, lawv txoj hmoov zoo,
    Huab Tais xaiv haiv neeg ntawd los ua nws lub cuab tam.

    Txais: (1a; 3a) Cia li zoo siab nyob hauv Huab Tais, nej cov ua ncaj! Nej hu ib zaj nkauj tshiab rau nws.

    Ntawm peb, peb tos ntsoov HUAB TAIS:
    nws yog tus pab peb, nws yog peb daim leem phiaj.
    Peb muaj kev zoo siab yog nyob hauv nws,
    peb chaw tso siab yog nyob hauv nws lub npe ntshiab.

    Txais: (1a; 3a) Cia li zoo siab nyob hauv Huab Tais, nej cov ua ncaj! Nej hu ib zaj nkauj tshiab rau nws.

    As Les Lus Yas

    Txais: As les lus yas, as les lus yas.

    Es Mas Nus Es, koj yog peb tus Vaj thiab tus Txiav Txoj Cai,
    thov koj tuaj cawm peb, HUAB TAIS, peb tus Tswv Ntuj!

    Txais: As les lus yas, as les lus yas.

    Ntawv Moo Zoo : LK 1: 39-45

    39 Tau ob peb hnub, ces Mab Liab sawv kev mus, nws rau siab ntso mus pem toj siab, mus rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 41 Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. 42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas Ntuj thiaj pub kom kuv tus Huab Tais leej niam tuaj xyuas kuv ? 44 Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. 45 Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo !"



    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 21st December 2016, 8:33 am

    TIM 22 LUB 12 HLIS 2016

    Hnub Tsib Lis Piam Plaub Caij Tos Huab tais Xyoo A Nruab Lis Piam Xyoo I

    Zaj Nyeem Ib 1 XAS MUAS 1:24-28


    24 Thaum tus me nyuam cais mis lawm, As Nas coj tus me nyuam nrog ib tug heev nyuj muaj peb xyoos, ib tawb hmoov nplej thiab ib hnab tawv cawv, mus fij rau ntuj hauv HUAB TAIS lub tuam tsev uas nyob XisLaus; tus me nyuam tseem me me kawg li. 25 Lawv muab tus heev nyuj tua txi Ntuj ces lawv coj tus me nyuam mus rau Es Lis. 26 Leej niam hais tias: "Tus tswv, kuv thov koj! Tseeb ib yam li koj muaj txoj sia, tus tswv, kuv yog tus poj niam uas tau txhos caug nyob ze koj ntawm no thov HUAB TAIS. 27 Tus me nyuam no yog tus uas kuv tau thov kom Ntuj pub rau kuv. HUAB TAIS tau muab rau kuv raws li kuv thov lawm. 28 Mas nyem no kuv xav muab nws pub rau HUAB TAIS kom tas nws sim neej. Kuv muab nws rau HUAB TAIS." Ces lawv txhos caug pe hawm nyob ntawm HUAB TAIS xub ntiag.

    NPN: 1 XAS MUAS 2: 1, 4-5, 6-7, 8ABCD

    Txais: (1a) Kuv lub siab hom khaj nyob hauv Huab Tais, tus Cawm kuv

    Kuv lub siab hom khaj nyob hauv HUAB TAIS,
    kuv tus kub sawv siab nyob hauv kuv tus Tswv Ntuj.
    Kuv rua ncauj dav fo tsis txuag kuv cov yeeb ncuab,
    kuv zoo siab vim koj pab kuv.

    Txais…

    Cov neeg muaj zog loj rab hneev dam daws,
    hos tus tsis muaj zog lub zog loj tuaj lawm ntau.
    Cov neeg tau noj tsau yuav tsum ua zog thiaj tau noj,
    hos tus tshaib plab tsis khwv los tau noj lawm.
    Tus poj khab seeb yuav muaj xya leej tub,
    hos tus muaj tub coob yuav tsis muaj ib tug li lawm.

    Txais…

    HUAB TAIS ua kom txawj tuag thiab pub kom muaj txoj sia;
    nws muab pov rau ntuj txias teb tsaus,
    nws rub kom sawv tau rov los.
    HUAB TAIS ua kom pluag thiab ua kom muaj,
    Nws txo kom qis, thiab nws muab txawb rau qhov siab.

    Txais…

    Nws tsa cov neeg pluag hauv plua tshauv los,
    nws rub cov txom nyem hauv qhov chaw qias
    los nrog cov nom tswv zaum,
    nws muab ib lub rooj zaum nto koob meej rau lawv.

    Txais…

    As Les Lus Yas

    Txais: As les lus yas, as les lus yas

    Vaj kav tas txhua haiv neeg thiab lub pob zeb txheem lub Koom Txoos,
    thov koj tuaj cawm tib neeg uas koj tau muab av los puab!

    Txais: As les lus yas, as les lus yas

    Ntawv Moo Zoo: LUS KAS 1: 46-56

    46 Ces Mab Liab hais tias : "Kuv tus plig cav txog Huab Tais lub hwj chim, 47 kuv lub tswv yim hom khaj nyob hauv Tswv Ntuj, tus Cawm kuv, 48 vim nws dauv muag ntsia nws tus ntxhais txib hauv txheej qis. Vim li ntawd, txij no mus, txhua tiam neeg yuav hais tias kuv txoj hmoov zoo, 49 vim tus Muaj Hwj Huam ua tej yam loj rau kuv, nws lub npe Ntshiab. 50 Nws lub siab hlub roos cov neeg hwm nws tiam dhau tiam. 51 Nws sab npab nthuav nws lub zog rau sawv daws pom. Cov neeg uas lub siab muab hlob, HuabTais ua kom lawv tawg tas. 52 Huab Tais nchuav cov muaj hwj chim poob ntawm lawv lub theej kiab. Nws tsa cov neeg hauv txheej qis kom siab. 53 Nws pub tej yam zoo rau cov neeg tshaib noj seem noj so, hos nws ntiab cov neeg muaj rov qab mus tes qhuav nquas. 54 HuabTais pab nws tus tub txib His Xas Lais, vim nws nco ntsoov tias nws lub siab hlub neeg, 55 nws ua raws li nws tau cog li rau peb cov yawg koob, tias nws yuav ua zoo rau Has Nplas Has thiab Has Nplas Has cov xeeb ntxwv mus ib txhiab ib txhis." 56 Mab Liab nrog Es Lis Xas Npes nyob peb lub hlis tej, ces nws rov mus tsev.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 22nd December 2016, 4:58 pm

    TIM 23 LUB 12 HLIS 2016

    Hnub Rau Lis Piam Plaub Caij Tos Huab tais Xyoo A Nruab Lis Piam Xyoo I

    Hwm LN John of Kanty/Jean de Kanty

    Zaj Nyeem Ib: Mas Las Kis 3: 1-4, 23-24


    Huab Tais Tswv Ntuj hais li no:
    1 Kuv xa kuv tus tub tshaj xov mus kho kev ua kuv ntej. Ces ib sij huam, tus Huab Tais uas nej nrhiav nws yuav chaws los hauv nws thaj chaw ntshiab, hos tus tub tshaj txog txoj kev cog lus uas nej ntshaw nws tuaj txog ntawd lawm ! Tus HUAB TAIS Xas Npas Aus hais li ntawd : 2 Leej twg yuav tiv taus hnub nws tuaj txog? Leej twg yuav sawv taus ntseg thaum nws tawm plaws los? Vim nws yuav zoo li cov hluav taws nchuav nyiaj nchuav kub, thiab zoo li tshuaj ntxhua xov kom dawb. 3 Nws yuav zaum ua tus nchuav nyiaj nchuav kub thiab tus ntxhua xov. Nws yuav ntxhua kom Les Vis cov tub huv tuaj, thiab yuav muab lawv nchuav kom tau cov tseem kub tseem nyiaj, ces lawv yuav yog cov cev thaj txi ntuj rau HUAB TAIS raws kev ncaj ncees. 4 Ces HUAB TAIS yuav pom zoo txais Yus Das thiab Yes Lus Xas Les cov thaj txi Ntuj ib yam li thaum ub, thaum pib thawj ob peb xyoos.
    23 Kuv yuav xub xa yaj saub Es Lias tuaj rau nej ua ntej hnub loj txaus ntshai uas HUAB TAIS yuav tuaj. 24 Nws yuav rub tau cov ua leej txiv lub siab rov mus hlub lawv cov tub thiab cov tub lub siab rov mus hlub lawv txiv, tsis li ntawd ces tsam kuv yuav tau tso kev puas tsuaj puas ntsoog tuaj raug lub teb chaws.

    NPN 25: 4-5AB, 8-9, 10 + 14

    Txais: (Lus Kas 21:28) Tsa nej taub hau ntsia, nej yuav pom nej txoj kev dim nyob ze ze lawm.

    HUAB TAIS, ua kom kuv paub koj tej kev,
    qhia koj tej kev rau kuv kawm.
    Coj kuv mus taug koj txoj kev tseeb, thov qhia rau kuv,
    vim koj yog Tswv Ntuj tus cawm kuv.

    Txais…

    HUAB TAIS yog txoj kev siab zoo thiab siab ncaj,
    nws qhia cov neeg txhaum rov los taug txoj kev zoo.
    nws coj cov neeg me mus rau txoj kev ncaj,
    nws qhia nws txoj kev rau cov neeg me kawm.

    Txais…

    Tas HUAB TAIS tej kev yog kev hlub thiab kev tseeb
    rau cov neeg coj raws nraim li nws tau cog lus thiab nws txoj cai.
    Cov neeg hwm HUAB TAIS xwb thiaj paub nws lub siab,
    thiab lawv thiaj to taub txog nws txoj kev cog lus.

    Txais…

    As Les Lus Yas

    Txais: As les lus yas, As les lus yas

    Vaj kav tas txhua haiv neeg thiab lub pob zeb txheem lub Koom Txoos,
    thov koj tuaj cawm tib neeg uas koj tau muab av los puab!

    Txais: As les lus yas, As les lus yas

    Ntawv Moo Zoo: LK 1: 57-66

    57 Ntawm Es Lis Xas Npes, mas txog lub caij nws daws cev, ces nws yug tau ib tug tub. 58 Cov neeg koom zej koom zos thiab nws cov kwv tij neej tsa hnov tias Huab Tais hlub Es Lis Xas Npes loj kawg. Lawv nrog Es Lis Xas Npes zoo siab. 59 Thaum txog hnub yim, lawv tuaj ua lub cim txiav rau tus me nyuam. Lawv xav tis nws npe raws li nws txiv Ntxas Kas Lias lub npe. 60 Nws niam hais tias : "Tsis yog. Tus me nyuam yuav hu ua Zam." 61 Lawv hais rau leej niam tias : "Tsis muaj ib tug hauv koj cov txheeb ze hu li ntawd." 62 Ces lawv piav tes rau leej txiv saib nws xav kom lawv tis tus me nyuam npe li cas. 63 Leej txiv kom lawv muab ib daim txiag los, nws sau ntawv tias : "Nws lub npe hu ua Zam." Sawv daws ceeb tas. 64 Tam sis ntawd, leej txiv lub ncauj qhib plho, tus nplaig muag nthas, nws hais tau lus, nws cav txog Tswv Ntuj. 65 Tsoom neeg nyob ze nkawd sawv daws tau ntshai kawg. Hos nyob pem toj siab hauv xeev Yus Das, sawv daws tham txog tej xwm ntawd. 66 Cov uas tau hnov luag tham txog tej xwm no, muab khaws cia rau nruab siab, lawv hais tias : "Tus me nyuam ntawd yuav yog ib tug zoo li cas ?" Huab Tais txhais tes yeej nrog nraim tus me nyuam ntawd tiag.



    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 22nd December 2016, 6:12 pm

    TIM 24 LUB 12 HLIS 2016

    Hnub Xya Lis Piam Plaub Caij Tos Huab Tais Xyoo A Nruab Lis PIam Xyoo I – Mis Xas sawv ntxov

    Zaj Nyeem Ib: 2 XM 7:1-5, 8B-12, 14A, 16


    1 Thaum tus vaj tshais los nyob hauv nws lub tsev loog lawm thiab HUAB TAIS pub nws so ntawm nws cov yeeb ncuab nyob ib ncig ntawm nws lawm, tus vaj hais rau tus Yaj Saub Nas Taas tias : "Koj ntsia saib, kuv nyob hauv ib lub tsev ntoo ciab, hos Tswv Ntuj lub Xab Cog Lus nyob hauv ib lub Tsev Tsam Phooj xwb!" 3 Nas Taas teb rau tus vaj tias : "Koj mus ua raws li koj siab nyiam, vim HUAB TAIS nrog nraim koj." 4 Tiam sis hmo ntawd, Tswv Ntuj lo lus nrov tuaj rau Nas Taas tias : 5 "Koj mus hais rau kuv tus tub txib Das Vis tias HUAB TAIS hais li no : Puas yog koj yuav txhim ib lub tsev rau kuv nyob?
    8b Kuv tau rho koj hauv tsiaj cov tshav zaub thiab hauv txoj kev lawv tsiaj los ua tus tswj kav kuv haiv His Xas Lais. 9 Koj mus txog twg kuv tau nrog koj nraim, thiab tau txo koj cov yeeb ncuab ntawm koj hauv ntej. Kuv yuav ua kom koj lub npe nrov ib yam li cov neeg tseem ceeb tshaj nyob ntiaj teb. 10 Kuv yuav hwm ib thaj av rau kuv haiv neeg His Xas Lais thiab kuv yuav muab lawv coj mus cog rau ntawd kom lawv nyob ntawd; lawv yuav tsis ntsib kev nyuaj siab ib zaug ntxiv, cov neeg phem yuav tsis tsuj lawv ib zaug ntxiv xws li yav thaum pib hauv paus, 11 thiab xws li txij hnub kuv tau tsa muaj cov txwj laus los coj kuv haiv neeg His Xas Lais. Kuv yuav cia koj tau so ntawm koj cov yeev ncuab. HUAB TAIS tseem hais ntxiv rau koj tias HUAB TAIS yuav npaj ib lub tse neeg rau koj: 12 thaum koj lub caij dua lawm, thiab koj mus so nrog koj cov yawg koob lawm, kuv yuav tsa koj ib tug xeeb leej xeeb ntxwv tawm ntawm koj roj koj ntshav los, sawv lawv koj qab; kuv yuav tsa nws ua vaj nyob ruaj nreb.
    14 Kuv yuav yog nws txiv, nws yuav yog kuv tus tub. 16 Koj tsev neeg thiab koj txoj kev ua vaj yuav nyob mus li nyob ntawm kuv xub ntiag; koj lub theej kiab yuav nyob ruaj nreb mus ib txhis."

    NPN 89: 2-3, 4-5, 27+29

    Txais: (2) Kuv yuav hu nkauj mus li cav txog HUAB TAIS lub siab zoo.

    Kuv yuav hu nkauj mus li cav txog HUAB TAIS tej kev zoo,
    kuv lub ncauj yuav tshaj txog koj txoj kev pheej xeeb mus tiam dhau tiam.
    Vim koj tau hais tias: “Kuv lub siab zoo yuav nyob ruaj mus li;”
    nyob saum ntuj koj tau cog koj txoj kev pheej xeeb kom ruaj nreb.

    Txais…

    “Kuv tau cog lus nrog tus neeg kuv tau xaiv,
    kuv tau cog lus ruaj rau kuv tus tub txib Das Vis tias:
    kuv yuav tsa koj tsoom xeeb leej xeeb ntxwv nyob ruaj nreb mus li,
    thiab koj lub theej kiab yuav nyob khov kho mus tiam dhau tiam,”

    Txais…

    “Nws yuav hais rau kuv tias, ‘Koj yog kuv txiv,
    kuv tus Tswv Ntuj, kuv lub tsua, kuv tus cawm seej.’
    Kuv yuav ua siab zoo rau nws mus tas ib txhis,
    thiab kuv txoj kev nrog nws cog lus yuav nyob ruaj nreb.”

    Txais…

    As Les Lus Yas

    Txais: As les lus yas, as les lus yas

    Qhov Kaj Ntug ci ntsa iab,
    Qhov pom kev ci ntsa paug mus li, lub hnub muaj kev ncaj ncees,
    thov koj tuaj ci kaj cov neeg nyob hauv kev tsaus ntuj thiab hauv txoj kev tuag tus duab ntxoov ntxoo.

    Txais: As les lus yas, as les lus yas

    Ntawv Moo Zoo: LK 1: 67-79

    67 Ces Leej Ntuj Plig Ntshiab los nyob puv hauv tus me nyuam leej txiv Ntxas Kas Lias, nws ua yaj saub hais tias: 68 "His Xas Lais tus Huab Tais Tswv Ntuj nto koob meej, vim nws tuaj xyuas thiab tuaj npo nws haiv neeg. 69 Nws tsa ib txog kev cawm muaj zog rau peb nyob hauv nws tus tub txib Das Vis tsev neeg. 70 Nws ua raws li nws kom cov yaj saub ntshiab txheej thaud xub qhia tias : 71 nws yuav cawm peb ntawm peb cov yeeb ncuab, thiab ntawm cov neeg ntxub peb txhais tes. 72 Nws tau hlub peb cov yawg koob. Nws nco ntsoov txog cov lus ntshiab nws nrog lawv cog, 73 nws nco ntsoov txog lo lus nws cog rau peb txiv Has Nplas Has tias : 74 nws yuav ua kom peb txhob ntshai, nws yuav npo peb ntawm peb cov yeeb ncuab txhais tes, 75 peb thiaj tau kev tsob hwb nws hauv txoj kev ntshiab thiab txoj kev ncaj nyob ntawm nws xub ntiag tas peb sid. 76 Hos koj, me tub, luag yuav hu koj ua Leej Nyob Siab tus yaj saub. Koj yuav mus tom Huab Tais hauv ntej, koj yuav npaj nws txoj kev. 77 Koj yuav qhia nws haiv neeg paub txoj kev cawm, uas tawm ntawm txoj kev zam txhaum los. 78 Peb tus Tswv Ntuj lub siab hlub mos nyoos, nws xa lub hnub saum txheej siab tawm tuaj rau peb. 79 Nws kaj cov neeg zaum hauv qhov tsaus ntuj thiab cov nyob hauv kev tuag tus duab ntxoo. Nws hwj peb txhais taw mus taug txoj kev thaj yeeb."



    Mim
    Tswv Cuab Hmong Catholique
    Tswv Cuab Hmong Catholique

    Messages : 1745
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 24th December 2016, 5:59 am

    Cov zaj nyeem rau lub Koob Tsheej Yes Xus yug los nyob tas nrho rau hauv no lawm, nej mus taum nyeem. Nej yuav tsum mus kom txog tim 24 lub 12 hlis, ces nej xaiv saib yog lub sij hawm twg xwb:

    http://hmongcatholique.forumdediscussions.com/t1456-cov-zaj-nyeem-ua-koob-tsheej-yes-xus-yug-los#13557


    Sponsored content

    Re: COV ZAJ NYEEM NRUAB LIS PIAM XYOO I 2016-2017

    Post  Sponsored content


      Current date/time is 26th February 2017, 12:47 pm