COV ZAJ NYEEM NRUAB LIS PIAM XYOO I 2022-2023

Tim     17     lub     6     Hli     2023

Hnub Xya Lis Piam Kaum Nruab Xyoo A Nruab Lis Piam Xyoo I

Yuav Hwm Niam Mab Liab Lub Plawv Tsis Lo Txhaum
Lectionary: 363/573

Yog xav nyeem tas nrho cov zaj rau hnub hwm Niam Mab lub Plawv Tsis lo Txhaum xwb, mas mus saib nram kawg.

Zaj Nyeem Ib:   2 KLN 5: 14-21

Cov kwj tim nkauj muad:
14 Leej Pleev txoj kev nyiam txhib peb, kom peb ntseeg tias nws ib leeg tuag rau sawv daws; ua li mas sawv daws kuj tuag tib si thiab.
15 Nws tuag pub rau sawv daws, kom cov neeg ciaj tsis txhob ua neej rau lawv tus kheej xwb, tiam sis kom lawv ua neej rau tus uas tau tuag thiab sawv rov loskom tau pab lawv.
16 Li ntawd, txij nyem no mus, peb yuav tsis txhob saib ib tug neeg raws li lub cev nqaij xwb. Tab yog peb tau pom Leej Pleev raws li lub cev nqaij yav tas los lawd, los nyem no, peb tsis pom nws zoo li ntawd lawm.
17 Vim li ntawd, yog leej twg nyob hauv Leej Pleev, mas nws yog ib tug uas raug tsim dua tshiab lawm: yam qub dua mus tas, hos yam tshiab sawv los nyob rau ntawd lawm .
18 Tas txhua yam puav leej yog tuaj ntawm Tswv Ntuj tuaj, nws yog tus tau ua kom peb rov nrog nws sib haum xeeb nyob hauv Leej Pleev, thiab nws tau muab txoj hauj lwm coj kom sawv daws los sib haum xeeb rau peb ua.
19 Tswv Ntuj yog tus ua kom lub ntiaj teb neeg nrog nws rov sib haum xeeb dua nyob hauv Leej Pleev, nws tsis saib txog neeg cov txhaum ntxiv, thiab nws muab cov lus muaj kev sib haum xeeb tso rau peb ua cov qhia.
20 Ces peb yog Leej Pleev cov tiam lis, zoo cuag li yog Tswv Ntuj siv peb mus qhuab qhia neeg. Peb sawv Leej Pleev chaw thov nej, kom nej cia li nrog Tswv Ntuj rov sib haum xeeb mog.
21 Tswv Ntuj ua kom tus neeg uas tsis paub ua txhaum, txia ua kev txhaum los pab peb, kom xwv nyob hauv Leej Pleev peb hloov tau mus ua Tswv Ntuj txoj kev ncaj.

NPN   103: 1-2, 3-4, 9-10, 11-12

Txais: (8a) Huab Tais muaj lub siab zoo thiab khuv leej neeg.

Kuv tus ntsuj plig, koj cav txog HUAB TAIS mog;
tas kuv tus kheej, koj cav txog nws lub npe ntshiab.
Kuv tus ntsuj plig, koj cav txog HUAB TAIS mog,
koj tsis txhob hnov qab nws tej kev zoo ib qho li.

Txais: (8a) Huab Tais muaj lub siab zoo thiab khuv leej neeg.

Nws tau zam tas koj tej txhaum rau koj,
nws tau kho tas koj tej kev mob nkeeg kom zoo hlo.
Nws tau cawm koj txoj sia ntawm kev puas nstoog,
nws tau muab nws txoj kev ua zoo thiab kev khuv leej rau koj ntoo.

Txais: (8a) Huab Tais muaj lub siab zoo thiab khuv leej neeg.

Nws tsis yws tas mus li,
nws kuj tsis chim tas mus ib txhis.
Nws tsis nplua peb raws li peb tau ua txhaum,
nws tsis ua pauj rau peb raws li peb tau ua phem.

Txais: (8a) Huab Tais muaj lub siab zoo thiab khuv leej neeg.

Npaum li lub ntuj nyob siab saum ntiaj teb,
nws kuj hlub cov neeg uas hwm nws tshaj npaum li ntawd.
Npaum li sab hnub tuaj nyob deb ntawm sab hnub poob,
nws kuj muab peb tej txhaum pov tseg deb ntawm peb npaum li ntawd.

Txais: (8a) Huab Tais muaj lub siab zoo thiab khuv leej neeg.

As Les Lus Yas:    Lk 2: 19

xais: As les lus yas, as les lus yas.

Tus nkauj tsim txiaj Mab Liab tau txoj hmoov zoo, vim nws khaws
Tswv Ntuj lo lus cia thiab muab coj los xav hauv nruab siab.

Txais: As les lus yas, as les lus yas.

Ntawv Moo Zoo:   LK 2:  41-51

41 Yes Xus niam thiab txiv nkawd niaj xyoo mus ua lub Ntees Hla pem Yes LusXas Les.
42 Thaum Yes Xus muaj kaum ob xyoos, lawv kuj mus ua lub Ntees Hla rau ped raws li kev cai thiab.
43 Thaum cov hnub ua ntees ntawd tas lawm, Yos Xes thiab Mab Liab nkawd sawv kev rov los tsev, hos tus me tub Yes Xus tseem nyob Yes Lus Xas Les, nws niam thiab nws txiv tsis paub li.
44 Nkawd xav tias nws nyob hauv pab neeg coob coob, nrog sawv daws rov qab los lawm. Ces nkawd mus ib hnub ke, nkawd mam li pib nrhiav nws hauv cov txheeb ze thiab cov swm neeg.
45 Tiam sis nkawd nrhiav tsis tau, ces nkawd thiaj rov mus nrhiav nws pem Yes Lus Xas Les.
46 Nkawd nrhiav tau peb hnub, thiaj nrhiav tau Yes Xus nyob hauv lub Tuam Tsev Teev Ntuj, nws zaum hauv nruab nrab cov kws Txoj Cai, nws mloog lawv thiab nug lawv.
47 Cov neeg uas tau hnov nws hais lus puav leej yoob tas rau nws txoj kev to taub thiab nws cov lus teb.
48 Thaum nkawd pom Yes Xus, nkawd xav tsis thoob, ces nws niam hais rau nws tias: "Me tub, vim li cas koj ua li ntawd rau wb? Saib koj txiv wb nrhiav koj, wb ntxhov siab tas nrho."
49 Yes Xus hais rau nkawd tias: "Vim li cas neb nrhiav kuv? Neb tsis paub tias kuv yuav tsum leg kuv Txiv cov hauj lwm no lod?”
50 Tiam sis nkawd tsis to taub nws lo lus nws hais rau nkawd li.
51 Yes Xus nrog nkawd rov mus nyob Nas Xas Les, nws mloog nkawd lus. Nws niam khaws tej  ntawd huv tib si cia rau nruab siab.

++++++++++++++++++++++++

Hnub Xya hauv Lis Piam Hnub Chiv Ob tom qab Leej Ntuj Plig Nqes Los

Hwm Niam Mab Liab lub PLawv Tsis Lo Txhaum
Lectionary: 573

Zaj Nyeem Ib:    HX 61: 9-11

HUAB TAIS hais tias:
9 Kuv haiv neeg tsoom xeeb leej yuav nto moo nyob hauv cov kuj cuab, lawv cov xeeb ntxwv yuav muaj koob meej nyob hauv cov haiv neeg. Tas tsoom neeg uas pom lawv yuav zeem tias lawv yog ib haiv neeg uas HUAB TAIS foom hmoov zoo rau.
10 Kuv zoo siab tag nrho nyob hauv HUAB TAIS, kuv tus plig dhia hom khaj nyob hauv kuv tus Tswv Ntuj; vim nws muab kev cawm ua tsoos rau kuv hnav, nws muab kev ncaj ua tsho tshaj sab rau kuv npua, xws li nraug vauv tau ib lub mom teev kub los ntoo, xws li nkauj nyab tau npauj kub npauj nyiag los coj.
11 Ib yam li daim av ua tau kom tej nroj tsuag nthaw kaus tuaj, los ib lub vaj ua tau kom tej noob tseb rau hauv txawj hlav tuaj, ib yam li ntawd, HUAB TAIS Tswv Ntuj kuj yuav ua kom txoj kev ncaj thiab kev cav kev qhuas txhawv tawm tuaj nyob ntawm txhua haiv neeg xub ntiag.

NPN:   1 XM 2: 1, 4-5, 6-7, 8abcd

Txais: (1) Kuv lub siab dhia hom khaj nyob hauv HUAB TAIS tus cawm kuv.

Kuv lub siab dhia hom khaj nyob hauv HUAB TAIS,
kuv muaj ntsej muag nyob hauv kuv tus Tswv Ntuj.
Kuv lub ncauj hais lus tsis ntshai kuv cov yeeb ncuab,
vim kuv zoo siab nyob hauv koj txoj kev cawm.

Txais: (1) Kuv lub siab dhia hom khaj nyob hauv HUAB TAIS tus cawm kuv.

Cov neeg muaj zog rab hneev dam daws,
hos cov zog sib lawv lub zog loj tuaj.
Cov uas tau noj tsau npo yuav tsum mus ua zog thiaj tau noj,
hos cov tshaib plab tso txoj kev khwv tseg.
Tus pog khab seeb yug tauj xya leej tub,
hos tus muaj tub coob tsis muaj kev sov siab li.

Txais: (1) Kuv lub siab dhia hom khaj nyob hauv HUAB TAIS tus cawm kuv.

HUAB TAIS ua kom tuag thiab ua kom ciaj sia.
Nws muab thawb lawm hauv ntuj txias teb tsaus,
thiab nws tsa kom muaj sia sawv rov los.
HUAB TAIS ua kom pluag thiab ua kom muaj;
nws muab txo kom qis thiab nws tsa kom siab.

Txais: (1) Kuv lub siab dhia hom khaj nyob hauv HUAB TAIS tus cawm kuv.

Nws tsa cov txom nyem hauv cov plua av los rau qhov siab;
nws tshem cov pluag tawm hauv qhov chaw qias los,
nws coj lawv mus zaum nrog cov tub nom tub tswv
thiab muab ib lub theej kiab muaj hwj chim ua lawv tug.

Txais: (1) Kuv lub siab dhia hom khaj nyob hauv HUAB TAIS, tus cawm kuv.

As Les Lus Yas:    Lk 2: 19

xais: As les lus yas, as les lus yas.

Tus nkauj tsim txiaj Mab Liab tau txoj hmoov zoo vim nws
khaws Tswv Ntuj lo lus cia thiab muab coj los xav hauv nruab siab.

Txais: As les lus yas, as les lus yas.

Ntawv Moo Zoo:   LK 2:  41-51

41 Yes Xus niam thiab txiv nkawd niaj xyoo mus ua lub Ntees Hla pem Yes LusXas Les.
42 Thaum Yes Xus muaj kaum ob xyoos, lawv kuj mus ua lub Ntees Hla rau ped raws li kev cai thiab.
43 Thaum cov hnub ua ntees ntawd tas lawm, Yos Xes thiab Mab Liab nkawd sawv kev rov los tsev, hos tus me tub Yes Xus tseem nyob Yes Lus Xas Les, nws niam thiab nws txiv tsis paub li.
44 Nkawd xav tias nws nyob hauv pab neeg coob coob, nrog sawv daws rov qab los lawm. Ces nkawd mus ib hnub ke, nkawd mam li pib nrhiav nws hauv cov txheeb ze thiab cov swm neeg.
45 Tiam sis nkawd nrhiav tsis tau, ces nkawd thiaj rov mus nrhiav nws pem Yes Lus Xas Les.
46 Nkawd nrhiav tau peb hnub, thiaj nrhiav tau Yes Xus nyob hauv lub Tuam Tsev Teev Ntuj, nws zaum hauv nruab nrab cov kws Txoj Cai, nws mloog lawv thiab nug lawv.
47 Cov neeg uas tau hnov nws hais lus puav leej yoob tas rau nws txoj kev to taub thiab nws cov lus teb.
48 Thaum nkawd pom Yes Xus, nkawd xav tsis thoob, ces nws niam hais rau nws tias: "Me tub, vim li cas koj ua li ntawd rau wb? Saib koj txiv wb nrhiav koj, wb ntxhov siab tas nrho."
49 Yes Xus hais rau nkawd tias: "Vim li cas neb nrhiav kuv? Neb tsis paub tias kuv yuav tsum leg kuv Txiv cov hauj lwm no lod?”
50 Tiam sis nkawd tsis to taub nws lo lus nws hais rau nkawd li.
51 Yes Xus nrog nkawd rov mus nyob Nas Xas Les, nws mloog nkawd lus. Nws niam khaws tej  ntawd huv tib si cia rau nruab siab.

Tim    19     lub     6     Hli     2023

Hnub Ob Lis Piam Kaum Ib Nruab Xyoo A Nruab Lis Piam Xyoo I
Lectionary: 365

XHLT:   LN Romuald, Tswj cov Txiv Tab Seeb

Zaj Nyeem Ib:   2 KLN 6: 1-10

Cov kwv tij nkauj muad:
1 Vim peb nrog nej ua hauj lwm, mas peb thov nej kom nej tsis txhob lam txais Tswv Ntuj lub txiaj ntsim dag xwb mog.
2 Vim nws hais tias: ‘Thaum zoo sij hawm, kuv tau teb koj, thaum txog hnub cawm neeg, kuv tau pab koj.’ Lub sij hawm zoo, ces yog nyem no, hnub cawm neeg, ces yog nyem no ntag.
3 Peb tsis ua ib yam uas yuav ua rau ib tug twg poob rau qhov phem li, kom peb txoj kev tshaj lub Moo Zoo thiaj tsis muaj ib qho chaw xyeej.
4 Tiam sis nyob hauv txhua yam, peb xav kom luag pom tias peb yog Tswv Ntuj cov tub txib uas nyob rawv hauv txoj kev ua siab ntev nyiaj ntau yam, hauv txoj kev ntsib kev txhawj xeeb, kev nyuaj, kev ntxhov siab,
5 kev raug luag ntaus, raug luag kaw, raug luag tawm tsam, kev siv zog khwv, kev yoo dab ntub, kev yoo tshaib yoo nqhis;
6 nyob hauv txoj kev xyaum ua neeg dawb huv, xyaum ua neeg txawj ntse, ua neeg siab ntev, ua neeg siab zoo; nyob hauv Leej Tswv Yim Ntshiab, nyob hauv txoj kev nyiam tseeb tiag;
7 nyob hauv lo lus tseeb, nyob hauv Tswv Ntuj lub hwj huam; nyob hauv txoj kev siv tej cuab yeej ntawm txoj kev ncaj los ua qhov zoo thiab tiv qhov phem;
8 nyob hauv txoj kev muaj hwj chim thiab kev poob ntsej muag, txoj kev raug luag thuam thiab raug luag qhuas; raug luag saib tias yog neeg dag, txawm tias peb hais qhov tseeb xwb.
9 Peb yog cov uas luag tsis paub, tab sis kuj muaj neeg paub coob kawg; cov uas luag hais tias yuav tuag, tab sis kuj tseem muaj txoj sia nyob; cov uas luag saib tias yog neeg raug txim, tab sis kuj tsis tau raug muab tua;
10 luag xav tias peb tu siab, tab sis peb zoo siab mus li; luag saib peb pluag kawg nkaus, tab sis peb ua kom coob leej nplua nuj tuaj; luag saib peb yog cov neeg tsis muaj dab tsi li, tab sis peb muaj tas ib puas tsav yam ua peb tug.

NPN   98: 1, 2b-3ab, 3cd-4

Txais: (2a) Huab Tais ua kom neeg paub txog nws txoj kev cawm.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
nws sab npab ntshiab tau ua.

Txais: (2a) Huab Tais ua kom neeg paub txog nws txoj kev cawm.

HUAB TAIS ua kom cov haiv neeg pom nws txoj kev ncaj
Nws rov nco txog nws txoj kev ua zoo
thiab kev pheej xeeb rau tsev neeg His Xas Lais.

Txais: (2a) Huab Tais ua kom neeg paub txog nws txoj kev cawm.

Tas cov npoo ntiaj teb kawg tau pom
peb tus Tswv Ntuj txoj kev cawm neeg.
Tas txhua teb chaws, nej hu nkauj zoo siab rau HUAB TAIS mas,
nej qw suab nkauj, nej cav txog nws.

Txais: (2a) Huab Tais ua kom neeg paub txog nws txoj kev cawm.

As Les Lus Yas:   NPN 119: 105

Txais: As les lus yas, as les lus yas.

Koj lo lus yog lub teeb tsom hauv kuv ko taw,
yog ib qho pom kev kaj kuv txoj kev.

Txais: As les lus yas, as les lus yas.

Ntawv Moo Zoo:   MT 5: 38-42

Yes Xus hais rau nws cov thwj tim tias:
38 “Nej tau hnov tej lus qhia tias: ‘Qhov muag pauj qhov muag, kaus hniav pauj kaus hniav.’
39 Hos kuv hais rau nej tias: nej tsis txhob nrog tus neeg phem sib cav. Yog leej twg ib ncuav pias rau koj sab plhu xis, tig sab plhu laug rau nws thiab.
40 Leej twg xav ua plaub rau koj kom tau koj lub tsho, mas koj muab koj lub tsho tshaj sab ntxiv rau nws thiab.
41 Leej twg thov koj xa nws mus ib ncua kev, mas koj nrog nws mus ob ncuas.
42 Leej twg thov dab tsi ntawm koj, mas koj pub rau nws; leej twg xav txais koj nyiaj, mas koj txhob tig nrob qaum rau nws.”

Tim     20     lub     6    Hli     2023

Hnub Peb Lis Piam Kaum Ib Nruab Xyoo A Nruab Lis Piam Xyoo I
Lectionary: 366

Zaj Nyeem Ib:   2 KLN 8: 1-9

1 Cov kwv tij, peb xav kom nej paub txog lub txiaj ntsim uas Tswv Ntuj tau pub rau cov Koom Txoos nyob Mas Xes Dos Nias teb.
2 Lawv tau raug kev sim siab loj nyob hauv kev txom nyem, tsis kav lawv txoj kev zoo siab puv npo thiab lawv txoj kev pluag ti txha tseem ua kom txoj kev ua siab dav fo pub paj tshab ntau txhawv phwj yaws tawm hauv lawv tuaj.
3 Lawv pub raws li lawv muaj, kuv yeej ua tau pov thawj txog, thiab lawv tseem pub tshaj qhov lawv muaj thiab, lawv zoo siab hlo pub tsis muaj tus yuam.
4 Lawv tau taij peb tsis tseg kom peb cia lawv nrog sawv daws koom txoj kev tsob hwb cov ntshiab.
5 Lawv tau ua zoo tshaj qhov peb tos ntawm lawv; lawv xub muab lawv fij rau Huab Tais ua ntej, ces lawv mam li pab peb raws li Tswv Ntuj nyiam.
6 Vim li ntawd, peb thiaj tau thov Tis Tos tias raws li nws twb tau pib ua los lawm, kom nws nrog nej ua qhov hauj lwm muaj txiaj ntsim zoo no kom tiav.
7 Nej twb ua tau zoo heev nyob hauv txhua yam lawm, yam li kev ntseeg, kev txawj hais lus, kev paub txuj, kev kub siab lug rau txhua yam, thiab kev ua kom peb nyiam nej, ua li mas nej kuj yuav tsum ua zoo tshaj nyob hauv txoj kev pub paj tshab muaj txiaj ntsim no thiab.
8 Kuv hais li no tsis yog xav yuam nej, tsuas yog xav kom nej paub txog lwm pawg txoj kev kub siab lug, ces nej thiaj yuav nyiam thiab hlub luag tseeb tiag xwb.
9 Vim nej twb paub txog peb tus Huab Tais Yes Xus Pleev lub txiaj ntsim lawm: Yog qhov tias, nws yog tus nplua nuj, tab sis vim nej, mas nws ua kom nws pluag, kom xwv nws txoj kev pluag ua nej nplua nuj tuaj.

NPN    146: 1b-2, 5-6ab, 6c-7, 8-9a

Txais: (1b) Kuv tus plig, koj cav lus zoo txog HUAB TAIS mas!
los: As les lus yas.

Kuv tus plig, koj cia li cav lus zoo txog HUAB TAIS!
Kuv yuav cav txog HUAB TAIS tas kuv sim neej,
kuv yuav hu nkauj cav txog kuv tus Tswv Ntuj
thaum kuv tseem muaj sia nyob.

Txais: (1b) Kuv tus plig, koj cav lus zoo txog HUAB TAIS mas!
los: As les lus yas.

Muaj hmoov zoo yog tus tau Yas Kos tus Tswv Ntuj nres nws,
Yog tus tso siab rau HUAB TAIS nws tus Tswv Ntuj,
uas yog tus tswv tsim lub ntuj lub teb,
tsim dej ntuj thiab ib puas tsav yam nyob hauv dej.

Txais: (1b) Kuv tus plig, koj cav lus zoo txog HUAB TAIS mas!
los: As les lus yas.

Nws yog tus pheej xeeb mus ib txhiab ib txhis;
cov raug luag quab yuam, nws tsa lawv cai,
nws pub mov rau cov neeg tshaib noj;
HUAB TAIS tso cov neeg raug txim kom lawv dim.

Txais: (1b) Kuv tus plig, koj cav lus zoo txog HUAB TAIS mas!
los: As les lus yas.

HUAB TAIS qhib cov dig muag qhov muag,
HUAB TAIS tsa cov khoov nkoos kom sawv ntseg,
HUAB TAIS nyiam cov neeg ncaj,
HUAB TAIS pov hwm cov pej kum neeg.

Txais: (1b) Kuv tus plig, koj cav lus zoo txog HUAB TAIS mas!
los: As les lus yas.

As Les Lus yas:   ZAM 13: 34

Txais: As Les Lus Yas.

Kuv muab ib lo lus qhia tshiab rau nej:
Nej yuav sib nyiam sib hlub ib yam li kuv nyiam thiab hlub nej.

Txais: As Les Lus Yas.

Ntawv Moo Zoo:   MT 5: 43-48

Yes Xus haisrau nws cov thwj tim tias:
43 "Nej tau hnov tej lus qhia tias: ‘Koj yuav nyiam tus nyob ze koj, koj yuav ntxub koj tus yeeb ncuab.’
44 Tab sis, kuv hais rau nej tias: nej yuav nyiam nej cov yeeb ncuab, nej yuav thov Ntuj rau cov tsim txom nej,
45 nej thiaj yuav yog nej Txiv nyob saum ntuj cov tub; vim tias nej Txiv ua kom lub hnub tawm tuaj ziab cov neeg phem thiab cov neeg zoo, thiab nws ua kom nag los rau cov neeg siab ncaj thiab cov neeg siab nkhaus huv tib si.
46 Yog nej nyiam cov neeg nyiam nej xwb, mas nej yuav tau koob haum dab tsi? Tab yog cov sau se, lawv tsis txawj nyiam li ntawd thiab lod?.
47 Yog nej tsuas hais lus hu nej cov kwv tij xwb, mas nej tau ua dab tsi txawv? Tab yog cov neeg teev pej kum dab los lawv los lawv tsis txawj ua li ntawd thiab lod?
48 Nej, mas nej yuav tsum ua neeg zoo tshaj plaws, vim nej Txiv nyob saum ntuj yog tus zoo tshaj plaws.”

Tim     21     lub     6     Hli     2023

Hnub Plaub Lis Piam Kaum Nruab Xyoo A Nruab Lis Piam Xyoo I
Lectionary: 367

Yuav Hwm LN Aloysius Gonzaga, ua Txiv Tab Seeb

Zaj Nyeem Ib:    2 KLN  9: 6-11

Cov kwv tij nkauj muad:
6 Nej yuav nco tias, tus tseb nplej tsawg, nws kuj yuav sau tau tsawg, tus tseb nplej ntau nws kuj yuav sau tau nplej ntau thiab.
7 Nej nyias yuav ua raws li nyias tau txiav nyob hauv nyias siab lawm; nej txhob pub zoo li nej khuv khuv xim, thiab zoo li yog luag yuam nej, vim Tswv Ntuj nyiam tus zoo siab luag ntxhi pub.
8 Tswv Ntuj muaj peev xwm yuav pub tau tas ib puas tsav yam txiaj ntsim nplua mias los rau nej, kom nej muaj tas txhua yam siv tas mus li, thiab tseem muaj seem txaus pab rau tej yam hauj lwm zoo thiab.
9 Raws li Ntawv sau tseg tias: ‘Nws pub paj tshab puv ntia txhua txhia chaw, nws pub rau cov pluag; nws txoj kev ua neeg ncaj yuav nyob mus li.’
10 Tus muab noob rau tus tswv teb cog, thiab muab mov los ua txhiam xws, nws yuav muab noob rau nej thiab ua kom nej cov noob ntsu tuaj, thiab yuav ua kom cov qoob txi ntawm nej txoj kev ncaj ntsu ntau tuaj.
11 Ces nej yuav nplua nuj nyob hauv txhua yam vim nej txoj kev ua siab dav, uas peb yuav siv los ua kom muaj kev ua Tswv Ntuj tsaug.

NPN     112: 1bc-2, 3-4, 9

Txais: (1b) Tus neeg hwm Huab Tais nws txoj hmoov zoo.
los: As les lus yas.

Tus muaj hmoov zoo yog tus uas hwm HUAB TAIS,
thiab nyiam coj Huab Tais cov lus qhia tas siab tas ntsws.
Nws caj ces yuav muaj peev xwm nyob ntiaj teb,
caj ces neeg siab ncaj yuav tau txoj hmoov zoo.

Txais: (1b) Tus neeg hwm Huab Tais nws txoj hmoov zoo.
los: As les lus yas.

Kev muaj kev nplua nuj yuav nyob hauv nws vaj tse;
nws txoj kev ua siab dav yuav nyob mus li.
Qhov pom kev ci hauv qhov tsaus tuaj kaj tus neeg ncaj;
Nws khuv leej neeg, nws zam rau luag, thiab nws ua ncaj.

Txais: (1b) Tus neeg hwm Huab Tais nws txoj hmoov zoo.
los: As les lus yas.

Nws ua siab dfav fo pub rau cov pluag :
nws txoj kev ua siab dav yuav nyob mus li,
nws lub meej mom yuav raug muab tsa rau qhov siab muaj hwj chim.

Txais: (1b) Tus neeg hwm Huab Tais nws txoj hmoov zoo.
los: As les lus yas.

As Les Lus Yas:    ZAM  14: 23

Txais: As Les Lus Yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws.
Kuv Txiv wb yuav tuaj nyob hauv nws.

Txais: As Les Lus Yas.

Ntawv Moo Zoo:    MT  6: 1-6, 16-18

Yes Xus hais rau nws cov thwj tim tias:
1 “Nej ceev faj, tsis txhob ua ncaj nyob ntawm neeg xub ntiag, kom luag pom nej xwb. Yog nej ua li ntawd, mas nej yuav tsis txais koob haum ntawm nej Txiv nyob saum ntuj.
2 Thaum koj pub rau luag, koj txhob tshuab hom ua koj ntej, xws li cov neeg zoo sab nraud lawv ua nyob hauv cov tsev txoos thiab nyob ntawm tej kev, kom sawv daws cav lus zoo txog lawv. Kuv hais tseeb rau nej, lawv twb txais lawv cov koob haum tas lawm.
3 Hos koj, mas thaum koj pub rau luag, koj txhob cia koj sab tes laug paub qhov uas sab tes xis ua.
4 Li ntawd, tsis muaj neeg paub tias koj tau pub rau luag. Ces koj Txiv uas nws pom hauv qhov chaw nraim yuav pauj rau koj.
5 "Thaum nej teev Ntuj, nej txhob ua li cov neeg zoo sab nraud: lawv nyiam mus sawv ntsug hauv cov tsev txoos, thiab ntawm tej kev tshuam, kom sawv daws pom lawv. Kuv hais tseeb rau nej, lawv twb txais lawv cov koob haum lawm.
6 Hos koj, mas thaum koj teev Ntuj, koj mus nyob twj ywm hauv koj chav pw, kaw koj qhov rooj rau, ces koj thov koj Txiv uas nws nyob hauv qhov chaw nraim. Koj Txiv uas nws pom hauv qhov chaw nraim, yuav pauj rau koj.
16 Thaum nej yoo mov, nej txhob ua ntsej muag ntshaus xws li cov neeg zoo sab nraud: lawv ua ntsej muag mluas mlob, kom luag pom tias yog lawv yoo mov. Kuv hais tseeb rau nej tias cov neeg ntawd twb txais lawv cov koob haum tas lawm.
17 Hos koj, mas thaum koj yoo mov, koj yuav pleev tshuaj tsw qab rau saum taub hau, thiab yuav ntxuav ntsej muag,
18 kom txhob muaj neeg paub tias koj yoo mov, tsuas kawg koj Txiv uas nws nyob hauv qhov chaw nraim tib leeg thiaj paub xwb. Koj Txiv uas nws pom hauv qhov chaw nraim yuav pauj rau koj.”

Tim     22     lub     6     Hli     2023

Hnub Tsib Lis Piam Kaum Ib Nruab Xyoo A Nruab Lis Piam Xyoo I
Lectionary: 368

XHLT:    LN John Fisher, ua Tswv Qhia & LN Thomas More, ob tug Tim Khawv;
LN Paulinus nyob Nola, ua Tswv Qhia

Zaj Nyeem Ib:   2 KLN 11: 1-11

Cov kwv tij nkauj muad:
1 “Xav kom nej ua siab ntev rau kuv, txawm kuv yuav hais tau tej yam vwm me ntsis, los kuv thov kom nej ua siab ntev xwb mog!
2 Vim tias kuv lub siab khib nej ib yam li yog Tswv Ntuj khib thiab, vim kuv tau qhaib nej rau ib tug txiv xwb, nej yog zoo li ib tug nkauj xwb dawb huv uas kuv muab rau Leej Pleev yuav.
3 Tab sis, kuv ntshai tsam, ib yam li Es Vas raug tus nab ntse siab nkhaus ntxias tau nws, mas tsam nej kuj yuav cia nej lub tswv yim hloov, ces nej yuav nyob deb ntawm txoj kev ua siab ncaj thiab ua siab dawb paug rau Leej Pleev.
4 Yog muaj tej tus tuaj tshaj ib tug Yes Xus txawv tus peb tau tshaj, los yog nej txais dua lwm tus Leej Ntuj Plig txawv tus nej tau txais lawm, los yog nej hnov dua ib lub Moo Zoo txawv lub Moo Zoo nej ib txwm tau ntseeg los, mas ntshai tsam nej cia li yuav qaug rau tej ntawd yooj yooj yim xwb.
5 Kuv xav tias kuv yeej tsis qis dua cov hauv paus xa lus muaj peev xwm ntawd li.
6 Tej zaum kuv yuav tsis txawj hais lus zoo, tab sis hais txog kev paub txuj, mas kuv yeej tsis swb li. Nyob hauv txhua yam, peb yeej tau ua rau sawv daws pom tias peb paub txuj.
7 Kuv puas tau ua ib qho yuam kev, vim kuv ua hauj lwm dawb tshaj Tswv Ntuj lub Moo Zoo rau nej, kuv tau txo kom kuv qis, thiab tsa nej rau qhov siab?
8 Kuv tau noj nyiaj hli ntawm lwm cov Koom Txoos, kom kuv tau kev tsob hwb nej.
9 Thaum kuv tuaj nrog nej nyob lawm, txawm kuv tsis muaj txaus noj txaus haus, los kuv tsis tau tsuam ib lub nra rau nej leej twg ris li, vim muaj ib co kwv tij tuaj Mas Xes Dos Nias teb tuaj tau pab kuv kev noj kev haus lawm. Li ntawd, kuv tau ceev faj kom txhob ua ib lub nra hnyav rau nej, thiab kuv tseem yuav ua li ntawd ntxiv mus.
10 Vim Leej Pleev txoj kev tseeb uas nyob hauv kuv, mas yuav tsis muaj leej twg txwv tau kuv cov lus uas kuv khav txog kuv me me no nyob As Kas Yas teb li.
11 Yog vim li cas? Puas yog vim kuv tsis nyiam nej? Tswv Ntuj yog tus paub tias kuv yeej nyiam nej kawg!

NPN   111: 1b-2, 3-4, 7-8

Txais: (7a) Huab Tais, koj cov hauj lwm yog qhov ncaj thiab qhov tseeb.
los: As les lus yas.

Kuv yuav ua HUAB TAIS tsaug tas kuv lub siab lub ntsws
nyob ntawm tsoom neeg siab ncaj xub tiag thiab hauv lawv lub txoos.
HUAB TAIS cov hauj lwm loj tas nrho,
zoo ntxim siab kawg nkaus.

Txais: (7a) Huab Tais, koj cov hauj lwm yog qhov ncaj thiab qhov tseeb.
los: As les lus yas.

HUAB TAIS cov hauj lwm muaj hwj chim thiab nto koob meej,
nws txoj kev ncaj yuav nyob ib txhiab ib txhis.
Nws nto koob meej lug vim nws cov hwj huam yees ntxwv ;
HUAB TAIS muaj lub siab zoo  thiab khuv leej neeg

Txais: (7a) Huab Tais, koj cov hauj lwm yog qhov ncaj thiab qhov tseeb.
los: As les lus yas.

Cov hauj lwm nws txhais tes tsim yog hauj lwm txaus ntseeg thiab ncaj nces.
Nws cov lus qhuab qhia yog cov lus tseeb,
yog cov lus yuav nyob ruaj mus li ib txhis,
xeeb tawm los nyob hauv kev tseeb thiab kev ncaj ncees.

Txais: (7a) Huab Tais, koj cov hauj lwm yog qhov ncaj thiab qhov tseeb.
los: As les lus yas.

As Les Lus Yas:   LOS MAS 8: 15bc

Txais: As les lus yas, as les lus yas.

Nej tau txais ib lub tswv yim ua tub ki tshiab,
lub tswv yim ntawd qhia peb hu Tswv Ntuj tias: ‘As Npas! Txiv!’

Txais: As les lus yas, as les lus yas.

Ntawv Moo Zoo:   MT 6: 7-15

Yes Xus hais rau nws cov thwj tim tias:
7 “Thaum nej teev Ntuj, nej txhob ntuas mus ntuas los zoo li cov neeg teev dab; lawv xav tias yog lawv hais lus ntau, mas dab yuav mloog lawv zoo dua.
8 Nej txhob ua zoo li lawv. Vim nej Txiv yeej paub tias qhov twg yog qhov nej yuav tsum muaj: nej tseem tsis tau thov, nws twb xub paub lawm.
9 Nej yuav teev Ntuj zoo li no :
‘Peb Txiv nyob saum ntuj, koj lub Npe ntshiab nto moo lug.
10 Koj lub Ceeb Tsheej kom los txog. Kom muaj raws koj nyiam nyob ntiaj teb no li nyob saum ntuj.
11 Thov koj pub mov txaus peb noj hnub no.
12 Koj zam peb cov txhaum rau peb zoo li peb zam rau cov tau ua txhaum rau peb.
13 Koj txhob tso peb raug kev ntxias, thov koj npo peb dim ntawm kev phem.’
14 Yog nej zam rau cov neeg ua txhaum rau nej, mas nej Txiv nyob saum ntuj kuj yuav zam rau nej thiab.
15 Hos yog nej tsis zam txhaum rau luag, mas nej Txiv kuj yuav tsis zam nej cov txhaum rau nej li thiab.”

Tim     23     lub     6     Hli     2023

Hnub Rau Lis Piam Kaum Ib Nruab Xyoo A Nruab Lis Piam Xyoo I
Lectionary: 369

Zaj Nyeem Ib:   2 KLN 11: 18, 21-30

Cov kwv tij nkauj muad:
18 Vim muaj coob leej khav txog lawv nyob hauv sab nqaij tawv , mas kuv kuj xav khav txog kuv thiab.
21 Kuv hais nrog kev txaj muag tias, peb yog ib co neeg swb rau kev tsis muaj zog . Yog ib tug twg muaj peev xwm khav txog ib yam dab tsi los xij, mas kuv yuav hais raws li ib tug neeg vwm hais, kuv kuj muaj peev xwm ib yam nkaus thiab.
22 Lawv khav tias lawv yog neeg Hes Nplaws lod? Kuv kuj yog ib tug Hes Nplaws thiab! Lawv yog ib co His Xas Lais lod? kuv kuj yog ib tug His Xas Lais thiab! Lawv yog Has Nplas Has cov xeeb ntxwv lod? Kuv kuj yog Has Nplas Has ib tug xeeb ntxwv thiab.
23 Lawv khav tias lawv yog Leej Pleev cov tub txib lod? Kuv yuav hais raws li ib tug neeg vwm hais tias, kuv yog Leej Pleev ib tug tub txib zoo tshaj lawv, vim kuv khwv ua hauj lwm heev tshaj, kuv raug txim hauv tsev loj faj ntau tshaj, kuv raug luag nplawm ntau tshaj, kuv twb yuav luag raug tua ntau zaus kawg nkaus.
24 Kuv tau raug cov Yus Das nplawm kuv txog plaub caug nplawg luv ib, yog tsib zaug.
25 Kuv tau raug lawv xuas pas ntaus kuv peb zaug, raug lawv xuas pob zeb txawb kuv ib zaug; tau caij nkoj, lub nkoj puas tog peb zaug; tau nyob ib hnub ib hmos hauv cov nplaim dej hiav txwv tob.
26 Kuv nquag tawm rooj ntau zaus mus ko taw kev deb, tau ntsib xwm txheej ntawm cov niam dej loj, ntawm cov tub sab, ntawm kuv haiv neeg, ntawm cov neeg teev pej kum dab; ntsib xwv txheej nyob hauv cov tsheej, hauv teb chaws suab puam, hauv dej hiav txwv; thiab tseem raug xwv txheej los ntawm cov kwv tij cuav los thiab .
27 Kuv ntsib kev khwv kev sab thiab nkees, kev yoo dab ntub ntau zaus, kev yoo tshaib yoo nqhis, ntau zaus tsis muaj mov noj, nquag tiv no, tsis muaj ris tsho npua cev.
28 Ntxiv rau tej yam no, tseem muaj kuv txoj kev niaj hnub ntxhov siab txog cov Koom Txoos tas huv si thiab.
29 Leej twg tsis muaj zog, es kuv ho muaj zog? Leej twg poob rau kev txhaum, es kuv ho tsis mob siab?
30 Yog kuv yuav tsum khav, mas kuv kawg yuav khav txog tej yam uas ua kom pom kuv txoj kev tsis muaj zog xwb.

NPN   34: 2-3, 4-5, 6-7

Txais: (18b) Tswv Ntuj cawm tus neeg siab ncaj ntawm tas nws tej kev nyuaj.

Kuv yuav cav txog HUAB TAIS txhua lub sij hawm;
lo lux qhuas txog nws yuav nyob rawv ntawm kuv lub ncauj.
Kom kuv tus plig rov qhuas txog nws nyob hauv HUAB TAIS xwb;
ces tus neeg me yuav hnov kuv thiab yuav zoo siab.

Txais: (18b) Tswv Ntuj cawm tus neeg siab ncaj ntawm tas nws tej kev nyuaj.

Nej nrog kuv cav txog HUAB TAIS,
peb sawv daws ua ke qhuas nws lub npe.
Kuv nrhiav HUAB TAIS; nws tau teb kuv,
Nws cawm kuv dim ntawm tas kuv tej kev ntshai.

Txais: (18b) Tswv Ntuj cawm tus neeg siab ncaj ntawm tas nws tej kev nyuaj.

Nej vam txog HUAB TAIS, ces kev zoo siab yuav ua nej ci ntsa iab,
nej ntsej muag yuav tsis liab ploog vim kev txaj muag.
Thaum tus pluag hu, HUAB TAIS mloog,
thiab yuav npo nws dim ntawm tas nws tej kev nyuaj ntxhov.

Txais: (18b) Tswv Ntuj cawm tus neeg siab ncaj ntawm tas nws tej kev nyuaj.

As Les Lus Yas:   MT 5: 3

Txais: As les lus yas, as les lus yas.

Cov tau txoj hmoov zoo yog cov pluag hauv nruab siab,
vim Ntuj lub Ceeb Tsheej yog lawv li.

Txais: As les lus yas, as les lus yas.

Ntawv Moo Zoo:   MT 6: 19-23

Yes Xus hais rau nws cov thwj tim tias:
19 "Nej tsis txhob sau tej txhab nyiaj txhaj kub cia rau nej nyob ntiaj teb no, vim muaj kab rws kab lia txo thiab ua kom puas, thiab muaj tub sab tho qhov tsev tuaj nyiag.
20 Tiam sis nej yuav sau tej txhab nyiaj txhab kub cia nyob saum ntuj, uas tsis muaj kab rws kab lia txo thiab ua kom puas, tsis muaj tub sab tho qhov tsev tuaj nyiag.
21 Vim tias, koj txhab nyiaj txhab kub nyob qhov twg, mas koj lub siab kuj yuav nyob qhov ntawd thiab.
22 Lub teeb ua kom lub cev pom kev yog lub qhov muag. Yog koj lub qhov muag zoo, mas tas koj lub cev yuav pom kev nrig.
23 Tab sis yog koj lub qhov muag phem, mas tas koj lub cev yuav nyob tsaus ntuj nti. Yog qhov pom kev uas nyob hauv koj twb tsaus nti, mas yuav ua cas tsaus ntuj heev tshaj li.”

Tim     24     lub     6     Hli     2023

Koob Tsheej Hwm LN Zam Ntxuav Plig Hnub Yug
Lectionary: 587

Zaj Nyeem Ib:   HIS XAIS 49: 1-6

1 Cov teb chws ntug hiav txwv, nej mloog kuv hais!
Cov haiv neeg uas nyob deb, nej cuab pob ntseg mloog kuv!
HUAB TAIS yeej hu kuv txij thaum kuv yug los lawm,
nws yeej hu kuv npe txij thaum kuv nyob hauv kuv niam plab  lawm.
2 Nws muab kuv lub ncauj ua ib rab ntaj ntse zuag plias;
nws muab kuv zais rau hauv nws txhais npab qhov ntxoov.
Nws muab kuv ua ib xib xub vos ntse ntse,
muab kuv zais rau hauv nws lub raj xub.
3 HUAB TAIS hais rau kuv tias: "koj yog kuv tus tub txib;
His Xas Lais, kuv yuav ua kom kuv lub hwj chim tawm los nyob hauv koj."
4 Hos kuv mas kuv xav hais tias: "Kuv tau siv zog khwv dag tsis tau dab tsi li,
kuv nkim kuv lub zog tas dawb dawb xwb.
Tsis kav kuv muaj paj tshab nyob ntawm HUAB TAIS,
kuv tus nqi zog yog nyob ntawm kuv tus Tswv Ntuj.”
5 Nyem no, HUAB TAIS tau hais lawm,
nws yog tus tau puab kuv nyob hauv kuv niam plab
kom kuv ua nws tus tub txib,
kom tau coj Yas Kos rov los cuag nws,
kom tau sau His Xas Lais rov los nrog nws ua ke,
vim Huab Tais saib kuv tsim nyog txais koob meej;
ces kuv tus Tswv Ntuj yog kuv lub zog.
6 Nws hais tias: "Tsis tsim nyog kom koj yog kuv tus tub txib xwb,
tus uas rov tsa cov xeem Yas Kos kom sawv,
thiab coj cov His Xas Lais seem kom rov los,
kuv tseem xaiv koj kom koj yog lub teeb ci kaj cov kuj cuab thisab,
ces kuv txoj kev cawm thiaj yuav ri mus txog tim cov npoo ntiaj teb kawg.”

NPN   139: 1b-3, 13-14ab, 14c-15

Txais: (14) Kuv cav txog koj vim koj puab kuv tau zoo tas nrho.

HUAB TAIS, koj tsom tshab kuv, koj paub kuv:
koj paub thaum kuv sawv thiab thaum kuv zaum;
koj nyob deb paub tas tej kuv xav.
Koj saib nraim kuv thaum kuv taug kev los thaum kuv so,
koj paub txhua yam kuv ua.

Txais: (14) Kuv cav txog koj vim koj puab kuv tau zoo tas nrho.

Koj yog tus tsim kuv sab nruab nrog tas huv si;
koj xaws kuv ntxiv kuv hauv kuv niam plab.
Kuv ua koj tsaug, vim koj tsim kuv tau txaus ntshai txaus qhuas tas nrho:
koj tsim kuv zoo ua luaj, koj cov dej num zoo tas nrho

Txais: (14) Kuv cav txog koj vim koj puab kuv tau zoo tas nrho.

Koj paub kuv tus ntsuj plig txhij txhua thoob plaws.
koj pom thaum kuv cov pob txha pib tsheej xeeb los,
thaum koj puab kuv nyob hauv qhov chaw nraim,
thaum koj xaws kuv tsheej zuj zus puag hauv tej nruab a.

Txais: (14) Kuv cav txog koj vim koj puab kuv tau zoo tas nrho.

Zaj Nyeem Ob:   HAUJ LWM 13: 22-26

Paj Lug hais lus, nws hais tias:
22 “Tswv Ntuj tsa Das Vis ua vaj. Tswv Ntuj ua pov thawj txog Das Vis li no: ‘Kuv nrhiav tau Das Vis,
Yes Xes tus tub; nws yog tus neeg ntxim kuv siab, nws yuav ua raws li kuv lub siab xav tas huv si.’
23 Nyob hauv Das Vis cov xeeb ntxwv, raws li Tswv Ntuj tau cog lus,
nws coj ib tug cawm seej tuaj rau tsoom His Xas Lais, yog Yes Xus.
24 Zam xub tuaj npaj kev rau nws ua ntej, Zam tuaj tshaj rau haiv His Xas Lais
kom tas sawv daws txais cov kab ke ntxuav los thov txhaum.
25 Thaum Zam ua nws txoj hauj lwm yuav tiav, nws hais tias:
‘Nej xav tias kuv yog leej twg? Kuv tsis yog tus nej xav. Ntsia saib, tus lawv kuv qab,
nws twb tuaj lawm; tus ntawd mas kuv tsis tsim nyog daws nws txoj hlua khau.’
26 Cov kwv tij, nej cov uas yog Has Nplas Has cov tub, thiab nej cov uas hwm Tswv Ntuj,
lo lus tshaj txog txoj kev cawm seej no twb tuaj txog peb lawm.”

As Les Lus Yas:   LK 1: 76

Txais: As les lus yas, as les lus yas.

Me tub, luag yuav hu koj ua Leej Nyob Siab Tshaj tus yaj saub,
vim koj yuav mus ua Huab Tais ntej, koj yuav npaj nws txoj kev.

Txais: As les lus yas, as les lus yas.

Ntawv Moo Zoo:   LK 1: 57-66, 80

57 Thaum txog Es Lis Xas Npes lub caij daws cev, mas nws yug tau ib tug tub.
58 Cov neeg koom zej koom zos thiab nws cov kwv tij neej tsa hnov tias
Huab Tais hlub Es Lis Xas Npes kawg nkaus, mas lawv nrog nws zoo siab tas nrho.
59 Thaum txog hnub yim, lawv tuaj ua lub cim txiav tawv rau tus me nyuam,
lawv xav tis nws npe hu ua Ntxas Kas Lias raws li nws txiv.
60 Tab sis nws niam hais tias: "Tsis tau, tus me nyuam yuav hu ua Zam."
61 Lawv hais rau leej niam tias: "Tsis muaj ib tug hauv koj cov txheeb ze hu li ntawd."
62 Ces lawv piav tes rau leej txiv saib nws xav kom lawv tis tus me nyuam npe hu li cas.
63 Leej txiv kom lawv muab ib daim txiag los, nws sau ntawv rau saud tias:
"Zam yog nws lub npe." Sawv daws ceeb tas.
64 Tam sis ntawd, leej txiv lub ncauj qhib plho, tus nplaig muag nthas,
nws hais tau lus los cav txog Tswv Ntuj.
65 Tsoom neeg nyob ib ncig ntawd sawv daws tau ntshai kawg.
Hos nyob pem toj siab hauv xeev Yus Das, sawv daws tham txog tej xwm ntawd.
66 Cov uas tau hnov luag tham txog tej xwm no, muab khaws cia rau nruab siab, lawv hais tias:
"Tus me nyuam ntawd yuav yog ib tug zoo li cas?" Vim Huab Tais txhais tes yeej nrog nraim tus me nyuam.
80 Tus me nyuam hlob tuaj, nws lub tswv yim muaj zog zuj zus.
Nws nyob hauv teb chaws suab puam mus txog hnub nws tawm los rau cov His Xas Lais pom.

Tim     26     lub     6     Hli     2023

Hnub Ob Lis Piam Kaum Ob Nruab Xyoo A Nruab Lis Piam Xyoo I  
Lectionary: 371

Zaj Nyeem Ib:   HAUV PAUS 12: 1-9

1 HUAB TAIS hais rau Has Nplas tias: "Tso koj lub teb chaws, koj tej txheeb ze thiab koj txiv lub vaj tse tseg, koj mus nyob lub teb chaws uas kuv yuav qhia rau koj.
2 Kuv yuav tsa koj ua ib haiv neeg loj, kuv yuav foom hmoov zoo rau koj, thiab yuav ua kom koj lub npe nto moo loj, kom koj nqa txoj hmoov zoo rau txhua tus.
3 Kuv yuav foom hmoov zoo rau cov neeg uas foom hmoov zoo rau koj, kuv yuav foom phem rau cov uas foom phem rau koj. Tas txhua yim neeg nyob ntiaj teb yuav tau hmoov zoo nyob hauv koj.”
4 Ces Has Nplas sawv kev mus raws li HUAB TAIS kom nws mus. Los kuj nrog nws mus thiab. Thaum Has Nplas tsiv hauv Has Laas teb mus, nws muaj xya caum tsib xyoos.
5 Has Nplas coj nws poj niam Xas Lais, thiab nws tus tij laug tus tub hu ua Los, thiab nws sau tas nkawd lub cuab tam uas nkawd tau tsim, thiab tas nkaw cov tub txib tub txuas uas nkawd muaj nyob Has Laas nrog nws mus. Lawv sawv kev mus rau Kas Nas Has, ces lawv kuj mus txog Kas Nas Has teb.
6 Has Nplas mus hla lub teb chaws, nws thiaj mus txog thaj chaw hu ua Xis Kes, txog ntua ntawm tus ntoo ntseej Mos Les; thaum ntawd, cov neeg Kas Nas Has nyob hauv lub teb chaws.
7 HUAB TAIS tawm los rau Has Nplas pom, thiab hais rau nws tias: "Kuv yuav muab lub teb chaws no pub rau koj tsoom xeeb leej xeeb ntxwv." Ces Has Nplas txhim ib lub thaj txi ntuj rau HUAB TAIS, vim HUAB TAIS tawm los rau nws pom nyob ntawd.
8 Has Nplas thiaj txav ntawd mus rau pem roob, nyob ntawm sab hnub tuaj ntawm Npes Thes. Nws tsa nws lub tsev tsam phooj rau ntawd, Npes Thes nyob rov sab hnub poob, hos Ais nyob rov sab hnub tuaj. Nyob ntawd nws kuj tsa ib lub thaj txi ntuj rau HUAB TAIS thiab nws teev HUAB TAIS lub npe.
9 Ces Has Nplas maj mam tsiv ua ntu zus ib thaj chaw dhau ib thaj, mus txog lub teb chaws Nes Zes.

NPN   33: 12-13, 18-19, 20+22

Txais: (12) Haiv neeg Huab Tais xaiv ua nws tug lawv txoj hmoov zoo.

Haiv neeg uas lawv tus Tswv Ntuj yog HUAB TAIS, lawv txoj hmoov zoo!
lawv yog haiv neeg uas Huab Tais xaiv los ua nws lub cuab tam.
HUAB TAIS nyob txheej ntuj saud dauv muag los ntsia,
nws pom tas nrho ib tsoom neeg.

Txais: (12) Haiv neeg Huab Tais xaiv ua nws tug lawv txoj hmoov zoo.

Ntsias saib, HUAB TAIS lub qhov muag saib ntsoov cov neeg hwm nws,
ntsia ntsoov cov tso siab rau nws txoj kev hlub,
nws yuav npo lawv dim ntawm txoj kev tuag,
thiab yuav txuag lawv txoj sia thaum muaj kev tshaib plab.

Txais: (12) Haiv neeg Huab Tais xaiv ua nws tug lawv txoj hmoov zoo.

Peb tus ntsuj plig tos ntsoov HUAB TAIS:
nws yog tus pab peb, nws yog peb daim leem phiaj!
HUAB TAIS, thov kom koj lub siab zoo roos peb,
vim peb tso siab lug rau koj!

Txais: (12) Haiv neeg Huab Tais xaiv ua nws tug lawv txoj hmoov zoo.

As Les Lus Yas:   HES NPLAWS 4: 12

Txais: As les lus yas, as les lus yas.

Tswv Ntuj lo lus muaj sia thiab ua tau hauj lwm,
nws txawj tsom tau tej tswv yim thiab tej kev xav hauv neeg nruab siab.

Txais: As les lus yas, as les lus yas.

Ntawv Moo Zoo:   MT 7: 1-5

Yes Xus hais rau nws cov thwj tim tias:
1 “Nej tsis txhob txiav txim rau luag, Ntuj thiaj yuav tsis txiav txim rau nej ;
2 vim tias, nej txiav txim li cas rau luag, mas Ntuj kuj yuav txiav txim ib yam li ntawd rau nej. Nej luj li cas rau luag, mas Ntuj kuj yuav luj li ntawd rau nej.
3 Ua cas koj pom tus quav nplej nyob hauv koj tus kwv qhov muag, tab sis koj ho tsis pom tus nqaj ntoo nyob hauv koj qhov muag?
4 Koj tseem hais rau koj tus kwv tias: ‘Cia kuv rho tus quav nplej hauv koj qhov muag pov tseg,’ tab sis ib tug nqaj ntoo twb nyob hauv koj qhov muag!
5 Neeg zoo sab nraud, koj xub rho tus nqaj hauv koj qhov muag tso, koj thiaj li pom kev rho tus quav nplej hauv koj tus kwv qhov muag.”

*Unrevised

Tim 27 lub 6 Hli 2023

Hnub Peb Lis Piam Kaum Ob Nruab Xyoo A Nruab Lis Piam Xyoo I
Lectionary: 372

XHLT: LN Cyril nyob Alexandria, ua Tswv Qhia thiab Kws cov Txuj Ntshiab

Zaj Nyeem Ib: HAUV PAUS 13: 2, 5-18

2 Has Nplas nplua nuj kawg, nws muaj tsiaj txhu, muaj nyiaj thiab muaj kub ntau.
5 Los, uas nrog Has Nplas mus, nws kuj muaj yaj muaj nyuj thiab muaj tsev tsam phooj ntau.
6 Lub teb chaws tsis txaus sawv daws tsa tsev nyob ua ke; vim nkawd muaj cuab yeej cuab tam ntau ces thiaj tsis tau kev rau sawv daws nyob ua ke.
7 Has Nplas cov tub zov tsiaj thiab Los cov tub zov tsiaj kuj muaj lus sib cav sib ceg thiab. Lub caij ntawd yog cov neeg Kas Nas Has thiab cov neeg Pes Lis Xis nyob hauv lub teb chaws.
8 Vim li ntawd Has Nplas thiaj hais rau Los tias: "Tsis xav kom koj thiab kuv wb muaj kev tsis sib haum xeeb, los puas kom kuv cov tub zov tsiaj thiab koj cov tub zov tsiaj muaj kev tsis sib haum xeeb, vim wb yog ob txiv tub.
9 Tas nrho lub teb chaws twb qhib lug rau koj los tsis sub? Yog li kuv thov kom koj ncaim kuv mus mog. Yog koj mus sab laug ces kuv yuav mus sab xis; yog koj mus sab xis, ces kuv yuav mus sab laug."
10 Los tsa muag ntsia, nws pom tas nrho lub tiaj Yos Las Das yog ib lub tiaj muaj dej nyob qhov txhia chaw mus txog ntua rau Xos As, zoo li HUAB TAIS lub vaj, thiab zoo li teb chaws Hais Nkws Tos; thaum ntawd HUAB TAIS tseem tsis tau rhuav Xos Dos Mas thiab Nkos Mos Las.
11 Los thiaj xaiv lub tiaj Yos Las Das huv si rau nws. Ces nws muab xub ke mus rau sab hnub tuaj. Nkawd thiaj tau sib ncaim li ntawd.
12 Has Nplas thiaj nyob hauv lub teb chaws Kas Nas Has, hos Los mus nyob hauv cov nroog hauv lub tiaj. Los mus tsa nws cov tsev tsam phooj nyob txog thaj tsam ze ntawm Xos Dos Mas.
13 Cov neeg Xos Dos Mas yog ib co neeg phem tas nrho, thiab ua txhaum loj kawg nkaus rau HUAB TAIS.
14 Thaum Los ncaim mus lawm, HUAB TAIS hais rau Has Nplas tias: "Koj tsa qhov muag ntsia, txij ntawm qhov koj nyob ko mus rau sab pej thiab sab naj, mus rau toob fab thiab xib fab.
15 tas nrho lub teb chaws uas koj pom ntawd, kuv yuav muab rau koj thiab rau koj tsoom xeeb leej xeeb ntxwv nyob mus li.
16 Kuv yuav ua kom koj cov xeeb leej xeeb ntxwv coob npaum li cov plua av nyob ntiaj teb. Yog neeg suav txheeb cov plua av hauv ntiaj teb mas lawv thiaj yuav suav txheeb koj cov xeeb leej xeeb ntxwv.
17 Koj sawv, koj cia li mus ncig kom txhua thaj av qhov ntev thiab qhov dav, vim kuv yuav muab pub rau koj." 18 Ces Has Nplas tshais nws cov tsev tsam phooj, nws tsiv mus nyob ze cov ntoo Ntseej ntawm Mas Nples, uas nyob Hes Nploos. Nyob ntawd nws txhim ib lub thaj txi ntuj rau HUAB TAIS.

NPN 15: 2-3a, 3bc-4ab, 5

Txais: (1b) Tus neeg ncaj yuav tau nyob ntawm Huab Tais xub ntiag.

Tus uas taug kev tsis muaj chaw xyeej thiab ua ncaj,
Tus uas xav qhov tseeb nyob hauv nws nruab siab,
Thiab nws tsis cia nws tus nplaig hais lus dag.

Txais: (1) Tus neeg ncaj yuav tau nyob ntawm Huab Tais xub ntiag.

Nws tsis ua phem rau luag,
Nws tsis nrhiav lus rau tus nyob ze nws.
Nws tsis saib cov neeg phem muaj nqes.
Nws hwm cov neeg hwm HUAB TAIS.

Txais: (1) Tus neeg ncaj yuav tau nyob ntawm Huab Tais xub ntiag.

Nws qiv nyiaj txiag, nws tsis tsuam paj.
Nws tsis txais luag cov nyiaj xiab kom muab txim rau tus tsis txhaum.
Leej twg ua li hais los no, mas nws yuav tsis ntsib kev nyuaj.

Txais: (1) Tus neeg ncaj yuav tau nyob ntawm Huab Tais xub ntiag.

As Les Lus Yas: ZAM 8: 12

Txais: As les lus yas, as les lus yas.

Huab Tais hais tias: “Kuv yog ntiaj teb neeg qhov pom kev,
leej twg los raws kuv yuav tau qhov pom kev kaj nws lub neej.”

Txais: As les lus yas, as les lus yas.

Ntawv Moo Zoo: MT 7: 6, 12-14

Yes Xus hais rau nws cov thwj tim tias:
6 "Nej tsis txhob muab tej yam ntshiab pub rau dev noj, los txhob muab nej cov hlaws npliag deg pov rau ntawm npua xub ntiag, tsam npua muab tsuj ntiag rau hauv av thiab tig rov los dua nej ua daim tas.
12 "Txhua yam nej xav kom luag ua rau nej mas nej yuav xub ua rau luag tso. Txoj Cai thiab cov Yaj Saub yog li no.
13 “Nej chaws ntawm lub qhov rooj nqaim mus lawm hauv. Vim lub qhov rooj dav thiab txoj kev dav yog txoj yuav coj mus rau lub qhov tuag; muaj coob leej taug txoj kev ntawd.
14 Hos lub qhov rooj nqaim thiab txoj kev ti thiaj yog txoj coj mus rau txoj sia; muaj tsawg leej nrhiav tau txoj kev ntawd taug.”

*Unrevised

Tim 28 lub 6 Hli 2023

Hnub Plaub Lis Piam kaum Ob Nruab Xyoo A Nruab Lis Piam Xyoo I
Lectionary: 373

Yuav Hwm LN Irenaeus, Tswv tuag ua Tim Khawv

Zaj Nyeem Ib: HP 15: 1-12, 17-18

1 Thaum tej no dhau tas lawm, Has Nplas yees hnov HUAB TAIS lo lus hais rau nws tias: "Koj txhob ntshai mog, Has Nplas! Kuv yog daim leem phiaj thaiv koj, koj yuav tau txais koob haum loj kawg nkaus."
2 Has Nplas teb tias: "HUAB TAIS Tswv Ntuj, koj yuav muab paj tshab dab tsi pub rau kuv? Kuv niaj hnub nyob tsis muaj tub ki li; tus yuav txais kuv lub cuab tam ntshai yog kuv tus tub txib tus tub Es Lis Xes nyob Das Mas xwb?"
3 Has Nplas hais ntxiv tias: "Koj tsis pub kom kuv muaj ib tsob noob li ces ib tug tub txib uas yug hauv kuv tsev yuav los txais kuv lub cuab tam xwb lau."
4 HUAB TAIS lo lus nrov tam sid tuaj rau Has Nplas tias: "Tus ntawd yuav tsis yog tus los txais koj lub cuab tam, tus yuav txais koj lub cuab tam yog koj tus tub uas yug tawm ntawm koj los."
5 HUAB TAIS coj Has Nplas mus nraum zoov thiab hais rau nws tias: "Koj tsa muag ntsia saum ntuj thiab koj suav cov hnub qub saib koj suav puas txheeb." Ces nws hais tias: "Koj cov xeeb ntxwv yuav coob npaum li ntawd."
6 Has Nplas ntseeg HUAB TAIS, ces HUAB TAIS muab qhov ntawd suav ua kev ncaj ncees rau Has Nplas.
7 HUAB TAIS hais rau nws tias: "Kuv yog tus HUAB TAIS uas tau coj koj tawm hauv cov neeg Kas Dias lub teb chaws Uj los mus nyob lub teb chaws no, uas kuv yuav muab rau koj ua koj tug."
8 Has Nplas teb tias: "HUAB TAIS Tswv Ntuj, dab tsi yuav ua kom kuv paub tias kuv yuav tau lub teb chaws no los ua kuv tug ?"
9 HUAB TAIS hais rau nws tias: "Koj mus coj ib tug xyuas nyuj muaj peb xyoos, ib tug nkauj tshis muaj peb xyoos, ib tug thav yaj muaj peb xyoos, ib tug nkauj nquab thiab ib tug me nyuam lau nquab tuaj rau kuv."
10 Has Nplas coj cov tsiaj raws li hais tuaj. Nws muab cov tsiaj phua nruab nrab, nws muab ob sab teeb nyias nyob nyias sab; tiam sis nws tsis phua cov noog.
11 Dav yuj plaws ya ntxiag los noj cov tsiaj, tab sis Has Nplas nplawm kom dav khiav.
12 Thaum lub hnub tab tom poob qho, Has Nplas cia li tuaj ib tug dab ntub hlob hlob ua kom nws looj hlias mus, ces muaj ib qho txaus ntshai thiab tsaus nti los tsuam Has Nplas.
17 Thaum lub hnub poob qho kiag thiab tsaus ntuj lawm, txawm pom ib lub qhov cub ncho pa lug thiab ib teg tsau cig cig los hla ntawm cov sab nqaij kis nruab nrab.
18 Hnub ntawd, HUAB TAIS nrog Has Nplas cog lus li no: "Kuv muab lub teb chaws no rau koj tsoom xeeb ntxwv ua lawv tug, txij li ntawm tus niam dej nyob Hais Nkws Tos teb mus txog ntua tus niam dej loj Aws Fas Tes.”

NPN 105: 1-2, 3-4, 6-7, 8-9

Txais: (8a) Huab Tais nco ntsoov nws lo lus nws tau cog mus li ib txhis.
los: As les lus yas.

Nej ua HUAB TAIS tsaug, nej hu txog nws lub npe,
nej qhia nws cov hauj lwm loj rau cov haiv neeg paub.
Nej seev nkauj rau HUAB TAIS, nej hu nkauj cav txog nws ;
nej piav txog nws cov hwj huam yees ntxwv tas tib si.

Txais: (8a) Huab Tais nco ntsoov nws lo lus nws tau cog mus li ib txhis.
los: As les lus yas.

Nej nrhiav koob meej rau nej nyob hauv nws lub npe,
cov uas muaj lub siab nrhiav Huab Tais, nej cia li zoo siab!
Nej nrhiav HUAB TAIS nyob hauv nws lub zog,
nej nrhiav kev tsob hwb nws tsis tseg.

Txais: (8a) Huab Tais nco ntsoov nws lo lus nws tau cog mus li ib txhis.
los: As les lus yas.

Nej, Has Nplas Has tsoom xeeb ntxwv, nej yog Huab Tais cov tub txib,
Nej, Yas Kos cov tub, nej yog cov Huab Tais tau xaiv,
Nws, HUAB TAIS yog peb tus Tswv Ntuj,
Nws tej cai tswj tas qhov txhia chaw hauv lub ntiaj teb.

Txais: (8a) Huab Tais nco ntsoov nws lo lus nws tau cog mus li ib txhis.
los: As les lus yas.

Nws nco ntsoov mus li txog cov lus nws cog,
yog ib co lus cog ruaj khov rau txhiab tiam tub ki.
Yog cov lus nws tau nrog Has Nplas Has cog,
thiab nws tau rov zeem tseeb rau His Xas Has.

Txais: (8a) Huab Tais nco ntsoov nws lo lus nws tau cog mus li ib txhis.
los: As les lus yas.

As Les Lus Yas: ZAM 15: 4a, 5b

Txais: As les lus yas, as les lus yas.

Huab Tais hais tias:
“Nej yuav nyob ruaj hauv kuv ib yam li kuv nyob hauv nej;
leej twg nyob ruaj nreb hauv kuv nws yuav txi txiv ncw.”

Txais: As les lus yas, as les lus yas.

Ntawv Moo Zoo: MT 7: 15-20

Yes Xus hais rau nws cov thwj tim tias:
15 “Nej ceev faj txog cov yaj saub cuav, lawv txia ua ib co yaj tuaj cuag nej, tab sis nyob sab hauv, lawv yog ib co hma nrhiav ncauj.
16 Nej ntsia lub txiv lawv txi, ces nej yuav paub lawv. Luag puas de txiv cawv saum ib tsob pos, los de txiv ncuav pias saum ib tsob nrhab?
17 Li ntawd, tus ntoo zoo txi ib co txiv zoo, hos tus ntoo phem kuj txi ib co txiv phem.
18 Tsob ntoo zoo txi tsis tau txiv phem, hos tsob ntoo phem kuj txi tsis tau txiv zoo.
19 Tsob ntoo twg tsis txi txiv zoo, luag yuav muab ntov mus pov hlawv.
20 Li ntawd, thaum nej pom lawv cov txiv, nej yuav paub tias lawv zoo li cas.”

[size=]*Unrevised[/size]

Tim 29 lub 6 Hli 2023

Hnub Tsib Lis Piam Kaum Ob Nruab Xyoo A Nruab Lis Piam Xyoo I

Koob Tsheej Hwm Hauv Paus Xa Lus LN Pob Zeb thiab Paj Lug – Thaj Txi Ntuj Nruab hnub
Lectionary: 591

Zaj Nyeem Ib: HAUJ LWM 12: 1-11

1 Lub caij ntawd, tus vaj Hes Los ntes ib co neeg nyob hauv lub Koom Txoos thiab tsim txom lawv.
2 Nws xuas ntaj tua Yas Kos uas yog Zam tus tij laug.
3 Thaum nws pom tias cov Yus Das zoo siab rau qhov nws ua ntawd, nws kuj tso neeg mus
ntes Pob Zeb thiab. Thaum ntawd yog lub caij noj cov ncuav mov tsis rau poov xab.
4 Thaum Hes Los ntes tau Pob Zeb lawm, nws coj Pob Zeb mus kaw hauv tsev loj faj, muaj plaub pab
tub rog zov rawv, ib pab muaj plaub leeg. Hes Los npaj tias thaum ua lub Ntees Hla tas nrho,
mas nws yuav coj Pob Zeb tawm los rau ntawm tsoom pej xeem xub ntiag.
5 Li ntawd, Pob Zeb raug kaw hauv tsev loj faj; hos lub Koom Txoos thov Tswv Ntuj tsis tseg rau Pob Zeb.
6 Hmo ua ntej kiag hnub Hes Los yuav coj Pob Zeb tawm los, Pob Zeb pw tsaug zog
nyob nruab nrab ob tug tub rog, muaj ob txog saw khi rawv nws cia, hos tseem muaj
ib co tub rog zov qhov rooj nyob sab nraud saib lub tsev loj faj thiab.
7 Ib sij huam, Huab Tais tus Tshiab cia li los sawv nyob ze ntawm Pob Zeb, thiab muaj ib qho ci ci
ua kom pom kev rau hauv kem tsev. Tus Tshiab diaj Pob Zeb ntawm ib sab, tsa kom nws sawv, thiab
hais rau nws tias: "Koj sawv tsees tam sis no!" Cov saw khi Pob Zeb ob txhais tes cia li plam plaws tas.
8 Tus Tshiab hais tias: "Sia koj txoj siv thiab rau koj nkawm khau!" Pob Zeb ua li ntawd tas,
Tus Tshiab hais tias: "Hnav koj lub tsho loj ces lawv kuv qab!"
9 Ces Pob Zeb lawv tus Tshiab qab tawm mus. Pob Zeb tsis paub tias
qhov tus tshiab ua ntawd yog tiag, nws xav tias yog nws ua yog toog pom xwb.
10 Nkawd mus hla thawj pab zov keeb, thiab tseem mus dhau pab ob ntxiv thiab, nkawd thiaj los txog
lub qhov rooj hlau uas yuav tawm sab nraud mus rau hauv nroog. Lub qhov rooj hlau cia li qhib plho nws tus kheej rau nkawd, nkawd tawm plaws mus taug ib txog kev, ces tus Tshiab cia li ploj ntais ncaim mus lawm.
11 Pob Zeb thiaj tsim dheev feeb meej tuaj, nws hais tias: "Zaum no, kuv paub tseeb lawm tias
Huab Tais tau xa nws tus Tshiab tuaj pab kuv kom kuv dim ntawm Hes Los txhais tes
thiab ntawm qhov uas cov Yus Das vam vam yuav tau pom."

NPN 34: 2-3, 4-5, 6-7, 8-9

Txais: Huab Tais tus tshiab yuav tuaj cawm cov uas hwm nws.

Kuv yuav cav txog HUAB TAIS txhua lub sij hawm;
nws lub koob meej yuav nyob rawv ntawm kuv lub ncauj.
Kuv tus plig lub koob meej yog nyob hauv HUAB TAIS;
tus neeg me yuav hnov txog kuv thiab yuav zoo siab.

Txais: Huab Tais tus tshiab yuav tuaj cawm cov uas hwm nws.

Nej nrog kuv cav txog HUAB TAIS,
peb sawv daws ua ke qhuas nws lub npe.
Kuv tau nrhiav HUAB TAIS, ces nws teb kuv,
Nws cawm kuv dim ntawm tas kuv tej kev ntshai.

Txais: Huab Tais tus tshiab yuav tuaj cawm cov uas hwm nws..

Nej vam txog HUAB TAIS, ces kev zoo siab yuav ua nej ci ntsa iab,
nej ntsej muag yuav tsis liab ploog vim kev txaj muag.
Thaum tus pluag hu, HUAB TAIS mloog
thiab yuav cawm nws ntawm tas nws tej kev nyuaj siab.

Txais: Huab Tais tus tshiab yuav tuaj cawm cov uas hwm nws.

HUAB TAIS tus tshiab tsa tsev tsam phooj
nyob ncig cov neeg hwm HUAB TAIS, nws cawm lawv.
Nej saj ces nej yuav pom tias HUAB TAIS siab zoo npaum li cas.
Tus tau txoj hmoov zoo yog tus vam khom HUAB TAIS.

Txais: Huab Tais tus tshiab yuav tuaj cawm cov uas hwm nws.

Zaj Nyeem Ob: 2 TMT 4: 6-8, 17-18

6 Ntawm kuv, Paj Lug, mas kuv twb raug muab hliv los txi Ntuj lawm,
ces twb txog lub caij kuv yuav mus lawm.
7 Kuv tau sib tw khiav txaus, kuv khiav mus txog chaw lawm; kuv tau ceev txoj kev ntseeg cia.
8 Txij nyem no mus, lub mom teeb kub muaj kev ncaj nyob tos kuv lawm xwb. Huab Tais tus txiav txim ncaj yuav muab ua paj tshab rau kuv thaum txog hnub ntawd, tsis yog muab rau kuv ib leeg xwb,
nws tseem yuav muab rau tas ib tsoom neeg nyiam nws thiab tos ntsoov lub caij nws yuav los.
17 Huab Tais yog tus tau pab kuv thiab ntxiv zog rau kuv, kom vim kuv, mas txoj kev tshaj Lo Lus
thiaj yuav tiav log, ces tas cov neeg teev pej kum dab thiaj tau hnov txog.
Nws tau npo kuv dim ntawm tsov ntxhuav lub ncauj lo.
18 Huab Tais yeej yuav npo kuv dim ntawm txhua yam kev phem thiab yuav txuag kuv kom kuv mus
txog nws lub Ceeb Tsheej nyob saum ntuj. Thov kom Huab Tais nto koob meej mus ib txhiab ib txhis. Ua li.

As Les Lus Yas: MT 16: 18

Txais: As les lus yas, as les lus yas.

Koj yog Pob Zeb, kuv yuav txhim kuv lub Koom Txoos rau saum lub pob zeb no.
Dab phem teb cov qhov rooj yuav tiv tsis yeej nws.

Txais: As les lus yas, as les lus yas.

Ntawv Moo Zoo: MT 16: 13-19

13 Thaum Yes Xus tuaj txog cheeb tsam ntawm Xes Ntxas Les Fis Lis Pos,
nws nug cov thwj tim tias: "Luag tej hais tias Neeg Leej Tub yog leej twg?"
14 Lawv teb tias : “Ib txhia hais tias yog Zam Ntxuav Plig, ib txhia hais tias yog Es Lias,
muaj lwm cov hais tias yog Yes Les Mias los yog ib tug hauv cov yaj saub.”
15 Yes Xus hais rau lawv tias: "Nej ne, nej hais tias kuv yog leej twg?"
16 Xis Moos Pob Zeb teb tias: "Koj yog Leej Pleev, yog tus Tswv Ntuj Muaj Txoj Sia Leej Tub."
17 Yes Xus teb rau Pob Zeb tias: "Xis Moos, Yos Nas tub, koj txoj hmoov zoo, vim tsis yog
nqaij thiab ntshav qhia koj paub txog qhov no, yog kuv Txiv nyob saum ntuj qhia koj.
18 Ua li mas kuv hais rau koj: Koj yog Pob Zeb, kuv yuav txhim kuv lub Koom Txoos rau saum
lub pob zeb no, ces dab phem teb cov qhov rooj yuav tiv tsis yeej nws.
19 Kuv yuav muab lub Ceeb Tsheej saum ntuj cov yawm sij rau koj tuav.
Koj khi yam twg nyob ntiaj teb no, yam ntawd kuj yuav raug khi nyob saum ntuj;
koj daws yam twg nyob ntiaj teb no, yam ntawd kuj yuav raug daws nyob saum ntuj."

*********************************

Koob Tsheej Hwm ob tug Hauv Paus Xa Lus LN Pob Zeb thiab Paj Lug – Thaj Txi Ntuj hmo ua ntej
Lectionary: 590

Zaj Nyeem Ib: HAUJ LWM 3:1-10

1 Pob Zeb thiab Zam nkawd nce mus pem lub Tuam Tsev Teev Ntuj,
mus ua zaj teev ntuj thaum teev cuaj (3 teev hnub qaij).
2 Thaum ntawd, luag coj ib tug neeg tuag ceg nruab thiab tuaj. Lawv niaj hnub muab nws tso rau
ntawm lub qhov rooj mus hauv lub Tuam Tsev Teev Ntuj, hu ua Qhov Rooj Zoo Nkauj,
kom tus tuag ceg tau kev thov khawv ntawm cov neeg uas chaws mus hauv.
3 Thaum nws pom Pob Zeb thiab Zam nkawd tab tom yuav chaws mus hauv, ces nws thov khawv ntawm nkawd.
4 Pob Zeb ntsia ntsoov nws, Zam kuj ntsia ntsoov thiab. Pob Zeb hais tias "Koj ntsia wb."
5 Tus tuag ceg ntsia ntsoov nkawd, tsis ntsais muag, nws xav tias nws yuav tau ib yam dab tsi.
6 Tab sis Pob Zeb hais tias: "Nyiaj thiab kub mas kuv tsis muaj. Tab sis qhov kuv muaj,
mas kuv muab pub rau koj: Kuv tuav txog Yes Xus Pleev, tus neeg Nas Xas Les lub npe, koj mus kev!"
7 Ces Pob Zeb tuav nkaus tus tuag ceg sab tes xis rub nws sawv.
Tam sim ntawd, nws ob txhais taw thiab nws ob lub pob qij taws ruaj nrees tuaj.
8 Nws tib plhaw sawv tsees, ces nws mus mus los los ib ncig ntawd. Nws nrog nkawd chaws mus
hauv lub Tuam Tsev. Nws rhais ruam mus kev, nws dhia tej paj paws thiab nws cav txog Tswv Ntuj.
9 Tas tsoom pej xeem pom nws rhais ruam mus kev thiab cav txog Tswv Ntuj.
10 Sawv daws zeem tau nws : yog tus zaum thov khawv ntawm lub Qhov Rooj Zoo Nkauj tiag.
Sawv daws ceeb tas thiab ua siab poob nthav txog qhov uas nyuam qhuav tshwm sim tuaj rau tus tuag ceg.

NPN 19: 2-3,4-5

Txais: (5) Lawv lo lus xa moo nrov mus thoob ntiaj teb.
los: As les lus yas.

Cov txheej ntuj saud tshaj txog Tswv Ntuj lub koob meej,
lub qab ntuj khwb tshaj cov hauj lwm nws txhais tes tsim los.
Nruab hnub hais lo lus rau nruab hnub mloog,
Hmo ntuj qhia rau hmo ntuj paub txog.

Txais: (5) Lawv lo lus xa moo nrov mus thoob ntiaj teb.
los: As les lus yas.

Tsis muaj ib lo lus los ib zaj lus piav
uas leej tib neeg yuav tsis hnov txog.
Lawv lub suab ncha mus puv tas ntiaj teb,
lawv lo lus xa moo nrov txog tim npoo ntiaj teb kawg.

Txais: (5) Lawv lo lus xa moo nrov mus thoob ntiaj teb.
los: As les lus yas.

Zaj Nyeem Ob: NLT 1: 11-20

11 Cov kwv tij nkauj muad, kuv xav kom nej paub tias,
lub Moo Zoo uas kuv xa tuaj rau nej, mas tsis yog tuaj ntawm neeg tuaj.
12 Vim kuv tsis tau txais lub Moo Zoo ntawd ntawm neeg los thiab tsis ytog neeg qhia rau kuv paub,
yog Yes Xus Pleev yees tawm los qhia rau kuv paub.
13 Nej yeej tau hnov tias, thaum kuv tseem coj cov Yus Das kev cai, kuv tau ua dab tsi lawm;
kuv tau hiam Tswv Ntuj lub Koom Txoos heev kawg nkaus, thiab kuv tau xav rhuav lub Koom Txoos kom ploj mus..
14 Kuv tau coj txoj kev cai Yus Das mus deb tshaj coob leej nyob hauv kuv phaum neeg hauv kuv haiv neeg,
vim kuv kub siab tshaj plaws rau kuv cov yawg koob tej kab lis kev cai ib txwm coj los.
15 Tiam sis Tswv Ntuj, tus uas xaiv kuv thaum kuv tseem nyob hauv
kuv niam plab lawm thiab tus hu kuv los nyob hauv nws lub txiaj ntsim,
16 thaum nws ua kom nws Leej Tub tawm los rau kuv pom, kom kuv tshaj txog nws rau cov pej kum neeg,
17 mas tam sis ntawd, kuv tsis tau mloog raws li neeg nqaij tawv lub tswv yim, kuv tsis tau mus pem Yes Lus Xas Les mus cuag cov xub ua Hauv Paus Xa Lus dua kuv; kuv mus rau As Las Npias teb, ces kuv rov los nyob Das Mas xwb.
18 Twb peb xyoos tom qab lawm, kuv thiaj mam mus pem Yes Lus Xas Les,
mus nrog Pob Zeb tham; kuv nrog nws nyob tau kaum tsib hnub.
19 Tiam sis kuv tsis tau ntsib lwm tus Hauv Paus Xa Lus li, kuv tsuas tau ntsib Yas Kos, uas yog Huab Tais tus kwv tij xwb.
20 Hais txog qhov kuv sau li no tuaj rau nej, mas kom nej saib tias nyob ntawm Tswv Ntuj xub ntiag, kuv tsis dag.

As Les Lus Yas: Zam 21: 17

Txais: As les lus yas, as les lus yas.

Huab Tais, koj paub tas ib puas tsav yam, koj paub tias kuv nyiam koj tiag.

Txais: As les lus yas, as les lus yas.

Ntawv Moo Zoo: Zam 21: 15-19

Yes Xus tawm tuaj rau nws cov thwj tim pom.
15 Thaum lawv noj tshais tas, Yes Xus hais rau Xis Moos Pob Zeb tias:
"Xis Moos, Zam tus tub, koj puas nyiam kuv dua lawv cov ntawd?"
Pob Zeb hais rau Yes Xus tias: "Huab Tais, koj yeej paub tias kuv nyiam koj."
Yes Xus hais rau Pob Zeb tias: "Koj coj kuv cov me nyuam yaj mus noj zaub mog."
16 Yes Xus rov hais zaum ob tias "Xis Moos, Zam tus tub, koj puas nyiam kuv?" Pob Zeb hais rau Yes Xus tias:
"Huab Tais, koj yeej paub tias kuv nyiam koj." Yes Xus hais rau nws tias: "Koj zov kuv cov yaj mog."
17 Yes Xus tseem rov hais dua zaum peb rau Pob Zeb tias: "Xis Moos, Zam tus tub, koj puas nyiam kuv tiag?”
Pob Zeb tu siab rau qhov Yes Xus hais rau nws zaum peb tias: "Koj puas nyiam kuv tiag?"
Pob Zeb hais rau Yes Xus tias: "Huab Tais, koj paub tas ib puas tsav yam, koj yeej paub tias kuv nyiam koj tiag."
Yes Xus hais rau Pob Zeb tias : "Koj coj kuv cov yaj mus noj zaub mog.
18 Kuv hais qhov muaj tseeb tiag rau koj: Thaum koj tseem hluas zog, koj muab koj txoj siv koj sia koj,
koj xav mus qhov twg los koj mus koj. Tiam sis thaum koj laus lawm, koj yuav tsa tes
cia lwm tus muab siv rau koj sia, thiab coj koj mus rau qhov chaw uas koj tsis xav mus."
19 Yes Xus hais qhov ntawd qhia tias Pob Zeb yuav tuag zoo li cas kom Tswv Ntuj nto koob meej.
Yes Xus hais li tas, nws hais rau Pob Zeb tias: "Koj raws kuv mus."

Tim 30 lub 6 Hli 2023

Hnub Rau Lis Kaum Ob Nruab Xyoo A Nruab Lis Piam Xyoo I
Lectionary: 375

Zaj NYeem Ib: HP 17: 1, 9-10, 15-22

1 Thaum Has Nplas muaj cuaj caum cuaj xyoos, HUAB TAIS yees tawm los hais rau nws tias: "Kuv yog Es Sas Dais, tus Tswv Ntuj muaj hwj huam loj tas nrho. Koj yuav taug kev ntawm kuv xub ntiag thiab yuav ua neeg zoo tsis muaj ib qho xyeej.”
9 Tswv Ntuj hais ntxiv rau Has Nplas Has tias: "Ntawm koj mas koj yuav ua raws li kuv lo lus uas kuv nrog koj cog, koj thiab koj caj ces uas los ntom qab koj, mus tiam dhau tiam.
10 Kuv lo lus uas kuv nrog koj cog, thiab nrog koj caj ces cog, thiab nej yuav tsum ua raws nraim, mas yog li no: Tas nrho nej cov tub huv si yuav tsum ua lub cim txiav tawv.”
15 Tswv Ntuj kuj tseem hais rau Has Nplas Has tias: "Koj poj niam Xas Lais, koj yuav tsis hu nws ua Xas Lais ntxiv, nws yuav hu ua Xas Las lawm.
16 Kuv yuav foom hmoov zoo rau nws thiab kuv yuav muab ib tug tub yug ntawm nws los rau koj. Kuv yuav foom hmoov zoo rau tus tub ntawd thiab; ntau haiv neeg yuav sawv hauv nws los, ntau tus vaj kav tej haiv neeg yuav tawm ntawm nws los."
17 Ces Has Nplas Has khoov pw nthi hauv av, nws tuaj dab ros, vim nws xav hauv nruab siab tias : "Ib tug tub puas yuav yug tau ntawm ib tug txiv neej muaj ib puas xyoo lod? Thiab Xas Las twb muaj cuaj caum xyoo lawm, nws puas tseem yuav yug me nyuad tau?"
18 Has Nplas Has hais rau Tswv Ntuj tias: "Thov kom Is Mas Es ua lub neej raws li koj nyiam."
19 Tiam sis Tswv Ntuj teb tias: "Koj poj niam Xas Las yuav yug ib tug tub rau koj, koj yuav tis nws npe hu ua His Xas Has, kuv yuav nrog nws cog lus, yog ib txog kev cog lus nyob mus li. Kuv yuav ua nws tus Tswv Ntuj thiab ua nws caj ces tom qab nws tus Tswv Ntuj.
20 Hais txog Is Mas Es los kuv tau hnov koj lo lus thov lawm. Kuv yuav foom hmoov zoo rau nws, kuv yuav ua kom nws tsim noob ntau, yuav ua kom nws huam vam. Nws yuav yug tau kaum ob tug thawj coj, thiab kuv yuav ua kom nws yog ib haiv neeg loj.
21 Tiam sis tus kuv yuav nrog nws cog lus yog His Xas Has uas lwm xyoo rov txog lub zim txwv no, Xas Las yuav yug rau koj."
22 Thaum Tswv Ntuj nrog Has Nplas Has tham li no tas, mas Tswv Ntuj ncaim nws mus lawm.

NPN 128: 1-2, 3, 4-5

Txais: (4) Huab Tais foom koob hmoov rau cov uas hwm nws.

Nej cov hwm HUAB TAIS, nej txoj hmoov zoo,
thiab nej cov taug raws nws txoj kev!
Vim nej yuav tau noj lub txiv ntawm nej tej hauj lwm,
nej yuav tau hmoov zoo thiab yuav tau txais txiaj ntsim.

Txais: (4) Huab Tais foom koob hmoov rau cov uas hwm nws.

Kuj poj niam yuav zoo li ib txoj hmab txiv cawv txi txiv ncw
nyob rau hauv koj tej kaum vaj kaum tsev,
koj cov me nyuam zoo li ib co ntoo txiv roj
nyob ncig lees koj lub phaj tsum.

Txais: (4) Huab Tais foom koob hmoov rau cov uas hwm nws.

Ntsia saib, tus neeg muaj txoj hmoov zoo
yog tus ntshai HUAB TAIS.
HUAB TAIS nyob saum roob Xis Yoos foom koob hmoov rau nej;
thov kom nej tau pom Yes Lus Xas Les vam meej niaj hnub hauv nej lub neej.

Txais: (4) Huab Tais foom koob hmoov rau cov uas hwm nws.

As Les Lus Yas: MT 8: 17

Txais: As les lus yas, as les lus yas.

Leej Pleev tshem peb tej kev ceg tawv mus,
thiab nws ris peb tej kev mob kev ntsaj.

Txais: As les lus yas, as les lus yas.

Ntawv Moo Zoo: MT 8: 1-4

1 Thaum Yes Xus nqes saum roob los, tej pab neeg coob coob raws nws.
2 Ces ib tug neeg mob ruas txav los, nws txhos caug ntua pe Yes Xus, nws hais tias: “Huab Tais, yog koj xav, mas koj yeej ua tau kom kuv rov huv tuaj.”
3 Yes Xus cev tes mus plhws tus mob ruas, nws hais tias: "Kuv xav, koj cia li rov huv tuaj." Ces tam sis ntawd tus mob ruas cia li zoo hlo.
4 Yes Xus hais rau nws tias: “Koj tsis txhob qhia qhov ntawd rau leeg twg. Tiam sis koj mus thws koj lub cev rau cov leej choj saib, thiab koj mus cev paj tshab raws li Mais Xes qhia, ua puav pheej rau lawv pom.”

*Unrevised

Tim 1 lub 7 Hli 2023

Hnub Xya Lis Piam Kaum Ob Nruab Xyoo A Nruab Lis Piam Xyoo I
Lectionary: 376

XHLT: LN Junipero, ua Leej Choj

Zaj Nyeem Ib: HP 18: 1-15

1 HUAB TAIS yees tawm los rau Has Nplas Has pom nyob hauv tsob qab ntoo qhib ntawm Maas Les, Has Nplas Has tab tom zaum ntawm nws lub qhov rooj tsev tsam phooj, yog lub sij hawm uas pib sov tuaj thaum yav nruab hnub.
2 Nws tsa muag ntsia, nws pom peb tug txiv neej tuaj sawv ze ntawm nws. Nws pom dheev lawv, nws cia li sawv tsees ntawm nws lub qhov rooj tsev tsam phooj mus tos txais lawv; nws khoov hauv av pe,
3 thiab nws hais tias: "Huab Tais, yog koj saib kuv tsim nyog no thov koj tsis txhob tuaj hla ntawm koj tus tub txib tsis nres xyuas kuv li.
4 Kuv mam li kom lawv nqa me ntsis dej los rau nej ntxuav ko taw, ces nej thiaj zoo so nyob hauv tsob qab ntoos no.
5 Thiab kuv yuav nrhiav ib qho mov rau nej noj kom nej muaj zog ces nej mam li mus ntxiv, vim twb yog li no, nej thiaj tuaj hla ntawm kuv." Ces lawv teb nws tias: "Ua li koj hais."
6 Has Nplas Has thiaj maj nrawm nroos mus hauv nws lub tsev tsam phooj mus hais rau Xas Las tias: "Koj tsuag tsuag mus luj peb taig hmoov nplej, cov hmoov nplej uas qab qab, koj muab do, muab puab ua ib co ncuav mov ci."
7 Has Nplas Has tso sas ntws mus xyuas nws pab tsiaj, nws ntes kiag ib tug thav nyuj mos tab tom qab, nws muab cob kiag rau nws tus tub txib coj mus ua kom siav sai sai.
8 Ces Has Nplas Has nqa mis nyuj khov thiab mis nyuj haus thiab tus nyuj mos uas twb ua siav lawm coj los rau rau ntawm lawv xub ntiag. Ces nws mus sawv ntsug ze lawv nyob ntawm tsob qab ntoos, saib lawv noj mov.
9 Lawv nug nws tias: "Koj poj niam Xas Las mus qhov twg lawm?" Has Nplas Has teb tias: "Nws nyob hauv tsev tsam phooj."
10 Ib tug thiaj hais tias: "Lwm xyoo tav lub zim txwv no, mas kuv yuav rov tuaj xyuas koj dua, thaum ntawd koj poj niam Xas Las yuav yug tau ib tug tub lawm." Xas Las hnov, vim nws nyob ntawm qhov rooj tsev tsam phooj sab hauv mloog, nyob ntawm tus txiv neej nrob qaum.
11 Has Nplas Has thiab Xas Las nkawd twb laus laus thiab muaj hnub nyoog nchav heev lawm. Xas Las twb tsis ua li tej poj niam ntxiv lawm.
12 Ces Xas Las luag twj ywm hauv nruab siab tias : "Zaum no kuv twb laus lawm thiab kuv tus txiv los twb laus lawm, kuv tseem yuav rov paub txoj kev zoo siab thiab lod ?"
13 Tab sis HUAB TAIS hais rau Has Nplas Has tias: "Ua cas Xas Las thiaj luag hais tias : 'Niag laus li kuv, tseem yuav yug tau me nyuam thiab lod?'
14 Puas muaj ib yam uas HUAB TAIS ua tsis tau? Lwm xyoo kuv yuav rov tuaj ntsib koj dua tib lub caij no raws li kuv tau teem lawm, thaum ntawd Xas Las yuav muaj ib tug tub."
15 Xas Las tsis kam lees, vim nws ntshai, nws hais tias : "Kuv tsis tau luag." Tiam sis HUAB TAIS hais tias: "Koj twb luag lawm."

NPN LK 1: 46-47, 48-49, 50+53, 54-55

Txais: (54b) Huab Tais rov nco txog nws txoj kev khuv leej neeg.

Kuv tus plig cav txog Huab Tais lub hwj chim loj,
kuv lub tswv yim hom khaj nyob hauv Tswv Ntuj, tus Cawm kuv.

Txais: (54b) Huab Tais rov nco txog nws txoj kev khuv leej neeg.

Vim nws dauv muag los saib nws tus ntxhais txib tsis muaj tsim.
Txij no mus, txhua tiam neeg yuav hais tias kuv txoj hmoov zoo;
vim tus Muaj Hwj Huam ua tej yam loj rau kuv, nws lub npe ntshiab.

Txais: (54b) Huab Tais rov nco txog nws txoj kev khuv leej neeg.

Nws lub siab khuv leej cov neeg hwm nws tiam dhau tiam.
Nws pub tej yam zoo rau cov neeg tshaib tau noj seem noj so,
nws ntiab cov neeg muaj rov qab mus tes qhuav nquas.

Txais: (54b) Huab Tais rov nco txog nws txoj kev khuv leej neeg.

Nws tuaj pab nws tus tub txib His Xas Lais,
vim nws nco ntsoov tias nws tau cog lus yuav khuyv leej neeg,
nws tau cog lus rau peb cov yawg koob, rau Has Nplas Has
thiab Has Nplas Has cov xeeb ntxwv mus ib txhiab ib txhis."

Txais: (54b) Huab Tais rov nco txog nws txoj kev khuv leej neeg.

As Les Lus Yas: MT 8: 17

Txais: As les lus yas, as les lus yas.

Leej Pleev tshem peb tej kev ceg tawv mus
thiab nws ris peb tej kev mob kev ntsaj.

Txais: As les lus yas, as les lus yas.

Ntawv Moo Zoo: MT 8: 5-17

5 Thaum Yes Xus mus hauv Kas Fas Naus, muaj ib tug xab txheeb txav los ze Yes Xus, nws thov tias:
6 "Huab Tais, kuv tus tub txib pw tom tsev, nws tes taw tuag tas, nws mob hnyav kawg."
7 Yes Xus teb tias: "Kuv yuav mus kho nws."
8 Tus xab txheeb hais ntxiv tias: "Huab Tais, kuv tsis tsim nyog koj chaws los hauv kuv tsev, tsuav yog koj hais ib lo lus xwb ces kuv tus tub txib yuav zoo hlo.
9 Vim tias kuv kuj yog ib tug neeg zwm rau lwm tus, thiab kuv kuj muaj ib co tub rog zwm rau kuv thiab. Yog kuv hais rau ib tug tias : 'Koj mus!' nws cia li mus; kuv ho hais rau lwm tus tias: 'Koj los,' nws kuj cia li los; kuv hais rau kuv tus tub txib tias: 'Koj ua qhov no!' nws cia li ua."
10 Yes Xus hnov nws hais li ntawd, Yes Xus qhuas kawg; nws hais rau cov neeg raws nws tias: "Kuv hais tseeb rau nej, kuv tsis tau pom dua ib tug neeg ntseeg npaum li ntawd nyob hauv cov His Xas Lais.
11 Kuv hais rau nej: yuav muaj neeg coob tuaj Toob Fab thiab Xib Fab tuaj zaum nrog Has Nplas Has, nrog His Xas Has thiab nrog Yas Kos noj rooj qav hauv Ntuj lub Ceeb Tsheej.
12 Hos cov tub hauv Ceeb Tsheej yuav raug muab rho mus pov rau hauv qhov tsaus ntuj nraum zoov; nyob nraud, sawv daws yuav quaj tom hniav nkawv.”
13 Yes Xus hais rau tus xab txheeb tias: "Koj rov mus ! Koj yuav tau raws li koj lub siab ntseeg!" Ces tib lub sij hawm ntawd, nws tus tub txib zoo hlo.
14 Ces Yes Xus chaws mus hauv Pob Zeb tsev. Nws pom Pob Zeb niam tais pw saum txaj, mob kub cev.
15 Yes Xus tuav nws txhais tes, tus mob kub cev thim hl.. Ces Pob Zeb niam tais sawv, nws tsob hwb Yes Xus.
16 Yav tsaus ntuj, lawv coj ib co neeg raug dab coob leej tuaj cuag Yes Xus. Yes Xus hais ib lo lus los ntiab cov dab ntawd, thiab nws kho cov neeg mob zoo tas huv si.
17 Ua li mas muaj raws li Yaj Saub His Xais lo lus tias: “Nws tshem peb tej kev ceg tawv mus, nws ris peb tej kev mob kev ntsaj.”

*Unrevised

Tim     3     lub     7     Hli     2023

Hnub Ob Lis Piam Kaum Peb Nruab Xyoo A Nruab Lis Piam Xyoo I

Hwm LN Tos Mas, tus Hauv Paus Xa Lus.
Lectionary: 593

Zaj Nyeem Ib:    EFX 2: 19-22

Cov kwv tij nkauj muad:
19 Nej tsis yog ib co pej kum neeg, los ib co qhua ntxiv lawm, nej nrog cov ntshiab ua pej xeem koom ib lub teb chaws thiab nej yog Tswv Ntuj tsev neeg,
20 uas yog ib lub tuam tsev txhim rau saum cov Hauv Paus Xa Lus thiab cov Yaj Saub ua lub taw ntsa, hod Yes Xus Pleev ua lub pob zeb txheem tas lub tsev.
21  Nyob hauv Leej Pleev tas lub tuam tsev sib tuav ruaj thiab hlob ua ib lub Tuam Tsev Ntshiab nyob hauv Huab Tais.
22 Nyob hauv Leej Pleev, nej sawv daws kuj puav leej ua ke raug muab tsa ua ib lub  tsev, nyob  hauv Leej Ntuj Plig, cia rau Tswv Ntuj nyob thiab.

NPN    117: 1BC, 2

Txais:  (MK 16:15) Nej mus thoob qab ntuj, nej mus tshaj lub Moo Zoo mog
los: As les lus yas.

Tas ib tsoom kuj cuab, nej cav lus zoo txog HUAB TAIS.
Tas ib tsoom haiv neeg, nej cav txog nws lub hwj chim.

Txais:  (Mas Kos 16:15) Nej mus thoob qab ntuj, nej mus tshaj lub Moo Zoo mog.
los: As les lus yas.

Huab Tais txoj kev ua zoo rau peb nyob ruaj nreb,
nws txoj kev pheej xeeb nyob mus ib txhiab ib txhis.

Txais:  (Mas Kos 16:15) Nej mus thoob qab ntuj, nej mus tshaj lub Moo Zoo mog.
los: As les lus yas.

As Les Lus Yas:        ZAM  20:   29

Txais: As les lus yas, as les lus yas.

Huab Tais hais tias: "Tos Mas, koj ntseeg vim koj tau pom kuv.
Cov uas tsis tau pom tab sis lawv ntseeg, mas lawv txoj hmoov zoo!"

Txais: As les lus yas, as les lus yas.

Ntawv Moo Zoo:   ZAM 20: 24-29

24 Tos Mas, uas tseem hu ua Dis Dws Mos thiab, yog ib tug hauv pab Kaum Ob; thaum Yes Xus yees tawm tuaj, nws tsis nrog lawv nyob.
25 Ces lawv hais rau nws tias: "Peb pom Huab Tais lawm!" Tab sis Tos Mas hais rau lawv tias: "Yog kuv tsis pom cov qhov ntsia hlau nyob ntawm nws ob txhais tes, yog kuv tsis tau muab kuv tus ntiv tes ntxig rau hauv cov qhov ntsia hlau ntawd, thiab yog kuv tsis tau muab kuv txhais tes ntxig ntawm nws phab tav, mas kuv tsis ntseeg li."
26 Yim hnub tom qab, cov thwj tim rov nyob ua ke hauv tsev dua, Tos Mas kuj nrog lawv nyob thiab. Cov qhov rooj puav leej xauv tas, Yes Xus cia li tshwm plaws los sawv hauv nruab nrab lawv, nws hais rau lawv tias: "Nej nyob kaj lug!"
27 Ces Yes Xus hais rau Tos Mas tias: "Cev koj ntiv tes rau ntawm no, koj ntsia kuv ob txhais tes saib; cev koj txhais tes los, muab ntxig rau hauv kuv phab tav; koj txhob ua neeg tsis ntseeg ntxiv, koj ntseeg mog."
28 Tos Mas teb rau Yes Xus tias: "Kuv tus Huab Tais, kuv tus Tswv Ntuj."
29 Yes Xus hais rau Tos Mas tias: "Koj ntseeg vim koj tau pom kuv puas yog? Cov uas tsis tau pom tab sis lawv ntseeg, mas lawv txoj hmoov zoo."

Tim       4      lub      7      Hli      2023

Hnub Peb Lis Piam Kaum Peb Nruab Xyoo A Nruab Lis Piam Xyoo I
Lectionary:  378

Zaj Nyeem Ib:    HAUV PAUS 19: 15-29

15 Thaum pib kaj ntug, ob tug Tshiab txhib Los tias: "Koj cia li saw! Coj koj poj niam thiab koj ob tug ntxhais uas nyob ntawm no nrog koj khiav mus, tsam ib ntsis nej yuav nrog lub nroog Xos Dos Mas raug kev rau txim muab nej cheb mus thiab."
16 Los tseem ua xyem xyav, ces ob tug txiv neej nthos nkaus Los tes nrog nws poj niam thiab ob tug ntxhais, vim HUAB TAIS khuv leej lawv; nkawd muab lawv cab tawm plaws rau sab nroog nraud kom lawv dim.
17 Thaum lawv tawm los txog sab nroog nraud lawm, nkawd hais rau Los tias: "Nej cia li khiav cawm nej txoj sia! Nej tsis txhob tig ntsia rov tom qab, tsis txhob theem nram tiaj qhov twg li, nej yeej meem khiav mus nkaum lawm pem roob, tsis li ntawd ces nej yuav raug muab cheb mus tas!"
18 Los teb tias: "Ntshai kuv yuav tsis mus ped, HUAB TAIS, thov koj!
19 Koj twb tau saib koj tus tub txib muaj nqes thiab koj twb tau hlub kuv kawg nkaus, koj thiaj cawm kuv kom kuv tseem muaj sia nyob. Tiam sis ntshai kuv yuav khiav tsis yeej mus pem roob, ces xwm txheej xub tuaj raug kuv, ces kuv xub tuag lawm.
20 Thov koj! Muaj ib lub nroog nyob tsis deb tom ntej tod, khiav kuj yuav txog sai. Nws yog ib lub nroog me me xwb. Thov koj cia kuv mus nkaum nyob ntawd, vim tsuas yog ib lub nroog me me xwb, lost sis yog? Ces kuv thiaj yuav cawm tau kuv txoj sia.
21 HUAB TAIS teb rau Los tias: "Ua li ntawd. Kuv yuav cia koj ua raws li koj tau thov, kuv yuav tsis rhuav lub nroog uas koj hais ntawd.
22 Kav tsij maj zeeg khiav mus lawm tod. Vim tias yog koj mus tsis tau txog, mas kuv yuav ua tsis tau dab tsi ua ntej li." Vim li no lub nroog ntawd thiaj muaj lub npe hu ua Xos As.
23 Thaum lub hnub tab tom tawm plaws tuaj ci rau ntiaj teb, Los kuj khiav nkag plaws rau hauv Xos As thaum ntawd.
24 Ces HUAB TAIS nchuav kiag ib co nag leej faj xyaw hluav taws poob sis lug saum ntuj los hlawv Xos Dos Mas thiab Nkos Mos Las thaum ntawd.
25 Nws muab cov nroog thiab lub tiaj rhuav du lug nrog rau cov neeg nyob hauv cov nroog thiab tej nroj tsaug uas tuaj nyob saum npoo av tas huv tib si.
26 Hos, Los poj niam ces nws tig ntsia rov tom qab ces nws cia li khov kiag ua ib tug ncej ntsev lawm.
27 Tag kis thaum sawv ntxov ntxov, Has Nplas Has mus nyob ntawm thaj chaw uas nws tau nrog HUAB TAIS hais lus.
28 Nws tsa muag ntsia Xos Dos Mas, Nkos Mos Las thiab tas nrho thaj tsam ntawm lub tiaj, nws pom pa taws ncho lug cuag li tawm hauv ib lub qhov txos tuaj.
29 Ces thiaj hais tau tias, thaum Tswv Ntuj rhuav cov nroog nram tiaj, nws nco ntsoov txog Has Nplas Has, ces nws tau npo Los dim ntawm kev puas tsuaj thaum nws rhuav cov nroog uas Los nyob.

NPN    26: 2-3, 9-10, 11-12

Txais: (3a) Huab Tais, koj txoj kev khuv leej
nyob raws ntawm kuv qhov muag.

HUAB TAIS, koj tshawb kuv, koj sim kuv mas,
Koj sim kuv tus ntsuj plig kuv lub siab mas,
Vim koj txoj kev khuv leej yeej nyob rawv ntawm kuv qhov muag;
Thiab kuv yeej taug kev nyob hauv koj txoj kev tseeb.

Txais: (3a) Huab Tais, koj txoj kev khuv leej
nyob raws ntawm kuv qhov muag.

Koj tsis txhob sau kuv tus plig mus nrog cov neeg txhaum tus plig,
tsis txhob sau kuv txoj sia mus nrog cov neeg txo luag txoj sia.
Lawv ob txhais tes tau ua phem,
Lawv sab tes xis tuav nyiaj xiab puv nkaus tes

Txais: (3a) Huab Tais, koj txoj kev khuv leej
nyob raws ntawm kuv qhov muag.

Tiam sis kuv taug raws kev ncaj ncees,
thov koj cawm kuv thiab khuv leej kuv.
Kuv ko taw tsuj saum qhov av tiaj tus;
nyob hauv cov txoos, kuv yuav cav lus zoo txog HUAB TAIS.

Txais: (3a) Huab Tais, koj txoj kev khuv leej
nyob raws ntawm kuv qhov muag.

As Les Lus Yas:    NPN 130: 5

Txais: As les lus yas, as les lus yas.

Kuv tso siab rau HUAB TAIS,
kuv tus plig tso siab rau nws lo lus.

Txais: As les lus yas, as les lus yas.

Ntawv Moo Zoo:    MT 8: 23-27

23 Yes Xus nce mus hauv nkoj, cov thwj tim kuj lawv nws qab nce mus hauv thiab.
24 Ib sij huam cua daj cua dub nplawm tuaj rau hauv hiav txwv ces cov nplaim dej sawv nphau tej niag twv tuaj npog nkaus lub nkoj. Hos Yes Xus nws tsaug nws zog lawm.
25 Cov thwj tim los ntawm Yes Xus, lawv tsa nws tias: "Huab Tais, koj cawm peb mas, peb twb yuav tuag !"
26 Yes Xus hais rau lawv tias: "Vim li cas nej ntshai, ua cas nej ntseeg me ua luaj?”
Ces Yes Xus sawv ntsug, nws txwv cua thiab dej ntuj, ces txhua yam cia li rov tus yees lawm.
27 Cov txiv neej ntawd yoob tas, lawv hais tias: "Tus ntawd yog leej twg? Tab yog cua thiab dej ntuj los yeej mloog nws lus!"

Tim     5     lub     7     Hli     2023

Hnub Plaub Lis Piam Kaum Peb Nruab Xyoo A Nruab Lis Piam Xyoo I
Lectionary: 379

XHLT:    LN Anthony Mary Zaccaria, ua Leej Choj; LN Elizabeth nyob Portugal

Zaj Nyeeem Ib:    HP 21: 5, 8-20a

5 Has Nplas Has muaj ib puas xyoo nkaus thaum nws tus tub His Xas Has yug los.
8 Tus me nyuam loj tuaj, thaum txog caij muab nws cais mis, Has Nplas Has ua ib pluag mov loj loj rau His Xas Has hnub cais mis ntawd.
9 Xas Las xauj pom Has Nplas Has tus tub uas yug ntawm As Nkas, tus poj Hais Nkws Tos los, nrog nws tus tub His Xas Has ua si.
10 Xas Las hais rau Has Nplas Has tias: "Ntiab tus ntxhais qhev ntawd thiab nws tus tub khiav mus. Tsis pub kom tus ntxhais qhev ntawd tus tub los nrog kuv tus tub His Xas Has sib txeeb lub cuab tam."
11 Cov lus no ua rau Has Nplas Has tsis zoo siab thiab ntxhov siab rau nws tus tub Is Mas E.
12 Tiam sis Tswv Ntuj hais rau nws tias: "Koj tsis txhob nyuaj siab txog tus me nyuam thiab koj tus ntxhais txib. Xas Las xav kom koj ua dab tsi mas koj ua raws li ntawd, vim His Xas Has thiaj yog koj caj ces tus yuav ris koj lub npe nyob mus li.
13 Hos tus tub ntawm tus ntxhais qhev los kuv kuj yuav muab nws ua ib haiv neeg loj vim nws yog koj roj ntsha."
14 Ces tag kis, Has Nplas Has sawv ntxov ntxov los ntim mov thiab ib hnab tawv dej rau As Nkas, nws muab khuam rau saum As Nkas xub pwg thiab muab tus me nytuam cob rau nws, ces Has Nplas Has kom nkawd tawm mus. As Nkas thiaj mus, nws mus poob zoo ncig mus ncig los hauv lub hav suab puam Npes Xas Npes.
15 Thaum nws lub hnab tawv dej tas lawm, nws muab tus me nyuam tso tseg rau hauv ib tsob qab ntoos,
16 ces nws txav mus zaum deb ntawm tus me nyuam li ib ncua hneev. Nws xav tias: "Kuv tsis xav pom tus me tub txoj sia tu." As Nkas mus zaum deb ntawd, ces tus me nyuam tsa suab quaj.
17 Tswv Ntuj hnov tus me tub lub suab quaj, ces Tswv Ntuj tus Tshiab hu saum ntuj tuaj rau As Nkas tias: "As Nkas, muaj teeb meem dab tsi? Koj tsis txhob txhawj vim Tswv Ntuj tau hnov tus me tub lub suab quaj ntawm nws qhov chaw tuaj lawm.
18 Koj cia li sawv tsees mus tsaws nws los puag kom ruaj ruaj, vim kuv yuav muab nws tsa ua ib haiv neeg loj."
19 Tswv Ntuj qhib As Nkas qhov muag ces As Nkas pom ib lub qhov dej. Nws thiaj nqa lub hnab mus ntim dej coj los rau tus me tub haus.
20 Ces tus me tub hlob zuj zus tuaj, Tswv Ntuj nrog nraim nws.

NPN    34: 7-8, 10-11, 12-13

Txais: (7a) Huab Tais mloog tus txom nyem lub suab quaj.

Thaum tus txom nyem quaj hu, HUAB TAIS mloog nws,
Huab Tais cawm nws ntawm tas nws tej kev txhawj xeeb.
HUAB TAIS tus tshiab tsa tsev tsam phooj ncig
cov neeg hwm HUAB TAIS, nws cawm lawv.

Txais: (7a) Huab Tais mloog tus txom nyem lub suab quaj.

Nej uas yog nws tsoom neeg ntshiab, nej cia li hwm HUAB TAIS,
vim cov neeg hwm HUAB TAIS tsis tshaib tsis nqhis  dab tsi li.
Cov muaj koob muaj npe yuav txom nyem tshaib plab;
hos cov nrhiav HUAB TAIS yuav tsis tshaib tsis nqhis tej yam zoo li.

Txais: (7a) Huab Tais mloog tus txom nyem lub suab quaj.

Cov me nyuad, los ntawm no, los mloog kuv hais;
Kuv yuav qhia txoj kev hwm HUAB TAIS rau nej.
Nej leej twg xav tau txoj sia,
thiab xav zoo siab nyob hauv lub neej vam meej?

Txais: (7a) Huab Tais mloog tus txom nyem lub suab quaj.

As Les Lus Yas:    YAS KOS 1: 18

Txais: As les lus yas, as les lus yas.

Leej Txiv pom zoo kom peb yug los nyob hauv lo lus tseeb,
kom peb yog thawj cov txiv nyob hauv txhua yam uas nws tsim los.

Txais: As les lus yas, as les lus yas.

Ntawv Moo Zoo:    MT 8: 28-34

28 Thaum Yes Xus tuaj txog sab ntug dej tim ub, txog rau ntawm cov Nkas Das Lis lub teb chaws, mas muaj ob tug neeg raug dab tawm hauv cov toj ntxas tuaj cuag Yes Xus. Nkawd tsiv tsaim kawg nkaus, tsis muaj leeg twg muaj cuab kav taug txoj kev ntawd li.
29 Ob tug ntawd qw nrov nrov tias: "Tswv Ntuj Leej Tub, koj xav ua dab tsi rau peb? Tsis tau txog lub caij teem, koj txawm siv tuaj tsim txom peb lawm lod?"
30 Nyob tsis deb ntawd, muaj ib pab npua coob coob tab tom noj zaub.
31 Cov dab thov Yes Xus tias: "Yog koj ntiab peb tawm, mas thov koj cia peb mus nyob hauv pab npua tod."
32 Yes Xus teb tias: "Nej kav tsij mus mas." Cov dab tawm plaws nkag mus nyob hauv cov npua, ces tas pab npua dhia puag saum tsag siab rau hauv dej ntuj; pab npua poob dej tuag tas tib si.
33 Cov tub zov npua tso tes khiav mus hauv nroog, lawv mus piav tas txhua yam tib si thiab piav txog tej xwm tshwm sim rau ob tug neeg raug dab ntawd.
34 Ces tas lub nroog tawm tuaj cuag Yes Xus. Thaum lawv pom nws, lawv thov kom nws tawm hauv lawv thaj chaw mus.

Tim     6     lub     7     Hli     2023

Hnub Tsib Lis Piam Kaum Peb Nruab Xyoo A Nruab Lis Piam Xyoo I
Lectionary:  380

XHLT:   LN Maria Goretti, Nkauj Xwb tuag ua Tim Khawv

Zaj Nyeem Ib:    HAUV PAUS 22: 1b-19

1 Tswv Ntuj xav sim Has Nplas Has siab, nws hu tias: "Has Nplas Has!" Has Nplas Has teb tias: "Kuv nyob ntawm no!"
2 Tswv Ntuj hais tias: "Coj koj leej tub twm zeej His Xas Has uas koj hlub kawg nkaus, koj coj nws mus kom txog lub teb chaws Mos Lis Yas. Nyob ntawd koj yuav muab nws txi rau kuv saum ib lub roob uas kuv yuav qhia rau koj."
3 Tag kis, Has Nplas Has sawv ntxov ntxov los, nws nog nra rau nws tus luj, nws coj ob tug tub txib thiab nws tus tub His Xas Has nrog nws mus. Nws phua ib co taws npaj mus ua thaj txi ntuj, ces nws sawv kev mus rau thaj chaw uas Tswv Ntuj qhia rau nws.
4 Hnub peb, Has Nplas Has tsa muag ntsia pom thaj chaw ntawd tseem nyob deb.
5 Has Nplas Has hais rau nws ob tug tub txib tias: "Neb nrog tus luj nyob ntawm no. Kuv thiab kuv tus tub wb yuav mus ntxiv, wb yuav mus pe hawm Ntuj, ces wb mam rov los ntawm neb."
6 Has Nplas Has muab cov taws txi Ntuj nog rau nws tus tub His Xas Has ris, hos nws nqa cov hluav taws thiab rab riam, ces nkawd ob leeg ua ke mus.
7 His Xas Has nug nws txiv Has Nplas Has tias: "Kuv txiv!" Has Nplas Has teb tias: "Had, me tub!" His Xas Has hais ntxiv tias: "Ua cas pom hluav taws thiab cov taws xwb, ua li tus yaj yuav coj los hlawv txi Ntuj ne nyob qhov twg?"
8 Has Nplas Has teb tias: "Me tub, Tswv Ntuj mam li muab tus yaj uas yuav txi Ntuj rau wb." Ces nkawd ob leeg taug kev mus ntxiv.
9 Thaum nkawd tuaj txog thaj chaw uas Tswv Ntuj tau qhia nws lawm, Has Nplas Has tsa ib lub thaj txi Ntuj rau ntawd thiab nws muab cov taws mus teeb rau saud. Nws muab nws tus tub His Xas Has pav, ces nws muab tso rau saum lub thaj txi Ntuj saum cov taws.
10 Has Nplas Has tsa hlo tes mus nthos rab riam yuav coj los tua nws tus tub.
11 Tiam sis HUAB TAIS tus Tshiab hu saum ntuj tuaj rau nws tias: "Has Nplas Has! Has Nplas Has!" Has Nplas Has teb tias: "Kuv nyob ntawm no!"
12 Tus Tshiab hais tias: "Txhob tsa koj txhais tes rau saum tus me nyuad! Txhob ua dab tsi phem rau nws! Zaum no kuv paub hais tias koj hwm Tswv Ntuj tiag, vim koj tsis yig, koj tseem muab koj leej tub twm zeej los txi rau kuv."
13 Has Nplas Has tsa muag ntsia pom ib tug laug tshis nyob tom nws qub qab, uas ob tug kub daig rau hauv ib koog pos, Ces nws mus muab tus laug tshis los hlawv txi Ntuj hloov nws tus tub chaw.
14 Has Nplas Has tis npe rau thaj chaw ntawd hu ua qhov chaw "HUAB TAIS mam muab.” Ces zaum no thiaj muaj lo lus hais kam tias "Saum lub roob HUAB TAIS mam muab."
15 HUAB TAIS tus Tshiab rov hu zaum ob saum ntuj tuaj rau Has Nplas Has,
16 nws hais tias: "HUAB TAIS hais tias: Kuv tuav txog kuv lub npe cog lus rau koj tias: vim koj tau ua li ntawd, koj tsis yig, koj tuaj yeem muab koj leej tub, uas yog koj tib leeg tub los txi rau kuv,
17 mas kuv yuav foom hmoov zoo ntau rau koj, kuv yuav ua kom koj tsoom xeeb leej xeeb ntxwv huam vam tuaj coob npaum cov hnub qub saum ntuj thiab ntau npaum cov xuab zeb uas nyob ntawm ntug hiav txwv. Koj tsoom xeeb leej xeeb ntxwv yuav ua tswv kav lawv cov yeeb ncuab tej qhov rooj loog.
18 Tas txhua haiv neeg nyob ntiaj teb yuav tau txais txoj hmoov zoo nyob hauv koj tsoom xeeb leej xeeb ntxwv, vim koj tau mloog kuv lus."
19 Has Nplas Has rov qab los txog ntawm nws ob tug tub txib, ces lawv sawv kev ua ke rov los rau Npes Xas Npes uas yog qhov chaw Has Nplas Has tsa nws lub tsev nyob.

NPN    115: 1-2, 3-4, 5-6, 8-9

Txais: (116:9) Kuv yuav taug kev nyob ntawm Huab Tais xub ntiag,
hauv cov neeg ciaj lub teb chaws.

HUAB TAIS, koj txhob pub kom peb nto koob meej,
tab sis thov ua kom koj lub npe nto koob meej,
vim koj siab zoo, vim koj yog qhov tseeb.
Vim li cas cov kuj cuab thiaj yuav tau kev hais tias:
"Lawv tus Tswv Ntuj nyob qhov twg ?"

Txais: (116:9) Kuv yuav taug kev nyob ntawm Huab Tais xub ntiag,
hauv cov neeg ciaj lub teb chaws.

Peb tus Tswv Ntuj nyob txheej ntuj saud;
nws ua tau tas ib puas tsav yam nws xav ua.
Lawv cov mlom dab yog nyiaj yog kub,
yog neeg ob txhais tes puab xwb.

Txais: (116:9) Kuv yuav taug kev nyob ntawm Huab Tais xub ntiag,
hauv cov neeg ciaj lub teb chaws.
Cov mlom muaj qhov ncauj, tab sis tsis txawj hais lus;
lawv muaj qhov muag, tab sis tsis pom kev;
lawv muaj pob ntseg, tab sis tsis hnov lus;
lawv muaj qhov ntswg, tab sis tsis hnov ntxhiab;

Txais: (116:9) Kuv yuav taug kev nyob ntawm Huab Tais xub ntiag,
hauv cov neeg ciaj lub teb chaws.

Cov puab mlom yuav zoo ib yam li lawv cov mlom,
Txhua tus tso siab rau cov mlom yuav zoo ib yam li lawv.
His Xas Lais tsev neeg tso siab rau HUAB TAIS;
nws yog tus pab lawv, yog daim leem phiaj thaiv lawv.

Txais: (116:9) Kuv yuav taug kev nyob ntawm Huab Tais xub ntiag,
hauv cov neeg ciaj lub teb chaws.

As Les Lus Yas:    2 KLN 5: 19

Txais: As les lus yas, as les lus yas.

Tswv Ntuj ua kom lub ntiaj teb nrog nws
rov sib haum xeeb nyob hauv Leej Pleev,
nws tso cov lus pab kom neeg nrog nws
rov sib raug zoo rau peb muab tshaj tawm.

Txais: As les lus yas, as les lus yas.

Ntawv Moo Zoo:    MT 9: 1-8

1 Yes Xus nce mus hauv ib lub nkoj, nws hla dej rov los txog lub nroog nws nyob.
2 Thaum ntawd, neeg nqa ib tug tuag ceg pw saum ib lub txaj tuaj rau Yes Xus. Yes Xus pom lawv ntseeg, nws hais rau tus tuag ceg tias: "Me tub, koj tso siab mog! Koj cov txhaum daws tas lawm."
3 Thaum ntawd, muaj ob peb tug Kws Ntawv Ntshiab xav twj ywm hauv nruab siab tias: ‘Tus neeg ntawd thuam Ntuj.’
4 Tab sis Yes Xus paub qhov lawv xav, ces nws hais tias: "Vim li cas nej xav tej yam phem rau nruab siab?
5 Lo lus twg hais yooj yim dua, puas yog lo tias: 'Koj cov txhaum daws tas lawm,' los yog lo tias: 'Koj sawv mus kev?'
6 Kom nej paub tias Neeg Leej Tub muaj lub hwj huam daws txhaum tau nyob ntiaj teb no," ces Yes Xus hais rau tus tuag ceg tias: "Koj sawv, koj nqa koj lub txaj, koj rov mus tsev".
7 Ces tus tuag ceg sawv tsees los thiab nws rov mus tsev lawm.
8 Tsoom sid pom li ntawd, sawv daws qhuas kawg. Lawv cav txog Tswv Ntuj vim nws pub lub hwj huam loj npaum li no rau tib neeg.

Tim     7     lub     7     Hli     2023

Thawj Hnub Rau Lis Piam Kaum Peb Nruab Xyoo A Nruab Lis Piam Xyoo I
Lectionary: 381

Zaj Nyeem Ib:    HP 23: 1-4, 19; 24: 1-8, 62-67

1 Xas Las ua neej ntev txog ib puas nees nkaum xya xyoo.
2 Ces nws tuag nyob Kis Lis Yas Tas Npas uas yog Hes Nploos, nyob teb chaws Kas Nas Has. Has Nplas Has ua nws lub ntees thiab quaj nyiav nws nyob ntawd.
3 Ces Has Nplas Has tso nws tus tuag rau ntawd, nws mus hais rau Hes cov tub tias:
4 "Txawm tias kuv yog ib tug pej kum neeg ua qhua tuaj poob rau hauv nej, los kuv thov nej muag ib thaj av rau kuv ua toj ntxas kom kuv tau coj kuv tus tuag mus zais."
19 Ces Has Nplas Has thiaj yuav thaj av thiab coj Xas Las nws poj niam mus los rau hauv lub qhov tsua hauv daim teb Mas Pes Las, nyob ncaj ntawm Mas Nples, uas yog Hes Nploos, hauv teb chaws Kas Nas Has.
24: 1 Thaum Has Nplas Has nyob laus nkoos muaj hnub nyoog nchav, thiab HUAB TAIS tau foom hmoov zoo rau Has Nplas Has nyob hauv tas txhua yam lawm,
2 Has Nplas Has hais rau nws tus tub txib uas yog tus laus dua nyob hauv nws tsev, thiab yog tus saib tas nws lub cuab tam huv si tias: "Koj cev tes mus npuab kuv sab qab ncej puab,
3 kuv yuav kom koj tuav txog HUAB TAIS, tus Tswv Ntuj kav lub ntuj lub teb los cog lus tias, koj yuav tsis nrhiav ib tug poj niam nyob hauv cov neeg Kas Nas Has uas kuv nrog lawv nyob no los rau kuv tus tub yuav.
4 Tiam sis koj yuav mus pem kuv lub teb chaws, mus xaiv ib tug poj niam nyob hauv kuv tsev neeg coj los rau kuv tus tub His Xas Has yuav."
5 Tus tub txib hais tias: "Ntshai tsam tus poj niam ntawd tsis kam nrog kuv los nyob teb chaws no ne? Kuv puas yuav tsum coj koj tus tub rov mus lawm pem lub teb chaws uas koj tawm los lawd?"
6 Has Nplas Has teb tias: "Koj yuav ceev faj tsis txhob coj kuv tus tub rov mus nyob rau ped.
7 HUAB TAIS, tus Tswv lub ntuj, nws tau coj kuv tawm ntawm kuv txiv lub tsev thiab ntawm kuv tsev neeg lub teb chaws los, thiab nws tau cog lus rau kuv tias: “Kuv yuav muab lub teb chaws no rau koj cov xeeb leej xeeb ntxwv nyob;” tus HUAB TAIS ntawd yuav xa nws tus Tshiab mus ua koj ntej, ces koj yuav coj tau ib tug poj niam nyob ped los rau kuv tus tub.
8 Yog tus poj niam tsis kam nrog koj los, mas koj yuav tsis ua txhaum rau lo lus koj cog rau kuv no li, tab sis koj tsis txhob coj kuv tus tub rov mus nyob ped kiag li."
62 Thaum ntawd, His Xas Has los tom lub qhov dej Las Hais Luas los, vim nws los nyob hauv lub teb chaws Nes Zes lawm.
63 Thaum yav tsaus ntuj, nws tawm mus teev ntuj nraum cov nras teb, nws thiaj tsa muag ntsia pom ib co ntxhuav tab tom tuaj.
64 Les Npes Kas kuj tsa muag ntsia pom His Xas Has thiab. Nws nqes plhuav saum tus ntxhuav los rau hauv av.
65 Nws nug tus tub txib tias: "Tus txiv neej uas taug kev hauv cov nras teb tuaj tos peb ntawd yog leej twg?" Tus tub txib teb tias: "Yog kuv tus tswv." Ces Les Npes Kas muab nws txoj phuam los kauv zoj nws ntsej muag
66 Tus tub txib piav tas puas tsav yam txog txoj hauj lwm nws tau mus ua rau His Xas Has mloog.
67 Ces His Xas Has coj Les Npes Kas los nyob hauv nws niam Xas Las lub tsev tsam phooj. Nws yuav Les Npes Kas ua nws poj niam. Nws nyiam Les Npes Kas, ces nws muaj kev nplig siab, vim nws niam twb ncaim mus lawm.

NPN    106: 1b-2, 3-4a, 4b-5

Txais: (1b) Nej cav lus zoo ua Huab Tais tsaug vim nws siab zoo.

Nej cav lus zoo ua HUAB TAIS tsaug, vim nws siab zoo,
nws khuv leej neeg mus li ib txhiab ib txhis.
Leej twg yuav piav tau HUAB TAIS tej hauj lwm muaj hwj huam loj,
los hais tau tas puas tsav yam lus cav txog nws?

Txais: (1b) Nej cav lus zoo ua Huab Tais tsaug vim nws siab zoo.

Cov tau hmoov zoo yog cov neeg tsom txoj kev ncaj taug,
yog cov ua raws txoj kev haum pheej tas mus li.
HUAB TAIS, thov koj nco txog peb vim koj hlub koj haiv neeg.

Txais: (1b) Nej cav lus zoo ua Huab Tais tsaug vim nws siab zoo.

Thov koj tuaj xyuas kuv tuaj pab cawm kuv,
Kom kuv tau pom cov koj xaiv txoj kev vam meej,
Kom kuv zoo siab nyob hauv koj haiv neeg txoj kev zoo siab,
Kom kuv tau koob meej nyob hauv koj lub cuab tam.

Txais: (1b) Nej cav lus zoo ua Huab Tais tsaug vim nws siab zoo.

As Les Lus Yas:    MT 11: 28

Txais: As les lus yas, as les lus yas.

Huab Tais hais tias: Tas nej sawv daws uas nej khwv
thiab ris nra hnyav, nej tuaj cuag kuv, mas kuv yuav cia nej so los siav.

Txais: As les lus yas, as les lus yas.

Ntawv Moo Zoo:    MT 9: 9-13

9 Yes Xus tawm mus, thaum nws tab tom taug kev, nws pom ib tug txiv neej hu ua Mas Tais zaum ntawm lub rooj sau se. Yes Xus hais rau nws tias: "Koj raws kuv mus!" Ces tus txiv neej ntawd sawv tsees raws Yes Xus mus.
10 Thaum Yes Xus zaum noj mov hauv Mas Tais tsev, muaj ib co neeg sau se thiab ib co neeg txhaum coob coob tuaj nrog Yes Xus thiab nws cov thwj tim noj mov.
11 Cov Fas Lis Xais pom li ntawd, lawv hais rau cov thwj tim tias: "Vim li cas nej tus Xib Hwb nrog cov sau se thiab cov neeg txhaum noj mov?"
12 Yes Xus twb hnov lawm, nws thiaj hais tias: "Cov neeg noj qab nyob zoo tsis yog cov yuav vam txog kws kho mob, tiam sis cov neeg mob yog cov yuav vam txog.
13 Nej yuav mus kawm lo lus no lub ntsiab cia: 'Qhov kuv xav yuav yog txoj kev khuv leej, tsis yog thaj txi Ntuj.' Kuv tsis yog tuaj hu cov neeg ncaj, kuv tuaj hu cov neeg txhaum."

Tim      8     lub     7     Hli     2023

Hnub Xya Lis Piam Kaum Peb Nruab Xyoo A Nruab Lis Piam Xyoo I
Lectionary:   382

Zaj Nyeem Ib:    HP 27: 1-5, 15-29

1 Thaum His Xas Has laus laus, qhov muag tsis pom kev lawm, nws hu nws tus tub hlob Es Xas Ws los, nws hais tias: "Me tub!" Tus tub teb tias: "Kuv txiv!"
2 His Xas Has hais ntxiv tias: "Kuv laus laus lawm, kuv tsis paub hnub kuv yuav tuag.
3 Koj nqa koj cov twj tua nqaij, koj rab hneev thiab lub raj xub, koj mus yos tua nqaij los rau kuv noj.
4 Koj npaj ib roog qav raws li kuv xis, koj coj los rau kuv noj, ces kuv yuav foom hmoov zoo rau koj ua ntej kuv tuag.”
5 Les Npes Kas hnov ntsoov His Xas Has hais li ntawd rau Es Xas Ws. Ces thaum Es Xas Ws mus tua nqaij rau nruab tsuag lawm,
15 Les Npes Kas thiaj li muab Es Xas Ws nws tus tub hlob, cov khaub ncaws zoo tshaj uas nyob hauv tsev rau nws tus tub ntxawg Yas Kos hnav.
16 Nws muab cov tawv me nyuam tshis los qhwv Yas Kos ob txhais caj npab thiab lub caj dab uas tsis tuaj plaub.
17 Ces nws muab tais nqaij thiab phaj mov uas nws npaj tau rau Yas Kos nqa.
18 Yas Kos thiaj mus cuag nws txiv, nws hais tias: "Kuv txiv." Nws txiv hais tias: "Kuv nyob ntawm no os, me tub, koj yog leej twg?"
19 Yas Kos teb nws txiv tias: "Kuv yog koj tus tub hlob Es Xas Ws. Kuv twb ua tau tas raws li koj hais lawm. Koj sawv los zaum noj cov nqaij kuv tau mus tua, kom koj tau foom hmoov zoo rau kuv."
20 His Xas Has hais rau nws tus tub Yas Kos tias: "Ua cas koj ntsib nqaij sai ua luaj!" Yas Kos teb tias: "Yog vim koj tus HUAB TAIS Tswv Ntuj pab kuv."
21 His Xas Has thiaj hais rau Yas Kos tias: "Txav los ntawm no, kuv xuas koj saib koj puas yog kuv tus tub Es Xas Ws tiag."
22 Yas Kos thiaj txav los rau nws txiv His Xas Has xuas nws. Nws txiv hais tias: "Lub suab yog Yas Kos lub, tab sis ob sab npab no yog Es Xas Ws ob sab!"
23 His Xas Has zeem tsis tau tias yog Yas Kos vim ob txhais npab tuaj plaub li Es Xas Ws li ces His Xas Has thiaj foom hmoov zoo rau Yas Kos.
Nws hais tias: "Koj puas yog kuv tus tub Es Xas Ws tiag?" Yas Kos teb tias: "Yog tiag mas."
25 Ces His Xas Has hais tias: "Cev phaj rau kuv noj kuv tus tub cov nqaij saib, kuv yuav foom hmoov zoo rau koj." Yas Kos cev nqaij rau nws txiv noj, cev cawv rau nws txiv haus tas.
26 Nws txiv hais tias: "Me tub txav los ntawm no los nwj kuv saib."
27 Yas Kos txav mus nwj nws txiv. Nws txiv tau hnia nws tus tub cov khaub ncaws tus ntxhiab, ces nws foom hmoov li no: "Kuv me tub tus ntxhiab yog tsw zoo li ib daim teb av zoo uas HUAB TAIS tau foom hmoov zoo rau lawm.
28 Thov kom Tswv Ntuj tso lwg los rau koj, thiab pub cov av zoo rau koj, pub nplej, pub cawv haus tsis tag noj tsis qig rau koj.
29 Kom cov haiv neeg tsob hwb koj, kom cov teb chaws pe koj. Koj yuav yog ib tug thawj coj ntawm koj cov kwv tij, koj niam cov tub yuav khoov pe koj. Leej twg foom phem rau koj, mas nws yuav raug hmoov phem. Leej twg foom hmoov zoo rau koj, mas nws yuav tau txoj hmoov zoo!"

NPN    135: 1b-2, 3-4, 5-6

Txais: (3a) Nej cav txog Hiab Tais vim Huab Tais siab zoo.

Nej cav txog HUAB TAIS lub npe,
HUAB TAIS cov tub txib, nej cav txog nws.
Nej cov uas sawv nyob hauv HUAB TAIS tsev,
cov uas nyob hauv peb tus Tswv Ntuj cov tshav loog,

Txais: (3a) Nej cav txog Hiab Tais vim Huab Tais siab zoo.

Nej cav txog HUAB TAIS vim Huab Tais siab zoo!
Nej hu nkauj cav txog nws lub npe uas peb nyiam tas nrho,
Vim HUAB TAIS tau xaiv Yas Kos ua nws li,
nws tau xaiv His Xas Lais ua nws teej tug.

Txais: (3a) Nej cav txog Hiab Tais vim Huab Tais siab zoo.

Kuv yeej paub tias HUAB TAIS loj tas nrho;
peb tus HUAB TAIS loj dua tas ib tsoom tswv ntuj.
HUAB TAIS ua tas puas tsav yam raws nws siab xav,
nyob saum ntuj thiab nyob ntiaj teb no,
nyob hauv dej ntuj thiab hauv tej qab thu tob tob.

Txais: (3a) Nej cav txog Hiab Tais vim Huab Tais siab zoo.

As Les Lus Yas:    ZAM 10: 27

Txais: As les lus yas, as les lus yas.

Huab Tais hais tias: Kuv cov yaj mloog kuv lub suab;
kuv paub kuv cov yaj, kuv cov yaj raws nraim kuv qab mus.

Txais: As les lus yas, as les lus yas.

Ntawv Moo Zoo:    MT 9: 14-17

14 Zam cov thwj tim tuaj cuag Yes Xus, lawv hais tias: "Peb yoo mov, cov Fas Lis Xais kuj yoo. Vim li cas koj cov thwj tim tsis yoo?"
15 Yes Xus teb lawv tias: “Thaum nraug vauv tseem nrog nws cov phooj ywg nyob, mas lawv puas ntoo xyom? Muaj ib hnub, thaum luag coj nraug vauv mus lawm, mas lawv mam li yuav yoo mov.
16 Tsis muaj leej twg ntxiv ib daim ntaub tshiab rau ib lub qub tsho, vim daim ntaub ntawd yuav nqws thiab rub lub qub tsho, ces haj yam yuav ntuag loj.
17 Luag kuj tsis xuas hnab tawv qub los ntim cov cawv tshiab thiab; vim cov hnab tawv qub yuav tawg, ces cawv yuav txeej tas, cov hnab kuj yuav puas tas. Luag thiaj li muab cov cawv tshiab ntim hauv cov hnab tshiab, cov hnab thiab cov cawv thiaj yuav kav ntev.”

Tim     10     lub     7     Hli     2023

Hnub Ob Lis Piam Kaum Plaub Nruab Xyoo A Nruab Lis Piam Xyoo I
Lectionary: 383

Zaj Nyeem Ib:   HP 28: 10-22a

10 Yas Kos sawv kev ntawm Npes Xas Npes mus, nws mus rau Has Laas teb.
11 Thaum nws mus txog ib qho chaw uas muaj chaw teev hawm, lub hnub twb poob qho lawm; nws thiaj nres nrhiav chaw pw rau ntawd; nws khaws ib lub pob zeb ntawm qhov chaw teev hawm los rau ncoo, ces nws pw tsaug zog nyob  ntawd.
12 Nws ua ib zag npau suav: Nws pom ib tug ntaiv, tus taw txhos rau hauv ntiaj teb, lub ntsis mus nto saum ntuj, hos Tswv Ntuj cov Tshiab nce thiab nqes mus mus los los ntawm tus ntaiv.
13 Ces txawn pom HUAB TAIS sawv ze ntawd thiab hais rau nws tias: "Kuv yog HUAB TAIS, yog koj yawg Has Nplas Has tus Tswv Ntuj, thiab yog His Xas Has tus Tswv Ntuj. Thaj av uas koj tau los pw no, kuv yuav muab rau koj thiab rau koj tsoom xeeb leej xeeb ntxwv.
14 Koj tsoom xeeb leej xeeb ntxwv yuav coob npaum li cov plua av nyob saum npoo ntiaj teb. Nyob hauv lawv, koj yuav nyob puv ntia mus rau sab hnub tuaj thiab sab hnub poob, mus rau sab qaum teb thiab sab qab teb huv tib si. Vim koj thiab koj tsoom xeeb leej xeeb ntxwv, mas tas txhua haiv neeg hauv ntiaj teb yuav tau txais txoj hmoov zoo.
15 Kuv yuav nrog koj nraim, thiab yuav saib xyuas koj nyob qhov txhia chaw uas koj yuav mus, thiab kuv yuav coj koj rov los nyob hauv lub teb chaws no. Kuv yuav tsis tso koj pov tseg mus txog thaum kuv tau ua raws li kuv tau cog lus rau koj tiav tas lawm."
16 Yas Kos tsim dheev nruab dab ntub los, nws hais tias: "HUAB TAIS nyob ntawm thaj chaw no tiag lau, tiam sis kuv twb tsis paub li!"
17 Yas Kos ntshai, ces nws hais tias: "Thaj chaw teev hawm no muaj hwj xyeej kawg nkaus! Yeej yog Tswv Ntuj lub tsev nyob thiab yog lub rooj ntug ntag!"
18 Tag kis, Yas Kos sawv ntxov ntxov los, nws muab lub pob zeb uas nws tau siv rau ncoo los teeb ua pej thuam, nws hliv roj ywg saum lub ntsis.
19 Nws tis npe rau thaj chaw ntawd hu ua Npes Thes. Hos yav tas los, mas lub nroog hu ua Lus Xaws no.
20 Yas Kos fiv yeem zoo li no: "Yog Tswv Ntuj nrog nraim kuv thiab saib xyuas kuv ntawm txoj kev uas kuv taug no, yog nws pub mov rau kuv noj, pub ris tsho rau kuv hnav,
21 yog kuv rov los txog kuv txiv tsev tsis raug xwv txheej dab tsi, mas HUAB TAIS yuav ua kuv tus Tswv Ntuj,
22 hos daim pob zeb uas kuv muab teeb ua pej thuam no yuav yog Tswv Ntuj qhov chaw nyob."

NPN   91: 1-2, 3-4a, 14-15ab

Txais: (2b) Kuv tus Tswv Ntuj, kuv tso siab lug rau koj.

Koj tus uas tsa tsev rau hauv tus Nyob Siab lub chaw nkaum,
Tus uas nyob nraim hauv tus Muaj Hwj Huam tus duab ntxoov ntxoo,
Koj hais rau HUAB TAIS tias: "Koj yog kuv lub chaw nkaum,
thiab kuv lub yeej ntsa zeb, koj yog kuv tus Tswv Ntuj, tus kuv tso siab rau.”

Txais: (2b) Kuv tus Tswv Ntuj, kuv tso siab lug rau koj.

Nws yog tus npo koj dim ntawm tus cuab noog lub vas,
yog  cawm koj ntawm tus mob aws tsis txuag siav.
Nws muab nws ob phab tis los vov koj.
Koj cia li khiav los nkaum hauv nws lub qab tis.

(2b) Kuv tus Tswv Ntuj, kuv tso siab lug rau koj.

Vim nws dai dhuam rau kuv, mas kuv yuav cawm nws,
Kuv yuav muab nws tso rau qhov chaw siab vim nws lees paub kuv lub npe.
Nws yuav hu txog kuv ces kuv yuav teb nws;
kuv yuav nrog nws nyob thaum nws raug txom nyem.

(2b) Kuv tus Tswv Ntuj, kuv tso siab lug rau koj.

As Les Lus Yas:   2 TMT 1: 10

Txais: As les lus yas, as les lus yas.

Yes Xus Pleev tus Cawm Peb tau rhuav txoj kev tuag pov tseg
thiab ua kom txoj sia tawm tuaj nyob hauv lub Moo Zoo.

Txais: As les lus yas, as les lus yas.

Ntawv Moo Zoo:   MT 9: 18-26

18 Thaum Yes Xus tseem tab tom hais lus rau lawv, muaj ib tug nom tuaj txog, nws txhos caug ntua ntawm Yes Xus, nws thov tias: "Kuv tus ntxhais txoj sia nyuam qhuav tu nrho lawm. Thov koj tuaj tsa tes rau saum nws, ces nws yuav rov muaj txoj sia."
19 Yes Xus sawv, nws lawv tus nom qab mus; nws cov thwj tim kuj mus thiab.
20 Muaj ib tug poj niam tsob ntshav tau kaum ob xyoos lawm, nws txav los ze ntawm Yes Xus nraub qaum, nws kov Yes Xus lub tw tsho.
21 Vim nws xav hauv siab tias: ‘Tsuav yog kuv tau kov nws lub tsho xwb, mas kuv yuav zoo.’
22 Yes Xus tig ntsia, nws pom tus poj niam, ces nws hais rau tus poj niam tias: "Me ntxhais, koj tso siab mog! Koj lub siab ntseeg cawm koj lawm." Txij ntawd los, tus poj niam cia li dim plaws ntawm tus mob lawm.
23 Thaum Yes Xus tuaj txog tus nom lub tsev, nws pom cov txiv tshuab raj thiab pom neeg coob coob ua ntxhov hnyo, Yes Xus hais tias:
24 "Nej tawm mus. Tus me ntxhais tsis tuag, nws tsaug zog xwb." Sawv daws luag Yes Xus.
25 Thaum lawv ntiab cov neeg tawm mus tas lawm, Yes Xus chaws mus hauv, nws tuav tus me ntxhais txhais tes, ces tus me ntxhais sawv tsees los.
26 Lub moo ntawd nrov mus thoob lub teb chaws ntawd.

Tim     11     lub     7     Hli     2023

Hnub Peb Lis Piam Kaum Plaub Nruab Xyoo A Nruab Lis Piam Xyoo I
Lectionary: 384

Yuav hwm:   LN Benedict, Thawj Tswj koom haum Txiv Tab Seeb(Abbot)

Zaj Nyeem Ib:   HP 32: 23-33

23 Thaum hmo ntuj, Yas Kos sawv, nws coj nws ob tug poj niam, nws ob tug ntxhais txib, thiab nws kaum ib tug me nyuam, lawv hla tus dej Yas Npos ntawm qhov chaw ntiav zoo hla.
24 Nws coj lawv hla tus dej, thiab coj tas puas tsav yam uas nws muaj nrog lawv hla dej mus rau sab tid tas tib si.
25 Tshuav Yas Kos tib leeg nyob ntawd xwb; hmo ntawd, muaj ib tug txiv neej nrog Yas Kos sib ntsuas zog ib hmos kaj ntug plaws.
26 Nws pom tias nws kov tsis yeej Yas Kos, ces nws ntaus Yas Kos lub qij txha ntawm ntsag thaum nkawd tab tom sib ntsuas zog, ua rau lub qij txha ntawd qis kiag.
27 Nws hais rau Yas Kos tias: "Koj tso kuv, twb kaj ntug lawm." Tiam sis Yas Kos teb tias: "Yog koj tsis foom hmoov zoo rau kuv mas kuv tsis tso koj li."
28 Tus txiv neej ntawd nug tias: "Koj hu li cas?" Yas Kos teb tias: " Yas Kos."
29 Nws hais ntxiv tias: "Luag yuav tsis hu koj ua Yas Kos ntxiv lawm, luag  yuav hu koj ua His Xas Lais, vim koj muaj zog tiv Tswv Ntuj thiab tiv neeg, thiab koj yeej lawm."
30 Yas Kos thov tias: "Thov koj qhia koj lub npe rau kuv." Tiam sis tus ntawd teb tias: "Vim li cas koj thiaj nug txog kuv lub npe?" Thaum ntawd kiag, nws foom hmoov zoo rau Yas Kos.
31 Yas Kos tis npe rau thaj chaw ntawd hu ua Pes Nus Es, nws hais tias: "Vim kuv tau pom Tswv Ntuj tim ntsej tim muag, tsis kav kuv txoj sia tseem nyob."
32 Thaum hnub tuaj, Yas Kos ncaim ntawm Pes Nws Es mus. Nws deeg pauv mus kev, vim nws lub ntsag.
33 Yog vim li no, cov His Xas Lais thiaj caiv tsis noj cov leeg nqaij ntawm ntsag uas tuav lub pob qij txha ntawm ncej puab los txog niaj hnub no, vim Huab Tais ntaus Yas Kos lub qij txha ntawm cov leeg nqaij ntawm ntsag.

NPN   17: 1bcd, 2-3, 6-7ab, 8b+15

Txais: (15a) Nyob hauv txoj kev ncaj, kuv yuav pom koj lub ntsej muag, Huab Tais.

HUAB TAIS, thov koj mloog ib zag lus kom plaub ncaj ncees;
Koj cuab pob ntseg rau kuv lub suab quaj,
Koj tig ntsej los rau kuv lo lus thov vim kuv di ncauj tsis hais lus dag.

Txais: (15a) Nyob hauv txoj kev ncaj, kuv yuav pom koj lub ntsej muag, Huab Tais.

Thov cia koj ua tus txiav txim rau kuv,
Vim koj qhov muag thiaj pom qhov ncaj.
Txawm koj sim kuv, koj tuaj tsom kuv siab thaum hmo ntuj,
txawm koj sim kuv nyob hauv hluav taws,
los koj yuav tsis pom dab tsi phem nyob hauv kuv.

Txais: (15a) Nyob hauv txoj kev ncaj, kuv yuav pom koj lub ntsej muag, Huab Tais.

Tswv Ntuj, kuv hu txog koj, vim koj yeej yuav teb kuv;
thov koj tig pob ntseg los rau kuv, thiab mloog kuv lo lus.
Thov qhib koj txoj kev khuv leej txaus qhuas rau peb pom,
koj yog tus cawm cov uas khiav mus deb ntawm lawv cov yeeb ncuab.

Txais: (15a) Nyob hauv txoj kev ncaj, kuv yuav pom koj lub ntsej muag, Huab Tais.

Thov koj txuag kuv nyob hauv koj phab tis qhov ntxoov,
Kuv yeej yuav tau pom koj lub ntsej muag nyob hauv txoj kev ncaj.
Thaum kuv tsim dheev los, kuv yuav zoo siab hlo tau nyob ze ntawm koj.

Txais: (15a) Nyob hauv txoj kev ncaj, kuv yuav pom koj lub ntsej muag, Huab Tais.

As Les Lus Yas:   ZAM 10: 14

Txais: As les lus yas, as les lus yas.

Huab Tais hais tias: Kuv yog tus zoo tswv zov yaj,
kuv paub kuv cov yaj, kuv cov yaj paub kuv.

Txais: As les lus yas, as les lus yas.

Ntawv Moo Zoo:   MT 9: 32-38

32 Luag coj ib tug neeg uas raug dab nplaig txhav tsis txawj hais lus tuaj cuag Yes Xus.
33 Yes Xus ntiab tus dab tawm, ces tus neeg nplaig txhav cia li hais tau lus. Tas tsoom sid qhuas kawg, lawv hais tias: "Tsis tau muaj dua tej yam zoo li no tshwm sim hauv haiv His Xas Lais ib zaug li."
34 Tab sis cov Fas Lis Xais hais tias: "Nws hu txog tus Tuam dab tuaj ntiab cov dab tawm."
35 Yes Xus mus ncig txhua cov nroog thiab txhua cov zos huv si, nws qhia sawv daws nyob hauv lawv cov tsev txoos, nws tshaj lub Moo Zoo txog lub Ceeb Tsheej, thiab nws kho sawv daws tej txiab xeeb thiab tej mob nkeeg zoo tas huv si.
36 Yes Xus pom tsoom neeg coob, nws lub siab hlub lawv, vim lawv qaug zog thiab tsis muaj tus coj, zoo li ib co yaj tsis muaj tswv zov li.
37 Yes Xus thiaj hais rau nws cov thwj tim tias: "Qoob loo ntau kawg, tab sis cov tub zog tsawg.
38 Nej thov tus Tswv qoob kom nws xa ib co tub zog tuaj sau nws cov qoob mas."

Tim      12     lub     7     Hli     2023

Hnub Plaub Lis Piam Kaum Plaub Nruab Xyoo A Nruab Lis Piam Xyoo I
Lectionary: 385

Zaj Nyeem Ib:   HP 41: 55-57; 42: 5-7a, 17-24a

55 Thaum, muaj kev tshaib plab nyob thoob Hais Nkws Tos teb, ces cov pej xeem tuaj quaj thov mov noj ntawm Fas Las Oos. Fas Las Oos hais rau cov neeg Hais Nkws Tos tias: "Nej mus cuag Yos Xes, nws hais dab tsi rau nej, mas nej ua li ntawd."
56 Vim tas ntiaj teb tshaib plab, ces Yos Xes qhib cov txhab nplej nyob qhov txhia chaw, thiab muag mov rau cov Hais Nkws Tos sawv daws, thaum uas muaj kev tshaib plab loj nyob Hais Nkws Tos teb.
57 Tas ntiaj teb kuj tuaj rau Hais Nkws Tos teb, tuaj muas nplej ntawm Yos Xes, vim tas ntiaj teb kuj tshaib plab loj thiab.
42:  5 Ces His Xas Lais cov tub thiaj tuaj mus muas nplej, lawv nrog sawv daws tuaj, vim nyob Kas Nas Has teb, muaj kev tshaib plab thiab.
6 Yos Xes yog tus tswj lub teb chaws, nws yog tus muag nplej rau cov neeg sawv daws. Yos Xes cov tij laug tuaj txog, lawv khoov ntsej muag ti av pe Yos Xes.
7a Thaum Yos Xes pom nws cov tij laug, nws rov paub lawv tam sis ntawd, tab sis nws tsis ua kom lawv paub nws li, nws hais lus nchav nchav rau lawv.
17 Ces nws muab lawv sawv daws kaw tau peb hnub hauv ib qho chaw.
18 Hnub peb, nws hais rau lawv tias: "Nej yuav ua li no, ces nej thiaj yuav cawm  nej txoj sia, vim kuv yog ib tug neeg hwm Tswv Ntuj:
19 Yog nej tau hais qhov tseeb tiag, mas nej yuav tso nej ib tug kaw nyob hauv qhov chaw no, hos cov mas nej rov qab mus, nej yuav ris nplej mus rau nej tsev neeg noj kom lawv txhob tshaib tshaib.
20 Tiam sis nej yuav tsum rov tuaj, nej coj nej tus kwv ntxawg tuaj rau kuv pom, thaum ntawd kuv paub tias nej hais tseeb lawm ces nej yuav tsis tuag." Ces lawv pom zoo ua raws li ntawd.
21 Tiam sis lawv rov sib hais rau lawv tias: "Muaj tseeb tiag, yog peb them lub txim txhaum uas thaud peb ua rau peb tus kwv xwb. Peb twb pom nws txoj kev txom nyem siab, nws thov peb, los peb tsis mloog nws li. Vim li ntawd peb thiaj raug kev nyuaj siab li no."
22 Lus Npees thiaj teb lawv tias: "Kuv puas tau hais rau nej tias kom nej txhob ua phem rau tus me nyuam no? Los nej tsis xav mloog kuv hais, ces zaum no luag thiaj nug peb txog nws cov ntshav."
23 Lawv sib tham, lawv tsis paub tias Yos Xes twb to taub lawv hais dab tsi lawm, vim muaj ib tug neeg nyob ntawd txhais lus rau Yos Xes.
24a Ces Yos Xes txav mus nyob nraim lawv, nws quaj twj ywm.

NPN   33: 2-3, 10-11, 18-19

Txais: (22) Huab Tais, thov koj khuv leej peb vim peb tso siab rau koj.

Nej ntaus nkauj nog ncas ua HUAB TAIS tsaug.
Nej ntaus nkauj nog ncas kaum txoj hlua cav txog nws!
Nej hu ib zag nkauj tshiab rau nws,
nej ua tib zoo qoj cov hlua ncas nrog suab qw zoo siab.

Txais: (22) Huab Tais, thov koj khuv leej peb vim peb tso siab rau koj.

HUAB TAIS ua kom cov hauj lwm tsoom kuj cuab npaj mus tsis taus,
Nws ua kom cov haiv neeg zaj tswv yim tsheej xeeb tsis tau.
Tiam sis cov hauj lwm HUAB TAIS npaj yuav nyob mus li,
Zaj tswv yim nws lub siab xav tau yuav nyob txheej dhau txheej.

Txais: (22) Huab Tais, thov koj khuv leej peb vim peb tso siab rau koj.

Ntsia saib, HUAB TAIS lub qhov muag saib ntsoov cov neeg hwm nws,
ntsia ntsoov cov uas tso siab rau nws lub siab zoo,
tias nws yuav npo lawv dim ntawm kev tuag,
thiab yuav txuag lawv thaum muaj kev tshaib plab.

Txais: (22) Huab Tais, thov koj khuv leej peb vim peb tso siab rau koj.

As Les Lus Yas:   MK 1: 15

Txais: As les lus yas, as les lus yas.

Tswv Ntuj lub Ceeb Tsheej los txog ze lawm :
nej cia li hloov siab thiab ntseeg txog lub Moo Zoo.

Txais: As les lus yas, as les lus yas.

Ntawv Moo Zoo:   MT 10: 1-7

1 Yes Xus hu nws kaum ob leeg thwj tim los ntawm nws. Nws muab hwj huam rau lawv kom lawv ntiab tau dab tawm, thiab kho tau txhua yam txiab xeeb txhua yam mob nkeeg kom zoo.
2 Kaum ob leeg Hauv Paus Xa Lus muaj npe li no :
3 Thawj tug, yog Xis Moos uas tseem hu nws ua Pob Zeb, As Nres, Xis Moos tus kwv, Yas Kos, uas yog Ntxes Npes Dais tub, Zam, uas Yas Kos tus kwv, Fis Lis Pos, thiab Npas Tos Los Mas Yos, Tos Mas, thiab Mas Tais, tus sau se; Yas Kos, uas yog As Fas Yos tub, thiab Thas Dais Yos ,
4 Xis Moos tus neeg Kas Nas Nias, thiab Yus Das Kas Lis Yaus, tus muab Yes Xus rau luag ntes.
5 Yes Xus xa kaum ob leeg no mus tshaj lub Moo Zoo, nws qhia lawv tias: “Nej tsis txhob mus rau hauv cov neeg teev pej kum dab, txhob mus hauv ib lub nroog Xas Mas Lias li.
6 Nej mus cuag cov yaj poob zoo hauv tsev neeg His Xas Lais tso.
7 Thaum nej taug kev, nej ceeb toom tias: “Lub Ceeb Tsheej saum ntuj tuaj txog ze ze lawm.”

Tim     13     lub     7     Hli     2023

Hnub Tsib Lis Piam Kaum Plaub Nruab Xyoo A Nruab Lis Piam Xyoo I
Lectionary: 386

XHLT:   LN Henry

Zaj Nyeem Ib:   HP 44: 18-21, 23b-29; 45:1-5

18 Yus Das txav los ntawm Yos Xes, nws hais rau Yos Xes tias: "Yawg Hlob, koj tus tub txib thov koj pub nws hais ib lo lus tseeb thiab thov koj tsis txhob npau taws rau koj tus tub txib, vim koj yeej zoo cuag li yog Fas Las Oos lawm!
19 Yawg Hlob tau nug koj cov tub txib hais tias: 'Nej txiv puas tseem nyob thiab nej puas tseem muaj ib tug kwv?'
20 Peb tau teb Yawg Hlob hais tias: 'Peb tseem muaj peb txiv uas nws laus laus lawm thiab peb tshuav ib tug kwv ntxawg uas yug thaum peb txiv twb laus lawm. Nws tus tij laug tuag lawm, cov tub uas nws niam yug mas tshuav nws tib leeg xwb, mas peb txiv hlub nws kawg!'
21 Ces koj tau hais rau koj cov tub txib tias: 'Nej mus coj nws tuaj rau kuv, kom kuv pom nws.'
23b 'Yog nej tus kwv ntxawg tsis nrog nej tuaj mas nej tsis txhob tuaj ntsib kuv ntxiv lawm.'
24 Ces thaum peb rov qab mus txog ntawm koj tus tub txib uas yog peb txiv, peb tau hais Yawg Hlob cov lus rau nws.
25 Thaum peb txiv rov hais rau peb tias: 'Nej rov qab mus muas me ntsis nplej dua.'
26 Peb tau teb nws tias: 'Peb mus tsis tau, yog peb tus kwv ntxawg nrog peb thiab mas peb thiaj mus tau, vim tus txiv neej ntawd tsuas txais peb, yog peb nrog peb tus kwv ntxawg xwb.'
27 Ces koj tus tub txib uas yog peb txiv tau hais rau peb tias: 'Nej twb paub lawm tias kuv poj niam tsuas yug ob tug me nyuam rau kuv xwb.
28 Ib tug ncaim kuv lawm, kuv tau hais tias: Ntshai nws raug muab dua ua daim tas lawm! ces kuv yeej tsis rov pom nws ib zaug ntxiv los txog tav no li.
29 Yog nej tseem coj tus no mus deb ntawm kuv, yog nws raug dab tsi phem, mas nej yuav ua kom kuv tu siab tuag, thiab ua kom kuv cov plaub hau dawb no mus nkag hauv qhov ntxa xwb.'”
45: 1 Ces Yos Xes nyiaj tsis taus ntxiv nyob ntawm nws cov neeg sawv daws xub ntiag, nws nthe rau lawv tias: "Nej kom sawv daws tawm mus." Sawv daws tawm tas tib si, ces Yos Xes thiaj qhia nws rau nws cov kwv tij.
2 Tab sis nws quaj nrov nrov ces tas cov neeg Hais Nkws Tos hnov, ces lub moo ntawd thiaj nrov mus txog hauv Fas Las Oos lub loog.
3 Yos Xes hais rau nws cov kwv tij tias: "Kuv yog Yos Xes! Kuv txiv puas tseem nyob?" Nws cov kwv tij teb tsis taus nws ib los li, vim lawv poob siab tag rau nws.
4 Nws hais rau nws cov kwv tij tias: "Nej txav los ze ze kuv mas!" Ces lawv txav los. Nws hais tias: "Kuv yog Yos Xes, nej tus kwv uas thaud nej muab muag rau Hais Nkws Tos teb lawm.
5 Tiam sis zaum no nej tsis txhob tu siab, nej tsis txhob khuv xim tias cas nej tau muag kuv rau ntawm no lawm. Twb yog Tswv Ntuj xa kuv ua nej ntej tuaj kom tau cawm neeg txoj sia xwb.”

NPN   105: 16-17, 18-19, 20-21

Txais: (5a) Nej cim ntsoov Huab Tais cov hwj huam nws tau ua tseg.

Thaum HUAB TAIS tso kev tshaib plab poob los rau saum lub teb chaws,
thiab ua kom tej qoob loo uas yug lawv txoj sia piam tas,
nws tso ib tug neeg mus ua lawv ntej,
yog Yos Xes, tus raug muag mus ua qhev.

Txais: (5a) Nej cim ntsoov Huab Tais cov hwj huam nws tau ua tseg.

Lawv muab khawb hlau khi nws ko taw
thiab muab saw hlau pav nws,
mus txog thaum muaj tuaj raws li nws tau ua saub hais tseg;
HUAB TAIS lo lus ua pov thawj tias nws yog tus hais lus tseeb. .

Txais: (5a) Nej cim ntsoov Huab Tais cov hwj huam nws tau ua tseg.

Tus vaj hu nws mus thiab tso nws tawm nkuaj,
tus tswj cov haiv neeg muab kev twj lij rau nws.
Tus vaj muab nws ua tus kav tus vaj lub vaj lub tsev
thiab tus tswj tas txhua yam uas yog tus vaj tug.

Txais: (5a) Nej cim ntsoov Huab Tais cov hwj huam nws tau ua tseg

As Les Lus Yas:   MK 1: 15

Txais: As les lus yas, as les lus yas.

Tswv Ntuj lub Ceeb Tsheej los txog ze lawm :
nej hloov siab mog, thiab nej cia li ntseeg txog lub Moo Zoo.

Txais: As les lus yas, as les lus yas.

Ntawv Moo Zoo:   MT 10: 7-15

Yes Xus hais rau nws cov thwj tim tias:
7 “Thaum nej taug kev, nej ceeb toom tias lub Ceeb Tsheej saum ntuj tuaj txog ze lawm.
8 Nej kho cov mob kom zoo, nej tsa cov tuag kom sawv rov los, nej kho cov mob ruas kom huv tuaj, nej ntiab dab phem kom khiav tawm. Nej tau txais dawb, nej yuav pub dawb rau luag.
9 Nej txhob muab kub, muab nyiaj, los muab txiaj toog qhwv rau hauv duav siv.
10 Txhob ris hnab taug kev, txhob nqa ob lub tsho, txhob nqa khau los nqa pas nrig li, vim tias tus tub zog tsim nyog txais nws pluas mov noj.”
11 “Nej mus hauv lub nroog los lub zos twg, nej nug kom tau ib tug neeg tsim nyog, nej nyob hauv nws tsev mus txog hnub nej rov qab.
12 Thaum nej chaws mus hauv ib lub tsev, nej foom kev thaj yeeb rau lub tsev ntawd.
13 Yog lub tsev ntawd tsim nyog txais, mas nej txoj kev thaj yee yuav nqes los nyob hauv lawv. Yog lub tsev ntawd tsis tsim nyog txais, ces nej txoj kev thaj yeeb  yuav rov los rau nej.
14 Yog leej twg tsis txais nej, thiab tsis mloog nej cov lus, mas nej cia li tawm ntawm lub tsev ntawd los lub nroog ntawd mus, thiab nej yuav nchos cov plua av uas lo nej ko taw tseg.
15 Kuv hais tseeb rau nej tias, txog Hnub Txiav Txim, teb chaws Xos Dos Mas thiab Nkos Mos Las yuav raug txim hnyav tsis cuag li lub nroog uas tsis txais nej ntawd.”

Tim     14     lub     7     Hli     2023

Hnub Rau Lis Piam Kaum Plaub Nruab Xyoo A Nruab Lis Piam Xyoo I
Lectionary: 387

Yuav Hwm LN Kateri Tekakwitha, Nkauj Tsim Txiaj

Zaj Nyeem Ib:   HP 46: 1-7, 28-30

1 His Xas Lais sau tas nrho nws lub cuab tam, nws sawv kev mus. Thaum nws mus txog Npes Xas Npes, nws muab ib co txim txi rau nws txiv His Xas Has tus Tswv Ntuj.
2 Nyob ntawd thaum hmo ntuj, Tswv Ntuj yees tawm los hu His Xas Lais tias: "Yas Kos! Yas Kos!" His Xas Lais teb tias: "Kuv nyob ntawm no!"
3 Tswv Ntuj rov hais tias: "Kuv yog Tswv Ntuj, yog koj txiv tus Tswv Ntuj. Koj tsis txhob ntshai mus nyob Hais Nkws Tos teb, vim nyob nrad, kuv yuav tsa koj ua ib haiv neeg loj.
4 Kuv yuav nrog koj mus nyob Hais Nkws Tos teb, thiab kuv yuav coj koj rov los nyob ntawm no, thaum Yos Xes kaw koj ob lub qhov muag lawm."
5 Ces Yas Kos sawv kev ntawm Npes Xas Npes mus. His Xas Lais cov tub muab lawv txiv Yas Kos thiab muab lawv cov poj niam me nyuam nce rau saum cov tsheb uas Fas Las Oos xa tuaj tos lawv txiv.
6 Lawv coj lawv cov tsiaj thiab lawv lub cuab tam uas lawv tsim tau nyob teb chaws Kas Nas Has huv tib si, ces lawv mus nyob Hais Nkws Tos teb; Yas Kos thiab tas nrho nws cov tub ki xeeb leej xeeb ntxwv nrog nws mus.
7 Nws cov tub, thiab nws cov tub cov tub, nws cov ntxhais thiab nws cov tub cov ntxhais, thiab tas nrho nws cov xeeb leej xeeb ntxwv huv tib si, nws coj nrog nws mus nyob Hais Nkws Tos teb.
28 His Xas Lais xa Yus Das ua ntej mus hais rau Yos Xes kom Yos Xes tuaj tos nws nyob xeev Nkaus Ses. Ces lawv tuaj mus rau ntawm xeev Nkaus Ses.
29 Hos Yos Xes npaj nws lub tsheb nees, ces nws caij tsheb tuaj tos nws txiv His Xas Lais nyob Nkaus Ses. Thaum nws pom nws txiv, nws puag nkaus nws txiv caj dab, ces nws quaj ntev loo puag rawv nws txiv.
30 His Xas Lais hais rau Yos Xes tias: "Zaum no, kuv tuag los tau lawm lau, vim kuv tau pom koj lub ntsej muag lawm, thiab pom tias koj tseem muaj txoj sia nyob.”

NPN   37: 3-4, 18-19, 27-28, 39-40

Txais: (39a) Txoj kev cawm tus neeg ncaj tuaj ntawm Huab Tais tuaj.

Nej tso siab rau HUAB TAIS thiab ua qhov zoo,
ces nej yuav tau nyob hauv lub teb chaws
thiab yuav tau noj tau haus tsis muaj kev txhawj.
Nej zoo siab nyob hauv HUAB TAIS mog,
ces nws yuav pub rau nej raws nej lub siab ntshaw.

Txais: (39a) Txoj kev cawm tus neeg ncaj tuaj ntawm Huab Tais tuaj.

HUAB TAIS saib ntsoov cov neeg siab ncaj lub neej,
lawv lub cuab tam yuav nyob mus li.
Lub caij txom nyem, lawv yuav tsis poob ntsej muag,
lub caij muaj kev tshaib plab, lawv yuav tau noj tsau.

Txais: (39a) Txoj kev cawm tus neeg ncaj tuaj ntawm Huab Tais tuaj.

Nej tso txoj kev phem tseg mus ua qhov zoo mog,
ces nej yuav nyob ruaj nreb mus li.
Vim HUAB TAIS nyiam txoj kev ncaj,
nws tsis tso cov neeg ntseeg nws pov tseg.

Txais: (39a) Txoj kev cawm tus neeg ncaj tuaj ntawm Huab Tais tuaj.

Txoj kev cawm tus neeg ncaj tuaj ntawm HUAB TAIS tuaj,
nws yog lawv lub chaw vam khom thaum lawv ntsib kev nyuaj.
HUAB TAIS pab lawv thiab cawm lawv dim,
nws tso lawv dim ntawm tus phem thiab cawm lawv,
vim lawv tuaj vam khom txog nws.

Txais: (39a) Txoj kev cawm tus neeg ncaj tuaj ntawm Huab Tais tuaj.

As Les Lus Yas:   ZAM 16: 13a, 14:26d

Txais: As les lus yas, as les lus yas.

Thaum Leej Tswv Yim muaj qhov tseeb tuaj txog,
nws yuav coj nej kom mus txog txhua yam tseeb
thiab yuav ua kom nej rov nco txog txhua yam kuv tau hais rau nej lawm.

Txais: As les lus yas, as les lus yas.

Ntawv Moo Zoo:   MT 10: 16-23

Yes Xus hais rau nws cov Hauv Paus Xa Lus tias:
16 “Kuv xa nej xws li ib co yaj mus nyob hauv nruab nrab ib co hma. Mas nej yuav ua neeg ntse xws li nab, thiab ua neeg siab ncaj xws li nquab.
17 Tiam sis nej yuav ceev faj txog tej tib neeg , vim lawv yuav mus kom nej rau cov txwj laus txiav txim, lawv yuav muab nej nplawm hauv lawv cov tsev txoos.
18 Lawv yuav cab nej mus rau cov nom tswv thiab cov vaj ntxwv vim kuv, kom nej tau ua tim khawv txog kuv nyob ntawm cov nom tswv thiab cov teev pej kum dab xub ntiag.
19 Thaum luag ntes nej mus rau lawv, mas nej tsis txhob txhawj tias yuav hais li cas thiab yuav teb dab tsi. Lub sij hawm ntawd, yuav muaj tus muab cov lus teb rau nej hais.
20 Li ntawd, tsis yog nej yuav hais lus, yog nej Txiv Leej Tswv Yim yuav hais lus nyob hauv nej.
21 Kwv tij yuav muab nws tus kwv tij rau luag tua, leej txiv yuav muab nws tus me nyuam rau luag. Tej me nyuam yuav sawv tiv niam thiab txiv, thiab yuav muab nkawd rau luag tua.
22 Sawv daws yuav ntxub nej vim kuv lub npe. Tab sis, tus twg ua siab ntev nyiaj kom txog qhov kawg, mas nws yuav txais kev cawm.
23 Yog luag caum nej ntes hauv lub nroog no, mas nej kav tsij khiav mus rau lwm lub. Kuv hais tseeb rau nej tias, thaum Neeg Leej Tub los txog, mas nej tseem khiav mus tsis tau txhua cov nroog hauv His Xas Lais teb.”

Tim     15     lub     7     Hli     2023

Hnub Xya Lis Piam Kaum Plaub Nruab Xyoo A Nruab Lis Piam Xyoo I
Lectionary: 388

Yuav Hwm  LN Bonaventure, ua Tswv Qhia thiab Kws cov Txuj Ntshiab

Zaj Nyeem Ib:   HP 49: 29-32; 50: 15-26a

29 Yas Kos ceeb toom rau nws cov tub tias: "Txog caij kuv yuav rov mus cuag kuv cov neeg lawm. Nej yuav muab kuv coj mus los nrog kuv phaj txiv phaj yawg nyob hauv lub qhov tsua hauv Es Plhoos tus neeg His Tis daim teb,
30 hauv lub qhov tsua uas nyob hauv daim teb Mas Pes Las, nyob ntsia ntsoov mus rau Mas Nples, hauv teb chaws Kas Nas Has, uas Has Nplas Has tau muas ntawm tus His Tis hu ua Es Plhoos los ua toj ntxas.
31 Has Nplas Has thiab nws poj niam Xas Las nkawd ob lub ntxa nyob ntawd, His Xas Has thiab Les Npes Kas nkawd kuj nyob ntawd; kuv kuj muab Les As faus rau ntawd lawm thiab.
32 Yog daim teb nrog lub qhov tsua uas thaud Has Nplas Has muas ntawm Hes Thes cov tub los."
50: 15 Thaum Yos Xes cov tij laug pom tias lawv txiv tuag lawm, lawv sib tham tias: "Tsam Yos Xes tseem muaj kev chim rau peb, ces nws yuav ua phem rau peb pauj qhov peb tau ua rau nws ne?"
16 Ces lawv xa lus mus rau Yos Xes tias: “Ua ntej koj txiv yuav tuag nws tau hais li no cia:
17 'Nej yuav hais rau Yos Xes tias: Kuv thov koj zam rau koj cov tij laug mog, thov koj zam lawv qhov ua tsis zoo thiab ua txhaum rau koj, vim lawv tau ua phem kawg nkaus rau koj lawm.’ Zaum no peb kuj thov koj thiab, thov koj zam txhaum rau koj txiv tus Tswv Ntuj cov tub txib tej krv ua phem thiab." Yos Xes kua muag poob nthav thaum lawv hais cov lus no rau nws.
18 Nws cov tij laug kuj tuaj ntsib nws kiag, lawv txhos caug ntawm nws ko taw pe nws tias: "Thov koj yuav peb ua koj cov tub txib."
19 Tiam sis Yos Xes teb rau lawv tias: "Nej tsis txhob ntshai! Kuv puas yuav txeeb ua Tswv Ntuj tau?
20 Qhov phem uas nej tau npaj ua rau kuv, mas Tswv Ntuj muab hloov ua ib qho zoo lawm, ces thiaj muaj tuaj raws li niaj hnub no, vim nws xav cawm ntau haiv neeg txoj sia.
21 Nyem no nej tsis txhob ntshai kiag li, kuv yog tus yuav yug nej kev noj kev haus thiab yug nej tej me tub me nyuam." Yos Xes nplij lawv thiab hais lus mos lus zoo rau lawv.
22 Ces Yos Xes thiab nws txiv tsev neeg thiaj nyob ruaj rau Hais Nkws Tos teb. Yos Xes nyob txog ib puas kaum xyoo.
23 Nws tau pom nws cov xeeb ntxwv, uas yog Es Fais cov tub mus txog peb tiam;  hos Mas Kis, uas yog Mas Nas Xes tus tub, nws cov tub kuj yug los rau Yos Xes puag tib si.
24 Thaum kawg, Yos Xes hais rau nws cov kwv tij tias: "Txog kuv lub caij tuag lawm, Tswv Ntuj yeej yuav tuaj xyuas nej thiab yuav coj nej nce rov qab mus nyob hauv lub teb chaws uas nws tau cog lus muab rau Has Nplas Has, His Xas Has thiab Yas Kos."
25 Ces Yos Xes kom His Xas Lais cov tub cog lus li no: "Thaum Tswv Ntuj tuaj coj nej mus, mas nej yuav tsum thauj kuv cov pob txha ntawm no nrog nej mus."
26a Thaum Yos Xes tuag, nws muaj ib puas kaum xyoo.

NPN   105: 1-2, 3-4, 6-7

Txais: (NPN 69:33) Cov neeg me, nej cia li zoo siab mog,
thov kom nej lub siab zoo hlo!

Nej ua HUAB TAIS tsaug, nej hu txog nws lub npe,
nej qhia nws cov hauj lwm loj rau cov haiv neeg paub.
Nej seev nkauj rau HUAB TAIS, nej hu nkauj cav txog nws ;
nej tshaj txog nws cov hwj huam loj tas huv si.

Txais: (NPN 69:33) Cov neeg me, nej cia li zoo sia mog,
thov kom nej lub siab zoo hlo!

Nej nrhiav koob meej rau nej nyob hauv nws lub npe,
cov uas muaj lub siab nrhiav Huab Tais, nej cia li zoo siab!
Nej nrhiav HUAB TAIS nyob hauv nws lub zog,
nej nrhiav tsob hwb nws tsis tseg.

Txais: (NPN 69:33) Cov neeg me, nej cia li zoo siab mog,
thov kom nej lub siab zoo hlo!

Has Nplas Has tsoom xeeb ntxwv, nej yog Huab Tais cov tub txib,
Yas Kos cov tub, nej yog cov Huab Tais tau xaiv.
HUAB TAIS nws yog peb tus Tswv Ntuj;
tas lub ntiaj teb coj raws nws tej lus txiav txim.

Txais: (NPN 69:33) Cov neeg me, nej cia li zoo siab mas,
kom nej lub siab zoo hlo!

As Les Lus Yas:   1 PZ 4: 14

Txais: As les lus yas, as les lus yas.

Yog nej raug luag cem vim Leej Pleev lub npe, mas nej txoj hmoov zoo,
vim Tswv Ntuj Leej Tswv Yim tuaj so nyob saum nej.

Txais: As les lus yas, as les lus yas.

Ntawv Moo Zoo:   MT 10: 24-33

Yes Xus hais rau nws cov thwj tim tias:
24 "Tus thwj tim tsis loj dua nws tus xib hwb, tus tub txib kuj tsis loj dua nws tus tswv.
25 Tus thwj tim yuav txaus siab heev yog nws yoog tau raws li nws tus xib hwb lawm. Tus tub txib kuj yuav txaus siab heev yog nws zoo caum tau nws tus tswv lawm. Yog lawv twb hu tus tswv tsev ua Npes Ntxes Npus, mas lawv haj yam yuav hu cov neeg hauv nws tsev neeg li ntawd!
26 Ua li mas nej txhob ntshai lawv! Vim tsis muaj ib yam npog rawv uas yuav tsis qhib tawm, tsis muaj ib yam zais ntshis uas yuav tsis tawm los rau sawv daws paub.
27 Tej yam uas kuv hais rau nej hauv qhov tsaus ntuj, nej yuav hais tawm thaum nruab hnub nrig. Hos yam nej hnov ntxhi rau hauv nej pob ntseg, mas nej yuav nce mus nyob saum tej ru tsev tshaj tawm.
28 Nej txhob ntshai cov neeg tua tau nej lub cev, tab sis lawv tua tsis tau nej tus plig. Nej yuav tsum ntshai tus muaj peev xwm rhuav tau nej tus plig thiab nej lub cev huv si nyob hauv lub pas hluav taws.
29 Ob tug noog tsig txhuv tsuas muab muag tau ib npib xwb los tsis yog? Tsis kav, tsis muaj ib tug poob hauv av tau, yog nej Txiv tsis tso lus.
30 Nej kuj ib yam, tab yog nej cov plaub hau, mas nej Txiv yeej suav tas huv si lawm.
31 Li ntawd, nej tsis txhob ntshai, nej muaj nqis tshaj tej pab tsig txhuv coob coob ua ke.
32 Leej twg lees paub kuv rau sawv daws, mas kuv kuj yuav lees paub nws rau kuv Txiv nyob saum Ntuj.
33 Hos tus tsis lees paub kuv rau sawv daws, mas kuv kuj yuav tsis lees paub nws rau kuv Txiv nyob saum ntuj thiab.”