COV ZAJ NYEEM NRUAB LIS PIAM XYOO I 2022-2023

Tim     17     lub     7     Hli     2023

Hnub Ob Lis Piam Kaum Tsib Nruab Xyoo A Nruab Lis Piam Xyoo I
Lectionary: 389

Zaj NYeem Ib:    KT 1: 8-14, 22

8 Muaj ib tug vaj tshiab sawv los kav Hais Nkws Tos teb, nws tsis paub dab tsi txog Yos Xes li.
9 Nws hais rau nws cov neeg tias: "Nej ntsia saib, cov neeg His Xas Lais ntawd coob heev tuaj thiab muaj zog tuaj ntau dua peb lawm.
10 Peb yuav tsum nrhiav ib zag tswv yim los yuam kom lawv tsis txhob huam vam ntxiv. Yog tsis ua li ntawd mas ntshai tsam thaum muaj tsov rog tuaj, lawv mus nrog cov yeeb ncuab koom siab tig ua rog rau peb, ces lawv yuav tawm hauv lub teb chaws no mus."
11 Li ntawd ces lawv tsa ib cov thawj saib hauj lwm los yuam cov His Xas Lais kom ua hauj lwm hnyav hnyav raws li lawv txib; cov His xas Lais thiaj yuav tsum txhim tsa lub nroog Pis Toos thiab Las Mas Xes rau Fas Las Oos tau siv ua chaw cia ntau yam.
12 Tab sis cov His Xas Lais yim raug txom nyem, lawv yim huam vam coob ntxiv xwb, lawv mus nyob puv qhov txhia chaw. Ces cov Hais Nkws Tos ntshai cov His Xas Lais.
13 Lawv muab cov His Xas Lais yuam ua qhev nruj nruj,
14 mas lawv lub neej txom nyem kawg nkaus, vim lawv ua hauj lwm hnyav hnyav xwb: lawv do av, puab thwv cib, thiab lawv ua ntau yam hauj lwm hnyav nyob nruab liaj nruab teb. Lawv raug ua qhev tuag nthi xwb.
22 Ces Fas Las Oos ceeb toom li no rau nws cov neeg tias: "Cov His Xas Lais yug tau pes tsawg leej tub, mas nej muab pov rau hauv tus niam dej kom tas, hos cov ntxhais mas, nej cia nyob tau."

NPN    124: 1b-3, 4-6, 7-8

Txais: (8a) Peb txoj kev pab yog nyob hauv Huab Tais lub npe.

Kom His Xais Lais yuav tsum hais tias:
Yog HUAB TAIS tsis txhob tuaj peb tog,
mas thaum cov neeg sawv tuaj ntaus peb,
lawv yeej yuav muab peb nqos ciaj lawm,
vim lawv npau taws rau peb cuag hluav taws kub.

Txais: (8a) Peb txoj kev pab yog nyob hauv Huab Tais lub npe.

Ntshai dej twb los nyab peb, twb phwj tuaj ntsawj peb mus tas;
ntshai dej sab siv twb huam tuaj vov peb tas.
cov dej nphau nphwv twb tuaj ntsawj peb must as.
Peb kav tsij cav lus zoo txog HUAB TAIS,
Vim nws tsis tau pub kom peb raug lawv xuas hniav xo peb!

Txais: (8a) Peb txoj kev pab yog nyob hauv Huab Tais lub npe.

Peb zoo puav tam li tus noog dim ntawm tus cuab ntxiab lub vas;
lub vas ntuag rhe, peb dim plaws lawm.
Peb qhov chaw vam khom yog nyob hauv HUAB TAIS lub npe,
nws yog tus tsim lub ntuj lub teb.

Txais: (8a) Peb txoj kev pab yog nyob hauv Huab Tais lub npe.
 
As Les Lus Yas:     MT 5: 10

Txais: As les lus yas, as les lus yas.

Cov tau txoj hmoov zoo yog cov raug luag hiam vim txoj kev ncaj,
Ntuj lub Ceeb Tsheej yog lawv tug.

Txais: As les lus yas, as les lus yas.

Ntawv Moo Zoo:     MT 10: 34—11:1

Yes Xus hais rau nws cov thwj tim tias:
34 "Nej txhob xav tias kuv tuaj yog coj kev thaj yeeb tuaj rau lub ntiaj teb. Kuv tsis coj kev thaj yeeb tuaj, kuv coj hniav ntaj hniav riam tuaj.
35 Kuv tuaj ua kom tub sawv los tiv txiv, ntxhais sawv los tiv niam, nyab sawv los tiv poj.
36 Ua li mas yus cov yeeb ncuab yog cov neeg nyob hauv yus tsev ntag.
37 Tus nyiam nws niam nws txiv dua kuv, mas nws tsis tsim nyog nrog kuv. Tus nyiam nws tej tub tej ntxhais dua kuv, mas nws tsis tsim nyog nrog kuv.
38 Tus tsis kwv nws tus ntoo cuam thiab tsis lawv kuv qab, mas nws tsis tsim nyog nrog kuv.
39 Tus nrhiav nws txoj sia, nws yuav ua nws txoj sia ploj, hos tus ua nws txoj sia ploj vim kuv, mas nws yuav nrhiav tau nws txoj sia.
40 "Tus txais nej, mas yog nws txais kuv. Tus txais kuv, mas yog nws txais Tus xa kuv tuaj.
41 Tus txais ib tug yaj saub, vim tus ntawd yog yaj saub, mas nws yuav txais koob haum phim tus yaj saub. Tus txais ib tug neeg ncaj, vim tus ntawd yog neeg ncaj, mas nws yuav txais koob haum phim tus neeg ncaj.
42 Yog leej twg pub txawm ib khob dej txiag xwb los xij rau ib tug neeg me li cov no haus, vim tus ntawd yog ib tug thwj tim, mas kuv hais tseeb rau nej tias, nws yeej yuav tsum tau txais nws qhov koob haum xwb."
11:  1 Thaum Yes Xus qhia nws kaum ob leeg thwj tim tas lawm, nws tso qhov chaw ntawd tseg, nws mus qhuab qhia thiab tshaj lub Moo Zoo rau hauv lawv cov nroog.

Tim     18     lub     7     Hli     2023

Hnub Peb Lis Piam Kaum Tsib Nruab Xyoo A Nruab Lis Piam Xyoo I
Lectionary: 390

XHLT:  LN Camillus nyob Lellis, ua Leej Choj

Zaj Nyeem Ib:    KT 2: 1-15a

1 Muaj ib tug txiv neej, uas yog Les Vis caj, nws mus yuav ib tug ntxhais kuj yog Les Vis caj ces thiab, los ua txij nkawm.
2 Tus poj niam muaj me nyuam, ces nws yug tau ib tug tub. Nws pom tias nws tus tub zoo nraug kawg, nws muab tus tub zais tau peb lub hlis.
3 Thaum nws zais tsis tau ntxiv lawm, nws npaj ib lub tawb xuas ncaug fiab, nws muab roj hmab dub thiab muab ciab ntoo leem zoo zoo rau. Nws tso tus me nyuam rau hauv lub tawb, nws coj lub tawb mus tso rau hauv ib koog tauj deg ntawm tus ntug niam dej.
4 Tus me nyuam tus muam hlob nyob tsis deb ntawd saib saib yuav muaj dab tsi tshwm sim rau tus me nyuam.
5 Thaum ntawd Fas Las Oos tus ntxhais nqes tuaj da dej hauv tus niam dej, nws cov ntxhais txib ncig ua si ntawm ntug dej. Tus ntxhais pom lub tawb ntab ntab hauv cov tauj deg, nws kom nws ib tug ntxhais txib mus muab los.
6 Nws muab qhib xyuas ces nws pom tus me nyuam, yog ib tug tub quaj quaj nyob hauv. Nws hlub tus me nyuam, nws hais tias: "Yog ib tug me nyuam tub Hes Nplaws."
7 Tus me nyuam tus muam tawm los hais rau Fas Las Oos tus ntxhais tias: "Koj puas xav kom kuv mus nrhiav ib tug poj niam Hes Nplaws tuaj pab koj pub mis rau tus me nyuam noj?"
8 Fas Las Oos tus ntxhais teb tias: "Koj mus nrhiav tuaj." Tus me ntxhais thiaj mus nrhiav tus me nyuam leej niam tuaj.
9 Fas Las Oos tus ntxhais hais tias: "Koj coj tus me nyuam no mus tu rau kuv, kuv yuav muab nqi zog rau koj." Ces tus poj niam coj tus me nyuam mus tu lawm.
10 Thaum tus me nyuam loj lawm, nws coj tus me nyuam rov tuaj rau Fas Las Oos tus ntxhais. Fas Las Oos tus ntxhais muab tus me nyuam los ua nws tus tub. Nws tis npe rau hu ua Mais Xes, nws hais tias: "Vim kuv tau npo nws hauv dej los."
11 Thaum Mais Xes loj tiav txiv lawm, muaj ib zaug, nws mus xyuas nws haiv neeg. Nws pom tej hauj lwm hnyav hnyav uas luag yuam lawv ua. Nws kuj pom ib tug Hais Nkws Tos tab tom muab nws ib tug kwv tij Hes Nplaws ntaus.
12 Nws ntsia ib ncig tsis pom muaj leej twg, nws txawm muab tus Hais Nkws Tos tua, thiab muab zais rau hauv cov suab puam.
13 Hnub tom qab, nws rov mus dua, nws pom ob tug neeg Hes Nplaws tab tom sib ntaus. Nws hais rau tus xub pib tias: "Tim li cas koj ntaus koj tus npawg?"
14 Tus ntawd teb tias: "Leej twg tsa koj ua txwj laus txiav txim rau wb? Koj puas xav muab kuv tua xws li koj tua tus Hais Nkws Tos thiab?" Ces Mais Xes ntshai, nws xav tau tias: "Ntshai sawv daws paub tas lawm."
15 Ces Fas Las Oos kuj hnov hais txog qhov ntawd thiab, nws nrhiav Mais Xes tua. Mais Xes thiaj khiav mus deb ntawm Fas Las Oos, nws khiav mus nyob Mas Dias teb.

NPN    69: 3, 14, 30-31, 33-34

Txais: (33) Nej tig mus nrhiav Huab tais thaum nej txom nyem,
ces nej yuav muaj txoj sia.

Kuv mus zom rau hauv lub hav iav muaj av nkos tob tob,
tsis muaj dab tsi ruaj rau kuv tsuj tiag taw.
Kuv tog rau hauv cov dej tob,
dej ceev ntsawj tuaj kuv kov tsis yeej.

Txais: (33) Nej tig mus nrhiav Huab tais thaum nej txom nyem,
ces nej yuav muaj txoj sia.

Ntawm kuv mas, HUAB TAIS, kuv teev ntuj thov txog koj
kom koj ua siab zoo rau kuv, Tswv Ntuj.
Koj muaj lub siab hlub loj tas nrho, thov koj teb kuv,
thov koj tuaj pab kuv tas mus li.

Txais: (33) Nej tig mus nrhiav Huab tais thaum nej txom nyem,
ces nej yuav muaj txoj sia.

Kuv poob rau txoj kev txom nyem thiab kev tu siab lawm,
Tswv Ntuj, thov kom koj txoj kev cawm txuag kuv cia.
Kuv yuav hu ib zag nkauj cav txog Tswv Ntuj lub npe,
thiab kuv yuav cav txog nws lub koob meej los ua nws tsaug.

Txais: (33) Nej tig mus nrhiav Huab tais thaum nej txom nyem,
ces nej yuav muaj txoj sia.

Cov neeg me, nej yuav pom thiab yuav zoo siab;
Nej cov uas nrhiav Tswv Ntuj, thov kom nej lub siab rov ciaj sia.
Vim HUAB TAIS mloog cov pluag lub suab thov;
nws tsis ntxub nws cov neeg uas raug luag yuam.

Txais: (33) Nej tig mus nrhiav Huab tais thaum nej txom nyem,
ces nej yuav muaj txoj sia.

As Les Lus yas:    NPN 95: 8

Txais: As les lus yas, as les lus yas.

Yog hnub no nej hnov nws lub suab,
Tsis txhob ua nej lub siab tawv ncauj mog.

Txais: As les lus yas, as les lus yas.

Ntawv Moo Zoo:    MT 11: 20-24

20 Yes Xus pib tsawm cov nroog uas tau pom nws ua hwj huam yees ntxwv ntau tshaj, tab sis lawv tsis hloov siab li.
21 “Kos Las Xis, koj txoj hmoov phem! Npes Xais Das, koj txoj hmoov phem! Vim tias, cov hwj huam yees ntxwv uas kuv tau ua nyob hauv neb, kheev lam yog ua nyob Tws Los thiab nyob Xis Doos, mas ob lub nroog ntawd twb hloov siab tas, twb npua ntaub tsaj thiab muab hmoov tshauv nphoo nkawd puag ntxov lawm.
22 Kuv hais meej rau neb tias, txog hnub txiav txim mas Tws Los thiab Xis Doos yuav raug txim sib dua neb.
23 Thiab koj, Kas Fas Naus, koj xav tias koj yuav sawv siab txij ntuj no lod? Koj yuav nqes lawm puag hauv tub tuag teb mog. Vim tias cov hwj huam yees ntxwv kuv tau ua nyob hauv koj, kheev lam yog ua nyob Xos Dos Mas, mas lub nroog ntawd twb tseem yuav nyob txog tav no.
24 Kuv hais meej rau koj, txog hnub txiav txim mas daim av Xos Dos Mas yuav raug txim sib dua koj mog."

Tim     19     lub     7     Hli     2023

Hnub Plaub Lis Piam Kaum Tsib Nruab Xyoo A Nruab Lis Piam Xyoo I
Lectionary: 391

Zaj Nyeem Ib:    KT 3: 1-6ab, 9-12

1 Mais Xes mus zov nws yawm txiv Zes Raus pab yaj; Zes Raus yog ib tug leej choj Mas Dias. Mais Xes coj cov yaj mus noj zaub dhau lub hav suab puam, ces nws mus txog lub roob Hos Les, uas yog Tswv Ntuj lub roob.
2 Nyob ntawd HUAB TAIS tus Tshiab yees tawm los rau Mais Xes pom nyob hauv ib co nplaim taws cig cig hauv ib tsob me nyuam ntoo. Mais Xes ntsia ntsoov pom tsob me nyuam ntoo ntawd yeej cig ntsa iab tab sis ua cas tsis txawj kug li.
3 Ces Mais Xes hais tias: "Kuv yuav tsum mus xyuas yam txawv txawv uas kuv pom ntawd saib yog vim dab tsi, ua cas tsob me nyuam ntoo tsis txawj kuh hnyiab li."
4 HUAB TAIS pom nws taug kev tuaj mus xyuas, ces Tswv Ntuj hu nws hauv tsob me nyuam ntoo tuaj tias: "Mais Xes, Mais Xes." Mais Xes teb tias: "Kuv nyob ntawm no."
5 Tswv Ntuj hais tias: "Koj txhob txav los ze ntawm no, hle koj nkawm khau ntawm koj ko taw, vim thaj chaw uas koj tsuj no yog ib thaj chaw ntshiab."
6ab Tswv Ntuj hais ntxiv tias: "Kuv yog koj cov yawg koob tus Tswv Ntuj, yog Has Nplas Has tus Tswv Ntuj, yog His Xas Has tus Tswv Ntuj, thiab yog Yas Kos tus Tswv Ntuj.
9 “Nyem no, cov His Xas Lais lub suab quaj nrov tuaj txog kuv lawm; thiab kuv kuj pom tias cov Hais Nkws Tos quab yuam lawv heev kawg.
10 Li ntawd, nyem no koj mus mog, kuv xa koj mus cuag Fas Las Oos, mus coj kuv haiv neeg uas yog His Xas Lais cov tub, tawm hauv Hais Nkws Tos teb los."
11 Mais Xes hais rau Tswv Ntuj tias: "Kuv yog leej twg, kuv thiaj yuav mus cuag  Fas Las Oos, thiab mus coj His Xas Lais cov tub tawm hauv Hais Nkws Tos teb los?"
12 Tswv Ntuj hais tias: "Kuv yuav nrog nraim koj; lub cim ntawm no yuav qhia rau koj kom koj paub tias yog kuv xa koj mus: Thaum koj coj haiv His Xas Lais tawm hauv Hais Nkws Tos teb los lawm, mas nej yuav teev hawm Tswv Ntuj nyob saum lub roob no."

NPN    103: 1b-2, 3-4, 6-7

Txais: (8a) Huab Tais lub siab zoo thiab khuv leej neeg.

Kuv tus ntsuj plig, koj cav txog HUAB TAIS mog;
kuv tus kheej tas nrho, koj cav txog nws lub npe ntshiab.
Kuv tus ntsuj plig, koj cav txog HUAB TAIS mog,
koj tsis txhob hnov qab nws tej kev zoo ib qho li.

Txais: (8a) Huab Tais lub siab zoo thiab khuv leej neeg.

Nws tau zam tas koj tej txhaum rau koj,
nws tau kho tas koj tej kev mob kev nkeeg kom zoo hlo.
Nws tau cawm koj txoj sia ntawm kev puas ntsoog,
nws tau muab nws txoj kev ua siab zoo thiab kev khuv leej rau koj ntoo.

Txais: (8a) Huab Tais lub siab zoo thiab khuv leej neeg.

HUAB TAIS muab kev ncaj rau cov raug luag tsuj, nws tsa lawv cai.
Nws tau qhia nws tej kev rau Mais Xes paub,
thiab cia nws cov hauj lwm rau tsoom His Xas Lais pom.

Txais: (8a) Huab Tais lub siab zoo thiab khuv leej neeg.

As Les Lus Yas:    MT 11: 25

Txais: As les lus yas, as les lus yas.

Kuv cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog lub Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo:    MT 11: 25-27

25 Lub caij ntawd, Yes Xus hais tias: "Txiv, kuv cav lus zoo txog koj, Huab Tais kav lub ntuj lub teb, vim koj zais tej yam ntawd rau cov neeg thoob tsib thiab cov neeg ntse, koj ho qhib rau cov neeg me paub.
26 Qhov tseeb, Txiv, koj lub siab yeej nyiam li ntawd.
27 Kuv Txiv muab tas ib puas tsav yam rau kuv. Tsis muaj leej twg paub Leej Tub, tsuas kawg Leej Txiv thiaj paub xwb; kuj tsis muaj leej twg paub Leej Txiv, tsuas kawg Leej Tub thiaj paub xwb, thiab tus uas Leej Tub pom zoo qhia rau kom paub xwb.”

Tim     20     lub     7     Hli     2023

Hnub Tsib Lis Piam Kaum Tsib Nruab Xyoo A Nruab Lis Piam Xyoo I
Lectionary: 392

XHLT:   LN Apollinaire, Tswv Qhia tuag ua Tim Khawv

Zaj Nyeem Ib:    KT 3: 13-20

13 Mais Xes hnov HUAB TAIS lub suab hais lus hauv tsob me nyuam ntoo cig cig tuaj, nws hais rau Tswv Ntuj tias: "Thaum kuv mus cuag cov tub ki His Xas Lais, thiab kuv hais rau lawv tias: 'Nej cov yawg koob tus Tswv Ntuj xa kuv tuaj pab nej,' yog lawv nug kuv tias: 'Nws lub npe hu li cas?' kuv yuav hais li cas rau lawv?”
14 Tswv Ntuj hais rau Mais Xes tias: "Kuv yog tus Kuv Yog." Tswv Ntuj hais ntxiv tias: "Koj yuav hais rau cov His Xas Lais li no: ‘Tus Kuv Yog xa kuv tuaj pab nej."
15 Tswv Ntuj tseem hais ntxiv rau Mais Xes tias: "Koj yuav hais li no rau cov tub ki His Xas Lais: ‘HUAB TAIS, uas yog nej cov yawg koob tus Tswv Ntuj, yog Has Nplas Has tus Tswv Ntuj, His Xas Has tus Tswv Ntuj thiab Yas Kos tus Tswv Ntuj xa kuv tuaj pab nej.’ Lub npe no yog kuv lub npe mus li ib txhis, thiab yog kuv lub npe rau txhua tiam neeg txheej dhau txheej.
16 Koj mus, koj hu cov txwj laus His Xas Lais tuaj sib sau ua ke, koj hais rau lawv tias: 'HUAB TAIS uas yog nej cov yawg koob tus Tswv Ntuj, yog Has Nplas Has tus Tswv Ntuj, His Xas Has tus Tswv Ntuj thiab Yas Kos tus Tswv Ntuj, tau yees tawm los rau kuv pom xyeem, nws hais rau kuv tias: Kuv tau tuaj xyuas nej, thiab tau pom txhua yam uas luag ua rau nej nyob Hais Nkws Tos teb lawm.
17 Ces kuv tau siab tias kuv yuav coj nej tawm hauv txoj kev txom nyem nyob Hais Nkws Tos teb los, mus nyob hauv cov neeg Kas Nas Has, cov His Tis, cov As Mos Lis, cov Pes Lis Xis, cov His Vis thiab cov Yes Npus Xis daim av, yog ib daig av uas muaj mis nyuj thiab zib mu ntws lug.’
18 Koj hais li no ces lawv yuav mloog koj cov lus. Ces koj thiab cov txwj laus His Xas Lais nej yuav mus cuag tus vaj Hais Nkws Tos, nej yuav hais rau nws tias: 'HUAB TAIS uas yog cov Hes Nplaws tus Tswv Ntuj tuaj xyuas peb lawm. Thov koj tso lus rau peb mus deb li peb hnub ke lawm hauv teb chaws suab puam, peb yuav mus txi peb tus HUAB TAIS Tswv Ntuj.'
19 Kuv paub zoo tias tus vaj Hais Nkws Tos yuav tsis tso nej mus yooj yim, yuav tsum muaj ib txhais tes muaj hwj huam yuam nws xwb, nws thiaj tso.
20 Vim li ntawd, kuv yuav tsa kuv txhais tes thiab yuav ua ntau yam hwj huam los ntaus Hais Nkws Tos teb, ces thaum kawg, tus vaj yuav tso nej mus.”

NPN    105: 1+5, 8-9, 24-25, 26-27

Txais: (8a) Huab Tais nco ntsoov nws lo lus nws tau cog mus ib txhis.
los:      As les lus yas.

Nej cav lus zoo ua HUAB TAIS tsaug, nej hu txog nws lub npe,
nej qhia nws cov hauj lwm rau txhua haiv neeg paub.
Nej nco ntsoov txog cov hwj huam loj uas nws tau ua,
nco ntsoov nws cov hwj huam txaus qhuas,
thiab cov lus txiav txim uas nws lub ncauj tau hais.

Txais: (8a) Huab Tais nco ntsoov nws lo lus nws tau cog mus ib txhis.
los:     As les lus yas.

Nws nco ntsoov mus li txog cov lus nws cog cia,
yog ib co lus nws cog ruaj rau txhiab tiam neeg.
Yog cov lus nws tau nrog Has Nplas Has cog,
thiab nws tau rov zeem tseeb rau His Xas Has.

Txais: (8a) Huab Tais nco ntsoov nws lo lus nws tau cog mus ib txhis.
los:     As les lus yas.

Nws ua kom nws haiv neeg huam vam coob tuaj lawm ntau,
thiab ua kom lawv muaj zog dua lawv cov yeeb ncuab,
uas nws ua kom lawv ntxeev siab los ntxub nws haiv neeg,
thiab los ua siab phem lim hiam rau nws cov tub txib.

Txais: (8a) Huab Tais nco ntsoov nws lo lus nws tau cog mus ib txhis.
los:     As les lus yas.

HUAB TAIS xa nws tus tub txib Mais Xes mus
thiab xa As Loos uas nws tau xaiv mus.
Nkawd ua Huab Tais cov cim muaj hwj xyeej nyob hauv lawv,
thiab ua hwj huam yees ntxwv nyob hauv Has lub teb chaws

Txais: (8a) Huab Tais nco ntsoov nws lo lus nws tau cog mus ib txhis.
los:     As les lus yas.

As Les Lus Yas:    MT 11: 28

Txais: As les lus yas, as les lus yas.

Huab Tais hais tias:
Tas nej sawv daws uas nej khwv thiab ris nra hnyav,
nej tuaj cuag kuv, mas kuv yuav cia nej so los siav.

Txais: As les lus yas, as les lus yas.

Ntawv Moo Zoo:    MT 11: 28-30

Yes Xus hais tias:
28 "Tas nej sawv daws uas nej khwv thiab ris nra hnyav, nej tuaj cuag kuv mog! Kuv yuav cia nej so los siav.
29 Nej txais kuv tus quab mus kwv, nej kawm ntawm kuv, vim kuv ua neeg me thiab tsis muab hlob; ces nej tus plig yuav nrhiav tau chaw so los siav.
30 Vim kuv tus quab kwv yooj yim, thiab kuv lub nra sib kha.”

Tim     21     lub     7     Hli     2023

Hnub Rau Liam Kaum Tsib Nruab Xyoo A Nruab Lis Piam Xyoo I
Lectionary: 393

Zaj Nyeem Ib:    KT 11: 10—12: 14

10 Mais Xes thiab As Loos nkawd ua ib cov hwj huam yees ntxwv loj nyob ntawm Fas Las Oos xub ntiag, tiam sis Huab Tais ua kom Fas Las Oos lub siab tawv qhawv, ces Fas Las Oos tsis kam tso cov His Xas Lais tawm ntawm nws lub teb chaws mus li.
12: 1 HUAB TAIS hais rau Mais Xes thiab As Loos nyob Hais Nkws Tos teb tias:
2 "Lub hlis no nej yuav muab suav ua thawj lub hlis hauv nej txoj kev xam nyoog, yuav yog lub ib hlis pib lub xyoo rau nej.
3 Neb hais rau ib tsoom His Xas Lais tias: Lub hlis no xiab kaum, mas nej txhua yim neeg nyias yuav tsum npaj nyias ib tug tsiaj me rau nyias tsev neeg, txhua lub tsev nyias yuav tsum npaj nyias ib tug tsiaj me.
4 Yog yim neeg twg tsawg dhau rau ib tug tsiaj me, mas lawv yuav mus nrog lwm yim neeg uas nyob ze lawv thiab yuav suav cov neeg kom coob txaus koom noj ib tug tsiaj me.
5 Tus tsiaj ntawd yuav tsum yog ib tug thav tsiaj muaj ib xyoos tsis muaj chaw xyeej li. Nej xaiv ib tug thav yaj los tau ib tug thav tshis los tau.
6 Nej yuav muab tso rau ib qho tos txog hnub xiab kaum plaub lub hlis no; hmo ntawd, tas tsoom His Xas Lais tuaj sib txoos ua ke, ces lawv yuav tua lawv cov tsiaj thaum tsaus ntuj lawm.
7 Lawv yuav cug cov ntshav coj mus pleev ob tug ncej puab rooj thiab pleev daim txiag tav saum lub qhov rooj nkag hauv lub tsev uas lawv noj tus tsiaj ntawd.
8 Hmo ntawd, lawv yuav noj tus tsiaj cov nqaij txhiab hauv hluav taws, lawv  yuav noj ntxuag ib co ncuav mov tsis xyaw poov xab, thiab ib cov txuj lom iab.
9 Lawv yuav tsis txhob noj nyoos los hau li, tiam sis yuav muab ci kheej nrog lub taub hau, cov tes taw thiab plab hnyuv huv si.
10 Nej tsis txhob tseg ib qho seem rau tag kis li; yog tag kis seem dab tsi, mas nej muab pov hlawv hauv hluav taws kom tas.
11 Nej yuav noj tus tsiaj ntawd zoo li no: Nej sia siv khov kho, nej rau khau thiab tuav nej rab pas nrig ntawm tes tib si, nej yuav noj tsuag tsuag noj nrawm nroos, vim yog HUAB TAIS hmo hla.
12 Hmo ntawd, kuv yuav hla mus thoob Hais Nkws Tos teb, kuv yuav ntaus cov tub hlob nyob Hais Nkws Tos teb huv si kom ntog tas, tsis hais neeg los tsiaj li; thiab kuv yuav txiav txim rau cov dab Hais Nkws Tos, kuv yog HUAB TAIS.
13 Hos cov ntshav yuav yog ib lub cim qhia tias nej nyob hauv cov tsev ntawd. Kuv pom cov ntshav, kuv yuav hla dhau plaws mus, ces nej yuav tsis raug qhov xwv txheej loj thaum kuv tuaj ntaus Hais Nkws Tos teb.
14 Hnub ntawd yuav yog ib hnub hmoov tsuj xeeb rau nej, nej yuav muab qee ua ib hnub cav txog HUAB TAIS mus txheej dhau txheej tiam dhau tiam; yuav yog ib txog cai nyob mus li rau nej coj kom tau cav txog HUAB Tais.    

NPN   116: 12-13, 15+16bc, 17-18

Txais: (13) Kuv yuav cev lub ntim cawm neeg,
thiab yuav hu txog HUAB TAIS lub npe.

Kuv yuav muab dab tsi los pauj
ib puas tsav yam zoo uas HUAB TAIS ua rau kuv ?
Kuv yuav cev lub ntim cawm neeg,
thiab yuav hu txog HUAB TAIS lub npe.

Txais: (13) Kuv yuav cev lub ntim cawm neeg,
thiab yuav hu txog HUAB TAIS lub npe.

HUAB TAIS saib cov uas ntseeg txog nws
lawv txoj kev tuag muaj nqes loj.
Kuv yog koj tus tub txib, yog koj tus ntxhais txib tus tub;
Koj tau daws cov hlua khi kuv lawm.

Txais: (13) Kuv yuav cev lub ntim cawm neeg,thiab yuav hu txog HUAB TAIS lub npe.

Kuv yuav cev ib co txim los ua koj tsaug,
thiab kuv yuav hu txog HUAB TAIS lub npe.
Kuv yuav pauj kuv lub yeem rau HUAB TAIS
nyob ntawm tas nws haiv neeg xub ntiag,

Txais: (13) Kuv yuav cev lub ntim cawm neeg,thiav yuav hu txog HUAB TAIS lub npe.

As Les Lus Yas:    ZAM 10: 27

Txais: As les lus yas, as les lus yas.

Huab Tais hais tias: Kuv cov yaj mloog kuv lub suab;
kuv paub kuv cov yaj, lawv raws nraim kuv qab mus.

Txais: As les lus yas, as les lus yas.

Ntawv Moo Zoo:    MT 12: 1-8

1 Muaj ib hnub Xas Npas Tos, Yes Xus mus hla hauv ib co teb npleg. Nws cov thwj tim tshaib plab, ces lawv pib de tej hnab nplej los noj.
2 Cov Fas Lis Xais pom li ntawd, lawv hais rau Yes Xus tias: "Saib, koj cov thwj tim ua tej yam txwv tsis pub ua hnub Xas Npas Tos!"
3 Yes Xus hais rau lawv tias: "Nej tsis tau nyeem txog qhov Das Vis ua thaum Das Vis thiab cov neeg nrog nws lawv tshaib plab,
4 ces lawv tau chaws mus hauv Tswv Ntuj lub tsev, thiab tau noj cov ncuav mov txi Ntuj, uas Das Vis thiab nws cov neeg noj tsis tau, kawg yog cov leej choj xwb thiaj noj tau lod?
5 Los nej puas tau nyeem nyob hauv Txoj Cai tias, hnub Xas Npas Tos, cov leej choj uas nyob hauv lub Tuam Tsev Teev Ntuj tsis caiv hnub Xas Npas Tos, los lawv tsis txhaum no?
6 Kuv hais rau nej tias: Nyob ntawm no, muaj ib yam loj dua lub Tuam Tsev Teev Ntuj.
7 Muaj lo Lus hais tias: ‘Qhov kuv xav tau yog txoj kev khuv leej tsis yog thaj txi Ntuj;’ yog nej paub lo lus no lub ntsiab, mas nej yuav tsis muab txim rau cov neeg tsis txhaum ntawd.
8 Vim tias, Neeg Leej Tub yog tus tswv ntawm hnub Xas Npas Tos."

Tim      22     lub     7     Hli     2023

Hnub Xya Lis Piam Kaum Tsib Nruab Xyoo A Nruab Lis Piam Xyoo I

Koob Tsheej Hwm LN Mab Liab Mas Ntas Las
Lectionary: 603

Zaj Nyeem Ib:    KWV TXHIAJ 3: 1-4b

Tus nkauj nyab hais tias:
1 Ntuj teb tag hmo, kuv nyob saum kuv lub lav,
kuv nrhiav tus uas kuv lub siab nyiam.
Kuv nrhiav nws, tab sis nrhiav tsis tau.
2 Ua li mas, kuv yuav sawv mus ncig hauv lub nroog,
yuav nrhiav ntawm tej kev, ntawm tej tshav puam.
Kuv nrhiav tus uas kuv lub siab nyiam;
kuv nrhiav nws, tab sis nrhiav tsis tau.
3 Cov tub zov keeb uas ncig mus ncig los hauv lub nroog,
lawv ntsib kuv: "Nej puas pom tus kuv lub siab nyiam?"
4 Kuv nyuam qhuav mus dhau plaws ntawm lawv xwb,
ces kuv nrhiav tau tus kuv lub siab nyiam.

Los:     2 KLN 5: 14-17

Cov kwv tij nkauj muad:
14 Leej Pleev txoj kev nyiam rub peb lub siab, vim peb ntseeg tias
ib tug neeg xwb tau tuag hloov sawv daws, ces sawv daws kuj tau nrog nws tuag thiab.
15 Leej Pleev yeej tau tuag hloov sawv daws tiag, ua li mas kom cov neeg tseem ciaj nyob txhob ua neej rau lawv tus kheej ntxiv lawm, tiam sis kom lawv ua neej rau tus uas tau tuag hloov lawv, thiab nws tau sawv rov los lawm.
16 Vim li ntawd, txij nyem no mus, mas peb yuav tsis paub ib tug neeg twg zoo li thaum nws ua neej nyob sab nqaij tawv lawm; txawm tias yav dhau los, peb paub Leej Pleev thaum nws tseem nyob hauv nws lub cev nqaij, los nyem no peb tsis pom nws zoo li ntawd lawm.
17 Li no, yog leej twg nyob hauv Leej Pleev, mas nws yog ib tug uas raug tsim dua tshiab lawm, tus neeg qub dua tas mus, tshuav tus tshiab lawm xwb

NPN    63: 2, 3-4, 5-6, 8-9

Txais: (2b) Kuv tus ntsuj plig nqhis txog koj, Huab Tais, kuv tus Tswv Ntuj.

Tswv Ntuj, koj yog kuv tus Tswv Ntuj, yog tus kuv nrhiav;
kuv lub cev seev yees txog koj, kuv tus plig nqhis txog koj,
zoo puav tam li av qhuav qhawv, nkig nkuav, tsis tau dej.

Txais: (2b) Kuv tus ntsuj plig nqhis txog koj, Huab Tais, kuv tus Tswv Ntuj.

Kuv tau tig mus saib koj nyob hauv lub tuam tsev ntshiab,
kom kuv pom koj lub hwj huam thiab koj lub hwj chim.
Vim koj txoj kev ua siab zoo muaj nqis dua txoj sia,
mas kuv di ncauj yuav cav txog koj lub koob meej.

Txais: (2b) Kuv tus ntsuj plig nqhis txog koj, Huab Tais, kuv tus Tswv Ntuj.

Kuv yuav cav txog koj tas kuv sim neej,
kuv yuav tsa tes thov ntuj hu txog koj lub npe.
Kuv tus plig yuav txaus siab hlo li tus tau noj nqaig noj hno,
kuv di ncauj yuav hom khaj, kuv lub ncauj yuav qhuas txog koj.

Txais: (2b) Kuv tus ntsuj plig nqhis txog koj, Huab Tais, kuv tus Tswv Ntuj.

Koj yog tus pab kuv;
kuv qw zoo siab nyob hauv koj phab tis qhov ntxoov.
Kuv tus ntsuj plig dai dhuam rau ntawm koj,
koj txhais tes xis hwj kuv nraim.

Txais: (2b) Kuv tus ntsuj plig nqhis txog koj, Huab Tais, kuv tus Tswv Ntuj.

As Les Lus Yas

Txais: As les lus yas, as les lus yas.

Mab Liab, koj qhia rau peb saib, koj pom dab tsi ntawm kev?
Kuv pom Leej Pleev sawv rov los muaj hwj chim; kuv pom nws lub ntxa qhuav.

Txais: As les lus yas, as les lus yas.

Ntawv Moo Zoo:     ZAM 20: 1-2, 11-18

1 Thawj hnub pib lub lis piam, thaum sawv ntxov ntuj tsis tau kaj, Mab Liab Mas Ntas Las mus tom ntxa. Nws pom daim txiag zeb tshem ntawm lub ntxa lawm.
2 Ces Mab Liab khiav mus cuag Xis Moos Pob Zeb thiab lwm tus thwj tim, uas yog tus Yes Xus nyiam. Nws hais rau nkawd tias: "Lawv nqa Huab Tais tawm hauv ntxa  lawm, peb tsis paub xyov lawv coj nws mus tso rau qhov twg lawm."
11 Mab Liab sawv ze ntawm lub ntxa sab nraud, nws quaj. Thaum nws quaj, nws khoov xauj hauv lub ntxa.
12 Ces nws pom ob tug tshiab hnav dawb zaum ntawm qhov chaw uas lawv tso Yes Xus lub cev, ib tug zaum pem taub hau, ib tug zaum nram ko taw.
13 Ob tug Tshiab hais rau Mab Liab tias: "Tus poj niam, ua cas koj quaj?" Mab Liab hais rau nkawd tias: "Lawv nqa kuv tus Huab Tais lawm, kuv tsis paub lawv muab nws tso rau qhov twg li."
14 Hais li ntawd tas, Mab Liab tig ntsia tom qab, nws pom Yes Xus sawv ntsug nyob ntawd, tab sis nws tsis paub tias yog Yes Xus.
15 Yes Xus hais rau Mab Liab tias: "Tus poj niam, ua cas koj quaj? Koj nrhiav leej twg?" Mab Liab xav tias yog tus tu lub vaj, ces Mab Liab hais rau nws tias: "Txiv hlob, yog koj nqa nws mus lawm no, koj qhia kuv saib koj muab nws tso rau qhov twg, kuv yuav mus nqa nws los."
16 Yes Xus hais rau Mab Liab tias: "Mab Liab!" Mab Liab tig hlo mus,
nws ua lus Hes Nplaws hais tias: "Las Npus Nis!" Txhais tias: Xib Hwb.
17 Yes Xus hais rau Mab Liab tias: "Koj txhob tuav kuv, vim kuv tseem tsis tau nce mus cuag Leej Txiv. Tiam sis koj mus cuag kuv cov kwv tij, koj hais rau lawv tias: ‘Kuv yuav mus cuag kuv Txiv thiab nej Txiv, mus cuag kuv tus Tswv Ntuj thiab nej tus Tswv Ntuj.’"
18 Mab Liab Mas Ntas Las thiaj los tshaj rau cov thwj tim tias: "Kuv pom Huab Tais lawm,” thiab nws hais Yes Xus cov lus rau lawv.

Tim     24     lub     7     Hli     2023

Hnub Ob Lis Piam Kaum Rau Nruab Xyoo A Nruab Lis Piam Xyoo I
Lectionary: 395

XHLT:   LN Sharbel Makhluf, ua Leej Choj

Zaj NYeem Ib:   KT 14: 5-18

5 Thaum lawv hais rau tus vaj Hais Nkws Tos tias cov His Xas Lais twb khiav tas lawm, mas Fas Las Oos thiab nws cov tub txib hloov siab, lawv hais tias: "Peb ua dab tsi li ntawd? Peb tso cov His Xas Lais mus ces yog peb tso lawv dim kom lawv txhob tau ua peb cov hauj lwm xwb."
6 Ces Fas Las Oos npaj nws lub tsheb rog nees thiab sau nws cov tub rog nrog nws mus.
7 Nws coj rau pua lub tsheb rog nees, uas yog cov zoo tshaj, thiab tas cov tsheb rog nees nyob Hais Nkws Tos teb tib si nrog nws mus; muaj ib co thawj tub rog tsav  txhua lub tsheb.
8 HUAB TAIS ua kom Fas Las Oos, uas yog tus vaj Hais Nkws Tos, lub siab tawv qhawv tuaj, ces nws sawv kev mus caum cov His Xas Lais uas lawv tau ntsej muag tab meeg tawm hauv lub teb chaws mus lawm.
9 Cov Hais Nkws Tos mus caum tau cov His Xas Lais ntawm ntug dej hiav txwv, uas lawv tseem tsa tsev tsam phooj so nyob ntawd; Fas Las Oos cov nees, cov tsheb rog, cov tsav tsheb thiab cov tub rog tuaj txog, yog ze ntawm Pis Has His Los, nyob ua ntej ntawm Npas Xes Foos.
10 Thaum Fas Las Oos tuaj txog ze lawm, cov His Xas Lais tsa muag ntsia pom cov Hais Nkws Tos tuaj caum lawv, mas cov His Xas Lais ntshai kawg, lawv quaj hu HUAB TAIS.
11 Thiab lawv hais rau Mais Xes tias: "Puas yog vim nyob Hais Nkws Tos teb tsis muaj qhov ntxa rau peb, koj thiaj li coj peb los tuag rau hauv teb chaws suab puam no? Koj coj peb tawm Hais Nkws Tos teb los ua dab tsi?
12 Thaum nyob Hais Nkws Tos teb, peb tsis tau hais rau koj lod? Tias: ‘Cia peb nyob peb, cia peb ua cov Hais Nkws Tos qhev twj ywm.’ Yog peb nyob ua lawv qhev twj ywm yuav zoo dua tuaj tuag nyob teb chaws suab puam no."
13 Mais Xes hais rau lawv tias: "Nej tsis txhob ntshai mas! Nej nyob ruaj nreb ces nej yuav pom HUAB TAIS cov hwj huam loj uas nws yuav ua pab nej hnub no, vim cov Hais Nkws Tos uas nej pom hnub no, nej yuav tsis pom ib zaug ntxiv lawm.
14 HUAB TAIS yuav ntaus rog thaiv nej, hos nej, mas nej tsuas nyob twj ywm xwb."
15 HUAB TAIS hais rau Mais Xes tias: "Vim li cas nej thiaj hu txog kuv? Koj hais rau cov His Xas Lais kom lawv rov sawv kev mus ntxiv.
16 Koj yuav tsa koj rab pas thiab xyab koj txhais tes rau saum dej hiav txwv, koj yuav faib dej ua ob sab, kom tsoom His Xas Lais tau taug kev qhuav qhawv hla mus.
17 Kuv yuav ua kom cov Hais Nkws Tos lub siab tawv qhawv, ces lawv yuav caum cov His Xas Lais qab mus thiab, ces kuv yuav nto koob meej vim Fas Las Oos thiab nws cov tub rog, nws cov tsheb rog thiab nws  cov tsav tsheb.
18 Cov Hais Nkws Tos thiaj yuav paub tias kuv yog HUAB TAIS, thaum kuv tau koob meej vim Fas Las Oos thiab nws cov tsheb rog thiab nws cov tsav tsheb lawm."

NPN:    KT 15: 1bc-2, 3-4, 5-6

Txais: (1b) Peb cav txog Huab Tais vim nws tau ua kom nws nto koob meej lawm.

Kuv hu nkauj cav txog HUAB TAIS, vim nws muaj kev yeej nto koob meej loj,
nws tau muab tus nees thiab lub tsheb nees pov rau hauv hiav txwv.
HUAB TAIS yog kuv lub zog, thiab kuv lub peev xwm, nws tau cawm kuv dim.
Nws yog kuv tus Tswv Ntuj, kuv cav txog nws,
nws yog kuv txiv tus Tswv Ntuj, kuv qhuas txog nws

Txais: (1b) Peb cav txog Huab Tais vim nws tau ua kom nws nto koob meej lawm.

HUAB TAIS yog ib tug tseem tub rog, nws lub npe yog HUAB TAIS.
Nws muab Fas Las Oos cov tsheb rog thiab cov tub rog pov rau hauv hiav txwv.
Nws cov thawj tub rog tseem ceeb raug Dej Hiav Txwv Liab
muab npog nkaus tas tib si.

Txais: (1b) Peb cav txog Huab Tais vim nws tau ua kom nws nto koob meej lawm.

Cov dej nphau nphwv los nyab lawv tas,
Lawv tog rau hauv qab thu xws li tej lub pob zeb.
Huab Tais, koj sab tes xis muaj hwj huam loj tas nrho,
Huab Tais, koj sab tes xis ua kom yeeb ncuab puas nstoog tas.

Txais: (1b) Peb cav txog Huab Tais vim nws tau ua kom nws nto koob meej lawm.

As Les Lus yas:    NPN 95: 8

Txais: As les lus yas, as les lus yas.

Hnub no, yog nej hnov nws lub suab,
Txhob ua nej lub siab tawv ncauj mog.

Txais: As les lus yas, as les lus yas.

Ntawv Moo Zoo:    MT 12: 38-42

38 Ib co Kws Ntawv Ntshiab thiab ib co Fas Lis Xais hais rau Yes Xus tias: "Xib Hwb, peb xav kom koj ua ib lub cim rau peb pom."
39 Yes Xus teb rau lawv hais tias: "Tiam neeg phem thiab fav xeeb lawv taij ib lub cim, tab sis yuav tsis muaj ib lub cim rau lawv pom, lub cim lawv yuav pom kawg yog Yaj Saub Yos Nas lub cim xwb.
40 Ib yam li Yos Nas tau nyob peb hnub peb hmos hauv tus vaj ntses lub plab, Neeg Leej Tub kuj yuav nyob hauv plawv av peb hnub peb hmos thiab.
41 Thaum txog Hnub Txiav Txim, cov neeg nyob Nis Nis Vas yuav nrog tiam neeg no sawv rov los, lawv yuav muab txim rau tiam neeg no, vim thaum Yos Nas ntuas lawv, lawv hloov siab. Hos nyob ntawm no twb muaj loj dua Yos Nas!
42 Thaum txog Hnub Txiav Txim, tus poj vaj nyob Qab Teb kuj yuav nrog phaj neeg no sawv rov los, thiab yuav muab txim rau lawv, vim nws tuaj tim npoo ntiaj teb kawg tuaj mloog Xas Los Moos cov lus thoob tsib. Hos nyob ntawm no, twb muaj loj dua Xas Los Moos!”

Tim     25     lub     7     Hli     2022

Hnub Peb Lis Piam Kaum Rau Nruab Xyoo A Nruab Lis Piam Xyoo I

Hmoov Tsuj Xeeb Hwm LN Yas Kos, tus Hauv Paus Xa Lus
Lectionary: 605

Zaj Nyeem Ib: 2 KLN 4: 7-15

Cov kwv tij nkauj muad:
7 Peb khaws yam muaj nqis loj no cia rau hauv tej lub hub av,
kom lub hwj huam loj ntawd yog tuaj ntawm Tswv Ntuj tuaj, tsis yog tawm ntawm peb los.
8 Peb raug kev tsim txom nyob hauv txhua yam, tab sis peb tsis raug yuam;
txawm peb tsis to taub, los peb tsis tas kev cia siab.
9 Peb raug luag hiam, tab sis Ntuj tsis tso peb pov tseg;
peb raug luag ntaus peb vau hlo, tab sis peb tsis raug luag rhuav.
10 Peb mus txog qhov twg, peb ris rawv Yes Xus txoj kev tuag nyob hauv peb lub cev,
kom xwv Yes Xus txoj sia tawm tuaj nyob hauv peb lub cev thiab.
11 Txawm peb muaj txoj sia los peb yeej niaj hnub yuav raug kev tuag vim Yes Xus,
kom xwv Yes Xus txoj sia tawm tuaj nyob hauv peb lub cev uas txawj tuag.
12 Li ntawd txoj kev tuag lis rawv nws txoj hauj lwm nyob hauv peb,
hos txoj sia lis rawv nws txoj hauj lwm nyob hauv nej.
13 Li ntawd ces peb sawv daws muaj tib lub tswv yim ntseeg xwb, raws li ntawv sau tseg tias: ‘Kuv ntseeg, kuv thiaj tau hais lus.’ Peb kuj ib yam, peb ntseeg, ces peb thiaj hais lus.
14 Peb paub tseeb tias, tus tau tsa Huab Tais Yes Xus sawv rov los, nws kuj yuav tsa peb
nrog Yes Xus sawv rov los, thiab yuav coj peb nrog nej mus nyob ze nws.
15 Tas txhua yam peb ua yog ua los pab nej xwb, kom lub txiaj ntsim nplua mias
uas Ntuj nchuav los rau saum ib co neeg coob zuj zus yuav ua kom
txoj kev ua Ntuj tsaug muaj ntau ntws lug tuaj, ces Tswv Ntuj yuav muaj hwj chim loj.

NPN 126: 1bc-2ab, 2cd-3, 4-5, 6

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

Thaum HUAB TAIS coj cov neeg hauv Xis Yoos mus nyob txim rov los,
peb zoo li ib co neeg ua npau suav.
Ces peb lub ncauj muaj suab luag nqhua,
peb tus nplaig qw nkauj zoo siab.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

Tej pej kum cuab hais nroo ntws tias :
"HUAB TAIS ua tej yam loj tas nrho rau lawv!"
HUAB TAIS yeej tau ua tej yam loj rau peb tiag,
peb zoo siab kawg nkaus.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

HUAB TAIS, thov koj ua kom peb rov vam meej tuaj,
xws li dej sab siv huam nyob teb chaws suab puam.
Cov neeg tseb nplej ntxuag kua muag,
lawv yuav sau nplej ntxuag kev zoo siab.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

Thaum mus, lawv quaj kua muag poob,
vim lawv ris cov seev noob,
thaum rov los, lawv hu nkauj zoo siab,
vim lawv ris cov res nplej tshiab los.

Txais: (5) Cov neeg tseb nplej ntxuag kua muag yuav sau nplej ntxuag kev zoo siab.

As Les Lus Yas: ZAM 15: 16

Txais: As les lus yas, as les lus yas.

Huab Tais hais tias: Kuv xaiv nej tawm ntawm ntiaj teb los
kom nej mus txi ib co txiv uas yuav nyob ruaj.

Txais: As les lus yas, as les lus yas.

Ntawv Moo Zoo: MT 20: 20-28

20 Ntxes Npes Dais ob tug tub leej niam nrog nws ob tug tub txav los ze Yes Xus,
nws txhos caug ntua thov ib yam ntawm Yes Xus.
21 Yes Xus hais rau nws tias: “Koj xav tau dab tsi?” Leej niam hais rau Yes Xus tias: “Thov koj cia kuv ob tug tub no, ib tug zaum ntawm koj sab xis, ib tug zaum ntawm koj sab laug nyob hauv koj lub Ceeb Tsheej.”
22 Yes Xus teb tias: “Nej tsis paub qhov nej thov. Neb puas haus taus lub ntim uas kuv yuav haus?” Nkawd teb tias: “Wb haus taus.”
23 Yes Xus hais rau nkawd tias: “Kuv lub ntim, mas neb yuav haus, tab sis qhov yuav tau zaum ntawm kuv sab xis thiab sab laug, tsis yog kuv yuav muab rau neb; kuv Txiv tau npaj qhov ntawd rau leej twg, mas yog leej twg tug."
24 Kaum leej thwj tim hnov cov lus thov ntawd, lawv npau taws rau nkawd ob kwv tij.
25 Ces Yes Xus hu lawv kom txav los ze nws, nws hais tias: “Nej paub tias cov thawj tswj tsoom kuj cuab lawv kav pej xeem nruj; cov loj ua kom tsoom pej xeem pom tias lawv muaj peev xwm tswj neeg tiag.
26 Tab sis nyob hauv nej, mas yuav tsis txhob muaj li ntawd;
leej twg xav ua tus loj nyob hauv nej, mas nws yuav ua nej tus tub txib.
27 Leej twg xav ua tus thawj nyob hauv nej, mas nws yuav ua nej tus tub qhe.
28 Yog vim li ntawd, Neeg Leej Tub tsis yog tuaj nyob ntiaj teb no kom luag tsob hwb nws,
nws tuaj kom tau tsob hwb sawv daws, thiab muab nws txoj sia los ua nqi txhiv coob leej.”

Tim     26     lub     7     Hli     2023

Hnub Plaub Lis Piam Kaum Rau Nruab Xyoo A Nruab Lis Piam Xyoo I
Lectionary: 397

Yuav Hwm  LN Joachim thiab LN Anna, Mab Liab Niam thiav Txiv

Zaj Nyeem Ib:    KT 16: 1-5, 9-15

1 Tas soom His Xas Lais sawv kev ntawm Es Lis mus, lawv mus txog rau lub hav suab puam Xees, nyob nruab nrab ntawm Es Lis thiab lub roob Xis Nais, yog hnub tim kaum tsib, lub hli ob suav txij hnub lawv tawm Hais Nkws Tos teb los lawm.
2 Tas tsoom His Xas Lais cem cem yws yws Mais Xes thiab As Loos nkawd nyob hauv teb chaws suab puam.
3 Cov His Xas Lais hais rau nkawd tias: "Kheev lam HUAB TAIS txhais tes twb tua peb tuag tas nyob Hais Nkws Tos teb lawm mas, thaum ntawd peb zaum ncig tej lauj kaub nqaij thiab peb muaj mov noj tsau plab npo! Neb coj peb los nyob hauv lub hav suab puam no, yog coj kom peb sawv daws los tuag tshaib tas xwb!"
4 Ces HUAB TAIS hais rau Mais Xes tias: "Kuv yuav ua kom mov poob saum ntuj los rau nej noj. Niaj tag kis, cov neeg yuav tawm mus khaws kom txaus rau lawv noj hnub ntawd xwb. Kuv xav sim lawv li ntawd, kuv thiaj yuav paub tias lawv puas mloog kuv cov lus los tsis mloog.
5 Hnub rau, thaum lawv mus khaws cov mov lawv yuav nqa los tsev, mas cov mov ntawd yuav tsum ntau npaum li cov lawv niaj hnub khaws ob npaug."
9 Mais Xes hais rau As Loos tias: "Koj hais rau tas tsoom His Xas Lais tias: Nej cia li txav los ze ntawm HUAB TAIS xub ntiag, vim nws tau hnov nej cov lus yws lus cem lawm."
10 Thaum As Loos hais lus rau tas tsoom His Xas Lais, lawv tig mus ntsia tom sab hav suab puam, lawv pom HUAB TAIS lub hwj chim tawm los nyob saum tauv huab.
11 HUAB TAIS hais lus rau Mais Xes, nws hais tias :
12 "Kuv tau hnov cov His Xas Lais tej lus yws lus cem lawm. Koj hais li no rau lawv: ‘Thaum yav tsaus ntuj zuag, nej yuav tau nqaij noj, thaum kaj ntug, nej yuav tau mov noj kom tsau plab, ces nej yuav paub tias kuv HUAB TAIS yog nej tus Tswv Ntuj."
13 Ces thaum tsaus ntuj, muaj ib co yij ya tuaj tsaws puv thaj chaw lawv nyob, hos thaum sawv ntxov, muaj ib txheej lwg poob los vov ib ncig thaj tsam lawv nyob.
14 Thaum cov lwg ntawd qhuav tas, ces txawm pom ib co ua tsig daws zoo li ib co te,nyob saum npoo av.
15 Thaum cov His Xas Lais pom li ntawd, lawv sib nug zom zaws tias: "Cov ntawd yog dab tsi?" Vim lawv yeej tsis paub tias yog dab tsi tiag. Mais Xes hais rau lawv tias: "Cov ntawd, yog cov mov uas HUAB TAIS muab pub rau nej noj.”

NPN    78: 18-19, 23-24, 25-26, 27-28

Txais: (24b) Huab Tais muab cov mov poob saum ntuj los rau lawv noj.

Lawv sim Tswv Ntuj nyob hauv lawv nruab siab,
lawv taij kom nws muab cov mov uas lawv tshaib nqhis txog rau lawv noj.
Lawv hais lus thuam Tswv Ntuj tias :
"Tswv Ntuj puas muaj peev xwm rau tau
ib rooj mov nyob hauv teb chaws suab puad?”

Txais: (24b) Huab Tais muab cov mov poob saum ntuj los rau lawv noj.

Tsis kav nws txib cov txheej ntuj saud,
thiab nws qhib cov qhov rooj ntug.
Ces nua kom mov mas nas poob li nag los rau lawv noj;
nws muab qaum ntuj cov mov rau lawv.

Txais: (24b) Huab Tais muab cov mov poob saum ntuj los rau lawv noj.

Tib neeg tau noj tsoom Tshiab cov mov,
nws xa txhiam laj txhiam xws rau lawv tau noj seem noj sos.
Nws ua kom nthwv cua toob fab tshuab tuaj nyob saum ntuj,
Nws lub hwj huam ua kom cua tuaj naj fab tuaj.

Txais: (24b) Huab Tais muab cov mov poob saum ntuj los rau lawv noj..

Nws ua kom nqaij poob li nag los rau lawv zoo li ib cov plua tshauv.
Nws ua kom muaj noog coob npaum cov suab puam ntawm ntug dej ntuj,
los tsaws puv lawv tej chaw ua si, thiab ncig lawv tej tsev tsam phooj.

Txais: (24b) Huab Tais muab cov mov poob saum ntuj los rau lawv noj.

As Les Lus Yas

Txais: As les lus yas, as les lus yas.

Cov noob nplej yog Tswv Ntuj lo lus, Leej Pleev yog tus tseb;
Txhua leej uas los cuag nws yuav ciaj nyob mus li.

Txais: As les lus yas, as les lus yas.

Ntawv Moo Zoo:    MT 13: 1-9

1 Hnub ntawd, Yes Xus tawm hauv tsev mus zaum ntawm ntug dej ntuj.
2 Tej pab neeg coob coob tuaj ntsauv nws, ces nws nce mus zaum hauv ib lub nkoj, hos tas tsoom neeg sawv nyob ntawm ntug dej.
3 Yes Xus ua paj lug qhia lawv ntev loo, nws hais li no: "Tus tseb noob tawm mus tseb cov noob.
4 Thaum nws tseb, muaj ib co noob poob ntawm ntug kev, noog ya tuaj khaws tas huv si lawm.
5 Ib co noob poob rau hauv cov av pob zeb, nyob ntawd tsis muaj av ntau, ces cov noob tuaj kaus sai, vim av tsis tob.
6 Thaum hnub tuaj, tshav ziab cov yub tuag tas, vim tsis muaj cag ces cov yub qhuav tas.
7 Tseem muaj ib co noob poob rau hauv cov pos. Pos hlob tuaj laum cov yub tas.
8 Hos muaj ib co noob poob rau hauv thaj av zoo, cov noob ntawd txi tau txiv, tej lub noob txi ib puas lub ntxiv, tej lub txi rau caum lub, tej lub txi peb caug lub.
9 Leej twg muaj pob ntseg, kom nws yeej meem mloog."

TIM     27     LUB     7     HLI     2023

Hnub Tsib Lis Piam Kaum Rau Nruab Xyoo A Nruab Lis Piam Xyoo I
Lectionary: 398

Zaj Nyeem Ib:    KT 19: 1-2, 9-11, 16-20b

1 Thaum pib lub hli peb uas tsoom tub ki His Xas Lais tau tawm Hais Nkws Tos teb los lawm, thawj hnub ntawd lawv thiaj los txog lub teb chaws suab puam Xis Nais.
2 Lawv tau sawv kev ntawm Les Fis Dis los, ces lawv los txog lub hav suab puam ntawm roob Xis Nais, lawv tsa tsev nyob hauv lub hav suab puam: Cov His Xas Lais tsa tsev rau ntawm hauv ntej lub taw roob.
9 HUAB TAIS hais rau Mais Xes tias: "Kuv yuav tuaj ntsib koj hauv ib tauv huab ntom nti, kom thaum tsoom pej xeem hnov kuv nrog koj hais lus, ces lawv thiaj yuav ntseeg koj tas mus li." Ces Mais Xes hais tsoom pej xeem cov lus rau HUAB TAIS.
10 HUAB TAIS hais rau Mais Xes tias: "Koj mus ntsib tsoom pej xeem, koj hais rau lawv kom hnub no thiab tag kis, lawv yuav tsum tu lawv kom lawv dawb huv,  lawv yuav tsum ntxhua lawv tej ris tsho kom huv si,
11 lawv yuav tsum ua tas puas tsav yam kom tiav ua ntej hnub peb, vim hnub peb, HUAB TAIS yuav nqes los rau saum lub roob Xis Nai, rau tsoom pej xeem sawv daws qhov muag ntsia ntsoov.”
16 Ces hnub peb thaum sawv ntxov, xob quaj nroo ntws thiab xob laim liab pes vog, muaj ib tauv huab tuab ntom nti ntsauv lub roob, hnov ib lub suab hom nrov loj kawg, ua kom nyob hauv lub yeej, tsoom pej xeem sawv daws ntshai tshee na.
17 Ces Mais Xes hais kom sawv daws tawm hauv yeej mus, yuav mus ntsib Tswv Ntuj; sawv daws thiaj mus nyob nram taw roob.
18 Lub roob Xis Nais ncho pa lug, vim HUAB TAIS nqes nyob hauv hluav taws los rau saud. Pa taws ncho lug cuag li tawm hauv ib lub qhov txos tuaj, hos tas lub roob co qeeg nkaws ua zog koog.
19 Hnov lub suab hom nrov loj zuj zus loj zuj zus tuaj, thaum Mais Xes hais lus rau Tswv Ntuj, hos Tswv Ntuj teb hauv xob quaj tuaj.
20 Thaum HUAB TAIS nqes los nyob saum lub roob Xis Nais, saum lub ncov roob, mas HUAB TAIS hu Mais Xes kom mus cuag nws saum lub ncov roob.

NPN:    DN 3: 52, 53, 54, 55, 56

Txais: (52b) Peb cav txog koj peb qhuas txog koj tas mus li!

Huab Tais, peb phaj txiv tus Tswv Ntuj, thov kom koj nto koob meej,
Koj yog tus tsim nyog cav txog tsim nyog qhuas txog
tshaj lwm tus, tas mus ib txhis;
Kom koj lub npe ntshiab muaj hwj chim nto koob meej,
koj uas tsim nyog cav txog thiab qhuas txog tshaj cov, mus tiam dhau tiam.

Txais: (52b) Peb cav txog koj peb qhuas txog koj tas mus li!

Kom koj nto koob meej nyob hauv koj lub tuam tsev muaj hwj chim nsthiab,
Koj yog tus tsim nyog cav txog thiab qhuas txog tshaj cov, tas mus ib txhis.

Txais: (52b) Peb cav txog koj peb qhuas txog koj tas mus li!

Kom koj nto koob meej nyob saum koj lub theej kiab hauv koj lub ceeb tsheej,
Koj yog tus tsim nyog cav txog thiab qhuas txog tshaj cov, tas mus ib txhis.

Txais: (52b) Peb cav txog koj peb qhuas txog koj tas mus li!

Kom koj nto koob meej, koj tus zaum saum koj lub theej kiab
uas txawb saum cov kes lus npis, tsom rau hauv cov thu tob;
Koj yog tus tsim nyog cav txog thiab qhuas txog tshaj cov, tas mus ib txhis.

Txais: (52b) Peb cav txog koj peb qhuas txog koj tas mus li!

Kom koj nto koob meej nyob saum lub qab ntuj ntsuab saum ntuj,
Koj yog tus tsim nyog cav txog thiab muaj hwj chim tas mus ib txhis.

Txais: (52b) Peb cav txog koj peb qhuas txog koj tas mus li!

As Les Lus Yas:    MT 11: 25

Txais: As les lus yas, as les lus yas.

Kuv cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog Ntuj Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo:    MT 13: 10-17

10 Cov thwj tim txav los ze Yes Xus, lawv hais rau nws tias: "Vim li cas koj thiaj ua paj lug hais lus rau tsoom neeg?"
11 Yes Xus teb rau lawv tias: "Vim Ntuj pub kom nej paub txog tej yam tob hauv Ntuj lub Ceeb Tsheej, tab sis Ntuj tsis pub kom cov ntawd paub.
12 Tus uas twb muaj lawm, mas Ntuj yuav pub rau nws, ces nws yuav muaj ntau kawg. Hos ntawm tus tsis muaj, ces Ntuj tseem yuav thau qhov nws muaj tawm mus thiab.
13 Vim li ntawd, kuv thiaj ua paj lug hais rau lawv: vim tias, lawv ntsia los lawv tsis pom, lawv mloog los lawv tsis hnov thiab tsis to taub li.
14 Ces thiaj muaj raws li cov lus uas Yaj Saub His Xais xub hais tseg txog lawv tias: ‘Nej pob ntseg hnov, los nej yuav tsis to taub li;
nej ntsia, tab sis nej yuav tsis pom li.
15 Haiv neeg no lub siab qhwv dhau, lawv pob ntseg tsis hnov lus zoo li,
lawv qi qhov muag nti, vim lawv ntshai tsam lawv qhov muag pom,
tsam lawv pob ntseg hnov, tsam lawv lub siab to taub,
ces lawv yuav tsum hloov siab, thiab kuv yuav kho tau lawv zoo.’
16 Hos nej, mas nej qhov muag tau hmoov zoo, vim nej qhov muag pom kev, thiab nej pob ntseg tau hmoov zoo, vim nej pob ntseg hnov lus.
17 Kuv hais tseeb rau nej, cov yaj saub thiab cov neeg siab ncaj thaud coob leej ntshaw pom yam uas nej pom, tab sis lawv tsis tau pom, ntshaw hnov yam uas nej hnov, tab sis lawv tsis tau hnov.”

Tim     28     lub     7     Hli     2023

Hnub Rau Lis Piam Kaum Rau Nruab Xyoo A Nruab Lis Piam Xyoo I
Lectionary: 399

Zaj Nyeem Ib:    KT 20: 1-17

1 Tswv Ntuj qhia cov lus no tas tib si, nws hais tias:
2 "Kuv yog HUAB TAIS, koj tus Tswv Ntuj, kuv yog tus tau coj koj tawm ntawm Hais Nkws Tos teb los, ntawm lub tsev yuam koj ua qhev los.
3 Koj yuav tsis txhob muaj dua lwm tus tswv ntuj dhau ntawm kuv lawm.
4 Koj yuav tsis txhob txaug tej tug duab mlom los rau koj teev, uas zoo li tej yam nyob saum lub ntuj siab saud, los zoo li tej yam nyob hauv qhov qis hauv ntiaj teb no, los zoo li tej yam nyob hauv cov dej hauv qab daim npoo av.  
5 Koj yuav tsis txhob pe cov mlom ntawd, txhob tsob hwb lawv, vim kuv HUAB TAIS, koj tus Tswv Ntuj, yog ib tug Tswv Ntuj muaj khib; cov uas ntxub kuv, mas kuv muab phaj txiv lub txim txhaum rau lawv cov me nyuam ris, mus txog tiam peb tiam plaub huv tib si.  
6 Hos kuv yuav ua zoo rau cov uas nyiam kuv thiab mloog kuv tej lus qhia mus txog txhiab tiam neeg.
7 Koj yuav tsis txhob hu txog koj tus HUAB TAIS Tswv Ntuj lub npe mus ua tsis zoo, vim HUAB TAIS yuav tsis zam txim rau tus neeg uas tuav txog nws lub npe mus ua tsis zoo.
8 Koj yuav nco ntsoov muab hnub xas npas tos ua ib hnub ntshiab.
9 Koj yuav khwv ua hauj lwm rau hnub thiab ua tas txhua yam dej num nyob hauv rau hnub ntawd.
10 Tab sis hnub xya yog hnub xas npas tos rau koj tus HUAB TAIS Tswv Ntuj, mas koj yuav tsis txhob ua ib yam hauj lwm dab tsi li; koj thiab koj tus tub, koj tus ntxhais, koj tus tub txib, koj tus ntxhais txib, koj cov tsiaj txhu, tus qhua uas tuaj nyob sab hauv koj cov rooj loog, nej sawv daws yuav caiv.
11 Vim tias HUAB TAIS tau ua hauj lwm rau hnub los tsim lub ntuj, lub ntiaj teb, lub hiav txwv, thiab tas puas tsav yam nyob hauv, tiam sis hnub xya nws so, vim li ntawd HUAB TAIS tau foom hmoov zoo rau hnub xya, nws muab hnub xya qee ua ib hnub ntshiab.
12 Koj yuav hwm koj niam thiab koj txiv, koj thiaj yuav tau nyob ntev niaj ntau xyoo hauv lub teb chaws uas koj tus HUAB TAIS Tswv Ntuj muab pub rau koj.
13 Koj yuav tsis txhob tua neeg.
14 Koj yuav tsis txhob zes luag txij luag nkawm.
15 Koj yuav tsis txhob ua tub sab tub nyiag.
16 Koj yuav tsis txhob lam ua tim khawv liam rau luad tej.
17 Koj yuav tsis txhob ntshaw txeeb luag vaj luag tsev. Koj yuav tsis txhob ntshaw txeeb luag tus poj niam, luag tus tub txib, tus ntxhais txib, tus nyuj los tus luj, los ib yam dab tsi uas yog luag tug li."

NPN    19: 8, 9, 10, 11

Txais: (Zam 6:68c) Huab Tais, koj muaj cov lus pub txoj sia nyob mus li.

HUAB TAIS txoj cai zoo tas nrho,
nws ntxiv siav rau tus ntsuj plig;
HUAB TAIS cov cai lij choj tsim nyog ntseeg,
nws ua kom tus neeg ruam thoob tsib tuaj.

Txais: (Zam 6:68c) Huab Tais, koj muaj cov lus pub txoj sia nyob mus li.

HUAB TAIS cov lus qhuab qhia yog lus ncaj,
ua kom neeg muaj kev zoo siab.
HUAB TAIS lo lus meej kawg nkaus,
ua kom qhov muag pom kev.

Txais: (Zam 6:68c) Huab Tais, koj muaj cov lus pub txoj sia nyob mus li.

Kev hwm HUAB TAIS yog txoj kev dawb huv,
kev hwm Huab Tais yuav nyob mus li.
HUAB TAIS cov lus txiav txim yog lus tseeb,
Txhua lo lus nws txiav yog qhov ncaj.

Txais: (Zam 6:68c) Huab Tais, koj muaj cov lus pub txoj sia nyob mus li.

Nws cov lus txiav txim, tsim nyog ntshaw dua kub,
Tsim nyog ntshaw dua ib txhab tseem kub,
qab zib dua cov kua zib ntawm cov paj,
los cov zib mu ntawm daim nas muv.

Txais: (Zam 6:68c) Huab Tais, koj muaj cov lus pub txoj sia nyob mus li.

As Les Lus Yas:    LK 8: 15

Txais: As Les Lus Yas, as les lus yas.

Cov uas muaj ib lub siab dav coj raws lo lus, lawv tau hmoov zoo
lawv txi taus txiv vim lawv ua siab ntev coj lo lus tsis tso tseg.

Txais: As Les Lus Yas, as les lus yas..

Ntawv Moo Zoo:    MT 13: 18-23

Yes Xus hais rau nws cov thwj tim tias:
18 “Nej mloog zaj paj lug hais txog tus tseb nplej mas.
19 Lub noob poob ntawm ntug kev yog tus neeg uas tau hnov Lo Lus qhia txog lub Ceeb Tsheej, tiam sis nws tsis to taub, ces tus Phem tuaj txog, nws muab yam uas tseb rau hauv tus ntawd lub siab lawm nyiag tshem tawm mus.
20 Lub noob poob rau hauv cov av pob zeb, yog tus neeg uas thaum nws hnov Lo Lus, nws zoo siab hlo txais thaum ntawd.
21 Tab sis nws tsis muaj cag nyob hauv nws, ces tsuas kav ib nyuag ntu xwb, thaum muaj kev txom nyem, los muaj kev raug luag hiam vim Lo Lus, ces nws tso tseg tam sis ntawd.
22 Lub noob uas poob rau hauv cov pos, yog tus uas hnov Lo Lus, tab sis ntiaj teb tej kev txob xeeb, thiab nyiaj txiag tej kev ntxias laum Lo Lus, ces Lo Lus txi tsis taus txiv.
23 Lub noob uas poob rau hauv cov av zoo, yog tus uas hnov Lo Lus, nws to taub Lo Lus ntawd, ces nws txi txiv; nws txi ib puas lub, los rau caum lub, los peb caug lub txiv.”

Tim      29     lub     7     Hli     2023

Hnuv Xya Lis Piam Kaum Rau Nruab Xyoo B Nruab Lis Piam Xyoo I
Lectionary: 400

Yuav Hwm LN Mas Tas, Mab Liab Mas Ntas Las, thiab Las Ntxas Los

(Yog xav xaiv cov zaj nyeem rau LN Mas Tas, Mab Liab Mas Ntas Las thiab Las Ntxas Los, mas mus saib nyob nram qab)

Zaj Nyeem Ib:    KT 24: 3-8

3 Thaum Mais Xes los hais HUAB TAIS cov lus thiab cov cai qhia rau tsoom pej xeem, mas tas sawv daws koom ib lub suab teb tias: "Peb yuav ua tas txhua yam raws li Huab Tais tau hais."
4 Mais Xes muab HUAB TAIS cov lus sau cia tas tib si, ces tag kis nws sawv ntxov ntxov los, nws txhim ib lub thaj txi Ntuj rau ntawm taw roob thiab kaum ob tug ncej zeb rau kaum ob lub xeem His Xas Lais.
5 Ces nws xa ib co tub hluas His Xas Lais mus hlawv tsiaj txi Ntuj, lawv coj tej tus thav nyuj mus ua txim thov kev thaj yeeb txi rau HUAB TAIS.
6 Mais Xes cug cov ntshav, nws muab ib nrab hliv rau hauv tej lub phiab, hos ib nrab hliv ywg lub thaj txi Ntuj.
7 Ces nws muab phau ntawv cog lus los nyeem rau tsoom pej xeem mloog, lawv teb tias: "Txhua yam HUAB TAIS tau hais, peb yuav mloog thiab peb yuav coj."
8 Mais Xes txawm muab cov ntshav los nchos rau saum tsoom pej xeem sawv daws, nws hais tias: "Cov ntshav no yog ntshav cog lus, uas yog lo lus HUAB TAIS tau nrog nej cog raws nraim li nws tau hais rau nej lawm."  *

NPN    50: 1b-2, 5-6, 14-15

Txais: (14a) Koj cev ib co lus qhuas ua txim txi rau Tswv Ntuj.

HUAB TAIS Tswv Ntuj nws qhib ncauj hais lus;
nws hu tas lub ntiaj teb tuaj koom, txij hnub tuaj txog hnub poob tuaj.
Tswv Ntuj nyob saum lub roob Xis Yoos,
nws zoo saib tas nrho, nws ci ntsa iab.

Txais: (14a) Koj cev ib co lus qhuas ua txim txi rau Tswv Ntuj.

“Nej sau cov ntseeg txog kuv tuaj nyob ntawm kuv xub ntiag,
nej sau cov uas tau tua tsiaj los nrog kuv cog lus tuaj.”
Ces lub ntuj tshaj nws txoj kev ncaj,
vim Tswv Ntuj yog tus txiav txim

Txais: (14a) Koj cev ib co lus qhuas ua txim  txi rau Tswv Ntuj.

“Koj muab lo lus qhuas los ua txim txi rau Tswv Ntuj,
koj pauj koj lub yeem rau tus Nyob Siab mog.
Thaum kev txhawj xeeb tuaj, koj hu txog kuv,
kuv yuav npo koj dim, ces koj yuav cav txog kuv lub koob meej.”

Txais: (14a) Koj cev ib co lus qhuas ua txim txi rau Tswv Ntuj.

As Les Lus Yas:    Yas Kos 1: 21bc

Txais: As les lus yas, as les lus yas.

Nej yuav ua neeg me txais lo lus uas twb muab cog rau hauv nej lawm,
nws yog qhov yuav cawm tau nej tus ntsuj plig.

Txais: As les lus yas, as les lus yas.

Ntawv Moo Zoo:    Mas Tais 13: 24-30

24 Yes Xus tseem hais dua ib zag paj lug rau tsoom neeg coob tias: "Lub Ceeb Tsheej saum ntuj zoo li ib tug neeg tseb ib co noob zoo rau hauv nws daim teb.
25 Thaum sawv daws tsaug zog tas lawm, nws tus yeeb ncuab tuaj, thiab tseb ib co nroj xyaw rau hauv cov nplej tas ces nws rov mus lawm.
26 Thaum cov nplej hlob tuaj thiab txhawv, nroj kuj tawm tuaj thiab.
27 Cov tub txib tuaj hais rau tus tswv qoob tias: "Huab Tais, koj tau tseb ib co noob zoo zoo rau hauv koj daim teb los tsis sub? Vim li cas thiaj muaj nroj?"
28 Tus tswv qoob teb rau lawv tias: "Yog ib tug yeeb ncuab tuaj ua qhov ntawd." Cov tub txib hais rau tus tswv tias: "Koj puas xav kom peb mus dob cov nroj pov tseg?" Tus tswv teb tias:
29 "Kuv tsis xav! Tsam thaum nej sau nroj, nej rho tau nplej nrog thiab.
30 Nej cia nroj nrog nplej hlob ua ke mus txog lub caij sau nplej. Thaum txog caij sau nplej lawm, kuv mam hais rau cov sau nplej tias: Nej xub sau cov nroj ua ntej tso, nej muab pav ua tej teg cia yuav muab pov hlawv, hos nej sau cov nplej rau hauv kuv lub txhab.”

+++++++++++++++++++++

Tim     29     lub     7     Hli

Yuav Hwm LN Mas Tas, Ma Liab, thia Las Ntxas Los
Lectionary: 607

Zaj Nyeem I:    1 Zam 4: 7-16

7 Cov zoo nyiam, peb yuav sib nyiam sib hlub mog, vim txoj kev hlub tuaj ntawm Tswv Ntuj tuaj; ua li mas tus twg hlub, tus ntawd yug ntawm Tswv Ntuj los, thiab nws paub Tswv Ntuj.
8 Tus tsis muaj kev hlub, mas nws tsis paub Tswv Ntuj, vim Tswv Ntuj yog txoj kev hlub.
9 Tswv Ntuj txoj kev hlub peb tawm los rau qhov muag pom xyeem li no: Tswv Ntuj xa nws Leej Tub Twm Zeej tuaj nyob ntiaj teb no, kom peb muaj txoj sia nyob hauv nws Leej Tub.
10 Nws txoj kev hlub yog li no: tsis yog peb tau nyiam Tswv Ntuj, tiam sis yog Tswv Ntuj tau nyiam peb, ces nws tau xa nws Leej Tub tuaj ua nqi txhiv peb ntawm peb cov txhaum.
11 Cov zoo nyiam, yog Tswv Ntuj nyiam peb npaum li ntawd, mas peb kuj yuav sib nyiam sib hlub thiab.
12 Tsis muaj leej twg tau pom Tswv Ntuj ib zaug li. Txawm li ntawd los yog peb sib nyiam sib hlub, mas Tswv Ntuj yuav nyob hauv peb, thiab nws txoj kev hlub yuav hlob tiav log zoo txhij zoo txhua nyob hauv peb.
13 Tos peb paub tias peb nyob hauv Tswv Ntuj, thiab nws nyob hauv peb, los yog vim qhov no: yog qhov tias nws pub nws Leej Tswv Yim rau peb.
14 Ntawm peb, mas peb tau pom ntsoov, ces peb ua tim khawv zeem tias, Leej Txiv tau xa nws Leej Tub tuaj cawm lub qab ntuj neeg.
15 Tus twg lees tias Yes Xus yog Tswv Ntuj Leej Tub, mas Tswv Ntuj nyob hauv nws, thiab nws nyob hauv Tswv Ntuj.
16 Ntawm peb mas peb paub thiab peb ntseeg tias Tswv Ntuj hlub peb tiag.
Tswv Ntuj yog txoj kev hlub; ua li mas yog leej twg nyob rawv hauv txoj kev hlub,  nws kuj nyob rawv hauv Tswv Ntuj, thiab Tswv Ntuj nyob hauv nws.

NPN   34:2-3, 4-5, 6-7, 8-9, 10-11

Txais:   (2)  Kuv yuav cav txog Huab Tais txhua lub  sij hawm.
los:     (9)  Nej saj ces nej yuav pom Huab Tais lub siab zoo.

Kuv yuav cav txog HUAB TAIS txhua lub sij hawm;
lo lus qhuav txog nws yuav nyob rawv ntawm kuv lub ncauj.
Kuv tus plig yuav tau koob meej nyob hauv HUAB TAIS;
tus neeg me yuav hnov txog kuv thiab yuav zoo siab.

Txais:   (2)  Kuv yuav cav txog Huab Tais txhua lub  sij hawm.
los:     (9)  Nej saj ces nej yuav pom Huab Tais lub siab zoo.

Nej nrog kuv cav txog HUAB TAIS mas,
peb sawv daws ua ke qhuas txog nws lub npe mog.
Kuv nrhiav HUAB TAIS, ces nws teb kuv,
Nws cawm kuv dim ntawm tas kuv tej kev ntshai.

Txais:   (2)  Kuv yuav cav txog Huab Tais txhua lub  sij hawm.
los:     (9)  Nej saj ces nej yuav pom Huab Tais lub siab zoo.

Nej vam txog HUAB TAIS, ces nej yuav ci hob vim kev zoo siab,
nej ntsej muag yuav tsis liab ploog vim kev txaj muag.
Thaum tus pluag hu, HUAB TAIS mloog
thiab yuav cawm nws ntawm tas nws tej kev nyuaj siab.

Txais:   (2)  Kuv yuav cav txog Huab Tais txhua lub  sij hawm.
los:     (9)  Nej saj ces nej yuav pom Huab Tais lub siab zoo.

HUAB TAIS tus tshiab tsa tsev tsam phooj
nyob ncig cov neeg hwm HUAB TAIS, nws cawm lawv.
Nej saj ces nej yuav pom tias HUAB TAIS lub siab zoo npaum li cas.
Tus tau txoj hmoov zoo yog tus nrhiav chaw nkaum hauv HUAB TAIS.

Txais:   (2)  Kuv yuav cav txog Huab Tais txhua lub  sij hawm.
los:     (9)  Nej saj ces nej yuav pom Huab Tais lub siab zoo.

Nej uas yog nws tsoom neeg ntshiab, nej cia li hwm HUAB TAIS,
vim cov neeg hwm HUAB TAIS tsis ntshaw txog dab tsi li.
Cov muaj koob muaj npe yuav txom nyem tshaib plab;
hos cov nrhiav HUAB TAIS yuav tsis tshaib tsis nqhis dab tsi li.

Txais:   (2)  Kuv yuav cav txog Huab Tais txhua lub  sij hawm.
los:     (9)  Nej saj ces nej yuav pom Huab Tais lub siab zoo.

As Les Lus Yas:    Zam 8: 12

Txais: As les lus yas, as les lus yas.

Huab Tais hais tias: “Kuv yog ntiaj teb neeg qhov pom kev,
leej twg los raws kuv yuav tau qhov pom kev uas pub txoj sia.”

Txais: As les lus yas, as les lus yas.

Ntawv Moo Zoo:    Zam 11: 19-27  

19 Muaj coob leej Yus Das tuaj xyuas Mas Tas thiab Mab Liab nkawd,
lawv tuaj nplij nkawd vim nkawd tus nus Las Ntxas Los tuag lawm.
20 Thaum Mas Tas hnov tias Yes Xus tuaj, ces Mas Tas mus tos Yes Xus, hos Mab Liab zaum nyob hauv tsev.
21 Mas Tas hais rau Yes Xus tias: "Huab Tais, yog koj ntxov tuaj txog ntawm no, mas kuv tus nus yuav tsis tuag.
22 Tsis kav, kuv paub tias nyem no, koj thov yam twg ntawm Tswv Ntuj, mas Tswv Ntuj yuav muab rau koj."
23 Yes Xus hais rau Mas Tas tias: "Koj tus nus yuav sawv rov los."
24 Mas Tas hais rau Yes Xus tias: "Kuv paub hais tias thaum txog lub caij sawv rov los Hnub Kawg, mas nws yuav sawv rov los."
25 Yes Xus hais rau Mas Tas tias: "Kuv yog Txoj Kev Sawv Rov Los thiab yog Txoj Sia;
tus ntseeg txog kuv, tab yog nws tuag lawm, nws tseem yuav muaj txoj sia tuaj.
26 Hos leej twg ua neej nyob nws ntseeg txog kuv, mas nws yuav tsis tuag ib zaug li. Koj puas ntseeg qhov ntawd?"
27 Mas Tas hais rau Yes Xus tias: "Huab Tais, kuv ntseeg. Kuv yeej ntseeg hais tias koj yog Leej Pleev, yog Tswv Ntuj Leej Tub, tus uas yuav tuaj nyob hauv lub qab ntuj no."  

Los:    LK 10: 38-42

38 Thaum Yes Xus lawv taug kev, lawv mus txog hauv ib lub zos.
Ib tug poj niam hu ua Mas Tas txais Yes Xus los hauv nws tsev.
39 Tus poj niam ntawd muaj ib tug niam hluas hu ua Mab Liab, uas zaum ntawm Huab Tais ko taw, nws mloog rawv Huab Tais hais lus.
40 Hos Mas Tas ntxhov siab txog ntau yam qav num yuav tos txais qhua, ces nws los hais
rau Yes Xus tias: "Huab Tais, koj tsis txhawj txog tias kuv tus niam hluas cia kuv tib leeg
lis qav lis num xwb lod? Koj hais kom nws pab kuv thiab mas!"
41 Tab sis Huab Tais teb rau Mas Tas tias: "Mas Tas yuas Mas Tas, koj txhawj thiab ua siab fab txog ntau yam,
42 tab sis tsuas muaj ib yam xwb uas yuav tsum ua; Mab Liab xaiv tau qhov zoo tshaj lawm,
yuav tsis txhob muab tshem ntawm nws mus."    *

Tim     31     lub     7     Hli     2023

Hnub Ob Lis Pias Kaum Xya Nruab Xyoo A Nruab Lis Piam Xyoo I
Lectionary: 401

Yuav Hwm LN Ignatius of Loyola, ua Leej Choj

Zaj Nyeem Ib:    KT 32: 15-24, 30-34

15 Mais Xes tig rov qab nqes saum roob los, nws nqa ob daig txiag zeb sau cov Lus Qhia ntawm tes; ob daig txiag ntawd sau ob sab, sab saud thiab sab hauv huv si.
16 Ob daig txiag ntawd yog Tswv Ntuj txua, cov npe ntawv yog Tswv Ntuj sau, nws muab txaug rau saum ob daig txiag zeb.
17 Yos Suas hnov tsoom pej xeem qw tsheej tsaug, nws hais rau Mais Xes tias: “Muaj suab nrov cuag li yog sib tua hauv lub yeej lawm!"
18 Mais Xes teb tias: "Tsis yog lub suab qw yeej ib nthwv rog, kuj tsis yog lub suab qw swb ib nthwv rog thiab. Kuv hnov zoo li yog suab hu nkauj ua kev lom zem."
19 Thaum nws los txog ze lub yeej lawm, Mais Xes pom tus mlom nyuj thiab tej pab dhia daj dhia luag lom zem. Ces Mais Xes npau taws heev, nws muab ob daig txiag zeb ntawm nws tes cuam rau hauv av, ob daig txiag zeb tawg tas rau ntawm lub taw roob.
20 Nws muab tus mlom nyuj uas lawv nchuav tau pov hlawv rau hauv hluav taws, ces nws muab coj los tuav ua hmoov mos mos, muab coj mus nphoo rau hauv dej, ces nws yuam cov His Xas Lais haus cov dej ntawd.
21 Mais Xes hais rau As Loos tias: "Haiv neeg ntawd tau ua dab tsi rau koj, vim li cas koj thiaj coj lawv ua ib qho txhaum loj tas npaud?"
22 As Loos teb tias "Thov koj tus ua hlob tsis txhob npau taws, koj twb paub tias haiv neeg ntawd zoo li cas lawm, koj paub tias lawv yeej nyiam ua qhov phem.
23 Lawv hais rau kuv tias: 'Koj ua ib tug tswv ntuj rau peb teev, kom nws mus ua peb ntej, vim tus Mais Xes uas nws coj peb tawm ntawm Hais Nkws Tos teb los, mas peb tsis paub xyov nws dua twg lawm.'
24 Kuv hais rau lawv tias: 'Leej twg coj kub ntawm nws, muab hle tawm los.' Lawv muab los rau kuv, kuv coj mus pov rau hauv hluav taws, ces tus nyuj no cia li tawm los."
30 Hnub tom qab, Mais Xes hais rau tsoom pej xeem tias: "Nej tau ua ib qho txhaum loj kawg. Kuv yuav nce mus cuag HUAB TAIS, kuv yuav thov HUAB TAIS, tej zaum nws yuav zam rau nej."
31 Mais Xes thiaj rov nce mus cuag HUAB TAIS, nws hais tias: “Haiv neeg ntawd tau ua ib qho txhaum loj kawg. Lawv tau puab ib tug tswv ntuj kub rau lawv teev.
32 Tab sis nyem no thov koj zam rau lawv qhov txhaum. Yog koj tsis kam zam no ces thov koj rho kuv tawm hauv phau ntawv uas koj tau sau cia lawm!"
33 HUAB TAIS hais rau Mais Xes tias: "Tus tau ua txhaum rau kuv, mas kuv yuav rho nws tawm hauv kuv phau ntawv mus.
34 Tab sis zaum no koj rov mus, koj coj haiv neeg ntawd mus rau qhov chaw uas kuv tau hais rau koj lawm. Ntsia saib, kuv tus Tshiab yuav mus ua nej ntej. Txog hnub uas kuv tuaj xyuas lawv, kuv mam li muab txim rau lawv vim lawv qhov txhaum."

NPN    106: 19-20, 21-22, 23

Txais: (1a) Nej ua Huab Tais tsaug vim nws siab zoo.

Peb cov yawg koob puab ib tug mlom nyuj nyob ntawm roob Hos Les;
lawv txhos caug pe tus mlom uas lawv nchuav.
Lawv muab lawv lub koob meej mus pauv
ib tug duab mlom uas yog ib tug nyuj noj zaub.

Txais: (1a) Nej ua Huab Tais tsaug vim nws siab zoo.

Lawv tsis nco qab tus Tswv Ntuj uas tau cawm lawv lawm,
tus tau ua tej yam loj nyob Hais Nkws Tos teb ,
tus tau ua tej yam hwj huam txaus qhuas nyob Haas teb,
tus tau ua tej yam txaus ntshai nyob ntawm lub Hiav Txwv Liab.

Txais: (1a) Nej ua Huab Tais tsaug vim nws siab zoo.

Nws tau hais tias nws yuav ua kom lawv tuag tu noob
tab sis Mais Xes, tus uas nws xaiv,
tau sawv lawv chaw thov nws nrog nws hais,
kom nws cheem nws lub siab npau taws uas tsis xav txuag lawv.

Txais: (1a) Nej ua Huab Tais tsaug vim nws siab zoo.

As Les Lus Yas:     YK 1: 18

Txais: As les lus yas, as les lus yas.

Leej Txiv pom zoo ua kom peb yug los nyob hauv lo lus tseeb,
kom peb zoo li thawj phaum txiv nyob hauv txhua yam uas nws tsim los.

Txais: As les lus yas, as les lus yas.

Ntawv Moo Zoo:    Mt 13:31-35

31 Yes Xus hais ib zag paj lug rau tej pab neeg coob tias: "Lub Ceeb Tsheej saum ntuj zoo li ib lub noob ntoo zaub roj uas ib tug neeg nqa mus tseb rau hauv nws daim teb.
32 Lub noob ntawd me tshaj txhua hom noob, tab sis thaum nws hlob tuaj, nws loj dua lwm cov zaub huv tib si, nws loj luaj li ib tsob ntoo, ces tej noog ya saum ntuj los nkaum hauv nws cov ceg."
33 Yes Xus tseem hais dua ib zag paj lug rau lawv tias: "Lub Ceeb Tsheej saum ntuj zoo li ib co poov xab uas ib tug poj niam muab zais rau hauv peb kawg hmoov nplej mus txog thaum tas cov hmoov ntawd su tuaj.’
34 Yes Xus ua paj lug hais ib puas tsav yam ntawd rau zeej tsoom, tsis muaj ib yam uas nws tsis ua paj lug hais.
35 Li ntawd thiaj muaj raws li tus yaj saub tau hais tseg tias: “Kuv yuav qhib ncauj hais ib co paj lug; tej yam zais txij thaum ntuj tsim teb raug los lawm, kuv yuav muab tshaj tawm.”

Tim     1     lub     8     Hli     2023

Hnub Peb Lis Piam Kaum Xya Nruab Xyoo A Nruab Lis Piam Xyoo I
Lectionary: 402

Yuav Hwm:   LN Alphonsus Liguori, Tswv ua Kws cov Txuj Ntshiab

Zaj Nyeem Ib:    KT 33: 7-11; 34:5B-9, 28

7 Mais Xes nqa lub tsev tsam phooj, nws coj mus tsa rau sab yeej nraud, nyob nrug deb ntawm lub yeej. Nws tis npe rau tias Tsev Tsam Phooj Sib Ntsib. Yog leej twg xav vam txog HUAB TAIS, mas nws yuav tawm mus lawm tom lub Tsev Tsam Phooj Sib Ntsib, uas nyob sab yeej nraud.
8 Niaj zaus thaum Mais Xes tawm mus tom lub Tsev Tsam Phooj, mas tas tsoom neeg sawv daws sawv ntsug, nyias sawv ntawm nyias lub qhov rooj tsev tsam phooj, lawv ntsia ntsoov Mais Xes mus nkag kiag hauv lub Tsev Tsam Phooj lawm.
9 Thaum Mais Xes nkag mus rau hauv lub Tsev Tsam Phooj, mas twv huab nqes los nyob ntawm lub qhov rooj,  hos HUAB TAIS nrog Mais Xes tham.
10 Tas tsoom neeg sawv daws pom twv huab nyob ntawm lub qhov rooj Tsev Tsam Phooj, ces sawv daws sawv, thiab nyias nyob ntawm nyias lub qhov rooj khoov pe.
11 HUAB TAIS hais lus rau Mais Xes, tim ntsej tim muag, ib yam li ib tug tib neeg nrog nws tus phooj ywg tham, tham tas ces Mais Xes mam rov los hauv lub yeej. Tab sis Mais Xes tus tub txib Yos Suas uas yog Nus tus tub, nyob rawv hauv lub Tsev Tsam Phooj tsis nrug li.
34: 5b Mais Xes nrog HUAB TAIS sawv nyob ntawd thiab nws hu txog HUAB TAIS lub npe.
6 Ces HUAB TAIS hla ntawm Mais Xes xub ntiag, Mais Xes qw nrov nrov tias: "HUAB TAIS, HUAB TAIS, tus Tswv Ntuj uas lub siab khuv leej neeg thiab pub txiaj ntsim ntau, tus npau taws qeeb, tus muaj lub siab zoo tas nrho thiab tsis fav xeeb,
7 tus pub txiaj ntsim rau txhiab vam leej, tus ua siab ntev zam neeg qhov phem, qhov yuam kev thiab qhov txhaum rau neeg, tiam sis nws tsis cia leej twg dim nws lub txim; nws muab phaj txiv lub txim txhaum rau phaj tub thiab phaj xeeb ntxwv ris mus txog tiam peb tiam plaub huv si."
8 Tam sis ntawd, Mais Xes nyo hau kiag khoov pe hauv av.
9 Ces nws hais tias: "Huab Tais, yog koj saib kuv tsim nyog, thov koj nrog nraim peb mus; txawm tias peb yog ib haiv neeg xwb qwb txhav, los thov koj zam peb qhov phem thiab peb cov txhaum rau peb, koj muab peb los ua koj lub cuab tam."
28 Mais Xes nrog Huab Tais nyob ntawd tau plaub caug hnub plaub caug hmo, nws tsis noj mov tsis haus dej li, nws sau cov nqe cog lus rau hauv phau ntawv, uas yog kaum lo lus qhia.

NPN    103: 6-7, 8-9, 10-11, 12-13

Txais: (8a) Huab Tais siab zoo thiab khuv leej neeg.

HUAB TAIS nrhiav muab kev ncaj
thiab muab cai rau tas cov raug luag tsuj.
Nws qhia nws tej kev rau Mais Xes paub,
nws qhia nws cov hauj lwm rau tsoom His Xas Lais.

Txais: (8a) Huab Tais siab zoo thiab khuv leej neeg.

HUAB TAIS khuv leej neeg, nws pub txiaj ntsim ntau
nws npau taws qeeb, nws siab zoo tas nrho.
Nws tsis niaj hnub cem los yws, nws kuj tsis npau taws mus li.

Txais: (8a) Huab Tais siab zoo thiab khuv leej neeg.

Nws tsis nplua peb raws li peb tau ua txhaum,
nws tsis pauj rau peb raws li peb tej kev ua phem.
Xws li lub ntuj nyob siab saum lub ntiaj teb npaum li cas,
nws kuj ua zoo npaum li ntawd rau cov neeg hwm nws thiab.

Txais: (8a) Huab Tais siab zoo thiab khuv leej neeg.

Sab hnub tuaj nyob deb ntawm sab hnub poob npaum li cas,
mas nws kuj tshem peb cov txhaum mus deb peb npaum li ntawd.
Zoo li ib leeg txiv hlub nws cov me nyuam,
HUAB TAIS kuj hlub cov hwm nws zoo ib yam li ntawd,

Txais: (8a) Huab Tais siab zoo thiab khuv leej neeg.

As Les Lus Yas

Txais: As les lus yas, as les lus yas.

Lub noob nplej yog Tswv Ntuj lo lus, Leej Pleev yog tus tseb nplej;
Txhua tus uas tuaj cuag nws yuav ciaj nyob mus li.

Txais: As les lus yas, as les lus yas.

Ntawv Moo Zoo:    MT 13: 36-43

36 Yes Xus tso tsoom neeg mus tsev, ces nws los rau hauv lub tsev. Cov thwj tim txav los hais rau nws tias: "Koj txhais zaj paj lug hais txog cov nroj tuaj hauv daim teb rau peb saib."
37 Yes Xus teb rau lawv tias: "Tus tseb cov noob zoo, yog Neeg Leej Tub.
38 Daim teb, yog lub qab ntuj neeg; cov noob zoo, yog cov tub hauv lub Ceeb Tsheej; cov nroj, yog tus Phem cov tub.
39 Tus yeeb ncuab uas tseb cov nroj, yog Dab Phem; lub caij sau nplej, yog lub zim txwv kawg; cov tub sau nplej, yog cov Tshiab.
40 Ib yam li luag sau cov nroj mus pov hlawv hauv hluav taws, lub zim txwv kawg kuj yuav zoo ib yam li ntawd :
41 Neeg Leej Tub yuav xa nws cov Tshiab tuaj, lawv yuav sau txhua yam kev coj neeg ua txhaum thiab cov neeg ua phem tawm hauv nws lub Ceeb Tsheej mus.
42 Lawv yuav coj cov ntawd mus pov rau hauv lub qhov hluav taws; nyob hauv, yuav muaj kev quaj laug laws thiab tom hniav nkawv.
43 Ces cov neeg siab ncaj yuav ci ntsa iab li lub hnub nyob hauv lawv Txiv lub Ceeb Tsheej. Leej twg muaj pob ntseg, kom nws yeej meem mloog.”

Tim     2     lub     8     Hli     2023

Hnub Plaub Lis Piam Kaum Xya Nruab Xyoo A Nruab Lis Piam Xyoo I
Lectionary: 403

XHLT:   LN Eusebius nyob Vercelli, ua Tswv Qhia;
               LN Peter Julian Eymard, ua Leej Choj

Zaj Nyeem Ib:    KT 34: 29-35

29 Thaum Mais Xes nqes saum roob Xis Nais rov los, nws tuav ob daig txiag zeb sau cov Lus Qhia ntawm nws tes. Nws tsis paub hais tias nws lub ntsej muag daim tawv ci vog vim nws tau nrog HUAB TAIS tham.
30 Thaum As Loos thiab cov His Xas Lais pom Mais Xes, lawv saib nws lub ntsej muag daim tawv ci vog, lawv ntshai txav los ze nws.
31 Mais Xes hu lawv, ces As Loos thiab tas cov txwj laus thiaj txav los ze nws; Mais Xes nrog lawv tham.
32 Cov pej xeem His Xas Lais sawv daws mam txav los tom qab, ces Mais Xes qhia tas puas tsav yam uas HUAB TAIS tau hais rau nws saum roob Xis Nais rau lawv.
33 Thaum Mais Xes hais lus tas lawm, nws muab ib daig ntaub los npog nws ntsej muag.
34 Txhua zaus thaum Mais Xes yuav nkag mus nrog HUAB TAIS tham, mas nws tshem daim ntaub npog nws ntsej muag, mus txog thaum nws yuav ncaim Huab Tais rov tawm los. Nws tawm los lawm, mas nws tshaj rau cov His Xas Lais paub txog HUAB TAIS cov lus ceeb toom.
35 Cov His Xas Lais pom Mais Xes lub ntsej muag daim tawv ci vog, ces Mais Xes rov muab ntaub los npog nws ntsej muag mus txog thaum nws yuav rov chaws mus nrog HUAB TAIS tham dua.

NPN    99: 5, 6, 7, 9

Txais: (9c) Huab Tais, peb tus Tswv Ntuj yog tus ntshiab.

Nej qhuas txog HUAB TAIS, peb tus Tswv Ntuj,
nej pe hawm nws ntawm nws lub rooj tiag taw;
Nws ntshiab tiag!

Txais: (9c) Huab Tais, peb tus Tswv Ntuj yog tus ntshiab.

Mais Xes thiab As Loos nkawd yog ob tug hauv nws tsoom leej choj,
Xas Muas yog ib tug hauv cov uas vam txog nws lub npe;
lawv hu txog HUAB TAIS mas nws teb lawv.

Txais: (9c) Huab Tais, peb tus Tswv Ntuj yog tus ntshiab.

HUAB TAIS nyob hauv tus ncej huab nrog lawv tham;
Lawv tau hnov nws qhia nws tej lij choj thiab nws txoj cai
uas nws muab rau lawv.

Txais: (9c) Huab Tais, peb tus Tswv Ntuj yog tus ntshiab.

Nej qhuas txog HUAB TAIS, peb tus Tswv Ntuj;
nej pe hawm nws nyob saum lub roob nws txoj kev ntsiab,
vim HUAB TAIS peb tus Tswv Ntuj ntshiab tiag!

Txais: (9c) Huab Tais, peb tus Tswv Ntuj yog tus ntshiab.

As Les Lus Yas:    ZAM 15: 15b

Txais: As les lus yas, as les lus yas.

Huab Tais hais tias: Kuv hu nej ua kuv cov phooj ywg,
vim kuv tau qhia rau nej paub tas puas tsav yam uas leej Txiv hais rau kuv lawm.

Txais: As les lus yas, as les lus yas.

Ntawv Moo Zoo:    MT 13: 44-46

Yes Xus hais rau nws cov thwj tim tias:
44 “Lub Ceeb Tsheej saum ntuj zoo li ib hub nyiaj faus rau hauv ib daim teb. Muaj ib tug neeg mus nrhiav tau, nws rov muab zais dua; nws zoo siab kawg, nws mus muag nws lub cuab tam tas huv si, ces nws muas daim teb ntawd.
45 "Lub Ceeb Tsheej saum ntuj kuj tseem zoo li ib tug tub luam nrhiav cov hlaws npliag deg zoo nkauj.
46 Thaum nws nrhiav tau ib lub muaj nqi loj, nws mus muag nws lub cuab tam tas huv si, ces nws muas lub hlaws npliag deg ntawd.”

Tim     3     lub     8     Hli     2023

Hnub Tsib Lis Piam Kaum Xya Nruab Xyoo A Nruab Lis Piam Xyoo I
Lectionary: 404

Zaj Nyeem Ib:    KT 40: 16-21, 34-38

16 Mais Xes ua tas puas tsav yam raws nraim li HUAB TAIS qhia kom ua.
17 Lub ib hlis xiab ib xyoo ob, nws tsa lub Tsev Nyob.
18 Mais Xes yog tus tsa lub Tsev Nyob; nws teeb cov taw, nws tsa lub cuam khoov, nws tso cov nqaj tav rau thiab tsa cov ncej rau.
19 Ces nws muab daim ntaub tsev tsam phooj nthuav rau saum lub Tsev Nyob, nws muab daim ntaub npog tsev tsam phooj los vov rau saum toj lub Tsev Nyob, raws li HUAB TAIS tau hais rau nws.
20 Mais Xes muab ob daig txiag zeb txaug cov lus qhia kaw rau hauv lub Phij Xab Cog Lus. Nws muab cov nqaj laug rau ntawm lub Phij Xab os sab, thiab muab lub rooj thov kev zam txim los tso tshooj rau saum lub Phij Xab Cog Lus.
21 Nws nqa lub Phij Xab Cog Lus mus tso rau hauv lub Tsev Nyob; nws tsa ib daim ntaub kem rau kom los thaiv lub Phij Xab Cog Lus raws li Huab Tais tau hais rau Mais Xes.
34 Ces twv huab los ntsauv lub Tsev Tsam Phooj Sib Ntsib, thiab HUAB TAIS lub hwj chim ci puv nkaus hauv lub Tsev Nyob.
35 Mais Xes nkag tsis tau mus rau hauv lub Tsev Tsam Phooj Sib Ntsib, vim twv huab los ntsauv rawv saum lub tsev tsam phooj sib ntsib thiab HUAB TAIS lub hwj chim ci ntsa iab puv lub Tsev Nyob.
36 Txhua zaus thaum twg yog twv huab nce mus nyob siab saum toj lub Tsev Nyob lawm mas cov His Xas Lais mam sawv kev mus dua ntxiv.
37 Yog twv huab tsis nce siab, mas lawv tsis sawv kev li mus txog hnub uas twv huab nce siab rau saud lawm.
38 Vim tias,  nruab hnub mas pom HUAB TAIS twv huab nyob npog saum lub Tsev Nyob, hos hmo ntuj mas tas tsoom His Xas Lais pom muaj ib co hluav taws nyob hauv  twv huab; yeej puav leej zoo li ntawd nyob qhov txhia chaw uas lawv tau mus tas tib si.

NPN    84: 3, 4, 5-6a+8a, 11

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Kuv tus plig ntshaw seev yees yuj plaws
txog HUAB TAIS cov tshav loog.
Kuv lub siab lub cev quaj qw hu
txog tus Tswv Ntuj muaj txoj sia.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Tab yog cov noog ntxias los yeej nrhiav tau chaw nyob,
cov noog luv los nrhiav tau zes puag lawv cov me nyuam
nyob ntawm koj cov thaj txi ntuj, HUAB TAIS kav tsoom tshiab,
kuv tus vaj, kuv tus Tswv Ntuj!

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Cov neeg tau nyob hauv koj tsev lawv txoj hmoov zoo,
lawv tau kev cav txog koj mus li tsis tso tseg.
Cov uas muab koj ua lawv lub zog, lawv txoj hmoov zoo.
Lawv yim mus kev lawv lub zog yim loj tuaj.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Kuv yeem nyob ib hnub hauv koj cov tshav loog
zoo dua nyob ib txhiab hnub lwm qhov chaw,
kuv yeem nyob ntawm kuv tus Tswv Ntuj taw rooj
zoo dua nyob hauv cov neeg phem lub tsev tsam phooj.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

As Les Lus Yas:    HL 16: 14b

Txais: As les lus yas, as les lus yas.

HUAB TAIS, thov koj qhib peb tej siab ntsws
kom peb mloog koj leej Tub cov lus.

Txais: As les lus yas, as les lus yas.

Ntawv Moo Zoo:    MT 13: 47-53

Yes Xus hais rau nws cov thwj tim tias:
47 "Lub Ceeb Tsheej saum ntuj tseem zoo li ib lub vas uas luag pov rau hauv dej ntuj; lub vas puav tau txhua tsav txhua yam ntses.
48 Thaum lub vas puv lawm, lawv rub lub vas los tim ntug nqhuab, lawv zaum, ces lawv xaiv cov zoo rau hauv tawb, hos muab cov phem pov tseg.
49 Thaum lub zim txwv kawg, kuj yuav zoo ib yam li ntawd thiab: cov tshiab yuav tawm tuaj mus, lawv yuav cais cov neeg phem ntawm cov neeg ncaj.
50 Lawv yuav muab cov neeg phem pov tseg rau hauv lub qhov hluav taws; nyob hauv, yuav muaj quaj laug laws thiab tom hniav nkawv.
51 Nej puas to taub tas ib puas tsav yam no?" Lawv teb rau Yes Xus tias: "Peb to taub."
52 Yes Xus hais rau lawv tias: “Vim li no, txhua tus Kws Ntawv Ntshiab uas los ua thwj tim nyob hauv lub Ceeb Tsheej saum ntuj, mas nws zoo li ib tug tswv tsev uas rho tau tej yam tshiab thiab tej yam qub hauv nws lub cuab tam los.”
53 Thaum Yes Xus hais cov paj lug no tas lawm, mas nws tawm ntawm qhov chaw ntawd mus.

Tim     4     lub     8     Hli     2023

Hnub Rau Lis Piam Kaum Xya Nruab Xyoo A Nruab Lis Piam Xyoo I
Lectionary: 405

Yuav Hwm: LN John Vianney, ua Leej Choj

Zaj Nyeem Ib:    LV 23: 1, 4-11, 15-16, 27, 34b-37

1 HUAB TAIS hais rau Mais Xes tias :
4 Cov no yog HUAB TAIS cov hnub nyoog tsuj xeeb, uas thaum txog caij txog nyoog, nej yuav tsum ua tej lub txoos ntshiab los ua kev zoo siab nco txog.
5 Lub ib hlis xiab kaum plaub thaum tsaus ntuj, yog Huab Tais Hmo Hla.
6 Hnub xiab kaum tsib, yog hnub tsuj xeeb txog cov mov tsis xyaw poov xab rau HUAB TAIS; mas nej yuav noj mov tsis xyaw poov xab xya hnub sib law.
7 Thawj hnub, nej yuav sib sau ua lub txoos ntshiab, nej yuav tsis txhob ua ib yam hauj lwm hnyav li.
8 Xya hnub sib law, nej yuav niaj hnub hlawv ib co txim hauv hluav taws rau HUAB TAIS. Hnub xya, yog hnub sib sau ua lub txoos ntshiab, nej yuav tsis txhob ua ib yam hauj lwm hnyav li.
9 HUAB TAIS tseem hais rau Mais Xes tias:
10 "Koj hais rau Tsoom His Xas Lais tias: ‘Thaum nej mus txog lub teb chaws uas kuv muab rau nej nyob lawm, nej cog tau qoob loo mas nej yuav nqa thawj tes nplej tshiab ntawm nej cov qoob loo tuaj rau tus leej choj.
11 Leej choj yuav muab tes nplej ntawd los tsa ob peb zaug nyob ntawm HUAB TAIS xub ntiag kom nws pom zoo txais nej; yog hnub lawv qab hnub Xas Npas Tos, mas leej choj yuav ua cov kab ke tsa tes nplej tshiab ntawd rau Huab Tais.
15 Txij hnub lawv qab hnub xas npas tos ntawd, uas yog hnub nej coj nej thawj tes nplej tshiab tuaj rau Huab Tais, txij hnub ntawd mus nej yuav suav xya lub lis piam txwm nkaus.
16 Ces hnub tsib caug, uas yog hnub lawv qab hnub xas npas tos tim xya, nej yuav nqa dua ib co nplej tshiab tuaj ua txim cev rau HUAB TAIS.
27 Lub xya hli xiab kaum, yog hnub them txim txhaum. Nej yuav sib sau ua lub txoos ntshiab. Nej yuav ua kev them txim txhaum thiab nej yuav hlawv ib co txim rau HUAB TAIS.
34b Thaum txog lub xya hli xiab kaum tsib, nej yuav pib ua HUAB TAIS lub koob tsheej nco txog cov Tsev Tsam Phooj, nej yuav ua xya hnub nkaus.
35 Thawj hnub, nej ua lub txoos ntshiab, nej yuav tsis txhob ua ib yam hauj lwm hnyav li.
36 Nej yuav niaj hnub hlawv ib co tsiaj ua txim rau HUAB TAIS kom puv xya hnub sib law. Hnub yim, nej yuav sib sau ua lub txoos ntshiab thiab nej yuav hlawv ib co txim rau HUAB TAIS. Hnub nej sib sau xaus ntawd yog ib hnub caiv, nej yuav tsis txhob ua ib yam hauj lwm hnyav li.
37 Cov hnub nyoog no yog HUAB TAIS cov hnub nyoog ua hmoov tsuj xeeb, mas nej yuav tshaj tawm tias yog tej lub hnub nyoog rau sawv daws tuaj sib sau ua lub txoos ntshiab, tuaj hlawv tsiaj ua ib co txim cev rau HUAB TAIS, tuaj cev qoob loo rau Ntuj, ua thaj txi Ntuj noj cov txim, hliv dej hliv cawv txi Ntuj, raws li tej kab ke teem cia rau nyias hnub.”

NPN   81: 3-4, 5-6, 10-11ab

Txais: (2a) Nej zoo siab hu nkauj rau Tswv Ntuj mas, nws yog tus pab peb.

Nej pib suab paj nruag, nej ntaus nruas npuaj,
Ntaus nkauj nog ncas thiab ntaus thaj cheej.
Nej tshuab hom thaum hli xiab,
thaum hli nra, thaum peb ua hmoov tsuj xeeb loj.

Txais: (2a) Nej zoo siab hu nkauj rau Tswv Ntuj mas, nws yog tus pab peb.

Vim yog His Xas Lais txoj cai lij choj,
yog txoj cai Yas Kos tus Tswv Ntuj tau txiav.
Yog txoj cai Tswv Ntuj muab rau Yos Xes coj
thaum nws tawm hauv Hais Nkws Tos teb los.

Txais: (2a) Nej zoo siab hu nkauj rau Tswv Ntuj mas, nws yog tus pab peb.

Koj yuav tsis txhob muaj dua lwm tus tswv ntuj nyob hauv koj,
koj yuav tsis txhob txhos caug pe pej kum neeg cov dab qhuas.
Kuv, HUAB TAIS, yog koj tus Tswv Ntuj,
tus tau coj koj tawm ntawm Hais Nkws Tos teb los.

Txais: (2a) Nej zoo siab hu nkauj rau Tswv Ntuj mas, nws yog tus pab peb.

As Les Lus Yas:  1 PZ 1: 25

Txais: As les lus yas, as les lus yas.

Huab Tais Lo Lus yuav nyob tas ib txhiab ib txhis,
yog lo lus uas tau muab tshaj tawm rau nej lawm.

Txais: As les lus yas, as les lus yas.

Ntawv Moo Zoo:   MT 13: 54-58

54 Yes Xus rov los txog thaj chaw uas nws nyob hlob, nws qhia tsoom neeg nyob hauv lawv lub tsev txoos. Lawv ceeb tas, lawv hais tias: "Lub tswv yim thoob tsib, thiab cov hwj huam yees ntxwv ntawd, nws tau qhov twg los?
55 Tus ntawd tsis yog tus kws ntoo tus tub lod? Nws niam tsis yog tus hu ua Mab Liab no lod? Thiab nws cov kwv tij twb yog Yas Kos, Yos Xes, Xis Moos thiab Yus Das lawv los tsis yog?
56 Hos tas nws cov muam tib si tsis nrog peb nyob ntawm no lod? Tas ib puas tsav yam ntawd, nws muab qhov twg los?"
57 Lawv tsis txaus siab rau Yes Xus, ces Yes Xus hais rau lawv tias: "Ib tug yaj saub yeej raug luag hwm, tsuas yog cov neeg nyob hauv nws teb chaws thiab cov nyob hauv nws tsev neeg xwb thiaj saib nws tsis rau nqi."
58 Ces Yes Xus tsis ua hwj huam yees ntxwv ntau nyob ntawd, vim lawv tsis ntseeg.

Tim     5     lub    8     Hli     2023

Thawj Hnub Xya Lis Piam Kaum Xya Nruab Xyoo A Nruab Lis Piam Xyoo I
Lectionary: 406

XHLT:    Hnub Foom Hmoov Zoo rau lub Tuam Tsev St Mary Major nyob Los Mas

Zaj Nyeem Ib:    LV 25: 1, 8-17

1 HUAB TAIS hais rau Mais Xes saum lub roob Xis Nais tias :
8 “Koj yuav suav xya lis piam xyoo, uas yog xya zaus xya xyoo, ces lub caij ntawd yuav yog plaub caug cuaj xyoos rau nej lawm.
9 Xyoo tsib caug, thaum txog lub xya hli hnub xiab kaum, nej yuav tshuab hom nrov nrov; hnub ntawd yog hnub ua kev them txim txhaum, mas tas lub teb chaws yuav tshuab hom nrov nrov nyob qhov txhia chaw hauv lub teb chaws.
10 Nej yuav muab xyoo tsib caug ntawd los ua ib xyoos Ntshiab; nej yuav tshaj kev twj lij rau tas cov neeg nyob hauv lub teb chaws huv si. Yog ib xyoos rau nej so ua kev zoo siab; nej nyias yuav rov mus nyob hauv nyias vaj nyias tsev, nyias yuav rov mus nyob hauv nyias tsev neeg thaj av.
11 Nyob hauv xyoo tsib caug no uas yog ib xyoos rau nej ua kev zoo siab, mas nej yuav tsis txhob tseb noob qoob noob loo li, thiab nej yuav tsis txhob sau cov nplej uas nws tuaj nws li, nej yuav tsis txhob de cov txiv cawv uas txi saum cov hmab tsis tau muab txo ceg.
12 Vim yog ib xyoos ua kev zoo siab, uas nej yuav muab saib ua ib Xyoos Ntshiab, , mas nej noj tej yam uas tuaj nyob hauv tej nruab liaj nruab teb xwb.
13 Xyoo ua kev zoo siab no, mas nej txhua tus nyias yuav rov mus nyob hauv nyias thaj av.
14 Yog koj muag ib yam dab tsi rau ib tug neeg nyob ze koj, los koj muas dab tsi ntawm nws los, mas yuav tsis txhob pub kom neb muaj kev ib leeg noj tau ib leeg.
15 Koj yuav suav saib lub xyoo ua kev zoo siab dhau los tau pes tsawg xyoo lawm, ces koj yuav them tus nqi muas av ntawm tus nyob ze koj rau nws raws li cov xyoo ntawd. Tus muag av rau koj los kuj yuav suav nqe rau koj them raws li saib pes tsawg cim qoob nws tau sau los lawm thiab.
16 Yog muaj ntau xyoo, mas koj yuav nce tus nqe kom siab txaus, yog muaj tsawg xyoo, mas koj yuav txo tus nqe kom qis phim, vim tias tus nqe nws yuav muag rau koj mas yog tus nqe ntawm pes tsawg cim qoob.
17 Ua li mas nej yuav tsis txhob ib leeg noj ib leeg, nej yuav ntshai nej tus Tswv Ntuj; vim kuv HUAB TAIS, yog nej tus Tswv Ntuj.”

NPN    67: 2-3, 5, 7-8

Txais: (4) Tswv Ntuj, cia kom tas txhua haiv neeg cav txog koj!
los: Alleluia.

Thov kom Tswv Ntuj hlub peb thiab foom hmoov zoo rau peb,
kom nws ua nws lub ntsej muag ci tuaj rau saum peb.
Ua kom lub ntiaj teb paub txog koj tej kev,
ces cov kuj cuab thiaj yuav paub txog koj txoj kev cawm neeg.

Txais: (4) Tswv Ntuj, cia kom tas txhua haiv neeg cav txog koj!
los: Alleluia.

Kom cov kuj cuab dhia hom khaj thiab qw zoo siab,
vim koj kav cov haiv neeg raws kev ncaj;
koj yog tus coj cov kuj cuab nyob ntiaj teb.

Txais: (4) Tswv Ntuj, cia kom tas txhua haiv neeg cav txog koj!
los: Alleluia.

Lub ntiaj teb twb txi nws cov txiv lawm;
vim peb tus Tswv Ntuj tau foom hmoov zoo rau peb lawm.
Thov kom Tswv Ntuj foom lus zoo rau peb,
kom tas cov npoo ntiaj teb kawg hwm nws ntshai nws!

Txais: (4) Tswv Ntuj, cia kom tas txhua haiv neeg cav txog koj!
los: Alleluia.

As Les Lus Yas:    MT 5: 10

Txais: As les lus yas, as les lus yas.

Cov tau txoj hmoov zoo yog cov raug luag hiam vim txoj kev ncaj,
vim lub Ceeb Tsheej saum ntuj yog lawv tug.

Txais: As les lus yas, as les lus yas.

Ntawv Moo Zoo:    MT 14: 1-12

1 Lub caij ntawd, Yes Xus lub moo nrov ncha mus txog vaj txheeb Hes Los pob ntseg.
2 Ces Hes Los hais rau nws cov tub txib tias: "Tus ntawd yog Zam Ntxuav Plig! Nws sawv hauv cov tuag rov los lawm; vim li ntawd cov hwj huam yees ntxwv thiaj ua hauj lwm nyob hauv nws. “
3 Vim tias Hes Los tau ntes Zam thiab muab Zam khi coj mus kaw rau hauv tsev loj faj, los ntawm qhov tias Hes Los Dias yog Hes Los tij laug Fis Lis Pos tus poj niam.
4 Ces Zam tau hais rau Hes Los tias: "Koj tsis muaj cai yuav tus poj niam ntawd."
5 Hes Los twb xav muab Zam tua, tab sis nws ho ntshai tsoom pej xeem, vim sawv daws saib Zam yog ib tug yaj saub.
6 Ua li mas, thaum txog hnub tsuj xeeb Hes Los lub hnub nyoog yug, Hes Los Dias tus ntxhais tuaj dhia seev cev rau sawv daws saib, nws dhia tau ntxim Hes Los siab kawg.
7 Hes Los thiaj cog lus tias nws yuav pub yam uas tus ntxhais thov rau nws.
8 Leej niam cob tus ntxhais, ces tus ntxhais hais tias: "Thov koj muab Zam Ntxuav Plig lub taub hau txawb hauv ib lub phaj nqa los rau kuv ntawm no."
9 Tus vaj tu siab thiab mluas kiag, tab sis vim nws tau cog lus lawm, thiab vim cov qhua tuaj koom rooj qav, mas tus vaj thiaj txib kom lawv ua raws li tus ntxhais tau thov.
10 Tus vaj xa neeg mus txiav Zam caj dab hauv tsev loj faj.
11 Lawv muab Zam lub taub hau txawb hauv ib lub phaj nqa los cev rau tus ntxhais; ces tus ntxhais nqa mus cev rau nws niam.
12 Zam cov thwj tim tuaj nqa Zam lub cev mus faus; ces lawv mus hais qhia rau Yes Xus paub.

Tim     7     lub     8     Hli     2023

Hnub Ob Lis Piam Kaum Yim Nruab Xyoo A Nruab Lis Piam Xyoo I
Lectionary: 407

XHLT:  LN Cajetan, ua Leej Choj; los LN Sixtus II, Vaj Qhia tuag ua Tim Khawv thc.

Zaj Nyeem Ib:    XP 11: 4b-15

4b Cov tub ki His Xas Lais rov quaj quaj tias: "Kheev lam peb muaj nqaij noj mas!
5 Ua cas peb yuav nco tej nqaij ntses uas peb tau noj dawb nyob Hais Nkws Tos teb ua luaj! Nco tej dib ntsuab, tej dib pag, tej zaub, tej dos tej qij tib si!
6 Nyem no ces peb tshaib nqhis tas txhua yam, peb ntsia qhov twg los tsis muaj dab tsi li, tsuas pom mov Mas Nas xwb!"
7 Cov Mas Nas ntawd ua tej lub zoo li noob zaub txhwb qaib, daj tsaus tsaus li ib co txab ntoo.
8 Thaum tsoom pej xeem mus ncig khaws Mas Nas los txog, lawv xuas zeb zom los muab tuav hauv tshuaj khib, ces lawv muab hau rau hauv lauj kaub, lawv mam muab puab ua ncuav noj; cov ncuav Mas Nas qab li ncuav xyaw roj.
9 Hmo ntuj, thaum lwg poob los, cov Mas Nas kuj poob los thiab.
10 Mais Xes hnov tsoom pej xeem quaj quaj, nyias quaj ntawm nyias lub qhov rooj tsev tsam phooj; lawv ua rau HUAB TAIS npau taws heev, hos Mais Xes tu siab kawg nkaus.
11 Mais Xes hais rau HUAB TAIS tias: "Vim li cas koj ua nyuaj li no rau koj tus tub txib? Vim koj saib kuv tsis xis koj siab los ua cas koj thiaj muab lub nra saib tas koj haiv neeg huv si rau kuv ris?
12 Puas yog kuv tau xeeb haiv neeg no, los tau yug lawv los? Ua cas koj thiaj hais rau kuv tias: 'Koj puag haiv neeg no rau ntawm koj xub ntiag xws li ib leej niam pub mis puag tus me nyuam noj mis, mus kom txog lub teb chaws uas kuv tau cog lus muab rau lawv cov yawg koob’?
13 Kuv yuav muab nqaij qhov twg los rau tas cov neeg no noj? vim lawv quaj tsis tseg rau kuv tias: ‘Koj muab nqaij rau peb kom peb tau noj!’
14 Kuv ib leeg ris tsis taus haiv neeg no li, lawv hnyav dhau rau kuv lawm.
15 Yog koj ua nyuaj li no rau kuv, mas thov koj muab kuv tua kom tuag ntawm no zoo dua, yog tias koj tseem saib kub muaj nqes, kom kuv thiaj tsis tau pom txoj kev nyuaj siab li no ntxiv lawm."

NPN    81: 12-13, 14-15, 16-17

Txais: (2a) Nej hu nkauj zoo siab rau Tswv Ntuj, tus uas pab peb.

Kuv haiv neeg tsis mloog kuv lub suab,
His Xas Lais tsis xav mloog kuv lus.
Kuv thiaj tso lawv ua raws lawv lub siab cam thawj;
ces lawv thiaj mus raws li lawv lub siab ntshaw.

Txais: (2a) Nej hu nkauj zoo siab rau Tswv Ntuj, tus uas pab peb.

Kheev lam kuv haiv neeg mloog kuv lus mas,
thiab His Xas Lais lam mus raws kuv txoj kev mas,
tam sis ntawd kuv yuav txo lawv cov yeeb ncuab kom swb lawv tas,
kuv yuav tig kuv txhais tes mus ntaus cov neeg ntxub lawv.

Txais: (2a) Nej hu nkauj zoo siab rau Tswv Ntuj, tus uas pab peb.

Cov uas ntxub HUAB TAIS lam ua txuj qhuas kuv,
Tiam sis lawv txoj hmoov phem yuav nyob mus li .
Hos kuv yuav muab cov hmoov nplej qab tshaj los yug His Xas Lais,
yuav muab zib mu saum tsua los rau lawv noj kom txaus siab.

Txais: (2a) Nej hu nkauj zoo siab rau Tswv Ntuj, tus uas pab peb.

As Les Lus Yas:    MT 4: 4

Txais: As les lus yas, as les lus yas.

Neeg tsis kawg muab mov los yug siav xwb,
neeg tseem yuav yuav txhua lo lus tawm ntawm
Tswv Ntuj lub ncauj los yug siav thiab.

Txais: As les lus yas, as les lus yas.

Ntawv Moo Zoo:    MT 14: 13-21

13 Thaum Yes Xus hnov tias Zam Ntxuav Plig tuag lawm, nws caij nkoj mus rau ib qhov chaw xu kev, kom txhob muaj neeg. Zeej tsoom hnov, lawv tawm hauv tej nroog mus ko taw raws nws qab.
14 Thaum Yes Xus nqes nkoj, nws pom ib pab neeg coob coob, ces nws lub siab hlub lawv ; nws kho lawv cov neeg uas muaj mob muaj nkeeg kom zoo hlo.
15 Yav yuav tsaus ntuj, cov thwj tim txav los hais rau nws tias: "Thaj tsam no, tsis muaj neeg nyob, thiab lig lawm; koj tso tsoom neeg mus  tsev kom lawv tau kev mus muas mov noj hauv tej zos."
16 Yes Xus teb rau lawv tias: "Tsis tas lawv yuav mus qhov twg li, nej yog cov yuav muab mov rau lawv noj."
17 Cov thwj tim hais rau Yes Xus tias: “Ntawm no, peb tsuas muaj tsib lub ncuav mov thiab ob tug ntses xwb.”
18 Yes Xus hais tias: "Nej nqa los rau kuv."
19 Ces Yes Xus hais kom sawv daws zaum saum tej nroj tsaug; nws tuav tsib lub ncuav mov thiab ob tug ntses, nws tsa muag ntsia saum ntuj, nws hais zaj foom hmoov zoo, nws muab cov ncuav mov ntais, nws cev rau cov thwj tim, kom lawv muab rau sawv daws.
20 Tas sawv daws tau noj tsau txaus siab npo, lawv tseem khaws tej mov seem tau puv kaum ob tawb thiab.
21 Cov neeg uas tau noj mov ntawd muaj ze ntawm tsib txhiab leej txiv neej, tsis xam cov poj niam me nyuam li.

Tim     8     lub     8     Hli     2023

Hnub Peb Lis Piam Kaum Yim Nruab Xyoo A Nruab Lis Piam Xyoo I
Lectionary: 408

Yuav Hwm:   LN Dominic, ua Leej Choj

Zaj Nyeem Ib:   XP 12: 1-13

1 Mis Lias thiab As Loos nkawd yws yws txog Mais Xes, vim Mais Xes poj niam yog ib tug neeg Kus Sis uas nws tau yuav.
2 Nkawd yws tias: "HUAB TAIS puas hais lus rau Mais Xes ib leeg xwb? Nws tsis hais lus rau wb thiab lod?" Ces HUAB TAIS hnov.
3 Mais Xes yog ib tug neeg uas nyiam ua neeg me tshaj txhua leej hauv lub ntiaj teb no.
4 Ib sij huam, HUAB TAIS hais rau Mais Xes, As Loos thiab Mis Lias lawv tias: "Nej peb leeg tuaj lawm tom lub Tsev Tsam Phooj Sib Ntsib." Ces lawv peb leeg mus.
5 HUAB TAIS nqes hauv tus ncej huab los nyob ntawm lub qhov rooj Tsev Tsam Phooj. Nws hu As Loos thiab Mis Lias nkawd, ces nkawd ob leeg txav mus.
6 HUAB TAIS hais tias: "Neb mloog kuv cov lus no: Yog muaj ib tug yaj saub nyob hauv nej, mas kuv cia nws ua yog toog pom kuv, kuv hais lus rau nws nyob hauv npau suav xwb.
7 Tiam sis kuv tsis ua li ntawd rau kuv tus tub txib Mais Xes; nws yog tus kuv muab tas kuv lub tsev tso rau saib.
8 Kuv nrog nws hais lus tim ntsej tim muag kiag, kuv hais lus tseeb, tsis ua paj lug hais rau nws, nws tau pom kiag HUAB TAIS tus ntsuj. Vim li cas neb thiaj muaj cuab kav hais lus tsis zoo txog kuv tus tub txib Mais Xes?"
9 HUAB TAIS npau taws rau nkawd heev, ces nws rov mus lawm.
10 Tus ncej huab kuj ploj ntawm lub Tsev Tsam Phooj mus lawm thiab. Ces Mis Lias cia li mob ruas, nws ib ce dawb paug cuag daus. As Loos tig mus ntsia Mis Lias, As Loos pom nws mob ruas lawm.
11 As Loos hais rau Mais Xes tias: "Kuv tus tswv, thov koj txhob muab txim rau wb qhov txhaum uas wb tsis tau ua zoo xav, wb cia li ua lawm.
12 Thov koj tsis txhob cia nws zoo li ntawd, xws li tus me nyuam tuag hauv nws niam plab, uas thaum nws nchuav tawm los nws tej nqaij twb lwj tas ib nrab lawm."
13 Ces Mais Xes thiaj quaj thov HUAB TAIS tias: "Tswv Ntuj aw, kuv thov koj, thov koj kho nws kom nws zoo mas!"

NPN    51: 3-4, 5-6ab, 6cd-7, 12-13

Txais:   (3a) HUAB TAIS, thov koj khuv leej peb mas, vim peb tau ua txhaum lawm.

Tswv Ntuj, thov koj khuv leej kuv mas, vim koj lub siab zoo;
thov koj so kuv qhov txhaum pov tseg, vim koj muaj kev hlub loj tas nrho.  
Thov koj ntxuav kuv lub txim pov tseg kom tas  
thiab muab kuv qhov txhaum tshem mus kom kuv dawb huv tuaj.

Txais:   (3a) HUAB TAIS, thov koj khuv leej peb mas, vim peb tau ua txhaum lawm.

Kuv lees paub kuv qhov txhaum,
kuv qhov txhaum nyob rawv ntawm kuv xub ntiag.
Kuv tau ua txhaum rau koj ib leeg xwb,
kuv tau ua qhov uas koj saib yog qhov phem.”

Txais:   (3a) HUAB TAIS, thov koj khuv leej peb mas, vim peb tau ua txhaum lawm.

Thov kom neeg pom koj txoj kev ncaj thaum koj txiav txim,
thiab pom tias koj yeej ua yog thaum koj rau txim.
Koj ntsia, thaum kuv yug los kuv yeej muaj txim,
thaum kuv niam xeeb kuv, kuv yeej muaj txhaum lawm.

Txais:   (3a) HUAB TAIS, thov koj khuv leej peb mas, vim peb tau ua txhaum lawm.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim kom ruaj nreb rau kuv.
Koj tsis txhob muab kuv ntiab mus deb ntawm koj,  
thiab txhob rho koj leej Tswv Yim Ntshiab tawm ntawm kuv mus.

Txais:   (3a) HUAB TAIS, thov koj khuv leej peb mas, vim peb tau ua txhaum lawm.

As Les Lus yas:    ZAM 1: 49b

Txais: As les lus yas, as les lus yas.

Las Npis, koj yog Tswv Ntuj Leej Tub,
Koj yog His Xas Lais tus Vaj.

Txais: As les lus yas, as les lus yas.

Ntawv Moo Zoo:    MT 14: 22-36

22 Yes Xus txhib cov thwj tim kom nce nkoj ua nws ntej mus lawm sab ntug dej tim ub, hos nws nyob xa tsoom sid rov qab.
23 Thaum Yes Xus xa pab neeg rov qab mus tas lawm, nws nce mus saum roob rau ib qho xu kev, ces nws teev Ntuj. Thaum tsaus ntuj, tshuav nws ib leeg lawm xwb.
24 Lub nkoj twb mus deb ntawm ntug nqhuab lawm ntau ntsua muag. Dej nphau tuaj nplawm lub nkoj tsis tseg, vim cua tshuab tom hauv ntej tuaj.
25 Thaum hmo ntuj lub caij ntu plaub yav yuav kaj ntug, Yes Xus mus caum cov thwj tim, nws mus ko taw saum nplaim dej mus.
26 Lawv pom Yes Xus mus ko taw saum dej ntuj, lawv ceeb tas, lawv hais tias: "Yog poj ntxoog;" ces lawv qw qw, vim lawv ntshai kawg.
27 Tam sis ntawd Yes Xus hais rau lawv tias: "Nej tso siab mas! Yog kuv, nej xhob ntshai."
28 Pob Zeb hais rau Yes Xus tias: "Huab Tais, yog koj tiag no, koj hais kom kuv tsuj nplaim dej tuaj cuag koj."
29 Yes Xus teb tias: "Tuaj mas!" Ces Pob Zeb nqes nkoj tso ko taw tsuj saum nplaim dej mus cuag Yes Xus.
30 Tab sis nws pom cua hlob, nws ntshai, ces nws pib tog hauv dej, nws qw tias: "Huab Tais, cawm kuv mas!"
31 Yes Xus cev tes tam sis ntawd tuav Pob Zeb, nws hais rau Pob Zeb tias: "Neeg ntseeg me, ua cas koj ua xyem xyav?”
32 Thaum Yes Xus nkawd nce hlo rau hauv nkoj lawm, ces cua tu nrho.
33 Cov nyob hauv nkoj txhos caug zom zaws pe Yes Xus, lawv hais tias: "Koj yog Tswv Ntuj Leej Tub tiag!"
34 Thaum lawv hla dhau dej lawm, lawv mus nqes nkoj rau ntawm Nkes Nes Xas Les.
35 Cov neeg nyob txawm ntawd cim tau Yes Xus, ces lawv mus qhia rau tas ib thaj tsam nyob ncig ntawd paub. Sawv daws coj lawv cov neeg mob tuaj rau Yes Xus.
36 Lawv thov Yes Xus kom nws cia cov neeg mob chwv nws tus tw tsho xwb; ces txhua tus uas tau chwv, puav leej dim ntawm lawv tus mob.

Los:    MT 15: 1-2, 10-14  

Yog tej xyoo uas zaj saum toj no twb raug nyeem hnub ua ntej lawm, ces yuav xaiv nyeem zaj nram no:

1 Ib co Fas Lis Xais thiab ib co Kws Ntawv Ntshiab nyob Yes Lus Xas Les tuaj cuag Yes Xus, lawv hais rau nws tias:
2 "Vim li cas koj cov thwj tim hla cov yawg koob tej kab kev lis kev cai? Vim thaum lawv noj mov, lawv tsis xub ntxuav tes tso."
10 Yes Xus hu tsoom sid kom txav los ze nws. Nws hais rau lawv tias: "Nej mloog mog, kom nej to taub.
11 Tsis yog tej yam nkag hauv lub ncauj mus ua kom tus neeg tsis huv, tiam sis yog tej yam uas tawm hauv lub ncauj los ua kom tus neeg tsis huv."
12 Cov thwj tim txav los ze Yes Xus, lawv hais tias: "Koj puas paub tias cov Fas Lis Xais hnov koj hais li ntawd, mas lawv tsis txaus siab?"
13 Yes Xus teb tias: "Tus yub nroj twg tsis yog kuv Txiv nyob saum ntuj cog, mas yuav raug muab dob pov tseg.
14 Cia lawv chim lawv; lawv yog ib co neeg dig muag coj ib pab dig muag kev. Yog ib tug dig muag coj lwm tus dig muag kev, mas nkawd ob leeg kawg yuav ua ke mus poob qho xwb."

Tim      9      lub      8      Hli      2023

Hnub Plaub Lis Piam Kaum Yim Nruab Xyoo A Nruab Lis Piam Xyoo I
Lectionary: 409

XHLT:  LN Teresa Benedicta of the Cross, Nkauj Tsim Txiaj tuag ua Tim Khawv

Zaj Nyeem Ib:   XP 13: 1-2, 25–14:1, 26-29a, 34-35

1 HUAB TAIS hais rau Mais Xes [nyob hauv lub suab puam Pas Las] tias:
2 "Koj xa ib co neeg mus soj ntsuam Kas Nas Has teb, lub teb chaws uas kuv muab rau His Xas Lais cov tub ki mus nyob. Koj xa cov thawj coj, ib lub xeem ib tug mus."
25 Lawv mus soj ntsuam lub teb chaws tau plaub caug hnub, ces lawv rov qab los.
26 Thaum lawv los txog, lawv mus cuag Mais Xes, As Loos, thiab tas tsoom tub ki His Xas Lais nyob hauv lub hav suab puam Pas Las, nyob ntawm Kas Des. Lawv coj ib co lus los piav qhia rau tas tsoom neeg  sawv daws mloog, thiab lawv muab tej txiv hmab txiv ntoo uas lawv nqa tau los rau tas tsoom neeg saib.
27 Lawv hais rau Mais Xes tias: "Peb mus txog lub teb chaws uas koj xa peb mus xyuas. Yog ib lub teb chaws uas mis nyuj thiab zib ntab zib mu ntws lug; ntawm no yog lub teb chaws tej txiv hmab txiv ntoo.
28 Tab sis haiv neeg nyob hauv lub teb chaws ntawd tsiv kawg nkaus;  lawv tej nroog xov ntsa zeb ntsa tsua, thiab khov kawg li.  Peb tseem tau pom As Nas Kis cov xeeb ntxwv huv si thiab.
29 Cov neeg As Mas Les Kis nyob hauv lub xeev Nes Zes; cov neeg His Tis, cov Yes Npus Xis , thiab cov As Mos Lis lawv nyob pem cov toj roob, hos cov neeg Kas Nas Has nyob raws ntug hiav txwv thiab raws tus ntug dej Yos Las Das."
30 Kas Les thiaj hais lus rau tsoom pej xeem uas yws yws Mais Xes kom lawv txhob yws ntxiv, nws hais tias: "Peb yuav tsum sawv kev mus, peb mus ntaus kom tau lub teb chaws, peb muaj peev xwm ua tau xwb."
31 Tiam sis cov txiv neej uas tau nrog nws mus, teb tias: "Peb yuav ntaus tsis yeej haiv neeg ntawd li, vim lawv muaj zog tshaj peb."
32 Ces lawv hais ib co lus hem txog lub teb chaws uas lawv tau mus soj ntsuam  loslawm  rau cov tub ki His Xas Lais, lawv hem tias: "Lub teb chaws uas peb mus soj ntsuam mas yog ib lub teb chaws noj cov neeg nyob hauv nws. Cov neeg peb tau pom mas txhua tus yog neeg loj loj siab siab xwb.
33 Peb tau pom caj ces neeg loj loj siab siab ntag (cov neeg As Nas Kis yog ib caj ces neeg loj loj siab siab). Peb muab peb piv rau lawv mas peb zoo nkaus li ib co kooj xwb, lawv los ntshai lawv yeej saib peb zoo li kooj thiab xwb."
14:   1 Ces tas tsoom pej xeem tsa suab hlo quaj nrov nrov, lawv qw zom zaws; hmo ntawd tas haiv neeg quaj ib hmos.
26 Huab Tais hais rau Mais Xes thiab As Loos tias:  
27 “Tsav neeg phem no yuav yws yuav cem kuv mus txog thaum twg? Kuv hnov cov His Xas Lais tej lus yws lus cem kuv lawm.
28 Koj hais rau lawv tias: ‘Huab Tais hais li no: Kuv tuav txog kuv txoj sia los hais, kuv yuav ua rau nej raws nraim li nej cov lus uas nej tau hais rau kuv pob ntseg hnov lawm.
29a Nej cov pob txha yuav poob rau hauv lub teb chaws suab puam no.
34 Nej tau mus soj ntsuam lub teb chaws tau plaub caug hnub; muab ib hnub suav ua ib xyoos, ces nej yuav tau raug txom nyem kom puv plaub caug xyoo, vim nej lub txim txhaum, nej thiaj li yuav paub hais tias yog kuv muab nej tso pov tseg ces nej yuav zoo li cas.  
35 Kuv Huab Tais tau hais lawm, kuv yuav ua raws li ntawd rau tas tsoom neeg phem uas tuaj sib sau yws txog kuv no. Nyob hauv thaj suab puam no, lawv yuav tsum xaus lawv lub neej, lawv yuav tsum tuag mus.’”

NPN   106: 6-7ab, 13-14, 21-22, 23

Txais:   (4a) Huab Tais, thov koj nco txog peb, vim koj yeej hlub koj haiv neeg.

Peb tau ua txhaum ib yam li peb phaj txiv,
Peb tau ncaim ntawm koj txoj kev, peb tau ua qhov phem lawm.
Nyob Hais Nkws Tos teb, peb phaj txiv tsis
saib koj cov hwj huam yees ntxwv muaj nqes.

Txais:   (4a) Huab Tais, thov koj nco txog peb, vim koj yeej hlub koj haiv neeg.

Tau tsis ntev, lawv twb tsis nco qab nws tej hwj huam lawm,
lawv tsis tos mloog nws zaj tswv yim nws tej lus li.
Nyob teb chaws suab puam, lawv ntshaw noj ntshaw haus,
lawv sim Tswv Ntuj nyob ntawm thaj chaw av nkig teb do.

Txais:   (4a) Huab Tais, thov koj nco txog peb, vim koj yeej hlub koj haiv neeg.

Lawv tsis nco qab tus Tswv Ntuj uas tau cawm lawv,
tus tau ua tej yam loj nyob Hais Nkws Tos teb,
tus tau ua tej yam hwj huam txaus qhuas nyob Haas teb,
tus tau ua tej yam txaus ntshai nyob ntawm Dej Ntuj Liab.

Txais:   (4a) Huab Tais, thov koj nco txog peb, vim koj yeej hlub koj haiv neeg..

Nws tau hais tias nws yuav ua kom lawv tuag tu noob
tab sis Mais Xes, tus uas nws xaiv,
tau sawv lawv chaw thov nws nrog nws hais,
kom nws tso nws lub siab npau taws tseg.

Txais:   (4a) Huab Tais, thov koj nco txog peb, vim koj yeej hlub koj haiv neeg.

As Les Lus Yas:   LK 7: 16

Txais: As les lus yas, as les lus yas.

Ib tug yaj saub loj sawv los nyob hauv peb,
Tswv Ntuj tau tuaj xyuas nws haiv neeg lawm.

Txais: As les lus yas, as les lus yas.

Ntawv Moo Zoo:   MT 15: 21-28

21 Yes Xus tawm ntawm qhov chaw ntawd mus, nws mus rau thaj tsam Tws Los thiab Xis Doos teb.
22 Txawm muaj ib tug poj niam Kas Nas Has nyob hauv teb chaws ntawd tuaj. Nws hu nrov nrov tias: "Huab Tais, Das Vis Leej Tub, thov koj khuv leej kuv mas! Kuv tus ntxhais raug ib tug dab phem uas tsim txom nws heev  kawg."
23 Yes Xus tsis teb ib los li. Cov thwj tim txav los hais tias: "Koj muab nws ntiab khiav mus, vim nws pheej hu nrov nrov tsis tseg lawv peb qab."
24 Yes Xus teb rau lawv tias: "Kuv raug xa tuaj cawm cov yaj ploj hauv His Xas Lais tsev neeg xwb."
25 Tab sis tus poj niam twb tuaj txog lawm, nws txhos caug ntua pe Yes Xus, nws thov tias: "Huab Tais, thov koj pab kuv!"
26 Yes Xus teb rau nws tias: "Tsis phim muab me nyuam tej mov pov rau cov me nyuam dev noj."
27 Tus poj niam teb tias: "Huab Tais, li ntawd los cov me nyuam dev tseem tau noj tej tsig mov txeej ntawm lawv tus tswv lub rooj los thiab."
28 Ces Yes Xus teb rau nws tias: "Tus poj niam, koj txoj kev ntseeg loj kawg! Kom koj tau raws li koj lub siab xav." Ces nws tus ntxhais zoo hlo txij lub caij ntawd mus lawm.

Tim     10     lub     8     Hli     2023

Hnub Tsib Lis Piam Kaum Yim Nruab Xyoo A Nruab Lis Piam Xyoo I

Ua Hmoov Hwm LN Lawrence, leej Tsob Hwb tuag ua Tim Khawv
Lectionary: 618

Zaj Nyeem Ib:   2 KLN 9: 6-10

Cov kwv tij nkauj muad:
6 Leej twg tseb nplej tsawg nws kuj yuav sau tau tsawg, leej twg tseb nplej ntau nws kuj yuav sau tau ntau.
7 Nej nyias yuav pub raws li nyias tau txiav txim nyob hauv nyias siab lawm, nej tsis txhob pub zoo li nej khuv khuv xim, thiab zoo li yog nej yuav tsum pub, vim Tswv Ntuj nyiam tus zoo siab hlo pub rau luag.
8 Tswv Ntuj muaj peev xwm yuav pub tau tas ib puas tsav yam txiaj ntsim nchuav lug rau nej, kom nej muaj txhua yam tas mus li txhua sij hawm, thiab tseem yuav seem ib co txaus pab nej ua txhua yam hauj lwm zoo.
9 Raws li Ntawv sau tseg tias: ‘Nws tau muab faib rau luag,
nws tau pub rau cov pluag; nws txoj kev ua ncaj yuav nyob mus li.’
10 Tus uas muab noob qoob rau tus tswv teb, thiab muab mov ua txhiam xws,
nws haj yam yuav muab noob qoob rau nej thiab ua kom nej cov noob ntsu ntau tuaj, thiab nws yuav ua kom nej txoj kev ncaj txi tau txiv ntau.

NPN   112: 1-2, 5-6, 7-8, 9

Txais: (5) Tus neeg txawj hlub thiab qiv rau tus txom nyem, nws txoj hmoov zoo.

Tus hwm HUAB TAIS, nws txoj hmoov zoo :
Nws nyiam Huab Tais cov lus qhia tas siab nrho,
Nws caj ces yuav muaj hwj chim nyob ntiaj teb;
tiam neeg siab ncaj yuav tau txoj hmoov zoo.

Txais: (5) Tus neeg txawj hlub thiab qiv rau tus txom nyem, nws txoj hmoov zoo.

Tus neeg txawj hlub luag thiab qiv rau luag, nws txoj hmoov zoo.
Nws ua nws tej hauj lwm raws kev ncaj.
Nws yuav nyob ruaj nreb mus li;
sawv daws yuav nco ntsoov txog tus neeg ncaj mus ib txhis.

Txais: (5) Tus neeg txawj hlub thiab qiv rau tus txom nyem, nws txoj hmoov zoo.

Nws yuav tsis ntshai cov lus cuav hais phem txog nws ;
nws lub siab nyob ruaj nreb, nws tso siab lug rau HUAB TAIS.
Nws ua siab tawv qhawv, nws yuav tsis ntshai,
mus txog thaum nws tsa hau siab dauv muag saib nws cov yeeb ncuab.

Txais: (5) Tus neeg txawj hlub thiab qiv rau tus txom nyem, nws txoj hmoov zoo.

Nws pub tsis txuag li rau cov pluag :
nws txoj kev ua siab dav yuav nyob mus li,
nws yuav muaj meej mom siab thiab yuav nto koob meej,

Txais: (5) Tus neeg txawj hlub thiab qiv rau tus txom nyem, nws txoj hmoov zoo.

As Les Lus Yas:   ZAM 8: 12bc

Txais: As les lus yas, as les lus yas.

Huab Tais hais tias:  "Leej twg lawv kuv qab,
nws yuav tsis maub tsaus ntuj taug kev.
Nws yuav tau qhov pom kev kaj nws lub neej."

Txais: As les lus yas, as les lus yas.

Ntawv Moo Zoo:   ZAM 12: 24-26

Yes Xus hais rau nws cov thwj tim tias:
24 “Kuv hais qhov muaj tseeb tiag rau nej, yog ib lub noob nplej tsis poob rau hauv av thiab tsis tuag, mas nws tsuas yog ib lub noob nplej xwb, hos yog nws tuag, mas nws txi txiv ntau.
25 Leej twg nyiam nws txoj sia, mas nws ua nws txoj sia ploj; hos leej twg ntxub nws txoj sia hauv lub ntiaj teb no, mas nws yuav ceev tau nws txoj sia kom tau ciaj nyob mus li.
26 Yog leej twg xav tsob hwb kuv, mas nws yuav tsum los raws kuv, ces kuv nyob qhov twg, kuv tus tub txib kuj yuav nyob qhov ntawd thiab; yog leej twg tsob  hwb kuv, mas Leej Txiv yuav hwm nws.”