Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» COV ZAJ NYEEM NRUAB LIS PIAM XYOO II 2017-2018
by Mim Yesterday at 11:27 am

» Thov Leej Ntshiab YOS XES
by Maiv Tooj Yesterday at 6:22 am

» COV ZAJ NYEEM HNUB CHIV Xyoo B 2017-2018
by NrhiavTswvNtuj 7th December 2017, 5:47 am

» XH.Zoov Ntxheb Yaj Nthuav Ntawv Ntshiab.
by Maiv Tooj 7th December 2017, 5:42 am

» XH. Yaj Zoov Ntxheb lub Tsev THOOB TSIB
by Maiv Tooj 7th December 2017, 5:38 am

» COV ZAJ NYEEM NRUAB LIS PIAM XYOO I 2016-2017
by Mim 2nd December 2017, 5:19 pm

» Xib Hwb Thoj Xyooj lub neej
by Maiv Tooj 30th November 2017, 11:16 am

» Txhob poob siab
by Mim 27th November 2017, 2:49 pm

» COV ZAJ NYEEM HNUB CHIV XYOO A 2016-2017
by NrhiavTswvNtuj 24th November 2017, 6:16 am

» Người Công Giáo H, Mông ở Điên Biên Hmoob Kav Tos liv (Catholic) nyob xeev Dien Bien cob tsib teb
by Maiv Tooj 21st November 2017, 6:47 am

» Natuzza Evolo txais Tswv Ntuj txiaj ntsim.
by Maiv Tooj 14th November 2017, 8:53 pm

» TP.Txhiaj Foom
by Maiv Tooj 13th November 2017, 6:22 am

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM XYOO II 2017-2018

    Share
    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2003
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2017-2018

    Post  Mim on 3rd December 2017, 7:36 pm

    TIM 4 LUB 12 2017

    Hnub Ob Lis Piam Ib Caij Tos Huab Tais Xyoo B Nruab Lis Piam Xyoo II
    Hwm LN John Damascene

    Zaj Nyeem Ib: HIS XAIS 2: 1-5


    1 Lo lus uas tus Yaj Saub His Xais, uas yog As Mos tub, tau hnov hais txog Yus Das teb thiab Yes Lus Xas Les: 2 Ib hnub thaum lub caij kawg, lub roob uas HUAB TAIS tsa tsev nyob rau saud yuav yog lub roob loj dua cov, nws yuav sawv siab dua cov pov roob. Tas ib tsoom kuj cuab yuav khiav ua npoj ntws tuaj saum HUAB TAIS lub roob. 3 Muaj neeg coob yuav tuaj, lawv yuav hais tias : "Nej tuaj ! Peb nce mus pem Huab Tais lub roob, pem Yas Kos tus Tswv Ntuj lub tsev, kom nws qhia nws tej kev rau peb, ces peb yuav taug nws tej kev." Vim tias Huab Tais txoj kev cai yuav tawm ntawm Xis Yoos tuaj, thiab nws lo lus yuav tawm ntawm Yes Lus Xas Les tuaj. 4 Huab tais yuav txiav txim nyob hauv nruab nrab cov kuj cuab, nws yuav hais lus nchav rau coob leej neeg. Lawv yuav muab lawv rab ntaj los ntaus ua voom laij teb, muab lawv rab hmuv ntaus ua liag. Ib lub kuj cuab yuav tsis tsa ntaj mus ntaus lwm lub kuj cuab ntxiv; lawv yuav tsis kawm kev ntaus rog ntxiv lawm.
    5 Yas Kos tsev neeg, nej tuaj, peb cia li taug kev nyob hauv Huab Tais qhov pom kev!

    NPN 122: 1-2, 3-4B, 4CD-5, 6-7, 8-9

    Txais: Nej tuaj peb zoo siab hlo mus pem Huab Tais tsev

    Kuv zoo siab vim lawv hais rau kuv tias:.
    "Peb yuav nce mus lawm pem Huab Tais tsev.”
    Yes Lus Xas Les, nim no, peb txhais taw
    tau tsuj sab hauv koj cov rooj loog lawm.

    Txais: Nej tuaj peb zoo siab hlo mus pem Huab Tais tsev

    Yes Lus Xas Les raug luag txhim los zoo li
    ib lub Nroog uas zoo tau xwm yeem.
    Cov xeem neeg nce mus pem nws,
    Yog Huab Tais cov xeem neeg

    Txais: Nej tuaj peb zoo siab hlo mus pem Huab Tais tsev

    Lawv nce mus raws li txoj cai qhia rau His Xas Lais,
    Kom tau ua tsaug cav txog Huab Tais lub Npe.
    Nyob ntawd muaj ib co rooj txiav txim teeb tau tseg,
    Yog cov rooj cia rau Das Vis tsev neeg.

    Txais: Nej tuaj peb zoo siab hlo mus pem Huab Tais tsev

    Nej thov ntuj kom muaj kev thaj yeeb nyob Yes Lus Xas Les!
    Kom cov neeg uas nyiam koj tsuas muaj kev vam meej!
    Kom kev thaj yeeb nyob sab hauv koj cov ntsa loog,
    Kom kev vam meej nyob hauv koj cov vaj tsev.

    Txais: Nej tuaj peb zoo siab hlo mus pem Huab Tais tsev

    Vim kuv cov txheeb ze thiab kuv cov phooj ywg,
    kuv yuav foom rau koj tias: “Kom kev thaj yeeb nyob hauv koj!”
    Vim muaj Huab Tais peb tus Tswv Ntuj lub tsev,
    Kuv yuav thov ntuj kom koj tsuas tau kev zoo.

    Txais: Nej tuaj peb zoo siab hlo mus pem Huab Tais tsev

    As Les Lus yas: NPN 80: 4

    Txais: As les lus yas, as les lus yas.

    Thov koj tuaj cawm peb, Huab Tais, peb tus Tswv Ntuj;
    Cia koj lub ntsej muag ci tuaj rau saum peb, ces peb yuav tau txais kev cawm.

    Txais: As les lus yas, as les lus yas.

    Ntawv Moo Zoo: MT 8: 5-11

    5 Thaum Yes Xus mus hauv Kas Fas Naus, ib tug xab txheeb txav los ze Yes Xus, nws thov tias : 6 "Huab Tais, kuv tus tub txib pw tom tsev, nws tes taw tuag tas, nws mob txom nyem kawg." 7 Yes Xus hais rau nws tias : "Kuv yuav mus kho nws kom zoo." 8 Tus xab txheeb teb tias : "Huab Tais, kuv tsis tsim nyog koj chaws los hauv kuv lub qab ru tsev, tsuav yog koj hais ib lo lus xwb ces kuv tus tub txib yuav zoo hlo. 9 Vim tias kuv kuj yog ib tug neeg zwm rau tus loj dua kuv, kuv kuj muaj ib co tub rog zwm rau kuv thiab. Yog kuv hais rau ib tug tias : 'Koj mus !' nws cia li mus, kuv ho hais rau lwm tus tias : 'Koj los,' nws kuj cia li los. Kuv hais rau kuv tus tub txib tias : 'Koj ua qhov no !' nws cia li ua." 10 Yes Xus hnov nws hais li ntawd, Yes Xus qhuas kawg. Nws hais rau cov neeg raws nws qab tias : "Kuv hais tseeb rau nej, kuv tsis tau pom ib tug neeg ntseeg npaum li ntawd nyob hauv cov His Xas Lais li. 11 Kuv hais rau nej tias, yuav muaj neeg coob tuaj Toob Fab thiab Xib Fab tuaj nrog Has Nplas Has, His Xas Has thiab Yas Kos lawv noj rooj qav hauv Ntuj lub Ceeb Tsheej.“

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2003
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 4th December 2017, 1:12 pm

    TIM 5 LUB 12 HLIS 2017

    Hnub Peb Lis Piam Ib Caij Tos Huab Tais Xyoo B Nruab Lis Piam Xyoo II

    Zaj Nyeem Ib: HX 11: 1-10


    Hnub ntawd,
    1 Ib tug ntsuag yuav hlav ntawm Yes Xes lub hauv paus tuaj, ib lub cos paj yuav tawg ntawm nws cov cag tuaj. 2 HUAB TAIS lub tswv yim yuav nyob rawv saum nws. Yog ib lub tswv yim thoob tsib thiab muaj kev to taub, ib lub tswv yim pab xav tom ntej tom qab thiab muaj zog, ib lub tswv yim paub txuj thiab hwm HUAB TAIS. 3 Nws lub siab xib mus rau txoj kev hwm HUAB TAIS. Nws yuav tsis txiav cai raws li qhov muag pom sab nraud, nws yuav tsis txiav txim raws li hnov lus moo cua hais. 4 Nws yuav txiav txim ncaj rau cov pluag txom nyem, nws yuav phua raws kev haum pheej rau cov neeg me nyob hauv lub teb chaws. Nws yuav siv rab nplawm ntawm nws lub ncauj los ntaus cov neeg siab phem, nws yuav siv cov pa ntawm nws di ncauj los tua cov neeg lim hiam. 5 Kev ncaj yuav yog nws txoj phuam sia duav, kev pheej xeeb yuav yog nws txoj siv sia ntawm ntsag.
    6 Tus hma yuav nrog tus thav yaj nyob ua ke, tus tsov pom txwv yuav nrog tus thav tshis pw. Tus xyuas nyuj, tus thav tsov ntxhuav, thiab tus tsiaj rog yuav mus ua ke, ib tug me nyuam yuav coj lawv kev. 7 Tus maum nyuj thiab tus dais yuav nog zaub, nkawd cov me nyuam yuav pw ua ke; tus tsov ntxhuav yuav noj quav nyab xws li tus heev nyuj. 8 Tus me nyuam noj mis yuav ua si nyob ntawm nab qhov chaw, tus me nyuam cais mis lawm yuav cev tes rau hauv nab muaj taug lub qhov. 9 Yuav tsis muaj ua phem tsis muaj sib rhuav nyob saum tas kuv lub roob ntshiab, vim kev paub HUAB TAIS yuav nyob puv teb chaws, ib yam li dej puv lub hiav txwv.
    10 Thaum txog hnub ntawd, Yes Xes tus cag yuav sawv zoo li ib lub cim rau cov haiv neeg; cov kuj cuab yuav tuaj nrhiav nws; nws lub vaj tse yuav nto moo lug.

    NPN 72: 1-2, 7-8, 12-13, 17

    Txais: (7) Kev ncaj yuav tawg paj thaum lub caij nws nyob,
    yuav muaj kev thaj yeeb lug tsis txawj kawg.

    Tswv Ntuj, pub koj txoj kev haum pheej rau tus vaj,
    Thiab pub koj txoj kev ncaj rau vaj ntxwv tus tub;
    Nws yuav tswj koj haiv neeg raws kev ncaj
    thiab cov neeg me raws kev haum pheej.

    Txais: (7) Kev ncaj yuav tawg paj thaum lub caij nws nyob,
    yuav muaj kev thaj yeeb lug tsis txawj kawg.

    Kev ncaj yuav tawg paj lub caij nws nyob,
    thiab yuav muaj kev thaj yeeb lug mus txog thaum tsis muaj lub hli ntxiv.
    Thov kom nws tswj ib lub hiav txwv mus dhau ib lub hiav txwv,
    Thiaj txij tus niam dej mus txog npoo ntiaj teb kawg.

    Txais: (7) Kev ncaj yuav tawg paj thaum lub caij nws nyob,
    yuav muaj kev thaj yeeb lug tsis txawj kawg.

    Nws yuav cawm tus pluag uas hu txog nws,
    thiab yuav npo tus txom nyem uas tsis muaj chaw khaub zig.
    Nws yuav hlub tus neeg me thiab tus neeg pluag;
    Nws yuav cawm cov pluag txoj sia.

    Txais: (7) Kev ncaj yuav tawg paj thaum lub caij nws nyob,
    yuav muaj kev thaj yeeb lug tsis txawj kawg.

    Thov kom nws lub npe nto moo mus li;
    Kom nws lub npe nyob ntev npaum lub hnub.
    Nyob hauv nws, txhua xeem neeg nyob ntiaj teb yuav tau hmoov zoo;
    txhua haiv neeg yuav tshaj tawm nws txoj kev zoo siab.

    Txais: (7) Kev ncaj yuav tawg paj thaum lub caij nws nyob,
    yuav muaj kev thaj yeeb lug tsis txawj kawg.

    As Les Lus yas

    Txais: As les lus yas, as les lus yas.

    Nej ntsia, peb tus Huab Tais yuav tuaj nrog kev muaj hwj huam;
    nws yuav ua kom nws cov tub txib qhov muag pom kev tuaj.

    Txais: As les lus yas, as les lus yas.

    Ntawv Moo Zoo: LK 10: 21-24

    21 Lub caij ntawd, Yes Xus zoo siab nyob hauv Leej Ntuj Plig Ntshiab, nws hais tias : "Leej Txiv, kuv cav lus zoo txog koj, Huab Tais kav lub ntuj lub teb, koj tau zais tej ntawd ntawm cov neeg thoob tsib thiab cov neeg ntse, tiam sis koj qhib rau cov neeg coj li tus me nyuam paub. Leej Txiv, vim koj yeej nyiam ua li ntawd. 22 Kuv Txiv muab tas ib puas tsav yam tso rau kuv. Tsis muaj leej twg paub tias Leej Tub yog tus twg, kawg yog Leej Txiv thiaj paub; tsis muaj leej twg paub tias Leej Txiv yog tus twg, kawg yog Leej Tub thiaj paub, thiab kawg yog tus uas Leej Tub xav qhia rau kom paub xwb." 23 Yes Xus tig los rau nws cov thwj tim uas nyob ib cag, nws hais rau lawv tias : "Ob lub qhov muag uas pom tej yam nej pom no tau txoj hmoov zoo ! 24 Kuv hais rau nej tias coob tus yaj saub thiab coob tus vaj xav pom qhov uas nej pom, tab sis lawv tsis tau pom, xav hnov tej uas nej hnov, tab sis lawv tsis tau hnov."

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2003
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 5th December 2017, 7:11 am

    TIM       6      LUB      12      HLIS       2017

    Hnub Plaub Lis Piam Ib Caij Tos Huab Tais Nruab Lis Piam Xyoo II

    Hwm LN Nicholas

    Zaj Nyeem Ib:       HX  25:   6-10A


    6 Nyob saum lub roob no, tus HUAB TAIS kav tsoom tshiab yuav ua ib rooj nqaij rooj hno rau tas cov haiv neeg huv tib si, yog ib rooj qav muaj nqaij muaj cawv qab kawg nkaus, yog hom nqaij muaj ntshiv muaj roj muaj hlwb pob txha ntxuag, thiab yog hom cawv uas qab tshaj plaws. 7 Nyob saum lub roob no, HUAB TAIS yuav yaws daim ntaub vov tas ib tsoom neeg pov tseg, nws yuav rhuav lub vas uas qhwv tas ib tsoom kuj cuab. 8 Nws yuav rhuav kev tuag kom ploj mus li ib txhiab ib txhis. HUAB TAIS Tswv Ntuj yuav so cov kua muag ntws saum sawv daws lub ntsej muag. Nws yuav tshem nws haiv neeg nyob thoob ntiaj teb txoj kev poob ntsej muag, vim HUAB TAIS tau hais li ntawd. 9 Hnub ntawd sawv daws yuav hais tias : "Nej ntsia peb tus Tswv Ntuj uas peb vam txog tias nws yuav cawm peb, yog tus HUAB TAIS uas peb tos ntsoov txog. Peb kav tsij dhia lom zem kav tsij zoo siab nyob hauv nws txoj kev cawm seej”! 10 Vim HUAB TAIS yuav tso nws txhais tes nyob saum lub roob no.


    NPN        23:   1-3A, 3B-4, 5, 6

    Txais:  (6cd) Kuv yuav nyob hauv Huab Tais tsev niaj hnub tas kuv lub neej.

    HUAB TAIS yog tus tswv zov yaj saib kuv,
    kuv yuav tsis tshaib txog dab tsi.
    Nws cia kuv so nyob hauv tej tshav zaub mos ntsuab xiab;
    Nws coj kuv mus nyob ze cov dej tus yees;
    nws ua kom kuv tus ntsuj plig muaj zog

    Txais:  (6cd) Kuv yuav nyob hauv Huab Tais tsev niaj hnub tas kuv lub neej.

    Nws coj kuv mus taug txoj kev ncaj, vim nws lub npe.
    Txawm kuv taug kev hauv ib lub hav tsaus nti,
    kuv tsis ntshai dab tsi phem; vim koj nyob rawv ntawm kuv ib sab,
    koj rab nplawm thiab rab pas nrig ua kuv luag.

    Txais:  (6cd) Kuv yuav nyob hauv Huab Tais tsev niaj hnub tas kuv lub neej.

    Koj rau ib rooj mov rau ntawm kuv xub ntiag
    rau kuv cov yeeb ncuab ntsia ntsoov;
    koj muab roj pleev kuv taub hau;
    kuv lub ntim puv phwj yaws.

    Txais:  (6cd) Kuv yuav nyob hauv Huab Tais tsev niaj hnub tas kuv lub neej.

    Kev ua siab zoo thiab kev khuv leej raws kuv nraim
    niaj hnub hauv kuv lub neej;
    Kuv yuav nyob hauv HUAB TAIS tsev
    mus li txog txhiab niag tim puas xyoo.

    Txais:  (6cd) Kuv yuav nyob hauv Huab Tais tsev niaj hnub tas kuv lub neej.

    As Les Lus Yas    

    Txais:   As les lus yas, as les lus yas.

    Nej ntsia, Huab Tais tuaj cawm nws haiv neeg;
    Cov uas npaj tiav log tos txais nws lawv txoj hmoov zoo.

    Txais:   As les lus yas, as les lus yas.

    Ntawv Moo Zoo:       MT  15:   29-37

    29 Thaum Yes Xus mus dhau qhov chaw ntawd lawm, nws tuaj txog ntawm ntug dej ntuj Nkas Lis Lais, nws nce mus saum roob, nws mus zaum nyob ntawd. 30 Tej pab neeg coob coob tuaj cuag nws; lawv coj tej tus ceg tawv, tej tus dig muag, tej tus ruam tsis txawj hais lus, tej tus tuag tes tuag taw, thiab tseem coj lwm cov mob tuaj tso ntawm Yes Xus ko taw, Yes Xus kho sawv daws zoo tas huv tib si. 31 Ib zeej tsoom sawv daws qhuas kawg, vim lawv pom cov nplaig txhav hais tau lus, cov tuag tes tuag taw rov muaj zog tuaj, cov ceg tawv rov mus taus kev zoo, hos cov dig muag rov pom kev tuaj; ces lawv cav txog His Xas Lais tus Tswv Ntuj lub koob meej.
    32 Yes Xus hu nws cov thwj tim los cuag nws, nws hais rau lawv tias : “Kuv hlub pab neeg no, vim lawv twb nrog kuv nyob tau peb hnub lawm, lawv tsis muaj dab tsi noj. Kuv tsis xav cia lawv tshaib plab rov mus tsev, tsam lawv tsaus muag tom kev." 33 Cov thwj tim hais rau nws tias : "Peb yuav nrhiav mov qhov twg hauv lub teb chaws quav poj no kom txaus ib pab neeg coob npaum no noj ?" 34 Yes Xus hais rau lawv tias : “Nej muaj pes tsawg lub ncuav mov ?” Lawv teb tias : “Muaj xya lub thiab ob peb tug ntses me.” 35 Yes Xus kom tsoom sid zaum pem teb. 36 Nws tuav xya lub ncuav mov thiab cov ntses, nws ua Ntuj tsaug. Nws muab cov ncuav mov ntais, nws cev rau cov thwj tim, ces cov thwj tim coj mus faib rau tsoom sid. 37 Thaum sawv daws noj tsau tas, lawv khaws tej sab mov seem puv xya tawb !

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2003
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 8th December 2017, 10:37 am

    TIM 7 LUB 12 HLIS 2017

    Hnub Tsib Lis Piam Ib Caij Tos Huab Tais Xyoo B Nruab Lis Piam Xyoo II

    Hwm LN Ambrose, Tswv Qhia thiab Kws Txuj Ntshiab

    Zaj Nyeem Ib: HX 26: 1-6


    1 Hnub ntawd, nyob Yus Das teb lawv yuav hu ib zaj nkauj li no : "Peb muaj ib lub tsheej ruaj khov; nws muaj ntsa zeb thiab phab ntsa siab thaiv kom tau cawm peb. 2 Nej cia li qhib cov rooj loog ! Kom haiv neeg siab ncaj nkag los, yog haiv neeg uas coj txoj kev tseeb. 3 Koj muaj ib lub hom phiaj ruaj khov, yog koj yuav ua kom muaj kev thaj yeeb, txoj kev thaj yeeb uas yog peb tso siab rau koj. 4 Nej tso siab rau HUAB TAIS mus li! Vim HUAB TAIS yog lub tsua uas nyob ib txhiab ib txhis. 5 Nws yog tus ua kom cov nyob saum tej chaw siab poob rau qhov chaw qis; lub tsheej uas nyob saum qhov siab, nws ua kom poob nthav rau qhov qis, vau hlo rau hauv av, thiab mus nyob xyaw av. 6 Nws yuav raug cov neeg txom nyem muab ko taw tsuj thiab raug cov neeg pluag tshais ruam tsuj nws."

    NPN 118:1 + 8-9, 19-21, 25-27A

    Txais: (26a) Tus tuaj ntawm Huab Tais lub npe tuaj nto koob meej.

    Nej cav lus zoo ua HUAB TAIS tsaug, vim nws siab zoo,
    nws hlub peb tas ib txhiab ib txhis.
    Khiav los nkaum hauv HUAB TAIS zoo dua tso siab rau tib neeg !
    Zoo dua tso siab rau tej ua nom ua tswv.

    Txais: (26a) Tus tuaj ntawm Huab Tais lub npe tuaj nto koob meej.

    Nej qhib cov rooj vag mus hauv txoj kev ncaj rau kuv,
    kuv yuav chaws mus, kuv yuav ua HUAB TAIS tsaug.
    Ntawm no yog HUAB TAIS lub rooj vag;
    cov neeg ncaj yuav nkag nov mus.
    Kuv yuav ua koj tsaug, vim koj tau teb kuv, koj yog tus cawm kuv.

    Txais: (26a) Tus tuaj ntawm Huab Tais lub npe tuaj nto koob meej.

    HUAB TAIS, thov pub kev cawm rau peb!
    HUAB TAIS, thov pub kev yeej rau peb!
    Tus tuaj ntawm HUAB TAIS lub npe tuaj, nws nto koob meej.
    Peb nyob hauv HUAB TAIS tsev foom koob hmoov rau nej.
    HUAB TAIS yog Tswv Ntuj, nws pub qhov pom kev rau peb..

    Txais: (26a) Tus tuaj ntawm Huab Tais lub npe tuaj nto koob meej.

    As Les Lus Yas: His Xais 55: 6

    Txais: As les lus yas, As les lus yas

    Nrhiav HUAB TAIS thaum nej tseem nrhiav tau nws;
    hu nws thaum nws tseem nyob ze.

    Txais: As les lus yas, As les lus yas

    Zaj Ntawv Moo Zoo: Mas Tais 7: 21, 24-27


    Yes Xus hais rau nws cov thwj tim tias:
    21 “Tsis yog txhua tus hu kuv tias : ‘Huab Tais, Huab Tais,’ thiaj yuav tau mus hauv Ntuj lub Ceeb Tsheej. Tiam sis yog cov ua raws li kuv Txiv nyob saum ntuj lub siab nyiam. 24 Leej twg mloog cov lus uas kuv nyuam qhuav hais, thiab ua raws li cov lus no, mas tus neeg ntawd piv tau rau ib tug neeg xyuam xim uas nws txhim tsev rau saum tsua. 25 Thaum los nag hlob, dej sab siv huam, cua tshuab ntsawj lub tsev, tab sis tsev tsis vau, vim lub tsev cog rau saum tsua. 26 Hos leej twg hnov cov lus kuv nyuam qhuav hais, tab sis nws tsis ua raws li cov lus ntawd, tus neeg ntawd piv tau rau ib tug neeg ruam txhim tsev rau saum av xuab zeb. 27 Thaum los nag hlob, dej sab siv huam, cua tshuab ntsawj lub tsev, ces lub tsev vau tas puas tas, nws raug xwv txheej loj.”


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2003
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 8th December 2017, 2:06 pm

    TIM 8 LUB 12 HLIS 2017

    Hnub Rau Lis Piam Ib Caij Tos Huab Tais Xyoo B Nruab Lis Piam Xyoo II

    Hwm txog Niam Mab Liab xeeb los tsis lo neeg lub keeb txhaum

    Zaj Nyeem Ib : HAUV PAUS 3: 9-15, 20


    9 HUAB TAIS Tswv Ntuj hu tus txiv neej hais tias : "Koj nyob qhov twg ?" 10 Tus txiv neej teb tias : "Kuv hnov koj tshais ruam hauv lub vaj. Kuv ntshai vim kuv liab qab, kuv thiaj khiav tsiv nraim." 11 Tswv Ntuj rov hais ntxiv tias : "Leej twg qhia koj tias koj liab qab ? Yog koj noj lub txiv uas kuv txwv tsis pub noj lawm puas yog ?" 12 Tus txiv neej teb tias : "Yog tus poj niam uas koj tso nyob ze kuv, muab lub txiv rau kuv, ces kuv thiaj noj !" 13 HUAB TAIS Tswv Ntuj hais rau tus poj niam tias : "Koj ua dab tsi li ntawd ?" Tus poj niam teb tias : "Yog niag nab ntxias kuv, kuv thiaj noj." 14 Ces HUAB TAIS Tswv Ntuj hais rau tus nab hais tias : "Vim koj tau ua li ntawd, koj txoj hmoov yuav phem tshaj ib tsoom tsiaj nyeg thiab tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej. 15 Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws."
    20 Tus txiv neej tis npe rau nws poj niam hu ua Es Vas, vim nws yog ib tsoom neeg muaj txoj sia leej niam.

    NPN 98: 1, 2-3AB, 3CD-4

    Txais: (1) Nej hu ib zaj nkauj tshiab rau Huab Tais, vim nws tau ua tej yam txaus qhuas.

    Nej hu ib zaj nkauj tshiab rau Huab Tais,
    vim nws tau ua tej yam txaus qhuas;
    Nws txhais tes xis tau ua kom nws muaj yeej,
    nws txhais npab dawb huv tau ua.

    Txais…

    HUAB TAIS tau qhia nws txoj kev cawm seej rau sawv daws paub;
    nws tau qhia nws txoj kev ncaj rau cov haiv neeg pom.
    Nws tau nco qab txog nws lub siab zoo thiab nws lub siab pheej xeeb
    rau His Xas Lais tsev neeg.

    Txais...

    Txhua qhov chaw tim daim npoo ntiaj teb tau pom
    peb tus Tswv Ntuj txoj kev cawm seej lawm.
    Tas cov teb chaws, nej hu nkauj luag ntxhi rau HUAB TAIS;
    Cia li seev suab hu nkauj, cia li hu nkauj qhuas nws.

    Txais…

    Zaj Nyeem Ob: ES FES XOS 1: 3-6, 11-12

    Paj Lug sau ntawv tias:
    3 Kuv cav lus zoo txog peb tus Huab Tais Yes Xus Pleev tus Tswv Ntuj thiab nws Leej Txiv, nws tau foom txhua yam txiaj ntsim koob hmoov nyob saum ntuj pub rau peb nyob hauv Leej pleev. 4 Nws tau xaiv peb nyob hauv Leej Pleev thaum tseem tsis tau tsim lub ntuj lub teb, kom peb ntshiab huv, tsis muaj chaw xyeej rau ntawm nws xub ntiag nyob hauv txoj kev nyiam. 5 Nws yeej xub npaj peb los ua nws cov tub sau ntxhais sau nyob hauv Yes Xus Pleev thaum ntxov, raws li nws lub siab nyiam lawm, 6 kom tau cav txog nws lub koob meej ntawm nws txoj kev ua zoo, uas yog yam khoom plig nws pub rau peb nyob hauv leej Zoo Nyiam.
    11 Kuj yog nyob hauv nws, peb raug rho ntawv xaiv cia rau ib cag, raws li tus uas coj tas txhua yam haum li nws siab nyiam tus txheej txheem, 12 kom peb ua cov uas xub tso siab rau Leej Pleev ua ntej kom tau cav txog nws lub koob meej.

    As Les Lus Yas: LK 1: 28

    Txais: As les lus yas, As les lus yas.
    Koj nyob zoo, Mab Liab, koj tau txiaj ntsim puv siab, Huab Tais Ntuj nrog koj nyob;
    koj tau koob tau hmoov tshaj ib tsoom poj niam tib si.

    Txais: As les lus yas, As les lus yas.

    Zaj Ntawv Moo Zoo: LUS KAS 1: 26-38

    26 Lub rau hli, Tswv Ntuj xa tus Tshiab Nkas Nplias mus cuag ib tug ntxhais hauv ib lub zos nyob Nkas Lis Lais. Lub zos ntawd hu ua Nas Xas Les. 27 Tus ntxhais ntawd, lawv muab qhaib rau ib tug txiv neej hu ua Yos Xes, caj ces Das Vis lawm. Hos tus ntxhais lub npe hu ua Mab Liab. 28 Tus Tshiab chaws mus hauv Mab Liab tsev, nws hais rau Mab Liab tias : "Koj nyob kaj lug, tus tau txiaj ntsim puv siab ! Huab Tais nrog koj nyob." 29 Mab Liab hnov lo lus ntawd, nws lub siab nphau npog, nws xav hauv nruab siab tias lo lus hawm ntawd yog xav hais dab tsi. 30 Tus Tshiab hais rau Mab Liab tias : "Mab Liab, koj tsis txhob ntshai. Tswv Ntuj saib koj ntxim Tswv Ntuj siab. 31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus. 32 Nws yuav yog ib tug loj, luag yuav hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws. 33 Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg." 34 Mab Liab hais rau tus Tshiab tias : "Qhov ntawd yuav muaj tuaj zoo li cas, vim kuv tsis paub ib tug txiv neej." 35 Tus Tshiab teb rau Mab Liab tias : "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub. 36 Saib ! Es Lis Xas Npes, tus uas txheeb koj, luag hu nws ua pog khoom, nws hnub nyoog laus lawm, tab sis nws kuj xeeb tub lawm thiab; lub hlis no, yog lub rau hli rau nws lawm. Vim tias, tsis muaj ib yam uas Tswv Ntuj ua tsis tau." 38 Ces Mab Liab hais tias : "Kuv yog Huab Tais tus ntxhais txib. Kuv xav kom muaj raws li koj hais." Tus Tshiab thiaj tso Mab Liab tseg.

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2003
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 8th December 2017, 4:06 pm

    TIM 9 LUB 12 HLIS 2017

    Hnub Xya Lis Piam Ib Caij Tos Huab Tais Xyoo B Nruab Lis Piam Xyoo II

    Hwm LN Juan Diego

    Zaj Nyeem Ib: His Xais 30: 19-21, 23-26


    Huab Tais Tswv Ntuj hais li no:
    19 Xis Yoos tsoom neeg uas nyob Yes Lus Xas Les, nej yuav tsis quaj ntxiv : vim nws yuav ua zoo rau nej thaum nws hnov nej lub suab quaj; nws hnov dheev nej hu, ces nws yuav teb rau nej. 20 Huab Tais yuav muab cov mov txhawj xeeb rau nej noj thiab cov dej nyuaj siab rau nej haus. Tus xib hwb qhia nej yuav tsis nyob nraim ntawm nej ntxiv, nej qhov muag yuav pom tus qhuab qhia nej. 21 Nej pob ntseg yuav hnov ib lub suab nrov ntawm nej nraub qaum tuaj tias : “Ntawm no yog txoj kev, nej taug mus,” nej tsis txhob mus sab xis los sab laug.
    23 Nws yuav ua nag los ywg cov noob qoob nej tseb rau hauv av. Ces cov nplej uas tawm hauv av los yuav qab thiab yuav ntsu. Hnub ntawd, nej cov tsiaj yuav nog zaub hauv tej lub tiaj zaub, nej cov yaj yuav noj zaub hauv tej lub tshav dav dav. 24 Cov heev nyuj thiab cov luj uas ua txoj hauj lwm laij teb yuav noj cov quav nyab uas yog xuas duav hlau thiab duav nkaug daus rau noj. 25 Saum tej toj roob siab thiab tej pov roob siab, yuav muaj dej hlob thiab dej ntws, yog txog hnub sib tua loj thiab cov vaj loog zeb yuav vau tas. 26 Ces lub hli yuav ci pom kev npaum lub hnub hos lub hnub yuav ci pom kev tshaj xya npaug ntxiv, ib yam li yog xya hnub qhov pom kev ua ib hnub ci, hnub ntawd HUAB TAIS yuav qhwv nws haiv neeg cov qhov txhab thiab yuav kho lawv cov nqaij ntuag uas yog raug nws nplawm.

    NPN 147: 1-2, 3-4, 5-6

    Txais: (His Xais 30:18d) Txhua tus uas tos Huab Tais tau txoj hmoov zoo.

    Nej cav txog Huab Tais, vim nws siab zoo
    nej hu nkauj cav txog peb tus Tswv Ntuj, vim nws hlub neeg;
    tsim nyog peb cav txog nws.
    HUAB TAIS rov tsa Yes Lus Xas Les;
    nws sau His Xas Lais cov neeg tawg tas rov los ua ke.

    Txais…

    Nws kho cov neeg mob siab mob ntsws
    thiab qhwv lawv tej qhov txhab.
    Nws suav cov hnub qub;
    nws tis lawv cov npe ib lub zuj zus.

    Txais…

    Peb tus HUAB TAIS loj thiab muaj hwj huam tas nrho;
    nws txoj kev thoob tsib tsis muaj qhov txawj tag.
    HUAB TAIS tsa cov neeg me cai;
    nws thawb kom cov siab phem ntog hauv av.

    Txais…


    As Les Lus Yas: His Xai 33: 22


    Txais: As les lus yas, As les lus yas

    HUAB TAIS yog tus txiav txim rau peb, tus sau txoj cai rau peb,
    yog peb tus vaj; nws yog tus yuav cawm peb dim.
    .
    Txais: As les lus yas, As les lus yas

    Zaj Ntawv Moo Zoo: Mas Tais 9: 35-10:1, 5A, 6-8


    35 Yes Xus mus ncig txhua cov nroog thiab cov zos huv si, nws qhia sawv daws nyob hauv cov tsev txoos, nws tshaj lub Moo Zoo txog Ntuj lub Ceeb Tsheej, nws kho sawv daws tej txiab xeeb thiab tej mob nkeeg tas huv si. 36 Yes Xus pom tsoom pej xeem, nws hlub lawv, vim lawv sawv daws sab thiab qaug zog zoo li ib co yaj tsis muaj tsw zov. 37 Yes Xus thiaj hais rau nws cov thwj tim tias : "Qoob loo ntau kawg, tab sis cov tub zog tsawg. 38 Nej thov tus tswv qoob kom nws xa ib co tub zog tuaj sau nws cov qoob."
    10 1 Yes Xus hu nws kaum ob leeg thwj tim los cuag nws. Nws muab hwj huam kom lawv ntiab tau dab tawm, thiab kho tau tej txiab xeeb thiab tej mob nkeeg kom zoo. 5 Yes Xus xa kaum ob leeg no mus tshaj lub Moo Zoo, nws qhia lawv tias : 6 “Nej mus nrhiav cov yaj ploj hauv haiv His Xas Lais. 7 Thaum nej mus kev, nej ceeb toom tias: ‘Ntuj lub Ceeb Tsheej tuaj txog ze lawm.’
    8 Nej kho cov mob kom zoo, nej tsa cov tuag kom ciaj rov los, nej kho cov mob ruas kom huv, nej ntiab dab kom khiav. Nej tau txais dawb, nej kuj yuav pub dawb thiab.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2003
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim on 10th December 2017, 2:06 pm

    TIM 11 LUB 12 HLIS 2017

    Hnub Ob Lis Piam Ob Caij Tos Huab Tais Xyoo B Nruab Lis Piam Xyoo II

    Hwm LN Damasus I

    Zaj Nyeem Ib: HIS XAIS 35: 1-10


    1 Cov teb chaws suab puam thiab tej teb av qhuav yuav dhia hom khaj; lub teb chaws av phem yuav zoo siab thiab tawg paj. 2 Lawv yuav tawg paj ncw nra paug thiab yuav hu tej zaj nkauj zoo siab; lawv yuav tau txais Les Npas Nos lub koob meej, uas yog roob Kas Mes thiab Sas Los qhov zoo nkauj. Lawv yuav pom HUAB TAIS lub hwj chim, uas yog peb tus Tswv Ntuj lub meej mom ci ntsa iab. 3 Nej ua kom cov tuag tes rov muaj zog, kom cov hauv caug ntshaus raws rov khov tuaj. 4 Nej hais rau cov siab me tias : "Nej ua siab loj ! Nej txhob ntshai ! Ntsia saib, nej tus Tswv Ntuj tuaj lawm ! Nws tuaj hais qhov ncaj kom peb muaj ntsej muag; nws nqa paj tshab saum ntuj tuaj, nws tuaj cawm peb. 5 Ces cov dig muag ob lub qhov muag yuav rua hlo, cov lag ntseg ob lub pob ntseg yuav qhib plho. 6 Tus neeg ceg tawv yuav dhia nrawm xws tus muas lwj, tus nplaig txhav yuav hu tau nkauj. Ib co dej yuav txhawv tawm hauv cov teb chaws suab puam los, tej tus dej loj yuav ntws tawm hauv cov teb chaws av qhuav los. 7 Thaj av suab puam kub lug yuav hloov ua pas dej, lub teb chaws tshaib dej yuav txhawv dej ntws lug tawm los; thaj chaw uas hma nyob yuav hloov ua hav iav muaj tauj deg thiab muaj ncaug ua ntawv. 8 Nyob ntawd, yuav muaj ib txog kev rau lawv taug, ib txog kev loj tis npe hu ua "txoj Kev Ntshiab." Tus neeg tsis huv yuav mus tsis tau txoj kev ntawd, tsuas yog Nws xwb thiaj yuav taug txoj kev ntawd pub rau nws haiv neeg; cov neeg vwm yuav tsis yuam kev mus taug txoj kev ntawd. 9 Yuav tsis muaj tsov, tsis muaj tsiaj tsiv tsaim nyob ntawd, yuav tsis pom ib tug nyob ntawd li, tsuas yog cov uas Ntuj tau txhiv lawv thiaj tau taug xwb. 10 Vim cov neeg uas HUAB TAIS txhiv yuav rov qab los, lawv yuav chaws mus hauv Xis Yoos thiab nqua suab zoo siab ntag yees, ib txog kev zoo siab mus ib txhiab ib txhis nyob saum lawv taub hau. Lawv yuav ntsib kev zoo siab thiab kev luag ntxhwb ntxhi, kev tu siab thiab quaj ntsuag yuav ploj ntais mus.

    Nkauj Paj Nruag 85: 9AB+10, 11-12, 13-14

    Txais: (H X 35:4f) Peb tus Tswv Ntuj yuav tuaj cawm peb!

    Kuv hnov tias Tswv Ntuj hais dab tsi.
    Huab Tais nws tshaj txog kev thaj yeeb rau nws haiv neeg,
    Nws txoj kev cawm los txog ze ze cov hwm nws lawm,
    nws lub hwj chim nyob txawm hauv peb lub teb chaws.

    Txais: (H X 35:4f) Peb tus Tswv Ntuj yuav tuaj cawm peb!

    Kev ua zoo thiab kev tseeb yuav sib ntsib,
    kev ncaj thiaj kev thaj Yeeb yuav los sib puag.
    Kev Tseeb yuav nthaw kaus tawm hauv ntiaj teb los,
    kev ncaj yuav dauv muag ntsia saum ntuj los.

    Txais: (H X 35:4f) Peb tus Tswv Ntuj yuav tuaj cawm peb!

    HUAB TAIS yuav pub txiaj ntsim puv npo,
    peb cov av yuav ntsu qoob loo ntau tshaj qub.
    Kev ncaj yuav mus ua nws ntej,
    Kev cawm yuav taug raws txoj kev nws hneev taw rhawv.

    Txais: (H X 35:4f) Peb tus Tswv Ntuj yuav tuaj cawm peb!

    As Les Lus Yas

    Txais: As les lus yas, as les lus yas.

    Tus vaj yuav tuaj, yog tus Huab Tais kav ntiaj teb,
    nws yuav daws lub nra uas zoj peb cia.

    Txais: As les lus yas, as les lus yas.

    Ntawv Moo Zoo: LK 5: 17-26


    17 Tseem muaj ib hnub, thaum Yes Xus tab tom qhia sawv daws, muaj ib cov Fas Lis Xais thiab ib co Kws Txoj Cai tuaj ntawm txhua lub zos hauv xeev Nkas Lis Lais, xeev Yus Das, thiab tuaj Yes Lus Xas Les tuaj, lawv sawv daws zaum nyob ntawd. Huab Tais lub hwj huam ua kom Yes Xus kho tau cov neeg mob zoo. 18 Muaj ib pab neeg kwv ib tug tuag ceg saum ib lub txaj tuaj. Lawv nrhiav kev nqa tus tuag ceg mus hauv tsev, coj nws mus tso ntawm Yes Xus xub ntiag. 19 Tab sis lawv tsis tau kev nqa tus tuag ceg mus rau sab hauv, vim neeg coob dhau. Ces lawv nce mus saum ru tsev, lawv dawj cov thwv cib vov tsev, lawv dauv tus tuag ceg pw hauv nws lub txaj nqes mus hauv nruab nrab, rau ntawm Yes Xus xub ntiag. 20 Yes Xus pom lawv ntseeg, nws hais tias : "Ntawm koj, mas koj cov txhaum daws tas lawm." 21 Cov Kws Ntawv Ntshiab thiab cov Fas Lis Xais xav twj ywm rau nruab siab tias : "Tus neeg ntawd yog leej twg, nws thiaj thuam Ntuj ? Leej twg yuav daws txhaum tau ? Kawg yog Tswv Ntuj tib leeg xwb." 22 Yes Xus twb paub qhov lawv xav hauv nruab siab lawm, nws hais rau lawv tias : "Vim li cas nej thiaj xav tej zaj tswv yim li ntawd hauv nej siab ? 23 Lo lus twg yog lo hais yooj yim dua, lo lus tias : 'Koj cov txhaum daws tas lawm,' los yog lo lus tias : 'Koj sawv, koj mus kev ?' 24 Ua li mas, kom nej paub tias Neeg Leej Tub muaj hwj huam daws txhaum tau nyob ntiaj teb,” ces Yes Xus hais rau tus tuag ceg tias : “Kuv hais rau koj : koj sawv, koj nqa koj lub txaj, koj rov mus tsev." 25 Tam sis ntawd, tus tuag ceg sawv tsees ntawm sawv daws xub ntiag, nws nqa lub txaj uas thaum tuaj nws pw, nws rov mus tsev, nws cav txog Tswv Ntuj. 26 Sawv daws yoob tas, lawv cav txog Tswv Ntuj. Lawv ntshai kawg, lawv hais tias : "Hnub no, peb pom tej yam tsis txaus ntseeg li !"

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 2003
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO II 2017-2018

    Post  Mim Yesterday at 11:27 am

    TIM 12 LUB 12 HLIS 2017

    Hnub Peb Lis Piam Ob Caij Tos Huab Tais Xyoo B Nruab Lis Piam Xyoo II

    Hwm Leej Niam nyob Guadalupe

    Zaj Nyeem Ib: (Xaiv) Ntxes Kas Lias 2: 14-17


    14 Leej Ntxhais Xis Yoos, koj hu nkauj, koj zoo siab mog ! Koj ntsia kuv tuaj lawm, kuv tuaj nyob hauv koj: HUAB TAIS hais li ntawd. 15 Hnub ntawd, ntau haiv neeg yuav mus koom nrog HUAB TAIS; lawv yuav yog nws haiv neeg. Lawv yuav tuaj nyob hauv koj ces koj yuav paub tias tus HUAB TAIS kav tsoom tshiab xa kuv tuaj rau koj. 16 Huab Tais yuav tau Yus Das los ua nws tug nyob hauv lub teb chaws ntshiab thiab nws yuav rov xaiv Yes Lus Xas Les. 17 Txhua tus muaj lub cev nqaij, nej nyob ntsiag to ntawm HUAB TAIS xub ntiag, vim nws nti sawv los nyob hauv nws lub tsev ntshiab.

    Los Qhib Yav Tom Ntej 11: 19a; 12: 1-6a, 10ab

    19 Ces Tswv Ntuj lub Tuam Tsev nyob saum ntuj qhib plho, pom lub Xab Cog Lus tshwm los nyob hauv lub tuam tsev.
    12 1 Muaj ib lub cim loj tas nrho tshwm nyob saum ntuj : yog ib tug Poj Niam hnav lub hnub. Lub hli nyob hauv nws qab xib taws. Nws ntoo kaum ob lub hnub qub saum taub hau zoo li ib lub mom teev kub. 2 Tus Poj Niam ntawd xeeb tub lawm. Nws ntsaj mob, vim nws tab tom daws cev. 3 Tseem muaj dua ib lub cim tshwm tuaj nyob saum ntuj : ib tug niag Zaj loj kawg, liab ploog cuag hluav taws, nws muaj xya lub taub hau thiab kaum tus kub. Txhua lub taub hau ntoo ib lub mom kub. 4 Nws tus ko tw cheb cov hnub qub saum ntuj tas lawm ib feem peb. Nws muab pov los rau hauv ntiaj teb. Ces tus Zaj mus sawv ntsug ntawm tus poj niam uas tab tom daws cev xub ntiag, npaj nqos tus me nyuam uas tus poj niam yuav yug. 5 Tus Poj Niam yug tau ib tug me tub : yog tus yuav tuav ib rab cwj hlau coj tas txhua haiv neeg. Luag nqa tus me nyuam mus rau saum Tswv Ntuj, nyob ze ntawm Tswv Ntuj lub theej kiab lawm. 6 Hos tus Poj Niam khiav mus nyob hauv teb chaws suab puam : nws mus nyob hauv qhov chaw uas Tswv Ntuj npaj rau nws lawm.
    10 Ces kuv hnov ib lub suab nrov saum ntuj tuaj tias : “Zaum no, kev yeej, kev muaj hwj huam thiab kev ua vaj poob rau peb tus Tswv Ntuj ua nws tug, thiab nws Leej Pleev tau txais lub hwj chim lawm.”

    NPN: YUS DIS 13: 18BCDE, 19


    Txais: (15:9d) Koj yog tus ua kom luag muab peb haiv neeg saib rau qhov siab tshaj plaws.

    Me ntxhais, thov kom Tswv Ntuj tus Nyob Siab foom koob hmoov rau koj
    ntau tshaj tas ib tsoom poj niam nyob ntiaj teb no.
    Kom txhua leej cav txog HUAB TAIS Tswv Ntuj
    tus tsim lub ntuj thiab lub ntiaj teb.

    Txais…

    Txoj kev tso siab rau Ntuj koj tau qhia rau peb
    yuav tsis ploj ntawm tib neeg lub tswv yim mus li,
    lawv yuav nco ntsoov txog Tswv Ntuj lub hwj huam loj.

    Txais…

    As Les Lus Yas

    Txais: As les lus yas, As les lus yas

    Koj tau txais koob hmoov ntau, leej Ntshiab Mab Liab,
    nkauj tsim txiaj dawb huv, tus tsim nyog txhua leej qhuas;
    lub Hnub pub kev ncaj ncees tawm ntawm koj tuaj,
    yog Leej Pleev peb tus Tswv Ntuj.

    Txais: As les lus yas, As les lus yas

    Ntawv Moo Zoo: (Xaiv) Lus Kas 1: 26-38

    26 Lub rau hli, Tswv Ntuj xa tus Tshiab Nkas Nplias mus cuag ib tug ntxhais hauv ib lub zos nyob Nkas Lis Lais. Lub zos ntawd hu ua Nas Xas Les. 27 Tus ntxhais ntawd, lawv muab qhaib rau ib tug txiv neej hu ua Yos Xes, caj ces Das Vis lawm. Tus ntxhais lub npe hu ua Mab Liab. 28 Tus Tshiab chaws mus hauv Mab Liab tsev, nws hais rau Mab Liab tias : "Koj nyob kaj lug, tus tau txiaj ntsim puv siab ! Huab Tais nrog koj nyob." 29 Mab Liab hnov lo lus ntawd, nws lub siab nphau npog, nws xav hauv nruab siab tias lo lus hawm ntawd yog dab tsi. 30 Tus Tshiab hais rau Mab Liab tias : "Mab Liab, koj tsis txhob ntshai. Tswv Ntuj saib koj ntxim Tswv Ntuj siab. 31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus. 32 Nws yuav yog ib tug loj, luag yuav hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws. 33 Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg." 34 Mab Liab hais rau tus Tshiab tias : "Qhov ntawd yuav muaj tuaj zoo li cas, vim kuv tsis paub ib tug txiv neej." 35 Tus Tshiab teb rau Mab Liab tias : "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub. 36 Saib ! Es Lis Xas Npes, tus uas txheeb koj, luag hu nws ua pog khoom, nws hnub nyoog laus lawm, tab sis nws kuj xeeb tub lawm thiab. Lub hlis no, nws xeeb tub tau rau hli lawm. Vim tias, tsis muaj ib yam uas Tswv Ntuj ua tsis tau." 38 Ces Mab Liab hais tias : "Kuv yog Huab Tais tus ntxhais txib. Kuv xav kom muaj raws li koj hais." Tus Tshiab thiaj tso Mab Liab tseg.

    Los Lus Kas 1: 39-47

    39 Tau ob peb hnub, ces Mab Liab sawv kev mus, nws rau siab ntso mus pem toj siab, rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 41 Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. 42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas Ntuj thiaj pub kom kuv tus Huab Tais leej niam tuaj xyuas kuv ? 44 Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. 45 Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo !" 46 Ces Mab Liab hais tias : "Kuv tus plig cav txog Huab Tais lub hwj chim, 47 kuv lub tswv yim hom khaj nyob hauv Tswv Ntuj, tus Cawm kuv.

    Thov nej rov mus nyeem zaj tshwm sim no:
    http://hmongcatholique.forumdediscussions.com/t206-niam-mab-liab-guadalupe-tshwm-sim-nyob-mexico

    Sponsored content

    Re: COV ZAJ NYEEM NRUAB LIS PIAM XYOO II 2017-2018

    Post  Sponsored content


      Current date/time is 12th December 2017, 2:39 pm