COV ZAJ NYEEM NRUAB LIS PIAM XYOO I 2022-2023

Tim    27     lub     12     Hlis    2022

Caij Yes Xus Yug - Hnub Peb Hauv Thawj Yim Hnub Yes Xus Yug Los

Hmoov Hwm LN Zam, Hauv Paus Xa Lus thiab Kws Sau Zam Ntawv Moo Zoo
Lectionary: 697

Zaj Nyeem Ib: 1 ZAM 1: 1-4

Cov zoo nyiad:
1 Tej yam uas tau muaj thaum lub hauv paus los lawm,
tej yam uas peb tau hnov, tej yam peb tau pom xyeem ntawm qhov muag,
tej yam peb tau ntsia ntsoov, thiab tej yam peb txhais tes tau kov,
puav leej yog hais txog Leej Lo Lus pub txoj sia;
2 vim Txoj Sia tau tawm los rau qhov muag pom,
ces peb tau pom thiab peb ua tim khawv hais txog,
thiab peb tuaj tshaj kom nej paub txog txoj sia nyob mus li,
uas yeej nyob nrog Leej Txiv thiab kuj tau tawm los rau peb pom.
3 Yam uas peb tau pom thiab tau hnov, mas peb muab tshaj rau nej paub,
kom nej nrog peb koom ua ib lub siab; peb txoj kev koom siab ntawd yog koom nrog Leej Txiv thiab nws Leej Tub Yes Xus Pleev.
4 Peb sau hais txog qhov no, kom peb muaj txoj kev zoo siab puv meem mias.

NPN  97: 1-2, 5-6, 11-12

Txais:  (12) Cov neeg ncaj,  nej cia li zoo siab nyob hauv Huab Tais!

HUAB TAIS ua vaj, kom lub ntiaj teb zoo siab;
kom cov pov txwv uas muaj ntau lub luag ntxhi.
Cov huab thiab qhov tsaus ntuj nyob ncig nws,
kev ncaj thiab kev txiav txim yog lub taw ntsa txheem nws lub theej kiab.

Txais…

Cov roob yaj tas xws li ciab ntab yaj nyob ntawm Huab Tais xub ntiag,
ntawm tus HUAB TAIS  kav tas lub ntiaj teb xub ntiag.
Lub ntuj tshaj txog nws txoj kev ncaj ncees,
tas txhia haiv neeg pom nws lub hwj chim.

Txais…

Qhov pom kev thaum kaj ntug ci tuaj kaj cov neeg ncaj,
kev zoo siab ci tuaj rau cov neeg muaj siab zoo.
Cov neeg ncaj, nej cia li zoo siab nyob hauv HUAB TAIS,
nej yuav ua tsaug rau nws lub npe ntshiab mog.

Txais…

As Les Lus Yas:   Te Deum

Txais:  As les lus yas, As les lus yas

Tswv Ntuj peb cav txog koj,
peb qw tshaj tias koj ua peb tus Huab Tais;
npoj Hauv Paus Xa Lus muaj hwj chim cav txog koj.

Txais:  As les lus yas, As les lus yas

Ntawv Moo Zoo:     ZAM  20:   1a+2-8

1 Thawj hnub pib lub lis piam, thaum tseem ntxov ntxov,
2 Mab Liab Mas Ntas Las khiav mus cuag Xis Moos Pob Zeb thiab lwm tus thwj tim uas yog tus Yes Xus nyiam. Nws hais rau nkawd tias: "Lawv tshem Huab Tais tawm hauv ntxa mus lawm, peb tsis paub xyov lawv coj nws mus tso qhov twg lawm."
3 Pob Zeb tawm plaws mus, lwm tus thwj tim kuj tawm plaws thiab, nkawd mus tom ntxa.
4 Nkawd ob leeg ua ke khiav mus, tab sis lwm tus thwj tim khiav nrawm dua Pob Zeb, nws xub mus txog tom ntxa.
5 Nws khoov mus xauj, nws pom cov pluaj ntaub qhwv tuag nyob ntawd, tab sis nws tsis chaws mus hauv.
6 Ces Xis Moos Pob Zeb kuj lawv nws qab tuaj txog, Pob Zeb chaws mus hauv lub ntxa, nws pom cov pluaj ntaub nyob ntawd,
7 hos daim ntaub npog ntsej muag uas kauv taub hau, nws nyob nws, kauv zoo zoo rau ib qho, tsis xyaw cov pluaj ntaub.
8 Ces lwm tus thwj tim uas xub tuaj txog ntawm lub ntxa mam li chaws mus hauv thiab. Nws pom ces nws ntseeg.

Tim      28     lub     12     Hlis     2022  

Caij Yes Xus Yug - Hnub Plaub Hauv Thawj Yim Hnub Yes Xus Yug Los

Hmoov Hwm Cov Me Nyuam Tsis Txhaum, Tuag Ua Tim Khawv Pauv Yes Xus Chaw
Lectionary: 698

Zaj Nyeem Ib:  1 Zam 1: 5—2:2

Cov zoo nyiad:
5 Lub moo uas peb tau hnov ntawm Yes Xus los, thiab peb tshaj rau nej paub yog li no: Tswv Ntuj yog qhov pom kev, nyob hauv nws tsis muaj ib qho tsaus li.
6 Yog peb hais tias: “Peb nrog nws koom siab,” tab sis peb tseem mus taug txoj kev tsaus ntuj, mas peb dag xwb, peb tsis ua neej raws txoj kev tseeb.
7 Hos yog peb taug txoj kev pom kev, vim nws nyob hauv qhov pom kev, mas peb thiab nej muaj kev sib koom siab ua ke, ces nws Leej Tub Yes Xus cov ntshav ntxuav peb ntawm txhua yam txhaum kom peb dawb huv tuaj.
8 Yog peb hais tias: “Peb tsis muaj txhaum,” mas peb rov dag rau peb, qhov tseeb tsis nyob hauv peb li.
9 Yog peb lees peb cov txhaum, mas Tswv Ntuj uas yog tus pheej xeeb thiab tus siab ncaj yuav zam peb cov txhaum rau peb, thiab yuav ntxuav tas puas tsav yam phem ntawm peb pov tseg kom peb dawb huv tuaj.
10 Yog peb hais tias: “Peb tsis tau ua txhaum,” mas yog peb hais tias Tswv Ntuj dag xwb, ces nws lo lus tsis nyob hauv peb.
2: 1 Kuv cov me nyuad, kuv sau tej no tuaj rau nej, kom nej tsis txhob ua txhaum. Tiam sis yog muaj ib tug twg ua txhaum, los peb muaj ib tug pab peb cev lus thov Leej Txiv, yog Yes Xus Pleev, tus siab ncaj.
2 Nws yog tus nqi txhiv peb ntawm peb cov txhaum; tsis yog txhiv peb xwb, nws tseem txhiv tas lub qab ntuj neeg ntawm lawv cov txhaum huv tib si thiab.

NPN     124:  2-3, 4-5, 7cd-8

Txais:   (7) Peb tus ntsuj plig tau txais kev dim xws li
tus noog dim plaws ntawm tus cuab noog lub vas.  

Yog HUAB TAIS tsis txhob tuaj pab peb
thaum cov neeg sawv tuaj tua peb,
mas ntshai lawv yeej muab peb nqos ciaj lawm,
vim lawv npau taws heev rau peb cuag hluav taws kub.

Txais:   (7) Peb tus ntsuj plig tau txais kev dim xws li
tus noog dim plaws ntawm tus cuab noog lub vas.

Ntshai dej twb los nyab peb tas,
dej sab siv twb los tshoob peb tas ;
cov dej hlob twb tshoob peb mus lawm.

Txais:   (7) Peb tus ntsuj plig tau txais kev dim xws li
tus noog dim plaws ntawm tus cuab noog lub vas.

Lub vas ntuag rhe, peb dim plaws lawm.
Peb qhov chaw vam khom yog nyob hauv HUAB TAIS lub npe;
nws uas yog tus tsim lub ntuj lub teb.

Txais:   (7) Peb tus ntsuj plig tau txais kev dim xws li
tus noog dim plaws ntawm tus cuab noog lub vas.

As Les Lus Yas :  (zaj Te Deum)

Txais:  As  les lus yas,as les lus yas.        

Peb cav txog koj, Tswv Ntuj,    
peb qw zeem koj ua peb tus Huab Tais;        
tsoom tub rog tuag ua tim khawv hnav dawb cav txog koj.

Txais:  As  les lus yas,as les lus yas.

Ntawv Moo Zoo:      MT 2:   13-18

13 Thaum cov kws hnub qub rov qab mus lawm, Huab Tais tus Tshiab tawm tuaj ua npau suav rau Yos Xes, nws hais tias:  "Koj sawv, koj coj tus me nyuam thiab nws niam khiav mus lawm Hais Nkws Tos teb, koj yuav nyob ntawd mus txog thaum kuv rov tuaj hais rau koj, vim Hes Los tab tom yuav nrhiav tus me nyuam tua."
14 Yos Xes sawv tsees los, nws coj tus me nyuam thiab leej niam, lawv khiav hmo ntuj mus rau Hais Nkws Tos teb.
15 Nws nyob Hais Nkws Tos teb mus txog hnub Hes Los tuag, kom thiaj muaj raws li lo lus Huab Tais siv tus yaj saub xub hais tseg tias: “Kuv hu kuv leej tub tawm hauv Hais Nkws Tos teb los.”
16 Thaum Hes Los pom tias cov kws hnub qub dag nws, ces nws npau taws ceev kawg.  Nws xa neeg mus tua cov me nyuam uas nyob Npes Les Hes thiab nyob ib ncig thaj tsam ntawd tas tib si, kom tua cov uas muaj ob xyoos rov hauv, raws li lub caij cov kws hnub qub qhia rau nws.
17 Ces muaj raws li yaj saub Yes Les Mias tau hais tias:
18 “Yuav hnov ib lub suab nrov nyob Las Mas, yog ib lub suab quaj suab nyiav; yog Las Nkes quaj nws cov me nyuam; tsis muaj neeg nplij tau nws, vim nws cov me nyuam tsis nyob tas lawm.”

Tim      29     lub     12     Hlis     2022

Caij Yes Xus Yug - Hnub Tsib Hauv Thawj Yim Hnub Yes Xus Yug Los
Lectionary: 202

XHLT:    LN Tos Mas Becket, Tswv Qhia tuag ua Tim Khawv

Zaj Nyeem Ib:   1 ZAM 2: 3-11

Cov zoo nyiad:
3 Qhov ua kom peb pom tseeb tias peb paub Yes Xus, yog qhov tias peb coj nws cov lus qhia.
4 Tus hais tias: “Kuv paub nws,” tab sis twb tsis coj nws cov lus qhia, mas tus ntawd yog ib tug neeg dag, qhov tseeb tsis nyob hauv nws.
5 Hos tus coj Yes Xus lo lus, mas txoj kev nyiam Tswv Ntuj zoo tiav log nyob hauv nws lawm. Yog peb ua li ntawd, mas peb thiaj yuav paub tias peb koom siab nrog nws.
6 Tus uas nws hais tias nws nyob hauv Yes Xus, mas nws yuav tsum coj raws nraim li Yes Xus tau coj.
7 Cov zoo nyiad, kuv tsis yog sau ib lo lus qhia tshiab tuaj rau nej li, tsuas sau ib lo lus qhia qub uas nej twb tau txais puag thaum lub hauv paus los lawm xwb. Lo lus qhia qub ntawd yog lo lus uas nej twb tau hnov lawm.
8 Tsis kav, qhov kuv sau tuaj rau nej no, kuj yog ib lo lus qhia tshiab thiab, uas yog ib qho tseeb nyob hauv Yes Xus thiab nyob hauv nruab nrab nej. Vim qhov tsaus ntuj dua lawm, hos qhov uas yog qhov pom kev tseeb twb ci tuaj lawm.
9 Tus hais tias nws nyob hauv qhov pom kev, tab sis nws ntxub nws tus kwv tij, mas nws tseem nyob hauv qhov tsaus ntuj.
10 Tus nyiam nws tus kwv tij, mas nws thiaj nyob hauv qhov pom kev. Ces nyob hauv nws tsis muaj dab tsi yuav ua kom nws ntog taus.
11 Hos tus ntxub nws tus kwv tij, mas nws nyob hauv qhov tsaus ntuj, thiab nws maub taug kev hauv qhov tsaus ntuj, ces nws tsis paub tias xyov nws mus qhov twg li, vim qhov tsaus ntuj npog rawv nws qhov muag.

NPN   96: 1-2a, 2b-3, 5b-6

Txais: (11a) Kom lub ntuj zoo siab thiab kom lub ntiaj teb hom khaj!

Nej hu ib zaj nkauj tshiab rau HUAB TAIS,
tas cov teb chaws, nej hu nkauj rau HUAB TAIS,
nej hu nkauj rau HUAB TAIS, nej cav txog nws lub npe.

Txais…

Hnub dhau hnub, nej tshaj txog nws txoj kev cawm seej.
Nej piav txog nws lub hwj chim nyob hauv cov kuj cuab,
piav txog nws tej hauj lwm txaus qhuas nyob hauv txhua haiv neeg.

Txais…

HUAB TAIS tau tsim lub ntuj.
Lub hwj chim ci ntsa iab thiab lub meej mom mus ua nws ntej;
txoj kev qhuas thiab kev muaj hwj chim nyob hauv nws lub tuam tsev.

Txais…

As Les Lus Yas:   LK 2: 32

Txais: As les lus yas, As les lus yas

Yog ib qho pom kev tawm tuaj qhia rau cov pej kum neeg paub,
thiab yog qhov ua kom koj haiv His Xas Lais tau koob meej.

Txais: As les lus yas, As les lus yas

Ntawv Moo Zoo:   LK 2: 22-35

22 Thaum txog lub caij yuav ua cov kab ke ntxuav kom huv rau ob niam tub raws li Mais Xes Txoj Cai, Mab Liab thiab Yos Xes nkawd coj tus me nyuam Yes Xus mus pem Yes Lus Xas Les, kom tau fij tus me nyuam rau Huab Tais,
23 raws li Huab Tais Txoj Cai sau tias: "Txhua tus me nyuam tub uas xub qhib leej niam plab yug los, mas yuav muab qee rau Huab Tais."
24 thiab kom tau cev ib co txim raws li Huab Tais txoj cai tau teev cia uas yog: ib nkawg nquab lwb rwg, los puas ob tug me nyuam nquab dawb.
25 Thaum ntawd nyob Yes Lus Xas Les, muaj ib tug txiv neej npe hu ua Xis Mes Oos. Tus neeg ntawd yog neeg ncaj thiab nyiam teev Ntuj. Nws tos ntsoov tus yuav tuaj nplij His Xas Lais. Leej Ntuj Plig Ntshiab nyob saum nws.
26 Leej Ntuj Plig Ntshiab qhia rau nws ces nws paub tias yog nws tsis xub tau pom Huab Tais tus Pleev, mas nws yuav tsis tuag.
27 Leej Ntuj Plig coj nws tuaj nyob hauv lub Tuam Tsev Teev Ntuj. Ces thaum leej niam thiab leej txiv nkawd coj tus me nyuam Yes Xus tuaj ua cov kab ke rau nws raws li Txoj Cai,
28 mas Xis Mes Oos txais tus me nyuam los puag hauv nws ob txhais npab, ces nws cav lus zoo txog Tswv Ntuj tias:
29 “Huab Tais, nyem no koj tso koj tus tub txib mus so kaj lug raws li koj lo lus tau lawm,
30 vim kuv qhov muag twb tau pom koj txoj kev cawm neeg lawm,
31 uas koj tau npaj nyob ntawm tas ib tsoom haiv neeg xub ntiag;
32 yog qhov pom kev uas tawm tuaj qhia rau cov kuj cuab paub, thiab yog qhov ua kom koj haiv His Xas Lais nto koob meej.”
33 Tus me nyuam niam thiab txiv qhuas cov lus nkawd hnov hais txog tus me nyuam kawg.
34 Ces Xis Mes Oos foom hmoov zoo rau lawv, nws hais rau Mab Liab, uas yog Yes Xus niam tias: "Koj saib mus, tus me nyuam no yuav ua chaw rau ntau leej His Xas Lais ntog thiab ntau leej sawv los; nws yuav yog ib lub cim ua kom muaj neeg hais lus tiv nws.
35 Hos ntawm koj, mas ib rab ntaj yuav ntsia ntsees koj lub siab, kom xwv tej lus uas coob leej xav tuaj nruab siab tawm los rau sawv daws paub.”

Tim 30 lub 12 Hlis 2022

Caij Yes Xus Yug – Hnub Rau hauv Thawj Yim Hnub Yes Xus Yug Los

Nyob rau sab USA no mas hnub no peb ua hmoov hwm Yim Neeg Ntshiab)

Hmoov Hwm Yim Neeg Ntshiab: Yes Xus, Mab Liab thiab Yos Xes Lectionary: 17(Xyoo A)

Zaj Nyeem Ib: Sir 3:2-6, 12-14

2 Huab Tais ua kom leej txiv tau koob meej nyob hauv nws cov me nyuam, thiab nws tsa kom leej niam muaj cai tswj nws tej tub ki.
3 Tus uas hwm nws txiv yog nws ua kev them nws cov txim txhaum.
4 Tus hwm nws niam nws zoo li tus neeg khaws ib txhab nyiaj cia.
5 Tus hwm nws txiv nws yuav ntsib kev zoo siab nyob hauv nws tej tub ki. Thaum nws thov Ntuj, Tswv Ntuj yuav mloog nws cov lus thov.
6 Tus hwm nws txiv yuav ua neej nyob ntev xyoo.
Tus mloog Huab Tais lus, nws nplij nws niam lub siab.
12 Me tub, koj yuav tau tu koj txiv thaum nws laus lawm;
Koj tsis txhob ua kom nws muaj kev tu siab nyob hauv nws lub neej.
13 Txawm tias nws lub tswv yim tsis zoo lawm los koj yuav ua siab ntev rau nws; thaum koj tseem muaj zog ntsos, koj tsis txhob ntxub koj txiv.
14 Vim tias txoj kev ua zoo rau yus txiv yog ib qho yuav raug muab cim ntsoov cia, thiab yuav muab coj los suav ua nqe them koj cov txim txhaum -- yuav yog ib yam nyob ruaj mus li.

Los: Col 3:12-21

Cov kwv tij nkauj muad:
12 Nej twb yog cov uas Tswv Ntuj xaiv, nej yog nws cov ntshiab, yog cov uas nws nyiam; li ntawd mas nej yuav tsum hnav ib lub siab khuv leej luag, ib lub siab zoo, ib lub siab nyiam ua neeg me, ib lub siab mos siab muag, thiab ib lub siab ntev.
13 Nej ib leeg yuav rub lub siab ntev rau ib leeg, thiab yuav ib leeg zam rau ib leeg, yog tias nej ib tug twg muaj lus nrog lwm tus; xws li Huab Tais twb zam rau nej, mas nej kuj yuav ua ib yam li ntawd thiab.
14 Qhov loj tshaj txhua yam, yog nej yuav tsum hnav txoj kev nyiam, uas yog yam yuav ua tau kom nej zoo txhij txhua.
15 Thov kom Leej Pleev txoj kev thaj yeeb tuaj kav nej lub siab;
Yog txoj kev thaj yeeb uas nej raug hu los nyob hauv koom ua ib lub cev xwb. Ua li mas nej yuav tsum nco ntsoov ua Tswv Ntuj tsaug mog.
16 Thov kom Leej Pleev Lo Lus nyob txawm hauv nej ua kom nej nplua nuj, ces nej yuav rov sib qhia, rov sib ntuas nyob hauv txoj kev thoob tsib; nej yuav siv tej zaj nkauj paj nruag, tej zaj nkauj seev, thiab tej zaj nkauj cav txog Tswv Ntuj los hu rau nws, ua nws tsaug nco nws txiaj ntsim nyob hauv nej nruab siab.
17 Tas txhua yam nej hais los nej ua, mas nej yuav tuav txog Huab Tais Yes Xus lub npe ua, thiab nej yuav ua Leej Txiv Tswv Ntuj tsaug nyob hauv nws.
18 Cov poj niam, nej yuav mloog nej tus txiv lus,
vim tsim nyog yuav ua li ntawd nyob hauv Huab Tais.
19 Cov txiv neej, nej yuav hlub nej cov poj niam; nej tsis txhob npau taws rau lawv.
20 Cov me nyuam, nej yuav mloog nej niam nej txiv lus nyob hauv tas txhua yam, vim qhov ntawd yog qhov uas Huab Tais nyiam.
21 Cov ua txiv, nej tsis txhob qhuab qhia nej cov me nyuam
nruj dhau tsiv dhau, kom lawv thiaj tsis tas kev cia siab.

Los: Col 3:12-17

Cov kwv tij nkauj muad:
12 Nej twb yog cov uas Tswv Ntuj xaiv, nej yog nws cov ntshiab, yog cov uas nws nyiam; li ntawd mas nej yuav tsum hnav ib lub siab khuv leej luag, ib lub siab zoo, ib lub siab nyiam ua neeg me, ib lub siab mos siab muag, thiab ib lub siab ntev.
13 Nej ib leeg yuav rub lub siab ntev rau ib leeg, thiab yuav ib leeg zam rau ib leeg, yog tias nej ib tug twg muaj lus nrog lwm tus; xws li Huab Tais twb zam rau nej, mas nej kuj yuav ua ib yam li ntawd thiab.
14 Qhov loj tshaj txhua yam, yog nej yuav tsum hnav txoj kev nyiam, uas yog yam yuav ua tau kom nej zoo txhij txhua.
15 Thov kom Leej Pleev txoj kev thaj yeeb tuaj kav nej lub siab;
Yog txoj kev thaj yeeb uas nej raug hu los nyob hauv koom ua ib lub cev xwb. Ua li mas nej yuav tsum nco ntsoov ua Tswv Ntuj tsaug mog.
16 Thov kom Leej Pleev Lo Lus nyob txawm hauv nej ua kom nej nplua nuj, ces nej yuav rov sib qhia, rov sib ntuas nyob hauv txoj kev thoob tsib; nej yuav siv tej zaj nkauj paj nruag, tej zaj nkauj seev, thiab tej zaj nkauj cav txog Tswv Ntuj los hu rau nws, ua nws tsaug nco nws txiaj ntsim nyob hauv nej nruab siab.
17 Tas txhua yam nej hais los nej ua, mas nej yuav tuav txog Huab Tais Yes Xus lub npe ua, thiab nej yuav ua Leej Txiv Tswv Ntuj tsaug nyob hauv nws.

NPN 128: 1-2, 3, 4-5

Txais: (1) Cov tau txoj hmoov zoo yog cov uas
hwm Huab Tais thiab taug nws tej kev.

Txhua tus uas hwm HUAB TAIS, nej txoj hmoov zoo,
vim nej taug raws nws tej kev!
Nej yuav tau noj lub txiv ntawm nej tes hauj lwm,
nej yuav tau hmoov zoo thiab nws yuav ua zoo rau nej.

Txais: (1a) Cov tau txoj hmoov zoo yog cov uas
hwm Huab Tais thiab taug nws tej kev.

Nej tus poj niam yuav zoo li txoj hmab txiv cawv uas
txi txiv ncw hna nyob hauv nej tej kaum vaj kaum tsev,
nej cov me nyuam yuav zoo li ib co ntoo txiv roj
nyob ncig lees nej lub phaj tsum.

Txais: (1a) Cov tau txoj hmoov zoo yog cov uas
hwm Huab Tais thiab taug nws tej kev.

Nej saib, tus neeg muaj txoj hmoov zoo yog tus hwm HUAB TAIS.
HUAB TAIS nyob saum roob Xis Yoos foom hmoov zoo rau nej.
Thov kom nej tau pom Yes Lus Xas Les vam meej
niaj hnub hauv nej lub neej.

Txais: (1a) Cov tau txoj hmoov zoo yog cov uas
hwm Huab Tais thiab taug nws tej kev.

As Les Lus Yas: KLX 3:15a, 16a

Txais: As les lus yas, as les lus yas.

Kom Leej Pleev txoj kev thaj yeeb tuaj kav nej lub siab.
Kom Leej Pleev Lo Lus nyob txawm hauv nej ua nej nplua nuj.

Txais: As les lus yas, as les lus yas.

Ntawv Moo Zoo: Mt 2:13-15, 19-23

13 Thaum cov kws hnub qub rov qab mus lawm,
Huab Tais tus Tshiab tawm tuaj ua npau suav rau Yos Xes,
nws hais tias: "Koj sawv, koj coj tus me nyuam
thiab nws niam khiav mus Hais Nkws Tos teb,
koj yuav nyob ntawd mus txog thaum kuv rov tuaj hais rau koj,
vim Hes Los tab tom yuav nrhiav tus me nyuam tua."
14 Ces Yos Xes sawv, nws coj tus me nyuam thiab leej niam,
lawv khiav hmo ntuj mus rau Hais Nkws Tos teb.
15 Nws nyob Hais Nkws Tos teb mus txog hnub Hes Los tuag,
kom tau ua raws li Huab Tais lo lus nws tau siv tus yaj saub
xub hais tseg tias: “Kuv hu kuv leej tub tim Hais Nkws Tos teb los.”
19 Thaum Hes Los tuag lawm, Huab Tais tus Tshiab tawm los
ua npau suav rau Yos Xes nyob Hais Nkws Tos teb.
20 Tus Tshiab hais tias : "Koj sawv, koj coj tus me nyuam
thiab nws niam, nej sawv kev rov mus nyob His Xas Lais thaj av,
vim cov neeg uas xav muab tus me nyuam tua, tuag lawm."
21 Ces Yos Xes sawv, nws coj tus me nyuam
thiab leej niam rov los rau His Xas Lais thaj av.
22 Tab sis, Yos Xes hnov tias As Kes Los ua vaj hloov nws txiv Hes Los chaw kav Yus Das teb, ces Yos Xes ntshai rov mus Yus Das teb.
Ntuj qhia nws hauv npau suav, ces nws thiaj tsiv mus rau xeev Nkas Lis Lais.
23 Nws mus nyob rau hauv ib lub zos hu ua Nas Xas Les,
kom tau ua raws li cov yaj saub xub hais lawm tias:
“Luag yuav hu nws ua tus neeg Nas Xaus Les.”

Tim 31 lub 12 Hlis 2022

Caij Yes Xus Yug los - Hnub Xya hauv Thawj Yim Hnub Yes Xus Yug Los
Lectionary: 204

XHLT: LN Sylvester I, ua Vaj Qhia

Zaj Nyeem Ib: 1 ZAM 2: 18-21

18 Cov me nyuad, twb txog lub zim txwv kawg lawm. Nej tau hnov hais txog tias tus tiv Leej Pleev yuav tuaj no, zaum no twb muaj ntau tus uas tiv Leej Pleev tau tshwm tuaj lawm; vim li ntawd peb thiaj paub tias txog lub zim txwv kawg lawm.
19 Cov neeg ntawd tawm hauv peb mus, tab sis lawv tsis yog cov uas koom nrog peb tiag. Yog lawv nrog peb tiag, mas lawv yeej tseem yuav nrog peb ua ke. Qhov uas lawv tawm ntawm peb mus lawm twb qhia tias tsis yog tas txhua leej nrog peb koom ua ib pab.
20 Ntawm nej, mas nej tau txais cov roj ntawm tus Ntshiab los pleev nej, ces nej sawv daws muaj kev paub txhua yam lawm.
21 Kuv sau ntawv tuaj rau nej, tsis yog vim nej tsis paub qhov tseeb; kuv sau tuaj, yog vim nej twb paub lawm, thiab vim txhua yam lus dag yeej tawm tsis tau ntawm qhov tseeb tuaj li.

NPN 96: 1-2, 11-12, 13

Txais: (11a) Kom lub ntuj zoo siab thiab lub ntiaj teb hom khaj!

Nej hu ib zaj nkauj tshiab rau HUAB TAIS,
tas cov teb chaws, nej hu nkauj rau HUAB TAIS,
nej hu nkauj rau HUAB TAIS, nej cav txog nws lub npe.
Nej tshaj txog nws txoj kev cawm seej hnub dhau hnub.

Txais…

Kom lub ntuj zoo siab thiab lub ntiaj teb hom khaj;
kom lub hiav txwv thiab txhua yam nyob hauv qw nrov nroo ntws;
kom cov tiaj nrag thiab txhua yam nyob hauv luag ntxhi!
Ces tas txhua tsob ntoo nyob hauv hav zoov
yuav dhia zoo siab ntawm HUAB TAIS xub ntiag.

Txais…

HUAB TAIS tuaj lawm,
nws tuaj kav lub ntiaj teb.
Nws yuav kav ntiaj teb neeg raws kev ncaj
thiab cov haiv neeg raws kev haum pheej.

Txasi…

As Les Lus Yas: ZAM 1: 14a,12a

Txais: As les lus yas, as les lus yas

Tswv Ntuj Lo Lus yug los muaj ib lub cev nqaij
thiab nws tau nrog peb nyob.
Cov uas txais nws, nws pub kom lawv
muaj peev xwm ua tau Tswv Ntuj cov me nyuam.

Txais: As les lus yas, as les lus yas

Ntawv Moo Zoo: ZAM 1: 1-18

1 Thaum lub hauv paus, Leej Lo Lus yeej nyob lawm. Leej Lo Lus nrog Tswv Ntuj nyob, Leej Lo Lus yog Tswv Ntuj.
2 Thaum lub hauv paus, nws nrog Tswv Ntuj nyob.
3 Tas ib puas tsav yam tshwm tawm los yog vim nws. Yog tsis muaj nws, yuav tsis muaj ib yam dab tsi tshwm tau los nyob.
4 Yam uas nws ua kom tshwm tawm los yog txoj sia; txoj sia ntawd yog qhov pom kev kaj tib neeg.
5 Qhov pom kev ci rau hauv qhov tsaus ntuj, qhov tsaus ntuj ua tsis tau kom qhov pom kev ploj li.
6 Muaj ib tug neeg uas yog Tswv Ntuj xa nws tuaj, nws lub npe hu ua Zam.
7 Nws tuaj yog tuaj ua tim khawv, kom tau hais lus pov thawj txog qhov pom kev, ces txhua leej txhua tus thiaj yuav ntseeg vim nws.
8 Tus ntawd nws tsis yog qhov pom kev, tab sis nws tuaj ua pov thawj txog qhov pom kev.
9 Qhov pom kev tseeb uas ci tuaj kaj txhua leej txhua tus neeg,
nws tau tuaj nyob hauv lub sim ceeb.
10 Nws tuaj nyob hauv lub sim ceeb, uas yog nws ua kom tshwm tawm los, tiam sis lub sim ceeb tsis paub nws li.
11 Nws los nyob hauv nws tsev neeg, tiam sis nws cov neeg tsis txais nws li.
12 Tab sis cov uas txais nws, mas nws pub lub hwj huam rau lawv kom lawv ua tau Tswv Ntuj cov me nyuam; lawv yog cov uas ntseeg txog nws lub npe.
13 Cov ntawd lawv tsis yug los raws ntiaj teb txoj kev xeeb tawm los, tsis yog neeg xav kom lawv yug los, thiab kuj tsis yog neeg txiav txim siab ua kom lawv yug los; tiam sis lawv yug ntawm Tswv Ntuj los.
14 Leej Lo Lus tau xeeb los muaj ib lub cev nqaij, nws tau tsa tsev nrog peb nyob. Peb tau ntsia ntsoov nws lub hwj chim; yog ib lub hwj chim tsim nyog rau Leej Txiv ib Leeg Tub twm zeej, uas muaj txiaj ntsim thiab qhov tseeb nyob puv hauv nws.
15 Zam ua tim khawv txog nws, Zam tau qw tshaj tawm tias: "Tus no yog tus kuv tau hais txog nws tias: Tus uas lawv kuv qab tuaj, nws loj dua kuv, vim nws yeej ib txwm nyob ua ntej kuv lawm."
16 Peb sawv daws puav leej tau txais qhov uas nws muaj puv npo nyob hauv nws, yog tau txais txiaj ntsim tas txiaj ntsim dua,
17 vim tias txoj Cai yog hla ntawm Mais Xes tuaj, hos lub txiaj ntsim thiab txoj kev tseeb yog tuaj ntawm Yes Xus Pleev tuaj.
18 Tsis muaj leej twg tau pom dua Tswv Ntuj ib zaug li; yog Leej Tub Twm Zeej uas yog Tswv Ntuj, nws nyob rawv ntawm Leej Txiv ib sab, nws qhia kom peb paub Tswv Ntuj.

Tim      2     lub     1     Hlis     2023

Hnub Ob Lis Piam Ob Caij Yes Xus Yug los Xyoo A Nruab lis piam Xyoo I
Lectionary: 205

Yuav Hwm LN Basil tus Loj thiab LN Gregory Nazianzen, ob tug Tswv Qhia ua Kws cov Txuj Ntshiab

Zaj Nyeem Ib: 1 ZAM 2: 22-28

Cov zoo nyiad:
22 Leej twg yog tus neeg dag? Yog tus uas tsis kam lees tias Yes Xus yog Leej Pleev; tus ntawd yog tus tiv Leej Pleev, vim nws tsis lees tias muaj Leej Txiv thiab Leej Tub.
23 Leej twg tsis lees Leej Tub, mas nws kuj tsis muaj Leej Txiv li thiab; tus uas lees Leej Tub, mas nws kuj muaj Leej Txiv thiab.
24 Qhov uas nej tau hnov txij thaum lub hauv paus los mas kom qhov  ntawd nyob ruaj rau hauv nej. Yog qhov uas nej tau hnov txij thaum lub hauv paus los nyob ruaj hauv nej, mas nej kuj yuav nyob ruaj hauv Leej Tub thiab hauv Leej Txiv thiab.
25 Qhov uas nws tau cog lus yuav pub rau nej yog qhov no: yog txoj sia nyob mus li.
26 Kuv sau tej no rau nej hais txog cov neeg uas yuav coj nej mus yuam kev.
27 Ntawm nej mas cov roj pleev nej uas nej tau txais ntawm nws, yeej nyob ruaj hauv nej, ces nej tsis tas yuav muaj leej twg qhuab qhia nej, tiam sis yog cov roj uas nws tau pleev nej yuav qhia txhua yam rau nej paub, cov roj pleev ntawd yog tseeb tsis yog dag; li ntawd, mas nej yuav tsum nyob ruaj nreb hauv Leej Pleev, raws li cov roj tau qhia rau nej.
28 Cov me nyuam, nyem no nej yuav tsum nyob ruaj hauv Leej Pleev mog, kom thaum twg nws tshwm sim los, peb thiaj yuav tso siab lug, thiab tsis tau txais kev txaj muag rau nws thaum lub zim txwv nws los ntawd.

NPN 98: 1, 2-3ab, 3cd-4

Txais: (3cd) Tas cov npoo ntiaj teb kawg tau pom
peb tus Tswv Ntuj lub hwj huam cawm neeg lawm.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
nws sab npab ntshiab tau ua.

Txais…

HUAB TAIS ua kom neeg paub txog nws txoj kev cawm seej,
nws muab nws txoj kev ncaj tawm los rau cov haiv neeg pom.
Nws rov nco txog nws txoj kev ua zoo thiab ua ncaj rau
tsev neeg His Xas Lais.

Txais…

Tas cov npoo ntiaj teb kawg tau pom peb
tus Tswv Ntuj txoj kev cawm seej lawm;
Tas txhua teb chaws, nej hu nkauj zoo siab rau HUAB TAIS,
nej cuab suab hu nkauj, nej cav txog nws.

Txais…

As Les Lus Yas: HES NPLAWS 1: 1-2

Txais: As les lus yas, as les lus yas

Yav tas los, Tswv Ntuj hais lus rau peb cov yawg koob
nyob hauv cov yaj saub;
niaj hnub no, nws hais lus rau peb nyob hauv nws Leej Tub.

Txais: As les lus yas, as les lus yas

Ntawv Moo Zoo: ZAM 1: 19-28

19 Ntawm no yog Zam cov lus pov thawj:
Thaum cov Yus Das nyob Yes Lus Xas Les xa ib co leej choj thiab ib co les vis tuaj mus nug Zam hais tias: "Koj yog leej twg ?"
20 Mas Zam lees, nws tsis zais, nws lees tias: "Kuv tsis yog Leej Pleev."
21 Lawv nug Zam tias: "Ua li koj yog leej twg? Koj puas yog Es Lias?" Zam hais tias: "Kuv tsis yog."
"Koj puas yog tus Yaj Saub?" Zam teb tias: "Tsis yog."
22 Lawv thiaj hais rau nws tias: "Koj yog leej twg tiag? Peb yuav tsum coj ib lo lus teb rov mus rau cov xa peb tuaj. Koj hais dab tsi txog koj tus kheej?"
23 Zam hais tias: "Kuv yog lub suab ntawm tus neeg qw hauv teb chaws suab puam tias: ‘Nej kho kom Huab Tais txoj kev ncaj tuaj,’ raws li yaj saub His Xais tau hais tseg."
24 Luag kuj xa ib co Fas Lis Xais tuaj thiab.
25 Lawv nug Zam tias: "Koj tsis yog Leej Pleev, tsis yog Es Lias, thiab tsis yog tus Yaj Saub, vim li cas koj thiaj ua kab ke ntxuav?"
26 Zam teb rau lawv tias: "Kuv ua kab ke ntxuav nyob hauv dej. Tiam sis nyob hauv nej, muaj ib tug uas nej tsis paub,
27 tus ntawd yuav lawv kuv qab tuaj, kuv tsis tsim nyog yuav daws nws txoj hlua khau."
28 Tej no tshwm sim tuaj nyob Npes Tas Nias, nyob sab dej Yos Las Das tim ub, ntawm thaj chaw uas Zam ua cov kab ke ntxuav.  

Tim 3 lub 1 Hlis 2023

Hnub Peb Lis Piam Ob Caij Yes Xus Yug Los Nruab Lis Piam Xyoo I
Lectionary: 206

XHLT: Hwm Yes Xus lub Npe Ntshiab tas nrho

Zaj Nyeem Ib: 1 ZAM 2: 29–3:6

29 Yog nej twb paub tias Tswv Ntuj yog tus ncaj, mas nej kuj yuav paub tias yog leej twg ua raws txoj kev ncaj, mas tus ntawd yug ntawm Tswv Ntuj los thiab.
3:1 Ntsia saib, Leej Txiv txoj kev hlub peb loj npaum li cas, nws thiaj pub kom peb hu ua Tswv Ntuj cov me nyuam – peb yeej yog li ntawd tiag thiab. Tos ntiaj teb neeg tsis paub peb los vim ntiaj teb neeg twb tsis paub nws.
2 Cov zoo nyiad, nyem no peb yog Tswv Ntuj me nyuam lawm; tseem tsis tau muaj qhov qhia rau peb pom tias peb yuav zoo li cas. Tiam sis peb paub tias thaum Leej Pleev rov los, mas peb yuav zoo li Nws, vim nws zoo li cas mas peb yuav pom nws zoo li ntawd.
3 Tus twg cia siab lug li no nyob hauv Leej Pleev, mas nws yuav ua kom nws dawb huv tuaj ib yam li Leej Pleev yog tus dawb huv.
4 Tus twg ua txhaum, mas kuj yog nws ua kev phem, vim kev txhaum yog kev phem.
5 Nej twb paub lawm tias Leej Pleev tau tawm los, yog los kom tau tshem neeg cov txhaum pov tseg, hos nyob hauv nws tsis muaj ib qho txhaum li.
6 Tus twg nyob rawv hauv Leej Pleev mas nws tsis ua txhaum; tus twg ua txhaum mas yog nws tsis tau pom thiab tsis paub Leej Pleev li.

NPN 98: 1, 3cd-4, 5-6

Txais: (3cd) Tas cov npoo ntuj npoo ntiaj teb kawg tau pom
peb tus Tswv Ntuj lub hwj huam cawm neeg lawm.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
nws sab npab ntshiab tau ua.

Txais…

Tas cov npoo ntuj npoo ntiaj teb kawg tau pom
peb tus Tswv Ntuj txoj kev cawm neeg.
Tas txhua teb chaws, nej zoo siab hu nkauj rau HUAB TAIS,
nej tsa suab hu nkauj, nej cav txog nws.

Txais…

Nej ntaus nkauj nog ncas cav txog HUAB TAIS
nej ntau nkauj nog ncas thiab hu tej zaj nkauj seev.
Nej tshuab puab tshuab hom nrov nrov,
nej hu nkauj zoo siab nyob ntawm
tus Vaj uas yog HUAB TAIS xub ntiag.

Txais…

As Les Lus Yas: ZAM 1: 14a,12a

Txais: As les lus yas, As les lus yas

Tswv Ntuj Lo Lus yuav ib lub cev nqaij, nws tuaj nrog peb nyob.
Cov uas txais nws, nws pub kom lawv muaj
peev xwm ua tau Tswv Ntuj cov me nyuam.

Txais: As les lus yas, As les lus yas

Ntawv Moo Zoo: ZAM 1: 29-34

29 Zam Ntxuav Plig pom Yes Xus tuaj ze ntawm nws, nws hais tias : "Nej ntsia Tswv Ntuj tus Yaj, tus daws qab ntuj neeg cov txhaum.
30 Tus ntawd yog tus uas kuv tau hais txog nws tias: ‘Muaj ib tug neeg yuav tuaj lawv kuv qab, nws mus ua kuv ntej, vim nws xub nyob dua kuv lawm.’
31 Kuv tsis paub nws, tab sis yog yuav ua kom nws tawm los rau cov His Xas Lais paub, kuv thiaj tuaj ua cov kab ke ntxuav nyob hauv dej."
32 Ces Zam ua tim khawv hais tias: "Kuv pom Leej Ntuj Plig nqes saum ntuj los xws li ib tug nquab los nyob saum nws.
33 Kuv tsis tau paub nws li, tab sis Tus xa kuv tuaj ua kab ke ntxuav hauv dej, nws hais rau kuv tias: ‘Tus uas koj yuav pom Leej Ntuj Plig nqes lost saws thiab nyob saum nws, mas nws yog tus yuav ua kab ke ntxuav nyob hauv Leej Ntuj Plig Ntshiab.’
34 Kuv tau pom lawm, ces kuv ua tim khawv tias nws yog Tswv Ntuj Leej Tub.”

Tim 4 lub 1 Hlis 2023

Hnub Plaub Lis Piam Ob Caij Yes Xus Yug Los Nruab Lis Piam Xyoo I
Lectionary: 207

Yuav Hwm LN Elizabeth Ann Seton, ua Leej Phauj (hwm nyob USA)

Zaj Nyeem Ib: 1 JN 3: 7-10

7 Cov me nyuad, nej txhob cia luag tej ua kom nej yuam kev mog. Tus ua raws txoj kev ncaj, mas nws ncaj ib yam li Leej Pleev yog tus ncaj.
8 Tus ua txhaum, mas nws tuaj ntawm dab phem tuaj, vim txij thaum lub hauv paus los, dab phem yog tus ua txhaum. Vim li no, Tswv Ntuj Leej Tub thiaj tawm tuaj kom tau rhuav dab phem cov hauj lwm.
9 Leej twg yug ntawm Tswv Ntuj los, mas nws tsis ua txhaum, vim Tswv Ntuj lub noob nyob ruaj rau hauv nws, ces nws ua txhaum tsis tau, vim nws yug ntawm Tswv Ntuj los.
10 Qhov no ua kom peb pom meej tias, cov twg yog Tswv Ntuj cov me nyuam, thiab cov twg yog dab phem cov me nyuam. Tus twg tsis ua raws txoj kev ncaj, mas nws tsis yog Tswv Ntuj tug, thiab tus tsis nyiam nws tus kwv tij kuj tsis yog ib yam.

NPN 98: 1, 7-8, 9

Txais: (3cd) Tas cov npoo ntuj npoo ntiaj teb tau pom
peb tus Tswv Ntuj lub hwj huam cawm neeg lawm.

Nej hu ib zaj nkauj tshiab rau HUAB TAIS
vim nws tau ua tej yam tsim nyog qhuas;
nws txhais tes xis tau ua kom nws yeej,
nws sab npab ntshiab tau ua.

Txais: (3cd) Tas cov npoo ntuj npoo ntiaj teb tau pom
peb tus Tswv Ntuj lub hwj huam cawm neeg lawm.

Kom dej hiav txwv thiab cov tsiaj nyob hauv
ua nrov nroo ntws,
Kom lub ntiaj teb thiab cov neeg nyob hauv
ua lom zem ntsuag qees;
Kom cov niam dej npuaj teg,
Kom cov roob nrog lawv qw zoo siab
nyob ntawm HUAB TAIS xub ntiag.

Txais: (3cd) Tas cov npoo ntuj npoo ntiaj teb tau pom
peb tus Tswv Ntuj lub hwj huam cawm neeg lawm.

HUAB TAIS tab tom tuaj,
nws tuaj tswj kav lub ntiaj teb.
Nws yuav tswj qab ntuj neeg raws kev ncaj,
Nws yuav tswj cov haiv neeg raws kev haum pheej.

Txais: (3cd) Tas cov npoo ntuj npoo ntiaj teb tau pom
peb tus Tswv Ntuj lub hwj huam cawm neeg lawm.

As Les Lus Yas: HES NPLAWS 1: 1-2

Txais: As les lus yas, as les lus yas.

Thaum ub, Tswv Ntuj hais lus rau peb cov yawg koob nyob hauv cov yaj saub.
Lub zim txwv no, Tswv Ntuj hais nws cov lus rau peb nyob hauv nws Leej Tub.

Txais: As les lus yas, as les lus yas.

Ntawv Moo Zoo: ZAM 1: 35-42

35 Zam nrog nws ob tug thwj tim rov sawv ntsug nyob ntawd.
36 Nws ntsia Yes Xus hla tuaj mus, nws hais tias: "Neb ntsia Tswv Ntuj tus Yaj."
Ob tug thwj tim hnov Zam hais li ntawd, ces nkawd raws Yes Xus qab mus.
38 Yes Xus tig los, nws pom nkawd raws nws, nws hais rau nkawd tias: "Neb nrhiav dab tsi?" Nkawd hais rau Yes Xus tias: "Las Npis, (uas txhais tias Xib Hwb), koj so nyob qhov twg?"
39 Yes Xus hais rau nkawd tias: "Neb tuaj, ces neb yuav pom." Ces nkawd mus, nkawd pom qhov chaw Yes Xus nyob. Hnub ntawd, nkawd nrog Yes Xus nyob ib hnub. Thaum ntawd kwv yees li plaub teev hnub qaij lawm.
40 As Nres, uas yog Xis Moos Pob Zeb tus kwv, yog ib tug ntawm ob tug thwj tim uas hnov Zam hais li ntawd thiab tau raws Yes Xus qab mus.
41 Nws xub mus ntsib nws tus tij laug Xis Moos, nws hais rau Xis Moos tias: "Wb ntsib tus Mes Xias lawm," lo lus no txhais tias Leej Pleev.
42 Ces As Nres coj Xis Moos mus cuag Yes Xus. Yes Xus ntsia Xis Moos, nws hais tias: "Koj yog Xis Moos, Zam tus tub, koj lub npe yuav hu ua Kes Fas," lo lus no txhais tias Pob Zeb.

Tim 5 lub 1 Hlis 2023

Thawj Hnub Tsib Lis Piam Ob Caij Yes Xus Yug Los Nruab Lis Piam Xyoo I
Lectionary: 208

Yuav Hwm LN John Neumann, ua Tswv Qhia

Zaj Nyeem Ib: 1 Zam 3: 11-21

11 Lo lus uas txij thaum lub hauv paus los nej tau hnov, yog lo lus no : kom peb yuav tsum ib leeg hlub ib leeg,
12 tsis txhob yoog raws li Kas Ees, uas nws mloog dab phem, nws thiaj muab nws tus kwv tua. Vim li cas nws tua nws tus kwv? Yog vim nws ua cov hauj lwm phem, hos nws tus kwv ua cov hauj lwm ncaj.
13 Li ntawd, cov kwv tij, nej tsis txhob poob siab yog lub ntiaj teb neeg ntxub nej.
14 Peb paub tias, peb twb hla ntawm txoj kev tuag los nyob hauv txoj sia lawm, vim peb nyiam peb hlub peb cov kwv tij. Tus tsis nyiam tsis hlub, nws tseem nyob hauv txoj kev tuag.
15 Leej twg ntxub nws tus kwv tij, mas nws yog ib tug tua neeg. Nej twb paub lawm tias, tsis muaj ib tug tua neeg uas yuav tau txoj sia nyob mus li nyob hauv nws.
16 Peb paub txog txoj kev nyiam kev hlub vim qhov tias Yes Xus tau siv nws txoj sia los pab peb. Li ntawd peb kuj yuav tsum siv peb txoj sia los pab peb cov kwv tij thiab.
17 Tus uas muaj txhua yam hauv lub ntiaj, yog nws pom nws ib tug kwv tij nyob hauv txoj kev txom nyem, tab sis nws kaw nti nws lub siab tsis kam hlub nws tus kwv tij, mas Tswv Ntuj txoj kev nyiam kev hlub yuav ua li cas nyob tau hauv nws?
18 Cov me nyuad, peb tsis txhob nyiam ntawm peb lo lus thiab peb lub ncauj xwb, peb ua kiag tej yam hauj lwm los nyiam luag thiab peb yuav nyiam tiag tiag!
19 Peb ua li ntawd, mas peb thiaj paub tias peb nyob hauv txoj kev tseeb, ces peb lub siab yuav nyob kaj lug nyob ntawm Tswv Ntuj xub ntiag.
20 Tab yog peb lub siab rov muab txim rau peb los Tswv Ntuj loj tshaj peb lub siab thiab nws paub tas ib puas tsav yam.
21 Li ntawd, cov zoo nyiad, yog peb lub siab tsis muab txim rau peb, mas peb muaj kev tso siab lug nyob ntawm Tswv Ntuj xub ntiag.

NPN 100: 1b-2, 3, 4, 5

Txais: (1) Tas lub ntiaj teb, nej qw zoo siab rau HUAB TAIS mas!

Tas txhua lub teb chaws, nej hu nkauj zoo siab rau HUAB TAIS mas!
Nej xyiv fab hlo luag ntxhi tsob hwb HUAB TAIS ;
nej hu nkauj zoo siab chaws los ntawm nws xub ntiag mog.

Txais: (1) Tas lub ntiaj teb, nej qw zoo siab rau HUAB TAIS mas!

Nej yuav tsum paub tias HUAB TAIS yog Tswv Ntuj.
Nws tsim peb los, peb yog nws tug,
peb yog nws haiv neeg, yog nws pab yaj nws saib.

Txais: (1) Tas lub ntiaj teb, nej qw zoo siab rau HUAB TAIS mas!

Nej chaws mus hauv nws cov rooj loog, nej ua nws tsaug,
Nej mus hauv nws cov tshav loog, nej cav txog nws ;
nej ua nws tsaug, nej foom lus zoo rau nws lub npe.

Txais: (1) Tas lub ntiaj teb, nej qw zoo siab rau HUAB TAIS mas!

HUAB TAIS muaj lub siab zoo :
HUAB TAIS, nws ua zoo rau peb mus li,
thiab nws ua ncaj rau peb txheej dhau txheej.

Txais: (1) Tas lub ntiaj teb, nej qw zoo siab rau HUAB TAIS mas!

As Les Lus Yas

Txais: As les lus yas, as les lus yas.

Ib hnub ntshiab tawm tuaj rau peb lawm.
Tuaj mas, cov haiv neeg, nej tuaj pe hawm Huab Tais.
Hnub no ib qho pom kev loj kawg tawm tuaj kaj lub ntiaj teb.

Txais: As les lus yas, as les lus yas.

Ntawv Moo Zoo: Zam 1: 43-51

43 Yes Xus txiav siab mus rau Nkas Lis Lais teb, nws txawm ntsib Fis Lis Pos; nws hais rau Fis Lis Pos tias: "Koj los raws kuv."
44 Fis Lis Pos nyob Npes Xais Das uas yog As Nres thiab Pob Zeb nkawd lub nroog.
45 Fis Lis Pos ntsib Nas Tas Nais, nws hais rau Nas Tas Nais tias: "Tus uas Mais Xes tau sau txog nyob hauv Txoj Cai, thiab cov Yaj Saub tau hais txog, mas peb ntsib nws lawm. Yog Yes Xus, uas yog Yos Xes nyob Nas Xas Les tus tub."
46 Ces Nas Tas Nais hais rau Fis Lis Pos tias: "Puas yuav muaj ib yam zoo tawm hauv Nas Xas Les tuaj tau?" Fis Lis Pos hais rau nws tias: "Koj tuaj ces koj yuav pom."
47 Yes Xus pom Nas Tas Nais tuaj, nws hais txog Nas Tas Nais, nws hais tias: "Nej saib, tus ntawd yog ib tug tseem His Xas Lais uas tsis zais siab li."
48 Nas Tas Nais hais rau Yes Xus tias: "Ua cas koj paub kuv?" Yes Xus teb rau Nas Tas Nais tias: "Thaum Fis Lis Pos tseem tsis tau hu koj, kuv twb pom koj nyob hauv tsob qab ntoo txiv ncuav pias lawm."
49 Nas Tas Nais teb rau Yes Xus tias: "Las Npis, koj yog Tswv Ntuj Leej Tub! Koj yog His Xas Lais tus Vaj."
50 Yes Xus hais rau nws tias: "Yog vim kuv hais rau koj tias, kuv pom koj nyob hauv tsob qab ntoo txiv ncuav pias, mas koj thiaj ntseeg, puas yog? Koj yuav pom tej yam loj dua no."
51 Ces Yes Xus hais ntxiv rau nws tias: "Kuv hais qhov muaj tseeb tiag rau nej: Nej yuav pom ntuj qhib los, thiab pom Tswv Ntuj cov Tshiab nce mus thiab nqes los nyob saum Neeg Leej Tub."

Tim     6     lub     1     Hlis     2023

Thawj Hnub Rau Lis Piam Ob Yes Xus Yug Los Nruab Lis Piam Xyoo I
Lectionary: 209

XHLT:   LN Andre Bessette, ua Leej Tij

Zaj Nyeem Ib: 1 ZAM 5: 5-13

Cov zoo nyiad,
5 Tus yeej lub ntiaj teb yog leej twg? Tsuas kawg yog tus uas ntseeg tias
Yes Xus yog Tswv Ntuj Leej Tub xwb.
6 Tus tuaj hauv dej thiab hauv ntshav tuaj yog Yes Xus Pleev; nws tsis
tuaj hauv dej tuaj xwb, nws tuaj hauv dej thiab hauv ntshav tuaj. Leej
Ntuj Plig yog tus ua tim khawv txog qhov ntawd; Leej Ntuj Plig yog qhov
tseeb.
7 Ua li mas muaj peb tug ua tim khawv zeem txog qhov ntawd:
8 Muaj Leej Ntuj Plig, muaj dej thiab muaj ntshav; peb tug no puav leej
hais ib lo lus xwb.
9 Yog peb twb ntseeg tib neeg lo lus tim khawv, masTswv Ntuj lo lus tim
khawv haj yam yuav tsum loj dua.
Tswv Ntuj lo lus tim khawv yog li no: Yog lo tias nws tau ua tim khawv
txog nws Leej Tub lawm.
10 Leej twg ntseeg txog Tswv Ntuj Leej Tub, mas nws tau lo lus tim
khawv ntawd los nyob hauv nws. Hos tus tsis ntseeg mas nws muab
Tswv Ntuj ua ib tug neeg dag, vim nws tsis ntseeg lo lus tim khawv uas
Tswv Ntuj hais txog nws Leej Tub.
11 Tswv Ntuj lo lus tim khawv yog li no: Tswv Ntuj pub txoj sia nyob mus
li rau peb, txoj sia ntawd nyob hauv nws Leej Tub.
12 Leej twg muaj Leej Tub, ces nws tau txoj sia; leej twg tsis muaj Tswv
Ntuj Leej Tub, mas nws tsis tau txoj sia.
13 Kuv sau tej no tuaj rau nej, kom nej paub tseeb tias, nej cov uas
ntseeg txog Tswv Ntuj Leej Tub lub npe, mas nej tau txoj sia nyob mus li.

NPN 147: 12-13, 14-15, 19-20

Txais: (12a) Yes Lus Xas Les, koj cia li cav txog Huab Tais.
Los: As les lus yas

Yes Lus Xas Les, koj cav txog koj tus Huab Tais mog,
Xis Yoos, koj qhuas txog koj tus Tswv Ntuj mog.
Vim nws tau ua kom koj cov tab ntoo ntawm rooj vag khov tuaj lawm.
Nws tau foom hmoov zoo rau koj cov me nyuam uas nyob hauv koj.

Txais: (12a) Yes Lus Xas Les, koj cia li cav txog Huab Tais.
Los: As les lus yas

Nws ua kom muaj kev thaj yeeb nyob hauv koj tus ciam av
Nws ua kom koj muaj cov mov qab noj tsau npo.
Nws xa nws lo lus ceeb toom tuaj rau ntiaj teb,
nws lo lus khiav ceev nrooj tuaj.

Txais: (12a) Yes Lus Xas Les, koj cia li cav txog Huab Tais.
Los: As les lus yas

Nws tshaj nws tej lus rau Yas Kos
thiab nws tej kev cai tej lij choj rau His Xas Lais.
Nws tsis tau ua li no dua rau lwm haiv neeg,
tsis tau qhia nws tej cai lij choj rau lawv paub li. As les lus yas.

Txais: (12a) Yes Lus Xas Les, koj cia li cav txog Huab Tais.
Los: As les lus yas

As Les Lus Yas: MK 9: 7

Txais: As les lus yas, as les lus yas

Ces lub ntuj qhib plho, thiab Leej Txiv lub suab nrov nroo ntws tias:
"Tus no yog kuv Leej Tub uas kuv nyiam; nej mloog nws mog."

Txais: As les lus yas, as les lus yas

Ntawv Moo Zoo: MK 1: 7-11

7 Zam Ntxuav Plig tshaj tias: "Tus lawv kuv qab tuaj, nws muaj zog dua kuv; kuv tsis tsim nyog khoov daws nws txoj hlua khau.
8 Ntawm kuv, mas kuv muab dej los ntxuav nej, hos nws mas nws yuav ntxuav nej nyob hauv Leej Ntuj Plig Ntshiab.
9 Lub zim txwv ntawd, Yes Xus tuaj ntawm Nas Xas Les xeev Nkas Lis Lais tuaj txais kab ke ntxuav ntawm Zam, nyob hauv tus dej Yos Las Das.
10 Thaum Yes Xus tawm hauv dej los, nws pom lub ntuj dua rhe, ces Leej Ntuj Plig nqes xws li ib tug nquab los rau saum nws,
11 thiab muaj ib lub suab nrov saum ntuj tuaj hais tias: "Koj yog kuv leej Tub uas kuv nyiam kawg, koj yog kuv qhov chaw zoo siab."

Los:   LK 3:23-38

23 Thaum Yes Xus pib ua nws txoj hauj lwm tshaj lus, nws muaj hnub nyoog ze peb caug xyoo. Sawv daws xav tias nws yog Yos Xes tub, uas yog Hes Lis tub,
24 uas yog Mas Thas tub, uas yog Les Vis tub, uas yog Mes Kis tub, uas yog Zas Nais tub, uas yog Yos Xes tub,
25 uas yog Mas Tas Thias tub, uas yog As Mos tub, uas yog Nas Hus tub, uas yog Es Lis tub, uas yog Nas Nkais tub,
26 uas yog Mas As tub, uas yog Mas Tas Thias tub, uas yog Xes Mes Ees tub, uas yog Yos Xes tub, uas yog Yos Das tub,
27 uas yog Yuas Nas tub, uas yog Les Xas tub, uas yog Ntxos Los Npas Npes tub, uas yog Xas Las Thias tub, uas yog Nes Lis tub,
28 uas yog Mes Kis tub, uas yog As Dis tub, uas yog Kos Xas tub, uas yog Ees Mas Das tub, uas yog Ej tub,
29 uas yog Yos Suas tub, uas yog Es Lis Yes Xes tub, uas yog Yos Lis tub, uas yog Mas Thas tub, uas yog Les Vis tub,
30 uas yog Xis Mes Oos tub, uas yog Yus Das tub, uas yog Yos Xes tub, uas yog Zos Nas tub, uas yog Es Lias Kis tub,
31 uas yog Mes Les As tub, uas yog Mes Nas tub, uas yog Mas Tas Thas tub, uas yog Nas Thas tub, uas yog Das Vis tub,
32 uas yog Yes Xes tub, uas yog Os Npes tub, uas yog Npuag Oos tub, uas yog Xas Las tub, uas yog Nas As Xoos tub,
33 uas yog As Mis Nas Das tub, uas yog As Das Mis tub, uas yog As Nis tub, uas yog Hes Xaws Loos tub, uas yog Fas Les tub, uas yog Yus Das tub,
34 uas yog Yas Kos tub, uas yog His Xas Has tub, uas yog Has Nplas Has tub, uas yog Tes Las tub, uas yog Nas Hos tub,
35 uas yog Xes Lws tub, uas yog Las Nkaus tub, uas yog Fas Les tub, uas yog Es Npes tub, uas yog Ses Las tub,
36 uas yog Kes Naas tub, uas yog As Fas Xas tub, uas yog Xees tub, uas yog Nos Hes tub, uas yog Las Mev tub,
37 uas yog Mas Thus Xas Las tub, uas yog Es Nov tub, uas yog Yas Les tub, uas yog Mas Has Las Lees tub, uas yog Kais Naas tub,
38 uas yog Es Nov tub, X uas yog Xes tub, uas yog As Das tub, uas yog Tswv Ntuj tus tub.

Los:    LK 3: 23,31-34,36,38

23 Thaum Yes Xus pib ua nws txoj hauj lwm tshaj lus, nws muaj hnub nyoog ze peb caug xyoo. Sawv daws xav tias nws yog Yos Xes tub, uas yog Hes Lis tub,
31 uas yog Mes Les As tub, uas yog Mes Nas tub, uas yog Mas Tas Thas tub, uas yog Nas Thas tub, uas yog Das Vis tub,
32 uas yog Yes Xes tub, uas yog Os Npes tub, uas yog Npuag Oos tub, uas yog Xas Las tub, uas yog Nas As Xoos tub,
33 uas yog As Mis Nas Das tub, uas yog As Das Mis tub, uas yog As Nis tub, uas yog Hes Xaws Loos tub, uas yog Fas Les tub, uas yog Yus Das tub,
34 uas yog Yas Kos tub, uas yog His Xas Has tub, uas yog Has Nplas Has tub, uas yog Tes Las tub, uas yog Nas Hos tub,
36 uas yog Kes Naas tub, uas yog As Fas Xas tub, uas yog Xees tub, uas yog Nos Hes tub, uas yog Las Mev tub,
38 uas yog Es Nov tub, uas yog Xees tub, uas yog As Das tub, uas yog Tswv Ntuj tus tub.

Tim 7 lub 1 Hlis 2023

Thawj Hnub Xya Lis Piam Ob Caij Yes Xus Yug Los Nruab Lis Piam Xyoo I
Lectionary: 210

XHLT: LN Raymond Peñafort

Zaj Nyeem Ib: 1 ZAM 5: 14-21

Cov zoo nyiad:
14 Peb muaj kev tso siab lug rau Tswv Ntuj tias, yog peb thov ib yam raws li nws lub siab xav, mas nws yeej yuav mloog peb.
15 Yog peb paub tias nws mloog peb thaum peb thov ib yam dab tsi, mas peb kuj paub tias peb twb tau yam uas peb thov los ua peb tug lawm.
16 Ces yog leej twg pom nws tus kwv tij ua ib qho txhaum, uas tsis yog ib qho txhaum coj mus rau kev tuag, mas nws yuav thov Tswv Ntuj rau nws tus kwv tij, ces Tswv Ntuj yuav pub txoj sia rau tus kwv tij ntawd; qhov no tsuas yog hais rau cov neeg ua txhaum tsis yog txhaum coj mus rau kev tuag xwb, vim muaj ib hom txhaum uas coj mus rau kev tuag; kuv tsis hais kom nej thov Ntuj rau tus neeg ua qhov txhaum uas coj mus rau kev tuag ntawd.
17 Tas puas tsav yam tsis zoo yeej yog kev txhaum, tab sis muaj ib hom txhaum tsis yog txhaum coj mus rau kev tuag.
18 Peb paub tias tus yug ntawm Tswv Ntuj los, mas nws tsis ua txhaum, vim tias tus uas yug ntawm Tswv Ntuj los mas Tswv Ntuj pov hwm nws, ces tus Phem kov tsis tau nws.
19 Peb paub tias peb yog Tswv Ntuj tug, hos tas lub qab ntuj neeg nyob rau hauv tus Phem lub hwj huam.
20 Peb kuj paub tias Tswv Ntuj Leej Tub twb tuaj lawm, nws pub txoj kev txawj to taub rau peb, kom peb paub tus uas yog tus Tseeb. Peb twb nyob hauv tus uas yog tus Tseeb, hauv nws Leej Tub Yes Xus Pleev lawm. Nws thiaj yog tus Tseem Tswv Ntuj, thiab yog txoj sia nyob mus li.
21 Cov me nyuad, nej ceev faj mog thiab nej txav deb ntawm cov dab mlom mog.

NPN 149: 1-2, 3-4, 5-6a+9b

Txais: (4a) Huab Tais zoo siab nyob hauv nws haiv neeg.
los: As les lus yas

Nej hu ib zaj nkauj tshiab rau HUAB TAIS,
nej cav txog nws nyob hauv tsoom ntseeg lub txoos.
Kom cov His Xas Lais zoo siab nyob hauv tus uas tsim lawv los,
kom Xis Yoos cov me nyuam luag ntxhi nyob hauv lawv tus vaj.

Txais: (4a) Huab Tais zoo siab nyob hauv nws haiv neeg.
los: As les lus yas

Lawv yuav dhia lom zem cav txog nws lub npe,
kom lawv hu nkauj cav txog nws nrog
suab nruas thiab suab nkauj nog ncas.
Vim HUAB TAIS hlub nws haiv neeg,
thiab nws muab txoj kev yeej los npua cov neeg me.

Txais: (4a) Huab Tais zoo siab nyob hauv nws haiv neeg.
los: As les lus yas

Kom cov muaj lub siab ntseeg hom khaj
nyob hauv txoj kev nto koob meej;
kom lawv hu nkauj zoo siab saum lawv tej chaw zaum;
kom lawv lub qa tsuas muaj qw suab cav txog Tswv Ntuj.
Tas cov uas ntseeg txog nws lub koob meej yog li ntawd. As les lus yas.

Txais: (4a) Huab Tais zoo siab nyob hauv nws haiv neeg.
los: As les lus yas

As Les Lus Yas: LK 7: 16b

Txais: As les lus yas, as les lus yas

Ib tug yaj saub loj sawv los nyob hauv peb, Tswv Ntuj tuaj xyuas nws haiv neeg lawm.

Txais: As les lus yas, as les lus yas. *

Ntawv Moo Zoo: ZAM 2: 1-11

1 Thaum ntawd, muaj ib rooj tshoob hauv lub zos Kas Nas xeev Nkas Lis Lais. Yes Xus niam tuaj nyob ntawd thiab.
2 Lawv kuj caw Yes Xus thiab nws cov thwj tim mus noj tshoob thiab.
3 Thaum lawv tsis tshuav cawv ntxiv lawm, Yes Xus niam hais rau Yes Xus tias: "Lawv tsis muaj cawv lawm."
4 Ces Yes Xus hais rau nws niam tias: "Niad, tsis yog kuv thiab koj hauj lwm. Kuv lub sij hawm tseem los tsis tau txog."
5 Yes Xus niam hais rau cov tub ce cawv tias: "Yes Xus kom nej ua yam twg, mas nej ua huv tib si mog."
6 Nyob ntawd, muaj rau lub hub zeb teem dej rau cov Yus Das siv raws li lawv tej kev cai ntxuav tes. Ib lub hub ntim tau plaub mus rau rau thoob dej.
7 Yes Xus hais rau cov tub ce cawv tias: "Nej hliv dej kom puv cov hub no." Ces lawv hliv dej puv nkaus saum cov ncauj hub.
8 Yes Xus hais rau lawv tias: "Zaum no, nej ce cov dej no nqa mus rau txiv thiaj com." Ces lawv ce cov dej ntawd nqa mus.
9 Thaum txiv thiaj com saj cov dej txia ua cawv, mas nws tsis paub tias cov cawv los qhov twg los. Tab sis cov tub ce cawv paub, vim lawv yog cov tau ce dej. Txiv thiaj com hu nraug vauv los.
10 Nws hais rau nraug vauv tias: "Sawv daws ce cov cawv qab los haus tso. Thaum cov neeg qaug cawv lawm, mam li ce cov qab tsis heev los haus. Hos koj, mas koj muab cov cawv qab cia txog tav no."
11 Yes Xus thawj lub cim yog zoo li ntawd. Nws ua nyob Kas Nas xeev Nkas Lis Lais. Nws muab nws lub hwj chim tawm los, ces nws cov thwj tim ntseeg txog nws.

Tim 9 lub 1 Hlis 2023

Hnub Ob Tom Qab Yes Xus Tawm Tuaj

Nco Txog Huab Tais Txais lub Cim Ntxuav
Lectionary: 21

Zaj Nyeem Ib: HIS XAIS 42: 1-4, 6-7

Huab Tais hais tias:
1 Ntawm no yog kuv tus tub txib uas kuv nres, tus kuv xaiv uas nws ua xis kuv siab tas nrho. Kuv tau muab kuv lub tswv yim rau saum nws. Nws yuav coj txoj kev ncaj mus rau cov kuj cuab.
2 Nws yuav tsis nthe, tsis hais lus nrov, tsis ua suab ncha kom neeg hnov nyob ntawm tej kev.
3 Nws yuav tsis lov tus txhiav qaug, nws yuav tsis tshuab tus nplaim teeb cig qauj les, nws yuav txiav txim ncaj raws nraim li qhov tseeb.
4 Kuv tus tub txib yuav tsis swb los ntaus siab me mus txog hnub nws tsa tau txoj kev ncaj kav ntiaj teb lawm. Cov pov txwv yuav tos ntsoov nws txoj kev qhuab qhia.
6 Kuv, HUAB TAIS, tau hu koj nyob hauv txoj kev ncaj, kuv tuav rawv koj tes, kuv tau qee koj, tau muab koj los ua txoj kev cog lus rau cov haiv neeg, los ua lub teeb pom kev kaj cov kuj cuab,
7 kom tau qhib cov dig muag qhov muag, kom tau tso cov neeg kaw hauv tsev loj faj tawm los, thiab rho cov neeg nyob hauv qhov taub kom tawm hauv kev tsaus ntuj los.

Los: HL 10: 34-38

34 Ces Pob Zeb tsa ncauj hais rau cov neeg tuaj nyob hauv Kos Nes Lis tsev tias: "Nyem no, kuv paub tseeb lawm tias Tswv Ntuj tsis kws leej twg cai.
35 Nyob hauv tas txhua haiv neeg, yog leej twg hwm nws thiab coj txoj kev ncaj, mas tus ntawd yeej ntxim Tswv Ntuj siab.
36 Tswv Ntuj tau xa nws lo lus tuaj rau cov His Xas Lais, uas yog lub moo zoo txog kev thaj yeeb raws li Yes Xus Pleev qhia; Yes Xus yog sawv daws tus Huab Tais.
37 Nej twb paub txog tej lus uas tshwm sim tuaj nyob hauv tas xeev Yus Das lawm, uas yog pib hauv xeev Nkas Lis Lais tuaj mus, tom qab uas Zam tshaj txog cov kab ke ntxuav rau sawv daws.
38 Nej tau hnov txog Yes Xus nyob Naj Xas Les, tias Tswv Ntuj tau pleev nws, tau muab Leej Ntuj Plig Ntshiab thiab muab hwj huam rau nws. Nws mus ncig teb ncig chaw ua zoo rau txhua leej; nws kho cov neeg poob rau hauv dab phem tes kom lawv zoo hlo, vim Tswv Ntuj nrog nws nyob.”

NPN 29: 1-2, 3-4, 3, 9-10

Txais: (11b) Huab Tais yuav foom kev thaj yeeb rau nws haiv neeg.

Nej uas yog Tswv Ntuj cov tub, nej cav txog Huab Tais,
Nej ua kom Huab Tais nto koob meej;
Nej ua kom Huab Tais lub npe muaj hwj chim;
Nej hnav tsoos ntshiab mus pe hawm Huab Tais.

Txais: (11b) Huab Tais yuav foom kev thaj yeeb rau nws haiv neeg.

Huab Tais lub suab yuj rau saum cov dej,
Huab Tais nyob saum cov dej loj dej dav,
Huab Tais lub suab muaj hwj huam loj,
Huab Tais lub suab muaj hwj chim.

Txais: (11b) Huab Tais yuav foom kev thaj yeeb rau nws haiv neeg.

Tus Huab Tais muaj hwj chim nthe nrov nroo ntws,
txhua leej nyob hauv nws lub tuam tsev hais tias: “Koj muaj hwj chim!”
Huab Tais zaum saum theej kiab nyob siab dua cov dej nyab;
Huab Tais zaum saum theej kiab ua vaj mus tas ib txhiab ib txhis.

Txais: (11b) Huab Tais yuav foom kev thaj yeeb rau nws haiv neeg.

As Les Lus Yas: Mk 9:7

Txais: As les lus yas, as les lus yas.

Ces lub ntuj qhib plho, thiab Leej Txiv lub suab nrov nroo ntws tias:
Tus no yog kuv Leej Tub uas kuv nyiam, nej mloog nws mog.

Txais: As les lus yas, as les lus yas

Ntawv Moo Zoo: Mt 3:13-17

13 Lub zim txwv ntawd, Yes Xus tawm hauv xeev Nkas Lis Lais mus cuag Zam ntawm tus dej Yos Las Das, kom Zam ua kab ke ntxuav rau nws.
14 Zam tsis kam, Zam hais tias: "Kuv yog tus yuav tsum thov koj ntxuav kuv, tab sis, koj ho tuaj cuag kuv."
15 Yes Xus teb rau Zam tias: "Nyem no, cia koj ua rau kuv, wb thiaj tau ua raws txoj kev ncaj." Ces Zam ua raws li Yes Xus hais.
16 Yes Xus txais kab ke ntxuav tas, nws tawm hauv dej los tim ntug nqhuab tam sis ntawd. Ces lub ntuj qhib plho, Zam pom Tswv Ntuj leej Ntuj Plig nqes xws li ib tug nquab los rau saum Yes Xus.
17 Thiab muaj ib lub suab nrov saum ntuj tuaj hais tias: "Tus no yog kuv Leej Tub uas kuv nyiam. Nws yog kuv qhov chaw zoo siab."

Tim 10 lub 1 Hlis 2023

Hnub Peb Lis Piam Ib Nruab Xyoo A Nruab Lis Piam Xyoo I
Lectionary: 306

Zaj Nyeem Ib: HES NPLAWS 2: 5-12

5 Tswv Ntuj tsis tau muab lub qab ntuj neeg yuav los yav tom ntej uas peb hais txog, zwm rau ib co Tshiab.
6 Muaj ib tug tau hais ib co lus zeem tseeb li no tias:
“Neeg yog dab tsi koj thiaj nco txog nws, los neeg tus tub yog dab tsi, koj thiaj txhawj txog nws?
7 Koj tau muab nws tso qis dua cov Tshiab ib me ntu; koj muab hwj chim thiab koob meej ua mom teev kub rau nws ntoo.
8 Koj tso tas puas tsav puas yam rau hauv nws qab xib taws.”
Tswv Ntuj tso txhua yam zwm rau tib neeg, nws tsis cia ib yam dab tsi uas yuav tsis zwm rau tib neeg. Tsis kav lub zim txwv no, peb tsis pom tias txhua yam yeej zwm rau tib neeg.
9 Tiam sis Yes Xus tus uas tau nyob qis dua cov Tshiab ib me ntu, mas peb pom tias nws tau lub hwj chim thiab lub koob meej ua mom teev kub ntoo lawm, vim nws tau nyiaj kev txom nyem hauv txoj kev tuag. Tswv Ntuj lub txiaj ntsim ua kom nws yuav tsum saj txoj kev tuag, nws thiaj pab tau txhua leej txhua tus.
10 Vim tias tus uas tas puas tsav yam yog nws tug thiab nws yog tus tsim tas puas tsav yam, mas thaum nws coj coob leej tub ki mus txais koob meej, tsim nyog nws yuav tsum cia tus thawj uas coj txoj kev cawm los rau lawv, raug txom nyem loj kom nws yog tus neeg zoo txhij txhua tas nrho.
11 Vim tus ua tau kom luag ntshiab tuaj, thiab cov tau txais kev ntshiab, sawv daws puav leej tawm ntawm ib lub hauv paus los xwb. Vim li ntawd, nws thiaj tsis txaj muag hu lawv ua nws cov kwv tij.
12 Nws thiaj hais tias: “Kuv yuav tshaj koj lub npe rau kuv cov kwv tij, kuv yuav cav txog koj nyob hauv nruab nrab lub txoos.”

NPN 8: 2ab+5, 6-7, 8-9

Txais: (7) Koj tau muab koj Leej Tub ua tus tswj tej yam koj txhais tes tau tsim los.

HUAB TAIS, peb tus Huab Tais, ua cas koj lub npe
yuav muaj hwj chim loj ua luaj nyob saum tas lub ntiaj teb!
Tib neeg yog dab tsi, koj thiaj li quav ntsej txog nws?
Tib neeg tus tub yog dab tsi, koj thiaj txhawj txog nws?

Txais: (7) Koj tau muab koj Leej Tub ua tus tswj tej yam koj txhais tes tau tsim.

Koj tau tsim nws qis me ntsis cov tshiab,
koj tau muab koob meej thiab hwj chim rau nws ntoo.
Koj tau tsa nws ua tus kav tej yam koj txhais tes tau tsim,
koj tso txhua tsav txhua yam rau hauv nws qab xib taws.

Txais: (7) Koj tau muab koj Leej Tub ua tus tswj tej yam koj txhais tes tau tsim.

Xws li tas cov yaj thiab cov nyuj,
tas cov tsiaj nyob hauv tej nras liaj nras teb,
cov noog ya saum ntuj, cov ntses hauv hiav txwv,
thiab txhua yam tsiaj ua luam dej hauv hiav txwv.

Txais: (7) Koj tau muab koj Leej Tub ua tus tswj tej yam koj txhais tes tau tsim.

As Les Lus Yas: 1 TXLN 2: 13

Txais: As les lus yas, as les lus yas.

Nej yuav txais Tswv Ntuj lo lus, tsis txais li yog neeg lo lus,
tiam sis raws li qhov tseeb tiag, uas yog Tswv ntuj lo lus.

Txais: As les lus yas, as les lus yas.

Ntawv Moo Zoo: MK 1: 21-28

21 Yes Xus thiab nws cov thwj tim mus hauv Kas Fas Naus. Hnub Xas Npas Tos, Yes Xus mus hauv lub tsev txoos, thiab nws qhia sawv daws.
22 Zeej tsoom qhuas nws cov lus qhia, vim nws qhia lawv xws li ib tug neeg muaj peev xwm, tsis zoo li cov kws Ntawv Ntshiab.
23 Tam sis ntawd, nyob hauv lawv lub tsev txoos, muaj ib tug neeg raug ib tug dab tsis huv qw qw,
24 nws hais tias: "Yes Xus Nas Xas Les, koj xav ua dab tsi rau peb? Puas yog koj tuaj rhuav peb? Kuv paub koj yog leej twg: koj yog Tswv Ntuj tus Ntshiab."
25 Yes Xus cem nws tias: "Ua twj ywm, koj cia li tawm hauv nws mus."
26 Dab tsis huv siv zog muab tus neeg ntawd nchos, nws nthe ib suab nrov nrov ces nws tawm hauv tus neeg mus.
27 Tas sawv daws ntshai, lawv sib nug zom zaws tias: “Qhov ntawd yog dab tsi? Yog ib txog kev qhuab qhia tshiab muaj peev xwm kawg; tab yog dab tsis huv los nws tswj tau lawv, ces lawv mloog nws lus.”
28 Ces ib sij huam, Yes Xus lub moo nto lug rau txhua qhov, mus thoob tas ib cheeb tsam hauv xeev Nkas Lis Lais.

Tim 11 lub 1 Hlis 2023

Hnub Plaub Lis Piam Ib Nruab Xyoo A Nruab Lis Piam Xyoo I
Lectionary: 307

Zaj Nyeem Ib: HES NPLAWS 2: 14-18

14 Vim ib co me nyuam koom roj ntsha thiaj ib ce nqaij, mas Yes Xus kuj nrog lawv koom thiab, kom nyob hauv txoj kev tuag nws yeej tus muaj txoj kev tuag lub hwj huam, uas yog tus dab phem.
15 Thiab nws muab kev twj lij rau cov uas ntshai ntshai kev tuag ces lawv raug ua qhev tas lawv sim neej.
16 Nws tsis yog tuaj cawm ib co tshiab, nws tuaj cawm Has Nplas Has tsoom xeeb ntxwv.
17 Vim li no, nws thiaj yuav tsum yug los zoo ib yam li nws cov kwv cov muam nyob hauv txhua yam, kom nws ua tau ib tug Tuam Leej Choj khuv leej neeg thiab pheej xeeb nyob ntawm Tswv Ntuj xub ntiag, nws thiaj them tau tsoom pej xeem cov txhaum.
18 Vim nws tus kheej tau raug kev sim siab nyob hauv txoj kev txom nyem, mas nws thiaj muaj peev xwm pab tau cov uas raug kev sim siab.

NPN 105: 1-2, 3-4, 6-7, 8-9

Txais: (8a) Huab Tais nco ntsoov tas mus li txog nws lo lus cog tseg.
los: As les lus yas.

Nej ua HUAB TAIS tsaug, nej hu txog nws lub npe,
nej tshaj tej yam nws tau ua rau cov haiv neeg paub.
Nej hu nkauj rau nws, nej hu nkauj cav txog nws,
nej tshaj txog tej yam loj tsim nyog qhuas nws tau ua.

Txais: (8a) Huab Tais nco ntsoov tas mus li txog nws lo lus cog tseg.
los: As les lus yas.

Nej txais koob meej nyob hauv nws lub npe,
nej cia li zoo siab, nej cov uas muaj lub siab nrhiav HUAB TAIS!
Nej vam txog HUAB TAIS, nej vam nws lub zog,
nej yuav nrhiav kom tau tsob hwb nws tsis tseg.

Txais: (8a) Huab Tais nco ntsoov tas mus li txog nws lo lus cog tseg.
los: As les lus yas.

Has Nplas Has tsoom xeeb ntxwv,
nej yog Tswv Ntuj cov tub txib,
Yas Kos cov tub, nej yog cov nws tau xaiv!
HUAB TAIS nws yog peb tus Tswv Ntuj!
Nyob thoob ntiaj teb, neeg coj raws nws txiav txim.

Txais: (8a) Huab Tais nco ntsoov tas mus li txog nws lo lus cog tseg.
los: As les lus yas.

Nws nco ntsoov tas mus li txog nws lo lus cog tseg
uas nws tau hais ruaj khov kom kav ib txhiab tiam neeg,
raws li nws tau hais rau Has Nplas Has
thiab tau nrog His Xas Has cog lus.

Txais: (8a) Huab Tais nco ntsoov tas mus li txog nws lo lus cog tseg.
los: les lus yas.

As Les Lus Yas: ZAM 10: 27

Txais: As les lus yas, as les lus yas

Huab Tais hais tias: Kuv cov yaj mloog kuv lub suab,
kuv paub kuv cov yaj, kuv cov yaj taug kev raws kuv qab.

Txais: As les lus yas, as les lus yas

Ntawv Moo Zoo: MK 1: 29-39

29 Yes Xus tawm hauv tsev txoos los, nws nrog Yas Kos thiab Zam nkawd mus hauv Xis Moos thiab As Nres nkawd tsev.
30 Xis Moos niam tais mob kub cev, nws pw saum txaj. Tam sim ntawd, lawv tham txog tus niam tais rau Yes Xus paub.
31 Yes Xus txav los tuav niam tais txhais tes, tsa nws sawv. Tus mob kub cev cia li thim hlo. Ces niam tais mus tsob hwb lawv.
32 Yav tsaus ntuj, thaum lub hnub poob qho lawm, sawv daws coj tas nrho cov neeg mob thiab cov raug dab tib si tuaj rau Yes Xus.
33 Tas lub nroog sau nthwv tuaj nyob ua ke ntawm qhov rooj.
34 Yes Xus kho coob leej zoo, uas lawv nyias raug nyias hom mob, thiab nws ntiab ntau tus dab phem tawm; nws tsis pub cov dab hais lus li, vim lawv paub nws.
35 Tag kis thaum tseem ntxov ntxov tsis tau kaj ntug, Yes Xus sawv, nws tawm mus rau ib qho chaw tsis muaj neeg, ces nws teev Ntuj nyob ntawd.
36 Xis Moos thiab cov neeg nrog nws raws Yes Xus qab mus nrhiav nws.
37 Thaum lawv nrhiav tau Yes Xus, lawv hais rau nws tias: "Sawv daws nrhiav koj."
38 Yes Xus hais rau lawv tias: "Peb mus rau lwm qhov chaw hauv cov zej zog nyob tsis deb ntawm no, kom kuv tau kev qhuab qhia nyob ntawd thiab; vim yog qhov no, kuv thiaj tau tawm tuaj."
39 Ces Yes Xus mus thoob lub xeev Nkas Lis Lais, nws qhuab qhia nyob hauv lawv cov tsev txoos, thiab nws ntiab dab phem tawm.

Tim 12 lub 1 Hlis 2023

Hnub Tsib Lis Piam Ib Nruab Xyoo A Nruab Lis Piam Xyoo I
Lectionary: 308

Zaj Nyeem Ib: HES NPLAWS 3: 7-14

7 Vim li ntawd, Leej Ntuj Plig Ntshiab hais tias :
“Hnub no, yog nej hnov nws lub suab,
8 mas nej tsis txhob ua nej lub siab tawv ncauj, xws li thaum muaj kev ntxeev siab hauv lub caij raug sim siab nyob teb chaws suab puam.
9 Nyob ntawd, nej cov yawg koob tau sim kuv thiab tau tawm tsam kuv, txawm lawv twb tau pom kuv cov hauj lwm tau plaub caug xyoo.
10 Kuv thiaj npau taws rau tiam neeg ntawd, kuv tau hais tias :
‘Lawv niaj hnub ua yuam kev nyob hauv lawv lub siab, lawv tsis paub kuv tej kev li.’
11 Kuv npau taws heev, kuv thiaj tau cog lus tias: ‘Lawv yuav tsis tau mus nyob hauv kuv lub chaw so.’”
12 Cov kwv tij, nej yuav ceev faj, kom nyob hauv nej tsis txhob muaj ib tug twg ua lub siab phem tsis xav ntseeg, ces nws tso tus Tswv Ntuj muaj txoj sia pov tseg.
13 Nej yuav tsum niaj hnub sib txhawb zog thaum tseem yog “hnub no,” kom xwv nej tsis txhob muaj ib tug twg cia kev txhaum txoj kev dag, ntxias tau nej kom nej ua lub siab cam thawj.
14 Vim tias peb yuav ua tau Leej Pleev cov phooj ywg koom tes, mas yuav tsum yog peb nyob ruaj nreb hauv peb txoj kev, txij thaum pib mus txog thaum xaus.

NPN 95: 6-7c, 8-9, 10-11

Txais: ( 8 ) Hnub no yog nej hnov nws lub suab,
mas nej tsis txhob ua nej lub siab cam thawj.

Tuaj peb mus khoov pe hawm nws, peb mus txhos caug
ntawm tus HUAB TAIS tsim peb los xub ntiag.
Vim nws yog peb tus Tswv Ntuj,
peb yog haiv neeg nws saib, pab yaj nws coj.

Txais: ( 8 ) Hnub no yog nej hnov nws lub suab,
mas nej tsis txhob ua nej lub siab cam thawj.

Kheev lam hnub no nej mloog nws lub suab hais:
“Nej tsis txhob ua lub siab cam thawj li nyob Me Lis Npas,
li lub caij uas nyob Mas Xas hauv teb chaws suab puam,
ntawm qhov chaw uas nej phaj txiv tau sim kuv;
lawv twb tau pom kuv tej hauj lwm los lawv tseem sim kuv.”

Txais: ( 8 ) Hnub no yog nej hnov nws lub suab,
mas nej tsis txhob ua nej lub siab cam thawj.

Tau plaub caug xyoo kuv ceeb laj nyiaj phaj neeg ntawd kawg;
kuv tau hais tias: “Haiv neeg no lub siab mus yuam kev,
lawv tsis paub kuv tej kev li.”
Vim li no kuv npau taws, kuv thiaj tau cog lus tias:
“Lawv yuav tsis tau nkag mus nyob hauv kuv lub chaw so li.”

Txais: ( 8 ) Hnub no yog nej hnov nws lub suab,
mas nej tsis txhob ua nej lub siab cam thawj.

As Les Lus Yas: MT 4: 23

Txais: As les lus yas, as les lus yas.

Yes Xus tshaj lub Moo Zoo txog lub Ceeb Tsheej
thiab nws kho txhua yam mob nyob hauv cov neeg zoo hlo.

Txais: As les lus yas, as les lus yas.

Ntawv Moo Zoo: MK 1: 40-45

40 Muaj ib tug neeg mob ruas tuaj cuag Yes Xus, nws txhos caug thov Yes Xus tias: "Yog koj xav, mas koj yeej ua tau kom kuv rov huv tuaj."
41 Yes Xus hlub tus neeg ntawd, Yes Xus cev tes tuav nws thiab hais rau nws tias: "Kuv xav. Koj rov huv tuaj."
42 Tam sim ntawd, tus mob ruas tso tus neeg ntawd tseg, nws cia li huv hlo.
43 Yes Xus txwv nruj nruj rau nws thiab kom nws rov mus tam sis ntawd.
44 Yes Xus hais rau nws tias: "Koj ua twj ywm, txhob qhia dab tsi rau leej twg li. Tiam sis koj yuav mus thws koj lub cev rau tus leej choj saib, thiab mus cev paj tshab ntxuav txhaum rau koj raws li Mais Xes qhia, los ua puav pheej rau lawv pom."
45 Tab sis tus neeg ntawd tawm plaws xwb, nws cia li pib tshaj tas tej ntawd tawm thiab mus hais rau qhov txhia chaw paub. Ces Yes Xus tsis tau kev tab meeg mus rau hauv ib lub nroog li, nws nyob sab nroog nraud ntawm tej qhov chaw tsis muaj neeg xwb, los neeg tseem tuaj tas qhov txhia chaw tuaj cuag nws thiab.

Tim 13 lub 1 Hlis 2023

Hnub Rau Lis Piam Ib Nruab Xyoo A Nruab Lis Piam Xyoo I
Lectionary: 309

XHLT: LN Hilary, ua Tswv Qhia thiab Kws cov Txuj Ntshiab

Zaj Nyeem Ib: HES NPLAWS 4: 1-5, 11

1 Peb yuav tsum ceej faj nraim kom, txawm txoj kev cog lus tias peb yuav tau mus hauv Tswv Ntuj lub chaw so yeej muaj nyob ntawd, los kom nej ib tug twg tsis txhob raug luag saib tsis tsim nyog mus.
2 Vim peb yeej tau txais lub Moo Zoo ib yam li peb cov yawg koob thaud thiab. Tab sis lo lus lawv tau hnov tsis pab lawv dab tsi, vim lawv tsis muaj kev koom siab nyob hauv txoj kev ntseeg, nrog cov uas mloog lo lus.
3 Peb cov uas ntseeg, mas peb yuav tau mus hauv lub chaw so ntawd, raws li Tswv Ntuj tau hais tias:
“Kuv npau taws, kuv thiaj cog lus tias lawv yuav tsis tau mus nyob hauv kuv lub chaw so.”
Tswv Ntuj tej hauj lwm twb yeej tiav tas puag thaum ntuj tsim teb raug lawm,
4 rau qhov muaj ntawv sau hais txog hnub xya li no tias: “Hnub xya, Tswv Ntuj so, nws tso hauj lwm tseg tas tib si.”
5 Thiab tseem muaj qhov chaw hais saud tias: “Lawv yuav tsis tau mus nyob hauv kuv lub chaw so.”
11 Ua li mas peb kav tsij peem tiag kom tau mus nyob hauv lub chaw so ntawd, kom tsis txhob muaj ib tug twg poob vim nws yoog lawv tus piv txwv tawv ncauj thaum ub.

NPN 78: 3+4bc, 6c-7, 8

Txais: (7b) Nej yuav tsis txhob hnov qab Huab Tais cov hauj lwm!

Tej yam uas peb tau hnov thiab peb paub,
tej yam uas peb cov yawg koob tau hais qhia rau peb,
peb yuav muab hais qhia rau cov tiam neeg tom ntej,
yog tej yam txaus qhuas HUAB TAIS tau ua thiab yog nws lub zog.

Txais: (7b) Nej yuav tsis txhob hnov qab Huab Tais cov hauj lwm!

Lawv kuj yuav tsum tau qhia rau lawv tej tub ki tias
kom lawv yuav tsum tso siab rau Tswv ntuj,
thiab tsis txhob hnov qab Tswv ntuj cov hwj huam
tiam sis lawv yuav coj raws nws tej lus qhia.

Txais: (7b) Nej yuav tsis txhob hnov qab Huab Tais cov hauj lwm!

Kom lawv tsis txhob ua zoo li lawv cov yawg koob,
uas yog ib tiam neeg phem thiab ntxeev siab,
ib tiam neeg tsis muaj lub siab ruaj nreb,
tsis muaj lub tswv yim npuab Tswv Ntuj khov kho.

Txais: (7b) Nej yuav tsis txhob hnov qab Huab Tais cov hauj lwm!

As Les Lus Yas: LK 7: 16

Txais: As les lus yas, as les lus yas

Ib tug yaj saub loj tau sawv los nyob hauv peb,
Tswv Ntuj tuaj xyuas nws haiv neeg lawm.

Txais: As les lus yas, as les lus yas

Ntawv Moo Zoo: MK 2: 1-12

1 Ob peb hnub tom qab, Yes Xus rov los hauv Kas Fas Naus, sawv daws paub txog tias nws nyob hauv tsev.
2 Ces neeg tuaj sib sau coob coob ua ke, tsis tshuav chaw seem rau lawv li lawm, tab ntawm qhov rooj los tsis seem li. Yes Xus tshaj Lo Lus rau sawv daws.
3 Ces muaj plaub leeg kwv ib tug tuag ceg tuaj rau Yes Xus.
4 Lawv tsis tau kev coj tus tuag ceg los rau Yes Xus vim neeg coob dhau, ces lawv mus yaws lub ru tsev ncaj ntawm qhov chaw Yes Xus nyob; lawv tho qhov saum ruv tsev, lawv dauv lub txaj uas tus tuag ceg pw nqes los.
5 Yes Xus pom lawv lub siab ntseeg, nws hais rau tus tuag ceg tias: "Me nyuad, koj cov txhaum daws tas lawm."
6 Muaj ib co kws Ntawv Ntshiab zaum nyob ntawd, lawv xav hauv nruab siab tias:
7 "Tus neeg ntawd hais dab tsi li ntawd? Nws thuam Ntuj lawm! Leej twg thiaj daws txhaum tau? Tsuas kawg Tswv Ntuj tib leeg xwb."
8 Tab sis Yes Xus lub tswv yim twb paub tam sis ntawd tias lawv xav dab tsi hauv lawv siab lawm, nws thiaj hais rau lawv tias: "Ua cas nej xav tej zaj zoo li ntawd nyob hauv nej nruab siab?
9 Lo lus twg yog lo hais yooj yim dua rau tus tuag ceg: lo tias 'Koj cov txhaum daws tas', los lo tias ‘Koj sawv, nqa koj lub txaj, koj mus’?
10 Ua li mas, kom nej paub tias Neeg Leej Tub muaj cai daws txhaum tau nyob ntiaj teb no," ces Yes Xus hais rau tus tuag ceg tias:
11 "Kuv hais rau koj, koj sawv, nqa koj lub txaj, koj rov mus tsev."
12 Tus tuag ceg sawv tsees, nws nqa hlo nws lub txaj tam sim ntawd, nws tawm mus rau sawv daws pom. Cov neeg nyob ntawd yoob tas, lawv cav txog Tswv Ntuj, thiab lawv hais tias: "Peb tsis tau pom dua ib yam zoo li no ib zaug li."

Tim 14 lub 1 Hlis 2023

Hnub Xya Lis Piam Ib Nruab Xyoo A Nruab Lis Piam Xyoo I
Lectionary: 310

Zaj Nyeem Ib: HES NPLAWS 4: 12-16

12 Tswv Ntuj lo lus muaj sia, nws ua tau hauj lwm, nws ntse dua ib rab ntaj ob sab ntse, nws txeem mus tau rau hauv kis uas cais tus ntsuj plig ntawm lub tswv yim, thiab kis uas cais cov pob qij txha ntawm cov hlwb txha; thiab nws nyeem tau tej zaj tswv yim thiab tej txoj kev xav nyob hauv neeg nruab siab.
13 Tsis muaj ib yam tsim tawm los uas Tswv Ntuj lo lus pom tsis tau, txhua yam liab qab thiab qhib lug rau nws qhov muag pom; nws yog tus uas peb yuav tsum teb rau nws txog txhua yam.
14 Peb muaj ib tug Tuam Leej Choj uas yog tus loj, nws tau hla dhau cov txheej ntuj saud tuaj, yog Yes Xus, Tswv Ntuj leej Tub, mas peb yuav tsum tuav rawv peb txoj kev ntseeg kom ruaj nreb khov kho.
15 Peb tsis muaj ib tug Tuam Leej Choj uas tsis txawj hlub peb cov neeg zog me, tiam sis peb muaj ib tug Tuam Leej Choj uas tau raug txoj kev sim siab txhij txhua ib yam nkaus li peb, tsuas tshuav kiag txoj kev txhaum nws tsis tau ua xwb.
16 Li ntawd mas peb kav tsij tso siab lug mus kom txog lub theej kiab muaj txiaj ntsim, kom peb tau txais kev khuv leej, thiab txais txiaj ntsim los pab peb thaum peb xav tau kev pab

NPN 19: 8, 9, 10, 15

Txais: (Zam 6:63c) Huab Tais, koj cov lus yog ntsuj plig thiab yog txoj sia.

HUAB TAIS txoj cai zoo tas nrho,
ua tau kom tus ntsuj plig muaj zog tuaj;
HUAB TAIS cov cai lij choj tsim nyog ntseeg,
ua tau kom tus neeg tsis ntse thoob tsib tuaj.

Txais: (Zam 6:63c) Huab Tais, koj cov lus yog ntsuj plig thiab yog txoj sia.

HUAB TAIS cov cai lij choj ncaj ncees,
ua tau kom lub siab zoo hlo ;
HUAB TAIS lo lus qhia meej kawg,
ua tau kom qhov muag pom kev.

Txais: (Zam 6:63c) Huab Tais, koj cov lus yog ntsuj plig thiab yog txoj sia.

Txoj kev hwm HUAB TAIS yog kev ntshiab,
yog txoj yuav nyob mus li;
HUAB TAIS cov txhooj yog qhov tseeb,
tas nrho nws cov txhooj yeej ncaj ncees.

Txais: (Zam 6:63c) Huab Tais, koj cov lus yog ntsuj plig thiab yog txoj sia.

Thov kom cov lus kuv lub ncauj hais
thiab tej yam kuv lub siab xav tau zoo raws li koj nyiam.
HUAB TAIS, koj yog kuv lub tsua thiab tus cawm kuv.

Txais: (Zam 6:63c) Huab Tais, koj cov lus yog ntsuj plig thiab yog txoj sia.

As Les Lus Yas: LK 4: 18

Txais: As les lus yas, as les lus yas.

Huab Tais xa kuv tuaj kom coj lub moo zoo tuaj rau cov pluag
thiab tshaj kev twj lij rau cov raug kaw nyob hauv tsev loj faj.

Txais: As les lus yas, as les lus yas.

Ntawv Moo Zoo: MK 2: 13-17

13 Yes Xus tawm mus ncig taug ntug dej ntuj; tas tsoom sid tuaj ntsauv nws, ces nws qhuab qhia lawv.
14 Thaum Yes Xus taug kev, nws pom Les Vis, uas yog As Fas Yos tub, zaum ntawm rooj sau se; ces Yes Xus hais rau Les Vis tias: "Koj los raws kuv." Les Vis sawv tsees, nws raws Yes Xus mus.
15 Thaum Yes Xus zaum noj mov hauv Les Vis tsev, mas muaj ib co sau se thiab ib co neeg txhaum coob coob nrog Yes Xus thiab nws cov thwj tim zaum noj mov, vim lawv yeej muaj coob leej raws Yes Xus.
16 Cov kws Ntawv Ntshiab uas yog ib co Fas Lis Xais pom Yes Xus nrog cov neeg txhaum thiab cov sau se noj mov, lawv hais rau nws cov thwj tim tias: "Vim li cas nws nrog cov sau se thiab cov neeg txhaum noj mov?"
17 Yes Xus hnov, nws hais rau lawv tias: "Tsis yog cov neeg noj qab nyob zoo thiaj yuav vam txog kws kho mob, tiam sis yog cov neeg muaj mob. Kuv tsis yog tuaj hu cov neeg ncaj, kuv tuaj hu cov neeg txhaum."

Tim 16 lub 1 Hlis 2023

Hnub Ob Lis Piam Ob Nruab Xyoo A Nruab Lis Piam Xyoo I
Lectionary: 311

Zaj Nyeem Ib: HES NPLAWS 5: 1-10

Cov kwv tij nkauj muad:
1 Txhua tus Tuam Leej Choj yog muab hauv zeej tsoom los tsa ua tus sawv lawv chaw nyob ntawm Tswv Ntuj xub ntiag, kom nws ua tus cev paj tshab thiab cev cov txim them txim txhaum rau Tswv Ntuj.
2 Nws yog tus ua siab ntev pab cov neeg tsis paub dab tsi thiab cov neeg yuam kev, vim tias nws kuj txawj ua txhaum ib yam nkaus li lawv thiab.
3 Vim nws txawj ua txhaum, mas nws yuav tsum ua thaj txi Ntuj them nws cov txhaum, ib yam li nws txi Ntuj them tsoom sid cov txhaum.
4 Tsis muaj leej twg yuav rov muab nws tsa ua leej choj tau, yog Tswv Ntuj hu mas nws thiaj ua leej choj tau, ib yam li Tswv Ntuj tau hu As Loos.
5 Leej Pleev kiag los kuj ib yam, nws tsis tau rov muab hwj chim rau nws tus kheej kom nws raug tsa ua Tuam Leej Choj, tiam sis tus muab hwj chim rau nws yog tus hais rau nws tias: “Koj yog kuv Leej Tub, hnub no, kuv tau xeeb koj los.”
6 Tswv Ntuj tseem hais nyob lwm qhov tias: “Koj ua leej choj mus ib txhiab ib txhis, raws li Mes Kis Xes Des txoj cai.”
7 Thaum Yes Xus tseem nyob hauv nws lub cev nqaij, nws tau quaj qw los kua muag teev ntuj thov tus muaj peev xwm cawm tau nws ntawm txoj kev tuag, ces Tswv Ntuj mloog nws tej lus thov vim nws hwm Tswv Ntuj zoo.
8 Ces txawm tias nws yog tus tub cag, los nws yuav tsum tau kawm txoj kev mloog lus nyob hauv txoj kev raug txom nyem.
9 Thaum nws ua tas txhua yam zoo tiav log lawm, nws yog lub hauv paus uas pub txoj kev cawm nyob mus li rau cov neeg mloog nws lus.
10 Vim tias Tswv Ntuj tsa nws ua Tuam Leej Choj raws li Mes Kis Xes Des txoj cai.

NPN 110: 1, 2, 3, 4

Txais: (4b) Koj yuav ua leej choj mus ib txhis
raws li Mes Kis Xes Des txoj cai.

HUAB TAIS hais rau kuv tus Huab Tais tias:
“Koj zaum ntawm kuv sab xis
mus txog thaum kuv muab koj cov yeeb ncuab
ua rooj rau koj tiag taw.”

Txais: (4b) Koj yuav ua leej choj mus ib txhis
raws li Mes Kis Xes Des txoj cai. .

HUAB TAIS yuav ua kom koj tus cwj ua vaj muaj hwj huam
nthuav kom deb txij ntawm Xis Yoos mus:
“Koj yuav ua vaj nyob nruab nrab hauv koj cov yeeb ncuab.”

Txais: (4b) Koj yuav ua leej choj mus ib txhis
raws li Mes Kis Xes Des txoj cai.

“Koj tau txais lub hwj huam ua vaj ua koj tug hnub koj yug los
nyob hauv lub hwj chim ntshiab ci ntsa iab lawm.
Ua ntej lub hnub qub sawv ntxov, zoo li cov lwg, kuv tau xeeb koj los.”

Txais: (4b) Koj yuav ua leej choj mus ib txhis
raws li Mes Kis Xes Des txoj cai.

HUAB TAIS tau cog lus lawm, nws yuav tsis thim nws lo lus tias:
“Koj ua leej choj mus ib txhis raws li Mes Kis Xes Des txoj cai.”

Txais: (4b) Koj yuav ua leej choj mus ib txhis
raws li Mes Kis Xes Des txoj cai.

As Les Lus Yas: HES NPLAWS 4: 12

Txais: As les lus yas, as les lus yas.

Tswv Ntuj lo lus muaj sia thiab ua tau hauj lwm,
nws txawj mem tau tej zaj tswv yim thiab
tej zaj kev xav nyob hauv neeg nruab siab.

Txais: As les lus yas, as les lus yas.

Ntawv Moo Zoo: MK 2: 18-22

18 Zam cov thwj tim thiab cov Fas Lis Xais cov thwj tim ua kam cov kev cai yoo mov, ces muaj neeg tuaj hais rau Yes Xus tias: "Vim li cas Zam cov thwj tim thiab cov Fas Lis Xais cov thwj tim yoo mov, hos koj cov thwj tim tsis yoo li?"
19 Yes Xus hais rau lawv tias: “Thaum nraug vauv tseem nrog nws cov kwv luag nyob, lawv puas yoo mov tau? Thaum lub caij lawv tseem muaj nraug vauv nrog lawv, mas lawv yoo tsis tau.
20 Tab sis, muaj ib hnub luag yuav coj nraug vauv ntawm lawv mus, ces hnub ntawd lawv yuav yoo mov.
21 Tsis muaj leej twg yuav ntxiv ib daig ntaub tshiab uas tsis tau nqws rau lub khaub tsho, yog ua li ntawd mas daim ntaub tshiab yuav rub daim qub, ces haj yam yuav ntuag loj.
22 Kuj tsis muaj leej twg ntim cawv tshiab rau hauv ib co hnab tawv qub; vim cov cawv yuav ua cov hnab tawv qub tawg, ces cawv yuav txeej tas, hos cov hnab tawv los kuj yuav puas tas. Vim li ntawd mas cawv tshiab yuav muab ntim rau cov hnab tawv tshiab.”

Tim 17 lub 1 Hlis 2023

Hnub Peb Lis Piam Ob Nruab Xyoo A Nruab Lis Piam Xyoo I
Lectionary: 312

Yuav Hwm LN Aas Tos Nis, Thawj tug Txiv Twj Cuab

Zaj Nyeem Ib: HES NPLAWS 6: 10-20

Cov kwv tij:
10 Tswv Ntuj tsis yog ib tug siab tsis ncaj ncees, uas yuav cia li tsis nco qab nej tej hauj lwm thiab nej txoj kev nyiam luag vim nws lub npe, thaum nej tau pab thiab nej tseem niaj hnub pab cov ntshiab.
11 Peb xav kom nej txhua leej muaj lub siab kub lug ua kom txoj kev tso siab tsuas muaj tawg paj txi txiv mus txog hnub kawg xwb,
12 kom nej tsis txhob ua ib co neeg nkees qaug zog, tiam sis kom nej yoog raws cov uas lawv ntseeg thiab ua lub siab ntev tsis tso tseg, ces lawv tau txais lub cuab tam raws li txoj kev cog lus.
13 Thaum Tswv Ntuj cog lus rau Has Nplas Has, nws tuav tsis tau ib tug loj dua nws lub npe, ces nws rov tuav nws lub npe los cog lus,
14 nws hais tias: “Kuv yuav foom hmoov zoo rau koj, thiab kuv yuav ua kom koj huam vam coob tas nrho.”
15 Vim Has Nplas Has tau ua lub siab ntev ntev tos tsis ntaus siab yau li, mas nws thiaj tau txais raws li Tswv Ntuj cog lus.
16 Tej tib neeg cog lus, mas lawv tuav txog ib tug loj dua lawv lub npe los cog lus, ces lawv siv txoj kev twv ntuj cog lus, kom txhob muaj chaw sib cav sib ceg.
17 Yog li ntawd, Tswv Ntuj xav kom cov yuav txais lub cuab tam paub tias nws lo lus yeej tsis hloov li, mas nws thiaj tau siv txoj kev twv ntuj los cog lus.
18 Kom nyob hauv ob qho ruaj khov uas hloov tsis tau no, uas Tswv Ntuj dag tsis tau, peb cov uas tau tso puas tsav yam tseg muaj kev ua siab loj loj, tuav ruaj nreb txoj kev tso siab lug uas nyob ntawm peb hauv ntej.
19 Txoj kev tso siab ntawd yog zoo li ib tug nqe lauj nkoj ruaj thiab khov peb muaj los tuav peb tus plig kom nyob tus, nws txeem tau mus dhau daim ntaub thaiv kem ntshiab mus rau sab hauv.
20 Yes Xus yog thawj tug ua peb ntej nkag mus nyob rau sab hauv lawm, vim nws ua Tuam Leej Choj mus li, raws nraim Mes Kis Xes Des txoj cai.

NPN 111: 1-2, 4-5, 9+10c

Txais: (5) Huab Tais yuav nco ntsoov lo lus nws tau cog mus tas ib txhis.
los: As les lus yas.

Kuv yuav ua HUAB TAIS tsaug tas kuv lub siab lub ntsws,
thaum kuv nrog tsoom neeg siab ncaj ua ib pab thiab ua lub txoos.
HUAB TAIS cov hauj lwm loj tas nrho,
zoo ntxim siab kawg nkaus.

Txais: (5) Huab Tais yuav nco ntsoov lo lus nws tau cog mus tas ib txhis.
los: As les lus yas.

Nws cov hauj lwm txaus qhuas ua kom nws nto moo lug;
HUAB TAIS muaj lub siab zoo thiab khuv leej neeg.
Nws muab txhiam xws rau cov hwm nws tau noj,
nws yuav nco ntsoov mus li txog tias nws tau cog lus.

Txais: (5) Huab Tais yuav nco ntsoov lo lus nws tau cog mus tas ib txhis.
los: As les lus yas.

Nws tau xa kev cawm tuaj rau nws haiv neeg,
nws yuav tsis hloov nws lo lus tas mus li ib txhis;
nws lub npe ntshiab thiab loj tas nrho.
Nws lub koob meej yuav nyob mus li ib txhis.

Txais: (5) Huab Tais yuav nco ntsoov lo lus nws tau cog mus tas ib txhis.
los: As les lus yas.

As Les Lus Yas: EFX 1: 17-18

Txais: As les lus yas, as les lus yas.

Thov kom peb tus Huab Tais Yes Xus Pleev leej Txiv
qhib peb lub qhov muag hauv peb nruab siab kom pom kev,
peb thiaj paub txog tias yog peb tso siab peb yuav tau dab tsi,
yog peb mloog Tswv Ntuj hu peb.

Txais: As les lus yas, as les lus yas.

Ntawv Moo Zoo: MK 2: 23-28

23 Muaj ib zaug, yog hnub Xas Npas Tos, Yes Xus hla ib thaj teb, nws cov thwj tim txawm fawb ib txoj kev taug, thiab lawv pib de tej hnab nplej.
24 Cov Fas Lis Xais hais rau Yes Xus tias: "Saib! Vim li cas lawv ua tej yam txwv tsis pub ua hnub Xas Npas Tos?"
25 Yes Xus hais rau lawv tias: "Nej tsis tau nyeem ib zaug txog qhov Das Vis tau ua, thaum nws tsis muaj dab tsi noj ces nws thiab nws cov kwv luag tshaib plab lod?
26 Tias thaum lub caij As Npias Thas ua tuam leej choj, nws nkag mus hauv Tswv Ntuj lub tsev li cas, thiab nws noj cov ncuav mov txi Ntuj uas kawg yog cov leej choj thiaj noj tau xwb, thiab nws tseem muab rau nws cov kwv luag noj thiab lod?"
27 Ces Yes Xus hais rau lawv tias: "Ntuj tsim hnub Xas Npas Tos rau tib neeg, tsis yog tsim tib neeg rau hnub Xas Npas Tos.
28 Vim li ntawd, neeg Leej Tub yog tswv kav hnub Xas Npas Tos thiab."

Tim 18 lub 1 Hlis 2023

Hnub Plaub Lis Piam Ob Nruab Xyoo A Nruab Lis Piam Xyoo I
Lectionary: 313

Zaj Nyeem Ib: HES NPLAWS 7: 1-3, 15-17

1 Mes Kis Xes Des, tus vaj kav Xas Les uas yog Tswv Ntuj nyob siab tus leej choj, nws tuaj ntsib Has Nplas Has thaum Has Nplas Has mus tua yeej cov vaj lawm thiab rov los tsev; ces nws foom hmoov zoo rau Has Nplas Has.
2 Has Nplas Has qee ib feem kaum ntawm puas tsav yam nws muaj pub rau Mes Kis Xes Des. Lub npe Mes Kis Xes Des txhais tias ‘Vaj muaj txoj kev ncaj,’ thiab nws kuj ua vaj kav Xas Les, txhais tias tus Vaj muaj kev thaj yeeb!
3 Nws tsis muaj niam tsis muaj txiv, tsis muaj caj ces, nws lub neej tsis muaj hnub pib tsis muaj hnub xaus li, yog zoo li Tswv Ntuj Leej Tub; nws ua leej choj mus ib txhiab ib txhis.
15 Tseem muaj ib qho qhia tseeb kawg, li no tias: Yog muaj lwm tus sawv ua leej choj raws li Mes Kis Xes Des,
16 mas nws ua leej choj tsis yog vim muaj lus qhia tseg tias nyob saum nqaij tawv nws caj ces keeb kwm yeej ua leej choj, tiam sis yog los ntawm lub hwj huam muaj txoj sia uas rhuav tsis tau.
17 Vim yeej muaj ib lo lus zeem tseeb tias: “Koj ua leej choj mus li raws nraim Mes Kis Xes Des txoj cai.”

NPN 110: 1, 2, 3, 4

Txais: (4b) Koj yuav ua leej choj mus ib txhis
raws li Mes Kis Xes Des txoj kab ke.

HUAB TAIS hais rau kuv tus Huab Tais tias:
“Koj zaum ntawm kuv sab xis mus txog thaum
kuv muab koj cov yeeb ncuab ua rooj rau koj tiag taw.”

Txais: (4b) Koj yuav ua leej choj mus ib txhis
raws li Mes Kis Xes Des txoj kab ke.

HUAB TAIS yuav ua kom koj tus cwj ua vaj lub hwj huam
nthuav mus deb txij ntawm Xis Yoos mus:
Koj yuav ua vaj nyob nruab nrab hauv koj cov yeeb ncuab.

Txais: (4b) Koj yuav ua leej choj mus ib txhis
raws li Mes Kis Xes Des txoj kab ke.

Koj tau lub hwj chim ua vaj ua koj tug
txij hnub koj yug los lawm,
yog lub hwj chim ntshiab ci ntsa iab,
Ua ntej lub hnub qub sawv ntxov,
zoo li cov lwg, kuv tau yug koj los lawm.

Txais: (4b) Koj yuav ua leej choj mus ib txhis
raws li Mes Kis Xes Des txoj kab ke.

HUAB TAIS tau cog lus lawm, nws yuav tsis thim nws lo lus tias:
“Koj ua leej choj mus ib txhis raws li Mes Kis Xes Des txoj cai.”

Txais: (4b) Koj yuav ua leej choj mus ib txhis
raws li Mes Kis Xes Des txoj kab ke.

As Les Lus Yas: MT 4: 23

Txais: As les lus yas, as les lus yas.

Yes Xus tshaj lub Moo Zoo txog lub Ceeb Tsheej
thiab nws kho txhua yam mob nyob hauv cov neeg zoo hlo.

Txais: As les lus yas, as les lus yas.

Ntawv Moo Zoo: MK 3: 1-6

1 Yes Xus rov mus hauv lub tsev txoos dua. Nyob ntawd, muaj ib tug neeg uas ib sab tes qhuav.
2 Ces lawv nyas ntshis ntsia saib Yes Xus puas yuav kho tus neeg qhuav tes ntawd hnub Xas Npas Tos, kom lawv tau kev liam rau Yes Xus.
3 Yes Xus hais rau tus neeg qhuav tes tias: "Koj los sawv nyob hauv nruab nrab."
4 Thiab Yes Xus hais rau lawv tias: "Hnub Xas Npas Tos, txoj cai puas kheev kom ua qhov zoo los ua qhov phem, puas kheev kom cawm ib txog sia los txo ib txog sia?" Sawv daws nyob ntsiag to.
5 Yes Xus ntsia ib ncig npau taws vog, nws tu siab vim lawv lub siab txhav qhi, ces nws hais rau tus neeg qhuav tes tias: "Koj xyab tes." Ces nws xyab kiag tes, nws txhais tes rov zoo hlo.
6 Ces cov Fas Lis Xais tawm mus, lawv mus nrog cov Hes Los Dias sab laj tam sis ntawd, saib yuav ua li cas lawv thiaj muab tau Yes Xus tua.

Tim     19     lub     1     Hlis     2023

Hnub Tsib Lis Piam Ob Nruab Xyoo A Nruab Lis Piam Xyoo I
Lectionary: 314

Zaj Nyeem Ib:   HES NPLAWS 7: 25—8:6

25 Yes Xus muaj peev xwm cawm tau cov neeg uas vam txog nws kom mus cuag tau Tswv Ntuj, vim nws muaj txoj sia mus li kom nws tau thov Ntuj pab lawv tsis tseg.
26 Yeej tsim nyog kom peb yuav tsum muaj ib tug Thawj Leej Choj zoo li ntawd, ib tug ntshiab huv, tsis muaj txhaum, tsis muaj ib yam phem nyob hauv nws, nws tsis raug suav nrog cov neeg txhaum, nws nyob siab dua cov txheej ntuj saud.
27 Nws tsis tas yuav niaj hnub tua tsiaj txi Ntuj li lwm cov leej choj, kom tau them nws cov txhaum, thiab them tsoom pej xeem cov txhaum. Nws tsuas txi Ntuj ib zaug xwb los pab tas txhua leej, yog thaum nws rov muab nws tus kheej txi rau Ntuj.
28 Txoj Cai tsa ib co neeg muaj txaug muaj txhaum los ua thawj leej choj, tiam sis lo lus nyob hauv txoj kev cog lus uas los tom qab Txoj Cai, tau tsa Leej Tub ua tus thawj leej choj mus ib txhiab ib txhis, vim nws tau ua tas txhua yam zoo tiav log.
8: 1 Lub ntsiab tseem ceeb uas tau hais txog yog qhov no: Peb muaj ib tug Thawj Leej Choj zoo li hais ntawd, uas mus zaum ntawm tus muaj hwj huam lub theej kiab phab xis nyob saum cov txheej ntuj saud lawm.
2 Nws tuav txoj kab xwm saib Kem Tsev Ntshiab, thiab saib lub tsev tsam phooj, lub tseem, uas yog Huab Tais tsa, tsis yog tib neeg tsa.
3 Txhua tus thawj leej choj raug tsa los ua tus cev paj tshab thiab txi Ntuj; ua li mas tus ntawd kuj yuav tsum muaj tej yam mus txi Ntuj thiab.
4 Yog tias Leej Pleev tseem nyob ntiaj teb no, mas nws tsis tau ua leej choj, vim twb muaj cov leej choj txi Ntuj raws Txoj Cai lawm.
5 Cov leej choj no txoj kev teev hawm tsuas yog ib tug piv txwv los ib tug duab txog txoj kev teev hawm nyob saum ntuj xwb, vim thaum Mais Xes yuav tsa lub tsev tsam phooj, Tswv Ntuj tau qhia nws paub thiab hais rau nws tias: “Koj ntsia, koj yuav ua txhua yam kom raws li tus piv txwv kuv muab rau koj saib nyob saum lub roob.”
6 Qhov tseeb, Leej Pleev tau txais ib txog kab xwm siab dua txoj qub, vim nws ua tus cev lus rau ib txog kev cog lus zoo dua, uas txawb rau saum ib co lus zoo dua qub lawm.

NPN   40: 7-8a, 8b-9, 10, 17

Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

Koj tsis ntshaw tsiaj los txhiam xws txi rau koj,
tiam sis koj muab ob lub pob ntseg txawj mloog lus rau kuv.
Koj tsis xav tau tsiaj hlawv txi ntuj los tsiaj hlawv them txim txhaum,
kuv thiaj hais tias: “Kuv nyob ntawm no, cia kuv tuaj.”

Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

Nyob hauv kauj ntawv muaj lus hais tseg rau kuv tias:
“Ua ywj koj siab, kuv tus Tswv Ntuj, yog yam ntxim kuv siab,
koj txoj cai nyob rawv hauv kuv nruab plaw!”

Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

Kuv tau tshaj koj txoj kev ncaj
rau tsoom neeg coob tuaj sib txoos paub,
kuv tsis tau kaw kuv lub ncauj, HUAB TAIS, koj yeej paub.

Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

Thov kom txhua leej uas nrhiav koj
zoo siab hom khaj nyob hauv koj,
thiab kom cov uas nyiam koj txoj kev cawm seej
cav tsis tseg tias: “Kom HUAB TAIS nto koob meej.”

Txais: (8a+9a) Kuv nyob ntawm no, HUAB TAIS, kuv tuaj ua ywj koj lub siab.

As Les Lus Yas:   2 TMT 1: 10

Txais: As les lus yas, as les lus yas.

Peb tus Cawm Seej Yes Xus Pleev twb rhuav txoj kev tuag lawm,
thiab nws ua kom txoj sia ci tawm tuaj nyob hauv lub Moo Zoo.

Txais: As les lus yas, as les lus yas.

Ntawv Moo Zoo:   MK 3: 7-12

7 Yes Xus nrog nws cov thwj tim mus so nyob nram ntug dej ntuj. Muaj ib pab neeg coob kawg nyob Nkas Lis Lais thiab nyob Yus Das teb raws nws qab tuaj;
8 cov neeg nyob Yes Lus Xas Les, nyob Is Dus Mias, nyob sab dej Yos Las Das tim ub, thiab nyob ib ncig Tws Los thiab Xis Doos los tuaj coob kawg tuaj cuag Yes Xus, vim lawv hnov txog tas ib puas tsav yam uas nws ua.
9 Yes Xus hais kom cov thwj tim npaj ib lub nkoj me rau nws mus nyob hauv vim muaj neeg coob dhau, kom lawv txhob tuaj txiv nws.
10 Yes Xus kho ntau leej zoo, ces tas cov neeg uas muaj mob muaj nkeeg sawv daws phoom tas zog kom tau chwv nws.
11 Thaum cov dab tsis huv pom Yes Xus, mas lawv khoov hauv av nyob ntawm nws xub ntiag, lawv qw tias: "Koj yog Tswv Ntuj Leej Tub!"
12 Yes Xus txwv lawv nruj tsis pub lawv hais lus kom muaj neeg paub txog nws.

Tim 20 lub 1 Hlis 2023

Hnub Rau hauv Lis Piam Ob Nruab Xyoo A Nruab Lis Piam Xyoo I
Lectionary: 315

XHLT: LN Sebastian, tuag ua Tim Khawv; LN Fabian, Vaj Qhia tuag ua Tim Khawv

Zaj Nyeem Ib: HES NPLAWS 8: 6-13

Cov kwv tij nkauj muad:
6 Qhov tseeb, Leej Pleev tau txais ib txog kab xwm siab dua txoj qub, vim nws ua tus cev lus rau ib txog kev cog lus zoo dua, uas txawb rau saum ib co lus zoo dua qub lawm.
7 Vim tias yog txoj kev cog lus thawj zaug zoo tas tsis muaj chaw xyeej li lawm, mas tsis tas yuav rov cog lus dua zaum ob.
8 Tiam sis Tswv Ntuj pom tias cov neeg tsis coj kom zoo, ces nws tsawm tseg tias:
“Yuav muaj ib hnub yav tom ntej, kuv yuav nrog His Xas Lais tsev neeg thiab Yus Das tsev neeg cog dua ib lo lus tshiab;
9 yuav tsis cog lus xws li kuv tau nrog lawv cov yawg koob cog lus, hnub uas kuv tuav lawv tes, coj lawv tawm hauv Hais Nkws Tos teb los lawm. Vim thaum ntawd lawv tsis nyob ruaj hauv kuv lo lus cog, ces kuv kuj tsis quav ntsej lawv.” Huab Tais hais li ntawd.
10 “Kuv yuav nrog His Xas Lais tsev neeg rov cog lus li no thaum dhau lub sij hawm ntawd lawm,” Huab Tais hais li ntawd. “Kuv yuav muab kuv cov kev cai lij choj cog rau hauv lawv lub tswv yim, kuv yuav muab txaug rau hauv lawv nruab siab, ces kuv yuav ua lawv tus Tswv Ntuj, lawv yuav ua kuv haiv neeg.
11 “Tsis tas yuav muaj leej twg qhia lwm tus, tsis tas nyias yuav hais rau nyias tus kwj tij tias: ‘Koj yuav tsum paub Huab Tais,’ vim tus hlob tus yau sawv daws yuav tsum paub kuv tas huv tib si.
12 “Kuv yuav zam lawv tej kev txaug kev txhaum rau lawv, kuv yuav tsis nco txog lawv cov txhaum ntxiv.”
13 Thaum Tswv Ntuj hais txog kev cog lus tshiab, mas yog nws saib thawj txoj kev cog lus qub lawm. Tej yam uas qub thiab pib puas, mas tshuav tsis ntev yuav ploj mus.

NPN 85: 8+10, 11-12, 13-14

Txais: (11a) Kev ua siab zoo thiab kev tseeb yuav tuaj sib ntsib.

HUAB TAIS, thov muab koj txoj kev khuv leej rau peb pom,
Thiab muab koj txoj kev cawm pub rau peb.
Txoj kev cawm yeej nyob ze ze cov uas hwm nws lawm tiag;
lub hwj chim yuav nyob txawm hauv peb lub teb chaws.

Txais: (11a) Kev ua siab zoo thiab kev tseeb yuav tuaj sib ntsib.

Kev ua siab zoo thiab thiab kev tseeb yuav tuaj sib ntsib,
kev ncaj thiab kev thaj yeeb yuav los sib puag.
Kev tseeb yuav txhawv hauv ntiaj teb los,
thiab kev ncaj yuav dauv muag ntsia saum ntuj tuaj.

Txais: (11a) Kev ua siab zoo thiab kev tseeb yuav tuaj sib ntsib.

HUAB TAIS yuav tso nws tej koob hmoov los,
ces peb lub teb chaws yuav ntsu qoob.
Kev ncaj yuav taug kev ua nws ntej,
kev cawm yuav taug raws nws tus hneev taw.

Txais: (11a) Kev ua siab zoo thiab kev tseeb yuav tuaj sib ntsib. .

As Les Lus Yas

Txais: As les lus yas, as les lus yas.

Tswv Ntuj nrog lub ntiaj teb rov sib haum nyob hauv leej Pleev,
nws muab lo lus nrhiav kev siv haum xeeb tso rau peb tshaj.

Txais: As les lus yas, as les lus yas.

Ntawv Moo Zoo: MK 3: 13-19

13 Yes Xus nce mus saum lub roob, nws hais cov uas nws xav hu kom los ntawm nws; ces lawv los nyob ze nws.
14 Nws tsa kaum ob leeg uas nws tis npe rau lawv hu ua cov Hauv Paus Xa Lus , kom lawv nrog nraim nws, thiab kom nws tau xa lawv mus tshaj Lo Lus,
15 thiab kom lawv tau txais lub peev xwm ntiab tau dab phem tawm mus.
16 Nws tsa Pab Kaum Ob: muaj Xis Moos uas nws tis npe hu ua Pob Zeb,
17 Yas Kos, Ntxes Npes Dais tub thiab Zam, Yas Kos tus kwv; nws tis nkawd npe hu ua Npuas Nes Nkes, txhais tias Yawm Xob cov tub;
18 muaj As Nres, Fis Lis Pos, Npas Tos Los Mas Yos, Mas Tais, Tos Mas, Yas Kos uas yog As Fes Yos tub, Thas Das Yos, Xis Moos tus Kas Nas Nias,
19 thiab Yus Das Kas Lis Yaus, tus muab Yes Xus muag.

Tim     21     lub     1     Hlis     2023

Hnub Xya Lis Piam Ob Nruab Xyoo A Nruab Lis Piam Xyoo I
Lectionary: 316

Yuav Hwm LN Agnes, Nkauj Tsim Txiaj tuag ua Tim Khawv

Zaj Nyeem Ib:   HES NPLAWS 9: 2-3, 11-14

2 Lawv tsa ib lub tsev tsam phooj; nyob chav sab nraud, muaj tus ncej txawb teeb, lub rooj, thiab cov ncuav mov txi ntuj; chav ntawd hu ua lub Tsev Ntshiab.
3 Ces nyob tom qab daim ntaub thaiv ob, yog lub tsev tsam phooj hu ua chav Ntshiab rau yam Ntshiab.
11 Thaum Leej Pleev tuaj, nws yog tus Thawj Leej Choj kav lub cuab tam uas tab tom tuaj, nws hla ib lub tsev tsam phooj loj dua thiab zoo dua, uas tsis yog xuas tes tsa, tsis yog tsim los nyob hauv ntiaj teb no.
12 Nws chaws mus hauv chav Ntshiab ib zaug xwb, nws tsis siv ntshav tshis los ntshav nyuj, nws siv kiag nws cov roj ntsha los muab txoj kev cawm uas nyob mus li rau neeg.
13 Yog tias ntshav laug thiab ntshav heev nyuj thiab cov hmoov tshauv xyuas nyuj, uas luag muab tsuag rau saum cov neeg tsis huv, twb ua tau kom cov tsis huv ntawd lub cev huv tuaj,
14 mas Leej Pleev cov ntshav haj yam ua tau kom peb lub siab huv tuaj thiab kom peb dim tau ntawm cov hauj lwm coj mus rau kev tuag, los teev tus Tswv Ntuj muaj txoj sia, vim Leej Tswv Yim tus nyob mus li, ua kom Leej Pleev rov muab nws tus kheej, uas tsis muaj ib qho xyeej li, txi rau Tswv Ntuj.

NPN   47: 2-3, 6-7, 8-9

Txais: (6) Thaum Tswv Ntuj nce saum nws lub theej kiab,
muaj suab qw zoo siab, muaj suab hom nrov hwm Huab Tais.

Tas txhua haiv neeg, nej npuaj teg,
nej qw suab zoo siab rau Tswv Ntuj,
vim HUAB TAIS tus nyob siab, tus zoo tshaj,
yos tus vaj loj kav tas nrho lub ntiaj teb.

Txais: (6) Thaum Tswv Ntuj nce saum nws lub theej kiab,
muaj suab qw zoo siab, muaj suab hom nrov hwm Huab Tais.

Tswv Ntuj nce saum nws lub theej kiab, muaj suab zoo sia
HUAB TAIS nce, muaj suab hom nrov nroo ntws.
Nej hu nkauj cav txog Tswv Ntuj, nej cav txog nws,
nej hu nkauj cav txog peb tus vaj, nej cav txog nws.

Txais: (6) Tswv Ntuj nce saum nws lub theej kiab,
muaj suab qw zoo siab, muaj suab hom nrov hwm Huab Tais.

Tus vaj kav tas lub ntiaj teb yog Tswv Ntuj,
nej hu tej zaj nkauj paj nruag cav txog nws.
Tswv Ntuj tswj cov haiv neeg,
nws zaum saum nws lub theej kiab ntshiab.

Txais: (6) Tswv Ntuj nce saum nws lub theej kiab,
muaj suab qw zoo siab, muaj suab hom nrov hwm Huab Tais.

As Les Lus Yas:   Hauj Lwm 16: 14b

Txais: As les lus yas, as les lus yas.

Huab Tais, thov koj qhib peb lub siab
kom peb mloog koj leej Tub cov lus.

Txais: As les lus yas, as les lus yas.

Ntawv Moo Zoo:   MK 3: 20-21

20 Yes Xus nrog nws cov thwj tim nkag los rau hauv ib lub tsev,
ces rov muaj neeg coob coob tuaj ntsauv lawv dua,
Yes Xus thiab nws cov thwj tim tsis xyeej noj mov li.
21 Yes Xus tsev neeg hnov li ntawd, lawv tawm mus coj nws,
vim lawv hais tias: "Nws tsis meej pem lawm."

Tim 23 lub 1 Hlis 2023

Hnub Ob Lis Piam Peb Nruab Xyoo A Nruab Lis Piam Xyoo I
Lectionary: 317

Hnub Thov Ntuj Kom Muaj Txoj Cai Tsis Pub Rho Me Nyuam

XHLT: LN Vincent, Leej Tsob Hwb tuag ua Tim Khawv;
LN Marianne Cope, Nkauj Tsim Txiaj

Zaj Nyeem Ib: HES NPLAWS 9: 15, 24-28

15 Li ntawd Leej Pleev yog tus sawv neeg chaw nyob hauv ib txog kev cog lus tshiab, kom nws txoj kev tuag ua nqi them rau cov txim txhaum nyob hauv thawj txoj kev cog lus, ces cov neeg uas Ntuj hu, thiaj yuav tau txais lub cuab tam nyob mus li raws li tau cog lus lawm.
24 Leej Pleev tsis tau chaws mus hauv ib lub tsev Ntshiab uas yog neeg txhais tes txhim, yog ib lub ua piv txwv txog lub tseem xwb, nws yeej tau mus kiag rau saum ntuj lawm tiag tiag, ces zaum no nws thiaj sawv peb chaw nyob ntawm Tswv Ntuj xub ntiag.
25 Tsis yog nws yuav rov cev nws rau Ntuj ob peb zaug xws li tus tuam leej choj, uas niaj xyoo yuav tsum chaws mus hauv kem tsev ntshiab, rov mus cev ib co ntshav uas tsis yog nws cov rau Ntuj.
26 Yog tias Leej Pleev ua li ntawd xwb, mas nws yuav tsum tau raug txom nyem ntau ntau zaus txij puag thaum ntuj tsim teb raug los lawm. Tab sis zaum no yog lub zwj ceeb kawg, mas nws tau tawm los muab nws txi rau Ntuj ib zaug xwb, kom tau rhuav kev txhaum pov tseg.
27 Ib yam li leej tib neeg tsuas tuag ib zaug xwb, dhau ntawd lawm, yog lub caij txiav txim.
28 Leej Pleev kuj ib yam li ntawd, nws rov muab nws txi rau Ntuj ib zaug xwb, kom tau them ib zeej tsoom cov txhaum. Ces nws tseem yuav tawm los zaum ob, tsis yog los them txhaum lawm, yog tawm los kom tau muab kev cawm rau cov neeg uas tos ntsoov nws.

NPN 98: 1, 2-3ab, 3cd-4, 5-6

Txais: (1a) Nej hu ib zaj nkauj tshiab rau Huab Tais,
nws tau ua tej yam txaus qhuas.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
nws sab npab ntshiab tau ua li ntawd.

Txais: (1a) Nej hu ib zaj nkauj tshiab rau Huab Tais,
vim nws tau ua tej yam txaus qhuas.

HUAB TAIS ua kom sawv daws paub txog nws txoj kev cawm,
nws muab nws txoj kev ncaj rau cov haiv neeg pom.
Nws rov nco txog nws txoj kev ua zoo rau
thiab kev hlub tsev neeg His Xas Lais.

Txais: (1a) Nej hu ib zaj nkauj tshiab rau Huab Tais,
vim nws tau ua tej yam txaus qhuas.

Tas npoo ntuj npoo ntiaj teb tau pom
peb tus Tswv Ntuj txoj kev cawm neeg.
Tas txhua teb chaws, nej zoo siab hu nkauj rau HUAB TAIS,
nej qw suab hu nkauj, nej cav txog nws.

Txais: (1a) Nej hu ib zaj nkauj tshiab rau Huab Tais,
vim nws tau ua tej yam txaus qhuas.

Nej ntaus nkauj nog ncas cav txog Huab Tais,
nej ntaus nkauj nog ncas nrog tej zaj nkauj zoo mloog.
Nej tshuab hom ntxuag suab kub nyuj,
nej hu nkauj zoo siab ntawm peb tus Vaj,
Ntawm peb tus HUAB TAIS xub ntiag.

Txais: (1a) Nej hu ib zaj nkauj tshiab rau Huab Tais,
vim nws tau ua tej yam txaus qhuas.

As Les Lus yas: 2 TM 1: 10

Txais: As les lus yas, as les lus yas.

Peb tus Cawm Seej Yes Xus Pleev tau rhuav txoj kev tuag pov tseg,
thiab tau ua kom txoj sia ci tawm tuaj nyob hauv lub Moo Zoo.

Txais: As les lus yas, as les lus yas.

Ntawv Moo Zoo: MK 3: 22-30

22 Cov thoob xwm ntawv nqes pem Yes Lus Xas Les tuaj, lawv hais xog Yes Xus tias: "Nws raug dab Npes Ntxes Npus lawm,” thiab tseem hais tias: "Nws hu txog tus thawj dab los ntiab dab tawm."
23 Yes Xus hu lawv los ntawm nws, ces nws ua paj lug hais rau lawv tias: "Xas Tas yuav ua cas thiaj ntiab tau Xas Tas tawm?
24 Yog ib lub teb chaws rov ua kom nws sib tawg, mas lub teb chaws ntawd yuav nyob tsis ruaj.
25 Yog ib tse neeg rov ua kom nws sib tawg, mas tsev neeg ntawd yuav nyob tsis taus ua ib tse li.
26 Yog Xas Tas rov sawv tiv Xas Tas, mas nws yuav tawg tas yuav nyob tsis taus ntxiv, nws kawg yuav ploj mus xwb.
27 Tsis muaj leej twg nkag tau mus hauv tus neeg muaj zog lub tsev mus lwg nws lub cuab tam, yog tsis xub muab tus neeg muaj zog khi tso, ces nws mam mus lwg tus muaj zog lub tsev.
28 Kuv hais tseeb rau nej tias, Ntuj yuav zam txhua yam txhaum thiab txhua lo lus thuam Ntuj rau neeg.
29 Tab sis tus twg thuam Leej Ntuj Plig Ntshiab, mas Ntuj yuav tsis zam rau nws tas mus li ib txhis, vim nws tau ua ib qho txhaum nyob mus li."
30 Yes Xus hais li ntawd vim lawv hais tias: "Nws raug ib tug dab tsis huv."

Tim 24 lub 1 Hlis 2023

Hnub Peb Lis Piam Peb Nruab Xyoo A Nruab Lis Piam Xyoo I
Lectionary: 318

Yuav Hwm LN Francis de Sales, ua Tswv Qhia thiab Kws cov Txuj Ntshiab

Zaj Nyeem Ib: HES NPLAWS 10: 1-10

Cov kwv tij,
1 Vim Txoj Cai tsuas yog ib tug duab ntxoov ntxoo txog tej yam zoo uas yuav muaj tuaj yav pem suab xwb, tsis yog tus tseem duab ntawm tej yam zoo ntawd, mas Txoj Cai thiaj ua tsis tau kom cov neeg uas tuaj txi Ntuj tas mus li dawb huv tas nrho, txawm tias lawv niaj xyoo txi Ntuj raws nraim li qub li lawv ib txwm ua xyoo dhau xyoo los lawm.
2 Yog tias Txoj Cai ua tau kom neeg dawb huv, mas lawv yuav tsis tas txi Ntuj ntxiv lawm puas yog? Vim tias lawv txi ib zaug Ntuj ua kom lawv dawb huv lawm ces lawv lub siab yuav tsis pom ntxiv tias lawv muaj txhaum lawm.
3 Tiam sis niaj xyoo thaum lawv txi Ntuj mas tsuas ua kom lawv rov nco txog lawv cov txhaumthaum ntawd xwb.
4 Vim ntshav nyuj ntshav tshis tsis muaj hwj huam daws txhaum tau.
5 Vim li ntawd, thaum Leej Pleev los nyob ntiaj teb no, nws thiaj hais tias: “Cov thaj txi Ntuj thiab cov paj tshab, koj tsis xav yuav, koj thiaj npaj ib lub cev rau kuv.
6 Cov thaj hlawv tsiaj thiab cov thaj txi Ntuj them txim txhaum, koj tsis zoo siab txais.
7 Kuv thiaj hais tias: ‘Tswv Ntuj, cia kuv tuaj, vim tias qhov uas ntawv tau sau tseg yog sau hais txog kuv, cia kuv tuaj ua raws li koj nyiam.’ ”
8 Nws tau xub hais txog tias “Cov thaj txi Ntuj, cov paj tshab, cov thaj hlawv tsiaj, cov thaj txi Ntuj them txim txhaum, koj tsis xav yuav tsis zoo siab txais.” Tej ntawd yog tej yam lawv ua raws Txoj Cai qhia kom ua xwb.
9 Ces nws thiaj hais ntxiv tias: “Cia kuv tuaj ua raws li koj nyiam.” Li ntawd, nws rhuav thawj txoj cai thiab tsa ib txog cai tshiab los hloov.
10 Qhov uas Tswv Ntuj nyiam mas yog kom peb ntshiab tuaj thaum Yes Xus Pleev muab nws lub cev txi rau Ntuj, tsuas txi ib zaug xwb tau lawm.

NPN 40: 2+4ab, 7-8a, 10, 11

Txais: (8a+9a) Kuv nyob ntawm no HUAB TAIS, kuv tuaj ua raws li koj nyiam.

Kuv tau tos thiab tos ntsoov HUAB TAIS,
nws tau khoov qis qis tig los mloog kuv.
Nws tau muab ib zaj nkauj tshiab rau hauv kuv qhov ncauj,
yog ib zaj nkauj cav txog peb tus Tswv Ntuj.

Txais: (8a+9a) Kuv nyob ntawm no HUAB TAIS, kuv tuaj ua raws li koj nyiam.

Thaj txi ntuj thiab paj tshab koj tsis ntshaw,
tiam sis koj muab ob lub pob ntseg txawj mloog lus rau kuv.
Cov thaj hlawv tsiaj thiab cov thaj them txim txhaum, koj tsis xav tau,
kuv thiaj hais tias: “Cia kuv tuaj.”

Txais: (8a+9a) Kuv nyob ntawm no HUAB TAIS, kuv tuaj ua raws li koj nyiam.

Kuv tau tshaj koj txoj kev ncaj rau tsoom neeg coob tuaj sib txoos paub;
kuv tsis tau kaw qhov ncauj; HUAB TAIS, koj yeej paub.

Txais: (8a+9a) Kuv nyob ntawm no HUAB TAIS, kuv tuaj ua raws li koj nyiam.

Koj txoj kev ncaj kuv tsis tau muab zais cia rau nruab siab;
kuv tau hais txog koj txoj kev pheej xeeb thiab koj txoj kev cawm,
kuv tsis tau muab koj lub siab zoo thiab koj txoj kev tseeb zais cia,
kuv tau muab qhia rau pab neeg coob coob paub.

Txais: (8a+9a) Kuv nyob ntawm no HUAB TAIS, kuv tuaj ua raws li koj nyiam.

As Les Lus Yas: MT 11: 25

Txais: As les lus yas, as les lus yas. lleluia, alleluia.

Kuv cav txog koj, Leej Txiv, HUAB TAIS kav lub ntuj lub teb,
koj tau qhia tej yam tob txog lub Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: MK 3: 31-35

31 Yes Xus niam thiab nws cov kwv tij tuaj txog ntawm lub tsev, lawv nyob nraum zoov, lawv tso neeg mus hais rau Yes Xus paub thiab hu nws.
32 Muaj ib pab neeg zaum ncig Yes Xus, lawv hais rau nws tias: "Koj niam nrog koj cov kwv tij thiab cov muam tuaj nyob nraud, lawv nrhiav koj."
33 Yes Xus teb rau lawv tias: "Leej twg yog kuv niam thiab yog kuv kwv kuv tij ?"
34 Yes Xus ntsia ncig lees rau cov neeg zaum ncig nws, nws hais tias: "Kuv niam thiab kuv cov kwv tij yog cov no.
35 Vim tias leej twg ua raws li Tswv Ntuj lub siab, tus ntawd yog kuv kwv tij, kuv nkauj muam thiab kuv niam."