Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» COV ZAJ NYEEM NRUAB LIS PIAM XYOO I 2016-2017
by Mim Yesterday at 10:48 am

» Zaj Thov Ntuj hu ua "Memorare"
by Mim 15th August 2017, 11:34 am

» SAJ YES XUS KEV TXOM NYEM
by Mim 15th August 2017, 10:11 am

» COV ZAJ NYEEM HNUB CHIV XYOO A 2016-2017
by NrhiavTswvNtuj 3rd August 2017, 9:16 am

» XH. Yaj Zoov Ntxheb lub Tsev THOOB TSIB
by Maiv Tooj 3rd August 2017, 8:44 am

» XH.Zoov Ntxheb Yaj Nthuav Ntawv Ntshiab.
by Maiv Tooj 3rd August 2017, 8:26 am

» Saib duab txawv txawv
by Maiv Tooj 24th July 2017, 1:26 pm

» TP.Txhiaj Foom lub TSEV Ntawv
by Maiv Tooj 19th July 2017, 9:25 am

» Txiv Plig Neej Vaj
by Maiv Tooj 18th July 2017, 4:31 pm

» Xib Hwb Thoj Xyooj lub neej
by Maiv Tooj 3rd July 2017, 2:58 pm

» Sib pab txuag tswv ntuj pab yaj
by Maiv Tooj 3rd July 2017, 7:08 am

» MOO QAIJ QAUG
by Tub Kawm 2nd July 2017, 6:06 pm

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM XYOO I 2016-2017

    Share
    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 4:21 am

    TIM 18 LUB 5 HLIS 2017

    Hnub Tsib Lis Piam Tsib Caij Plaub Caug Xyoo A Nruab Lis Piam Xyoo I

    Hwm LN Zam I, ua Vaj Qhia xyoo 523 txog 526

    Zaj Nyeem Ib: HAUJ LWM 15: 7-21


    7 Lawv sib cav ntev loo, ces Pob Zeb sawv thiab hais rau lawv tias : "Kwv tij sawv daws, nej paub hais tias : thaum lub hauv paus los, Tswv Ntuj tau xaiv kuv nyob hauv nruab nrab nej, kom cov teev dab tau hnov lub Moo Zoo ntawm kuv lub ncauj, thiab kom lawv txais kev ntseeg. 8 Tswv Ntuj uas nws paub neeg lub siab, nws twb qhia peb tias nws nyiam cov neeg teev pej kum dab, nws twb pub Leej Ntuj Plig Ntshiab rau lawv ib yam li rau peb. 9 Nws tsis saib lawv thiab peb yog ib co neeg sib txawv, vim tias nws ntxuav lawv lub siab nyob hauv txoj kev ntseeg lawm. 10 Tim li cas nyem no nej thiaj li xav sim Tswv Ntuj. Tim li cas nej xav muab rab quab uas peb cov yawg koob thiab peb twb tsis muaj zog ris, mus nog rau cov thwj tim lub caj dab ? 11 Thiab peb kuj ntseeg tias yog Huab Tais Yes Xus lub txiaj ntsim xwb cawm peb ib yam li cawm lawv." 12 Ces sawv daws nyob ntsiag to. Lawv mloog Paj Lug thiab Npas Nas Npes nkawd piav txog cov hauj lwm muaj hwj huam uas Tswv Ntuj kom nkawd ua nyob hauv tsoom neeg teev pej kum dab. 13 Thaum nkawd hais lus tas, ces Yas Kos qhib ncauj hais tias : "Kwv tij, nej mloog kuv hais. 14 Xis Moos nyuam qhuav piav tias txij lub hauv paus los, Tswv Ntuj yeej xaiv tej tus nyob hauv cov neeg teev dab los ua ib haiv neeg hwm nws lub npe. 15 Qhov ntawd raug cov Yaj Saub cov lus, raws li Ntawv sau cia tias : 16 ' Thaum ntawd, kuv yuav rov qab los, kuv yuav rov tsa Das Vis lub tsev tsam phooj uas vau lawm, tej vaj tse uas pob tas lawm, kuv yuav rov kho, kuv yuav rov txhim kom sawv ntseg ; 17 kom lwm cov neeg nrhiav Huab Tais, thiab kom tas ib tsoom haiv neeg uas kuv npaj lawv cia hwm kuv lub npe nrhiav kuv. 18 Yog tus Huab Tais uas tau qhia tej yam ntawd tau ntau txheej ntau tiam los lawm cov lus. 19 Vim li no, mas kuv thiaj pom zoo tias : kom tsis txhob ua ntxhov rau cov neeg teev dab uas tig los ntseeg Tswv Ntuj. 20 Peb tsuas qhia lawv kom caiv cov nqaij txi dab, caiv kev ua txij nkawm tsis raug cai, caiv cov nqaij pos tuag, thiab caiv ntshav xwb. 21 Vim tias txij puag txheej thaud los, yeej muaj neeg tshaj txog Mais Xes nyob tas txhia lub nroog thiab nyeem nws tej lus niaj hnub xas npas tos nyob hauv cov Tsev Txoos."

    NPN 96: 1-2A, 2B-3, 10


    Txais: (3) Nej tshaj tswv Ntuj cov hauj lwm loj rau txhua haiv neeg paub.
    Los: As les lus yas.

    Nej hu ib zaj nkauj tshiab rau HUAB TAIS,
    tas ntiaj teb neeg nej hu nkauj rau HUAB TAIS.
    Nej hu nkauj rau HUAB TAIS, nej cav txog nws lub npe.

    Txais: (3) Nej tshaj tswv Ntuj cov hauj lwm loj rau txhua haiv neeg paub.
    Los: As les lus yas.

    Hnub dhau hnub nej tshaj txog nws txoj kev cawm neeg.
    Nej cav txog nws lub koob meej rau cov neeg tsis paub Ntuj,
    cav txog nws cov hauj lwm loj rau txhua haiv neeg.

    Txais: (3) Nej tshaj tswv Ntuj cov hauj lwm loj rau txhua haiv neeg paub.
    Los: As les lus yas.

    Nej hais rau cov naiv neeg tias: HUAB TAIS ua vaj.
    Nws tau tsim lub ntiaj teb kom nyob ruaj, muab tshem tsis tau,
    nws tswj cov haiv neeg raws txoj kev ncaj.

    Txais: (3) Nej tshaj tswv Ntuj cov hauj lwm loj rau txhua haiv neeg paub.
    Los: As les lus yas.

    As Les Lus Yas: ZAM 10: 27

    Txais: As les lus yas, as les lus yas.

    Huab Tais hais tias, kuv cov yaj mloog kuv lub suab;
    kuv paub lawv thiab lawv raws kuv qab mus.

    Txais: As les lus yas, as les lus yas.

    Ntawv Moo Zoo: ZAM 15: 9-11

    Yes Xus hais rau nws cov thwj tim tias:
    9 “Kuv nyiam nej ib yam li Leej Txiv nyiam kuv. Nej nyob ruaj hauv kuv txoj kev nyiam mog.
    10 Yog nej coj kuv cov lus qhia, mas nej yuav nyob ruaj hauv kuv txoj kev nyiam, ib yam li kuv coj kuv Txiv cov lus qhia thiab kuv nyob ruaj hauv nws txoj kev nyiam.
    11 Kuv hais tej no rau nej kom kuv txoj kev kaj siab nyob hauv nej thiab nej thiaj muaj kev kaj siab puv npo.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 4:24 am

    TIM 19 LUB 5 HLIS 2017

    Hnub Rau Lis Piam Tsib Caij Hla Xyoo A Nruab Lis Piam Xyoo I

    Zaj Nyeem Ib: HAUJ LWM 15: 22-31


    22 Ces cov Hauv Paus Xa Lus thiab cov txwj laus nrog lub Koom Txoos hais sib haum. Lawv txiav tias yuav xaiv lawv ob peb leeg thiab xa lawv nrog Paj Lug thiab Npas Nas Npes nkawd mus As Nthias Kias. Lawv xaiv Yus Das uas tseem hu ua Npas Xas Npas thiab Xis Las, nkawd yog ob tug ua cov coj nyob hauv cov kwv tij. 23 Cov Hauv Paus Xa Lus muab tsab ntawv li no rau nkawd nqa mus : "Cov Hauv Paus Xa Lus thiab cov txwj laus, uas yog nej cov kwv tij, xa lus tuaj rau cov kwv tij uas yog pej kum neeg los txais kev ntseeg, nyob As Nthias Kias, nyob Xis Lias teb, thiab nyob Xis Lis Xias teb. Noj qab nyob zoo rau nej sawv daws. 24 Peb tau hnov tias muaj ib co neeg tuaj ntawm peb tuaj , tiam sis tsis yog peb xa lawv tuaj. Lawv tuaj hais ib co lus ua kom nej ntxhov siab thiab ua kom nej lub tswv yim tws kev. 25 Peb thiaj ua ke txiav tias cia peb xaiv ob tug sawv peb chaw tuaj cuag nej nrog ob tug kwv tij Npas Nas Npes thiab Paj Lug nkawd, 26 uas yog ob tug neeg zoo siab siv nkawd txoj sia los tsob hwb peb tus Huab Tais Yes Xus Pleev lub Npe. 27 Ua li mas peb tso Yus Das thiab Xis Las nkawd tuaj, kom nkawd hais kiag cov lus uas peb xa tuaj, rau nej. 28 Leej Ntuj Plig Ntshiab thiab peb tau txiav tias yuav tsis yuam ib lub nra ntxiv rau nej ris, tsuas kom nej coj tej yam tseem ceeb raws li no xwb : 29 caiv cov nqaij txi dab, caiv ntshav, caiv cov nqaij tsiaj nyem caj dab tuag, caiv kev sib yuav tsis raws txoj cai. Tej no yog tej nej yuav tsum caiv thiaj li zoo. Nej nyob kaj lug." 30 Nkawd thiaj tau sawv kev mus, lawv nqes mus rau As Nthias Kias. Thaum mus txog, lawv hu sawv daws tuaj, ces nkawd muab tsab ntawv rau lub txoos. 31 Lub txoos nyeem tsab ntawv ces lawv zoo siab tias cov lus nyob hauv txhawb lawv ntau

    NPN 57: 8-9, 10 - 12

    Txais: (10a) Kuv yuav nrog tsoom haiv neeg cav txog koj, Huab Tais.
    los: As les lus yas.

    Kuv lub siab nyob ruaj nreb, Tswv Ntuj, kuv lub siab nyob ruaj nreb.
    Kuv yuav hu nkauj, yuav hu ib zaj cav txog koj.
    Kuv tus ntsuj plig, koj tsim dheev los;
    nkauj nog ncas thiab thaj cheej, nej cia li tsim dheev!
    Kuv yuav tsa kom lub hnub sawv tawm tuaj.

    Txais: (10a) Kuv yuav nrog tsoom haiv neeg cav txog koj, Huab Tais.
    los: As les lus yas.

    Kuv yuav nrog tsoom haiv neeg cav txog koj, Huab Tais,
    kuv yuav nrog tsoom kuj cuab ku nkauj qhuas txog koj.
    Vim koj txoj kev hlub loj siab npaum lub ntuj,
    thiab koj txoj kev ua ncaj loj siab npaum cov huab.
    Tswv Ntuj, ua kom koj nto koob meej nyob txheej ntuj saud,
    thiab kom koj lub hwj chim ci tuaj rau saum tas lub ntiaj teb!

    Txais: (10a) Kuv yuav nrog tsoom haiv neeg cav txog koj, Huab Tais.
    los: As les lus yas.

    As Les Lus Yas: ZAM 15: 15b

    Txais: As les lus yas, as les lus yas.

    Huab Tais hais tias, kuv hu nej ua kuv cov phooj ywg,
    vim kuv tau qhia rau nej paub tas puas tsav yam uas leej Txiv hais rau kuv lawm.

    Txais: As les lus yas, as les lus yas.

    Ntawv Moo Zoo: ZAM 15: 12-17


    Yes Xus hais rau nws cov thwj tim tias:
    12 Kuv lo lus qhia yog lo lus no : nej sis nyiam sis hlub zoo li kuv tau nyiam tau hlub nej. 13 Tsis muaj leej twg muaj txoj kev nyiam loj dua tus uas siv nws txoj sia rau nws cov phooj ywg. 14 Yog nej ua qhov kuv qhia nej, mas nej yog kuv cov phooj ywg. 15 Kuv tsis hu nej ua kuv cov tub txib, vim tus tub txib tsis paub qhov uas tus tswv ua. Tab sis kuv hu nej ua phooj ywg, vim tas ib puas tsav yam kuv hnov ntawm kuv Txiv, mas kuv qhia nej paub tas huv si. 16 Tsis yog nej xaiv kuv, yog kuv xaiv nej. Thiab yog kuv xa nej mus kom nej txi txiv, kom nej cov txiv nyob ruaj, kom xwv nej tuav txog kuv lub npe thov yam twg ntawm Leej Txiv, mas nws muab rau nej. 17 Lo lus qhia uas kuv muab rau nej yog kom nej sis nyiam sis hlub."

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 4:27 am

    TIM 20 LUB 5 HLIS 2017

    Hnub Xya Lis Piam Tsib Caij Hla Xyoo A Nruab Lis Piam Xyoo I

    Hwm LN Bernadine nyob Siena

    Zaj Nyeem Ib: HAUJ LWM 16: 1-10


    1 Paj Lug thiaj mus txog Des Npes thiab Lis Ros. Nyob ntawd muaj ib tug thwj tim hu ua Tis Mos Tes. Nws niam yog ib tug poj niam Yus Das txais kev ntseeg. Nws txiv yog ib tug Hes Las. 2 Cov kwv tij nyob Lis Ros thiab nyob Is Kos Nias, sawv daws zeem tseeb tias Tis Mos Tes yog neeg zoo. 3 Paj Lug xav kom Tis Mos Tes nrog nws mus tshaj Ntuj lus. Ces Paj Lug coj Tis Mos Tes mus ua lub cim txiav, vim muaj ib co Yus Das coob nyob tsis deb tsis ze, thiab sawv daws paub tias nws txiv yog neeg Hes Las. 4 Nkawd hla lub nroog twg, mas nkawd tshaj txoj cai uas cov Hauv Paus Xa Lus thiab cov txwj laus nyob Yes Lus Xas Les tau tsa rau cov Ntseeg. 5 Ua li mas cov Koom Txoos khov zuj zus nyob hauv txoj kev ntseeg, thiab niaj hnub huam vam coob ntxiv tuaj. 6 Paj Lug nkawd mus rau lub teb chaws Fis Zias thiab xeev ntuj Nkas Las Tias, vim Leej Ntuj Plig tsis kheev nkawd tshaj ntuj Lo Lus nyob As Xias teb. 7 Thaum nkawd tuaj txog ntawm Mis Xias ciam teb, nkawd xav mus rau Npis Tis Nias teb, tab sis Yes Xus Leej Tswv Yim tsis kheev. 8 Ces nkawd hla Mis Xias teb nqes mus rau nram lub tsheej Thuas. 9 Ces thaum hmo ntuj, Paj Lug yees pom ib tug Mas Xes Dos Nias sawv ntsug ntawm nws xub ntiag thov nws tias : "Koj hla tuaj rau Mas Xes Dos Nias teb, tuaj pab peb !" 10 Paj Lug pom li ntawd tas nrho, ces peb nrhiav kev mus Mas Xes Dos Nias teb tam sim ntawd, vim peb paub tseeb tias Tswv Ntuj hu peb mus tshaj Ntuj lus rau lub teb chaws ntawd.

    NPN 100: 1B-2, 3, 5

    Txais: Kom tas lub ntiaj teb qw zoo siab rau Tswv Ntuj.
    los: As les lus yas.

    Tas lub ntiaj teb, nej hu nkauj rau HUAB TAIS !
    Nej xyiv fab hlo luag ntxhi tsob hwb HUAB TAIS ;
    nej hu nkauj zoo siab chaws los ntawm nws xub ntiag !


    Txais: Kom tas lub ntiaj teb qw zoo siab rau Tswv Ntuj.
    los: As les lus yas.

    Nej cia li lees tias HUAB TAIS yog Tswv Ntuj.
    Nws tsim peb los, peb yog nws tug,
    peb yog nws haiv neeg, yog pab yaj nws saib.

    Txais: Kom tas lub ntiaj teb qw zoo siab rau Tswv Ntuj.
    los: As les lus yas.

    HUAB TAIS muaj lub siab zoo :
    nws hlub peb mus li,
    nws ua ncaj rau peb txheej dhau txheej.

    Txais: Kom tas lub ntiaj teb qw zoo siab rau Tswv Ntuj.
    los: As les lus yas.

    As Les Lus Yas: KOS LOS XAIS 3: 1

    Txais: As les lus yas, as les lus yas.

    Yog nej twb tau nrog Leej Pleev sawv rov los lawm,
    mas nej cia li nrhiav tej yam nyob txheej saud, uas yog qhov chaw Leej Pleev nyob,
    zaum rawv ntawm Tswv Ntuj phab xis.

    Txais: As les lus yas, as les lus yas.

    Ntawv moo Zoo: Zam 15: 18-21


    Yes Xus hais rau nws cov thwj tim tias:
    18 "Yog lub qab ntuj neeg ntxub nej, mas nej yuav paub tias lawv twb ntxub kuv ua ntej lawm.
    19 Yog nej yog lub qab ntuj neeg tug, mas qab ntuj neeg yuav nyiam yam uas yog nws tug. Tab sis vim nej tsis yog qab ntuj neeg tug, rau qhov kuv tau xaiv nej thau nej hauv lub qab ntuj neeg los mas lub qab ntuj neeg ntxub nej.
    20 Nej nco ntsoov lo lus uas kuv tau hais rau nej tias : ‘Tus tub txib tsis loj dua nws tus tswv.’ Yog lawv twb hiam kuv, mas lawv kuj yuav hiam nej thiab. Yog lawv khaws kuv lo lus, mas lawv kuj yuav khaws nej lo lus thiab.
    21 Tiam sis lawv yuav ua tas puas tsav yam ntawd rau nej vim kuv lub npe, rau qhov lawv tsis paub Tus xa kuv tuaj.”


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 5:09 am

    TIM 22 LUB 5 HLIS 2017

    Hnub Ob Lis Piam Rau Caij Hla Xyoo A Nruab Lis Piam Xyoo I

    Hwm LN Rita nyob Cascia, Is Tas Lis teb

    Zaj Nyeem Ib: HAUJ LWM 16: 11-15


    11 Peb caij nkoj nyob Thuas ncaj qha mus rau Xas Mos Thas. Hnub tom qab peb mus rau Nias Pos Lis. 12 Txog ntawd, peb mus ntxiv rau Fis Lis Pos uas yog thawj lub tsheej nyob hauv lub cheeb Mas Xes Dos Nias, uas yog ib lub xeev cov Los Mas kav. Peb nyob ob peb hnub hauv lub nroog ntawd. 13 Txog hnub xav npas tos, peb tawm mus rau sab rooj vag nraud, nyob ntawm ib tug ntug dej, uas yog ib qho chaw neeg tuaj teev ntuj kam. Peb zaum, thiab peb hais lus rau cov poj niam tuaj sib sau nyob ntawd. 14 Hauv pab poj niam ntawd muaj ib tug hu ua Lis Dias, nws mloog peb hais. Nws yog ib tug muag tshuaj zas ntaub liab tsam xem nyob hauv lub tsheej Thias Tis Las. Nws teev Tswv Ntuj. Huab Tais qhib nws lub siab kom nws txais Paj Lug cov lus. 15 Thaum Lis Dias thiab nws tsev neeg txais lub cim ntxuav tas, nws thov peb li no: "Yog nej saib kuv yog ib tug neeg ntseeg txog Huab Tais zoo, mas thov nej chaws los nyob hauv kuv tsev." Ces nws kom peb mus so hauv nws tsev.

    NPN 149: 1b-2, 3-4, 5-6A+9B


    Txais: (4a) Huab Tais zoo siab nyob hauv nws haiv neeg.
    los: As les lus yas

    Nej hu ib zaj nkauj tshiab rau HUAB TAIS,
    nej cav txog nws nyob hauv tsoom ntseeg lub txoos.
    His Xas Lais yuav zoo siab nyob hauv tus uas tsim lawv,
    Xis Yoos cov me nyuam yuav luag ntxhi nyob hauv lawv tus vaj.

    Txais: (4a) Huab Tais zoo siab nyob hauv nws haiv neeg.
    los: As les lus yas

    Lawv yuav ua kev lom zem yoj cev cav txog nws lub npe,
    lawv yauv hu nkauj cav txog nws nrog suab nruas thiab suab nkauj nog ncas.
    Vim HUAB TAIS hlub nws haiv neeg,
    thiab nws muab txoj kev yeej ua zam npua cov neeg me.

    Txais: (4a) Huab Tais zoo siab nyob hauv nws haiv neeg.
    los: As les lus yas

    Cov muaj lub siab ntseeg hom khaj nyob hauv txoj kev nto koob meej;
    lawv yuav hu nkauj zoo siab hauv lawv tej chaw nyob;
    lawv lub qa tsuas muaj qw suab cav txog Tswv Ntuj.
    Cov uas ntseeg nws lawv lub koob meej yog li no. As les lus yas.

    Txais: (4a) Huab Tais zoo siab nyob hauv nws haiv neeg.
    los: As les lus yas

    As Les Lus Yas: ZAM 15: 26B, 27A

    Txais: As les lus yas, as les lus yas.

    Huab Tais hais tias, leej Tswv Yim muaj qhov tseeb yuav ua tim khawv txog,
    thiab nej kuj yuav ua kuv tim khawv ib yam.

    Txais: As les lus yas, as les lus yas.

    Ntawv Moo Zoo: ZAM 15: 26—16:4A


    Yes Xus hais rau nws cov thwj tim tias:
    26 Leej Nplij Neeg yuav tuaj. Nws yog tus uas kuv yuav xa ntawm Leej Txiv tuaj rau nej. Nws yog Leej Ntuj Plig qhia qhov tseeb uas tawm hauv Leej Txiv los, nws yuav ua tim khawv txog kuv. 27 Nej kuj ua tim khawv thiab, vim nej nrog kuv txij lub hauv paus los.
    16 1 "Kuv hais tej no rau nej kom nej txhob dawm ko taw. 2 Luag yuav ntiab nej tawm hauv cov tsev txoos. Luag haj tseem yuav ua phem tshaj, vim txog lub sij hawm uas tus muab nej tua, nws yuav xav tias nws ua ib qho los hawm Tswv Ntuj. 3 Lawv yuav ua li ntawd vim lawv tsis paub Leej Txiv thiab tsis paub kuv. 4 Kuv hais tej no rau nej, kom thaum txog lub sij hawm ntawd, nej nco ntsoov tias kuv twb xub qhia nej lawm.

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 5:14 am

    TIM 23 LUB 5 HLIS 2017

    Hnub Peb Lis Piam Rau Caij Hla Xyoo A Nruab Lis Piam Xyoo I

    Zaj Nyeem Ib: HAUJ LWM 16: 22-34


    22 Tas tsoom sid nyob Fis Lis Pos qw ntsuag qees cem Paj Lug thiab Xis Las nkawd. Ces cov nom txiav txim kom luag muab nkawd tej khaub ncaws hle, thiab muab pas nplawm nkawd. 23 Lawv muab nkawd nplawm sab kawg, ces lawv mam muab nkawd pov rau hauv tsev loj faj. Lawv ceeb toom rau tus zov tsev loj faj tseev kom zov nkawd zoo zoo. 24 Tus zov tsev loj faj hnov cov nom tswv hais li ntawd, mas nws coj nkawd mus kaw hauv lub qhov taub uas nyob hauv nruab nrog tsev loj faj, thiab tseem xuas saw hlau khi nkawd ko taw tib si rau tej tus ncej. 25 Thaum ib tag hmo, Paj Lug thiab Xis Las nkawd teev ntuj, nkawd hu nkauj cav txog Tswv Ntuj. Cov neeg nyob txim mloog nkawd. 26 Ib sij huam, lub tsev loj faj qeeg heev, cov phab ntsa ua zog tas. Tas cov qhov rooj cia li qhib plho tam sim ntawd, hos cov saw khi cov neeg raug txim plam tas huv tib si. 27 Tus zov tsev loj faj tsim dheev los, nws pom cov qhov rooj qhib lug, ces nws rho hlo nws rab ntaj, nws yuav rov tua nws, vim nws xav tias cov neeg raug txim twb khiav tas lawm. 28 Tab sis Paj Lug qw ib suab nrov nrov tias : "Koj txhob tua koj. Peb sawv daws tseem nyob ntawm no huv tib si." 29 Tus zov tsev loj faj thiaj kom luag taws tsau, ces nws chaws nrawm nroos los hauv, nws los txhos caug tshee na ntawm Paj Lug thiab Xis Las nkawd ko taw, 30 nws coj nkawd tawm sab nraud, nws hais rau nkawd tias : "Ob tug hlob, kuv yuav ua li cas Ntuj thiaj yuav cawm kuv ?" 31 Nkawd teb tias : "Koj ntseeg txog Huab Tais Yes Xus, ces Ntuj yuav cawm koj thiab koj tsev neeg." 32 Nkawd qhia Huab Tais Lo Lus rau nws, thiab rau cov neeg hauv nws tsev tas huv tib si. 33 Tus zov tsev loj faj coj nkawd los hauv nws tsev, thaum ntawd twb yog ib tag hmo lawm. Nws ntxuav nkawd cov qhov txhab. Ces nws thiab tas nws tsev neeg huv si txais lub cim ntxuav tam sim ntawd. 34 Nws coj nkawd nce mus saum nws tsev, nws rau mov rau sawv daws noj. Nws thiab tas nws tsev neeg huv si zoo siab, vim lawv ntseeg txog Tswv Ntuj lawm.

    NPN 138: 1-2AB, 2CDE-3, 7C-8

    Txais: (7c) Huab Tais, koj sab tes xis cawm kuv.
    Los: As les lus yas.

    Kuv yuav ua koj tsaug, HUAB TAIS, tas kuv lub siab ntsws,
    vim koj tau hnov kuv lub ncauj cov lus thov;
    kuv yuav hu nkauj cav txog koj nyob ntawm cov tshiab xub ntiag;
    kuv yuav tuaj pe hawm koj nyob hauv koj lub tuam tsev ntshiab
    thiab yuav ua tsaug rau koj lub npe.

    Txais: (7c) Huab Tais, koj sab tes xis cawm kuv.
    Los: As les lus yas.

    Vim koj lub siab zoo thiab koj txoj kev tseeb,
    vim koj tau muab koj lub npe thiab koj txoj kev cog lus
    ua qhov loj tshaj tas txhua yam,
    thaum kuv hu, koj teb kuv,
    koj ntxiv zog rau kuv kom kuv lub zog loj tuaj.

    Txais: (7c) Huab Tais, koj sab tes xis cawm kuv.
    Los: As les lus yas.

    Koj txhais tes xis cawm kuv.
    HUAB TAIS yuav ua kom tiav tej yam nws npaj ua rau kuv. ;
    HUAB TAIS, koj lub siab zoo nyob mus li;
    thov koj txhob muab yam koj txhais tes tau tsim los tso tseg.

    Txais: (7c) Huab Tais, koj sab tes xis cawm kuv.
    Los: As les lus yas.

    As Les Lus Yas: ZAM 16: 7, 13

    Txais: As les lus yas, as les lus yas.

    Huab Tais hais tias, kuv yuav xa Leej Tswv yim qhia qhov tseeb tuaj rau nej,
    nws yuav coj nej mus txog yam uas yog tseem qhov tseeb.

    Txais: As les lus yas, as les lus yas.

    Ntawv Moo Zoo: ZAM 16: 5-11

    Yes Xus hais rau nws cov thwj tim tias:
    5 "Nyem no kuv yuav mus cuag Tus Xa kuv tuaj. Nej tsis muaj leej twg nug kuv txog tias: ‘Koj yuav mus qhov twg?’ 6 Ziag no, nej tu siab tas, vim kuv hais tej no rau nej. 7 Tab sis kuv hais qhov tseeb rau nej tias: Cia kuv mus mas yuav zoo dua rau nej. Yog kuv tsis mus, mas Leej Nplij Neeg yuav tsis tuaj rau hauv nej. Hos yog kuv mus, mas kuv yuav xa Leej Nplij Neeg tuaj rau nej. 8 Thaum Leej Nplij Neeg tuaj txog, nws yuav txiav txim kom qab ntuj neeg paub tseeb txog kev txhaum, txog kev ncaj, thiab txog kev raug txim. 9 Kev txhaum, vim lawv tsis ntseeg txog kuv, 10 kev ncaj, vim kuv mus cuag Leej Txiv, ces nej yuav tsis pom kuv ntxiv, 11 kev raug txim, vim tus tswj lub qab ntuj neeg twb raug txim lawm. “

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 5:17 am

    TIM 24 LUB 5 HLIS 2017

    Hnub Plaub Lis Piam Rau Caij Hla Xyoo A Nruab Lis Piam Xyoo I

    Zaj Nyeem Ib: HAUJ LWM 17: 15, 22—18:1


    15 Cov neeg uas xa Paj Lug, xa nws mus txog ntua As Thes Nas, ces lawv rov qab. Lawv coj Paj Lug cov lus rov los rau Xis Las thiab Tis Mos Tes kom nkawd mus caum Paj Lug sai sai.
    22 Ces Paj Lug mus sawv ntsug ntawm pab txwj laus tuav tswv yim As Les Os Pas Nkus, nws hais tias : "Cov neeg As Thes Nas, raws li kuv pom mas nej yog ib co neeg teev dab zoo kawg nkaus. 23 Kuv mus yos hauv nej lub tsheej thiab mus xyuas nej cov tsev teev dab, mas kuv pom muaj ib lub thaj txi dab uas sau ib co npe ntawv tias : ‘Rau tus dab peb tsis paub.’ Mas tus uas nej hwm, tab sis nej tsis paub, kuv tuaj tshaj txog nws rau nej paub. 24 Tus Tswv Ntuj tsim lub sim ceeb thiab tsim tas puas tsav yam nyob hauv lub sim ceeb, yog tus Huab Tais kav lub ntuj lub teb, nws tsis nyob hauv cov tsev teev dab uas yog neeg ob txhais tes txhim. 25 Nws kuj tsis tas yuav neeg ob txhais tes los tsob hwb nws, xws li ib tug uas ntshaw yam ub yam no. Vim nws twb yog tus pub txoj sia txoj pa thiab txhua yam rau sawv daws. 26 Tos Tswv Ntuj tsim neeg tawm ntawm ib lub hauv paus los nyob puv ntiaj teb, thiab teem caij teem chaw rau neeg nyob , 27 los yog vim nws xav kom neeg nrhiav Tswv Ntuj, tej zaum lawv yuav tsum maj mam maub nrhiav thiaj mam ntsib nws, txawm tias nws yeej nyob tsis deb ntawm peb ib tug twg li. 28 Vim peb yeej ‘nyob hauv Tswv Ntuj, peb thiaj muaj txoj sia, txawj nti, thiab ciaj taus.’ Nej twb muaj ib co neeg txawj sau lus paj huam tseg tias : ‘Peb kuj yog nws caj ces.’ 29 Li ntawd, peb yog Tswv Ntuj caj ces, mas peb yuav tsis txhob xav tias Tswv Ntuj yog zoo li ib tug mlom kub, mlom nyiaj, los mlom pob zeb uas neeg lub tswv yim thiab txhais tes puab tau. 30 Tswv Ntuj tau ua siab ntev nyiaj lub caij uas neeg tsis paub nws los, tiam sis nyem no, Tswv Ntuj xav kom ib zeej tsoom nyob tas qhov txhia chaw sawv daws yuav tsum los thov txhaum. 31 Vim Tswv Ntuj tau teem ib hnub cia txiav txim rau lub qab ntuj neeg raws li txoj kev ncaj thiab nws twb xaiv tau tus yuav txiav txim ntawd lawm. Nws kuj tau tsa tus txiav txim ntawd sawv hauv cov tub tuag rov los, kom sawv daws paub tias muaj tseeb tiag." 32 Thaum Paj Lug hais txog kev sawv hauv cov tub tuag rov los, mas ib txhia thuam Paj Lug, ib txhia hais rau Paj Lug tias : "Lwm zaus tso, peb mam rov mloog koj hais txog qhov ntawd dua." 33 Ces Paj Lug tso lawv tseg li ntawd. 34 Tsis kav, kuj muaj tus puav raws Paj Lug thiab txais kev ntseeg. Cov txais kev ntseeg muaj ib tug yog Des Nis Xyus, uas nws yog ib tug kev txwj laus As Les Os Pas Nkus; kuj muaj ib tug poj niam hu ua Das Mas Lis thiab ob peb leeg ntxiv .
    18 1 Ua li ntawd tas, ces Paj Lug tawm hauv As Thes Nas. Nws mus txog Kos Lis Nthos.

    NPN 148: 1-2, 11-12, 13, 14

    Txais: Lub ntuj thiab lub ntiaj teb puv nkaus koj lub hwj chim.
    los: As les lus yas.

    Nej nyob saum ntuj cav txog Huab Tais,
    nej nyob saum tej chaw siab cav txog nws.
    Nws cov tshiab, nej cav txog nws,
    nws cov peeb zeej, nej cav txog nws.

    Txais: Lub ntuj thiab lub ntiaj teb puv nkaus koj lub hwj chim.
    los: As les lus yas.

    Kom tas cov vaj ntxwv nyob ntiaj teb thiab tas txhua haiv neeg,
    tas cov tub nom tub tsw thiab cov nom txiav txim nyob ntiaj teb,
    cov tub nraug hluas thiab ntxhais nkauj xwb,
    cov laus thiab cov me nyuam yaus,

    Txais: Lub ntuj thiab lub ntiaj teb puv nkaus koj lub hwj chim.
    los: As les lus yas.

    Kom lawv cia li cav txog Huab Tais lub npe ,
    vim nws tib lub npe thiaj loj siab dua cov;
    nws lub hwj xyeej nyob siab tshaj lub ntiaj teb thiab lub ntuj.

    Txais: Lub ntuj thiab lub ntiaj teb puv nkaus koj lub hwj chim.
    los: As les lus yas.

    Nws tsa nws haiv neeg lub peev xwm kom siab :
    Vim li no kom cov ntseeg nws, uas yog cov tub ki His Xas Lais
    uas yog haiv neeg nyob ze nws, sawv daws yuav tsum cav txog nws.

    Txais: Lub ntuj thiab lub ntiaj teb puv nkaus koj lub hwj chim.
    los: As les lus yas.

    As Les Lus Yas: ZAM 14: 16

    Txais: As les lus yas, as les lus yas.

    Kuv yuav thov Leej Txiv,
    ces nws yuav xa dua ib Tug Pab
    los nrog nej nyob mus li.

    Txais: As les lus yas, as les lus yas.

    Ntawv Moo Zoo: ZAM 16: 12-15

    Yes Xus hais rau nws cov thwj tim tias:
    “12 Kuv tseem tshuav ntau yam yuav hais rau nej, tab sis nyem no nej ris tsis taus. 13 Thaum Leej Tswv Yim qhia qhov tseeb tuaj txog, nws yuav coj nej mus rau qhov tseeb tas huv si. Vim nws yuav tsis hais nws cov lus, nws yuav hais qhov nws hnov, thiab nws yuav xub qhia nej txog tej xwm uas yuav tshwm sim tuaj. 14 Nws yuav ua kom kuv muaj koob meej, vim nws yuav coj yam uas yog kuv tug tuaj qhia rau nej. 15 Tas ib puas tsav yam uas yog Leej Txiv tug, mas kuj yog kuv tug huv tib si. Vim li ntawd kuv thiaj hais rau nej tias : Leej Tswv Yim yuav coj yam uas yog kuv tug tuaj qhia rau nej. “

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 5:27 am

    TIM 25 LUB 5 HLIS 2017

    HNUB TSIB LIS PIAM RAU CAIJ HLA XYOO A Nruab Lis Piam Xyoo I


    Hnub Tsib no kev cai yog ua hmoov nco txog Yes Xus nce mus saum ntuj, tiam sis nyob ntau qhov chaw lub Koom Txoos muab Hnub Yes Xus nce mus saum ntuj pauv mus rau Hnub Chiv tom ntej lawm. Yog li ntawd kuv thiaj tso ob co zaj nyeem tib si rau hnub no. Yog nej lub teb chaws los nej qhov chaw ua hmoov nco txog Yes Xus mus saum ntuj rau hnub no, ces nej mus xaiv cov zaj nyeem hais txog Yes Xus mus saum ntuj, yog nej teb chaws los qhov chaw tsis ua hmoov Yes Xus mus saum ntuj hnub no, ces nej mus xaiv cov zaj nyeem rau Hnub Tsib Lis Piam Rau Caij Hla.



    NCO TXOG YES XUS NCE MUS SAUM NTUJ


    Zaj Nyeem Ib: HAUJ LWM 1: 1-11

    1 Tes Os Fis Los, nyob hauv kuv thawj phau ntawv, kuv twb sau txog tas ib puas tsav yam uas Yes Xus tau ua thiab tau qhia txij lub hauv paus los,
    2 mus txog hnub uas Leej Ntuj Plig Ntshiab tau tshoj kom nws hais nws cov lus kawg rau cov Hauv Paus Xa Lus uas nws tau xaiv, ces nws raug nqa mus saum ntuj lawm.
    3 Lawv yog cov uas, muaj ntau yam zeem tseeb tias thaum nws raug luag tsim txom tas, nws yees tawm los muaj txoj sia rau lawv pom; nws tawm los rau lawv pom tau plaub caug hnub, nws tham txog Tswv Ntuj lub Ceeb Tsheej rau lawv.
    4 Muaj ib zaug thaum lawv noj mov, nws hais rau lawv kom tsis txhob tawm hauv Yes Lus Xas Les mus, kom nyob tos qhov uas Leej Txiv tau cog lus yuav xa tuaj. Nws hais tias: "Yog lo lus no uas nej tau hnov ntawm kuv lub ncauj:
    5 Zam ua kab ke ntxuav nyob hauv dej, hos nej, mas tshuav hnub puav ntxiv xwb, nej yuav txais kab ke ntxuav nyob hauv Leej Ntuj Plig Ntshiab."
    6 Thaum cov Hauv Paus Xa Lus nyob ua ke, lawv nug Yes Xus tias : "Huab Tais, nyem no puas yog lub sij hawm koj yuav rov tsa tus vaj His Xas Lais ?"
    7 Yes Xus hais rau lawv tias : "Tsis yog nej hauj lwm yuav paub txog lub zim txwv thiab lub sij hawm uas Leej Txiv siv nws lub hwj huam los teem cia.
    8 Tab sis nej, mas nej yuav txais ib lub peev xwm, uas yog Leej Tswv Yim Ntshiab yuav nqes los rau saum nej. Ces nej yuav ua kuv cov tim khawv nyob Yes Lus Xas Les, nyob thoob lub xeev Yus Das thiab Xas Mas Lias, mus txog puag tim npoo ntiaj teb."
    9 Nws hais cov lus no tas xwb, ces nws nce siab zuj zus ntawm lawv qhov muag mus lawm; muaj ib tw huab los thaiv ces lawv tsis pom nws ntxiv.
    10 Thaum Yes Xus nce mus lawm, lawv tseem nyob hab nuv ntawd ntsia ntsoov saum ntuj, ces cia li muaj ob tug neeg hnav dawb los sawv ntawm lawv.
    11 Nkawd hais tias : "Cov meeg Nkas Lis Lais, vim li cas nej sawv ntsug ntsia ntsoov saum ntuj zoo li no ? Tus Yes Xus uas raug nqa ntawm nej mus rau saum ntuj lawd, nws yuav rov los zoo nkaus li nej pom nws nce mus saum ntuj thiab."

    NPN 47: 2-3, 6-7, 8-9

    Txais: (6) Tswv Ntuj nce saum nws lub theej kiab,
    muaj suab qw zoo siab, muaj suab hom nrov rau Huab Tais.
    Los: As les lus yas.

    Txhua haiv neeg, nej npuaj teg,
    nej qw suab zoo siab rau Tswv Ntuj,
    vim HUAB TAIS tus nyob siab, tus zoo tshaj,
    yos tus vaj loj kav tas nrho lub ntiaj teb.

    Txais: (6) Tswv Ntuj nce saum nws lub theej kiab,
    muaj suab qw zoo siab, muaj suab hom nrov rau Huab Tais.
    Los: As les lus yas.

    Tswv Ntuj nce saum nws lub theej kiab, muaj suab zoo sia
    HUAB TAIS nce, muaj suab hom nrov.
    nej hu nkauj cav txog Tswv Ntuj, nej cav txog nws,
    nej hu nkauj cav txog peb tus vaj, nej cav txog nws.

    Txais: (6) Tswv Ntuj nce saum nws lub theej kiab,
    muaj suab qw zoo siab, muaj suab hom nrov rau Huab Tais.
    Los: As les lus yas.

    Tus vaj kav tas lub ntiaj teb yog Tswv Ntuj,
    nej hu nkauj cav txog nws.
    Tswv Ntuj tswj cov haiv neeg,
    Tswv Ntuj zaum saum nws lub rooj ntshiab.

    Txais: (6) Tswv Ntuj nce saum nws lub theej kiab,
    muaj suab qw zoo siab, muaj suab hom nrov rau Huab Tais.
    Los: As les lus yas.

    Zaj Nyeem Ob: ES FES XOS 1: 17-23


    Cov kwv tij nkauj muam,
    17 Kuv thov kom peb tus Huab Tais Yes Xus Pleev tus Tswv Ntuj, Leej Txiv uas muaj koob meej, pub ib lub tswv yim thoob tsib thiab txawj mem tau tej yam uas Ntuj qhib tawm los rau nej, nej thiaj yuav paub nws tseeb tiag.
    18 Kuv thov nws tso qhov pom kev tuaj kaj cov qhov muag hauv nej lub siab, kom nej pom tias nej muaj kev tso siab loj npaum li cas vim Tswv Ntuj hu nej, nej yuav nplua nuj kev nto koob meej npaum li cas vim nej yuav tau nws lub cuab tam koom cov leej ntshiab,
    19 thiab nws lub hwj huam loj heev tshaj npaum li cas rau peb cov ntseeg , raws li peb pom nws siv nws lub hwj huam.
    20 Nws siv nws lub hwj huam nyob hauv Leej Pleev: nws tsa Leej Pleev sawv hauv cov tub tuag los thiab tsa Leej Pleev zaum ua vaj ntawm nws phab xis nyob saum ntuj,
    21 nyob siab tshaj txhua tus loj, txhua tus tswj muaj zog, txhua tus muaj hwj chim, txhua tus vaj ntxwv huab tais, thiab txhua lub npe uas hu tau, hauv lub zim txwv tiam no mus dhau tiam yav tom ntej huv si.
    22 Tswv Ntuj tso tas puas tsav yam rau hauv Leej Pleev qab xib taws thiab tsa nws nyob rau qhov chaw siab tshaj uas yog ua lub Koom Txoos tus Hau,
    23 lub Koom Txoos yog nws lub Cev, yog qhov puv npo nyob hauv tus uas nyob puv txhua yam txhua tsav.

    Los: ES FES XOS 4: 1-13

    1 Kuv yog tus raug txim vim Huab Tais, kuv thov nej, kom nej coj ib lub neej phim txoj kev uas Ntuj tau hu nej los taug.
    2 Nej yuav ua neeg tsis muab hlob , ua neeg siab muag siab zoo, ua siab ntev ib leeg txhawb ib leeg nyob hauv txoj kev nyiam.
    3 Nej yuav siv zog txuag kom nej nyob sib haum koom ib lub tswv yim hauv txoj kev thaj yeeb.
    4 Tsuas muaj ib lub cev thiab ib lub tswv yim xwb, ib yam li tsuas muaj ib txoj kev tso siab uas Ntuj hu nej los taug xwb.
    5 Tsuas muaj ib tug Huab Tais, ib txoj kev ntseeg, ib lub cim ntxuav, 6 ib tug Tswv Ntuj xwb, nws ua sawv daws Txiv, nws nyob siab dua sawv daws, nws nyob tas qhov txhia chaw thiab nyob hauv sawv daws.
    7 Tsis kav peb nyias tau txais Ntuj lub txiaj ntsim raws li Yes Xus Pleev pub rau nyias.
    8 Li ntawd luag thiaj hais tias : ‘Nws nce mus saum qhov siab, nws coj cov raug txim mus, nws pub paj tshab rau cov tib neeg.’
    9 Lo lus tias : ‘nws nce’, txhais tias nws kuj tau xub nqes mus puag hauv yeeb ceeb lawm thiab.
    10 Tus tau nqes mus puag hauv, kuj yog tus uas tau nce mus nyob siab dua cov txheej ntuj saud thiab. Nws ua li ntawd, mas nws thiaj nyob puv hauv txhua yam.
    11 Thiab nws kuj yog tus pub kom ib txhia ua Hauv Paus Xa Lus, ib txhia ua Yaj Saub, ib txhia tshaj lub Moo Zoo, ib txhia ua leej choj, ib txhia ua xib hwb.
    12 Yes Xus tau tsa cov neeg ntshiab ua ntau txoj kab xwm raws li no, kom lawv txhim Leej Pleev lub Cev.
    13 Thaum ua qhov no tiav lawm, mas peb sawv daws yuav tsum ua ib leeg xwb nyob hauv txoj kev ntseeg thiab txoj kev paub Tswv Ntuj Leej Tub. Ces peb sawv daws yuav koom ua tus tib neeg uas zoo txhij zoo txhua, uas yog Yes Xus Pleev lub Cev hlob tiav log.

    Los: ES FES XOS 4: 1-7, 11-13

    1 Kuv yog tus raug txim vim Huab Tais, kuv thov nej, kom nej coj ib lub neej phim txoj kev uas Ntuj tau hu nej los taug.
    2 Nej yuav ua neeg tsis muab hlob , ua neeg siab muag siab zoo, ua siab ntev ib leeg txhawb ib leeg nyob hauv txoj kev sib nyiam.
    3 Nej yuav siv zog txuag kom nej nyob sib haum koom ib lub tswv yim hauv txoj kev thaj yeeb.
    4 Tsuas muaj ib lub cev thiab ib lub tswv yim xwb, ib yam li tsuas muaj ib txoj kev tso siab uas Ntuj hu nej los taug xwb.
    5 Tsuas muaj ib tug Huab Tais, ib txoj kev ntseeg, ib lub cim ntxuav, 6 ib tug Tswv Ntuj xwb, nws ua sawv daws Txiv, nws nyob siab dua sawv daws, nws nyob tas qhov txhia chaw thiab nyob hauv sawv daws.
    7 Tsis kav peb nyias tau txais Ntuj lub txiaj ntsim, raws li Yes Xus Pleev pub rau nyias.
    11 Thiab nws kuj yog tus pub kom ib txhia ua Hauv Paus Xa Lus, ib txhia ua Yaj Saub, ib txhia tshaj lub Moo Zoo, ib txhia ua tub leej choj, ib txhia ua xib hwb.
    12 Yes Xus tau tsa cov neeg ntshiab ua ntau txoj kab xwm raws li no, kom lawv txhim Leej Pleev lub Cev.
    13 Thaum ua qhov no tiav lawm, mas peb sawv daws yuav tsum ua ib leeg xwb, nyob hauv txoj kev ntseeg thiab txoj kev paub Tswv Ntuj Leej Tub. Ces peb sawv daws yuav koom ua tus tib neeg uas zoo txhij zoo txhua, uas yog Yes Xus Pleev lub Cev hlob tiav log.

    As Les Lus Yas: MT 28: 19A, 20B

    Txais: As les lus yas, as les lus yas.

    Huab Tais hais tias, nej mus qhuab qhia rau tas txhua haiv neeg,
    kuv yuav nrog nej nyob nraim mus txog thaum ntiaj teb kawg.

    Txais: As les lus yas, as les lus yas.

    Ntawv Moo Zoo: MK 16: 15-20

    15 Yes Xus hais rau lawv tias : "Nej mus thoob qab ntuj, nej tshaj lub Moo Zoo rau txhua leej txhua tus. 16 Tus twg ntseeg thiab txais lub cim ntxuav, mas nws yuav txais kev cawm dim, hos tus tsis ntseeg yuav raug txim. 17 Cov cim no yuav nrog cov uas ntseeg : lawv yuav hu txog kuv lub npe los ntiab dab tau; lawv yuav hais ib co lus tshiab; 18 lawv yuav tuav tau nab ntawm lawv tes; yog lawv haus tshuaj lom neeg, tshuaj yuav tsis ua xwv txheej rau lawv; thaum lawv tsa tes rau saum cov neeg mob, mas cov mob yuav zoo hlo." 19 Thaum Huab Tais Yes Xus hais cov lus no tas rau lawv, nws raug nqa nce mus saum ntuj thiab nws mus zaum ntawm Tswv Ntuj sab xis lawm. 20 Ces cov thwj tim tawm mus qhuab qhia rau tas qhov txhia chaw, Huab Tais nrog lawv lis hauj lwm thiab nws ua ib co cim nrog los ua tim khawv txhawb Lo Lus.



    HNUB TSIB LIS PIAM RAU CAIJ HLA XYOO A Nruab Lis Piam Xyoo I

    Zaj Nyeem Ib: HAUJ LWM 18: 1-8


    1 Ua li ntawd tas, Paj Lug tawm hauv As Thes Nas mus, nws mus txog Kos Lis Nthos. 2 Nyob Kos Lis Nthos, Paj Lug ntsib ib tug neeg Yus Das hu ua As Kis Las, uas yug los nyob Poos Tus teb. Nws thiab nws poj niam hu ua Phis Xis Las nkawd nyuam qhuav tsiv tim Is Tas Lis teb los txog vim tus Vaj Klaus Dis Yus ceeb toom kom tas cov Yus Das sawv daws yuav tsum tawm hauv Los Mas mus. Paj Lug mus cuag nkawd; 3 vim tias Paj Lug kuj ua txoj hauj lwm uas nkawd ua thiab, nws thiaj mus nrog nkawd nyob, thiab nrog nkawd ua hauj lwm. Lawv txoj hauj lwm yog xaws ntaub ua tsev tsam phooj. 4 Niaj hnub xas npas tos, Paj Lug mus qhia sawv daws nyob hauv lub tsev txoos. Nws siv zog qhia cov Yus Das thiab cov Hes Las kom lawv ntseeg. 5 Thaum Xis Las thiab Tis Mos Tes nkawd tuaj ntawm Mas Xes Dos Nias teb tuaj txog lawm, mas Paj Lug siv nws lub sij hawm cia tshaj Lo Lus lawm xwb. Nws zeem tseeb rau cov Yus Das tias Yes Xus yog Leej Pleev. 6 Tab sis lawv tsis ntseeg, lawv hais tej lo lus thuam Ntuj. Ces Paj Lug nchos nws cov ris tsho thiab nws hais rau lawv tias : "Cia nej cov ntshav rov poob los rau saum nej taub hau. Kuv hauj lwm nrog nej tiav lawm, txij no mus kuv yuav mus tsham cov neeg teev pej kum dab lawm xwb." 7 Paj Lug hais li ntawd tas, ces nws sawv kev mus. Nws mus hauv ib tug hu ua Tis Tos Yus Tus lub tsev. Yus Tus yog ib tug neeg hwm Tswv Ntuj ; nws lub tsev nyob puab lub tsev Txoos. 8 Khis Pus uas yog tus saib lub tsev Txoos nrog nws tsev neeg sawv daws ntseeg txog Huab Tais. Muaj ntau leej Kos Lis Nthos hnov Paj Lug, lawv ntseeg thiab txais lub cim ntxuav.

    NPN 98: 1, 2-3ab,3cd-4

    Txais: (2b) Huab Tais muab nws txoj kev cawm neeg muaj hwj huam rau cov kuj cuab pom.
    los: As les lus yas.

    Nej hu ib zag nkauj tshiab rau HUAB TAIS,
    vim nws ua dej num loj muaj tsim nto moo.
    Nws sab xis, nws sab npab ntshiab ua kom nws yeej.

    Txais: (2b) Huab Tais muab nws txoj kev cawm neeg muaj hwj huam rau cov kuj cuab pom.
    los: As les lus yas.

    HUAB TAIS ua kom sawv daws paub nws txoj kev cawm ;
    nws muab nws txoj kev ncaj rau cov kuj cuab pom.
    Nws rov nco txog nws txoj kev hlub thiab npuab His Xas Lais tsev neeg.

    Txais: (2b) Huab Tais muab nws txoj kev cawm neeg muaj hwj huam rau cov kuj cuab pom.
    los: As les lus yas.

    Tas npoo ntuj npoo ntiaj teb tau pom
    peb tus Tswv Ntuj txoj kev cawm seej.
    Tas txhua teb chaws, nej qw zoo siab cav txog HUAB TAIS !
    Nej qhib suab hu nkauj, nej qhuas txog nws!

    Txais: (2b) Huab Tais muab nws txoj kev cawm neeg muaj hwj huam rau cov kuj cuab pom.
    los: As les lus yas.

    As Les Lus Yas: ZAM 14: 18


    Txais: As les lus yas, as les lus yas.

    Huab Tais hais tias: kuv yuav tsis cia nej ua ntsuag,
    kuv yuav rov los nrog nej nyob ces nej yuav zoo siab hlo.

    Txais: As les lus yas, as les lus yas.

    Ntawv Moo Zoo: ZAM 16: 16-20

    Yes Xus hais rau nws cov thwj tim tias:
    16 "Tshuav me ntsis ntxiv lawm xwb, ces nej yuav tsis pom kuv. Tab sis ib me ntsis ntxiv, nej yuav rov pom kuv." 17 Muaj ob peb tug thwj tim sib tham tias : "Nws hais dab tsi li ntawd rau peb tias : ‘Tshuav me ntsis ntxiv lawm xwb, ces nej yuav tsis pom kuv, tab sis ib me ntsis ntxiv , nej yuav rov pom kuv,’ thiab lo lus tias : ‘Kuv mus cuag Leej Txiv.’ " 18 Cov thwj tim sib tham hais tias : "Lo lus tias ‘me ntsis’, uas nws hais ntawd yog li cas ? Peb tsis paub nws xav hais dab tsi li." 19 Yes Xus paub tias lawv xav nug nws, ces nws hais rau lawv tias : "Nej rov sib nug txog lo lus kuv hais tias : Tshuav me ntsis lawm xwb, nej yuav tsis pom kuv, tab sis ib me ntsis ntxiv, nej yuav rov pom kuv. 20 Kuv hais qhov muaj tseeb tiag rau nej tias nej yuav quaj thiab nej yuav nyiav, hos lub qab ntuj neeg yuav zoo siab. Nej yuav tu siab loj, tab sis nej txoj kev tu siab yuav hloov ua kev zoo siab.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 5:32 am

    TIM 26 LUB 5 HLIS 2017

    Hnub Rau Lis Piam Rau Caij Hla Xyoo A Nruab Lis Piam Xyoo I

    Hwm LN Philip Neri

    Zaj Nyeem Ib: HAUJ LWM 18: 9-18


    9 Muaj ib hmos, Paj Lug ua yog toog pom Huab Tais hais rau nws tias : "Koj tsis txhob ntshai, kav tsij rau siab ntso hais lus, koj tsis txhob nyob twj ywm. 10 Vim kuv nrog nraim koj, tsis muaj leej twg yuav tsa tes ua phem rau koj tau. Vim tias kuv muaj ib haiv neeg coob nyob hauv lub tsheej no." 11 Ces Paj Lug thiaj nyob hauv lub tsheej ntawd ib xyoos thiab rau hli. Nws qhia Tswv Ntuj lo lus rau lawv 12 Thaum ntawd, Nkas Loos ua pwm tsav kav lub xeev As Kas Yis. Cov Yus Das koom siab sawv ntxeev Paj Lug, lawv coj Paj Lug tuaj rau lub tsev txiav txim. 13 Lawv hais tias : "Tus neeg ntawd tuaj haub zeej tsoom kom sawv daws teev Tswv Ntuj tsis haum Txoj Cai." 14 Paj Lug tseem yuav qhib ncauj hais, tab sis Nkas Loos twb teb ntua rau cov Yus Das tias : "Cov Yus Das, yog nej hais txog kev ua tub sab tub nyiag, los kev ua phem, mas kuv yuav nrog nej tu plaub tu ntug. 15 Tab sis yog nej sib cav txog tej lo lus, tej lub npe, thiab txog ib txoj cai uas yog nej li, mas cia nej ua nej. Kuv tsis kam txiav txim rau tej yam ntawd." 16 Ces Nkas Loos ntiab sawv daws tawm hauv tsev txiav txim mus. 17 Sawv daws thiaj ntes tus saib lub tsev Txoos hu ua Xos Tes Nes. Lawv muab nws ntaus nyob ze lub tsev txiav txim. Nkas Loos tsis quav ntsej rau tej ntawd li. 18 Paj Lug tseem nyob Kos Lis Nthos ib ntus ntxiv, nws mam ncaim cov kwv tij mus. Nws nce nkoj mus rau Xis Lias teb. Phis Xis Las thiab As Kis Las nkawd nrog nws mus. Lawv mus txog Kees Khes, Paj Lug chais plaub hau, vim nws tau fiv ib lub yeem li ntawd.

    NPN 47: 2-3, 4-5, 6-7

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    Txhua haiv neeg, nej npuaj teg,
    nej qw suab zoo siab rau Tswv Ntuj,
    vim HUAB TAIS tus nyob siab, tus zoo tshaj,
    yos tus vaj loj kav tas nrho lub ntiaj teb.

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    Nws coj cov haiv neeg los zwm rau peb,
    nws tso cov kuj cuab rau hauv peb qab xib taws.
    Nws xaiv peb lub cuab tam rau peb,
    Yog Yas Kos lub koob meej, tus uas nws nyiam.

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    Tswv Ntuj nce saum nws lub theej kiab, muaj suab zoo sia
    HUAB TAIS nce, muaj suab hom nrov.
    nej hu nkauj cav txog Tswv Ntuj, nej cav txog nws,
    nej hu nkauj cav txog peb tus vaj, nej cav txog nws.

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    As Les Lus yas: LK 24: 46, 26

    Txais: As les lus yas, as les lus yas.

    Leej Pleev yuav tsum raug txom nyem thiab sawv hauv cov tub tuag rov los
    Ces nws thiaj mam mus rau hauv nws lub hwj chim.

    Txais: As les lus yas, as les lus yas.

    Ntawv moo Zoo: ZAM 16: 20-23


    20 Kuv hais qhov muaj tseeb tiag rau nej tias nej yuav quaj thiab nej yuav nyiav, hos lub qab ntuj neeg yuav zoo siab. Nej yuav tu siab loj, tab sis nej txoj kev tu siab yuav hloov ua kev zoo siab. 21 Thaum ib tug poj niam daws cev, mas nws nyuaj siab, vim txog caij lawm. Tab sis thaum nws yug tau nws tus me nyuam lawm, nws tsis nco nyuaj siab ntxiv, vim tias ib tug me nyuam yug los nyob hauv ntiaj teb no lawm. 22 Nej kuj zoo li ntawd : Nyem no nej nyuaj siab, tab sis kuv yuav rov pom nej dua, ces nej lub siab yuav kaj. Yuav tsis muaj leej twg rhuav tau nej txoj kev zoo siab. 23 Hnub ntawd, nej yuav tsis nug kuv txog dab tsi ntxiv lawm. Kuv hais qhov muaj tseeb tiag rau nej : Nej tuav txog kuv lub npe thov dab tsi ntawm Leej Txiv, mas nws yuav pub rau nej.”

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 5:36 am

    TIM 27 LUB 5 HLIS 2017

    Hnub Xya Lis Piam Rau Caij Hla Xyoo A Nruab Lis Piam Xyoo I

    Hwm LN Augustine nyob Canterbury

    Zaj Nyeem Ib: HAUJ LWM 18: 23-28


    23 Paj Lug nyob As Nthias Kias ib ntus, ces nws sawv kev, nws mus ncig cov teb chaws Nkas Las Tias thiab Fis Zias ib qho dhau ib qho zuj zus, mus pab txhawb zog rau cov thwj tim. 24 Muaj ib tug Yus Das hu ua As Pos Los, uas yug nyob As Les Xas Nrias, nws tuaj txog Es Fes Xos. Nws yog neeg txawj hais lus thiab paub Ntawv Ntshiab zoo. 25 Nws tau kawm Huab Tais Txoj Kev. Nws kub siab lug, nws hais thiab nws qhia raug kawg txog Yes Xus, txawm tias nws tsuas paub Zam lub cim ntxuav xwb. 26 Nws hais lus tsis ua xyem xyav li nyob hauv lub tsev Txoos. Phis Xis Las thiab As Kis Las nkawd hnov nws cov lus, ces nkawd coj nws nrog nkawd mus, thiab nkawd qhia Tswv Ntuj Txoj Kev rau nws kom meej dua. 27 As Pos Los xav mus As Kas Yis teb, cov kwj tij txhawb nws kom ua siab loj mus. Lawv sau ib tsab ntawv mus rau cov thwj tim kom lawv txais nws. Vim nws muaj Ntuj lub txiaj ntsim, mas thaum nws tuaj txog As Kas Yis teb, nws tau pab cov ntseeg ntau kawg. 28 Nws tsis ntshai tab meeg hais lus tiv cov Yus Das. Nws siv Ntawv Ntshiab los qhia tias Yes Xus yeej yog Leej Pleev tiag.

    NPN 47: 2-3, 8-9, 10


    Txais: (8a) Tswv Ntuj ua vaj kav tas lub ntiaj teb.
    los: Alleluia.

    Txhua haiv neeg, nej npuaj teg,
    nej qw suab zoo siab rau Tswv Ntuj,
    vim HUAB TAIS tus nyob siab, tus zoo tshaj,
    yog tus vaj loj kav tas nrho lub ntiaj teb.

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    Tus vaj kav tas lub ntiaj teb yog Tswv Ntuj,
    nej hu nkauj cav txog nws.
    Tswv Ntuj tswj cov haiv neeg,
    Tswv Ntuj zaum saum nws lub rooj zaum ntshiab.

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    Cov vaj txheeb hauv txhua haiv neeg tuaj sib sau ua ke :
    Lawv yog Has Nplas Has tus Tswv Ntuj haiv neeg.
    Vim cov leem phiaj thaiv ntiaj teb yog Tswv Ntuj tug,
    Nws loj tshaj tas txhia tsav txhua yam.

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    As Les Lus Yas: ZAM 16: 28

    Txais: As les lus yas, as les lus yas.

    Kuv tuaj ntawm Leej Txiv tuaj rau hauv ntiaj teb,
    zaum no kuv yuav tso ntiaj teb tseg thiab rov mus cuag Leej Txiv.

    Txais: As les lus yas, as les lus yas.

    Ntawv Moo Zoo: ZAM 16: 23B-28

    Yes Xus hais rau nws cov thwj tim tias:
    23b “"Kuv hais qhov muaj tseeb tiag rau nej : Nej tuav txog kuv lub npe thov dab tsi ntawm Leej Txiv, mas nws yuav pub rau nej. 24 Los txog tav no, nej tsis tau tuav txog kuv lub npe thov ib yam dab tsi. Nej thov ces nej yuav tau txais, nej thiaj yuav muaj kev zoo siab puv npo. 25 Kuv tau siv tej zaj paj lug los hais tej no rau nej. Txog lub caij uas kuv yuav tsis siv tej zaj paj lug los hais rau nej ntxiv. Kuv yuav ncaj qha qhia meej txog Leej Txiv rau nej. 26 Txog hnub ntawd, nej yuav tuav txog kuv lub npe los thov. Kuv tsis hais rau nej tias kuv yuav thov Leej Txiv rau nej. 27 Leej Txiv twb nyiam nej lawm, vim nej nyiam kuv, thiab nej ntseeg tias kuv tuaj ntawm Tswv Ntuj tuaj. 28 Kuv tawm ntawm Leej Txiv tuaj nyob hauv lub ntiaj teb no. Zaum no kuv tso lub ntiaj teb tseg, kuv yuav rov mus cuag Leej Txiv."

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 6:11 am

    TIM 29 LUB 5 HLIS 2017

    Hnub Ob Lis Piam Xya Caij Hla Xyoo A Nruab Lis Piam Xyoo I

    Zaj Nyeem Ib: HAUJ LWM 19: 1-8


    1 Thaum As Pos Los nyob Kos Lis Nthos, Paj Lug hla lub teb chaws toj siab mus rau Es Fes Xos. Nws ntsib ib co thwj tim nyob ntawd. 2 Nws hais rau lawv tias : "Thaum nej los ntseeg, nej puas tau txais Leej Ntuj Plig Ntshiab ?" Lawv teb nws tias : "Peb tsis tau hnov tias muaj Leej Ntuj Plig Ntshiab li." 3 Paj Lug thiaj hais tias : "Ua li nej txais leej twg lub cim ntxuav?” Lawv teb tias : "Peb txais Zam lub cim ntxuav." 4 Ces Paj Lug hais rau lawv tias : "Zam ua kab ke ntxuav kom sawv daws thov txhaum. Nws hais kom tsoom laj mej pej xeem ntseeg txog tus yuav lawv nws qab tuaj, tus ntawd yog Yes Xus." 5 Lawv hnov cov lus ntawd, mas lawv txais lub cim ntxuav nyob hauv Huab Tais Yes Xus lub npe. 6 Thaum Paj Lug tsa tes rau lawv, mas Leej Ntuj Plig Ntshiab los nyob saum lawv, ces lawv hais ib co xeem lus tshiab, thiab lawv ua yaj saub. 7 Pab neeg no tas huv si, muaj kaum ob leeg. 8 Paj Lug mus hauv lub tsev Txoos, nws hais lus tsis ua xyem xyav tau peb lub hlis txog Tswv Ntuj lub Ceeb Tsheej rau cov neeg tuaj mloog nws thiab nws nrhiav cov lus hais kom lawv ntseeg nws.

    NPN 68: 2-3AB, 4-5ACD, 6-7AB

    Txais: (33a) Nej cia li hu nkauj rau Tswv Ntuj, cov ceeb tsheej nyob ntiaj teb.
    los: As les lus yas.

    Tswv Ntuj sawv tsees, nws cov yeeb ncuab tawg tas sib ncaim tas,
    Cov ntxub nws khiav mus deb ntawm nws lub ntsej muag.
    Xws li cov pa taws txawj yaj tas, koj ua kom lawv yaj mus,
    zoo li ciab ntab yaj nyob hauv hluav taws.

    Txais: (33a) Nej cia li hu nkauj rau Tswv Ntuj, cov ceeb tsheej nyob ntiaj teb.
    los: As les lus yas.

    Cov neeg siab ncaj zoo siab, lawv dhia nyob ntawm
    Tswv Ntuj xub ntiag, lawv zoo siab tas nrho :
    Nej hu nkauj rau Tswv Ntuj, nej hu nkauj cav txog nws lub npe ;
    Nws lub npe hu ua : HUAB TAIS .

    Txais: (33a) Nej cia li hu nkauj rau Tswv Ntuj, cov ceeb tsheej nyob ntiaj teb.
    los: As les lus yas.

    Tus ua leej txiv rau cov ntsuag nos, tus txheem plaub rau cov poj ntsuam,
    Yog tus Tswv Ntuj uas nyob hauv nws lub tsev ntshiab.
    Tswv Ntuj pub tsev rau tus neeg txom nyem nyob,
    nws coj cov neeg raug txim tawm los kom tau ntsib kev vam meej,

    Txais: (33a) Nej cia li hu nkauj rau Tswv Ntuj, cov ceeb tsheej nyob ntiaj teb.
    los: As les lus yas.

    As Les Lus Yas: KOS LOS XAIS 3: 1

    Txais: As les lus yas, as les lus yas.

    Yog nej twb tau nrog Leej Pleev sawv rov los lawm,
    mas nej cia li nrhiav tej yam nyob txheej saud, uas yog qhov chaw Leej Pleev nyob,
    zaum rawv ntawm Tswv Ntuj phab xis.

    Txais: As les lus yas, as les lus yas.

    Ntawv Moo Zoo: ZAM 16: 29-33

    29 Yes Xus cov thwj tim hais rau nws tias : "Zaum no koj ncaj qha hais, koj tsis siv tej zaj paj lug lawm. 30 Zaum no peb paub tias koj paub tas ib puas tsav yam, tsis tas leej twg yuav nug koj. Yog vim li ntawd peb thiaj ntseeg tias koj tuaj ntawm Tswv Ntuj tuaj." 31 Yes Xus teb rau lawv tias : "Nyem no nej ntseeg lawm lod ? 32 Yuav txog sij hawm, twb txog sij hawm lawm uas nej sawv daws yuav sib ncaim tas, nyias yuav mus nyias ib qho, nej yuav tso kuv pov tseg ib leeg. Tab sis kuv tsis nyob kuv ib leeg, vim Leej Txiv nrog kuv. 33 Kuv hais tej ntawd rau nej kom nej nyob thaj yeeb hauv kuv. Nej yuav raug luag hiam hauv ntiaj teb no, tab sis nej ua siab loj mog ! Kuv twb yeej lub ntiaj teb lawm.“


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 6:15 am

    TIM 30 LUB 5 HLIS 2017

    Hnub Peb Lis Piam Xya Caij Hla Xyoo A Nruab Lis Piam Xyoo I

    Zaj Nyeem Ib: HAUJ LWM 20: 17-27


    17 Thaum Paj Lug tuaj txog Mis Les Tos, nws xa neeg mus hu cov txwj laus saib lub Koom Txoos nyob Es Fes Xos tuaj. 18 Thaum lawv tuaj txog, nws hais rau lawv tias : “Nej paub zoo tias txij hnub kuv ko taw tau tsuj As Xias teb los txog tav no, kuv ib txwm coj li cas thaum kuv nrog nej. 19 Kuv tau ua neeg me tsob hwb Huab Tais, txawm kuv ntsib txoj kev los kua muag, txoj kev txom nyem ntau zaus, vim cov Yus Das tuav tswv yim ua phem rau kuv. 20 Nej paub zoo tias yog kuv pom ib yam zoo ua los pab nej thaum twg, mas kuv tsis tau thaub qab ib zaug li, txawm yuav yog thaum kuv qhuab ntuas nej thiab qhia nej nyob ntawm sawv daws xub ntiag los nyob hauv nej vaj nej tsev. 21 Kuv qhuab ntuas cov Yus Das thiab cov Hes Las tas zog kom sawv daws tig los mloog Tswv Ntuj thiab ntseeg txog peb tus Huab Tais Yes Xus Pleev. 22 "Nyem no, kuv mus Yes Lus Xas Les, vim yog Leej Ntuj Plig khi kuv coj kuv mus, kuv yeej tsis paub tias yuav muaj dab tsi tuaj raug kuv nyob ped li. 23 Kuv tsuas paub tias thaum kuv hla ib lub nroog mus rau lwm lub, mas Leej Ntuj Plig Ntshiab xub qhia kuv tias saw hlau thiab kev txom nyem tos nrhw kuv. 24 Txawm li cas los kuv tsis muab kuv txoj sia saib ua qhov loj muaj nqes tshaj. Tsuav yog kuv tau taug kuv txoj kev kom kawg thiab leg cov dej num uas Huab Tais Yes Xus muab rau kuv leg kom tiav xwb, uas yog mus ua tim khawv txog lub Moo Zoo pub Tswv Ntuj lub txiaj ntsim. 25 Kuv paub tias txij no mus, tas nej cov uas kuv tau nrog nyob thiab qhia txog lub Ceeb Tsheej rau, mas nej yuav tsis pom kuv lub ntsej muag ntxiv lawm. 26 Vim li no mas hnub no, kuv thiaj hais tseeb rau nej tias kuv tsis tshuav nej leej twg ib tug twg nqe txog ntawm nws txoj sia, 27 vim kuv tsis ntshai tshaj tas nrho Tswv Ntuj txoj kev uas nws npaj rau nej.

    NPN 68: 10-11, 20-21

    Txais: (33a) Nej cia li hu nkauj rau Tswv Ntuj, cov ceeb tsheej nyob ntiaj teb.
    los: As les lus yas.

    Tswv Ntuj, koj tso nag muaj txiaj ntsim ntau los ywg koj lub cuab tam,
    koj rov ua kom thaj av zoo tuaj thaum nws tsuag lawm.
    koj cov yaj los nyob hauv thaj av ntawd,
    Tswv Ntuj, koj lub siab zoo pub thaj av rau tus pluag.

    Txais: (33a) Nej cia li hu nkauj rau Tswv Ntuj, cov ceeb tsheej nyob ntiaj teb.
    los: As les lus yas.

    Cia li cav txog HUAB TAIS lub koob meej hnub dhau hnub !
    Nws yog tus saib peb, yog Tswv Ntuj uas cawm peb.
    Tswv Ntuj yog tus Tswv Ntuj pub kev cawm rau peb,
    HUAB TAIS Tswv Ntuj yog tus saib txoj kev tuag lub rooj vag.

    Txais: (33a) Nej cia li hu nkauj rau Tswv Ntuj, cov ceeb tsheej nyob ntiaj teb.
    los: As les lus yas.

    As Les Lus Yas: ZAM 14: 16

    Txais: As les lus yas, as les lus yas.

    Kuv yuav thov Leej Txiv,
    ces nws yuav xa dua ib Tug Pab
    los nrog nej nyob mus li.

    Txais: As les lus yas, as les lus yas.

    Ntawv Moo Zoo: ZAM 17: 1-11A

    1 Yes Xus hais li ntawd tas, nws tsa muag ntsia saum ntuj, nws hais tias: "Txiv, txog sij hawm lawm ! Koj ua kom koj Leej Tub muaj koob meej mas. Ces koj Leej Tub yuav ua kom koj muaj koob meej, 2 vim koj muab hwj huam rau nws kav tas txhua leej txhua tus, kom nws pub txoj sia nyob mus li rau txhua leej uas koj muab rau nws. 3 Txoj sia nyob mus li yog zoo li no : kom lawv paub koj, uas yog tus tseem Tswv Ntuj, thiab paub Yes Xus Pleev uas yog tus koj xa tuaj. 4 Kuv ua kom koj muaj koob meej nyob ntiaj teb no, vim tias cov hauj lwm uas koj muab rau kuv ua, mas kuv ua tiav lawm. 5 Txiv, nyem no koj ua kom kuv muaj koob meej nyob ntawm koj xub ntiag, yog lub koob meej uas kuv muaj txawm rau ntawm koj xub ntiag thaum lub sim ceeb tsis tau xeeb los nyob. Yes Xus yog tus leej choj thov Leej Txiv rau cov thwj tim. 17 : 6 - 19. 6 "Cov neeg koj rho hauv lub qab ntuj los pub rau kuv, mas kuv ua kom lawv pom xyeem koj lub Npe. Cov neeg no yog koj tug, koj muab lawv pub rau kuv, ces lawv coj rawv koj lo lus. 7 Nyem no lawv paub tias tas txhua yam uas koj muab rau kuv yog tuaj ntawm koj tuaj. 8 Vim tias cov lus uas koj muab rau kuv, mas kuv muab pub rau lawv lawm. Lawv txais koj cov lus, ces lawv paub tseeb tias kuv tuaj ntawm koj tuaj, thiab lawv ntseeg tias yog koj xa kuv tuaj. 9 Kuv thov koj rau lawv. Kuv tsis thov koj rau lub qab ntuj neeg, kuv thov koj rau cov uas koj muab pub rau kuv, vim lawv yog koj tug. 10 Txhua yam uas yog kuv tug, kuj yog koj tug ; txhua yam uas yog koj tug, kuj yog kuv tug thiab. Kuv muaj koob meej nyob hauv lawv. 11 Kuv tsis nyob hauv lub qab ntuj no ntxiv lawm, tab sis lawv tseem nyob hauv lub qab ntuj no.

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 6:19 am

    TIM      31     LUB     5     HLIS      2017

    Hnub Plaub Lis Piam Xya Caij Hla Xyoo A Nruab Lis Piam Xyoo I

    Hwm Niam Mab Liab mus saib Es Lis Xas Npes

    Zaj Nyeem Ib:     XFN  3:   14-18A


    14 Leej me ntxhais Xis Yoos, koj cia li nqua suab qw zoo siab ! Tsoom His Xas Lais, nej cia li hu nkauj luag ntxhi ! Me ntxhais Yes Lus Xas Les, koj lub siab cia li zoo siab tas nrho dhia hom khaj ! 15 HUAB TAIS tau thim nws cov lus txiav txim rau koj lawm. Nws tau caum koj cov yeeb ncuab khiav mus tas. HUAB TAIS , His Xas Lais tus vaj nws nyob nruab nrab hauv koj, koj yuav tsis ntshai kev phem dab tsi ntxiv. 16 Hnub ntawd, Yes Lus Xas Les yuav hnov cov lus no tias: “Xis Yoos, koj txhob ntshai, txhob ntaus siab me ! 17 HUAB TAIS koj tus Tswv Ntuj nyob nruab nrab hauv koj ! Nws yog tus muaj hwj huam cawm koj. Nws zoo siab tas nrho vim muaj koj. Nws kev hlub ua kom koj rov tshiab tuaj. Nws hu nkauj dhia zoo siab yog vim koj, 18 xws li thaum neeg hu nkauj ua koob tsheej zoo siab.”

    Los: LOS MAS  12:   9-16

    9 Nej tsis txhob ua txuj lam nyiam luag xwb. Nej yuav nyiam qhov zoo tuag nthi ntxub qhov phem. 10 Nej yuav sib hlub xws li nej yog ib co kwv tij txheeb tiag. Nej ib leeg yuav saib ib leeg muaj nqes. 11 Nej yuav siv zog rau siab ua hauj lwmtsob hwb Huab Tais, txhob ua neeg nkees, thiab yuav siv tas nej lub tswv yim. 12 Nej yuav xyiv fab nyob hauv txoj kev tso siab rau Ntuj, nej yuav ua siab ntev ris kev txom nyem, nej yuav nquag teev Ntuj tsis tseg li. 13 Nej yuav muab kev pab rau cov ntshiab. Nej yuav xyiv fab txais cov qhua tuaj hauv nej. 14 Nej yuav foom lus zoo rau cov neeg hiam nej, foom lus zoo xwb, txhob foom lus phem. 15 Nej yuav zoo siab nrog cov neeg muaj kev zoo siab, nej yuav quaj nrog cov neeg tau kev quaj ntsuag. 16 Nej yuav ua siab zoo rau sawv daws ib yam nkaus; nej tsis txhob ua neeg muab hlob, tiam sis yuav saib taus cov neeg me nrog lawv ua taus phooj ywg; txhob rov saib nej zoo dua luag tej.

    NPN:       HIS XAIS  12:   2-3, 4BCD, 5-6

    Txais: (6) His Xas Lais tus loj thiab tus Ntshiab tuaj nyob hauv nej lawm.

    Tswv Ntuj yog tus cawm kuv,
    Kuv tso siab rau nws, kuv tsis txhawj.
    Kuv lub zog thiab kuv lub peev xwm yog HUAB TAIS,
    Nws yog tus cawm kuv.
    Nej yuav zoo siab luag ntxhi mus ce dej
    Hauv lub qhov dej muaj kev cawm neeg."

    Txais: (6) His Xas Lais tus loj thiab tus Ntshiab tuaj nyob hauv nej lawm.

    Nej ua HUAB TAIS tsaug, nej cav txog nws lub npe;
    Nej tshaj nws tej hauj lwm loj rau cov haiv neeg paub,
    Nej qhia rau lawv tias nws lub npe zoo tas nrho.

    Txais: (6) His Xas Lais tus loj thiab tus Ntshiab tuaj nyob hauv nej lawm.

    Nej hu nkauj qhuas HUAB TAIS txog nws tej hauj lwm muaj hwj chim,
    Coj mus qhia rau tas ntiaj teb paub kom thoob .
    Nroog Xis Yoos, koj tsa suab qw zoo siab,
    vim His Xas Lais tus loj thiab tus Ntshiab tuaj nyob hauv nej lawm!

    Txais: (6) His Xas Lais tus loj thiab tus Ntshiab tuaj nyob hauv nej lawm.

    As Les Lus Yas:     LK  1:   45


    Txais: As les lus yas, as l;es lus yas.

    Koj tau hmoov zoo, nkauj tsim txiaj Mab Liab, vim koj ntseeg
    tias yuav muaj tuaj raws li Huab Tais hais rau koj.

    Txais: As les lus yas, as les lus yas.

    Ntawv Moo Zoo:      LK  1:   39-56


    39 Mab Liab sawv kev mus, nws rau siab ntso maj nroos mus pem toj siab, mus rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 41 Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. 42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas Ntuj thiaj pub kom kuv tus Huab Tais leej niam tuaj xyuas kuv ? 44 Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. 45 Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo !" 46 Ces Mab Liab hais tias : "Kuv tus plig cav txog Huab Tais lub hwj chim, 47 kuv lub tswv yim hom khaj nyob hauv Tswv Ntuj, tus Cawm kuv, 48 vim nws dauv muag ntsia nws tus ntxhais txib tsis muaj tsim. Vim li ntawd, txij no mus, txhua tiam neeg yuav hais tias kuv txoj hmoov zoo, 49 vim tus Muaj Hwj Huam ua tej yam loj rau kuv, nws lub npe Ntshiab. 50 Nws lub siab hlub cov neeg hwm nws tiam dhau tiam. 51 Nws tau xyab nws txhais npab muaj zog , ua kom cov neeg uas lub siab muab hlob tawg tas. 52 Huab Tais nchuav cov muaj hwj chim poob ntawm lawv lub theej kiab, hos nws tsa cov neeg hauv txheej qis kom siab. 53 Nws pub tej yam zoo rau cov neeg tshaib noj seem noj so, hos nws ntiab cov neeg muaj rov qab mus tes qhuav qhawv. 54 Huab Tais tuaj pab nws tus tub txib His Xas Lais, vim nws nco ntsoov tias nws khuv leej neeg, 55 raws lo lus nws tau cog rau peb cov yawg koob, rau Has Nplas Has thiab Has Nplas Has tsoom xeeb leej xeeb ntxwv mus ib txhiab ib txhis."
    56 Mab Liab nrog Es Lis Xas Npes nyob peb lub hlis tej, ces nws rov mus tsev.



    Last edited by Mim on 10th June 2017, 7:15 am; edited 1 time in total
    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 6:36 am

    TIM 1 LUB 6 HLI 2017

    Hnub Tsib Lis Piam Xya Caij Hla Xyoo A Nruab Lis Piam Xyoo I

    Hwm LN Justin

    Zaj Nyeem Ib: HAUJ LWM 22: 30; 23: 6-11


    30 Hnub tom qab, tus saib kev ncaj ncees xav paub tseeb tias cov Yus Das liam dab tsi rau Paj Lug, ces nws daws Paj Lug thiab nws kom cov leej choj thiab tas tsoom txwj laus Xas Nes Nrees tuaj sib sau. Nws coj Paj Lug mus rau lawv nug.
    23 6 Paj Lug paub tias cov neeg nyob ntawd muaj ib tog yog tog Xas Dus Kais, hos ib tog yog tog Fas Lis Xais. Ces nws tsa suab hais nrov nrov rau tsoom Xas Nes Nrees tias : "Kwv tij, kuv yog ib tug Fas Lis Xais, kuv yog Fas Lis Xais tub. Kuv raug txiav txim li no yog vim peb muaj txoj kev cia siab tias cov neeg tuag yuav ciaj rov qab los ." 7 Paj Lug tseem hais li no suab tsis tau tu, cov Fas Lis Xais thiab cov Xas Dus Kais twb pib sib ceg lawm, ces sawv daws faib kiag ua ob tog. 8 Vim cov Xas Dus Kais hais tias tsis muaj kev sawv rov los, tsis muaj cov Tshiab thiab tsis muaj dab li, hos cov Fas Lis Xais ntseeg txog peb yam ntawd tib si. 9 Sawv daws thiaj sib cav ntsuag qees. Muaj ob peb tug kws ntawv, uas yog tog Fas Lis Xais sawv, lawv siv zog hais nrov nrov tias : "Peb tsis pom tus neeg ntawd ua ib qho txhaum dab tsi. Tej zaum tsam yog ib tug dab los yog ib tug Tshiab hais lus rau nws ne ?" 10 Lawv pheej sib cav heev zuj zus tuaj xwb. Tus saib kev ncaj ncees ntshai tsam lawv muab Paj Lug hlais ua daim, nws thiaj kom pab tub rog nqes mus chua Paj Lug ntawm lawv los thiab coj nws rov los nyob hauv lub yeej. 11 Hmo tom qab, Huab Tais tuaj xyuas Paj Lug, thiab hais rau nws tias : "Ua siab loj loj! Koj tau ua tim khawv txog kuv nyob Yes Lus Xas Les lawm, ib yam nkaus li ntawd koj tseem yuav ua tim khawv txog kuv nyob Los Mas thiab."

    NPN 16: 1-2A+5, 7-8, 9-10, 11


    Txais: (1) Tswv Ntuj, thov koj txuag kuv, vim koj yog kuv chaw tso siab.
    Los : As les lus yas.

    Tswv Ntuj, thov koj txuag kuv, vim kuv tuaj khaub zig koj.
    Kuv hais rau HUAB TAIS tias: " Koj yog kuv tus HUAB TAIS !”
    Huab Tais, kuv lub cuab tam, kuv lub ntim,
    Koj yog tus tuav rawv kuvb txoj hmoo.

    Txais: (1) Tswv Ntuj, thov koj txuag kuv, vim koj yog kuv chaw tso siab.
    Los : As les lus yas.

    Kuv cav lus zoo txog tus HUAB TAIS uas qhia kuv xav tswv yim,
    Tab yog hmo ntuj kuv siab ntsws tseem qhia kuv.
    Kuv cia HUAB TAIS nyob ntawm kuv xub ntiag tsis tseg,
    Vim nws nyob ntawm kuv sab xis, kuv yuav tsis qaij tsis qaug

    Txais: (1) Tswv Ntuj, thov koj txuag kuv, vim koj yog kuv chaw tso siab.
    Los : As les lus yas.

    Vim li ntawd, kuv lub siab luag ntxhi, kuv tus plig hom khaj,
    kuv lub cev kuj tau nyob nyab xeeb,
    Vim koj yuav tsis tso kuv tus ntsuj plig pov tseg rau ntuj txias teb tsaus.
    Koj tsis kheev tus ntseeg koj mus pom lub qhov ntuj tob.

    Txais: (1) Tswv Ntuj, thov koj txuag kuv, vim koj yog kuv chaw tso siab.
    Los : As les lus yas.

    Koj yuav qhia rau kuv txog txoj kev muaj txoj sia,
    txog kev zoo siab nyob ntawm koj xub ntiag,
    txog nyob ntawm koj sab xis, muaj kev nplij siab tsis txawj tsuag ib sid.

    Txais: (1) Tswv Ntuj, thov koj txuag kuv, vim koj yog kuv chaw tso siab.
    Los : As les lus yas.

    As Les Lus Yas: ZAM 17: 21


    Txais: As les lus yas, as les lus yas.

    Huab Tais hais tias: Thov kom lawv sawv daws koom ua ib leeg,
    ib yam li koj, Leej Txiv, nyob hauv kuv, kuv nyob hauv koj,
    kom lawv nyob hauv wb, ntiaj teb neeg thiaj ntseeg tias yog koj xa kuv tuaj.

    Txais: As les lus yas, as les lus yas.

    Ntawv Moo Zoo: ZAM 17: 20-26

    Yes Xus tsa muag ntsia saum ntuj, nws thov ntuj li no:
    20 "Kuv tsis thov koj rau cov no xwb, kuv tseem thov koj rau cov uas yuav ntseeg txog kuv vim lawv lo lus thiab, 21 kom lawv sawv daws koom ua ib leeg, ib yam li koj, Leej Txiv, nyob hauv kuv, kuv nyob hauv koj, kom lawv nyob hauv wb, ntiaj teb neeg thiaj ntseeg tias yog koj xa kuv tuaj. 22 Lub koob meej uas koj muab rau kuv, mas kuv muab rau lawv lawm, kom xwv lawv ua ib leeg xws li wb ua ib leeg. 23 Kuv nyob hauv lawv, koj nyob hauv kuv, lawv thiaj li ua tsheej ib leeg tiag, lub qab ntuj neeg thiaj paub tias yog koj xa kuv tuaj, thiab paub tias koj nyiam lawv ib yam li koj nyiam kuv. 24 Txiv, cov uas koj muab rau kuv, kuv nyob qhov twg, mas kuv xav kom lawv tau nrog kuv nyob qhov ntawd thiab, kom lawv pom kuv lub koob meej uas koj muab rau kuv, vim koj tau nyiam kuv, txij thaum tsis tau tsim lub sim ceeb. 25 Txiv siab ncaj, lub qab ntuj neeg tsis paub koj, tab sis kuv paub koj, thiab cov no kuj paub tias yog koj xa kuv tuaj. 26 Kuv twb ua kom lawv paub koj lub npe lawm. Kuv tseem yuav ua kom lawv paub ntxiv, kom txoj kev nyiam uas koj muab los nyiam kuv, nyob hauv lawv, thiab kom kuv nyob hauv lawv."

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 6:40 am

    TIM 2 LUB 6 HLI 2017

    Hnub Rau Lis Piam Xya Caij Hla Xyoo A Nruab Lis Piam Xyoo I

    Hwm LN Marcellinus thiab LN Peter

    Zaj Nyeem Ib: HAUJ LWM 25: 13-21


    13 Ob peb hnub tom qab, tus vaj As Nqis Pas thiab Npes Les Nis nkawd tuaj txog Xes Ntxas Les, nkawd mus xyuas Fes Tus. 14 Vim tias nkawd yuav nyob ntev hnub, ces Fes Tus thiaj piav txog Paj Lug rau tus vaj. Nws hais tias : "Nyob ntawm no, muaj ib tug neeg nyob txim uas Fes Lis cia nws kaw rau hauv tsev loj faj. 15 Thaum kuv mus Yes Lus Xas Les, cov leej choj thiab cov txwj laus Yus Das tuaj liam nws rau kuv, lawv kom kuv muab txim rau nws. 16 Kuv teb lawv tias cov Los Mas tsis muaj kev cai yuav cia li muab tus neeg raug luag liam tso rau lawv tes, yuav tsum xub hu cov neeg kom tuaj nrog tus raug liam ntawd tim ntsej tim muag hais tso, thiab yuav cia tus raug liam tau kev hais lus daws lub txim uas luag liam rau nws tso. 17 Ua li mas cov Yus Das thiaj nrog kuv tuaj ntawm no; peb tsis ncua sij hawm li, tag kis tom qab kiag, kuv mus zaum hauv lub tsev txiav txim, kuv kom lawv coj tus neeg los. 18 Cov neeg tuaj liam txav los liam; lawv liam tsis tau ib qho phem raws qhov kuv xav li. 19 Lawv tsuas nrog nws muaj lus sib cav, xyov, hais txog lawv txoj kev cai teev ntuj, thiab hais txog ib tug Yes Xus uas tuag lawm, tab sis Paj Lug hais tias nws tseem muaj txoj sia nyob xwb. 20 Kuv tsis pom qab ua dab tsi rau ib zag sib cav li ntawd, kuv thiaj nug Paj Lug saib nws puas yeem mus pem Yes Lus Xas Les, cia mam txiav txim txog tej ntawd rau nws nyob ped. 21 Tiam sis Paj Lug tau thov kom cia tso nws mus rau tus Tuam Vaj txiav txim rau nws xwb. Kuv thiaj li ceeb toom cia Paj Lug nyob ntawm no mus txog hnub kuv xa nws mus rau Xes Ntxas.”

    NPN 103: 1-2, 11-12, 19-20AB


    Txais: (19a) Huab Tais tsa nws lus theej kiab rau txheej ntuj saud.
    los: As les lus yas.

    Kuv tus ntsuj plig, koj cav txog HUAB TAIS;
    kuv tej siab ntsws, nej cav txog nws lub npe ntshiab.
    Kuv tus ntsuj plig, koj cav txog HUAB TAIS,
    koj tsis txhob hnov qab nws tej kev zoo ib qho li.

    Txais: (19a) Huab Tais tsa nws lus theej kiab rau txheej ntuj saud.
    los: As les lus yas.

    Siab npaum li lub ntuj nyob rau saum ntiaj teb,
    nws kuj hlub cov neeg uas hwm nws loj npaum li ntawd.
    Deb npaum li sab hnub tuaj nyob deb sab hnub poob,
    nws tau muab peb tej txhaum pov tseg deb ntawm peb npaum li ntawd .

    Txais: (19a) Huab Tais tsa nws lus theej kiab rau txheej ntuj saud.
    los: As les lus yas.

    HUAB TAIS tsa nws lub theej kiab rau txheej ntuj saud,
    nws lub hwj chim ua vaj kav tas txhia tsav txhua yam.
    Nej uas yog nws cov Tshiab, nej cav lus zoo txog HUAB TAIS,
    nej uas yog cov muaj peev xwm zog loj thiab nej mloog nws lus.

    Txais: (19a) Huab Tais tsa nws lus theej kiab rau txheej ntuj saud.
    los: As les lus yas.

    As Les Lus Yas: ZAM 14: 26


    Txais: As les lus yas, as les lus yas.

    Leej Ntuj Plig Ntshiab yuav qhia tas ib puas tsav yam rau nej,
    thiab yuav pab nej rov nco txog tas txhua yam uas kuv tau hais rau nej.

    Txais: As les lus yas, as les lus yas.

    Ntawv Moo Zoo: ZAM 21: 15-19

    15 Thaum lawv noj tshais tas, Yes Xus hais rau Xis Moos Pob Zeb tias : "Xis Moos, Zam tub, koj puas nyiam kuv dua lawv cov ntawd ?" Pob Zeb hais rau Yes Xus tias : "Huab Tais, koj yeej paub tias kuv nyiam koj." Yes Xus hais rau Pob Zeb tias : "Koj muab zaub rau kuv cov yaj noj." 16 Yes Xus rov hais zaum ob tias : "Xis Moos, Zam tub, koj puas nyiam kuv ?" Pob Zeb hais rau Yes Xus tias : "Huab Tais, koj yeej paub tias kuv nyiam koj." Yes Xus hais rau nws tias : "Koj zov kuv cov yaj mog." 17 Yes Xus tseem rov hais dua zaum peb rau Pob Zeb tias : "Xis Moos, Zam tub, koj puas nyiam kuv tiag ?” Pob Zeb tu siab rau qhov Yes Xus hais rau nws zaum peb tias : "Koj puas nyiam kuv tiag ?" Pob Zeb hais rau Yes Xus tias : "Huab Tais, koj paub tas ib puas tsav yam, koj yeej paub tias kuv nyiam koj tiag." Yes Xus hais rau Pob Zeb tias : "Koj muab zaub rau kuv cov yaj noj mog. 18 Kuv hais qhov muaj tseeb tiag rau koj : Thaum koj tseem hluas, koj muab koj siv koj sia koj, koj xav mus qhov twg los koj mus koj. Tiam sis thaum koj laus lawm, koj yuav tsa tes cia lwm tus kho siv rau koj sia thiab coj koj mus qhov uas koj tsis xav mus." 19 Yes Xus hais qhov ntawd qhia tias Pob Zeb yuav tuag zoo li cas kom Tswv Ntuj nto koob meej. Yes Xus hais li tas, nws hais rau Pob Zeb tias : "Koj raws kuv mus."

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 6:43 am

    TIM 3 LUB 6 HLI 2017

    Hnub Xya Lis Piam Xya Caij Hla Xyoo A Nruab Lis Piam Xyoo I

    Hwm LN Charles Lwanga thiab Cov, Uganda, Africa, tuag ua Tim Khawv

    Zaj Nyeem Ib: HAUJ LWM 28: 6-20, 30-31


    16 Thaum peb tuaj txog hauv Los Mas lawm, mas lawv cia Paj Lug nws nyob nws hauv ib lub tsev, tsuas muaj tus tub rog uas zov nws nrog nws nyob xwb. 17 Peb hnub tom qab, Paj Lug nqua hu cov thawj coj Yus Das hauv lub nroog tuaj sib txoos ua ke. Thaum lawv tuaj txog tas, Paj Lug hais rau lawv tias : "Kwv tij, kuv tsis tau ua dab tsi txhaum peb haiv neeg, los txhaum peb cov yawg koob tej kev cai, tsis kav lawv ntes kuv nyob Yes Lus Xas Les, thiab lawv muab kuv rau cov Los Mas. 18 Thaum cov Los Mas tshuaj lus tas, lawv xav tso kuv mus, vim kuv tsis tau ua dab tsi txaus ris lub txim tuag. 19 Tab sis cov Yus Das tsis kam tso, mas kuv thiaj tau hu txog Xes Ntxas ua tus txiav txim, tsis yog vim kuv xav liam dab tsi rau kuv haiv neeg. 20 Vim li no, mas kuv thiaj xav ntsib nej thiab hais rau nej paub tias, yog vim His Xas Lais txoj kev tso siab, mas kuv thiaj li coj txoj saw khi no."
    30 Paj Lug nyob tau ob xyoos nkaus hauv lub tsev uas nws ntiav. Nws txais cov neeg uas tuaj xyuas nws tas huv tib si. 31 Nws tshaj txog Tswv Ntuj lub Ceeb Tsheej, thiab qhia txog Huab Tais Yes Xus Pleev, nws tso siab lug qhia, tsis muaj leej twg txwv nws li.

    NPN 11: 4, 5+7

    Txais: (7b) Huab Tais, cov neeg siab ncaj yuav ntsia ntsoov koj lub ntsej muag.
    los: As les lus yas.

    HUAB TAIS nyob hauv nws lub tuam tsev ntshiab;
    HUAB TAIS lub theej kiab nyob saum ntuj.
    Nws qhov muag saib ntsoov ntiaj teb,
    nws ntsia tsom ntsoov rau ntiaj teb neeg.

    Txais: (7b) Huab Tais, cov neeg siab ncaj yuav ntsia ntsoov koj lub ntsej muag.
    los: As les lus yas.

    HUAB TAIS sim tus neeg ncaj thiab tus neeg phem,
    nws ntxub tus lim hiam nyiam kev sib ntaus sib tua.
    Vim HUAB TAIS siab ncaj, nws nyiam cov hauj lwm ncaj ncees,
    cov neeg siab ncaj yuav ntsia ntsoov HUAB TAIS ntsej muag

    Txais: (7b) Huab Tais, cov neeg siab ncaj yuav ntsia ntsoov koj lub ntsej muag.
    los: As les lus yas.

    As Les Lus Yas: ZAM 16: 7, 13

    Txais: As les lus yas, as les lus yas.

    Huab Tais hais tias: Kuv yuav xa Leej Tswv Yim qhia qhov tseeb tuaj rau nej;
    Nws yuav coj nej mus txog txhua yam tseeb.

    Txais: As les lus yas, as les lus yas.

    Ntawv Moo Zoo: ZAM 21: 20-25

    20 Pob Zeb tig ntsia tom qab, nws pom tus thwj tim uas Yes Xus nyiam lawv nkawd qab. Yog tus uas thaum lawv noj hmo, nws tig mus pheeb rau ntawm Yes Xus hauv siab, thiab nug tias : 'Huab Tais, tus muab koj rau luag yog leej twg'. 21 Pob Zeb pom tus thwj tim ntawd, Pob Zeb hais rau Yes Xus tias : "Huab Tais, tus ntawd ned ?" 22 Yes Xus hais rau Pob Zeb tias : "Yog kuv xav kom nws nyob mus txog hnub kuv rov los kuj xij, tsis yog koj hauj lwm. Hos koj, mas koj raws kuv mus." 23 Lo lus no ncha mus hauv cov kwv tij tias : 'Tus thwj tim ntawd yuav tsis tuag.' Tab sis Yes Xus tsis tau hais rau Pob Zeb tias : 'Nws yuav tsis tuag', Yes Xus tsuas tau hais tias : 'Yog kuv xav kom nws nyob txog hnub kuv rov los, kuj xij, tsis yog koj hauj lwm.' 24 Yog tus thwj tim ntawd ua tim khawv txog tej xwm no thiab yog nws muab sau cia. Peb paub tias nws cov lus ua pov thawj muaj tseeb. 25 Tseem tshuav ntau yam kawg uas Yes Xus tau ua, yog yuav sau ib yam zuj zus tas huv tib si, mas kuv xav tias lub ntiaj teb yuav ntim tsis tas cov ntawv uas sau txog nws tej hauj lwm.

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 7:27 am

    TIM 5 LUB 6 HLI 2017

    HNUB OB LIS PIAM CUAJ NRUAB XYOO A Nruab Lis Piam XYOO I

    Hwm LN Boniface, Tswv Qhia tuag ua Tim Khawv

    Zaj Nyeem Ib: TOS NPIS 1: 3; 2: 1-8


    1 3 Kuv, Tos Npis, tau ua neej raws txoj kev tseeb thiab kev ncaj ncees tas kuv sid. Kuv tau ua ntau yam pub pab rau kuv cov kwv tij thiab rau kuv haiv neeg uas nrog kuv nyob txim nyob Nis Nis Vas, nyob As Xis Lias teb.
    2 1b Thaum txog peb lub Hmoov Tsib Caug, uas kuj yog lub Hmoov cov Lis Piam, lawv npaj tau ib roog qav qab rau kuv noj, kuv tab tom qhau cev ntawm rooj yuav noj mov. 2 Lawv rau tau rooj thiab nqa tau ntau yam zaub mov los txawb rau ntawm kuv xub ntiag, ces kuv hais rau kuv tus tub Tos Npias tias: “ Me tub, koj mus nrhiav nyob hauv peb cov kwv tij nyob txim nyob Nis Nis Vas saib puas muaj ib tug pluag uas nws tseem muaj lub siab nco ntsoov txog Tswv Ntuj; koj coj nws los nrog kuv noj kuv pluas mov. Me tub, kuv yuav nyob ntawm no tos koj rov los." 3 Tos Npias thiaj mus nrhiav ib tug neeg pluag nyob hauv peb cov kwv tij lawm. Tab sis ib me ntsis nws rov los, nws hais tias : "Txiv !" Kuv teb tias : "Dab tsi, me tub ?" Nws hais tias : "Txiv, lawv nyuam qhuav muab peb ib tug neeg tua tuag, lawv muab nws zawm caj dab tuag, lawv muab nws coj tuaj pov rau ntawm tshav kiab, nws lub cev tseem nyob ntawd." 4 Ces kuv sawv tsees tam sid, tso plhuav kuv pluas mov tseg tsis kov li. Kuv mus nkaus hlo tus neeg tuag kwv tom kiab los, kuv muab zais rau hauv kuv ib kem tsev tos kom lub hnub poob qho tso, kuv mam coj mus faus. 5 Kuv thiaj rov los, kuv mus ntxuav cev tas, kuv mam los noj kuv pluas mov ntxuag kua muag. 6 Kuv nco txog tus Yaj Saub As Mos cov lus saub hais txog Npes Thes tias : "Nej tej hnub nyoog nqaum paj nqaum nruas yuav hloov ua hnub nyoog ntoo xyom, nej tej suab hu nkauj yuav hloov ua suab nyiav." 7 Ces kuv quaj. Thaum hnub poob qho lawm, kuv mus khawb tau ib lub qhov ntxa, kuv muab tus tuag faus rau hauv. 8 Cov neeg nyob ze kuv luag luag kuv tias : "Saib ! Nws rov qab tsis ntshai lawm. Zaum tas los luag twb tau nrhiav nws tua vim tib zaj no xwb, ces nws twb khiav yuav luag tsis dim. Nyem no, nws tseem rov qab nyiag faus cov neeg tuag dua !"

    NPN 112: 1B-2, 3B-4, 5-6


    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Nws muaj hmoov zoo tus uas hwm HUAB TAIS,
    thiab nyiam coj Huab Tais cov lus qhia tas siab tas ntsws.
    Nws caj ces yuav muaj peev xwm nyob ntiaj teb,
    ntuj yuav foom koob hmoov rau caj ces neeg siab ncaj.

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Nws txoj kev ncaj yuav nyob ruaj nreb mus li.
    Nws ci sawv hauv qhov tsaus ntuj,
    ua lub teeb kaj cov neeg siab ncaj,
    nws muaj lub siab zoo, khuv leej luag, thiab ua ncaj.

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    Tus neeg txawj hlub luag thiab qiv rau luag nws txoj hmoov zoo.
    Nws tswj nws tej nyiaj txiag raws kev ncaj.
    Tus neeg ncaj yuav nyob ruaj nreb,
    sawv daws yuav nco ntsoov txog nws mus li

    Txais: (1b) Tus neeg hwm Huab Tais nws txoj hmoov zoo.
    los: As les lus yas.

    As Les Lus Yas: QYTN 1: 5AB

    Txais: As les lus yas, as les lus yas.

    yes Xus Pleev, koj yog tus tim khawv tseeb,
    koj yog tus tub hlob yug ntawm txoj kev tuag los.
    Koj tau hlub peb thiab thiab muab koj roj ntsha
    los txhiv pev dim ntawm peb cov txhaum.

    R. Alleluia, alleluia.

    Ntawv Moo Zoo: MK 12: 1-12

    1 Yes Xus pib hais tej zaj paj lug li no : "Muaj ib tug neeg cog tau ib daim teb txiv cawv. Nws xov laj kab ncig, nws txaug ib lub zeb tsuam cawv, thiab nws txhim ib lub lawj siab siab. Nws ntiav ib co tub zog saib, ces nws tawm rooj mus ua qhua deb lawm. 2 Thaum txog caij, nws xa ib tug tub txib mus cuag cov zov teb, kom lawv muab ib feem ntawm cov txiv cawv rau nws. 3 Tab sis lawv nthos nkaus tus tub txib, muab nws ntaus tas, kom nws rov qab mus tes dawb tes npliag. 4 Tus tswv teb xa dua ib tug tub txib mus : cov tub zog kuj ntaus nws taub hau thiab ua tub qaug nws. 5 Tus tswv teb rov xa dua ib tug mus : cov tub zog muab tus tub txib ntawd tua. Lawv kuj ua ib yam li ntawd rau ntau tus tub txib, lawv muab ib co ntaus, muab ib co tua. 6 Tus tswv teb tseem tshuav ib tug neeg ntxiv, yog nws tus tub uas nws nyiam. Nws xa tus tub mus tom qab, nws xav tias : ‘Lawv yuav hwm kuv tus tub.’ 7 Tab sis, cov tub zog sib tham tias : ‘Tus ntawd yog tus yuav txais lub cuab tam. Tsuag tsuag ! Peb muab nws tua, lub cuab tam thiaj yuav yog peb tug.’ 8 Ces lawv nthos nkaus nws, muab nws tua thiab coj nws mus pov tseg rau tom ntug teb. 9 Tus tswv teb yuav ua dab tsi ? Nws yuav tuaj muab cov zov teb tua, thiab yuav muab daim teb txiv cawv pub rau lwm cov neeg. 10 Nej tsis tau nyeem cov lus no hauv Ntawv lod : ‘Lub pob zeb uas cov tub txhim tsev muab pov tseg, hloov ua lub pob zeb txheem ru tsev. 11 Qhov ntawd, yog Huab Tais ua thiaj tau li ntawd, yog ib yam zoo kawg rau peb qhov muag ntsia?’” 12 Lawv to taub tias Yes Xus zaj paj lug no tsom lawv hais. Lawv nrhiav kev ntes Yes Xus, tab sis lawv ntshai tsoom sid. Ces lawv tso Yes Xus tseg, lawv rov mus.

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 7:33 am

    TIM 6 LUB 6 HLI 2017

    Hnub Peb Lis Piam Cuaj Nruab Xyoo A Nruab Lis Piam Xyoo I

    Hwm LN Norbert

    Zaj Nyeem Ib: TOS NPIS 2: 9-14


    9 Hmo ntawd, kuv da dej tas, kuv mus nraum peb lub tshav, kuv mus pw ntawm taw ntsa loog; sov sov ces kuv pw tsis npog ntsej muag. 10 Kuv tsis paub tias nyob ncaj saum qhov chaw kuv pw, muaj ib co noog ua zes rau saum phab ntsa. Txawm muaj ib tawb quav noog poob nthav sov so los rau hauv kuv ob lub qhov muag. Kuv ob lub qhov muag thiaj hlav tej daim dawb dawb. Kuv coj mus rau cov kws tshuaj kho ib tug dhau ib tug; tab sis lawv yim muab lawv cov tshuaj rau mas yim haj yam mob loj tuaj xwb, ces thaum kawg kuv cia li ua neeg dig muag. Kuv tsis pom kev li ntawd tau plaub xyoos, kuv cov kwv tij nrog kuv tu siab kawg. As His Kas yug kuv tau ob xyoos ces nws mus dua Es Lis Mais teb lawm. 11 Thaum ntawd kuv poj niam thiaj As Nas mus ua hauj lwm, nws muab plaub yaj los tooj ua xov thiab nws ntos ntaub rau cov neeg tuaj kom nws ntos. 12 Thaum ntos tau lawm nws xa mua rau lawv ces lawv them nqi rau nws. Hnub tim 7 lub peb hlis, kuv poj niam ua tiav ib tug ntaub thiab xa rau cov tswv. Lawv them nqe rau nws tas tib si thiab lawv tseem pub ib tug tshis rau nws coj los tua noj. 13 Thaum nws nkag los tsev, tus tshis txawm quaj. Kuv hu kuv poj niam tias: "Tus tshis ntawd los qhov twg los ? Tej zaum ntshai yog nyiag los xwb mas coj rov mus rau nws tus tswv. Peb tsis muaj cai noj tej yam nyiag los." 14 Kuv poj niam hais tias : "Yog lawv pub rau kuv, ntxiv kuv tus nqi zog xwb !" Kuv tsis ntseeg, kuv kom kuv poj niam cab rov mus rau cov tswv, vim tias kuv pab kuv poj niam txaj muag heev. Ces kuv poj niam teb tias : "Koj tej kev niaj hnub pub rau luag dua twg lawd? Koj tej kev niaj hnub ua zoo zoo xwb dua twg tas lawd? Sawv daws paub ntsoov tias koj tau dab tsi vim tej ntawd ntag los mas."

    NPN 112: 1-2, 7-8, 9


    Txais: (7bc) Tus neeg ncaj lub siab ruaj nreb tso siab lug rau Huab Tais.
    los: As les lus yas.

    Nws muaj hmoov zoo tus uas hwm HUAB TAIS,
    thiab nyiam coj Huab Tais cov lus qhia tas siab tas ntsws.
    Nws caj ces yuav muaj peev xwm nyob ntiaj teb,
    ntuj yuav foom koob hmoov rau caj ces neeg siab ncaj.

    Txais: (7bc) Tus neeg ncaj lub siab ruaj nreb tso siab lug rau Huab Tais.
    los: As les lus yas.

    Nws tsis ntshai hnov ib tsab xov phem;
    nws lub siab ruaj nreb, nws tso siab rau HUAB TAIS.
    Nws lub siab khob kho, nws tsis txhawj,
    nws yuav tsa taub hau siab saib nws cov yeeb ncuab.

    Txais: (7bc) Tus neeg ncaj lub siab ruaj nreb tso siab lug rau Huab Tais.
    los: As les lus yas.

    Nws siab dav, nws pub ntau rau cov pluag :
    nws txoj kev siab dav siab ncaj yuav nyob mus li,
    nws yuav muaj ntsej muag, nws lub koob meej yuav nrov.

    Txais: (7bc) Tus neeg ncaj lub siab ruaj nreb tso siab lug rau Huab Tais.
    los: As les lus yas.

    As Les Lus Yas: ES FES XOS 1: 17-18

    Txais: As les lus yas, as les lus yas.

    Thov kom peb tus Huab Tais Yes Xus Pleev leej Txiv
    tso qhov pom kev ci tuaj kaj peb cov qhov muag hauv peblub siab,
    kom peb pom tias txoj kev tso siab uas
    Tswv Ntuj hu nej los nyob hauv, zoo npaum li cas,

    Txais: As les lus yas, as les lus yas.

    Ntawv Moo Zoo: MK 12: 13-17


    13 Ob peb tug Fas Lis Xais thiab Hes Los Dias raug luag xa tuaj lem Yes Xus kom nws hais lus yuam kev. 14 Lawv tuaj txog, lawv hais rau Yes Xus tias : "Xib Hwb, peb paub tias koj yog ib tug neeg hais qhov tseeb, thiab koj tsis tsa leej twg cai, vim koj tsis saib tib neeg sab nraud. Koj tsuas qhia Tswv Ntuj txoj kev raws qhov tseeb xwb. Puas kheev them se rau Xes Ntxas los tsis kheev ? Peb puas yuav tsum them se los tsis them ?" 15 Tab sis Yes Xus paub tias lawv siab nkhaus, ces nws hais rau lawv tias : "Ua cas nej xav sim kuv ? Muab ib lub txiaj nyiag los rau kuv saib." 16 Lawv muab ib lub txiaj nyiag los, Yes Xus thiaj hais rau lawv tias : "Tus duab no yog leej twg tus ? Thiab cov npe ntawv hauv no yog leej twg li ?" Lawv hais rau Yes Xus tias : "Yog Xes Ntxas li." 17 Ces Yes Xus hais rau lawv tias : "Yam twg yog Xes Ntxas tug, ces nej muab rau Xes Ntxas, yam twg yog Tswv Ntuj tug, mas nej muab rau Tswv Ntuj." Ces lawv nyob hab nuv cia, tsis paub xav dab tsi txog nws.

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 7:36 am

    TIM 7 LUB 6 HLI 2017

    Hnub Plaub Lis Piam Cuaj Nruab Xyoo A Nruab Lis Piam Xyoo I

    Zaj Nyeem Ib: TOS NPIS 3: 1-11A, 16-17A


    1 Ces tu kuv siab tas nrho, kuv xyu tej suab thiab kuv kua muag poob. Kuv thiaj hais zaj teev Ntuj no tias : 2 "HUAB TAIS, koj siab ncaj, koj ua qhov twg yog qhov ncaj. Koj tej kev tsuas yog txiaj ntsim thiab qhov tseeb xwb. Koj yog tus txiav txim rau lub ntiaj teb. 3 Vim li no, thov koj nco txog kuv, Huab Tais, thov koj tig saib kuv. Koj tsis txhob rau txim rau kuv vim kuv tej kev txhaum los tej kev yuam kev los vim kuv cov yawg koob tej kev txhaum. Vim peb tau ua txhaum rau koj, 4 peb tau hla koj tej lus qhia, ces koj tau tso peb raug luag tuaj lwg peb, raug luag tuaj cab peb mus kaw, thiab raug luag tua, raug luag hais, raug luag thuam thiab cem nyob hauv cov haiv neeg uas koj muab peb cais mus nyob. 5 Koj tej kev txiav txim rau kuv yeej tseeb thaum koj muab txim rau kuv vim kuv tej kev txhaum thiab kuv cov yawg koob tej kev txhaum. 6 Nyem no, thov koj ua rau kuv raws li koj nyiam. Thov koj thau kuv txoj sia mus. Kuv xav dim ntawm lub ntiaj teb no mus, kuv xav rov qab mus ua av. Yog kuv tuag mas zoo dua kuv ciaj. Rau qhov kuv raug lawv lam tau lam cem kuv, tu kuv siab loj tas nrho ! HUAB TAIS, kuv tos koj tuaj cawm kuv ntawm txoj kev txom nyem no. Thov koj cia kuv mus nyob lub teb chaws kuv yuav so mus li. HUAB TAIS, thov koj tsis txhob fee koj lub ntsej muag rau kuv. Vim kuv tuag zoo dua cia kuv ua neej raug txom nyem loj npaum no thiab cia kuv hnov luag cem kuv.”
    7 Tib hnub ntawd, Xas Las uas yog Las Nkus Es tus ntxhais nyob Es Npas Tas Nas nyob Mes Dias teb kuj raug nws txiv ib tug ntxhais txib thuam nws thiab. 8 Vim tias lawv twb muab nws pub tshoob rau xya tus txiv lawm, tab sis tus dab phem As Mos Des uas nws phem tshaj plaws hauv cov dab phem, muab nws cov txiv tua tuag tas tib si, tsis pub lawv tau nrog Xas Las pw ua niam txiv raws tus kev cai li. Ces tus ntxhais txib tseem hais tias : "Twb yog koj muab koj cov txiv tua xwb los mas ! Koj yuav txiv xya zaus lawm, koj txoj hmoov tsis zoo ib zaug li ! 9 Tsis yog vim koj cov txiv tuag tas ces koj txawm muaj cai rau txim rau peb ! Koj cia li mus raws koj cov txiv qab mas ! Kom xwv peb tsis txhob tau pom koj ib tug tub los ib tug ntxhais li !" 10 Hnub ntawd, Xas Las tu siab loj, nws quaj. Nws nce mus saum nws txiv lub paim, nws npaj tias nws yuav mus dai tuag nyob saud. Tab sis nws ho xav tau tias : "Tsam luag tej yuav cem kuv txiv ne? Lawv yuav hais tias : 'Koj muaj ib tug nyuag ntxhais rau koj hlub xwb, koj tseem tsis muaj hmoo, nws tseem dai tuag lawm thiab !' Kuv tsis xav ua kom kuv txiv tu siab li ntawd thaum nws yav laus no mus txog hnub nws tuag. Ntshai zoo dua kom kuv txhob dai tuag, tiam sis kuv yuav thov HUAB TAIS ua kom kuv tuag, kom kuv thiaj tsis hnov luag tej thuam kuv ntxiv." 11 Tam sim ntawd, Xas Las tsa tes tig mus ntawm qhov rais, nws thov Ntuj tias : "HUAB TAIS ,thov kom koj nto koob meej, Tswv Ntuj khuv leej neeg, kom koj lub npe ntshiab nto koob meej. Thov kom koj nto koob meej nyob hauv koj tej dej num mus ib txhiab ib txhis!”
    16 Hnub ntawd, Tos Npis thiab Xas Las nkawd ob zag thov ntuj nce mus txog pem Tswv Ntuj lub hwj chim. 17 Tswv Ntuj thiaj xa Las Fais tuaj kho nkawd ob leeg. Las Fais yuav tuaj laws tej yam dawb dawb nyob hauv Tos Npis qhov muag kom nws rov pom kev tuaj; thiab nws yuav tuaj muab Las Nkus Es tus ntxhais Xas Las txis rau Tos Npis tus tub Tos Npias ua poj niam; thiab nws tuaj cawm Xas Las ntawm tus dab phem As Mos Des uas phem tshaj plaws lwm cov dab.

    NPN 25: 2-3, 4-5AB, 6+7BC, 8-9

    Txais: (1) Huab Tais, kuv tsa kuv tus ntsuj plig tuaj rau koj.

    Kuv tso siab rau koj, thov koj tsis txhob cia kuv poob ntsej muag,
    txhob pub kom kuv cov yeeb ncuab tau kev thuam kuv.
    Cov neeg tso siab rau koj, tsis muaj ib tug yuav poob ntsej muag,
    hos cov neeg ntxeev siab rau kev ntseeg yuav poob ntsej muag.

    Txais: (1) Huab Tais, kuv tsa kuv tus ntsuj plig tuaj rau koj.

    Huab Tais, thov rub kuv mus rau hauv koj tej kev,
    thov qhia koj tej kev rau kuv taug,
    txhawb kom kuv mus raws koj txoj kev tseeb thiab qhia rau kuv kawm,
    vim koj yog Tswv Ntuj, tus cawm kuv.

    Txais: (1) Huab Tais, kuv tsa kuv tus ntsuj plig tuaj rau koj.

    Huab Tais, koj yeej ib txwm muaj lub siab zoo,
    thiab muaj kev hlub txij puag thaum ub los, thov koj nco ntsoov.
    Huab Tais, vim koj lub siab hlub neeg,
    thov koj nco txog kuv.

    Txais: (1) Huab Tais, kuv tsa kuv tus ntsuj plig tuaj rau koj.

    Huab Tais yog tus ncaj tus zoo,
    nws thiaj coj tus neeg txhaum rov los rau txoj kev zoo.
    Nws coj tus neeg me mus raws txoj kev ncaj,
    nws qhia nws txoj kev rau tus neeg txom nyem taug.

    Txais: (1) Huab Tais, kuv tsa kuv tus ntsuj plig tuaj rau koj.

    As Les Lus Yas: ZAM 11: 25A, 26

    Txais: As les lus yas, as les lus yas.

    Huab Tais hais tias: Kuv yog txoj kev sawv rov los thiab txoj sia,
    leej twg ntseeg txog kuv yuav tsis tuag li.

    Txais: As les lus yas, as les lus yas.

    Ntawv Moo Zoo: MK 12: 18-27

    18 Ib co xas dus kais tuaj cuag Yes Xus. Lawv yog cov uas hais tias neeg tuag yuav tsis sawv rov los. Lawv nug Yes Xus tias : 19 "Xib Hwb, Mais Xes sau cia rau peb tias : "Yog leej twg ib tug kwv tij tuag tseg poj niam cia, tsis tau muaj me nyuam, mas tus kwv yuav tsum qaws tus niam tij kom tsa tau tus kwv tij ntawd lub keeb sawv." 20 Muaj xya leej kwv tij. Thawj tug yuav poj niam, nws tuag, tsis tau muaj tub ki. 21 Tus ob qaws tus niam tij ntawd, nws kuj tuag tsis tau muaj tub ki ; tus peb kuj tuag ib yam li ntawd. 22 Xya leej kwv tij ntawd yeej tsis muaj tub ki li. Thaum lawv tuag tas lawm, tus poj niam kuj tuag thiab. 23 Txog caij neeg lub cev sawv rov los, lawv kuj yuav sawv rov los, mas tus poj niam ntawd yuav yog leej twg tus ? Vim lawv xya tus kwv tij puav leej tau yuav nws ua lawv poj niam." 24 Yes Xus hais rau lawv tias : "Puas yog vim nej tsis paub Ntawv Ntshiab thiab tsis paub Tswv Ntuj lub hwj huam, nej thiaj yuam kev ? 25 Vim tias, thaum neeg lub cev yuav sawv hauv cov tuag los, sawv daws yuav tsis yuav poj niam, tsis yuav txiv, sawv daws yuav zoo li cov Tshiab nyob saum ntuj. 26 Hais txog cov tuag kev sawv rov los, nej puas tau nyeem Mais Xes phau Ntawv, zaj hais txog Tsob Pos, uas Tswv Ntuj hais rau Mais Xes tias : Kuv yog Has Nplas Has tus Tswv Ntuj, His Xas Has tus Tswv Ntuj, Yas Kos tus Tswv Ntuj. 27 Tswv Ntuj tsis yog cov tuag tus Tswv Ntuj. Yog cov neeg ciaj tus Tswv Ntuj. Nej yuam kev lawm deb."

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 7:39 am

    TIM 8 LUB 6 HLI 2017

    Hnub Tsib Lis Piam Cuaj Nruab Xyoo A Nruab Lis Piam Xyoo I

    Zaj Nyeem Ib: TOS NPIS 6: 10-11; 7: 1BCDE, 9-17; 8: 4-9A


    6 10 Thaum tus tshiab Las Fais thiab Tos Npias mus txog Mes Dias teb lawm thiab mus yuav txog Es Npas Tas Nas,
    11 tus tshiab hais rau Tos Npias tias: “Tus kwv Tos Npias!” Nws teb tias: “Dab tsi?” Tus tshiab hais tias: “Hmo no wb yuav mus pw hauv Las Nkes tsev; nws yog koj ib tug txheeb ze. Nws muaj ib tug ntxhais hu ua Xas Las.”
    7 1b… Ces nws coj tus hluas mus tom Las Nkes tsev; nkawd pom Las Nkes zaum ntawm lub rooj vag ntawm nws lub ntsa vaj. Nkawd xub hu nws. Nws teb nkawd tias: “Neb tuaj los ob tug kwv tij! Nyob zoo rau neb thiab os, los tsev mas!” Ces nws coj nkawd los hauv nws tsev.
    9 Las Nkes ntes ib tug yaj los tua, nws ua ib pluag mov txais nkawd zoo. Thaum nkawd da dej ntxuav cev tas, nkawd los noj mov, Tos Npias hais rau Las Fais tias : "Tij laug As Ntxas Lias, thov koj pab kuv mus thov Las Nkes kom nws muab kuv tus muam Xas Las rau kuv yuav yuad?' 10 Las Nkes hnov nws cov lus no, Las Nkes hais rau nws tias : "Hmo no koj noj mov haus dej kom txaus txaus tso ! Koj tsis txhob txhawj, cav tsis muaj leej twg muaj cai yuav yuav kuv tus ntxhais Xas Las, tsuas yog koj tib leeg xwb os, tus kwv. Txawm li cas los kuv yeej muab tsis tau rau lwm tus, vim koj twb yog tus ze nws tshaj lawm. Tiam sis, me tub ! Kuv yuav hais tseeb tseeb rau koj. 11 Kuv twb nrhiav nyob hauv peb cov kwv tij xya tus txiv rau nws lawm. Tab sis cov txiv ntawd puav leej tuag tas tib si thawj hmo thaum lawv nyuam qhuav nkag kiag rau nws chav pw. Ua li mas nyem no koj rau siab noj thiab haus tso mog ! HUAB TAIS yuav pub nws lub txiaj ntsim rau koj thiab nws txoj kev kaj lug rau koj xwb." Tos Npias txawm teb tias : "Kuv tsis xav noj tsis xav haus li, yog koj tsis xub hais tias koj yuav muab rau kuv thiab tsis muab tso." Las Nkes thiaj teb tias: “Cia ua li koj nyiam, vim raws Mais Xes txoj Cai ces nws yeej poob rau koj, yog lub ntuj txiav kom muab rau koj. Ces kuv muab koj tus muam cob rau koj. Txij no mus koj yog nws tus nus thiab nws yog koj tus muam. Nws yog koj tug txij hnub no mus li lawm. Tus Tswv saum lub Ntuj yeej yuav saib xyuas koj hmo no os me tub, thiab yuav muab nws txoj koob hmoov thiab nws txoj kev kaj siab lug rau koj.” 12 Las Nkes hu nws tus ntxhais Xas Las los, nws muab tus ntxhais txhais tes cob rau Tos Npias, nws hais tias : "Kuv muab kuv tus ntxhais cob rau koj. Mais Xes Txoj Cai thiab tus txhooj yeej qhaib nws los ua koj poj niam lawm. Koj yuav nws, koj coj nws mus nrog koj nyob hauv koj txiv tsev, koj ua siab loj loj. Thov kom Tswv Ntuj pub neb rov mus txog tsev, mus dawb mus huv mog !" 13 Las Nkes hais rau nws poj niam kom mus muab ib kauj ntawv los rau nws sau. Ces Las Nkes sau ntawv cog lus cia tias nws muab nws tus ntxhais rau Tos Npias yuav ua poj niam raws li Mais Xes kev cai. 14 Ua li ntawd tas sawv daws thiaj noj mov haus dej. 15 Las Nkes hu nws poj niam Es Nas los thiab hais tias : "Leej muam, koj npaj kem tsev ob, koj coj wb tus ntxhais mus pw hauv." 16 Es Nas mus kho tau chaw raws li nws tus txiv hais kom kho, nws los coj nws tus ntxhais mus pw. Nws quaj quaj rau tus ntxhais tas, nws so kua muag thiab nws hais tias : "Kuv me ntxhais, koj tso siab mog ! Tswv Ntuj yuav hloov koj txoj kev tu siab los ua kev zoo siab mog ! Ua siab loj loj!" Ces leej niam tawm los.
    8 4 Thaum tus ntxhais niam thiab txiv tawm hauv chav los thiab kaw qhov rooj rau lawm, Tos Npias sawv tsees saum txaj los, nws hais rau Xas Las tias: "Leej muad, wb sawv ! Wb ob leeg yuav tsum teev Ntuj tso, wb yuav thov kom HUAB TAIS pub nws lub txiaj ntsim pab wb thiab kom nws pov hwm wb." 5 Ces Xas Las sawv thiab nkawd ob leeg teev Ntuj thov kom Tswv Ntuj pov hwm nkawd. Tos Npias thiaj pib hais tias : "Peb cov yawg koob tus Tswv Ntuj, thov kom koj nto koob meej, thiab kom koj lub npe ntoo koob meej mus txheej dhau txheej ! Kom cov txheej ntuj saud thiab tas txhua tsav yam koj tau tsim los cav txog koj lub koob meej mus txheej dhau txheej. 6 Koj yog tus tsim As Das, koj yog tus tsim Es Vas nws poj niam kom ua tus pab nws tus txhawb nws, ces caj ces tib neeg thiaj yug ntawm nkawd ob leeg los. Koj yog tus hais tias : 'Yuav tsis txhob cia txiv neej nws nyob nws ib leeg, peb yuav tsim ib tug los pab nws kom zoo li nws.' 7 Nyem no kuv yuav kuv tus muam no, tsis yog kuv yuav los ua si. Kuv yuav vim kuv musj lub siab dawb paug hlub nws tiag. Thov koj hlub nws thiab hlub kuv. Thiab thov koj pub wb ua wb lub neej laus nkoos ua ke!" 8 Nkawd ob leeg ua ke teb tias : "Ua li ! Ua li!" 9 Ces nkawd mus pw ib hmos.

    NPN 128: 1-2, 3, 4-5

    Txais: (1a) Cov uas hwm Huab Tais tau txoj hmoov zoo.

    Nej cov hwm HUAB TAIS, nej txoj hmoov zoo,
    thiab nej cov taug raws nws txoj kev!
    Vim nej yuav tau noj lub txiv ntawm nej tej hauj lwm,
    nej yuav tau hmoov zoo thiab nws yuav nyiam nej.

    Txais: (1a) Cov uas hwm Huab Tais tau txoj hmoov zoo.

    Kuj tus poj niam yuav zoo li ib txoj hmab txiv cawv txi txiv ncw
    nyob rau hauv koj tej kaum vaj kaum tsev,
    koj cov me nyuam zoo li ib co ntoo txiv roj
    nyob ncig lees koj lub phaj tsum.

    Txais: (1a) Cov uas hwm Huab Tais tau txoj hmoov zoo.

    Nej saib, tus neeg muaj txoj hmoov zoo
    yog tus ntshai HUAB TAIS.
    HUAB TAIS nyob saum roob Xis Yoos foom koob hmoov rau nej,
    kom nej tau pom Yes Lus Xas Les vam meej niaj hnub hauv nej lub neej.

    Txais: (1a) Cov uas hwm Huab Tais tau txoj hmoov zoo.

    As Les Lus Yas: 2 TMT 1: 10

    Txais: As les lus yas, as les lus yas.

    Yes Xus Pleev tus Cawm Peb tau rhuav txoj kev tuag pov tseg
    thiab ua kom txoj sia nyob mus li tawm tuaj nyob hauv lub Moo Zoo.

    Txais: As les lus yas, as les lus yas.

    Ntawv Moo Zoo: MK 12: 28-34

    28 Ib tug kws Ntawv Ntshiab hnov lawv sib cav, nws pom tias Yes Xus teb raug kawg rau cov xas dus kais, nws txav los nug Yes Xus tias : "Nyob hauv cov lus qhia tas huv tib si, lo lus qhia twg yog thawj lo lus qhia ?" 29 Yes Xus teb rau nws tias : "Thawj lo lus qhia yog lo lus no : "His Xas Lais, koj mloog mog ! Peb tus Huab Tais Tswv Ntuj tib leeg xwb yog Huab Tais. 30 Koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog. 31 Lo lus qhia ob yog lo lus no : Koj yuav nyiam tus nyob ze koj ib yam li koj nyiam koj. Tsis muaj lwm lo lus qhia loj dua ob lo lus no." 32 Tus kws Ntawv Ntshiab hais rau Yes Xus tias : "Koj hais raug kawg, Xib Hwb, koj hais qhov tseeb : muaj ib tug Huab Tais Tswv Ntuj xwb, tsis muaj dua lwm tus Tswv Ntuj dhau ntawm nws. 33 Kev nyiam Tswv Ntuj tas yus lub siab lub ntsws, tas yus lub tswv yim thiab tas yus lub zog, thiab nyiam tus nyob ze yus ib yam li yus nyiam yus, yog zoo tshaj tej tsiaj hlawv thiab tej thaj txi Ntuj huv tib si." 34 Yes Xus pom tus kws Ntawv Ntshiab txhab ib lo lus thoob tsib, ces nws hais rau tus kws Ntawv Ntshiab tias : "Koj nyob tsis deb ntawm Tswv Ntuj lub Ceeb Tsheej lawm." Ces tsis muaj leej twg muaj cuab kav nug Yes Xus ntxiv.

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 7:42 am

    TIM 9 LUB 6 HLI 2017

    Hnub Rau Lis Piam Cuaj Xyoo A Nruab Lis Piam Xyoo I

    Hwm LN Ephrem

    Zaj Nyeem Ib: TOS NPIS 11: 5-17


    5 As Nas zaum ntsia ntsoov txoj xub ke uas nws tus tub yuav rov los. 6 Nws ntsia pom deb zoo li yog nws tus tub, nws hais rau leej txi tias : "Koj tus tub nrog tus ua nws luag los txog lawm !" 7 Thaum nkawd los tsis tau txog ntawm nws txiv tsev, Las Fais hais rau Tos Npias tias : "Kuv hais rau koj tias koj txiv yuav rov pom kev tuaj. 8 Koj yuav muab lub tsib ntses los pleev nws qhov muag. Cov tshuaj yuav tom me ntsis ces yuav muaj tej daim tawv dawb dawb me me nti ntawm nws lub qhov muag los. Ces koj txiv yuav tsis dig muag ntxiv, nws yuav rov qab pom kev tuaj." 9 Tos Npias niam khiav khiav tuaj puag lias nws tus tub caj dab, nws hais tias: "Nyem no, kuv tuag kuj tau, kuv rov tau pom koj lawm !" Ces nws niam quaj ! 10 Tos Npis sawv tuaj, nws maub dawm ub dawm no, tab sis nws kuj xuas hla tuaj dhau lub qhov rooj loog thiab. Tos Npias taug kev los ntsib nws, 11 Tos Npias nqa lub tsib ntses ntawm tes. Nws tshuab pa rau nws txiv qhov muag thiab nws tuav nws txiv ruaj ruaj, nws hais tias : "Txiv, koj txhob ntshai !" Ces nws muab lub tsib ntses pleev nws txiv qhov muag, nws tos ib me ntsis, 12 ces nws xuas nws ob txhais tes mus nti daim tawv me me ntawm nws txiv lub kaum muag los. 13 Nws txiv puag lias nws tus tub caj dab 14 thiab nws txiv quaj. Nws txiv hais tias : "Me tub, tus uas yog kuv qhov pom kev, kuv pom koj lawm ! " Tos Npis tseem hais ntxiv tias : "Tswv Ntuj nto meej nto moo ! Nws lub npe loj tas nrho nto meej nto moo! Nws cov tshiab nto meej nto moo! Nws lub npe loj tas nrho nto meej nto moo mus tiam dhau tiam! 15 Vim nws tau muab kev txom nyem rau kuv, thiab nws kuj tau hlub kuv. Nyiam no, kuv tau pom kuv tus tub Tos Npias lawm tiag !" Tos Npias chaws mus hauv tsev, nws tsa suab hlo nrov nrov cav txog Tswv Ntuj vim nws zoo siab. Thiab nws tham qhia nws txiv tias nws tau mus kev zoo thiab nws nqa tau cov nyiaj los lawm. Nws twb yuav tau poj niam lawm thiab, nws yuav Las Nkes tus ntxhais hu ua Xas Las. Xas Las lawv nws qab los txog tsis deb cov rooj loog Nis Nis Vas lawm. 16 Ces Tos Npis sawv tsees mus tos nws tus nyab nyob ntawm cov rooj loog Nis Nis Vas. Nws mus, nws cav txog Tswv Ntuj vim nws zoo siab. Thaum cov neeg nyob Nis Nis Vas pom tsis muaj neeg tuav nws tes mus kev thiab pom nws rov muaj zog zoo li thaum ub, mas lawv poob siab. 17 Tos Npis hais rau lawv tias yog Tswv Ntuj tau hlub nws thiab rov qhib nws qhov muag lawm. Ces Tos Npis mus txog ntawm Xas Las, uas yog Tos Npias poj niam, nws foom lus zoo rau Xas Las tias : "Me ntxhais, kuv zoo siab tos txais koj! Koj tus Tswv Ntuj nto koob meej, vim nws tau tso koj los nrog peb nyob ! Thov kom koj txiv tau txoj hmoov zoo thiab kom kuv tus tub Tos Npias thiab koj, neb tau txoj hmoov zoo mog! Me ntxhais, koj los nyob hauv koj tsev, thov kom koj tau txoj hmoov zoo thiab kev zoo siab ! Los tsev, me ntxhais!" Hnub ntawd, tas cov neeg Yus Das nyob Nis Nis Vas zoo siab.

    NPN 146: 1B-2, 6C-7, 8-9A, 9BC-10

    Txais: (1b) Kuv tus plig, koj cav lus zoo txog HUAB TAIS !
    los: As les lus yas.

    Kuv tus plig, koj cav lus zoo txog HUAB TAIS !
    Kuv yuav cav txog HUAB TAIS tas kuv sim neej,
    kuv yuav ntaus paj nruag rau kuv tus Tswv Ntuj
    thaum kuv tseem muaj sia nyob.

    Txais: (1b) Kuv tus plig, koj cav lus zoo txog HUAB TAIS !
    los: As les lus yas.

    nws pheej xeeb mus ib txhiab ib txhis :
    cov raug luag quab yuam, nws tsa lawv cai.
    nws pub mov rau cov neeg tshaib noj.
    HUAB TAIS tso cov neeg raug txim

    Txais: (1b) Kuv tus plig, koj cav lus zoo txog HUAB TAIS !
    los: As les lus yas.

    HUAB TAIS qhib cov dig muag qhov muag,
    HUAB TAIS tsa cov khoov nkoos kom sawv ntseg,
    HUAB TAIS nyiam cov neeg ncaj.
    HUAB TAIS pov hwm cov pej kum neeg .

    Txais: (1b) Kuv tus plig, koj cav lus zoo txog HUAB TAIS !
    los: As les lus yas.

    Nws txhawb tus ntsuag nos thiab tus poj ntsuam,
    nws mooj tus siab phem ob txhais taw kom yuam kev.
    HUAB TAIS yuav ua vaj mus li; Xis Yoos,
    koj tus Tswv Ntuj ua vaj mus txheej dhau txheej ! As les lus yas!

    Txais: (1b) Kuv tus plig, koj cav lus zoo txog HUAB TAIS !
    los: As les lus yas.

    As Les Lus Yas: ZAM 14: 23

    Txais: As les lus yas, as les lus yas.

    Yog leej twg nyiam kuv, nws yuav coj rawv kuv lo lus,
    ces kuv Txiv yuav nyiam nws.
    Kuv Txiv wb yuav ua tsev nyob hauv nws.

    Txais: As les lus yas, as les lus yas.

    Ntawv Moo Zoo: MK 12: 35-37

    35 Thaum Yes Xus qhia hauv lub Tuam Tsev Teev Ntuj, nws hais tias : "Vim li cas cov kws Ntawv Ntshiab thiaj hais tias Leej Pleev yog Das Vis tub ?
    36 Tab sis Leej Ntuj Plig tshoj Das Vis kom nws hais cov lus no : Huab Tais hais rau kuv tus Huab Tais tias : Koj zaum ntawm kuv sab xis, mus txog hnub kuv muab koj cov yeeb ncuab rau hauv koj qab xib taws.
    37 Das Vis hu Leej Pleev ua Huab Tais ; ua cas Leej Pleev ho yog Das Vis tub thiab ?" Ces tsoom neeg coob zoo siab mloog Yes Xus.


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th June 2017, 7:47 am


    TIM 10 LUB 6 HLI 2017

    Hnub Xya Lis Piam Cuaj Nruab Xyoo A Nruuab Lis Piam Xyoo I

    Zaj Nyeem Ib: TOS NPIS 12: 1, 5-15, 20


    1 Thaum lawv los ua tshoob hauv tsev tas lawm, Tos Npis hu nws tus tub Tos Npias los, hais rau nws tias : "Me tub, koj yuav nco ntsoov them nqi rau tus ua koj luag. Koj yuav muab tshaj tus nqi uas peb tau hais tseg."
    5 Tos Npias hu tus ua nws luag los, Tos Npias hais rau nws tias : "Koj yuav ib nrab tej yam uas koj tau thauj los, koj ua siab kaj lug rov mus mog !" 6 Ces Las Fais coj nkawd ob leeg mus ntawm ib qho chaw xu me ntsis, nws hais rau nkawd tias : "Nej ua Tswv Ntuj tsaug, nej cav txog nws rau tsoom neeg ciaj mloog tias nws tau ua zoo rau nej npaum li cas. Nej qhuas txog nws thiab hu nkauj cav txog nws lub npe. Nej qhia rau txhua leej neeg paub txog Tswv Ntuj tej dej num raws li tsim nyog lawv yuav tsum paub txog. Nej tsis txhob nkees ua nws tsaug. 7 Yeej phim yuav tsum nrog tus vaj zais nws tej lus npog cia, tiam sis Tswv Ntuj tej hauj lwm mas yuav tsum muab tshaj tawm kom sawv daws paub txog. Nej ua nws tsaug kom tsim nyog. Nej ua qhov zoo ces yuav tsis muaj qhov phem tuaj raug nej. 8 Txoj kev teev ntuj nrog kev yoo mov thiab txoj kev pub rau luag nrog kev ncaj ncees muaj nqes dua txoj kev nplua nuj nrog kev ua txhaum. Xyaum pub rau luag muaj nqes dua khaws ib niag pob kub cia. 9 Txoj kev pub rau luag cawm yus ntawm txoj kev tuag thiab ntxuav yus tej txhaum tas huv si. Cov neeg pub rau luag yuav ua neej nyob ntev niaj ntau hnub. 10 Cov neeg ua txhaum thiab ua phem lob kev puas tsuaj rau lawv. 11 Kuv yuav qhia qhov tseeb rau neb, yuav tsis zais ib yam dab tsi. Kuv twb hais rau neb lawm hais tias tsim nyog yuav nrog tus vaj khaws nws tej lus npog cia, tiam sis kuj tsim nyog yuav tsum tshaj Tswv Ntuj cov hauj lwm tawm thiab. 12 Nyem no, neb yuav paub tias, thaum koj thiab Xas Las neb tab tom teev Ntuj, mas yog kuv cev thiab kuv nyeem neb zaj thov nyob ntawm Huab Tais lub hwj chim. Thaum koj mus faus cov neeg tuag los kuj yog kuv cev koj cov yeeb koob rau Ntuj. 13 Thaum koj tsis ua xyem xyav, koj cia li tso diav plhuav sawv tsees mus faus ib tug neeg tuag, los kuj yog Ntuj xa kuv tuaj sim koj lub siab ntseeg. 14 Thiab yog Tswv Ntuj xa kuv tuaj kho koj kom zoo hlo thiab kho koj tus nyab Xas Las. 15 Kuv yog Las Fais, yog ib tug ntawm xya leej Tshiab uas chaws mus nyob ntawm Tswv Ntuj lub hwj chim tsob hwb nws.
    20 Yog li, nej cav txog Huab Tais nyob ntiaj teb no thiab ua Tswv Ntuj tsaug. Kuv yuav nce rov mus cuag tus uas tau xa kuv tuaj. Nej yuav tsum muab tas puas tsav yam tshwm sim rau nej sau cia.”

    NPN: Tos Npis 13: 2, 6efgh, 7, 8

    Txais: (1b) Peb cav txog Tswv Ntuj tus uas nyob mus li.

    Nws nplua neeg thiab nws kuj khuv leej neeg;
    nws muab neeg thawb kom poob lawm puag dab nriag teb,
    thiab nws kuj npo neeg puag hauv lub qhov ntuj tob tawm los.
    Tsis muaj leej twg yuav khiav dim tau ntawm nws txhais tes.

    Txais: (1b) Peb cav txog Tswv Ntuj tus uas nyob mus li.

    Nej yuav saib tas puas tsav yam nws tau ua rau nej,
    ces nej tsa suab nrov nrov cav txog nws.
    Nej cav lus zoo txog tus Huab Tais muaj kev ncaj ncees,
    thiab nej qhuas txog tus Vaj kav cov caij nyoog.

    Txais: (1b) Peb cav txog Tswv Ntuj tus uas nyob mus li.

    Txawm kuv raug mus nyob txim rau pej kum teb,
    kuv yuav ua Huab Tais tsaug;
    kuv yuav tshaj tawm txog nws lub hwj huam thiab hwj chim
    Rau ib haiv neeg txhaum paub.

    Txais: (1b) Peb cav txog Tswv Ntuj tus uas nyob mus li.

    Tas nej cov uas nws tau xaiv, nej cav txog Huab tais,
    tas nej sawv daws cav txog nws lub hwj chim.
    Nej qee tej lub hnub nyoog los ua kev zoo siab, cav txog nws.

    Txais: (1b) Peb cav txog Tswv Ntuj tus uas nyob mus li.

    As Les Lus yas: MT 5: 3

    Txais: As les lus yas, as les lus yas.

    Cov pluag hauv nruab siab lawv txoj hmoov zoo,
    vim Ntuj lub Ceeb Tsheej yog lawv li.

    Txais: As les lus yas, as les lus yas.

    Ntawv moo Zoo: MK 12: 38-44

    38 Thaum Yes Xus qhia sawv daws, nws tseem hais tias : "Nej ceev faj rau cov kws Ntawv Ntshiab. Lawv nyiam hnav tej lub tsho ntev ua zam piav yeev. Lawv nyiam kom luag hawm lawv tom tej tshav puam. 39 Lawv nyiam zaum cov rooj kim txwv pem hauv ntej hauv tsev txoos, thiab thawj cov rooj zaum thaum lawv noj nqaij haus cawv. 40 Lawv dhuas cov poj ntsuam lub cuab tam nqos tas. Tsis kav lawv ua txuj hais tej zaj teev ntuj ntev. Lawv yuav raug txiav txim hnyav dua." 41 Yes Xus zaum ncaj rau lub txhab ceev nyiaj. Nws ntsia zeej tsoom tso lawv cov txiaj toog rau hauv lub txhab ceev nyiaj. Cov nplua nuj coob leej tso nyiaj ntau rau hauv. 42 Muaj ib tug poj ntsuam pluag tuaj tso ob lub txiaj toog me me, tsis muaj nqi dab tsi. 43 Ces Yes Xus hu cov thwj tim los ze nws, nws hais rau lawv tias : "Kuv hais tseeb rau nej, tus poj ntsuam no pluag, tab sis nws tso nyiaj ntau dua cov uas tau tso nyiaj rau hauv lub txhab ceev nyiaj huv tib si. 44 Vim tas cov neeg tso nyiaj ntawd, rho lawv tej nyiaj seem mus tso, hos tus poj ntsuam ntawd rho nyiaj hauv nws txoj kev pluag los : nws rho tas nrho nws lub cuab tam, uas nres nws txoj sia los tso rau hauv."


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 11th June 2017, 3:46 pm

    TIM 12 LUB 6 HLI 2017

    Hnub Ob Lis Piam Kaum Nruab Xyoo A Nruab Lis Piam Xyoo I

    Zaj Nyeem Ib: 2 KOS LIS NTHOS 1: 1-7


    1 Kuv, Paj Lug, tus uas Tswv Ntuj pom zoo tsa ua Yes Xus Pleev ib tug Hauv Paus Xa Lus nrog tus kwv Tis Mos Tes, sau ntawv rau Tswv Ntuj lub Koom Txoos nyob Kos Lis Nthos, thiab rau cov ntshiab nyob As Kas Yas teb tib si. 2 Thov kom peb Txiv Tswv Ntuj thiab Huab Tais Yes Xus Pleev pub txiaj ntsim thiab kev thaj yeeb tuaj rau nej. 3 Peb cav lus zoo txog Tswv Ntuj, uas yog peb tus Huab Tais Yes Xus Pleev Leej Txiv, yog Leej Txiv khuv leej neeg, yog tus Tswv Ntuj nplij sawv daws. 4 Nws nplij peb nyob hauv peb txoj kev txom nyem, kom peb nplij luag tej nyob hauv lawv txoj kev txom nyem thiab, vim peb xub tau txais Tswv Ntuj cov lus nplij. 5 Leej Pleev txoj kev txom nyem tuaj raug peb ntau ; tab sis, vim Leej Pleev, mas peb kuj tau txais kev nplij ntau kawg thiab. 6 Tab yog peb raug txom nyem, los tsuas yog raug kom nej tau txais kev nplij thiab kev cawm. Thaum peb txais kev nplij, los cov lus nplij peb kuj ua kom nej txais kev nplij thiab : kev nplij yuav ua kom nej ua siab ntev ris txoj kev txom nyem, ib yam li peb ua siab ntev ris. 7 Thaum peb xav txog nej, mas peb tso siab ruaj nreb rau nej. Peb paub tias nej nrog peb ris kev txom nyem, mas nej kuj yuav nrog peb txais kev nplij.

    NPN 34: 2-3, 4-5, 6-7, 8-9

    Txais: (9a) Nej saj ces nej yuav pom Huab Tais lub siab zoo.

    Kuv yuav cav txog HUAB TAIS txhua lub sij hawm;
    nws lub koob meej yuav nyob rawv ntawm kuv lub ncauj.
    Kuv tus plig tau koob meej nyob hauv HUAB TAIS;
    kom tus neeg me hnov thiab zoo siab.

    Txais: (9a) Nej saj ces nej yuav pom Huab Tais lub siab zoo.

    Nej nrog kuv cav txog HUAB TAIS lub koob meej,
    peb sawv daws ua ke qhuas nws lub npe.
    Kuv nrhiav HUAB TAIS, nws tau teb kuv,
    thiab tau cawm kuv ntawm kuv tej kev ntshai.

    Txais: (9a) Nej saj ces nej yuav pom Huab Tais lub siab zoo.

    Nej vam txog nws ces nej yuav zoo siab luag ntxhi,
    nej ntsej muag yuav tsis liab vim nej tau txaj muag.
    Thaum tug neeg pluag hu, HUAB TAIS hnov,
    thiab yuav cawm nws ntawm tas nws tej kev nyuaj.

    Txais: (9a) Nej saj ces nej yuav pom Huab Tais lub siab zoo.

    HUAB TAIS tus tshiab tsa tsev tsam phooj ncig
    cov neeg hwm HUAB TAIS, nws cawm lawv.
    Nej saj ces nej yuav pom HUAB TAIS lub siab zoo npaum li cas.
    Hmoov zoo rau tus muab HUAB TAIS ua nws lub chaw nkaum !

    Txais: (9a) Nej saj ces nej yuav pom Huab Tais lub siab zoo.

    As Les Lus Yas: MT 5: 12A

    Txais: As les lus yas, as les lus yas.

    Nej yuav zoo siab thiab hom khaj,
    vim nej yuav tau txais koob haum loj nyob saum ntuj.

    Txais: As les lus yas, as les lus yas.

    Ntawv Moo Zoo: MT 5: 1-12

    1 Yes Xus pom neeg coob coob tuaj, nws nce mus saum lub roob. Nws zaum. Cov thwj tim txav los ze Yes Xus. 2 Ces Yes Xus tsa ncauj qhia lawv hais tias : 3 "Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li. 4 Cov tau txoj hmoov zoo, yog cov siab zoo, vim lawv yuav txais lub ntiaj teb los ua lawv tug. 5 Cov tau txoj hmoov zoo, yog cov quaj ntsuag, vim Ntuj yuav nplij lawv. 6 Cov tau txoj hmoov zoo, yog cov tshaib thiab nqhis txoj kev ncaj, vim Ntuj yuav daws lawv qhov nqhis. 7 Cov tau txoj hmoov zoo, yog cov hlub luag tej, vim Ntuj yuav hlub lawv. 8 Cov tau txoj hmoov zoo, yog cov siab huv, vim lawv yuav pom Tswv Ntuj. 9 Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam. 10 Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug. 11 Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo. 12 Nej zoo siab thiab nej hom khaj mog, vim nej yuav tau txais koob haum loj nyob saum ntuj. Cov yaj saub ua nej ntej, kuj raug luag hiam zoo li ntawd thiab.


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 12th June 2017, 12:25 pm

    TIM 13 LUB 6 HLI 2017

    Hnub Peb Lis Piam Kaum Nruab Xyoo A Nruab Lis Piam Xyoo I

    Hwm LN Anthony nyob Padua

    Zaj NYeem Ib: 2 Kos Lis Nthos 1: 18-22


    Paj Lug sau tias:
    18 Ib yam li Tswv Ntuj yog tus tsis dag, peb cov lus rau nej kuj tsis ib txhij muaj lo lus ‘tau’ thiab ‘tsis tau.’ 19 Vim Tswv Ntuj Leej Tub Yes Xus Pleev, uas Xis Vas Nus thiab Tis Mos Tes thiab kuv peb tshaj rau nej paub, mas nws tsis ib txhij muaj ‘tau’ thiab ‘tsis tau,’ nyob hauv Yes Xus tsuas muaj qhov ‘tau’ xwb. 20 Nyob hauv Yes Xus tas nrho Tswv Ntuj cov lus nws tau cog txhua lo muaj qhov “tau” huv tib si; thiab kuj yog nrog Yes Xus, peb thiaj hais tau lo lus tias ‘Ua li’ rau Tswv Ntuj los cav txog nws lub koob meej. 21 Tus ua kom peb nrog nej nyob ruaj nreb hauv Leej Pleev, thiab tus tau pleev roj rau peb, yog Tswv Ntuj. 22 Nws tau muab nws lub thwj los ntaus cim rau peb, thiab nws tau tso Leej Ntuj Plig los nyob hauv peb ua puav pheej txog txhua yam nws npaj rau peb .

    NPN 119: 129, 130, 131, 132, 133, 135

    Txais: (135a) Huab Tais, cia koj lub ntsej muag ci tuaj rau kuv.

    Koj tej lus qhuab qhia zoo tas nrho,
    vim li ntawd kuv thiaj mloog.

    Txais: (135a) Huab Tais, cia koj lub ntsej muag ci tuaj rau kuv.

    Koj cov lus tawm tuaj ci kom pom kev,
    ua kom cov neeg me txawj to taub.

    Txais: (135a) Huab Tais, cia koj lub ntsej muag ci tuaj rau kuv.

    Kuv huas pa rua ncauj hlo,
    Vim kuv tshaib koj cov lus qhia.

    Txais: (135a) Huab Tais, cia koj lub ntsej muag ci tuaj rau kuv.

    Thov koj tig los saib kuv thiab khuv leej kuv,
    ib yam li koj tig los rau cov neeg nyiam koj lub npe.

    Txais: (135a) Huab Tais, cia koj lub ntsej muag ci tuaj rau kuv.

    Thov koj hwj kuv txhais taw kom ruaj khov raws li koj tau cog lus,
    txhob kheev kom kev phem tuaj tswj tau kuv.

    Txais: (135a) Huab Tais, cia koj lub ntsej muag ci tuaj rau kuv.

    Thov cia koj lub ntsej muag ci tuaj rau koj tus tub txib
    thiab qhia koj cov kev cai lij choj rau kuv.

    Txais: (135a) Huab Tais, cia koj lub ntsej muag ci tuaj rau kuv.

    As Les Lus Yas: MT 5: 16

    Txais: As les lus yas, as les lus yas.

    Cia nej qhov pom kev ci nyob ntawm zeej tsoom xub ntiag,
    kom lawv pom nej cov dej num zoo, ces lawv yuav cav txog nej Txiv nyob saum ntuj.

    Txais: As les lus yas, as les lus yas.

    Ntawv Moo Zoo: MT 5: 13-16

    Yes Xus hais tias:
    13 "Nej yog cov ntsev las lub ntiaj teb. Tab sis yog ntsev tsuag lawm, yuav muab dab tsi ua kom ntsev rov qab daw tuaj ? Ntsev tsuag tsis zoo ua dab tsi, tsuas kawg muab pov tseg nraum zoov rau neeg tsuj xwb. 14 "Nej yog qhov pom kev ci rau lub ntiaj teb. Ib lub nroog txhim rau saum ib lub ncov roob, yuav muab zais tsis tau. 15 Hos, luag kuj tsis taws teeb coj mus zais rau hauv qab txee, luag muab txawb saum tus ncej teeb, lub teeb ci rau tas cov neeg nyob hauv tsev pom kev. 16 Li ntawd, nej qhov pom kev yuav tsum ci nyob ntawm zeej tsoom xub ntiag, kom lawv pom nej cov dej num zoo, ces lawv yuav cav txog nej Txiv nyob saum ntuj.

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 13th June 2017, 4:55 pm

    TIM 14 LUB 6 HLI 2017

    Hnub Plaub Lis Piam Kaum Nruab Xyoo A Nruab Lis Piam Xyoo I

    Zaj Nyeem Ib: 2 KLN 3: 4-11

    4 Peb ntseeg khov ntseeg ruaj li ntawd nyob ntawm Tswv Ntujxub ntiag, vim Leej Pleev. 5 Tsis yog vim tias ntawm peb tus kheej peb muaj peev xwm ua tau tej yam uas peb yuav khav tau tias yog peb ua tawm hauv peb los; tiam sis peb muaj peev xwm ua tau tej yam yog tuaj ntawm Tswv Ntuj tuaj. 6 Nws pub kom peb muaj peev xwm lis txoj kab xwm saib kev cog lus tshiab,uas tsis yog ib txog kev cog lus nyob hauv ntawv,yog ib txog kev cog lus nyob hauv Leej Ntuj Plig: Vim ntawv txawj tua neeg, hos Leej Ntuj Plig pub txoj sia rau neeg. 7 Yog tias txoj kab xwm coj kevtuag, uas lawv txaug rau saum daim txiag zeb, twb muaj hwj chim loj npaum no, ua kom cov tub ki His Xas Lais ntsia tsis taus Mais Xes lub ntsej muag vim nws lub ntsej muag muaj hwj chim, txawm tias yog ib lub hwj chim kav ib pliag xwb, 8 mas txoj kab xwm coj Leej Ntuj Plig haj yam yuav tsum muaj hwj chim loj tshaj ntawd ! 9 Yog tias txoj kab xwm muab txim rau neeg twb muaj hwj chim, mas txoj kab xwm muab kev ncaj ncees haj yam muaj hwj chim loj tshaj. 10 Yog peb muab lub hwj chim hauv txoj kab xwm qub los piv rau lub hwj chim hauv txoj kab xwm tshiab, mas txoj kab xwb qub tsis muaj hwj chim dab tsi li : 11 vim tias yog yam uas yuav dua sai twb tawm tuaj muaj hwj chim, mas yam uas yuav nyob mus li, haj yam yuav tsum muaj hwj chim!

    NPN 99: 5, 6, 7, 8, 9

    Txais: (9c) Huab Tais, peb tus Tswv Ntuj yog tus ntshiab.

    Nej qhuas, nej khav txog HUAB TAIS, peb tus Tswv Ntuj,
    nej pe nws ntawm nws lub rooj tiag taw !
    Nws ntshiab tiag!

    Txais: (9c) Huab Tais, peb tus Tswv Ntuj yog tus ntshiab.

    Mais Xes thiab As Loos nkawd yog ob tug hauv nws tsoom leej choj,
    Xas Muas yog ib tug hauv cov uas vam txog nws lub npe;
    thaum lawv hu txog HUAB TAIS, nws teb lawv.

    Txais: (9c) Huab Tais, peb tus Tswv Ntuj yog tus ntshiab.

    HUAB TAIS nyob hauv tus ncej huab nrog lawv tham;
    Lawv coj nws tej lij choj thiab txoj cai nws muab rau lawv.

    Txais: (9c) Huab Tais, peb tus Tswv Ntuj yog tus ntshiab.

    HUAB TAIS, peb tus Tswv Ntuj, koj teb rau lawv,
    koj yog ib tug Tswv Ntuj siab ntev rau lawv,
    tab sis koj rau txim rau lawv vim lawv cov txhaum.

    Txais: (9c) Huab Tais, peb tus Tswv Ntuj yog tus ntshiab.

    Nej qhuas txog HUAB TAIS, peb tus Tswv Ntuj ;
    nej pe nws nyob saum nws lub roob ntsiab,
    vim HUAB TAIS peb tus Tswv Ntuj ntshiab tiag !

    Txais: (9c) Huab Tais, peb tus Tswv Ntuj yog tus ntshiab.

    As Les Lus Yas: NPN 25: 4B, 5A

    Txais: As les lus yas, as les lus yas.

    Kuv tus Tswv Ntuj, qhia koj txoj kev rau kuv taug,
    thiab coj kuv mus nyob hauv koj txoj kev tseeb.

    Txais: As les lus yas, as les lus yas.

    Ntawv Moo Zoo: MT 5: 17-19

    Yes Xus hais rau nws cov thwj tim tias:
    17 Nej txhob xav tias kuv tuaj rhuav Txoj Cai thiab cov Yaj Saub : kuv tsis tuaj rhuav, kuv tuaj qhia ntxiv kom thoob. 18 Vim tias qhov kuv hais rau nej muaj tseeb : lub ntuj lub teb yuav dua, tab sis tsis muaj ib tug txwm ntawv, los ib lub cim ntawv me me hauv Txoj Cai yuav ploj. Tas ib puas tsav yam nyob hauv Txoj Cai yuav tsum tshwm sim tuaj tso. 19 Tus twg hla ib txog cai me, thiab nws qhia kom luag ua xws li nws, mas Ntuj yuav saib tus ntawd qis tshaj cov nyob hauv Ntuj lub Ceeb Tsheej. Hos tus ua rawsTxojCai tas huv si, thiab nws qhia kom luag ua xws li nws, Ntuj yuav saib nws yog tus loj nyob hauv Ntuj lub Ceeb Tsheej.

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1910
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 14th June 2017, 12:13 pm

    TIM 15 LUB 6 HLI 2017

    Hnub Tsib Lis Piam Kaum Nruab Xyoo A Nruab Lis Piam Xyoo I

    Zaj Nyeem Ib: 2 KLN 3: 15—4:1, 3-6


    Brothers and sisters:
    To this day, whenever Moses is read,
    a veil lies over the hearts of the children of Israel,
    but whenever a person turns to the Lord the veil is removed.
    Now the Lord is the Spirit and where the Spirit of the Lord is,
    there is freedom.
    All of us, gazing with unveiled face on the glory of the Lord,
    are being transformed into the same image from glory to glory,
    as from the Lord who is the Spirit.

    Therefore, since we have this ministry through the mercy shown us,
    we are not discouraged.
    And even though our Gospel is veiled,
    it is veiled for those who are perishing,
    in whose case the god of this age
    has blinded the minds of the unbelievers,
    so that they may not see the light of the Gospel
    of the glory of Christ, who is the image of God.
    For we do not preach ourselves but Jesus Christ as Lord,
    and ourselves as your slaves for the sake of Jesus.
    For God who said, Let light shine out of darkness,
    has shone in our hearts to bring to light
    the knowledge of the glory of God
    on the face of Jesus Christ.

    NPN 85: 9AB+10, 11-12, 13-14

    Txais: (10b) HUAB lub hwj chim yuav tuaj nyob hauv peb lub teb chaws.

    Kuv yuav hnov tias Tswv Ntuj tshaj tawm txog dab tsi;
    Huab Tais, nws tshaj tawm txog kev thaj yeeb rau nws haiv neeg.
    Cov neeg hwm HUAB TAIS tau nws txoj kev cawm nyob ze ze lawv,
    nws lub hwj chim yuav nyob txawm hauv peb lub teb chaws.

    Txais: (10b) HUAB lub hwj chim yuav tuaj nyob hauv peb lub teb chaws.

    Kev siab zoo thiab thiab kev tseeb yuav tuaj sib ntsib,
    kev ncaj thiab kev thaj yeeb yuav los sib puag.
    Kev tseeb yuav tawm hauv av los,
    thiab kev ncaj yuav dauv muag ntsia saum ntuj tuaj

    Txais: (10b) HUAB lub hwj chim yuav tuaj nyob hauv peb lub teb chaws.

    HUAB TAIS kiag yuav pub nws txoj kev nplua nuj,
    ces peb lub teb chaws yuav ntsu qoob.
    Kev ncaj yuav taug kev ua nws ntej,
    kev cawm yuav taug kev raws nws txoj lw.

    Txais: (10b) HUAB lub hwj chim yuav tuaj nyob hauv peb lub teb chaws.

    As Les Lus Yas: JN 13: 34

    Txais: As les lus yas, as les lus yas.

    Kuv muab ib lo lus qhia tshiab rau nej:
    Nej yuav ib leeg hlub ib leeg raws li kuv tau hlub nej.

    Txais: As les lus yas, as les lus yas.

    Ntawv Moo Zoo: MT 5: 20-26

    Yes Xus hais rau nws cov thwj tim tias:
    20 "Kuv hais rau nej : yog nej tsis ua siab ncaj dua cov Kws Ntawv Ntshiab thiab cov Fas Lis Xais, mas nej yuav mus tsis tau hauv Ntuj lub Ceeb Tsheej. 21 "Nej hnov cov lus qhia rau nej cov laus thaud tias : ‘Koj tsis txhob tua neeg. Tus twg tua neeg, nws yuav raug luag txiav txim rau nws.’ 22 Hos kuv mas kuv hais rau nej: Leej twg npau taws rau nws tus kwv tij, mas nws yuav raug txim ntawm tsev hais plaub. Yog nws hais rau nws tus kwv tij tias "Niag ruam !" mas nws yuav raug txim ntawm lub rooj txwj laus Xas Nes Nrees. Yog nws hais rau nws tus kwv tij tias : "Niag vwm", mas nws yuav raug txim nyob hauv dab phem cov hluav taws. 23 Thaum koj cev ib co txim rau saum lub thaj txi Ntuj, yog koj nco dheev tias koj tus kwv tij tau muaj lus tsis zoo rau koj lawm, 24 mas koj cia li tso koj cov txim rau ntawm lub thaj txi Ntuj, koj mus nrog koj tus kwv tij hais kom haum tso, koj mam rov los cev koj cov txim. 25 Thaum koj nrog tus neeg ntxub koj tseem ua ke mus kev, koj kav tsij nrog nws hais kom haum, tsam nws coj koj mus kom rau tus txiav txim, ces tus txiav txim muab koj cob rau tub ceev xwm kom muab koj kaw hauv tsev loj faj. 26 Kuv hais tseeb rau koj tias, koj yuav tawm tsis tau hauv tsev loj faj los, mus txog thaum koj rho nyiaj qab nas txog npib kawg nkaus mus them tas rau tso.”




    Sponsored content

    Re: COV ZAJ NYEEM NRUAB LIS PIAM XYOO I 2016-2017

    Post  Sponsored content


      Current date/time is 18th August 2017, 2:30 pm