Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» SAJ YES XUS KEV TXOM NYEM
by Bao X Mary Yesterday at 1:41 pm

» COV ZAJ NYEEM NRUAB LIS PIAM XYOO I 2016-2017
by Mim 24th March 2017, 2:57 pm

» COV ZAJ NYEEM HNUB CHIV XYOO A 2016-2017
by NrhiavTswvNtuj 23rd March 2017, 9:26 pm

» XH. Yaj Zoov Ntxheb lub Tsev THOOB TSIB
by Maiv Tooj 23rd March 2017, 9:15 pm

» XH.Zoov Ntxheb Yaj Nthuav Ntawv Ntshiab.
by Maiv Tooj 23rd March 2017, 9:10 pm

» MOO QAIJ QAUG
by Maiv Tooj 18th March 2017, 12:17 pm

» Thov Leej Ntshiab YOS XES
by Maiv Tooj 9th March 2017, 12:30 am

» Tshuaj NTSUAB
by Lajpovyaj 3rd March 2017, 4:48 am

» Hnub Txais Tshauv thiab Caij 40
by Mim 28th February 2017, 10:38 am

» TP.Txhiaj Foom lub TSEV Ntawv
by Maiv Tooj 21st February 2017, 8:04 am

» Xib Hwb Thoj Xyooj lub neej
by Maiv Tooj 13th February 2017, 11:15 am

» COV ZAJ NYEEM RAU TEJ HNUB TSHWJ XEEB
by Mim 24th January 2017, 5:06 pm

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM XYOO I 2016-2017

    Share
    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 23rd January 2017, 6:59 pm

    TIM       24      LUB      1       HLIS       2017

    Hnub Peb Lis Piam Peb Nruab Xyoo A Nruab Lis Piam Xyoo I

    Hwm LN  Francis de Sales, ua Tswv Qhia

    Zaj Nyeem Ib:      HES NPLAWS  10:   1-10


    1 Vim Txoj Cai tsuas yog tus duab zeem txog tej yam zoo uas yuav muaj tuaj yav pem suab xwb, tsis yog kiag tej yam ntawd, mas Txoj Cai thiaj ua tsis tau kom cov neeg uas tuaj cuag Tswv Ntuj dawb huv tas huv si, txawm tias lawv niaj xyoo txi Ntuj raws nraim li lawv ib txwm ua xyoo dhau xyoo los lawm. 2 Yog tias Txoj Cai ua tau kom neeg dawb huv tas huv si, mas lawv yuav tsis tas txi Ntuj ntxiv, vim tias lawv txi ib zaug xwb ces lawv tsis pom tias lawv muaj txhaum ntxiv lawm. 3 Tiam sis qhov tseeb yog qhov tias, niaj xyoo thaum lawv txi Ntuj mas ua rau lawv rov nco txog lawv cov txhaum.  4 Vim ntshav nyuj ntshav tshis tsis muaj hwj huam daws txhaum tau. 5 Vim li ntawd, thaum Leej Pleev los nyob ntiaj teb no, nws thiaj hais tias : “Cov thaj txi Ntuj thiab cov paj tshab, koj tsis xav yuav, koj thiaj puab ib lub cev rau kuv.  6 Cov thaj hlawv tsiaj thiab cov thaj txi Ntuj them txim txhaum, koj tsis zoo siab txais. 7 Kuv thiaj hais tias : ‘Tswv Ntuj, cia kuv tuaj, vim qhov kauj ntawv sau tseg yog sau hais txog kuv, cia kuv tuaj ua raws li koj nyiam.’ ”  8 Leej Pleev tau pib hais txog tias : “Cov thaj txi Ntuj, cov paj tshab, cov thaj hlawv tsiaj, cov thaj txi Ntuj them txim txhaum, koj tsis xav yuav tsis zoo siab txais,”  txawm tias tej ntawd twb yog tej yam uas Txoj Cai qhia kom ua.  9 Ces Leej Pleev hais ntxiv tias : “Cia kuv tuaj ua raws li koj nyiam.” Li ntawd, nws rhuav thawj txoj cai thiab tsa ib txog tshiab los hloov. 10 Vim nws ua raws li Tswv Ntuj nyiam ces peb thiaj ntshiab tuaj thaum nws muab nws lub cev txi rau ntuj, nws tsuas txi ib zaug xwb tau lawm.

    NPN    40:   2+4AB, 7-8A, 10, 11

    Txais:   (8a+9a) Kuv nyob ntawm no HUAB TAIS, kuv tuaj ua raws li koj nyiam.

    Kuv tau tso siab tos ntsoov HUAB TAIS,  
    nws tau khoov qis qis los rau kuv thiab mloog kuv.
    Nws tau muab ib zaj nkauj tshiab rau kuv qhov ncauj,
    ib zaj nkauj hu rau Tswv Ntuj.

    Txais:   (8a+9a) Kuv nyob ntawm no HUAB TAIS, kuv tuaj ua raws li koj nyiam.

    Thaj txi ntuj thiab paj tshab koj tsis ntshaw,
    tiam sis koj muab ib lub pob ntseg mloog lus rau kuv.
    Cov tsiaj hlawv thiab cov thaj txi ntuj them txim txhaum, koj tsis xav tau,
    kuv thiaj hais tias:  “Ntawm no, kuv tuaj lawm.”

    Txais:   (8a+9a) Kuv nyob ntawm no HUAB TAIS, kuv tuaj ua raws li koj nyiam.

    Kuv tau tshaj txog koj txoj kev ncaj rau cov neeg coob tuaj sib txoos;
    kuv tsis tau kaw qhov ncauj; HUAB TAIS, koj yeej paub.

    Txais:   (8a+9a) Kuv nyob ntawm no HUAB TAIS, kuv tuaj ua raws li koj nyiam.

    Koj txoj kev ncaj kuv tsis tau muab zais cia rau nruab siab;
    kuv tau hais txog koj txoj kev pheej xeeb thiab koj txoj kev cawm,
    kuv tsis tau zais koj lub siab zoo thiab koj txoj kev tseeb
    kuv tau qhia rau pab neeg coob coob paub.

    Txais:   (8a+9a) Kuv nyob ntawm no HUAB TAIS, kuv tuaj ua raws li koj nyiam.

    As Les Lus Yas:      MT  11: 25

    Txais:   As les lus yas, as les lus yas. lleluia, alleluia.

    Peb cav txog koj, Leej Txiv, HUAB TAIS kav lub ntuj lub teb,
    koj tau qhia tej yam tob txog Ntuj Ceeb Tsheej rau cov neeg me.

    Txais:   As les lus yas, as les lus yas.

    Ntawv Moo Zoo:     MK  3:   31-35

    31 Yes Xus niam thiab nws cov kwv tij tuaj txog ntawm  lub tsev, lawv nyob nraum zoov, lawv kom luag mus hu Yes Xus. 32 Muaj ib pab neeg zaum ncig Yes Xus, lawv hais rau nws tias : "Koj niam nrog koj cov kwv tij thiab cov muam tuaj nyob nraud, lawv nrhiav koj." 33 Yes Xus teb rau lawv tias : "Leej twg yog kuv niam ? Leej twg yog kuv kwv tij ?" 34 Yes Xus ntsia cov neeg zaum ncig nws, nws hais tias : "Kuv niam thiab kuv cov kwv tij nyob ntawm no. 35 Leej twg ua raws li Tswv Ntuj lub siab, tus ntawd yog kuv ib leeg kwv tij, ib leeg muam thiab ib leeg niam."


    Last edited by Mim on 29th January 2017, 3:02 pm; edited 3 times in total
    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 24th January 2017, 5:07 pm

    TIM 25 LUB 1 HLIS 2017

    Hnub Plaub Lis Piam Peb Nruab Xyoo A Nruab Lis Piam Xyoo I

    Nco txog Hnub LN Paj Lug Tig Los Ntseeg

    Zaj Nyeem Ib: HAUJ LWM 22: 3-16


    3 Paj Lug hais rau cov neeg li no:
    "Kuv yog ib tug Yus Das. Kuv yug los nyob Tas Xis nyob Xis Lis Xias teb. Tab sis kuv tuaj hlob nyob hauv lub tsheej no. Nkas Mas Lias yog kuv tus xib hwb, nws qhia kuv kom ua raws nraim peb cov yawg koob Txoj Cai. Mas kuv yeej kub siab lug rau Tswv Ntuj ib yam li nej nyem no. 4 Kuv tau hiam Txoj Kev no kom txog qhov tuag, kuv tau muab saw hlau los khi poj niam txiv neej huv tib si, thiab coj lawv mus pov rau hauv tsev loj faj. 5 Tus thawj leej choj thiab pab txwj laus tib si puav leej ua tim khawv pom kuv tau ua li ntawd tiag. Kuv tseem tau txais lawv ib co ntawv hais txog cov kwv tij nyob Das Mas thiab. Ces kuv thiaj sawv kev mus lawm tid, kuv npaj siab mus khi cov nyob Das Mas coj los rau txim nyob Yes Lus Xas Les. 6 Kuv tseem tab tom mus kev, tshuav tsis deb yuav txog Das Mas, thaum ntawd twb yuav tav su, cia li muaj ib qho pom kev ci dawb paug loj loj tuaj saum ntuj tuaj vij kuv. 7 Kuv poob nthav pem teb, kuv hnov ib lub suab hais rau kuv tias : 'Xauv, Xauv, vim li cas koj hiam kuv ?' 8 Kuv teb tias : 'Huab Tais, koj yog leej twg ?' Ces nws teb kuv tias : 'Kuv yog tus Yes Xus Nas Xas Les uas koj hiam.' 9 Cov neeg nrog kuv kuj pom qhov pom kev ci dawb loj loj thiab, tab sis lawv tsis hnov lub suab hais lus rau kuv. 10 Kuv hais ntxiv tias : 'Huab Tais, kuv yuav tsum ua dab tsi ?' Huab Tais thiaj hais rau kuv tias : 'Koj sawv, koj mus Das Mas. Mus txog tod, mas lawv mam qhia rau k0oj txog tas puas tsav yam Ntuj yeej npaj rau koj lawm uas kom koj yuav tsum ua.' 11 Thaum ntawd kuv tsis pom kev kiag li, vim qhov pom kev ci loj ntawd fam kuv qhov muag lawm. Kuv cov phooj ywg thiaj tuav kuv tes, coj kuv mus txog Das Mas. 12 Nyob ntawd muaj ib tug hu ua As Nas Nias, nws yog ib tug neeg hwm Ntuj raws li Txoj Cai; cov Yus Das nyob hauv lub tsheej ntawd sawv daws hais lus zoo txog nws. 13 Nws tuaj xyuas kuv, nws sawv ze ntawm kuv, nws hais rau kuv tias : 'Xauv, kuv tus kwv, koj rov pom kev mog.' Kuv cia li pom nws tam sim ntawd. 14 Nws hais ntxiv tias : 'Peb cov yawg koob tus Tswv Ntuj yeej ib txwm xaiv koj lawm, kom koj paub nws lub siab, kom koj pom tus Siab Ncaj, thiab kom koj hnov lub suab tawm hauv nws lub ncauj los. 15 Vim tias koj yuav tsum ua nws tim khawv nyob ntawm zeej tsoom xub ntiag txog tej yam koj tau pom thiab tau hnov. 16 Ua li mas koj tseem yuav tos dab tsi ntxiv ? Koj kav tsij txais lub cim ntxuav thiab koj hu txog nws lub npe kom nws ntxuav koj cov txhaum pov tseg.' ”

    Los: HAUJ LWM 9: 1-22

    1 Hais txog Xauv, mas nws tsuas niaj hnub xav ntsoov txog qhov hiam thiab tua Huab Tais cov thwj tim nkaus xwb, ces nws mus cuag tus thawj leej choj. 2 Nws thov kom tus thawj leej choj muab ntawv tso cai rau nws mus xyuas hauv cov tsev txoos nyob Das Mas saib puas muaj cov neeg npuab Txoj Kev. Yog muaj, mas nws yuav muab lawv khi cab mus pem Yes Lus Xas Les, tsis hais poj niam los txiv neej li. 3 Thaum nws tab tom taug kev, yuav txog Das Mas, ces ib sij huam, muaj ib qho pom kev ci dawb vog tuaj saum ntuj tuaj ncig nws. 4 Nws ntog rau pem teb, nws hnov ib lub suab hais rau nws tias : "Xauv, Xauv, tim li cas koj hiam kuv?" 5 Xauv teb hais tias : "Huab Tais, koj yog leej twg ?" Lub suab hais tias : "Kuv yog Yes Xus, tus uas koj hiam. 6 Koj sawv, koj mus hauv lub nroog. Yuav muaj neeg qhia koj tias koj yuav ua dab tsi." 7 Cov neeg nrog Xauv ua ke mus, sawv daws nres, lawv ntshai ntshai hais tsis taus ib lo lus : lawv kuj hnov lub suab thiab, tab sis lawv tsis pom dab tsi li. 8 Xauv sawv hauv av los, nws qhov muag rua pliav, tab sis nws tsis pom kev li. Lawv tuav nws tes coj nws mus hauv lub nroog Das Mas. 9 Nws nyob peb hnub, tsis pom kev, tsis noj tsis haus dab tsi li. 10 Nyob Das Mas, muaj ib tug thwj tim hu ua As Nas Nias. Huab Tais yees tawm los hais rau nws tias : "As Nas Nias." As Nas Nias teb tias : "Huab Tais, kuv nyob ntawm no." 11 Huab Tais hais ntxiv tias : "Koj sawv mus, koj mus tom txoj kev uas hu ua Kev Ncaj, koj mus hauv Yus Das tsev, koj nrhiav ib tug neeg hu ua Xauv nyob Tas Xis tuaj. Tam sim no nws tab tom teev Ntuj. 12 Nws pom ib tug txiv neej hu ua As Nas Nias chaws los tsa tes rau saum nws kom nws rov pom kev tuaj." 13 As Nas Nias teb tias : "Huab Tais, kuv tau hnov ntau leej hais tias tus neeg ntawd ua phem kawg rau koj cov Ntshiab nyob Yes Lus Xas Les. 14 Nws tuaj ntawm no, vim nws tau cai ntawm cov leej choj tuaj khi cov neeg uas hu txog koj lub npe tas huv tib si." 15 Tab sis Huab Tais hais rau As Nas Nias hais tias : "Koj mus, vim tus neeg ntawd yog ib lub twj uas kuv xaiv los coj kuv lub Npe mus rau cov neeg teev dab, rau cov vaj, thiab rau cov His Xas Lais. 16 Kuv yuav qhia nws tias nws yuav tsum raug tsim txom npaum li cas vim kuv lub Npe."
    17 As Nas Nias thiaj mus. Nws chaws mus hauv lub tsev ntawd. Nws tsa tes rau saum Xauv, nws hais tias : "Xauv, kuv tus kwv, yog Huab Tais xa kuv tuaj, yog tus Yes Xus uas tau tawm los rau koj pom tom txoj kev uas koj tuaj. Nws xa kuv tuaj kom koj rov qab pom kev, thiab kom koj tau txais Leej Ntuj Plig Ntshiab puv hauv koj.” 18 Tam sim ntawd muaj tej daim zoo li nplai ntses poob ntawm Xauv qhov muag los, ces nws rov qab pom kev. Lawv ua lub cim ntxuav rau nws Tam sim ntawd. 19 Ces nws noj mov, nws rov qab muaj zog tuaj. Xauv nrog cov thwj tim nyob ob peb hnub hauv Das Mas. 20 Ces tam sis ntawd nws cia li mus nyob hauv cov tsev Txoos, thiab pib qhuab qhia txog Jesus, nws tshaj tawm tias Yes Xus yog Tswv Ntuj Leej Tub. 21 Tas tsoom neeg uas tau hnov nws, mas lawv poob siab, lawv hais zom zaws tias : "Tus no tsis yog tus uas nyob Yes Lus Xas Les, nws hiam cov neeg hu txog lub Npe ntawd lod ? Tsis yog nws twb txhob txwm tuaj ntawm no kom tau ntes lawv, muab lawv khi, thiab cab lawv mus rau cov Thawj Leej Choj xwb lod?" 22 Hos Xauv, mas nws muaj zog zuj zus tuaj. Nws nrog cov Yus Das nyob Das Mas sib cav, nws ua pov thawj hais tias Yes Xus yog Leej Pleev tiag.

    NPN 117: 1BC, 2

    Txais: (Mas Kos 16:15) Nej mus thoob qab ntuj, nej tshaj
    lub Moo Zoo rau txhua leej txhua tus.
    los: As les lus yas.

    Tas ib tsoom kuj cuab, nej cav lus zoo txog HUAB TAIS.
    Tas ib tsoom haiv neeg, nej cav txog nws lub hwj chim.

    Txais: (Mas Kos 16:15) Nej mus thoob qab ntuj, nej tshaj
    lub Moo Zoo rau txhua leej txhua tus.
    los: As les lus yas.

    Vim nws lub siab hlub peb nyob ruaj nreb,
    HUAB TAIS lub siab pheej xeeb mus ib txhiab ib txhis.

    Txais: (Mas Kos 16:15) Nej mus thoob qab ntuj, nej tshaj
    lub Moo Zoo rau txhua leej txhua tus.
    los: As les lus yas.

    As Les Lus Yas: ZAM 15: 16

    Txais: As les lus yas, as les lus yas.

    Huab Tais hais tias: Kuv yog tus xaiv nej hauv lub ntiaj teb los
    thiab xa nej mus kom nej txi ib co txiv uas yuav nyob mus li.

    Txais: As les lus yas, as les lus yas.

    Ntawv Moo Zoo: MK 16: 15-18

    15 Yes Xus hais rau nws cov thwj tim tias : "Nej mus thoob qab ntuj, nej tshaj lub Moo Zoo rau txhua leej txhua tus. 16 Tus twg ntseeg thiab txais lub cim ntxuav, mas nws yuav txais kev cawm, hos tus tsis ntseeg yuav raug txim. 17 Cov cim no yuav nrog nraim cov uas ntseeg : lawv hu txog kuv lub npe ces lawv yuav ntiab dab tau, lawv yuav hais tej hom lus tshiab, 18 lawv yuav tuav nab tau thiab yog lawv haus tshuaj lom neeg, tshuaj yuav tsis ua xwv txheej rau lawv; thaum lawv tsa tes rau saum cov neeg mob, mas cov mob yuav zoo."


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 25th January 2017, 8:22 am

    TIM 26 LUB 1 HLIS 2017

    Hnub Tsib Lis Piam Peb Nruab Xyoo A Nruab Lis Piam Xyoo I

    Hwm LN Tis Mos Tes thiab LN Tis Tos, ua Tswv Qhia

    Zaj Nyeem Ib: 2 TMT 1: 1-8


    1 Kuv, Paj Lug, uas yog Yes Xus Pleev ib tug Hauv Paus Xa Lus, vim Tswv Ntuj pom zoo, raws li txoj kev cog lus yuav pub txoj sia uas nyob hauv Yes Xus Pleev, 2 kuv sau ntawv rau Tis Mos Tes, kuv tus tub zoo nyiam; thov kom Leej Txiv Tswv Ntuj, thiab peb tus Huab Tais Yes Xus Pleev khuv leej koj, pub txiaj ntsim thiab kev thaj yeeb rau koj. 3 Kuv ua Tswv Ntuj tsaug, tus Tswv Ntuj uas kuv muaj ib lub siab dawb paug tsob hwb raws li kuv cov poj yawm ib txwm ua los; kuv nco txog koj tsis tseg thaum lub caij kuv teev ntuj, nruab hnub los hmo ntuj. 4 Thaum kuv nco txog koj cov kua muag, mas kuv lub siab xav pom koj, kom kuv rov zoo siab. 5 Kuv nco txog txoj kev ntseeg ncaj ncees, uas nyob hauv koj, yog txoj kev ntseeg uas tau xub nyob hauv koj pog Laus Is, thiab nyob hauv koj niam Aws Nis lawm. Kuv tso siab lug tias txoj kev ntseeg ntawd nyob hauv koj thiab. 6 Yog vim li ntawd, kuv thov ntuas koj, kom koj rov txhib lub txiaj ntsim uas Tswv Ntuj tso rau hauv koj hnub kuv tiag tes rau koj kom sawv. 7 Lub tswv yim uas Tswv Ntuj pub rau peb tsis yog ib lub tswv yim muaj kev ntshai, yog ib lub tswv yim muaj zog, muaj kev nyiam, muaj kev pab yus tswj yus tus kheej. 8 Li ntawd koj yuav tsis txhob txaj muag ua tim khawv txog peb tus Huab Tais los txaj muag vim kuv ua Yes Xus tus neeg raug txim. Tiam sis koj yuav zoo siab raug txom nyem vim lub Moo Zoo, thiab tso siab lug rau Tswv Ntuj lub hwj huam.

    Los: TIS TOS 1: 1-5

    1 Kuv, Paj Lug, Tswv Ntuj ib tug tub txib, thiab Yes Xus Pleev ib tug Hauv Paus Xa Lus, uas coj raws cov neeg Tswv Ntuj xaiv los txais kev ntseeg thiab txais txoj kev paub qhov tseeb uas qhia kev hwm Ntuj, 2 thiab pab kom lawv muaj txoj kev tso siab tias yuav tau txoj sia nyob mus li raws li Tswv Ntuj tsis txawj dag tau cog lus puag thaum ntxov ub lawm. 3 Thaum txog lub caij teem, nws tau tshaj tawm nws lo lus nyob hauv txoj kev qhuab qhia uas nws tau txib kom kuv ua raws li peb tus Tswv Ntuj cawm neeg lo lus qhia. 4 Kuv sau ntawv tuaj rau Tis Tos, kuv ib tug tseem tub nyob hauv peb txoj kev ntseeg. Thov kom Leej Txiv Tswv Ntuj, thiab Yes Xus Pleev, tus cawm peb, pub txiaj ntsim thiab kev thaj yeeb rau koj. 5 Tos kuv tau tso koj tseg nyob Khes Tas, yog vim xav kom koj npaj tej yam tsis muaj kom muaj txhij, thiab xav kom koj tsa ib co leej choj nyob hauv txhua lub nroog, raws li kuv tau qhia koj.

    NPN 96: 1-2A, 2B-3, 7-8A, 10

    Txais: (3) Nej tshaj tswv Ntuj cov hauj lwm loj rau txhua haiv neeg paub.

    Nej hu ib zaj nkauj tshiab rau HUAB TAIS,
    tas ntiaj teb neeg nej hu nkauj rau HUAB TAIS.
    Nej hu nkauj rau HUAB TAIS, nej cav txog nws lub npe.

    Txais: (3) Nej tshaj tswv Ntuj cov hauj lwm loj rau txhua haiv neeg paub.

    Hnub dhau hnub nej tshaj txog nws txoj kev cawm neeg.
    Nej cav txog nws lub koob meej rau cov haiv neeg paub,
    nej cav txog nws cov hauj lwm loj rau txhua xeem neeg hnov.

    Txais: (3) Nej tshaj tswv Ntuj cov hauj lwm loj rau txhua haiv neeg paub.

    Cov yim neeg nyob hauv cov haiv neeg, nej muab rau HUAB TAIS,
    nej muab lub koob meej thiab lo lus qhuas lus cav rau HUAB TAIS
    nej muab rau HUAB TAIS lub koob meej uas phim nws lub npe!

    Txais: (3) Nej tshaj tswv Ntuj cov hauj lwm loj rau txhua haiv neeg paub.

    Nej hais rau cov naiv neeg tias: HUAB TAIS ua vaj.
    Nws tau tsim lub ntiaj teb kom nyob ruaj, muab tshem tsis tau,
    nws tswj cov haiv neeg raws txoj kev ncaj.

    Txais: (3) Nej tshaj tswv Ntuj cov hauj lwm loj rau txhua haiv neeg paub.

    As Les Lus Yas: NPN 119: 105

    Txais: As les lus yas, as les lus yas.

    Koj lo lus yog lub teeb tsom hauv kuv ko taw,
    yog qhov pom kev kaj kuv txoj kev.

    Txais: As les lus yas, as les lus yas.

    Ntawv Moo Zoo: MK 4: 21-25

    21 Yes Xus hais rau nws cov thwj tim tias : "Thaum yus nqa ib lub teeb los, puas yog yuav muab txawb hauv qab txees los hauv qab txag ? Tsis yog yuav muab txawb saum tus ncej teeb lod ?
    22 Vim tsis muaj ib yam zais ntshis cia, uas yuav tsis tshwm rau luag pom, tsis muaj ib yam npog rawv uas yuav tsis tawm los rau luag paub.
    23 Leej twg muaj pob ntseg mloog, mas cia nws mloog !"
    24 Ces nws hais rau lawv tias : “Nej yuav mob siab rau mloog tej yam uas nej hnov ! Nej luj li cas mas Ntuj kuj yuav rov luj li ntawd rau nej, thiab Ntuj tseem yuav muab ntau ntxiv rau nej.
    25 Vim tias tus uas twb muaj lawm, Ntuj yuav pub ntxiv rau nws, hos tus tsis muaj, mas Ntuj tseem yuav rho qhov nws muaj mus thiab.”


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 26th January 2017, 5:04 am

    TIM 27 LUB 1 HLIS 2017

    Hnub Rau Lis Piam Peb Nruab Xyoo A Nruab Lis Piam Xyoo I

    Hwm LN Angela Merici

    Zaj Nyeem Ib: Hes Nplaws 10: 32-39


    32 Nej yuav nco ntsoov txog yav thaum ntxov nej nyuam qhuav los txais txoj kev pom kev, thaum ntawd, nej tau ua siab ntev ris txoj kev sim siab nyob hauv ntau hom kev txom nyem.
    33 Qee zaus nej tau raug luag tab meeg tsawm thiab hiam nej kiag, qee zaus nej tau nrog lwm cov neeg raug tej kev txom nyem ntawd ua ke.
    34 Nej kuj tseem tau nrog cov nyob hauv tsev loj faj raug txom nyem thiab nej tseem zoo siab raug luag tuaj lwg nej tej cuab yeej cuab tam, vim nej paub tias nej muaj ib lub cuab tam zoo tshaj thiab yuav nyob mus li.
    35 Ua li mas nej yuav tsis txhob ntaus siab me kiag li, vim nej yeej yuav tau txais paj tshab loj.
    36 Nej yuav tsum ua siab ntev nyiaj ntxiv tas zog, mas nej thiaj ua tau raws li Tswv Ntuj lub siab nyiam, ces nej yuav tau txais raws li Tswv Ntuj tau cog lus.
    37 “Vim tias tshuav tsis ntev lawm, yeej tshuav tsis ntev li lawm, ces tus yuav tuaj, nws yuav tuaj txog, nws yuav tsis ncua ntev.
    38 Kuv tus neeg siab ncaj yuav tsum ua neej muaj kev ntseeg. Tab sis yog nws ntxeev siab mas kuv lub siab yuav tsis nyiam nws.”
    39 Ntawm peb mas peb tsis yog cov neeg ntxeev siab thiab mus taug kev ploj, peb yog cov neeg uas ntseeg ruaj mus taug txoj kev cawm peb tus ntsuj plig.

    NPN 37: 3-4, 5-6, 23-24, 39-40

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    Nej tso siab rau HUAB TAIS thiab ua qhov zoo,
    ces nej yuav tau nyob hauv lub teb chaws thiab muaj noj nrog kev tso siab.
    Nej zoo siab nyob hauv HUAB TAIS,
    ces nws yuav pub rau nej raws nej lub siab ntshaw.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    Muab nej txoj kev taug tso rau HUAB TAIS ua tus saib;
    nej tso siab rau nws ces nws yuav pab.
    Nws yuav ua kom txoj kev ncaj ncees sawv tuaj ziab nej li qhov pom kev;
    ces nej txoj kev yeej yuav ci npaum thaum tav su nrig.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    HUAB TAIS ua kom ib tug neeg tshais ruam muaj zog,
    thiab HUAB TAIS pom zoo txoj kev nws taug.
    Txawm nws ntog, nws yuav tsis pw nthi,
    vim HUAB TAIS txhais tes txheem nws.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    Txoj kev cawm tus neeg ncaj tuaj ntawm HUAB TAIS tuaj,
    nws yog lawv lub chaw nkaum thaum lawv ntsib kev nyuaj.
    HUAB TAIS pab lawv thiab tso lawv dim,
    nws tso lawv dim ntawm tus phem thiab cawm lawv,
    vim lawv tuaj nkaum hauv nws.

    Txais: (39a) Txoj kev cawm tus neeg ncaj tuaj ntawm HUAB TAIS tuaj.

    As Les Lus Yas: MT 11: 25

    Txais: As les lus yas, as les lus yas.

    Peb cav txog koj, Leej Txiv, Huab Tais kav lub ntuj lub teb,
    koj tau qhia tej yam tob txog Ntuj Ceeb Tsheej rau cov neeg me paub.

    Txais: As les lus yas, as les lus yas.

    Ntawv Moo Zoo: MK 4: 26-34

    26 Yes Xus hais tias : “Tswv Ntuj lub Ceeb Tsheej zoo xws li ib tug neeg pov ib co noob rau nruab a :
    27 Nws txawm pw los nws sawv, hmo ntuj los nruab hnub, lub noob tuaj kaus thiab hlob, nws tsis paub tias lub noob hlob zoo li cas.
    28 Av xwb tim txawj xeeb kom hloov : xub ua yub tas, ua plab nab, ces nplej txhawv puv hnab.
    29 Thaum nplej siav, tus neeg ntawd xuas liag hlais tam sis ntawd, vim qoob siav lawm.”
    30 Yes Xus tseem hais tias : "Peb yuav muab Tswv Ntuj lub Ceeb Tsheej piv rau dab tsi thiab? Thiab peb yuav ua paj lug qhia txog Tswv Ntuj lub Ceeb Tsheej zoo li cas ?
    31 Tswv Ntuj lub Ceeb Tsheej yog zoo li ib lub noob zaub roj, uas thaum luag muab tseb rau hauv av, mas lub noob ntawd me tshaj lwm cov noob nyob ntiaj teb no.
    32 Tab sis thaum tseb tas lawd, lub noob hlob, nws siab dua lwm cov zaub huv si ; nws ncau ceg deb, ces tej noog ya saum ntuj tau kev los nkaum hauv nws qhov ntxoov."
    33 Yes Xus siv ntau hom paj lug zoo li no los qhia Lo Lus rau lawv, raws li lawv mloog tau.
    34 Tsis muaj ib yam uas nws tsis ua paj lug hais. Thaum tshuav cov thwj tim nrog nws nyob xwb, nws txhais txhua yam huv tib si rau lawv.


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 28th January 2017, 6:18 am

    TIM 28 LUB 1 HLIS 2017

    Hnub Xya Lis PIam Peb Nruab Xyoo A Nruab Lis Piam Xyoo I

    Hwm LN Tos Mas Aquinas

    Zaj Nyeem Ib: Hes Nplaws 11: 1-2, 8-19


    1 Txoj kev ntseeg yog txoj kev zeem tau meej tias peb yuav txais yam uas peb cia siab tos, yog qhov ua puav pheej tias yam uas peb tsis pom, yeej muaj tseeb tiag. 2 Yog txoj kev ntseeg ua kom cov poj yawm txwv koob nto moo zoo.
    8 Yog vim Has Nplas Has ntseeg, mas nws thiaj mloog Ntuj hu nws kom sawv kev mus ib lub teb chaws uas nws yuav txais los ua nws lub cuab tam. Ces nws sawv kev mus, txawm nws twb tsis paub tias nws yuav mus lawm qhov twg. 9 Yog vim Has Nplas Has ntseeg, mas nws thiaj mus nyob hauv thaj av uas yog thaj Ntuj cog lus tias yuav pub rau nws, tiam sis yog pej kum neeg av. Nws mus ua neej nyob hauv tsev tsam phooj xwb, ib yam li His Xas Has thiab Yas Kos thiab, nkawd kuj nrog nws txais tib lub cuab tam nyob hauv tib txog kev cog lus. 10 Has Nplas Has tos ntsoov txog ib lub tsheej muaj taw ntsa uas yog Tswv Ntuj yuav txhim thiab yuav tsa. 11 Yog vim Xas Las ntseeg, mas tab nws txawm laus heev lawm, dhau lub caij lawm, los nws txais lub zog xeeb tau tub, vim nws ntseeg tias tus tau cog lus rau nws, yuav tsis fav xeeb. 12 Vim li ntawd, tus neeg uas twb yuav txog nws lub caij tuag tseem yug tau ib co xeeb ntxwv coob npaum li cov hnub qub nyob saum ntuj thiab cov suab zeb nyob ntawm ntug hiav txwv uas suav tsis txheeb.
    13 Cov neeg ntawd, lawv tuag nyob hauv txoj kev ntseeg, lawv tseem tsis tau txais txhua yam uas Tswv Ntuj tau cog lus tias yuav pub rau lawv. Tab sis lawv twb tau nyob deb pom thiab zeem txog txhua yam ntawd lawm, thiab lawv lees paub tias lawv tsuas yog ib co pej kum neeg tuaj hla lub ntiaj teb no xwb. 14 Lawv hais lus li no qhia kom peb pom tias lawv nrhiav ib lub teb chaws yuav mus nyob ruaj. 15 Yog lawv xav txog lub teb chaws uas lawv tawm los lawm, mas lawv twb muaj caij rov mus nyob lawv qub teb qub chaw lawm. 16 Tab sis lawv tos txog ib lub teb chaws zoo dua, yog lub nyob saum ntuj. Vim li ntawd Tswv Ntuj tsis txaj muag rov hu nws ua lawv tus Tswv Ntuj, ces nws npaj ib lub tsheej rau lawv tiag tiag.
    17 Yog vim Has Nplas Has ntseeg, mas thaum Tswv Ntuj sim nws, nws cia li muab His Xas Has txi rau Ntuj; nws yog tus tau txais txoj kev cog lus, tiam sis nws cia li muab nws tib leeg tub twm zeej txi rau Ntuj. 18 Tus tub ntawd twb yog tus Tswv Ntuj hais txog tias : “Koj tsoom xeeb leej xeeb ntxwv yuav tawm ntawm His Xas Has los.” 19 Has Nplas Has xav tau tias Tswv Ntuj yeej tsa tau cov neeg tuag kom ciaj rov los. Vim li ntawd Has Nplas Has thiaj rov qab tau nws tus tub, ces zaj no thiaj yog ib lub cim.

    NPN: LK 1: 69-70, 71-72, 73-75

    Txais: (68) Peb cav txog Huab Tais, His Xas Lais tus Tswv Ntuj;
    nws tuaj txog nws haiv neeg lawm.

    Nws tau tsa ib tug cawm seej muaj hwj huam rau peb,
    yug ntawm nws tus tub txib Das Vis tsev neeg los.

    Txais: (68) Peb cav txog Huab Tais, His Xas Lais tus Tswv Ntuj;
    nws tuaj txog nws haiv neeg lawm..

    Txheej thaum ub, nws siv cov yaj saub nrog peb cog lus tias
    nws yuav cawm peb ntawm peb cov txhaum,
    ntawm tas cov uas ntxub peb txhais tes.
    Nws tau cog lus tias nws yuav khuv leej peb cov yawg koob
    thiab nws yuav nco ntsoov nws lo lus nws tau cog.

    Txais: (68) Peb cav txog Huab Tais, His Xas Lais tus Tswv Ntuj;
    nws tuaj txog nws haiv neeg lawm..

    Tswv Ntuj tau nrog peb yawg koob Has Nplas Has cog lus li no:
    Nws yuav tso peb dim ntawm yeeb ncuab cov hlua khi peb,
    peb yuav muaj kev twj lij teev hawm nws tsis muaj kev ntshai,
    tau kev ua neeg ntshiab neeg ncaj ncees raws li nws nyiam
    Niaj hnub hauv peb lub neej.

    Txais: (68) Peb cav txog Huab Tais, His Xas Lais tus Tswv Ntuj;
    nws tuaj txog nws haiv neeg lawm.

    As Les Lus Yas: Zam 3: 16

    Txais: As les lus yas, as les lus yas.

    Tswv Ntuj hlub lub ntiaj teb npaum li no, nws thiaj tso nws tib leeg Tub los
    kom leej twg ntseeg nws, tus ntawd yuav tau txoj siab nyob mus li.

    Txais: As les lus yas, as les lus yas.

    Ntawv Moo Zoo: MK 4: 35-41

    35 Hnub ntawd, thaum tsaus ntuj zuj zus lawm, Yes Xus hais rau nws cov thwj tim tias : "Peb hla mus sab ntug dej tid."
    36 Ces lawv tso tsoom sid mus tsev, lawv coj Yes Xus mus, nws cia li mus zoo li ntawd rau hauv nkoj. Muaj ib co nkoj nrog nws mus thiab.
    37 Muaj ib nthwv khaub zeeg cua loj kawg sawv tuaj. Dej nphau nphwv los rau hauv nkoj, ces lub nkoj twb puv dej tas lawm.
    38 Yes Xus nyob tom tw nkoj, nws tsaug zog saum ib lub hauv ncoo. Lawv tsa Yes Xus, lawv hais rau nws tias : "Xib Hwb, peb yuav tuag, koj tsis quav ntsej li lod ?"
    39 Yes Xus sawv tsees los, nws txwv cua, thiab nws hais rau dej ntuj tias : "Tswm seeb ! Koj nyob twj ywm !" Ces cua tu nrho, dej rov nyob tus yees.
    40 Yes Xus hais rau lawv tias : "Ua cas nej ntshai ua luaj ? Nej tseem tsis tau ntseeg li lod ?"
    41 Lawv ntshai kawg, lawv sib tham hais tias : "Tus ntawd yog leej twg ? Txawm tias yog cua thiab dej ntuj los yeej mloog nws lus ?"


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 30th January 2017, 6:55 am

    TIM 30 LUB 1 HLIS 2017

    Hnub Ob Lis Piam Plaub Nruab Xyoo A Nruab Lis Piam Xyoo I

    Zaj NYeem Ib: HES NPLAWS 11: 32-40


    32 Kuv yuav hais txog dab tsi ntxiv ? Kuv tsis muaj sij hawm piav txog Zes Des Oos, Npas Las, Xas Xoos, Zes Faws Tes, Das Vis, Xas Muas thiab cov Yaj Saub. 33 Lawv yog ib co neeg muaj kev ntseeg, mas lawv thiaj ntaus rog yeej ntau lub teb chaws, lawv ua qhov ncaj, lawv pom muaj tuaj raws li txoj kev cog lus, lawv kaw tsov lub qhov ncauj, 34 lawv tua cov hluav taw kub hnyiab tuag tas, lawv dim ntawm rab hniav ntaj ntse, lawv rov muaj zog tuaj txawm tias lawv muaj mob muaj nkeeg, lawv muaj siab tawv qhawv ntaus tsam rog, lawv caum tsoom tub rog pej kum rov qab tas. 35 Ib txhia poj niam tau pom lawv cov txiv tuag lawm ciaj sawv rov los. Hos ib txhia yeem cia luag muab lawv dua, tsis yeem cia luag tso lawv dim, vim lawv xav tau ib txog kev sawv rov los zoo dua. 36 Hos lwm cov txaus siab cia luag thuam thiab luag nplawm, los cia luag khi lawv thiab coj mus kaw hauv tsev loj faj. 37 Lawv raug luag muab pob zeb txawb lawv tuag, mag luag rab kaw txiav lawv tu, raug ntaj tua lawv tuag; lawv khiav rau ub rau no tsis muaj chaw nyob, lawv hnav tawv yaj tawv tshis tsis muaj hnav, yoo tshaib yoo nqhis txom nyem ntsuav, thiab raug luag tsim txom luag hiam. 38 Lub ntiaj teb twb tsis tsim nyog txais lawv, tsis kav lawv yuav tsum khiav nkaum hauv tej hav suab puam, pem tej toj roob, hauv tej qhov tsua, thiab tej qhov taub qhov av. 39 Tas cov neeg ntawd puav leej nto moo zoo vim lawv ntseeg. Tsis kav lawv tsis tau txais yam uas Tswv Ntuj cog lus tias yuav pub. 40 Yog vim tias Tswv Ntuj npaj ib yam zoo tshaj rau peb sawv daws, ua li mas lawv yuav tsum tos peb, ces lawv thiaj yuav nrog peb ua ke tau qhov uas zoo kawg nkaus zoo txhij zoo txhua.

    NPN 31: 20, 21, 22, 23, 24

    Txais: (25) Tas ib tsoom neeg tso siab rau HUAB TAIS, nej cia li muaj lub siab loj.

    Huab Tais, koj muaj lub siab zoo tas nrho,
    Koj tshwj zias koj qhov zoo pub rau cov neeg hwm koj,
    Koj pub rau txhua leej uas tuaj khaub zig koj,
    Koj tab meeg pub kom tej tib neeg pom.

    Txais: (25) Tas ib tsoom neeg tso siab rau HUAB TAIS, nej cia li muaj lub siab loj.

    Koj muab lawv zais rau hauv qhov xu hauv koj lub ntsej muag,
    Kom lawv nyob deb ntawm tib neeg tej siab phem,
    Koj coj lawv mus nraim hauv koj lub chaw nyob,
    Kom deb ntawm tus nplaig nkhaus tsawm neeg.

    Txais: (25) Tas ib tsoom neeg tso siab rau HUAB TAIS, nej cia li muaj lub siab loj.

    Kom txhua leej txhua tus cav txog HUAB TAIS,
    vim nws tau ua hwj huam loj khuv leej kuv
    nyob hauv ib lub nroog xov ntsa zeb.

    Txais: (25) Tas ib tsoom neeg tso siab rau HUAB TAIS, nej cia li muaj lub siab loj.

    Kuv tau kev tws kev ntxhov, kuv thiaj hais tias :
    "Kuv nyob deb ntawm koj qhov muag pom."
    Tsis kav, koj hnov kuv lub suab thov,
    thaum kuv quaj hu txog koj,

    Txais: (25) Tas ib tsoom neeg tso siab rau HUAB TAIS, nej cia li muaj lub siab loj.

    Tas tsoom neeg hwm HUAB TAIS, nej nyiam nws mog !
    HUAB TAIS txuag cov ntseeg ruaj txog nws,
    hos nws nplua tus muab hlob ti txha nkaus.

    Txais: (25) Tas ib tsoom neeg tso siab rau HUAB TAIS, nej cia li muaj lub siab loj.

    As Les Lus Yas: LK 7: 16

    Txais: As les lus yas, as les lus yas.

    "Ib tug yaj saub loj sawv los nyob hauv peb,
    Tswv Ntuj tuaj xyuas nws haiv neeg lawm.

    Txais: As les lus yas, as les lus yas.

    Ntawv Moo Zoo: MK 5: 1-20

    1 Yes Xus thiab nws cov thwj tim tuaj txog sab ntug dej ntuj tim ub, yog ntawm Nkes Las Xes teb chaws. 2 Thaum Yes Xus nqes plhuav saum nkoj los, tam sis ntawd, muaj ib tug neeg raug ib tug dab tsis huv tawm hauv cov ntxa tuaj cuag Yes Xus : 3 Nws yeej nyob txawm hauv cov toj ntxas; tab yog xuas saw hlau khi los, tsis muaj leej twg pav tau nws li, 4 vim ntau zaus los lawm, lawv twb muab saw hlau pav nws, rau cuab rau nws, tsis kav nws ua saw hlau tu tas, ua cuab lov tas, yeej tsis muaj leej twg muaj peev xwm tswj tau nws li. 5 Niaj hnub niaj hmo, nws nyob hauv ntxa thiab nyob pem tej roob, nws nqov ntuj tsis tseg, thiab nws muab pob zeb los hlais nws. 6 Thaum nws pom Yes Xus tseem nyob deb, nws khiav tuaj tos, nws txhos caug ntua ntawm Yes Xus xub ntiag, 7 ces nws qw nrov nrov tias : “Yes Xus, Tswv Ntuj Nyob Siab Leej Tub, koj xav ua dab tsi rau kuv ? Kuv hu txog Tswv Ntuj los thov, koj txhob tsim txom kuv.” 8 Vim Yes Xus hais rau nws tias : "Dab tsis huv, koj tawm ntawm tus neeg no mus !" 9 Yes Xus nug nws tias : "Koj lub npe hu ua li cas ?" Nws teb tias : "Kuv lub npe hu ua Npoj, vim peb coob kawg." 10 Nws thov Yes Xus heev kawg kom txhob ntiab nws tawm hauv lub teb chaws mus. 11 Thaum ntawd, muaj ib pab npua coob coob tab tom noj zaub saum lub roob. 12 Cov dab tsis huv thov Yes Xus tias : "Koj xa peb mus hauv cov npua ntawd, cia peb nkag mus hauv cov npua." 13 Yes Xus tso lus rau lawv mus. Ces cov dab tsis huv tawm mus, lawv nkag hauv cov npua. Ces tas pab npua dhia nplawg ntia puag saum tsag rau hauv dej ntuj. Pab npua ntawd kwv yees muaj ob txhiab tus, tuag tas rau hauv dej ntuj. 14 Cov zov npua tso tes khiav, lawv mus qhia lub moo ntawd rau hauv nroog thiab hauv cov zej zog. Ces neeg tuaj mus xyuas saib muaj xwm zeej dab tsi. 15 Thaum lawv tuaj txog ze ntawm Yes Xus, lawv pom tus neeg raug dab Npoj hnav ris tsho, thiab nws meej pem lawm, mas lawv ntshai. 16 Cov uas tau pom, piav rau lawv txog qhov Yes Xus tau ua rau tus raug dab, hos pab npua raug li cas. 17 Ces lawv thov Yes Xus kom txav mus deb ntawm lawv teb chaws. 18 Thaum Yes Xus nce mus hauv nkoj, tus neeg raug dab thov kom Yes Xus cia nws nrog Yes Xus mus. 19 Tab sis Yes Xus tsis kheev, nws hais rau tus raug dab tias : "Koj rov mus tsev, rov mus nrog koj tsev neeg nyob, koj qhia lawv txog tas txhua yam loj uas Huab Tais tau ua rau koj thiab nws tau khuv leej koj li cas." 20 Tus raug dab rov mus, nws pib tshaj txhua yam uas Yes Xus tau ua rau nws nyob lub xeev Des Kas Pos Lis. Sawv daws qhuas kawg.



    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 30th January 2017, 10:43 am

    TIM     31    LUB     1     HLIS     2017

    Hnub Peb Lis Piam Plaub Nruab Xyoo A Nruab Lis Piam Xyoo I

    Hwm LN John Bosco, ua Leej Choj

    Zaj Nyeem Ib:      HES NPLAWS  12:   1-4


    1 Li ntawd muaj ib co tim khawv coob kawg nyob ua ib tauv huab ncig saum peb taub hau, mas peb kuj yuav muab txhua lub nra uas nias peb rau hauv thiab tej kev txhaum uas lo rawv peb xyeeb hlo pov tseg, peb kav tsij peem khiav tas zog mus raws txoj kev ntaus tsam uas nyob ntawm peb hauv ntej.
    2 Peb yuav ntsia ntsoov Yes Xus uas yog tus ntaus thawj coj peb hauv txoj kev ntseeg thiab pab peb ntseeg kom tom thawj mus txog qhov zoo kawg nkaus. Vim nws paub tias yuav muaj kev zoo siab nyob tom ntej, mas Yes Xus tuaj yeem nyiaj txoj kev txom nyem saum ntoo cuam, tsis quav ntsej txog txoj kev raug txaj muag, ces nws tau mus zaum saum Tswv Ntuj lub theej kiab ntawm nws sab xis lawm.  
    3 Nej nco ntsoov tias Yes Xus tau ua tiag nyiaj dhau cov neeg txhaum txoj kev tiv nws loj kawg nkaus, nej thiaj yuav tsis ntaus siab me thiab tsis tag kev cia siab.  
    4 Nyob hauv txoj kev tawm tsam kev txhaum, nej twb tseem tsis tau siv zog tiag tiv kom txog thaum nej nqaij ntuag ntshav nrog.

    NPN    22 : 26B-27, 28 + 30, 31-32

    Txais:   (27b) Huab Tais, cov uas nrhiav koj lawv yuav cav txog koj.      

    Kuv yuav pauj yeem nyob ntawm cov neeg hwm Huab Tais xub ntiag.
    Tus neeg pluag yuav tau noj seem noj so;
    cov uas nrhiav HUAB TAIS yuav cav txog nws;
    Thov kom lawv lub siab muaj sia nyob mus li!

    Txais:   (27b) Huab Tais, cov uas nrhiav koj lawv yuav cav txog koj.

    Tas cov npoo ntiaj teb kawg yuav rov nco txog HUAB TAIS
    thiab tig lawv lub siab mus rau nws.
    Tas cov xeem neeg hauv cov haiv neeg yuav khoov pe hawm nws.
    Tas cov neeg muaj hwj chim nyob ntiaj yuav khoov pe hawm nws ib leeg.  
    Tas cov neeg uas mus nyob hauv av lawm yuav khoov pe hawm nws.

    Txais:   (27b) Huab Tais, cov uas nrhiav koj lawv yuav cav txog koj.

    Kuv tus plig yuav ciaj sia nyob hauv HUAB TAIS;
    kuv cov xeeb leej xeeb ntxwv yuav tsob hwb nws.
    Yuav tsum qhia rau tiam neeg yuav tuaj no txog HUAB TAIS  
    ces lawv thiaj yuav tshaj tawm rau haiv neeg tiam tom ntej
    kom lawv paub txog nws txoj kev cawm neeg ncaj ncees.

    Txais:   (27b) Huab Tais, cov uas nrhiav koj lawv yuav cav txog koj.

    As Les Lus Yas:    MT  8:   17

    Txais:  As les lus yas, as les lus yas.

    Leej Pleev tshem peb tej kev ceg tawv mus
    thiab nws cug nrob qaum ris peb tej kev mob kev ntsaj.

    Txais:  As les lus yas, as les lus yas.

    Ntawv Moo Zoo:    MK  5:   21-43

    21 Thaum Yes Xus caij nkoj rov los txog sab ntug dej tim no, ib pab neeg coob tuaj sib sau ntsauv nws, ces nws sawv  nyob ntawm ntug dej ntuj. 22 Muaj ib tug hauv cov tswj tsev txoos hu ua Yais Los tuaj txog, thaum nws pom dheev Yes Xus, nws txhos caug ntua ntawm Yes Xus ko taw. 23 Nws thov Yes Xus tias :  "Kuv tus me ntxhais txoj sia twb yuav tu, thov koj tuaj tsa tes cawm nws kom nws ciaj." 24 Yes Xus nrog Yais Los mus. Ib pab neeg coob raws Yes Xus mus thiab, lawv sawv daws txiv Yes Xus txhua sab tuaj.
    25 Muaj ib tug poj niam tsob ntshav tau kaum ob xyoos los lawm. 26 Ntau tus kws tshuaj tau ua kom nws txom nyem kawg. Nws tau siv tas nws lub cuab tam los kho tsis tau nws zoo li, nws mob heev zuj zus ntxiv xwb. 27 Nws hnov luag hais txog Yes Xus, ces nws nrog tsoom sid sib txiv tom Yes Xus nraub qaum. Nws kov Yes Xus lub tsho. 28 Vim nws xav hauv siab tias : "Tsuav yog kuv tau kov nws lub tsho xwb, mas kuv yeej yuav dim." 29 Ces tam sis ntawd, nws qhov tsob ntshav tu nrho, nws hnov nws lub cev zoo hlo ntawm tus mob. 30 Tam sim ntawd, Yes Xus kuj hnov ib lub zog tawm plaws hauv nws mus ; ces Yes Xus tig rov los nug pab neeg ntawd tias : "Leej twg kov kuv lub tsho ?" 31 Cov thwj tim hais rau nws tias : "Koj ntsia saib, tas tsoom sid txiv koj txhua sab tuaj, koj tseem hais tias : ‘Leej twg kov kuv ?’ " 32 Yes Xus ntsia ib ncig kom pom tus neeg uas tau kov nws. 33 Ces tus poj niam ntshai thiab tshee na, vim nws paub qhov uas nyuam qhuav tshwm sim hauv nws. Nws los txhos caug ntawm Yes Xus ko taw thiab qhia qhov tseeb rau Yes Xus. 34 Yes Xus hais rau nws tias : “Me ntxhais, koj lub siab ntseeg cawm koj lawm. Koj rov mus kaj siab lug, kom koj tus mob zoo hlo mus."
    35 Thaum Yes Xus tseem tab tom hais lus, ib co neeg tuaj ntawm tus tswj tsev txoos lub tsev tuaj hais tias : “Koj tus ntxhais twb tuag lawm, koj tseem yuav txob Xib Hwb ua dab tsi ?” 36 Tab sis Yes Xus twb hnov lo lus lawv nyuam qhuav hais, nws hais rau tus tswj tsev txoos tias : "Koj txhob ntshai, tsuav koj ntseeg xwb." 37 Yes Xus tsis kheev leej twg nrog nws mus li. Nws tsuas cia Pob Zeb, Yas Kos thiab Yas Kos tus kwv Zam nrog nws mus xwb. 38 Lawv tuaj txog tus tswj tsev txoos lub tsev, Yes Xus pom sawv daws ua ntxhov hnyo : ib txhia quaj nyiav, ib txhia quaj qw nrov nrov. 39 Yes Xus los hauv tsev, nws hais rau lawv tias : "Ua cas sawv daws ua ntxhov hnyo thiab quaj zom zaws ? Tus me ntxhais tsis tuag, nws tsaug zog xwb." 40 Ces lawv luag Yes Xus zom zaws. Tab sis Yes Xus ntiab sawv daws tawm mus nraum zoov, nws tsuas kheev tus me nyuam niam thiab txiv, thiab cov nrog nws tuaj, nyob xwb. Nws chaws mus hauv kem uas tus me nyuam nyob. 41 Yes Xus tuav tus me nyuam txhais tes, nws hais rau tus me nyuam tias : "Tas lis tas kus," txhais tias : "Me ntxhais, kuv hais rau koj, koj sawv !" 42 Tus me ntxhais sawv tsees tam sis ntawd, nws mus kev, vim nws twb muaj kaum ob xyoos lawm. Tam sim ntawd, sawv daws ntshai kawg. 43 Yes Xus txwv lawv heev kom txhob qhia leej twg paub. Ces nws kom lawv muab mov rau tus me ntxhais noj.

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 31st January 2017, 7:30 am

    TIM     1     LUB     2     HLIS      2017

    Hnub Plaub Lis Piam Plaub Nruab Xyoo A Nruab Lis Piam Xyoo I  

    Zaj Nyeem Ib:       HES NPLAWS  12:   4-7, 11-15


    Cov kwv tij, cov nkauj muam:
    4  Nyob hauv txoj kev tawm tsam kev txhaum, nej twb tseem tsis tau siv zog tiag tiv kom txog thaum nej nqaij ntuag ntshav nrog. 5 Nej puas nco qab cov lus uas yog hais rau nej xws li hais rau ib co tub tias : “Me tub, koj txhob tsis liam fab Huab Tais lo lus cem lus qhuab; koj txhob npau taws, thaum nws cob qhia koj. 6 Vim tias tus uas Huab Tais nyiam mas Huab Tais cob qhia nws, thiab Huab Tais rau txim rau tus uas Huab Tais txais los ua nws tus tub.” 7 Kev raug txom nyem yog ib txog kev cob qhia nej. Tswv Ntuj cob nej xws li nws cov tub. Puas muaj ib tug tub twg uas nws txiv tsis cob qhia nws ?
    11 Txhua yam kev cob qhia yeej tsis ua kom leej twg zoo siab thaum tam sis ntawd, tsuas muaj ua kom chim siab xwb. Tiam sis yav tom qab, mas txoj kev cob qhia mam li yuav txi txiv muaj kev thaj yeeb thiab kev ncaj ncees rau cov neeg uas tau raug kev cob qhia. 12 Ua li mas nej kav tsij rov tsa nej ob txhais tes uas tsaug leeg, thiab nej ob lub hauv caug uas ntshaus hnyo,  13 thiab nej ua kom tej kev nkhaus ncaj tuaj rau nej ob txhais taw, kom tus ceg tawv txhob must sis ncaj kev, nws thiaj yuav zoo taus. 14 Nej yeej meem nrhiav kom tau nrog sawv daws nyob thaj yeeb, thiab nrhiav txoj kev ntshiab, vim yog tus twg tsis muaj kev ntshiab mas nws yuav pom tsis tau Tswv Ntuj. 15 Nej ceev faj kom txhob muaj ib tug twg tsis tau Tswv Ntuj lub txiaj ntsim nyob hauv nws, thiab kom tsis txhob muaj ib tug cag iab hlav taus kaus tuaj tsim kev ntxhov thiab ua kom coob leej poob rau kev phem.

    NPN      103:   1-2, 13-14, 17-18A

    Txais:   (17) THuab Tais yuav ua siab zoo tas mus li rau cov uas hwm nws.

    Kuv tus ntsuj plig, koj cav txog HUAB TAIS;
    Kuv tus kheej tas nrho, koj cav txog nws lub npe ntshiab.    
    Kuv tus ntsuj plig, koj cav txog HUAB TAIS,
    koj tsis txhob hnov qab nws tej paj tshab ib qho li.

    Txais:   (17) THuab Tais yuav ua siab zoo tas mus li rau cov uas hwm nws.

    Xws li leej txiv hlub nws cov mw nyuam,
    ib yam li ntawd, HUAB TAIS hlub cov uas hwm nws.
    Vim nws paub tias nws puab peb los zoo li cas,
    nws nco ntsoov tias peb yog plua av.      

    Txais:   (17) THuab Tais yuav ua siab zoo tas mus li rau cov uas hwm nws.

    Tiam sis HUAB TAIS yuav ua siab zoo ib txhiab  
    dhau ib txhis rau cov uas hwm nws,
    thiab nws yuav ua ncaj rau cov me nyuam no cov me nyuam tib si
    yog tias lawv coj nraim nws cov lus qhia.

    Txais:   (17) THuab Tais yuav ua siab zoo tas mus li rau cov uas hwm nws.

    As Les Lus Yas:      Zam  10:   27

    Txais:   As les lus yas, as les lus yas.

    Huab Tais hais tias, kuv cov yaj mloog kuv lub suab,      
    kuv paub law, ces lawv caum kuv qab.    

    Txais:   As les lus yas, as les lus yas.

    Ntawv Moo Zoo:     MK  6:   1-6

    1 Yes Xus tawm hauv qhov chaw ntawd mus, nws rov mus lub zos nws nyob hlob, cov thwj tim kuj nrog nws mus thiab.
    2 Hnub Xas Npas Tos, Yes Xus mus pib qhia hauv tsev txoos. Muaj coob leej hnov nws cov lus, lawv ceeb tas, lawv hais tias : "Nws tau tej ntawd qhov twg los ? Leej twg muab lub siab thoob tsib ntawd rau nws, thiab cov hwj huam yees ntxwv loj uas nws ob txhais tes ua?
    3 Tus ntawd tsis yog tus kws ntoo, Mab Liab tus tub lod ? Nws tsis yog Yas Kos, Yos Xes, Yus Das thiab Xis Moos lawv tus kwv tij lod ? Hos nws cov muam, tsis yog cov nrog peb nyob ua ke ntawm no lod ? Yes Xus ua rau lawv poob siab loj.
    4 Ces Yes Xus hais rau lawv tias : "Ib tug Yaj Saub tsuas raug luag ntxub nyob hauv lub zos nws nyob hlob, hauv nws cov txheeb ze thiab nws tsev neeg xwb."
    5 Vim li ntawd, Yes Xus ua tsis tau ib yam hwj huam yees ntxwv nyob ntawd li, nws tsuas tsa tes rau tus puav tuag ceg los tuag tes kom zoo. 6 Nws xav tsis thoob txog qhov lawv tsis muaj kev ntseeg li.



    Last edited by Mim on 3rd February 2017, 12:18 pm; edited 3 times in total
    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 1st February 2017, 7:28 am

    TIM      2     LUB     2     HLIS      2017

    Hnub Tsib Lis Piam Plaub Nruab Xyoo A Nruab Lis Piam Xyoo I

    Nco txog Niam Mab Liab thiab Yos Xes coj Yes Xus mus fij rau Ntuj

    Zaj Nyeem Ib:    MAS LAS KIS  3:   1-4

    Huab Tais Tswv Ntuj hais tias:
    1 “Kuv yuav xa kuv tus tub tshaj xov mus npaj kev ua kuv ntej. Tos nco, tus Huab Tais uas nej nrhiav nws yuav chaws los hauv nws lub tuam tsev, tus tshaj xo txog lo lus tau cog, tus uas nej ntshaw, nws twb tuaj txog ntawd lawm !” Tus HUAB TAIS kav tsoom hnub qub hais li ntawd.
    2 Hnub nws tuaj txog, leej twg yuav tiv taus ? Thaum nws tawm tuaj, leej twg yuav sawv taus ntsug? Vim nws zoo li cov hluav taws nchuav hlau, thiab zoo li cov tshuaj ntxhua khaub ncaws dawb.
    3 Nws yuav tuaj zaum ua tus nchuav nyiaj thiab tus ntxhua nyiaj kom huv, nws yuav ua kom Les Vis cov tub huv tuaj; nws yuav nchuav lawv ib yam li nchuav kub los nchuav nyiaj, kom lawv yog cov cev thaj txi Ntuj rau Huab Tias raws kev ncaj.
    4 Ces HUAB TAIS yuav zoo siab txais Yus Das thiab Yes Lus Xas Les thaj txi Ntuj, ib yam li yav thaum ub, yav thaum ntxov thaum pib.

    NPN      24:  7, 8, 9, 10

    Txais:   (Cool Leej twg yog tus vaj muaj koob meej?  
               Tus vaj muaj koob meej yog HUAB TAIS!

    Cov rooj vag, nej tsa nej daim txiag
    puab saum qhov rooj kom siab,
    cov qhov rooj laus, nej tshoom kom siab ntxiv,  
    kom tus vaj muaj koob meej tau kev nkag los!  

    Txais:   (Cool Leej twg yog tus vaj muaj koob meej?  
               Tus vaj muaj koob meej yog HUAB TAIS!

    Leej twg yog tus vaj muaj koob meej?
    Yog HUAB TAIS, nws muaj zog, muaj peev xwm,
    yog HUAB TAIS, nws muaj peev xwm yeej tsam rog.

    Txais:   (Cool Leej twg yog tus vaj muaj koob meej?  
               Tus vaj muaj koob meej yog HUAB TAIS!

    Cov rooj vag, nej tsa nej daim txiag
    puab saum qhov rooj kom siab,
    cov qhov rooj laus, nej tshoom kom siab ntxiv,  
    kom tus vaj muaj koob meej tau kev nkag los!

    Txais:   (Cool Leej twg yog tus vaj muaj koob meej?  
               Tus vaj muaj koob meej yog HUAB TAIS!

    Tus vaj muaj koob meej ntawd yog leej twg?
    Tus HUAB TAIS kav tsoom hnub qub,
    nws yog tus vaj muaj koob meej.

    Txais:   (Cool Leej twg yog tus vaj muaj koob meej?  
               Tus vaj muaj koob meej yog HUAB TAIS!

    Zaj Nyeem Ob:      HEB  2:   14-18

    14 Vim cov me nyuam koom ib co ntshav ib ce nqaij, li ntawd Yes Xus kuj nrog lawv koom, kom nws txoj kev tuag yeej tau tus tuav txoj kev tuag lub hwj huam, tus ntawd yog tus dab phem Xas Tas;
    15 thiab kom nws cawm tau cov uas raug kev tuag muab lawv ua qhev nyob hauv txoj kev ntshai tuag tas lawv sid.
    16 Yes Xus tsis ua hauj lwm cawm cov Tshiab, nws txoj hauj lwm yog tuaj cawm Has Nplas Has tsoom xeeb ntxwv.
    17 Vim li no, nws thiaj yuav tsum yug los zoo ib yam nkaus li nws tsoom kwv, kom nws thiaj ua tau ib tug tuam Leej Choj uas khuv leej neeg thiab npuab Tswv Ntuj rau lawv, sawv lawv chaw nyob ntawm Tswv Ntuj, kom tau them tsoom pej xeem cov txim txhaum.
    18 Vim nws tus kheej tau raug kev sim siab nyob hauv kev txom nyem, mas nws thiaj txawj pab tau cov raug kev sim siab thiab.

    As Les Lus Yas:     LK  2:   32

    Txais:  As les lus yas, as les lus yas. lleluia, alleluia.

    Ib qho pom kev tawm tuaj kaj cov pej kum haiv neeg,
    hos lub koob meej yog koj haiv His Xas Lais tau txais.

    Txais:  As les lus yas, as les lus yas.

    Ntawv Moo Zoo:     LK  2:   22-40

    22 Thaum txog lub caij ua kab ke ntxuav ob niam tub raws li Mais Xes Txoj Cai, Mab Liab thiab Yos Xes nkawd coj Yes Xus mus pem Yes Lus Xas Les, kom tau cev tus me nyuam rau Huab Tais, 23 raws li Huab Tais Txoj Cai sau tseg tias : "Txhua tus me nyuam tub uas yog tus xub qhib leej niam plab tawm los, yuav muab qee rau Huab Tais." 24 Nkawd tseem yuav cev ib co txim rau Ntuj raws li Huab Tais Txoj Cai uas sau cia tias : muab ib nkawg nquab lwb rwg, los ob tug thav nquab dawb.
    25 Thaum ntawd nyob Yes Lus Xas Les, muaj ib tug txiv neej hu ua Xis Mes Oos. Tus txiv neej ntawd yog neeg ncaj thiab nyiam teev Ntuj, nws tos nrhw tus yuav tuaj nplij His Xas Lais; Leej Ntuj Plig Ntshiab nyob hauv nws. 26 Leej Ntuj Plig Ntshiab tshoj nws ces nws paub tias yog nws tsis tau pom Huab Tais tus Pleev, mas nws yuav tsis tuag. 27 Leej Ntuj Plig coj nws tuaj nyob hauv lub Tuam Tsev Teev Ntuj. Thaum niam thiab txiv coj tus me nyuam Yes Xus tuaj ua cov kab ke raws Txoj Cai, 28 Xis Mes Oos txais tus me nyuam los rau hauv nws ob txhais npab, nws cav lus zoo txog Tswv Ntuj, nws hais tias : 29 “Tus tseem Tswv, nyem no koj tso koj tus tub txib mus kaj lug tau lawm, raws li koj lo lus, 30 vim kuv qhov muag tau pom koj txoj kev cawm neeg lawm, 31 uas koj tau npaj nyob ntawm ib tsoom haiv neeg xub ntiag, 32 yog qhov pom kev tawm tuaj kaj cov pej kum haiv neeg, yog koj haiv neeg His Xas Lais lub koob meej. 33 Yes Xus niam thiab txiv qhuas cov lus nkawd hnov hais txog tus me nyuam. 34 Xis Mes Oos foom hmoov zoo rau lawv, nws hais rau Mab Liab, Yes Xus niam tias : "Koj yuav pom , tus me nyuam no yuav ua chaw rau ntau leej nyob His Xas Lais ntog thiab ntau leej rov sawv. Nws yog ib lub cim ua kom sawv daws sib cav tsis sib haum. 35 Hos ntawm koj, mas ib rab ntaj yuav hno ntsees koj tus plig, kom xwv tej lus uas coob leej xav tuaj nruab siab tawm los rau sawv daws paub.”
    36 Tseem muaj ib tug yaj saub poj niam, hu ua As Nas, yog Fas Nus Ees tus ntxhais, xeem As Xej. Nws lub hnub nyoog laus lawm. Dhau nws lub caij ua nkauj xwb lawm, mas nws nrog nws tus txiv nyob tau xya xyoo, 37 ces nws ua poj ntsuam laus li ntawd txog yim caum plaub xyoos, nws tsis nrug ntawm lub Tuam Tsev Teev Ntuj li, nws yoo mov thiab teev Ntuj los tsob hwb Tswv Ntuj thawm hnub thawm hmo. 38 Tib lub sij hawm ntawd, nws kuj tuaj nyob ntawd thiab, nws cav lus zoo txog Tswv Ntuj, thiab nws hais txog tus me nyuam rau txhia leej txhia tus uas tos txog lub caij Yes Lus Xas Les yuav tau kev dim.
    39 Thaum lawv ua txhua yam raws li Huab Tais Txoj Cai tas lawm, lawv rov mus Nkas Lis Lais, hauv lawv lub nroog Nas Xas Les. 40 Hos ntawm tus me nyuam, nws hlob, nws muaj zog zuj zus, kev thoob tsib puv nws siab ntsws; Tswv Ntuj lub txiaj ntsim nyob hauv nws.
    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 2nd February 2017, 4:11 pm

    TIM 3 LUB 2 HLIS 2017

    Hnub Rau Lis Piam Plaub Nruab Xyoo A Nruab Lis Piam Xyoo I

    Hwm LN Blaise thiab LN Ansgar

    Zaj Nyeem Ib: HES NPLAWS 13: 1-8


    1 Nej yuav nyob ruaj hauv txoj kev sib nyiam sib hlub xws li ib pab kwv tij. 2 Nej nco ntsoov txoj kev ua zoo txais tej qhua. Vim txoj kev txais qhua, mas ib co neeg thaum ub thiaj tau txais tej tus Tshiab tuaj so hauv lawv tsev, lawv twb tsis paub tias yog Ntuj ib tug Tshiab. 3 Nej nco ntsoov txog cov neeg nyob hauv tsev loj faj, ib yam li yog nej nrog lawv kaw ua ke rau hauv ntag. Nej nco ntsoov txog cov raug luag tsim txom xws li yog nej raug thiab, vim nej muaj ib lub cev nqaij thiab. 4 Nej sawv daws yuav hwm txoj kev ua txij nkawm, nej yuav txuag lub txaj ua txij ua nkawm tsis pub tsuas ib qho txhaum. Vim Tswv Ntuj yuav txiav txim rau cov ua plees ua yi, thiab cov zes luag txij luag nkawm. 5 Nej yuav coj tus yeeb yam tsis ntshaw nyiaj txiag dhau, nej muaj li cas mas nej yuav txaus siab yuav li ntawd. Vim Tswv Ntuj hais tias : “Kuv yuav tsis tsis pab koj, yuav tsis tso koj pov tseg.” 6 Ces peb thiaj muaj cuab kav hais tias : “Huab Tais yog kuv qhov chaw vam khom. Kuv tsis ntshai. Leej twg yuav ua tau dab tsi rau kuv ?”
    7 Nej nco ntsoov txog nej cov thawj coj uas tau tshaj Tswv Ntuj lo lus rau nej. Nej ntsia saib lawv coj lawv lub neej mus zoo li cas, ces nej yoog lawv txoj kev ntseeg mog !
    8 Yes Xus Pleev zoo li qub mus li : tus nag hmo, tus hnub no, thiab tus yuav tuaj yog tib tug xwb.

    NPN 27: 1, 3, 5, 8B-9ABC

    Txais: (1a) HUAB TAIS yog kuv qhov pom kev thiab yog tus cawm kuv.

    HUAB TAIS yog kuv qhov pom kev thiab yog kuv tus cawm kuv,
    Kuv yuav ntshai leej twg?
    HUAB TAIS yog kuv qhov chaw vam hauv kuv lub neej,
    kuv yuav ntshai leej twg?

    Txais: (1a) HUAB TAIS yog kuv qhov pom kev thiab yog tus cawm kuv.

    Txawm muaj ib pab tub rog nyob ntawm kuv hauv ntej,
    kuv lub siab yuav tsis ntshai,
    txawm luag ua ib nthwv rog tawm tsam kuv
    los kuv yeej yuav tso siab lug.

    Txais: (1a) HUAB TAIS yog kuv qhov pom kev thiab yog tus cawm kuv.

    Vim nws yuav muab kuv nkaum rau hauv nws lub tsev,
    Thaum txog hnub muaj kev kub ntxhov;
    Nws yuav muab kuv zais rau hauv nws lub tsev tsam phooj,
    nws yuav muab kuv tso nyob siab rau saum ib lub tsua.

    Txais: (1a) HUAB TAIS yog kuv qhov pom kev thiab yog tus cawm kuv.

    HUAB TAIS, kuv nrhiav kom tau nrog koj nyob.
    Thov txhob muab koj lub ntsej muag zais ntawm kuv,
    txhob npau taws txhob ntiab koj tus tub txib.
    Koj yog tus pab kuv: txhob ntiab kuv khiav ntawm koj mus.

    Txais: (1a) HUAB TAIS yog kuv qhov pom kev thiab yog kuv txoj kev cawm.

    As Les Lus Yas: LK 8: 15

    Txais: As Les Lus Yas, as les lus yas.

    Lawv muaj hmoov zoo cov uas muaj ib lub siab dav coj raws lo lus
    thiab lawv txi txiv ncw vim lawv mob siab rau.

    Txais: As Les Lus Yas, as les lus yas..

    Ntawv Moo Zoo: MK 6: 14-29

    14 Tus vaj Hes Los hnov hais txog Yes Xus, vim Yes Xus lub npe nto moo loj, thiab luag tej hais tias : "Zam Ntxuav Plig sawv hauv cov tuag rov qab los lawm, vim li ntawd, cov hwj huam yees ntxwv thiaj tawm hauv nws tuaj." 15 Hos ib txhia hais tias : ‘Nws yog Es Lias.’ Lwm cov hais tias : ‘Yog ib tug yaj saub xws li tej yaj saub.’ 16 Tab sis Hes Los hnov hais txog Yes Xus, nws hais tias : "Yog tus Zam uas kuv tau txiav nws caj dab, nws sawv rov los lawm." 17 Vim Hes Los yog tus xa neeg mus ntes Zam thiab muab saw hlau khi Zam rau hauv tsev loj faj, tim Hes Los Dias, uas yog Hes Los tij laug Fis Lis Pos tus poj niam, tab sis Hes Los yuav los ua nws poj niam. 18 Ces Zam hais rau Hes Los tias: "Koj tsis muaj cai yuav koj tij laug tus poj niam." 19 Ces Hes Los Dias ntxub Zam tas siab nrho, nws xav muab Zam tua, tab sis nws tua tsis tau, 20 vim Hes Los ntshai Zam, thiab nws paub tias Zam yog ib tug neeg siab ncaj siab ntshiab, ces Hes Los txuag Zam. Thaum Hes Los hnov Zam hais lus, mas ua rau nws xav tsis thoob li. Nws kuj nyiam mloog Zam thiab. 21 Muaj ib lub zoo sij hawm los txog, yog hnub tsuj xeeb Hes Los hnub yug. Nws ua ib roog qav caw cov nom tswv, cov thawj tub rog, thiab cov neeg tseem ceeb hauv xeev Nkas Lis Lais tuaj koom. 22 Thaum ntawd, Hes Los Dias tus ntxhais chaws los dhia seev cev, nws dhia tau ntxim Hes Los thiab cov qhua tuaj koom rooj qav ntawd siab kawg. Ces tus vaj hais rau tus ntxhais tias : "Koj thov saib koj xav yuav dab tsi, kuv yuav muab rau koj." 23 Ces tus vaj cog lus rau tus ntxhais tias : "Koj thov yam twg, mas kuv yuav muab rau koj, tab txawm yuav yog ib nrab ntawm lub teb chaws kuv kav !" 24 Tus ntxhais tawm plaws mus nug nws niam tias : "Kuv yuav thov dab tsi ?" Leej niam hais tias : "Zam Ntxuav Plig lub taub hau." 25 Tam sim ntawd, tus ntxhais rov ntsuj los ntawm tus vaj, nws hais tias : "Kuv xav kom koj muab Zam Ntxuav Plig lub taub hau tso saum ib lub phaj, cev rau kuv tam sim no." 26 Tus vaj tu siab kawg, tab sis vim nws tau cog lus thiab vim muaj cov qhua, nws thiaj tsis xav thim nws lo lus. 27 Ces tus vaj txib ib tug zov keeb tam sim ntawd, kom mus nqa Zam lub taub hau los. 28 Tus zov keeb mus txiav Zam caj dab hauv tsev loj faj, nws nqa Zam lub taub hau txawb hauv ib lub phaj los cev rau tus ntxhais; tus ntxhais muab cev rau nws niam. 29 Zam cov thwj tim hnov li ntawd, lawv tuaj kwv Zam lub cev mus tso rau hauv ib lub ntxa.


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 3rd February 2017, 12:08 pm

    TIM      4     LUB     2     HLIS      2017

    Thawj Hnub Xya Lis Piam Plaub Nruab Xyoo A Nruab Lis Piam Xytoo I

    Zaj Nyeem Ib:       HES NPLAWS  13:   15-17, 20-21


    15 Peb cia li nrog Yes Xus cev ib thaj txi ntuj cav txiaj ntsim rau Tswv Ntuj txhua lub sij hawm,  thaj cav txiaj ntsim yog lub txiv txi ntawm peb lub ncauj thaum peb lees paub Tswv Ntuj lub npe. 16 Hais txog kev ua ua zoo rau luag thiab kev muab yus lub cuab tam faib rau luag, mas nej yuav nco ntsoov ua, vim Tswv Ntuj nyiam tej txoj kev txi Ntuj zoo li ntawd. 17 Nej yuav mloog nej cov thawj coj lus, thiab nej yuav tsis txhob cav lawv, vim lawv yog tus saib xyuas nej tus plig, lawv yuav tau mus lees ntawm Ntuj tias lawv tau saib zoo li cas. Nej mloog lus kom lawv zoo siab coj nej, lawv thiaj tsis muaj chaw yws chaw nroo, yog lawv nroo mas yuav tsis muaj txiaj ntsim zoo rau nej.
    20 Thov kom tus Tswv Ntuj pub kev thaj yeeb, uas yog tus tau tsa tus thawj tswv zov yaj, peb tus Huab Tais Yes Xus Pleev, hauv cov tub tuag rov los, uas nws yog tus tau muab nws cov roj ntsha los ua kev cog lus nyob mus li,  21 thov kom tus Tswv Ntuj ntawd muab txoj kev txawj ua zoo txhua yam pub rau nej kom nej txawj ua raws nraim nws lub siab xav, ces nej thiaj yuav xis nws siab nyob hauv Yes Xus Pleev, uas yog tus tsim nyog tau txais lub koob meej mus li ib txhiab ib txhis. Ua li.

    NPN      23:   1-3A, 3B-4, 5, 6

    Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

    HUAB TAIS yog tus tswv zov yaj saib kuv, kuv yuav tsis ntshaw dab tsi.
    Nws coj kuv mus so nyob hauv tej tshav zaub mos ntsuab xiab.
    Nws coj kuv mus tso nyob ze tej tus dej tus yees;
    nws ua kom kuv tus ntsuj plig los siav.

    Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

    Nws coj kuv mus taug txoj kev ncaj vim nws lub npe.
    Txawm kuv taug kev nyob hauv lub hav tsaus nti,
    kuv tsis ntshai dab tsi phem, vim koj nyob rawv ntawm kuv ib sab
    nrog koj rab pas nplawm thiab rab pas nrig, ua rau kuv lub siab loj.

    Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

    Koj rau ib rooj mov rau ntawm kuv xub ntiag
    rau kuv cov yeeb ncuab ntsia ntsoov.
    Koj muab roj pleev kuv taub hau;
    kuv lub khob puv phwj yaws.

    Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

    Kuv tsuas tau ntsib txoj kev ua siab zoo thiab kev zam txhaum
    txhua txhia hnub hauv kuv lub neej.
    Ces kuv yuav tau nyob hauv HUAB TAIS tsev
    ntev niaj ntau xyoo lawm yav tom ntej.

    Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

    As Les Lus Yas:       ZAM  10:   27

    Txais: As les lus yas, as les lus yas.

    Huab Tais hais tias, kuv cov yaj mloog kuv lub suab;
    kuv paub lawv, ces lawv caum kuv qab.

    Txais: As les lus yas, as les lus yas.

    Ntawv Moo Zoo:       MK  6:   30-34

    30 Cov Hauv Paus Xa Lus los sib sau ncig Yes Xus, lawv piav tas puas tsav yam uas lawv tau ua thiab tau qhia.
    31 Ces Yes Xus hais rau lawv tias : "Nej los rau ib qho chaw xu kev tsis muaj neeg, nej so me ntsis." Vim cov neeg tuaj thiab cov rov mus coob coob, ces cov Hauv Paus Xa Lus tsis xyeej noj mov li.
    32 Lawv thiaj caij nkoj mus rau ib qho chaw xu kev, tsis muaj neeg.
    33 Tsoom sid pom cov Hauv Paus Xa Lus caij nkoj mus, coob leej twb mem tau lawm. Ces sawv daws khiav ko taw hauv cov nroog tuaj mus. Lawv xub mus txog chaw.
    34 Thaum Yes Xus nqes nkoj, nws pom ib pab neeg coob coob, nws hlub lawv, vim lawv zoo li cov yaj uas tsis muaj tswv zov. Ces Yes Xus pib qhuab qhia lawv ntev loo txog ntau yam.

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 6th February 2017, 7:47 am

    TIM      6     LUB     2     HLIS      2017

    Hnub Ob Lis Piam Tsib Nruab Xyoo A Nruab Lis Piam Xyoo I

    Hwm LN Paul (Paj Lug) Miki thiab Pab Nrog Nws, tuag ua Tim Khawv

    Zaj Nyeem Ib:      HP  1:   1-19


    1 Thaum chiv lub keeb, Tswv Ntuj tsim lub ntuj thiab lub ntiaj teb, 2 mas lub ntiaj teb tseem tsis tau tsheej thiab tsis muaj dab tsi nyob hauv li. Qhov tsaus ntuj nti npog lub qhov ntuj dub nciab. Tswv Ntuj nthwv cua kiv nplawm ntws saum nplaim dej.
    3 Tswv Ntuj hais tias : "Kom muaj qhov pom kev." Ces txawm muaj qhov pom kev tuaj. 4 Tswv Ntuj pom tias qhov pom kev ntawd zoo kawg. Tswv Ntuj cais qhov pom kev ntawm qhov tsaus ntuj. 5 Tswv Ntuj hu qhov pom kev ua "nruab hnub" thiab hu qhov tsaus ntuj ua "hmo ntuj." Txawm muaj tsaus ntuj thiab muaj kaj ntug : yog thawj hnub.
    6 Tswv Ntuj hais tias : "Kom muaj ib lub ruv ntsuab nyob hauv nruab nrab cov dej thiab kom nws quas cov dej ntawm cov dej". Ces txawm muaj li ntawd tuaj. 7 Tswv Ntuj ua ib lub ruv ntsuab los quas cov dej nyob hauv qab lub ruv ntawm cov dej nyob saum qaum lub ruv. 8 Tswv Ntuj hu lub ruv ntsuab ua "lub ntuj." Txawm muaj tsaus ntuj thiab muaj kaj ntug : yog hnub ob.
    9 Tswv Ntuj hais tias : "Kom cov dej uas nyob hauv qab lub ntuj sib sau los nyob ib qho chaw xwb, thiab kom av qhuav tshwm tawm los." Ces txawm muaj li ntawd tuaj. 10 Tswv Ntuj hu cov av qhuav ua "ntiaj teb" thiab hu cov dej sib sau ua ke ua "hiav txwv." Tswv Ntuj pom tias qhov ntawd zoo kawg. 11 Tswv Ntuj hais tias : "Kom lub ntiaj teb tuaj nroj tsuag ntsuab xiab : kom muaj nroj tsuag txawj muaj noob, thiab kom muaj ntoo txi txiv nyias txi nyias hom txiv uas muaj nyias hom noob nyob ntiaj teb." Ces txawm muaj li ntawd tuaj. 12 Ntiaj teb tuaj nroj tsuag ntsuab xiab : tej nroj tsuag nyias txawj txi nyias hom noob thiab tej ntoo nyias txawj txi nyias hom txiv uas muaj nyias hom noob. Tswv Ntuj pom hais tias qhov ntawd zoo kawg. 13 Txawm muaj tsaus ntuj thiab muaj kaj ntug : yog hnub peb.
    14 Tswv Ntuj hais tias : "Kom muaj tej lub pom kev ci ci nyob saum lub qab ntuj ntsuab saud, cia cais nruab hnub thiab hmo ntuj, cia ua tej lub cim, thiab cia xam hnub xam nyoog, thiab suav hnub suav xyoo, 15 kom cov pom kev ntawd ci nyob saum lub qab ntuj ntsuab ua kom ntiaj teb pom kev." Ces txawm muaj li ntawd tuaj. 16 Tswv Ntuj ua ob lub pom kev ci loj dua cov, lub pom kev ci loj dua yog lub kav nruab hnub, lub pom kev ci me dua yog lub kav hmo ntuj; thiab nws ua cov hnub qub. 17 Tswv Ntuj muab lawv txawb rau saum lub qab ntuj ntsuab saud kom ci rau ntiaj teb pom kev, 18 cia kav nruab hnub thiab hmo ntuj, thiab cia cais qhov pom kev ntawm qhov tsaus ntuj. Tswv Ntuj pom tias qhov ntawd zoo kawg. 19 Txawm muaj tsaus ntuj thiab muaj kaj ntug : yog hnub plaub.

    NPN      104:   1-2A, 5-6, 10 + 12, 24 + 35C

    Txais: (31b) Kom Huab Tais zoo siab rau nws cov hauj lwm.

    Kuv tus ntsuj plig, koj cia li cav txog HUAB TAIS!
    HUAB TAIS kuv tus Tswv Ntuj, koj yeej loj tas nrho!
    Koj hnav hwj chim thiab koob meej ua ris tsho,
    koj hnav qhov pom kev ua tsho tshaj sab.

    Txais: (31b) Kom Huab Tais zoo siab rau nws cov hauj lwm.

    Koj txhim lub ntiaj teb kom ruaj rau ntawm nws qhov chaw txawb,
    nws yuav txav tsis tau mus ib txhiab ib txhis.
    Koj muab lub hiav txwv ua zoo li ib daim tsoos tsho npog nws;
    muaj dej tob siab tshaj tej ncov roob.

    Txais: (31b) Kom Huab Tais zoo siab rau nws cov hauj lwm.

    Koj ua kom muaj dej txhawv ntws raws tej kwj ha
    thiab chev ncig raws tej hauv paus roob.
    Cov noog ya saum ntuj ua zes nyob ze cov dej,
    lawv tsaws saum tej ceg ntoos quaj.

    Txais: (31b) Kom Huab Tais zoo siab rau nws cov hauj lwm.
    HUAB TAIS, koj tej hauj lwm muaj ntau tsav yam kawg li!
    Koj txoj kev thoob tsib tsim txhua yam zoo tas nrho;
    lub ntiaj teb puv nkaus koj tej kev nplua nuj.
    Kuv tus ntsuj plig, koj cia li cav txog HUAB TAIS! As les lus yas.

    Txais: (31b) Kom Huab Tais zoo siab rau nws cov hauj lwm.

    As Les Lus Yas:      MT  4:   23

    Txais: As les lus yas, as les lus yas.

    Yes Xus tshaj lub Moo Zoo txog Ntuj lub Ceeb Tsheej
    thiab nws kho txhua yam mob nyob hauv cov neeg zoo hlo.

    Txais: As les lus yas, as les lus yas.

    Ntawv Moo Zoo:      MK  6:   53-56

    53 Cov thwj tim hla dhau dej, lawv tuaj nres ntawm thaj av Nkes Nes Xas Les, ces lawv nqes nkoj.
    54 Thaum lawv nqes plhuav nkoj, muaj neeg cim tau Yes Xus tam sis ntawd.
    55 Ces lawv khiav mus ncig thoob ib cheeb tsam ntawd, lawv mus kwv cov neeg muaj txiab nkeeg saum tej lub txaj tuaj rau ntawm qhov chaw uas lawv hnov tias Yes Xus nyob.
    56 Txhua txhia qhov chaw uas Yes Xus mus, hauv cov zos, cov nroog, los tom tej teb, lawv coj neeg mob tuaj tso rau ntawm tej tshav puam, lawv thov Yes Xus kom nws cia lawv kov nws, tab yog kov nws lub tw tsho xwb los xij. Ces cov neeg uas tau kov Yes Xus puav leej dim ntawm lawv tus mob.


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 6th February 2017, 11:11 am

    TIM 7 LUB 2 HLIS 2017

    Hnub Peb Lis Piam Tsib Nruab Xyoo A Nruab Lis Piam Xyoo I

    Zaj Nyeem Ib: HP 1: 20—2:4A


    20 Tswv Ntuj hais tias : "Kom cov dej muaj tau tej tsiaj muaj sia npau xi nyob hauv, thiab kom muaj noog ya nyob saum ntiaj teb, saum ib nta lub qab ntuj ntsuab." Ces txawm muaj li ntawd tuaj. 21 Tswv Ntuj tsim cov zaj hiav txwv loj loj thiab tas puas tsav yam tsiaj muaj sia uas txawj ntab hauv dej, coob coob npau xi nyob hauv dej, nyias muaj raws nyias hom; thiab tsim tas cov noog muaj tis, nyias muaj raws nyias hom. Tswv Ntuj pom tias qhov ntawd zoo kawg. 22 Tswv Ntuj foom lus zoo rau lawv tias : "Nej yeej meem tsim noob, yeej meem huam vam, yeej meem mus nyob puv cov dej hauv hiav txwv, thiab kom cov noog yeej meem huam vam mus puv ntiaj teb." 23 Txawm muaj tsaus ntuj thiab muaj kaj ntug : yog hnub tsib.
    24 Tswv Ntuj hais tias : "Kom lub ntiaj teb txawj muaj txhua yam tsiaj muaj sia, nyias muaj raws nyias hom : tsiaj nyeg, kab ntsaum, tsiaj qus, nyias muaj raws nyias hom." Ces txawm muaj li ntawd tuaj. 25 Tswv Ntuj ua tej tsiaj qus kom nyias muaj nyias hom, tej tsiaj nyeg kom nyias muaj nyias hom, thiab tas txhua yam kab ntsaum kom nyias muaj nyias hom. Tswv Ntuj pom tias qhov ntawd zoo kawg. 26 Tswv Ntuj hais tias : "Cia peb ua tib neeg kom zoo raws li peb tus duab kom zoo xws li peb. Yuav cia lawv ua tswv kav cov ntses nyob hauv hiav txwv, cov noog ya saum ntuj, cov tsiaj nyeg, tas txhua yam tsiaj qus thiab txhua yam kab ntsaum nkag hauv av. 27 Ces Tswv Ntuj tsim tib neeg zoo raws li nws tus duab; raws li Tswv Ntuj tus duab, nws tau tsim tib neeg. Nws tsim nkawd ua txiv neej thiab ua poj niam. 28 Tswv Ntuj foom lus zoo rau nkawd thiab hais rau nkawd tias : "Neb yeej meem tsim noob, yeej meem huam vam thiab mus nyob puv ntiaj teb, thiab kav ntiaj teb; neb tswj cov ntses nyob hauv hiav txwv, cov noog ya saum ntuj thiab tas puas tsav yam tsiaj uas nkag saum av." 29 Tswv Ntuj hais tias : "Kuv muab tas puas tsav yam nroj tsuag muaj noob uas tuaj nyob saum npoo av, thiab kuv muab tas puas tsav yam ntoo txi txiv thiab muaj noob rau neb : tej ntawd yuav yog neb tej txhiam laj txhiam xws. 30 Rau tas cov tsiaj qus, cov noog ya saum ntuj, tas txhua yam nkag hauv av thiab ciaj sia, kuv muab tas txhua yam nroj ntsuab rau lawv ua txhiam xws noj." Ces txawm muaj li ntawd tuaj. 31 Tswv Ntuj ntsia tas txhua yam nws tau ua : txhua yam ntawd zoo kawg nkaus. Txawm muaj tsaus ntuj thiab muaj kaj ntug : yog hnub rau.
    2 1 Lub ntuj thiab lub ntiaj teb yog tsim los zoo li no, thiab tas txhua yam nyob rau hauv. 2 Tswv Ntuj ua nws txoj num tiav tas rau hnub xya. Ces hnub xya nws thiaj so, vim nws ua txhua yam tiav tas lawm. 3 Tswv Ntuj foom lus zoo rau hnub xya thiab muab hnub xya ua hnub ntshiab, vim nws ua nws txoj num tsim ntuj tsim teb tiav tas ces hnub ntawd nws so. 4a Zaj kwv huam piav txog lub ntuj thiab lub ntiaj teb, thaum ntuj tsim teb raug thaum uas HUAB TAIS Tswv Ntuj tsim lub ntuj thiab lub ntiaj teb, mas yog zoo li saum no.

    NPN 8: 4-5, 6-7, 8-9

    Txais: (2ab) HUAB TAIS, peb tus Tswv Ntuj, koj lub npe zoo tas nrho nyob thoob ntiaj teb!

    Thaum kuv ntsia saum ntuj pom cov hauj lwm koj ob txhais tes tau tsim,
    lub hli thiab cov hnub qub uas koj tau muab txawb rau lawv qhov chaw,
    neeg yog dab tsi , koj thiaj quav ntsej txog nws?
    Neeg tus tub yog dab tsi koj thiaj hlub txog nws?

    Txais: (2ab) HUAB TAIS, peb tus Tswv Ntuj, koj lub npe zoo tas nrho nyob thoob ntiaj teb!

    Koj tau tsim nws nyob qis me ntsis cov tshiab,
    koj tau muab meej mom muab hwj chim rau nws ntoo.
    Koj tau tsa nws ua tus kav txhua yam koj txhais tes tau tsim,
    koj muab txhua yam tso rau hauv nws qab xib taws:

    Txais: (2ab) HUAB TAIS, peb tus Tswv Ntuj, koj lub npe zoo tas nrho nyob thoob ntiaj teb!

    Tas nrho the yaj tej nyuj,
    tej tsiaj nyob hauv nruab liaj nruab teb,
    cov noog ya saum huab saum cua, cov ntses nyob hauv hiav txwv,
    thiab txhua yam ua luam dej taug raws cov hiav txwv.

    Txais: (2ab) HUAB TAIS, peb tus Tswv Ntuj, koj lub npe zoo tas nrho nyob thoob ntiaj teb!

    As Les Lus yas: NPN 119: 36, 29B

    Txais: As les lus yas, as les lus yas.

    HUAB TAIS, thov koj rub kuv lub siab mus rau koj tej lus qhia,
    thiab pub lub txiaj ntsim rau kuv kom kuv coj koj txoj cai.

    Txais: As les lus yas, as les lus yas.

    Ntawv Moo Zoo: MK 7: 1-13

    1 Cov Fas Lis Xais thiab tus puav Kws Ntawv Ntshiab tuaj Yes Lus Xas Les tuaj, lawv sib sau ntsauv Yes Xus. 2 Lawv pom tus puav thwj tim xuas tes tsis huv noj mov, yam li lawv tsis xub ntxuav tes tso, 3 vim tias cov Fas Lis Xais, thiab tas cov Yus Das huv tib si, mas lawv tsis noj mov yog lawv tsis xub ntxuav tes tso, raws nraim li tej laus ib txwm ua los. 4 Thaum lawv mus kav kiab kav khw rov los, yog lawv tsis tau xub pov dej rau saum lawv tso, mas lawv tsis noj mov. Tseem muaj ntau yam uas cov Yus Das ua raws li txoj kev ib txwm ua kam los : xws li ntxuav khob, ntxuav hub, thiab ntxuav tej tais tooj dag. 5 Vim li ntawd, cov Fas Lis Xais thiab cov kws Ntawv Ntshiab thiaj nug Yes Xus tias : "Ua cas koj cov thwj tim tsis ua raws li tej laus kev cai ib txwm qhia kom ua, lawv cia li xuas tes tsis huv noj mov ?" 6 Yes Xus hais rau lawv tias : "Neeg zoo sab nraud, His Xais hais raug kawg txog nej, ntawv thiaj sau tseg tias : Haiv neeg no tsuas hwm kuv saum di ncauj, lawv lub siab nyob deb kuv. 7 Lawv lam teev kuv dag, tej kev cai lawv qhuab qhia tsuas yog neeg kab ke xwb ! 8 Nej tso Tswv Ntuj lo lus qhia tseg, nej muab nej khi rau neeg txoj cai ib txwm qhia los." 9 Thiab Yes Xus hais rau lawv tias : "Nej rhuav Tswv Ntuj lo lus qhia pov tseg kom tas nrho, nej thiaj tau coj nej cov kev cai ib txwm qhia los. 10 Mais Xes yeej tau qhia tias : ‘Koj yuav hwm koj niam koj txiv, tus tsawm niam tsawm txiv, yuav tsum raug lub txim tuag !’ 11 Tab sis nej, mas nej hais tias : ‘Yog ib tug neeg hais rau nws niam los nws txiv tias : cov nyiaj txiag uas kuv yuav muab los pab koj, mas yog kos npas, txhais tias muab qee rau Ntuj lawm, 12 ces nej tsis hais kom nws ua dab tsi ntxiv rau nws niam los nws txiv li. 13 Nej muab tej kab ke ib txwm ua uas nej txais ntawm tej laus los rhuav Tswv Ntuj lo lus li no. Nej tseem ua ntau yam ntxiv zoo li ntawd thiab!"


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 7th February 2017, 2:14 pm

    TIM       8      LUB      2      HLIS       2017

    Hnub Plaub Lis Piam Tsib Nruab Xyoo A Nruab Lis Piam Xyoo I

    Hwm LN Jerome Emiliani thiab LN Josephine Bakhita

    Zaj Nyeem Ib:      HP  2:   4B-9, 15-17


    4b Thaum lub caij HUAB TAIS Tswv Ntuj tsim lub ntiaj teb thiab lub ntuj, 5 tseem tsis tau muaj ib tug yub ntoo tuaj nyob ntiaj teb, tsis tau muaj ib tug nroj tsuag tuaj li, vim HUAB TAIS Tswv Ntuj tseem tsis tau ua kom los nag rau ntiaj teb, thiab tseem tsis tau muaj tib neeg los cog tej av li. 6 Tab sis muaj dej txia hauv av los ywg tas nrho daim npoo av kom ntub ntub. 7 Ces HUAB TAIS Tswv Ntuj muab ib thooj av nplaum los puab ua tib neeg, nes tshuab pa rau hauv tus tib neeg qhov ntswg, ces tib neeg ciaj los ua ib tug muaj sia.
    8 HUAB TAIS Tswv Ntuj cog tau ib lub vaj nyob Es Dees, nyob sab hnub tuaj.  Nws muab tus txiv neej uas nws tau puab tso rau hauv lub vaj ntawd. 9 HUAB TAIS Tswv Ntuj ua kom txhua yam ntoo uas zoo saib thiab zoo noj tuaj hauv lub vaj thaj av. Tus ntoo muaj txoj sia tuaj nyob hauv nruab nrab lub vaj, thiab tus ntoo uas paub qhov zoo qhov phem.
    15 HUAB TAIS Tswv Ntuj coj tus txiv neej mus nyob hauv lub vaj Es Dees kom nws cog lub vaj thiab tu lub vaj. 16 HUAB TAIS Tswv Ntuj hais rau tus txiv neej li no : "Koj noj tau cov txiv txi ntawm tas txhua tsob ntoo hauv lub vaj no tib si. 17 Tiam sis cov txiv txi ntawm tus ntoo paub qhov zoo thiab qhov phem, mas koj txhob noj. Yog koj noj thaum twg, mas thaum ntawd mus koj yuav txawj tuag."

    NPN     104:   1-2A, 27-28, 29BC-30

    Txais:   (1a) Kuv tus ntsuj plig, koj cia li cav txog HUAB TAIS!

    Kuv tus ntsuj plig, koj cia li cav txog HUAB TAIS!
    HUAB TAIS kuv tus Tswv Ntuj, koj yeej loj tas nrho!
    Koj hnav hwj chim thiab koob meej ua ris tsho,
    koj hnav qhov pom kev ua tsho tshaj sab.

    Txais:   (1a) Kuv tus ntsuj plig, koj cia li cav txog HUAB TAIS!

    Tas txhua yam koj tau tsim ntsia ntsoov koj
    tias koj yuav pub rau lawv noj thaum txog caij txog nyoog.
    Thaum koj pub rau lawv, lawv mus sau los,
    thaum koj qhib koj txhais tais, lawv tau txais tej yam zoo puv npo.    

    Txais:   (1a) Kuv tus ntsuj plig, koj cia li cav txog HUAB TAIS!

    Yog koj rho lawv txoj pa, lawv kawg puas mus
    thiab yuav rov mus thawj lawv cov plua tshauv.
    Thaum koj xa koj lub tswv yim mus, nws yuav tsim lawv dua,
    thiab koj yuav ua kom lub ntiaj teb rov tshiab tuaj.    

    Txais:   (1a) Kuv tus ntsuj plig, koj cia li cav txog HUAB TAIS!

    As Les Lus Yas:      Zam   17:   17B, 17A

    Txais:  As les lus yas, as les lus yas.

    Huab Tais, koj lo lus yog qhov tseeb:
    thov koj qee zias peb los nyob hauv qhov tseeb.

    Txais:  As les lus yas, as les lus yas.

    Ntawv Moo Zoo:     MK  7:   14-23

    14 Yes Xus rov hu tsoom sid los ntawm nws, ces nws hais rau lawv tias : "Tas nej sawv daws, nej mloog kuv kom nej to taub mog !
    15 Tsis muaj dab tsi nyob sab nraud, uas nkag rau hauv neeg lub cev, yuav ua tau kom neeg tsis huv. Yam ua kom neeg tsis huv yog yam tawm hauv neeg nruab siab los.
    16  Leej twg muaj pob ntseg hnov, yeej meem mloog.  
    17 Thaum Yes Xus los hauv tsev thiab nyob nrug deb ntawm tsoom sid lawm, cov thwj tim nug nws txog zaj paj lug ntawd.
    18 Ces Yes Xus hais rau lawv tias : "Nej tsis muaj tswv yim to taub li thiab lod ? Nej tsis to taub tias tej yam nyob sab nraum no, nkag rau hauv tib neeg ua tsis tau kom tib neeg tsis huv.
    19 Vim tias tej yam ntawd tsis nkag mus hauv tib neeg lub siab, tsuas nkag rau hauv plab, tas ces tawm mus rau nraum chaw plob lawm xwb.” (Ua li mas Yes Xus qhia tias txhua hom txhiam xws puav leej huv).
    20 Yes Xus hais ntxiv tias : "Yam uas tawm hauv tus tib neeg los yog yam ua kom nws tsis huv.
    21 Vim tias tej yam uas txhawv hauv tib neeg nruab siab los yog tej yam tswv yim phem, yog kev xav sib dee, kev ua tub sab, kev tua neeg,
    22 kev deev luag txij nkawm, kev cuaj khaum, kev lim hiam, kev ua cuav, kev ntxias luag ua plees ua yi, kev khib, kev thuam Ntuj, kev muab hlob thuam luag, kev vwm tsis meej pem.
    23 Txhua hom kev phem no tawm sab hauv los, mas thiaj ua kom neeg tsis huv."

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 8th February 2017, 5:00 am

    TIM 9 LUB 2 HLIS 2017

    Hnub Tsib Lis PIam Tsib Nruab Xyoo A Nruab Lis Piam Xyoo I

    Zaj Nyeem Ib: HP 2: 18-25


    18 HUAB TAIS Tswv Ntuj hais tias : "Tsis zoo cia txiv neej nyob ib leeg xwb, kuv yuav ua ib tug pab nws kom phim nws." 19 HUAB TAIS Tswv Ntuj thiaj muab av los puab tas puas tsav yam tsiaj qus thiab tas puas tsav yam noog ya saum ntuj. Nws coj los rau tus txiv neej xyuas saib nws yuav tis npe li cas rau. Txhua yam tsiaj yuav muaj lub npe raws li tus txiv neej tis rau nws. 20 Tus txiv neej tis npe rau tas txhua hom tsiaj nyeg, rau cov noog ya saum ntuj, thiab rau tas txhua hom tsiaj qus, tiam sis nws nrhiav tsis tau ib tug pab nws kom phim nws li.
    21 HUAB TAIS Tswv Ntuj tso ib tug dab ntub hlob hlob laum tus txiv neej; ces thaum nws tsaug zog lawm, Tswv Ntuj rho nws ib tug tav tawm los, nws muaj nqaij los kaw lub qhov rov rau. 22 HUAB TAIS Tswv Ntuj muab tus tav uas nws rho ntawm tus txiv neej los puab ua ib tug poj niam, Tswv Ntuj coj los rau tus txiv neej saib. 23 Tus txiv neej nqua suab hlo tias : "Zaum no, tus no yog tseem txha ntawm kuv txha thiab tseem nqaij ntawm kuv nqaij tiag ! Tus no yuav hu ua 'poj niam,' vim nws tawm ntawm txiv neej los !" 24 Vim li no txiv neej thiaj tso niam tso txiv tseg, mus npuab nws tus poj niam, ces nkawd ua ib lub cev nqaij xwb. 25 Thaum ntawd, tus txiv neej thiab tus poj niam nkawd ob leeg nyob liab qab, tiam sis nkawd ib leeg tsis txaj muag rau ib leeg li.

    NPN 128: 1-2, 3, 4-5

    Txais: (1a) Cov uas hwm Huab Tais tau txoj hmoov zoo.

    Nej cov hwm HUAB TAIS, nej txoj hmoov zoo,
    vim nej taug raws nws txoj kev!
    Nej yuav tau noj vim nej ob txhais tes ua hauj lwm,
    nej yuav tau hmoov zoo thiab nej yuav zoo siab.

    Txais: (1a) Cov uas hwm Huab Tais tau txoj hmoov zoo.

    Koj tus poj niam yuav zoo li txoj hmab txiv cawv txi txiv ncw
    nyob rau hauv koj lub vaj lub tsev,
    koj cov me nyuam yuav zoo li ib co ntsuag ntoo txiv roj
    nyob ncig lees koj lub phaj tsum.

    Txais: (1a) Cov uas hwm Huab Tais tau txoj hmoov zoo.

    Yog li, tus neeg muaj txoj hmoov zoo
    yog tus ntshai HUAB TAIS.
    Kom HUAB TAIS nyob saum Xis Yoos foom koob hmoov rau koj,
    kom koj tau pom Yes Lus Xas Les
    tej kev zoo niaj hnub hauv koj lub neej.

    Txais: (1a) Cov uas hwm Huab Tais tau txoj hmoov zoo.

    As Les Lus Yas: Yas Kos 1: 21BC

    Txais: As les lus yas, as les lus yas.

    Nej yuav ua neeg me txais lo lus
    uas twb muab cog rau hauv nej lawm,
    nws thiaj yuav cawm tau nej tus ntsuj plig.

    Txais: As les lus yas, as les lus yas.

    Ntawv Moo Zoo: MK 7: 24-30

    24 Yes Xus sawv kev ntawd mus rau xeev ntuj Tws Los. Nws mus hauv ib lub tsev, nws tsis xav kom muaj neeg paub li, tab sis nws tsiv nraim tsis tau.
    25 Muaj ib tug poj niam uas nws tus ntxhais raug ib tug dab tsis huv, nws tau hnov hais txog Yes Xus tam sis ntawd, ces nws tuaj txhos caug ntawm Yes Xus ko taw.
    26 Tus poj niam ntawd yog ib tug neeg Hes Las, yug los nyob Xis Lias Fes Nis Xias xeev ntuj, nws thov kom Yes Xus ntiab tus dab tawm hauv nws tus ntxhais mus.
    27 Yes Xus hais rau nws tias : "Yuav tsum xub cia cov me nyuam noj kom tsau tso, vim tsis phim yuav muab me nyuam cov mov los pov rau me nyuam dev noj."
    28 Tab sis tus poj niam teb rau Yes Xus tias : “Huab Tais, yog li koj hais ! Tab sis, cov me nyuam dev nyob hauv qab rooj kuj noj tej tsig mov uas poob ntawm cov me nyuam los.”
    29 Ces Yes Xus hais rau tus poj niam tias : "Vim koj hais lo lus no, koj rov mus mog, tus dab twb tawm hauv koj tus ntxhais lawm."
    30 Tus poj niam rov mus txog tsev, nws pom tus me nyuam pw saum txaj, tus dab phem twb tawm mus lawm.


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 9th February 2017, 9:09 am

    TIM       10      LUB       2       HLIS        2017

    Hnub Rau Lis Piam Tsib Nruab Xyoo A Nruab Lis Piam Xyoo I

    Hwm LN Scholastica, Nkauj Dawb Huv

    Zaj Nyeem Ib:       HAUV PAUS  3:   1-8


    1 Tus nab yog tus ntse tshaj tas txhua hom tsiaj HUAB TAIS Tswv Ntuj tau tsim los nyob nruab nrag. Nab hais rau tus poj niam tias : "Li ntawd, Tswv Ntuj hais tias : Neb yuav tsis txhob noj txhua yam txiv ntoo hauv lub vaj no puas yog ?" 2 Tus poj niam teb rau tus nab tias : "Wb noj tau tas cov txiv txi saum cov ntoo hauv lub vaj no tib si. 3 Tsuas tshwj kiag cov txiv txi saum tsob ntoo nyob hauv nruab nrab lub vaj xwb, Tswv Ntuj hais tias : ‘Neb tsis txhob noj, tsis txhob kov, yog neb noj neb kov, mas neb yuav tuag’ no.” 4 Tus nab teb ntua tus poj niam tias : "Tsis muaj li ntawd ib zaug ! Neb yuav  tsis tuag. 5 Vim Tswv Ntuj paub tias, hnub twg neb noj ces neb qhov muag yuav qhib, neb yuav zoo li tej tus tswv ntuj uas paub qhov zoo thiab qhov phem." 6 Ces tus poj niam pom hais tias tus ntoo ntawd yeej zoo noj thiab zoo saib kawg, thiab yog qhov uas yus ntshaw noj kom yus muaj kev paub kev txawj xav. Nws de zoj lub txiv ntawm tus ntoo los noj. Nws kuj muab cev rau nws tus txiv uas nrog nws nyob, ces tus txiv kuj noj thiab. 7 Ces nkawd ob leeg qhov muag qhib plho, nkawd paub hais tias nkawd liab qab. Nkawd thiaj muab nplooj ncuav pias los xaws ua tiab npua. 8 Thaum lub caij cua tuaj ntxiag, nkawd hnov HUAB TAIS Tswv Ntuj rhais ruam ncig hauv lub vaj; tus txiv neej thiab nws tus poj niam khiav mus tsiv nraim hauv cov ntoo nyob hauv lub vaj kom HUAB TAIS Tswv Ntuj txhob pom nkawd.

    NPN      32:   1-2, 5, 6, 7

    Txais:   (1a) Cov uas Ntuj zam txhaum rau lawv, lawv txoj hmoov zoo.

    Hmoov zoo rau tus uas Ntuj thim nws qhov txhaum lawm,
    tus uas Ntuj muab nws qhov txhaum npog rau.  
    Hmoov zoo rau tus neeg uas HUAB TAIS tsis suav txim rau nws,
    tus uas lub tswv yim tsis muaj ib qho kev siab phem.

    Txais:   (1a) Cov uas Ntuj zam txhaum rau lawv, lawv txoj hmoov zoo.

    Kuv lees kuv qhov txhaum rau koj,
    kuv tsis muab kuv qhov txhaum npog cia.    
    Kuv hais tias:  “Kuv lees kuv qhov txhaum rau HUAB TAIS,”
    ces koj muab kuv lub txim ntawm kuv qhov txhaum tshem tas.

    Txais:   (1a) Cov uas Ntuj zam txhaum rau lawv, lawv txoj hmoov zoo.

    Vim li no txhua tus neeg muaj kev ntseeg ntuj yuav tsum
    teev ntuj hu txog koj thaum lub caij muaj kev nyuaj siab.
    Txawm tias dej tob phwj yaws
    los dej yuav tsis nce mus txog nws.

    Txais:   (1a) Cov uas Ntuj zam txhaum rau lawv, lawv txoj hmoov zoo.

    Koj yog kuv lub chaw nkaum, koj yuav thaiv kuv ntawm txoj kev nyuaj;
    koj yuav cia ib co suab qw zoo siab txog kev twj lij nyob ncig kuv.

    Txais:   (1a) Cov uas Ntuj zam txhaum rau lawv, lawv txoj hmoov zoo.

    As Les Lus Yas:        HAUJ LWM  16:   14B

    Txais:  As les lus yas, as les lus yas.

    HUAB TAIS, thov koj qhib peb tej siab ntsws
    kom peb mloog koj leej Tub cov lus.

    Txais:  As les lus yas, as les lus yas.

    Ntawv Moo Zoo:       MK  7:   31-37

    31 Yes Xus tso Tws Los teb tseg, nws taug txoj kev hla Xis Doos mus rau dej ntuj Nkas Lis Lais, mus rau hauv xeev Des Kas Pos Lis. 32 Luag coj ib tug neeg lag ntseg, hais lus txhav txhav, tuaj rau Yes Xus, lawv thov kom Yes Xus tsa tes rau saum nws. 33 Yes Xus coj nws tawm ntawm tsoom sid mus rau ib cag tsis muaj neeg, Yes Xus muab nws ntiv tes ntxig rau tus lag ntseg ob lub qhov ntsej, nws nti aub ncaug pleev tus neeg ntawd tus nplaig. 34 Yes Xus tsa muag ntsia saum ntuj, nws nroo ib suab, nws hais rau tus lag ntseg tias : "Es fas tas," txhais tias : "Koj qhib los." 35 Tus lag ntseg ob lub qhov ntsej qhib plo tam sis ntawd, hos cov hlua khi nws tus nplaig kuj plam plaws, ces nws hais lus meej. 36 Yes Xus txwv tsis pub lawv hais qhov ntawd rau leej twg li. Tab sis Yes Xus yim txwv, lawv yim tshaj tawm. 37 Lawv qhuas kawg nkaus, lawv hais tias : "Nws ua tau ib puas tsav yam zoo kawg,  nws ua kom tus lag ntseg hnov lus, thiab ua kom tus nplaig txhav hais tau lus."

    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 10th February 2017, 2:58 pm

    TIM 11 LUB 2 HLIS 2017

    Hnub Xya Lis Piam Tsib Nruab Xyoo A Nruab Lis Piam Xyoo I

    Hwm Niam Mab Liab tim Lourdes

    Zaj Nyeem Ib: HP 3: 9-24


    9 HUAB TAIS Tswv Ntuj thiaj hu tus txiv neej hais tias : "Koj nyob qhov twg ?" 10 Tus txiv neej teb tias : "Kuv hnov koj mus kev hauv lub vaj, kuv ntshai vim kuv liab qab, kuv thiaj khiav tsiv nraim lawm." 11 Tswv Ntuj rov hais ntxiv tias : "Leej twg qhia koj tias koj liab qab ? Yog koj noj lub txiv uas kuv txwv tsis pub noj lawm puas yog ?" 12 Tus txiv neej teb tias : "Yog tus poj niam uas koj tso nyob ze kuv, muab lub txiv rau kuv, ces kuv thiaj noj !" 13 HUAB TAIS Tswv Ntuj hais rau tus poj niam tias : "Koj ua dab tsi li ntawd ?" Tus poj niam teb tias : "Yog niag nab ntxias kuv, kuv thiaj noj."
    14 Ces HUAB TAIS Tswv Ntuj hais rau tus nab hais tias : "Vim koj tau ua li ntawd, koj txoj hmoov yuav phem tshaj ib tsoom tsiaj nyeg thiab tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej. 15 Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws." 16 Tswv Ntuj hais rau tus poj niam hais tias : "Kuv yuav ua kom koj muaj mob ntau thaum lub caij koj cev xeeb tub xeeb ki. Koj yuav tau mob tau ntsaj, koj thiaj yug tau me tub me nyuam. Tsis kav, koj tseem yuav ntshaw koj tus txiv, thiab nws yuav tswj koj." 17 Tswv Ntuj hais rau tus txiv neej hais tias : "Vim koj tau mloog koj tus poj niam lus, koj thiaj noj lub txiv kuv txwv tsis kheev noj, mas av yuav raug foom phem vim koj ! Koj yuav siv zog khwv tas koj lub neej koj thiaj tau noj. 18 Av yuav tuaj pos tuaj nrhab rau koj, thiab koj yuav noj tej nroj tsuag uas tuaj hauv nruab liaj nruab teb. 19 Koj ntsej muag yuav tawm hws lug koj thiaj tau noj, mus txog hnub koj rov mus ua av, vim koj yog av puab. Koj yog plua av ces koj yuav rov mus ua plua av."
    20 Tus txiv neej tis npe rau nws poj niam hu ua Es Vas, vim nws yog ib tsoom neeg muaj txoj sia leej niam. 21 HUAB TAIS Tswv Ntuj muab tawv tsiaj los ua tsoos rau tus txiv neej thiab nws poj niam, thiab muab rau nkawd hnav. 22 Ces HUAB TAIS Tswv Ntuj hais tias : "Zaum no tib neeg zoo li peb lawm, nws paub qhov phem thiab qhov zoo lawm. Yuav tsis pub kom nws cev tes mus de tau tsob txiv muaj txoj sia thiab coj los no kom nws muaj txoj sia nyob mus li." 23 HUAB TAIS Tswv Ntuj thiaj tshem tib neeg tawm hauv lub vaj Es Dees mus, kom nws mus cog cov av uas muab los puab nws. 24 Tswv Ntuj ntiab tib neeg tawm, nws tso ib co Tshiab Kes Lus Npis zov lub vaj Es Dees ntawm sab hnub tuaj thiab nws tsa ib rab ntaj nplaim taws uas kiv ncig lees, thaiv txoj kev mus txog tus ntoo muaj txoj sia.

    NPN 90: 2, 3-4ABC, 5-6, 12-13

    Txais: (1) Nyob txhua tiam, Huab Tais, koj yog peb qhov chaw vam.

    Ua ntej cov roob raug tsim tawm los,
    ua ntej lub ntiaj teb thiab tas lub qab ntuj khwb tshwm muaj los,
    ib txhis dhau ib txhis koj yeej yog Tswv Ntuj lawm.

    Txais: (1) Nyob txhua tiam, Huab Tais, koj yog peb qhov chaw vam.

    Koj cia neeg hloov rov mus ua plua av,
    koj hais tias: “Me nyuam neeg, nej rov mus.”
    Vim tias ib txhiab xyoo rau koj zoo li yog nag hmo xwb,
    uas twb dhau tas lawm, los tsuas zoo li
    ib lub caij zov hmo thaum hmo ntuj xwb.

    Txais: (1) Nyob txhua tiam, Huab Tais, koj yog peb qhov chaw vam.

    Koj ua kom lawv tas thaum nyob nruab dab ntub,
    tag kis sawv ntxov lawv zoo li cov nroj tsuag hloov sai sai:
    thaum hnub tuaj nroj tsuag sawv ntsuab xiab,
    tiam sis yav tsaus ntuj nws twb ntsws tas tuag tas.

    Txais: (1) Nyob txhua tiam, Huab Tais, koj yog peb qhov chaw vam.

    Thov koj qhia peb txawj suav peb cov hnub cov hmo kom zoo,
    kom peb txawj muaj kev thoob tsib hauv nruab siab.
    HUAB TAIS, thov koj rov qab los! Yuav tos hov ntev?
    Thov koj khuv leej koj cov tub txib!

    Txais: (1) Nyob txhua tiam, Huab Tais, koj yog peb qhov chaw vam.

    As Les Lus Yas: MT 4: 4B

    Txais: As les lus yas, as les lus yas.

    Ib tug neeg tsis ciaj sia vim tej zaub mov nkaus xwb,
    tiam sis vim txhua lo lus tawm ntawm Tswv Ntuj lub ncauj los.

    Txais: As les lus yas, as les lus yas.

    Ntawv Moo Zoo: MK 8: 1-10

    1 Thaum lub caij ntawd, rov qab muaj dua ib pab neeg coob coob tuaj, lawv tsis muaj dab tsi noj. Yes Xus hu nws cov thwj tim los, nws hais rau lawv tias :
    2 "Kuv hlub cov neeg no, vim lawv nrog kuv nyob tau peb hnub lawm, lawv tsis muaj dab tsi noj.
    3 Yog kuv cia lawv yoo tshaib rov mus tsev, mas lawv yuav tsaus muag tom tog kev, vim lawv ib txhia tuaj deb tuaj." 4 Cov thwj tim teb rau Yes Xus tias : "Qhov chaw no yog chaw twj cuab xwb, yuav muab mov qhov twg los rau cov neeg ntawd noj kom tsau ?”
    5 Ces Yes Xus nug lawv tias : "Nej muaj pes tsawg lub ncuav mov?" Lawv hais tias : "Xya lub."
    6 Yes Xus kom tsoom sid zaum pem teb. Nws tuav xya lub ncuav mov, nws ua Ntuj tsaug, nws muab cov ncuav mov ntais, muab cev rau cov thwj tim kom nqa mus faib; ces cov thwj tim nqa mus faib rau pab neeg coob coob noj.
    7 Lawv muaj ob peb tug me nyuam ntses thiab. Yes Xus foom hmoov zoo rau cov ntses tas, nws kom lawv nqa mus rau sawv daws noj thiab.
    8 Lawv sawv daws tau noj tsau plab kawg, lawv khaws cov seem nqa los: tau xya tawb !
    9 Cov neeg ntawd kwv yees muaj plaub txhiab leej. Ces Yes Xus kom lawv rov mus tsev.
    10 Yes Xus nrog cov thwj tim nce mus hauv nkoj tam sis ntawd, nws mus rau thaj tsam Das Mas Nus Thas.



    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 13th February 2017, 4:15 pm

    TIM 13 LUB 2 HLIS 2017

    Hnub Ob Lis Piam Rau Nruab Xyoo A Nruab Lis Piam Xyoo I

    Xaj Nyeem Ib: HP 4: 1-15, 25


    1 As Das paub nws poj niam Es Vas, ces Es Vas xeeb tub thiab yug tau Kas Ees; nws hais tias : "Kuv tau ib tug tub ntawm HUAB TAIS los." 2 Nws kuj yug tau As Npes, yog Kas Ees tus kwv. As Npes hlob los ua ib tug tub yug cov tsiaj me hos Kas Ees cog qoob cog loo. 3 Ntev tom qab no, Kas Ees txawm muab nws cov qoob los txi rau HUAB TAIS. 4 Hos As Npes, nws kuj muab thawj tus me nyuam uas nws cov tsiaj yug tau, los txi Ntuj. Nws tseem muab lawv cov roj los txi huv tib si. HUAB TAIS zoo siab txais As Npes thiab nws cov txim. 5 Tab sis HUAB TAIS tsis zoo siab txais Kas Ees thiab nws cov txim, ces Kas Ees npau taws thiab ua ntsej muag dub nciab. 6 HUAB TAIS hais rau Kas Ees tias: "Vim li cas koj thiaj npau taws thiab ua ntsej muag dub nciab li ko ? 7 Yog koj ua qhov zoo mas koj yuav rov tsa taus koj lub ntsej muag xwb, puas yog? Hos yog koj tsis ua qhov zoo ces kev txhaum nyob rawv ntawm koj qhov rooj, zoo li tus tsiaj nyas nrhw koj. Nws xav tom koj, tiam sis yog koj xav mas koj yuav yeej tau nws."
    8 Tab sis Kas Ees hais rau nws tus kwv As Npes tias : "Wb mus yos tom teb." Thaum nkawd mus txog tom teb lawm, Kas Ees txawm dhia rhees mos ntiag nws tus kwv, muab tus kwv tua. 9 HUAB TAIS hais rau Kas Ees tias : "Koj tus kwv As Npes nyob qhov twg ?" Kas Ees teb tias : "Kuv tsis paub. Kuv puas yog tus zov rawv kuv tus kwv ?" 10 HUAB TAIS hais rau nws tias : "Koj tau ua dab tsi lawd? Koj tus kwv cov ntshav lub suab quaj qw hauv av tuaj rau kuv ! 11 Zaum no koj yuav tau hmoov phem nyob saum thaj av uas tau rua ncauj cug koj tus kwv cov ntshav uas yog koj txhais tes tau txo. 12 Thaum koj ua teb, av yuav tsis txi qoob rau koj; koj yuav khiav tsiv nraim thiab ua neeg loj leeb ncig ntiaj teb." 13 Kas Ees hais rau HUAB TAIS tias : "Kuv lub txim hnyav dhau, kuv ris tsis taus. 14 Ntsia saib, hnub no koj muab kuv ntiab tawm hauv thaj av zoo no mus, kuv yuav tsum mus tsiv nraim kom deb ntawm koj lub ntsej muag, thiab kuv yuav ua neeg loj leeb ncig ntiaj teb. Ntshai thawj tus neeg tuaj ntsib kuv yuav muab kuv tua xwb !" 15 HUAB TAIS teb tias : "Yuav tsis muaj li ntawd; yog leej twg tua Kas Ees mas yuav muaj tus pab ua pauj rau Kas Ees xya zaus." Ces HUAB TAIS ntaus ib lub cim rau Kas Ees kom thawj tug neeg ntsib nws txhob muab nws tua.
    25 As Das paub nws poj niam, ces nws poj niam yug tau ib tug tub ntxiv; nws poj niam tis npe rau hu ua Xes Thes, nws hais tias : "Tswv Ntuj pub dua ib tug tub rau kuv los pauv As Npes chaw, vim Kas Ees muab nws tua lawm."

    NPN 50: 1+8, 16BC-17, 20-21

    Txais: (14a) Qhov nej yuav cev rau Tswv Ntuj yog ib thaj cav txog nws.

    HUAB TAIS Tswv Ntuj tau hais lus thiab ceeb toom rau lub ntiaj teb,
    txij thaum lub hnub tawm tuaj mus txog thaum lub hnub poob qho tias:
    “Tsis yog vim nej cov thaj txi ntuj kuv thiaj tau cem nej,
    vim nej cov tsiaj hlawv txi ntuj nyob ntawm kuv xub ntiag tsis tseg.

    Txais: (14a) Qhov nej yuav cev rau Tswv Ntuj yog ib thaj cav txog nws.

    “Vim li cas nej qog kuv cov kev cai lij choj
    thiab lees kuv txoj kev cog lus ntawm nej lub ncauj,
    tiam sis nej ntxub txoj kev coj nruj raws kuv txoj cai
    thiab muab kuv cov lus pov tseg rau nram nej nrob qaum?

    Txais: (14a) Qhov nej yuav cev rau Tswv Ntuj yog ib thaj cav txog nws.

    “Nej zaum tsaws hais lus phem txog nej tus kwv tij,
    nej xyav lus moo cua txog nej niam tus tub.
    Thaum nej ua tej yam zoo li no, kuv puas yuav tsum ua ntsej lag muag dig?
    Los nej puas xav tias kuv zoo li nej thiab?
    Kuv yuav muab txim rau nej, thiab yuav piav nej lub txim kom nej paub.”

    Txais: (14a) Qhov nej yuav cev rau Tswv Ntuj yog ib thaj cav txog nws.

    As Les Lus Yas: ZAM 14: 6

    Txais: As les lus yas, as les lus yas.

    Huab Tais hais tias: Kuv yog txoj kev, qhov tseeb thiab txoj sia,
    tsis muaj leej twg mus cuag tau Leej Txiv, yog nws tsis mus ntawm kuv mus.

    Txais: As les lus yas, as les lus yas.

    Ntawv Moo Zoo: MK 8: 11-13

    11 Cov Fas Lis Xais tawm tuaj, lawv pib nrog Yes Xus tham. Lawv xav sim Yes Xus, ces lawv taij kom Yes Xus ua ib lub cim tawm saum ntuj tuaj.
    12 Yes Xus xyu twj ywm rau nruab siab, nws hais tias : "Tiam neeg no taij ib lub cim ua dab tsi ? Kuv hais tseeb rau nej, yuav tsis muaj ib lub cim rau tiam neeg no pom."
    13 Ces Yes Xus tso lawv tseg, nws rov nce nkoj thiab sawv kev mus rau sab ntug dej tim ub.


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 13th February 2017, 5:14 pm

    TIM 14 LUB 2 HLIS 2017

    Hnub Peb Lis Piam Rau Nruab Xyoo A Nruab Lis Piam Xyoo I

    Hwm LN Cyril thiab LN Methodius

    Zaj Nyeem Ib: HP 6: 5-8; 7: 1-5, 10


    6 5 HUAB TAIS pom hais tias nyob ntiaj teb, neeg siab phem tas nrho, thiab neeg lub siab tsuas xav qhov phem tas mus li xwb. 6 HUAB TAIS khuv xim hais tias cas nws tau tsim neeg los nyob ntiaj teb, nws tu siab. 7 Ces HUAB TAIS hais tias : "Kuv yuav muab cov neeg uas kuv tau tsim ntawd rhuav kom ploj tas saum daim npoo av, tsis hais neeg, los tsiaj nyeg, kab ntsaum los noog ya saum ntuj huv tib si, vim kuv khuv xim tias kuv tau tsim lawv los."
    8 Tiam sis Nos Hes yog ib tug neeg zoo xis HUAB TAIS siab.
    7 1 HUAB TAIS hais rau Nos Hes tias : "Koj nkag mus hauv lub nkoj, koj thiab tas nrho koj tsev neeg, vim nyob hauv tiam neeg no, kuv tsuas pom koj ib leeg xwb thiaj li ncaj ncees. 2 Ntawm tas nrho cov tsiaj huv, koj yuav khaws xya nkawm, tus txiv nrog tus maum; ntawm cov tsiaj tsis huv, koj yuav khaws ib nkawg, ib tug txiv thiab ib tug maum. 3 Hos cov noog ya saum ntuj, koj khaws xya nkawm, ib tug lau nrog tus poj, kom tau ua noob rau ntiaj teb. 4 Tshuav xya hnub ntxiv xwb kuv yuav tso nag los nyab ntiaj teb plaub caug hnub plaub caug hmo, kuv yuav rhuav tas puas tsav yam muaj sia kuv tau tsim los kom ploj ntais saum daim npoo av mus." 5 Nos Hes ua tas puas tsav yam raws li HUAB TAIS kom nws ua.
    10 Thaum dhau xya hnub lawm, ces dej nag los nyab ntiaj teb.

    NPN 29: 1A+2, 3AC-4, 3B+9C-10

    Txais: (11b) Huab Tais yuav foom kev thaj yeeb rau nws haiv neeg.

    Nej muab rau HUAB TAIS, nej uas yog Tswv Ntuj cov tub,
    nej muab rau HUAB TAIS lub koob meej thiab lo lus qhuas,
    nej muab rau HUAB TAIS lub koob meej kom phim nws lub npe;
    nej hnav ib co tsoos ntshiab mus pe hawm HUAB TAIS.

    Txais: (11b) Huab Tais yuav foom kev thaj yeeb rau nws haiv neeg.

    HUAB TAIS lub suab nyob saum cov dej,
    HUAB TAIS nyob saum cov dej loj dav tas nrho.
    HUAB TAIS lub suab muaj hwj huam,
    HUAB TAIS lub suab muaj hwj chim.

    Txais: (11b) Huab Tais yuav foom kev thaj yeeb rau nws haiv neeg.

    Tus Tswv Ntuj muaj koob meej nrov nroo ntws li xob quaj,
    nyob hauv nws lub tuam tsev sawv daws hais tias, “Nto koob meej!”
    HUAB TAIS zaum saum theej kiab saum toj cov dej nyab,
    HUAB TAIS zaum saum teeej kiab ua vaj mus tas ib txhis.

    Txais: (11b) Huab Tais yuav foom kev thaj yeeb rau nws haiv neeg.

    As Les Lus Yas: ZAM 14: 23

    Txais: As les lus yas, as les lus yas.

    Huab Tais hais tias: Tus twg nyiam kuv, mas nws yuav khaws kuv lo lus,
    ces kuv Txiv yuav nyiam nws, thiab peb yuav tuaj nyob hauv nws.

    Txais: As les lus yas, as les lus yas.

    Ntawv Moo Zoo: MK 8: 14-21

    14 Cov thwj tim tsis nco qab ntim mov, lawv tsuas muaj ib lub ncuav mov nyob hauv nkoj xwb. 15 Thaum ntawd, Yes Xus qhia lawv zoo li no : "Nej yuav xyuam xim, nej yuav ceev faj txog cov poov xab Fas Lis Xais thiab cov poov xab Hes Los." 16 Ces cov thwj tim sib tham tias yog vim lawv tsis ntim mov. 17 Yes Xus paub qhov lawv xav, ces Yes Xus hais rau lawv tias : "Ua cas nej sib tham tias yog vim nej tsis ntim mov ? Nej tseem tsis tau to taub thiab tsis paub li lod? Puas yog nej lub siab qhwv dhau lawd? 18 Puas yog nej lam muaj qhov muag xwb, nej tsis pom kev, nej lam muaj pob ntseg xwb, nej tsis hnov lus li ? 19 Nej tsis nco qab txog thaum kuv ntais tsib lub ncuav mov rau tsib txhiab leej noj, nej khaws tau pes tsawg tawb mov seem nqa mus?" Cov thwj tim teb tias : "Kaum ob tawb." 20 “Thiab zaum uas kuv ntais xya lub ncuav mov rau plaub txhiab leej noj, nej khaws tau pes tsawg tawb mov seem nqa mus ?" Lawv hais tias : "Xya tawb." 21 Ces Yes Xus hais rau lawv tias : "Ua cas nej tseem tsis to taub thiab lod?"


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 14th February 2017, 10:25 am

    TIM 15 LUB 2 HLIS 2017

    Hnub Plaub Lis Piam Rau Nruab Xyoo A Nruab Lis Piam Xyoo I

    Zaj Nyeem Ib: HP 8: 6-13, 20-22


    6 Nos Hes tos plaub caug hnub, ces nws qhib lub qhov rai uas nws tau ua rau ntawm lub nkoj, 7 nws tso tus uab lag tawm mus; uab lag ya mus ya los mus txog thaum dej qhuav hauv ntiaj teb tso. 8 Nos Hes kuj tso tus nquab tawm ntawm nws mus xyuas saib dej puas tau nqhuab hauv av thiab. 9 Tiam sis tus nquab nrhiav tsis tau chaw tsaws li, ces nquab ya rov los rau ntawm lub nkoj, vim dej tseem nyab cov av hauv ntiaj teb thoob plaws. Nos Hes thiaj li xyab tes mus txais tus nquab thiab coj nquab los nrog nws nyob hauv lub nkoj. 10 Nws tos tau xya hnub ntxiv, nws rov qab tso tus nquab tawm ntawm lub nkoj mus dua. 11 Thaum tsaus ntuj, nquab ya rov los, ntawm nws kaus ncauj muaj ib tug ceg txiv ntoo roj muaj nplooj ntsuab uas tus nquab nyuam qhuav de tshiab tshiab. Ces Nos Hes paub tias dej nqig tas lawm. 12 Nws rov tos tau xya hnub ntxiv, nws mam rov tso tus nquab tawm mus dua. Tus nquab tsis rov los ntxiv lawm. 13 Ces thaum Nos Hes muaj rau pua ib xyoos, lub ib hlis, xiab ib, dej nqig tas hauv ntiaj teb lawm. Nos Hes yaws lub ruv npog lub nkoj, nws ntsia pom lub ntiaj teb cov npoo av qhuav lawm.
    20 Nos Hes tsa ib lub thaj txi ntuj rau Huab Tais. Nws muab txhua yam tsiaj huv thiab txhua yam noog huv los hlawv txi Ntuj saum lub thaj. 21 Thaum Huab Tais hnov cov pa ncho tsw qab, Huab Tais hais rau nws tus kheej tias : "Kuv yuav tsis foom phem rau av vim tib neeg ib zaug ntxiv lawm, vim tias neeg lub siab yeej xeeb tau phem puag thaum yau los. Thiab kuv yuav tsis ua kom txhua yam muaj sia tu noob li kuv tau ua no ib zaug ntxiv.” 22 Tsuav yog tseem muaj lub ntiaj teb, mas yuav muaj caij cog qoob thiab caij sau qoob, yuav muaj txias thiab muaj kub, yuav muaj caij sov caij no, yuav muaj nruab hnub thiab muaj hmo ntuj mus li."

    NPN 116: 12-13, 14-15, 18-19

    Txais: (17a) Huab Tais, kuv yuav cev ib thaj txi ntuj cav txog koj.
    los: As les lus yas.

    Kuv yuav muab dab tsi los pauj
    ib puas tsav yam zoo uas HUAB TAIS ua rau kuv ?
    Kuv yuav cev lub ntim cawm neeg rau nws,
    kuv yuav hu txog HUAB TAIS, yuav tuav txog nws lub npe

    Txais: (17a) Huab Tais, kuv yuav cev ib thaj txi ntuj cav txog koj.
    los: As les lus yas.

    Kuv yuav pauj kuv lub yeem rau HUAB TAIS
    nyob ntawm tas nws haiv neeg xub ntiag.
    HUAB TAIS saib cov ntseeg nws
    txoj kev tuag muaj nqes tas nrho.

    Txais: (17a) Huab Tais, kuv yuav cev ib thaj txi ntuj cav txog koj.
    los: As les lus yas.

    Kuv yuav pauj kuv lub yeem rau HUAB TAIS
    nyob ntawm nws haiv neeg xub ntiag,
    nyob ntawm cov tshav loog hauv HUAB TAIS tsev,
    nyob hauv nruab nrab koj, Yes Lus Xas Les.
    .
    Txais: (17a) Huab Tais, kuv yuav cev ib thaj txi ntuj cav txog koj.
    los: As les lus yas.

    As Les Lus Yas: EFX 1: 17-18

    Txais: As les lus yas, as les lus yas.

    Thov kom peb tus Huab Tais Yes Xus Pleev leej Txiv
    qhib peb lub qhov muag hauv peb lub siab kom pom kev,
    kom peb thiaj paub txog tias peb txoj kev tso siab
    yog dab tsi thaum peb mloog Tswv Ntuj hu peb.

    Txais: As les lus yas, as les lus yas.

    Ntawv Moo Zoo: MK 8: 22-26

    22 Thaum Yes Xus thiab nws cov thwj tim tuaj txog Npes Xais Das, lawv coj ib tug neeg dig muag tuaj rau Yes Xus, lawv thov kom Yes Xus kov tus dig muag.
    23 Yes Xus tuav tus dig muag tes, thiab coj nws tawm mus rau sab zos nraud. Yes Xus muab nws aub ncaug pleev tus dig muag ob lub qhov muag, ces nws tsa tes rau saum tus dig muag. Yes Xus nug nws tias : "Koj puas pom ib qho dab tsi ?"
    24 Tus dig muag tsa muag saib, nws teb tias : "Kuv pom ib co neeg, zoo li ib co ntoo mus kev."
    25 Yes Xus rov qab tsa tes rau saum tus dig muag ob lub qhov muag dua, ces tus dig muag pom kev tseeb, nws zoo lawm. Nws pom ib puas tsav yam meej thiab nws pom tau deb.
    26 Yes Xus thiaj kom nws rov mus tsev, Yes Xus hais rau nws tias : "Tab yog lub zos no, los koj tsis txhob rov mus hauv li."


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 16th February 2017, 7:12 am

    TIM 16 LUB 2 HLIS 2017

    Hnub Tsib Lis Piam Rau Nruab Xyoo A Nruab Lis Piam Xyoo I

    Zaj Nyeem Ib: HP 9: 1-13


    1 Tswv Ntuj foom hmoov zoo rau Nos Hes thiab rau nws cov tub, nws hais rau lawv tias: "Nej yeej meem tsim noob, nej kav tsij huam vam mus nyob puv lub ntiaj teb. 2 Kom tas puas tsav yam tsiaj hauv ntiaj teb, puas tsav yam noog ya saum ntuj, puas tsav yam tsiaj nkag hauv av thiab puas tsav yam ntses hauv hiav txwv hwm nej thiab ntshai nej. Lawv nyob hauv nej lub xib teg tas huv si. 3 Txhua yam txawj ua zog thiab muaj sia yog txhiam xws rau nej noj. Kuv tseem muab cov nroj ntsuab rau nej siv thiab, ces yog kuv muab tas txhua yam tib si rau nej lawm. 4 Tshuav ib qho xwb: nej yuav tsis txhob noj nqaij nrog nws txoj sia, uas yog cov ntshav. 5 Vim hais tias, kuv yuav nug txog nej txhua tus cov ntshav, kuv yuav nug ntawm tsiaj thiab ntawm tib neeg, yuav nug ib tug tib neeg txog nws tus kwv tij cov ntshav; kuv yuav nug txog tib neeg txoj sia. 6 Leej twg txo tib neeg cov ntshav, kuj yuav raug tib neeg txo nws cov ntshav. Vim hais tias neeg tau raug tsim los zoo xws li Tswv Ntuj tus ntsuj duab. 7 Ntawm nej, mas nej yeej meem tsim noob, yeej meem huam vam coob mus nyob puv ntiaj teb thiab kav ntiaj teb."
    8 Tswv Ntuj hais li no rau Nos Hes thiab rau nws cov tub nrog nws: 9 "Ntawm no, kuv nrog nej cog lus, nrog nej thiab nej caj ces los tom qab nej cog lus, 10 thiab nrog txhua yam uas muaj txoj sia nyob nrog nej, cov noog, cov tsiaj nyeg, txhua tsav txhua hom tsiaj hauv ntiaj teb uas nrog nej tawm hauv lub nkoj los, cog lus. 11 Kuv cog lus rau nej tias : Tas puas tsav yam muaj sia yuav tsis raug dej nyab rhuav siav kom tu noob ib zaug ntxiv. Yuav tsis muaj dej los nyab ntiaj teb thiab rhuav ntiaj teb ib zaug ntxiv." 12 Tswv Ntuj hais tias : "Ntawm no yog lub cim rau cov tiam neeg tom ntej paub tias kuv tsa ib txog kev cog lus rau ntawm kuv thiab ntawm nej thiab rau tas puas tsav yam muaj sia uas nrog nej nyob. 13 Kuv ua zaj sawv rau saum cov huab ; nws yuav ua lub cim nco txog tias kuv thiab lub ntiaj teb tau cog lus cia lawm.

    NPN 102: 16-18, 19-21, 29+22-23

    Txais: (20b) Huab Tais nyob saum ntuj dauv muag ntsia lub ntiaj teb.

    HUAB TAIS, txhua haiv neeg yuav hwm koj lub npe,
    tas cov vaj nyob ntiaj teb yuav ntshai koj lub hwj chim,
    Vim thaum HUAB TAIS rov txhim Xis Yoos,
    sawv daws yuav pom nws nyob hauv nws lub hwj chim;
    nws yuav tig los mloog cov neeg txom nyem tej lus thov,
    nws yuav tsis thuam lawv zaj teev ntuj.

    Txais: (20b) Huab Tais nyob saum ntuj dauv muag ntsia lub ntiaj teb

    Nej sau tej no cia rau phaj tub ki yuav los yav tom ntej,
    cov tiam neeg HUAB TAIS yuav tsim thiaj yuav cav txog nws tias:
    “HUAB TAIS nyob saum nws lub tsev ntshiab dauv muag los saib;
    HUAB TAIS nyob saum txheej ntuj siab ntsia ntiaj teb,
    Kom tau mloog cov neeg nyob txim lub suab ntsaj,
    kom tau tso cov yuav raug tua dim kev tuag.”

    Txais: (20b) Huab Tais nyob saum ntuj dauv muag ntsia lub ntiaj teb

    Koj cov tub txib tej me nyuam yuav nyob ruaj nreb,
    lawv cov xeeb ntxwv yuav nyob ntawm koj xub ntiag mus li.
    Sawv daws yuav tshaj HUAB TAIS lub npe nyob saum Xis Yoos,
    thiab yuav cav lus zoo txog nws nyob Yes Lus Xas Les;
    thaum ntawd cov haiv neeg yuav sib sau los nyob ua ke,
    cov ceeb tsheej yuav sib txoos los tsob hwb HUAB TAIS.
    Txais: (20b) Huab Tais nyob saum ntuj dauv muag ntsia lub ntiaj teb

    As Les Lus Yas: ZAM 6: 63C, 68C

    Txais: As les lus yas, as les lus yas.

    Huab Tais, koj cov lus yog tswv yim thiab yog txoj sia;
    koj muaj cov lus pub txoj sia nyob mus li.

    Txais: As les lus yas, as les lus yas.

    Ntawv Moo Zoo: MK 8: 27-33

    27 Yes Xus nrog nws cov thwj tim mus rau cov zos nyob cheeb tsam ntawm Xes Ntxas Les Fis Lis Pos. Thaum lawv tseem taug kev, Yes Xus nug nws cov thwj tim li no : "Luag tej hais tias kuv yog leej twg ?"
    28 Cov thwj tim teb tias : "Lawv hais tias koj yog Zam Ntxuav Plig, hos ib txhia hais tias koj yog Es Lias, ib txhia hais tias koj yog ib tug hauv cov yaj saub."
    29 Yes Xus nug lawv tias : "Nej ne, nej hais tias kuv yog leej twg ?" Pob Zeb teb rau Yes Xus tias : "Koj yog Leej Pleev."
    30 Ces Yes Xus txwv lawv nruj kom txhob hais txog nws rau leej twg li.
    31 Yes Xus pib qhia cov thwj tim hais tias : "Neeg Leej Tub yuav tsum raug txom nyem lo kawg nkaus. Cov txwj laus, cov thawj leej choj thiab cov thoob xwm yuav tsis kam lees nws ; luag yuav muab nws tua; peb hnub tom qab, nws yuav sawv rov los.
    32 Yes Xus tab meeg hais txog tej ntawd tsis zais li. Pob Zeb txawm rub Yes Xus los ntawm nws, ces Pob Zeb yws Yes Xus.
    33 Tab sis Yes Xus tig los ntsia nws cov thwj tim, nws cem Pob Zeb hnyav ncawv tias : "Xas Tas, koj lawv kuv qab ! Vim koj cov tswv yim koj xav tsis yog li Tswv Ntuj cov, yog li neeg cov xwb !"


    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 16th February 2017, 10:09 am

    TIM 17 LUB 2 HLIS 2017

    Hnub Rau Lis Piam Rau Nruab Xyoo A nruab Lis Piam Xyoo I

    Hwm xya tus LN tsim tsa lub Koom Haum cov Servites

    Zaj Nyeem Ib: HP 11: 1-9


    1 Thaum ntawd, tas ntiaj teb sawv daws hais ib xeem lus thiab siv ib co lus xwb. 2 Thaum lawv tsiv sab toob fab los mus, lawv los nrhiav tau ib lub tiaj nyob hauv teb chaws Xis Nes As, ces lawv los nyob ntawd. 3 Lawv ib leeg hais rau ib leeg tias : "Tuaj peb puab thwj cib, peb muab ci hauv hluav taws kom tawv!" Ces lawv siv cov thwj cib ntawd los pauv cov pob zeb txhim tsev thiab siv roj hmab dub los pauv cov hmoov xis maas ua cov leem. 4 Lawv hais tias : "Tuaj peb txhim ib lub nroog rau peb thiab ib tug pej thuam kom lub ntsis siab siab mus txog saum ntuj, ces peb lub npe thiaj yuav nrov; tsis li ntawd ces ntshai peb yuav sib tawg mus nyob thoob ntiaj teb xwb."
    5 HUAB TAIS nqes los xyuas lub nroog thiab tus pej thuam uas neeg tau tsa sawv. 6 Ces HUAB TAIS hais tias : "Ntsia saib, lawv yog ib haiv neeg xwb, thiab hais ib xeem lus xwb; qhov no tsuas yog qhov lawv nyuam qhuav pib ua xwb, txij no mus yog lawv xav ua dab tsi thaum twg ces yuav tsis muaj ib yam uas lawv yuav ua tsis tau lawm. 7 Mus, peb sim nqes mus xyuas saib; peb yuav ua kom lawv hais lus sib txawv, ces lawv yuav tsis sib to taub ntxiv lawm." 8 Ces HUAB TAIS ua kom lawv sib tawg mus nyob thoob ntiaj teb ces lawv tso tseg tsis txhim lub nroog ntxiv. 9 Vim li ntawd lub nroog thiaj hu ua nroog Npas Npes, vim yog nyob ntawd tas ntiaj teb neeg hais lus tsis sib to taub ntxiv; thiab yog nyob ntawd, HUAB TAIS ua kom neeg tawg mus nyob txhua qhov chaw saum daim npoo av thoob ntiaj teb.

    NPN 33: 10-11, 12-13, 14-15

    Txais: (12) Haiv neeg Huab Tais xaiv ua nws tug lawv tau txoj hmoov zoo.

    HUAB TAIS rhuav cov hauj lwm tsoom kuj cuab npaj ua,
    nws ua kom cov haiv neeg zaj tswv yim mus tsis taus.
    Cov hauj lwm HUAB TAIS npaj ciaj sia mus li,
    zaj nws xav tau hauv nruab siab nyob txheej dhau txheej.

    Txais: (12) Haiv neeg Huab Tais xaiv ua nws tug lawv tau txoj hmoov zoo.

    Hmoov zoo rau haiv neeg uas Tswv ntuj yog lawv tus HUAB TAIS,
    Hmoov zoo rauv Haiv neeg nws xaiv los ua nws lub cuab tam!
    HUAB TAIS nyob txheej ntuj saud dauv muag los ntsia,
    nws pom tas ib tsoom neeg cov tub ki.

    Txais: (12) Haiv neeg Huab Tais xaiv ua nws tug lawv tau txoj hmoov zoo.

    Nws zaum saum nws lub rooj zaum saib,
    nws pom tas ib tsoom neeg nyob ntiaj teb.
    Nws yog tus puab txhua leej txhua tus lub siab,
    nws to taub txhua txoj hauj lwm neeg ua.

    Txais: (12) Haiv neeg Huab Tais xaiv ua nws tug lawv tau txoj hmoov zoo.

    As Les Lus Yas: ZAM 15: 15B

    Txais: As les lus yas, as les lus yas.

    Huab Tais hais tias: Kuv hu nej ua phooj ywg,
    vim kuv tau qhia rau nej paub tas ib puas tsav yam
    kuv hnov ntawm Leej Txiv los.

    Txais: As les lus yas, as les lus yas.

    Ntawv Moo Zoo: MK 8: 34—9: 1

    34 Yes Xus hu tsoom sid thiab cov thwj tim los, nws hais rau lawv tias : "Yog leej twg xav los raws kuv, nws yuav tsum tsis txhob nco qab nws tus kheej, nws yuav kwv nws tus ntoo cuam, thiab yuav lawv kuv qab.
    35 Vim yog leej twg xav cawm nws txoj sia, mas nws yuav plam nws txoj sia. Hos leej twg plam nws txoj sia vim kuv thiab vim lub Moo Zoo, mas nws yuav cawm nws txoj sia.
    36 Yuav muaj qab hau dab tsi rau ib tug neeg, yog nws txeeb tau lub qab ntuj no tas huv tib si los ua nws tug, tab sis nws ua nws txoj sia ploj?
    37 Tus tib neeg ntawd yuav muab dab tsi los pauv thiaj tau nws txoj sia ?
    38 Tus twg txaj muag lees kuv thiab kuv cov lus nyob hauv tiam neeg fav xeeb thiab muaj txhaum no, mas Neeg Leej Tub kuj yuav txaj muag lees tus ntawd thaum nws yuav rov los muaj nws Txiv lub hwj chim, thiab nrog tsoom tshiab ntshiab.”
    9 1 Yes Xus tseem hais rau lawv tias : "Kuv hais tseeb rau nej : cov neeg nyob ntawm no, ib txhia yuav tsis xub saj kev tuag ua ntej lawv tau pom Tswv Ntuj lub Ceeb Tsheej muaj hwj huam los txog tso.”



    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 18th February 2017, 6:26 am

    TIM 18 LUB 2 HLIS 2017

    Hnub Xya Lis Piam Rau Nruab Xyoo A Nruab Lis Piam Xyoo I

    Zaj Nyeem Ib: HES NPLAWS 11: 1-7


    1 Txoj kev ntseeg yog txoj kev zeem tau meej tias peb yuav txais yam uas peb cia siab tos, nws yog qhov puav pheej tias yam uas peb tsis pom, yeej muaj tseeb tiag. 2 Yog txoj kev ntseeg ua kom cov poj yawm txwv koob thaud tau txais Ntuj txoj kev lees paub lawv. 3 Nyob hauv txoj kev ntseeg, peb to taub tias yog Tswv Ntuj lo lus tau tsim lub ntuj thiab lub ntiaj teb. Li ntawd, tej yam uas peb pom tau yog tawm ntawm tej yam peb pom tsis tau tuaj. 4 Yog vim txoj kev ntseeg, mas As Npes thiaj cev ib thaj txi Ntuj muaj nqis dua Kas Ees thaj rau Tswv Ntuj; vim kev ntseeg, nws thiaj tau txais kev lees paub tias nws siab ncaj, Tswv Ntuj thiaj lees txais nws cov paj tshab; vim kev ntseeg, txawm As Npes tuag lawm los nws tseem hais lus qees. 5 Yog vim txoj kev ntseeg, mas Hes Nov thiaj cia li nce mus saum ntuj lawm, nws tsis ntsib txoj kev tuag li; neeg nrhiav tsis tau nws ntxiv, vim Tswv Ntuj coj nws mus saum ntuj lawm. Thaum nws tseem tsis tau mus saum ntuj mas nws tau txais kev lees paub tias nws yog ib tug neeg ntxim Tswv Ntuj siab. 6 Yog neeg tsis muaj txoj kev ntseeg, mas neeg ua ntxim Tswv Ntuj siab tsis tau. Vim tus neeg uas txav mus ze Tswv Ntuj nws yuav tsum ntseeg tias muaj Tswv Ntuj tiag, thiab ntseeg tias Tswv Ntuj yog tus pub paj tshab zoo rau cov neeg nrhiav nws. 7 Yog vim kev ntseeg, mas Tswv Ntuj thiaj xub qhia txog tej yam uas tseem tsis tau pom rau Nos Hes paub, ces Nos Hes mloog, nws txua ib lub nkoj kom tau kev cawm nws tsev neeg. Yog vim kev ntseeg mas Nos Hes muab txim rau lub qab ntuj neeg, thiab nws yog tus tau txais txoj kev ncaj lub cuab tam uas los ntawm kev ntseeg los.

    NPN 145: 2-3, 4-5, 10-11

    Txais: (1) Kuv yuav cav txog koj lub npe mus li, Huab Tais.

    Kuv yuav niaj hnub cav txog koj lub koob meej,
    kuv yuav cav lus zoo txog koj lub npe mus li ib txhiab ib txhis.
    HUAB TAIS loj tas nrho, tsim nyog cav txog nws ;
    nws loj tas nrho, neeg ntsuas tsis tau.

    Txais: (1) Kuv yuav cav txog koj lub npe mus li, Huab Tais.

    Sawv daws yuav qhuas txog koj tej hauj lwm txheej dhau txheej,
    Lawv yuav tshaj koj txoj kev muaj hwv xyeej rau neeg paub.
    Lawv yuav hais txog koj lub hwj chim loj ci ntsa iab muaj koob meej.
    Lawv yuav piav txog koj cov dej num tsim nyog qhuas.

    Txais: (1) Kuv yuav cav txog koj lub npe mus li, Huab Tais.

    HUAB TAIS, cia koj txhua yam hauj lwm ua koj tsaug,
    thiab cia cov neeg nyiam koj cav txog koj.
    Cia lawv qhuas txog koj lub Ceeb Tsheej muaj hwj chim
    Thiab piav txog koj lub hwj huam loj.

    Txais: (1) Kuv yuav cav txog koj lub npe mus li, Huab Tais.

    As Les Lus Yas: MK 9: 7

    Txais: As les lus yas, as les lus yas.

    Lub ntuj qhib plho ces Leej Txiv lub suab nrov nroo ntws tias :
    "Tus no yog kuv Leej Tub uas kuv nyiam ; nej mloog nws hais."

    Txais: As les lus yas, as les lus yas.

    Ntawv Moo Zoo: MK 9: 2-13

    2 Tau rau hnub tom qab, Yes Xus hu Pob Zeb, Yas Kos, thiab Zam rau ib cag, nws coj lawv nkaus xwb, lawv nce mus rau saum ib lub roob siab. Ces nws ib ce hloov tas rau ntawm lawv xub ntiag. 3 Nws cov ris tsho cia li ci dawb paug, dawb noaum nyob ntiaj teb no tsis muaj tshuaj yuav ua tau kom dawb li ntawd. 4 Es Lias thiab Mais Xes nkawd tawm los rau lawv pom, nkawd nrog Yes Xus tham. 5 Ces Pob Zeb hais rau Yes Xus tias : "Xib Hwb, peb nyob ntawm no mas hmoov zoo kawg. Cia peb ua peb lub tsev tsam phooj : ib lub rau koj, ib lub rau Mais Xes, ib lub rau Es Lias." 6 Pob Zeb tsis paub tias nws hais dab tsi, vim lawv ntshai kawg. 7 Ces ib twv huab los ntxoov roos lawv, thiab ib lub suab nrov hauv twv huab tuaj tias : "Tus no yog kuv Leej Tub uas kuv nyiam; nej mloog nws hais."
    8 Ib sij huam, lawv ntsia ib ncig tsis pom leej twg li, tsuas pom Yes Xus tib leeg nrog lawv nyob xwb. 9 Thaum lawv tab tom nqes pem roob los, Yes Xus txwv lawv kom txhob piav txog qhov lawv pom ntawd rau leej twg li, yuav tsum tos kom Neeg Leej Tub sawv hauv cov tuag rov los tso. 10 Peb leeg thwj tim ua raws li lo lus txwv ntawd, tab sis lawv sib nug lawv tias "sawv hauv cov tuag rov los" yog txhais li cas.
    11 Ces lawv nug Yes Xus tias : "Vim li cas cov kws Ntawv Ntshiab hais tias Es Lias yuav tsum xub los tso ?" 12 Yes Xus thiaj hais rau lawv tias : "Yog tiag, Es Lias yuav tsum xub los tso, thiab nws yuav kho tas puas tsav yam kom zoo. Thiab ntawv kuj hais txog tias Neeg Leej Tub yuav raug li cas, nws yuav tsum raug txom nyem loj, thiab yuav raug luag ntxub. 13 Tiam sis kuv hais rau nej tias Es Lias twb los lawm, tab sis lawv ua rau nws ywj lawv siab nyiam, raws nraim li Ntawv xub sau txog nws lawm.



    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 20th February 2017, 1:02 pm

    TIM 20 LUB 2 HLIS 2017

    Hnub Ob Lis Piam Xya Nruab Xyoo A Nruab Lis Piam Xyoo I

    Nyob USA yog Hnub thov Ntuj pab rau tus Pwm Tsav (tus President) kav yus teb chaws

    Zaj Nyeem Ib: NPES XIS LAS 1: 1-10


    1 Txhua txoj kev thoob tsib tuaj ntawm HUAB TAIS tuaj. Kev thoob tsib nrog HUAB TAIS nyob mus li. 2 Cov suab puam hauv hiav txwv, cov teev dej nag, cov hnub cov hmo uas yuav nyob mus li, leej twg thiaj yuav suav txheeb ? 3 Lub ntuj siab li cas, lub ntiaj teb dav li cas, qab tiv txwv tob li cas, leej twg thiaj yuav ntsuas tau ? 4 Ntuj tsim kev thoob tsib ua ntej txhua tsav txhua yam, thiab lub tswv yim ntse xyuam xim yeej ib txwm nyob puag thaum ntxov ub los. 5 Kev thoob tsib qhov chaw txhawv yog Tswv Ntuj lo lus nyob puag saum cov txheej ntuj siab, nws tej kev yog tej lus qhuab lus qhia uas tsis muaj pib muaj xaus. 6 Kev thoob tsib tus cag, Ntuj tau muab rau leej twg pod? Kev thoob tsib cov nru lus tob tob, leej twg thiaj paub txog ? 7 Ntuj qhib kev thoob tsib cov txuj ci rau leej twg pom xyeem ? Leej twg to taub nws txoj kev muaj muaj tswv yim ua ntau yam ? 8 Tsuas muaj ib tug xwb thiaj thoob tsib, uas tsim nyog sawv daws ntshai; nws zaum saum nws lub theej kiab. Tsuas muaj ib tug xwb, yog tus Nyob Siab, tus vaj tsim ntuj tsim teb muaj hwj huam tas nrho, nws zaum saum nws lub theej kiab. 9 Yog Huab Tais, nws yog tus tau tsim kev thoob tsib, nws pom tau, nws ntsuas tau kev thoob tsib, thiab nws tso kev thoob tsib nyob hauv nws cov hauj lwm tas tib si, 10 thiab nyob hauv txhua tus muaj txoj sia raws li nws pom zoo; Huab Tais muab kev thoob tsib pub rau cov neeg nyiam Huab Tais.

    NPN 93: 1AB, 1CD-2, 5

    Txais: (1a) HUAB TAIS ua vaj, nws hnav hwj chim muaj tsim.
    los: As les lus yas.

    Huab Tais ua vaj, nws hnav hwj chim ci ntsa iab,
    Nws hanv lub tsho muaj zog thiab sia siv khov kho.

    Txais: (1a) HUAB TAIS ua vaj, nws hnav hwj chim muaj tsim.
    los: As les lus yas.

    Nws tsim Lub ntiaj teb nyob ruaj nreb, txav tsis tau chaw.
    Koj lub theej kiab yeej teem tau ruaj khov kho txij puag thaum ub los.
    Huab Tais, koj yeej ib txwm nyob txhiab niag tim puas xyoo mus li.

    Txais: (1a) HUAB TAIS ua vaj, nws hnav hwj chim muaj tsim.
    los: As les lus yas.

    Koj cov cai lij choj tseeb khov tas nrho,
    Huab Tais, txoj kev ntshiab tsab koj lub tsev
    kom zoo nkauj mus li lawm yav tom ntej.

    Txais: (1a) HUAB TAIS ua vaj, nws hnav hwj chim muaj tsim.
    los: As les lus yas.

    As Les Lus Yas: 2 TM 1: 10

    Txais: As les lus yas, as les lus yas.

    Peb tus Cawm Seej Yes Xus Pleev tau rhuav txoj kev tuag pov tseg,
    thiab tau ua kom txoj sia ci tawm tuaj nyob hauv lub Moo Zoo.

    Txais: As les lus yas, as les lus yas.

    Ntawv Moo Zoo: MK 9: 14-29

    14 Thaum Yes Xus nrog Pob Zeb, Yas Kos thiab Zam lawv rov los txog ntawm cov thwj tid, lawv pom ib pab neeg coob coob nyob ncig cov thwj tim, thiab ib co kws Ntawv Ntshiab nrog cov thwj tim sib cav. 15 Tam sim ntawd, tas tsoom sid pom Yes Xus, lawv ceeb tas, lawv khiav tuaj tos Yes Xus, thiab hais nyob zoo rau nws. 16 Ces Yes Xus nug lawv tias : "Nej sib cav txog dab tsi ?" 17 Muaj ib tug hauv pab neeg ntawd hais rau Yes Xus tias : "Xib Hwb, kuv coj kuv tus tub tuaj rau koj, nws raug ib tug dab nplaig txhav. 18 Thaum tus dab nkag rau hauv nws, mas dab muab nws thawb rau pem teb, ces tus tub ua npuas ncauj, nws zom hniav, thiab ib ce txhav tas. Kuv thov koj cov thwj tim kom lawv ntiab tus dab ntawd, tab sis lawv tsis muaj peev xwm yuav ntiab tau."
    19 Yes Xus teb rau lawv tias : "Tiam neeg tsis muaj kev ntseeg, kuv yuav nrog nej nyob txog thaum twg ? Kuv yuav nyiaj nej txog thaum twg ? Nej coj tus tub los rau kuv saib." 20 Ces lawv coj nws los rau Yes Xus. Thaum tus dab pom dheev Yes Xus, dab muab tus me nyuamb ntswj heev heev, ces nws ntog pem teb, nws dov lam rau hauv av, ua npuas ncauj nto plaws. 21 Yes Xus nug leej txiv tias : "Nws raug qhov ntawd tau hov ntev los lawm ?" Leej txiv teb tias : "Txij thaum yau los lawm. 22 Muaj ntau zaus dab muab nws thawb rau hauv hluav taws los rau hauv dej kom tuag. Yog koj pab tau, thov koj pab peb, thov koj khuv leej peb." 23 Yes Xus teb tias : "Yog koj pab taud !... Tus ntseeg, mas txhua yam yeej yuav ua tau tau nws." 24 Tam sis ntawd, tus me nyuad txiv hais nrov nrov tias : "Kuv ntseeg ! Thov koj pab kuv txoj kev ntseeg uas me me xwb!"
    25 Yes Xus pom muaj neeg coob coob tuaj ntsauv, nws cem niag dab tsis huv tias : "Dab nplaig txhav, dab lag ntseg, kuv yuam koj, koj cia li tawm hauv tus me nyuam no mus, txhob rov los nkag hauv nws ib zaug ntxiv li." 26 Tus dab nthe nrov nrov, nws muab tus me nyuam co heev heev, ces nws tawm mus. Tus me nyuam nyob zoo li tuag lawm. Coob leej hais tias : ‘nws tuag lawm.’ 27 Tab sis, Yes Xus tuav nws tes, tsa nws sawv, ces tus me nyuam sawv tsees los thiab nws sawv ntsug. 28 Thaum Yes Xus rov los txog tsev, nws cov thwj tim nug nws twj ywm tias : "Vim li cas peb ntiab tsis tau tus dab ntawd ?" 29 Yes Xus hais rau lawv tias : "Hom dab ntawd tsuas yog txoj kev teev Ntuj xwb thiaj ntiab tau."



    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1770
    Date d'inscription : 2009-10-16

    Re: COV ZAJ NYEEM NRUAB LIS PIAM XYOO I 2016-2017

    Post  Mim on 22nd February 2017, 6:02 pm

    TIM 21 LUB 2 HLIS 2017

    Hnub Peb Lis Piam Xya Nruab Xyoo A Nruab Lis Piam Xyoo I

    Hwm LN Peter Damian

    Zaj Nyeem Ib: NPES XIS LAS 2: 1-11


    1 Me tub, yog koj xav los tsob hwb Huab Tais mas koj yuav npaj koj tus plig kom txawj tiv yeej kev ntxias. 2 Koj yuav ua neeg siab ncaj thiab siab nyob ruaj nreb khov kho. Thaum txog lub caij raug txom nyem koj txhob coj dog coj dig. 3 Koj khaub zig Huab Tais, tsis txhob txav mus deb ntawm nws, ces thaum txog koj hnub kawg Huab Tais yuav tsa koj rau qhov siab. 4 Tas puas tsav yam uas tuaj raug koj, mas koj txais mog ! Thaum koj raug kev txom nyem kev poob koob meej, mas koj ua siab ntev nyiaj. 5 Vim tias luag nchuav kub nyob hauv hluav taws kom huv tuaj, hos cov neeg uas Ntuj xaiv, mas Ntuj nchuav lawv nyob hauv txoj kev tau poob ntsej muag. 6 Koj tso siab rau Huab Tais, nws yuav tuaj pab koj. Koj taug twj ywm txoj kev ncaj, koj tso siab rau Huab Tais. 7 Nej cov uas hwm Huab Tais, nej vam txog nws lub siab khuv leej neeg. Nej tsis txhob ncaim ntawm nws mus, yog ncaim ces nej kawg ntog. 8 Nej cov uas hwm Huab Tais, nej tso siab rau nws, ces nej yuav txais koob haum xwb. 9 Nej cov neeg uas hwm Huab Tais, nej vam ntsoov tias nej yuav tau txais nws cov paj tshab, nej yuav tau txais txoj kev zoo siab mus li, thiab txais nws txoj kev khuv leej neeg. 10 Nej xav txog cov phaj neeg dua tas lawm , nej saib saib cov neeg tso siab rau Huab Tais, puas muaj leej twg raug txoj kev swb ? Cov hwm Huab Tais, puas muaj ib tug uas Huab Tais tso nws pov tseg ? Los puas muaj ib tug tau thov Huab Tais, tab sis Huab Tais tsis teb nws li? 11 Vim Huab Tais hlub thiab khuv leej neeg, nws zam txhaum rau lawv thiab cawm lawv thaum lawv raug txom nyem.

    NPN 37 : 3-4, 18-19, 27-28, 39-40

    Txais: (5) Nej muab nej txoj sia cob rau Huab Tais, nws yeej yuav pab nej.

    Nej tso siab rau HUAB TAIS thiab ua qhov zoo,
    ces nej yuav tau nyob hauv lub teb chaws thiab muaj kev tso siab.
    Nej zoo siab nyob hauv HUAB TAIS,
    ces nws yuav pub rau nej raws nej lub siab ntshaw.

    Txais: (5) Nej muab nej txoj sia cob rau Huab Tais, nws yeej yuav pab nej.

    HUAB TAIS paub cov coj ncaj lub caij ua neej,
    lawv lub cuab tam yuav nyob mus li.
    Lub caij txom nyem lawv yuav tsis poob ntsej muag,
    lub caij muaj kev tshaib plab, lawv yuav tau noj tsau.

    Txais: (5) Nej muab nej txoj sia cob rau Huab Tais, nws yeej yuav pab nej.

    Nej tso txoj kev phem tseg mus ua qhov zoo,
    nej yuav nyob ruaj nreb hauv qhov zoo mus li.
    Vim HUAB TAIS nyiam txoj kev ncaj,
    nws tsis tso cov neeg ntseeg nws pov tseg.
    Cov neeg siab phem yuav raug luag muab txo kom ploj mus,
    cov tsis hwm Ntuj caj ces yuav raug muab rho tawm.

    Txais: (5) Nej muab nej txoj sia cob rau Huab Tais, nws yeej yuav pab nej.

    Txoj kev cawm tus neeg ncaj tuaj ntawm HUAB TAIS tuaj,
    nws yog lawv lub chaw nkaum thaum lawv ntsib kev nyuaj.
    HUAB TAIS pab lawv thiab tso lawv dim,
    nws tso lawv dim ntawm tus phem thiab cawm lawv,
    vim lawv tuaj nkaum hauv nws.

    Txais: (5) Nej muab nej txoj sia cob rau Huab Tais, nws yeej yuav pab nej.

    As Les Lus Yas: NKAS LAS TIAS 6: 14

    Txais: As les lus yas, as les lus yas.

    Thov kom kuv tsis txhob khav ib zaug li, yog yuav khav ces khav
    nyob hauv peb tus Huab Tais Yes Xus Pleev tus ntoo cuam xwb ,
    vim nws muab lub tniaj teb ntsia dai rau ntawm kuv
    thiab muab kuv ntsia dai rau lub ntiaj teb

    Txais: As les lus yas, as les lus yas.

    Ntawv Moo Zoo: MK 9: 30-37

    30 Yes Xus thiab nws cov thwj tim tawm qhov chaw ntawd mus, lawv hla xeev Nkas Lis Lais. Yes Xus tsis xav kom muaj neeg paub li. 31 Vim nws qhia rau nws cov thwj tim tias : "Luag yuav muab Neeg Leej Tub muag rau hauv tsoom neeg txhais tes. Lawv yuav muab nws tua. Thaum nws tuag tas lawm, peb hnub tom qab, nws yuav sawv rov los." 32 Cov thwj tim tsis to taub lo lus ntawd, tab sis lawv ntshai nug Yes Xus.
    33 Ces lawv mus txog Kas Fas Naus. Thaum lawv mus hauv tsev lawm, Yes Xus nug lawv tias : "Nej sib cav txog dab tsi nyob tom kev?" 34 Lawv nyob ntsiag to, vim nyob tom kev, lawv sib cav tias leej twg yog tus loj dua cov. 35 Yes Xus zaum, nws hu Pab Kaum Ob los, nws hais rau lawv tias : "Leej twg xav ua tus thawj, mas nws yuav ua tus tuaj tom qab sawv daws, thiab yuav ua sawv daws tus tub txib." 36 Ces Yes Xus coj ib tug me nyuam los sawv hauv nruab nrab lawv, nws puag tus me nyuam, ces nws hais rau lawv tias : 37 "Leej twg txais ib tug me nyuam yaus zoo li tus no, vim kuv lub npe, yog nws txais kuv. Thiab leej twg txais kuv, mas tsis yog nws txais kuv, yog txais Tus xa kuv tuaj."




    Sponsored content

    Re: COV ZAJ NYEEM NRUAB LIS PIAM XYOO I 2016-2017

    Post  Sponsored content


      Current date/time is 26th March 2017, 5:42 pm