COV ZAJ NYEEM NRUAB LIS PIAM XYOO I 2016-2017

TIM       11      LUB      10      HLI       2017

Hnub Plaub Lis Piam Nees Nkaum Xya Nruab Xyoo A Nruab Lis Piam Xyoo I

Hwm LN  Vaj Qhia Zam XIII    

Zaj Nyeem Ib:       YOS NAS  4:   1-11

1 Yos Nas chim kawg thiab nws npau taws vim Tswv Ntuj tsis ua li nws hais rau lub nroog Nis Nis Vas. 2 Nws thov HUAB TAIS zoo li no : "HUAB TAIS, puas yog li kuv hais thaum kuv tseem nyob hauv kuv lub teb chaws ? Tos kuv tau khiav mus rau Tas Xis los yog vim kuv yeej paub tias koj yog ib tug Tswv Ntuj khuv leej neeg, koj lub siab hlub mos nyoos, koj npau taws qeeb, koj lub siab zoo tas nrho, koj rov thim koj lo lus phem. 3 HUAB TAIS, nyem no koj thau kuv txoj sia mus mas ! Yog kuv tuag mas zoo dua kuv muaj txoj sia nyob." 4 HUAB TAIS teb tias : "Koj puas muaj cai yuav npau taws ?"
5 Yos Nas tawm hauv lub tsheej mus, nws mus zaum nyob ntawm ib qho chaw nyob rov sab toob fab ntawm lub tsheej. Nws ua ib lub tsev pheeb suab rau nws nkaum ntxoov ntxoo, nws zaum ntsia tos saib puas yuav muaj dab tsi tshwm sim tuaj raug lub tsheej. 6 Ces HUAB TAIS Tswv Ntuj ua kom muaj ib tsob hmab taub hwb hlob tuaj roos Yos Nas, kom tshav txhob kub nws taub hau thiab kom nws txoj kev chim siab ploj. Yos Nas pom tsob hmab taub hwb, nws zoo siab kawg nkaus. 7 Tab sis tag kis sawv ntxov, Tswv Ntuj ua kom muaj kab tuaj txo txoj hmab taub, ces txoj hmab ntsws tas. 8 Thaum lub hnub tuaj siab lawm, Tswv Ntuj ua kom muaj ib nthwv cua kub lug tshuab sab hnub tuaj tuaj, lub hnub ziab rau Yos Nas taub hau ua kom nws yuav luag tsis nco qab. Ces Yos Nas thov tuag xwb, nws hais tias : "Kuv tuag zoo dua kuv muaj txoj sia nyob."
9 HUAB TAIS hais rau Yos Nas tias : "Koj puas muaj cai npau taws rau txoj hmab taub ntawd ?" Yos Nas teb tias : "Kuv yeej muaj cai, kuv npau taws kawg xav tuag lawm xwb." 10 Ces HUAB TAIS hais tias : "Koj mob siab rau txoj hmab taub ntawd, koj twb tsis tau siv zog cog, koj tsis tau ua kom hlob, nws tuaj nws hmo ntawd, ces nws rov tuag nws hmo ntawd xwb. 11 Kuv ne, vim li cas kuv thiaj yuav tsis mob siab rau lub tsheej loj Nis Nis Vas? muaj tshaj ib puas nees nkaum txhiab leej neeg nyob hauv, lawv twb tsis paub tias lawv sab xis yog sab twg sab laug yog sab twg, thiab kuj muaj tsiaj txhu ntau nyob hauv."

NPN      86:   3-4, 5-6, 9-10

Txais:   (15) Huab Tais, koj siab zoo thiab khuv leej neeg.    

Thov koj khuv leej kuv, Huab Tais,
vim kuv hu koj tas hnub.
Thov koj pub kev zoo siab rau koj tus tub txib tus ntsuj plig,
vim kuv tsa kuv tus ntsuj plig yuj plaws tuaj rau koj, Huab Tais.

Txais:   (15) Huab Tais, koj siab zoo thiab khuv leej neeg.

Huab Tais, koj muaj lub siab zoo thiab txawj zam txhaum,
koj txoj kev siab zoo loj tas nrho rau cov uas hu txog koj.
HUAB TAIS, thov koj mloog kuv zaj thov ntuj
thiab cuab pob ntseg rau kuv lub suab thov

Txais:   (15) Huab Tais, koj siab zoo thiab khuv leej neeg.

Huab Tais, tas ib tsoom kuj cuab uas koj tsim los
yuav tuaj pe ntawm koj xub ntiag,
Lawv yuav cav txog koj lub npe muaj koob meej.
Tswv Ntuj koj yog tus loj, koj ua hwj huam txaus qhuas,
Koj tib leeg thiaj yog Tswv Ntuj.

Txais:   (15) Huab Tais, koj siab zoo thiab khuv leej neeg.

As Les Lus Yas:       LM  8:   15BC

Txais:     As les lus yas, as les lus yas.

Nej tau txais ib lub tswv yim ua tub ki sau,
lub tswv yim ntawd qhia peb hu Tswv Ntuj tias : ‘As Npas ! Txiv !’

Txais:     As les lus yas, as les lus yas.

Ntawv Moo Zoo:       LK  11:   1-4

1 Muaj ib zaug, Yes Xus teev Ntuj nyob ib qho chaw. Thaum nws teev Ntuj tas lawd, nws ib tug thwj tim hais rau nws tias: "Huab Tais, koj qhia peb teev Ntuj xws li Zam qhia nws cov thwj tim saib." 2 Yes Xus hais rau lawv tias : "Thaum nej teev Ntuj, nej hais li no : Txiv, kom koj lub Npe ntshiab, 3 kom koj lub Ceeb Tsheej los txog ! Thov koj niaj hnub pub mov txaus rau peb noj hnub ntawd. 4 Thov koj zam txhaum rau peb zoo li peb zam rau cov tshuav nqi ntawm peb. Koj txhob cia peb poob rau hauv txoj kev ntxias.”

TIM       12      LUB      10      HLI       2017

Hnub Tsib Lis Piam Nees Nkaum Xya Nruab Xyoo A Nruab Lis Piam Xyoo I  

Zaj Nyeem Ib:       MAS LAS KIS  3:   13-20B

13 HUAB TAIS hais li no : "Nej hais lus nchav lus phem txog kuv, tsis kav nej tseem hais tias : ‘Peb tau hais dab tsi tsis zoo txog koj ?’ 14 Nej hais li no : ‘Kev tsob hwb Tswv Ntuj tsis zoo dab tsi. Peb tau coj nws cov lus qhia, peb tau ua kev tu siab nyob ntawm tus HUAB TAIS kav tsoom tshiab xub ntiag, peb tau tus dab tsi zoo? 15 Nyem no peb hais tias cov neeg tau hmoov zoo yog cov neeg muab hlob, cov ua phem yog cov vam meej. Lawv sim Tswv Ntuj tab sis lawv kuj tsis raug nplua dab tsi.’”
16 Ces cov hwm HUAB TAIS sib tham, HUAB TAIS cua pob ntseg ua zoo mloog lawv. Ces lawv muab sau tseg rau hauv ib phau ntawv nyob ntawm HUAB TAIS xub ntiag, tias cov twg yog cov hwm Huab Tais thiab tso siab rau nws lub npe. 17 Tus HUAB TAIS kav tsoom tshiab hais li no : "Thaum txog hnub kuv teem tseg mas cov ntawd yuav yog kuv tug, lawv yuav yog kuv cov neeg tshwj xeeb. Kuv yuav khuv leej lawv xws li ib leeg txiv khuv leej nws tus tub uas tsob hwb nws. 18 Ces thaum ntawd nej yuav rov qab pom tias tus neeg ncaj txawv tus neeg nkhaus li cas, tus tsob hwb Tswv Ntuj txawv tus tsis tsob hwb nws li cas . 19 Vim Huab Tais lub Hnub Nyoog yuav tawm tuaj ntaiv cuag li ib lub qhov txos, ces cov neeg muab hlob thiab tas cov neeg siab phem yuav zoo li ib co quav nyab; lub hnub nyoog uas yuav tuaj ntawd, yuav hlawv lawv tas huv tib si, kom tsis txhob tshuav ib tug cag los ib tug kav li,” tus Huab Tais kav tsoom tshiab hais li ntawd. 20 “Tab sis nej cov uas hwm kuv lub npe, mas lub Hnub pub txoj kev ncaj yuav sawv tuaj rau nej, nws cov sab yuav ci tuaj kho nej kom nej tej mob zoo hlo."

NPN      1:   1-2, 3, 4+6

Txais: (NPN 40:5a) Cov muaj hmoov zoo yog cov uas tso siab rau Huab Tais.

Muaj hmoov zoo yog tus uas tsis coj
raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo coj HUAB TAIS txoj cai,
thiab nws xav ntsoov HUAB TAIS txoj cai nruab hnub hmo ntuj.

Txais: (NPN 40:5a) Cov muaj hmoov zoo yog cov uas tso siab rau Huab Tais.

Nws zoo li ib tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj ntsws li.
Nws ua yam twg tau yam ntawd. .

Txais: (NPN 40:5a) Cov muaj hmoov zoo yog cov uas tso siab rau Huab Tais.

Cov neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov tus neeg ncaj txoj kev,
hos tus neeg phem txoj kev yaj ntshis mus.

Txais: (NPN 40:5a) Cov muaj hmoov zoo yog cov uas tso siab rau Huab Tais.

As Les Lus yas:       HL  16:   14B

Txais: As les lus yas, as les lus yas.

HUAB TAIS, thov koj qhib peb tej siab ntsws
kom peb mloog koj leej Tub cov lus.

Txais: As les lus yas, as les lus yas

Ntawv Moo Zoo:       LK  11:   5-13

5 Yes Xus hais rau lawv tias : "Yog nej leej twg muaj ib tug phooj ywg tuaj cuag nej thaum ib tag hmo, thiab hais rau nej tias : 'Phooj ywg, koj txais peb lub ncuav mov rau kuv, 6 vim kuv ib tug npawg mus tawm rooj los txog hauv kuv tsev, kuv tsis muaj dab tsi rau nws noj li.' 7 Hos tus nyob hauv tsev teb tias : 'Txhob txob kuv, lub qhov rooj twb xauv lawm, kuv cov me nyuam peb twb pw tas, kuv sawv tsis taus los muab dab tsi rau koj lawm.' 8 Kuv hais rau nej tias, tab yog nws tsis sawv los muab vim tus ntawd yog nws phooj ywg, tsis kav nws yeej yuav sawv los muab rau tus ntawd raws li nws thov, vim nws taij tsis tseg."
9 "Li ntawd, kuv hais rau nej tias: Nej thov, ces nej yuav tau txais, nej nrhiav, ces nej yuav ntsib; nej khob ces qhov rooj yuav qhib rau nej. 10 Vim tias leej twg thov, nws yuav tau txais, leej twg nrhiav, nws yuav ntsib, hos leej twg khob qhov rooj, luag yuav qhib rau nws. 11 Nyob hauv nej, leej txiv twg yuav muab ib tug nab rau nws tus tub yog tus tub tai jib tug ntses? 12 Los yuav muab ib tug kab lij tshooj rau yog nws tus tub tai jib lub qe? 13 Txawm tias nej yog neeg phem, tsis kav nej twb txawj pub tej yam zoo rau nej cov me nyuam. Ua li mas Leej Txiv nyob saum ntuj nws puas tsis haj yam yuav txawj pub Leej Ntuj Plig Ntshiab rau cov uas thov nws?"

TIM       13      LUB      10       HLI       2017

Hnub Rau Lis Piam Nees Nkaum Xya Nruab Xyoo A Nruab Lis Piam Xyoo I  

Zaj Nyeem Ib:       YOS ES  1:   13-15; 2:   1-2

13 Cov Leej Choj, nej sia siv , nej cia li quaj zoo li cov ntoo xyom ! Cov ua tub txib nyob ntawm thaj txi Ntuj, nej quaj nej nyiav mas ! Kuv tus Tswv Ntuj cov tub txib, nej cia li tuaj, nej hnav ntaub tsaj pw mog ! Vim nej tus Tswv Ntuj lub tsev tsis muaj cov txim thiab cov dej caw txi Ntuj lawm. 14 Nej ceeb toom ib lub sij hawm ntshiab los yoo mov, teem ib lub hnub nyoog los sib sau. Nej hu tas cov txwj laus thiab tas tsoom neeg nyob hauv lub teb chaws tuaj sib koom nyob hauv HUAB TAIS nej tus Tswv Ntuj lub tsev. Nej tsa suab nrov nrov thov HUAB TAIS.” 15 Vim txog hnub hmoov phem lawm! HUAB TAIS lub hnub nyoog tuaj txog ze lawm tiag! Yog ib lub hnub nyoog uas coj kev puas mtsoog tuaj ntawm tus muaj hwj huam tas nrho tuaj.
2    1 “Nej tshuab hom Nyob Xis Yoos mas ! Nyob saum kuv lub roob ntshiab nej tshuab kub twg ceeb toom rau sawv daws! Kom tas cov neeg nyob hauv lub teb chaws ntshai tshee na, vim HUAB TAIS lub hnub nyoog tuaj txog lawm; Nws nyob ntawm no lawm tiag ! 2 Yog ib hnub muaj kev tsaus ntuj thiab muaj kev tu siab, yog ib hnub pos huab nti thiab dub nciab. Xws li lub hnub tawm tuaj, muaj ib haiv neeg coob coob thiab muaj zog, cia li nchuav nthwv tuaj mus nyob puv tej toj roob. Tsis tau muaj dua ib haiv neeg zoo li ntawd txij thaum ntxov ub los; yuav tsis rov muaj dua zoo li ntawd ntxiv ntau txhiab ntau tiam tom ntej lawm.

NPN       9:   2-3, 6+16, 8-9

Txais:   (9) Huab Tais yuav txiav txim ncaj ncees rau lub sim ceeb.  

HUAB TAIS, kuv muab tas kuv siab ntsws los ua koj tsaug,
kuv tshaj txog koj cov hauj lwm tsim nyog qhuas.
Kuv zoo siab, kuv hom khaj nyob hauv koj;
Tus Tswv Nyob Siab, kuv hu nkauj cav txog koj lub npe.

Txais:   (9) Huab Tais yuav txiav txim ncaj ncees rau lub sim ceeb.

Koj tsawm cov kuj cuab, koj rhuav tus tsis hwm Ntuj,
koj ua kom lawv lub npe ploj mus ib txhis.
Tsoom kuj cuab zom av rau hauv lub qhov ntuj lawv tau khawb,
lawv ko taw daig hauv rooj ntxiab uas lawv tau cuab.

Txais:   (9) Huab Tais yuav txiav txim ncaj ncees rau lub sim ceeb.

HUAB TAIS zaum ua vaj mus ib txhiab ib txhis,
nws teeb nws lub theej kiab khov kho tos lub caij txiav txim.
Nws txiav txim rau lub sim ceeb raws txoj kev ncaj.
Nws tswj kav tsoom haiv neeg raws txoj kev haum pheej.

Txais:   (9) Huab Tais yuav txiav txim ncaj ncees rau lub sim ceeb.

As Les Lus yas:       ZAM  12:   31B-32

Txais:   As les lus yas, as les lus yas.

Zaum no tus Tswj lub ntiaj teb no
yuav raug ncaws pov rau nraum zoov.
Thaum luag tsa kuv siab rau saum ntiaj teb lawm,
mas kuv yuav rub tas txhua leej kom los cuag kuv."

Txais:   As les lus yas, as les lus yas.

Ntawv Moo Zoo       LK  11:   15-26

Yes Xus caum ib tug dab ruam tsis txawj hais lus tawm hauv ib tug neeg mus.
15 Tab sis ib txhia hauv cov neeg nyob ntawd hais tias : "Yog nws hu txog Npes Ntxes Npus tus thawj dab phem nws thiaj ntiab tau dab." 16 Tseem muaj ib txhia xav sim Yes Xus, ces lawv thov kom Yes Xus ua ib lub cim tawm saum ntuj tuaj. 17 Tab sis Yes Xus paub qhov lawv xav, nws hais rau lawv tias : "Lub teb chaws twg rov tawm tsam nws tus kheej, mas nws kawg raug kev puas tsuaj; tej vaj tse ib lub yuav vau tsuam ib lub. 18 Yog tias Xas Tas rov tawm tsam Xas Tas tus kheej, mas nws lub ceeb tsheej yuav ua cas nyob tau ruaj ? Vim nej hais tias kuv hu txog Npes Ntxes Npus los ntiab dab no. 19 Yog kuv vam txog Npes Ntxes Npus los ntiab dab no, nej cov tub ne lawv ho vam txog leej twg los ntiab dab ? Ua li mas, nej cov tub yog cov yuav txiav txim rau nej. 20 Hos yog tias kuv vam txog Tswv Ntuj tus ntiv tes los ntiab dab, mas yog vim tias Tswv Ntuj lub Ceeb Tsheej los txog nej lawm.
21 Thaum ib tug neeg muaj zog tuav ntaj tuav hmuv zov nws lub vaj loog, mas nws lub cuab tam nyob nyab xeeb. 22 Tab sis, thaum twg lwm tus muaj zog dua nws tuaj ntaus yeej nws, ces lawv txeeb nws cev ris tsho hlau uas yog nws lub chaw tso siab mus, thiab muab nws tej cuab yeej cuab tam sib faib tas. 23 Leej twg tsis nrog kuv, ces yog nws tiv kuv. Leej twg tsis nrog kuv sau los ua ke, ces yog nws muab w pov tseg tas xwb.
24 Thaum dab tsis huv tawm hauv ib tug neeg mus, nws mus ua loj leeb rau hauv tej teb chaws qhuav, nrhiav ib lub chaw so, tab sis nrhiav tsis tau, ces nws hais tias : 'Kuv yuav rov mus nyob hauv lub tsev uas kuv tawm los.' 25 Thaum dab tsis huv rov qab los txog, nws pom lub tsev cheb huv si thiab tu du lug cia. 26 Ces nws mus coj xya tus dab uas tseem tsiv tsaim dua nws nkag los nyob hauv lub tsev ntawd. Thaum kawg, tus neeg ntawd lub neej phem dua qhov qub lawm ntau."

TIM 14 LUB 10 HLI 2017

Hnub Xya Lis Piam Nees Nkaum Xya Nruab Xyoo A Nruab Lis Piam Xyoo I

Hwm LN Callistus I

Zaj Nyeem Ib: YOS ES 4: 12-21

Huab Tais hais tias:
12 “Kom cov haiv neeg tsim dheev los, kom lawv sawv tuaj mus tom lub hav tiaj Yos Xas Fas. Kuv yuav zaum nyob ntawd txiav txim rau tas txhia lub kuj cuab nyob ib ncig. 13 Nqa nej rab liag mus, vim qoob twb siav lawm. Nej tuaj, tuaj tsuj cov txiv cawv vim lub tsu ua cawv puv lawm. Cov rhawv puv phwj yaws, vim lawv txoj kev nkhaus loj tas nrho ! 14 Neeg coob tis ua coob tuaj nyob hauv lub hav txiav txim, vim HUAB TAIS lub hnub nyoog tuaj txog ze ze nyob hauv lub hav txiav txim lawm. 15 Lub hnub thiab lub hli tsaus nti, cov hnub qub tsis ntsa lawm. 16 HUAB TAIS nyooj laws saum Xis Yoos tuaj, nws ua nws lub suab nrov hauv Yes Lus Xas Les tuaj. Lub ntuj lub ntiaj teb co qeeg nkaws, tab sis HUAB TAIS yog nws haiv neeg chaw nkaum, nws yuav yog tsoom tub ki His Xas Lais lub ntsa zeb thaiv lawv! 17 Ces nej yuav paub tias kuv yog HUAB TAIS nej tus Tswv Ntuj, uas nyob saum kuv lub roob Ntshiab Xis Yoos. Yes Lus Xas Les yuav yog ib qho chaw ntshiab, cov pej kum neeg yuav tsis hla hauv nws mus ntxiv lawm. 18 Hnub ntawd, ib co cawv tshiab yuav nrog saum roob los, kua mis yuav ntws pem tej pov roob los. Dej yuav ntws lug hauv txhia tus kwj nyob Yus Das teb. Ib tug dej yuav txhawv ntawm HUAB TAIS lub tsev los ywg lub hav Sis Tis. 19 Hais Nkws Tos teb yuav txia ua ib lub teb chaws txom nyem, Es Dos yuav hloov ua ib thaj chaw qhuav qhawv, vim lawv tau hiam tsoom tub ki Yus Das, lawv tau ua kom cov ntshav dawb huv ntws nyob hauv lawv teb chaws. 20 Tab sis Yus Das teb yuav nyob mus li, thiab Yes Lus Xas Les yuav nyob mus txheej dhau txheej. 21 Kuv yuav ua pauj rau lawv cov ntshav, kuv yuav tsis zam txim." HUAB TAIS yuav ua tsev nyob saum Xis Yoos.

NPN 97: 1-2, 5-6, 11-12

Txais: (12) Tus neeg ncaj, koj yuav zoo siab nyob hauv Huab Tais!

HUAB TAIS yog vaj ntxwv, kom lub ntiaj teb zoo siab;
kom cov pov txwv ntau lub luag ntxhi.
Cov huab thiab qhov tsaus ntuj nyob ncig nws,
kev ncaj ncess thiab kev txiav txim yog lub taw
ntsa txheem nws lub theej kiab.

Txais…

Cov roob yaj tas xws li ciab ntab yaj nyob ntawm Huab Tais xub ntiag,
ntawm tus HUAB TAIS kav tas lub ntiaj teb xub ntiag.
Lub ntuj tshaj txog nws txoj kev ncaj ncees,
tas txhua haiv neeg pom nws lub hwj chim.

Txais…

Qhov pom kev ci tawm tuaj kaj tus neeg ncaj,
kev zoo siab ci tuaj rau tus neeg siab zoo.
Cov neeg ncaj nej zoo siab nyob hauv HUAB TAIS,
nej ua tsaug rau nws lub npe ntshiab.

Txais…

As Les Lus Yas: LK 11: 28

Txais: As les lus yas, as les lus yas.

Cov muaj hmoov zoo yog cov uas mloog
Tswv Ntuj Lo Lus thiab ua raws li ntawd,

Txais: As les lus yas, as les lus yas.

Ntawv Moo Zoo: LK 11: 27-28

27 Thaum Yes Xus tseem hais tej lus ntawd, muaj ib tug poj niam nyob hauv nruab nrab tsoom sid tsa suab hais nrov rau Yes Xus tias : "Lub plab uas tau nqa koj thiab lub xub ntiag uas pub mis rau koj tau txoj hmoov zoo !"
28 Tab sis Yes Xus hais tias : "Cov uas mloog Tswv Ntuj Lo Lus thiab ua raws li Lo Lus ntawd, mas lawv haj yam tau txoj hmoov zoo."

TIM      16      LUB      10      HLI       2017

Hnub Ob Lis Piam Nees Nkaum Yim Nruab Xyoo A Nruab Lis Piam Xyoo I  

Hwm LN Hedwig; LN Marguerite Marie Alacoque

Zaj Nyeem Ib:       LOS MAS  1:   1-7

1 Kuv, Paj Lug, uas yog Yes Xus Pleev tus tub txib; Ntuj hu kuv los ua Hauv Paus Xa Lus, thiab qee kuv los tshaj Tswv Ntuj lub Moo Zoo, 2 uas Tswv Ntuj tau xub cog lus ua ntej rau hauv nws cov yaj saub tej ntawv ntshiab tseg lawm, 3 yog lub Moo Zoo hais txog nws Leej Tub, uas yug hauv Das Vis caj ces los raws li neeg ntiaj teb. 4 Nws yog Tswv Ntuj Leej Tub muaj hwj huam raws li Leej Tswv Yim tus ntshiab huv, vim nws txoj kev sawv hauv cov tub tuag rov los,  peb tus Huab Tais Yes Xus Pleev. 5 Peb txais txiaj ntsim ntawm nws los thiab txoj hauj lwm ua hauv paus xa lus kom peb qhia tau txoj kev mloog lus thiab coj raws txoj kev ntseeg rau cov neeg teev pej kum dab paub, ces nws lub npe yuav tau koob meej. 6 Nej kuj yog ib co nyob hauv cov neeg ntawd thiab; nej raug hu los ua Yes Xus Pleev tug. 7 Kuv sau ntawv tuaj rau nej, uas yog cov neeg Tswv Ntuj nyiam nyob Los Mas, nws hu nej los ua neeg ntshiab.  Thov kom nej txais txiaj ntsim thiab kev thaj yeeb tuaj ntawm peb Leej Txiv Tswv Ntuj, thiab ntawm Huab Tais Yes Xus Pleev tuaj.

NPN       98:   1, 2-3AB, 3CD-4

Txais:    (2a) Huab Tais ua kom neeg paub txog nws txoj kev cawm.  

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
nws sab npab ntshiab tau ua.

Txais:    (2a) Huab Tais ua kom neeg paub txog nws txoj kev cawm.

HUAB TAIS ua kom neeg paub txog nws txoj kev cawm,  
nws ua kom cov haiv neeg pom nws txoj kev ncaj
Nws rov nco txog nws txoj kev ua zoo thiab kev pheej xeeb
rau tsev neeg His Xas Lais.

Txais:    (2a) Huab Tais ua kom neeg paub txog nws txoj kev cawm.

Tas npoo ntuj npoo ntiaj teb tau pom
peb tus Tswv Ntuj txoj kev cawm neeg.
Tas txhua teb chaws, nej hu nkauj
zoo siab rau HUAB TAIS,
nej qw suab nkauj, nej cav txog nws

Txais:    (2a) Huab Tais ua kom neeg paub txog nws txoj kev cawm.

As Les Lus Yas:       NPN  95:   8

Txais: As les lus yas, as les lus yas.

Hnub no, yog nej hnov nws lub suab,
Txhob ua nej lub siab tawv ncauj.

Txais: As les lus yas, as les lus yas.

Ntawv Moo Zoo:       LK  11:   29-32

29 Thaum tej pab neeg coob coob tuaj sib txiv nyob ua ke ib ncig ntawd, Yes Xus pib hais lus li no tias: "Tiam neeg no yog ib tiam neeg phem. Lawv taij ib lub cim, tab sis lub cim lawv yuav pom kawg yog Yos Nas lub cim xwb. 30 Ib yam li Yos Nas yog ib lub cim rau cov neeg nyob Nis Nis Vas, Neeg Leej Tub kuj yuav yog ib lub cim rau tiam neeg no. 31 Txog hnub txiav txim, tus poj vaj nyob Naj Fab yuav nrog tiam neeg no sawv rov los, nws yuav muab txim rau lawv, vim nws tuaj puag tim npoo ntiaj teb tuaj mloog Xas Los Moos cov lus thoob tsib; hos nyob ntawm no, twb muaj tus loj dua Xas Los Moos ! 32 Txog hnub txiav txim, cov neeg nyob Nis Nis Vas yuav nrog tiam neeg no sawv rov los, lawv yuav muab txim rau tiam neeg no, vim tias thaum Yos Nas tuaj qhuab qhia lawv, mas lawv tso kev txhaum tseg, hos nyob ntawm no twb muaj tus loj dua Yos Nas !"

TIM 17 LUB 10 HLI 2017

Hnub Peb Lis Piam Nees Yim Nruab Xyoo A Nruab Lis Piam Xyoo I

Hwm LN Ignatius nyob Antioch, Tswv Qhia tuag ua Tim Khawv

Zaj Nyeem Ib: LM 1: 16-25

16 Kuv tsis txaj muag txog lub Moo Zoo li; nws yog Tswv Ntuj lub hwj huam cawm tas txhua tus neeg uas ntseeg, xub cawm cov Yus Das ua ntej, ces cov Hes Las. 17 Vim nyob hauv lub Moo Zoo Tswv Ntuj txoj kev ncaj tawm tuaj rau neeg pom nyob hauv txoj kev ntseeg mus rau txoj kev ntseeg, xws li ntawv sau tseg tias : ‘Tus neeg siab ncaj muaj txoj sia vim txoj kev ntseeg.’
18 Tswv Ntuj lub siab npau taws tawm saum ntuj los raug tas cov uas tsis hwm Ntuj thiab cov neeg nkhaus, vim lawv txoj kev tsis ncaj thaiv txoj kev tseeb tsis pub tawm los. 19 Lawv yeej paub txog tej yam uas txawj qhia txog Tswv Ntuj rau neeg , vim Tswv Ntuj tau ua kom lawv paub txog lawm. 20 Vim txhua yam uas neeg pom tsis tau txog Tswv Ntuj, txij thaum ntuj tsim teb raug los, neeg lub tswv yim yeej tsom tau nyob hauv nws cov hauj lwm ; neeg to taub tau meej tias Tswv Ntuj lub hwj huam nyob mus li, thiab nws yog tus Tswv Ntuj. Vim li ntawd, cov neeg tsis ncaj hais tsis tau tias lawv tsis muaj txhaum. 21 Vim lawv twb paub Tswv Ntuj, tab sis lawv tsis cav txog Tswv Ntuj lub koob meej, lawv tsis ua nws tsaug. Tiam sis lawv xav tswv yim xws li cov neeg uas lub tswv yim puas, ces lawv lub siab nyob hauv qhov tsaus ntuj nti. 22 Lawv khav tias lawv thoob tsib, tab sis lawv vwm tas. 23 Lawv muab tus Tswv Ntuj nyob mus li lub hwj chim hloov los ua tej tus duab xws li duab neeg uas txawj tuag, los duab noog, duab tsiaj txhu muaj plaub txhais tes taw, los duab nab.
24 Vim li ntawd Tswv Ntuj thiaj tso lawv pov tseg rau hauv lawv txoj kev ua phem raws li lawv lub siab ntshaw: rau hauv txoj kev ua neeg tsis dawb huv, rau hauv txoj kev lawv rov sib ua tsis tsim txiaj rau lawv lub cev. 25 Lawv hloov txoj kev tseeb txog Tswv Ntuj los ua kev dag; ces lawv yeem mus teev hawm thiab tsob hwb tej yam uas yog tsim tawm los, lawv tsis yeem teev hawm thiab tsob hwb tus tsim tas txhua yam uas nws nto koob meej mus ib txhiab ib txhis. Ua li.

NPN 19: 2-3, 4-5

Txais: (2a) Cov txheej ntuj saud tshaj txog Tswv Ntuj lub koob meej.

Cov txheej ntuj saud tshaj txog Tswv Ntuj lub koob meej,
lub qab ntuj khwb tshaj cov hauj lwm nws txhais tes tsim los.
Nruab hnub hais lo lus rau nruab hnub mloog,
Hmo ntuj qhia rau hmo ntuj paub txog.

Txais: (2a) Cov txheej ntuj saud tshaj txog Tswv Ntuj lub koob meej.

Tsis muaj ib lo lus los ib zaj lus piav
Uas leej tib neeg yuav tsis hnov txog.
Lawv lub suab yeej ncha puv tas ntiaj teb,
lawv lo lus xa moo yeej nrov txog tim npoo ntiaj teb.

Txais: (2a) Cov txheej ntuj saud tshaj txog Tswv Ntuj lub koob meej.

As Les Lus Yas: HES NPLAWS 4: 12

Txais: As les lus yas, as les lus yas.

Tswv Ntuj lo lus muaj sia thiab ua tau hauj lwm,
nws txawj tsom tau tej tswv yim thiab tej kev xav nyob hauv neeg nruab siab.

Txais: As les lus yas, as les lus yas.


Ntawv Moo Zoo: LK 11: 37-4

37 Thaum Yes Xus tseem tab tom hais lus, muaj ib tug Fas Lis Xais caw Yes Xus mus noj mov tim nws tsev. Yes Xus chaws mus hauv tsev, nws mus zaum ntawm rooj mov. 38 Tus Fas Lis Xas pom li ntawd, ces nws poob siab rau qhov Yes Xus tsis xub ntxuav tes tso mam noj mov. 39 Tab sis Huab Tais hais rau tus Fas Lis Xais ntawd tias : "Nej cov Fas Lis Xais mas nej ntxuav khob ntxuav phaj sab nraud kom huv, tab sis nej muaj kev tub sab thiab kev phem nyob puv nkaus nej sab hauv. 40 Neeg vwm ! Tus tsim sab nraud nws tsis tsim sab hauv thiab lod ? 41 Tej yam uas nyob sab hauv mas nej yuav tsum muab pub rau luag, ces txhua yam yuav dawb huv rau nej.

TIM 18 LUB 10 HLI 2017

Hnub Plaub Lis Piam Nees Nkaum Yim Nruab Xyoo A Nruab Lis Piam Xyoo I

Hwm LN Lus kas, tus kws sau Ntawv Moo Zoo

Zaj Nyeem Ib: 2 TM 4: 10-17B

Tus hmov tshua,
10 Des Mas uas nyiam lub ntiaj teb dua, nws tso kuv tseg thiab nws sawv kev mus rau Tes Xas Los Nis lawm; Khes Xees mus Nkas Las Tias teb, hos Tis Tos mus Das Mas Tias teb lawm. 11 Tshuav Lus Kas tib leeg nrog kuv nyob xwb. Koj mus coj Mas Kos nrog koj tuaj thiab, vim nws yog ib tug muaj nqis rau kuv txoj hauj lwm tshaj Ntuj lus. 12 Kuv tau xa Tis Sis Kos mus nyob Es Fes Xos lawm. 13 Thaum koj tuaj, mas koj pab nqa kuv lub tsho tshaj sab uas kuv tso nyob Thos As, hauv Kas Pos tsev lawm; koj nqa cov kauj ntawv thiab qhov tseem ceeb yog cov tawv sau ntawv tuaj thiab.
14 Tus kws nchuav tooj As Les Xas Nraws tau ua phem kawg rau kuv; cia Huab Tais mam li ua pauj rau nws raws li nws tau ua. 15 Koj yuav tau ceev faj txog nws thiab, vim nws yog ib tug siv zog tiv peb txoj kev tshaj Ntuj lus.
16 Thawj zaug uas kuv tau mus sawv ntawm cov nom txiav txim xub ntiag, mas tsis muaj leej twg tuaj nres kuv tog li, sawv daws tso kuv pov tseg tas tib si. Kuv thov kom Ntuj txhob suav txim rau lawv! 17 Tab sis Huab Tais tau nrog nraim kuv, nws tso nws lub zog los txhawb kuv, kom kuv tshaj lub Moo Zoo kom tiav log, ces lub Moo Zoo thiaj nrov mus txog tas cov neeg teev pej kum dab pob ntseg.

NPN 145: 10-11, 12-13, 17-18

Txais: (12) Huab Tais, koj cov phooj ywg tshaj txog
koj lub Ceeb Tsheej muaj hwj chim ci ntsa iab rau tib neeg paub.

HUAB TAIS, cia tas koj cov hauj lwm ua koj tsaug,
thiab cia cov uas nyiam koj cav txog koj.
Cia lawv qhuas txog koj lub Ceeb Tsheej muaj hwj chim
thiab piav txog koj lub hwj huam loj.

Txais: (12) Huab Tais, koj cov phooj ywg tshaj txog
koj lub Ceeb Tsheej muaj hwj chim ci ntsa iab rau tib neeg paub.

Cia lawv qhia rau neeg paub txog koj lub hwj huam loj
thiab koj lub Ceeb Tsheej muaj hwj chim ci ntsa iab.
Koj lub Ceeb Tsheej yog ib lub Ceeb Tsheej txais tas cov hlob nrog cov yau,
thiab koj txoj kev tswj kav yuav nyob mus txheej dhau txheej.

Txais: (12) Huab Tais, koj cov phooj ywg tshaj txog
koj lub Ceeb Tsheej muaj hwj chim ci ntsa iab rau tib neeg paub.

Huab Tais tej kev yog kev ncaj tas huv si
nws tej dej num yog kev ntshiab.
Huab Tais nyob ze cov hu txog nws,
cov uas muaj lub siab hu txog nws tiag tiag.

Txais: (12) Huab Tais, koj cov phooj ywg tshaj txog
koj lub Ceeb Tsheej muaj hwj chim ci ntsa iab rau tib neeg paub.

As Les Lus Yas: ZAM 15: 16

Txais: As les lus yas, as les lus yas.

Huab Tais hais tias: yog kuv xaiv nej hauv lub ntiaj teb los
Kom nej mus txi ib co txiv uas yuav nyob ruaj.

Txais: As les lus yas, as les lus yas.

Ntawv Moo Zoo: LK 10: 1-9

1 Dhau qhov ntawd lawm, Huab Tais tseem xaiv xya caum ob leeg thwj tim, nws xa lawv mus tej pab ob leeg, ua nws ntej mus rau hauv cov nroog thiab tej qhov chaw uas nws yuav mus. 2 Nws hais rau lawv tias : "Qoob loo zoo sau muaj ntau kawg, tab sis cov tub zog muaj tsawg. Nej thov tus Tswv qoob kom nws xa ib co tub zog tuaj sau nws cov qoob. 3 Nej kav tsij mus! Kuv xa nej zoo li ib co yaj mus nyob nruab nrab ib cov hma. 4 Nej tsis txhob nqa nas nyiaj, txhob ris hnab, txhob rau khau, txhob hais lus hu leej twg ntawm kev. 5 Nej chaws mus hauv lub tsev twg, nej xub hais tias : "Kom lub tsev no nyob kaj lug lau!" 6 Yog muaj txoj kev kaj lug ib leeg tub nyob ntawd, mas nej txoj kev kaj lug yuav mus roos nws. Yog tsis muaj, mas nej txoj kev kaj lug yuav rov los rau nej. 7 Nej nyob hauv lub tsev ntawd, nej noj nej haus tej yam uas lawv muaj hauv tsev, vim tus tub zog tsim nyog txais ib tug nqi zog. Nej txhob tawm hauv ib lub tsev mus nyob dua lwm lub. 8 Nej mus hauv lub nroog twg, yog luag txais nej, mas nej noj tej yam uas luag muab rau nej. 9 Nej kho cov neeg mob hauv lub nroog ntawd kom zoo, thiab nej hais rau lawv tias : "Tswv Ntuj lub Ceeb Tsheej tuaj txog nej lawm."

TIM 19 LUB 10 HLI 2017

Hnub Tsib Lis Piam Nees Nkaum Yim Nruab Xyoo A Nruab Lis Piam Xyoo I

Hwm LN John de Brébeuf thiab Isaac Jogues, ib co Leej Choj tuag ua Tim kHawv

Zaj Nyeem Ib: LM 3: 21-30

21 Nyem no, Tswv Ntuj txoj kev ncaj tawm tuaj rau neeg pom xyeem , tsis yog vim Txoj Cai tiam sis yog qhov uas Txoj Cai thiab cov Yaj Saub tau zeem tseeb txog. 22 Kev ntseeg txog Yes Xus Pleev pub Tswv Ntuj txoj kev ncaj rau tas txhua leej uas ntseeg, vim tsis muaj ib co neeg txawv lwm cov, 23 sawv daws puav leej ua txhaum tas huv tib si, yeej tsis muaj ib tug tau Tswv Ntuj lub hwj chim li. 24 Yog nws lub txiaj ntsim ua kom sawv daws ncaj tuaj, vim Yes Xus Pleev tau txhiv sawv daws. 25 Tswv Ntuj tso Yes Xus tuaj ua nqi them txim txhaum (rau peb) nyob hauv txoj kev ntseeg txog nws cov ntshav kom tau ua pov thawj txog nws txoj kev ncaj, vim nws tshem tej txhaum uas neeg tau xub ua ua ntej lawm pov tseg kom tas. 26 Tswv Ntuj ua lub siab ntev ntev kom tau ua pov thawj txog nws txoj kev ncaj rau lub sij hawm niaj hnub no pom tias nws ib txhij yog tus ncaj, thiab tus pub kev ncaj rau cov neeg ntseeg txog Yes Xus.
27 Puas muaj dab tsi ua kom peb khav tau ? Tsis muaj li. Peb puas yuav khav tau vim peb ua raws txoj cai? Tsis tau li; peb tsuas khav tau nyob hauv txoj kev ntseeg xwb. 28 Peb pom tias neeg ncaj tuaj tau vim txoj kev ntseeg, tsis yog vim nws ua raws Txoj Cai.
29 Tswv Ntuj puas yog cov Yus Das tus Tswv Ntuj nkaus xwb? Nws tsis yog cov neeg teev pej kum dab tus Tswv Ntuj thiab lod? Nws yeej yog cov neeg teev pej kum dab tus Tswv ntuj thiab. Vim tsuas muaj ib tug Tswv Ntuj xwb, 30 nws ua kom cov neeg txais lub cim txiav ncaj tuaj raws li lawv txoj kev ntseeg ; hos nws ua kom cov neeg tsis tau txais lub cim txiav ncaj tuaj nyob hauv txoj kev ntseeg thiab.

NPN 130: 1B-2, 3-4, 5-6AB

Txais: (7) Huab Tais muaj kev khuv leej thiab kev cawm neeg loj tas nrho.

Kuv nyob hauv qab tiv txwv hu txog koj, HUAB TAIS,
HUAB TAIS, thov koj mloog kuv lub suab!
Thov koj cuab pob ntseg mloog kuv lub suab thov koj.

Txais: (7) Huab Tais muaj kev khuv leej thiab kev cawm neeg loj tas nrho.

HUAB TAIS, yog koj cim ntsoov peb cov txhaum
leej twg thiaj yuav nyob taus?
Tab sis nyob ntawm koj muaj kev zam txhaum,
ces sawv daws yuav hwm koj.

Txais: (7) Huab Tais muaj kev khuv leej thiab kev cawm neeg loj tas nrho.

Kuv tso siab rau HUAB TAIS,
kuv tus ntsuj plig tso siab rau nws lo lus.
Kuv tus ntsuj plig tos ntsoov HUAB TAIS
heev tshaj cov zov keeb tos lub caij kaj ntug.

Txais: (7) Huab Tais muaj kev khuv leej thiab kev cawm neeg loj tas nrho.

As Les Lus Yas: ZAM 14: 6

Txais: As les lus yas, as les lus yas.

Huab Tais hais tias: Kuv yog Txoj Kev, yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau, yog nws tsis los ntawm kuv mus.

Txais: As les lus yas, as les lus yas.

Ntawv Moo Zoo: LK 11: 47-54

Yes Xus hais tias:
47 ”Nej txoj hmoov phem, nej cov uas txhim cov yaj saub tej ntxa, uas yog nej phaj txiv muab lawv tua. 48 Nej yog cov ua tim khawv txog thiab cov pom zoo tias qhov nej phaj txiv ua yog hauj lwm zoo : lawv yog cov muab tua, hos nej yog cov txhim ntxa. 49 Yog vim li ntawd Tswv Ntuj txoj kev Thoob Tsib thiaj hais tias : ‘Kuv yuav xa ib co yaj saub thiab ib co hauv paus xa lus mus cuag lawv, lawv yuav muab ib co tua thiab hiam ib co.’ 50 Vim li ntawd tiam neeg no yuav tsum ris lub txim them cov yaj saub tej ntshav uas tau nchuav txij thaum ntuj tsim teb raug los, 51 txij As Npes cov ntshav los txog Ntxas Kas Lias cov ntshav, tus uas raug tua ntawm kis nruab nrab lub thaj txi Ntuj thiab lub Tsev Ntshiab. Kuv hais rau nej tias tiam neeg no yuav raug lub txim them cov nqi ntshav ntawd. 52 Nej tsoom Kws Lij Choj, nej txoj hmoov phem, vim nej rho tus yuam sij qhib txoj kev txawj ntse pov tseg, nej tsis kam nkag mus hauv, hos cov xav nkag mus los nej tsis pub mus."
53 Thaum Yes Xus tawm ntawd mus lawm, cov Kws Ntawv Ntshiab thiab cov Fas Lis Xais pib ntxub Yes Xus tas siab nrho. Lawv nug kom Yes Xus hais txog ntau yam kawg, 54 vim lawv xav cuab ntxiab tos rawv yuav ntes nws yog nws hais ib lo lus txawv li cas.

TIM 20 LUB 10 HLI 2017

Hnub Rau Lis Piam Nees Nkaum Yim Nruab Xyoo A Nruab Lis Piam Xyoo I

Hwm LN Paul of the Cross/Paul de la Croix

Zaj Nyeem Ib: LM 4: 1-8

Cov kwv tij,
1 Peb yuav hais li cas txog qhov Has Nplas Has, peb tus yawg koob raws li neeg ntiaj teb, nrhiav tau ? 2 Yog Has Nplas Has muaj kev ncaj vim nws cov hauj lwm mas nws muaj chaw khav. Tab sis Tswv Ntuj tsis pom zoo li ntawd. 3 Ntawv hais dab tsi ? Ntawv hais tias : ‘Has Nplas Has ntseeg txog Tswv Ntuj, ces Tswv Ntuj saib qhov ntawd yog Has Nplas Has txoj kev ncaj ncees.’ 4 Thaum ib tug neeg ua ib txog hauj lwm, mas peb tsis saib nws tus nqe zog yog ib qho paj tshab pub dawb rau nws, tiam sis yog ib qho uas nws khwv tau los ua nws tug. 5 Tab sis thaum ib tug neeg tsis tau ua hauj lwm, nws ntseeg txog tus ua kom tus neeg tsis hwm Ntuj ncaj tuaj, mas nws txoj kev ntseeg yuav raug muab suav ua nws txoj kev ncaj. 6 Das Vis kuj tau hais zoo li ntawd tias tus muaj txoj hmoov zoo yog tus uas Tswv Ntuj tsis saib nws cov hauj lwm li, Tswv Ntuj cia li pub kev ncaj rau nws : 7 ‘Cov tau txoj hmoov zoo yog cov uas Ntuj zam txhaum rau lawv, thiab muab lawv cov txhaum npog rau. 8 Tus tau txoj hmoov zoo yog tus uas Huab Tais tsis saib nws cov txhaum.’

NPN 32: 1B-2, 5, 11

Txais: (7) Huab Tais, kuv vam txog koj thaum kuv ntsib kev nyuaj ntxhov,
Koj ua kom kuv lub siab puv nkaus kev zoo siab vim kuv tau kev cawm seej.

Tus tau txoj hmoov zoo, yog tus uas Ntuj zam nws qhov txhaum
lawm, yog tus uas Ntuj muab nws qhov txhaum npog rau lawm.
Tus tau txoj hmoov zoo, yog tus uas HUAB TAIS tsis suav txim
rau nws, yog tus uas tsis muaj ib lub tswv yim dag.

Txais: (7) Huab Tais, kuv vam txog koj thaum kuv ntsib kev nyuaj ntxhov,
Koj ua kom kuv lub siab puv nkaus kev zoo siab vim kuv tau kev cawm seej.

Kuv qhia kuv qhov txhaum rau koj,
Kuv tsis zais kuv qhov yuam kev.
Kuv hais tias : "Kuv yuav lees kuv cov txhaum rau HUAB TAIS".
Ces koj tshem lub txim ntawm kuv qhov txhaum mus.

Txais: (7) Huab Tais, kuv vam txog koj thaum kuv ntsib kev nyuaj ntxhov,
Koj ua kom kuv lub siab puv nkaus kev zoo siab vim kuv tau kev cawm seej.

Cov neeg ncaj nej cia li zoo siab
nyob hauv HUAB TAIS, nej luag ntxhi;
tas ib tsoom siab zoo siab ncaj,
nej cia li dhia zoo siab !

Txais: (7) Huab Tais, kuv vam txog koj thaum kuv ntsib kev nyuaj ntxhov,
Koj ua kom kuv lub siab puv nkaus kev zoo siab vim kuv tau kev cawm seej.

As Les Lus yas: NPN 33: 22

Txais: As les lus yas, as les lus yas.

HUAB TAIS, thov kom koj lub siab hlub roos peb,
vim koj yog peb qhov chaw vam khom.

Txais: As les lus yas, as les lus yas.

Ntawv Moo Zoo: LK 12: 1-7

1 Thaum ntawd, muaj neeg coob coob tuaj sib txoos ua tsheej pawg, nyob sib tsuj pes daws, Yes Xus thiaj pib hais lus, nws xub hais rau nws cov thwj tim tias : "Nej ceev faj txog cov poov xab uas yog cov Fas Lis Xais txoj kev dag ua zoo sab nraud xwb. 2 Tsis muaj ib yam zais ntshis uas yuav tsis qhib tawm los, tsis muaj ib yam npog cia uas yuav tsis muaj neeg paub txog. 3 Yog vim li ntawd, txhua yam uas nej hais nyob hauv qhov tsaus ntuj nti, yuav nrov rau luag hnov thaum nruab hnub nrig; yam uas nej ntxhi rau hauv luag pob ntseg nyob hauv tej chav kaw nti, yuav raug muab tshaj tawm saum tej ru tsev. 4 Kuv cov phooj ywg, kuv hais rau nej : Nej tsis txhob ntshai cov uas tua neeg lub cev, thaum lawv tua tas, lawv ua tsis tau dab tsi ntxiv lawm. 5 Kuv qhia nej tias nej yuav tsum ntshai leej twg : nej yuav tsum ntshai tus uas tua nej lub cev tas, tseem muaj peev xwm muab nej pov rau hauv dab phem teb thiab. Kuv hais rau nej tias, tus ntawd mas nej yuav tsum ntshai nws tiag.
6 Tsib tug noog tsig txhuv tsuas muag tau ob lub txiaj toog xwb, puas yog ? Tsis kav, tsis muaj ib tug tsig txhuv uas Tswv Ntuj yuav tsis nco txog. 7 Tab yog nej cov plaub hau saum taub hau los Tswv Ntuj yeej suav tas huv si lawm. Nej tsis txhob txhawj: nej muaj nqis dua tej pab tsig txhuv coob coob.”

TIM 21 LUB 10 HLI 2017

Hnub Xya Lis Piam Nees Nkaum Yim Nruab Xyoo A Nruab Lis Piam Xyoo I

Zaj Nyeem Ib: LM 4: 13, 16-18

Cov kwv tij,
13 Tswv Ntuj cog lus tias nws yuav pub lub sim ceeb no rau Has Nplas Has thiab nws tsoom xeeb ntxwv ua lawv tug, tsis yog vim Txoj Cai, hos yog vim txoj kev ncaj tuaj ntawm kev ntseeg tuaj.
16 Vim tias lub cuab tam ntawd yog tau txais los ntawm kev ntseeg los, mas nws thiaj yog ib lub txiaj ntsim pub dawb. Thiab lo lus uas Tswv Ntuj cog ntawd yog cog rau tas Has Nplas Has tsoom xeeb ntxwv huv tib si, tsis yog rau cov nyob hauv Txoj Cai xwb, tiam sis yog rau cov uas coj kev ntseeg raws li Has Nplas Has huv tib si thiab; nws yog tas nrho peb sawv daws txiv. 17 Raws li lo lus sau tseg tias : ‘Kuv tsa koj ua txiv rau ntau tej haiv neeg,’ Has Nplas Has yog peb sawv daws txiv nyob ntawm Tswv Ntuj xub ntiag, yog tus Tswv Ntuj uas Has Nplas Has ntseeg txog, tus uas pub txoj sia rau cov neeg tuag, thiab tus hu tej yam tseem tsis tau xeeb kom xeeb tau los nyob.
18 Has Nplas Has tsis pom muaj chaw tso siab li, tsis kav nws tseem tso siab, nws ntseeg tias nws yuav tau ua ntau haiv neeg txiv, raws nraim li lo lus hais tias : ‘Koj tsoom xeeb ntxwv yuav coob li ntawd.’

NPN 105: 6-7, 8-9, 42-43

Txais: (8a) Huab Tais nco ntsoov nws lo lus nws tau cog mus ib txhis.

Nej, Has Nplas Has tsoom xeeb ntxwv,
uas yog Huab Tais cov tub txib,
Nej, Yas Kos cov tub, uas yog cov Huab Tais tau xaiv,
HUAB TAIS yog peb tus Tswv Ntuj tiag,
Nws tej cai tswj tas qhov txhia chaw hauv lub ntiaj teb.

Txais: (8a) Huab Tais nco ntsoov nws lo lus nws tau cog mus ib txhis.

Nws nco ntsoov mus li cov lus nws cog cia,
yog ib co lus cog ruaj rau txhiab tiam tub ki.
Yog cov lus nws tau nrog Has Nplas Has cog,
thiab nws tau rov zeem tseeb rau His Xas Has.

Txais: (8a) Huab Tais nco ntsoov nws lo lus nws tau cog mus ib txhis.

Vim HUAB TAIS rov nco txog nws lo lus ntshiab
uas nws hais rau nws tus tub txib Has Nplas Has.
Nws coj nws haiv neeg tawm los luag ntxhi ,
nws coj cov neeg nws tau xaiv tawm los, lawv qw zoo siab.

Txais: (8a) Huab Tais nco ntsoov nws lo lus nws tau cog mus ib txhis.

As Les Lus Yas: ZAM 15: 26B, 27A

Txais: As les lus yas, as les lus yas.

Huab Tais hais tias, leej Tswv Yim muaj qhov tseeb yuav ua tim
khawv txog kuv, thiab nej kuj yuav ua kuv tim khawv ib yam.

Txais: As les lus yas, as les lus yas.

Ntawv Moo Zoo: LK 12: 8-12

Yes Xus hais tias:
8 “Kuv hais rau nej : txhua leej uas lees paub kuv nyob ntawm tsoom neeg xub ntiag, mas Neeg Leej Tub kuj yuav lees paub tus ntawd nyob ntawm Tswv Ntuj cov Tshiab xub ntiag thiab. 9 Tab sis leej twg tsis lees paub kuv nyob ntawm tsoom neeg ntiag, mas kuj yuav tsis muaj tus lees paub nws nyob ntawm Tswv Ntuj tsoom Tshiab xub ntiag thiab.
10 Yog leej twg hais ib lo lus phem txog Neeg Leej Tub, mas Ntuj yuav zam tau rau nws. Tab sis tus twg thuam Leej Ntuj Plig Ntshiab, mas Ntuj yuav tsis zam rau nws li.
11 Thaum luag coj nej mus sawv hauv cov tsev txoos, ntawm cov thawj coj thiab cov nom tswv xub ntiag, mas nej tsis txhob txhawj tias nej yuav ua li cas nej thiaj tau cai thiab yuav hais dab tsi ; 12 vim lub sij hawm ntawd, Leej Ntuj Plig Ntshiab mam li yuav qhia kom nej hais li cas."

TIM 23 LUB 10 HLI 2017

Hnub Ob Lis Piam Nees Nkaum Cuaj Nruab Xyoo A Nruab Lis Piam Xyoo I

Hwm LN John nyob Capistrano

Zaj Nyeem Ib: LM 4: 20-25

Cov kwv tij,
20 Thaum Has Nplas Has hnov Tswv Ntuj cog lus, nws tsis muaj lub siab tsis ntseeg, nws tsis ua xyem xyav li; tiam sis nws tsuas muaj ib txoj kev ntseeg muaj zog ua kom nws cia li cav txog Tswv Ntuj xwb. 21 Nws tso siab lug tias qhov Tswv Ntuj tau cog lus, nws yeej muaj lub peev xwm ua kom tau. 22 Yog vim li no Ntuj thiaj “saib qhov ntawd yog Has Nplas Has txoj kev ncaj.” 23 Tab sis qhov uas ntawv sau hais tias Ntuj “saib qhov ntawd yog Has Nplas Has txoj kev ncaj,” tsis yog hais txog Has Nplas Has tib leeg xwb; 24 lo lus ntawd kuj yog hais txog peb sawv daws huv tib si thiab : nws kuj yuav saib qhov ntawd ua peb txoj kev ncaj thiab, yog tias peb ntseeg txog tus tau tsa Yes Xus peb tus Huab Tais sawv hauv cov tub tuag rov los, 25 uas raug luag muab muag vim peb cov txhaum, thiab nws sawv rov los kom peb tau txais kev ua neeg ncaj.

NPN: LK 1: 68B-69, 70-72, 73-75

Txais: (68) Peb cav txog Huab Tais, His Xas Lais tus Tswv Ntuj;
nws tuaj xyuas nws haiv neeg lawm.

Nws tau tuaj xyuas nws haiv neeg thiab tuaj txhiv lawv.
Nws tau tsa ib tug cawm seej muaj hwj huam rau peb,
tawm ntawm nws tus tub txib Das Vis tsev neeg los.

Txais: (68) Peb cav txog Huab Tais, His Xas Lais tus Tswv Ntuj;
nws tuaj xyuas nws haiv neeg lawm..

Txheej thaum ub, nws tau siv cov yaj saub los cog lus tias :
nws yuav cawm peb ntawm peb cov yeeb ncuab,
thiab ntawm tas cov uas ntxub peb txhais tes.
Nws tau cog lus tias nws yuav khuv leej txog peb phaj txiv
thiab nws yuav nco ntsoov txog nws txoj kev cog lus ntshiab.

Txais: (68) Peb cav txog Huab Tais, His Xas Lais tus Tswv Ntuj;
nws tuaj xyuas nws haiv neeg lawm..

Yog lo lus nws tau nrog peb yawg koob Has Nplas Has cog tias:
Nws yuav tso peb dim ntawm yeeb ncuab txhais tes,
peb yuav muaj kev twj lij teev hawm nws tsis muaj kev ntshai,
tau kev ua neeg ntshiab neeg ncaj ncees raws li
nws nyiam niaj hnub hauv peb lub neej.

Txais: (68) Peb cav txog Huab Tais, His Xas Lais tus Tswv Ntuj;
nws tuaj xyuas nws haiv neeg lawm.

As Les Lus yas: MT 5: 3

Txais: As les lus yas, as les lus yas.

Cov muaj hmoov zoo yog cov pluag hauv nruab siab,
vim Ntuj lub Ceeb Tsheej yog lawv li.

Txais: As les lus yas, as les lus yas.

Ntawv Moo Zoo: LK 12: 13-21

13 Muaj ib tug neeg hauv tsoom sid hais rau Yes Xus tias : "Xib Hwb, koj hais kom kuv tij laug faib peb lub cuab tam rau kuv thiab." 14 Yes Xus hais rau nws tias : "Npawg, leej twg tsa kuv ua tus txiav txim los tus faib cuab tam rau neb ?" 15 Ces nws hais rau cov neeg ntawd tias : "Nej ceev faj, nej yuav txuag kom nej txhob muaj kev ntshaw tau ntau, vim tias neeg txawm nplua nuj npaum twg los nws txoj sia tsis yog nyob hauv nws lub cuab tam." 16 Ces Yes Xus hais zaj paj lug no rau lawv : "Muaj ib tug neeg nplua nuj, nws cov teb ntsu qoob loo kawg nkaus. 17 Nws rov nug nws tus kheej tias : 'Kuv yuav ua li cas, vim kuv tsis muaj chaw rau kuv cov qoob ?' 18 Ces nws hais tias : 'Kuv yuav ua li no : kuv yuav rhuav kuv cov txhab, yuav rov ua dua ib co txhab loj dua; kuv yuav sau kuv cov qoob loo thiab lwm yam huv si los tso rau hauv. 19 Ces kuv yuav hais rau kuv tus plig tias : Me ntsuj plig, koj muaj qoob loo cuab tam ntau kav koj ntev niaj ntau xyoo, kav tsij mus so, mus noj mus haus, mus ua lom zem xauv npo.’ 20 Tab sis Tswv Ntuj hais rau nws tias : 'Neeg vwm ! Hmo no kiag, luag yuav coj koj tus ntsuj plig rov qab, tej yam uas koj npaj tau, yuav yog leej twg tug ?’ 21 Li no, tus uas nrhiav kev nplua nuj khoom nyiaj txiag rau nws tus kheej kuj yuav zoo li ntawd, vim nws tsis nrhiav kev nplua nuj nyob hauv Tswv Ntuj."

TIM 24 LUB 10 HLI 2017

Hnub Peb Lis Piam Nees Nkaum Cuaj Nruab Xyoo A Nruab Lis Piam Xyoo I

Hwm LN Anthony Mary Claret/ Antoine Marie Claret

Zaj Nyeem Ib: LM 5: 12, 15B, 17-19, 20B-21

Cov kwv tij,
12 Vim ib tug neeg xwb, kev txhaum tau tshwm los nyob hauv lub ntiaj teb, thiab kev txhaum kuj coj kev tuag los, ces txoj kev tuag thiaj raug tas zeej tsoom, vim sawv daws ua txhaum.
15b Yog tias ib tug neeg ua txhaum xwb coob leej tuag, mas Tswv Ntuj lub txiaj ntsim thiab ib tug neeg xwb, uas yog Yes Xus Pleev, lub txiaj ntsim paj tshab haj yam yuav ntws lug los rau coob leej ntau tus.
17 Yog tias ib tug neeg tau ua txhaum, ces kev tuag tau ua vaj kav txhua tus vim ib tug ntawd, mas cov tau txais txiaj ntsim ntau thiab txais kev ncaj ua paj tshab, lawv haj yam yuav tau ua vaj nyob hauv txoj sia vim Yes Xus Pleev tib leeg . 18 Li ntawd, yog ib tug neeg qhov txhaum pus tas ib zeej tsoom mus rau kev raug txim, ib tug neeg txoj kev ncaj kuj pus tas ib zeej tsoom mus rau kev ncaj thiab txoj sia. 19 Li ntawd, vim ib tug neeg txoj kev tsis mloog lus, ces cov coob thiaj ua neeg txhaum, vim ib tug neeg txoj kev mloog lus, cov coob kuj yuav tau kev ua neeg ncaj. 20b Tab sis qhov twg muaj kev txhaum ntau, mas haj yam muaj txiaj ntsim ntau ntws lug tshaj tej kev txhaum. 21 Ces txawm txoj kev txhaum tau ua vaj kav txoj kev tuag los, lub txiaj ntsim kuj yuav ua vaj nyob hauv txoj kev ncaj, kom tau txoj sia nyob mus li nyob hauv Yes Xus Pleev peb tus Huab Tais.

NPN 40: 7-8A, 8B-9, 10, 17

Txais: (8a+9a) Huab Tais, kuv nyob ntawm no; kuv tuaj ua raws koj nyiam.

Koj tsis ntshaw tej tsiaj los tej txhiam xws txi rau koj,
tiam sis koj muab pob ntseg rau kuv kom kuv cuab ntsej mloog lus.
Koj tsis xav tau tsiaj hlawv txi ntuj los tsiaj hlawv them txim txhaum,
kuv thiaj hais tias: “Kuv nyob ntawm no, cia kuv tuaj.”

Txais: (8a+9a) Huab Tais, kuv nyob ntawm no; kuv tuaj ua raws koj nyiam.

Nyob hauv kauj ntawv muaj lus sau tseg rau kuv tias:
“Ua ywj koj lub siab, kuv tus Tswv Ntuj,
yog yam ntxim kuv siab,
koj txoj cai nyob rawv hauv kuv nruab plaw!”

Txais: (8a+9a) Huab Tais, kuv nyob ntawm no; kuv tuaj ua raws koj nyiam.

Kuv tau tshaj tawm koj txoj kev ncaj
rau tsoom neeg coob tuaj sib txoos,
kuv tsis tau kaw kuv lub qhov ncauj,
HUAB TAIS, koj yeej paub.

Txais: (8a+9a) Huab Tais, kuv nyob ntawm no; kuv tuaj ua raws koj nyiam.

Thov kom txhua leej uas nrhiav koj
zoo siab hom khaj nyob hauv koj,
thiab kom cov uas nyiam koj txoj kev cawm
cav tsis tseg tias: “HUAB TAIS nto koob meej.”

Txais: (8a+9a) Huab Tais, kuv nyob ntawm no; kuv tuaj ua raws koj nyiam.

As Les Lus yas: LK 21: 36

Txais: As les lus yas, as les lus yas.

Nej yuav ceev faj txhua lub sij hawm thiab yuav teev Ntuj,
nej thiaj yuav muaj zog sawv taus ntseg
ntawm Neeg Leej Tub xub ntiag."

Txais: As les lus yas, as les lus yas.

Ntawv Moo Zoo: LK 12: 35-38

Yes Xus hais rau nws cov thwj tim tias:
35 "Nej yuav sia siv rawv thiab taws teeb nraim,
36 nej ua zoo li ib co tub txib uas tos ntsoov lawv tus tswv mus ua tshoob yuav rov los. Thaum nws rov los txog, nws yuav khob qhov rooj, ces lawv yuav qhib plho rau nws tam sis ntawd.
37 Cov tub txib uas thaum tus tswv los txog, nws pom lawv zov hmo tos, mas lawv txoj hmoov zoo. Kuv hais tseeb rau nej tias, tus tswv yuav sia siv, yuav coj lawv mus zaum ntawm rooj thiab yuav nqa mov los tiam lawv.
38 Txawm tias tus tswv yuav los txog thaum lub caij zov hmo ob los thaum lub caij peb los xij, yog nws pom lawv zov hmo zoo li ntawd, mas cov tub txib ntawd txoj hmoov zoo !”

TIM       25      LUB      10      HLI       2017

Hnub Plaub Lis Piam Nees Nkaum Cuaj Nruab Xyoo A Nruab Lis Piam Xyoo I  

Zaj Nyeem Ib:       LM  6:   12-18

Paj Lug sau ntawv rau cov Los Mas tias:
12 Nej txhob cia kev txhaum ua vaj kav nej lub cev uas txawj tuag, kom nej thiaj tsis mloog nej lub cev tej kev ntshaw. 13 Nej txhob cia nej tes taw qhov muag ua ib co cuab yeej txhawb txoj kev tsis ncaj mus rau kev ua txhaum, nej yuav muab nej tus kheej cev rau Tswv Ntuj, xws li ib co neeg ciaj sawv hauv qhov tuag rov los, thiab muab nej tes taw qhov muag ua ib co cuab yeej cev rau Tswv Ntuj kom tau txhawb txoj kev ncaj. 14 Kev txhaum yuav kav tsis tau nej, vim nej tsis zwm rau txoj cai, tiam sis nej zwm rau lub txiaj ntsim.
15 Yog li peb puas yuav ua txhaum vim tsis zwm rau txoj cai tiam sis peb zwm rau lub txiaj ntsim ? Thov kom peb tsis xhob ua li ntawd. 16 Nej puas paub tias thaum nej rov muab nej zwm rau ib tug tswv kom nej ua nws cov qhev mloog lus, mas nej yog tus tswv uas nej mloog ntawd cov qhev?  Yog nej mloog kev txhaum, ces nej ua kev txhaum qhev coj nej mus rau kev tuag; yog nej ua kev mloog lus cov tub txib, ces nej yuav txais kev ncaj. 17 Tiam sis peb ua Tswv Ntuj tsaug, vim txawm tias yav thaud nej tau ua kev txhaum qhev, los nej tuaj yeem muab nej lub siab tas nrho los mloog txoj kev cai ntseeg. 18 Nej dim ntawm kev txhaum lawm, ces nej los ua kev ncaj cov tub txib.

NPN       124:   1B-3, 4-6, 7-8

Txais:   (8a) Peb tau kev pab yog nyob hauv Huab Tais lub npe.  

Yog HUAB TAIS tsis txhob tuaj peb tog,
His Xais Lais yuav tsum hais tias:
yog HUAB TAIS tsis txhob tuaj peb tog,
thaum cov neeg tuaj tua peb,
mas lawv yeej yuav muab peb nqos ciaj,
vim lawv npau taws cuag hluav taws kub rau peb.

Txais:   (8a) Peb tau kev pab yog nyob hauv Huab Tais lub npe.

Ntshai dej twb los tshoob peb, tus
dej twb phwj tuaj nyab peb tas;
Dej sab siv twb huam tuaj nyab peb tas.
Peb kav tsij cav lus zoo txog HUAB TAIS,
Vim nws tsis tau pub kom peb raug lawv xo peb !

Txais:   (8a) Peb tau kev pab yog nyob hauv Huab Tais lub npe.

Peb zoo puav tam li tus noog dim
ntawm tus cuab ntxiab lub vas ;
lub vas ntuag rhe, peb dim plaws lawm.
Peb qhov chaw vam khom yog
nyob hauv HUAB TAIS lub npe,
Nws uas yog tus tsim lub ntuj lub teb.

Txais:   (8a) Peb tau kev pab yog nyob hauv Huab Tais lub npe.

As Les Lus Yas:       MT  24:   42A, 44

Txais: As les lus yas, as les lus yas.

Nej yuav zov hmo nraim,
Vim nej tsis paub tias Neeg Leej Tub yuav los lub caij twg.

Txais: As les lus yas, as les lus yas

Ntawv Moo Zoo:       LK  12:   39-48

Yes Xus hais rau nws cov thwj tim tias:
39 “Nej yeej paub tias yog tus tswv tsev paub lub sij hawm twg tub sab yuav tuaj, mas nws yuav zov nraim tsis cia tub sab tho nws qhov tsev. 40 Nej kuj ib yam thiab, nej yuav npaj kom txhij, vim yog lub sij hawm uas nej tsis nco faj, mas Neeg Leej Tub thiaj yuav los ." 41 Ces Pob Zeb hais tias : "Huab Tais, koj hais zaj paj lug no, puas yog koj hais rau peb, los hais rau sawv daws ?" 42 Huab Tais teb hais tias : "Leej twg yog tus tub txib pheej xeeb thiab xyuam xim, uas tus tswv tsev tsa nws saib tus tswv cov tub zog kom thaum txog caij nws faib nplej rau lawv raws caij raws nyoog? 43 Tus tub txib uas thaum tus tswv rov los txog, nws pom tab tom lis nws tej dej num, mas nws txoj hmoov zoo. 44 Kuv hais tseeb rau nej, tus tswv yuav tsa nws saib tus tswv lub cuab tam tas huv si. 45 Tab sis yog tus tub txib ntawd xav hauv siab tias 'kuv tus Tswv yuav los lig,' ces nws pib muab tus tswv tej tub txib ntxhais txib ntaus, nws noj nws haus kom qaug, 46 tus tub txib no tus tswv yuav los txog hnub uas nws tsis nco faj, thiab lub sij hawm uas nws tsis paub, tus tswv yuav ntiab tus tub txib no tawm kom mus nrog cov tsis hwm Ntuj nyob. 47 Tus tub txib twg uas nws yeej paub qhov uas tus tswv xav kom ua, tab sis nws tsis npaj dab tsi li, thiab tsis tau ua raws li qhov tus tswv xav kom ua, mas tus tub txib ntawd yuav mag tus tswv rab nplawm sab ntsuav. 48 Hos tus tub txib uas yeej tsis paub qhov tus tswv xav kom ua li, thiab nws kuj tau ua tej yam tsim nyog ntaus kom sab, mas nws yuav mag tus tswv nplawm sib dua; vim tias tus uas Ntuj tau pub ntau rau, Ntuj kuj yuav taij ntau rov qab; tus uas Ntuj tso ntau yam rau nws ceev, mas Ntuj yuav kom nws xa ntau dua rov qab.”

TIM       26      LUB      10      HLI       2017

Hnub Tsib Lis Piam Nees Nkaum Cuaj Nruab Xyoo A Nruab Lis Piam Xyoo I

Zaj Nyeem Ib:       LM  6:   19-23

Paj Lug sau ntawv rau cov neeg Los Mas tias:
19 Kuv piav raws li tib neeg xwb, vim nej muaj qhov phem nyob hauv nej lub cev. Yam li thaum ub, nej tau muab nej tes taw qhov muag los ua txoj kev phem kev tsis tsim txiaj qhev ces nej tau ua neeg tsis tsim txiaj; zaum no, nej kuj yuav muab nej tes taw qhov muag los zwm rau txoj kev ncaj kom nej ua tau neeg ntshiab thiab.
20 Thaum nej tseem ua kev txhaum qhev, mas nej tsis zwm rau txoj kev ncaj li. 21 Thaum ntawd, nej tau dab tsi zoo los ntawm tej yam nej ua uas nyem no nej rov txaj muag rau nej? Vim qhov kawg, tej ntawd yuav coj nej mus rau hauv txoj kev tuag xwb. 22 Tiam sis nyem no nej dim ntawm txoj kev ua txhaum los ua Tswv Ntuj cov tub txib lawm, mas qhov zoo rau nej yog qhov tias nws yuav coj nej mus ua neeg ntshiab dawb huv, ces qhov kawg nej yuav tau txoj sia nyob mus li. 23 Vim tias tus nqi zog uas txoj kev txhaum them los yog txoj kev tuag, hos cov paj tshab uas Tswv Ntuj pub yog txoj sia nyob mus li nyob hauv Yes Xus Pleev peb tus Huab Tais.

NPN       1:   1-2, 3, 4+6

Txais: (NPN 40:5a) Cov muaj hmoov zoo yog cov uas tso siab rau Huab Tais.

Muaj hmoov zoo yog tus uas tsis coj
raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo coj HUAB TAIS txoj cai,
thiab nws xav ntsoov HUAB TAIS txoj cai nruab hnub hmo ntuj.

Txais: (NPN 40:5a) Cov muaj hmoov zoo yog cov uas tso siab rau Huab Tais.

Nws zoo li ib tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj ntsws li.
Nws ua yam twg tau yam ntawd. .

Txais: (NPN 40:5a) Cov muaj hmoov zoo yog cov uas tso siab rau Huab Tais.

Cov neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov tus neeg ncaj txoj kev,
hos tus neeg phem txoj kev yaj ntshis mus.

Txais: (NPN 40:5a) Cov muaj hmoov zoo yog cov uas tso siab rau Huab Tais.

As Les Lus Yas:       FLP  3:   8-9

Txais: As les lus yas, as les lus yas.

kuv saib tas puas tsav yam tsis muaj qab hau, kom kuv
tau Leej Pleev ua kuv tug thiab kom kuv nyob hauv nws.

Txais: As les lus yas, as les lus yas.

Ntawv Moo Zoo:       LK  12:   49-53

Yes Xus hais rau nws cov thwj tim tias:
49 "Kuv coj hluav taws tuaj zes rau lub ntiaj teb, kuv xav kom kheev lam cov hluav taws ntawd twb cig hlob lawm. 50 Muaj ib lub cim ntxuav uas kuv yuav tsum tau mus txais; kuv lub siab ntxhov hnyo mus txog thaum tej ntawd tiav tas. 51 Nej puas xav tias kuv tuaj ua kom muaj kev thaj yeeb nyob ntiaj teb no ? Tsis yog kuv tuaj ua qhov ntawd. Kuv hais rau nej tias, yog kuv tuaj ua kom muaj kev sib ncaim sib cais. 52 Txij no mus, ib tse neeg muaj tsib leeg yuav sib ncaim sib cais, peb leeg yuav tiv ob leeg, ob leeg yuav tiv peb leeg ; 53 txiv yuav tiv tub, tub yuav tiv txiv, niam yuav tiv ntxhais, ntxhais yuav tiv niam, poj yuav tiv nyab, nyab yuav tiv poj."

TIM       27      LUB      10      HLI       2017

Hnub Rau Lis Piam Nees Nkaum Cuaj Nruab Xyoo A Nruab Lis Piam Xyoo I  

Zaj Nyeem Ib:       LM  7:   18-25A

Paj Lug sau ntawv rau cov ntseeg nyob Los Mas tias:
18 Kuv paub tias qhov zoo yeej tsis nyob txawm hauv kuv, los yog hauv kuv lub cev li.  Lub siab xav ua yam zoo mas yeej nyob rawv ntawd, tab sis yuav ua kiag qhov zoo mas ua tsis tau.  19 Vim tias kuv tsis ua qhov zoo uas kuv xav ua, hos kuv ua qhov phem uas kuv tsis xav ua. 20 Yog kuv tsis ua qhov kuv xav ua, mas tsis yog kuv ua qhov ntawd, yog txoj kev txhaum uas nyob hauv kuv ua qhov ntawd. 21 Ces kuv thiaj pom tias muaj zoo li no: thaum kuv xav ua qhov zoo, mas qhov phem tawm plaws tam sim ntawd los thaiv. 22 Nyob puag hauv kuv nruab siab, kuv yeej txaus siab rau Tswv Ntuj Txoj Cai, 23 tab sis kuv pom tias muaj dua lwm txoj cai tswj kuv lub cev, txoj cai ntawd tawm tsam tiv txoj cai nyob hauv kuv lub tswv yim,  nws muab kuv khi rau txoj kev ua txhaum uas nyob hauv kuv lub cev. 24 Kuv yog ib tug neeg txom nyem tas nrho tiag ! Leej twg yuav npo tau kuv dim ntawm lub cev uas pus kuv mus rau txoj kev tuag ? 25 Kuv yuav ua Tswv Ntuj tsaug vim yog Yes Xus Pleev peb tus Huab Tais.

NPN       119:   66, 68, 76, 77, 93, 94

Txais:   (68b) Huab Tais, thov koj qhia koj cov cai lij choj rau kuv.  

Thov koj qhia kev thoob tsib thiab kev txawj ntse
rau kuv, vim kuv tso siab rau koj cov lus qhia.

Txais:   (68b) Huab Tais, thov koj qhia koj cov cai lij choj rau kuv.

Koj yog tus siab zoo, koj ua qhov zoo,
thov koj qhia koj cov cai lij choj rau kuv.

Txais:   (68b) Huab Tais, thov koj qhia koj cov cai lij choj rau kuv.

Thov muab koj txoj kev hlub los nplij kuv
raws li koj tau cog lus rau koj tus tub txib.

Txais:   (68b) Huab Tais, thov koj qhia koj cov cai lij choj rau kuv.

Thov kom koj muab koj txoj kev khuv leej rau kuv, ces kuv
yuav muaj txoj sia, vim koj Txoj Cai yog kuv kev zoo siab.

Txais:   (68b) Huab Tais, thov koj qhia koj cov cai lij choj rau kuv.

Kuv yuav tsis hnov qab koj cov lus qhia ib zaug li,
Vim koj cov lus qhia ua kom kuv rov muaj txoj sia.

Txais:   (68b) Huab Tais, thov koj qhia koj cov cai lij choj rau kuv.

Kuv yog koj tug, thov  koj cawm kuv mas !
Vim kuv tau nrhiav koj cov lus qhia.

Txais:   (68b) Huab Tais, thov koj qhia koj cov cai lij choj rau kuv.

As Les Lus Yas:       MT  11:   25

Txais: As les lus yas, as les lus yas.

Kuv cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog Ntuj Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo:       LK  12:   54-59

54 Yes Xus tseem hais rau tsoom neeg sawv daws tias : "Thaum nej pom huab sawv laum sab hnub poob, tam sis ntawd, nej hais tias ntuj yuav los nag, ces kuj los nag tiag. 55 Thaum cua nplawm sab qab teb tuaj, nej hais tias ntuj yuav sov, ces muaj li ntawd tuaj tiag. 56 Neeg zoo nraum tawv, nej twb paub ntsuas lub ntuj lub teb tus yam ntxwv, ua cas nej tsis paub ntsuas lub zim txwv no li? 57 Vim li cas nej tsis txiav rau nej tus kheej tias qhov twg yog qhov ncaj?
58 Yog koj nrog koj tus yeeb ncuab taug kev mus cuag nom, mas nyob ntawm kev, koj yuav tsum nrog nws sib hais kom haum ua ntej, tsam nws coj koj mus rau tus nom txiav txim, ces nom txiav txim muab koj cob nkaus rau tub ceev xwm, tub ceev xwm muab koj pov rau hauv tsev loj faj. 59 Kuv hais rau koj tias: Koj yuav tsis tawm hauv tsev loj faj los mus txog thaum koj rho nyiaj qab nas txog xus kawg los them kom tas rau.”

TIM 28 LUB 10 HLI 2017

Hnub Xya Lis Piam Nees Nkaum Cuaj Nruab Xyoo A Nruab Lis Piam Xyoo I

Hwm LN Xis Moos thiab Yus Das(Jude), ob tug Hauv Paus Xa Lus

Zaj Nyeem Ib: EFX 2: 19-22

Paj Lug sau ntawv rau cov ntseeg nyob Es Fes Xos tias:
9 Li ntawd, nej tsis yog ib co pej kum neeg, los ib co qhua ntxiv, tiam sis nej koom ua ib cuab nrog cov neeg ntshiab thiab nej yog Tswv Ntuj tsev neeg, 20 uas yog txhim rau saum cov Hauv Paus Xa Lus thiab cov Yaj Saub ua cov taw ntsa, Yes Xus Pleev yog lub pob zeb txheem tas lub tsev. 21 Nyob hauv Leej Pleev, lub tuam tsev sib dhos ruaj thiab hlob ua ib lub tuam tsev teev ntuj ntshiab nyob hauv Huab Tais. 22 Nyob hauv Leej Pleev, nej kuj raug muab sib dhos ua ke tsim tsa ua ib lub tsev rau Tswv Ntuj nyob, nyob hauv Leej Ntuj Plig.

NPN 19: 2-3, 4-5

Txais: (5) Lawv lo lus xa moo nrov mus thoob ntiaj teb.

Cov txheej ntuj saud piav txog Tswv Ntuj lub koob meej,
lub qab ntuj khwb tshaj cov hauj lwm nws txhais tes tau ua.
Nruab hnub hais lo lus rau nruab hnub mloog,
Hmo ntuj qhia rau hmo ntuj paub txog.

Txais: (5) Lawv lo lus xa moo nrov mus thoob ntiaj teb.

Tsis muaj ib lo lus los ib zaj lus piav
Uas leej tib neeg yuav tsis hnov txog.
Lawv lub suab yeej ncha puv tas ntiaj teb,
lawv lo lus xa moo yeej nrov txog tim npoo ntuj.

Txais: (5) Lawv lo lus xa moo nrov mus thoob ntiaj teb.

As Les Lus Yas: Te Deum

Txais: As les lus yas, as les lus yas.

Tswv Ntuj, peb cav txog koj,
peb tshaj tias koj yog Huab Tais;
tsoom Hauv Paus Xa Lus uas
muaj koob meej lawv cav txog koj.

Txais: As les lus yas, as les lus yas.

Ntawv Moo Zoo: LK 6: 12-16

12 Ob peb hnub ntawd, Yes Xus nce mus pem roob mus teev Ntuj, nws teev Tswv Ntuj ib hmos nkaus. 13 Thaum kaj ntug, nws hu nws cov thwj tim los ntawm nws, nws xaiv kaum ob leeg nyob hauv lawv, nws hu cov ntawd ua Hauv Paus Xa Lus. 14 Muaj Xis Moos, uas nws tis npe hu ua Pob Zeb rau, As Nres, Pob Zeb tus kwv, Yas Kos, Zam, Fis Lis Pos, Npas Tos Los Mas Yos, 15 Mas Tais, Tos Mas, Yas Kos uas yog As Fas Yos tub, Xis Moos Siab Kub, 16 Yus Das, Yas Kos tub, thiab Yus Das Kas Lis Yaus, uas yog tus ntxeev siab.

TIM 30 LUB 10 HLI 2017

Hnub Ob Lis Piam peb caug Nruab Xyoo A Nruab Lis Piam Xyoo I

Zaj Nyeem Ib: LM 8: 12-17

Paj Lug sau ntawv rau cov ntseeg nyob Los Mas tias:
12 Cov kwv tij, peb tsis tshuav lub cev nuj nqis, peb tsis tas yuav tsum ua neej mloog lub cev. 13 Yog nej ua neej mloog lub cev mas nej kawg yuav tuag; tab sis yog nej cia Leej Tswv Yim pab nej cheem lub cev cov hauj lwm, mas nej yuav muaj txoj sia.
14 Txhua leej txhua tus uas Tswv Ntuj Leej Tswv Yim coj lawv, mas lawv yog Tswv Ntuj cov me nyuam. 15 Nej tsis tau txais ib lub tswv yim ua qhev, kom nej poob rau hauv txoj kev ntshai. Tiam sis nej tau txais ib lub tswv yim ua tub ki tshiab, ces nej hu Tswv Ntuj tias : ‘As Npas ! Txiv !’ 16 Leej Tswv Yim nrog peb lub tswv yim zeem tseeb tias peb yog Tswv Ntuj cov me nyuam tiag. 17 Vim cov me nyuam kuj yog cov yuav txais lub cuab tam, ces peb yuav tau txais Tswv Ntuj lub cuab tam, peb yuav nrog Leej Pleev koom txais lub cuab tam ntawd, tsuav yog tias peb nrog nws raug txom nyem, kom peb tau nrog nws muaj hwj chim thiab.

NPN 68: 2+4, 6-7AB, 20-21

Txais: (21a) Peb tus Tswv Ntuj yog tus Tswv Ntuj pub kev cawm seej.

Tswv Ntuj sawv tsees, nws cov yeeb ncuab tawg sib ncaim tas,
cov ntxub Tswv Ntuj khiav mus deb ntawm nws lub ntsej muag
Hos cov siab ncaj zoo siab thiab hom khaj nyob
ntawm Tswv Ntuj xub ntiag, lawv zoo siab luag ntxhi :

Txais: (21a) Peb tus Tswv Ntuj yog tus Tswv Ntuj pub kev cawm seej.

Tus ua cov ntsuag nos txiv thiab tuaj cov poj ntsuam tog
Yog Tswv Ntuj uas nyob hauv nws lub tsev ntshiab.
Tswv Ntuj pub ib tse neeg rau tus tsis muaj leej twg,
nws coj cov neeg raug txim tawm los
kom lawv mus ntsib kev vam meej,

Txais: (21a) Peb tus Tswv Ntuj yog tus Tswv Ntuj pub kev cawm seej.

Thov kom HUAB TAIS nto koob meej txhia niaj txhia hnub !
Nws yog tus ris peb lub nra, Tswv Ntuj yog peb txoj kev cawm seej.
Tswv Ntuj yog ib tug Tswv Ntuj cawm peb,
Huab Tais, kuv tus Huab Tais, koj yog tus tuav txoj kev tuag cov rooj vag.

Txais: (21a) Peb tus Tswv Ntuj yog tus Tswv Ntuj pub kev cawm seej.

As Les Lus Yas: ZAM 17: 17B, 17A

Txais: As les lus yas, as les lus yas.

Huab Tais, koj lo lus yog qhov tseeb;
thov koj xaiv peb mus nyob hauv qhov tseeb.

Txais: As les lus yas, as les lus yas.


Ntawv Moo Zoo: LK 13: 10-17

10 Muaj ib zaug Yes Xus qhuab qhia nyob hauv ib lub tsev txoos hnub xas npas tos. 11 Nyob ntawd muaj ib tug poj niam raug ib tug dab khoov duav tau kaum yim xyoo lawm. Nws nyob khoov nkoos, yeej sawv tsis taus ntseg li. 12 Yes Xus pom tus poj niam ntawd, Yes Xus hais rau nws tias : "Tus poj niamj, koj dim ntawm koj tus mob khoov duav lawm." 13 Ces Yes Xus tsa nws txhais tes rau saum tus poj niam; tam sis ntawd, tus poj niam sawv taus ntseg, ces nws cav txog Tswv Ntuj. 14 Tus tswj tsev txoos tsis txaus siab rau qhov Yes Xus kho neeg hnub Xas Npas Tos, nws thiaj qhib ncauj hais rau tsoom sid tias : "Muaj rau hnub uas yuav tsum ua hauj lwm, nej tuaj kho mob tej hnub ntawd, txhob tuaj hnub Xas Npas Tos !" 15 Huab Tais teb rau tus ntawd tias : "Neeg zoo nraum tawv ! Hnub Xas Npas Tos, nej txhua leej txhua tus twb daws nej tus nyuj los tus luj ntawm lub dab zaub cab mus haus dej los sad ? 16 Has Nplas Has tus ntxhais no, Xas Tas twb muab khi tau kaum yim lub xyoo no lawm, tseem yuav tsis txhob ua kom nws dim ntawm cov hlua no hnub Xas Npas Tos thiab lod ?" 17 Thaum Yes Xus hais li ntawd, cov neeg ntxub Yes Xus txaj muag kawg, hos tas tsoom sid zoo siab rau txhua yam hauj lwm nto koob meej uas Yes Xus ua.

TIM 31 LUB 10 HLI 2017

Hnub Peb Lis Piam Peb Caug Nruab Xyoo A Nruab Lis Piam Xyoo I

Zaj Nyeem Ib: LM 8: 18-25

Paj Lug sau ntawv rau cov ntseeg nyob Los Mas tias:
18 Kuv pom tau tias tej kev txom nyem nyob hauv lub caij no, yuav muab los piv tsis tau rau lub hwj chim uas yuav tawm tuaj rau luag pom nyob hauv peb. 19 Vim tas puas tsav yam Ntuj tsim los yeej tos ntshis txog lub caij Tswv Ntuj cov me nyuam yuav tawm los rau sawv daws pom xyeem. 20 Tas puas tsav yam Ntuj tsim puav leej zwm rau kev tsis muaj nuj nqes, tsis yog vim lawv tuaj yeem zwm rau, hos yog vim tus muab lawv mus zwm rau, kom muaj txoj kev cia siab tias: 21 lawv yuav dim ntawm txoj kev ua kev ploj tuag qhev los mus rau txoj kev twj lij ua Tswv Ntuj tsoom tub ki muaj hwj chim.
22 Peb paub tias, los txog lub zwj ceeb no, tas puas tsav yam Ntuj tsim ntsaj qaws xws li ib tug poj niam daws cev. 23 Tsis yog tas puas tsav yam ntsaj xwb, tab txawm peb twb yog cov tau txais Leej Ntuj Plig thawj cov txiv, tsis kav peb tseem ntsaj qaws nyob hauv peb nruab siab, vim peb cia siab rawv rau lub caij peb yuav tau ua tub sau uas yog lub caij txhiv peb lub cev. 24 Peb tau txais kev cawm nyob hauv txoj kev cia siab tos rawv ntawd. Thaum yus tau pom yam uas yus cia sia tos rawv lawm, mas tsis muaj cia siab tos ntxiv ; Leej twg thiaj tseem yuav cia siab tos rawv yam nws twb tau pom lawd? 25 Tab sis thaum peb cia siab tos yam peb tsis pom, mas peb yuav ua siab ntev tos.

NPN 126: 1BC-2AB, 2CD-3, 4-5, 6

Txais: (3a) Huab Tau tau ua tej yam loj tas nrho rau peb.

Thaum HUAB TAIS coj Xis Yoos cov neeg nyob txim rov los,
peb zoo li ib co neeg ua npau suav.
Peb lub ncauj muaj suab luag nqhua,
peb tus nplaig qw nkauj zoo siab.

Txais: (3a) Huab Tau tau ua tej yam loj tas nrho rau peb.

Tej pej kum cuab hais nroo ntws tias :
"HUAB TAIS ua tej yam loj tas nrho rau lawv !"
HUAB TAIS tau ua tej yam loj rau peb tiag,
peb zoo siab tas nrho.

Txais: (3a) Huab Tau tau ua tej yam loj tas nrho rau peb.

HUAB TAIS, thov koj hloov peb txoj hmoov phem kom
zoo xws li dej sab siv huam nyob teb chaws suab puam.
Cov neeg tseb nplej ntxuag kua muag,
lawv yuav sau nplej ntxuag kev lom zem.

Txais: (3a) Huab Tau tau ua tej yam loj tas nrho rau peb.

Thaum mus, lawv quaj,
vim lawv ris cov seev noob yuav coj mus tseb,
thaum lawv rov los, lawv hu nkauj,
vim lawv ris cov res nplej tshiab los

Txais: (3a) Huab Tau tau ua tej yam loj tas nrho rau peb.

As Les Lus Yas: MT 11:25

Txais: As les lus yas, as les lus yas.

Kuv cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog Ntuj Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: LK 13: 18-21

18 Yes Xus hais tias : "Tswv Ntuj lub Ceeb Tsheej yog zoo li cas ? Kuv yuav muab piv rau dab tsi ? 19 Tswv Ntuj lub Ceeb Tsheej zoo li ib lub noob zaub roj uas ib tug neeg nqa mus tseb rau hauv nws lub vaj. Lub noob hlob loj tsheej ib tsob ntoo, ces cov noog ya saum ntuj los nkaum hauv nws cov ceg."
20 Yes Xus tseem hais tias : "Kuv yuav muab Tswv Ntuj lub Ceeb Tsheej piv rau dab tsi ? 21 Tswv Ntuj lub Ceeb Tsheej zoo li ib co poov xab uas ib tug poj niam muab do rau hauv peb kawg hmoov nplej mus txog thaum cov hmoov su tuaj tas huv si."

TIM 1 LUB 11 HLIS 2017

Hnub Plaub Lis Piam Peb Caug Nruab Xyoo A Nruab Lis Piam Xyoo I

Hwm tas ib tsoom Leej Ntshiab - Yog ib hnub uas tsoom ntseeg yuav tsum mus teev ntuj ib yam li Hnub Chiv (Holiday of Obligation/ Fête d’Obligation).

Zaj Nyeem Ib: QYTN 7: 2-4, 9-14

2 Kuv, Zam, rov pom dua ib tug Tshiab tawm sab Toob Fab tuaj ; nws nqa tus Tswv Ntuj muaj txoj sia lub thwj. Nws hu ib suab nrov nrov rau plaub tug Tshiab uas tau txais txoj hauj lwm tso xwv txheej rau lub ntiaj teb tias : 3 “Nej txhob rawm tso xwv txheej mus rau lub ntiaj teb, los lub hiav txwv, los tej ntoo. Tos peb ntaus cim rau saum Tswv Ntuj cov tub txib hauv pliaj tso.” 4 Ces kuv hnov tias lawv ntaus cim rau npaum no leej : ib puas plaub caug plaub txhiab leej nyob hauv tas nrho cov xeem His Xas Lais.
9 Dhau tej ntawd tas lawm, kuv pom ib pab neeg coob coob suav tsis txheeb; muaj tas txhua teb chaws, txhua haiv neeg, txhua xeem lus tib si nyob hauv. Lawv sawv ntsug ze ntawm lub theej kiab, nyob ntawm Leej Yaj xub ntiag. Lawv hnav tsho dawb ntev, thiab tuav tej rev nplooj ntoo txoob ntawm tes. 10 Lawv ua ib suab qw nrov nrov muaj ceem tias : “Kev cawm seej yog peb tus Tswv Ntuj uas nws zaum saum lub theej kiab tug, thiab yog Leej Yaj tug !” 11 Ces tas tsoom Tshiab uas sawv ncig lub theej kiab, ncig cov txwj laus thiab plaub Leeg Muaj Txoj Sia, lawv txhos caug, ntsej muag khoov ti av pe Tswv Ntuj. 12 Lawv hais tias : “Lo Lus cav, lub hwj chim, kev thoob tsib, kev ua tsaug, kev nto koob meej, kev muaj hwj huam thiab muaj zog yog peb tus Tswv Ntuj li, mus tas ib txhiab ib txhis ! Ua li.” 13 Ib tug txwj laus txawm hais rau kuv tias : “Cov neeg uas hnav tsho dawb ntev ntawd yog leej twg ? Lawv tuaj qhov twg tuaj ?” 14 Kuv teb tias : “Huab Tais, yog koj thiaj paub xwb.” Nws rov hais tias : “Lawv yog cov uas hla dhau txoj kev raug luag hiam hnyav los. Lawv tau ntxhua lawv cov tsho ntev, thiab muab raus Leej Yaj cov ntshav kom dawb.”

NPN 24: 1BC-2, 3-4AB, 5-6

Txais: (6) Huab Tais, lawv yog haiv neeg uas ntshaw pom koj lub ntsej muag.

Lub ntiaj teb thiab puas tsav yam nyob hauv yog HUAB TAIS li,
lub sim ceeb thiab cov nyob hauv yog nws tug.
Vim nws yog tus tsim lub ntiaj teb los txawb rau saum cov hiav txwv
thiab muab tso rau saum cov dej ntws.

Txais: (6) Huab Tais, lawv yog haiv neeg uas ntshaw pom koj lub ntsej muag.

Leej twg thiaj yuav nce tau mus saum HUAB TAIS lub roob?
Los leej twg thiaj yuav mus sawv taus nyob hauv nws thaj chaw ntshiab?
Yog tus uas txhais tes tsis muaj txhaum, lub siab dawb huv,
tus uas tsis ntshaw tej yam tsis muaj qab hau.

Txais: (6) Huab Tais, lawv yog haiv neeg uas ntshaw pom koj lub ntsej muag.

HUAB TAIS yuav foom koob hmoov rau nws. ,
yog paj tshab tuaj ntawm Tswv Ntuj tus cawm nws tuaj.
Lawv yuav zoo li no, tsav neeg uas nrhiav Tswv Ntuj,
cov uas nrhiav Yas Kos tus Tswv Ntuj lub ntsej muag.

Txais: (6) Huab Tais, lawv yog haiv neeg uas ntshaw pom koj lub ntsej muag.

Zaj Nyeem Ob: 1 ZAM 3: 1-3

Cov zoo nyiad,
1 Nej ntsia saib, Leej Txiv txoj kev hlub peb loj tas npaum no, peb thiaj tau lub npe hu ua Tswv Ntuj cov me nyuam; peb yeej yog Tswv Ntuj cov me nyuam tiag tiag! Tos lub ntiaj teb tsis paub peb los vim lawv twb tsis paub Tswv Ntuj.
2 Cov zoo nyiad, zaum no peb yog Tswv Ntuj cov me nyuam lawm. Qhov uas yav tom ntej peb yuav plhis mus zoo li cas, tseem tsis tau tawm los rau peb qhov muag pom xyeem. Peb paub tau tias, thaum qhov ntawd tawm los rau peb qhov muag pom, mas peb yuav zoo li Leej Pleev, vim nws zoo li cas mas peb yuav pom Nws zoo li ntawd. 3 Tus twg tso siab rau Leej Pleev, mas nws kuj yuav dawb huv tuaj, vim Leej Pleev yog tus dawb huv.

As Les Lus Yas: MT 11: 28

Txais: As les lus yas, as les lus yas.

Huab Tais hais tias: “Nej tuaj cuag kuv mas, tas nej sawv daws
uas nej khwv thiab ris nra hnyav! Kuv yuav cia nej so los siav.

Txais: As les lus yas, as les lus yas.

Ntawv Moo Zoo: MT 5: 1-12A

1 Yes Xus pom neeg coob coob tuaj, nws nce mus saum lub roob. Nws zaum, cov thwj tim txav los ze nws. 2 Ces Yes Xus tsa ncauj qhia lawv hais tias : 3 "Cov tau txoj hmoov zoo, yog cov pluag hauv nruab siab, vim Ntuj lub Ceeb Tsheej yog lawv li. 4 Cov tau txoj hmoov zoo, yog cov siab zoo, vim lawv yuav txais lub ntiaj teb los ua lawv tug. 5 Cov tau txoj hmoov zoo, yog cov quaj ntsuag, vim Ntuj yuav nplij lawv. 6 Cov tau txoj hmoov zoo, yog cov tshaib thiab nqhis txoj kev ncaj, vim Ntuj yuav daws lawv qhov nqhis. 7 Cov tau txoj hmoov zoo, yog cov hlub luag tej, vim Ntuj yuav hlub lawv. 8 Cov tau txoj hmoov zoo, yog cov siab dawb siab huv, vim lawv yuav pom Tswv Ntuj. 9 Cov tau txoj hmoov zoo, yog cov tsim kev thaj yeeb, vim lawv yuav hu ua Tswv Ntuj cov me nyuam. 10 Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug. 11 Thaum luag thuam nej, hiam nej, thiab liam ntau yam phem rau nej vim kuv, mas nej txoj hmoov zoo. 12 Nej yuav zoo siab thiab nej hom khaj, vim nej yuav tau txais koob haum loj nyob saum ntuj.”

TIM 2 LUB 11 HLIS 2017

Hnub Tsib Lis Piam Peb Caug Nruab Xyoo A Nruab Lis Piam Xyoo I

Nco txog tas ib tsoom ntseeg tau tas sim neej lawm (All Souls/Fête des Morts)

Zaj Nyeem Ib: THOOB TSIB 3: 1-9

1 Cov neeg ncaj tus ntsuj plig nyob hauv Tswv Ntuj txhais tes, tsis muaj ib yam xwv txheej dab tsi yuav raug tau lawv. 2 Cov neeg tsis muaj tswv yim xav tias cov neeg ncaj tuag lawm, lawv txoj kev ncaim mus yog ib yam xwv txheej loj, 3 thiab lawv txoj kev tawm rooj mus deb ntawm peb, yog ib txog kev puas tsuaj loj. Tab sis cov neeg ncaj ntawd nyob hauv kev thaj yeeb lawm. 4 Tib neeg xav tias yog cov neeg siab ncaj raug txim loj, tab sis lawv mas lawv tso siab lug tias lawv muaj txoj sia nyob mus li. 5 Lawv raug ib txog kev txom nyem sib, tab sis lawv yuav txais txiaj ntsim koob hmoov loj. Tswv Ntuj yeej tau sim lawv tiag, ces nws pom tias lawv tsim nyog ua nws tug. 6 Tswv Ntuj tau sim cov neeg siab ncaj zoo li sim kub nyob hauv lub yeej vub, nws tau pom zoo txais lawv zoo li thaj txi Ntuj zoo txhij zoo txhua. 7 Thaum txog lub caij Tswv Ntuj tuaj xyuas lawv, mas lawv yuav ci ntsa iab; lawv yuav khiav nrawm cuag li hluav taws ri mus kis tej roob nqeeb qhuav. 8 Lawv yuav txiav txim rau cov kuj cuab, lawv yuav tswj cov haiv neeg, Huab Tais yuav yog lawv tus vaj mus ib txhis. 9 Cov neeg tso siab rau Huab Tais yuav to taub txoj kev tseeb, cov neeg npuab Huab Tais yuav nyob ze nws hauv txoj kev nyiam: Vim Huab Tais tshwj zias nws lub txiaj ntsim thiab nws txoj kev khuv leej rau nws cov ntshiab, thiab nws txoj kev hlub tshua rau nws cov xaiv.

NPN 23: 1-3A, 3B-4, 5, 6

Txais: (1) Huab Tais yog tus tswv zov yaj saib kuv, kuv yuav tsis tshaib dab tsi li.
Los: (4) Txawm kuv taug kev hauv ib lub hav tsaus nti,
los kuv tsis ntshai dab tsi phem, vim koj nrog nraim kuv.

HUAB TAIS yog tus tswv zov yaj saib kuv,
kuv yuav tsis tshaib txog dab tsi.
Nws cia kuv so nyob hauv tej tshav zaub mos ntsuab xiab;
Nws coj kuv mus nyob ze cov dej tus yees;
nws ua kom kuv tus ntsuj plig muaj zog.

Txais…

Nws coj kuv mus taug txoj kev ncaj, vim nws lub npe.
Txawm kuv taug kev hauv ib lub hav tsaus nti,
kuv tsis ntshai dab tsi phem; vim koj nyob rawv ntawm kuv ib sab,
koj rab nplawm thiab rab pas nrig ua kuv luag.

Txais…

Koj rau ib rooj mov rau ntawm kuv xub ntiag
rau kuv cov yeeb ncuab ntsia ntsoov;
koj muab roj pleev kuv taub hau;
kuv lub ntim puv phwj yaws.

Txais…

Txiaj ntsim thiab kev zoo siab raws kuv nraim
niaj hnub hauv kuv lub neej;
Kuv lub chaw nyob yog hauv HUAB TAIS tsev
mus kom tas cov hnub nyoog.

Txais…

Zaj Nyeem Ob: LOS MAS 5: 5-11

Paj Lug sau ntawv tias:
5 Kev tso siab ua kom peb tsis muaj chaw khuv xim, vim Leej Ntuj Plig Ntshiab, uas Ntuj pub rau peb, nws hliv Tswv ntuj txoj kev nyiam rau hauv peb lub siab. 6 Vim tias thaum lub sij hawm peb tsis muaj zog, thaum txog lub hnub nyoog teem tseg, yog thaum ntawd Leej Pleev thiaj tau tuag kom tau pab cov neeg tsis hwm Ntuj. 7 Yog yuav tsum tuag kom tau pab ib tug neeg ncaj, mas yus twb txiav txim siab nyuaj; yog yuav tuag kom tau pab ib tug neeg siab zoo mas nyaj tej zaum yus yuav muaj peev xwm zog. 8 Tiam sis yam uas zeem tseeb tias Tswv Ntuj hlub peb yog qhov tias thaum peb tseem yog neeg txhaum, Leej Pleev tuag kom tau pab peb. 9 Nyem no peb twb muaj kev ncaj nyob hauv Leej Pleev cov roj ntsha lawm, mas nws haj yam yuav cawm peb ntawm Ntuj txoj kev npau taws. 10 Yog tias thaum peb tseem ua yeeb ncuab rau Tswv Ntuj, nws Leej Tub txoj kev tuag twb ua kom peb nrog Tswv Ntuj rov sib haum xeeb, mas nyem no thaum peb nrog Tswv Ntuj rov sib haum xeeb lawm, mas Tswv Ntuj Leej Tub txoj sia haj yam yuav cawm tau peb. 11 Tsis tas li xwb, peb tseem khav tau tias peb nyob hauv Tswv Ntuj vim peb tus Huab Tais Yes Xus Pleev, tus uas tau ua kom zaum no peb muaj kev haum xeeb nrog Tswv Ntuj.

Los LM 6: 3-9

Paj Lug sau ntawv tias:
3 Nej puas paub txog tias thaum peb tau txais lub Cim Ntxuav nyob hauv Yes Xus Pleev, mas kuj yog peb sawv daws tau txais lub Cim Ntxuav nyob hauv Yes Xus txoj kev tuag thiab? 4 Li ntawd thaum peb txais lub Cim Ntxuav peb kuj nrog Yes Xus tuag mus zwm ntxa thiab, kom, ib yam li Leej Pleev tau sawv hauv cov tub tuag rov los vim Leej Txiv lub hwj huam tau tsa nws sawv, peb kuj yuav tau coj dua ib lub neej tshiab thiab. 5 Vim tias yog peb nrog Leej Pleev koom ua ib tug nyob hauv txoj kev tuag zoo li nws txoj, mas peb kuj yuav nrog Leej Pleev koom ib txoj kev sawv rov los thiab. 6 Peb yuav tsum to taub tias peb tus qub neeg raug muab ntsia nrog Yes Xus dai saum ntoo cuam lawm, kom peb lub cev uas xib rau kev txhaum tsis txhob muaj zog kav peb, peb thiaj tsis txhob ua kev txhaum cov qhev ntxiv. 7 Vim tias tus neeg tuag tau txais kev zam nws cov txhaum tas lawm. 8 Tab sis, yog peb tau nrog Leej Pleev tuag mas peb ntseeg tias peb yuav tau nrog nws muaj txoj sia nyob thiab. 9 Peb paub tias Leej Pleev tau sawv hauv qhov tuag los lawm, nws yuav tsis tuag ntxiv, txoj kev tuag tsis muaj cuab kav tuaj raug nws ib zaug ntxiv.

As Les Lus Yas: MT 25: 34

Txais: As les lus yas, as les lus yas.

Nej los mog ! Nej cov uas kuv Txiv pub txoj hmoov zoo rau nej,
los txais lub Ceeb Tsheej uas yeej npaj tseg rau nej
txij puag thaum pib tsim lub sim ceeb los lawm ua nej tug.

Txais: As les lus yas, as les lus yas.

Ntawv Moo Zoo: ZAM 6: 37-40

Yes Xus hais rau cov neeg tias:
37 “Txhua yam uas kuv Txiv muab rau kuv yuav los cuag kuv. Hos tus tuaj cuag kuv, kuv yuav tsis ntiab nws rau nraum zoov. 38 Vim kuv nqes saum ntuj los, tsis yog los ua ywj kuv siab, yog los ua raws li Tus Xa kuv tuaj lub siab. 39 Tus Xa kuv tuaj lub siab xav yog zoo li no : Kom kuv tsis txhob ua ib yam uas nws muab rau kuv ploj li, thiab hnub kawg, kom kuv tsa yam ntawd sawv rov los. 40 Qhov uas kuv Txiv nyiam yog zoo li no : kom leej twg pom Leej Tub thiab ntseeg txog Leej Tub, mas nws yuav muaj txoj sia nyob mus li, thiab Hnub Kawg, kuv yuav tsa nws sawv rov los."

TIM 3 LUB 11 HLIS 2017

Hnub Rau Lis Piam Peb Caug Nruab Xyoo A Nruab Lis Piam Xyoo I

Hwm LN Martin de Porres

Zaj Nyeem Ib: LM 9: 1-5

Paj Lug sau ntawv rau cov ntseeg nyob Los Mas tias:
1 Kuv hais qhov tseeb nyob hauv Leej Pleev, kuv tsis dag; kuv lub siab ua tim khawv qhia rau kuv paub nyob hauv Leej Ntuj Plig Ntshiab tias : 2 Kuv muaj kev tu siab loj thiab mob siab tas mus li hauv nruab siab. 3 Vim kuv xav kom yog kuv ua tus raug muab cais ntawm Leej Pleev mus, kheev lam kuv pab tau kuv tsoom kwv tij, kuv haiv neeg uas nrog kuv koom ib hom roj ntshav, 4 uas yog cov His Xas Lais, lawv yog cov tau txais txoj hmoov ua Tswv Ntuj cov tub sau, cov tau txais lub hwj chim, txoj kev cog lus, Txoj Cai, txoj kev teev hawm, thiab cov lus cog ruaj. 5 Lawv muaj cov yawg koob yawg suab, thiab Leej Pleev tawm ntawm lawv los raws li sab nqaij tawv; nws yog tus nyob siab dua txhua yam thiab yog tus Tswv Ntuj muaj koob meej mus li. Ua li.

NPN 147: 12-13, 14-15, 19-20

Txais: Yes Lus Xas Les, koj cia li cav txog Huab Tais.

Yes Lus Xas Les, koj cav txog HUAB TAIS lub koob meej!
Xis Yoos, koj cav lus zoo txog koj tus Tswv Ntuj!
Vim nws ua kom koj cov nqaj laug qhov rooj khov ;
nws foom hmoov zoo rau cov tub nyob hauv koj lub loog.

Txais: Yes Lus Xas Les, koj cia li cav txog Huab Tais.

Nws ua kom muaj kev thaj yeeb nyob hauv koj ciaj ciam teb chaws,
nws pub cov mov nplej mog qab tshaj rau koj noj txaus siab.
Nws xa nws lo lus tuaj rau ntiaj teb,
nws lo lus khiav yeev nrawm nroos.

Txais: Yes Lus Xas Les, koj cia li cav txog Huab Tais.

Nws tshaj nws lo lus rau Yas Kos paub,
Nws qhia nws cov lij choj thiab cov lus qhia rau His Xas Lais.
Nws tsis tau ua li ntawd rau lwm haiv neeg twg li,
Nws tsis tau qhia nws tej lus qhia rau
lwm cov haiv neeg paub li. As les lus yas.

Txais: Yes Lus Xas Les, koj cia li cav txog Huab Tais.

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias, kuv cov yaj mloog kuv lub suab;
kuv paub lawv, lawv raws nraim kuv qab mus.

Txais: As les lus yas, as les lus yas.

Ntawv Moo Zoo: LK 14: 1-6

1 Muaj ib hnub Xas Npas Tos, Yes Xus tuaj noj mov nyob hauv ib tug thawj coj Fas Lis Xais tsev, ces lawv nyas ntshis Yes Xus. 2 Tab tom muaj ib tug neeg mob phob vog nyob ntawm nws xub ntiag. 3 Ces Yes Xus hais rau cov Kws Lij Choj thiab cov Fas Lis Xais tias : "Hnub Xas Npas Tos, puas muaj cai kho mob los tsis muaj?" 4 Lawv nyob ntsiag to. Ces Yes Xus tuav tus neeg mob, thiab kho nws zoo hlo, ces Yes Xus kom nws rov mus tsev. 5 Yes Xus thiaj hais rau lawv tias : "Yog nej tus tub los tus nyuj poob rau hauv ib lub qhov tim thaj hnub Xas Npas Tos, nej leej twg thiaj yuav tsis rub nws tawm tam sis ntawd ? ” 6 Tiam sis lawv teb tsis tau dab tsi rau nws lo lus nug ntawd li.

NTIM 4 LUB 11 HLIS 2017

Hnub Xya Lis Piam Peb Caug Nruab Xyoo A Nruab Lis Piam Xyoo I

Hwm LN Charles Borromeo, ua Tswv Qhia

Zaj Nyeem Ib: LM 11: 1-2A, 11-12, 25-29

Paj Lug sau ntawv rau cov ntseeg nyob Los Mas tias:
1 Kuv nug tias : ‘Tswv Ntuj puas tau muab nws haiv neeg xyeeb pov tseg ?’ Nws tsis tau muab li ! Vim kuv twb yog ib tug tub His Xas Lais, yog Has Nplas Has ib tug xeeb ntxwv, nyob hauv lub xeem Npes Yas Mis. 2 Tswv Ntuj tsis nrauj haiv neeg uas nws ib txwm xub paub thaum ntxov los lawm.
11 Kuv nug tias : ‘Cov His Xas Lais puas tau dawm ko taw loj kom lawv qaug mus li?’ Tsis yog li ntawd! Tiam sis lawv mus ib ruam yuam kev, kom cov neeg teev pej kum dab tau txais kev cawm, ces yuav ua rau lawv muaj kev khib. 12 Yog tias cov His Xas Lais qhov yuam kev ua kom lub qab ntuj neeg txais paj tshab ntau, thiab thaum lawv cov neeg tsawg tuaj ua kom cov neeg teev pej kum dab txais paj tshab ntau , mas yog tias cov His Xas Lais muaj coob, mas lub qab ntuj neeg haj yam yuav tau qhov zoo ntau ntxiv xwb.
25 Cov kwv tij, kuv tsis xav cia nej tsis paub dab tsi txog zaj txuj tob zais ntshis no, tsam nej tsis txawj ua neeg thoob tsib nyob hauv nej txoj kev xav tswv yim: Ib nrab cov neeg His Xas Lais yuav ua siab tawv qhawv tsis ntseeg mus txog lub caij uas tas ib tsoom neeg teev pej kum dab los txais kev ntseeg tso. 26 Thaum ntawd tas tsoom His Xas Lais mam li txais kev cawm, raws li cov lus sau tseg tias : ‘Tus cawm nej yuav tuaj pem Xis Yoos tuaj ; nws yuav rho Yas Kos cov kev phem pov tseg. 27 Thaum kuv rho lawv cov txhaum pov tseg tas lawm, mas kuv yuav nrog lawv cog lus.’ 28 Cov His Xas Lais ua yeeb ncuab rau lub Moo Zoo vim nej, tab sis raws li lawv yog haiv neeg raug xaiv, Tswv Ntuj hlub lawv, vim lawv cov yawg koob. 29 Vim tias thaum Tswv Ntuj tau pub txiaj ntsim thiab tau hu nws haiv neeg lawm, mas nws tsis thim nws lo lus.

NPN 94: 12-13A, 14-15, 17-18

Txais: (14a) Huab Tais yuav tsis tso nws haiv neeg pov tseg.

HUAB TAIS, tus uas koj qhuab qhia nws, tau txoj hmoov zoo,
tus uas koj cob qhia nws txog koj txoj cai, tau txoj hmoov zoo.
Nws tau kev dim ntawm cov hnub nyoog phem.

Txais: (14a) Huab Tais yuav tsis tso nws haiv neeg pov tseg.

Vim HUAB TAIS tsis nrauj nws haiv neeg,
nws tsis muab nws lub cuab tam laim pov tseg.
Txoj kev txiav txim yuav rov txiav raws kev ncaj,
tas tsoom neeg siab ncaj yuav taug raws kev ncaj.

Txais: (14a) Huab Tais yuav tsis tso nws haiv neeg pov tseg.

Yog HUAB TAIS tsis pab kuv, mas tshuav tsis ntev
kuv tus ntsuj plig yuav mus nyob hauv qhov ntsiag to.
Thaum kuv hais tias : "Kuv yuav ntog !"
HUAB TAIS, koj txoj kev khuv leej txheem kuv.

Txais: (14a) Huab Tais yuav tsis tso nws haiv neeg pov tseg.

As Les Lus yas: MT 11: 29AB

Txais: As les lus yas, as les lus yas.

Huab Tais hais tias, nej txais kuv tus quab mus kwv,
Nej kawm yoog raws li kuv, vim kuv muaj
lub siab txo hwj chim ua neeg me.

Txais: As les lus yas, as les lus yas.

Ntawv Moo Zoo: LK 14: 1, 7-11

1 Muaj ib hnub Xas Npas Tos, Yes Xus tuaj noj mov nyob hauv ib tug thawj coj Fas Lis Xais tsev. Lawv soj ntshis Yes Xus.
7 Yes Xus hais ib zag paj lug rau cov neeg tuaj noj mov ntawd, vim nws pom lawv xaiv thawj cov rooj zaum; nws hais rau lawv tias: 8 "Thaum luag caw koj mus noj tshoob, koj tsis txhob mus zaum thawj cov rooj, tsam luag caw ib tug muaj meej mom dua koj tuaj thiab. 9 Ces tus tswv tsev uas tau caw neb tuaj yuav los hais rau koj tias : 'Koj cia qhov chaw kod rau tus no zaum.' Ces koj yuav sawv mus zaum lub rooj puag nram qab, koj yuav tau txaj muag. 10 Thaum luag caw koj, mas koj yuav mus zaum lub rooj puag nram qab, kom thaum tus caw koj los txog, nws hais rau koj tias : 'Npawg, koj nce los zaum pem toj no.' Ces koj yuav tau ntsej muag nyob ntawm cov neeg tuaj nrog koj koom noj rooj qav xub ntiag. 11 Vim tias tus uas nws tsa nws siab, mas nws yuav raug muab txo kom qis, hos tus uas nws txo nws qis, mas nws yuav raug muab tsa kom siab."

TIM 6 LUB 11 HLIS 2017

Hnub Ob Lis Piam Peb Caug Ib Nruab Xyoo A Nruab Lis Piam Xyoo I

Zaj Nyeem Ib: LM 11: 29-36

Paj Lug sau ntawv rau cov ntseeg nyob Los Mas tias:
29 Thaum Tswv Ntuj tau pub txiaj ntsim thiab tau hu neeg lawm, mas nws tsis thim nws lo lus. 30 Li ntawd yav thaud, yeej muaj ib lub sij hawm los lwm lub uas nej tsis kam los ntseeg Tswv Ntuj, tsis kav, nyem no Tswv Ntuj zam rau nej, vim cov His Xas Lais txoj kev tsis mloog lus. 31 Nyem no, lawv tsis mloog Ntuj lus, tab sis vim Tswv Ntuj zam rau nej, mas nws kuj yua zam rau lawv thiab. 32 Vim Tswv Ntuj tso tas ib zeej tsoom neeg mus poob rau hauv txoj kev tsis mloog lus, kom xwv nws tau kev zam rau tas sawv daws.
33 Tswv Ntuj cov paj tshab, nws txoj kev thoob tsib thiab nws cov txuj ci tob tas nrho ! Neeg tsom tsis tau Tswv Ntuj tej txuj tob, neeg tsis to taub Tswv Ntuj tej kev li. 34 Leej twg thiaj paub tau zaj uas Huab Tais xav ? Leej twg thiaj qhia tswv yim tau rau Huab Tais ? 35 Los leej twg puas tau pub txiaj ntsim paj tshab rau Tswv Ntuj, ces nws yuav kom Tswv Ntuj them rov rau nws ? 36 Vim tias txhua yam yog tuaj ntawm Tswv Ntuj tuaj, txhua yam yog nws ua kom tshwm sim los, txhua yam yog nws ua rau nws. Lub hwj chim thiaj yog Tswv Ntuj tug mus tag ib txhiab ib txhis. Ua li.

NPN 69: 30-31, 33-34, 36-37

Txais: (14c) Huab Tais, koj muaj txoj kev hlub loj, thov koj teb kuv.

Kuv poob rau kev txom nyem thiab muaj mob,
Tswv Ntuj, tso koj txoj kev cawm tuaj pab txuag kuv.
Kuv yuav hu ib zag nkauj cav txog Tswv Ntuj lub npe,
kuv yuav ua nws tsaug kom nws nto koob meej loj.

Txais: (14c) Huab Tais, koj muaj txoj kev hlub loj, thov koj teb kuv.

Cov neeg me pom, lawv yuav zoo siab kawg nkaus ;
Cov uas nrhiav Tswv Ntuj, nej yuav tau txoj sia;
Vim HUAB TAIS mloog cov pluag zaj lus thov;
nws tsis ntxub nws cov neeg raug luag coj mus kaw.

Txais: (14c) Huab Tais, koj muaj txoj kev hlub loj, thov koj teb kuv.

Tswv Ntuj yuav cawm Xis Yoos,
nws yuav rov txhim cov tsheej hauv Yus Das teb.
Lawv yuav nyob hauv lub teb chaws,
lawv yuav tau lub teb chaws ua lawv tug.
Tswv Ntuj cov tub txib tej xeeb ntxwv yuav tau
lub teb chaws los ua lawv lub cuab tam;
cov uas nyiam nws lub npe yuav tau nyob hauv.

Txais: (14c) Huab Tais, koj muaj txoj kev hlub loj, thov koj teb kuv.

As Les Lus yas: ZAM 8: 31B-32

Txais: As les lus yas, as les lus yas.

Huab Tais hais tias: Yog nej nyob hauv kuv cov lus,
mas nej yuav yog kuv cov tseem thwj tim thiab nej yuav paub qhov tseeb.

Txais: As les lus yas, as les lus yas.

If you remain in my word, you will truly be my disciples,
and you will know the truth, says the Lord.
R. Alleluia, alleluia.

Ntawv Moo Zoo: LK 14: 12-14

12 Yes Xus hais rau tus neeg caw nws tuaj noj mov tias : "Thaum koj npaj ib roog su los ib roog hmo, koj txhob caw koj cov phooj ywg, los koj cov kwv tij nkauj muam, los koj cov neej tsa, los cov neeg nplua nuj uas nyob ze koj, tsam lawv ho rov caw koj thiab ces koj twb tau txais kev pauj lawm. 13 Thaum koj ua ib roog qav, koj yuav caw cov pluag, cov tu tes tu taw, cov ceg tawv, cov dig muag. 14 Koj hmoov yuav zoo, vim lawv tsis muaj dab tsi yuav pauj rov rau koj. Thaum lub caij cov neeg siab ncaj sawv rov los, mas koj mam yuav txais kev pauj."

TIM 7 LUB 11 HLIS 2017

Hnub Peb Lis Piam Peb Caug Ib Nruab Xyoo A Nruab Lis Piam Xyoo I

Zaj Nyeem Ib: LM 12: 5-16AB

5 Peb muaj coob leej, peb koom ua ib lub cev xwb nyob hauv Leej Pleev; peb txhua leej kuj yog tes taw ib leeg rau ib leeg thiab. 6 Peb nyias muaj nyias txoj kev txawj raws li lub txiaj ntsim nyias tau txais. Tus txawj ua saub nws yuav ua kom haum li txoj kev ntseeg. 7 Tus txawj ua tub txib, nws yuav tsob hwb luag. Tus txawj ua xib hwb qhia luag, nws yuav ua zoo qhia. 8 Tus txawj ntuas luag, nws yuav ua zoo ntuas. Tus nyiam pub tej yam rau luag, nws yuav ua siab dav fo pub. Tus txawj ua thawj coj, nws yuav kub siab coj. Tus nyiam pab cov neeg txom nyem, nws yuav ua ntsej muag luag ntxhi pab. 9 Nej tsis txhob lam ua txuj nyiam luag tej xwb; nej yuav ntxub txoj kev phem, thiab muab nej khi ruaj nreb rau txoj kev zoo. 10 Nej yuav sib hlub vim nej yog ib co kwv tij. Nej yuav ib leeg hwm ib leeg, nej ua kom nej yog tus xub hwm luag. 11 Nej tsis txhob ua neeg nkees, nej ua neeg muaj lub tswv yim ua siab kub, nej tsob hwb Huab Tais. 12 Nej yuav zoo siab nyob hauv txoj kev tso siab. Nej ua siab ntev nyiaj tej kev txom nyem uas los raug nej. Nej yuav mob siab rau nquag teev Ntuj. 13 Nej yuav tso nyiaj pab cov ntshiab tej kev siv. Nej yuav xyiv fab txais cov qhua tuaj so hauv nej tsev.
14 Nej yuav foom lus zoo rau cov neeg hiam nej, nej foom lus zoo xwb, txhob foom lus phem. 15 Nej pom leej twg zoo siab mas nej yuav nrog lawv zoo siab, nej pom leej twg quaj mas nej kuj yuav nrog lawv quaj. 16a Nej yuav sib hwm ib leeg saib tau sib leeg; nej tsis txhob ua neeg muab hlob, nej yuav cia nej lub siab xib rau cov neeg me.

NPN 131: 1BCDE, 2, 3

Txais: Nyob hauv koj, Huab Tais, kuv nrhiav tau txoj kev kaj lug.

HUAB TAIS, kuv lub siab tsis khav theeb,
kuv tsis tsa hau siab los ntsia luag.
Kuv tsis nrhiav tej yam loj nto koob meej,
los tej yam tob uas kuv lub tswv yim tsis duav.

Txais: Nyob hauv koj, Huab Tais, kuv nrhiav tau txoj kev kaj lug.

Kuv cia kuv tus plig nyob thaj yeeb ntsiag to
zoo li tus me nyuam uas cais mis lawm.
Zoo li tus me nyuam cais mis lawm nyob hauv nws niam
xub ntiag, kuv tus plig kuj zoo li ntawd nyob hauv kuv.

Txais: Nyob hauv koj, Huab Tais, kuv nrhiav tau txoj kev kaj lug.

His Xas Lais, koj yuav tso siab rau HUAB TAIS,
txij nyem no mus tas ib txhiab ib txhis.

Txais: Nyob hauv koj, Huab Tais, kuv nrhiav tau txoj kev kaj lug.

As Les Lus yas: MT 11: 28

Txais: As les lus yas, as les lus yas.

Huab Tais hais tias: Tas nej sawv daws uas nej khwv thiab ris
nra hnyav, nej tuaj cuag kuv mas ! Kuv yuav cia nej so los siav.

Txais: As les lus yas, as les lus yas.

Ntawv Moo Zoo: LK 14: 15-24

15 Cov neeg tuaj noj mov ntawd muaj ib tug hais rau Yes Xus tias : "Tus uas yuav tau noj mov nyob hauv Tswv Ntuj lub Ceeb Tsheej, mas nws txoj hmoov zoo." 16 Yes Xus hais rau nws tias : "Muaj ib tug neeg ua ib roog qav loj, nws caw neeg coob coob. 17 Thaum txog caij noj, nws xa nws tus tub txib mus nqua hu cov neeg nws caw tias : 'Nej tuaj, vim nyem no npaj tau txhij tas lawm.' 18 Tab sis cov raug caw, tus twg los muaj chaw tab kaum tas huv si. Thawj tug hais rau tus tub txib tias : 'Kuv yuav tau ib daim teb, kuv yuav tsum mus xyuas. Thov koj zam rau kuv.' 19 Hos muaj ib tug hais tias : 'Kuv yuav tau tsib nkawg txiv nyuj, kuv yuav mus sim kuv cov nyuj. Thov koj zam rau kuv.' 20 Lwm tus hais tias : 'Kuv nyuam qhuav yuav poj niam, kuv tuaj tsis tau.' 21 Tus tub txib rov los qhia tej ntawd rau nws tus tswv. Ces tus tswv tsev npau taws, nws hais rau tus tub txib tias : 'Koj maj zeeg mus tom cov tshav puam thiab cov kev hauv nroog, koj coj cov pluag, cov tu tes tu taw, cov dig muag, thiab cov ceg tawv, sawv daws tuaj hauv no.' 22 Ces tus tub txib hais tias : 'Huab tais, kuv twb ua raws li koj hais lawm, tsis kav tseem tshuav chaw seem thiab.' 23 Tus tswv hais rau tus tub txib tias : 'Koj tawm mus taug tej kev loj, taug tej laj kab, koj coj kom tau neeg tuaj, kom kuv lub tsev puv nkaus.' 24 Li ntawd, kuv hais rau nej tias cov neeg uas raug caw, yuav tsis muaj ib tug tau saj kuv rooj qav li."

TIM 8 LUB 11 HLIS 2017

Hnub Plaub Lis Piam Peb Caug Ib Nruab Xyoo A Nruab Lis Piam Xyoo I

Zaj Nyeem Ib: LM 13: 8-10

Paj Lug sau ntawv rau cov ntseeg nyob Los Mas tias:
8 Nej tsis txhob tshuav leej twg nuj nqis li, tiam sis yam nej tshuav yog yuav tsum sib nyiam sib hlub. Vim tus nyiam luag tej, mas nws ua raws li Txoj Cai qhia tas huv tib si lawm. 9 Cov lus qhia hais tias : “Koj txhob zes luag txij luag nkawm, koj txhob tua neeg, koj txhob ua tub sab tub nyiag, koj lub siab yuav tsis txhob ntshaw,” cov lus qhia no thiab lwm cov lus qhia lub ntsiab yog nyob hauv lo lus nram no tas huv tib si: “Koj yuav nyiam luag tej ib yam li koj nyiam koj.” 10 Leej twg nyiam luag tej, mas nws tsis ua ib qho phem rau luag. Li ntawd, Txoj Cai lub ntsiab yog txoj kev nyiam.

NPN 112: 1B-2, 4-5, 9

Txais: (5a) Tus neeg ua siab zoo thiab qiv rau cov neeg txom nyem yuav tau hmoov zoo.

Tuss muaj hmoov zoo yog tus uas hwm HUAB TAIS,
thiab nyiam coj Huab Tais cov lus qhia tas siab tas ntsws.
Nws caj ces yuav muaj hwj chim nyob ntiaj teb,
caj ces neeg siab ncaj yuav tau txais koob hmoov.

Txais: (5a) Tus neeg ua siab zoo thiab qiv rau cov neeg txom nyem yuav tau hmoov zoo.

Tus neeg ncaj ci hauv qhov tsaus ntuj, ua lub teeb kaj cov neeg ncaj,
nws ua siab zoo, khuv leej luag, thiab coj ncaj.
Tus neeg txawj hlub luag thiab qiv rau luag nws txoj hmoov zoo.
Nws tswj nws tej hauj lwm raws txoj kev ncaj.

Txais: (5a) Tus neeg ua siab zoo thiab qiv rau cov neeg txom nyem yuav tau hmoov zoo.

Nws tsis qia dub nws pub ntau rau cov pluag :
nws txoj kev ua siab dav yuav nyob mus li,
nws yuav tau ntsej muag, nws yuav muaj koob meej.

Txais: (5a) Tus neeg ua siab zoo thiab qiv rau cov neeg txom nyem yuav tau hmoov zoo.

As Les Lus yas: 1 PZ 4: 14

Txais: As les lus yas, as les lus yas.

Yog nej raug luag cem vim Leej Pleev lub npe,
mas nej txoj hmoov zoo,
vim Tswv Ntuj Leej Tswv Yim tuaj roos nej.

Txais: As les lus yas, as les lus yas.

Ntawv Moo Zoo: LK 14: 25-33

25 Tej pab neeg coob coob nrog Yes Xus taug kev. Yes Xus tig los hais rau lawv tias : 26 "Leej twg los raws kuv, yog nws tsis ntxub nws niam nws txiv, nws poj niam me nyuam, nws cov kwv tij thiab cov muam, thiab nws txoj sia, mas tus ntawd ua tsis tau kuv thwj tim. 27 Leej twg tsis kwv nws tus ntoo cuam thiab tsis lawv kuv qab, mas nws ua tsis tau kuv thwj tim. 28 Yog nej leej twg xav txhim ib tug pej thuam, nws puas tsis xub los zaum xam saib yuav siv nyiaj npaum li cas, thiab ntsuas saib nws puas muaj nyiaj txaus ua kom tiav lod ? 29 Tsam nws pib txhim cov taw ntsa tas, ho ua tsis tau kom tiav, ces tas cov neeg pom yuav thuam nws hais tias : 30 ‘Saib ! Tus neeg no pib txhim, nws ho tsis muaj cov peev los ua kom tiav !’ 31 Los ib tug vaj yuav sawv kev mus ua rog ntaus lwm tus vaj, nws puas tsis xub zaum xam saib nws muaj kaum txhiab leej tub rog, nws puas yuav tiv tau tus vaj uas coj nees nkaum txhiab leej tuaj ? 32 Yog nws paub tias yuav tiv tsis tau, mas thaum lwm tus vaj tseem tuaj txog deb, nws yuav xa ib pab tiam lis mus thov kom cia lub teb chaws nyob thaj yeeb. 33 Nej kuj zoo ib yam li ntawd, yog nej leej twg tsis tso nws lub cuab tam tseg, mas nws ua tsis tau kuv thwj tim.”