HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


COV ZAJ NYEEM NRUAB LIS PIAM XYOO I   2016-2017 - Page 13 Empty

Latest topics

» Ua tsaug ntees.
by Maiv Tooj 21st February 2024, 11:33 pm

» DUAB MAB LIAB TSHIAB.
by Maiv Tooj 16th February 2024, 8:39 am

» COV ZAJ NYEEM NRUAB LIS PIAM XYOO I 2022-2023
by Mim 10th August 2023, 7:04 am

» Cov zaj nyeem Hnub Chiv Xyoo A. 2022-2023
by Maiv Tooj 20th July 2023, 11:21 pm

» SAJ YES XUS KEV TXOM NYEM
by Maiv Tooj 7th March 2023, 6:34 am

» Tswv Ntuj ua tau tag puas tsav yam, F. Ts. Cob Tsib teb
by Mim 3rd February 2023, 11:33 am

» DAIM NTAUB QHWV TUAG NYOB TURIN
by Mim 29th January 2023, 9:24 am

» Txiv plig Tshaj Sawm (Harry Thiel ) Lub neej
by Maiv Tooj 28th December 2022, 8:25 am

» TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
by Maiv Tooj 28th December 2022, 7:55 am

» COV ZAJ NYEEM NRUAB LIS PIAM XYOO II 2021-2022
by Mim 24th November 2022, 9:06 pm

» COV ZAJ NYEEM Hnub Chiv 2021-2022 Xyoo C
by NrhiavTswvNtuj 18th November 2022, 8:28 am

» Cov Txiv Plig ua tau muaj txiaj ntsim rau Peb Hmoob nyob Los Tsuas, Thaib teb ua ntej & tom qab 1975
by Maiv Tooj 14th November 2022, 10:03 am

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM XYOO I 2016-2017

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 27th November 2017, 2:02 pm

    TIM 9 LUB 11 HLIS 2017

    Hnub Tsib Lis Piam Peb Caug Ib Nruab Xyoo A Nruab Lis Piam Xyoo I

    Nco txog Hnub Foom Hmoov Zoo rau lub Tuam Tsev Teev Ntuj Lateran

    Zaj Nyeem Ib: EXK 47: 1-2, 8-9, 12


    1 Nws coj kuv rov los txog ntawm lub qhov rooj txuas nkag mus hauv lub Tuam Tsev Teev Ntuj, ua ciav kuv pom dej ntws hauv taw rooj los dua sab hnub tuaj lawm, vim lub Tuam Tsev tig sab qhov rooj txuas mus rau sab hnub tuaj. Dej txhawv ntawm lub tuam tsev sab xis uas yog nram sab naj lub thaj txi Ntuj los. 2 Nws coj kuv tawm ntawm lub qhov rooj nyob sab pej los rau sab nraud, thiab coj kuv ncig sab Tuam Tsev nraud los txog ntawm lub rooj vag uas tig rau sab hnub tuaj. Nyob ntawd, dej ntws ntawm sab xis los.
    8 Nws hais rau kuv tias : "Cov dej no ntws mus rau sab toob fab mus nram lub hav As Las Npas, yuav mus tshwm rau hauv lub hiav txwv, mus ua kom cov dej hiav txwv huv tuaj. 9 Tus dej no ntws txog qhov twg mas tas puas tsav yam muaj txoj sia txawj mus mus los los yuav ciaj nyob hauv cov dej no. Yuav muaj ntses ntau heev vim tus dej no ntws mus txog qhov twg mas cov dej yuav huv tuaj thiab txoj sia hlob taus hauv cov dej no.
    12 Nyob ntawm ob sab ntug dej yuav tuaj tas puas tsav yam txiv ntoo, lawv cov nplooj yuav tsis zeeg li thiab lawv yuav txi txiv mus li. Niaj hli lawv yuav txi ib phaum txiv tshiab, vim cov dej uas ntws ntawm thaj chaw ntshiab los. Cov txiv yuav yog ib co txhiam xws, hos cov nplooj yuav yog ib co tshuaj."

    NPN 46: 2-3, 5-6, 8-9

    Txais: (5) Cov dej hauv tus niam dej ua kom Tswv Ntuj lub tsheej zoo siab,
    lub tsheej uas yog tus Nyob Siab qhov chaw nyob.

    Tswv Ntuj yog peb chaw nkaum yog peb lub zog,
    yog tus pab peb mus li thaum peb ntsib kev nyuaj.
    Vim li no, peb tsis ntshai, txawm ntiaj teb yuav ua zog koog
    thiab toj roob hauv pes yuav nphau nphwv rau hauv qab tiv txwv.

    Txais: (5) Cov dej hauv tus niam dej ua kom Tswv Ntuj lub tsheej zoo siab,
    lub tsheej uas yog tus Nyob Siab qhov chaw nyob.

    Muaj ib tug dej, nws ncau ceg mus ua kom Tswv Ntuj lub tsheej
    zoo siab, lub tsheej uas yog tus Nyob Siab qhov chaw nyob.
    Tswv Ntuj nyob hauv lub tsheej, nws yuav tsis ntsib kev nyuaj ntxhov,
    Tswv Ntuj yuav pab nws thaum kaj ntug txoog.

    Txais: (5) Cov dej hauv tus niam dej ua kom Tswv Ntuj lub tsheej zoo siab,
    lub tsheej uas yog tus Nyob Siab qhov chaw nyob.

    Tus Huab Tais kav tsoom tshiab nrog peb nyob,
    peb lub yeej ntsa zeb yog Yas Kos tus Tswv Ntuj.
    Nej tuaj xyuas HUAB TAIS cov hauj lwm saib,
    xyuas tej yam loj tas nrho nws tau ua nyob ntiaj teb.

    Txais: (5) Cov dej hauv tus niam dej ua kom Tswv Ntuj lub tsheej zoo siab,
    lub tsheej uas yog tus Nyob Siab qhov chaw nyob.

    Zaj Nyeem Ob: 1 KLN 3: 9C-11, 16-17

    Paj Lug sau ntawv rau cov ntseeg nyob Kos Lis Nthos tias:
    “Nej yog Tswv Ntuj lub Tuam Tsev. 10 Kuv ua raws li lub txiaj ntsim uas Tswv Ntuj pub rau kuv. Kuv zoo li ib tug neeg txhim tsev, kuv pib txhim tau cov taw ntsa, ces lwm tus tuaj txhim ntxiv rau saud. Tab sis nyias yuav muab siab rau saib nyias txoj kev txhim tsev saib yuav txhim li cas. 11 Vim tias tsis muaj leej twg yuav txhim tau ib tug taw ntsa txawv tus uas ib txwm nyob : tus taw ntsa ntawd yog Yes Xus Pleev.
    16 Nej puas paub tias nej yog Tswv Ntuj lub Tuam Tsev, thiab Tswv Ntuj Leej Tswv Yim nyob txawm hauv nej ? 17 Yog leej twg rhuav Tswv Ntuj lub Tuam Tsev, mas Tswv Ntuj yuav rhuav tus ntawd. Vim tias Tswv Ntuj lub Tuam Tsev yog ib yam ntshiab; nej yog lub tuam tsev ntawd.

    As Les Lus Yas: 2 XWM 7: 16

    Txais: As les lus yas, as les lus yas.

    Huab Tais hais tias, kuv tau xaiv thiab tau tshwj lub tsev no
    cia rau kuv lub npe kom nyob ntawd tas mus li.

    Txais: As les lus yas, as les lus yas.

    Ntawv Moo Zoo: ZAM 2: 13-22


    13 Yuav txog cov Yus Das lub Ntees Hla, ces Yes Xus mus pem Yes Lus Xas Les. 14 Nyob hauv lub Tuam Tsev Teev Ntuj, nws pom cov tub luam muag nyuj, muag tshis, thiab muag nquab, thiab pom cov neeg pauv nyiaj zaum nyob ntawd. 15 Nws muab ib co hlua ua ib rab nplawm, nws ntiab sawv daws huv tib si tawm hauv lub Tuam Tsev Teev Ntuj, nrog cov yaj thiab cov nyuj mus; nws nchuav cov pauv nyiaj tej nyiaj, thiab nws muab lawv tej rooj ntxeev. 16 Nws hais rau cov muag nquab tias : "Nej tshem tej ntawd tawm hauv no mus. Nej tsis txhob muab kuv Txiv lub Tsev los ua ib lub tsev lag tsev luam ntxiv." 17 Yes Xus cov thwj tim nco txog lo lus uas Ntawv sau tseg tias : “Kev mob siab rau koj lub Tsev ua kuv lub siab kub lug.” 18 Cov Yus Das thiaj hais rau nws tias : "Koj tau ua li no, koj yuav muab lub cim dab tsi rau peb pom ?” 19 Yes Xus teb rau lawv, nws hais tias : "Nej rhuav lub Tsev Ntshiab no. Peb hnub tom qab, mas kuv rov txhim tau.” 20 Cov Yus Das thiaj hais tias : "Lawv ua hauj lwm plaub caug rau xyoo diam thiaj txhim tau lub Tsev Ntshiab no, hos koj li, koj ua peb hnub xwb, koj yuav rov txhim tau ntag!" 21 Tab sis Yes Xus hais txog lub tsev ntshiab uas yog nws lub cev. 22 Thaum Yes Xus sawv hauv cov tuag rov los, nws cov thwj tim rov nco txog tias nws twb tau hais li ntawd lawm, ces lawv ntseeg txog Phau Ntawv thiab ntseeg txog lo lus uas Yes Xus tau hais.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 27th November 2017, 2:04 pm

    TIM 10 LUB 11 HLIS 2017

    Hnub Rau Lis Piam Peb Caug Ib Nruab Xyoo A Nruab Lis Piam Xyoo I

    Hwm LN Leo tus Loj, ua Vaj Qhia thiab ua Kws Txuj Ntshiab

    Zaj Nyeem Ib: LM 15: 14-21


    Paj Lug sau ntawv rau cov ntseeg nyob Los Mas tias:
    14 Kuv cov kwv tij, kuv yeej paub tseeb txog nej lawm tias nej muaj lub siab zoo tas nrho, nej muaj kev paub kev txawj, nej muaj kev txawj sib qhuab sib qhia sib ntuas. 15 Tsis kav kuv muaj cuab kav sau tej yam ntxhib me ntsis rau nej, yog vim kuv xav kom nej nco zoo txog tej ntawd. 16 Kuv ua tau li ntawd yog vim lub txiaj ntsim uas Tswv Ntuj pub rau kuv: nws tsa kuv ua tus cev Yes Xus Pleev cov lus rau cov neeg teev pej kum dab, nws tsa kuv ua Leej Choj tsob hwb Tswv Ntuj lub Moo Zoo, kom tau muab cov neeg teev pej kum dab ua ib co txim xis Tswv Ntuj siab, vim lawv ntshiab tuaj nyob hauv Leej Tswv Yim Ntshiab lawm. 17 Vim li ntawd mas kuv muaj cai khav nyob hauv Yes Xus Pleev txog tej yam uas hais txog Tswv Ntuj. 18 Kuv tsis muaj cuab kav yuav hais txog dab tsi li, tsuas muaj cuab kav hais txog qhov uas Leej Pleev ua nyob hauv kuv xwb, yog mus coj cov haiv neeg teev pej kum dab los mloog Ntuj lus thiab ua raws li ntawd. 19 Yog vim lub hwj huam ua tau cov cim thiab cov hwj huam yees ntxwv nyob hauv Tswv Ntuj Leej Tswv Yim, mas txij Yes Lus Xas Les mus txog Is Lis Lis Kus teb, kuv tau tshaj Leej Pleev lub Moo Zoo kom thoob plaws tas. 20 Kuv lub siab tsuas xav tshaj lub Moo Zoo rau cov teb chaws uas neeg tsis tau hu txog Leej Pleev lub npe ib zaug li xwb, vim kuv tsis xav txhim tsev rau saum tej taw ntsa uas luag xub txhim lawm, 21 kuv thiaj tau ua raws li lo lus sau tseg tias : ‘Cov neeg uas tsis tau muaj neeg qhia txog nws rau lawv dua, lawv yuav pom, cov neeg uas tsis tau hnov hais txog nws dua, lawv yuav to taub.’

    NPN 98: 1, 2-3AB, 3CD-4

    Txais: (2b) Huab Tais qhia nws txoj kev cawm neeg muaj hwj huam rau cov kuj cuab paub.

    Nej hu ib zag nkauj tshiab rau HUAB TAIS,
    vim nws ua tej yam loj muaj tsim nto moo.
    Nws sab tes xis ua kom nws yeej,
    nws sab npab ntshiab ua.

    Txais: (2b) Huab Tais qhia nws txoj kev cawm neeg muaj hwj huam rau cov kuj cuab paub.

    HUAB TAIS ua kom sawv daws paub nws txoj kev cawm ;
    nws muab nws txoj kev ncaj rau cov kuj cuab pom.
    Nws rov nco txog nws txoj kev hlub
    thiab npuab His Xas Lais tsev neeg.

    Txais: (2b) Huab Tais qhia nws txoj kev cawm neeg muaj hwj huam rau cov kuj cuab paub.

    Tas npoo ntuj npoo ntiaj teb tau pom
    peb tus Tswv Ntuj txoj kev cawm seej.
    Tas txhua teb chaws, nej qw zoo siab cav txog HUAB TAIS !
    Nej qhib suab hu nkauj, nej qhuas txog nws!

    Txais: (2b) Huab Tais qhia nws txoj kev cawm neeg muaj hwj huam rau cov kuj cuab paub.

    As Les Lus yas: 1 ZAM 2: 5

    Txais: As les lus yas, as les lus yas.

    Tus twg coj nraim Leej Pleev lo lus, mas txoj kev
    nyiam Tswv Ntuj zoo tiav log nyob hauv nws lawm.

    Txais: As les lus yas, as les lus yas.

    Ntawv Moo Zoo LK 16: 1-8

    1 Yes Xus tseem hais rau cov thwj tim tias : "Muaj ib tug neeg nplua nuj, nws muaj ib tug tim xyoob xam txiaj. Luag qhia tus tswv tias tus tim xyoob muab nws tej nyiaj txiag siv lwj siv liam. 2 Tus tswv hu tus tim xyoob tuaj, nws hais rau tus tim xyoob tias : ‘Kuv hnov luag hais dab tsi txog koj li ntawd? Koj qhia saib koj siv kuv tej nyiaj txiag li cas. Txij no mus, koj yuav tsis tau ua tus xam txiaj ntxiv.’ 3 Tus tim xyoob xav zoj rau nruab siab tias : ‘Kuv yuav ua li cas, vim kuv tus tswv yuav tshem txoj hauj lwm xam txiaj ntawm kuv mus? Mus ncaws teb, kuv tsis muaj zog. Mus thov khawv, kuv kuj txaj muag. 4 Kuv paub kuv yuav ua dab tsi kom thaum luag tshem txoj hauj lwm xam txiaj ntawm kuv lawd, muaj neeg txais kuv mus nyob hauv lawv tsev.’ 5 Ces tus tim xyoob hu cov neeg tshuav nqi ntawm tus tswv ib tug zuj zus tuaj. Nws hais rau thawj tug tias : ‘Koj tshuav nuj nqi ntawm kuv tus tswv npaum li cas ?’ 6 Tus tshuav nqi teb tias : ‘Ib puas hub roj.’ Tus tim xyoob hais rau nws tias : 'Muab koj daim ntawv tshuav nqi los, koj zaum, koj sau sai sai rau ua tsib caug.' 7 Tus tim xyoob hais rau lwm tus tias : ‘Koj ne, koj tshuav nqi pes tsawg ?’ Nws hais tias : ‘Ib puas tawb nplej.’ Tus tim xyoob hais rau nws tias : 'Muab koj daim ntawv tshuav nqi los, koj sau ua yim caum.' 8 Tus tswv qhuas tus tim xyoob siab tsis ncaj tias nws txawj ua neeg xyuam xim. Vim ntiaj teb neeg cov tub, thaum lawv nrog lawv cov npawg ua ke, lawv xyuam xim dua kev kaj cov tub.”


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 27th November 2017, 2:07 pm

    TIM 11 LUB 11 HLIS 2017

    Hnub Xya Lis Piam Peb Caug Ib Nruab Xyoo A Nruab Lis Piam Xyoo I

    Hwm LN Martin nyob Tours, Fab Kis teb, ua Tswv Qhia

    Zaj Nyeem Ib: LM 16: 3-9, 16, 22-27


    Paj Lug sau ntawv rau cov ntseeg nyob Los Mas tias:
    3 Nej yuav xa kuv cov lus hmov tshua rau Phlis Xis Las thiab As Kis Las nkawd, vim nkawd yog ob tug tau nrog kuv ua hauj lwm nyob hauv Yes Xus Pleev. 4 Nkawd tau muab nkawd lub caj dab los thaiv kuv txoj sia; tsis yog kuv ib leeg xwb yuav nco nkawd txiaj ntsim, tiam sis tas cov Koom Txoos nyob hauv cov neeg teev pej kum dab kuj yuav nco nkawd txiaj ntsim thiab. 5 Nej kuj yuav xa rau lub koom txoos uas sib sau nyob hauv nkawd tsev thiab. Nej xa kuv cov lus hmov tshua rau Es Pais Nes Tus, tus kuv nyiam thiab: nws yog thawj tug uas As Xias teb muab rau Leej Pleev. 6 Nej xa kuv cov lus rau Mab Liab thiab, nws tau khwv khwv pab nej kawg nkaus . 7 Nej xa rau As Nros Nis Kos thiab Yus Nias thiab, nkawd yog kuv ob tug kwv tij thiab kwv luag nyob hauv tsev loj faj ; nkawd yog ob tug Hauv Paus Xa Lus nto moo zoo, xub tau los nyob hauv Leej Pleev ua ntej kuv. 8 Nej xa kuv cov lus rau As Plias Tos, tus kuv nyiam nyob hauv Huab Tais; 9 thiab xa rau Us Npas Nos, tus tau nrog kuv ua hauj lwm nyob hauv Leej Pleev, thiab rau Xaws Tas Kis, tus kuv nyiam.
    16 Nej sawv daws yuav rov sib foom lus hmov tshua thiab sib qawg raws txoj kev ntshiab. Leej Pleev cov Koom Txoos tib si kuj xa lawv cov lus hmov tshua tuaj rau nej thiab.
    22 Kuv, Tes Xis Yus, uas yog tus sau tsab ntawv no xa kuv cov lus hmov tshua tuaj rau nej nyob hauv Huab Tais thiab. 23 Nkas Yus, tus uas tos txais kuv thiab txais tas lub Koom Txoos, xa nws cov lus hmov tshua tuaj rau nej thiab; Es Las Tos, tus ua lub tsheej tus ceev nyiaj, thiab peb tus kwv Kuas Tus, nkawd kuj xa nkawd cov lus hmov tshua tuaj rau nej thiab. [24...]
    25 Thov kom tus uas txawj ua kom nej muaj zog nyob ruaj nreb raws lub Moo Zoo kuv xa tuaj thiab raws Yes Xus Pleev cov lus qhuab qhia, raws txoj kev qhib tawm tej yam tob tob uas nyob zais ntshis cia tau ntau tiam los, 26 tiam sis, nyem no, muab qhia tawm rau sawv daws paub nyob hauv cov yaj saub tej ntaub ntawv, thiab raws li tus Tswv Ntuj nyob mus li yeej pom zoo, kom txhua haiv neeg paub txog ces thiaj rub tau kom sawv daws los ua neeg mloog lus nyob hauv txoj kev ntseeg. 27 Thov kom tus Tswv Ntuj uas nws ib leeg yog tus thoob tsib, kom nws muaj koob meej nyob hauv Yes Xus Pleev, mus txog txhiab niag tim puas xyoo. Ua li !

    NPN 145: 2-3, 4-5, 10-11


    Txais: (1) Kuv yuav cav txog koj lub npe mus li, Huab Tais.

    Kuv yuav niaj hnub cav txog koj lub koob meej,
    kuv yuav cav lus zoo txog koj lub npe mus li ib txhiab ib txhis.
    HUAB TAIS loj tas nrho, tsim nyog cav txog nws ;
    nws loj tas nrho, neeg ntsuas tsis tau.

    Txais: (1) Kuv yuav cav txog koj lub npe mus li, Huab Tais.

    Sawv daws yuav qhuas txog koj tej hauj lwm txheej dhau txheej,
    Lawv yuav tshaj koj txoj kev muaj hwv xyeej rau neeg paub.
    Lawv yuav hais txog koj lub hwj chim loj ci ntsa iab muaj koob meej.
    Lawv yuav piav txog koj cov dej num tsim nyog qhuas.

    Txais: (1) Kuv yuav cav txog koj lub npe mus li, Huab Tais.

    HUAB TAIS, cia koj txhua yam hauj lwm ua koj tsaug,
    thiab cia cov neeg nyiam koj cav txog koj.
    Cia lawv qhuas txog koj lub Ceeb Tsheej muaj hwj chim
    Thiab piav txog koj lub hwj huam loj.

    Txais: (1) Kuv yuav cav txog koj lub npe mus li, Huab Tais.

    As Les Lus Yas: 2 KLN 8: 9


    Txais: As les lus yas, as les lus yas.

    Yes Xus Pleev tau ua neeg pluag txawm tias nws yog tus nplua nuj,
    kom xwv nws txoj kev pluag ua kom nej nplua nuj tuaj.

    Txais: As les lus yas, as les lus yas.

    Ntawv Moo Zoo: LK 16: 9-15


    Yes Xus hais rau nws cov thwj tim tias:
    9 “Kuv hais rau nej tias: Nej sim ua phooj ywg nrog txoj kev nplua nuj tsis ncaj ncees saib, ces thaum txoj kev nplua nuj ntawd dua tas lawm, luag thiaj yuav txais nej mus nyob hauv cov tsev tsam phooj nyob mus li. 10 Leej twg yog tus luag ntseeg tau thaum nws saib tej yam me, luag kuj ntseeg tau nws thaum nws saib tej yam loj. Leej twg ua tsis ncaj thaum nws saib tej yam me, nws kuj ua tsis ncaj thaum nws saib tej yam loj. 11 Yog luag twb ntseeg tsis tau nej thaum nej saib tej yam uas tsis muaj kev ncaj, mas leej twg thiaj yuav ntseeg tau nej thiab tso tej yam tseem ceeb rau nej saib ? 12 Thaum nej saib yam uas yog luag tug, yog nej ua tsis ncaj, mas leej twg yuav muab yam uas yog nej tug rau nej tuav? 13 Tsis muaj ib tug tub txib twg yuav tsob hwb ob tug tswv tau. Nws yeej yuav ntxub ib tug, nyiam ib tug, los nws yuav npuab ib tug, thuam ib tug. Nej yuav ua Tswv Ntuj tub txib thiab nyiaj txiag tub txib tsis tau."
    14 Cov Fas Lis Xais uas yog neeg nyiam nyiaj txiag, lawv hnov cov lus ntawd, lawv thuam Yes Xus. 15 Ces Yes Xus hais rau lawv tias : "Nej yog cov uas rov qhuas rau ntawm neeg xub ntiag tias nej siab ncaj, tab sis Tswv Ntuj paub nej siab tas. Vim tias yam uas neeg muab saib siab yog ib yam phem kawg nkaus nyob ntawm Tswv Ntuj xub ntiag."

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 28th November 2017, 8:53 am

    TIM 13 LUB 11 HLIS 2017

    Hnub Ob Lis Piam Peb Caug Ob Nruab Xyoo A Nruab Lis Piam Xyoo I

    Hwm LN Frances Xavier Cabrini, Nkauj Ntshiab

    Zaj Nyeem Ib: THOOB TSIB 1: 1-7


    1 Nej cov uas txiav txim rau lub ntiaj teb, nej yuav nyiam txoj kev ncaj! Nej yuav xav tswv yim txog Huab Tais raws txoj kev zoo ! Nej ua siab dawb paug nrhiav nws. 2 Cov neeg tsis sim Huab Tais thiaj nrhiav tau nws xwb, thiab nws ua kom cov neeg zoo siab ntseeg nws tau pom nws. 3 Vim cov zaj tswv yim nkhaus cais neeg kom nyob deb ntawm Tswv Ntuj, hos Tswv Ntuj lub hwj huam uas raug sim, yuav ua kom tus neeg ruam poob ntsej muag. 4 Vim kev thoob tsib tsis chaws mus hauv ib tug ntsuj plig uas nrhiav ua phem, nws kuj tsis nyob hauv ib lub cev uas zwm rau kev txhaum thiab. 5 Lub tswv yim ntshiab uas qhia kom yus txawj cheem yus tus kheej, nws khiav deb ntawm txoj kev dag, nws nrug deb ntawm tej zaj tswv yim ruam. Thaum muaj txoj kev tsis ncaj mas nws cheem txoj kev tsis ncaj ntawd. 6 Kev thoob tsib yog ib lub tswv yim nyiam ua zoo rau luag, tiam sis nws muab txim rau tus neeg hais lus thuam Ntuj, vim Tswv Ntuj ua tim khawv pom hauv qhov nraim nkoos puag hauv nws nruab siab thiab pom qhov tseeb hauv nws nruab plaw, thiab Tswv Ntuj yog tus hnov cov lus uas nws tus nplaig hais tawm. 7 Huab Tais lub Tswv Yim nyob puv lub sim ceeb, nws nyob ntxaum tas txhua yam, nws paub tas puas tsav yam lus uas neeg hais.

    NPN 139: 1B-3, 4-6, 7-8, 9-10

    Txais: (24b) Huab Tais, koj coj kuv kev mus taug txoj kev ciaj nyob mus li.

    HUAB TAIS, koj tsom thoob kuv, koj paub kuv :
    koj paub thaum kuv sawv thiab thaum kuv zaum ;
    koj nyob deb tsom paub tas tej kuv xav.
    Koj saib nraim kuv thaum kuv mus kev los thaum kuv zaum,
    koj paub txhua yam kuv ua.

    Txais: (24b) Huab Tais, koj coj kuv kev mus taug txoj kev ciaj nyob mus li.

    Lo lus uas tsis tau nyob saum kuv tus nplaig,
    HUAB TAIS, koj twb xub paub tas lawm.
    Koj nyob tom kuv qab tom kuv hauv ntej, koj nyob
    ib ncig kuv, koj tso koj txhais tes rau saum kuv.
    Koj txoj kev paub txhua yam zoo dhau rau kuv,
    siab tshaj qhov kuv ncav tau lawm!

    Txais: (24b) Huab Tais, koj coj kuv kev mus taug txoj kev ciaj nyob mus li.

    Kuv yuav mus lawm qhov twg thiaj nraim tau ntawm koj lub tswv yim?
    Kuv yuav khiav lawm ces twg, thiaj nyob deb ntawm koj lub ntsej muag?
    Yog kuv nce mus saum ntuj, koj twb nyob saud lawm !
    Yog kuv nqes lawm puag ntuj txias teb tsaus, koj kuj nyob hauv thiab!

    Txais: (24b) Huab Tais, koj coj kuv kev mus taug txoj kev ciaj nyob mus li.

    Yog kuv ya raws lub caij kaj ntug ob phab tis mus,
    yog kuv mus nyob puag sab dej ntuj kawg nkaus tim ub,
    los tseem yog koj txhais tes coj kuv mus rau ntawd,
    yog koj sab tes xis hwj kuv kom kuv nyob ruaj nreb.

    Txais: (24b) Huab Tais, koj coj kuv kev mus taug txoj kev ciaj nyob mus li.

    As Les Lus Yas: PHIL 2: 15D, 16A

    Txais: As les lus yas, as les lus yas.

    Nej yuav ci zoo li tej lub teeb ci pom kev rau lub ntiaj teb,
    vim nej tuav rawv Lo Lus pub txoj sia kom ruaj nreb.

    Txais: As les lus yas, as les lus yas.

    Ntawv Moo Zoo: LK 17: 1-6

    1 Yes Xus hais rau cov thwj tim tias : "Yeej yuav cheem tsis tau kom txhob muaj tej kev coj luag ua txhaum, tab sis tus coj kom luag ua txhaum mas nws txoj hmoov phem ! 2 Txhiaj khoov cia muab ib lub zeb zom dai ntawm nws caj dab thiab muab nws pov rau hauv dej ntuj, kom nws tsis txhob tau coj ib tug neeg me li no mus ua txhaum. 3 Nej yuav tsum ceev faj! Yog koj tus kwv ua txhaum, mas koj yuav qhuab ntuas nws. Yog nws thov txhaum, mas koj yuav zam rau nws. 4 Yog ib hnub nws ua txhaum rau koj xya zaus, nws rov los thov koj xya zaus hais tias 'Kuv thov txhaum,' mas koj yuav zam rau nws."
    5 Cov Hauv Paus Xa Lus hais rau Huab Tais tias : "Thov koj txhab kom peb txoj kev ntseeg loj tuaj!" 6 Ces Huab Tais teb tias : "Yog nej muaj kev ntseeg luaj li ib lub noob zaub roj, mas nej yuav hais tau rau tsob ntoo txiv zaub kab no tias: 'Rho koj cov cag tawm, koj tshais koj mus cog rau hauv dej ntuj,' mas tsob ntoo yuav mloog nej lus.”


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 29th November 2017, 2:25 pm

    TIM 14 LUB 11 HLIS 2017

    Hnub Peb Lis Piam Peb Caug Ob Nruab Xyoo A Nruab Lis Piam Xyoo I

    Zaj Nyeem Ib: THOOB TSIB 2: 23–3:9


    23 Muaj tseeb tias Tswv Ntuj yeej tsim tib neeg los kom tsis txawj tuag tsis txawj puas. Nws tsim neeg muaj lub meej yim zoo raws li Tswv Ntuj lub meej yim. 24 Tiam sis vim dab phem khib ces txoj kev tuag thiaj txeem los nyob hauv lub sim ceeb lawm. Cov neeg uas yog dab phem tug, mas muaj ib hnub lawv yuav paub txoj kev tuag txoj kev puas.
    3 1 Hos cov neeg ncaj tus ntsuj plig nyob hauv Tswv Ntuj txhais tes. Tsis muaj ib yam xwv txheej dab tsi yuav chwv tau lawv. 2 Cov neeg tsis muaj tswv yim xav tias cov neeg ncaj tuag lawm, lawv txoj kev dua nras yog ib txog kev tu siab loj, 3 thiab lawv txoj kev ncaim peb mus yog ib txog kev puas tsuaj loj kawg nkaus. Tab sis cov neeg ncaj ntawd nyob hauv kev thaj yeeb lawm. 4 Ntawm tib neeg qhov muag mas yog lawv raug txim tuag, tab sis lawv tso siab lug tias lawv yuav muaj txoj sia nyob mus li. 5 Lawv raug ib txog kev txom nyem sib, tab sis lawv yuav txais txiaj ntsim koob hmoov loj. Vim Tswv Ntuj sim lawv, nws pom tias lawv tsim nyog ua nws tug. 6 Tswv Ntuj sim lawv zoo li sim kub nyob hauv lub yeej vub, nws txais lawv zoo li co txim hlawv txi Ntuj uas nws zoo siab txais. 7 Thaum txog lub caij Tswv Ntuj tuaj xyuas lawv, mas lawv yuav ci ntsa iab; lawv yuav khiav nrawm cuag li hluav taws ri mus kis tej roob nqeeb qhuav. 8 Lawv yuav txiav txim rau cov kuj cuab, thiab lawv yuav tswj cov haiv neeg. Huab Tais yuav ua vaj kav lawv mus ib txhis. 9 Cov neeg tso siab rau Huab Tais yuav to taub txoj kev tseeb, cov neeg npuab Huab Tais yuav nyob ze nws hauv txoj kev sib nyiam. Vim Huab Tais tshwj zias nws lub txiaj ntsim thiab nws txoj kev zam rau nws cov ntshiab, thiab nws saib xyuas cov nws xaiv.

    NPN 34: 2-3, 16-17, 18-19

    Txais: (2a) Kuv yuav cav txog HUAB TAIS txhua lub sij hawm.

    Kuv yuav cav txog HUAB TAIS txhua lub sij hawm;
    lo lus cav txog nws lub koob meej
    yuav nyob rawv ntawm kuv lub ncauj.
    Kuv tus plig txoj kev khav yog nyob hauv HUAB TAIS;
    tus neeg me yuav hnov kuv thiab yuav zoo siab.

    Txais: (2a) Kuv yuav cav txog HUAB TAIS txhua lub sij hawm.

    HUAB TAIS muaj qhov muag pom cov neeg ncaj,
    muaj pob ntseg hnov lawv lub suab quaj.
    HUAB TAIS tawm tsam cov neeg ua phem,
    nws rhuav lawv kom lub ntiaj teb txhob nco txog lawv ntxiv.

    Txais: (2a) Kuv yuav cav txog HUAB TAIS txhua lub sij hawm.

    Thaum cov neeg ncaj hu, HUAB TAIS hnov lawv,
    Nws cawm lawv ntawm tas lawv tej kev nyuaj.
    HUAB TAIS nyob ze ze cov neeg siab lwj siab ntuag,
    thiab nws cawm cov uas tas kev cia siab.

    Txais: (2a) Kuv yuav cav txog HUAB TAIS txhua lub sij hawm.

    As Les Lus Yas: ZAM 14: 23

    Txais: As les lus yas, as les lus yas.

    Yog leej twg nyiam kuv, nws yuav coj rawv kuv lo lus,
    ces kuv Txiv yuav nyiam nws.
    Kuv Txiv wb yuav tuaj nyob hauv nws.

    Txais: As les lus yas, as les lus yas.

    Ntawv Moo Zoo: LK 17: 7-10

    Yes Xus hais rau cov Hauv Paus Xa Lus tias:
    7 "Nyob hauv nej, yog nej tus tub txib mus laij teb los mus zov yaj tom teb rov los txog, nej puas muaj leej twg yuav hais rau nws tias : ‘Koj tsuag tsuag los ntawm no los zaum noj mov ?’ 8 Ntshai nej yuav hais rau nws li no xwb : ‘Koj npaj hmo rau kuv noj. Koj sia daim ntaub tiag duav, koj rau rooj thiab nqa zaub nqa mov los rau kuv noj mus txog thaum kuv noj kuv haus tas lawm, mas koj mam noj koj mam haus tom qab.’ 9 Tus tswv ntawd puas muaj kev yuav nco tus tub txib txiaj ntsim, vim nws tsuas ua raws li nws raug txib xwb? 10 Nej kuj zoo ib yam li ntawd : thaum nej ua tas txhua yam raws li nej raug txib lawm, mas nej yuav hais tias : "Peb yog ib co tub txib tsis muaj nqes li ; peb tsuas ua qhov uas peb yuav tsum ua xwb.’"

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 29th November 2017, 2:27 pm

    TIM       15      LUB      11      HLIS       2017

    Hnub Plaub Lis Piam Peb Caug Ob Nruab Xyoo A Nruab Lis Piam Xyoo I

    Hwm LN Albert tus Loj

    Zaj Nyeem Ib:        THOOB TSIB  6:   1-11


    1 Cov vaj aw, nej mloog mas, nej yuav tsum to taub ! Cov nom txiav txim rau cov teb chaws tim npoo ntiaj teb, nej yuav kawm kom paub! 2 Nej cov uas tswj zeej tsoom thiab khav tias nej kav ntau lub kuj cuab, nej cia li tig ntsej los mloog! 3 Yog Huab Tais muab hwj chim rau nej, yog Tus Nyob Siab pub kom nej muaj hwj huam. Nws yuav saib nej cov hauj lwm thiab nws yuav tsom nej cov tswv yim. 4 Nej yog ib co tub txib leg hauj lwm rau nws lub ceeb tsheej, yog nej txiav txim tsis ncaj, nej tsis coj raws Txoj Cai, nej tsis taug raws li Tswv Ntuj nyiam, 5 mas nws yuav tuaj muab txim loj rau nej sai sai, vim cov ua hlob yuav raug txiav txim hnyav. 6 Tus neeg me, mas Ntuj yuav zam rau nws thiab khuv leej nws. Tab sis cov muaj peev xwm yuav raug txiav txim nruj. 7 Vim tus Tswv kav tas txhua yam nws tsis kws leej twg cai, nws tsis ntshai cov muaj peev xwm. Nws yog tus tsim tus loj tus me huv tib si, nws saib xyuas sawv daws zoo ib yam,  8 tab sis nws yuav ua nruj ua tsiv dua rau cov ua hlob. 9 Li no, kuv thiaj hais cov lus no rau nej cov ua nom ua tswv kom nej kawm tau kev thoob tsib, thiab kom nej tsis txhob ua kev txhaum. 10 Cov uas taug nraim raws txoj kev cai ntshiab mas Ntuj yuav saib lawv yog neeg ntshiab. Cov kawm kom paub txoj kev ntshiab zoo, mas lawv yuav muaj lus teb tsis tau kev tws. 11 Nej yuav tsum ntshaw kuv cov lus, nej yuav tshaib thiab nqhis txog ces yuav muaj tus qhia rau nej.

    NPN       82:   3-4, 6-7


    Txais:   (8a) Tswv Ntuj, koj sawv tsees los txiav txim rau ntiaj teb mas.

    Nej cia li tuaj tus neeg me thiab tus ntsuag nos tog,
    nej txiav txim ncaj rau tus txom nyem thiab tus pluag.
    Nej pab cawm tus neeg me thiab tus pluag
    kom lawv dim ntawm tus neeg phem txhais tes.

    Txais:   (8a) Tswv Ntuj, koj sawv tsees los txiav txim rau ntiaj teb mas.

    Kuv hais rau nej tias: “nej yog ib co tswv ntuj,
    nej cov uas yog tus Nyob Siab cov tub.
    Tab sis nej yuav txawj tuag li tej tib neeg,
    nej yuav txawj poob tsim ib yam li tej vaj txheeb.”

    Txais:   (8a) Tswv Ntuj, koj sawv tsees los txiav txim rau ntiaj teb mas.

    As Les Lus yas:       1 TXLN  5:   18

    Txais: As les lus yas, as les lus yas.

    Txawm yuav muaj xwm dab tsi tshwm sim tuaj,
    los nej yuav ua Ntuj tsaug mus li, vim Tswv Ntuj lub siab
    xav kom nej ua li ntawd nyob hauv Yes Xus Pleev.

    Txais: As les lus yas, as les lus yas.

    Ntawv Moo Zoo:       LK  17:   11-19

    11 Thaum Yes Xus taug kev mus pem Yes Lus Xas Les, nws hla hauv Xas Mas Lias thiab Nkas Lis Lais teb mus. 12 Thaum nws tab tom yuav mus hauv ib lub zos, muaj kaum tus mob ruas tuaj cuag nws, lawv nres nrug deb ntawm nws. 13 Lawv tsa suab hais nrov nrov rau nws tias : "Xib Hwb Yes Xus, thov koj khuv leej peb!" 14 Yes Xus pom lawv, nws hais rau lawv tias : “Nej mus thws nej lub cev rau cov Leej Choj saib." Thaum lawv tab tom mus ces lawv lub cev huv tuaj. 15 Muaj ib tug hauv pab ntawd pom tias nws lub cev zoo lawm, ces nws tig hlo rov qab los, nws tsa suab nrov nrov cav txog Tswv Ntuj. 16 Nws khoov pe ntsej muag ti av rau ntawm Yes Xus ko taw, nws ua Yes Xus tsaug. Nws yog ib tug neeg Xas Mas Lias. 17 Yes Xus thiaj tsa ncauj hais tias : “Muaj kaum leej rov huv tuaj diam los tsis yog ? Tshuav cuaj leeg ne, lawv dua qhov twg lawm? 18 Ua cas tsuas muaj tus qhua no xwb thiaj rov los cav txog Tswv Ntuj ?" 19 Ces Yes Xus hais rau nws tias : "Koj sawv mus, koj lub siab ntseeg cawm koj lawm."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 29th November 2017, 2:32 pm

    TIM 16 LUB 11 HLIS 2017

    Hnub Tsib Lis Piam Peb Caug Ob Nruab Xyoo A Nruab Lis Piam Xyoo I

    Hwm LN Margaret nyob Scotland; hwm LN Gertrude

    Zaj Nyeem Ib: THOOB TSIB 7: 22B-8:1


    22 Nyob hauv kev thoob tsib muaj ib lub tswv yim ntse, dawb huv, tsis muaj lwm lub zoo li ntawd, muaj ntau fab, nyob zais ntshis, muag, txawj piav meej, tsis muaj yam tsuas, paub tseeb, tsis nrhiav ua phem, nyiam kev ua zoo, nrawm, 23 rub neeg lub siab, ua zoo rau luag, ua tib neeg phooj ywg, nyob ruaj nreb, tsis ua xyem xyav, nyob tus tus, ua tau txhua yam, pom tas txhua yam, nkag tau tshab hauv txhua lub tswv yim uas ntse, dawb huv, thiab nyob zais ntshis. 24 Kev thoob tsib txawj mus los nrawm dua txhua yam uas txawj ua zog, nws nkag thiab hla thoob plaws dhau txhua yam, vim nws txoj kev ntshiab. 25 Kev thoob tsib yog ib lo pa tawm ntawm Tswv Ntuj lub hwj huam los, yog ib yam ntshiab huv ncho ntawm Tus Muaj Hwj Huam lub hwj chim los. Vim li ntawd, tsis muaj ib yam phem yuav txeem tau mus rau hauv nws. 26 Kev thoob tsib yog ib qho pom kev ci ntawm qhov pom kev nyob mus li tuaj, yog ib daig tsom iav huv si tsom tau Tswv Ntuj lub hwj huam, yog daim duab qhia txog Tswv Ntuj lub siab zoo. 27 Txawm kev thoob tsib nyob twm zeej xwb, tsis kav nws ua tau tas puas tsav yam. Nws nyob nws li qub mus li, tsis kav nws ua tau kom txhua yam tshiab tuaj. Tiam dhau tiam nws mus ntxaum cov neeg ntshiab tus ntsuj plig, nws tsa lawv ua Tswv Ntuj cov phooj ywg thiab cov Yaj Saub. 28 Tswv Ntuj tsis nyiam leej twg tshaj tus uas nrog kev thoob tsib nyob txawm. 29 Kev thoob tsib zoo nkauj dua lub hnub, nws zoo tshaj tas txhua ntsauv hnub qub. Muab piv rau qhov pom kev, nws tseem zoo dua qhov pom kev, 30 vim qhov pom kev txawj hloov chaw rau qhov tsaus ntuj los nyob, hos kev phem tsis paub yeej kev thoob tsib li.
    8 1 Txoj kev thoob tsib lub zog txeem mus thoob ntuj thoob teb, nws tsav lub sim ceeb kom mus tau zoo.

    NPN 119: 89, 90, 91, 130, 135, 175


    Txais: (89a) HUAB TAIS, koj lo lus yuav nyob mus li.

    HUAB TAIS, koj lo lus nyob mus li,
    nws nyob ruaj nreb saum ntuj.

    Txais: (89a) HUAB TAIS, koj lo lus yuav nyob mus li.

    Koj txoj kev hlub pheej xeeb nyob tiam dhau tiam
    koj teeb lub ntiaj teb kom nws nyob ruaj nreb.

    Txais: (89a) HUAB TAIS, koj lo lus yuav nyob mus li.

    Tas ib puas tsav yam nyob ruaj khov los txog tav no raws li
    koj tau txiav, vim txhua yam yog koj ntxhais txib tub txuas.

    Txais: (89a) HUAB TAIS, koj lo lus yuav nyob mus li.

    Txoj kev paub txog koj cov lus ua kom pom kev,
    ua kom cov neeg me muaj kev to taub.

    Txais: (89a) HUAB TAIS, koj lo lus yuav nyob mus li.

    Thov kom koj lub ntsej muag ci tuaj rau koj tus tub txib,
    Thiab thov koj qhia koj cov cai lij choj rau kuv.


    Txais: (89a) HUAB TAIS, koj lo lus yuav nyob mus li.

    Cia kuv tus ntsuj plig muaj txoj sia nyob, kuv thiaj yuav tau cav txog koj.
    Thiab thov cia cov cai koj tau txiav tuaj txhawb nqa kuv.

    Txais: (89a) HUAB TAIS, koj lo lus yuav nyob mus li.

    As Les Lus Yas: ZAM 15: 5


    Txais: As les lus yas, as les lus yas.

    Huab Tais hais tias: Kuv yog tsob txiv cawv,
    nej yog cov ceg. Tus uas nyob hauv kuv thiab
    kuv nyob hauv nws, mas nws yuav txi txiv ncw.

    Txais: As les lus yas, as les lus yas.

    Ntawv Moo Zoo: LK 17: 20-25

    20 Cov Fas Lis Xais nug Yes Xus tias thaum twg Tswv Ntuj lub Ceeb Tsheej thiaj li yuav los txog. Yes Xus teb rau lawv tias : "Thaum Tswv Ntuj lub Ceeb Tsheej los mas neeg qhov muag yuav pom tsis tau. 21 Yuav tsis muaj neeg hais tau tias: 'Ntuj lub Ceeb Tsheej nyob ntawm no,’ Los ‘Nyob tod', vim tias Tswv Ntuj lub Ceeb Tsheej yog nyob hauv nruab nrab nej."
    22 Yes Xus hais rau nws cov thwj tim tias : "Yuav muaj tej hnub uas nej ntshaw kom pom ib hnub thaum Neeg Leej Tub tseem nrog nej nyob, tab sis nej yuav tsis pom li. 23 Luag yuav hais rau nej tias : Nws nyob tod', los 'Nws nyob ntawm no'. Mas nej tsis txhob mus xyuas, tsis txhob tso sas khiav mus caum. 24 Vim tias, ib yam li cov kab xob laim uas ci pom kev dawb vog kaj ib ceg kaum ntuj mus rau lwm ces, Neeg Leej Tub kuj yuav zoo ib yam li ntawd thaum txog lub zim txwv nws los. 25 Tab sis nws yuav tsum xub raug luag tsim txom loj kawg nkaus thiab raug tiam neeg no tsis lees paub nws tso.”

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 2nd December 2017, 5:19 pm

    TIM 17 LUB 11 HLIS 2017

    Hnub Rau Lis Piam Peb Caug Ob Nruab Xyoo A Nruab Lis Piam Xyoo I

    Hwm LN Elizabeth nyob Hungary, ua Leej Phauj

    Zaj Nyeem Ib: THOOB TSIB 13: 1-9


    1 Txhua tus neeg yeej yog neeg tsis muaj tswv yim vim txhua tus tsis paub Tswv Ntuj. Lawv pom txhua yam uas zoo, tiam sis lawv paub tsis tau tus uas ib txwm nyob; lawv ntsuam kom paub cov hauj lwm ua tiav log lawm, tiam sis lawv zeem tsis tau tus ua cov hauj lwm ntawd. 2 Ces lawv saib hluav taws, saib cua, saib tej cua hlob, saib cov hnub qub, saib cov dej nphau nphwv, saib cov hnub cov hli, saib tej yam uas tswj kom lub ntiaj khiav tau zoo yog ib co tswv ntuj. 3 Lawv zoo siab tias tej ntawd zoo nkauj ua luaj ces lawv xav tias tej ntawd yog ib co tswv ntuj, tab sis lawv yuav tsum paub tias tus Tswv tsim tej ntawd nws zoo tshaj tej ntawd ntau npaug, vim tias tus uas yog kev zoo nkauj nws tsim tej ntawd. 4 Yog lawv qhuas tias tej yam ntawd muaj hwj huam thiab muaj zog ua tau hauj lwm, mas phim thaum lawv pom tej ntawd, lawv yuav xav tau tias tus tsim tej ntawd tseem muaj hwj huam loj dua tej ntawd thiab. 5 Vim lub hwj chim thiab qhov zoo nkauj uas nyob hauv tej yam raug tsim los ua kom peb pom tau tias tus tsim tej ntawd yog ib tug zoo li cas. 6 Tiam sis tsis nyog thuam cov neeg ntawd hnyav, vim tias txawm lawv yuam kev los lawv yeej nrhiav Tswv Ntuj thiab lawv xav ntsib nws. 7 Lawv nrhiav tas zog kom to taub nws cov hauj lwm, tab sis lawv pom tias tej yam ntawd zoo nkauj tas nrho, ces ua rau lawv yuam kev. 8 Txawm yog li ntawd los yuav zam tsis tau rau lawv, 9 vim tias yog lawv twb nrhiav tau kev paub txuj kom lawv paub tsom tau lub sim ceeb, vim li cas lawv ho tsis ntsib nws tus Tswv thaum ntxov?

    NPN 19: 2-3, 4-5AB


    Txais: (2a) Cov txheej ntuj saud piav txog Tswv Ntuj lub koob meej.

    Cov txheej ntuj saud piav txog Tswv Ntuj lub koob meej,
    lub qab ntuj khwb tshaj cov hauj lwm nws txhais tes tau ua.
    Nruab hnub hais lo lus rau nruab hnub mloog,
    Hmo ntuj qhia rau hmo ntuj paub txog
    Txais: (2a) Cov txheej ntuj saud piav txog Tswv Ntuj lub koob meej.
    Tsis muaj ib lo lus los ib zaj lus piav
    Uas neeg yuav tsis hnov txog.
    Lawv lub suab ncha puv tas ntiaj teb,
    lawv lo lus xa moo nrov txog tim npoo ntuj kawg.

    Txais: (2a) Cov txheej ntuj saud piav txog Tswv Ntuj lub koob meej.

    As Les Lus yas: LK 21: 28

    Txais: As les lus yas, as les lus yas.

    Nej yuav sawv kom ntseg, thiab tsa nej taub hau,
    vim txoj kev txhiv nej los txog ze ze lawm.

    Txais: As les lus yas, as les lus yas.

    Ntawv Moo Zoo: LK 17: 26-37

    Yes Xus hais rau nws cov thwj tim tias:
    26 “Thaum lub caij Nom Hes nyob muaj tshwm sim li cas, mas kuj yuav tshwm sim ib yam li ntawd thaum txog Neeg Leej Tub lub caij thiab. 27 Lawv noj, lawv haus, lawv yuav poj niam thiab yuav txiv mus txog hnub uas Nom Hes nkag kiag mus rau hauv lub nkoj, ces dej tuaj nyab ua kom sawv daws tuag tas. 28 Thiab kuj tseem yuav zoo li lub caij uas Los ua neej nyob thiab: lawv noj, lawv haus, lawv muas cuab yeej, lawv muag cuab yeej, lawv cog qoob loo, lawv txhim vaj txhim tse. 29 Tab sis hnub uas Los tawm plaws khiav ntawm Xos Dos Mas mus, hluav taws thiab leej faj poob saum ntuj los ua sawv daws tuag tas huv si. 30 Hnub uas Neeg Leej Tub yuav tawm tuaj kuj yuav zoo ib yam li ntawd thiab. 31 Hnub ntawd, tus uas nyob saum ru tsev, hos nws lub cuab tam nyob hauv tsev lawm, mas nws yuav tsis txhob nqes mus nqa; tus nyob tom teb kuj ib yam, nws yuav tsis txhob lem rov mus muab tej yam nws tso tseg tom qab li. 32 Nej yuav nco ntsoov txog Los poj niam! 33 Leej twg nrhiav kev txuag nws txoj sia, mas nws yuav ua nws txoj sia ploj. Hos leej twg ua nws txoj sia ploj, mas nws yuav txuag tau nws txoj sia. 34 Kuv hais rau nej, hmo ntawd, ob leeg pw ib txag, luag yuav coj ib tug mus, tseg ib tug nyob. 35 Muaj ob tug poj niam ua ke zom zeb, luag yuav coj ib tug mus, tseg ib tug nyob." [36...] 37 Ces lawv hais rau Yes Xus tias : “Coj mus qhov twg, Huab Tais ?" Yes Xus hais rau lawv tias : "Lub cev nyob qhov twg, mas dav kuj yuav sib sau ntsauv nyob ntawd."


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 17th February 2018, 10:01 am

    TIM 18 LUB 11 HLIS 2017

    Hnub Xya Lis Piam Peb Caug Ob Nruab Xyoo A Nruab Lis Piam Xyoo I

    Nco Txog Hnub Fij ob lub Tuam tsev Teev Ntuj LN Pob Zeb thiab LN Paj Lug rau Ntuj (Dedication of the Basilicas of Sts. Peter and Paul);

    Hwm LN Rose Philippine Duchesne


    Zaj Nyeem Ib: THOOB TSIB 18: 14-16; 19:6-9

    14 Thaum lub caij tas puas tsav yam nyob tiaj tus ntsiag to, hos hmo ntuj twb dhau nrawm nroos mus txog ib tag hmo lawm, 15 ces nyob saum txheej ntuj siab, koj lo lus muaj hwj huam tas nrho ya ntxiag tawm ntawm koj lub theej kiab ua vaj mus, xws li ib tug peeb zeej tsis hlub neeg, tuaj nyob hauv ib lub teb chaws uas yuav raug puas loj, nws tuav koj txoj kev txiav txim uas thim tsis tau, ua nws rab ntaj ntse. 16 Nws nres nroos, ces nws ua kom muaj kev tuag puv tas lub sim ceeb; nws siab mus chwv lub ntuj thiab nws sawv saum lub ntiaj teb.
    19 6 Lub sij hawm tam sis ntawd, tas puas tsav yam koj tau tsim los raws nws yam huv tib si, koj rov tsim dua tshiab tas nrho, kom tas txhua yam mloog koj cov lus qhia, koj cov me nyuam thiaj yuav tsis raug xwv txheej. 7 Lawv pom twv huab ua nws tus duab los roos lub yeej. Lawv pom av qhuav tshwm hauv tiv txwv dej los. Lub hiav txwv Liab txia ua ib txog kev zoo taug. Cov dej nphau nphwv txia ua ib lub tiaj muaj nroj ntsuab xiab. 8 Tas nrho haiv neeg ntawd hla saum txoj kev no, koj txhais tes txuag rawv lawv, hos lawv ntsia ntsoov koj cov hwj huam loj tas nrho. 9 Lawv zoo li ib co nees mus nog zaub tom nras; lawv dhia paj paws xws li ib pab yaj; lawv cav txog koj, Huab Tais, vim koj yog tus npo lawv dim.

    NPN 105: 2-3, 36-37, 42-43

    Txais: (5a) Nej nco ntsoov txog cov hwj huam loj Huab Tais tau ua.
    los: As les lus yas.

    Nej seev nkauj rau HUAB TAIS, nej cav txog nws ;
    nej tshaj nws cov hwj huam txaus qhuas tas huv tib si.
    Nej nrhiav koob meej nyob hauv HUAB TAIS lub npe,
    nej cov muaj lub siab nrhiav Huab Tais, nej cia li zoo siab!

    Txais: (5a) Nej nco ntsoov txog cov hwj huam loj Huab Tais tau ua.
    los: As les lus yas.

    Nws tua cov tub hlob hauv lawv lub teb chaws tas huv si,
    Uas yog thawj cov txiv nyob hauv lawv haiv neeg.
    Nws coj nws haiv neeg mus, nqa tau nyiaj tau kub nrog,
    tsis muaj ib tug hauv lawv cov xeem yuav dawm ntog li.

    Txais: (5a) Nej nco ntsoov txog cov hwj huam loj Huab Tais tau ua.
    los: As les lus yas.

    Vim HUAB TAIS rov nco txog nws lo lus ntshiab
    uas nws hais rau nws tus tub txib As Nplas Has.
    Nws coj nws haiv neeg tawm mus luag ntxhi,
    nws coj cov neeg nws xaiv mus, lawv zoo siab qw suab ntas ntua.

    Txais: (5a) Nej nco ntsoov txog cov hwj huam loj Huab Tais tau ua.
    los: As les lus yas.

    As Les Lus Yas: 2 TXLN 2: 14

    Txais: As les lus yas, as les lus yas.

    Tswv Ntuj siv lub Moo Zoo hu peb los kom peb tau txais
    peb tus Huab Tais Yes Xus Pleev lub koob meej ua peb tug.

    Txais: As les lus yas, as les lus yas.

    Ntawv Moo Zoo: LK 18: 1-8

    1 Yes Xus hais ib zag paj lug rau nws cov thwj, qhia rau lawv tias yuav tsum teev Ntuj tsis tseg, txhob ntaus siab yau. 2 Nws hais tias : “Nyob hauv ib lub nroog, muaj ib tug txwj laus txiav txim, nws tsis ntshai Tswv Ntuj thiab tsis hwm leej twg li. 3 Muaj ib tug poj ntsuam nyob hauv lub nroog ntawd tuaj cuag tus txwj laus, nws hais tias : ‘Thov koj pab tsa kuv cai tiv tus neeg ntxub kuv.’ 4 Tus txwj laus tsis kam pab, nws muab ncua ntev ntev. Tab sis thaum kawg nws xav tias : ‘Tab yog kuv tsis ntshai Tswv Ntuj thiab tsis hwm ib tug neeg twg li los, 5 vim tus poj ntsuam ntawd txob kuv dhau, kuv yuav tsa nws cai, kom xwv nws txhob tuaj txob txob kuv thiab txhob ua kuv dias taub hau ntxiv.’" 6 Ces Huab Tais hais tias : "Nej mloog tus txwj laus txiav txim siab tsis ncaj cov lus saib. 7 Yog tias cov neeg Tswv Ntuj xaiv, ua hnub ua hmo hu txog nws tsis tseg, nws puas yuav tsis tsa lawv cai li ? Nws puas yuav tos ntev ntev tsis teb lawv li? 8 Kuv hais rau ne tias, Tswv Ntuj yeej yuav tsa lawv cai sai sai xwb. Tab sis thaum Neeg Leej Tub los, nws puas yuav nrhiav tau txoj kev ntseeg nyob ntiaj teb ?"

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 17th February 2018, 10:04 am

    TIM       20      LUB      11      HLIS       2017

    Hnub Ob Lis Piam Peb Caug Peb Nruab Xyoo A Nruab Lis Piam Xyoo I  

    Zaj Nyeem Ib:       1 MKN  1:   10-15, 41-43, 54-57, 62-64


    10 Muaj ib tug cag phem hlav hauv cov vaj As Lev Xaas Daws tau tsa tuaj : yog Aas Caus Kus Es Pis Fas, yog tus vaj Aas Caus Kus tus tub. Nws yog ib tug neeg tau mus nyob dua txim nyob Los Mas lawm. Nws sawv los ua vaj xyoo 137 raws li cov Hes Las txoj kev xam nyoog raws lawv cov vaj. 11 Lub caij ntawd, muaj ib tiam neeg tsis hwm txoj cai sawv hauv tsoom His Xas Lais tuaj. Lawv ntxias tau ntau leej mus yuam kev. Lawv hais tias : "Peb kav tsij mus nrog lwm cov haiv neeg uas nyob ib ncig peb sib fim. Vim tias txij thaum peb ncaim ntawm lawv los lawm, mas peb tau raug ntau yam xwv txheej." 12 Cov pej xeem nyiam cov lus ntxias no. 13 Lawv muaj ib co maj nroos mus thov tus vaj, ces tus vaj tso lus kheev lawv mus coj cov pej kum neeg tej kev cai thiab tej dab qhuas. 14 Lawv tsa ib lub tshav sib tw nyob Yes Lus Xas Les xws li muaj nyob pej kum teb. Lawv muab lub Cim Txiav ntawm lawv daim tawv npog rau, thiab lawv tso txoj kev nrog Tswv Ntuj cog lus tseg. 15 Lawv mus nrog cov pej kum neeg coj dab sib fim. Lawv ntxeev siab mus taug txoj kev phem. 41 Tus vaj Aas Caus Kus tshaj rau nws lub teb chaws tas tib si tias kom sawv daws koom ua ib haiv neeg xwb, 42 nyias yuav tso nyias tej kab lis kev cai pov tseg. Ces cov pej kum neeg sawv daws ua raws li tus vaj cov lus ceeb toom. Nyias tso nyias cov kev cai pov tseg. 43 Muaj coob leej His Xas Lais txais tus vaj txoj kev teev hawm. Lawv txi dab thiab tsis caiv hnub xas npas tos li lawm.
    54 Hnub tim kaum tsib lub hlis Kis Laws xyoo 145, tus vaj tsa ib qho phem tshaj plaws rau saum cov Yus Das lub thaj hlawv tsiaj txi Ntuj, thiab nyob hauv cov nroog nyob ib ncig, lawv kuj tsa ib co thaj txi dab thiab. 55 Nyob ntawm lawv tej qhov rooj thiab nyob hauv tej kev, sawv daws hlawv xyab nplawg ntia. 56 Hos yog lawv pom cov phau ntawv hais txog Mais Xes Txoj Cai mas lawv muab dua thiab muab pov hlawv tas. 57 Yog lawv pom ib tug neeg muaj ib phau ntawv hais txog Mais Xes Txoj Cai los pom ib tug neeg coj Txoj Cai mas nws yuav tsum raug txiav txim tuag vim tus vaj ua txoj cai li ntawd. 62 Tsis kav muaj coob leej His Xas Lais kuj nyob ruaj nreb, lawv txiav txim siab muaj peev xwm tiv tsis kam noj tej yam tsis huv. 63 Lawv yeem tuag zoo dua noj tej yam tsis huv thiab ua txhaum rau Txoj Cai Cog Lus. Ces lawv kuj tau txais kev tuag tiag. 64 Muaj kev txom nyem loj nyob rawv saum cov His Xas Lais taub hau.

    NPN       119:   53, 61, 134, 150, 155, 158

    Txais:   (88) Huab Tais, thov koj muab txoj sia rau kuv,
    ces kuv yuav ua raws koj lo lus qhia.

    Kuv pom cov tsis hwm Ntuj tso koj
    Txoj Cai pov tseg, kuv npau taws.

    Txais:   (88) Huab Tais, thov koj muab txoj sia rau kuv,
    ces kuv yuav ua raws koj lo lus qhia.

    Cov neeg tsis hwm Ntuj cuab voj hlua khi kuv,
    tab sis, kuv tsis tau hnov qab koj Txoj Cai.

    Txais:   (88) Huab Tais, thov koj muab txoj sia rau kuv,
            ces kuv yuav ua raws koj lo lus qhia.

    Thov koj txhiv kuv dim ntawm neeg txoj kev lim hiam,
    kom kuv tau coj nraim koj tej lus qhia.

    Txais:   (88) Huab Tais, thov koj muab txoj sia rau kuv,
            ces kuv yuav ua raws koj lo lus qhia.

    Cov neeg phem lim hiam tuaj tsim txom kuv,
    lawv yog cov txav mus deb ntawm koj Txoj Cai.

    Txais:   (88) Huab Tais, thov koj muab txoj sia rau kuv,
          ces kuv yuav ua raws koj lo lus qhia.

    Txoj kev cawm nyob deb cov neeg txhaum,
    vim lawv tsis nrhiav koj cov cai lij choj.

    Txais:   (88) Huab Tais, thov koj muab txoj sia rau kuv,
            ces kuv yuav ua raws koj lo lus qhia.

    Kuv pom cov neeg ntxeev siab, kuv dhuav siab tas nrho,
    vim lawv tsis mloog raws li koj cov lus cog.

    Txais:   (88) Huab Tais, thov koj muab txoj sia rau kuv,
            ces kuv yuav ua raws koj lo lus qhia.

    As Les Lus Yas:       ZAM  8:  12

    Txais: As les lus yas, as les lus yas.

    Huab Tais hais tias: Kuv yog qhov pom kev kaj lub qab ntuj neeg.
    Leej twg lawv kuv qab, nws yuav tau qhov pom kev uas coj mus rau txoj sia

    Txais: As les lus yas, as les lus yas.

    Ntawv Moo Zoo:       LK  18:   35-43

    35 Thaum Yes Xus tuaj yuav txog Yes Lis Kos, muaj ib tug dig muag zaum thov khawv ntawm ntug kev. 36 Nws hnov ib pab neeg taug kev, nws nug saib yog muaj dab tsi. 37 Lawv qhia nws tias yog Yes Xus Nas Xas Les hla tuaj mus. 38 Ces nws tsa suab hu nrov nrov tias : "Yes Xus, Das Vis Leej Tub, thov koj khuv leej kuv !" 39 Cov uas mus kev tom hauv ntej cem nws kom ua twj ywm, tab sis nws haj yam hu nrov nrov tias : "Das Vis Leej Tub, thov koj khuv leej kuv !” 40 Yes Xus nres, nws kom lawv coj tus dig muag los rau nws. Thaum tus dig muag los txog ze, Yes Xus nug nws tias : 41 "Koj xav kom kuv ua dab tsi rau koj ?" Tus dig muag hais tias : "Huab Tais, thov ua kom kuv rov pom kev." 42 Ces Yes Xus hais rau nws tias : "Koj rov pom kev mas ! Koj lub siab ntseeg cawm koj lawm." 43 Tam sis ntawd, tus dig muag rov pom kev, ces nws raws Yes Xus mus, nws cav txog Tswv Ntuj. Tas tsoom pej xeem pom qhov ntawd, lawv cav lus zoo txog Tswv Ntuj.


    Last edited by Mim on 17th February 2018, 2:03 pm; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 17th February 2018, 1:46 pm

    TIM 21 LUB 11 HLIS 2017

    Hnub Peb Lis Piam Peb Caug Peb Nruab Xyoo A Nruab Lis Piam Xyoo I

    Hwm Hnub lawv coj Mab Liab mus fij rau hauv lub Tuam Tsev Teev Ntuj

    Zaj Nyeem Ib: 2 MKN 6:18-31


    18 Es Les As Ntxas yog ib tug nyob hauv cov thawj kws Txoj Cai. Nws muaj hnub nyoog nchav lawm thiab nws muaj ib lub meej mom muaj tsim. Nws raug lawv yuam kom qhib qhov ncauj thiab kom nws noj nqaij npuas. 19 Tab sis nws yeem muaj koob meej nyob hauv txoj kev tuag dua ua lub neej muaj txhaum, ces nws tuaj yeem mus rau ntawm qhov chaw uas nws yuav raug tsim txom. 20 Txawm nws nyiam nws txoj sia npaum twg los nws nti cov nqaij nyob hauv nws qhov ncauj pov tseg, nws ua zoo li cov uas muaj peev xwm tsis kam saj tej yam caiv. 21 Cov neeg uas npaj rooj mov yuam neeg ntawd coj Es Les As Ntxas mus rau ib qho, vim lawv paub nws tau ntev lawm. Lawv pab tswv yim rau nws kom nws yuav tsum npaj nws ib co nqaij tsis caiv uas nws yuav noj tau tuaj, ces nws lam ua txuj noj cov nqaij txi dab raws li tus vaj cov lus ceeb toom xwb. 22 Yog nws ua li ntawd mas nws yuav tsis raug txim tuag, thiab lawv tseem yuav ua zoo rau nws ntxiv raws li lawv txoj qub kev phooj ywg.
    23 Tab sis Es Les As Ntxas tuaj yeem ua raws txoj kev ncaj, kom tsim nyog nws lub hnub nyoog laus thiab kom phim nws lub meej mom thiab nws lub neej uas nws ua tau zoo txij puag thaum yau los lawm, thiab nws yeem ua raws Txoj Cai ntshiab uas Tswv Ntuj qhia, ces nws teb rau lawv sai sai tias kom lawv cia li xa nws mus lawm hauv lub teb chaws tsaus ntuj xwb. 24 Es Les As Ntxas hais tias : "Laus li peb no lawm tsis phim yuav dag, tsis phim yuav zais. Nyob tsam ntau leej hluas to taub tias thaum Es Les As Ntxas muaj cuaj caum xyoo nws mus ua pej kum kev cai lawm. 25 Ces yog vim qhov kuv dag li ntawd, kom kuv tau nyob ib nyuag me me ntxiv, ces lawv thiaj xav yuam kev vim kuv, hos kuv yuav ua neej laus nkoos nyob hauv kev txaj muag thiab kev poob koob meej. 26 Tab txawm tias nyem no kuv tsis raug tib neeg tua kuv, los ciaj tuag kuv yeej yuav tsis dim ntawm tus muaj hwj huam txhais tes li. 27 Li ntawd yog kuv ua siab tawv qhawv tuag nyem no, mas thiaj phim kuv ua neej laus nkoos. 28 Thiab kuv thiaj yuav tso tau ib tug piv txwv zoo rau cov hluas pom tias txoj kev tuaj yeem txaus siab tuag pub rau Txoj Cai ntshiab uas peb hwm yog zoo li cas."
    Thaum Es Les As Ntxas hais li ntawd tas, nws cia li txav los ze ntawm qhov chaw nws yuav raug tsim txom. 29 Cov neeg uas puag ta xav pab nws, nyem no lawv hloov siab tas lawm, vim lawv xav tias nws cov lus yog lus vwm xwb. 30 Thaum lawv ntaus Es Les As Ntxas, nws yuav tu siav txog tes, nws nroo ib suab nws hais tias : "Tus HUAB TAIS uas paub tas ib puas tsav yam, nws pom tseeb tias yog kuv tsis xav tuag los tau, tab sis kuv tuaj yeem nyiaj mob nyob hauv kuv lub cev raug luag nplawm, thiab kuv tus plig zoo siab nyiaj tej no vim kuv hwm HUAB TAIS." 31 Es Les As Ntxas tuag li ntawd. Nws tso tau ib tug piv txwv zoo qhia txog txoj kev ua qhov ncaj thiab txoj kev ua siab tawv qhawv rau cov hluas thiab rau rau tas nrho haiv neeg tib si.

    NPN 3: 2-3, 4-5, 6-7

    Txais: (6b) Huab Tais tuaj kuv tog.

    HUAB TAIS, kuv cov yeeb ncuab coob tas nrho !
    Coob sawv los ntxeev siab rau kuv!
    Coob leej hais txog kuv tias :
    “Yuav tsis muaj kev cawm rau nws nyob hauv Tswv Ntuj li.”

    Txais: (6b) Huab Tais tuaj kuv tog.

    Tiam sis, HUAB TAIS, koj yog daim leem phiaj thaiv kuv,
    koj yog kuv lub koob meej, yog tus tsa kuv taub hau kom siab.
    Thaum kuv tsa suab nrov hu HUAB TAIS,
    nws teb kuv saum nws lub roob ntshiab tuaj.

    Txais: (6b) Huab Tais tuaj kuv tog.

    Thaum kuv qhau cev pw tsaug zog,
    kuv tsim rov los dua vim HUAB TAIS nres kuv.
    Kuv tsis ntshai cov neeg coob coob
    uas sawv vij vog ib ncig kuv thoob plaws.

    Txais: (6b) Huab Tais tuaj kuv tog.

    As Les Lus Yas: 1 ZAM 4: 10B

    Txais: As les lus yas, as les lus yas.

    Tswv Ntuj nyiam peb, nws thiaj xa nws Leej Tub
    tuaj ua nqi txhiv peb ntawm peb cov txhaum.

    Txais: As les lus yas, as les lus yas.

    Ntawv Moo Zoo: LK 19: 1-10


    1 Yes Xus mus hauv Yes Lis Kos, nws taug kev hla lub tsheej. 2 Muaj ib tug txiv neej lub npe hu ua Ntxas Kais, nws yog ib tug tswj hauv cov neeg sau se, nws yog neeg nplua nuj. 3 Nws nrhiav kom tau kev pom saib Yes Xus yog leej twg, tab sis nws tsis tau kev, vim neeg coob dhau, thiab nws yog neeg qig taub. 4 Ces nws khiav mus ua ntej, nws nce mus saum ib tsob ntoo xis kas mos kom tau pom Yes Xus, vim Yes Xus yuav los hla ntawd mus. 5 Thaum Yes Xus los txog ntawm qhov chaw ntawd, nws tsa muag ntsia saud, nws hais tias : "Ntxas Kais, koj nqes los sai, vim hnub no kuv yuav tsum mus hauv koj tsev." 6 Ntxas Kais nqes nrawm nroos los, nws zoo siab txais Yes Xus. 7 Sawv daws pom li ntawd, lawv yws yws hais tias : "Nws mus so hauv ib tug neeg txhaum lub tsev !" 8 Hos Ntxas Kais sawv ntsug, nws hais rau Huab Tais tias : "Huab Tais, kuv yuav muab kuv tej cuab yeej cuab tam ib nrab pub rau cov pluag. Yog kuv tau ua tsis ncaj rau leej twg lawm, mas kuv yuav them plaub npaug pauj rau nws." 9 Yes Xus hais rau Ntxas Kais tias : "Hnub no, txoj kev cawm los txog hauv lub tsev no lawm, vim tus no kuj yog Has Nplas Has ib leeg tub thiab. 10 Vim tias Neeg Leej Tub tuaj yog tuaj nrhiav thiab tuaj cawm tus uas ploj lawm."

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 17th February 2018, 2:25 pm

    TIM 22 LUB 11 HLIS 2017

    Hnub Plaub Lis Piam Peb Caug Peb Nruab Xyoo A Nruab Lis Piam Xyoo I

    Hwm LN Cecilia, nkauj ntshiab tuag ua Tim Khawv

    Zaj Nyeem Ib: 2 MKN 7: 1, 20-31


    1 Muaj xya leej kwv tij nrog leej niam raug luag ntes thiab raug luag muab hlua thiab muab leeg nyuj los nplawm lawv, vim tus vaj xav yuam kom lawv noj nqaij npuas uas lawv Txoj Cai txwv tsis pub noj.
    20 Leej niam ua tej yam txaus qhuas kawg thiab tsim nyog yuav tsum nco ntsoov txog mus li. Nws ntsia nws xya leej tub ib tug tuag zuj zus nyob hauv tib hnub nkaus. Tsis kav nws ua siab tawv qhawv ris qhov ntawd vim nws tso siab rau Tswv Ntuj. 21 Leej niam hais nws xeem lus los ntuas nws cov tub ib leeg dhau ib leeg. Nws muaj ib lub tswv yim txawj xav zoo thiab nws muaj ib lub peev xwm txiv neej txhawb nws lub siab poj niam kom nws txawj hais tej lo lus ntxiv zog rau nws cov tub. 22 Leej niam hais rau lawv tias : "Kuv tsis paub nej xeeb zoo li cas los nyob hauv kuv lub cev. Tsis yog kuv muab lub tswv yim thiab txoj sia rau nej ! Tsis yog kuv tau teeb txhua yam kom nej xeeb tawm los zoo li nej nyem no. 23 Tus Tswv tsim lub ntiaj teb nws tsim kom muaj tib neeg. Nws yog lub hauv paus chiv kom muaj txhua yam. Tus Tswv siab zoo khuv leej neeg yuav rov muab lub tswv yim thiab txoj sia rau nej, vim nej tsis hlub nej lub cev nyem no, nej nyiam nws Txoj Cai dua." 24 Tus vaj Aas Caus Kus xav tias cov lus ntawd yog lus thuam nws thiab cem nws. Thaum ntawd, tus tub ntxawg tseem muaj txoj sia nyob. Ces tus vaj thiaj ntxias tus tub ntxawg tias yog nws tso nws cov yawg koob tej kev cai pov tseg mas tus vaj yeej cog lus tias yuav ua kom tus tub ntxawg nplua nuj thiab kom nws tau zoo, yuav nrog nws ntaus phooj ywg zoo thiab yuav muab ib txog hauj lwm siab rau nws ua. 25 Tab sis tus tub ntxawg tsis mloog tus vaj cov lus. Ces tus vaj hu kom nws niam los thiab hais kom nws ntuas nws tus tub kom tus tub rov cawm nws txoj sia. 26 Tus vaj hais lus ntev loo tas, ces leej niam thiaj lees tias nws mam mus ntuas nws tus tub. 27 Nws ua txoj lam ua li tus vaj hais, nws khoov mus siv nws xeem lus hais lus rau nws tus tub tias : "Me tub, koj hlub koj niam mog ! Koj niam tau nqa koj cuaj lub hlis nyob hauv nws xub ntiag, tau pub mis rau koj noj peb xyoos, tau tu koj qhia koj los txog txij no. 28 Me tub, koj ntsia lub ntuj thiab lub ntiaj teb, thiab tas puas tsav yam uas nyob hauv, koj yuav paub tias Tswv Ntuj tsis tau siv dab tsi los tsim tej ntawd li. Nws kuj tsim neeg ib yam li ntawd thiab. 29 Koj tsis txhob ntshai tus niag tsim txom neeg ntawd, koj yuav ua kom koj tsim nyog raws tau koj cov tij laug, koj ua siab tuag mog, kuv thiaj yuav rov ntsib koj nrog lawv ua ke thaum txog lub caij txais kev zam txhaum." 30 Nws niam tseem hais tsis tau tas, tus tub twb hais tias : "Nej tseem tos dab tsi ntxiv ? Kuv tsis mloog tus vaj cov lus, kuv yuav mloog Txoj Cai uas Mais Xes qhia rau peb cov yawg koob. 31 Hos koj uas yog tus coj txoj kev txom nyem tuaj rau cov Hes Nplaws, koj yuav tsis dim ntawm Tswv Ntuj txhais tes."

    NPN 17: 1BCD, 5-6, 8+15

    Txais: (15b) Huab Tais, thaum koj lub hwj chim tawm tuaj,
    kuv txoj kev zoo siab yuav puv nkaus.

    HUAB TAIS, thov koj mloog ib zag lus ua plaub ncaj ncees;
    Koj cuab pom ntseg rau kuv lub suab quaj,
    Koj tig ntsej los rau kuv lo lus thov vim kuv di ncauj tsis hais lus dag.

    Txais: (15b) Huab Tais, thaum koj lub hwj chim tawm tuaj,
    kuv txoj kev zoo siab yuav puv nkaus.

    Kuv taug koj txoj kev nraim, kuv ko taw tsis tau mus yuam kev.
    Kuv tus Tswv Ntuj, kuv hu txog koj, vim koj yeej yuav teb kuv;
    thov koj qaij pob ntseg los rau kuv thiab koj mloog kuv lo lus!

    Txais: (15b) Huab Tais, thaum koj lub hwj chim tawm tuaj,
    kuv txoj kev zoo siab yuav puv nkaus.

    Thov koj txuag kuv xws li txuag koj lub ntsiab muag,
    Thov koj txuag kuv zoo li txuag koj lub ntsiab muag.
    Thov koj zais kuv rau hauv koj phab tis qhov ntxoov,
    Kuv yeej yuav tau pom koj lub ntsej muag nyob hauv txoj kev ncaj.
    Kuv tsim dheev los, kuv yuav zoo siab hlo tau nyob ze ntawm koj.

    Txais: (15b) Huab Tais, thaum koj lub hwj chim tawm tuaj,
    kuv txoj kev zoo siab yuav puv nkaus.

    As Les Lus yas: ZAM 15:16

    Txais: As les lus yas, as les lus yas.

    Huab Tais hais tias: yog kuv xaiv nej hauv lub ntiaj teb los,
    Kom nej mus txi ib co txiv uas yuav nyob ruaj.

    Txais: As les lus yas, as les lus yas.

    Ntawv Moo Zoo: LK 19: 11-28

    11 Thaum cov neeg mloog Yes Xus tej lus ntawd, nws tseem hais dua ib zag paj lug ntxiv, yog vim Yes Lus Xas Les nyob ze ze lawm, ces sawv daws xav hais tias Tswv Ntuj lub Ceeb Tsheej yuav tawm los tam sis ntawd. 12 Yes Xus thiaj hais tias : "Muaj ib tug neeg yog caj ces ua nom ua tswv, nws mus rau ib lub teb chaws nyob deb , yuav mus txais lub hwj chim ua vaj ntxwv, ces nws mam rov qab los. 13 Nws hu nws kaum leej tub txib tuaj, nws muab kaum choj nyiag rau lawv, nws hais rau lawv tias : ‘Nej coj mus ua lag ua luam mus txog hnub kuv rov los.’ 14 Tab sis cov pej xeem ntxub nws, lawv xa ib pab tiam lis lawv qab mus hais tias : ‘Peb tsis xav kom tus no ua vaj kav peb.’ 15 Thaum nws txais lub hwj chim ua vaj tas, nws rov los, nws hu cov tub txib uas nws tau muab nyiaj rau lawv tuaj, kom paub saib nyias tau ua nyias lag luam li cas. 16 Thawj tug tuaj txog, nws hais tias : ‘Huab Tais, koj choj nyiaj ntxeev tau kaum choj paj lawm.’ Tus vaj hais rau nws tias : 17 ‘Zoo kawg, tub txib zoo. Koj tau muaj lub siab pheej xeeb hauv tej yam me me, ua li mas koj txais hwj chim kav kaum lub nroog.’ 18 Tus ob tuaj txog, nws hais tias : ‘Huab Tais, koj choj nyiaj ntxeev tau tsib choj paj lawm.’ 19 Tus vaj hais rau tus ntawd tias : ‘Koj ua nom tswj tsib lub nroog.’ 20 Hos muaj ib tug tuaj txog, nws hais tias : ‘Huab Tais, qho no yog koj choj nyiaj, kuv muab qhwv rau hauv ib daim ntaub cia. 21 Kuv ntshai koj, vim koj yog ib tug neeg coj nruj, koj khaws xyeem yuav tej yam uas koj tsis tau muab tshwj tseg, koj sau tej yam uas koj tsis tau tseb.’ 22 Tus vaj hais rau nws tias : ‘Tub txib phem dab tsi, kuv txiav txim rau koj raws nraim li koj lub ncauj tau hais. Koj paub tias kuv yog ib tug neeg coj nruj, kuv khaws xyeem yuav tej yam uas kuv tsis tau muab tshwj tseg, kuv sau tej yam uas kuv tsis tau tseb, 23 vim li cas koj tsis coj kuv choj nyiaj mus tso hauv cov tsev ceev nyiaj ? Thaum kuv rov los, kuv yuav rho kuv choj nyiaj nrog ib qho paj.’ 24 Ces tus vaj hais rau cov neeg nyob ntawd tias : ‘Nej rho nws choj nyiaj, nej muab rau tus uas muaj kaum choj.’Ces lawv hais rau tus vaj tias : 25 ‘Huab Tais, nws twb muaj kaum choj lawm.’26 ‘Kuv hais rau nej tias tus uas muaj lawm, luag yuav pub ntxiv rau ; hos tus uas tsis muaj, mas luag tseem yuav muab qhov uas nws muaj tshem mus thiab. 27 Hos kuv cov yeeb ncuab, uas tsis kam kuv ua vaj saib lawv, nej coj lawv los ntawm no, nej muab lawv txiav caj dab tas huv si rau ntawm kuv xub ntiag.’"
    28 Thaum Yes Xus hais cov lus ntawd tas, nws mus ua ntej taug kev mus pem Yes Lus Xas Les.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 17th February 2018, 3:04 pm

    TIM 23 LUB 11 HLIS 2017

    HNUB TSIB LIS PIAM PEB CAUG PEB NRUAB XYOO A NRUAB LIS PIAM XYOO I

    Hwm LN Clement I; LN Columban; Tus Tau Hmoov Zoo Miguel Augustin Pro

    Zaj Nyeem Ib: 1 MKN 2: 15-29


    15 Tus vaj kom nws cov tub rog mus yuam cov His Xas Lais kom thim kev ntseeg; lawv tuaj nyob hauv lub nroog Mos Dis tuaj npaj yuam kom txi dab. 16 Muaj coob leej His Xas Lais mus koom cov tub rog. Tshuav Mas Tas Thias thiab nws cov tub lawv thiaj mus sib sau rau lawv ib qho. 17 Tus vaj cov tub rog thiaj hais rau Mas Tas Thias tias : "Koj yog ib tug thawj coj nto koob meej thiab muaj hwj chim nyob hauv lub nroog no, vim koj muaj tub muaj kwv tij pab koj. 18 Ua li mas koj ua sawv daws ntej mus ua raws li tus vaj cov lus ceeb toom. Koj ua zoo li tas txhia haiv neeg tau ua, zoo li cov nom Yus Das thiab cov uas peb tso nyob Yes Lus Xas Les tau ua. Ces koj thiab koj cov tub yuav nrog tus vaj ua phooj ywg zoo. Nej yuav tau txais nyiaj txais kub thiab txais ntau yam ua paj tshab." 19 Mas Tas Thias teb nrov nrov rau lawv tias : "Tab yog tas txhua haiv neeg mloog tus vaj thiab ua raws li nws cov lus ceeb toom, thiab tso lawv cov yawg koob tej kev cai pov tseg, 20 los kuv thiab kuv cov tub cov kwv tij peb yuav ua raws li peb cov yawg koob tau cog lus xwb. 21 Thov kom Tswv Ntuj txuag peb, tsis txhob cia peb tso Txoj Cai thiab tej kev cai lij choj pov tseg ! 22 Peb yuav tsis mloog tus vaj cov lus. Peb yuav tsis txhob ncaim ntawm peb txoj kev cai mus sab xis los sab laug li." 23 Thaum Mas Tas Thias hais lus tu nrho, muaj ib tug Yus Das tab meeg txav los rau sawv daws pom, nws txi dab nyob saum lub thaj nyob Mos Dis, raws li tus vaj cov lus ceeb toom. 24 Thaum Mas Tas Thias pom li ntawd mas nws mob siab ib zag thiab ua nws ib ce tshee tas. Nws npau taws heev, ces nws tib sas mus muab tus Yus Das caj dab txiav kiag nyob saum lub thaj. 25 Nws kuj tua tus neeg uas tus vaj xa tuaj yuam kom lawv txi dab thiab. Ces nws rhuav lub thaj pov tseg. 26 Nws lub siab kub lug rau Txoj Cai xws li thaud Pis Nas siab kub lug ntaus Xis Lis uas yog Xas Lws tus tub. 27 Mas Tas Thias thiaj qw nrov nrov rau lub nroog tias : "Yog leej twg kub siab rau Txoj Cai thiab khaws nraim cov lus cog, mas kom nws tuaj raws kuv mus !" 28 Mas Tas Thias thiab nws cov tub khiav mus nyob pem roob, lawv tso lawv tej cuab yeej cuab tam tas huv si rau hauv nroog. 29 Ces muaj coob leej uas nrhiav kev ncaj thiab nyiam Txoj Cai, lawv khiav mus tsa tsev nyob hauv teb chaws suab puam.

    NPN 50: 1B-2, 5-6, 14-15

    Txais: (23b) Kuv yuav qhia Tswv Ntuj lub hwj huam cawm neeg rau tus neeg siab ncaj.

    HUAB TAIS Tswv Ntuj nws qhib ncauj hais lus;
    nws hu tas lub ntiaj teb, txij hnub tuaj txog hnub poob los.
    Tswv Ntuj nyob saum lub roob Xis Yoos,
    nws zoo saib tas nrho, nws ci ntsa iab tuaj.

    Txais: (23b) Kuv yuav qhia Tswv Ntuj lub hwj huam cawm neeg rau tus neeg siab ncaj.

    “Nej sau cov ntseeg txog kuv tuaj nyob ntawm kuv xub ntiag,
    Nej sau cov uas tau tua tsiaj nrog kuv cog lus los nyob ntawm no.”
    Ces lub ntuj tshaj nws txoj kev ncaj :
    Vim tias Tswv Ntuj yog tus txiav txim.

    Txais: (23b) Kuv yuav qhia Tswv Ntuj lub hwj huam cawm neeg rau tus neeg siab ncaj.

    Koj muab koj lo lus cav lus qhuas los txi rau Tswv Ntuj,
    koj pauj koj lub yeem rau tus Nyob Siab.
    Thaum kev txhawj xeeb tuaj, koj hu txog kuv,
    kuv yuav npo koj dim, ces koj yuav cav txog kuv lub koob meej.


    Txais: (23b) Kuv yuav qhia Tswv Ntuj lub hwj huam cawm neeg rau tus neeg siab ncaj.

    As Les Lus Yas: NPN 95: 8

    Txais: As les lus yas, as les lus yas.

    Hnub no, yog nej hnov nws lub suab,
    Tsis txhob ua nej lub siab tawv ncauj.

    Txais: As les lus yas, as les lus yas.

    Ntawv Moo Zoo: LK 19: 41-44

    41 Thaum Yes Xus tuaj yuav txog Yes Lus Xas Les, nws pom lub nroog, nws quaj rau lub nroog, 42 nws hais tias : "Hnub no, koj kheev lam to taub txog lub ntsiab ntawm txoj kev thaj yeeb mas ! Tab sis, qhov ntawd ces nyob zais ntshis ntawm koj qhov muag lawm. 43 Vim tias, yuav muaj ib hnub uas koj cov yeeb ncuab yuav khawb kwj vij koj, lawv yuav tuaj puav koj, lawv yuav nias qees qhov txhia chaw tuaj rau koj. 44 Lawv yuav tsuj koj rau hauv av, yuav tsuj koj thiab koj cov me nyuam uas nyob hauv koj. Lawv yuav tsis tseg ib lub pob zeb uas tseem tshooj ib lub nyob, yog vim koj tsis kam txais lub caij uas Ntuj tuaj xyuas koj.”

    *****************************************

    TIM 23 LUB 11 HLIS 2017


    Xyoo no yog As Mes Lis Kas lub Hmoov ua Ntuj Tsaug (Thanksgiving), yuav xaiv cov zaj nyeem raws li nram no:

    Zaj Nyeem Ib: NPES XIS LAS 50: 22-24


    22 Zaum no, nej cia li cav txog tus Tswv Ntuj kav tas txhua leej, nws yog tus tau ua tej yam loj tas nrho nyob hauv ntiaj teb, nws yog tus ua kom neeg txawj loj hlob txij puag thaum tseem nyob hauv leej niam plab los, thiab nws puab neeg raws li nws nws lub siab nyiam. 23 Thov kom nws pub ib lub siab muaj kev zoo siab puv npo rau peb thiab pub kom muaj kev thaj yeeb lug lub caij peb ua neej thiab nyob hauv His Xas Lais mus li txheej dhau txheej tiam dhau tiam. 24 Thov kom nws pub nws tej txiaj ntsim nyob nrog peb nraim thiab kom nws cawm peb thaum lub caij peb ua neej .

    NPN 145:2-3, 4-5, 6-7, 8-9, 10-11

    Txais: (1) Kuv yuav cav txog koj lub npe mus li, Huab Tais.

    Kuv yuav niaj hnub cav txog koj lub koob meej,
    kuv yuav cav lus zoo txog koj lub npe mus li ib txhiab ib txhis.
    HUAB TAIS loj tas nrho, tsim nyog cav txog nws ;
    nws loj tas nrho, neeg ntsuas tsis tau.

    Txais: (1) Kuv yuav cav txog koj lub npe mus li, Huab Tais.

    Sawv daws yuav qhuas txog koj tej hauj lwm txheej dhau txheej,
    Lawv yuav tshaj koj txoj kev muaj hwj xyeej rau neeg paub.
    Koj cov hauj lwm qhia txog koj lub hwj huam hwj chim loj ci ntsa iab,
    kuv yuav hais tag hais thiab txog koj cov dej num tsim nyog qhuas.

    Txais: (1) Kuv yuav cav txog koj lub npe mus li, Huab Tais.

    Neeg yuav hais txog koj lub hwj huam ua tej yam txaus ntshai,
    lawv yuav tshaj koj lub hwj huam loj kawg nkaus.
    Neeg yuav tshaj txog koj lub siab zoo siab dav tas nrho,
    thiab yuav qw ntsuag qees cav txog koj lub siab ncaj.

    Txais: (1) Kuv yuav cav txog koj lub npe mus li, Huab Tais.

    HUAB TAIS lub siab hlub mos nyoos thiab khuv leej neeg,
    nws npau taws qeeb, nws lub siab hlub neeg tas nrho.
    HUAB TAIS ua siab zoo rau txhua leej txhua tus,
    nws lub siab khuv leej tas puas tsav yam nws tau tsim.

    Txais: (1) Kuv yuav cav txog koj lub npe mus li, Huab Tais.

    HUAB TAIS, cia koj txhua yam hauj lwm ua koj tsaug,
    thiab cia cov uas nyiam koj cav txog koj.
    Cia lawv qhuas txog koj lub Ceeb Tsheej muaj hwj chim
    Thiab piav txog koj lub hwj huam.

    Txais: (1) Kuv yuav cav txog koj lub npe mus li, Huab Tais.

    Zaj Nyeem Ob: 1 KLN 1: 3-9

    Paj Lug sau ntawv tias:
    3 Thov kom peb Txiv Tswv Ntuj thiab Huab Tais Yes Xus Pleev pub txiaj ntsim thiab kev thaj yeeb rau nej. 4 Kuv ua Tswv Ntuj tsaug tsis tseg vim nej, vim lub txiaj ntsim uas Tswv Ntuj tau pub rau nej nyob hauv Yes Xus Pleev, 5 ces nej muaj kev nplua nuj nyob hauv txhua yam, kev nplua nuj txawj hais lus thiab kev nplua nuj paub txog tas txhua yam txuj ci, 6 ib yam li txoj kev ua tim khawv txog Leej Pleev kuj tau cog ruaj khov kho nyob hauv nej lawm, 7 ces nej tsis tshuav ib lub txiaj ntsim uas nej tsis tau txais, thaum lub caij uas nej tos ntsoov peb tus Huab Tais Yes Xus Pleev yuav tshwm sim los. 8 Nws yuav ua kom nej ntseeg ruaj nreb mus txog qhov kawg, kom hnub uas peb tus Huab Tais Yes Xus Pleev rov los txog, mas tsis muaj ib qho xyeej nyob hauv nej. 9 Tswv Ntuj yog tus pheej xeeb, nws hu nej kom los nrog nws Leej Tub, peb tus Huab Tais Yes Xus Pleev muaj kev sib raug zoo sib koom siab.

    As Les Lus Yas: 1 TXLN 5: 18

    Txais: As les lus yas, as les lus yas.

    Txawm nej raug dab tsi los nej yuav ua tsaug mus li,
    vim Tswv Ntuj lub siab xav kom nej ua li ntawd nyob hauv Yes Xus Pleev.

    Txais: As les lus yas, as les lus yas.

    Ntawv Moo Zoo: LK 17: 11-19

    11 Thaum Yes Xus taug kev mus Yes Lus Xas Les, nws hla Xas Mas Lias thiab Nkas Lis Lais teb. 12 Thaum nws yuav mus hla hauv ib lub zos, muaj kaum tus mob ruas tuaj cuag nws, lawv nres deb ntawm nws. 13 Lawv tsa suab hais nrov nrov rau nws tias : "Xib Hwb Yes Xus, thov koj khuv leej peb!" 14 Yes Xus pom lawv, nws hais rau lawv tias : “Nej mus thws nej lub cev rau cov Leej Choj saib." Thaum lawv tab tom mus, lawv lub cev cia li huv tuaj. 15 Muaj ib tug hauv pab ntawd pom tias nws lub cev zoo lawm, nws tig hlo rov qab los, nws tsa suab nrov nrov cav txog Tswv Ntuj. 16 Nws khoov ti av pe ntawm Yes Xus ko taw, nws ua Yes Xus tsaug. Nws yog ib tug neeg Xas Mas Lias. 17 Yes Xus thiaj tsa ncauj teb tias : “Tsis yog muaj kaum leej rov huv tuaj lawm lod ? Tshuav cuaj leeg ne, dua qhov twg lawm? 18 Ua cas tsuas muaj tus qhua no xwb thiaj rov los ua tsaug cav txog Tswv Ntuj ?" 19 Ces Yes Xus hais rau nws tias : "Koj sawv mus tsev, koj lub siab ntseeg cawm tau koj lawm."

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 17th February 2018, 3:21 pm

    TIM 24 LUB 11 HLIS 2017

    Hnub Rau Lis Piam Peb Caug Peb Nruab Xyoo A Nruab Lis Piam Xyoo I

    Hwm LN Andrew Dung-Lac, thiab nws cov kwv luag tuag ua Tim Khawv

    Zaj Nyeem Ib: 1 MKN 4: 36-37, 52-59


    36 Ces Yus Das thiab nws cov kwv tij hais tias : "Peb cov yeeb ncuab tawg tas lawm, peb yuav mus ua kom lub Tuam Tsev Teev Ntuj dawb huv tuaj thiab rov muab fij rau Ntuj." 37 Ces Tas tsoom tub rog tuaj sib sau ua ke thiab lawv nce mus pem lub roob Xis Yoos.
    52 Lub cuaj hlis, uas hu ua lub hli Kis Laws, hnub tim nees nkaum tsib, xyoo ib puas plaub caug yim, lawv sawv ntxov los, 53 lawv mus txi Ntuj raws txoj cai nyob saum lub thaj hlawv tsiaj txi Ntuj tshiab uas lawv tsa tau. 54 Lawv foom hmoov zoo rau lub thaj, lawv hu nkauj ntaus thaj cheej, ntaus nkauj nog ncas, thiab ntaus nruas; hnub ntawd kuj yog hnub ua kev nco txog lub caij thiab hnub uas cov neeg teev pej kum dab tau ua tsis zoo rau lub thaj txi Ntuj. 55 Tas tsoom sid txhos caug pe hawm thiab cav txog tus nyob saum lub ntuj uas tau coj lawv mus rau txoj kev yeej. 56 Lawv ua lub txoos lom zem no yim hnub los tsa lub thaj. Lawv zoo siab hlo hlawv tsiaj txi Ntuj, thiab ua tej thaj txi ntuj noj cov txim thiab ua Ntuj tsaug. 57 Lawv muab ib co duab mom kub thiab duab leem kub los eb kom lub Tuam Tsev qhov rooj sab nraud zoo nkauj. Lawv rov kho cov qhov rooj rau thiab lawv ua qhov rooj rau cov kem tsev pw. 58 Tas tsoom sid sawv daws zoo siab luag ntxhi. Lawv tsis nco qab lawv qhov kev txaj muag uas cov pej kum neeg ua rau lawv lawm. 59 Ces Yus Das nrog nws cov kwv tij thiab tas tsoom His Xas Lais txiav tias niaj xyoo thaum txog lub caij ntawd lawv yuav rov ua lub hnub nyoog tsa lub thaj txi Ntuj ntawd nyob hauv txoj kev lom zem thiab kev zoo siab; lawv yuav nqaum paj nqaum nruas puv yim hnub, txij tim nees nkaum tsib Kis Laws mus.

    NPN 1 XWM 29: 10BCD, 11ABC, 11D-12A, 12BCD

    Txais: (13b) Tswv Ntuj muaj hwj huam, peb cav txog koj lub npe muaj hwj chim.

    Thov kom koj nto koob meej, Huab Tais,"
    His Xas Lais tus Tswv Ntuj, peb Leej Txiv,
    kom koj nto koob meej mus li ib txhiab ib txhis.

    Txais: (13b) Tswv Ntuj muaj hwj huam, peb cav txog koj lub npe muaj hwj chim.

    Huab Tais, koj yog tus loj, tus muaj hwj huam,
    tus muaj hwj chim, tus ci ntsa iab, tus nto koob meej,
    vim tas txhua yam nyob saum ntuj thiab nyob ntiaj teb yog koj li.

    Txais: (13b) Tswv Ntuj muaj hwj huam, peb cav txog koj lub npe muaj hwj chim.

    Huab Tais, koj yog tus tseem vaj ntxwv,
    koj yog tus nyob siab ua txhua leej tus hau.
    Kev nplua nuj thiab kev muaj koob nto npe yog koj pub.

    Txais: (13b) Tswv Ntuj muaj hwj huam, peb cav txog koj lub npe muaj hwj chim.

    Koj kav tas txhua tsav txhua yam,
    Koj txhais tes tuav lub hwj huam thiab lub peev xwm,
    koj yog tus muab txoj kev ua hlob thiab lub zog rau txhua leej.

    Txais: (13b) Tswv Ntuj muaj hwj huam, peb cav txog koj lub npe muaj hwj chim.

    As Les Lus yas: ZAM 10: 27

    Txais: As les lus yas, as les lus yas.

    Huab Tais hais tias, kuv cov yaj mloog kuv lub suab;
    kuv paub lawv, lawv raws nraim kuv qab mus.

    Txais: As les lus yas, as les lus yas.

    Ntawv Moo Zoo: LK 19: 45-48

    45 Yes Xus chaws mus hauv lub Tuam Tsev Teev Ntuj, ces nws ntiab cov neeg muag toob xib kom tawm khiav, nws hais rau lawv tias : 46 "Ntawv sau hais tias : Kuv lub tsev yog tsev teev Ntuj, tab sis nej muab ua ib lub qhov tsua rau tub sab nkaum." 47 Yes Xus niaj hnub qhuab qhia nyob hauv lub Tuam Tsev Teev Ntuj. Cov Thawj Leej Choj, cov Kws Ntawv Ntshiab, thiab pej xeem cov thawj coj nrhiav ib txog kev muab nws tua. 48 Tab sis lawv nrhiav tsis tau tias lawv yuav ua dab tsi, vim tsoom pej xeem nyob dai ncuv rau nws lub ncauj mloog nws cov lus.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 17th February 2018, 3:36 pm

    TIM 25 LUB 11 HLIS 2017

    Hnub Xya Lis Piam Peb Caug Peb Nruab Xyoo A Nruab Lis Piam Xyoo I

    Hwm LN Catherine nyob Alexandria

    Zaj Nyeem Ib: 1 MKN 6: 1-13


    1 Tus vaj Aas Caus Kus mus ncig xyuas cov xeev nyob qaum teb. Nws hnov tias nyob pem Pes Xis teb muaj ib lub nroog hu ua Es Lis Mais uas nto koob meej kawg, vim lub nroog ntawd nplua nuj thiab muaj nyiaj muaj kub ntau. 2 Muaj ib lub tuam tsev teev mlom uas muaj nqes kawg vim muaj ib co kaus mom looj taub hau uas yog kub, muaj ib co hlau thaiv hauv siab thiab muaj riam muaj phom uas As Lev Xas Daws, yog Fis Lis Pos tus tub thiab yog thawj tug vaj Mas Xes Dos Nias kav cov neeg Hes Las tau muab tso tseg rau hauv. 3 Tus vaj Aas Caus Kus sim mus ntaus kom tau lub nroog ntawd nws thiaj tau lwg lub nroog; tab sis nws ntaus tsis tau, vim cov neeg nyob hauv lub tsheej xub paub ua ntej lawm. 4 Lawv tuav riam tuav phom tiv nws. Ces nws tso tes khiav tawm ntawm thaj tsam ntawd thiab npaj yuav rov los mus rau Npas Npis Los, nws tu siab kawg. 5 Thaum Aas Caus Kus tseem nyob Pes Xis teb, luag tuaj hais rau nws tias nws cov tub rog uas mus rau Yus Das teb tawg tas lawm. 6 Lis Xias uas tau coj ib pab tub rog coob mus, tau raug cov His xas Lais muab lawv caum rov qab tas. Cov His Xas Lais muaj zog tuaj lawm, vim lawv tau cov hmuv cov ntaj, cov neeg thiab ntau yam uas lawv txeeb tau ntawm cov tub rog lawv ntaus yeej los. 7 Lawv tau rhuav lub thaj txi dab uas Aas Caus Kus tau tsa rau saum lub thaj txi Ntuj nyob Yes Lus Xas Les, thiab lawv tau tsa tej lub ntsa siab siab ib yam li thaum ub xov thaj chaw Ntshiab thiab xov Aas Caus Kus lub nroog Npes Txus lawm. 8 Tus vaj hnov li ntawd mas nws ntshai heev thiab nws poob siab loj. Nws tu siab kawg nkaus rau qhov tias nws ua tsis tau raws li nws xav, ces nws cia li mob thiab nyob saum txaj lawm xwb. 9 Nws nyob li ntawd hauv txoj kev tu siab tau ntau hnub. 10 Thaum nws paub tias nws yuav tuag, nws hu nws cov phooj ywg tuaj tas huv tib si, nws hais rau lawv tias : "Kuv lub qhov muag yuav qi me me tsis tau li, kuv lub siab ntxhov hnyo xwb. 11 Kuv hais rau kuv tus kheej tias : ‘Cas kuv thiaj tau txoj kev txom nyem loj npaum no?! Cas kuv thiaj muaj kev tu siab ntws lug li no?! Thaum kuv tseem muaj hwj chim mas kuv ua zoo, thiab luag kuj nyiam kuv kawg thiab!’ 12 Tab sis nyem no kuv rov nco txog tej yam phem uas kuv tau ua nyob Yes Lus Xas Les lawm. Kuv tau nqa tej cuab yeej kub thiab nyiaj uas nyob hauv tawm tas los, thiab kuv tau kom neeg muab cov neeg Yus Das mus tua pov tseg dawb dawb, lawv tsis muaj txhaum dab tsi li. 13 Kuv lees tias yog vim kuv tau ua li ntawd, mas nyem no kuv thiaj tau raug txoj kev txom nyem li no. Zaum no kuv yuav tuag nyob hauv txoj kev tu siab loj tas nrho, nyob hauv ib lub teb chaws tsis yog kuv lub."

    NPN 9: 2-3, 4+6, 16+19

    Txais: 16a) Huab Tais, kuv yuav zoo siab nyob hauv koj txoj kev cawm.

    HUAB TAIS, kuv muab tas kuv siab ntsws los ua koj tsaug,
    kuv yuav tshaj txog koj cov hauj lwm tsim nyog qhuas.
    Kuv zoo siab kuv hom khaj nyob hauv koj,
    kuv hu nkauj cav txog koj lub npe, tus Nyob Siab.

    Txais: 16a) Huab Tais, kuv yuav zoo siab nyob hauv koj txoj kev cawm.

    Thaum kuv cov yeeb ncuab thim rov qab,
    lawv tawg tas, lawv tuag ntawm koj xub ntiag.
    Koj tsawm cov kuj cuab, koj txo tus tsis hwm Ntuj,
    koj tshem lawv lub npe kom ploj mus ib txhis.

    Txais: 16a) Huab Tais, kuv yuav zoo siab nyob hauv koj txoj kev cawm.

    Tsoom kuj cuab zom rau hauv lub qhov lawv tau khawb,
    lawv ko taw daig hauv rooj ntxiab uas lawv tau cuab.
    Cov pluag yuav tsis raug luag tsis nco qab lawv ntxiv,
    cov txom nyem yuav muaj qhov chaw tso siab.

    Txais: 16a) Huab Tais, kuv yuav zoo siab nyob hauv koj txoj kev cawm.

    As Les Lus yas: 2 TM 1: 10

    Txais: As les lus yas, as les lus yas.

    Peb tus Cawm Seej Yes Xus Pleev twb rhuav txoj kev tuag lawm,
    thiab nws ua kom txoj sia ci tawm tuaj nyob hauv lub Moo Zoo.

    Txais: As les lus yas, as les lus yas.

    Ntawv Moo Zoo: LK 20: 27-40

    27 Muaj ob peb tug Xas Dus Kais txav los, lawv yog cov uas hais tias neeg tuag tsis muaj kev sawv rov los. 28 Lawv nug Yes Xus tias : "Mais Xes sau cia rau peb tias : Yog leej twg tus kwv tij tuag lawm, tseg poj niam cia tsis tau muaj me nyuam li, mas tus kwv yuav tsum qaws tus poj ntsuam kom tsa tau tus kwv tij uas tuag lawd lub keeb sawv. 29 Muaj xya leej kwv tij, thawj tug yuav poj niam, nws tuag tsis tau muaj tub ki li. 30 Ces tus ob kuj ib yam, 31 thiab tus peb kuj ib yam nkawd qaws tus poj niam ntawd. Ces tas lawv xya leej puav leej ua ib yam li ntawd; lawv tuag tas huv si tsis muaj tub ki li. 32 Thaum kawg, tus poj niam kuj tuag lawm thiab. 33 Ua li mas thaum txog lub zim txwv cov tuag sawv rov los, tus poj niam ntawd yuav yog leej twg tus poj niam ? Vim lawv xya leej tau yuav nws ua poj niam huv si." 34 Yes Xus thiaj hais rau lawv tias : "Cov tub ki hauv lub caij no sib qaws ua txij ua nkawm thiab tseem rov yuav txiv tshiab yuav niam tshiab dua. 35 Tab sis cov uas raug txiav txim tias lawv tsim nyog mus nyob fab lwm tiam, thiab tsim nyog sawv hauv cov tuag rov los, mas lawv tsis yuav poj niam thiab tsis yuav txiv. 36 Lawv yuav tsis txawj tuag ntxiv, vim lawv yuav zoo li cov Tshiab thiab lawv yog Tswv Ntuj cov tub, uas yog kev sawv rov los cov tub. 37 Hais txog tias cov tuag yuav sawv rov los, mas Mais Xes twb qhia txog qhov ntawd nyob hauv zaj hais txog Tsob Pos, thaum nws hu Huab Tais ua Has Nplas Has tus Tswv Ntuj, His Xas Has tus Tswv Ntuj, thiab Yas Kos tus Tswv Ntuj. 38 Vim tias Tswv Ntuj tsis yog cov tuag tus Tswv Ntuj, nws yog cov ciaj tus Tswv Ntuj; sawv daws muaj txoj sia nyob hauv nws." 39 Ob peb tug Kws Ntawv Ntshiab qhib ncauj hais tias : "Xib Hwb, koj teb tau zoo kawg." 40 Ces lawv tsis muaj cuab kav nug Yes Xus ib lo lus dab tsi ntxiv.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 18th February 2018, 8:08 am

    TIM 27 LUB 11 HLIS 2017

    Hnub Ob Lis Piam Peb Caug Plaub Nruab Xyoo A Nruab Lis Piam Xyoo I

    Zaj Nyeem Ib: DN 1: 1-6, 8-20


    1 Thaum Zos Yas Kis ua vaj kav Yus Das teb tau peb xyoo, mas tus vaj Nas Npws Kos Dos Nos Xos nyob Npas Npis Los tuaj ntaus vij Yes Lus Xas Les. 2 Huab Tais tso tus vaj Zos Yas Kis uas kav Yus Das teb thiab ib co twj siv hauv Tswv Ntuj lub Tuam Tsev poob rau hauv nws tes. Nws thiaj coj lawv mus rau teb chaws Xis Nes As; nws coj cov twj mus ceev cia rau hauv nws lub tuam tsev teev nws cov dab lub txhab nyiaj. 3 Nws txib As Pes Nas uas yog tus tswj nws cov neeg sam kom xaiv ib co me nyuam uas yog noob vaj ntxwv los noob nom nyob hauv tsoom His Xas Lais. 4 Yuav xaiv cov me nyuam tsis muaj chaw xyeej, muaj lub meej mom zoo nraug, ntse thiab thoob tsib, paub txuj, thiab muaj kev to taub txog tej txuj ci, tsim nyog tuaj nyob hauv tus vaj lub loog, thiab yuav kawm tau cov ntawv thiab cov lus Kas Dias. 5 Tus vaj niaj hnub qee nws cov zaub mov, tej dej cawv pub rau lawv noj lawv haus. Yuav cia lawv kawm puv peb xyoos mam cia lawv los ua tus vaj cov tub ncig. 6 Nyob hauv pab ntawd muaj plaub tug yog neeg Yus Das : muaj Das Nias, As Nas Nias, Mis Xas Ees thiab As Xas Lias.
    8 Tiam sis Das Nias txiav txim siab caiv tsis nrog luag noj tsis nrog luag noj haus tus vaj tej zaub mov thiab tej dej caw kom nws txhob poob rau hauv txoj kev tsis dawb huv, nws thiaj thov tus tswj cov neeg sam kom pub nws caiv tsis noj tej yam tsis huv ntawd. 9 Tswv Ntuj tshoj tus tswj cov neeg sam kom nws muaj lub siab zoo hlub thiab xav pab Das Nias. 10 Tab sis nws hais rau Das Nias tias : "Kuv ntshai kuv tus txiv huab tais xwb, vim nws yog tus qee tej zaub tej mov rau nej noj thiab tej cawv rau nej haus. Yog nws pom nej cov ntsej muag yuag tshaj cov me nyuam nrog nej ib phaum, mas nej yuav ua teeb meem rau kuv txoj hauj lwm nyob ze ntawm huab tais." 11 Das Nias thiaj hais rau tus tub zov keeb uas yog tus tswj cov neeg sam tso ua tus saib Das Nias, As Nas Nias, Mis Xas Ees thiab As Xas Lias lawv tias : 12 "Kuv thov koj, koj sim koj cov tub txib kaum hnub saib, koj muab zaub rau peb noj thiab muab dej rau peb haus xwb. 13 Koj yuav pom peb lub ntsej muag piv rau cov me nyuam uas noj tus vaj tej qav tej hno lub ntsej muag, ces koj mam yuav ua rau koj cov tub txib raws li koj tau pom." 14 Tus saib lawv pom zoo ua raws li Das Nias thov, nws thiaj cia lawv sim kaum hnub. 15 Dhau kaum hnub tas lawv ntsej muag tshiab tuaj thiab lawv rog dua cov me nyuam noj tus vaj cov qav. 16 Ces tus saib lawv tsis muab tus vaj cov zaub mov cov dej caw rau lawv noj lawv haus ntxiv, nws tsuas muab zaub rau lawv noj xwb. 17 Tswv Ntuj pub txuj ci thiab tswv yim rau plaub tug hluas ntawd kom lawv txawj ntaub txawj ntawv thiab ua neeg thoob tsib. Das Nias tseem txawj txhais tej zaj yees pom thiaj tej dab ntub npau suav thiab. 18 Thaum txog lub caij tus vaj teem kom coj cov me nyuam ntawd tuaj cuag nws, tus tswj cov neeg sam thiaj coj lawv tuaj cuag Nas Npws Kos Dos Nos Xos. 19 Tus vaj nrog tas sawv daws tham, nws pom tias tsis muaj ib tug thoob tsib cuag Das Nias, As Nas Nias, Mis Xas Ees, thiab As Xas Lias lawv li, ces lawv thiaj tuaj ua cov tub ncig nyob ntawm tus vaj xub ntiag. 20 Tus vaj nug lawv txog tej yam yuav tsum muaj kev thoob tsib thiab kev xyuam los teb, mas nws pom tias lawv teb tau zoo tshaj kaum npaug cov txiv neeb txiv yaig uas nyob hauv nws lub teb chaws huv tib si.

    NPN: DN 3: 52, 53, 54, 55, 56

    Txais: (52b) Peb cav txog koj lub koob meej peb qhuas txog koj tas mus li!

    Huab Tais peb phaj txiv tus Tswv Ntuj, thov kom koj nto koob meej,
    tsim nyog cav txog koj tsim nyog qhuas txog koj tshaj tas txhua yam mus li;
    Kom koj lub npe ntshiab muaj hwj chim nto koob meej,
    Tsim nyog cav txog tsim nyog qhuas txog koj tshaj tas txhua yam mus li.

    Txais: (52b) Peb cav txog koj koj lub koob meej peb qhuas txog koj tas mus li!

    Kom koj nto koob meej nyob hauv lub tuam tsev muaj koj lub hwj chim nsthiab,
    Tsim nyog cav txog tsim nyog qhuas txog koj tshaj tas txhua yam mus li.

    Txais: (52b) Peb cav txog koj lub koob meej peb qhuas txog koj tas mus li!

    Kom koj nto koob meej nyob saum koj lub theej kiab hauv koj lub ceeb tsheej,
    Tsim nyog cav txog tsim nyog qhuas txog koj tshaj tas txhua yam mus li.

    Txais: (52b) Peb cav txog koj lub koob meej peb qhuas txog koj tas mus li!

    K0m koj nto koob meej, koj tus zaum saum koj lub theej kiab
    uas txawb saum cov dab kes lus npis tsom rau hauv qab thu tob;
    Tsim nyog cav txog tsim nyog qhuas txog koj tshaj tas txhua yam mus li.

    Txais: (52b) Peb cav txog koj peb qhuas txog koj tas mus li!

    Kom koj nto koob meej nyob saum lub ntuj ntsuab saum ntuj,
    Tsim nyog cav txog koj tsim nyog qhuas txog koj tas mus li..

    Txais: (52b) Peb cav txog koj lub koob meej peb qhuas txog koj tas mus li!

    As Les Lus yas: MT 24: 42A, 44

    Txais: As les lus yas, as les lus yas.

    Nej yuav tsis txhob tsaug zog,
    Vim nej tsis paub tias Neeg Leej Tub yuav los lub caij twg.

    Txais: As les lus yas, as les lus yas

    Ntawv Moo Zoo: LK 21: 1-4


    1 Yes Xus tsa muag ntsia, nws pom ib co neeg nplua nuj tso nyiaj pub rau hauv lub txhab ceev nyiaj. 2 Nws kuj pom ib tug poj ntsuam pluag pluag tso ob lub txiaj toog thiab. 3 Ces nws hais tias : "Kuv hais tseeb rau nej tias tus poj ntsuam pluag pluag no tso ntau tshaj sawv daws huv tib si. 4 Vim tias tas cov neeg ntawd, lawv pub lawv cov nyiaj seem xwb. Tab sis tus poj ntsuam ntawd nws muab hauv nws txoj kev pluag los, nws pub tas nrho qhov nws yuav siv."

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 18th February 2018, 8:27 am

    TIM 28 LUB 11 HLIS 2017

    Hnub Peb Lis Piam Peb Caug Plaub Nruab Xyoo A Nruab Lis Piam Xyoo I

    Zaj Nyeem Ib: DN 2: 31-45


    31 Das Nias hais rau tus vaj Nes Npws Kos Dos Nos Xos tias : "Vaj ntxwv, koj tau yees pom ib yam tawm tuaj. Koj tau pom ib tug mlom loj loj ci kawg nkaus sawv nyob ntawm koj xub ntiag. Nws muaj hwj xyeej txaus ntshai kawg. 32 Tus mlom ntawd lub taub hau yog tseem kub. Nws lub hauv siab thiab ob txhais npab yog nyiaj. Nws lub plab thiab ob txhais ncej puab yog tooj dub. 33 Ob txhais ceg yog hlau. Ob txhais ko taw yog hlau xyaw ib nrab av nplaum. 34 Koj tseem ntsia tus mlom ntawd, koj pom dheev ib lub pob zeb cia li plam plaws tsis muaj tes mus chwv li, ntog los tsoo tus mlom, nws ob txhais ko taw uas yos hlau thiab av sib xyaws tawg ua daim tas. 35 Ces hlau, av, tooj, nyiaj, thiab kub cia li tib txhij ntsoog tas ua zoo li cov npluag nplej tom tshav ntaus nplej thaum lub caij ntuj so lawm xwb. Cua tuaj muab tshuab ya tas tsis tshuav ib qho li. Lub pob zeb uas ntog los tsoo tus mlom cia li txia ua ib lub roob loj loj puv tas ntiaj teb.
    36 Koj zaj npau suav yog zoo li ntawd. Peb kuj yuav txhais lub ntsiab nyob ntawm koj vaj xub ntiag thiab. 37 Vaj ntxwv, koj yog tus vaj kas tas tsoom vaj. Vim tus Tswv Ntuj kav lub ntuj tau pub kev ua vaj, pub hwj huam, lub zog thiab hwj chim rau koj. 38 Cov tib neeg, cov tsiaj nyob nruab nrag, cov me noog ya saum ntuj, txawm lawv nyob qhov twg los nws tso rau hauv koj txhais tes kom koj ua tus tswj lawv huv tib si. Koj yog lub taub hau kub ntag. 39 Yuav muaj dua ib tug vaj sawv lawv koj qab, yuav tsis loj npaum koj. Thiab tseem yuav muaj dua tus peb, yog tooj, nws yuav kav tas ntiaj teb.
    40 Kuj tseem yuav muaj dua ib tug vaj, yog tus plaub, nws yuav tawv cuag hlau, uas tsoo kom txhua yam tawg ua hmoov tas thiab swb nws tas; xws li hlau tsoo kom txhua yam tawg, nws kuj yuav tsoo cov ntawd kom ua hmoov tas thiab vau tas. 41 Ob txhais ko taw thiab ntiv taw koj pom uas yog ib nrab hlau ib nrab av nplaum, txhais tias yuav yog ib lub teb chaws muaj kev sib tawg, tiam sis nws kuj yuav muaj zog li hlau thiab, raws li koj pom muaj hlau xyaw av. 42 Ob txhais taw ib nrab hlau ib nrab av ntawd, kuj yog txhais tias lub teb chaws muaj ib feem tawv, muaj ib feem muag luav. 43 Xws li koj tau pom muaj hlau xyaw av, kuj yog hais tias lawv yuav nrhiav kev sib haum nyob hau txoj kev sib yuav, tab sis lawv yuav sib koom tsis tau, ib yam li hlau xyaw tsis tau av.
    44 Thaum lub caij cov vaj ntawd kav teb chaws, tus Tswv Ntuj kav lub ntuj yuav tsa ib lub teb chaws ua vaj uas yuav tsis muaj neeg rhuav tau thiab yuav tsis poob nyob hauv lwm haiv neeg txhais tes ib zaug li. Lub teb chaws ntawd yuav rhuav thiab tsuj lwm cov teb chaws huv tib si. Nws yuav nyob mus li tas ib txhiab ib txhis. 45 Yog lub ntsiab ntawm lub pob zeb uas koj pom ntog pem roob los tsis tau muaj neeg kov, nws ntog los tsoo av, hlau, tooj, nyiaj, thiab kub ntsoog tas. Ua li mas yog tus Tswv Ntuj loj tau qhia tus vaj txog tej yam yuav tshwm sim yav tom ntej. Zaj npau suav yeej muaj raws nraim li no, thiab nws lub ntsiab yeej tseeb tiag."

    NPN: DN 3: 57, 58, 59, 60, 61

    Txais: (59b) Nej cav txog nws lub koob meej
    thiab qhuas txog nws mus li.

    Tas ib puas tsam yam tawm ntawm Huab Tais
    txhais tes los, nej foom lus zoo rau Huab Tais,
    nej cav txog nws nej tsa nws nyob siab tshaj
    tas txhua yam mus ib txhiab ib txhis !

    Txais: (59b) Nej cav txog nws lub koob meej
    thiab qhuas txog nws mus li.

    Tas Huab Tais ib tsoom Tshiab,
    nej foom lus zoo rau Huab Tais,
    nej cav txog nws nej tsa nws nyob siab tshaj
    tas txhua yam mus ib txhiab ib txhis !

    Txais: (59b) Nej cav txog nws lub koob meej
    thiab qhuas txog nws mus li.

    Cov txheej ntuj, nej foom lus zoo rau Huab Tais,
    nej cav txog nws nej tsa nws nyob siab tshaj
    tas txhua yam mus ib txhiab ib txhis !

    Txais: (59b) Nej cav txog nws lub koob meej
    thiab qhuas txog nws mus li.

    Cov dej nyob txheej ntuj saud, nej foom lus zoo rau Huab Tais,
    nej cav txog nws nej tsa nws nyob siab tshaj
    tas txhua yam mus ib txhiab ib txhis !

    Txais: (59b) Nej cav txog nws lub koob meej
    thiab qhuas txog nws mus li.

    Nej sawv daws cov muaj hwj huam nyob saum ntuj,
    nej foom lus zoo rau Huab Tais,
    nej cav txog nws nej tsa nws nyob siab tshaj
    tas txhua yam mus ib txhiab ib txhis !

    Txais: (59b) Nej cav txog nws lub koob meej
    thiab qhuas txog nws mus li.

    As Les Lus yas: QYTN 2: 10C

    Txais: As les lus yas, as les lus yas.

    Koj ntseeg ruaj nreb mus txog hnub tuag,
    Ces kuv yuav muab txoj sia ua koj lub mom teev kub.

    Txais: As les lus yas, as les lus yas.

    Ntawv Moo Zoo: LK 21: 5-11

    5 Thaum ntawd, ib txhia hais tias lub Tuam Tsev Teev Ntuj txhim tau pob zeb zoo nkauj rau thiab muaj tej paj tshab txi Ntuj ua kom zoo saib. Yes Xus hais tias : 6 "Tej uas nej qhov muag pom ntawm no, muaj ib hnub yuav tsis muaj ib lub pob zeb tseem tshooj ib lub cia uas yuav tsis pob tas rau hauv av." 7 Lawv nug Yes Xus tias : "Xib Hwb, thaum twg tej ntawd mam li tshwm sim tuaj, thiab yuav muaj lub cim dab tsi thaum tej ntawd yuav tshwm sim tuaj ?”
    8 Yes Xus hais tias : "Nej ceev faj txhob cia luag ua kom nej yuam kev. Vim yuav muaj coob leej siv kuv lub npe tuaj, lawv yuav hais tias : ‘Kuv yog nws,’ thiab yuav hais tias : 'Lub zim txwv twb los txog lawm'. Mas nej txhob mus raws lawv.
    9 Thaum nej hnov luag tham txog kev ua tsov ua rog thiab kev kub ntxhov, mas nej tsis txhob ntshai. Vim tias tej ntawd yuav tsum xub tshwm sim tuaj tso, tab sis tsis tau txog lub zim txwv kawg tam sis ntawd." 10 Yes Xus hais rau lawv tias : "Ib haiv neeg yuav sawv los ntaus lwm haiv neeg, ib lub teb chaws yuav sawv los ntaus lwm lub teb chaws. 11 Yuav muaj av qeeg loj, thiab nyob ntau qhov chaw, muaj tshaib plab thiab muaj mob aws; kuj yuav muaj tej yam xwm txaus ntshai kawg, thiab tej lub cim loj tawm saum ntuj tuaj. “

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 18th February 2018, 8:41 am

    TIM       29      LUB      11      HLIS       2017

    Hnub Plaub Lis Piam Peb Caug Plaub Nruab Xyoo A Nruab Lis Piam Xyoo I  

    Zaj Nyeem Ib:       DN  5:   1-6, 13-14, 16-17, 23-28


    1 Tus vaj Npas Tas Xas ua ib roog qav loj rau nws cov nom cov tswv noj, lawv muaj li ib txhiab leej tuaj; tus vaj haus cawv nyob ntawm lawv ib txhiab leej ntawd xub ntiag. 2 Thaum Npas Tas Xas saj cov cawv lawm, nws txib kom luag nqa cov tais kub tais nyiaj uas nws txiv Nas Npws Kos Dos Nos Xos muab tau hauv lub Tuam Tsev Teev Ntuj nyob Yes Les Xas Les nqa los, kom tus vaj nrog nws cov nom cov tswv, nws cov poj niam, cov hluas nkauj seev cev tau siv los haus dej haus cawv. 3 Luag thiaj nqa tau cov ntim kub ntim nyiaj uas muab hauv Tswv Ntuj lub Tuam Tsev nyob Yes Lus Xas Les tuaj. Ces tus vaj thiab nws cov nom cov tswv, cov poj niam, cov hluas nkauj seev cev lawv tau muab siv haus dej haus cawv. 4 Thaum lawv haus dej haus cawv li ntawd, lawv hais tej zaj cav txog lawv cov dab mlom nyiaj mlom kub, mlom tooj mlom hlau, thiab mlom zeb mlom ntoo. 5 Ib sij huam, txawm pom ib co ntiv tes nrog txhais tes neeg yees tawm tuaj nyob ntawm tus ncej teeb sab tid, sau sau ntawv rau saum lub phab ntsa hmoov zeb sib hauv tus vaj lub tsev. Tus vaj pom xyeem kiag txhais tes sau ntawv. 6 Ces tus vaj txawm ua ntsej muag puas nyas, nws ua siab poob nthav, nws lub ntsag tej leeg muag tas, nws ob lub hauv caug sib tsoo zom zaws.
    13 Lawv thiaj mus hu Das Nias tuaj rau ntawm tus vaj. Tus vaj nug Das Nias tias : "Koj puas yog Das Nias, ib tug Yus Das nyob hauv pab neeg nyob txim uas kuv txiv coj Yus Das teb los ? 14 Kuv hnov tias Tswv Ntuj lub tswv yim nyob hauv koj. Koj muaj qhov pom kev, muaj kev txawj kev ntse kev thoob tsib zoo kawg nkaus nyob hauv koj no.
    16 Kuv tseem hnov tias koj txawj txhais tej yam thiab txawj daws teeb meem no, yog tias koj twm tau thiab txhais tau cov ntawv no lub ntsiab rau kuv mas kuv yuav muab lub tsho tsam xem rau koj hnav, muab saw kub rau koj coj ntawm caj dab, thiab tsa koj ua tus nom peb tswj lub teb chaws." 17 Das Nias teb rau tus vaj tias : "Cia muab koj cov paj tshab rov rau koj tus kheej, thiab muab koj cov khoom plig pub rau lwm tus. Kuv mam cia li twm cov ntawv no rau tus vaj thiab txhais lub ntsiab rau nws xwb.
    23 Koj tau tsa koj siab, koj tau tiv tus Huab Tais kav lub ntuj lawm, vim koj tau kom luag nqa cov twj nyob hauv Huab Tais lub Tuam Tsev los rau koj thiab koj cov nom cov tswv, cov poj niam thiab cov hluas nkauj seev cev, nej tau muab siv haus dej haus cawv, nej tau cav txog nej cov dab mlom kub mlom nyiaj, mlom tooj mlom hlau, mlom ntoo mlom pob zeb uas lawv tsis txawj hnov lus, tsis txawj pom kev, tsis muaj tswv yim dab tsi li. Nej tsis cav txog tus Tswv Ntuj uas nws tuav rawv nej txoj sia rau hauv nws txhais tes thiab nws coj rawv nej taug kev hauv nej lub neej li. 24 Nws thiaj tau xa txhais tes ntawd tuaj kos cov npe ntawv no. 25 Cov ntawv no yog sau li no:  Maws Nes, Maws Nes, Taws Kes, Pas Xis. 26 Cov lus ntawd yog txhais li no : Maws Nes, txhais tias : Tswv Ntuj tau ntsuas koj lub teb chaws thiab tau muab nws rhuav tas lawm. 27 Taws Kes, txhais tias : Tswv Ntuj tau luj koj saum teev. Koj hnyav tsis txaus. 28 Pas Xis, txhais tias : koj lub teb chaws raug muab faib lawm, ib qho rau cov Mes Dias, ib qho rau cov Pes Xis."

    NPN:       DN  3:   62, 63, 64, 65, 66, 67

    Txais:   (59b) Nej ua kom nws nto koob meej thiab nej cav txog nws mus li.

    Nkauj hnub nraug hli, nej foom lus zoo rau Huab Tais,
    neb cav txog nws, nej tso nws nyob siab
    dua tas txhua yam mus li ib txhiab ib txhis !

    Txais:   (59b) Nej ua kom nws nto koob meej thiab nej cav txog nws mus li.

    Cov hnub qub nyob saum ntuj, nej foom lus zoo rau Huab Tais,
    neb cav txog nws, nej tso nws nyob siab
    dua tas txhua yam mus li ib txhiab ib txhis !

    Txais:   (59b) Nej ua kom nws nto koob meej thiab nej cav txog nws mus li.

    Cov nag cov lwg, nej foom lus zoo rau Huab Tais,
    neb cav txog nws, nej tso nws nyob siab
    dua tas txhua yam mus li ib txhiab ib txhis !

    Txais:   (59b) Nej muab lub koob meej rau nws thiab cav txog nws mus li.

    Cov cua, nej foom lus zoo rau Huab Tais,
    neb cav txog nws, nej tso nws nyob siab
    dua tas txhua yam mus li ib txhiab ib txhis !

    Txais:   (59b) Nej ua kom nws nto koob meej thiab nej cav txog nws mus li.

    Cov hluav taws qhov kub, nej foom lus zoo rau Huab Tais,
    neb cav txog nws, nej tso nws nyob siab
    dua tas txhua yam mus li ib txhiab ib txhis !

    Txais:   (59b) Nej ua kom nws nto koob meej thiab nej cav txog nws mus li.

    Lub caij no caij sov, nej foom lus zoo rau Huab Tais,
    neb cav txog nws, nej tso nws nyob siab
    dua tas txhua yam mus li ib txhiab ib txhis !

    Txais:   (59b) Nej ua kom nws nto koob meej thiab nej cav txog nws mus li.

    As Les Lus Yas:       QYTN  2:   10C


    Txais:   As les lus yas, as les lus yas.    

    Koj ntseeg ruaj nreb mus txog hnub tuag,
    Ces kuv yuav muab txoj sia ua koj lub mom teev kub.

    Txais:   As les lus yas, as les lus yas.

    Ntawv Moo Zoo:       LK  21:   12-19

    Yes Xus hais rau lawv tias:
    12 Tab sis ua ntej ib puas tsav yam ntawd, luag yuav cev tes ntes nej, thiab yuav hiam nej, coj nej mus kom rau cov tsev txoos thiab tsev loj faj, cab nej mus rau ntawm cov vaj thiab cov nom tswj teb chaws xub ntiag vim kuv lub npe. 13 Qhov ntawd yuav yog ib lub zoo sij hawm rau nej ua tim khawv. 14 Nej khaws rau nruab siab tias nej yuav tsis txhob xub npaj tias nej yuav hais li cas thiaj yeej. 15 Vim kuv yuav muab ib lub ncauj thiab ib txog kev thoob tsib rau nej, ces cov ntxub nej yuav tsis muaj peev xwm tiv tau thiab cav tau nej li. 16 Tab yog nej niam nej txiv, nej cov kwv tij, cov txheeb ze, thiab cov phooj ywg, los lawv tseem yuav mus kom nej thiab, thiab yuav muab nej ib txhia rau luag tua. 17 Tas sawv daws yuav ntxub nej vim kuv lub npe. 18 Tab sis tsis muaj ib txoj plaub hau saum nej taub hau yuav ploj li. 19 Nej ua siab ruaj nreb kom tom thawj, ces nej yuav tau txais nej txoj sia."

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 18th February 2018, 9:21 am

    TIM 30 LUB 11 HLIS 2017

    Hnub Tsib Lis Piam Peb Caug Plaub Nruab Xyoo A Nruab Lis Piam Xyoo I

    Hwm LN As Nres, ua Hauv Paus Xa Lus

    Zaj Nyeem Ib: LOS MAS 10: 9-18


    Paj Lug sau ntawv rau cov neeg Los Mas tias:
    9 Yog koj di ncauj lees tias Yes Xus yog Huab Tais, thiab koj lub siab ntseeg tias Tswv Ntuj tau tsa Yes Xus sawv hauv cov tuag rov los, mas koj yuav txais kev cawm. 10 Vim lub siab uas ntseeg tiag ua kom tus neeg ncaj tuaj, thiab lub ncauj uas lees ntseeg ua kom tus neeg tau txais kev cawm. 11 Muaj ntawv sau cia tias : ‘Txhua tus ntseeg txog nws, yuav tsis poob ntsej muag.’ 12 Li ntawd, cov Yus Das thiab cov Hes Las tsis sib txawv dab tsi li; sawv daws muaj ib tug Huab Tais xwb, uas pub nplua mias rau cov neeg hu txog nws. 13 Vim tias : ‘Leej twg hu txog Huab Tais lub npe, nws yuav tau txais kev cawm.’ 14 Yog li ntawd, cov uas tsis tau ntseeg txog Huab Tais, lawv yuav ua cas thov nws ? Hos cov tsis tau hnov txog nws, lawv yuav ua cas ntseeg ? Thiab lawv yuav ua cas hnov txog nws, yog tsis muaj tus tshaj lub Moo Zoo li? 15 Leej twg ho yuav ua cas tshaj lub Moo Zoo yog tsis muaj tus xa nws mus? Muaj ntawv sau cia tias : ‘Cov neeg xa lub moo zoo, cas lawv ko taw yuav zoo nkauj ua luaj li!’ 16 Tab sis tsis yog txhua leej tau mloog lub Moo Zoo, vim His Xais hais tias : ‘Huab Tais, leej twg thiaj ntseeg cov lus lawv hnov ntawm peb?’ 17 Li ntawd, kev ntseeg txhawv ntawm kev hnov lo lus los, uas yog hnov Leej Pleev lo lus. 18 Ces kuv nug tias : ‘Ua li lawv puas tau hnov lo lus ? Lawv yeej yuav tsum tau hnov xwb, vim tias: ‘Lawv lub suab twb ntxhe mus thoob ntiaj teb, thiab lawv cov lus twb nrov mus txog tim npoo ntuj kawg lawm.’

    NPN 19: 8, 9, 10, 11

    Txais: (10) Huab Tais cov kev txiav txim yog qhov tseeb, txhua yam yog ncaj ncees..
    los: (Zam 6:63) Koj cov lus, Huab Tais, yog ntsuj plig thiab yog txoj sia.

    HUAB TAIS txoj cai zoo tas nrho,
    nws ntxiv siav rau tus ntsuj plig;
    HUAB TAIS tus txhooj yog qhov tseeb,
    txawj ua kom tus neeg ruam thoob tsib tuaj.

    Txais: (10) Huab Tais cov kev txiav txim yog qhov tseeb, txhua yam yog ncaj ncees..
    los: (Zam 6:63) Koj cov lus, Huab Tais, yog ntsuj plig thiab yog txoj sia.

    HUAB TAIS cov lus qhuab qhia yog lus ncaj
    ua kom neeg lub siab kaj.
    HUAB TAIS lo lus qhia ntshiab si,
    ua kom neeg qhov muag pom kev.

    Txais: (10) Huab Tais cov kev txiav txim yog qhov tseeb, txhua yam yog ncaj ncees..
    los: (Zam 6:63) Koj cov lus, Huab Tais, yog ntsuj plig thiab yog txoj sia.

    Kev hwm HUAB TAIS yog kev dawb huv,
    kev hwm Huab Tais yuav nyob mus li.
    HUAB TAIS cov lus txiav txim yog lus tseeb,
    yog lus ncaj ncees tas huv si.

    Txais: (10) Huab Tais cov kev txiav txim yog qhov tseeb, txhua yam yog ncaj ncees..
    los: (Zam 6:63) Koj cov lus, Huab Tais, yog ntsuj plig thiab yog txoj sia.

    HUAB TAIS cov lus tsim nyog ntshaw dua kub,
    tsim nyog ntshaw dua ib txhab tseem kub,
    Nws cov lus qab zib dua zib ntab,
    qab zib tshaj cov zib nas muv.

    Txais: (10) Huab Tais cov kev txiav txim yog qhov tseeb, txhua yam yog ncaj ncees..
    los: (Zam 6:63) Koj cov lus, Huab Tais, yog ntsuj plig thiab yog txoj sia.

    As Les Lus Yas: MT 4: 19

    Txais: As les lus yas, as les lus yas.

    Huab Tais hais tias: Nej raws kuv mus,
    Kuv yuav tsa nej ua cov tub puav neeg.

    Txais: As les lus yas, as les lus yas.

    Ntawv Moo Zoo: MT 4: 18-22

    18 Yes Xus mus ko taw taug ntug dej ntuj Nkas Lis Lais, nws pom ob kwv tij : Xis Moos uas hu ua Pob Zeb, thiab nws tus kwv As Nres, nkawd tseem tab tom pov vas ntses rau hauv dej ntuj, vim nkawd yog tub puav ntses. 19 Yes Xus hais rau nkawd tias : "Neb raws kuv mus, kuv yuav tsa neb ua tub puav neeg." 20 Nkawd tso plhuav cov vas ntses tam sis ntawd, nkawd raws Yes Xus mus. 21 Yes Xus mus ntxiv, nws ho pom dua ob kwv tij thiab : Yas Kos, uas yog Ntxes Npes Dais tus tub, thiab Zam uas yog Yas Kos tus kwv, nkawd nrog nkawd txiv Ntxes Npes Dais nyob hauv nkoj, lawv tseem tab tom ntxiv lawv cov vas ntaus ntses. Yes Xus hu nkawd. 22 Tam sis ntawd, nkawd tso plhuav lub nkoj thiab nkawd txiv tseg, nkawd raws Yes Xus mus.

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 18th February 2018, 9:30 am

    TIM 1 LUB 12 HLIS 2017

    Hnub Rau Lis Piam Peb Caug Plaub Nruab Xyoo A Nruab Lis Piam Xyoo I

    Zaj Nyeem Ib: DN 7: 2-14


    2 Das Nias piav tias: "Thaum hmo ntuj kuv tau ua yog toog, kuv yees pom plaub nthwv cua tuaj plaub ceg kaum ntuj tuaj ntsawj lub hiav txwv loj loj. 3 Muaj plaub tug tsiaj loj loj tawm hauv lub hiav txwv los, ib tug zoo txawv ib tug. 4 Thawj tus tsiaj zoo xws li ib tug tsov, ho muaj tis xws li dav. Kuv ntsia ntsoov tus tsov ntawd, ua ciav leej twg muab nws cov tis hle tas, thiab muab nws tsa sawv hauv av los sawv ntsug saum ob txhais ko taw xws li neeg, ces lawv muab ib lub siab neeg rau nws. 5 Tus tsiaj ob kuv pom zoo xws li ib tug dais. Nws pheeb rau nws ib sab, nws kwv peb tug pob txha tav ntawm qhov ncauj, nws cov hniav tom rawv. Lawv hais rau nws tias : "Koj sawv mus noj nqaij kom tas ntau ntau !" 6 Tas qhov no lawm, kuv ntsia pom dua ib tug tsiaj ntxiv, zoo li ib tug tsov pom txwv, tuaj plaub tug tis nraum nrob qaum li ib tug noog thiab nws muaj plaub lub taub hau. Ces nws tau txais kev ua nom ua tswv.
    7 Dhau qhov no lawm, kuv rov yees pom dua ib tug tsiaj thaum hmo ntuj, yog tus plaub. Nws txaus ntshai thiab tsiv kawg nkaus, nws muaj zog tas nrho. Nws muaj ib co hniav hlau loj kawg li, nws noj dab tsis mas nws muab zom muab xo tawg tas, tej qhov seem nws muab tsuj ntiag rau hauv av. Tus tsiaj ntawd txawv tas nrho cov xub ua ntej tib si. Nws muaj kaum tus kub thiab. 8 Kuv tseem saib saib cov kub ntawd, ces txawm tuaj kiag ib tug kub ntxiv, tus me me. Muaj peb tug kub loj cia li nkoj cag hlo tawm cia chaw rau tus me nyob. Tus kub no muaj qhov muag xws li qhov muag neeg nyob ntawm tus kub, thiab muaj qhov ncauj; nws hais lus loj kawg nkaus.
    9 Kuv ntsia ntsoov, kuv txawm pom lawv muab ib co theej kiab los teeb rau ntawd, ces tus Laus los zaum saum nws lub theej kiab. Nws cov ris tsho dawb cuag daus, nws cov plaub hau huv cuag plaub yaj. Nws lub theej kiab yog nplaim taws, muaj ib co log uas yog hluav taws. 10 Muaj ib tug dej yog hluav taws txhawv ntws lug ntawm nws hauv ntej los mus. Txhiab txhiab leej tsob hwb nws, vam vam leej sawv ntsug nyob ntawm nws xub ntiag. Lub rooj txiav txim pib lawm, tej ntaub ntawv twb nthuav tas lawm. 11 Kuv ntsia ntsoov txij thaum kuv hnov cov lus loj loj uas tus kub hais mus txog thaum lawv muab tus tsiaj tua kiag thiab muab nws lub cev pov rau hauv hluav taws. 12 Dua li lwm cov tsiaj, lawv kuj poob lawv lub hwj chim ua tus tswj; tiam sis luag rub lawv txoj sia kom lawv nyob ib ntus thiab ib sij hawm ntxiv.
    13 Hmo ntuj kuv kuj tseem yees pom zoo li ib tug Neeg Leej Tub tuaj nyob saum cov huab saum ntuj. Thaum nws los txog ze ntawm tus Laus lawm, lawv coj nws mus cob rau tus Laus. 14 Ces nws txais kev tswj, lub koob meej thiab kev ua vaj. Tas txhia haiv neeg, txhia kuj cuab, txhia xeem lus yuav tsob hwb nws. Nws txoj kev tswj yog ib txog kev tswj nyob mus li tsis txawj kawg. Nws txoj kev ua vaj yuav tsis raug kev puas tsuaj li.

    NPN: DN 3: 75, 76, 77, 78, 79, 80, 81

    Txais: Nej ua kom Huab Tais nto koob meej, nej cav txog nws tas mus li!

    Cov ncov roob siab cov ncov roob qis, nej foom lus zoo rau Huab Tais,
    nej cav txog nws, nej muab nws saib siab
    dua txhua yam tas mus li ib txhiab ib txhis!

    Txais: Nej ua kom Huab Tais nto koob meej, nej cav txog nws tas mus li!

    Tas ib puas tsav yam hlob tuaj tshwm npoo av, nej foom lus zoo rau Huab Tais,
    nej cav txog nws, nej muab nws saib siab
    dua txhua yam tas mus li ib txhiab ib txhis!

    Txais: Nej ua kom Huab Tais nto koob meej, nej cav txog nws tas mus li!

    Cov dej txhawv, nej nej foom lus zoo rau Huab Tais,
    nej cav txog nws, nej muab nws tso nyobsaib siab
    dua txhua yam tas mus li ib txhiab ib txhis!

    Txais: Nej ua kom Huab Tais nto koob meej, nej cav txog nws tas mus li!

    Cov dej ntuj cov dej ntws, nej foom lus zoo rau Huab Tais,
    nej cav txog nws, nej muab nws saib siab
    dua txhua yam tas mus li ib txhiab ib txhis!

    Txais: Nej ua kom Huab Tais nto koob meej, nej cav txog nws tas mus li!

    Cov vaj ntses cov me ntses, nej foom lus zoo rau Huab Tais,
    nej cav txog nws, nej muab nws saib siab
    dua txhua yam tas mus li ib txhiab ib txhis!

    Txais: Nej ua kom Huab Tais nto koob meej, nej cav txog nws tas mus li!

    Cov noog ya saum ntuj, nej foom lus zoo rau Huab Tais,
    nej cav txog nws, nej muab nws saib siab
    dua txhua yam tas mus li ib txhiab ib txhis!

    Txais: Nej ua kom Huab Tais nto koob meej, nej cav txog nws tas mus li!

    Tas ib puas tsav yam tsiaj nyeg tsiaj qus, nej foom lus zoo rau Huab Tais,
    nej cav txog nws, nej muab nws saib siab
    dua txhua yam tas mus li ib txhiab ib txhis!

    Txais: Nej ua kom Huab Tais nto koob meej, nej cav txog nws tas mus li!

    As Les Lus Yas: LK 21: 28

    Txais: As les lus yas, as les lus yas.

    Nej yuav sawv kom ntseg, nej yuav tsa taub hau,
    vim txoj kev cawm nej los txog ze lawm.

    Txais: As les lus yas, as les lus yas.

    Ntawv Moo Zoo: LK 21: 29-33

    29 Yes Xus hais ib zag paj lug tias : "Nej ntsia tsob txiv ncuav pias thiab tas cov ntoo huv tib si. 30 Thaum nplooj pib hlav, nej pom, nej to taub tias ntuj sov los yuav txog. 31 Ntawm nej kuj ib yam thiab : thaum nej pom tej ntawd tshwm sim tuaj, nej yuav to taub tias Tswv Ntuj lub ceeb tsheej los yuav txog. 32 Kuv hais tseeb rau nej tias tiam neeg no tsis tau dua, tas ib puas tsav yam ntawd twb yuav tshwm sim tuaj. 33 Lub ntuj thiab lub ntiaj teb yuav dua mus, tab sis kuv cov lus yuav tsis dua.”

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Mim 18th February 2018, 9:38 am

    TIM 2 LUB 12 HLIS 2017

    Hnub Xya Lis Piam Peb Caug Plaub Nruab Xyoo A Nruab Lis Piam Xyoo I

    Zaj Nyeem Ib: DN 7: 15-27


    15 "Kuv, Das Nias, ua lub siab poob tas nyob hauv kuv lub cev, tej yam kuv lub tswv yim yees pom ua kom kuv ntxhov siab hnyo. 16 Kuv thiaj mus nug ib tug sawv nyob ntawd kom nws qhia qhov tseeb hais txog tej ntawd rau kuv. Nws thiaj teb kuv thiab txhais lub ntsiab rau kuv tias : 17 "Plaub tug tsiaj loj loj ntawd yog plaub tug vaj uas yuav sawv kav hauv ntiaj teb. 18 Tiam sis cov uas txais txoj kev ua vaj yog Leej Nyob Siab cov Ntshiab, lawv yuav txais ua lawv tug mus li tas ib txhiab ib txhis."
    19 Kuv thiaj xav nug kom meej txog tus tsiaj tim plaub uas txawv tshaj lwm cov, txaus ntshai tshaj plaws thiab muaj hniav hlau, muaj rau taw tooj, nws noj dab tsi mas nws muab xo tawg tas huv si thiab muab ko taw tsuj ntiag tej seem rau hauv av. 20 Kuv nug txog kaum tus kub tuaj nyob saum nws taub hau, nug txog tus kub uas hlav tuaj thiab muaj peb tug cia li lov lawm. Kuv nug txog tus kub uas muaj qhov muag muaj qhov ncauj txawj hais lus loj loj thiab zoo li nws muaj tsim dua cov huv si. 21 Vim kuv ntsia ntsoov tus kub ntawd ua rog rau cov Ntshiab thiab nws yeej lawv 22 mus txog thaum tus Laus tuaj txog, ces lawv txiav txim rau Leej Nyob Siab cov Ntshiab yeej, ces thiaj txog lub caij uas cov Ntshiab txais lub ceeb tsheej los ua lawv tug.
    23 Tus neeg ntawd thiaj teb kuv tias : "Tus tsiaj tim plaub ntawd yog ib lub teb chaws muaj vaj ntxwv yuav sawv los nyob hauv ntiaj teb, nws yuav txawv tas cov teb chaws muaj vaj tib si. Nws yuav noj tas lub ntiaj teb, yuav muab rhuav thiab yuav muab tsuj lwj liam tas. 24 Ntawm kaum tus kub mas yog yuav sawv kaum tus vaj nyob hauv lub teb chaws ntawd, thiab yuav muaj dua ib tug vaj lawv cov ntawd qab. Nws yuav txawv cov ua nws ntej tas huv si, thiab nws yuav muab peb tug vaj txo. 25 Nws yuav hais lus thuam Leej Nyob Siab, thiab yuav tsim txom Leej Nyob Siab cov Ntshiab. Nws yuav xav hloov cov caij nyoog thiab Txoj Cai. Cov Ntshiab yuav raug nyob hauv nws xib tes ib lub zim txwv, ib co zim txwv thiab ib nrab zim txwv.
    26 Tab sis thaum txog caij rub rooj txiav txim, luag yuav txo nws lub hwj huam kom poob, kom yaj kom ploj mus kom tas nrho. 27 Ces txoj kev ua vaj thiab txoj kev tswj txoj kev muaj hwj chim nyob tas txhua lub teb chaws hauv lub qab ntuj yuav raug muab rau tus Nyob Siab tsoom ntshiab ua lawv tug. Leej Nyob Siab lub ceeb tsheej yog ib lub ceeb tsheej nyob mus ib txhiab ib txhis. Tas txhua txoj kev tswj yuav tsob hwb nws thiab yuav mloog nws lus.”

    NPN: DN 3: 82, 83, 84, 85, 86, 87

    Txais: Nej ua kom Huab Tais nto koob meej, nej cav txog nws tas mus li!

    Tas ib tsoom tib neeg, nej foom lus zoo rau Huab Tais,
    nej cav txog nws, nej muab nws saib siab
    dua txhua yam tas mus li ib txhiab ib txhis!

    Txais: Nej ua kom Huab Tais nto koob meej, nej cav txog nws tas mus li!

    Tas ib tsoom His Xas Lais, nej foom lus zoo rau Huab Tais,
    nej cav txog nws, nej muab nws saib siab
    dua txhua yam tas mus li ib txhiab ib txhis!

    Txais: Nej ua kom Huab Tais nto koob meej, nej cav txog nws tas mus li!

    Tas ib tsoom Leej Choj, nej foom lus zoo rau Huab Tais,
    nej cav txog nws, nej muab nws saib siab
    dua txhua yam tas mus li ib txhiab ib txhis!

    Txais: Nej ua kom Huab Tais nto koob meej, nej cav txog nws tas mus li!

    Huab Tais tsoom tub txib, nej foom lus zoo rau nws
    nej cav txog nws, nej muab nws saib siab
    dua txhua yam tas mus li ib txhiab ib txhis!

    Txais: Nej ua kom Huab Tais nto koob meej, nej cav txog nws tas mus li!

    Cov ntsuj plig dawb thiaj ncaj, nej foom lus zoo rau Huab Tais,
    nej cav txog nws, nej muab nws saib siab
    dua txhua yam tas mus li ib txhiab ib txhis!

    Txais: Nej ua kom Huab Tais nto koob meej, nej cav txog nws tas mus li!

    Cov neeg siab ntshiab tsis muab hlob,
    nej foom lus zoo rau Huab Tais,
    nej cav txog nws, nej muab nws saib siab
    dua txhua yam tas mus li ib txhiab ib txhis!

    Txais: Nej ua kom Huab Tais nto koob meej, nej cav txog nws tas mus li!

    As Les Lus yas: LK 21: 36

    Txais: As les lus yas, as les lus yas.

    Nej yuav ceev faj txhua lub sij hawm thiab yuav teev Ntuj,
    nej thiaj yuav muaj zog sawv taus ntsug
    nyob ntawm Neeg Leej Tub xub ntiag."

    Txais: As les lus yas, as les lus yas.

    Ntawv Moo Zoo: LK 21: 34-36

    Yes Xus hais rau nws cov thwj tim tias:
    34 “Nej ceev faj kom nej lub siab txhob qaug rau txoj kev quav dej quav cawv thiab txoj kev luab cawv kom qaug, thiab rau lub neej tej kev txob xeeb, tsam nej tsis nco faj ces lub zim txwv ntawd cia li poob nthav los rau saum nej 35 xws li ib lub vas. Vim tias lub zim txwv ntawd yuav los raug txhua leej txhua tus uas nyob saum ntiaj teb daim npoo av. 36 Nej ua ib co neeg feeb meej, thiab nej yuav teev Ntuj txhua lub sij hawm kom nej thiaj muaj zog hla dhau ib puas tsav yam uas yuav tshwm sim tuaj, thiab nej thiaj yuav sawv taus ntsug ntawm Neeg Leej Tub xub ntiag.”


    Sponsored content


    COV ZAJ NYEEM NRUAB LIS PIAM XYOO I   2016-2017 - Page 13 Empty Re: COV ZAJ NYEEM NRUAB LIS PIAM XYOO I 2016-2017

    Post  Sponsored content


      Current date/time is 18th March 2024, 10:14 pm