COV ZAJ NYEEM NRUAB LIS PIAM XYOO I 2016-2017

TIM 12 LUB 9 HLIS 2017

Hnub Peb Lis Piam Nees Nkaum Peb Nruab Xyoo A Nruab Lis Piam Xyoo I

Hwm Niam Mab Liab lub Npe Ntshiab

Zaj Nyeem Ib: KLX 2: 6-15

Cov kwv tij,
6 Nej tau txais tus Huab Tais Yes Xus Pleev lawm, nej kav tsij taug kev nraim nyob hauv nws; 7 nej yeej meem nrhau cag thiab tsa tsev ruaj rau hauv nws. Nej ua kom nej txoj kev ntseeg ruaj nreb khov kho, raws li nej tau kawm los lawm. Nej lub siab yuav tsum puv nkaus cov lus ua Ntuj tsaug. 8 Nej ceev faj kom luag txhob ntxias tau nej qaug mus rau lawv tej zaj tswv yim thiab lawv tej lus dag raws li tib neeg xav, thiab raws li ntiaj teb xav xwb, tsis yog raws li Leej Pleev xav.
9 Nyob hauv Leej Pleev lub hwj chim ua Tswv Ntuj yeej nyob tas nrho hauv nws lub cev ua tib neeg. Nej los nyob hauv Leej Pleev, mas nej kuj tau txais nws lub hwj chim ua Tswv Ntuj huv tib si thiab. 10 Nws yog lub Taub Hau kav tas tsoom Tshiab ua Vaj Txheeb thiab muaj hwj huam. 11 Nej kuj tau txais lub cim txiav tawv nyob hauv Leej PLeev thiab, yog lub cim txiav uas tsis yog neeg txhais tes ua: yog Leej Pleev lub cim txiav, uas muab yus lub cev nqaij hle pov tseg tas huv tib si. 12 Hnub nej txais lub Cim Ntxuav, nej nrog Leej Pleev nqes mus rau hauv ntxa, thiab nej kuj nrog nws sawv rov qab los, vim nej ntseeg txog Tswv Ntuj lub huam tsa tau Leej Pleev sawv hauv cov tub tuag rov los. 13 Txawm nej twb tuag lawm vim nej cov txhaum thiab vim nej lub cev tsis ua lub cim txiav rau, los Leej Pleev tsa nej sawv rov los ua ke nrog nws, vim tias nws twb zam txhaum rau peb tas huv si lawm, 14 thiab nws muab peb lub txim uas txoj cai txiav rau peb ris so pov tseg tib si, nws muab tshem tawm ntawm peb mus, thiab muab ntsia rau saum ntoo cuam. 15 Leej Pleev txo cov Tshiab ua Vaj Txheeb thiab muaj hwj huam ; nws coj lawv lawv nws qab rau sawv daws ntsia, nws yog tus yeej lawv.

NPN 145: 1B-2, 8-9, 10-11

Txais: (9) HUAB TAIS ua siab zoo hlub txhua yam nws tau tsim.

Kuv tus Tswv Ntuj, kuv tus vaj, kuv cav lus zoo txog koj,
kuv yuav foom koob meej rau koj lub npe mus ib txhiab ib txhis.
Kuv yuav niaj hnub foom koob meej rau koj,
kuv yuav cav lus zoo txog koj lub npe mus ib txhiab ib txhis.

Txais: (9) HUAB TAIS ua siab zoo hlub txhua yam nws tau tsim.

HUAB TAIS lub siab hlub thiab khuv leej neeg,
nws npau taws qeeb, nws lub siab hlub neeg tas nrho.
HUAB TAIS ua siab zoo rau txhua leej txhua tus,
nws lub siab khuv leej tas puas tsav yam nws tau tsim.

Txais: (9) HUAB TAIS ua siab zoo hlub txhua yam nws tau tsim.

HUAB TAIS, cia koj cov hauj lwm txhua yam ua koj tsaug,
thiab cia cov uas nyiam koj cav txog koj.
Cia lawv qhuas txog koj lub Ceeb Tsheej muaj hwj chim
Thiab piav txog kuj lub hwj huam loj.

Txais: (9) HUAB TAIS ua siab zoo hlub txhua yam nws tau tsim.

As Les Lus Yas: ZAM 15: 16

Txais: As les lus yas, as les lus yas.

Huab Tais hais tias: kuv xaiv nej tawm ntawm ntiaj teb los
kom nej mus txi ib co txiv uas yuav nyob ntev.

Txais: As les lus yas, as les lus yas.

Ntawv Moo Zoo: LK 6: 12-19

12 Thaum ntawd, Yes Xus mus teev Ntuj pem roob, nws teev Tswv Ntuj ib hmos. 13 Thaum kaj ntug, nws hu nws cov thwj tim los, nws xaiv kaum ob leeg, nws hu lawv ua cov Hauv Paus Xa Lus. 14 Muaj Xis Moos, uas nws tis npe rau hu ua Pob Zeb, muaj As Nres, Pob Zeb tus kwv, muaj Yas Kos, Zam, Fis Lis Pos, Npas Tos Los Mas Yos, 15 Mas Tais, Tos Mas, Yas Kos uas yog As Fas Yos tub, Xis Moos tus Siab Kub, 16 Yus Das, Yas Kos tub, thiab Yus Das Kas Lis Yaus, uas yog tus ntxeev siab.
17 Yes Xus nrog cov lawv nqes los, nws sawv saum ib qho chaw tiaj. Muaj Yes Xus ib pab thwj tim coob kawg thiab ib pab neeg kuj coob kawg tuaj ntawm xeev Yus Das, thiab ntawm Yes Lus Xas Les tuaj, thiab ntawm thaj tsam ntug dej ntuj ntawm Tws Los thiab Xis Doos tuaj. 18 Lawv tuaj mloog Yes Xus thiab tuaj kom nws kho lawv cov mob. Tab cov uas raug tej tus dab tsis huv tsim lawv, kuj puav leej rov zoo tas. 19 Tas txhua leej nyob hauv pab neeg nrhiav kom tau kev kov Yes Xus, vim muaj ib lub hwj huam tawm hauv nws los kho sawv daws zoo tas huv si.

TIM       13      LUB      9       HLI       2017

Hunb Plaub Lis Piam Nees Nkaum Peb Nruab Xyoo A Nruab Lis Piam Xyoo I  

Hwm LN John Chrysostom, ua Tswv Qhia thiab Kws Txuj Ntshiab (Doctor of the Church)

Zaj Nyeem Ib:       KLX  3:   1-11

Cov kwv tij,
1 Nej pom xeeb nrog Leej Pleev sawv rov los lawm, mas nej yuav nrhiav tej yam nyob txheej saud, uas yog qhov chaw Leej Pleev zaum ntawm Tswv Ntuj phab xis. 2 Nej lub siab yuav dai dhuam rau tej yam nyob txheej saud, txhob dai rau tej yam nyob ntiaj teb no. 3 Vim tias, nej tuag lawm, hos nej txoj sia nrog Leej Pleev tsiv nraim nyob hauv Tswv Ntuj. 4 Thaum Leej Pleev uas yog nej txoj sia tshwm tawm los, mas nej kuj yuav nrog nws tshwm tawm los muaj hwj chim.
5 Nej yuav ua kom tej yam uas mloog raws lub ntiaj teb nyob hauv nej tuag mus: 6 Xws li kev ua dev ua npua, kev tsis dawb huv, kev nyiam ua txhaum, kev ntshaw ua phem, kev ntshaw nyiaj txiag, vim kev ntshaw nyiaj phem npaum li kev teev dab thiab. Tej yam no ua kom Tswv Ntuj npau taws rau cov neeg tsis mloog lus. 7 Yav thaud, nej kuj tau coj ib tug yam ntxwv zoo li ntawd, vim nej tseem coj lub neej ntawd. 8 Hos nyem no, nej yuav tsum tso tej ntawd pov tseg tas huv tib si : tso txoj kev npau taws, txoj kev ua siab ceev, txoj kev nkhaus, kev xyav luag moo, kev hais lus phem lus qias pov tseg deb ntawm nej di ncauj . 9 Nej txhob ib leeg dag ib leeg, vim nej twb hle tus qub neeg thiab nws cov hauj lwm pov tseg lawm; 10 nej hnav tus neeg tshiab, uas yog tus hloov dua tshiab kom muaj txoj kev paub txuj raws li Tus Tsim nws tus duab. 11 Nyob hauv txoj kev ntawd, mas tsis muaj tus Hes Las los Yus Das, tsis muaj tus txais lub cim txiav, los tus tsis txais, tsis muaj tus neeg qus, tus Xis Thias, tus qhev, los tus twj lij lawm, tsuas muaj Leej Pleev xwb, vim Leej Pleev yog txhua tsav txhua yam, thiab nws nyob hauv txhua tsav txhua yam.

NPN       145:   2-3, 10-11, 12-13AB

Txais:   (9) HUAB TAIS ua siab zoo rau txhua yam nws tau tsim.

Kuv yuav niaj hnub cav txog koj lub koob meej,
kuv yuav cav lus zoo txog koj lub npe mus li ib txhiab ib txhis.
HUAB TAIS loj tas nrho, tsim nyog cav txog nws ;
nws loj tas nrho, neeg ntsuas tsis tau.

Txais:   (9) HUAB TAIS ua siab zoo rau txhua yam nws tau tsim.

HUAB TAIS, cia koj cov hauj lwm txhua yam ua koj tsaug,
thiab cia cov uas nyiam koj cav txog koj.
Cia lawv qhuas txog koj lub Ceeb Tsheej muaj hwj chim
Thiab piav txog koj lub hwj huam loj.

Txais:   (9) HUAB TAIS ua siab zoo rau txhua yam nws tau tsim.

Cia lawv qhia rau neeg paub txog koj lub hwj huam loj
thiab koj lub Ceeb Tsheej muaj hwj chim ci ntsa iab.
Koj lub Ceeb Tsheej yog ib lub Ceeb Tsheej txais tas cov hlob nrog cov yau,
thiab koj txoj kev tswj kav yuav nyob mus txheej dhau txheej.

Txais:   (9) HUAB TAIS ua siab zoo rau txhua yam nws tau tsim.

As Les Lus Yas:       LK  6:   23AB

Txais:  As les lus yas, as les lus yas.

Nej yuav zoo siab, nej yuav dhia hom khaj,
vim nej yuav tau txais koob haum loj nyob saum ntuj.

Txais:  As les lus yas, as les lus yas.

Ntawv Moo Zoo:       LK  6:   20-26

20 Yes Xus tsa muag ntsia nws cov thwj tim, nws hais tias : "Nej cov pluag, nej txoj hmoov zoo, vim Tswv Ntuj lub Ceeb Tsheej yog nej tug. 21 Nej cov uas nyem no nej tshaib, nej txoj hmoov zoo, vim nej yuav tau noj txaus siab. Nej cov uas nyem no nej quaj, nej txoj hmoov zoo, vim nej yuav luag. 22 Thaum muaj neeg ntxub nej, thaum lawv ntiab nej, los cem nej, los xyav lus phem txog nej lub npe vim Neeg Leej Tub, mas nej txoj hmoov zoo. 23 Hnub ntawd, nej yuav zoo siab, nej yuav dhia hom khaj, vim nej tau txais koob haum loj nyob saum ntuj. Txheej thaud, lawv cov yawg koob kuj tau ua li ntawd rau cov Yaj Saub.”
24 “Hos nej cov uas nplua nuj, nej txoj hmoov phem, vim nej twb tau txais kev nplij siab lawm. 25 Nej cov uas nyem no tau noj tsau, nej txoj hmoov phem, vim nej yuav tshaib plab. Nej cov uas nyem no nej luag, nej txoj hmoov phem, vim nej yuav mluas thiab yuav quaj. 26 Thaum zeej tsoom cav lus zoo txog nej, mas nej txoj hmoov phem, vim txheej thaud, lawv cov yawg koob kuj ua li ntawd rau cov yaj saub cuav thiab."

TIM      14     LUB     9     HLIS      2017

Hnub Tsib Lis Piam Nees Nkaum Peb Nruab Xyoo A Nruab Lis Piam Xyoo I

Hnub Hwm tus Ntoo Cuam (Exaltation of the Holy Cross), uas yog thaum LN Hes Les Nas nrhiav tau tus Ntoo Cuam tseeb.

Zaj Nyeem Ib:       XP 21:   4B-9

4b Thaum lawv mus txog ib tog kev, tsoom pej xeem npau taws. 5 Lawv cem Tswv Ntuj thiab cem Mais Xes tias : "Vim li cas neb thiaj coj peb tawm Hais Nkws Tos teb kom peb los tuag hauv lub teb chaws suab puam no? Twb tsis muaj mov noj, tsis muaj dej haus li. Peb dhuav noj cov niag mov tsuag ntawd dhau lawm !" 6 Tswv Ntuj thiaj tso ib cov nab muaj taug hluav taws tuaj tom lawv. Ces cov His Xas Lais tuag coob leej. 7 Tsoom pej xeem mus hais rau Mais Xes tias : "Peb tau ua txhaum lawm vim peb tau cem HUAB TAIS thiab cem koj. Koj thov Ntuj kom HUAB TAIS tshem cov niag nab ntawd ntawm peb mus." Ces Mais Xes thiaj thov Ntuj rau lawv. 8 HUAB TAIS hais rau Mais Xes tias : "Koj nchuav ib tug nab muaj taug hluav taws, koj muab khuam rau saum ib tug ncej; leej twg raug nab tom, yog nws ntsia tus nab nchuav ntawd ces nws yuav ciaj." 9 Mais Xes thiaj muab tooj nchuav ua ib tug nab, nws muab khuam rau saum ib tug ncej. Yog nab tom leej twg, mas nws tsa muag ntsia tus nab tooj ntawd ces nws thiaj ciaj.

NPN      78:   1BC-2, 34-35, 36-37, 38

Txais:   (7b) Nej yuav tsis txhob hnov qab Huab Tais cov hauj lwm.    

Kuv haiv neeg, nej yuav mloog kuv txoj cai lij choj,
nej yuav tig ntsej los mloog cov lus tawm ntawm kuv lub ncauj los.
Kuv yuav qhib ncauj hais paj lug,
Kuv yuav piav tej zaj txog lub caij thaum ub.

Txais:   (7b) Nej yuav tsis txhob hnov qab Huab Tais cov hauj lwm.

Thaum Tswv Ntuj tua lawv, lawv mam nug txog nws ;
lawv mam tig rov los rau Tswv Ntuj thiab lawv sawv ntxov los nrhiav nws.
Lawv rov nco txog tias Tswv Ntuj yog lawv lub tsua,
Thiab nco tias tus Tswv Ntuj Nyob Siab yog tus txhiv lawv.

Txais:   (7b) Nej yuav tsis txhob hnov qab Huab Tais cov hauj lwm.

Tab sis lawv lam ntxias Tswv Ntuj ntawm ncauj xwb,
lawv tus nplaig hais lus dag nws.
Lawv lub siab tsis npuab nws ruaj nreb,
lawv tsis ntseeg zoo txog cov lus nws cog rau lawv.

Txais:   (7b) Nej yuav tsis txhob hnov qab Huab Tais cov hauj lwm.

Tab sis, Tswv Ntuj lub siab hlub neeg zam rau lawv,
nws tsis rhuav lawv pov tseg.  
Nws cheem nws lub siab npau taws tsis tseg,
nws tsis pub kom nws lub siab ceev tsim dheev los.

Txais:   (7b) Nej yuav tsis txhob hnov qab Huab Tais cov hauj lwm.

Zaj Nyeem Ob:       FLP 2:6-11

Cov kwv tij,
6 Yes Xus Pleev yog Tswv Ntuj, tiam sis nws tsis tau nrhiav kom nws tau lub hwj chim loj cuag li Tswv Ntuj, nws muab nws lub hwj chim hle, 7 nws yeem ua zoo li ib tug qhev, nws yug los ua neeg, luag pom nws tsuas zoo li tib neeg xwb. 8 Nws txo nws qis : nws tuaj yeem mloog lus mus txog qhov tuag, tab txawm yog kev tuag saum ntoo cuam. 9 Vim li ntawd Tswv Ntuj thiaj tsa nws ua tus loj nyob siab dua cov, thiab muab lub npe loj dua txhua lub rau nws. 10 Kom cov neeg hnov tuav txog Yes Xus lub npe, mas txhua leej txhua tus cia li txhos caug hawm, tsis hais nyob saum ntuj, los nyob ntiaj teb no, los nyob nruab yeeb. 11 Thiab txhua xeem lus yuav tsum cav tias Yes Xus Pleev yog Huab Tais, kom Leej Txiv Tswv Ntuj thiaj muaj koob meej nto moo lug.

As Les Lus Yas

Txais:   As les lus yas, as les lus yas.

Leej Pleev, peb pe hawm koj, peb foom lus zoo rau koj,
Vim koj cawm ntiaj teb neeg nyob saum koj tus Ntoo Cuam.  

Txais:   As les lus yas, as les lus yas.

Ntawv Moo Zoo:       ZAM  3:   13-17

Yes Xus hais rau Nis Kos Des Mos tias:
13 “Tsis muaj leej twg tau nce mus saum ntuj, tsuas kawg yog tus nqes saum ntuj los xwb, uas yog Neeg Leej Tub tus nyob saum ntuj.
14 Xws li Mais Xes tsa tus nab nyob teb chaws suab puam, Neeg Leej Tub kuj yuav tsum raug muab tsa siab,
15 kom xwv tus ntseeg txog nws tsis txhob tuag tiam sis muaj txoj sia nyob mus li.
16 Vim Tswv Ntuj nyiam lub qab ntuj neeg npaum li no nws thiaj muab nws Leej Tub twm zeej rau, kom xwv tus ntseeg txog nws tsis txhob tuag tiam sis muaj txoj sia nyob mus li.
17 Tswv Ntuj tsis tau xa nws Leej Tub tuaj hauv lub qab ntuj kom nws muab txim rau lub qab ntuj neeg, tiam sis nws xa nws Leej Tub tuaj kom lub qab ntuj neeg tau txais kev cawm vim nws.”

TIM       15      LUB      9      HLIS        2017

Hnub Rau Lis Piam Nees Nkaum Peb Nruab Xyoo A Nruab Lis Piam Xyoo I

Hwm Leej Niam tus Raug Kev Txom Nyem Siab Loj (Our Lady of Sorrows)

Zaj Nyeem Ib:       1 TMT  1:   1-2, 12-14

1 Kuv, Paj Lug, uas yog Yes Xus Pleev tus Hauv Paus Xa Lus raws li Tswv Ntuj tus cawm peb, thiab Yes Xus Pleev uas yog peb qhov chaw tso siab, nkawd tau tsa kuv ua, 2 kuv sau ntawv rau Tis Mos Tes, kuv ib leeg tseem tub nyob hauv txoj kev ntseeg. Thov kom koj tau txais txiaj ntsim, kev hlub, thiab kev thaj yeeb tuaj ntawm Tswv Ntuj peb Leej Txiv, thiab ntawm Yes Xus Pleev peb tus Huab Tais tuaj.
12 Kuv ua tus uas txhawb zog rau kuv, Yes Xus Pleev peb tus Huab Tais tsaug, vim nws saib kuv yog ib tug neeg tsis fav xeeb, ces nws tau hu kuv los tsob hwb nws. 13 Thaud, kuv yog ib tug neeg thuam Ntuj, hiam luag, thiab nyiam ua nruj ua tsiv, tiam sis Tswv Ntuj tau zam rau kuv lawm, vim kuv tsis paub thiab tsis muaj kev ntseeg kuv thiaj ua li ntawd. 14 Nyem no, kuv tau txais peb tus Huab Tais lub txiaj ntsim tuaj puv rau hauv kuv, nrog rau txoj kev ntseeg thiab txoj kev nyiam uas nyob hauv Yes Xus Pleev.

NPN      16:   1B-2A+5, 7-8, 11

Txais: (5a) Huab Tais, koj yog kuv lub cuab tam.

Tswv Ntuj, thov koj txuag kuv, vim kuv tuaj nkaum hauv koj.
Kuv hais rau HUAB TAIS tias: " Koj yog kuv tus HUAB TAIS !”
Huab Tais, kuv lub cuab tam, kuv lub ntim,
Koj yog tus tuav rawv kuv txoj hmoo.

Txais: (5a) Huab Tais, koj yog kuv lub cuab tam.

Kuv cav lus zoo txog tus HUAB TAIS uas qhia kuv xav tswv yim,
Tab yog hmo ntuj kuv lub siab ntsws tseem txhib kuv.
Kuv cia HUAB TAIS nyob ntawm kuv xub ntiag tsis tseg,
Vim nws nyob ntawm kuv sab xis, kuv yuav tsis qaij tsis qaug

Txais: (5a) Huab Tais, koj yog kuv lub cuab tam.

Koj yuav qhia kuv taug txoj kev mus rau txoj sia,
koj yuav qhia kuv paub txog txoj kev zoo siab
puv npo nyob ntawm koj xub ntiag,
txog txoj kev nplij siab tsis txawj kawg nyob ntawm koj sab xis.

Txais: (5a) Huab Tais, koj yog kuv lub cuab tam.

Zaj nkauj hauv qab no yog ib zaj nkauj txog Niam Mab Liab txoj kev txom nyem siab vim nws pom Yes Xus raug kev tsim txom loj dhau. Yog ib zaj ntev ntev thiab ntshai yuav nyuaj txhais ua lus Hmoob, ces kuv tso ua lus Aas Kiv thiab lus Fab Kis ua ntej. Yog ib zaj uas peb xav hu rau lub caij no los tau tsis hu los tau.

Sequence (Optional) — Stabat Mater    
 
At the cross her station keeping,
Stood the mournful Mother weeping,
Close to Jesus to the last.

Through her heart, his sorrow sharing,
All his bitter anguish bearing,
Now at length the sword had passed.

Oh, how sad and sore distressed
Was that Mother highly blessed
Of the sole begotten One!

Christ above in torment hangs,
She beneath beholds the pangs
Of her dying, glorious Son.

Is there one who would not weep,
'Whelmed in miseries so deep,
Christ's dear Mother to behold?

Can the human heart refrain
From partaking in her pain,
In that mother's pain untold?

Bruised, derided, cursed, defiled,
She beheld her tender Child,
All with bloody scourges rent.

For the sins of his own nation
Saw him hang in desolation
Till his spirit forth he sent.

O sweet Mother! font of love,
Touch my spirit from above,
Make my heart with yours accord.

Make me feel as you have felt;
Make my soul to glow and melt
With the love of Christ, my Lord.

Holy Mother, pierce me through,
In my heart each wound renew
Of my Savior crucified.

Let me share with you his pain,
Who for all our sins was slain,
Who for me in torments died.

Let me mingle tears with you,
Mourning him who mourned for me,
All the days that I may live.

By the cross with you to stay,
There with you to weep and pray,
Is all I ask of you to give.

Virgin of all virgins blest!
Listen to my fond request:
Let me share your grief divine.

Let me to my latest breath,
In my body bear the death
Of that dying Son of yours.

Wounded with his every wound,
Steep my soul till it has swooned
In his very Blood away.

Be to me, O Virgin, nigh,
Lest in flames I burn and die,
In his awful judgment day.

Christ, when you shall call me hence,
Be your Mother my defense,
Be your cross my victory.

While my body here decays,
May my soul your goodness praise,
Safe in heaven eternally.
Amen. (Alleluia)

https://www.youtube.com/watch?v=Sbej1UO2mf8

Zaj ua Lus Fab Kis

Debout, la mère des douleurs
Près de la croix était en pleurs
Quand son Fils pendait au bois
..
Alors, son âme gémissante
Toute triste et toute dolente
Un glaive la transperça.
..
Qu’elle était triste, anéantie,
La femme entre toutes bénie,
La Mère du Fils de Dieu!
..
Dans le chagrin qui la poignait,
Cette tendre Mère pleurait
Son Fils mourant sous ses yeux.
..
Quel homme sans verser de pleurs
Verrait la Mère du Seigneur
Endurer si grand supplice?
..
Qui pourrait dans l’indifférence
Contempler en cette souffrance
La Mère auprès de son Fils?
..
Pour toutes les fautes humaines,
Elle vit Jésus dans la peine
Et sous les fouets meurtri.
..
Elle vit l’Enfant bien-aimé
Mourir tout seul, abandonné,
Et soudain rendre l’esprit.
..
O Mère, source de tendresse,
Fais-moi sentir grande tristesse
Pour que je pleure avec toi.
..
Fais que mon âme soit de feu
Dans l’amour du Seigneur mon Dieu:
Que je lui plaise avec toi.
..
Mère sainte, daigne imprimer
Les plaies de Jésus crucifié
En mon cœur très fortement.
..
Pour moi, ton Fils voulut mourir,
Aussi donne-moi de souffrir
Une part de ses tourments.
..
Pleurer en toute vérité
Comme toi près du crucifié
Au long de mon existence.
..
Je désire auprès de la croix
Me tenir, debout avec toi,
Dans ta plainte et ta souffrance.
..
Vierge des vierges, toute pure,
Ne sois pas envers moi trop dure,
Fais que je pleure avec toi.
..

Du Christ fais-moi porter la mort,
Revivre le douloureux sort
Et les plaies, au fond de moi.
..

Fais que ses propres plaies me blessent,
Que la croix me donne l’ivresse
Du sang versé par ton Fils.
..
Je crains les flammes éternelles;
O Vierge, assure ma tutelle
A l’heure de la justice.
..
O Christ, à l’heure de partir,
Puisse ta Mère me conduire
A la palme de la victoire.
..
A l’heure où mon corps va mourir,
A mon âme fais obtenir
La gloire du paradis.
Amen.

Lus Hmoob

Nram no kuv tau lam muab txhais me ntsis lub ntsiab zoo li no. Vim cov lus Aas Kiv thiab cov lus Fab Kis nyias kuj muaj nyias ib co lus txawv me ntsis, yog li ntawd muaj qee qhov kuv kuj tau hais txawv me ntsis lawv cov lus thiab.

Leej Niam tu siab loj, nws sawv ntsug
ze ntawm tus Ntoo Cuam, nws quaj kua muag si,
vim nws Leej Tub nyob dai ncuv saum tus Ntoo .

Nws lub siab quaj dhi mob siab tsheej zag,
nrog leej Tub nyiaj kev txom nyem;
Ib rab ntaj chob rawv nws hauv siab.

Nws tu siab loj tiag, nyob qaug zog zis,
Nws yog leej Niam tau txoj hmoov zoo,
yog tus yug Tswv Ntuj tib leeg Tub.

Leej Niam lub siab mob ncus nco,
nws pom nws leej Tub ua nruj nriaj,
nws ntsia ntsoov nws leej Tub txoj sia tu.

Leej twg thiaj tsis los kua muag
yog nws pom Huab Tais leej Niam
txoj kev ntsim siab loj npaum no?

Leej twg thiaj tsis nrog hlub
yog nws pom txoj kev tu siab loj ntawm
leej Niam txoj kev hlub nws Leej Tub?

Yog vim tas txhua leej neeg cov txhaum
Nws thiaj tau pom Yes Xus raug thuam,
raug nto, raug nplawm ua nqaij ntsoog.

Nws ntsia ntsoov nws tus Tub nws hlub
Nyob dai ncuv tsis muaj phooj ywg saib
mus txog thaum nws txoj sia tu nrho.

Aub leej Niam tus muaj kev hlub loj,
Thov koj pub kom kuv txawj nrog koj tu siab
thiab nrog koj poob kua muag iab kua muag daw.

Thov koj pab ua kom kuv lub siab kub lug
nyob hauv txoj kev nyiam kuv tus Tswv Ntuj,
kom kuv ua ntxim nws siab hauv kuv lub neej

Leej Niam ntshiab, thov koj muab Yes Xus
cov qhov txhab txaug kom ruaj nreb
rau hauv kuv nruab siab nruab plawv.

Koj leej Tub tau txaus siab tuag vim kuv
Thov koj pub kom kuv tau saj nws kev
txom nyem thiab nrog nws nyiaj mob.

Kom kuv txawj tu siab nrog koj quaj
los kua muag nyob ze nws tus Ntoo Cuam
Nyob hauv tas kuv lub neej.

Kuv xav nrog koj sawv nyob ze ntawm
tus Ntoo Cuam, xav nrog koj faib me ntsis
koj txoj kev ntsawv siab tu plawv.

Koj yog tus nkauj tsim txiaj dawb huv
Tshaj tas txhua tus nkauj dawb huv
Thov koj mloog kuv zaj thov koj.

Thaum txog kuv hnub kawg, thov koj pab
kom kuv lub cev tau txais kev tuag nyob
hauv koj leej Tub lub cev  txoj kev tuag.

Thov kom kuv tau txais koob hmoov ntawm
nws cov qhov txhab, kom nws cov ntshav
ntxuav kuv tus ntsuj plig kom dawb huv.

Nkauj Ntshiab Mab Liab, thov pab kom thaum
txog hnub kuv mus raug txiav txim kom kuv tau
kev dim ntawm dab phem cov hluav taws.

Leej Pleev, thaum kuv los cuag koj, thov cia
koj leej Niam los tos kuv coj kuv kev, kom
koj tus Ntoo Cuam pab kuv tau kev yeej.

Thaum kuv lub cev nyob hauv av tos,
cia kuv tus ntsuj plig los cav txog koj mus li
nyob hauv koj lub CeebTsheej ntawm koj xub ntiag.
Ua li.


As Les Lus Yas

Txais:    As les lus yas, as les lus yas.

Nkauj tsim txiaj Mab Liab, koj txoj hmoov zoo,
vim koj tsis tuag, tiam sis koj tau lub mom ua tim khawv,    
thaum koj sawv hauv Huab Tais tus qab Ntoo Cuam.

Txais:    As les lus yas, as les lus yas.

Ntawv Moo Zoo:       ZAM  19:   25-27

25 Sawv ze ntawm Yes Xus tus Ntoo Cuam muaj nws niam thiab nws niam tus viv ncaus Mab Liab uas yog Klos Pas poj niam, thiab Mab Liab Mas Ntas Las. 26 Yes Xus pom nws niam, thiab pom tus thwj tim uas nws nyiam sawv ze ntawd, ces nws hais rau nws niam tias : "Niad, tus ntawd yog koj tus tub." 27 Thiab Yes Xus hais rau tus thwj tim tias : "Tus ntawd yog koj niam." Ces txij lub sij hawm ntawd los, tus thwj tim coj Mab Liab mus nyob hauv nws tsev.

Los:       LK  2:   33-35

33 Yes Xus niam thiab txiv qhuas cov lus nkawd hnov hais txog tus me nyuam.
34 Xis Mes Oos foom hmoov zoo rau nkawd, nws hais rau Mab Liab, Yes Xus niam tias : "Koj ntsia ! Tus me nyuam no yuav ua chaw rau ntau leej His Xas Lais ntog thiab ntau leej rov sawv; thiab nws yuav yog ib lub cim ua kom neeg hais lus tsis sib haum.
35 Hos ntawm koj, mas ib rab ntaj yuav chob koj tus plig, kom xwv tej tswv yim uas coob leej xav tuaj nruab siab tawm los rau sawv daws paub.”

TIM 16 LUB 9 HLIS 2017

Hnub Xya Lis Piam Nees Nkaum Peb Nruab Xyoo A Nruab Lis Piam Xyoo I

Hwm LN Cornelius, ua Vaj Qhia, thiab LN Cyprian, ua Tswv Qhia, ob tug Tim Khawv

Zaj Nyeem Ib: 1 TM 1: 15-17

Tus zoo nyiad
15 Lo Lus no yog ib lo lus txaus ntseeg thiab tsim nyog peb yuav tsum khaws cia ruaj, yog lo tias: Yes Xus Pleev tuaj nyob ntiaj teb no yog tuaj cawm cov neeg txhaum ; kuv yog thawj tug hauv cov neeg txhaum ntawd ntag. 16 Tos Yes Xus Pleev tau zam rau kuv ua thawj tug, los yog vim nws xav muab kuv ua piv txwv qhia txog nws lub siab ntev rau cov neeg uas yuav ntseeg txog nws pom kom lawv tau txoj sia nyob mus li. 17 Kom tus Vaj kav tiam dhau tiam, tus tsis txawj tuag, tus neeg pom tsis tau, tuas uas nws tib leeg yog Tswv Ntuj, kom nws muaj koob meej thiab muaj hwj chim mus li txheej dhau txheej tis dhau tis. Ua li.

NPN 113: 1B-2, 3-4, 5A+6-7

Txais: (2) Nej cav txog Huab Tais lub npe mus li.

HUAB TAIS cov tub txib, nej cav txog nws,
nej cav txog HUAB TAIS lub npe.
Kom HUAB TAIS lub npe nto moo lug,
txij no mus txheej dhau txheej !

Txais: (2) Nej cav txog Huab Tais lub npe mus li.

Txij thaum hnub tawm txog hnub poob qho,
kom HUAB TAIS lub npe nto koob meej.
HUAB TAIS nyob siab tshaj ib tsoom kuj cuab,
nws lub koob meej nyob siab dua txheej ntuj saud.

Txais: (2) Nej cav txog Huab Tais lub npe mus li.

Leej twg thiaj zoo li HUAB TAIS, peb tus Tswv Ntuj?
Nws dauv muag los ntsia lub ntuj thiab lub ntiaj teb.
Nws tsa tus pluag sawv hauv plua tshauv los,
nws rub tus txom nyem hauv qhov qias los.

Txais: (2) Nej cav txog Huab Tais lub npe mus li.

As Les Lus Yas: ZAM 14: 23

Txais: As les lus yas, as les lus yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws.
Kuv Txiv wb yuav tuaj nyob hauv nws.

Txais: As les lus yas, as les lus yas.

Ntawv Moo Zoo: LK 6: 43-49

Yes Xus hais rau nws cov thwj tim tias:
43 "Tsis muaj ib tsob ntoo zoo nkauj yuav txi ib co txiv lwj, tsis muaj ib tsob ntoo lwj yuav txi ib co txiv zoo nkauj. 44 Xav paub tsob ntoo, ces ntsia nws lub txiv xwb. Neeg tsis de txiv ncuav pias saum tej tsob ntoo tuaj pos, los de txiv cawv saum ib co hmab tuaj pos. 45 Tus neeg zoo, rho tej yam zoo uas nyob puv hauv nws lub siab tawm los. Tus neeg phem rho tej yam phem uas nyob puv hauv nws lub siab tawm los. Vim tias lub siab puv nkaus yam twg mas lub ncauj hais yam ntawd tawm.
46 "Vim li cas nej hu kuv tias 'Huab Tais, Huab Tais', tab sis nej tsis ua raws li kuv hais ? 47 Tus uas tuaj cuag kuv, nws mloog kuv tej lus thiab ua raws li kuv hais, mas kuv yuav qhia nej tias nws yog ib tug neeg zoo li cas. 48 Nws zoo xws li ib tug neeg txhim tsev, uas khawb av kom tob tob, thiab puab lub taw ntsa rau saum pob tsuas. Thaum dej sab siv huam, dej dag nphau nphwv tuaj ntsawj lub tsev, tab sis ua tsis tau kom lub tsev ua zog, vim lub tsev ntawd txhim tau ruaj. 49 Hos tus mloog kuv cov lus, tab sis nws tsis ua raws, nws zoo xws li tus neeg txhim tsev rau saum npoo av, tsis cog taw ntsa tob. Thaum dej sab siv tuaj ntsawj lub tsev, lub tsev vau tam sis ntawd, thiab lub tsev puas tas nrho."

TIM 18 LUB 9 HLIS 2017

Hnub Ob Lis Piam Nees Nkaum Plaub Nruab Xyoo A Nruab Lis Piam Xyoo I

Zaj Nyeem Ib: 1 TM 2: 1-8

Tus zoo nyiad,
1 Qhov ua ntej dua cov mas yog kuv xav thov kom nej muaj kev vam txog Ntuj, kev teev Ntuj, kev thov Ntuj, thiab hais tej zaj ua Ntuj tsaug rau tas ib zeej tsoom neeg. 2 Nej yuav thov Ntuj rau cov vaj ntxwv, thiab cov muaj cai tswj luag tej, kom peb tau kev coj ib lub neej nyob nyab xeeb thiab tiaj tus nyob hauv txoj kev hwm Ntuj thiab txoj kev ib leeg saib tau sib leeg. 3 Qhov no yog qhov zoo thiab xis Tswv Ntuj tus cawm peb lub siab. 4 Tswv Ntuj xav kom tas zeej tsoom txais kev cawm thiab paub qhov tseeb txog yav tom ntej. 5 Vim tsuas muaj tib tug Tswv Ntuj xwb, thiab tsuas muaj tib tug cev lus rau Tswv ntuj thiab rau tib neeg xwb, yog tus tib neeg Yes Xus Pleev. 6 Nws tau muab nws los ua nqi txhiv sawv daws. Thaum txog lub caij teem, mam li yuav muaj ua tim khawv zeem tseeb txog tej yam ntawd. 7 Vim li no kuv thiaj raug tsa ua ib tug tub tshaj xo thiab ib tug Hauv Paus Xa Lus. Kuv hais tseeb, kuv tsis dag. Kuv yog tus xib hwb qhia cov neeg teev pej kum dab, kom lawv paub txoj kev ntseeg thiab paub qhov tseeb. 8 Li ntawd, kuv xav kom nyob tas qhov txhia chaw, cov neeg sawv daws yuav tsum tsa lawv txhais tes dawb huv thov Ntuj, tsis txhob muaj kev npau taws los muaj lus sib cav.

NPN 28: 2, 7, 8-9

Txais: (6) Kom HUAB TAIS nto koob meej, vim nws tau mloog kuv lo lus thov.

Thov koj mloog kuv lub suab thaum kuv hu txog koj,
thaum kuv tsa tes rau tim koj lub tsev ntshiab,.

Txais: (6) Kom HUAB TAIS nto koob meej, vim nws tau mloog kuv lo lus thov.

HUAB TAIS yog kuv lub zog, thiab kuv daim leej phiaj.
kuv lub siab vam txog nws, nws tuaj pab kuv;
ces kuv lub siab hom khaj, kuv hu nkauj ua nws tsaug.

Txais: (6) Kom HUAB TAIS nto koob meej, vim nws tau mloog kuv lo lus thov.

HUAB TAIS yog nws haiv neeg lub zog,
nws yog lub yeej khov cawm nws tus pleev.
Thov koj cawm koj haiv neeg thiab
foom hmoov zoo rau koj lub cuab tam,
koj pub rau lawv noj thiab nqa lawv mus li.

Txais: (6) Kom HUAB TAIS nto koob meej, vim nws tau mloog kuv lo lus thov.

As Les Lus Yas: ZAM 3: 16

Txais: As les lus yas, as les lus yas.

Tswv Ntuj hlub lub qab ntuj neeg npaum no,
nws thiaj muab nws Leej Tub twm zeej rau,
kom xwv tus ntseeg txog nws muaj txoj sia nyob mus li.

Txais: As les lus yas, as les lus yas.

Ntawv Moo Zoo: LK 7: 1-10

1 Thaum Yes Xus hais nws cov lus rau tsoom sid mloog tas, nws mus hauv Kas Fas Naus. 2 Muaj ib tug xab txheeb nws muaj ib tug tub txib uas nws nyiam tab tom mob hnyav, yuav tuag. 3 Thaum tus xab txheeb hnov hais txog Yes Xus, nws xa ib co laus neeg Yus Das tuaj thov Yes Xus kom mus kho nws tus tub txib. 4 Thaum cov laus neeg tuaj txog ntawm Yes Xus, lawv thov Yes Xus tas zog rau tus xab txheeb tias : "Tsim nyog koj yuav ua qhov ntawd rau nws, 5 nws nyiam peb haiv neeg, thiab nws yog tus tau txhim lub tsev txoos rau peb." 6 Yes Xus nrog lawv taug kev mus. Thaum lawv tuaj yuav txog lub tsev, tus xab txheeb xa ib co phooj ywg tuaj hais rau Yes Xus tias : "Huab Tais, txhob tab kaum koj, vim kuv tsis tsim nyog koj chaws los hauv kuv lub qab ru tsev, 7 thiab kuv saib kuv tsis tsim nyog tuaj cuag koj; tab sis koj hais ib lo lus xwb ces kuv tus tub txib yuav zoo hlo. 8 Vim tias, kuv kuj yog ib tug neeg zwm rau ib tug loj, thiab kuv muaj ib co tub rog uas zwm rau kuv, yog kuv hais rau ib tug tias 'Mus !' ces nws cia li mus ; hos kuv hais rau lwm tus tias : 'Los !', mas nws cia li los. Kuv hais rau kuv tus tub qhev tias 'Ua qhov no !' ces nws cia li ua". 9 Yes Xus hnov cov lus no, nws qhuas tus xab txheeb kawg. Nws tig ntsia tom qab, nws hais rau cov neeg lawv nws qab tias : "Kuv hais rau nej, nyob hauv tsoom His Xas Lais, kuv tsis tau pom ib lub siab ntseeg npaum li no." 10 Thaum cov neeg uas tuaj cuag Yes Xus rov mus txog tsev, lawv pom tus tub qhev twb zoo neej lawm.

TIM 19 LUB 9 HLIS 2017

Hnub Peb Lis Piam Nees Nkaum Plaub Nruab Xyoo A Nruab Lis Piam Xyoo I

Hwm LN Januarius

Zaj Nyeem Ib: 1 TM 3: 1-13

1 Lo lus no yog ib lo lus tseeb: Yog leej twg ntshaw ua ib tug tswv qhia, mas nws xav tau ib txog dej num tseem ceeb. 2 Vim li ntawd, tus tswv qhia yuav tsum yog ib tug neeg tsis muaj chaw xyeej, yuav ib tug poj niam xwb, tsis haus dej haus cawv, ua siab tus tus, coj ib tug zoo cwj pwm, nyiam txais qhua, txawj qhia luag. 3 Nws tsis quav dej quav cawv, tsis nrog luag sib ntaus, tiam sis coj zoo, ntxub kev sib ceg, tsis muaj lub siab dai rau nyiaj txiag. 4 Nws txawj kav nws tsev neeg ; nws txawj qhuab qhia nws cov me nyuam kom lawv nyob hauv txoj kev mloog lus thiab ua neeg tsim txiaj. 5 Vim tias, ib tug neeg tsis txawj kav nws tsev neeg, mas nws yuav ua cas saib tau Tswv Ntuj lub Koom Txoos ? 6 Nws yuav tsis txhob yog ib tug nyuam qhuav txais kev ntseeg tau tsis ntev, tsam nws poob rau kev muab hlob, khav nws tus kheej, ces nws yuav raug txim xws li tus dab phem. 7 Nws kuj yuav tsum yog ib tug uas cov nyob sab nraud saib tias nws yog ib tug neeg zoo, ces nws thiaj yuav tsis raug luag thuam thiab tsis poob rau hauv tus dab phem lub vas.
8 Cov tub tsob hwb los ib yam, lawv kuj yuav tsum yog ib co neeg tsim nyog, yuav tsis txhob hais lus dag, yuav tsis txhob quav cawv, txhob ntsaw kev noj nyiaj raws txoj kev tsis ncaj. 9 Lawv yuav tsum muaj ib lub siab dawb paug txuag txoj kev ntseeg, uas yog ib yam txuj tob tob. 10 Chiv thawj, yuav xub sim lawv siab tso, ces yog lawv tsis muaj qhov xyeej, mas mam li txais lawv los ua txoj hauj lwm ua tub tsob hwb. 11 Cov poj niam los ib yam, lawv yuav tsum yog ib co neeg tsim nyog, tsis hais lus xaiv, tsis haus cawv ntau, tij lim nyob hauv tas puas tsav yam lawv ua. 12 Cov tub tsob hwb yog cov neeg yuav ib tug poj niam xwb, lawv yuav tsum txawj coj lawv cov me nyuam thiab lawv tsev neeg. 13 Yog lawv ua lawv txoj dej num tub tsob hwb zoo, lawv kuj yuav tau txais ib lub koob meej zoo, thiab lawv lub siab yuav nyob ruaj nreb hauv txoj kev ntseeg txog Yes Xus Pleev.

NPN 101:1B-2AB, 2CD-3AB, 5, 6

Txais: (2) kuv yuav taug raws txoj kev ncaj hauv kuv lub siab.

Kuv yuav hu nkauj txog kev khuv leej thiab kev ncaj,
Huab Tais, kuv yuav hu nkauj cav txog koj.
Kuv yuav rau siab ntso taug txoj kev zoo :
thaum twg koj li mam tuaj xyuas kuv ?

Txais: (2) kuv yuav taug raws txoj kev ncaj hauv kuv lub siab.

Kuv taug raws txoj kev ncaj hauv kuv lub siab,
Nyob hauv kuv lub vaj lub tsev.
Kuv tsis cia kuv qhov muag
ntsia ib yam phem li.

Txais: (2) kuv yuav taug raws txoj kev ncaj hauv kuv lub siab.

Tus twg nyiag hais lus rhuav tus nyob ze nws,
mas kuv yuav tsis txuag nws li.
Tus neeg saib luag qis thiab muaj lub siab muab hlob,
Mas kuv yuav tsis ua siab ntev rau nws.

Txais: (2) kuv yuav taug raws txoj kev ncaj hauv kuv lub siab.

Kuv qhov muag saib ntsoov cov siab ncaj nyob
hauv lub teb chaws, kom lawv tau los nyob ze kuv.
Leej twg coj tus yam ntxwv zoo,
yuav los ua kuv tus tub txib.

Txais: (2) kuv yuav taug raws txoj kev ncaj hauv kuv lub siab.

As Les Lus Yas: LK 7: 16

Txais: As les lus yas, as les lus yas.

Ib tug yaj saub loj sawv nyob hauv peb,
yog Tswv Ntuj tuaj xyuas nws haiv neeg.

Txais: As les lus yas, as les lus yas.

Ntawv Moo Zoo: LK 7: 11-17

11 Dhau ntawd lawm, Yes Xus mus hauv ib lub nroog hu ua Nas Ees. Yes Xus cov thwj tim thiab ib pab neeg coob coob nrog nws ua ke mus. 12 Thaum Yes Xus tuaj yuav txog lub qhov rooj loog nkag mus hauv lub nroog, lawv tab tom kwv ib tug tuag tawm tuaj txog ntawd; yog ib leeg tub twm zeej, hos nws niam yog ib tug poj ntsuam. Ib pab neeg coob coob hauv nroog nrog leej niam tawm tuaj. 13 Huab Tais pom tus poj ntsuam, Huab Tais khuv leej nws. Huab Tais hais rau nws tias : "Koj txhob quaj." 14 Yes Xus txav los tuav lub hleb, ces cov kwv hleb nres. Yes Xus hais tias : "Tus hluas, kuv hais rau koj : Koj sawv !" 15 Ces tus tuag sawv los zaum, thiab nws pib hais lus. Yes Xus muab tus tub hluas ntawd cob rau nws niam. 16 Tas sawv daws ntshai kawg. Lawv cav txog Tswv Ntuj tias : "Ib tug yaj saub loj sawv los nyob hauv peb, yog Tswv Ntuj tuaj xyuas nws haiv neeg." 17 Cov lus cav txog tus hluas ntawd ncha mus thoob tas xeev Yus Das thiab tas ib ncig lub teb chaws ntawd.

TIM 20 LUB 9 HLIS 2017

Hnub Plaub Lis Piam Nees Nkaum Plaub Nruab Xyoo A Nruab Lis Piam Xyoo I

Hwm LN Andrew Kim Tae-gŏn, ua Leej Choj, thiab LN Paul Chŏng Ha-sang, thiab cov, tuag ua Tim Khawv

Zaj Nyeem Ib: 1 TM 3: 14-16

Tus Zoo Nyiad,
14 Kuv sau cov lus no tuaj rau koj nyem no, tiam sis kuv vam tias tshuav tsis ntev kuv yuav tau tuaj ntsib koj. 15 Yog tias ho muaj dab tsis khuam kuv tsis tau tuaj sai, mas koj yuav tsum paub tias koj yuav coj tus yam ntxwv zoo li cas nyob hauv Tswv Ntuj lub tsev , uas yog tus Tswv Ntuj muaj txoj sia lub Koom Txoos, yog tus ncej thiab lub hauv paus txheem txoj kev tseeb. 16 Yeej muaj tseeb tias txoj kev teev hawm Tswv Ntuj yog ib zag txuj tob kawg nkaus to taub nyuaj: vim Leej Pleev tawm los rau neeg pom nyob hauv lub cev nqaij, nws yog ib tug ntshiab nyob hauv Leej Ntuj Plig, tsoom Tshiab tau pom nws, nws lub npe nrov ncha ntws hauv tsoom neeg teev pej kum dab, ntiaj teb neeg ntseeg txog nws, nws nce mus saum ntuj mus nyob muaj hwj chim lawm.

NPN 111: 1-2, 3-4, 5-6

Txais: (2) HUAB TAIS cov hauj lwm loj tas nrho!

Kuv yuav ua HUAB TAIS tsaug tas kuv lub siab lub ntsws,
thaum tsoom neeg siab ncaj tuaj sib sau thiab nyob hauv lub txoos.
HUAB TAIS cov hauj lwm loj tas nrho,
txhua leej yuav nrhiav rawv nws cov hauj lwm raws li nws nyiam.

Txais: (2) HUAB TAIS cov hauj lwm loj tas nrho!

HUAB TAIS cov hauj lwm muaj hwj xyeej thiab muaj hwj chim,
nws txoj kev ncaj yuav nyob ib txhiab ib txhis.
Nws nto koov meej lug vim nws cov hauj lwm txaus qhuas ;
HUAB TAIS lub siab zoo, nws khuv leej neeg.

Txais: (2) HUAB TAIS cov hauj lwm loj tas nrho!

Nws muab txhiam xws rau cov hwm nws tau noj,
nws yuav nco ntsoov mus li txog tias nws tau cog lus.
Nws ua kom nws haiv neeg paub txog nws tej hauj lwm muaj hwj huam,
Nws muab cov pej kum haiv neeg lub cuab tam pub rau lawv.

Txais: (2) HUAB TAIS cov hauj lwm loj tas nrho!

As Les Lus Yas: ZAM 6: 63C, 68C

Txais: As les lus yas, as les lus yas.

Koj cov lus, Huab Tais, yog ntsuj plig thiab yog txoj sia;
koj muaj cov lus pub txoj sia nyob mus li.

Txais: As les lus yas, as les lus yas.

Ntawv Moo Zoo: LK 7: 31-35

Yes Xus hais rau cov neeg tias:
31 "Kuv yuav muab tiam neeg no piv rau dab tsi ? Lawv zoo li leej twg ? 32 Lawv zoo li ib pab me nyuam yaus zaum tom tshav puam, lawv sib hu tias : 'Peb twb tshuab raj rau nej, nej tsis seev cev dhia li! Peb twb cuab suab hu nkauj tuag, nej tsis nyiav li!' 33 Thaum Zam Ntxuav Plig tuaj, nws tsis noj mov tsis haus cawv, nej hais tias : 'Nws raug dab !' 34 Neeg Leej Tub tuaj, nws noj mov thiab haus cawv, nej hais tias : 'Saib, tus neeg hu dab thiab quav cawv ntawd, nws nrog cov sau se thiab cov neeg txhaum ua phooj ywg !' 35 Tiam sis kev Thoob Tsib twb txais kev yeej nyob hauv nws cov me nyuam tas huv tib si lawm."

TIM 21 LUB 9 HLIS 2017

Hnub Tsib Lis Piam Nees Nkaum Plaub Nruab Xyoo A Nruab Lis Piam Xyoo I

Hwm LN Mas Tais, tus Hauv Paus Xa Lus

Zaj Nyeem Ib: ES FES XOS 4: 1-7, 11-13

Cov kwv tij,
1 Kuv, ib tug neeg raug txim vim Huab Tais, kuv thov nej, kom nej coj ib lub neej phim txoj kev uas Ntuj hu nej los taug, 2 yuav ua neeg tsis muab hlob, ua neeg siab mos siab zoo; yuav ua siab ntev, ib leeg txhawb ib leeg nyob hauv txoj kev nyiam; 3 yuav siv zog txuag kom nej muaj kev koom siab koom ib tug Leej Tswv Yim nyob hauv txoj kev thaj yeeb; 4 tsuas muaj ib lub Cev thiab ib lub Tswv Yim xwb, ib yam li tsuas muaj ib txog kev cia siab nyob hauv txoj kev uas Ntuj hu nej thiab nej tau txais; 5 tsuas muaj ib tug Huab Tais, ib txoj kev ntseeg, ib lub cim ntxuav xwb, 6 tsuas muaj ib tug Tswv Ntuj ua sawv daws Txiv xwb, nws nyob siab dua sawv daws, nws tuaj ntawm sawv daws tuaj, nws nyob hauv sawv daws. 7 Tiam sis peb nyias tau txais Ntuj lub txiaj ntsim raws li Leej Pleev luj pub rau nyias.
11 Nws pub kom ib txhia ua Hauv Paus Xa Lus, ib txhia ua Yaj Saub, ib txhia ua tub tshaj lub Moo Zoo, ib txhia ua tswv saib pab yaj thiab ua xib hwb, 12 nws ua li ntawd kom xwv cov ntshiab thiaj ua tau Tswv Ntuj tes dej num kom lawv txhim tsa tau Leej Pleev lub Cev, 13 ces thaum kawg peb sawv daws yuav ua ib leeg xwb nyob hauv txoj kev ntseeg thiab txoj kev paub Tswv Ntuj Leej Tub, peb yuav hlob tiav txiv hlob tiav txuj tiav ci zoo txhij xoo txhua, ua tau Leej Pleev lub Cev uas hlob tiav log lawm.

NPN 19: 2-3, 4-5

Txais: (5) Lawv lo lus xa moo nrov mus thoob ntiaj teb.

Cov txheej ntuj saud piav txog Tswv Ntuj lub koob meej,
lub qab ntuj khwb tshaj cov hauj lwm nws txhais tes tsim los.
Nruab hnub hais lo lus rau nruab hnub mloog,
Hmo ntuj qhia rau hmo ntuj paub txog.

Txais: (5) Lawv lo lus xa moo nrov mus thoob ntiaj teb.

Tsis muaj ib lo lus los ib zaj lus piav
Uas leej tib neeg yuav tsis hnov txog.
Lawv lub suab yeej ncha puv tas ntiaj teb,
lawv lo lus xa moo yeej nrov txog tim npoo ntuj.

Txais: (5) Lawv lo lus xa moo nrov mus thoob ntiaj teb.

As Les Lus Yas - Te Deum

Txais: As les lus yas, as les lus yas.

Tswv Ntuj, peb cav txog koj,
peb tshaj tias koj yog Huab Tais;
tsoom Hauv Paus Xa Lus uas
muaj koob meej lawv cav txog koj.

Txais: As les lus yas, as les lus yas.

Ntawv Moo Zoo: MT 9: 9-13

9 Yes Xus tawm mus, thaum nws tab tom mus kev, nws pom ib tug neeg hu ua Mas Tais, zaum ntawm lub rooj sau se. Yes Xus hais rau nws tias : "Koj raws kuv mus !" Ces tus neeg ntawd sawv tsees raws Yes Xus mus.
10 Thaum Yes Xus zaum noj mov hauv (Mas Tais) tsev, muaj ib co neeg sau se thiab ib co neeg txhaum coob tuaj nrog Yes Xus thiab cov thwj tim noj mov. 11 Cov Fas Lis Xais pom li ntawd, ces lawv hais rau cov thwj tim tias : "Vim li cas nej tus Xib Hwb nrog cov sau se thiab cov neeg txhaum noj mov ?" 12 Tab sis Yes Xus twb hnov qhov lawv hais lawm, nws thiaj teb tias : "Tsis yog cov neeg noj qab nyob zoo thiaj yuav vam txog kws kho mob, tsuas yog cov neeg mob thiaj vam txog xwb. 13 Nej yuav kawm lo lus no lub ntsiab : 'Qhov kuv xav yuav yog txoj kev khuv leej, tsis yog thaj txi ntuj.' Vim kuv tsis tuaj hu cov neeg ncaj, kuv tuaj hu cov neeg txhaum."

TIM 22 LUB 9 HLIS 2017

Hnub Rau Lis Piam Nees Nkaum Plaub Nruab Xyoo A Nruab Lis Piam Xyoo I

Zaj Nyeem Ib: 1 TM 6: 2C-12

Tus zoo nyiad,
2c Koj yuav tsum qhia thiab txhib sawv daws kom ua raws li hais ntawd. 3 Yog muaj ib tug twg qhia lwm yam kev ntseeg txawv, tsis qhia raws li peb tus Huab Tais Yes Xus Pleev cov lus tseeb, thiab tsis raws li txoj kev cai hwm Ntuj, 4 mas nws yog ib tug neeg dig muag vim kev muab hlob, ib tug neeg tsis paub dab tsi, nws raug tus mob uas nyiam txoj kev siv lus los sib cav thiab sib ceg; tej lus ntawd ua kom muaj kev khib siab, muaj lus sib cav kom yeej, lus sib thuam, lus iab liam siab phem, 5 muaj lus sib cav sib ceg tsis muaj qab hau ntawm cov neeg uas muaj lub tswv yim phem, tsis paub qhov tseeb li, vim lawv saib kev hwm Ntuj yog ib txog kev nrhiav kom yus nplua nuj xwb.
6 Kev hwm Ntuj uas yog yus txaus siab rau qhov ntawd yeej coj ib yam kev nplua tuaj tiag. 7 Vim peb tsis tau nqa dab tsi los nyob ntiaj teb no li, peb kuj yuav nqaj tsis tau dab tsi thaum peb rov mus li. 8 Li ntawd, tsuav yog peb muaj txaus noj txaus hnav, mas peb yuav tsum txaus siab yuav li ntawd. 9 Hos cov neeg uas xav nplua nuj muaj nyiaj txiag ntau, mas lawv poob rau kev ntxias, lawv mag ib rooj ntxiab, thiab lawv poob rau ntau txoj kev ntshaw tsis muaj qab hau thiab tsis zoo , ces yuav coj kev xyob txhiaj thiab kev puas ntsoog tuaj raug lawv. 10 Vim lub hauv paus cag uas hlav txhua hom kev phem yog txoj kev nyiam nyiaj txiag. Qee leej qaug rau nyiaj txiag, lawv yuam kev mus deb ntawm txoj kev ntseeg, ces ntau hom kev nyuaj kev ntxhov siab thiaj chob lawv tus plig.
11 Ntawm koj, uas yog Tswv Ntuj tus neeg, koj yuav tsum txav mus deb ntawm tej ntawd tas tib si. Koj xyaum taug txoj kev ua neeg ncaj ncees, kev hwm Ntuj, kev ntseeg zoo, kev nyiam luag, kev ua siab ntev, thiab kev ua zoo rau luag. 12 Koj ntaus ntsug rog zoo los pab kev ntseeg. Koj yuav tsum txeeb kom tau txoj sia nyob mus li uas Ntuj hu koj los txais thiab vim koj xav tau txais, koj thiaj tau los lees coj txoj kev ntseeg rau coob leej tim khawv pom.

NPN 49: 6-7, 8-10, 17-18, 19-20

Txais: Cov pluag hauv nruab siab tau txoj hmoov zoo,
Ntuj lub Ceeb Tsheej yog lawv li.

Thaum tsiv hnub tsiv nyoog, vim li cas kuv thiaj ntshai
cov neeg nkhaus uas nyob ncig kuv txoj kev phem?
Lawv yog cov tso siab rau lawv peev nyiaj txiag
lawv khav hais tias lawv nplua nuj kawg.

Txais: Cov pluag hauv nruab siab tau txoj hmoov zoo,
Ntuj lub Ceeb Tsheej yog lawv li.

Tiam sis ib tug neeg yuav rov muas nws txoj kev dim tsis tau,
nws yuav them tus nqi txhiv nws rau Tswv Ntuj kuj tsis tau.
Vim tus nqi them yus txoj sia hnyav dhau, yus yeej tsis muaj txaus ib zaug li
Kom yus thiaj muaj txoj sia nyob mus li thiab tsis pom lub qhov ntxa ib zaug li.

Txais: Cov pluag hauv nruab siab tau txoj hmoov zoo,
Ntuj lub Ceeb Tsheej yog lawv li.

Koj txhob ntshai thaum ib tug neeg nplua nuj tuaj
thiab nws tsev neeg lub cuab tam huam vam tuaj.
Vim tias hnub nws tuag, nws yuav nqa tsis tau dab tsi li,
Tej nws muaj yuav tsis caum nws qab mus li.

Txais: Cov pluag hauv nruab siab tau txoj hmoov zoo,
Ntuj lub Ceeb Tsheej yog lawv li.

Thaum ua neej nyob, nws rov qhuas nws tsis tseg tias:
"Luag tej cav txog koj vim koj ua tau txhua yam zoo rau koj ! "
Nws kawg yuav rov mus cuag nws cov yawg koob,
lawv yuav tsis pom qhov pom kev ci tas ib txhiab ib txhis.

Txais: Cov pluag hauv nruab siab tau txoj hmoov zoo,
Ntuj lub Ceeb Tsheej yog lawv li.

As Les Lus Yas: MT 11: 25

Txais: As les lus yas, as les lus yas.

Kuv cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog Ntuj Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: LK 8: 1-3

1 Yes Xus taug kev mus ntawm ib lub nroog los ib lub zos mus rau lwm lub. Nws qhia thiab tshaj lub Moo Zoo txog Tswv Ntuj lub Ceeb Tsheej. Pab Kaum Ob leeg nrog Yes Xus mus, 2 thiab kuj muaj ib co poj niam uas Yes Xus tau kho lawv dim ntawm dab phem thiab dim ntawm lawv tus mob: muaj Mab Liab uas luag hu ua Mas Ntas Las, yog tus uas Yes Xus ntiab xya tus dab phem tawm hauv nws mus; 3 muaj Yos As Nas, uas yog Tshus Xas, Hes Los tus tim xyoob tus poj niam, muaj Xus Xas Nas thiab coob leej ntxiv. Lawv muab lawv lub cuab tam los tsob hwb Yes Xus thiab nws cov thwj tim.

TIM 23 LUB 9 HLIS 2017

Hnub Xya Lis Piam Nees Nkaum Plaub Nruab Xyoo A Nruab Lis Piam Xyoo I

Hwm LN Pius nyob Pietrelcina ( Padre Pio)

Zaj Nyeem Ib: 1 TM 6: 13-16

Tus zoo nyiad,
13 Kuv tso txoj hauj lwm no rau koj, nyob ntawm Tswv Ntuj tus pub txoj sia rau txhua tsav txhua yam thiab nyob ntawm Leej Pleev Yes Xus xub ntiag, nws yog tus tau hais lo lus zeem tseeb ua pov thawj zoo nyob ntawm Poos Xyus Pis Las Tos xub ntiag, 14 thov kom koj khaws lo lus qhia kom zoo, txhob muaj qhov phem thiab txhob muaj chaw xyeej, mus txog hnub peb tus Huab Tais Yes Xus Pleev rov los, 15 kom thaum txog caij txog nyoog, nws yuav ua kom tus vaj nto koob meej, tus tseem Vaj tawm los, uas yog tus Vaj kav tas tsoom vaj, tus Huab Tais kav tas tsoom huab tais, 16 tsuas yog nws ib leeg thiaj muaj txoj sia tsis txawj kawg ua nws tug, nws nyob txawm saum qhov pom kev uas neeg mus tsis txog, neeg tsis tau pom dua, thiab neeg pom tsis tau. Kev nto koob meej thiab kev muaj hwj huam yog nws tug mus tas ib txhiab ib txhis ! Ua li !

NPN 100:1B-2, 3, 4, 5

Txais: (2) Nej tuaj muaj kev zoo siab nyob ntawm Huab Tais xub ntiag.

Txhua lub teb chaws, nej zoo siab hu nkauj rau HUAB TAIS !
Nej xyiv fab hlo luag ntxhi tsob hwb HUAB TAIS ;
nej hu nkauj zoo siab chaws los ntawm nws xub ntiag !

Txais: (2) Nej tuaj muaj kev zoo siab nyob ntawm Huab Tais xub ntiag.

Nej yuav tsum paub tias HUAB TAIS yog Tswv Ntuj.
Nws tsim peb los, peb yog nws tug,
peb yog nws haiv neeg, yog pab yaj nws saib.

Txais: (2) Nej tuaj muaj kev zoo siab nyob ntawm Huab Tais xub ntiag.

Nej chaws ntawm nws cov rooj vag mus, nej ua nws tsaug,
Nej mus hauv nws cov tshav loog, nej cav txog nws ;
nej ua nws tsaug, nej foom lus zoo rau nws lub npe.

Txais: (2) Nej tuaj muaj kev zoo siab nyob ntawm Huab Tais xub ntiag.

Vim nws muaj lub siab zoo :
HUAB TAIS, nws txoj kev ua zoo yuav nyob mus li,
nws yuav ua ncaj rau txheej dhau txheej.

Txais: (2) Nej tuaj muaj kev zoo siab nyob ntawm Huab Tais xub ntiag.

As Les Lus Yas: LK 8: 15

Txais: As Les Lus Yas, as les lus yas.

Lawv muaj hmoov zoo cov uas muaj ib lub siab dav coj raws lo lus
thiab lawv txi txiv ncw vim lawv mob siab rau.

Txais: As Les Lus Yas, as les lus yas..

Ntawv Moo Zoo: LK 8: 4-15

4 Thaum ntawd muaj tej pab neeg coob coob tuaj sis sau ua ke, thiab muaj neeg tuaj hauv cov nroog tuaj cuag Yes Xus. Ces Yes Xus ua paj lug hais li no : 5 "Tus tseb nplej tawm mus tseb nws cov noob qoob noob loo. Thaum nws tseb, muaj ib co noob poob rau ntawm ntug kev, luag tsuj cov noob ntawd, thiab noog ya saum ntuj los noj tas lawm. 6 Muaj ib co noob poob rau saum pob zeb, cov yub nplej hlav tuaj, tab sis cia li qhuav tas, vim tsis muaj av noo . 7 Muaj ib co noob poob rau hauv cov pos, cov yub nplej nrog pos hlob ua ke, tab sis pos laum cov nplej tuag tas. 8 Muaj ib co noob poob rau hauv thaj av zoo, cov yub nplej hlob, thiab txi txiv txog pua lub." Yes Xus hais cov lus no tas, nws hais nrov nrov tias : "Leej twg muaj pob ntseg mloog, cia nws yeej meem mloog !"
9 Yes Xus cov thwj tim nug nws tias zaj paj lug no lub ntsiab yog dab tsi. 10 Yes Xus hais tias : "Ntuj pub kom nej paub txog tej txuj tob tob hauv Tswv Ntuj lub Ceeb Tsheej, tab sis rau luag tej, mas tsuas yog lus paj lug xwb, kom xwv lawv ntsia los lawv tsis pom, lawv hnov los lawv tsis to taub. 11 Zaj paj lug ntawd txhais li no : Cov noob, yog Tswv Ntuj Lo Lus. 12 Cov noob uas poob ntawm ntug kev, yog cov uas tau hnov, tab sis dab phem tuaj rho Lo Lus tawm hauv lawv lub siab mus, kom lawv txhob ntseeg, thiab txhob tau txais kev cawm. 13 Cov uas poob rau saum pob zeb, yog cov neeg uas thaum lawv hnov Lo Lus, lawv zoo siab hlo txais. Tab sis lawv tsis muaj cag, lawv tsuas ntseeg ib ntus xwb, lub caij lawv muaj kev sim siab, lawv cia li tso tseg. 14 Cov noob uas poob rau hauv hav pos yog cov neeg uas tau hnov Lo Lus, tab sis lawv lub neej tej kev txhawj xeeb, tej kev nrhiav nyiaj txiag, thiab tej kev ntshaw ua kom zoo yus siab laum Lo Lus, ces Lo Lus hlob tsis taus txi tsis taus txiv. 15 Hos cov noob poob hauv thaj av zoo, yog cov uas tau hnov Lo Lus, lawv khaws nkaus Lo Lus rau hauv lawv lub siab zoo siab dav, ces lawv txi txiv vim lawv lub siab ruaj nreb xyaum tas zog kom tau.

TIM       25      LUB      9      HLIS       2017

Hnub Ob Lis Piam Nees Nkaum Tsib Nruab Xyoo A Nruab Lis Piam Xyoo I  

Zaj Nyeem Ib:       ES NRAS  1:   1-6

1 Thawj xyoo uas Kus Los pib ua vaj nyob Pes Xis teb, HUAB TAIS xav ua raws li nws lo lus uas Yes Les Mias tau hais, nws tuaj tshoj Kus Los, tus vaj Pes Xis lub tswv yim ces Kus Los thiaj tshaj ib co lus ceeb toom rau nws lub teb chaws tas tib si, muaj ua lus hais thiab muaj ua ntawv sau tias : 2 "Tus vaj Kus Los uas kav Pes Xis teb hais li no : HUAB TAIS, tus Tswv lub ntuj, muab tas cov teb chaws nyob ntiaj teb rau kuv kav thiab nws xav kom kuv ua txoj haum lwm txhim ib lub Tuam Tsev teev nws nyob Yes Lus Xas Les nyob Yus Das teb. 3 Li ntawd yog nej leej twg yog Tswv Ntuj haiv neeg mas kom Tswv Ntuj nrog nej nyob, thiab kom nej mus pem Yes Lus Xas Les uas nyob Yus Das teb, kom nej mus txhim lub Tuam Tsev teev HUAB TAIS uas yog His Xas Lais tus Tswv Ntuj, yog tus Tswv Ntuj nyob Yes Lus Xas Les. 4 Tas cov neeg uas nrog nej nyob qhov txhia chaw mas lawv yuav muab nyiaj, muab kub, muab toob xib los muab tsiaj ua paj tshab siab dawb tuaj pab txhim Tswv Ntuj lub Tuam Tsev nyob Yes Lus Xas Les." 5 Ces cov txiv tsev Yus Das thiab Npes Yas Mis, cov Leej Choj, cov Les Vis thiab tas cov neeg uas Tswv Ntuj tshoj lawv lub tswv yim, sawv daws sawv mus pem Yes Lus Xas Les kom tau txhim HUAB TAIS lub Tuam Tsev. 6 Cov neeg nyob ncig lawv kuj pab lawv. Lawv muab nyiaj muab kub, muab toob xib, muab tsiaj thiab pub ntau yam muaj nqes thiab ntau hom paj tshab pab lawv dawb dawb.

NPN       126:   1B-2AB, 2CD-3, 4-5, 6

Txais:   (3) HUAB TAIS ua tej yam loj tas nrho rau peb.    

Thaum HUAB TAIS thim Xis Yoos cov neeg nyob txim rov los,
peb zoo li ib co neeg ua npau suav.
Peb lub ncauj muaj suab luag nqhua,
peb tus nplaig qw nkauj zoo siab.

Txais:   (3) HUAB TAIS ua tej yam loj tas nrho rau peb.

Tej pej kum cuab hais nroo ntws tias :
"HUAB TAIS ua tej yam loj tas nrho rau lawv !"
HUAB TAIS tau ua tej yam loj rau peb tiag,
peb zoo siab tas nrho.

Txais:   (3) HUAB TAIS ua tej yam loj tas nrho rau peb.

HUAB TAIS, thov koj thim peb cov neeg nyob txim kom rov qab los
xws li dej sab siv huam nyob teb chaws suab puam.
Cov neeg tseb nplej ntxuag kua muag,
lawv yuav sau nplej ntxuag kev lom zem.

R. The Lord has done marvels for us.

Thaum mus, lawv quaj,
vim lawv ris cov seev noob coj mus tseb,
thaum lawv rov los, lawv hu nkauj,
vim lawv ris cov res nplej tshiab los.

Txais:   (3) HUAB TAIS ua tej yam loj tas nrho rau peb.

As Les Lus Yas:       MT  5:   16

xais: As les lus yas, as les lus yas.

Cia nej qhov pom kev ci nyob ntawm zeej tsoom xub ntiag,
kom lawv pom nej cov dej num zoo, ces lawv yuav cav txog nej Txiv nyob saum ntuj.

Txais: As les lus yas, as les lus yas.

Ntawv Moo Zoo:      LK  8:   16-18

Yes Xus hais rau cov neeg coob coob tias:
16 "Tsis muaj leej twg taws tau ib lub teeb, yuav muab ib lub thoob los khwb, los yuav muab txawb rau hauv qab txag. Luag tsuas muab txawb saum tus ncej teeb, kom xwv cov neeg nkag los hauv tsev pom kev.
17 Vim tias tsis muaj ib yam zais ntshis uas yuav tsis tshwm los, tsis muaj ib yam npog cia uas yuav tsis qhib los rau sawv daws paub thiab pom.
18 Nej yuav ceev faj tias thaum nej mloog nej coj li cas. Vim tias tus uas twb muaj lawm, tseem yuav tau txais  ntxiv,  hos tus tsis muaj, tab yog qhov nws xav tias nws muaj, tseem yuav raug muab rho tawm ntawm nws mus."

TIM       26      LUB      9      HLIS       2017

Hnub Peb Lis Piam Nees Nkaum Tsib Nruab Xyoo A Nruab Lis Piam Xyoo I

Hwm LN Cosmas thiab LN Damian

Zaj Nyeem Ib:       ES NRAS  6:   7-8, 12B, 14-20

Vaj ntxwv Das Lis Yus tshaj ib co lus ceeb toom rau cov nom tswv nyob sab dej Aws Fas Tes sab tim ub tias:
7. “Nej tsis txhob txwv cov hauj lwm tsa Tswv Ntuj lub tsev, txhob txwv tus nom saib xeev Yus Das thiab cov txwj laus Yus das; cia lawv tsa Tswv Ntuj lub tsev nyob rau ntawm nws thaj chaw.  8. Kuv muaj lus ceeb toom li no tias kom cov txwj laus Yus Das kav tsij tsa Tswv Ntuj lub tsev thiab kom rho cov nyiaj se hauv tus vaj lub txhab nyiaj uas yog tuaj tim sab dej Aws Fas Tes sab tid tuaj los them rau lawv cov nuj nqes sai sai kom lawv txoj hauj lwm thiaj mus taus ntxiv.
12b. Kuv, Das Lis Yus, tau ceeb toom kom nej yuav tsum ua li ntawd.”
14 Cov txwj laus Yus Das txhim lub tuam tsev ntxiv mus, tus yaj saub As Nkais thiab Ntxas Kas Lias uas yog Is Dos tub hais lus txhib sawv daws. Lawv txhim lub tuam tsev teev Ntuj kom tiav raws li tsoom His Xas Lais tus Tswv Ntuj kom ua thiab raws li cov vaj Kus Los thiab Das Lis Yus thiab As Tas Xes Xes uas yog tus vaj Pes Xis, lawv cov lus ceeb toom. 15 Lawv ua lub tsev tiav  rau hnub tim peb lub hli As Das uas yog xyoo rau Das Lis Yus ua vaj. 16 Cov His Xas Lais – muaj cov leej choj, cov Les Vis thiab cov seem ntawm cov raug mus nyob txim rov los – lawv ua ib lub hnub nyoog lom zem, lawv ua cov kab ke fij lub tuam tsev ntawd rau Tswv Ntuj. 17 Lawv muab ib puas tus heev nyuj, ob puas tus laug yaj, plaub puas tus thav yaj los txi Ntuj, thiab lawv muab kaum ob tug laug tshis raws li kaum ob xeem His Xas Lais los txi thov kom Tswv Ntuj zam His Xas Lais cov txhaum rau lawv. 18 Ces lawv tsa kom muaj cov Leej Choj raws li lawv tes dej num thiab tsa cov Les Vis kom muaj pab los tuav cov kab xwm tsob hwb Tswv Ntuj nyob Yes Lus Xas Les, raws li cov lus sau tseg nyob hauv Mais Xes phau ntawv. 19 Cov neeg mus nyob txim rov los lawv ua lub hnub nyoog Hla rau lub ib hlis xiab kaum plaub.
20. Cov Les Vis mus ntxuav kom lawv dawb huv ua ke li lawv yog ib tug xwb, ces lawv yog ib co neeg ntshiab mus txi tus yaj hla pub rau tas cov mus nyob txim rov los, pub rau lawv cov kwv tij ua leej choj, thiab rau lawv tus kheej.

NPN        122:   1-2, 3-4AB, 4CD-5

Txais: (1) Tuaj peb zoo siab hlo mus pem Huab Tais tsev
los: As les lus yas.

Kuv zoo siab vim lawv hais rau kuv tias:.
"Peb yuav nce mus lawm pem Huab Tais tsev.”
Yes Lus Xas Les, nim no, peb txhais taw
tau tsuj koj cov rooj loog lawm.

Txais…

Yes Lus Xas Les, yog ib lub nroog
luag txhim tau zoo xwm yeem.
Cov xeem neeg nce mus pem nws,
Yog Huab Tais cov xeem neeg

Txais…

Lawv nce mus raws li txoj cai qhia rau His Xas Lais,
Kom tau cav txog Huab Tais lub Npe.
Nyob ntawd muaj ib co rooj zaum txiav txim teeb tau tseg,
Yog cov rooj cia rau Das Vis tsev neeg zaum.

Txais…

As Les Lus Yas: ZAM 15: 4A, 5B

Txais: As les lus yas, as les lus yas.

Nej yuav nyob ruaj hauv kuv ib yam li kuv nyob hauv nej;
leej twg nyob ruaj hauv kuv nws yuav txi txiv ncw.

Txais: As les lus yas, as les lus yas.

As Les Lus Yas:       LK  11:   28

Txais:   As les lus yas, as les lus yas.

Cov muaj hmoov zoo yog cov uas mloog
Tswv Ntuj Lo Lus thiab ua raws li ntawd,

Txais:   As les lus yas, as les lus yas.

Ntawv Moo Zoo:       LK  8:   19-21

19 Yes Xus niam thiab nws cov kwv tij tuaj, tab sis lawv tuaj cuag nws tsis tau vim neeg coob coob.
20 Muaj neeg mus qhia Yes Xus tias : "Koj niam thiab koj cov kwv tij tuaj sawv nraud, lawv xav pom koj."
21 Tab sis Yes Xus teb rau lawv tias : "Kuv niam thiab kuv cov kwv tij yog cov uas mloog Tswv Ntuj Lo Lus thiab ua raws li Lo Lus ntawd.

TIM 27 LUB 9 HLIS 2017

Hnub Plaub Lis Piam Nees Nkaum Tsib Nruab Xyoo A Nruab Lis Piam Xyoo I

Hwm LN Vincent de Paul, ua Leej Choj

Zaj Nyeem Ib: ES NRAS 9: 5-9

Thaum lub caij ua thaj txi Ntuj yav tsaus ntuj, kuv sawv hauv kuv txoj kev nyuaj siab los, kuv dua rhe kuv cev ris tsho thiab kuv lub tsho loj, ces kuv txhos caug ntua, tsa tes rau Huab Tais, kuv tus Tswv Ntuj. 6 Kuv hais tias: “Kuv tus Tswv Ntuj aw, kuv txaj muag dhau kuv tsis tsim nyog yuav tsa kuv lub ntsej muag tuaj rau koj li, vim peb cov txhaum ntau dhau tsuam saum peb taub hau, peb lub txim loj dhau siab mus txog saum ntuj lawm. 7 Txij puag thaum peb phaj txiv los txog hnub no, peb tau ua yuam kev loj. Vim peb tej kev phem, peb thiaj swb rau luag, peb thiab peb cov vaj thiab cov leej choj thiaj raug pej kum teb cov vaj tswj ywj siab, raug luag dab ntaj txo peb, raug luag coj mus nyob txim, raug luag lwg, raug poob ntsej muag xws li niaj hnub no. 8 Lub sij hawm no, peb muaj ib lub caij tau txais kev khuv leej ntawm Huab Tais peb tus Tswv Ntuj; nws tau pub kom peb muaj ib pab seem dim los thiab kom peb muaj ib feem nyob hauv nws thaj chaw ntshiab; li no peb tus Tswv Ntuj ua kom peb qhov muag pom kev me ntsis tuaj thiab nws txo peb txoj kev ua luag qhev kom sib tuaj. 9 Txawm peb ua luag qhev tiag, tiam sis peb tus Tswv Ntuj tsis tso peb pov tseg nyob hauv peb txoj kev ua qhev. Nws tig cov vaj Pes Xis lub siab kom los hlub peb, nws ua kom peb rov ciaj sia tuaj, peb thiaj tau rov tsa Tswv Ntuj lub tsev uas vau tas kom sawv los nyob ruaj; thiab nws tau pub kom peb muaj ib lub ntsa laj kab thaiv nyob Yus das thiab nyob Yes Lus Xas Les.”

NPN: TOS NPIS 13: 2, 3-4A, 4BEFGHN, 7, 8

Txais: (1b) Kom Tswv Ntuj nto koob meej, nws yog tus nyob mus li.

Nws nplua neeg thiab nws kuj khuv leej neeg;
nws muab neeg thawb kom poob lawm puag dab nriag teb,
thiab nws kuj npo neeg puag hauv lub qhov ntuj tob tawm los.
Tsis muaj leej twg yuav khiav dim tau ntawm nws txhais tes.

Txais: (1b) Kom Tswv Ntuj nto koob meej, nws yog tus nyob mus li.

His Xas Lais cov tub, nej cav txog nws nyob
ntawm cov teev pej kum dab xub ntiag,
vim nws tau tseb nej mus nyob xyaw lawv,
kom nws tau ua tej yam hwj huam loj pab nej.

Txais: (1b) Kom Tswv Ntuj nto koob meej, nws yog tus nyob mus li.

Nej yuav qhuas txog nws nyob ntawm txhua
yam muaj sia xub ntiag, vim nws yog nej tus Huab Tais,
nws yog nej tus Tswv ntuj, nws yog peb Txiv thiab
peb tus Tswv Ntuj mus tas ib txhiab ib txhis.

Txais: (1b) Kom Tswv Ntuj nto koob meej, nws yog tus nyob mus li.

Txawm kuv raug mus nyob txim rau pej kum teb,
los kuv tseem cav txog Huab Tais;
kuv qhia txog nws lub hwj huam thiab hwj chim
Rau ib haiv neeg txhaum paub.

Txais: (1b) Kom Tswv Ntuj nto koob meej, nws yog tus nyob mus li.

Tas nej cov uas Huab Tais tau xaiv, nej cav txog nws,
tas nej sawv daws cia li cav txog nws lub hwj chim.
Nej qee tej lub hnub nyoog los ua kev zoo siab thiab cav txog nws.

Txais: (1b) Kom Tswv Ntuj nto koob meej, nws yog tus nyob mus li.

As Les Lus Yas: MK 1: 15

Txais: As les lus yas, as les lus yas.

Tswv Ntuj lub Ceeb Tsheej los txog ze lawm :
nej hloov siab, nej cia li ntseeg txog lub Moo Zoo.

Txais: As les lus yas, as les lus yas.

Ntawv Moo Zoo: LK 9: 1-6

1 Yes Xus hu Pab Kaum Ob los, nws muab hwj huam thiab peev xwm rau lawv kom lawv yuam tau txhua tus dab thiab kho tau mob kom zoo. 2 Ces nws xa lawv mus tshaj Tswv Ntuj lub Ceeb Tsheej thiab kho cov mob kom zoo. 3 Nws hais rau lawv tias : "Nej txhob nqa dab tsi taug kev, txhob nqa pas nrig, txhob ris hnab, txhob ntim mov, txhob nqa nyiaj, txhob nqa ib lub tsho seem li. 4 Nej chaws mus hauv lub tsev twg, nej nyob hauv lub tsev ntawd mus txog hnub nej rov qab. 5 Hos cov neeg uas tsis txais nej, thaum nej tawm hauv lub nroog ntawd mus, mas nej nchos tej plua av lo nej ko taw huv si tseg cia ua pov thawj txog lawv." 6 Ces cov thwj tim mus ib lub zos dhau ib lub zos, lawv tshaj lub Moo Zoo thiab kho cov mob nyob txhua qhov chaw kom zoo.

TIM       28      LUB      9      HLIS       2017

Hnub Tsib Lis Piam Nees Nkaum Tsib Nruab Xyoo A Nruab Lis Piam Xyoo I

Hwm LN Wenceslaus, thiab LN Lorenzo Ruiz thiab nws cov Phooj Ywg

Zaj Nyeem Ib:       AS NKAIS  1:   1-8

1 Xyoo ob uas Das Lis Yus ua vaj, thaum lub rau hli xiab ib, HUAB TAIS cov lus tawm ntawm tus Yaj Saub As Nkais los hais rau Ntxos Los Npas Npes, uas yog Shij Thias tus nom kav Yus Das teb tub, thiab rau Yos Xuas, tus thawj Leej Choj uas yog Yes Hos Xes Das tub tias:  2 Tsoom tshiab tu HUAB TAIS hais li no : "Haiv neeg no hais tias tsis tau txog caij rov tsa HUAB TAIS lub tsev.” 3 Ces Huab Tais lo lus tawm hauv tus yaj saub As Nkais tuaj hais li no:  4 “Puas yog lub caij rau nej tau zoo nyob hauv nej tej tsev vov txiag zoo zoo, hos lub tsev no nyob puas tsus cia?" 5 Tsoom tshiab tus HUAB TAIS hais li no tias: "Nyem no nej yuav xav tswv yim txog tej yam nej ua. 6 Nej tau tseb noob ntau, tab sis nej sau tau tsawg los cia; nej noj mov lawm, tab sis nej tsis hnov tsau plab; nej haus dej, tab sis tsis txaus daws nej qhov nqhis; nej tau hnav, tab sis tsis sov nej. Tus txais nyiaj hli, nws muab nws cov nyiaj hli ntim rau hauv ib lub hnab to qab xwb !”  8 Tsoom tshiab tus HUAB TAIS hais li no: "Nej yuav xav tswv yim txog tej yam nej ua! Nej yuav nce mus saum roob, nej mus txiav ntoo los, yuav coj los tsa lub tsev. Ces kuv yuav zoo siab nyob hauv lub tsev ntawd, kuv yuav tau txais koob meej nyob ntawd."  Yog Huab Tais lo lus.

NPN       149:   1B-2, 3-4, 5-6A+9B

xais: (4a) Huab Tais zoo siab nyob hauv nws haiv neeg.
los: As les lus yas

Nej hu ib zaj nkauj tshiab rau HUAB TAIS,
nej cav txog nws nyob hauv tsoom ntseeg lub txoos.
His Xas Lais yuav zoo siab nyob hauv tus uas tsim lawv,
Xis Yoos cov me nyuam yuav luag ntxhi nyob hauv lawv tus vaj.

Txais: (4a) Huab Tais zoo siab nyob hauv nws haiv neeg.
los: As les lus yas

Lawv yuav ua kev lom zem yoj cev cav txog nws lub npe,
lawv yuav hu nkauj cav txog nws nrog suab nruas thiab suab nkauj nog ncas.
Vim HUAB TAIS hlub nws haiv neeg,
thiab nws muab txoj kev yeej rau cov neeg me hnav ua zam.

Txais: (4a) Huab Tais zoo siab nyob hauv nws haiv neeg.
los: As les lus yas

Cov muaj lub siab ntseeg hom khaj nyob hauv txoj kev nto koob meej;
lawv yuav hu nkauj zoo siab hauv lawv tej chaw nyob;
lawv lub qa tsuas muaj qw suab cav txog Tswv Ntuj.
Qhov no yog cov uas ntseeg nws lub koob meej. As les lus yas.

Txais: (4a) Huab Tais zoo siab nyob hauv nws haiv neeg.
los: As les lus yas

As Les Lus Yas:       ZAM  14:   6

Txais: As les lus yas, as les lus yas.

Huab Tais hais tias: Kuv yog Txoj Kev, yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau, yog nws tsis los ntawm kuv mus.

Txais: As les lus yas, as les lus yas.

Ntawv Moo Zoo:       LK  9:   7-9

7 Vaj txheeb Hes Los hnov txog txhua yam tshwm sim, nws tsis pom qab yuav xav li cas, vim ib txhia hais tias : "Yog Zam sawv hauv cov tuag rov los lawm."
8 Qee leej hais tias : "Yog Es Lias tshwm sim los." Lwm cov tseem hais tias : "Yog ib tug yaj saub thaum ub sawv rov los lawm."
9 Tab sis Hes Los hais tias : "Zam, mas kuv kom luag txiav nws caj dab lawm. Ua li tus uas kuv hnov hais tias nws ua tej yam ntawd yog leej twg ?" Ces Hes Los nrhiav kom tau kev pom Yes Xus.

TIM 29 LUB 9 HLIS 2017

Hnub Rau Lis Piam Nees Nkaum Tsib Nruab Xyoo A Nruab Lis Piam Xyoo I

Hwm cov Tuam Tshiab LN Miv Kas (Michael), Nkas Nplias (Gabriel), thiab Las Fais (Raphael)

Zaj Nyeem Ib: DN 7: 9-10, 13-14

9 Kuv ntsia ntsoov mus txog thaum kuv pom lawv pov ib co theej kiab los txawb rau ntawd, ces tus Laus hnub nyoog nchav los zaum saum nws lub theej kiab; nws cov ris tsho dawb ci cuag daus, nws cov plaub hau saum taub hau dawb paug cuag plaub yaj. Nws lub theej kiab cig cuag li yog nplaim taws, lub theej kiab muaj ib co log hluav taws ci ntsa iab. 10 Muaj ib tug dej yog dej hluav taws txhawv ntws lug ntawm nws xub ntiag los. Txhiab txhiab leej tsob hwb nws, vam vam leej sawv ntsug nyob ntawm nws xub ntiag. Lub rooj txiav txim npaj tiav tas, tej ntawv twb nthuav tas lawm.
13 Thaum hmo ntuj kuv yees pom tej yam zoo li no: Tuaj nyob saum cov huab zoo li yog ib tug Neeg leej Tub, nws yuav tuaj ntsib tus Lau; lawv coj nws mus txog ntua ntawm tus Laus xub ntiag. 14 Ces Neeg Leej Tub txais lub hwj huam, lub koob meej thiab kev ua vaj. Tas txhia haiv neeg, txhia kuj cuab, txhia xeem lus yuav tsum tsob hwb nws. Nws txoj kev tswj yog ib txog kev tswj nyob mus li tsis txawj kawg. Nws txoj kev ua vaj yuav tsis muaj txawj tas li.

Los QYTN 12: 7-12AB

7 Muaj ib nthwv rog nyob saum ntuj : Miv Kas thiab nws cov Tshiab ua rog ntaus tus Zaj, tus Zaj thiab nws cov dab kuj ua rog tiv lawv thiab. 8 Tab sis tus Zaj swb lawm, ces tus Zaj thiab nws cov dab tsis tau kev nyob saum ntuj ntxiv. 9 Niag Zaj loj loj, niag nab txheej thaud uas tseem hu ua Dab Phem thiab hu ua Xas Tas, uas yog tus ntxias tas ntiaj teb neeg , nws raug muab cuam pov rau hauv ntiaj teb thiab nws cov dab kuj raug pov nrog nws huv tib si.
10 Ces kuv hnov ib lub suab nrov loj loj saum ntuj tuaj tias : “Zaum no, yog lub caij peb tus Tswv Ntuj txoj kev cawm, nws lub hwj huam, thiab nws txoj kev ua vaj los txog lawm, thiab yog nws Leej Pleev lub caij ua tus tswj lawm. Vim tus niag uas liam rau peb cov kwv tij nruab hnub hmo ntuj nyob ntawm Tswv Ntuj xub ntiag, nws raug muab cuam poob rau puag hauv lawm. 11 Lawv yeej nws vim Leej Yaj cov ntshav, thiab vim lawv lo lus ua tim khawv. Lawv tsis khuv xim lawv txoj sia, lawv yeem tuag. 12 Vim li ntawd mas lub ntuj thiab tas cov uas nyob saum ntuj, nej cia li zoo siab!”

NPN 138: 1-2AB, 2CDE-3, 4-5

Txais: (1) HUAB TAIS, kuv yuav cav txog koj nyob ntawm cov tshiab xub ntiag.

Kuv yuav ua koj tsaug, HUAB TAIS, tas kuv lub siab ntsws,
vim koj tau hnov kuv lub ncauj cov lus thov;
kuv yuav hu nkauj cav txog koj nyob ntawm cov tshiab xub ntiag;
kuv yuav tuaj pe hawm koj nyob hauv koj lub tuam tsev ntshiab
thiab yuav ua tsaug rau koj lub npe.

Txais: (1) HUAB TAIS, kuv yuav cav txog koj nyob ntawm cov tshiab xub ntiag.

Vim koj lub siab zoo thiab koj txoj kev tseeb,
koj tau muab koj lub npe thiab koj txoj kev cog lus
ua qhov loj tshaj tas txhua yam.
Thaum kuv hu, koj teb kuv,
koj ntxiv zog rau kuv kom kuv lub zog loj tuaj.

Txais: (1) HUAB TAIS, kuv yuav cav txog koj nyob ntawm cov tshiab xub ntiag.

HUAB TAIS, tas ib tsoom vaj nyob ntiaj teb ua koj tsaug,
vim lawv hnov koj cov lus koj lub ncauj tau cog.
Lawv cav lus zoo txog HUAB TAIS tej kev tias :
"HUAB TAIS lub koob meej loj tas nrho !

Txais: (1) HUAB TAIS, kuv yuav cav txog koj nyob ntawm cov tshiab xub ntiag.

As Les Lus Yas: NPN 103: 21

Txais: As les lus yas, as les lus yas.

Cia li cav lus zoo txog HUAB TAIS, nej uas yog nws tsoom tshiab,
nej uas yog nws cov tub txib ua ywj nws lub siab xav.

Txais: As les lus yas, as les lus yas.

Ntawv Moo Zoo: ZAM 1: 47-51

47 Yes Xus pom Nas Tas Nais tuaj, nws hais txog Nas Tas Nais, nws hais tias : "Nej saib, tus ntawd yog ib tug tseem His Xas Lais uas tsis zais siab li." 48 Nas Tas Nais hais rau Yes Xus tias: "Ua cas koj paub kuv ?" Yes Xus teb rau Nas Tas Nais tias : "Thaum Fis Lis Pos tsis tau hu koj, kuv twb pom koj nyob hauv tsob qab ntoo txiv ncuav pias lawm." 49 Nas Tas Nais teb rau Yes Xus tias : "Las Npis, koj yog Tswv Ntuj Leej Tub tiag ! Koj yog His Xas Lais tus Vaj." 50 Yes Xus hais rau nws tias : "Yog vim kuv hais rau koj tias : Kuv pom koj nyob hauv tsob qab ntoo txiv ncuav pias, mas koj thiaj ntseeg. Koj yuav pom tej yam loj dua no." 51 Ces Yes Xus hais rau Nas Tas Nais tias : "Kuv hais qhov muaj tseeb tiag rau nej: Nej yuav pom lub ntuj qhib los, thiab pom Tswv Ntuj cov Tshiab nce thiab nqes los saum Neeg Leej Tub.”

TIM       30      LUB      9      HLIS       2017

Hnub Xya Lis Piam Nees Nkaum Tsib Nruab Xyoo A Nruab Lis Piam Xyoo I

Hwm LN Jerome, ua Leej Choj thiab Kws Txuj Ntshiab (Dr of the Church)

Zaj Nyeem Ib:       NTXAS KAS LIAS  2:   5-9, 14-15A

5 Kuv, (Ntxas Kas Lias), tsa muag ntsia, kuv pom muaj ib tug txiv neej tuav ib txog hlua ntawm tes. 6 Kuv hais rau nws tias: "Koj mus qhov twg ?" Nws teb kuv tias : "Kuv mus ntsuas Yes Lus Xas Les saib nws dav li cas thiab nws ntev li cas ?" 7 Ces tus Tshiab uas nrog kuv hais lus txawm txav zoj mus pem hauv ntej, hos muaj dua lwm tus tshiab tawm tuaj ntsib nws, hais rau nws tias : 8 "Koj khiav mus hais rau tus tub hluas ntawd tias : Yes Lus Xas Les yuav nyob qhib rooj lug xws li  pem tej zej zog, vim cov neeg thiab cov tsiaj nyob coob hauv Yes Lus Xas Les." 9 Ces HUAB TAIS hais tias: “Kuv yuav yog ib lub ntsa loog hluav taws nyob ncig Yes Lus Xas Les tas tib si, thiab lub hwj chim yuav nyob hauv Yes Lus Xas Les.”
14 Huab Tais hais tias: “Leej Ntxhais Xis Yoos, koj cia li hu nkauj thiab zoo siab! Koj ntsia kuv tuaj lawm ! Kuv yuav tuaj nyob hauv koj. 15 Hnub ntawd, ntau haiv neeg yuav tuaj khaub zig HUAB TAIS, lawv yuav yog kuv haiv neeg, ces kuv yuav nyob nruab nrab hauv nej nrog nej nyob."

NPN :       YLM  31:   10, 11-12AB, 13

Txais: (10d) Huab Tais yuav saib peb nraim xws li tus tswv zov yaj saib nws pab yaj.

Txhua haiv neeg, nej mloog Huab Tais lo lus,
nej coj mus tshaj tawm rau cov pov txwv nyob deb hais tias:
‘Nws tau cia His Xas Lais tawg mus rau ntau qhov,
nyem no nws rov sau lawv los ua ke,
nws saib lawv xws li tus tswv saib nws pab yaj.’

Txais: (10d) Huab Tais yuav saib peb nraim xws li tus tswv zov yaj saib nws pab yaj.

Huab Tais yuav txhiv Yas Kos,
nws yuav txhiv lawv ntawm tus neeg tswj lawv txhais tes los.
Lawv yuav qw zom zaws nce mus saum cov ncov roob Xis Yoos,
lawv yuav tuaj laub lug tuaj mus txais Huab Tais lo lus koob hmoov.
Txais: (10d) Huab Tais yuav saib peb nraim xws li tus tswv zov yaj saib nws pab yaj.

Ces cov ntxhais hluas yuav ua lom zem thiab yoj cev,
cov tub hluas thiab cov laus neeg kuj ua ib yam.
Kuv yuav muab lawv tej kev tu siab ntxeev ua kev zoo siab,
kuv yuav chawj lawv nplij lawv thaum dhau kev txom nyem lawm.

Txais: (10d) Huab Tais yuav saib peb nraim xws li tus tswv zov yaj saib nws pab yaj.

As Les Lus Yas:       2 TM  1:   10

Txais: As les lus yas, as les lus yas.

Peb tus Cawm Seej Yes Xus Pleev tau rhuav txoj kev tuag pov tseg
thiab ua kom txoj sia nyob mus li tawm tuaj nyob hauv lub Moo Zoo.

Txais: As les lus yas, as les lus yas.

Ntawv Moo Zoo:       LK  9:   43B-45

43B Sawv daws yoob tas rau qhov Yes Xus tau ua, ces nws hais rau cov thwj tim tias :
44 "Nej ua tib zoo cuab pob ntseg khaws cov lus no cia : Neeg Leej Tub yuav raug luag muab nws rau hauv tsoom neeg txhais tes."
45 Tab sis cov thwj tim tsis to taub lo lus ntawd, muaj dab tsi ntis kom lawv txhob to taub lub ntsiab, tiam sis lawv ntshai nug Yes Xus txog lo lus ntawd.

TIM       2      LUB      10      HLI       2017

Hnub Ob Lis Piam Nees Nkaum Rau Nruab Xyoo A Nruab Lis Piam Xyoo I

Hwm cov Tshiab Pov Hwm (the Guardian Angels)

Zaj Nyeem Ib:       NKL  8:   1-8

1 Tus HUAB TAIS kav tsoom tshiab lo lus nrov tuaj txog kuv.  2 Tus Huab Tais kav tsoom tshiab hais li no: "Kuv khib Xis Yoos kawg nkaus, kuv lub siab muaj txoj kev khib npau taws heev rau nws. 3 HUAB TAIS hais li no : "Kuv yuav rov los cuag Xis Yoos, kuv yuav los nyob nruab nrab hauv Yes Lus Xas Les. Yes Lus Xas Les yuav hu ua lub tsheej muaj kev tseeb; tus HUAB TAIS kav tsoom tshiab lub roob yuav hu ua lub Roob Ntshiab." 4 Tus HUAB TAIS kav tsoom tshiab hais li no : "Cov yawg laus thiab cov pog laus tseem yuav rov tau zaum nyob ntawm Yes Lus Xas Les tej tshav puam, ib leeg yuav nrig ib rab pas ntawm tes, vim lawv hnub nyoog nchav. 5 Tej tshav nyob hauv lub tsheej yuav muaj me nyuam tub me nyuam ntxhais tuaj nyob ua si zom zaws puv ntia hauv cov tshav ntawd." 6 Tus HUAB TAIS kav tsoom tshiab hais li no : "Yog cov seem ntawm haiv neeg no saib qhov ntawd yog ib yam hwj huam loj thaum lub caij ntawd, mas kuv puas yuav saib zoo li ntawd thiab ?" 7 Tus HUAB TAIS kav tsoom tshiab hais li no : "Nej saib, kuv cawm kuv haiv neeg dim ntawm cov teb chaws nyob sab hnub tuaj thiab ntawm cov teb chaws nyob sab hnub poob. 8 Kuv yuav coj lawv rov los nyob txawm rau hauv Yes Lus Xas Les. Lawv yuav yog kuv haiv neeg. Kuv yuav yog lawv tus Tswv Ntuj nyob hauv txoj kev tseeb thiab txoj kev ncaj."

NPN       102:   16-18, 19-21, 29+22-23

Txais:   (17) Huab Tais yuav rov txhim tsa Xis Yoos dua,
nws yuav tawm tuaj nyob hauv nws lub hwj chim.

HUAB TAIS, txhua haiv neeg yuav hwm koj lub npe,
thiab tas cov vaj nyob ntiaj teb yuav ntshai koj lub hwj chim,
thaum HUAB TAIS rov txhim Xis Yoos,
thiab nws tawm tuaj nyob hauv nws lub hwj chim;
thaum nws tig los mloog cov neeg txom nyem tej lus thov,
thiab tsis thuam lawv zaj teev ntuj.

Txais:   (17) Huab Tais yuav rov txhim tsa Xis Yoos dua,
nws yuav tawm tuaj nyob hauv nws lub hwj chim.

Nej sau tej no cia rau phaj tub ki yuav los yav tom ntej,
cov tiam neeg HUAB TAIS yuav tsim thiaj yuav cav txog nws tias:
“HUAB TAIS nyob saum nws lub tsev ntshiab dauv muag los saib;
HUAB TAIS nyob saum txheej ntuj siab ntsia rau ntiaj teb,
kom tau mloog cov neeg nyob txim lub suab ntsaj,
kom tau tso cov yuav raug tua dim kev tuag.”

Txais:   (17) Huab Tais yuav rov txhim tsa Xis Yoos dua,
nws yuav tawm tuaj nyob hauv nws lub hwj chim.

Koj cov tub txib tej me nyuam yuav nyob ruaj nreb,
lawv cov xeeb ntxwv yuav nyob ntawm koj xub ntiag mus li.
Sawv daws yuav tshaj HUAB TAIS lub npe nyob saum Xis Yoos,
thiab yuav cav lus zoo txog nws nyob Yes Lus Xas Les;
thaum ntawd cov haiv neeg yuav sib sau los nyob ua ke,
cov ceeb tsheej yuav sib txoos los tsob hwb HUAB TAIS.

Txais:   (17) Huab Tais yuav rov txhim tsa Xis Yoos dua,
nws yuav tawm tuaj nyob hauv nws lub hwj chim.

As Les Lus Yas:       NPN  103:   21

Txais: As les lus yas, as les lus yas.

Cia li cav lus zoo txog HUAB TAIS, nej uas yog nws tsoom tshiab,
nej uas yog nws cov tub txib ua ywj nws lub siab xav.

Txais: As les lus yas, as les lus yas.

Ntawv Moo Zoo:       MT  18:   1-5, 10

1 Lub caij ntawd cov thwj tim los cuag Yes Xus, lawv hais rau nws tias : “Leej twg yog tus loj dua nyob hauv Ntuj lub Ceeb Tsheej ?” 2 Yes Xus hu ib tug me nyuam los, nws coj tus me nyuam los nyob hauv nruab nrab lawv, 3 nws hais tias : “Kuv hais tseeb rau nej, yog nej tsis hloov siab los coj xws li ib co me nyuam, mas nej yuav mus tsis tau hauv Ntuj lub Ceeb Tsheej. 4 Leej twg rov saib nws me me xws li tus me nyuam no, tus ntawd yog tus loj dua nyob hauv Ntuj lub Ceeb Tsheej. 5 Leej twg txais ib tug me nyuam zoo li tus no, vim kuv lub npe, mas yog nws txais kuv
10 Nej ceev faj, kom nej tsis txhob thuam ib tug me nyuam zoo li no li; kuv hais rau nej li ntawd, vim nyob saum ntuj, lawv cov tshiab ntsia ntsoov kuv Txiv nyob saum ntuj lub ntsej muag mus li.”

TIM       3      LUB      10      HLI       2017

Hnub Peb Lis Piam Nees Nkaum Rau Nruab Xyoo A Nruab Lis Piam Xyoo I

Zaj Nyeem Ib:      NKL  8:   20-23

20 Tus HUAB TAIS kav tsoom tshiab hais li no : "Tseem yuav muaj ntau haiv neeg, thiab yuav muaj cov neeg nyob hauv ntau lub nroog tuaj. 21 Cov nyob hauv ib lub nroog yuav mus lawm lwm lub nroog, lawv yuav sib hu tias : ‘Tuaj peb mus thov Huab Tais nyob ntawm nws xub ntiag, peb mus nrhiav tus HUAB TAIS kav tsoom tshiab ! Kuv los yeej yuav mus xwb.’ 22 Ces ntau haiv neeg ntau lub kuj cuab muaj hwj xyeej yuav tuaj nrhiav tus HUAB TAIS kav tsoom tshiab nyob Yes Lus Xas Les, thiab tuaj thov nws nyob ntawm nws xub ntiag.” 23 Tus HUAB TAIS kav tsoom tshiab hais li no : "Lub caij ntawd, kaum tus neeg uas hais txhua xeem lus nyob hauv cov haiv neeg yuav tuav nkaus ib tug neeg Yus Das tw tsho ruaj ruaj, ces lawv yuav hais rau nws tias : "Peb yuav nrog koj mus, vim peb hnov hais tias Tswv Ntuj nrog nej nyob."

NPN       87:   1B-3, 4-5, 6-7

Txais:  (NKL 8: 23) Tswv Ntuj nrog peb nyob.

Nws raug txhim rau saum cov roob ntshiab,
Huab Tais nyiam Xis Yoos cov
rooj vag tshaj tas nrho Yas Kos tej vaj tse.
Neeg hais ntau yam zoo qhuas txog koj,
Tswv Ntuj lub tsheej!

Txais:  (NKL 8: 23) Tswv Ntuj nrog peb nyob.

Kuv yuav hais txog Las Has thiab
Npas Npis Los rau cov uas paub kuv.
hais txog Fis Lis Tis, Tws Los, thiab
Es Thias Pias tias: “Tus no yug nyob ntawd".
Tiam sis luag yuav hais txog Xis Yoos tias :
“Txhua tus neeg yug nyob hauv nws,
Tus tsa nws kom nyog ruaj khov
yog tus Huab Tais nyob siab."

Txais:  (NKL 8: 23) Tswv Ntuj nrog peb nyob.

HUAB TAIS yuav sau rau hauv phau ntawv txheeb npe tias :
"Tus neeg no yug los nyob ntawd !"
Tsis hais cov vaj ntxwv los cov me nyuam yaus,
Sawv daws puav leej muab koj ua lawv chaw nyob.

Txais:  (NKL 8: 23) Tswv Ntuj nrog peb nyob.

As Les Lus Yas:       MK  10:   45

Txais:   As les lus yas, as les lus yas.

Neeg Leej Tub tuaj kom tau tsob hwb sawv daws
thiab muab nws txoj sia los ua nqi txhiv coob leej.

Txais:   As les lus yas, as les lus yas.

Ntawv Moo Zoo:        LK  9:   51-56

51 Lub sij hawm uas Yes Xus yuav ncaim mus los yuav txog, ces nws ua siab tawv qhawv mus pem Yes Lus Xas Les.
52 Yes Xus xa ib co tub fi xov ua nws ntej mus. Thaum lawv mus txog ib tog kev, lawv nkag hauv ib lub zos Xas Mas Lias kom tau npaj txhua yam rau Yes Xus.
53 Tab sis cov Xas Mas Lias tsis txais nws, vim nws npaj yuav mus pem Yes Lus Xas Les.
54 Ob tug thwj tim Yas Kos thiab Zam nkawd pom li ntawd, nkawd hais tias : "Huab Tais, koj puas xav kom peb hu ib co hluav taws nqes saum ntuj los hlawv lawv ?"
55 Tab sis Yes Xus tig los cem nkawd.
56 Ces lawv mus ntxiv rau lwm lub zos.

TIM 4 LUB 10 HLI 2017

Hnub Plaub Lis Piam Nees Nkaum Rau Nruab Xyoo A Nruab Lis Piam Xyoo I

Hwm LN Francis nyob Assisi

Zaj Nyeem Ib NES HES MIS 2:1-8

1 Thaum lub 4 hlis (Nis Xaas) xyoo nees nkaum uas As Tas Xes Xes ua vaj, kuv ua tus kav xwm saib cawv, ces kuv mus ce cawv rau tus vaj. Los txog tav no kuv tsis tau ua ntsej muag mluas ib zaug li. 2 Ces hnub ntawd tus vaj thiaj hais rau kuv tias : "Vim li cas koj ua ntsej muag mluas li kod ? Koj twb tsis mob, ntshai yog muaj ib yam dab tsi nyob hauv koj lub siab xwb !" Kuv txawm ntshai, ces kuv hais rau tus vaj tias : 3 "Thov kom vaj nyob ntev niaj mus ntau xyoo ! Ua cas kuv thiaj yuav tsis mluas li no ? Vim lub tsheej uas kuv niam kuv txiv lawv tej ntxa nyob twb puas tas lawm, tej rooj loog kub hnyiab tas." 4 Tus vaj hais rau kuv tias : "Koj xav thov dab tsi ?" 5 Kuv thov tus Tswv nyob saum ntuj thiab kuv teb tus vaj tias : "Yog vaj zoo siab thiab pom zoo, mas kuv xav thov koj xa kuv mus Yus Das teb, mus hauv lub tsheej uas kuv cov yawg koob lawv tej ntxa nyob, kom kuv mus txhim kho dua rau" 6 Tus vaj thiab tus poj vaj uas zaum ntawm nws ib sab, nug kuv tias : "Koj yuav mus ho ntev ? Thaum twg koj mam rov los ?" Kuv teem ib lub hnub nyoog uas zoo li haum tus vaj siab, ces nws kheev kuv mus. 7 Kuv tseem thov tus vaj tias : "Yog tus vaj zoo siab mas thov koj muab ntawv rau kuv nqa mus rau cov vaj txheeb nyob ntawm tus dej Aws Fas Tes sab tim ub, lawv thiaj yuav kheev kuv hla lawv teb chaws mus txog Yus Das teb. 8 Thiab muab ib daig ntawv mus rau As Xas uas yog tus saib vaj lub loog kom nws muab ntoo rau kuv coj mus ua cov qhov rooj vag ntawm lub yeej muaj lub Tuam Tsev Teev Ntuj, thiab ua cov ntsa yeej thiab ua lub tsev kuv yuav nyob." Tus vaj tso lus rau kuv ua, vim kuv tus Tswv Ntuj txhais tes nyob saum kuv pab kuv.

NPN 137: 1-2, 3, 4-5, 6

Txais: (6ab) Kom kuv tus nplaig ruam yog kuv tsis nco qab koj!

Peb zaum ze ntawm cov ntug dej nyob Npas Npis Los,
peb quaj vim peb nco txog Xis Yoos.
Peb muab peb tej nkauj nog ncas dai
rau saum tej ceg lwg zaj uas nyob ib ncig ntawd.

Txais: (6ab) Kom kuv tus nplaig ruam yog kuv tsis nco qab koj!

Nyob ntawd, cov neeg uas ntes peb taij kom
peb qhia cov lus hauv peb cov nkauj rau lawv,
cov neeg uas coj peb mus, taij kom peb ua lom zem ,
lawv hais tias: "Nej seev cov nkauj Xis Yoos rau peb mloog!"

Txais: (6ab) Kom kuv tus nplaig ruam yog kuv tsis nco qab koj!

Peb yuav ua cas seev tau HUAB TAIS
ib zaj nkauj nyob vaim kum teb ?
Yes Lus Xas Les, yog kuv hnov qab koj,
thov kom kuv txhob nco qab kuv sab tes xis!

Txais: (6ab) Kom kuv tus nplaig ruam yog kuv tsis nco qab koj!

Thov kom kuv tus nplaig kum rau saum qab yiag,
yog tias kuv tsis nco txog koj ntxiv,
yog kuv tsis muab Yes Lus Xas Les
ua kuv qhov chaw zoo siab ua ntej tshaj cov.

Txais: (6ab) Kom kuv tus nplaig ruam yog kuv tsis nco qab koj!

As Les Lus Yas: FLP 3: 8-9

Txais: As les lus yas, as les lus yas.

kuv saib tas puas tsav yam tsis muaj qab hau, kom kuv
tau Leej Pleev ua kuv tug thiab kom kuv nyob hauv nws.

Txais: As les lus yas, as les lus yas.

Ntawv Moo Zoo: LK 9: 57-62

57 Thaum Yes Xus thiab nws cov thwj tim tab tom taug kev, muaj ib tug neeg hais rau Yes Xus tias : "Koj mus qhov twg los kuv yuav raws koj mus." 58 Yes Xus hais rau nws tias : "Hma muaj hma lub qhov nkaum, tej noog ya saum ntuj kuj muaj zes nyob, tab sis Neeg Leej Tub twb tsis muaj ib qho chaw rau ncoo li." 59 Yes Xus tseem hais rau lwm tus neeg tias: "Koj raws kuv mus." Tus ntawd hais tias : "Thov koj cia kuv mus faus kuv txiv tso." 60 Tab sis Yes Xus hais rau nws tias : "Cia cov tuag mam faus lawv cov tuag, hos koj mas koj yuav mus tshaj Tswv Ntuj lub Ceeb Tsheej." 61 Tseem muaj ib tug hais tias : "Huab Tais, kuv yuav raws koj mus, tab sis thov koj cia kuv rov mus hais ib lo lus sib ncaim rau kuv tsev neeg tom tsev tso." 62 Yes Xus hais rau nws tias : "Leej twg tuav rab khais lawm, yog nws tseem tig ntsia rov tom qab, mas nws tsis phim Tswv Ntuj lub Ceeb Tsheej."

TIM 5 LUB 10 HLI 2017

Hnub Tsib Lis Piam Nees Nkaum Rau Nruab Xyoo A Nruab Lis Piam Xyoo I

Hwm tus tau txoj hmoov zoo(Blessed) Francis Xavier Seelos

Zaj Nyeem Ib: NHM 8: 1-4A, 5-6, 7B-12

1 Tas tsoom pej xeem sawv daws tuaj sib txoos ua ke xws li yog ib leeg xwb nyob ntawm lub tshav ntawm lub qhov rooj dej. Lawv kom tus thoob xwm Es Nras nqa phau ntawv Mais Xes txoj cai uas HUAB TAIS qhia kom His Xas Lais coj tuaj. 2 Ces tus Leej Choj Es Nras nqa phau ntawv txoj cai tuaj tso ntawm lub txoos hauv ntej. Nyob hauv lub txoos muaj cov txiv neej, cov poj niam thiab cov me nyuam paub tab uas yuav to taub zoo. Hnub ntawd yog hnub xiab ib lub xya hli. 3 Nyob ntawm lub tshav ncaj lub qhov rooj dej, Es Nras nyeem ntawv txij thaum nyuam qhuav kaj ntug mus txog hnub ntseg. Nws nyeem rau cov poj niam cov txiv neej thiab cov me nyuam paub tab sawv daws mloog. Sawv daws cug pob ntseg zoo mloog txoj cai. 4a Tus thoob xwm ntawv Es Nras sawv nyob saum ib lub sam thiaj uas lawv txhob txwm npaj rau lub sij hawm ntawd. 5 Es Nras qhib phau ntawv, sawv daws pom nws zoo, vim nws nyob qhov chaw siab dua sawv daws. Thaum nws pib qhib phau ntawv mas tsoom sid sawv daws sawv. 6 Es Nras pib cav txog HUAB TAIS tus Tswv Ntuj uas loj tas nrho; tas sawv daws tsa tes rau saum ntuj thiab teb tias : "Ua li ! Ua li !" Ces tas tsoom pej xeem nyo taub hau pe HUAB TAIS, lawv ntsej muag khoov rau hauv av. 7b Ces tsoom pej xeem sawv ntsug nyob rau ntawd. 8 Ces Es Nras lawv nyeem Tswv Ntuj txoj cai nyob hauv ntawv kom meej meej thiab txhais lub ntsiab kom sawv daws to taub zoo. 9 Ces Nes Hes Mis tus nom tswj xeev thiab tus leej choj thoob xwm Es Nras thiab cov Les Vis uas yog cov qhuab qhia tsoom pej xeem, lawv hais rau tas tsoom pej xeem tias : "Hnub no, yog ib hnub ntshiab rau HUAB TAIS nej tus Tswv Ntuj ! Nej tsis txhob nyob tej tug mluas mlob, nej tsis txhob quaj !" Lawv hais li no vim thaum sawv daws hnov cov lus nthuav txoj cai mas sawv daws quaj. 10 Nws tseem hais ntxiv tias : "Nyem no, nej mus noj nqaij noj hno kom qab rog, haus dej haus cawv kom qab zib, nej nqa ib feem mus faib rau cov tsis tau npaj dab tsi. Hnub no yog ib hnub ntshiab huv rau peb tus HUAB TAIS ! Nej tsis txhob tu siab ! Vim HUAB TAIS chaw zoo siab yog nej lub zog !" 11 Cov Les Vis kom tsoom sid nyob twj ywm, lawv hais tias : "Nej tswm seeb vim hnub no yog ib hnub ntshiab, nej txhob tu siab." 12 Ces tas tsoom sid mus noj mov haus cawv, lawv xa txhiam xws noj rau cov tsis muaj, sawv daws ua tej yam lom zem loj, vim lawv to taub cov lus uas tau tshaj tawm rau lawv mloog.

NPN 19: 8, 9, 10, 11

Txais: (9ab) Huab Tais cov lus qhia ua kom neeg zoo siab.

HUAB TAIS txoj cai zoo tas nrho,
nws ntxiv siav rau tus ntsuj plig;
HUAB TAIS tus txhooj tsim nyog yuav,
nws ua kom tus neeg ruam thoob tsib tuaj.

Txais: (9ab) Huab Tais cov lus qhia ua kom neeg zoo siab.

HUAB TAIS cov lus qhuab qhia yog lus ncaj
ua kom neeg muaj kev zoo siab.
HUAB TAIS lo lus meej kawg nkaus,
ua kom qhov muag pom kev.

Txais: (9ab) Huab Tais cov lus qhia ua kom neeg zoo siab.

Kev hwm HUAB TAIS yog txoj kev dawb huv,
kev hwm Huab Tais yuav nyob mus li.
HUAB TAIS cov lus txiav txim yog lus tseeb,
Txhua lo lus nws txiav yog qhov ncaj.

Txais: (9ab) Huab Tais cov lus qhia ua kom neeg zoo siab.

Nws cov lus txiav txim tsim nyog ntshaw dua kub,
Tsim nyog ntshaw dua ib txhab tseem kub,
qab zib dua cov kua zib,
los cov zib mu ntawm daim nas muv.

Txais: (9ab) Huab Tais cov lus qhia ua kom neeg zoo siab.

As Les Lus Yas: MK 1: 15

Txais: As les lus yas, as les lus yas.

Tswv Ntuj lub Ceeb Tsheej los txog ze lawm :
nej cia li hloov siab thiab ntseeg txog lub Moo Zoo.

Txais: As les lus yas, as les lus yas.

Ntawv Moo Zoo: LK 10: 1-12

1 Dhau qhov ntawd lawm, Huab Tais tseem xaiv xya caum ob leeg, nws xa lawv mus tej pab ob leeg, ua nws ntej mus rau hauv cov nroog thiab tej qhov chaw uas nws yuav mus. 2 Nws hais rau lawv tias : "Qoob loo zoo sau muaj ntau kawg, tab sis cov tub zog muaj tsawg. Nej thov tus Tswv qoob kom nws xa ib co tub zog tuaj sau nws cov qoob. 3 Nej mus, kuv xa nej zoo li ib co yaj mus nyob nruab nrab ib cov hma. 4 Nej tsis txhob nqa nas nyiaj, txhob ris hnab, txhob nqa khau, txhob hais lus hu leej twg ntawm kev. 5 Nej chaws mus hauv lub tsev twg, nej xub hais tias : ‘Kom lub tsev no nyob kaj lug !’ 6 Yog muaj ib tug neeg nyiam txoj kev kaj lug nyob ntawd, mas nej txoj kev kaj lug yuav roos nws. Yog tsis muaj, mas nej txoj kev kaj lug yuav rov los rau nej. 7 Nej nyob hauv lub tsev ntawd, nej noj nej haus tej yam uas lawv muaj, vim tus tub zog tsim nyog txais nqi zog. Nej txhob tawm hauv ib lub tsev mus nyob dua lwm lub. 8 Nej mus hauv lub nroog twg, yog luag txais nej, nej noj tej yam uas luag muab rau nej. 9 Nej kho cov neeg mob hauv lub nroog ntawd kom zoo, thiab nej hais rau lawv tias : ‘Tswv Ntuj lub Ceeb Tsheej tuaj txog ze nej lawm.’ 10 Tab sis yog nej mus hauv lub nroog twg, luag tsis txais nej, nej tawm mus nraum tej kev nej hais tias : 11 ‘Tab yog tej plua av uas lo peb ko taw, peb muab nchos tseg tib si cia ua tim khawv txog nej. Tab sis, nej yuav tsum paub tias Tswv Ntuj lub Ceeb Tsheej tuaj txog ze lawm.’ 12 Kuv hais rau nej tias, txog hnub ntawd, lub nroog Xos Dos Mas yuav raug txim sib dua lub nroog ntawd.”

TIM       6      LUB      10      HLI       2017

Hnub Rau Lis Piam Nees Nkaum Rau Nruab Xyoo A Nruab Lis Piam Xyoo I

Hwm LN Bruno; hwm tus tau txoj hmoov zoo Marie Rose Durocher

Zaj Nyeem Ib:       NPAS LWS  1:   15-22

15 Nej yuav hais li no : “Huab Tais peb tus Tswv Ntuj yog tus muaj kev ncaj. Ntawm peb mas peb nyob hauv txoj kev txaj muag: Tas peb cov nyob Yus Das teb thiab cov nyob Yes Lus Xas Les tau kev txaj muag. 16 Peb cov vaj, cov nom tswv, cov Leej Choj, cov Yaj Saub thiab peb cov yawg koob sawv daws puav leej nyob hauv txoj kev txaj muag. 17 Vim peb tau ua txhaum rau Huab Tais peb tus Tswv Ntuj, peb tsis ntseeg nws, peb tsis tso siab rau nws. 18 Peb tau tawv ncauj, peb tsis mloog Huab Tais peb tus Tswv Ntuj lub suab, peb tsis ua raws li cov lus qhia uas nws muab rau peb. 19 Txij hnub Huab Tais coj peb cov yawg koob tawm ntawm Hais Nkws Tos teb los txog hnub no, peb tau tawv ncauj tsis mloog Huab Tais peb tus Tswv Ntuj. Peb tau mus yuam kev,  tsis kam mloog nws lub suab qhia. 20 Li ntawd, peb thiaj raug cov xwv txheej thiab cov lus tsawm uas Huab Tais hais rau nws tus tub txib Mais Xes, lub caij nws coj peb cov yawg koob tawm hauv Hais Nkws Tos teb los, kom peb tau ib lub teb chaws uas mis nyuj thiab zib mu ntws lug, xws li niaj hnub no. 21 Peb tsis mloog Huab Tais peb tus Tswv Ntuj cov lus uas cov Yaj Saub nws xa tuaj hais rau peb. 22 Peb nyias ua raws li nyias lub siab hnkaus nyiam, ces peb mus teev lwm cov dab thiab peb ua tej yam uas Huab Tais peb tus Tswv Ntuj saib yog phem."

NPN      79:   1B-2, 3-5, 8, 9

Txais:   (9) Huab Tais, thov koj cawm peb kom koj lub npe nto koob meej.  

Tswv Ntuj, cov kuj cuab tuaj tsuj koj lub cuab tam lawm,
lawv ua tsis zoo rau koj lub tuam tsev ntshiab,
lawv tsoo rhuav Yes Lus Xas Les pob tag.
Lawv muab koj cov tub txib lub cev
pub rau cov noog ya saum ntuj noj,
muab koj cov ntseeg lub cev pub
rau ntiaj teb cov tsiaj qus dua.

Txais:   (9) Huab Tais, thov koj cawm peb kom koj lub npe nto koob meej.

Lawv nchuav koj cov ntseeg tej ntshav zoo li dej
Uas ntws sis laub sis lug ncig Yes Lus Xas Les,
tsis muaj leej twg yuav faus lawv lub cev.
Cov neeg nyob ze peb ua tub qaug peb,
cov nyob ncig peb thuam peb luag peb.
HUAB TAIS, koj yuav npau taws hov ntev?
Koj puas yuav npau mus li?
Koj txoj kev khib puas yuav kub cuag hluav taws?

Txais:   (9) Huab Tais, thov koj cawm peb kom koj lub npe nto koob meej.

Thov koj txhob nco txog txhob cia peb ris peb tej txhaum dhau los,
muab koj lub siab khuv leej neeg tuaj pab peb sai sai,
vim peb poob rau qhov qis kawg nkaus lawm.

Txais:   (9) Huab Tais, thov koj cawm peb kom koj lub npe nto koob meej..

Tswv Ntuj peb tus cawm seej, thov koj pab peb,
kom koj lub npe nto koob meej lug;
Thov cawm peb thiab zam peb cov txhaum rau peb
vim koj lub npe zoo.

Txais:   (9) Huab Tais, thov koj cawm peb kom koj lub npe nto koob meej.

As Les Lus yas:       NPN  95:   8

Txais: As les lus yas, as les lus yas.

Hnub no, yog nej hnov nws lub suab,
Txhob ua nej lub siab tawv ncauj.

Txais: As les lus yas, as les lus yas.

Ntawv Moo Zoo:       LK  10:   13-16

Yes Xus hais tias:
13 “Kos Las Xis, koj txoj hmoov phem ! Npes Xais Das, koj txoj hmoov phem ! Cov hwj huam yees ntxwv tshwm sim nyob hauv neb lam yog tshwm sim nyob Tws Los thiab Xis Doos, mas lawv twb zaum hauv ntaub tsaj thiab hauv hmoov tshauv, lawv twb thov txhaum ntxov lawm. 14 Tws Los thiab Xis Doos thiaj yuav raug txim sib dua neb thaum txog lub caij txiav txim. 15 Hos Koj, Kas Fas Naus, luag puas yuav tsa koj siab txij ntuj? Koj ces twb yuav nqes mus hauv dab phem teb.
16 Leej twg mloog nej, mas yog nws mloog kuv. Leej twg xyeej nej, mas kuj yog xyeej kuv. Leej twg xyeej kuv, mas yog nws xyeej tus xa kuv tuaj."

TIM 7 LUB 10 HLI 2017

Thawj Hnub Xya Lis Piam Nees Nkaum Rau Nruab Xyoo A Nruab Lis Piam Xyoo I

Hwm Leej Niam Muaj txoj Saw Mab Liab (Our Lady of the Rosary)

Zaj Nyeem Ib: NPAS LWS 4: 5-12, 27-29

5 "Kuv haiv neeg, nej ua siab loj ! Nej yog pab neeg ua kom sawv daws nco tias tseem tshuav haiv His Xas Lais. 6 Nej raug muag rau cov kuj cuab, tsis yog ua kom nej ploj mus tas, tiam sis yog vim nej tau ua Huab Tais npau taws, ces nej thiaj raug poob rau hauv cov yeeb ncuab txhais tes. 7 Nej tau ua kom tus tsim nej npau taws, vim nej ua tej thaj txi dab phem, nej tsis txi Tswv Ntuj. 8 Nej tsis nco qab tus Tswv Ntuj nyob mus li, uas yog tus tau yug nej; nej tau ua kom Yes Lus Xas Les uas yog tus tu nej hlob tu siab. 9 Nws yog tus pom tias Huab Tais npau taws rau nej, nws hais tias : ‘Nej cov uas nyob ze Xis Yoos nej cuab pob ntseg mloog, vim Tswv Ntuj tso kev tu siab loj tuaj raug kuv ! 10 Kuv tau pom tus muaj txoj sia nyob mus li tso kuv cov tub cov ntxhais rau luag coj mus nyob txim lawm. 11 Kuv zoo siab luag ntxhi tu lawv kom hlob, zaum no kuv quaj thiab tu siab ntsia lawv mus. 12 Kom txhob muaj leej twg hnyos kuv vim kuv yog ib tug poj ntsuam uas raug coob leej muab tso pov tseg. Kuv nyob ib tug twm zeej yog vim yog kuv cov me nyuam tau ua txhaum, lawv tau ncaim ntawm Tswv Ntuj Txoj Cai lawm.
27 Kuv cov me nyuad, nej ua siab loj ! Nej hu txog Tswv Ntuj! Tus tso tej no los raug nej nws yuav rov nco txog nej. 28 Vim nej lub siab tau feeb mus rau txoj kev ncaim deb ntawm Tswv Ntuj lawm, nyem no nej yuav tsum tig rov los kub siab nrhiav nws zoo dua yav thaud kaum npaug ntxiv. 29 Vim tus uas tau tso xwv txheej tuaj raug nej, nws yuav cawm nej thiab yuav pub txoj kev zoo siab mus li rau nej.’”

NPN 69: 33-35, 36-37

Txais: (34) HUAB TAIS mloog cov pluag lo lus thov.

Cov neeg me pom, lawv yuav zoo siab kawg nkaus ;
Cov uas nrhiav Tswv Ntuj, lawv yuav tau txoj sia;
Vim HUAB TAIS mloog cov pluag zaj lus thov;
nws tsis ntxub nws cov neeg raug luag coj mus kaw.
Lub ntuj lub teb, cov dej hiav txwv thiab txhua yam
mus los hauv hiav txwv yuav cav lus zoo txog nws!

Txais: (34) HUAB TAIS mloog cov pluag lo lus thov.

Tswv Ntuj yuav cawm Xis Yoos,
nws yuav rov txhim cov tsheej hauv Yus Das teb.
Lawv yuav nyob hauv lub teb chaws,
lawv yuav tau lub teb chaws ua lawv tug.
Tswv Ntuj cov tub txib tej xeeb ntxwv yuav tau
lub teb chaws los ua lawv lub cuab tam;
cov uas nyiam nws lub npe yuav tau nyob hauv.

Txais: (34) HUAB TAIS mloog cov pluag lo lus thov.

As Les Lus Yas: MT 11: 25

Txais: As les lus yas, as les lus yas.

Kuv cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog Ntuj Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: LK 10: 17-24

17 Pab xya caum ob leeg rov qab los txog, lawv zoo siab kawg, lawv hais tias : "Huab Tais, tab yog cov dab phem, tsis kav lawv mloog peb lus vim koj lub npe." 18 Yes Xus hais rau lawv tias : "Kuv twb pom Xas Tas poob saum ntuj los zoo li ib kab xob laim lawm! 19 Nej yuav pom, kuv pub hwj huam rau nej lawm kom nej ko taw tsuj tau nab, tsuj tau kab lij tshooj, tsuj tau Yeeb Ncuab lub hwj huam tib si, yuav tsis muaj dab tsi ua xwv txheej tau rau nej li. 20 Txawm li ntawd los nej tsis txhob zoo siab vim cov dab mloog nej lus, nej yuav zoo siab vim nej lub npe muab sau cia rau saum ntuj lawm."
21 Lub sij hawm ntawd, Yes Xus zoo siab tas nrho nyob hauv Leej Tswv Yim Ntshiab, nws hais tias : "Kuv cav lus zoo txog koj, Leej Txiv, Huab Tais kav lub ntuj lub teb, koj tau zais tej ntawd rau cov neeg thoob tsib thiab cov neeg ntse, koj qhib rau cov neeg me paub. Txiv, vim koj yeej nyiam ua li ntawd. 22 Kuv Txiv tau muab tas ib puas tsav yam rau kuv lawm. Tsis muaj leej twg paub tias Leej Tub yog tus twg, kawg yog Leej Txiv thiaj paub. Tsis muaj leej twg paub tias Leej Txiv yog tus twg, kawg yog Leej Tub thiaj paub, thiab yog tus uas Leej Tub xav qhia rau kom paub xwb." 23 Yes Xus tig los rau nws cov thwj tim, uas nyob rau ib cag, nws hais rau lawv tias : "Cov qhov muag uas pom tej yam nej pom no tau txoj hmoov zoo ! 24 Kuv hais rau nej tias coob tus yaj saub thiab coob tus vaj xav pom qhov uas nej pom, tab sis lawv tsis tau pom, xav hnov tej uas nej hnov, tab sis lawv tsis tau hnov."

TIM 9 LUB 10 HLI 2017

Hnub Ob Lis Piam Nees Nkaum Xya Nruab Xyoo A Nruab Lis Piam Xyoo I

Hwm LN Dennis thiab cov; hwm LN John Leonardi

Zaj Nyeem Ib: YOS NAS 1: 1–2:1-2, 11

1 HUAB TAIS hais rau Yos Nas uas yog As Mis Tais tus tub tias : 2 "Koj sawv los, koj mus tom lub tuam tsheej Nis Nis Vas. Koj mus hais rau lawv tias lawv txoj kev phem nrov nce tuaj txog kuv lawm." 3 Yos Nas sawv los, nws npaj khiav mus rau Tas Xis kom deb ntawm HUAB TAIS. Nws mus nram Yos Pes, nws nrhiav tau ib lub nkoj yuav mus Tas Xis. Nws them nqe kev rau lawv ces nws nce hauv lub nkoj nrog lawv mus Tas Xis, kom deb ntawm HUAB TAIS. 4 Tab sis HUAB TAIS tso cua hlob tuaj nplawm lub hiav txwv, ces cua daj cua dub sawv loj loj tuaj ntsawj lub hiav txwv ua kom lub nkoj yuav luag tawg tas. 5 Cov tub nquam nkoj ntshai, lawv nyias thov nyias tus tswv ntuj kom tuaj pab. Lawv muab cov toob xib pov tseg rau hauv dej kom lub nkoj sib tuaj. Hos Yos Nas ces nws nqes mus hauv sab hauv qab lub nkoj nws mus pw tsaug zog hauv lawm. 6 Lawv tus tsav nkoj thiaj los hais rau Yos Nas tias : "Koj tseem tau zoo tsaug zog thiab lod ? Koj sawv los thov koj tus Tswv Ntuj mas ! Tej zaum Tswv Ntuj yuav nco txog peb, ces peb yuav tsis tuag." 7 Ces lawv sib tham tias : "Peb ntaus kuam saib saib yog leej twg coj xwv txheej tuaj rau peb." Lawv txawm ntaus kuam, ces raug rau Yos Nas. 8 Lawv hais rau Yos Nas tias: "Koj sim qhia peb saib yog vim li cas peb thiaj raug xwv txheej li no? Koj ua txoj hauj lwm dab tsi ? Koj nyob qhov twg, lub teb chaws twg tuaj ? Koj yog haiv neeg dab tsi ?" 9 Yos Nas teb lawv tias : "Kuv yog ib tug Hes Nplaws, kuv teev HUAB TAIS, tus Tswv lub ntuj uas tsim lub hiav txwv thiab tsim thaj av qhuav." 10 Cov nquam nkoj ntshai kawg, lawv hais rau Yos Nas tias : "Ua cas koj ua li ntawd ?” Vim lawv twb paub tias yog nws khiav mus deb ntawm HUAB TAIS, nws twb xub hais qhia rau lawv li ntawd lawm . 11 Lawv nug Yos Nas tias : "Peb yuav ua li cas rau koj kom lub hiav txwv rov tus yees tuaj? Vim lub hiav txwv haj yam nphau loj zuj zus xwb.” 12 Nws teb rau lawv tias : "Nej muab kuv pov rau hauv lub hiav txwv, ces dej yuav tus rau nej. Kuv paub tias yog tim kuv mas cua thiaj hlob li no rau nej." 13 Lawv xub sim nquam lub nkoj rov los rau tim ntug nqhuab, tab sis tsis tau li vim dej nphau heev dhau. 14 Ces lawv thov HUAB TAIS tias: "HUAB TAIS, thov koj tsis txhob cia peb tuag vim tus neeg no txoj sia. Koj tsis txhob suav txim rau peb tias peb tau tua ib tug neeg tsis muaj txhaum, vim koj yog tus ua rau nws raws li koj nyiam." 15 Ces lawv nthos nkaus Yos Nas thiab muab nws pov rau hauv lub hiav txwv. Tam sim ntawd lub hiav txwv tus yees tuaj. 16 Lawv ntshai HUAB TAIS kawg nkaus, ces lawv txi ib co txim rau HUAB TAIS, thiab lawv fiv ib co yeem rau nws.
2 1 HUAB TAIS ua kom ib tug ntses loj loj tawm tuaj nqos Yos Nas. Yos Nas nyob hauv tus ntses lub plab tau peb hnub peb hmos. 2 Yos Nas nyob hauv tus ntsev lub plab thov Huab Tais nws tus Tswv Ntuj.
11 Ces Huab Tais thiaj hais kom tus ntses muab Yos Nas ntuav tawm los tso rau saum nruab nqhuab.

NPN: YOS NAS 2: 3, 4, 5, 8

Txais: (7) Huab Tais, koj npo kuv tawm ntawm lub qhov ntuj los.

Nyob hauv kuv txoj kev txom nyem,
kuv quaj hu HUAB TAIS, nws teb kuv.
Nyob hauv ntuj txias teb tsaus lub plab,
kuv thov kom pab, koj hnov kuv lub suab.

Txais: (7) Huab Tais, koj npo kuv tawm ntawm lub qhov ntuj los.

Koj muab kuv pov rau puag hauv qab tiv txwv,
Puag hauv plawv nruab hiav txwv
Dej nphau nphwv tej niag twv los vov kuv tas.

Txais: (7) Huab Tais, koj npo kuv tawm ntawm lub qhov ntuj los.

Kuv thiaj hais tias kuv nyob deb ntawm
koj lub ntsej muag lawm !
Li ntawd los kuv tseem yuav rov tig
mus saib koj lub Tuam Tsev Ntshiab

Txais: (7) Huab Tais, koj npo kuv tawm ntawm lub qhov ntuj los.

Thaum kuv tus plig twb tsis nco qab hauv kuv lawm,
kuv nco dheev txog kuv tus HUAB TAIS,
ces kuv zaj thov Ntuj nce tuaj txog koj
nyob hauv koj lub Tuam Tsev Ntshiab.

Txais: (7) Huab Tais, koj npo kuv tawm ntawm lub qhov ntuj los.

As Les Lus Yas: ZAM 13: 34

Txais: As les lus yas, as les lus yas.

Kuv muab ib lo lus qhia tshiab rau nej tias:
nej yuav tsum sib nyiam sib hlub ib yam li kuv tau nyiam tau hlub nej.

Txais: As les lus yas, as les lus yas.

Ntawv Moo Zoo: LK 10: 25-37

25 Lub sij hawm ntawd, ib tug Kws Lij Choj sawv, nws xav sim Yes Xus ces nws nug tias : "Xib Hwb, kuv yuav ua dab tsi thiaj tau txais txoj sia nyob mus li los ua kuv lub cuab tam ?" 26 Yes Xus hais rau nws tias : "Nyob hauv Txoj Cai muaj dab tsi sau tseg ? Koj nyeem hais dab tsi ?” 27 Tus Kws Lij Choj teb tias : "Koj yuav nyiam Huab Tais koj tus Tswv Ntuj, tas koj siab ntsws, tas koj ntsuj plig, tas koj lub zog, tas koj lub tswv yim, thiab koj yuav nyiam tus nyob ze koj ib yam li koj nyiam koj.” 28 Yes Xus hais rau nws tias : "Koj teb raug lawm. Koj ua li ntawd, koj yuav muaj txoj sia." 29 Tab sis tus Kws Lij Choj xav cav kom nws yog tus hais yog, ces nws hais rau Yes Xus tias : "Leej twg yog tus nyob ze kuv ?” 30 Yes Xus thiaj hais ntxiv tias : "Muaj ib tug neeg nqes ntawm Yes Lus Xas Les mus rau nram Yes Lis Kos, nws ntsib ib pab tub sab, lawv muab nws tej ris tsho hle, muab nws ntaus sab sab, ces lawv mus lawv lawm, tso nws tseg tshuav txoj sia xwb. 31 Muaj ib tug Leej Choj taug txoj kev ntawd nqes tuaj tom thawj, nws pom tus raug mob, nws lug kev hla mus lawm. 32 Muaj ib tug Les Vis ho tuaj txog ntawd, nws pom tus raug mob, nws kuj lug kev hla mus lawm. 33 Tab sis ib tug Xas Mas Lias mus tawm rooj tuaj txog ze ntawm tus raug mob, nws pom nws hlub tus raug mob. 34 Nws txav los ntawm tus raug mob, nws hliv roj thiab hliv cawv rau cov qhov txhab, nws muab qhwv rau. Nws tsaws tus raug mob caij nws tus luj, ces nws coj tus raug mob mus txog ib lub tsev txais qhua, nws tu tus raug mob ntawd. 35 Hnub tom qab, nws rho tau ob lub txiaj nyiag rau tus saib lub tsev txais qhua, nws hais tias : ‘Koj tu tus neeg mob no, yog koj siv tshaj lawd, thaum kuv rov qab los, kuv yuav them rov rau koj.’ 36 Raws li koj xav, lawv peb leeg no, leej twg ua tus nyob ze tus neeg uas poob rau hauv tub sab txhais tes ?" 37 Tus Kws Lij Choj hais tias : "Yog tus uas tau khuv leej tus raug mob." Ces Yes Xus hais rau nws tias : "Koj mus, koj yuav ua zoo li ntawd thiab."

TIM 10 LUB 10 HLI 2017

Hnub Peb Lis Piam Nees Nkaum Xya Nruab Xyoo A Nruab Lis Piam Xyoo I

Zaj Nyeem Ib: YOS NAS 3: 1–10

1 HUAB TAIS lub suab nrov tuaj rau Yos Nas yog zaum ob tias : 2 "Yos Nas, koj sawv, koj yuav mus kom txog lub tuam tsheej Nis Nis Vas thiab koj yuav qhia tej lus uas kuv yuav hais rau koj rau lawv." 3 Ces Yos Nas sawv los npaj, thiab nws sawv kev mus rau Nis Nis Vas raws li Huab Tais hais. Lub tsheej Nis Nis Vas yog ib lub tsheej loj dav kawg nkaus, yuav mus peb hnub ke thiaj hla dhau lub tsheej. 4 Yos Nas pib nkag mus rau hauv lub nroog, nws mus ib hnub kev ces nws qw hais rau lawv tias : "Tshuav plaub caug hnub xwb mas lub tsheej Nis Nis Vas yuav swb tas rau luag." 5 Ces cov neeg nyob Nis Nis Vas ntseeg Tswv Ntuj, lawv ceeb toom rau tsoom sid tias kom sawv daws ua kev yoo mov, ces tas sawv daws npua ntaub tsaj, tsis hais tus hlob los tus yau li." 6 Thaum tus vaj kav Nis Nis Vas tau hnov cov lus ntawd, nws sawv ntawm nws lub theej kiab mus, nws hle nws tej ris tsho tseg, nws muab ntaub tsaj los hnav, nws mus zaum hauv qhov tshauv. 7 Tus vaj kom lawv tshaj ib lo lus ceeb toom los ntawm tus vaj thiab nws cov tub nom tub tswv los, nyob txhua qhov hauv lub tsheej Nis Nis Vas tias : "Tej neeg, tej tsiaj txhu, tsis hais nyuj los yaj, sawv daws yuav tsis txhob noj dab tsi li, tsis noj txhiam xws tsis haus dej li. 8 Tsis hais tus neeg los tus tsiaj, yuav tsum hnav ntaub tsaj tib si thiab yuav hu txog Tswv Ntuj tas zog. Nyias yuav tso nyias txoj kev phem pov tseg thiab tso txoj kev ua txhaum ntawm nyias txhais tes tseg. 9 Ces nyaj tej zaudTswv Ntuj siab yuav nqig, nws yuav tso nws txoj kev npau taws tseg, ces peb sawv daws yuav tsis tuag." 10 Tswv Ntuj pom tias cov neeg nyob Nis Nis Vas muab siab rau tso txoj kev txhaum tseg tig los yuav lub siab tshiab, ces Tswv Ntuj thim nws txoj kev xav ua phem rau lawv, nws tsis ua raws li nws tau npaj.

NPN 130: 1B-2, 3-4AB, 7-8

Txais: (3) Huab Tais, yog koj cim ntsoov peb cov txhaum, leej twg yuav nyob taus?

Kuv nyob hauv qab tiv txwv hu txog koj, HUAB TAIS,
HUAB TAIS, thov koj mloog kuv lub suab!
Thov koj cuab pob ntseg mloog kuv lo lus thov koj.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

HUAB TAIS, yog koj cim ntsoov peb cov txhaum
leej twg thiaj yuav nyob taus?
Tab sis nyob ntawm koj muaj kev zam txhaum,
ces sawv daws hwm koj.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

His Xas Lais, koj yuav tos ntsoov HUAB TAIS,
Vim nyob ntawm HUAB TAIS muaj txoj kev ua siab zoo,
thiab nyob ntawm nws muaj txoj kev cawm nplua mias;
nws yuav cawm His Xas Lais ntawm tas lawv tej kev txhaum.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

As Les Lus Yas: LK 11: 28

Txais: As les lus yas, as les lus yas.

Cov muaj hmoov zoo yog cov uas mloog
Tswv Ntuj Lo Lus thiab ua raws li ntawd,

Txais: As les lus yas, as les lus yas.

Ntawv Moo Zoo: LK 10: 38-42

38 Thaum lawv taug kev, Yes Xus nkag mus hauv ib lub zos. Muaj ib tug poj niam hu ua Mas Tas txais Yes Xus los hauv nws tsev. 39 Tus poj niam ntawd muaj ib tug niam hluas hu ua Mab Liab uas los zaum ntawm Huab Tais ko taw, mloog ntsoov Huab Tais hais lus. 40 Hos Mas Tas rau siab ntso lis ntau yam qav num tos txais qhua. Ces Mas Tas los hais rau Yes Xus tias : "Huab Tais, koj tsis quav ntsej tias kuv tus niam hluas cia kuv tib leeg lis qav lis num tos txais qhua xwb lod ? Koj hais kom nws pab kuv thiab mas !" 41 Tab sis Huab Tais teb rau Mas Tas tias : "Mas Tas, Mas Tas, koj txhawj thiab ua siab fab lis ntau yam, 42 tab sis tsuas muaj ib yam xwb uas yuav tsum ua. Mab Liab xaiv tau yam zoo tshaj lawm, yuav tsis txhob muab tshem ntawm nws mus."