Tshuaj NTSUAB

Nyob zoo Mim,

Tseem tshuav daim puav duab thiab, cia khoom mam li tuaj tso ntxiv.

Hais txog cov tshuaj hmoob mas tsuas lam kawm kom ho siv qhov puav nyuag daws kev txhawm peem xwb. Txhob mloog hmoob tas tas, vim hmoob tsuas hais qhov zoo xwb lawv tsis paub txog qhov tsis haum rau tus neeg los yog ho tua tau lwm yam. Xws li tej yam tshuaj ntsuab kho tau cancer tab sis tua raum, ces yuav tsum paub siv.

Nyob zoo tais Tooj,

Yeej yog li koj hais os, hais txog tshuaj ntsuab mas peb yuav tsum tau ceev faj zoo, vim tsis tau muaj neeg muab los kawm hais tias yam twg muab tim tsis tau nrog yam twg, thiab Hmoob tsis paub meej txog tias yuav siiv npaum li cas thiaj zoo, yog siv tsawg dhau los yuav tsis zoo tus mob, yog siv ntau dhau ces muaj zog dhau kuj ho yuav ua kom muaj mob lwm yam ntxiv thiab. Kuj tseem muaj qhov tias ib txhia neeg mas zoo li lawv tsis paub tshuaj tiag tiag lawv lam muag tshuaj xwb.

Tiam sis ntawm kuv mas kuv kuj ntseeg tias muaj tej hom tshuaj ntsuab uas yeej pab tau thiab. Yuav tsum yog muab raug tus mob mas thiaj yuav zoo, yog lam kwv yees muab xwb mas tej zaum kuj yuav tsis zoo li. Thaum i kuv nyob Fab Kis teb kuv muaj ib co pob khaus lub Fab Kis thiab Aas Kiv hu ua Eczema no, xub ua rau nraum kuv ob sab xwb qwb, ces cia li kis los ua rau saum kuv ob sab qaum pob muag ntxiv thiab. Tej kws tshuaj hais tias yog eczema xwb mas yuav kho tsis zoo, tsuas yog muab tshuaj pleev kom nyob taus xwb no. Kuv pleev lawv cov tshuaj mas zoo li ploj lawm thiab tsis khaus lawm, tiam sis kuv tso tseg kiag li ob peb hnub ces rov pib khaus tuaj. Yog kuv cia ntev me ntsis ces cia li txawj ua kua yig nplaum nplaum daj tsawv, mas khaus kawg nkaus. Kuv nco tsis meej lawm tiam sis zoo li kuv niam lawv hu ua mob txhab txiag sub no.
Thaum kuv los txog tsev, kuv niam qhia kom kuv mus muab cov plav ntxaiv los tsoo tsoo ces muab rhaub ntxuav, kuv rhaub ntxuav li ntawd ob los peb zaug tej xwb ces cia li zoo tav no li lawm, kuv tsis tau yuav pleev tshuaj tas mus li li kws tshuaj hais lawm. Qhov yuav zoo no, mas yuav tsum yog muaj tus paub es qhia yus siv. Tiam sis tej zaum kuj ho tsis haum yus ces kuj yuav tsis zoo thiab los kuj muaj, hos tej zaum mas saib zoo li yog yam mob ntawd, ces luag qhia tias kom siv tus tshuaj ntawd rau, tiam sis tsis zoo vim twb tsis yog yam mob ntawd hos nws yog nws lwm yam lawm ces thiaj tsis zoo thiab. Tshuaj ntsuab mas yuav tsum yog tus neeg siv kam, mas nws thiaj muab tshuaj raug.

Nyob hauv no mas qhov kuv xav tau tshaj tsuas yog cov npe xwb nroj tsuag xwb, kom hais txog los yus thiaj paub me me tias yog tsob zoo li cas no xwb.

Mim,

Kuv loj kuj tau siv tej yam zoo heev thiab, tab sis yuav tau kom Peb Hmoob ceev faj txog tshuaj hmoob. Yeej muaj cov tshuaj tseeb, cov kws tshuaj cuav thiab.

Ua li koj puas nco tsob plav ntxaiv zoo li cas, kuv nco tsis tau lawm.

Yog cov hmoob nyob Thaib, Nplog thiab Cob Tsib teb tuaj pom kuv sob lus nov no thov nej nias ib cov duab nroj tsuag nyob nej lub teb chaws tuaj qhia rau peb thiab tau khaws tseg. Tsis hais ten nroj tsuag nyob hav zoov hav tsuag los yog nyob tog vaj tog tsev, vim peb cov ncaim mus deb peb tsis paub npe tag lawm.

Thov ua tsaug.

Tais Tooj,

Tsob plav ntxaiv yog ib tsob me nyuam ntoo, tus kav ua yas, tiam sis kuv tsis muaj duab txog li. Tim Guyane, kuv txiv lawv cog muaj.

Tais Tooj,

Kuv tsis paub tias xyov dab Lug puas yuav xa tau duab raws huab cua li. Cia kuv tau nrog nws tham kuv mam hais os. Yog tsis tau no los cia thaum twg kuv mus txog tid kuv mam li yees ib co duab mam tso rau hauv no rau peb tau khaws cia.

Kuv ho xav nug tias puas muaj neeg nyob Nyab Laj teb los Nplog teb uas tuaj pom peb tso npe nroj tsuag? Yog muaj no nej puas paub tsob ntsuag xyas, tsob txiv qab hub, txiv pos tshauv, paj txiv quav nees, thiab tsob txiv huab txhib peb teb chaws? Nej puas muab tau duab tuaj rau peb xyuas thiab? Ua tsaug nawb.

Tsob qwv qws saum no kuv pom muaj ntau nyob As Mes Lis Kas teb no.

Nyob zoo Mim,

Koj hais puas yog "ntsuag sas"? los yeej yog ntsuag xyas li koj hais? Vim ntsuag xyas mas kuv tsis tau hnov dua.