Would you like to react to this message? Create an account in a few clicks or log in to continue.
Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...
February 9- 2014 Nruab Xyoo –HNUB CHIV 5 - Xyoo A NEJ YOG COV NTSEV LAS LUB NTIAJ TEB
NEJ YOG LUB TEEB CI RAU LUB NTIAJ TEB
= Hnub no mas peb zoo siab txais Tswv Ntuj Lo Lus uas Huab Tais Yes Xus tshaj los mus txhib peb siab ua Huab Tais Tswv Ntuj tej hauj lwm,. Yam peb yuav ua tim khawv txog yus tej kev ntseeg Ntuj . Yeej yog Lo Lus tseem ceeb uas peb yuav kub siab khaws tseg
NEJ YOG COV NTSEV LAS LUB NTIAJ TEB .
Txhais tias : cov ntsev uas peb niaj hnub siv mas thiaj ua kom yus tej txhiam laj txhiam xws tsis txhob lwj . Mas nyob rau hauv peb nruab siab mas yus tej kev ntseeg Ntuj thiaj yeej pab kom tej pab neeg nyob ib ncig ntawm peb thiaj rov siv zog ntshaw coj lub neej ntshiab dawb huv zuj zus kom sawv daws txhob coj lub neej ywj faj ywj fwj.,,,
NUG : tim li cas hais lo lus ntawd ?
T E B : vim tias tus tib neeg ntseeg Ntuj mus raws qhov tseeb zoo mas nws tsis txaj muag hais qhia luag tej ob cag tias “ Niaj hnub no peb tsis nyob ntawm dab tog tas lawm- Tswv Ntuj tau txais peb cov me neeg coj lub neej nyob ntawm Tswv Ntuj tog, yog tog uas pab peb txais kev cawm”, :” Hes Nplaws 6:9
Tus Hauv Paus Xa Lus Paj Lug qhia qhov tseeb rau peb tias :” Huab Tais Tswv Ntuj tau xaiv peb los ua nws cov tub ki tshiab, kom peb ntshiab huv, tsis lo txhaum” Es Fes Xos 1: 4-5
NUG : peb tsoom pej xeem ntseeg ( nyob rau hauv lub Koom Txoos ) mas peb yuav ua li cas thiaj coj tau lub neej ntshiab dawb huv ? Yeej nyuaj kawg nkaus ..!!
TEB : yeej nyuaj kawg tiag ! Tab sis peb yuav tsa muag ntsia peb Txiv khuv leej neeg tas nrho - Nws tej kev hlub muaj peev xwm tiv thaiv tau peb tej zaj tswv yim tsis huv kom tej yam ntawd ploj lawm kiag . Peb yuav vam txog peb tus Huab Tais Yes Xus Pleev ,uas yog tus Huab Tais Cawm Seej.- Huab Tais “ muaj hwj huam ua hauj lwm nyob hauv peb siab - Nws ua tau ntau tshaj qhov peb thov thiab qhov peb xav tau “ EFX 3: 20
NEJ YOG LUB TEEB CI RAU LUB NTIAJ TEB.
NUG : Huab Tais Yes Xus yeej xav kom peb ua tus dab tsi ?
TEB : Huab Tais yeej hu peb tsoom ntseeg los mus ua tim khawv txog yus tej kev ntseeg kom xwv yus tej kev ntseeg maj mam nqes los kaj luag tej lub siab
Qhov loj kuj mus raws li no : peb yuav taug kev nyiam kev hlub, raws li peb tau hnov hauv thawj thawj tsab ntawv tias:
“Koj pom ib tug neeg muaj lub cev zoo li koj,mas koj txhob thuam nws,- Koj tsis cia lwm tus hais lus phem nrov – Koj yuav tsis cia lwm tus hem luag tej ob cag – ces koj txoj kev kaj yuav ziab rau tej tus neeg uas niaj hnub koj los mus ntsib .Saib : txog lub caij koj yuav thov Tswv Ntuj nqes los pab , mas Huab Tais Tswv Ntuj yuav teb koj tias : “ kUV NYOB NTAWM NO “ Saib : Huab Tais Tswv Ntuj khuv leej neeg tas nrho – Mas tej pab neeg uas taug kev nyiam kev hlub, raws li Huab Tais tus piv txwv ,mas ib txwm los Tswv Ntuj haj yam mloog cov neeg ntawd lawv tej lo lus thov, tsis tu ncua
Cov kwv tij, phim yuav khaws Tswv Ntuj Lo Lus tseg tias :”Nej yuav yoog raws li Huab Tais Tswv Ntuj, xws li ib cov me nyuam zoo nyiam – Peb yuav yoog raws li Huab Tais Yes Xus Pleev uas nws tau siv nws txoj sia los pab peb “ Es Fes Xos 5: 1-2
THOV NTUJ PAB : Huab Tais Yes Xus , koj hu peb ua Tswv Ntuj tej hauj lwm , yam kom peb ua tim khawv txog yus tej kev ntseeg, peb cov kwv tij Hmoob coob leej thiaj yuav tau paub tseeb tias koj nyob txawm hauv peb nruab siab - koj txoj kev kaj kuj yuav tau ci ntsa iab rau hauv lawv tej nplooj siab nplooj ntsws.. Thov koj txhab zog rau peb kom xwv peb thiaj rov kub siab taug kev nyiam kev hlub, uas yuav tsis muaj cai kawg lauj - Huab Tais siab zoo, ua koj tsaug ntau ..
March 9 – 2014 Caij Plaub Caug - HNUB CHIV 1 - XYOO A
Hnub no yog Hnub Chiv 1, hauv lub Caij PLAUB CAUG. Li ntawd, yog lub caij tseem ceeb hauv lub Koom Txoos Kav Tos Liv. Vim tias lub caij no mas cov neeg ntseeg Ntuj sawv daws yuav tau sib zog tiv thaiv dab phem tej kev haub ntxias thiab tiv thaiv yus tej zaj tswv yim uas tsis huv kom ploj mus thiab peb tseem tig los yuav lub siab tshiab uas coj lub neej ntshiab dawb huv dua qub. Txhais tias : “Peb yuav coj lub neej raws li Yes Xus tus lwj lwm.”
Kwv tij phooj ywg, saib nyob hauv teb chaws suab puam, dab phem tau ntxias Yes Xus kom txhob mloog Ntuj lus. Dab phem uas nws yog tus ntxias neeg thiab hu tias Xas Tas, mas tau hais rau Yes Xus tias : “Koj yog Tswv Ntuj Leej Tub tiag no, mas koj hais kom cov pob zeb no txia ua mov soj.”
Kwv tij, dab phem yeej tsis ntseeg tias Yes Xus yog Tswv Ntuj Leej Tub tiag tiag. Ua li mas nws thiaj xav sim Yes Xus tias : “Yog kuv tsis pom ib yam hwj huam yees ntxwv zeem tau meej tias koj yog Tswv Ntuj Leej Tub, mas kuv yuav tsis ntseeg ib zaug li.“
Yog vim li ntawd, Yes Xus thiaj teb rau Xas Tas tias : “Neeg tsis kawg muab mov los yug siav xwb, neeg tseem yuav cov lus uas tawm ntawm Tswv Ntuj lub ncauj los yug siav thiab.” Kwv tij, Yes Xus tseem hais ntxiv tias : “Tab txawm kuv tsis ua ib yam hwj huam yees ntxwv los rau koj pom tias kuv yog Tswv Ntuj Leej Tub, tsis kav koj yuav tau ntseeg tias : 1. Tswv Ntuj lub Tswv Yim nyob txawm hauv kuv lub siab. 2. Tswv Ntuj Lo Lus yeej yog kuv txoj sia. 3. Kuv yeej tsis kam ncaim ntawm kuv Txiv uas nyob saum ntuj ib zaug li.
Kwv tij phooj ywg, li ntawd mas peb sawv daws uas yog neeg ntseeg Ntuj, peb yuav tau xav tswv yim raws li Yes Xus tias : “Tab txawm peb tsis pom ib yam hwj huam yees ntxwv loj nyob ntawm peb xub ntiag hais txog Tswv Ntuj, los kom peb ntseeg khov kho txog Tswv Ntuj li qub. Vim tias Huab Tais Tswv Ntuj tej lus, mas yog qhov tseeb thiab zoo pab peb txoj sia. Rau qhov Tswv Ntuj yog peb Txiv, uas hlub peb sawv daws kawg nkaus. Ua li mas tsis tas yuav tos kom muaj hwj huam yees ntxwv rau peb pom, ces peb mam ntseeg thiab tso siab rau Huab Tais Tswv Ntuj.
Kwv tij, lub Caij PLAUB CAUG no mas phim peb yuav nco ntsoov tias : “Peb tus ntsuj plig yog qhov tseem ceeb tshaj plaws, phim peb yuav muab Tswv Ntuj tej lus los txhim kho nws, ces yuav ua rau peb pom kev ua neej mus raws qhov yog, peb thiaj txawj paub ua lub neej npuab Tswv Ntuj mus li thiab nyiam ua lub neej yog Ntuj cov me nyuam raws Ii Yes Xus tus piv txwv. Li ntawd, lub caij no peb yuav tau tu siab rau peb tej txhaum thiab peb yuav sib zog tiv thaiv qhov kev ua phem tas mus li.
Kwv tij phooj ywg, dab phem tseem hais ib cov lus haub ntxias Yes Xus ntxiv tias : “Yes Xus, yog koj xav ua tus loj thiab nto koob meej, mas kuv mam tsa koj los ua tus vaj ntxwv kav tas txhia haiv neeg nyob hauv ntiaj teb no, tab sis koj xub txhos caug pe kuv tso.“
Yog vim li ntawd, Huab Tais Yes Xus thiaj cem dab phem tias : “Xas Tas, koj phem tshaj plaws, koj tseem kom kuv txhob hwm Tswv Ntuj thiab ntxeev siab rau Tswv Ntuj, koj cia li khiav mus kom deb deb kuv.” Dab phem thiaj li khiav ntawm Yes Xus mus lawm, vim nws swb Yes Xus txoj kev thoob tsib. Lub caij ntawd kiag, txawm muaj Tswv Ntuj ib cov Tshiab txav los tsob hwb Yes Xus thiab muab mov rau Yes Xus noj.
Kwv tij phooj ywg, Huab Tais Yes Xus yeej tsis kam ua tus vaj nto koob meej thiab muaj hwj chim nyob hauv ntiaj teb no. Vim Yes Xus twb yog tus tswj Tswv Ntuj lub Ceeb Tsheej uas nyob saum ntuj lawm, ces Yes Xus thiaj hais tias : “Kuv lub siab zoo thiab tsis muab hlob.” (Mas Tas 11:29.)
Kwv tij, ua li mas nyob rau hauv lub CAIJ PLAUB CAUG no, peb yuav tau ua neeg me nyob ntawm Tswv Ntuj lub xub ntiag thiab nyob ntawm zeej tsoom lub xub ntiag. Yog peb tau ua yuam kev rau luag tej lawm, mas peb yuav tsum thov txim ntawm luag sai thiab txhob muaj lub tswv yim phem yaum luag mus ua tej yam tsis hwm Ntuj thiab tsis hwm neeg li tus dab phem Xas Tas uas sim Yes Xus siab.
Tsis tas li ntawd, thaum peb pom lwm tus ua tej yam hauj lwm zoo thiab muaj nqes los pab luag tej, mas peb yuav tau hais ib cov lus qhuas txog lawv tej hauj lwm uas zoo zoo ntawd. Hos thaum peb hnov lwm tus hais lus xaiv thiab ntxias kom peb ncaim ntawm Tswv Ntuj mus, mas peb yuav ua ntsej lag muag dig thiab tsis txhob ua raws li cov neeg phem tej lus haub.
Li ntawd, thaum muaj neeg haub ntxias peb kom rov taw tuam Ntuj, mas kom peb nco ntsoov Huab Tais Yes Xus lo lus tias : “XAS TAS, KOJ KHIAV MUS KOM DEB DEB KUV.”
Kwv tij phooj ywg, ua li mas lub CAIJ PLAUB CAUG no, peb yuav tau siv zog tiv thaiv kev ua txhaum thiab tiv thaiv tej yam uas tsis haum Tswv Ntuj siab, kom peb xyaum ua neeg siab ntshiab thiab siab dawb tas mus li.
THOV NTUJ : Huab Tais Leej Txiv siab zoo, koj pub LUB CAIJ PLAUB CAUG no kom xwv peb tau kev tig rov los xyaum taug koj txoj kev ua neeg zoo, kom peb txawj nyiam luag tej ob cag, mas peb ua koj tsaug ntau. Peb Txiv khuv leej neeg tas nrho, thov koj xa Leej Ntuj Plig Ntshiab nqes los tshoj tsoom Hmoob lub siab ntsws, kom xwv cov kwv tij Hmoob txawj tiv thaiv kev ua txhaum, lawv thiaj tau txais koj txoj kev yeej dab phem xws li Yes Xus. Huab Tais Leej Txiv, ua koj tsaug ntau.
March 16 - 2014 Caij Plaub Caug - Hnub Chiv 2 - XYOO A
PEB TSIS NKIM ZOG DAG UA TSWV NTUJ TEJ HAUJ LWM NYOB HAUV HUAB TAIS YES XUS …
= Cov kwv tij phooj ywg hmov thiab tshua, peb sawv daws khwv ua ntau yam hauj lwm los yug peb tsev neeg . Peb xub xav txog LUB HAUV NTSIS ntawm tej hauj lwm ntawd, xws li peb tsev neeg muaj noj muaj haus—Cov me nyuam mus kawm ntau yam txuj ci los npaj coj ib lub neej ruaj nreb khov kho
= Ntawm peb tsoom ntseeg, mas hnub no zoo hnub, rau qhov tias Huab Tais Yes Xus qhia qhov tseeb rau cov Hauv Paus Xa Lus ( thiab nws ib txhij qhia peb tsoom ntseeg, uas nyob rau hauv ntau lub teb chaws ) kom xwv niaj hnub no peb yuav rov kub siab mloog Huab Tais Lo Lus thiab yuav coj lub neej nyob ntawm Tswv Ntuj lub xub ntiag
= Ntawv Moo Zoo sau li no tias : “Hnub ntawd, Yes Xus thiab peb tug thwj tim mus saum ib lub roob. Ces Yes Xus txia ntshis ua tus tshiab – Yes Xus ntsej muag ci ntsa iab li lub hnub – Nws ris tsho ci dawb vog li cov sab hnub ( + “ uas nyob ntiaj teb no tsis muaj tshuaj yuav ua tau kom dawb li ntawd” Mas Kos 9:3 ),,ces ib ntsis muaj ib twv huab ci dawb paug tuaj npog lawv -, Ces hauv twv huab ntawd, Huab Tais Leej Txiv hais ib nyuag lus nrov tias :” Tus no yog kuv Leej Tub uas kuv nyiam kawg – Kuv lub siab nrog nws nyob – Nej mloog nws mog”
= Cov kwv tij, Huab Tais Yes Xus xub qhia tias : tom qab ntawm hnub uas nws yuav sawv ntawm cov tub tuag rov los ,nws thiaj ua Vaj Muaj Hwj Chim pem Tswv Tswv Ntuj lub Ceeb Tsheej.
Ces peb niaj hnub haj yam tso siab lug tias peb” tsis nkim zog dag ua Tswv Ntuj tej hauj lwm nyob hauv Huab Tais Yes Xus“ ( 1 Kos Lis Nthos 15:58 ) , Li ntawd LUB HAUV NTSIS NTAWM PEB LUB NEEJ kuj mus zoo li no tias : yam yuav tsum muaj ib hnub peb yuav tau mus pem Tswv Ntuj lub Ceeb Tsheej, ces peb yuav nrog Huab Tais Yes Xus koom siab koom ntsws muaj hwj chim, xws li Huab Tais Yes Xus ntag
= Cov kwv tij .peb txoj hmov zoo thiab peb nyob kaj lug kaj nrig ntseeg khov kho tias :” Yog vim peb tau txais lub Cim Ntxuav thiab lub Cim Txhab Zog, hos txhia txhia Hnub Chiv peb nrog Huab Tais Yes Xus koom siab ua Thaj Txi Ntuj ces “peb yeej muaj Huab Tais Yes Xus Pleev txoj sia thiab nws lub hwj chim nqes los ua peb ntiag tug. Li ntawd peb yuav tso siab lug thiab peb yuav ntseeg ruaj nreb mus txog hnub kawg” Hes Nplaws 3:14
= Peb niaj hnub nyob kaj lug kaj nrig ntseeg ruaj nreb cuag li Leej Ntshiab Zam ntawm tus Ntoo Cuam. Zoo li nws sawv Huab Tais Tswv Ntuj chaw los qhia peb tias:
“ Nej yuav ntsia Huab Tais Yes Xus tib leeg .Qhov tseeb tias : kuv niaj hnub muab kuv Leej Tub los pub rau nej Huab Tais Yes Xus nyob hauv nej nruab siab, mas nej yuav saib Huab Tais Yes Xus ua tus loj tshaj plaws.- Vim tias :; 1 : Nws yog nej ib tug kwv tij txheeb txheeb – 2 : Nws nrog nej nyob nraim thiab nws ua nej luag tag mus li – 3 : Nws yog nej tus Xib Hwb – 4 : Nws yog nej lub cuab yeej cuab tam, uas tsis txawj lwj tsis tsuas thiab tsis txawj nphob – 5 : Huab Tais Yes Xus kuj yog nej nqi zog “
= Cov kwv tij, hauv lub Caij Plaub Caug no, mas tsim nyog peb yuav khaws Leej Ntshiab Zam 5 lo lus tseem ceeb ntawd tseg , ces peb yuav npuab Huab Tais Yes Xus tuag nthi - Li ntawd peb yuav zoo siab rov xav txog lub hauv ntsis ntawm peb lub neej . Peb kuj yuav coj rawv Huab Tais Yes Xus tus thwj tim lo lus , uas lub npe hu ua Zam tias : Nej ntsia saib : Huab Tais Leej Txiv txoj kev nyiam peb loj tas npaum no : Yam li peb hu ua Tswv Ntuj cov me nyuam – Peb yog Tswv Ntuj cov me nyuam tiag Qhov uas yav tom ntej peb yuav plhis mus zoo li cas kuj tseem tsis tau tawm los rau qhov muag pom xyeem. Li cas los, peb ntseeg khov kho tias : Thaum Huab Tais Yes Xus Pleev yuav tawm los rau qhov muag pom xyeem, mas peb yuav coj lub neej zoo li Yes Xus. vim tias, Huab Tais Yes Xus zoo li cas mas peb yuav pom Nws zoo li ntawd ( 1 Zam 3:1-2
PEB YUAV NCO TXOG TSWV NTUJ TEJ TXIAJ NTSIM :
Peb Txiv khuv leej neeg tas nrho, hauv peb tsoom kwv tij Hmoob, koj tau xaiv peb los ua koj Leej Tub, Huab Tais Yes Xus Pleev, cov thwj tim thiab peb yog koj cov me nyuam. Li ntawd, peb nyob kaj lug kaj nrig los tos nrhw txog lub neej muaj hwj chim, pem Tswv Ntuj lub Ceeb Tsheej. Ua li, peb” tsis nkim zog dag ua Tswv Ntuj tej hauj lwm nyob hauv Huab Tais Yes Xus “ Tsis tas li ntawd xwb : peb niaj hnub yuav vam txog Leej Ntuj Plig Ntshiab nqes los txeem hauv peb nruab siab, kom xwv peb “ yuav tso siab lug mus li thiab peb yuav ntseeg ruaj nreb mus txog hnub kawg” ( Hes Nplaws 3: 14 ) Huab Tais Leej Txiv peb niaj hnub yuav nco ntsoov txog koj tej txiaj ntsim tsis tu ncua .”
March 23 – 2014 LUB CAIJ PLAUB CAUG - HNUB CHIV 3 - XYOO A
HUAB TAIS, KOJ YOG TUS CAWM LUB QAB NTUJ NEEG TIAG. ...
. ( Thov kom nej rov twm Ntawv Moo Zoo, hauv Zam Ntawv Moo Zoo., zaj 4 qib 5 rov mus txog qib 42 ..Yog zaj tseem ceeb uas qhia peb tias : Huab Tais Yes Xus tshaj lub Moo Zoo rau ib tug poj niam Xas Mas Lias. )
Huab Tais Yes Xus mam li rov qhia 2 yam tseem ceeb rau peb – Huab Tais Yes Xus yog tus daws peb tej kev tshaib kev nqhis Huab Tais pab peb teev hawm Tswv Ntuj hauv txoj kev tseeb
Ua li tsim nyog peb yuav kawm 2 qib lus ntawd hauv peb nruab siab
1 : “ Leej twg haus cov dej no tas, nws kuj tseem yuav nqhis ntxiv – Hos tus haus cov dej kuv muab rau nws, mas nws yuav tsis nqhis ib zaug ntxiv” ( Zam 4 : 14 )
Huab Tais Yes Xus lo lus tias :” Leej twg haus cov dej no tas, nws tseem yuav nqhis ntxiv “kuj thooj li li lwm qib lus tias ” Neeg tsis kawg muab mov los yug siav xwb “ ( Mas Tais 4: 4 ) Ua li ,peb niaj hnub hais tau ib qib lus hauv Ntawv Ntshiab, hais tias :: “Tswv Ntuj, kuv tus plig nqhis koj , zoo puav tam li av qhuav qhawv, nkig nkuav,tsis tau dej” Nkauj Paj Nruag 63
Cov kwv tij, tsoom neeg sawv daws nyob thoob ntiaj teb kuj tshaib nqhis txog ib lub siab ntshiab dawb huv, Li ntawd peb tau zoo siab txais .lub Cim Ntxuav ces thiaj rov yug dua tshiab, ces thiaj txia ua Tswv Ntuj cov me nyuam ,
Tsis tas li ntawd xwb, peb tseem rov tshaib nqhis txog ntau ntau yam. Peb tshaib nqhis txog qhov tseeb thiab txog kev ncaj ncees thiab txog kev nyiam kev hlub Peb ua qhov ntawd ntxiv mus, tsis muaj caij tag Mas zaj lus nplij peb siab kuj mus li tias :, Huab Tais Yes Xus thiaj yog tus daws peb tej tshaib kev nqhis. kuj yog vim Huab Tais pub Leej Ntuj Plig Ntshiab ( uas yog Tswv Ntuj kev nyiam kev hlub ) nqes los puv peb tej siab npo .
THOV NTUJ PAB : Huab Tais Yes Xus, peb zoo siab hu txog koj pab, ces thiaj hais tau zaj nkauj teev Ntuj no tias :” Koj yog tus dej cag pub cov dej tshuaj, daws tas peb qhov nqhis – Peb lub siab thiaj kaj” . Huab Tais khuv leej neeg tas nrho, thov koj hlub peb tsoom neeg, uas pluag kev ntseeg thiab pluag kev nyiam Tswv Ntuj, kev nyiam luag tej , Ua li ntawd thov koj txhim kho peb tej nplooj siab nplooj ntsws kom rov tshiab zuj zus .
Huab Tais Yes Xus, Huab Tais khuv leej neeg tas nrho, peb zoo siab ntseeg tias : “ Leej Ntuj Plig Ntshiab yog Ntuj txoj kev nyiam . Ua li ntawd peb tus Huab Tais od , thov koj hliv Leej Ntuj Plig Ntshiab ntawd rau hauv peb lub siab “ Los Mas 5:5
2 : Huab Tais Yes Xus hais rau tus poj niam Xas Mas Lias tias :” Phauj, koj ntseeg kuv mog .,Txog sij hawm,uas cov neeg hawm Ntuj ,lawv yuav hawm Huab Tais Leej Txiv nyob hauv lub tswv yim thiab nyob hauv txoj kev tseeb “ ( Zam 4:24 )
Cov kwv tij , txhua txhia zaus peb teev hawm Tswv Ntuj mas peb nco ntsoov tias :” Huab Tais Yes Xus nyob pem Tswv Ntuj lub Ceeb Tsheej, nws muaj muaj txoj sia mus li . Ua li Huab Tais Yes Xus niaj hnub thov Ntuj pab peb cov neeg sawv daws “ ( Hes Nplaws 7: 25 )
Tsis tas li ntawxd xwb : peb tseem nco thiab ntseeg tias : .Huab Tais Yes Xus kuj “ nyob txawm hauv peb siab Peb mam li ntaus yeej kev phem kev txhaum “ Li ntawd mas peb zoo siab ntseeg ruaj nreb khov kho tias :” Peb tus Huab Tais Yes Xus thiaj yog tus loj dua tus nyob hauv lub qab ntuj neeg “ (1 Zam, 2:14 + 4:4 ).. Huab Tais Yes Xus thiaj yog tus pab peb teev hawm Huab Tais Leej Txiv nyob hauv lub tswv yim thiab nyob hauv txoj kev tseeb ( Zam 4: 24 )
THOV NTUJ PAB :
Huab Tais Yes Xus, Huab Tais khuv leej neeg tas nrho, koj yog Tswv Ntuj Leej Tub - Koj “ yog tus ntaus thawj coj cov ntseeg - Koj pab peb ntseeg kom tom thawj “ ( Hes Nplaws 12:2 ) .
Yog vim koj nqes los tshoj peb siab, ces peb los mus teev hawm Huab Tais Leej Txiv nyob hauv lub tswv yim thiab nyob hauv txoj kev tseeb
Huab Tais od, yog vim koj nyiam thiab koj hlub peb, ces “ peb tau txais ib lub tswv yim ua tub ki tshiab ces peb hu tau Huab Tais Tswv Ntuj tias:” Txiv !” ( Los Mas 8 :15 Huab Tais khuv leej neeg tas nrho, peb ua koj tsaug ntau.
. “ Koj yog tus Cawm lub qab ntuj neeg dim ntawm qhov txhaum tiag “ ( Zam 4: 42 ).
March 30 - 2014 LUB CAIJ PLAUB CAUG - HNUB CHIV 4 - XYOO A
“KUV YOG QHOV POM KEV KAJ LUB QAB NTUJ NEEG”
Kwv tij phooj ywg, lub lis piam no thov kom nej nyeem cov qib lus hauv Zam Ntawv Moo Zoo, xws li Zam zaj 9 :1 + 6-9 + 13-17 + 34- 38, vim yog cov zaj tseem ceeb uas hais tias : “Huab Tais Yes Xus kho ib tug neeg dig muag puag nruab thiab los.”
Tsis tas li ntawd, nyob hauv 4 phau Ntawv Moo Zoo, peb kuj tau twm ntau zaj lus uas Huab Tais Yes Xus ua hwj huam yees ntxwv, kom peb pom tias Yes Xus muab Tswv Ntuj txoj kev nyiam kev hlub uas muaj zog tas nrho los kho ntau tus neeg mob kom rov zoo hlo, yam li yog kho cov neeg dig muag, cov lag ntseg, cov ceg tawv, cov mob ruas thiab 3 tus neeg uas twb tuag lawm, Yes Xus kuj tsa kom lawv sawv rov los muaj txoj sia.
Li ntawd, thiaj xav kom peb sawv daws ntseeg Yes Xus thiab tso siab rau nws, ces peb yuav paub tias Huab TaisYes Xus kho tau peb tus ntsuj tus plig kom rov pom kev tuaj thiab ua kom peb lub siab rov ntshiab huv zuj zus tuaj, ces peb lub neej yuav nyob kaj siab lug rau ntawm Tswv Ntuj lub xub ntiag.
Kwv tij, nyob hauv Ntawv Moo Zoo mas tau hais tias : “Yes Xus taug taug kev, ces nws txawm pom ib tug neeg uas ib txwm dig muag puag nruab thiab los, ces Yes Xus thiaj hlub nws heev, vim nws lub neej txom txom nyem tsis thooj li luag tej.”
Ua li mas kom peb sawv daws xav tias ib tus neeg twg uas nws dig muag txij nruab thiab los, mas ntshe nws yuav tsis pom nws niam nws txiv, nws poj niam me nyuam, tsis pom lub ntiaj teb tej paj xyoob paj ntoos uas zoo zoo nkauj thiab tas ib puas tsav yam uas nyob ib ncig ntawm nws. Li ntawd, mas yog ib yam teeb meem loj heev kawg rau tus neeg uas ib txwm los nws dig muag thiab tsuas vam txog lwm tus pab nws ua ub ua no tas mus li xwb, mas yeej ua rau nws kho siab heev. Yog vim li no, ces thaum Huab Tais Yes Xus uas yog Tswv Ntuj Leej Tub taug kev, nws pom tus neeg dig muag, ces nws thiaj hlub thiab xav pab kom tus neeg ntawd rov pom kev tuaj xws li zeej tsoom. Qhov no, yog ib yam qhia tau rau peb sawv daws paub tias : “Huab Tais Yes Xus, mas nws muaj lub siab nyiam thiab hlub neeg heev.”
Kwv tij phooj ywg, hnub no Ntawv Moo Zoo qhia peb tias Huab Tais Yes Xus nto aub ncaug rau hauv pem teb, ces nws muab nws cov aub ncaug ntawd ua ib qho av nkos coj los pleev tus dig muag lub qhov muag thiab Yes Xus hais rau tus dig muag ntawd tias : “Koj mus ntxuav qhov muag tom lub pas dej Xis Los Es, ces tus dig muag txawm mus ntxuav raws li Yes Xus hais. Thaum nws ntxuav tas, ces tus dig muag ntawd cia li pom kev lawm.”
Kwv tij, ua li mas xam pom tias nyob hauv tus dig muag sim neej, yeej tsis muaj ib zaug uas nws yuav zoo siab npaum li hnub Yes Xus tau kho nws kom rov pom kev tuaj. Tsis tas li hnub ntawd, Huab Tais Yes Xus kuj qhia tus neeg ntawd tias : “Yes Xus yog tus Huab Tais cawm ntiaj teb neeg kom dim ntawm qhov txhaum, ces nws thiaj zoo siab hlo txhos caug los pe Yes Xus.”
Kwv tij phooj ywg hmov thiab tshua, ua li mas lub lis piam no tsim nyog peb yuav khaws Huab Tais Yes Xus Lo Lus tias : “KUV YOG QHOV POM KEV KAJ LUB QAB NTUJ NEEG”, coj los xav tswv yim siv nyob rau hauv peb lub neej.
NUG : Huab Tais Yes Xus ua li cas thiaj kaj tau lub qab ntuj neeg ?
TEB : Huab Tais Yes Xus muab nws txoj kev nyiam kev hlub uas muaj zog tas nrho los kho tib neeg tej nplooj siab nplooj ntsws, ces tib neeg lub siab yuav rov plhis tshiab tuaj, yam li fab hauv peb tus ntsuj plig, mas peb sawv daws tus plig kuj raug kev mob nkees, ces thiaj hais tias : “Peb zoo li tus neeg ib txwm dig muag puag nruab thiab los, mas peb yuav tau vam txog Huab Tais Yes Xus pab kho peb tus ntsuj plig kom rov zoo thiab pom kev tuaj.” Li ntawd, peb thiaj zoo siab ntseeg ruaj nreb khov kho tias : “Ib hnub dhau ib hnub thiab xyoo dhau xyoo, mas Huab Tais Yes Xus kuj khuv leej peb thiab tas nrho ntiaj teb neeg huv tib si.”
TEB : Yog lo lus tias : “Tswv Ntuj yog Txoj kev nyiam” (1 Zam 4::8-10) Tsis tas li ntawd, nej tseem pom ntau qib lus tseem ceeb hauv Ntawv Ntshiab, xws li NPN 103 : 8+13 +17 - NPN 136:1-26 + EFX 2:4-8 + Tis Tos 3:4-7 thiab ntau puas qib lus uas hais txog tib yam ntawd.
Kwv tij phooj ywg, thov kom nej nco tias hauv peb tsoom Hmoob yeej muaj peb ib cov kwv tij neej tsa uas zoo siab ntseeg txog Tswv Ntuj kev nyiam kev hlub uas muaj zog tas nrho, yam li peb ib tug niam dab laug uas nws nyob teb chaws Mes Kas, mas thaum lub 1 hlis xyoo 2014 no nws sau tej qib lus zoo li no tias :
Kuv zoo siab uas kuv tau ua Tswv Ntuj ib tug me nyuam, uas Tswv Ntuj hlub hlub kuv heev. Muaj tej lub caij kuv tsis tshua nco qab tias Tswv Ntuj HLUB kuv lawm, tab sis Tswv Ntuj txoj KEV HLUB ntawd tseem nrog nraim kuv nyob mus li tsis ploj txog tav no, tsis txawj hloov. Tswv Ntuj zam txhaum pub rau kuv tas mus li, zoo yam li tus dej ntws uas tsis txawj tu nyob rau hauv kuv lub neej. Li ntawd, kuv thiaj yuav tsum nquag teev Ntuj thiab txais Ntuj Lus txhua txhua hnub, ces ua rau kuv lub siab nyob kaj lug. Kwv tij, ua li mas phim peb sawv daws yuav ua raws li tus niam dab laug no, ces lub caij Plaub Caug no peb yuav pom Tswv Ntuj txoj kev kaj nqes los nyob rau hauv peb lub neej.
THOV NTUJ : Huab Tais Leej Txiv, peb ua koj tsaug ntau, vim tias koj tau pub peb ntseeg txog koj tej kev nyiam kev hlub uas muaj nqis tas nrho, tsis txawj qub thiab tshiab tag mus li, ces peb thiaj zoo siab khaws koj tej lus ntawd tseg cia siv nyob rau hauv peb lub neej. Ua li mas thov koj tsis txhob pub kom peb ntaus siab yau, kom peb txawj ua siab loj siab tawv thiab muaj lub siab kub lug npuab koj tas mus li, ces peb lub neej thiaj yuav nyob kaj nyob huv thiab peb lub neej yuav pom kev ci ntsa iab nyob rau ntawm koj xub ntiag mus li.
Huab Tais Leej Txiv, peb yuav nco txog koj tej txiaj ntsim mus li.
Cov kwv tij hmov thiab tshua, hnub no zoo hnub, yog hnub uas peb tsoom ntseeg zoo siab sib sau los cav txog Tswv Ntuj lub koob meej - Hos peb tsoom ntseeg Kav Tos Liv , peb zoo siab nrog peb pawg ntseeg hauv peb zos sib koom siab koom ntsws teev hawm peb Txiv siab zoo .Peb mam li ua lub Thaj Txi Ntuj – Hnub no yog Hnub Chiv thiaj yog hnub uas peb los mus mloog Tswv Ntuj Lo Lus yam peb rov tig los yuav lub siab dua thiab peb nrog Huab Tais Yes Xus teev hawm peb Txiv nyob saum ntuj Yeej muaj raws ib qib lus uas peb hais kam hauv ib zaj nkauj teev Ntuj zoo li no tias : “ Tswv Ntuj tsim peb los ua neeg tau nrog luag noj sib luag ,hnav sib npaug - Peb zoo siab hlo cev peb lub neej lub siab los nrog Yes Xus txi Ntuj ua Huab Tais tsaug “
Hnub no peb nrog ntau txhiab pawg ntseeg nyob tas ntiaj teb koom siab koom ntsws ua ib cov kab ke nqaum paj nqaum nplooj hwm Huab Tais Yes Xus Pleev, uas nws yog peb tus Vaj khuv leej neeg tas nrho . Cov kwv tij, hnub no thiaj yog thawj hnub hauv lub Lis Piam Ntshiab – Hnub no thiaj yog Hnub Chiv nqaum nplooj, Peb mam li yuav nco ntsoov txog hnub uas Huab Tais Yes Xus tau nkag rau hauv lub nroog Yes Lus Xas Les.- Peb yuav muaj lus zoo siab zoo ntsws ua cov kab ke nqaum nplooj los cav txog Huab Tais Yes Xus . Tsis tas li ntawd xwb Hnub no peb kuj yuav txiav txim ib siab raws Yes Xus qab los mus nrog Huab Tais koom ris kev txom nyem. Ces yav tom ntej peb thiaj yuav tau nrog Huab Tais Yes Xus sawv ntawm lub qub neej los mus coj ib lub neej tshiab, nyob pem Tswv Ntuj lub Ceeb Tsheej . Peb xub mloog ib zaj nkauj hwm Huab Tais Yes Xus uas nws yog peb tus Vaj khuv leej neeg tas nrho - Peb hais li no tias
Yes Xus, peb tus Vaj, koj los nrog peb nraim . Thov kom cawm peb mas - Koj yog peb lub zog . Tswv Ntuj , koj nres peb . Koj yog peb lub tsua. Koj ntaus tus yeeb ncuab uas muaj zog dua peb . Koj yog tus dej cag pub cov dej tshuaj daws tas peb qhov nqhis , peb lub siab thiaj kaj . Thov koj tuav peb tes thiab coj peb kev hla dhau txoj kev ntxhov, koj yog peb lub zog
Zoo li thaum peb cov kwv tij ntseeg hauv peb zos sib sau los ua cov kab ke nqaum nplooj, mas tus Txiv Plig kuj hais zaj foom hmoov zoo rau cov nplooj .Nws hais li no “ Huab Tais Tswv Ntuj , uas muaj hwj huam loj nrho , peb thov koj foom hmoov zoo rau cov nplooj no kom ntshiab tuaj “ Hnub no peb zoo siab hwm koj Leej Tub, peb tus Huab Tais Yes Xus Pleev . Nws yog peb tus Vaj. Thov koj pab peb sawv daws kom xwv peb rov txiav txim ib siab nyiam Huab Tais Yes Xus tas siab tas ntsws. “ Peb vam txog peb tus Huab Tais Yes Xus Pleev uas nws yog koj tus Tub – Nws nrog koj thiab nrog Leej Tswv Yim Ntshiab muaj txoj sia thiab ua Vaj nyob mus li txog txhiab niag tim puas xyoo UA LI
Mas Tais Ntawv Moo Zoo 21:1-11 ; “ Thaum Yes Xus lawv tuaj yuav txog Yes Lus Xas Les thiab twb tuaj txog Npes Fas Zes ntawm lub roob txiv ntoo roj lawm , Yes Xus xa ob tug thwj tim mus ua ntej . Nws hais nrau nkawd tias :” Neb mus hauv lub zos nyob tom neb hauv ntej . Neb yuav pom ib tug maum luj khi nrog nws tus me nyuam . Neb daws tus maum luj Neb cab ob niam tub luj los rau kuv . Yog muaj neeg hais dab tsi rau neb , ces neb hais rau lawv tias :” Huab Tais xav siv – Ib me ntsis, nws yuav xa rov los”. Qhov ntawd tshwm sim tuaj raws li tus yaj saub xub hais tseg tias :” Nej hais rau tus ntxhais Xis Yoos tias : “Saib koj tus vaj tuaj cuag koj , Nws siab zoo - Nws zaum saum ib tug luj. Nws caij ib tug me nyuam luj yog tus luj thauj nra tus me nyuam” Ob tug thwj tim mus ua raws li Yes Xus tau hais . Nkawd cab ob niam tub luj los - Nkawd muab nkawd ob lub tsho tshaj sab pua luj nrob qaum, ces Yes Xus zaum saud .Muaj neeg coob hle lawv tej tsho tshaj sab los pua kev thiab - Tas tsoom neeg uas mus ua Yes Xus ntej thiab lawv Yes Xus qab qw tias :” Das Vis Leej Tub, thov koj cawm peb ! Tus uas Huab Tais xa tuaj, nto koob meej ! Tus nyob saum cov txheej ntuj siab , thov koj cawm peb ! “ Thaum Yes Xus los hauv Yes Lus Xas Les, mas tas lub nroog ua nphoo ntxoj nphoo ntxuas . Tas tsoom sid hais tias :” Yog tus Yaj Saub Yes Xus, uas tuaj ntawm Nas Xas Les , xeev Nkas Lis Lais, tuaj “
HUAB TAIS PLEEV Lub qab ntuj neeg cav txog koj
Thaum ntawd ces pawg ntseeg sawv daws uas tuav cov nplooj hauv lawv tes, ces sawv daws chaws los hauv tsev teev Ntuj . Sawv daws kuj zoo siab hais zaj nkauj FAJ TIM HUAB TAIS
Faj Tim Huab Tais Ntshiab : Tswv Ntuj kav tsoom hnub qub, koj nto koob meej puv lub ntuj lub teb Koj muaj txoj sia mus li nyob txheej ntuj saud . Tus tuaj ntawm Huab Tais xub ntiag tuaj nto moo lug . Nws muaj txoj sia mus li nyob txheej ntuj saud
Cov kwv tij, lub caij puag thaud, ib cov neeg His Xas Lais tau zoo siab hwm Yes Xus uas nkag hauv lub nroog Yes Lus Xas Les . Cov pej xeem His Xas Lais ntawd kuj nco tias : 3 xyoo sis law , mas Yes Xus tau ncig teb ncig chaws . Nws tshaj lub Moo Zoo rau ntau puas leej. Nws tau pab kho ib cov neeg mob kom zoo Hos hnub uas Yes Xus nkag hauv lub nroog Yes Lus Xas Les ntawd ,mas cov pej xeem His Xas Lais zoo siab hwm Yes Xus . Lawv kuj poob siab me me vim Yes Xus ua neeg me los caij ib tug luj xws li ib tug pej xeem xwb. Mas lub zim txwv no ,nyob hauv peb zos mas peb kuj zoo siab hwm Huab Tais Yes Xus, raws li cov His Xas Lais thaud. Peb hwm Huab Tais thiab peb yuav tso siab lug rau nws . thiab peb yuav nyiam nws ntag Cov kwv tij, tsim nyog peb yuav nco txog tej qib lus tseem ceeb hauv Ntawv Moo Zoo. Yuav nco thiab yuav xav saib : peb yuav kawm 2 – 3 qib lus ntawd hauv nruab siab , puas tau ? Yog qib lus no tias; “ Tas nej sawv daws uas nej khwv thiab ris nra hnyav, Nej tuaj cuag kuv mog ! Nej kawm ntawm kuv mog vim kuv siab zoo – Kuv tsis muab hlob . – Nej tus plig yuav nrhiav chaw so los siav “ ( Mas Tais 11:28 – 29 )
HAIS IB ZAJ TEEV NTUJ : Huab Tais Yes Xus, peb tus Huab Tais, peb tus Vaj, koj muab ib tug piv txwv rau peb, kom xwv peb ua raws li koj tau ua rau peb . Ua li ntawd lub zim txwv no peb ib siab yoog raws li koj tus piv txwv, ces peb lub neej yuav tau ntxim Tswv Ntuj lub siab.Peb niaj hnub , yuav nco txog Huab Tais Leej Niam, uas yog tus Nkauj Tsim Txiaj Mab Liab, tej lus hais tias :”
Cov neeg zaum ua vaj, Huab Tais ua kom lawv nqes ntawm lawv lub rooj zaum. Cov neeg me, Huab Tais tsa lawv nyob qhov chaw siab
NKAUJ PAJ NRUAG : Yes Xus lub npe no zoo
Cov kwv tij ,txhua txhia xyoo uas peb ua hmoov nqaum paj nqaum nplooj ,mas peb ib txhij mloog ib zaj lus ntev zog ,uas qhia peb txog Yes Xus kev txom nyem, rov mus txog qib lus uas qhia peb tias : Yes Xus txoj sia tu nrho = Ziag no peb cia li xaiv tej zaj lus hauv ntawv Moo Zoo
=== Zaj lus 1 tias :” Pis Las Tos muab Yes Xus rau cov tub rog nplawm tas - Ces nws tso Yes Xus rau lawv cia lawv muab Yes Xus dai saum ntoo cuam “ . Cov kwv tij, ib pab tub rog nplawm Yes Xus. Lawv xuas ib cov hlua uas muaj pob txha thiab muaj qe txhuas. Ua li thaum lawv nplawm Yes Xus zoo li ntawd, mas Yes Xus thiaj los ntshav ntau. Ces cov tub rog xav tias : Yes Xus los ntshav ntau ces ib ntsis thaum nws yuav dai saum tus ntoo cuam, mas nws yuav tuag sai
TEEV NTUJ : Huab Tais Yes Xus, peb hnov zaj lus ntawd, mas peb kuj lees tias : Koj raug raug txom nyem heev li ntawd thiab koj tuag kuj yog vim tas ntiaj teb cov txhaum thiab yog vim tas cov neeg uas niaj hnub no ua neej nyob ntiaj teb . Li ntawd lub caij puag thaud ,cov tub rog Los Mas lawv yog cov neeg sawv peb chaw los txo koj txoj sia Huab Tais od, peb nco txog zaj lus ntawd ces peb ib txhij tu siab kawg nkaus .Peb thov koj zam peb tej txim txhaum . Huab Tais, thov koj pab peb kom xwv peb ntxub tas puas tsav yam qhov txhaum huv tib si
Zaj lus 2 tias : Tus nom tswj teb chaws cov tub rog coj Yes Xus nrog lawv mus hauv lub tshav txiav txim. Lawv txhib tas npoj tub rog los hiam Yes Xus. Cov tub rog hle Yes Xus cov ris tsho – Lawv muab ib lub tsho tshaj sab liab los rau Yes Xus hnav. Lawv muab ib cov pos los ua ib lub kauj tso rau saum Yes Xus taub hau. Lawv muab ib rab pas tauj rau nws sab xis tuav. Ces cov tub rog txhos caug ntawm Yes Xus xub ntiag . Lawv thuam Yes Xus tias :” Vaj Yus Das, peb hwm koj ! “ . Cov tub rog nto aub ncaug rau Yes Xus. Lawv muab rab pas tuaj ntaus Yes Xus taub hau - Thaum lawv thuam Yes Xus tas, lawv muab lub tsho tshaj sab liab hle - Lawv rov muab Yes Xus cov ris tsho rau Yes Xus hnav – Ces lawv cab Yes Xus mus dai saum ntoo cuam “
Cov kwv tij, lub caij ntawd cov His Xas Lais cem thiab thuam thiab ntxub cov Los Mas, uas lawv tau txeeb teb chaws His Xas Lais los ua cov Los Mas ntiag tug. Mas hnub uas Yes Xus raug tsim txom, cov tub rog Los Mas kuj tsawm Yes Xus thiab lawv hnyos Yes Xus kawg, Saib : thaum cov tub rog muab Yes Xus dai saum ntoo cuam tas. mas nyob saum Yes Xus taub hau, lawv sau ntawv piav txog Yes Xus lub txim tias : “Tus no yog cov His Xas Lais tus vaj “ Cov kwv tij, thaum Pis Las Tos sau lo lus ntawd, mas nws yeej thuam cov His Xas Lais tias lawv tau muab lawv tus vaj tua tuag. Cov kwv tij, peb tsoom ntseeg txog Huab Tais Yes Xus mas lub caij peb ua Ntoo Cuam lub Cim thiab peb tsa muag ntsia tus ntoo cuam thiab peb yuav nco ntsoov txog qhov tob tshaj plaws hauv tas tsoom neeg kwv huam, hais tias : Yes Xus raug dai saum tus ntoo cuam . Nws tau muab nws txoj sia los txi Ntuj kom tau cawm peb dim ntawm qhov txhaum. Yes Xus kuj sawv ntawm cov tub tuag rov los thiab nws mam li mus saum Ntuj lub Ceeb Tsheej Huab Tais Yes Xus thiaj pov hwm peb tsoom neeg thiab Huab Tais Yes Xus yog tus hlub tshua tas sawv daws neeg kawg nkaus. Nws yog peb tus Vaj Pleev - Nws niaj hnub pab kom peb cov neeg dim ntawm qhov txhaum. Yes Xus yog tus Vaj Pleev kav sawv daws neeg lub siab nyob hauv lub qab ntuj no
TEEV NTUJ : Huab Tais Yes Xus, lub caij ntawd, koj tuaj yeem raug li ntawd kuj yog vim koj muab koj tej kev hlub xyaw koj tej kev txom nyem ces muab koj txoj sia los txi Ntuj. Huab Tais Yes Xus, peb tus Vaj khuv leej neeg tas nrho, peb rov thov txim ntawm koj -Huab Tais peb yeej tu siab ntawm peb tej txhaum
PAJ NRUAG ; Yes Xus, peb tus Vaj…
Zaj lus 3 tias : “ Thaum cov tub rog Los Mas coj Yes Xus mus pem lub roob Nkos Nkos Tas mas cov tub rog nthos ib tug txiv neej hu ua Xis Moos tuaj Xis Les Nas teb tuaj . Lawv muab Yes Xus tus ntoo cuam rau Xis Moos pab nrog Yes Xus kwv tus Ntoo Cuam
TEEV NTUJ : Huab Tais Yes Xus , koj tau tshaj lo lus no tias : “ Leej twg xav los raws kuv , nws yuav niaj hnub kwv nws tus ntoo cuam, ces nws yuav lawv kuv qab “ . Huab Tais, koj yeej muab koj tej kev khuv leej neeg los mus kwv tus ntoo cuam thiab koj raug dai saum tus ntoo cuam kuj yog vim koj muab koj txoj sia los txi Ntuj kom tau cawm cov neeg dim ntawm qhov txhaum. Mas ,lub zim txwv no, nyob hauv peb zos, koj hu peb tsoom ntseeg nrog koj koom siab koom ntsws, ces peb yuav muab peb tej mob nkees thiab peb tej hauj lwm hnyav los txi Ntuj kuj zoo cuag li koj thiab nyob hauv koj thiab. Huab Tais Yes Xus, thov koj pub ib feem ntawm koj tej kev nyiam kev hlub nqes los hauv peb lub siab. Ces nyob ntawm Tswv Ntuj lub xub ntiag peb lub neej thiaj yuav tau muaj nqis. Huab Tais, ua koj tsaug ntau
Zaj lus 4 tias : “ Hnub ntawd , yav hnub qaij 3 teev, mas Yes Xus hu ib suab nrov nrov hais tias :” Txiv, kuv tso kuv txoj sia rau hauv koj txhais tes “ TEEV NTUJ : Huab Tais Yes Xus, koj tau tso siab lug rau Leej Txiv nyob saum ntuj. Tab txawm koj raug txom nyem npaum li ntawd, los koj tseem tso siab lug rau Leej Txiv tuag nthi. Koj yeej ntseeg ruaj nreb khov kho tias : Leej Txiv yuav tsis tso koj pov tseg. Ces koj vam ntsoov tias : Leej Txiv yuav tsa koj sawv ntawm cov tub tuag rov los . Hos qhov nplij peb siab kuj mus li no tias : txhua txhia hnub koj hu peb nrog koj koom siab koom ntsws hais tib zaj lus cuag li koj tias : “ Txiv ,kuv tso kuv txoj sia hauv koj txhais tes “
Huab Tais Yes Xus, thov koj pab peb sawv daws huv tib si, kom xwv peb” tso peb tej kev ntxhov siab thiab peb tej kev mob nkees huv tib si rau Tswv Ntuj, vim tias peb Txiv nyob saum ntuj yog tus txuag peb lub neej thiab peb txoj sia : ( 1 P Z 5:7 ).. Nyob nyob peb thiaj yuav muab tas ib puas tsav yam hauv peb lub neej los txi rau Tswv Ntuj, kuj yog vim koj thiab nyob hauv koj, Huab Tais Yes Xus od . Ces peb lub neej thiaj yuav txia ntshis los ua ib cov txim ntshiab muaj txoj sia ntxim Tswv Ntuj lub siab “ LM 12 : 1-2
Cov kwv tij , hnub no mas tsim nyog peb yuav khaws peb zaj lus no tseg hauv peb nruab siab : 1 : Huab Tais Yes Xus yog peb tus Vaj khuv leej neeg tas nrho. Nws muab nws tej kev nyiam kev hlub los cawm peb dim ntawm qhov txhaum 2 Thaum peb ua Ntoo Cuam lub Cim mas peb haj yam yuav tu siab ntawm peb tej txhaum 3 :: Peb teev hawm Tswv Ntuj mas peb yuav tso peb txoj sia hauv Tswv Ntuj txhais tes, kuj yog vim Huab Tais Yes Xus thiab nyob hauv Huab Tais
Thov kom nej siv sij hawm ntev hauj sim los mus twm 3 zaj lus tseem ceeb uas hnub no peb tsoom ntseeg Kav Tos Liv hauv tas txhia lub teb chaws mloog hauv tsev teev Ntuj, xws li tsab ntawv 1 yog nyob hauv phau ntawv Hauj Lwm zaj 2:14-28 + 1 Pob Zeb 1:18-21 + 3 : Lus Kas 24: 13-35. Peb zaj lus no, pab txhawb nqa peb tej kev ntseeg ces peb thiaj zoo siab rov nyiam Huab Tais Yes Xus. Ua li mas llub caij HLA no, peb thiaj zoo siab hu zaj nkauj tias : As les lus yas, Yes Xus sawv rov los. As les lus yas, nws yeej txoj kev tuag. As les lus Yas
Hnub no, xav kom nej khaws 2 nyuag lo lus me me no tseg, yam li : 1 : Huab Tais Yes Xus yeej paub tas ib puas tsav yam hauv peb nruab siab. 2 : Thaj Txi Ntuj thiab lub Cim Yug, mas peb saib loj tshaj plaws.
1 : HUAB TAIS YEEJ PAUB TAS IB PUAS TSAV YAM HAUV PEB NRUAB SIAB.
NUG : Tim li cas Huab Tais Yes Xus thiaj tshwm sim tuaj rau ob tug thwj tim uas nkawd taug kev mus rau lub zos Es Mas Ws ?
TEB : Yog vim Huab Tais tsom tau ob tug thwj tim ntawd lub siab, ces Yes Xus twb paub tias nkawd hnov qab txog Yes Xus tej lus uas Yes Xus tau tshaj tawm tias : ”Hnub peb, Neeg Leej Tub yuav sawv ntawm cov tub tuag rov los.“ Nkawd tsis nco qab tej lus no lawm, ces thiaj ua rau nkawd kev ntseeg tsuag tsuag, nkawd ntaus siab yau, ua rau nkawd kev tso siab rau Tswv Ntuj ploj tas nrho. Tab sis Huab Tais Yes Xus paub nkawd tej kev nyuaj siab ntxhov plawv, ces nws thiaj txhob txwm tuaj xyuas nkawd thiab nrog nkawd koom ua ib lub siab, kom nkawd rov zeem tseeb tau Yes Xus, ces nkawd thiaj yuav muaj lub siab mus tshaj Tswv Ntuj lub Moo Zoo rau luag tej.
Kwv tij, niaj hnub no peb nyob qhov twg kuj xij, tsis hais hmo ntuj los nruab hnub, Huab Tais yeej tsom kwm peb sawv daws tas mus li, vim nws yog Tswv Ntuj Leej Tub. Li ntawd, nyob hauv ntawv Nkauj Paj Nruag zaj 139 thiaj hais tias : “Huab Tais, koj tsom kuv thiab koj paub kuv. Huab Tais, lo lus uas tsis tau nyob saum kuv tus nplaig, koj xub paub lawm. Thov koj coj kuv mus taug txoj kev muaj txoj sia nyob mus li. Kuv cav lus zoo txog koj, vim koj tej dej num zoo nkauj.”
TEEV NTUJ : Huab Tais Yes Xus, ob hnub no mas peb raug tej kev nyuaj siab ntxhov plawv xws li ob tug thwj tim uas mus tom lub zos Es Mas Ws. Tab sis txawm li cas los, peb kuj tseem ntseeg tias koj nrog peb nyob nraim yam tsis tu ncua. Li ntawd, thov koj ua peb luag tag mus li thiab nyob ze ntawm peb sawv daws ib leeg dhau ib leeg. Huab Tais siab zoo, thov koj nplij peb siab xws li lub caij thaud os mog. Thov koj hlub peb sawv daws thiab pab txhab zog rau peb tej kev ntseeg, peb lub neej thiaj nyob thaj yeeb nyab xeeb thiab tau kev nyob kaj lug. Huab Tais, peb ua koj tsaug ntau. Kwv tij phooj ywg, hmo uas Huab Tais Yes Xus tsim Thaj Txi Ntuj thiab tsim lub Cim Yug, mas Khes Os Fas nkawd kuj nyob ntawd thiab. Ua li mas thaum Yes Xus zaum ntawm lub rooj mov, nws tuav lub ncuav mov thiab Yes Xus hais zaj foom hmoov zoo rau lub mov mog, mas yog thooj li Yes Xus tab tom ua hwj huam yees ntxwv xws li yav dhau los, kom cov mov txia ntshis ua Yes Xus lub Cev Ntshiab, ces Yes Xus mam cev lub Cim Yug ntawd rau nws ob tug thwj tim. Thaum ntawd, ua rau nkawd qhov muag qhib plho, ces nkawd zeem tau Yes Xus thiab nkawd rov muaj lub siab kub lug tuaj.
2 : THAJ TXI NTUJ THIAB LUB CIM YUG, MAS PEB SAIB LOJ TSHAJ PLAWS.
NUG : Txij ntawm xyoo 33 los mus, mas hauv lub Koom Txoos Kav Tos Liv, txoj kev ntseeg txog Lub Cim Yug kuj mus ib yam nkaus lod ? TEB : Peb kev ntseeg kuj mus ib yam nkaus.
Kwv tij, nyob hauv peb Thaj Txi Ntuj, mas peb tsuas hnov tus Leej Choj hais lo lus foom hmoov zoo rau lub ncuav mov tias : “NEJ SAWV DAWS TXAIS , NEJ NOJ. YOG KUV LUB CEV UAS YUAV RAUG PUAS KOM TAU PAB NEJ”
Qhov no, mas yog Huab Tais Yes Xus xuas tus Leej Choj rov hais Huab Tais tej qub lus rau peb, ces peb thiaj zoo siab hwm peb tus Huab Tais Yes Xus, uas yog tus Huab Tais Cawm Neeg kom dim ntawm qhov txhaum. Li ntawd, Thaj Txi Ntuj thiab lub Cim Yug, peb thiaj saib loj tshaj plaws.
Cov kwv tij uas yog neeg ntseeg Ntuj hauv lub Koom Txoos Kav Tos Liv, mas txhua txhia Hnub Chiv peb yuv siab kub lug xws li ob tug thwj tim uas nrog Yes Xus zaum ntawm rooj mov, yam li Huab Tais Yes Xus rov ua hwj huam yees ntxwv xws li lub caij thaud rau peb pom nyob lub caij no.
Li ntawd, peb txoj hmoov thiaj zoo heev. Vim tias niaj hnub no Leej Ntuj Plig Ntshiab tseem tshoj peb sawv daws tej siab ntsws tsis tseg, ces peb thiaj zeem tau Yes Xus uas nyob txawm hauv lub Cim Yug, ces peb thiaj rov hais tau tus Hauv Pauv Paus Xa Lus Tos Mas tej qub lus tias :
“KUV TUS HUAB TAIS, KUV TUS TSWV NTUJ”
TEEV NTUJ : Huab Tais Yes Xus, peb lees tias zaum puav peb kuj ua xyem xyav txog koj, ces peb tsis tshua ntseeg txog lub Cim Yug pes tsawg. Ua li mas thov koj xa Leej Ntuj Plig Ntshiab nqes los nyob hauv peb siab, kom xwv peb tej kev ntseeg txog lub Cim Yug rov ruaj nreb dua qub. Li ntawd, peb yuav muab siab rau coj lub neej raws nraim li koj tus piv txwv thiab peb yuav rov kub siab nyiam koj tas siab tas ntsws.
Kwv tij phooj ywg, nyob hauv haiv neeg His Xas Lais, mas thaum ub coob leej lawv yog cov neeg zov yaj. Lawv saib cov yaj thooj li yog lawv txoj sia. Ua li mas txhua txhia hnub, lawv thiaj saib cov yaj zoo zoo tas siab tas ntsws. Yog vim li no, ces Huab Tais Yes Xus thiaj hlub tshua peb sawv daws, vim Yes Xus yog tus ZOO TSWV ZOV YAJ. Kwv tij, zaj lus tseem ceeb tias : “Huab Tais Yes Xus yog tus Zoo Tswv Zov Yaj,” mas hauv Ntawv Ntshiab peb thiaj pom tias muaj ntau phab ntawv uas hais txog zaj lus no, yam li : NPN 100:3 = “Peb yog HuabTais haiv neeg, yog pab yaj hauv nws lub tshav zaub.” Hes Nplaws 13:20 = “Peb tus Huab Tais Yes Xus Pleev, yog tus Thawj Tswv Zov Yaj, nws ua kom peb txawj leg txhua yam raws nraim nws lub siab xav.” 1 Pob Zeb 2:25 = “Yav thaud,nej yog ib cov yaj poob zoo. Nyem no, nej tig rov los cuag tus Zoo Tswv Zov Yaj, uas zov nej txoj sia.” Tsis tas li ntawd, nyob hauv Ntawv Moo Zoo, mas kuj qhia peb txog ntau yam tseem ceeb uas Huab Tais Yes Xus niaj hnub ua, xws li : 1 : Huab Tais Yes Xus paub peb sawv daws ib leeg dhau ib leeg thiab ib tug dhau ib tug. Kwv tij, qhov uas Huab Tais Yes Xus ua, mas tsis thooj li cov thawj coj uas saib tsoom pej xeem huab hwm ua. Vim cov thawj coj ntawd, lawv tsuas paub tias peb yog txiv neej, los yog poj niam thiab hnub nyoog muaj tsawg xyoo xwb. Tab sis thaum peb xav dab tsi hauv peb nruab siab, mas lawv tsis paub li lawm. Peb tej kev lom zem thiab peb tej kev nyuaj siab ntxhov plaws, mas cov nom tswv uas yog thawj coj ntawd lawv haj yam tsis paub kiag. Ho ntawm Huab Tais Yes Xus, mas nws yeej paub tas ib puas tsav yam hauv peb nruab siab thiab nws kuj pom tas ib puas tsav yam hauv peb lub neej. Ua li mas Huab Tais Yes Xus txoj kev hlub, thiaj yog ib txog kev hlub uas mos nyoos, ces nws thiaj khuv leej peb zoo li ib leeg txiv tsev uas hlub nqee mos nyoos rau nws cov me nyuam. Txij puag txheej tshoj thaud los, Huab Tais Yes Xus txoj kev hlub, kuj tau roos peb sawv daws huv tib si tas mus li. (NPN 103:8-17) Ua li mas Huab Tais Yes Xus txoj kev hlub, yeej loj dua peb tej kev hlub. Vim tias Yes Xus tau siv nws txoj sia los cawm tas nrho ntiaj teb neeg kom dim ntawm txoj kev ua txhaum. Tsis thooj li peb tej kev hlub uas muab nyiaj coj mus pab luag tej xwb. Li ntawd, tsim nyog peb yuav tau tsa muag ntsia Huab Tais Yes Xus txoj kev hlub thiab xyaum ua raws li nws tus lwj lwm, mas peb thiaj yuav ua tau ib tug Zoo Tswv Zov Yaj raws li Huab Tais Yes Xus tus piv txwv. Kwv tij, ua li mas niaj hnub peb yuav tsum nco ntsoov ua Huab Tais Yes Xus tsaug tsis tseg thiab peb yuav tau tso siab lug rau Huab Tais Yes Xus mus li. 2 : Huab Tais Yes Xus muab nws txoj sia los cawm peb sawv daws huv tib si. Kwv tij phooj ywg, yeej yog raws li Yes Xus lo lus tias : “Kuv tuaj ua kom lawv tau txoj sia thiab kom lawv tau txoj sia loj zuj zus.” Ua li mas niaj zaus thaum peb ua Ntoo Cuam lub Cim, mas tsim nyog peb yuav zoo siab rov hais tib zaj lus raws li tus Hauv Paus Xa Lus Paj Lug lo lus tias : “Tswv Ntuj leej Tub nyiam kuv, thiab nws muab nws txoj sia los txi Ntuj kom nws tau pab kuv.” (NLT 2:20) THOV NTUJ : Huab Tais Yes Xus Pleev, koj yog peb tus Huab Tais uas khuv leej neeg tas nrho. Peb sawv daws zoo siab ntseeg khov kho tias : “Tab txawm koj nyob saum Tswv Ntuj lub Ceeb Tsheej, los koj yeej paub peb sawv daws ib leeg dhau ib leeg, ib tug dhau ib tug thiab koj yeej saib peb thooj li yog koj ib tug me nyuam uas koj hlub hlub nyob rau hauv ntiaj teb no.” Li ntawd, tas tej hauj lwm uas koj tau ua los pab peb sawv daws tej siab ntsws, kom peb rov ntshiab huv zuj zus tuaj, mas thov koj ua mus ntxiv yam tsis muaj caij kawg, kom peb plhis tau los ua koj ib tug me tub zov yaj uas zoo nyob rau ntawm koj xub ntiag thiab nyob ntawm Huab Tais Leej Txiv xub ntiag. Peb sawv daws ua koj tsaug ntau !
Cov kwv tij, hnub no zoo hnub – yog hnub Caiv uas peb nrog peb pawg ntseeg sib koom siab koom ntsws cav txog peb tus Huab Tais Tswv Ntuj thiab peb thov Huab Tais Yes Xus hwj peb thiab roos peb tej siab ntsws
Zoo li nej tseem nco tias tsaib no lub 3 hlis, hnub tim 13 mas nyob puag tim lub nroog Los Mas ,teb chaws Is Tas Lis mas 120 tus Tswv Qhia Liab pov ntawv los xaiv lawv ib tug Tswv Qhia Liab neeg los ua Vaj Qhia tshiab =- Vim li ntawd peb muaj tus Vaj Qhia Fas Ntshis Kus los ua peb tus thawj coj saib peb tsoom ntseeg Kav Tos Liv Txij ntawm lub caij ntawd mus mas Vaj Qhia Fas Ntshis Kus kuj tau sau 2 tsab ntawv tseem ceeb los qhia peb pawg ntseeg Kav Tos Liv, kom xwv peb rov zoo siab ua Huab Tais Yes Xus cov kwv luag . Hos tsab ntawv tim ob mas tsaib no hnub tim 24 lub 11 hlis Vaj Qhia.Fas Ntshis kus sau tsab ntawv ntawd tas lawm. Lub ntsiab lus kuj mus li no ias : LUB MOO ZOO PAB TXHAWB NQA TXOJ KEV KAJ LUG KAJ NRIG. Ua li hnub no, peb tsuas nthuav piav 5 zaj lus uas yuav raug peb siab ntsws npo xwb.
PAJ NRUAG Peb xub thov kom Leej Ntuj Plig Ntshiab nqes los tshoj peb siab ( yog zaj lus no : As les lus yas , Leej Ntuj Plig, koj los mas….)
Zaj lus 1 tias :
Tus tib neeg twg ntseeg ruaj nreb khov kho txog Huab Tais Tswv Ntuj thiab ntseeg txog Huab Tais Yes Xus kev nyiam kev hlub, mas txoj kev kaj lug kaj nrig nqes los hauv tus neeg ntawd lub siab # 5
Cov kwv tij, raws li Ntawv Ntshiab Lo Lus sau tseg mas peb tsoom ntseeg nyob kaj lug kaj nrig, kuj tsis yog vim peb yog neeg nplua nuj los yog vim peb yog ib tug thawj coj saib ib cov pej xeem huab hwm coob.
Peb cov ntseeg txoj hmoov zoo heev yog vim peb ntseeg ruaj nreb khov kho tias Huab Tais Tswv Ntuj khuv leej peb sawv daws, tsis xaiv neeg. Thov kom nej sawv daws, nyias rov nco txog tus Hauv Paus Xa Lus Paj Lug lo lus tias : “Tswv Ntuj Leej Tub nyiam kuv thiab nws muab nws txoj sia los txi Ntuj kom nws pab tau kuv.” (Nkas Las Tias 2:20.) Huab Tais Yes Xus yog tus Huab Tais Cawm neeg dim ntawm qhov txhaum thiab nws muab nws txoj kev hlub pab txhawb nqa peb kom xwv peb thiaj rov yug los tshiab ua Ntuj cov me nyuam zoo nyiam.“
Thov kom nej mloog tus Hauv Paus Xa Lus Pob Zeb lo lus no tias : “Nej tseem tsis tau pom Huab Tais Yes Xus Pleev- Tsis kav nej twb nyiam nws. Nej tseem tsis tau pom nws tab sis nej ntseeg . Mas nej tau ib txog kev zoo siab uas piav tsis tau- Ua li mas nej hom khaj mog - Nej twb muaj koob meej, vim nej txais kev ntseeg tus nqi, uas yog txoj kev cawm nej tus plig.” (1 Pob Zeb 1:8-9)
Zaj lus 2 :
Zaj lus tias : Tus tib neeg twg txais Huab Tais Yes Xus hauv nws nruab siab, mas nws thiaj soj qab txoj kev nyob kaj lug. Hos txoj kev kaj lug kaj nrig ntawd kuj rov loj hlob zuj zus # 1
Cov kwv tij, tus tib neeg twg qhib nws lub siab los coj rawv Tswv Ntuj Lo Lus thiab nws xyiv fab teev Huab Tais Ntuj ib tug xwb thiab nws ib siab nyiam Huab Tais Ntuj tshaj tas puas tsav yam mas nws mam li txais lub Cim Ntxuav, lub Cim Txhab Zog. Thiab txhua txhia Hnub Chiv nws mam li txais Cim Yug - Mas hauv tus neeg ntawd lub siab txoj kev kaj lug kaj nrig thiaj rov loj hlob zuj zus thiab rov ua cag ruaj hauv nws lub siab.
Zaj lus 3 tias :
Tus tib neeg twg rhais ib ruam me me los mus cuag Yes Xus, mas nws thiaj paub qhov tseeb tias : Yes Xus twb tos saib thaum twg peb mam li tuaj fim nws. Huab Tais yuav nthuav txhais npab los txais peb. Thaum yus mus cuag Yes Xus mas thiaj yog ib lub caij muaj nqes uas yus teev tau Huab Tais zoo li no tias : “Huab Tais Yes Xus, thov koj pab me yau os mog.” # 3
Cov kwv tij, lub caij twg peb rhais ib ruam me me los mus cuag Yes Xus ? Yog thaum, peb lees tias peb mloog Ntuj Lus nyuaj thiab peb lees tias peb tej siab ntsws tsis huv. Mas lub caij ntawd thiaj yog ib lub caij tseem ceeb uas peb tsuas xav yus tej lus thov Huab Tais pab. - Yeej tsis xav txog lwm zaj tswv yim kiag - Tej zaj lus thov Huab Tais, mas peb hais 4 – 5 lwm tej kuj haj yam zoo. Ib ntsis tsis ntev mas peb thiaj soj qab Ntuj hnov cov txiaj ntsim uas nqes los pab txhim kho peb lub siab - Yog txiaj ntsim nqes los nplij peb siab thiab Peb thiaj nyob kaj lug kaj nrig ntseeg Ntuj ntxiv mus
Ib txwm los mas peb tsoom ntseeg tau zoo siab khaws Huab Tais Yes Xus lub Moo Zoo tseg tias : “Nej thov, ces nej yuav tau txais.” (Mas Tais 7:7.) Peb yim nyob ua neej nyob ntiaj teb no, peb yim paub tias : “Huab Tais Tswv Ntuj yog Txoj kev Nyiam “ (1 Zam 4:8 ) Huab Tais Tswv Ntuj yog peb niam peb txiv – Hos nyob ntawm Tswv Ntuj lub xub ntiag mas Huab Tais Yes Xus thiaj yog peb tus Tij Laug hlob. Li ntawd, peb kub siab vam txog Huab Tais pab txhawb nqa peb tej siab ntsws. Cov kwv tij, peb niaj hnub yuav rhais ib ruam me me, vim tias peb tso siab lug tias Huab Tais yuav ”muab lub hwj huam los hlub tshua peb. Huab Tais yuav tau pab. “ zoo tshaj qhov peb thov thiab qhov peb xav tau” (Es Fes Xos 3:20) Txhua txhia zaus uas peb txais Ntuj cov txiaj ntsim li ntawd, mas txoj kev kaj lug kaj nrig yeej ci ntsa iab hauv peb nruab siab.
Paj nruag “Kuv tso kuv tso sia.”
Zaj 4 : “Ntawm peb mas ntau zaus peb ceeb laj thov Huab Tais nqes los khuv leej peb. Tab sis ntawm Huab Tais Yes Xus, mas yeej tsis muaj ib zaug uas Huab Tais ceeb laj zam peb tej txhaum” # 3
Cov kwv tij, peb qhib Ntawv Moo Zoo, mas peb rov zoo siab hnov ntau zaj lus tseem ceeb tias : hauv tas peb xyoo uas Huab Tais Yes Xus ncig teb chaws His Xas Lais, mas muaj ntau tus neeg raug mob nkeeg tuaj cuag Yes Xus – thov Huab Tais kho lawv lub cev kom zoo. Ntawv Moo Zoo kuj sau li no tias :” Huab Tais Ntuj lub hwj huam ua kom Yes Xus kho tau cov neeg mob. Ces Yes Xus hais ib lo lus rau ib tug neeg tuag ceg tias : “Kuv hais rau koj tias. Koj nqa koj lub txaj - koj rov mus tsev.” Tam sis ntawd, tus tuag ceg sawv tsees ntawm sawv daws xub ntiag- Nws nqa nws lub txaj uas thaum tuaj nws pw . Ces nws rov mus tsev.” ( Lus Kas 5:17-26) Nyob hauv plaub phau Ntawv Moo Zoo, mas yeej muaj ntau zaj qhia peb tias : Yes Xus kho tej tus neeg mob kom zoo, xws Ii tej tus neeg dig muag - tus neeg tuag ceg, tus noog mob ruas, tus lag ntseg. Thov kom nej mloog zaj lus tias : “Yes Xus kho tus neeg mob ruas : Muaj ib zaug, Yes Xus nyob hauv ib lub nroog. Muaj ib tug neeg tuaj – Nws ib ce mob ruas tas huv si. Thaum nws pom Yes Xus, nws pe – Nws khoov ntsej muag ti av – Nws thov Yes Xus tias : “Huab Tais, yog koj xav, mas koj ua tau kom kuv rov huv tuaj”- Ces Yes Xus cev tes tuav tus neeg mob ruas- Nws hais tias “Kuv xav – Koj cia li huv mog”- tam sis ntawd tus mob ruas tso tus neeg tseg “ (Lus Kas 5:12-13) Txhais tias Yes Xus hlub tshua tus neeg mob ruas kawg nkaus - Nws mam li kho tus neeg txom txom nyem , uas yog neeg mob ruas
Cov kwv tij peb zoo siab ntseeg khov kho tias : ” Huab Tais Ntuj lub hwj huam ua kom Yes Xus kho tau cov neeg mob . Ua li Huab Tais Yes Xus uas yog Huab Tais Tswv Ntuj ib yam nkaus Huab Tais Leej Txiv ,ces “ Tsis muaj ib yam uas Tswv Ntuj ua tsis tau “ (Lus Kas 1:37) Cov kwv tij,,peb tsoom ntseeg ib txwm zoo siab ntseeg tias : Huab Tais Yes Xus yog tus tseem kws tshuaj, uas muaj peev xwm txhim kho tau peb lub cev nqaij daim tawv thiab peb tej nplooj siab nplooj ntsws kom rov huv tuaj , Ces yeej tsis muaj ib zaug uas Huab Tais Yes Xus ceeb laj mloog peb tej lus thov .Yog vim Huab Tais hlub neeg tas nrho mas nws zam peb tej txhaum tau , ces Huab Tais ib txhij nrog peb koom zoo siab thiab los mas.
Zaj 5 : Huab Tais lub siab nplua nuj hauv kev nyiam kev hlub uas yuav tsis xawj yau, tsis txawj qub. Huab Tais muab tau nws tej kev hlub los ua kom peb tej nplooj siab nplooj ntsws plhis tshiab tuaj # 11 Cov kwv tij, Huab Tais Yes Xus lub siab zoo siab dav fo. Nws yeej puag tau sawv daws neeg hauv nws nruab siab . Saib : ib tug tib neeg laus, uas ib txwm coj tus cwj pwm zoo li cas, mas kom nws tsis txhob xav tias :” Ib tug neeg laus laus nkoos xws li kuv mas Huab Tais Yes Xus ua tsis tau dab tsi los pab kuv lauj” . Tseev kom tus neeg laus ntawd rov ntseeg tias:” Tsis muaj ib yam tshiab , uas Tswv Ntuj ua tsis tau “ . Yog vim qhov ntawd mas peb yuav tsis ntaus siab yau, tab sis peb yuav rov zoo siab rov ntseeg tias : tab txawm yus laus npaum li cas, los Huab Tais tseem muaj hwj huam pab txhim kho tau peb lub siab kom rov plhis tshiab tuaj Li ntawd lub caij twg peb los mus cuag peb ib tug txiv ntxawm uas coj qub kev cai tau 35 – 400 xyoo tej, mas peb tseem muaj peev xwm thov Ntuj nqes los tshoj tus neeg laus ntawd , saib puas yuav muaj ib hnub nws yuav tau ntshaw coj ib lub neej ntshiab dawb huv Vim tias Huab Tais lub siab nplua nuj hauv kev nyiam kev hlub. Huab Tais yeej muaj peev xwm txhim kho tas sawv daws neeg huv tib si ntag
Cov kwv tij Hmoob, peb sawv daws ua Ntuj tsaug, rau qhov tias Vaj Qhia Fas Ntshis Kus tau sau tsab ntawv ntawd uas yog ib yam tseem ceeb Tsis tas li ntawd xwb peb yuav rov nyob kaj lug kaj nrig ntseeg Tswv Ntuj dua qub.
Hnub no zoo hnub, rau qhov tias yog Hnub Chiv uas peb tsoom ntseeg cav txog Ntuj zaj hwj huam yees ntxwv tias : Yes Xus sawv ntawm cov tub tuag rov los.. Tsis tas li xwb ,Huab Tais caw peb nrog Huab Tais koom txi Ntuj ua ke ntag .
Zoo li hauv peb tsev , ob tug niam txiv nrog cov me nyuam sib haum xeeb, nyob ua ke . ib tug hais lus zoo rau ib tug – ib leeg kuj hwm ib leeg , hais tej lo lus qhuas txog lwm tus kev nyiam kev hlub. Ces sawv daws nyob kaj lug kaj nrig nyob ua ke ntag
Mas hnub no hauv Ntawv Moo Zoo ,Huab Tais Yes Xus ( Tswv Ntuj Leej Tub ) kuj rov hais 2 zaj lus ,uas yog Lo Lus tseeb tseeb , kom xwv peb haj yam nyob kaj lug kaj nrig thiab kom peb ua siab loj siab tawv qhawv mus li - Zoo li 2 lo lus no tias
1: Kuv nyob qhov twg , mas nej thiaj yuav tau nrog kuv nyob qhov ntawd. 2 : Kuv yog Txoj Kev - yog Qhov Tseeb thiab yog Txoj Sia
1 : Kuv nyob qhov twg , mas nej thiaj kuj yuav tau nrog kuv nyob qhov ntawd.
Huab Tais Yes Xus muaj hwj chim thiab nyob kaj lug kaj nrig pem Tswv Ntuj lub Ceeb Tsheej. Mas tseev kom peb tso siab lug tos nrhw txog hnub zoo, uas peb yuav tau nrog Huab Tais koom coj lub neej muaj hwj chim, lub neej nyob kaj lug kaj nrig, rov mus txog txhiab niag tim puas xyoo
= Cov kwv tij ,peb niaj hnub ,zoo siab khaws lub Moo Zoo ntawd tseg tias “Peb yuav tau nrog Huab Tais nyob”
- Peb niaj hnub zoo siab twm tej zaj lus tseem ceeb hauv Ntawv Ntshiab ces peb thiaj rov tso siab lug tos txog peb lub neej tshiab nyob pem Tswv Ntuj lub Ceeb Tsheej
“ Thaum nej muaj ib tug tuag mas yuav tsis txhob tu siab xws li cov neeg uas tsis muaj kev tso siab ..Ntuj yuav coj peb mus cuag Huab Tais nyob saum ntuj – Peb mam li yuav tau nrog Huab Tais nyob ua ke, nyob mus li – Peb sawv daws nco ntsoov txog lo lus no. ces peb thiaj rov sib pab ua siab loj “ 1 Tes Xas Los Nis 4:13-18 Ntawm peb tsoom ntseeg mas txog hnub peb ib tug swm neeg tau tas sim neej mas peb ib txhij tu siab thiab peb kuj ua siab loj – tsis ntaus siab yau, xws li peb cov kwv tij uas coj qub kev cai
Yeej yog raws li tsab ntawv rau ib pawg ntseeg hauv lub nroog Kos Los Xais tias : “Tswv Ntuj tau coj peb los nyob hauv nws Leej Tub lub Ceeb Tsheej . Nyob hauv Leej Tub , peb tau txoj kev cawm thiab txoj kev zam txhaum” ( Kos Los Xais 1:13-14)
TEEV NTUJ :
Huab Tais Yes Xus, Huab Tais cawm neeg, koj qhia lo lus tseeb rau peb tias lub hauv ntsis ntawm peb lub neej thiaj yuav mus li no tias : “ Yuav tau muaj ib hnub zoo tshaj plaws tias : Peb yuav tau nrog Huab Tais nyob, rov mus txog txhiab niag tim puas xyoo. Peb thiaj nyob kaj lug kaj nrig ua Huab Tais tsaug 2 : Kuv yog Txoj Kev - yog Qhov Tseeb thiab yog Txoj Sia
A : Huab Tais Yes Xus yog Txoj Kev..
Yog tias peb nyob peb mas peb rov nrog Tswv Ntuj nyob tsis tau. Tiam sis Huab Tais Yes Xus yog tus puag sawv daws hauv nws nruab siab. Ces nws coj peb kev pab peb mus cuag peb tus Huab Tais Tswv Ntuj thiab kom peb npuab Tswv Ntuj lub siab
Cov kwv tij tsim nyog peb yuav khaub zig txog Yes Xus pab kom xwv peb kub siab npuab Tswv Ntuj lub siab,
B : Huab Tais Yes Xus yog Qhov Tseeb :
Yog tias peb nyob peb mas peb yuav tsis muaj Tswv Ntuj txoj kev thoob tsib los kaj peb lub siab. Tiam sis Huab Tais Yes Xus yog tus pab peb dim ntawm qhov tsaus ntuj nti.
Yeej yog raws li Ntawv Ntshiab sau tseg tias : “ Kuv yog qhov pom kev kaj lub qab ntuj neeg. Leej twg lawv kuv qab, nws yuav tsis mus hauv qhov tsaus ntuj. Nws yuav tau qhov pom kev uas coj mus rau txoj sia ‘ Zam 8:12
Cov kwv tij, tsim nyog peb yuav xyiv fab qhib peb siab los nyeem Tswv Ntuj Lo Lus, tsis tu ncua . Ces peb haj yam pom kev lug haum Tswv Ntuj lub siab
C ; Huab Tais Yes Xus yog peb Txoj Sia :
Yog tias peb nyob peb mas peb rov yug los dua ua Tswv Ntuj cov me nyuam tsis tau ib zaug li. Tab sis “ Cov neeg uas txais lub Moo Zoo thiab ntseeg txog Yes Xus lub npe, mas Huab Tais pub hwj huam rau lawv kom los ua Tswv Ntuj cov me nyuam’ ”Zam 1:12
TEEV NTUJ :
Huab Tais Yes Xus. koj niaj hnub ua Ntuj tej hauj lwm txhim kho peb nruab siab kom xwv peb rov npuab Tswv Ntuj lub siab thiab kom peb taug txoj kev kaj thiab kom peb nyob kaj lug kaj nrig ua Tswv Ntuj cov me nyuam zoo nyiam. Huab Tais khuv leej neeg tas nrho , peb ua koj tsaug ntau thiab peb thov koj tshoj peb tej siab ntsws ces peb yuav tau coj ib lub neej ntshiab dawb huv zuj zus, nyob ntawm peb Txiv nyob saum ntuj lub xub ntiag
Cov kwv tij, hnub no zoo hnub – yog hnub Caiv uas peb nrog peb pawg ntseeg sib koom siab koom ntsws cav txog peb tus Huab Tais Tswv Ntuj thiab peb thov Huab Tais Yes Xus hwj peb thiab roos peb tej siab ntsws
Zoo li nej tseem nco tias tsaib no lub 3 hlis, hnub tim 13 mas nyob puag tim lub nroog Los Mas ,teb chaws Is Tas Lis mas 120 tus Tswv Qhia Liab pov ntawv los xaiv lawv ib tug Tswv Qhia Liab neeg los ua Vaj Qhia tshiab =- Vim li ntawd peb muaj tus Vaj Qhia Fas Ntshis Kus los ua peb tus thawj coj saib peb tsoom ntseeg Kav Tos Liv Txij ntawm lub caij ntawd mus mas Vaj Qhia Fas Ntshis Kus kuj tau sau 2 tsab ntawv tseem ceeb los qhia peb pawg ntseeg Kav Tos Liv, kom xwv peb rov zoo siab ua Huab Tais Yes Xus cov kwv luag . Hos tsab ntawv tim ob mas tsaib no hnub tim 24 lub 11 hlis Vaj Qhia.Fas Ntshis kus sau tsab ntawv ntawd tas lawm. Lub ntsiab lus kuj mus li no ias : LUB MOO ZOO PAB TXHAWB NQA TXOJ KEV KAJ LUG KAJ NRIG. Ua li hnub no, peb tsuas nthuav piav 5 zaj lus uas yuav raug peb siab ntsws npo xwb.
PAJ NRUAG Peb xub thov kom Leej Ntuj Plig Ntshiab nqes los tshoj peb siab ( yog zaj lus no : As les lus yas , Leej Ntuj Plig, koj los mas….)
Zaj lus 1 tias :
Tus tib neeg twg ntseeg ruaj nreb khov kho txog Huab Tais Tswv Ntuj thiab ntseeg txog Huab Tais Yes Xus kev nyiam kev hlub, mas txoj kev kaj lug kaj nrig nqes los hauv tus neeg ntawd lub siab # 5
Cov kwv tij, raws li Ntawv Ntshiab Lo Lus sau tseg mas peb tsoom ntseeg nyob kaj lug kaj nrig, kuj tsis yog vim peb yog neeg nplua nuj los yog vim peb yog ib tug thawj coj saib ib cov pej xeem huab hwm coob.
Peb cov ntseeg txoj hmoov zoo heev yog vim peb ntseeg ruaj nreb khov kho tias Huab Tais Tswv Ntuj khuv leej peb sawv daws, tsis xaiv neeg. Thov kom nej sawv daws, nyias rov nco txog tus Hauv Paus Xa Lus Paj Lug lo lus tias : “Tswv Ntuj Leej Tub nyiam kuv thiab nws muab nws txoj sia los txi Ntuj kom nws pab tau kuv.” (Nkas Las Tias 2:20.) Huab Tais Yes Xus yog tus Huab Tais Cawm neeg dim ntawm qhov txhaum thiab nws muab nws txoj kev hlub pab txhawb nqa peb kom xwv peb thiaj rov yug los tshiab ua Ntuj cov me nyuam zoo nyiam.“
Thov kom nej mloog tus Hauv Paus Xa Lus Pob Zeb lo lus no tias : “Nej tseem tsis tau pom Huab Tais Yes Xus Pleev- Tsis kav nej twb nyiam nws. Nej tseem tsis tau pom nws tab sis nej ntseeg . Mas nej tau ib txog kev zoo siab uas piav tsis tau- Ua li mas nej hom khaj mog - Nej twb muaj koob meej, vim nej txais kev ntseeg tus nqi, uas yog txoj kev cawm nej tus plig.” (1 Pob Zeb 1:8-9)
Zaj lus 2 :
Zaj lus tias : Tus tib neeg twg txais Huab Tais Yes Xus hauv nws nruab siab, mas nws thiaj soj qab txoj kev nyob kaj lug. Hos txoj kev kaj lug kaj nrig ntawd kuj rov loj hlob zuj zus # 1
Cov kwv tij, tus tib neeg twg qhib nws lub siab los coj rawv Tswv Ntuj Lo Lus thiab nws xyiv fab teev Huab Tais Ntuj ib tug xwb thiab nws ib siab nyiam Huab Tais Ntuj tshaj tas puas tsav yam mas nws mam li txais lub Cim Ntxuav, lub Cim Txhab Zog. Thiab txhua txhia Hnub Chiv nws mam li txais Cim Yug - Mas hauv tus neeg ntawd lub siab txoj kev kaj lug kaj nrig thiaj rov loj hlob zuj zus thiab rov ua cag ruaj hauv nws lub siab.
Zaj lus 3 tias :
Tus tib neeg twg rhais ib ruam me me los mus cuag Yes Xus, mas nws thiaj paub qhov tseeb tias : Yes Xus twb tos saib thaum twg peb mam li tuaj fim nws. Huab Tais yuav nthuav txhais npab los txais peb. Thaum yus mus cuag Yes Xus mas thiaj yog ib lub caij muaj nqes uas yus teev tau Huab Tais zoo li no tias : “Huab Tais Yes Xus, thov koj pab me yau os mog.” # 3
Cov kwv tij, lub caij twg peb rhais ib ruam me me los mus cuag Yes Xus ? Yog thaum, peb lees tias peb mloog Ntuj Lus nyuaj thiab peb lees tias peb tej siab ntsws tsis huv. Mas lub caij ntawd thiaj yog ib lub caij tseem ceeb uas peb tsuas xav yus tej lus thov Huab Tais pab. - Yeej tsis xav txog lwm zaj tswv yim kiag - Tej zaj lus thov Huab Tais, mas peb hais 4 – 5 lwm tej kuj haj yam zoo. Ib ntsis tsis ntev mas peb thiaj soj qab Ntuj hnov cov txiaj ntsim uas nqes los pab txhim kho peb lub siab - Yog txiaj ntsim nqes los nplij peb siab thiab Peb thiaj nyob kaj lug kaj nrig ntseeg Ntuj ntxiv mus
Ib txwm los mas peb tsoom ntseeg tau zoo siab khaws Huab Tais Yes Xus lub Moo Zoo tseg tias : “Nej thov, ces nej yuav tau txais.” (Mas Tais 7:7.) Peb yim nyob ua neej nyob ntiaj teb no, peb yim paub tias : “Huab Tais Tswv Ntuj yog Txoj kev Nyiam “ (1 Zam 4: 8 ) Huab Tais Tswv Ntuj yog peb niam peb txiv – Hos nyob ntawm Tswv Ntuj lub xub ntiag mas Huab Tais Yes Xus thiaj yog peb tus Tij Laug hlob. Li ntawd, peb kub siab vam txog Huab Tais pab txhawb nqa peb tej siab ntsws. Cov kwv tij, peb niaj hnub yuav rhais ib ruam me me, vim tias peb tso siab lug tias Huab Tais yuav ”muab lub hwj huam los hlub tshua peb. Huab Tais yuav tau pab. “ zoo tshaj qhov peb thov thiab qhov peb xav tau” (Es Fes Xos 3:20) Txhua txhia zaus uas peb txais Ntuj cov txiaj ntsim li ntawd, mas txoj kev kaj lug kaj nrig yeej ci ntsa iab hauv peb nruab siab.
Paj nruag “Kuv tso kuv tso sia.”
Zaj 4 : “Ntawm peb mas ntau zaus peb ceeb laj thov Huab Tais nqes los khuv leej peb. Tab sis ntawm Huab Tais Yes Xus, mas yeej tsis muaj ib zaug uas Huab Tais ceeb laj zam peb tej txhaum” # 3
Cov kwv tij, peb qhib Ntawv Moo Zoo, mas peb rov zoo siab hnov ntau zaj lus tseem ceeb tias : hauv tas peb xyoo uas Huab Tais Yes Xus ncig teb chaws His Xas Lais, mas muaj ntau tus neeg raug mob nkeeg tuaj cuag Yes Xus – thov Huab Tais kho lawv lub cev kom zoo. Ntawv Moo Zoo kuj sau li no tias :” Huab Tais Ntuj lub hwj huam ua kom Yes Xus kho tau cov neeg mob. Ces Yes Xus hais ib lo lus rau ib tug neeg tuag ceg tias : “Kuv hais rau koj tias. Koj nqa koj lub txaj - koj rov mus tsev.” Tam sis ntawd, tus tuag ceg sawv tsees ntawm sawv daws xub ntiag- Nws nqa nws lub txaj uas thaum tuaj nws pw . Ces nws rov mus tsev.” ( Lus Kas 5:17-26) Nyob hauv plaub phau Ntawv Moo Zoo, mas yeej muaj ntau zaj qhia peb tias : Yes Xus kho tej tus neeg mob kom zoo, xws Ii tej tus neeg dig muag - tus neeg tuag ceg, tus noog mob ruas, tus lag ntseg. Thov kom nej mloog zaj lus tias : “Yes Xus kho tus neeg mob ruas : Muaj ib zaug, Yes Xus nyob hauv ib lub nroog. Muaj ib tug neeg tuaj – Nws ib ce mob ruas tas huv si. Thaum nws pom Yes Xus, nws pe – Nws khoov ntsej muag ti av – Nws thov Yes Xus tias : “Huab Tais, yog koj xav, mas koj ua tau kom kuv rov huv tuaj”- Ces Yes Xus cev tes tuav tus neeg mob ruas- Nws hais tias “Kuv xav – Koj cia li huv mog”- tam sis ntawd tus mob ruas tso tus neeg tseg “ (Lus Kas 5:12-13) Txhais tias Yes Xus hlub tshua tus neeg mob ruas kawg nkaus - Nws mam li kho tus neeg txom txom nyem , uas yog neeg mob ruas
Cov kwv tij peb zoo siab ntseeg khov kho tias : ” Huab Tais Ntuj lub hwj huam ua kom Yes Xus kho tau cov neeg mob . Ua li Huab Tais Yes Xus uas yog Huab Tais Tswv Ntuj ib yam nkaus Huab Tais Leej Txiv ,ces “ Tsis muaj ib yam uas Tswv Ntuj ua tsis tau “ (Lus Kas 1:37) Cov kwv tij,,peb tsoom ntseeg ib txwm zoo siab ntseeg tias : Huab Tais Yes Xus yog tus tseem kws tshuaj, uas muaj peev xwm txhim kho tau peb lub cev nqaij daim tawv thiab peb tej nplooj siab nplooj ntsws kom rov huv tuaj , Ces yeej tsis muaj ib zaug uas Huab Tais Yes Xus ceeb laj mloog peb tej lus thov .Yog vim Huab Tais hlub neeg tas nrho mas nws zam peb tej txhaum tau , ces Huab Tais ib txhij nrog peb koom zoo siab thiab los mas
Zaj 5 : Huab Tais lub siab nplua nuj hauv kev nyiam kev hlub uas yuav tsis xawj yau, tsis txawj qub. Huab Tais muab tau nws tej kev hlub los ua kom peb tej nplooj siab nplooj ntsws plhis tshiab tuaj # 11 Cov kwv tij, Huab Tais Yes Xus lub siab zoo siab dav fo. Nws yeej puag tau sawv daws neeg hauv nws nruab siab . Saib : ib tug tib neeg laus, uas ib txwm coj tus cwj pwm zoo li cas, mas kom nws tsis txhob xav tias :” Ib tug neeg laus laus nkoos xws li kuv mas Huab Tais Yes Xus ua tsis tau dab tsi los pab kuv lauj” . Tseev kom tus neeg laus ntawd rov ntseeg tias:” Tsis muaj ib yam tshiab , uas Tswv Ntuj ua tsis tau “ . Yog vim qhov ntawd mas peb yuav tsis ntaus siab yau, tab sis peb yuav rov zoo siab rov ntseeg tias : tab txawm yus laus npaum li cas, los Huab Tais tseem muaj hwj huam pab txhim kho tau peb lub siab kom rov plhis tshiab tuaj Li ntawd lub caij twg peb los mus cuag peb ib tug txiv ntxawm uas coj qub kev cai tau 35 – 400 xyoo tej, mas peb tseem muaj peev xwm thov Ntuj nqes los tshoj tus neeg laus ntawd , saib puas yuav muaj ib hnub nws yuav tau ntshaw coj ib lub neej ntshiab dawb huv Vim tias Huab Tais lub siab nplua nuj hauv kev nyiam kev hlub. Huab Tais yeej muaj peev xwm txhim kho tas sawv daws neeg huv tib si ntag
Cov kwv tij Hmoob, peb sawv daws ua Ntuj tsaug, rau qhov tias Vaj Qhia Fas Ntshis Kus tau sau tsab ntawv ntawd uas yog ib yam tseem ceeb Tsis tas li ntawd xwb peb yuav rov nyob kaj lug kaj nrig ntseeg Tswv Ntuj dua qub.
N0 2 VAJ QHIA FAS NTSHIS KUS TEJ ZAJ LUS TSEEM CEEB
Cov kwv tij, yav dhau los , nej twb tau mloog Vaj Qhia Fas Ntshis Kus tej zaj lus thoob tsib lawm. Vim tias tsaib no hnub tim 24, lub 11 hlis, Vaj Qhia tau tshaj nws zaj lus uas yuav tau pab cov neeg ntseeg Kav Tos Liv coob leej kom rov tig los taug txoj kev tseeb uas yuav ua rau lub neej rov nyob kaj lug kaj nrig. Li ntawd, lub ntsiab lus uas Vaj Qhia hais mas yog li no : “LUB MOO ZOO PAB TXHAWB NQA TXOJ KEV KAJ LUG KAJ NRIG.”
PAJ NRUAG ( Peb xub thov kom Leej Ntuj Plig Ntshiab nqes los tshoj peb siab - As les lus yas : Leej Ntuj Plig, koj los mas.
Cov kwv tij, yav dhau los nej twb tau mloog 5 nqe lus tseem ceeb uas hais tias : 1: Tus tib neeg twg ntseeg txog Huab Tais Yes Xus kev nyiam kev hlub, mas txoj kev kaj lug kaj nrig yuav nqes los nyob hauv tus neeg ntseeg ntawd lub siab. 2 Tus tib neeg twg yog txais Huab Tais Yes Xus los hauv nws nruab siab, mas txoj kev kaj lug kaj nrig ntawd kuj yuav loj hlob zuj zus tuaj nyob hauv nws lub neej. 3 : Peb los mus cuag Huab Tais Yes Xus, mas yog vim peb paub qhov tseeb tias : “Yes Xus yog tus tuaj ntawm Huab Tais Tswv Ntuj fim peb sawv daws.” 4 : Ntawm peb, mas ntau zaus peb ceeb laj thov Huab Tais Yes Xus nqes los khuv leej peb. Tab sis Huab Tais Yes Xus mas yeej tsis muaj ib zaug uas nws ceeb laj nqes los saib peb thiab zam peb tej txhaum. 5 : Huab Tais Yes Xus nplua nuj kev hlub heev, vim nws txoj kev hlub mas tsis txawj tsuag thiab tsis txawj qub.
Kwv tij, ua li mas hnub no thov kom nej ua zoo mloog 3 nqe lus tseem ceeb tias : 1 : Tus neeg twg yog ua tub tshaj Ntuj Lus, mas nws yuav tsum kub siab teev hawm Tswv Ntuj tiag tiag. # 262 2 : Huab Tais yog tus Cawm neeg dim ntawm qhov txhaum, ces peb thiaj zoo siab nyiam Huab Tais los pauj Huab Tais kev nyiam kev hlub # 264 3 : Peb mus tshaj Ntuj Lus kom ntiaj teb neeg txawj ua lub neej mus raws qhov tseeb thiab mus raws qhov yog. # 265 266 1 : TUS NEEG TWG YOG UA TUB TSHAJ NTUJ LUS, MAS NWS YUAV TSUM KUB SIAB TEEV HAWM TSWV NTUJ TIAG TIAG. Kwv tij, Vaj Qhia lo lus no tias : “Tej qav tej num tseem ceeb uas peb yuav tsum xyiv fab ua, mas yog peb txhob txwm qee tej lub caij ntev hauj sim los teev hawm Tswv Ntuj, yuav tsum txais Tswv Ntuj Lo lus thiab yuav rov soj ntsuam saib seb peb puas coj lub neej haum Tswv Ntuj lub Moo Zoo.” Li ntawd, kom peb sawv daws paub tias : “Tus tib neeg ntseeg twg uas tsis tshua teev Ntuj pes tsawg, mas ceev faj tsam tus neeg ntawd tej siab ntsws yuav qhuav qhawv, ces nws yuav tsis qab siab ua dab tsi tseem ceeb thiab nws tej kev ntseeg kuj yuav txias txias zuj zus.” Piv txwv tias peb yuav tsum ua pa tag mus li, yog tias hnub twg peb tsis ua pa lawm, mas peb txoj sia kawg yuav tsum tu. Txhais tias : “Yog peb tsis kub siab teev Ntuj, mas peb tej kev ntseeg Ntuj yuav ntaug thiab kuj yuav tu nrho.” Kwv tij, Vaj Qhia tseem hais ntxiv tias : “Yav dhau los mas kuv tau hnov tias nyob hauv ntau lub Ceeb Koom Txoos, uas nyob thoob ntiaj teb, mas ib lub hlis twg ib zaug, los ob zaug, lawv tau sib faib ua tej pab me me coob li 7 leej los 10 tawm leej, ces lawv sib sau ua ke rau hauv ib lub tsev. Lawv sawv daws txais Tswv Ntuj Lo Lus ua ke thiab lawv sib ntxiv kev ntseeg. Lawv kuj hais tej zaj nkauj cav txog Tswv Ntuj lub koob meej thiab lawv thov Ntuj tas zaj tas zog los pab zeej tsoom sawv daws.” Tsis tas li ntawd xwb, kuj muaj tej pawg ntseeg sib hloov los mus hawm lub Cim Yug nruab hnub thiab hmo ntuj nyob rau hauv lawv lub tsev teev Ntuj. Ces 24 teev hauv txhua hnub, thiaj pom muaj ib cov neeg zoo siab sib hloov mus teev hawm lub Cim Yug twj ywm. Qhov ntawd mas yog ib yam tseem ceeb kawg. Vaj Qhia hais ntxiv tias : “Nyob ntau thaj tsam, muaj tej pab neeg ntseeg yws yws tias lub zim txwv no mas kev tshaj Ntuj kuj nyuaj tshaj yav dhau los, ces ua rau cov neeg ntawd txawm nyob twj ywm lawm thiab lawv kuj tsis ua tim khawv txog txoj kev ntseeg Ntuj ntxiv.” Ua li mas xav hais rau cov neeg uas xav li ntawd tias : “Thov kom nej nco ntsoov tias thawj pab neeg uas tau ua Huab Tais Yes Xus cov thwj tim thiab tej pab neeg ntseeg hauv ntau lub teb chaws uas nyob rau zim txwv txij 2000 xyoo los no, mas lawv kuj raug ntau ntau yam teeb meem los thaiv kev tshaj Ntuj Lus, ces nyob ub nyob no thiaj muaj ib cov neeg ntseeg tsis kam thim kev ntseeg, lawv yeem hliv lawv tej roj ntsha los ua tim khawv txog txoj kev ntseeg Tswv Ntuj tib leeg.” Tsis tas li no, cov neeg ntseeg ntawd lawv kuj sib pab tsim kev ncaj ncees rau hauv lawv lub teb chaws thiab lawv kuj tau muab siab rau mloog txoj cai txuag tib neeg kev ywj pheej, mas yog ib yam hauj lwm uas nyuaj kawg rau lawv. Tab sis thov kom nej tsis txhob ua siab yau. Thov kom sawv daws nco txog tej pab neeg ntseeg coob uas Tswv Ntuj tej kev kaj lug ntws los nyob puv hauv lawv tej siab ntsws, vim lawv ntseeg txog Tswv Ntuj thiab lawv ua siab loj siab tawv los zeem tseeb txog txoj kev ntseeg Ntuj. Li ntawd, sawv daws yuav tau nco txog tej yam no, ces yuav tsis txhob yws yws tias : “Ua neeg ntseeg mas nyuaj kawg.” PAJ NRUAG : Koj txhob ntshai - Kuv yuav nrog koj nraim
2 HUAB TAIS YES XUS YOG TUS HUAB TAIS CAWM NEEG DIM NTAWM QHOV TXHAUM. CES PEB ZOO SIAB NYIAM HUAB TAIS LOS PAUJ HUAB TAIS KEV NYIAM KEV HLUB # 264 Kwv tij, Vaj Qhia Fas Ntshis Kus hais ntxiv tias : “Tas tsoom ntseeg huv tib si yeej yuav tsum ua tub Tshaj Ntuj Lus. Thawj thawj yam hauj lwm tseem ceeb tshaj plaws, mas yog peb nyias yuav xav hauv nyias lub siab tias Huab Tais Yes Xus hlub tshua peb sawv daws tuag nthi, yam li nws hlub peb ib tug dhau ib tug thiab ib leeg dhau ib leeg, ces nyob hauv peb nruab siab, peb thiaj tau txais Tswv Ntuj cov txiaj ntsim los cawm peb sawv daws ntawm lub neej uas txom nyem tsaus ntuj nti.” Yog vim li ntawd, mas peb yuav tau nyiam thiab hwm Huab Tais Yes Xus. Peb txoj kev nyiam ntawd, mas yuav tsum txhim kho kom loj hlob zuj zus tuaj, vim yog ib yam hauj lwm tseem ceeb uas peb ua los pauj Huab Tais Yes Xus tej kev nyiam kev hlub uas nws hmov tshua peb sawv daws. Kwv tij, peb ua neeg nyob, yeej yuav tsum muaj tej lub sij hawm uas peb txhob txwm tsa muag los nuam ntsia Yes Xus tus Ntoo Cuam, los peb siv me ntsis sij hawm los teev hawm Huab Tais uas nyob txawm hauv lub Cim Yug. Thaum peb ua qhov no, mas yuav hais lo puav lus rau Huab Tais raws li yus xav tau, yam li peb yuav hais tias : “Huab Tais, koj paub tas ib puas tsav yam thiab koj paub tias kuv nyiam koj tiag.” (Zam 21:17) thiab lo lus uas Tos Mas hais tias : “ Kuv tus Huab Tais, kuv tus Tswv Ntuj.” (Zam 20: 28) Tsis tas li ntawd, peb yuav tau siv sij hawm los nyob twj ywm cia Huab Tais Yes Xus dauv muag los ntsia peb thiab los nyob hauv peb tej siab ntsws .Qhov ntawd, mas yog peb cia Huab Tais los kaj peb lub siab thiab coj peb kev ua neej. Yog vim li no, tus tib neeg ntseeg twg uas qhuas txog Huab Tais Yes Xus kev nyiam kev hlub thiab thov kom Huab Tais pab coj nws kev ua neej, mas Huab Tais Yes Xus yuav nqes los txhim kho nws tej siab ntsws kom zoo zuj zus, ces nws lub neej yuav nyob kaj lug kaj nrig.
Kwv tij, Vaj Qhia rov hais ntxiv tias : “Qhov peb zoo siab ua tim khawv txog Ntawv Moo Zoo, mas peb yuav tsum nuam ntsia thiab qhuas txog Huab Tais Yes Xus tej lus uas nyob hauv Ntawv Moo Zoo, vim peb nyeem thiab khaws coj los siv nyob hauv peb nruab siab. “ Li ntawd, peb thiaj yuav muaj peev xwm mus qhia rau luag lwm leej lwm tus txog yus tus Huab Tais uas yus nyiam thiab yus hwm tas mus li. Ua li mas xav hais qhov tseeb rau sawv daws tias : “Tus tib neeg ntseeg uas nws zoo siab nuam ntsia Huab Tais Yes Xus thiab nyiam Huab Tais tuag nthi, mas kawg yuav tsum mus tshaj lub Moo Zoo rau lwm tus paub, ces luag tej thiaj txawj tig los ntseeg Ntuj ib yam li yus. Li ntawd, hauv tas txhia txoj hauj lwm uas peb niaj hnub yuav tsum muab siab rau ua, mas yog qhov tias : “Peb yuav tau txhawb nqa peb tej kev ntseeg kom loj hlob zuj zus tuaj, kom xwv peb lub siab nyiam Huab Tais thiab nyiam kev tshaj lub Moo Zoo mus li.”
3 : PEB MUS TSHAJ NTUJ LUS, KOM NTIAJ TEB NEEG TXAWJ UA LUB NEEJ MUS RAWS QHOV TSEEB THIAB MUS RAWS QHOV YOG. # 265 - 266 Kwv tij, Vaj Qhia tseem hais ntxiv tias : “Thaum peb mus tshaj lub Moo Zoo, mas puas tseem ceeb thiab puas nkim zog dag ?” Lo lus teb, mas hais meej tias : “Txoj hauj lwm tshaj Ntuj Lus, mas yeej yog ib txog hauj lwm uas tseem ceeb kawg nkaus, vim muaj tej pab neeg coob coob nyob thoob ntiaj teb xav paub Tswv Ntuj, tus uas tsim tib neeg los nyob rau hauv ntiaj teb no.” Tsis tas li ntawd xwb, kuj muaj tej pab neeg coob coob ntshaw Tswv Ntuj lub txiaj ntsim uas muaj nqe loj kawg. Li ntawd, tsim nyog tsoom neeg ntseeg yuav nco ntsoov tias : “Leej Ntuj Plig Ntshiab kuj ua Ntuj lub luag hauj lwm nyob hauv ib zeej tsoom neeg sawv daws nruab siab, ces thiaj muaj neeg coob nyob thoob ntiaj teb xav paub tias Huab Tais Tswv Ntuj yog leej twg thiab yuav ua li cas thiaj tau txais kev dim ntawm kev phem thiab dim ntawm kev txhaum.” Yog vim li no, mas cov tub tshaj Ntuj Lus thiaj vam ntsoov tias : “Lwm hnub yeej yuav muaj tej pab neeg txawj ua lub neej mus raws qhov tseeb thiab mus raws qhov yog.” Li ntawd, cov neeg ntseeg sawv daws yuav tau muab siab rau kawm Huab Tais Yes Xus txoj kev nyiam kev hlub thiab niaj hnub yuav tsum nco tias : “Huab Tais Yes Xus nrog yus nyob nraim, mas nws ua yus luag, zoo dua tib neeg ua yus luag. Vim tias Yes Xus yog ib tug Huab Tais uas khuv leej neeg tas nrho, ces Yes Xus thiaj niaj hnub muab nws txoj kev nyiam kev hlub uas muaj zog tas nrho los pov hwm peb sawv daws thiab roos peb lub neej tas mus li tsis tu ncua.” Ua li mas tsim nyog peb yuav tsum nco ntsoov lo lus tias : “Cov neeg ntseeg Ntuj, mas yeej muaj ib txhab nyiaj txhab kub uas loj tas nrho nyob hauv peb sawv daws nruab siab. Txhab nyiaj txhab kub ntawd, mas yog Huab Tais Yes Xus txoj kev nyiam kev hlub ntag, ces peb sawv daws thiaj yuav tsum muab siab rau tshaj lub Moo Zoo rau luag tej, kom xwv fab hauv lawv tus ntsuj tus plig, lawv nrog peb muaj txhab nyiaj txhab kub ua lawv tug thiab.
Kwv tij phooj ywg, hnub no Vaj Qhia tau piav 3 zaj lus tseem ceeb rau peb, xws li no : 1. Cov tub tshaj Ntuj Lus, mas yuav tsum kub siab teev hawm Tswv Ntuj. 2. Huab Tais Yes Xus yog tus cawm neeg dim ntawm qhov txhaum, ces peb thiaj zoo siab nyiam Huab Tais Yes Xus los pauj Huab Tais tej kev nyiam kev hlub. 3. Peb mus tshaj Ntuj Lus, kom xwb ntiaj teb neeg txawj ua lub neej mus raws qhov tseeb thiab mus raws qhov yog. TEEV NTUJ : Huab Tais Leej Txiv, koj tau xaiv peb los ua koj cov me tub me nyuam, kuj yog vim koj Leej Tub uas yog peb tus Huab Tais Yes Xus Pleev thiab yog vim Leej Ntuj Plig Ntshiab, ces peb tej kev ntseeg thiaj yog thooj li ib txhab nyiaj txhab kub, uas muaj nqe tas nrho nyob hauv peb lub neej. Peb thov ua koj tsaug ntau. Tsis tas li ntawd xwb, peb thov koj pub Leej Ntuj Plig Ntshiab nqes los rau hauv peb nruab siab, kom xwv peb rov kub siab tshaj koj lub Moo Zoo rau peb cov kwv tij neej tsa Hmoob thiab peb cov phooj ywg sawv daws. Thov koj pab nres peb lub siab, kom xwv peb txawj ua siab loj thiab ua siab tawv los mus ua koj tej qav tej num, kom peb maj mam coj lawv kev, lawv thiaj tau txais lub neej uas nyob kaj lug kaj nrig.
June 29 2014 OB TUG LEEJ NSTHIAB POB ZEB THIAB PAJ LUG
Hnub no zoo hnub, peb tsoom ntseeg Kav Tos Liv ua Ntuj tsaug ntau rau qhov tias nyob hauv thawj pab neeg ntseeg txog Huab Tais Yes Xus , mas ob tug Hauv Paus Xa Lus Pob Zeb thiab Paj Lug thiaj yog ob tug tim khawv txog lub Moo Zoo rov mus txog hnub uas nkawd yuav hliv nkawd roj ntsha los tim khawv txog Huab Tais Yes Xus
Zoo li Xis Moos Pob Zeb thiab Paj Lug nkawd lub neej kuj yog ib tug qauv zoo rau peb ua raws li nkawd ,ces peb yuav tau coj ib lub neej nyob thaj yeeb nyab xeeb,mus li
= Hais txog Pob Zeb mas Yes Xus kuj nco tias : hnub ib pab neeg ntes nws,mas Pob Zeb ntshai tsam nws yuav raug luag ntes, xws li Yes Xus. Ces 3 zaug sis law, Pob Zeb tsis lees Yes Xus, Tab sis Pob Zeb nco dheev tias txog lo lus uas Yes Xus tau hais nws tiias:” Qaib tsis tau qua, koj twb tsis kam lees paub kuv 3 zaug” . Pob Zeb tawm mus nraum zoov - Nws quaj tu siab tas nrho ( Mas Tais 26:29-75). Ho dhau lub caij Yes Xus sawv ntawm cov tub tuag rov los, mas 3 zaug sis law Huab Tais Yes Xus thiaj nug Pob Zeb tias “ Xis Moos,Zam tus tub, koj puas nyiam kuv tiag ? : “ . Pob Zeb teb tias :” Huab Tais, koj paub tas ib puas tsav yam. Koj paub tias kuv nyiam koj tiag “ ( Zam 21:17 ) Cov kwv tij, txij ntawm hnub ntawd mus lawm yav tom ntej mas Pob Zeb kuj yuav kub siab tshaj lub Moo Zoo hauv ntau lub teb chaws, rov mus txog hnub uas nyob Los Mas luag yuav muab Pob Zeb dai saum Ntoo Cuam, raws Ii Yes Xus tus piv txwv Cov kwv tij, Pob Zeb kuj tau sau 2 tsab ntawv tseem ceeb los mus txhawb zog rau tej pawg ntseeg xws li tej zaj lus no uas tsim nyog peb yuav khaws tseg, tias : “ Nej tseem tsis tau pom Yes Xus, tsis kav nej twb nyiam nws – Nej tsis tau pom Yes Xus, tab sis nej ntseeg, mas nej yuav tau ib txog kev zoo siab uas piav tsis tau” Cov kwv tij, peb yuav nco tias :” Yes Xus niaj hnub rov muab nws txi Ntuj kom nws tau ris ib zeej tsoom cov txhaum “. ( Hes Nplaws 9: 28 ) . Li ntawd tsim nyog peb yuav nyiam peb tus Huab Tais, uas khuv leej neeg tas nrho
“ Nej nrog Huab Tais Yes Xus Pleev raug txom nyem npaum li cas, nej yuav zoo siab npaum li ntawd thiab. Ces thaum Yes Xus lub hwj chim yuav tawm los rau pom xyeem, nej thiaj yuav tau nyob hauv txoj kev kaj siab lug – Nej yuav tso nej txoj sia rau Tus Tsim ntuj,Tsim teb uas yog tus pheej xeeb “ ( 1 Pob Zeb 4:13 + 4:19 )
Cov kwv tij , peb niaj hnub yuav nco tias :” Yes Xus niaj hnub tau muab nws txog kev nyiam kev hlub los cev nws lub neej txi Ntuj. Hos peb zoo siab ntseeg tias Huab Tais Yes Xus muab peb tej hauj lwm hnyav, peb tej kev mob nkees los khi rau nws Ntoo Cuam… Huab Tais Yes Xus ( uas nws nyob txawm hauv peb siab ) thiaj txais peb lub neej los nrog nws koom siab txi Ntuj ua ke tiag tiag - Tsim nyog peb yuav nco txog qhov tob no tias peb nrog Huab Tais Yes Xus koom siab koom ntsws txi Ntuj ntag
“Nej yuav txo nej tej kev ntxhov siab huv tib si rau Tswv Ntuj. vim tias nws yog tus txuag nej..Nej yuav nyob thaj yeeb nyob hauv Huab Tais Yes Xus Pleev . Cov kwv tij, Leej Ntshiab Pob Zeb txoj kev ntseeg cia li nyob ruaj nreb xws li ncej zeb ruaj nrees li ncej tsuas –dej tshoob tsis qaij – cua tshuab tsis qaug “– Ces Pob Zeb nyob thaj yeeb nyab xeeb nyob hauv Huab Tais Yes Xus. = Hais txog PAJ LUG mas thaum chiv chawj nws kuj tau tsim txom tej pawg ntseeg txog Yes Xus ,tab sis Huab Tais tau hu nws. Yes Xus tau pab txhim kho Paj Lug tej nplooj siab nplooj ntsws . Ces “ nws tau txais Leej Ntuj Plig Ntshiab puv hauv nws “ - Vim li ntawd Paj Lug tau siv tas lub neej los tshaj lub Moo Zoo hauv ntau lub teb chaws. Nws ua pov thawj hais tias Yes Xus yog Leej Pleev tiag – Nws yog tus Huab Tais Cawm Seej “ Paj Lug kuj tau sau.13 tsab ntawv tseem ceeb. Nws tej lo lus meej pem,xws li no :
“ Kuv cav lus zoo txog Tswv Ntuj, peb tus Huab Tais Yes Xus Pleev Leej Txiv ..Tswv Ntuj tau xaiv peb nyob hauv Leej Pleev, kom peb ntshiab huv, tsis lo txhaum rau ntawm nws xub ntiag thiab kom peb tau los nyob hauv txoj kev nyiam, Tswv Ntuj tau xaiv peb los ua nws cov tub ki , nyob hauv Yes Xus Pleev . Tswv Ntuj tau pub txiaj ntsim dawb rau peb nyob hauv Huab Tais Yes Xus Pleev ‘ ( Es Fes Xos 1:4-6 )
Cov kwv tij, thawj lo lus kuj sau li no tias :” Kuv cav lus zoo txog Tswv Ntuj, peb tus Huab Tais Yes Xus Pleev Leej Txiv “, Ua li hauv peb ib cov kwv tij Hmoob uas tau tig los ntseeg Ntuj, mas thawj thawj yam hauj lwm uas peb muab los cev rau Tswv Ntuj thiaj mus li no tias : peb yuav zoo siab ua Tswv Ntuj tsaug thiab nco txog nws tej txiaj ntsim, uas Tswv Ntuj tau pub dawb rau peb > Qhov tias peb ua neeg ntseeg Ntuj mas tsis yog vim peb tsim nyog ua Tswv Ntuj cov me nyuam. Qhov tseeb kuj mus li no tias : tab txawm peb tsis tsim nyog txais ib yam dab tsi ntawm Tswv Ntuj, los Tswv Ntuj tau tshoj peb siab los mus taug kev ntseeg Ntuj tib leeg xwb thiab peb kuj ua Huab Tais Yes Xus cov thwj tim…Tswv Ntuj od. Peb Txiv khuv leej neeg tas nrho, peb zoo zoo siab ua koj tsaug ntau
“ Niaj hnub nyem no mas tsis yog kuv muaj txoj sia ntxiv lawm -Qhov tseeb kuj mus li no tias : yog Huab Tais Yes Xus Pleev txoj sia ciaj nyob hauv kuv ..Tswv Ntuj Leej Tub nyiam kuv ces nws muab nws rau luag,kom nws pab tau kuv” ( Nkas Las Tias 2:20
Cov kwv tij, peb niaj hnub ua Ntoo Cuam lub Cim. Thaum ntawd mas tsim nyog peb yuav ua Huab Tais Yes Xus tsaug ntau - Saib : ib tug me neeg xws li yus, mas Huab Tais Yes Xus, Tswv Ntuj Leej Tub , nws niaj hnub muab nws los txi Ntuj kom xwv pab peb rov yug los dua tshiab, tsis tu ncua Tsis tas li ntawd xwb, nruab hnub los hmo ntuj, peb kuj yuav nco txog Huab Tais Yes Xus uas nws nrog peb nyob nraim - Nws ua peb luag – Nws nyob txawm hauv peb siab .Ces peb nyob qhov twg kuj xij, peb nrog Huab Tais Yes Xus tham twj ywm tau. Peb nthuav piav peb tej nplooj siab nplooj ntsws rau Huab Tais – tsis muab ib yam dab tsi los zais Yeej muaj tej tej lub caij uas peb hais tau rau Huab Tais Tias : Huab Tais siab zoo, Huab Tais khuv leej neeg tas nrho, kuv yeej xav npuab koj lub siab.- Kuv xav xav nyiam koj tshaj tas puas tsav yam
Cov kwv tij, Leej Ntshiab Pob Zeb thiab Leej Ntshiab Paj Lug tau sau tej tsab ntawv meej pem Ces peb rov pom tseeb tias peb nyob ntawm Tswv Ntuj tog, nyob ntawm tog muaj hwj chim .Peb mam li coj tau lub neej nyob thaj yeeb nyab xeeb, tag mus li. Peb Txiv khuv leej neeg tas nrho, peb ua koj tsaug - Kuv ua koj tsaug T.P. Txhiaj Foom omi
No 5 VAJ QHIA FAS NTSHIS KUS TEJ LO LUS TSEEM CEEB
Kwv tij phooj ywg, lub xyoo dhau los, mas hnub tim 24 lub 11 hlis xyoo 2013 ntawd, Vaj Qhia Fas Ntshis Kus tau tshaj ib zaj lus uas muaj nqis heev tias : “LUB MOO ZOO PAB TXHAWB NQA TXOJ KEV NYOB KAJ LUG KAJ NRIG.” Nyob rau hauv zaj lus ntawd, mas Vaj Qhia hais txog 4 yam xws li no : 1. Huab Tais Yes Xus nplua nuj kev hlub heev, ces Huab Tais txoj kev hlub thiaj tsis txawj tsuag thiab tsis txawj qub. 2. Ntau zaus mas peb ceeb laj thov Huab Tais Yes Xus nqes los khuv leej peb, tab sis ntawm Huab Tais Yes Xus mas nws yeej tsis muaj ib zaug uas Huab Tais ceeb laj zam peb tej txhaum. 3. Tus neeg ntseeg Ntuj twg uas nws los mus tshaj lub Moo Zoo, mas nws yuav tsum kub siab teev hawm Tswv Ntuj tiag tiag. 4. Huab Tais Yes Xus hu nws cov thwj tim sawv daws los pab tshaj Tswv Ntuj lub Moo Zoo. Kwv tij, dhau ntawm 4 nqe lus uas hais tas los no lawm, mas tsis ntev no xwb, Vaj Qhia Fas Ntshis Kus kuj tau hais 2 nqe lus tseem ceeb kawg thiab, xws li : 1. Hauv Ntawv Moo Zoo mas ntau lo lus muaj nqes kawg nkaus, uas tsim nyog peb yuav khaws tseg mus li. (# 164 : + # 266) 2. Tej pab neeg coob yeej xav hnov qhov tseeb. (# 265- 266)
PAJ NRUAG : As les lus yas – Leej Ntuj Plig, peb los mas
Ib : Hauv Ntawv Moo Zoo mas ntau lo lus muaj nqes kawg nkaus, uas tsim nyog peb yuav khaws tseg mus li. (# 164 : + # 266) Vaj Qhia Fas Ntshis Kus tau txhib peb sawv daws tias : “Huab Tais Yes Xus nyiam peb tas npaud, nws thiaj tau muab nws txoj sia los cawm peb sawv daws kom dim ntawm qhov txhaum. Ua li mas niaj hnub no Huab Tais txoj kev nyiam thiaj tseem ciaj sia tag mus li. Huab Tais nyob ntawm peb ib sab thiab txhua hnub Huab Tais kuj ua Tswv Ntuj tej qav tej num los kaj peb tej siab ntsws. Tsis tas li ntawd, Huab Tais yeej xav nqes los nyob hauv peb, kom tau pab peb dim ntawm kev txhaum thiab Huab Tais yuav pab peb sawv daws kom txawj coj lub neej nyob ruaj nreb mloog Tswv Ntuj lub Moo Zoo mus li.” ( # 164) Kwv tij phooj ywg, ua li mas tej lo lus no yog ib lub ntsiab tseem ceeb kawg nkaus pab peb txoj kev ua neej, mas tsim nyog peb sawv daws yuav tau nco ntsoov rau hauv peb tej siab ntsws thiab kom peb nco ntsoov txog tus Leej Ntshiab Paj Lug lo lus tias : “Huab Tais Yes Xus Pleev uas yog Tswv Ntuj Leej Tub, mas nws nyiam kuv heev, ces nws thiaj muab nws tus kheej los txi Ntuj kom tau pab kuv.” (Nkas Las Tias zaj 2:20) Kwv tij, Vaj Qhia Fas Ntshis Kus cov lus thiab tus Leej Ntshiab Paj Lug cov lus, mas yeej yog ib cov lus uas zoo thiab tob heev, ces muaj ntau ntau zaus cov neeg ntseeg Ntuj sawv daws nyob thoob ntiaj teb thiaj tau muab nkawd cov lus coj los hais dua, kom sawv daws rov nco ntsoov txog tej lus tseem ceeb ntawd tas mus li. Yog vim li no, mas txhua txhia zaus thaum peb ua Thaj Txi Ntuj, peb ntsia tus Ntoo Cuam thiab peb ua Ntoo Cuam lub Cim, mas kom peb sawv daws nco ntsoov rau hauv nruab siab tias : “Huab Tais Yes Xus nyiam peb kawg nkaus.” Li ntawd, tus Leej Ntshiab Paj Lug thiaj tau hais tias : “Kuv paub tseeb tias tsis muaj dab tsi yuav cais tau peb ntawmTswv Ntuj txoj kev nyiam. Tab yog txoj kev tuag, los yog yim cuaj phiaj Tshiab, txhua yam uas nyem no ua neej nyob thiab txhua yam uas tseem yuav xeeb los rau yav tom ntej, tas txhua yam nyob saum ntuj thiab nyob nruab yeeb, txhua yam uas Ntuj tsim los, mas yeej tsis muaj ib yam yuav cais tau peb ntawm Tswv Ntuj txoj kev nyiam kev hlub.” (Los Mas 8:38-39) Ua li mas kom peb sawv daws nco ntsoov rau hauv peb siab tias : “Huab Tais Yes Xus yeej nyiam peb kawg nkaus.” Paj Nruag Kwv tij phooj ywg, Vaj Qhia Fas Ntshis Kus tseem tshaj lus ntxiv tias : “Tus tib neeg twg ntseeg txog Huab Tais Yes Xus, mas nws lub neej yuav rov ci ntsa iab tuaj, ces nws yuav tau kev nyob kaj lug kaj nrig. Tab txawm muaj qee zaus nws raug txoj kev sim siab thiab raug kev ntxhov siab npaum li cas los xij, nws yeej tseem ua lub neej nyob tus yees mus li. (# 167) Li ntawd, mas thov muab ib cov lus nug thiab ib cov lus teb hais qhia rau peb tsoom Hmoob sawv daws xav tswv yim xws li no : NUG : Kev uas peb tig los ntseeg txog Huab Tais Yes Xus, puas yuav muaj peev xwm ua tau rau kom peb lub neej nyob tus yees raws li Vaj Qhia cov lus hais ? TEB : Peb sawv daws yeej yuav ua tau lub neej nyob tus yees raws li Vaj Qhia cov lus hais thiab, tab sis peb yuav tsum muaj kev tso siab rau Tswv Ntuj ib yam li uas Huab Tais Yes Xus tso siab rau nws Txiv. Vim thaum uas Yes Xus txoj sia yuav tu, mas nws tau hais rau nws Txiv tias : “Txiv, kuv tso kuv txoj sia rau hauv koj txhais tes”, ces thaum kawg Huab Tais Leej Txiv thiaj hlub Yes Xus thiab tsa Yes Xus sawv hauv qhov tuag rov los. Yes Xus thiaj muaj lub neej nyob tau tus yees rau saum Tswv Ntuj lub Ceeb Tsheej. Ua li mas yog peb tig los ntseeg txog Huab Tais Yes Xus thiab peb tso siab tiag tiag rau Huab Tais Leej Txiv, mas peb lub neej yeej yuav nyob tau tus yees raws li Vaj Qhia tej lus hais. NUG : Nyob hauv NTAWV COG LUS TSHIAB, puas muaj ib zaj lus uas qhia peb txog qhov txawv txawv ntawd tias : “Tab txawm peb raug txoj kev sim siab thiab raug kev ntxhov siab npaum twg, los peb yeej tseem nyob tau yam tus yees rau hauv Tswv Ntuj lub xub ntiag ? TEB : Kwv tij, yeej muaj ntau zaj lus uas qhia peb txog qhov ntawd, yam li nyob hauv thawj thawj tsab ntawv uas tus Leej Ntshiab Pob Zeb tau sau tseg, mas nws kuj tau sau tias : “Cov zoo nyiam, nej txhob poob siab txog cov hluav taws uas tuaj sim nej siab, vim tias nej tsis to taub txog tej xwm ntawd. Nej zoo siab nrog Yes Xus Pleev raug kev txom nyem npaum li cas, mas nej yuav tau txais kev zoo siab npaum li ntawd thiab. Vim tias Tswv Ntuj Leej Tswv Yim tuaj roos nej .” (1 Pob Zeb 4:12-13)
NUG : Peb yuav ua li cas, peb thiaj ntseeg Tswv Ntuj lub Moo Zoo ruaj nreb khov kho raws li tus Hauv Paus Xa Lus Pob Zeb ? TEB : Muaj ib qhov loj uas peb muaj peev xwm ua, yam li peb yuav tau coj lub neej raws li tus Leej Ntshiab Pob Zeb cov lus tias : “Leej Ntuj Plig Ntshiab sawv peb chaw thov Ntuj raws nraim Tswv Ntuj lub siab xav. Ua li mas peb yuav tau thov kom Leej Ntuj Plig nqes los nres peb sawv daws uas tsis muaj zog.” (Los Mas 8:26-27) # 280
PAJ NRUAG
Ob : Tej pab neeg coob yeej xav hnov qhov tseeb (# 265- 266) Kwv tij phooj ywg, Vaj Qhia Faas Ntshis Kus tau khaws Vaj Qhia Zam Paj Lug 2 tej lus uas nws tau tshaj tawm thaum lub 12 hli xyoo 1990 tias : “Leej Ntuj Plig Ntshiab nqes los tshoj tas ntiaj teb neeg huv tib si nyob thoob ntiaj teb lub siab. Li ntawd, tib neeg sawv daws thiaj xav hnov txog qhov tseeb. Tab sis qhov tseeb tob tob uas hais txog Huab Tais Tswv Ntuj, mas Tswv Ntuj yeej xav kom tib neeg yuav tsum ua lub neej mus raws qhov yog.” Tsis tas li ntawd xwb, tib neeg kuj yuav tsum xav saib yuav ua li cas thiaj dim ntawm qhov txhaum thiab qhov tuag, ces coob leej neeg ntseeg thiaj txiav siab mus ua tub tshaj Ntuj Lus nyob rau hauv yus lub teb chaws thiab nyob pej kum teb, kom xwv muaj neeg coob coob leej tig los paub txog qhov tseeb uas tuaj ntawm Tswv Ntuj tuaj.”
Kwv tij, Vaj Qhia tseem tshaj lus ntxiv tias : “Cov tub tshaj Ntuj lus uas mus nrog tej pab neeg nyob ua ke rau hauv lawv tej zej zos, mas yuav tsis txhob ua xyem xyav nug lawv tias : “Kev uas kuv tuaj tshaj Tswv Ntuj lub Moo Zoo rau nej mas puas muaj qab hau ?” Hais qhov tseeb, mas cov tub tshaj Ntuj lus yuav tsum xav tias : ”Nyob rau hauv thaj tsam uas yus mus nrog luag nyob, mas yeej yuav tsum muaj ib txhia tib neeg uas lawv xav paub txog qhov tseeb thiab lawv tos saib yuav ua li cas thiaj yuav tau txais kev dim ntawm qhov txhaum thiab qhov tuag.” Hom neeg uas xav li no, mas muaj kev tso siab lug tias yeej yuav muaj ib hnub uas tus neeg ntawd qhib siab tig los txais Huab Tais Yes Xus lub Moo Zoo, ces tus neeg ntawd lub neej yuav ntsib txoj kev kaj siab lug thiab tau txais Ntuj cov txiaj ntsim los txhim kho nws lub neej.
NUG : Tas peb cov neeg ntseeg Ntuj uas txiav siab los ua tub tshaj Ntuj lus raws li Huab Tais Yes Xus tus piv txwv, mas peb yuav tsum nco ntsoov txog yam dab tsi uas tseem ceeb tshaj plaws ? TEB : Vaj Qhia Faas Ntshis Kus tau teb zoo li no tias : “Cov neeg ntseeg Ntuj sawv daws mas yuav tsum zoo siab nyiam Huab Tais Yes Xus tuag nthi tiag tiag thiab peb yuav tau nyiam Tswv Ntuj lub Moo Zoo zuj zus.” Tsis tas li ntawd xwb, peb kuj yuav tsum txuag peb tej kev ntseeg kom loj hlob thiab nyob ruaj nreb zuj zus. Peb yuav tau nco ntsoov tias kev mus cuag tej pab neeg nyob qhov twg kuj xij, mas Huab Tais Yes Xus ua peb luag tas mus li thiab nrog nraim peb nyob. Huab Tais tseem pub Leej Ntuj Plig Ntshiab uas muaj nqes tas nrho los rau peb, ces peb thiaj ua tim khawv txog lub Tswv Ntuj Moo Zoo raws li Huab Tais Yes Xus tus piv txwv.
THOV NTUJ : Huab Tais Leej Txiv, peb zoo siab ua koj tsaug ntau, rau qhov tias hauv peb tsoom Hmoob mas koj tau hu peb ib cov neeg los ntseeg txog Huab Tais Yes Xus tej kev nyiam kev hlub uas muaj zog tas nrho, ces coob leej ntau tus lub neej thiaj nyob kaj siab lug thiab tsis mag kev tsaus ntuj nti. Tsis tas li ntawd xwb, Huab Tais Leej Txiv, peb tseem thov koj pub Leej Ntuj Plig Ntshiab nqes los tshoj peb tsoom Hmoob, kom xwv peb nco ntsoov tias koj yog tus pov hwm peb thiab roos tas nrho ntiaj teb neeg sawv daws. Li ntawd, thov koj tshoj peb tas mus li, kom peb txawj ua siab loj siab tawv mus pab tshaj koj lub Moo Zoo rau peb ib zeej tsoom, ces yav tom ntej ib txhia yuav tig los ntseeg txog koj txoj kev nyiam kev hlub thiab lawv yuav xyaum taug nraim koj txoj kev nyiam luag tej ob cag. Ua li mas Huab Tais Leej Txiv, peb tso siab rau koj thiab ua koj tsaug ntau ntau.
= Yeej muaj tej zaus uas peb los mus ntsib peb ib tug phooj ywg, uas yav dhau los ( tau ntev hli ntev xyoo los lawm ) nws thiab yus tau nyob ua ke -Tab sis tsis tau sib fim sib cuag tau ntau xyoo. Hos muaj ib hnub tus ntawd thiab yus rov los sib ntsib dua, Ces peb yeej zoo siab heev. Mas hnub no peb yuav rov hnov txog tej zaj lus tseem ceeb hauv Ntawv Ntshiab -Yog tej zag uas, tau ntev xyoo los lawm , peb twb tau twm, peb tau khaws tseg ib los 2 lub hlis tej- Tab sis peb hnov qab txog zaj lus ntawd lauj.. Mas hnub no peb thiaj rov twm Tswv Ntuj tej zaj lus tseem ceeb uas yuav rov txhab zog rau peb tej kev ntseeg kom rov loj hlob tuaj - Ces peb thiaj rov saj kev zoo siab los mas . == Thawj zaj lus , yog ib zaj lus hauv phau ntawv His Xais , hais tias : “ Tswv Ntuj , tsis muaj lwm tus Tswv Ntuj yuav saib xyuas txhia leej txhia tus li koj… Koj ua Vaj kav tas txhia leej, koj hlub sawv daws tau..Tab yog peb ua txhaum lawm , tsis kav koj tseem txawj pab peb tig los yuav lub siab tshiab” His Xais 12 13-19. = = = Thaum lub hauv paus,thiaj muaj lo lus no sau tseg tias : “Tswv Ntuj, tsis muaj lwm tus Tswv Ntuj yuav saib xyuas txhia leej txhia tus li koj “.Mas muab los piv rau lub hnub uas ziab txog tas qhov txhia chaw .–Dhau lub hnub ntawd lawm, mas tsis muaj lwm lub lauj Mas Tswv Ntuj kuj zoo li lub hnub ntawd . Teev Ntuj : Tswv Ntuj, tab txawm peb tsis pom koj, los koj ciaj sia nyob rawv mus li.. Koj saib xyuas peb cov neeg huv si . Koj niaj hnub muab koj tej kev hlub uas muaj zog tas nrho los pov hwm peb thiab roos peb , tsis tu ncua . Ua koj tsaug ntau = = = Qib 2 kuj mus li no tias : “Tab yog peb ua txhaum lawm, tsis kav koj tseem txawj pab peb tig los yuav lub siab tshiab” . Yam li :tab txawm peb tej kev ntseeg txias txias ( zoo li peb tau khiav mus deb nyob ntawm Tswv Ntuj ntev hlis hauj sim, ) los Tswv Ntuj tseem nco txog peb mus li.- Nws tseem khuv leej peb tsis tu ncua ..Ua li txhua txhia lub caij peb rov tuaj cuag Tswv Ntuj dua. mas thov Tswv Ntuj rov muab ib lub siab tshiab, ib lub siab ntshiab dawb huv rau peb os mog Teev Ntuj : Tswv Ntuj, peb Txiv siab zoo, peb tsis muaj peev xwm txo peb tej txhaum pov tseg li..Thov koj rov ntxuav peb tej siab ntsws dua - Thov koj yaug peb tej txhaum pov tseg sai os mog - Tswv Ntuj, peb Txiv khuv leej neeg tas nrho , ua koj tsaug ntau .. Zaj 2 kuj yog Ntawv Moo Zoo .Yog zaj lus hais txog nroj uas tuaj xyaw noob nplej Mas peb kuj txhais li no tau tias : Daim teb kuj yog peb lub siab ntag .Ces noob nplej zoo uas txhawv thiaj yog Tswv Ntuj Lo lus ,uas ua kom peb tig los yuav lub siab ntshiab.zuj zus,tsis tu ncua Tiam sis tus dab phem tuaj ntxias peb mus li, Ces muaj ob yam sib xyaw nyob rau hauv peb siab ntag Peb kuj xav txog lwm tus thiab. Mas ntau zaus nws kuj tsim koob hmoov, Nws nrog lwm sib haum xeeb Hos ua cas muaj tej zaus tus neeg ntawd ntog hauv qhov txhaum ? Ua li peb yuav xav li cas ? Huab Tais Yes Xus txhib peb siab kom peb ua ob yam huv si 1 : peb yuav nquag coj lub neej zoo ,lub neej tsim txiaj mus li. Yuav siv siv zog ua qhov ntawd tsis tu ncua li- Peb yuav tsis khav theeb tias :”100% kuv zoo tag lauj ! ! Tsis tas yuav ua tej yam dab tsi tshiab tshiab, uas tsim nyog yuav muab cev rau Tswv Ntuj l “ 2 : Hos muaj lub caij peb lees tias “ Ua cas kuv tseem xav txog tej zaj tswv yim tsis huv no ned ? Ua cas kuv tseem ntshaw txog tus yam ntxwv phem phem npaum li ntawd?” Cov kwv tij, lub caij peb xav txog tej no, mas peb yuav ua siab ntev tiv thaiv tej zaj tswv yim phem ntawd Yuav nco txog tus Hauv Paus Xa Lus Pob Zeb tej lus no tias:” Nej yuav ceev faj mus li, vim tias dab phem uas yog nej tus yeeb ncuab, nws zoo Ii ib tug tsov nyooj laws - Nws koos ncig lees nrhiav saib yuav tom leej twg . Nej tiv nws mog ! Nej nyob ruaj nreb hauv txoj kev ntseeg “ 1 Pob Zeb 5:8-9 Peb yuav kub siab los mus txais lub Cim daws txhaum, uas yog lub cim pab txhim kho peb lub siab kom rov dawb huv, xws li hmo peb tau tais lub Cim Ntxuav Hos lub caij twg peb pom lwm tus coj tus yam ntxwv tsis yog – Nws ua tej yam peb tsis xav pom mas thaum ntawd 1 : Yuav tsis txiav txim rau - Yuav tsis ntxub tus ntawd 2 : Peb yuav ua siab ntev . Peb thov Tswv Ntuj tas zog los pab, vim tias “ Huab Tais Tswv Ntuj muaj peev xwm ua tau ntau tshaj qhov peb thov thiab qhov peb xav tau “ Es Fes Xos 3:20 TEEV NTUJ : Huab Tais Yes Xus ,yog vim koj hlub tshua peb kawg nkaus, mas thov koj pov hwm peb, vim tias peb lub siab ntseeg txias txias – Thov koj pab xa Leej Ntuj Plig Ntshiab lub zog nqes los hauv peb lub siab - Huab Tais siab zoo, yog tias koj tsis kav tsij pab mas peb nyob tsis taus ntag . Huab Tais, xub ua koj tsaug NEJ NYOB RUAJ NREB HAUV TXOJ KEV NTSEEG
Kwv tij phooj ywg, hnub no zoo hnub, rau qhov peb yuav rov ntseeg ruaj nreb khov kho tias Tswv Ntuj pub kom peb niam Mab Liab tus ntsuj plig thiab lub cev nqaij daim tawv nce mus lawm saum Ntuj lub CeebTsheej. Li ntawd, Tswv Ntuj thiaj qhia peb tias “Peb tib neeg ntiaj teb lub hom phiaj tseem ceeb, mas yog lwm hnub thaum peb txoj sia tu lawm, peb tus ntsuj plig yuav mus saum Tswv Ntuj lub Ceeb Tsheej ib yam li niam Mab Liab ntag.” Yog vim li no, thiaj thov caw nej sawv daws los ua tib zoo xav txog cov lus nug thiab cov lus teb nram qab no : NUG : Tus Nkauj TsimTxiaj Mab Liab tau coj lub neej zoo li cas ? TEB : Huab Tais Tswv Ntuj tau pov hwm Mab Liab, ces Tswv Ntuj thiaj tau ua kom Mab Liab txhob zwm rau tib neeg lub keeb txhaum. Li ntawd, Tswv Ntuj tus tshiab Nkas Nplias thiaj tau hais rau Mab Liab tias : “Koj nyob kaj lug Mab Liab, tus tau txiaj ntsim puv siab. Huab Tais nrog koj nyob, koj tau koob tau hmoov tshaj ib zeej tsoom poj niam tib si.” Yog vim li ntawd, ces lub Koom Txoos Kav Tos Liv thiaj xam tias : “Mab Liab yog ib tug nkauj tsim txiaj uas muaj lub siab dawb huv ntxim Tswv Ntuj siab.”
NUG : Ua li Mab Liab tau ntseeg Tswv Ntuj heev, puas yog ? TEB : Nws ntseeg Ntuj tuag nthi tiag tiag. Saib, hnub Ntuj tus tshiab Nkas Nplas tuaj xaiv nws los ua tus Huab Tais Yes Xus leej niam, ces Mab Liab thiaj tab meeg hais lus zoo li no tias : “Kuv yog Huab Tais tus ntxhais txib, kuv xav kom muaj tuaj raws li lo lus koj hais.” Li ntawd, tas Mab Liab sim neej, nws thiaj muaj ib lub siab kub lug ntseeg Ntuj yam khov kho.
NUG : Tab txawm tus Nkauj Tsim Txiaj Mab Liab raug kev sim siab npaum li cas, los tsis kav nws kuj tseem tso siab lug rau peb Txiv nyob saum ntuj, ces Huab Tais Tswv Ntuj thiaj txais Mab Liab tus ntsuj tus plig thiab nws lub cev nqaij daim tawv mus nyob saum Tswv Ntuj lub Ceeb Tsheej lawm. Ua li mas yog peb ntseeg li no, peb cov neeg ntseeg nyob thooj qab ntuj yuav tau coj lub neej zoo li cas ? TEB : Peb niaj hnub yuav tau siv siv zog kub siab mloog Tswv Ntuj tej lus, ces peb lub neej thiaj yuav tau txais kev nyob kaj lug kaj nrig ib yam li Mab Liab.
NUG : Hnub no peb ntseeg tias Mab Liab tus ntsuj tus plig thiab nws lub cev nqaij daim tawv mus saum Ntuj lub Ceeb Tsheej lawm, mas qhov tseem ceeb tshaj plaws, tsim nyog peb yuav tau nco ntsoov txog dab tsi ? TEB : Tsim nyog peb yuav nco ntsoov tias : “Nyob saum Tswv Ntuj lub Ceeb Tsheej, Mab Liab niaj hnub dauv muag los saib peb thiab hlub peb, ces peb thiaj thov kom Niam Mab Liab pab cev peb tej lus rau Huab Tais Leej Txiv, uas yog tus Huab Tais khuv leej neeg tas nrho nyob saum Ceeb Tsheej.” Yog vim li no, ces thiaj xav kom peb nco ntsoov tias :
Leej Ntshiab Mab Liab, Tswv Ntuj Leej Niam, koj thov Tswv Ntuj hlub peb cov neeg txhaum, nyem no mus txog thaum peb lub caij dua, ua li.
NUG : Hnub no puas tsim nyog peb haj yam rov kub siab ntseeg txog tib neeg lub cev kev sawv rov los ? TEB : Peb yeej tsim nyog tso siab lug rau Tswv Ntuj thiab ntseeg txog lo lus tias : “Huab Tais Yes Xus Pleev twb yog tus sawv hauv cov tub tuag rov los lawm thiab nws ua peb ntej mus lawm saum Ntuj Ceeb Tsheej. Tab sis yuav muaj ib hnub uas Yes Xus rov qab los, ces hnub ntawd cov neeg tuag yuav rov qab sawv los muaj txoj sia ib yam li Yes Xus.”
THOV NTUJ : Huab Tais Leej Txiv uas khuv leej neeg tas nrho, peb ua koj tsaug ntau ntau, rau qhov koj tau txais niam Mab Liab tus ntsuj plig thiab nws lub cev ntaj ntsug mus nrog koj nyob saum koj lub Ceeb Tsheej lawm. Ua li mas thov koj tuav peb tes, coj peb kev, kom xwv muaj ib hnub peb tau nrog koj nyob saum koj lub Ceeb Tsheej thiab kom peb tau nyob ntawm tog uas txais kev cawm. ( Hes Nplaws 6:9 )
Tus hais lo lus no yog tus Hauv Paus Xa Lus Pob Zeb.hais tseg Ces ib ntsis Huab Tais Yes Xus teb tias : “Pob Zeb ,koj txoj hmoov zoo vim lo lus tseeb uas koj hais no mas yog kuv Txiv nyob saum ntuj qhia koj” Lub zim txwv no mas peb kuj tau hmoov zoo,xws li Pob Zeb tus piv txwv ,vim tias peb Txiv nyob saum ntuj kuj tau xa Leej Ntuj Plig nqes los tshoj peb lub siab mas peb mam li nyob kaj lug kaj nrig nco txog lub Moo Zoo hais tias :” Tswv Ntuj nyiam lub qab ntuj neeg npaum no. nws thiaj muab nws Leej Tub twm zeej rau ,kom xwv tus ntseeg txog Leej Tub thiaj muaj txoj sia nyob mus li ‘ ( Zam 3:16 ) Cov kwv tij, peb txoj hmoov zoo kawg nkaus. Ces thiaj tsim nyog nco txog Ntuj tej txiaj ntsim uas yog peb tej kev ntseeg Ntuj, Ces peb zoo siab khaws tus Hauv Paus Xa Lus Paj Lug lo lus no tseg tias: ” Tswv Ntuj cov paj tshab muaj nqis tas nrho !” – ( LM 11:33 )
= UA NTUJ TSAUG : Peb Txiv khuv leej neeg tas nrho . Txhua txhia hnub ,koj tseem pub peb ntseeg tias peb tus Huab Tais Yes Xus yog Leej Pleev. Nws yog Tswv Ntuj Muaj Txoj sia Leej Tub “..Txhua txhia hnub no, Huab Tais Yes Xus pub Leej Ntuj Plig Ntshiab nqes los pleev peb tej siab ntsws kom rov huv zuj zus .” Huab Tais Yes Xus yog peb txoj sia .Ua li thov kom Huab Tais hliv Tswv Ntuj txoj kev nyiam puv npo rau hauv peb lub siab “ ( Kos Los Xais 3:4 - Los Mas 5:5 ) Peb Txiv khuv leej neeg tas nrho, thov kom txoj sia ua koj cov me nyuam thiaj loj hlob zuj zus hauv peb siab .Peb thiaj coj tau ib lub neej nyob tiaj nyob tus ,nyob kaj lug kaj nrig ,nyob ntawm koj xub ntiag mus li . Peb Txiv siab zoo , ua koj tsaug ntau ntau
NEJ NYOB RUAJ NREB HAUV TXOJ KEV NTSEEG
2 : Kev tuag lub hwj chim yuav tiv tsis yeej lub pob zeb no Hauv Ntawv Moo Zoo mas Yes Xus hais tias :”Xis Moos, Yos Nas tus tub, koj ntseeg khov kho kuj yog vim kuv Txiv nyob saum ntuj qhia koj. -Li ntawd koj txoj hmoov zoo” Yes Xus qhuas txog Pob Zeb kev ntseeg vim tias nws tej kev ntseeg ruaj nreb xws li ncej zeb, ruaj nrees Ii ncej tsuas , dej tshoob tsis qaij , cua tshuab tsis qaug “ Tsis tas li ntwd xwb, Yes Xus tseem hais tias :”Koj yog Pob Zeb – Kuv yuav tsa kuv lub Koom Txoos rau saum lub pob zeb no Kev tuag lub hwj chim yuav tiv tsis yeej lub pob zeb” Ces Pob Zeb thiaj yuav ua thawj tus Vaj Qhia,uas saib lub Koom Txoos nyob hauv Yes Xus lub npe ( Txij ntawm xyoo 33 los txog tav no thiaj tau muaj 266 tus Vaj Qhia. ) Huab Tais Yes Xus hais tias : :” Kev tuag lub hwj chim yuav tiv tsis yeej lub pob zeb no:” txhais tias nyob rau hauv Huab Tais lub Koom Txoos tsuas yuav tshaj qhov tseeb xwb - Ua li yuav tsis muaj kev dag kev cuav hauv tej zaj lus uas lub Koom Txoos yuav tshaj tawm “ Cov kwv tij, peb kuj zoo siab nco txog tej lo lus uas Yes Xus tau cog tseg tias :” Kuv yuav thov Ntuj rau koj kom xwv koj lub siab ntseeg txhob qaug” ( LK 22:32 ) Txhais tias Huab Tais Yes Xus niaj hnub pub Leej Ntuj Plig rau lub Koom Txoos, ces lub Koom Txoos tsuas tshaj Qhov Tseeb rau peb cov ntseeg. Ces peb tej kev ntseeg .yuav tsum ruaj nreb khov kho, yuav tsis txhob qaug Peb mam li zoo siab ua Huab Tais Yes Xus cov thwj tim nyob rau hauv lub Koom Txoos Kav Tos Liv Zoo li tsaib no peb tus Vaj Qhia Fas Ntshis Kus tau tshaj tej lo lus tseem ceeb txhab zog rau peb tej kev ntseeg,hais tias : “Tus tib neeg uas txais Huab Tais Yes Xus kev nyiam kev hlub puv npo hauv nws nruab siab, ,nws thiaj saj tau kev nyob kaj lug kaj nrig, uas yuav tau loj hlob mus zuj zus ces tus ntseeg li ntawd thiaj coj tau ib lub neej muaj nqes heev “ UA NTUJ TSAUG : Huab Tais Leej Txiv , Tswv Ntuj khuv leej neeg tas nrho ,peb ua koj tsaug ntau ,rau qhov tias koj sau peb los ua Huab Tais Yes Xus cov thwj tim nyob hauv lub Koom Txoos Kav Tos Liv - Huab Tais Yes Xus tseem thov Ntuj pov hwm peb kom xwv peb lub siab ntseeg txhob qaug. Huab Tais Leej Txiv thov koj nqes los kaj Vaj Qhia Fas Ntshis Kus thiab peb tsoom ntseeg huv tib si kom xwv koj tej kev nyob kaj lug kaj nrig nqes puv no rau hauv peb lub siab , Ua koj tsaug ntau. NEJ NYOB RUAJ NREB HAUV TXOJ KEV NTSEEG ( 1 PZ 5:9 )
….Cov kwv tij hmov thiab tshua, hnub no zoo hnub vim tias peb sib sau los cav txog Tswv Ntuj lub koob meej .Qhov uas ntxim peb siab tshaj plaws kuj yog tias: Yes Xus tawm tsam yeej qhov txhaum thiab kev tuag - Ces peb niaj hnub zoo siab hais tseg tias : YES XUS SAWV ROV LOS - NWS YOG TUS HUAB TAIS CAWM NEEG Zoo li yav dhau los peb twb tshaj ib zaj lus tseem ceeb txog Thaj Txi Ntuj, yam li ; txhua zaus peb ua Thaj Txi Ntuj mas tej yam tseem ceeb uas peb yuav tsum nco thiaj mus li no tias 1 : Peb yuav nrog cov kwv tij sib koom siab koom ntsws 2 Peb yuav thov Huab Tais daws peb tej txhaum 3 Huab Tais Yes Xus pub Ntuj cov txiaj ntsim los cawm peb Ho hnub no peb yuav khaws Vaj Qhia Fas Ntshis Kus tej lo lus tseem ceeb , thiaj zoo siab ntseeg txog ob yam no yam li 1 : Thaum peb ua Thaj Txi Ntuj mas peb kuj nyob hauv kem tsev uas Huab Tais Yes Xus tau tsim lub Cim Yug 2 : Thaum peb ua Thaj Txi Ntuj mas peb nyob pem lub roob Nkos Nkos Tas Peb xub hais 2 zag nkauj teev Ntuj HNUB NO ZOO HNUB
UA TSAUG, UA TSAUG , YES XUS
1 “: Thaum peb ua Thaj Txi Ntuj mas peb kuj nyob hauv kem tsev uas Huab Tais Yes Xus tau tsim lub Cim Yug Cov kwv tij Huab Tais Yes Xus tsis tso peb ua ntsuag . Nws niaj hnub ua raws li tej qub lus nws tau cog tseg tias :” Thaum ob leeg los peb leeg sib sau ua ke tuav txog kuv lub npe,mas kuv nyob hauv nruab nrab lawv” ( MT 18:20 ).Yog vim tej lo lus yog qhov tseeb ces peb muaj peev xwm ntseeg tias “Peb nyob hauv kem tsev uas Huab Tais Yes Xus tau tsim lub Cim Yug” Peb cia li nco txog 2-3 yam uas txhua txhia Hnub Chiv peb mloog hauv Ntawv Moo Zoo hais tias 1 : Huab Tais Yes Xus ntxuav co thwj tim ko taw . Yes Xus ua neeg me thiaj ua tub txib pab cov thwj tim .Mas niaj hnub no peb yuav yoog raws li Yes Xus tus piv txwv tias ; peb yuav tsob hwb luag- yuav hlub luag tej> Tab txawm peb ntsib tej tus neeg txom txom nyem,mas peb yuav tsob hwm lawv 2 : Hmo Huab Tais tsim lub Cim Yug mas nws hais tias :””Kuv tsis hu nej ua kuv cov tub txib tab tsis kuv hu nej ua phooj ywg ‘ ( Zam 15:15) Huab Tais niaj hnub tseem rov hais tib zaj lus ntawd rau peb ntag . Ua li hauv peb nruab siab peb thiaj nco tias : Huab Tais Yes Xus, Tswv Ntuj Leej Tub thiaj yog peb tus phooj ywg. Nws niaj hnub saib peb – Nws hlub peb tuag nthi. Peb koom nrog Huab Tais ua ib tuam yim neeg ntag 3: Tib lub sij hawm Yes Xus tsim lub Cim Yug mas nws hais rau cov thwj tim tias ::” Kuv yuav sawv kev ncaim ntawm nej mus – Tab sis yuav tau muaj ib hnub kuv yuav rov los coj nej mus nyob ze kuv, kom xwv kuv nyob qhov twg ,nej nrog kuv nyob qhov ntawd” Z 14:3 Huab Tais txhua txhia hnub no tseem rov hais tib zaj lus ntawd rau peb ntag. Li ntawd peb haj yam ntseeg khov kho tias Huab Tais tsis tso peb tseg..Nws xub mus pem peb Txiv nyob saum ntuj ua peb ntej. Huab Tais yeej xav coj peb nrog nws nyob nraim, pem Tswv Tswv Ntuj lub Ceeb Tsheej Li ntawd, hauv Thaj Txi Ntuj mas tsim nyog peb yuav rov tso siab lug tias : yuav muaj ib hnub peb yuav nrog Huab Tais Yes Xus nyob ,nrog peb niam Mab Liab, nrog tas tsoom neeg siab ntshiab nyob. Ces peb yuav tsis ntaus siab yau tab sis peb yuav ua siab loj mloog Ntuj lus ntxiv mus thiaj npaj peb lub siab dawb huv npaj siab mus pem Tswv Ntuj lub Ceeb Tsheej 4 : Tib lib sij hawm Yes Xus tsim lub Cim Yug mas Huab Tais rov txhib peb siab los ntseeg tias : peb tsoom ntseeg kuj ua tub tes tub taw ,hauv lub Koom Txoos. Peb sawv daws kuj yog cov kwv tij txheeb txheeb,vim tias peb yog Huab Tais Leej Txiv cov me tub me nyuam.Tswv Ntuj hu peb los ua tib lub tuam yim neeg , kuj yog vim Huab Tais Yes Xus kev nyiam kev hlub kuj nyob txawm hauv peb nruab siab. Cov kwv tij Hnub Chiv peb zoo li peb nyob hauv kem tsev uas Yes Xus noj nws pluas mov kawg .Peb mam li qhib peb siab los mloog Tswv Ntuj Lo Lus. Zoo ib yam nkaus li cov Hauv Paus Xa Lus tau zoo siab mloog lub Moo Zoo Peb tsis pom Huab Tais nyob ntawm peb xub ntiag, tab sis muaj Txiv Plig los Xib Hwb nthuav piav ntau zaj hauv Ntawv Ntshiab. Lawv hais lus nyob hauv Huab Tais Yes Xus lub npe. Ces tsim nyog peb yuav khaws lawv tej lus tseg, ces peb ua Thaj Txi Ntuj lawm thiab rov mus tsev, mas peb haj yam rov muaj ib lub siab kaj huv ntseeg khov kho dua qub thiab peb haj yam rov tso siab rau Huab Tais thiab peb haj yam tos nrhw txog hnub zoo tshaj plaws uas peb yuav tso lub ntiaj teb no tseg, ces thiaj mus nrog Huab Tais nyob pem Tswv Ntuj Lub Ceeb Tsheej
PAJ NRUAG : HUAB TAIS NTUJ TUAJ NYOB HAUV
2 : Thaum peb ua Thaj Txi Ntuj mas peb nyob pem lub roob Nkos Nkos Tas Peb hais tau lo lus ntawd, kuj yog vim tus Txiv Plig hais tej lo lus foom hmoov zoo rau cov ncuav mov thiab lub ntim cawv kuj yog nyob hauv Huab Tais Yes Xus lub npe : “ Nej sawv daws txais - Nej noj – Yog kuv lub Cev uas yuav raug puas kom tau pab nej”..Tsis tas li ntawd,xwb tus Leej Choj tseem foom hmoov zoo rau lub ntim cawv tias :” Nej sawv daws txais, Nej haus . Yog lub ntim rau cov roj ntsha cog lus tshiab nyob mus li – Yog roj ntsha uas yuav ntws los daws nej thiab tsoom sid cov txhaum – Nej yuav ua li ntawd kom tau nco txog kuv “ NU G : Tim li cas peb hais lo lus ntawd tias :” Tus Txiv Plig hais tej lo lus foom hmoov zoo rau cov ncuav mov thiab lub ntim cawv kuj yog nyob hauv Huab Tais Yes Xus lub npe “ ? TEB tias : ib txwm los, txij ntawm hnub Yes Xus rov mus lawm saum ntuj los txog tav no mas nyob rau hauv peb lub Koom Txoos Kav Tos Liv,peb tau ntseeg tias : hmo uas YesXus noj pluas mov kawg mas Huab Tais hais ib zaj lus me me los txib cov Hauv Paus Xa Lus tias :” Nej yuav ua li ntawd kom tau nco txog kuv “ Cov kwv tij, hmo Yes Xus noj nws pluav mov kawg mas Yes Xus xub paub tias tag kis tuaj mas nws yuav tau muab nws lub neej los txi rau Tswv Ntuj pem lub roob Nkos Nkos Tas. Lub Thaj Txi Ntuj ntawd yeej yog Tswv Ntuj lub luag hauj lwm tseem ceeb tshaj plaws uas pab daws cov neeg tej txhaum. Mas Huab Tais siab zoo tas nrho yeej xav kom tiam dhau tiam nws cov thwj tim yuav tau txais Ntuj cov txiaj ntsim cawm neeg uas txhawv ntawm tus Ntoo Cuam los. Yes Xus mam li txib cov Hauv Paus Xa Lus rov hais Huab Tais Yes Xus tib cov lus foom hmoov zoo rau cov ncuav mov thiab lub ntim cawv. Cov kwv tij hmo Yes Xus noj nws pluas mov kawg mas Huab Tais muab nws tej kev hlub los ua hwj huam yees ntxwv uas ua kom cov mov ntawd thiab cov cawv ntawd ntim tau Huab Tais tej txiaj ntsim cawm neeg . NUG : Li ntawd ces txhua txhia zaus peb sib sau ua Thaj Txi Ntuj, mas txhais tias : Yes Xus uas nws tau muab nws lub neej txi rau peb Txiv nyob saum ntuj Ntuj pem lub roob Nkos Nkos Tas.mas Huab Tais mam li rov muab nws cev txi rau peb Txiv dua puas yog li ntawd ? TEB : Yeej yog raws li koj hais -Hauv peb Thaj Txi Ntuj mas Huab Tais Yes Xus rov muab nws lub Thaj Txi Ntuj los pub rau peb NUG : Li ntawd tau 1981 xyoo los lawm Yes Xus tau muab nws lub neej los txi Ntuj pem lub roob Nos Nkos Tas. Hos lub zim txwv no ,nyob hauv peb tsev teev Ntuj mas peb lub Thaj txi Ntuj thiaj yog tib lub Thaj Txi Ntuj ib yam nkaus lub caij thaud. Puas yog ? TEB : Yeej yog li tib lub Thaj Txi Ntuj ntag . Huab Tais Yes Xus khuv leej peb tag npaud, nws thiaj xav kom nws cov thwj tim nrog Huab Tais koom siab koom ntsws ces thiaj muab tau peb tej siab ntsws ,peb tej hauj lwm,pej tej kev zoo siab, peb tej kev nyuaj siab ntxhov plawv los nrog Huab Tais koom siab koom ntsws. Cov kwv tij, txhua txhia zaus peb sib sau ua Thaj Ntuj mas peb nyob pem lub roob Nkos Nkos Tas ,yam peb nrog Yes Xus koom siab koom ntsws cev peb lub neej los txi rau Tswv Ntuj
PAJ NRUAG TSWV NTUJ TSIM PEB LOS UA NEEG. Cov kwv tij, Vaj Qhia Fas Ntshis Kus sau tej lo lus tseem ceeb no tias :”Txhua txhia zaus peb sib sau ua Thaj Ntuj mas Huab Tais siab zoo muab nws lub Cev Ntshiab thiab nws roj ntshav muaj nqes tas nrho los cawm peb ntawm peb qhov txhaum..Hauv Thaj Txi Ntuj mas Huab Tais nqes los yaug peb tej txhaum pov tseg. Huab Tais pub peb rov npuab peb Txiv nyob saum ntuj lub siab dua. Tsis tas li ntawd xwb : hauv Thaj Txi Ntuj mas Huab Tais Yes Xus hliv nws tej kev nyiam kev hlub rau hauv peb siab.kom xwv peb rov coj dua ib lub neej kpm tshiab zuj zus, uas yog raws li Huab Tais Yes Xus thiab nyob hauv Huab Tais Yes Xus “ Cov kwv tij, tsim nyog peb yuav rov twm tej qib lus hauv Zam Ntawv Moo Zoo tias:’ “Kuv yog cov mov muaj txoj sia nqes los saum ntuj los. Leej twg noj cov mov no,nws yuav ciaj nyob mus li. Cov mov uas kuv yuav muab pub rau lub qab ntuj neeg noj kom lawv muaj txoj sia yog kuv lub cev nqaij,,vim kuv lub cev nqaij yog ib cov tseem txhiam xws noj thiab kuv cov ntshav yog ib yam zoo haus. Tus noj kuv cev nqaij thiab haus kuv cov ntshav ,nws nyob hauv kuv thiab kuv nyob hauv nws” ( Zam 6 :51-56 …… Cov kwv tij peb niaj hnub yuav zoo siab ua Ntuj tsaug tas siab tas ntsws, vim tias nyob rau hauv peb lub Koom Txoos Kav Tos Liv peb muaj Thaj Txi Ntuj thiab lub Cim Yug. Ces peb tej kev ntseeg Ntuj, peb tej kev tso siab lug thiab peb tej nyiam kev hlub thiaj rov loj hlob zuj zus, tsis tus ncua
PAJ NRUAG . Huab Tais Ntuj tuaj nyob hauv .. Kuv tus plig cav txog Ua tsaug, ua tsaug ,Yes Xus
September 7 2014 Nruab Xyoos - HNUB CHIV 23 XYOO A
Cov kwv tij hmov thiab tshua, peb sawv daws uas peb yog Huab Tais Yes Xus cov kwv cov muam, mas peb yuav tau coj rawv Huab Tais lo lus tias : “NEJ YUAV SIB NYIAM SIB HLUB IB YAM LI KUV TAU NYIAM NEJ” Hnub no thov kom nej khaws 2 zaj lus no tias : 2 : Peb sib pab ua kom lwm tus dim ntawm kev txhaum. 2 : Huab Tais Yes Xus nyob hauv nruab nrab peb.
1: Peb sib pab ua kom lwm tus dim ntawm kev txhaum. Kwv tij, nyob hauv peb tej zej zos, mas peb yuav tau nrog sawv daws sib koom siab koom ntsws, ces peb txhua tus thiaj nyob tau ua ke zoo li ib tsev neeg. Hos hauv Ntawv Moo Zoo hnub no, mas Huab Tais Yes Xus kuj tau tshaj tej lo lus ceeb toom tias : “Yog koj ib tug kwv tij mus ua txhaum lawm, mas koj yuav mus ntsib nws. Thaum neb ob leeg nyob ua ke, koj yuav ntuas nws. Yog nws mloog koj, mas koj cawm tau nws lawm. Piv txwv 1 : Koj tus kwv nws tsis nkag siab lwm tus zaj tswv yim kiag. Piv txwv 2 : Nws khav theeb heev, ces nws tsis qhuas txog lwm tus qhov zoo. Piv txwv 3 : Nws ua tsis ncaj rau nws tus txij nkawm. Yog vim li no, mas Huab Tais Yes Xus thiaj qhia kom peb mus pab ntuas nws, kom nws tig rov los coj tus yam ntxwv tshiab uas zoo thiab ntshiab huv. Ua li mas kom peb tsis txhob xav tias : “Tus ntawd tsis yog kuv xeem thiab kuv kwv tij, ces kav liam. Tsam kuv qhia nws, ces nws yuav tsis mloog kuv thiab pheej ua li qub.” Tab sis txawm li cas los kom peb yuav tsum txiav siab pab mus ntuas tus neeg yuam kev ntawd, kom nws thim rov los ua neeg zoo. Peb txhob cem nws, txhob thuam nws, txhob saib nws qis qis thiab txhob xaiv neeg. Thaum peb yuav mus ntsib nws, mas ib yam tseem ceeb uas peb yuav tsum ua yog li no : “Peb yuav nyob twj ywm los thov Huab Tais Yes Xus thiab Leej Ntuj Plig Ntshiab, kom pub kev thoob tsib los pab rau nws, vim tias peb hlub nws mas peb yuav tau ua li ntawd.” Kwv tij, tej yam uas hais los no, mas thaum ua kuj tsis yooj yim, tab sis qhov peb txiav siab mus pab ntuas nws kiag, mas yog vim Huab Tais Yes Xus ua tus tshoj peb lub siab, kom peb yuav tsum ua li ntawd.
2 : Huab Tais Yes Xus nyob hauv nruab nrab peb. Kwv tij, thaum peb 2-3 leeg sib sau los tuav txog Huab Tais Yes Xus lub npe thiab los teev hawm Tswv Ntuj, mas peb yuav tau xav tias: “Huab Tais Yes Xus nyob nruab nrab hauv peb sawv daws thiab nws nrog peb koom teev hawm Tswv Ntuj ua ke, ces Yes Xus yuav pab cev peb tej lus rau Tswv Ntuj.” Yog vim li ntawd, ces peb tej lus teev hawm Tswv Ntuj, mas Huab Tais Leej Txiv thiaj tsum mloog peb cov lus thov ntawd, vim tias muaj Huab Tais Yes Xus pab cev cov lus rau Tswv Ntuj. Kwv tij phooj ywg, yeej muaj tseeb raws li cov lus uas hais no tiag, mas tab txawm tias yog ib yam qhov muag tsis tau pom dua, pob ntseg tsis tau hnov dua thiab yog ib yam tsis tau nce los txog neeg lub siab. Tab sis yeej yog ib yam tseem ceeb kawg nkaus uas Huab Tais Yes Xus qhia tseg rau cov neeg uas nyiam nws, kom los sib sau ua ke. (1 Kos Lis Nthos 2;9) THOV NTUJ : Huab Tais Leej Txiv, peb ntseeg tias Huab Tais Yes Xus Pleev nyob nruab nrab hauv peb sawv daws thiab nws kuj nyob txawm hauv peb lub siab tas mus li, ces peb thiaj zoo siab ntseeg txog nws. Ua li mas peb thov ua koj tsaug ntau ntau thiab thov koj pab peb ntxiv, kom xwv peb txawj ua koj ib cov me nyuam uas zoo nyiam thiab mloog koj tej lus. “NEJ YUAV SIB NYIAM SIB HLUB IB YAM LI KUV TAU NYIAM NEJ”
Yog vim li ntawd, mas peb sawv daws yuav tau nco ntsoov tias : “PEB YUAV TAU TAUG NRAIM TXOJ KEV NYIAM RAWS LI HUAB TAIS YES XUS TUS LWJ LWM.” ( Es Fes Xos 5:2 )
Kwv tij phooj ywg, thaum Huab Tais Yes Xus raug dai saum tus ntoo cuam, mas yog nws tab tom siv nws txoj sia los pab cawm tas nrho ntiaj teb neeg tej kev txhaum. Yog vim li ntawd, mas nyob hauv Huab Tais Yes Xus lub siab, nws tsuas muaj txoj kev hlub xwb, nws tsis tau xav txog qhov yuav pauj kua zaub ntsuab rau cov neeg uas tau ua phem rau nws. Li ntawd, Yes Xus thiaj hais rau Huab Tais Leej Txiv tias : “Txiv, thov koj zam rau lawv”, ces Yes Xus lub siab thiaj nyob tiaj tus.
Kwv tij, peb cov neeg ntseeg yuav tau txiav siab kom meej tiag tiag los yoog raws li Huab Tais Yes Xus tus lwj lwm, ces thaum uas luag ua tej yam phem rau yus, mas yus thiaj txawj zam rau luag, zoo ib yam nkaus li Yes Xus uas nws tau zam rau cov neeg phem uas lawv iab liam nws thiab muab nws tua saum ntoo cuam.
THOV NTUJ : Huab Tais Leej Txiv, peb yog koj cov me tub me nyuam. Peb zoo siab kawg nkaus uas hnub no koj tau qhia tej yam zoo zoo rau peb sawv daws ua neej, kom xwv peb txawj zam rau luag. Li ntawd, thov koj pab tso Leej Ntuj Plig Ntshiab tshoj peb sawv daws lub siab, kom peb txawj tshaib thiab nqhis txog koj txoj kev nyiam kev hlub, uas koj tau muab pub rau Huab Tais Yes Xus. Huab Tais Leej Txiv, peb tseem thov koj pab ua tus coj peb kev ua neej, kom xwv peb tsoom Hmoob sawv daws lub neej nyob thaj yeeb nyab xeeb rau ntawm koj lub xub ntiag tas mus li.
Peb Txiv khuv leej neeg tas nrho, peb ua koj tsaug ntau ntau.
Yav dhau los,nyob tim lub nroog Los Mas mas Vaj Qhia Fas Nsthis Kus zoo siab tshaj tej lo lus txhib ib cov Txiv Plig, ib cov Leej Phauj, ib cov Xib Hwb ib cov tub ntxhais hluas uas kawm txuj ci los npaj siab ua Leej Choj los ua Leej Phauj thiab ib pawg ntseeg coob . Vaj Qhia xub twm ib zaj lus hauv Mas Tais Ntawv Moo Zoo hais tias : Yes Xus mus ncig txhua cov nroog thiab cov zos huv si. Yes Xus qhia sawv daws nyob hauv cov tsev txoos- Nws tshaj lub Moo Zoo txog Ntuj lub Ceeb Tsheej –Nws tseem kho sawv daws tej txiab xeeb thiab tej mob nkeeg tas huv si – Yes Xus pom tsoom pej xeem, Nws hlub lawv vim lawv sawv daws sab thiab qaug zog zoo li ib co yaj tsis muaj tswv zov – Yes Xus thiaj hais rau nws cov thwj tim tias: “ Qoob loo ntau kawg, tab sis cov tub zog tsawg. Nej thov tus Tswv qoob kom nws xa ib co tub zog tuaj sau nws cov qoob” Mas Tais 9:35-37 Cov kwv tij, lub zim txwv no mas Huab Tais Yes Xus tseem hu peb tsoom ntseeg huv tib si los mus pab Huab Tais Yes Xus tshaj lub Moo Zoo rau tej pawg neeg coob, kom xwv lawv tig los yuav lub siab tshiab. Cov Txiv Plig, cov Leej Phauj ,cov Xib Hwb tsoom pej xeem ntseeg huv tib si mas Huab Tais kuj hu lawv sawv daws kom xwv “ lawv sawv daws thiaj nrog Huab Tais Yes Xus koom ua Tswv Ntuj tej hauj lwm” 1 Kos Lis Nthos 3:9 Vaj Qhia mam li nthuav piav ob lub ntsiab lus tseem ceeb zoo li no .. 1 : Peb yuav ua tim khawv txog Huab Tais Tswv Ntuj kev nyiam kev hlub 2: Peb yuav ua neeg siab ntshiab xws li peb Txiv nyob saum ntuj
Thov kom nej nrog peb koom hais ib zaj nkauj teev Ntuj
KUV NYOB NOV, NTUJ
( CEEV FAJ Tsuas tshaj nqe lus 1 thiab lo lus txais xwb) phab 166
1 : Peb yuav ua tim khawv txog Huab Tais Tswv Ntuj kev nyiam kev hlub Vaj Qhia tshaj lus zoo li no tias :” Lub luag hauj lwm pab cawm neeg dim ntawm qhov txhaum thiab kev pab lawv kom rov yug lus tshiab mas Tswv Ntuj thiaj yog tus ua. Tab sis Huab Tais pub peb sawv daws nrog Huab Tais koom ua ntag Yeej yog raws li tus Hauv Paus Xa Lus tej lo lus tseem ceeb tias :” Peb yog cov nrog Tswv Ntuj ua hauj lwm. “ 1 Kos Lis Nthos 3:9 Vaj Qhia ntuas peb zoo li no tias : :” Txhua txhia hnub no, Huab TaIs Yes Xus tseem hu peb tsoom ntseeg kom xwv peb tso siab lug rau Huab Tais thiab kom peb nyiam Tswv Ntuj tas yus lub siab lub ntsws, tas yus lub tswv yim thiab tas yus lub zog thiab nyiam tus nyob ze yus ib yam li yus nyiam yus’ (Mas Kos 12:33) Cov kwv tij, tsis hais cov txij nkawm, los cov neeg uas coj lub neej tab seeb los cov Leej Choj thiab cov Leej Phauj, mas lub luag hauj lwm uas sawv daws yuav muab siab rau ua thiaj yog qhov tias : peb yuav ntseeg ruaj nreb khov kho tias : Huab Tais muab nws tej kev nyiam kev hlub los pov hwm peb tag mus li. Yeej tsis muaj ib zaug uas Huab Tais tso peb pov tseg Yeej yog raws li tej lus uas peb twm ntau zaus hauv Ntawv Ntshiab .Xws li Nkauj Paj Nruag 117 tias ;’ HuabTais lub siab hlub muaj zog tas nrho Huab Tais lub siab pheej xeeb mus ib txhiab ib txhis Nkauj Paj Nruag 103; Huab Tais hlub nqee mos nyoos rau cov hwm nws , zoo li ib leeg txiv tsev hlub nqee mos nyoos nws cov me nyuam .. Huab Tais hlub mos nyoos -Nws khuv leej neeg. Nws tsis pauj rau peb raws li tej txhaum peb ua. Nws xyeeb peb cov txhaum mus deb peb,deb cuag li sab hnub tuaj nyob deb sab hnub poob - Huab Tais txoj kev hlub roos cov hwm nws, txij puag hnub txheej tshoj thaud los, tsis muaj hnub kawg.” Hos tus Hauv Paus Xa Lus Zam kuj sau tej lo lus nplij peb siab tias : “Yog peb lees peb tej txhaum,mas Tswv Ntuj uas yog tus pheej xeeb thiab tus siab ncaj yuav daws peb cov txhaum- Nws yuav ua kom peb huv tuaj thiab ncaj tuaj” (1 Zam 1: 9) Tsis tas li ntawd xwb, tus Hauv Paus Xa Lus Paj Lug kuj sau tej lo lus meej pem zoo li no tias : “Tab txawm peb tsis npuab Huab Tais, los Huab Tais tseem npuab peb, vim nws yuav rov thim tsis tau nws txoj kev hlub ib zaug li” (2 Tis Mos Tes 2:13) Qhov tias lub luag hauj lwm uas peb yuav muab siab rau ua thiaj mus zoo li no tias : Peb yuav ua tim khawv txog Huab Tais Tswv Ntuj kev nyiam kev hlub. Cov kwv tij Hmoob, uas nej ntseeg Ntuj mas phim yuav nco txog tej lo lus,uas nej nyuam qhuav mloog .. Huab Tais lub siab pheej xeeb mus ib txhiab ib txhis .. Huab Tais hlub mos nyoos -Nws khuv leej neeg. Nws tsis pauj rau peb raws li tej txhaum peb ua. Nws xyeeb peb cov txhaum mus deb peb, deb cuag li sab hnub tuaj nyob deb sab hnub poob Tab txawm peb tsis npuab Huab Tais, los Huab Tais tseem npuab peb, vim nws yuav rov thim tsis tau nws txoj kev hlub ib zaug li.
Cov kwv tij, tus Hauv Paus Xa Lus Pob Zeb kuj txhib peb siab kom xwv peb zoo siab ua tim khawv txog Huab Tais Tswv Ntuj kev nyiam kev hlub, uas yog qhov tseem ceeb tshaj plaws hauv peb nruab siab. Peb tus Vaj Qhia Fas Ntshis Kus kuj vam tias peb yuav nco txog tus Hauv Paus Xa Lus Pob Zeb tej lo lus no tias : “Nej yuav hwm Huab Tais Yes Xus Pleev nyob hauv nej nruab siab. Thaum luag nug nej saib yog vim li cas nej tso siab rau Tswv Ntuj, mas nej yuav npaj kom nej txawj teb mus li” (1 Pob Zeb 3:15) Cov kwv tij, nej tseem nco tias :Huab Tais Yes Xus tau hu nej ntseeg txog Tswv Ntuj thiab ntseeg txog Huab Tais Yes Xus Pleev .Mas Huab Tais niaj hnub xuas nej sawv daws los mus zeem tseeb tias: “Huab Tais lub siab pheej xeeb mus ib txhiab ib txhis.” Li ntawd ces nej yim ua Huab Tais lub luag hauj lwm ua tub tshaj Ntuj lus, mas nej yim yuav rov nyob kaj lug kaj nrig zuj zus Paj Nruag SAWV, KUV YUAV SAWV TSEES MUS (CEEV FAJ Tsuas tshaj lus txog nqe lus 2 + lo lus txais xwb phab 159) .. 2 : Peb yuav ua neeg siab ntshiab xws li peb Txiv nyob saum ntuj Cov kwv tij, Vaj Qhia rov tshaj lub Moo Zoo tias: “ Nej yuav ua neeg siab ntshiab, vim nej Txiv nyob saum ntuj yog tus Huab Tais siab ntshiab.” (MasTais 5:48) Hos nyob hauv Ntawv Cog Lus Qub mas Tswv Ntuj txhib peb siab li no tias : “Nej yuav ua neeg ntshiab,vim kuv yog nej tus Huab Tais, nej tus Tswv Ntuj - Kuv yog Tus Ntshiab” (Les Vis 19:2) Muab txhais tias ; peb yuav coj raws Tswv Ntuj Lo lus tias : “kom xwv peb tso siab lug rau Huab Tais thiab kom peb nyiam Tswv Ntuj tas yus lub siab lub ntsws, tas yus lub tswv yim thiab tas yus lub zog thiab nyiam tus nyob ze yus ib yam li yus nyiam yus.” (Mas Kos 12:33) Vaj Qhia txhib peb siab kom xwv peb npuab Huab Tais Yes Xus lub siab , Yam li peb yuav txais Tswv Ntuj Lo Lus ,peb yuav kub siab teev hawm Tswv Ntuj – Peb yuav nrog tsoom ntseeg sib sau ua Thaj Txi Ntuj - Peb kuj yuav los mus txais tej lub Cim tseem ceeb uas pab nqa Tswv Ntuj tej txiaj ntsim cawm neeg, xws li lub Cim Daws Txhaum Yog vim qhov ntawd ces Huab Tais Yes Xus tsim Tswv Ntuj lub Ceeb Tsheej nyob hauv peb zos kuj yog vim peb ntag Mas Vaj Qhia ntuas peb tsoom ntseeg los mus ua 4 yam tseem ceeb, zoo li no tias : 1 : Peb yuav taug kev nyiam kev hlub sawv daws, raws li Huab Tais Yes Xus tus piv txwv 2 :Peb yuav mus pab sawv daws taug qhov tseeb 3 : Peb yuav siv zog pab sawv daws taug kev ncaj kev ncees 4 : Peb yuav tsim kev thaj yeeb kuj yog vim lub Moo Zoo qhia peb sawv daws zoo li no tias : “Cov tau txoj hmoov zoo yog cov tsim kev thaj yeeb, vim Tswv Ntuj yuav hu lawv ua Tswv Ntuj cov me nyuam.” (MasTais 5: 9) Nej yim ua Huab Tais lub luag hauj lwm ua tub tshaj Ntuj lus, mas nej yim yuav rov nyob kaj lug kaj nrig zuj zus Cov kwv tij peb zoo siab ua Tswv Ntuj tsaug, rau qhov tias peb Tus Vaj Qhia Fas Ntshis Kus txhib tsoom ntseeg sawv daws huv si kom xwv sawv daws muab siab rau nrog Huab Tais Yes Xus koom siab los mus ua tub tshaj Ntuj Lus. Yam li 1 : Peb yuav ua tim khawv txog Huab Tais Tswv Ntuj kev nyiam kev hlub 2: Peb yuav ua neeg siab ntshiab xws li peb Txiv nyob saum ntuj Li ntawd yeej yuav tsum muaj tej lub caij peb rov hais qib lus hauv zaj hu nkauj teev Ntuj ,hais tias : “Kuv nyob nov, Ntuj ! koj tau xaiv kuv - Kuv tau hnov koj hu kuv thaum hmo ntuj – Koj tuav kuv npe –Kuv ua siab mus – Kuv yuav puag koj haiv neeg hauv kuv nruab siab.” Thov kom nej nrog peb rov hais dua zaj nkauj teev Ntuj ntawd ib zaug ntxiv Ces tshaj tawm “KUV NYOB NOV NTUJ”
September 21 2014 - Nruab Xyoos HNUB CHIV 25 XYOO A
TSWV NTUJ TSIS KWS LEEJ TWG CAI
Kwv tij hmov thiab tshua, nyob thoob ntiaj teb muaj tej pab neeg kuj nug lo lus no tias : “Tus neeg uas los ntseeg Ntuj lawm, mas nws puas xav txog tej zaj tswv yim txawv txav uas ib txwm los nws tsis tau xav dua ?” Kwv tij, hnub no Tswv Ntuj qhia peb tias : “Tej zaj tswv yim uas thaum peb los ntseeg Ntuj lawm, mas peb yuav tau xav tias Tswv Ntuj lub siab loj tshaj peb lub siab.” ( 1 Zam 3:20 ) Vim li cas ho hais li ntawd ? Yeeb vim tias feem ntau peb tsuas xav txog tus kheej xwb, tab sis Tswv Ntuj mas nws khuv leej ntiaj teb neeg sawv daws tib si. Kwv tij, thov kom nej maj mam twm tej qib lus hauv phau ntawv His Xais 55:6-9 thiab twm zaj txhais txog tus tswv teb lub siab zoo hauv Mas Tais 20:1-16, ces nej yuav to taub Tswv Ntuj lub siab zoo zuj zus tuaj. Nyob hauv Mas Tais zaj ntawv Moo Zoo uas hais ntawd, mas yog hais txog cov tub zog uas lawv tau khwv khwv tas hnub, ces ua rau lawv yws yws tias : “Cov tuaj tom qab, tsuas ua hauj lwm ib teev xwb. Ua cas koj tseem saib lawv ib yam li peb ?” Tus tswv ntiav zog teb tias : “Yog kuv xav muab ib lub txiaj nyiag rau tus tuaj tom qab, mas kuv yeej muaj cai siv kuv tej nyiaj txiag raws kuv siab. Ua cas koj yuav khib vim kuv lub siab zoo ?” Kwv tij phooj ywg, yog vim li no mas niaj hnub no mas peb yuav nco ntsoov tias : “Peb txhob nrog Tswv Ntuj sib cav.” ( Los Mas 9:20 ) Peb yuav tsis txhob muaj khib xws li cov tub zog ntawd, vim tias peb tig los ntseeg Ntuj lawm, mas peb yuav tau xyaum ua lub siab loj xws li Tswv Ntuj qhia. Tsis tas li ntawd, peb tseem yuav ntseeg tias : “Huab Tais Tswv Ntuj lub tswv yim, mas yeej loj dua peb tej zaj tswv yim. Huab Tais thiaj pheej xeeb nyob hauv txhua txoj hauj lwm. Huab Tais kuj muaj kev hlub mos nyoos, ces nws khuv leej neeg thiab nws tsis pauj rau peb raws li tej txhaum uas peb tau ua. Huab Tais tseem xyeeb peb cov txhaum mus deb ntawm peb, deb cuag li sab hnub tuaj mus rau sab hnub poob.” Tsis tas li ntawd, Huab Tais Yes Xus tseem muab nws los ua nqi txhiv tas nrho ntiaj teb neeg cov txhaum, tsis yog txhiv peb xwb. (1 Zam 2:2 ) Kwv tij, ntawm peb cov neeg ntseeg Ntuj, mas peb txoj hmoov zoo kawg nkaus, vim peb niaj hnub ntseeg ruaj nreb khov kho txog Huab Tais Yes Xus txoj kev nyiam kev hlub uas muaj zog tas nrho, ces peb thiaj pom Huab Tais Yes Xus yog tus Cawm tas lub qab ntuj neeg. Kwv tij, yog vim peb ntseeg txog Huab Tais Yes Xus uas yog tus Cawm lub qab ntuj neeg,mas txhua txhia zaus thaum peb sib sau los ua Thaj Txi Ntuj, peb thiaj thov kom Tswv Ntuj khuv leej peb tsoom Hmoob sawv daws huv tib si tias : “Huab Tais, thov koj nco txog tas zeej tsoom dua nras thiab thov koj txais lawv sawv daws tuaj cuag koj, nyob pem koj lub teb chaws tshav ntuj nrig.” THOV NTUJ : Huab Tais Tswv Ntuj uas khuv leej neeg tas nrho. Thov koj tshoj tsoom Hmoob kom ntseeg tias : “Yes Xus Pleev yog tus Huab Tais txhiv tas lub qab ntuj neeg cov txhaum, ces lawv thiaj yuav paub tig los ntseeg txog koj thiab mloog koj cov lus qhia.”
September 28 2014 Nruab Xyoos HNUB CHIV 26 Xyoo A NEJ KAV TSIJ TIG LOS YUAV LUB SIAB TSHIAB
Kwv tij hmov thiab tshua , tas peb tsoom ntseeg Ntuj huv tib si, yeej muaj tej lo lus tseeb uas Huab Tais Yes Xus tshaj tawm los txhib peb tej kev ntseeg hais tag mus li : Yog lo lus tias:” Nej kav tsij tig los yuav lub siab tshiab,ces nej tej kev ntseeg thiaj yuav tau ciaj “ Es Xes Kias 18:31-32
PAJ NRUAG :As les lus yas - Leej Ntuj Plig ,koj los mas
Kwv tij, thov kom nej mloog zaj paj lug txog ob tug tub; Yes Xus tshaj zaj paj lug zoo li no tias :“ Nej sim hais saib ,nej xav li cas. Ib tug neeg muaj ob tug tub. Nws hais rau thawj tug tias:” Me tub, hnub no, koj mus ua num tom teb txiv cawv mog ”- Tus tub ntawd teb tias :” Kuv tsis xav mus”- Tab sis, ib me ntsis ,nws khuv xim. Ces nws cia li mus ua teb- Leej txiv kuj hais rau lwm tus tub ib yam li rau thawj tug thiab Tus tub ntawd teb tias:” Txiv, kuv npaj siab yuav mus “.Tab sis nws tsis mus. Thov kom nej hais saib :”.Ob tug tub no, leej twg tau ua raws leej txiv xav kom ua ?”. Lawv teb tias :” Yog thawj tug”. Yes Xus mam li hais rau lawv tias :” Kuv hais tseeb rau nej : cov sau se thiab cov niam ntiav xub mus hauv Ntuj lub Ceeb Tsheej, vim tias Zam Ntxuav Plig qhia Txoj Kev Ncaj rau nej, tab sis nej tsis tau mloog txog nws - Hos cov sau se thiab cov niam ntiav ntseeg txog nws . Tab txawm nej pom lawv tus qauv zoo, tom qab no, los nej tsis tau hloov siab los ntseeg txog Zam Ntxuav Plig “ Mas Tais 21: 28-32 Cov kwv tij, Yes Xus kuj nug lawv tias :” Ob tug tub no, leej twg tau ua raws li leej txiv xav kom ua ?”- Lawv teb tias :” Yog thawj tug” Xam pom tias : yog tias hnub peb nyob tim His Xas Lais teb,lub caij Yes Xus tshaj Ntuj lus mas peb kuj yuav teb tib lo lus xws li thawj tus tub uas nws khuv xim thiab nws yeej lees tias : “Yog kuv tsis kam mus ua teb mas txhais tias kuv yog neeg mom txheej mom ntsig” . Ces tus thawj tug ib siab mloog nws txiv lus thiaj yog.. Cov kwv tij, hnub no thiaj tsim nyog rov soj ntsuam saib: peb puas tu siab ntawm peb tej txhaum raws li thawj tus tub ntawd ? Peb puas kam “tig los yuav lub siab tshiab”. Ces thov kom nej txais Ntuj tej lo lus tseem ceeb hauv NTAWV NTSHIAB uas yog Lo Lus txhib peb sawv daws lub siab == Tus Yaj Saub Es Xes Kias tshaj Ntuj Lo Lus hais li no “Nej thim cov txhaum uas nej tau ua rau kuv”. EXK 38:31-txhais tias peb yuav tig nraub qaum rau tus yeeb yam ntshaw ua txhaum, ces rov txiav txim ib siab coj raws Tswv Ntuj lo lus hu peb ua neeg siab ntshiab los mas == Peb kuj yuav kub siab rov hais tej qib lus hauv Nkauj Paj Nruag 50 tias :” Kuv paub kuv cov txhaum- kuv tsis zais- kuv cia li lees….Koj lub siab zoo, Huab Tais,koj zam rau kuv –koj lub siab hlub neeg –Huab Tais, koj so kuv cov txhaum. Koj ntxuav kuv kom kuv dawb dua daus -koj muab koj cov dej yaug kuv kom kuv ntshiab tuaj “ Txhais tias : 1 : Peb niaj hnub yuav lees tias : peb yog neeg txhaum - 2 : peb niaj hnub yuav xyiv fab thov Tswv Ntuj yaug peb tej txhaum huv tib si pov tseg- 3 : peb yuav tawm tsam tiv thaiv tej zaj tswv yim tsis huv – Peb yuav coj lub neej mus raws qhov teeb tag mus li, tsis tu ncua.. == Peb yuav khaws Ntuj Lus no tias :”Cov neeg txhaum,nej muaj 2 lub siab.Nej kav tsij ua kom nej ntshiab tuaj. Nej yuav tu siab. Nej txo nej kom qis nyob ntawm Tswv Ntuj xub ntiag, ces Ntuj yuav tsa nej siab” Yas Kos 4:8-10. Txhais tias:peb txhob muaj 2 lub siab - yuav ntseeg Ntuj thiab yuav nyiam Huab Tais tiag THOV NTUJ : Huab Tais khuv leej neeg tas nrho, thov koj pab peb lees peb tej txhaum thiab thov koj txhab zog rau peb ,ces peb yuav rov xyaum nyiam Huab Tais Tswv Ntuj ”tas siab tas ntsws,tas tswv yim , tas zog
Cov kwv tij phooj ywg,uas nej nyob rau hauv ntau lub teb chaws, hnub no,peb mam li zoo siab tshaj Vaj Qhia Fas Ntshis Kus tej zaj lus tseem ceeb rau nej mloog . Yog hais txog 2 yam li no 1 : Peb yuav ua neeg siab ntshiab - 2 : Vaj Qhia tshaj tej lo lus hais txog lub Cim Daws Txhaum
PAJ NRUAG Xub tshaj zaj nkauj teev Ntuj As les lus yas. Leej Ntuj Plig koj los mas
…1 : PEB YUAV UA NEEG SIAB NTSHIAB Cov kwv tij , lub ntsiab lus ntawm Vaj Qhia Fas Ntshis Kus zaj lus txhib pawg ntseeg sawv daws kuj hais li no tias :: “Peb yuav ua neeg siab ntshiab kom tau pab cawm ntiaj teb neeg dim ntawm qhov txhaum”
Vaj Qhia tshaj lo lus no tias : “Nyob rau hauv phau ntawv Les Vis mas Tswv Ntuj hu peb ua neeg siab ntshiab, hais tias :” Huab Tais hais rau Mais Xes tias : Nej yuav ua neeg siab ntshiab vim kuv yog nej tus Huab Tais, nej tus Tswv Ntuj - Kuv yog Tus Ntshiab. Koj yuav tsis txhob ntxub koj tus kwv tij nyob hauv koj nruab siab..Koj yuav tsis txhob rob caub, tab sis koj yuav nyiam tus nyob ze koj ib yam li koj nyiam koj “ (Les Vis 1: 1-18,) Ua li, Tswv Ntuj hu peb yoog raws li Tswv Ntuj tus yam ntxwv.. Tswv Ntuj Lo Lus qhia peb zoo li ntawd thiaj yuav tsum yog txoj cai los nqes los kav tas ib puas tsav yam hauv peb lub neej . Mas peb yuav nco tias : kawg yuav tsum vam txog Leej Ntuj Plig Ntshiab txhab zog rau peb ,ces peb thiaj yuav muaj peev xwm coj lub neej raws li Tswv Ntuj lo lus qhia ntawd . vim tias peb nyob peb ,mas peb yuav tsis txawj coj lub neej ntshiab dawb huv Tsim nyog peb yuav ntseeg tias Leej Ntuj Plig Ntshiab muaj peev xwm txhim kho tau peb tej siab ntsws kom rov ntshiab dawb huv tuaj - Leej Ntuj Plig Ntshiab kuj pab tau peb txhua txhia hnub ntag Cov kwv tij, Vaj Qhia tseem hais txog lub Moo Zoo no tias ;’” Nej tau hnov tej lus no tias : Qhov muag pauj qhov muag – Kaus hniav pauj kaus hniav- hos kuv hais rau nej tias : leej twg ib ncuav pias rau koj sab plhu xis,mas koj yuav tig sab plhu laug rau nws” (Mas Tais 5:38-39) Muab txhais tias peb yuav ua siab zoo, siab dav fo rau luag tej huv tib si Ntawv Moo Zoo tseem qhia peb tias ::”Nej yuav nyiam nej cov yeeb ncuab- Nej yuav thov Ntuj rau cov tsim txom nej” (MT 5 ;43 44) Zoo li muaj tej zaus uas peb xav tias :: Tus ntawd phem phem ua luaj, ces yeej tsis phim yuav ua dab tsi zoo rau nws - Tab sis Huab Tais hu peb hlub txhua tus neeg ntawd .Peb yuav nco tias: Yes Xus xub taug txoj kev khuv leej luag tej ob cag. Ces Huab Tais qhuab qhia peb kom xwv peb thiaj ua raws li Yes Xus tus piv txwv . yam li ;peb txoj kev nyiam kev hlub luag thiaj yog txoj kev rau peb taug ntag , kom xwv peb tau pab cawm ntiaj teb neeg dim ntawm qhov txhaum Vaj Qhia rov hais nws tej lus tseem ceeb ib zaug ntxiv tias :”Nej yuav nyiam nej cov yeeb ncuab.” Tsam peb xav tswv yim twj ywm tias “ Tus no mas yeej tsis tsim txiaj kiag - thiab tsis phim yus yuav ua ib yam dab tsi zoo rau .Tab sis ib yam muaj nqes rau peb ua kiag kuj mus zoo li no tias :”Yus txhob txwm luag ntxhi rau nws los mas “. Tsam peb yuav xav tias “Yuav ua qhov zoo ntawd mas nyuaj kawg “- Thaum peb xav li ntawd thiaj yog ib lub caij uas peb yuav thov Ntuj tas zog zoo li no tias :”Peb Txiv khuv leej neeg tas nrho , thov koj pab peb kom xwv peb ib siab mloog Leej Ntuj Plig lub suab “ Vaj Qhia Fas Ntshis Kus tseem caw peb mloog Leej Ntshiab Paj Lug lo lus uas nws qhia peb tias “ Tswv Ntuj Leej Ntuj Plig nyob txawm hauv nej.. Tswv Ntuj lub Tuam tsev yog ib yam ntshiab - lub Tuam tsev ntawd yog nej ntag’ (1 Kos Lis Nthos 3:16-17) Ua li, nyob rau hauv peb lub neej mas niaj hnub peb kuj yuav tsum muab siab rau tsim tej zaj teev Ntuj txawv txav. uas tsis yog tej zaj teev Ntuj peb tau kawm hauv nruab siab . Tej zaj teev Ntuj txawv txav ntawd uas niaj hnub peb hais tau thiaj yog peb tej lus nyiam thiab hlub tshua sawv daws – Yog peb tej lo lus zam luag tej tej txim txhaum – Yog peb tej hauj lwm tsob hwb luag tej ob cag .
Cov kwv tij peb yuav xyuas zoo zoo hais tias : yog peb tsis nrog lawv sawv daws sib koom siab koom ntsws thiab peb tsis muab siab rau coj raws kev nyiam kev hlub , mas tsam peb lub tsev teev Ntuj ( uas yeej muaj tuaj hauv peb nruab siab ) kuj yuav hloov los ua zoo li ib lub tsev teev Ntuj uas puas tsuaj. Txhais tias peb kaw peb tej siab ntsws rau tus ub tus no mas zoo li yeej tsis xav nrog nws tham ib nyuag lo lus mas txhais tias peb ib txhij txwv tsis pub Tswv Ntuj chaws los hauv peb nruab siab. Li ntawd tus tib neeg uas tsis kub siab hlub thiab khuv leej luag tej ob cag, mas yuav muab tus neeg ntawd lub siab los piv rau ib lub tsev qhuav qhawv uas tsis pom muaj ib yam tseem ceeb, ib yam dawb huv rau hauv lub tsev lauj . Ua li Vaj Qhia tseem tshaj lo lus no tias : tseev kom peb tsoom ntseeg sawv daws ib siab coj ib lub neej ntshiab, kom xwv Huab Tais Yes Xus kev nyiam kev hlub thiaj yuav tau rov tshwm sim tuaj thiab ci ntsa iab tuaj nyob nruab nrab hauv peb . Yog vim qhov ntawd ces peb yuav nrog lawv sawv daws sib koom siab koom ntsws .Yog peb ua li mas peb yuav pab txhawb nqa peb lub Koom Txoos kom rov loj hlob zuj zus thiab rov ruaj nreb zuj zus mus los mas. Cov kwv tij peb zoo siab ua Vaj Qhia tsaug, rau qhov nws txhib peb tsoom ntseeg sawv daws huv tib si kom xwv peb yuav kub siab coj lub neej ntshiab zuj zus..Peb tej hauj lwm ntawd mas yog tej hauj lwm tseem ceeb uas pab cawm ntiaj teb dim ntawm qhov txhaum tiag tiag
PAJ NRUAG : LOS LEEJ NTUJ PLIG, LOS COJ
2 : VAJ QHIA TSHAJ TEJ LO LUS TXOG LUB CIM DAWS TXHAUM Cov kwv tij, yav dhau los, mas tom lub tshav puam Leej Ntshiab Pob Zeb, tim lub nroog Los Mas thiaj tau muaj ib cov neeg ntseeg coob txog ntawm 34,000 leej sib sau tuaj mloog Vaj Qhia Fas Ntshis Kus tej lo lus txhib peb tsoom ntseeg huv tib si . Hnub ntawd mas sawv daws kuj mloog tej lo lus tseem ceeb uas hais txog lub Cim Daws Txhaum Hnub ntawd ces thaum chiv thawj, Vaj Qhia rov twm ib zaj lus hauv Zam Ntawv Moo Zoo. Yog zaj lus qhia peb tias Huab Tais pab qhia cov thwj tim tias : nyob rau hauv lub Koom Txoos mas tsoom ntseeg kuj yuav tau txais tau Ntuj tej txiaj ntsim pab txhim kho lawv tej siab ntsws.vim tias yuav muaj lub Cim Daws Txhaum
Thov kom nej mloog Ntawv Moo Zoo saib tom qab ntawm lub caij Yes Xus sawv ntawm cov tub tuag rov los mas :” Yes Xus tawm los rau cov thwj tim pom.. Yes Xus muab nws ob txhais tes thiab nws phab tav rau lawv saib . Cov thwj tim pom Huab Tais – lawv zoo siab kawg. Yes Xus hais rau lawv tias :” Nej nyob kaj lug – Kuv xa nej mus xws li Leej Txiv xa kuv tuaj” Yes Xus hais li tas, nws tshuab pa rau lawv – Yes Xus hais rau lawv tias :” Nej txais Leej Ntuj Plig Ntshiab – Nej yuav daws txhaum rau leej twg, mas nws cov txhaum yuav daws.” (Zam 20:22- 23) Cov kwv tij , peb zoo siab ntseeg tias Yes Xus tau muab nws lub neej txi Ntuj, pem lub roob Nkos Nkos Tas, kom tau txhiv cov neeg dim ntawm qhov txhaum thiab kom lawv rov yug los tshiab dua . Hos ua ntej ntawm lub caij Yes Xus rov mus lawm saum ntuj, nws pub ib lub luag hauj loj rau nws cov thwj tim, yam lawv yuav muaj cai daws txhaum nyob hauv Huab Tais Yes Xus lub npe. Lawv yuav ua tau lub luag hauj lwm loj ntawd kuj yog vim Huab Tais Yes Xus yog tus pub Leej Ntuj Plig Ntshiab lub hwj huam tuaj roos lawv. Ua li Huab Tais Yes Xus hais lo lus tseeb tias : “Nej txais Leej Ntuj Plig Ntshiab : Nej yuav daws txhaum rau leej twg, mas nws cov txhaum yuav daws“ Cov kwv tij, yog vim Yes Xus tej lo lus meej pem ntawd thiaj yuav tsum muaj ib cov neeg uas lawv yuav txais lub Cim Tiag Tes tsa lawv ua Leej Choj los ua Txiv Plig , lawv yuav tau kev daws txhaum rau cov neeg uas lawv ua Huab Tais Yes Xus cov thwj tim nyob hauv lub Koom Txoos Cov kwv tij, txhua txhia lub caij peb txais lub cim Daws Txhaum mas Huab Tais Yes Xus, tus Huab Tais cawm neeg, muab nws tej kev hlub uas muaj zog tas nrho ,pab daws peb tej txhaum. Thiab nws pub peb coj lub neej nyob thaj yeeb nyab xeeb thiab coj lub neej nyob kaj lug kaj nrig Ua li thaum peb tu siab ntawm peb tej txhaum, ces peb kav tsij mus txais lub Cim Daws Txhaum ntawm ib tug Txiv Plig.. Ces peb xub lees peb tej txhaum, hais tias :” Txiv Plig ,kuv tau ua tej txhaum xws li no… zoo li no ….” Ces cia li lees peb tej txhaum tas huv huv rau Txiv Plig hnov. Tab sis peb lees peb tej txhaum rau Huab Tais Tswv Ntuj ntag . Peb lees peb tej txhaum tas ,ces Ib ntsis peb hnov tus Txiv Plig hais tej lo lus daws peb tej txhaum.. Tus Txiv Plig kuj hais tej lo lus tseem ceeb ntawd nyob hauv Huab Tais Yes Xus lub npe. Ua li tas, peb nyias rov paub qhov tseeb hauv nyias lub siab tias : “Huab Tais Tswv Ntuj tau daws kuv tej txhaum tiag tiag “.. Txhais tias. Huab Tais Tswv Ntuj tau pub Ntuj tej txiaj ntsim cawm kuv, npaum li hnub kuv tau txais lub Cim Ntxuav ntag” Cov kwv tij, txhia zaus peb teev Ntuj twj ywm, mas peb kuj thov txhaum ntawm Tswv Ntuj., zoo li thaum peb hais zaj teev Ntuj PEB TXIV NYOB SAUM NTUJ ,mas peb kuj hais kam lo lus no tias:” Koj zam txhaum rau peb zoo li peb zam tau luag “. Mas peb kuj zoo siab ntseeg tias Tswv Ntuj kuj mloog peb tej lo lus . Tab sis txhua txhia zaus. peb los mus txais lub Cim Daws Txhaum, mas peb haj yam zoo siab heev,rau qhov tias peb tau hnov kiag tus Txiv Plig lo lus tseem ceeb tias :” Kuv daws koj tej txhaum” Cov kwv tij, hauv peb lub Koom Txoos Kav Tos Liv, peb tau txoj hmoov zoo heev vim tias thaum peb txais lub Cim Daws Txhaum mas Tswv Ntuj kuj txhim kho peb lub siab kom rov ntshiab dawb huv tuaj, Peb rov yug los dua tshiab ntag - Ces peb thiaj rov muaj zog dua los tawm tsam tiv thaiv tej lus haub lus ntxias ces thiaj tau txais kev yeej los mas
Cov kwv tij peb kuj zoo siab ua Vaj Qhia Fas Ntshis Kus tsaug, rau qhov tias nws rov txhib peb siab los rov ntseeg khov kho txog ob yam tseem ceeb tias 1 :Tswv Ntuj hu peb coj lub neej ntshiab dawb huv 2 : Hauv lub Cim Daws Txhaum mas Tswv Ntuj rov txhim kho peb lub siab dua
PAJ NRUAG : = “ZAJ TU SIAB” “KUV NYOB HAUV QAB TIV TXWV” Tej lo lus hauv zaj KOJ LUB SIAB ZOO, HUAB TAIS, KOJ ZAM RAU KUV
Home
Yog koj tso siab rau Yesxus lub siab ntshiab, nws yuav ua koj siab kaj lug 
Vim li cas peb cov Kas Tos Liv ntseeg tias NIAM MAB LIAB yog TSWV NTUJ Niam? caws nej mus nias nyeem tau hauv no.
Leej Tshiab Mis Kas Ees thov koj pab tuav thiab saib xyuas peb lub Vas Sab Hmong Catholique ntawm no kom ruaj nrees.
