TP.Txhiaj Foom lub TSEV Ntawv

**Maiv Tooj** 15th July 2011, 2:43 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°1

TP.Txhiaj Foom lub TSEV Ntawv

Post Maiv Tooj 15th July 2011, 2:43 am

Txiv Plig Txhiaj Foom

NTHUAV NTAWV NTSHIAB

NTSEEG TXOG LEEJ NEEG LUB CEV KEV SAWV ROV LOS
TP.Txhiaj Foom lub TSEV Ntawv La_mor10

1 : Kev ntseeg thiab kev tso siab lug txhawv ntawm dab tsi los ?
2 : Tswv Ntuj Lo Lus yog QHOV TSEEB
3 : Yus tsis muaj tswv yim txaus los to taub tas txhia yam peb ntseeg txog.
4 : Yus tej kev ntseeg yog lub teeb ci ci kaj yus tej siab ntsws zoo tshaj plaws
5 : Hauv tas txhia yam peb ntseeg txog, mas puas muaj tej yam uas peb tsis pom - tab sis peb zeem tau meej tias muaj tseeb tiag ?
6 : Hauv haiv neeg His Xas Lais thiaj muaj ib cov neeg pib ntseeg txog leej neeg lub cev kev sawv rov los
7 : Huab Tais Yes Xus yog tus qhia lo lus meej pem tias : tus tib neeg lub cev kev sawv rov los
8 : Ob tug Hauv Paus Xa Lus Paj Lug thiab Zam kuj tshaj lus txog leej neeg lub cev kev sawv rov los
= Tswv Ntuj Lo Lus yog Lo Lus Tseeb…

1: Kev ntseeg thiab kev tso siab lug txhawv ntawm dab tsi los ?
= Yav dhau los nyob As Xias teb, thiab lub zim txwv no hauv 2 - 3 lub teb chaws mas yus kuj pom tej pab Hmoob nrhiav tau kev nyob kaj lug kaj nrig hauv txoj kev tig los yuav lub siab tshiab. Yam li lawv ntseeg txog Tswv Ntuj tib leeg xwb – Lawv tso lawv lub neej rau hauv Tswv Ntuj txhais tes - Lawv khaub zig txog Huab Tais Yes Xus – Lawv niaj hnub xyaum nyiam Tswv Ntuj ” tas siab tas ntsws tas tswv yim tas zog”.
Tim li cas lawv ua li ntawd ? Vim tias Leej Ntuj Plig Ntshiab nqes los tshoj lawv tej siab ntsws.(Saib D.V # 5 …*** )
Ua li « tej lo lus uas peb txais ntawm cov tub tshaj Ntuj Lus tuaj mas peb tsis txais Lo Lus ntawd xws li neeg lo lus xwb - . Tab sis peb txais raws nraim Tswv Ntuj Lo Lus, vim yeej yog Tswv Ntuj Lo Lus tiag »
Ces peb cov kwv tij Hmoob « nyob kaj lug kaj nrig nyob hauv Leej Ntuj Plig Ntshiab. Peb cov kwv tij ntawd niaj hnub xyaum tsob hwb tus Tswv Ntuj muaj txoj sia tib leeg xwb – Yog tus tseeb Tswv Ntuj ntag » 1 Tes Xas Los Nis 2,13 + 1,6 .
Nyob hauv peb cov kwv tij lub siab mas « kev ntseeg yug ntawm kev mloog Tswv Ntuj Lo Lus los » Los Mas 10,14-17

== Muaj lo lus nug zoo li no tias : nyob hauv Ntawv Moo Zoo, puas muaj tej phab ntawv ua puav pheej zeem tseeb tias : « Kev ntseeg yug ntawm kev mloog Tswv Ntuj Lo Lus los »
== Yeej muaj ntau : Xub xav txog tus Nkauj Tsim Txiaj Mab Liab – Tom qab ntawd thiaj yuav qhuas txog tej pab neeg uas lawv zoo siab mloog lub Moo Zoo
A : Xub xav txog tus Nkauj Tsim Txiaj Mab Liab:Lus Kas 1,26-38 ; Ntuj tus Tshiab xa xov tuaj rau Mab Liab. Saib Tswv Ntuj tshaj Lo Lus zoo li no rau Mab Liab tias : « Koj yuav xeeb tub - Koj yuav yug ib tug tub - Koj yuav tis nws npe hu ua Yes Xus..Luag yuav hu nws ua tus Nyob Siab Leej Tub »
Tom qab ntawd ces Tswv Ntuj cog lus zoo li no tias :”Leej Ntuj Plig Ntshiab yuav los nyob saum koj . Tus Nyob Siab lub hwj huam yuav los roos koj”
Thaum ntawd ces Mab Liab tsis ua xyem xyav. Nws yeej ntseeg khov kho tias : « Tsis muaj ib yam uas Tswv Ntuj ua tsis tau »
Qhov kawg ces Mab Liab thiaj tuaj yeem ua tus Huab Tais Cawm neeg leej niam. Mab Liab hais tias : « Kuv yog Huab Tais tus ntxhais txib - Kuv xav kom muaj raws li koj hais »
Mab Liab ntseeg thiab nyob kaj lug kaj nrig.
A : .Nws ntseeg tias : Tswv Ntuj Lo Lus yog Lo Lus tseeb ,yam li Mab Liab yuav yug tus Huab Tais Cawm neeg, kuj yog vim tus Nyob Siab lub hwj huam yuav los roos nws
B : Nws nyob kaj lug kaj nrig. Ua cas Tswv Ntuj xaiv nws los ua Tswv Ntuj tej dej num tseem ceeb tshaj plaws. Ces nws tus phauj Es Lis Xas Npes qhuas txog Mab Liab tias : «Koj tau ntseeg tias cov lus ( Huab Tais hais rau koj ), thiaj yuav tsheej xeeb nyob hauv koj, ces koj yuav tau nyob kaj lug kaj nrig tshaj plaws »
Ib txwm los, lub Koom Txoos saib tus Nkauj Tsim Txiaj Mab Liab loj kawg nkaus kuj yog vim nws txoj kev ntseeg Ntuj( C C C # 148 – 149 )-
B : Tej pab neeg coob kuj mloog lub Moo Zoo :
= ++ Mas Tais Ntawv Moo Zoo kuj sau cia li no tias: “Yes Xus pom neeg coob coob tuaj – Nws mam li nce mus saum lub roob - Yes Xus zaum- Cov thwj tim txav los ze Yes Xus . Ces Yes Xus tsa ncauj qhia lawv txog tej zaj lus tshiab, uas thawj thawj lo lus mus li no tias :”Cov tau txoj hmoov zoo” MT 5,1-12
++ Lus Kas 4,31 : “Sawv daws qhuas txog Yes Xus cov lus qhia, vim nws hais lus muaj hwj chim”
++ Lus Kas 7,16 : ( Tom qab ntawm zaj lus tias: “Yes Xus tsa tus poj ntsuam nyob Nas Ees tus tub twm zeej sawv rov los lawm” mas Lawv cav txog Tswv Ntuj tias : “Ib tug yaj saub sawv los nyob hauv peb : Tswv Ntuj tuaj xyuas nws haiv neeg”
++ Lus Kas 19,48 : “Tsoom pej xeem mloog Yes Xus thiab lawv dai dhuam rau nws cov lus“ + Lus Kas 9,43 : “Sawv daws nyob hab nuv vim lawv tau pom Tswv Ntuj lub hwj huam loj tas nrho”.
Lub zim txwv no, peb ib cov kwv tij kuj ntseeg thiab tso siab lug rau Tswv Ntuj, kuj yog vim tias ,hauv lub Koom Txoos , tej lo lus uas peb txais ntawm cov tub tshaj Ntuj Lus mas : “Peb tsis txais Lo Lus ntawd xws li neeg lo lus – Peb txais raws nraim Tswv Ntuj Lo Lus, vim yeej yog Tswv Ntuj Lo Lus tiag ….Peb thiaj li zoo siab nyob hauv Leej Ntuj Plig Ntshiab - Cov kwv tij ntawd mam li pib xyaum tsob hwb tus Tswv Ntuj muaj txoj sia – yog tus tseeb Tswv Ntuj ntag ”1 Tes Xas Los Nis 2,13 + 1,6
Rov hais dua : Kev nyob kaj lug kaj nrig hauv txoj kev ntseeg kuj txhawv ntawm kev tshaj Ntuj Lus los – Kev tshaj Ntuj Lus yog kev tshaj Leej Pleev Lo Lus” - Los Mas 10,14-17
Ces peb zoo siab hais tias: « Ua li »( los « Amen ». = : « Yog tiag tiag »

2 : Tswv Ntuj Lo Lus yog QHOV TSEEB : ( D.V. # 11 )
Lub ntsiab lus mus li no tias : Tswv Ntuj Lo Lus yog Qhov Tseeb – « Tswv Ntuj dag tsis tau » Hes Nplaws 6,18
- Hos Leej Ntuj Plig Ntshiab tshoj neeg lub tswv yim kom yuav tau tshaj Tswv Ntuj Lo Lus Tseeb raws li Tswv Ntuj lub siab nyiam - .
Ces tej pab neeg uas tau txais Ntuj Lo Lus thiaj muaj txoj sia nyob mus li - Tswv Ntuj mam li « pub hwj huam rau lawv kom los ua Tswv Ntuj cov me nyuam tas huv tib si » Zam 1,12

== Yes Xus hais lo lus tseg li no tias : « Kuv yog Txoj Kev , yog Qhov Tseeb thiab yog Txoj Sia » Zam 14,6
= = « Yes Xus tseem tau ua lwm cov cim ntau nyob ntawm cov thwj tim xub ntiag, uas tsis tau muab sau rau hauv phau ntawv no – Tau muab cov cim no sau tseg kom nej ntseeg tias : Yes Xus yog Leej Pleev - Yog Tswv Ntuj Leej Tub – Nej ntseeg, ces nej yuav muaj txoj sia nyob hauv Huab Tais Yes Xus lub npe » Zam 20,30-31
= = « Tas cov Ntawv Ntshiab huv tib si, yog Tswv Ntuj tshoj neeg kom muab sau tseg » 2 Tis Mos Tes 3,16 + D V # 11
= = « Nej ua tib zoo txais cov Yaj Saub tej lus khov kho – Tej lus ntawd yog ib lub teeb ci hauv qhov tsaus ntuj – Yog lub teeb ci mus txog lub caij nkauj hnub tawm tim hauv ntuj los ziab – Yog lub teeb ci mus txog lub caij uas lub hnub qub kaj ntug tawm los ntsais hauv nej lub siab . Thawj yam uas nej yuav tsum paub yog qhov no : nyob hauv Ntawv Ntshiab, tsis muaj ib lo lus uas tus Yaj Saub yuav lam hais raws li nws xav – Tsis yog vim neeg lub siab xav, ces nws cia li muaj lo lus ua yaj saub tawm los – Yog vim Leej Ntuj Plig Ntshiab tshoj, ces thiaj muaj tej tus neeg hais tau cov lus tuaj ntawm Tswv Ntuj tuaj » 2 Pob Zeb 1,19-21
Ua li , peb zoo zoo siab txais Ntuj Lo Lus, uas yog Lo Lus Tseeb.
Saib : « Ntawv Ntshiab zoo pab yus qhia txuj , zoo pab yus tiv cov neeg dag, pab kho tej zaj yuam kev , pab mus taug kev ncaj – Ua li mas Tswv Ntuj tus neeg hlob tiav lawm – Tswv Ntuj tus neeg muaj txhij muaj txhua pab nws ua cov hauj lwm zoo » 2 Tis Mos Tes 3,16-17
CCC # 2653 : « Tswv Ntuj lo Lus kuj ntim Huab Tais Yes Xus Pleev tej txuj ci ».
Ua li, thaum yus txais Tswv Ntuj Lo Lus , yus nrog Tswv Ntuj sib tham. Saib : « Thaum peb teev hawm Tswv Ntuj mas peb cev peb tej lus rau Nws – Hos txhua txhia lub caij peb twm Tswv Ntuj Lo Lus mas peb qhib peb lub siab los mloog Nws ntag » - Leej Ntshiab Aas Nplos Xyus (St Ambrose )
« Tus tib neeg twg tsis paub dab tsi txog Ntawv Ntshiab mas txhais tias : nws tsis paub dab tsi txog Huab Tais Yes Xus Pleev »
(Leej Ntshiab Yes Los Mius-St. Jerome CCC 133)
« Tswv Ntuj Lo Lus yees ua kom txoj kev ntseeg loj hlob tuaj » CCC 1102
« Yog vim Tswv Ntuj Lo Lus, peb thiaj li « nco ntsoov » txog tas cov hwj huam yees ntxwv Tswv Ntuj tau ua los pab cawm peb cov neeg kom rov ntshiab tuaj . Peb thiaj cav lus zoo txog Tswv Ntuj yooj yim – Peb kuj nco txog Tswv Ntuj txiaj ntsha txiaj ntsim, tsis nyuaj lauj » CCC 1103

3 : Yus tsis muaj tswv yim txaus los to taub tas txhia yam peb ntseeg txog :

= « Tswv Ntuj cov paj tshab muaj nqis tas nrho ! Tswv Ntuj lub tswv yim thoob tsib tas nrho ! Tswv Ntuj cov txuj tob tas nrho ! Neeg tsom tsis tau Tswv Ntuj Lo Lus”” Los Mas 11,33-36
= ( Yog Tswv Ntuj tib leeg pub tau kev thoob tsib ) :”Tus neeg twg thiaj yuav paub tau Tswv Ntuj tus nru lus ? Leej twg yuav mem tau qhov uas Huab Tais nyiam ? Leej tib neeg uas txawj tuag, nws zaj tswv yim tsis ruaj . Neeg lub cev txawj lwj, ua nra hnyav qees rau neeg tus plig - Neeg lub cev zoo li ib lub tsev av nkos tsuam tus plig uas muaj kev txhawj nyob puv hauv” “Peb yuav luag mem tsis tau tias muaj dab tsi nyob ntiaj teb no - Peb siv siv zog thiaj nrhiav tau tej yam uas nyob ze ntawm peb txhais tes : ua li mas, yog leej twg thiaj yuav nrhiav tau tej yam uas nyob saum ntuj ?
“ Huab Tais, leej twg yuav paub tau koj lub lub siab, yog tias koj tsis pub kev thoob tsib thiab koj tsis tso koj lub Tswv Yim Ntshiab tuaj saum ntuj tuaj
“Vim muaj li ntawd, ces cov neeg nyob ntiaj teb no tej xub ke ncaj tuaj “Thoob Tsib 9,13- 18

Nkauj Paj Nruag 94, 8-11: “Tsoom neeg ruam, nej yuav tsum paub !
Tus cog pob ntseg rau neeg, nws tsis txawj hnov lus lod ?
Tus puab qhov muag rau neeg , nws tsis txawj ntsia lod ?
Twb yog nws pub kev txawj ntse rau neeg
Huab Tais paub zaj tswv yim uas neeg xav
Nws paub tias yam neeg xav yog cua.
Nkauj Paj Nruag 138,8 :” Huab Tais yuav ua tas puas tsav yam rau kuv.
Huab Tais,koj lub siab hlub nyob mus ib txhiab ib txhis
Koj txhob tso cov hauj lwm tawm ntawm koj txhais tes pov tseg
Nkauj Paj Nruag 139,6 + 17 – 18 : “ Koj txoj kev paub ntau yam, tob dhau rau kuv, siab dua qhov kuv ncav tau !..
Tswv Ntuj ! Yam koj xav tob ua luaj rau kuv
- Koj cov tswv yim, muaj ntau tas nrho !
Kuv xav suav, tab sis koj cov tswv yim ntau dua cov suab puam:”
Cov Paj Lug 15,33 :” Txoj kev hwm Huab Tais qhia kev thoob tsib .
Kev nyiam ua neeg me xub mus ua ntej, ces kev nto koob meej mam li lawv qab.
Cov Paj Lug 16,19: “ Yus yuav nyiam ua neeg me fim cov neeg me, zoo dua nrog cov neeg muab hlob sib huas nyiaj txiag “
Tswv Ntuj Lo Lus kuj yog ib hom tshuaj pab daws yus tej qhov nqhis:
“Tswv Ntuj yog txoj kev nyiam: tus twg nyob hauv txoj kev nyiam, mas nws kuj nyob txawm hauv Tswv Ntuj thiab Tswv Ntuj nyob txawm hauv nws”
1 Zam 4,16
“ Lub zog yeej lub qab ntuj neeg yog txoj kev ntseeg.“ Tus yeej lub qab ntuj neeg yog tus ntseeg tias Yes Xus yog Tswv Ntuj Leej Tub” 1 Zam 5,4-5
Tswv Ntuj Lo Lus ” muaj nqe dua ib txhab nyiaj txhab kub” NPN 119.72
“ Qhov uas Huab Tais xav kom koj ua mus, mas tsuas yog ;
1: ua raws txoj kev ncaj xwb –2 : yog rau siab hlub luag mos nyoos –
3 : thiab xyaum ua neeg me nyob ntawm koj tus Tswv Ntuj lub xub ntiag
‘Mis Kas 6, 8

4 : Yus tej kev ntseeg yog lub teeb ci ci kaj yus tej siab ntsws zoo tshaj plaws :
Xub hais ib lo lus ua piv txwv tso : nyob hauv peb lub neej ua neeg nyob mas yeej muaj ntau yam, uas yus qhov muag tsis pom, tab sis yus lees tias: yeej muaj tseeb tiag, xws li hluav taws xob.. Ib yam ntxiv tias : yus siv lub xov tooj tuav ntawm tes. - Ib ntsis yus hnov lwm tus lub suab – Yog yus niam yus txiv los yus tus phooj ywg. Yus pom tsis tau nws ntsej muag, tab sis yus lees paub tias yeej yog yus niam los yus tus phooj ywg tiag , puas yog ?
Mas, hauv yus nruab siab, yus ” thiaj pom tau raws li Tswv Ntuj pub yus pom – Yus hnov Tswv Ntuj Lo Lus teb, ces yus qhov muab qhib los” Xam Phaj 24,4.
Mas yus niaj hnub zoo siab ua neeg ntseeg Ntuj - Yus yeej paub tseeb tias yus yog ib lub tsev rau Leej Ntuj Plig Ntshiab nyob. Ces Leej Ntuj Plig yeej yog lub teeb ci kaj yus lub tswv yim. Li ntawd ”muaj tej yam uas yus qhov muag tsis pom, tab sis yus yeej lees tias muaj tseeb tiag” : Hes Nplaws 11,1
= ( Yus nyeem Zam Ntawv Moo Zoo 21,19- 23 : Tom qab ntawm qhov tias Yes Xus sawv hauv cov tub tuag rov los , mas Yes Xus tawm los rau cov thwj tim pom, thaum Tos Mas tsis nyob. Thiab zaj lus tias Yes Xus rov yees tawm los rau cov thwj tim pom, thaum Tos Mas nyob. Hmo ntawd mas Tos Mas hnov lwm tus thwj tim lo lus tias :” Peb tau pom Huab Tais lawm”. Tab sis Tos Mas yeej tsis kam ntseeg lo lus lawv hais kiag ( qib 25 )- Nyob tsam Tos Mas thuam lawv tas siab , xws li lo lus tias : “ Nej lam hais xwb. Nej sawv daws poob tswv yim tas tus lauj “-
. Mas yim hnub tom qab, Yes Xus rov tawm los sawv hauv nruab nrab cov thwj tim – Yes Xus hais rau lawv tias :” Nej nyob thaj yeeb mog !”. Ces Yes Xus hais rau Tos Mas tias:” Tos Mas, kuv tus phooj ywg , koj cev koj ntiv tes rau ntawm no – Koj ntsia kuv ob txhais tes – Muab koj txhais tes los – kov kuv phab tav – Koj txhob ua neeg tsis ntseeg ntxiv – Koj ntseeg mog !”- Tos Mas txhos caug, nws thiaj teb rau Yes Xus tias :” Kuv tus Huab Tais – Kuv tus Tswv Ntuj !”- Yes Xus hais rau Tos Mas tias :” Vim koj pom kuv ces koj thiaj ntseeg - Cov uas tsis tau pom, tab sis lawv ntseeg , mas lawv txoj hmoov zoo”
Cov kwv tij od, hmo Tos Mas pom xyeem Yes Xus ntawm qhov muag mas Tos Mas txoj kev tsis ntseeg kuj pauv ua kev ntseeg khov kho ntag.
Saib : nws txhos caug hais rau Yes Xus tias: “Kuv tus Huab Tais =- Kuv tus Tswv Ntuj !”..Txhais tias : Tos Mas yog ib tug me neeg xws li peb sawv daws huv tib si. Nws ntseeg Ntuj nyuaj kawg nkaus - Qhov kawg ces Tos Mas ntseeg ruaj nreb khov kho : tus nyob ntawm nws xub ntiag thiaj yog Tswv Ntuj Leej Tub, uas tau yuav ib lub cev neeg…Tos Mas nyob kaj lug kaj nrig, vim tias Yes Xus sawv hauv cov tub tuag rov los tiag – Nws tau yeej kev tuag. Ua li nyem no mus lawm yav tom ntej “ Yes Xus yuav tsis rov tuag dua – Txoj kev tuag yuav tsis muaj cuab kav rov tuaj raug nws ib zaug ntxiv” Los Mas 6,9
Cov kwv tij, tsim nyog peb yuav thov Leej Ntuj Plig Ntshiab pab , kom peb tej kev ntseeg loj hlob tuaj li hais no: “Tej yam uas peb tsis pom yeej muaj tseeb tiag”. Ces peb yuav nyob kaj lug kaj nrig ntag.

= Yus kuj mus twm 2 qib lus hauv tus Hauv Paus Xa Lus Pob Zeb thawj tsab ntawv tias :” Nej tseem tsis tau pom Yes Xus Pleev, tsis kav nej twb nyiam nws – Nej tseem tsis tau pom Yes Xus, tsis kav nej ntseeg - Mas nej yuav tau ib txog kev zoo siab uas piav tsis tau - Ua li mas nej hom khaj mog - Nej twb muaj koob meej, vim nej txais kev ntseeg tus nqi, uas yog txov kev cawm nej tus plig” 1 Pob Zeb 1, 8- - 9.
Ua li ,tas peb sim neej, peb kuj yuav tsis pom Yes Xus – yuav tsis hnov Huab Tais tshaj lub Moo Zoo rau peb – peb yuav caw tsis tau Yes Xus nrog peb koom noj ib pluas mov..Yog li ntawd peb yuav ua dab tsi, peb thiaj zeem tau meej tias : “ Huab Tais Yes Xus niaj hnub ua peb luag – Nws nrog peb nyob nraim. Qhov peb zeem tau meej kuj yog vim tej qub lus Huab Tais tau cog tseg rau nws cov thwj tim tias: “Kuv niaj hnub nrog nej nyob nraim, mus txog lub zim txwv ntiaj teb kawg” Mas Tais 28,20. ? ?
Peb tsuas yuav ua ib yam tseem ceeb xwb, yam li peb yuav hu txog Leej Ntuj Plig Ntshiab kom nws nqes los tshoj peb lub laj lim plab plaws, kom peb thiaj yuav” zeem tau meej tias : Huab Tais nyob ze peb tag mus li, tsis tu ncua -. Nruab hnub, hmo ntuj , peb thiaj tau nrog nws tham – peb cev tau peb tej kev nyuaj siab ntxhov plawv rau nws.- peb thov Huab Tais pov hwm peb thiab hlub peb…
Cov kwv tij hmov thiab tshua , yuav tsum muaj Leej Ntuj Plig Ntshiab tej txiaj ntsim pab, peb thiaj li yuav muaj kev ” zoo siab hom khaj” li Leej Ntshiab Pob Zeb lo lus hais.

5 : Hauv tas txhia yam peb ntseeg txog, mas puas muaj tej yam uas peb tsis pom - tab sis peb zeem tau meej tias muaj tseeb tiag ?

Cov kwv tij, tsuas hais txog ob yam xwb.
1 : Hais txog Thaj Txi Ntuj thiab lub Cim Yug
2 : hais txog yus zaj ntseeg tias : Ntseeg txog leej neeg lub cev kev sawv rov los -
= Yam ib tias : txhua txhia Hnub Chiv , peb nrog pawg ntseeg hauv peb zos mus ua Thaj Txi Ntuj- Peb kuj zoo siab mus txais lub Cim Yug. Thaum ntawd peb tsuas pom ib cov ncuav mov me me xwb – Hos peb tsis pom Huab Tais – peb tsis hnov nws lub suab - Tab sis Leej Ntuj Plig Ntshiab niaj hnub tshoj peb siab, ces peb zoo siab hom khaj zeem tau meej tias yog Huab Tais, ib yam nkaus li Tos Mas, hais tias :” Kuv tus Huab Tais - Kuv tus Tswv Ntuj” Zam 20,28
== Thaum peb hwm Huab Tais Yes Xus zoo li ntawd mas peb ua Ntuj tsaug ntau, kuj yog vim 3 yam;
1 : Thaj Txi Ntuj thiab lub Cim Yug thiaj yog ib yam hwj huam yees ntxwv loj kawg nkaus uas Huab Tais niaj hnub ua los roos peb siab
2 : Huab Tais hais tseg tias: “ Kuv yog cov mov muaj txoj sia nqes saum ntuj los” Zam 6,51 - Ua cas Huab Tais tau tsim lub lub Cim Yug ces nws thiaj nyob ze peb tag npaud
3 : Hauv tas txhia yam Huab Tais tau tsim los, mas lub Cim Yug yog qhov muaj nqe tshaj plaws
( In English : 1 :The celebration of the Eucharist is : God’s miracle of love – 2 : It is God’s mystery of proximity – 3 : It is the masterpiece in the new creation . )
= Peb yeej tsis muaj tswv yim txaus los to taub lub Cim Yug – Li ntawd , peb kuj yuav tsis muaj plhus nrog Tswv Ntuj sib cav tias:” Huab Tais Tswv Ntuj ua qhov ntawd tsis leej tau ib zaug li !”…
Ua cas peb yuav hais lus ntxhib tag npaud, rau Tswv Ntuj tias : qhov ntawd mas koj ua tsis leej tau kiag ?
Phim peb yuav khaws Leej Ntshiab Paj Lug lo lus tias ::” Neeg, koj yog leej twg ,koj thiaj nrog Tswv Ntuj sib cav “ Los Mas 9,20….
“ Peb kuj zeem tau meej tias: tej yam uas peb tsis pom los tab sis yeej muaj tseeb tiag “
Peb yuav ua neeg me nyob ntawm Tswv Ntuj xub ntiag – Ces peb zoo zoo siab nco txog Ntuj tej txiaj ntsha txiaj ntsim muaj nqe tshaj plaws.

Yam 2 tias : Hais txog yus tej kev ntseeg tias : ntseeg txog leej neeg lub cev kev sawv rov los : yus muaj ib tug kwv tij neej tsa tau tas sim neej – Yus tsis pom tus neeg ntawd lub cev rov ciaj sia, tab sis nws tau txais Huab Tais Yes Xus lub hwj chim nqes los nyob hauv nws los ua nws ntiag tug .
Li cas los, yus tsis ua xyem xyav. Yus tsis nrog Tswv Ntuj sib cav. Tab sis yus rov nco ntsoov tias : “Huab Tais Yes Xus” cog lus ruaj nreb tias : Huab Tais yuav pab neeg zoo li ntawd. Mas Tswv Ntuj ib txwm tsis dag ib zaug” Tis Tos 1,2
Ua li yus ua neeg me- Yus tsis mag kev ntaus siab yau-
Yus ua Ntuj tsaug ntau, rau qhov tias : muaj ib hnub Huab Tais yuav ua raws li tej qub lus Nws tau cog tseg.
Yus kuj tso siab lug tias: tus kwv tij uas tau tas sim neej mas muaj ib hnub nws yuav txais ib feem hauv Huab Tais Yes Xus lub hwj chim hauv nws lub cev nqaij daim tawv los ua nws ntiag tug –
6 : Hauv haiv neeg His Xas Lais thiaj tau muaj ib cov neeg pib ntseeg txog leej neeg lub cev kev sawv rov los

Hauv tas txhia haiv neeg nyob thoob qab ntuj - thiaj yog thawj thawj haiv neeg uas Leej Ntuj Plig Ntshiab tshoj tej tus neeg lub siab los mus ntseeg txog Tswv Ntuj tib leeg.. Nyob nyob ces ib cov neeg His Xas Lais nplua nuj zuj zus hauv kev ntseeg Ntuj tib leeg thiab kev tso siab lug txog neeg txoj hmoov ,,kuj yog dhau lub caij neeg tau tas sim neej.
= Nkauj Paj Nruag 16
“ Tswv Ntuj, thov koj txuag kuv, vim kuv tuaj khaub zig koj
“ Kuv tsis muaj lwm qhov chaw kaj siab dua ntawm koj”
“ Kuv cav lus zoo txog kuv tus Huab Tais uas qhia kev xav tswv yim
“ Kuv cia Huab Tais nyob ntawm kuv xub ntiag tsis tseg .
“ Vim nws nyob ntawm kuv sab xis, kuv yuav tsis qaij tsis qaug
“ Koj yuav tsis tso kuv pov tseg rau ntuj txias teb tsaus.
” Koj qhia txoj kev muaj txoj sia rau kuv
“ Nyob ntawm koj sab xis,muaj kev nplij siab tsis txawj tsuag mus ib sid = Txoj Cai Ob 4,39-40 :” Nej yuav tsum paub, yuav tsum nco ntsoov rau nruab siab tias : Huab Tais yog Tswv Ntuj tiag – Nws yog Tswv Ntuj nyob saum ntuj thiab nyob ntiaj teb no tib si – Tsis muaj dua lwm tus Tswv Ntuj ‘ + 5,4 :Huab Tais, peb tus Tswv Ntuj yog tus tseem Huab Tais - Tsis muaj dua lwm tus tswv ntuj . Koj yuav nyiam Huab Tais , koj tus Tswv Ntuj.. Tus koj yuav hwm yog Huab Tais, koj tus Tswv Ntuj – Koj yuav tsob hwb nws tib leeg xwb “ + His Xais 45,5-25
= Das Nias 12,1-3 :” Cov pw tsaug zog hauv teb chaws plua tshauv plua av yuav rov tsim los ntau leej – Ib txhia yuav tau txoj sia nyob mus li – Ib txhia yuav raug poob ntsej muag, raug kev txom nyem mus ib txhiab mus ib txhis “
= Mas Kas Npes 2 - 7,14 :” Kuv yeem tuag nyob hauv neeg txhais tes - Kuv tso siab tias Tswv Ntuj yuav tsa kuv ciaj rov los’
7,17:” Tos tsis ntev , kuv yuav tau pom Tswv Ntuj lub hwj chim loj”
7,23 : “ Tswv Ntuj siab zoo - Nws yuav rov muab txoj sia thiab lub tswv yim rau nej
= Yob 19,25 – 26: ( Yob tso siab tias Tswv Ntuj yuav tsa nws sawv nyob ze Tswv Ntuj ) : “ Kuv paub tias tus txhiv kuv, nws muaj txoj sia – Hnub kawg, nws yuav sawv tsees los txiav txim rau lub ntiaj teb - Thaum kuv yuav xeev rov los, mas nws yuav tsa kuv sawv nyob ze nws, ces kuv cev nqaij yuav tau pom Tswv Ntuj.
==== Thaum Yes Xus ncig teb chaws His Xas Lais,mas nws kuj ===
==== tau ntsib ob peb tug Xas Dus Kais - Lawv yog cov uas === hais tias neeg tuag tsis muaj kev sawv rov los - LK 20,27-40 ===

7 : Huab Tais Yes Xus yog tus qhia lo lus meej pem tias : tus tib neeg lub cev kev sawv rov los .

= Huab Tais Yes Xus yog Tswv Ntuj Leej Tub .” Nws tej Lo Lus yog Qhov Tseeb” Zam 14,6
= “Txog lub sij hawm uas tas ib tsoom neeg nyob hauv ntxa yuav hnov Neeg Leej Tub lub suab : Ces lawv yuav tawm los – Cov tau ua zoo, yuav sawv rov los los txais txoj sia – Hos cov tau ua phem, yuav sawv rov los raug txim” Zam 5,28-29
=” Tus Xa kuv tuaj lub siab xav yog zoo li no : kom kuv tsis txhob ua ib yam ( uas nws muab rau kuv ) ploj li - Tab sis nws xav kom Hnub Kawg kuv tsa yam ntawd sawv rov los” Zam 6,39
= “ Kuv hais qhov muaj tseeb tiag rau nej : leej twg khaws kuv cov lus, nws yuav tsis pom txoj kev tuag ib zaug” Zam 8,51
Cov kwv tij, phim yuav qhib xyuas zaj 11 hauv Zam Ntawv Moo Zoo- Yog zaj tias :” Yes Xus tsa Las Ntxas Los sawv rov los, nyob Npes Tas Nias . Zam 11,1-44 ( Mas Tas yeej ntseeg tias Hnub Kawg leej tib neeg lub cev yuav sawv rov los )
Qib 22 – 27 :” Mas Tas hais rau Yes Xus tias: “Kuv paub tias koj thov yam twg ntawm Tswv Ntuj, mas Tswv Ntuj yuav muab rau koj”- Yes Xus
hais rau Mas Tas tias :” Koj tus nus yuav sawv rov los” – Mas Tas hais rau Yes Xus tias : “Kuv paub tias : thaum txog Hnub Kawg, lub caij leej tib neeg lub cev yuav ciaj rov los. mas kuv tus nus yuav sawv rov los”- Yes Xus hais rau Mas Tas tias :” Kuv yog Txoj kev Sawv Rov Los thiab yog Txoj Sia – Tus ntseeg txog kuv ( tab yog nws tuag lawm ) nws yuav muaj txoj sia nyob - Leej twg ua neej nyob ntseeg txog kuv, nws yuav tsis tuag ib zaug …Mas Tas, koj puas ntseeg qhov ntawd ?”
“ Mas Tas hais rau Yes Xus tias :” Huab Tais, kuv ntseeg – Kuv ib txwm ntseeg hais tias koj yog Leej Pleev – yog Tswv Ntuj Leej Tub tuaj nyob hauv lub qab ntuj no” –

8 : Ob tug Hauv Paus Xa Lus Paj Lug thiab Zam kuj tshaj lus txog leej neeg lub cev kev sawv rov los :
= Tus Hauv Paus Xa lus Paj Lug kuj tshaj tej lo lus meej pem zoo li no tias:” Leej Pleev sawv hauv cov tub tuag rov los lawm tiag – Nyob hauv ib tsoom neeg, uas mus tsaug zog lawm, mas Huab Tais Yes Xus Pleev thiaj yog thawj tug uas tau sawv rov los “ 1 Kos Lis Nthos 15.20
= “ Leej Pleev yog lub Hauv Paus - Nws yog tus xub yug los hauv cov tub tuag los” Kos Los Xais 1,15 – 16.
=” Leej Pleev nyob hauv nruab nrab nej : nws yog peb txoj kev tso siab lug tias : nej yuav tau txais lub hwj chim” Kos Los Xais 1,27
Tsim nyog peb khaws lo lus ntawd tias: “ Huab Tais Yes Xus yog thawj tug uas tau sawv rov los”. Ua li, lwm hnub tuaj, peb thiaj yuav raws nws qab – Peb lub cev nqaij daim tawv yuav txais ib feem hauv Huab Tais lub hwj chim los ua peb ntiag tug ntag –
Tsis tas li ntawd xwb, Leej Ntshiab Paj Lug thiab Zam nkawd tseem tshaj lo lus no tias:” Huab Tais Yes Xus Pleev muaj hwj huam tswj txhua tsav txhia yam – Li ntawd, peb lub tseem ceeb tsheej nyob saum ntuj, vim peb tos Huab Tais yuav los cawm peb – Nws yuav muab peb lub cev txom nyem no hloov ua ib lub cev muaj hwj chim, xws li nws lub” Fis Lis Pos 3,20 – 21 + Fis Lis Pos 1,23 .
Tus Hauv Paus Xa Lus Zam : “ Cov zoo nyiam, nyem no, peb yog Tswv Ntuj cov me nyuam - Qhov uas yav tom ntej peb yuav plhis mus zoo li cas, tseem tsis tau tawm los rau qhov muag pom xyeem - Peb paub tias : thaum Leej Pleev yuav tawm los rau qhov muag pom xyeem, mas peb yuav nyob zoo li Huab Tais , vim Huab Tais Yes Xus zoo li cas, mas peb yuav pom nws zoo li ntawd “ 1 Zam 3,2.

TSWV NTUJ LO LUS LUS YOG LO LUS TSEEB Peb thiaj ” nrauj kev ntshai kev txhawj pov tseg “ 1 Zam 4,18
“Peb ntseeg tias: Yes Xus tuag thiab sawv rov los - Tus tib neeg ntseeg tsis tu siab xws li cov neeg uas tsis muaj kev tso siab – Peb tso siab lug tias Tswv Ntuj yuav coj peb mus nrog Nws nyob mus li - Peb thiaj rov sib pab ua siab loj” 1 Tes Xas Los Nis 4,13 – 18

Leej Ntshiab Tes Les Xas ntawm tus me nyuam Yes Xus(St. Therese of Lisieux) lo lus kawg rau ib pab Leej Phauj, xyoo 1897, tias :” Thov kom nej tsis txhob hais lus yuam kev tias:” Ib ntsis nws thiaj yuav tuag !” – Qhov tseeb mus li no tias :” Nyem no mas thiaj txog lub caij kuv yuav chaws los hauv txoj sia” CCC 1011

C C C = Catechism of the Catholic Church = Phau ntawv pab nthuav piav kev ntseeg hauv lub Koom Txoos Kas Tos Liv
* * *…D V = Dei Verbum - Lo lus no yog xeem lus Las Tis Nas – Txhais ua lus Hmoob mas thiaj hais = Tswv Ntuj Lo Lus. Yog txhawv ntawm lub Rooj Ncauj Lus Vas Tis Kas 2… lub 11 hlis, tim 18, xyoo 1965.

Lub 12 hlis tim 26 – 2010
T.P. Txhiaj Foom omi

Last edited by Maiv Tooj on 15th August 2011, 9:29 pm; edited 1 time in total

**Maiv Tooj** 18th July 2011, 6:56 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°2

Search Query

Display results as : Posts Topics
Advanced Search

HMONG CATHOLIQUE

Yesxus Pleev

Phau Ntawv Ntshiab2002

Search

Gallery

Latest topics

Speciale Hmong Guyane

Hmoob Tshav Ntuj

Suav neeg tuaj saib, txij hnub 17/09/2010 los mus.

TP.Txhiaj Foom lub TSEV Ntawv

Similar topics

Similar topics

Niam Mab Liab

Tshiab Mis Kas Ees

NtawvXamNyoog2017_18_B.

KEV KAWM

KEEB KWM

NKAUJ TEEV NTUJ

KOOM TXOOS

CAW LOS NYEEM NTAWV