TP.Txhiaj Foom lub TSEV Ntawv

Cov kwv tij hnub no yog Hnub Chiv, uas peb sib sau ua Thaj Txi Ntuj. Mas tsim nyog
peb yuav mloog ib zaj lus tseem ceeb uas Vaj Qhia Fas Ntshis Kus tau tshaj tawm los txhab zog rau peb tej kev ntseeg Ntuj hauv lub Koom Txoos Kav Tos Liv .Nws tau sau nws zaj lus hnub tim 21, lub 11 hlis xyoo 2014. Yog vim Vaj Qhia zaj lus ntawd mas nyob rau hauv xyoo 2015 no txij ntawm hnub tim 2 lub 2 hlis mus, mas peb tsoom ntseeg Kav Tos Liv nyob thoob ntiaj teb kuj yuav rov xav txog LUB NEEJ QEE RAU TSWV NTUJ. Peb nco tias cov Txiv Plig, cov Leej Tij thiab cov Leej Phauj kuj coj lub neej tab seeb- Yog ib lub txiaj ntsim muaj nqes kawg.
Cov kwv tij, peb sawv daws nco tias : nyob thoob ntiaj teb yeej muaj cov Txiv Plig coob txog ntawm 420,000 leej . Hos tsoom Leej Phauj kuj coob txog 830,000 leej .Hos nyob rau hauv 2-3 lub teb chaws, uas peb tsoom Hmoob Kav Tos Liv nyob, mas thiaj muaj 7 tus T.P. Hmoob thiab 12 tus Leej Phauj Hmoob. Zoo li tseem tsis tau coob
Cov kwv tij, hnub no ,peb zoo siab muab Vaj Qhia tej lo lus tseem ceeb tshaj tawm rau nej sawv daws khaws tseg - Vaj Qhia kuj tshaj tej lo lus meej pem txog lub neej qee rau Tswv Ntuj - Yeej muaj txog 5 nqe lus hauv tsab ntawv ntawd.

NQE LUS 1 : Vaj Qhia xub tshaj tej lus zoo li no rau tas cov Txiv Plig thiab tas tsoom Leej Phauj nyob thoob ntiaj teb tias :” Nej sawv daws ,uas yog cov Txiv Plig thiab cov Leej Phauj mas nej coj lub neej qee rau Tswv Ntuj, mas tsoom ntseeg yeej pom tseeb tias, nej niaj hnub soj qab kev nyob kaj lug kaj nrig. Yog vim nej coj lub neej zoo li ntawd mas Tswv Ntuj thiaj pab qhia sawv daws tias ; Tswv Ntuj muaj peev xwm pub kev nyob kaj lug kaj nrig tuaj puv nej lub siab npo. Ua li ntawd, yog vim nej coj lub neej qee rau Tswv Ntuj, mas thiaj muaj tej pab neeg rov pom tseeb tias ; muaj raws li Lo Lus hauv Ntawv Ntshiab tias : “Thaum kuv tsis muaj zog mas kuv thiaj muaj zog”
2 KLN 12:10
Cov kwv tij, tas tsoom tub ntxhais hluas uas yav dhau los, Tswv Ntuj tau hu lawv los coj lub neej tab seeb mas lawv nyias lees hauv nyias lub siab tias : “Thaum kuv hnub nyoog 19- 20 xyoo ,mas kuv yeej tau xav tias kuv yuav tsis muaj zog txaus los mus coj lub neej tab seeb zoo li ntawd, Tab sis tau muaj ib hnub ,kuv teev Tswv Ntuj, ces kuv thiaj tso siab lug tias :”Nyem no mus lawm yav tom ntej, Huab Tais Tswv Ntuj, uas nws hu kuv, nws yuav pub nws lub hwj huam uas loj tas nrho nqes los nres kuv thiab roos kuv. Ces kuv thiaj “yuav muaj zog nyob hauv Huab Tais” EFX 6:10
Li ntawd, txij ntawm lub caij kuv tau teev Ntuj li ntawd, kuv thiaj tau ua siab loj siab tawv coj lub neej, raws Tswv Ntuj lub siab nyiam.”

NQE LUS 2 : Vaj Qhia sau lo lus no rau cov T.P.thiab cov Leej Phauj huv tib si tias : “Nej cov uas coj lub neej tab seeb ntawd mas phim yuav muab nej los piv rau ib cov poov xab, raws li lo lus hauv Mas Tais Ntawv Moo Zoo tias : “Ntuj lub Ceeb Tsheej zoo li ib co poov xab uas ib tug poj niam muab tso rau hauv peb kawg hmoov nplej mus txog thaum uas tas cov hmoov ntawd su tuaj.” MT 13:33. Ces Vaj Qhia nthuav piav qib lus ntawd tias : “Nej cov Txiv Plig thiab cov Leej Phauj tau txais lub Moo Zoo thiab nej vam txog Huab Tais cov txiaj ntsim pab nres nej lub siab mas nej yuav muab siab rau ua ntau yam muaj nqes thiab ntau yam zoo, uas zoo li yuav tau ntsu tuaj rau hauv tej pab neeg nyob thoob ntiaj teb. Tej yam muaj nqe ntawd kuj yog qhov tias : yuav txhib tej pab neeg siv zog sib pab sib nres - yuav txhib lawv los tsim kev ua phooj ua ywg – Yuav txhib lawv kom lawv sib npuab siab, yuav tsis saib leej twg qis qis.”
Cov kwv tij Hmoob, nej yuav los mus tsham ib cov T.P. thiab ib cov Leej Phauj, nej thiaj yuav tau pom tias, cov Txiv Plig thiab cov Leej Phauj ntawd kuj coj lub neej txhib tej pab neeg kom txawj sib nyiam sib hlub thiab tsim kev ncaj ncees hauv tej zej zog uas lawv nyob. Mas txhais tias 2 pab neeg ntawd kuj muaj tej lub luag hauj lwm tseem ceeb kawg nkaus.
PAJ NRUAG
NQE LUS TIM 3 : Vaj Qhia tseem sau lo lus no rau tas tsoom Leej Choj thiab tas tsoom Leej Phauj, nyob thoob ntiaj teb tias : “Nej cov T.P. thiab cov Leej Phauj sawv daws, nej yuav siv siv zog los pab txhib tej pab neeg kom txawj sib npuab siab thiab sib nyiam sib hlub ; yam li nej yuav pab txhawb nqa peb lub Koom Txoos, kom xwv luag tej ob cag saib lub Koom Txoos zoo li ib tsev neeg uas sawv daws niaj hnub xyaum coj lub neej sib nyiam sib hlub thiab lub neej sib npuab siab. Li ntawd hauv teb chaws twg kuj xij, yeej muaj ntau pab neeg uas nyias muaj nyias txuj thiab nyias coj nyias tus yam ntxwv sib txawv. Mas nej ob pab no, uas yog cov T.P.thiab cov Leej Phauj thiaj yuav txhim tsa kev sib haum xeeb nyob nruab nrab tej pab neeg ntawd.
Rau qhov tias nej muab siab rau coj rawv lub Moo Zoo. Ua li, hauv pab neeg twg uas tsis muaj kev tso siab txog lub neej tom ntej, mas nej yuav siv zog txhim tsa kev tso siab rau hauv cov neeg ntawd. Hos hauv pab neeg twg uas sawv daws tsis sib hlub, mas nej yuav siv zog txhim tsa kev sib hlub rau hauv lawv lub siab thiaj yog.”
Cov kwv tij, peb sawv daws yeej paub tias, cov T.P. thiab cov Leej Phauj kuj tsis xaiv neeg. Lawv ob pab yeej ua kom tej pawg neeg rov sib ntsib sib hwm thiab ua kom tej pab neeg nyob ib ncig ntawd sib tuav tes- ib pab ua zoo rau ib pab – Ib pawg ua zoo rau ib pawg

NQE LUS TIM 4 hais tias : Vaj Qhia kuj sau tej lus tias : “ Kuv vam ntsoov tias nej ob pab ntawd, uas yog cov T.P. thiab cov Leej Phauj, kuj yuav soj ntsuam nej tus yam ntxwv zoo, saib ; puas muaj tej yam tshiab uas nej yuav tsum ua los txhawb nqa lub Koom Txoos kom ruaj nreb dua qub. Hos thaum twg nej pab saib tej pab neeg pluag, mas nej yuav rov xav tias : “Tej yam tshiab tshiab pab txhawb nqa cov neeg ntawd mas ti tes ti taws yuav tsum ua xwb, mas kawg yuav tsum ua thiaj yog.” .
Cov kwv tij, Vaj Qhia kuj txhib cov T.P. thiab cov Leej Phauj sawv daws kom tsis txhob tsaug zog ..Tseev kom ob pab neeg ntawd sawv daws rov qhib lawv qhov muag los xyuas saib : yuav tsum pab tus twg thiab pab neeg twg.”

NQE LUS TIM 5 : Vaj Qhia Fas Tshis Kus kuj ib txhij sau tej lo lus ntuas tas cov pawg ntseeg Kav Tos Liv huv si nyob thoob ntiaj teb hais tias : “Xyoo 2015 no, kuv ib txhij xav txhib tej pawg ntseeg Kav Tos Liv. Thov kom nej nco tias : lub neej qee rau Tswv Ntuj yog Ntuj ib lub txiaj ntsim muaj nqe kawg. Tsis tas li ntawd xwb . Thov kom tsoom pej xeem ntseeg ntawd los mus tsham cov T.P. thiab cov Leej Phauj ntawd. Nej yuav nrog lawv sab laj thiab nej yuav hlub tshua lawv, rau qhov tias, tej pawg ntseeg sawv daws, cov Txiv Plig thiab cov Leej Phauj kuj nco txog lub Moo Zoo tias : “Nej yuav sib nyiam sib hlub ib yam li kuv tau nyiam nej. Qhov yuav ua kom sawv daws paub tias nej yog kuv cov thwj tim, thiaj yog qhov tias : nej sib nyiam sib hlub.” Zam 13:34- 35
Cov kwv tij, tsim nyog nej yuav khaws Ntawv Moo Zoo thiab Vaj Qhia lo lus ntawd tseg, vim tias tsoom pej xeem ntseeg thiab cov Txiv Plig, cov Leej Phauj sawv daws huv tib si tau txais tib lub luag hauj lwm loj kawg hais tias : “Huab Tais Yes Xus vam txog peb sawv daws los ua kom Huab Tais kev nyiam kev hlub yuav rov tshwm sim tuaj rau lwm pab lwm pawg pom xyeem ntawm qhov muag.”

PAJ NRUAG Zaj nkauj : Thaum peb nyiam peb hlub nrog luag….
Cov kwv tij, nyem no mus, thov kom nej mloog ib cov T.P., cov Leej Tij thiab cov Leej Phauj uas nyob Fab Kis teb, lawv tej zaj tswv yim.
Xub hais txog ib cov T.P., cov Leej Tij lawv tej lus ua tim khawv txog lawv lub neej qee rau Tswv Ntuj ua ntej. Hos tom qab ntawd, peb yuav khaws ib pab Leej Phauj lawv tej lus tseg thiab.
Xub hais txog ib cov T.P. ib cov Leej Tij : Muaj ib lub nroog, muaj ib co T.P.thiab co Leej Tij lawv nyob ua ke, lawv nyob 5 leeg ua ib vaj ib tse. Lawv lub Koom Haum npe hu ua “Koom Haum ntawm Yes Xus cov me kwv.” Lawv hais li no : “Niaj hnub, peb yuav tsum nco ntsoov tias : Peb coj lub neej qee rau Tswv Ntuj, ces peb thiaj tsis mus yuav txij nkawm, kuj yog vim tias peb ua ib siab muab peb lub neej, peb txoj sia los cev rau Tswv Ntuj thiab los cev rau luag tej ob cag. Ua li thaum txhua txhia zaus peb nyob twj ywm los hawm Huab Tais Yes Xus uas nyob nraim hauv lub Cim Yug, mas peb nyias rov hais tau lo puav lus teev hawm Huab Tais tias : “Huab Tais, tas ib puas tsav yam hauv peb lub cev nqaij daim tawv thiab hauv peb tus ntsuj tus plig, thov koj txais los ua koj tug. Huab Tais, peb nyiam koj , peb hlub koj kawg nkaus.”
Tsis tas li ntawd, peb los mus tsham tej pab neeg hauv peb lub nroog, mas peb yuav muab siab rau siv sij hawm ntev hauj sim los mloog saib lawv zoo siab ua neej ntxiv mus yog vim li cas. Ces peb thiaj nrog lawv koom zoo siab thiab.
Hos muaj qee zaus peb kuj tau los mus nug tej tug phooj ywg zoo li no tias : “Zoo li koj muaj kev nyuaj siab txog ntau yam, puas yog ? Thov koj piav lo puav lus txog qhov ntawd puas tau ?” Ua li thaum peb kub siab mloog qhov lawv xav, mas zoo cuag li peb rov hais Tswv Ntuj lo lus rau lawv, xws li lo lus nyob hauv phau ntawv His Xais zaj 43, qib 4 , tias: “Koj lub neej yeej muaj nqe.”
Hauv peb lub Koom Haum mas txhua txhia zaus peb los mus tsham tej pab neeg thiab peb mloog tej yam lawv xav, ces ib ntsis cov neeg ntawd kuj zoo siab luag ntxhwb ntxhi, rau qhov lawv feem ntau kuj tsis tau kev nthuav piav lawv tej tswv yim rau leej twg kiag. Ua li txhua txhia zaus peb mloog lawv tej zaj tswv yim tas, mas hais qhov tseeb tias kuj pab kom lawv muaj kev kaj siab tuaj me ntsis thiab.”
PAJ NRUAG : Thaum peb muaj kev hlub…
Ces hais lo puav lus txog ib pab Leej Phauj. Ces yuav paub tias ib txwm lawv lub neej tab seeb kuj muaj nqe, kuj yog vim li cas. Nyob hauv ib lub nroog tim teb chaws Fab Kis, ces muaj ib pab Leej Phauj lawv 7 leej nyob ua ke, ua ib vaj ib tsev– Lawv lub Koom Haum npe hu tias : “Peb tus Poj Vaj, Leej Ntshiab Mab Liab cov niam hluas.” Lawv tau sau lus zoo li no tias : “Xyoo 2005 no thiaj yog ib lub caij zoo, rau qhov peb rov sib tham thiab sib tawm tswv yim ua ke txog peb lub neej qee rau Tswv Ntuj. Peb niaj hnub zoo siab nco ntsoov tias : peb coj lub neej tab seeb, kuj yog vim Tswv Ntuj ,uas lub siab khuv leej neeg tas nrho ,nws tau hu peb cov no coj lub neej qee rau Tswv Ntuj. Peb thiaj li tso siab rau Tswv Ntuj, yam tuag nthi- Yog vim li ntawd peb coj tau ib lub neej nyob kaj lug kaj nrig ,ib lub neej nyob thaj yeeb nyab xeeb, nyob ntawm Tswv Ntuj lub xub ntiag, tsis tu ncua. Zaj tswv yim uas peb yeej xav txog tas mus li, thiaj yog ib zag hauv Ntawv Ntshiab tias : “Huab Tais Tswv Ntuj hlub mos nyoos – Nws khuv leej neeg tas nrho. Nws hlub tshua cov hwm nws, zoo li ib leeg txiv tsev hlub nqee mos nyoos nws cov me nyuam.’ ZPN 103
Peb cov Leej Phauj hauv peb tsev no, peb tseem xav tias : Huab Tais Tswv Ntuj lub siab hlub neeg tas npaud, nws thiaj muaj peev xwm pab txhawb nqa tau ib cov neeg ntseeg ,ces nws thiaj hu lawv, lawv muab lawv tus ntsuj tus plig thiab lawv lub cev nqaij daim tawv los mus cev rau Tswv Ntuj .Ua li peb cov Leej Phauj hauv no coj tau lub neej nyob tiaj nyob tus.”
THOV NTUJ : Huab Tais Tswv Ntuj, peb Leej Txiv khuv leej neeg, yav dhau los, koj tau hu ib pab tub ntxhais hluas Hmoob los mus coj lub neej tab seeb ,lub neej qee rau Tswv Ntuj, tas ib sim neej. Peb nqa tes ua koj tsaug. Peb Leej Txiv siab zoo tas nrho, peb thov koj rov hu ib pab tub hluas ntxhais hluas Hmoob tshiab, ces yav tom ntej nyob rau hauv 4-5 lub teb chaws ,uas peb tsoom Hmoob nyob thiaj yuav tau muaj ib pab Txiv Plig thiab ib pab Leej Phauj coob. Peb xub ua koj tsaug ntau.
NTUJ AIB ! Peb thov koj, Huab Tais Leej Txiv siab zoo.

Xyoo 2013 mas hauv lub zos Huab Xais, mas peb ib tug txiv ntxawm hais kuv tias : : “ Kuv xav kawm Ntuj Kev Cai, vim kuv xav xav coj lub neej ntshiab “
Kuv tau hnov lo lus ntawd ces thiaj zoo siab teb nws tias :” Kuv ua Ntuj tsaug vim tias koj mloog Tswv Ntuj uas tau tshoj koj lub siab yam koj tau qhib koj lub siab rau Huab Tais. Kuv kuj yuav thov Ntuj pab koj.”
Hnub no uas peb ua hnub Nyoog Leej Ntuj Plig nqes los, tsim nyog peb yuav nco tias : :” Kev ntseeg Ntuj kuj txhawv ntawm Leej Ntuj Ntshiab los—“ Ua li peb niaj hnub yuav thov Ntuj tas zaj tas zog, kom xwv Tswv Ntuj lub hwj huam thiab nws qhov pom kev rov nqes hauv peb siab mus li”
Phau ntawv COV HAUV PAUS XA LUS TEJ HAUJ LWM kuj qhia peb tias :” Tim Yes Lus Xa Les, cov Hauv Paus Xa Lus sib sau hu txog Tswv Ntuj pab , ces txawm muaj ib lub suab nrov saum ntuj tuaj xws li ib nthwv cua hlob hlob ntsawj – Lub suab ntawd nrov thoob plaws hauv lub tsev uas cov thwj tim nyob. Lawv pom tej ntshua nplaim me ya tuaj tsaws saum cov thwj tim txhua tus. Ces Leej Tswv Yim Ntshiab tuaj nyob puv lawv lub siab “.. Ces txij ntawm hnub ntawd mus, mas cov Hauv Paus Xa Lus yuav ua tim khawv txog lub Moo Zoo. Lawv pib ua Tswv Ntuj lub luag hauj lwm tseem ceeb ntawd nyob Yes Lus Xa Les, nyob tas Yus Das teb, mus txog puag tim npoo ntuj… “
Li ntawd, txij ntawm lub caij ntawd mus thiaj tau muaj tej pawg ntseeg coob tau tig los yuav lub siab tshiab.
NUG : Leej Ntuj Plig Ntshiab niaj hnub ua Ntuj lub luag hauj lwm zoo li cas hauv peb siab ?”
TEB : Leej Ntuj Plig Ntshiab nyob txawm hauv peb lub siab. Nws teev hawm Tswv Ntuj tias :” As Npas “. Lo lus As Npas yog lo lus His Xas Lais ,ces muab txhais tias : “TXIV “
Ua li ntawd, peb haj yam paub tias Huab Tais Tswv Ntuj yog Tswv Ntuj khuv leej neeg tas nrho. Peb yog nws cov me tub me nyuam.. Ces txhua txhia lub caij peb hu txog Tswv Ntuj ,mas peb haj yam kub siab hais tau rau Tswv Ntuj tias peb zoo siab ua Tswv Ntuj cov me nyuam zoo nyiam thiab peb zoo siab nyiam Tswv Ntuj ntag.
NUG : nyob hauv peb lub Koom Txoos puas muaj tej zaj teev hawm Leej Ntuj Plig Ntshiab ?
TEB : yeej muaj ntau zaj , xws li :
= Leej Ntuj Plig Ntshiab ,koj los hauv peb nruab siab vim koj yog tus nplij peb siab kom nyob tiaj nyog tus mus li.
= Yog tias peb tsis muaj koj hauv peb nruab siab mas peb lub neej zoo puav tam li “av qhuav, nkig nkuav,tsis tau dej : NPN 63
= Thov koj rov nqes los rov ntxuav peb siab kom rov dawb huv tuaj
NUG : Leej Ntuj Plig Ntshiab puas txhab zog hauv peb lub siab,kom xwv peb muab siab rau coj lub neej raws li Yes Xus tus piv txwv ?
TEB : Nws yeej ua li ntawd, yog vim peb muaj Leej Ntuj Plig Ntshiab hauv peb ces :” Peb yuav nyiam Tswv Ntuj - Peb yuav zoo siab ua neeg, Peb yuav tau nyob kaj lug –Peb yuav ua siab ntev. Peb yuav xyiv fab pab luag tej. Peb yuav tso siab rau luag. Peb yuav txawj kav peb lub cev zoo .Peb yuav ua siab ntev ris tas puas tsav yam nyuaj “ Nkas Las Tias 5:22-23 + 1 Kos Lis Nthos 13: 5-7
NUG : Thaum peb tau txais lub Cim Ntxuav ,mas peb kuj tau txais Leej Ntuj Plig Ntshiab hauv peb siab..Ua li peb tsuas txais nws ib zaug xwb. Puas yog ?
TEB : tsis yog li ntawd lauj, Saib txhua txhia lub caij peb sib sau los ua Thaj Txi Ntuj thiab peb los mus txais lub Cim daws txhaum, mas Tswv Ntuj rov pub Leej Ntuj Ntshiab dua rau peb , tsis tu ncua . Ua li phim peb yuav thov Ntuj rov pub Leej Ntuj Plig tuaj rau peb, uas yuav tsis muaj caij kawg

TEEV NTUJ : “ Leej Ntuj Plig, koj los mas ! Koj los nyob hauv cov neeg ntseeg txog koj . Kom ua kom lawv lub siab kub li hluav taws – Koj xa koj lub tswv yim los mas ! Mas tas lub ntiaj teb yuav tshiab tuaj
Peb sawv daws thov Huab Tais : Huab Tais, koj yog tus tso Leej Ntuj Plig los qhia txoj kev pom kev rau cov neeg ntseeg txog koj . Peb thov koj : koj tso Leej Ntuj Plig los pab peb nyiam qhov ncaj - Koj tso Leej Ntuj Plig los nplij peb kom peb zoo siab mus li . Peb vam txog peb tus Huab Tais Pleev .Ua li “

Txiv Plig Txhiaj Foom omi .

Nyob zoo ib tsoom kwv tij phooj ywg hmov thiab tshua sawv daws !
Hnub no kuv yuav muab 5 zag xov xwm coj los tshaj tawm pub rau nej sawv daws mloog. Cov xwm hnub no muaj xws li no :
1. Ib cov pej kum neeg coob coob khiav mus txog Is Tas Lias teb.
2. Cov Fab Kis uas yug nyob pej kum teb mas coob kawg.
3. Cov neeg thoj nam uas mus nyob Fab Kis teb, lawv ua lub neej li cas ?
4. Tseem fwv Fab Kis kuj pab yug cov pej kum neeg thiab.
5. Nyob Fab Kis teb, thaum ib tug neeg twg tau tag sim neej, mas cov txheeb kuj muaj cai so hauj lwm thiab kuj tau txais nyiaj hli li qub.

Paj nruag
Hais txog zaj xwm 1 : Ib cov pej kum neeg coob coob khiav mus txog Is Tas Lias teb, mas yog li no :
Kwv tij phooj ywg, hnub tim 1 lub 5 hlis xyoo 2015 no, muaj ib cov neeg thoj nam coob coob caij tej lub nkoj me me ntawm Lis Npias teb hla lub hiav txwv Mes Dis Tes Las Nes mus rau Is Tas Lias teb.
Cov neeg no lawv coob txog ntawm 5,800 tawm leej thiab sawv kev ntawm ob lub teb chaws mus sib txoos ua ke rau Lis Npias teb, yam li ib cov yog tuaj ntawm Xis Lias teb thiab tuaj ntawm Mas Lis teb.
Kwv tij, qhov teeb meem uas ua rau muaj ib cov neeg thoj nam caij nkoj hla lub hiav txwv Mes Dis Tes Las Nes zoo li no, mas yog vim nyob teb chaws Xis Lias, muaj ib cov tub rog Mawv Xis Lim hu ua Ais Es sawv los txeeb kav teb chaws Xis Lias thiab Is Lav, ces cov Ais Es no lawv tsim txom cov neeg uas tsis zwm rau lawv heev, ua rau tsoom pej xeem feem coob nyob tsis thaj yeeb, ces ib txhia kawg yuav tsum caij nkoj hla lub hiav txwv Mes Dis Tes Las Nes khiav mus kwm siav nyob rau Aws Los Pas tuam teb.
Hais txog cov neeg uas khiav ntawm teb chaws Mas Lis mus rau Aws Los Pas tuam teb, mas kuj muaj 2 yam teeb meem loj, xws li no :
1. Lawv tsis muaj dab tsi noj.
2. Lawv raug cov tub rog Maws Xis Lim Ais Es tsim txom heev kawg nkaus.
Li ntawd, ces hnub tim 2-3 lub 5 hlis, thiaj muaj ib cov nkoj Fab Kis thiab Is Tas Lias, txhob txwm mus pab cov neeg thoj nam no nyob hauv lub hiav Mes Dis Tes Las Nes. Tom qab ntawd, ho thauj lawv mus rau Is Tas Lias teb.
Yog vim li ntawd, ces 5,800 tawm leej no lawv yuav tau mus ua lub neej tshiab nyob rau hauv Aws Los Pas tuam teb, yam li mus nyob Is Tas Lias teb, Aas Kiv teb, Fab Kis teb, Zes Mas Nias teb thiab teb chaws Xws Ves Lis.
Kwv tij, ntawv xov xwm tseem tau tshaj lus tawm ntxiv tias nyob Is Tas Lias teb, mas xyoo 2015 no, cov neeg thoj nam uas khiav mus rau hauv Is Tas Lias teb yuav coob txog ntawm 200,000 tawm leej. Vim tsaib no twb coob txog ntawm 170,000 tawm leej lawm.
Ua li mas cov tseem fwv uas nyob Aws Los Pas tuam teb, lawv thiaj txhawj tias tsam txij nyem no mus rau yav tom ntej yuav muaj cov neeg thoj nam khiav tsov rog zoo li no coob zuj zus tuaj.

Pa nruag
Hais txog zaj xwm 2 : Cov Fab Kis uas yug nyob pej kum teb mas coob kawg, yog li no :
Kwv tij phooj ywg, txhua txhia xyoo mas yeej muaj ib cov pej kum neeg coob txog ntawm 90,000 tawm leej khiav mus ua dua lub neej tshiab nyob Fab Kis teb.
Yog vim li ntawd, ces cov pej kum neeg uas nyob Fab Kis teb lub zim txwv no mas lawv thiaj coob txog ntawm 6 plhom tawm leej lawm. Txhais tias 9% ntawm cov neeg Fab Kis, mas yog ib cov pej kum neeg uas tseem fwv Fab Kis pub lawv los ua pej xeem Fab Kis xwb.
Li ntawd, mas thawj xyoo thaum cov pej kum neeg no mus txog Fab Kis teb, lawv yuav tsum rau siab mus kawm ntawv ua ntej, ces tom qab ntawd lawv mam li mus ua hauj lwm nyob hauv cov los pav tej tsev lag luam uas tsim toob xib, kom tau me ntsis nyiaj los pab yug lawv tsev neeg.
Kwv tij, cov pej kum neeg uas khiav mus nyob Fab Kis teb li hais no, mas feem coob yog cov neeg uas nyob rau As Fis Kas tuam teb.
Tsis tas li ntawd, kuj muaj ib cov neeg nyob Aws Los Pas sab hnub tuaj, lawv kuj khiav los nyob hauv Fab Kis teb thiab, yam li yog ib cov neeg uas nyob teb chaws Pos Kas, cov neeg Los Mas Nias thiab cov neeg Pos Tws Nkas uas nyob rau sab Aws Los Pas qab teb.

Paj nruag
Hais txog zaj xwm 3 : Cov neeg thoj nam uas mus nyob Fab Kis teb, lawv ua lub neej li cas ?
Kwv tij phooj ywg, hais txog qhov no mas cov pej xeem uas ib txwm yug los nyob Fab Kis teb, ib txhia lawv kuj yws yws tias : « Cov pej kum neeg no txhob txwm tuaj txeeb peb tej hauj lwm ua xwb, tab sis qhov tseeb mas tsis yog li ntawd. Vim tias cov pej kum neeg no lawv ib txhia kuj tuaj yeem ua tej yam hauj lwm uas cov neeg Fab Kis tiag tiag tsis xav ua lawm, yam li yog cov hauj lwm cheb kev tsheb, cheb vaj cheb tsev, kaus kwj hoob, ntxuav tej tsev plob thiab cov hauj lwm tsaws tej yam qias qias neeg rau hauv tsheb coj mus pov tseg. »
Cov pej kum neeg no lawv kuj kam ua tej yam hauj lwm li no thiab, vim tias lawv xav tau me ntsis nyiaj los pab yug lawv tsev neeg, ces lawv thiaj tsis xyeej tej yam hauj lwm li no kiag li. Thov kom muaj hauj lwm rau lawv ua xwb, ces yeej zoo kawg lawm. Yog vim li no, ces ntev ntev xyoo cov tseem fwv Fab Kis thiaj tso cai pub lawv los ua pej xeem Fab Kis.

Paj nruag
Hais txog zaj xwm 4 : Tseem fwv Fab Kis kuj pab yug cov pej kum neeg thiab, mas yog li no :
Kwv tij phooj ywg, niaj hnub no cov pej kum neeg uas ua tub sab khiav mus nyob hauv Fab Kis teb, mas lawv kuj coob txog ntawm 250,000 tawm leej lawm. Cov neeg no tsis muaj ntaub ntawv raug kev cai ua pej xeem Fab Kis. Tab sis cov tseem fwv Fab Kis kuj pab kho mob dawb pub rau lawv thiab.
Kwv tij, thaum cov pej kum neeg no mus txog rau Fab Kis teb tshiab tshiab, mas ib yam uas lawv ua kam, yog lawv xub xub mus nrog cov swm neeg nyob ua ntej, ces ua rau lawv tsis raug them nqe vaj nqe tsev thiab lawv cov me nyuam kuj tau kev mus kawm ntawv ib yam li cov neeg Fab Kis.
Ua li mas hais rau sawv daws paub tias cov neeg ntseeg Ntuj uas nyob Xis Lias teb thiab Is Lav teb, mas lub caij niaj hnub no lawv raug cov tub rog Mawv Xis Lim Ais Es tsim txom heev kawg nkaus, ces ua rau lawv ib txhia txiav siab caij nkoj hla lub hiav txwv Mes Dis Tes Las Nes mus txog rau Fab Kis teb.
Li ntawd, txij ntawm lub 7 hli ntuj xyoo 2014 los txog niaj hnub no, mas cov tseem fwv Fab Kis twb pub 1,500 leej los ua pej xeem Fab Kis kiag lawm. Vim tias tseem fwv Fab Kis hlub cov neeg uas raug tsim txom no heev.

Paj nruag
Hais txog zaj xwm 5 : Nyob Fab Kis teb, thaum ib tug neeg twg tau tag sim neej, mas cov txheeb kuj muaj cai so hauj lwm thiab kuj tau txais nyiaj hli li qub, mas yog li no :
Kwv tij phooj ywg, nyob Fab Kis teb, mas thaum lub caij uas yus tsev neeg ib tug twg tau tag sim neej, yam li tsis hais yus niam yus txiv, yus cov kwv tij, yus cov muam, yus tus txwj nkawm thiab yus cov me nyuam ib tug twg tau tag sim neej lawm, mas tseem fwv Fab Kis kuj tso cai rau cov txheeb ze so hauj lwm tau thiab kuj tseem muab nyiaj hli txwm ib yam li qub pub rau tus neeg uas nws tsev neeg raug xwv txheej, xws li :
1. Yus niam yus txiv, yus cov kwv cov muam tau tag sim neej, mas pub so hauj lwm 5 hnub.
2. Yus cov me nyuam thiab yus tus txwj nkawm tag sim neej, mas pub so 10 hnub.
Li ntawd, yog tias yus muab txoj cai Fab Kis no los piv rau cov cai nyob pej kum teb, mas xam pom tias muaj ntau ntau lub teb chaws lawv cov tseem fwv kuj tsis tau tso cai rau kom tus neeg uas nws tsev neeg ib tug twg tau tag sim neej muaj cai so hauj lwm thiab tseem tau txais nyiaj hli li qub.

Yog vim li no, mas cov pej kum neeg uas nyuam qhuav khiav mus ua dua lub neej tshiab nyob rau Fab Kis teb, mas lawv thiaj muaj chaw vam khom thiab zoo siab rau txoj kev uas tau los ua pej xeem Fab Kis.
Kwv tij phooj ywg, ua li mas hnub no kuv tsuas coj 5 zag xov xwm tuaj ntsib nej sawv daws xwb, yam li :
1. Hais txog muaj ib cov pej kum neeg coob coob khiav mus txog Is Tas Lias teb.
2. Hais txog cov Fab Kis uas yug nyob pej kum teb mas coob kawg.
3. Hais txog cov neeg thoj nam uas mus nyob Fab Kis teb, lawv ua lub neej li cas ?
4. Hais txog tseem fwv Fab Kis kuj pab yug cov pej kum neeg thiab.
5. Hais txog nyob Fab Kis teb, thaum ib tug neeg twg tau tag sim neej, mas cov txheeb kuj muaj cai so hauj lwm thiab kuj tau txais nyiaj hli li qub
Li ntawd, mas txuas ntxiv ntawm no mus, thov caw nej los mloog ib txog nkauj. Tom qab zaj nkauj no tag, pem mam rov sib ntsib dua rau lwm hmo, sawv daws nyob zoo !
Paj nruag

Zaj no Txiv Plig Txhiaj Foom ua nyob Lomsak.
Haam Kub pab ntaus thiab kho me ntsis.
Hnub tim 25 lub 5 hlis xyoo 2015

Cov kwv tij phooj ywg, hnub no zoo hnub rau qhov Hnub Chiv no peb tsoom ntseeg Kav Tos Liv nyob thoob ntiaj teb, peb zoo siab hwm PEB LEEG HUAB TAIS, yam li Huab Tais Leej Txiv, Huab Tais Leej Tub thiab Leej Ntuj Plig Ntshiab.
Peb kuj nco tias tsoom ntseeg teev txoj cai Mawv Xis Lis, mas lawv kuj ntseeg txog Huab Tais Tswv Ntuj tib leeg xwb yog tus tsim ntuj tsim teb. Tab sis lawv tej kev ntseeg tsis tau tiav .
Hos peb tsoom ntseeg hauv lub Koom Txoos Kav Tos Liv thiab cov kwv tij Plos Tes Taas, peb ib txhij ntseeg txog Peb Leeg Huab Tais. uas yog Huab Tais Leej Txiv, Huab Tais Leej Tub thiab Leej Ntuj Plig Ntshiab..Ua Ii phim peb yuav rov xyuas cov kab ke teev Ntuj hauv peb lub Koom Txoos Kav Tos Liv thiab peb rov qhib Ntawv Ntshiab, ces peb thiaj rov nco ntsoov tias Huab Tais Tswv Ntuj lub hwj chim zoo li cas thiab peb yuav rov qhuas txog Tswv Ntuj lub luag hauj lwm cawm neeg dim ntawm qhov txhaum.
= Hauv zaj cav txog Tswv Ntuj tej txiaj ntsim mas peb thiaj hais kam tej lo lus teev Ntuj tias
“Tswv Ntuj muaj hwj huam nyob mus li, tsim nyog peb yuav ua koj tsaug mus thoob ntuj thoob teb. Huab Tais Leej Txiv ,koj nrog koj Leej Tub twm zeej thiab nrog Leej Ntuj Plig Ntshiab yog ib tug Tswv Ntuj. Nej muaj peb leeg, hos nej yog tib tug Tswv Ntuj .
Huab Tais Leej Txiv, yog vim koj qhia peb paub txog nej peb leeg lub hwj chim, ces peb thiaj ntseeg tau - Peb ntseeg tias koj Leej Tub thiab Leej Ntuj Plig Ntshiab muaj lub hwj chim loj sib luag zos - .Vim li ntawd, peb nrog Cuaj Phiaj Tshiab uas nyob saum ntuj koom suab hu nkauj mus li tias “ Ces hais Faj tim Huab Tais Ntshiab
Cov kwv tij , thawj txoj hauj lwm tseem ceeb uas peb tsoom ntseeg niaj hnub ua thiaj yog peb tej zaj cav txog Huab Tais Peb Leeg thiab peb tej kev nyiam Huab Tais Tswv Ntuj tas zaj tas zog
Hauv NTAWV NTSHIAB, mas Huab Tais Peb Leeg kuj qhia qhov tseeb tias : “Tswv Ntuj yog txoj kev nyiam - Tswv Ntuj txoj kev nyiam tas tsoom neeg tawm tuaj rau qhov muag pom xyeem li no: Tswv Ntuj xa nws Leej Tub Twm Zeej tuaj nyob ntiaj teb, Yes Xus ua nqe txhiv peb ntawm peb tej txhaum, kom peb ciaj hauv nws Leej Tub “ 1 Zam 4:9 + Zam 3:16-19
“Txhua leej txhua tus uas Leej Ntuj Plig Ntshiab coj, mas lawv yog Tswv Ntuj cov me nyuam tas huv tib si. Ces peb thiaj yuav tau nrog Huab Tais Yes Xus muaj hwj chim, pem Tswv Ntuj lub Ceeb Tsheej“
Los Mas 8:14- 17
Peb tso siab lug tias : yuav muaj ib hnub, Peb Leeg Huab Tais yuav pub Huab Tais Yes Xus Pleev lub hwj chim rau peb, raws li cov lus uas Tswv Ntuj tau cog tseg
Cov kwv tij, peb niaj hnub, peb nyob kaj lug kaj nrig ,vim tias nyias rua tau nyias tus ntsuj tus plig ob lub qhov muag, ces thiaj rov kub siab ntseeg ruaj nreb khov kho tias “ “Kuv yeej yog Tswv Ntuj ib tug me nyuam, uas Peb Leeg Huab Tais hlub tshua, tsis tu ncua- Tswv Ntuj kev nyiam kev hlub, nws nyob mus li, tsis txawj kawg ,tsis txawj hloov. Tswv Ntuj kev nyiam kev hlub ,uas tshiab tag mus li. Nws tsis txawj qub, zoo li tus dej ntws, uas tsis txawj tu”
Cov kwv tij, peb nyias qhuas txog Tswv Ntuj txiaj ntsim no tias :”Ib tug me neeg zoo li kuv thiaj yog Huab Tai Leej Txiv tus me nyuam. Kuv yog Huab Tais Yes Xus tus kwv los tus muam thiab kuv ua tau ib lub tsev rau Leej Ntuj Plig Ntshiab nyob “ Los Mas 8: 11 + 1 Kos Lis Nthos 3:16-17
PEB TEEV HAWM TSWV NTUJ : Huab Tais Leej Txiv, peb ua koj tsaug ntau, vim niaj hnub koj tseeem pub peb ua koj cov me tub nyuam, Ces peb coj tau lub neej nyob kaj lug kaj nrig nyob ntawm koj xub ntiag, tsis tu ncua . “ Thov koj txhob tso cov hauj lwm tawm ntawm koj txhais tes pov tseg “ NPN 138:8
PEB YOG HUAB TAIS TSWV NTUJ COV ME NYUAM TIAG

T.P. Txhiaj Foom omi

      Kwv tij phooj ywg, hnub no zoo hnub, peb zoo siab heev los mus hwm lub Cim Yug, uas ntim Huab Tais Yes Xus lub Cev thiab nws Roj Ntsha. -Yeej yog Ntuj lub txiaj ntsim uas peb tsoom ntseeg Kav Tos Liv saib loj tshaj dua lwm yam huv tib si nyob hauv lub qab ntuj khwb . Hnub no peb thiaj yuav nyob kaj lug kaj nrig ua Ntuj tsaug ntau  
NUG  :  Niaj zaus peb ua Thaj Txi Ntuj mas Huab Tais Yes Xus puas nrog peb nyob nraim ? Huab Tais nrog peb  nyob nraim ntag vim  Huab Tais tau cog lus tseg tias :”Thaum ob leeg los peb leeg sib sau ua ke tuav txog kuv lub npe, mas kuv nyob nyob hauv nruab nrab lawv’ MT 18:20.

Peb tsis pom Huab Tais ntsej muag, Peb tsis hnov nws lub suab. Tab sis peb xav txog  2 yam no:
Saib : 1 : Txhua txhia zaus peb sib sau ua Thaj Txi Ntuj, mas thaum chiv thawj peb sib koom txais lub Moo Zoo ua ke, mas txhais tias Huab Tais Yes Xus rov tshaj Ntuj Lus  tias Huab Tais Tswv Ntuj khuv leej peb tas nrho - Peb qhib peb siab los txais lub Moo Zoo, ces peb haj yam rov ntseeg Ntuj ruaj nreb dua qub.

2 : Hauv Thaj Txi Ntuj mas Huab Tais siv tus Txiv Plig rov hais Huab Tais tej qub lus thooj ib yam nkaus li hmo Yes Xus noj pluas mov kawg – Ua li, nyob hauv nruab nrab peb ,Huab Tais rov foom hmoov zoo rau lub mov mog tias :”Nej sawv  daws txais- Nej noj- Yog kuv lub Cev uas yuav raug puas kom tau pab nej”  
Huab Tais Yes Xus hais tias:”  Nej sawv daws txais.nej haus – Yog lub ntim rau kuv Roj Ntsha cog lus tshiab nyob mus li – Yog roj ntsha uas yuav ntws los daws nej thiab tsoom siv cov txhaum “
Tsis tas li ntawd xwb , Huab Tais rov txhib nws cov thwj tim zoo li no tias:” Nej yuav ua li ntawd kom tau nco txog kuv “
     Cov kwv tij, hauv peb Thaj Txi Ntuj mas Huab Tais Yes Xus muab nws tej kev hlub uas loj tas nrho ,los ua hwj huam yees ntxwv tias lub mov mog txia ntshis ua Huab Tais lub Cev Ntshiab – Ib cov cawv txia ntshis ua Huab Tais Roj Ntsha uas muaj  nqes tas nrho.  Ces tsim nyog nyias yuav txhos caug los hais tias:

HUAB TAIS  YES XUS, KOJ YOG KUV TUS  HUAB  TAIS , KUV TUS TSWV NTUJ    Zam 20:28

NUG :  Thaum peb sib sau uas Thaj Txi Ntuj, mas Huab Tais  puas txhib peb  siab los nrog Huab Tais koom los hawm Ntuj ?

      Peb ua tau qhov ntawd ntag - Peb niaj hnub nco tias   Huab Tais muab nws lub neej los txi Ntuj  pem lub roob Nkos Nkos Tas – Ho hauv Thaj Txi Ntuj, Huab Tais rov muab lub neej txi Ntuj, tsis tu ncua. Huab Tais ib txhij  txais peb  nrog Yes Xus koom siab txi Ntuj ua ke  
  Ua li  peb hais kam zaj nkauj teev Ntuj tias:” Peb zoo siab hlo cev peb lub neej lub siab los nrog Yes Xus txi Ntuj, ua Huab Tais tsaug “

UA NTUJ  TSAUG : Huab Tais Yes Xus, thov koj txais peb lub siab, peb tej hauj peb khwv ua, peb tej kev zoo siab, kev nyuaj siab huv tib si. Thov koj muab tej ntawd huv si los khi rawv rau tus Ntoo Cuam, los hawm peb Txiv nyob saum ntuj
NUG : Ntawv Moo Zoo tseem  qhia peb txog Lub Cim Yug ntxiv lod ?
Hauv Zam Ntawv Moo Zoo mas Yes Xus tshaj lo lus tseeb zoo li no tias :” Kuv yog cov mov muaj txoj sia nqes saum ntuj los. Leej twg noj cov mov no, nws yuav ciaj nyob mus li. Cov mov uas kuv yuav muab pub rau lub qab ntuj neeg noj kom lawv muaj txoj sia thiaj yog kuv lub cev. Kuv lub cev yog ib co tseem txhiam xws noj tiag thiab kuv cov ntshav yog ib yam zoo haus tiag “  Zam 6:51-55

  TEEV  HAWM  HUAB  TAIS  YES  XUS : Huab Tais khuv leej neeg tas nrho,  koj hlub peb tas npaud, koj thiaj tau tsim lub Cim Yug –Peb  ntseeg tias  koj nyob txawm hauv lub Cim Yug tiag  - Tab sis peb lees tias peb ntseeg tsis txaus.  Peb lub siab kuj txias txias . Li cas los , peb tseem nco tias :”Tsis muaj  ib yam uas koj ua tsis tau “ Lus Kas 1:37  -Ua li, peb thov koj xa Leej Ntuj Plig Ntshiab nqes los hauv peb siab- Peb thiaj yuav tshaib nqhis txog lub Cim Yug, tsis tu ncua. Huab Tais khuv leej neeg tas nrho, koj niaj hnub yog peb txoj sia . Thov koj pub ib feem hauv koj tej kev nyiam kev hlub los nqes los hauv peb  lub siab…Ces peb nyias yuav nyob kaj lug kaj nrig hais tau lo lus no tias :”Kuv muaj txoj sia nyob hauv kuv lub cev, Tab sis qhov loj plaws kuj yog  qhov tias Huab Tais Yes Xus Pleev txoj sia ciaj nyob hauv  kuv“  Nkas Las Tias 2:20

HUAB TAIS  YES XUS, KOJ YOG KUV TUS  HUAB  TAIS , KUV TUS TSWV NTUJ

T.P. Txhiaj Foom  omi

Kuv vam tias nej sawv daws yuav nyob zoo li qub.
Los txog tav no mas nej coob leej tau zoo siab twm phau ntawv me me Liaj Luv
Xa Moo.
Nej feem coob yeej xav txais ntxiv, tab sis nyem no peb yuav muab cov zaj tshiab
coj mus tso rau hauv Liaj Luv Xa Moo uas peb npaj yuav luam tawm, kom xwv
nej yuav tau kev nyeem sai.
Hnub no kuv thiaj txhob xwm sau lo puav lus rau nej coob leej.
Thov kom nej sau tej zaj lus tseem ceeb uas phim yuav tso rau hauv Liaj Luv Xa
Moo mus rau peb hauv Zoo Tswv Zov Yaj
Ces thov kom nej xa nej tej zaj SAI SAI , yam li ua ntej ntawm tim 20 lub 6 hlis
2015.
Li ntawd, mas kuv vam tias nej yuav xa tej zaj lus mus fim tsoom kwv tij Hmoob
sawv daws nyob hauv tsab xov xwm Liaj Luv Xa Moo xyoo no.
Ua nej sawv daws tsaug ntau.

TP. Txhiaj Foom o m i

Cov kwv tij, hnub no zoo hnub ,vim tias peb tsoom ntseeg Kav Tos Liv nyob thooj ntiaj teb zoo siab ua hmoov hwm Huab Tais Yes Xus lub siab ntshiab. Peb mam li yuav rov kub siab thov Huab Tais txhiv peb ntawm qhov txhaum, Peb yuav rov kub siab ntseeg tias Huab Yes Xus Yes Xus yog tus cawm ntiaj teb neeg ntawm qhov txhaum
Zoo li, nyias yuav khaws Ntuj lo lus hauv nyias lub siab tias “ Tswv Ntuj Leej Tub nyiam kuv ces nws rov muab nws los txi Ntuj kom nws pab tau kuv” NLT 2:20
Hnub no,phim peb yuav khaws Tswv Ntuj tej Lo Lus tseem ceeb tseg- Yog tej Lus uas hais txog Huab Tais Yes Xus kev hlub neeg thiab kev khuv leej neeg tas nrho..Zoo li tej qib lus no tias
1: : Nej cav lus zoo txog HuabTais- Nws siab zoo, vim nws lub siab hlub tas ib txhiab ib txhis “ NPN 136: 1

2 : “Huab Tais hlub mos nyoos . Nws khuv leej neeg – .Nws tsis pauj rau peb raws li tej txhaum peb ua- Huab Tais txoj kev hlub tsis muaj hnub kawg “ Nkauj Paj Nruag 103
3 : ”Huab Tais lub siab hlub muaj zog tas nrho. Nws lub siab pheej xeeb mus ib txhiab ib txhis “ Nkauj Paj Nruag 117:2
Peb yuav ua li cas thiaj khaws tau Tswv Ntuj tej Lo Lus tseg ?
Peb ua tau ib yam yooj yim tias : Zoo li Hnub Chiv no, yog thaum peb ua Thaj Txi Ntuj mas thov kom nej xaiv ib qib lus,uas yeej raug nej siab kawg nkaus, ces thiaj rov twm qib lis ntawd 3 los 4 zaug
Ib ntsis peb mam li yuav muab siab rau kawm Ntuj qib lus ntawd hauv nruab siab – Zoo li tej qib lus no tias :
Huab Tais hlub mos nyoos . Nws khuv leej neeg – .Nws tsis pauj rau peb raws li tej txhaum peb ua
Cov kwv tij , nyob hauv hauv Ntawv Ntshiab yeej muaj ntau qib lus uas qhia peb txog Huab Tais Yes Xus lub siab ntshiab – Zoo li qib lus no tias : : “Tswv Ntuj txoj kev nyiam yog zoo li no tias : tsis yog peb tau nyiam Tswv Ntuj- .Qhov tseeb mus li no tias : yog Tswv Ntuj tau nyiam peb thiab nws tau xa nws Leej Tub tuaj ua nqe txhiv peb ntawm peb cov txhaum ‘ 1 Zam 4:
Txhais tias : tab txawm peb tsis tsim nyog txais ib yam dab tsi ntawm Tswv Ntuj los, tsis kav Tswv Ntuj siab zoo siab siab dav fo “ tsis pauj rau peb raws li tej txhaum peb ua “
Peb yuav nco ntsoov txog Tswv Ntuj tej lo lus ces peb yuav tsis ntaus siab yau. Tab sis peb yuav ua siab loj siab tawv qhawv – Hos peb haj yam nplua nuj zuj zus hauv kev ntseeg ruaj nreb txog Huab Tais Yes Xus lub siab ntshiab –Peb kuj yuav rov ntseeg txog Tswv Ntuj tej txiaj ntsim kawg nkaus .
= Tsis tas li ntawd xwb: peb yuav khaws lwm qib lus tseem ceeb tias :”
Huab Tais lub siab hlub muaj zog tas nrho. Nws lub siab pheej xeeb mus ib txhiab ib txhis “
Txhais tias : Huab Tais Tswv Ntuj thiab Huab Tais Yes Xus lub siab khuv leej neeg tas nrho kuj ciaj sia tag mus li. Ces peb niaj hnub yuav thov Huab Tais Yes Xus hlub tshua peb, tsis tu ncua
Ua li hnub no, hnub no zoo hnub rau qhov tias : peb ib siab kawm Tswv Ntuj tej qib lus tseg hauv nruab siab. Ces hauv tas lub lis piam tuaj no los tas lub hlis yuav tuaj no, peb yuav rov xav txog tib qib lus ntawd tas siab ntsws.

TEEV HAWM HUAB TAIS YES XUS : ( Nyias hais tau lo lus no hauv nyias lub siab tias
“ Huab Tais khuv leej neeg tas nrho, uas koj nyob pem Tswv Ntuj lub Ceeb Tsheej, koj niaj hnub tseem muab koj txoj sia los txi Ntuj kom tau cawm me yaus dim ntawm qhov txhaum thiab koj txhawb nqa kuv kom xwv kuv coj tau lub neej ntshiab dawb huv zoo cuag li koj.- Huab Tais. kuv niaj hnub yuav tsa muag los ntsia koj uas dai saum tus Ntoo Cuam .- Huab Tais. siab zoo tas nrho , ua koj tsaug ntau. “

T.P. Txhiaj Foom omi

Hnub no mas Tswv Ntuj txhib peb siab kom xwv peb thiaj kub siab ua 2 yam , 1 : Peb yuav ua neeg me 2 : peb yuav tso siab lug rau Huab Tais Yes Xus tas zaj tas zog
1 : Peb yuav ua neeg me . Saib : hnub ntawd Tswv Ntuj hais lo lus dab tsi rau Yob ? Tswv Ntuj hais li no: “Thaum cov dej hiav txwv txhawj hauv tiv txwv los nrov nroo ntws, mas leej twg tau muab cov dej hiav txwv kaw thiab xov ? Puas yog koj ?” Thaum kuv tau hais rau cov dej hiav txwv tias :” Koj yuav tsis txhob mus dhau qhov no
:- Koj cov dej nphau nphwv yuav tsum nyob twj ywm ntawm no”, mas thaum ntawd koj nyob qhov twg ?”
Ua li thaum Yob hnov Tswv Ntuj lo lus mas nws tsis nrog Tswv Ntuj sib cav, xws li yav dhau los. Yob teb rau Tswv Ntuj tias :” Kuv lam tau lam cav xwb ! Kuv cov lus tsis tseem ceeb dab tsi . Kuv yuav teb dab tsi rau koj ? Kuv yuav muab tes los npog kuv qhov ncauj, kom kuv txhob cav koj ntxiv .Kuv tau hais ib zaug. Kuv tsis rov hais zaum ob ntxiv” ( Yob 38:8+11 = Yob 40:4-5 )
Cov kwv tij, yeej muaj tej lub caij uas peb yws yws rau Tswv Ntuj tias :” Tswv Ntuj od ! Tim li cas kuv raug mob li ntawd ? Tim li cas kuv kawm tsis tau ntawv ? Tsam koj hnov qab kuv lauj ?”
Thaum peb hais lo lus yws yws zoo li ntawd, mas zoo cuag li peb tej kev ntseeg txog Tswv Ntuj siab zoo kuj ploj ntais.. Ces peb yuav tsum “ Tab txawm peb tsis to taub Tswv Ntuj tej zaj tswv yim tob npaum li cas ,los kuv yuav tsum rov ntseeg tias : Tswv Ntuj tseem hlub tshua me yaus npaum li qub. Nws yuav tsis tso kuv pov tseg ib zaug li “
Cov kwv tij, phim yuav ua neeg me nyob ntawm Tswv Ntuj lub xub ntiag, thiab nyob ntawm sawv daws lub xub ntiag, ces peb yuav rov coj lub neej nyob tiaj nyob tus..


2 : Peb yuav tso siab lug rau Huab Tais Yes Xus tas zaj tas zog
Hnub ntawd mas Yes Xus thiab nws cov thwj tim nyob hauv nkoj – Lawv mus lawm sab ntug dej tim ub. Txawm muaj ib nthwv cua hlob tuaj .Dej nphau tej niag twv los ntsawj lub nkoj, ces dej los puv lub nkoj . Yes Xus nyob ntawm tog taub hau pem hauv nkoj.Nws tsaug zog, Cov thwj tim tsa Yes Xus sawv. Lawv hais tias :”Xib Hwb, peb yuav tuag ! Cas koj tsis liam faj “-.Yes Xus tsim dheev los . Nws txwv cov cua . Nws hais rau lub hiav txwv tias :” Tswm seeb ! koj ua twj ywm ! “.Ces tam sim ntawd cua tu nrho- Ntuj teb ntsiag to “
Cov kwv tij, yeej muaj tej lub caij uas peb raug kev nyuaj tshaj plaws,Zoo li peb hais tias :” Ob hnub no mas kuv lub neej tsis muaj qab hau ..vim tias nyob hauv kuv tsev sawv daws tsis sib haum,- ib leeg tsis mloog ib leeg – Ib tug tsis mloog ib tug .Sawv daws sib cav sib ceg tag mus li…”
Thaum ntawd peb haj yam tsa muag ntsia Hub Tais,uas nws nyob ntawm peb ib sab ..Nws nrog peb nyob nraim,tsis tu ncua. Ces peb tsuas ua ib yam xwb .Peb yuav tso siab lug rau Huab Tais YesXus tas zaj tas zog tias :” Huab Tais siab zoo, yog tias koj tsis nqes tes los cawm kuv, mas kuv nyob tsis tau “
Cov kwv tij peb thov Huab Tais tas zaj tas zog… Tsuas xav txog peb tej lus thov Huab pab xwb .Huab Tais npo peb dim ntawm peb tej kev nyuaj siab ntxhov plaws’
Tsim peb yuav khaws Huab Tais Yes Xus tej lo lus, uas muaj nqes xws li ib txhab nyiaj txhab kub tias :
“ Nej thov, ces nej yuav tau txais .Nej nrhiav, ces nej yuav ntsib –Nej khob qhov tooj, ces luag yuav qhib rau nej “Mas Tais 7:7 + Yas Kos 5: 16

T.P.Txhiaj Foom omi

Hnub no ,hauv Mas Kos Ntawv Moo Zoo mas Huab Tais Yes Xus qhia tej zaj lus tseem ceeb kawg
Saib : puas phim khaws 2 zaj lus no tseg tias
1 Huab Tais hlub peb sawv daws kawg nkaus
2 Tswv Ntuj ua yam twg kuj tau tas tib si

1 : Huab Tais hlub peb sawv daws kawg nkaus
Hnub ntawd tus neeg uas tuaj cuag Yes Xus, nws zoo siab hais rau Huab Tais : “Xib Hwb ,txij kuv yav hluas los mus ,mas Huab Tais Ntuj 10 Lo Lus Qhia, kuv tau coj nraim tej ntawd.”
“ Yes Xus ntsia tus ntawd”. Huab Tais Yes Xus yog Tswv Ntuj Leej Tub ,nws mam li tsom kwm tau tus neeg ntawd tej siab ntsws, ces Yes Xus paub tias tus neeg ntawd hais qhov tseeb…”tsis yog lam hais”
Thaum ntawd “ Yes Xus hlub tus neeg ntawd”. Huab Tais kuj luag ntxhi - Yes Xus paub qhov tseeb tias” Tus tib neeg twg ntseeg Ntuj thiab coj rawv Tswv Ntuj Lo Lus ,mas nws lub neej ntxim Tswv Ntuj lub siab” –
Yog vim li ntawd ces “Yes Xus hlub tus neeg ntawd”. Yes Xus nco txog Ntuj tej txiaj ntsim tias : Leej Ntuj Plig Ntshiab tau tshoj tus neeg ntawd lub siab, nws mam li mloog tau Huab Tais Ntuj 10 Lo Lus Qhia .

Niaj hnub nyem no, phim yuav nco ntsoov tias :
= Huab Tais tsom kwm peb tej siab ntsws thiab. Tsuas yog peb kub siab mloog Ntuj Lus, ces “Huab Tais thiaj hlub peb thiab “
= Peb yuav nco tias Leej Ntuj Plig Ntshiab niaj hnub tshoj peb lub siab, tsis tu ncua.
= Peb yuav nco txog tus Hauv Paus Xa Lus Paj Lug qib lus no tias:” Nej rau siab ua zoo zuj zus nyob hauv Huab Tais lub luag hauj lwm, vim nej paub tias peb tsis ua hauj lwm dag nyob hauv Huab Tas “ 1 Kos Lis Nthos 15:58
,,,,,,,,,,,,,,,,,, ………………. ,,,,,,,,,,,,,,,,,,,,,,
Tus neeg uas tuaj cuag Yes Xus, nws kuj hnov Huab Tais lo lus tias : “Koj mus, koj muag koj lub cuab tam - Koj muab pub rau cov neeg pluag. Ua li tas, mas koj los raws kuv mog ! “..Tus neeg ntawd hnov Yes Xus lo lus,nws mluas zog”- Yam li nws tsis kam coj Yes Xus lus vim nws yog neeg muaj txiag ntau
…………………………………………………………………………………………
Ib ntsis, 12 tus thwj tim sib tham tias :” Leej twg yuav txais kev cawm neeg tau ?”. Yes Xus lo lus teb mas phim yuav khaws tseg hauv nruab siab tias :

2 :”Yog neeg ua neeg xwb mas tsis tau li .Tab sis ntawm Tswv Ntuj mas ua yam twg kuj tau tas tib si “,
Tsoom kwv tij ,Huab Tais Lo Lus tias :” Tswv Ntuj ua yam twg kuj tau tas tib si” ,mas peb twb tau hnov ntau ntau zaus.
Peb kuj nyob kaj lug kaj nrig khaws Ntuj Lo Lus ntawd tseg hauv nruab siab.
Peb zoo siab ntseeg tias : Huab Tais Tswv Ntuj yog tus tsim ntuj tsim teb yog tus tsim tas puas tsav yam .Tswv Ntuj yog tus muaj hwj huam loj tas nrho.
Tiam sis Ntuj Lo Lus uas haj yam ntxim peb lub siab tshaj plaws thiaj yog Lo Lus no tias : ”Tswv Ntuj yog Txoj Kev Hlub”- 1 Zam 4:8 + qib 16

Tsis tas li ntawd xwb . peb tseem “ntseeg khov kho tias : peb nyob ntawm
Tswv Ntuj tog, yog tog txais kev cawm “ Hes Nplaws 6:9
Txawm li cas los, peb tej siab ntsws tseem khuam rau txoj kev ntshaw nyiaj txiag ntau dhau

Niaj hnub nyem no thiaj phim yuav nco tias:
= Fab hauv peb tus ntsuj tus plig mas zoo li Tswv Ntuj tshaj lo lus qhuab qhia peb tias :”Kuv cov me nyuam ,thov kom nej nco tias : Tej txhab nyiaj txhab kub uas mus raws qhov tseeb thiaj tsis yog tej yam nej pom los tej nyiaj txiag nej suav tau . Tab sis nej tej txhab nyiaj txhab kub uas mus raws qhov tseeb yog qhov tias nej yuav tsum muaj kev nyiam kev hlub puv nej tej siab npo thiab nej yuav “nyiam nej tus Huab Tais Tswv Ntuj tas siab, tas ntsws, tas tswv yim, tas zog” Lus Kas 10:27
= Huab Tais Yes Xus tseem qhuab qhia peb tias : “ Tab txawm yog ib tug neeg nyob hauv txoj kev nplua nuj, los nws txoj sia tsis nyob hauv nws tug “
Lus Kas 12: 15

THOV NTUJ : Huab Tais Leej Txiv, Tswv Ntuj khuv leej neeg tas nrho. Peb ua koj tsaug ntau ,rau qhov tias koj tau xaiv peb ib cov kwv tij Hmoob coob los mus teev hawm koj tib leeg xwb .Li cas los, peb lees tias peb mloog lub Moo Zoo tsis tom thawj .Peb tseem zwm rau txoj kev ntshaw nyiaj txiag ntau dhau . .Thov koj pab xa Leej Ntuj Ntshiab nqes los tshoj peb lub siab ,ces peb yuav rov kub siab nyiam koj “tas siab , tas ntsws, tas tswv yim, tas zog”. Ces peb yuav rov nplua nuj zuj zus hauv peb nruab siab - Peb kuj yuav tau coj lub neej nyob thaj yeeb nyab xeeb, nyob ntawm koj xub ntiag, tsis tu ncua.
Huab Tais Leej Txiv, peb xub ua koj tsaug ntau.”

T.P. Txhiaj Foom omi

Tsoom kwv tij phooj ywg, los txog tav no, mas peb twb tau khaws tej qib lus tseem ceeb hauv NTAWV NTSHIAB ( uas raug peb siab kawg nkaus ).Tej qib lus ntawd kuj kaj peb lub siab kuj yog ib lub ntsiab lus
meej pem hauv tas tsoom ntseeg txog Ntuj, xws li hauv neeg His Xas Lais thiab Huab Tais Yes Xus cov thwj tim.
Hnub no lub Koom Txoos rov pub peb txais qib lus no tias .”Koj yuav nyiam koj tus Huab Tais Tswv Ntuj tas siab tas ntsws, tas tswv yim,tas zog “ Lo lus qhia 2 Koj yuav nyiam tsoom txheeb,ib yam li koj nyiam koj “ Mas Kos 12: 30-31
Mas tus neeg twg txiav siab taug kev nyiam kev hlub mas nws lub neej yeej ntxim Tswv Ntuj lub siab

Qhov 1 tias yus niaj hnub nco ntsoov txog ntau yam muaj nqe uas lwm tus ua kam
Qhov 2 tias : yus ua ntau yam los pab lwm tus kom nws coj tau lub neej nyob tiaj nyob tus . .

1 :yus niaj hnub nco ntsoov txog ntau yam muaj nqe uas lwm tus ua kam :

= Yus cia li lees rau lwm tus tias : “Yog tias koj tsis nrog kuv nyob, mas kuv lub neej tsis muaj qab hau “ Txhais tias : koj hwm luag tej ob cag – koj tsis saib leej twg qis qis- Thaum lwm tus nrog koj tham,mas koj xyiv fab mloog lo lus nws hais . hos koj cia lwm tus nthuav nws zaj lus kom tag
Mas kuv nyiam ua qhov ntawd kawg

== Yus xav twj ywm tias :“ Lwm tus ( uas nrog yus nyob ) _nws ua neeg me nws tsis khav theeb nws tsis muab hlob nws tsis tshua hais lus ntau txog tej yam hauj lwm zoo uas nws ua kam”

== Yus cia li lees rau lwm tus :” Kuv niaj hnub nco tias :Thaum kuv ua tej yam tsis zoo, tsis ncaj rau koj ,los koj tsis pauv siab rau kuv…Txhais tias koj yeej coj rawv Tswv Ntuj Lo Lus tias “Tab txawm kuv fav xeeb rau koj , los koj tseem pheej xeeb thiab koj tseem ua ncaj rau kuv vim tias koj yuav rov thim koj tsis tau “ 2 Tis Mos Tes 2 : 13

Li ntawd mas yus niaj hnub nco ntsoov txog ntau yam muaj nqe uas lwm tus ua kam –

PAJ NRUAG

Qhov 2 tias : yus ua ntau ntau yam los pab lwm tus kom nws coj tau lub neej nyob tiaj nyob tus .
Yus xav txog tej yam no tias :

= Yus niaj hnub pab lwm tus kom xwv nws ua tau neej luag ntxhi mus li.

= Hnub twg kuv cog lus tias yuav ua ib yam tseem ceeb los pab nws,mas kuv yeej ua qhov ntawd tsis tu ncua .

= Kuv niaj hnub qhuas txog txhua txhia yam muaj nqe uas lwm tus ua kiag .

= Thaum lwm tus ua ib yam tsis zoo rau kuv,mas kuv ib siab zam txim rau nws ntag.

= Kuv zoo siab txhawb nqa lwm tus lub siab.kom xwv nws rov pib dua lub neej khov kho dua qub.

== Thaum lwm tus zoo siab heev ,mas kuv ib txhij nrog nws koom zoo siab thiab

= Thaum lwm tus raug kev nyuaj siab heev mas kuv ib txhij nrog nws koom raug kev nyuaj siab thiab
( Los Mas 12: 15 - 1 Kos Lis Nthos 12: 26

= Kuv zoo siab pab lwm tus kom xwv Huab Tais Yes Xus kev thaj yeeb nyab xeeb ci ntsa iab nqes los kaj txhua txhia yam hauv nws lub neej ,

TEEV NTUJ : :” Huab Tais Tswv Ntuj,tus khuv leej neeg tas nrho. Koj yog tus pub Leej Tswv Yim Ntshiab rau peb .Ua li, thov koj hliv Tswv Ntuj txoj kev nyiam kev hlub nqes los puv peb tej siab npo “ ( Los Mas 5: 5 )

ZAJ NKAUJ TEEV NTUJ

Thaum peb nyiam peb hlub…

(Zaj nkauj teev Ntuj : LEEJ NTUJ PLIG, KOJ LOS MAS….

NPN : Kuv nyob hauv qab tiv txwv…

Zaj PEB TXIV
KOJ NYOB KAJ LUG , MAB LIAB