Xov Xwm tuaj ntawm Is Ntos Nes Xias teb tuaj ( Indonesia )

Tsab ntawv xov xwm txawv teb chaws nyob Is Ntos Nes Xias teb tshaj ib zag tias : muaj 10 tus neeg tau puav tua ib tug ntxhw qus uas muaj 15 xyoos. Tus ntxhw ntawd yog hom ntxhw hu ua Xus Mas Ras uas yog hom ntxhw me tshaj cov nyob As Xias teb. Kuj yog ib hom ntxhw uas zim txwv no twb yuav tu noob lawm. Cov tub tseem hwv hais tias : cov neeg uas nyiag tua ntxhw, mas lawv yog ib co neeg lim hiam heev. Vim lawv muab tus ntxhw tua tuag, lawv txiav 2 tug kaus ntxhw. Lawv muab tus ntxhw cov nqaij hlais ib thooj thooj coj mus pov hauv ib tug dej uas ze ntawm qhov chaw lawv tua tus ntxhw tuag. Ces thiaj muaj neeg mus pom cov nqaij ntxhw nyob hauv dej. Cov tseem hwv Is Ntos Nes Xias tau xa tub ceev xwm mus tshuaj xwm nrhiav ntes cov neeg nyiag tua ntxhw lawm. Tus ntxhw ntawd raug tua tuag nyob hauv lub xeev As Ntses uas nyob Is Ntos Nes Xias qaum teb. Cov pwm tsav txuag xyoob ntoo thiab txuag tsiaj txhu hais tias : tam sim no cov ntxhw me ntawd tsuas tshuav 2,400 tawm tus nyob hauv Is Ntos Nes Xias teb lawm xwb. Cov ntxhw tuag 85 feem pua yog raug neeg nyiag tua txiav kaus coj mus muag. Tsis tas li ntawd, zim txwv no cov hav zoov nyob Is Ntos Nes Xias teb raug ntov ntau zuj zus. Ua rau tej tsiaj qus muaj chaw nkaum thiab nrhiav noj tsis tau. Vim li ntawd, cov ntxhw thiab tsov thiaj nkag los nrhiav noj nyob ze tej zej zog. Cov hav zoov nyob Is Ntos Nes Xias teb feem ntau cov ntoo raug neeg nyiag ntov mus muag, hos cov av raug cov tseem hwv muab ua chaw cog txhiam xws tas.