HMOOB NPAM NAJ XEES

Maiv Tooj,

ua cas koj yuav khaws tau cov duab kho siab ua luaj, yog kuv niam kuv txiv tej qub zog, ua rau kuv txaus siab heev li.Ua koj tsaug os.

Maiv Tooj,

Hais txog koj thiab koj tus niam hluas Ntsuab, koj niam koj txiv kuv niam ob yeej paub zoo thiab lawv yeej nyob ua ke os. Kuv los paub koj thiab tab sis kuv yog phaum yau lawm koj tsis paub kuv xwb. Kuv txiv yog Ntxoov Vaj Xyooj, Xwb Hwb Ntsum Hauj Xyooj nyob npam laj Xees tus tij laug hlob kiag mas. Npam laj xeem ces yog kuv niam kuv txiv tej qub zog.

Kuv zoo siab uas koj yog ib tug tseem ceeb ntawm peb cov hmoob npam laj xees ua tau khaws peb tej keev kwm zoo thiab nyiam Tswv Ntuj. Koj txoj hmoov zoo.

Wow......Bao, ua cas koj yog cov neeg nyob nram peb fresno no xwb yom, koj cov dab laug thiab koj txiv lawv peb sib paub zoo heev li nyob nram no, zoo siab os nawv, xav tias koj yog cov hmoob Catholic nyob sab xeev no os.

Nyob zoo Bao XMary,

Wow...! Tiag ntag, koj yog dab laug Ntxoov Vaj ntxhais los!
Tos kuv saib koj muaj ib tso zoo li koj tus niam laus Xia!
Kuv paub Xia thiab Xauv nkawd zoo dua, dua li nej cov yau ces kuv nco tsis zoo lawm.
Nyob tim no, Xauv peb nyob tsis deb tsis ze, peb kuj tau sib ntsib zaum puav thiab. Xia ces nws nyob deb dua, peb sib ntsib tsawg heev...Kuv yeej tseem nco ntsoov koj niam thiab koj txiv, los mus rau koj txiv ntxawm Vam Txoov lawv, tab sis nco tsis tshua tau lawv ntsej muag lawm...Kuv tseem nco tau thaum peb nyuam qhuav khiav los rau Naj Vuaj, peb tsis muaj zaub mov noj, koj niam koj txiv mus rau koj txiv ntxawm Vam Txoov lawv keev coj kuv niam mus ntais nej tej pob kws, ev nej tej dib taub thiab de nej tej zaub los rau peb noj. Nej tseem muab nplej muab mov rau peb noj thawm plaws xyoo. Yam peb twb tsis nco txhob nco txhawj tias peb los tshiab li...Ua li koj yug nyob Naj Vuaj los yog nyob Naj Ngos?

Kuv zoo siab uas Tswj Ntuj lub hwj huam coj tau Maiv Paj Lug wb los sib ntsib, ces ho qaws tau XH.Npuag Tub thiab...Hnub no peb muaj coob leej taug Tswv Ntuj txoj kev los txog rau lub Tsev no...Yog ib lub txiaj ntsim zoo kawg nkaus...Kuv ua Tswv Ntuj tsaug...

Bao, kuv nrhiav tau koj niam ntxawm Ntsum Hauj hlob ib daim duab mas ua rau Ntaj zoo siab kawg. Vim Ntaj tsis tau pom dua nws niam...Kuj muaj ib tug Hmoob Thoj tuaj nrhiav tau nws txiv thiab...

Yog kawg os, Xwb Hwb Npuag Tub,
kuv cov neeg nyob nram koj tag lawm. Yog hais txoj kev ntseeg xwb mas kuv yeej xav khiav los nrog nej nyob nram koj ntag. Tab sis kuj tsis zoo li xab thiab tej zaum Tswv Ntuj kuj cia nyob li nov saib yus txoj kev ntseeg puas yuav ruaj khov.

Thaum ub xyoo 1982 mus txog 90 ntawd kuv kuj nyob nram koj thiab tab sis nyob Madera ce peb yeej tuaj church Fresno hmong tas li. Tab sis peb khiav rov los rau Green Bay xyoo 1990 lawm.Vim yog raws kwv tij.

Nyob nram koj hos pab txhawb kuv cov neeg kom lawv txoj kev ntseeg ho loj hlob thiab nej ho thov Ntuj rau peb thiab os

Maiv Tooj e,

Kuv ces yug nyob Phas Dees no os. kuv yug xyoo 1964 lub 11 hli ntawd os.

Thaum peb nyob naj vuaj peb tuaj nram naj ywj es kuv twb nrog kuv tus niam laus xia, thiab koj cov viv ncaus Nrhiav thiab Mab lawv tuaj hauv nej tsev tab sis tsis pom koj, kuv pom ntsuab xwb, kuv pom koj niam thiab.

Zoo siab uas Tswv Ntuj coj kuv tuaj ntsib nej sawv daws, cov neeg nyb hauv no thiab sau ntawd hauv no kuv kuv paub lawv coob thiab. Zoo siab uas nej sawv daws tau tsim lub forum no peb thiaj tau tuaj sib ntsib thiab sib txhawv kev ntseeg.

Yog ntsib kuv dab Xauv no ho hais tias koj ntsib kuv nyb hauv nov thiab no os.

Xwb Hwb Npuag Tub,

ua koj tsaug uas koj tseem pom tau tias kuv tsev neeg yob ib tsev neeg zoo. Kuv zoo siab uas koj tau txhawm nqa kuv tsev neeg.Ua rau kuv muaj zog.

Nyob zoo Maiv Tooj,

Kuv yog koj tus dab laug Cheeb Xyooj, kuv lub npe laus
muab hloov hu ua Kwm Xeeb Xyooj lawm. Hnub no kuv tau tuaj txog koj lub vaj tsev, tu tau du lug, muaj chaw txawb chaw
rau, muab qab muaj hau. Nrog koj zoo siab, thiab qhuas koj
txoj kev txawj ntse, paub tab, thiab muaj peev xwm.

Kuv xav muab kuv zaj dab neeg Keeb Kwm Hmoob Npam Naj Vas tso rau hauv no. Tab sis kub tsis paub tso, es kuv tso tsis tau.
Koj qhia me ntsis kev tso text rau hauv koj lub tsev no?
Vim kuv tsis keej siv tej no ntau.

Hmoob Luam Nabthas cev tsoos tsho tshiab tam sim no
Zaj Tsav Xwm Contents:

1. Keeb Kwm zos Npam Naj Vas
2. Npe cov thawj coj nyob thaj tsam Npam Naj Vas
3. Keeb Kwm Hmoob tsiv los nyob Npam Naj Vas
4. Xeev Luam Nabthas poob rau Nplog tog sab laug
5. Hmoob Luam Nabthas sawv ua rog CIA
6. Lub nroog Naj Ywj [Nam Yu Lima site 118A]
7. Tseem Hwv Nplog pawg tub rog nqe 1 nyob Luam Nabthas
8. Tseem Hwv Nplog cov thawj coj tub rog tswj Naj Ywj
9. Naj Ywj poob rau Nplog tog sab laug xyoo 1972
10. Xeev Luam Nabthas poob rau Nplog sab laug zaum ob
11. Lub yeej Thoj nam Npab Toos[ Ban Thong Refugee Camp]
12. Keeb kwm Hmoob [Hmong History Time Line]
13. Nom tswv Thaib kaw Yeej Thoj Nam
14. Hmoob kev tuaj ua neej nyob tebchaws Amelikas

Tus sau yog: Kwm Xeeb Xyooj [Seng Xiong]
Copyright 2011. All rights reverved

Keeb Kwm Hmoob Luam Nabthas ຫຼວງນໍ້າທາ.
Keeb Kwm lub Zos Npam Naj Vas yog tshwm sim los li no.
Lub zos Npam Naj Xees yog zos Mab Daum [Ban Namsing] zos dej tsov ntxhuav.
Lub zos Npam Naj Xees no cov Mab Daum nyob los tau ntau pua xyoo lawm.
Lub zos Npam Naj Vas [Ban Namvang] yog Hmoob lub zos. Ob lub zos no nyob
Nrug sib deb li 15 miles. lub zos Npam Naj Vas nyob rau sab hnub tuaj qab teb.

Ua ntej no kuv yuav los hais txog cov zos Hmoob uas muaj nyob lub xeev Luam
Nabthas txij xyoo 1975 rov hauv li nram qab no:

1. Lub zos Tiaj Xyoob Ntxhws, Lub zos no yog thawj lub zos Hmoob los pib
nyob, Kws yees xyoo 1880AD. Hmoob los nyob tau tsis ntev xwb. Vim
Mab Daum tau muab Hmoob caum tawm mus lawm.
2. Lub zos Moj Sab, Hmoob mus nyob tom qab Fab Kis tau tso cai rau Hmoob
Mus nyob, Kwv yees xyoo 1880AD.
3. Lub zos Npam Naj Vas (Ban Nam Vang). Hmoob khiav tom lub zos Mob Sab
los nyob, kwv Yees li xyoo 1895.
4. Lub zos Roob Paj Iab, yog cov Hmoob Xyooj tsiv tawm ntawm lub zos
Npam Naj Vas mus nyob, nrug deb lub zos Npam Najvas li 1 mile rau sab
qab teb.
5. Lub zos Tshiab, cov Hmoob Thoj tsiv tim lub zos Npam Naj Vas los nyob,
Nrug deb lub zos Npam Naj Vas 5 miles rov rau sab qab teb.
6. Lub zos Pas Zaj, [Looj Thaj] yog cov Hmoob Yaj tsiv tawm ntawm lu zos
Npam Naj Vas mus nyob, nrug deb li 4 miles rov rau sab qab teb.
7. Lub zos Pas Xees Lees, Yog cov Hmoob Xyooj tsiv tawm ntawm lub zos
Npam Najvas mus nyob, nyob rov sab qab teb kwv yees 15 miles.
8. Lub Zos Pas Kha[Ban Pang Kha] Yog yawg Xaiv Yob Yaj tsiv tawm ntawm
Lub zos Pas Xees Lees mus nyob, nyob nrug deb ntawm lub zos Pas Xees
Lees li 1 mile rau sab qab teb.
9. Lub zos Npam Naj Cib, yog Vam Tub Thoj tsiv tawm ntawm lub zos
Npam Najvas los nyob.
10. Lub Zos Roob Txhia, Yog Yawg Lis Xeeb Xais tsiv sab Toj Kub kees Nees los
Nyob.
11. Lub Zos Pus Xab[Ban Phu Xang] yog cov Hmoob Yaj tsiv ntawm lub zos Looj
Thaj mus nyob.
12. Lub Zos Tob Poos[Ban Tao Pune] yog cov Hmoob Catholic tawm ntawm lub
zos Npam Naj Vas tsiv mus nyob yog xyoo 1961. Yog Txiv Plig Vaj Pov coj cov
Hmoob Catholic mus nyob txog xyoo 1962.
13. Lub Zos Tuam Hem Sab [Ban Dongving] Yog yawg koob Ntsuab cai Yaj,
Thiab Nyiaj Yob Yaj tsiv tawm lub zos Moj Sab mus nyob.
14. Lub Zos Toj kub Kees Nees [Npam Kees Nees]
15. Lub Zos Pheej Hauj[Ban Phin Ho] Hmoob Hawb, thiab Hmoob Thoj los nyob
kwv yees xyoo 1870
16. Lub zos Nab Npus
17. Lub zos Naj Las[Ban Nam La]
18. Lub zos Pab Twb Lwb
19. lub zos Naj Vuaj[Ban Na Wuo]
20. Lub zos Npam Pus Thav[Ban Phu Tha]
21. Lub zos Naj Ngos[Ban Nam Ngao]
22. Lub zos Naj Phes [Ban Nam Phet]
23. Lub zos Roob Phas Dees[Ban Phu Pha Dang]
24. Lub zos Xub Yoob
25. Lub zos Phas Oos[Ban Pha Ong]
26. Lub zos Naj Yoob[Ban Namyon]
27. Zos Hav Tsov
28. Lub zos Tsua Luv
29. Lub zos Naj Mais
30. Lub zos Quav Npua
31. Lub zos Nyiaj Ntxhim
32. Lub zos Tshav Nyuj
33. Lub zos Ciaj Coob
34. Lub zos Xas Xoob

Luam Nabthas muaj txog ntau haiv neeg nyob koom ua ib ke

Lub Xeev Luam Nabthas muaj txog 34 haiv neeg los nyob ua ke sib koom tebchaws
Nyob ua kev sib raug zoo koom ua ib lub xeev. Cov haiv neeg muaj li nram no:
Lao, Hmong, Akha, Mien, Samtao, Thai Dang, Thai Dam, Thai Lu, Thai Nuea,
Thai khao, Thai Kalom, Khamu, Lamet, Lahu, Mouser, Thai Yuan, Red Thai,
Lanten, Rok, Oo, Lao Bit, Kue.


Lub zos Npam Naj Xees yog lub zos niaj hnub no Hmoob nyob

Photo by Seng Xiong 2011

Raws li Npuag Vas Vwj, thiab Nyiaj Kawm Vwj tau hais mas ntau xyoo dhau los
nomtswv Nplog tau hais kom lawv nqes mus nyob nram teb tiag, ntawm ntug
kev tsheb ze Tob Poos. Tab sis thaum lawv mus nyob nram ua rau lawv muaj
mob heev, thiab ua rau lawv cov neeg tau tuag. Yog li ntawd lawv thiaj cia li
tsis nce rov los nyob ntawm Mab Daum lub qub zos no. Muaj 2 lub zos nyob ua
ke, ib lub yog Hmoob, muaj ib lub yog cov Kwv Txhoob. Koom ib tug nai ban.
Lawv ua liaj ua teb noj, thiab nyob li qub tsis hloov ntau li. Nom tswv Nplog
Tuaj ua tau o blub tsev kawm ntawv rau lawv lub zos no

Cov Mab Daum nyob lub zos no tau raug tshais mus nyob nram teb tiag tas
Lawm, lawv mus tsim zoo vaj tsev, thiab ua liab, cog ntoo yas phas las, lawv
Muaj kev vam meej ntau dua peb cov Hmoob uas nyob pem roob.
This is the present map

Lub zos Npam Naj Vas yog ib lub zos Hmoob nyob toj roob siab nyob sab qab
teb li 80 Miles deb lub nroog Luam Nabthas, thiab 100 miles sab qaum teb ntawm
Lub nroog Houei Xay [Bo Keo.]

Npe cov txwj laug [Nai Ban] Saib thaj tsam no 1880 - 1975

1. Nyiaj Yob Yaj kws yees xyoo 1881
2. Nyiaj Txoov Yaj
3. Nom Phaj Xyooj
4. Ntsuab Lwv Yaj
5. Zoov Laum Yaj
6. Ntsum Ntxawg Yaj
7. Vam Lwv Xyooj
8. Ntsum Xeev Thoj
9. Xaiv Tub Thoj
10. Tsuj Xwm Xyooj
11. Nchaiv Yis Xyooj 1950 - 1954
12. Suav Lwm Thoj 1954 – 1962
13. Major Vam Meej Xyoo [Xyooj Nraug] yog tus coj tag nrho Hmoob nyob
Sab tebchaws Luam Nabthas txij xyoo 1963 txog 1975.
14. Luetenant Sang Khammy [Nom Pov Yaj] yog Hmoob Luam Nabtha thawj
Tug tub rog Fab Kis Nws nyob lub zos Tuam Hem Sab. Sang Khamy yog
Yawg Koob Nyiaj Yob Yaj tus tub Xeeb Ntxwv

Txheej laus thaum ub mas lawv ntse heev, lawv txawj hais paj lug, thiab Lawv hais
plaub ntug mas lawv hais cai paj lug. Txheej no peb tsis paub, Thiab khaws tsis tau
li lawm. Cov laus thaum ub lawv puav leej paub lus Suav zoo.

Keeb Kwm Hmoob Khiav los nyob lub zos Npam Naj Vas

Raws hais mas twb tau muaj ib pab los txeem rau lub tebchaws Npam Naj Xees
Lawm. Tab sis vim Plhuab Nyuab tsis pub nyob, ces thiaj khiav mus rau lwm qhov
Lawm. Pab nram no yog pab thib 2 uas tau los pib nyob rau lub thaj tsam no:

Kwv yees li xyoo 1880AD tau muaj ib pab yawg koob: Ntsuab Cai Yaj, Nyiaj Yob Yaj,
Ntxoov Yias Yaj, Ntsum Tuam Yaj, Nplaib Ntxhais Yaj, thiab Ntsuab Maim Muas.
Lawv cov yawg koob no tau coj ib pab Hmoob khiav los nyob ntawm lub dawm yuav
mus lawm nram tiaj xyoob ntxhws ze ze ntawm lub zos Npam Naj Xees. Lawv cab nyuj
cab nees thiab los so ntawm lub dawm ntawd, Cov Mab Daum paub, thiab cov Mab
Daum tsis pub lawv nyob, Mab daum thiaj li tau ntau nruas dub nruas kub twg caum ,
tua phom nrov nroo ntws ib tog tuaj caum kom Hmoob tawm, thiab muab cov laus uas
khiav tsis taus muab pav thiab muab kwv, thiab muab ev coj mus rau nram lub zos Qhov
Hmoov Sib [Tao Pun]. Hmoob thiaj li tau khiav taug kev mus so ze ntawm lub nroog Pus
Khuas [Viang Phu Kha], thiab Hmoob tau mus ua tsev pheeb suab, thiab mus thov mov
ntawm cov Puab Yib tom nroog los noj.


Muaj ib hnub Fab Kis tus Commissioner tus poj niam tau caij nees tuaj ncig ua si,
thiaj nug Hmoob hais tias, yog ua li cas nej thiaj los nyob li no? Hmoob thiaj teb hais
tias, peb tau tsis los nyob rau thaj tsam ze lub zos Npam Naj Xees, tab sis Plhuab
Nyuab tsis pub peb nyob, thiab muab peb raws tawm. Yog li peb thiaj tau khiav los
nyob ntawm no. Tus pojniam Fab Kis thiaj hias tias yog li ntawd ces nej yuav tau
mus ntsib thaj Commonsay [Commissioner]. Lawv thiaj tau mus ntsib tus nom
Fab Kis, nws thiaj li hais tias yog nej muab nej 3 tug txiv nees zoo zoo nkauj rau kuv
mas kuv mam coj nej mus hais Mab Daum kom cia nej nyob. Hmoob thiaj li pom zoo
muab Hmoob 3 tug txiv nees uas rog zoo nkauj pub rau Fab Kis tus nom.

Fab kis tus Commissioner thiaj li tau caij nees nrog Hmoob mus ntsib cov Mab Daum
pem lub zos Npam Naj Xees [Ban Namsing]. Thaum mus txog lawm nws tau hu tag
nrho cov Mab Daum tuaj nrog nws sab laj. Nws tau nug seb leej twg yog tus tso cai
kom lawv raws Hmoob khiav, tsis pub Hmoob nyob? Nws taw tes rau txhua tus, tab
sis tus twg los tsis kam lees, thiaj muaj ib tug tau taw tes rau Ai Nye tus thawj hau zos,
Nws thiaj tau lees hais tias nws tau ua tiag, vim lawv yuav txuag lawv tej hav xyoob
Hav ntoos tsis xav pub neeg los txeeb. Thaj commissioner thiaj hais tias tej tebchaw
No yog Huab Tais Npog li av, es yuav tau muab rau Hmoob nyob, thiab cia Hmoob pab
Them se rau Fab Kis. Yog li ntawd thaj commonsay thiaj li taw tes kom Hmoob mus nyob
tim lub Roob Moj Sab. Lub caij ntawd mas lub roob Moj Sab yog hav zoov nuj txeeg tsaus
nti, thiab yog hav kav theej nkag mus tsis txeem li. Thaj commissioner thiaj yuam kom
Mab daum coj Hmoob kev nce mus txeem lub Roob Moj Sab, Mab Daum coj mus txog
Tim ib nta toj xwb ces mab daum rov qab los lawm. Hmoob mam txeem mus nkag
rau lub Roob Moj sab, Hmoob mus nyob rau ntawm lub pas dej Co, vim qhov ntawd thiaj
muaj dej txhaw me ntsis xwb. Lawv thiaj los ua noj ua haus nyob rau lub roob Moj Sab.
Lub Roob Mob Sab thaum lawv pib los nyob yog hav zoo nuj txeeg, muaj twj kum nyob.
Tab sis Hmoob los nyob tau kwv yees li ib tiam neej xwb, lub roob Moj Sab dhau mus ua
Suab puam hav nqeeb, thiab tsis muaj ntoo li lawm, los txog niaj hnub no los
Tseem zoo li qub yeej ciaj tsis tau hav zoov ntxiv lawm

Lawv los nyob lub Roob Mob Sab tau ntau lub xyoo. Tsis ntev ces lawv cov thawj coj
Tau sib txeeb ua hau ces lawv hais tsis sib haum thiab tau sib ntaus. Thiaj ua rau lawv
Sib tawg nyias tsiv mus nyob nyias ib lub zos. Yawg Ntsuab Maim Muas khiav rov mus
nyob Roob Nqeeb, Ntsum Tuam Yaj khia mus nyob Roob Tuam Hem Sab, yawg Nom
Phaj Xyooj khiav mus nyob lub zos Npam Naj Vas. Lub caij no yawg Ntsum Xeev Thoj
Tau khiav teb chaws Naj Mais los nrog Nom phaj Xyooj lawv pab Hmoob Xyooj nyob
Ua ke rau lub zos Npam Naj Vas. Ntsum Xeev Thoj lawv yog cov Hmoob Dub, Nom
Phaj Xyooj yog cov Hmoob Ntsuab.

Thaum lub caij ntawm mas luag tsuas cav hais tias lub roob Mob Sab zoo yaj yeeb,
Yeeb Mas zoo tshaj plaws li nplooj yeeb zoo qhwv mov. Yog li no yawg Zoov Xeeb
Xyooj, thiab Leej Xyooj yog cov Hmoob dawb nyob lub zos Toj Kub Kees Nees thiaj
tau tuaj saib, thiab pom hais tias muaj tiag, yog ntov hav zoov nuj txeeg ua yaj yeej
mas zoo kawg, nplooj yeeb dav zoo qhwv mov tiag. Ces ob tug txawm tau khiav Los
nrog lawv nyob lub zos Npam NajVas, tom qab ib xyoos ntxiv ces lawv thiaj rov los
tos peb Yawg uas yog Yawg Ntxoov Huas Xyooj nyob lub zos Toj Kub Kees Nees los
nrog Lawv nyob.

Lub Roob Moj Sab muaj lub moo ncha mus txog Suav teb Yunan, Yog li no txhua lub
xyoo thaum Hmoob lub paj tsiab 30 mas Suav tuaj nqus yaj yeeb coob kawg, Suav
thauj nyiaj choj, thiab ntaub xov tuaj pauv yaj yeej. Ib tug Suav los pav mas muaj txog
10 tawm tus nees tuaj ncig Hmoob tej zos thaj tsam lub Zos Npam NajVas. Tab sis lub
Zos Npam NajVas yog lub Suav tuaj ua ntej tshaj lwm lub. Tam sim no Nomtswv Nplog
Txwv tsis pub Hmoob mus ua yaj yeeb li lawm. Yog li no Lub roob Moj Sab thiaj tsis muaj
Neeg mus ncig ntau li lawm.

Lub caij no yog yawg Ntsum Xeev Thoj ua tus hau zos. Tab sis thaum yawg Ntsum
Xeev muaj mob lawm ces thiaj muab yawg Xaiv Tub Thoj los ua tus hau zos, Xaiv Tub
Thoj ua hau zos tau ntau lub xyoo, thiaj muab hloov rau Nchaiv Yis Xyooj ua. Kwv yees
xyoo 1955 Nchaiv Yis tau tsiv mus rau Phwv Cis Theeb, thiab tau muab tso rau Suav
Lwm Thoj ua tus tuav los txog hnub lub tebchaws poob rau tog nom sab laug xyoo 1962.

Tom qab no lawv huaj vam coob tuaj, ces yawg Zoov Laum Yaj thiaj coj ib pab cov
Hmoob Yaj khiam mus ua zos nyob Looj Thaj, thiaj tseg cov Hmoob Xyooj Hmoob
Dawb nrog cov Hmoob Thoj nyob lub zos Npam Naj Vas lawm xwb. Thaum ntawm
muaj yawg Xaiv Yob Yaj Khiav los nrog yawg Zoov Laum lawv nyob lawm thiab. Nyob
tsis ntev ces yawg Zoov Laum tsiv mus ua zos rau lub zos Pas Xees Lees nrog yawg
Ntsum Tuam Xyooj nyob, nws nyob tsis ntev ces nws tau tsiv mus ua zos nyob lub zos
Pas Khas. Tom qab no lub zos Pas khas yog cov Hmoob Xyooj nyob. Yawg Vam Tub Thoj
yog tus mus tsim lub zos Npam Naj Cib. Tom qab no yog cov kwv Tij Hmoob Muas khiav
los nyob lub zos no tau li ib tiam neej thiab.
Kuv tau sau hais txog lub Zos Npam Naj Vas ntau xwb, tsis hais txog lwm lub zos.
Vim lub zos no yog lub muaj ntau tus tau mus kawm ntawv, thiab tau sawv nrog
Luag ua laj kam tej kam chaw.

Cov kwv tij uas tau qhia zaj dab neeg Hmoob tsiv los nyob Npam Naj Vas es kuv thiaj
muab los sau ua dab neeg rau sawv daws tau khaws tseg, yog cov muaj npe li nram no:
1. Nyiaj Kawm Yaj nyob Npam Naj Xees, Luam Nabthas
2. Ntsum Hauj Xyooj nyob Fresno, California
3. Vam Meej Xyooj nyob Atwater, California
4. Npuag Vas Vwj nyob Npam Naj Xees, Luam Nabthas
5. Nom Phaj Xyooj nyob Dan Kang, Luam Nabthas
Yog nej tsis pab qhia ces kuv yuav sau tsis tau zaj dab neeg los qhia rau cov xeeb
leej xeeb ntxwv tau paub txog peb keeb kwm yav tag los li.
Kuv thov ua nej sawv daws tsaug.

Kuv yog Kwm Xeeb Xyooj, lub npe hluas niam txiv tis hu ua Cheeb Xyooj.
Lub npe ua laj kam official name yog [Seng Xiong]
Ban NamVang

Daim Duab no yog lub zos Npam Naj Vas, Tam sim Photo by Seng Xiong
no tsis muaj neeg nyob lawm, yog hav zoo lawm.


Lub zos Tob Poos Ban Tao Pune

Photo by Seng Xiong 2011

To: Txawj Teem Thoj
Lyon, France\\
22/03/2018

Zoo siab ntau uas koj yog ib tug tub txo hwj chim tseem xav nrog peb cov laus laus li kuv tham thiab nug txog tej yam neej neeg peb tej laus yav dhau los lawm.

Koj nug me ntsis txog hais tias: Kev kawm ntawv lubcaij ntawd, lub hom phiaj yog kawm los ua dab tsi? thiab puas tau mus kawm zoo li tej mab sua?

Kub teb rau koj raws li kuv tus kheej xwb. Kuv yug los nyob lub zos Roob Paj Iab (Zos Nrab) Npam Naj Vas, Toj Xeem Pus Khuas, xeev luam Nab Thas xyoo 1947, kuv muaj 2 xyoos xwb ces kuv txiv tau tso peb tseg lawm, tseg peb rau kuv niam ib leeg tus nrog kuv 3 tug tij laug thiab 2 tug muam.

Thaum kuv tseem me nyuam yau xwb, kuv pom tej tus txawj ntawv, txawj hais lus Nplog, thiab pom tej tus xib hwb qhia ntawv hnav ce ris tsho lub tsho dawb, nrog lub ris dub mas kuv ntshaw thiab xav hais tias kheev lam ib hnub twg kuv zoo li nws.

Xyoo 1958 Xib Hwb Hall uas yog ib tug pastor ntawm cov Seven Day Adventis tau tuaj qhia txoj moo zoo txoh peb lub zos Npam Naj Vas. Thiaj tuaj coj tau peb ib pab tub hluas mus kawm ntawv nyob nrooh Luam Nab Thas. Kuv uas yog ib tug tau mus kawm ntawv nrog thawj pab tub hluas Hmoob, thiab kuv yoh tus yau tshaj tag nrho.

Kuv thaum kuv loj los xeev xwm, kuv nyiaj tshuab rab ntsia, rab nplaim, ncas , thiab ntshaw kom txawj qeej, tab sis txom nyem heev rab qeej xwb yeej yuav tsis tau los xyaum. Thiab kuv tshaw kom txawj ntawv, thiab tsis xav khwv ua liab ua teb ntov ntoo li lub neej Hmoob es khwv tag lub neej, luaj teb nto ntoo ib xyoos dhau ib xyoo los tseem tshaib mov tsis txaus noj qeev. Kuv mus kawm ntawv mas kuv xav kom tau ua ib tug xib hwb qhia ntawv rau me nyuam yaus. Tab sis lub teb chaws tsis thaj yeeb ces peb lub xeev Luam Nab Thas poob rau Koom Sam xyoo 1962, Peb thiaj tau tawg rog khiav los mus nyob lub yeej Phas Dees (Roob Suv Ntsim) sawv daws los mus pib ua tug rog rau CIA. Los txog xyoo 1963 lub 7 hli, CIA tau xaiv peb cov tub hluas ua paub me ntsis ntawv Nplog mus kawm ua nais xaim nyob Thaib teb, kuv thiaj yog ib tug ntawm peb 8 leej tau mus kawm ua nais xaim. Thiab rov los ua hauj lwm rau CIA thiab Nom Nplog.

Xyoo 1968 Kuv kuj tau raug xaiv xa rov mus kawm elecronic, kho cov xaim uas yog Military Radio Communication nyob Thaib teb tau ib xyoos nkaus. Thaum kawm tag ces rov qab los ua tub rog txog lub caij lub teb chaws poob rau koom sam lawm xwb. Ces tsis muaj lub caij yuav tau mus kawm ntawv ntxiv kom tau mus qeb siab li lawm.

Lub caij peb tiam ntawd mas tej tsev qhia ntawv yeej tsis muaj tuaj txog peb zej zos, thiab tsis muaj tsev kawm ntawv mus txog qeb siab hlo li, Tej nom tswv yeej qheb rooj rau txhua hais neeg mus kawm ntawv, tab sis yog tsis muaj nyiaj ces yeej mus kawm tsis tau ntawv nyob nroog

Thaum tuaj txog teb chaws Amelikas. Kuv muaj lub hom phiaj xav mus kawm ua ib tug kws kho TV, Vim kwv twb tau kawm nyob Thaib teb lawm, ces kuv thiaj mus kawm 2 xyoo, thiab los ua hauj lwm los txog hnub so lawm xwb.

Kuv zoo siab thiab txaus siab yuav piav txhua yam rau tej xeeb leej xeeb ntxuv tau paub txog tej qub neej thiab lub neej tshiab, kom peb thiab puab hais tias peb los qhov twg los thiab peb yuav mus qhov twg. Thiab kuv xav tuaj tso tawm kom cov laus laus lawm tau tuaj saib es thiaj tsis laj laj nyob hauv lub tsis tas niaj tas xyoo tsis pom ab tsi li.

Zoo siab tau ntsib koj

Seng K. Xiong

Nyob zoo dab laug Kwm Xeeb,

Wow...! Hnub no cas kuv me dab laug yuav nqa tau ib cov zaub ntsuab pem Npam Naj Xees tuaj haus zaub tsuag rau peb noj yuad! Ntuj e! cas yuav rov hnov tej me qub lus, rau tej me qub teb chaw, cas yuav ua rau kuv lub siab yuj plaws rau lub neej puag thaum ub uas nco ntsoov tsis ploj.

Dab laug, hauv nov yeej siv tib yam li lwm qhov thiab xwb. Tsuas yog qhov tso duab ces tsis yog nyob hauv qab, yog nyob rau saum hauv xwb. Koj ntsias ntawm qhov 2 lub carré ntsuab ntsuab sib tshooj, koj nias qhov ntawd ces koj mam mus nrhiav koj cov duab los tso xwb.

Nws tuaj tso es qhov twg ho ua tsis tau raws siab nyiam los nws hais kuv mam li tuaj kho rau nws. Kuv zoo siab heev uas hnub no nws tuaj txog peb lub tsev. Peb xav tsim ntau yam zoo tab sis laj lim tswv yim los tsawg, lub caij nyoog los tssi txaus es peb lam ua li peb ua tau xwb. Yog nws muaj caij, kuv xav thov nws tuaj tham tag puas tsav yam uas nws nco thiab paub txog peb lub neej ntuj qub qab. Kuv tseem tos ntsi nws tij laug, dab laug, Xib Hwb Ntsum cob lus keeb kwm Hmoob Npam Naj Xees. Yog nws tau mus ntsib dab laug Ntsum Hauj no ces pab hais kom nws sau rau kuv tau khaws tseg no nawb. Kuv yuav muaj lus ua tsaug ntau.

Nyob zoo dab laug Kwm Xeeb Xyooj,

Ua tsaug ntau rau koj lub caij nyoog muaj nqes uas mus nrhiav cov keeb kwm Zos Npam Naj Vas no tuaj rau peb khaws tseg. Yog ib qho zoo kawg nkaus, yog tsis muaj koj sau tseg ces ntshe peb yuav tsis muaj neeg paub txog peb keeb kwm kiag li lawm. Hais qhov tseeb ces Peb Hmoob nyuam qhuav los nyob Nplog teb tssi ntev kiag li xwb yuad.
Es koj hais lub zos Npam Naj Vas yog lub uas peb hu ua Qub Zog no los yog lub ntawm uas Nyiaj Lwm Thoj lawv nyob? Los yog lub sab ntawm nej thiab peb nyob? Ua li lub zos uas nej thiab peb nyob ho hu li cas tiag? Lub sab nraum Nyiaj Lwm Thoj lawv ne ho hu li cas thiab? Cas thaum ub es pheej hais tias nraum lawv no xwb.

Dab laug, zoo li nws copy duab hauv microsoft word tuaj tso tsis tau, nws muaj duab no ho rov tuaj tso rau peb tau khaws tseg thiab.