HMOOB NPAM NAJ XEES

                              Chapter I

              THAM PEM NEEJ NEEG

In the past my male martyr for the nation was never afraid of spitting.
if it came to be sacrificing life for the nation, not to lose the nation, and do        not want to destroy my own country but is patriotic. When I fights, I am  confident
that I can do it.  Even with some injuries and death, I was proud to protect the country.  The thing all the time is I must protect and maintain my country, and to the fullest of my live, and do not let anyone destroy it…My Country First. In the days of war, my speech...is...the nation...is...life...what words did I said...was that word.  My ideology is my country first, diference from other Hmong men, others say personal and family first.

“Our MOTO Says we must protect, The Nation, the Religion, the King,
and the Constitution.”

Lub neej ua Tub Peeb Zeej.
Ua ib tug tub peeb zeej yog xyaum thiab kawm los tiv thaiv lub teb chaws, rau yus haiv neeg, lub zej zos thiab ciam dej ciam av, muaj los luv txhawb zog hais tias: (Lub teb chaws, txoj kev ntseeg, Vaj Ntxwv, Thiab txoj cai lij choj ຊາຕສາສະນາພະມະຫາກະສັດແລະລັຖທັມນູນ), ua ib tug tub Peeb zeej tsis paub lub ntsiab lus no ces yog lam mus ua xwb tsis yog hlub lub teb chaws daiv av.
Kuv xeev xwm los kuv pom peej zeej Nplog thiab Fab Kis hnav ris tsho daj rau khau tawv ntsia teeb ntxwv, kuv xav tias kheev lam kuv tau hnav thiab tau rau tej ntawd. Kuv xeev xwm los kuv xav txawv li lwm tus txiv neej Hmoob, vim kuv hlub kuv hais neeg, lub teb chaws Nplog uas yog kuv niam kuv txiv yug kuv.
Thaum muaj tsov rog tuaj txeeb lub teb chaws kuv yuav tsum sawv mus tiv thaiv Lub teb chaws kom yeeb ncuab txhob tuaj txeeb tau. Kuv lub siab xav tias kuv lub Teb chaws yog yam yuav tsum pab ua ntej lwm yam.

Kuv Tus Kheej:
Kuv yug nyob lub zos Npam Naj Vas “Ban Nam Vang” Kuv txiv yog Txooj Mas Xyooj, kuv niam yog Nplias Yaj, kuv muaj 3 tug tij laug, 2 tug muam,
Kuv yog tus kawg ntawm peb cov me nyuam, kuv txiv tau tag sim neej thaum kuv muaj 3 xyoos. Kuv ua ntsuag nrog kuv niam thiab cov tij laug ua lub neej txom nyem, khau tsis muaj rau, ris tsho tsis muaj cev zoo nrog luag hnav,


ntshaw muaj txiv lis xws luag ua npau suav toog tag li. Thaum Kuv xeev xwm
los kuv yeej tsis xav ua tej raws li kuv qhov muag pom cov tij thiav cov muam ua xwb kuv tshai ua teb. Kuv tau mus pib kawm ntawv rau nram nroog thaum kuv muaj 11 xyoos. Thaum kuv loj yuav tiav txiv xwb kuv npaj siab xav mus ua tub peeb zeej, los sis ua ib tug Xib hwb qhia ntawv. Thaum CIA tuaj pab ua rog nyob teb chaws Nplog Kuv txaus siab mus pab tiv thaiv lub teb chaws. Vim kuv muaj ib lub siab hlub lub teb chaws uas kuv pom tias zoo thiab muaj nqes heev rau kuv nyob hauv kuv lub siab los txog hnub no.

Yog vim li cas kuv thiaj txiav txim siab muab kuv cov zaj neej neeg no sau Tseg cia? Vim kuv tau muab kuv cov Notebooks post rau ntawm kuv lub Vaj Sab face Book private page. Tau muaj ib tug tub Hmoob Tsab:
“Tsab Tsim Nuj” nyob Fab Kis tuaj pom, nws tau nqua hu kom kuv muab
Ua photocopy xa rau nws, thiab nws tau hais ntau zaug lawm, ua rau kuv
Xav tsis tag. Vim kuv yuav muab copy tsis tau rau nws, vim yog personal
Confidence nyob hauv thiab. Nws rov hais tuaj ntxiv, kuv thiaj txias txim siab cia kuv muab los sau ua ib phau ua kev, kom tej tus xav paub txog peb
Cov laus tej neej neeg thiab tau saib xyuas ua neej neeg tseg. Kuv yeej tsis
Xav tias yuav muab los sau, vim siv sij hawm thiab tswv yim. Kuv xav tias
Yuav tsis muaj ib tug yuav xav paub txog peb tej laus tej neej neeg. Tab sis
Thaum kuv pom tus Tub “Tsab Tsim Nuj” xav pom thiab tau taib kuv ntau zaug lawm. Yog li no kuv thiaj siv lub sij hawm 2 lub hlis los muab coj los teeb ua kev thiab muab sau ua tej nqes kom zoo twm. Tab sis kuv sau tau
Li kuv lub tswv yim qes ntawm tus kheej xwb, tsis tau muaj tus tshuaj.

Txhua yam kuv sau rau hauv no yog muab los ntawm kuv cov phau
Ntawv Notebooks uas kuv tau sau khaws cia tseg thaum ua tsov rog.
Kuv tsis yog cia li lam hais li nco tau xwb es tsis muaj pov thawj.
Lub ncauj hais xwb tsis yog sau tseg yeej tsis muab tseeb tag nrho.
Thaum yus mloog cov neeg los tham mas nyias hais nyias ib yam,
Thiab hais ntau yam tsis muaj raws li tseeb. Tab txawm yog cov nom
Tswv Nplog, thiab cov CIA case worker los twb tsis paub.

Yog nej leej twg pom qhov twg tsis raug muag los thov sib pab qhia paub.

Ua Tsaug. Seng K. Xiong

Hmoob Npam Naj Vas Pib Ua Tub Peeb Zeej Zaum 1961[1]

Hmoob Npam Naj Vas pib ua tub peeb zeej rau Tseem Fwv Nplog xyoo 1961
Thaum lub teb chaws pib kub ntxho lawm tus tswv cheeb tsam nroog Phu Kha tau ceeb toom rau peb tus tswv zos Suav Lwm Thoj kom sau peb lub zos Hmoob 7 leej mus ua peeb zeeb zos zej zos [Peeb Zeej Tsov Hav Zoov ທະຫານເສືອປ່າ].
Yog li ntawd Tswv Zos thiaj tau xaiv kuv tij laug Vam Txoov mus ua tub peeb zeej, tag nrho peb cov Hmoob Npam Naj Vas ib ncig muaj 6 leeg, Cov Co muaj 15 tug, nrog rau cov Mab Daum, thiab cov Lwb tag nrho yog muaj 100 tug. Lawv tau mus nyob Na Le uas yog nyob ze kiag cov Nplog Liab.

Kuv niam tau hais kom kuv mus hloov kuv Tij Laug Vam Txoov vim tsis muaj neeg ua teb txaus rau peb tsev neeg.
Yog li no thiaj tau mus hloov nyob nws chaws, peb kuj tau mus txeeb ib lub
yeej tub rog tog Nplog Liab, lub yeej no thaum pib yog tog tseem Fwv Nplog cov peeb zeej nyob tab sis raug tog sab laug tuaj txeeb tau lawm; yog li peb thiaj tau mus txeeb rov qab los. Peb tau sawv kev ntawm lub nroog Pus Khuas, Vieng Phu Kha mus kev ko taw yog mus 2 hnub thiab ib tav su kev. Peb cia li nam kiag mus nruab hnub nrig thiab tua 2 rab phom loj uas yog hom “M-60 Motar 60 MM” mus rau saum lub yeej cov Nplog Liab nyob thiab peb cia li nce mus rau saum lub yeej, peb sib tua ntev li 25 feeb, ua rau peb tog tuag 2 tug, 1 tug yog co, 1 tug yog Nplog, tog Nplog Liab tuag ib tug. Cov Nplog Liab swb thiab khiav lawm. Raws li cov pej xeem Mab Daum nyob ze lub Yeej hais tias cov Nplog Liab muaj kwv yees li 10 tug xwb, peb tog muaj 80 Leej. Tom qab peb tau yeej lawm peb kuj tsis nyob thiab peb tau nqes mus rau Na Le, thiab cov coob rov qab los rau Pus Khuas tag lawm. Kev ntshai, thaum kuv pom tub rog raug tua tuag ntshav tawm liab vog, thiab paj hlwb tawm dawb paug, kuv mam paub ntshai thiab pw tsis tsaug zog li,
vim pheej ua yog toog pom tej ntawd.

Kov Phom huam Yuaj vim kev txhob poj
Muaj ib hnub kuv raug mus zov yas “ຢູ່ຍາມ zov kev” kuv nyob ntev li 20 feeb ces kuv pheej muab rab phom kov ua si ua rau rab phom huam yuaj nrov ib teg ua rau cov tub rog sib txeeb khiav nkag qhov taub thiab hno qw cuag cas, Num tuam yaj yog tus nais muj [ນາຍຫມູ່] tus loj txib kom Num Tuam tuaj saib kuv saib yog kuv tua phom los yog yeeb ncuab tua kuv, vim thaum kuv ua phom nrov ces kuv ntshai ces kuv tsis kav los qhia lawv. Num tuam tuaj hu kuv yam nws tshee ntshee nws lub suab tsheev “npawg Cheeb! npawg Cheeb! yog ua le caag?” kuv thiaj teb nws tias yog kuv tua qaib qus, tab sis qhov tseeb yog kuv kov phom huam yuaj xwb, “vim kuv twb tau npaj tias kuv yuav hais li cas rau lawv lawm.” Tus loj hais kom kuv mus qhia nws tab sis peb cov Hmoob kom kuv txhob mus tsam nws cem thiab ntaus kuv. Twb yog hnub tom qab kuv mam mus ntsib nws. Tab sis nws tsis cem kuv, nws hais tias kuv hnub nyoog me dhau lawm ces tsis ua cas.

Tau 5 hnub tom qab xwb tus loj hais kom kuv rov qab los tsev vim kuv hnub nyoog me dhau tsis tau paub qab hau. Thiab muab ibTug Lwb nyob lub zos
ntawm kiag los hloov kuv chaw lawm. Kuv thiaj tau rov los tsev yam kaj siab thiab zoo siab kawg, yog lub 2 hli 1962.
Peb cov mus ua tub peej zeej zov zej zos tau txais nyiaj hli ntawm nom tswv
Nplog “300 kip” rau ib hlis, thaum ntawd nyiaj Kip muaj nqe heev.
Peb cov Hmoob uas tau mus ua tub peej zeeb zej zos no twb tau tag sim neeg tag nrho lawm, yog muaj “Num Tuam Yaj, Num Phaj Xyoo, Tshuas Xeeb Xyooj, Txhiaj Xeeb Vwj, Txiab Neeb Xyooj, thiab kuv,” kuv tau mus nyob ntev li 3 lub hlis xwb.

Khiav tawm Teb Chaws
Khiav tawm Zos Tobpoos mus rau sab Thaib Teb 5/6/1962
Pab Hmoob ntseeg Catholic tau tshais tawm zos Npam Naj Vas mus nyob
Zos tob poos (Taopune) xyoo 1960 xaus.

Los txog lub 5 hlis 1962, Kuv thiab tij Laug Ntxoov Khwb Xyooj tau mus ua tshoob rau Txhiab Xeeb Vwj rooj tshoob rau tim Pus Xab, Muaj kuv tij laug Ntxoov Khwb mus ua Mej Koob, Sua Thoj mus ua niam tais ntsuab, kuv mus ua phij laj. Thaum peb tab tom ua rooj tshoob yuav tiav tab tom noj tshoob yuav xaus yuav tsaus ntuj xwb tau muaj ib tug kuv tsis nco nws lub npe tau tuaj qhia rau peb hais tias “teb chaws tawg tag lawm,” cov tub rog Nplog twg tawg khiav coob coob los txog peb lub zos Tob Poos lawm, hais kom peb txhob rov qab mus tsev lawm, kom peb cia li khiav mus rau Bo keo, vim lawv twb khiav tag los lawm. Thaum peb hnov lub xo phem li no ces peb cia khiav tes dawb tes do tsuas muaj ib nkawm khau khiab thiab 1 ce khaub ncaws nrog lub hnab nqa xwb. Peb sawv kev tawm Pus Xab mus poob kiag rau nram txoj kev tsheb uas mus tom nroog Luam Nab Thas mus rau Bo Keo, peb twb pom cov tub rog Nplog los coob kawg kiag taug kev ua kab sab tsis tu li. Peb taug kev mus tau 2 hnub nkaus tsis so li peb mam los kaj ntug rau Npam Poov, Thiab cia los ntsib yawm yij Nyiaj Yob Lis uas yog peb tus muam Xyo tus txiv.

Yij Nyiaj Yob tuav rawv kuv tes kom kuv txhob khiav thiab mus nrog nws nyob vim lub teb chaws yuav tiaj tus, tab sis kuv tsis kam nrog nws mus, peb thiaj tau khiav los txog Bokeo. Peb tau hla kiag rau sab Thaib Teb, vim cov neeg Nplog nyob hauv nroog Bokeo yeej khiav tawm tag hla rau sab Thaib teb lawm.

Thaum ntawd cov tub rog Nplog uas tawg khiav Luam Nab Thas tau hla kiag rau sab Thaib lub nroog Chiang Khong, thiab Thaib muab lawv thauj tawm mus rau Savan Nakhet tag lawm. Vim cov tub rog Suav Liab tsis raws, yog lawv raws ces cov tub rog Nplog tuag tag thiab peb los xyov yuav ua cas lawm.
Ua ntej tau ntev li 10 hnub Txiv Plig Vaj Pov twb tau khiab ua ntej mus rau Bo Keo law, Yog tus nplog Phon tsav lub tsheb Tractor thauj txiv plig Vaj Pov taug
Txoj kev tsheb ntawm Tobpoos mus rau Bokeo. Vim muaj kev sib tua nyhav nyob Phu Sam Yot, Tuam Hem Sab, ze ze nroog Luam Nab Thas.

Peb tau mus nyob hauv lub nroog Tseej Khoos “Chiang Khong” yog muaj Txiv Plig yog tus xoj ib lub tsev rau peb nyob tau ntau hnub, thiaj muaj “Bill Young thawj tus CIA Case worker” tau tuaj ntsib peb, thiab muab hauj lwm rau peb pib ua mus, thaum ntawd muaj Xeeb Vwj thiab Txhiaj Vws Yaj yog ob tug nrog Bill Young tham thiab thiaj kom Txhiaj Vws rov qab mus Npam Naj Vas es yuav xa ib cov phom mus rau Npam Naj Vas, thiab muab teem sij hawm 5 hnub kom Txhiaj Vws mus teeb daim ntaub ua tus T rau tom Pas Ntses Me es Xeeb Vwj coj Bill Young ob tug caij dav hlau helicopter coj 20 rab phom mus tso rau lawv siv pib ua hauj lwm.

Lub Neej Taug Kev Ko Taw
Kuv twb tau taug txoj kev “No. 3 uas yog mus ntawm Luam Nab Thas mus rau Bo Keo” ib lwm lawm, yog mus ntawm pe blub zos Tob Poos mus rau nroog Huay Xai/Bo Keo thiab rov qab los. Yog mus yuav 2 ce khauv ncaws thiab ib nkawm khau nyob tim Tseej Khoos “Chiang Khong” xwb. Thiab yog thawj zaug mus pom Thaib teb.

Txoj kev No. 3 mus ntawm pe blub Zos Tob Poos (Ban Tao Poon) mus rau Huay Xai/Bo Keo yog deb li 75 miles, mus los yog 150 miles. Kuv mus thiab los tau ntev li 2 lub lis tiam “week” xwb kuv tau rov qab taug txoj qub kev no ib zaug ntxiv; yog tawg teb chaws. Yog luam Nab Thas poob rau tog Nplog Liab zaum 1.

Pab Hmoob Npam Naj Vas Mus Nyob Phas Dees
“Roob Suv Ntsim” Lub 6 hli 1962.

CIA tau xa peb pab Hmoob Npam Naj Vas uas yog pab ntseeg kev cai Catholic mus nrog Tsav Yeej Kwm lawv nyob lub yeej Phas Dees [Pha Dang] uas yog ciam teb Thaib thiab Nplog, sab Thaib yog xeev Chiang Rai, sab Nplog yog xeev Xayabory. Tsav Yeej Kwm lawv pab pawg tau mus nyob ua ntej lawm.
CIA tau muab lub dav hlau helicopter uas yog Tsav Yeej Kwm lawv tau mus muab luaj lawm, thauj cov Hmoob Npam Naj Vas mus rau roob Phas Dees
tawm ntawm lub nroog Chiang Khong. Ua ntej ntawd CIA kuj muab lub dav hlau helicopter thauj cov Hmoob Npam Naj Vas tawm ntawm lub zos Naj Yoob mus rau nroog Tseej Khoom thiab.
Lub yeej Pha Dang no yog ib lub roob zuag xwb tab sis yog muaj 2 pab Hmoob mus ncaws thiab laij kom tiaj ua kom tau rau lub dav hlau me me ADO mus tsaws tau.

Khiav tawm Phas Dees:
2 pab Hmoob no tau khiav tawm Phas Dees xyoo 1964, pab Hmoob Npam Naj Vas tau sib faib ua 2 pab, pab 1 yog pab ua peeb zeej rau CIA tau khiav rov mus nyob Naj Vuaj, pab 2 yog pab nrog Txiv Plig Xaiv Vas tsis ua tub rog khiav mus nyob Naj Ngo “Ban Nam Ngao”. Tsav Yeej Kwm lawv pab tau khiav rov mus nyob Phwv Cis Theeb.

Kuv Pib mus kawm ua Nais Xaim nyob Thaib Teb.

Thaum lub 5 hli 1963 CIA tau xav kuv mus nyob Khaib Kang “Khai Kang Camp” uas yog ib qhov chaw txwv tsis pub neeg paub nyob sab Thaib Teb ntawm ntuj dej Nab Khoom, sab Nplog yog lub zos Xub Yoob [Nam Yon]. Yog lub roob Dawm Ntoo Tshuaj mus xaus rau Dej Nab Khoom. Kuv tau mus nyob nrog ib pab Co muaj 6 leej twb mus nyob ua ntej lawm. Yog mus nyob kawm ntawv “English” me ntsis ua ntej mus kawm tub rog nyob Pitsanuloke.
Kuv mus nyob tau ntev loo txog lub 7 hli 1963 xwb ces CIA tau xa peb tag nrho mus rau Phitsanuloke lub yeej Selid Sena. Thaum mus txog kiag xwb ces Thaib muab yus chais plob hau kom luv thiab faib khaub ncaws tshiab hnav; muaj 2 lub tsho dawb tes luv thiab 2 lub rib dub luv, thiab 2 ce ris tsho ntsuab tub peeb zeej.
Peb pib kawm kev cai tub peeb zeej me ntsis thiab kawm kev yeeb yam tes taw kom mus kev ib yam, kev xyaum tua phom, siv phom, thiab kev muaj meej ntawm tus kheej.
Tom qab kawm tau ib lub hlis tag lawm. Lawv muab faib ua 2 pab. Pab 1 mus kawm kev cob qhia tub peeb zeej, siv riam phom, pab 2 yog mus kawm ua nais xaim, tub ntaus xov tooj [Radio Morse Code Operator]. Kev kawm ua ib tug Radio Operator mas zoo li peb cov Hmoob nyob pem roob kawm ntawv qes qes tsuas yog kawm txog qeb 3 xwb, twb tsis muaj tus kawm txog qeb 6 li. Kev kawm yog ib yam kawm nyuaj tshaj, thiab yeej tsis nkag siab zoo pes tsawg li. Tab sis thaum los ua hauj lwm thiab nqes tes ua kiag lawm tau tsis ntev hnub xwb sawv daws yeej ua tau zoo kawg thiab yim ntev yim txawj ntau lawm. Muaj tsawg tus uas los ua tseem tsis tau zoo siv sij hawm ntev dua xwb.

Txoj kev mus kawm yog tau zoo noj, thiab noj raws sij hawm, thiab nyob
raws kev cai tswj, thiab muaj kev sawv ntxov mus khiav kom muaj zog, ua rau sawv daws hloov dua tshiab ntsej muag tshiab, tsis daj ntseg li thaum nyob Nplog teb. Txoj kev tau noj zoo, pw raws caij nyoog thiab muaj kev siv lub zog ua exercise thiaj ua rau noj qab nyob zoo thiab muaj zog.

KAWM RADIO MORSE CODE
Cov Morse Code uas yog muab tes ntaus tawm lub suab “Dot, Dash,” tus mloog yuav tsum nkag siab lub suab Dot thiab lub suab Dash mas thiaj yuav txhais tau cov lej Number 1,2,3, thiab cov A,B,C, sau tau los lawm mam coj los txiav tawm, txiav tau tawm mam coj los ntxhais ua lus. Vim yuav tau muab hloov nkag cov lej tag mam coj los txiav tawm mam hloov tau ua lus. Vim tsis pub kom yeeb ncuab txais tau ces lawv paub tag lawm.  

MORSE CODE CHART
Morse code is longer than the alphabet. Read the item's description for the max characters that can be used in morse code.

Each "dot" counts as one single character. Each "dash" counts as one single character. We only translate letters and numbers into morse code - any other symbols will be ignored.  Spaces count as a character as they also take up room.

COV NO YOG MUAB TES NTAUS Dot , Dash.
Lub dub kheej kheej yog lub suab Dot, Kab dub yog lub suab Dash.








Yus yuav tau kawm kom paub thiab nkag siab zoo zoo 2 hom lus uas yog
Muab tes ntaus thiab hais ntawm ncauj mas thiaj mus ua tau hauj lwm
Tom tshav rog tau vim tus Nais Xaim yog lub plawv ntawm pab peeb zeej.

     

Thaum peb kawm ntaus xaim tiav lawm; peb kuj tau mus kawm dhia kaus, kev kawm dhia Kaus mas luag tsis yuam lawm, yog tus siab me me mas nws yeej tsis tham txog kawm dhia kaus vim yog yam ntshai heev, ua ntej yuav kawm dhia kaus yog kawm khiav kom lub cev muag muaj zog thiab kom tiv taus tej yam nyuaj nyuaj, kawm ntev hnub txog kev cai dhai kaus thiab tais kaus, mam mus kawm dhia hom, dhia hom yog mus dhia saum ib lub sam thiaj siab siab mus rau hauv av uas muaj ib txoj hlua taug mus rau hauv av. Ib tug yuav tsum mus dhai hom txog 10 zaug mam mus dhai saum dav hlau. Thaum dhai Hom yus tshai txog 5 npaug, tab sis thaum mus dhai saum dav
hlau yus tshai txog 10 npaug lawm.

Vim kev dhia saum ib nta ntuj los rau haus av mas yog yam tsis yooj yim kiag
thiab. Tab sis thaum dhia tiav tag thiab sawv daws los txais tus tis noog mas
kuj txaus siab thiab zoo siab tias yus yog ib tug txiv neej yawg puv ntoob lawm thiab. Muaj ntau tus kuj tsis kam mus dhia kaus, thiab muaj tej tus thaum hais mas Khav theeb kawg tab sis thaum mus dhia hom kiag lawm tsis kam, thiab yeem swb tsis kam kawm mus ntxiv. Tab sis cov tsis khav theeb kiag nyob twj ywm ho yog cov mus dhia tiav. (Neeg khav theeb hais lus yeej tsis tseeb.)
Peb pab mus kawm Nais Xaim puav leej yog cov uas Txiv Plig thiab As Cas Hall coj mus kawm ntawv Nplog es paub me me ntawv Nplog thiab paub me me ntawv As Kiv A,B,C, nkaus xwb. Yog tsis muaj Txiv Plig thiab As Cas
lawv tuaj Qhia kev ntseeg peb Hmoob Qaum Teb Yeej Tsis muaj ntau tus yauv tau mus Kawm ua Nais Xaim coob tug los pab CIA thiab tuav hauj lwm pab lub teb chaws li no.

Thaum peb rov los txog Chiang Khong sab Thaib teb, peb tseem tsis tau hla kiag mus rau sab Nplog, peb tseem los xyaum ua nyob ntawm Houa Vieng uas yog CIA lub chaw ua hauj lwm nyob hauv lub nroog Chiang Khong, Thaib Teb, peb los ua tau tsis ntev ces peb txawm tshaiv chaw mus nyob pem Khai Kang “Khai Kang Camp” lub qub chaw uas peb xub mus nyob kawm ntawv As kiv, tab sis CIA ntiav Thaib muab ua zoo Vaj Tsev thiab teeb cov ncej xov tooj siab siab thiab zoo heev, muaj 3 lub tsev ua tau zoo tseg tos peb mus nyob. Kuv tseem nco ntsoov thaum peb nyob Khai Kang kuv tau mus tua tau nraj thiab liab los ua zaub rau peb noj, mas cov mab daum thiab Thaib qhua kuv kawg li.

Thaum lub caij peb los nyob ntawd mas Xyooj Nruag lawv thawj pab mus kawm Hua Hin thaum xyoo 1962 twb kawm tiav ua ntej thiab pib los ua hauj lwm nyob Naj Vuaj lawm yog xyoo 1964. Thaum peb los ua hauj lwm no yog lub caij uas CIA tau xa cov Team uas yog Hmoob mus nyob ntau thaj chaw xws li Team 8 mus nyob Npam Kees Nees, Team 10 mus Nyob Phwv Cis Theeb, Team 13 mus nyob Tuam Hem Sab, Team 4 mus nyob Phwv Laj Phwv Xaj, Team 5 mus nyob Ban Muang. Team 1,2.3,4,6, thiab 9 yog Co thiab Mab saum, thiab Lwb.

Xyoo 1964 Colonel Ntsuab Pov Xyooj tau coj ib pab team tuaj nyob Naj Vuaj ib Vuag thiab tshais mus nyob Roob Kwv Txhoob, deb ntawm zos Naj Vuaj kwv yeej 15 miles rau sav qaum teb. Nws nyob txog li 2 hlis xwb nws tau
tshais mus nyob Lao Tam, sab Muang Xai (Udom Xay). Lub caij ntawd yog xeev Luam Phab Npas. Tam sim no yog xeev Udom Xay.

Lub caj thaum xyoo 1965 mam muaj Captain Tub Yias Lis coj ib Team uas tuaj Looj Ceeb tuaj nyob Naj Tib. Lawv yog cov zwm rau Tseem Fwv Tseem Tub Peeb Zeej Nqe 2 [Military Region II]. Kom sawv daws nkag siab tias nyias muaj nyias hauj lwm tsis koom ua kev, vim kev xa cov xov xwm nyias xa rau nyias lub Hauv paus loj “Head Quarter Reginal” Peb yog zwm rau tseem tub peeb Zeeb Nqe 1 [Military Region I]. Feem coob tsis khag siab li, pheej xav tias cov tuaj Looj Ceeb tuaj ces yog tswj tag nrho txhua qhov lub teb chaws Nplog. Tab sis qhov tseeb tiag nyias muaj nyias pawg tub rog qeb, thiab nyias muaj nyias lub xeev thiab nyias txoj kev tswj coj.

Peb pab mus kawm ua kev uas yog cov Hmoob Luam Nab Thas zaum no
muaj coob tug, Tab sis kuv tsuas hais txog peb cov kawm ua Nais Xaim [Radio Morse Code Operators] Nkaus xwb: 1. Xeeb Vwj, 2. Mab Muas,
3. Tuam Xyooj, 4. Mab Xyooj, 5. Tawb Thoj, 6. Tsheej Thoj. 7. Yeeb Thoj, 8. Xab Yaj, 9. Qhiam Lis, 10. Tsuj Xab Yaj, 11. Seng Xiong yog kuv. Peb pab no yog thawj pab mus kawm nyob Pitsanuloke, yog los ua hauj lwm rau tseem fwv pawg tub rog Qeb I “Military Region I” Tus thawj tub rog yog General Chao Xayavong, lub head quarter yog nyob Luang Prabang.
Pab kawm ua tub cob qhia tub rog “Special Lima Team SLT” muaj coob tug
Tab sis kuv nco tsis tag tus, cov kuv nco tau muaj: Neeb Xyooj, Kaub Xyooj, Qhua Yaj, Xwm Yaj, Qhua Muas, Rwg Xyooj, Pov Xyooj, Xwm Xyooj A, Vws Xyooj, Xwm Xyooj B.

Lus Taw Qhia: Tau muaj peb cov Hmoob feem coob tsis paub thiab tsis nkag siab. Lawv xav tias Xeev Luam Nab Thas, thiab Naj Ywj LS-118A, thiab Bo Keo LS-25 yog zwm rau Tseem Fwv Pawg Tub Rog Nqe II uas yog yawg hlob Vaj Pov tswj. Tab sis qhov tseeb tsis yog, Luang Nam Thas Yog Tseem Fwv Pawg Tub Rog Nqe I yog tus tswj, Gen. Vaj Pov muaj cov team tuaj nyob thiab tab sis lawv tuaj nyob xa xov mus rau Looj Ceeb xwb, kev tswj hwm tsis yog lawv tswj. Nyias muaj nyias ciam av kav. Muaj cov Hmoob, Co, tau mus pab Hlob Vaj Pov thiab, tab sis cov mus rau Looj Ceeb yog zwm rau Hlob Vaj Pov Region II, Cov tsis mus yog zwm rau Region I. Txoj kev coj tswj tub rog thiab pej xeem los ib yam, nyias nyob nyias li cia av. Txhob muab keeb kwm ntxeev ua yam tsis yog rau tej xeej leej xeeb ntxwv tsis nkaj siab, thiab to tau yuam kev txoh txoj kev coj thiab tswj nyob lub teb chaws.

Ib lub teb chaws yeej muaj txoj cai lij choj tswj, muaj tseem fws, muaj
Tswv xeev, muaj tswv nroog, muaj tswv cheeb tsam, muaj tswv zos, thiab
Muaj tub rog tiv thaiv teb chaws. Tub rog los yeej nyias muaj nyias ib pab pawg los tswj nyias thaj tsam thiab tej lub xeev thiab, thiaj tsis cuam tshuam.

“The Royal Lao Army, also designated by its anglicized title RLA, was the Land Component of the Royal Lao Armed Forces, the official military of the Kingdom of Laos during the North Vietnamese invasion of Laos and the Laotian Civil War between 1960 and 1975.”

Kev Tswj Hwm Tub Rog, Royal Lao Military:

1,  Military Region I Luang Prabang, Luang Nam Tha, Phong Saly, Xayabori.
    Comander Gen. Chao Xayavong “ນາຍພົນ ເຈົ້າ ໄຊຍວົງ.”

2.  Military Region II Xieng Khuang, and Houaphan. Comander Gen. Vang
    Pao “ນາຍພົນ ວັງ ປາວ.”
3.  Military Region III Savanakhet, Khammuane, Saravan.  Comander Nouphet Daoheuang ນາຍພົນ ນູເພຕ ດາວເຫືອງ.”

4.  Military Region IV Pakse, Champasak, Attapeu.  Comander Soutchay Vongsavanh “ນາຍພົນ ສຸຕໄຈ ວົງສະວັງ.”
5.  Military Region V Cammander Thonglith Chokbenboun ນາຍພົນ ທອງລິຕ  ໂຈກເບນບູນ

Txhua Pawg Tub Rog “Region Military” nyias muaj nyiaj pab tub rog SGU. Thiab nyias muaj nyias ib tug coj CIA officer. Tsis yog koom Billair ib tug xwb.