KEV SIB HAUM XEEB “TSIS MUAJ TUS TWG YUAV HLUB HMOOB TSHAJ TUS HMOOB”

KEV SIB HAUM XEEB
“TSIS MUAJ TUS TWG YUAV HLUB HMOOB TSHAJ TUS HMOOB”




Peb Hmoob ua neej nyob, peb nyiam kev kwv kev tij, kev
neej kev tsav, kev phooj kev ywg tam sis peb ho tsuas muab txoj kev sib
faib thiab txoj kev sib ua plaub los ua qhov loj xwb.


21 – kev sib faib.


Peb yog Hmoob lawm, peb tseem sib tib hais tias tus no
yog “Hmoob dawb”, tus tod yog “Hmoob Ntsuab”, tus ped yog “Hmoob Liab
hau”, tus nrad yog “Hmoob Txaij Npab”, tus tid yog “Hmoob Looj ceeb”...


Peb yog Hmoob lawm, peb tseem sib faib hais tias pab no
coj dab, pab tod lawb dab. Cov lawb dab los tseem muaj cov ntseeg txiv
plig, cov ntseeg Vaj Tswv... Peb yog tib xeem lawm, peb tseem nug hais
tias puas yog ib tug dab qhuas, yog ib tug dab qhuas lawm ho tseem puas
koom tib tug pog yawg thiab...


22 – kev sib ua plaub.


Yog muaj tus mab tus qhua saib peb qis tshaj av, hais
lus tsis saib peb ; peb ua twj ywm npo npau cia siab ntsws tshuav tawg
los kav chawj. Tam sis yog ib tug Hmoob ua li ntawd mas peb yuav zam
tsis tau li ; yuav ua plaub txog qhov twg los ua.


Peb muaj tub muaj ntxhais peb xav kom yuav Peb Hmoob,
peb thiaj txib hu tau ; tam sis thaum muaj tus tub Hmoob tuaj hais peb
tus ntxhais mas peb ua nyuab thiab yuav nyiaj kim, ua mus ua los tej
tug tub Hmoob cia li tsis kam yuav poj niam Hmoob. Tam sid, yog peb tus
ntxhais ho mus yuav tus mab tus qhua los khiav raws luag lawm, tsis tau
txais ib kis nyiaj, tsis tau noj ib dia mov, tsis tau haus ib khob dej
los peb ho ua twj ywm.


Vim li no, peb thiaj yuav tsus rov qab los sib tham,
sib kho kom peb paub hlub peb es pom hais tias peb tseem ceeb tshaj lwm
tus.


23 – kab tshoob kev kos.


Peb 30 tawm lub koom haum twb tau tuaj sib tham nram
Bourges hnub tim 22/11/2003 es tau ua tus txhooj tshoob tshiab rau Peb
Hmoob Fab Kis Teb siv lawm tam sid muaj ib co tseem xav hais tias yuav
tsus coj tus txhooj no mus rau nom tswv Fab Kis muab ua txoj cai rau
peb taug. Tab sid peb twb paub lawm hais tias kev sau nqi mis nqi hno
tsuas muaj peb Hmoob thiaj sau xwb peb yeem paub hais tias tsis raug
luag teb chaws no tus cai, yog vim li no peb yuav kom luag muab ua tus
cai rau peb taug, luag yeem tsis ua. Li ntawd, kuv thiaj thov kom Peb
Hmoob nyias coj nyias pab nyias pawg los siv peb tus txhooj uas peb
feem coob pom zoo lawm.


III – KEV VAM MEEJ.


Peb yuav vam meej tau los yuav tsum yog peb muaj cov
tub cov ntxhais kawm ntawv siab es paub kav teb kav chaw, kho teb kho
chaw, ua lag ua luam, ua noj ua haus raws ib yam li luag cov teb chaws
vam meej es peb txawm yuav nyob lub teb chaws no los peb nyob muaj
ntsej muaj muag hos peb muaj hmoo tau rov qab peb teb chaws qub qab los
peb thiaj pab peb lub teb chaws thiab peb cov pej xeem huab hwm tau.


Tsis li no xwb, peb ua neej hmoob peb tseem muaj peb
tej lus, tej ntawv, tej txuj ci thiab tej kev cai uas peb yuav tsum
khaws, kho thiab qhia rau peb cov me tub me nyuam mus yav tom ntej.


IV – KAB MOB KEV TUAG.


Peb Hmoob feem coob nyias tseem ua kev cais nyob nyias
vaj nyias tsev, tua tsiaj tua txhuv raws nyias siab. Peb paub hais tias
kev ua li no yuav ua tsis tau ntev mus lawm yav tom ntej. Yog li, peb
yuav tsum pib nrhiav kom tau ib txoj hau kev tshiab rau peb coj.


Nej sawv daws pom lawm hais tias peb hauj lwm yuav ua
mus yav tom ntej muaj coob muaj ntau, tam sis kuv tib leeg ua xwb los
peb cov sawv cev hauv lub Rooj Tswj Xwm ua xwb peb yeem ua mus tsis
tau. Yog li, thov kom peb nco ntsoov hais tias lub koom haum no yog peb
sawv daws lub es cov hauj lwm no yog peb sawv daws hauj lwm ; tsis
txhob tos muaj tus txib peb mam ua, nyias paub nyias hais tias ua yam
twg yuav zoo rau lub koom haum thiab peb cov Hmoob ces yeej meem ua,
tsis li ntawd los ho hais mus rau lub rooj tswj xwm kom nws ho coj mus
tshawb xyuas es yog txaus ua los peb ho ua mus yav tom ntej.


Thaum kawg, ib co yuav xav hais tias tim li cas peb
thiaj li muab peb lub npe hmoob koom haum pauv ntawm « Koom Haum Hmoob
Kev Sib Pab » los ua « Koom Haum Hmoob Thooj Siab Koom Ntsws ». Thov
hais rau sawv daws paub hais tias thooj txhij thaum peb pauv peb cov
hom phiaj raws li saum no, peb tau pauv ob yam ntxiv :
1- Pauv npe « Hmoob Kev Sib Pab » los ua « Hmoob Thooj Siab Koom
Ntsws ».
Kev sib pab mas yog thaum ib tug muaj hauj lwm los tau kev txhawj xeeb,
peb mam mus pab xwb, tam sid kev thooj siab koom ntsws mas txawm hais
tias tus ntawd nws yuav tau kev nyuab siab, zoo siab los peb yeem nrog
nws koom huv tib si mas qhov no thiaj li yuav raug li peb sawv daws
txoj kev vam thiab kev coj nej hnub no.


2- Peb lub koom haum muaj ob rab qeej sib qhaib ua peb lub cim, zoo li ob txhais tes sib tuav, sib pab, sib txhawb, sib nug moo.


Vam thiab cia siab hais tias peb Hmoob yuav sib hlub,
sib zam txim, sib txhawb, sib pab, sib qhuab sib qhia mus ib txhiab ib
txhis.


Sau los ntawm :



VAJ VamNeej ( Association Hmoob Thooj siab koom ntsws)