KEV LAWB DAB THIAB KEV NTSEEG NTUJ Nyob zoo txog ib tsoom phooj ywg sawv daws,Hnub no kuv muaj lus zoo siab yuav qhia los sis piav txog kev cai lawb dab los yog kev cai ntseeg
Ntuj rau peb sawv daws tau kawm, los sis pub rau sawv daws pab coj mus xav saib yog li cas tiag ; vim kuv pog kuv yawg, los rau kuv niam kuv txiv, tsoom kwv tij, sawv daws kuj yog tseem coj dab loj kawg li thiab.
Ua li Hmoob hais : « ib txoog ib tsob » ntawm lawd sawv daws puav leej tseem coj dab, tseev teev dab loj heev li.
KEV COJ THIAB TEEV DAB :Peb tsoom Hmoob feem coob tseem coj dab, teev dab. Sawv daws yeej lam teev dab thiab coj dab xwb yeej ntshai nyob tsam pom dab los sis dab hem kawg nkaus.
Hmoob hais tias: “yog ib tug neeg twg uas tau tas nws sim neej, nws yuav mus ua dab, nws yuav sawv ciaj dab txoog, dab tso, los sis nws yuav mus rau ib lub teb chaws tshaib tshaib, nqhis nqhis, uas yog ib lub teb chaws tsis muaj noj tsis muaj haus…”
Mas yuav tsum tau npaj tsiaj npaj txhu, npaj tej yam haus rau nws, yuav tsum tau muab mov muab cawv coj los ntawg rau nws, thaum zoo li no lawm yuav tsum tau npaj ib lub plhuaj taub, ib lub raj xyoob thiab txua ib tug txhib ntawg rau tus tuag ntawd, Kuv tau mus xyuas , mus hlub, los sis mus pab txog tej uas tau tag sim neej thiab tau hnov luag cov uas txawj qhuab ke lawv qhuab hais tias: “
-Noj txij koj ib leeg noj, haus txij koj ib leeg haus, ploj txij koj ib leeg ploj, tuag txij koj ib leeg tuag, noj tsis tag hliv nruab taub, haus tsis tag hliv nruab rag, nqa tsis taus los ua tiag nqa, coj mus pub poj pub yawg noj lawm ntuj txiag teb tsaus, ntuj ntsim teb no, ntuj tuag tshaib teb tuag nqhis…”
Ib tsoom Phooj ywg sawv daws, Vim li cas peb cov niam cov txiv uas tseem coj qub kev cai (los sis tseem coj dab), lawv pheej ntawg, xa mus rau lub teb chaws ntawd?
– Sawv daws twb yeej paub tseeb tias lub teb chaws ntawd no no , txias-txias, tshaib-tshaib, tsaus ntuj nti xwb thiab txom txom nyem xwb ne!!!
Tab sis tiag, ntshai lawv tsis muaj lwm lub teb chaws yuav mus lawm, los sis lwm txoj kev mus… Lub teb chaws: “ ntuj txiag teb tsaus, lwm lo lus hais uas yog lub ntuj tawg “ Yog dab ntxwg nyoog lub xwb, Ntawv Moo Zoo twb qhia tseg tias yog lub teb chaws uas npaj rau cov neeg txhaum mus nyob, yog qhov chaw uas dab ntxwg nyoog ntxeev siab rau Tswv Ntuj ais thiaj muab nws rau txim rau ped, kom txhob tau noj, txhob tau haus, nws nyob txias tsaus ntuj nti yeej tsis pom kev li! Cais nws thiaj tshaib tshaib nqhis nqhis; nws thiaj ua zaj ua ntxeev, ua txhua yam tsav ntxias peb neeg ntiaj teb kom tau mus nrog nws nyob rau qhov chaw no no, txias txias tsaus ntuj nti ntawd, nws thiaj ua txhua tsav kom neeg ntiaj teb muab ub muab no, muab tsiaj muab txhu, los txi, nws thiaj tau noj tau haus thiab hwm nws kom peb hnov qab txog tus Tswv Ntuj tus uas tsim ib puas yam tsav hauv ntiaj teb no.Tus dab ntxwg nyoog no, nws xav txia zoo li peb leej tib neeg tus twg los tau, nws xav txia ua peb niam peb txiv peb pog peb yawg los nrhiav noj nrhiav haus ntawm peb los tau, nws ua txhua tsav puas yam kom peb neeg txhob paub txog Tswv Ntuj, thiab xav kom paub txog nws xwb.
Hos cov dab ntxias neeg ntawd yog tus dab ntxwg nyoog no cov qhev xwb.
Vim li cas peb cov kwv tij Hmoob feem ntau peb tseem coj dab (qub kev cai) ?
–Dab ntxwg nyoog yog ib tug dag noj dag haus, yog nws tsis tau noj tsis tau haus nws mus ncaj yim neeg twg yeej yuav ua kom yim ntawd mob ntag, ces yim ntawd yuav tsum tau mus saib, mus khob kuam los sis mus thov neeb thov yaig saib, yog thaum mus thov txiv neeb txiv yaig saib ces luag yeej yuav saib pom xwb xwb, Peb Hmoob thiaj hais tias cem qab pob zeb ces roob ris yuav dawb vog hauv… Thaum ntawd txiv neeb txiv yaig yuav hais tias: “yog dab niam dab txiv, los sis dab vaj dab tsev yuav noj yuav haus, vim lawv tshaib tshaib nqhis nqhis lawm es rov los nrhiav xwb…”
Thaum zoo li no yuav tsum tau muab tsiaj muab txhu los txi rau nws, yog tsis txi, tsis teev, ces dab txawm yuav muab tus neeg ntawd ua kom tuag mus ntag…
Peb Hmoob muaj ib lo hais tias: “Dag neej ces yuav txaj muag hos dag dab ces yuav tau tuag…”
Yog thaum tau teem dab thiab tus mob ntawd zoo ntu puav lawm, yog tsis pauj , dab yuav los ua rau kom tus neeg ntawd tuag mus tiag tiag…
Cov tseem teev dab yog vim li cas lawv tshuav dab nuj dab nqe ?
Qhov kawg ntawm tus coj dab, teev dab, lawv yuav mus ciaj ua dab, mus ua dab ntxwg nyoog qhev, mus nyob rau dab ntxwg nyoog lub teb chaws txias txias, no no, ntsim ntsim, tsaus ntuj nti, mus nyob rau qhov chaw tshaib tshaib nqhis nqis txom nyem ntsuav ntawd.
KEV LAWB DAB (Ntseeg Ntuj)Tsoom kwv tij phooj ywg sawv daws! -Txoj kev lawb dab tsuas yog lawb tus dab phem,
tus dab ntxias neeg, tus dab noj nyoos haus txias ntawd nkaus xwb (uas yog tus dab ntxwg nyoog uas Tswv Ntuj tau muab ntiab tawm hauv Nws lub zim txwv…)
Peb yeej tsis lawb niam lawb txiv, tsis lawb kwv tsis lawb tij, tsis lawb phooj lawb ywg, tsis lawb neej tsis lawb tsav ib zaug li os mog!
Xav hais rau nej sawv daws paub hais tias peb sawv daws yog neeg tib yam nkaus, peb yeej muaj niam muaj txi, muaj kwv muaj tij, muaj phooj muaj ywg, muaj neej muaj tsav tib yam, muaj tus txheeb tus ze thiab los sad, puas yog?
Qhov tseem ceeb yog PEB LUB NEEJ MUAJ QHOV XAUS ais nyias xav cawm nyias tus kheej, txoj sia, lub dag zog, thiab TUS NTSUJ TUS PLIG xwb!…vim txoj kev tuag caum peb ib txheej dhau ib txheej, ib tiam dhau ib tiam, los txog niaj hnub nim no, peb ib leeg cawm thiab yuav pab tsis tau ib leeg… Peb los ua niam ua txiv, los ua phooj ua ywg tsuas sib pab tau tej yam me me thaum tseem ua neej nyob xwb, es txoj kev tuag peb khiav tsis dim thiab ib tug pab tsis tau ib tug ais nyias thiaj yuav tsum tau pab nyias.
Tsoom phooj ywg sawv daws, kuv li sais: “kuv tsis kam mus ciaj ua dab, thiab ho mus nyob rau hauv lub teb chaws txias-txias, no- no, ntsim-ntsim, tsis pom kev es haj tseem tshaib-tshaib thiab nqhis-nqhis ntawd laid!…Kuv yuav tsum nrhiav kom tau tus Tswv uas Nws tsim kuv, nrhiav kom tau lub teb chaws uas xis nyob, muaj tshav ntuj nrig, mus nyob kaj siab lug, thiab nrhiav kom tau lub teb chaws muaj noj muaj haus, noj tsis tag, haus tsis txhawj, tsis tas yus yuav ntim su mus rau tus ub tus no noj li, thiab yuav mus nrhiav kom tau tus Tswv uas siab zoo; tus Tswv ntawd tsuas yog Tswv Ntuj tib tug xwb!”Tus Tswv Ntuj, Nws yog tus Tswv ntawm lub ntiaj teb, vim rau qhov lub ntuj lub teb yog Nws li, Nws tsim kom muaj lub ntuj lub teb los, tas puas tsav yam yog Nws tsim thiaj li xeeb muaj, tshwm los tiag tiag…
Neeg kuj yog Nws tsim tib yam nkaus,, Peb noob neej txoj sia muaj nuj nqes tshaj txhua yam tsav hauv lub qab ntuj no, peb tib neeg txoj sia yog txoj yog txoj uas Tswv Ntuj tau hlub tshaj plaws huv tib si…
Es peb yuav tsum tau npaj txoj kev ntseeg, thiab npaj siab rov los mus cuag Tswv Ntuj, mus nrog Nws nyob tiag os mog cov phooj ywg!
Mus nyob hauv Tswv Ntuj lub teb chaws, mus nyob muaj txhij muaj txhua, muaj tas puas tsav yam, mus nyob hauv Nws lub teb chaws noj tsis txob, hnav los tsis txhawj, noj tsis tag haus tsis qeg, noj tsis tshaib haus tsis nqhis.
Mus nyob kaj siab lug txais txoj sia ntev dhawv mus ib txhis, tsis txawj ploj tsis txawj tuag, tsis muaj lub caij nyoog tag, mus nyob kaj nrig tsis muaj caij kawg rau peb…Peb tsis tas yuav npaj ub npaj no coj mus noj, (los sis npaj yam noj yam haus) thiab yuav npaj tsiaj npaj txhu coj mus noj li!
Tswv Ntuj lub teb chaws zoo tshaj dab ntxwg nyoog lub lawm qas puas txhiab vam npaug;
Kuv ntseeg hais tias peb sawv daws txawm tus ntseeg thiab tsis ntseeg los yeej paub txog qhov nov heev li!
Cov phooj ywg uas tseem ua- ua xyem xyav txog Tswv Ntuj! –Nej twb paub tias: “tus siab ntev thiaj tau nom ua, tus siab zoo thiaj tau lub ntuj ntoo…”
Tus neeg twg los yeej xav tau koob hmoov los ntawm Tswv Ntuj thiab xwb, ua cas ho tsis kam los sis tsis paub los hwm Tswv Ntuj, los ua li Nws hais, los ua raws li nws qhia, los paub teev Tswv Ntuj li?
Sawv daws tsuas hais txog hwm dab, teev dab xwb ces thaum kawg thiaj muab xa mus rau lub teb chaws tshaib tshaib nqhis nqhis, tsis tau noj tsis tau haus, thiaj yuav tsum rov qab los nrhiav noj nrhiav haus ntawm tej tub tej ki, tej niam tej txiv los sis tej kwv tij…
Ua cas ho yuav tsis muab xa mus rau lub teb chaws noj los tsis txob haus los tsis txhawj, tsis tshaib tsis nqhes li thiaj li tsis rov los nrhiav noj haus ntxiv lawm?
Neeg ntiaj teb los kuj li, (peb haiv Hmoob los ib yam thiab.) Sawv daws tseem nrog dab ntxwg nyoog ua yeeb ncuab rau Tswv Ntuj xwb, tseem hiam Tswv Ntuj, tseem hliav hmuv nkaug Tswv ntuj tus tub uas Nws hlub tshaj plaws es tau tso los pab, los cawm neeg…
Piv xam li no: “Niam txiv twb yug tau tub ki liab ntsha tsuas, tu da quav da zis, thaum tseem me me niam ncej puab ua tog zaum, txiv muab caj npab ua tog rau ncoo, thaum tej tub ki loj hlob tuaj tseem tawm tsam leej niam leej txiv thiab, hnov qab niam txiv tej txiaj ntsig, mas ua rau niam txiv tu siab kawg nkaus. Yog tsis muaj niam muaj txiv, puas yuav muaj tej me tub me nyuam los sis tu ki?
Tswv Ntuj los zoo tib yam nkaus thiab. Nws yog neeg ntiaj teb tus tseem niam tseem txiv tiag tiag . Nws pom zoo kom muaj lub hnub lub hli ci-ziab rau ntiaj teb neeg, ziab rau tej nroj tsuag thiaj loj tau, ziab rau tej qoob loo thiaj hlob taus, txhia tsav puas yam thiaj loj tau tuaj, kom neeg thiaj nrhiav tau noj tau haus yug rau neeg lub cev, ua tshav ntuj los nag pub rau lub ntiaj teb…
Ua npaum li no los neeg tseem tsis qheb neeg lub siab los txais Tswv Ntuj txoj kev hlub thiab. Ais puas ncaj ncees raws li nej xav ?
OB TXOJ KEV XWB !
Nyob ntiaj teb no tsuas muaj ob txoj kev xwb!
–Txoj kev thib 1: Yog nrog Tswv Ntuj, tus tsim tas ib puas tsav yam. Nws tsim neeg los , nws yeej hlub neeg, yeej nyiam neeg tiag. Tswv Ntuj tsuas tos saib neeg puas yuav qheb neeg lub siab tos txais Nws xwb!
Txoj kev thib 2: Yog teev dab, nrog dab ntxwg nyoog hiam los sis ua yeeb ncuab rov rau Tswv Ntuj ntuj xwb!
Vim li cas teev dab xwb es ho hais tau tias hiam Tswv Ntuj, thiab ua yeeb ncuab rau Nws?
-Kuv xav qhia meej , thiab qhia peb paub tseeb raws li no: “Tswv Ntuj yog tus tsim txhua yam tawm los, Nws tsim neeg, tsim dab los ua ke, tab sis dab tsis kam hwm Tswv Ntuj thiab teev Nws(.Dab xav ua tus loj dua , thiab xav yuav lub hwj chim loj ntawm Tswv Ntuj...)
Dab paub tias neeg hwm Tswv Ntuj ces dab thiaj txia ua puas yam tsav los ntxias neeg, kom neeg tsis txhob nco qab txog Tswv Ntuj, zaum no neeg thiaj rov tsis paub hwm Tswv Ntuj thiaj tau khiav deb ntawm Nws thiab tsis paub teev Nws lawm...
Qhov ntawd, twb yog dab tawm tsam Tswv Ntuj, xav ua phem rau Nws, thiaj hais tau hais tias:“Hiam Tswv Ntuj, los sis rov ua yeeb ncuab rau Nws...“ Vim peb yog noob txaug neeg txhaum , yog xeeb leej xeeb ntxwv ntawm peb poj koob yawg koob uas yog AS DAS Thiab ES VAS los
Yog vim li no cov teev dab es lawv muab dab coj los ua lawv niam lawv txiv, muab dab los nyob rau hauv lawv lub vaj lub tse, lawv hais tias yog dab vaj dab tse, lawv hais tias lawv niam lawv txiv tuag mus ua dab lawm es lawv thiaj muab dab los ua lawv niam lawv txiv...tseem muab txhua yam ua yog Vajtswv tsim muaj coj fij, los sis laig rau dab thiab xws li tej tsiaj tej txu lawv tua, tej zaub tej mov lawv muab...
Ntawv Moo Zoo MATHAIS tshooj 3:16 Tswv Ntuj tau hlub neeg tiag tiag...
Thiaj tau tso Nws tib leeg tub Tswv Yes Xus los rau ntiaj teb...
Ntawv Moo Zoo MATHAIS tshooj 11:28-
Huab Tais Yes Xus tau caw peb txhua tug kom muab lub nra hnyav (kev nyuaj siab kev ntxhov siab, yam nyuaj uas peb ua neej nyob es peb ntsib peb muaj...) tso rau Nws ua tus ris, los kwv Nws tug ntoo khaub lig ... thiab rov los mus cuag Tswv Ntuj …
Qhov kawg no thov sawv txhob to taub yuam kev txog kev lawb dab hais tias yog ib txoj tsis zoo rau peb, vim yog mus coj luag txoj es tsis yog coj yus txoj . Txhob tos ntev mog cov phooj ywg! lub sij hawm thiaj li yuav tsis lig rau peb vim peb tsuas paub hnub no thiab hnub nyob xwb peb paub tsis tau rau yav tag kis.
Muaj ib zaj hais txog ib tug yawg nplua nuj. Nws tab tom npaj txua kom tau ib lub tsev loj loj kom txaus rau sawv daws nyob. Hmo ntawd pw xwb tag kis nws cia li tsis sawv lawm. Lub tsev loj heev li, cia li ua tsis tiav, cia li muab tso tseg li ntawd lawm…
Qhia los ntawm JTT
Fab Kis teb 2010
Home
Yog koj tso siab rau Yesxus lub siab ntshiab, nws yuav ua koj siab kaj lug 
Rau Tsoom PHOOJYWG, 
Vim li cas peb cov Kas Tos Liv ntseeg tias NIAM MAB LIAB yog TSWV NTUJ Niam? caws nej mus nias nyeem tau hauv no.
Leej Tshiab Mis Kas Ees thov koj pab tuav thiab saib xyuas peb lub Vas Sab Hmong Catholique ntawm no kom ruaj nrees.
