COV ZAJ NYEEM NRUAB LIS PIAM XYOO I 2022-2023

Tim 22 lub 2 Hlis 2023

Hnub Plaub Txais Tshauv - Pib Caij Plaub Caug Nruab Xyoo ABC, Nruab Lis Piam Xyoo I & II
Lectionary:219

Zaj Nyeem Ib: YOS ES 2: 12-18

12 HUAB TAIS hais tias:
"Lub sij hawm no, nej kav tsij muab tas nrho nej lub siab rov qab los cuag kuv;
nej yoo mov, nej quaj, nej nyiav.
13 Nej dua nej lub siab kom ntuag, tsis txhob dua nej tej ris tsho;
nej rov qab los cuag HUAB TAIS nej tus Tswv Ntuj,
vim nws siab zoo thiab khuv leej neeg tas nrho, nws npau taws qeeb,
nws lub siab puv nkaus kev ua zoo, nws tos tsis hnyoo
yuav thim nws txoj kev rau txim.
14 Tej zaum nws yuav rov thim xav dua los kuj muaj,
ces nws yuav foom ib lo lus zoo tseg rov tom qab,
kom nej muaj tej tsiaj txi ntuj thiab tej cawv
los cev rau HUAB TAIS nej tus Tswv Ntuj.
15 Nej tshuab puab tshuab hom nyob saum Xis Yoos mog!
Nej ua ib txog kev yoo ntshiab,
nej teem ib lub caij tuaj sib txoos tseem ceeb.
16 Nej hu tas tsoom pej xeem tuaj sib sau ua ke,
nej ua kom tsoom neeg dawb huv tuaj;
nej hu cov neeg laus tuaj, nej sau coj cov me nyuam yaus
thiab cov tseem noj mis tib si tuaj.
Kom nraug vauv yuav tsum tso nws lub chaw pw tseg,
Kom nyab yuav tsum tso nws lub paim tseg.
17 Kom cov Leej Choj, uas yog HUAB TAIS cov tub txib,
tuaj quaj nyob hauv lub tshav ntawm kis nruab nrab
lub qhov rooj thiab lub thaj txi Ntuj,
lawv yuav quaj hais tias: ‘HUAB TAIS, thov koj txuag koj haiv neeg!
Koj txhob tso koj lub cuab tam rau luag thuam,
txhob cia cov kuj cuab xyav lawv lub moo.
Vim li cas koj thiaj yuav cia kom cov haiv neeg tau kev thuam tias:
‘Lawv tus Tswv Ntuj nyob qhov twg?’”
18 Ces HUAB TAIS lub siab txhawj txog nws lub teb chaws,
nws thiaj zam rau nws haiv neeg.

NPN 51: 3-4, 5-6ab, 12-13, 14+17

Txais: (3a) HUAB TAIS, thov koj khuv leej peb vim peb tau ua txhaum lawm.

Tswv Ntuj, thov koj khuv leej kuv vim koj lub siab zoo;
thov koj so kuv qhov txhaum pov tseg, vim koj muaj kev hlub loj tas nrho.
Thov koj ntxuav kuv lub txim pov tseg kom tas huv si
thiab muab kuv qhov txhaum tshem mus kom kuv dawb huv tuaj.

Txais: (3a) HUAB TAIS, thov koj khuv leej peb vim peb tau ua txhaum lawm.

Kuv lees paub qhov phem kuv tau ua,
kuv qhov txhaum nyob rawv ntawm kuv xub ntiag mus li:
“Kuv tau ua txhaum rau koj ib leeg xwb,
kuv tau ua qhov uas koj saib yog tsis zoo.”

Txais: (3a) HUAB TAIS, thov koj khuv leej peb vim peb tau ua txhaum lawm.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob ntiab kuv mus deb ntawm koj xub ntiag,
thiab txhob rho koj leej Tswv Yim Ntshiab tawm ntawm kuv mus.

Txais: (3a) HUAB TAIS, thov koj khuv leej peb vim peb tau ua txhaum lawm.

Thov koj pub kom kuv rov zoo siab nyob hauv koj txoj kev cawm
thiab ua kom kuv muaj ib lub tswv yim xav mloog koj.
HUAB TAIS, thov koj qhib kuv di ncauj,
ces kuv lub ncauj yuav tshaj koj lub koob meej.

Txais: (3a) HUAB TAIS, thov koj khuv leej peb vim peb tau ua txhaum lawm.

Zaj Nyeem Ob: 2 KOS LIS NTHOS 5: 20—6: 2

Cov kwv tij nkauj muad:
20 Peb yog Leej Pleev cov tiam lis, ces zoo li yog Tswv Ntuj hais lus nyob hauv peb rau sawv daws. Peb thiaj li sawv Leej Pleev cev thov nej tias, kom nej cia li tig los nrog Tswv Ntuj rov sib raug zoo.
21 Vim Tswv Ntuj hlub peb, nws thiaj ua kom tus uas tsis paub kev txhaum txia ua kev txhaum, kom nyob hauv nws, peb plhis tau ua Tswv Ntuj txoj kev ncaj.
6: 1 Peb koom nrog nws ua hauj lwm ua ke, ces peb thiaj thov qhuab ntuas nej,
kom nej txhob txais Tswv Ntuj lub txiaj ntsim dag xwb.
2 Vim nws hais tias: “Thaum zoo sij hawm, kuv tau teb rau koj raws li koj thov.
Thaum txog hnub cawm neeg, kuv tau pab koj.”
Lub sij hawm zoo yog nyem no ntag; hnub cawm neeg yog nyem no kiag.

Zaj Cav lub Moo Zoo: NPN 95: 8

(Lub Caij 40 peb tsis hais As les lus yas lawm ces thiaj muab hloov hu li no lawm)

Txais: Huab Tais Yes Xus Pleev, Tswv Ntuj Lo Lus, peb cav txog koj.

Hnub no yog nej hnov nws lub suab,
nej tsis txhob ua nej lub siab tawv ncauj.

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo: MT 6: 1-6, 16-18

Yes Xus hais rau nws cov thwj tim tias:
1 “Nej ceev faj kom nej tsis txhob ua ncaj nyob ntawm neeg xub ntiag, kom luag pom nej. Yog nej ua li ntawd, mas nej yuav tsis txais koob haum dab tsi ntawm nej Txiv nyob saum ntuj.
2 Thaum koj pub rau luag, koj txhob tshuab hom ua koj ntej, xws li cov neeg zoo sab nraud ua nyob hauv cov tsev txoos thiab nyob ntawm tej kev, kom sawv daws cav lus zoo txog lawv. Kuv hais tseeb rau nej, lawv twb txais lawv cov koob haum tas lawm.
3 Hos koj, mas thaum koj pub rau luag, koj txhob cia koj sab tes laug paub qhov koj sab tes xis ua.
4 Li ntawd, tsis muaj neeg paub tias koj tau pub rau luag. Ces koj Txiv uas nws pom hauv qhov chaw nraim yuav pauj rau koj.
5 Thaum koj teev Ntuj, koj txhob ua li cov neeg zoo sab nraud: lawv nyiam sawv ntsug hauv cov tsev txoos, thiab ntawm tej kev tshuam, kom sawv daws pom lawv. Kuv hais tseeb rau nej, lawv twb txais lawv cov koob haum lawm.
6 Hos koj, mas thaum koj teev Ntuj, koj mus nyob twj ywm hauv koj kem txaj, kaw koj qhov rooj rau ces koj teev koj Txiv uas nws nyob hauv qhov chaw nraim. Koj Txiv uas nws pom hauv qhov chaw nraim, yuav pauj rau koj.
16 Thaum koj yoo mov, koj txhob ua ntsej muag mluas mlob xws li cov neeg zoo sab nraud: lawv ua ntsej muag ntshaus, kom luag paub tias lawv yoo mov. Kuv hais tseeb rau nej tias cov neeg ntawd twb txais lawv cov koob haum tas lawm.
17 Hos koj, mas thaum koj yoo mov, koj yuav pleev tshuaj tsw qab rau saum taub hau, koj yuav ntxuav muag,
18 kom txhob muaj neeg paub tias koj yoo mov, tsuas kawg koj Txiv uas nws nyob hauv qhov chaw nraim tib leeg paub xwb. Koj Txiv uas pom hauv qhov chaw nraim yuav pauj rau koj.”

Tim 23 lub 2 Hlis 2023

Hnub Tsib tom qab Hnub Plaub Txais Tshauv Xyoo ABC Nruab Lis Piam Xyoo I & II
Lectionary: 220

XHLT: LN Polycarp, Tswv Qhia Tuag ua Tim Khawv

Zaj Nyeem Ib: TCO 30: 15-20

Mais Xes hais rau tsoom pej xeem tias:
15 “Hnub no kuv muab kev muaj txoj sia thiab kev vam meej, kev tuag thiab kev puas ntsoog tso rau ntawm nej xub ntiag.
16 Yog nej mloog HUAB TAIS nej tus Tswv Ntuj cov lus qhia uas hnub no kuv muab rau nej no, yog nej nyiam nws, taug nws txoj kev, ua raws nws tej lus qhia, nws txoj cai thiab tej kev nws tau txiav, mas nej yuav muaj txoj sia thiab nej yuav huam vam ntws coob tuaj; HUAB TAIS nej tus Tswv Ntuj yuav foom hmoov zoo rau nej nyob hauv lub teb chaws uas nej tab tom yuav nkag mus nyob ua nej lub teb chaws.
17 Tab sis yog nej ntxeev siab, nej tsis mloog lus thiab nej cia luag ntxias tau nej mus nrog luag pe hawm thiab tsob hwb lwm cov dab,
18 mas hnub no kuv hais rau nej paub tias, nej yuav ploj mus tas, nej yuav tsis tau nyob ntev xyoo hauv lub teb chaws uas nej yuav hla tus dej Yos Las Das mus txeeb los ua nej tug.
19 Hnub no, kuv hu lub ntuj lub teb nrog kuv ua tim khawv txog nej tias: kuv tau muab txoj sia thiab txoj kev tuag, lo lus zoo thiab lo lus phem tso rau nej xaiv. Nej xaiv txoj sia mog! Nej thiab nej cov xeeb leej xeeb ntxwv thiaj yuav muaj txoj sia,
20 vim nej nyiam HUAB TAIS, nej tus Tswv Ntuj, nej mloog nws lub suab, thiab npuab nws ruaj nreb; qhov ntawd yog qhov yuav ua kom nej muaj txoj sia thiab yuav ua kom nej tau ua neej ntev dhawv hauv lub teb chaws uas HUAB TAIS tau cog lus tias yuav muab pub rau nej cov yawg koob Has Nplas Has, His Xas Has thiab Yas Kos.”

NPN 1: 1-2, 3, 4+6

Txais: (40:5a) Muaj hmoov zoo yog cov uas tso siab rau Huab Tais.

Muaj hmoov zoo yog tus uas tsis coj raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo coj HUAB TAIS txoj cai,
thiab nws xav ntsoov HUAB TAIS txoj cai nruab hnub hmo ntuj.

Txais: (40:5a) Muaj hmoov zoo yog cov uas tso siab rau Huab Tais.

Nws zoo li ib tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj nphob li.
Nws ua yam twg tau yam ntawd .

Txais: (40:5a) Muaj hmoov zoo yog cov uas tso siab rau Huab Tais.

Cov neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov tus neeg ncaj txoj kev,
hos tus neeg phem txoj kev yaj ntshis mus.

Txais: (40:5a) Muaj hmoov zoo yog cov uas tso siab rau Huab Tais.

Zaj Cav lub Moo Zoo: MT 4: 17

Huab Tais hais tias: Nej yuav thov txhaum,
vim lub Ceeb Tsheej saum ntuj tuaj txog ze lawm.

Ntawv Moo Zoo: LK 9: 22-25

22 Yes Xus hais rau nws cov thwj tim tias: “Neeg Leej Tub yuav tsum raug txom nyem loj thiab raug cov txwj laus, cov Thawj Leej Choj, thiab cov Kws Ntawv Ntshiab muab nws tshem tawm. Nws yuav raug luag tua, ces hnub peb nws yuav sawv rov los.”
23 Nws tseem hais rau sawv daws tias: “Yog leej twg xav los raws kuv, mas nws yuav tsis txhob nco txog nws, nws yuav niaj hnub kwv nws tus ntoo cuam, thiab lawv kuv qab.
24 Vim tias tus xav cawm nws txoj sia, mas nws yuav ua nws txoj sia ploj. Hos tus twg ua nws txoj sia ploj vim kuv, mas tus ntawd yuav cawm tau nws txoj sia.
25 Yog ib tug neeg txeeb tau lub ntiaj teb tas huv si los ua nws tug, tab sis nws ua nws ploj los ua nws tus kheej puam tsuaj tas, mas nws tau dab tsi zoo?”

Tim     24     lub     2     Hlis     2023

Hnub Rau tom qab Hnub Plaub Txais Tshauv Xyoo ABC Nruab Lis Piam Xyoo I & II
Lectionary: 221

Zaj Nyeem Ib:   HX 58: 1-9a

HUAB TAIS Tswv Ntuj hais li no:
1 -“Koj kav tsij qw nrov nrov txhob tso tseg, tsa koj lub suab kom nrov li lub hom, koj tshaj rau kuv haiv neeg txog lawv txoj kev ua phem, thiab rau Yas Kos tsev neeg txog lawv cov txhaum.
2 Lawv nrhiav kuv hnub dhau hnub, lawv xav paub txog kuv tej kev, lawv ua zoo li lawv yog ib lub kuj cuab uas coj kev ncaj thiab tsis tso nws tus Tswv Ntuj txoj cai pov tseg; lawv thov kom kuv txiav txim ncaj rau lawv; lawv zoo siab kawg tias lawv tau los nyob ze Tswv Ntuj.
3 -Vim li cas peb thiaj yuav yoo mov, yog koj twb tsis pom, los ua kev them txim txhaum yog koj twb tsis quav ntsej txog?
-Ntsia saib, hnub nej yoo mov, nej tseem ua hauj lwm rau nej tus kheej xwb, thiab nej tseem yuam nej cov tub zog thiab.
4 Thaum nej yoo mov nej tsuas nrhiav kev sib cav sib ceg, kev ua siab phem siv zog xuas nrig sib tsuab sib ntaus xwb. Nej yuav tseg tsis txhob yoo mov xws li niaj hnub no, ces thiaj yuav muaj tus mloog nej lub suab nyob saum txheej siab.
5 Txoj kev yoo zoo li no puas yog txoj uas kuv xaiv, puas yog ib hnub uas tib neeg ua kev them txim txhaum? Ua taub hau qaij de xws li ib tug tauj deg, tso cev pw saum ntaub tsaj thiab plua tshauv, puas yog qhov nej hu ua kev yoo, puas yog ib hnub uas HUAB TAIS zoo siab txais?
6 Txoj kev yoo raws li kuv nyiam yog zoo li no: Tshem txoj kev phem tej saw khi neeg, daws cov hlua quab yuam neeg, tso cov neeg raug hiam kom tau kev twj lij, muab txhua yam quab lov pov tseg,
7 muab koj mov los faib rau tus neeg tshaib noj, caw cov raug luag ntiab tawm thiab cov txom nyem tsis muaj chaw nyob los so hauv koj tsev, muab ris tsho rau cov neeg koj pom liab qab tau hnav, thiab tsis txhob tig nrob qaum rau tus uas yog koj roj koj ntshav.
8 Li no mas koj qhov pom kev thiaj yuav ci tawm tuaj xws li thaum lub hnub tawm, koj lub mob yuav zoo sai, koj txoj kev ncaj ncees yuav mus ua koj ntej, HUAB TAIS lub hwj chim yuav lawv koj qab thaiv koj.
9 Yog koj hu mas HUAB TAIS yuav teb, yog koj qw, nws yuav hais tias : ‘Kuv nyob ntawm no.’”

NPN   51: 3-4, 5-6ab, 18-19

Txais: (19b) Tswv Ntuj, koj yuav tsis ntiab tus tu siab
rau nws cov txhaum thiab ua neeg me.

Tswv Ntuj, thov koj khuv leej kuv, vim koj lub siab zoo;
thov koj so kuv qhov txhaum pov tseg, vim koj muaj kev hlub loj tas nrho.
Thov koj ntxuav kuv lub txim pov tseg kom tas
thiab koj tshem kuv qhov txhaum mus kom kuv dawb huv tuaj.

Txais: (19b) Tswv Ntuj, koj yuav tsis ntiab tus tu siab
rau nws cov txhaum thiab ua neeg me.

Kuv lees paub kuv qhov txhaum,
kuv qhov txhaum nyob rawv ntawm kuv xub ntiag.mus li:
“Kuv tau ua txhaum rau koj ib leeg xwb,
kuv tau ua qhov uas koj saib yog phem.”

Txais: (19b) Tswv Ntuj, koj yuav tsis ntiab tus tu siab
rau nws cov txhaum thiab ua neeg me.

Vim koj tsis zoo siab txais cov kev hlawv tsiaj txi ntuj;
yog kuv hlawv tsiaj txi rau koj, koj yuav tsis txais.
Tswv Ntuj, kuv thaj txi ntuj, yog muaj ib lub tswv yim xav lees txhaum;
tus muaj ib lub siab xav lees txhaum thiab ua neeg me,
Tswv ntuj, koj yuav tsis ntiab nws.

Txais: (19b) Tswv Ntuj, koj yuav tsis ntiab tus tu siab
rau nws cov txhaum thiab ua neeg me.

Zaj Cav lub Moo Zoo:   AS MOS 5: 14

Nej nrhiav qhov zoo txhob nrhiav qhov phem,
ces nej yuav muaj txoj sia, thiab Huab Tais yuav nrog nraim nej.

Ntawv Moo Zoo:   MT 9: 14-15

14 Zam cov thwj tim tuaj cuag Yes Xus, lawv hais tias:
"Peb thiab cov Fas Lis Xais yoo mov heev kawg, vim li cas koj cov thwj tim ho tsis yoo?".
15 Yes Xus teb lawv tias: “Cov qhua tuaj noj tshoob puas yuav tsum muaj kev tu siab thaum nraug vauv tseem nrog lawv nyob? Muaj ib hnub thaum luag coj nraug vauv mus lawm, mas lawv mam li yuav yoo mov.”  *

Tim 25 lub 2 Hlis 2023

Hnub Xya tom qab Hnub Plaub Txais Tshauv Xyoo ABC Nruab Lis Piam Xyoo I & II
Lectionary: 222

Zaj Nyeem Ib: HX 58: 9b-14

HUAB TAIS hais li no:
9b “Yog koj tshem txoj kev quab yuam neeg ntawm koj mus, yog koj tsis taw tes nki liam rau luag, koj tsis hais lus phem,
10 yog koj muaj lub siab dav fo pub rau tus neeg tshaib plab noj, thiab pab tus neeg txom nyem kom nws zoo siab, mas koj qhov pom kev yuav sawv tuaj nyob hauv qhov tsaus ntuj, thiab koj qhov tsaus yuav pom kev nrig li thaum tav su.
11 HUAB TAIS yuav coj koj kev tas mus li; nws yuav pub rau koj tau noj tau haus kom txaus siab tab txawn yog lub caij av qhuav qhawv, thiab nws yuav ua kom koj cov pob txha rov muaj zog tuaj; koj yuav zoo li ib lub vaj muaj dej ywg nraim, thiab yuav zoo li ib lub qhov uas dej txhawv tsis txawj tu.
12 Vim koj, mas tej qub vaj tse uas vau ntev los lawd yuav raug muab rov tsa dua tshiab; koj yuav rov txhim cov qub taw ntsa uas nyob ntau txheej ntau tiam los lawd dua tshiab; ces luag yuav hu koj ua “tus kho cov phab ntsa tawg,” “tus rov txhim tej vaj tej tse puas.”
13 Yog koj caiv hnub xas npas tos, koj thim koj txhais ko taw, tsis mus ua raws koj siab nyiam nyob hauv kuv hnub ntshiab, yog koj hu hnub xas npas tos ua "Hnub zoo tshaj plaws", thiab “HUAB TAIS hnub ntshiab tsim nyog hwm,” yog koj hwm hnub ntawd, koj tsis mus raws koj tej kev ntshaw, koj tsis ua raws koj siab nyiam, koj tsis hais lus phem,
14 mas koj yuav muaj kev zoo siab puv npo nyob hauv HUAB TAIS; kuv yuav cia koj caij tsheb hla saum tej chaw siab nyob hauv lub ntiaj teb; kuv yuav muab koj txiv Yas Kos lub cuab tam los yug koj. Vim HUAB TAIS lub ncauj tau hais li ntawd.

NPN 86: 1-2, 3-4, 5-6

Txais: (11ab) Thov koj qhia koj txoj kev rau kuv, Huab Tais,
kuv thiaj paub taug kev raws koj txoj kev tseeb.

Thov koj khoov cuab pob ntseg los mloog kuv, HUAB TAIS;
thov koj teb kuv, vim kuv txom nyem thiab kuv pluag.
Thov koj txuag kuv txoj sia, vim kuv lub siab npuab koj;
thov koj cawm koj tus tub txib uas tso siab rau koj.
Koj yog kuv tus Tswv Ntuj.

Txais: (11ab) Thov koj qhia koj txoj kev rau kuv, Huab Tais,
thiaj paub taug kev raws koj txoj kev tseeb.

Thov koj khuv leej kuv, Huab Tais,
vim kuv hu koj tas hnub.
Thov koj pub kev zoo siab rau koj tus tub txib tus ntsuj plig,
vim kuv tsa kuv tus ntsuj plig yuj plaws tuaj rau koj, Huab Tais.

Txais: (11ab) Thov koj qhia koj txoj kev rau kuv, Huab Tais,
kuv thiaj paub taug taug kev raws koj txoj kev tseeb.

HUAB TAIS, koj lub siab zoo thiab txawj zam txhaum,
koj ua zoo tas nrho rau cov uas hu txog koj.
HUAB TAIS, thov koj mloog kuv zaj thov ntuj
thiab cuab pob ntseg rau kuv lo lus thov.

Txais: (11ab) Thov koj qhia koj txoj kev rau kuv, Huab Tais,
kuv thiaj paub taug kev raws koj txoj kev tseeb.

Zaj Cav Lub Moo Zoo: ES XES KIAS 33: 11

Huab Tais hais tias: Kuv tsis zoo siab pom tus neeg phem tuag,
kuv tsuas xav kom nws tig los ua neeg zoo, ces nws thiaj yuav muaj txoj sia.

Ntawv Moo Zoo: LK 5: 27-32

27 Yes Xus mus pom ib tug sau se hu ua Les Vis zaum ntawm lub rooj sau se. Yes Xus hais rau nws tias: "Koj raws kuv mus."
28 Ces Les Vis sawv tsees, nws tso tas ib puas tsav yam tseg, nws raws Yes Xus mus.
29 Les Vis ua ib rooj qav loj tos txais Yes Xus hauv nws tsev. Muaj ib pab neeg sau se coob coob thiab tseem muaj lwm cov neeg nrog lawv zaum ntawm rooj mov.
30 Cov Fas Lis Xais thiab lawv cov Kws Ntawv Ntshiab yws yws rau Yes Xus cov thwj tim hais tias: "Vim li cas nej nrog cov neeg sau se thiab cov neeg txhaum noj haus ua ke?"
31 Yes Xus teb rau lawv tias: "Cov neeg noj qab nyob zoo tsis vam txog kws kho mob, tiam sis cov muaj txiab muaj nkeeg mas lawv vam txog.
32 Kuv tsis tuaj hu cov neeg ncaj, tiam sis kuv tuaj hu cov neeg txhaum kom tig los lees txhaum hloov dua siab." *

Tim 27 lub 2 Hlis 2023

Hnub Ob Lis Piam Ib Caij 40 Xyoo ABC Nruab Lis Piam Xyoo I & II
Lectionary: 224

Zaj Nyeem Ib: LES VIS 19: 1-2, 11-18

1 HUAB TAIS hais lus rau Mais Xes, nws hais tias :
2 "Koj hais rau tas tsoom tub ki His Xas Lais tuaj sib sau ua ke tias :
‘Nej yuav ua neeg ntshiab, vim kuv, HUAB TAIS nej tus Tswv Ntuj, kuv Ntshiab.
11 Nej yuav tsis txhob ua tub sab; tsis txhob hais tej lus cuav tsis muaj tseeb; tsis txhob dag ib leeg rau ib leeg.
12 Nej yuav tsis txhob lam tuav txog kuv lub npe los cog lus cuav, tsis txhob ua tej yam uas yog ua tsis hwm nej tus Tswv Ntuj lub npe. Kuv yog HUAB TAIS.
13 Koj tsis txhob nrhiav kev noj tus nyob ze koj, tsis txhob nyiag nws tug;
koj yuav tsis txhob khaws koj tus tub ntiav zog hnub no nws tus nqe zog cia rau ntawm koj kom txog tag kis.
14 Koj yuav tsis txhob tsawm foom lus phem rau tus neeg lag ntseg, thiab tsis txhob muab ib yam coj mus tav tus dig muag kev, tiam sis koj yuav ntshai koj tus Tswv Ntuj. Kuv yog HUAB TAIS.
15 Koj yuav tsis txhob ua tsis ncaj thaum koj txiav txim rau luag, txhob tuaj tus neeg pluag tog los txhob tsa tus ua nom cai, tiam sis koj yuav txiav txim rau cov neeg raws txoj kev ncaj xwb.
16 Koj yuav tsis txhob xyav koj cov neeg txheeb ze lub npe rau ub rau no, tsis txhob ua ntsej lag muag dig thaum tus nyob ze koj raug luag txov nws txoj sia. Kuv yog HUAB TAIS.
17 Koj yuav tsis txhob ntxub koj tus kwv tij nyob hauv koj nruab siab; koj yuav cem yuav qhuab qhia tus nyob ze koj, koj thiaj yuav tsis tau ris nws qhov txhaum.
18 Koj yuav tsis txhob nrhiav kev ua pauj, thiab yuav tsis txhob khaws kev chim rau koj cov neeg ib tug twg li. Tiam sis koj yuav nyiam tus nyob ze koj ib yam li koj nyiam koj. Kuv yog HUAB TAIS.

NPN 19: 8, 9, 10, 15

Txais: (Zam 6:63b) Huab Tais, koj cov lus yog tswv yim thiab yog txoj sia.

HUAB TAIS txoj cai zoo tas nrho,
nws ntxiv siav ntxiv zog rau tus ntsuj plig;
tsim nyog tso siab rau HUAB TAIS tus txhooj,
nws ua kom tus neeg ruam thoob tsib tuaj.

Txais: Huab Tais, koj cov lus yog tswv yim thiab yog txoj sia.

HUAB TAIS cov lus qhuab qhia yog lus ncaj
ua kom neeg lub siab luag ntxhi.
HUAB TAIS lo lus qhia meej kawg,
ua kom neeg qhov muag pom kev.

Txais: Huab Tais, koj cov lus yog tswv yim thiab yog txoj sia.

Txoj kev hwm HUAB TAIS yog kev dawb huv,
txoj kev ntawd yuav nyob mus li;
HUAB TAIS cov lus txiav txim yog lus tseeb,
tas nrho yog lus ncaj ncees.

Txais: Huab Tais, koj cov lus yog tswv yim thiab yog txoj sia.

Thov kom cov lus ntawm kuv lub ncauj
thiab txoj kev xav hauv kuv nruab siab zoo raws koj nyiam,
HUAB TAIS, kuv lub tsua thiab kuv tus cawm seej.

Txais: Huab Tais, koj cov lus yog tswv yim thiab yog txoj sia.

Zaj Cav lub Moo Zoo: 2 KOS LIS NTHOS 6: 2b

Ntsia saib, lub sij hawm zoo, yog nyem no.
Hnub muaj kev cawm neeg, yog nyem no.

Ntawv Moo Zoo: MT 25: 31-46

Yes Xus hais rau nws cov thwj tim tias:
31 “Thaum Neeg Leej Tub yuav los muaj hwj chim, thiab tas tsoom Tshiab yuav nrog nws los, mas nws yuav zaum saum nws lub theej kiab muaj hwj chim.
32 Tas ib tsoom haiv neeg yuav sib sau nyob ntawm nws xub ntiag. Ces nws yuav muab lawv cais nyias nyob rau nyias ib qho, xws li tus tswv zov yaj cais cov yaj ntawm cov tshis.
33 Nws yuav muab cov yaj tso rau ntawm nws sab xis, muab cov tshis tso rau ntawm nws sab laug.
34 Ces tus Vaj yuav hais rau cov nyob nws sab xis tias: “Nej cov uas kuv Txiv pub txoj hmoov zoo rau nej, nej los txais lub Ceeb Tsheej uas yeej npaj tseg rau nej txij puag thaum nyuam qhuav tsim lub sim ceeb los lawm, ua nej tug.
35 Vim tias kuv tshaib plab, nej pub rau kuv noj; kuv nqhis dej, nej pub rau kuv haus, kuv yog ib tug pej kum neeg, nej txais kuv;
36 kuv liab qab, nej muab rau kuv hnav; kuv mob, nej tuaj xyuas kuv; kuv nyob hauv tsev loj faj, nej tuaj saib kuv.”
37 Ces cov neeg ncaj yuav teb tias: “Huab Tais, thaum twg peb tau pom koj tshaib plab ces peb tau pub rau koj noj, los pom koj nqhis dej, ces peb tau muab rau koj haus?
38 Thaum twg peb tau pom koj yog ib tug pej kum neeg, ces peb tau txais koj, los pom koj liab qab ces peb tau muab rau koj hnav?
39 Thaum twg peb tau pom koj mob los nyob hauv tsev loj faj, ces peb tau tuaj xyuas koj?”
40 Tus Vaj yuav teb rau lawv tias: “Kuv hais tseeb rau nej, yog nej tau ua npaum li cas rau ib tug twg nyob hauv cov me tshaj hauv kuv tsoom kwv, mas yog nej tau ua rau kuv lawm.”
41 Ces tus vaj yuav hais rau cov nyob sab laug tias: “Nej khiav mus deb ntawm kuv, nej cov tau txoj hmoov phem, mus nyob hauv cov hluav taws kub tsis txawj tuag, uas yog npaj rau tus dab phem thiab nws cov dab nyob.
42 Vim thaum kuv tshaib plab nej tsis pub rau kuv noj, kuv nqhis dej nej tsis pub rau kuv haus,
43 kuv yog ib tug pej kum neeg nej tsis txais kuv, kuv liab qab nej tsis muab rau kuv hnav, kuv mob thiab kuv nyob hauv tsev loj faj nej tsis tuaj xyuas kuv.”
44 Ces cov ntawd kuj yuav teb rau tus Vaj tias: “Huab Tais, thaum twg peb tau pom koj tshaib plab los nqhis dej, pom koj yog ib tug pej kum neeg, pom koj liab qab, pom koj mob los nyob hauv tsev loj faj, ces peb tsis tau pab koj?”
45 Ces tus Vaj yuav teb rau lawv tias: “Kuv hais tseeb rau nej, yog nej tsis tau ua rau ib tug twg nyob hauv cov neeg me tshaj npaum li cas, mas yog nej tsis tau ua rau kuv.”
46 Ces cov no yuav mus raug txim ib txhiab ib txhis, hos cov siab ncaj yuav mus txais txoj sia nyob mus li.

Tim 28 lub 2 Hlis 2023

Hnub Peb Lis Piam Ib Caij 40 Xyoo ABC Nruab Lis Piam Xyoo I & II
Lectionary: 225

Zaj Nyeem Ib: HIS XAIS 55: 10-11

Huab Tais hais li no:
10 “Xws li cov nag thiab cov daus uas poob saum ntuj los, yuav tsis rov
mus saum ntuj ua ntej lawv yuav tsum xub ywg lub ntiaj teb tas tso,
kom av zoo thiab tuaj taus kaus, thiaj yuav txi taus noob qoob noob loo
rau tus tswv tseb noob thiab pub tau mov rau tus yuav noj tso,
11 ib yam li ntawd, lo lus tawm ntawm kuv lub ncauj los
kuj yuav tsis rov qab los cuag kuv qhuav nquas,
nws yuav tsum xub tau ua qhov kuv xav kom ua,
thiab ua tiav log txoj hauj lwm kuv xa nws mus ua tso."

NPN 34: 4-5, 6-7, 16-17, 18-19

Txais: (18b) Tswv Ntuj cawm cov neeg ncaj ntawm tas lawv tej kev nyuaj.

Nej nrog kuv cav txog HUAB TAIS lub koob meej,
peb sawv daws ua ke qhuas nws lub npe mog.
Kuv nrhiav HUAB TAIS, nws tau teb kuv,
thiab tau cawm kuv ntawm tas kuv tej kev ntshai.

Txais: (18b) Tswv Ntuj cawm tus neeg ncaj ntawm tas lawv tej kev nyuaj.

Nej vam txog nws ces nej yuav zoo siab luag ntxhi,
nej ntsej muag yuav tsis liab vim nej tau kev txaj muag.
Thaum tus neeg pluag hu, HUAB TAIS yuav hnov,
thiab yuav cawm nws ntawm tas nws tej kev nyuaj.

Txais: (18b) Tswv Ntuj cawm tus neeg ncaj ntawm tas lawv tej kev nyuaj.

HUAB TAIS muaj qhov muag pom cov neeg ncaj,
muaj pob ntseg hnov lawv lub suab quaj.
HUAB TAIS tawm tsam cov neeg ua phem,
rhuav lawv kom lub ntiaj teb txhob nco txog lawv ntxiv.

Txais: (18b) Tswv Ntuj cawm tus neeg ncaj ntawm tas lawv tej kev nyuaj.

Thaum cov neeg ncaj hu, HUAB TAIS hnov lawv,
Nws cawm lawv ntawm tas lawv tej kev nyuaj.
HUAB TAIS nyob ze ze cov neeg siab lwj siab ntuag,
thiab nws cawm cov uas tas kev cia siab.

Txais: (18b) Tswv Ntuj cawm tus neeg ncaj ntawm tas lawv tej kev nyuaj.

Zaj Cav lub Moo Zoo: MT 4: 4b

Neeg tsis kawg muab mov los yug siav xwb,
neeg tseem yuav muab txhua lo lus tawm
ntawm Tswv ntuj lub ncauj los yug siav thiab.

Ntawv Moo Zoo: MT 6: 7-15

Yes Xus hais rau nws cov thwj tim tias:
7 “Thaum nej teev Ntuj, nej txhob ntuas mus ntuas los zoo li cov neeg teev dab ua: lawv xav tias yog lawv hais lus ntau ntau, mas dab yuav mloog lawv zoo dua.
8 Nej txhob ua zoo li lawv. Vim nej Txiv paub tias qhov twg yog qhov nej yuav tsum muaj, tab yog nej tsis tau thov, nws twb xub paub lawm.
9 Nej yuav teev Ntuj zoo li no:
‘Peb Txiv nyob saum ntuj, ua kom koj lub Npe ntshiab nto moo lug.
10 Koj lub Ceeb Tsheej kom los txog.
Kom muaj raws koj nyiam nyob ntiaj teb no zoo li nyob saum ntuj.
11 Thov koj pub mov txaus peb noj hnub no.
12 Koj zam peb cov nuj nqes rau peb zoo li peb zam rau cov tshuav nuj nqes ntawm peb.
13 Koj txhob tso peb raug kev ntxias. Thov koj npo peb dim ntawm kev phem.’
14 Yog nej zam rau cov neeg ua txhaum rau nej, mas nej Txiv nyob saum ntuj kuj yuav zam rau nej thiab.
15 Hos yog nej tsis zam txhaum rau luag, mas nej Txiv kuj yuav tsis zam rau nej thiab.”

Tim     1     lub     3     Hlis     2023

Hnub Plaub Lis Piam Ib Caij 40 Xyoo ABC Nruab Lis Piam Xyoo I & II
Lectionary: 226

Zaj Nyeem Ib:   YOS NAS 3: 1-10

1 HUAB TAIS lo lus nrov tuaj rau Yos Nas zaum ob tias:
2 "Koj sawv kev, koj yuav mus kom txog lub tuam tsheej loj Nis Nis Vas, koj yuav tshaj rau lawv raws li kuv qhia rau koj hais."
3 Yos Nas thiaj sawv kev, ces nws mus rau Nis Nis Vas raws li HUAB TAIS lo lus. Lub tsheej Nis Nis Vas yog ib lub tsheej loj kawg nkaus, yuav mus peb hnub ke thiaj hla dhau lub tsheej.
4 Yos Nas pib mus hla hauv lub nroog, nws mus kev deb li ib hnub ke, nws ke mus ke tshaj tawm rau sawv daws tias: "Tshuav plaub caug hnub ntxiv, ces lub tsheej Nis Nis Vas yuav raug rhuav tas."
5 Cov neeg nyob Nis Nis Vas cia li ntseeg Tswv Ntuj; lawv ceeb toom kom sawv daws yoo mov thiab npua ntaub tsaj, tsis hais tus laus los tus hluas li.
6 Thaum lub moo no nrov tuaj txog tus vaj nyob Nis Nis Vas, nws sawv tsees ntawm nws lub theej kiab los, nws hle hlo nws lub tsho tshaj sab tseg, nws muab zoj ib lub hnab tsaj los npua, nws mus zaum hauv cov plua tshauv.
7 Ces nws kom lawv mus qw thoob plaws hauv lub nroog Nis Nis Vas raws li tus vaj thiab nws cov tub nom tub tswv lo lus ceeb toom tias: "Tej neeg thiab tsiaj txhu, cov tsiaj loj thiab tsiaj me, sawv daws yuav tsis txhob noj dab tsi li, tsis noj mov noj zaub tsis haus dej li.
8 Txawm tus neeg txawm tus tsiaj los yuav tsum npua hnab tsaj huv tib si thiab yuav hu txog Tswv Ntuj tas zog; txhua tus neeg nyias yuav tso nyias txoj kev ua phem tseg, yuav cheem nyias ob txhais tes kom txhob ntaus luag txhob tsim txom luag ntxiv.
9 Tsis muaj neeg paub, tiam sis tej zaud Tswv Ntuj siab yuav nqig, nws yuav thim xav, yuav thim nws txoj kev npau taws kub lug, ces peb sawv daws yuav tsis tuag ."
10 Tswv Ntuj pom lawv cov hauj lwm, thiab pom tias lawv tso lawv txoj kev ua phem tseg tiag, ces Tswv Ntuj hloov siab, nws thim qhov phem uas nws npaj yuav ua rau lawv, ces nws tsis ua raws li nws tau hais.

NPN   51: 3-4, 12-13, 18-19

Txais: (19b) Tswv Ntuj, koj tsis thuam tus tu siab rau nws cov txhaum thiab ua neeg me.

Tswv Ntuj, thov koj khuv leej kuv vim koj lub siab zoo;
thov koj so kuv qhov txhaum pov tseg, vim koj txoj kev hlub loj tas nrho.
Thov koj ntxuav kuv lub txim pov tseg kom tas
thiab tshem kuv qhov txhaum mus kom kuv dawb huv tuaj.

Txais: Tswv Ntuj, koj tsis thuam tus tu siab rau nws cov txhaum thiab ua neeg me.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,
thiab txhob rho koj leej Tswv Yim Ntshiab tawm ntawm kuv mus.

Txais: Tswv Ntuj, koj tsis thuam tus tu siab rau nws cov txhaum thiab ua neeg me.

Vim koj tsis zoo siab txais cov kev txi ntuj,
yog kuv hlawv tsiaj txi ntuj, koj yuav tsis txais.
Kuv txoj kev txi ntuj, Tswv Ntuj, yog muaj ib lub tswv yim xav lees txhaum;
tus muaj ib lub siab xav lees txhaum thiab ua neeg me,
Tswv ntuj, koj yuav tsis ntiab nws.

Txais: Tswv Ntuj, koj tsis thuam tus tu siab rau nws cov txhaum thiab ua neeg me.

Zaj Cav lub Moo Zoo:   YOS ES 2: 12-13

HUAB TAIS hais tias, lub sij hawm no,
nej kav tsij muab tas nrho nej lub siab tig rov los cuag kuv,
vim kuv muaj lub siab hlub thiab khuv leej neeg.

Ntawv Moo Zoo:   LK 11: 29-32

29 Thaum tej pab neeg coob coob tuaj sib sau nyob ua ke, Yes Xus pib hais lus rau lawv tias: "Tiam neeg no yog ib tiam neeg phem. Lawv taij ib lub cim, tab sis yuav tsis muaj ib lub cim rau lawv pom, tsuas kawg muaj tus yaj saub Yos Nas lub cim xwb.
30 Xws li Yos Nas yog ib lub cim rau cov neeg nyob Nis Nis Vas, Neeg Leej Tub kuj yog ib lub cim rau tiam neeg no thiab.
31 Thaum txog hnub txiav txim, tus poj vaj nyob Naj Fab yuav nrog tiam neeg no sawv rov los, nws yuav muab txim rau lawv, vim nws tuaj puag tim npoo ntiaj teb kawg tuaj mloog Xas Los Moos cov lus thoob tsib. Hos nyob ntawm no, twb muaj tus loj dua Xas Los Moos!
32 Thaum txog hnub txiav txim, cov neeg nyob Nis Nis Vas yuav nrog tiam neeg no sawv rov los, lawv yuav muab txim rau tiam neeg no, vim tias thaum Yos Nas tuaj qhia lawv, mas lawv thim xav, hos nyob ntawm no twb muaj tus loj dua Yos Nas!”  

Tim 2 lub 3 Hlis 2023

Hnub Tsib Lis Piam Ib Caij 40 Xyoo ABC Nruab Lis Piam Xyoo I & II
Lectionary: 227

Zaj Nyeem Ib: Es Thes C: 12, 14-16, 23-25 (raws li ‘USCCB Lectionary wkdays’.)

12 Tus poj vaj Es Thes txhawj xeeb loj kawg nkaus, ces nws tig mus vam khom HUAB TAIS pab. Nws khoov ti av nrog nws cov ntxhais txib, txij sawv nrxov mus txog tsaus ntuj.
14 Nws thiaj thov Huab Tais His Xas Lais tus Tswv Ntuj li no tias:
“Has Nplas Has tus Tswv Ntuj, His Xas Has tus Tswv Ntuj, Yas Kos tus Tswv Ntuj, thov kom koj nto koob meej. Thov koj tuaj pab kuv, vim kuv ib leeg xwb, tsis muaj leej twg pab, tsuas muaj koj xwb.
15 Thiab kuv tab tom yuav pheej hmoo rau kuv txoj sia.
16 Txij thaum kuv tseem yau los, kuv tau hnov kuv cov poj yawm tej ntaub ntawv hais txog tias: Huab Tais, txhua zaus koj yeej tuaj cawm cov neeg uas ua ntxim koj siab. Zaum no, thov koj pab kuv, vim kuv ib leeg xwb, tsis muaj leej twg pab, tsuas muaj koj xwb, Huab Tais kuv tus Tswv Ntuj.
23 Zaum no, thov koj tuaj pab kuv, uas yog ib tug me nyuam ntsuag.
24 Thov koj muab ib co lus muaj kuab rau kuv qhov ncauj kom txawj ua rau tsov ntxhuav lub siab muag thiab txawj tig tsov lub siab mus ntxub peb tus yeeb ncuab, thiaj yuav ua kom tus yeeb ncuab thiab nws cov neeg koom siab ploj mus kom tas.
25. Thov koj cawm peb dim ntawm peb cov yeeb ncuab txhais tes; koj muab peb txoj kev quaj ntsuag hloov mus ua kev zoo siab, thiab muab peb txoj kev tu siab hloov mus ua kev kaj siab.”

NPN 138: 1-2ab, 2cde-3, 7c-8

Txais: (3a) Huab Tais, thaum kuv hu kom koj tuaj pab, koj tau teb kuv.

HUAB TAIS, kuv ua koj tsaug tas siab tas ntsws,
vim koj tau hnov kuv lub ncauj cov lus thov;
kuv yuav hu nkauj cav txog koj nyob ntawm cov tshiab xub ntiag;
kuv yuav pe hawm koj nyob hauv koj lub tuam tsev ntshiab
thiab yuav hais ua tsaug rau koj lub npe.

Txais: (3a) Huab Tais, thaum kuv hu kom koj tuaj pab, koj tau teb kuv.

Vim Koj txoj kev ua siab zoo thiab koj txoj kev tseeb,
koj ua kom koj lub npe thiab koj txoj kev cog lus
nyob siab tshaj tas txhua yam.
Thaum kuv hu txog koj, koj tau teb kuv lawm,
koj tau ntxiv zog rau kuv kom kuv lub zog loj tuaj.

Txais: (3a) Huab Tais, thaum kuv hu kom koj tuaj pab, koj tau teb kuv.

Koj txhais tes xis tau cawm kuv.
HUAB TAIS yuav ua kom tiav tej yam nws tau ua rau kuv.
HUAB TAIS, koj lub siab zoo yuav nyob mus li;
thov koj txhob tso cov hauj lwmntawm koj txhais tes pov tseg.

Txais: (3a) Huab Tais, thaum kuv hu kom koj tuaj pab, koj tau teb kuv.

Zaj Cav lub Moo Zoo: NPN 51: 12a, 14a

Tswv Ntuj, thov koj tsim ib lub siab huv lis si rau kuv,
thov koj pub kom kuv rov zoo siab nyob hauv koj txoj kev cawm

Ntawv Moo Zoo: MT 7: 7-12

Yes Xus hais rau nws cov thwj tim tias:
7 "Nej thov, ces nej yuav tau txais; nej nrhiav, ces nej yuav ntsib; nej khob qhov rooj, ces luag yuav qhib rau nej.
8 Vim tias leej twg thov, nws yuav tau txais; leej twg nrhiav, nws yuav ntsib; leej twg khob qhov rooj, mas yuav muaj tus qhib rau nws.
9 Nyob hauv nej, puas muaj leej twg yuav muab ib lub pob zeb rau nws tus tub yog tus tub taij mov noj?
10 Los puas yuav muab ib tug nab rau nws, yog nws taij ib tug ntses?
11 Yog tias nej, uas yog neeg phem, twb txawj pub tej yam zoo rau nej cov me nyuam, mas nej Txiv tus nyob saum ntuj haj yam yuav txawj pub tej yam zoo rau cov neeg uas thov nws.
12 Tej yam uas nej xav kom luag ua rau nej, mas nej kuj yuav tsum ua tej ntawd rau luag thiab. Txoj Cai thiab cov Yaj Saub yog li ntawd.”

Tim 3 lub 3 Hlis 2023

Hnub Rau Lis Piam Ib Caij 40 Xyoo ABC Nruab Lis Piam Xyoo I & II
Lectionary: 228

XHLT: LN Katharine Drexel (USA)

Zaj Nyeem Ib: ES XES KIAS 18: 21-28

Huab Tais Tswv Ntuj hais tias:
21 “Yog tus neeg siab phem tseg ncua tsis ua tas nws tej txhaum uas nws tau ua ntxiv, nws los coj tas kuv cov lij choj thiab ua raws txoj cai thiab raws txoj kev ncaj, mas nws yeej yuav muaj txoj sia, nws yuav tsis tuag.
22 Kuv yuav tsis nco txog nws cov txhaum nws tau ua ib qho li, nws yuav ciaj vim qhov ncaj nws tau ua.
23 Kuv puas yuav zoo siab pom ib tug neeg txhaum tuag?” HUAB TAIS hais li. “Qhov tseeb, kuv yuav zoo siab dua yog nws tso nws txoj kev ua phem tseg kom nws tau txoj sia.
24 Tab sis yog tus neeg siab ncaj ncaim ntawm nws txoj kev ua ncaj thiab mus ua phem xws li tus neeg tsis hwm Ntuj ua, mas tus neeg ntawd puas yuav tsum muaj txoj sia nyob? Nws cov hauj lwm ncaj uas thaum ub nws tau ua, kuv yuav tsis nco txog ib qho li. Tiam sis, vim nws tau ntxeev siab thiab tau mus ua txhaum, mas vim li no nws yuav tuag.
25 Nej hais tias: ‘HUAB TAIS ua li ntawd mas nws ua tsis ncaj?’ Tsev neeg His Xas Lais, nej mloog zoo zoo mog, puas yog kuv ua tsis ncaj? Zoo li yog nej ua tsis ncaj los tsis yog?
26 Yog tus neeg siab ncaj ncaim ntawm txoj kev ncaj mus ua txhaum, ces nws yuav tuag; yog vim nws tau ua , ces nws thiaj yuav tuag.
27 Hos yog tus neeg siab phem tso nws txoj kev ua phem pov tseg, nws los ua raws txoj cai thiab raws txoj kev ncaj, ces nws yuav txuag tau nws txoj sia nyob.
28 Vim nws txiav siab tso tas nws tej kev ua txhaum pov tseg, mas nws yeej yuav muaj txoj sia, nws yuav tsis tuag.”

NPN 130: 1-2, 3-4, 5-7a, 7bc-8

Txais: (3) Huab Tais, yog koj cim ntsoov peb cov txhaum,
leej twg thiaj yuav nyob taus?

Kuv nyob hauv qab tiv txwv hu txog koj, HUAB TAIS,
HUAB TAIS, thov koj mloog kuv lub suab hu mas!
Thov koj cuab pob ntseg mloog kuv lub suab thov koj.

Txais: (3) Huab Tais, yog koj cim ntsoov peb cov txhaum,
twg thiaj yuav nyob taus?

HUAB TAIS, yog koj cim ntsoov peb cov txhaum,
leej twg thiaj yuav nyob taus?
Tab sis nyob ntawm koj muaj kev zam txhaum;
thov kom sawv daws hwm koj zoo.

Txais: (3) Huab Tais, yog koj cim ntsoov peb cov txhaum,
leej twg thiaj yuav nyob taus?

Kuv tso siab rau HUAB TAIS,
kuv tus ntsuj plig tso siab rau nws lo lus.
Kuv tus ntsuj plig tos ntsoov HUAB TAIS
tos heev tshaj cov zov keeb tos lub caij kaj ntug.
Kom His Xas Lais tos ntsoov HUAB TAIS.

Txais: (3) Huab Tais, yog koj cim ntsoov peb cov txhaum,
leej twg thiaj yuav nyob taus?

Vim HUAB TAIS muaj lub siab zoo,
thiab nws muaj txoj kev cawm nplua mias,
nws yuav cawm His Xas Lais
ntawm tas lawv tej kev txhaum.

Txais: (3) Huab Tais, yog koj cim ntsoov peb cov txhaum,
leej twg thiaj yuav nyob taus?

Zaj Cav lub Moo Zoo: ES XES KIAS 18:31

HUAB TAIS hais tias: “Nej cia li tso tas nej tej kev ua txhaum pov tseg,
nej hloov dua ib lub siab tshiab thiab ib lub tswv yim tshiab mog.”

Ntawv Moo Zoo: MT 5:20-26

Yes Xus hais rau nws cov thwj tim tias:
20 "Kuv hais rau nej: Yog nej tsis ua siab ncaj dua cov Kws Ntawv Ntshiab thiab cov Fas Lis Xais, mas nej yuav mus tsis tau hauv lub Ceeb Tsheej saum ntuj.
21 Nej tau hnov hais rau tej poj yawm txwv koob tias: ‘Koj tsis txhob tua neeg. Tus twg tua neeg, nws yuav raug txiav txim.’
22 Hos kuv, mas kuv hais rau nej tias: Leej twg npau taws rau nws tus kwv tij, mas nws yuav raug txiav txim. Leej twg hais rau nws tus kwv tij tias ‘Niag ruam,’ mas nws yuav raug txiav txim ntawm lub rooj txwj laus Xas Nes Nrees. Leej twg hais tias: ‘Niag vwm,’ mas nws yuav mus raug txim nyob hauv dab phem cov hluav taws.
23 Li ntawd thaum koj cev ib co txim rau saum lub thaj txi Ntuj, yog koj nco dheev tias koj tus kwv tij tau muaj lus rau koj lawm,
24 mas koj cia li tso koj cov txim rau ntawm lub thaj txi Ntuj, koj mus nrog koj tus kwv tij hais kom haum tso, koj mam rov los cev koj cov txim.
25 Thaum koj nrog tus neeg muaj lus rau koj tseem ua ke taug kev, koj kav tsij nrog nws hais kom haum sai sai, tsis li ntawd ces nws yuav coj koj mus kom rau tus txiav txim, tus txiav txim yuav muab koj cob rau tub ceev xwm, ces luag yuav muab koj kaw rau hauv tsev loj faj.
26 Kuv hais tseeb rau koj tias, luag yuav tsis tso koj tawm los, mus txog thaum koj them kom tas mus txog npib kawg tso.”

Tim 4 lub 3 Hlis 2023

Hnub Xya Lis Piam Ib Caij 40 Xyoo ABC Nruab Lis Piam Xyoo I & II
Lectionary: 229

XHLT: LN Casimir

Zaj Nyeem Ib: TXOJ CAI OB 26: 16-19

Mais Xes Hais rau tsoom pej xeem tias:
16 “Hnub no, HUAB TAIS nej tus Tswv Ntuj ceeb toom tias kom nej yuav tsum coj tej kev cai tej lij choj no. Yog li, nej yuav ua zoo muab tas nej lub siab nej tus ntsuj plig los coj tej kev cai tej lij choj ntawd.
17 Hnub no, nej nrog HUAB TAis cog ib lo lus li no tias: Nws yuav yog nej tus Tswv Ntuj, thiab nej yuav taug raws nws txoj kev, coj raws nws tej lij choj, tej lus qhia, tej kev cai, thiab nej yuav mloog nws lub suab.
18 Hnub no HUAB TAIS kuj nrog nej cog lus tias: nej yuav yog nws haiv neeg nws ntiag tug, xws li nws tau cog lus rau nej lawm. Yog tias nej coj nws tej lus qhia tas huv tib si,
19 mas HUAB TAIS yuav tsa nej kom nyob siab tshaj, kom nto koob meej tshaj, kom muaj meej mom tshaj, thiab muaj hwj chim tshaj lwm cov haiv neeg uas nws tau tsim los huv tib si; nej yuav yog ib haiv neeg ntshiab rau HUAB TAIS nej tus Tswv Ntuj, raws li nws tau cog lus lawm.”

NPN 119: 1-2, 4-5, 7-8

Txais: (1b) Cov muaj hmoov zoo yog cov uas coj raws Huab Tais txoj cai!

Cov muaj hmoov zoo yog cov uas taug ib txoj kev tsis muaj chaw xyeej,
yog cov uas taug raws HUAB TAIS txoj cai.
Cov muaj hmoov zoo yog cov uas coj raws nws tej lus qhia,
yog cov uas nrhiav nws tas lawv lub siab lub ntsws.

Txais: (1b) Cov muaj hmoov zoo yog cov uas coj raws Huab Tais txoj cai!

Koj tau ceeb toom kom sawv daws
mob siab mloog koj tej lus qhia.
Thov koj pab kuv kom kuv nyob ruaj nreb
hauv koj tej kev cai lij choj!

Txais: (1b) Cov muaj hmoov zoo yog cov uas coj raws Huab Tais txoj cai!

Kuv yuav muab ib lub siab ncaj los ua koj tsaug,
thaum kuv paub txog koj txoj cai ncaj ncees lawm.
Kuv yuav coj nraim koj tej cai lij choj,
thov koj tsis txhob tso kuv pov tseg kiag li.

Txais: (1b) Cov muaj hmoov zoo yog cov uas coj raws Huab Tais txoj cai!

Zaj Cav lub Moo Zoo: 2 KLN 6: 2b

Nej ntsia saib, lub sij hawm zoo yog nyem no;
hnub muaj kev cawm seej yog nyem no.

Ntawv Moo Zoo: MT 5: 43-48

Yes Xus hais rau nws cov thwj tim tias:
43 "Nej tau hnov tej lus qhia tias:
’Koj yuav nyiam tus nyob ze koj, koj yuav ntxub koj tus yeeb ncuab.’
44 Tab sis, kuv hais rau nej tias:
Nej yuav nyiam nej cov yeeb ncuab, nej yuav thov Ntuj rau cov tsim txom nej;
45 nej thiaj yuav yog nej Txiv tus nyob saum ntuj cov tub;
vim tias nws ua kom lub hnub tuaj ziab cov neeg phem thiab cov neeg zoo huv tib si,
thiab nws ua kom nag los rau cov siab ncaj thiab rau cov siab nkhaus huv tib si.
46 Vim tias yog nej nyiam cov neeg nyiam nej xwb, mas nej yuav tau koob haum dab tsi? Cov sau se lawv tsis txawj ua ib yam li ntawd thiab lod?
47 Yog nej tsuas hu nej cov kwv tij txheeb ze xwb, mas nej tau ua dab tsi tshaj? Cov neeg teev pej kum dab, lawv tsis txawj ua li ntawd thiab lod?
48 Hos nej, mas nej yuav tsum ua neeg zoo tshaj plaws,
ib yam li nej Txiv nyob saum ntuj yog tus zoo tshaj plaws.”

Tim 6 lub 3 Hlis 2023

Hnub Ob Lis Piam Ob Caij 40 Xyoo ABC Nruab Lis Piam Xyoo I & II
Lectionary: 230

Zaj Nyeem Ib: DN 9: 4b-10

4b “Huab Tais, tus Tswv Ntuj loj thiab tsim nyog qhuas tas nrho, koj ua raws li lo lus koj tau cog thiab koj khuv leej cov neeg uas nyiam koj thiab coj rawv koj cov lus qhia.
5 Peb tau ua txhaum lawm, peb tau ua qhov phem qhov tsis zoo, thiab peb tau ntxeev siab, tau tso koj cov lus qhia thiab koj cov cai lij choj pov tseg lawm.
6 Peb tsis tau mloog cov yaj saub uas yog koj cov tub txib lus, thaum lawv tuav txog koj lub npe hais lus rau peb cov vaj, rau peb cov thawj coj, rau peb phaj txiv, thiab rau tas tsoom pej xeem nyob hauv lub teb chaws.
7 Huab Tais, koj yog tus tau txoj kev ncaj hnub no, hos peb yog cov tau txoj kev txaj muag, txawm yuav yog cov nyob Yus Das teb, los cov nyob Yes Lus Xas Les, thiab tas nrho tsoom His Xas lais, cov nyob deb los nyob ze, nyob tas txhua lub teb chaws uas koj tau tso lawv mus nyob, vim lawv tau ntxeev siab rau koj.
8 Huab Tais, peb tau kev txaj muag, nrog rau peb cov vaj, peb cov nom cov tswv, thiab peb phaj txiv, vim peb tau ua txhaum rau koj.
9 Huab Tais, peb tus Tswv Ntuj yog tus muaj txoj kev khuv leej thiab txoj kev zam txhaum, txawm tias peb ntxeev siab rau nws,
10 thiab peb tsis mloog nws lub suab, tsis coj raws nws txoj cai uas nws kom nws cov yaj saub uas yog nws cov tub txib muab rau peb.”

NPN 79: 8, 9, 11+13

Txais: (103:10a) Huab Tais, thov koj tsis txhob ua rau peb raws li peb cov txhaum.

Thov koj txhob nco txog peb tej txhaum yav dhau los ntxiv;
muab koj txoj kev khuv leej tuaj rau peb sai sai,
vim peb poob rau qhov qis kawg nkaus lawm.

Txais: (103:10a) Huab Tais, thov koj tsis txhob ua rau peb raws li peb cov txhaum.

Thov koj pab peb, Tswv Ntuj, peb tus cawm seej,
vim koj lub npe muaj koob meej;
Thov cawm peb thiab zam peb cov txhaum rau peb
kom koj lub npe nto moo loj.

Txais: (103:10a) Huab Tais, thov koj tsis txhob ua rau peb raws li peb cov txhaum.

Thov koj cia cov neeg nyob txim lub suab ntsaj nrov tuaj txog koj,
koj siv koj lub hwj huam loj los cawm cov neeg poob rau hauv kev tuag.
Ces peb, uas yog koj haiv neeg thiab pab yaj nyob hauv koj lub nras zaub
yuav ua koj tsaug mus li tsis muaj caij kawg,
thiab yuav cav txog koj lub koob meej tiam dhau tiam.

Txais: (103:10a) Huab Tais, thov koj tsis txhob ua rau peb raws li peb cov txhaum.

Zaj Cav lub Moo Zoo: ZAM 6: 63c, 68c

Huab Tais, koj cov lus yog ntsuj plig thiab yog txoj sia;
koj muaj cov lus pub txoj sia nyob mus li.

Ntawv Moo Zoo: LK 6: 36-38

Yes Xus hais rau nws cov thwj tim tias:
36 “Nej yuav tsum khuv leej neeg ib yam li nej Txiv nws khuv leej neeg.
37 Nej yuav tsis txhob txiav txim rau luag, thiaj yuav tsis muaj tus txiav txim rau nej. Nej yuav tsis txhob rau txim rau luag, thiaj yuav tsis muaj tus rau txim rau nej. Nej zam rau luag, thiaj yuav muaj tus zam rau nej.
38 Nej pub rau luag, ces yuav muaj tus pub rau nej; luag yuav luj kom puv puv, yuav muab tswm muab nchos kom ceev ceev, yuav ua kom nco lug los hliv rau ntawm nej xub ntiag; vim tias nej luj li cas rau luag, mas kuj yuav muaj tus luj ib yam li ntawd rau nej thiab.” *

Tim 7 lub 3 Hlis 2023

Hnub Peb Lis Piam Ob Caij 40 Xyoo ABC Nruab Lis Piam Xyoo I & II
Lectionary: 231

XHLT: LN Perpetua thiab Felicity, tuag ua Tim Khawv

Zaj Nyeem Ib: HIS XAIS 1: 10, 16-20

10 Cov nom tswv kav Xos Dos Mas, nej cia li mloog Huab Tais lo lus!
Tsoom pej xeem nyob Nkos Mos Las,
nej cia li cuab pob ntseg rau peb tus Tswv Ntuj lo lus qhia!
16 Nej yuav ntxuav nej, nej ua kom nej dawb huv tuaj!
Nej tshem nej tej kev ua phem mus kom kuv qhov muag
txhob pom ntxiv; nej tso txoj kev ua phem tseg!
17 Nej xyaum ua qhov zoo, nej nrhiav txoj kev ncaj ncees,
nej pab tsa tus neeg raug luag tsuj cai,
nej ua ncaj rau tus tub ntsuag, nej tuaj tus poj ntsuam tog.
18 Nej tuaj, peb sib tham kom mus rau qhov ncaj! HUAB TAIS hais li.
Txawm tias nej tej txhaum yuav liab ploog, los yeej yuav
rov dawb li daus tau; tab yog nej tej txhaum yuav liab dub nciab,
los yeej yuav rov dawb xws plaub yaj tau.
19 Yog nej ua qhov zoo thiab nej mloog lus,
mas nej yuav tau noj tej yam zoo nyob hauv lub teb chaws.
20 Tiam sis yog nej tsis kam mloog lus thiab nej tawv kom dhau,
mas hniav ntaj yuav txo nej. HUAB TAIS lub ncauj tau hais li ntawd.

NPN 50: 8-9, 16bc-17, 21+23

Txais: (23b) Kuv yuav muab Tswv Ntuj lub hwj huam
cawm neeg rau tus neeg ncaj pom.

“Kuv tsis yog cem nej vim nej cov thaj txi ntuj,
nej tej tsiaj hlawv txi ntuj yeej nyob ntawm kuv xub ntiag mus li.
Kuv tsis coj ib tug heev nyuj hauv koj tsev mus,
los ib tug laug tshis hauv koj pab tsiaj mus.”

Txais: (23b) Kuv yuav muab Tswv Ntuj lub hwj huam
cawm neeg rau tus neeg ncaj pom..

“Tim li cas nej lub ncauj thiaj lam qog kuv cov kev cai lij choj,
thiab lam lees kuv cov lus kuv tau nrog nej cog,
tiam sis nej ntxub ua kom raws txoj cai
thiab nej muab kuv tej lus cuam pov tom qab xwb?”

Txais: (23b) Kuv yuav muab Tswv Ntuj lub hwj huam
cawm neeg rau tus neeg ncaj pom.

“Thaum nej ua tej yam zoo li no, kuv puas yuav tsum ua ntsej lag muag dig?
Nej puas xav tias kuv zoo nkaus li nej thiab?
Kuv yuav qhuab qhia nej, yuav kos kiag rau nej qhov muag ntsia.
Tus neeg twg tuaj cev lus zoo rau kuv, yog nws ua kom kuv nto koob meej;
tus twg xaiv txoj kev ncaj taug, kuv yuav
muab Tswv Ntuj txoj kev cawm rau nws pom.

Txais: (23b) Kuv yuav muab Tswv Ntuj lub hwj huam
cawm neeg rau tus neeg ncaj pom.

Zaj Cav lub Moo Zoo: ES XES KIAS 18: 31

HUAB TAIS hais tias:
Nej cia li muab tas nej tej txhaum nej tau ua pov tseg deb ntawm nej,
thiab nej cia li yuav dua ib lub siab tshiab thiab ib lub tswv yim tshiab.

Ntawv Moo Zoo: MT 23: 1-12

1 Yes Xus hais lus rau cov pab neeg coob coob thiab rau nws cov thwj tim,
2 nws hais tias: “Cov Kws Ntawv Ntshiab thiab cov Fas Lis Xais zaum Mais Xes lub rooj zaum.
3 Vim li no mas nej yuav ua thiab coj tas txhua yam lawv qhia rau nej, tab sis nej tsis txhob ua raws li lawv ua. Vim lawv qhia, tab sis lawv twb tsis coj raws qhov lawv qhia.
4 Lawv zoj tej lub nra hnyav hnyav ris tsis taus tso rau saum tsoom sid xwb pwg, tab sis lawv tsis kam tsa ib tug nyuag ntiv tes mus thawb kom ua zog li.
5 Lawv ua txhua tsav txhua yam kom neeg pom lawv xwb. Yog li ntawd, lawv thiaj coj tej lub txws ntim Txoj Cai dav dav, thiab dai tej tw ntxhoo ntev ntev.
6 Lawv nyiam zaum cov rooj tseem ceeb thaum lawv mus noj mus haus, thiab thawj cov rooj nyob hauv cov tsev txoos.
7 Lawv nyiam kom luag hawm lawv tom tej tshav puam, nyiam hnov sawv daws hu lawv ua “Xib Hwb”.
8 Hos nej, mas nej txhob cia luag hu nej ua “Xib Hwb”, vim nej tsuas muaj tib tug Xib Hwb xwb, thiab nej sawv daws yog ib co kwv tij.
9 Nej txhob hu leej twg nyob ntiaj teb no ua “Txiv”, vim nej tsuas muaj tib leeg Txiv uas nyob saum ntuj xwb.
10 Nej txhob cia luag hu nej ua “Thawj Tswj”, vim nej tsuas muaj tib tug Tswj xwb, yog Leej Pleev.
11 Tus loj dua cov nyob hauv nej, yuav ua nej tus tub txib.
12 Tus twg tsa nws siab, yuav raug txo kom qis; tus twg txo nws qis, yuav raug tsa kom siab.”

Tim     8     lub     3     Hlis     2023

Hnub Plaub Lis Piam Ob Caij 40 Xyoo ABC Nruab Lis Piam Xyoo I & II
Lectionary: 232

XHLT:   LN John of God, ib tug Txiv Tab Seeb

Zaj Nyeem Ib:   YES LES MIAS 18: 18-20

18 Haiv neeg Yus Das thiab cov pej xeem nyob Yes Lus Xas Les hais tias: "Nej tuaj! Peb yuav nrhiav ib lub tswv yim los rhuav Yes Les Mias; vim tias txoj kev qhuab qhia txoj cai yeej yuav tsis ploj, tseem yuav muaj cov Leej Choj los qhuab qhia; tseem yuav cov neeg thoob tsib los muab txoj kev tuav xam pab tswv yim; thiab tseem yuav muaj cov ua yaj saub los hais lus saub. Li ntawd nej tuaj, peb kav tsij siv peb lub ncauj los hais lus rhuav nws, thiab peb tsis txhob quav ntsej nws tej lus ib qhov me me li."
19 HUAB TAIS, thov koj cuab pob ntseg mloog kuv,
thiab thov koj mloog cov lus uas kuv cov yeeb ncuab hais.
20 Puas tsim nyog kom muaj kev ua phem pauj kev ua zoo?
vim lawv khawb ib lub qhov taub tos txo kuv txoj sia.
Thov koj nco txog tias kuv tau sawv nyob ntawm koj xub ntiag,
los hais txog lawv qhov zoo rau koj,
kom koj tshem koj txoj kev npau taws mus deb ntawm lawv.

NPN   31: 5-6, 14, 15-16

Txais: (17b) Huab Tais, thov koj cawm kuv mas, vim koj muaj lub siab zoo.

Koj yeej yuav cawm kuv dim ntawm rooj ntxiab uas lawv caws tos kuv,
vim koj yog kuv qhov chaw vam khom.
Kuv muab kuv tus ntsuj plig tso rau hauv koj txhais tes;
koj yeej yuav txhiv kuv dim, Huab Tais, tus Tswv Ntuj tsis txawj fav xeeb.

Txais: (17b) Huab Tais, thov koj cawm kuv mas, vim koj muaj lub siab zoo.

Kuv hnov tsoom neeg hais lus ntxhi
nyob ib ncig kuv ua rau kuv ntshai,
lawv sib tuav tswv yim txog kuv,
tias lawv yuav txo kuv txoj sia li cas.

Txais: (17b) Huab Tais, thov koj cawm kuv mas, vim koj muaj lub siab zoo.

Tiam sis, kuv tso siab plhuav rau koj, Huab Tais.
kuv hais tias: “Koj yog kuv tus Tswv Ntuj.”
Kuv txoj hmoo nyob hauv koj xib tes; thov koj cawm kuv dim
ntawm kuv cov yeeb ncuab thiab cov neeg hiam kuv txhais tes.

Txais: (17b) Huab Tais, thov koj cawm kuv mas, vim koj muaj lub siab zoo.

Zaj Cav lub Moo Zoo:   ZAM 8: 12

Huab Tais hais tias: Kuv yog lub ntiaj teb qhov pom kev;
leej twg lawv kuv qab yuav muaj txoj kev kaj uas pub txoj sia.

Ntawv Moo Zoo:   MT 20: 17-28

17 Thaum Yes Xus taug kev mus pem Yes Lus Xas Les, nws coj Pab Kaum Ob mus rau ib qho uas tsuas muaj lawv xwb; nws hais rau lawv thaum lawv tseem taug kev tias:
18 “Nej pom tias peb yuav mus pem Yes Lus Xas Les. Neeg Leej Tub yuav raug muag rau cov thawj leej choj thiab cov Kws Ntawv Ntshiab. Lawv yuav txiav lub txim tuag rau nws.
19 Lawv yuav muab nws rau cov neeg teev pej kum dab kom lawv thuam nws, nplawm nws thiab muab nws ntsia dai saum ntoo cuam. Ces hnub peb, nws yuav sawv rov los.”
20 Thaum ntawd, Ntxes Npes Dais ob tug tub leej niam nrog nws ob tug tub txav los ze Yes Xus, nws txhos caug ntua rau hauv av vim nws xav thov ib yam ntawm Yes Xus.
21 Yes Xus hais rau nws tias: “Koj xav tau dab tsi?” Leej niam hais rau Yes Xus tias: “Thov koj cia kuv ob tug tub no, ib tug zaum ntawm koj sab xis, ib tug zaum ntawm koj sab laug nyob hauv koj lub Ceeb Tsheej.”
22 Yes Xus teb tias: “Neb tsis paub qhov neb thov. Neb puas haus taus lub ntim uas kuv yuav haus?” Nkawd teb tias : “Wb haus taus.”
23 Yes Xus hais rau nkawd tias: “Kuv lub ntim, mas neb yuav tau haus tiag, tab sis qhov yuav tau zaum ntawm kuv sab xis thiab sab laug, mas kuv tsis yog tus yuav muab rau neb, tiam sis yog yuav cia rau cov uas kuv Txiv yeej npaj rau lawv lawm."
24 Thaum lawv kaum leej hnov cov lus ntawd, lawv npau taws rau nkawd ob kwv tij.
25 Ces Yes Xus hu lawv kom txav los ze nws, nws hais tias: “Nej paub lawm tias cov ua nom ua tswv kav tsoom kuj cuab, mas lawv ua nruj ua tsiv rau lawv cov neeg, thiab cov ua hlob ua kom luag paub tias lawv muaj peev xwm tswj lawv cov neeg.
26 Tab sis nyob hauv nej, mas yuav tsis txhob muaj ua li ntawd. Leej twg xav ua tus loj nyob hauv nej, mas nws yuav ua nej tus tub txib.
27 Leej twg xav ua nej tus thawj, mas nws yuav ua nej tus tub qhe.
28 Ib yam li ntawd, Neeg Leej Tub tsis tuaj nyob ntiaj teb no kom luag tsob hwb nws, tiam sis nws tuaj tsob hwb sawv daws, thiab muab nws txoj sia los ua nqi txhiv coob leej.”   *

Tim     9     lub     3     Hlis     2023

Hnub Tsib Lis Piam Ob Caij Plaub Caug Xyoo ABC Nruab Lis Piam Xyoo I & II
Lectionary: 233

XHLT:   LN Frances nyob Rome, Niam Tab Seeb

Zaj Nyeem Ib:   YES LES MIAS 17: 5-10a

5 HUAB TAIS hais tias: "Tau hmoov phem yog tus neeg uas tso siab rau tib neeg, nws nws nrhiav lub zog nyob hauv lub cev nqaij, hos nws lub siab txav mus deb ntawm HUAB TAIS.
6 Nws zoo puav tam li ib tsob ntoo txi tsis taus txiv nyob hauv hav suab puam, nws tsis pom ntuj tshav ntuj nag li, nws nyob hauv ib thaj chaw kub hnyiab dub nciab, uas yog av ntsev tsis muaj dab tsi yuav ciaj taus xwb.
7 Tus tau hmoov zoo yog tus neeg uas tso siab lug rau HUAB TAIS, tus uas HUAB TAIS yog nws txoj kev vam.
8 Nws zoo puav tam li ib tsob ntoo cog nyob ze dej; nws nrhau cag mus txog cov dej ntws lug. Thaum txog lub caij ntuj sov nws tsis ntshai dab tsi, nws cov nplooj ntsuab mus li; thaum txog lub xyoo ntuj qhuav qhawv nws tsis txhawj li, nws tseem txi taus txiv.
9 Neeg lub siab nkhaus tshaj lwm yam tas nrho, hloov tsis tau li; leej twg yuav to taub tau nws?
10 Kuv, HUAB TAIS, kuv ib leeg thiaj tsom tau hauv neeg lub tswv yim thiab sim tau neeg lub siab; ces kuv pub rau neeg kom phim tus yam ntxwv nws coj, kom haum raws li cov txiaj ntsim los ntawm nws tes hauj lwm los."

NPN   1: 1-2, 3, 4+6

Txais: (40:5a) Cov muaj hmoov zoo yog cov uas tso siab rau Huab Tais.

Tus muaj hmoov zoo yog tus uas tsis coj
raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo coj HUAB TAIS txoj cai,
thiab nws xav ntsoov HUAB TAIS txoj cai nruab hnub hmo ntuj.

Txais: (40:5a) Cov mua hmoov zoo yog cov uas tso siab rau Huab Tais.

Nws zoo puav tam li ib tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj daj li.
Nws ua yam twg tau yam ntawd. .

Txais: (40:5a) Cov mua hmoov zoo yog cov uas tso siab rau Huab Tais.

Cov neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov tus neeg ncaj txoj kev,
hos tus neeg phem txoj kev yaj ntshis mus.

Txais: (40:5a) Cov mua hmoov zoo yog cov uas tso siab rau Huab Tais.

Zaj Cav lub Moo Zoo:   LK 8: 15

Cov muaj hmoov zoo yog cov muaj ib lub siab dav coj raws Lo Lus,
thiab mob siab rau coj mus txog qhov kawg ces lawv txi tau txiv zoo.

Ntawv Moo Zoo:   LK 16: 19-31

Yes Xus hais rau cov Fas Lis Xais tias:
19 "Muaj ib tug neeg nplua nuj, nws hnav ntaub tsuj liab tsam xem thiab ntaub pag mos. Nws niaj hnub noj nqaij noj hno qab qab xwb.
20 Muaj ib tug pluag hu ua Las Ntxas Los pw nraum nws qhov rooj, ib ce mob kiav txhab thoob plaws.
21 Las Ntxas Los ntshaw noj tej tsig mov poob ntawm tus nplua nuj lub rooj mov los kom tsau nws plab... Dev tseem tuaj yaim nws tej qhov txhab thiab.
22 Muaj ib hnub, tus pluag tuag, ces cov Tshiab tuaj nqa nws mus rau hauv Has Nplas Has xub ntiag. Tus nplua nuj kuj tuag thiab, luag muab nws coj mus zwm ntxa.
23 Tus nplua nuj nyob hauv ntuj txias teb tsaus, nws raug txom nyem loj kawg. Nws tsa muag ntsia pom Has Nplas Has nyob deb thiab pom Las Ntxas Los nyob hauv Has Nplas Has xub ntiag.
24 Nws hu nrov nrov tias: ‘Txiv Has Nplas Has, thov koj khuv leej kuv, thov koj xa Las Ntxas Los tuaj muab nws tus ntsis ntiv tes tub dej rau kuv tus nplaig kom txias, vim kuv txom nyem heev nyob hauv cov hluav taws no.’
25 Tab sis Has Nplas Has hais tias: ‘Kuv tub aw, koj nco ntsoov tias thaum ua neej nyob koj tau txais tej yam zoo, hos Las Ntxas Los tau txais qhov phem. Zaum no Las Ntxas Los txais kev nplig siab nyob ntawm no, hos koj raug txom nyem.
26 Thiab tsis tag li ntawd, tseem muaj ib tug kwh tob kawg kem ntawm peb rau ntawm nej, kom cov uas xav hla ntawm peb rau tim nej hla tsis tau, thiab kom cov nyob tim nej txhob hla tau los rau tim no.’
27 Ces tus nplua nuj hais tias: ‘Txiv, yog li kuv thov koj xa Las Ntxas Los mus hauv kuv txiv tsev neeg,
28 vim kuv muaj tsib tug kwv tij, kom Las Ntxas Los mus qhia rau lawv paub, kom lawv tsis txhob tuaj nyob hauv qhov chaw raug txom nyem no.’
29 Ces Has Nplas Has hais tias: ‘Lawv muaj Mais Xes thiab cov Yaj Saub. Cia lawv mloog Mais Xes thiab cov Yaj Saub qhia.’
30 Tus nplua nuj hais tias: ‘Txiv Has Nplas Has, yog tias ib tug hauv cov tuag mus cuag lawv, mas lawv thiaj yuav hloov siab.’
31 Tab sis Has Nplas Has hais rau nws tias: ‘Yog lawv twb tsis mloog Mais Xes thiab cov Yaj Saub, mas tab yog ib tug sawv hauv cov tuag mus qhia lawv kiag los lawv yeej yuav tsis ntseeg nws li.’”

Tim 10 lub 3 Hlis 2023

Hnub Rau Lis Piam Ob Caij PLaub Caug Nruab Xyoo ABC Nruab Lis Piam Xyoo I & II
Lectionary: 234

Zaj Nyeem Ib: HP 37: 3-4, 12-13a, 17b-28a

3 His Xas Lais hlub Yos Xes tshaj nws cov tub tas huv si, vim Yos Xes yug thaum nws twb laus laus lawm. Ces nws kom lawv xaws ib lub tsho loj ntev ntev rau Yos Xes hnav.
4 Nws cov tij laug pom tias lawv txiv hlub nws tshaj nws cov tij laug txhua tus, mas lawv sawv daws ntxub nws kawg, lawv twb tsis xav hais lus zoo rau nws li.
12 Muaj ib zaug, Yos Xes cov tij laug mus zov lawv txiv pab yaj noj zaub nyob Xis Kes lawm.
13a His Xas Lais hais rau Yos Xes tias: "Koj cov tij laug mus zov tsiaj dua tom lub tshav zaub Xis Kes lawm puas yog? Los ntawm no, kuv yuav xa koj mus xyuas lawv."
17b Ces Yos Xes mus nrhiav nws cov tij laug, nws nrhiav tau lawv nyob Dos Tas.
18 Lawv pom nws thaum nws tseem tuaj txog deb. Thaum nws tuaj tsis tau txog ntawd, lawv sib tuav tswv yim tias yuav ua kom nws tuag.
19 Lawv sib tham tias: "Nej saib! Niag neeg txawj ua npau suav tuaj lawm!
20 Zaum no, peb muab nws tua kiag thiab muab nws pov rau hauv ib lub qhov tim thaj, ces peb mus hais tias yog ib tug tsiaj qus tom nws lawm. Ces peb yuav pom tias nws cov npau suav mas leej tas nrho!"
21 Tiam sis thaum Lus Npees hnov lawv tham, nws xav pab kom Yos Xes dim ntawm lawv tes, nws hais tias: "Peb tsis txhob txo ib txoj sia."
22 Lus Npees hais ntxiv rau lawv tias: "Nej tsis txhob ua kom ntshav ntws, nej cia li muab nws pov rau hauv lub qhov tim thaj ntawm suab puam no xwb, nej tsis txhob tsa nej txhais tes cia li tua nws." Lus Npees hais li no, vim nws xav cawm Yos Xes ntawm lawv tes, nws thiaj li yuav coj tau Yos Xes rov mus rau nws txiv.
23 Ces thaum Yos Xes tuaj txog ntawm nws cov tij laug lawm, lawv muab nws lub tsho loh ntev uas nws hnav hle.
24 Lawv txhom nws thiab muab nws pov rau hauv lub qhov tim thaj uas yog ib lub qhuav tsis muaj dej.
25 Ua li tas ces lawv mus zaum noj mov. Lawv tsa muag ntsia pom ib pab neeg Is Mas Es tuaj Nkas Las As tuaj. Lawv cov ntxhuav thauj ib co txab ntoo, ib co tshuaj pleev tawv nqaij thiab ib co tshuaj tsw qab uas lawv yuav coj mus rau Hais Nkws Tos teb.
26 Ces Yus Das hais rau nws cov kwv tij tias: "Yog peb muab peb tus kwv tua thiab muab nws cov ntshav zais, peb yuav tau dab tsi?
27 Nej los, peb muab nws muag rau cov neeg Is Mas Es ntawd xwb, peb txhob tsa peb txhais tes rau saum nws; vim nws twb yog peb tus kwv, koom tib co nqaij tawv ib yam li peb thiab." Ces nws cov kwv tij mloog nws hais.
28 Ces lawv rub Yos Xes tawm hauv lub qhov tim thaj los, lawv muab nws muag nees nkaum lub txiaj nyiag, rau cov neeg Is Mas Es ntawd.

NPN 105: 16-17, 18-19, 20-21

Txais: (5a) Nej yuav cim ntsoov Huab Tais cov hwj huam nws tau ua cia.

Thaum HUAB TAIS hu kom kev tshaib plab poob los rau saum lub teb chaws,
thiab ua kom tej qoob loo uas yuav yug lawv lwj tas,
nws tso ib tug neeg mus ua lawv ntej,
yog Yos Xes, tus raug muag mus ua qhev.

Txais: (5a) Nej yuav cim ntsoov Huab Tais cov hwj huam nws tau ua cia.

Lawv muab khawb hlau pav nws ko taw
thiab muab saw hlau khi nws.
Thaum kawg, kuj muaj tuaj raws li nws tau hais tseg;
HUAB TAIS lo lus ua pov thawj tias nws hais tseeb.

Txais: (5a) Nej yuav cim ntsoov Huab Tais cov hwj huam nws tau ua cia.

Tus vaj xa neeg mus tso nws tawm hauv nkuaj los,
tus tswj cov haiv neeg muab kev twj lij rau nws.
Tus vaj tsa nws ua tus kav tus vaj lub vaj lub tsev
thiab tus tswj tas txhua yam uas yog tus vaj tug.

Txais: (5a) Nej yuav cim ntsoov Huab Tais cov hwj huam nws tau ua cia.

Zaj Cav lub Moo Zoo: ZAM 3: 16

Txais: Huab Tais Yes Xus Pleev, Tswv Ntuj Lo Lus, peb cav txog koj.

Tswv Ntuj hlub lub ntiaj teb npaum li ntawd,
nws thiaj tso nws tib leeg tub los rau lawv,
kom xwv txhua leej uas ntseeg nws yuav muaj txoj sia nyob mus li.

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo: MT 21: 33-43, 45-46

Yes Xus hais rau cov thawj leej choj thiab pej xeem cov txwj laus tias:
33 “Nej mloog dua ib zag paj lug. Muaj ib tug tswv teb, nws cog tau ib thaj teb txiv cawv. Nws xov laj kab ncig nws thaj teb, nws khawb qhov rau ib lub zeb zom txiv cawv, thiab tseem txhim tau ib lub sam thiaj siab siab rau hauv. Nws ntiav ib co neeg zov, ces nws tawm rooj mus kev deb lawm.
34 Thaum yuav txog caij de txiv, nws xa nws cov tub txib mus nqa txiv cawv ntawm cov zov teb.
35 Tiam sis cov neeg zov teb ntes cov tub txib, muab ib tug ntaus, muab ib tug tua, muab pob zeb los txawb lwm tus kom tuag.
36 Tus tswv rov xa ib co tub txib coob dua thawj cov mus, cov zov teb kuj ua ib yam li lawv tau ua rau thawj cov thiab.
37 Qhov kawg, nws xa nws tus tub mus cuag lawv, nws xav tias: ‘Lawv yuav hwm kuv tus tub.’
38 Tab sis cov zov teb pom dheev tus tub xwb, lawv twb sib tham tias: ‘Tus ntawd yog tus yuav txais lub cuab tam. Tsuag tsuag! Peb muab nws tua, lub cuab tam thiaj yuav yog peb tug.’
39 Ces lawv ntes ntho tus tub, coj nws mus rau nraum ntug teb thiab muab nws tua.
40 Thaum tus tswv teb txiv cawv los txog, nws yuav ua dab tsi rau cov zov teb ntawd?”
41 Lawv teb rau Yes Xus tias: “Nws yuav ua kom cov zov teb siab phem ntawd tuag txom nyem ntsuav, ces nws yuav ntiav lwm cov neeg zov nws daim teb. Thaum txog caij txiv cawv siav, cov ntawd yuav xa cov txiv rau tus tswv.”
42 Yes Xus hais rau lawv tias: “Nej puas tau nyeem ib zaug li txog cov lus nyob hauv Ntawv tias :
‘Lub pob zeb uas cov tub txhim tsev muab pov tseg,
txia ua lub pob zeb txheem tsev;
yog Huab Tais ua kom muaj tau li ntawd;
yog ib qho zoo kawg nkaus rau ntawm peb qhov muag’?
43 Vim li ntawd, kuv hais rau nej tias: Tswv Ntuj lub Ceeb Tsheej yuav raug muab thau ntawm nej los pub rau ib haiv neeg uas yuav txi txiv rau nws.”
45 Cov thawj leej choj thiab cov Fas Lis Xais hnov Yes Xus cov zaj paj lug, lawv to taub tias Yes Xus hais txog lawv.
46 Lawv nrhiav kev ntes Yes Xus, tab sis lawv ho ntshai tsoom sid, vim sawv daws saib Yes Xus yog ib tug yaj saub.

Tim 11 lub 3 Hlis 2023

Hnub Xya Lis Piam Ob Caij Plaub Caug Xyoo A Nruab Lis Piam Xyoo II
Lectionary: 235

Zaj Nyeem Ib: MIS KES 7: 14-15, 18-20

14 Thov koj cia li siv koj rab pas ua tswv zov yaj los coj koj haiv neeg,
uas yog koj pab yaj koj lub cuab tam mas;
lawv nyob ncaim npoj hauv ib lub hav zoov nyob saum Kas Mes.
Thov koj cia lawv mus nog zaub nyob Npas Sas
thiab nyob Nkas Las As xws li yav thaum ub.
15 Xws li thaum lub caij thaum peb tawm Hais Nkws Tos teb los,
thov koj cia peb pom tej yam hwj huam loj.
18 Tus Tswv Ntuj twg thiaj zoo li koj, thiaj tsis suav txim thiab thiaj
zam txhaum rau cov neeg seem hauv nws lub cuab tam;
thiaj tsis npau taws tas mus li,
tiam sis nws nyiam ua lub siab zoo khuv leej neeg;
19 thiaj tseem yuav hlub peb dua ntxiv,
thiab yuav muab peb tej kev txhaum tsuj ntiag rau hauv av?
Koj yeej yuav muab peb tej txhaum
pov rhees kom tas lawm hauv qab tiv txwv tob;
20 koj yuav ua lub siab pheej xeeb rau Yas Kos, thiab yuav
pub txiaj ntsim rau Has Nplas Has, xws li koj tau cog lus
rau peb cov yawg koob puag thaum ntxov ub lawm.

NPN 103: 1-2, 3-4, 9-10, 11-12

Txais: (8a) Huab Tais siab zoo thiab khuv leej neeg.

Kuv tus ntsuj plig, koj cia li cav txog HUAB TAIS;
kuv tej siab ntsws, nej cia li cav txog nws lub npe ntshiab.
Kuv tus ntsuj plig, koj cia li cav txog HUAB TAIS,
koj tsis txhob hnov qab nws tej kev ua zoo ib qho li.

Txais: (8a) Huab Tais siab zoo thiab khuv leej neeg.

Nws zam tas koj tej txhaum rau koj,
nws kho tas koj tej mob nkeeg kom zoo hlo.
Nws cawm koj txoj sia ntawm kev puas nstoog,
nws muab nws txoj kev ua zoo thiab kev khuv leej rau koj ntoo.

Txais: (8a) Huab Tais siab zoo thiab khuv leej neeg.

Nws tsis cem tsis yws tas mus li,
nws kuj tsis chim tsis npau tas mus li ib txhis.
Nws tsis nplua peb raws li peb tau ua txhaum,
nws tsis ua pauj rau peb raws li peb tau ua phem.

Txais: (8a) Huab Tais siab zoo thiab khuv leej neeg.

Xws li lub ntuj nyob siab tshaj saum lub ntiaj teb npaum li cas,
nws kuj hlub cov neeg uas hwm nws tshaj npaum li ntawd.
Xws li sab hnub tuaj nyob deb ntawm sab hnub poob npaum li cas,
nws kuj muab peb tej txhaum pov tseg deb ntawm peb npaum li ntawd .

Txais: (8a) Huab Tais siab zoo thiab khuv leej neeg.

Zaj Cav lub Moo Zoo: LK 15: 18

Txais: Huab Tais Yes Xus Pleev, uas yog Tswv Ntuj Lo Lus,
peb cav txog koj.

Kuv yuav sawv kev, kuv yuav mus cuag kuv txiv thiab hais rau nws tias:
Txiv, kuv tau ua txhaum rau Ntuj thiab rau koj lawm.

Txais: Huab Tais Yes Xus Pleev, uas yog Tswv Ntuj Lo Lus,
peb cav txog koj.

Ntawv Moo Zoo: LK 15: 1-3, 11-32

1 Tas cov neeg sau se thiab cov neeg txhaum txav los ze kom tau mloog Yes Xus hais lus.
2 Ces cov fas lis xais thiab cov thoob xwm ntawv cem zom zaws tias: "Tus neeg ntawd txais cov neeg txhaum, nws tseem nrog lawv noj mov thiab!"
3 Yes Xus thiaj hais zaj paj lug no rau lawv.
11 Nws hais tias: “Ib tug neeg muaj ob tug tub.
12 Tus tub ntxawg hais rau nws txiv tias: ‘Txiv, koj muab koj lub cuab tam feem uas yog kuv tug faib rau kuv.’ Ces leej txiv thiaj muab nws lub cuab tam faib rau nws ob tug tub.
13 Ob peb hnub tom qab, tus tub ntxawg sau feem uas yog nws tug tas huv si, nws khiav mus rau ib lub teb chaws nyob deb. Nyob ntawd nws muab nws lub cuab tam phob ua dog dig vim nws coj ib lub neej tsis tsim txiaj.
14 Thaum nws muab nws lub cuab tam phob tas huv si lawm, lub teb chaws txawm tshaib plab loj. Ces nws pib paub txoj kev yoo tshaib yoo nqhis.
15 Nws thiaj mus ua zog hauv ib tug neeg nyob txawm lub teb chaws ntawd. Luag kom nws mus zov npua tom teb.
16 Nws ntshaw noj cov zaub uas npua noj kom tsau nws plab, tab sis tsis muaj neeg pub rau nws noj li.
17 Nws lub siab mam li ras dheev tias: ‘Pes tsawg leej tub zog nyob hauv kuv txiv tsev tau mov noj seem noj so, hos kuv nyob tuag tshaib ntuas ntawm no?
18 Kuv yuav sawv kev, kuv yuav mus cuag kuv txiv, kuv yuav hais rau nws tias: Txiv, kuv tau ua txhaum rau Ntuj thiab rau koj lawm.
19 Kuv tsis tsim nyog koj hu kuv ua koj tus tub ntxiv. Thov koj saib kuv ib yam li yog koj ib tug tub zog.’
20 Ces nws thiaj sawv kev, nws rov los cuag nws txiv. Thaum tus tub tseem los txog deb, nws txiv twb pom nws lawm; nws txiv hlub nws tas siab nrho. Leej txiv thiaj tso sas khiav mus puag nkaus tus tub caj dab, thiab nwj nws tub tub.
21 Tus tub hais rau leej txiv tias: 'Txiv, kuv tau ua txhaum rau Ntuj thiab rau koj lawm. Kuv tsis tsim nyog koj hu kuv ua koj tus tub ntxiv.'
22 Tab sis leej txiv hais rau cov tub txib tias: 'Nej tsuag tsuag mus nqa lub tsho zoo nkauj tshaj los ntawm no, nej muab rau nws hnav, nej muab ib ntiv nplhaib los ntxig nws ntiv tes, thiab ib nkawg khau los ntxig nws ko taw.
23 Nej cab tus xyuas nyuj rog los tua. Peb noj nqaij, peb ua lom zem.
24 Vim tias kuv tus tub no tuag lawm, nyem no nws ciaj rov los dua. Nws ploj lawm, nyem no rov nrhiav tau nws lawm.' Ces lawv sawv daws pib noj haus ua lom zem ntws.
25 Thaum ntawd, tus tub hlob tseem nyob tom teb. Thaum nws rov los yuav txog tsev, nws hnov suab paj nruag thiab suab dhia seev cev nrov ntsuag qees.
26 Nws hu ib tug tub txib kom tawm tuaj, nws nug saib lub suab ntawd yog dab tsi.
27 Tus tub txib hais rau nws tias: 'Yog koj tus kwv rov qab los tsev lawm, koj txiv tua tus xyuas nyuj rog, vim nws tau pom koj tus kwv rov los noj qab nyob zoo.'
28 Ces tus tub hlob npau taws, nws tsis kam nkag los hauv tsev. Leej txiv tawm tuaj hais kom nws los tsev.
29 Tab sis tus tub hlob teb rau nws txiv tias: ‘Kuv tau ua hauj lwm tsob hwb koj tau npaum no xyoo, kuv tsis tau hla koj ib lo lus li, koj twb tsis tau muab ib tug me nyuam tshis pub rau kuv ib zaug, kom tau nrog kuv cov phooj ywg noj ib pluag lom zem li.
30 Hos koj niag tub ntawd, twb muab koj lub cuab tam mus siv luaj thuam rau cov niam ntiav tas, thaum nws rov los txog, koj tseem tua tus nyuj rog rau nws thiab!'
31 Ces leej txiv hais rau tus tub hlob tias: 'Me tub, koj ib txwm nrog kuv nyob, ib puas tsav yam uas yog kuv tug, mas kuj yog koj tug tib si.
32 Tiam sis zaum no peb yuav tsum noj ib pluag loj thiab ua lom zem zoo siab, vim koj tus kwv no twb tuag lawm, zaum no nws rov ciaj dua, nws twb ploj lawm, zaum no rov nrhiav tau nws lawm.’”

Tim     13     lub     3     Hlis     2023

Hnub Ob Lis Piam Peb Caij Plaub Caug Xyoo ABC Nruab Lis Piam Xyoo I & II
Lectionary: 237

Zaj Nyeem Ib:   2 VAJ 5: 1-15ab

1 Nas Maas, tus thawj tub rog rau tus vaj As Las Mais, yog ib tug neeg uas tus vaj hwm thiab nyiam, vim yog muaj nws mas HUAB TAIS thiaj pab cov As Las Mais yeej rog. Tab sis tus neeg siab tawv muaj peev xwm ntawd yog ib tug mob ruas.
2 Muaj ib zaug cov As Las Mais tuaj lwg His Xas Lais teb, lawv ntes tau ib tug me nyuam ntxhais coj mus lawm. Tus ntxhais ntawd mus ua ntxhais txib rau Nas Maas tus poj niam.
3 Nws hais rau nws tus poj tswv tsev tias: "Yog kuv tus tswv mus cuag tus Yaj Saub nyob Xas Mas Lias teb mas tus Yaj Saub yuav cawm tau nws dim ntawm nws tus mob ruas xwb!"
4 Nas Maas mus qhia rau nws tus huab tais txog cov lus uas tus ntxhais tuaj teb chaws His Xas Lais tuaj tau hais.
5 Tus vaj As Las Mais teb tias: "Yog li ces koj mus, kuv yuav xa ib tsab ntawv nrog koj mus rau tus vaj His Xas Lais." Ces Nas Maas mus, nws nqa kaum choj nyiag, rau txhiab lub txiaj kub thiab kaum cev tsoos tsho ua zam mus.
6 Nws mus txog, nws cev tus vaj tsab ntawv rau tus vaj His Xas Lais nyeem. Nyob hauv tsab ntawv muaj cov lus hais li no : "Kuv xa kuv tus tub txib Nas Maas nrog tsab ntawv no tuaj. Thov koj kho nws tus mob kom zoo."
7 Thaum tus vaj His Xas Lais nyeem tsab ntawv tas, nws dua rhe nws lub tsho, nws hais tias: "Kuv puas yog ib tug tswv ntuj txawj ua kom neeg ciaj los neeg tuag, ua cas tus ntawd thiaj yuav kom kuv kho ib tug neeg mob ruas kom zoo? Qhov tseeb yog nws xav nrhiav lus rau kuv xwb ntag!"
8 Tab sis thaum Es Lis Xais, uas yog Tswv Ntuj tus neeg, hnov tias tus vaj dua nws cov ris tsho, mas nws tso neeg mus hais rau tus vaj tias: "Vim li cas koj dua koj cov ris tsho? Kom nws tuaj cuag kuv saib! Nws thiaj yuav paub tias muaj ib tug Yaj Saub nyob His Xas Lais teb."
9 Nas Maas thiaj caij nws lub tsheb nees nrog nws cov nees tuaj txog, nws nres ntawm Es Lis Xais qhov rooj.
10 Es Lis Xais tso neeg mus hais rau nws tias: "Koj mus da dej xya zaus nyob hauv tus dej Yos Las Das ces koj cev nqaij yuav rov zoo thiab koj yuav rov huv tuaj."
11 Nas Maas npau taws, nws hais tias: "Kuv vam tias ntshai nws yuav tawm tuaj, nws yuav hu txog HUAB TAIS nws tus Tswv Ntuj lub npe thiab nws yuav tsa tes plhws kuv qhov nqaij muaj mob, ces tus mob ruas yuav zoo hlo no!
12 Tus dej As Npas Nas thiab tus dej Fas Pas nyob Das Mas teb tsis zoo dua cov dej nyob His Xas Lais teb lod? Yog kuv mus da cov dej nyob Das Mas teb kuv yuav tsis zoo tuaj lod?" Ces Nas Maas lem loo nees rov qab, nws npau taws heev.
13 Tab sis nws cov tub txib txav los hais rau nws tias: "Txiv, yog tus Yaj Saub kom koj ua ib yam nyuaj dua ntawd mas koj twb yuav ua xwb puas yog? Txawm yog nws hais tias kom koj mus da dej xwb ces koj yuav zoo mas koj haj yam yuav tsum zoo siab ua xwb."
14 Nas Maas thiaj nqes mus hauv tus dej Yos Las Das, nws mus ntxuav cev xya zaus xws li Tswv Ntuj tus neeg hais, ces nws cov nqaij rov zoo hlo, cia li zoo xws li tus me nyuam mos tej nqaij dua; nws huv si tuaj lawm.
15 Nas Maas nrog nws pab neeg rov los, nws los sawv ntawm Tswv Ntuj tus neeg xub ntiag, nws hais tias: "Nyem no, kuv paub lawm tias tsis muaj dua lwm tus Tswv Ntuj nyob tas ntiaj teb no, tsuas kawg muaj nyob His Xas Lais teb xwb!”

NPN   42: 2, 3; 43: 3, 4

Txais: (42:3) Kuv tus ntsuj plig nqhis qhuav siab qhawv txog tus Tswv Ntuj
muaj txoj sia. Thaum twg kuv li tau mus pom Tswv Ntuj lub ntsej muag?

Xws li tus kauv nqhis cov dej ntws lug,
kuv tus ntsuj plig kuj nqhis txog koj, Tswv Ntuj.

Txais: Kuv tus ntsuj plig nqhis qhuav siab qhawv txog tus Tswv Ntuj
muaj txoj sia. Thaum twg kuv li tau mus pom Tswv Ntuj lub ntsej muag?

Kuv tus ntsuj plig nqhis txog Tswv Ntuj, tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Txais: Kuv tus ntsuj plig nqhis qhuav siab qhawv txog tus Tswv Ntuj
muaj txoj sia. Thaum twg kuv li tau mus pom Tswv Ntuj lub ntsej muag?

Thov xa koj qhov pom kev thiab koj txoj kev ua siab ncaj tuaj rau kuv,
thiaj yuav coj kuv taug kev mus ntxiv, thiab coj kom kuv tuaj txog
lub roob koj txoj kev ntshiab, thiaj txog koj lub chaw nyob.

Txais: Kuv tus ntsuj plig nqhis qhuav siab qhawv txog tus Tswv Ntuj
muaj txoj sia. Thaum twg kuv li tau mus pom Tswv Ntuj lub ntsej muag?

Ces kuv yuav chaws mus hauv lub thaj txi Tswv Ntuj,
tus Tswv Ntuj uas ua kom kuv muaj kev zoo siab thiab kaj siab.
Ces kuv yuav ntaus nkauj nog ncas ua koj tsaug,
Tswv Ntuj, kuv tus Tswv Ntuj!

Txais: Kuv tus ntsuj plig nqhis qhuav siab qhawv txog tus Tswv Ntuj
muaj txoj sia. Thaum twg kuv li tau mus pom Tswv Ntuj lub ntsej muag?

Zaj Cav lub Moo Zoo:   NPN 130: 5, 7

Kuv tso siab rau Huab Tais, kuv ntseeg nws lo lus,
nws yog tus muaj lub siab zoo thiab muaj kev cawm seej ntws lug.

Ntawv Moo Zoo:   LK 4: 24-30

24 Yes Xus hais rau cov neeg nyob hauv lub tsev txoos nyob Naj Xas Les tias: "Kuv hais tseeb rau nej tias, tsis muaj ib tug yaj saub uas luag yuav txais nws zoo hauv lub zos nws nyob hlob.
25 Kuv hais tseeb: lub caij Es Lias nyob, muaj coob tus poj ntsuam nyob His Xas Lais teb. Thaum ntuj kaw nag tau peb xyoos thiab rau hli, tas teb chaws tshaib plab loj kawg.
26 Tab sis Ntuj tsis xa Es Lias mus pab cov poj ntsuam His Xas Lais ib tug li. Ntuj xa Es Lias mus pab ib tug poj ntsuam nyob lub zos Xas Les Tas, nyob Xis Doos teb xwb.
27 Lub caij Es Lias nyob ntawd, kuj muaj coob tus mob ruas nyob His Xas Lais teb thiab, tab sis tsis muaj ib tug mob ruas His Xas Lais rov huv li, tsuas yog tus mob ruas Xis Lias hu ua Nas Maas thiaj rov huv xwb."
28 Tas cov neeg hauv lub tsev txoos hnov cov lus ntawd, mas lawv npau taws kawg.
29 Lawv sawv tsees, lawv ntiab caum Yes Xus kom tawm sab nroog nraud. Lawv coj Yes Xus mus txog ntawm ib qho ua qab tsuas saum lub roob uas lawv txhim lawv lub nroog, lawv yuav thawb Yes Xus kom poob lawm hauv lub qab tsuas.
30 Tab sis Yes Xus hla plaws hauv nruab nrab lawv, nws taug nws kev mus lawm.

Tim 14 lub 3 Hlis 2023

Hnub Peb Lis Piam Peb Caij Plaub Caug Xyoo ABC Nruab Lis Piam Xyoo I & II
Lectionary: 238

Zaj Nyeem Ib: DAS NIAS 3: 25, 34-43

25 As Xas Lias sawv hauv cov nplaim taws, nws thov ntuj nrov nrov tias :
34 "Huab Tais, thov koj saib koj lub npe, es koj tsis txhob tso peb rau luag tes mus li,
thiab tsis txhob rhuav lo lus koj tau cog.
35 Koj tsis txhob thau koj txoj kev khuv leej ntawm peb mus,
vim koj txuag Has Nplas Has koj tus phooj ywg, His Xas Has koj tus tub txib,
thiab His Xas Lais koj tus Ntshiab.
36 Koj tau cog lus rau lawv tias lawv yuav muaj tub ki coob cuag li cov hnub qub
nyob saum ntuj, los cuag li cov suab zeb nyob ntawm ntug hiav txwv.
37 Tiam sis peb yog ib haiv neeg tsawg tuaj lawm ntau, Huab Tais,
tsawg tshaj lwm haiv neeg tas tib si;
hnub no nyob tas ntiaj teb peb poob qis vim peb cov txhaum.
38 Lub caij no, peb tsis muaj nom tswv, tsis muaj yaj saub, tsis muaj tus thawj li,
tsis muaj tsiaj hlawv txi ntuj, tsis muaj cov txim, tsis muaj ib yam yuav fij rau ntuj,
tsis muaj xyab, tsis muaj qhov chaw yuav cev thawj cov txiv rau koj
kom tau txais koj cov txiaj ntsim koob hmoov li.
39 Tab sis vim peb muaj ib lub siab lees txhaum
thiab ib lub tswv yim txo hwj chim mas thov koj txais peb.
40 Zoo puav tam li yog ib co laug tshis thiab ib co heev nyuj
los yog ib txhiab tus yaj rog hlawv txi rau koj,
thov kom hnub no koj saib peb thaj txi ntuj yog zoo li ntawd,
thiab kom peb muab tas nrho peb lub siab los raws koj,
vim cov tso siab rau koj yuav tsis raug kev poob ntsej muag.
41 Nyem no peb muab tas peb lub siab los raws koj,
los hwm koj thiab peb los nrhiav koj lub ntsej muag.
42 Thov koj tsis txhob cia peb poob rau kev txaj muag,
tiam sis koj ua siab ntev rau peb thiab
koj muab koj txoj kev khuv leej loj tas nrho rau peb.
43 Thov koj ua hwj huam loj los cawm peb,
thiab koj ua kom koj lub npe tau hwj chim, Huab Tais."

NPN 25: 4-5ab, 6+7bc, 8-9

Txais: (6a) Huab Tais, thov koj nco ntsoov koj txoj kev khuv leej.

Huab Tais, thov koj ua kom kuv paub koj tej kev,
thov qhia koj tej lw rau kuv taug,
thov coj kuv mus raws koj txoj kev tseeb thiab qhia rau kuv paub,
vim koj yog Tswv Ntuj tus cawm kuv.

Txais: (6a) Huab Tais, thov koj nco ntsoov koj txoj kev khuv leej.

Huab Tais, thov koj nco ntsoov tias koj lub siab hlub neeg,
thiab koj lub siab zoo yeej ib txwm nyob txij puag thaud los lawm.
Koj lub siab zoo, Huab Tais, thov koj nco txog kuv,
vim koj muaj lub siab hlub neeg.

Txais: (6a) Huab Tais, thov koj nco ntsoov koj txoj kev khuv leej.

Huab Tais yog tus siab zoo siab ncaj,
nws thiaj qhia txoj kev zoo rau tus neeg txhaum taug.
Nws coj tus neeg me mus raws txoj kev ncaj,
nws qhia nws txoj kev rau tus neeg me taug.

Txais: (6a) Huab Tais, thov koj nco ntsoov koj txoj kev khuv leej.

Zaj Cav lub Moo Zoo: Yos Es 2: 12-13

HUAB TAIS hais tias: Nyem no nej cia li
muab tas nej lub siab tig rov los cuag kuv,
vim kuv muaj lub siab zoo thiab khuv leej neeg.

Ntawv Moo Zoo: MT 18: 21-35

21 Thaum ntawd, Pob Zeb txav los nug Yes Xus tias: “Huab Tais, yog kuv tus kwv tij ua txhaum rau kuv, kuv yuav zam pes tsawg zaus rau nws? Puas yuav zam txog xya zaus?”
22 Yes Xus teb rau Pob Zeb tias: “Kuv tsis hais tias kom koj zam txog xya zaus, tiam sis kom koj zam txog xya caum xya zaus.
23 Li ntawd, lub Ceeb Tsheej saum ntuj yog zoo li ib tug vaj uas xav nrog nws cov tub txib txheeb nws tej nyiaj txiag.
24 Thaum nws pib txheeb, luag coj ib tug tub txib uas tshuav nuj nqis txog ib vam nras nyiaj tuaj rau tus vaj.
25 Tus tub txib tsis muaj dab tsi them, ces tus vaj kom luag muab nws thiab nws poj niam me nyuam thiab tas nws lub cuab tam huv si muag, los them cov nuj nqis ntawd.
26 Tus tub txib txhos caug ntua ntawm tus vaj ko taw, nws pe tus vaj, nws hais tias: ‘Huab Tais, thov koj ua siab ntev rau kuv, kuv yuav them kom tas rau koj.’
27 Tus Huab Tais ntawd hlub nws tus tub txib, ces nws tso tus tub txib mus thiab tseem zam cov nuj nqis huv tib si rau nws.
28 Thaum tus tub txib tawm rov qab mus, nws ntsib nws ib tug phooj ywg ua tub txib li nws thiab, uas tshuav nqi ntawm nws ib puas lub txiaj nyiag. Tus tub txib ntawd nthos nkaus nws tus phooj ywg caj dab, zawm tus phooj ywg caj pas, thiab hais tias: ‘Koj tshuav kuv nqi koj cia li them kom tas rau kuv.’
29 Tus phooj ywg txhos caug ntua ntawm nws ko taw thov tias: ‘Thov koj ua siab ntev rau kuv, kuv yuav them rau koj.’
30 Tab sis tus tub txib ntawd tsis kam li, nws kom luag muab nws tus phooj ywg mus kaw hauv tsev loj faj mus txog hnub tus phooj ywg them nuj nqis tas huv tib si rau nws.
31 Tus tub txib cov phooj ywg pom nws ua li ntawd, lawv tu siab kawg, lawv mus qhia tej ntawd rau lawv tus Huab Tais.
32 Ces tus Huab Tais hu tus tub txib tuaj, nws hais rau tus tub txib ntawd tias: ‘Tub txib siab phem dab tsi! Cov nuj nqis uas koj tshuav ntawm kuv, kuv twb zam tas huv si rau koj, vim koj thov kuv.
33 Ua cas koj tsis hlub koj tus phooj ywg zoo li kuv tau hlub koj?’
34 Ces tus Huab Tais npau taws heev, nws muab tus tub txib ntawd tso rau cov tub hiam neeg tsim txom mus txog hnub nws them nws cov nuj nqis tas huv tib si.
35 Kuv Txiv nyob saum ntuj los kuj yuav ua ib yam li ntawd rau nej thiab, yog tias nej txhua tus tsis zam hauv nruab siab rau nej ib tug kwv tij twg.”

Tim     15     lub     3     Hlis     2023

Hnub Plaub Lis Piam Peb Caij Plaub Caug Xyoo ABC Nruab Lis Piam Xyoo I & II
Lectionary: 239

Zaj Nyeem Ib:   TXOJ CAI OB 4: 1, 5-9

Mais Xes hais lus rau tsoom pej xeem, nws hais tias:
1 "Cov His Xas Lais, zaum no nej mloog cov cai thiab cov lij choj uas kuv qhia rau nej coj, nej thiaj yuav muaj txoj sia thiab yuav tau nkag mus txeeb tau lub teb chaws uas HUAB TAIS nej cov yawg koob tus Tswv Ntuj muab pub rau nej los ua nej tug.
5 Li ntawd, kuv qhia rau nej ib co cai thiab lij choj raws li Huab Tais kuv tus Tswv Ntuj kom kuv qhia, kom nej yuav tau coj nyob hauv lub teb chaws nej yuav mus txeeb los ua nej tug.
6 Nej yuav mloog yuav coj raws nraim cov cai lij choj ntawd, ces nej thiaj yuav muab tau pov thawj rau luag lwm haiv neeg pom tias nej muaj kev thoob tsib thiab kev ntse; thaum lawv hnov txog tas cov cai lij choj no, lawv yuav hais tias: ‘Haiv neeg loj ntawd yog ib haiv neeg thoob tsib thiab muaj kev ntse tiag lau!’
7 Vim tias, haiv neeg loj twg thiaj muaj ib tug tswv ntuj nyob ze ze lawv li HUAB TAIS peb tus Tswv Ntuj nyob ze ze peb niaj zaus thaum peb hu txog nws?
8 Haiv neeg loj twg thiaj muaj ib co cai thiab lij choj ncaj ncees npaum tas nrho Txoj Cai uas kuv tsa rau nej hnub no?
9 Tiam sis nej yuav tsum tau ceev faj zoo tiag, nej yuav tau tsis txhob hnov qab tej yam nej qhov muag tau pom kiag, yuav tsis txhob muab tej ntawd tshem tawm ntawm nej lub cim xeeb mus yog nej tseem muaj txoj sia nyob; tiam sis nej yuav tsum tau muab qhia rau nej cov me nyuam, thiab rau nej cov me nyuam cov me nyuam huv tib si.”

NPN   147: 12-13, 15-16, 19-20

Txais: (12a) Yes Lus Xas Les, koj cia li cav txog Huab Tais.

Yes Lus Xas Les, koj cia li cav txog Huab Tais,
Xis Yoos, koj cia li cav txog koj tus Tswv Ntuj,
Vim nws tau ua kom cov tab ntawm koj cov rooj vag khov tuaj lawm,
nws tau foom hmoov zoo rau koj cov me nyuam nyob hauv koj lub loog.

Txais: (12a) Yes Lus Xas Les, koj cia li cav txog Huab Tais.

Nws xa nws lo lus ceeb toom tuaj rau ntiaj teb,
nws lo lus khiav nrawm nroos tuaj!
Nws tseb daus los zoo li plaub yaj,
nws pov cov te los zoo li hmoov tshauv.

Txais: (12a) Yes Lus Xas Les, koj cia li cav txog Huab Tais.

Nws tau tshaj nws lo lus rau Yas Kos,
tshaj nws cov kev cai thiab lij choj rau His Xas Lais.
Nws tsis tau ua zoo li ntawd rau lwm haiv neeg twg li,
nws tsis tau qhia nws cov lij choj rau lawv paub li.

Txais: (12a) Yes Lus Xas Les, koj cia li cav txog Huab Tais.

Zaj Cav lub Moo Zoo:   ZAM 6: 63c, 68c

HUAB TAIS, koj cov lus yog tswv yim thiab txoj sia,
koj muaj cov lus pub txoj sia nyob mus li.

Ntawv Moo Zoo:   MT 5: 17-19

Yes Xus hais rau nws cov thwj tim tias:
17 “Nej tsis txhob xav tias kuv tuaj rhuav Txoj Cai los cov Yaj Saub; kuv tsis yog tuaj rhuav, kuv tuaj qhia ntxiv kom thoob xwb.
18 Kuv hais tseeb rau nej tias: Lub ntuj lub teb yuav dua mus, tab sis yuav tsis muaj ib tug txwm ntawv me me, los ib teev ntawv me me hauv Txoj Cai yuav ploj li, mus txog thaum tas ib puas tsav yam yuav tsum tshwm sim tuaj tas tso.
19 Vim li no yog leej twg hla ib txog cai me me, thiab nws qhia kom luag tej ua xws li ntawd, mas luag yuav hu tus ntawd ua tus me tshaj cov nyob hauv lub Ceeb Tsheej saum ntuj; hos tus uas ua raws Txoj Cai tas huv si, thiab qhia kom luag tej ua li ntawd, mas luag yuav hu nws ua tus loj tshaj nyob hauv lub Ceeb Tshee saum ntuj.”

Tim    16     lub     3     Hlis     2023

Hnub Tsib Lis Piam Peb Caij Plaub Caug Xyoo ABC Nruab Lis Piam Xyoo I & II
Lectionary: 240

Zaj Nyeem Ib:   YES LES MIAS 7: 23-28

HUAB TAIS hais tias:
23 “Qhov kuv tau kom kuv haiv neeg ua yog li no: ‘Nej mloog kuv lub suab mog, ces kuv yuav yog nej tus Tswv Ntuj thiab nej yuav yog kuv haiv neeg. Nej yuav taug nraim txoj kev uas kuv qhia kom nej taug, nej thiaj yuav muaj kev vam meej.’
24 Tab sis lawv tsis mloog, tsis tig pob ntseg rau kuv li, lawv ua raws li lawv lub siab phem twm xeeb xwb, lawv tig nrob qaum rau kuv tsis tig ntsej muag los li.
25 Txij hnub nej phaj txiv tawm hauv Hais Nkws Tos teb los txog hnub no, kuv tau xa kuv cov tub txib Yaj Saub tuaj rau nej tsis tseg, kuv tsis nkees li.
26 Tab sis lawv tsis mloog tsis tig pob ntseg los li, lawv ua xwb qwb txhav qhi xwb, lawv tseem coj phem dua lawv phaj txiv lawm thiab.
27 Koj yuav hais cov lus no tas huv si rau lawv, tiam sis lawv yuav tsis mloog koj li thiab. Koj yuav hu lawv, tab sis lawv yuav tsis teb koj.
28 Ces koj yuav hais rau lawv tias: ‘Nov yog haiv neeg uas tsis kam mloog HUAB TAIS lawv tus Tswv Ntuj hais thiab tsis kam txais tej lus qhuab qhia li. Kev pheej xeeb ploj mus lawm, lawv lub ncauj twb tsis kam hais lo lus ntawd ntxiv li.’”

NPN   95: 1-2, 6-7, 8-9

Txais: ( Hnub no yog nej hnov nws lub suab, nej tsis txhob ua lub siab tawv ncauj.

Nej tuaj peb hu nkauj luag ntxhi rau HUAB TAIS,
peb qw suab cav txog lub Tsua Cawm peb.
Peb tuaj nyob ntawm nws xub ntiag ua nws tsaug,
peb hu nkauj paj nruag luag ntxhi rau nws.

Txais: ( 8 ) Hnub no yog nej hnov nws lub suab, nej tsis txhob ua lub siab tawv ncauj.

Nej tuaj peb mus khoov pe hawm nws,
peb mus txhos caug ntawm tus HUAB TAIS tsim peb los xub ntiag.
Vim nws yog peb tus Tswv Ntuj,
peb yog haiv neeg nws saib xyuas, pab yaj nws coj.

Txais: ( 8 ) Hnub no yog nej hnov nws lub suab, nej tsis txhob ua lub siab tawv ncauj.

Kheev lam hnub no nej mloog nws lub suab hais mas:
“Nej tsis txhob ua lub siab tawv ncauj li nyob Me Lis Npas,
thaum lub caij uas nyob Mas Xas hauv teb chaws suab puam,
qhov chaw uas nej phaj txiv tau sim kuv;
lawv tau sim kuv, txawm lawv twb tau pom kuv tej hauj lwm.”

Txais: ( 8 ) Hnub no yog nej hnov nws lub suab, nej tsis txhob ua lub siab tawv ncauj.

Zaj Cav lub Moo Zoo:   YOS ES 2: 12-13

Txais: Huab Tais Yes Xus Pleev, koj yog tus pub kev cawm seej,
tus muaj koob meej thiab muaj hwj huam.

HUAB TAIS hais tias: “Lub sij hawm no,
nej yuav muab tas nrho nej lub siab tig rov los cuag kuv,
vim kuv muaj lub siab hlub thiab khuv leej neeg.”

Txais: Huab Tais Yes Xus Pleev, koj yog tus pub kev cawm seej,
tus muaj koob meej thiab muaj hwj huam.

Ntawv Moo Zoo:   LK 11: 14-23

14 Yes Xus ntiab ib tug dab phem, yog tus dab ruam tsis txawj hais lus. Thaum tus dab tawm mus lawm, tus neeg ruam hais tau lus tuaj; pab neeg coob nyob ntawd qhuas kawg.
15 Lawv muaj ib txhia hais tias: "Nws hu txog tus vaj dab phem Npes Ntxes Npus los ntiab dab."
16 Tseem muaj ib txhia xav sim Yes Xus, ces lawv thov kom Yes Xus ua ib lub cim tawm saum ntuj tuaj rau lawv pom.
17 Tab sis Yes Xus paub qhov lawv xav, nws hais rau lawv tias: "Lub teb chaws twg rov tawm tsam nws tus kheej, mas nws kawg raug kev puas tsuaj, tej vaj tse ib lub yuav vau tsuam ib lub tas.
18 Yog tias Xas Tas rov tawm tsam Xas Tas, mas nws lub ceeb tsheej yuav ua cas nyob tau ruaj? Vim nej hais tias yog kuv hu txog Npes Ntxes Npus los ntiab dab.
19 Yog tias kuv vam txog Npes Ntxes Npus los ntiab dab no, nej cov neeg ho vam txog leej twg los ntiab dab? Ua li mas, nej cov neeg yuav txiav txim rau nej.
20 Hos yog tias kuv vam txog Tswv Ntuj tus ntiv tes los ntiab dab, mas Tswv Ntuj lub Ceeb Tsheej los txog nej lawm.
21 Thaum ib tug neeg muaj zog tuav ntaj tuav hmuv zov rawv nws lub tsev vaj loog, mas nws lub cuab tam nyob nyab xeeb.
22 Tab sis, thaum twg lwm tus muaj zog dua nws tuaj ntaus yeej nws, mas luag yuav txeeb nws cev ris tsho hlau uas yog nws lub chaw tso siab, ces luag yuav lwg nws tej cuab yeej cuab tam los sib faib.
23 Leej twg tsis nrog kuv, mas yog nws tiv kuv; leej twg tsis nrog kuv muab sau los khaws cia, mas yog nws ua kom ploj tas.”

Tim     17     lub     3     Hlis     2023

Hnub Rau Lis Piam Peb Caij Plaub Caug Xyoo ABC Nruab Xyoo I & II
Lectionary: 241

XHLT:   LN Patrick, ua Tswv Qhia

Zaj Nyeem Ib:   OS XES 14: 2-10

Huab Tais hais li no:
2 “Cov His Xas Lais, nej cia li rov qab los cuag HUAB TAIS nej tus Tswv Ntuj;
nej ntog vim yog nej tau ua txhaum lawm.
3 Nej yuav npaj ib co lus, ces nej yuav rov los cuag HUAB TAIS,
nej yuav hais rau nws tias: ‘Thov koj zam txhaum rau peb tas huv si,
koj tsuas saib peb qhov zoo xwb;
peb yuav muab peb di ncauj los ua thav nyuj cev rau koj.
4 As Xis Lias yuav cawm tsis tau peb; peb yuav tsis caij nees ntxiv;
peb yuav tsis hais ntxiv rau tej yam peb txhais tes tsim tawm los tias:
Peb tus Tswv Ntuj; Vim yog nyob ntawm koj xwb,
tus me nyuam ntsuag thiaj tau txais kev hlub.’
5 -- Kuv yuav kho lawv txoj kev ntxeev siab kom rov zoo los,
kuv yuav txaus siab hlo hlub lawv.
Kuv yuav tsis npau taws rau lawv ntxiv lawm.
6 Kuv yuav zoo li ib co lwg poob los yug His Xas Lais.
Ces nws yuav tawg taus paj zoo li cov paj nroj tsuag,
nws yuav nrhau taus cag xws li cov ntoo ciab Lis Npas Nos.
7 Nws cov ceg yuav hlav mus deb; nws yuav zoo xws li tsob txiv ntoo roj,
yuav tsw qab xws li cov ntoo ciab Lis Npas Nos.
8 Cov ib txwm nyob hauv nws qhov ntxoov yuav rov qab los;
lawv yuav cog kom rov muaj noob nplej.
Lawv yuav tawg paj xws li cov hmab txiv cawv,
ces yuav ua kom neeg nco txog nws xws li nco cov cawv Lis Npas Nos.
9 Es Fais, ua cas kuv thiaj tseem yuav hais txog tej dab mlom?
Vim kuv yog tus teb koj thiab tus saib xyuas koj.
Kuv zoo puav tam li ib tsob ntoo thuv ntsuab xiab,
koj txi taus txiv yog vim kuv.
10 Tus neeg thoob tsib, nws yuav tsum to taub txog tej no,
Tus neeg xyuam xim, nws yuav tsum paub txog tias,
HUAB TAIS tej kev yog kev ncaj; cov neeg siab ncaj thiaj yuav taug tau,
hos cov neeg txhaum yuav ntog nyob hauv tej kev ntawd.

NPN   81: 6c-8a, 8bc-9, 10-11ab, 14+17

Txais: (11+9a) Kuv yog HUAB TAIS koj tus Tswv Ntuj, koj cia li mloog kuv hais.

Kuv hnov ib co lus tshiab tias:
“Kuv txo nws lub nra ntawm nws xub pwg,
nws ob txhais tes dim tsis tau tuav lub pob tawb ntxiv.
Thaum koj muaj kev nyuaj siab, koj hu, ces kuv tau tuaj pab koj.”

Txais: Kuv yog HUAB TAIS koj tus Tswv Ntuj, koj cia li mloog kuv hais.

Koj tsis pom kuv, kuv tau teb koj nyob hauv xob quaj.
Kuv tau sim koj nyob ntawm cov dej Mes Lis Npas.
Kuv haiv neeg, nej mloog kuv, kuv yuav ntuas nej.
His Xas Lais, koj puas yuav mloog kuv hais?

Txais: Kuv yog HUAB TAIS koj tus Tswv Ntuj, koj cia li mloog kuv hais.

Nej yuav tsis txhob muaj dua lwm tus tswv ntuj,
tsis txhob teev hawm lwm tus pej kum dab.
Kuv, HUAB TAIS, yog nej tus Tswv Ntuj,
yog tus tau coj nej tawm hauv Hais Nkws Tos teb los.

Txais: Kuv yog HUAB TAIS koj tus Tswv Ntuj, koj cia li mloog kuv hais.

Kheev lam kuv haiv neeg cuab pob ntseg mloog kuv,
kheev lam His Xas Lais taug kuv tej kev mas,
kuv yuav muab cov nplej mov mog qab tshaj rau lawv noj,
thiab kuv yuav tho cov zib mu saum tsua los daws lawv nqhis.

Txais: Kuv yog HUAB TAIS koj tus Tswv Ntuj, koj cia li mloog kuv hais.

Zaj Cav lub Moo Zoo:   MT 4: 17

Huab Tais hais tias: “Nej cia li hloov siab,
lub Ceeb Tsheej saum ntuj nyob ze ze lawm.”

Ntawv Moo Zoo:   MK 12: 28-34

28 Ib tug kws Ntawv Ntshiab hnov lawv sib cav, nws pom tias Yes Xus teb raug kawg rau cov xas dus kais, ces nws txav los nug Yes Xus tias: "Nyob hauv cov lus qhia tas huv tib si, lo lus qhia twg yog lo loj tshaj?"
29 Yes Xus teb rau nws tias: "Thawj lo lus qhia yog lo no: ‘His Xas Lais, koj mloog mog! Peb tus Huab Tais Tswv Ntuj tib leeg xwb yog Huab Tais.
30 Koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog.’
31 Lo lus qhia ob yog lo no: ‘Koj yuav nyiam tus nyob ze koj ib yam li koj nyiam koj.’ Tsis muaj lwm lo lus qhia loj dua ob lo lus no lawm."
32 Tus kws Ntawv Ntshiab hais rau Yes Xus tias: "Koj hais raug kawg, Xib Hwb, koj hais qhov tseeb tias: muaj ib tug Tswv Ntuj xwb, tsis muaj dua lwm tus dhau ntawm nws lawm.
33 Thiab kev nyiam Tswv Ntuj tas yus lub siab lub ntsws, tas yus lub tswv yim thiab tas yus lub zog, thiab nyiam tus nyob ze yus ib yam li yus nyiam yus, mas muaj nqes tshaj tej tsiaj hlawv thiab cov thaj txi Ntuj huv tib si."
34 Yes Xus pom tus kws Ntawv Ntshiab teb ib co lus muaj kev to taub zoo, ces nws hais rau tus kws Ntawv Ntshiab tias: "Koj nyob tsis deb ntawm Tswv Ntuj lub Ceeb Tsheej lawm."
Ces tsis muaj leej twg muaj cuab kav nug Yes Xus dab tsi ntxiv li.

Tim    18     lub     3     Hlis     2023

Hnub Xya Lis Piam Peb Caij Plaub Caug Xyoo ABC Nruab Lis Piam Xyoo I & II
Lectionary: 242

XHLT:   LN Cyril nyob Yes Lus Xas Les, ua Tswv Qhia thiab Kws cov Txuj Ntshisb

Zaj Nyeem Ib:   OS XES 6: 1-6

1 Nej tuaj, peb rov qab los cuag HUAB TAIS. Nws tau dua peb ntuag, tab sis nws yuav rov kho peb kom zoo; nws tau nplawm peb, tab sis nws yuav qhwv peb cov qhov txhab rau.
2 Nws tos ob hnub ces nws yuav rov muab txoj sia rau peb; hnub peb, nws yuav tsa peb sawv rov los, peb yuav tau ua neej nyob ntawm nws xub ntiag.
3 Peb yuav tsum paub, peb yuav tsum nrhiav kom paub HUAB TAIS. Tseeb ib yam li lub hnub tawm tuaj thaum sawv ntxov, nws yeej yuav tuaj xwb. Nws yuav tuaj xws li nag poob los rau saum peb, xws li phaum nag tshiab uas poob los ywg lub ntiaj teb.
4 Kuv yuav ua dab tsi rau koj, Es Fais? Kuv yuav ua dab tsi rau koj, Yus Das? Nej txoj kev nyiam kuv yog zoo li cov huab thaum sawv ntxov, thiab zoo li cov lwg uas yaj sai sai.
5 Yog vim li ntawd kuv thiaj siv cov Yaj Saub los muab lawv tsuj rau hauv av, kuv lub ncauj thiaj hais cov lus muab lawv tua, ces kuv txoj kev txiav txim thiaj ci tawm plaws tuaj xws li qhov pom kev.
6 Vim tias kuv ntshaw txoj kev hlub ncaj ncees dua cov thaj txi Ntuj, kuv ntshaw kev paub Tswv Ntuj dua cov thaj hlawv tsiaj.

NPN   51: 3-4, 18-19, 20-21ab

Txais: (OX 6:6) Kuv xav pom nej txoj kev khuv leej neeg dua nej tej kev txi ntuj.

Thov koj khuv leej kuv, Tswv Ntuj, vim koj lub siab zoo;
thov koj so kuv qhov txhaum pov tseg, vim koj muaj kev hlub loj kawg nkaus;
thov ntxuav kuv lub txim kom tas nrho pov tseg
thiab tshem kuv qhov txhaum mus kom kuv dawb huv tuaj.

Txais: Kuv xav pom nej txoj kev khuv leej neeg dua nej tej kev txi ntuj.

Vim koj tsis zoo siab txais peb tej kev txi ntuj,
yog kuv yuav hlawv tsiaj txi ntuj, koj yuav tsis kam txais.
Kuv txoj kev txi ntuj, Tswv Ntuj, yog muaj ib lub tswv yim xav lees txhaum;
ib lub siab xav lees txhaum thiab ua neeg me,Tswv Ntuj, koj yuav tsis thuam.

Txais: Kuv xav pom nej txoj kev khuv leej neeg dua nej tej kev txi ntuj.

HUAB TAIS, thov koj ua siab dav rau Xis Yoos, vim koj lub siab zoo,
Thov koj rov tsa Yes Lus Xas Les cov ntsa loog rau.
Ces thaum ntawd koj yuav zoo siab txais peb cov thaj txi ntuj,
peb cov kev tua tsiaj thiab hlawv tsiaj txi ntuj.

Txais: Kuv xav pom nej txoj kev khuv leej neeg dua nej tej kev txi ntuj

Zaj Cav lub Moo Zoo:   NPN 95: 8

Yog hnub no nej hnov nws lub suab,
nej tsis txhob ua nej lub siab tawv ncauj.

Ntawv Moo Zoo:   LK 18: 9-14

9 Yes Xus hais zaj paj lug no rau cov neeg uas lawv khav tias lawv yog neeg ncaj, thiab lawv thuam luag tej.
10 "Muaj ob tug neeg nce mus teev Ntuj pem lub Tuam Tsev Teev Ntuj. Ib tug yog Fas Lis Xais, ib tug yog tub sau se.
11 Tus Fas Lis Xais sawv ntsug pem toj, nws teev Ntuj li no nyob hauv siab: 'Aub, Tswv Ntuj, kuv ua koj tsaug, vim kuv tsis zoo li zeej tsoom sawv daws; lawv mas lawv ua neeg qia dub, ua tsis ncaj, deev luag txij luag nkawm; los tsis zoo li tus sau se ntawd.
12 Kuv mas ib lis piam twg, kuv yoo mov ob zaug, kuv pub ib feem kaum ntawm tas txhia yam uas kuv khwv tau rau luag.'
13 Tus sau se nyob nrug deb, tsis muaj cuab kav tsa muag ntsia saum ntuj. Nws ntaus nws hauv siab, nws hais tias: 'Aub! Tswv Ntuj, thov koj khuv leej kuv, vim kuv yog neeg txhaum!'
14 Kuv hais rau nej tias: Tus sau se nqes rov los tsev, nws yog neeg ncaj tuaj lawm, hos tus Fas Lis Xais tsis ncaj tuaj. Vim tias leej twg tsa nws siab, yuav raug muab txo qis, hos leej twg txo nws qis, yuav raug muag tsa siab."

Tim    20     lub     3     Hlis    2023

Hmoov Loj Hwm leej Ntshiab Yos Xes, Niam Mab Liab tus Txij Nkawm
Lectionary: 543

Zaj Nyeem Ib:   2 XAS MUAS 7: 4-5a, 12-14a, 16

4 Hmo ntawd, HUAB TAIS tuaj hais lus rau Nas Taas, nws hais tias :
5a "Koj mus hais rau kuv tus tub txib Das Vis li no:
12 ‘Thaum txog koj lub caij mus nrog koj cov poj yawm txwv koob so lawm, kuv yuav tsa koj tus tub kom sawv los tom qab koj, yog tus tawm ntawm koj roj ntsha los, kuv yuav tsa nws txoj kev ua vaj kom nyob ruaj nreb.
13 Nws yog tus yuav txhim ib lub tsev rau kuv lub npe, ces kuv yuav tsa nws txoj kev ua vaj kom nyob ruaj nreb mus li.
14a Kuv yuav ua nws txiv, nws yuav ua kuv tus tub.
16 Koj tsev neeg thiab koj txoj kev ua vaj yuav nyob mus li nyob ntawm kuv xub ntiag; koj lub theej kiab yuav nyob ruaj nreb mus ib txhis.’”

NPN   89: 2-3, 4-5, 27+29

Txais: (37) Das Vis leej tub yuav nyob tas mus li ib txhis.

Kuv yuav hu nkauj mus li cav txog HUAB TAIS txoj kev hlub;
tiam dhau tiam kuv lub ncauj yuav tshaj koj txoj kev pheej xeeb.
Vim koj tau hais tias: “Kuv txoj kev ua zoo yuav nyob mus li;”
koj tau tsa koj txoj kev pheej xeeb kom nyob ruaj nreb nyob saum ntuj.

Txais: (37) Das Vis leej tub yuav nyob tas mus li ib txhis.

“Kuv tau hais haum nrog tus kuv xaiv,
kuv tau cog lus ruaj rau Das Vis kuv tus tub txib tias:
Kuv yuav tsa koj caj ces kom nyob mus li,
kuv yuav txhim koj lub theej kiab kom nyob tiam dhau tiam.”

Txais: (37) Das Vis leej tub yuav nyob tas mus li ib txhis.

“Nws yuav hais txog kuv tias: ‘Koj yog kuv txiv,
koj yog kuv tus Tswv Ntuj, kuv lub tsua, tus cawm kuv.’
Kuv yuav muab kuv txoj kev hlub rau nws tas mus li,
thiab kuv txoj kev nrog nws cog lus yuav nyob ruaj nreb.”

Txais: (37) Das Vis leej tub yuav nyob tas mus li ib txhis.

Zaj Nyeem Ob:   LOS MAS 4: 13, 16-18, 22

Cov kwv tij nkauj muad:
13 Has Nplas Has thiab nws tsoom xeeb ntxwv tau txais txoj kev cog lus tias lawv yuav tau txais lub ntiaj teb los ua lawv tug, tsis yog vim Has Nplas Has mloog txoj cai, tiam sis yog vim nws muaj txoj kev ncaj ncees uas los ntawm txoj kev ntseeg los.
16 Vim li no txoj kev cog lus ntawd yog txawb rau saum txoj kev ntseeg, ces nws thiaj yog ib qho txiaj ntsim koob hmoov thiab thiaj li nyob ruaj nreb rau tas Has Nplas Has tsoom xeeb leej xeeb ntxwv, tsis yog rau cov uas coj raws txoj cai xwb, tiam sis rau txhua tus uas coj txoj kev ntseeg raws li Has Nplas Has uas yog peb sawv daws txiv,
17 raws li muaj ntawv sau tseg tias: “Kuv tsa koj ua txiv rau ntau haiv neeg.” Tswv Ntuj yeej saib Has Nplas Has yog peb txiv, vim Has Nplas Has ntseeg Tswv Ntuj tus uas muab tau txoj sia rau cov neeg tuag thiab cia li hu xwb ces txhua yam tsis tau muaj txawj xeeb muaj tuaj.
18 Thaum tsis muaj kev cia siab li lawm, Has Nplas Has tseem cia siab tuag nthi thiab ntseeg tuag nthi tias nws yuav ua txiv rau ntau haiv neeg raws li cov lus hais rau nws tias: “Koj tsoom xeeb ntxwv yuav coob npaum li no.”
22 Vim li no thiaj muab qhov kev ntseeg ntawd ntaus nqe ua nws txoj kev ncaj ncees.

Zaj Cav lub Moo Zoo:   NPN 84: 5

Cov muaj hmoov zoo yog cov nyob hauv koj lub tsev, HUAB TAIS,
lawv yuav cav txog koj mus li tsis muaj caij kawg.

Ntawv Moo Zoo:   MT 1: 16, 18-21, 24a

16 Yas Kos yug Yos Xes uas yog Mab Liab tus txiv. Mab Liab yug Yes Xus, uas luag hu nws ua Leej Pleev.
18 Yes Xus Pleev lub keeb yog chiv zoo li no: Mab Liab uas yog Yes Xus niam raug muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub.
19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm xwb.
20 Thaum nws txiav siab li ntawd lawm, Huab Tais tus Tshiab txawm tawm los ua npau suav rau nws, thiab hais rau nws tias: "Yos Xes, Das Vis leej tub, koj txhob ntshai coj Mab Liab koj tus poj niam los nyob hauv koj tsev. Yog Leej Ntuj Plig Ntshiab ua kom nws xeeb tub.
21 Nws yuav yug ib tug tub, koj yuav tis nws npe hu ua Yes Xus, vim nws yuav cawm nws haiv neeg ntawm lawv cov txhaum."
24 Thaum Yos Xes tsim los, nws ua raws li Huab Tais tus Tshiab qhia rau nws: nws mus coj nws poj niam los nyob hauv nws tsev.

Los:   LK 2: 41-51a

41 Yes Xus niam thiab txiv nkawd niaj xyoo mus ua lub Ntees Hla pem Yes Lus Xas Les.
42 Thaum Yes Xus muaj kaum ob xyoos, lawv kuj mus ua lub Ntees Hla pem Yes Lus Xas Les raws li kev cai thiab.
43 Thaum cov hnub ua ntees tiav tas lawm, Yos Xes thiab Mab Liab nkawd sawv kev rov mus tsev, hos tus me tub Yes Xus tseem nyob Yes Lus Xas Les, nws niam thiab nws txiv tsis paub.
44 Nkawd xav tias nkawd tus tub nrog pab neeg tuaj ua ke rov qab lawm. Ces nkawd mus ib hnub ke, nkawd mam li pib nrhiav nkawd tus tub hauv cov txheeb ze thiab cov swm neeg.
45 Nkawd nrhiav tsis tau, ces nkawd rov mus nrhiav nws pem Yes Lus Xas Les.
46 Nkawd nrhiav tau peb hnub, thiaj nrhiav tau Yes Xus nyob hauv lub Tuam Tsev Teev Ntuj. Nws zaum hauv nruab nrab cov kws qhia Txoj Cai, nws mloog lawv thiab ho nug lawv.
47 Cov neeg uas tau hnov Yes Xus hais lus, puav leej yoob tas rau nws txoj kev to taub thiab rau nws cov lus teb.
48 Thaum nkawd pom Yes Xus, nkawd xav tsis thoob, ces Yes Xus niam hais rau Yes Xus tias: "Me tub, vim li cas koj ua li ntawd rau wb? Saib! Koj txiv wb nrhiav koj, wb ntxhov siab tas nrho."
49 Yes Xus hais rau nkawd tias: "Vim li cas neb nrhiav kuv? Neb tsis paub tias kuv yuav tsum nyob hauv kuv Txiv lub tsev no lod?”
50 Mab Liab thiab Yos Xes nkawd tsis to taub lo lus uas Yes Xus hais rau nkawd li.
51 Yes Xus nrog nkawd rov mus nram Nas Xas Les, nws mloog nkawd lus.

Tim     21     lub     3     Hlis     2023

Hnub Peb Lis Piam Plaub Caij Plaub Caug Xyoo ABC Nruab Lis Piam Xyoo I & II
Lectionary: 245

Zaj Nyeem Ib:   ES XES KIAS 47: 1-9, 12

1 Tus tshiab coj kuv, Es Xes Kias, rov los txog ntawm lub qhov rooj nkag mus hauv lub Tuam Tsev Teev Ntuj. Ua ciav kuv pom muaj dej ntws tawm hauv lub qab taw rooj los dua sab hnub tuaj lawm, vim lub Tuam Tsev tig mus rau sab hnub tuaj. Dej ntws tawm ntawm sab xis ntawm lub Tuam Tsev Teev Ntuj los, nyob sab naj lub thaj txi ntuj.
2 Nws coj kuv tawm ntawm lub rooj vag nyob sab pej los rau sab nraum zoov, thiab coj kuv ncig sab Tuam Tsev nraud los txog ntawm lub rooj vag nyob sab hnub tuaj, uas kuv pom dej txhawv ntws sis tawm ntawm sab xis los.
3 Ces Tus tshiab nrug mus rau sab hnub tuaj, nws nqa ib txoj hlua ntsuas ntawm tes, nws ntsuas ntev li ib txhiab tshim, ces nws kom kuv mus kwm dej; dej txij li kuv lub qij taws.
4 Nws rov ntsuas ib txhiab tshim ntxiv, thiab kom kuv rov mus kwm dej dua, dej nce txij kuv hauv caug lawm. Nws rov ntsuas dua ib txhiab tshim ntxiv, nws rov kom kuv mus kwm dej, dej txij kuv duav lawm.
5 Nws tseem rov qab ntsuas dua ib txhiab tshim ntxiv, thaum ntawd cia li yog ib tug dej loj loj kuv kwm tsis tau lawm, vim cov dej puv tuaj ua ib tug dej loj loj hla tsis dhau lawm, yuav tsum yog ua luam dej xwb mas thiaj hla dhau.
6 Ces nws hais rau kuv tias: " Neeg leej tub, koj puas pom qhov ntawd?" Nws thiaj coj kuv taug tus ntug dej rov los.  
7 Thaum kuv rov taug kev los, mas kuv pom muaj ib co ntoo ntau ntau kawg nyob ntawm sab ntug dej tim no thiab nyob sab tim ub.
8 Nws hais rau kuv tias: "Cov dej no ntws mus rau thaj tsam sab toob fab thiab nqes mus rau nram lub hav As Las Npas, thiab mus tshuam rau hauv hiav txwv, hauv cov dej tsis zoo haus, mus ua kom cov dej ntawd qab ntshiab si tuaj.
9 Tus dej no ntws txog qhov twg, mas tas puas tsav yam muaj sia uas txawj huam vam yuav ciaj sia; ces yuav muaj ntses ntau heev tuaj, vim tus dej no mus txog qhov twg, mas nws ua kom cov dej ntawd ntshiab huv tuaj thiab ua kom tas txhua tsav yam yuav ciaj sia nyob qhov ntawd.
12 Nyob ntawm tus dej ob sab ntug yuav tuaj tas ib puas tsav yam ntoo txi txiv; lawv cov nplooj yuav tsis zeeg thiab lawv cov txiv yuav muaj tsis tu ncua li; niaj lub hlis lawv yuav txi ib phaum txiv tshiab, vim cov dej ywg cov ntoo ntawd ntws ntawm thaj chaw ntshiab los. Lawv cov txiv yuav yog txhiam xws noj, lawv cov nplooj yuav yog tshuaj kho mob nkeeg."

NPN   46: 2-3, 5-6, 8-9

Txais: ( Tus Huab Tais kav tsoom tshiab nrog peb nyob;
Peb lub yeej ntsa zeb yog Yas Kos tus Tswv Ntuj.

Tswv Ntuj yog peb lub chaw nkaum, yog peb lub zog,
yog tus pab peb mus li thaum peb ntsib kev nyuaj.
Vim li no peb tsis ntshai, txawm ntiaj teb yuav ua zog koog thiab
txawm toj roob hauv pes yuav nphau nphwv rau hauv qab tiv txwv.

Txais: Tus Huab Tais kav tsoom tshiab nrog peb nyob;
Peb lub yeej ntsa zeb yog Yas Kos tus Tswv Ntuj.

Muaj ib tug dej txhawv, nws ncau ceg mus ua kom Tswv Ntuj lub tsheej zoo siab,
lub tsheej uas yog tus Nyob Siab lub vaj tse dawb huv.
Tswv Ntuj nyob hauv lub tsheej, nws yuav tsis muaj kev txhawj xeeb,
Tswv Ntuj yuav tuaj pab nws thaum kaj ntug txoog.

Txais: Tus Huab Tais kav tsoom tshiab nrog peb nyob;
Peb lub yeej ntsa zeb yog Yas Kos tus Tswv Ntuj.

Tus Huab Tais kav tsoom tshiab nrog peb nyob,
peb lub yeej ntsa zeb yog Yas Kos tus Tswv Ntuj.
Tuaj! nej tuaj xyuas HUAB TAIS cov hauj lwm saib,
yog tej yam txaus qhuas nws tau ua nyob ntiaj teb no.

Txais: Tus Huab Tais kav tsoom tshiab nrog peb nyob;
Peb lub yeej ntsa zeb yog Yas Kos tus Tswv Ntuj.

Zaj Cav lub Moo Zoo:   NPN 51: 12a, 14a

Tswv Ntuj, thov koj tsim ib lub siab huv lis si rau kuv,
koj pub kom kuv rov muaj kev zoo siab nyob hauv koj txoj kev cawm.

Ntawv Moo Zoo:   ZAM 5: 1-16

1 Txog cov Yus Das ib lub hnub nyoog ua koob tsheej lawm, ces Yes Xus nce mus pem Yes Lus Xas Les.
2 Nyob Yes Lus Xas Les, ntawm lub rooj vag hu ua Rooj Vag Yaj, muaj ib lub pas dej uas lus Hes Nplaws hu ua Npes Xas Das, muaj tsib lub ru tsev ua chaw nkaum nyob rau ntawd.
3 Hauv cov qab ru tsev no, muaj  ib pab neeg coob kawg pw: ib co muaj mob, ib co dig muag, ib co ceg tawv, thiab ib co tuag tes tuag taw. Lawv tos kom cov dej pib ntas.
4 Vim muaj tej lub caij, Huab Tais tus Tshiab nqes los rau hauv lub pas dej, ces ua kom dej co dej ntas. Thaum ntawd, yog leej twg xub nqes mus rau hauv dej, mas nws tus mob zoo hlo, txawm raug tus mob dab tsi los zoo tas huv tib si.
5 Muaj ib tug txiv neej nyob ntawd, nws mob tau peb caug yim xyoo lawm.
6 Yes Xus pom nws pw ntawd, Yes Xus paub tias nws tuaj pw ntawd tau ntev los lawm, nws hais rau tus neeg mob tias: "Koj puas xav kom koj tus mob zoo?"
7 Tus neeg mob teb rau Yes Xus tias: "Huab Tais, thaum dej ntas kiag, kuv tsis muaj leej twg pab muab kuv tso rau hauv dej li. Thaum kuv tab tom mus, twb muaj lwm tus xub nqes ua kuv ntej lawm."
8 Yes Xus hais rau nws tias: "Koj sawv! Nqa koj daim lev pua chaw, thiab koj mus kev mas."
9 Tam sis ntawd tus neeg mob zoo hlo. Nws nqa nws daim lev, ces nws sawv mus kev. Hnub ntawd yog hnub Xas Npas Tos.
10 Cov Yus Das hais rau tus neeg uas zoo los ntawd tias: "Hnub no yog hnub  Xas Npas Tos, txwv tsis pub koj nqa koj daim lev pua chaw."
11 Tab sis nws hais rau lawv tias: "Tus uas kho kuv zoo, nws twb hais rau kuv tias: ‘Nqa koj daim lev pua chaw, thiab koj mus kev mas’ no ne."
12 Lawv nug nws tias: "Leej twg yog tus hais rau koj tias: ‘Nqa koj daim lev pua chaw, thiab koj mus kev’?"
13 Tab sis tus neeg uas zoo ntawd tsis paub tias yog leej twg, vim Yes Xus twb ploj lawm, thiab muaj neeg coob coob nyob rau ntawd.
14 Ib tsam, Yes Xus pom nws nyob hauv lub Tuam Tsev Teev Ntuj, Yes Xus hais rau nws tias: "Nyem no, koj tus mob twb zoo lawm, koj txhob ua txhaum ntxiv, tsam ib yam phem tshaj ho rov raug koj dua."
15 Tus neeg mus hais rau cov Yus Das tias tus kho nws zoo yog Yes Xus.
16 Vim li ntawd, cov Yus Das thiaj pib hiam Yes Xus, vim nws ua tej ntawd hnub Xas Npas Tos.

Tim     22     lub     3     Hlis     2023

Hnub Plaub Lis Piam Plaub lub Caij Plaub Caug Xyoo ABC Nruab Lis Piam Xyoo I & II
Lectionary: 246

Zaj Nyeem Ib:   HIS XAIS 49: 8-15

8 HUAB TAIS hais li no: “Thaum txog lub zoo caij nyoog, kuv tau teb koj,
thaum txog hnub cawm neeg, kuv tau pab koj;
kuv tau txuag koj, tau muab koj ua ib txog kev cog lus rau tsoom neeg,
kom koj rov tsa lub teb chaws sawv thiab
kom koj faib cov cuab tam uas tsis muaj neeg yuav.
9 Koj yuav hais rau cov neeg raug kaw tias: 'Nej tawm los,'
hais rau cov neeg nyob hauv qhov tsaus ntuj tias:
'Nej tawm tuaj rau sawv daws pom!'
Lawv yuav nrhiav tau chaw noj zaub nyob ntawm tej ntug kev,
cov roob do hau yuav yog lawv tej chaw noj zaub.
10 Lawv yuav tsis tshaib yuav tsis nqhis,
cov cua kub lug thiab lub hnub yuav tsis ntaiv lawv,
vim tus khuv leej lawv yuav coj lawv kev
thiab puav lawv mus kom txog cov dej txhawv ntws lug.
11 Kuv yuav hloov kuv cov roob tas huv si los ua ib txog kev,
kuv tej kev loj yuav yog tej txoj kev nyob siab.
12 Ntsia saib cov no tuaj deb kawg tuaj, hos cov tod tuaj pej fab thiab xib fab tuaj,
cov ntawd tuaj Xis Nim teb tuaj.
13 Cov txheej ntuj saud nej cia li qw zoo siab,
ntiaj teb nrag cai koj cia li dhia hom khaj;
cov toj roob hauv pes nej cia li qw suab nkauj zoo siab,
vim HUAB TAIS tuaj nplij nws haiv neeg lawm,
nws hlub nws cov neeg uas raug txom nyem.
14 Xis Yoos hais tias: ‘HUAB TAIS tso kuv pov tseg lawm,
kuv tus Huab Tais tsis nco qab kuv lawm.’
15 Ib tug poj niam puas yuav tsis nco qab nws tus me nyuam mos tau?
Nws puas yuav tsis hlub tus tub uas tawm hauv nws plab los tau?
Tab txawm tus poj niam ntawd tsis nco qab tau
los kuv yuav tsis muaj qhov tsis nco qab koj ib zaug li!”

NPN   145: 8-9, 13cd-14, 17-18

Txais: (8a) Huab Tais yog tus hlub thiab khuv leej neeg.

Huab Tais yog tus hlub thiab khuv leej neeg,
nws npau taws qeeb, nws lub siab puv kev ua zoo.
Huab Tais ua zoo rau txhua leej txhua tus,
nws hlub tas txhua yam nws tau tsim los.

Txais: Huab Tais yog tus hlub thiab khuv leej neeg.

Huab Tais yog tus pheej xeeb nyob hauv tas nws tej lus,
nws yog tus ntshiab huv nyob hauv tas nws tej hauj lwm.
Huab Tais tsa cov ntog kom txhua tus sawv taus rov los,
nws tsa cov khoov nkoos kom tas txhua leej sawv taus ntseg.

Txais: Huab Tais yog tus hlub thiab khuv leej neeg.

Huab Tais yog tus ncaj nyob hauv tas nws tej kev,
nws yog tus ntshiab nyob hauv tas nws tej hauj lwm.
Huab Tais nyob ze ze tas cov uas hu txog nws,
tas cov uas muaj lub siab hu txog nws tiag.

Txais: Huab Tais yog tus hlub thiab khuv leej neeg.

Zaj Cav lub Moo Zoo:   ZAM 11: 25a, 26

Huab Tais hais tias: “Kuv yog txoj kev sawv rov los thiab yog txoj sia,
leej twg ntseeg txog kuv yuav tsis txawj tuag li.”

Ntawv Moo Zoo:   ZAM 5: 17-30

17 Yes Xus teb rau cov Yus Das tias: "Kuv Txiv ua hauj lwm txog tav no, kuv kuj ua hauj lwm ib yam thiab."
18 Yog vim li no, cov Yus Das thiaj yim huab xav muab Yes Xus tua, vim nws tsis caiv hnub xas npas tos, thiab nws tseem hu Tswv Ntuj ua nws Txiv, ces nws tsa nws nrog Tswv Ntuj loj sib luag lawm.
19 Yes Xus thiaj teb rau lawv, nws hais tias: "Kuv hais qhov muaj tseeb tiag rau nej: Leej Tub ua tsis tau ib yam dab tsi ntawm nws tus kheej, nws tsuas ua raws qhov nws pom Leej Txiv ua xwb. Vim tias Leej Txiv ua yam twg, mas Leej Tub kuj ua raws nraim li ntawd thiab xwb.
20 Vim Leej Txiv nyiam Leej Tub, ces nws qhia ib puas tsav yam nws ua rau Leej Tub paub. Nws tseem yuav qhia ib co hauj lwm loj tshaj cov no rau Leej Tub paub thiab, kom nej ceeb tas.
21 Ib yam li leej Txiv tsa cov tuag kom sawv rov los thiab pub nws txoj sia, ib yam li ntawd, leej Tub xav pub txoj sia rau leej twg kuj tau nyob ntawm nws xav.
22 Leej Txiv tsis txiav txim rau leej twg, nws tso txoj hauj lwm txiav txim huv tib si rau Leej Tub ua lawm,
23 kom sawv daws hwm Leej Tub ib yam li hwm Leej Txiv. Tus tsis hwm Leej Tub, kuj tsis hwm Leej Txiv uas yog tus xa Leej Tub tuaj thiab.
24 Kuv hais qhov muaj tseeb tiag rau nej, tus twg mloog kuv lo lus, thiab ntseeg txog tus xa kuv tuaj, mas nws tau txoj sia nyob mus li, nws yuav tsis mus raug txim, nws twb hla ntawm txoj kev tuag mus rau hauv txoj sia lawm.
25 Kuv hais qhov muaj tseeb tiag rau nej tias, lub zim txwv yuav los txog, twb los txog nyem no kiag lawm, uas cov tuag yuav hnov Tswv Ntuj Leej Tub lub suab; cov uas yuav hnov, yuav muaj txoj sia nyob.
26 Ib yam li Leej Txiv muaj txoj sia nyob hauv nws, Leej Txiv kuj pub kom Leej Tub muaj txoj sia nyob hauv nws thiab.
27 Leej Txiv pub hwj huam rau Leej Tub kom txiav txim tau, vim nws yog Neeg Leej Tub.
28 Nej tsis txhob poob siab rau qhov ntawd, vim txog lub sij hawm lawm uas tas ib tsoom neeg nyob hauv qhov ntxa yuav hnov nws lub suab,
29 ces lawv yuav tawm los; cov tau ua zoo yuav mus rau txoj kev sawv rov los muaj txoj sia, hos cov tau ua phem yuav mus rau txoj kev sawv rov los mus raug txim.
30 Kuv ua yam twg, kuv ua tsis tau kuv tus kheej; kuv txiav txim raws li qhov kuv hnov, ces kuv cov lus txiav txim yog lus ncaj, vim kuv tsis nrhiav kom tau ua raws li kuv lub siab xav, kuv tsuas nrhiav kom tau ua raws li Tus Xa kuv tuaj lub siab xav xwb.”