COV ZAJ NYEEM NRUAB LIS PIAM XYOO I 2022-2023

Tim     20     lub     4     Hlis     2023

Hnub Tsib Lis Piam Ob Caij Hla Xyoo ABC Nruab Lis Piam Xyoo I & II
Lectionary: 270

Zaj Nyeem Ib:   HAUJ LWM 5: 27-33

27 Thaum lub tsev txiav txim cov tub ceev xwm coj cov Hauv Paus Xa Lus los txog, luag  kom lawv mus sawv ntawm cov txwj laus Xas Nes Nrees xub ntiag. Tus Thawj leej choj nug cov Hauv Paus Xa Lus tias:
28 "Peb twb tau txwv nej, tsis kheev nej siv lub npe ntawd los qhuab qhia lawm ne, tab sis nej tseem qhia nej zaj ntawd mus thoob Yes Lus Xas Les thiab, yeej yog nej xav kom tus neeg ntawd cov ntshav rov qab poob los rau peb ris xwb."
29 Ces Pob Zeb thiab cov Hauv Paus Xa Lus teb tias: "Peb yuav tsum mloog Tswv Ntuj lus zoo dua mloog neeg lus.
30 Peb cov yawg koob tus Tswv Ntuj tau tsa Yes Xus sawv rov los lawm, tus Yes Xus uas nej muab nws dai rau saum ib tug ncej ntoo kom tuag.
31 Tswv Ntuj tau tsa nws nyob siab ntawm Tswv Ntuj sab xis ua tus Coj thiab tus Cawm Seej, kom nws tau pub txoj kev thov txhaum thiab kev zam txhaum rau His Xas Lais.
32 Peb yog cov ua tim khawv txog tej no, thiab Leej Ntuj Plig Ntshiab, uas Tswv Ntuj pub rau cov neeg mloog nws lus, kuj ua tim khawv txog thiab."
33 Lawv hnov li ntawd mas lawv npau taws kawg, lawv xav muab cov Hauv Paus Xa Lus tua xwb.

NPN   34: 2+9, 17-18, 19-20

Txais: (7a) Huab Tais mloog tus pluag lub suab quaj.
los: As les lus yas.

Kuv yuav cav txog HUAB TAIS txhua lub sij hawm;
lo lus cav txog nws yuav nyob rawv ntawm kuv lub ncauj.
Nej saj ces nej yuav paub tias HUAB TAIS siab zoo npaum li cas.
Tus muaj hmoov zoo yog tus mus nkaum nyob hauv HUAB TAIS.

Txais: (7a) Huab Tais mloog tus pluag lub suab quaj.
los: As les lus yas.

HUAB TAIS tig ntsej muag mus tiv cov neeg phem,
nws rhuav kom txhob muaj kev nco txog lawv nyob ntiaj teb ntxiv.
Thaum cov neeg ncaj hu, HUAB TAIS mloog lawv,
thiab nws npo lawv dim ntawm tas lawv tej kev nyuaj siab.

Txais: (7a) Huab Tais mloog tus pluag lub suab quaj.
los: As les lus yas.

HUAB TAIS nyob ze ze tus neeg muaj kev lwj siab;
nws pab cawm cov neeg tag kev cia siab.
Tus siab ncaj raug ntau yam kev nyuaj kev ntxhov,
tiam sis HUAB TAIS npo nws dim ntawm tas txhua yam huv si.

Txais: (7a) Huab Tais mloog tus pluag lub suab quaj.
los: As les lus yas.

As Les Lus Yas:   ZAM 20: 29

Txais: As les lus yas, as les lus yas.

Huab Tais hais tias: "Tos Mas, koj ntseeg vim koj tau pom kuv.
Cov uas tsis tau pom tab sis lawv ntseeg, mas lawv txoj hmoov zoo!"

Txais: As les lus yas, as les lus yas.

Ntawv Moo Zoo:   ZAM 3: 31-36

31 “Tus tuaj saum txheej siab tuaj, nws nyob siab dua sawv daws. Tus tuaj hauv ntiaj teb tuaj, nws yog ntiaj teb tug, nws hais txog tej yam nyob ntiaj teb; hos tus tuaj saum ntuj tuaj nws nyob siab dua sawv daws.
32 Nws ua tim khawv txog qhov nws tau pom thiab tau hnov, tab sis tsis muaj leej twg txais nws cov lus tim khawv.
33 Tus uas txais nws cov lus tim khawv, nws lees meej tias Tswv Ntuj yog tus tseeb tiag.
34 Tus uas Tswv Ntuj xa tuaj, nws hais Tswv Ntuj cov lus. Tswv Ntuj pub Leej Ntuj Plig puv ntoob rau nws tsis xuas dab tsi luj.
35 Leej Txiv nyiam Leej Tub, nws tso tas ib puas tsav yam rau hauv Leej Tub txhais tes.
36 Leej twg ntseeg txog Leej Tub, mas nws muaj txoj sia nyob mus li. Hos tus tsis kam ntseeg txog Leej Tub, mas nws yuav tsis pom txoj sia; Tswv Ntuj txoj kev npau taws yuav nyob rawv saum nws.”

Tim     21     lub     4     Hlis     2023

Hnub Rau Lis Piam Ob Caij Hla Xyoo ABC Nruab Lis Piam Xyoo I & II
Lectionary: 271

XHLT:   LN Anselm, ua Tswv Qhia thiab Kws cov Txuj Ntshiab

Zaj Nyeem Ib:   HAUJ LWM 5: 34-42

34 Ib tug Fas Lis Xais nyob hauv cov txwj laus Xas Nes Nrees hu ua Nkas Mas Lias, yog ib tug kws Txoj Cai uas tas tsoom pej xeem hwm, nws txawm sawv, nws hais kom coj cov Hauv Paus Xa Lus tawm mus ib pliag.
35 Ces nws hais rau cov txwj laus Xas Nes Nrees tias: "Cov kwv tij His Xas Lais, nej yuav xyuam xim txog tej yam nej xav ua rau cov neeg ntawd.
36 Nyuam qhuav tau tsis ntev los no xwb, muaj ib tug hu ua Thaws Das sawv tuaj; nws hais tias nws yog ib tug neeg tseem ceeb; muaj kwv yees plaub puas leej neeg caum nws, tab sis nws raug luag tua tuag, ces cov neeg uas ntseeg nws cia li tawg tas ua tsis tau dab tsi li lawm.
37 Tom qab nws, Yus Das, uas yog ib tug neeg Nkas Lis Lais, sawv los thaum lub caij txheeb tsoom mej hwm. Nws kuj coj tau coob leej raws nws qab thiab, tiam sis nws kuj tuag lawm thiab, ces cov neeg uas ntseeg nws kuj tawg tas xwb.
38 Ua li mas, nyem no kuv hais rau nej tias, nej tsis txhob quav ntsej txog cov neeg no, nej tso lawv mus. Vim tias, yog cov dej num los txoj hauj lwm no tuaj ntawm neeg tuaj xwb, mas nws yuav rov rhuav nws ploj mus tas.
39 Hos yog tias nws tuaj ntawm Tswv Ntuj tuaj, mas nej yeej rhuav tsis tau lawv li; nej tsis txhob tuam yim, tsam lam yog nej ua rog tiv Tswv Ntuj." Ces sawv daws pom zoo ua li Nkas Mas Lias hais.
40 Lawv hu cov Hauv Paus Xa Lus kom rov los, lawv kom luag muab cov Hauv Paus Xa Lus nplawm, lawv txwv tsis pub tuav txog Yes Xus lub npe ntxiv, ces lawv tso cov Hauv Paus Xa Lus mus.
41 Cov Hauv Paus Xa Lus tawm ntawm lub rooj txwj laus Xas Nes Nrees los, lawv zoo siab tias Ntuj tseem saib lawv tsim nyog raug luag hiam raug poob ntsej muag vim Lub Npe.
42 Niaj hnub nyob hauv lub Tuam Tsev Teev Ntuj thiab nyob hauv lawv tej tsev, lawv qhia thiab tshaj txog Yes Xus Pleev lub Moo Zoo tsis tso tseg li.

NPN   27: 1, 4, 13-14

Txais: (4abc) Ib yam uas kuv nrhiav, yog kom tau nyob hauv Huab Tais tsev.
los:     As les lus yas.

Huab Tais yog kuv qhov pom kev thiab yog txoj kev cawm kuv;
Kuv yuav ntshai leej twg?
Huab Tais yog kuv qhov chaw nkaum hauv kuv lub neej,
Kuv yuav tshee rau leej twg?

Txais: (4abc) Ib yam uas kuv nrhiav, yog kom tau nyob hauv Huab Tais tsev.
los:     As les lus yas.

Kuv tsuas thov ib yam ntawm Huab Tais xwb;
yog kom kuv tau nyob hauv Huab Tais lub tsev niaj hnub hauv kuv lub neej,
kom kuv tau ntsia ntsoov Huab Tais txoj kev zoo,
thiab tau pom nws lub tuam tsev.

Txais: (4abc) Ib yam uas kuv nrhiav, yog kom tau nyob hauv Huab Tais tsev.
los:     As les lus yas.

Kuv ntseeg tias kuv yuav tau pom Huab Tais lub siab zoo siab dav
nyob hauv cov neeg muaj txoj sia lub teb chaws.
Nej ua siab loj tos ntsoov Huab Tias;
nej ua siab tawv qhawv, nej tos ntsoov Huab Tais.

Txais: (4abc) Ib yam uas kuv nrhiav, yog kom tau nyob hauv Huab Tais tsev.
los:     As les lus yas.

As Les Lus yas:   MT 4: 4b

Txais: As les lus yas, as les lus yas.

Neeg tsis kawg muab mov los yug siav xwb,
neeg tseem yuav yuav txhua lo lus tawm ntawm
Tswv Ntuj lub ncauj los yug siav thiab.

Txais: As les lus yas, as les lus yas.

Ntawv Moo Zoo:   ZAM 6: 1-15

1 Yes Xus hla mus rau sab dej ntuj Nkas Lis Lais tim ub, rau ntawm Tis Npes Lias.
2 Muaj ib pab neeg coob kawg raws nws mus, vim lawv tau pom cov cim nws ua kho tej neeg mob.
3 Yes Xus nce mus saum roob, nws nrog nws cov thwj tim zaum nyob saud.
4 Twb yuav txog lub Ntees Hla uas yog cov Yus Das lub ntees ua hmoov loj.
5 Yes Xus tsa muag ntsia pom ib pab neeg coob coob tuaj cuag nws, nws hais rau Fis Lis Pos tias: "Peb yuav mus muas mov qhov twg los rau cov neeg ntawd noj?"
6 Yes Xus hais li ntawd sim Fis Lis Pos, tab sis Yes Xus yeej paub tias nws yuav ua dab tsi lawm.
7 Fis Lis Pos teb rau Yes Xus tias: "Txawm muab ob puas lub txiaj nyiag mus muas mov los los twb tsis txaus kom lawv ib leeg tau ib qho me me li."
8 Yes Xus ib tug thwj tim hu ua As Nres, yog Xis Moos Pob Zeb tus kwv, hais rau Yes Xus tias:
9 "Ib tug me nyuam nyob ntawm no muaj tsib lub ncuav mov qib thiab ob tug ntses, tab sis qhov ntawd yuav ua cas txaus rau npaum no leej neeg?"
10 Yes Xus hais tias: "Nej kom cov neeg zaum." Nyob ntawm qhov chaw ntawd muaj nroj ntau. Ces cov neeg zaum, kwv yees muaj tsib txhiab leej txiv neej.
11 Yes Xus tuav cov ncuav mov, nws ua ntuj tsaug tas, nws muab faib rau cov neeg uas zaum ntawd; nws kuj ua ib yam li ntawd rau cov ntses thiab, kom sawv daws tau noj txaus siab npo.
12 Thaum lawv noj tsau tas lawm, Yes Xus hais rau nws cov thwj tim tias: "Nej khaws cov sab mov seem kom txhob nkim ib qho pov tseg li."
13 Ces lawv thiaj khaws cov mov seem noj tsis tag uas ntsu ntawm tsib lub ncuav mov qib los, lawv ntim puv kaum ob pob tawb.
14 Tsoom sid pom lub cim Yes Xus ua, ces lawv hais tias: "Tus no yog tus Yaj Saub tiag lau, tus uas yuav tsum tuaj nyob hauv lub qab ntuj neeg."
15 Yes Xus paub tias lawv yuav tuaj ntes nws coj mus tsa ua vaj, ces nws rov mus nws tib leeg twj ywm rau saum roob lawm.

Tim     22     lub     4     Hlis     2023

Hnub Xya Lis Piam Ob Caij Hla Xyoo ABC Nruab Lis Piam Xyoo I & II
Lectionary: 272

Zaj Nyeem Ib:   HAUJ LWM 6: 1-7

1 Lub caij ntawd, cov thwj tim coob zuj zus tuaj lawm, ces cov Hes Las yws yws cov Hes Nplaws,
vim tsis muaj neeg nco txog lawv cov poj ntsuam Hes Las, niaj hnub thaum lub caij faib mov mas li.
2 Pab Kaum Ob thiaj hu tas nrho cov thwj tim tuaj sab laj, lawv hais tias:
"Tsis phim peb yuav tso Tswv Ntuj Lo Lus tseg, es mus faib zaub faib mov ntawm cov rooj noj mov.
3 Cov kwv tij, nej xaiv nyob hauv nej xya leej txiv neej uas nto moo zoo, kom yog neeg muaj Leej Ntuj Plig nyob puv hauv lawv thiab yog neeg thoob tsib. Peb yuav tsa lawv los tuav txoj hauj lwm ntawd.
4 Hos peb, mas peb yuav muab siab hlo npuab txoj kev teev ntuj thiab leg txoj hauj lwm tsob hwb Lo Lus.”
5 Cov lus no haum tas lub txoos siab, ces lawv xaiv Tes Fas Nos, uas nws yog ib tug neeg ntseeg ruaj, thiab muaj Leej Ntuj Plig Ntshiab nyob puv hauv nws, thiab Fis Lis Pos, Plos Kos Los, Nis Kas Nos, Tis Moos, Pas Mes Nas, thiab Nis Kos Las, uas nyob As Nthias Kias tuaj thiab yog ib tug neeg los ntseeg tshiab.
6 Lawv coj cov neeg no los rau cov Hauv Paus Xa Lus; ces cov Hauv Paus Xa Lus thov ntuj thiab tsa tes rau saum lawv.
7 Tswv Ntuj lo lus thiaj ri mus deb zuj zus ntxiv, hos cov thwj tim huam vam coob kawg tuaj nyob
Yes Lus Xas Les; tab cov leej choj kiag kuj muaj ib pab coob kawg los mloog lus raws txoj kev ntseeg thiab.

NPN   33: 1-2, 4-5, 18-19

Txais: (22) HUAB TAIS, thov koj muab koj txoj kev khuv leej
los roos peb, vim peb tso siab rau koj.
Los : As les lus yas.

Cov neeg siab ncaj, nej cia li zoo siab nyob hauv HUAB TAIS;
txoj kev qhuas Huab Tais phim tus neeg siab ncaj.
Nej ntaus nkauj nog ncas ua HUAB TAIS tsaug;
nej ntaus thaj cheej kaum txoj hlua cav txog nws.

Txais: (22) HUAB TAIS, thov koj muab koj txoj kev khuv leej
los roos peb, vim peb tso siab rau koj.
Los : As les lus yas.

HUAB TAIS lo lus yog lus ncaj,
nws tej num yog num tsim nyog tso siab rau.
Nws nyiam kev ncaj thiab kev haum pheej;
HUAB TAIS txoj kev ua zoo nyob puv tas lub ntiaj teb.

Txais: (22) HUAB TAIS, thov koj muab koj txoj kev khuv leej
los roos peb, vim peb tso siab rau koj.
Los : As les lus yas.

Nej ntsia, HUAB TAIS lub qhov muag saib ntsoov cov neeg hwm nws,
thiab saib ntsoov cov tso siab rau nws txoj kev ua zoo.
Nws yuav npo lawv dim ntawm kev tuag,
thiab yuav txuag lawv txoj sia thaum muaj kev tshaib plab.

Txais: (22) HUAB TAIS, thov koj muab koj txoj kev khuv leej
los roos peb, vim peb tso siab rau koj.
Los : As les lus yas.

As Les Lus Yas

Txais: As les lus yas, as les lus yas.

Leej Pleev, tus tsim tas puas tsav yam, sawv rov los lawm,.
nws muaj lub siab khuv leej tas txhua haiv neeg.

Txais: As les lus yas, as les lus yas.

Ntawv Moo Zoo:   ZAM 6: 16-21

16 Thaum yav tsaus ntuj, Yes Xus cov thwj tim nqes mus rau nram dej ntuj,
17 lawv nce hauv ib lub nkoj, lawv hla dej mus rau Kas Fas Naus nyob sab ntug dej tid.
Twb tsaus ntuj lawm, tab sis Yes Xus tseem tsis tau los txog ntawm lawv.
18 Dej ntuj nphau zom zaws tuaj vim muaj ib nthwv cua hlob hlob ntsawj tuaj.
19 Thaum cov thwj tim nquam nkoj los deb li nees nkaum tsib los peb caug ncua kev lawm,
ces lawv txawm pom Yes Xus mus kev saum nplaim dej ntuj, los ze zuj zus
rau ntawm lub nkoj, ces lawv pib ntshai.
20 Tab sis Yes Xus hais rau lawv tias: "Yog kuv, nej tsis txhob ntshai."
21 Lawv thiaj npaj tos nws los rau hauv nkoj, tab sis tam sis ntawd lub nkoj
twb mus txog qhov chaw uas lawv yuav mus lawm.

Tim     24     lub     4     Hlis     2023

Hnub Ob Lis Piam Peb Caij Hla Xyoo ABC Nruab Lis Piam Xyoo I & II
Lectionary: 273

Xav Hwm Los Tau:   LN Fidelis of Sigmaringen, ua Leej Choj thiab Tuag ua Tim Khawv

Zaj Nyeem Ib:   Hauj Lwm 6: 8-15

8 Tes Fas Nos yog ib tug muaj txiaj ntsim thiab hwj huam puv nws siab ntsws, nws ua ib co hwj huam yees ntxwv thiab ib co cim loj kawg nyob hauv tsoom pej xeem.
9 Ces muaj ib co neeg tuaj ntawm lub tsev txoos hu ua Tsev Txoos rau cov tau txais kev twj lij,
thiab rau cov tuaj Xis Les Nas, cov tuaj As Les Xas Nrias, thiab cov tuaj Xis Lis Xias
thiab As Xias tuaj. Lawv txav los nrog Tes Fas Nos sib cav.
10 Lawv tsis muaj peev xwm cav yeej txoj kev thoob tsib thiab Leej Ntuj Plig uas qhia nws hais lus.
11 Ces lawv txw ib co neeg kom liam tias:
"Peb tau hnov tus neeg ntawd hais ib co lus thuam Mais Xes thiab thuam Tswv Ntuj."
12 Lawv haub tsoom pej xeem, tsoom laus neeg, thiab tsoom kws ntawv ntshiab kom sawv daws npau taws, ces lawv tuaj tos kev ntes Tes Fas Nos thiab coj nws mus rau lub rooj txwj laus Xas Nes Nrees.
13 Lawv coj ib co tim khawv cuav tuaj liam tias: "Tus neeg ntawd hais lus phem tsis tseg txog lub Tsev Ntshiab ntawm no thiab txog Txoj Cai.
14 Peb tau hnov nws hais tias: ‘Yes Xus Nas Xas Les yuav rhuav lub chaw no, thiab nws yuav hloov tej kab ke uas Mais Xes tau muab rau peb.’"
15 Tas cov uas zaum hauv lub rooj txwj laus Xas Nes Nrees tig qhov muag mus ntsia nruj nreem rau Tes Fas Nos, ces lawv pom Tes Fas Nos lub ntsej muag zoo xws li ib tug Tshiab lub ntsej muag.

NPN    119: 23-24, 26-27, 29-30

Txais: (1ab) Cov tau txoj hmoov zoo yog cov neeg
          ua raws nraim HUAB TAIS Txoj Cai!
los:     Alleluia.

Txawm tias cov tub huab tais sib sau nrhiav kev liam rau kuv,
los koj tus tub txib xav ntsoov txog koj tej cai lij choj.
Koj cov cai yeej ua rau kuv zoo siab tiag,
Koj cov cai pab kom kuv txawj xav tswv yim.

Txais: (1ab) Cov tau txoj hmoov zoo yog cov neeg
          ua raws nraim HUAB TAIS Txoj Cai!
los:    Alleluia.

Kuv qhia kuv tej kev rau koj, ces koj tau teb kuv,
thov koj qhia koj txoj cai lij choj rau kuv paub.
Thov koj ua kom kuv to taub txog txoj kev coj koj cov lus qhia,
kuv yuav mob siab xav txog koj cov hauj lwm uas tsim nyog qhuas.

Txais: (1ab) Cov tau txoj hmoov zoo yog cov neeg
          ua raws nraim HUAB TAIS Txoj Cai!
los:    Alleluia.

Thov koj tshem txoj kev cuav mus deb ntawm kuv,
koj muab koj Txoj Cai ua txiaj ntsim pub rau kuv.
Kuv tau xaiv txoj kev tseeb taug,
kuv khaws koj cov cai lij choj nyob rawv ntawm kuv xub ntiag.

Txais: (1ab) Cov tau txoj hmoov zoo yog cov neeg
          ua raws nraim HUAB TAIS Txoj Cai!
los:    Alleluia.

As Les Lus yas:   MT 4: 4b

Txais: As les lus yas, as les lus yas.

Neeg tsis kawg muab mov los yug siav xwb,
neeg tseem yuav yuav txhua lo lus tawm ntawm
Tswv Ntuj lub ncauj los yug siav thiab.

Txais: As les lus yas, as les lus yas.

Ntawv Moo Zoo:   Zam 6: 22-29

(Hnub Yes Xus muab mov pub rau tsib txhiab leej noj, hmo ntawd yog hmo uas cov thwj tim pom Yes Xus mus kev saum nplaim dej.)
22 Tag kid thaum sawv ntxov, tsoom neeg uas tseem nyob sab ntug dej ntuj tid pom tias tsuas muaj ib lub nkoj nyob ntawd lawm xwb, thiab lawv paub tias Yes Xus tsis tau nrog nws cov thwj tim nce nkoj li, cov thwj tim lawv mus lawv lawm xwb.
23 Txawm muaj lwm cov nkoj tuaj Tis Npes Lias tuaj txog ze ntawm qhov chaw lawv tau noj cov mov uas Huab Tais tau thov Ntuj ua Ntuj tsaug rau.
24 Thaum tsoom neeg pom tias Yes Xus tsis nyob ntawd lawm, nws cov thwj tim kuj tsis nyob lawm thiab, ces lawv nce cov nkoj ntawd mus rau tim Kas Fas Naus mus nrhiav Yes Xus tid.
25 Thaum lawv tuaj nrhiav tau Yes Xus rau sab ntug dej tim no, lawv hais rau nws tias: "Las Npis, thaum twg koj tuaj ntawm no lawm?"
26 Yes Xus teb rau lawv tias: "Kuv hais qhov tseeb tiag rau nej: Nej nrhiav kuv, tsis yog vim nej tau pom ib co cim, hos yog vim nej tau noj cov ncuav mov tsau nej plab xwb.
27 Nej tsis txhob ua hauj lwm nrhiav cov txhiam xws txawj lwj mas, nej yuav ua hauj lwm nrhiav cov txhiam xws pub txoj sia nyob mus li, uas yog cov Neeg Leej Tub yuav muab pub rau nej, vim nws yog tus uas Leej Txiv Tswv Ntuj tau ntaus thwj rau lawm."
28 Lawv hais rau Yes Xus tias: "Peb yuav ua dab tsi peb thiaj ua tau Tswv Ntuj cov hauj lwm?"
29 Yes Xus teb rau lawv hais tias: "Tswv Ntuj txoj hauj lwm yog li no: kom nej ntseeg txog tus uas nws xa tuaj."

Tim   25     lub     4     Hlis

Hmoov Hwm LN Mas Kos, tus sau Mas Kos Ntawv Moo Zoo.
Lectionary: 555

Zaj Nyeem Ib:  1 PZ 5: 5b-14

Cov zoo nyiad:
5b Thaum nej ib leeg fim ib leeg, tas nej txhua tus yuav tsum npua rawv txoj kev ua neeg me, vim tias:
“Tswv Ntuj tiv cov neeg muab hlob, hos nws pub nws cov txiaj ntsim rau cov ua neeg me.”
6 Li ntawd nej yuav zoo siab ua neeg me nyob hauv Tswv Ntuj txhais tes muaj hwj huam,
ces thaum txog lub sij hawm teem cia, nws yuav tsa nej rau qhov chaw siab.
7 Nej tso nej tej kev ntxhov siab tas huv tib si rau Tswv Ntuj, vim nws yog tus hlub nej.
8 Nej yuav tsis txhob haus dej haus cawv thiab yuav ua neeg ceev faj nraim, vim tus dab phem uas yog nej tus yeeb ncuab, nws zoo li ib tug tsov nyooj laws, koos ncig lees nyas ntshis nrhiav saib yuav tom leej twg.
9 Nej tiv nws mog! Nej nyob ruaj nreb hauv txoj kev ntseeg; nej nco ntsoov tias nej cov kwv tij
nkauj muam nyob tas ntiaj teb puav leej raug tib txog kev txom nyem li nej thiab.
10 Tus Tswv Ntuj pub txhua yam txiaj ntsim uas tau hu nej los txais lub koob meej nyob mus li hauv Yes Xus Pleev, nws yuav rov tsa nej kom sawv taus ntseg, nws yuav ua kom nej nyob ruaj khov kho, nws yuav ntxiv zog rau nej, thiab yuav rov txhim kho nej thaum nej raug kev nyuaj ib nyuag ntus lawm.
11 Thov kom Tswv Ntuj ua tus tswj tus kav mus li tiam dhau tiam. Ua li.
12 Yog Xis Vas Nus, uas kuv saib nws yog ib tug kwv siab ncaj ncees, ua tus sau kuv cov lus luv luv no rau nej, los ntuas nej, thiab ua tim khawv qhia meej rau nej tias lub txiaj ntsim no yog Tswv Ntuj lub tseem txiaj ntsim tiag; nej nyob ruaj nreb hauvlub txiaj ntsim no mog.
13 Pab neeg raug Ntuj xaiv nyob Npas Npis Los, xa lawv cov lus hmov tshua tuaj rau nej,
thiab kuv tus tub Mas Kos kuj xa thiab.
14 Nej ib leeg yuav hais lus hu ib leeg nyob hauv txoj kev sib qawg muaj kev sib nyiam sib hlub. Kom nej sawv daws cov nyob hauv Leej Pleev muaj kev thaj yeeb nyab xeeb mog!

NPN   89: 2-3, 6-7, 16-17

Txais: (2) Kuv yuav hu nkauj mus li cav txog HUAB TAIS lub siab zoo.
Los: As les lus yas.

Kuv yuav hu nkauj mus li cav txog HUAB TAIS tej kev ua zoo,
kuv lub ncauj yuav tshaj txog koj txoj kev tsis fav xeeb mus tiam dhau tiam.
Vim koj tau hais tias: “Kuv lub siab zoo yuav nyob ruaj mus li;”
nyob saum ntuj koj tau cog koj txoj kev tsis fav xeeb kom nyob ruaj nreb.

Txais: (2) Kuv yuav hu nkauj mus li cav txog HUAB TAIS lub siab zoo.
Los: As les lus yas.

Huab Tais, cov txheej ntuj saud cav txog koj tej hauj lwm loj,
thiab txog koj txoj kev tsis fav xeeb, nyob hauv tsoom neeg ntshiab lub txoos.
Nyob saum ntuj puas muaj leej twg yuav piv tau rau Huab Tais?
Puas muaj leej twg nyob hauv Tswv Ntuj cov tub yuav zoo li Huab Tais?

Txais: (2) Kuv yuav hu nkauj mus li cav txog HUAB TAIS lub siab zoo.
Los: As les lus yas.

Cov neeg uas paub txoj kev qw zoo siab lawv txoj hmoov zoo;
Huab Tais, koj lub ntsej muag ci rau lawv pom kev taug kev.
Lawv zoo siab tas hnub nyob hauv koj lub npe,
koj txoj kev ncaj tsa lawv nyob rau qhov siab.

Txais: (2) Kuv yuav hu nkauj mus li cav txog HUAB TAIS lub siab zoo.
Los: As les lus yas.

As Les Lus Yas:  1 KLN 1: 23a+24b

Txais: As les lus yas, as les lus yas.

Peb tshaj txog leej Pleev raug ntsia dai saum ntoo cuam;
nws yog Tswv Ntuj lub hwj huam thiab yog Tswv Ntuj txoj kev thoob tsib.

Txais: As les lus yas, as les lus yas.

Ntawv Moo Zoo:   MK 16: 15-20

15 Yes Xus tshwm sim tuaj rau pab Kaum Ib pom thiab hais rau lawv tias:
"Nej mus thoob qab ntuj, nej tshaj lub Moo Zoo rau txhua leej txhua tus.
16 Tus twg ntseeg thiab txais lub cim ntxuav, mas nws yuav txais kev cawm,
hos tus tsis ntseeg yuav mus raug txim.
17 Cov cim no yuav nrog nraim cov uas ntseeg: lawv tuav txog kuv lub npe, mas lawv yuav ntiab dab tau;
lawv yuav txawj hais tej xeem lus tshiab;
18 lawv yuav tuav tau nab hauv lawv txhais tes; yog lawv haus tshuaj lom neeg, tshuaj yuav tsis ua xwv txheej rau lawv; thaum lawv tsa tes rau saum cov neeg mob, mas cov mob yuav zoo."
19 Thaum Huab Tais Yes Xus hais cov lus no tas rau lawv, nws raug nqa mus rau saum ntuj,
nws mus zaum ntawm Tswv Ntuj sab xis lawm.
20 Hos cov thwj tim tawm mus tshaj lub Moo Zoo rau tas qhov txhia chaw,
Huab Tais nrog lawv lis hauj lwm nraim, thiab nws ua ib co cim zeem tseeb txog Lo Lus.

Tim   26     lub     4     Hlis     2023

Hnub Plaub Lis Piam Peb Caij Hla Xyoo ABC Nruab Lis Piam Xyoo I & II
Lectionary: 275

Zaj Nyeem Ib:   HAUJ LWM 8: 1b-8

1b Hnub ntawd, muaj kev hiam loj kawg nkaus tuaj raug lub Koom Txoos nyob Yes Lus Xas Les,
ces sawv daws tawg khiav mus nyob nruab liaj nruab teb hauv cov xeev Yus Das thiab Xas Mas Lias tas,
tsuas tshuav cov Hauv Paus Xa Lus thiaj tsis khiav xwb.
2 Muaj ib co neeg hwm Ntuj zoo tuaj muab Tes Fas Nos lub cev mus zais, thiab lawv quaj nyiav nws nrov nrov.
3 Hos Xauv, mas nws nrhiav kev kom tau rhuav lub Koom Txoos xwb. Nws mus ib lub tsev dhau ib lub tsev,
nws cab cov txiv neej thiab cov poj niam huv si coj mus rau luag kaw.
4 Cov neeg uas tawg ncaim mus rau lwm qhov chaw mas,
lawv mus txog twg lawv tshaj txog Lo Lus rau sawv daws hnov.
5 Li ntawd Fis Lis Pos thiaj mus rau nram ib lub nroog nyob Xas Mas Lias teb,
thiab nws tshaj txog Leej Pleev rau lawv.
6 Tej pab neeg coob koom ua ib lub siab kub siab mloog qhov uas Fis Lis Pos hais rau lawv,
thaum lawv hnov cov lus nws hais thiab pom cov cim nws ua.
7 Vim tias muaj coob tus dab phem qw tej suab nrov nrov tawm ntawm cov neeg raug dab tsis huv mus,
hos cov tuag ceg thiab cov ceg tawv coob leej kuj cia li zoo hlo.
8 Nyob hauv lub nroog ntawd, lawv muaj kev zoo siab loj kawg nkaus.

NPN   66: 1-3a, 4-5, 6-7a

Txais: (1) Kom tas lub ntiaj teb cia li qw zoo siab rau Tswv Ntuj.
los: As les lus yas.

Tas ntiaj teb, nej cia li qw zoo siab rau Tswv Ntuj ;
Nej hu nkauj cav txog nws lub npe muaj hwj chim,
nej hais tej zaj lus cav txog nws lub koob meej.
Nej hais rau Tswv Ntuj tias: "Koj tej num muaj hwj xyeej ua luaj!”

Txais: (1) Kom tas ntiaj teb cia li qw zoo siab rau Tswv Ntuj.
los: As les lus yas.

"Kom tas lub ntiaj teb tuaj pe hawm koj
thiab hu nkauj cav txog koj, hu nkauj qhuas koj lub npe!”
Nej tuaj xyuas Tswv Ntuj cov hauj lwm mas,
Nws ua hauj lwm muaj hwj xyeej nyob hauv As Das tsoom tub ki.

Txais: (1) Kom tas ntiaj teb cia li qw zoo siab rau Tswv Ntuj.
los: As les lus yas.

Nws ua kom dej ntuj hloov ua av qhuav,
lawv taug kev hla dej, dej tsis ntub lawv ko taw ;
Li ntawd, peb yuav zoo siab nyob hauv nws.
Nws lub hwj huam yuav kav sawv daws tas mus li.

Txais: (1) Kom tas ntiaj teb cia li qw zoo siab rau Tswv Ntuj.
los: As les lus yas.

As Les Lus Yas:   Zam 6: 40

Txais: As les lus yas, as les lus yas.

Huab Tais hais tias:
Txhua tus uas ntseeg txog Leej tub yuav muaj txoj sia nyob mus li,
thiab thaum txog hnub kawg, kuv yuav tsa nws sawv rov los.

Txais: As les lus yas, as les lus yas.

Ntawv Moo Zoo:   ZAM 6: 35-40

35 Yes Xus hais rau pab neeg coob coob tias: "Kuv yog cov mov muaj txoj sia.
Leej twg tuaj cuag kuv mas nws yuav tsis tshaib ib zaug li,
leej twg ntseeg txog kuv mas nws yuav tsis nqhis ib zaug li.
36 Kuv tau hais rau nej lawm tias, txawm nej tau pom kuv, los nej tsis ntseeg li.
37 Txhua yam uas kuv Txiv muab rau kuv yuav los cuag kuv;
tus twg tuaj cuag kuv, mas kuv yuav tsis ntiab nws tawm.
38 Vim kuv nqes saum ntuj los, tsis yog los ua ywj kuv siab, yog los ua raws li Tus Xa kuv tuaj lub siab.
39 Tus Xa kuv tuaj lub siab nyiam yog li no: Kom kuv tsis txhob ua ib tug
uas nws muab rau kuv ploj li, thiab hnub kawg, kom kuv tsa tus ntawd sawv rov los.
40 Qhov uas kuv Txiv nyiam yog li no: Yog kom txhua tus uas pom Leej Tub thiab ntseeg txog Leej Tub
mas nws yuav tsum muaj txoj sia nyob mus li, thiab Hnub Kawg, kuv yuav tsa nws sawv rov los."

Tim       27     lub     4     Hlis     2023

Hnub Tsib Lis Piam Peb Caij Hla Xyoo ABC Nruab Lis Piam Xyoo I & II
Lectionary: 276

Zaj Nyeem Ib:   HAUJ LWM 8: 26-40

26 Huab Tais tus Tshiab hais rau Fis Lis Pos tias: "Koj sawv, koj nqes mus lawm naj fab, koj taug txoj kev uas nqes ntawm Yes Lus Xas Les mus rau nram Nkas Xas, uas yog txoj kev hla hauv hav suab puam."
27 Fis Lis Pos thiaj sawv thiab muab ncauj ke mus. Muaj ib tug neeg Es Caus Pias, uas yog ib tug neeg sam,
nws yog cov Es Caus Pias tus poj vaj hu ua Kaas Des ib tug nom loj; nws yog tus saib tas nrho
tus poj vaj cov txhab nyiaj. Nws tau tuaj mus pe hawm Tswv Ntuj pem Yes Lus Xas Les.
28 Thaum nws tab tom rov los tsev, nws zaum hauv nws lub tsheb nees nyeem tus yaj saub His Xais phau ntawv.
29 Leej Ntuj Plig hais rau Fis Lis Pos tias: "Koj mus caum lub tsheb ntawd, koj mus kom ze ze lub tsheb."
30 Fis Lis Pos thiaj khiav mus caum, nws hnov tus nom ntawd nyeem His Xais phau ntawv,
nws nug tias: "Koj puas to taub qhov koj nyeem?"
31 Tus nom teb tias: "Kuv yuav ua li cas to taub yog tsis muaj neeg qhia rau kuv?"
Ces nws caw kom Fis Lis Pos nce los nrog nws zaum.
32 Zaj lus uas tus nom tab tom nyeem yog zaj no:
“Nws zoo li ib tug yaj luag cab nrhuj nrheev mus rau hauv tsev tua tsiaj thiab nws kuj zoo li
ib tug thav yaj nyob ntsiag to rau tus uas chais nws cov plaub, nws tsis qhib ncauj li.
33 Nyob hauv nws txoj kev poob ntsej muag, luag tsis txiav txim ncaj rau nws li. Leej twg thiaj yuav hais txog nws tej xeeb leej xeeb ntxwv? Vim tias luag twb tshem nws txoj sia tawm hauv ntiaj teb mus lawm.”
34 Tus nom sam hais rau Fis Lis Pos tias: "Kuv thov koj qhia kuv saib tus yaj saub hais txog leej twg
zoo li ntawd? Nws puas rov hais txog nws, los nws hais txog lwm leej lwm tus?"
35 Fis Lis Pos thiaj qhib ncauj hais lus; nws siv cov lus sau tseg ntawd
los qhia lub Moo Zoo txog Yes Xus rau tus nom sam.
36 Thaum nkawd taug kev mus txog ib qho chaw muaj dej, tus nom sam hais tias:
"Ntawm no twb muaj dej, puas muaj dab tsi ua kom kuv txais tsis tau lub cim ntxuav?"
[37 Fis Lis Pos hais tias: “Yog koj muab tas nrho koj lub siab ntseeg, ces koj txais tau.”
Tus nom teb tias: “Kuv yeej ntseeg tias Yes Xus Pleev yog Tswv Ntuj Leej Tub.”]
38 Ces nws kom lub tsheb nres. Fis Lis Pos thiab tus nom sam nkawd
ob leeg nqes mus rau hauv dej, Fis Lis Pos thiaj ua lub cim ntxuav rau nws.
39 Thaum nkawd tawm hauv dej los, Huab Tais lub tswv yim nqa hlo Fis Lis Pos mus lawm,
ces tus nom sam tsis pom Fis Lis Pos ntxiv, tab sis nws zoo siab kawg, nws taug nws txoj kev mus ntxiv.
40 Hos Fis Lis Pos mas nws tshwm hauv lub zos As Xos Tus; nws ke taug kev ke tshaj lub Moo Zoo
rau cov nroog uas nws hla tas huv si, mus txog thaum nws mus rau ntawm Xes Ntxas Les.

NPN   66: 8-9, 16-17, 20

Txais: (1) Kom tas ntiaj teb cia li qw zoo siab rau Tswv Ntuj.
los: As les lus yas.

Tsoom haiv neeg, nej cav txog peb tus Tswv Ntuj mas,
nej qw nrov nrov cav txog nws;
vim nws yog tus pub txoj sia rau peb tus ntsuj plig
thiab nws tsis pub kom peb npleem ko taw.

Txais: (1) Kom tas ntiaj teb cia li qw zoo siab rau Tswv Ntuj.
los: As les lus yas

Tas nej cov uas hwm Tswv Ntuj, nyem no nej mloog kuv
tshaj tawm txog qhov uas nws tau ua rau kuv.
Thaum kuv qhib ncauj hais lus thov nws,
Lo lus qhuas twb nyob ntawm kuv ntsis nplaig lawm.

Txais: (1) Kom tas ntiaj teb cia li qw zoo siab rau Tswv Ntuj.
los: As les lus yas

Thov kom Tswv Ntuj nto meej nto moo,
vim nws tsis muab kuv lo lus thov xyeeb pov tseg,
nws tsis tshem nws txoj kev ua zoo mus deb ntawm kuv.

Txais: (1) Kom tas ntiaj teb cia li qw zoo siab rau Tswv Ntuj.
los: As les lus yas.

As Les Lus Yas:   ZAM 6: 51

Txais: As les lus yas, as les lus yas.

Huab Tais hais tias:
Kuv yog cov mov muaj txoj sia nqes saum ntuj los,
leej twg noj cov mov no yuav ciaj nyob mus li.

Txais: As les lus yas, as les lus yas.

Ntawv Moo Zoo:   ZAM 6: 44-51

Yes Xus hais rau pab neeg coob coob tias:
44 “Tsis muaj leej twg tuaj cuag kuv tau, yog Leej Txiv tus xa kuv tuaj tsis rub nws los,
hos kuv, mas hnub kawg, kuv yuav tsa nws sawv rov los.
45 Muaj lus sau tseg nyob hauv cov Yaj Saub hais tias: ‘Tswv Ntuj yog tus yuav qhia rau tas sawv daws.’
Txhua tus uas mloog Leej Txiv lub suab thiab kawm ntawm nws, mas nws tuaj cuag kuv.
46 Tsis muaj leej twg tau pom Leej Txiv li, tsuas yog tus tuaj ntawm Tswv Ntuj tuaj xwb thiaj tau pom.
47 Kuv hais qhov muaj tseeb tiag rau nej: Tus muaj lub siab ntseeg, mas nws muaj txoj sia nyob mus li.
48 Kuv yog cov mov muaj txoj sia.
49 Nej cov yawg koob tau noj cov mov mas nas hauv teb chaws suab puam, tab sis lawv tuag tas lawm.
50 Qhov mov no yog qhov mov nqes saum ntuj los,
Kom xwv tus twg noj cov mov no, mas nws yuav tsis tuag.
51 Kuv yog cov mov muaj txoj sia uas nqes saum ntuj los; leej twg noj cov mov no, nws yuav ciaj nyob mus li; cov mov uas kuv yuav muab pub rau lub qab ntuj neeg yog kuv lub Cev, kom xwv lub qab ntuj neeg muaj txoj sia."

Tim     28     lub     4     Hlis     2023

Hnub Rau Lis Piam Peb Caij Hla Xyoo ABC Nruab Lis Piam Xyoo I & II
Lectionary: 277

XHLT:    LN Peter Chanel, Leej Choj tuag ua Tim Khawv; LN Louis Marie de Montfort

Zaj Nyeem Ib:   HAUJ LWM 9: 1-20

1 Xauv tseem xav ntsoov txog qhov yuav hiam thiab tua Huab Tais cov thwj tim xwb,
ces nws mus cuag tus thawj leej choj.
2 Nws thov kom tus thawj leej choj sau ntawv mus hais rau cov tsev txoos nyob Das Mas tias,
yog nws mus nrhiav muaj cov neeg uas ntseeg Txoj Kev, tsis hais poj niam los txiv neej,
mas nws yuav muab lawv khi cab los rau Yes Lus Xas Les.
3 Thaum nws tab tom taug kev mus yuav txog Das Mas,
ib sij huam, txawm muaj ib qho pom kev ci dawb vog tuaj saum ntuj tuaj ncig nws.
4 Nws poob nthav ntog rau hauv av, nws hnov ib lub suab hais rau nws tias:
"Xauv, Xauv, tim li cas koj hiam kuv?"
5 Xauv teb hais tias: "Huab Tais, koj yog leej twg?"
Lub suab ntawd hais tias: "Kuv yog Yes Xus, tus uas koj tab tom hiam.
6 Nyem no koj sawv, koj mus rau hauv lub nroog,
ces yuav muaj neeg qhia koj tias koj yuav tsum ua dab tsi."
7 Cov neeg nrog Xauv ua ke sawv daws nyob nres nroos, tsis hais lus li, lawv ntshai kawg,
vim lawv hnov lub suab, tab sis lawv tsis pom neeg li.
8 Xauv sawv hauv av los, nws rua qhov muag plias, tab sis nws tsis pom kev li.
Lawv thiaj tuav nws tes coj nws mus hauv lub nroog Das Mas.
9 Nws nyob li ntawd tau peb hnub, tsis pom kev tsis noj tsis haus dab tsi li.
10 Nyob Das Mas, muaj ib tug thwj tim hu ua As Nas Nias. Huab Tais yees tawm los hais rau nws tias:
"As Nas Nias." As Nas Nias teb tias: "Huab Tais, kuv nyob ntawm no."
11 Huab Tais hais ntxiv tias: "Koj sawv, koj mus lawm tom txoj kev hu ua Kev Ncaj, koj mus hauv
Yus Das tsev, koj nrhiav tus neeg hu ua Xauv nyob Tas Xis tuaj. Nws tab tom teev Ntuj.
12 Thiab nws yees pom ib tug txiv neej hu ua As Nas Nias
chaws los hauv tsev los tsa tes rau saum nws kom nws rov pom kev tuaj."
13 Tiam sis As Nas Nias teb tias: "Huab Tais, kuv hnov coob leej hais tias
tus neeg ntawd tau ua phem heev kawg rau koj cov Ntshiab nyob Yes Lus Xas Les no,
14 thiab nyob ntawm no, nws tau cai ntawm cov thawj leej choj
tuaj khi cov neeg uas hu txog koj lub npe tas huv tib si no."
15 Huab Tais hais rau As Nas Nias tias: "Koj cia li mus, vim tus neeg ntawd yog ib lub cuab yeej uas kuv xaiv los coj kuv lub Npe mus qhia rau cov neeg teev pej kum dab, rau cov ua vaj, thiab rau cov tub ki His Xas Lais.
16 Kuv yuav qhia nws tias nws yuav tsum raug tsim txom npaum li cas vim kuv lub Npe."
17 Ces As Nas Nias thiaj mus; nws chaws mus hauv lub tsev, nws tsa tes rau saum Xauv, nws hais tias:
"Xauv, kuv tus kwv aw, yog Huab Tais xa kuv tuaj, yog tus Yes Xus uas tau tshwm sim rau koj tom txoj kev
uas koj tuaj, kom koj rov qab pom kev, thiab kom koj tau txais Leej Ntuj Plig Ntshiab puv hauv koj.”
18 Tam sim ntawd muaj tej daim plhaws zoo li nplai ntses poob ntawm Xauv qhov muag los,
ces nws rov qab pom kev tam sis ntawd. Nws sawv tsees los, ces nws txais lub cim ntxuav kiag.
19 Nws noj mov ces nws rov qab muaj zog tuaj.
Xauv nrog cov thwj tim hauv Das Mas nyob ob peb hnub.
20 Nws cia li maj nrawm nroos mus nyob hauv cov tsev Txoos, nws pib tshaj txog Leej Pleev tias:
“Tus ntawd yog Tswv Ntuj Leej Tub.”

NPN   117: 1bc, 2

Txais: (MK 16:15) Nej mus kom thoob qab ntuj mus tshaj lub Moo Zoo.
los: As les lus yas.

Tas ib tsoom kuj cuab, nej cav lus zoo txog HUAB TAIS.
Tas ib tsoom haiv neeg, nej cav txog nws lub hwj chim.

Txais: (Mas Kos 16:15) Nej mus kom thoob qab ntuj mus tshaj lub Moo Zoo.
los:   As les lus yas.

Vim nws txoj kev ua siab zoo rau peb nyob ruaj nreb,
HUAB TAIS txoj kev pheej xeeb nyob mus li ib txhiab ib txhis.

Txais: (MK 16:15) Nej mus kom thoob qab ntuj mus tshaj lub Moo Zoo
los: As les lus yas.

As Les Lus yas:   ZAM 6: 56

Txais: As les lus yas, as les lus yas.

Huab Tais hais tias: “Tus twg noj kuv lub cev thiab haus kuv cov ntshav,
mas nws yuav nyob ruaj hauv kuv thiab kuv yuav nyob ruaj hauv nws.

Txais: As les lus yas, as les lus yas.

Ntawv Moo Zoo:   Zam 6: 52-59

52 Cov Yus Das rov sib cav zom zaws nyob hauv lawv tias:
"Tus neeg ntawd yuav ua li cas muab tau nws cev nqaij los rau peb noj?"
53 Yes Xus thiaj hais rau lawv tias: "Kuv hais qhov tseeb tiag rau nej: Yog nej tsis noj Neeg Leej Tub
lub cev nqaij thiab tsis haus nws cov ntshav, mas nej yuav tsis muaj txoj sia nyob hauv nej.
54 Hos tus noj kuv lub cev nqaij thiab haus kuv cov ntshav, mas nws muaj txoj sia nyob mus li;
ces hnub kawg, kuv yuav tsa nws sawv rov los.
55 Vim kuv lub cev nqaij yog tseem txhiam xws noj, thiab kuv cov ntshav yog tseem dej haus.
56 Tus noj kuv cev nqaij thiab haus kuv cov ntshav, mas nws nyob ruaj hauv kuv thiab kuv nyob ruaj hauv nws.
57 Ib yam li Leej Txiv tus muaj txoj sia xa nws kuv tuaj, ces kuv muaj txoj sia vim Leej Txiv,
ib yam li ntawd, tus noj kuv lub cev, nws kuj yuav muaj txoj sia vim kuv thiab.
58 Qhov mov no yog qhov mov nqes saum ntuj los, tsis zoo li cov mov uas nej cov yawg koob tau noj,
tab sis lawv tuag lawm. Hos tus noj qhov mov no, mas nws yuav ciaj nyob mus li."
59 Yes Xus hais cov lus ntawd thaum nws qhia nyob hauv lub tsev txoos nyob Kas Fas Naus.

Tim 29 lub 4 Hlis 2023

Hnub Xya Lis Piam Peb Caij Hla Xyoo ABC Nruab Lis Piam Xyoo I & II
Lectionary: 278

Yuav Hwm: LN Catherine of Siena, Nkauj Tsim Txiaj ua Kws cov Txuj Ntshiab

Zaj Nyeem Ib: HAUJ LWM 9: 31-42

31 Lub Koom Txoos nyob hauv cov teb chaws Yus Das, Nkas Lis Lais, thiab Xas Mas Lias tau nyob thaj yeeb.
Nws txhim tsa nws tus kheej kom loj zuj zus tuaj thiab nws taug txoj kev hwm Huab Tais zoo.
Nws tau txais Leej Ntuj Plig Ntshiab txoj kev nplig siab, ces nws huam vam coob zuj zus tuaj.
32 Pob Zeb ncig mus rau txhua qhov chaw, nws kuj nqes mus txog nram cov ntshiab nyob lub zos Lis Das thiab.
33 Nyob nrad nws ntsib ib tug neeg hu ua Es Nes As pw saum txaj
tau yim xyoo lawm vim nws tuag ceg.
34 Pob Zeb hais rau nws tias: "Es Nes As, Yes Xus Pleev kho kom koj zoo hlo.
Koj cia li sawv los tu koj lub txaj." Tam sis ntawd tus tuag ceg sawv tsees los.
35 Tas cov neeg nyob hauv Lis Das thiab nyob Sas Loos pom nws, ces sawv daws tig los mloog Huab Tais.
36 Nyob Yos Pes, muaj ib tug thwj tim poj niam hu ua Tas Npis Thas. Nws lub npe txhais tias
Me Nyuam Mos Lwj. Nws ua ntau yam hauj lwm zoo thiab nws pub ntau yam rau cov neeg txom nyem.
37 Muaj ib hnub, Tas Npis Thas cia li mob, ces nws tuag lawm.
Lawv muab nws ntxuav tas, lawv coj nws mus xyab rau saum chav tsev siab.
38 Vim Lis Das nyob ze Yos Pes, cov thwj tim hnov tias Pob Zeb tuaj txog Lis Das lawm,
ces lawv tso ob tug neeg tuaj thov Pob Zeb tias: "Thov koj tuaj nram peb sai sai txhob ncua li."
39 Ces Pob Zeb sawv nrog ob tug neeg ntawd mus; thaum nws tuaj txog ntua, lawv coj nws nce mus saum
chav tsev siab. Cov poj ntsuam sawv daws quaj zom zaws los ntsauv Pob Zeb. Lawv muab tej tsoos tsho
Tas Npis Thas tau ua thaum nws tseem nrog lawv nyob rau Pob Zeb saib.
40 Pob Zeb kom lawv sawv daws tawm mus sab nraud, nws txhos caug thov Ntuj,
ces nws tig los hais rau tus tuag tias: "Tas Npis Thas, koj sawv."
Tus poj niam rua qhov muag, nws pom Pob Zeb, ces nws sawv tsees los zaum.
41 Pob Zeb tuav nws txhais tes, rub kom nws sawv ntsug. Ces Pob Zeb hu cov Ntshiab
thiab cov poj ntsuam los, nws muab ib tug neeg ciaj sia cob rau lawv.
42 Tas lub tsheej Yos Pes hnov txog lub moo ntawd, ces coob leej los ntseeg txog Huab Tais.

NPN 116: 12-13, 14-15, 16-17

Txais: (12) Kuv yuav muab dab tsi rau Huab Tais los pauj
tas ib puas tsav yam zoo uas nws tau ua rau kuv ?
los: As les lus yas.

Kuv yuav muab dab tsi rau Huab Tais
los pauj tas ib puas tsav yam zoo uas nws tau ua rau kuv ?
Kuv yuav cev lub ntim cawm neeg,
Thiab kuv yuav hu txog HUAB TAIS lub npe.

Txais: (12) Kuv yuav muab dab tsi rau Huab Tais los pauj
tas ib puas tsav yam zoo uas nws tau ua rau kuv ?
los: As les lus yas.

Kuv yuav pauj kuv lub yeem rau HUAB TAIS
nyob ntawm tas nws haiv neeg xub ntiag.
HUAB TAIS saib cov ntseeg txog nws
txoj kev tuag muaj nqes heev.

Txais: (12) Kuv yuav muab dab tsi rau Huab Tais los pauj
tas ib puas tsav yam zoo uas nws tau ua rau kuv ?
los: As les lus yas.

HUAB TAIS, kuv yog koj tus tub txib,
tus tub txib uas yog koj tus ntxhais txib tus tub.
Koj tau daws cov hlua khi kuv lawm.
Kuv yuav cev ib co txim los ua koj tsaug,
thiab kuv yuav hu txog HUAB TAIS lub npe.

Txais: (12) Kuv yuav muab dab tsi rau Huab Tais los pauj
tas ib puas tsav yam zoo uas nws tau ua rau kuv ?
los: As les lus yas.

As Les Lus Yas: ZAM 6: 63c, 68c

Txais: As les lus yas, as les lus yas.

Koj cov lus, Huab Tais, yog ntsuj plig thiab yog txoj sia;
koj muaj cov lus pub txoj sia nyob mus li.

Txais: As les lus yas, as les lus yas.

Ntawv Moo Zoo: ZAM 6: 60-69

60 Yes Xus cov thwj tim coob tus hnov cov lus ntawd, lawv hais tias:
"Cov lus no ntxhib dhau, leej twg yuav xav mloog?"
61 Tab sis Yes Xus twb paub lawm tias nws cov thwj tim yws yws txog qhov ntawd,
Nws thiaj hais rau lawv tias: "Cov lus ntawd ua rau nej ceeb lod?
62 Yog nej tseem pom Neeg Leej Tub nce mus saum qhov chaw
uas nws xub nyob thiab mas nej yuav ua li cas?
63 Yog tus ntsuj plig ua kom muaj txoj sia, lub cev nqaij ua tsis tau dab tsi.
Cov lus uas kuv tau hais rau nej yog ntsuj plig thiab yog txoj sia.
64 Tab sis nyob hauv nej, muaj ib co tsis ntseeg." Txij lub hauv paus los, Yes Xus yeej paub lawm tias
cov tsis ntseeg yog leej twg, thiab tus yuav muab nws muag yog leej twg.
65 Ces Yes Xus hais tias: "Vim li no kuv thiaj tau rau nej tias tsis muaj leej twg tuaj cuag kuv tau,
yog Leej Txiv tsis pub kom nws tuaj."
66 Txij thaum ntawd los, Yes Xus coob leej thwj tim thiaj li rov qab tas,
tsis caum Yes Xus mus ntxiv lawm.
67 Yes Xus thiaj hais rau Pab Kaum Ob tias: "Nej ne, nej puas xav rov mus thiab?"
68 Xis Moos Pob Zeb teb rau Yes Xus tias: "Huab Tais, peb yuav mus caum leej twg?
Koj thiaj yog tus muaj cov lus pub txoj sia nyob mus li.
69 Ntawm peb mas peb ntseeg thiab peb paub meej tias koj yog Tswv Ntuj tus Ntshiab."

Tim     1     lub      5     Hlis     2023`

Hnub Ob Lis Piam Plaub Caij Hla Xyoo ABC Nruab Lis Piam Xyoo I & II
Lectionary: 279

XHLT:    LN Txiv Ntshiab Yos Xes tus Ua Hauj Lwm

Zaj Nyeem Ib:   Hauj Lwm 11: 1-18

1 Cov Hauv Paus Xa Lus thiab cov kwv tij nyob hauv xeev Yus Das tau hnov tias
cov neeg teev pej kum dab kuj tau los txais Tswv Ntuj lo lus lawm thiab.
2 Ces thaum Pob Zeb mus pem Yes Lus Xas Les,
mas cov ntseeg uas txais lub cim txiav thiaj tuaj nrog Pob Zeb sib cav, lawv hais tias:
3 "Koj tseem mus hauv cov neeg tsis txais lub cim txiav tsev, thiab nrog lawv noj mov huv si thiab!"
4 Pob Zeb thiaj li piav txij lub hauv paus txog lub ntsis ib qho zuj zus rau lawv tias:
5 “Nyob hauv lub nroog Yos Pes, thaum kuv tseem tab tom teev ntuj,
kuv yees pom ib yam nqes saum ntuj los, zoo li yog ib daig ntaub loj loj
tuav ntawm plaub ces kaum tso dauv nqes saum ntuj los txog ntua ntawm kuv.
6 Kuv qhov muag ntsia ntsoov rau daim ntaub, kuv ua twb zoo ntsia, ces kuv pom cov tsiaj muaj plaub txhais tes taw uas nyob ntiaj teb no, muaj cov tsiaj qus, cov tsiaj txawj nkag, thiab cov noog ya saum nruab ntug huv tib si.
7 Kuv kuj hnov ib lub suab hais rau kuv tias: 'Pob Zeb, koj sawv, koj mus muab los tua ces koj noj.'
8 Kuv teb tias: 'Huab Tais, kuv tsis noj; txog tav no tsis tau muaj dua ib yam
qias los tsis huv nkag rau hauv kuv qhov ncauj ib zaug li.'
9 Lub suab teb zaum ob saum ntuj tuaj tias:
'Yam uas Tswv Ntuj tau ua kom huv, mas koj tsis txhob muab saib tias tsis huv.'
10 Ua li ntawd txog peb zaug, ces txhia yam raug rov muab rub rau saum ntuj lawm.
11 Thaum ntawd kiag, txawm muaj peb tug neeg tuaj txog ntawm lub tsev uas peb nyob;
yog luag xa lawv ntawm Xes Ntxas Les tuaj cuag kuv.
12 Leej Ntuj Plig hais rau kuv tias kom nrog lawv mus tsis txhob saib tias lawv yog neeg txawv peb li. Lawv rau leej kwv tij no kuj nrog kuv mus thiab, ces peb chaws mus hauv tus neeg ntawd lub tsev.
13 Nws thiaj piav rau peb tias nws pom ib tug tshiab tuaj sawv ntsug hauv nws tsev, tus tshiab hais rau nws tias: 'Koj tso neeg mus nram Yos Pes, mus hais kom Xis Moos tus hu ua Pob Zeb tuaj ntawm no.
14 Nws yuav hais ib co lus rau koj, ces cov lus ntawd yuav ua kom koj thiab koj tsev neeg
tas huv tib si tau txais kev cawm.’
15 Kuv nyuam qhuav pib hais lus xwb, Leej Ntuj Plig Ntshiab twb cia li nqes los rau saum lawv
ib yam li nws tau nqes los rau saum peb thaum pib hauv paus lawm thiab.
16 Kuv thiaj nco txog Huab Tais lo lus uas nws hais tias: 'Zam mas nws ua kab ke ntxuav nyob hauv dej, hos nej mas nej yuav txais kab ke ntxuav nyob hauv Leej Ntuj Plig Ntshiab.'
17 Yog tias Tswv Ntuj twb pub tib lub txiaj ntsim rau cov neeg ntawd xws li nws tau pub rau peb vim peb ntseeg txog Huab Tais Yes Xus Pleev, mas kuv yog leej twg, kuv ho yuav los thaiv Tswv Ntuj kev?”
18 Lawv hnov cov lus no tas, lawv thiaj tsis muaj lus tib dab tsi ntxiv, ces lawv cav txog Tswv Ntuj tias: "Ua li mas Tswv Ntuj kuj pub txoj kev thov txhaum kom tau txais txoj sia rau cov neeg teev pej kum dab thiab."

NPN   42: 2-3; 43: 3, 4

Txais: (3a) Kuv tus plig nqhis qhuav siab qhawv txog tus Tswv Ntuj muaj txoj sia.
los: As les lus yas.

Xws li tus kauv nqhis cov dej ntws lug,
kuv tus plig kuj nqhis txog koj, Tswv Ntuj.
Kuv tus plig nqhis txog Tswv Ntuj, tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Txais: (3a) Kuv tus plig nqhis qhuav siab qhawv txog tus Tswv Ntuj muaj txoj sia.
los: As les lus yas.

Thov koj xa koj qhov pom kev thiab qhov kev pheej xeeb tuaj coj kuv kev
kom kuv mus txog saum lub roob muaj koj txoj kev ntshiab,
kom mus txog ntua qhov chaw koj nyob.

Txais: (3a) Kuv tus plig nqhis qhuav siab qhawv txog tus Tswv Ntuj muaj txoj sia.
los: As les lus yas.

Ces kuv yuav mus kom txog ntawm Tswv Ntuj lub thaj,
ntawm tus Tswv Ntuj uas yog kuv txoj kev sov siab thiab zoo siab;
Ces kuv yuav ntaus nkauj nog ncas ua koj tsaug,
Tswv Ntuj, kuv tus Tswv Ntuj!

Txais: (3a) Kuv tus plig nqhis qhuav siab qhawv txog tus Tswv Ntuj muaj txoj sia.
los: As les lus yas.

As Les Lus Yas:   ZAM 10: 14

Txais: As les lus yas, as les lus yas.

Huab Tais hais tias: Kuv yog tus zoo tswv zov yaj,
kuv paub kuv cov yaj, kuv cov yaj paub kuv.

Txais: As les lus yas, as les lus yas.

Ntawv Moo Zoo:   ZAM 10: 11-18

Yes Xus hais tias:
11 Kuv yog tus zoo tswv zov yaj. Tus zoo tswv zov yaj siv nws txoj sia los pab cov yaj.
12 Tus luag ntiav zov, nws tsis yog tus tswv, cov yaj tsis yog nws li, thaum nws pom hma tuaj, nws tso cov yaj pov tseg, nws khiav lawm. Hma muab cov yaj kwv mus, ua pab yaj tawg tas.
13 Vim nws tsuas yog tus luag ntiav zov xwb, nws tsis txhawj dab tsi txog cov yaj.
14 Kuv yog tus zoo tswv zov yaj, kuv paub kuv cov yaj, kuv cov yaj paub kuv,
15 ib yam li Leej Txiv paub kuv thiab kuv paub Leej Txiv. Kuv siv kuv txoj sia rau kuv cov yaj.
16 Kuv tseem muaj ib co yaj uas tsis nyob hauv lub nkuaj no. Kuv yuav tsum coj cov ntawd kev thiab. Lawv yuav mloog kuv lub suab, ces yuav muaj ib pab yaj, thiab ib tug tswv zov yaj xwb.
17 Yog vim li ntawd Leej Txiv thiaj nyiam kuv, vim tias kuv siv kuv txoj sia kom kuv muab tau txoj sia rov los rau kuv.
18 Tsis muaj leej twg tshem kuv txoj sia ntawm kuv mus, kuv yog tus yeem siv kuv txoj sia pub rau luag. Kuv muaj hwj huam siv tau kuv txoj sia, thiab muaj hwj huam muab tau kuv txoj sia rov los. Qhov no yog lo lus qhia kuv txais ntawm kuv Txiv los."

Tim   2     lub     5     Hlis     2023

Hnub Peb Lis Piam Plaub Caij Hla Xyoo ABC Nruab Lis Piam Xyoo I & II
Lectionary: 280

Yuav Hwm:   LN  Athanasius, ua Tswv thiab Kws cov Txuj Ntshiab

Zaj Nyeem Ib:   HAUJ LWM 11: 19-26

19 Txoj kev hiam uas sawv tuaj vim Tes Fas Nos ntawd, ua kom cov ntseeg tau tawg tas mus lawm; lawv thiaj  khiav mus txog rau Fes Nis Xias teb, txog Kws Plos, thiab txog As Caus Kus. Thaum khiav ntawd, lawv tsis tshaj Lo Lus rau leej twg li, tsuas tshaj rau cov Yus Das nkaus xwb.
20 Tiam sis nyob hauv lawv, muaj ib co yog neeg Kws Plos thiab neeg Xis Les Nias, ces thaum tuaj txog
As Caus Kus, cov ntawd kuj mus qhuab qhia cov Hes Las thiab tshaj txog Huab Tais Yes Xus rau lawv thiab.
21 Huab Tais txhais tes pab lawv, ces muaj neeg coob kawg los ntseeg thiab tig los cuag Huab Tais.
22 Lub moo ntawd nrov mus txog lub Koom Txoos nyob Yes Lus Xas Les pob ntseg, ces lawv thiaj xa Npas Nas Npes mus nyob As Caus Kus.
23 Thaum Npas Nas Npes tuaj txog, nws pom Tswv Ntuj lub txiaj ntsim, mas nws zoo siab heev,
nws txhawb lawv kom ua siab loj siab tawv nyob ruaj nreb hauv txoj kev ntseeg txog Huab Tais,
24 vim nws yog ib tug neeg zoo muaj Leej Ntuj Plig Ntshiab thiab muaj kev ntseeg nyob puv hauv nws,
ces ib pab neeg coob kawg los ntseeg txog Huab Tais ntxiv.
25 Npas Nas Npes thiaj mus rau Tas Xis mus nrhiav Xauv.
26 Thaum nws nrhiav tau Xauv lawm, nws coj Xauv los nyob As Caus Kus.  Nyob ntawd, nkawd nrog lub Koom Txoos sib ntsib thiab nkawd qhia ib pab neeg coob kawg tau ib xyoos nkaus. Yog nyob As Caus Kus mas luag thiaj pib hu cov thwj tim ua cov ntseeg Leej Pleev.

NPN   87: 1b-3, 4-5, 6-7

Txais: (117:1a) Tas txhua haiv neeg, nej cia li cav txog Huab Tais.
los: Alleluia.

Nws cov taw ntsa yog txhim rau saum cov roob ntshiab,
Huab Tais nyiam Xis Yoos cov rooj vag tshaj lwm lub vaj tse hauv Yas Kos.
Aub Tswv Ntuj lub tsheej, neeg hais ntau yam qhuas txog koj!

Txais: (117:1a) Tas txhua haiv neeg, nej cia li cav txog Huab Tais.
los: Alleluia.

Kuv hais txog Las Has thiab Npas Npis Los tias
lawv nyob hauv cov uas paub Huab Tais.
Kuv hais txog Fis Lis Tis, Tws Los, Es Thias Pias tias:
“Tus neeg no yug los nyob ntawd".
Tab sis luag yuav hais txog Xis Yoos tias:
“Txhua tus neeg tau yug los nyob hauv nws;
tus tau txhim tsa nws yog tus HUAB TAIS Nyob Siab."

Txais: (117:1a) Tas txhua haiv neeg, nej cia li cav txog Huab Tais.
los: Alleluia.

Luag yuav sau rau hauv phau ntawv txheeb npe tias :
"Tus neeg no yug los nyob rau ntawd !"
Tas txhua leej txhua tus yuav hu nkauj dhia lom zem tias:
“Kuv lub chaw nyob yog nyob hauv koj.”

Txais: (117:1a) Tas txhua haiv neeg, nej cia li cav txog Huab Tais.
los: Alleluia.

As Les Lus yas:   ZAM 10: 27

Txais: As les lus yas, as les lus yas.

Huab Tais hais tias: Kuv cov yaj mloog kuv lub suab,
kuv paub kuv cov yaj, kuv cov yaj raws nraim kuv qab mus.

Txais: As les lus yas, as les lus yas.

Ntawv Moo Zoo:   ZAM 10: 22-30

22 Thaum ntawd txog lub hnub nyoog ua koob tsheej rov fij
lub Tuam Tsev Teev Ntuj nyob Yes Lus Xas Les. Yog lub caij ntuj no.
23 Yes Xus mus mus los los hauv lub Tuam Tsev Teev Ntuj nyob hauv lub qab ru tsev Xas Los Moos.
24 Cov Yus Das los ntsauv ncig nws, ces lawv hais rau nws tias: "Koj yuav cia peb lub siab
ua xyem xyav txog thaum twg? Saib koj yog Leej Pleev no, koj cia li hais rau peb kom meej?"
25 Yes Xus teb rau lawv tias: "Kuv twb hais rau nej tas lawm, tiam sis nej tsis ntseeg.
Cov hauj lwm uas kuv ua nyob hauv kuv Txiv lub npe ua tim khawv txog kuv.
26 Tab sis nej tsis ntseeg vim nej tsis nyob hauv kuv cov yaj.
27 Kuv cov yaj mloog kuv lub suab, kuv paub lawv, lawv raws nraim kuv qab.
28 Kuv pub txoj sia nyob mus li rau lawv, lawv yuav tsis tuag ib zaug li.
Tsis muaj leej twg yuav chua tau lawv ntawm kuv txhais tes mus li.
29 Kuv Txiv uas yog tus muab lawv rau kuv, nws loj tshaj txhua leej txhua tus tas nrho,
mas tsis muaj leej twg yuav txeeb tau lawv ntawm Leej Txiv txhais tes mus li.
30 Leej Txiv thiab kuv, wb yog ib tug xwb."

Tim     3     lub     5     Hlis    

Hwm LN Fis Lis Pos thiab LN Yas Kos, ob tug Hauv Paus Xa Lus
Lectionary: 561

Zaj Nyeem Ib:   1 KLN 15: 1-8

1 Cov kwv tij nkauj muad, kuv rov hais rau nej kom nej nco ntsoov txog lub Moo Zoo uas kuv twb tau tshaj rau nej lawm; nej tau txais, thiab nej yeej nyob ruaj nreb hauv lub Moo Zoo ntawd lawm.
2 Nej yeej yuav tau txais kev cawm vim lub moo zoo ntawd, tsuav yog nej coj raws nraim li
cov lus kuv tau qhia rau nej, thiab tsis yog nej lam ntseeg dag xwb.
3 Qhov tseem ceeb ua ntej tshaj cov uas kuv tau qhia rau nej kuj yog qhov kuv tus kheej
tau txais los thiab: Yog qhov tias Leej Pleev tau tuag vim peb cov txhaum, raws li Ntawv tau sau tseg;
4 qhov tias lawv tau muab nws mus zwm ntxa, thiab hnub peb, nws tau sawv rov qab los, raws li Ntawv xub sau tseg lawm;
5 nws tau yees tawm los rau Pob Zeb pom, thiab rau pab kaum ob pom.
6 Tom qab ntawd, nws tseem tau yees tawm los rau cov kwv tij muaj tshaj tsib puas leej ib txhij pom; lawv cov coob tseem ua neej nyob tiam sis muaj qee leej twb ncaim mus lawm.
7 Nws kuj tseem tau tawm los rau Yas Kos pom, thiab rau tas cov Hauv Paus Xa Lus huv tib si pom.
8 Tus kawg nkaus nws tau tshwm sim rau pom yog kuv, uas zoo xws li ib tug me nyuam yug tsis txwm caij txwm nyoog,

NPN   19: 2-3, 4-5

Txais: (5) Lawv lo lus xa moo nrov mus thoob ntiaj teb.
los: As les lus yas.

Cov txheej ntuj saud tshaj txog Tswv Ntuj lub koob meej,
lub qab ntuj khwb tshaj cov hauj lwm nws txhais tes tsim los.
Nruab hnub hais lo lus rau nruab hnub mloog,
Hmo ntuj qhia rau hmo ntuj paub txog.

Txais: (5) Lawv lo lus xa moo nrov mus thoob ntiaj teb.
los: As les lus yas.

Tsis muaj ib lo lus los ib zaj lus piav
uas leej tib neeg yuav tsis hnov txog.
Lawv lub suab ncha mus puv tas ntiaj teb,
lawv lo lus xa moo nrov txog tim npoo ntiaj teb kawg.

Txais: (5) Lawv lo lus xa moo nrov mus thoob ntiaj teb.
los: As les lus yas.

As Les Lus Yas:   ZAM 14: 6b, 9c

Txais: As les lus yas, as les lus yas.

Huab Tais hais tias:
“Kuv yog Txoj Kev, yog Qhov Tseeb, thiab yog Txoj Sia;
Fis Lis Pos, leej twg tau pom kuv ces yog pom Leej Txiv lawm.”

Txais: As les lus yas, as les lus yas.

Ntawv Moo Zoo:   ZAM 14: 6-14

6 Yes Xus hais rau Tos Mas tias: "Kuv yog Txoj Kev, yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau, yog nws tsis hla ntawm kuv mus.
7 Yog nej paub kuv, mas nej kuj yuav paub kuv Txiv thiab.
Txij nyem no mus, nej twb paub nws thiab tau pom nws lawm."
8 Fis Lis Pos hais rau Yes Xus tias:
"Huab Tais, thov koj pub kom peb pom Leej Txiv, ces txaus peb siab lawm."
9 Yes Xus hais rau Fis Lis Pos tias: "Fis Lis Pos, kuv tau nrog nej nyob ntev npaum no,
koj tseem tsis tau paub kuv thiab lod? Leej twg tau pom kuv ces yog nws tau pom Leej Txiv lawd.
Ua cas koj thiaj hais tau tias: 'Koj pub kom peb pom Leej Txiv'?
10 Koj tsis ntseeg tias kuv nyob hauv Leej Txiv, thiab Leej Txiv nyob hauv kuv lod? Cov lus uas kuv hais
rau nej, tsis yog kuv hais kuv xwb; yog Leej Txiv uas nyob txawm hauv kuv, nws ua nws cov hauj lwm.
11 Nej ntseeg kuv mog, tias kuv nyob hauv Leej Txiv thiab Leej Txiv nyob hauv kuv;
txawm li cas los nej cia li ntseeg vim cov hauj lwm.
12 "Kuv hais qhov muaj tseeb tiag rau nej, tus ntseeg txog kuv, nws kuj yuav ua cov hauj lwm kuv ua,
thiab nws tseem yuav ua tej yam loj dua, vim kuv yuav mus cuag Leej Txiv.
13 Yam twg nej tuav txog kuv lub npe thov, mas kuv yuav ua yam ntawd,
kom xwv Leej Txiv nto koob meej nyob hauv Leej Tub.
14 Yog nej tuav txog kuv lub npe thov ib yam dab tsi, mas kuv yuav ua yam ntawd."

Tim     4     lub     5     Hlis     2023

Hnub Tsib Lis Piam Plaub Caij Hla Xyoo ABC Nruab Lis Piam Xyoo I &II
Lectionary: 282

Zaj Nyeem Ib:   HAUJ LWM 13: 13-25

13 Paj Lug thiab ob tug nrog nws lawv caij nkoj ntawm Pas Fos mus rau Pes Nkas nyob Pas Fis Lias teb. Tab sis Zam, uas tseem hu ua Mas Kos, tso nkawd tseg, nws rov mus Yes Lus Xas Les lawm.
14 Hos Paj Lug nkawd thiaj sawv kev ntawm Pes Nkas mus txog As Caus Kus nyob Pis Xis Dias teb.
Thaum txog hnub xas npas tos, nkawd mus hauv lub Tsev Txoos, ces nkawd mus zaum.
15 Thaum lawv nyeem Txoj Cai thiab cov Yaj Saub tas, mas cov tswj lub Tsev Txoos tso neeg los hais rau nkawd tias: "Ob tug kwv tij, yog neb muaj lus dab tsi zoo txhawb tsoom pej xeem lub siab no, neb hais mas!"
16 Paj Lug thiaj li sawv tsees, nws tsa tes, thiab nws hais tias:
"Cov kwv tij His Xas Lais, thiab nej cov uas hwm Tswv Ntuj, nej mloog mog!
17 Haiv neeg His Xas Lais no tus Tswv Ntuj tau xaiv peb cov yawg koob,
thiab nws tau ua kom haiv neeg no muaj koob meej thaum lub caij uas lawv nyob Hais Nkws Tos teb,
ces nws tau tsa nws txhais npab los pab kom lawv tawm ntawm lub teb chaws ntawd los.
18 Tau kwv yees plaub caug xyoo, nws tau ua siab ntev nyiaj
lawv tus cwj pwm nyob hauv teb chaws suab puam.
19 Ces nws tau rhuav xya haiv neeg nyob hauv lub teb chaws Kas Nas Has,
nws mam li muab lub teb chaws ntawd pub rau lawv ua lawv tug.
20 Thaum lawv tau nyob ntev kwv yees li plaub puas tsib caug xyoo lawm,
Tswv Ntuj thiaj tsa ib co txwj laus txiav txim los coj lawv mus txog lub caij tus yaj saub Xas Muas nyob.
21 Txij thaum ntawd los, lawv xav muaj ib tug vaj. Ces Tswv Ntuj muab Xas Ws,
uas yog Kis tus tub, xeem Npes Yas Mis rau lawv, ntev li plaub caug xyoo.
22 Tswv Ntuj muab Xas Ws xyeeb pov tseg, nws thiaj tsa Das Vis ua lawv tus vaj.
Tswv Ntuj ua pov thawj txog Das Vis tias: ‘Kuv nrhiav tau Das Vis, Yes Xes tus tub,
nws yog tus neeg ntxim kuv siab, nws yuav ua raws li kuv lub siab xav tas huv si.’
23 Nyob hauv Das Vis caj ces, Tswv Ntuj ua raws li nws tau cog lus,
nws tsa ib tug cawm seej rau haiv His Xas Lais, yog Yes Xus.
24 Zam xub tuaj ua ntej, npaj kev rau Yes Xus yuav tuaj;
nws tshaj ib txog kab ke ntxuav los lees txhaum rau tas haiv His Xas Lais sawv daws.
25 Thaum Zam ua nws txoj hauj lwm yuav tiav, nws tau hais tias: ‘Nej xav tias kuv yog leej twg?
Kuv tsis yog nws. Muaj ib tug tab tom tuaj lawv kuv qab; kuv tsis tsim nyog daws nws txoj hlua khau.’"

NPN   89: 2-3, 21-22, 25+27

Txais: (2) Kuv yuav hu nkauj mus li cav txog HUAB TAIS lub siab zoo.
Los: As les lus yas.

Kuv yuav hu nkauj mus li cav txog HUAB TAIS tej kev pub txiaj ntsim,
kuv lub ncauj yuav tshaj txog koj txoj kev pheej xeeb mus tiam dhau tiam.
Vim koj tau hais tias: “Kuv tsa kuv txoj kev ua zoo kom nyob mus li;”
nyob saum ntuj koj tau cog koj txoj kev pheej xeeb kom ruaj nreb.

Txais: (2) Kuv yuav hu nkauj mus li cav txog HUAB TAIS lub siab zoo.
Los: As les lus yas.

Kuv nrhiav tau kuv tus tub txib Das Vis,
kuv tau muab kuv cov roj ntshiab los pleev nws,
kom kuv txhais tes nyob ze nws mus li,
thiab kom kuv txhais npab ua kom nws muaj zog.

Txais: (2) Kuv yuav hu nkauj mus li cav txog HUAB TAIS lub siab zoo.
Los: As les lus yas.

Kuv txoj kev pheej xeeb thiab kev khuv leej yuav nyob nrog nws nraim.
Vim kuv lub npe nws yuav tsa taus nws hauv pliaj kom siab.
Nws yuav hais txog kuv li no tias: "Koj yog kuv txiv,
kuv tus Tswv Ntuj, kuv lub Tsua, kuv tus Cawm Seej!"

Txais: (2) Kuv yuav hu nkauj mus li cav txog HUAB TAIS lub siab zoo.
Los: As les lus yas.

As Les Lus Yas:   QYTN 1: 5ab

Txais: As les lus yas, as les lus yas.

Yes Xus Pleev, koj yog tus tim khawv pheej xeeb,
koj yog thawj tus yug ntawm cov tuag los,
koj tau hlub peb thiab tau cawm peb dim ntawm
peb cov txhaum nyob hauv koj cov ntshav.

Txais: As les lus yas, as les lus yas.

Ntawv Moo Zoo:   ZAM 13: 16-20

Thaum Yes Xus ntxuav nws cov thwj tim ko taw tas, nws hais rau lawv tias:
16 “Kuv hais qhov muaj tseeb tiag rau nej tias: Tus tub txib tsis loj dua nws tus tswv,
tus tub xa xov kuj tsis loj dua tus uas xa nws tuaj.
17 Yog nej to taub qhov no, mas nej txoj hmoov zoo yog nej ua raws li ntawd.
18 Kuv tsis hais txog nej txhua leej txhua tus. Kuv paub cov uas kuv tau xaiv. Tab sis vim
yuav tsum tshwm sim raws li ntawv sau cia tias: ‘Tus noj kuv cov mov nws tsa luj taws rau kuv.’
19 Nyem no, kuv xub hais rau nej cheem tej ntawd tsis tau tshwm sim,
kom xwv thaum tej ntawd tshwm tuaj, nej ntseeg tias kuv yog tus Kuv Yog.
20 Kuv hais qhov muaj tseeb tiag rau nej: Leej twg txais tus uas kuv xa nws mus,
mas yog nws txais kuv; leej twg txais kuv, mas yog nws txais tus xa kuv tuaj."

Tim     5     lub     5     Hlis     2023

Hnub Rau Lis Piam Plaub Caij Hla Xyoo ABC Nruab Lis Piam Xyoo I & II
Lectionary: 283

Zaj Nyeem Ib:   HAUJ LWM 13: 26-33

Paj Lug tau hais lus nyob hauv lub tsev txoos nyob As Caus Kus, Pis Xis Dias teb tias:
26 “Kuv cov kwv tij uas nej yog Has Nplas Has caj ces cov tub, thiab nej cov uas hwm Tswv Ntuj aw,
lo lus pub txoj kev cawm neeg no yeej yog xa tuaj rau peb.
27 Cov neeg nyob Yes Lus Xas Les thiab lawv cov thawj coj tsis kam lees paub nws,
ces thaum lawv tau txiav txim muab nws tua, mas yog lawv tau ua raws li cov yaj saub
cov lus uas peb nyeem niaj hnub xas npas tos hnub dhau hnub los lawm.
28 Lawv twb nrhiav tsis tau ib yam dab tsi kom txaus muab lub txim tuag rau nws,
tsis kav lawv tseem thov kom Pis Las Tos muab nws tua.
29 Thaum lawv ua tas puas tsav yam raws li Ntawv sau tseg txog nws lawm,
mas lawv daws nws saum tus ntoo los thiab lawv muab nws mus zwm ntxa.
30 Tab sis Tswv Ntuj tau tsa nws sawv hauv cov tuag rov los.
31 Tau ntau hnub nws yees tawm los xyuas cov neeg nrog nws tuaj ntawm Nkas Lis Lais tuaj mus rau
Yes Lus Xas Les. Nyem no lawv yog cov ua tim khawv txog nws nyob ntawm tsoom pej xeem xub ntiag.
32 Peb kiag kuj tshaj lub Moo Zoo no rau nej tias, raws li Tswv Ntuj tau cog lus rau peb cov yawg koob,
33 mas nws tau ua kom tiav log raws li ntawd rau peb uas yog lawv cov me nyuam lawm:
Nws tau ua tiav yog thaum nws tsa Yes Xus sawv tuaj, raws li nyob hauv zaj nkauj paj nruag ob,
uas muaj lo lus sau tseg tias: 'Koj yog kuv Leej Tub, hnub no kuv tau xeeb koj los.'”

NPN   2: 6-7, 8-9, 10-11

Txais: (7bc) Koj yog kuv Leej Tub, hnub no kuv tau xeeb koj los.
los: As les lus yas.

“Kuv tus kheej tau tsa kuv tus vaj nyob saum Xis Yoos,
saum lub roob muaj kuv txoj kev ntshiab."
Kuv yuav tshaj HUAB TAIS txoj cai tawm.
HUAB TAIS hais rau kuv tias:
“Koj yog kuv leej tub, hnub no kuv tau xeeb koj los.”

Txais: (7bc) Koj yog kuv Leej Tub, hnub no kuv tau xeeb koj los.
los: As les lus yas.

“Koj thov kuv, ces kuv yuav muab
tsoom kuj cuab los ua koj lub cuab tam,
kuv yuav muab lub ntiaj teb mus txog
tim cov npoo kawg los ua koj tug.
Koj yuav tuav ib tug cwj hlau los tswj lawv;
koj yuav tsoo lawv ntsoog tas xws li lub tais av."

Txais: (7bc) Koj yog kuv Leej Tub, hnub no kuv tau xeeb koj los.
los: As les lus yas.

Ib tsoom vaj, nyem no nej yuav mob siab rau mloog,
cov tswj lub ntiaj teb, nej yuav cuab pob ntseg kom hnov.
Nej yuav tsob hwb HUAB TAIS nrog kev ntshai;
nej yuav zoo siab nyob ntawm nws xub ntiag;
nej yuav zoo siab thiab ntshai nws.

Txais: (7bc) Koj yog kuv Leej Tub, hnub no kuv tau xeeb koj los.
los: As les lus yas.

As Les Lus Yas:   ZAM 14: 6

Txais: As les lus yas, as les lus yas.

Huab Tais hais tias: “Kuv yog Txoj Kev, yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau, yog nws tsis hla ntawm kuv mus.”

Txais: As les lus yas, as les lus yas.

Ntawv Moo Zoo:   ZAM 14: 1-6

Yes Xus hais rau nws cov thwj tim tias:
1 “Nej tsis txhob ntxhov siab mog. Nej twb ntseeg Tswv Ntuj, mas nej ntseeg kuv thiab.
2 Nyob hauv kuv Txiv tsev, muaj ntau chav. Yog tsis muaj,
mas kuv puas yuav hais rau nej tias kuv mus npaj ib qho chaw rau nej?
3 Yog tias kuv mus lawm thiab kuv npaj tau ib qho chaw rau nej lawm, mas kuv yuav
rov los coj nej mus nrog kuv, kom xwv kuv nyob qhov twg, nej nyob qhov ntawd thiab.
4 Qhov kuv yuav mus, nej yeej paub txoj kev lawm.”
5 Tos Mas hais rau Yes Xus tias: "Huab Tais, peb tsis paub koj yuav mus qhov twg,
peb yuav ua cas paub txoj kev?"
6 Yes Xus hais rau Tos Mas tias: "Kuv yog Txoj Kev, yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau, yog nws tsis hla ntawm kuv mus."

Tim       6     lub     5     Hlis     2023

Hnub Xya Lis Piam Plaub Caij Hla Xyoo ABC Nruab Lis Piam Xyoo I & II
Lectionary: 284

Zaj Nyeem Ib:   HAUJ LWM 13: 44-52

44 Hnub Xas Npas Tos tom qab, yuav luag tas lub tsheej tuaj sib sau mloog Tswv Ntuj lo lus.
45 Thaum cov Yus Das pom neeg tuaj coob coob, mas khib lawv kawg,
ces lawv hais lus rhuav thiab thuam Paj Lug cov lus heev kawg.
46 Paj Lug thiab Npas Nas Npes nkawd ob leeg hais ncaj qha tsis zais lus tias:
"Peb yeej yuav tsum xub tshaj Tswv Ntuj lo lus rau nej ua ntej dua cov, tab sis nej tsis kam
txais lo lus, thiab nej rov txiav txim rau nej tias nej tsis tsim nyog txais txoj sia nyob mus li,
ces nyem no peb yuav tig mus qhia cov neeg teev pej kum dab.
47 Vim Huab Tais twb tau ceeb toom rau peb lawm tias: ‘Kuv tsa koj ua qhov pom kev kaj
cov pej kum haiv neeg, kom koj coj kuv txoj kev cawm mus txog tim npoo ntiaj teb kawg.’"
48 Cov neeg teev pej kum dab hnov cov lus no, mas lawv zoo siab kawg, lawv cav txog Huab Tais lo lus, thiab tas cov uas muaj lub txiaj ntsim kom lawv tau txoj sia nyob mus li mas lawv tig los ntseeg.
49 Ces Huab Tais lo lus ri mus puv tas thaj tsam teb chaws ntawd.
50 Tab sis cov Yus Das mus cob cov poj niam nom uas nquag tuaj teev hawm,
thiab cov txiv neej ua thawj coj nyob hauv lub tsheej, ces lawv pib hiam Paj Lug thiab
Npas Nas Npes nkawd, thiab lawv ntiab nkawd kom tawm hauv lawv nrim teb mus.
51 Nkawd thiaj nchos cov plua av lo nkawd ko taw rau lawv, ces nkawd mus rau Is Kos Nias.
52 Hos cov thwj tim, mas lawv muaj kev zoo siab thiab muaj Leej Ntuj Plig Ntshiab puv npo hauv lawv.

NPN 98: 1, 2-3ab, 3cd-4

Txais: (3cd) Tas cov npoo ntiaj teb Kawg tau pom Tswv Ntuj lub hwj huam cawm neeg lawm.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws muaj yeej,
nws sab npab ntshiab tau ua.

Txais…

HUAB TAIS tau qhia kom neeg paub txog nws txoj kev cawm,
nws muab nws txoj kev ncaj rau cov haiv neeg pom.
Nws rov nco txog nws txoj kev ua zoo thiab
kev pheej xeeb rau tsev neeg His Xas Lais.

Txais…

Tas cov npoo ntiaj teb kawg tau pom
peb tus Tswv Ntuj txoj kev cawm neeg lawm.
Tas txhua teb chaws, nej zoo siab hu nkauj rau HUAB TAIS;
nej qw suab hu nkauj, nej cav txog nws.

Txais…

As Les Lus Yas:   ZAM 8: 31b-32

Txais: As les lus yas, as les lus yas.

Huab Tais hais tias: Yog nej nyob ruaj hauv kuv lo lus,
mas nej yog kuv cov tseem thwj tim thiab nej yuav paub qhov tseeb.

Txais: As les lus yas, as les lus yas.

Ntawv Moo Zoo:   ZAM 14: 7-14

Yes Xus hais rau nws cov thwj tim tias:
7 “Yog tias nej paub kuv, mas nej kuj yuav paub kuv Txiv thiab.
Txij nyem no mus, nej twb paub nws thiab twb tau pom nws lawm."
8 Fis Lis Pos hais rau Yes Xus tias: "Huab Tais, koj pub kom peb pom Leej Txiv, ces peb txaus siab lawm."
9 Yes Xus hais rau Fis Lis Pos tias: "Fis Lis Pos, kuv nrog nej nyob tau ntev npaum no,
koj tseem tsis tau paub kuv thiab lod? Leej twg pom kuv, mas nws kuj tau pom Leej Txiv lawd.
Ua cas koj thiaj hais tau tias: 'Koj pub kom peb pom Leej Txiv'?
10 Koj tsis ntseeg tias kuv nyob hauv Leej Txiv, thiab Leej Txiv nyob hauv kuv lod? Cov lus uas kuv hais rau nej, tsis yog kuv hais kuv, yog Leej Txiv uas nyob txawm hauv kuv nws ua nws cov hauj lwm xwb.
11 Nej ntseeg kuv mas, tias kuv nyob hauv Leej Txiv, thiab Leej Txiv nyob hauv kuv;
txawm nej tsis ntseeg kuv los nej yuav tsum ntseeg vim cov hauj lwm.
12 Kuv hais qhov muaj tseeb tiag rau nej tias: Tus ntseeg kuv, nws kuj yuav ua cov hauj lwm kuv ua no, thiab nws tseem yuav ua tej yam loj dua cov no thiab, vim tias kuv yuav mus cuag Leej Txiv lawm.
13 Ces nej thov dab tsi nyob hauv kuv lub npe, mas kuv yuav ua,
kom xwv Leej Txiv muaj koob meej nyob hauv Leej Tub.
14 Yog nej tuav txog kuv lub npe thov ib yam dab tsi, mas kuv yuav ua yam ntawd."

Tim 8 lub 5 Hlis 2023

Hnub Ob Lis Piam Tsib Caij Hla Xyoo ABC Nruab Lis Piam Xyoo I & II
Lectionary 285

Zaj Nyeem Ib: HL 14: 5-18

5 Nyob Is Kos Nias, cov neeg teev dab thiab cov Yus Das nrog lawv cov thawj coj
npaj ua phem thiab npaj txawb pob zeb rau Paj Lug thiab Npas Nas Npes nkawd.
6 Nkawd paub txog li ntawd, ces nkawd khiav mus rau Lis Kos Nis teb,
hauv cov nroog Lis Ros thiab Des Npes thiab thaj tsam ib ncig ntawd.
7 Nkawd tshaj lub Moo Zoo nyob rau ntawd.
8 Nyob Lis Ros, muaj ib tug txiv neej zaum nyob ntawd uas nws ko taw tsis muaj zog,
nws tuag taw txij hnub nws yug los lawm, nws tsis tau mus kev ib zaug li.
9 Nws mloog rawv Paj Lug qhuab qhia, Paj Lug kuj ntsia ntsoov nws,
ces Paj Lug pom tias nws muaj kev ntseeg txaus kho kom nws zoo.
10 Paj Lug thiaj hais ib suab nrov nrov tias: "Koj cia li sawv ntseg ntsees saum koj ob txhais taw mas!" Tus tuag taw tib plhaw sawv tsees thiab nws mus kev.
11 Cov neeg pom Paj Lug ua tau li ntawd, lawv ua lus Lis Kos Nis qw zom zaws tias:
"Dab nqes los rau hauv peb zoo xws li tib neeg lawm lau!"
12 Lawv hu Npas Nas Npes ua Zws Pis Tawm(Jupiter), hos hu Paj Lug ua Mev Kws Lis(Mercury),
vim Paj Lug yog tus hais lus ntau dua.
13 Tus leej choj teev Zws Pis Tawm uas nyob ze ze nraum lub qhov rooj loog
coj ib co heev nyuj nrog tej txoj hlab ntaub chob nplooj ntxuag paj ntoos tuaj txog ntawm
lub qhov rooj loog, vim tus leej choj nrog tsoom pej xeem npaj yuav txi nyuj rau nkawd.
14 Thaum ob tug hauv paus xa lus Npas Nas Npes thiab Paj Lug hnov li ntawd,
nkawd dua rhe nkawd cov ris tsho, thiab nkawd khiav loo tawm mus qw rau tsoom neeg tias:
15 "Cov kwv tij aw, nej ua dab tsi li no? Wb zoo li nej thiab xwb, wb yog tib neeg ib yam nkaus li nej xwb; wb tuaj qhia nej kom nej tso tej yam tsis muaj nqes no pov tseg, tig los hwm tus Tswv Ntuj muaj txoj sia, uas yog tus tsim lub ntuj lub teb lub hiav txwv thiab tas txhua yam nyob hauv xwb.
16 Nyob hauv cov tiam neeg dhau los, nws tau cia cov haiv neeg nyias mus raws nyias txoj kev.
17 Tsis kav tsis yog tias, nws tsis muaj pov thawj txog tej yam zoo uas nws ua: Nws twb tso nag poob saum ntuj los rau nej, twb ua kom muaj caij nyoog zoo ua qoob ua loo, thiab twb ua kom nej muaj noj muaj haus thiab kom nej muaj kev zoo siab puv npo ne."
18 Nkawd cov lus no twb yuav luag txwv tsis tau kom tsoom neeg coob tsis txhob tua nyuj txi rau nkawd.

NPN 115: 1-2, 3-4, 15-16

Txais: (1ab) HUAB TAIS, koj tsis txhob cia peb nto koob meej,
tab sis koj cia kom koj lub npe nto koob meej.
los: As les lus yas.

HUAB TAIS, koj txhob cia peb nto koob meej,
tab sis cia kom koj lub npe nto koob meej,
vim koj khuv leej neeg, vim koj yog qhov tseeb.
Vim li cas cov teev pej kum dab thiaj yuav tau kev hais tias:
"Lawv tus Tswv Ntuj nyob qhov twg ?"

Txais: (1ab HUAB TAIS, koj tsis txhob cia peb nto koob meej,
tab sis cia kom koj lub npe nto koob meej.
los: As les lus yas.

Peb tus Tswv Ntuj nyob txheej ntuj saud ;
ib puas tsav yam nws xav ua, nws ua tau tas.
Lawv cov mlom dab yog nyiaj yog kub,
yog neeg ob txhais tes puab tawm los xwb.

Txais: ((1ab HUAB TAIS, koj tsis txhob cia peb nto koob meej,
tab sis cia kom koj lub npe nto koob meej.
los: As les lus yas.

Thov kom HUAB TAIS foom hmoov zoo rau nej,
nws yog tus tsim lub ntuj lub teb.
Lub ntuj yog HUAB TAIS lub ntuj,
hos lub ntiaj teb, nws muab pub rau tib neeg.

Txais: (1ab HUAB TAIS, koj tsis txhob cia peb nto koob meej,
tab sis cia kom koj lub npe nto koob meej.
los: As les lus yas.

As Les Lus Yas: Zam 14: 26

Txais: As les lus yas, as les lus yas.

Leej Ntuj Plig Ntshiab yuav qhia tas ib puas tsav yam rau nej
thiab yuav pab nej rov nco txog txhua yam kuv tau hais rau nej.

Txais: As les lus yas, as les lus yas.

Ntawv Moo Zoo: Zam 14: 21-26

Yes Xus hais rau nws cov thwj tim tias:
21 Leej twg muaj kuv cov lus qhia, thiab coj raws li ntawd, nws thiaj yog tus nyiam kuv. Tus nyiam kuv mas kuv Txiv yuav nyiam nws, kuv kuj yuav nyiam nws, thiab kuv yuav muab kuv rau nws pom."
22 Yus Das - tsis yog tus Kas Lis Yaus - hais rau Yes Xus tias:
"Huab Tais, vim li cas koj thiaj yuav muab koj rau peb pom, ho tsis muab rau lub qab ntuj neeg pom?"
23 Yes Xus teb rau Yus Das tias: "Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws, kuv Txiv wb yuav los rau hauv nws, wb yuav tsa tsev nyob hauv nws.
24 Tus tsis nyiam kuv, nws tsis coj raws kuv lo lus. Lo lus uas nej hnov, tsis yog kuv lo lus, yog Leej Txiv uas xa kuv tuaj lo lus.
25 Kuv hais tej no rau nej thaum kuv tseem nrog nej nyob.
26 Tus Pab nej, Leej Ntuj Plig Ntshiab, uas Leej Txiv yuav xa nws ntawm kuv lub npe tuaj,
nws yog tus yuav qhia tas ib puas tsav yam rau nej, thiab nws yuav pab kom nej rov nco txog tas txhua yam uas kuv tau hais rau nej.”

Tim     9     lub     5     Hlis     2023

Hnub Peb Lis Piam Tsib Caij Hla Xyoo ABC Nruab Lis PIam Xyoo I & II
Lectionary: 286

Zaj Nyeem Ib: HAUJ LWM 14: 19-28

19 Thaum ntawd, muaj ib co Yus Das tuaj As Caus Kus thiab Is Kos Nias tuaj
haub ntxias cov npoj neeg coob, ces lawv xuas pob zeb txawb rau Paj Lug
thiab muab nws cab mus pov rau sab tsheej nraud, lawv xav tias nws tuag lawm.
20 Tab sis thaum cov thwj tim tuaj sawv ncig Paj Lug, nws rov sawv los thiab nws rov mus hauv
lub tsheej. Hnub tom qab, nws thiab Npas Nas Npes nkawd sawv kev mus rau Des Npes lawm.
21 Thaum nkawd tshaj lub Moo Zoo tas nyob hauv lub tsheej Des Npes, thiab nkawd qhia tau
ib pab thwj tim coob lawm, nkawd rov mus rau Lis Ros, thiab rau Is Kos Nias thiab rau As Caus Kus.
22 Nkawd txhawb cov thwj tim kom muaj ib lub siab ruaj nreb thiab txhawb kom lawv nyob
tawv qhawv hauv txoj kev ntseeg. Nkawd qhia tias: "Peb yuav tsum raug ntau yam
kev txom nyem, peb thiaj yuav tau mus hauv Tswv Ntuj lub Ceeb Tsheej."
23 Nkawd xaiv ib co txwj laus coj lawv nyob hauv txhua lub koom txoos; nkawd ua cov kab ke teev ntuj thiab yoo mov los muab cov txwj laus ntawd fij rau tus Huab Tais uas lawv tau los ntseeg txog.
24 Ces nkawd hla Pis Xis Dias teb mus txog Paas Fis Lias teb.
25 Thaum nkawd tshaj lo lus nyob Pes Nkas tas lawm, nkawd thiaj li nqes mus rau nram As Tas Lias.
26 Ces nkawd mam caij nkoj ntawd mus rau As Caus Kus, uas yog lub tsheej Tswv Ntuj lub txiaj ntsim tau xaiv nkawd los mus ua txoj hauj lwm uas nkawd tau ua tiav log no.
27 Thaum nkawd los txog, nkawd hu lub Koom Txoos tas huv si tuaj, ces nkawd piav txog
tas txhua yam uas Tswv Ntuj tau pab nkawd ua rau sawv daws mloog, thiab nkawd piav tias
Tswv Ntuj tau qhib qhov rooj rau cov neeg teev pej kum dab los ua neeg ntseeg lawm.
28 Ces nkawd nrog cov thwj tim nyob ib ntus uas tsis yog luv luv.

NPN   145: 10-11, 12-13ab, 21

Txais: (12) Huab Tais, koj cov phooj ywg tshaj rau neeg paub
txog koj lub ceeb tsheej muaj hwj chim ci ntsa iab.
los: As les lus yas.

HUAB TAIS, koj cia kom tas koj cov hauj lwm ua koj tsaug,
thiab cia kom cov uas nyiam koj cav txog koj.
Cia lawv qhuas txog koj lub Ceeb Tsheej muaj hwj chim
thiab piav txog koj lub hwj huam loj.

Txais: (12) Huab Tais, koj cov phooj ywg tshaj rau neeg paub
txog koj lub ceeb tsheej muaj hwj chim ci ntsa iab.
los: As les lus yas..

Cia lawv qhia rau neeg paub txog koj lub hwj huam loj
thiab koj lub Ceeb Tsheej muaj hwj chim ci ntsa iab.
Koj lub Ceeb Tsheej yog ib lub Ceeb Tsheej rau tas txhua tiam neeg,
thiab koj txoj kev tswj kav yuav nyob mus txheej dhau txheej.

Txais: (12) Huab Tais, koj cov phooj ywg tshaj rau neeg paub
txog koj lub ceeb tsheej muaj hwj chim ci ntsa iab.
los:   As les lus yas.

Thov kom kuv lub ncauj cia li cav txog HUAB TAIS,
thiab kom txhua leej muaj lub cev nqaij cia li foom lus zoo
rau nws lub npe ntshiab mus ib txhiab ib txhis!

Txais: (12) Huab Tais, koj cov phooj ywg tshaj rau neeg paub
txog koj lub ceeb tsheej muaj hwj chim ci ntsa iab.
los: As les lus yas.

As Les Lus Yas:   LK 24: 46, 26

Txais: As les lus yas, as les lus yas.

Leej Pleev yuav tsum raug txom nyem
thiab sawv hauv tsoom tub tuag rov los,
kom nws tau mus rau hauv nws lub hwj chim.

Txais: As les lus yas, as les lus yas.

Ntawv Moo Zoo:   ZAM 14: 27-31a

Yes Xus hais rau nws cov thwj tim tias:
27 “Kuv tso txoj kev thaj yeeb rau nej, kuv muab kuv txoj kev thaj yeeb rau nej.
Kuv tsis muab rau nej xws li lub qab ntuj neeg muab. Nej tsis txhob ntxhov siab, tsis txhob ntshai.
28 Nej tau hnov kuv hais rau nej tias: ‘Kuv yuav mus, ces kuv yuav rov los cuag nej.’
Yog nej nyiam kuv, mas nej yuav zoo siab tias kuv mus cuag Leej Txiv, vim Leej Txiv loj dua kuv.
29 Zaum no kuv tau xub hais tej ntawd rau nej lawm, cheem tseem tsis tau tshwm sim tuaj,
kom thaum tej ntawd tshwm sim tuaj, nej thiaj ntseeg.
30 Kuv yuav tsis tau nrog nej tham ntau ntxiv, vim tus tswj lub qab ntuj neeg tab tom tuaj lawm. Nws tsis muaj hwj huam ua tau dab tsi rau kuv.
31a Tab sis lub qab ntuj neeg yuav tsum paub hais tias, kuv nyiam Leej Txiv
thiab kuv ua raws nraim li Leej Txiv tau txib kom kuv ua.”

Tim     10     lub     5     Hlis     2023

Hnub Plaub Lis Piam Tsib Caij Hla Xyoo ABC Nruab Lis Piam Xyoo I & II
Lectionary: 287

XHLT:   LN Zam nyob Avila, ua Leej Choj thiab Kws cov Txuj Ntshiab;
LN Damien de Veuster nyob Moloka’I, ua Leej Choj

Zaj Nyeem Ib:   HAUJ LWM 15: 1-6

1 Muaj ib co neeg tuaj Yus Das teb tuaj, lawv qhia cov kwv tij tias: "Yog nej tsis ua lub cim txiav tawv raws li Mais Xes txoj cai, mas nej yuav tsis tau txais kev cawm."
2 Vim Paj Lug thiab Npas Nas Npes nkawd nrog lawv sib hais tsis haum thiab sib cav muaj ceem hauj sim txog qhov ntawd, ces lawv thiaj txiav txim tias cia tso Paj Lug thiab Npas Nas Npes thiab lawv ob peb leeg mus pem Yes Lus Xas Les, mus cuag cov Hauv Paus Xa Lus thiab cov txwj laus, mus nrog lawv tham txog cov lus sib cav ntawd.
3 Lub Koom Txoos thiaj xa lawv cov ntawd mus; thaum lawv hla Fes Nis Xias thiab Xas Mas Lias teb, lawv piav txog cov teev pej kum dab tig los txais kev ntseeg rau cov kwv tij mloog, mas sawv daws zoo siab kawg.
4 Thaum lawv tuaj txog Yes Lus Xas Les, lub Koom Txoos nrog cov Hauv Paus Xa Lus thiab cov txwj laus txais tos lawv zoo. Paj Lug thiab Npas Nas Npes nkawd piav rau sawv daws txog tej yam Tswv Ntuj tau coj nkawd ua.
5 Tab sis, muaj ib co neeg uas yog tog Fas Lis Xais los txais kev ntseeg, lawv sawv los tawm suab hais tias: ‘Yuav tsum qhia kom cov neeg teev pej kum dab los txais lub cim txiav tawv thiab hais kom lawv coj Mais Xes txoj cai thiab.’
6 Ces cov Hauv Paus Xa Lus thiab cov txwj laus thiaj sib sau sab laj txog qhov no.

NPN   122: 1-2, 3-4ab, 4cd-5

Txais: (1) Nej tuaj peb zoo siab hlo mus lawm pem Huab Tais tsev.
los: As les lus yas.

Kuv zoo siab vim lawv hais rau kuv tias:.
"Peb yuav nce mus lawm pem Huab Tais tsev.”
Nyem no peb txhais taw tau tsuj
koj cov rooj loog lawm os Yes Lus Xas Les.

Txais…

Yes Lus Xas Les, yog ib lub nroog
uas luag txhim tau zoo xwm yeem.
Muaj ib co xeem neeg nce mus pem Yes Lus Xas Les,
Yog Huab Tais cov xeem neeg.

Txais…

Lawv mus raws li txoj cai qhia rau His Xas Lais,
Kom tau ua tsaug cav txog Huab Tais lub Npe.
Nyob ntawd muaj ib co rooj txiav txim teeb tau tseg,
Yog cov rooj cia rau Das Vis tsev neeg.

Txais…

As Les Lus Yas:   ZAM 15: 4a, 5b

Txais: As les lus yas, as les lus yas.

Huab Tais hais tias:
Nej yuav nyob ruaj hauv kuv ib yam li kuv nyob hauv nej;
leej twg nyob ruaj hauv kuv mas nws yuav txi txiv ntau.

Txais: As les lus yas, as les lus yas.

Ntawv Moo Zoo:   ZAM 15: 1-8

Yes Xus hais rau nws cov thwj tim tias:
1 "Kuv yog tsob tseem hmab txiv cawv, kuv Txiv yog tus tswv cog txiv cawv.
2 Nyob hauv kuv, txoj hmab twg tsis txi txiv, mas kuv Txiv muab txiav pov tseg,
txoj hmab twg txi txiv, mas kuv Txiv tav nws ntsis kom nws txi txiv ncw dua tuaj.
3 Nej lub ntsis twb raug tav lawm, vim lo lus kuv tau hais rau nej.
4 Nej yuav nyob ruaj hauv kuv, ib yam li kuv nyob hauv nej. Tus ceg twg tsis txuas rau txoj hmab, mas nws txi tsis taus txiv nws tus kheej; nej kuj ib yam, nej yuav txi tsis taus txiv yog nej tsis nyob ruaj hauv kuv.
5 Kuv yog txoj hmab txiv cawv, nej yog cov ceg. Tus uas nyob ruaj hauv kuv thiab kuv nyob hauv nws, mas nws yuav txi txiv ntau; vim tias yog tsis muaj kuv mas nej ua tsis tau dab tsi li.
6 Yog leej twg tsis nyob hauv kuv, luag yuav muab nws pov tseg rau sab nraud xws li tus ceg ntoo, ces nws yuav qhuav mus. Luag yuav sau cov ceg qhuav mus pov rau hauv hluav taws kom kub hnyiab tas.
7 Yog nej nyob ruaj hauv kuv, thiab kuv cov lus nyob ruaj hauv nej,
mas yog nej xav tau dab tsi nej thov, ces yuav tshwm raws li nej thov rau nej.
8 Qhov yuav ua kom kuv Txiv tau koob meej, yog qhov tias, nej txi txiv ntau thiab nej ua kuv thwj tim.”

Tim     11     lub     5     Hlis     2023

Hnub Tsib Lis Piam Tsib Caij Hla Xyoo ABC Nruab Lis Piam Xyoo I & II
Lectionary: 288

Zaj Nyeem Ib:   HAUJ LWM 15: 7-21

7 Thaum lawv twb tau sib cav ntau heev lawm,
Pob Zeb thiaj sawv thiab hais rau cov Hauv Paus Xa Lus thiab cov txwj laus tias: "Kuv cov kwv tij, nej twb paub lawm hais tias txij thaum lub hauv paus los, Tswv Ntuj tau xaiv kuv nyob nruab nrab hauv nej, kom yog vim kuv lub ncauj ces cov teev pej kum dab tau hnov lub Moo Zoo thiab los ntseeg.
8 Ces Tswv Ntuj tus uas paub neeg lub siab, nws twb tau ua tim khawv txog qhov no,
thaum uas nws pub Leej Ntuj Plig Ntshiab rau lawv ib yam li nws tau pub rau peb lawm.
9 Nws tsis saib lawv thiab peb yog neeg sib txawv, vim tias nws twb ntxuav lawv lub siab
kom dawb nyob hauv txoj kev ntseeg lawm.
10 Tim li cas nyem no nej thiaj li xav sim Tswv Ntuj, nej thiaj xav muab ib tug quab los tso rau saun  
cov thwj tim xub pwg, uas peb cov yawg koob thiab peb twb tsis muaj zog ris?
11 Ntawm peb mas peb ntseeg tias yog Huab Tais Yes Xus
lub txiaj ntsim cawm peb ib yam li cawm lawv thiab."
12 Ces sawv daws nyob ntsiag to. Lawv mloog Paj Lug thiab Npas Nas Npes nkawd piav txog
cov cim thiab cov hwj huam uas Tswv Ntuj tau siv nkawd ua nyob hauv tsoom neeg teev pej kum dab.
13 Thaum nkawd hais lus ntsiag lawm, Yas Kos thiaj qhib ncauj hais tias:
"Kwv tij sawv daws, nej mloog kuv hais.
14 Xis Moos twb tau piav tias Tswv Ntuj xub tau tuaj kom tau xaiv
ib haiv neeg nyob hauv cov neeg teev pej kum dab los rau nws lub npe.
15 Qhov ntawd raug raws li cov Yaj Saub cov lus sau cia tias:
16 ‘Dhau ntawd lawm, kuv yuav rov qab los, kuv yuav rov txhim Das Vis lub tsev tsam phooj uas vau lawm; tej yam uas pob tas, kuv yuav rov txhim rau, ces kuv yuav tsa kom nws rov sawv;
17 kom tas lwm cov neeg thiab tas cov teev pej kum dab, uas luag hu txog kuv lub npe rau saum lawv, tau los nrhiav Huab Tais.
18 Huab Tais, tus tau ua tej yam no uas neeg yeej paub thaum ntxov los lawm, nws hais li ntawd.’
19 Vim li no, mas kuv thiaj pom zoo tias kom tsis txhob ua nyuaj
rau cov neeg teev pej kum dab uas tig los ntseeg Tswv Ntuj.
20 Tiam sis peb yuav sau ntawv qhia rau lawv kom caiv tej yam tsis huv yog vim tej dab mlom, caiv kev sib yuav tsis raug cai, caiv cov nqaij pos tuag, thiab caiv ntshav.
21 Hais txog Mais Xes mas, tau ntau tiam los lawm, yeej muaj cov neeg uas tshaj txog nws nyob hauv txhua lub nroog thaum lawv nyeem nws tej lus hauv cov Tsev Txoos niaj hnub xas npas tos lawm."

NPN   96: 1-2a, 2b-3, 10

Txais: (3) Nej cia li tshaj tswv Ntuj cov hauj lwm txaus qhuas rau txhua haiv neeg paub.
Los: As les lus yas.

Nej hu ib zag nkauj tshiab rau HUAB TAIS;
tas txhua teb chaws, nej hu nkauj rau HUAB TAIS.
Nej hu nkauj rau HUAB TAIS, nej cav txog nws lub npe.

Txais: (3) Nej cia li tshaj tswv Ntuj cov hauj lwm txaus qhuas rau txhua haiv neeg paub.
Los: As les lus yas.

Nej tshaj txog nws txoj kev cawm hnub dhau hnub .
Nej piav txog nws lub hwj chim rau cov kuj cuab hnov,
piav txog nws cov hauj lwm txaus qhuas rau txhua haiv neeg paub.

Txais: (3) Nej cia li tshaj tswv Ntuj cov hauj lwm txaus qhuas rau txhua haiv neeg paub.
Los: As les lus yas.

Nej hais rau cov naiv neeg tias: HUAB TAIS yog tus vaj.
Nws tau tsim lub ntiaj teb kom nyob ruaj, muab tshem tsis tau;
nws tswj cov haiv neeg raws txoj kev ncaj.

Txais: (3) Nej cia li tshaj tswv Ntuj cov hauj lwm txaus qhuas rau txhua haiv neeg paub.
Los: As les lus yas.

As Les Lus Yas:   ZAM 10: 27

Txais: As les lus yas, as les lus yas.

Huab Tais hais tias: Kuv cov yaj mloog kuv lub suab;
kuv paub kuv cov yaj, kuv cov yaj raws kuv qab mus.

Txais: As les lus yas, as les lus yas.

Ntawv Moo Zoo:   ZAM 15: 9-11

Yes Xus hais rau nws cov thwj tim tias:
9 “Ib yam li Leej Txiv nyiam kuv, kuv kuj nyiam nej ib yam li ntawd. Nej nyob ruaj hauv kuv txoj kev nyiam mog.
10 Yog nej coj kuv cov lus qhia, mas nej yuav nyob ruaj hauv kuv txoj kev nyiam, ib yam li kuv coj kuv Txiv cov lus qhia thiab kuv nyob ruaj hauv nws txoj kev nyiam.
11 Kuv qhia tej no rau nej kom kuv txoj kev zoo siab nyob hauv nej
thiab kom nej txoj kev zoo siab nyob puv npo.”

Tim     12     lub     5    Hlis     2023

Hnub Rau Lis Piam Tsib Caij Hla Xyoo ABC Nruab Lis Piam Xyoo I & II
Lectionary: 289

Zaj Nyeem Ib:   HAUJ LWM 15: 22-31

22 Cov Hauv Paus Xa Lus thiab cov txwj laus nrog tas lub Koom Txoos pom zoo, ces lawv txiav txim tias cia xaiv lawv ob peb leeg sawv lawv cev nrog Paj Lug thiab Npas Nas Npes nkawd mus As Caus Kus. Lawv thiaj xaiv Yus Das uas tseem hu ua Npas Xas Npas, thiab Xis Las nkawd, uas yog ob tug thawj coj nyob hauv cov kwv tij.
23 Lawv sau ib tsab ntawv li no rau nkawd nqa mus: "Cov Hauv Paus Xa Lus thiab cov txwj laus,
uas yog nej cov kwv tij, xa lus tuaj rau cov kwv tij uas yog cov pej kum neeg los txais kev ntseeg nyob As Caus Kus, nyob Xis Lias teb, thiab nyob Xis Lis Xias teb: Noj qab nyob zoo rau nej sawv daws.
24 Peb tau hnov tias muaj ib co neeg tuaj ntawm peb pab neeg tuaj,
lawv tau hais ib co lus ua kom nej ntxhov siab thiab ua kom nej lub tswv yim nyob tsis tus;
tiam sis peb tsis tau tso cai kom lawv tuaj hais cov lus ntawd.
25 Peb thiaj li tau koom ib lub siab pom zoov tias cia peb xaiv ib co sawv peb chaw
xa nrog ob tug kwv tij Npas Nas Npes thiab Paj Lug nkawd tuaj cuag nej.
26 Npas Nas Npes thiab Paj Lug nkawd yog ob tug neeg zoo siab siv
nkawd lub neej los tsob hwb peb tus Huab Tais Yes Xus Pleev lub Npe.
27 Ua li mas peb tso Yus Das thiab Xis Las nkawd tuaj,
kom nkawd tuaj hais tib co lus xwb, tim ncauj tim lus kiag rau nej tias:
28 ‘Leej Ntuj Plig Ntshiab thiab peb tau pom zoo txiav tias
yuav tsis yuam ib lub nra ntxiv rau nej ris, tsuas kom nej coj tej yam tseem ceeb raws li no xwb:
29 kom caiv cov nqaij txi dab, thiab caiv ntshav, thiab caiv cov nqaij muab pos tuag, thiab caiv kev sib yuav tsis raug cai. Yog nej caiv raws li no ces nej coj tau zoo lawm. Nej nyob kaj lug mog."
30 Cov ntawd thiaj tau sawv kev mus. Thaum mus txog As Caus Kus lawm, lawv hu sawv daws tuaj sib sau ua ke, ces nkawd muab tsab ntawv rau lawv.
31 Thaum cov neeg nyeem tsab ntawv ntawd, mas lawv zoo siab kawg tias cov lus ntawd txhawb lawv ntau.

NPN   57: 8-9, 10+12

Txais: (10a) Kuv yuav ua koj tsaug nyob hauv cov haiv neeg, Huab Tais.
los: As les lus yas.

Kuv lub siab nyob ruaj nreb, Tswv Ntuj, kuv lub siab nyob ruaj nreb.
Kuv yuav hu nkauj, yuav seev ib zaj cav txog koj.
Kuv tus ntsuj plig, koj tsim dheev los mas;
thaj cheej thiab nkauj nog ncas, nej cia li tsim dheev!
Kuv yuav tsa kom lub hnub kaj ntug sawv tawm tuaj.

Txais: (10a) Kuv yuav ua koj  tsaug nyob hauv cov haiv neeg, Huab Tais.
los:   As les lus yas.

Kuv yuav ua koj tsaug nyob hauv cov haiv neeg, Huab Tais,
kuv yuav hu nkauj qhuas txog koj nyob hauv tsoom kuj cuab.
Vim koj txoj kev khuv leej loj siab npaum cov txheej ntuj saud,
thiab koj txoj kev ua ncaj loj siab npaum lub ntuj ntsuab.
Tswv Ntuj, ua kom koj nto koob meej nyob txheej ntuj saud,
thiab kom koj lub hwj chim ci tuaj rau saum tas lub ntiaj teb!

Txais: (10a) Kuv yuav ua koj tsaug nyob hauv cov haiv neeg, Huab Tais..
los: As les lus yas.

As Les Lus Yas:   ZAM 15: 15b

Txais: As les lus yas, as les lus yas.

Huab Tais hais tias, kuv hu nej ua kuv cov phooj ywg,
vim kuv tau qhia rau nej paub tas puas tsav yam uas Leej Txiv hais rau kuv lawm.

Txais: As les lus yas, as les lus yas.

Ntawv Moo Zoo:   ZAM 15: 12-17

Yes Xus hais rau nws cov thwj tim tias:
12 “Kuv lo lus qhia yog lo no: nej yuav sis nyiam sis hlub zoo li kuv nyiam kuv hlub nej.
13 Tsis muaj leej twg muaj txoj kev nyiam loj tshaj no lawm:
Yog siv yus txoj sia los rau yus cov phooj ywg.
14 Nej yog kuv cov phooj ywg yog nej ua raws li qhov kuv qhia rau nej.
15 Kuv tsis hu nej ntxiv ua tub txib, vim tus tub txib tsis paub qhov uas tus tswv ua. Tab sis kuv hu nej ua phooj ywg, vim kuv tau qhia tas ib puas tsav yam uas kuv hnov ntawm kuv Txiv los rau nej lawm.
16 Tsis yog nej xaiv kuv, yog kuv xaiv nej, thiab yog kuv xa nej mus kom nej txi ib co txiv uas nyob ruaj, kom xwv nej tuav txog kuv lub npe thov yam twg ntawm Leej Txiv, mas nws yuav muab rau nej.
17 Qhov kuv hais kom nej ua yog kom nej sib nyiam sib hlub.”

Tim     13     lub     5     Hlis     2023

Hnub Xya Lis Piam Tsib Caij Hla Xyoo ABC Nruab Lis Piam Xyoo I & II
Lectionary: 290

Zaj Nyeem Ib:   HAUJ LWM 16: 1-10

1 Paj Lug kuj mus txog Des Npes thiab Lis Ros thiab; nyob ntawd muaj ib tug thwj tim hu ua Tis Mos Tes; nws niam yog ib tug poj niam Yus Das txais kev ntseeg, tiam sis nws txiv yog ib tug neeg Hes Las.
2 Cov kwv tij nyob Lis Ros thiab nyob Is Kos Nias sawv daws hais lus zoo kawg txog nws.
3 Paj Lug xav coj Tis Mos Tes nrog nws ua ke, Paj Lug thiaj kom Tis Mos Tes mus ua lub cim txiav tawv, vim muaj ib co Yus Das nyob thaj tsam ntawd, thiab sawv daws paub tias nws txiv yog neeg Hes Las.
4 Paj Lug lawv mus hla ib lub nroog dhau ib lub nroog, lawv mus txog twg mas lawv tshaj thiab txhob kom sawv daws coj txoj cai uas cov Hauv Paus Xa Lus thiab cov txwj laus nyob Yes Lus Xas Les tau txiav.
5 Ua li mas niaj hnub cov Koom Txoos loj hlob khov zuj zus nyob hauv txoj kev ntseeg,
thiab huam vam coob ntxiv tuaj.
6 Paj Lug lawv taug kev mus hla cov teb chaws Fis Zias thiab Nkas Las Tias,  vim Leej Ntuj Plig tsis kheev lawv tshaj lub Moo Zoo nyob As Xias teb.
7 Thaum lawv tuaj txog ntawm ciam teb Mis Xias, lawv xav mus rau Npis Tis Nias teb,
tab sis Yes Xus Leej Tswv Yim tsis kheev.
8 Ces lawv hla Mis Xias teb nqes mus rau nram lub tsheej Thuas.
9 Thaum hmo ntuj, Paj Lug txawm yees pom ib tug neeg Mas Xes Dos Nias sawv ntsug
ntawm nws xub ntiag thov nws tias: "Koj hla tuaj rau Mas Xes Dos Nias teb, tuaj pab peb!"
10 Paj Lug pom li ntawd tas, peb thiaj nrhiav kev mus rau Mas Xes Dos Nias tam sis ntawd,
vim peb to taub tias Tswv Ntuj hu peb mus tshaj lub Moo Zoo rau lawv cov ntawd.

NPN   100: 1b-2, 3, 5

Txais: (2a) Kom tas lub ntiaj teb qw zoo siab rau Tswv Ntuj.
los: As les lus yas.

Tas txhua teb chaws, nej hu nkauj zoo siab rau HUAB TAIS!
Nej xyiv fab hlo luag ntxhi tsob hwb HUAB TAIS ;
nej hu nkauj zoo siab chaws los ntawm nws xub ntiag!


Txais: Kom tas lub ntiaj teb qw zoo siab rau Tswv Ntuj.
los: As les lus yas.

Nej yuav tsum pau tias HUAB TAIS yog Tswv Ntuj.
Nws tsim peb los, peb yog nws tug,
peb yog nws haiv neeg, yog pab yaj nws zov.

Txais: Kom tas lub ntiaj teb qw zoo siab rau Tswv Ntuj.
los: As les lus yas.

HUAB TAIS muaj lub siab zoo,
nws txoj kev ua zoo yuav nyob mus li,
nws ua ncaj rau peb txheej dhau txheej.

Txais: Kom tas lub ntiaj teb qw zoo siab rau Tswv Ntuj.
los: As les lus yas.

As Les Lus Yas:   KLX 3: 1

Txais: As les lus yas, as les lus yas.

Yog nej twb tau nrog Leej Pleev sawv rov los lawm,
mas nej cia li nrhiav tej yam nyob txheej saud,
uas yog qhov chaw Leej Pleev nyob zaum rawv ntawm Tswv Ntuj phab xis.

Txais: As les lus yas, as les lus yas.

Ntawv moo Zoo:   Zam 15: 18-21

Yes Xus hais rau nws cov thwj tim tias:
18 "Yog lub qab ntuj neeg ntxub nej, mas nej yuav tsum paub tias lawv twb ntxub kuv ua ntej lawm.
19 Yog nej yog lub qab ntuj neeg tug, mas qab ntuj neeg yuav nyiam yam uas yog nws tug.
Tab sis vim nej tsis yog qab ntuj neeg tug, rau qhov kuv tau xaiv nej thau nej
hauv lub qab ntuj neeg los lawm mas lub qab ntuj neeg thiaj ntxub nej.
20 Nej nco ntsoov lo lus uas kuv tau hais rau nej tias: ‘Tus tub txib tsis loj dua nws tus tswv.’ Yog lawv twb hiam kuv, mas lawv kuj yuav hiam nej thiab. Yog lawv khaws kuv lo lus, mas lawv kuj yuav khaws nej lo lus thiab.
21 Lawv yuav ua tas puas tsav yam ntawd rau nej vim kuv lub npe, rau qhov lawv tsis paub Tus xa kuv tuaj.”

Tim     15     lub     5     Hlis     2023

Hnub Ob Lis Piam Rau Caij Hla Xyoo ABC Nruab Lis Piam Xyoo I & II
Lectionary: 291

XHLT:    LN Isidore    

Zaj Nyeem Ib:   HAUJ LWM 16: 11-15

11 Peb caij nkoj nyob Thuas ncaj qha mus rau Xas Mos Thas; hnub tom qab peb mus rau Nias Pos Lis.
12 Txog ntawd, peb mus ntxiv rau Fis Lis Pos, ib lub tsheej tseem ceeb nyob hauv thawj lub cheeb tsam
Mas Xes Dos Nias, uas yog ib lub xeev cov Los Mas kav. Peb nyob ob peb hnub hauv lub nroog ntawd.
13 Txog hnub xav npas tos, peb tawm mus rau sab rooj vag nraud, mus rau ntawm ib tug ntug dej,
uas peb xav tias yog ib qho chaw zoo rau neeg tuaj teev ntuj.
Peb zaum, thiab peb hais lus rau cov poj niam tuaj sib sau rau ntawd.
14 Muaj ib tug poj niam hu ua Lis Dias, nws yog ib tug neeg muag cov ntaub liab tsam xem,
nyob Thias Tis Las tuaj; nws yog ib tug neeg hwm Tswv Ntuj, nws thiaj ua zoo mloog,
ces Huab Tais qhib nws lub siab kom kub siab nyiam tej yam uas Paj Lug hais.
15 Thaum Lis Dias thiab nws tsev neeg txais lub cim ntxuav tas, nws thov peb li no: "Yog nej saib kuv yog ib tug neeg ntseeg txog Huab Tais, mas thov nej los hauv kuv tsev thiab los so." Ces peb thiaj tau ua raws li nws hais.

NPN   149: 1b-2, 3-4, 5-6a+9b

Txais: (4a) Huab Tais zoo siab nyob hauv nws haiv neeg.
los: As les lus yas

Nej hu ib zaj nkauj tshiab rau HUAB TAIS,
nej cav txog nws nyob hauv tsoom ntseeg lub txoos.
Kom His Xas Lais cia li zoo siab nyob hauv tus tau tsim lawv los
kom Xis Yoos cov me nyuam luag ntxhi nyob hauv lawv tus vaj.

Txais: (4a) Huab Tais zoo siab nyob hauv nws haiv neeg.
los: As les lus yas

Lawv yuav ua kev lom zem yoj cev cav txog nws lub npe,
lawv yuav hu nkauj cav txog nws nrog suab nruas thiab suab nkauj nog ncas.
Vim HUAB TAIS hlub nws haiv neeg,
nws muab txoj kev yeej tsam los ua zam npua cov neeg me.

Txais: (4a) Huab Tais zoo siab nyob hauv nws haiv neeg.
los: As les lus yas

Kom cov muaj lub siab ntseeg hom khaj nyob hauv txoj kev muaj hwj chim;
lawv yuav hu nkauj zoo siab nyob hauv lawv tej chaw nyob;
lawv lub qa tsuas muaj qw suab cav txog Tswv Ntuj.
Lub hwj chim no yog txhua tus ntseeg txog nws lub hwj chim. As les lus yas.

Txais: (4a) Huab Tais zoo siab nyob hauv nws haiv neeg.
los: As les lus yas

As Les Lus Yas:   ZAM 15: 26b, 27a

Txais: As les lus yas, as les lus yas.

Huab Tais hais tias:
Leej Tswv Yim muaj qhov tseeb yuav ua tim khawv txog kuv,
thiab nej kuj yuav ua tim khawv txog kuv thiab.

Txais: As les lus yas, as les lus yas.

Ntawv Moo Zoo:   ZAM 15: 26—16:4a

Yes Xus hais rau nws cov thwj tim tias:
26 “Thaum Leej Nplij Neeg tuaj txog, uas yog tus kuv yuav xa ntawm Leej Txiv tuaj rau nej,
yog Leej Ntuj Plig muaj qhov tseeb uas tuaj ntawm Leej Txiv tuaj, nws yuav ua tim khawv txog kuv.
27 Nej kuj yog kuv cov tim khawv thiab, vim nej tau nrog kuv txij thaum lub hauv paus los lawm.
16:1 Kuv xub hais tej no rau nej kom nej txhob ntog.
2 Luag yuav ntiab nej tawm hauv cov tsev txoos mus. Yuav muaj ib lub caij
uas txhua tus muab nej tua yuav xav tias yog nws ua ib qho los hwm Tswv Ntuj.
3 Lawv ua li ntawd vim lawv tsis paub Leej Txiv thiab tsis paub kuv.
4a Kuv hais tej no rau nej, kom thaum txog lub sij hawm lawv ua li ntawd, nej yuav nco txog tias kuv twb xub hais qhia rau nej lawm.”

Tim     16     lub     5     Hlis     2023

Hnub Peb Lis Piam Rau Caij Hla Xyoo ABC Nruab Lis Piam Xyoo I & II
Lectionary: 292

Zaj Nyeem Ib:   HL 16: 22-34

22 Tas tsoom sid nyob Fis Lis Pos koom ua phem rau Paj Lug thiab Xis Las nkawd;
cov nom tswv kom lawv muab nkawd tej khaub ncaws hle, thiab muab pas nplawm nkawd.
23 Lawv muab nkawd nplawm ntau nplawg sab kawg, ces lawv muab nkawd pov rau hauv tsev loj faj.
Lawv ceeb toom rau tus saib tsev loj faj kom yuav tsum zov nkawd zoo zoo.
24 Tus saib tsev loj faj hnov lawv hais li ntawd, mas nws coj nkawd mus kaw hauv chav tsev kaw uas
nyob hauv nruab nrog tsev loj faj, thiab tseem xuas saw khi nkawd ko taw tib si rau ntawm ib tug ncej.
25 Thaum ib tag hmo, Paj Lug thiab Xis Las nkawd teev ntuj hu nkauj cav txog Tswv Ntuj,
cov neeg nyob txim mloog nkawd.
26 Ib sij huam txawm muaj ib qho av qeeg loj loj, ua rau lub tsev loj faj tej taw ntsa ua zog koog,
tas cov qhov rooj cia li qhib plho tam sim ntawd, hos cov saw khi cov neeg raug txim plam tas huv tib si.
27 Tus saib tsev loj faj tsim dheev los, nws pom cov qhov rooj qhib lug, ces nws rho hlo nws rab ntaj,
nws yuav rov tua nws, vim nws xav tias cov neeg raug txim twb khiav dim tas lawm.
28 Tab sis Paj Lug qw ib suab nrov nrov tias: "Koj txhob ua dab tsi rau koj tus kheej,
sawv daws tseem nyob ntawm no tas huv tib si."
29 Tus saib tsev loj faj thiaj kom lawv taws teeb, ces nws maj nroos nkag los,
nws los txhos caug tshee na ntawm Paj Lug thiab Xis Las nkawd ko taw.
30 Nws coj nkawd tawm sab nraud, nws hais rau nkawd tias:
"Ob tug hlob, kuv yuav ua dab tsi kuv thiaj yuav txais kev cawm?"
31 Nkawd teb tias: "Koj ntseeg txog Huab Tais Yes Xus, ces koj thiab koj tsev neeg yuav txais kev cawm."
32 Ces nkawd qhia Huab Tais Lo Lus rau nws, thiab rau cov neeg hauv nws tsev tas huv tib si.
33 Thaum ib tag hmo ntawd, tus saib tsev loj faj coj nkawd los thiab ntxuav nkawd cov qhov txhab,
ces nws thiab tas nws tsev neeg huv si txais lub cim ntxuav tam sim ntawd.
34 Nws coj nkawd nce mus saum nws tsev, nws rau mov rau nkawd noj;
nws thiab tas nws tsev neeg huv si zoo siab, vim lawv tau los ntseeg txog Tswv Ntuj lawm.

NPN   138: 1-2ab, 2cde-3, 7c-8

Txais: (7c) Huab Tais, koj sab tes xis cawm kuv.
Los: As les lus yas.

Kuv yuav ua koj tsaug, HUAB TAIS, tas kuv lub siab ntsws,
vim koj tau hnov kuv lub ncauj cov lus thov;
kuv yuav hu nkauj cav txog koj nyob ntawm tsoom tshiab xub ntiag;
kuv yuav tuaj pe hawm koj nyob hauv koj lub tuam tsev ntshiab
thiab yuav ua tsaug rau koj lub npe.

Txais: (7c) Huab Tais, koj sab tes xis cawm kuv.
Los: As les lus yas.

Vim koj lub siab zoo thiab koj txoj kev tseeb,
koj tau ua kom koj lub npe thiab koj txoj kev cog lus
yog qhov loj tshaj tas txhua yam.
Thaum kuv hu, koj tau teb kuv, koj tau ntxiv zog
rau kuv kom kuv lub zog loj tuaj nyob hauv kuv.

Txais: (7c) Huab Tais, koj sab tes xis cawm kuv.
Los: As les lus yas.

Koj txhais tes xis cawm kuv.
HUAB TAIS yuav ua kom tiav tej yam nws tau ua rau kuv;
HUAB TAIS, koj lub siab zoo yuav nyob mus li;
thov koj txhob muab yam hauj lwm koj txhais tes tau ua tso pov tseg.

Txais: (7c) Huab Tais, koj sab tes xis cawm kuv.
Los: As les lus yas.

As Les Lus yas:   ZAM 16: 7, 13

Txais: As les lus yas, as les lus yas.

Huab Tais hais tias:
Kuv yuav xa Leej Tswv yim qhia qhov tseeb tuaj rau nej,
nws yuav coj nej mus txog txhua yam tseeb.

Txais: As les lus yas, as les lus yas.

Ntawv Moo Zoo:   ZAM 16: 5-11

Yes Xus hais rau nws cov thwj tim tias:
5 “Nyem no kuv yuav mus cuag Tus Xa kuv tuaj. Nej tsis muaj leej twg nug kuv tias: ‘Koj yuav mus qhov twg?’
6 Tiam sis vim kuv hais tej no rau nej, ces nej muaj kev tu siab nyob puv nej siab ntsws.
7 Tab sis kuv hais qhov tseeb rau nej tias: Cia kuv mus mas yog qhov zoo dua rau nej.
Vim yog kuv tsis mus, mas Leej Nplij Neeg yuav tsis tuaj nyob hauv nej.
Hos yog kuv mus, mas kuv yuav xa nws tuaj rau nej. o
8 Thaum nws tuaj txog, nws yuav ua kom lub qab ntuj neeg paub meej
txog txoj kev txhaum, txog txoj kev ncaj, thiab txog txoj kev raug txim:
9 txoj kev txhaum, vim lawv tsis ntseeg txog kuv,
10 txoj kev ncaj, vim kuv yuav mus cuag Leej Txiv, ces nej yuav tsis pom kuv ntxiv,
11 txoj kev raug txim, vim tus tswj lub qab ntuj neeg twb mus raug txim lawm.”

Tim    17    lub     5     Hlis     2023

Hnub Plaub Lis Piam Rau Caij Hla Xyoo ABC Nruab Lis Piam Xyoo I & II
Lectionary: 293

Zaj Nyeem Ib:   HAUJ LWM 17: 15, 22—18:1

15 Cov neeg coj Paj Lug kev xa nws mus txog ntua As Thes Nas, lawv mam rov qab los, lawv coj Paj Lug cov lus rov los rau Xis Las thiab Tis Mos Tes nkawd kom nkawd mus caum Paj Lug sai li sai tau.
22 Ces Paj Lug mus sawv ntsug ntawm lub rooj txwj laus As Les Os Pas Nkus, nws hais tias:
"Cov neeg As Thes Nas aw, raws li kuv pom mas nej yog ib co neeg muaj kev teev hawm zoo kawg nkaus.
23 Kuv tau mus yos ncig thiab mus xyuas nej cov tsev teev hawm, mas kuv pom muaj ib lub thaj
uas sau ib co lus tias : ‘Rau tus Tswv Ntuj peb tsis paub.’ Tus uas nej hawm,
tab sis nej tsis paub ntawd mas kuv tuaj tshaj txog nws rau nej paub.
24 Tus Tswv Ntuj tsim lub sim ceeb thiab tsim tas ib puas tsav yam nyob hauv lub sim ceeb, tus Huab Tais kav lub ntuj lub teb, nws tsis nyob hauv cov tsev teev hawm uas yog neeg ob txhais tes txhim.
25 Nws kuj tsis tas yuav siv neeg los tsob hwb nws vim nws xav tau yam ub yam no,
tiam sis nws yog tus uas pub txoj sia txoj pa thiab txhua yam rau sawv daws.
26 Nws tau tsim tas txhua haiv neeg tawm ntawm ib tug neeg xwb los nyob puv tas ntiaj teb,
thiab nws teem cov caij nyoog thiab cais cov ciam dej ciam av rau lawv nyob,
27 kom lawv nrhiav Tswv Ntuj, tej zaud lawv yuav tsum tau maj mam maub xuas nrhiav kom ntsib nws,
txawm tias nws twb yeej nyob tsis deb ntawm peb ib tug twg li.
28 Vim ‘peb muaj txoj sia, peb txawj ua zog, thiab ciaj taus ua tib neeg yog nyob hauv nws,’
xws li nej twb muaj ib co neeg txawj sau lus paj huam tseg tias: ‘Peb kuj yog nws caj ces thiab.’
29 Li ntawd, peb yog Tswv Ntuj caj ces, mas peb yuav tsis txhob xav tias Tswv Ntuj yog zoo li
ib tug duab kub, duab nyiaj, los duab pob zeb uas neeg lub tswv yim xav tau thiab txhais tes txua tau.
30 Tswv Ntuj tsis suav lub caij uas tib neeg tsis paub txog nws yav tas los lawd, tiam sis nyem no,
nws xav kom tas ib zeej tsoom nyob tas qhov txhia chaw sawv daws yuav tsum los thov txhaum.
31 Vim Tswv Ntuj twb tau teem ib hnub cia txiav txim rau lub qab ntuj neeg raws li txoj kev ncaj lawm,
thiab nws twb xaiv tau tus yuav txiav txim ntawd lawm; nws tau tsa tus ntawd sawv hauv cov tub tuag rov los, kom ib tsoom neeg paub tias yuav muaj tseeb li ntawd tiag."
32 Thaum lawv hnov hais txog kev sawv hauv cov tub tuag rov los, mas ib txhia pib thuam,
hos ib txhia hais rau Paj Lug tias: “Peb tseem xav hnov koj hais txog qhov ntawd dua lwm zaus."
33 Ces Paj Lug tso lawv tseg li ntawd.
34 Tsis kav, kuj muaj tus puav los raws Paj Lug thiab txais kev ntseeg.
Nyob hauv lawv muaj ib tug yog Dis Yos Nis Xus, uas nws yog ib tug kev txwj laus As Les Os Pas Nkus;
thiab kuj muaj ib tug poj niam hu ua Das Mas Lis, thiab ob peb leeg ntxiv .
18: 1 Dhau qhov no lawm, Paj Lug tawm hauv As Thes Nas mus, ces nws mus txog rau Kos Lis Nthos.

NPN   148: 1-2, 11-12, 13, 14

Txais: Lub ntuj thiab lub ntiaj teb puv nkaus koj lub hwj chim.
los: As les lus yas.

Nej nyob saum ntuj cav txog Huab Tais,
nej nyob saum tej chaw siab cav txog nws,
nws cov tshiab, nej cav txog nws,
nws cov peeb zeej, nej cav txog nws.

Txais: Lub ntuj thiab lub ntiaj teb puv nkaus koj lub hwj chim.
los: As les lus yas.

Kom tas cov vaj nyob ntiaj teb thiab tas txhua haiv neeg,
tas cov tub nom tub tsw thiab cov nom txiav txim nyob ntiaj teb,
cov tub nraug hluas thiab ntxhais nkauj xwb,
cov neeg laus thiab cov me nyuam yaus,

Txais: Lub ntuj thiab lub ntiaj teb puv nkaus koj lub hwj chim.
los: As les lus yas.

Kom lawv cia li cav txog Huab Tais lub npe ,
vim nws tib lub npe thiaj loj siab dua cov;
nws lub hwj xyeej nyob siab tshaj lub ntiaj teb thiab lub ntuj.

Txais: Lub ntuj thiab lub ntiaj teb puv nkaus koj lub hwj chim.
los: As les lus yas.

Nws tsa nws haiv neeg lub ntsej muag kom siab :
Vim li no kom sawv daws cov ntseeg nws yuav tsum cav txog nws,
kom cov tub ki His Xas Lais, lawv yog haiv neeg nyob ze nws,
cav txog nws. As les lus yas.

Txais: Lub ntuj thiab lub ntiaj teb puv nkaus koj lub hwj chim.
los: As les lus yas.

As Les Lus Yas:   ZAM 14: 16

Txais: As les lus yas, as les lus yas.

Kuv yuav thov Leej Txiv, ces nws yuav xa dua ib
tug Nplij Neeg los nrog nej nyob mus li.

Txais: As les lus yas, as les lus yas.

Ntawv Moo Zoo:   ZAM 16: 12-15

Yes Xus hais rau nws cov thwj tim tias:
“12 Kuv tseem tshuav ntau yam yuav hais rau nej, tab sis nyem no nej ris tsis taus.
13 Thaum Leej Tswv Yim qhia qhov tseeb tuaj txog, nws yuav coj nej mus rau qhov tseeb tas huv si.
Nws yuav tsis hais nws cov lus, tiam sis nws yuav hais qhov nws hnov,
thiab nws yuav tshaj rau nej txog tej xwm uas yuav tshwm sim tuaj.
14 Nws yuav ua kom kuv muaj koob meej, vim nws yuav coj yam uas yog kuv tug tuaj tshaj rau nej paub.
15 Tas ib puas tsav yam uas Leej Txiv muaj, mas kuj yog kuv tug huv tib si; vim li ntawd
kuv thiaj hais rau nej tias, Leej Tswv Yim yuav coj yam uas yog kuv tug tuaj tshaj rau nej paub.”

Tim      18     lub     5     Hlis     2023

Nyob cov teb chaws los puas cheeb koom txoos uas ua koob tsheej nco txog HT Yes Xus nce mus saum ntuj hnub tsib no, nej mus saib cov zaj nyeem rau hnub ntawd nyob hauv qab cov zaj nyeem no.

COV ZAJ NYEEM RAU HNUB TSIB LIS PIAM RAU CAIJ HLA
Lectionary: 294

XHLT:   LN Zam I, ua Vaj Qhia thiab tuag ua Tim Khawv

Zaj Nyeem Ib:    HAUJ LWM 18: 1-8

1 Dhau tej ntawd lawm, Paj Lug tawm hauv As Thes Nas mus, nws mus txog Kos Lis Nthos.
2 Nyob ntawd, nws ntsib ib tug neeg Yus Das hu ua As Kis Las, yug los nyob Poos Tus teb,
uas nyuam qhuav tsiv tim Is Tas Lis los, nrog nws poj niam hu ua Phis Xis Las, vim tus vaj Klaus Dis Yus ceeb toom kom tas cov Yus Das sawv daws yuav tsum tawm hauv Los Mas mus. Paj Lug thiaj mus xyuas nkawd.
3 Vim tias Paj Lug kuj ua txoj hauj lwm nkawd ua thiab, ces nws mus nrog nkawd nyob thiab ua hauj lwm. Lawv txoj hauj lwm yog xaws tsev tsam phooj.
4 Niaj hnub xas npas tos, Paj Lug mus nrog cov neeg sib cav nyob hauv lub tsev txoos.
Cov lus nws hais ua kom cov Yus Das thiab cov Hes Las ntseeg nws.
5 Thaum Xis Las thiab Tis Mos Tes nkawd nqes pem Mas Xes Dos Nias teb los txog lawm, mas Paj Lug siv nws lub sij hawm tas nrho los tshaj Lo Lus lawm xwb; nws zeem tseeb rau cov Yus Das tias Yes Xus yog Leej Pleev.
6 Tab sis lawv hais lus tiv Paj Lug thiab thuam nws, ces Paj Lug nchos nws cov ris tsho rau lawv
thiab hais rau lawv tias: "Cia kom nej cov ntshav rov poob los rau saum nej taub hau.
Kuv tsis yog tus ris nej lub txim txhaum ntxiv. Txij no mus kuv yuav mus tsham cov neeg teev pej kum dab lawm xwb."
7 Ces Paj Lug tawm ntawd mus, nws mus hauv ib tug hu ua Tis Tos Yus Tus lub tsev,
yog ib tug neeg teev hawm Tswv Ntuj lub tsev, uas nyob puab kiag ntawm lub tsev Txoos.
8 Khis Pus, uas yog tus saib lub tsev Txoos, kuj ntseeg txog Huab Tais nrog nws tsev neeg tas nhro,
thiab muaj ntau leej neeg Kos Lis Nthos hnov Paj Lug, lawv kuj los ntseeg thiab txais lub cim ntxuav.

NPN    98: 1, 2-3ab,3cd-4

Txais: (2b) Huab Tais muab nws hwj huam cawm neeg rau cov kuj cuab pom.
los: As les lus yas.

Nej hu ib zag nkauj tshiab rau HUAB TAIS,
vim nws ua tej yam loj muaj tsim txaus qhuas.
Nws sab tes xis ua kom nws yeej, nws sab npab ntshiab ua.

Txais: (2b) Huab Tais muab nws hwj huam cawm neeg rau cov kuj cuab pom.
los: As les lus yas.

HUAB TAIS ua kom sawv daws paub nws txoj kev cawm ;
nws muab nws txoj kev ncaj rau cov kuj cuab pom.
Nws rov nco txog nws txoj kev ua zoo
thiab kev pheej xeeb rau His Xas Lais tsev neeg.

Txais: (2b) Huab Tais muab nws hwj huam cawm neeg rau cov kuj cuab pom.
los: As les lus yas.

Tas cov npoo ntiaj teb kawg tau pom
peb tus Tswv Ntuj txoj kev cawm seej lawm
Tas txhua teb chaws, nej qw zoo siab cav txog HUAB TAIS mog!
Nej cuab suab hu nkauj, nej cav txog nws!

Txais: (2b) Huab Tais muab nws hwj huam cawm neeg rau cov kuj cuab pom.
los: As les lus yas.

As Les Lus Yas:   ZAM 14: 18

Txais: As les lus yas, as les lus yas.

Huab Tais hais tias: Kuv yuav tsis tso nej ua ntsuag,
kuv yuav rov los cuag nej, ces nej lub siab yuav zoo hlo.

Txais: As les lus yas, as les lus yas.

Ntawv Moo Zoo:   ZAM 16: 16-20

Yes Xus hais rau nws cov thwj tim tias:
16 "Tshuav me ntsis ntxiv xwb, ces nej yuav tsis pom kuv lawm,
tab sis ib me ntsis ntxiv, ces nej yuav rov pom kuv dua."
17 Muaj ob peb tug thwj tim sib tham tias: "Nws hais dab tsi li ntawd rau peb tias:
‘Tshuav me ntsis xwb, ces nej yuav tsis pom kuv lawm, tab sis ib me ntsis ntxiv,
ces nej yuav rov pom kuv dua,’ thiab nws hais tias: ‘Vim kuv mus cuag Leej Txiv’?"
18 Ces lawv hais tias: "Qhov ‘ib me ntsis’ uas nws hais ntawd yog li cas? Peb tsis paub nws xa hais txog dab tsi li."
19 Yes Xus paub tias lawv xav nug nws, ces nws hais rau lawv tias: "Puas yog nej rov sib nug nej txog qhov kuv hais tias: ‘Tshuav me ntsis xwb, nej yuav tsis pom kuv lawm, tab sis ib me ntsis ntxiv, nej yuav rov pom kuv dua’?
20 Kuv hais qhov muaj tseeb tiag rau nej tias, nej yuav quaj thiab nej yuav nyiav, hos lub qab ntuj neeg yuav zoo siab; nej yuav tu siab loj, tab sis nej txoj kev tu siab yuav hloov mus ua kev zoo siab.”

+++++++++++++++++++++++++++++

Hnub Tsib Lis Piam Rau Caij Hla

Hmoov Tsuj Xeeb YES XUS NCE MUS SAUM NTUJ  Xyoo ABC
Lectionary: 58

Zaj Nyeem Ib:   HAUJ LWM 1: 1-11

1 Tes Os Fis Los aw, nyob hauv kuv thawj phau ntawv,
kuv tau sau txog tas ib puas tsav yam uas Yes Xus tau pib ua thiab tau pib qhia,
2 mus txog hnub uas Leej Ntuj Plig Ntshiab tau tshoj nws hais nws cov lus kawg rau cov
Hauv Paus Xa Lus uas yog cov nws tau xaiv, ces nws raug luag coj mus rau saum ntuj lawm.
3 Lawv kuj yog cov uas nws tau tawm los muaj txoj sia rau lawv pom; tau plaub caug hnub tom qab lub caij nws raug txom nyem tas lawm, muaj ntau yam zeem tseeb tias nws tau tawm los rau lawv pom thiab tau tham txog Tswv Ntuj lub Ceeb Tsheej rau lawv.
4 Thaum lawv noj mov, nws hais rau lawv kom tsis txhob tawm hauv Yes Lus Xas Les mus,
“Nej nyob tos qhov uas Leej Txiv tau cog lus yuav xa tuaj tso, uas yog qhov nej tau hnov kuv hais txog tias:
5 ‘Zam tau ua kab ke ntxuav nyob hauv dej, hos nej, mas tshuav hnub puav ntxiv xwb,
nej yuav txais kab ke ntxuav nyob hauv Leej Ntuj Plig Ntshiab.’”
6 Thaum cov Hauv Paus Xa Lus los sib sau ua ke, lawv nug Yes Xus tias: "Huab Tais,
nyem no puas yog lub sij hawm koj yuav rov tsa txoj kev ua vaj nyob hauv His Xas Lais?"
7 Yes Xus hais rau lawv tias: "Tsis yog nej hauj lwm yuav paub txog cov caij nyoog
los lub sij hawm uas Leej Txiv tau teem cia raws li nws tus kheej tau txiav lawm.
8 Tab sis nej, mas nej yuav txais lub peev xwm los nyob hauv nej thaum Leej Tswv Yim Ntshiab
nqes los rau saum nej, ces nej yuav ua kuv cov tim khawv nyob Yes Lus Xas Les,
nyob thoob Yus Das teb thiab Xas Mas Lias teb, mus txog tim npoo ntiaj teb kawg."
9 Nws hais cov lus no tas, ces muaj dab tsi nqa nws nce siab zuj zus ntawm lawv qhov muag
ntsia ntsoov mus lawm; txawm  muaj ib tw huab los thaiv ces lawv tsis pom nws ntxiv.
10 Thaum Yes Xus nce mus lawm, lawv tseem nyob hab nuv ntawd ntsia ntsoov saum ntuj,
ces cia li muaj ob tug neeg hnav dawb los sawv ze ntawm lawv.
11 Nkawd hais tias: "Cov neeg Nkas Lis Lais, vim li cas nej sawv ntsug ntsia ntsoov saum ntuj zoo li no? Tus Yes Xus uas raug nqa ntawm nej mus rau saum ntuj lawm,
nws yuav rov los zoo nkaus li nej tau pom nws nce mus saum ntuj thiab."

NPN   47: 2-3, 6-7, 8-9

Txais: (6) Tswv Ntuj nce rau saum nws lub theej kiab,
           muaj suab qw zoo siab, muaj suab hom nrov rau Huab Tais.
Los:      As les lus yas.

Txhua haiv neeg, nej npuaj teg,
nej qw suab zoo siab rau Tswv Ntuj mas,
vim HUAB TAIS tus nyob siab, tus zoo tshaj,
yog tus vaj loj kav tas nrho lub ntiaj teb.

Txais: (6) Tswv Ntuj nce rau saum nws lub theej kiab,
           muaj suab qw zoo siab, muaj suab hom nrov rau Huab Tais.
Los:      As les lus yas.

Tswv Ntuj nce rau saum nws lub theej kiab, muaj suab qw zoo siab,
HUAB TAIS nce mus, muaj suab hom nrov doog diaj.
Nej hu nkauj cav txog Tswv Ntuj, nej hu nkauj cav txog nws,
Nej hu nkauj cav txog peb tus vaj, nej hu nkauj cav txog nws.

Txais: (6) Tswv Ntuj nce mus rau saum nws lub theej kiab,
           muaj suab qw zoo siab, muaj suab hom nrov rau Huab Tais.
Los:      As les lus yas.

Tus vaj kav tas lub ntiaj teb yog Tswv Ntuj,
nej hu nkauj paj nruag cav txog nws.
Tswv Ntuj tswj kav cov haiv neeg,
Tswv Ntuj zaum saum nws lub theej kiab ntshiab.

Txais: (6) Tswv Ntuj nce mus rau saum nws lub theej kiab,
           muaj suab qw zoo siab, muaj suab hom nrov rau Huab Tais.
Los:      As les lus yas.

(Cov Zaj Nyeem Ob muaj sib txawv rau xyoo A, los B, los C, nej mus xaiv cov zaj nyeem kom haum rau xyoo no).

Xyoo A
Zaj Nyeem Ob:   EFX 1: 17-23

Cov kwv tij nkauj muad,
17 Thov kom peb tus Huab Tais Yes Xus Pleev tus Tswv Ntuj, uas yog Leej Txiv tus muaj hwj chim,
pub ib lub tswv yim thoob tsib thiab txawj paub yav tom ntej rau nej, kom nej thiaj paub nws zoo.
18 Thov kom nej cov qhov muag hauv nej nruab siab txawj pom kev tuaj,
ces nej thiaj yuav paub txog tias, txoj kev cia siab uas los ntawm txoj kev Tswv Ntuj hu nej los yog dab tsi, txoj kev muaj hwj chim tej kev nplua nuj nyob hauv cov leej ntshiab txoj kev koom txais nws lub cuab tam yog dab tsi,
19 thiab nej thiaj yuav paub tias nws lub hwj huam uas nws siv los pab peb cov neeg ntseeg
loj tshaj npaum li cas, raws li lub peev xwm loj kawg nkaus uas nws tau siv,
20 thaum nws ua hauj lwm tsa Leej Pleev kom sawv hauv cov tub tuag rov los thiab tsa Leej Pleev zaum ntawm nws phab xis nyob saum cov txheej ntuj saud,
21 zaum nyob siab dua tas cov tshiab ua vaj, cov tshiab muaj hwj chim,
cov tshiab muaj hwj huam, cov tshiab ua huab tais, thiab siab dua txhua lub npe uas hu tau, tsis yog hauv lub zim txwv tiam no xwb tiam sis mus rau tiam yuav tuaj huv tib si.
22 Tswv Ntuj tso tas ib puas tsav yam rau hauv Leej Pleev qab xib taws
thiab tsa nws ua lub taub hau kav tas nrho lub Koom Txoos,
23 uas yog Leej Pleev lub Cev, yog qhov chaw muaj tas nrho tus uas nyob puv npo tas txhua tsav txhua yam huv tib si.  


As Les Lus Yas:   MT 28: 19a, 20b

Txais: As les lus yas, as les lus yas.

Huab Tais hais tias: Nej mus qhuab qhia rau tas txhua haiv neeg,
kuv yuav nrog nej nyob nraim mus txog thaum ntiaj teb kawg.

Txais: As les lus yas, as les lus yas.

Xyoo A
Ntawv Moo Zoo:   MT 28:16-20

16 Pab Kaum Ib leeg thwj tim mus txog Nkas Lis Lais teb, lawv mus saum lub roob uas Yes Xus teem rau lawv.
17 Thaum lawv pom Yes Xus, lawv pe hawm nws, tiam sis lawm tseem ua xyem xyav thiab.
18 Yes Xus txav los ze lawv, nws hais rau lawv tias:
"Ntuj pub ib puas tsav yam hwj huam nyob saum ntuj thiab nyob ntiaj teb no rau kuv lawm.
19 Ua li mas nej mus, nej ua kom tas ib tsoom haiv neeg los ua kuv thwj tim; nej hu txog Leej Txiv, thiab Leej Tub thiab Leej Ntuj Plig Ntshiab lub npe, nej ntxuav lawv.
20 Nej qhia kom lawv coj tas puas tsav yam uas kuv tau qhia kom nej coj.
Ntawm kuv, mas kuv nrog nej nyob mus li mus txog lub caij kawg.”