Tau txiaj ntsim vim teev Tswv Ntuj Txoj Kev Khuv Leej.

Txiaj ntsim ntawm kev Teev Tswv Ntuj txoj kev khuv leej .


Thaum lub 2 hlis 2014, kuv tus nyab mus daws cev tim tsev kho mob, yug tau tus me nyuam thawj hnub, hnub qab kuv txawm mus xyuas kuv tus nyab. Kuv mus txog kuv txawm muab kuv tus xeeb ntxwv puag, puag ces kuv txawm pom nws sab qaum tes doog thiab o; kuv txawm nug kuv tus nyab tias ua cas nws txhais tes zoo li no? Kuv tus nyeb teb tias: "twb yog tias nws cov ntshav liab ntau dhau lawm, lawv muab txhuav ntshav". Ces tib pliag xwb, tus ntxhais kho mob (imfermière) txawm los nqa hlo tus me nyuam, hais tias coj mus ntxuav no ces cia li coj lawm; coj mus ntev ntev tsis pom los, kuv nug ces ho hais tias yog coj mus ncu lawm, ob niam tub tsis los li. Hnub tom qab, mam rov mus nug dua ces lawv hais tias tus me nyuam tsis zoo li, xyov lawv tsis paub ua li cas li; vim thaum twg noj mis ces tus me nyuam ua tsis taus pa li. Yog nyob lub tsev kho mob uas kuv tus txiv (tus me nyuam yawg) tuag. Lawv coj tus me nyuam mus rau kem mob nyhav, lawv ntxig xov ntau txoj rau tus me nyuam, lawv tsis pub neeg mus xyuas coob lawm.

Kuj ua rau ob tug tub nyab no tag kev cia siab, nkaws yeej tsis npaj txaj chaw thiab khaub ncaws tos me nyuam li. Kuv thiaj hais rau kuv tus nyab hais tias nyab aw! ua cas tub neb tsis xyuas txaj chaw rau me nyuam naj? Kuv tus nyab kuj teb tias "lwm hnub mam xyuas" no xwb. Ces kuv kuj txhawj heev thiab, kuv tsis paub yuav ua li cas, ces kuv thiaj li tham rau kuv tus niam hluas, niam XH.Txiaj Hawj Yaj, nws thiaj hais rau kuv tias: "Mim, Maiv Paj Lug thiab niam ntxawm Txooj Tub lawv twb tso tau ib "zaj teev Tswv Ntuj txoj kev khuv leej" rau hauv cab sab, koj kuj muab cov ntawv ntawd los thov Ntuj rau tus me nyuam seb." Ces kuv kom nws qhia kuv seb nyob qhov twg, nws thiaj qhia kuv ces kuv thiaj hais rau kuv tus tub tias kom nws muab zaj "thov Tswv Ntuj txoj kev khuv leej" luam rau kuv; vim kuv qhov muag tsis pom kev zoo ces kuv ceeb laj saib hauv hlwb hlau. Kuv tus tub muab luam tau rau kuv ces kuv cia li teev kiag. Kuv tsis yog teev ib hnub ib zaug xwb, kuv teev ib hnub no xyov txog 200-300 zaj li lov xyov kuv tsis suav li lawm; kuv kom kuv ob tug me nyuam nrog kuv teev thiab. Kuv thov tau 3 hnub xwb ces lawv hais tias kuv tus xeeb ntxwv zoo me ntsis lawm, tau 7 hnub nkaus xwb ces lawv txawm muab xov rho tag nrho, 9 hnub kiag xwb ces kuv tus xeeb ntxwv zoo hlo, cia li tawm kiag tsev kho mob los tsis muaj mob dab tsi li lawm.

Kuv ua tsaug rau "Tswv Ntuj txoj kev khuv leej neeg".

Tus sau: Niam XH.Lis Vam Xab.