Tswv Ntuj lub Txiaj Ntsim

Tswv Ntuj lub Txiaj Ntsim.

Nyob zoo Xyoo Ntshiab rau tsoom nyeem sawv daws,

Kuv tau hais rau nej tias kuv yuav tuaj nrog nej tham txog ntawm TswvNtuj lub txiaj ntsim. Tiam sis kuv pheej hos tsis tau tuaj li, thov txim ntau vim kuv tsis xyeej siab li thiab vim kuv tsis muaj lub laj lim plab plaw yuav piav qhia tau rau nej meej hais txog TswvNtuj lub txiaj ntsim uas kuv tau txias los.

Peb ua neeg nyob, peb yeej tau txais Ntuj lub txiaj ntsim ntau ib yam li, nyob hauv ntawv ntshiab, cov leej ntshiab tau hais tseg tias lawv tau txais Ntuj lub txiaj tsim zoo li cas? Peb kuj tau txais ib yam li ntawd thiab, tab sis peb tsis paub xwb.

Yog li ntawd, hnub no kuv yuav tuaj qhias txog lub txiaj ntsim uas kuv tau txais ntawm TswvNtuj los:
Thaum kuv tseem mos mos liab, kuv tau mob yuav luag tuag, TxivPlig TxawjTeem tau coj kuv mus kho rau hauv lub tsev khomob nyob Sa Nyab Npus Lis, kuv thiaj li zoo.
Tom qab ntawd, thaum peb twb nyob Thaibteb lawm, kuv txiv Tub tuag tas lawm thiab, lub sij hawm ntawd, kuv muaj li 8 xyoo ntau mus rau 9 xyoos. Lub caij ntawd yog caij ntuj nag, dej Nab Nyaus huam hlob hlob, ntsuag kuj tuaj tuaj. Peb tsis muaj dab tsi noj ces kuv tus txivlaus thiaj tau coj peb mus lov ntsuag.
Thaum peb lov tau ntsuag tas lawm, peb rov los tsev, peb thiaj tau rov hla tus dej NabNyaus los; peb taug ib tug cav hla tus dej ntawd, kuv tus txivlaus coj kuv tus nus taug yav cav hla ua ntej, kuv yog tus lawv nkawd qab, hos kuv ob tug niamlaus lawd kuv qab thiab; thaum peb los txog nruab nrab yav cav, txoj hmab uas peb tuav, txawm vias peb, ces kuv niamlaus wb txawm pob kiag rau hauv dej lawm. Thaum ntawd tus dej huam loj loj.
Dej muab tshoob kuv niamlaus lawm, kuv ces txhais kotaw ho mus khuam rau ntawm tus niag nkhib ntoo, tab sis dej ntaus yav cev quav hlo ua ob ya, ib ya nyob sab cav pem no, hos ib ya nyob sab qab cav sab haud mus dua sab nrad lawm tab sis kuj tsis haus dej thiab.

Lub siab xav txog Niam Mab Liab, ces ho xav tau tias tej laus hais tias thaum poob deg, nyob hau dej ua tsis tau pa no.
Ces kuv thiaj li sim ua pa seb no, ces thiaj ua pa naj kuj ua tau pa ib yam li nyob saum nqhuab thiab.

Kuv txivlaus thiaj los muab tau kuv, tas ces thiaj mus muab tus niamlaus uas nrog dej ntws lawm. Nws kuj muab tau wb ob leeg; wb kuj tsis raug dab tsis li, kuj tsis haus dej li thiab.
Tas li ntawd, peb cia li los tsev lawm.

Cov lus timkhawv uas kuv nyuam qhuav hais tas los no,
yog qhia rau sawv daws paub tias "kuv ntseeg txog hais tais, yog Tswv Ntuj tau pab kuv los lawm."
Kuv ua Ntuj tsaug, thiab kuv thov tshaj rau SD. paub.

Ua li nej ne, nej puas tau muaj tej yam zoo li no?
Nej puas xav tau tias yog TswvNtuj pab nej?

Ua nej tshaug uas nej tau tuaj nyeem kuv cov lus tim khawv cav txog TswvNtuj.

Nyob zoo sib ntsib dua
MasLias

Nyob zoo Mas Lias,

Zoo siab pom nws rov tuaj xyuas peb thiab tseem tham tau ib zaj lus pov thawj rau peb kawm ntxiv.

Nws tham txaus ntshai ua luaj li, twb tsis hais txog qhov nws lub cev khuam tus cav es quav ua ob ya, tab txhais ko taw daig lawm xwb twb txaus ntshai. Yog nws muaj txoj kev ntseeg zoo, Niam Mab Liab thiaj li pab tau nws.