NTUJ MUAJ TXIAJ NTSIM LOJ RAU HMOOB.

Zaj 425- NTUJ MUAJ TXIAJ NTSIM LOJ RAU HMOOB.

A.Haiv Hmoob, twb raug ntuj cawm ntxov ntxov los lawm! Suav txij li lub zim txwv, uas Yawg Paj Cai sawv ua rog los. Uas cov tub rog Fuaj Kuj mus ntes tau Yawg Paj Cai cov Peeb Zeej los khi cuab nyob rau Xeev khuam.
Cov tub rog Fuaj Kuj muab cuab ua tej tsham leej, xuas ntaj txiav caj dab ua rau Hmoob tuag coob kawg. Lub Zim txwv ntawd, muaj ib tug Txiv Plig Huaj Kuj tuaj nyob Suav teb.
Nws paub paub lus Hmoo kawg, nws hnov txog tus xwm txheej no. Ces nws nqes pem Suav teb tuaj huj rog. Yog tus uas Hmoob hu ua tswv cheem rog no ntag.
Nws tuaj hais kom tsoom tub rog Fuaj Kuj, tsis txhob muab Tsoom me nyuam Hmoob tua zoo li ntawd. Cov me nyuam Hmoob tus kev chawj chim tsis yog ntxub cov tub rog Fuaj Kuj.
Yog tus nqi sau se yaj yeeb no, kim dhau lawm, lawv them tsis tau lawv thiaj sawv tawm tsam xwb. Tso cov me nyuam Hmoob no rov mus tsev.
Zaum ib no, kuj yog Tswv Ntuj tsev neeg tuaj cawm Haiv Hmoob. Ntawm tus nqi se yaj Yeeb, tus tswv cheem rog no, nws tseem muaj ntaub ntawv piav txog lub zim txwv nws tuaj cawm Hmoob muaj ntaub ntawv sau tseg nyob Fuaj Kuj teb.
B. Tswv Ntuj tsev neeg tau cawm tsoom Hmoob zaum ob, yog lub zim txwv, uas Yawg Txiv Hlo Vaj Pov tau tawm mus nyob txawv teb chaws.
Yawg vaj Pov tsoom tub Peeb Zeej, nrog rau tej niam tej txi. Uas lawv tsis muaj kev tso siab nyob rau Los Tsuas teb. Lawv ntshai tsoom Nplog Liab coj lawv mus kawm txuj, ces muaj hnub mus xwb, tsis muaj hnub rov qab los.
Lawv raws Yawg hlob Vaj Pov, tuaj mus rau txawv teb chaws. Cov nqes dav hlau ntawd yog Tswv Ntuj tsev neeg ua tus qiv nyiaj rau tas tsoom Hmoob them lawv tus nqi dav hlau ya tuaj mus txog chaw.
Mus txog ua neej muaj mam them rov qab, feem coob txog caij txog nyoog, lawv khwv tsis muaj, los laus lawm lawv them tsis tau. Ces Tswv Ntuj tsev neeg kuj zam rau lawv mus tas tiv si lawm.
Cov them tau los lawv kuj txais tus qub nqi, tsis cuab paj tshaj li. Feem coob yog feem them tsis taus rov rau Tswv Ntuj tsev neeg los zam rau lawv, twb tau 40 xyoo lawm.
Tsis muaj leej twg tseem tshuav lawv nqis. Tej no kuj yog Tswv Ntuj tsev neeg ua pab tsoom Hmoob tuaj rau txawv teb chaws.
C.Tas nrho tsoom Hmoob tsis hais txiv neej poj niam, tub ntxhais hluas, uas sawv daws nce mus nto ib theem, kom paub kev sib xa xov rau txoj kev sib nug moo.
Los kev sib ua lag luam nrhiav nyiaj txiag, sib pab rau Tsoom Hmoob kev noj kev haus. Lub caij sawv das raug kev txom nyem, sib ncaim ib leej mus rau ib rab teb.
Tau kev sib nug moo thiab ua lag luam, los sib cawm tsev neeg, uas sawv daws siv cov ntawv Hmoob Las Tees. Hu ua ntawv Hmoob thoob teb {RPA} , no kuj yog Tswv Ntuj tsev neeg ua tus tsim los pub rau Tsoom Hmoob kom muaj ntawv hais tau Hmoob lus meej.
Thiaj tau kev sib xa xov los nug moo thaum sawv daws muaj kev sib ncaim mus nyob deb lawd. Ua rau Tsoom Hmoob lub siab kaj lawm ntau kawg.
Kuv ntseeg tias, Tswv Ntuj tseem tau ua ntau tshaj no, los pab peb Haiv Hmoob. Kuv tsis yog neeg political, mas kuv kuj tsis paub ntau tshaj no ntxiv mus.
Vim lub txiaj ntsim tawm hauv Tswv Ntuj tsev neeg no, los ntag. Kwv tij Tswv Ntuj hlub peb Haiv Hmoob loj paum no. Tsim nyog peb yuav nrog Tswv Ntuj koom siab hlub yus Haiv neeg yog tsoom txheeb ze yus tiag.
Peb yuav xyaum ua siab ntev, xyaum sib mloog lus, peb sawv daws tseem yog neeg ruam sib xws. Yus txhob rawm tsab ua tus neeg ntse, es tsis xav mloog leej twg!
Thaum peb tseem ua neeg ruam, mas li cas los peb tuaj yeem mus nyob ua ib nkuag. Lwm hnub peb sawv daws txawj ntse tas lawd, los peb kuj yuav tuaj yeem mus nyob ua ib tse, kom peb muaj kev sib raug zoo sib pab mus kom peb muaj lub zoo npe mog.

Sacramento tim 7/2/2019.
Yaj zoov Ntxheb X.H.