Xiong J.P nyob fab kis piav txog kev ntseeg yesxus thiab hmoob kab li kev cai

Nyob zoo tus muam maiv paj lug thiab tus phauj maiv tooj nrog rau leej choj cwj vuam chiv thiab nej cov phooj ywg sawv daws.

Ua ntej no kuv thov qhuas txog tus muam maiv paj lug thiab tus phauj maiv tooj uas neb muaj zoo lub peev xwm qhib tau lub vas sab hlwb hlau no los ua lub suab tshaj Vaj Yes Xus txoj kab xwm cawg neeg kom dim ntawm dab phem es rov tau mus ua Tswv Ntuj tub ki.kuv tau pom nej sawv daws tuaj qhia txog Yes Xus txoj moo zoo rau peh haiv hmoob nyob thoob ntiaj teb no tau hnov mas kuv zoo siab kawg li ua nej sawv daws tsaug ntau nawv mog. Vim kuv yog ib tug ntseeg nyob hauv lub koom txoos CATHOLIQUE thiab.

Hnub no kuv xav tuaj fim nej sawv daws nyob hauv no thiab. Mas ntxiv no mu kuv xav hias rau tsoom phooj ywg hmoob cov ntseeg lawm thiab cov tseem tsis tau ntseeg nej sawv daws uas yog kwj tij hmoob nyob thoob ntiaj teb paub tseeb meej tias. Txoj kev ntseeg Yes Xus no nws tsis yog leej twg tug li. Raws li niaj hnub no kuv tau hnov peb haiv hmoob feem coob hais mas lawv hais tias:
"Txoj kev mus ntseeg yesxus no yog luag mab sua li ntiag tug xwb. Tsis yog peb hmoob li. yog ntseeg Yes Xus ces yog peb tso peb poj yawg tseg mus teev luag li poj yawm lawm."

Hais txog qhov no mas yog peb hmoob to taub yuam kev lawm xwb vim tsis tau mus muab los tshawb fawb lub paus mus kawg ntsis kom paub meej tias nws yog dab tsi tiag. Yog tias hmoob
tseem muaj dua lwm tus Tswv Ntuj tsis koom nrog ntiaj teb neeg li mas thiaj yuav hais tau tias kev ntseeg Ntuj tsis yog peb hmoob li ntiag tug. Nyob saum ntuj thiab ntiaj teb no nws tsuas muaj ib tug Tswv Ntuj saib xyuas neeg ntiaj teb xwb tsis muaj lwm tus nyob qhov twg hlo li lawm. Mas kuv xav qhia tseeb rau nej cov kwv tij hmoob uas tseem tsis tau los ntseeg paub meej li no:
"Qhov uas niaj hnub no peb cov xub tau mus ntseeg Yes Xus lawm pheej muab los qhiaj rau nej zoo li no los yog kev hlub kev khuv leej txog nej xwb."

Vim nej yog peb kwv tij phooj ywg xws li ib tsev neeg xwb. Qhov no xav kom nej to taub zoo tias tsis yog peb cov uas xub ntseeg lawm xav haub ntxias dag rau nej. txoj kev ntseeg no cia kuv muab los ua piv txwv raws li ib lub tsev kiab khw uas lawv muag khoom rau hauv. Yog nej nceg mus txog lub kiab khw ntawd nej tsuas nyob sab nraud ntsia xwb tsis nkag mus xyuas sab hauv li. Ces nej yeej tsis paub txog tias lub kiab khw ntawd nws muag khoom zoo thiab muaj pes tsawg yam nyob rau hauv li. txoj kev ntseeg Yes Xus nws kuj piv tau zoo ib yam li lub khw thiab. Thaum kuv tseem nyob ib cag ntsia lawv cov xub mus ntseeg Yes Xus, kuv kuj xav ib yam li nej thiab tsis to taub dab tsi txog Yes Xus li. Kuv tseem xav tau phem kawg tias ua cas cov niag kwv tij hmoob ruam ruam ntawd tseem kam mus ntseeg ib niag neeg uas lawv hu nws ua Yes Xus raug txim ntsia rau saum ntoo khaub lig lauj.

Tom qab no yog xyoo 1977 ntawd kuv raug dab phem tsim txom hnyav heev kuv muaj ob tug me nyuam thiaj tau tuag lawm. Tau Tsis ntev tom qab ntawd kuv poj niam thiaj rov yug tau ib tug me tub los twb tsis tau puv hli txawm siv mob lawm mus hu txiv neeb tuaj ua neeb ces txiv neeb hais tias. Tos koj cov me nyuam pheej muaj muaj mob thiab tsis hlob zoo li no los yog vim muaj ib tug dab phem noj koj cov ntsuj me nyuam. Thaum kuv hnov tus txiv neeb hais tias muaj ib tug dab phem noj koj cov ntsuj me nyuam no mas ua rau kuv poob siab loj kawg thiab ntshai heev li. Kuv thiaj hais rau txiv neeb tias yog li yuav ua li cas. Ces tus txiv neeb thiaj hais tias koj mus yuav kom tau ib tug dev ib tug os ib tug npua. tus dev ces muab ua lub rooj vag quas tus dab phem ntawd. Tus os ces ua ib lub phaj tsawb xa tus dab phem ntawd mus. Tus npua ces muab los tuam koj tus choj tub vim koj tus choj tub lov lawm ua li no tag ces kawg zoo xwb lauv.

Ua cas ua neeb tag tau tsis ntev hnub ntev hmo me nyuam rov qab mob li qub tuaj thiaj lauj. Tsis pom qab yuav ua zaj twg ntxiv lawm ces thiaj xav zoj tias tam tseeb cia mus hu kiag xib hwb tuaj txiav dab kiag xwb lauj. Ces txawm mus hu xib hwb tuaj txiav dab tas ces mus nrog cov ntseeg teev Ntuj. Lub caij ntawd yog lub Caij tos Huab Tais. Ua cas thaum txog caij lawv nyeem Ntawv Ntshiab lawv pheej nyeem hais tias Tswv Ntuj leej Tub yuav tuaj ua rau kuv tsis to taub cov lus ntawd li. ces kuv txawm los zaum xav tswv yim tias puas yuav muaj Tswv Ntuj leej Tub tiag ne? Tsis txaus siab ntag ntshe yuav tsum tau mu nug kiag xib hwb saib yog dab dab tsi tiag. Ces kuv txawm mus nug xib hwb tias kuv hnov nej pheej nyeem ntawv hais tias
Tswv ntuj leej Tub yuav tuaj no ua li puas yuav muaj Tswv Ntuj leej Tub tiag? Ces xib hwb teb rau kuv tias:
"Aub! kuv ua xib hwb laus li no kuv tsis tau hnov ib tug tuaj nug zoo li koj li. Kuv paub tias tom ntej no mus koj yuav yog ib tug to taub kev ntseeg zoo ntag."
Ces xib hwb thiaj hais tias Tswv Ntuj leej Tub mas nws yeej muaj tiag. Yog koj xav paub tiag ces koj yuav tsum nyeem Ntawv Ntshiab xwb. Ces xib hwb thiaj qiv nws phau Ntawv Ntshiab rau kuv. Thaum kuv nqa tau phau ntawv los kuv nyeem tas hnub tas hmo tau ib lub hlis xwb kuv nyeem thoob plaws phau Ntawv Ntshiab. Ces kuv hnov kuv lub siab qhib plho zoo li lub qhov rooj los yog xws li sab phab ntsa tsev qhib es yus pom tshab plaws dua sab nrau kaj nrig lawm. Ces kus xa zoj tias uas cas kuv yuav paub Yes Xus lig ua luaj lawm lauj ces kuv thiaj sawv tsees tam sim ntawd mus hais rau xib hwb tias koj cia li ua lub Cim Ntxuav sai sai rauv kuv tsev neeg ntag. Xib hwb teb tias:
"Koj nyuam qhuav txais kev ntseeg tau ob peb lub hlis los no xwb mas kuv yuav tsis tau muaj cai ua lub Cim Ntxuav rau nej. Sai npaum twg yuav tsum yog ib xyoos. Kuv paub tseeb koj yog ib tug to taub zoo lawm."

Cov kwv tij hmoob tej kuv hais tas los no tsis yog lam hais dag rau nej. Txij hnub kuv tau ntseeg Yes Xus lawm ces kus tus tub cia li tsis muaj mob li qub lawm nws cia li hlob mos nyoos lawm xwb. Dhau ntawd los poj niam yug cov me nyuam tom qab no ces tsis ua dab tsi li lawm twb tsis hu plig lawm thiab. Luag lwm tus mas yug ib tug me nyuam tshiab mas yuav npaj ib rooj mov hu zej zog tuaj khi hlua rau tus me nyuam.

kuv ces tsis ua hmoob teb kab li kev cai ntawd li lawm vim dhuav kuv dhau lawm. Poj niam yug tau me nyuam tshiab ces thaum puv hli lawm ces mus thov Txiv Plig ua lub Cim Ntxuav rau xwb. Yus twb los ntsib tau tus tseem tswv uas muaj zog dua neeg thiab dab lawm ces tsis tas yuav mus vam khom lwm tus los yog kab li kev cai pab lawm. Kuv xav qhia qhov tseeb uas muaj nuj nqi tshaj nyiaj kub nyob hauv peb lub neej ntseeg Yes Xus mas nws yog li nram no.

1- Peb dim ntawm kev raug dab phem tsim txom.

2- Peb tau paub txog tus tseem tswv ntuj uas yeej hlub peb tiag. Nws tsis zoo li dab thiab neeg es niaj hnub niaj hmo ntaim noj ntaim haus ntawm peb. Txhua yam peb muaj tseem yog tswv ntuj pub kom peb muaj zoo li ntawd.

3- Tswv Ntuj tseem yog tus pab peb cev nqaij daim tawv uas niaj hnub no kom ciaj tau nyob tau ua zog tau mus tau. Niaj hnub no yog tsis muaj Ntuj lub txiaj ntsim pub dawb tuaj pab peb mas txawm peb noj mov haus dej tsau plab npaum twg los yeej kawg tuag xwb.

4- Thaum txog hnub tag peb lub caij nyob ntiaj teb yog peb ua lub neej mloog lus raws li Vaj Yes Xus cov lus qhia. Tswv Ntuj kuj yuav cawm kom peb tus ntsuj plig txhob mus raug txim nrog dab phem nyob hauv lub yias dej kub dej npau los yog lub pas leej faj mus tas ib txhiab ib txhis. Qhov nog yog ib qhov uas txaus ntshai tshaj plaws yog nej paub txog.

Vaj Yes Xus tau qhia tias txij thaum Tswv Ntuj tsim lub ntuj thiab lub ntiaj teb los txog hnub ntawd mas neeg tsis tau pom dua muaj ib zaug uas txaus ntshai npaum ntawd thiab neeg kuj yuav tsis rov pom ib zaug ntxiv lawm. Qhov kuv hais no tsis yog lam muab hais los hem dag rau nej. Nws muaj tim khawv tseeb. Tus ua tim khawv ntawd nws yog leej twg. Nws yog Yes Xus uas tus tau muab nws lub cev thiab nws cov ntshav los cawm neeg ntiaj teb ntag. kuv hais li no txawm nej yuav ntseeg thiab tsis ntseeg los tsis yuam. Tsuav yog kuv qhia rau nej paub tas lawm ces kuv lub siab nqig lawm. Kuv xav kom peb haiv hmoob nej txhob ua neeg caj qwb txhav tawv ncauj mus txog hnub ntawd mog. kuv tau hais los ntev heev lawm ntshe nej tsaug zog lawm poj. Mam ntsib nej lwm zau

Sau npe xyooj J.P

Nyob zoo tij laug Xyooj Zoov Pov,

Zoo siab nws tuaj txog peb lub tsev Ntshiab.
Ua tsaug rau nws cov lus kwv huam yog ib zaj lus nyiaj lus kub uas qhia rau tsoom zeej pom kev deb.

Maiv Paj Lug wb yog ob tug pib qab teb, xav thov kwv tij neej tsa sawv daws tuaj nrog wb txhawb kom Peb Hmoob tau mov nplej tshiab noj li luag lwm haiv neeg. Zoo kawg, hnub no nws ua tij tuaj txog peb lub tsev lawm, vam thiab cia siab tias nws yuav tuaj txhab dag txhab zog rau peb, nws yuav coj zog tuaj ntxiv kom peb lub tsev peem tsheej ib lub tsev nyob.

Tij laug Xyooj Pov, nyeem koj zaj kwv huam no ua rau kuv nco txog Tub Kawm lub neej dhau los thiab. Li ntawd kuv thov muab Tub Kawm zaj coj los tso nrog koj zaj nyob nob kom peb thiaj li nrhiav tau los nyeem yooj yim.

Thu Jul 26, 2012 7:11 am

Nyob zoo cov phooj ywg, zoo sib hnub no rov tuaj ntsib nej. Cas nej yuav tham txog cov txiv neeb uas tau ua neeb pab yus tus neeg mob, tiam sis yog ntxiag das yus lub neej kom poob nyiaj poob txiaj xwb. Kuv thov tham me ntsis rau nej tias: thaum uas kuv tsi taus los txais txoj kev ntseeg Tswv Ntuj mas, peb tsev neeg yeej muaj muaj mob kawg, niam thiab txiv muab nyiaj muab txiaj, los poj qaib niam npuas coj los kho mob ua rau peb lub neej txom nyem tas, tiam sis mob tib tsis zoo li. cov txiv neeb hais tias peb tsev neeg mas yog raug dab ntxaug lawm no. Lawv kom peb khiav tawm hauv peb lub zos mus rau ib qho kom dab xob pom. Tiam si peb khiav mus ce nyob tau tsis ntev yej muaj mob li qub xwb. Rov caw lawv cov txiv neeb tuaj ua neeb, cov txiv neeb ntawd hais tias yuav tsum tua ib tus npua txais rau mas thiaj yuav zoo mob, tua tas rau los yej tsi zoo. Lawv kom peb rov khiav, yog tsi khiav mas tsi tau, peb tau khiav ntau ntau zaug ua rau peb lub neej piam tas. thiab tsi tas li xwb thaum uas yus mus caw tus txiv neeb tuaj yog yus tsi muaj nyiaj rau nws mas nws twb tsi kam tuaj pab yus ua neej thiab. Tuaj txog los tseem kom yus nrhiav qaib nrhiav npua rau thiab yog tsis nrhiav ces yuav tsis tau, yog li peb tsev neeg thiaj muab lub neej sau los kho mob tas, khiav rau ub khiav rau no ua rau peb nrog tsi tau tej kwv tij nyob ua zej ua zos li. Li ntawd Niam thiab txiv hnov hais Txog Txoj Kev Ntseeg Tswv Ntuj mas zoo tshaj lawm tsi tsum ua neeb ua yais lawm no. Li ntawd nkawd thiaj coj peb los ntseeg Tswv Ntuj lawm, thaum ntaws tej zaum kuv muaj 12 13 xyoo tej lawm. Kuv kuj nco tau thau ua niam thiab txiv lawv coj peb khiav rau ub rau no tib si, thaum ntawd peb tau kiiav rau ub rau no, thiab muab peb lub neej sau tas coj los kho mob los yeej tsi zoo li. Li ntawd peb thiaj li los Ntseeg Tswv Ntuj lawm, txij taum peb los ntseeg Ntuj lawm ces peb los kuj tsi muaj mob ntau lawm. Thaum muaj mob ces peb tsuas yog nrhiav tshuaj rau, thiab Teev Ntuj pab xwb. Thiab txij li thaum los ntseeg ntuj lawm ces peb rov los nyob rau ntawm peb lub qub zos los yeej tsi pom cov dab ntxaug uas cov txiv neeb hais ntawd ua cas rau peb lawm. Peb thiaj hnov qab hlo txoj kev hu neeb yaig lawm. Txij thaum peb los ntseeg ntuj lawm, mas kuv muab xav xav mas cov txiv neeb uas tuaj ua neej ntawd, muaj ib txhia mas ua neeb tseeb thiab tiag, muaj ib txhia mas lam ntxiag noj ntxiag hau xwb. Qhov tseeb lawv yeej tsi paub, lawv lam tau lam ua xwb kom lawv tau noj ib ziag dhau ib ziag xwb. Muab xav los mas tu siab tshaj thiaj txiav txim siab los ntseeg Ntuj lawm. Cov phooj ywg kuv tuaj tham li no kuv tsi yog tuaj haub ntxiag nej los nrog kuv ntseeg, tiam sis xav qhia kom nej paub tias txoj kev ua neeb thiab txoj kev ntseeg nws sib txawv deb li cas. Thov kom sawv daws nkag siab. Mam sib ntsib dua.

Nyob zoo tug tij laug xyooj zoo siab koj tuaj tham txog koj lub neej ua dab tauj dab qhev thaum tseem tsi tau paub ntuj kev cai .txhua yam yeej muaj li koj hais os. Txoj kev ntseeg yog thaum koj nyob ib cas ntsia mas yeej tsi muaj dab tsi yuav zoo.tiam sis txij hnub koj mob siab txom nyem txaus lawm yus rov los nrhiav tug pub txoj sia rau yus lawm .mas yus thov yam twg nws yuav muab rau yug txhua lub sij hawm .txoj kev ntseeg no luas muab ntsia mas tsi paub li cas ,luas niaj hnub muab cov ntseeg tsim txom .qhov yos yexus tug piv rau neeg cov tom qab xeeb ntxwv .niaj hnub no hais lub npe yexus txhiaj raug luag ntxub luas thuam .tiam sis txawm li cas los yog yug ruaj siab lawm mas yus yuav tau txawm kev cawm xwb os mog. .

Nyob zoo tij laug Xiong JP
Kuv tau nyeem koj sob lus lawm,koj hais tau zoo kawg li. Koj cov lus yog ib co lus zoo ua tim khawv txog txoj kev ntseeg Yesxus kom txhua leej tau yeem lub siab thiaj li yuav ras txog txoj kev ntseeg ntuj yog txoj kev tseeb thiab muaj kev tso siab. Thaum yus lub neej nyob ntiaj teb no kawg lawm, yus thiaj li muaj kev tso siab,tsis muaj qhov ntshai,es yus thiaj li zoo siab hlo mus cuag tus tswv uas tsim yus txoj sia.

Peb haiv Hmoob kuv muab tshawb fawb los mus pom tau tias feem coob yog ib haiv neeg siab coob ua niag tsov muaj ob lub taub hau. Ib lub siab mas mus ntseeg ntuj, hos ib lub siab mas tseem muab kev coj dab los txuam rau kev ntseeg ntuj thiab xav vuag ntau yam los xyaw txoj kev ntseeg. Vim peb haiv Hmoob txawj ntau yam xws li ua khaw koob,hu plig, nchuav qe saib,co pob zeb,ua dab khaub ruab,ua neeb thiab lwm yam. Yog li ntawd peb Hmoob txoj kev ntseeg ntuj thiaj li tsis nyob ruaj khov. Cov uas los cuag Yesxus lawm los vim raug dab ntxwg nyoog tsim txom txaus nkaus es thiaj li lam lawb dab lawm xwb.

Kuv nyeem koj sob lus kuv ntseeg tias koj yog ib tug yuav ntseeg ruaj.
thov kom koj nyob ruaj nreb hauv txoj kev ntseeg Yesxus es thiaj li yuav tsis nkim koj lub caij los ntseeg Yesxus nyob rau tiam no. Kuv pom tias koj cov lus koj hais thiaj li nkag kuv kis. Koj thiab kuv thiaj li ntseeg tau zoo ib yam. Peb txhua tus hais tias ntseeg ntuj no,tab sis nyias ntseeg txawv nyias thiab nawv. Thaum yus muaj kev ntseeg lawm, yus ho mus nrog lwm tus ntseeg tham, mas yus thiaj li ntes
tau lawv tej lus thiab lawv ntseeg li cas ces yus yeej paub tias lawv txoj kev ntseeg tob los ntiav,ruaj los tsis ruaj.

Peb txoj kev ntseeg ntuj nws tseem zoo li tus dej sab siv thiab tus dej
cag. Dej sab siv mas nws tsuas txhawv lub caij ntuj nag xwb,lub caij ntuj qhua ces tu lawm los yog nqhuab lawm. Hos tus dej cag mas txhawv thawm niaj thawm xyoo tsis muaj hnub yuav tu li. Yog yus muaj kev ntseeg thiab kev tso siab lawm yus yuav tsum yog tus dej cag uas txhawv
tas mus li xwb. Yus yuav tsis txhob tso Tswvntuj tseg yus yuav nyiam
Tswvntuj tas mus li. Muaj ib txhia neeg ntseeg mas thaum lawv noj qab nyob zoo lawv tsis nco txog Tswvntuj lawm thiab ib txhia mas thaum lawv
muaj mob muaj nkeeg mas lawv kuj tsis nco qab txog Tswvntuj lawm thiab.
Mas cov no yog zoo li tus dej sab siv uas lub caij ntuj qhua ces nqhuab
lawm. Mas yog li peb yog ib tug ntseeg Yesxus tiag peb xav ua Yesxus thwj tim,peb yuav tau tso siab plhuav rau Yesxus txhob ua xyeem xyav,
ua Tswvntuj tsaug tsis tseg,nyiam Tswvntuj tas mus li,txhua lub caij.
Nquag ua qhov zoo xwb,txhob pub qhov phem nkag tau los. Yog li ntawd,
Yesxus thiaj hais nyob hauv LUSKAS tshooj6:43-45 hais tias TSOB NTOO
ZOO NWS YEEJ TXI TAU TXIV ZOO. TSOB NTOO PHEM NWS YEEJ TXI TAU TXIV PHEM. Yus yuav paub cov txiv los ntawm tsob ntoo. Peb kuj ntsuas tau
neeg lub siab los ntawm nws tej lus thiab nws tes hauj lwm.

Ntxhuav Mom Xyooj

Nyob zoo tus phauj maiv tooj thiab tus muam maiv paj lug. Thiab tas nej cov phooj ywg sawv daws kuv tsis hais nej npe los thov txhob tu siab mog.

Ua ntej no kuv thov ua tsaug rau tus phauj maiv tooj thiab tus muam maiv paj lug uas neb tau hais ib cov lus zoo kawg los txhawb kuv lub zog. Ua neb tsaug nawv mog. Tiag mas tsim nyog kuv yuav tsum thov kev tso cai ntawm neb tas mas. Kuv thiaj muaj cai tuaj sau ntawv hauv nej lub vas sab no. Txawm ua tsis yog lawm los ho thov zam txim pub kuv thiab.Ntxiv no mus kuv yuav hais ob peb lo lus rau phauj maiv tooj li no.Qhov kuv hu koj ua phauj no mas hmoob muaj ib lo lus hais tias. Tsis yog lam hu cuav mom zeem xwb. Yeej hu tiag tiag. Kuv hu koj raws peb tus phauj tooj ntxawg uas yog neb tus kwv nws nrog peb nyob ua ke. Xav kom koj txhob hu kuv ua tij laug no. Vim kuv yog lawm tub. Txawm kuv ho laus zog dua yawg laus txooj tub neb los yuav tau hu npe xwb mog.

Txiv no mus kuv ho yuav los hai txog ntawm maiv pav lug cov lus nug kuv tias. Kuv puas xav mus sau siab teev Ntuj nrog cov ntseeg sawv daws thiab puas xav mus LOURDES Hais txog kev sau siab nrog cov ntseeg mus teev ntuj nyob tej qhov chaw zoo nkauj mas kuv kuj yog ib nyiam kawg. Xyoo 2012 no peb cov ntseeg nyob xeev 45 kuj tau mus sau siab 2 zaug thiab. Hais txog mus LOURDES mas nej ho npaj siab mus lub caij twg xwb? Xyoo 1985 peb muaj ib pab ntseeg hmoob catholique kwv yees li 30 tawm leej tau mus ib zaug yog lub yim hli ntuj mas cov ntseeg nyob thoob ntiaj teb tuaj coob heev. Neeg npau xi npaum li tej ntsaum xwb. Pom muaj tej qhov zoo saib xav mus xyuas los tsis tau kev txav taw li. Kuv mus ua ko tw da lub pas dej hwv huaj xwb yog 1h00 diam thiaj mus txog rau ntawm lub pas dej hwv huaj. Yog nej npaj mus rau xya hli yim hli ntawd mas ntshe kuv yuav tsis mus. Vim lub caij ntawd neeg tuaj coob dhau. Yog nej ho mus tej lub caij neeg tsis coob heev no kuv kuj xav nrog nej mus thiab. Hais txog kev sau siab ces hais li no xwb. Lwm hnub yog li cas no mam hais dua.

Tswv ntuj lub hwj huam uas tau pab kuv


Kuv ho yuav los piav txog Tswv Ntuj lub hwj huam uas tau pab kuv lub caj dhau tas los. Xyoo 1978 Kuv poj niam me nyuam peb tau sawv kev hauv lub yeej thoj nam Nas Nyaus thaib teb tuaj mus rau Fab Kis. Txog Xyoo 1979 kuv poj niam txawm xeeb thawj tug me nyuam nyob rau Fab Kis teb no ces nws txawm mob heev. Tsis zoo li cov xub muaj nyob teb chaws Nplog lawm. Kuv los kuj tsis tau paub tias yog poj niam muaj me nyuam mob xwb. Kuv txawm hu Dr tuaj xyuas ces Dr hais tias"
" Koj tus poj niam mas nws mob heev lawm nawv. Koj yuav tau coj nws mus pw tsev kho mob sai sai no xwb."

Kuv txawm coj poj niam mus tam sis ntawd mus pw tsev kho mob. Coj mus txog tsev kho mob ces kuv rov los tsev. Tag kis kuv rov tuaj xyuas poj niam. Kuv nyuam qhuav mus txog ntua kem txaj poj niam pw xwb txawm los kiag ib tug poj niam kho mob los hais rau kuv tias:
"Koj nrog kuv mus vim Dr xav ntsib koj."

Kuv sawv tsees nrog nws mus txog Dr lub BUREAU ces Dr txawm hais tias:
"Koj tuaj txog lawm zoo heev. Hais rau koj paub tias qhov koj tus poj niam mob no mas yog vim nws muaj ib tug me nyuam mas thiaj ua rau nws mob li no. Yuav kom koj poj niam zoo mas yuav tsum muab tus me nyuam thau pov tseg mas thiaj zoo."

Thaum kuv hnov Dr hais tias "yuav tsum muab tus me nyuam thau pov tseg" mas ua rau kuv lub siab nphau npog poob ib twv loj kawg nkaus li.
Kuv Thiaj nug Dr tias:
" Vim li cas ho yuav muab tus mem nyuam thau pov tseg?"
Ces Dr hais tias:
-Vim tus mem nyuam nws mob lawm ces thiaj ua rau tus niam mob thiab.
Dr txawm muab kiag ib daim ntawv los hais tias:
-Koj kos npe rau daim ntawv no ces kuv thau kiag tsis ntev lau 0h10 xwb tau lawm.

Thaum Dr muab kiag daim ntawv los hais tias:"Koj kos npe rau daim ntawv no." Kuv lub siab xav zoj tias nyob hauv Tswv Ntuj 10 lo lus qhia twb hais tias kom tsis txhob tua neeg no. Yog kuv tseem kos npe rau Dr thau tus me nyuam no pov tseg. Ces hais tau tias yog kuv tso lus Rau lawv tua ib tug neeg kiag ntag. Kuv xav li no ces kuv txawm hais rau Dr tias:
"Koj tos me ntsis cia kuv rov mus nug kuv poj niam tso."

Kuv rov los hais poj niam tias: "Dr hais tias qhov koj mob no mas yog vim koj muaj ib tug me nyuam mas koj thiaj mob. Yuav kom koj zoo ces kawg muab tus me nyuam thau pov tseg xwb no. Tab sis kuv hais rau koj.
Peb yog neeg ntseeg Ntuj lawm peb ua tsis tau li Dr hais ntawd. Ntawm kuv ces tsis muaj chaw yuav tiv tau Dr li cas li. Kuv tsuas mus hais rau Dr tias Koj tsis kam thau tus me nyuam koj xav yuav tus me nyuam no nawv. Yog Dr tsis los nug koj los tseg yog nug koj ces koj yuav tsum teb tias koj tsis kam thau tus me nyuam li nawv."

Ces kuv rov mus hais rau Dr tias kuv mus nug poj niam nws tsis kam thau tus me nyuam nawv. Ces Dr hais tias:

"Ua cas ho tsis kam? Tus me nyuam no nws mob lawm na. Cia nws yug los ib me ntsis tuag tes tuag taw tsis muaj qhov muag tsis muaj qhov ntswg ne! Xav yuav los lwm hnub mam li muaj dua tus tshiab tsis mob tso. Tus no nws mob Yuav tsum muab thau xwb. Txawm koj poj niam tsis kam los tsuav yog koj kos npe rau daim ntawv no ces kuv cia li thau xwb."

Ces kuv teb tias yog kuv poj niam tsis kam mas kuv kuj yuav tsis kos npe rau koj daim ntawv thiab. Ces Dr cia li npau taws rau kuv nws cem tias:
-yog tsis kam thau no ces tag kis cia li tawm mus tsev.

Tab sis kuv poj niam nws tus mob tseem mob heev. Ces hmo ntawd kuv rov los txog tsev ua rau kuv ntxhov siab heev.

Kuv thiaj thov Tswv Ntuj hauv nruab siab tias:

"Huab Tais Tswv Ntuj Hnub no kuv mus xyuas poj niam pw tim tsev kho mob mas tus Dr tau hais ib cov lus phem heev rau poj niam. Nws hais tias poj niam mob mas yog vim nws muaj me nyuam mob xwb. Yuav kom zoo mas yuav tsum muab tus me nyuam thau pov tsev. Vim tus me nyuam mob lawm. Yog cia tus me nyuam yug los mas. Nws yuav tuag tes taw yuav tsis muaj qhov ncauj qhov ntswg no. yog li kuv thov koj yog Tus Tswv Ntuj muaj hwj huam loj tas nrho nyob saum Ntuj thiab nyob ntiaj teb. Koj yog tus tsim noob neej noob tsav, yog tus paub tas ib puas tsav yam. Tej yam neeg ua tsis tau koj thiaj yog tus ua tau. Yog li ntawd kuv thov koj pub koj lub hwj huam los kho tus niam thiab tus me nyuam kom zoo hlo. Kom thaum txog hnub tus me nyuam yug los tsis txhob muaj qhov phem raws li tus Dr hais ntawd."

Thaum kuv thov Tswv Ntuj li no tas ces thiaj ua rau kuv lub siab rov nyob tus lawm. Los txog Xyoo 198O Tus me nyuam yug los tsis pom yuav muaj ib qhov phem raws li tus Dr hais ntawd li. Kuv pom tseeb tias Txoj kev tso siab rau Tswv Ntuj yog ib yam muaj zog tshaj plaws uas nws muaj peev xwm cawm tau neeg txoj sia.

Thaum kuv tus ntxhais hlob tuaj txawj hais lus lawm kuv thiaj hais rau tus ntxhais tias. Yog kuv tsis muaj txoj kev tso siab thiab ntseeg Ntuj mas ntshe peb twb tsis muaj koj lawm. Vim kuv muaj txoj kev tso siab rau Tswv Ntuj loj heev mas Koj thiaj tsis tau raug Dr muab thau pov tseg.

TSWV NTUJ LUB TXIAJ NTSIM PAB KUV ZAUM OB

Xyoo Ntawd yog 1981, thawj ob peb xyoos uas kuv tuaj txog Fab Kis ces tsis tau paub lus zoo ces kuv mus ua ib txoj hauj lwm tsuag xim.
Kuv tsuag xim tau Ob xyoos. Yus tsuag xim ib hnub, tej chim yus tshuab ntswg mas tau ib cov xim hauv yus qhov ntswg los ua li ntawd ces kuv txawm xav tau phem tias: "Yog yus pheej yuav ua txoj hauj lwm no mus ntxiv ntshe muaj ib hnub twg yus yuav tau ib tug mob phem xwb ntag." Thiab tus Los Pav PATRON uas txais kuv ua hauj lwm los nws pheej ua tsis ncaj rau kuv thiab. Kuv ua hauj lwm ib hlis mas nws tseg ib hnub tsis them li. Tab sis yus tsis paub lus zoo ces yus kav liam tsis hais li thiab. Lub caij ntawd yog lub rau hli ces tshuav ob hlis txog lub yim hli ces kuv mus so (VACANCES).

Thaum kuv xav li ntawd tas ces kuv txawm Thov Tswv Ntuj nyob hauv kuv nruab siab tias:"Huab Tais Tswv Ntuj kuv yog ib tug neeg tsis muaj kev txawj ntse li luag lwm tus. Kuv ua neeg thoj nam tuaj nyob Fab Kis lub teb chaws no. Niaj hnub no kuv ua ib txoj hauj lwm tsuag xim. Ua hauj lwm ib hnub mas thaum kuv tshuab ntswg tau ib cov xim hauv qhov ntswg los. Kuv pom tias yog kuv ua txoj hauj lwm no mus ntxiv tom ntej no yuav muaj tej yam mob phem rau kuv thiab tsis tas li no tus Los Pav PATRON los nws kuj ua tsis ncaj rau kuv thiab Kuv ua hauj lwm ib lub hlis mas nws txiav ib hnub tsis them rau kuv. Huab Tais Tswv Ntuj yog koj hlub txog kuv lub neej txom nyem nyob teb chaws no mas. Kuv thov koj mus tshoj tej tus Los Pav PATRON muaj lub siab zoo kom nws pub ib txoj hauj lwm zoo rau ua kom xwv kuv thiaj pab tau kuv poj niam me nyuam lub neej txoj sia nyob rau lub teb chaws no."

Thaum kuv thov Tswv Ntuj zoo li yog lub rau hli. Txog lub yim hli ces kuv txawm los so VACANCES lawm.

Muaj ib hnub kuv tab tom so nyob hauv tsev thaum ntawd kwv yees li yuav txog 17hoo yuav tsaus ntuj. Ces txawm hnov neeg tuaj nias tswb (khob qhov rooj), kuv mus qhib qhov rooj cas yog ib tug poj niam fab kis. Ces kuv kom nws los hauv tsev nws zaum zoj ib pliag. Nws txawm hais rau
kuv tias:

"Koj puas xav mus nrog kuv tus txiv ua hauj lwm ua ke?"

Kuv txawm xav zoj tias ntshe yog nws tus txiv pom muaj hauj lwm ces nws thiaj tuaj hais qhia kuv ho.
Kuv thiaj nug nws tias:
-Yog ua hauj lwm dab tsi?
-Yog ua hauj lwm nyob saum ib lub tshuab. Yog koj xav ua thiab no ces tag kis 7h30 koj tuaj kom txog tom peb tsev. Tuaj ntsib kuv tus txiv.

Lawv lub tsev nyob deb ntawm peb tsev kwv yees li 500mètres xwb. Tag kis 7h30 kuv mus txog tom lawv tsev. Tus txiv pom kuv nws hais rau kuv tias:
"Kuv muaj ib txoj hauj lwm rau koj ua lai."

Ces nws txawm hais tias kuv coj koj mus xyuas ces wb txawm tawm ib lub qhov rooj uas tsis yog lub kuv tuaj lawm. Tawm dua sab tsev to lawm. Mus txog sab to cas yog ib lub tsev ua hauj lwm luam ntawv. Imprimerie, muaj 25 tug neeg ua hauj lwm nyob hauv. Kuv thiaj paub tias nws yog ib tug Los Pav luam ntawv. Ces nws txawm coj kuv mus saib ib lub tshuab me luam kua mem dub. Nws txawm hais tias:
"koj txoj hauj lwm ces yog ua nyob saum ib lub tshuab zoo li lub no ntag tas."
Wb rov los txog hauv nws lub BUREAU, nws hais rau kuv tias:
-Koj puas yuav ua txoj hauj lwm no?
-Kuv mas ua xwb tab sis kuv tseem tsis tau tawm kuv txoj hauj lwm. Yog koj kam no cia kuv rov mus sau ib tsab ntawv rau tus Los Pav tias kuv tsuas ua hauj lwm rau nws 10 Hnub xwb. Ces kuv mam tuaj ua hauj lwm ntawm koj no.
-ua li koj hais ntag zoo kawg.

Ces kuv rov los sau ib tsab ntawv rau tus qub Los Pav. Thaum rov mus ua hauj lwm 10 hnub rau tus qub Los Pav tas ces kuv thiaj los ua txoj hauj lwm luam ntawv no txij xyoo 1981 los txog hnub no.

Qhov no yog Tswv Ntuj ib lub txiaj ntsim pab kuv muaj zog tas nrho nws muaj peev xwm mus yuam kom tau tej tus Los Pav siab zoo los txais yus ua tej txoj hauj lwm uas yus yeej tsis tau paub txog tsis tau kawm li. Qhov yog lub hwj chim tuaj ntawm Tswv Ntuj tuaj tiag tiag li. Txoj hauj lwm luam ntawv no mas yog ib tug neeg uas nws yeej tsis tau kawm tawm los mas Los Pav yuav tsis txais yooj yim npaum no li.

Cov phooj ywg thaum nej hnov kuv piav txog Tswv Ntuj lub txiaj ntsim uas nws tau pab kuv zoo li no. Yog nej ntseeg tsis tau mas nej yuav xav tias yog kuv hais dab neeg xwb no. Tab sis nws muaj tseeb tiag. Vim kuv tau pom ntawm qhov muag los lawm. Txij hnub kuv tau ua neeg ntseeg los
txog hnub no mas kuv tau thov Tswv Ntuj pab kuv ntau zaus. Kuv tsuas muab ob zaj no piav rau nej xwb. Txoj kev thov ntuj mas tsis zoo li nej thov ib tug neeg pab nej es yuav pab kiag tam sis ntawv. Kev thov Ntuj pab mas tej zaum yus twb tsis nco faj lawm mam li tshwm sim rau yus pom tom qab. Qhov yus paub tias yog Tswv Ntuj pab yus mas yog zoo li no. Nws tshwm sim tuaj raws nkaus li qhov yus thov ntag.

Ib qho ntxiv kev thov ntuj pab mas yus yuav tsum paub tias. Yog tseem ceeb los tsis tseem ceeb. Txhob lam thov ntuj tej yam tsis tsim nyog. Muaj ib zaug ib tug kwv tij hmoob nws tseem coj dab qhuas. Nws hais rauv kuv tias Npawg cas koj twb yog ib tug neeg ntseeg ntuj no. Cas
koj ho tsis mus nram LOURDES mus thov kom Niam Mab Liab ua kom koj raug LOTO. Ces kuv luag luag rau nws tas kuv thiaj teb nws tias: qhov koj hais no nws tsis tsim nyog. Txawm koj thov los Ntuj yuav tsis pab koj li. Txoj kev thov Tswv Ntuj yog ib yam tseem ceeb heev sawv daws yuav tau ceev faj txhob lam ua dog dig. Xaus li no xwb mam sib ntsib dua cov phooj ywg.

Nyob zoo koj dua xiong_jp,

Koj nug tias peb yuav rov qab mus sau siab nyob Lourdes lub caij twg?

Hais txog rov qab mus sau siab taug kev nyob Lourdes tseem tsis tau paub meej, tiam sis kuv tau nrog T.P Cwj Vuam Chiv tham thaum peb taug kev hav zoov nyob Midi-Pyrénée , T.P hais rau kuv tias lwm xyoo yog npaj tau xav kom sawv daws rov qab mus rau lub caij ua hmoov Niam Mab Liab nce mus pem ntuj yog hnub tim 15 lub 8 hli ntuj 2013.

Koj yeej hais yog lawm, lub 7 hli thiab 8 hli ntuj neeg yuav coob heev, tiam sis yog koj mus, peb tsis yog mus ncaj qha rau thaj chaw Niam Mab Liab tawm rau Bernadette, peb yog yuav mus pw ib qho chaw so es maj mam taug kev mus kom txog Lourdes xwb, yog li no ntshe yuav tsis tau phoom neeg coob npaum cas, thiab yog thaum mus ua ke txog Lourdes neeg tuaj coob los yus pawg Hmoob li mus so tej qho chaw kom txhob muaj neeg coob coob phoom peb thiaj tau kev thov ntuj. Yog yus mus yus tus kheej xwb mas yeej xav mus lub caij ntuj nag thiab ntuj no kom neeg tsawg thiaj tau kev mus pem lub tsua Niam Mab Liab Tshwm sim, tiam sis thaum mus coob li peb mus nod lawm ces yog T.P lawv coj mus qhov twg, yus yeej nrog nraim lawv xwb ces yeej zoo kawg li. Qhov zoo yog tau nrog tsoom phoojywg Hmoob nyob thoob fab kis teb no tuaj sib fim li hnub peb mus los ntawv . Yog ib yam pom txhua tus neeg nyob ib ceg fab kis kaum ntuj tuaj mas sawv daws zoo siab kawg.

Kuv ua koj tsaug uas koj tau tuaj sau koj ob zaj txiaj ntsim koj txais ntawm Tswv Ntuj pub koj yav dhau los rau peb nyeem.

Wow...koj zaj txiaj ntsim 1 uas koj sau txog Dr yuav kom nrho tus me nyuam txaus poob siab kawg li os yuad, kuv ho zoo siab tias koj txoj kev ntseeg ntuj nruaj thiab tso siab loj tas nrho rau Tswv Ntuj pab tau koj. Peb ua neeg nyob ces txoj kev ntseeg ntuj thiab tso siab rau ntuj yeej yog ua li koj hais kiag saum no ces yus thov yeej yuav tau kev pab xwb li.

Yesxus twb hais tias nej thov nej yuav tau txais, nej khob qhov rooj yuav qhib rau nej,ib yam nej cov me nyuam thov ib tug ntses ntawm nej, nej puas yuav cev ib tug nab rau nws? yam twg nej cov me nyuam thov, nej yeej yuav muab kom tau rau nws.

Peb los ib yam nkaus, yog yam twg peb thov Tswv ntuj yuav pub rau peb, yog tias peb thov mus rau qhov zoo.

Muaj tej zaum tej yam yus twb tsis nco qab thov Tswv ntuj twb pub rau yus ua ntej yus thov. Yog tias neeg thov Ntuj, pheej thov kom tau ib pob nyiaj ntau ntau los sis yog thov kom cov yeeb ncuab tuag mus xwb ces yuav tsis muaj hnub tau. Yuav thov ntuj yuav tsum txawj thov, yuav thov dab tsi yuav tsum ua kom Tswv Ntuj lub hwj chim ntoo moo, yuav tsum paub tias yam twg yus thov tau ntawm Tswv Ntuj yog vim muaj Tswv Ntuj lub Hwj Huam nres yus, yus yuav tau qhuas txog Tswv Ntuj tsis yog qhuas txog yus.


Muab ib txhia neeg, tam sim no txawj sawv saub coob, khav tias yog neeg zoo zoo es Tswv ntuj nqis los ua kom lawv hnov ub hnov no thiab pub lawv kho tau neeg mob ub mob no, thiab cuag li lawv twb yog Tswv Ntuj tus Tshiab. Tej yam ib txhia ua neeg saub cuav no ces ua rau tus neeg nws qhuas nws lawm, tsis yog ua kom qhuas Tswv Ntuj. Ntshai rwg tsam yog ntxwj nyoog ntxias mus ua li ntawv xwb.

Kuv zoo siab tau nrog koj tham hnub no xiong_jp...muaj dab tsi peb mam tham dua mus, zoo siab tias zaum no yuav rov tau hnov dua koj lub txiaj ntsim zoo tuaj ntawm Tswv Ntuj tuaj rau peb nyeem ntxiv.

Nyob zoo me tub Xyooj Zoov Pov,

Kuv tsis nco qab hais rau nws lawm tias kuv muab nws lub Topic nov coj mus tso rau nram "cov tim khawv" lawm. Tab sis nws twb ho tuaj nrhiav tau lawm ces zoo kawg li.

Ua tsaug rau nws zaj lus no, zoo kawg.

Peb Hmoob tseem tshuav ntau yam heev yuav kawm, yuav paub txog lub ntsiab ntawm txoj kev ntseeg Yes Xus. Peb Hmoob pheej rov mus ua dab, ua neeb saib yaig los vim Peb Hmoob twb tsis paub txog lub ntsiab ntawm kev ntseeg, Peb Hmoob tsuas xav txog lub neej niaj hnub ntawm cev nqaij daim tawv nyob yaj ceeb no xwb. Li ntawd txawm yuav mus ua dab qhev, muab ntsuj plig mus yuam rau dab kom lwm hnub tag yus lub neej txoj sia es dab yuav yus tus ntsuj plig los tsuav yus lub cev nqaij daim tawv zoo xwb. Li nov lawv thiaj li plhaw ub plhaw no. Yog lawv paub txog lub ntsiab ntawm lub neej tom ntej thiab Qhov tseem ceeb ntawm Mis Xas mas lawv yuav mob siab mus teev Ntuj Hnub Chiv los yog txhua hnub hauv nruab lis piam twb tsis txaus.

Nyob zoo Tij laug Zoov Pov,
Kuv muab koj cov ntawv copy kho los tso rau hauv qab no kom sawv daws nyeem tau yooj yim, es thov koj tus ua tij zam txim pub thiab.
Ib qho kuv xav qhia koj tias thaum koj sau ntawv rau hauv Cab Sab no koj sau kab lus kom kawg rau tom ntug es cia nws mam li hloov nws xwb ces thaum koj sau tau xa tuaj nws thiaj li nyob muaj cov lus sib txuas.


Nyob zoo phauj maiv tooj thiab tus muam maiv paj lug thiab tas nej cov phooj ywg sawv daws.

Kuv cia siab tias nej sawv daws yuav tau txais Tswv Ntuj lub txiaj ntsim kev kaj siab xwb. Hunb no kuv qee ib lub sij hawm rov tuaj ntsib nej txhua tus phooj ywg sawv daws nyob hauv vas sab CATHOLIQUE no. Hnub no kuv xav tuaj piav me ntsis txog kev ntseeg YES XUS raws li kuv tshawb pom.

Txoj kev ntseeg YES XUS yog ib yam neeg to taub nyuaj kawg txog. Yog tus tsis muab lub siab los tshawb nrhiav tiag tiag mas. Tab yog nws ua neeg ntseeg tau 20 los 30 xyoo yeej tseem tsis tau paub dab tsi txog YES XUS txoj kev cawm neeg no li. Niaj hnub no kuv hnov peb cov kwv tij hmoob uas twb ua neeg ntseeg tau ntev ntev los lawm muaj coob leej hais tias. Txoj kev teev Ntuj no nws yog xib hwb thiab txiv plig lawv hauj lwm xwb. Tsis tas yuav mus teev Ntuj nrog lawv txhua lub vas thij.

Huab Tais Ntuj yeej nyob tas qhov txhia chaw nws yeej pov hwm sawv daws zoo ib yam xwb. Li ntawd niaj hnub no thiaj tseem muaj coob leej kwv tij hmoob ntseeg thaum lawv ntsib teeb meem kev nyuaj siab. Xws li lawv tsev neeg muaj ib tug mob txaus txhawj lawm mas. Lawv tsis muaj kev tso siab tias Tswv Ntuj yog tus muaj hwj huam hwj chim loj dua neeg thiab dab. Ces lawv tseem tig rov mus vam txog kev ua neeb ua khawv koob saib yaig saib saub pab lawv dua. Yog lawv mus ua tas txhua yam hais no los lawv tus neeg mob ntawd yeej tsis zoo li. Ces lawv mam tig rov los thov xib hwb thiab cov thawj coj kev ntseeg mus pab thov Ntuj rau lawv tus neeg mob tom qab.

Cov ntseeg coj zoo li no kuv pom muaj coob heev li. Vim tias cov xib hwb cov Txiv plig tshaj Tswv Ntuj lub moo zoo lawv tsis muaj hwj huam hwj chim li Vaj YES XUS. Thaum ub Vaj YES XUS tshaj lub moo zoo cawm neeg no rau Cov neeg txheej thaud lawv kuj zoo tib yam li peb txheej neeg tam sim no thiab. Lawv kuj yog vam txo kom yes xus kho cov neeg mob xwb. Tab sis YES XUS yog Tswv Ntuj nws muaj hwj huam ces. Txawm lawv yuav muaj cov neeg mob phem zoo li cas los. YES XUS hais ib lo lus xwb. Ces cov neeg mob ntawd cia li zoo hlo lawm. YES XUS tsis tas yuav ua neeb los khawv koob li peb neeg.

Vim li ntawd thiaj muaj tej pab neeg coob coob raws YES XUS qab. Muaj ib feem tsis yog nyiam thiab ntseeg tias. YES XUS yog Tswv Ntuj ces lawv thiaj raws YES XUS qab. Tab sis yog lawv ntshaw kom YES XUS pab kho lawv cov neeg mob kom zoo xwb. Peb cov hmoob niaj hnub no uas lawv tsis to taub txog YES XUS cov lus qhia cawm neeg txoj sia rau sab ntsuj plig. Los sawv daws puav leej ntshaw tib yam nkaus li ntawd. Yog lawv pom tias qhov twg yuav pab tau kom lawv tus mob zoo ces. Txawm yog dab los lawv yeej kam mus zwm dab li. Rau qhov lawv twb tsis paub txog tias Tswv Ntuj tau npaj ib lub neej zoo tas npau tos lawv ne.

Kuv yuav rov hais txog kuv tus kheej kiag los yeej zoo tib yam li ntawd thiab. Lub caij thaum kuv tseem nyob hauv txoj txoj kev ntseeg dab qhua mas kuv yeej tsis paub dab tsi txog YES XUS li. Ib yam li cov lus kuv xub sau ua ntej los lawm. Qhov tseeb yog kuv raug dab phem tsim txom hnyav heev ces. Thiaj xav tias mus lawb dab kom txhob tau teev dab ntxiv lawm xwb. Tsis yog tias kuv xub paub meej meej tias. Vaj YES XUS yog tus Tswv Ntuj tso los cawm neeg ntiaj teb ces kuv thiaj txiav siab mus ntseeg YES XUS zoo li no.

Kuv yeej ib txwm paub txij thaum kuv tseem yau kwv yees li 6 los 7 XYoo ntawd tias. Muaj ib cov neeg lawb dab mus coj YES XUS kev cai no. Tab sis tej niam tej txiv ho tsis nrog luag lawb dab ces. Yus yog me nyuam xwb tsis paub tias dab tsi thiaj yog qhov zoo. Dhau ntawd los yus ho hlob tiav neeg ces ho mus yuav poj niam ces muaj me tub me nyuam lawm thiaj muaj kev nyuaj siab. Thiaj mam dhia mus lawb dab kom dim kev ntshai dab xwb. Yeej tsis paub txog tias kev ntseeg YES XUS tswv Ntuj Yuav pub ib lub neej zoo tas npaum no rau neeg.

Raws li kuv tau tshawb xyuas peb haiv hmoob mas. Feem coob cov tso dab qhua tseg tig los ua neeg ntseeg YES XUS mas puav leej yog cov raug dab tsim txom hnyav thiaj khiav mus lawb dab kom dim kev ntshai dab xwb. Yeej tsis paub txog tias txoj kev ntseeg YES XUS no nws yog Tswv Ntuj txoj kab xwm cawm neeg ntiaj teb kom dim ntawm txoj kev tuag zaum ob. Uas yog lub neej sab ntsuj plig. Kuv xav tias yog peb sawv daws txhua tus neeg yeej paub tseeb thiab ntseeg tias. Txoj kev ntseeg YES XUS nws yog txoj hauv kev pab kom neeg dim ntawm txoj kev tuag lub neej sab ntsuj pli no mas, ntshe sawv daws yuav sib twv khiav huas los mus rau txoj kev ntseeg YES XUS no xwb.

Vim peb txhua tus yug los txawb saum npoo ntiaj teb no. Tsis hais tus phem lo tus zoo yeej tsis xav tuag li. Niaj hnub no neeg ntiaj teb 5O los 70% feem pua. Los vim neeg tsis to taub thiab tsis kam ntseeg tias Tswv Ntuj tau teem ib hnub cia txiav txim rau neeg lub neej sab ntsuj plig. Thiab Tswv Ntuj Kuj Teem ib hnuj cia cawm neeg lub neej sab ntsuj plig thiab. Ntxiv no mus kuv xav hais ob peb lo lus txaus luag me ntsis zoo li no. Xyoo 1977 ntaw peb tsev neeg nyuam qhuav txais kev ntseeg YES XUS tau tsis ntev. peb muaj ib tug txiv ntxawm uas nws yog kuv txiv tus kwv. Muaj ib hnub nws txawm hais rau kuv tias. Koj txiv nej txawm yuav lawb dab mus li los? Ces kuv teb rau nws tias txiv ntxawd hais rau koj paub tias. Zoo li tus dej uas ntws lawm ces tsis muaj hnub yuav ntws rov qab. Tsuas muaj qhov tias yuav ntws kom mus txog lub pas hiav txwv xwb. Ces peb txiv ntxawm teb tias txhob ua li ntawd. Vim cov kwv tij tseem tshuav coob lawv twb tsis lawb dab ne. Es koj txiv nej txawm tsis yuav kwv tij li lawm los. Kuv teb tias txawm peb lawb dab los peb yeej tseem yog kwv tij li qub. Ces peb txiv ntxawm hais ntxiv tias.

Kuv xav mas yog txoj kev ntseeg YES XUS no nws yeej tseem ceeb tiag mas. Thaj nai phoo vaj pov nws twb ntse tag npaum no ces nws yeej lawb dab lawm. Kuv hnov peb txiv ntxawm hais li ntawd ces kuv luag luag tas. Ces kuv teb tias txiv ntxawd koj to taub yuam kev loj lawm. Nws tsis yog li koj xav ntawd. Thaj nai phoo vaj pov nws yeej yog ib tug ntse li koj hais. Tab sis nws tsuas yog ntse raws kev ua nom ua tub rog xwb. Tsis yog yuav ntse mus txog qhov paub YES XUS. Kuv hais rau koj tias thaum ub cov thawj leej choj cov thoob xwm ntawv lawv niaj hnub teev Tswv Ntuj. Tab sis thaum txog hnub YES XUS tuaj qhia Tswv Ntuj cov lus lawv tsis paub lawv tseem cem tias. YES XUS yog thuam Ntuj xwb. Lawv thiaj muab YES XUS TUA lawm. Peb tus txiv ntxawm ntawd ma xyoo 1970 ntawd nws twb lawb dab tau 2 Xyoos Tab yog nws thaub qab rov los teev dab dua xwb.

Ces kuv txawm tig rov nug txiv ntxwm tias. Thaum ub koj twb yog ib tug lawb dab thiab ne. Yog vim koj pom dab tsi phem koj thiaj tso tseg tig rov los teev dab qhua li koj lawm. Ces txiv ntxawm teb tias. Aub txoj kev ntseeg YES XUS mas yeej tsis muaj ib lo lus yuav qhia kom ua phem li yeej zoo kawg. Tab sis qhov kuv cia li tso tseg tig rov los teev dab qhuas zoo li no los yog vim tias. Kuv ntshai tsam thaum txog hnub peb tus Vaj hmoob los ces nws tsis kam yuav kuv lawm.

Thaum kuv hnov peb txiv ntxawm hais li ntawd mas kuv luag luag mob plab tas li. Ces kuv thiaj teb tias txiv ntxawd cas koj yuav xav tau yuam kev loj tas npau no. Koj yuav tsum paub tias txhua tus vaj nyob ntiaj teb no yeej tsis muaj ib tug nws yuav muaj hwj chim nws ib leeg li. Tus twg tau los ua ib tug Vaj kav ib lub teb chaws los yeej yog Tswv Ntuj pub rau nws thiaj tau.

Txawm peb yuav muaj ib tug Vaj hmoob los yeej kawg teev Tswv Ntuj. Peb tsis muaj Vaj los peb yeej kawg teev hawm Tswv Ntuj xwb thiaj yog. Tos peb txiv ntxawm ho hais tau ib cov lus txawv txawv zoo li no los.Nejsim mus saib nyob hauv INTERNET Hmoob cov vas sab saib. Tseem coob coob leej hmoob tuaj sau hais tias tsis ntev tom ntej no peb hmoob yuav muaj ib tug vaj los pab haiv hmoob xwb. Hais txog qhov no mas kuv xav hais rau peb haiv hmoob zoo li no. Kuv yog hmoob kuv yeej nyiam hmoob kuv yeej hlub hmoob. Cov lus kuv yuav hais no tsis yog kuv xav thuam peb haiv hmoob. Tab sis kuv xav kom peb haiv hmoob lub hlwb tsis txhob mus xav txog tej yam uas yuav tshwm sim tsis tau rau qhov muag pom ib zaug li.

Txawm hmoob yuav tos pes tsawg tiam neej tom ntej no mus los yeej yuav tsis muaj hnub tshwm sim tau rau hmoob pom li. Qhov no nws tsuas yog ib tug nywj xwb yeej tsis muaj tseeb li. Tus nywj phem no twb los tshoj peb haiv hmoob lub hlwb tau ntau tiam neej los lawm. Hnub twg yog tus nywj no los raug rau tus twg ces tus ntawd ciaj hais rau sawv daws tias. Huab tais hmoob yuav los kom npaj siab tos. Lub neej dhau tas los mas kuj tseem muaj tej tus nws txawj ua tau tej yam hwj huam kom sawv daws ntseeg me ntsis thiab. Tas sis nws yog ib tug Nywj cuav xwb ces tsis kav ntev. Tsuas nyob 1 los 2 Xyoos tej xwb ces tsuag tas lawm ces ho rov nyob ntsiag to lawm li no xwb.

Kuv xav kom peb haiv neeg hmoob txhob ua neeg caj qwb txhav tawv ncauj mus txog hnub kawg tsis kam hloov siab tig rov los nrhiav tus Tswv tsim yus txoj sia. Nws thiaj yog tus yuav hlub tiag tiag. Kuv tsis hais lwm haiv neeg vim lwm haiv neeg luag yog cov xub paub mus deb tshaj peb haiv hmoob lawm ntau npaug. Nyob hauv peb haiv hmoob mas nyuam qhuav yog los pib sawv ntawm txoj ncauj xub kev xwb. Twb tsis tau pib rhais ruam mus li. Tab sis tseem yog feem tsawg xwb.Piv txwv tias peb hmoob yog 100% feem pua nyuam qhuav yog 10% feem pua thiaj tig los nrog ntiaj teb neeg pib mus sawv ntawm txoj ncauj xub kev xwb. Tshuav 90% feem pua ces yog cov qhov muag ntsia ntsoov los tsis pom. Pob ntseg mloog ntsoov los tsis hnov li. Muab xav los mas tu siab kawg li kwv tij hmoob.

Thaum txog hnub teem uas yog hunb kawg ntshe peb haiv hmoob yuav yog cov ploj mus tas nyob ntiaj teb. Vim niab hnub no peb hmoob feem coob tsis kam tig los xyuas kom paub meej txog txoj kev tseem ceeb. Uas yog tuaj ntawm tus tseem tseem Tswv Ntuj tuaj tiag. Pheej nyob deb deb ntsia tuaj hais tias. Tej ntawd yog luag mab sua li teej tug xwb. Hai lo lus tsis pub hmoob tu siab. yog xav qhia qhov tseeb rau hmoob xwb. Qhov no tsis yog lam hais raws kuv paub xwb. Niaj hnub no Peb cov kwv tij hmoob muaj ib cov uas yog cov muaj kev txawj ntse me ntsis. Lawv tseem tig rov mus tsim ntau txoj kev teev hawm tshiab uas tsis muaj tim khawv dab tsi yuav qhia tau tias. Nws yog tshwm sim muaj tuaj zoo li cas kom txaus sawv daws ntseeg tau. Raws li kuv tau muab coj los tshawb xyuas mas.

Lawv tsuas yog tsim tej zaj raws li lub tswv yim xav tau thiab raws tej zaj dab neeg txheej thaum ub tej pog yawg hais los mus xwb. Nws yeej tsis yog ib zaj muaj tseeb es yuav yog ib txoj kev teev hawm ciaj sia tiag tiag uas tsim nyog teev hawm. Niaj hnub no nyob hauv peb cov tub ntxhai hmoob uas txawj ntse kawm ntawv siab txog DOCTEUR INGENIEUR thiab
tej ua nom ua tswv lub caij dhau los. Lawv yeej tsis kam txo lawv lub hwj chim tig los mus tshawb xyuas txog Tswv Ntuj txoj kev cawm neeg txoj sia no li. Niaj hnub no peb cov tub ntxhais txawj ntse thiab cov ua nom ua tswv.

Lawv lub hlwb tsus yog pheej xav tias. Yuav ua li cas thiaj muaj nyiaj yuav ua li cas thiaj tau nom mus nyob qhov chaw muaj hwj chim siab. Kuv hais rau nej tsoom tub txawj ntxhais ntse paub tias. Xav kom nej ib nyuag txo nej lub hwj chim me me tig los nrhiav nej txoj sia ua ntev tso. Mam mus nrhiav kev muaj nyiaj ua nom ua tswv tom qab. Vim tias peb yug los ua leej tib neeg nyob saum lub npoo ntiaj teb no ces. Txoj kev zoo nkauj zoo nraug muaj nyiaj kev txawj ntse ua nom ua tswv no nws tsuas kav peb ib nyuag ntu li 70 los 80 xyoo xwb ces twb ploj mus lawm. Yog li ntawd nws tsis tsim nyog peb peem ciaj peem tuag lawm. Qhov tsim nyog tiag. Nws yog peb txoj sia uas yuav nyob mus ib txhis tsis muaj hnub yuav ploj tau. Uas Tswv Ntuj twb npaj tseg tos peb lawm. Yog li tsim nyog peb txhua tus yuav xub muab siab mus nrhiav txoj sia ua ntej tso.

Lub caij no peb haiv hmoob kuj zoo tib yam li thaum ub. Haiv neeg hias xas lais. Lub caij thaum ub. Vaj YES XUS tuaj qhia ntuj txoj kev cawm neeg txoj sia no rau lawv. Cov thawj leej choj cov nom tswv cov neeg txaj ntse. Lawv sawv dws puav leej tsis kam ntseeg tej lus uas Vaj YES XUS Tau qhia txog txoj sia ntawd.Cov ntseeg YES XUS ces tsuas yog cov neeg liaj neeg teb thiab cov tsis muaj kev txawj ntse xwb. Li ntawd Vaj YES XUS thiaj hais ib lo lus tias. TXiv koj tau zai tej ntawd rau cov neeg txawj neeg ntse. Koj ho qhib rau cov neeg me paub. Txiv kuv ua koj tsaug. koj lub siab yeej nyiam li ntawd.

Kuv ntseeg tias niaj hnub no peb cov tig mloog YES XUS cov lus qhia txog txoj sia ntawd. Tsuas peb cov tsis muaj kev txawj ntse xwb. Peb cov hmoob uas lawv muaj kev txawj ntse ces lawv yeej tsis kam txo hwj chim ntseeg txog YES XUS tej lus qhia txog txoj sia li thiab. Xau li no xwb.

Ntxiv nov kuv xav hais lo puav lus rau nej cov phooj ywg tuaj hauv lub vas sab CATHOLIQUE no tias. kuv hnov muaj coob leej pheej hais los lus tias. Peb mus ua mis xas. Lo lus no nws tsis yog lus hmoob. Peb hmoob twb muaj tej l lus zoo hais kawg. Peb mus teev hawm Ntuj. Peb mus ua lub txoos teev Ntuj. Peb mus ua lub txoos cav txog Tswv Ntuj. Qhov no kuv tsuas hais raws li kuv nyiam peb cov lus hmoob xwb. Yog nej ho tsis nyiam los. Nej hias li nej nyiam xwb. Sib ntsib dua.

SAU NPE XIONG J.P

NYOB ZOO PHAUJ MAIV TOOJ THIAB XH NPUAG TUB KUV ZOO SIAB HEEV


Kuv ua neb tsaug ntau nawv. Neb muaj lub siab zoo pab kho cov lus
kuc sau kom nws nyob xwm yeem thiaj zoo nyeem. Thiab ua tsaug rau
phauj maiv cov duab uas zoo nkauj muab tso rau. Nws zoo nkauj heev
li. Kuv cov ntawv mas tej zaum ntshe yog li Xh npuag tub hais
lawm. Yog muab sau los ti ntug dhau lawm; Thaum kuv ntaus mas
yeej ua kab zoo zoo. Tab sis cas thaum muab xa mus cas cia li
dhiav tas lawm. Kuv ua neb tsaug ntau uas neb muab kho tau zoo heev.

Phauj maiv tooj. Kuv xav thov koj pab kuv ib qhov ntxiv thiab.
Yog tias koj rhuav tau no. Kuv xav thov koj muab kuv thawj phab
ntawv uas kuv xub sau ua ntej ntawd rhuav pov tseg kom txhob
muaj ob qhov yog hais ib cov lus xwb. Vim tias thaum kuv sau tas
muab xa lawm ces. Kuv rov muab nyeem no cas muaj tej qhov yuam
kev thiab sau tsis raug ces kuv rov muab kho rau tas. Muab xa
mus cas tsis yog qhov qub lawm. Nws mus tshwm dua qhov tshiab
nram qab lawm. Qhov qub nws tseem nyob li qub kuv muab saib
cas cov lus nws tseem yuam kev li qub thiab. Ces kuv thiaj muab
rov los rhuav tas rov nias rau cas nws nyob li qub. Yog koj

paub rhuav no koj pab muab qhov pem toj uas yog qhov kuv xub
sau ntawd. Vim nws muaj ntau nqi lus nyob hauv nws sau yuam kev
lawm. Koj tseg phab tawm rov hauv qab xwb. Ua tsaug ntau nawv
phauj. Mam sib ntsib dua Xiong J.P

Nyob zoo tub Zoov Pov,

Ua li, kuv mam mus muab qhov nram qab copie mus tso rau lub poste ua ntej es muab qhov nram qab tshem tawm.

Thaum koj ntau ntawv, koj ntau mus txawm kab ntawv kawg lawm los koj ntau mus, yog chaw tsis txaus nws mam nqes nws rau kab hauv qab xwb, koj txhob txhawj xeeb txog es koj nias qhov nqes kab. Vim qhov chaw ua koj sau thiab qhov uas tso tawm nws tsis zoo ib yam ces yog koj nias qhov nqes kab ces thaum koj tso tshwm, muaj kab ntev kab luv thiab cov kab ntawv tsis sib txuas, nyias nyob nyias kab.

Dua li, yog koj xav rov mus kho cov ntawv uas koj xub sau lawm,

koj txhob nias ntawm "Quote" koj nias ntawm Edite

mas koj thiaj mus kho tau. Kho tag koj rov Envoyer los Send thiab rov nyob qhov chaw qub.