UA KOOB TSHEEJ YES XUS YUG LOS XYOO 2018

Tim 13 lub 7 Hli 2019

Hnub Xya Lis Piam Kaum Plaub Nruab Xyoo C Nruab Lis Piam Xyoo I

Hwm LN Henry II, ua vaj ntxwv kav Yes Las Mas teb

Zaj Nyeem Ib: HP 49: 29-32; 50: 15-26A

29 Yas Kos ceeb toom rau nws cov tub tias : "Txog caij kuv yuav rov mus cuag kuv cov yawg koob lawm. Nej yuav muab kuv coj mus los nrog kuv cov phaj txiv nyob hauv lub qhov tsua hauv Es Plhoos tus neeg His Tis daim teb, 30 yog lub qhov tsua nyob hauv daim teb Mas Pes Las, nyob rov sab Mas Nples, hauv teb chaws Kas Nas Has, uas Has Nplas Has tau muas ntawm tus His Tis hu ua Es Plhoos los ua toj ntxas. 31 Has Nplas Has thiab nws poj niam Xas Las nkawd ob lub ntxa nyob ntawd, His Xas Has thiab Les Npes Kas nkawd kuj nyob ntawd. Kuv kuj muab Les As faus rau ntawd lawm thiab. 32 Yog daim teb thiab lub qhov tsua uas thaud lawv muas ntawm Hes Thes cov tub los."

50 15 Thaum Yos Xes cov tij laug pom tias lawv txiv tuag lawm, ces lawv hais tias: "Tsam Yos Xes tseem muaj kev chim rau peb, ces nws yuav ua phem rau peb pauj qhov peb tau ua rau nws ne?" 16 Ua li mas, lawv xa lus mus rau Yos Xes tias: “Ua ntej koj txiv yuav tuag nws tau hais li no cia: 17 'Nej yuav hais rau Yos Xes tias: Kuv thov koj zam txhaum rau koj cov tij laug, koj zam lawv qhov ua phem thiab lawv qhov txhaum rau lawv vim lawv tau ua tsis zoo rau koj lawm.’ Zaum no peb kuj thov koj zam txhaum rau koj txiv tus Tswv Ntuj cov tub txib thiab." Yos Xes kua muag poob nthav thaum lawv hais cov lus no rau nws. 18 Nws cov tij laug kuj tuaj ntsib nws kiag, lawv txhos caug ntawm nws ko taw pe nws tias: "Thov koj yuav peb ua koj cov tub txib." 19 Tiam sis Yos Xes teb rau lawv tias : "Nej tsis txhob ntshai ! Kuv puas yuav txeeb Tswv Ntuj qhov chaw? 20 Qhov phem nej tau ua rau kuv, mas Tswv Ntuj muab hloov ua ib qho zoo lawm, ces thiaj muaj tuaj raws li niaj hnub no, vim nws xav cawm ntau haiv neeg txoj sia. 21 Nyem no nej tsis txhob ntshai kiag li, kuv yog tus yuav yug nej kev noj kev haus thiab yug nej tej me tub me nyuam." Yos Xes nplij lawv thiab hais lus mos lus zoo rau lawv.
22 Ces Yos Xes thiab nws txiv tsev neeg thiaj nyob ruaj rau Hais Nkws Tos teb. Yos Xes nyob tau ib puas kaum xyoo. 23 Nws tau pom nws cov xeeb ntxwv, uas yog Es Fais cov tub mus txog peb tiam. Nws kuj tau pom Mas Kis uas yog Mas Nas Xes tus tub cov tub yug los rau Yos Xes puag tib si.
24 Thaum kawg, Yos Xes hais rau nws cov kwv tij tias : "Txog kuv lub caij tuag lawm, Tswv Ntuj yuav tuaj xyuas nej thiab yuav coj nej nce rov qab mus nyob hauv lub teb chaws uas nws tau cog lus muab rau Has Nplas Has, His Xas Has thiab Yas Kos." 25 Ces Yos Xes kom His Xas Lais cov tub cog lus li no : "Thaum Tswv Ntuj tuaj coj nej mus, mas nej yuav tsum thauj kuv cov pob txha ntawm no nrog nej mus." 26 Thaum Yos Xes tuag, nws muaj ib puas kaum xyoo.

NPN 105: 1-2, 3-4, 6-7

Txais: (NPN 69:33) Cov neeg me nej cia li zoo sia, thov kom nej zoo siab puv npo!

Nej ua HUAB TAIS tsaug, nej hu txog nws lub npe,
nej qhia nws cov hauj lwm loj rau cov haiv neeg paub.
Nej seev nkauj rau HUAB TAIS, nej hu nkauj cav txog nws ;
nej tshaj txog nws cov hwj huam yees ntxwv tas huv si.

Txais: (NPN 69:33) Cov neeg me nej cia li zoo sia, thov kom nej zoo siab puv npo!

Nej nrhiav koob meej rau nej nyob hauv nws lub npe,
cov uas muaj lub siab nrhiav Huab Tais, nej cia li zoo siab!
Nej nrhiav HUAB TAIS thiab nws lub zog,
nej nrhiav tsob hwb nws tsis tseg.

Txais: (NPN 69:33) Cov neeg me nej cia li zoo sia, thov kom nej zoo siab puv npo!

Has Nplas Has tsoom xeeb ntxwv,nej yog Huab Tais cov tub txib,
Yas Kos cov tub, nej yog cov Huab Tais tau xaiv;
HUAB TAIS nws yog peb tus Tswv Ntuj,
Nws tej cai tswj tas qhov txhia chaw hauv lub ntiaj teb.

Txais: (NPN 69:33) Cov neeg me nej cia li zoo sia, thov kom nej zoo siab puv npo!

As Les Lus Yas: 1 PZ 4: 14

Txais: As les lus yas, as les lus yas.

Yog nej raug luag cem vim Leej Pleev lub npe, mas nej txoj hmoov zoo,
vim Tswv Ntuj Leej Tswv Yim tuaj roos nej.

Txais: As les lus yas, as les lus yas.

Ntawv Moo Zoo: MT 10: 24-33

Yes Xus hais rau nws cov thwj tim tias:
24 "Tus thwj tim tsis loj dua nws tus xib hwb, tus tub txib kuj tsis loj dua nws tus tswv. 25 Tus thwj tim yuav txaus siab heev yog nws yoog tau raws li nws tus xib hwb lawm. Tus tub txib kuj yuav txaus siab heev yog nws zoo caum tau nws tus tswv lawm. Yog lawv twb hu tus tswv tsev ua Npes Ntxes Npus, mas lawv haj yam yuav hu cov neeg hauv nws tsev neeg li ntawd!
26 Li ntawd nej txhob ntshai lawv ! Vim tsis muaj ib yam npog rawv uas yuav tsis qhib tawm, tsis muaj ib yam zais ntshis uas yuav tsis tawm los rau sawv daws paub. 27 Tej yam uas kuv hais rau nej hauv qhov tsaus ntuj, nej yuav hais tawm thaum nruab hnub nrig. Hos yam nej hnov ntxhi rau hauv nej pob ntseg, mas nej yuav nce mus tshaj tawm saum tej ru tsev. 28 Nej txhob ntshai cov neeg tua tau nej lub cev, tab sis lawv tua tsis tau nej tus plig. Nej yuav tsum ntshai tus muaj peev xwm rhuav tau nej tus plig thiab nej lub cev huv si nyob hauv lub pas hluav taws.
29 Ob tug noog tsig txhuv tsuas muab muag tau ib npib xwb los tsis yog? Tsis kav, tsis muaj ib tug poob hauv av tau, yog nej Txiv tsis tso lus. 30 Nej kuj ib yam, tab yog nej cov plaub hau, nej Txiv yeej suav tas huv si lawm. 31 Li ntawd, nej tsis txhob ntshai dab tsi, nej muaj nqis tshaj tej pab tsig txhuv coob coob ua ke.
32 Leej twg lees paub kuv rau sawv daws, mas kuv kuj yuav lees paub nws rau kuv Txiv nyob saum Ntuj. 33 Hos tus tsis lees paub kuv rau sawv daws, mas kuv kuj yuav tsis lees paub nws rau kuv Txiv nyob saum ntuj thiab.”

Tim 15 lub 7 Hli 2019

Hnub Ob Lis Piam Kaum Tsib Nruab Xyoo C Nruab Lis Piam Xyoo I

Hwm LN Bonaventure, Tswv Qhia thiab Kws Txuj Ntxhiab

Zaj NYeem Ib: KT 1: 8-14, 22

8 Muaj ib tug vaj tshiab sawv los kav Hais Nkws Tos teb, nws tsis paub dab tsi txog Yos Xes lawm. 9 Nws hais rau nws cov neeg tias: "Cov neeg His Xas Lais coob dhau thiab muaj zog dhau lawm. 10 Peb yuav tsum nrhiav ib zag tswv yim zoo yuam kom lawv tsis txhob huam vam ntxiv. Yog tsis ua li ntawd mas ntshai tsam thaum muaj tsov rog, lawv mus nrog cov yeeb ncuab koom siab tig ua rog rau peb, ces lawv yuav tawm hauv lub teb chaws no mus." 11 Ces lawv tsa ib cov thawj saib hauj lwm yuam cov His Xas Lais kom ua hauj lwm hnyav hnyav raws li lawv txib; cov His xas Lais thiaj txhim tsa tau ob lub nroog muaj tej txhab ntim qoob loo rau Fas Las Oos, yog ob lub nroog Pis Toos thiab Las Mas Xes. 12 Tab sis cov His Xas Lais yim raug txom nyem, lawv yim huam vam coob ntxiv xwb, lawv mus nyob puv qhov txhia chaw. Ces cov Hais Nkws Tos ntshai cov His Xas Lais. 13 Lawv muab cov His Xas Lais yuam ua qhev nruj nruj, 14 mas lawv lub neej txom nyem kawg, vim lawv ua hauj lwm hnyav hnyav xwb: lawv do av, puab thwv cib, thiab lawv ua ntau yam hauj lwm hnyav nyob nruab liaj nruab teb. Luag yuam lawv nruj nruj kom lawv ua txhua tsav txhua yam.
22 Ces Fas Las Oos ceeb toom li no rau nws cov neeg tias : "Cov His Xas Lais yug tau pes tsawg leej tub, mas nej muab pov rau hauv tus niam dej kom tas, hos cov ntxhais mas, nej mam cia nyob."

NPN 124: 1B-3, 4-6, 7-8

Txais: (8a) Peb muaj kev pab yog nyob hauv Huab Tais lub npe.

Yog HUAB TAIS tsis txhob tuaj peb tog ,
Kom His Xais Lais yuav tsum hais tias:
yog HUAB TAIS tsis txhob tuaj peb tog,
thaum cov neeg sawv tuaj tua peb,
mas lawv yeej yuav muab peb nqos ciaj,
vim lawv npau taws rau peb cuag hluav taws kub.

Txais: (8a) Peb muaj kev pab yog nyob hauv Huab Tais lub npe.

Ntshai dej twb los nyab peb tas, tus dej twb phwj tuaj ntswj peb mus tas;
Dej sab siv twb huam tuaj vov peb tas.
Peb kav tsij cav lus zoo txog HUAB TAIS,
Vim nws tsis tau pub kom peb raug lawv xuas hniav xo peb !

Txais: (8a) Peb muaj kev pab yog nyob hauv Huab Tais lub npe.

Peb zoo puav tam li noog dim ntawm tus cuab ntxiab lub vas ;
lub vas ntuag rhe, peb dim plaws lawm.
Peb qhov chaw vam khom yog nyob hauv HUAB TAIS lub npe,
Nws uas yog tus tsim lub ntuj lub teb.

Txais: (8a) Peb muaj kev pab yog nyob hauv Huab Tais lub npe.

As Les Lus Yas: MT 5: 10

Txais: As les lus yas, as les lus yas.

Cov tau txoj hmoov zoo yog cov raug luag hiam vim txoj kev ncaj,
Ntuj lub Ceeb Tsheej yog lawv tug.

Txais: As les lus yas, as les lus yas.

Ntawv Moo Zoo: MT 10: 34—11:1

Yes Xus hais rau nws cov thwj tim tias:
34 "Nej txhob xav tias kuv tuaj yog coj kev thaj yeeb tuaj rau lub ntiaj teb. Kuv tsis coj kev thaj yeeb tuaj, kuv coj hniav ntaj hniav riam tuaj. 35 Kuv tuaj ua kom tub sawv los tiv txiv, ntxhais sawv los tiv niam, nyab sawv los tiv poj. 36 Ua li mas yus cov yeeb ncuab yog cov neeg nyob hauv yus tsev.
37 "Tus nyiam nws niam nws txiv dua kuv, mas nws tsis tsim nyog nrog kuv. Tus nyiam nws tej tub tej ntxhais dua kuv, mas nws tsis tsim nyog nrog kuv. 38 Tus tsis kwv nws tus ntoo cuam thiab tsis raws kuv qab, mas nws tsis tsim nyog nrog kuv. 39 Tus nrhiav nws txoj sia, nws yuav ua nws txoj sia ploj, hos tus ua nws txoj sia ploj vim kuv, mas nws yuav nrhiav tau nws txoj sia.
40 "Tus txais nej, mas yog nws txais kuv. Tus txais kuv, mas yog nws txais Tus xa kuv tuaj. 41 Tus txais ib tug yaj saub, vim tus ntawd yog yaj saub, mas nws yuav txais koob haum phim tus yaj saub. Tus txais ib tug neeg ncaj, vim tus ntawd yog neeg ncaj, mas nws yuav txais koob haum phim tus neeg ncaj. 42 Yog leej twg pub txawm ib khob dej txiag xwb los xij rau ib tug neeg me li cov no haus, vim tus ntawd yog ib tug thwj tim, mas kuv hais tseeb rau nej tias, nws yeej yuav tsum tau txais nws qhov koob haum."
11 1 Thaum Yes Xus qhia nws kaum ob leeg thwj tim tas lawm, nws tso qhov chaw ntawd tseg, nws mus qhuab qhia thiab tshaj lub Moo Zoo rau hauv lawv cov nroog.

Tim 16 lub 7 Hli 2019

Hnub Peb Lis Piam Kaum Tsib Nruab Xyoo C Nruab Lis Piam Xyoo I

Hwm Niam Mab Liab nyob saum Roob Kas Mes-Our Lady of Mount Carmel

Zaj Nyeem Ib: KT 2: 1-15A

1 Muaj ib tug txiv neej yog Les Vis xeeb ntxwv mus yuav ib tug ntxhais kuj yog Les Vis xeeb ntxwv thiab, los ua txij nkawm. 2 Tus poj niam yug tau ib tug tub. Nws pom tias nws tus tub zoo nraug kawg, nws muab tus tub zais tau peb lub hlis. 3 Thaum nws zais tsis tau ntxiv lawm, nws npaj ib lub tawb xuas ncaug fiab, nws muab roj hmab dub thiab muab ciab ntoo leem zoo zoo rau. Nws tso tus me nyuam rau hauv lub tawb, nws coj mus tso rau hauv ib koog tauj deg ntawm ntug Niam Dej. 4 Tus me nyuam tus muam hlob nyob tsis deb ntawd saib saib yuav muaj dab tsi tshwm sim rau tus me nyuam. 5 Thaum ntawd Fas Las Oos tus ntxhais nqes tuaj da dej hauv tus Niam Dej, nws cov ntxhais txib ncig ua si ntawm ntug dej. Tus ntxhais pom lub tawb ntab ntab hauv cov tauj deg, nws kom ib tug ntxhais txib mus muab los. 6 Nws muab qhib xyuas ces nws pom tus me nyuam : yog ib tug tub quaj quaj nyob hauv. Nws hlub tus me nyuam, nws hais tias : "Yog ib tug me nyuam tub Hes Nplaws." 7 Tus me nyuam tus muam tawm los hais rau Fas Las Oos tus ntxhais tias : "Koj puas xav kom kuv mus nrhiav ib tug poj niam Hes Nplaws tuaj pab koj pub mis rau tus me nyuam noj ?" 8 Fas Las Oos tus ntxhais teb tias : "Koj mus nrhiav tuaj." Tus me ntxhais thiaj mus nrhiav tus me nyuam leej niam tuaj. 9 Fas Las Oos tus ntxhais hais tias : "Koj coj tus me nyuam no mus tu rau kuv, kuv yuav muab nqi zog rau koj." Ces tus poj niam coj tus me nyuam mus tu lawm. 10 Thaum tus me nyuam loj lawm, nws coj tus me nyuam rov tuaj rau Fas Las Oos tus ntxhais. Fas Las Oos tus ntxhais hlub tus me nyuam ib yam li yog nws yug. Nws tis npe rau hu ua Mais Xes, nws hais tias : "Vim kuv tau npo nws hauv dej los."
11 Thaum Mais Xes loj tiav lawm, muaj ib zaug, nws mus xyuas nws haiv neeg. Nws pom tej hauj lwm hnyav hnyav uas luag yuam lawv ua. Nws kuj pom ib tug Hais Nkws Tos tab tom muab nws ib tug kwv tij Hes Nplaws ntaus. 12 Nws ntsia ib ncig tsis pom muaj leej twg, nws txawm muab tus Hais Nkws Tos tua, thiab muab zais rau hauv cov suab puam. 13 Hnub tom qab, nws rov mus dua, nws pom ob tug neeg Hes Nplaws tab tom sib ntaus. Nws hais rau tus xub thab tias : "Tim li cas koj ntaus koj tus npawg ?" 14 Tus ntawd teb tias : "Leej twg tsa koj ua txwj laus txiav txim rau wb ? Koj puas xav muab kuv tua xws li koj tua tus Hais Nkws Tos thiab ?" Ces Mais Xes ntshai, nws xav tau tias : "Ntshai sawv daws paub tas lawm." 15 Ces Fas Las Oos kuj hnov hais txog qhov ntawd, nws nrhiav Mais Xes tua. Mais Xes thiaj khiav mus deb ntawm Fas Las Oos. Nws khiav mus nyob Mas Dias teb.

NPN 69: 3, 14, 30-31, 33-34

Txais: (33) Nej tig mus nrhiav Huab tais thaum nej txom nyem, ces nej yuav muaj txoj sia.

Kuv mus zom rau hauv lub hav iav muaj av nkos tob tob,
tsis muaj dab tsi ruaj rau kuv tsuj tiag taw.
Kuv tog rau hauv cov dej tob,
dej ceev ntsawj tuaj kuv kov tsis yeej.

Txais: (33) Nej tig mus nrhiav Huab tais thaum nej txom nyem, ces nej yuav muaj txoj sia.

Ntawm kuv, HUAB TAIS, kuv teev ntuj thov txog koj
kom koj ua siab zoo rau kuv, Tswv Ntuj.
Koj muaj lub siab hlub loj tas nrho, thov koj teb kuv,
thov koj tuaj pab kuv tas mus li.

Txais: (33) Nej tig mus nrhiav Huab tais thaum nej txom nyem, ces nej yuav muaj txoj sia.

Kuv poob rau kev txom nyem thiab kev tu siab lawm,
Tswv Ntuj, thov kom koj txoj kev cawm txuag kuv cia.
Kuv yuav hu ib zag nkauj cav txog Tswv Ntuj lub npe,
kuv yuav ua nws tsaug kom nws nto koob meej.

Txais: (33) Nej tig mus nrhiav Huab tais thaum nej txom nyem, ces nej yuav muaj txoj sia.

Cov neeg me pom, lawv zoo siab kawg nkaus :
Nej cov uas nrhiav Tswv Ntuj, thov kom nej lub siab rov ciaj sia.
Vim HUAB TAIS pub rau cov pluag raws li lawv thov;
nws tsis ntxub cov neeg raug luag coj mus kaw.

Txais: (33) Nej tig mus nrhiav Huab tais thaum nej txom nyem, ces nej yuav muaj txoj sia.

As Les Lus yas: NPN 95: 8

Txais: As les lus yas, as les lus yas.

Yog hnub no nej hnov nws lub suab,
Tsis txhob ua nej lub siab tawv ncauj.

Txais: As les lus yas, as les lus yas.

Ntawv Moo Zoo: MT 11: 20-24

20 Yes Xus pib cem cov nroog uas tau pom nws ua hwj huam yees ntxwv ntau tshaj, tab sis lawv tsis hloov siab li. 21 “Kos Las Ntxis, koj txoj hmoov phem ! Npes Xais Das, koj txoj hmoov phem ! Vim tias, cov hwj huam yees ntxwv uas kuv tau ua nyob hauv neb, kheev lam yog ua nyob Tws Los thiab nyob Xis Doos, mas ob lub nroog ntawd twb npua ntaub tsaj thiab muab hmoov tshauv nphoo nkawd puag ntxov lawm, thiab nkawd twb hloov siab tas lawm. 22 Kuv hais meej rau neb tias, txog hnub txiav txim, Tws Los thiab Xis Doos yuav raug txim sib dua neb. 23 Thiab koj, Kas Fas Naus, koj xav tias koj yuav sawv siab txij ntuj no puas yog ? Koj yuav nqes lawm puag hauv tub tuag teb. Vim tias cov hwj huam yees ntxwv kuv tau ua nyob hauv koj, kheev lam yog ua nyob Xos Dos Mas, mas lub nroog ntawd twb tseem yuav nyob txog tav no. 24 Kuv hais meej rau koj, txog hnub txiav txim, thaj av Xos Dos Mas yuav raug txim sib dua koj."

Tim 17 lub 7 Hli 2019

Hnub Plaub Lis Piam Kaum Tsib Nruab Xyoo A Nruab Lis Piam Xyoo I

Zaj Nyeem Ib: KT 3: 1-6, 9-12

1 Mais Xes niaj hnub mus zov nws yawm txiv Zes Raus pab yaj; Zes Raus yog ib tug leej choj Mas Dias. Mais Xes coj cov yaj mus noj zaub dhau lub hav suab puam, ces nws mus txog Tswv Ntuj lub roob Hos Les. 2 Nyob ntawd HUAB TAIS tus Tshiab yees tawm los rau Mais Xes pom nyob hauv ib co nplaim taws cig cig hauv ib tsob me nyuam ntoo. Mais Xes ntsia ntsoov tsob me nyuam ntoo ntawd yeej cig ntsa iab tab sis ua cas tsis txawj kug li. 3 Ces Mais Xes hais tias : "Kuv yuav lug kev mus xyuas yam txawv txawv ntawd saib yog dab tsi, ua cas tsob me nyuam ntoo ntawd tsis txawj kug li." 4 HUAB TAIS pom nws lug kev tuaj xyuas, ces Tswv Ntuj hu nws hauv tsob me nyuam ntoo tuaj tias : "Mais Xes, Mais Xes." Mais Xes teb tias : "Kuv nyob ntawm no." 5 Tswv Ntuj hais tias : "Koj txhob txav los ze ntawm no, hle koj nkawm khau ntawm koj ko taw, vim thaj chaw uas koj tsuj no yog ib thaj chaw ntshiab." 6 Tswv Ntuj hais ntxiv tias : "Kuv yog koj cov yawg koob tus Tswv Ntuj, yog Has Nplas Has tus Tswv Ntuj, yog His Xas Has tus Tswv Ntuj, thiab yog Yas Kos tus Tswv Ntuj." Ces Mais Xes thaiv nws lub ntsej muag, vim nws ntshai ntsia Tswv Ntuj.
9 “Nyem no, cov His Xas Lais lub suab quaj nrov tuaj txog kuv lawm. Thiab kuv kuj pom tias cov Hais Nkws Tos quab yuam lawv hnyav kawg nkaus. 10 Li ntawd, koj mus, kuv xa koj mus cuag Fas Las Oos. Koj mus coj kuv haiv neeg uas yog His Xas Lais cov tub tawm hauv Hais Nkws Tos teb los." 11 Mais Xes hais rau Tswv Ntuj tias : "Kuv yog leej twg, kuv thiaj yuav mus cuag tau Fas Las Oos, thiab coj tau His Xas Lais cov tub tawm hauv Hais Nkws Tos teb los ?" 12 Tswv Ntuj hais tias : "Kuv yuav nrog nraim koj; lub cim ntawm no yuav qhia rau koj kom koj paub tseeb tias yog kuv xa koj mus tiag : Thaum koj coj haiv His Xas Lais tawm hauv Hais Nkws Tos teb los lawm, mas nej yuav tsob hwb Tswv Ntuj saum lub roob no kiag."

NPN 103: 1B-2, 3-4, 6-7

Txais: (8a) Huab Tais hlub thiab khuv leej neeg.

Kuv tus ntsuj plig, koj cav txog HUAB TAIS;
kuv tej siab ntsws, nej cav txog nws lub npe ntshiab.
Kuv tus ntsuj plig, koj cav txog HUAB TAIS,
koj tsis txhob hnov qab nws tej kev zoo ib qho li.

Txais: (8a) Huab Tais hlub thiab khuv leej neeg.

Nws tau zam tas koj tej txhaum rau koj,
nws tau kho tas koj tej kev mob nkeeg kom zoo hlo..
Nws tau cawm koj txoj sia ntawm kev puas ntsoog,
nws tau muab nws txoj kev ua siab zoo thiab kev khuv leej rau koj ntoo.

Txais: (8a) Huab Tais hlub thiab khuv leej neeg.

HUAB TAIS muab kev ncaj rau cov raug luag tsuj, nws tsa lawv cai.
Nws qhia nws tej kev rau Mais Xes paub,
nws qhia nws cov hauj lwm rau tsoom His Xas Lais paub.

Txais: (8a) Huab Tais hlub thiab khuv leej neeg..

As Les Lus Yas: MT 11: 25

Txais: As les lus yas, as les lus yas.

Kuv cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog Ntuj Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: MT 11: 25-27

25 Lub caij ntawd, Yes Xus hais tias : "Txiv, kuv cav lus zoo txog koj, Huab Tais kav lub ntuj lub teb, vim koj zais tej yam ntawd rau cov neeg thoob tsib thiab cov neeg ntse, koj ho qhib rau cov neeg me paub.
26 Muaj tseeb, Txiv, koj lub siab yeej nyiam li ntawd.
27 Kuv Txiv muab tas ib puas tsav yam rau kuv. Tsis muaj leej twg paub Leej Tub, tsuas kawg Leej Txiv thiaj paub xwb. Kuj tsis muaj leej twg paub Leej Txiv, tsuas kawg Leej Tub thiaj paub xwb, thiab tus uas Leej Tub pom zoo qhia rau kom paub xwb.”

Tim 18 lub 7 Hli 2019

Hnub Tsib Lis Piam Kaum Tsib Nruab Xyoo C Nruab Lis Piam Xyoo I

Hwm LN Camillus de Lellis

Zaj Nyeem Ib: KT 3: 13-20

13 Mais Xes hais rau Tswv Ntuj tias: "Thaum kuv mus cuag cov His Xas Lais, thiab kuv hais rau lawv tias : 'Nej cov yawg koob tus Tswv Ntuj xa kuv tuaj pab nej,' yog lawv nug kuv tias : 'Nws lub npe hu li cas ?' kuv yuav hais li cas rau lawv ?” 14 Tswv Ntuj hais rau Mais Xes tias : "Kuv yog tus Kuv Yog." Tswv Ntuj hais ntxiv tias : "Koj yuav hais rau cov His Xas Lais li no : ‘Tus Kuv Yog’ xa kuv tuaj pab nej." 15 Tswv Ntuj tseem hais ntxiv rau Mais Xes tias : "Koj yuav hais li no rau cov His Xas Lais : ‘ HUAB TAIS, uas yog nej cov yawg koob tus Tswv Ntuj, yog Has Nplas Has tus Tswv Ntuj, His Xas Has tus Tswv Ntuj thiab Yas Kos tus Tswv Ntuj xa kuv tuaj pab nej.’ Lub npe no yog kuv lub npe mus li ib txhis, thiab yog lub npe ua kom neeg nco txog kuv mus txheej dhau txheej.
16 Koj mus, koj hu cov txwj laus His Xas Lais tuaj sib sau ua ke, koj hais rau lawv tias: 'HUAB TAIS uas yog nej cov yawg koob tus Tswv Ntuj, yog Has Nplas Has tus Tswv Ntuj, His Xas Has tus Tswv Ntuj thiab Yas Kos tus Tswv Ntuj, tau yees tawm los rau kuv pom, nws hais rau kuv tias : “Kuv tau tuaj xyuas nej, thiab tau pom txhua yam uas luag ua rau nej nyob Hais Nkws Tos teb lawm. 17 Ces kuv tau hais tias kuv yuav coj nej tawm hauv txoj kev txom nyem nyob Hais Nkws Tos teb los mus nyob hauv cov neeg Kas Nas Has, thiab cov His Tis, thiab cov As Mos Lis, thiab cov Pes Lis Xis, thiab cov His Vis thiab cov Yes Npus Xis daim av, yog ib daig av uas muaj mis nyuj thiab zib mu ntws lug.”’ 18 Lawv yuav mloog koj cov lus. Ces koj thiab cov txwj laus His Xas Lais, nej yuav mus cuag tus vaj Hais Nkws Tos, nej yuav hais rau nws tias : 'HUAB TAIS uas yog cov Hes Nplaws tus Tswv Ntuj tuaj xyuas peb lawm. Thov koj tso lus rau peb mus deb li peb hnub ke lawm hauv teb chaws suab puam, peb yuav mus txi peb tus HUAB TAIS Tswv Ntuj.' 19 Kuv paub zoo tias tus vaj Hais Nkws Tos yuav tsis tso nej mus yooj yim, yuav tsum muaj ib txhais tes muaj hwj huam yuam nws xwb, nws thiaj tso. 20 Vim li ntawd, kuv yuav tsa kuv txhais tes thiab yuav ua ntau yam hwj huam yees ntxwv nyob ntawm tus vaj xub ntiag los ntaus Hais Nkws Tos teb, ces thaum kawg, nws yuav tso nej mus.”

NPN 105: 1+5, 8-9, 24-25, 26-27

Txais: (8a) Huab Tais nco ntsoov nws lo lus nws tau cog mus ib txhis.
los: As les lus yas.

Nej cav lus zoo ua HUAB TAIS tsaug, nej hu txog nws lub npe,
nej qhia nws cov hauj lwm rau txhua haiv neeg paub.
Nej nco ntsoov txog cov hwj huam yees ntxwv nws tau ua,
Nco ntsoov nws cov hauj lwm txaus qhuas, nws lub muaj hwj huam,
thiab cov lus txiav txim tawm ntawm nws lub ncauj los.

Txais: (8a) Huab Tais nco ntsoov nws lo lus nws tau cog mus ib txhis.
los: As les lus yas.

Nws nco ntsoov mus li txog cov lus nws cog cia,
yog ib co lus nws cog ruaj rau txhiab tiam tub ki.
Yog cov lus nws tau nrog Has Nplas Has cog,
thiab nws tau rov zeem tseeb rau His Xas Has.

Txais: (8a) Huab Tais nco ntsoov nws lo lus nws tau cog mus ib txhis.
los: As les lus yas.

Nws ua kom nws haiv neeg huam vam coob tuaj lawm ntau,
Thiab muaj zog dua haiv neeg uas ntxub lawv.
Nws ntxeev cov ntawd lub siab kom lawv ntxub nws haiv neeg,
thiab hiam ua phem rau nws cov tub txib.

Txais: (8a) Huab Tais nco ntsoov nws lo lus nws tau cog mus ib txhis.
los: As les lus yas.

HUAB TAIS xa nws tus tub txib Mais Xes
thiab As Loos uas nws tau xaiv mus.
Nkawd ua Huab Tais cov cim muaj hwj xyeej nyob hauv lawv,
thiab ua hwj huam yees ntxwv nyob hauv cov Has lub teb chaws

Txais: (8a) Huab Tais nco ntsoov nws lo lus nws tau cog mus ib txhis.
los: As les lus yas.

As Les Lus Yas: MT 11: 28

Txais: As les lus yas, as les lus yas.

Huab Tais hais tias: Tas nej sawv daws uas nej khwv
thiab ris nra hnyav, nej tuaj cuag kuv, Kuv yuav cia nej so los siav.

Txais: As les lus yas, as les lus yas.

Ntawv Moo Zoo: MT 11: 28-30

Yes Xus hais tias:
28 "Tas nej sawv daws uas nej khwv thiab ris nra hnyav, nej tuaj cuag kuv mog ! Kuv yuav cia nej so los siav.
29 Nej txais kuv tus quab mus kwv. Nej kawm ntawm kuv mog, vim kuv siab zoo thiab kuv tsis muab hlob; nej tus plig yuav nrhiav tau chaw so los siav.
30 Vim kuv tus quab kwv yooj yim, thiab kuv lub nra sib.”

Tim 19 lub 7 Hli 2019

Hnub Rau Liam Kaum Tsib Nruab Xyoo C Nruab Lis Piam Xyoo I

Zaj Nyeem Ib: KT 11: 10—12: 14

11 10 Mais Xes thiab As Loos nkawd ua ib cov hwj huam yees ntxwv loj nyob ntawm Fas Las Oos xub ntiag, tiam sis Huab Tais ua kom Fas Las Oos lub siab tawv qhawv, ces Fas Las Oost sis kam tso cov His Xas Lais tawm ntawm nws lub teb chaws mus.
12 1 HUAB TAIS hais rau Mais Xes thiab As Loos nyob Hais Nkws Tos teb tias : 2 "Lub hlis no nej yuav muab suav ua thawj lub hlis, yuav yog lub ib hlis pib lub xyoo rau nej. 3 Neb hais rau ib tsoom His Xas Lais tias: Lub hlis no xiab kaum, mas cov txiv tsev nyias yuav tsum npaj nyias ib tug tsiaj me rau nyias tsev neeg, thiab txhua lub tsev nyias yuav tsum npaj nyias ib tug tsiaj me. 4 Yog yim neeg twg tsawg dhau noj tsis tas ib tug tsiaj me, mas nej yuav mus nrog lwm yim neeg uas nyob ze nej dua cov kom muaj neeg coob txaus koom noj ib tug tsiaj me. Nej yuav xaiv ib tug kom txaus nkaus sawv daws noj tsis seem. 5 Yuav tsum yog ib tug txiv tsis muaj chaw xyeej, hnub nyoog ib xyoos; Nej xaiv ib tug thav yaj los tau ib tug thav tshis los tau.
6 Nej yuav muab tso rau ib qho tos txog hnub xiab kaum plaub lub hlis no. Hmo tim kaum plaub, tas tsoom His Xas Lais, nyias yuav tua nyias tus tsiaj thaum tsaus ntuj zuag. 7 Nej yuav cug cov ntshav coj mus pleev ob tug ncej puab rooj thiab pleev daim txiag tav saum lub qhov rooj nkag hauv lub tsev uas nej noj tus tsiaj ntawd. 8 Hmo ntawd, nej yuav noj tus tsiaj cov nqaij txhiab hauv hluav taws, nej yuav noj ntxuag ib co ncuav mov tsis xyaw poov xab, thiab ib cov txuj lom iab. 9 Nej tsis txhob muab ib yam ua nyoos los hau xyaw dej noj li. Nej tsuas muab ci hauv hluav taws noj xwb, nrog lub taub hau, cov tes taw thiab plab hnyuv huv si. 10 Nej tsis txhob tseg ib qho seem rau tag kis li. Tag kis, yog seem dab tsi, mas nej muab pov hlawv hauv hluav taws kom tas.
11 Nej yuav noj tus tsiaj ntawd zoo li no : Nej sia siv khov kho, nej rau khau thiab tuav nej rab pas nrig ntawm tes huv si, nej yuav noj tsuag tsuag noj nrawm nroos, vim yog HUAB TAIS hmo hla. 12 Hmo ntawd, kuv yuav hla mus thoob Hais Nkws Tos teb, kuv yuav ntaus neeg cov tub hlob, thiab tsiaj cov me nyuam hlob, kom ntog tas huv tib si. Thiab kuv yuav txiav txim rau cov dab Hais Nkws Tos, vim kuv yog HUAB TAIS. 13 Cov ntshav yuav yog ib lub cim qhia tias nej nyob hauv cov tsev uas nej nyob ntawd. Kuv pom cov ntshav, kuv yuav hla plaws mus, nej yuav tsis raug qhov xwv txheej loj thaum kuv tuaj ntaus Hais Nkws Tos teb.
14 Nej yuav cim ntsoov hnub ntawd cia, nej yuav muab qee ua ib hnub nqaum paj nqaum nruas cav txog HUAB TAIS mus txheej dhau txheej tiam dhau tiam. Nej yuav muab hnub ntawd ua ib txog cai nyob muys li rau nej coj kom tau cav txog HUAB Tais.

NPN 116: 12-13, 15+16BC, 17-18

Txais: (13) Kuv yuav cev lub ntim cawm neeg,
kuv yuav hu txog HUAB TAIS lub npe.

Kuv yuav muab dab tsi los pauj
ib puas tsav yam zoo uas HUAB TAIS ua rau kuv ?
Kuv yuav cev lub ntim cawm neeg,
kuv yuav hu txog HUAB TAIS lub npe.

Txais: (13) Kuv yuav cev lub ntim cawm neeg,
kuv yuav hu txog HUAB TAIS lub npe.

HUAB TAIS saib cov ntseeg txog nws
Lawv txoj kev tuag muaj nqes loj.
Kuv yog koj tus tub txib, yog koj tus ntxhais txib tus tub;
Koj tau daws cov hlua khi kuv.

Txais: (13) Kuv yuav cev lub ntim cawm neeg,
kuv yuav hu txog HUAB TAIS lub npe.

Kuv yuav cev ib co txim los ua koj tsaug,
kuv yuav tuav txog HUAB TAIS lub npe.
Kuv yuav pauj kuv lub yeem rau HUAB TAIS
nyob ntawm tas nws haiv neeg xub ntiag,

Txais: (13) Kuv yuav cev lub ntim cawm neeg,
kuv yuav hu txog HUAB TAIS lub npe.

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias, kuv cov yaj mloog kuv lub suab;
kuv paub kuv cov yaj, lawv raws li nraim kuv mus.

Txais: As les lus yas, as les lus yas.

Ntawv Moo Zoo: MT 12: 1-8

1 Muaj ib hnub Xas Npas Tos, Yes Xus hla ib co teb npleg. Cov thwj tim tshaib plab, ces lawv pib de tej hnab nplej los noj. 2 Cov Fas Lis Xais pom li ntawd, lawv hais rau Yes Xus tias : "Saib, koj cov thwj tim ua tej yam txwv tsis pub ua hnub Xas Npas Tos !" 3 Yes Xus hais rau lawv tias : "Nej tsis tau nyeem txog qhov Das Vis ua thaum Das Vis thiab nws cov neeg tshaib plab lod, 4 tias lawv tau chaws mus hauv Tswv Ntuj lub tsev, thiab lawv tau noj cov ncuav mov txi Ntuj, uas Das Vis thiab nws cov neeg noj tsis nyog, kawg yog cov leej choj xwb thiaj noj tau lod? 5 Los nej puas tau nyeem hauv Txoj Cai tias, hnub Xas Npas Tos, cov leej choj uas nyob hauv lub Tuam Tsev Teev Ntuj tsis caiv hnub Xas Npas Tos, los lawv tsis txhaum? 6 Kuv hais rau nej tias, nyob ntawm no, muaj ib yam loj dua lub Tuam Tsev Teev Ntuj. 7 Lo Lus hais tias : ‘Qhov kuv xav tau yog txoj kev khuv leej tsis yog thaj txi Ntuj,’ yog nej paub lo lus no lub ntsiab, mas nej yuav tsis muab txim rau cov neeg tsis txhaum. 8 Vim tias, Neeg Leej Tub yog tus tswv kav hnub Xas Npas Tos."

Tim 20 lub 7 Hli 2019

Hnub Xya Lis Piam Kaum Tsib Nruab Xyoo C Nruab Lis Piam Xyoo I

Hwm LN Apollinaris

Zaj Nyeem Ib: KT 12: 37-42

37 Cov His Xas Lais sawv kev ntawm Las Maws Xes mus rau Xws Kos, lawv muaj ze ntawm rau pua txhiab leej txiv neej mus ko taw, tsis suav me nyuam yaus 38 Ib pab neeg coob coob muaj ntau hom neeg sib xyaws daws kuj nrog lawv mus thiab. Tseem muaj lawv cov tsiaj loj thiab tsiaj me coob coob nrog lawv thiab. 39 Lawv muab cov hmoov nplej uas tau do tsis xyaw poov xab uas lawv nqa Hais Nkws Tos teb los ci ua tej lub ncuav tsis su noj : vim luag ntiab kom lawv tawm hauv Hais Nkws Tos teb sai sai, ces lawv tsis muaj sij hawm tos ntxiv thiab ntim tsis tau txhiam xws rau lawv li.
40 Cov His Xas Lais nyob Hais Nkws Tos teb tau plaub puas peb caug xyoo. 41 Hnub uas puv plaub puas peb caug xyoo kiag ntawd, HUAB TAIS tsoom tub ki tawm hauv Hais Nkws Tos teb mus. 42 Hmo ntawd HUAB TAIS tau zov hmo saib xyuas tsoom His Xas Lais, nws ua kom lawv tawm ntawm Hais Nkws Tos teb los; yog ib hmos uas tas tsoom tub ki His Xas Lais yuav nyob zov hmo cav txog HUAB TAIS txheej dhau txheej tiam dhau tiam.

NPN 136: 1+23-24, 10-12, 13-15

Txais: Nws txoj kev khuv leej yuav nyob tas ib txhiab ib txhis.
los: As les lus yas.

Nej cav lus zoo ua HUAB TAIS tsaug, vim nws siab zoo,
Vim nws txoj kev khuv leej yuav nyob tas ib txhiab ib txhis
Thaum peb poob qis, nws nco txog peb,
vim nws txoj kev khuv leej yuav nyob tas ib txhiab ib txhis.
nws rub rhe peb dim ntawm oeb cov yeeb ncuab los,
vim nws txoj kev khuv leej yuav nyob tas ib txhiab ib txhis.

Txais: Nws txoj kev khuv leej yuav nyob tas ib txhiab ib txhis.
los: As les lus yas.

Nws ntaus cov Hais Nkws Tos nyob hauv lawv cov tub hlob,
Vim nws txoj kev khuv leej yuav nyob tas ib txhiab ib txhis.
Nws coj cov His Xas Lais tawm hauv lawv mus,
Vim nws txoj kev khuv leej yuav nyob tas ib txhiab ib txhis.
Nws siv nws txhais tes muaj zog, nws tsa nws txhais npab pab lawv,
Vim nws txoj kev khuv leej yuav nyob tas ib txhiab ib txhis.

Txais: Vim nws txoj kev khuv leej yuav nyob tas ib txhiab ib txhis
los: As les lus yas.

Nws phua dej ntuj Lisb ua ob sab,
Vim nws txoj kev khuv leej yuav nyob tas ib txhiab ib txhis.
Nws coj His Xas Lais hla hauv nruab nrab,
Vim nws txoj kev khuv leej yuav nyob tas ib txhiab ib txhis.
Nws ua kom Fas Las Oos thiab nws tsoom tub rog tog rau hauv dej,
Vim nws txoj kev khuv leej yuav nyob tas ib txhiab ib txhis.

Txais: Vim nws txoj kev khuv leej yuav nyob tas ib txhiab ib txhis.
los: As les lus yas.

As Les Lus Yas: 2 KLN 5: 19

Txais: As les lus yas, as les lus yas.

Tswv Ntuj ua kom lub ntiaj teb nrog nws rov sib haum xeeb nyob hauv Leej Pleev
Thiab nws muab kev tshaj lub moo zoo txog kev sib haum xeeb cob rau peb ua.

Txais: As les lus yas, as les lus yas.

Ntawv Moo Zoo: MT 12: 14-21

14 Cov Fas Lis Xais tawm mus sab laj nrhiav saib yuav muab Yes Xus tua zoo li cas.
15 Yes Xus paub qhov lawv xav ua, ces nws tawm ntawm qhov chaw ntawd mus. Muaj neeg coob coob raws nws,
ces nws kho lawv sawv daws zoo tas huv si. 16 Tiam sis nws txwv tsis pub lawv qhia rau leej twg paub li.
17 Ua li mas muaj tuaj raws li Yaj Saub His Xais tau hais tseg tias :
18 “Nej ntsia, tus Tub Txib uas kuv xaiv.
Nws yog tus kuv nyiam, kuv lub siab nyiam nyob hauv nws.
Kuv yuav tso kuv lub Tswv Yim rau saum nws.
Nws yuav tshaj Txoj Kev Ncaj rau tsoom kuj cuab.
19 Nws yuav tsis cav, tsis nthe nrov,
tsis muaj leej twg hnov nws lub suab tom tej tshav puam.
20 Tus tauj ntsws, nws tsis muab lov,
tus teeb xeeb cig qauj les, nws tsis muab tshuab.
Nws yuav ua li ntawd mus txog hnub nws coj Txoj Kev Ncaj mus txais kev yeej.
21 Tsoom kuj cuab yuav tso siab lug rau nws lub npe.”

Tim 22 lub 7 Hli 2019

Hnub Ob Lis Piam Kaum Rau Nruab Xyoo C Nruab Lis Piam Xyoo I

Hwm LN Mab Liab Mas Ntas Las

Zaj Nyeem Ib: KWV TXHIAJ 3: 1-4B

1 Kuv nyob saum kuv lub lav, ntuj teb tag hmo,
kuv nrhiav tus uas kuv lub siab nyiam.
Kuv nrhiav nws, tab sis nrhiav tsis tau.
2 Kuv sawv mus ncig hauv lub nroog,
kuv nrhiav ntawm tej kev, ntawm tej tshav puam.
Kuv nrhiav tus uas kuv lub siab nyiam;
kuv nrhiav nws, tab sis nrhiav tsis tau.
3 Cov tub zov keeb saib lub nroog,
lawv ncig mus ncig los, lawv ntsib kuv:
"Nej puas pom tus kuv lub siab nyiam ?"
4 Kuv nyuam qhuav mus dhau plaws ntawm lawv,
ces kuv nrhiav tau tus kuv lub siab nyiam.

Los: 2 KLN 5: 14-17

Cov kwv tij nkauj muad:
14 Leej Pleev txoj kev nyiam yuav txhib peb lub siab, yog tias peb ntseeg ruaj tias ib tug neeg tau tuag pub rau sawv daws, ces sawv daws kuj tau nrog nws tuag thiab.
15 Leej Pleev yog tus tau tuag pub rau sawv daws, kom cov neeg ciaj nyob txhob ua neej rau lawv tus kheej xwb ntxiv lawm, tiam sis kom lawv ua neej rau tus uas tau tuag pub rau lawv, thiab nws tau sawv rov los lawm.
16 Li ntawd, txij nyem no mus, peb yuav tsis txhob saib ib tug neeg raws li lub cev sab nqaij tawv lawm; txawm peb tau pom Leej Pleev nyob hauv nws lub cev, los nyem no peb tsis pom nws zoo li ntawd lawm.
17 Li no, yog leej twg nyob hauv Leej Pleev, mas nws yog ib tug uas Ntuj tsim dua tshiab lawm: yam qub dua tas, yam tshiab los nyob lawm.

NPN 63: 2, 3-4, 5-6, 8-9

Txais: (2b) Kuv tus ntsuj plig nqhis txog koj. Huab Tais kuv tus Tswv Ntuj.

Tswv Ntuj, koj yog kuv tus Tswv Ntuj, yog tus kuv nrhiav;
kuv lub cev seev yees txog koj, kuv tus plig nqhis txog koj,
zoo puav tam li av qhuav qhawv, nkig nkuav, tsis tau dej.

Txais: (2b) Kuv tus ntsuj plig nqhis txog koj. Huab Tais kuv tus Tswv Ntuj.

Kuv tig mus saib koj nyob hauv lub tuam tsev ntshiab,
kuv pom koj lub hwj huam thiab koj lub hwj chim.
Vim koj txoj kev hlub kev ua zoo muaj nqis dua txoj sia,
kuv di ncauj yuav cav lus zoo txog koj.

Txais: (2b) Kuv tus ntsuj plig nqhis txog koj. Huab Tais kuv tus Tswv Ntuj.

Kuv yuav cav txog koj tas kuv sim neej,
kuv yuav tsa tes thov ntuj hu txog koj lub npe.
Kuv tus ntsuj plig yuav txaus siab hlo li tus tau noj nqaig noj hno,
kuv di ncauj yuav zoo siab, kuv lub ncauj yuav qhuas txog koj.

Txais: (2b) Kuv tus ntsuj plig nqhis txog koj. Huab Tais kuv tus Tswv Ntuj.

Koj yog tus pab kuv;
kuv qw zoo siab hauv koj phab tis qhov ntxoov.
Kuv tus ntsuj plig dai dhuam rau ntawm koj,
koj txhais tes xis hwj kuv nraim.

Txais: (2b) Kuv tus ntsuj plig nqhis txog koj. Huab Tais kuv tus Tswv Ntuj.

As Les Lus Yas

Txais: As les lus yas, as les lus yas.

Mab Liab, koj qhia rau peb saib, koj pom dab tsi ntawm kev?
Kuv pom Leej Pleev sawv rov los lub hwj chim, kuv pom nws lub ntxa qhuav.

Txais: As les lus yas, as les lus yas.

Ntawv Moo Zoo: ZAM 20: 1-2, 11-18

1 Thawj hnub pib lub lis piam, thaum sawv ntxov, ntuj tsis tau kaj, Mab Liab Mas Ntas Las mus tom ntxa. Nws pom daim txiag zeb tshem ntawm lub ntxa lawm. 2 Mab Liab khiav mus cuag Xis Moos Pob Zeb thiab lwm tus thwj tim, uas yog tus Yes Xus nyiam. Nws hais rau nkawd tias : "Lawv nqa Huab Tais tawm hauv ntxa lawm, peb tsis paub xyov lawv coj nws mus tso rau qhov twg lawm."
11 Mab Liab sawv ze ntawm lub ntxa sab nraud, nws quaj. Thaum nws quaj, nws khoov rau hauv lub ntxa. 12 Ces nws pom ob tug Tshiab hnav dawb zaum hauv qhov chaw uas lawv tso Yes Xus lub cev, ib tug zaum pem taub hau, ib tug zaum nram ko taw. 13 Ob tug Tshiab hais rau Mab Liab tias: "Tus poj niam, ua cas koj quaj ?" Mab Liab hais rau nkawd tias : "Vim lawv nqa kuv tus Huab Tais lawm, kuv tsis paub lawv muab nws tso rau qhov twg li." 14 Hais li ntawd tas, Mab Liab tig ntsia tom qab. Nws pom Yes Xus sawv ntsug nyob ntawd. Tab sis nws tsis paub tias yog Yes Xus. 15 Yes Xus hais rau Mab Liab tias : "Tus poj niam, ua cas koj quaj ? Koj nrhiav leej twg ?" Mab Liab xav tias yog tus saib lub vaj, ces Mab Liab hais rau nws tias : "Yawg hlob, yog koj nqa nws lub cev lawm no, koj qhia kuv saib koj muab tso qhov twg lawm, kuv yuav mus nqa nws los." 16 Yes Xus hais rau Mab Liab tias : "Mab Liab !" Mab Liab tig hlo mus, nws ua lus Hes Nplaws hais tias : "Las Npus Nis !" Txhais tias : Xib Hwb. 17 Yes Xus hais rau Mab Liab tias : "Koj txhob tuav kuv, vim kuv tseem tsis tau nce mus cuag Leej Txiv. Koj mus cuag kuv cov kwv tij, koj hais rau lawv tias : Kuv yuav nce mus cuag kuv Txiv thiab nej Txiv, mus cuag kuv tus Tswv Ntuj thiab nej tus Tswv Ntuj." 18 Mab Liab Mas Ntas Las thiaj los tshaj rau cov thwj tim hais tias : "Kuv pom Huab Tais lawm,” thiab nws hais cov lus Yes Xus tau hais rau nws rau lawv.

Tim      23      lub      7      Hli      2019

Hnub Peb Lis Piam Kaum Rau Nruab xyoo C Nruab lis piam Xyoo I

Hwm LN Bridget

Zaj Nyeem Ib:       Kev Tsiv  14:   21—15:1

21 Mais Xes tsa tes rau saum dej ntuj, ces HUAB TAIS ua cua hlob hlob ntsawj toob fab tuaj thawb cov dej ib hmos, ces qab thu dej tawm qhuav qhawv los, hos dej faib ua ob sab. 22 Cov His Xas Lais nkag mus hauv hiav txwv, lawv tsuj av qhuav qhawv mus, nyob ntawm lawv sab xis thiab sab laug muaj ob lub phab ntsa dej.
23 Cov Hais Nkws Tos caum lawv qab : Fas Las Oos cov nees, cov tsheb rog thiab cov tsav tsheb nkag mus hauv dej ntuj caum cov cov His Xas Lais. 24 Thaum yav yuav kaj ntug, HUAB TAIS nyob saum tus ncej huab hluav taws, ntsia mus rau cov Hais Nkws Tos, nws ua kom cov Hais Nkws Tos tau ntshai kawg. 25 Nws ua kom lawv cov log tsheb daig thiab ntog qeeb qeeb. Ces cov Hais Nkws Tos hais tias : "Peb khiav mus deb ntawm cov His Xas Lais vim HUAB TAIS pab lawv tawm tsam ntaus cov Hais Nkws Tos !"
26 HUAB TAIS hais rau Mais Xes tias : "Koj tsa tes rau saum dej ntuj, kom cov dej ntws rov los nyab cov Hais Nkws Tos thiab lawv cov tsheb rog thiab cov tsav tsheb tib si." 27 Mais Xes tsa tes rau saum dej ntuj, ces thaum pib kaj ntug, dej ntws rov los nyob qhov qub chaw. Cov Hais Nkws Tos tig khiav rov qab, tiam sis dej nphau nphwv los npog lawv, HUAB TAIS ua kom lawv ntxeev zom zaws rau hauv dej ntuj. 28 Cov dej nphau rov los nyob qhov qub, los npog cov tsheb thiab cov tsav tsheb Hais Nkws Tos uas tau nkag mus hauv qab thu dej caum cov His Xas Lais, tsis dim ib tug li. 29 Hos cov His Xas Lais tau taug kev qhuav nyob hauv plawv dej ntuj, cov dej ua ob sab phab ntsa nyob ntawm lawv sab xis thiab sab laug. 30 Hnub ntawd, HUAB TAIS cawm cov His Xas Lais dim ntawm cov Hais Nkws Tos txhais tes. Cov His Xas Lais pom cov Hais Nkws Tos tuag pawg lug ntawm ntug dej ntuj. 31 Cov His Xas Lais pom HUAB TAIS lub peev xwm uas nws siv los tiv yeej cov Hais Nkws Tos. Tsoom pej xeem sawv daws hwm HUAB TAIS, lawv tso siab rau HUAB TAIS thiab rau nws tus tub txib Mais Xes.
15   1 Ces Mais Xes thiab tsoom tub ki His Xas Lais hu nkauj cav txog HUAB TAIS li no : "Kuv hu nkauj cav txog HUAB TAIS, vim nws yeej thiab nws muaj koob meej, nws tau muab tus nees thiab tus caij nees pov rau hauv hiav txwv.”

As Les Lus Yas:        Zam  14:   23

Txais: As Les Lus Yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws.
Kuv Txiv wb yuav tuaj nyob hauv nws.

Txais: As Les Lus Yas.

Ntawv Moo Zoo:        MT  12:   46-50

46 Yes Xus tseem tab tom hais lus rau tej pab neeg,
ces Yes Xus niam thiab nws cov kwv tij tuaj sawv nraum zoov, lawv xav nrog nws txuas lus.
[47 Muaj ib tug hais rau Yes Xus tias : “koj niam thiab koj cov kwv tij tuaj txog nraud, lawv xav nrog koj txuas lus.”]
48 Yes Xus teb rau tus neeg tuaj qhia nws tias :
“Leej twg yog kuv niam? Leej twg yog kuv cov kwv tij ?"
49 Yes Xus taw tes rau nws cov thwj tim, nws hais tias :
"Kuv niam thiab kuv cov kwv tij yog cov ntawd.
Vim tias tus twg ua raws kuv Txiv nyob saum ntuj lub siab,
Mas tus ntawd yog kuv kwv tij, kuv nkauj muam, thiab kuv niam."

Tim 24 lub 7 Hli 2019

Hnub Plaub Lis Piam Kaum Rau Nruab Xyoo C Nruab Lis Piam Xyoo I

Hwm LN Sharbel Makluf

Zaj Nyeem Ib: KT 16: 1-5, 9-15

1 Tas soom tub ki His Xas Lais sawv kev ntawm Es Lis mus, lawv sawv daws mus txog lub hav suab puam Xees, nyob nruab nrab ntawm Es Lis thiab lub roob Xis Nais, yog hnub tim kaum tsib, lub hli ob txij hnub lawv tawm Hais Nkws Tos teb los lawm. 2 Tas tsoom tub ki His Xas Lais cem cem yws yws Mais Xes thiab As Loos nkawd nyob hauv teb chaws suab puam. 3 Cov tub ki His Xas Lais hais rau nkawd tias : "Kheev lam HUAB TAIS txhais tes tua kom peb tuag tas nyob Hais Nkws Tos teb, thaum peb zaum ncig tej lauj kaub nqaij thiab peb muaj mov noj tsau plab npo mas! Neb coj peb los nyob hauv lub hav suab puam no kom peb sawv daws tuag tshaib tas xwb !"
4 Ces HUAB TAIS hais rau Mais Xes tias : "Kuv yuav ua kom mov poob saum ntuj los rau nej noj. Cov neeg yuav niaj tag kis tawm mus khaws kom txaus rau lawv noj hnub ntawd xwb. Kuv xav sim lawv li ntawd, kuv thiaj paub tias lawv puas mloog kuv cov lus qhia los tsis mloog. 5 Hnub rau, thaum lawv mus muab qhov lawv mus khaws tau lawm los ua noj, mas qhov ntawd yuav tsum muaj npaum li qhov lawv niaj hnub khaws ob npaug."
9 Mais Xes hais rau As Loos tias : "Koj hais rau tas tsoom tub ki His Xas Lais tias : ‘Nej cia li txav los ze ntawm HUAB TAIS xub ntiag, vim nws tau hnov nej cov lus yws lus cem lawm.’" 10 Ces thaum As Loos tab tom hais lus rau tas tsoom tub ki His Xas Lais, lawv tig mus ntsia tom sab hav suab puam, lawv pom HUAB TAIS lub hwj chim tawm los nyob saum cov huab. 11 HUAB TAIS hais lus rau Mais Xes tias : 12 "Kuv tau hnov cov tub ki His Xas Lais tej lus yws lus cem lawm. Koj hais li no rau lawv : Thaum yav tsaus ntuj zuag, nej yuav tau nqaij noj, thaum kaj ntug, nej yuav tau mov noj kom tsau plab, ces nej thiaj yuav paub tias kuv HUAB TAIS yog nej tus Tswv Ntuj."
13 Thaum tsaus ntuj, muaj ib co yij ya tuaj tsaws puv thaj chaw lawv nyob, hos thaum sawv ntxov, muaj ib txheej lwg dawb paug puv ib ncig thaj tsam lawv nyob. 14 Thaum cov lwg ntawd qhuav tas, ces txawm pom ib co hmoov mos mos, ua tsig daws zoo li ib co te,nyob saum npoo av. 15 Thaum cov tub ki His Xas Lais pom li ntawd, lawv sib nug zom zaws tias : "Cov ntawd yog dab tsi ?" Vim lawv yeej tsis paub tias yog dab tsi tiag. Mais Xes hais rau lawv tias : "Cov ntawd, yog cov mov uas HUAB TAIS muab pub rau nej noj.”

NPN 78: 18-19, 23-24, 25-26, 27-28

Txais: (24b) Huab Tais muab cov mov poob saum ntuj los rau lawv noj.

Lawv sim Tswv Ntuj nyob hauv lawv nruab siab,
lawv taij kom nws muab mov rau lawv noj daws kev tshaib.
Lawv hais lus twv Tswv Ntuj tias :
"Tswv Ntuj puas muaj peev xwm rau tau
ib rooj mov nyob hauv teb chaws suab puam?”

Txais: (24b) Huab Tais muab cov mov poob saum ntuj los rau lawv noj.

Nws txib cov txheej ntuj saud,
thiab nws qhib cov qhov rooj ntug.
Nws ua kom mov mas nas poob li los nag los rau lawv noj,
nws muab qaum ntuj cov mov rau lawv :

Txais: (24b) Huab Tais muab cov mov poob saum ntuj los rau lawv noj.

Tib neeg tau noj tsoom Tshiab cov mov,
nws xa txhiam laj txhiam xws rau lawv noj seem noj sos.
Nws ua kom nthwv cua toob fab tshuab tuaj nyob saum ntuj,
Nws lub hwj huam ua kom cua tuaj naj fab tuaj.

Txais: (24b) Huab Tais muab cov mov poob saum ntuj los rau lawv noj..

Nws ua kom nqaij poob li nag los rau lawv, ntau npaum cov plua av.
Nws ua kom cov noog poob los coob npaum
cov suab puam ntawm ntug dej ntuj.
Cov noog los tsaws puv lawv tej chaw ua si, ncig lawv tej tsev.

Txais: (24b) Huab Tais muab cov mov poob saum ntuj los rau lawv noj.

As Les Lus Yas

Txais: As les lus yas, as les lus yas.

Cov noob nplej yog Tswv Ntuj lo lus, Leej Pleev yog tus tseb nplej;
Txhua leej uas los cuag nws yuav ciaj nyob mus li.

Txais: As les lus yas, as les lus yas.

Ntawv Moo Zoo: MT 13: 1-9

1 Hnub ntawd, Yes Xus tawm hauv tsev mus zaum ntawm ntug dej ntuj. 2 Tej pab neeg coob tuaj ntsauv nws, ces nws nce mus zaum hauv ib lub nkoj, hos tas tsoom neeg sawv nyob ntawm ntug dej. 3 Yes Xus ua paj lug qhia lawv ntev loo, nws hais li no : "Tus tseb nplej tawm mus tseb noob nplej. 4 Thaum nws tseb, muaj ib co noob poob ntawm ntug kev, noog ya tuaj noj tas huv si lawm. 5 Ib co noob poob rau hauv cov av pob zeb, nyob ntawd tsis muaj av ntau, ces cov noob tuaj kaus sai, vim av tsis tob. 6 Thaum hnub tuaj, tshav ziab cov yub nkig tas, vim tsis muaj cag ces cov yub qhuav tas. 7 Tseem muaj ib co noob poob rau hauv cov pos. Pos hlob tuaj laum cov yub tas. 8 Hos muaj ib co noob poob rau hauv thaj av zoo, cov noob ntawd txhawv hnab, tej lub noob txi ib puas lub ntxiv, tej lub txi rau caum lub, tej lub txi peb caug lub. 9 Leej twg muaj pob ntseg, nws kav tsij mloog."

Tim 25 lub 7 Hli 2019

Hnub Tsib Lis Piam Kaum rau Nruab Xyoo C Nruab Lis Piam Xyoo I

Hwm LN Yas Kos, tus Hauv Paus Xa Lus

Zaj Nyeem Ib: 2 KLN 4: 7-15

Cov kwv tij nkauj muad:
7 Peb khaws yam uas muaj nqis loj no cia rau hauv tej lub hub av, kom lub hwj huam loj ntawd yog tuaj ntawm Tswv Ntuj tuaj, tsis yog tawm ntawm peb los. 8 Peb raug luag tsim txom nyob hauv txhua yam, tab sis luag yuam tsis tau peb; peb ntsib kev nyuaj siab, tiam sis peb tsis tas kev cia siab. 9 Peb raug luag hiam, tab sis Ntuj tsis tso peb pov tseg; peb raug luag thawb rau hauv av, tab sis peb tsis raug luag rhuav. 10 Peb mus txog qhov twg, mas peb ris rawv Yes Xus txoj kev tuag nyob hauv peb lub cev, kom xwv Yes Xus txoj sia tawm tuaj nyob hauv peb lub cev thiab. 11 Txawm peb tseem muaj txoj sia los peb niaj hnub yuav tsum raug kev tuag mus li yog vim Yes Xus, kom xwv Yes Xus txoj sia tawm tuaj nyob hauv peb lub cev uas txawj tuag. 12 Li ntawd txoj kev tuag lis rawv nws txoj hauj lwm nyob hauv peb, hos txoj sia lis rawv nws txoj hauj lwm nyob hauv nej. 13 Vim tias peb muaj tib lub tswv yim ntseeg xwb, raws li ntawv sau tseg tias: ‘Kuv ntseeg, kuv thiaj hais tawm.’ Peb kuj ib yam, peb ntseeg, ces peb thiaj hais tawm. 14 Peb paub tseeb tias, tus tau tsa Huab Tais Yes Xus sawv rov los, nws kuj yuav tsa peb nrog Yes Xus sawv los, thiab yuav coj peb thiab nej mus nyob ze nws. 15 Tas txhua yam peb yog ua los pab nej xwb, kom neeg coob ntxiv tuaj zuj zus tau txais txiaj ntsim, ces txoj kev ua Ntuj tsaug yuav muaj ntws lug ua kom Tswv Ntuj nto koob meej.

NPN 126: 1BC-2AB, 2CD-3, 4-5, 6

Txais: (5) Cov neeg tseb nplej ntxuag kua muag yuav sau nplej ntxuag kev lom zem.

Thaum HUAB TAIS coj Xis Yoos cov neeg nyob txim rov los,
peb zoo li ib co neeg ua npau suav.
Peb lub ncauj muaj suab luag nqhua,
peb tus nplaig qw nkauj zoo siab.

Txais: (5) Cov neeg tseb nplej ntxuag kua muag yuav sau nplej ntxuag kev lom zem.

Tej pej kum haiv hais nroo ntws tias :
"HUAB TAIS ua tej yam loj tas nrho rau lawv !"
HUAB TAIS tau ua tej yam loj rau peb tiag,
peb zoo siab kawg nkaus.

Txais: (5) Cov neeg tseb nplej ntxuag kua muag yuav sau nplej ntxuag kev lom zem.

HUAB TAIS, thov koj sau peb cov neeg rov qab los
xws li dej sab siv huam nyob teb chaws suab puam.
Cov neeg tseb nplej ntxuag kua muag,
lawv yuav sau nplej ntxuag kev lom zem.

Txais: (5) Cov neeg tseb nplej ntxuag kua muag yuav sau nplej ntxuag kev lom zem.

Thaum mus, lawv quaj kua muag poob,
vim lawv ris cov seev noob,
thaum rov los, lawv hu nkauj zoo siab,
vim lawv ris cov tes nplej tshiab los.

Txais: (5) Cov neeg tseb nplej ntxuag kua muag yuav sau nplej ntxuag kev lom zem.

As Les Lus Yas: ZAM 15: 16

Txais: As les lus yas, as les lus yas.

Huab Tais hais tias: kuv xaiv nej tawm ntawm ntiaj teb los
kom nej mus txi ib co txiv uas yuav tsis txawj phem

Txais: As les lus yas, as les lus yas.

Ntawv Moo Zoo: MT 20: 20-28

20 Ntxes Npes Dais ob tug tub leej niam nrog nws ob tug tub txav los ze Yes Xus, nws txhos caug ntua thov ib yam ntawm Yes Xus. 21 Yes Xus hais rau nws tias : “Koj xav tau dab tsi ?” Leej niam hais rau Yes Xus tias : “Thov koj cia kuv ob tug tub no, ib tug zaum ntawm koj sab xis, ib tug zaum ntawm koj sab laug nyob hauv koj lub Ceeb Tsheej.” 22 Yes Xus teb tias : “Nej tsis paub qhov nej thov. Neb puas haus taus lub ntim uas kuv yuav haus ?” Nkawd teb tias : “Wb haus taus.” 23 Yes Xus hais rau nkawd tias : “Kuv lub ntim, mas neb yuav haus, tab sis qhov yuav tau zaum ntawm kuv sab xis thiab sab laug, tsis yog kuv yuav muab rau neb. Kuv Txiv npaj qhov ntawd rau leej twg, mas yog leej twg tug."
24 Kaum leej thwj tim hnov cov lus thov ntawd, lawv tsis txaus siab rau nkawd ob kwv tij. 25 Ces Yes Xus hu lawv kom txav los ze nws, nws hais tias : “Nej paub tias cov thawj tswj tsoom kuj cuab kav pej xeem nruj, cov loj ua kom luag pom tias lawv muaj peev xwm tswj pej xeem. 26 Tab sis nyob hauv nej, mas yuav tsis txhob muaj li ntawd : leej twg xav ua tus loj nyob hauv nej, mas nws yuav ua nej tus tub txib. 27 Leej twg xav ua tus thawj nyob hauv nej, mas nws yuav ua nej tus qhev. 28 Yog vim li ntawd, Neeg Leej Tub tsis tuaj nyob ntiaj teb no kom luag tsob hwb nws. Nws tuaj tsob hwb sawv daws, thiab muab nws txoj sia los ua nqi txhiv coob leej.”

Tim 26 lub 7 Hli 2019

Hnub Rau Lis Piam Kaum Rau Nruab Xyoo C Nruab Lis Piam Xyoo I

Hwm LN Yos As Kis thiab LN As Nas, Niam Mab Liab niam thiab txiv

Zaj Nyeem Ib: KT 20: 1-17

1 Tswv Ntuj hais tas cov lus no tias:
2 "Kuv yog HUAB TAIS, koj tus Tswv Ntuj, kuv yog tus ua kom koj dim ntawm Hais Nkws Tos teb los, dim ntawm lub tsev yuam koj ua qhev los.
3 Koj yuav tsis txhob muaj dua lwm tus tswv ntuj tshaj ntawm kuv lawm.
4 Koj yuav tsis txhob txaug tej tug duab mlom los rau koj teev, uas zoo li tej yam nyob saum ntuj saud, los zoo li tej yam nyob hauv ntiaj teb hauv no, los zoo li tej yam nyob hauv cov dej hauv qab lub ntiaj teb. 5 Koj yuav tsis txhob pe cov mlom ntawd, txhob tsob hwb lawv, vim kuv HUAB TAIS koj tus Tswv Ntuj yog ib tug Tswv Ntuj muaj khib; cov uas ntxub kuv, mas vim phaj txiv tau ua txhaum, ces kuv yuav rau txim rau phaj tub thiab phaj xeeb ntxwv mus txog tiam peb tiam plaub huv tib si. 6 Hos cov nyiam kuv thiab ua raws kuv cov lus qhia, mas kuv yuav ua zoo rau lawv txog ntau txhiab leej ntau vam leej.
7 Koj yuav tsis txhob hu txog koj tus HUAB TAIS Tswv Ntuj lub npe mus ua dog dig, vim HUAB TAIS yuav tsis zam txim rau tus neeg uas tuav txog nws lub npe mus ua dog dig.
8 Koj yuav nco ntsoov caiv hnub xas npas tos, koj yuav muab saib ua ib hnub ntshiab. 9 Koj yuav khwv rau hnub thiab ua tas txhua yam hauj lwm nyob hauv rau hnub ntawd, 10 tab sis hnub xya yog hnub caiv xas npas tos rau koj tus HUAB TAIS Tswv Ntuj. Hnub ntawd koj yuav tsis txhob ua ib yam hauj lwm dab tsi li. Koj thiab koj tus tub, koj tus ntxhais, koj tus tub txib, koj tus ntxhais txib, koj cov tsiaj txhu, tus qhua uas tuaj nyob hauv koj tsev, nej sawv daws yuav caiv. 11 Vim tias HUAB TAIS tau ua hauj lwm rau hnub los tsim lub ntuj, lub ntiaj teb, lub hiav txwv, thiab tas puas tsav yam nyob hauv, tiam sis hnub xya nws so, vim li ntawd HUAB TAIS tau foom hmoov zoo rau hnub xya, nws muab hnub xya qee ua ib hnub ntshiab.
12 Koj yuav hwm koj niam thiab koj txiv, koj thiaj yuav tau nyob ntev niaj ntau xyoo hauv lub teb chaws uas koj tus HUAB TAIS Tswv Ntuj muab pub rau koj.
13 Koj yuav tsis txhob tua neeg.
14 Koj yuav tsis txhob zes luag txij luag nkawm.
15 Koj yuav tsis txhob ua tub sab tub nyiag.
16 Koj yuav tsis txhob lam ua tim khawv liam rau luag tej.
17 Koj yuav tsis txhob ntshaw txeeb luag vaj luag tsev. Koj yuav tsis txhob ntshaw txeeb luag tus poj niam, luag tus tub txib, luag tus ntxhais txib, luag tus nyuj los tus luj, los ib yam dab tsi uas yog luag tug."

NPN 19: 8, 9, 10, 11

Txais: (Zam 6:68c) Huab Tais, koj muaj cov lus pub txoj sia nyob mus li.

HUAB TAIS txoj cai zoo tas nrho,
nws ntxiv siav rau tus ntsuj plig;
HUAB TAIS tus txhooj tsim nyog yuav,
nws ua kom tus neeg ruam thoob tsib tuaj.

Txais: (Zam 6:68c) Huab Tais, koj muaj cov lus pub txoj sia nyob mus li.

HUAB TAIS cov lus qhuab qhia yog lus ncaj
ua kom neeg muaj kev zoo siab.
HUAB TAIS lo lus meej kawg nkaus,
ua kom qhov muag pom kev.

Txais: (Zam 6:68c) Huab Tais, koj muaj cov lus pub txoj sia nyob mus li.

Kev hwm HUAB TAIS yog txoj kev dawb huv,
kev hwm Huab Tais yuav nyob mus li.
HUAB TAIS cov lus txiav txim yog lus tseeb,
Txhua lo lus nws txiav yog qhov ncaj.

Txais: (Zam 6:68c) Huab Tais, koj muaj cov lus pub txoj sia nyob mus li.

Nws cov lus txiav txim, tsim nyog ntshaw dua kub,
Tsim nyog ntshaw dua ib txhab tseem kub,
qab zib dua cov kua zib ntawm cov paj,
los cov zib mu ntawm daim nas muv.

Txais: (Zam 6:68c) Huab Tais, koj muaj cov lus pub txoj sia nyob mus li.

As Les Lus Yas: LK 8: 15

Txais: As Les Lus Yas, as les lus yas.

Cov uas muaj ib lub siab dav coj raws lo lus lawv tau hmoov zoo
thiab lawv txi taus txiv vim lawv ua siab ntev coj tsis tso tseg.

Txais: As Les Lus Yas, as les lus yas..

Ntawv Moo Zoo: MT 13: 18-23

Yes Xus hais rau nws cov thwj tim tias:
18 “Nej cia li mloog zaj paj lug hais txog tus tseb nplej. 19 Txhua tus neeg uas tau hnov Lo Lus qhia txog Ntuj lub Ceeb Tsheej, tiam sis nws tsis to taub, ces tus Phem tuaj txog, nws muab yam uas twb tseb rau hauv tus ntawd lub siab lawm rho kiag tawm: tus ntawd ces yog cov noob uas poob ntawm ntug kev. 20 Cov noob poob rau hauv cov av pob zeb, yog tus neeg uas thaum nws hnov Lo Lus, nws zoo siab hlo txais thaum ntawd. 21 Tab sis nws tsis muaj cag nyob hauv nws, ces tsuas kav ib nyuag ntu xwb : thaum muaj kev txom nyem, los muaj kev raug luag hiam vim Lo Lus, ces nws ntog tam sis ntawd. 22 Cov noob uas poob rau hauv cov pos, yog tus uas hnov Lo Lus, tab sis ntiaj teb tej kev txob xeeb, thiab nyiaj txiag tej kev ntxias laum Lo Lus, ces Lo Lus txi tsis taus txiv. 23 Cov noob uas poob rau hauv cov av zoo, yog tus uas hnov Lo Lus, nws to taub Lo Lus ntawd, ces nws txi txiv, ib tug txi ib puas lub, ib tug txi rau caum lub, hos lwm tus txi peb caug lub txiv.”

Tim 27 lub 7 Hli 2019

Hnuv Xya Lis Piam Kaum Rau Nruab Xyoo CA Nruab Lis Piam Xyoo I

Zaj Nyeem Ib: KT 24: 3-8

3 Mais Xes rov los hais HUAB TAIS cov lus thiab cov cai qhia rau tsoom pej xeem, tas sawv daws koom ib lub suab teb tias: "Peb yuav ua tas txhua yam raws li Huab Tais tau hais." 4 Mais Xes muab HUAB TAIS cov lus sau rau hauv ib phau ntawv cia, ces tag kis nws sawv ntxov los, nws txhim ib lub thaj txi Ntuj rau ntawm taw roob thiab kaum ob tug ncej zeb rau kaum ob lub xeem His Xas Lais. 5 Ces nws xa ib co tub hluas His Xas Lais mus hlawv tsiaj txi Ntuj, lawv coj tej tus thav nyuj mus ua txim kev thaj yeeb txi rau HUAB TAIS. 6 Mais Xes cug cov ntshav, nws muab ib nrab hliv rau hauv phiab, hos ib nrab hliv ywg lub thaj txi Ntuj. 7 Ces nws muab phau ntawv cog lus los nyeem rau tsoom pej xeem mloog, lawv qw tias : "Txhua yam HUAB TAIS tau hais, peb yuav coj thiab peb yuav mloog." 8 Mais Xes txawm muab cov ntshav los nchos rau saum tsoom pej xeem sawv daws, nws hais tias : "Cov ntshav no yog ntshav cog lus raws nraim li HUAB TAIS tau hais rau nej lawm."

NPN 50: 1B-2, 5-6, 14-15

Txais: (14a) Koj cev ib co lus qhuas txi rau Tswv Ntuj.

HUAB TAIS Tswv Ntuj nws qhib ncauj hais lus;
nws hu tas lub ntiaj teb los, txij hnub tuaj txog hnub poob.
Tswv Ntuj nyob saum lub roob Xis Yoos,
nws zoo saib tas nrho, nws ci ntsa iab.

Txais: (14a) Koj cev ib co lus qhuas txi rau Tswv Ntuj.

Nej sau cov ntseeg txog kuv tuaj nyob ntawm kuv xub ntiag,
Nej sau cov uas tau tua tsiaj los nrog kuv cog lus.
Lub ntuj tshaj nws txoj kev ncaj :
Vim Tswv Ntuj yog tus txiav txim

Txais: (14a) Koj cev ib co lus qhuas txi rau Tswv Ntuj.

Koj muab lo lus qhuas los txi rau Ntuj,
koj pauj koj lub yeem rau tus Nyob Siab.
Thaum kev txhawj xeeb tuaj, koj hu txog kuv,
kuv yuav npo koj dim, ces koj yuav cav txog kuv lub koob meej.

Txais: (14a) Koj cev ib co lus qhuas txi rau Tswv Ntuj.

As Les Lus Yas: Yas Kos 1: 21BC

Txais: As les lus yas, as les lus yas.

Nej yuav ua neeg me txais lo lus uas twb muab cog rau hauv nej lawm,
nws yog qhov yuav cawm tau nej tus ntsuj plig.

Txais: As les lus yas, as les lus yas.

Ntawv Moo Zoo: Mas Tais 13: 24-30

24 Yes Xus tseem hais dua ib zag paj lug rau cov neeg tias : "Ntuj lub Ceeb Tsheej zoo li ib tug neeg tseb ib co noob zoo rau hauv nws daim teb. 25 Thaum sawv daws tsaug zog tas lawm, nws tus yeeb ncuab tuaj tseb ib co nroj xyaw rau hauv cov nplej tas ces nws rov mus lawm. 26 Thaum cov nplej hlob tuaj thiab txhawv, nroj kuj tawm tuaj thiab. 27 Cov tub txib tuaj hais rau tus tswv qoob tias : "Huab Tais, koj tau tseb ib co noob qoob zoo rau hauv koj daim teb los tsis sub ? Vim li cas thiaj muaj nroj ?" 28 Tus tswv qoob teb rau lawv tias : "Yog ib tug yeeb ncuab tuaj ua qhov ntawd." Cov tub txib hais rau tus tswv tias : "Koj puas xav kom peb mus sau cov nroj pov tseg ?" Tus tswv teb tias : 29 "Kuv tsis xav ! Tsam thaum nej sau nroj, nej rho tau nplej nrog thiab. 30 Nej cia nroj nrog nplej hlob ua ke mus txog lub caij sau nplej. Thaum txog caij sau nplej lawm, kuv mam hais rau cov sau nplej tias : Nej xub sau cov nroj ua ntej tso, nej muab pav ua tej teg cia yuav muab pov hlawv, hos nej sau cov nplej rau hauv kuv lub txhab.”

Tim 29 lub 7 Hli 2019

Hnub Ob Lis Pias Kaum Xya Nruab Xyoo A Nruab Lis Piam Xyoo I

Hwm LN Mas Tas, Mab Liab Mas Ntas Las tus niam laus

Zaj Nyeem Ib: KT 32: 15-24, 30-34

15 Mais Xes tig rov qab nqes saum roob los, nws nqa ob daig txiag zeb Tim Khawv ntawm tes, ob daig txiag ntawd sau ob sab huv si, sab saud thiab sab hauv. 16 Ob daig txiag ntawd yog Tswv Ntuj txua, cov npe ntawv yog Tswv Ntuj sau, nws muab txaug rau saum ob daig txiag zeb. 17 Yos Suas hnov tsoom pej xeem qw tsheej tsaug, nws hais rau Mais Xes tias : “Muaj suab nrov cuag li sib tua hauv lub yeej !" 18 Mais Xes teb tias : "Tsis yog lub suab qw yeej ib nthwv rog, kuj tsis yog lub suab qw swb ib nthwv rog thiab. Kuv hnov zoo li yog suab hu nkauj ua kev lom zem." 19 Thaum nws los txog ze lub yeej lawm, Mais Xes pom tus mlom nyuj thiab tej pab dhia daj dhia luag lom zem. Ces Mais Xes npau taws heev, nws muab ob daig txiag zeb ntawm nws tes cuam pov tseg, ob daig txiag zeb tawg tas ntawm lub taw roob. 20 Nws muab tus mlom nyuj uas lawv nchuav pov rau hauv hluav taws kom yaj tas, nws muab coj los tuav ua hmoov mos mos, muab coj mus nphoo rau hauv dej, ces nws yuam cov His Xas Lais haus cov dej ntawd.
21 Mais Xes hais rau As Loos tias : "Haiv neeg ntawd tau ua dab tsi rau koj, vim li cas koj thiaj coj lawv ua ib qho txhaum loj tas npaud ?" 22 As Loos teb tias : "Thov koj tus loj tsis txhob npau taws, koj twb paub tias haiv neeg ntawd zoo li cas lawm, koj paub tias lawv yeej nyiam ua qhov phem. 23 Lawv hais rau kuv tias : 'Koj ua ib tug tswv ntuj rau peb teev, kom nws mus ua peb ntej, vim tus Mais Xes uas nws coj peb tawm ntawm Hais Nkws Tos teb los, mas peb tsis paub xyov nws dua twg lawm.' 24 Kuv hais rau lawv tias : 'Leej twg coj kub ntawm nws, muab hle tawm los.' Lawv muab los rau kuv, kuv coj mus pov rau hauv hluav taws, ces tus nyuj no cia li tawm los."
30 Hnub tom qab, Mais Xes hais rau tsoom pej xeem tias : "Nej tau ua ib qho txhaum loj kawg. Kuv yuav nce mus cuag HUAB TAIS, kuv yuav thov HUAB TAIS, tej zaum nws yuav zam rau nej." 31 Mais Xes thiaj rov nce mus cuag HUAB TAIS, nws hais tias : “Haiv neeg ntawd tau ua ib qho txhaum loj kawg. Lawv tau puab ib tug tswv ntuj kub rau lawv teev. 32 Tab sis thov koj ua siab zam rau lawv qhov txhaum. Yog koj tsis kam zam no ces thov koj rho kuv tawm hauv phau ntawv uas koj tau sau !" 33 HUAB TAIS hais rau Mais Xes tias : "Tus tau ua txhaum rau kuv, mas kuv yuav rho nws tawm hauv kuv phau ntawv mus. 34 Zaum no koj rov mus, koj coj haiv neeg ntawd mus rau qhov chaw uas kuv tau hais rau koj lawm. Kuv tus Tshiab yuav mus ua koj ntej. Txog hnub uas kuv tuaj xyuas lawv, kuv mam li muab txim rau lawv vim lawv qhov txhaum."

NPN 106: 19-20, 21-22, 23

Txais: (1a) Nej ua Huab Tais tsaug vim nws siab zoo.

Peb cov yawg koob puab ib tug mlom nyuj nyob ntawm roob Hos Les;
lawv txhos caug pe tus mlom uas lawv nchuav.
Lawv muab lawv lub koob meej
pauv ib tug duab mlom uas yog ib tug nyuj noj zaub.

Txais: (1a) Nej ua Huab Tais tsaug vim nws siab zoo.

Lawv tsis nco qab tus Tswv Ntuj uas tau cawm lawv,
tus tau ua tej yam loj nyob Hais Nkws Tos teb ,
tus tau ua tej yam hwj huam txaus qhuas nyob Haas teb,
tus tau ua tej yam txaus ntshai nyob ntawm Dej Ntuj Liab.

Txais: (1a) Nej ua Huab Tais tsaug vim nws siab zoo.

Nws tau hais tias nws yuav ua kom lawv tuag tu noob
tab sis Mais Xes, tus uas nws xaiv,
tau sawv lawv chaw thov nws nrog nws hais,
kom nws txo nws lub siab npau taws tsis xav txuag lawv.

Txais: (1a) Nej ua Huab Tais tsaug vim nws siab zoo.

As Les Lus Yas: Zam 8: 12

Txais: As les lus yas, as les lus yas.

Huab Tais hais tias: “Kuv yog qhov pom kev kaj lub qab ntuj neeg.
Leej twg lawv kuv qab, nws yuav tau qhov pom kev uas coj mus rau txoj sia."

Txais: As les lus yas, as les lus yas.

Ntawv Moo Zoo: Zam 11: 19-27

19 Cov Yus Das coob leej tuaj xyuas Mas Tas thiab Mab Liab nkawd, lawv tuaj nplij nkawd vim nkawd tus nus tuag lawm. 20 Thaum Mas Tas hnov tias Yes Xus tuaj, ces Mas Tas mus tos Yes Xus, hos Mab Liab zaum nyob hauv tsev. 21 Mas Tas hais rau Yes Xus tias : "Huab Tais, yog koj ntxov tuaj txog ntawm no, mas kuv tus nus yuav tsis tuag. 22 Tiam sis tab nyem no los kuv paub tias, yog koj thov yam twg ntawm Tswv Ntuj, mas Tswv Ntuj yuav muab rau koj." 23 Yes Xus hais rau Mas Tas tias : "Koj tus nus yuav sawv rov los." 24 Mas Tas hais rau Yes Xus tias : "Kuv paub tias thaum txog Hnub Kawg, lub caij leej tib neeg lub cev ciaj rov los, mas nws yuav sawv rov los." 25 Yes Xus hais rau Mas Tas tias : "Kuv yog Txoj Kev Sawv Rov Los thiab yog Txoj Sia : tus ntseeg txog kuv, tab yog nws tuag lawm, nws yuav muaj txoj sia nyob. 26 Leej twg ua neej nyob ntseeg txog kuv, mas nws yuav tsis tuag ib zaug li. Koj puas ntseeg qhov ntawd ?" 27 Mas Tas hais rau Yes Xus tias : "Huab Tais, kuv ntseeg. Kuv yeej ntseeg hais tias koj yog Leej Pleev, yog Tswv Ntuj Leej Tub tus uas tuaj nyob hauv lub qab ntuj no."

Tim 30 lub 7 Hli 2019

Hnub Peb Lis Piam Kaum Xya Nruab Xyoo C Nruab Lis Piam Xyoo I

Hwm LN Peter Chrysologus

Zaj Nyeem Ib: Kev Tsiv 33: 7-11; 34:5B-9, 28

7 Mais Xes nqa lub tsev sam phooj, nws coj mus tsa rau sab yeej nraud, nrug deb ntawm lub yeej. Nws tis npe rau tias Tsev Tsam Phooj Sib Ntsib. Yog leej twg xav vam txog HUAB TAIS, mas nws yuav tawm mus tom lub Tsev Tsam Phooj Sib Ntsib, nyob sab yeej nraud. 8 Niaj zaus thaum Mais Xes tawm mus nraum lub Tsev Tsam Phooj, mas tas tsoom neeg sawv daws sawv, nyias sawv ntsug ntawm nyias lub qhov rooj tsev tsam phooj, lawv ntsia ntsoov Mais Xes mus nkag kiag hauv lub Tsev Tsam Phooj lawm. 9 Thaum Mais Xes nkag mus hauv lub Tsev Tsam Phooj, mas twv huab nqes los nyob ntawm qhov rooj, ces HUAB TAIS nrog Mais Xes tham. 10 Tas tsoom neeg sawv daws pom twv huab nyob ntawm lub qhov rooj Tsev Tsam Phooj, ces sawv daws sawv, thiab nyias khoov ntawm nyias lub qhov rooj tsev tsam phooj pe hawm. 11 HUAB TAIS hais lus rau Mais Xes, tim ntsej tim muag, ib yam li ib tug tib neeg nrog nws tus phooj ywg tham, tas ces Mais Xes mam rov los hauv lub yeej. Tab sis Mais Xes tus tub txib Yos Suas uas yog Nus tus tub, nyob rawv hauv lub Tsev Tsam Phooj tsis nrug li.
34 5b Mais Xes nrog HUAB TAIS sawv nyob ntawd thiab nws hu txog HUAB TAIS lub npe. 6 HUAB TAIS hla ntawm Mais Xes xub ntiag, ces Mais Xes qw nrov nrov tias: "HUAB TAIS, HUAB TAIS, tus Tswv Ntuj uas lub siab khuv leej neeg thiab pub txiaj ntsim ntau, tus npau taws qeeb, tus ua zoo tas mus li, tus tsis fav xeeb, 7 tus tshwj zias ua zoo rau txhiab leej vam leej, tus ua siab ntev nyiaj neeg qhov phem, qhov yuam kev thiab qhov txhaum, tiam sis nws tsis cia leej twg dim txim. Thaum phaj txiv ua txhaum, nws nplua phaj tub thiab phaj xeeb ntxwv mus txog tiam peb tiam plaub huv si." 8 Tam sis ntawd, Mais Xes txhos caug ntua khoov hauv av pe. 9 Ces nws hais tias : "Huab Tais, yog koj saib kuv tsim nyog, thov koj nrog nraim peb mus, txawm tias peb yog ib haiv neeg xwb qwb txhav, los thov koj zam peb qhov phem thiab peb cov txhaum rau peb, koj muab peb los ua koj tug."
28 Mais Xes nrog Huab Tais nyob tau plaub caug hnub plaub caug hmo, nws tsis noj mov tsis haus dej li, nws sau cov nqe cog lus rau hauv phau ntawv, uas yog kaum lo lus qhia.

NPN 103: 6-7, 8-9, 10-11, 12-13

Txais: (8a) Huab Tais siab zoo thiab khuv leej neeg.

HUAB TAIS nrhiav muab kev ncaj
thiab muab cai rau tas cov raug luag tsuj.
Nws qhia nws tej kev rau Mais Xes paub,
nws qhia nws cov hauj lwm rau tsoom His Xas Lais.

Txais: (8a) Huab Tais siab zoo thiab khuv leej neeg.

HUAB TAIS khuv leej neeg, nws pub txiaj ntsim ntau
nws npau taws qeeb, nws siab zoo tas nrho.
Nws tsis chim ntev, nws tsis npau taws mus li.

Txais: (8a) Huab Tais siab zoo thiab khuv leej neeg.

Nws tsis nplua peb raws li peb tau ua txhaum,
nws tsis pauj rau peb raws li peb tej kev ua phem.
Xws li lub ntuj nyob siab tshaj saum lub ntiaj teb,
Nws kuj ua zoo rau cov neeg hwm nws ntau tshaj thiab.

Txais: (8a) Huab Tais siab zoo thiab khuv leej neeg.

Deb npaum li sab hnub tuaj nyob deb sab hnub poob.
Nws xyeeb peb cov txhaum mus deb peb npaum li ntawd,
Zoo li ib leeg txiv hlub nws cov me nyuam,
HUAB TAIS kuj hlub cov hwm nws zoo ib yam li ntawd,

Txais: (8a) Huab Tais siab zoo thiab khuv leej neeg.

As Les Lus Yas

Txais: As les lus yas, as les lus yas.

Lub noob nplej yog Tswv Ntuj lo lus, Leej Pleev yog tus tseb nplej;
Txhua tus uas tuaj cuag nws yuav ciaj nyob mus li.

Txais: As les lus yas, as les lus yas.

Ntawv Moo Zoo: MT 13: 36-43

36 Yes Xus tso tsoom neeg mus tsev, ces nws los hauv lub tsev. Cov thwj tim txav los hais rau nws tias : "Koj txhais zaj paj lug hais txog cov nroj tuaj hauv daim teb rau peb saib." 37 Yes Xus teb rau lawv tias : "Tus tseb cov noob zoo, yog Neeg Leej Tub. 38 Daim teb, yog lub qab ntuj neeg. Cov noob zoo, yog cov tub hauv lub Ceeb Tsheej. Cov nroj, yog tus Phem cov tub. 39 Tus yeeb ncuab uas tseb cov noob nroj, yog Dab Phem. Lub caij sau nplej, yog lub zim txwv kawg. Cov tub sau nplej, yog cov Tshiab. 40 Ib yam li luag sau cov nroj mus pov hlawv, lub zim txwv kawg kuj yuav zoo ib yam li ntawd : 41 Neeg Leej Tub yuav xa nws cov Tshiab tuaj, lawv yuav sau txhua yam kev ntxias neeg ua txhaum thiab cov neeg ua phem tawm hauv nws lub Ceeb Tsheej mus. 42 Lawv yuav coj cov ntawd mus pov rau hauv lub qhov hluav taws; nyob hauv, yuav muaj kev quaj laug laws thiab tom hniav nkawv. 43 Ces cov neeg siab ncaj yuav ci ntsa iab zoo li lub hnub nyob hauv lawv Txiv lub Ceeb Tsheej. Leej twg muaj pob ntseg, kom nws mloog.”

Tim 31 lub 7 Hli 2019

Hnub Plaub Lis Piam Kaum Xya Nruab Xyoo C Nruab Lis Piam Xyoo I

Hwm LN Ignatius nyob nyob Loyola, ua Leej Choj

Zaj Nyeem Ib: KT 34: 29-35

29 Thaum Mais Xes nqes saum roob Xis Nais rov los, nws tuav ob daig txiag zeb Ua Tim Khawv ntawm nws tes. Nws tsis paub hais tias nws lub ntsej muag daim tawv ci ntsa iab vim nws tau nrog HUAB TAIS tham. 30 As Loos thiab tas tsoom His Xas Lais pom Mais Xes, lawv pom daim nws lub ntsej muag daim tawv ci ntsa iab, lawv ntshai txav los ze nws. 31 Mais Xes hu lawv, ces As Loos thiab tas cov txwj laus thiaj txav los ze nws. Mais Xes nrog lawv tham. 32 Cov pej xeem His Xas Lais mam txav los tom qab, ces Mais Xes qhia tas puas tsav yam uas HUAB TAIS tau hais rau nws nyob saum roob Xis Nais. 33 Thaum Mais Xes hais lus tas lawm, nws muab ib daig ntaub los npog nws ntsej muag. 34 Thaum Mais Xes yuav nkag mus nrog HUAB TAIS tham, nws mam tshem daim ntaub npog nws lub ntsej muag tawm mus txog thaum nws yuav rov tawm los. Nws tawm los, nws tshaj rau cov His Xas Lais paub txog HUAB TAIS cov lus ceeb toom. 35 Cov His Xas Lais pom Mais Xes lub ntsej muag daim tawv ci ntsa iab, ces Mais Xes rov muab ntaub los npog nws ntsej muag mus txog thaum nws yuav chaws rov mus nrog HUAB TAIS tham dua.

NPN 99: 5, 6, 7, 9

Txais: (9c) Huab Tais, peb tus Tswv Ntuj yog tus ntshiab.

Nej qhuas txog HUAB TAIS, peb tus Tswv Ntuj,
nej pe hawm nws ntawm nws lub rooj tiag taw !
Nws ntshiab tiag!

Txais: (9c) Huab Tais, peb tus Tswv Ntuj yog tus ntshiab.

Mais Xes thiab As Loos nkawd yog ob tug hauv nws tsoom leej choj,
Xas Muas yog ib tug hauv cov uas vam txog nws lub npe;
thaum lawv hu txog HUAB TAIS, nws teb lawv.

Txais: (9c) Huab Tais, peb tus Tswv Ntuj yog tus ntshiab.

HUAB TAIS nyob hauv tus ncej huab nrog lawv tham;
Lawv tau hnov nws tej lij choj thiab txoj cai nws muab rau lawv.

Txais: (9c) Huab Tais, peb tus Tswv Ntuj yog tus ntshiab.

Nej qhuas txog HUAB TAIS, peb tus Tswv Ntuj ;
nej pe hawm nws nyob saum nws lub roob ntsiab,
vim HUAB TAIS peb tus Tswv Ntuj ntshiab tiag !

Txais: (9c) Huab Tais, peb tus Tswv Ntuj yog tus ntshiab.

As Les Lus Yas: ZAM 15: 15B

Txais: As les lus yas, as les lus yas.

Huab Tais hais tias: Kuv hu nej ua kuv cov phooj ywg,
vim kuv tau qhia rau nej paub tas puas tsav yam uas leej Txiv hais rau kuv lawm.

Txais: As les lus yas, as les lus yas.

Ntawv Moo Zoo: MT 13: 44-46

Yes Xus hais rau nws cov thwj tim tias:
44 “Ntuj lub Ceeb Tsheej zoo li ib hub nyiaj faus rau hauv ib daim teb. Muaj ib tug neeg mus nrhiav tau, nws rov muab zais dua; nws zoo siab kawg, nws mus muag nws lub cuab tam tas huv si, ces nws muas daim teb ntawd.
45 "Ntuj lub Ceeb Tsheej tseem zoo li ib tug tub luam nrhiav cov hlaws npliag deg zoo nkauj.
46 Thaum nws nrhiav tau ib lub muaj nqi loj, nws mus muag nws lub cuab tam tas huv si, ces nws muas lub hlaws npliag deg ntawd.”

Tim 1 lub 8 Hli 2019

Hnub Tsib Lis Piam Kaum Xya Nruab Xyoo C Nruab Lis Piam Xyoo I

Hwm LN Alphonsus Liguori, ua Tswv Qhia thiab thiab Kws cov Txuj Ntshiab

Zaj Nyeem Ib: KT 40: 16-21, 34-38

16 Mais Xes ua tas puas tsav yam uas HUAB TAIS kom ua, nws ua raws nraim li HUAB TAIS qhia. 17 Xyoo ob, lub ib hlis xiab ib, nws tsa lub Tsev Nyob. 18 Mais Xes tsa lub Tsev Nyob, nws teeb cov taw, nws tsa lub cuam khoov, nws tso cov nqaj tav rau thiab tsa cov ncej rau. 19 Ces nws muab tsev tsam phooj nthuav rau saum lub Tsev Nyob, nws muab daim ntaub tsev tsam phooj los vov sab saud rau raws li HUAB TAIS tau hais rau nws. 20 Mais Xes muab ob daig txiag zeb txaug cov lus qhia kaw rau hauv lub Phij Xab Cog Lus. Nws muab cov nqaj laug rau ntawm lub Phij Xab, thiab muab lub rooj thov txim los tso tshooj rau saum lub Phij Xab Cog Lus. 21 Nws nqa lub Phij Xab Cog Lus mus tso rau hauv lub Tsev Nyob; nws tsa daim ntaub kem rau kom los thaiv lub Phij Xab Cog Lus Raws li Huab Tais tau hais rau Mais Xes.
34 Ces twv huab los ntsauv lub Tsev Tsam Phooj Sib Ntsib, thiab HUAB TAIS lub hwj chim ci puv nkaus hauv lub Tsev Nyob. 35 Mais Xes nkag tsis tau mus rau hauv lub Tsev Tsam Phooj Sib Ntsib, vim twv huab los ntsauv rawv saum lub tsev tsam phooj sib ntsib thiab HUAB TAIS lub hwj chim ci ntsa iab puv lub Tsev Nyob. 36 Txhua zaus thaum twg yog twv huab nce mus nyob siab saum toj lub Tsev Nyob lawm mas cov tub ki His Xas Lais mam sawv kev mus dua ntxiv. 37 Yog twv huab tsis nce siab, mas lawv tsis sawv kev li mus txog hnub uas twv huab nce siab rau saud lawm. 38 Vim tias nruab hnub mas HUAB TAIS twv huab nyob saum lub Tsev Nyob, hos hmo ntuj mas muaj ib co hluav taws cig cig hauv twv huab rau tas tsoom His Xas Lais pom; txhua qhov lawv mus txog mas yeej puav leej zoo li ntawd tib si.

NPN 84: 3, 4, 5-6A+8A, 11

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Kuv tus plig ntshaw seev yees yuj plaws
rau HUAB TAIS cov tshav loog.
Kuv lub siab lub cev quaj qw hu
txog tus Tswv Ntuj muaj txoj sia.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Tab cov me noog ntxias nrhiav tau chaw nyob,
noog luv nrhiav tau zes puag nws cov me nyuam
nyob ntawm koj cov thaj txi ntuj, HUAB TAIS kav tsoom tshiab,
kuv tus vaj, kuv tus Tswv Ntuj!

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Cov neeg nyob hauv koj tsev lawv txoj hmoov zoo :
lawv tau kev cav txog koj mus li tsis tseg.
Cov uas saib koj yog lawv lub zog, lawv txoj hmoov zoo.
Lawv yim mus kev lawv lub zog yim loj tuaj.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

Kuv yeem nyob ib hnub hauv koj cov tshav loog
zoo dua nyob ib txhiab hnub lwm qhov chaw,
kuv yeem nyob ntawm kuv tus Tswv Ntuj taw rooj
zoo dua nyob hauv cov neeg phem lub tsev tsam phooj.

Txais: (2) Huab Tais Tswv Ntuj muaj hwj huam, koj lub tuam tsev zoo xis siab ua luaj!

As Les Lus Yas: HL 16: 14B

Txais: As les lus yas, as les lus yas.

HUAB TAIS, thov koj qhib peb tej siab ntsws
kom peb mloog koj leej Tub cov lus.

Txais: As les lus yas, as les lus yas.

Ntawv Moo Zoo: MT 13: 47-53

Yes Xus hais rau nws cov thwj tim tias:
47 "Ntuj lub Ceeb Tsheej tseem zoo li ib lub vas uas luag pov rau hauv dej ntuj. Lub vas puav tau txhua tsav txhua hom ntses. 48 Thaum lub vas puv lawm, lawv rub lub vas los tim ntug nqhuab, lawv zaum, ces lawv xaiv cov zoo rau hauv tawb, hos muab phem pov tseg. 49 Thaum lub zim txwv kawg, kuj yuav zoo ib yam li ntawd thiab : cov tshiab yuav tawm tuaj mus, lawv yuav cais cov neeg phem ntawm cov neeg ncaj. Lawv yuav muab cov neeg phem pov tseg rau hauv lub qhov hluav taws : nyob hauv, yuav muaj quaj laug laws thiab tom hniav nkawv.
51 "Nej puas to taub tas ib puas tsav yam no ?" Lawv teb rau Yes Xus tias : "Peb to taub." 52 Yes Xus hais rau lawv tias : “Vim li no, txhua tus Kws Ntawv Ntshiab uas los ua thwj tim nyob hauv Ntuj lub Ceeb Tsheej, mas nws zoo li ib tug tswv tsev uas rho tau tej yam tshiab thiab tej yam qub hauv nws lub cuab tam los.”
53 Thaum Yes Xus hais cov paj lug no tas, nws tso qhov chaw ntawd tseg.

Tim 2 lub 8 Hli 2019

Thawj Hnub Rau Lis Piam Kaum Xya Nruab Xyoo C Nruab Lis Piam Xyoo I

Hwm LN Eusebius nyob Vercelli; hwm LN Peter Julian Eymard

Zaj Nyeem Ib: LV 23: 1, 4-11, 15-16, 27, 34B-37

1 HUAB TAIS hais lus rau Mais Xes, nws hais tias :
4 Cov no yog HUAB TAIS cov hnub nyoog tsuj xeebj, uas thaum txog caij txog nyoog, nej yuav tsum ua tej lub txoos ntshiab los ua kev zoo siab nco txog: 5 Lub ib hlis xiab kaum plaub thaum tsaus ntuj, yog Huab Tais Hmo Hla. 6
Hnub xiab kaum tsib, yog hnub ua koob tsheej txog cov mov tsis xyaw poov xab ; mas nej yuav noj mov tsis xyaw poov xab xya hnub sib law. 7 Thawj hnub, nej yuav sib sau ua lub txoos ntshiab, nej yuav tsis txhob ua ib yam hauj lwm hnyav li. 8 Xya hnub sib law, nej yuav niaj hnub cev ib co txim rau HUAB TAIS. Hnub xya, yog hnub sib sau ua lub txoos ntshiab, nej yuav tsis txhob ua ib yam hauj lwm hnyav li.
9 HUAB TAIS tseem hais rau Mais Xes tias : 10 "Koj hais rau Tsoom tub ki His Xas Lais tias : Thaum nej mus txog lub teb chaws uas kuv muab rau nej nyob lawm, yog nej cog tau qoob loo mas nej yuav nqa thawj tes nplej ntawm nej cov qoob loo tuaj rau tus leej choj. 11 Leej choj yuav muab tes nplej lod cev rau HUAB TAIS kom nws saib nej xis nws siab. Yog hnub tom qab hnub Xas Npas Tos, mas leej choj yuav ua cov kab ke cev cov qoob tshiab ntawd.
15 Txij hnub tom qab hnub xas npas tos uas nej tuaj cev thawj tes nplej tshiab rau Ntuj, txij hnub ntawd mus nej yuav suav xya lub lis piam txwm nkaus. 16 Nej yuav suav tsib caug hnub, ces rov txog hnub tom qab hnub xas npas tos tim xya dua, ces nej rov qab nqa tej yam qoob tshiab tuaj cev rau HUAB TAIS dua.
27 Lub xya hli xiab kaum, yog hnub them txim txhaum. Nej yuav sib sau ua lub txoos ntshiab. Nej yuav yoo mov them txim txhaum thiab nej yuav hlawv ib co txim rau HUAB TAIS.
34 Lub xya hli xiab kaum tsib, nej yuav pib ua HUAB TAIS lub koob tsheej nco txog cov Tsev Tsam Phooj, nej yuav ua xya hnub sib law. 35 Thawj hnub, nej ua lub txoos ntshiab, nej yuav tsis txhob ua ib yam hauj lwm hnyav li. 36 Nej yuav niaj hnub hlawv ib co txim rau HUAB TAIS kom puv xya hnub sib law. Hnub yim, nej yuav sib sau ua lub txoos ntshiab thiab nej yuav hlawv ib co txim rau HUAB TAIS. Hnub nej sib sau ua ke ntawd yog ib hnub loj, nej yuav tsis txhob ua ib yam hauj lwm hnyav li.
37 Cov hnub nyoog no yog HUAB TAIS cov hnub nyoog tsuj xeeb, mas nej yuav tshaj tawm tias yog tej lub hnub nyoog rau sawv daws tuaj sib sau ua lub txoos ntshiab, tuaj cev tej cov txim rau HUAB TAIS, hlawv tsiaj txi Ntuj, cev qoob loo txi Ntuj, ua thaj txi Ntuj noj cov txim, hliv dej hliv cawv txi Ntuj, raws li nyias tej kab ke kav nyias lub hnub nyoog.”

NPN 81: 3-4, 5-6, 10-11AB

Txais: (2a) Nej cia li hu nkauj zoo siab rau Tswv Ntuj, nws yog peb lub zog.

Nej pib suab paj nruag, nej ntaus nruas npuaj,
Ntaus nkauj nog ncas thiab ntaus thaj cheej.
Nej tshuab hom thaum hli xiab,
thaum hli nra peb ua kev zoo siab.

Txais: (2a) Nej cia li hu nkauj zoo siab rau Tswv Ntuj, nws yog peb lub zog.

Yog His Xas Lais txoj cai lij choj,
yog txoj cai Yas Kos tus Tswv Ntuj tau txiav.
Yog txoj cai Tswv Ntuj muab rau Yos Xes coj
Thaum nws tawm hauv Hais Nkws Tos teb los.

Txais: (2a) Nej cia li hu nkauj zoo siab rau Tswv Ntuj, nws yog peb lub zog.

Koj yuav tsis txhob muaj dua lwm tswv ntuj nyob hauv koj,
koj yuav tsis txhob txhos caug pe pej kum neeg cov dab qhuas.
Kuv, HUAB TAIS yog koj tus Tswv Ntuj,
tus tau coj koj tawm ntawm Hais Nkws Tos teb los.

Txais: (2a) Nej cia li hu nkauj zoo siab rau Tswv Ntuj, nws yog peb lub zog.

As Les Lus Yas: 1 PT 1: 25

Txais: As les lus yas, as les lus yas.

Huab Tais Lo Lus yuav nyob tas ib txhiab ib txhis,
Yog lo lus uas tau muab tshaj tawm rau nej lawm.

Txais: As les lus yas, as les lus yas.

Ntawv Moo Zoo: MT 13: 54-58

54 Yes Xus rov los txog lub teb chaws uas nws nyob hlob, nws qhia tsoom sid nyob hauv lawv tej tsev txoos. Lawv ceeb nws, lawv hais tias : "Lub tswv yim thoob tsib, thiab cov hwj huam yees ntxwv ntawd, nws tau qhov twg los ?
55 Tus ntawd yog tus kws ntoo tus tub los tsis sub ? Nws niam tsis yog tus hu ua Mab Liab no lod ? Thiab nws cov kwv tij twb yog Yas Kos, Yos Xes, Xis Moos thiab Yus Das lawv los tsis yog ?
56 Hos tas nws cov muam tib si, tsis yog nrog peb nyob ua ke ntawm no lod ? Tas ib puas tsav yam ntawd, nws muab qhov twg los ?"
57 Lawv poob siab tas rau nws. Ces Yes Xus hais rau lawv tias : "Ib tug yaj saub yeej raug luag hwm, tsuas yog cov neeg nyob hauv nws teb chaws thiab cov nyob hauv nws tsev neeg xwb thiaj saib nws tsis rau nqi."
58 Yes Xus tsis ua hwj huam yees ntxwv ntau nyob ntawd, vim lawv tsis ntseeg.

Tim 3 lub 8 Hli 2019

Thawj Hnub Xya Lis Piam Kaum Xya Nruab Xyoo C Nruab Lis Piam Xyoo I

Zaj Nyeem Ib: LV 25: 1, 8-17

1 HUAB TAIS hais rau Mais Xes saum lub roob Xis Nais tias :
8 “Koj yuav suav xya lis piam xyoo, uas yog xya zaus xya xyoo, ces lub caij ntawd yuav yog plaub caug cuaj xyoos rau nej. 9 Thaum txog lub xya hli xiab kaum, nej yuav tshuab hom nrov nrov. Hnub thawd yog hnub them txim txhaum, mas tas lub teb chaws yuav tshuab hom nrov nrov nyob qhov txhia chaw. 10 Nej yuav muab xyoo tsib caug ua ib xyoos Ntshiab; nej yuav tshaj rau cov neeg nyob hauv lub teb chaws tias sawv daws nyob muaj kev twj lij. Yog ib lub caij rau nej sawv daws muaj kev zoo siab; nej nyias yuav rov mus nyob hauv nyias vaj nyias tsev, nyias yuav rov mus nyob hauv nyias tsev neeg. 11 Vim yog nej xyoo hom khaj zoo siab thiab yog xyoo tsib caug rau nej mas nej yuav tsis txhob tseb noob qoob noob loo, thiab nej yuav tsis txhob sau cov nplej uas nws tuaj nws, nej yuav tsis txhob de cov txiv cawv uas txi saum cov hmab tsis tau muab txo ceg. 12 Vim yog ib xyoos zoo siab, mas nej yuab muab saib ua ib Xyoos Ntshiab, ces nej tsuas noj tau tej txhiam xws uas tuaj rau hauv tej nruab teb xwb.
13 Xyoo zoo siab ntawd, mas nej txhua tus nyias yuav rov mus nyob hauv nyias thaj av. 14 Yog koj muag ib yam dab tsi rau ib tug neeg nyob ze koj, los koj muas dab tsi ntawm nws los, mas yuav tsis txhob pub kom muaj kev ib tug noj tau ib tug. 15 Koj yuav suav saib lub xyoo zoo siab dhau tau pes tsawg xyoo lawm, ces koj yuav them tus nqi muas khoom ntawm tus nyob ze koj raws li cov xyoo ntawd. Tus muag rau koj kuj yuav suav saib tshuav pes tsawg cim qoob rau koj sau, ces nws yuav hais tus nqi rau koj them raws li ntawd xwb. 16 Yog tseem tshuav ntau xyoo, mas tus nqe yuav kim, yog tshuav tsawg xyoo, mas tus nqe yuav pheej yig, vim tias nws yuav xam saib nws muag tus nqe raws pes tsawg cim qoob rau koj them. 17 Nej yuav tsis txhob ib leeg dag ib leeg noj. Nej yuav ntshai nej tus Tswv Ntuj. kuv HUAB TAIS yog nej tus Tswv Ntuj.”

NPN 67: 2-3, 5, 7-8

Txais: (4) Tswv Ntuj, cia kom tas txhua haiv neeg cav txog koj!
los: Alleluia.

Thov kom Tswv Ntuj hlub peb thiab foom hmoov zoo rau peb,
kom nws ua nws lub ntsej muag ci tuaj rau saum peb,
Kom lub ntiaj teb thiaj yuav paub txog koj tej kev,
cov kuj cuab thiaj yuav paub txog koj txoj kev cawm neeg.

Txais: (4) Tswv Ntuj, cia kom tas txhua haiv neeg cav txog koj!
los: Alleluia.

Kom cov kuj cuab hom khaj thiab qw zoo siab,
vim koj kav cov haiv neeg raws kev ncaj,
koj ua tus coj cov kuj cuab nyob ntiaj teb.

Txais: (4) Tswv Ntuj, cia kom tas txhua haiv neeg cav txog koj!
los: Alleluia.

Lub ntiaj teb twb txi txiv lawm:
Yog Tswv Ntuj, peb tus Tswv Ntuj foom koob hmoov rau peb.
Thov kom Tswv Ntuj foom lus zoo rau peb,
kom tas npoo ntuj npoo ntiaj teb hwm nws ntshai nws!

Txais: (4) Tswv Ntuj, cia kom tas txhua haiv neeg cav txog koj!
los: Alleluia.

As Les Lus Yas: MT 5: 10

Txais: As les lus yas, as les lus yas.

Cov tau txoj hmoov zoo yog cov raug luag hiam vim txoj kev ncaj,
Ntuj lub Ceeb Tsheej yog lawv tug.

Txais: As les lus yas, as les lus yas.

Ntawv Moo Zoo: MT 14: 1-12

1 Lub caij ntawd, Yes Xus lub moo nto ncha mus txog vaj txheeb Hes Los pob ntseg, 2 ces Hes Los hais rau nws cov tub txib tias : "Tus ntawd yog Zam Ntxuav Plig ! Nws sawv hauv cov tuag rov los lawm; vim li ntawd cov hwj huam yees ntxwv thiaj ua hauj lwm nyob hauv nws. “
3 Vim tias Hes Los tau ntes Zam thiab muab Zam khi coj mus kaw rau hauv tsev loj faj, los ntawm qhov tias Hes Los Dias yog Hes Los tij laug Fis Lis Pos tus poj niam. 4 Vim Zam hais rau Hes Los tias : "Koj tsis muaj cai yuav tus poj niam ntawd." 5 Hes Los twb xav muab Zam tua, tab sis nws ho ntshai tsoom pej xeem, vim sawv daws saib Zam yog ib tug yaj saub. 6 Ua li mas, thaum txog hnub tsuj xeeb Hes Los hnub yug, Hes Los Dias tus ntxhais tuaj dhia seev cev rau sawv daws saib, nws dhia tau ntxim Hes Los siab kawg. 7 Hes Los thiaj cog lus tias yuav pub yam nws thov rau nws. 8 Leej niam cob tus ntxhais, ces tus ntxhais hais tias : "Thov koj muab Zam Ntxuav Plig lub taub hau txawb hauv ib lub phaj nqa los rau kuv ntawm no." 9 Tus vaj tu siab thiab mluas zog, tab sis vim nws tau cog lus lawm, thiab vim cov qhua tuaj koom rooj qav, mas tus vaj thiaj txib kom lawv ua raws li tus ntxhais tau thov. 10 Tus vaj xa neeg mus txiav Zam caj dab hauv tsev loj faj. 11 Lawv muab Zam lub taub hau txawb hauv ib lub phaj nqa los cev rau tus ntxhais; tus ntxhais nqa mus cev rau nws niam. 12 Zam cov thwj tim tuaj nqa Zam lub cev mus faus. Ces lawv mus hais qhia rau Yes Xus paub

Tim 5 lub 8 Hli 2019

Hnub Ob Lis Piam Kaum Yim Nruab Xyoo C Nruab Lis Piam Xyoo I

Tsuj xeeb hnub foom hmoov zoo rau lub tuam tsev St Mary Major

Zaj Nyeem Ib: XP 11: 4B-15

4b Cov His Xas Lais rov qab quaj quaj tias : "Kheev lam peb muaj nqaij noj mas!5 Ua cas peb yuav nco tej nqaij ntses uas peb tau noj dawb nyob Hais Nkws Tos teb ua luaj ! Nco tej dib ntsuab, tej dib pag, tej zaub, tej dos tej qij tib si ! 6 Nyem no ces peb lub zog ntaug zuj zus, peb ntsia qhov twg los tsis muaj dab tsi tsuas pom mov Mas Nas xwb !"
7 Cov Mas Nas ntawd ua tej lub zoo li noob zaub txhwb qaib, dawb lam lam li ib co txab ntoo. 8 Thaum tsoom pej xeem mus ncig khaws Mas Nas los txog, lawv xuas zeb zom los muab tuav hauv tshuaj khib, ces lawv muab hau rau hauv lauj kaub, lawv mam muab puab ua ncuav noj. Cov ncuav Mas Nas qab li ncuav nplej xyaw roj. 9 Hmo ntuj, thaum lwg poob los, cov Mas Nas kuj nrog lwg poob los thiab.
10 Mais Xes hnov tsoom pej xeem quaj quaj, nyias quaj ntawm nyias lub qhov rooj tsev tsam phooj; lawv ua rau HUAB TAIS npau taws heev, hos Mais Xes tu siab kawg nkaus. 11 Mais Xes nug HUAB TAIS tias : "Vim li cas koj ua nyuaj li no rau koj tus tub txib ? Vim koj saib kuv tsis xis koj siab los ua cas koj thiaj muab haiv neeg no rau kuv ris ? 12 Puas yog kuv tau xeeb haiv neeg no, los tau yug lawv los ? Ua cas koj thiaj hais rau kuv tias: 'Koj puag haiv neeg no rau ntawm koj xub ntiag xws li leej niam pub mis puag tus me nyuam noj mis mus kom txog lub teb chaws uas kuv tau cog lus muab rau lawv cov yawg koob ?' 13 Kuv yuav muab nqaij qhov twg los rau tas cov neeg no noj ? vim lawv quaj tsis tseg rau kuv tias: ‘Koj muab nqaij rau peb noj!’ 14 Kuv ib leeg ris tsis taus haiv neeg no li, lawv hnyav dhau rau kuv lawm. 15 Yog koj ua nyuaj kuv li no, thov koj ua siab zoo muab kuv tua kom tuag zoo dua, kom kuv thiaj tsis tau nyiaj txoj kev ntxhov siab no ntxiv lawm !"

NPN 81: 12-13, 14-15, 16-17

Txais: (2a) Nej qw zoo siab rau Tswv Ntuj, tus pab peb.

Kuv haiv neeg tsis mloog kuv lub suab,
His Xas Lais tsis xav mloog kuv lus.
Kuv thiaj tso lawv ua raws lawv lub siab cam thawj;
ces lawv thiaj mus raws li lawv lub siab ntshaw !

Txais: (2a) Nej qw zoo siab rau Tswv Ntuj, tus pab peb.

Kheev lam kuv haiv neeg mloog kuv lus mas !
Kheev lam His Xas Lais mus raws kuv txoj kev mas !
Tam sis ntawd kuv yuav txo lawv cov yeeb ncuab kom swb tas,
kuv yuav tig kuv txhais tes mus ntaus cov neeg ntxub lawv.

Txais: (2a) Nej qw zoo siab rau Tswv Ntuj, tus pab peb.

Cov uas ntxub HUAB TAIS lam ua txuj qhuas kuv,
Tiam sis lawv txoj hmoov phem yuav nyob mus li .
Kuv yuav muab hmoov nplej mos los yug His Xas Lais,
Yuav muab zib ntab zib mu saum tsua los rau lawv noj txaus siab.

Txais: (2a) Nej qw zoo siab rau Tswv Ntuj, tus pab peb.

As Les Lus Yas: MT 4: 4

Txais: As les lus yas, as les lus yas.

Neeg tsis kawg muab mov los yug siav xwb,
neeg tseem yuav yuav txhua lo lus tawm ntawm
Tswv Ntuj lub ncauj los yug siav thiab.

Txais: As les lus yas, as les lus yas.

Ntawv Moo Zoo: MT 14: 13-21

13 Thaum Yes Xus hnov tias Zam Ntxuav Plig tuag lawm, nws caij nkoj mus rau ib qhov chaw xu kev, kom tau nyob ib leeg. Zeej tsoom hnov, lawv tawm hauv tej nroog mus ko taw raws nws qab. 14 Thaum Yes Xus nqes nkoj, nws pom ib pab neeg coob coob, ces nws hlub lawv ; nws kho lawv cov neeg uas muaj mob muaj nkeeg kom zoo hlo. 15 Yav yuav tsaus ntuj, cov thwj tim txav los hais rau nws tias : "Thaj tsam no, tsis muaj neeg nyob, thiab lig lawm ; koj tso tsoom neeg rov mus hauv tej zos kom lawv tau kev mus muas mov noj." 16 Yes Xus teb rau lawv tias : "Tsis tas lawv yuav mus qhov twg li, nej yog cov yuav muab mov rau lawv noj." 17 Cov thwj tim hais rau Yes Xus tias : “Ntawm no, peb tsuas muaj tsib lub ncuav mov thiab ob tug ntses xwb.” 18 Yes Xus hais tias : "Nej nqa los rau kuv." 19 Ces Yes Xus hais kom sawv daws xyab zaum saum tej nroj tsuag, nws tuav tsib lub ncuav mov thiab ob tug ntses, nws tsa muag ntsia saum ntuj, nws hais zaj foom hmoov zoo, nws muab cov ncuav mov ntais, nws cev rau cov thwj tim, kom lawv muab rau sawv daws. 20 Tas sawv daws tau noj tsau txaus siab npo, lawv tseem khaws tej mov seem tau puv kaum ob tawb ! 21 Cov neeg tau noj mov ntawd muaj ze ntawm tsib txhiab leej txiv neej, tsis xam poj niam me nyuam li.

Tim      6      lub      8      Hli      2019

Hnub Peb Lis Piam Kaum Yim Nruab Xyoo C Nruab Lis Piam Xyoo I

Nco txog Yes Xus lub Hwj Chim tawm los rau nws cov Thwj Tim Pom.

Zaj Nyeem Ib:        DN  7:   9-10, 13-14

9 Kuv ntsia, kuv txawm pom luag muab ib co theej kiab los txawb rau ntawd,
ces tus neeg laus los zaum saum nws lub theej kiab.
Nws cov ris tsho dawb paug li daus, nws cov plaub hau saum taub hau dawb paug cuag plaub yaj.
Nws lub theej kiab yog nplaim taws, muaj ib co log hluav taws.
10 Muaj ib tug dej hluav taws txhawv ntws lug ntawm nws xub ntiag los.
Txhiab txhiab leej tsob hwb nws tiam nws, vam vam leej sawv nyob ntawm nws xub ntiag. Ces lawv qhib lub rooj txiav txim, tej ntaub ntawv twb nthuav tas lawm.
13 Hmo ntuj kuv tseem yees pom ntxiv zoo li no:
Muaj ib tug zoo xws li neeg leej tub, nws tuaj saum cov huab saum ntuj tuaj;
nws txav los rau ntawm tus Laus, ces lawv coj nws los qhia rau tus Laus.
14 Ces tus uas zoo xws li neeg leej tub txais lub hwj huam kav, lub koob meej thiab kev ua vaj.
Tas txhia haiv neeg, txhia lub kuj cuab, txhia xeem lus tsob hwb nws.
Nws lub hwj huam kav yog ib lub hwj huam nyob mus li tsis txawj kawg;
Nws txoj kev ua vaj yuav tsis raug leej twg muab rhuav.

NPN        97:   1-2, 5-6, 9

Txais: (1a+9a) Huab Tais ua vaj, nws yog tus loj tshaj kav tas lub ntiaj teb.

HUAB TAIS yog vaj ntxwv, lub ntiaj teb zoo siab;
ntau lub pov txwv luag ntxhi.
Cov huab thiab qhov tsaus nyob ncig nws,
kev ncaj ncees thiab kev txiav txim
yog lub taw ntsa txheem nws lub theej kiab.

Txais: (1a+9a) Huab Tais ua vaj, nws yog tus loj tshaj kav tas lub ntiaj teb.

Cov roob yaj tas xws li ciab ntab yaj nyob ntawm Huab Tais xub ntiag,
ntawm tus HUAB TAIS kav tas lub ntiaj teb xub ntiag.
Cov txheej ntuj cav txog nws txoj kev ncaj ncees,
tas txhua haiv neeg pom nws lub hwj chim.

Txais: (1a+9a) Huab Tais ua vaj, nws yog tus loj tshaj kav tas lub ntiaj teb.

Vim koj HUAB TAIS yog tus nyob siab dua cov saib tas lub ntiaj teb.
koj loj tshaj tas ib tsoom tswv ntuj.

Txais: (1a+9a) Huab Tais ua vaj, nws yog tus loj tshaj kav tas lub ntiaj teb.

Zaj Nyeem Ob:        2 PZ  1:   16-19

Cov zoo nyiad:
16 Peb tsis yog ntseeg raws li tej zaj dab neeg uas neeg lub tswv yim ntse tau xev, tiam sis peb tau tuaj qhia nej yog qhia kom nej paub txog peb tus Huab Tais Yes Xus Pleev lub hwj huam thiab nws txoj kev tuaj nrog peb nyob, vim peb yog ib co tim khawv tau pom xyeem nws lub hwj chim ntawm peb qhov muag. 17 Leej Pleev tau txais koob meej thiab hwj chim ntawm Leej Txiv Tswv Ntuj; muaj kev qhia meej txog qhov ntawd yog hnub uas lub suab muaj hwj xyeej nrov tuaj txog nws tias : “Tus no yog kuv Leej Tub, tus kuv nyiam, nws ua ntxim kuv lub siab tas nrho.” 18 Lub suab ntawd, peb tau hnov nrov saum ntuj tuaj, hnub uas peb nrog Yes Xus nyob saum lub roob ntshiab. 19 Peb kuj tseem muaj cov Yaj Saub tej lus uas yog ib co lus tsim nyog ntseeg. Nej yuav tsum mob siab ntseeg tej lus ntawd thiab, uas yog ib co lus zoo li ib lub teeb ci hauv qhov tsaus ntuj rau nej, mus txog thaum lub hnub tawm tuaj thiab lub hnub qub kaj ntug ci tuaj rau hauv nej nruab siab lawm.

As Les Lus Yas:        MT  17:   5C

Txais: As les lus yas, as les lus yas.

"Tus no yog kuv leej tub uas kuv nyiam, nws yog kuv qhov chaw zoo siab,
nej cia li mloog nws hais.

Txais: As les lus yas, as les lus yas.

Ntawv Moo Zoo:         LK  9:   28b-36

28b Yes Xus coj Pob Zeb, Zam, thiab Yas Kos nrog nws, ces nws nce mus teev Ntuj saum roob. 29 Thaum Yes Xus teev Ntuj, nws lub ntsej muag hloov, nws cev ris tsho dawb ci ntsa iab tuaj. 30 Txawm muaj ob tug neeg nrog Yes Xus tham, yog Mais Xes thiab Es Lias nkawd. 31 Nkawd tawm los muaj hwj chim, nrog Yes Xus tham txog nws txoj kev yuav ncaim mus uas yuav tshwm sim nyob Yes Lus Xas Les. 32 Pob Zeb thiab cov nrog nws qaug dab ntub kawg nkaus, tab sis thaum lawv tsim meej lawm, lawv pom Yes Xus lub hwj chim thiab pom ob tug neeg uas sawv nrog Yes Xus ua ke. 33 Thaum ob tug ntawd yuav ncaim ntawm Yes Xus mus, Pob Zeb hais rau Yes Xus tias : "Xib Hwb, peb nyob ntawm no mas zoo kawg ! Cia peb tsa peb lub tsev tsam phooj, ib lub rau koj, ib lub rau Mais Xes, ib lub rau Es Lias." Pob Zeb tsis paub tias nws hais dab tsi li. 34 Thaum Pob Zeb tab tom hais li ntawd txawm muaj ib twv huab tuaj ua ntxoov ntxoo vov nkaus lawv. Thaum lawv nkag mus rau hauv twv huab, lawv ntshai kawg. 35 Muaj ib lub suab nrov hauv twv huab tuaj tias : "Tus no yog kuv Leej Tub, yog tus kuv Xaiv, nej mloog nws mog." 36 Thaum lub suab hais li ntawd tas, tshuav Yes Xus tib leeg lawm xwb. Lub caij ntawd, cov thwj tim ua twj ywm tsis qhia dab tsi rau leej twg txog qhov uas lawv tau pom li.

Tim      7      lub      8      Hli      2019

Hnub Plaub Lis Piam Kaum Yim Nruab Xyoo C Nruab Lis Piam Xyoo I

Hwm LN Sixtus II thiab cov nrog nws tuag ua Tim KHawv; hwm LN Cajetan

Zaj Nyeem Ib:       XP  13:   1-2, 25–14:1, 26A-29A, 34-35

1 HUAB TAIS hais lus rau Mais Xes, nws hais tias : 2 "Koj xa ib co neeg mus xyuas Kas Nas Has teb, xyuas lub teb chaws uas kuv muab rau cov His Xas Lais mus nyob. Koj xa cov thawj coj, ib lub xeem ib tug mus."
25 Lawv mus xyuas lub teb chaws tau plaub caug hnub, ces lawv rov qab los txog. 26 Lawv mus cuag Mais Xes, As Loos, thiab tsoom His Xas Lais nyob hauv lub hav suab puam Pas Las, nyob ntawm Kas Des. Lawv coj ib co lus los piav qhia rau Mais Xes thiab rau tas tsoom pej xeem mloog, lawv muab tej txiv hmab txiv ntoo uas lawv nqa tau los rau sawv daws saib. 27 Lawv piav li no : "Peb mus txog lub teb chaws uas koj xa peb mus xyuas. Muaj tseeb tias yog ib lub teb chaws uas mis nyuj thiab zib ntab zib mu ntws lug, thiab ntawm no yog tej txiv  uas muaj nyob hauv lub teb chaws. 28 Tab sis haiv neeg nyob hauv lub teb chaws ntawd tsiv kawg nkaus;  lawv tej nroog xov ntsa zeb ntsa tsua, thiab khov kawg li.  Peb tseem tau pom As Nas Kis cov xeeb ntxwv huv si thiab. 29 Cov neeg As Mas Les Kis nyob hauv lub xeev Nes Zes; cov neeg His Tis, cov Yes Npus Xis , thiab cov As Mos Lis lawv nyob pem cov roob, hos cov neeg Kas Nas Has nyob raws ntug hiav txwv thiab raws tus ntug dej Yos Las Das."
30 Kas Les thiaj hais lus rau tsoom pej xeem uas yws yws Mais Xes, nws hais tias : "Peb yuav tsum sawv kev mus, peb mus ntaus kom tau lub teb chaws : peb muaj peev xwm ua tau xwb." 31 Tiam sis cov txiv neej uas tau nrog nws mus, teb tias : "Peb yuav ntaus tsis yeej haiv neeg ntawd li, vim lawv muaj zog tshaj peb." 32 Ces lawv hais ib co lus hem txog lub teb chaws uas lawv tau mus xyuas rau cov His Xas Lais, lawv hem tias : "Lub teb chaws uas peb mus xyuas mas yog ib lub teb chaws noj neeg. Cov neeg peb tau pom mas txhua tus yog neeg loj loj siab siab xwb. 33 Peb tau pom kiag As Nas Kis cov tub, uas yog caj ces neeg loj loj cov xeeb ntxwv. Peb muab peb piv rau lawv mas peb zoo nkaus li ib co kooj xwb, lawv los ntshai lawv yeej saib peb zoo li ntawd thiab xwb."
14   1 Ces tas tsoom pej xeem tsa suab yws nthe zom zaws nrov nrov. Hmo ntawd lawv nroo lawv quaj ib hmos.
26 Huab Tais hais rau Mais Xes thiab As Loos tias:  27 “Tsav neeg phem no yuav yws yuav cem kuv mus txog thaum twg? Kuv hnov cov His Xas Lais tej lus yws lus cem kuv lawm. 28 Koj hais rau lawv tias: ‘Huab Tais hais li no: Kuv cog lus ntawm kuv txoj sia tias: Kuv yuav ua rau nej raws nraim li nej cov lus uas nej tau hais rau kuv pob ntseg hnov lawm. 29 Nej cov pob txha yuav raug tso tseg nyob hauv lub teb chaws suab puam no.
34 Nej tau mus pom lub teb chaws tau plaub caug hnub, nej yuav tau them nej lub txim txhaum kom puv plaub caug xyoo, ib hnub muab suav ua ib xyoos, nej thiaj yuav paub hais tias yog nej tsis yuav li kuv hais ces nej yuav zoo li cas.  35 Kuv Huab Tais tau hais lawm, kuv yuav ua raws li ntawd rau tas tsoom neeg phem uas tuaj sib sau yws thiab cem kuv no. Nyob hauv thaj chaw suab puam no, lawv txhua txhia tus yuav tsum tuag kom tas tso.”

NPN       106:   6-7AB, 13-14, 21-22, 23

Txais:   (4a) Huab Tais, thov koj nco txog peb, vim koj hlub koj haiv neeg.

Peb tau ua txhaum ib yam li peb cov yawg koob,
Peb ncaim ntawm koj txoj kev, peb tau ua qhov phem.
Nyob Hais Nkws Tos teb, peb phaj yawg tsis
saib koj cov hwj huam yees ntxwv muaj nqes.

Txais:   (4a) Huab Tais, thov koj nco txog peb, vim koj hlub koj haiv neeg.

Tau tsis ntev, lawv twb tsis nco qab nws tej hwj huam lawm,
lawv tsis tos mloog nws zaj tswv yim nws tej lus li.
Nyob teb chaws suab puam, lawv ntshaw noj ntshaw haus,
lawv sim Tswv Ntuj nyob ntawm thaj chaw av nkig teb do.

Txais:   (4a) Huab Tais, thov koj nco txog peb, vim koj hlub koj haiv neeg.

Lawv tsis nco qab tus Tswv Ntuj uas tau cawm lawv,
tus tau ua tej yam loj nyob Hais Nkws Tos teb ,
tus tau ua tej yam hwj huam txaus qhuas nyob Haas teb,
tus tau ua tej yam txaus ntshai nyob ntawm Dej Ntuj Liab.

Txais:   (4a) Huab Tais, thov koj nco txog peb, vim koj hlub koj haiv neeg..

Nws tau hais tias nws yuav ua kom lawv tuag tu noob
tab sis Mais Xes, tus uas nws xaiv,
tau sawv lawv chaw thov nws nrog nws hais,
kom nws tsis txhob mloog nws lub siab npau taws uas xav txo lawv.

Txais:   (4a) Huab Tais, thov koj nco txog peb, vim koj hlub koj haiv neeg.

As Les Lus Yas:       LK  7:   16

Txais: As les lus yas, as les lus yas.

Ib tug yaj saub loj sawv los nyob hauv peb,
Tswv Ntuj tau tuaj xyuas nws haiv neeg lawm.

Txais: As les lus yas, as les lus yas.

Ntawv Moo Zoo:        MT  15:   21-28

21 Yes Xus tawm ntawm qhov chaw ntawd, nws mus rau thaj tsam Tws Los thiab Xis Doos teb. 22 Muaj ib tug poj niam Kas Nas Has nyob hauv teb chaws ntawd tuaj. Nws hu nrov nrov tias : "Huab Tais, Das Vis Leej Tub, thov koj khuv leej kuv! Kuv tus ntxhais raug ib tug dab phem uas tsim txom nws heev  kawg." 23 Yes Xus tsis teb ib los li. Cov thwj tim txav los hais tias : "Koj muab nws ntiab khiav mus, vim nws pheej hu nrov nrov tsis tseg lawv peb qab." 24 Yes Xus teb rau lawv tias : "Ntuj xa kuv tuaj cawm cov yaj ploj hauv His Xas Lais tsev neeg xwb." 25 Tab sis tus poj niam twb tuaj txog lawm, nws txhos caug ntua pe Yes Xus, nws thov tias : "Huab Tais, thov koj pab kuv !" 26 Yes Xus teb rau nws tias : "Tsis phim muab me nyuam tej mov pov rau cov me nyuam dev noj." 27 Tus poj niam teb tias : "Huab Tais, yog li koj hais. Tab sis cov me nyuam dev tsuas noj tej tsig mov txeej ntawm lawv tus tswv lub rooj los xwb !" 28 Ces Yes Xus teb rau nws tias : "Tus poj niam, koj lub siab ntseeg loj kawg! Kom koj tau raws li koj lub siab xav." Ces nws tus ntxhais zoo hlo txij lub caij ntawd mus lawm.

Tim 8 lub 8 Hli 2019

Hnub Tsib Lis Piam Kaum Yim Nruab Xyoo C Nruab Lis Piam Xyoo I

Hwm LN Dominic, ua Leej Choj

Zaj Nyeem Ib: XP 20: 1-13

1 Lub ib hlis, tsoom tub ki His Xas Lais sawv daws los txog lub teb chaws suab puam Xees. Tsoom pej xeem los tsa tsev nyob Kas Des. Thaum lawv los txog ntawd, ces Mis Lias tuag, lawv muab nws faus rau ntawd.
2 Tsoom neeg sawv daws tsis tau dej haus, ces lawv koom siab tuaj ib tog cem Mais Xes thiab As Loos nkawd. 3 Lawv tuaj cem Mais Xes tias : "Kheev peb lam nrog peb cov kwv tij tuag thaum HUAB TAIS tuaj rhuav lawv mas ! 4 Vim li cas koj thiaj coj HUAB TAIS haiv neeg los nyob hauv lub suab puam no kom peb thiab peb cov tsiaj tuag tas? 5 Vim li cas koj thiaj coj peb tawm hauv Hais Nkws Tos teb los nyob lub niag teb chaws phem no ? Tsis zoo cog qoob, tsis muaj txiv cev, tsis muaj hmab txiv cawv, tsis muaj txiv ntsiav kws, twb tsis muaj dej haus li thiab!"
6 Mais Xes thiab As Loos ncaim ntawm cov neeg, nkawd mus nyob ntawm lub qhov rooj Tsev Tsam Phooj Sib Ntsib. Nkawd txhos caug ntua khoov ntsej muag pe ti av, ces HUAB TAIS lub hwj chim tawm tuaj rau nkawd pom. 7 HUAB TAIS hais rau Mais Xes tias : 8 "Koj nqa koj rab pas nrig, ces koj thiab As Loos koj tij laug neb yuav nqua hu tsoom pej xeem kom tuaj sib sau ua ke, ces koj yuav hais lus rau phab tsua no rau lawv ntsia ntsoov, kom phab tsua cia li txhawv dej los. Ces koj yuav ua tau kom dej tawm hauv phab tsua los rau lawv haus. Koj yuav muab rau tsoom pej xeem thiab rau lawv cov tsiaj haus." 9 Mais Xes thiaj muab nws tus pas nrig tawm ntawm nws qhov chaw ntawm HUAB TAIS xub ntiag los raws li HUAB TAIS kom ua.
10 Mais Xes thiab As Loos nkawd hu tas tsoom pej xeem tuaj sawv nyob ntawm hauv ntej ntawm phab tsua, ces Mais Xes hais rau lawv tias : "Cov neeg cem taus, nej mloog mog. Peb puas ua tau kom dej txhawv hauv phab tsua no los rau nej haus ?" 11 Ces Mais Xes tsa nws txhais tes, nws muab nws rab pab nplawm phab tsua ob nplawg : Dej txhawv ntws lug tawm los, txaus rau tas tsoom pej xeem thiab lawv cov tsiaj haus. 12 HUAB TAIS hais rau Mais Xes thiab As Loos tias : "Vim neb tsis ntseeg kuv tsis ua kom cov tub ki His Xas Lais pom tias kuv yog tus ntshiab, mas neb yuav tsis tau coj tsoom neeg ntawd mus tsuj lub teb chaws uas kuv muab rau lawv nyob." 13 Cov dej ntawd yog cov dej nyob Mes Lis Npas, vim nyob ntawd cov His Xas Lais ntxeev siab rau HUAB TAIS, ces HUAB TAIS muab nws txoj kev ntshiab rau lawv pom.

NPN 95: 1-2, 6-7, 8-9

Txais: ( 8 ) Hnub no yog nej hnov nws lub suab, nej tsis txhob ua nej lub siab tawv ncauj.

Nej tuaj peb hu nkauj luag ntxhi rau HUAB TAIS,
peb qw suab cav txog lub Tsua Cawm peb.
Peb tuaj nyob ntawm nws xub ntiag ua nws tsaug,
peb hu nkauj paj nruag luag ntxhi rau nws.

Txais: ( 8 ) Hnub no yog nej hnov nws lub suab, nej tsis txhob ua nej lub siab tawv ncauj.

Tuaj peb mus khoov pe hawm nws,
peb mus txhos caug ntawm tus HUAB TAIS tsim peb los xub ntiag.
Vim nws yog peb tus Tswv Ntuj,
peb yog haiv neeg nws saib xyuas, pab yaj nws coj.

Txais: ( 8 ) Hnub no yog nej hnov nws lub suab, nej tsis txhob ua nej lub siab tawv ncauj.

Xav kom hnub no nej mloog nws lus suab hais:
“Nej tsis txhob ua lub siab tawv ncauj li nyob Mes Lis Npas,
thaum lub caij uas nyob Mas Xas hauv teb chaws suab puam,
qhov chaw uas nej phaj txiv tau sim kuv;
lawv twb tau pom kuv tej hauj lwm los lawv tseem sim kuv thiab.”

Txais: ( 8 ) Hnub no yog nej hnov nws lub suab, nej tsis txhob ua nej lub siab tawv ncauj.

As Les Lus Yas: MT 16: 18

Txais: As les lus yas, as les lus yas.

Koj yog Pob Zeb, kuv yuav txhim kuv lub Koom Txoos rau saum lub pob zeb no.
Dab phem teb cov qhov rooj yuav tiv tsis taus lub pob zeb no.

Txais: As les lus yas, as les lus yas.

Ntawv Moo Zoo: MT 16: 13-23

13 Yes Xus tuaj txog cheeb tsam ntawm Xes Ntxas Les Fis Lis Pos, ces nws nug cov thwj tim li no : "Luag tej hais tias Neeg Leej Tub yog leej twg ?" 14 Lawv teb tias : “Ib txhia hais tias : Yog Zam Ntxuav Plig. Ib txhia hais tias, yog Es Lias. Tseem muaj lwm cov hais tias yog Yes Les Mias los yog ib tug hauv cov yaj saub.” Yes Xus hais rau lawv tias : 15 "Nej ne, nej hais tias kuv yog leej twg ?" 16 Xis Moos Pob Zeb teb tias : "Koj yog Leej Pleev, yog tus Tswv Ntuj Muaj Txoj Sia Leej Tub." 17 Yes Xus teb rau Pob Zeb tias : "Xis Moos, Yos Nas tub, koj txoj hmoov zoo, vim tsis yog nqaij thiab ntshav qhia rau koj paub. Yog kuv Txiv nyob saum ntuj qhia rau koj. 18 Ua li mas kuv hais rau koj : Koj yog Pob Zeb, kuv yuav txhim kuv lub Koom Txoos rau saum lub pob zeb no. Dab phem teb cov qhov rooj yuav tiv tsis taus lub pob zeb no. 19 Kuv yuav muab Ntuj lub Ceeb Tsheej cov yawm sij rau koj. Koj khi yam twg nyob ntiaj teb no, Ntuj yuav saib yam ntawd yog khi nyob saum ntuj. Koj daws yam twg nyob ntiaj teb no, Ntuj yuav saib yam ntawd yog daws nyob saum ntuj." 20 Ces Yes Xus txwv cov thwj tim tsis pub qhia leej twg tias nws yog Leej Pleev.
21 Txij hnub ntawd los, Yes Xus pib qhia rau nws cov thwj tim tias nws yuav tsum mus pem Yes Lus Xas Les, nws yuav raug kev txom nyem loj vim cov txwj laus, cov thawj leej choj thiab cov Kws Ntawv Ntshiab. Nws yuav raug luag muab tua. Hnub peb, nws yuav sawv rov los. 22 Pob Zeb rub Yes Xus mus rau ib qho, nws hais rau Yes Xus tias : "Huab Tais, kom Tswv Ntuj txuag koj ! Tsis pub kom tej yam ntawd tuaj raug koj !" 23 Tab sis, Yes Xus tig los hais rau Pob Zeb tias : "Xas Tas, koj lawv kuv qab. Koj thaiv kuv kev. Koj tsis xav li Tswv Ntuj xav, koj xav li neeg xav xwb.”

Tim 9 lub 7 Hli 2019

Hnub Rau Lis Piam Kaum Yim Nruab Xyoo C Nruab Lis Piam Xyoo I

Hwm LN Teresa Benedicta of the Cross

Zaj Nyeem Ib: TCO 4: 32-40

Mais Xes hais rau tsoom pej xeem tias:
32 "Nej sim nug txog txheej laus thaud saib, thaum lub caij ua ntej nej yug los, txij hnub Tswv Ntuj tau tsim neeg los nyob ntiaj teb no, txij qab ntug mus txog hauv ntuj, saib puas tau muaj dua ib yam loj npaum li no tshwm sim tuaj? Puas tau muaj neeg hnov dua hais txog qhov ntawd? 33 Puas tau muaj dua lwm haiv neeg uas tau hnov Tswv Ntuj lub suab hais lus hauv hluav taws tuaj li nej tau hnov, thiab lawv tseem muaj txoj sia nyob? 34 Puas muaj lwm tus tswv ntuj uas tau ua tej yam los sim neeg siab, tej lub cim loj thiab tej yam hwj huam txaus qhuas, los tau sawv tsam rog, los yog siv nws txhais tes muaj hwj huam thiab xyab nws txhais npab muaj zog, thiab tau ua tej yam txaus ntshai kawg kom tau coj ib haiv neeg tawm hauv lwm haiv neeg los ua nws tug, xws li HUAB TAIS nej tus Tswv Ntuj tau ua pab nej nyob Hais Nkws Tos teb, rau nej qhov muag pom xyeem kiag?
35 HUAB TAIS tau pub kom nej pom tej yam ntawd kom nej paub tias HUAB TAIS yog Tswv Ntuj tiag, tsis muaj dua lwm tus tswv ntuj ntxiv. 36 Nws kheev kom nej hnov nws lub suab nrov saum ntuj tuaj, kom nws thiaj yuav qhuab qhia tau nej; nws pub kom nej pom nws cov hluav taws nyob ntiaj teb no, thiab nej kuj tau hnov nws hais lus hauv cov hluav taws tuaj. 37 Vim HUAB TAIS hlub nej cov yawg koob, nws thiaj xaiv nej uas yog lawv cov xeeb leej xeeb ntxwv tom qab lawv, nws thiaj tuaj nrog nej nyob kom tau siv nws lub hwj huam loj thau nej tawm ntawm Hais Nkws Tos teb los. 38 Nws tau ntiab tej haiv neeg loj thiab muaj zog dua nej kom khiav ntawm nej hauv ntej mus. Nws coj nej mus nyob hauv lawv lub teb chaws, uas nws muab los ua nej lub cuab tam xws li niaj hnub no. 39 Vim li no, nej yuav tsum paub nej yuav tsum nco ntsoov rau nruab siab tias : HUAB TAIS yog Tswv Ntuj kav saum ntuj thiab kav ntiaj teb no tib si. Tsis muaj dua lwm tus Tswv Ntuj lawm.
40 Nej yuav coj Huab Tais tej cai lij choj thiab nws cov lus qhia uas kuv ceeb toom rau nej hnub no, kom nej thiab nej cov tub ki tom qab nej thiaj yuav muaj kev vam meej, thiab thiaj yuav ua lub neej nyob ntev dhawv hauv lub teb chaws uas HUAB TAIS nej tus Tswv Ntuj muab pub rau nej nyob mus ib txhiab ib txhis."

NPN 77: 12-13, 14-15, 16+21

Txais: (12a) Kuv nco ntsoov Huab Tais cov hauj lwm loj.

Kuv nco ntsoov HUAB TAIS cov hauj lwm loj ;
kuv nco txog koj cov hwj huam yees ntxwv thaum ub.
Kuv muab koj cov hauj lwm coj los ntsuam,
kuv muab tej yam loj koj tau ua coj los xav.

Txais: (12a) Kuv nco ntsoov Huab Tais cov hauj lwm loj.

Tswv Ntuj, koj txoj kev yog kev ntshiab;
Tus tswv ntuj twg thiaj loj zoo li peb tus Tswv Ntuj?
Koj yog tus Tswv Ntuj ua hwj huam loj;
koj tau muab koj lub peev xwm rau cov haiv neeg pom.

Txais: (12a) Kuv nco ntsoov Huab Tais cov hauj lwm loj.

Koj xuas koj txhais npab muaj zog los txhiv koj haiv neeg,
Koj txhiv Yas Kos thiab Yos Xes cov tub.
Koj coj koj haiv neeg zoo li coj ib pab yaj;
Koj siv Mais Xes thiab As Loos nkawd los coj lawv.

Txais: (12a) Kuv nco ntsoov Huab Tais cov hauj lwm loj.

As Les Lus Yas: MT 5: 10

Txais: As les lus yas, as les lus yas.

Cov tau txoj hmoov zoo yog cov raug luag hiam vim txoj kev ncaj,
Ntuj lub Ceeb Tsheej yog lawv tug.

Txais: As les lus yas, as les lus yas.

Ntawv Moo Zoo: MT 16: 24-28

24 Yes Xus hais rau nws cov thwj tim tias : “Yog leej twg xav los raws kuv, nws yuav tsum ntxub nws tus kheej, nws yuav kwv nws tus ntoo cuam, thuab yuav lawv kuv qab. 25 Vim leej twg xav cawm nws txoj sia, mas nws yuav plam nws txoj sia. Hos leej twg plam nws txoj sia vim kuv, mas nws yuav rov nrhiav tau nws txoj sia. 26 Yog ib tug neeg txeeb tau tas lub ntiaj teb huv tib si los ua nws tug, tab sis nws ua nws txoj sia ploj, mas nws tau dab tsi ? Neeg yuav muab dab tsi los pauv tau nws txoj sia ? 27 Vim tias Neeg Leej Tub yuav nrog nws cov Tshiab los muaj Leej Txiv lub hwj chim, ces nws yuav pauj rau nyias raws li nyias cov hauj lwm. 28 Kuv hais tseeb rau nej : muaj ib txhia neeg uas sawv ntawm no, yuav tsis tau saj txoj kev tuag mus txog thaum lawv tau pom Neeg Leej Tub los nyob hauv nws lub Ceeb Tsheej tso.”

Tim      10      lub      8      Hli      2019

Hnub Xya Lis Piam Kaum Yim Nruab Xyoo C Nruab Lis Piam Xyoo I

Hwm LN Lawrence, leej Tsob Hwb tuag ua Tim Khawv

Zaj Nyeem Ib:      2 KLN  9:   6-10

Cov kwv tij nkauj muam aw:
6 Nej yuav nco ntsoov tias, tus tseb nplej tsawg, nws kuj yuav sau tau tsawg, tus tseb nplej ntau nws yuav sau tau ntau.
7 Nej nyias yuav pub raws li nyias tau txiav nyob hauv nyias siab lawm, nej txhob pub zoo li nej khuv khuv xim, thiab zoo li yog luag yuam nej, vim Tswv Ntuj nyiam tus zoo siab hlo pubmrau luag. 8 Tswv Ntuj muaj peev xwm yuav pub tau tas ib puas tsav yam txiaj ntsim nchuav lug rau nej, kom nej muaj txhua yam tas mus li thiab txhua lub sij hawm, thiab tseem yuav seem ib co txaus pab nej ua txhua yam hauj lwm zoo. 9 Raws li Ntawv sau tseg tias : ‘Nws tau ua siab dav, nws pub rau cov pluag ; nws txoj kev ua neeg ncaj yuav nyob mus li.’ 10 Tus uas muab noob nplej rau tus tswv teb tau tseb, thiab muab mov rau tib neeg noj, nws haj yam yuav muab noob thiab ua kom nej cov noob ntau phwj yaws, nws yuav ua kom nej txoj kev ncaj loj tuaj thiab txi txiv ntau.

NPN    112:   1-2, 5-6, 7-8, 9

Txais: (5) Tus neeg txawj hlub luag thiab qiv rau luag, nws txoj hmoov zoo.

Tus hwm HUAB TAIS, nws txoj hmoov zoo :
Nws nyiam Huab Tais cov lus qhia tas siab nrho,
Nws caj ce yuav muaj zog nyob ntiaj teb;
tiam neeg siab ncaj yuav tau txoj hmoov zoo.

Txais: (5) Tus neeg txawj hlub luag thiab qiv rau luag, nws txoj hmoov zoo.

Tus neeg txawj hlub luag thiab qiv rau luag, nws txoj hmoov zoo.
Nws ua nws tej hauj lwm raws kev ncaj.
Nws yuav nyob ruaj nreb mus li;
sawv daws yuav nco ntsoov txog tus neeg ncaj mus ib txhis.

Txais: (5) Tus neeg txawj hlub luag thiab qiv rau luag, nws txoj hmoov zoo.

Nws yuav tsis ntshai cov lus cuav hais phem txog nws ;
nws lub siab nyob ruaj nreb, nws tso siab lug rau HUAB TAIS.
Nws ua siab tawv qhawv, nws yuav tsis ntshai,
nws yuav tsa hauv pliaj siab saib nws cov yeeb ncuab.

Txais: (5) Tus neeg txawj hlub luag thiab qiv rau luag, nws txoj hmoov zoo.

Nws pub tsis txuag rau cov pluag :
nws txoj kev ua siab dav yuav nyob mus li,
nws yuav tau ntsej muag, yuav nto koob meej lug,

Txais: (5) Tus neeg txawj hlub luag thiab qiv rau luag, nws txoj hmoov zoo.

As Les Lus Yas:      ZAM  8:   12BC

Txais: As les lus yas, as les lus yas.

Huab Tais hais tias:  "Leej twg lawv kuv qab,
nws yuav tsis maub mus kev hauv qhov tsaus ntuj.
Nws yuav tau qhov pom kev kaj nws lub neej."

Txais: As les lus yas, as les lus yas.

Ntawv Moo Zoo:      ZAM  12:   24-26

Yes Xus hais rau nws cov thwj tim tias:
24 “Kuv hais qhov muaj tseeb tiag rau nej : Yog ib lub noob nplej tsis poob rau hauv av thiab tsis tuag, mas nws tsuas nyob li ntawd xwb. Hos yog nws tuag, mas nws txi txiv ntau.
25 Tus twg nyiam nws txoj sia, mas nws ua nws txoj sia ploj. Hos tus twg tsis khuv xim nws txoj sia nyob hauv lub ntiaj teb no, mas nws yuav ceev tau nws txoj sia kom tau ciaj nyob mus li.
26 Tus twg xav tsob hwb kuv, mas nws yuav tsum los raws kuv. Kuv nyob qhov twg, kuv tus tub txib kuj yuav nyob qhov ntawd thiab. Tus twg tsob hwb kuv, mas Leej Txiv kuj yuav hwm nws thiab.”