UA KOOB TSHEEJ YES XUS YUG LOS XYOO 2018

Tim 14 lub 6 Hli 2019

Hnub Rau Lis Piam Kaum Nruab Xyoo C Nruab Lis Pian Xyoo I

Zaj Nyeem Ib: 2 COR 4: 7-15

Cov kwv tij nkauj muad:
7 Peb muab thooj pov haum muaj nqis no tso nyob hauv tej lub hub av, kom lub hwj huam loj ntawd yog tuaj ntawm Tswv Ntuj tuaj, tsis yog tawm hauv peb los. 8 Luag txiv peb qhov txhia chaw tuaj, tab sis peb tsis raug luag tsuj. Peb tau kev tws, tab sis peb tsis muaj kev yuav tas kev cia siab. 9 Peb raug luag hiam, tab sis Ntuj tsis tso peb pov tseg. Peb raug luag thawb rau hauv pem teb, tab sis luag rhuav tsis tau peb. 10 Peb mus txog qhov twg, peb ris rawv Yes Xus txoj kev txom nyem kev tuag nyob hauv peb lub cev, kom xwv Yes Xus txoj sia tawm tuaj rau sawv daws pom xyeem nyob hauv peb lub cev thiab. 11 Txawm tias peb tseem muaj txoj sia los niaj hnub luag xav muab peb tua vim Yes Xus, kom xwv Yes Xus txoj sia tawm los rau sawv daws pom xyeem nyob hauv peb lub cev txawj tuag. 12 Li ntawd txoj kev tuag lis nws lub luag hauj lwm nyob hauv peb, hos txoj sia lis nws lub luag hauj lwm nyob hauv nej.
13 Peb muaj txoj kev ntseeg zoo ib yam li ntawv sau tseg tias : ‘Kuv ntseeg, kuv thiaj hais cov lus ntawd.’ Peb los kuj ib yam, peb ntseeg peb thiaj hais cov lus ntawd. 14 Peb paub tias, tus tsa Huab Tais Yes Xus sawv rov los, nws kuj yuav tsa peb nrog Yes Xus sawv thiab. Thiab nws yuav coj peb nrog nej mus nyob ze ntawm nws. 15 Tas puas tsav yam no yog tshwm sim los pab nej xwb, kom muaj neeg coob zuj zus tau txais txiaj ntsim ntau, ces yuav muaj neeg coob zuj zus ua Ntuj tsaug, kom Tswv Ntuj muaj koob meej.

NPN 116: 10-11, 15-16, 17-18

Txais: (17a) Huab Tais, Kuv yuav cev ib co txim los cav txog koj.
los: As les lus yas.

Kuv yeej ntseeg ruaj nreb txawm kuv hais tias:
“Kuv txom nyem dhau lawm.”
Nyob hauv kuv txoj kev nyuaj siab, kuv thiaj hais tias:
“Tsis muaj ib tug neeg uas yus yuav ntseeg tau.”

Txais: (17a) Huab Tais, Kuv yuav cev ib co txim los cav txog koj.
los: As les lus yas.

Huab Tais saib yog ib qho muaj nqes loj
thaum lub caij cov neeg ntseeg txog nws tas txoj sia.
Huab Tais, kuv yog koj tus tub txib,
kuv yog koj tus tub txib tiag, yog koj tus ntxhais txib tus tub,
koj tau daws cov hlua khi kuv lawm.

Txais: (17a) Huab Tais, Kuv yuav cev ib co txim los cav txog koj.
los: As les lus yas.

Kuv yuav cev ib co txim los cav txog koj,
kuv yuav tuav txog HUAB TAIS lub npe.
Kuv yuav pauj kuv lub yeem rau HUAB TAIS
nyob ntawm tas nws tsoom neeg xub ntiag,

Txais: (17a) Huab Tais, Kuv yuav cev ib co txim los cav txog koj.
los: As les lus yas.

As Les Lus Yas: FLP 2: 15D, 16A

Txais: As les lus yas, as les lus yas.

nej yuav yog tej lub teeb ci pom kev kaj lub ntiaj teb,
nej yuavkhaws Lo Lus pub txoj sia kom nyob ruaj nreb.

Txais: As les lus yas, as les lus yas.

Ntawv Moo Zoo: MT 5: 27-32

Yes Xus hais tias:
27 “Nej tau hnov lo lus qhia tias : ‘Koj yuav tsis txhob deev luag txij luag nkawm.’ 28 Hos kuv, mas kuv hais rau nej : Leej twg ntsia ib tug poj niam vim ntshaw zes nws, tus ntawd twb deev tus poj niam ntawd hauv nruab siab lawm. 29 Yog koj sab qhov muag xis coj koj mus ua txhaum, mas kav tsij muab sab qhov muag ntawd kaus pov tseg deb koj : txhiaj khoov cia ib sab qhov muag puas zoo dua tas koj lub cev poob rau hauv dab phem teb. 30 Yog koj sab tes xis coj koj mus ua txhaum, kav tsij muab txiav pov tseg deb koj : txhiaj khoov cia tu ib sab tes zoo dua tas koj lub cev poob rau hauv dab phem teb.
31 Tseem muaj cov lus qhia tias : ‘Leej twg nrauj nws poj niam, yuav tsum muab ib daim ntawv nrauj rau tus poj niam.’ 32 Tab sis, kuv hais rau nej tias: Tus txiv neej twg nrauj nws poj niam, yog nws tso nws poj niam mus ua txhaum deev hluas, qhov no tsis yog hais txog tus poj niam uas mus nrog luag ua dev ua npua. Hos leej twg yuav ib tug poj nrauj, mas tus ntawd yog ib tug deev luag txij luag nkawm.”

Tim 15 lub 6 Hli 2019

Hnub Xya Lis Piam Kaum Nruab Xyoo C Nruab Lis Piam Xyoo I

Zaj Nyeem Ib: 2 KLN 5: 14-21

Cov kwj tim nkauj muad:
14 Leej Pleev txoj kev nyiam txhib peb tas zog, vim peb ntseeg tias nws ib leeg tuag rau sawv daws ; vim li ntawd kuj yog zoo li sawv daws tuag tib si thiab. 15 Nws tuag pub rau sawv daws, yog kom cov neeg ciaj tsis txhob ua neej rau lawv tus kheej xwb, tiam sis kom lawv ua neej rau tus uas tau tuag thiab sawv rov los pub rau lawv lawm.
16 Li ntawd, txij nyem no mus, peb yuav tsis txhob saib ib tug neeg raws li lub cev nqaij xwb. Tab yog peb tau pom Leej Pleev raws li lub cev nqaij yav tas los lawd, los nyem no, peb tsis pom nws zoo li ntawd lawm. 17 Vim li ntawd, yog leej twg nyob hauv Leej Pleev, mas nws yog ib tug uas Ntuj tsim dua tshiab lawm: yam qub dua mus tas, hos yam tshiab sawv los nyob rau ntawd lawm . 18 Tas txhua yam no puav leej yog tuaj ntawm Tswv Ntuj tuaj, nws ua kom peb rov nrog nws sib haum xeeb nyob hauv Leej Pleev, thiab nws muab txoj hauj lwm coj sawv daws los sib haum xeeb rau peb leg. 19 Tswv Ntuj yog tus nyob hauv Leej Pleev ua kom lub ntiaj teb neeg nrog nws rov sib haum xeeb dua, nws tsis saib txog neeg cov txhaum ntxiv, thiab nws muab cov lus muaj kev sib haum xeeb tso rau peb ua cov leg. 20 Ces peb yog Leej Pleev cov tiam lis, zoo cuag li yog Tswv Ntuj siv peb mus qhuab qhia mus txhib neeg. Peb sawv Leej Pleev chaw thov nej tas zog, kom nej cia li nrog Tswv Ntuj rov sib haum xeeb. 21 Tswv Ntuj ua kom tus uas tsis muaj txhaum, txia ua kev txhaum los pab peb,kom xwv nyob hauv Leej Pleev peb hloov tau mus ua Tswv Ntuj txoj kev ncaj.

NPN 103: 1-2, 3-4, 9-10, 11-12

Txais: (8a) Huab Tais muaj lub siab zoo thiab khuv leej neeg.

Kuv tus ntsuj plig, koj cav txog HUAB TAIS;
kuv tej siab ntsws, nej cav txog nws lub npe ntshiab.
Kuv tus ntsuj plig, koj cav txog HUAB TAIS,
koj tsis txhob hnov qab nws tej kev zoo ib qho li.

Txais: (8a) Huab Tais muaj lub siab zoo thiab khuv leej neeg.

Nws tau zam tas koj tej txhaum rau koj,
nws tau kho tas koj tej kev mob nkeeg zoo.
Nws tau cawm koj txoj sia ntawm kev puas nstoog,
nws tau muab nws txoj kev ua siab zoo thiab kev khuv leej rau koj ntoo.

Txais: (8a) Huab Tais muaj lub siab zoo thiab khuv leej neeg.

Nws tsis npau taws tas mus li,
nws kuj tsis chim tas mus ib txhis.
Nws tsis nplua peb raws li peb tau ua txhaum,
nws tsis ua pauj rau peb raws li peb tau ua phem.

Txais: (8a) Huab Tais muaj lub siab zoo thiab khuv leej neeg.

Npaum li lub ntuj nyob siab saum ntiaj teb,
nws hlub cov neeg uas hwm nws tshaj npaum li ntawd.
Npaum li sab hnub tuaj nyob deb ntawm sab hnub poob,
nws muab peb tej txhaum pov tseg deb ntawm peb npaum li ntawd .

Txais: (8a) Huab Tais muaj lub siab zoo thiab khuv leej neeg.

As Les Lus Yas: NPN 119: 36A, 29B

Txais: As les lus yas, as les lus yas.

Tswv Ntuj, koj dib kuv lub siab kom xib mus rau koj cov lij choj,
thiab koj muab koj Txoj Cai pub ua txiaj ntsim rau kuv.

Txais: As les lus yas, as les lus yas.

Ntawv Moo Zoo: MT 5: 33-37

Yes Xus hais rau nws cov thwj tim tias:
33 “Nej tseem hnov cov lus qhia rau tej laus thaud tias : ‘Koj tsis txhob cog lus dag, koj yuav tsum pauj rau Huab Tais raws li cov lus koj tau cog.’ 34 Tab sis kuv hais rau nej tias, nej tsis txhob cog lus ib zaug li; txhob muab lub ntuj los ua tim khawv, vim lub ntuj yog Tswv Ntuj lub theej kiab ; 35 txhob muab lub ntiaj teb los ua tim khawv, vim lub ntiaj teb yog Tswv Ntuj lub rooj tiag taw ; txhob muab Yes Lus Xas Les los ua tim khawv, vim yog tus Tuam Vaj lub Nroog. 36 Txhob muab koj lub taub hau los ua tim khawv cog lus, vim koj ua tsis tau kom ib txog plaub hau dawb tuaj los dub tuaj. 37 Nej yuav hais li no : Muaj ces hais tias ‘Muaj’ ; tsis muaj, ces hais tias ‘Tsis muaj.’ Cov lus hais tshaj, yog tuaj ntawm tus Phem tuaj.”

Tim 17 lub 6 Hli 2019

Hnub Ob Lis Piam Kaum Ib Nruab Xyoo C Nruab Lis Piam Xyoo I

Zaj Nyeem Ib: 2 KLN 6: 1-10

Paj Lug sau ntawv rau cov ntseeg nyob Kos Lis Nthos tias:
1 Vim peb thiab nej ua hauj lwm ua ke, mas peb thov nej kom nej tsis txhob lam txais Tswv Ntuj lub txiaj ntsim dag xwb. 2 Vim nws hais tias: ‘Thaum zoo caij zoo nyoog, kuv tau teb koj, thaum txog hnub cawm neeg, kuv tau cev tes pab koj.’ Lub sij hawm zoo, yog nyem no, hnub cawm neeg, yog nyem no. 3 Peb tsis pub kom muaj ib tug yuam kev vim peb, kom thiaj tsis muaj ib qho phem nyob hauv peb txoj dej num. 4 Nyob hauv txhua yam, peb xav kom sawv daws saib peb yog Tswv Ntuj cov tub khiav dej num: xws li nyob hauv txoj kev rub lub siab kom ntev ntev, hauv txoj kev ris kev txhawj xeeb, kev nyuaj, kev ntxhov siab, 5 kev raug luag ntaus, raug luag kaw, raug luag ntxeev ua ntxhov quav niab, kev sab, kev yoo dab ntub, kev yoo tshaib yoo nqhis; 6 nyob hauv txoj kev xyaum ua neeg siab dawb siab huv, xyaum ua neeg muaj kev txawj kev ntse, ua neeg siab ntev, ua neeg siab zoo; nyob hauv Leej Tswv Yim Ntshiab, nyob hauv txoj kev nyiam kev hlub tseeb, 7 nyob hauv lo lus tseeb, nyob hauv Tswv Ntuj lub hwj huam; nyob hauv txoj kev siv cov cuab yeej ntawm txoj kev ncaj rau cov nyob sab xis thiab cov nyob sab laug; 8 nyob hauv txoj kev muaj koob meej thiab kev poob ntsej muag, txoj kev nto moo zoo, thiab nto moo phem; nyob hauv txoj kev raug luag saib tias yog neeg dag, txawm tias peb hais qhov tseeb xwb; 9 raug luag saib tias tsis muaj neeg paub, tsis kav sawv daws paub peb coob, raug luag hais tias peb yuav tuag, tab sis peb tseem muaj txoj sia nyob; raug luag saib peb yog neeg raug txim, tab sis peb kuj tsis tau raug tua; 10 raug luag xav tias peb tu siab, tab sis peb zoo siab mus li ; raug luag saib peb pluag kawg nkaus, tab sis peb ua kom coob leej nplua nuj tuaj ; raug luag saib peb yog cov neeg tsis muaj dab tsi li, tab sis peb muaj tas ib puas tsav yam ua peb tug.

NPN 98: 1, 2B-3AB, 3CD-4

Txais: (2a) Huab Tais ua kom neeg paub txog nws txoj kev cawm.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
nws sab npab ntshiab tau ua.

Txais: (2a) Huab Tais ua kom neeg paub txog nws txoj kev cawm.

HUAB TAIS ua kom cov haiv neeg pom nws txoj kev ncaj
Nws rov nco txog nws txoj kev ua zoo thiab kev pheej xeeb
rau tsev neeg His Xas Lais.

Txais: (2a) Huab Tais ua kom neeg paub txog nws txoj kev cawm.

Tas cov npoo ntiaj teb kawg tau pom
peb tus Tswv Ntuj txoj kev cawm neeg.
Tas txhua teb chaws, nej hu nkauj zoo siab rau HUAB TAIS,
nej qw suab nkauj, nej cav txog nws.

Txais: (2a) Huab Tais ua kom neeg paub txog nws txoj kev cawm.

As Les Lus Yas: NPN 119: 105

Txais: As les lus yas, as les lus yas.

Koj lo lus yog ib lub teeb tsom hauv kuv ko taw,
yog ib qho pom kev kaj kuv txoj kev.

Txais: As les lus yas, as les lus yas.

Ntawv Moo Zoo: MT 5: 38-42

Yes Xus hais rau nws cov thwj tim tias:
38 “Nej hnov tej lus qhia tias : ‘Qhov muag pauj qhov muag, kaus hniav pauj kaus hniav.’
39 Hos kuv hais rau nej tias: nej tsis txhob nrog tus neeg phem sib cav. Yog leej twg ib ncuav pias rau koj sab plhu xis, tig sab plhu laug rau nws thiab.
40 Leej twg xav ua plaub rau koj kom tau koj lub tsho, mas koj muab koj lub tsho tshaj sab ntxiv rau nws thiab.
41 Leej twg thov koj xa nws mus ib ncua kev, mas koj nrog nws mus ob ncuas.
42 Leej twg thov koj, mas koj pub rau nws. Leej twg xav txais nyiaj ntawm koj, mas koj txhob tig nraub qaum rau nws.”

Tim 18 lub 6 Hli 2019

Hnub Peb Lis Piam Kaum Ib Nruab Xyoo C Nruab Lis Piam Xyoo I

Zaj Nyeem Ib: 2 KLN 8: 1-9

1 Cov kwv tij, peb xav kom nej paub txog lub txiaj ntsim uas Tswv Ntuj tau pub rau cov Koom Txoos nyob Mas Xes Dos Nias teb. 2 Vim tias txawm lawv raug kev txhawj xeeb loj, los lawv lub siab puv nkaus kev zoo siab thiab nyob hauv lawv txoj kev pluag, lawv tseem muaj lub siab dav fo pub paj tshab ntau. 3 Lawv pub raws li lawv muaj, kuv yeej ua tau pov thawj txog, thiab lawv tseem pub tshaj qhov lawv muaj thiab, lawv zoo siab hlo pub tsis muaj tus yuam. 4 Lawv taij peb tsis tseg, kom peb kheev lawv nrog sawv daws koom txoj dej num pab cov ntshiab. 5 Lawv tau ua zoo tshaj qhov peb tos ntawm lawv ; lawv xub muab lawv fij rau Huab Tais ua ntej tso, ces lawv mam li pab peb raws li Tswv Ntuj nyiam. 6 Vim li ntawd, peb thiaj tau thov Tis Tos tias raws li nws twb tau pib ua los lawm, kom nws nrog nej ua qhov hauj lwm muaj txiaj ntsim zoo no kom tiav. 7 Zaum no nej ua tau zoo heev nyob hauv txhua yam lawm, tsis hais kev ntseeg, los kev hais lus, los kev paub txuj, los kev kub siab lug rau txhua yam , los kev tau txais peb txoj kev nyiam nej, ua li mas thov kom nej kuj yuav tsum ua zoo tshaj nyob hauv txoj kev pub paj tshab muaj txiaj ntsim no thiab. 8 Kuv hais li no tsis yog xav yuam nej, kuv tsuas yog xav sim saib nej puas muaj txoj kev nyiam kev hlub tseeb tiag thaum nej nco txog luag tej. 9 Nej twb paub lawm tias peb tus Huab Tais Yes Xus Pleev tau ua ib yam muaj txiaj ntsim loj rau nej: Nws yog tus nplua nuj, tab sis vim nej mas nws ua komn nws pluag, kom xwv nws txoj kev pluag ua kom nej nplua nuj tuaj.

NPN 146: 1B-2, 5-6AB, 6C-7, 8-9A

Txais: (1b) Kuv tus plig, koj cav lus zoo txog HUAB TAIS!
los: As les lus yas.

Kuv tus plig, koj cav lus zoo txog HUAB TAIS !
Kuv yuav cav txog HUAB TAIS tas kuv sim neej,
kuv yuav hu nkauj cav txog kuv tus Tswv Ntuj
thaum kuv tseem muaj sia nyob.

Txais: (1b) Kuv tus plig, koj cav lus zoo txog HUAB TAIS!
los: As les lus yas.

Muaj hmoov zoo yog tus tau Yas Kos tus Tswv Ntuj nres nws,
Yog tus tso siab rau HUAB TAIS nws tus Tswv Ntuj,
uas yog tus tswv tsim lub ntuj lub teb,
tsim dej ntuj thiab ib puas tsav yam nyob hauv dej.

Txais: (1b) Kuv tus plig, koj cav lus zoo txog HUAB TAIS!
los: As les lus yas.

Nws yog tus pheej xeeb mus ib txhiab ib txhis;
cov raug luag quab yuam, nws tsa lawv cai,
nws pub mov rau cov neeg tshaib noj;
HUAB TAIS tso cov neeg raug txim kom lawv dim.

Txais: (1b) Kuv tus plig, koj cav lus zoo txog HUAB TAIS!
los: As les lus yas.

HUAB TAIS qhib cov dig muag qhov muag,
HUAB TAIS tsa cov khoov nkoos kom sawv ntseg,
HUAB TAIS nyiam cov neeg ncaj,
HUAB TAIS pov hwm cov pej kum neeg.

Txais: (1b) Kuv tus plig, koj cav lus zoo txog HUAB TAIS!
los: As les lus yas.

As Les Lus yas: ZAM 13: 34

Txais: As Les Lus Yas.

Kuv muab ib lo lus qhia tshiab rau nej:
Nej yuav sib nyiam sib hlub li kuv nyiam thiab hlub nej.

Txais: As Les Lus Yas.

Ntawv Moo Zoo: MT 5: 43-48

Yes Xus hais tias:
43 "Nej tau hnov tej lus qhia tias : ‘Koj yuav nyiam tus nyob ze koj, koj yuav ntxub koj tus yeeb ncuab.’
44 Tab sis, kuv hais rau nej tias : nej yuav nyiam nej cov yeeb ncuab, nej yuav thov Ntuj rau cov tsim txom nej,
45 nej thiaj yuav yog nej Txiv nyob saum ntuj cov tub ; vim tias nej Txiv ua kom lub hnub tawm tuaj ziab cov neeg phem thiab cov neeg zoo, thiab nws ua kom nag los rau cov neeg siab ncaj thiab cov neeg siab nkhaus huv tib si.
46 Yog nej nyiam cov neeg nyiam nej xwb, mas nej yuav tau koob haum dab tsi ? Tab yog cov sau se, lawv kuj txawj nyiam li ntawd.
47 Yog nej tsuas hais lus hu nej cov kwv tij xwb, mas nej tau ua dab tsi zoo tshaj luag ? Tab yog cov neeg teev pej kum dab los lawv kuj txawj ua li ntawd thiab.
48 Hos nej, mas nej yuav tsum ua neeg zoo tshaj, vim nej Txiv nyob saum ntuj yog tus zoo tshaj.”

Tim      19      lub      6      Hli      2019

Hnub Plaub Lis Piam Kaum Nruab Xyoo C Nruab Lis Piam Xyoo I

Hwm LN Romuald

Zaj Nyeem Ib:        2 KLN  9:   6-11

Paj Lug sau ntawv rau cov ntseeg nyob Kos Lis Nthos tias:
6 “Nej yuav nco tias, tus tseb nplej tsawg, nws kuj yuav sau tau tsawg, tus tseb nplej ntau nws kuj yuav sau tau nplej ntau. 7 Nej nyias yuav pub raws li nyias tau xub txiav nyob hauv nyias siab lawm. Nej txhob pub zoo li nej khuv khuv xim, thiab zoo li yog luag yuam nej, vim Tswv Ntuj nyiam tus zoo siab luag ntxhi pub.
8 Tswv Ntuj muaj peev xwm yuav pub tau tas ib puas tsav yam txiaj ntsim nplua mias los rau nej, kom nej muaj tas txhua yam txaus siv tas mus li, thiab tseem muaj ib co seem txaus pab rau tej yam hauj lwm zoo. 9 Raws li Ntawv sau tseg tias : ‘Nws ua siab dav pub paj tshab, nws pub rau cov pluag ; nws txoj kev ua neeg ncaj yuav nyob mus li.’
10 Tus uas muab noob qoob noob loo rau tus tswv teb cog, thiab muab mov los ua txhiam xws, nws yuav ua kom nej cov noob qoob noob loo ntau tuaj, thiab nws yuav ua kom cov qoob txi ntawm nej txoj kev ncaj huam vam ntau tuaj. 11 Ces nej yuav nplua nuj txhua yam vim nej txoj kev ua siab dav. Nej txoj kev ua siab dav ntawd yuav ua kom peb muaj lus ua tsaug rau Tswv Ntuj.

NPN        112:   1BC-2, 3-4, 9

Txais: (1b) Tus neeg hwm Huab Tais nws txoj hmoov zoo.
los: As les lus yas.

Tus muaj hmoov zoo yog tus uas hwm HUAB TAIS,
thiab nyiam coj Huab Tais cov lus qhia tas siab tas ntsws.
Nws caj ces yuav muaj peev xwm nyob ntiaj teb,
Ntuj yuav foom koob hmoov rau caj ces neeg siab ncaj.

Txais: (1b) Tus neeg hwm Huab Tais nws txoj hmoov zoo.
los: As les lus yas.

Nyob hauv nws vaj tse yuav muaj kev nplua nuj kev nto moo,
nws txoj kev ua siab dav yuav nyob mus li.
Nws yuav ci hauv qhov tsaus ntuj ua lub teeb ci kaj cov neeg ncaj,
nws khuv leej luag, nws zam rau luag, nws ua haum pheej.

Txais: (1b) Tus neeg hwm Huab Tais nws txoj hmoov zoo.
los: As les lus yas.

Nws tsis qia dub, nws pub ntau rau cov pluag :
nws txoj kev ua siab dav yuav nyob mus li,
nws yuav muaj ntsej muag, nws lub koob meej yuav nrov.

Txais: (1b) Tus neeg hwm Huab Tais nws txoj hmoov zoo.
los: As les lus yas.

As Les Lus Yas:        ZAM  14:   23

Txais: As Les Lus Yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws.
Kuv Txiv wb yuav tuaj nyob hauv nws.

Txais: As Les Lus Yas.

Ntawv Moo Zoo:        MT  6:   1-6, 16-18

Yes Xus hais rau nws cov thwj tim tias:
1 “Nej ceev faj, tsis txhob ua ncaj nyob ntawm neeg xub ntiag, kom luag pom nej xwb. Yog nej ua li ntawd, mas nej yuav tsis txais koob haum ntawm nej Txiv nyob saum ntuj. 2 Thaum koj pub rau luag, koj txhob tshuab hom ua koj ntej xws li cov neeg zoo sab nraud lawv ua nyob hauv cov tsev txoos thiab nyob ntawm tej kev, kom sawv daws cav lus zoo txog lawv. Kuv hais tseeb rau nej, lawv twb txais lawv cov koob haum tas lawm. 3 Hos koj, mas thaum koj pub rau luag, koj txhob cia koj sab tes laug paub qhov uas sab tes xis ua. 4 Li ntawd, tsis muaj neeg paub tias koj tau pub rau luag. Ces koj Txiv uas nws pom hauv qhov chaw nraim yuav pauj rau koj.
5 "Thaum nej teev Ntuj, nej txhob ua li cov neeg zoo sab nraud : lawv nyiam sawv ntsug hauv cov tsev txoos, thiab ntawm tej kev tshuam, kom sawv daws pom lawv. Kuv hais tseeb rau nej, lawv twb txais lawv cov koob haum lawm. 6 Hos koj, mas thaum koj teev Ntuj, koj mus nyob twj ywm hauv koj kem txaj, kaw koj qhov rooj ces koj teev koj Txiv uas nws nyob hauv qhov chaw nraim. Koj Txiv uas nws pom hauv qhov chaw nraim, yuav pauj rau koj.
16 Thaum nej yoo mov, nej txhob ua ntsej muag ntshaus xws li cov neeg zoo sab nraud : lawv ua ntsej muag mluas mluas, kom luag pom tias yog lawv yoo mov. Kuv hais tseeb rau nej tias cov neeg ntawd twb txais lawv cov koob haum tas lawm. 17 Hos koj, mas thaum koj yoo mov, koj yuav pleev tshuaj tsw qab rau saum taub hau, thiab koj yuav ntxuav muag, 18 kom txhob muaj neeg paub tias koj yoo mov, tsuas kawg koj Txiv uas nws nyob hauv qhov chaw nraim tib leeg paub xwb. Koj Txiv pom hauv qhov chaw nraim yuav pauj rau koj.”

TIM 20 LUB 6 HLI 2019

Hnub Tsib Lis Piam Kaum Ib Nruab Xyoo C Nruab Lis Piam Xyoo I

Zaj Nyeem Ib: 2 KLN 11: 1-11

Paj Lug sau ntawv rau cov ntseeg nyob Kos Lis Nthos tias:
1 “Xav kom nej ua siab ntev rau kuv, txawm kuv yuav hais tej yam vwm me ntsis. Kuv thov kom nej ua siab ntev xwb mog! 2 Vim tias kuv lub siab khib nej ib yam li yog Tswv Ntuj khib thiab, vim kuv tau qhaib nej rau ib tug txiv neej xwb; nej yog zoo li ib tug nkauj xwb dawb huv uas kuv muab rau Leej Pleev yuav. 3 Tab sis, kuv ntshai tsam nej ua raws Es Vas uas nws cia tus nab ntse siab nkhaus ntxias tau nws, ces nej yuav hloov tswv yim, nej yuav tsis tuag siab nthi thiab ua siab dawb paug rau Leej Pleev ntxiv. 4 Yog muaj tej tus tuaj tshaj ib tug Yes Xus txawv tus peb tau tshaj, los yog nej txais dua lwm tus Leej Ntuj Plig txawv tus nej tau txais lawm, los yog nej hnov dua ib lub Moo Zoo txawv lub Moo Zoo nej ib txwm tau txais lawm, mas ntshai tsam nej cia li yuav mloog yooj yooj yim xwb.
5 Tab sis kuv xav tias kuv yeej tsis qis dua cov tuam hauv paus xa lus ntawd li. 6 Tej zaum kuv tsis tau kawm kom txawj hais lus zoo, tab sis hais txog kev paub txuj, mas kuv yeej paub. Peb ua yam twg, los sawv daws yeej pom tias peb paub txuj.
7 Kuv puas tau ua ib qho yuam kev, vim kuv ua hauj lwm dawb tshaj Tswv Ntuj lub Moo Zoo rau nej, kuv tau txo kom kuv qis, thiab tsa nej rau qhov siab? 8 Kuv tau noj nyiaj hli ntawm lwm cov Koom Txoos, kom kuv tau kev tsob hwb nej. 9 Thaum kuv tseem nrog nej nyob, txawm kuv tsis muaj txaus noj txaus haus, los kuv tsis tau ua ib lub nra rau nej ris, vim muaj ib co kwv tij tuaj Mas Xes Dos Nias teb tuaj tau pab kuv kev noj kev haus. Kuv tau ceev faj kom txhob ua ib lub nra hnyav rau nej, thiab kuv tseem yuav ua li ntawd ntxiv mus. 10 Kuv tuav txog Leej Pleev txoj kev tseeb uas nyob hauv kuv, kuv hais tseeb tias, tsis muaj leej twg yuav txwv tau kuv cov lus uas kuv khav txog kuv me me no nyob As Kas Yas teb li. 11 Yog vim li cas ? Puas yog vim kuv tsis nyiam nej ? Tswv Ntuj yog tus paub tias kuv nyiam nej !

NPN 111: 1B-2, 3-4, 7-8

Txais: (7a) Huab Tais, koj cov hauj lwm yog kev ncaj thiab kev tseeb.
los: As les lus yas.

Kuv yuav ua HUAB TAIS tsaug tas kuv lub siab lub ntsws
nyob ntawm tsoom neeg siab ncaj xub tiag thiab hauv lawv lub txoos.
HUAB TAIS cov hauj lwm loj tas nrho,
zoo ntxim siab kawg nkaus.

Txais: (7a) Huab Tais, koj cov hauj lwm yog kev ncaj thiab kev tseeb.
los: As les lus yas.

HUAB TAIS cov hauj lwm muaj hwj xyeej thiab muaj hwj chim,
nws txoj kev ncaj yuav nyob ib txhiab ib txhis.
Nws nto koob meej lug vim nws cov hwj huam yees ntxwv ;
HUAB TAIS lub siab hlub neeg, nws nyiam zam txhaum.

Txais: (7a) Huab Tais, koj cov hauj lwm yog kev ncaj thiab kev tseeb.
los: As les lus yas.

Cov hauj lwm nws txhais tes ua yog hauj lwm tseeb thiab ncaj nces.
Nws cov lus qhuab qhia yog cov lus tsim nyog tso siab rau,
Yog cov lus yuav nyob ruaj mus li ib txhis,
xeeb tawm los nyob hauv kev tseeb thiab kev ncaj ncees.

Txais: (7a) Huab Tais, koj cov hauj lwm yog kev ncaj thiab kev tseeb.
los: As les lus yas.

As Les Lus Yas: LOS MAS 8: 15BC

Txais: As les lus yas, as les lus yas.

Nej tau txais ib lub tswv yim ua tub ki tshiab,
lub tswv yim ntawd qhia peb hu Tswv Ntuj tias : ‘As Npas ! Txiv !’

Txais: As les lus yas, as les lus yas.

Ntawv Moo Zoo: MT 6: 7-15

Yes Xus hais rau nws cov thwj tim tias:
7 “Thaum nej teev Ntuj, nej txhob ntuas mus ntuas los zoo li cov neeg teev dab; lawv xav tias yog lawv hais lus ntau, mas dab yuav mloog lawv zoo dua. 8 Nej txhob ua zoo li lawv. Vim nej Txiv paub tias qhov twg yog qhov nej yuav tsum muaj, tab yog nej tseem tsis tau thov, nws twb xub paub lawm.
9 Nej yuav teev Ntuj zoo li no :
‘Peb Txiv nyob saum ntuj, koj lub Npe ntshiab nto moo lug.
10 Koj lub Ceeb Tsheej kom los txog. Kom muaj raws li koj nyiam nyob ntiaj teb no li nyob saum ntuj.
11 Thov koj pub mov txaus peb noj hnub no.
12 Koj zam peb cov txhaum rau peb zoo li peb zam rau cov tau ua txhaum rau peb.
13 Koj txhob tso peb raug kev ntxias. Thov koj npo peb dim ntawm kev phem.’
14 Yog nej zam rau cov neeg ua txhaum rau nej, mas nej Txiv nyob saum ntuj kuj yuav zam rau nej thiab. 15 Hos yog nej tsis zam txhaum rau luag, mas nej Txiv kuj yuav tsis zam nej cov txhaum rau nej li.”

Tim 21 lub 6 Hli 2019

Hnub Rau Lis Piam Kaum Ib Nruab Xyoo C Nruab Lis Piam Xyoo I

Hwm LN Aloysius Gonzaga

Zaj Nyeem Ib: 2 KLN 11: 18, 21-30

Cov kwv tij nkauj muad:
18 Vim muaj coob leej khav xws li ntiaj teb neeg ua kam, mas kuv kuj xav khav kuv thiab !
21 Kuv hais tej no nrog kev txaj muag, vim peb yog ib co neeg tsis muaj zog . Yog ib tug twg muaj peev xwm ua tau ib yam dab tsi los xij, mas kuv yuav hais raws li ib tug neeg vwm hais, kuj kuj muaj peev xwm ib yam nkaus thiab. 22 Lawv khav tias lawv yog neeg Hes Nplaws, kuv kuj yog ib tug Hes Nplaws thiab ! Lawv khav tias lawv yog ib co His Xas Lais, kuv kuj yog ib tug His Xas Lais thiab ! Lawv khav tias lawv yog Has Nplas Has xeeb ntxwv, kuv kuj yog Has Nplas Has xeeb ntxwv thiab. 23 Lawv khav tias lawv yog Leej Pleev cov tub txib, kuv kuj khav tau tias kuv yog Leej Pleev ib tug tub txib tseem zoo tshaj lawv thiab, yog yuav hais raws li ib tug neeg vwm hais . Vim kuv khwv ua hauj lwm ntau dua lawv. Kuv raug txim hauv tsev loj faj ntau dua lawv. Kuv raug luag nplawm ntau dua lawv. Kuv yuav luag raug tua ntau zaus kawg. 24 Tsib zaug, kuv tau raug cov Yus Das nplawm kuv plaub caug nplawm luv ib. 25 Lawv xuas pas ntaus kuv peb zaug. Lawv txawb pob zeb tua kuv ib zaug. Muaj peb zaug kuv caij nkoj, lub nkoj puas tog tas, ces kuv nyob tau ib hnub ib hmos hauv tiv txwv dej. 26 Kuv nquag tawm rooj mus ko taw taug kev deb, nquag ntsib xwm txheej ntawm cov niam dej loj, ntawm cov tub sab, ntawm kuv haiv neeg, ntawm cov neeg teev dab teev qhua; kuv nquag raug xwv txheej hauv cov tsheej, hauv teb chaws suab puam, thiab hauv dej hiav txwv; thiab tseem raug xwv txheej los ntawm cov kwv tij cuav los thiab . 27 Kuv yog ib tug neeg khwv, kuv sab, kuv yoo dab ntub ntau zaus, kuv tshaib plab kuv nqhis dej, kuv yoo mov ntau zaus, kuv tiv no, thiab tsis tau dab tsi hnav. 28 Dhau tej yam sab nraud lawm, tseem tshuav kuv txoj kev ntxhov siab niaj hnub txog cov Koom Txoos tas huv si thiab.
29 Leej twg tsis muaj zog, kuv tsis yog tus tsis muaj zog lod? Leej twg ntog, tsis ua rau kuv lub siab kub npau lod?
30 Yog yuav tsum khav, mas kuv kawg yuav khav txog tej yam ua kom pom kuv txoj kev tsis muaj zog xwb.

NPN 34: 2-3, 4-5, 6-7

Txais: (18b) Tswv Ntuj cawm tus neeg siab ncaj ntawm tas nws tej kev nyuaj.

Kuv yuav cav txog HUAB TAIS txhua lub sij hawm;
nws lub koob meej yuav nyob rawv ntawm kuv lub ncauj.
Kuv tus plig lub koob meej yog nyob hauv HUAB TAIS;
tus neeg me yuav hnov kuv thiab yuav zoo siab.

Txais: (18b) Tswv Ntuj cawm tus neeg siab ncaj ntawm tas nws tej kev nyuaj.

Nej nrog kuv cav txog HUAB TAIS,
peb sawv daws ua ke qhuas nws lub npe.
Kuv nrhiav HUAB TAIS; nws teb kuv,
Nws cawm kuv dim ntawm tas kuv tej kev ntshai.

Txais: (18b) Tswv Ntuj cawm tus neeg siab ncaj ntawm tas nws tej kev nyuaj.

Nej vam txog HUAB TAIS, ces kev zoo siab yuav ua nej ci ntsa iab,
nej ntsej muag yuav tsis liab ploog vim kev txaj muag.
Thaum tus pluag hu, HUAB TAIS mloog,
thiab yuav npo nws dim ntawm tas nws tej kev nyuaj ntxhov.

Txais: (18b) Tswv Ntuj cawm tus neeg siab ncaj ntawm tas nws tej kev nyuaj.

As Les Lus Yas: MT 5: 3

Txais: As les lus yas, as les lus yas.

Cov tau txoj hmoov zoo yog cov pluag hauv nruab siab,
vim Ntuj lub Ceeb Tsheej yog lawv li.

Txais: As les lus yas, as les lus yas.

Ntawv Moo Zoo: MT 6: 19-23

Yes Xus hais rau nws cov thwj tim tias:
19 "Nej txhob sau tej txhab cuab tam cia nyob ntiaj teb no, vim muaj kab rws kab lia txo, thiab muaj tub sab tho qhov tsev tuaj nyiag. 20 Tiam sis nej yuav sau tej txhab cuab tam cia nyob saum ntuj : nyob saud, tsis muaj kab rws kab lia txo, tsis muaj tub sab tho qhov tsev tuaj nyiag. 21 Vim tias, koj txhab cuab tam nyob qhov twg, mas koj lub siab kuj yuav nyob qhov ntawd.
22 "Lub teeb ua kom lub cev pom kev yog lub qhov muag. Yog koj lub qhov muag zoov, mas tas koj lub cev yuav pom kev nrig. 23 Tab sis yog koj lub qhov muag phem, mas tas koj lub cev yuav nyob tsaus ntuj nti. Yog qhov pom kev uas nyob hauv koj twb tsaus nti, mas yuav ua cas tsaus ntuj.”

Tim 22 lub 6 Hli 2019

Hnub Xya Lis Piam Kaum Ib Nruab Xyoo C Nruab Lis Piam Xyoo I

Hwm LN John Fisher thiab Thomas More; Hwm LN Paulinus nyob Nola, Is Tas Lis

Zaj Nyeem Ib: 2 KLN 12: 1-10

Cov kwv tij nkauj muad:
1 Puas yuav tsum khav txog txhua yad? Tej lus khav ntawd tsis muaj qab hau. Tiam sis kuv yuav hais txog Huab Tais tej kev yees tawm tuaj thiab tej yam nws tau qhia rau kuv paub. 2 Kuv paub ib tug neeg nyob hauv Leej Pleev, uas tau kaum plaub xyoos los lawm, nws raug nqa hlo mus txog saum txheej ntuj peb. Xyov nws mus nrog nws lub cev los kuv tsis paub, tsis mus nrog nws lub cev los kuv tsis paub, Tswv Ntuj thiaj paub xwb. 3 Kuv paub tias tus neeg ntawd, xyov yog nrog nws lub cev los kuv tsis paub, tsis nrog nws lub cev los kuv tsis paub, Tswv Ntuj thiaj paub xwb, 4 nws raug nqa hlo mus txog saum lub nras lom zem, nws tau hnov ib co lus zoo tas nrho neeg tsis txawj qog tau thiab txwv tsis pub leej twg hais tawm. 5 Kuv yuav khav tau txog tus neeg ntawd, tab sis ntawm kuv tus kheej, mas kuv tsuas khav txog kuv tej kev tsis muaj zog xwb. 6 Yog tias kuv khav, mas kuv tsis yog ib tug neeg vwm, kuv kawg hais qhov muaj tseeb xwb. Tab sis kuv tsis khav, vim ntshai tsam luag tej xav tias kuv zoo dua qhov sawv daws pom thiab qhov sawv daws hnov ntawm kuv. 7 Ntuj tau qhia tej yam loj tas nrho rau kuv paub, tiam sis nws tsis xav kom kuv muab hlob, ces nwsj tso ib tug saus los chob kuv cov nqaij. Qhov ntawd yog Xas Tas ib tug dab tuaj nplawm kuv tej nplawg, kom kuv tsis txhob muab hlob. 8 Kuv tau thov Huab Tais peb zaug kom qhov ntawd txav mus deb ntawm kuv. 9 Tiam sis Huab Tais teb rau kuv tias: ‘Kuv lub txiaj ntsim txaus pab koj lawm, vim lub hwj huam yuav tawm los yog nyob hauv tus tsis muaj zog.’ Yog li ntawd, mas kuv thiaj khav txog kuv txoj kev tsis muaj zog xwb, kom Leej Pleev lub hwj huam los nyob saum kuv. 10 Tim li ntawd mas kuv thiaj zoo siab nyob hauv kuv txoj kev tsis muaj zog, nyob hauv txoj kev raug luag thuam, kev tsis muaj txawm peem, kev raug luag hiam, thiab tej kev ntshai, vim Leej Pleev. Vim tias yog thaum kuv tsis muaj zog, mas kuv thiaj muaj zog.

NPN 34: 8-9, 10-11, 12-13

Txais: (9a) Nej saj ces nej yuav paub tias Huab Tais lub siab zoo npaum cas.

HUAB TAIS tus tshiab tuaj tsa tsev tsam phooj
ncig cov neeg hwm HUAB TAIS, nws cawm lawv dim.
Nej saj nej thiaj paub tias HUAB TAIS siab zoo npaum cas.
Tus muaj hmoov zoo yog tus muab
HUAB TAIS los ua nws lub chaw nkaum.

Txais: (9a) Nej saj ces nej yuav paub tias Huab Tais lub siab zoo npaum cas.

Nej, uas yog nws tsoom neeg ntshiab, nej cia li hwm HUAB TAIS,
vim cov neeg hwm HUAB TAIS yuav muaj txhij muaj txhua
Cov neeg muaj hwj chim yuav txawj pluag txawj tshaib plab;
Tiam sis cov nrhiav HUAB TAIS yuav tsis ntshaw txog dab tsi li.


Txais: (9a) Nej saj ces nej yuav paub tias Huab Tais lub siab zoo npaum cas.

Kuv cov tub, nej tuaj mloog kuv hais !
Kuv yuav qhia txoj kev hwm HUAB TAIS rau nej.
Nej leej twg yog tus xav tau txoj sia?
Leej twg yog tus zoo siab pom lub neej vam meej?

Txais: (9a) Nej saj ces nej yuav paub tias Huab Tais lub siab zoo npaum cas.

As Les Lus Yas: 2 KLN 8: 9

Txais: As les lus yas, as les lus yas.

Huab Tais Yes Xus Pleev yog tus nplua nuj, tab sis nws ua kom nws pluag,
kom xwv nws txoj kev pluag ua kom nej nplua nuj tuaj.

Txais: As les lus yas, as les lus yas.

Ntawv Moo Zoo: MT 6: 24-34

Yes Xus hais rau nws cov thwj tim tias:
24 "Tsis muaj leej twg yuav tsob hwb ob tug tswv tau : nws yuav ntxub ib tug, nyiam lwm tus; los nws yuav npuab ib tug, thuam lwm tus. Nej ib txhij tsob hwb Tswv Ntuj thiab nyiaj txiag tsis tau.
25 Yog vim li ntawd, kuv thiaj hais rau nej tias : Nej tsis txhob txhawj txog nej txoj sia tias yuav muab dab tsi los noj los yuav muab dab tsi los haus, txhob txhawj txog nej lub cev tias yuav muab dab tsi los hnav. Nej txoj sia tsis muaj nqis dua txhiam xws noj lod ? Nej lub cev tsis muaj nqis dua tej tsoos hnav lod ? 26 Nej ntsia cov noog saum ntuj saib : lawv tsis tseb nplej, tsis hlais nplej, tsis sau qoob rau hauv txhab li, tsis kav nej Txiv nyob saum ntuj pub rau lawv noj. Nej tsis muaj nqis dua cov noog ntawd lod ? 27 Nej leej twg txhawj txhawj, nws puas rub tau txoj sia kom ntev li ib tshim ntxiv ? 28 Hais txog tej tsoos tsho, nej yuav txhawj dab tsi ? Nej kawm ntawm cov paj ntoos nyob tom tej nras saib, lawv cia li hlob, lawv tsis khwv, tsis ua maj ua ntuag li. 29 Kuv hais rau nej tias, tab yog Xas Los Moos, txawm nws muaj koob meej nto moo lug los, tsis kav nws tsis tau hnav zoo npaum li ib lub paj ntoos. 30 Tej nroj nruab nrag, hnub no ciaj, tag kis luag twb yuav muab pov hlawv hauv qhov txos, tsis kav Tswv Ntuj tseem muab zam zoo npaum ntawd rau lawv hnav. Tswv Ntuj tseem yuav tsis ua zoo tshaj rau nej lod, neeg ntseeg tsis ti txha ? 31 Nej tsis txhob ua siab fab tias : 'Peb yuav muab dab tsi los noj ? Yuav muab dab tsi los haus ? Yuav muab dab tsi los hnav ?’ 32 Tej ntawd yog tas puas tsav yam uas cov neeg teev pej kum dab nrhiav. Hos nej Txiv nyob saum ntuj yeej paub tias nej yuav tsum muaj tej ntawd tas huv si. 33 Tiam sis nej yuav xub nrhiav nej Txiv lub Ceeb Tsheej thiab nws txoj kev ncaj tso, ces nws yuav pub tas puav tsav yam ntawd tib si ntxiv rau nej.
34 Nej tsis txhob ua siab fab txog tag kis, cia tag kis mam li txhawj rau tag kis, vim hnub no twb muaj kev nyuaj txaus rau hnub no lawm.”

Tim 24 lub 6 Hli 2019

Hnub Ob Lis Piam Kaum Ob Nruab Xyoo C Nruab Lis Piam Xyoo I

Hwm LN Zam Ntxuav Plig Hnub Yug Los.

Zaj Nyeem Ib: HIS XAIS 49: 1-6

1 Cov pov txwv, nej mloog kuv hais ! Cov haiv neeg nyob deb, nej cuab pob ntseg mloog kuv ! HUAB TAIS yeej hu kuv txij thaum kuv tseem nyob hauv kuv niam plab lawm, nws yeej hu kuv npe txij thaum kuv tseem nyob hauv kuv niam cev lawm. 2 Nws muab kuv lub ncauj ua ib rab ntaj ntse zuag plias; nws muab kuv zais rau hauv nws txhais tes qhov ntxoov. Nws muab kuv ua ib xib xub vos ntse ntse, muab kuv ntim hauv nws lub raj xub. 3 HUAB TAIS hais rau kuv tias : "His Xas Lais, koj yog kuv tus tub txib, kuv yuav nto koob meej nyob hauv koj." 4 Hos kuv hais tias : "Kuv tau siv zog khwv, tab sis tsis tau dab tsi li, kuv nkim kuv lub zog tas dawb xwb. Tsis kav kuv muaj cai nyob ntawm HUAB TAIS, kuv tus nqi zog yog nyob ntawm kuv tus Tswv Ntuj.
5 Nyem no, HUAB TAIS uas yog tus puab kuv nyob hauv kuv niam nrog cev nws kom kuv ua nws tus tub txib, kom tau mus coj Yas Kos rov los cuag nws, kom tau coj His Xas Lais rov los nrog nws ua ke. Ces kuv yuav muaj koob meej nyob ntawm HUAB TAIS xub ntiag, thiab kuv tus Tswv Ntuj yog kuv lub zog." 6 Nws tseem hais tias : "Tsis tsim nyog kom koj yog kuv tus tub txib rov tsa cov xeem Yas Kos kom sawv, thiab coj cov His Xas Lais seem kom rov qab los xwb, kuv tseem xaiv koj kom koj yog lub teeb ci ntsa kaj cov kuj cuab, ces kuv txoj kev cawm thiaj yuav ri mus txog cov npoo ntiaj teb kawg tib si.”

NPN 139: 1B-3, 13-14AB, 14C-15

Txais: (14) Kuv cav txog koj vim koj puab kuv tau zoo tas nrho.

HUAB TAIS, koj tsom tshab kuv, koj paub kuv :
koj paub thaum kuv sawv thiab thaum kuv zaum ;
koj nyob deb paub tas tej kuv xav.
Koj saib nraim kuv thaum kuv mus kev los thaum kuv zaum,
koj paub txhua yam kuv ua.

Txais: (14) Kuv cav txog koj vim koj puab kuv tau zoo tas nrho.

Koj yog tus tsim kuv lub tswv yim tej plab plaw ;
koj xaws kuv ntxiv kuv hauv kuv niam plab.
Kuv ua koj tsaug, vim koj tes dej num txaus ntshai txaus qhuas :
koj tsim kuv zoo ua luaj, koj cov dej num zoo tas nrho

Txais: (14) Kuv cav txog koj vim koj puab kuv tau zoo tas nrho.

Koj paub kuv tus ntsuj plig txhij txhua thoob plaws.
koj pom thaum kuv cov pob txha pib tsheej xeeb los,
thaum koj puab kuv nyob hauv qhov chaw nraim,
thaum koj xaws kuv tsheej zuj zus puag hauv tej nruab a.

Txais: (14) Kuv cav txog koj vim koj puab kuv tau zoo tas nrho.

Zaj Nyeem Ob: HAUJ LWM 13: 22-26

Paj Lug hais lus, nws hais tias:
22 “Tswv Ntuj muab Xas Ws xyeeb pov tseg, nws tsa Das Vis ua lawv tus vaj. Tswv Ntuj ua pov thawj txog Das Vis li no: ‘Kuv nrhiav tau Das Vis, Yes Xes tus tub. Nws yog tus neeg ntxim kuv siab, nws yuav ua raws li kuv lub siab xav tas huv si.’ 23 Nyob hauv Das Vis cov xeeb ntxwv, Tswv Ntuj tau tsa ib tug cawm seej tuaj pab tsoom His Xas Lais, yog Yes Xus, raws li nws tau cog lus lawm. 24 Zam xub tuaj ua ntej, nws tuaj tshaj rau haiv His Xas Lais kom tas sawv daws txais cov kab ke ntxuav los thov txhaum. 25 Thaum Zam ua nws txoj hauj lwm yuav tiav, nws nug tias : ‘Nej xav hais tias kuv yog leej twg? Kuv tsis yog tus uas nej xav. Tiam sis tus lawv kuv qab, nws twb tuaj lawm; tus ntawd mas kuv tsis tsim nyog daws nws txoj hlua khau.’
26 Cov kwv tij, nej cov uas yog Has Nplas Has cov tub, thiab nej cov uas hwm Tswv Ntuj nyob ntawm no, lo lus tshaj txog txoj kev cawm seej no tuaj txog peb lawm.”

As Les Lus Yas: LK 1: 76

Txais: As les lus yas, as les lus yas.

Koj, me tub, luag yuav hu koj ua Leej Nyob Siab tus yaj saub,
vim koj yuav mus ua Huab Tais ntej, koj yuav npaj nws txoj kev.

Txais: As les lus yas, as les lus yas.

Ntawv Moo Zoo: LK 1: 57-66, 80

57 Thaum txog Es Lis Xas Npes lub caij daws cev, mas nws yug tau ib tug tub. 58 Cov neeg koom zej koom zos thiab nws cov kwv tij neej tsa hnov tias Huab Tais hlub Es Lis Xas Npes kawg nkaus, mas lawv nrog nws zoo siab. 59 Thaum txog hnub yim, lawv tuaj ua lub cim txiav rau tus me nyuam. Lawv xav tis nws npe hu ua Ntxas Kas Lias raws li nws txiv. 60 Tab sis nws niam hais tias : "Tsis yog, tus me nyuam yuav hu ua Zam." 61 Lawv hais rau leej niam tias: "Tsis muaj ib tug hauv koj cov txheeb ze hu li ntawd." 62 Ces lawv piav tes rau leej txiv saib nws xav kom lawv tis tus me nyuam npe hu li cas. 63 Leej txiv kom lawv muab ib daim txiag los, nws sau ntawv rau saud tias : " Zam yog nws lub npe." Sawv daws ceeb tas. 64 Tam sis ntawd, leej txiv lub ncauj qhib plho, tus nplaig muag nthas, nws hais tau lus, nws cav txog Tswv Ntuj. 65 Tsoom neeg nyob ze ntawd sawv daws tau ntshai kawg. Hos nyob pem toj siab hauv xeev Yus Das, sawv daws tham txog tej xwm ntawd. 66 Cov uas tau hnov luag tham txog tej xwm no, muab khaws cia rau nruab siab, lawv hais tias : "Tus me nyuam ntawd yuav yog ib tug zoo li cas ?" Huab Tais txhais tes yeej nrog nraim tus me nyuam ntawd.
80 Tus me nyuam hlob tuaj, nws lub tswv yim muaj zog zuj zus. Nws nyob hauv teb chaws suab puam mus txog hnub nws tawm los rau cov His Xas Lais pom.

Tim 25 lub 6 Hli 2019

Hnub Peb Lis Piam Kaum Ob Nruab Xyoo C Nruab Lis Piam Xyoo I

Zaj Nyeem Ib: HAUV PAUS 13: 2, 5-18

2 Has Nplas nplua nuj kawg, nws muaj tsiaj txhu, muaj nyiaj thiab muaj kub ntau.
5 Los, uas nrog Has Nplas mus, nws kuj muaj yaj muaj nyuj thiab muaj tsev tsam phooj ntau.
6 Lub teb chaws tsis txaus sawv daws tsa tsev nyob ua ke: vim nkawd muaj cuab yeej cuab tam ntau ces thiaj tsis tau kev rau sawv daws nyob ua ke ntxiv. 7 Has Nplas cov tub zov tsiaj thiab Los cov tub zov tsiaj kuj pib muaj lus sib cav sib ceg. Lub caij ntawd cov neeg Kas Nas Has thiab cov neeg Pes Lis Xis nyob hauv lub teb chaws.
8 Vim li ntawd Has Nplas thiaj hais rau Los tias: "Wb tsis txhob muaj kev tsis sib haum xeeb. Kuv cov tub zov tsiaj thiab koj cov tub zov tsiaj los yuav tsis txhob muaj kev tsis sib haum xeeb, vim wb yog ob txiv tub. 9 Tas nrho lub teb chaws twb qhib lug rau koj los tsis sub? Yog li kuv thov kom koj ncaim kuv mus mog. Yog koj mus sab laug ces kuv yuav mus sab xis ; yog koj mus sab xis, ces kuv yuav mus sab laug."
10 Los tsa muag ntsia, nws pom tas nrho lub tiaj Yos Las Das yog ib lub tiaj muaj dej nyob qhov txhia chaw mus txog ntua rau Xos As, zoo li HUAB TAIS lub vaj, thiab zoo li teb chaws Hais Nkws Tos; thaum ntawd HUAB TAIS tseem tsis tau rhuav Xos Dos Mas thiab Nkos Mos Las. 11 Los thiaj xaiv lub tiaj Yos Las Das huv si rau nws. Ces nws muab xub ke mus rau sab hnub tuaj. Nkawd thiaj tau sib ncaim li ntawd. 12 Has Nplas thiaj nyob hauv lub teb chaws Kas Nas Has, hos Los mus nyob hauv cov nroog hauv lub tiaj. Los mus tsa nws cov tsev tsam phooj nyob txog thaj tsam ze ntawm Xos Dos Mas. 13 Cov neeg Xos Dos Mas yog ib co neeg phem tas nrho, thiab ua txhaum loj rau HUAB TAIS.
14 Thaum Los ncaim mus lawm, HUAB TAIS hais rau Has Nplas tias : "Koj tsa qhov muag ntsia, txij ntawm qhov koj nyob ko mus rau sab pej thiab sab naj, mus rau toob fab thiab xib fab, 15 tas nrho lub teb chaws uas koj pom ntawd, kuv yuav muab rau koj thiab rau koj tsoom xeeb leej xeeb ntxwv nyob mus li. 16 Kuv yuav ua kom koj cov xeeb leej xeeb ntxwv coob npaum li cov plua av nyob ntiaj teb. Yog neeg suav txheeb cov plua av hauv ntiaj teb mas lawv thiaj yuav suav txheeb koj cov xeeb leej xeeb ntxwv. 17 Koj sawv, koj cia li mus ncig kom txhua thaj av qhov ntev thiab qhov dav, vim kuv yuav muab pub rau koj." 18 Ces Has Nplas tshais nws cov tsev tsam phooj, nws tsiv mus nyob ze cov ntoo Ntseej ntawm Mas Nples, uas nyob Hes Nploos. Nyob ntawd nws txhim ib lub thaj txi HUAB TAIS.

NPN 15: 2-3A, 3BC-4AB, 5

Txais: (1) Tus neeg ncaj yuav tau nyob saum Huab Tais lub roob ntshiab.

Tus uas taug kev tsis muaj chaw xyeej thiab ua ncaj,
Tus uas hais qhov tseeb nyob nws nruab siab,
Thiab nws tsis cia nws tus nplaig hais lus dag.

Txais: (1) Tus neeg ncaj yuav tau nyob saum Huab Tais lub roob ntshiab.

Nws tsis ua phem rau luag,
Nws tsis nrhiav lus rau tus nyob ze nws.
Nws tsis saib cov neeg phem muaj nqes.
Nws hwm cov neeg hwm HUAB TAIS.

Txais: (1) Tus neeg ncaj yuav tau nyob saum Huab Tais lub roob ntshiab.

Nws qiv nyiaj txiag, nws tsis tsuam paj.
Nws tsis txais luag cov nyiaj xiab kom muab txim rau tus tsis txhaum.
Leej twg ua li hais los no, mas nws yuav nyob ruaj nreb.

Txais: (1) Tus neeg ncaj yuav tau nyob saum Huab Tais lub roob ntshiab.

As Les Lus Yas: ZAM 8: 12

Txais: As les lus yas, as les lus yas.

Huab Tais hais tias: “Kuv yog ntiaj teb neeg qhov pom kev,
leej twg los raws kuv yuav tau kev pom kev rau nws lub neej.”

Txais: As les lus yas, as les lus yas.

Ntawv Moo Zoo: MT 7: 6, 12-14

Yes Xus hais rau nws cov thwj tim tias:
6 "Nej tsis txhob muab tej yam ntshiab pub rau dev noj, los txhob muab nej cov hlaws npliag deg pov rau ntawm npua xub ntiag, tsam npua muab tsuj ntiag rau hauv av thiab npua tig rov los dua nej.
12 "Txhua yam nej xav kom luag ua rau nej mas nej yuav xub ua rau luag tso. Txoj Cai thiab cov Yaj Saub yog li ntawd.
13 “Nej chaws ntawm lub qhov rooj nqaim mus lawm hauv. Vim lub qhov rooj dav thiab txoj kev dav yog txoj yuav coj mus rau lub qhov tuag; muaj coob leej taug txoj kev ntawd.
14 Hos lub qhov rooj nqaim thiab txoj kev ti thiaj yog txoj coj mus rau txoj sia; muaj tsawg leej nrhiav tau txoj kev ntawd taug.”

TIM 26 LUB 6 HLI 2019

Hnub Plaub Lis Piam kaum Ob Nruab Xyoo C Nruab Lis Piam Xyoo I

Zaj Nyeem Ib: HP 15: 1-12, 17-18

1 Thaum tej no dhau tas lawm, HUAB TAIS yees tawm los hais lus rau Has Nplas tias : "Koj txhob ntshai mog, Has Nplas! Kuv yog daim leem phiaj thaiv koj. koj yuav tau txais koob haum loj kawg nkaus." 2 Has Nplas teb tias : "HUAB TAIS Tswv Ntuj, koj yuav muab dab tsi pub rau kuv ? Kuv niaj hnub nyob tsis muaj tub ki li; tus yuav txais kuv lub cuab tam puas yuav yog kuv tus tub txib tus tub Es Lis Xes nyob Das Mas Kus xwb?" 3 Has Nplas hais ntxiv tias : "Koj tsis pub kom kuv muaj ib tsob noob li ces ib tug tub txib uas yug hauv kuv tsev yuav los txais kuv lub cuab tam xwb." 4 HUAB TAIS lo lus nrov tam sid tuaj rau Has Nplas tias : "Tus ntawd yuav tsis yog tus los txais koj lub cuab tam, tus yuav txais koj lub cuab tam yog koj ib tug tub uas yog tseem koj roj koj ntshav tiag." 5 HUAB TAIS coj Has Nplas mus nraum zoov thiab hais rau nws tias : "Koj tsa muag ntsia saum ntuj thiab koj suav cov hnub qub saib koj suav puas txheeb." Ces nws hais tias : "Koj cov xeeb ntxwv yuav coob npaum li ntawd."
6 Has Nplas ntseeg HUAB TAIS, ces HUAB TAIS muab Has Nplas lub siab ntseeg suav ua kev ncaj rau Has Nplas.
7 HUAB TAIS hais rau nws tias : "Kuv yog tus HUAB TAIS uas tau coj koj tawm hauv cov neeg Kas Dias lub teb chaws Uj los mus nyob lub teb chaws no, uas kuv yuav muab rau koj ua koj tug." 8 Has Nplas teb tias : "HUAB TAIS Tswv Ntuj, kuv yuav ua cas paub tias kuv yuav tau lub teb chaws los ua kuv tug ?" 9 HUAB TAIS hais rau nws tias : "Koj mus coj ib tug xyuas nyuj muaj peb xyoos, ib tug nkauj tshis muaj peb xyoos, ib tug thav yaj muaj peb xyoos, ib tug nkauj nquab thiab ib tug me nyuam lau nquab tuaj rau kuv." 10 Has Nplas coj cov tsiaj raws li hais tuaj. Nws muab cov tsiaj phua nruab nrab, nws muab ob sab teeb nyias nyob nyias sab, tiam sis nws tsis phua cov noog. 11 Dav yuj plaws ya ntxiag los noj cov tsiaj, tab sis Has Nplas nplawm kom dav khiav.
12 Thaum lub hnub tab tom poob qho, Has Nplas cia li tuaj ib tug dab ntub hlob hlob ua kom nws looj hlias mus, ces muaj ib qho tsaus ntuj nti loj txaus ntshai kawg los laum Has Nplas.
17 Thaum lub hnub poob qho lawm thiab tsaus ntuj lawm, txawm muaj ib lub qhov txos ncho pa lug thiab ib teg tsau cig cig los hla ntawm cov sab nqaij kis nruab nrab. 18 Thaum ntawd, HUAB TAIS nrog Has Nplas cog lus li no : "Kuv muab lub teb chaws no rau koj tsoom xeeb ntxwv ua lawv tug, txij li ntawm lub vos hav dej txawj qhuav nyob Hais Nkws Tos teb mus txog ntua tus niam dej loj Aws Fas Tes.”

NPN 105: 1-2, 3-4, 6-7, 8-9

Txais: (8a) Huab Tais nco ntsoov nws lo lus nws tau cog mus li ib txhis.
los: As les lus yas.

Nej ua HUAB TAIS tsaug, nej hu txog nws lub npe,
nej qhia nws cov hauj lwm loj rau cov haiv neeg paub.
Nej seev nkauj rau HUAB TAIS, nej hu nkauj cav txog nws ;
nej piav txog nws cov hwj huam yees ntxwv tas tib si.

Txais: (8a) Huab Tais nco ntsoov nws lo lus nws tau cog mus li ib txhis.
los: As les lus yas.

Nej nrhiav koob meej rau nej nyob hauv nws lub npe,
cov uas muaj lub siab nrhiav Huab Tais, nej cia li zoo siab!
Nej nrhiav HUAB TAIS nyob hauv nws lub zog,
nej nrhiav kev tsob hwb nws tsis tseg.

Txais: (8a) Huab Tais nco ntsoov nws lo lus nws tau cog mus li ib txhis.
los: As les lus yas.

Nej, Has Nplas Has tsoom xeeb ntxwv, nej yog Huab Tais cov tub txib,
Nej, Yas Kos cov tub, nej yog cov Huab Tais tau xaiv,
Nws, HUAB TAIS yog peb tus Tswv Ntuj,
Nws tej cai tswj tas qhov txhia chaw hauv lub ntiaj teb.

Txais: (8a) Huab Tais nco ntsoov nws lo lus nws tau cog mus li ib txhis.
los: As les lus yas.

Nws nco ntsoov mus li txog cov lus nws cog,
yog ib co lus cog ruaj khov rau txhiab tiam tub ki.
Yog cov lus nws tau nrog Has Nplas Has cog,
thiab nws tau rov zeem tseeb rau His Xas Has.

Txais: (8a) Huab Tais nco ntsoov nws lo lus nws tau cog mus li ib txhis.
los: As les lus yas.

As Les Lus Yas: ZAM 15: 4A, 5B

Txais: As les lus yas, as les lus yas.

Huab Tais hais tias:
“Nej yuav nyob ruaj hauv kuv ib yam li kuv nyob hauv nej;
leej twg nyob ruaj nreb hauv kuv nws yuav txi txiv ncw.”

Txais: As les lus yas, as les lus yas.

Ntawv Moo Zoo: MT 7: 15-20

Yes Xus hais rau nws cov thwj tim tias:
15 “Nej ceev faj txog cov yaj saub cuav, lawv txia ua ib co yaj tuaj cuag nej, tab sis nyob sab hauv, lawv yog ib co hma nrhiav ncauj.
16 Nej ntsia lub txiv lawv txi, ces nej yuav paub lawv. Luag puas de txiv cawv saum ib tsob pos, los de txiv ncuav pias saum ib tsob nrhab ?
17 Li ntawd, tus ntoo zoo txi ib co txiv zoo, hos tus ntoo lwj txi ib co txiv phem.
18 Tsob ntoo zoo txi tsis tau txiv phem, hos tsob ntoo lwj kuj txi tsis tau txiv zoo.
19 Tsob ntoo twg tsis txi txiv zoo, luag yuav muab ntov mus pov hlawv.
20 Li ntawd, thaum nej pom lawv cov txiv, nej yuav paub lawv zoo li cas.”

Tim 27 lub 6 Hli 2019

Hnub Tsib Lis Piam Kaum Ob Nruab Xyoo C Nruab Lis Piam Xyoo I

Hwm LN Cyril nyob Alexandria

Zaj Nyeem Ib: HP 16: 1-12, 15-16

1 Xas Lais uas yog Has Nplas poj niam yug tsis tau me nyuam rau Has Nplas li. Tiam sis Xas Lais muaj ib tug ntxhais txib, yog neeg Hais Nkws Tos hu ua As Nkas. 2 Xas Lais hais rau Has Nplas tias : "Koj twb pom tias HUAB TAIS tsis pub kuv muaj me nyuam li. Ua li mas koj mus ntsib kuv tus ntxhais txib. Tej zaum nws yog tus yuav muab me nyuam rau kuv." Ces Has Nplas mloog Xas Lais hais. 3 Thaum Has Nplas los nyob tau kaum xyoo hauv Kas Nas Has teb lawm, mas nws poj niam Xas Lais muab nws tus ntxhais txib Hais Nkws Tos rau Has Nplas nws tus txiv kom yuav ua poj niam. 4 Has Nplas mus ntsib As Nkas ces As Nkas xeeb tub. Thaum As Nkas pom tias nws xeeb tub lawm, ces nws tsis hwm Xas Lais ua nws tus tswv ntxiv. 5 Xas Lais thiaj hais rau Has Nplas tias : "Nws ua saib tsis taus kuv li ntawd los yog tim koj. Twb yog kuv muab kuv tus ntxhais txib tso rau hauv koj xub ntiag, cas txij thaum nws pom tias nws xeeb tub lawd, nws cia li tsis hwm kuv ntxiv. Cia Tswv Ntuj mam txiav txim rau kuv thiab rau koj." 6 Has Nplas hais rau Xas Lais tias : "Koj tus ntxhais txib nyob hauv koj lub xib teg, koj yuav ua li cas rau nws los nyob ntawm koj siab xav." Xas Lais thiaj ua nruj ua tsiv heev rau As Nkas, ces As Nkas khiav.
7 HUAB TAIS tus Tshiab mus ntsib As Nkas ze ntawm ib tug dej txhawv nyob hauv tiaj suab puam, yog tus dej uas nyob ntawm txoj kev mus rau Suj. 8 HUAB TAIS tus Tshiab nug tias : "As Nkas, Xas Lais tus ntxhais txib, koj los qhov twg los thiab koj yuav mus qhov twg ?" As Nkas teb tias : "Yog kuv khiav kuv tus tswv Xas Lais." 9 HUAB TAIS tus Tshiab hais rau As Nkas tias : "Koj rov qab mus nrog koj tus tswv nyob, koj yuav txo hwj chim mloog nws lus mog." 10 HUAB TAIS tus Tshiab hais tias : "Kuv yuav ua kom koj cov xeeb ntxwv coob coob tsis muaj leej twg suav tau." 11 HUAB TAIS tus Tshiab hais rau As Nkas ntxiv tias : "Koj cev xeeb tub lawm, koj yuav yug ib tug tub, koj yuav tis nws npe hu ua Is Mas Es, vim HUAB TAIS hnov koj lub suab quaj nyob hauv kev txom nyem lawm. 12 Nws yuav yog neeg zoo li ib tug luj qus qus, nws yuav tsa tes ntaus sawv daws thiab sawv daws yuav tsa tes ntaus nws. Nws yuav tsa yeej tiv tas nws tsoom kwv tsoom tij huv tib si."
15 As Nkas yug tau ib tug tub rau Has Nplas. Has Nplas tis npe rau tus tub uas As Nkas yug hu ua Is Mas Es.
16 Has Nplas muaj yim caum rau xyoo thaum As Nkas yug Is Mas Es rauHas Nplas.

Los: HP 16: 6B-12, 15-16

6 Has Nplas hais rau Xas Lais tias : "Koj tus ntxhais txib nyob hauv koj lub xib teg, koj yuav ua li cas rau nws los nyob ntawm koj siab xav." Xas Lais thiaj ua nruj ua tsiv heev rau As Nkas, ces As Nkas khiav.
7 HUAB TAIS tus Tshiab mus ntsib As Nkas ze ntawm ib tug dej txhawv nyob hauv tiaj suab puam, yog tus dej uas nyob ntawm txoj kev mus rau Suj. 8 HUAB TAIS tus Tshiab nug tias : "As Nkas, Xas Lais tus ntxhais txib, koj los qhov twg los thiab koj yuav mus qhov twg ?" As Nkas teb tias : "Yog kuv khiav kuv tus tswv Xas Lais." 9 HUAB TAIS tus Tshiab hais rau As Nkas tias : "Koj rov qab mus nrog koj tus tswv nyob, koj yuav txo hwj chim mloog nws lus mog." 10 HUAB TAIS tus Tshiab hais tias : "Kuv yuav ua kom koj cov xeeb ntxwv coob coob tsis muaj leej twg suav tau." 11 HUAB TAIS tus Tshiab hais rau As Nkas ntxiv tias : "Koj cev xeeb tub lawm, koj yuav yug ib tug tub, koj yuav tis nws npe hu ua Is Mas Es, vim HUAB TAIS hnov koj lub suab quaj nyob hauv kev txom nyem lawm. 12 Nws yuav yog neeg zoo li ib tug luj qus qus, nws yuav tsa tes ntaus sawv daws thiab sawv daws yuav tsa tes ntaus nws. Nws yuav tsa yeej tiv tas nws tsoom kwv tsoom tij huv tib si."
15 As Nkas yug tau ib tug tub rau Has Nplas. Has Nplas tis npe rau tus tub uas As Nkas yug hu ua Is Mas Es.
16 Has Nplas muaj yim caum rau xyoo thaum As Nkas yug Is Mas Es rauHas Nplas..

NPN 106: 1B-2, 3-4A, 4B-5

Txais: (1b) Nej cav lus zoo ua Huab Tais tsaug vim nws siab zoo.

Nej cav lus zoo ua HUAB TAIS tsaug vim nws siab zoo,
nws khuv leej neeg mus li ib txhiab ib txhis.
Leej twg yuav piav tau HUAB TAIS lub hwj huam loj,
Los hais tau tas puas tsav yam lus cav txog nws?

Txais: (1b) Nej cav lus zoo ua Huab Tais tsaug vim nws siab zoo.

Cov tau hmoov zoo yog cov neeg tsom txoj kev ncaj taug,
Yog cov ua raws txoj kev haum pheej tas mus li.
HUAB TAIS, thov koj nco txog peb vim koj hlub koj haiv neeg.

Txais: (1b) Nej cav lus zoo ua Huab Tais tsaug vim nws siab zoo.

Thov koj tuaj xyuas kuv tuaj pab cawm kuv,
Kom kuv tau pom cov koj xaiv txoj kev vam meej,
Kom kuv lub siab kaj vim koj haiv neeg muaj kev zoo siab,
Kom kuv tau koob meej nrog koj lub cuab tam.

Txais: (1b) Nej cav lus zoo ua Huab Tais tsaug vim nws siab zoo.

As Les Lus Yas: Zam 14: 23

Txais: As Les Lus Yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws.
Kuv Txiv wb yuav tuaj nyob hauv nws.

Txais: As Les Lus Yas.

Ntawv Moo Zoo: MT 7: 21-29

Yes Xus hais rau nws cov thwj tim tias:
21 “Tsis yog txhua tus uas hu kuv ua : "Huab Tais, Huab Tais," yuav tau mus hauv Ntuj lub Ceeb Tsheej. Yog cov ua raws li kuv Txiv nyob saum ntuj lub siab nyiam. 22 Hnub ntawd, yuav muaj coob leej hais rau kuv tias : "Huab Tais, Huab Tais, thaud, tsis yog peb tuav koj lub npe ua yaj saub lod ? Tsis yog peb tuav koj lub npe ntiab dab khiav lod ? Tsis yog peb tuav koj lub npe los ua hwj ntau yam huam yees ntxwv lod ?" 23 Ces kuv yuav ncaj qha teb rau lawv tias : "Kuv tsis tau paub nej dua li! Nej txav mus deb ntawm kuv, nej cov uas tau ua tsis ncaj ."
24 Leej twg mloog cov lus uas kuv nyuam qhuav hais, thiab nws ua raws li cov lus no, mas tus neeg ntawd piv tau rau ib tug neeg xyuam xim uas nws txhim tsev rau saum tsua. 25 Thaum los nag hlob, dej sab siv huam, cua tshuab tuaj ntsawj lub tsev, tab sis tsev tsis vau, vim lub tsev cog rau saum tsua. 26 Hos leej twg hnov cov lus kuv nyuam qhuav hais, tab sis nws tsis ua raws li cov lus ntawd, tus neeg ntawd piv tau rau ib tug neeg ruam txhim tsev rau saum tej av suab puam. 27 Thaum los nag hlob, dej sab siv huam, cua tshuab tuaj ntsawj lub tsev, ces lub tsev vau. Nws raug xwv txheej loj.”
28 Thaum Yes Xus hais cov lus ntawd tas, tsoom sid qhuas nws cov lus qhia kawg. 29 Vim nws qhia lawv zoo li neeg muaj peev xwm, tsis zoo li lawv cov Kws Ntawv Ntshiab.

Tim 28 lub 6 Hli 2019

Hnub Rau Lis Piam Kaum Ob Nruab Xyoo C Nruab Lis Piam Xyoo I

Hawm Yes Xus lub Plawv (los Siab) Ntshiab

Zaj Nyeem Ib: EXK 34: 11-16

11 HUAB TAIS Tswv Ntuj hais li no : “Kuv yog tus yuav mus nrhiav kuv cov yaj thiab yuav saib xyuas lawv. 12 Xws li ib tug tswv zov yaj uas saib xyuas nws cob yaj thaum lawv tawg ncaim mus rau ntau qhov chaw, kuv kuj yuav saib xyuas kuv cov yaj thiab. Kuv yuav npo lawv dim ntawm txhua qhov chaw uas lawv tawg mus nyob thaum yog ib hnub pos huab nti thiab tsaus ntuj dub nciab. 13 Kuv yuav coj lawv tawm ntawm cov haiv neeg uas lawv mus nyob nrog , kuv yuav sau lawv tawm ntawm cov pej kum teb los, kuv yuav coj lawv rov los rau hauv lawv thaj av, thiab kuv yuav cia lawv nog zaub nyob pem His Xas Lais tej hauv roob, nyob nram tej vos hav thiab tas qhov txhia chaw uas muaj neeg nyob hauv lub teb chaws. 14 Kuv yuav cia lawv nog zaub nyob hauv ib thaj chaw zaub mos nyoos, thiab His Xas Lais tej toj roob hauv pes siab yuav yog lawv chaw nyob. Nyob ntawd lawv yuav tau so nyob hauv ib thaj av zoo thiab lawv yuav nog tej hav zaub zoo mos nyoos nyob saum His Xas Lais tej toj roob”. 15 HUAB TAIS Tswv Ntuj tseem hais tias: “Yog kuv yuav coj kuv cov yaj mus nog zaub, thiab ua kom lawv tau so. 16 Kuv yuav nrhiav kom tau tus poob zoo, kuv yuav coj tus ncaim npoj rov los poo npoj, kuv yuav qhwv tus muaj mob qhov txhab tej qhov txhab, kuv yuav kho tus muaj mob kom zoo hlo. Tus yaj rog thiab noj qab nyob zoo kuv yuav saib xyuas nws. Kuv yuav coj kuv cov yaj mus nog zaub raws txoj kev ncaj kev ncees.”

NPN 23: 1-3A, 3B-4, 5, 6.

Txais: (1) Huab Tais yog tus tswv zov yaj saib kuv, kuv yuav tsis tshaib tsis nqhis.

HUAB TAIS yog tus tswv zov yaj saib kuv, kuv yuav tsis tshaib txog dab tsi.
Nws cia kuv so nyob hauv tej tshav zaub mos ntsuab xiab;
Nws coj kuv mus nyob ze cov dej tus yees;
nws ua kom kuv tus ntsuj plig rov muaj zog.

Txais…

Nws coj kuv mus taug txoj kev ncaj, vim nws lub npe.
Txawm kuv taug kev hauv ib lub hav tsaus nti,
kuv tsis ntshai dab tsi phem, vim koj nyob rawv ntawm kuv ib sab,
koj rab nplawm thiab rab pas nrig ua kuv luag.

Txais…

Koj rau ib rooj mov rau ntawm kuv xub ntiag
rau kuv cov yeeb ncuab ntsia ntsoov;
koj muab roj pleev kuv taub hau;
kuv lub ntim puv phwj yaws.

Txais…

Txiaj ntsim thiab kev khuv leej yuav raws kuv nraim
niaj hnub hauv kuv lub neej;
Kuv yuav tau nyob hauv HUAB TAIS tsev
Mus ntev niaj ntau zyoo.

Txais…

Zaj Nyeem Ob: LM 5: 5B-11

Cov kwv tij nkauj muad:
5b Leej Ntuj Plig Ntshiab, uas Ntuj pub rau peb, nws tau hliv Tswv ntuj txoj kev nyiam rau hauv peb nruab siab.
6 Thiab ib qho ntxiv yog thaum lub sij hawm peb tseem tsis tsis muaj zog, thaum txog lub caij teem lawm, Leej Pleev tau tuag kom tau pab cov neeg tsis hwm Ntuj. 7 Yog yuav tuag kom tau pab ib tug neeg ncaj mas yus kam nyuaj kawg nkaus; hos yog yuav tuag pab ib tug neeg siab zoo mas nyaj tej zaud yus yuav muaj peev xwm tuag tau. 8 Yog tias Tswv Ntuj twb qhia peb tias nws nyiam peb thaum peb tseem yog neeg txhaum, vim Leej Pleev tau tuag kom tau pab peb, 9 mas nyem no peb twb ua neeg ncaj nyob hauv Leej Pleev cov roj ntsha lawm, mas nws haj yam yuav cawm peb nyob hauv Leej Pleev ntawm txoj kev npau taws. 10 Yog tias thaum peb tseem ua yeeb ncuab rau Tswv Ntuj, nws Leej Tub txoj kev tuag twb ua kom peb nrog Tswv Ntuj rov sib haum xeeb, mas nyem no thaum peb twb nrog Tswv Ntuj rov sib haum xeeb lawm, mas nws Leej Tub txoj sia haj yam yuav cawm peb. 11 Tsis tas li xwb, peb tseem muaj koob meej nyob hauv Tswv Ntuj thiab, vim peb tus Huab Tais Yes Xus Pleev uas yog tus ua kom peb tau kev nrog Tswv Ntuj sib haum xeeeb.

As Les Lus Yas: MT 11: 29AB

Txais: As les lus yas, as les lus yas.

Huab Tais hais tias: “Nej txais kuv tus quab mus nej kwv,
Nej kawm ntawm kuv vim kuv muaj lub siab txo hwj chim ua neeg me.

Txais: As les lus yas, as les lus yas.

Los Zam 10: 14

Txais: As les lus yas, as les lus yas.

Huab Tais hais tias: “Kuv yog tus zoo tswv zov yaj,
Kuv paub kuv cov yaj, kuv cov yaj paub kuv.”

Txais: As les lus yas, as les lus yas.

Ntawv Moo Zoo: LK 15: 3-7

3 Yes Xus thiaj hais zaj paj lug no rau cov fas lis xais thiab cov thoob xwm ntawv : 4 "Yog nej leej twg muaj ib puas tus yaj, tab sis ib tug ploj lawm, mas nws puas yuav tsis tso cuaj caum cuaj tus yaj tseg rau tom hav suab puam, ces nws mus nrhiav kom tau tus uas poob zoo lawd? 5 Thaum nws nrhiav tau lawm, mas nws muab kwv hlo saum xwb pwg los, nws zoo siab kawg. 6 Thaum nws rov los txog tsev, nws nqua hu nws cov phooj ywg thiab cov nyob ze nws tuaj, nws hais rau lawv tias : 'Nej nrog kuv zoo siab, vim kuv nrhiav tau kuv tus yaj poob zoo lawm.' 7 Kuv hais rau nej tias, thaum ib tug neeg txhaum hloov siab tig los ntxub kev txhaum, mas muaj kev zoo siab loj nyob saum ntuj dua kev zoo siab rau cuaj caum cuaj leeg siab ncaj uas tsis tas yuav hloov siab los ntxub kev txhaum.”

Tim 29 lub 6 Hli 2019

Hnub Xya Lis Piam Kaum Ob Nruab Xyoo C Nruab Lis Piam Xyoo I

Hwm ob tug Hauv Paus Xa Lus LN Pob Zeb thiab Paj Lug – Thaj Txi Ntuj hnub ntawd

Zaj Nyeem Ib: HAUJ LWM 12: 1-11

1 Lub caij ntawd, tus vaj Hes Los ntes ib co neeg nyob hauv lub Koom Txoos thiab tsim txom lawv. 2 Nws xuas ntaj tua Yas Kos uas yog Zam tus tij laug. 3 Thaum nws pom tias cov Yus Das zoo siab rau qhov nws ua ntawd, nws kuj tso neeg mus ntes Pob Zeb thiab; thaum ntawd yog lub caij noj cov ncuav mov tsis rau poov xab. 4 Thaum Hes Los ntes tau Pob Zeb lawm, nws coj Pob Zeb mus kaw hauv tsev loj faj. Nws kom plaub pab tub rog zov rawv, ib pab muaj plaub leeg. Hes Los npaj tias thaum ua lub Ntees Hla tas nrho, mas nws yuav coj Pob Zeb tawm los rau ntawm tsoom pej xeem xub ntiag. 5 Ces Pob Zeb thiaj raug kaw hauv tsev loj faj; tiam sis lub Koom Txoos thov Tswv Ntuj tsis tseg rau Pob Zeb.
6 Thaum yuav txog hnub Hes Los coj Pob Zeb tawm los, hmo ua ntej kiag Pob Zeb pw tsaug zog nyob nruab nrab ob tug tub rog, muaj ob txog hlua khi rawv nws cia, hos tseem muaj ib co zov qhov rooj nyob sab nraud saib lub tsev loj faj thiab. 7 Ib sij huam, Huab Tais tus Tshiab cia li los sawv nyob ze ntawm Pob Zeb, thiab muaj ib qho ci ua kom kem tsev pom kev lug. Tus Tshiab diaj Pob Zeb sab tav, tsa kom nws sawv, thiab hais rau nws tias : "Koj sawv tsees tam sis no !" Cov hlua khi Pob Zeb ob txhais tes cia li plam plaws tas. 8 Tus Tshiab hais ntxiv tias : "Muab koj txoj siv los sia thiab rau koj nkawm khau !" Pob Zeb ua li ntawd tas, tus Tshiab hais tias : "Muab koj lub tsho ntev los kauv koj ces koj lawv kuv qab !" 9 Ces Pob Zeb lawv tus Tshiab qab tawm mus. Pob Zeb tsis paub tias qhov tus tshiab ua ntawd yog tiag, nws xav tias yog nws ua yog toog pom xwb. 10 Nkawd mus hla thawj pab zov keeb, thiab tseem mus dhau pab ob ntxiv thiab, nkawd thiaj txog lub qhov rooj hlau uas yuav tawm sab nraud mus rau hauv nroog. Lub qhov rooj hlau cia li qhib plho nws tus kheej rau nkawd, nkawd tawm plaws mus taug ib txog kev, ces tus Tshiab cia li ploj ntais ncaim mus lawm. 11 Pob Zeb thiaj tsim dheev feeb meej tuaj, nws hais tias : "Zaum no, kuv paub tseeb lawm tias Huab Tais tau xa nws tus Tshiab tuaj pab kuv kom kuv dim ntawm Hes Los txhais tes thiab ntawm qhov uas cov Yus Das vam vam yuav tau pom."

NPN 34: 2-3, 4-5, 6-7, 8-9

Txais: Huab Tais tus tshiab yuav tuaj cawm cov uas hwm nws.

Kuv yuav cav txog HUAB TAIS txhua lub sij hawm;
nws lub koob meej yuav nyob rawv ntawm kuv lub ncauj.
Kuv tus plig tlub koob meej yog nyob hauv HUAB TAIS;
tus neeg me yuav hnov txog thiab yuav zoo siab.

Txais: Huab Tais tus tshiab yuav tuaj cawm cov uas hwm nws.

Nej nrog kuv cav txog HUAB TAIS,
peb sawv daws ua ke qhuas nws lub npe.
Kuv nrhiav HUAB TAIS, ces nws teb kuv,
Nws cawm kuv dim ntawm tas kuv tej kev ntshai.

Txais: Huab Tais tus tshiab yuav tuaj cawm cov uas hwm nws..

Nej vam txog HUAB TAIS, ces kev zoo siab yuav ua nej ci ntsa iab,
nej ntsej muag yuav tsis liab ploog vim kev txaj muag.
Thaum tus pluag hu, HUAB TAIS mloog
thiab yuav cawm nws ntawm tas nws tej kev nyuaj ntxhov.

Txais: Huab Tais tus tshiab yuav tuaj cawm cov uas hwm nws.

HUAB TAIS tus tshiab tsa tsev tsam phooj nyob
ncig cov neeg hwm HUAB TAIS, nws cawm lawv.
Nej saj ces nej yuav pom HUAB TAIS siab zoo npaum li cas.
Tus tau txoj hmoov zoo yog tus muab
HUAB TAIS ua nws lub chaw nkaum.

Txais: Huab Tais tus tshiab yuav tuaj cawm cov uas hwm nws.

Zaj Nyeem Ob: 2 TMT 4: 6-8, 17-18

6 Ntawm kuv, Paj Lug, mas kuv twb raug muab hliv los txi Ntuj lawm, ces twb txog lub caij kuv yuav mus lawm. 7 Kuv tau sib tw khiav txaus, kuv khiav mus txog chaw lawm; kuv tau ceev txoj kev ntseeg cia. 8 Nyem no mus, lub kaus mom muaj kev ncaj nyob tos kuv lawm xwb. Yog Huab Tais tus txiav txim ncaj yuav muab ua paj tshab rau kuv thaum txog hnub ntawd, tsis yog muab rau kuv ib leeg xwb, nws tseem yuav muab rau tas ib tsoom neeg nyiam nws thiab tos ntsoov lub caij nws yuav los.
17 Huab Tais yog tus tau pab kuv thiab muab nws lub zog rau kuv kom kuv tshaj lo lus kom lo lus nrov mus txog cov neeg teev pej kum dab pob ntseg. Nws tau npo kuv dim ntawm tsov ntxhuav lub qhov ncauj. 18 Huab Tais yuav npo kuv dim ntawm txhua yam kev phem thiab yuav txuag kuv kom kuv mus txog nws lub Ceeb Tsheej nyob saum Ntuj. Thov kom Huab Tais nto koob meej mus ib txhiab ib txhis. Ua li.


As Les Lus Yas: MT 16: 18

Txais: As les lus yas, as les lus yas.

Koj yog Pob Zeb, kuv yuav txhim kuv lub Koom Txoos rau saum lub pob zeb no.
Dab phem teb cov rooj vag yuav tiv tsis yeej lub pob zeb no.

Txais: As les lus yas, as les lus yas.

Ntawv Moo Zoo: MT 16: 13-19

13 Thaum Yes Xus tuaj txog cheeb tsam ntawm Xes Ntxas Les Fis Lis Pos, nws nug cov thwj tim tias : "Luag tej hais tias Neeg Leej Tub yog leej twg ?" 14 Lawv teb tias : “Ib txhia hais tias yog Zam Ntxuav Plig, ib txhia hais tias yog Es Lias, tseem muaj lwm cov hais tias yog Yes Les Mias los yog ib tug hauv cov yaj saub.” Yes Xus hais rau lawv tias : 15 "Nej ne, nej hais tias kuv yog leej twg ?" 16 Xis Moos Pob Zeb teb tias : "Koj yog Leej Pleev, yog tus Tswv Ntuj Muaj Txoj Sia Leej Tub." 17 Yes Xus teb rau Pob Zeb tias : "Xis Moos, Yos Nas tub, koj txoj hmoov zoo, vim tsis yog nqaij thiab ntshav qhia koj paub txog qhov no, yog kuv Txiv nyob saum ntuj qhia koj. 18 Ua li mas kuv hais rau koj : Koj yog Pob Zeb, kuv yuav txhim kuv lub Koom Txoos rau saum lub pob zeb no, ces dab phem teb cov rooj vag yuav tiv tsis yeej nws. 19 Kuv yuav muab Ntuj lub Ceeb Tsheej cov yawm sij rau koj tuav. Koj khi yam twg nyob ntiaj teb no, Ntuj yuav saib yam ntawd yog khi nyob saum ntuj. Koj daws yam twg nyob ntiaj teb no, Ntuj yuav saib yam ntawd yog daws nyob saum ntuj."

Tim 1 lub 7 Hli 2019

Hnub Ob Lis Piam Kaum Peb Nruab Xyoo C Nruab Lis Piam Xyoo I

Hwm LN Junipero Serra

Zaj Nyeem Ib: HP 18: 16-33

16 Thaum peb tug txiv neej uas tuaj xyuas Has Nplas Has tab tom sawv kev mus, lawv ntsia pom Xos Dos Mas. Has Nplas Has kuj nrog lawv mus thiab, nws xa lawv mus. 17 HUAB TAIS hais hauv nruab siab tias : "Kuv puas yuav zais tsis qhia Has Nplas Has paub txog qhov uas kuv npaj yuav ua ? 18 Vim hais tias nws yuav yog ib haiv neeg loj thiab muaj peev xwm, thiab tas txhua haiv neeg nyob hauv ntiaj teb yuav tau hmoov zoo yog vim nws. 19 Kuv twb tau xaiv nws lawm, kom nws qhuab qhia nws cov tub cov ntxhais thiab nws tsev neeg uas yuav los tom qab nws, kom sawv daws coj raws nraim li HUAB TAIS txoj kev, uas yog yuav tsum ua raws qhov yog thiab qhov ncaj ncees; yog lawv coj li ntawd mas HUAB TAIS thiaj li yuav pub rau Has Nplas Has raws li qhov nws tau cog lus rau Has Nplas Has lawm." 20 Ces HUAB TAIS hais tias : "Muaj ib lub suab yws txog Xos Dos Mas thiab Nkos Mos Las nrov loj kawg, thiab lawv los ua txhaum hnyav kawg nkaus. 21 Yog li kuv yuav nqes mus xyuas saib lawv puas tau ua phem npaum li lub suab nrov tuaj hais los tsis tau, ces kuv thiaj yuav paub."
22 Ob tug txiv neej sawv kev mus rau Xos Dos Mas lawm, tshuav HUAB TAIS tseem nrog Has Nplas Has sawv nyob ntawd. 23 Ces Has Nplas Has txav zog los ze, nws nug tias : "Koj puas yuav rhuav cov neeg ncaj nrog cov neeg txhaum tib si? 24 Tej zaud tsam muaj txog li tsib caug leej neeg ncaj nyob hauv lub nroog ne, koj puas yuav muab lub nroog rhuav, tsis zam rau lub nroog tab yog muaj lawv nyob hauv ? 25 Thov kom koj tsis txhob ua ib yam zoo li ntawd, tsis txhob rhuav tus neeg ncaj nrog tus neeg txhaum. Ua li ces tus neeg ncaj nrog tus neeg txhaum tuag zoo ib yam xwb tsis muaj qhov txawv li. Thov kom lub tswv yim ntawd nyob deb ntawm koj. Tus txiav txim rau lub ntiaj teb, nws yuav tsis txiav txim ncaj lod ?" 26 HUAB TAIS teb tias : "Yog kuv nrhiav tau tsib caug leej neeg ncaj nyob hauv lub nroog Xos Dos Mas, mas kuv yuav zam rau lub nroog tas huv si vim lawv." 27 Has Nplas Has teb tias : "Kuv yog plua av plua tshauv xwb, tsis kav kuv tseem muaj cuab kav nrog kuv tus Huab Tais hais. 28 Vim tias, tej zaum tsam tsis muaj txog tsib caug leej neeg ncaj, es yog tsawg tsib leeg ne, koj puas yuav rhuav lub nroog tas huv si vim tsawg tsib leeg ntawd ?" HUAB TAIS teb tias : "Kuv yuav tsis rhuav, yog tias kuv nrhiav tau plaub caug tsib leeg ncaj." 29 Has Nplas Has rov hais ntxiv tias : "Tej zaum tsam muaj plaub caug leej xwb ne?" HUAB TAIS teb tias : "Kuv yuav tsis rhuav lub nroog, vim plaub caug leej ntawd." 30 Has Nplas Has hais tias : "Thov kom kuv tus Huab Tais txhob npau taws thiab cia kuv hais lus dua. Tej zaum tsam muaj peb caug leej xwb ne?" HUAB TAIS teb tias : "Kuv yuav tsis rhuav lub nroog, yog kuv nrhiav tau peb caug leej." 31 Has Nplas Has hais tias : "Kuv ua neeg muaj cuab kav tas zog, kuv thiaj nrog kuv tus Huab Tais hais ntxiv : Tej zaum tsam nrhiav tau nees nkaum leej xwb ne ?" HUAB TAIS teb tias : "Kuv yuav tsis rhuav lub nroog, vim nees nkaum leej ntawd." 32 Has Nplas Has hais tias : "Thov kom kuv tus Huab Tais tsis txhob npau taws, kuv tseem yuav hais ib zaug ntxiv yog zaum kawg : Tej zaum tsam nrhiav tau kaum leej xwb ne?" HUAB TAIS teb tias : "Kuv yuav tsis rhuav lub nroog, vim kaum leej ntawd." 33 HUAB TAIS nrog Has Nplas Has tham tas, nws mus lawm. Ces Has Nplas Has rov qab mus tsev.

NPN 103: 1B-2, 3-4, 8-9, 10-11

xais: (8a) Huab Tais siab zoo thiab khuv leej neeg.

Kuv tus plig, koj cia li cav txog HUAB TAIS;
tas nrho kuv tus kheej, koj cia li cav txog nws lub npe ntshiab.
Kuv tus plig, koj cia li cav txog HUAB TAISs,
thiab tsis txhob hnov qab nws tej txiaj ntsim koob hmoov.

Txais: (8a) Huab Tais siab zoo thiab khuv leej neeg.

Nws zam tas nrho koj cov txhaum rau koj,
nws kho tas koj tej mob nkeeg kom zoo.
Nws txhiv koj txoj sia ntawm kev puas tsuaj puas ntsoog,
nws muab nws lub siab zoo thiab nws kev hlub rau koj ntoo.

Txais: (8a) Huab Tais siab zoo thiab khuv leej neeg.

HUAB TAIS khuv leej thiab hlub neeg,
nws npau taws qeeb, nws muaj kev hlub puv npo
Nws tsis cem tsis yws tas mus li,
nws kuj tsis npau taws tas mus ib txhis.

Txais: (8a) Huab Tais siab zoo thiab khuv leej neeg.

Nws tsis nplua peb raws li peb tau ua txhaum,
nws tsis pauj rau peb raws li peb tau ua phem.
Npaum li lub ntuj nyob siab tshaj saum ntiaj teb,
nws kuj hlub cov neeg uas hwm nws tshaj npaum li ntawd.

Txais: (8a) Huab Tais siab zoo thiab khuv leej neeg.

As Les Lus Yas: NPN 95: 8

Txais: As les lus yas, as les lus yas.

Yog hnub no nej hnov nws lub suab,
Nej tsis txhob ua nej lub siab tawv ncauj.

Txais: As les lus yas, as les lus yas.

Ntawv Moo Zoo: MT 8: 18-22

18 Yes Xus pom tias muaj neeg coob coob tuaj ntsauv nws, ces nws kom lawv mus lawm sab ntug dej tim ub.
19 Txawm muaj ib tug kws ntawv ntshiab txav los hais rau nws tias: “ Xib Hwb, txawm koj yuav mus qhov twg los kuv yuav raws koj mus.”
20 Yes Xus hais rau nws tias: “Hma muaj hma lub qhov nkaum, cov noog saum ntuj kuj muaj lawv lub zes, hos Neeg Leej Tub twb tsis muaj chaw rau ncoo li.”
21 Muaj ib tug nyob hauv nws cov thwj tim hais rau nws tias: “Huab Tais, thov koj cia kuv mus faus kuv txiv tso.”
22 Tab sis Yes Xus hais rau nws tias: “Koj raws kuv mus, koj cia cov tuag mam li faus lawv cov tuag.”

Tim 2 lub 7 Hli 2019

Hnub Peb Lis Piam Kaum Peb Nruab Xyoo A Nruab Lis Piam Xyoo I

Zaj Nyeem Ib: HAUV PAUS 19: 15-29

15 Thaum pib kaj ntug, ob tug Tshiab rov txhib Los tias : "Koj cia li sawv ! Coj koj poj niam thiab koj ob tug ntxhais nyob ntawm no mus, tsam ib ntsis nej yuav nrog lub nroog Xos Dos Mas raug xwm txheej thiab." 16 Los tseem ua xyem xyav, ces ob tug txiv neej nthos nkaus Los tes nrog nws poj niam thiab ob tug ntxhais, vim HUAB TAIS khuv leej lawv, nkawd muab lawv cab tawm plaws rau sab nroog nraud kom lawv dim. 17 Thaum lawv tab tom tawm los txog sab nroog nraud, nkawd hais rau Los tias : "nej cia li khiav cawm nej txoj sia! Nej tsis txhob tig ntsia rov tom qab, tsis txhob theem nram tiaj, nej khiav mus nkaum lawm pem roob ces nej thiaj yuav tsis tuag !" 18 Los teb tias : "Ntshai kuv yuav tsis mus ped, HUAB TAIS ! 19 Koj twb tau saib koj tus tub txib muaj nqe thiab koj twb tau hlub kuv kawg nkaus koj thiaj cawm kuv kom kuv tseem muaj sia nyob. Tiam sis yog kuv khiav mus pem roob ces ntshai tsam kuv khiav tsis yeej ces xwm txheej xub tuaj raug kuv, ces kuv xub tuag lawm. 20 Muaj ib lub nroog nyob tsis deb tom ntej tod, khiav kuj yuav txog sai. Nws yog ib lub nroog me me xwb. Thov cia kuv mus nkaum ntawd ; vim tsuas yog ib lub nroog me me xwb puas yog? Ces kuv yuav dim muaj txoj sia. 21 HUAB TAIS teb rau Los tias : "Kuv yuav cia koj ua li koj thov, kuv yuav tsis rhuav lub nroog uas koj hais ntawd. 22 Kav tsij maj zeeg khiav mus rau ntawd. Vim tias yog koj mus tsis tau txog, mas kuv yuav ua tsis tau dab tsi ua ntej li." Vim li no lub nroog ntawd thiaj muaj lub npe hu ua Xos As. 23 Thaum lub hnub tawm plaws tuaj ci rau ntiaj teb, ces Los kuj khiav nkag plaws rau hauv Xos As.
24 Ces HUAB TAIS nchuav kiag ib co nag leej faj xyaw hluav taws poob saum ntuj los hlawv Xos Dos Mas thiab Nkos Mos Las. 25 Nws muab cov nroog thiab lub tiaj rhuav du lug nrog rau cov neeg nyob hauv cov nroog thiab tej nroj tsuag tuaj nyob saum npoo av tas huv tib si. 26 Hos Los poj niam ces nws tig ntsia rov tom qab ces nws cia li khov kiag ua ib tug ncej ntsev lawm.
27 Tag kis thaum sawv ntxov ntxov, Has Nplas Has mus nyob ntawm thaj chaw uas nws tau nrog HUAB TAIS hais lus. 28 Nws tsa muag ntsia Xos Dos Mas, Nkos Mos Las thiab tas nrho lub tiaj, nws pom pa taws ncho lug cuag li tawm hauv ib lub qhov txos tuaj.
29 Ces thiaj hais tau tias, thaum Tswv Ntuj rhuav cov nroog nram tiaj, nws nco ntsoov txog Has Nplas Has, ces nws tau npo Los dim ntawm kev puas tsuaj thaum nws rhuav cov nroog uas Los nyob.

NPN 26: 2-3, 9-10, 11-12

Txais: (3a) Huab Tais, koj txoj kev khuv leej
nyob raws ntawm kuv qhov muag.

HUAB TAIS, koj tshawb kuv, koj sim kuv mas,
Koj sim kuv tus ntsuj plig kuv lub siab mas,
Vim koj txoj kev khuv leej yeej nyob rawv ntawm kuv qhov muag;
Thiab kuv yeej taug kev nyob hauv koj txoj kev tseeb.

Txais: (3a) Huab Tais, koj txoj kev khuv leej
nyob raws ntawm kuv qhov muag.

Koj tsis txhob sau kuv tus plig mus nrog cov neeg txhaum tus plig,
tsis txhob sau kuv txoj sia mus nrog cov neeg txo luag roj ntshav txoj sia.
Lawv ob txhais tes tau ua phem,
Lawv sab tes xis tuav nyiaj xiab puv nkaus tes

Txais: (3a) Huab Tais, koj txoj kev khuv leej
nyob raws ntawm kuv qhov muag.

Tiam sis kuv taug raws kev ncaj ncees,
thov koj cawm kuv thiab khuv leej kuv.
Kuv ko taw tsuj saum qhov av tiaj;
nyob hauv cov txoos, kuv yuav cav lus zoo txog HUAB TAIS.

Txais: (3a) Huab Tais, koj txoj kev khuv leej
nyob raws ntawm kuv qhov muag.

As Les Lus Yas: NPN 130: 5

Txais: As les lus yas, as les lus yas.

Kuv tso siab rau HUAB TAIS,
kuv tus ntsuj plig tso siab rau nws lo lus.

Txais: As les lus yas, as les lus yas.

Ntawv Moo Zoo: MT 8: 23-27

23 Yes Xus nce mus hauv nkoj, cov thwj tim kuj lawv nws qab nce mus hauv thiab.
24 Ib sij huam cua daj cua dub nplawm tuaj rau hauv hiav txwv ces cov nplaim dej sawv nphau tej niag twv tuaj npog nkaus lub nkoj. Hos Yes Xus nws tsaug nws zog lawm.
25 Cov thwj tim los ntawm Yes Xus, lawv tsa nws tias : "Huab Tais, koj cawm peb mas, peb twb yuav tuag !"
26 Yes Xus hais rau lawv tias : "Vim li cas nej ntshai, ua cas nej yuav ntseeg me ua luaj ?" Ces Yes Xus sawv ntsug, nws txwv cua thiab dej ntuj, ces txhua yam cia li rov tus yees lawm.
27 Cov txiv neej ntawd yoob tas, lawv hais tias : "Tus ntawd yog leej twg ? Tab yog cua thiab dej ntuj los yeej mloog nws lus !"

Tim 3 lub 7 Hli 2019

Hnub Plaub Lis Piam Kaum Peb Nruab Xyoo C Nruab Lis Piam Xyoo I

Hwm LN Tos Mas, tus Hauv Paus Xa Lus.

Zaj Nyeem Ib: EFX 2: 19-22

Paj Lug sau ntawv tias:
19 Li ntawd, nej tsis yog ib co pej kum neeg, los ib co qhua ntxiv, nej nrog cov ntshiab koom ua neeg pej xeem, nej yog Tswv Ntuj lub tsev nyob,
20 uas txhim rau saum cov Hauv Paus Xa Lus thiab cov Yaj Saub ua taw ntsa, Yes Xus Pleev kiag ua lub pob zeb teem kaum txheem tas lub tsev.
21 Nyob hauv Leej Pleev, lub tsev txawj sib dhos zoo thiab loj hlob ua ib lub Tuam Tsev Ntshiab nyob hauv Huab Tais.
22 Nyob hauv Leej Pleev, nej kuj raug muab tsa ua ib lub tsev cia rau Tswv Ntuj nyob, nyob hauv Leej Ntuj Plig.

NPN 117: 1BC, 2

Txais: (Mas Kos 16:15) Nej mus thoob qab ntuj, nej tshaj
lub Moo Zoo rau txhua leej txhua tus.
los: As les lus yas.

Tas ib tsoom kuj cuab, nej cav lus zoo txog HUAB TAIS.
Tas ib tsoom haiv neeg, nej cav txog nws lub hwj chim.

Txais: (Mas Kos 16:15) Nej mus thoob qab ntuj, nej tshaj
lub Moo Zoo rau txhua leej txhua tus.
los: As les lus yas.

Huab Tais lub siab ua zoo rau peb nyob ruaj nreb,
nws lub siab pheej xeeb mus ib txhiab ib txhis.

Txais: (Mas Kos 16:15) Nej mus thoob qab ntuj, nej tshaj
lub Moo Zoo rau txhua leej txhua tus.
los: As les lus yas.

As Les Lus Yas: ZAM 20: 29

Txais: As les lus yas, as les lus yas.

Huab Tais hais tias: "Tos Mas, koj ntseeg vim koj pom kuv.
Cov uas tsis tau pom tab sis lawv ntseeg, mas lawv txoj hmoov zoo!"

Txais: As les lus yas, as les lus yas.

Ntawv Moo Zoo: ZAM 20: 24-29

24 Tos Mas yog ib tug hauv pab Kaum Ob, nws tseem hu ua Dis Dws Mos thiab. Thaum Yes Xus tshwm sim los, nws tsis nrog cov thwj tim nyob.
25 Lwm cov thwj tim hais rau nws tias : "Peb pom Huab Tais lawm !" Ces Tos Mas hais rau lawv tias : "Yog kuv tsis pom lub qhov ntsia hlau nyob hauv nws ob txhais tes, yog kuv tsis tau muab kuv tus ntiv tes ntxig lub qhov ntsia hlau, thiab yog kuv tsis muab kuv txhais tes ntxig ntawm nws phab tav, mas kuv tsis ntseeg."
26 Yim hnub tom qab, cov thwj tim rov nyob hauv tsev dua. Tos Mas kuj nrog lawv nyob thiab. Cov qhov rooj puav leej kaw tas. Yes Xus tawm los sawv hauv nruab nrab, nws hais rau lawv tias : "Nej nyob kaj lug !"
27 Ces Yes Xus hais rau Tos Mas tias : "Cev koj ntiv tes rau ntawm no, koj ntsia kuv ob txhais tes saib. Cev koj txhais tes los, muab ntxig rau hauv kuv phab tav. Koj txhob ua neeg tsis ntseeg ntxiv, koj ntseeg mog." 28 Tos Mas teb rau Yes Xus tias : "Kuv tus Huab Tais, Kuv tus Tswv Ntuj." 29 Yes Xus hais rau Tos Mas tias : "Vim koj pom kuv, mas koj thiaj ntseeg, puas yog? Cov uas tsis tau pom tab sis lawv ntseeg, mas lawv txoj hmoov zoo."

Tim 4 lub 7 Hli 2019

Hnub Tsib Lis Piam Kaum Peb Nruab Xyoo C Nruab Lis Piam Xyoo I

Zaj Nyeem Ib: HAUV PAUS 22: 1B-19

1 Tswv Ntuj xav sim Has Nplas Has siab, nws hu tias : "Has Nplas Has !" Has Nplas Has teb tias : "Kuv nyob ntawm no !" 2 Tswv Ntuj hais tias : "Coj koj leej tub twm zeej His Xas Has uas koj hlub kawg nkaus, koj coj nws mus kom txog lub teb chaws Mos Lis Yas. Nyob ntawd koj yuav muab nws txi rau kuv saum ib lub roob uas kuv yuav qhia rau koj." 3 Tag kis, Has Nplas Has sawv ntxov ntxov los, nws nog nra rau nws tus luj, nws coj ob tug tub txib thiab nws tus tub His Xas Has nrog nws mus. Nws phua ib co taws npaj mus ua thaj txi ntuj, ces nws sawv kev mus rau thaj chaw uas Tswv Ntuj qhia rau nws.
4 Hnub peb, Has Nplas Has tsa muag ntsia pom thaj chaw ntawd tseem nyob deb. 5 Has Nplas Has hais rau nws ob tug tub txib tias : "Neb nrog tus luj nyob ntawm no. Kuv thiab kuv tus tub wb yuav mus ntxiv, wb yuav mus pe hawm Ntuj, ces wb mam rov los ntawm neb." 6 Has Nplas Has muab cov taws txi Ntuj nog rau nws tus tub His Xas Has ris, hos nws nqa cov hluav taws thiab rab riam, ces nkawd ob leeg ua ke mus. 7 His Xas Has nug nws txiv Has Nplas Has tias : "Kuv txiv !" Has Nplas Has teb tias : "Had, me tub!" His Xas Has hais ntxiv tias : "Ua cas pom hluav taws thiab cov taws xwb, ua li tus yaj yuav coj los hlawv txi Ntuj ne nyob qhov twg ?" 8 Has Nplas Has teb tias : "Me tub, Tswv Ntuj mam li muab tus yaj uas yuav txi Ntuj rau wb." Ces nkawd ob leeg taug kev mus ntxiv.
9 Thaum nkawd tuaj txog thaj chaw uas Tswv Ntuj tau qhia nws lawm, Has Nplas Has tsa ib lub thaj rau ntawd thiab nws muab cov taws mus teeb rau saud. Nws muab nws tus tub His Xas Has pav, ces nws muab tso rau saum lub thaj txi Ntuj saum cov taws . 10 Has Nplas Has tsa tes mus nthos rab riam yuav coj los tua nws tus tub. 11 Tiam sis HUAB TAIS tus Tshiab hu saum ntuj tuaj rau nws tias : "Has Nplas Has ! Has Nplas Has !" Has Nplas Has teb tias : "Kuv nyob ntawm no !" 12 Tus Tshiab hais tias : "Txhob tsa koj txhais tes rau saum tus me nyuad ! Txhob ua dab tsi phem rau nws ! Zaum no kuv paub hais tias koj hwm Tswv Ntuj tiag, vim koj tsis yig, koj tseem muab koj leej tub twm zeej los txi rau kuv."
13 Has Nplas Has tsa muag ntsia pom ib tug laug tshis uas ob tug kub daig hauv ib koog pos nyob tom nws qub qab. Ces nws mus muab tus laug tshis los hlawv txi Ntuj hloov nws tus tub chaw. 14 Has Nplas Has tis npe rau thaj chaw ntawd hu ua qhov chaw "HUAB TAIS mam muab.” Ces zaum no thiaj muaj lo lus hais kam tias "Saum lub roob HUAB TAIS mam muab." 15 HUAB TAIS tus Tshiab rov hu zaum ob saum ntuj tuaj rau Has Nplas Has, 16 nws hais tias : "HUAB TAIS hais tias : Kuv tuav txog kuv lub npe cog lus rau koj tias : vim koj tau ua li ntawd, koj tsis yig, koj tuaj yeem muab koj leej tub, uas yog koj tib leeg tub los txi rau kuv, 17 mas kuv yuav foom hmoov zoo ntau rau koj, kuv yuav ua kom koj tsoom xeeb leej xeeb ntxwv coob npaum cov hnub qub saum ntuj thiab ntau npaum cov xuab zeb uas nyob ntawm ntug hiav txwv. Koj tsoom xeeb leej xeeb ntxwv yuav ua tswv kav lawv cov yeeb ncuab tej qhov rooj loog. 18 Tas txhua haiv neeg nyob ntiaj teb yuav tau txais txoj koob hmoov zoo nyob hauv koj tsoom xeeb leej xeeb ntxwv, vim koj tau mloog kuv lus."
19 Has Nplas Has rov qab los txog ntawm nws ob tug tub txib, ces lawv sawv kev ua ke rov los rau Npes Xas Npes uas yog qhov chaw Has Nplas Has tsa nws lub tsev nyob.

NPN 115: 1-2, 3-4, 5-6, 8-9

Txais: (116:9) Kuv yuav taug kev nyob ntawm Huab Tais xub ntiag,
Hauv cov neeg ciaj lub teb chaws.

HUAB TAIS, txhob pub kom peb nto koob meej,
tab sis thov ua kom koj lub npe nto koob meej,
vim koj siab zoo, vim koj yog qhov tseeb.
Vim li cas thiaj ua kom cov kuj cuab tau kev hais tias :
"Lawv tus Tswv Ntuj nyob qhov twg ?"

Txais: (116:9) Kuv yuav taug kev nyob ntawm Huab Tais xub ntiag
Hauv cov neeg ciaj lub teb chaws.

Peb tus Tswv Ntuj nyob txheej ntuj saud ;
nws ua tau tas ib puas tsav yam nws xav ua.
Lawv cov mlom dab yog nyiaj yog kub,
yog neeg ob txhais tes puab xwb.

Txais: (116:9) Kuv yuav taug kev nyob ntawm Huab Tais xub ntiag
Hauv cov neeg ciaj lub teb chaws.

Cov mlom muaj qhov ncauj, tab sis tsis txawj hais lus ;
lawv muaj qhov muag, tab sis tsis pom kev.
Lawv muaj pob ntseg, tab sis tsis hnov lus ;
awv muaj qhov ntswg, tab sis tsis hnov ntxhiab ;

Txais: (116:9) Kuv yuav taug kev nyob ntawm Huab Tais xub ntiag
Hauv cov neeg ciaj lub teb chaws.

Cov puab mlom yuav zoo ib yam li lawv cov mlom,
Txhua tus tso siab rau cov mlom yuav zoo ib yam li lawv.
His Xas Lais cov tub tso siab rau HUAB TAIS,
Nws yog tus pab lawv, yog daim leem phiaj thaiv lawv.

Txais: (116:9) Kuv yuav taug kev nyob ntawm Huab Tais xub ntiag
Hauv cov neeg ciaj lub teb chaws.

As Les Lus Yas: 2 KLN 5: 19

Txais: As les lus yas, as les lus yas.

Tswv Ntuj ua kom lub ntiaj teb nrog nws rov sib raug zoo nyob hauv Leej Pleev,
nws tso cov lus pab kom neeg nrog nws rov sib raug zoo rau peb muab tshaj tawm.

Txais: As les lus yas, as les lus yas.

Ntawv Moo Zoo: MT 9: 1-8

1 Yes Xus nce mus hauv nkoj, nws hla dej nws rov los txog lub nroog nws nyob.
2 Thaum ntawd, neeg nqa ib tug tuag ceg pw saum ib lub txaj tuaj rau Yes Xus. Yes Xus pom lawv ntseeg, nws hais rau tus tuag ceg tias : "Me tub, koj tso siab mog ! Koj cov txhaum daws tas lawm."
3 Thaum ntawd, muaj ob peb tug Kws Ntawv Ntshiab xav twj ywm hauv nruab siab tias : ‘Tus neeg ntawd thuam Ntuj.’ 4 Tab sis Yes Xus paub qhov lawv xav, nws hais tias : "Vim li cas nej xav tej yam phem rau nruab siab ?
5 Lo lus twg hais yooj yim dua, puas yog lo tias : 'Koj cov txhaum daws tas lawm,' los yog lo tias: 'Koj sawv tsees mus kev ?' 6 Kom nej paub tias Neeg Leej Tub muaj lub hwj huam daws txhaum tau nyob ntiaj teb no," ces Yes Xus hais rau tus tuag ceg tias : "Koj sawv, koj nqa koj lub txaj, koj rov mus tsev".
7 Ces tus tuag ceg sawv thiab nws rov mus tsev lawm.
8 Tsoom sid pom li ntawd, sawv daws qhuas kawg. Lawv cav txog Tswv Ntuj vim nws pub lub hwj huam loj npaum li no rau tib neeg.

Tim 5 lub 7 Hli 2019

Thawj Hnub Rau Lis Piam Kaum Peb Nruab Xyoo C Nruab Lis Piam Xyoo I

Hwm LN Anthony Zaccaria; hwm LN Elizabeth nyob Portugal

Zaj Nyeem Ib: HP 23: 1-4, 19; 24: 1-8, 62-67

1 Xas Las ua neej ntev txog ib puas nees nkaum xya xyoo. 2 Ces nws tuag nyob Kis Lis Yas As Npas uas yog Hes Nploos, nyob teb chaws Kas Nas Has. Has Nplas Has ua nws lub ntees thiab quaj nyiav nws nyob ntawd. 3 Ces Has Nplas Has tso nws tus tuag tseg, nws mus hais rau Hes cov tub tias : 4 "Kuv yog ib tug pej kum neeg ua qhua tuaj poob rau hauv nej. Kuv thov nej muag ib qho chaw rau kuv kom kuv tau coj kuv tus tuag mus zais."
19 Ces Has Nplas Has coj Xas Las nws poj niam mus los rau hauv lub qhov tsua hauv daim teb Mas Pes Las, nyob ntawm Mas Nples sab hnub tuaj, uas yog Hes Nploos, hauv teb chaws Kas Nas Has.
24 1 Thaum ntawd Has Nplas Has laus laus muaj hnub nyoog nchav lawm thiab HUAB TAIS tau foom hmoov zoo rau Has Nplas Has nyob hauv txhua yam tib si lawm. 2 Ces Has Nplas Has hais rau nws tus tub txib uas laus dua cov nyob hauv nws tsev, thiab yog tus saib tas nws lub cuab tam huv si tias : 3 "Koj cev tes npuab kuv sab qab ncej puab, kuv yuav kom koj tuav txog HUAB TAIS tus Tswv Ntuj kav lub ntuj thiab lub ntiaj teb los cog lus tias koj yuav tsis nrhiav ib tug poj niam nyob hauv cov neeg Kas Nas Has uas kuv nrog lawv nyob los rau kuv tus tub yuav. 4 Tiam sis koj yuav mus pem kuv lub teb chaws, mus xaiv ib tug poj niam nyob hauv kuv tsev neeg coj los rau kuv tus tub His Xas Has yuav." 5 Tus tub txib nug tias : "Ntshai tsam tus poj niam ntawd tsis kam nrog kuv los nyob teb chaws no ne? Kuv puas yuav tsum coj koj tus tub mus lawm pem lub teb chaws uas koj tawm los lawm?" 6 Has Nplas Has teb tias : "Koj yuav ceev faj tsis txhob coj kuv tus tub rov mus rau ped. 7 HUAB TAIS, tus Tswv lub ntuj thiab lub ntiaj teb, nws tau coj kuv mus deb kuv txiv lub tsev thiab deb kuv tsev neeg lub teb chaws, thiab nws tau cog lus rau kuv tias: “Kuv yuav muab lub teb chaws no rau koj cov xeeb leej xeeb ntxwv nyob,” tus HUAB TAIS ntawd yuav xa nws tus Tshiab mus ua koj ntej, ces koj yuav coj tau ib tug poj niam nyob ped los rau kuv tus tub. 8 Yog tus poj niam tsis kam nrog koj los, mas koj yuav tsis ua txhaum rau lo lus koj cog no li, tab sis koj tsis txhob coj kuv tus tub mus kiag li."
62 Lub caij ntawd His Xas Has rov tom lub qhov dej Las Hais Luas rov los, thiab nws nyob hauv lub teb chaws Nes Zes. 63 Yav tsaus ntuj, nws tawm mus ncig ua si nraum cov nras teb, nws tsa muag ntsia pom ib co ntxhuav tuaj txog ze lawm. 64 Les Npes Kas kuj tsa muag ntsia pom His Xas Has thiab. Nws nqes plhuav saum tus ntxhuav los rau hauv av. 65 Nws nug tus tub txib hais tias : "Tus txiv neej uas taug kev tuaj tos peb ntawd yog leej twg ?" Tus tub txib teb tias : "Yog kuv tus tswv." Ces Les Npes Kas muab nws txoj phuam los khwb nws taub hau. 66 Tus tub txib piav tas puas tsav yam txog txoj hauj lwm nws tau mus ua rau His Xas Has mloog. 67 Ces His Xas Has coj Les Npes Kas los nyob hauv nws niam Xas Las lub tsev tsam phooj. Nws yuav Les Npes Kas ua nws poj niam. Nws nyiam Les Npes Kas thiab nws muaj kev nplig siab, ces nws tsis nco nws niam heev lawm.

NPN 106: 1B-2, 3-4A, 4B-5

Txais: (1b) Nej cav lus zoo ua Huab Tais tsaug vim nws siab z0o.

Nej cav lus zoo ua HUAB TAIS, vim nws siab zoo,
nws khuv leej neeg mus li ib txhiab ib txhis.
Leej twg yuav piav tau HUAB TAIS lub hwj huam loj,
Los hais tau tas puas tsav yam lus cav txog nws?

Txais: (1b) Nej cav lus zoo ua Huab Tais tsaug vim nws siab z0o.

Cov tau hmoov zoo yog cov neeg tsom txoj kev ncaj taug,
Yog cov ua raws txoj kev haum pheej tas mus li.
HUAB TAIS, thov koj nco txog peb vim koj hlub koj haiv neeg.

Txais: (1b) Nej cav lus zoo ua Huab Tais tsaug vim nws siab z0o.

Thov koj tuaj xyuas kuv tuaj pab cawm kuv,
Kom kuv tau pom koj cov xaiv txoj kev vam meej,
Kom kuv lub siab kaj vim koj haiv neeg txoj kev zoo siab,
Kom kuv tau koob meej nrog koj lub cuab tam.

Txais: (1b) Nej cav lus zoo ua Huab Tais tsaug vim nws siab z0o.

As Les Lus Yas: MT 11: 28

Txais: As les lus yas, as les lus yas.

Huab Tais hais tias: Tas nej sawv daws uas nej khwv
thiab ris nra hnyav, nej tuaj cuag kuv, Kuv yuav cia nej so los siav.

Txais: As les lus yas, as les lus yas.

Ntawv Moo Zoo: MT 9: 9-13

9 Yes Xus tawm mus, thaum nws tab tom taug kev, nws pom ib tug neeg zaum ntawm lub rooj sau se. Tus ntawd hu ua Mas Tais. Yes Xus hais rau nws tias : "Koj raws kuv mus !" Ces tus neeg ntawd sawv tsees raws Yes Xus mus.
10 Thaum Yes Xus zaum noj mov hauv (Mas Tais) tsev, muaj ib co neeg sau se thiab ib co neeg txhaum coob coob tuaj nrog Yes Xus thiab nws cov thwj tim noj mov. 11 Cov Fas Lis Xais pom li ntawd, lawv hais rau cov thwj tim tias : "Vim li cas nej tus Xib Hwb nrog cov sau se thiab cov neeg txhaum noj mov ?" 12 Yes Xus twb hnov lawm, nws thiaj hais tias : "Cov neeg noj qab nyob zoo tsis yog cov yuav vam txog kws kho mob, tiam sis cov neeg mob yog cov yuav vam txog. 13 Nej yuav kawm lo lus no lub ntsiab cia : 'Qhov kuv xav yuav yog txoj kev khuv leej, tsis yog thaj txi Ntuj.' Vim kuv tsis tuaj hu cov neeg ncaj, kuv tuaj hu cov neeg txhaum."

Tim 6 lub 7 Hli 2019

Thawj Hnub Xya Lis Piam Kaum Peb Nruab Xyoo C Nruab Lis Piam Xyoo I

Hwm LN Maria Goretti

Zaj Nyeem Ib: HP 27: 1-5, 15-29

1 Thaum His Xas Has laus laus, qhov muag tsis pom kev lawm, nws hu nws tus tub hlob Es Xas Ws los, nws hais tias : "Me tub !" Tus tub teb tias : "Kuv txiv !" 2 His Xas Has hais ntxiv tias : "Kuv laus laus lawm, kuv tsis paub hnub kuv yuav tuag. 3 Koj nqa koj cov twj tua nqaij, koj rab hneev thiab lub raj xub, koj mus yos tua nqaij los rau kuv noj. 4 Koj ua ib roog qav raws li kuv xis rau kuv noj, ces kuv yuav foom hmoov zoo rau koj tso kuv mam tuag.” 5 Les Npes Kas hnov ntsoov His Xas Has hais li ntawd rau Es Xas Ws. Ces thaum Es Xas Ws mus tua nqaij rau nruab tsuag lawm,
15 Les Npes Kas thiaj li muab Es Xas Ws nws tus tub hlob cov khaub ncaws zoo tshaj uas nyob hauv tsev rau nws tus tub ntxawg Yas Kos hnav. 16 Nws muab cov tawv me nyuam tshis los qhwv Yas Kos ob txhais caj npab thiab lub caj dab uas tsis tuaj plaub. 17 Ces nws muab tais nqaij thiab phaj mov uas nws npaj tau rau Yas Kos nqa. 18 Yas Kos thiaj mus cuag nws txiv, nws hais tias : "Kuv txiv." Nws txiv hais tias : "Kuv nyob ntawm no os, me tub, koj yog leej twg ?" 19 Yas Kos teb nws txiv tias : "Kuv yog koj tus tub hlob Es Xas Ws. Kuv twb ua tau tas raws li koj hais lawm. Koj sawv los zaum noj cov nqaij kuv tau mus tua, kom koj tau foom hmoov zoo rau kuv." 20 His Xas Has hais rau nws tus tub Yas Kos tias : "Ua cas koj ntsib nqaij sai ua luaj !" Yas Kos teb tias : "Yog vim koj tus HUAB TAIS Tswv Ntuj pab kuv." 21 His Xas Has thiaj hais rau Yas Kos tias : "Txav los ntawm no, kuv xuas koj saib koj puas yog kuv tus tub Es Xas Ws tiag." 22 Yas Kos thiaj txav los rau nws txiv His Xas Has xuas nws. Nws txiv hais tias : "Lub suab yog Yas Kos lub, tab sis ob sab npab no yog Es Xas Ws ob sab !" 23 His Xas Has zeem tsis tau tias yog Yas Kos vim ob txhais npab tuaj plaub li Es Xas Ws li ces His Xas Has thiaj foom hmoov zoo rau Yas Kos. 24 Nws hais tias : "Koj puas yog kuv tus tub Es Xas Ws tiag ?" Yas Kos teb tias : "Yog tiag." 25 Ces His Xas Has hais tias : "Cev phaj rau kuv noj kuv tus tub cov nqaij saib, kuv yuav foom hmoov zoo rau koj." Yas Kos cev nqaij rau nws txiv noj, cev cawv rau nws txiv haus tas. 26 Nws txiv hais tias : "Me tub txav los ntawm no los nwj kuv saib." 27 Yas Kos txav mus nwj nws txiv. Nws txiv tau hnia nws tus tub cov khaub ncaws tus ntxhiab, ces nws foom hmoov li no : "Kuv me tub tus ntxhiab yog tsw zoo li ib daim teb av zoo uas HUAB TAIS tau foom hmoov zoo rau lawm. 28 Thov kom Tswv Ntuj tso lwg los rau koj, thiab pub cov av zoo rau koj, pub nplej, pub cawv haus tsis tag noj tsis qig rau koj. 29 Kom cov haiv neeg tsob hwb koj, kom cov teb chaws pe koj. Koj yuav yog ib tug thawj coj ntawm koj cov kwv tij, koj niam cov tub yuav khoov pe koj. Leej twg foom phem rau koj, mas nws yuav raug hmoov phem. Leej twg foom hmoov zoo rau koj, mas nws yuav tau txoj hmoov zoo !"

NPN 135: 1B-2, 3-4, 5-6

Txais: (3a) Nej cav txog Hiab Tais vim Huab Tais siab zoo.

Nej cav txog HUAB TAIS lub npe,
HUAB TAIS cov tub txib, nej cav txog nws.
Nej uas sawv nyob hauv HUAB TAIS tsev,
nej uas nyob hauv peb tus Tswv Ntuj cov tshav loog,

Txais: (3a) Nej cav txog Hiab Tais vim Huab Tais siab zoo.

Nej cav txog HUAB TAIS vim Huab Tais siab zoo!
Nej hu nkauj cav txog nws lub npe uas ntxim nyiam tas nrho,
Vim HUAB TAIS tau xaiv Yas Kos ua nws li,
Tau xaiv His Xas Lais ua nws teej tug.

Txais: (3a) Nej cav txog Hiab Tais vim Huab Tais siab zoo.

Kuv yeej paub tias HUAB TAIS loj tas nrho;
peb tus HUAB TAIS loj dua tas ib tsoom tswv ntuj.
HUAB TAIS ua tas puas tsav yam raws nws siab xav,
nyob saum ntuj thiab nyob ntiaj teb no,
nyob hauv dej ntuj thiab hauv tej qab thu hiav txwv tob.

Txais: (3a) Nej cav txog Hiab Tais vim Huab Tais siab zoo.

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias: Kuv cov yaj mloog kuv lub suab;
kuv paub lawv thiab lawv raws nraim kuv qab mus.

Txais: As les lus yas, as les lus yas.

Ntawv Moo Zoo: MT 9: 14-17

14 Zam cov thwj tim tuaj cuag Yes Xus, lawv hais tias : "Peb yoo mov, cov Fas Lis Xais kuj yoo. Vim li cas koj cov thwj tim tsis yoo ?"
15 Yes Xus teb lawv tias : “Thaum nraug vauv tseem nrog nws cov phooj ywg nyob, mas lawv puas ntoo xyom ? Muaj ib hnub, thaum luag coj nraug vauv mus lawm, mas lawv mam li yuav yoo mov.
16 Tsis muaj leej twg ntxiv ib daim ntaub tshiab rau ib lub qub tsho. Vim daim ntaub ntawd yuav nqws thiab rub lub qub tsho, ces haj yam yuav ntuag loj.
17 Luag kuj tsis xuas hnab tawv qub los ntim cov cawv tshiab thiab ; vim cov hnab tawv qub yuav tawg, ces cawv yuav txeej tas, cov hnab kuj yuav puas tas. Luag thiaj li muab cov cawv tshiab ntim hauv cov hnab tshiab, cov hnab thiab cov cawv thiaj yuav kav ntev.”

Tim 8 lub 7 Hli 2019

Hnub Ob Lis Piam Kaum Plaub Nruab Xyoo C Nruab Lis Piam Xyoo

Zaj Nyeem Ib: HP 28: 10-22A

10 Yas Kos tso Npes Xas Npes teb tseg, nws sawv kev mus rau Has Laas teb. 11 Thaum nws mus txog ib qho chaw, hnub twb poob qho lawm, nws thiaj pw ib hmos ntawd. Nws khaws ib lub pob zeb nyob ntawd los rau ncoo, nws pw tsaug zog nyob ntawd. 12 Nws ua ib zag npau suav : Nws pom ib tug ntaiv, tus taw txhos rau hauv ntiaj teb, lub ntsis mus nto saum ntuj, hos Tswv Ntuj ib co Tshiab nce thiab nqes mus mus los los ntawm tus ntaiv. 13 Ces Yas Kos pom HUAB TAIS sawv saum ntsis ntaiv thiab hais tias : "Kuv yog HUAB TAIS, kuv yog koj txiv Has Nplas Has tus Tswv Ntuj, thiab yog His Xas Has tus Tswv Ntuj. Thaj av uas koj tau los pw no, kuv yuav muab rau koj thiab rau koj tsoom xeeb leej xeeb ntxwv. 14 Koj tsoom xeeb leej xeeb ntxwv yuav coob npaum li cov hmoov av nyob saum npoo ntiaj teb. Koj yuav nyob puv ntia mus rau sab hnub tuaj sab hnub poob, mus rau sab qaum teb sab qab teb huv tib si. Tas txhua haiv neeg hauv ntiaj teb yuav tau txais txoj hmoov zoo vim koj thiab koj tsoom xeeb leej xeeb ntxwv. 15 Kuv yuav nrog koj nraim, txawm koj yuav mus qhov twg los kuv yuav saib xyuas koj, thiab kuv yuav coj koj rov los nyob hauv lub teb chaws no. Kuv yuav tsis tso koj pov tseg mus txog thaum kuv tau ua raws li kuv tau cog lus rau koj tiav tas lawm." 16 Yas Kos tsim dheev nruab dab ntub los, nws hais tias : "HUAB TAIS nyob ntawm thaj chaw no tiag tiag, tiam sis kuv tsis paub li!" 17 Yas Kos ntshai, ces nws hais tias : "Thaj chaw no muaj hwj xyeej kawg nkaus ! Yeej yog Tswv Ntuj lub tsev nyob thiab yog lub rooj ntug ntag !"
18 Yas Kos sawv ntxov ntxov los, nws muab lub pob zeb uas nws siv ua hauv ncoo los teeb ua pej thuam, nws hliv roj ywg lub ntsis saud. 19 Nws tis npe rau thaj chaw ntawd hu ua Npes Thes. Hos yav thaud, mas lub nroog hu ua Lwv no. 20 Yas Kos fiv yeem zoo li no : "Yog Tswv Ntuj nrog nraim kuv thiab saib xyuas kuv ntawm txoj kev uas kuv taug no, yog nws pub mov rau kuv noj, pub ris tsho rau kuv hnav, 21 yog kuv rov los txog kuv txiv tsev tsis raug xwv txheej dab tsi, mas HUAB TAIS yuav ua kuv tus Tswv Ntuj, 22 hos daim pob zeb uas kuv muab teeb ua pej thuam no yuav yog Tswv Ntuj lub tsev."

NPN 91: 1-2, 3-4A, 14-15AB

Txais: (2b) Kuv tus Tswv Ntuj, kuv tso siab lug rau koj.

Tus uas tsa tsev rau hauv tus Nyob Siab lub chaw nkaum,
Tus uas nraim hauv tus Muaj Hwj Huam tus duab ntxoov ntxoo,
Koj hais rau HUAB TAIS tias : "Koj yog kuv lub chaw nkaum, kuv lub yeej ntsa zeb,
Koj yog kuv tus Tswv Ntuj : kuv tso siab lug rau koj!"

Txais: (2b) Kuv tus Tswv Ntuj, kuv tso siab lug rau koj.

Nws yog tus npo koj dim ntawm tus cuab noog lub vas,
tus cawm koj ntawm tus mob aws tsis txuag siav.
Nws muab nws ob phab tis los vov koj.
Koj cia li khiav los nkaum hauv nws lub qab tis.

(2b) Kuv tus Tswv Ntuj, kuv tso siab lug rau koj.

Vim nws dai rau kuv ruaj nreb, mas kuv yuav cawm nws,
Kuv yuav muab nws txawb rau qhov chaw siab
vim nws zeem paub kuv lub npe.
Nws yuav hu txog kuv ces kuv yuav teb nws;
thaum nws txom nyem, kuv yuav nrog nws nyob.

(2b) Kuv tus Tswv Ntuj, kuv tso siab lug rau koj.

As Les Lus Yas: 2 TM 1: 10

Txais: As les lus yas, as les lus yas.

Yes Xus Pleev tus Cawm Peb tau rhuav txoj kev tuag pov tseg
thiab ua kom txoj sia nyob mus li tawm tuaj nyob hauv lub Moo Zoo.

Txais: As les lus yas, as les lus yas.

Ntawv Moo Zoo: MT 9: 18-26

18 Thaum Yes Xus tseem tab tom hais lus rau lawv, muaj ib tug nom tuaj txog, nws txhos caug ntua ntawm Yes Xus, nws thov tias : "Kuv tus ntxhais txoj sia nyuam qhuav tu nrho. Thov koj tuaj tsa tes rau saum nws, ces nws yuav rov muaj txoj sia." 19 Yes Xus sawv, cov thwj tim nrog Yes Xus lawv tus nom qab mus. 20 Muaj ib tug poj niam tsob ntshav tau kaum ob xyoos lawm, nws txav los ze ntawm Yes Xus nraub qaum, nws kov Yes Xus lub tw tsho. 21 Vim nws xav hauv siab tias : ‘Tsuav yog kuv kov tau nws lub tsho xwb, mas kuv yuav dim.’ 22 Yes Xus tig ntsia, nws pom tus poj niam, ces nws hais rau tus poj niam tias : "Me ntxhais, koj tso siab mog ! Koj lub siab ntseeg cawm koj lawm." Tus poj niam cia li dim plaws ntawm tus mob txij ntawd los lawm.
23 Thaum Yes Xus tuaj txog tus nom lub tsev, nws pom cov txiv tshuab raj thiab pom neeg coob coob ua ntxhov hnyo, Yes Xus hais tias : 24 "Nej tawm mus. Tus me ntxhais tsis tuag, nws tsaug zog xwb." Sawv daws luag Yes Xus. 25 Thaum lawv ntiab cov neeg tawm mus tas, Yes Xus chaws mus hauv, nws tuav tus me ntxhais txhais tes, ces tus me ntxhais sawv los. 26 Lub moo ntawd nrov mus thoob lub teb chaws ntawd.

Tim 9 lub 7 Hli 2019

Hnub Peb Lis Piam Kaum Plaub Nruab Xyoo C Nruab Lis Piam Xyoo I

Hwm LN Augustine Zhao Rong thiab cov…, tuag ua Tim Khawv

Zaj Nyeem Ib: HP 32: 23-33

23 Tib hmos ntawd, Yas Kos sawv, nws coj nws ob tug poj niam, nws ob tug ntxhais txib, thiab nws kaum ib tug me nyuam, lawv hla tus dej Yas Npos ntawm qhov chaw ntiav zoo hla. 24 Nws coj lawv hla tus dej, thiab coj tas puas tsav yam uas nws muaj nrog lawv hla dej mus rau sab tid tas, 25 tshuav Yas Kos tib leeg nyob xwb. Hmo ntawd, muaj ib tug txiv neej nrog Yas Kos sib ntsuas zog ib hmos kaj ntug plaws. 26 Nws pom tias nws kov tsis yeej Yas Kos, ces nws ntaus Yas Kos lub qij txha ntawm ntsag, ua rau lub qij txha ntawd qis kiag. 27 Nws hais rau Yas Kos tias : "Koj tso kuv, twb kaj ntug lawm." Tiam sis Yas Kos teb tias : "Yog koj tsis foom hmoov zoo rau kuv mas kuv tsis tso koj li." 28 Tus txiv neej ntawd nug tias : "Koj hu li cas?" Yas Kos teb tias : " Yas Kos." 29 Nws hais ntxiv tias : "Koj yuav tsis hu ua Yas Kos ntxiv lawm, koj yuav hu ua His Xas Lais, vim koj muaj zog tiv tau Tswv Ntuj thiab tiv tau neeg, thiab koj yeej lawm." 30 Yas Kos thov tias : "Thov koj qhia koj lub npe rau kuv." Tiam sis tus ntawd teb tias : "Vim li cas koj thiaj xav paub kuv lub npe ?" Ib txhij ntawd nws foom hmoov zoo rau Yas Kos. 31 Yas Kos thiaj tis npe rau thaj chaw ntawd hu ua Pes Nws Es, nws hais tias : "Vim kuv tau pom Tswv Ntuj tim ntsej tim muag, tsis kav kuv txoj sia tseem nyob." 32 Thaum hnub tuaj, Yas Kos ncaim ntawm Pes Nws Es mus. Nws deeg pauv mus kev, vim nws lub ntsag qis lawm. 33 Yog vim li no cov His Xas Lais thiaj caiv tsis noj cov leeg nqaij ntawm ntsag uas tuav lub pob qij txha ntawm ncej puab los txog niaj hnub no, vim Huab Tais ntaus Yas Kos lub qij txha ntawm cov leeg nqaij ntawm ntsag.

NPN 17: 1BCD, 2-3, 6-7AB, 8B+15

Txais: (15a) Nyob hauv txoj kev ncaj, kuv yuav pom koj lub ntsej muag, Huab Tais.

HUAB TAIS, thov koj mloog ib zag lus kom plaub ncaj ncees;
Koj cuab pom ntseg rau kuv lub suab quaj,
Koj tig ntsej los rau kuv lo lus thov vim kuv di ncauj tsis hais lus dag.

Txais: (15a) Nyob hauv txoj kev ncaj, kuv yuav pom koj lub ntsej muag, Huab Tais.

Cia koj ua tus txiav txim rau kuv,
Vim koj qhov muag thiaj pom qhov ncaj!
koj sim kuv siab, koj tuaj xyuas kuv thaum hmo ntuj;
koj sim kuv nyob hauv hluav taws,
tiam sis koj yuav tsis pom dab tsi phem nyob hauv kuv.

Txais: (15a) Nyob hauv txoj kev ncaj, kuv yuav pom koj lub ntsej muag, Huab Tais.

Tswv Ntuj, kuv hu txog koj, vim koj yeej yuav teb kuv;
thov koj qaij pob ntseg los rau kuv, thiab mloog kuv lo lus.
Thov qhib koj lub siab hlub loj rau peb pom,
koj yog tus cawm cov uas khiav mus deb ntawm lawv cov yeeb ncuab.

Txais: (15a) Nyob hauv txoj kev ncaj, kuv yuav pom koj lub ntsej muag, Huab Tais.

Thov koj txuag kuv nyob hauv koj phab tis qhov ntxoov,
Kuv yeej yuav tau pom koj lub ntsej muag nyob hauv txoj kev ncaj.
Kuv tsim dheev los, kuv yuav zoo siab hlo tau nyob ze ntawm koj.

Txais: (15a) Nyob hauv txoj kev ncaj, kuv yuav pom koj lub ntsej muag, Huab Tais.

As Les Lus Yas: ZAM 10: 14

Txais: As les lus yas, as les lus yas.

Huab Tais hais tias: Kuv yog tus zoo tswv zov yaj,
kuv paub kuv cov yaj, kuv cov yaj paub kuv.

Txais: As les lus yas, as les lus yas.

Ntawv Moo Zoo: MT 9: 32-38

32 Thaum lawv tawm mus, luag coj ib tug neeg nplaig txhav uas raug ib tug dab tuaj cuag Yes Xus. 33 Yes Xus ntiab tus dab tawm, ces tus neeg nplaig txhav cia li hais lus tau. Tas tsoom sid qhuas kawg, lawv hais tias : "Tsis tau muaj dua tej yam zoo li ntawd tshwm sim hauv haiv His Xas Lais ib zaug li." 34 Tab sis cov Fas Lis Xais hais tias : "Nws hu txog tus Tuam Thawj dab tuaj ntiab cov dab."
35 Yes Xus mus ncig txhua cov nroog thiab txhua cov zos huv si, nws qhia sawv daws nyob hauv cov tsev txoos, nws tshaj lub Moo Zoo txog Ntuj lub Ceeb Tsheej, nws tseem kho sawv daws tej txiab xeeb thiab tej mob nkeeg tas huv si. 36 Yes Xus pom tsoom pej xeem, nws hlub lawv, vim lawv sawv daws ceeb laj thiab qaug zog zoo li ib co yaj tsis muaj tswv zov. 37 Yes Xus thiaj hais rau nws cov thwj tim tias : "Qoob loo ntau kawg, tab sis cov tub zog tsawg. 38 Nej thov tus Tswv qoob kom nws xa ib co tub zog tawm tuaj mus sau nws cov qoob."

Tim 10 lub 7 Hli 2019

Hnub Plaub Lis Piam Kaum Plaub Nruab Xyoo C Nruab Lis Piam Xyoo I

Zaj Nyeem Ib: HP 41: 55-57; 42: 5-7A, 17-24A

55 Thaum ntawd muaj kev tshaib plab nyob thoob Hais Nkws Tos teb, ces cov pej xeem tuaj quaj thov mov noj ntawm Fas Las Oos. Fas Las Oos hais rau cov neeg Hais Nkws Tos tias : "Nej mus cuag Yos Xes, nws hais dab tsi rau nej, mas nej ua li ntawd." 56 Vim tas teb chaws tshaib plab, ces Yos Xes qhib cov txhab nplej nyob qhov txhia chaw, thiab muag mov rau cov Hais Nkws Tos sawv daws, vim muaj kev tshaib plab loj nyob teb chaws Hais Nkws Tos. 57 Tas ntiaj teb sawv daws kuj tuaj Hais Nkws Tos teb tuaj muas nplej ntawm Yos Xes, vim tas ntiaj teb tshaib plab loj.
42 5 Ces His Xas Lais cov tub thiaj tuaj mus muas nplej, lawv nrog sawv daws tuaj, vim nyob Kas Nas Has teb, muaj kev tshaib plab loj thiab. 6 Yos Xes yog tus tuav lub teb chaws, nws yog tus muag nplej rau sawv daws. Yos Xes cov tij laug tuaj txog, lawv khoov ti av pe Yos Xes. 7 Thaum Yos Xes pom nws cov tij laug, nws rov paub lawv tam sim ntawd. Tab sis nws ua txuj tsis paub lawv thiab hais lus nchav nchav rau lawv.
17 Yos Xes muab lawv sawv daws kaw tau peb hnub hauv tsev loj faj. 18 Hnub peb, nws hais rau lawv tias : "Kuv yog neeg hwm Tswv Ntuj. Yog nej xav cawm nej txoj sia mas nej yuav ua li no: 19 Yog nej yog neeg ncaj tiag, mas nej yuav tso nej ib tug nyob hauv tsev loj faj, hos cov mas nej rov qab mus, nej yuav ris nplej mus rau nej tsev neeg noj. 20 Nej rov mus coj nej tus kwv ntxawg tuaj rau kuv pom, thaum ntawd kuv paub tias nej hais tseeb lawm ces nej yuav tsis tuag." Ces lawv pom zoo ua raws li ntawd. 21 Tiam sis lawv rov sib hais lawv tias : "Muaj tseeb lawm tiag, yog peb them lub txim txhaum uas thaud peb ua rau peb tus kwv xwb. Peb twb pom nws txoj kev txom nyem siab, nws thov thov peb, los peb tsis mloog nws li. Vim li ntawd peb thiaj raug kev nyuaj siab li no." 22 Lus Npees thiaj teb lawv tias : "Kuv twb hais rau nej tias kom nej txhob ua phem rau tus me nyuam ! Nej tsis xav mloog kuv hais, ces zaum no luag thiaj nug peb txog nws cov ntshav." 23 Lawv sib tham, lawv tsis paub tias Yos Xes to taub lawv xeem lus, vim muaj ib tug neeg nyob ntawd txhais lus rau Yos Xes. 24 Ces Yos Xes txav mus nraim lawv, nws quaj twj ywm.

NPN 33: 2-3, 10-11, 18-19

Txais: (22) Huab Tais, thov koj khuv leej peb vim peb tso siab rau koj.

Nej ntaus nkauj nog ncas ua HUAB TAIS tsaug.
Nej ntaus nkauj nog ncas kaum txoj hlua cav txog nws!
Nej hu ib zag nkauj tshiab rau nws,
nej muab siab rau qoj cov hlua ncas nrog suab qw zoo siab.

Txais: (22) Huab Tais, thov koj khuv leej peb vim peb tso siab rau koj.

HUAB TAIS ua kom cov hauj lwm tsoom kuj cuab npaj mus tsis taus,
Nws ua kom cov haiv neeg zaj tswv yim tsheej xeeb tsis tau.
Tiam sis cov hauj lwm HUAB TAIS npaj yuav nyob mus li,
Zaj tswv yim nws lub siab xav tau yuav nyob txheej dhau txheej.

Txais: (22) Huab Tais, thov koj khuv leej peb vim peb tso siab rau koj.

HUAB TAIS lub qhov muag saib ntsoov cov neeg hwm nws,
saib ntsoov cov tso siab rau nws txoj kev ua siab zoo;
nws yuav npo lawv dim ntawm kev tuag,
thiab yuav txuag lawv txoj sia thaum muaj kev tshaib plab.

Txais: (22) Huab Tais, thov koj khuv leej peb vim peb tso siab rau koj.

As Les Lus Yas: MK 1: 15

Txais: As les lus yas, as les lus yas.

Tswv Ntuj lub Ceeb Tsheej los txog ze lawm :
nej hloov siab, nej cia li ntseeg txog lub Moo Zoo.

Txais: As les lus yas, as les lus yas.

Ntawv Moo Zoo: MT 10: 1-7

1 Yes Xus hu nws kaum ob leeg thwj tim los cuag nws. Nws muab hwj huam kom lawv ntiab tau dab tawm, thiab kho tau txhua yam txiab xeeb thiab txhua yam mob nkeeg kom thim. 2 Kaum ob leeg Hauv Paus Xa Lus muaj npe li no : 3 thawj tug, yog Xis Moos uas sawv daws hu nws ua Pob Zeb, As Nres, Xis Moos tus kwv, Yas Kos, yog Ntxes Npes Dais tus tub, Zam, Yas Kos tus kwv, Fis Lis Pos, thiab Npas Tos Los Mas Yos, Tos Mas, thiab Mas Tais, tus sau se; Yas Kos, uas yog As Fas Yos tub, Thas Dais Yog , 4 Xis Moos tus neeg Kas Nas Nias, thiab Yus Das Kas Lis Yaus, tus muab Yes Xus rau luag ntes.
5 Yes Xus xa kaum ob leeg no mus tshaj lub Moo Zoo, nws qhia lawv tias : “Nej tsis txhob mus cuag cov neeg teev dab, txhob mus hauv ib lub nroog Xas Mas Lias li. 6 Nej xub mus cuag cov yaj poob zoo hauv haiv His Xas Lais tso. 7 Thaum nej taug kev, nej ceeb toom tias: “Ntuj lub Ceeb Tsheej tuaj txog ze ze lawm.”

Tim 11 lub 7 Hli 2019

Hnub Tsib Lis Piam Kaum Plaub Nruab Xyoo C Nruab Lis Piam Xyoo I

Hwm LN Benedict, ua Thawj Tswj cov Txiv Twj Cuab

Zaj Nyeem Ib: HP 44: 18-21, 23B-29; 45:1-5

18 Ces Yus Das txav los ntawm Yos Xes, nws hais rau Yos Xes tias : "Yawg Hlob, koj tus tub txib thov koj pub nws hais ib lo lus tseeb thiab thov koj tsis txhob npau taws rau koj tus tub txib, vim koj yeej zoo cuag li yog Fas Las Oos lawm! 19 Yawg Hlob tau nug koj cov tub txib hais tias : 'Nej txiv puas tseem nyob thiab nej puas tseem muaj ib tug kwv ?' 20 Peb tau teb Yawg Hlob hais tias : 'Peb tseem muaj peb txiv uas nws laus laus lawm thiab peb tshuav ib tug kwv ntxawg uas yug thaum peb txiv twb laus lawm. Nws tus tij laug tuag lawm, cov tub uas nws niam yug mas tshuav nws tib leeg xwb, mas peb txiv hlub nws kawg !' 21 Ces koj tau hais rau koj cov tub txib tias : 'Nej mus coj nws tuaj rau kuv, kom kuv pom nws.'
23b 'Yog nej tus kwv ntxawg tsis nrog nej tuaj mas kuv yuav tsis txais nej tuaj ntsib kuv ntxiv lawm.' 24 Ces thaum peb rov qab mus txog ntawm koj tus tub txib uas yog peb txiv, peb tau hais Yawg Hlob cov lus rau nws. 25 Thaum peb txiv rov hais rau peb tias : 'Nej rov qab mus muas me ntsis nplej dua.' 26 Peb tau teb nws tias : 'Peb mus tsis tau, yog peb tus kwv ntxawg nrog peb thiab mas peb thiaj mus tau, vim tus txiv neej ntawd tsuas txais peb, yog peb nrog peb tus kwv ntxawg xwb.' 27 Ces koj tus tub txib uas yog peb txiv tau hais rau peb tias : 'Nej twb paub lawm tias kuv poj niam tsuas yug ob tug me nyuam rau kuv xwb. 28 Ib tug ncaim kuv lawm, kuv tau hais tias : Ntshai nws raug muab dua ua daim tas lawm ! ces kuv yeej tsis rov pom nws ib zaug ntxiv los txog tav no li. 29 Yog nej tseem coj tus no mus deb ntawm kuv, yog nws raug dab tsi phem, mas nej yuav ua kom kuv tu siab tuag, thiab ua kom kuv cov plaub hau dawb mus nkag hauv qhov ntxa xwb.'”
45 1 Ces Yos Xes nyiaj tsis taus ntxiv, nws nthe rau nws cov neeg tias : "Nej kom sawv daws tawm mus." Sawv daws tawm tas tib si, ces Yos Xes thiaj qhia nws rau nws cov kwv tij. 2 Tab sis nws quaj nrov nrov ces tas cov neeg Hais Nkws Tos hnov, ces lub moo ntawd thiaj nrov mus txog hauv Fas Las Oos tsev. 3 Yos Xes hais rau nws cov kwv tij tias : "Kuv yog Yos Xes ! Kuv txiv puas tseem nyob ?" Nws cov kwv tij teb tsis taus nws ib los li, vim lawv lawv poob siab tag rau nws. 4 Nws hais rau nws cov kwv tij tias : "Nej txav los ze ze kuv mas !" Ces lawv txav los. Nws hais tias : "Kuv yog Yos Xes, nej tus kwv uas thaud nej muab muag rau Hais Nkws Tos teb lawm. 5 Tiam sis zaum no nej tsis txhob tu siab, nej tsis txhob khuv xim tias cas nej tau muag kuv rau ntawm no lawm. Twb yog Tswv Ntuj xa kuv ua nej ntej tuaj kom tau cawm neeg txoj sia xwb.”

NPN 105: 16-17, 18-19, 20-21

Txais: (5a) Nej cim ntsoov Huab Tais cov hwj huam nws tau ua tseg.

Thaum HUAB TAIS hu kom kev tshaib plab poob los rau saum lub teb chaws,
thiab ua kom tej qoob loo uas yug lawv txoj sia piam tas,
nws tso ib tug neeg mus ua lawv ntej,
yog Yos Xes, tus raug muag mus ua qhev.

Txais: (5a) Nej cim ntsoov Huab Tais cov hwj huam nws tau ua tseg.

Lawv muab khawb hlau khi nws ko taw
thiab muab saw hlau pav nws,
mus txog thaum muaj tuaj raws li nws tau ua saub hais tseg.
HUAB TAIS lo lus ua pov thawj tias nws yog tus hais lus tseeb. .

Txais: (5a) Nej cim ntsoov Huab Tais cov hwj huam nws tau ua tseg.

Tus vaj hu nws mus thiab tso nws tawm nkuaj,
tus tswj cov haiv neeg muab kev twj lij rau nws.
Tus vaj muab nws ua tus kav tus vaj lub vaj lub tsev
thiab tus tswj tas txhua yam uas yog nws tug.

Txais: (5a) Nej cim ntsoov Huab Tais cov hwj huam nws tau ua tseg

As Les Lus Yas: MK 1: 15

Txais: As les lus yas, as les lus yas.

Tswv Ntuj lub Ceeb Tsheej los txog ze lawm :
nej hloov siab, nej cia li ntseeg txog lub Moo Zoo.

Txais: As les lus yas, as les lus yas.

Ntawv Moo Zoo: MT 10: 7-15

Yes Xus hais rau nws cov thwj tim tias:
7 “Thaum nej mus kev, nej ceeb toom tias Ntuj lub Ceeb Tsheej tuaj txog ze lawm. 8 Nej kho cov mob kom zoo, nej tsa cov tuag kom sawv rov los, nej kho cov mob ruas kom huv tuaj, nej ntiab cov dab kom khiav mus. Nej tau txais dawb, nej yuav pub dawb rau luag. 9 Nej txhob muab kub, muab nyiaj, los muab nyiaj npib qhwv rau hauv duav siv. 10 Txhob ris hnab taug kev, txhob nqa ob lub tsho, txhob nqa khau los nqa pas nrig li, vim tias tus tub zog tsim nyog txais nws pluas mov noj.” 11 “Nej mus hauv lub nroog los lub zos twg, nej nug kom tau ib tug neeg tsim nyog, nej nyob hauv nws tsev mus txog hnub nej rov qab. 12 Thaum nej chaws mus hauv luag tsev, nej foom kev kaj lug rau lub tsev ntawd. 13 Yog lub tsev ntawd tsim nyog txais, mas nej txoj kev kaj lug yuav nqes los nyob hauv lawv. Yog lub tsev ntawd tsis tsim nyog txais, ces nej txoj kev kaj lug yuav rov los roos nej. 14 Leej twg tsis txais nej, thiab tsis mloog nej cov lus, nej cia li tawm hauv lub tsev ntawd los lub nroog ntawd mus. Nej yuav nchos cov plua av lo nej ko taw pov tseg. 15 Kuv hais tseeb rau nej tias: txog Hnub Txiav Txim, teb chaws Xos Dos Mas thiab Nkos Mos Las yuav raug txim hnyav tsis cuag li lub nroog uas tsis txais nej ntawd.”

Tim 12 lub 7 Hli 2019

Hnub Rau Lis Piam Kaum Plaub Nruab Xyoo C Nruab Lis Piam Xyoo I

Zaj Nyeem Ib: HP 46: 1-7, 28-30

1 His Xas Lais sau tas nrho nws lub cuab tam, nws sawv kev mus. Thaum nws tuaj txog Npes Xas Npes, nws muab ib co txim txi rau nws txiv His Xas Has tus Tswv Ntuj. 2 Hmo ntuj, Tswv Ntuj yees tawm los hu His Xas Lais tias : "Yas Kos ! Yas Kos !" His Xas Lais teb tias : "Kuv nyob ntawm no !" 3 Tswv Ntuj rov hais tias : "Kuv yog Tswv Ntuj, yog koj txiv tus Tswv Ntuj, koj tsis txhob ntshai mus nyob Hais Nkws Tos teb, vim nyob nrad, kuv yuav tsa koj ua ib haiv neeg loj. 4 Kuv yuav nrog koj mus nyob Hais Nkws Tos teb, thiab kuv yuav coj koj rov los nyob ntawm no. Yos Xes yog tus yuav kaw koj ob lub qhov muag rau."
5 Ces Yas Kos sawv kev ntawm Npes Xas Npes mus. His Xas Lais cov tub muab lawv txiv Yas Kos thiab muab lawv cov poj niam me nyuam nce rau saum cov tsheb uas Fas Las Oos xa tuaj tos lawv txiv. 6 Lawv coj lawv cov tsiaj thiab tas nrho lawv lub cuab tam uas lawv tsim tau nyob teb chaws Kas Nas Has, ces lawv tsiv mus nyob Hais Nkws Tos teb. Yas Kos thiab tas nrho nws cov xeeb leej xeeb ntxwv nrog nws mus: 7 nws coj nws cov tub, thiab nws cov tub cov tub, nws cov ntxhais thiab nws cov tub cov ntxhais, thiab tas nrho nws cov xeeb leej xeeb ntxwv huv tib si, nrog nws mus nyob Hais Nkws Tos teb.
28 His Xas Lais xa Yus Das ua ntej mus hais rau Yos Xes kom Yos Xes tuaj tos nws nyob xeev Nkaus Ses. Ces lawv tuaj txog Nkaus Ses teb. 29 Yos Xes kom lawv nog nws lub tsheb, ces nws caij tsheb tuaj tos nws txiv His Xas Lais nyob Nkaus Ses. Thaum nws pom nws txiv, nws puag nkaus nws txiv caj dab, ces nws quaj ntev loo puag rawv nws txiv. 30 His Xas Lais hais rau Yos Xes tias : "Zaum no, kuv tuag los tau lawm, vim kuv tau pom koj lub ntsej muag lawm, thiab koj tseem muaj txoj sia nyob.”

NPN 37: 3-4, 18-19, 27-28, 39-40

Txais: (39a) Txoj kev cawm tus neeg ncaj tuaj ntawm Huab Tais tuaj.

Nej tso siab rau HUAB TAIS thiab ua qhov zoo,
ces nej yuav tau nyob hauv lub teb chaws
thiab yuav tau noj tau haus tsis muaj kev txhawj.
Nej zoo siab nyob hauv HUAB TAIS,
ces nws yuav pub rau nej raws nej lub siab ntshaw.

Txais: (39a) Txoj kev cawm tus neeg ncaj tuaj ntawm Huab Tais tuaj.

HUAB TAIS saib ntsoov cov coj ncaj lub neej,
lawv lub cuab tam yuav nyob mus li.
Lub caij txom nyem lawv yuav tsis poob ntsej muag,
lub caij muaj kev tshaib plab, lawv yuav tau noj tsau.

Txais: (39a) Txoj kev cawm tus neeg ncaj tuaj ntawm Huab Tais tuaj.

Nej tso txoj kev phem tseg mus ua qhov zoo,
nej yuav nyob ruaj nreb hauv qhov zoo mus li.
Vim HUAB TAIS nyiam txoj kev ncaj,
nws tsis tso cov neeg ntseeg nws pov tseg.

Txais: (39a) Txoj kev cawm tus neeg ncaj tuaj ntawm Huab Tais tuaj.

Txoj kev cawm tus neeg ncaj tuaj ntawm HUAB TAIS tuaj,
nws yog lawv lub chaw nkaum thaum lawv ntsib kev nyuaj.
HUAB TAIS pab lawv thiab cawm lawv dim,
nws tso lawv dim ntawm tus phem thiab cawm lawv,
vim lawv tuaj nkaum hauv nws.

Txais: (39a) Txoj kev cawm tus neeg ncaj tuaj ntawm Huab Tais tuaj.

As Les Lus Yas: ZAM 16: 13A, 14:26D

Txais: As les lus yas, as les lus yas.

Thaum Leej Tswv Yim muaj qhov tseeb tuaj,
nws yuav coj nej kom mus txog txhua yam tseeb
thiab yuav ua kom nej rov nco txog txhua yam kuv hais rau nej lawm.

Txais: As les lus yas, as les lus yas.

Ntawv Moo Zoo: MT 10: 16-23

Yes Xus hais rau nws cov thwj tim tias:
16 “Kuv xa nej xws li ib co yaj mus nyob hauv nruab nrab ib co hma. Mas nej yuav ua neeg ntse xws li nab, ua siab dawb xws li nquab. 17 Tiam sis nej yuav ceev faj txog tej tib neeg , vim lawv yuav mus kom nej rau cov rooj txwj laus txiav txim, lawv yuav muab nej nplawm hauv lawv cov tsev txoos. 18 Lawv yuav cab nej mus rau cov nom tswv thiab cov vaj ntxwv vim kuv, kom nej tau ua tim khawv txog kuv nyob ntawm cov nom tswv thiab cov teev pej kum dab xub ntiag. 19 Thaum luag ntes nej mus rau lawv, mas nej tsis txhob txhawj tias yuav hais li cas thiab yuav teb dab tsi. Lub sij hawm ntawd, yuav muaj tus muab cov lus teb rau nej hais. 20 Li ntawd, tsis yog nej yuav hais lus, yog nej Txiv Leej Tswv Yim yuav hais lus nyob hauv nej.
21 Kwv tij yuav muab nws tus kwv tij rau luag tua, leej txiv yuav muab nws tus me nyuam rau luag. Tej me nyuam yuav sawv tiv niam thiab txiv, thiab yuav muab nkawd rau luag tua. 22 Sawv daws yuav ntxub nej vim kuv lub npe. Tab sis, tus twg ua siab ntev nyiaj kom txog qhov kawg, mas nws yuav txais kev cawm. 23 Yog luag caum nej hauv lub nroog no, mas nej kav tsij khiav mus rau lwm lub. Kuv hais tseeb rau nej tias, thaum Neeg Leej Tub los txog, mas nej tseem khiav tsis tau txhua cov nroog hauv His Xas Lais teb.”