UA KOOB TSHEEJ YES XUS YUG LOS XYOO 2018

TIM 7 LUB 11 HLIS 2019

Hnub Tsib Lis Piam Peb Caug Ib Nruab Xyoo C Nruab Lis Piam Xyoo I

Zaj Nyeem Ib: LM 14: 7-12

Cov kwv tij nkauj muad:
7 Peb tsis muaj leej twg yuav ua neej vim yus tus kheej, thiab tsis muaj leej twg yuav tuag vim yus tus kheej. 8 Yog peb ua neej nyob, mas peb ua neej vim Huab Tais, thiab yog peb tuag, mas peb kuj tuag vim Huab Tais. Ua li mas txawm peb ua neej nyob los peb tuag, mas peb yog Huab Tais tug. 9 Yog vim li no Leej Pleev thiaj tuag thiab sawv rov los muaj txoj sia, kom tau ua tsoom neeg tuag thiab neeg ciaj tus Huab Tais. 10 Ua cas koj thiaj txiav txim rau koj tus kwv tij? Los ua cas koj thiaj ntxub koj tus kwv tij? Vim peb sawv daws puav leej yuav tau mus sawv ntawm Tswv Ntuj lub rooj txiav txim.
11 Muaj ntawv sau cia tias : “Huab Tais hais tias: Txhua leej txhua tus yuav txhos caug nyob ntawm kuv xub ntiag, thiab txhua xeem lus yuav cav lus zoo txog Tswv Ntuj.”
12 Li ntawd, peb nyias yuav tsum tau piav nyias lub neej rau Tswv Ntuj.

NPN 27: 1BCDE, 4, 13-14

Txais: (13) Kuv ntseeg tias kuv yuav tau pom Huab Tais qhov zoo
nyob hauv cov neeg ciaj sia lub teb chaws.

Huab Tais yog kuv qhov pom kev thiab kuv txoj kev cawm;
Kuv yuav ntshai leej twg?
Huab Tais yog kuv qhov chaw nkaum hauv kuv lub neej,
Kuv yuav tshee vim leej twg?

Txais: (13) Kuv ntseeg tias kuv yuav tau pom Huab Tais qhov zoo
nyob hauv cov neeg ciaj sia lub teb chaws.

Kuv tsuas thov ib yam ntawm Huab Tais; qhov kuv nrhiav yog:
kom tau nyob hauv Huab Tais tsev niaj hnub hauv kuv lub neej,
Kom kuv tau ntsia ntsoov Huab Tais txoj kev zoo
thiab tau pom nws lub tuam tsev.

Txais: (13) Kuv ntseeg tias kuv yuav tau pom Huab Tais qhov zoo
nyob hauv cov neeg ciaj sia lub teb chaws.

Kuv ntseeg hais tias kuv yuav tau pom Huab Tais txoj kev nplua mias
nyob hauv cov neeg ciaj sia lub teb chaws.
Nej ua siab loj tos ntsoov Huab Tias;
ua siab tawv qhawv tos ntsoov Huab Tais.

Txais: (13) Kuv ntseeg tias kuv yuav tau pom Huab Tais qhov zoo
nyob hauv cov neeg ciaj sia lub teb chaws.

As Les Lus Yas: MT 11: 28

Txais: As les lus yas, as les lus yas.

Huab Tais hais tias: “Tas nej sawv daws uas nej khwv thiab ris nra hnyav,
nej tuaj cuag kuv mas kuv yuav cia nej so los siav.”

Txais: As les lus yas, as les lus yas.

Ntawv Moo Zo0: LK 15: 1-10

1 Tas cov neeg sau se thiab cov neeg txhaum txav los ze Yes Xus, lawv xav mloog Yes Xus hais lus. 2 Ces cov Fas Lis Xais thiab cov Kws Ntawv Ntshiab nroo zom zaws tias : "Tus neeg no txais cov neeg txhaum, nws tseem nrog lawv noj mov thiab !" 3 Yes Xus thiaj hais zaj paj lug no rau lawv : 4 "Yog nej leej twg muaj ib puas tus yaj, tab sis ib tug ploj lawm, mas nws puas yuav tsis tso cuaj caum cuaj tus tseg rau tom hav suab puam, thiab mus nrhiav kom tau tus uas poob zoo lawd? 5 Thaum nws nrhiav tau tus yaj poob zoo lawd, nws muab kwv saum xwb pwg, nws zoo siab tas nrho. 6 Thaum nws rov los txog tsev, nws nqua hu nws cov phooj ywg thiab cov nyob ze ntawm nws tuaj, nws hais rau lawv tias : 'Nej nrog kuv zoo siab, vim kuv nrhiav tau kuv tus yaj poob zoo lawm.' 7 Kuv hais rau nej tias, ib yam li ntawd, thaum ib tug neeg txhaum hloov siab tig los ua zoo, mas nyob saum ntuj kuj yuav muaj kev zoo siab loj dua txoj kev zoo siab rau cuaj caum cuaj leeg siab ncaj uas tsis tas yuav hloov siab tig los ua zoo.
8 Los tus poj niam twg yog nws muaj kaum lub txiaj nyiag, muaj ib lub poob lawm, nws puas yuav tsis taws teeb cheb tsev, ua tib zoo tshawb nrhiav kom tau nws lub txiaj nyiag? 9 Thaum nws nrhiav tau lawm, nws nqua hu nws cov phooj ywg thiab cov nyob ze ntawm nws tuaj, nws hais rau lawv tias : ‘Nej nrog kuv zoo siab vim kuv nrhiav tau kuv lub txiaj nyiag uas poob lawd!’ 10 Kuv hais rau nej tias, ib yam li ntawd, kuj muaj kev zoo siab loj nyob hauv Tswv Ntuj tsoom Tshiab, thaum ib tug neeg txhaum hloov siab tig los tu siab thiab lees txhaum.”

TIM 8 LUB 11 HLIS 2019

Hnub Rau Lis Piam Peb Caug Ib Nruab Xyoo C Nruab Lis Piam Xyoo I

Zaj Nyeem Ib: LM 15: 14-21

Paj Lug sau ntawv rau cov ntseeg nyob Los Mas tias:
14 Kuv cov kwv tij, kuv yeej paub tseeb txog nej lawm tias nej muaj lub siab zoo tas nrho, nej muaj kev paub kev txawj, nej muaj kev txawj sib qhuab sib qhia sib ntuas. 15 Tsis kav kuv muaj cuab kav sau tej yam ntxhib me ntsis rau nej, yog vim kuv xav kom nej nco zoo txog tej ntawd. 16 Kuv ua tau li ntawd yog vim lub txiaj ntsim uas Tswv Ntuj pub rau kuv: nws tsa kuv ua tus cev Yes Xus Pleev cov lus rau cov neeg teev pej kum dab, nws tsa kuv ua Leej Choj tsob hwb Tswv Ntuj lub Moo Zoo, kom tau muab cov neeg teev pej kum dab ua ib co txim xis Tswv Ntuj siab, vim lawv ntshiab tuaj nyob hauv Leej Tswv Yim Ntshiab lawm. 17 Vim li ntawd mas kuv muaj cai khav nyob hauv Yes Xus Pleev txog tej yam uas hais txog Tswv Ntuj. 18 Kuv tsis muaj cuab kav yuav hais txog dab tsi li, tsuas muaj cuab kav hais txog qhov uas Leej Pleev ua nyob hauv kuv xwb, yog mus coj cov haiv neeg teev pej kum dab los mloog Ntuj lus thiab ua raws li ntawd. 19 Yog vim lub hwj huam ua tau cov cim thiab cov hwj huam yees ntxwv nyob hauv Tswv Ntuj Leej Tswv Yim, mas txij Yes Lus Xas Les mus txog Is Lis Lis Kus teb, kuv tau tshaj Leej Pleev lub Moo Zoo kom thoob plaws tas. 20 Kuv lub siab tsuas xav tshaj lub Moo Zoo rau cov teb chaws uas neeg tsis tau hu txog Leej Pleev lub npe ib zaug li xwb, vim kuv tsis xav txhim tsev rau saum tej taw ntsa uas luag xub txhim lawm, 21 kuv thiaj tau ua raws li lo lus sau tseg tias : ‘Cov neeg uas tsis tau muaj neeg qhia txog nws rau lawv dua, lawv yuav pom, cov neeg uas tsis tau hnov hais txog nws dua, lawv yuav to taub.’

NPN 98: 1, 2-3AB, 3CD-4

Txais: (2b) Huab Tais qhia nws txoj kev cawm neeg muaj hwj huam rau cov kuj cuab paub.

Nej hu ib zag nkauj tshiab rau HUAB TAIS,
vim nws ua tej yam loj muaj tsim nto moo.
Nws sab tes xis ua kom nws yeej,
nws sab npab ntshiab ua.

Txais: (2b) Huab Tais qhia nws txoj kev cawm neeg muaj hwj huam rau cov kuj cuab paub.

HUAB TAIS ua kom sawv daws paub nws txoj kev cawm ;
nws muab nws txoj kev ncaj rau cov kuj cuab pom.
Nws rov nco txog nws txoj kev hlub
thiab npuab His Xas Lais tsev neeg.

Txais: (2b) Huab Tais qhia nws txoj kev cawm neeg muaj hwj huam rau cov kuj cuab paub.

Tas npoo ntuj npoo ntiaj teb tau pom
peb tus Tswv Ntuj txoj kev cawm seej.
Tas txhua teb chaws, nej qw zoo siab cav txog HUAB TAIS !
Nej qhib suab hu nkauj, nej qhuas txog nws!

Txais: (2b) Huab Tais qhia nws txoj kev cawm neeg muaj hwj huam rau cov kuj cuab paub.

As Les Lus yas: 1 ZAM 2: 5

Txais: As les lus yas, as les lus yas.

Tus twg coj nraim Leej Pleev lo lus, mas txoj kev
nyiam Tswv Ntuj zoo tiav log nyob hauv nws lawm.

Txais: As les lus yas, as les lus yas.

Ntawv Moo Zoo LK 16: 1-8

1 Yes Xus tseem hais rau cov thwj tim tias : "Muaj ib tug neeg nplua nuj, nws muaj ib tug tim xyoob xam txiaj. Luag qhia tus tswv tias tus tim xyoob muab nws tej nyiaj txiag siv lwj siv liam. 2 Tus tswv hu tus tim xyoob tuaj, nws hais rau tus tim xyoob tias : ‘Kuv hnov luag hais dab tsi txog koj li ntawd? Koj qhia saib koj siv kuv tej nyiaj txiag li cas. Txij no mus, koj yuav tsis tau ua tus xam txiaj ntxiv.’ 3 Tus tim xyoob xav zoj rau nruab siab tias : ‘Kuv yuav ua li cas, vim kuv tus tswv yuav tshem txoj hauj lwm xam txiaj ntawm kuv mus? Mus ncaws teb, kuv tsis muaj zog. Mus thov khawv, kuv kuj txaj muag. 4 Kuv paub kuv yuav ua dab tsi kom thaum luag tshem txoj hauj lwm xam txiaj ntawm kuv lawd, muaj neeg txais kuv mus nyob hauv lawv tsev.’ 5 Ces tus tim xyoob hu cov neeg tshuav nqi ntawm tus tswv ib tug zuj zus tuaj. Nws hais rau thawj tug tias : ‘Koj tshuav nuj nqi ntawm kuv tus tswv npaum li cas ?’ 6 Tus tshuav nqi teb tias : ‘Ib puas hub roj.’ Tus tim xyoob hais rau nws tias : 'Muab koj daim ntawv tshuav nqi los, koj zaum, koj sau sai sai rau ua tsib caug.' 7 Tus tim xyoob hais rau lwm tus tias : ‘Koj ne, koj tshuav nqi pes tsawg ?’ Nws hais tias : ‘Ib puas tawb nplej.’ Tus tim xyoob hais rau nws tias : 'Muab koj daim ntawv tshuav nqi los, koj sau ua yim caum.' 8 Tus tswv qhuas tus tim xyoob siab tsis ncaj tias nws txawj ua neeg xyuam xim. Vim ntiaj teb neeg cov tub, thaum lawv nrog lawv cov npawg ua ke, lawv xyuam xim dua kev kaj cov tub.”

TIM      9      LUB      11      HLIS      2019

Hnub Xya Lis Piam Peb Caug Ib Nruab Xyoo C Nruab Lis Piam Xyoo I

Nco txog Hnub Foom Hmoov Zoo rau lub Tuam Tsev Teev Ntuj Lateran nyob Los Mas

Zaj Nyeem Ib:       EXK  47:   1-2, 8-9, 12

1 Tus tshiab coj kuv rov los txog ntawm lub qhov rooj loj nkag mus hauv lub Tuam Tsev Teev Ntuj, ua ciav kuv pom dej ntws tawm hauv lub qab taw rooj los mus dua sab hnub tuaj lawm, vim lub Tuam Tsev tig sab qhov rooj loj mus rau sab hnub tuaj; dej ntws ntawm lub tuam tsev sab naj los mus, uas yog sab naj ntawm lub thaj txi Ntuj. 2 Nws coj kuv mus tawm ntawm lub qhov rooj nyob sab pej los rau sab nraum zoov, thiab coj kuv ncig sab Tuam Tsev nraud los txog ntawm lub rooj vag uas tig rau sab hnub tuaj; nyob ntawd, kuj thiaj pom dej ntws ntawm sab xis los.
8 Nws hais rau kuv tias : "Cov dej no ntws mus rau thaj tsam nyob sab hnub tuaj, ces yuav nqes mus rau nram lub hav As Las Npas, thiab yuav mus tshwm rau hauv hiav txwv, ces cov dej hiav txwv yuav huv tuaj. 9 Tus dej no ntws txog qhov twg mas tas puas tsav yam muaj txoj sia uas txawj huam vam yuav ciaj nyob hauv cov dej no; yuav muaj ntses ntau heev vim tus dej no ntws mus txog qhov twg mas cov dej hiav txwv yuav huv tuaj thiab txhua yam muaj txoj sia yuav hlob taus hauv cov dej no.
12 Nyob ntawm ob sab ntug ntawm tus dej yuav tuaj tas puas tsav yam ntoo txi txiv zoo noj, lawv cov nplooj yuav tsis zeeg li thiab lawv yuav txi txiv zoo. Niaj hli lawv yuav txi ib phaum txiv tshiab, vim cov dej ywg lawv ntws ntawm thaj chaw ntshiab los. Lawv cov txiv yuav yog ib co txhiam xws, hos lawv cov nplooj yuav yog ib co tshuaj."

NPN       46:   2-3, 5-6, 8-9

Txais: (5) Cov dej hauv tus niam dej ua kom Tswv Ntuj lub tsheej zoo siab,
       lub tsheej uas yog tus Nyob Siab qhov chaw nyob.

Tswv Ntuj yog peb chaw nkaum yog peb lub zog,
yog tus pab peb mus li thaum peb ntsib kev nyuaj.
Vim li no, peb tsis ntshai, txawm ntiaj teb yuav ua zog koog
thiab toj roob hauv pes yuav nphau nphwv rau hauv qab tiv txwv.

Txais: (5) Cov dej hauv tus niam dej ua kom Tswv Ntuj lub tsheej zoo siab,
       lub tsheej uas yog tus Nyob Siab qhov chaw nyob.

Muaj ib tug dej, nws ncau ceg mus ua kom Tswv Ntuj lub tsheej zoo siab,
lub tsheej uas yog tus Nyob Siab qhov chaw nyob.
Tswv Ntuj nyob hauv lub tsheej, nws yuav tsis ntsib kev nyuaj ntxhov,
Tswv Ntuj yuav pab nws thaum kaj ntug txoog.

Txais: (5) Cov dej hauv tus niam dej ua kom Tswv Ntuj lub tsheej zoo siab,
       lub tsheej uas yog tus Nyob Siab qhov chaw nyob.

Tus Huab Tais kav tsoom tshiab nrog peb nyob,
peb lub yeej ntsa zeb yog Yas Kos tus Tswv Ntuj.
Nej tuaj, nej yuav pom HUAB TAIS cov hauj lwm,
pom tej yam loj tas nrho nws tau ua nyob ntiaj teb.

Txais: (5) Cov dej hauv tus niam dej ua kom Tswv Ntuj lub tsheej zoo siab,
       lub tsheej uas yog tus Nyob Siab qhov chaw nyob.

Zaj Nyeem Ob:       1 KLN  3:   9C-11, 16-17

Cov kwv tij nkauj muad
9c “Nej yog Tswv Ntuj lub Tuam Tsev. 10 Raws li lub txiaj ntsim uas Tswv Ntuj pub rau kuv, kuv zoo li ib tug neeg txawj txhim tsev, kuv pib txhim tau cov taw ntsa, ces lwm tus tuaj txhim ntxiv rau saud. Tab sis nyias yuav muab siab rau saib nyias txoj kev txhim tsev saib yuav txhim li cas. 11 Vim tias tsis muaj leej twg yuav txhim tau ib tug taw ntsa txawv tus uas ib txwm nyob: tus taw ntsa ntawd yog Yes Xus Pleev.
16 Nej puas paub tias nej yog Tswv Ntuj lub Tuam Tsev, thiab Tswv Ntuj Leej Tswv Yim nyob txawm hauv nej ?
17 Yog leej twg rhuav Tswv Ntuj lub Tuam Tsev, mas Tswv Ntuj yuav rhuav tus ntawd. Vim tias Tswv Ntuj lub Tuam Tsev yog ib yam ntshiab; nej yog lub tuam tsev ntawd.

As Les Lus Yas:       2 XWM  7:   16

Txais: As les lus yas, as les lus yas.

Huab Tais hais tias:
Kuv tau xaiv thiab tau tshwj lub tsev no cia,
kom kuv lub npe nyob ntawd tas mus li.

Txais: As les lus yas, as les lus yas.

Ntawv Moo Zoo:       ZAM  2:   13-22

13 Yuav txog cov Yus Das lub Ntees Hla, ces Yes Xus nce mus pem Yes Lus Xas Les. 14 Nyob hauv lub Tuam Tsev Teev Ntuj, nws pom cov tub luam muag nyuj, muag tshis, thiab muag nquab, thiab pom cov neeg pauv nyiaj zaum nyob ntawd. 15 Nws muab ib co hlua ua ib rab nplawm los ntiab sawv daws huv tib si tawm hauv lub Tuam Tsev Teev Ntuj, nrog cov yaj thiab cov nyuj mus; nws nchuav cov pauv nyiaj tej nyiaj pov rau hauv av, thiab nws muab lawv tej rooj ntxeev. 16 Nws hais rau cov muag nquab tias : "Nej tshem tej ntawd tawm hauv no mus. Nej tsis txhob muab kuv Txiv lub Tsev los ua ib lub tsev lag tsev luam ntxiv." 17 Yes Xus cov thwj tim nco txog lo lus uas Ntawv sau tseg tias : “Kev mob siab rau koj lub Tsev ua kom kuv lub siab kub lug.” 18 Cov Yus Das thiaj hais rau nws tias : "Koj yuav muab lub cim dab tsi rau peb pom kom peb paub tias yog vim li cas koj thiaj ua li ntawd?” 19 Yes Xus teb rau lawv hais tias : "Nej rhuav lub tuam tsev no; ces peb hnub tom qab, kuv yuav rov tsa tiav tas.” 20 Cov Yus Das thiaj hais tias : "Lawv txhim tau plaub caug rau xyoo diam thiaj txhim tau lub tuam tsev no, hos koj li, koj ua peb hnub xwb, koj yuav rov txhim tau ntag lod?" 21 Tab sis Yes Xus hais txog lub tuam tsev uas yog nws lub cev. 22 Thaum Yes Xus sawv hauv cov tuag rov los lawm, nws cov thwj tim mam rov nco txog tias nws twb tau hais li ntawd lawm, ces lawv ntseeg txog cov ntawv ntshiab thiab ntseeg txog lo lus uas Yes Xus tau hais.

TIM 11 LUB 11 HLIS 2019

Hnub Ob Lis Piam Peb Caug Ob Nruab Xyoo C Nruab Lis Piam Xyoo I

Hwm LN Martin nyob Tours, ua Tswv Qhia

Zaj Nyeem Ib: THOOB TSIB 1: 1-7

1 Nej cov uas txiav txim rau lub ntiaj teb, nej yuav nyiam txoj kev ncaj. Nej yuav xav tswv yim txog Huab Tais raws txoj kev ncaj, thiab nej yuav muaj ib lub siab nrhiav nws tiag tiag. 2 Vim tias nws pub kom cov neeg tsis sim nws thiaj nrhiav tau nws, thiab nws ua kom cov neeg tsis ua xyem xyav txog nws tau pom nws. 3 Vim cov zaj tswv yim nkhaus cais neeg kom nyob deb ntawm Tswv Ntuj, hos Tswv Ntuj lub hwj huam uas raug sim, yuav rau txim rau tus neeg vwm. 4 Vim kev thoob tsib tsis chaws mus hauv ib tug ntsuj plig uas nrhiav ua phem, thiab nws kuj tsis nyob hauv ib lub cev uas zwm rau kev txhaum. 5 Vim ib lub tswv yim ntshiab thiab txawj coj zoo yuav khiav deb ntawm txoj kev cuav, thiab yuav muab tej zaj tswv yim phem tso pov tseg. Thaum muaj txoj kev tsis ncaj ncees tuaj mas nws yuav tsis zoo siab pom.
6 Kev thoob tsib yog ib lub tswv yim nyiam kev ua phooj ywg, tiam sis nws yuav tsis tso ib tug neeg hais lus thuam Ntuj dim nws lub txim, vim Tswv Ntuj ua tim khawv pom nws tej kev xav hauv qhov nraim nkoos hauv nws nruab siab, thiab pom qhov tseeb hauv nws nruab plaw, thiab Tswv Ntuj yog tus hnov cov lus uas nws tus nplaig hais tawm. 7 Vim Huab Tais Leej Tswv Yim nyob puv hauv lub sim ceeb, nws yog tus tuav tas txhua yam kom nyob ruaj, nws paub txhua yam uas neeg hais.

NPN 139: 1B-3, 4-6, 7-8, 9-10

Txais: (24b) Huab Tais, thov koj coj kuv kev mus taug txoj kev ciaj nyob mus li.

HUAB TAIS, koj tsom thoob hauv kuv, koj paub kuv :
koj paub thaum kuv sawv thiab thaum kuv zaum ;
koj nyob deb to taub tas tej kuv xav.
Koj saib nraim kuv thaum kuv mus kev los thaum kuv zaum,
koj paub txhua yam kuv ua txhua txoj kev kuv taug.

Txais: (24b) Huab Tais, thov koj coj kuv kev mus taug txoj kev ciaj nyob mus li.

Lo lus uas tsis tau nyob saum kuv tus nplaig,
HUAB TAIS, koj twb xub paub tas lawm.
Koj nyob tom kuv qab tom kuv hauv ntej,
koj nyob ib ncig kuv, koj tso koj txhais tes rau saum kuv.
Koj txoj kev paub txhua yam zoo dhau rau kuv,
siab tshaj qhov kuv ncav tau.

Txais: (24b) Huab Tais, thov koj coj kuv kev mus taug txoj kev ciaj nyob mus li.

Kuv yuav mus lawm qhov twg thiaj nraim tau ntawm koj Leej Tswv Yim?
Kuv yuav khiav lawm ces twg, thiaj nyob deb ntawm koj?
Yog kuv nce mus saum ntuj, koj twb nyob saud lawm !
Yog kuv nqes lawm puag ntuj txias teb tsaus, koj kuj nyob hauv thiab!

Txais: (24b) Huab Tais, thov koj coj kuv kev mus taug txoj kev ciaj nyob mus li.

Yog kuv ya raws lub caij kaj ntug ob phab tis mus,
yog kuv mus lawm puag sab dej ntuj kawg nkaus tim ub,
los tseem yog koj txhais tes coj kuv mus rau ntawd,
yog koj sab tes xis hwj kuv kom kuv nyob ruaj nreb.

Txais: (24b) Huab Tais, thov koj coj kuv kev mus taug txoj kev ciaj nyob mus li.

As Les Lus Yas: FLP 2: 15D, 16A

Txais: As les lus yas, as les lus yas.

Nej yuav tsum ci zoo li tej lub teeb ci pom kev rau lub ntiaj teb,
vim nej khawm ruaj nreb rau Lo Lus pub txoj sia.

Txais: As les lus yas, as les lus yas.

Ntawv Moo Zoo: LK 17: 1-6

1 Yes Xus hais rau nws cov thwj tim tias : "Yeej yuav cheem tsis tau kom txhob muaj tej kev coj luag ua txhaum, tab sis tus coj kom luag ua txhaum mas nws txoj hmoov phem ! 2 Txhiaj khoov cia muab ib lub zeb zom dai ntawm nws caj dab thiab muab nws pov rau hauv hiav txwv, zoo dua cia nws coj ib tug neeg me li no mus ua txhaum. 3 Nej yuav tsum ceev faj! Yog koj tus kwv ua txhaum, mas koj yuav qhuab ntuas nws. Yog nws thov txhaum, mas koj yuav zam rau nws. 4 Yog ib hnub nws ua txhaum rau koj xya zaus, nws rov los thov koj xya zaus hais tias 'Kuv thov txhaum,' mas koj yuav tsum zam rau nws."
5 Cov Hauv Paus Xa Lus hais rau Huab Tais tias : "Thov koj txhab kom peb txoj kev ntseeg loj tuaj!" 6 Ces Huab Tais teb tias : "Yog nej muaj kev ntseeg luaj li ib lub noob zaub roj, mas nej yuav hais tau rau tsob ntoo txiv zaub kab no tias: 'Rho koj cov cag tawm, koj tshais koj mus cog rau hauv dej ntuj,' mas tsob ntoo yuav mloog nej lus.”

TIM 12 LUB 11 HLIS 2019

Hnub Peb Lis Piam Peb Caug Ob Nruab Xyoo C Nruab Lis Piam Xyoo I

Hwm LN Josaphat, Tswv Qhia tuag ua Tim Khawv

Zaj Nyeem Ib: THOOB TSIB 2: 23–3: 9

23 Tswv Ntuj tau tsim tib neeg los kom tsis txawj tuag, thiab kom zoo xws li Tswv Ntuj. 24 Tiam sis vim dab phem muaj khib ces txoj kev tuag thiaj txeem los nyob hauv lub sim ceeb lawm, thiab cov neeg uas yog dab phem tug thiaj paub txawj tuag.
3 1 Hos cov neeg ncaj tus ntsuj plig nyob hauv Tswv Ntuj txhais tes, tsis muaj ib yam kev tsim txom dab tsi yuav chwv tau lawv. 2 Rau cov neeg tsis muaj tswv yim, cov neeg ncaj zoo li tuag lawm; lawv xav tias cov neeg ncaj txoj kev tso ntiaj teb tseg yog ib txoj kev raug txom nyem loj, 3 thiab lawv txoj kev ncaim peb mus yog txoj kev ua kom lawc puas tsuaj tas mus lawm; tab sis cov neeg ncaj twb tau txoj kev nyob thaj yeeb lawm. 4 Tib neeg xav tias lawv tuag mas yog lawv raug txim, tab sis lawv muaj kev tso siab lug tias lawv yuav tau txoj sia nyob mus li. 5 Lawv raug ib txog kev txom nyem sib, tab sis lawv yuav txais txiaj ntsim koob hmoov loj, vim Tswv Ntuj tau sim lawv, nws pom tias lawv tsim nyog ua nws tug. 6 Tswv Ntuj sim lawv zoo li sim kub nyob hauv hluav taws; nws txais lawv zoo li yog ib co txim hlawv txi rau nws. 7 Thaum Tswv Ntuj tuaj xyuas lawv, mas lawv yuav ci ntsa iab thiab lawv yuav khiav nrawm cuag li cov txim taws kis mus hlawv tej hauv paus nplej qhuav. 8 Lawv yuav txiav txim rau cov kuj cuab, thiab yuav tswj cov haiv neeg. Huab Tais yuav ua vaj kav lawv mus li ib txhiab ib txhis. 9 Cov neeg tso siab rau Huab Tais yuav to taub txoj kev tseeb, cov neeg npuab Huab Tais yuav nyob ze nws hauv txoj kev nyiam, vim Huab Tais tshwj zias nws lub txiaj ntsim thiab nws txoj kev khuv leej rau nws cov ntshiab, thiab nws saib xyuas cov nws xaiv.

NPN 34: 2-3, 16-17, 18-19

Txais: (2a) Kuv yuav cav txog HUAB TAIS txhua lub sij hawm.

Kuv yuav cav txog HUAB TAIS txhua lub sij hawm;
lo lus cav txog nws yuav nyob rawv ntawm kuv lub ncauj.
Kuv tus plig lub koob meej yog nyob hauv HUAB TAIS;
tus neeg me yuav hnov kuv thiab yuav zoo siab.

Txais: (2a) Kuv yuav cav txog HUAB TAIS txhua lub sij hawm.

HUAB TAIS muaj qhov muag pom cov neeg ncaj,
muaj pob ntseg hnov lawv lub suab quaj.
HUAB TAIS tawm tsam cov neeg ua phem,
nws rhuav lawv kom lub ntiaj teb txhob nco txog lawv ntxiv.

Txais: (2a) Kuv yuav cav txog HUAB TAIS txhua lub sij hawm.

Thaum cov neeg ncaj hu, HUAB TAIS hnov lawv,
Nws npo lawv ntawm tas lawv tej kev nyuaj.
HUAB TAIS nyob ze ze cov neeg siab lwj siab ntuag,
thiab nws cawm cov uas tas kev cia siab.

Txais: (2a) Kuv yuav cav txog HUAB TAIS txhua lub sij hawm.

As Les Lus Yas: ZAM 14: 23

Txais: As les lus yas, as les lus yas.

Yog leej twg nyiam kuv, nws yuav coj rawv kuv lo lus,
ces kuv Txiv yuav nyiam nws;
Kuv Txiv wb yuav tuaj nyob hauv nws.

Txais: As les lus yas, as les lus yas.

Ntawv Moo Zoo: LK 17: 7-10

Yes Xus hais rau cov Hauv Paus Xa Lus tias:
7 "Nyob hauv nej, yog nej tus tub txib mus laij teb los mus zov yaj tom teb rov los txog, nej puas muaj leej twg yuav hais rau nws tias : ‘Koj tsuag tsuag los ntawm no los zaum ntawm rooj noj mov ?’ 8 Ntshai nej yuav hais rau nws li no xwb : ‘Koj npaj hmo rau kuv noj. Koj sia daim ntaub tiag duav, koj rau rooj thiab nqa zaub nqa mov los rau kuv noj mus txog thaum kuv noj kuv haus tas lawm, mas koj mam noj koj mam haus tom qab.’ 9 Tus tswv ntawd puas muaj kev yuav nco tus tub txib txiaj ntsim, vim nws tsuas ua raws li nws raug txib xwb? 10 Nej kuj zoo ib yam li ntawd : thaum nej ua tas txhua yam raws li nej raug txib lawm, mas nej yuav hais tias : "Peb yog ib co tub txib tsis muaj nqes li ; peb tsuas ua qhov uas peb yuav tsum ua xwb.’"

****************************************

TIM 12 LUB 11 HLIS

HWM LN JOSAPHAT, TSWV QHIA TUAG UA TIM KHAWV

Yog xav xaiv cov zaj nyeem tshwj xeeb rau hnub hwm LN Josaphat raws li nram no los tau:

Zaj Nyeem Ib: EFX 4: 1-7, 11-13

Cov kwv tij nkauj muad:
1 Kuv uas yog tus neeg raug txim nyob hauv Huab Tais, kuv thov qhuab ntuas nej, kom nej coj ib lub neej phim txoj kev uas Ntuj hu nej los taug, 2 kom nej ua neeg tsis muab hlob, ua neeg siab zoo siab muag, yuav ua siab ntev ib leeg txhawb ib leeg nyob hauv txoj kev nyiam, 3 yuav siv zog txuag txoj kev koom ua ib leeg hauv Leej Tswv Yim kom sawv daws muaj kev thaj yeeb. 4 Tsuas muaj tib lub cev thiab tib lub Tswv Yim xwb, raws li Ntuj hu nej los taug tib txoj kev tso siab uas nyob hauv txoj kev Ntuj hu nej. 5 Tsuas muaj tib tug Huab Tais, tib txoj kev ntseeg, tib lub cim ntxuav, 6 tib tug Tswv Ntuj ua sawv daws Txiv xwb; nws nyob siab dua sawv daws, nws tuaj ntawm sawv daws tuaj, nws nyob hauv sawv daws. 7 Tiam sis peb nyias tau txais txiaj ntsim raws li qhov paj tshab uas Yes Xus Pleev pub rau nyias.
11 Nws pub paj tshab kom ib txhia ua Hauv Paus Xa Lus, ib txhia ua Yaj Saub, ib txhia tshaj lub Moo Zoo, ib txhia ua tswv zov yaj, ib txhia ua xib hwb, 12 ces cov ntshiab thiaj muaj txhij txhua kom lawv ua tau txoj dej num, txhim tau Leej Pleev lub Cev, 13 mus txog thaum peb sawv daws koom tau ua ib leeg xwb nyob hauv txoj kev ntseeg thiab txoj kev paub Tswv Ntuj Leej Tub, mus txog thaum peb hlob tiav log li tus neeg hlob tiav niam tiav txiv lawm, kom loj siab zoo txhij zoo txhua raws li Leej Pleev thaum nws hlob tiav lawm.

NPN 1: 1-2, 3, 4+6

Txais: (NPN 40:5a) Cov muaj hmoov zoo yog cov uas tso siab rau Huab Tais.
los: (2a) Cov muaj hmoov zoo yog cov luag ntxhi nyob hauv Huab Tais txoj cai.
los: (92:13-14) Tus neeg ncaj yuav tawg paj txi txiv
xws li tsob txoob nyob hauv Huab Tais lub vaj.

Muaj hmoov zoo yog tus uas tsis coj
raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo coj HUAB TAIS txoj cai,
thiab nws xav ntsoov txog
HUAB TAIS txoj cai nruab hnub hmo ntuj.

Txais: (NPN 40:5a) Cov muaj hmoov zoo yog cov uas tso siab rau Huab Tais.
Los: …

Nws zoo li ib tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj ntsws li.
Nws ua yam twg tau yam ntawd. .

Txais: (NPN 40:5a) Cov muaj hmoov zoo yog cov uas tso siab rau Huab Tais.
Los: …

Cov neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov tus neeg ncaj txoj kev,
hos tus neeg phem txoj kev yaj ntshis mus.

Txais: (NPN 40:5a) Cov muaj hmoov zoo yog cov uas tso siab rau Huab Tais.
Los: …

As Les Lus Yas: ZAM 15: 9B, 5B

Txais:. As les lus yas, as les lus yas.

Huab Tais hais tias: “Nej nyob truaj hauv kuv txoj kev nyiam mog.
Tus uas nyob hauv kuv thiab kuv nyob hauv nws, mas nws yuav txi txiv ntau.

Txais:. As les lus yas, as les lus yas

Ntawv Moo Zoo: ZAM 17: 20-26

Yes Xus tsa muag ntsia saum ntuj, nws hais tias:
20 "Leej Txiv Ntshiab, kuv tsis thov koj rau cov no xwb, kuv tseem thov koj rau cov uas yuav ntseeg txog kuv vim lawv lo lus thiab, 21 kom lawv sawv daws koom ua ib leeg, ib yam li koj, Leej Txiv, koj nyob hauv kuv thiab kuv nyob hauv koj; kom lawv nyob hauv wb thiab, lub qab ntuj neeg thiaj ntseeg tias yog koj xa kuv tuaj. 22 Lub koob meej uas koj muab rau kuv, mas kuv muab rau lawv lawm, kom xwv lawv ua ib leeg xws li wb ua ib leeg. 23 Kuv nyob hauv lawv, koj nyob hauv kuv, lawv thiaj li ua tsheej ib leeg tiag, lub qab ntuj neeg thiaj paub tias yog koj xa kuv tuaj, thiab paub tias koj nyiam lawv ib yam li koj nyiam kuv. 24 Txiv, cov uas koj muab rau kuv, kuv nyob qhov twg, mas kuv xav kom lawv tau nrog kuv nyob qhov ntawd thiab, kom lawv pom kuv lub koob meej uas koj muab rau kuv, vim koj tau nyiam kuv, ua ntej thaum tsis tau tsim lub sim ceeb lawm. 25 Txiv siab ncaj, lub qab ntuj neeg tsis paub koj, tab sis kuv paub koj, thiab cov no kuj paub tias yog koj xa kuv tuaj. 26 Kuv twb tau ua kom lawv paub koj lub npe lawm, kuv tseem yuav ua kom lawv paub ntxiv, kom txoj kev nyiam uas koj muab los nyiam kuv, nyob hauv lawv, thiab kom kuv nyob hauv lawv."

TIM 13 LUB 11 HLIS 2019

Hnub Plaub Lis Piam Peb Caug Ob Nruab Xyoo C Nruab Lis Piam Xyoo I

Hwm LN Frances Xavier Cabrini, Nkauj Xwb Dawb Huv


Zaj Nyeem Ib: THOOB TSIB 6: 1-11

1 Cov vaj aw, nej mloog mas, nej yuav tsum to taub ! Cov nom txiav txim rau cov teb chaws tim npoo ntiaj teb, nej yuav kawm kom paub! 2 Nej cov uas tswj zeej tsoom neeg coob thiab khav tias nej kav ntau lub kuj cuab, nej cia li tig ntsej los mloog! 3 Vim yog Huab Tais muab hwj chim kav neeg rau nej, yog tus Nyob Siab pub kom nej muaj hwj huam ua vaj. Nws yuav tshuaj txog nej cov hauj lwm thiab nws yuav nug txog nej lub hom phiaj nej npaj. 4 Nej yog ib co tub txib leg hauj lwm rau nws lub ceeb tsheej, tiam sis nej tsis tswj luag raws kev ncaj, nej tsis coj raws Txoj Cai, thiab nej tsis taug raws li Tswv Ntuj nyiam, 5 mas nws yuav tuaj rau txim loj rau nej sai sai, vim cov ua hlob yuav raug txiav txim hnyav. 6 Tus neeg me, mas Ntuj yuav zam rau nws thiab khuv leej nws. Tab sis cov ua hlob yuav raug txiav txim nruj. 7 Vim tus Tswv kav tas txhua yam nws tsis kws leej twg cai, nws tsis ntshai cov muaj meej mom, vim nws yog tus tsim tus loj tus me huv tib si, nws saib xyuas sawv daws zoo ib yam, 8 tab sis nws yuav ua nruj ua tsiv dua rau cov ua tus coj. 9 Li no, kuv thiaj hais cov lus no rau nej cov ua nom ua tswv kom nej kawm tau kev thoob tsib, thiab kom nej tsis txhob ua kev txhaum. 10 Cov uas taug nraim raws txoj kev cai ntshiab mas Ntuj yuav saib lawv yog neeg ntshiab; cov kawm kom paub txoj kev cai ntshiab zoo, mas lawv yuav muaj lus teb tsis tau kev tws. 11 Nej yuav tsum xav paub kuv cov lus, nej yuav tsum ntshaw paub ces yuav muaj tus qhia rau nej.

NPN 82: 3-4, 6-7

Txais: (8a) Tswv Ntuj, koj sawv tsees los txiav txim rau ntiaj teb mas.

Nej cia li tuaj tus neeg me thiab tus ntsuag nos tog,
nej txiav txim ncaj rau tus txom nyem thiab tus tsis muaj dab tsi.
Nej pab cawm tus neeg me thiab tus pluag
kom lawv dim ntawm tus neeg phem txhais tes.

Txais: (8a) Tswv Ntuj, koj sawv tsees los txiav txim rau ntiaj teb mas.

Kuv hais rau nej tias: “Nej yog ib co tswv ntuj,
tas nej cov uas yog tus Nyob Siab cov tub.
Tsis kav nej yuav txawj tuag li tej tib neeg,
nej yuav txawj poob tsim ib yam li tej ua nom ua tswv.”

Txais: (8a) Tswv Ntuj, koj sawv tsees los txiav txim rau ntiaj teb mas.

As Les Lus yas: 1 TXLN 5: 18

Txais: As les lus yas, as les lus yas.

Txawm yuav muaj dab tsi los nej yuav ua Ntuj tsaug ,
vim Tswv Ntuj lub siab xav kom nej ua li ntawd nyob hauv Yes Xus Pleev.

Txais: As les lus yas, as les lus yas.

Ntawv Moo Zoo: LK 17: 11-19

11 Thaum Yes Xus taug kev mus pem Yes Lus Xas Les, nws hla hauv Xas Mas Lias thiab Nkas Lis Lais teb mus. 12 Thaum nws tab tom yuav mus rau hauv ib lub zos, muaj kaum tus mob ruas tuaj cuag nws, lawv nres nrug deb ntawm nws. 13 Lawv tsa suab hais nrov nrov rau nws tias : "Xib Hwb Yes Xus, thov koj khuv leej peb!" 14 Thaum Yes Xus pom lawv, nws hais rau lawv tias : “Nej mus thws nej lub cev rau cov Leej Choj saib." Thaum lawv tab tom mus ces lawv lub cev huv tuaj. 15 Muaj ib tug hauv pab ntawd pom tias nws lub cev zoo lawm, ces nws tig hlo rov qab los, nws tsa suab nrov nrov cav txog Tswv Ntuj. 16 Nws khoov pe ntsej muag ti av rau ntawm Yes Xus ko taw, nws ua Yes Xus tsaug. Nws yog ib tug neeg Xas Mas Lias. 17 Yes Xus thiaj tsa ncauj hais tias : “Muaj kaum leej rov huv tuaj diam los tsis yog ? Tshuav cuaj leeg ne, lawv dua qhov twg lawm? 18 Ua cas tsuas muaj tus qhua no xwb thiaj rov los cav txog Tswv Ntuj ?" 19 Ces Yes Xus hais rau nws tias : "Koj sawv mus, koj lub siab ntseeg cawm koj lawm."

TIM 14 LUB 11 HLIS 2019

Hnub Tsib Lis Piam Peb Caug Ob Nruab Xyoo C Nruab Lis Piam Xyoo I

Zaj Nyeem Ib: THOOB TSIB 7: 22B-8:1

22b Nyob hauv kev thoob tsib muaj ib lub tswv yim ntse, dawb huv, tsis muaj lwm lub zoo li ntawd, muaj ntau fab, pom tsis tau tam sid, khiav nrawm, pom meej, tsis muaj yam tsuas, paub tseeb, tsis ua phem, nyiam qhov zoo, ntse zuag plias, 23 rub neeg lub siab, ua zoo rau luag, ua tib neeg tus phooj ywg, nyob ruaj nreb, tsis ua xyem xyav, tsis muaj kev nyuaj siab, muaj hwj huam ua txhua yam, saib xyuas txhua yam, nkag tau tshab hauv txhua lub tswv yim uas ntse, dawb huv, thiab nyob zais ntshis. 24 Kev thoob tsib mus los nrawm dua txhua yam uas txawj ua zog, nws nkag thiab hla thoob plaws dhau txhua yam, vim nws ntshiab dawb huv. 25 Kev thoob tsib yog ib txoj pa tawm ntawm Tswv Ntuj lub hwj huam los, yog ib yam ntshiab huv ncho tawm ntawm Tus Muaj Hwj Huam Tas Nrho lub hwj chim tuaj. Vim li ntawd, tsis muaj ib yam phem yuav txeem tau mus rau hauv nws. 26 Kev thoob tsib yog ib qho pom kev ci lam lug tawm ntawm qhov pom kev nyob mus li tuaj, yog ib daig tsom iav huv si tsom pom Tswv Ntuj tej hauj lwm, thiab yog daim duab qhia txog Tswv Ntuj lub siab zoo. 27 Txawm kev thoob tsib nyob ib leeg twm zeej, tsis kav nws ua tau tas puas tsav yam. Nws nyob li qub tas mus li, tsis kav nws ua tau kom txhua yam tshiab tuaj. Tiam dhau tiam nws mus ntxaum cov neeg ntshiab tus ntsuj plig, nws tsa lawv ua Tswv Ntuj cov phooj ywg thiab cov Yaj Saub. 28 Tswv Ntuj tsis nyiam leej twg tshaj tus uas nrog kev thoob tsib nyob txawm. 29 Kev thoob tsib zoo nkauj dua lub hnub, nws zoo tshaj tas txhua ntsauv hnub qub. Muab piv rau qhov pom kev, nws tseem ci muaj zog dua qhov pom kev. 30 Qhov pom kev txawj hloov chaw cia qhov tsaus ntuj los nyob, hos kev phem tsis txawj yeej tau kev thoob tsib li.
8 1 Txoj kev thoob tsib muaj peev xwm koos lub ntiaj teb ntawm ib sab ntuj kawg mus rau lwm sab, nws tsav txhua yam kom mus tau zoo.

NPN 119: 89, 90, 91, 130, 135, 175

Txais: (89a) HUAB TAIS, koj lo lus yeej nyob mus li.

HUAB TAIS, koj lo lus nyob mus li,
nws nyob ruaj nreb saum ntuj.

Txais: (89a) HUAB TAIS, koj lo lus yeej nyob mus li.

Koj txoj kev tseeb nyob tiam dhau tiam
koj teeb lub ntiaj teb kom nws nyob ruaj nreb.

Txais: (89a) HUAB TAIS, koj lo lus yeej nyob mus li.

Tas ib puas tsav yam nyob ruaj khov los txog tav no
raws li koj tau teem cia, vim txhua tsav yam tsob hwb koj.

Txais: (89a) HUAB TAIS, koj lo lus yeej nyob mus li.

Txoj kev paub txog koj cov lus ua kom pom kev,
ua kom cov neeg me muaj kev to taub.

Txais: (89a) HUAB TAIS, koj lo lus yeej nyob mus li.

Thov kom koj lub ntsej muag ci tuaj rau koj tus tub txib,
Thiab thov koj qhia koj cov cai lij choj rau kuv.

Txais: (89a) HUAB TAIS, koj lo lus yeej nyob mus li.

Thov cia kuv tus ntsuj plig muaj txoj sia kom tau cav txog koj.
Thiab cia koj cov cai lij choj txhawb nqa kuv.

Txais: (89a) HUAB TAIS, koj lo lus yeej nyob mus li.

As Les Lus Yas: ZAM 15: 5

Txais: As les lus yas, as les lus yas.

Huab Tais hais tias: Kuv yog tsob txiv cawv,
nej yog cov ceg. Tus uas nyob hauv kuv thiab
kuv nyob hauv nws, mas nws yuav txi txiv ntau.

Txais: As les lus yas, as les lus yas.

Ntawv Moo Zoo: LK 17: 20-25

20 Cov Fas Lis Xais nug Yes Xus tias thaum twg Tswv Ntuj lub Ceeb Tsheej thiaj li yuav los txog. Yes Xus teb rau lawv tias : "Thaum Tswv Ntuj lub Ceeb Tsheej los mas neeg qhov muag yuav pom tsis tau, 21 yuav tsis muaj neeg tshaj tias: 'Ntuj lub Ceeb Tsheej nyob ntawm no,’ Los ‘Nyob tod', vim tias Tswv Ntuj lub Ceeb Tsheej twb tuaj nyob hauv nruab nrab nej lawm."
22 Ces Yes Xus hais rau nws cov thwj tim tias : "Yuav muaj tej hnub uas nej ntshaw kom pom ib hnub thaum Neeg Leej Tub tseem nrog nej nyob, tab sis nej yuav tsis pom ntxiv. 23 Yuav muaj tej cov neeg hais rau nej tias : ‘Nws nyob tod', los 'Nws nyob ntawm no'. Mas nej tsis txhob mus xyuas, tsis txhob tso sas khiav mus caum. 24 Vim tias, ib yam li cov kab xob laim uas ci pom kev dawb vog kaj ib ceg kaum ntuj mus rau lwm ces, Neeg Leej Tub kuj yuav zoo ib yam li ntawd thaum nws los. 25 Tab sis nws yuav tsum xub raug luag tsim txom loj kawg nkaus thiab raug tiam neeg no tsis lees paub nws tso.”

TIM      15      LUB      11      HLIS      2019

Hnub Rau Lis Piam Peb Caug Ob Nruab Xyoo C Nruab Lis Piam Xyoo I

Hwm LN Albert tus Loj

Zaj Nyeem Ib:       THOOB TSIB  13:   1-9

1 Txhua tus neeg yeej yog neeg tsis muaj tswv yim thiab sawv daws tsis paub Tswv Ntuj. Lawv pom tej yam uas zoo kawg, tiam sis lawv paub tsis tau tus uas ib txwm nyob; lawv ntsuam kom paub cov hauj lwm ua tiav log lawm, tiam sis lawv zeem tsis tau tus ua cov hauj lwm ntawd. 2 Ces lawv saib hluav taws, saib cua los tej cua hlob, saib cov hnub qub, cov dej nphau nphwv, saib cov hnub cov hli, saib tej yam uas tswj kom lub ntiaj khiav tau zoo, yog ib co tswv ntuj. 3 Yog tias vim lawv zoo siab pom tej ntawd zoo nkauj ua luaj ces lawv thiaj xav tias tej ntawd yog ib co tswv ntuj, mas xav kom lawv yuav tsum paub tias tus Tswv tsim tej ntawd nws zoo tshaj tej ntawd npaum li cas; vim tias yog lub hauv paus kev zoo nkauj ua tus tsim tej ntawd. 4 Yog lawv twb qhuas tias tej yam ntawd muaj hwj huam thiab muaj zog ua tau hauj lwm, mas phim thaum lawv pom tej ntawd, lawv yuav xav tau tias tus tsim tej ntawd tseem muaj hwj huam loj dua tej ntawd npaum li cas. 5 Vim lub hwj chim thiab qhov zoo nkauj uas nyob hauv tej yam raug tsim los ntawd ua tau kom neeg pom tias tus tsim tej ntawd yog ib tug zoo li cas. 6 Tiam sis peb thuam tsis tau cov neeg ntawd hnyav, vim tias tej zaum yog lawv yuam kev xwb, lawv yeej nrhiav Tswv Ntuj thiab yeej xav ntsib nws kawg. 7 Lawv ua hauj lwm tsis tseg nrhiav nyob hauv nws cov hauj lwm, tab sis lawv pom tias tej yam ntawd zoo nkauj tas nrho, ces ua rau lawv yuam kev. 8 Txawm yog li ntawd los yuav zam tsis tau rau lawv. 9 Vim tias yog lawv twb nrhiav tau kev paub txuj kom lawv paub tsom tau lub sim ceeb, vim li cas lawv ho tsis ntsib nws tus Tswv thaum ntxov?

NPN       19:   2-3, 4-5AB

Txais: (2a) Cov txheej ntuj saud tshaj txog Tswv Ntuj lub koob meej.

Cov txheej ntuj saud tshaj txog Tswv Ntuj lub koob meej,
lub qab ntuj khwb piav txog cov hauj lwm nws txhais tes tau ua.
Nruab hnub hais lo lus rau nruab hnub mloog,
Hmo ntuj qhia rau hmo ntuj paub txog

Txais: (2a) Cov txheej ntuj saud piav txog Tswv Ntuj lub koob meej.

Tsis muaj ib lo lus los ib zaj lus qhia
Uas neeg yuav tsis hnov txog.
Lawv lub suab ncha mus puv tas ntiaj teb,
lawv lo lus xa moo nrov txog tim npoo ntiaj teb kawg.

Txais: (2a) Cov txheej ntuj saud piav txog Tswv Ntuj lub koob meej.

As Les Lus yas:       LK  21:   28

Txais: As les lus yas, as les lus yas.

Nej yuav sawv kom ntseg, thiab tsa nej taub hau,
vim txoj kev txhiv nej dim los txog ze ze lawm.

Txais: As les lus yas, as les lus yas.

Ntawv Moo Zoo:       LK  17:   26-37

Yes Xus hais rau nws cov thwj tim tias:
26 “Thaum lub caij Nom Hes nyob muaj tshwm sim li cas, mas kuj yuav tshwm sim ib yam li ntawd thaum txog Neeg Leej Tub lub caij thiab. 27 Lawv noj, lawv haus, lawv yuav poj niam thiab yuav txiv mus txog hnub uas Nom Hes nkag kiag mus rau hauv lub nkoj, ces dej tuaj nyab ua kom sawv daws tuag tas. 28 Thiab kuj tseem yuav zoo li lub caij uas Los ua neej nyob thiab: lawv noj, lawv haus, lawv muas cuab yeej, lawv muag cuab yeej, lawv cog qoob loo, lawv txhim vaj txhim tse. 29 Tab sis hnub uas Los tawm plaws khiav ntawm Xos Dos Mas mus, hluav taws thiab leej faj poob saum ntuj los ua sawv daws tuag tas huv si. 30 Hnub uas Neeg Leej Tub yuav tawm tuaj kuj yuav zoo ib yam li ntawd thiab. 31 Hnub ntawd, tus uas nyob saum ru tsev, hos nws lub cuab tam nyob hauv tsev lawm, mas nws yuav tsum tsis txhob nqes mus nqa; tus nyob tom teb kuj ib yam, nws yuav tsis txhob lem rov mus muab tej yam nws tso tseg nyob tom qab li. 32 Nej yuav nco ntsoov txog Los poj niam! 33 Leej twg nrhiav kev txuag nws txoj sia, mas nws yuav ua nws txoj sia ploj. Hos leej twg ua nws txoj sia ploj, mas nws yuav txuag tau nws txoj sia. 34 Kuv hais rau nej tias, hmo ntawd, ob leeg pw ib txag, luag yuav coj ib tug mus, tseg ib tug nyob. 35 Muaj ob tug poj niam ua ke zom zeb, luag yuav coj ib tug mus, tseg ib tug nyob." [36...] 37 Ces lawv hais rau Yes Xus tias : “Coj mus qhov twg, Huab Tais ?" Yes Xus hais rau lawv tias : "Lub cev nyob qhov twg, mas dav kuj yuav sib sau ntsauv nyob ntawd."

********************************************

TIM      15      LUB      11      HLIS  

HWM LN ALBERT TUS LOJ, UA TSWV QHIA THIAB KWS COV TXUJ NTSHIAB

Yog xav xaiv cov zaj nyeem tshwj xeeb rau hnub hwm LN Albert raws li nram no los tau:

Zaj Nyeem Ib:       NXL  15:   1-6

1 Tus hwm Huab Tais nws yuav ua li no, tus mloog Txoj Cai nws yuav tau txais txoj kev thoob tsib. 2 Txoj kev thoob tsib yuav tuaj cuag nws xws li ib leeg niam, yuav tos txais nws xws li ib tug poj niam tsim txiaj, 3 yuav muab txoj kev to taub los ua mov yug nws, thiab yuav muab cov dej thoob tsib rau nws haus. 4 Tus neeg hwm Huab Tais yuav ib rau txoj kev thoob tsib, ces nws yuav tsis ntog; nws yuav khaub zig txoj kev thoob tsib, ces nws yuav tsis poob ntsej muag. 5 Txoj kev thoob tsib yuav tsa nws nyob siab dua cov nyob ib ncig nws, thiab yuav qhib nws qhov ncauj hais lus rau cov neeg nyob hauv lub txoos teev ntuj, yuav muab lub tswv yim thoob tsib thiab txawj to taub rau nws, thiab muab lub hwj chim ua tsoos rau nws npua.  6 Nws yuav nrhiav tau kev zoo siab thiab kev luag ntxhi ua lub mom rau nws ntoo, nws yuav txais lub zoo npe nyob mus li los ua nws lub cuab tam.

NPN       119:   9, 10, 11, 12, 13, 14

Txais: (12b) Huab Tais, thov koj qhia koj txoj cai lij choj rau kuv.

Yuav ua cas ib tug tub hluas thiaj coj tau tus yeeb yam dawb huv ?
Yog yuav ua raws li koj cov lo lus.

Txais: (12b) Huab Tais, thov koj qhia koj txoj cai lij choj rau kuv.

Kuv nrhiav koj tas siab tas ntsws,
thov koj txhob cia kuv ncaim mus deb koj cov lus qhia.

Txais: (12b) Huab Tais, thov koj qhia koj txoj cai lij choj rau kuv.

Kuv khaws koj cov lus koj tau cog rau nruab siab
kom kuv tsis txhob ua txhaum rau koj.

Txais: (12b) Huab Tais, thov koj qhia koj txoj cai lij choj rau kuv.

HUAB TAIS, ua kom koj nto koob meej !
Thov koj qhia koj txoj cai lij choj rau kuv.

Txais: (12b) Huab Tais, thov koj qhia koj txoj cai lij choj rau kuv.

Kuv di ncauj tshaj tas nrho cov lus qhuab qhia
tawm ntawm koj lub ncauj los.

Txais: (12b) Huab Tais, thov koj qhia koj txoj cai lij choj rau kuv.

Kuv zoo siab hlo taug txoj kev ua raws li koj lo lus qhia,
Zoo siab npaum li kuv nplua nuj muaj txhij txhua.

Txais: (12b) Huab Tais, thov koj qhia koj txoj cai lij choj rau kuv.

As Les Lus Yas:        HL  16:   14B

Txais: As les lus yas, as les lus yas.

HUAB TAIS, thov koj qhib peb tej siab ntsws
kom peb mloog koj leej Tub cov lus.

Txais: As les lus yas, as les lus yas.

Ntawv Moo Zoo:       MT  13:   47-52

Yes Xus hais rai tsoom neeg coob tias:
47 "Ntuj lub Ceeb Tsheej kuj tseem zoo li ib lub vas uas luag pov rau hauv dej ntuj,  nws puav tau ntau tsav ntau hom ntses. 48 Thaum lub vas puv lawd, cov tub puav ntses rub lub vas los tim ntug nqhuab, lawv zaum thiab lawv xaiv cov zoo rau hauv tawb, hos muab cov tsis zoo pov tseg. 49 Thaum lub zim txwv kawg, kuj yuav zoo ib yam li ntawd thiab : cov tshiab yuav tawm tuaj, lawv yuav cais cov neeg phem ntawm cov neeg ncaj, 50 thiab yuav muab cov neeg phem pov tseg rau hauv lub qhov hluav taws; nyob hauv, sawv daws yuav quaj tom hniav nkawv.
51 Nej puas to taub tas ib puas tsav yam no ?" Lawv teb rau Yes Xus tias : "Peb to taub." 52 Ces Yes Xus hais rau lawv tias: “Ua li mas, ib tug Kws Ntawv Ntshiab uas tau los kawm txog Ntuj lub Ceeb Tsheej, mas nws zoo li ib tug tswv tsev uas rho tau tej yam qub thiab tej yam tshiab hauv nws lub txhab rau cuab yeej los.”

TIM 16 LUB 11 HLIS 2019

Hnub Xya Lis Piam Peb Caug Ob Nruab Xyoo C Nruab Lis Piam Xyoo I

Hwm LN Margaret nyob Scotland, thiab LN Gertrude

Zaj Nyeem Ib: THOOB TSIB 18: 14-16; 19:6-9

14 Thaum txoj kev nyob kaj lug ntsiag los npog tas txhua yam, hos hmo ntuj twb dhau nrawm nroos mus txog nrab hmo lawm, 15 koj lo lus muaj hwj huam tas nrho sawv tsees tawm ntawm koj lub theej kiab ua vaj nyob saum ntuj tuaj, xws li ib tug peeb zeej tsis hlub neeg, tuaj rau hauv ib lub teb chaws uas yuav raug puas loj, nws tuav koj lo lus txiav txim uas cheem tsis tau, ua nws rab ntaj ntse zuag plias. 16 Nws tuaj nres nroos, ces nws ua kom muaj kev tuag puv tas qhov txhia chaw; nws siab mus chwv lub ntuj thiab nws sawv saum lub ntiaj teb.
19 6 Vim tas puas tsav yam koj tau tsim los, koj rov tsim dua tshiab tas nrho raws nws yam, kom mloog koj cov lus qhia, koj cov me nyuam thiaj yuav tsis raug xwv txheej. 7 Lawv pom twv huab ua nws tus duab los roos lub yeej, muaj av qhuav tshwm tawm hauv qhov chaw uas xub muaj dej nyob los, ua ib txog kev zoo taug hla lub Hiav Txwv Liab thiab ua ib lub tiaj muaj nroj ntsuab xiab hloov cov dej nphau nphwv tuaj. 8 Cov neeg uas koj txhais tes txuag ua ib haiv neeg hla saum txoj kev no mus, hos lawv ntsia ntsoov koj cov hwj huam loj tas nrho. 9 Lawv zoo li ib co nees mus nog zaub tom nras; lawv dhia paj paws xws li ib pab yaj, lawv cav txog koj, Huab Tais, vim koj yog tus cawm lawv dim.

NPN 105: 2-3, 36-37, 42-43

Txais: (5a) Nej nco ntsoov txog cov hwj huam loj Huab Tais tau ua.
los: As les lus yas.

Nej seev nkauj rau HUAB TAIS, nej cav lus zoo txog nws ;
nej tshaj nws cov hwj huam txaus qhuas tas huv tib si.
Nej nrhiav koob meej nyob hauv nws lub npe,
nej cov muaj lub siab nrhiav Huab Tais, nej cia li zoo siab!

Txais: (5a) Nej nco ntsoov txog cov hwj huam loj Huab Tais tau ua.
los: As les lus yas.

Nws tua txhua tus tub hlob hauv lawv lub teb chaws,
Uas yog thawj phaum txiv ntawm lawv lub zog txiv neej.
Nws coj nws haiv neeg tawm mus,
Lawv nqa tau nyiaj tau kub hnyav ncawv nrog lawv,
tsis muaj ib tug hauv lawv cov xeem yuav dawm ntog li.

Txais: (5a) Nej nco ntsoov txog cov hwj huam loj Huab Tais tau ua.
los: As les lus yas.

Vim HUAB TAIS nco ntsoov txog nws lo lus ntshiab
uas nws hais rau nws tus tub txib Has Nplas Has.
Nws coj nws haiv neeg tawm mus luag ntxhi,
yog cov neeg nws xaiv, lawv zoo siab qw suab ntas ntua.

Txais: (5a) Nej nco ntsoov txog cov hwj huam loj Huab Tais tau ua.
los: As les lus yas.

As Les Lus Yas: 2 TXLN 2: 14

Txais: As les lus yas, as les lus yas.

Tswv Ntuj siv lub Moo Zoo hu peb los kom peb tau txais
peb tus Huab Tais Yes Xus Pleev lub koob meej ua peb tug.

Txais: As les lus yas, as les lus yas.

Ntawv Moo Zoo: LK 18: 1-8

1 Yes Xus hais ib zag paj lug rau nws cov thwj, qhia rau lawv tias yuav tsum teev Ntuj tsis tseg, txhob ntaus siab yau. 2 Nws hais tias : “Nyob hauv ib lub nroog, muaj ib tug txwj laus txiav txim, nws tsis ntshai Tswv Ntuj thiab tsis hwm leej twg li. 3 Muaj ib tug poj ntsuam nyob hauv lub nroog ntawd nquag tuaj cuag nws, thiab hais rau nws tias : ‘Thov koj pab tsa kuv cai tiv tus neeg ntxub kuv.’ 4 Tau ntev loo, tus txwj laus tsis kam pab li, tab sis thaum kawg nws xav tias : ‘Tab yog kuv tsis ntshai Tswv Ntuj thiab tsis hwm ib tug neeg twg li los, 5 vim tus poj ntsuam ntawd txob kuv dhau, kuv yuav tsa nws cai, kom xwv nws txhob tuaj txob txob kuv thiab txhob ua kuv dias taub hau ntxiv.’" 6 Ces Huab Tais hais tias : "Nej mloog tus txwj laus txiav txim siab tsis ncaj cov lus saib. 7 Yog tias cov neeg Tswv Ntuj xaiv, ua hnub ua hmo hu txog nws tsis tseg, nws puas yuav tsis tsa lawv cai li ? Nws puas yuav tos ntev ntev tsis teb lawv li? 8 Kuv hais rau ne tias, Tswv Ntuj yeej yuav tsa lawv cai sai sai xwb. Tab sis thaum Neeg Leej Tub los, nws puas yuav tseem nrhiav tau txoj kev ntseeg nyob ntiaj teb?"

TIM      18      LUB      11      HLIS      2019

Hnub Ob Lis Piam Peb Caug Peb Nruab Xyoo C Nruab Lis Piam Xyoo I

Nco txog Hnub Foom Hmoov Zoo rau lub Tuam Tsev LN Pob Zeb thiab Paj Lug

Hwm LN Rose Philippine Duchesne

Zaj Nyeem Ib:       1 MKN  1:   10-15, 41-43, 54-57, 62-64

10 Muaj ib tug cag phem hlav hauv cov vaj uas As Lev Xaas Daws tau tsa tuaj : yog Aas Caus Kus Es Pis Fas, uas yog tus vaj Aas Caus Kus tus tub. Nws yog ib tug neeg tau mus nyob dua txim nyob Los Mas lawm. Nws sawv los ua vaj xyoo 137 raws li cov Hes Las txoj kev xam nyoog raws lawv cov vaj.
11 Lub caij ntawd, muaj ib tiam neeg tsis hwm txoj cai sawv hauv tsoom His Xas Lais tuaj. Lawv ntxias tau ntau leej mus yuam kev. Lawv hais tias : "Peb kav tsij mus nrog lwm cov haiv neeg uas nyob ib ncig peb sib fim. Vim tias txij thaum peb ncaim ntawm lawv los lawm, mas peb tau raug ntau yam xwv txheej." 12 Cov pej xeem nyiam cov lus ntxias no. 13 Lawv muaj ib co maj nroos mus cuag tus vaj, ces tus vaj tso lus kheev kom lawv mus coj cov pej kum neeg tej kev cai. 14 Lawv thiaj tsa ib lub tshav sib tw nyob Yes Lus Xas Les xws li cov pej kum teb chaws muaj. 15 Lawv muab lub Cim Txiav ntawm lawv daim tawv rov musk ho rau, thiab lawv tso txoj kev nrog Tswv Ntuj cog lus tseg, lawv mus nrog cov pej kum neeg coj dab sib fim. Lawv muab lawv tus kheej muag rau txoj kev ua phem.
41 Ces tus vaj Aas Caus Kus tshaj rau nws lub teb chaws tas tib si tias kom sawv daws yuav tsum koom ua ib haiv neeg xwb, thiab nyias yuav tsum tso nyias tej kab lis kev cai pov tseg. 42 Tas cov pej kum neeg sawv daws ua raws li tus vaj cov lus ceeb toom. 43 Thiab kuj muaj coob leej His Xas Lais txais tus vaj txoj kev teev hawm, lawv txi dab thiab tsis caiv hnub xas npas tos li lawm.
54 Hnub tim kaum tsib lub hlis Kis Les xyoo 145, tus vaj tsa qho phem kawg nkauss rau saum cov Yus Das lub thaj hlawv tsiaj txi Ntuj, thiab nyob hauv cov nroog nyob ib ncig, lawv kuj tsa ib co thaj txi dab thiab. 55 Sawv daws hlawv xyab zom zaws rau ntawm lawv tej qhov rooj thiab nyob ntawm tej kev. 56 Yog lawv pom cov phau ntawv hais txog txoj Cai mas lawv muab dua thiab muab pov hlawv tas. 57 Yog lawv pom ib tug neeg twg muaj ib phau ntawv hais txog txoj Cai los yog lawv pom ib tug neeg coj raws txoj Cai mas nws yuav tsum raug txiav txim tuag vim tus vaj ua txoj cai li ntawd.
62 Tsis kav muaj coob leej His Xas Lais kuj nyob ruaj nreb, lawv txiav txim siab muaj peev xwm tiv tsis kam noj tej yam tsis huv. 63 Lawv yeem tuag zoo dua noj tej yam tsis huv thiab ua txhaum rau Txoj Cai Cog Lus. Ces lawv kuj tau txais kev tuag tiag. 64 Muaj kev txom nyem loj kawg nyob rawv saum cov His Xas Lais taub hau.

NPN       119:   53, 61, 134, 150, 155, 158

Txais:   (88) Huab Tais, thov koj muab txoj sia rau kuv,
ces kuv yuav ua raws koj lo lus qhia.

Kuv ntsawv siab vim cov tsis hwm Ntuj
tso koj txoj Cai pov tseg.

Txais:   (88) Huab Tais, thov koj muab txoj sia rau kuv,
ces kuv yuav ua raws koj lo lus qhia.

Txawm cov neeg tsis hwm Ntuj cuab voj hlua tos kuv,
los kuv tsis tau hnov qab koj Txoj Cai li.

Txais:   (88) Huab Tais, thov koj muab txoj sia rau kuv,
        ces kuv yuav ua raws koj lo lus qhia.

Thov koj txhiv kuv dim ntawm neeg txoj kev lim hiam,
kom kuv tau coj nraim koj tej lus qhia.

Txais:   (88) Huab Tais, thov koj muab txoj sia rau kuv,
      ces kuv yuav ua raws koj lo lus qhia.

Cov neeg phem lim hiam tuaj tsim txom kuv,
vim lawv txav mus deb ntawm koj xoj Cai lawm.

Txais:   (88) Huab Tais, thov koj muab txoj sia rau kuv,
      ces kuv yuav ua raws koj lo lus qhia.

Txoj kev cawm nyob deb cov neeg txhaum,
vim lawv tsis nrhiav koj cov cai lij choj.

Txais:   (88) Huab Tais, thov koj muab txoj sia rau kuv,
        ces kuv yuav ua raws koj lo lus qhia.

Kuv pom cov neeg ntxeev siab, ua rau kuv tsis zoo siab li,
vim lawv tsis mloog raws li koj lo lus koj tau cog.

Txais:   (88) Huab Tais, thov koj muab txoj sia rau kuv,
      ces kuv yuav ua raws koj lo lus qhia.

As Les Lus Yas:       ZAM  8:  12

Txais: As les lus yas, as les lus yas.

Huab Tais hais tias: Kuv yog qhov pom kev kaj lub qab ntuj neeg.
Leej twg lawv kuv qab, nws yuav tau qhov pom kev uas coj mus rau txoj sia

Txais: As les lus yas, as les lus yas.

Ntawv Moo Zoo:       LK  18:   35-43

35 Thaum Yes Xus tuaj yuav txog Yes Lis Kos, muaj ib tug dig muag zaum thov khawv ntawm ntug kev. 36 Nws hnov ib pab neeg taug kev, ces nws nug saib yog muaj dab tsi. 37 Lawv qhia nws tias yog Yes Xus Nas Xas Les tuaj hla ntawd mus. 38 Ces nws tsa suab hu nrov nrov tias : "Yes Xus, Das Vis Leej Tub, thov koj khuv leej kuv !" 39 Cov uas mus kev tom hauv ntej cem nws kom ua twj ywm, tab sis nws haj yam hu nrov nrov tias : "Das Vis Leej Tub, thov koj khuv leej kuv !” 40 Ces Yes Xus nres, nws kom lawv coj tus dig muag los rau nws. Thaum tus dig muag los txog ze, Yes Xus nug nws tias : 41 "Koj xav kom kuv ua dab tsi rau koj ?" Tus dig muag hais tias : "Huab Tais, thov ua kom kuv rov pom kev." 42 Ces Yes Xus hais rau nws tias : "Koj rov pom kev mas ! Koj lub siab ntseeg cawm tau koj lawm." 43 Tam sis ntawd, tus dig muag rov pom kev, ces nws raws Yes Xus mus, nws cav txog Tswv Ntuj. Tas tsoom pej xeem pom qhov ntawd, lawv cav lus zoo txog Tswv Ntuj.


*********************************************

TIM 18 LUB 11 HLIS

NCO TXOG HNUB FOOM HMOOV ZOO RAU COV TUAM TSEV LN POB ZEB THIAB LN PAJ LUG

Yog xav xaiv cov zaj nyeem tshwj xeeb rau kev nco hnub Foom Hmoov Zoo rau lub Tuam Tsev LN Pob Zeb thiab Paj Lug raws li nram no los tau:

Zaj Nyeem Ib: HL 28: 11-16, 30-31

11 Tom qab peb lub hlis lawm, peb caij nkoj mus, yog ib lub nkoj uas nyob tos hauv lub pov txwv no kom ntuj no dhau tso. Yog ib lub nkoj As Lev Xaas Nrias muaj tus mlom ob kwv tij ntxaib Dis Os Kus Lis nyob pem taub hau nkoj. 12 Peb mus nqes nkoj nyob Xis Las Kus, peb nyob ntawd peb hnub. 13 Ces peb rov caij nkoj ntawd ncig raws ntug dej mus txog Les Zias. Ib hnub tom qab, cua sawv sab Naj tuaj, ces hnub ob peb thiaj mus txog rau Pus Tos Lis. 14 Peb ntsib ib co kwv tij nyob Pus Tos Lis. Lawv thov kom peb nrog lawv nyob xya hnub, ces peb mam li mus rau Los Mas. 15 Cov kwv tij hauv Los Mas hnov tias peb tuaj, ces lawv tuaj tos peb txog puag tom lub tshav As Pias thiab lub zos hu ua Peb Chav Tsev Haus Cawv. Paj Lug pom lawv, mas nws ua Tswv Ntuj tsaug, thiab nws lub siab rov loj tuaj. 16 Thaum peb tuaj txog hauv Los Mas lawm, mas lawv cia Paj Lug nws nyob nws hauv ib lub tsev, nrog tus tub rog uas zov nws.
30 Paj Lug nyob tau ob xyoos nkaus hauv lub tsev uas nws tus kheej ntiav rau nws nyob. Nws txais cov neeg uas tuaj xyuas nws tas huv tib si. 31 Nws tshaj txog Tswv Ntuj lub Ceeb Tsheej, thiab qhia txog Huab Tais Yes Xus Pleev; nws tab meeg qhia, tsis muaj leej twg txwv nws li.


NPN 98: 1, 2-3AB, 3CD-4, 5-6

Txais: (2b) HUAB TAIS tau qhia nws lub hwj huam
cawm neeg rau cov kuj cuab paub.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
nws sab npab ntshiab tau ua qhov ntawd.

Txais: (2b) HUAB TAIS tau qhia nws lub hwj huam
cawm neeg rau cov kuj cuab paub.

HUAB TAIS ua kom sawv daws paub txog nws txoj kev cawm,
nws muab nws txoj kev ncaj rau cov haiv neeg pom.
Nws rov nco txog nws txoj kev ua zoo rau
thiab hlub tsev neeg His Xas Lais.

Txais: (2b) HUAB TAIS tau qhia nws lub hwj huam
cawm neeg rau cov kuj cuab paub.

Tas npoo ntuj npoo ntiaj teb tau pom
peb tus Tswv Ntuj txoj kev cawm neeg.
Tas txhua teb chaws, nej zoo siab hu nkauj rau HUAB TAIS,
nej qw suab hu nkauj, nej cav txog nws.

Txais: (2b) HUAB TAIS tau qhia nws lub hwj huam
cawm neeg rau cov kuj cuab paub.

Nej ntaus nkauj nog ncas cav txog Huab Tais,
nej ntaus nkauj nog ncas nrog tej zaj nkauj zoo mloog.
Nej tshuab hom ntxuag suab kub nyuj,
nej hu nkauj zoo siab nyob ntawm peb tus vaj
Ntawm peb tus HUAB TAIS xub ntiag.

Txais: (2b) HUAB TAIS tau qhia nws lub hwj huam
cawm neeg rau cov kuj cuab paub.

As Les Lus Yas: Te Deum

Txais: As les lus yas, as les lus yas.

Tswv Ntuj, peb cav lus zoo txog koj,
peb tshaj tias koj yog Huab Tais;
tsoom Hauv Paus Xa Lus uas
muaj koob meej lawv cav txog koj.

Txais: As les lus yas, as les lus yas.

Ntawv Moo Zoo: MT 14: 22-33

22 Thaum tsoom neeg coob tau noj mov tsau tas lawm, Yes Xus txhib cov thwj tim kom nce nkoj ua nws ntej mus lawm sab ntug dej tim ub, hos nws yuav nyob xa tsoom sid rov qab. 23 Thaum Yes Xus xa zeej tsoom rov qab mus tas lawm, nws nce mus saum roob, rau ib qho chaw xu kev, ces nws teev Ntuj. Thaum tsaus ntuj, tshuav nws tib leeg xwb. 24 Lub nkoj twb mus deb ntawm ntug nqhuab lawm ntau ntsua muag kev. Dej nphau nphwv tuaj nplawm lub nkoj, vim cua tshuab tom hauv ntej tuaj. 25 Thaum lub caij yuav kaj ntug, Yes Xus mus ko taw saum nplaim dej, nws tuaj caum cov thwj tim. 26 Lawv pom Yes Xus mus ko taw saum dej ntuj, lawv ntshai kawg, lawv hais tias : "Yog dab os!” Ces lawv qw qw, vim lawv ntshai. 27 Tam sis ntawd Yes Xus hais rau lawv tias : "Nej tso siab mas ! Yog kuv ! Txhob ntshai." 28 Pob Zeb teb rau Yes Xus tias : "Huab Tais, yog koj tiag no, koj kheev kom kuv tsuj nplaim dej tuaj cuag koj." 29 Yes Xus teb tias : "Tuaj mas !" Ces Pob Zeb nqes saum nkoj los thiab pib tsuj saum nplaim dej mus cuag Yes Xus. 30 Tab sis nws pom cua hlob hlob, ces nws ntshai, nws txawm pib tog hauv dej, nws qw qw tias : "Huab Tais, cawm kuv mas !" 31 Yes Xus cev tes tam sis ntawd mus tuav Pob Zeb, nws hais rau Pob Zeb tias : "Neeg muaj kev ntseeg tsawg, ua cas koj ua xyem xyav ?" 32 Thaum nkawd nce hlo rau hauv nkoj lawm, ces cua tu nrho. 33 Cov nyob hauv nkoj pe Yes Xus, lawv hais tias : "Koj yog Tswv Ntuj Leej Tub tiag !"

TIM 19 LUB 11 HLIS 2019

Hnub Peb Lis Piam Peb Caug Peb Nruab Xyoo C Nruab Lis Piam Xyoo I

Zaj Nyeem Ib: 2 MKN 6: 18-31

18 Es Les As Ntxas yog ib tug nyob hauv cov thawj kws Txoj Cai. Nws hnub nyoog nchav lawm thiab nws muaj ib lub meej mom muaj tsim. Nws raug lawv muab nws qhov ncauj rua thiab yuam kom nws noj nqaij npuas. 19 Tab sis nws yeem muaj koob meej nyob hauv txoj kev tuag dua ua lub neej muaj txhaum, ces nws mus nws rau ntawm qhov chaw uas nws yuav raug tsim txom. 20 Nws nti cov nqaij nyob hauv nws qhov ncauj pov tseg, xws li cov uas muaj peev xwm tsis kam saj tej yam caiv, txawm tias qhov ntawd yuav ua kom nws tas nws txoj sia. 21 Cov neeg uas npaj rooj nqaij txi dab ntawd coj Es Les As Ntxas mus rau ib qho, vim lawv paub nws zoo, lawv pab tswv yim rau nws tias kom nws yuav tsum npaj nws ib co nqaij uas nws noj tau tuaj, ces nws tsuas lam ua txuj noj cov nqaij txi dab raws li tus vaj cov lus ceeb toom xwb. 22 Yog nws ua li ntawd mas nws yuav tsis raug txim tuag, thiab lawv tseem yuav ua zoo rau nws ntxiv raws li lawv txoj qub kev phooj ywg.
23 Tab sis Es Les As Ntxas tuaj yeem ua raws qhov zoo tshaj, kom tsim nyog nws lub hnub nyoog laus thiab kom phim nws lub meej mom thiab nws lub neej uas nws ua tau zoo txij puag thaum yau los lawm, thiab nws yeem ua raws Txoj Cai ntshiab uas Tswv Ntuj qhia, ces nws teb sai sai rau lawv tias kom lawv cia li xa nws mus lawm hauv lub teb chaws tsaus ntuj xwb. 24 Nws hais tias : "Laus li peb no lawm tsis phim yuav ua txuj dag, nyob tsam ntau leej hluas yuav to taub tias thaum Es Les As Ntxas muaj cuaj caum xyoo nws mus ua pej kum neeg kev cai lawm. 25 Ces yog vim qhov kuv dag kom kuv tau nyob ib nyuag me me ntxiv xwb, ces lawv thiaj xav yuam kev vim kuv, hos kuv yuav ua neej laus nkoos nyob hauv kev txaj muag thiab kev poob koob meej. 26 Tab txawm tias nyem no kuv tsis raug tib neeg tua kuv, los ciaj tuag kuv yeej yuav tsis dim ntawm tus muaj hwj huam txhais tes li. 27 Li ntawd yog kuv ua siab tawv qhawv tso kuv txoj sia nyem no li ib tug txiv neej yawg tiag, mas thiaj tsim nyog qhov kuv ua neej laus nkoos. 28 Thiab kuv thiaj yuav tso tau ib tug piv txwv zoo rau cov hluas pom tias txoj kev tuaj yeem txaus siab tuag pub rau Txoj Cai ntshiab uas peb hwm yog zoo li cas." Thaum Es Les As Ntxas hais li ntawd tas, nws cia li txav los ze ntawm qhov chaw nws yuav raug tsim txom.
29 Cov neeg uas puag ta xav pab nws, nyem no lawv hloov siab xav ua phem lawm, vim lawv xav tias nws cov lus yog lus vwm xwb. 30 Thaum lawv ntaus Es Les As Ntxas, nws yuav tu siav txog tes, nws nroo ib suab nws hais tias : "Tus HUAB TAIS uas muaj txoj kev paub dawb huv, nws yeej paub tseeb tias yog kuv tsis xav tuag los tau, tab sis kuv tuaj yeem nyiaj mob loj nyob hauv kuv lub cev raug luag nplawm, thiab kuv tus plig zoo siab nyiaj tej no vim kuv hwm HUAB TAIS."
31 Es Les As Ntxas tuag li ntawd. Nyob hauv nws txoj kev tuag nws tso tau ib tug piv txwv zoo qhia txog txoj kev ua siab tawv qhawv thiab txoj kev ua qhov zoo rau cov hluas thiab rau tas nrho nws haiv neeg tib si.

NPN 3: 2-3, 4-5, 6-7

Txais: (6b) Huab Tais yog tus txheem kuv.

HUAB TAIS, kuv cov yeeb ncuab coob tas nrho !
Coob leej sawv los ntxeev siab rau kuv!
Coob leej hais txog kuv tias :
“Yuav tsis muaj kev cawm rau nws nyob hauv Tswv Ntuj li.”

Txais: (6b) Huab Tais yog tus txheem kuv.

Tiam sis, HUAB TAIS, koj yog daim leem phiaj thaiv kuv,
koj yog kuv lub koob meej, yog tus tsa kuv taub hau kom siab.
Thaum kuv tsa suab nrov hu HUAB TAIS,
nws teb kuv saum nws lub roob ntshiab tuaj.

Txais: (6b) Huab Tais yog tus txheem kuv.

Thaum kuv qhau cev pw tsaug zog,
kuv tsim rov los dua vim HUAB TAIS nres kuv.
Kuv tsis ntshai cov neeg coob coob
uas sawv vij vog ib ncig kuv tas nrho.

Txais: (6b) Huab Tais yog tus txheem kuv.

As Les Lus Yas: 1 ZAM 4: 10b

Txais: As les lus yas, as les lus yas.

Tswv Ntuj nyiam peb, nws thiaj xa nws Leej Tub
tuaj ua nqi txhiv peb ntawm peb cov txhaum.

Txais: As les lus yas, as les lus yas.

Ntawv Moo Zoo: LK 19: 1-10

1 Yes Xus mus hauv Yes Lis Kos, nws npaj taug kev hla lub tsheej mus. 2 Muaj ib tug txiv neej lub npe hu ua Ntxas Kais, nws yog ib tug tswj hauv cov neeg sau se, nws yog neeg nplua nuj. 3 Nws nrhiav kom tau kev pom saib Yes Xus yog leej twg, tab sis nws tsis tau kev, vim neeg coob dhau, thiab nws yog neeg qig taub. 4 Ces nws khiav mus ua ntej, nws nce mus saum ib tsob ntoo xis kas mos kom tau pom Yes Xus, vim Yes Xus yuav los hla ntawd mus. 5 Thaum Yes Xus los txog ntawm qhov chaw ntawd, nws tsa muag ntsia saud, nws hais tias : "Ntxas Kais, koj nqes los sai, vim hnub no kuv yuav tsum mus hauv koj tsev." 6 Ntxas Kais nqes nrawm nroos los, nws zoo siab txais Yes Xus. 7 Sawv daws pom li ntawd, lawv yws yws hais tias : "Nws mus so hauv ib tug neeg txhaum lub tsev !" 8 Hos Ntxas Kais sawv ntsug, nws hais rau Huab Tais tias : "Huab Tais, kuv yuav muab kuv tej cuab yeej cuab tam ib nrab pub rau cov pluag. Yog kuv tau ua tsis ncaj rau leej twg lawm, mas kuv yuav them plaub npaug pauj rau nws." 9 Yes Xus hais rau Ntxas Kais tias : "Hnub no, txoj kev cawm los txog hauv lub tsev no lawm, vim tus no kuj yog Has Nplas Has ib leeg tub thiab. 10 Vim tias Neeg Leej Tub tuaj yog tuaj nrhiav thiab tuaj cawm tus uas ploj lawd."

TIM 20 LUB 11 HLIS 2019

Hnub Plaub Lis Piam Peb Caug Peb Nruab Xyoo C Nruab Lis Piam Xyoo I

Zaj Nyeem Ib: 2 MKN 7: 1, 20-31

1 Kuj tseem muaj xya leej kwv tij nrog leej niam raug tus vaj ntes thiab raug muab hlua thiab muab leeg nyuj los nplawm lawv, yuam kom lawv noj nqaij npuas uas Tswv Ntuj txoj cai txwv tsis pub noj.
20 Leej niam ua tej yam txaus qhuas kawg thiab tsim nyog yuav tsum nco ntsoov txog mus li. Nws ntsia nws xya leej tub ib tug tuag zuj zus nyob hauv tib hnub nkaus, tsis kav nws ua siab tawv qhawv ris qhov ntawd vim nws tso siab rau Tswv Ntuj. 21 Nws hais lawv phaj txiv xeem lus los ntuas nws cov tub ib leeg dhau ib leeg. Nws muaj ib lub tswv yim txawj xav zoo thiab nws muaj ib lub peev xwm txiv neej txhawb nws lub siab poj niam kom nws txawj hais tej lo lus txhawb zog rau nws cov tub li no: 22 "Kuv tsis paub nej xeeb zoo li cas los nyob hauv kuv lub plab. Kuv tsis yog tus muab txoj sia txoj pa rau nej ! Kuv tsis yog tus tau teeb txhua yam kom nyob muaj chaw rau hauv nej. 23 Li ntawd, tus Tswv tsim lub sim ceeb, uas yog tus puab kom pib muaj tib neeg los thiab nws yog lub hauv paus chiv kom muaj txhua tsav txhua yam, tus Tswv siab zoo khuv leej neeg ntawd yeej yuav rov muab txoj pa thiab txoj sia rau nej, vim nej tsis hlub nej nyem no kom tau nyiam nws Txoj Cai dua."
24 Tus vaj Aas Caus Kus xav tias cov lus ntawd yog lus thuam nws thiab cem nws ntag, vim leej niam ua lub suab hais lus tshawv tsawv. Thaum ntawd, tus tub ntxawg tseem muaj txoj sia nyob, ces tus vaj thiaj ntxias nws, tsis yog hais lo lus ntxias xwb hos tseem cog lus tib si tias, tus vaj yeej yuav ua kom nws nplua nuj thiab kom nws tau zoo yog nws tso nws cov yawg koob tej kev cai pov tseg, tus vaj yuav nrog nws ntaus phooj ywg zoo thiab yuav muab ib txog hauj lwm siab rau nws ua. 25 Tab sis tus tub ntxawg tsis mloog tus vaj cov lus, ces tus vaj hu kom leej niam los thiab hais kom nws ntuas nws tus tub kom tus tub rov cawm nws txoj sia. 26 Tus vaj hais lus ntev loo tas, ces leej niam thiaj lees tias nws mam mus ntuas nws tus tub. 27 Ces nws ua txuj lam ua li tus vaj siab phem hais, nws khoov mus siv nws xeem lus hais rau nws tus tub tias : "Me tub, koj hlub koj niam mog ! Kuv tau nqa koj cuaj lub hlis nyob hauv kuv lub plab, tau pub mis rau koj noj peb lub xyoos, tau tu koj qhuab qhia koj los txog txij no, thiab tau yug zaub yug mov rau koj. 28 Me tub, kuv xav kom koj ntsia lub ntuj thiab lub ntiaj teb, thiab tas puas tsav yam uas nyob rau hauv, koj yuav tsum paub tias Tswv Ntuj tsis tau siv dab tsi uas twb xub muaj lawm los tsim tej ntawd li. Nws kuj tsim neeg ib yam li ntawd thiab. 29 Koj tsis txhob ntshai tus niag neeg tua neeg ntawd, koj yuav ua kom phim koj cov tij laug mog. Koj ua siab tuag, ces kuv thiaj yuav rov ntsib koj nrog koj cov tij laug ua ke nyob hauv Tswv Ntuj txoj kev khuv leej neeg mog."
30 Nws niam tseem hais lus tsis tau tas, tus tub twb hais tias : "Nej tseem tos dab tsi ntxiv ? Kuv tsis kam mloog tus vaj cov lus, kuv yuav mloog Txoj Cai uas Mais Xes qhia rau peb cov yawg koob xwb. 31 Hos koj tus uas nrhiav txhua yam kev tsim txom los rau cov neeg Hes Nplaws, mas koj yuav tsis dim ntawm Tswv Ntuj txhais tes li."

NPN 17: 1BCD, 5-6, 8+15

Txais: (15b) Huab Tais, thaum koj lub hwj chim tawm tuaj,
kuv yuav muaj kev zoo siab puv npo.

HUAB TAIS, thov koj mloog ib zag lus ua plaub ncaj ncees;
Koj cuab pom ntseg rau kuv lub suab quaj,
Koj tig ntsej los rau kuv lo lus thov vim kuv di ncauj tsis hais lus dag.

Txais: (15b) Huab Tais, thaum koj lub hwj chim tawm tuaj,
kuv yuav muaj kev zoo siab puv npo.

Kuv taug koj txoj kev nraim, kuv ko taw tsis tau mus yuam kev.
Kuv tus Tswv Ntuj, kuv hu txog koj, vim koj yeej yuav teb kuv;
thov koj qaij pob ntseg los rau kuv thiab koj mloog kuv lo lus!

Txais: (15b) Huab Tais, thaum koj lub hwj chim tawm tuaj,
kuv yuav muaj kev zoo siab puv npo.

Thov koj txuag kuv zoo li txuag koj lub ntsiab muag,
Thov koj zais kuv rau hauv koj phab tis qhov ntxoov,
Kuv yeej yuav tau pom koj lub ntsej muag vim txoj kev ncaj.
Kuv tsim dheev los, kuv yuav zoo siab hlo tau nyob ze ntawm koj.

Txais: (15b) Huab Tais, thaum koj lub hwj chim tawm tuaj,
kuv yuav muaj kev zoo siab puv npo.

As Les Lus yas: ZAM 15: 16

Txais: As les lus yas, as les lus yas.

Huab Tais hais tias: Kuvtau xaiv nej hauv lub ntiaj teb los,
Kom nej mus txi ib co txiv uas yuav nyob ruaj.

Txais: As les lus yas, as les lus yas.

Ntawv Moo Zoo: LK 19: 11-28

11 Cov neeg ntawd mloog Yes Xus hais cov lus no, thiab nws tseem hais ib zag paj lug ntxiv, vim nws mus txog ze ze Yes Lus Xas Les lawm, thiab cov neeg xav hais tias ntshai Tswv Ntuj lub Ceeb Tsheej yuav tawm los nyob rau ntawd sai sai no. 12 Yes Xus thiaj hais tias : "Muaj ib tug neeg yog tub nom tub tswv, nws mus rau ib lub teb chaws nyob deb , yuav mus txais txoj kev ua vaj tas ces nws mam rov qab los. 13 Nws hu nws kaum leej tub txib tuaj, nws muab kaum choj kub rau lawv, nws hais rau lawv tias : ‘Nej coj mus ua lag ua luam mus txog hnub kuv rov los.’ 14 Tab sis nws cov pej xeem ntxub nws, lawv xa ib pab tiam lis lawv qab mus hais tias : ‘Peb tsis xav kom tus no ua vaj kav peb.’ 15 Thaum nws txais kev ua vaj tas lawm, nws rov los txog, nws kom lawv hu cov tub txib uas nws tau muab kub rau tuaj, kom paub saib lawv nyias tau ua nyias lag luam li cas lawm. 16 Thawj tug tuaj txog, nws hais tias : ‘Huab Tais, koj choj kub ntxeev tau kaum choj paj lawm.’ Tus vaj hais rau nws tias : 17 ‘Zoo kawg, tub txib zoo. Koj tau muaj lub siab pheej xeeb hauv tej yam me me, ua li mas koj yuav ua nom tswj kaum lub nroog.’ 18 Tus ob tuaj txog, nws hais tias : ‘Huab Tais, koj choj kub ntxeev tau tsib choj paj lawm.’ 19 Tus vaj hais rau tus ntawd tias : ‘Koj yuav ua nom tswj tsib lub nroog.’ 20 Muaj ib tug tuaj txog, nws hais tias : ‘Huab Tais, qho no yog koj choj kub, kuv tau muab qhwv rau hauv ib txoj phuam cia, 21 vim kuv ntshai koj, vim koj yog ib tug neeg coj nruj nruj, koj cia li khaws yuav tej yam uas koj tsis tau muab tshwj cia, koj sau tej yam uas koj tsis tau tseb.’ 22 Tus vaj hais rau nws tias : ‘Tub txib siab phem, kuv txiav txim rau koj raws nraim li koj lub ncauj tau hais. Koj twb paub tias kuv yog ib tug neeg coj nruj, kuv cia li khaws yuav tej yam uas kuv tsis tau muab tshwj cia, kuv sau tej yam uas kuv tsis tau tseb, 23 vim li cas koj tsis coj kuv choj kub mus tso hauv cov tsev ceev nyiaj ? Ces thaum kuv rov los, kuv thiaj tau rho kuv choj kub nrog ib qho paj.’ 24 Ces tus vaj hais rau cov neeg nyob ntawd tias : ‘Nej rho choj kub ntawm nws los, nej muab rau tus uas muaj kaum choj.’ 25 Ces lawv hais rau tus vaj tias : ‘Huab Tais, nws twb muaj kaum choj lawm.’ 26 ‘Kuv hais rau nej tias tus uas muaj lawm, luag yuav pub ntxiv rau nws; hos tus uas tsis muaj, mas luag tseem yuav muab qhov uas nws muaj tshem mus thiab. 27 Hos kuv cov yeeb ncuab, uas tsis kam kuv ua vaj tswj lawv, mas nej coj lawv los ntawm no, nej muab lawv tua rau ntawm kuv xub ntiag.’"
28 Thaum Yes Xus hais cov lus no tas, nws mus zoj ua ntej, taug kev nce mus pem Yes Lus Xas Les lawm.

TIM 21 LUB 11 HLIS 2019

HNUB TSIB LIS PIAM PEB CAUG PEB NRUAB XYOO C NRUAB LIS PIAM XYOO I

Nco txog Hnub Lawv Coj Niam Mab Liab mus Cob Rau lub Tuam Tsev Teev Ntuj

Zaj Nyeem Ib: 1 MKN 2: 15-29

15 Tus vaj cov tub rog uas saib xyuas txoj hauj lwm yuam neeg kom thim lawv txoj kev ntseeg tuaj txog hauv lub nroog Mos Dis tuaj npaj yuam kom txi dab. 16 Muaj coob leej His Xas Lais mus koom cov tub rog, tshuav Mas Tas Thias thiab nws cov tub lawv thiaj mus sib sau rau lawv ib qho. 17 Ces tus vaj cov tub rog hais rau Mas Tas Thias tias: "Koj yog ib tug thawj coj nto koob meej thiab muaj hwj chim nyob hauv lub nroog no, thiab koj muaj tub muaj kwv tij txhawb koj, 18 ua li mas koj cia ua thawj hlo mus ua raws li tus vaj cov lus ceeb toom, xws li tas txhia haiv neeg tau ua, thiab cov thawj coj Yus Das, thiab cov neeg uas tseem nyob Yes Lus Xas Les tau ua. Ces koj thiab koj cov tub yuav tau ua tus vaj phooj ywg zoo. Koj thiuab koj cov tub nej yuav tau txais nyiaj txais kub thiab txais ntau yam ua paj tshab."
19 Tiam sis Mas Tas Thias teb nrov nrov rau lawv tias : "Tab yog tas txhua haiv neeg uas nyob hauv tus vaj lub qasb tswj hwm mloog nws lus thiab xaiv txoj kev ua raws li nws cov lus ceeb toom, ces nyias tso nyias cov yawg koob tej kev cai pov tseg, 20 los kuv thiab kuv cov tub cov kwv tij peb yuav ua raws li peb cov yawg koob tau cog lus xwb. 21 Thov kom peb tsis txhob tso Txoj Cai thiab tej kev cai lij choj pov tseg ! 22 Peb yuav tsis mloog tus vaj cov lus. Peb yuav tsis kam ncaim ntawm peb txoj kev cai teev hawm mus sab xis los sab laug li."
23 Thaum Mas Tas Thias hais lus tu nrho, txawm muaj ib tug Yus Das tab meeg txav los rau sawv daws pom, nws txi dab nyob saum lub thaj nyob Mos Dis, raws li tus vaj cov lus ceeb toom. 24 Thaum Mas Tas Thias pom li ntawd mas nws mob siab kub lug thiab nws tej siab ntsws tshee na. Nws npau taws heev, ces nws tib sas mus muab tus Yus Das tua kiag rau saum lub thaj. 25 Ib txhij ntawd nws kuj tua tus rog uas tus vaj xa tuaj yuam kom lawv txi dab thiab. Ces nws rhuav lub thaj pov tseg. 26 Nws lub siab kub lug rau Txoj Cai xws li thaud Pis Nes As siab kub lug ntaus Xis Lis uas yog Xas Lws tus tub.
27 Mas Tas Thias thiaj qw nrov nrov rau lub nroog tias : "Yog leej twg kub siab rau Txoj Cai thiab coj nraim cov lus cog, mas kom nws tuaj raws kuv qab mus !" 28 Mas Tas Thias thiab nws cov tub thiaj khiav mus nyob pem roob, lawv tso lawv tej cuab yeej cuab tam tas huv si rau hauv nroog. 29 Ces muaj coob leej uas xav coj raws kev ncaj thiab Txoj Cai, lawv khiav mus tsa tsev nyob hauv teb chaws suab puam.

NPN 50: 1B-2, 5-6, 14-15

Txais: (23b) Kuv yuav qhia Tswv Ntuj lub hwj huam cawm neeg rau tus neeg siab ncaj.

HUAB TAIS Tswv Ntuj nws qhib ncauj hais lus,
nws nqua hu tas lub ntiaj teb, txij hnub tuaj txog hnub poob,
Tswv Ntuj nyob saum lub roob Xis Yoos,
nws zoo saib tas nrho, nws ci ntsa iab tuaj.

Txais: (23b) Kuv yuav qhia Tswv Ntuj lub hwj huam cawm neeg rau tus neeg siab ncaj.

“Nej sau cov ntseeg txog kuv tuaj nyob ntawm kuv xub ntiag,
Nej sau cov uas tau tua tsiaj nrog kuv cog lus tuaj.”
Ces lub ntuj tshaj nws txoj kev ncaj,
Vim tias Tswv Ntuj yog tus txiav txim.

Txais: (23b) Kuv yuav qhia Tswv Ntuj lub hwj huam cawm neeg rau tus neeg siab ncaj.

“Koj muab koj lo lus cav lus qhuas los txi rau Tswv Ntuj,
koj pauj koj lub yeem rau tus Nyob Siab.
Thaum kev txhawj xeeb tuaj, koj hu txog kuv,
kuv yuav npo koj dim, ces koj yuav cav txog kuv lub koob meej.”


Txais: (23b) Kuv yuav qhia Tswv Ntuj lub hwj huam cawm neeg rau tus neeg siab ncaj.

As Les Lus Yas: NPN 95: 8

Txais: As les lus yas, as les lus yas.

Hnub no, yog nej hnov nws lub suab,
Tsis txhob ua nej lub siab tawv ncauj.

Txais: As les lus yas, as les lus yas.

Ntawv Moo Zoo: LK 19: 41-44

41 Thaum Yes Xus tuaj yuav txog Yes Lus Xas Les, nws pom lub nroog, nws quaj rau lub nroog, 42 nws hais tias : "Kheev lam hnub no koj to taub txog tias dab tsi thiaj yuav muab kev thaj yeeb rau koj mas! Tab sis, qhov ntawd ces nyob zais ntshis ntawm koj qhov muag lawm. 43 Vim tias, yuav muaj ib hnub uas koj cov yeeb ncuab yuav khawb kwj vij koj, lawv yuav tuaj puav koj, yuav nias qees qhov txhia chaw tuaj rau koj. 44 Lawv yuav tsuj koj rau hauv av, yuav tsuj koj thiab koj cov me nyuam uas nyob hauv koj. Lawv yuav tsis tseg ib lub pob zeb uas tseem tshooj ib lub nyob li, yog vim koj tsis kam txais lub caij uas Ntuj tuaj xyuas koj.”

TIM      22      LUB      11      HLIS      2019

Hnub Rau Lis Piam Peb Caug Peb Nruab Xyoo C Nruab Lis Piam Xyoo I

Hwm LN Cecilia, Nkauj Ntshiab tuag ua Tim Khawv

Zaj Nyeem Ib:       1 MKN  4:   36-37, 52-59

36 Ces Yus Das thiab nws cov kwv tij hais tias : "Peb cov yeeb ncuab twb tawg tas lawm, peb yuav mus ua kom lub Tuam Tsev Teev Ntuj dawb huv tuaj, yuav muab fij rau Ntuj." 37 Ces Tas tsoom tub rog tuaj sib sau ua ke thiab lawv nce mus pem lub roob Xis Yoos.
52 Thaum tseem ntxov ntxov hnub tim nees nkaum tsib lub cuaj hlis, uas yog lub hli Kis Les, xyoo ib puas plaub caug yim, lawv sawv los, 53 lawv mus txi Ntuj raws li txoj cai nyob saum lub thaj hlawv tsiaj txi Ntuj tshiab uas lawv tau tsa. 54 Lawv ua kab ke fij lub thaj rau Tswv Ntuj, lawv hu nkauj, ntaus thaj cheej, ntaus nkauj nog ncas, thiab ntaus nruas npuaj; kuj haum kiag rau lub caij thiab hnub uas cov neeg teev pej kum dab tau ua phem rau lub thaj txi Ntuj. 55 Tas tsoom sid txhos caug pe hawm thiab cav txog tus nyob saum lub ntuj uas tau coj lawv mus rau txoj kev yeej. 56 Lawv ua lub txoos lom zem fij lub thaj txi Ntuj no tau yim hnub. Lawv zoo siab hlo hlawv tsiaj txi Ntuj, thiab ua tej thaj txi ntuj noj cov txim thiab ua Ntuj tsaug. 57 Lawv muab ib co duab mom kub thiab leem phiaj kub los tso rau lub Tuam Tsev sab qhov rooj loj sab nraud kom zoo nkauj. Lawv rov kho cov qhov rooj vag thiab cov leej choj cov kem tsev pw rau, thiab ua qhov rooj rau cov kem tsev pw ntawd. 58 Tas tsoom sid sawv daws zoo siab luag ntxhi, lawv tsis nco qab lawv qhov kev txaj muag uas cov pej kum neeg ua rau lawv lawm.
59 Ces Yus Das nrog nws cov kwv tij thiab tas tsoom His Xas Lais txiav tias niaj xyoo thaum txog lub caij ntawd lawv yuav rov ua lub hnub nyoog fij lub thaj txi Ntuj ntawd nyob hauv txoj kev lom zem thiab zoo siab kom puv yim hnub, txij tim nees nkaum tsib lub hli Kis Les mus.

NPN       1 XWM  29:   10BCD, 11ABC, 11D-12A, 12BCD

Txais: (13b) Tswv Ntuj muaj hwj huam, peb cav txog koj lub npe muaj hwj chim.

Huab Tais, thov kom koj nto koob meej,
His Xas Lais tus Tswv Ntuj, peb Leej Txiv,
kom koj nto koob meej mus li ib txhiab ib txhis.

Txais: (13b) Tswv Ntuj muaj hwj huam, peb cav txog koj lub npe muaj hwj chim.

Huab Tais, koj yog tus loj, tus muaj hwj huam,
tus muaj hwj chim, tus ci ntsa iab, tus nto koob meej,
vim tas txhua yam nyob saum ntuj thiab nyob ntiaj teb yog koj li.

Txais: (13b) Tswv Ntuj muaj hwj huam, peb cav txog koj lub npe muaj hwj chim.

Huab Tais, koj yog tus tseem vaj ntxwv,
koj yog tus nyob siab ua txhua leej tus hau.
Kev nplua nuj thiab kev muaj koob nto npe yog koj pub.

Txais: (13b) Tswv Ntuj muaj hwj huam, peb cav txog koj lub npe muaj hwj chim.

Koj kav tas txhua tsav txhua yam,
Koj txhais tes tuav lub hwj huam thiab lub peev xwm,
koj yog tus muab txoj kev ua hlob thiab lub zog rau txhua leej.

Txais: (13b) Tswv Ntuj muaj hwj huam, peb cav txog koj lub npe muaj hwj chim.

As Les Lus Yas:       ZAM  10:   27

Txais: As les lus yas, as les lus yas.

Huab Tais hais tias, kuv cov yaj mloog kuv lub suab;
kuv paub lawv, lawv raws nraim kuv qab mus.

Txais: As les lus yas, as les lus yas.

Ntawv Moo Zoo:       LK  19:   45-48

45 Yes Xus chaws mus hauv lub Tuam Tsev Teev Ntuj, ces nws ntiab cov neeg muag toob xib kom tawm khiav,  46 nws hais rau lawv tias: "Ntawv sau li no : ‘Kuv lub tsev yog tsev teev Ntuj, tab sis nej muab ua ib qho chaw rau tub sab nkaum.’" 47 Yes Xus niaj hnub qhuab qhia nyob hauv lub Tuam Tsev Teev Ntuj. Hos cov Thawj Leej Choj, cov Kws Ntawv Ntshiab, thiab cov thawj coj tsoom pej xeem nrhiav kev yuav muab nws tua. 48 Tab sis lawv nrhiav tsis tau kev kom tau ua raws li lawv lub hom phiaj, vim tsoom pej xeem nyob dai ncuv rau nws lub ncauj mloog nws cov lus.


*************************************

TIM 22 LUB 11 HLIS

HWM LN CECILIA, NKAUJ NTSHIAB TUAG UA TIM KHAWV

Yog xav xaiv cov zaj nyeem tshwj xeeb rau hnub hwm LN Cecilia raws li nram no los tau:

Zaj Nyeem Ib: OS XES 2: 16BC, 17CD, 21-22

Huab Tais hais li no:
16bc "Kuv yuav coj nws mus lawm hauv teb chaws suab puam,
kuv yuav hais lus zoo rau nws lub siab mloog.
17cd Nyob ntawd, nws yuav teb kuv zoo li thaum nws tseem hluas
zoo li thaum nws tawm hauv Hais Nkws Tos teb los."
21 Kuv yuav muab koj qhaib rau kuv tas mus li ib txhis.
Kuv yuav qhaib koj nyob hauv txoj cai thiab txoj kev ncaj..
22 Kuv yuav qhaib koj nyob hauv txoj kev pheej xeebj,
ces koj yuav paub HUAB TAIS."

NPN 45: 11-12, 14-15, 16-17

Txais: (11) Mi ntxhais, koj mloog kuv hais, koj ntsia thiab cuab pob ntseg mloog.
Los: Nraug vauv tuaj txog lawm, peb kav tsij tawm mus ntsib tus Huab Tais Pleev.

Me ntxhais, koj mloog thiab ntsia tuaj! Tig koh lub pob ntseg los mas,
Koj tsis txhob nco koj haiv neeg, koj niam koj txiv lub tsev ntxiv.
Tus vaj qaug siab lais rau koj txoj kev zoo nkauj;
Nws yog koj tus huab tais, koj yuav pe hawm nws.

Txais: (11) Mi ntxhais, koj mloog kuv hais, koj ntsia thiab cuab pob ntseg mloog.
Los: Nraug vauv tuaj txog lawm, peb kav tsij tawm mus ntsib tus Huab Tais Pleev.

Vaj ntxwv tus ntxhais nkag los muaj hwj chim kawg,
Nws hnav ib ce zam yog paj ntaub ntos xov kub.
Nws hnav zam paj ntaub rau lawv kwv nws mus cob rau tus vaj;
ib pab nkauj xwb lawv nws qab kuj raug coj mus rau tus vaj thiab.

Txais: (11) Mi ntxhais, koj mloog kuv hais, koj ntsia thiab cuab pob ntseg mloog.
Los: Nraug vauv tuaj txog lawm, peb kav tsij tawm mus ntsib tus Huab Tais Pleev.

Lawv ua ib pab muaj kev zoo siab sib law sib liag,
lawv chaws mus hauv tus vaj lub tuam tsev.
Koj cov tub yuav los sawv phaj txiv chaw,
koj yuav tsa lawv ua vaj txheeb kav tas ntiaj teb

Txais: (11) Mi ntxhais, koj mloog kuv hais, koj ntsia thiab cuab pob ntseg mloog.
Los: Nraug vauv tuaj txog lawm, peb kav tsij tawm mus ntsib tus Huab Tais Pleev.

As Les Lus Yas

Txais: As les lus yas, as les lus yas.

Tus no yog tus ntxhais xyuam xim uas Huab Tais yuav los pom nws nyob tos;
thaum Huab Tais los txog, nws yuav tau nrog Huab Tais nkag mus noj rooj tshoob.

Txais: As les lus yas, as les lus yas.

Ntawv Moo Zoo: MT 25: 1-13

Yes Xus hais zaj paj lug no rau nws cov thwj tim:
1 “Ntuj lub Ceeb Tsheej yuav zoo xws li kaum leej ntxhais taws teeb tawm mus tos nraug vauv. 2 Lawv muaj tsib leeg ruam hos tsib leeg xyuam xim. 3 Cov ruam nqa teeb, tab sis tsis nqa roj nrog. 4 Hos cov xyuam xim nqa tej hwj roj nrog lawv cov teeb. 5 Nraug vauv los lig, ces lawv qaug dab ntub. Sawv daws tsaug zog tas. 6 Thaum ib tag hmo, ib lub suab nthe tias : ‘Nraug vauv los txog lawm ! Nej tawm los ntsib nws !’ 7 Ces tas cov ntxhais ntawd sawv los npaj lawv cov teeb. 8 Cov ruam hais rau cov xyuam xim tias : ‘Nej pub ib qho roj rau peb mas, peb cov teeb tuag lawm.’ 9 Tab sis cov xyuam xim teb tias : ‘Ntshai roj yuav tsis txaus rau peb thiab rau nej. Cia nej mus muas roj tom cov tub luam los rau nej.’ 10 Thaum cov ntxhais ruam tseem mus muas roj lawm, ces nraug vauv los txog. Cov uas npaj txhij tos tau rog nraug vauv chaws mus hauv rooj tshoob, ces luag muab qhov rooj kaw rau lawm. 11 Thaum lwm cov ntxhais los txog, lawv hais tias : ‘Huab Tais, Huab Tais, thov koj qhib qhov rooj rau peb!’ 12 Tab sis nraug vauv teb tias : ‘Kuv hais tseeb rau nej, kuv cav tsis paub tias nej yog leej twg as!’”13 Ua li mas nej zov hmo mog, vim nej tsis paub hnub twg thiab lub sij hawm twg.”

TIM 23 LUB 11 HLIS 2019

Hnub Xya Lis Piam Peb Caug Peb Nruab Xyoo C Nruab Lis Piam Xyoo I

Hwm LN Clement I, Vaj Qhia tuag ua Tim Khawv; LN Columban, tus Tau Hmoov Zoo Miguel Agustin Pro

Zaj Nyeem Ib: 1 MKN 6: 1-13

1 Tus vaj Aas Caus Kus mus ncig xyuas cov xeev nyob qaum teb. Nws hnov tias lub nroog Es Lis Mais nyob pem Pes Xis teb yog ib lub nroog nto koob meej kawg, vim nws nplua nuj muaj nyiaj muaj kub ntau. 2 Nyob hauv muaj ib lub tuam tsev teev mlom uas nplua nuj kawg vim muaj ib co leem phiaj kub, ib co tsho hlau thaiv hauv siab thiab ib co riam phom uas As Lev Xas Daws, Fis Lis Pos tus tub uas yog thawj tug vaj Mas Xes Dos Nias kav cov neeg Hes Las tau muab tso tseg rau hauv. 3 Ces tus vaj Aas Caus Kus mus sim ntaus kom tau lub nroog ntawd kom tau lwg lub nroog; tab sis nws ntaus tsis tau, vim cov neeg nyob hauv nroog xub paub nws lub hom phiaj ua ntej lawm. 4 Ces lawv tuav riam tuav phom tiv nws. Ces nws khiav tawm ntawm thaj tsam ntawd, nws tu siab kawg rov los mus rau Npas Npis Los.
5 Thaum Aas Caus Kus tseem nyob Pes Xis teb, luag tuaj hais rau nws tias nws cov tub rog uas mus rau Yus Das teb tawg tas lawm. 6 Lis Xias uas tau coj ib pab tub rog muaj zog mus, tau raug cov His xas Lais muab lawv caum rov qab tas. Cov His Xas Lais muaj zog tuaj lawm, vim lawv tau cov riam phom, cov neeg thiab ntau yam uas lawv txeeb tau ntawm cov tub rog lawv ntaus yeej los. 7 Lawv tau rhuav yam Phem Tshaj Plaws uas Aas Caus Kus tau tsa rau saum lub thaj txi Ntuj nyob Yes Lus Xas Les, thiab lawv tau tsa tej lub ntsa siab siab ib yam li thaum ub xov thaj chaw Ntshiab thiab xov Aas Caus Kus lub nroog Npes Xus Las lawm.
8 Tus vaj hnov xov li ntawd mas nws poob siab loj thiab ntshai kawg nkaus. Nws tu siab loj rau qhov tias nws ua tsis tau raws li nws xav, ces nws cia li mob thiab nyob saum txaj lawm xwb. 9 Nws nyob li ntawd tau ntau hnub hauv txoj kev tu siab uas yim huab loj zuj zus xwb. Ces ua rau nws xav tau tias ntshai nws kawg yuav tuag xwb 1o Nws thiaj hu nws cov phooj ywg tuaj tas huv tib si, nws hais rau lawv tias : "Kuv lub qhov muag yuav qi me me tsis tau li lawm, kuv lub siab poob rau txoj kev ntxhov hnyo xwb. 11 Kuv hais rau kuv tus kheej tias : ‘Cas kuv thiaj tau txoj kev txom nyem loj npaum no?! Cas kuv thiaj muaj kev tu siab ntws lug li no?! Thaum kuv tseem muaj hwj chim mas kuv ua zoo, thiab luag kuj nyiam kuv kawg thiab!’ 12 Tab sis nyem no kuv rov nco txog tej yam phem uas kuv tau ua nyob Yes Lus Xas Les lawm. Kuv tau nqa tej cuab yeej kub thiab nyiaj uas nyob hauv tawm tas los, thiab kuv tau kom luag muab cov neeg Yus Das tua pov tseg dawb dawb lawv tsis muaj txhaum dab tsi li. 13 Kuv paub tias yog vim kuv tau ua li ntawd, mas nyem no kuv thiaj tau raug txoj kev txom nyem li no. Zaum no ces kuv yuav tuag nyob hauv txoj kev tu siab loj tas nrho, nyob hauv ib lub teb chaws tsis yog kuv lub."

NPN 9: 2-3, 4+6, 16+19

Txais: 16a) Huab Tais, kuv yuav zoo siab nyob hauv koj txoj kev cawm.

HUAB TAIS, kuv muab tas kuv siab ntsws los ua koj tsaug,
kuv yuav tshaj txog koj cov hauj lwm tsim nyog qhuas.
Kuv zoo siab kuv hom khaj nyob hauv koj,
kuv hu nkauj cav txog koj lub npe, tus Nyob Siab.

Txais: 16a) Huab Tais, kuv yuav zoo siab nyob hauv koj txoj kev cawm.

Vim kuv cov yeeb ncuab thim rov qab,
lawv tawg tas, lawv tuag tas ntawm koj xub ntiag.
Koj tsawm cov kuj cuab, koj txo tus tsis hwm Ntuj pov tseg,
koj tshem lawv lub npe kom ploj mus li ib txhiab ib txhis.

Txais: 16a) Huab Tais, kuv yuav zoo siab nyob hauv koj txoj kev cawm.

Tsoom kuj cuab zom av rau hauv lub qhov lawv tau khawb,
lawv ko taw daig hauv rooj ntxiab uas lawv tau cuab lawm.
Cov pluag yuav tsis raug luag tsis nco qab lawv ntxiv,
cov txom nyem txoj kev tso siab yuav tsis ploj mus li ntxiv.

Txais: 16a) Huab Tais, kuv yuav zoo siab nyob hauv koj txoj kev cawm.

As Les Lus Yas: 2 TM 1: 10

Txais: As les lus yas, as les lus yas.

Peb tus Cawm Seej Yes Xus Pleev twb rhuav txoj kev tuag lawm,
thiab nws ua kom txoj sia ci tawm tuaj nyob hauv lub Moo Zoo.

Txais: As les lus yas, as les lus yas.

Ntawv Moo Zoo: LK 20: 27-40

27 Muaj ob peb tug Xas Dus Kais txav los, lawv yog cov uas hais tias neeg tuag tsis muaj kev sawv rov los. 28 Lawv nug Yes Xus tias : "Mais Xes sau cia rau peb tias : Yog leej twg tus kwv tij tuag lawm, tseg poj niam cia tsis tau muaj me nyuam li, mas tus kwv yuav tsum qaws tus poj ntsuam kom tsa tau tus kwv tij uas tuag lawd lub keeb sawv. 29 Muaj xya leej kwv tij, thawj tug yuav poj niam, nws tuag tsis tau muaj tub ki li. 30 Ces tus ob, 31 thiab tus peb kuj qaws tus poj niam ntawd thiab. Ces tas lawv xya leej puav leej ua ib yam li ntawd; lawv tuag tas huv si tsis muaj tub ki li. 32 Thaum kawg, tus poj niam kuj tuag lawm thiab. 33 Ua li mas thaum txog lub zim txwv sawv rov los, tus poj niam ntawd yuav yog leej twg tus poj niam ? Vim lawv xya leej tau yuav nws ua poj niam huv si."
34 Yes Xus thiaj hais rau lawv tias : "Cov tub ki hauv lub zwj ceeb no yuav poj niam thiab yuav txiv. 35 Tab sis cov uas raug txiav txim tias lawv tsim nyog mus nyob fab lwm tiam, thiab tsim nyog sawv hauv cov tuag rov los, mas lawv tsis yuav poj niam thiab tsis yuav txiv ntxiv lawm. 36 Lawv yuav tsis txawj tuag ntxiv, vim lawv yuav zoo li cov Tshiab thiab lawv yog Tswv Ntuj cov tub, uas yog txoj kev sawv rov los cov tub. 37 Hais txog tias cov tuag yuav sawv rov los, mas Mais Xes twb qhia txog qhov ntawd nyob hauv zaj hais txog Tsob Pos lawm, thaum nws hu Huab Tais ua Has Nplas Has tus Tswv Ntuj, His Xas Has tus Tswv Ntuj, thiab Yas Kos tus Tswv Ntuj. 38 Vim tias Tswv Ntuj tsis yog cov tuag tus Tswv Ntuj, nws yog cov ciaj tus Tswv Ntuj; sawv daws muaj txoj sia vim nws." 39 Ob peb tug Kws Ntawv Ntshiab qhib ncauj teb tias : "Xib Hwb, koj hais tau zoo kawg." 40 Ces lawv tsis muaj cuab kav nug Yes Xus ib lo lus dab tsi ntxiv.

TIM 25 LUB 11 HLIS 2019

Hnub Ob Lis Piam Peb Caug Plaub Nruab Xyoo C Nruab Lis Piam Xyoo I

Hwm LN Catherine nyob Alexandria

Zaj Nyeem Ib: DN 1: 1-6, 8-20

1 Thaum Yes Haus Yas Kis ua vaj kav Yus Das teb tau peb xyoo, mas tus vaj Nas Npws Kos Dos Nos Xos uas yog tus vaj Npas Npis Los tuaj vij Yes Lus Xas Les. 2 Huab Tais tso tus vaj Yes Haus Yas Kis uas yog tus vaj Yus Das thiab ib co twj siv hauv Tswv Ntuj lub Tuam Tsev poob rau hauv nws tes. Nws thiaj coj lawv mus rau teb chaws Sis Nes As, thiab nws coj cov twj mus cia rau hauv nws cov tswv ntuj lub txhab nyiaj.
3 Nws hais rau As Pes Nas uas yog nws tus thawj neeg sam kom mus xaiv ib co me nyuam tub uas yog noob vaj ntxwv thiab noob nom noob tswv nyob hauv cov His Xas Lais coj tuaj. 4 Cov tub ntawd yuav tsum tsis txhob muaj chaw xyeej li, muaj lub meej mom zoo nraug, muaj kev ntse nrog kev thoob tsib, muaj laj lim tswv yim paub txuj ci, muaj kev to taub txog kev kawm txuj, thiab muaj peev xwm tsim nyog tuaj nyob hauv tus vaj lub loog, thiab yuav kawm tau cov ntawv thiab cov lus Kas Dias. 5 Tus vaj niaj hnub qee nws cov zaub mov, tej dej cawv pub rau lawv noj lawv haus. Yuav qhuab qhia lawv kom puv peb xyoos; thaum tas lub caij ntawd lawm mam cia lawv los ua tus vaj cov tub tsob hwb. 6 Nyob hauv pab ntawd muaj plaub tug yog neeg Yus Das : muaj Das Nias, As Nas Nias, Mis Sas Es thiab As Xas Lias.
8 Das Nias txiav txim siab caiv tsis nrog luag noj tsis nrog luag haus tus vaj tej zaub mov thiab tej dej caw kom nws txhob poob rau hauv txoj kev tsis dawb huv, nws thiaj thov tus thawj neeg sam kom pub nws caiv tsis noj tej yam tsis huv ntawd. 9 Tswv Ntuj tshoj tus thawj neeg sam kom nws muaj lub siab zoo hlub thiab xav pab Das Nias. 10 Tab sis nws hais rau Das Nias tias : "Kuv ntshai kuv tus txiv huab tais xwb, vim nws yog tus qee tej zaub tej mov rau nej noj thiab tej cawv rau nej haus. Yog nws pom nej cov ntsej muag yuag tshaj cov me nyuam nrog nej ib phaum, mas nej yuav ua teeb meem rau kuv txoj hauj lwm nyob ze ntawm txiv huab tais." 11 Das Nias thiaj hais rau tus tub zov keeb uas yog tus thawj neeg sam tso ua tus saib Das Nias, As Nas Nias, Mis Sas Es thiab As Xas Lias lawv tias : 12 "Kuv thov koj, koj sim koj cov tub txib li kaum hnub saib, koj muab zaub rau peb noj thiab muab dej rau peb haus xwb. 13 Koj yuav pom peb lub ntsej muag piv rau cov tub hluas uas noj tus vaj tej qav tej hno lub ntsej muag, ces koj mam yuav ua rau koj cov tub txib raws li qhov koj pom." 14 Tus saib lawv pom zoo ua raws li Das Nias thov, nws thiaj sim lawv tau kaum hnub. 15 Dhau kaum hnub ntawd lawm, lawv ntsej muag tshiab tshaj thiab lawv puv dua cov hluas uas noj tus vaj tej qav tej hno. 16 Ces tus saib lawv tsis muab tus vaj cov zaub mov cov dej caw rau lawv noj lawv haus ntxiv, nws tsuas muab zaub rau lawv noj lawm xwb.
17 Tswv Ntuj pub txuj ci thiab tswv yim rau plaub tug hluas ntawd kom lawv txawj txhua yam ntaub ntawv thiab ua neeg thoob tsib. Das Nias tseem paub txhais tej zaj yees pom thiaj tej dab ntub npau suav thiab. 18 Thaum txog lub caij tus vaj teem kom coj cov hluas ntawd tuaj cuag nws, tus thawj neeg sam thiaj coj lawv tuaj cuag Nas Npws Kos Dos Nos Xos. 19 Tus vaj nrog tas sawv daws tham, nws pom tias tsis muaj leej twg zoo cuag li Das Nias, As Nas Nias, Mis Sas Es, thiab As Xas Lias lawv li, ces lawv thiaj tuaj ua cov tub txib nyob kiag ntawm tus vaj xub ntiag. 20 Tus vaj nug lawv txog tej yam yuav tsum muaj kev thoob tsib thiab kev xyuam xim los teb, mas nws pom tias lawv teb tau zoo tshaj kaum npaug cov txiv neeb txiv yaig thiab tej tub txawj khawv koob hwj huaj uas nyob hauv nws lub teb chaws huv tib si.

NPN: DN 3: 52, 53, 54, 55, 56

Txais: (52b) Peb cav txog koj lub koob meej peb qhuas txog koj tas mus li!

Huab Tais peb phaj txiv tus Tswv Ntuj, thov kom koj nto koob meej,
tsim nyog cav txog koj tsim nyog qhuas txog koj tshaj tas txhua yam mus li;
Kom koj lub npe ntshiab muaj hwj chim nto koob meej,
Tsim nyog cav txog tsim nyog qhuas txog koj tshaj tas txhua yam mus li txhua tiam.

Txais: (52b) Peb cav txog koj koj lub koob meej peb qhuas txog koj tas mus li!

Kom koj nto koob meej nyob hauv lub tuam tsev muaj koj lub hwj chim nsthiab,
Tsim nyog cav txog tsim nyog qhuas txog koj tshaj tas txhua yam tas mus li.

Txais: (52b) Peb cav txog koj lub koob meej peb qhuas txog koj tas mus li!

Kom koj nto koob meej nyob saum koj lub theej kiab hauv koj lub ceeb tsheej,
Tsim nyog cav txog tsim nyog qhuas txog koj tshaj tas txhua yam mus li.

Txais: (52b) Peb cav txog koj lub koob meej peb qhuas txog koj tas mus li!

K0m koj nto koob meej, koj tus uas zaum saum koj lub theej kiab
txawb saum cov tshiab kes lus npis tsom rau hauv cov qab thu tob;
Tsim nyog cav txog tsim nyog qhuas txog koj tshaj tas txhua yam tas mus li.

Txais: (52b) Peb cav txog koj peb qhuas txog koj tas mus li!

Kom koj nto koob meej nyob saum lub ntuj ntsuab saum ntuj,
Tsim nyog cav txog tsim nyog nto koob meej tas mus li..

Txais: (52b) Peb cav txog koj lub koob meej peb qhuas txog koj tas mus li!

As Les Lus Yas: MT 24: 42A, 44

Txais: As les lus yas, as les lus yas.

Nej yuav tsis txhob tsaug zog,
Vim nej tsis paub tias Neeg Leej Tub yuav los thaum twg.

Txais: As les lus yas, as les lus yas

Ntawv Moo Zoo: LK 21: 1-4

1 Yes Xus tsa muag ntsia, nws pom ib co neeg nplua nuj tso nyiaj pub rau hauv lub txhab ceev nyiaj,
2 nws kuj pom ib tug poj ntsuam pluag pluag tso ob lub txiaj toog rau thiab.
3 Ces nws hais tias : "Kuv hais tseeb rau nej tias, tus poj ntsuam pluag pluag no tso ntau tshaj sawv daws huv tib si.
4 Vim tias tas cov neeg ntawd, lawv pub lawv cov nyiaj seem xwb, tab sis tus poj ntsuam ntawd nws muab hauv nws txoj kev pluag los, nws pub tas nrho qhov nws yuav siv muas noj rau lawm."

TIM      26      LUB      11      HLIS      2019

Hnub Peb Lis Piam Peb Caug Plaub Nruab Xyoo C Nruab Lis Piam Xyoo I

Zaj Nyeem Ib:       DN  2:   31-45

31 Das Nias hais rau Nes Npws Kos Dos Nos Xos tias : "Vaj ntxwv, koj tau yees pom ib tug mlom loj loj ci kawg nkaus sawv nyob ntawm koj xub ntiag; ntsia mas nws txaus ntshai kawg li. 32 Tus mlom ntawd lub taub hau yog tseem kub; nws lub hauv siab thiab ob txhais npab yog nyiaj; nws lub plab thiab ob txhais ncej puab yog tooj dub, 33 ob txhais ceg yog hlau, ob txhais ko taw yog ib nrab hlau ib nrab av nplaum. 34 Koj tseem ntsia tus mlom ntawd, koj pom dheev ib lub pob zeb cia li raug muab txaug tawm pem ib lub roob los, tiam sis tsis yog neeg txhais tes txaug, nws los tsoo tus mlom ob txhais ko taw uas yos hlau thiab av nplaum tawg ua daim tas. 35 Ces hlau, av nplaum, tooj dub, nyiaj, thiab kub cia li tib txhij pob tas nrho ntsoog mos mos tas ua zoo li cov npluag nplej tom tshav ntaus nplej thaum lub caij ntuj so lawm xwb. Ces cua tuaj muab tshuab ya tas mus tsis tshuav ib qho li lawm. Tiam sis lub pob zeb uas ntog los tsoo tus mlom cia li txia ua ib lub roob loj loj puv tas ntiaj teb.
36 Koj zaj npau suav yog zoo li ntawd. Zaum no peb kuj yuav txhais lub ntsiab rau koj tus ua vaj paub thiab. 37 Vaj ntxwv, koj yog tus vaj kas tas tsoom vaj. Tus Tswv Ntuj kav lub ntuj tau pub kev ua vaj, pub hwj huam, lub zog thiab hwj chim rau koj. 38 Cov tib neeg, cov tsiaj nyob nruab nrag, cov me noog ya saum ntuj, txawm lawv yuav nyob qhov twg los nws tso rau hauv koj txhais tes kom koj ua tus tswj lawv huv tib si. Koj yog lub taub hau kub ntag. 39 Tom qab koj, yuav muaj dua ib tug vaj sawv los, nws yuav tsis loj npaum li koj. Thiab tseem yuav sawv dua ib tug vaj, yog tus peb; nws yog tooj dub, nws yuav kav tas ntiaj teb. 40 Kuj tseem yuav muaj dua ib tug vaj ntxiv, yog tus plaub, nws yuav tawv cuag hlau, vim hlau  tsoo kom txhua yam tawg tas ntsoog tas; xws li hlau tsoo kom txhua yam tawg, nws kuj yuav tsoo cov ntawd kom tawg tas thiab vau tas.
41 Ob txhais ko taw thiab cov ntiv taw koj pom yog ib nrab hlau ib nrab av nplaum, vim nws yog ib lub teb chaws tsis zoo xwm yeem, tiam sis nws kuj yuav muaj zog li hlau thiab, raws li koj pom muaj hlau xyaw av nplaum. 42 Cov ntiv taw ntawm ob txhais taw ib nrab yog hlau ib nrab yog av nplaum, kuj yog txhais tias lub teb chaws muaj ib feem yuav muaj zog, ib feem yuav tsis muaj zog. 43 Xws li koj tau pom muaj hlau xyaw av nplaum, kuj yog txhais tias lawv yuav nrhiav kev sib haum nyob hau txoj kev sib yuav ua neeg txuam tsoov, tab sis lawv yuav sib koom tsis tau, ib yam li hlau xyaw tsis tau av.
44 Thaum lub caij cov vaj ntawd ua neej nyob, tus Tswv Ntuj kav lub ntuj yuav tsa ib lub teb chaws muaj vaj kav uas yuav tsis muaj neeg rhuav tau thiab yuav tsis poob nyob hauv lwm haiv neeg txhais tes ib zaug li. Lub teb chaws ntawd yuav rhuav thiab tsuj lwm cov teb chaws huv tib si kom tawg tas thiab kom ploj mus tas. Nws yuav nyob mus li tas ib txhiab ib txhis, 45 raws li qhov koj pom lub pob zeb uas tsis yog neeg txhais tes txaug tawm pem roob los, nws los tsoo cov av, cov hlau, cov tooj dub, cov nyiaj, thiab kub ntsoog tas. Ua li mas yog tus Tswv Ntuj loj tau qhia rau tus vaj txog tej yam yuav tshwm sim yav tom ntej. Koj zaj npau suav yeej muaj li ntawd, thiab nws lub ntsiab yeej meej li no."

NPN:       DN  3:   57, 58, 59, 60, 61

Txais: (59b) Nej ua kom nws nto koob meej thiab nej cav txog nws tas mus li.

Tas ib puas tsam yam Huab Tais tau tsim los,
nej foom lus zoo rau Huab Tais,
nej cav txog nws nej tsa nws nyob siab tshaj
tas txhua yam mus ib txhiab ib txhis !

Txais: (59b) Nej ua kom nws nto koob meej thiab nej cav txog nws tas mus li.

Tas Huab Tais ib tsoom Tshiab,
nej foom lus zoo rau Huab Tais,
nej cav txog nws nej tsa nws nyob siab tshaj
tas txhua yam mus ib txhiab ib txhis !

Txais: (59b) Nej ua kom nws nto koob meej thiab nej cav txog nws tas mus li.

Cov txheej ntuj saud, nej foom lus zoo rau Huab Tais,
nej cav txog nws nej tsa nws nyob siab tshaj
tas txhua yam mus ib txhiab ib txhis !

Txais: (59b) Nej ua kom nws nto koob meej thiab nej cav txog nws tas mus li.

Cov dej nyob txheej ntuj siab saud,
nej foom lus zoo rau Huab Tais,
nej cav txog nws nej tsa nws nyob siab tshaj
tas txhua yam mus ib txhiab ib txhis !

Txais: (59b) Nej cav txog nws lub koob meej
thiab qhuas txog nws tas mus li.

Nej sawv daws uas yog Huab Tais tsoom tub rog,
nej foom lus zoo rau Huab Tais,
nej cav txog nws nej tsa nws nyob siab tshaj
tas txhua yam mus ib txhiab ib txhis !

Txais: (59b) Nej ua kom nws nto koob meej thiab nej cav txog nws tas mus li.

As Les Lus Yas:       QYTN  2:   10C

Txais: As les lus yas, as les lus yas.

Koj yuav ntseeg ruaj nreb mus txog hnub tuag,
Ces kuv yuav muab txoj sia rau koj ntoo.

Txais: As les lus yas, as les lus yas.

Ntawv Moo Zoo:       LK  21:   5-11

5 Thaum ntawd, ib txhia hais txog tias lub Tuam Tsev Teev Ntuj txhim tau pob zeb zoo nkauj kawg thiab muaj tej paj tshab txi Ntuj ua kom zoo saib. Yes Xus hais tias : 6 "Tej uas nej qhov muag pom ntawm no, muaj ib hnub yuav tsis tshuav ib lub pob zeb tseem tshooj ib lub cia uas yuav tsis pob tas rau hauv av." 7 Lawv nug Yes Xus tias : "Xib Hwb, thaum twg tej ntawd mam li tshwm sim tuaj, thiab yuav muaj lub cim dab tsi qhia tias tej ntawd yuav tshwm sim tuaj?”
8 Yes Xus hais tias : "Nej yuav ceev faj txhob cia luag ua kom nej yuam kev. Vim yuav muaj coob leej siv kuv lub npe tuaj, lawv yuav hais tias : ‘Kuv yog nws,’ thiab yuav hais tias : 'Lub zim txwv twb los txog lawm'. Mas nej txhob mus caum lawv.
9 Thaum nej hnov tham txog kev ua tsov ua rog thiab kev kub ntxhov, mas nej tsis txhob ntshai. Vim tias tej ntawd yuav tsum xub tshwm sim tuaj tso, tab sis tsis tau txog lub zim txwv kawg tam sis ntawd." 10 Yes Xus hais ntxiv rau lawv tias : "Ib haiv neeg yuav sawv los ntaus lwm haiv neeg, ib lub teb chaws yuav sawv los ntaus lwm lub teb chaws. 11 Yuav muaj av qeeg loj, thiab nyob qhov ub qhov no, yuav muaj tshaib plab thiab muaj mob aws; thiab kuj yuav muaj tej yam xwm txaus ntshai kawg, thiab tej lub cim loj tawm saum ntuj tuaj.”

TIM      27      LUB      11      HLIS      2019

Hnub Plaub Lis Piam Peb Caug Plaub Nruab Xyoo C Nruab Lis Piam Xyoo I  

Zaj Nyeem Ib:       DN  5:   1-6, 13-14, 16-17, 23-28

1 Tus vaj Npas Tas Xas ua ib roog qav loj loj rau nws cov tub nom tub tswv noj; lawv muaj li ib txhiab leej tuaj; tus vaj nrog ib txhiab leej ntawd haus dej haus cawv. 2 Thaum Npas Tas Xas saj cov cawv lawm, nws txib kom luag nqa cov tais kub tais nyiaj uas nws txiv Nas Npws Kos Dos Nos Xos muab tshem hauv lub Tuam Tsev Teev Ntuj nyob Yes Les Xas Les nqa los, kom tus vaj nrog nws cov tub nom tub tswv, nws cov poj niam, cov hluas nkauj seev cev tau siv los haus dej haus cawv. 3 Luag thiaj nqa tau cov ntim kub ntim nyiaj uas muab hauv Tswv Ntuj lub Tuam Tsev nyob Yes Lus Xas Les tuaj. Ces tus vaj nrog nws cov tub nom tub tswv, cov poj niam, cov hluas nkauj seev cev lawv tau muab siv haus dej haus cawv. 4 Thaum lawv haus dej haus cawv li ntawd, lawv hais tej zaj cav txog lawv cov dab mlom nyiaj mlom kub, mlom tooj mlom hlau, thiab mlom zeb mlom ntoo.
5 Ib sij huam, txawm pom ib co ntiv tes nrog ib txhais tes neeg yees tawm tuaj nyob ntawm tus ncej teeb sab tid, sau sau ntawv rau saum lub phab ntsa hmoov zeb sib hauv tus vaj lub tsev. Tus vaj pom xyeem kiag txhais tes sau ntawv. 6 Ces tus vaj txawm ua ntsej muag puas nyas, nws ua siab poob nthav, nws lub ntsag tej leeg tuag tas, nws ob lub hauv caug sib tsoo zom zaws.
13 Lawv thiaj mus hu Das Nias tuaj rau ntawm tus vaj. Tus vaj nug Das Nias tias : "Koj puas yog Das Nias, ib tug Yus Das nyob hauv pab neeg nyob txim uas kuv txiv coj Yus Das teb los ? 14 Kuv hnov tias Tswv Ntuj lub tswv yim nyob hauv koj. Koj muaj qhov pom kev, muaj kev txawj kev ntse kev thoob tsib zoo kawg nkaus nyob hauv koj no.
16 Kuv tseem hnov tias koj txawj txhais tej yam thiab txawj daws teeb meem no, yog tias koj twm tau thiab txhais tau cov ntawv no lub ntsiab rau kuv mas kuv yuav muab lub tsho tsam xem rau koj hnav, muab saw kub rau koj coj ntawm caj dab, thiab tsa koj ua tus nom peb tswj lub teb chaws." 17 Das Nias teb rau tus vaj tias : "Cia khaws koj cov paj tshab rov rau koj tus kheej, thiab muab koj cov khoom plig pub rau lwm tus. Kuv mam cia li twm cov ntawv no rau tus vaj thiab txhais lub ntsiab rau koj xwb.
23 Koj tau tsa koj siab, koj tau tiv tus Huab Tais kav lub ntuj lawm, vim koj tau kom luag nqa cov twj nyob hauv Huab Tais lub Tuam Tsev los rau koj thiab koj cov tub nom tub tswv, cov poj niam thiab cov hluas nkauj seev cev, nej tau muab siv haus dej haus cawv, nej tau cav txog nej cov dab mlom kub mlom nyiaj, mlom tooj mlom hlau, mlom ntoo mlom pob zeb uas lawv tsis txawj hnov lus, tsis txawj pom kev, tsis muaj tswv yim dab tsi li. Nej tsis cav txog tus Tswv Ntuj uas nws tuav rawv nej txoj sia rau hauv nws txhais tes thiab nws coj rawv nej taug kev hauv nej lub neej li. 24 Nws thiaj tau xa txhais tes ntawd tuaj kos cov npe ntawv no. 25 Cov ntawv no yog sau li no:  Maws Nes, Maws Nes, Tes Kes, thiab Pas Xis. 26 Cov lus ntawd yog txhais li no : Maws Nes, txhais tias : Tswv Ntuj tau ntsuas koj lub teb chaws thiab tau muab nws rau luag tsuj lawm. 27 Tes Kes, txhais tias : Tswv Ntuj tau muab koj luj saum rab teev lawm, koj hnyav tsis txaus. 28 Pas Xis, txhais tias : koj lub teb chaws raug muab faib lawm, ib qho rau cov Mes Dias, ib qho rau cov Pes Xis."

NPN:       DN  3:   62, 63, 64, 65, 66, 67

Txais:   (59b) Nej ua kom nws nto koob meej thiab nej cav txog nws tas mus li.

Nkauj hnub nraug hli, nej foom lus zoo rau Huab Tais,
neb cav txog nws, nej tso nws nyob siab
dua tas txhua yam mus li ib txhiab ib txhis !

Txais:   (59b) Nej ua kom nws nto koob meej thiab nej cav txog nws tas mus li.

Cov hnub qub nyob saum ntuj, nej foom lus zoo rau Huab Tais,
neb cav txog nws, nej tso nws nyob siab
dua tas txhua yam mus li ib txhiab ib txhis !

Txais:   (59b) Nej ua kom nws nto koob meej thiab nej cav txog nws tas mus li.

Cov nag cov lwg, nej foom lus zoo rau Huab Tais,
neb cav txog nws, nej tso nws nyob siab
dua tas txhua yam mus li ib txhiab ib txhis !

Txais:   (59b) Nej muab lub koob meej rau nws thiab cav txog nws mus li.

Cov cua, nej foom lus zoo rau Huab Tais,
neb cav txog nws, nej tso nws nyob siab
dua tas txhua yam mus li ib txhiab ib txhis !

Txais:   (59b) Nej ua kom nws nto koob meej thiab nej cav txog nws mus li.

Cov hluav taws qhov kub, nej foom lus zoo rau Huab Tais,
neb cav txog nws, nej tso nws nyob siab
dua tas txhua yam mus li ib txhiab ib txhis !

Txais:   (59b) Nej ua kom nws nto koob meej thiab nej cav txog nws mus li.

Lub caij no caij sov, nej foom lus zoo rau Huab Tais,
neb cav txog nws, nej tso nws nyob siab
dua tas txhua yam mus li ib txhiab ib txhis !

Txais:   (59b) Nej ua kom nws nto koob meej thiab nej cav txog nws mus li.

As Les Lus Yas:       QYTN  2:   10C

Txais:   As les lus yas, as les lus yas.    

Koj ntseeg ruaj nreb mus txog hnub tuag,
Ces kuv yuav muab txoj sia rau koj ntoo.

Txais:   As les lus yas, as les lus yas.

Ntawv Moo Zoo:       LK  21:   12-19

Yes Xus hais rau tsoom neeg tias:
12 Ua ntej ib puas tsav yam, mas luag yuav cev tes ntes nej, thiab yuav hiam nej, coj nej mus kom rau cov tsev txoos thiab tsev loj faj, cab nej mus rau ntawm cov vaj thiab cov nom tswj teb chaws xub ntiag vim kuv lub npe. 13 Qhov ntawd yuav yog ib lub zoo sij hawm rau nej ua tim khawv. 14 Nej khaws rau nruab siab tias nej yuav tsis txhob xub npaj tias nej yuav hais li cas thiaj yeej. 15 Vim kuv yuav muab ib lub ncauj muaj kev thoob tsib rau nej, ces tas cov ntxub nej yuav tsis muaj peev xwm tiv tau thiab cav tau nej li. 16 Tab yog nej niam nej txiv, nej cov kwv tij, cov txheeb ze, thiab cov phooj ywg, los lawv tseem yuav mus kom nej thiab, thiab yuav muab nej ib txhia rau luag tua. 17 Tas sawv daws yuav ntxub nej vim kuv lub npe. 18 Tab sis tsis muaj ib txoj plaub hau saum nej taub hau yuav ploj li. 19 Nej ua siab ruaj nreb kom tom thawj, ces nej yuav tau txais nej txoj sia."

TIM 28 LUB 11 HLIS 2019

HNUB TSIB LIS PIAM PEB AUS PLAUB NRUAB XYOO C NRUAB LIS PIAM XYOO I

HNUB UA NTUJ TSAUG (THANKSGIVING DAY, MUS SAIB COV ZAJ NYEEM NYOB NRAM QAB)

Zaj Nyeem Ib: DN 6: 12-28

12 Cov tub nom tub tswv thiab cov tswj xeev thiaj tuaj nkag hauv Das Nias tsev thiab lawv pom nws tab tom teev Ntuj thov nws tus Tswv Ntuj. 13 Ces lawv mus hais rau tus vaj tias : "Aub ! Vaj ntxwv! Koj twb tau sau yuas rau ib Txoj Cai tias, yog peb caug hnub tom ntej no, leej twg tseem teev ib tug tswv ntuj dab tsi kuj xij los thov ib tug neeg twg, tsuav tsis yog thov koj, mas tus ntawd yuav raug muab pov rau hauv lub nkuaj tsov no ne, los tsis yog ?" Tus vaj teb tias : "Txoj cai yeej tau txiav meej lawm, thiab raws li cov Mes Dias thiab cov Pes Xis Txoj Cai mas yuav hla tsis tau li." 14 Ces lawv hais rau tus vaj tias : "HuabtTais vaj ntxwv, Das Nias, tus neeg Yus Das uas tuaj nyob txim, nws tsis quav ntsej txog koj los txog txoj cai koj tau txiav kiag li ! Ib hnub, nws mus ua nws zaj teev Ntuj peb zaug."
15 Tus vaj hnov cov lus no, nws tu siab tas nrho, nws txiav txim siab tias nws yuav nrhiav ib txog kev cawm Das Nias. Ib hnub tsaus ntuj ntais, tus vaj nrhiav ib txog kev tso Das Nias kom txhob raug txim. 16 Tab sis cov neeg ntawd tuaj hais tsis tseg rau tua vaj tias: "Aub ! Vaj ntxwv! Koj yeej paub lawm tias raws li cov Mes Dias thiab cov Pes Xis Txoj Cai mas thaum tus vaj tshaj tawm los txwv ib yam lawm mas yuav hla tsis dhau li.”
17 Ces tus vaj txib kom lawv mus coj Das Nias tuaj thiab kom muab nws pov rau hauv lub nkuaj tsov. Tus vaj hais rau Das Nias tias : "Thov kom koj tus Tswv Ntuj uas koj rau siab tsob hwb nws tsis tseg tuaj cawm koj." 18 Lawv nqa ib lub pob zeb los thaiv ntawm lub rooj nkuag tsov. Tus vaj ntaus nws lub thwj thiab cov nom lub thwj rau, kom tsis txhob hloov dab tsi txog Das Nias kev raug txim li.
19 Ces tus vaj rov mus hauv nws lub tsev, nws yoo mov ib hmos thiab tsis pub kom muaj neeg tuaj cuam tshuam nws li. Tas ib hmos nws tsis tuaj dab ntub me me li. 20 Kaj ntug txoog xwb, tus vaj sawv tsees thiab nws maj nroos mus lawm tom lub nkuaj tsov. 21 Mus txog ntawm lub nkuaj tsov, nws ua suab quaj dhi hu Das Nias tias : "Das Nias aw! Koj yog tus Tswv Ntuj muaj txoj sia tus tub txib ! Tus Tswv Ntuj uas koj muab siab rau tsob hwb nws tsis tseg puas tuaj pab cawm koj ntawm ncauj tsov thiab?" 22 Das Nias teb rau tus vaj tias : "Aub ! Vaj ntxwv! Thov kom koj muaj txoj sia nyob mus li ! 23 Kuv tus Tswv Ntuj tau xa nws tus Tshiab tuaj kaw cov tsov qhov ncauj lawm, ces tsov tsis tau ua dab tsi rau kuv li, vim nws pom tias kuv tsis tau ua dab tsi txhaum. Ntawm koj los kuv kuj tsis ua dab tsi txhaum rau koj li thiab." 24 Tus vaj zoo siab hlo, nws ceeb toom kom lawv tso Das Nias tawm los. Ces lawv tso Das Nias tawm los, nws tsis raug qhov twg sab li vim nws tso siab rau nws tus Tswv Ntuj. 25 Tus vaj thiaj tso lus ceeb toom kom coj cov neeg uas liam rau Das Nias tuaj. Nws muab lawv thiab lawv tej poj niam me nyuam pov rau hauv nkuaj tsov. Lawv tseem poob tsis tau ti hauv av, tsov twb dhia tuaj huas lawv tas, twb ua lawv tej pob txha ntsoog tag.
26 Ces vaj Das Lis Yus thiaj sau ntawv tshaj rau tas txhia haiv neeg txhia xeem lus nyob ntiaj teb no tias : "Kom kev thaj yeeb ntws lug los rau saum nej ! 27 Kuv ceeb toom tias nyob tas cov teb chaws uas kuv kav, mas cov neeg sawv daws yuav tsum ntshai thiab yuav hwm Das Nias tus Tswv Ntuj,
vim nws yog tus Tswv Ntuj muaj txoj sia nyob mus li.
Nws lub ceeb tsheej yuav tsis raug leej twg muab rhuav,
Nws txoj kev tswj kav yuav tsis txawj kawg.
28 Nws cawm thiab npo neeg dim,
nws ua tej lub cim thiab tej yam hwj huam
nyob saum ntuj thiab nyob ntiaj teb no.
Nws tau cawm Das Nias dim ntawm tsov lub zog."

NPN DN 3: 68, 69, 70, 71, 72, 73, 74

Txais: (59b) Nej ua kom nws nto koob meej thiab nej cav txog nws mus li.
.
Cov dej nag cov lwg, nej cav lus zoo txog Huab Tais,
nej qhuas txog nws tshaj txhua yam tas mus li ib txhiab ib txhis.

Txais: (59b) Nej ua kom nws nto koob meej thiab nej cav txog nws mus li.

Cov te txias, qhov no ntxiag, nej cav lus zoo txog Huab Tais,
nej qhuas txog nws tshaj txhua yam tas mus li ib txhiab ib txhis.

Txais: (59b) Nej ua kom nws nto koob meej thiab nej cav txog nws mus li.

Cov dej khov, cov daus npu, nej cav lus zoo txog Huab Tais,
nej qhuas txog nws tshaj txhua yam tas mus li ib txhiab ib txhis.

Txais: (59b) Nej ua kom nws nto koob meej thiab nej cav txog nws mus li.

Cov hnub cov hmo, nej cav lus zoo txog Huab Tais,
nej qhuas txog nws tshaj txhua yam tas mus li ib txhiab ib txhis.

Txais: (59b) Nej ua kom nws nto koob meej thiab nej cav txog nws mus li.

Qhov pom kev qhov tsaus ntuj, nej cav lus zoo txog Huab Tais,
nej qhuas txog nws tshaj txhua yam tas mus li ib txhiab ib txhis.

Txais: (59b) Nej ua kom nws nto koob meej thiab nej cav txog nws mus li.

Cov kab xob laim cov huab tsaus, nej cav lus zoo txog Huab Tais,
nej qhuas txog nws tshaj txhua yam tas mus li ib txhiab ib txhis.

Txais: (59b) Nej ua kom nws nto koob meej thiab nej cav txog nws mus li.

Ntiaj teb nrag cai, nej cav lus zoo txog Huab Tais,
nej qhuas txog nws tshaj txhua yam tas mus li ib txhiab ib txhis.

Txais: (59b) Nej ua kom nws nto koob meej thiab nej cav txog nws mus li.

As Les Lus Yas: LK 21: 28

Txais: As les lus yas, as les lus yas.

Nej yuav sawv kom ntseg, thiab tsa nej taub hau,
vim txoj kev txhiv nej dim los txog ze ze lawm.

Txais: As les lus yas, as les lus yas.

Ntawv Moo Zoo: LK 21: 20-28

Yes Xus hais rau nws cov thwj tim tias:
20 "Thaum nej pom tej pab tub rog tuaj vij vog Yes Lus Xas Les, mas nej yuav paub tias Yes Lus Xas Les txoj kev puas ntsoog nyob ze ze lawm. 21 Thaum ntawd mas cov nyob Yus Das teb kav tsij cia li khiav mus lawm pem roob; cov nyob hauv lub nroog yuav tsum tawm khiav mus, hos cov uas nyob tom tej teb txhob mus lawm hauv lub nroog. 22 Vim thaum ntawd yog lub caij yuav muaj kev raug txim, ces txhua tsav txhua yam uas sau tseg rau hauv Ntawv lawd yuav tsum tshwm sim tuaj. 23 Hmoov phem heev rau cov poj niam uas cev tsis tab seeb thiab cov uas muaj me nyuam mos noj mis. Vim tias yuav muaj kev txom nyem loj los raug ntiaj teb, thiab yuav muaj kev npau taws loj txiav txim rau haiv neeg no. 24 Lawv yuav ntog vim hniav ntaj, thiab luag yuav ntes lawv mus nyob txim rau hauv tas cov pej kum haiv neeg; ces Yes Lus Xas Les yuav raug cov pej kum haiv neeg tuaj tsuj mus txog hnub cov pej kum haiv neeg lub hnub nyoog tiav tas."
25 Yuav muaj ib co cim nyob saum lub hnub, lub hli thiab cov hnub qub. Nyob ntiaj teb no, ib tsoom haiv neeg yuav raug kev nyuaj siab loj, vim muaj kev txhawj xeeb txog cov dej ntuj yuav nphau nphwv loj loj tuaj ua suab nrov nroo ntws. 26 Neeg yuav tuag ntshai, vim sawv daws txhawj kawg txog tej yam yuav tuaj raug lub qab ntuj neeg; vim tej yam muaj hwj huam nyob txheej ntuj saud yuav co ua zog koog. 27 Ces thaum ntawd, sawv daws yuav pom Neeg Leej Tub tuaj nyob hauv ib twv huab ,muaj hwj huam thiab muaj hwj chim loj kawg nkaus. 28 Thaum tej ntawd pib tshwm sim tuaj, mas nej yuav sawv kom ntseg, nej yuav tsa taub hau siab, vim txoj kev txhiv nej los txog ze lawm."


**************************************************

TIM 28 LUB 11 HLIS 2019

Hnub Tsib Lis Piam Peb Caug Plaub Nruab Xyoo C Nruab Lis Piam Xyoo I

Thanksgiving Day – Hnub Ua Ntuj Tsaug nyob USA.

Niaj xyoo nyob rau USA mas lub 11 hlis Hnub Tsib hauv lub lis piam plaub, yog hnub Ua Ntuj Tsaug (Thanksgiving). Cov zaj nyeem yog raws li nram no:

Zaj Nyeem Ib: Npes Xis Las 50: 22-24

22 Zaum no, nej cia li cav txog tus Tswv Ntuj kav tas lub sim ceeb, nws yog tus tau ua tej yam loj tas nrho nyob qhov txhia chaw, nws yog tus ua kom peb txawj loj hlob tuaj txij puag thaum tseem nyob hauv leej niam plab, thiab nws ua rau peb raws li nws txoj kev hlub kev khuv leej. 23 Thov nws pub kom peb muaj kev zoo siab puv npo thiab kom muaj kev thaj yeeb lug nyob hauv His Xas Lais, lub caij peb ua neej no thiab fab lwm tiab . 24 Thov kom nws pub nws tej txiaj ntsim nyob nrog peb nraim thiab kom nws cawm peb thaum peb tseem ua neej nyob.

NPN 145: 2-3, 4-5, 6-7, 8-9, 10-11

Txais: (1) Kuv yuav cav txog koj lub npe mus li, Huab Tais.

Kuv yuav niaj hnub cav txog koj lub koob meej,
kuv yuav cav lus zoo txog koj lub npe mus li ib txhiab ib txhis.
HUAB TAIS loj tas nrho, tsim nyog cav txog nws ;
nws loj tas nrho, neeg ntsuas tsis tau.

Txais: (1) Kuv yuav cav txog koj lub npe mus li, Huab Tais.

Txheej dhau txheej tiam dhau tiam yuav qhuas txog koj tej hauj lwm,
Lawv yuav tshaj txog koj lub hwj huam loj.
Lawv yuav qhia txog koj lub hwj chim ci ntsa iab,
thiab yuav piav txog koj cov dej num tsim nyog qhuas.

Txais: (1) Kuv yuav cav txog koj lub npe mus li, Huab Tais.

Neeg yuav hais txog koj lub hwj huam ua tej yam txaus ntshai,
lawv yuav tshaj koj lub hwj huam loj kawg nkaus.
Neeg yuav tshaj txog koj lub siab zoo siab dav tas nrho,
thiab yuav qw ntsuag qees cav txog koj lub siab ncaj.

Txais: (1) Kuv yuav cav txog koj lub npe mus li, Huab Tais.

HUAB TAIS lub siab hlub mos nyoos thiab khuv leej neeg,
nws npau taws qeeb, nws lub siab hlub neeg tas nrho.
HUAB TAIS ua siab zoo rau txhua leej txhua tus,
nws lub siab khuv leej tas puas tsav yam nws tau tsim.

Txais: (1) Kuv yuav cav txog koj lub npe mus li, Huab Tais.

HUAB TAIS, cia koj txhua yam hauj lwm ua koj tsaug,
thiab cia cov uas nyiam koj cav txog koj.
Cia lawv qhuas txog koj lub Ceeb Tsheej muaj hwj chim
thiab cav txog koj lub hwj huam.

Txais: (1) Kuv yuav cav txog koj lub npe mus li, Huab Tais.

Zaj Nyeem Ob: 1 KLN 1: 3-9

Cov kwv tij,
3 Thov kom peb Txiv Tswv Ntuj thiab Huab Tais Yes Xus Pleev pub txiaj ntsim thiab kev thaj yeeb rau nej.
4 Kuv ua Tswv Ntuj tsaug tsis tseg vim nej, vim lub txiaj ntsim uas Tswv Ntuj tau pub rau nej nyob hauv Yes Xus Pleev, 5 ces nyob hauv nws nej muaj kev nplua nuj nyob hauv txhua yam, kom txawj hais lus thiab kom paub txog tas txhua yam txuj ci; 6 vim txoj kev ua tim khawv txog Leej Pleev uj tau cog ruaj khov kho nyob hauv nej lawm, 7 ces nej tsis tshuav ib lub txiaj ntsim uas nej tsis tau txais, thaum lub caij uas nej tos ntsoov peb tus Huab Tais Yes Xus Pleev yuav tshwm sim los. 8 Nws yuav ua kom nej ntseeg ruaj nreb mus txog qhov kawg, kom hnub uas peb tus Huab Tais Yes Xus Pleev rov los txog, mas tsis muaj ib qho xyeej nyob hauv nej. 9 Tswv Ntuj yog tus pheej xeeb, nws hu nej kom los nrog nws Leej Tub, peb tus Huab Tais Yes Xus Pleev muaj kev sib raug zoo sib koom siab.

As Les Lus Yas: 1 TXLN 5: 18

Txais: As les lus yas, as les lus yas.

Txawm nej yuav raug dab tsi los nej yuav ua Tswv Ntuj tsaug sis tseg,
Vim Tswv Ntuj lub siab xav kom nej ua li ntawd nyob hauv Yes Xus Pleev.

Txais: As les lus yas, as les lus yas.

Ntawv Moo Zoo: LK 17: 11-19

11 Thaum Yes Xus taug kev mus Yes Lus Xas Les, nws hla Xas Mas Lias thiab Nkas Lis Lais teb. 12 Thaum nws yuav mus hla hauv ib lub zos, muaj kaum tus mob ruas tuaj cuag nws, lawv nres deb ntawm nws. 13 Lawv tsa suab hais nrov nrov rau nws tias : "Xib Hwb Yes Xus, thov koj khuv leej peb!" 14 Yes Xus pom lawv, nws hais rau lawv tias : “Nej mus thws nej lub cev rau cov Leej Choj saib." Thaum lawv tab tom mus, lawv lub cev cia li huv tuaj. 15 Muaj ib tug hauv pab ntawd pom tias nws lub cev zoo lawm, nws tig hlo rov qab los, nws tsa suab nrov nrov cav txog Tswv Ntuj. 16 Nws khoov ti av pe ntawm Yes Xus ko taw, nws ua Yes Xus tsaug. Nws yog ib tug neeg Xas Mas Lias. 17 Yes Xus thiaj tsa ncauj teb tias : “Tsis yog muaj kaum leej rov huv tuaj lawm lod ? Tshuav cuaj leeg ne, dua qhov twg lawm? 18 Ua cas tsuas muaj tus qhua no xwb thiaj rov los ua tsaug cav txog Tswv Ntuj ?" 19 Ces Yes Xus hais rau nws tias : "Koj sawv mus, koj lub siab ntseeg cawm tau koj lawm."

TIM 29 LUB 11 HLIS 2019

Hnub Rau Lis Piam Peb Caug Plaub Nruab Xyoo C Nruab Lis Piam Xyoo I

Zaj Nyeem Ib: DN 7: 2-14

2 Das Nias piav tias: "Thaum hmo ntuj kuv tau ua yog toog, kuv yees pom plaub nthwv cua nyob saum ntuj tshuab rau lub hiav txwv loj loj. 3 Ces muaj plaub tug tsiaj loj loj tawm hauv lub hiav txwv los, ib tug zoo txawv ib tug. 4 Thawj tus tsiaj zoo xws li ib tug tsov, ho muaj tis xws li dav. Kuv ntsia ntsoov tus tsov ntawd, ua ciav leej twg muab nws cov tis rho tas, thiab muab nws tsa sawv hauv av los kom sawv ntsug saum ob txhais ko taw xws li neeg, ces lawv muab ib lub tswv yim neeg rau nws. 5 Kuv pom ib tug tsiaj ntxiv, tus ob, zoo xws li ib tug dais. Nws pw rau nws ib sab, nws tom rawv peb tug pob txha tav ntawm qhov ncauj ntawm kis nruab nrab nws cov hniav. Lawv hais rau nws tias : "Koj sawv, koj mus noj nqaij kom tas ntau ntau mas!" 6 Tas qhov no lawm, kuv pom dua ib tug tsiaj ntxiv, zoo li ib tug tsov pom txwv, tuaj plaub tug tis nraum nrob qaum li ib tug noog thiab nws muaj plaub lub taub hau. Ces nws tau txais kev ua nom ua tswv.
7 Dhau qhov no lawm, kuv rov yees pom dua ib tug tsiaj thaum hmo ntuj, yog tus plaub. Nws txaus ntshai thiab tsiv kawg nkaus, nws muaj zog loj tas nrho. Nws muaj ib co hniav hlau loj kawg nkaus, uas noj dab tsis mas muab zom muab xo ntsoog tawg tas, tej qhov seem nws muab ko taw tsuj ntiag rau hauv av. Tus tsiaj ntawd zoo txawv tas nrho cov xub ua ntej tib si. Nws muaj kaum tus kub thiab. 8 Kuv tseem saib saib cov kub ntawd, ces txawm tuaj kiag ib tug kub ntxiv, tus me me tuaj ntawm ib kis nruab ntrab cov kub tuaj. Muaj peb tug kub loj cia li raug muab rho hlo cag tawm, tseg chaw rau tus me nyob. Tus kub no muaj qhov muag xws li qhov muag neeg nyob ntawm tus kub, thiab muaj qhov ncauj hais lus khav kawg nkaus. 9 Kuv ntsia ntsoov pom luag muab ib co theej kiab los txawb rau ntawd, ces tus Laus los zaum saum nws lub theej kiab. Nws cov ris tsho ci cuag daus, nws cov plaub hau dawb cuag plaub yaj. Nws lub theej kiab yog nplaim taws, muaj ib co log hluav taws. 10 Muaj ib tug dej hluav taws txhawv ntws lug tawm ntawm qhov chaw nws zaum los mus. Txhiab txhiab leej tsob hwb nws, vam vam leej sawv ntsug nyob ntawm nws xub ntiag. Lub rooj txiav txim twb pib lawm, tej ntaub ntawv twb nthuav tas rau ntawd lawm. 11 Kuv ntsia ntsoov txij thaum tus kub ntawd hais ib co lus khav theeb kawg nkaus mus txog thaum lawv muab tus tsiaj tua kiag thiab muab nws lub cev pov hlawv rau hauv hluav taws. 12 Dua li lwm cov tsiaj, lawv kuj poob lawv lub hwj chim ua tus tswj; tiam sis luag rub lawv txoj sia kom lawv nyob ib ntus thiab ib lub sij hawm ntxiv.
13 Hmo ntuj kuv kuj tseem yees pom ib tug zoo li Neeg Leej Tub tuaj saum cov huab saum ntuj tuaj. Thaum nws los txog ze ntawm tus Laus lawm, lawv coj nws mus qhia rau tus Laus. 14 Ces nws txais kev tswj kav, lub koob meej thiab kev ua vaj. Tas txhia haiv neeg, txhia kuj cuab, txhia xeem lus yuav tsob hwb nws. Nws txoj kev tswj kav yog ib txog kev tswj kav nyob mus li tsis txawj kawg. Nws txoj kev ua vaj yuav tsis raug kev rhuav tshem li.

NPN: DN 3: 75, 76, 77, 78, 79, 80, 81

Txais: Nej ua kom Huab Tais nto koob meej, thiab nej cav txog nws mus li!

Cov ncov roob siab cov ncov roob qis, nej cav lus zoo txog Huab Tais,
nej qhuas txog nws tshaj txhua yam tas mus li ib txhiab ib txhis.

Txais: Nej ua kom Huab Tais nto koob meej, thiab nej cav txog nws mus li!

Tas ib puas tsav yam hlob tuaj tshwm npoo av, nej cav lus zoo txog Huab Tais,
nej qhuas txog nws tshaj txhua yam tas mus li ib txhiab ib txhis.

Txais: Nej ua kom Huab Tais nto koob meej, nej cav txog nws tas mus li!

Cov dej txhawv, nej cav lus zoo txog Huab Tais,
nej qhuas txog nws tshaj txhua yam tas mus li ib txhiab ib txhis.

Txais: Nej ua kom Huab Tais nto koob meej, thiab nej cav txog nws mus li!

Cov dej ntuj cov dej ntws, nej cav lus zoo txog Huab Tais,
nej qhuas txog nws tshaj txhua yam tas mus li ib txhiab ib txhis.

Txais: Nej ua kom Huab Tais nto koob meej, thiab nej cav txog nws mus li!

Cov vaj ntses cov me ntses, nej cav lus zoo txog Huab Tais,
nej qhuas txog nws tshaj txhua yam tas mus li ib txhiab ib txhis.

Txais: Nej ua kom Huab Tais nto koob meej, thiab nej cav txog nws mus li!

Tas cov noog ya saum ntuj, nej cav lus zoo txog Huab Tais,
nej qhuas txog nws tshaj txhua yam tas mus li ib txhiab ib txhis.

Txais: Nej ua kom Huab Tais nto koob meej, thiab nej cav txog nws mus li!

Tas ib puas tsav yam tsiaj nyeg tsiaj qus, nej cav lus zoo txog Huab Tais,
nej qhuas txog nws tshaj txhua yam tas mus li ib txhiab ib txhis.

Txais: Nej ua kom Huab Tais nto koob meej, thiab nej cav txog nws mus li!

As Les Lus Yas: LK 21: 28

Txais: As les lus yas, as les lus yas.

Nej yuav sawv kom ntseg, nej yuav tsa taub hau,
vim txoj kev txhiv nej los txog ze lawm.

Txais: As les lus yas, as les lus yas.

Ntawv Moo Zoo: LK 21: 29-33

29 Yes Xus hais ib zag paj lug rau nws cov thwj tim tias : "Nej ntsia tsob txiv ncuav pias thiab tas cov ntoo huv tib si. 30 Thaum lawv cov cos nplooj pib tawg, nej pom, nej to taub tias ntuj sov los yuav txog.
31 Ib yam li ntawd, thaum nej pom tej yam ntawd tshwm sim tuaj, nej yuav tsum paub tias Tswv Ntuj lub ceeb tsheej los yuav txog.
32 Kuv hais tseeb rau nej tias, tiam neeg no tsis tau dua, tas ib puas tsav yam ntawd twb yuav tshwm sim tuaj ua ntej tso.
33 Lub ntuj thiab lub ntiaj teb yuav dua mus, tab sis kuv cov lus yuav tsis dua mus li.”

TIM 30 LUB 11 HLIS 2019

Hnub Xya Lis Piam Peb Caug Plaub Nruab Xyoo C Nruab Lis Piam Xyoo I

Hwm LN As Nres, ua Hauv Paus Xa Lus

Zaj Nyeem Ib: LOS MAS 10: 9-18

Paj Lug sau ntawv tias:
9 Yog koj di ncauj lees paub Huab Tais Yes Xus, thiab koj lub siab ntseeg tias Tswv Ntuj tau tsa nws sawv hauv cov tuag rov los lawm, mas koj yuav txais kev cawm. 10 Vim lub siab uas ntseeg tiag ua kom tus neeg ncaj tuaj, thiab lub ncauj uas lees paub ua kom tus neeg tau txais kev cawm.
11 Muaj ntawv sau cia tias : ‘Txhua tus ntseeg txog nws, yuav tsis raug poob ntsej muag.’
12 Li ntawd, cov Yus Das thiab cov Hes Las tsis muaj sib txawv dab tsi li; sawv daws muaj ib tug Huab Tais xwb, uas pub nplua mias rau cov neeg hu txog nws. 13 Vim tias : ‘Leej twg hu txog Huab Tais lub npe, nws yuav tau txais kev cawm.’
14 Yog li ntawd, cov uas tsis tau ntseeg txog Huab Tais, lawv yuav ua cas thov nws ?
Hos cov tsis tau hnov txog nws, lawv yuav ua cas ntseeg ?
Thiab lawv yuav ua cas hnov txog nws, yog tsis muaj tus tshaj lub Moo Zoo li?
15 Leej twg ho yuav ua cas tshaj lub Moo Zoo yog tsis muaj tus xa nws mus?
Muaj ntawv sau cia tias : ‘Cov neeg xa lub moo zoo, mas cas lawv ko taw yuav zoo nkauj ua luaj li!’
16 Tab sis tsis yog txhua leej tau mloog lub Moo Zoo, vim His Xais hais tias : ‘Huab Tais, leej twg thiaj ntseeg cov lus lawv hnov ntawm peb?’
17 Li ntawd, kev ntseeg txhawv ntawm kev tau hnov lo lus los; kev tau hnov yog hnov Leej Pleev lo lus.
18 Ces kuv nug tias : ‘Ua li lawv tsis tau hnov lo lus lod? Lawv yeej yuav tsum tau hnov xwb, vim tias:
‘Lawv lub suab twb ntxhe mus thoob ntiaj teb,
thiab lawv cov lus twb nrov mus txog tim npoo ntiaj teb kawg lawm.’

NPN 19: 8, 9, 10, 11

Txais: (10) Huab Tais cov kev txiav txim yog qhov tseeb, txhua yam yog ncaj ncees..
los: (Zam 6:63) Huab Tais, koj cov lus yog ntsuj plig thiab yog txoj sia.

HUAB TAIS txoj cai zoo tas nrho,
nws ntxiv siav rau tus ntsuj plig;
HUAB TAIS tus txhooj yog qhov tseeb,
txawj ua kom tus neeg ruam thoob tsib tuaj.

Txais: (10) Huab Tais cov kev txiav txim yog qhov tseeb, txhua yam yog ncaj ncees..
los: (Zam 6:63) Huab Tais, koj cov lus yog ntsuj plig thiab yog txoj sia.

HUAB TAIS cov lus qhia yog lus ncaj
ua kom neeg lub siab kaj.
HUAB TAIS txoj cai yog lub tseeb,
ua kom neeg qhov muag pom kev.

Txais: (10) Huab Tais cov kev txiav txim yog qhov tseeb, txhua yam yog ncaj ncees..
los: (Zam 6:63) Huab Tais, koj cov lus yog ntsuj plig thiab yog txoj sia.

Kev hwm HUAB TAIS yog kev dawb huv,
kev hwm Huab Tais yuav nyob mus li.
HUAB TAIS cov lus txiav txim yog lus tseeb,
yog lus ncaj ncees tas huv si.

Txais: (10) Huab Tais cov kev txiav txim yog qhov tseeb, txhua yam yog ncaj ncees..
los: (Zam 6:63) Huab Tais, koj cov lus yog ntsuj plig thiab yog txoj sia.

HUAB TAIS cov lus tsim nyog ntshaw dua kub,
tsim nyog ntshaw dua ib txhab tseem kub,
Nws cov lus qab zib dua zib ntab,
qab zib tshaj cov zib nas muv.

Txais: (10) Huab Tais cov kev txiav txim yog qhov tseeb, txhua yam yog ncaj ncees..
los: (Zam 6:63) Huab Tais, koj cov lus yog ntsuj plig thiab yog txoj sia.

As Les Lus Yas: MT 4: 19

Txais: As les lus yas, as les lus yas.

Huab Tais hais tias: Nej raws kuv mus,
Kuv yuav tsa nej ua cov tub puav neeg.

Txais: As les lus yas, as les lus yas.

Ntawv Moo Zoo: MT 4: 18-22

18 Yes Xus mus kev taug ntug dej ntuj Nkas Lis Lais, nws pom ob kwv tij : Xis Moos uas tseem hu ua Pob Zeb, thiab nws tus kwv As Nres, nkawd tab tom pov vas rau hauv dej ntuj, vim nkawd yog tub puav ntses. 19 Yes Xus hais rau nkawd tias : "Neb raws kuv mus, kuv yuav tsa neb ua tub puav neeg." 20 Nkawd tso plhuav cov vas ntses tam sis ntawd, nkawd raws Yes Xus mus. 21 Yes Xus taug kev mus ntxiv, nws ho pom dua ob kwv tij thiab : Yas Kos, uas yog Ntxes Npes Dais tus tub, thiab Zam uas yog Yas Kos tus kwv, nkawd nrog nkawd txiv Ntxes Npes Dais nyob hauv nkoj, lawv tseem tab tom ntxiv lawv cov vas ntaus ntses. Yes Xus hu nkawd. 22 Tam sis ntawd, nkawd tso plhuav lub nkoj thiab nkawd txiv tseg, nkawd raws Yes Xus mus.