UA KOOB TSHEEJ YES XUS YUG LOS XYOO 2018

TIM 18 LUB 2 HLIS 2019

Hnub Ob Lis Piam Rau Nruab Xyoo C Nruab Lis Piam Xyoo I

Xaj Nyeem Ib: HP 4: 1-15, 25

1 As Das paub nws poj niam Es Vas, ces Es Vas xeeb tub thiab yug tau Kas Ees; nws hais tias : "Kuv tau ib tug tub ntawm HUAB TAIS los." 2 Nws kuj yug tau As Npes, Kas Ees tus kwv thiab. As Npes hlob los ua ib tug tub yug cov tsiaj me hos Kas Ees cog qoob cog loo. 3 Ntev tom qab no, Kas Ees txawm muab nws cov qoob los txi rau HUAB TAIS. 4 Hos As Npes, nws kuj muab thawj tus me nyuam uas nws cov tsiaj yug tau, los txi rau Ntuj. Nws tseem muab lawv cov roj los txi huv tib si. HUAB TAIS zoo siab txais As Npes thiab nws cov txim. 5 Tab sis HUAB TAIS tsis zoo siab txais Kas Ees thiab nws cov txim, ces Kas Ees npau taws thiab ua ntsej muag dub nciab.
6 HUAB TAIS hais rau Kas Ees tias: "Vim li cas koj thiaj npau taws thiab ua ntsej muag dub nciab li ko ? 7 Yog koj ua qhov zoo mas koj yeej yuav rov tsa taus koj lub ntsej muag xwb, puas yog? Hos yog koj tsis ua qhov zoo ces kev txhaum nyob rawv ntawm koj qhov rooj, zoo li tus tsiaj nyas nrhw yuav ntsiab koj. Tiam sis yog koj xav mas koj yuav yeej tau nws."
8 Tab sis Kas Ees hais rau nws tus kwv As Npes tias : "Wb mus lawm tom teb." Thaum nkawd mus txog tom teb lawm, Kas Ees txawm sawv tsees mos ntiag nws tus kwv, muab tus kwv tua. 9 HUAB TAIS hais rau Kas Ees tias : "Koj tus kwv As Npes nyob qhov twg ?" Kas Ees teb tias : "Kuv tsis paub. Kuv puas yog tus zov rawv kuv tus kwv ?" 10 HUAB TAIS hais rau nws tias : "Koj tau ua dab tsi lawd? Koj tus kwv cov ntshav quaj qw hauv av tuaj rau kuv ! 11 Zaum no koj yuav tau hmoov phem nyob saum thaj av uas tau rua ncauj cug koj tus kwv cov ntshav uas yog koj txhais tes tau muab txo. 12 Thaum koj ua teb, av yuav tsis ntsu qoob rau koj ntxiv; koj yuav khiav tsiv nraim thiab ua neeg loj leeb ncig ntiaj teb."
13 Kas Ees hais rau HUAB TAIS tias : "Kuv lub txim hnyav dhau qhov kuv ris taus lawm. 14 Ntsia saib, hnub no koj ntiab kuv tawm hauv thaj av no mus, kuv yuav tsum khiav mus deb ntawm koj lub ntsej muag, thiab kuv tseem yuav ua neeg thoj nam loj leeb ncig ntiaj teb. Ntshai thawj tus neeg tuaj ntsib kuv yuav muab kuv tua xwb !" 15 HUAB TAIS hais rau nws tias : "Yuav tsis muaj li ntawd; yog leej twg tua Kas Ees mas yuav muaj tus pab ua pauj rau Kas Ees xya zaus." Ces HUAB TAIS ntaus ib lub cim rau Kas Ees kom leej twg ntsib nws txhob muab nws tua.
25 As Das rov paub nws poj niam dua, ces nws poj niam yug tau ib tug tub ntxiv; nws poj niam tis npe rau hu ua Xes Thes, nws hais tias : "Tswv Ntuj pub dua ib tug tub rau kuv los pauv As Npes chaw, vim Kas Ees muab nws tua lawm."

NPN 50: 1+8, 16BC-17, 20-21

Txais: (14a) Qhov nej yuav cev rau Tswv Ntuj yog ib thaj cav txog nws.

HUAB TAIS Tswv Ntuj tau hais lus thiab ceeb toom rau lub ntiaj teb,
txij thaum lub hnub tawm tuaj mus txog thaum lub hnub poob qho tias:
“Tsis yog vim nej cov thaj txi ntuj kuv thiaj tau cem nej,
vim nej cov tsiaj hlawv txi ntuj nyob ntawm kuv xub ntiag tsis tseg.”

Txais: (14a) Qhov nej yuav cev rau Tswv Ntuj yog ib thaj cav txog nws.

“Vim li cas nej qog kuv cov kev cai lij choj
thiab lees kuv txoj kev cog lus ntawm nej lub ncauj,
tiam sis nej ntxub txoj kev coj nruj raws kuv txoj cai
thiab muab kuv cov lus pov tseg rau nraum nej nrob qaum?

Txais: (14a) Qhov nej yuav cev rau Tswv Ntuj yog ib thaj cav txog nws.

“Nej zaum tsaws hais lus phem txog nej tus kwv tij,
nej xyav lus moo cua txog nej niam tus tub.
Thaum nej ua tej yam zoo li no, kuv puas yuav tsum ua ntsej lag muag dig?
Los nej puas xav tias kuv zoo li nej thiab?
Kuv yuav muab nej rau txim, thiab yuav piav nej lub txim kom nej paub.”

Txais: (14a) Qhov nej yuav cev rau Tswv Ntuj yog ib thaj cav txog nws.

As Les Lus Yas: ZAM 14: 6

Txais: As les lus yas, as les lus yas.

Huab Tais hais tias: Kuv yog txoj kev, qhov tseeb thiab txoj sia,
tsis muaj leej twg mus cuag tau Leej Txiv, yog nws tsis mus ntawm kuv mus.

Txais: As les lus yas, as les lus yas.

Ntawv Moo Zoo: MK 8: 11-13

11 Cov Fas Lis Xais tawm tuaj, lawv pib nrog Yes Xus sib tham. Lawv xav sim Yes Xus, ces lawv taij kom Yes Xus ua ib lub cim tawm saum ntuj tuaj.
12 Yes Xus xyu twj ywm rau nruab siab, nws hais tias : "Tim li cas tiam neeg no thiaj taij ib lub cim ua dab tsi ? Kuv hais tseeb rau nej tias, yuav tsis muaj ib lub cim rau tiam neeg no pom."
13 Ces Yes Xus tso lawv tseg, nws rov nce nkoj thiab sawv kev mus rau sab ntug dej tim ub.

TIM 19 LUB 2 HLIS 2019

Hnub Peb Lis Piam Rau Nruab Xyoo C Nruab Lis Piam Xyoo I

Zaj Nyeem Ib: HP 6: 5-8; 7: 1-5, 10

6 5 HUAB TAIS pom hais tias nyob ntiaj teb, neeg siab phem tas nrho, thiab neeg lub siab tsuas xav qhov phem tas mus li xwb. 6 HUAB TAIS khuv xim hais tias cas nws tau tsim neeg los nyob ntiaj teb, nws tu siab heev. 7 Ces HUAB TAIS hais tias : "Kuv yuav muab cov neeg uas kuv tau tsim ntawd rhuav kom ploj tas saum daim npoo av, tsis hais neeg, los tsiaj nyeg, kab ntsaum los noog ya saum ntuj huv tib si, vim kuv khuv xim tias kuv tau tsim lawv los."
8 Tiam sis Nos Hes yog ib tug neeg zoo xis HUAB TAIS siab.
7 1 HUAB TAIS hais rau Nos Hes tias : "Koj nkag mus hauv lub nkoj, koj thiab tas nrho koj tsev neeg, vim nyob hauv tiam neeg no, kuv tsuas pom koj ib leeg xwb thiaj li ncaj ncees. 2 Ntawm tas nrho cov tsiaj huv, koj yuav khaws xya nkawm nrog koj, tus txiv nrog tus maum; ntawm cov tsiaj tsis huv, koj yuav khaws ib nkawg, ib tug txiv thiab ib tug maum. 3 Hos cov noog ya saum ntuj, koj khaws xya nkawm, ib tug lau nrog tus poj, kom tau ua noob rau tas ntiaj teb. 4 Tshuav xya hnub ntxiv xwb kuv yuav tso nag los nyab ntiaj teb plaub caug hnub plaub caug hmo, kuv yuav rhuav tas puas tsav yam muaj sia kuv tau tsim los kom ploj ntais saum daim npoo av mus."
5 Nos Hes ua tas puas tsav yam raws li HUAB TAIS kom nws ua.
10 Thaum dhau xya hnub lawm, txawm muaj dej huam loj los nyab ntiaj teb.

NPN 29: 1A+2, 3AC-4, 3B+9C-10

Txais: (11b) Huab Tais yuav foom kev thaj yeeb rau nws haiv neeg.

Nej muab rau HUAB TAIS, nej uas yog Tswv Ntuj cov tub,
nej muab rau HUAB TAIS lub koob meej thiab lo lus qhuas,
nej muab rau HUAB TAIS lub koob meej kom phim nws lub npe;
nej hnav ib co tsoos ntshiab mus pe hawm HUAB TAIS.

Txais: (11b) Huab Tais yuav foom kev thaj yeeb rau nws haiv neeg.

HUAB TAIS lub suab nyob saum cov dej,
HUAB TAIS nyob saum cov dej loj dav tas nrho.
HUAB TAIS lub suab muaj hwj huam,
HUAB TAIS lub suab muaj hwj chim.

Txais: (11b) Huab Tais yuav foom kev thaj yeeb rau nws haiv neeg.

Tus Tswv Ntuj muaj koob meej ua xob quaj nrov nroo ntws,
nyob hauv nws lub tuam tsev sawv daws hais tias, “Nto koob meej!”
HUAB TAIS zaum saum theej kiab saum toj cov dej nyab,
HUAB TAIS zaum saum teeej kiab ua vaj mus tas ib txhis.

Txais: (11b) Huab Tais yuav foom kev thaj yeeb rau nws haiv neeg.

As Les Lus Yas: ZAM 14: 23

Txais: As les lus yas, as les lus yas.

Huab Tais hais tias: Tus twg nyiam kuv, mas nws yuav khaws kuv lo lus,
ces kuv Txiv yuav nyiam nws, ces peb yuav tuaj nyob hauv nws.

Txais: As les lus yas, as les lus yas.

Ntawv Moo Zoo: MK 8: 14-21

14 Cov thwj tim tsis nco qab ntim mov, ces lawv tsuas muaj ib lub ncuav mov nyob hauv nkoj xwb. 15 Thaum ntawd, Yes Xus qhia lawv zoo li no : "Nej yuav xyuam xim, nej yuav ceev faj txog cov poov xab Fas Lis Xais thiab cov poov xab Hes Los." 16 Ces cov thwj tim txawm sib tham tias yog vim lawv tsis ntim mov. 17 Yes Xus paub qhov lawv xav, ces Yes Xus hais rau lawv tias : "Ua cas nej thiaj sib tham tias yog vim nej tsis ntim mov ? Nej tseem tsis tau to taub thiab tsis paub li lod? Puas yog nej lub siab qhwv dhau lawd? 18 Puas yog nej lam muaj qhov muag xwb, nej tsis pom kev, nej lam muaj pob ntseg xwb, nej tsis hnov lus li ? 19 Nej tsis nco qab txog tias thaum kuv ntais tsib lub ncuav mov rau tsib txhiab leej noj, nej khaws tau pes tsawg tawb mov seem nqa mus lod?" Cov thwj tim teb tias : "Kaum ob tawb." 20 “Thiab zaum uas kuv ntais xya lub ncuav mov rau plaub txhiab leej noj, nej khaws tau pes tsawg tawb mov seem nqa mus ?" Lawv hais tias : "Xya tawb." 21 Ces Yes Xus hais rau lawv tias : "Ua cas nej tseem tsis tau to taub li thiab lod?"

TIM 20 LUB 2 HLIS 2019

Hnub Plaub Lis Piam Rau Nruab Xyoo C Nruab Lis Piam Xyoo I

Zaj Nyeem Ib: HP 8: 6-13, 20-22

6 Nos Hes tos plaub caug hnub, ces nws qhib lub qhov rai uas nws tau ua rau ntawm lub nkoj, 7 nws tso tus uab lag tawm mus; uab lag ya mus thiab ya rov los mus txog thaum dej qhuav hauv ntiaj teb lawm. 8 Ces Nos Hes kuj tso ib tug nquab tawm ntawm nws mus xyuas saib dej puas tau nqhuab tas saum daim npoo av thiab. 9 Tiam sis tus nquab nrhiav tsis tau chaw txawb nws ob txhais ko taw, ces nquab ya rov los rau ntawm nws ntawm lub nkoj, vim dej tseem nyab cov av hauv ntiaj teb thoob plaws. Nos Hes thiaj li xyab tes mus txais tus nquab coj los rau ntawm nws hauv lub nkoj. 10 Nws tos tau xya hnub ntxiv, nws rov qab tso tus nquab tawm ntawm lub nkoj mus dua. 11 Thaum tsaus ntuj, nquab ya rov los, ntawm nws kaus ncauj muaj ib daig nplooj txiv ntoo roj uas tus nquab nyuam qhuav de tshiab tshiab. Ces Nos Hes paub tias dej nqig tas lawm. 12 Nws rov tos tau xya hnub ntxiv, nws mam rov tso tus nquab tawm mus dua. Tus nquab tsis rov los ntxiv lawm.
13 Ces yog thaum Nos Hes muaj rau pua ib xyoos, lub ib hlis hnub xiab ib, dej nqig tas hauv ntiaj teb lawm. Nos Hes thiaj yaws lub ruv npog lub nkoj, nws ntsia ua ciav pom lub ntiaj teb cov npoo av qhuav lawm.
20 Ces Nos Hes tsa ib lub thaj txi ntuj rau Huab Tais. Nws muab txhua yam tsiaj huv thiab txhua yam noog huv los hlawv txi rau Ntuj saum lub thaj. 21 Thaum Huab Tais hnia cov pa ncho tsw qab, Huab Tais hais rau hauv nws nruab siab hais tias tias : "Kuv yuav tsis foom phem rau av vim tib neeg ib zaug ntxiv lawm, vim tias neeg lub siab yeej xeeb tau phem puag thaum yau los. Thiab kuv yuav tsis ua kom txhua yam muaj sia tu noob li kuv tau ua no ib zaug ntxiv.” 22 Tsuav yog tseem muaj lub ntiaj teb, mas yeej yuav muaj caij cog qoob thiab caij sau qoob, yuav muaj txias thiab muaj kub, yuav muaj caij sov thiab caij no, yuav muaj nruab hnub thiab muaj hmo ntuj tas mus li tsis tu."

NPN 116: 12-13, 14-15, 18-19

Txais: (17a) Huab Tais, kuv yuav cev rau koj ib thaj txi ntuj cav txog koj.
los: As les lus yas.

Kuv yuav muab dab tsi los pauj rau Huab Tais
tas ib puas tsav yam zoo uas nws tau ua rau kuv ?
Kuv yuav cev lub ntim cawm neeg rau nws,
kuv yuav hu txog HUAB TAIS, yuav tuav txog nws lub npe

Txais: (17a) Huab Tais, kuv yuav cev rau koj ib thaj txi ntuj cav txog koj.
los: As les lus yas.

Kuv yuav pauj kuv lub yeem rau HUAB TAIS
nyob ntawm tas nws haiv neeg xub ntiag.
HUAB TAIS saib cov ntseeg nws
txoj kev tuag muaj nqes tas nrho.

Txais: (17a) Huab Tais, kuv yuav cev rau koj ib thaj txi ntuj cav txog koj.
los: As les lus yas.

Kuv yuav pauj kuv lub yeem rau HUAB TAIS
nyob ntawm nws haiv neeg xub ntiag,
nyob ntawm cov tshav loog hauv HUAB TAIS tsev,
nyob hauv nruab nrab koj, Yes Lus Xas Les.
.
Txais: (17a) Huab Tais, kuv yuav cev rau koj ib thaj txi ntuj cav txog koj.
los: As les lus yas.

As Les Lus Yas: EFX 1: 17-18

Txais: As les lus yas, as les lus yas.

Thov kom peb tus Huab Tais Yes Xus Pleev leej Txiv
qhib peb lub qhov muag hauv peb lub siab kom pom kev,
kom peb thiaj paub txog tias peb txoj kev tso siab
yog dab tsi thaum peb mloog Tswv Ntuj hu peb.

Txais: As les lus yas, as les lus yas.

Ntawv Moo Zoo: MK 8: 22-26

22 Thaum Yes Xus thiab nws cov thwj tim tuaj txog Npes Xais Das, lawv coj ib tug neeg dig muag tuaj rau Yes Xus, lawv thov kom Yes Xus kov tus dig muag.
23 Yes Xus tuav tus dig muag tes, thiab coj nws tawm mus rau sab zos nraud. Yes Xus muab nws aub ncaug pleev tus dig muag ob lub qhov muag, ces nws tsa tes rau saum tus dig muag. Yes Xus nug nws tias : "Koj puas pom ib qho dab tsi ?"
24 Tus dig muag tsa muag saib, nws teb tias : "Kuv pom ib co neeg zoo li ib co ntoo mus mus kev."
25 Yes Xus rov qab tsa tes rau saum tus dig muag ob lub qhov muag dua, ces tus dig muag pom kev tseeb, nws zoo lawm. Nws pom ib puas tsav yam meej kawg tuaj.
26 Yes Xus thiaj kom nws rov mus tsev, Yes Xus hais rau nws tias : "Koj tsis txhob nkag mus hauv lub zos li."

TIM 21 LUB 2 HLIS 2019

Hnub Tsib Lis Piam Rau Nruab Xyoo C Nruab Lis Piam Xyoo I

Hwm LN Peter Damian

Zaj Nyeem Ib: HP 9: 1-13

1 Tswv Ntuj foom hmoov zoo rau Nos Hes thiab rau nws cov tub, nws hais rau lawv tias: "Nej yeej meem tsim noob, nej kav tsij huam vam mus nyob puv lub ntiaj teb. 2 Tas puas tsav yam tsiaj hauv ntiaj teb, puas tsav yam noog ya saum ntuj, puas tsav yam tsiaj nkag hauv av thiab puas tsav yam ntses hauv hiav txwv yuav hwm nej thiab ntshai nej. Lawv nyob hauv nej lub xib teg tas huv si. 3 Txhua yam txawj ua zog thiab muaj sia yog txhiam xws rau nej noj, ib yam li cov nroj ntsuab huv tib siv thiab; ces yog kuv muab tas txhua yam rau nej lawm.
4 Tshuav ib yam xwb: nej yuav tsis txhob noj cov nqaij tseem muaj sia uas yog nws cov ntshav. 5 Vim hais tias, kuv yuav nug txog nej txhua tus cov ntshav. Kuv yuav nug ntawm tas cov tsiaj tib si thiab ntawm tib neeg; kuv yuav nug ib tug tib neeg txog nws tus kwv tij, kuv yuav nug txog tus tib neeg txoj sia. 6 Yog leej twg txo tib neeg cov ntshav, nws kuj yuav raug tib neeg txo nws cov ntshav thiab. Vim hais tias neeg tau raug tsim los zoo xws li Tswv Ntuj tus ntsuj duab.
7 Ntawm nej, mas nej yeej meem tsim noob, yeej meem huam vam coob mus nyob puv ntiaj teb thiab kav ntiaj teb."
8 Tswv Ntuj hais rau Nos Hes thiab rau nws cov tub nrog nws nyob tias: 9 "Ntawm no, kuv nrog nej cog lus, nrog nej thiab nej caj ces yuav los tom qab nej cog lus, 10 thiab nrog txhua yam muaj txoj sia nyob nrog nej cog lus, cov noog, cov tsiaj nyeg, txhua tsav txhua hom tsiaj hauv ntiaj teb uas nrog nej tawm hauv lub nkoj los, cog lus. 11 Kuv cog lus rau nej tias : Tas puas tsav yam muaj sia yuav tsis raug dej nyab muab rhuav kom tu noob ib zaug ntxiv. Yuav tsis muaj dej los nyab thiab rhuav ntiaj teb ib zaug ntxiv." 12 Tswv Ntuj hais tias : "Ntawm no yog lub cim qhia rau cov tiam neeg tom ntej mus li tias kuv tau nrog nej cog lus thiab nrog tas puas tsav yam muaj sia uas nrog nej nyob cog lus. 13 Kuv ua zaj sawv rau saum cov huab ; nws yuav ua lub cim nco txog tias kuv thiab lub ntiaj teb tau cog lus cia lawm.

NPN 102: 16-18, 19-21, 29+22-23

Txais: (20b) Huab Tais nyob saum ntuj dauv muag ntsia rau lub ntiaj teb.

HUAB TAIS, txhua haiv neeg yuav hwm koj lub npe,
tas cov vaj nyob ntiaj teb yuav ntshai koj lub hwj chim,
Vim thaum HUAB TAIS rov txhim Xis Yoos,
sawv daws yuav pom nws nyob hauv nws lub hwj chim;
nws yuav tig los mloog cov neeg txom nyem tej lus thov,
nws yuav tsis thuam lawv zaj teev ntuj.

Txais: (20b) Huab Tais nyob saum ntuj dauv muag ntsia rau lub ntiaj teb

Nej sau tej no cia rau phaj tub ki yuav los yav tom ntej paub,
cov tiam neeg HUAB TAIS yuav tsim thiaj yuav cav txog nws tias:
“HUAB TAIS nyob siab saum nws lub tsev ntshiab dauv muag los saib;
HUAB TAIS nyob saum txheej ntuj siab ntsia ntiaj teb,
Kom tau mloog cov neeg nyob txim lub suab ntsaj,
kom tau tso cov yuav raug tua dim kev tuag.”

Txais: (20b) Huab Tais nyob saum ntuj dauv muag ntsia rau lub ntiaj teb

Koj cov tub txib tej me nyuam yuav nyob ruaj nreb,
lawv cov xeeb ntxwv yuav nyob ntawm koj xub ntiag mus li.
Sawv daws yuav tshaj HUAB TAIS lub npe nyob saum Xis Yoos,
thiab yuav cav lus zoo txog nws nyob Yes Lus Xas Les;
thaum ntawd cov haiv neeg yuav sib sau los nyob ua ke,
cov ceeb tsheej yuav sib txoos los tsob hwb HUAB TAIS.
Txais: (20b) Huab Tais nyob saum ntuj dauv muag ntsia rau lub ntiaj teb

As Les Lus Yas: ZAM 6: 63C, 68C

Txais: As les lus yas, as les lus yas.

Huab Tais, koj cov lus yog tswv yim thiab yog txoj sia;
koj muaj cov lus pub txoj sia nyob mus li.

Txais: As les lus yas, as les lus yas.

Ntawv Moo Zoo: MK 8: 27-33

27 Yes Xus nrog nws cov thwj tim mus rau cov zos nyob cheeb tsam ntawm Xes Ntxas Les Fis Lis Pos. Thaum lawv tseem taug kev, Yes Xus nug nws cov thwj tim li no : "Luag tej hais tias kuv yog leej twg ?"
28 Cov thwj tim teb tias : "Lawv hais tias koj yog Zam Ntxuav Plig, hos ib txhia hais tias koj yog Es Lias, ib txhia hais tias koj yog ib tug hauv cov yaj saub."
29 Yes Xus nug lawv tias : "Nej ne, nej hais tias kuv yog leej twg ?" Pob Zeb teb rau Yes Xus tias : "Koj yog Leej Pleev."
30 Ces Yes Xus txwv lawv nruj kom txhob hais txog nws rau leej twg li.
31 Yes Xus pib qhia cov thwj tim hais tias : "Neeg Leej Tub yuav tsum raug txom nyem loj kawg nkaus. Cov txwj laus, cov thawj leej choj thiab cov thoob xwm yuav tsis kam lees nws ; luag yuav muab nws tua; peb hnub tom qab, nws yuav sawv rov los.”
32 Yes Xus tab meeg hais txog tej ntawd tsis zais li. Pob Zeb txawm rub Yes Xus los ntawm nws, ces Pob Zeb yws Yes Xus.
33 Tab sis Yes Xus tig los ntsia nws cov thwj tim, nws cem Pob Zeb hnyav ncawv tias : "Xas Tas, koj lawv nram kuv qab ! Vim koj cov tswv yim koj xav tsis yog li Tswv Ntuj cov, yog li neeg cov xwb !"

TIM 22 LUB 2 HLIS 2019

Hnub Rau Lis Piam Rau Nruab Xyoo C Nruab Lis Piam Xyoo I

Hwm Pob Zeb lub Rooj Zaum (Feast of the Chair of Saint Peter)

Zaj Nyeem Ib: 1 PZ 5: 1-4

Cov zoo nyiad,
1 Kuv xav ntuas cov txwj laus nyob hauv nej, vim kuv kuj yog ib tug txwj laus thiab, thiab kuv yog ib tug tim khawv txog Leej Pleev txoj kev txom nyem; thiab kuv kuj yuav nrog sawv daws txais lub hwj chim uas lwm hnub yuav tawm tuaj.
2 Nej yuav tsum tu Tswv Ntuj cov yaj uas nrog nej nyob kom zoo. Nej yuav saib xyuas lawv, tsis yog vim muaj tus yuam nej, tiam sis yog nej txaus siab coj lawv raws li Tswv Ntuj nyiam; tsis yog vim nej yuav tau ib pob nyiaj, tiam sis tsuas yog vim nej mob siab kub siab txog lawv xwb.
3 Nej tsis txhob ua ib co huab tais quab yuam cov neeg poob rau nej ua tus saib, tiam sis nej yuav ua ib tug qauv zoo rau pab yaj ntawd.
4 Thaum tus thawj Tswv Zov Yaj tawm los, nej yuav tau txais lub mom yeej kub muaj koob meej tsis txawj tsuag li.

NPN 23: 1-3A, 4, 5, 6

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

HUAB TAIS yog tus tswv zov yaj saib kuv, kuv yuav tsis ntshaw dab tsi.
Nws coj kuv mus so nyob hauv tej tshav zaub mos ntsuab xiab.
Nws coj kuv mus tso nyob ze tej tus dej tus yees;
nws ua kom kuv tus ntsuj plig los siav.

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

Txawm kuv taug kev nyob hauv lub hav tsaus nti,
kuv tsis ntshai dab tsi phem, vim koj nyob rawv ntawm kuv ib sab
nrog koj rab pas nplawm thiab rab pas nrig, ua rau kuv muaj siab loj.

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

Koj rau ib rooj mov rau ntawm kuv xub ntiag
rau kuv cov yeeb ncuab ntsia ntsoov.
Koj muab roj pleev kuv taub hau;
kuv lub khob puv phwj yaws.

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

Kuv tsuas ntsib txoj kev siab zoo siab dawb
txhua txhia hnub hauv kuv lub neej xwb.
Kuv yuav tau nyob hauv HUAB TAIS tsev
ntev niaj ntau xyoo lawm tom ntej.

Txais: (1) Huab Tais yog tus tswv zov yaj saib kuv; kuv yuav tsis ntshaw dab tsi.

As Les Lus Yas: MT 16: 18

Txais: As les lus yas, as les lus yas.

Koj yog Pob Zeb, kuv yuav txhim kuv lub Koom Txoos rau saum lub pob zeb no,
Dab phem teb cov qhov rooj yuav kov tsis yeej nws li.

Txais: As les lus yas, as les lus yas.

Ntawv Moo Zoo: MT 16: 13-19

13 Thaum Yes Xus tuaj txog cheeb tsam ntawm Xes Ntxas Les Fis Lis Pos, nws nug cov thwj tim tias : "Luag tej hais tias Neeg Leej Tub yog leej twg ?" 14 Lawv teb tias : “ Ib txhia hais tias yog Zam Ntxuav Plig, ib txhia hais tias yog Es Lias, tseem muaj lwm cov hais tias yog Yes Les Mias los yog ib tug hauv cov yaj saub.” Yes Xus hais rau lawv tias : 15 "Nej ne, nej hais tias kuv yog leej twg ?" 16 Xis Moos Pob Zeb teb tias : "Koj yog Leej Pleev, yog tus Tswv Ntuj Muaj Txoj Sia Leej Tub." 17 Yes Xus teb rau Pob Zeb tias : "Xis Moos, Yos Nas tub, koj txoj hmoov zoo, vim tsis yog nqaij thiab ntshav qhia qhov no rau koj paub, yog kuv Txiv nyob saum ntuj qhia rau koj. 18 Ua li mas kuv hais rau koj : Koj yog Pob Zeb, kuv yuav txhim kuv lub Koom Txoos rau saum lub pob zeb no. Dab phem teb cov qhov rooj yuav tiv tsis yeej nws li. 19 Kuv yuav muab Ntuj lub Ceeb Tsheej cov yawm sij rau koj tuav. Koj khi yam twg nyob ntiaj teb no, yam ntawd kuj yuav khi nyob saum ntuj. Koj daws yam twg nyob ntiaj teb no, yam ntawd kuj yuavg daws nyob saum ntuj."

TIM 23 LUB 2 HLIS 2019

Hnub Xya Lis Piam Rau Nruab Xyoo C Nruab Lis Piam Xyoo I

Hwm LN Polycarp, HP Xa Lus Zam ib tug thwj tim ua Tswv Qhia tuag ua Tim Khawv xyoo 155 AD

Zaj Nyeem Ib: HES NPLAWS 11: 1-7

Cov kwv tij:
1 Txoj kev ntseeg yog txoj kev zeem tau meej tias peb yuav txais yam uas peb cia siab tos, nws yog qhov puav pheej tias yam uas peb tsis pom, yeej muaj tseeb tiag. 2 Yog txoj kev ntseeg ua kom cov poj yawm txwv koob thaud tau txais Ntuj txoj kev lees paub lawv. 3 Nyob hauv txoj kev ntseeg, peb to taub tias yog Tswv Ntuj lo lus tau tsim lub ntuj thiab lub ntiaj teb. Li ntawd, tej yam uas peb pom tau yog tawm ntawm tej yam peb pom tsis tau tuaj. 4 Yog vim txoj kev ntseeg, mas As Npes thiaj cev ib thaj txi Ntuj muaj nqis dua Kas Ees thaj rau Tswv Ntuj; vim kev ntseeg, nws thiaj tau txais kev lees paub tias nws siab ncaj, Tswv Ntuj thiaj lees txais nws cov paj tshab; vim kev ntseeg, txawm As Npes tuag lawm los nws tseem hais lus qees. 5 Yog vim txoj kev ntseeg, mas Hes Nov thiaj cia li nce mus saum ntuj lawm, nws tsis ntsib txoj kev tuag li; neeg nrhiav tsis tau nws ntxiv, vim Tswv Ntuj coj nws mus saum ntuj lawm. Thaum nws tseem tsis tau mus saum ntuj mas nws tau txais kev lees paub tias nws yog ib tug neeg ntxim Tswv Ntuj siab. 6 Yog neeg tsis muaj txoj kev ntseeg, mas neeg ua ntxim Tswv Ntuj siab tsis tau. Vim tus neeg uas txav mus ze Tswv Ntuj nws yuav tsum ntseeg tias muaj Tswv Ntuj tiag, thiab ntseeg tias Tswv Ntuj yog tus pub paj tshab rau cov neeg nrhiav nws. 7 Yog vim kev ntseeg, mas Tswv Ntuj thiaj xub qhia txog tej yam uas tseem tsis tau pom rau Nos Hes paub, ces Nos Hes mloog, nws txua ib lub nkoj kom tau kev cawm nws tsev neeg. Yog vim kev ntseeg mas Nos Hes muab txim rau lub qab ntuj neeg, thiab nws yog tus tau txais txoj kev ncaj ua cuab tam vim kev ntseeg.

NPN 145: 2-3, 4-5, 10-11

Txais: (1) Huab Tais, kuv yuav cav txog koj lub npe mus li.

Kuv yuav niaj hnub cav txog koj lub koob meej,
kuv yuav cav lus zoo txog koj lub npe mus li ib txhiab ib txhis.
HUAB TAIS loj tas nrho, tsim nyog cav txog nws ;
nws loj tas nrho, neeg ntsuas tsis tau.

Txais: (1) Huab Tais, kuv yuav cav txog koj lub npe mus li.

Sawv daws yuav qhuas txog koj tej hauj lwm txheej dhau txheej,
Lawv yuav tshaj koj txoj kev muaj hwv xyeej rau neeg paub.
Lawv yuav hais txog koj lub hwj chim loj ci ntsa iab muaj koob meej.
Lawv yuav piav txog koj cov dej num tsim nyog qhuas.

Txais: (1) Huab Tais, kuv yuav cav txog koj lub npe mus li.

HUAB TAIS, cia koj txhua yam hauj lwm ua koj tsaug,
thiab cia cov neeg nyiam koj cav txog koj.
Cia lawv qhuas txog koj lub Ceeb Tsheej muaj hwj chim
Thiab piav txog koj lub hwj huam loj.

Txais: (1) Huab Tais, kuv yuav cav txog koj lub npe mus li.

As Les Lus Yas: MK 9: 7

Txais: As les lus yas, as les lus yas.

Lub ntuj qhib plho ces Leej Txiv lub suab nrov nroo ntws tias :
"Tus no yog kuv Leej Tub uas kuv nyiam ; nej mloog nws hais."

Txais: As les lus yas, as les lus yas.

Ntawv Moo Zoo: MK 9: 2-13

2 Tau rau hnub tom qab, Yes Xus hu Pob Zeb, Yas Kos, thiab Zam rau ib cag, nws coj lawv nce mus rau saum ib lub roob siab, lawv nkaus xwb. Ces nws ib ce hloov tas rau ntawm lawv xub ntiag. 3 Nws cov ris tsho cia li ci dawb paug, dawb tshaj plaws, nyob ntiaj teb no tsis muaj tshuaj yuav ua tau kom dawb li ntawd. 4 Es Lias thiab Mais Xes nkawd tawm los rau lawv pom, nkawd nrog Yes Xus tham. 5 Ces Pob Zeb hais rau Yes Xus tias : "Xib Hwb, peb nyob ntawm no mas zoo kawg li. Cia peb ua peb lub tsev tsam phooj : ib lub rau koj, ib lub rau Mais Xes, ib lub rau Es Lias." 6 Pob Zeb tsis paub tias nws hais dab tsi, vim lawv ntshai kawg. 7 Ces muaj ib twv huab los ntxoov lawv, thiab ib lub suab nrov hauv twv huab tuaj tias : "Tus no yog kuv Leej Tub uas kuv nyiam; nej mloog nws hais."
8 Ib sij huam, lawv ntsia ib ncig tsis pom leej twg li, tsuas pom Yes Xus tib leeg nrog lawv nyob xwb. 9 Thaum lawv tab tom nqes pem roob los, Yes Xus txwv lawv kom txhob piav txog qhov lawv pom ntawd rau leej twg li, yuav tsum tos kom Neeg Leej Tub sawv hauv cov tuag rov los tso. 10 Peb leeg thwj tim ua raws li lo lus txwv ntawd, tab sis lawv sib nug lawv tias "sawv hauv cov tuag rov los" yog txhais li cas?
11 Ces lawv nug Yes Xus tias : “Vim li cas cov kws Ntawv Ntshiab hais tias Es Lias yuav tsum xub los tso ?” 12 Yes Xus thiaj hais rau lawv tias : “Yog tiag, Es Lias yuav tsum xub los tso, thiab nws yuav kho tas puas tsav yam kom zoo. Thiab ntawv kuj hais li cas txog Neeg Leej Tub? Tias nws yuav tsum raug txom nyem loj, thiab yuav raug luag ntxub. 13 Tiam sis kuv hais rau nej tias Es Lias twb los lawm, tab sis lawv ua rau nws ywj lawv siab nyiam, raws nraim li Ntawv xub sau txog nws lawm.”

TIM      25      LUB      2      HLIS      2019

Hnub Ob Lis Piam Xya Nruab Xyoo C Nruab Lis Piam Xyoo I

Zaj Nyeem Ib:       NPES XIS LAS  1:   1-10

1 Txhua txoj kev thoob tsib tuaj ntawm HUAB TAIS tuaj, thiab nrog HUAB TAIS nyob tas mus li ib txhis. 2 Cov suab puam hauv hiav txwv, cov teev dej nag, cov hnub cov hmo uas nyob mus li, leej twg thiaj yuav suav txheeb ? 3 Lub ntuj siab li cas, lub ntiaj teb dav li cas, qab tiv txwv tob li cas, leej twg thiaj yuav soj ntsuam tau ? 4 Ntuj tsim kev thoob tsib ua ntej txhua tsav txhua yam, thiab lub tswv yim ntse xyuam xim yeej ib txwm nyob puag thaum ntxov ub los. 5 Tswv Ntuj lo lus nyob puag saum qhov chaw siab yog lub hauv dej txhawv kev thoob tsib, nws tej kev yuav nyob mus li tsis txawj kawg. 6 Ntuj puas tau qhia kev thoob tsib tus cag rau leej twg paub? Kev thoob tsib cov nru lus tob, leej twg thiaj paub txog? 7 Ntuj puas tau qhia kev thoob tsib cov txuj ci rau leej twg paub? Leej twg thiaj to taub txog nws ntau txoj ntau yam kev? 8 Tsuas muaj ib tug xwb thiaj thoob tsib, uas tsim nyog sawv daws ntshai; nws zaum saum nws lub theej kiab. Yog Huab Tais.  9 Nws yog tus tau tsim kev thoob tsib, nws pom tau, nws ntsuas tau kev thoob tsib, thiab nws tso kev thoob tsib nyob rau hauv nws cov hauj lwm tas tib si, 10 thiab nyob hauv txhua tus muaj txoj sia raws li nws lub siab dav pom zoo; Huab Tais muab kev thoob tsib pub nchuav lug rau cov neeg nyiam nws.

NPN       93:   1AB, 1CD-2, 5

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

Huab Tais ua vaj, nws hnav hwj chim ci ntsa iab,
Nws hanv lub tsho muaj zog thiab sia siv khov kho.

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

Nws tsim Lub ntiaj teb nyob ruaj nreb, txav tsis tau chaw.
Koj lub theej kiab yeej teem tau ruaj khov kho txij puag thaum ub los.
Huab Tais, koj yeej ib txwm nyob txhiab niag tim puas xyoo mus li.

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

Koj cov cai lij choj tseeb khov tas nrho,
Huab Tais, txoj kev ntshiab tsab koj lub tsev
kom zoo nkauj mus li lawm yav tom ntej.

Txais: (1a) HUAB TAIS ua vaj, nws hnav hwj chim muaj tsim.
los: As les lus yas.

As Les Lus Yas:       2 TMT  1:   10

Txais: As les lus yas, as les lus yas.

Peb tus Cawm Seej Yes Xus Pleev tau rhuav txoj kev tuag pov tseg,
thiab tau ua kom txoj sia ci tawm tuaj nyob hauv lub Moo Zoo.

Txais: As les lus yas, as les lus yas.

Ntawv Moo Zoo:       MK  9:   14-29

14 Thaum Yes Xus nrog Pob Zeb, Yas Kos thiab Zam lawv nqes saum roob rov los txog ntawm cov thwj tim, lawv pom ib pab neeg coob coob nyob ncig cov thwj tim, thiab ib co kws Ntawv Ntshiab nrog cov thwj tim sib cav. 15 Tam sis ntawd, tas tsoom sid pom Yes Xus, lawv ceeb tas, lawv khiav tuaj ntawm Yes Xus, thiab tuaj hu nws. 16 Ces Yes Xus nug lawv tias : "Nej nrog lawv sib cav txog dab tsi ?" 17 Muaj ib tug hauv pab neeg ntawd teb rau Yes Xus tias : "Xib Hwb, kuv coj kuv tus tub tuaj rau koj, nws raug ib tug dab nplaig txhav. 18 Thaum twg tus dab nkag rau hauv nws, mas dab muab nws thawb rau pem teb, ces tus tub ua npuas ncauj, nws zom hniav, thiab ib ce txhav tas. Kuv thov koj cov thwj tim kom lawv ntiab tus dab ntawd, tab sis lawv tsis muaj peev xwm yuav ntiab tau."
19 Yes Xus teb rau lawv tias : "Tiam neeg tsis muaj kev ntseeg, kuv yuav nrog nej nyob txog thaum twg ? Kuv yuav ua tiag nyiaj nej mus txog thaum twg ? Nej coj tus tub los rau kuv saib." 20 Ces lawv coj nws los rau Yes Xus. Thaum tus dab pom dheev Yes Xus, dab muab tus me nyuamb ntswj pes lees, ces nws ntog pem teb, nws dov lam rau hauv av, ua npuas ncauj nto plaws. 21 Yes Xus nug leej txiv tias : "Nws raug qhov ntawd tau hov ntev los lawm ?" Leej txiv teb tias : "Txij thaum yau los lawm. 22 Muaj ntau zaus dab muab nws thawb rau hauv hluav taws los rau hauv dej kom tuag. Yog koj pab tau, thov koj pab peb, thov koj khuv leej peb." 23 Yes Xus teb tias : "Yog koj pab tau!... Tus ntseeg, mas txhua yam yeej yuav pab tau nws xwb." 24 Tam sis ntawd, tus me nyuam txiv hais nrov nrov tias : "Kuv ntseeg ! Thov koj pab kuv tus us tsis muaj kev ntseeg txaus!"
25 Yes Xus pom muaj neeg tuaj ntsauv coob coob, nws cem niag dab tsis huv tias : "Dab nplaig txhav, dab lag ntseg, kuv yuam koj, koj cia li tawm hauv tus me nyuam no mus, txhob rov los nkag hauv nws ib zaug ntxiv li." 26 Tus dab nthe nrov nrov, nws muab tus me nyuam nchos lwj nchos liam, ces nws tawm mus. Tus me nyuam nyob zoo li tuag lawm. Coob leej hais tias : ‘Nws tuag lawm!’ 27 Tab sis, Yes Xus tuav nws tes, tsa nws sawv, ces tus me nyuam sawv tsees los thiab nws sawv ntsug kiag.
28 Thaum Yes Xus rov los txog tsev lawm, nws cov thwj tim nug nws twj ywm tias : "Vim li cas peb ntiab tsis tau tus dab ntawd ?" 29 Yes Xus hais rau lawv tias : "Hom dab ntawd tsuas yog txoj kev teev Ntuj xwb thiaj ntiab tau."

TIM 26 LUB 2 HLIS 2019

Hnub Peb Lis Piam Xya Nruab Xyoo C Nruab Lis Piam Xyoo I

Zaj Nyeem Ib: NPES XIS LAS 2: 1-11

1 Me tub, yog koj xav los tsob hwb Huab Tais mas koj yuav npaj koj tus plig kom txawj tiv yeej kev ntxias. 2 Koj yuav ua neeg siab ncaj thiab siab nyob ruaj nreb khov kho. Thaum txog lub caij raug txom nyem koj txhob lam coj dog dig. 3 Koj khaub zig Huab Tais, tsis txhob txav mus deb ntawm nws, ces thaum txog koj hnub kawg Huab Tais yuav tsa koj rau qhov siab. 4 Tas puas tsav yam uas tuaj raug koj, mas koj txais mog ! Thaum koj raug kev txom nyem kev poob koob meej, mas koj ua siab ntev nyiaj. 5 Vim tias luag nchuav kub nyob hauv hluav taws kom huv tuaj, hos cov neeg uas Ntuj xaiv, mas Ntuj nchuav lawv nyob hauv txoj kev poob ntsej muag. 6 Koj tso siab lug rau Huab Tais, nws yuav tuaj pab koj. Koj taug twj ywm txoj kev ncaj, koj tso siab plhuav rau Huab Tais. 7 Nej cov uas hwm Huab Tais, nej vam txog nws lub siab khuv leej neeg. Nej tsis txhob ncaim ntawm nws mus, yog ncaim ces nej kawg ntog. 8 Nej cov uas hwm Huab Tais, nej tso siab rau nws, ces nej yuav txais koob haum xwb. 9 Nej cov neeg uas hwm Huab Tais, nej vam ntsoov tias nej yuav tau txais nws cov paj tshab, nej yuav tau txais txoj kev zoo siab mus li, thiab txais nws txoj kev khuv leej neeg. 10 Nej xav txog cov phaj neeg dua tas lawm , nej saib saib cov neeg tso siab rau Huab Tais, puas muaj leej twg raug txoj kev swb ? Cov hwm Huab Tais, puas muaj ib tug uas Huab Tais tso nws pov tseg ? Los puas muaj ib tug tau thov Huab Tais, tab sis Huab Tais tsis teb nws li? 11 Vim Huab Tais hlub thiab khuv leej neeg, nws zam txhaum rau lawv thiab cawm lawv thaum lawv raug txom nyem.

NPN 37: 3-4, 18-19, 27-28, 39-40

Txais: (5) Nej muab nej txoj sia cob rau Huab Tais, nws yeej yuav pab nej.

Nej tso siab rau HUAB TAIS thiab ua qhov zoo,
ces nej yuav tau nyob hauv lub teb chaws
thiab yuav muaj noj muaj haus tsis tu pluas.
Nej zoo siab nyob hauv HUAB TAIS,
ces nws yuav pub rau nej raws nej lub siab ntshaw.

Txais: (5) Nej muab nej txoj sia cob rau Huab Tais, nws yeej yuav pab nej.

HUAB TAIS paub cov coj ncaj lub hnub nyoog ua neej,
lawv lub cuab tam yuav nyob mus li.
Lub caij txom nyem lawv yuav tsis poob ntsej muag,
lub caij muaj kev tshaib plab, lawv yuav tau noj tsau.

Txais: (5) Nej muab nej txoj sia cob rau Huab Tais, nws yeej yuav pab nej.

Nej tso txoj kev phem tseg mus ua qhov zoo,
ces nej yuav nyob ruaj nreb mus li.
Vim HUAB TAIS nyiam txoj kev ncaj,
nws tsis tso cov neeg ntseeg nws pov tseg.

Txais: (5) Nej muab nej txoj sia cob rau Huab Tais, nws yeej yuav pab nej.

Txoj kev cawm cov neeg ncaj tuaj ntawm HUAB TAIS tuaj,
nws yog lawv lub chaw nkaum thaum lawv ntsib kev nyuaj.
HUAB TAIS pab lawv thiab tso lawv dim,
nws tso lawv dim ntawm tus phem thiab cawm lawv,
vim lawv tuaj nkaum hauv nws.

Txais: (5) Nej muab nej txoj sia cob rau Huab Tais, nws yeej yuav pab nej.

As Les Lus Yas: NKAS LAS TIAS 6: 14

Txais: As les lus yas, as les lus yas.

Thov kom kuv tsis txhob khav ib zaug li, yog yuav khav ces khav
nyob hauv peb tus Huab Tais Yes Xus Pleev tus ntoo cuam xwb ,
vim nyob saum tus ntoo cuam nws muab lub ntiaj teb ntsia
dai rau ntawm kuv thiab muab kuv ntsia dai rau lub ntiaj teb.

Txais: As les lus yas, as les lus yas.

Ntawv Moo Zoo: MK 9: 30-37

30 Yes Xus thiab nws cov thwj tim tawm qhov chaw ntawd mus; lawv hla hauv xeev Nkas Lis Lais, tiam sis Yes Xus tsis xav kom muaj neeg paub li. 31 Vim nws qhia rau nws cov thwj tim tias : "Luag yuav muab Neeg Leej Tub muag rau hauv tsoom neeg txhais tes. Ces lawv yuav muab nws tua. Thaum nws tuag tas lawm, peb hnub tom qab, nws yuav sawv rov los." 32 Cov thwj tim tsis to taub lo lus ntawd, tab sis lawv ntshai nug Yes Xus.
33 Ces lawv mus txog Kas Fas Naus. Thaum lawv mus hauv tsev lawm, Yes Xus nug lawv tias : "Nej sib cav txog dab tsi nyob tom kev?" 34 Lawv nyob ntsiag to, vim nyob tom kev, lawv sib cav tias leej twg yog tus loj dua cov. 35 Yes Xus zaum, nws hu Pab Kaum Ob los, nws hais rau lawv tias : "Leej twg xav ua tus thawj, mas nws yuav ua tus tuaj tom qab sawv daws, thiab yuav ua sawv daws tus tub txib." 36 Ces Yes Xus coj ib tug me nyuam los sawv hauv nruab nrab lawv, nws puag tus me nyuam, ces nws hais rau lawv tias : 37 "Leej twg txais ib tug me nyuam yaus zoo li tus no vim kuv lub npe, mas yog nws txais kuv. Thiab leej twg txais kuv, mas tsis yog nws txais kuv, yog txais Tus xa kuv tuaj."

TIM 27 LUB 2 HLIS 2019

Hnub Plaub Lis Piam Xya Nruab Xyoo C Nruab Lis Piam Xyoo I

Zaj Nyeem Ib: NPES XIS LAS 4: 11-19

11 Kev thoob tsib qhuab qhia nws cov me nyuam, nws saib xyuas cov nrhiav nws. 12 Tus nyiam kev thoob tsib kuj nyiam txoj sia. Cov uas sawv ntxov tsees los nrhiav kev thoob tsib mas lawv yuav ntsib kev zoo siab. 13 Tus muaj kev thoob tsib nws yuav tau lub koob meej los ua nws cuab tam. Nws mus txog twg, Huab Tais yuav foom hmoov zoo rau nws. 14 Cov uas tsob hwb kev thoob tsib kuj yog lawv tsob hwb Tus Ntshiab. Cov uas nyiam kev thoob tsib Huab Tais kuj nyiam lawv. 15 Tus mloog kev thoob tsib lus yuav txiav txim rau cov kuj cuab. Tus muab siab rau yoog raws kev thoob tsib nws yuav tau nyob nyab xeeb. 16 Yog nws tso siab rau kev thoob tsib, nws yuav tau txais kev thoob tsib los ua nws tug, nws cov xeeb leej xeeb ntxwv kuj yuav tau txais ua lawv tug. 17 Chiv thawj, kev thoob tsib coj nws mus taug tej txoj kev com kawb, ua kom nws ntshai thiab tshee, thiab ua nruj ua tsiv cob qhia nws sim nws mus txog thaum kev thoob tsib ntseeg tau nws siab lawm. 18 Ces kev thoob tsib yuav coj nws rov los taug txoj kev ncaj, ua kom nws zoo siab thiab qhia txhua yam tob txog kev paub txuj thiab kev ncaj ncees rau nws paub. 19 Yog nws mus taug txoj kev yuam kev, mas kev thoob tsib tso nws pov tseg thiab cia nws mus raws kev ploj kev tuag.

NPN 119: 165, 168, 171, 172, 174, 175

Txais: (165a) Huab Tais, cov neeg nyiam koj Txoj Cai, lawv tau nyob thaj yeeb lug.

Cov neeg nyiam koj Txoj Cai, lawv txais ib txog kev thaj yeeb loj,
tsis muaj dab tsi tav lawv kev.

Txais: (165a) Huab Tais, cov neeg nyiam koj Txoj Cai, lawv tau nyob thaj yeeb lug..

Kuv coj koj cov lus qhia thiab koj cov cai koj tau txiav,
tej kev kuv taug puav leej taug nyob ntawm koj xub ntiag.

Txais: (165a) Huab Tais, cov neeg nyiam koj Txoj Cai, lawv tau nyob thaj yeeb lug.

Kuv di ncauj cav qhuas txog koj lub koob meej,
vim koj qhia koj cov cai lij choj rau kuv paub.

Txais: (165a) Huab Tais, cov neeg nyiam koj Txoj Cai, lawv tau nyob thaj yeeb lug.

Kom kuv tus nplaig cav qhuas txog koj lo lus cog cia,
vim tas koj cov lus qhia yog lus ncaj.

Txais: (165a) Huab Tais, cov neeg nyiam koj Txoj Cai, lawv tau nyob thaj yeeb lug.

HUAB TAIS, kuv ntshaw txoj kev cawm tuaj ntawm koj tuaj,
koj Txoj Cai yog kuv qhov chaw sov siab.

Txais: (165a) Huab Tais, cov neeg nyiam koj Txoj Cai, lawv tau nyob thaj yeeb lug.

Thov cia kuv muaj txoj sia nyob kom tau cav txog koj,
Thiab cia koj cov cai koj tau txiav tuaj txhawb nqa kuv.

Txais: (165a) Huab Tais, cov neeg nyiam koj Txoj Cai, lawv tau nyob thaj yeeb lug.

As Les Lus Yas: ZAM 14: 6

Txais: As les lus yas, as les lus yas.

Huab Tais hais tias: "Kuv yog Txoj Kev, yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau, yog nws tsis hla ntawm kuv mus.

Txais: As les lus yas, as les lus yas.

Ntawv Moo Zoo: MK 9: 38-40

38 Zam hais rau Yes Xus tias : "Xib Hwb, peb pom ib tug neeg hu txog koj lub npe los ntiab dab, ces peb tau txwv nws, vim nws tsis nrog peb.
39 Tab sis Yes Xus hais tias : “Nej txhob txwv nws, vim tsis muaj ib tug neeg hu txog kuv lub npe los ua hwj huam yees ntxwv tas, ho yuav hais lus phem txog kuv tam sis ntawd.
40 Leej twg tsis tiv peb, mas yog nws tuaj peb tog.”

TIM 28 LUB 2 HLIS 2019

Hnub Tsib Lis Piam Xya Nruab Xyoo C Nruab Lis Piam Xyoo I

Zaj Nyeem Ib: NPES XIS LAS 5: 1-8

1 Koj txhob tso siab rau koj tej nyiaj txiag, koj txhob hais tias : Qhov ntawd txaus kuv siab lawm.' 2 Koj tsis txhob cia koj lub siab thiab koj lub zog coj koj mus ua raws koj lub siab ntshaw. 3 Koj txhob hais tias : 'Leej twg yog tus kav kuv?' Vim Huab Tais yuav muab txim rau koj. 4 Koj tsis txhob hais tias : 'Kuv ua txhaum, puas muaj xwv txheej dab tsi tuaj raug kuv li?' Vim Huab Tais txawj maj mam ua siab ntev ncua sij hawm. 5 Koj txhob tso siab dhau tias Ntuj yeej zam txhaum rau koj mus li, ces koj ua txhaum tsis tseg. 6 Koj txhob hais tias : 'Huab Tais siab zoo tas nrho, kuv ua txhaum ntau los nws yeej yuav zam rau kuv xwb!' Vim HUAB TAIS txawj hlub thiab txawj npau taws. Nws npau taws rau cov neeg txhaum. 7 Koj txhob ua siab qeeb qeeb tsis rov los cuag Huab Tais, txhob ncua hnub dhau hnub, tsam ib sij huam Huab Tais npau taws, ces txog hnub txiav txim koj yuav raug kev puas tsuaj. 8 Koj txhob tso siab rau tej nyiaj txiag koj tau ntawm txoj kev ua tsis ncaj los; thaum txog hnub raug txom nyem, tej ntawd pab tsis tau koj dab tsi li.

NPN 1: 1-2, 3, 4+6

Txais: (40:5a) Cov tau hmoov zoo yog cov uas tso siab rau Huab Tais.

Muaj hmoov zoo yog tus uas tsis coj raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo coj HUAB TAIS txoj cai,
thiab nws xav ntsoov HUAB TAIS txoj cai nruab hnub hmo ntuj.

Txais: (40:5a) Cov tau hmoov zoo yog cov uas tso siab rau Huab Tais.

Nws zoo li ib tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj zeeg li.
Nws ua yam twg yam ntawd vam meej tuaj.

Txais: (40:5a) Cov tau hmoov zoo yog cov uas tso siab rau Huab Tais.

Cov neeg phem tsis zoo li ntawd, lawv tsis zoo li ntawd li
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov cov neeg ncaj txoj kev,
hos cov neeg phem txoj kev yaj ntshis mus.

Txais: (40:5a) Cov tau hmoov zoo yog cov uas tso siab rau Huab Tais.

As Les Lus Yas: 1 Tes Xas Los Nis 2: 13

Txais: As les lus yas, as les lus yas.

Nej txais Tswv Ntuj lo lus txhob txais li yog neeg lo lus ;
nej txais kom raws li yeej yog Tswv Ntuj Lo Lus tiag tiag.

Txais: As les lus yas, as les lus yas.


Ntawv Moo Zoo: MK 9: 41-50

Yes Xus hais rau nws cov thwj tim tias:
41 "Kuv hais tseeb rau nej, yog leej twg muab ib khob dej rau nej haus, vim nej yog Leej Pleev tug, mas tus ntawd yeej yuav tsis plam nws qhov koob haum.
42 Yog leej twg coj ib tug neeg me uas ntseeg txog kuv no kom ua txhaum, mas txhiaj khoov cia luag muab lub zeb zom uas luj kiv mus dai ntawm nws caj dab, thiab muab nws pov rau hauv dej ntuj. 43 Yog koj txhais tes coj koj mus ua txhaum, muab txiav pov tseg : txhiaj khoov cia koj tu ib sab tes mus hauv Txoj Sia, zoo dua koj muaj ob sab tes mus hauv dab phem teb hauv cov hluav taws tsis txawj tuag. [44]. 45 Yog koj txhais taw coj koj mus ua txhaum, muab txiav pov tseg : txhiaj khoov cia koj tu taw mus hauv Txoj Sia, zoo dua cia koj muaj ob txhais taw poob hauv dab phem teb [46]. 47 Yog koj lub qhov muag coj koj mus ua txhaum, muab kaus pov tseg : txhiaj khoov cia koj dig ib sab qhov muag mus hauv Tswv Ntuj lub Ceeb Tsheej zoo dua cia koj muaj ob sab qhov muag poob rau hauv dab phem cov hluas taws, 48 hauv qhov chaw uas lawv cov kas noj tsis tso tseg, thiab hluav taws tsis txawj tuag.
49 Vim tias hluav taws yuav ua kom sawv daws qab ntsev. 50 Ntsev yog ib yam qab, tab sis, yog ntsev tsuag lawm, yuav muab dab tsi las kom ntsev daw li qub? Nej cia ntsev nyob hauv nej mog, nej thiaj yuav nrog sawv daws muaj kev thaj yeeb.

TIM 1 LUB 3 HLIS 2019

Thawj Hnub Rau Lis Piam Xya Nruab Xyoo C NRuab Lis Piam Xyoo I

Zaj Nyeem Ib: NXL 6: 5-17

5 Kev hais lus mos ua kom yus tau phooj ywg coob thiab ua kom tus yeeb ncuab lub siab ntaug; ib lub ncauj txawj hais lus zoo ua kom luag hais lus zoo rov rau yus. 6 Koj yuav nrog coob leej sib fim ua phooj ywg, tab sis nyob hauv ib txhiab leej koj tsuas xaiv ib leeg xwb ua tus pab koj xav tswv yim. 7 Yog koj xav nrog ib tug ntaus phooj ywg, koj xub sim nws tso, txhob rawm maj qhib koj lub siab ntseeg nws sai. 8 Vim muaj tej tus phooj ywg nws tsuas nrog koj thaum zoo sij hawm xwb, tab sis lwm hnub koj ntsib kev nyuaj mas nws yuav tsis nrog koj ntxiv. 9 Muaj tej tus phooj ywg txawj hloov mus ua yeeb ncuab, ces nws yuav qhia neb tej lus tsis sib haum tawm, ua kom koj poob ntsej muag. 10 Muaj tej tus phooj ywg yuav nrog koj zaum noj ib rooj mov, tab sis thaum txog hnub koj nyuaj siab lawv yuav fav xeeb rau koj. 11 Thaum koj nyob vam meej ntws, lawv coj zoo li lawv yog kiag koj, lawv tsis ntshai txib koj cov tub txib. 12 Tab sis thaum koj raug kev txom nyem, lawv yuav ntxeev siab rau koj, lawv tsis xav ntsib koj ntxiv.
13 Koj yuav txav mus deb ntawm koj cov yeeb ncuab thiab koj yuav ceev faj txog koj cov phooj ywg. 14 Ib tug zoo phooj ywg yog ib lub zog loj txhawb yus, tus nrhiav tau ib tug zoo phooj ywg mas nws nrhiav tau ib txhab kub. 15 Ib tug zoo phooj ywg, yus ntsuas tsis tau nws tus nqi, tsis muaj ib yam yuav muab luj tau los piv rau nws. 16 Ib tug zoo phooj ywg yog ib hauv tshuaj cawm yus txoj sia; cov uas hwm HUAB TAIS yuav nrhiav tau tus zoo phooj ywg ntawd. 17 Cov neeg hwm Huab Tais yuav nrhiav tau ib co tseem phooj ywg; vim tias ib tug neeg coj li cas mas nws cov phooj ywg kuj coj li ntawd thiab.

NPN 119: 12, 16, 18, 27, 34, 35

Txais: (35a) Huab Tais, thov koj coj kuv taug kev raws koj cov lus qhia.

HUAB TAIS, thov kom koj nto koob meej !
Thov koj qhia koj tej cai lij choj rau kuv.

Txais: (35a) Huab Tais, thov koj coj kuv taug kev raws koj cov lus qhia.

Kuv nyiam koj cov cai lij choj,
kuv yuav tsis hnov qab koj tej lus.

Txais: (35a) Huab Tais, thov koj coj kuv taug kev raws koj cov lus qhia.

Thov koj qhib kuv qhov muag, kuv thiaj yuav pom
tias koj txoj Cai zoo tas nrho. .

Txais: (35a) Huab Tais, thov koj coj kuv taug kev raws koj cov lus qhia.

Thov koj ua kom kuv to taub txoj kev yuav coj raws koj cov lus qhia,
kuv yuav ua zoo xav txog koj cov dej num uas tsim nyog qhuas.

Txais: (35a) Huab Tais, thov koj coj kuv taug kev raws koj cov lus qhia.

Thov koj ua kom kuv muaj kev to taub, kuv thiaj yuav coj raws koj Txoj Cai,
Thiab thiaj yuav muab tas kuv lub siab lub ntsws los mloog koj Txoj Cai.

Txais: (35a) Huab Tais, thov koj coj kuv taug kev raws koj cov lus qhia.

Thov koj coj kuv taug kev kom raws koj cov lus qhia,
vim kuv txaus siab taug txoj kev ntawd

Txais: (35a) Huab Tais, thov koj coj kuv taug kev raws koj cov lus qhia.

As Les Lus Yas: ZAM 17: 17B, 17A

Txais: As les lus yas, as les lus yas.

Huab Tais, koj lo lus yog qhov tseeb;
thov koj qee peb mus nyob hauv qhov tseeb.

Txais: As les lus yas, as les lus yas.

Ntawv Moo Zoo: MK 10: 1-12

1 Yes Xus tso qhov chaw ntawd tseg, nws mus rau lub xeev Yus Das, thiab rau sab dej Yos Las Das tim ub. Rov muaj dua tej pab neeg coob tuaj mus cuag nws. Nws rov qhia lawv xws li nws ua kam. 2 Ib cov Fas Lis Xais txav los nug nws tias: "Ib tug txiv neej puas muaj cai nrauj nws poj niam?" vim lawv xav sim nws. 3 Yes Xus teb rau lawv tias : "Mais Xes qhia li cas rau nej ?" 4 Lawv teb tias : "Mais Xes kom ua ntawv nrauj tso thiaj nrauj tau." 5 Yes Xus teb rau lawv tias : "Yog vim nej lub siab tawv dhau, Mais Xes thiaj sau txoj cai ntawd. 6 Tab sis, txij thaum chiv lub keeb ntuj tsim teb raug los, Tswv Ntuj tsim nkawd yog txiv neej, thiab yog poj niam. 7 Vim li ntawd, txiv neej yuav tso nws niam nws txiv tseg mus koom nrog nws tus poj niam, 8 ces nkawd ob leeg yuav ua ib lub cev nqaij lawm xwb. Ua li mas nkawd tsis yog ob lub cev lawm, nkawd yog ib lub cev nqaij lawm xwb. 9 Yog vim qhov no, mas yam uas Tswv Ntuj muab sau los ua ke, neeg yuav tsis txhob muab txhem.” 10 Thaum lawv nyob hauv tsev lawm, cov thwj tim rov nug Yes Xus txog qhov ntawd. 11 Ces Yes Xus hais rau lawv tias: "Tus txiv neej twg nrauj nws poj niam, ho rov yuav dua lwm tus, mas nws yog ib tug muaj txij nkawm mus deev hluas, nws ua tsis ncaj rau nws poj niam. 12 Hos tus poj niam twg nrauj nws tus txiv, rov yuav dua lwm tus, mas nws yog ib tug muaj txiv mus deev hluas.”

TIM 2 LUB 3 HLIS 2019

Thawj Hnub Xya Lis Piam Xya Nruab Xyoo C Nruab Lis Piam Xyoo I

Zaj Nyeem Ib: NXL 17: 1-19

1 Huab Tais muab av luaj los tsim tib neeg, nws ua kom tib neeg rov mus ua av. 2 Huab Tais pub kom lawv tsuas nyob pes tsawg niaj pes tsawg xyoo xwb; nws muab tas puas tsav yam nyob ntiaj teb rau lawv ua tus kav. 3 Nws muab ib lub zog zoo li nws lub rau lawv, nws tsim lawv zoo xws li nws tus duab. 4 Huab Tais ua kom tas puas tsav yam ntshai lawv, nws tsa lawv ua tus tswj tej me tsiaj me noog. [5] 6 Nws muab lub tswv yim, muab nplaig, muab qhov muag, pob ntseg, thiab lub siab txawj xav rau tib neeg. 7 Huab Tais muab kev txawj ntse, kev to taub rau lawv; nws pub kom lawv paub qhov phem qhov zoo. 8 Nws muab nws qhov pom kev tso rau hauv lawv lub siab kom kawv pom tias nws tej hauj lwm zoo tas nrho. [9] 10 Ces lawv yuav cav txog nws lub npe ntshiab thaum lawv piav txog nws tej hauj lwm loj zoo saib. 11 Huab Tais muab kev paub txuj rau lawv, thiab muab Txoj Cai pub txoj sia rau lawv. 12 Huab Tais nrog lawv cog ib co lus nyob mus li, thiab nws qhia kom lawv paub nws Txoj Cai nws tau txiav. 13 Lawv qhov muag tau pom Huab Tais lub hwj chim ci ntsa iab, lawv pob ntseg tau hnov Huab Tais lub suab muaj hwj chim loj. 14 Huab Tais hais rau lawv tias : “Nej ceev faj txog txhua yam kev txhaum.” Huab Tais muab ib txoj cai rau txhua leej kom ua zoo rau tus nyob ze nws. 15 Tib neeg tej xub ke nyob ntawm Huab Tais xub ntiag mus li, muab nraim tsis tau ntawm nws qhov muag. [16] 17 Tswv Ntuj tsa muaj vaj kav txhua haiv neeg, tiam sis His Xas Lais yog nws li teej tug. [18] 19 Txhua yam lawv ua nws yeej pom tau tseeb npaum pom lub hnub, nws qhov muag ntsia ntsoov lawv tej kev.

NPN 103: 13-14, 15-16, 17-18

Txais: (17) Huab Tais ua zoo tas mus li rau cov hwm nws.

Ib yam li leej txiv muaj lub siab muag hlub nws cov me nyuam
HUAB TAIS kuj muaj lub siab muag hlub cov uas hwm nws,
Vim nws paub tias nws tsim peb los zoo li cas,
nws nco ntsoov tias peb yog av luaj.

Txais: (17) Huab Tais ua zoo tas mus li rau cov hwm nws.

Leej tib neeg ua neej nyob zoo li tsob nroj tsuag ;
nws txawj nthuav zoo li tsob paj tawg tom teb :
cua tshuab ib nthwv tuaj rau nws xwb, nws ploj ntais lawm,
qhov chaw uas nws nyob twb tsis nco qab nws lawm.

Txais: (17) Huab Tais ua zoo tas mus li rau cov hwm nws.

Tab sis, HUAB TAIS yuav hlub cov hwm nws
txheej dhau txheej tis dhau tis, tsis muaj caij kawg,
Nws yuav ua ncaj rau lawv tsoom tub ki cov tub ki,
Thiab rau cov uas coj nraim nws txoj kev cog lus.

Txais: (17) Huab Tais ua zoo tas mus li rau cov hwm nws.

As Les Lus Ys: MT 11: 25

Txais: As les lus yas, as les lus yas.

Peb cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog Ntuj Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: MK 10: 13-16

13 Muaj neeg coj ib co me nyuam tuaj rau Yes Xus kom Yes Xus plhws lawv, tab sis cov thwj tim muab lawv cem.
14 Yes Xus pom li ntawd, nws npau taws, nws hais rau lawv tias : “Nej cia cov me nyuam yaus tuaj cuag kuv, nej txhob txwv lawv. Vim yog cov neeg uas yuav tau Tswv Ntuj lub Ceeb Tsheej los ua lawv tug yog cov zoo li cov me nyuam no.
15 Kuv hais tseeb rau nej : leej twg tsis txais Tswv Ntuj lub Ceeb Tsheej zoo li ib tug me nyuam, mas nws yuav mus tsis tau hauv Tswv Ntuj lub Ceeb Tsheej.”
16 Ces Yes Xus puag cov me nyuam, nws tsa tes rau saum lawv, foom hmoov zoo rau lawv.

TIM 4 LUB 3 HLIS 2019

Hnub Ob Lis Piam Yim Nruab Xyoo C Nruab Lis Piam Xyoo I

Hwm LN Casimir

Zaj Nyeem Ib: NPES XIS LAS 17: 24-29

24 HUAB TAIS pub kom cov neeg thov txhaum tau kev rov los cuag nws. Nws txhawb zog rau cov neeg tas kev cia siab.
25 Koj cia li rov los cuag HUAB TAIS, cia li tso kev txhaum pov tseg; koj los nyob ntawm nws xub ntiag thov nws, tsis txhob ua txhaum rau nws ntxiv lawm.
26 Koj rov los cuag tus Nyob Siab, koj tig nraub qaum rau txoj kev tsis ncaj. Koj kav tsij ntxub txoj kev txhaum kom tas koj lub siab lub ntsws.
27 Leej twg nyob hauv ntuj txias teb tsaus thiaj yuav cav txog Tus Nyob Siab tau, yog tias cov neeg tseem ciaj ho tsis cav txog nws?
28 Tus neeg tuag lawm zoo ib yam li tus tsis tau yug los dua, nws yeej cav lus zoo tsis tau; yog cov neeg muaj txoj sia nyob thiab noj qab nyob zoo thiaj yuav cav txog Huab Tais xwb.
29 HUAB TAIS txoj kev hlub loj ua luaj ! Nws txoj kev zam txhaum rau cov neeg tig rov los cuag nws loj tas npaud !

NPN 32: 1-2, 5, 6, 7

Txais: (11a) Cov neeg siab ncaj yuav hom khaj zoo siab nyob hauv Huab tais.

Hmoov zoo rau tus uas Ntuj thim nws qhov txhaum lawm,
tus uas Ntuj muab nws qhov txhaum npog rau lawm.
Hmoov zoo rau tus neeg uas HUAB TAIS tsis suav txim rau nws,
tus uas lub tswv yim tsis muaj ib qho kev siab phem.

Txais: (11a) Cov neeg siab ncaj yuav hom khaj zoo siab nyob hauv Huab tais.

Kuv lees kuv qhov txhaum rau koj,
kuv tsis muab kuv qhov txhaum npog cia.
Kuv hais tias: “Kuv lees kuv qhov txhaum rau HUAB TAIS,”
ces koj muab kuv lub txim ntawm kuv qhov txhaum tshem tas.

Txais: (11a) Cov neeg siab ncaj yuav hom khaj zoo siab nyob hauv Huab tais.

Vim li no txhua tus neeg ntseeg ntuj yuav tsum teev ntuj
hu txog koj thaum lub caij muaj kev nyuaj siab.
Txawm tias muaj dej tob nyab phwj yaws
los dej yuav nce mus tsis txog nws.

Txais: (11a) Cov neeg siab ncaj yuav hom khaj zoo siab nyob hauv Huab tais.

Koj yog kuv lub chaw nkaum, koj thaiv kuv ntawm txoj kev nyuaj;
koj cia ib co suab qw zoo siab txog txoj kev dim nyob ncig kuv.

Txais: (11a) Cov neeg siab ncaj yuav hom khaj zoo siab nyob hauv Huab tais.

As Les Lus Yas: 2 KLN 8: 9

Txais: As les lus yas, as les lus yas.

Yes Xus Pleev tau ua neeg pluag txawm tias nws yog tus nplua nuj,
kom xwv nws txoj kev pluag ua kom nej nplua nuj tuaj.

Txais: As les lus yas, as les lus yas.

Ntawv Moo Zoo: MK 10: 17-27

17 Thaum Yes Xus tab tom sawv kev mus, muaj ib tug neeg khiav los txhos caug ntawm Yes Xus xub ntiag, nws nug tias : "Xib Hwb siab zoo, kuv yuav ua dab tsi thiaj yuav tau txais txoj sia nyob mus li los ua kuv cuab tam ?" 18 Yes Xus hais rau nws tias : "Vim li cas koj hu kuv ua tus siab zoo ? Tsis muaj leej twg siab zoo, tsuas kawg Tswv Ntuj tib leeg xwb. 19 Koj twb paub cov lus qhia tias : koj txhob tua neeg, txhob zes luag txij luag nkawm, txhob ua tub sab tub nyiag, txhob ua tim khawv cuav, txhob ua luam cuav, hwm koj niam koj txiv." 20 Tus neeg ntawd teb rau Yes Xus tias : "Xib Hwb, txij thaum kuv yav hluas los, kuv yeej coj raws nraim li ntawd." 21 Yes Xus ntsia nws, ces Yes Xus nyiam nws, thiab hais rau nws tias : "Tsuas tshuav ib yam xwb koj tsis muaj : koj mus, koj muab koj lub cuab tam muag, muab tus nqi pub rau cov pluag, kom koj muaj ib lub cuab tam muaj nqis nyob saum ntuj. Ces koj los raws kuv." 22 Tus neeg ntawd hnov lo lus no, nws ua ntsej muag ntshaus tas, ces nws rov mus tu siab nrho, vim nws muaj cuab yeej cuab tam ntau.
23 Ces Yes Xus ntsia ib ncig nws, nws hais rau cov thwj tim tias : "Yuav nyuaj npaum li no rau cov neeg nplua nuj nkag mus rau hauv Tswv Ntuj lub Ceeb Tsheej!" 24 Cov thwj tim yoob tas rau cov lus no. Ces Yes Xus rov hais rau lawv tias : "Kuv cov me nyuad, kev mus hauv Tswv Ntuj lub Ceeb Tsheej mas yeej nyuaj npaum no ! 25 Ib tug ntxhuav nkag rau hauv lub qhov koob yuav tau yooj yim dua ib tug nplua nuj nkag mus rau hauv Tswv Ntuj lub Ceeb Tsheej." 26 Cov thwj tim yim huab yoob heev tuaj, lawv sib tham tias : "Leej twg thiaj yuav tau txais kev cawd ?" 27 Yes Xus ntsia lawv, nws hais tias : "Yog neeg ua neeg xwb, mas yeej tsis tau li, tab sis yog Tswv Ntuj ua mas tau. Vim Tswv Ntuj ua tau tas ib puas tsav yam."

TIM 5 LUB 3 HLIS 2019

Hnub Peb Lis Piam Yim Nruab Xyoo C Nruab Lis Piam Xyoo I

Zaj Nyeem Ib: NPES XIS LAS 35: 1-12

1 Ua raws Txoj Cai yog muab ntau yam cev rau Ntuj; muab siab rau coj cov lus qhia yog cev tej thaj txi Ntuj koom siab. 2 Ua zoo rau luag yog cev ib co hmoov nplej los txi Ntuj; pub nyiaj rau tus pluag yog cev ib thaj cav txog Ntuj. 3 Qhov ntxim Huab Tais siab yog qhov yus txav mus deb ntawm txoj kev ua phem; thaum yus tso txoj kev ua tsis zoo tseg yog yus cev ib thaj txi Ntuj them txim txhaum.
4 Koj tsis txhob mus tes dawb tes do ntawm Huab Tais xub ntiag; vim txhua yam uas koj fij rau Ntuj yog ua kom haum txoj cai xwb. 5 Qhov uas tus neeg siab ncaj cev rau Ntuj ua rau lub thaj txi Ntuj zoo siab, nws ncho ib co pa tsw qab nyob ntawm tus Nyob Siab xub ntiag. 6 Qhov uas tus neeg siab ncaj txi rau Ntuj zoo ntxim Huab Tais siab, nws yuav nco ntsoov thaj txi ntuj ntawd tas mus li. 7 Koj yuav ua siab dav mus pe hawm Huab Tais, txhob ua siab nqaim thaum koj cev thawj cov qoob rau nws.
8 Txhua zaus koj pub tej yam koj yuav ua ntsej muag luag ntxhi, thiab koj yuav zoo siab hlo qee koj qhov nyiaj kaum feem pua. 9 Koj yuav pub rau tus Nyob Siab ib yam li nws tau pub rau koj lawm, ua siab dav fo pub raws li koj pub tau. 1o Vim Huab Tais yog tus uas yeej pauj rov qab tas mus li, nws yuav pauj rov rau koj xya npaug. 11 Koj tsis txhob muab nyiaj txiag xiab Huab Tais, vim nws yuav tsis txais; koj tsis txhob tso siab rau tej thaj txi ntuj tsis ncaj ncees. 12 Vim Huab Tais yog ib tug tswv txiav txim ncaj, nws tsis kws leej twg cai.

NPN 50: 5-6, 7-8, 14+23

Txais: (23b) Kuv yuav qhia Tswv Ntuj lub hwj huam cawm neeg rau tus neeg ncaj.

"Nej sau cov neeg ntseeg kuv tuaj nyob ntawm kuv xub ntiag,
cov uas tau tua tsiaj txi ntuj nrog kuv cog lus.”
Lub ntuj tshaj nws txoj kev ncaj ncees,
vim Tswv Ntuj yog tus txiav txim.

Txais: (23b) Kuv yuav qhia Tswv Ntuj lub hwj huam cawm neeg rau tus neeg ncaj.

“ Kuv haiv neeg, koj mloog, kuv yuav hais lus;
His Xas Lais, kuv yuav hais tej yam phem txog koj,
Kuv,Tswv Ntuj, yog koj tus Tswv Ntuj.
Tsis yog vim koj cov thaj txi Ntuj, kuv thiaj yuav hais lus tib koj,
vim koj cov tsiaj hlawv txi Ntuj yeej nyob ntawm kuv xub ntiag mus li.

Txais: (23b) Kuv yuav qhia Tswv Ntuj lub hwj huam cawm neeg rau tus neeg ncaj.

Koj yuav tsum muab lo lus qhuas lus cav los txi rau Ntuj,
koj yuav tsum pauj koj lub yeem rau tus Tswv Nyob Txheej Siab.
Leej twg muab lo lus qhuas lus cav los txi Ntuj, nws ua rau kuv nto koob meej.
kuv yuav qhia Tswv Ntuj txoj kev cawm rau tus neeg taug txoj kev ncaj paub.

Txais: (23b) Kuv yuav qhia Tswv Ntuj lub hwj huam cawm neeg rau tus neeg ncaj.

As Les Lus Yas: MT 11: 25

Txais: As les lus yas, as les lus yas.

Peb cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog Ntuj Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: MK 10: 28-31

28 Pob Zeb hais rau Yes Xus tias : “Ntawm peb, mas peb tau tso ib puas tsav yam tseg, peb tau los raws koj.”
29 Yes Xus teb tias : "Kuv hais tseeb rau nej, tsis muaj ib tug neeg uas tau tso vaj tse, kwv tij, nkauj muam, niam thiab txiv, me tub me nyuam, los liaj teb tseg vim kuv thiab vim lub Moo Zoo,
30 uas yuav tsis tau txais tam sis no hauv tiam neej no, ib puas npaug ntawm vaj tse, kwv tij, nkauj muam, niam, me tub me nyuam, thiab liaj teb, ntxiv rau kev raug luag hiam, thiab lwm tiam, txoj sia nyob mus li.
31 Coob leej mus ua ntej, yuav tuaj puag tom qab, hos coob leej tuaj tom qab, yuav mus ua ntej.”

Nyob zoo sawv daws cov uas tuaj nyeem ntawv hauv no,

Tag kis ces twb rov txog hnub peb pib lub Caij 40(Lent) lawm, yog Hnub Plaub Txais Tshauv. Peb cov ntseeg Kas Tos Liv peb yuav tsum nco ntsoov tias, hnub ntawd peb yuav yoo mov, yuav caiv nqaij tsis txhob noj nqaij li, peb noj tau nqaij ntses xwb. Hnub Plaub Txais Tshauv ntawd thiab hnub Rau Nrshiab (Good Friday) mas yog ob hnub uas pev caiv nqaij thiab yoo mov.  Yog peb yoo taus mas ib hnub ntawd peb tsuas noj ib pluag mov loj xwb dua li mas noj txom me ntsis ncauj li ob pluag kom txhob tshaib dhau xwb. Txhua txhua hnub Rau (Friday) hauv lub Caij 40, peb yuav tsum caiv nqaij thiab. Txoj cai qhia li no: Cov ntseeg muaj li 14 xyoos rov saud mas sawv daws yuav tsum caiv nqaij Hnub Plaub Txais Tshauv thiab Hnub Rau Ntshiab thiab niaj Hnub Rau hauv lub Caij 40, cov muaj li 18 xyoo rov saud mas yuav tsum caiv nqaij thiab yoo mov Hnub Plaub Txais Tshauv thiab Hnub Rau Ntshiab thiab caiv nqaij niaj Hnub Rau hauv lub Caij 40.
Yog nej muaj caij mas thov kom nej mus koom thaj txi ntuj txais tshauv hnub ntawd. Yog nej ho tsis khoom los Hnub Chiv tom ntej mas yuav muaj txais tshauv thaum lub caij sawv daws tuaj koom thaj Txi Ntuj thiab.

Cov zaj nyeem rau Hnub Plaub Txais Tshauv yog cov nram no:

TIM      6      LUB      3      HLIS      2019

Hnub Plaub Txais Tshauv  -  Pib Caij  Plaub Caug Xyoo C

Zaj Nyeem Ib:      YOS ES  2:   12-18

12 HUAB TAIS hais li no : "Lub sij hawm no, nej kav tsij muab tas nej lub siab rov qab los cuag kuv; nej yoo mov, nej quaj, nej nyiav li thaum nej ntoo xyom. 13 Nej dua nej lub siab kom ntuag tsis txhob dua nej tej ris tsho, ces nej rov qab los cuag HUAB TAIS nej tus Tswv Ntuj, vim nws muaj kev hlub thiab kev khuv leej neeg, nws npau taws qeeb, nws muaj lub siab zoo tas nrho, nws txawj thim txoj kev xav rau txim. 14 Puas muaj leej twg paub tau? Tej zaum nws yuav thim xav thiab yuav tsis rau txim, nws yuav foom ib lo lus zoo cia, kom muaj tsiaj ua txim thiab muaj cawv los hliv txi rau HUAB TAIS nej tus Tswv Ntuj.
15 Nej tshuab puab nyob saum Xis Yoos ! Nej teem ib lub hnub nyoog ntshiab ua kev yoo mov, nej tshaj tawm ib lub caij tshwj xeeb tuaj sib txoos ua ke. 16 Nej hu tas tsoom pej xeem tuaj sib sau, nej ua kom lub txoos ntshiab huv tuaj; nej hu cov laus tuaj, nej sau coj cov me nyuam yaus thiab cov tseem noj mis tib si tuaj. Tus vauv yuav tso nws lub chaw tseg, tus nyab yuav tso nws lub paim tseg.
17 Cov Leej Choj, HUAB TAIS cov tub txib,  yuav tuaj nyob ntawm kis nruab nrab lub qhov rooj thiab lub thaj txi Ntuj, lawv yuav quaj, lawv yuav hais tias : "HUAB TAIS, thov koj txuag koj haiv neeg ! Koj txhob tso koj lub cuab tam rau hauv txoj kev raug luag saib tsis taus, txhob cia cov kuj cuab hnyos lawv. Vim li cas koj thiaj yuav cia kom cov haiv neeg tau kev thuam tias : ‘Lawv tus Tswv Ntuj dua qhov twg lawd ?’”
18 Ces HUAB TAIS lub siab khib txog nws lub teb chaws, nws thiaj zam rau nws haiv neeg.

NPN      51:   3-4, 5-6AB, 12-13, 14+17

Txais:   (3a) HUAB TAIS, thov koj khuv leej peb vim peb tau ua txhaum lawm.

Tswv Ntuj, thov koj khuv leej kuv vim koj lub siab zoo;
thov koj so kuv qhov txhaum pov tseg vim koj muaj kev hlub loj tas nrho.  
Thov koj ntxuav kuv lub txim pov tseg kom tas
thiab muab kuv qhov txhaum tshem mus kom kuv dawb huv tuaj.

Txais:   (3a) HUAB TAIS, thov koj khuv leej peb vim peb tau ua txhaum lawm.

Kuv lees paub kuv qhov txhaum,
kuv qhov txhaum nyob rawv ntawm kuv xub ntiag.
“Kuv tau ua txhaum rau koj ib leeg xwb,
kuv tau ua qhov uas koj saib yog tsis zoo.”

Txais:   (3a) HUAB TAIS, thov koj khuv leej peb vim peb tau ua txhaum lawm.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,  
thiab txhob rho koj leej Tswv Yim Ntshiab tawm ntawm kuv mus.

Txais:   (3a) HUAB TAIS, thov koj khuv leej peb vim peb tau ua txhaum lawm.

Thov koj pub kom kuv rov muaj kev zoo siab
nyob hauv koj txoj kev cawm
thiab ua kom kuv muaj ib lub tswv yim txawj xav.
HUAB TAIS, thov qhib kuv di ncauj,
ces kuv lub ncauj yuav tshaj koj lub koob meej.

Txais:   (3a) HUAB TAIS, thov koj khuv leej peb vim peb tau ua txhaum lawm.

Zaj Nyeem Ob:      2 KOS LIS NTHOS  5:   20—6: 2

Cov kwv tij nkauj muad,
20 Peb yog Leej Pleev cov tiam lis; ces zoo li yog Tswv Ntuj qhuab ntuas neeg nyob hauv peb. Peb thiaj tuav txog Leej Pleev lub npe thov nej tas zog, kom nej cia li nrog Tswv Ntuj rov sib haum xeeb. 21 Tswv Ntuj ua kom tus uas tsis paub kev ua txhaum, txia ua kev txhaum, kom nyob hauv nws, peb plhis mus ua Tswv Ntuj txoj kev ncaj.
6    1 Vim peb nrog Leej Pleev ua hauj lwm ua ke, mas peb thov qhuab ntuas nej, kom nej txhob txais Tswv Ntuj lub txiaj ntsim dag xwb. 2 Vim Tswv Ntuj hais tias: “Thaum lub sij hawm zoo, kuv tau teb rau koj raws li koj thov. Thaum txog hnub cawm neeg, kuv tau pab koj.” Lub sij hawm zoo, yog nyem no ntag. Hnub cawm neeg, yog nyem no kiag.

Zaj Cav lub Moo Zoo:     NPN  95:   8

(Lub Caij 40 peb tsis hais As les lus yas lawm ces thiaj muab hloov hu li no lawm)

Txais: Huab Tais Yes Xus Pleev, Tswv Ntuj Lo Lus, peb cav txog koj.

Hnub no yog nej hnov nws lub suab,
nej tsis txhob ua nej lub siab tawv ncauj.

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo:      MT  6:   1-6, 16-18

Yes Xus hais rau nws cov thwj tim tias:
1 “Nej ceev faj, nej txhob ua ncaj nyob ntawm neeg xub ntiag xwb, kom luag pom nej. Yog nej ua li ntawd, mas nej yuav tsis txais koob haum dab tsi ntawm nej Txiv nyob saum ntuj. 2 Thaum koj pub rau luag, koj txhob tshuab hom ua koj ntej, xws li cov neeg zoo sab nraud ua nyob hauv cov tsev txoos thiab nyob ntawm tej kev, kom sawv daws cav lus zoo txog lawv. Kuv hais tseeb rau nej, lawv twb txais lawv cov koob haum tas lawm. 3 Hos koj, mas thaum koj pub rau luag, koj txhob cia koj sab tes laug paub qhov koj sab tes xis ua. 4 Li ntawd, tsis muaj neeg paub tias koj tau pub rau luag. Ces koj Txiv uas nws pom hauv qhov chaw nraim yuav pauj rau koj.  
5 Thaum nej teev Ntuj, nej txhob ua li cov neeg zoo sab nraud : lawv nyiam sawv ntsug hauv cov tsev txoos, thiab ntawm tej kev tshuam, kom sawv daws pom lawv. Kuv hais tseeb rau nej, lawv twb txais lawv cov koob haum lawm. 6 Hos koj, mas thaum koj teev Ntuj, koj mus nyob twj ywm hauv koj kem txaj, kaw koj qhov rooj ces koj teev koj Txiv uas nws nyob hauv qhov chaw nraim. Koj Txiv uas nws pom hauv qhov chaw nraim, yuav pauj rau koj.
16 Thaum nej yoo mov, nej txhob ua ntsej muag ntshaus xws li cov neeg zoo sab nraud : lawv ua ntsej muag mluas mluas, kom luag pom meej tias lawv yoo mov. Kuv hais tseeb rau nej tias cov neeg ntawd twb txais lawv cov koob haum tas lawm. 17 Hos koj, mas thaum koj yoo mov, koj yuav pleev tshuaj tsw qab rau saum taub hau, koj ntxuav muag rau, 18 kom txhob muaj neeg paub tias koj yoo mov, tsuas kawg koj Txiv uas nws nyob hauv qhov chaw nraim tib leeg paub xwb. Koj Txiv pom hauv qhov chaw nraim yuav pauj rau koj.”

TIM 7 LUB 3 HLIS 2019

Hnub Tsib tom qab Hnub Plaub Txais Tshauv Xyoo C Nruab Lis Piam Xyoo I

Hwm LN Perpetua thiab LN Felicity, tuag ua Tim Khawv

Zaj Nyeem Ib: Txoj Cai Ob 30: 15-20

Mais Xes hais rau tsoom peej xeem tias:
15 “Hnub no kuv muab kev muaj txoj sia thiab kev vam meej, kev tuag thiab kev txom nyem tso ntawm nej xub ntiag. 16 Yog nej mloog HUAB TAIS nej tus Tswv Ntuj cov lus qhia uas hnub no kuv muab cob rau koj no, yog nej nyiam nws, taug nws txoj kev, ua raws nws tej lus qhia, nws txoj cai thiab tej yam nws tau txiav, mas nej yuav muaj txoj sia thiab nej yuav huam vam tuaj; HUAB TAIS nej tus Tswv Ntuj yuav foom hmoov zoo rau nej hauv lub teb chaws uas nej tab tom yuav nkag mus nyob ua nej lub teb chaws. 17 Tab sis yog nej ntxeev siab, nej tsis mloog lus thiab nej cia luag ntxias tau nej mus nrog luag pe thiab tsob hwb lwm cov dab, 18 mas hnub no kuv hais rau nej tias: nej yuav ploj mus, thiab nej yuav tsis tau nyob ntev xyoo hauv lub teb chaws uas nej hla tus dej Yos Las Das mus txeeb los ua nej tug. 19 Hnub no, kuv muab lub ntuj lub teb los nrog kuv ua tim khawv txog nej tias : kuv muab txoj sia thiab txoj kev tuag, lo lus zoo thiab lo lus phem tso rau ntawm nej xub ntiag rau nej xaiv. Yog li nej cia li xaiv txoj sia mog ! Nej thiab nej cov xeeb ntxwv thiaj yuav muaj txoj sia nyob. 20 Nej yuav nyiam HUAB TAIS,nej tus Tswv Ntuj, nej yuav mloog nws lub suab, thiab npuab nws ruaj nreb, vim qhov ntawd yog nej txoj sia, thiab qhov ntawd yuav ua kom nej tau ua neej ntev xyoo hauv lub teb chaws uas HUAB TAIS tau cog lus yuav mub pub rau nej cov yawg koob Has Nplas Has, His Xas Has thiab Yas Kos.”

NPN 1: 1-2, 3, 4+6

Txais: (40:5a) Muaj hmoov zoo yog cov uas tso siab rau Huab Tais.

Muaj hmoov zoo yog tus uas tsis coj raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo coj HUAB TAIS txoj cai,
thiab nws xav ntsoov HUAB TAIS txoj cai nruab hnub hmo ntuj.

Txais: (40:5a) Muaj hmoov zoo yog cov uas tso siab rau Huab Tais.

Nws zoo li ib tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj zeeg li.
Nws ua yam twg tau yam ntawd. .

Txais: (40:5a) Muaj hmoov zoo yog cov uas tso siab rau Huab Tais.

Cov neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov cov neeg ncaj txoj kev,
hos cov neeg phem txoj kev yaj ntshis mus.

Txais: (40:5a) Muaj hmoov zoo yog cov uas tso siab rau Huab Tais.

Zaj Cav lub Moo Zoo: MT 4: 17

Txais: Huab Tais Yes Xus Pleev, Tswv Ntuj Lo Lus, peb cav txog koj.

Huab Tais hais tias, nej yuav tig rov los ua zoo,
Ntuj lub Ceeb Tsheej tuaj txog ze lawm.

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo: LK 9: 22-25

22 Yes Xus hais rau nws cov thwj tim tias : "Neeg Leej Tub yuav tsum raug txom nyem loj. Cov txwj laus, cov Thawj Leej Choj, thiab cov Kws Ntawv Ntshiab yuav tsis kam yuav nws, ces nws yuav raug muab tua, tab sis hnub peb nws yuav sawv rov los."
23 Yes Xus hais rau sawv daws tias : "Leej twg xav los raws kuv, nws yuav tsis txhob nco txog nws, nws yuav niaj hnub kwv nws tus ntoo cuam, thiab yuav lawv kuv qab.
24 Vim tias tus xav cawm nws txoj sia, mas nws yuav ua nws txoj sia ploj. Hos tus twg ua nws txoj sia ploj vim kuv, mas tus ntawd cawm tau nws txoj sia.
25 Yog ib tug neeg txeeb tau lub ntiaj teb tas huv si los ua nws tug, tab sis nws ua nws tus kheej ploj, los ua nws tus kheej raug puas tsuaj tas, mas puas zoo dab tsi rau nwd?”

TIM 8 LUB 3 HLIS 2019

Hnub Rau tom qab Hnub Plaub Txais Tshauv Xyoo C Nruab Lis Piam Xyoo I

Hwm LN John of God

Zaj Nyeem Ib: HIS XAIS 58: 1-9A

1 HUAB TAIS hais li no: "Koj kav tsij qw tas zog txhob tso tseg, tsa koj lub suab kom nrov xws li lub hom, koj tshaj rau kuv haiv neeg txog lawv txoj kev ua phem, tshaj rau Yas Kos tsev neeg txog lawv txoj kev ua txhaum. 2 Lawv kuj niaj hnub nrhiav kuv, lawv xav paub kuv txoj kev, lawv ua xws li lawv yog ib haiv neeg coj kev ncaj thiab tsis tso lawv tus Tswv Ntuj Txoj Cai pov tseg. Lawv thov kom kuv txiav ib txog cai ncaj rau lawv, lawv xav txav los nyob ze Tswv Ntuj. 3 ‘Vim li cas peb twb yoo mov los koj tsis pom li? Peb twb tsim txom peb, los koj tsis quav ntsej txog li ?’ Yog vim li no : vim hnub nej yoo mov, nej tsuas nrhiav kev zoo rau nej tus kheej xwb, thiab nej tseem yuam nej cov tub zog thiab. 4 Vim nej yoo mov yog yoo kom nej tau nrhiav kev sib cav sib ceg, siv zog xuas nrig sib ntaus xwb. Yog nej yoo mov raws li niaj hnub no xwb mas yuas tsis muaj neeg mloog nej lub suab nyob saum ntuj ib zaug li.
5 Hnub uas ib tug neeg ua kom nws lub cev tau nyiaj mob puas yog txoj kev yoo mov uas kuv nyiam ? Ua taub hau qaij das xws li ib tug tauj deg, tso cev pw saum ntaub tsaj thiab hauv cov plua tshauv puas yog qhov koj hu ua kev yoo, thiab hu ua ib hnub uas HUAB TAIS txaus siab rau ?
6 Ntshai txoj kev yoo raws li kuv nyiam yuav yog li no dua: daws cov saw tsis ncaj ncees uas khi neeg, tshem cov nra uas quab yuam neeg, tso cov neeg raug hiam kom tau kev twj lij, muab cov quab txhua tus lov pov tseg kom tas huv si. 7 Muab koj cov mov los faib rau tus neeg tshaib noj, caw cov txom nyem tsis muaj chaw nyob los so hauv koj tsev; yog koj pom ib tug neeg liab qab, koj muab ris tsho rau hnav; koj tsis tig nrob qaum rau tus nrog koj koom ib co roj ntsha. 8 Yog koj ua li no , mas koj qhov pom kev yuav ci tawm tuaj xws li thaum lub hnub tawm tuaj, koj lub qhov txhab yuav zoo sai, koj txoj kev ncaj ncees yuav mus ua koj ntej, HUAB TAIS lub hwj chim yuav lawv koj qab nraim. 9 Yog koj hu mas HUAB TAIS yuav teb, yog koj qw kom pab, mas nws yuav hais tias : ‘Kuv nyob ntawm no.’"

NPN 51: 3-4, 5-6AB, 18-19

Txais: (19b) Tswv Ntuj, koj tsis thuam tus tu siab rau nws cov txhaum thiab ua neeg me.

Tswv Ntuj, thov koj khuv leej kuv, vim koj lub siab zoo;
vim koj muaj kev hlub loj tas nrho, thov koj so kuv qhov txhaum pov tseg.
Thov koj ntxuav kuv lub txim pov tseg kom tas
thiab koj muab kub qhov txhaum tshem mus kom kuv dawb huv tuaj.

Txais: (19b) Tswv Ntuj, koj tsis thuam tus tu siab rau nws cov txhaum thiab ua neeg me.

Kuv lees paub kuv qhov txhaum,
kuv qhov txhaum nyob rawv ntawm kuv xub ntiag.
“Kuv tau ua txhaum rau koj ib leeg xwb,
kuv tau ua qhov uas koj saib yog tsis zoo.”

Txais: (19b) Tswv Ntuj, koj tsis thuam tus tu siab rau nws cov txhaum thiab ua neeg me.

Vim koj tsis zoo siab txais cov kev txi ntuj;
yog kuv hlawv tsiaj txi ntuj, koj yuav tsis txais.
Kuv txoj kev txi ntuj, Tswv Ntuj, yog muaj ib lub siab xav lees txhaum;
tus muaj ib lub siab xav lees txhaum thiab ua neeg me,
Tswv ntuj, koj yuav tsis thuam.

Txais: (19b) Tswv Ntuj, koj tsis thuam tus tu siab rau nws cov txhaum thiab ua neeg me.

Zaj Cav lub Moo Zoo: AS MOS 5: 14

Txais: Huab Tais Yes Xus Pleev, Tswv Ntuj Lo Lus, peb cav txog koj.

Nej nrhiav qhov zoo txhob nrhiav qhov phem
ces nej yuav muaj txoj sia nyob,
thiab Huab Tais yuav nrog nraim nej.

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo: MT 9: 14-15

14 Zam cov thwj tim tuaj cuag Yes Xus, lawv hais tias : "Peb yoo mov, cov Fas Lis Xais kuj yoo. Vim li cas koj cov thwj tim tsis yoo ?"
15 Yes Xus teb lawv tias : “Thaum nraug vauv tseem nrog nws cov phooj ywg nyob, mas lawv puas yuav ntoo xyod ? Tiam sis muaj ib hnub, luag coj nraug vauv lawm, mas lawv mam li yuav yoo mov.”

TIM 9 LUB 3 HLIS 2019

Hnub Xya tom qab Hnub Plaub Txais Tshauv Xyoo C Nruab Lis Piam Xyoo I

Hwm LN Rose nyob Los Mas

Zaj Nyeem Ib: HIS XAIS 58: 9B-14

Huab Tais hais li no:
9b Yog koj tshem txoj kev quab yuam neeg ntawm koj mus, yog koj tseg tsis taw tes nki rau luag, yog koj tsis hais cov lus phem, 10 yog koj qhib koj lub siab dav fo rau tus neeg tshaib, yog koj nplig tus neeg raug txom nyem kom zoo siab, mas koj qhov pom kev yuav ci sawv tuaj nyob hauv qhov tsaus ntuj, koj txoj kev tsaus ntuj yuav pom kev nrig li thaum tav su. 11 HUAB TAIS yuav coj koj kev tas mus li, nws yuav daws koj txoj kev nqhis thaum lub caij ntuj qhuav qhawv, nws yuav ua kom koj cov pob txha rov muaj zog. Koj yuav zoo li ib lub vaj muaj dej ywg, koj yuav zoo li tus dej txhawv uas dej ntws tsis txawj tu. 12 Koj cov qub vaj tse uas vau lawd yuav rov sawv tuaj, koj yuav txhim cov taw ntsa rau cov tiam neeg txheej dhau txheej mus; luag yuav hu koj ua tus kho tej ntsa loog puas, tus rov txhim tej kev kom tau kev mus nyob. 13 Yog koj caiv koj txhais ko taw tsis hla hnub xas npas tos, koj tsis ua raws koj lub siab nyiam nyob hauv kuv hnub ntshiab, yog koj hu hnub xas npas tos ua "Hnub qab zib,” koj hu HUAB TAIS hnub ntshiab ua “hnub tsim nyog hwm;” yog koj hwm hnub xas npas tos koj tsis mus kev deb, koj tsis leg koj tej dej num, koj tsis mus piav tej zaj lus, 14 ces koj yuav muaj kev puv siab npo nyob hauv HUAB TAIS, kuv yuav coj koj mus hla muaj hwj chim ntxiag saum cov toj roob siab nyob hauv lub teb chaws, kuv yuav muab koj txiv Yas Kos lub cuab tam los yug koj; vim HUAB TAIS lub ncauj tau hais li ntawd.

NPN 86: 1-2, 3-4, 5-6

Txais: (11ab) Thov koj qhia koj txoj kev rau kuv, Huab Tais,
kuv thiaj taug tau raws koj txoj kev tseeb.

Thov koj khoov los cuab pob ntseg mloog kuv,
HUAB TAIS, thov teb kuv,
vim kuv txom nyem thiab kuv pluag.
Thov koj txuag kuv tus ntsuj plig, vim kuv npuab koj;
thov koj cawm koj tus tub txib uas tso siab rau koj.
Koj yog kuv tus Tswv Ntuj.

Txais: (11ab) Thov koj qhia koj txoj kev rau kuv, Huab Tais,
kuv thiaj taug tau raws koj txoj kev tseeb.

Thov koj khuv leej kuv, Huab Tais,
vim kuv hu koj tas hnub.
Thov koj pub kev zoo siab rau koj tus tub txib tus ntsuj plig,
vim kuv tsa kuv tus ntsuj plig yuj plaws tuaj rau koj, Huab Tais.

Txais: (11ab) Thov koj qhia koj txoj kev rau kuv, Huab Tais,
kuv thiaj taug tau raws koj txoj kev tseeb.

Huab Tais, koj muaj lub siab zoo thiab txawj zam txhaum,
koj txoj kev ua siab zoo loj tas nrho rau cov uas hu txog koj.
HUAB TAIS, thov koj mloog kuv zaj thov ntuj
thiab cuab pob ntseg rau kuv lub suab thov.

Txais: (11ab) Thov koj qhia koj txoj kev rau kuv, Huab Tais,
kuv thiaj taug tau raws koj txoj kev tseeb.

Zaj Cav Lub Moo Zoo: ES XES KIAS 33: 11

Txais: Huab Tais Yes Xus Pleev, Tswv Ntuj Lo Lus, peb cav txog koj.

Huab Tais hais tias, kuv tsis zoo siab pom tus neeg phem raug txoj kev tuag,
kuv xav pom kom nws tig los ua neeg zoo, ces nws thiaj yuav ciaj sia.

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo: LK 5: 27-32

27 Dhau tej ntawd tas lawm, Yes Xus tawm mus. Nws ntsia pom ib tug sau se hu ua Les Vis zaum ntawm lub rooj sau se. Yes Xus hais rau nws tias : "Koj raws kuv mus."
28 Ces Les Vis sawv tsees, nws tso tas ib puas tsav yam tseg, nws raws Yes Xus mus.
29 Les Vis ua ib rooj qav loj txais Yes Xus hauv nws tsev. Muaj ib pab neeg sau se coob thiab tseem muaj lwm cov neeg nrog lawv nyob ntawm rooj mov.
30 Cov Fas Lis Xais thiab lawv cov Kws Ntawv Ntshiab yws yws rau Yes Xus cov thwj tim hais tias : "Vim li cas nej nrog cov neeg sau se thiab cov neeg txhaum noj haus ua ke ?"
31 Yes Xus teb tias : "Tsis yog cov neeg noj qab nyob zoo thiaj vam txog kws kho mob. Yog cov muaj txiab muaj nkeeg.
32 Tsis yog kuv tuaj hu cov neeg ncaj kom tig los lees txhaum, yog kuv tuaj hu cov neeg txhaum."

TIM      11      LUB      3      HLIS      2019

Hnub Ob Lis Piam Ib Caij Plaub Caug Xyoo C Nruab Lis Piam Xyoo I

Zaj Nyeem Ib:       LES VIS  19:   1-2, 11-18

1 HUAB TAIS hais rau Mais Xes tias : 2 "Koj hais rau tas nrho tsoom tub ki His Xas Lais tias : Nej yuav ua neeg ntshiab, vim kuv nej tus HUAB TAIS Tswv Ntuj, kuv Ntshiab.
11 Nej yuav tsis txhob ua tub sab, tsis txhob dag, tsis txhob hais tej yam tsis tseeb ib leeg rau ib leeg. 12 Nej yuav tsis txhob lam tuav txog kuv lub npe los cog lus cuav, vim thaum nej ua li ntawd yog nej tsis hwm nej tus Tswv Ntuj lub npe. Kuv yog HUAB TAIS.
13 Nej yuav tsis txhob nrhiav kev noj tus nyob ze ntawm nej los txhav nws tug. Tus tub zog uas nej ntiav thaum nruab hnub, nws tus nqe zog yuav tsum tsis txhob nyob ntawm nej tes ib hmos kom txog tag kis. 14 Nej yuav tsis txhob foom lus phem rau tus neeg lag ntseg, tsis txhob muab tej yam mus tav tus dig muag kev, tiam sis nej yuav ntshai nej tus Tswv Ntuj. Kuv yog HUAB TAIS.
15 Nej yuav tsis txhob ua tsis ncaj thaum nej txiav txim rau luag; tsis txhob tuaj tus neeg pluag tog, tsis txhob tsa tus  ua nom lub meej mom, tiam sis nej yuav txiav txim rau txhua tus raws txoj kev ncaj nkaus xwb. 16 Nej yuav tsis txhob ua neeg taug xaiv muab nej cov neeg xyav moo phem, tsis txhob hais lus ua kom tus nyob ze ntawm nej yuav tsum tau hliv nws cov roj ntsha. Kuv yog HUAB TAIS.
17 Nej yuav tsis txhob ntxub nej tus kwv tij nyob hauv nej nruab siab. Nej yuav cem yuav qhuab yuav qhia tus nyob ze ntawm nej, nej thiaj tsis tau ris nws qhov txhaum. 18 Nej yuav tsis txhob nrhiav kev rob caub thiab yuav tsis txhob chim ntev ntev rau ib tug twg nyob hauv nej haiv neeg. Tiam sis nej yuav nyiam tus nyob ze nej ib yam li nej nyiam nej. Kuv yog HUAB TAIS.

NPN       19:   8, 9, 10, 15

Txais: (Zam 6:63b) Huab Tais, koj cov lus yog ntsuj plig thiab yog txoj sia.

HUAB TAIS txoj cai zoo tas nrho,
nws ntxiv siav rau tus ntsuj plig;
HUAB TAIS tus txhooj tsim nyog ntseeg,
nws ua kom tus neeg ruam thoob tsib tuaj.

Txais: Huab Tais, koj cov lus yog ntsuj plig thiab yog txoj sia.

HUAB TAIS cov lus qhuab qhia yog lus ncaj
ua kom neeg zoo siab kaj siab.
HUAB TAIS lo lus qhia ntshiab si,
ua kom neeg qhov muag pom kev.

Txais: Huab Tais, koj cov lus yog ntsuj plig thiab yog txoj sia.

Txoj kev hwm HUAB TAIS dawb huv,
thiab yuav nyob mus li;
HUAB TAIS cov lus txiav txim yog lus tseeb,
txhua lo lus yog lus ncaj.

Txais: Huab Tais, koj cov lus yog ntsuj plig thiab yog txoj sia.

Thov kom cov lus ntawm kuv lub ncauj zoo ntxim koj siab
thiab txoj kev xav hauv kuv nruab siab yog qhov koj pom zoo,
HUAB TAIS, kuv lub tsua thiab tus txhiv kuv.

Txais: Huab Tais, koj cov lus yog ntsuj plig thiab yog txoj sia.

Zaj Cav lub Moo Zoo:       2 KOS LIS NTHOS  6:   2B

Txais: Huab Tais Yes Xus Pleev, Tswv Ntuj Lo Lus, peb cav txog koj.

Lub sij hawm zoo, yog nyem no.
Hnub muaj kev cawm neeg, yog nyem no.

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo:       MT  25:   31-46

Yes Xus hais rau nws cov thwj tim tias:
31 “Thaum Neeg Leej Tub rov los nyob hauv nws lub hwj chim thiab tas tsoom Tshiab nrog nws los, mas nws yuav zaum saum nws lub theej kiab muaj koob meej. 32 Tas ib tsoom haiv neeg yuav sib sau nyob ntawm nws xub ntiag. Nws yuav muab tsoom neeg cais ib leeg rau ib leeg, xws li tus zov yaj cais cov yaj ntawm cov tshis. 33 Nws yuav tso cov yaj nyob ntawm nws sab xis, tso cov tshis nyob ntawm nws sab laug. 34 Ces tus Vaj yuav hais rau cov nyob sab xis tias : ‘Nej los mog ! Nej yog cov uas kuv Txiv pub txoj hmoov zoo rau. Nej txais lub Ceeb Tsheej uas Ntuj yeej npaj tseg rau nej txij puag thaum pib tsim lub sim ceeb lawm los ua nej tug. 35 Vim tias kuv tshaib plab, nej pub rau kuv noj ; kuv nqhis dej, nej pub rau kuv haus, kuv yog ib tug pej kum neeg, nej txais kuv ; 36 kuv liab qab, nej muab rau kuv hnav ; kuv mob, nej tuaj xyuas kuv ; kuv nyob hauv tsev loj faj, nej tuaj tsham kuv.’ 37 Ces cov neeg ncaj yuav teb tias : ‘Huab Tais, thaum twg peb tau pom koj tshaib plab ces peb tau pub rau koj noj, pom koj nqhis dej, ces peb tau muab rau koj haus, 38 pom koj yog ib tug pej kum neeg, ces peb tau txais koj, pom koj liab qab ces tau muab rau koj hnav ? 39 Pom koj mob los nyob hauv tsev loj faj, ces peb tau tuaj xyuas koj ?’ 40 Tus Vaj yuav teb rau lawv li no : ‘Kuv hais tseeb rau nej. Nej tau ua npaum li cas rau cov me tshaj hauv kuv tsoom kwv, mas yog nej ua rau kuv.’  41 Ces tus vaj yuav hais rau cov nyob sab laug tias : ‘Nej txoj hmoov phem. Nej khiav mus deb ntawm kuv, mus nyob hauv cov hluav taws kub tsis txawj tuag, uas Ntuj npaj rau tus dab phem thiab nws cov dab. 42 Vim thaum kuv tshaib plab nej tsis pub rau kuv noj, kuv nqhis dej nej tsis pub rau kuv haus, 43 kuv yog ib tug pej kum neeg nej tsis txais kuv, kuv liab qab nej tsis muab rau kuv hnav, kuv mob thiab kuv nyob hauv tsev loj faj nej tsis tuaj xyuas kuv.’ 44 Ces cov ntawd yuav teb rau tus Vaj tias : ‘Huab Tais, thaum twg peb tau pom koj tshaib plab los nqhis dej, pom koj yog ib tug pej kum neeg, pom koj liab qab, pom koj mob los nyob hauv tsev loj faj, ces peb tsis tau pab koj ?’ 45 Ces tus Vaj yuav teb rau lawv tias : ‘Kuv hais tseeb rau nej, nej tsis tau ua rau cov me tshaj hauv kuv tsoom kwv npaum li cas, mas yog nej tsis tau ua rau kuv npaum li ntawd.’ 46 Ces cov no yuav mus raug txim tas ib txhiab ib txhis. Hos cov siab ncaj yuav mus txais txoj sia nyob mus li.”

TIM      12      LUB      3      HLIS      2019

Hnub Peb Lis Piam Ib hauv Caij Plaub Caug Xyoo C Nruab Lis Piam Xyoo I

Zaj Nyeem Ib:      HIS XAIS  55:   10-11

Huab Tais hais tias:
10 Xws li cov nag thiab cov daus uas poob saum ntuj los,
Lawv tsis rov mus saum ntuj ua ntej lawv yuav tsum xub ywg lub ntiaj teb tas tso, kom av muaj chiv thiab av zoo, Thiaj yuav txi tau noob qoob noob loo rau tus tswv teb thiab pub tau zaub mov rau tus yuav noj,  
11 Lo lus tawm ntawm kuv lub ncauj los kuj zoo ib yam li ntawd thiab;
Nws yuav tsis rov los cuag kuv qhuav nquas,
Nws yuav xub leg qhov kuv xav kom nws ua kom tiav raws lub hom phiaj kuv xa nws mus ua tso."

NPN     34:   4-5, 6-7, 16-17, 18-19

Txais:   (18b) Tswv Ntuj cawm tus neeg ncaj ntawm txhua yam kev nyuaj.      

Nej nrog kuv cav txog HUAB TAIS lub koob meej,
peb sawv daws ua ke qhuas nws lub npe.
Kuv nrhiav HUAB TAIS, nws tau teb kuv,
thiab tau cawm kuv ntawm kuv tej kev ntshai.

Txais:   (18b) Tswv Ntuj cawm tus neeg ncaj ntawm txhua yam kev nyuaj.

Nej vam txog nws ces nej yuav zoo siab luag ntxhi,
nej ntsej muag yuav tsis liab vim nej tau kev txaj muag.
Thaum tug neeg pluag hu, HUAB TAIS hnov,
thiab yuav cawm nws ntawm tas nws tej kev nyuaj.

Txais:   (18b) Tswv Ntuj cawm tus neeg ncaj ntawm txhua yam kev nyuaj.

HUAB TAIS muaj qhov muag pom cov neeg ncaj,
muaj pob ntseg hnov lawv lub suab quaj.
HUAB TAIS tawm tsam cov neeg ua phem,
nws rhuav kom lub ntiaj teb txhob nco txog lawv ntxiv.

Txais:   (18b) Tswv Ntuj cawm tus neeg ncaj ntawm txhua yam kev nyuaj.

Thaum cov neeg ncaj hu, HUAB TAIS hnov lawv,
Nws cawm lawv ntawm tas lawv tej kev nyuaj.
HUAB TAIS nyob ze ze cov neeg siab lwj siab ntuag,
thiab nws cawm cov uas tas kev cia siab.

Txais:   (18b) Tswv Ntuj cawm tus neeg ncaj ntawm txhua yam kev nyuaj.

Zaj Cav lub Moo Zoo:     MT  4:   4B

Txais: Huab Tais Yes Xus Pleev, Tswv Ntuj Lo Lus, peb cav txog koj.

Neeg tsis kawg muab mov los yug siav xwb,
neeg tseem yuav yuav txhua lo lus tawm
ntawm Tswv ntuj lub ncauj los thiab.

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo:     MT  6:   7-15

Yes Xus hais rau nws cov thwj tim tias:
7 “Thaum nej teev Ntuj, nej txhob ntuas mus ntuas los zoo li cov neeg teev dab : lawv xav tias yog lawv hais lus ntau, mas dab yuav mloog lawv zoo dua. 8 Nej txhob ua zoo li lawv, vim nej Txiv yeej xub paub tias qhov twg yog qhov nej yuav tsum muaj ua ntej nej thov nws lawm. 9 Nej yuav teev Ntuj zoo li no:
‘Peb Txiv nyob saum ntuj, koj lub Npe ntshiab nto moo lug.
10 Koj lub Ceeb Tsheej los txog.
Kom muaj raws li koj nyiam nyob ntiaj teb no li nyob saum ntuj.
11 Thov koj pub mov txaus rau peb noj hnub no.
12 Koj zam txhaum rau peb zoo li peb zam rau cov ua txhaum rau peb.
13 Koj txhob tso peb raug kev ntxias, thov koj npo peb dim ntawm kev phem.’
14 Yog nej zam rau cov neeg ua txhaum rau nej, mas nej Txiv nyob saum ntuj kuj yuav zam rau nej thiab. 15 Hos yog nej tsis zam txhaum rau luag, mas nej Txiv kuj yuav tsis zam rau nej li.”

TIM      13      LUB      3      HLIS      2019

Hnub Plaub Lis Piab Ib Caij Plaub Caug Zyoo C Nruab Lis Piam Xyoo I

Zaj Nyeem Ib:       YOS NAS  3:   1-10

1 HUAB TAIS lo lus nrov tuaj rau Yos Nas zaum ob tias : 2 "Koj sawv, koj yuav mus kom txog Nis Nis Vas, lub tuam tsheej, koj yuav hais rau lawv raws li kuv qhia rau koj hais." 3 Yos Nas sawv los, nws sawv kev mus lawm Nis Nis Vas raws li HUAB TAIS lo lus. Lub tsheej Nis Nis Vas yog ib lub tsheej loj kawg nkaus, yuav mus peb hnub ke thiaj hla dhau lub tsheej. 4 Yos Nas Nkag mus hauv lub nroog, nws mus kev ib hnub, ces nws tshaj tawm rau sawv daws tias : "Tshuav plaub caug hnub ntxiv xwb, ces lub tsheej Nis Nis Vas yuav raug rhuav tas." 5 Cov neeg nyob Nis Nis Vas cia li ntseeg Tswv Ntuj; lawv ceeb toom kom sawv daws yoo mov thiab lawv hnav ntaub tsaj, tsis hais tus hlob los tus yau.
6 Lub moo no kuj nrov tuaj txog tus vaj nyob Nis Nis Vas; nws sawv tsees ntawm nws lub theej kiab mus hle nws lub tsho loj tseg, nws muab zoj ib lub hnab tsaj los npua, nws mus zaum hauv cov tshauv. 7 Ces lawv mus qw thoob plaws lub nroog Nis Nis Vas raws li tus vaj thiab cov nom loj lo lus ceeb toom tias : "Tej neeg thiab tej tsiaj txhu, cov tsiaj loj thiab tsiaj me, sawv daws yuav tsis txhob noj dab tsi li, tsis noj mov tsis haus dej li. 8 Tus twg kuj yuav tsum npua hnab tsaj thiab yuav hu txog Tswv Ntuj tas zog, nyias yuav tso nyias txoj kev ua phem tseg, yuav cheem nyias ob txhais tes kom txhob ua txhaum ntxiv. 9 Tsis muaj neeg paub, tiam sis tej zaum Tswv Ntuj siab yuav nqig, nws yuav thim xav, nws yuav tso nws txoj kev npau taws tseg, ces peb sawv daws yuav tsis tuag ?" 10 Tswv Ntuj pom qhov lawv ua, vim lawv mob siab siv zog tso lawv txoj kev ua txhaum ua phem tseg, ces Tswv Ntuj thim txoj kev rau txim uas nws tau npaj rau lawv, nws tsis nplua lawv raws li nws tau hais.

NPN       51:   3-4, 12-13, 18-19

Txais: (19b) Tswv Ntuj, koj yuav zoo siab txais tus tu siab rau nws cov txhaum thiab ua neeg me.

Tswv Ntuj, thov koj khuv leej kuv vim koj lub siab zoo;
thov koj so kuv qhov txhaum pov tseg, vim koj muaj kev hlub loj tas nrho.
Thov koj ntxuav kuv lub txim pov tseg kom tas
thiab muab kuv qhov txhaum tshem mus kom kuv dawb huv tuaj.

Txais: Tswv Ntuj, koj yuav zoo siab txais tus tu siab rau nws cov txhaum thiab ua neeg me.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,
thiab txhob rho koj leej Tswv Yim Ntshiab ntawm kuv mus.

Txais: Tswv Ntuj, koj yuav zoo siab txais tus tu siab rau nws cov txhaum thiab ua neeg me.

Vim koj tsis zoo siab txais cov kev txi ntuj,
yog kuv hlawv tsiaj txi ntuj, koj yuav tsis txais.
Kuv txoj kev txi ntuj, Tswv Ntuj,
yog muaj ib lub tswv yim xav lees txhaum;
muaj ib lub siab xav lees txhaum thiab ua neeg me,
Tswv ntuj, koj yuav zoo siab txais.

Txais: Tswv Ntuj, koj yuav zoo siab txais tus tu siab rau nws cov txhaum thiab ua neeg me.

Zaj Cav lub Moo Zoo:       YOS ES  2:   12-13

Txais: Huab Tais Yes Xus Pleev, Tswv Ntuj Lo Lus, peb cav txog koj.

HUAB TAIS hais tias, lub sij hawm no,
nej muab tas nrho nej lub siab tig rov los cuag kuv,
vim kuv muaj lub siab hlub thiab khuv leej neeg.

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo:       LK  11:   29-32

29 Thaum tej pab neeg coob coob tuaj sib txiv nyob ua ke, Yes Xus pib hais lus li no tias : "Tiam neeg no yog ib tiam neeg phem. Lawv taij ib lub cim, tab sis lub cim lawv yuav pom kawg yog Yos Nas lub cim xwb. 30 Vim tias Neeg Xws li thaud Yos Nas yog ib lub cim rau cov neeg nyob Nis Nis Vas, Neeg Leej Tub kuj yog ib lub cim rau tiam neeg no thiab. 31 Txog hnub txiav txim, tus poj vaj nyob Naj Fab yuav nrog tiam neeg no sawv los, nws yuav muab txim rau tiam neeg no, vim nws tuaj puag tim npoo ntiaj teb tuaj mloog Xas Los Moos cov lus thoob tsib. Hos nyob ntawm no, twb muaj tus loj dua Xas Los Moos ! 32 Txog hnub txiav txim, cov neeg nyob Nis Nis Vas yuav nrog tiam neeg no sawv, lawv yuav muab txim rau tiam neeg no, vim tias thaum Yos Nas tuaj qhia lawv los, mas lawv lees txhaum, hos nyob ntawm no twb muaj tus loj dua Yos Nas !”

TIM 14 LUB 3 HLIS 2019

Hnub Tsib Lis Piam Ib Caij Plaub Caug Xyoo C Nruab Lis Piam Xyoo I

Zaj Nyeem Ib: Es Thes 4 C: 12, 14-16, 23-25 (raws: New American Bible Rev. Ed., Cath. Book Publ. Corp. 2011)
Es Thes 4: 17k(a, e), 17l-17m, 17r-17t(Bible de Jerusalem,les Editions du Cerf,Paris VII,1992)
Es Thes 14: 1, 3-5, 12-14 (raws: Douay-Rheims Bible)

1 Tus poj vaj Es Thes nyuaj siab tas nrho tias yuav muaj xwv txheej loj, ces nws vam khom HUAB TAIS pab. 3 Nws thiaj thov Huab Tais, His Xas Lais tus Tswv Ntuj li no: “Kuv tus Huab Tais, koj ib leeg yog peb tus Vaj. Thov koj tuaj pab kuv vim kuv ib leeg xwb, tsis muaj leej twg pab, tsuas muaj koj ib leeg xwb. 4 Kuv tab tom yuav pheej hmoo rau kuv txoj sia. 5 Txij thaum kuv yug los, kuv tau hnov hais nyob hauv kuv haiv neeg tias, Huab Tais, koj yog tus tau xaiv His Xas Lais hauv txhua haiv neeg los, thiab xaiv peb phaj txiv hauv lawv cov yawg koob los ua koj tug mus ib txhis, thiab koj tau ua zoo rau lawv raws li koj tau cog lus.
12 HUAB TAIS, thov koj nco ntsoov, thov koj tawm tuaj pab thaum peb ntsib kev txom nyem; thiab thov koj muab ib lub siab loj rau kuv, koj uas yog tus Vaj kav tas txhua cov dab, tus Tswj kav tas txhua tus nom tswv. 13 Thov koj muab ib co lus rau kuv qhov ncauj kom txawj ntxias kom tsov seej tuaj thiab txawj tig tsov lub siab mus ntxub peb tus yeeb ncuab, kom nws thiab nws cov neeg koom siab ploj mus kom tas. 14 HUAB TAIS, thov koj muab koj txhais tes muaj hwj huam los cawm peb, thiab thov koj pab kuv, vim kuv ib leeg xwb, tsis muaj leej twg pab, tsuas muaj koj ib leeg xwb.

NPN 138: 1-2AB, 2CDE-3, 7C-8

Txais: (3a) Huab Tais, thaum kuv hu txog koj, koj tau pab kuv lawm.

Kuv yuav ua koj tsaug, HUAB TAIS, tas kuv lub siab lub ntsws,
vim koj tau hnov kuv cov lus thov ntawm kuv lub ncauj;
kuv yuav hu nkauj cav txog koj nyob ntawm cov tshiab xub ntiag.
Kuv yuav tuaj pe hawm koj nyob hauv koj lub tuam tsev ntshiab
thiab yuav ua tsaug rau koj lub npe.

Txais: (3a) Huab Tais, thaum kuv hu txog koj, koj tau pab kuv lawm.

Vim koj lub siab zoo thiab vim koj txoj kev tseeb,
koj tau muab koj lub npe thiab koj txoj kev cog lus
ua qhov loj tshaj tas txhua yam.
Thaum kuv hu, koj tau teb kuv,
koj tau ntxiv zog rau kuv kom kuv lub zog loj tuaj.

Txais: (3a) Huab Tais, thaum kuv hu txog koj, koj tau pab kuv lawm.

Koj txhais tes xis cawm kuv.
HUAB TAIS yuav ua kom tiav tej yam nws npaj ua rau kuv. ;
HUAB TAIS, koj lub siab zoo yuav nyob mus li;
koj tsis txhob muab yam koj txhais tes tau tsim los tso tseg.

Txais: (3a) Huab Tais, thaum kuv hu txog koj, koj tau pab kuv lawm.

Zaj Cav lub Moo Zoo: NPN 51: 12A, 14A

Txais: Huab Tais Yes Xus Pleev, Tswv Ntuj Lo Lus, peb cav txog koj.

Tswv Ntuj, thov koj tsim ib lub siab huv lis si rau kuv,
thov koj pub kom kuv rov muaj kev zoo siab nyob hauv koj txoj kev cawm

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo: MT 7: 7-12

Yes Xus hais tias:
7 "Nej thov, ces nej yuav tau txais; nej nrhiav, ces nej yuav ntsib; nej khob qhov rooj, ces luag yuav qhib rau nej.
8 Vim tias leej twg thov, nws yuav tau txais ; leej twg nrhiav, nws yuav ntsib ; leej twg khob qhov rooj, mas yuav muaj tus qhib qhov rooj rau nws.
9 Nej leej twg tus tub taij mov, nej puas yuav muab ib lub pob zeb rau nws noj ?
10 Los yog nej tus tub taij ib tug ntses, nej puas yuav muab ib tug nab rau nws ?
11 Txawm tias nej yog neeg phem, tsis kav nej twb txawj pub tej yam zoo rau nej cov me nyuam. Li ntawd nej Txiv nyob saum ntuj haj yam txawj pub qhov zoo tshaj rau cov neeg uas thov nws.
12 Tas ib puas tsav yam uas nej xav kom luag ua rau nej, mas nej yuav xub ua rau luag tso : Txoj Cai thiab cov Yaj Saub yog li ntawd.

TIM      15      LUB      3      HLIS      2019

Hnub Rau Lis Piam Ib Caij Plaub Caug Xyoo C Nruab Lis Piam Xyoo I

Zaj Nyeem Ib:       ES XES KIAS  18:   21-28

21 Tus neeg muaj ib lub siab phem yog nws hloov siab tseg tsis ua txhaum ntxiv, nws tig los coj kuv cov lus qhia thiab ua raws txoj kev ncaj kev zoo, mas nws yuav muaj txoj sia, nws yuav tsis tuag. 22 Kuv yuav tsis nco qab txog nws cov txhaum ntxiv, nws yuav ciaj vim nws tau ua qhov zoo. 23 HUAB TAIS Tswv Ntuj hais tias : "Kuv puas yuav zoo siab tau yog kuv pom tus neeg txhaum tuag? Nthsai kuv yuav xav pom tus neeg txhaum hloov siab tig rov los ua zoo kom nws muaj txoj sia nyob xwb.
24 Tab sis yog tus neeg siab ncaj nws ncaim ntawm txoj kev ncaj thiab nws mus ua tej kev txhaum kev phem xws li tus neeg phem ua, mas tus neeg ntawd nws puas tsim nyog muaj txoj sia nyob ? Nws cov hauj lwm zoo uas thaum ub nws ua, mas kuv yuav tsis nco txog ntxiv. Ces vim nws tau ntxeev siab thiab tau ua txhaum, vim li ntawd mas nws yuav tuag. 25 Nej hais tias: ‘HUAB TAIS ua tsis ncaj!’ His Xas Lais tsev neeg, nej mloog zoo zoo. Puas yog kuv ua tsis ncaj? Ntshai yog nej ua tsis ncaj los tsis yog? 26 Tus neeg siab ncaj nws ncaim ntawm nws txoj kev ncaj, nws mus ua txhaum, mas nws yuav tuag vim nws txoj kev ua txhaum. 27 Tus neeg siab phem nws tso nws txoj kev ua phem pov tseg, nws los ua qhov ncaj qhov zoo, mas nws tus ntsuj plig txoj sia yuav nyob. 28 Thaum nws pom dheev nws cov txhaum, nws tso nws txoj kev ua phem pov tseg, mas nws yuav muaj txoj sia nyob, nws yuav tsis tuag.

NPN       130:   1-2, 3-4, 5-7a, 7bc-8

Txais: (3) Huab Tais, yog koj cim ntsoov peb cov txhaum, leej twg yuav nyob taus?

Kuv nyob hauv qab tiv txwv hu txog koj, HUAB TAIS,
HUAB TAIS, thov koj mloog kuv lub suab!
Thov koj cuab pob ntseg mloog kuv lo lus thov koj.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

HUAB TAIS, yog koj cim ntsoov peb cov txhaum
leej twg thiaj yuav nyob taus?
Tab sis nyob ntawm koj muaj kev zam txhaum,
mas kom sawv daws hwm koj.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

Kuv tso siab rau HUAB TAIS,
kuv tus ntsuj plig tso siab rau nws lo lus.
Kuv tus ntsuj plig tos ntsoov HUAB TAIS,
heev tshaj cov zov keeb tos lub caij kaj ntug.
His Xas Lais, koj yuav tos ntsoov HUAB TAIS.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

Vim nyob ntawm HUAB TAIS muaj txiaj ntsim koob hmoov,
thiab nyob ntawm nws muaj txoj kev cawm nplua mias;
nws yuav cawm His Xas Lais ntawm tas lawv tej kev txhaum.

Txais: (3) Huab Tais, yog koj cim ntsoov peb cov txhaum, leej twg yuav nyob taus?

Zaj Cav lub Moo Zoo:       ES XES KIAS  18:   31

Txais: Huab Tais Yes Xus Pleev, Tswv Ntuj Lo Lus, peb cav txog koj.

HUAB TAIS hais tias: “Nej cia li tso tas nej tej kev ua txhaum pov tseg,
thiab yuav dua ib lub siab tshiab thiab ib lub tswv yim tshiab.”

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo:       MT  5:   20-26

Yes Xus hais rau nwsd cov thwj tim tias:
20 “Kuv hais rau nej : yog nej tsis ua siab ncaj dua cov Kws Ntawv Ntshiab thiab cov Fas Lis Xais, mas nej yuav mus tsis tau hauv Ntuj lub Ceeb Tsheej.
21 Nej hnov cov lus qhia rau tej laus thaud tias : ‘Koj tsis txhob tua neeg. Tus twg tua neeg, nws yuav raug luag txiav txim rau nws.’ 22 Hos kuv, mas kuv hais rau nej tias : Leej twg npau taws rau nws tus kwv tij, nws yuav raug txim ntawm tsev hais plaub. Yog nws hais rau nws tus kwv tij tias ‘Niag ruam’ mas nws yuav raug txim ntawm lub rooj txwj laus Xas Nes Nrees. Yog nws hais rau nws tus kwv tij tias : ‘Niag vwm’, mas nws yuav raug txim nyob hauv dab phem cov hluav taws.
23 Li ntawd, thaum koj cev ib co txim rau saum lub thaj txi Ntuj, yog koj nco dheev tias koj tus kwv tau muaj lus rau koj lawm. 24 Mas koj cia li tso koj cov txim rau ntawm lub thaj txi Ntuj, koj mus nrog koj tus kwv hais kom haum tso, koj mam rov los cev koj cov txim.
25 Thaum koj nrog tus neeg ntxub koj tseem ua ke mus kev, koj kav tsij nrog nws hais kom haum, tsam nws coj koj mus kom rau tus txiav txim, ces tus txiav txim muab koj cob rau tub ceev xwm kom muab koj kaw hauv tsev loj faj. 26 Kuv hais tseeb rau koj, koj yuav tawm tsis tau hauv tsev loj faj los, mus txog thaum koj rho nyiaj qab nas txog npib kawg nkaus los them tas tso.”

TIM 16 LUB 3 HLIS 2019

Hnub Xya Lis Piam Ib Caij Plaub Caug Xyoo C Nruab Lis Piam Xyoo I

Zaj Nyeem Ib: TXOJ CAI OB 26: 16-19

Mais Xes Hais rau nws haiv neeg tias:
16 “Hnub no, HUAB TAIS, nej tus Tswv Ntuj ceeb toom rau nej tias nej yuav tsum coj nws tej lij choj thiab tej kev cai. Yog li nej yuav coj tej kev cai ntawd, thiab nej yuav muab tas nej lub siab tus nstuj plig los ua raws li ntawd.
17 Hnub no, nej tau lees tias HUAB TAIS yog nej tus Tswv Ntuj, nej yuav taug nws txoj kev, coj nws tej lij choj, khaws nws tej lus qhia thiab nws tej kev cai, thiab mloog nws lub suab.
18 Hnub no HUAB TAIS kuj tau lees tias nej yuav ua nws haiv neeg, ua nws tug raws li nws tau hais rau nej, tiam sis nej yuav tsum coj raws nws tej lus qhia tas huv tib si.
19 Ces HUAB TAIS yuav tsa nej nyob siab dua tas txhua hais neeg nws tau tsim los, nyob hauv txoj kev nto koob meej, txoj kev muaj koob muaj npe, txoj kev muaj hwj chim; nej yuav yog haiv neeg ntshiab cia rau HUAB TAIS nej tus Tswv Ntuj, xws li nws tau hais rau nej lawm.

NPN 119: 1-2, 4-5, 7-8

Txais: (1b) Cov muaj hmoov zoo yog cov uas coj raws Huab Tais txoj cai!

Cov muaj hmoov zoo yog cov uas taug
ib txoj kev tsis muaj qhov xyeej,
yog cov uas taug raws HUAB TAIS txoj cai.
Cov muaj hmoov zoo yog cov uas coj raws nws tej lus qhia,
yog cov uas nrhiav nws tas lawv siab lawv ntsws.

Txais: (1b) Cov muaj hmoov zoo yog cov uas coj raws Huab Tais txoj cai!

Koj tau ceeb toom kom sawv daws
mob siab mloog koj tej lus qhia.
Thov koj pab kuv kom kuv nyob ruaj nreb
hauv txoj kev coj koj tej kev cai lij choj!

Txais: (1b) Cov muaj hmoov zoo yog cov uas coj raws Huab Tais txoj cai!

Kuv yuav muaj ib lub siab ncaj ua koj tsaug,
thaum kuv tau kawm txog koj txoj cai ncaj ncees lawm.
Kuv yuav coj nraim koj tej cai lij choj,
thov koj tsis txhob tso kuv pov tseg.

Txais: (1b) Cov muaj hmoov zoo yog cov uas coj raws Huab Tais txoj cai!

Zaj Cav lub Moo Zoo: 2 KLN 6: 2B

Txais: Huab Tais Yes Xus Pleev, Tswv Ntuj Lo Lus, peb cav txog koj.

Lub sij hawm zoo, yog nyem no,
Hnub muaj kev cawm neeg, yog nyem no.

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo: MT 5: 43-48

Yes Xus hais rau nws cov thwj tim tias:
43 "Nej tau hnov lo lus qhia tias : ‘Koj yuav nyiam tus nyob ze koj, koj yuav ntxub koj tus yeeb ncuab.’
44 Tab sis, kuv hais rau nej tias, nej yuav nyiam nej cov yeeb ncuab, nej yuav thov Ntuj rau cov hiam nej ; 45 nej thiaj yog nej Txiv nyob saum ntuj cov tub ; vim nej Txiv ua kom lub hnub tuaj ziab cov neeg phem thiab cov neeg zoo, nws ua kom nag los rau cov siab ncaj thiab cov siab nkhaus.
46 Yog nej nyiam cov neeg nyiam nej xwb, mas nej yuav tau koob haum dab tsi ? Tab yog cov sau se, los lawv kuj txawj ua li ntawd thiab.
47 Yog nej tshwj zias nej cov lus zoo rau nej cov txheeb ze xwb, mas nej tau ua dab tsi txawv ? Tab yog cov neeg teev pej kum dab, los lawv kuj txawj ua li ntawd thiab.
48 Hos nej, mas nej yuav ua neeg zoo tshaj, vim nej Txiv nyob saum ntuj yog tus zoo tshaj.”

TIM 18 LUB 3 HLIS 2019

Hnub Ob Lis Piam Ob Caij Plaub Caug Xyoo C Nruab Lis Piam Xyoo I

Hwm LN Cyril myob Yes Lus Xas Les

Zaj Nyeem Ib: DN 9: 4B-10

4b"Kuv tus HUAB TAIS, tus Tswv Ntuj loj thiab txaus ntshai, tus ua raws nraim li lo lus cog cia thiab muab koj txoj kev hlub rau cov neeg nyiam koj thiab coj koj cov lus qhia, 5 peb tau ua txhaum thiab ua qhov tsis ncaj, peb tau ua qhov phem thiab tau ntxeev siab, peb tau ncaim ntawm koj cov lus qhia thiab ntawm cov cai koj tau txiav. 6 Peb tsis tau mloog koj cov tub txib yaj saub, uas lawv tau sawv koj chaw hais lus rau peb cov vaj, rau peb cov nom tswv, rau peb cov yawg koob, thiab rau tas haiv neeg nyob hauv lub teb chaws. 7 Huab Tais, koj yog tus tau txoj kev ncaj ua koj trug, peb yog tus tau kev txaj muag hnub no, peb sawv daws uas nyob Yus Das, nyob Yes Lus Xas Les, tas cov His Xas Lais tib si, cov nyob deb nyob ze, nyob tas qhov txhia chaw uas koj ntiab peb mus nyob, vim peb txoj kev ntxeev siab rau koj. 8 HUAB TAIS, peb tau kev txaj muag, peb thiab peb cov vaj, peb cov nom tswv, peb phaj txiv tib si vim peb tau ua txhaum rau koj. 9 Huab Tais peb tus Tswv Ntuj yog tus zoo muaj kev khuv leej thiab kev zam txhaum, hos peb tau ntxeev siab rau nws lawm, 10 thiab peb tsis tau mloog HUAB TAIS peb tus Tswv Ntuj lub suab, peb tsis tau taug raws li nws txoj cai uas nws cov tub txib yaj saub tau qhia kom peb coj.

NPN 79: 8, 9, 11+13

Txais: (103:10a) Huab Tais, koj tsis txhob nplua peb raws li peb cov txhaum.

Thov koj txhob nco txog peb txheej thaud tej txhaum ntxiv;
coj koj txoj kev khuv leej tuaj rau peb sai sai,
vim peb poob rau hauv qhov qis kawg nkaus lawm.

Txais: (103:10a) Huab Tais, koj tsis txhob nplua peb raws li peb cov txhaum.

Thov koj pab peb, Tswv Ntuj peb tus cawm seej,
vim koj lub npe muaj koob meej loj;
Thov cawm peb thiab zam peb cov txhaum rau peb
kom koj lub npe tau koob meej.

Txais: (103:10a) Huab Tais, koj tsis txhob nplua peb raws li peb cov txhaum.

Thov koj cia cov neeg nyob txim lub suab ntsaj nrov tuaj txog koj;
koj siv koj lub hwj huam loj los cawm cov neeg poob rau hauv kev tuag.
Ces peb, uas yog koj haiv neeg thiab pab yaj nyob hauv koj lub nras zaub
peb yuav ua koj tsaug mus li tsis muaj caij kawg;
tiam dhau tiam peb yuav cav txog koj lub koob meej.

Txais: (103:10a) Huab Tais, koj tsis txhob nplua peb raws li peb cov txhaum.

Zaj Cav lub Moo Zoo: ZAM 6: 63C, 68C

Txais: Huab Tais Yes Xus Pleev, Tswv Ntuj Lo Lus, peb cav txog koj.

Huab Tais, koj cov lus yog Tswv Yim thiab yog txoj sia;
koj muaj cov lus pub txoj sia nyob mus li.

Txais: Huab Tais Yes Xus Pleev, Tswv Ntuj Lo Lus, peb cav txog koj.

Ntawv Moo Zoo: LK 6: 36-38

Yes Xus hais rau nws cov thwj tim tias:
36 “Nej yuav hlub neeg ib yam li nej Txiv yog tus hlub neeg.
37 Nej tsis txhob txiav txim, Ntuj thiaj yuav tsis txiav txim rau nej. Nej tsis txhob muab txim rau luag, Ntuj thiaj yuav tsis muab txim rau nej. Nej zam txhaum ces Ntuj thiaj yuav zam rau nej.
38 Nej pub rau luag, Ntuj thiaj yuav pub rau nej. Ntuj yuav xuas ib lub tawb loj los luj, yuav muab tswm muab co kom ceev thiab ntim nco lug ces yuav muab hliv rau hauv nej xub ntiag. Vim Ntuj yuav xuas lub tawb uas nej luj rau luag rov los luj rau nej.”