COV ZAJ NYEEM NRUAB LIS PIAM XYOO I 2016-2017

TIM 14 LUB 8 HLI 2017

Hnub Ob Lis Piam Kaum Cuaj Nraub Xyoo A Nruab Lis Piam Xyoo I

Hwm LN Maximilian Kolbe, Leej Choj tuag ua Tim Khawv

Zaj Nyeem Ib: TCO 10: 12-22

Mais Xes hais rau tsoom pej xeem tias:
12 His Xas Lais, HUAB TAIS nej tus Tswv Ntuj xav kom nej ua dab tsi ? Nws tsuas xav kom nej hwm HUAB TAIS nej tus Tswv Ntuj, kom nej taug nws tej kev, kom nej nyiam nws, kom nej muab tas nej lub siab nej tus ntsuj plig los tsob hwb HUAB TAIS nej tus Tswv Ntuj, 13 kom nej khaws HUAB TAIS tej lus qhia thiab nws cov kev cai lij choj uas hnub no kuv qhia ray nej, ces nej yuav tau lub neej kaj siab. 14 Nej xav saib, lub ntuj, thiab cov txheej ntuj saud, lub ntiaj teb thiab tas puas tsav yam nyob hauv ntiaj teb, puav leej yog HUAB TAIS nej tus Tswv Ntuj tug. 15 Tsis kav Huab Tais tsuas ncawg nej cov yawg koob xwb, vim nws nyiam lawv, thiab nws tau xaiv lawv caj ces los tom qab lawv uas yog nej; nyob hauv tas txhua haiv neeg, nws tsuas xaiv nej xwb xws li niaj hnub no. 16 Nej ua lub cim txiav tawv rau nej lub siab thiab nej lub xwb qwb, kom tsis txhob txhav ntxiv lawm. 17 Vim HUAB TAIS nej tus Tswv Ntuj yog tus Tswv Ntuj kav tsoom tswv ntuj, tus Huab Tais kav tsoom huab tais. Nws yog tus Tswv Ntuj loj, Tus muaj hwj huam, thiab Tus Muaj Hwv Xyeej tas nrho. Nws tsis tsa leej twg cai, nws tsis txais leej twg cov nyiaj xiab. 18 Nws txiav txim ncaj rau tus me nyuam ntsuag thiab tus poj ntsuam. Nws hlub tus pej kum neeg, nws pub mov thiab pub ris tsho rau tus pej kum neeg. 19 Nej kuj yuav tsum hlub cov pej kum neeg thiab, vim thaud nyob Hais Nkws Tos teb nej twb yog ib co pej kum neeg. 20 Nej yuav hwm thiab yuav tsob hwb HUAB TAIS nej tus Tswv Ntuj, nej yuav npuab nws, nej yuav tuav txog nws lub npe los cog lus. 21 Nws yog nej lub koob meej, nws yog nej tus Tswv Ntuj, nws tau ua tej yam loj tas nrho thiab muaj hwj xyeej txaus ntshai kawg rau nej qhov muag pom. 22 Thaum nej cov yawg koob tsiv mus nyob Hais Nkws Tos teb, lawv tsuas muaj xya caum leej xwb. Nyem no, HUAB TAIS nej tus Tswv Ntuj ua kom nej coob npaum li cov hnub qub nyob saum ntuj.”

NPN 147: 12-13, 14-15, 19-20

Txais: (12a) Yes Lus Xas Les, koj cia li cav txog Huab Tais.

Yes Lus Xas Les, cia li cav txog Huab Tais lub koob meej,
Xis Yoos, cia li cav txog koj tus Tswv Ntuj.
Vim nws tau ua kom cov tab ntawm koj cov rooj vag khov tuaj lawm,
nws tau foom hmoov zoo rau koj cov me nyuam nyob hauv koj.

Txais: (12a) Yes Lus Xas Les, koj cia li cav txog Huab Tais.

Nws xa nws lo lus qhuab qhia tuaj rau ntiaj teb;
nws lo lus khiav nrawm nroos!
Nws tseb daus los zoo li plaub yaj,
nws pov cov te los zoo li tshauv.

Txais: (12a) Yes Lus Xas Les, koj cia li cav txog Huab Tais.

Nws tau tshaj nws lo lus rau Yas Kos,
nws cov kev cai thiab lij choj rau His Xas Lais.
Nws tsis tau ua zoo li ntawd rau lwm haiv neeg twg li,
nws tsis tau qhia nws cov lij choj rau lawv paub li.

Txais: (12a) Yes Lus Xas Les, koj cia li cav txog Huab Tais.

As Les Lus yas: 2 TXLN 2: 14

Txais: As les lus yas, as les lus yas.

Tswv Ntuj siv peb lub Moo Zoo hu nej kom nej tau txais
peb tus Huab Tais Yes Xus Pleev lub koob meej ua nej tug.

Txais: As les lus yas, as les lus yas.

Ntawv Moo Zoo:l MT 17: 22-27

22 Thaum Yes Xus thiab nws cov thwj tim nyob Nkas Lis Lais teb, nws hais rau lawv tias : "Neeg Leej Tub yuav raug luag muag rau hauv tsoom neeg txhais tes. 23 Lawv yuav muab nws tua, hnub peb nws yuav sawv rov los." Ces cov thwj tim ntxhov siab kawg nkaus.
24 Thaum lawv rov qab los rau Kas Fas Naus, cov sau se rau lub Tuam Tsev Teev Ntuj tuaj cuag Pob Zeb, lawv hais rau nws tias : "Nej tus xib hwb puas them ob lub txiaj nras mas pab lub Tuam Tsev Teev Ntuj ?" 25 Pob Zeb teb tias : "Nws them." Thaum Pob Zeb los txog hauv tsev, Yes Xus xub nug nws tias : "Xis Moos, koj xav li cas ? Cov vaj kav ntiaj teb sau se ntawm leej twg ? Ntawm lawv cov tub los ntawm luag tej qhua ?" 26 Pob Zeb teb tias : "Ntawm luag tej qhua." Yes Xus hais rau Pob Zeb tias : "Yog li mas cov tub tsis tas them se li. 27 Tab sis, wb yuav tsis txhob ua kom luag to taub yuam kev. Koj mus lawm nram dej ntuj, koj pov nuv rau hauv dej; thawj tug ntses tawm tuaj, koj muab rub los, koj rua nws lub qhov ncauj, koj yuav pom ib lub txiaj nyiag, koj muab lub txiaj nyiag ntawd rau lawv kom tau them se rau kuv thiab rau koj."

TIM     15     LUB     8     HLI      2017

Hnub Peb lis Piam Kaum Cuaj Nruab Xyoo A Nruab Lis Piam Xyoo I

Hwm Niam Mab Liab Nce Mus Saum Ntuj Nrog Nws lub Cev – Thaj Txi Ntuj Hmo Ua Ntej

Zaj Nyeem Ib:       1 XWM  15:   3-4, 15-16; 16:1-2

3 Das Vis hu tas tsoom His Xas Lais tuaj sib sau nyob Yes Lus Xas Les; lawv yuav kwv HUAB TAIS lub Phij Xab Cog Lus mus rau hauv qhov chaw uas nws tau npaj tseg. 4 Das Vis kuj hu As Loos cov tub thiab hu cov Les Vis tuaj.
15 Cov Les Vis muab ib co nqaj kwv Tswv Ntuj lub Phij Xab Cog Lus nyob saum lawv xub pwg, xws li Mais Xes tau ceeb toom tseg raws li HUAB TAIS lo lus. 16 Ces Das Vis hais rau cov ua thawj nyob hauv cov Les Vis kom xaiv ib co kws hu nkauj nyob hauv lawv cov kwv tij, thiab kom lawv ntaus lawv cov twj ua paj nruag, nkauj nog ncas thiab nruas npuaj, kom nrov nrov ua ib lub ntees zoo siab lom zem loj.
16   1 Lawv coj Tswv Ntuj lub Xab Cog Lus los rau sawv daws pom thiab coj mus tso rau hauv nruab nrab lub Tsev Tsam Phooj uas Das Vis txhob txwm tsa cia txais lub Xab. Lawv hlawv tsiaj txi rauTswv Ntuj thiab lawv ua tej thaj txi Ntuj noj cov txim.  2 Thaum Das Vis hlawv tsiaj txi Ntuj thiab ua cov thaj txi Ntuj noj cov txim tas nws tuav txog HUAB TAIS lub npe, thiab nws foom hmoov zoo rau tsoom sid.

NPN      132:   6-7, 9-10, 13-14

Txais:   (  HUAB TAIS, koj sawv mus nyob pem koj lub chaw so,
      koj thiab lub Phij Xab uas muaj koj txoj kev ntshiab.

Peb hnov txog qhov ntawd nyob Es Fas Tas,
peb nrhiav tau nws tom cov nras teb Yas As.
Peb kav tsij nkag mus hauv nws lub tsev,
peb txhos caug pe ntawm nws lub rooj tiag taw.

Txais:   (  HUAB TAIS, koj sawv mus nyob pem koj lub chaw so,
      koj thiab lub Xab uas muaj koj txoj kev ntshiab.

Thov kom koj cov leej choj hnav txoj kev ncaj,
kom cov hwm koj qw zoo siab lom zem.
Vim koj tus tub txib Das Vis,
Thov koj mloog tus koj tau pleev cov lus thov.

Txais:   (  HUAB TAIS, koj sawv mus nyob pem koj lub chaw so,
      koj thiab lub Xab uas muaj koj txoj kev ntshiab.

HUAB TAIS tau xaiv Xis Yoos,
nws yeem yuav Xis Yoos los ua nws chaw nyob.
Xis Yoos yog kuv qhov chaw so mus ib txhiab ib txhis,
kuv yuav nyob txawm saum Xis Yoos, vim kuv xaiv nws.

Txais:   (  HUAB TAIS, koj sawv mus nyob pem koj lub chaw so,
      koj thiab lub Xab uas muaj koj txoj kev ntshiab.

Zaj Nyeem Ob:    1 KLN  15:   54B-57

54 Thaum yam uas txawj lwj hnav tau txoj kev tsis txawj lwj lawm thiab thaum yam uas txawj tuag hnav tau txoj kev tsis txawj tuag lawm, mas yuav muaj raws li lo lus nyob hauv Ntawv hais tias : “Txoj kev tuag tog tas rau hauv txoj kev yeej lawm. 55 Kev tuag, koj txoj kev yeej nyob qhov twg ? Kev tuag, koj tus ple muaj taug nyob qhov twg ?”
56 Kev tuag tus ple muaj taug yog kev txhaum. Kev txhaum lub zog yog txoj cai. 57 Tiam sis peb ua Tswv Ntuj tsaug, vim nws pub kev yeej rau peb nyob hauv peb tus Huab Tais Yes Xus Pleev.

As Les Lus Yas:      LK  11: 28

Txais:   As les lus yas, as les lus yas.

Cov muaj hmoov zoo yog cov uas mloog Tswv Ntuj lo lus
thiab coj raws nraim li ntawd.      

Txais:   As les lus yas, as les lus yas.

Ntawv Moo Zoo:      LK  11:   27-28

27 Thaum Yes Xus tseem hais tej lus ntawd, muaj ib tug poj niam nyob hauv nruab nrab tsoom sid tsa suab hais nrov nrov rau Yes Xus tias : "Lub plab uas tau nqa koj thiab lub xub ntiag uas pub mis rau koj tau txoj hmoov zoo !"
28 Yes Xus teb tias : "Cov uas mloog Tswv Ntuj Lo Lus thiab ua raws li Tswv Ntuj Lo Lus, mas lawv thiaj yog cov tau txoj hmoov zoo."

*********************************

TIM     15    LUB    8    HLI     2016

Hwm Niam Mab Liab Nce Mus Saum Ntuj Nrog Nws lub Cev – Thaj Txi Ntuj Thaum Nruab Hnub

Zaj Nyeem Ib:     QYTN  11:   19A; 12:1-6A, 10AB

19 Ces Tswv Ntuj lub Tuam Tsev nyob saum ntuj qhib los, yus pom tau nws Lub Phij Xab Cog Lus nyob hauv lub tuam tsev.
12   1 Muaj ib lub cim loj tas nrho tshwm nyob saum ntuj : ib tug Poj Niam hnav lub hnub, lub hli nyob hauv nws qab xib taws, Kaum ob lub hnub qub ua ib lub mom teev kub nyob saum nws taub hau. 2 Tus Poj Niam ntawd xeeb tub lawm. Nws ntsaj mob, vim nws tab tom daws cev. 3 Tseem muaj dua ib lub cim tshwm tuaj nyob saum ntuj : ib tug niag Zaj loj kawg, liab ploog cuag hluav taws. Nws muaj xya lub taub hau thiab kaum tus kub. Xya lub taub hau ntoo xya lub kaus mom kub. 4 Nws tus ko tw cheb cov hnub qub saum ntuj poob tas lawm ib feem peb; nws muab cuam pov los rau hauv ntiaj teb. Ces tus Zaj mus sawv ntawm tus poj niam uas tab tom daws cev xub ntiag, npaj nqos tus me nyuam uas tus poj niam yuav yug. 5 Tus Poj Niam yug tau tus me nyuam, yog ib tug me tub : yog tus yuav tuav ib rab cwj hlau coj tas txhua haiv neeg. Luag nqa hlo tus me nyuam mus rau ntawm Tswv Ntuj thiab ntawm nws lub theej kiab lawm. 6 Hos tus Poj Niam khiav mus nyob hauv teb chaws suab puam : nws mus nyob hauv qhov chaw uas Tswv Ntuj npaj rau nws.
10 Ces kuv hnov ib lub suab nrov loj loj saum ntuj tuaj tias : “Zaum no, kev yeej thiab kev muaj hwj huam los txog lawm, thiab peb tus Tswv Ntuj txoj kev ua Vaj thiab nws Leej Pleev lub hwj huam los txog lawm thiab.

NPN     45:   10, 11, 12, 16

Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.  

Muaj ib co ntxhais vaj ntxwv ua koj pab niam tais ntsuab,
tus poj vaj hnav kub Os Fis sawv ntawm koj sab xis.

Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.

Me ntxhais, koj mloog mog ! Koj ntsia, koj tig ntsej los mloog :
Koj txhob nco koj haiv neeg, koj niam koj txiv lub tsev ntxiv.

Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.

Tus vaj qaug siab hlo rau koj txoj kev zoo nkauj !
Nws yog koj tus huab tais, koj mus txhos caug pe ntawm nws xub ntiag.

Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.

Luag coj lawv ua ib pab muaj kev zoo siab sib law sib liag
chaws mus hauv tus vaj lub tuam tsev.

Txais:   (10bc) Tus poj vaj sawv nyob ntawm koj sab xis, nws hnav zam nyiaj zam kub.

Zaj Nyeem Ob:      1  KLN  15:   20-27

20 Leej Pleev sawv hauv cov tuag rov los lawm; nws yog thawj tug sawv rov los nyob hauv ib tsoom neeg uas mus pw tsaug zog lawm.  21 Tim ib tug neeg, ces txoj kev tuag thiaj muaj tau, kuj yog tim ib tug neeg ces txoj kev sawv hauv cov tuag rov los thiaj muaj tau thiab. 22 Ib yam li sawv daws tuag nyob hauv As Das, sawv daws kuj yuav ciaj rov los nyob hauv Leej Pleev thiab. 23 Tiam sis nyias muaj nyias lub sij hawm: Ua ntej dua cov yog Leej Pleev, tus xub sawv rov los, ces thaum txog lub hnub nyoog Leej Pleev rov tawm tuaj, mas Leej Pleev cov neeg yuav sawv rov los. 24 Ces mam yog lub caij kawg: Thaum ntawd Leej Pleev yuav muab nws txoj kev ua vaj cob rau Leej Txiv Tswv Ntuj, tiam sis yuav yog tom qab uas nws rhuav txhua txoj kev ua vaj, txhua txoj kev ua tus tswj, thiab txhua tus muaj hwj huam tas lawm tso. 25 Vim Leej Pleev yuav tsum ua vaj mus txog lub caij Leej Txiv tso tsoom yeeb ncuab tas tib si rau hauv nws qab xib taws. 26 Tus yeeb ncuab kawg, uas nws yuav rhuav, yog txoj kev tuag. 27 Vim nws tau muab tas puas tsav yam rau hauv nws qab xib taws lawm.

As Les Lus Yas:  

Txais:   As les lus yas, as les lus yas.

Mab Liab nce mus saum ntuj,
ib pab tshiab hu nkauj zoo siab.

Txais:   As les lus yas, as les lus yas.

Ntawv Moo Zoo:       LK  1:   39-56

39 Tau ob peb hnub, ces Mab Liab sawv kev mus, nws rau siab ntso mus pem toj siab, rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 41 Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. 42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas Ntuj thiaj pub kom kuv tus Huab Tais leej niam tuaj xyuas kuv ? 44 Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. 45 Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo !"
46 Ces Mab Liab hais tias : "Kuv tus plig cav txog Huab Tais lub hwj chim, 47 kuv lub tswv yim hom khaj nyob hauv Tswv Ntuj, tus Cawm kuv, 48 vim nws dauv muag ntsia nws tus ntxhais txib hauv txheej qis. Vim li ntawd, txij no mus, txhua tiam neeg yuav hais tias kuv txoj hmoov zoo, 49 vim tus Muaj Hwj Huam ua tej yam loj rau kuv, nws lub npe Ntshiab. 50 Nws lub siab hlub roos cov neeg hwm nws tiam dhau tiam. 51 Nws sab npab nthuav nws lub zog rau sawv daws pom. Cov neeg uas lub siab muab hlob, Huab Tais ua kom lawv tawg. 52 Huab Tais nchuav cov muaj hwj huam poob ntawm lawv lub theej kiab. Nws tsa cov neeg hauv txheej qis kom siab. 53 Nws pub tej yam zoo rau cov neeg tshaib noj seem noj so, hos nws ntiab cov neeg muaj rov qab mus tes qhuav. 54 Huab Tais pab nws tus tub txib His Xas Lais, vim nws nco ntsoov tias nws lub siab hlub neeg, 55 nws ua raws li nws tau tshaj rau peb cov yawg koob, nws ua zoo tas nrho rau Has Nplas Has thiab Has Nplas Has cov xeeb ntxwv mus ib txhiab ib txhis."
56 Mab Liab nrog Es Lis Xas Npes nyob peb lub hlis tej, ces nws rov mus tsev.

TIM 16 LUB 8 HLI 2017

Hnub Plaub Lis Piam Kaum Cuaj Nruab Xyoo A Nruab Lis Piam Xyoo I

Hwm LN Stephen of Hungary

Zaj Nyeem Ib: TCO 34: 1-12

1 Mais Xes sawv kev ntawm cov tiaj Mos As, nws nce mus saum lub roob Nes Npos, mus txog lub ncov roob Pis Nkas uas nyob ncaj Yes Lis Kos sab tid. HUAB TAIS muab lub teb chaws huv tib si rau Mais Xes pom : txij Nkas Las As teb mus txog ntua rau Daas teb, 2 Nes Tas Lis teb, uas yog Es Fais thiab Mas Nas Xes nkawd lub teb chaws, tas Yus Das teb mus txog lub hiav txwv Xib Fab, 3 lub teb chaws Nes Zes, lub hav Yes Lis Kos uas yog ib lub tsheej muaj txoob ntau, mus txog ntua rau thaj tsam Xos As. 4 HUAB TAIS hais rau Mais Xes tias : "Koj ntsia lub teb chaws uas kuv cog lus muab rau Has Nplas Has, His Xas Has thiab Yas Kos raws li cov lus no : 'Kuv yuav muab rau koj tsoom xeeb ntxwv nyob.' Kuv muab rau koj qhov muag pom, tiam sis koj yuav hla tsis tau mus txog cov teb chaws ntawd." 5 Mais Xes, HUAB TAIS tus tub txib tuag nyob ntawd, nws tuag hauv Mos As teb chaws, raws li HUAB TAIS tau txiav. 6 Lawv muab Mais Xes faus rau hauv lub kwj ha nyob Mos As teb ncaj ntawm Npes Pes Os sab tid. Tsis muaj leej twg paub tias Mais Xes lub ntxa nyob qhov twg kiag los txog niaj hnub no li. 7 Thaum Mais Xes tuag, nws muaj ib puas nees nkaum xyoo, nws qhov muag tseem tsis tau puas, thiab nws lub zog tseem tsis tau ntaug li. 8 Tsoom tub ki His Xas Lais quaj Mais Xes tau peb caug hnub nyob hauv lub kwj ha Mos As, ces lawv thiaj ua lub ntees tiav.
9 Yos Xuas uas yog Nuv tus tub muaj lub tswv yim thoob tsib, vim Mais Xes tau tsa tes rau saum nws lawm. Cov His Xas Lais mloog Yos Xuas lus, lawv ua raws li HUAB TAIS tau ceeb toom rau Mais Xes. 10 Txij thaum ntawd los txog tav no, tsis tau muaj dua ib tug Yaj Saub zoo li Mais Xes sawv hauv cov His Xas Lais los ntxiv lawm; Mais Xes yog tus HUAB TAIS paub tim ntsej tim muag. 11 Tsuas yog ua tau cov cim thiab cov hwj huam yees ntxwv loj cuag li Mais Xes ua uas yog HUAB TAIS tau txib kom nws mus ua nyob Hais Nkws Tos teb, tiv tus vaj Fas Las Oos thiab Fas Las Oos cov tub ncig, thiab tas nws tsoom pej xeem huv tib si, 12 thiab tsis muaj dua lwm tus yuav muab tau nws lub hwj huam loj thiab nws lub hwj xyeej txaus ntshai rau tas tsoom His Xas Lais pom li Mais Xes ntxiv lawm.

NPN 66: 1-3A, 5+8, 16-17

Txais: (20a+10b) Tswv Ntuj nto koob meej vim nws nchuav
kuv tug ntsuj plig nyob hauv hluav taws.

Tas ntiaj teb, nej qw zoo siab cav txog Tswv Ntuj ;
Nej hu nkauj cav txog nws lub npe nto koob meej,
nej tshaj tej zaj lus cav txog nws.
Nej hais rau Tswv Ntuj tias : "Koj tej hauj lwm muaj hwj xyeej ua luaj!”

Txais: (20a+10b) Tswv Ntuj nto koob meej vim nws nchuav
kuv tug ntsuj plig nyob hauv hluav taws.

Nej tuaj, nej yuav pom Tswv Ntuj cov hauj lwm,
nws cov hwj huam loj nws ua rau As das cov tub :
Tsoom haiv neeg, nej cav lus zoo txog peb tus Tswv Ntuj,
Nej qw kom lub suab cav txog nws ncha ntws mus deb.

Txais: (20a+10b) Tswv Ntuj nto koob meej vim nws nchuav
kuv tug ntsuj plig nyob hauv hluav taws.

Tas nej cov uas hwm Tswv Ntuj, nej tuaj mloog kuv piav
txog qhov uas nws tau ua rau kuv tus ntsuj plig.
Thaum kuv qhib ncauj thov nws,
Lo lus qhuas twb nyob ntawm kuv tsis nplaig lawm.

Txais: (20a+10b) Tswv Ntuj nto koob meej vim nws nchuav
kuv tug ntsuj plig nyob hauv hluav taws.

As Les Lus yas: 2 KLN 5: 19

Txais: As les lus yas, as les lus yas.

Tswv Ntuj ua kom lub ntiaj teb nrog nws rov sib raug zoo nyob hauv Leej Pleev,
nws tso cov lus pab kom neeg nrog nws rov sib raug zoo rau peb muab tshaj tawm.

Txais: As les lus yas, as les lus yas.

Ntawv Moo Zoo: MT 18: 15-20

Yes Xus hais rau nws cov thwj tim tias:
15 “Yog koj ib tug kwv tij ua txhaum rau koj, koj yuav mus cuag nws mus nrog nws tham ib leeg txog nws qhov txhaum . Yog nws mloog koj, mas koj rov tau kwv tau tij dua lawm. 16 Yog nws tsis mloog koj, koj yuav coj ib leeg los ob leeg nrog koj mus dua, kom ob tug los peb tug tim khawv nrog hnov tej lus ntawd. 17 Yog nws tsis mloog cov nrog koj mus thiab, koj yuav qhia rau lub Koom Txoos paub. Yog nws tseem tsis mloog lub Koom Txoos hais thiab, ces koj yuav saib nws zoo li ib tug neeg teev pej kum dab los ib tug tub sau se xwb.
18 Kuv hais tseeb rau nej tias, yog nej khi yam twg nyob ntiaj teb no, mas yam ntawd kuj yuav raug khi nyob saum ntuj; yog nej daws yam twg nyob ntiaj teb no, mas yam ntawd kuj yuav raug daws nyob saum ntuj. 19 Kuv rov hais tseeb rau nej dua tias : yog muaj ob leeg hauv nej hais sib haum koom suab thov dab tsi nyob ntiaj teb no, mas kuv Txiv nyob saum ntuj yuav pub yam ntawd rau nkawd. 20 Thaum ob leeg los peb leeg sib sau ua ke nyob hauv kuv lub npe, mas kuv nyob nruab nrab hauv lawv.”

TIM 17 LUB 8 HLI 2017

Hnub Tsib Lis Piam Kaum Cuaj Nruab Xyoo A Nruab Lis Piam Xyoo I

Zaj Nyeem Ib: YX 3: 7-10A, 11, 13-17

7 HUAB TAIS hais rau Yos Xuas tias : "Hnub no, kuv yuav tsa koj ua tus loj rau tas tsoom His Xas Lais pom, kom lawv paub tias kuv yuav nrog koj ib yam li kuv nrog Mais Xes. 8 Koj yuav ceeb toom rau cov Leej Choj kwv lub Phij Xab Cog Lus li no : thaum nej mus txog ntawm ntug dej Yos Las Das lawm, nej yuav mus sawv nyob hauv tus dej." 9 Ces Yos Xuas hais rau cov tub ki His Xas Lais tias : "Nej txav los mloog HUAB TAIS nej tus Tswv Ntuj cov lus !" 10 Yos Xuas hais ntxiv tias : "Nej yuav pom ib yam ua rau nej paub tias tus Tswv Ntuj muaj txoj sia nws nyob nruab nrab hauv nej, nws yuav rhuav tshem cov neeg Kas Nas Has ntawm nej hauv ntej.
11 HUAB TAIS uas yog tus Tswv kav tas lub ntiaj teb, nws lub Phij Xab Cog Lus yuav ua nej ntej mus rau hauv tus dej Yos Las Das.
13 Thaum cov Leej Choj kwv HUAB TAIS, tus Tswv kav tas lub ntiaj teb nws lub Phij Xab Cog Lus mus tsuj tus dej Yos Las Das, mas dej yuav tsis ntws ntxiv; cov dej sab pem hauv yuav nres ua ib pawg!” 14 Thaum tsoom pej xeem tso lub yeej tseg, rhuav lawv cov tsev tsam phooj thiab sawv kev mus hla tus dej Yos Las Das, mas cov Leej Choj kwv lub Phij Xab Cog Lus mus ua sawv daws ntej. 15 Thaum cov kwv lub Phij Xab Cog Lus tuaj txog ntua ntawm tus ntug dej Yos Las, mas cov Leej Choj kwv lub Phij Xab Cog Lus muab lawv ko taw nqes plhuav mus tsuj cov dej ntawm tus ntug dej tam sis ntawd; thaum ntawd yog lub caij sau nplej, mas tus dej Yos Las Das phwj dhau ob sab ntug tas lub caij ntawd. 16 Ces cov dej ntws pem hauv los cia li nres kiag tam sid, thiab teev ua ib lub pas loj zuj zus thiab dav dav zuj zus tuaj, txij ntawm As Das mus, uas yog ib lub nroog nyob ze ntawm thaj tsam Kav Tas. Hos cov dej nram qab deg uas ntws mus txog lub hiav txwv daw ntsev hu ua hiav txwv As Las Npas cia li cais tu nrho ntawm cov pem hauv lawm. Tsoom pej xeem hla dej ncaj ntawm lub tsheej Yes Lis Kos. 17 Cov Leej Choj uas kwv lub Phij Xab Cog Lus lawv sawv nres twj ywm ntawm qhov chaw dej nqhuab tas nyob hauv nruab nrab tus dej Yos Las Das, hos tas tsoom His Xas Lais kuj hla dej ntawm qhov chaw nqhuab ntawd mus txog thaum tas haiv His Xas Lais hla tus dej Yos Las Das tas.

NPN 114: 1-2, 3-4, 5-6

Txais: As les lus yas.

Thaum His Xas Lais tawm ntawm Hais Nkws Tos teb los,
thaum Yas Kos lub cuab yim tso ib haiv neeg qus tseg,
Yus Das ciaj ua chaw ntshiab rau HUAB TAIS so,
His Xas Lais ciaj ua tsev rau HUAB TAIS nyob.

Txais: As les lus yas.

Dej ntuj pom, dej ntuj zam kev khiav,
Dej Yos Las Das ntws loo rov qab,
Cov roob dhia tej plhaw xws li cov txiv laug tshis,
cov pov roob dhia paj paws xws li cov me nyuam yaj.

Txais: As les lus yas!

Cov dej ntuj, vim li cas nej khiav ?
Dej Yos Las Das, vim li cas koj ntws rov qab ?
Cov roob siab, vim li cas nej dhia tej plhaw xws li cov txiv laug tshis?
Cov pov roob, vim li cas nej dhia paj paws xws cov me nyuam yaj ?

Txais: As les lus yas!

As Les Lus Yas: NPN 119: 135

Txais: As les lus yas, as les lus yas.

Thov cia koj lub ntsej muag ci tuaj rau koj tus tub txib
Thiab thov qhia koj cov cai lij choj rau kuv.

Txais: As les lus yas, as les lus yas.

Ntawv Moo Zoo: MT 18: 21–19:1

21 Thaum ntawd, Pob Zeb txav los hais rau Yes Xus tias : “Huab Tais, yog kuv tus kwv tij ua txhaum rau kuv, kuv yuav zam rau nws pes tsawg zaus ? Kuv puas yuav zam txog xya zaus ?” 22 Yes Xus hais rau Pob Zeb tias : “Kuv tsis hais rau koj tias 'xya zaus', kuv hais rau koj tias, 'xya caum xya zaus'.”
23 “Vim li ntawd, Ntuj lub Ceeb Tsheej yog zoo li ib tug vaj uas xav nrog nws cov tub txib txheeb nws tej nyiaj txiag. 24 Thaum nws pib txheeb, lawv coj ib tug tub txib uas tshuav nws nuj nqis ib vam nras nyiaj tuaj rau nws. 25 Tus tub txib tsis muaj dab tsi them, ces tus vaj kom luag muab nws thiab nws poj niam, nws cov me nyuam thiab tas nws lub cuab tam huv si muag, los them cov nuj nqis ntawd. 26 Tus tub txib txhos caug ntua ntawm tus tswv ko taw, nws pe tus tswv, nws hais tias : “Thov koj ua siab ntev rau kuv, kuv yuav them kom tas rau koj.” 27 Tus tswv hlub tus tub txib, ces nws tso tus tub txib mus thiab tseem zam cov nuj nqis huv tib si rau nws. 28 Thaum tus tub txib tawm rov qab mus, nws ntsib nws ib tug phooj ywg tib txib, uas tshuav nws nqi ib puas lub txiaj nyiag. Tus tub txib ntawd nthos nkaus nws tus phooj ywg, zawm tus phooj ywg caj pas, thiab hais tias : “Them qhov nqi koj tshuav los rau kuv.” 29 Nws tus phooj ywg txhos caug ntua ntawm nws ko taw thov tias : “Thov koj ua siab ntev rau kuv, kuv yuav them kom tas rau koj.” 30 Tab sis tus tub txib ntawd tsis kam li, nws tawm mus muab nws tus phooj ywg kaw hauv tsev loj faj mus txog hnub tus phooj ywg them nuj nqis tas huv tib si rau nws. 31 Tus tub txib cov phooj ywg pom nws ua li ntawd, lawv chim kawg, lawv mus qhia tej ntawd rau lawv tus tswv. 32 Ces tus vaj hu tus tub txib tuaj, nws hais rau tus tub txib ntawd tias : “Tub txib siab phem dab tsi ! Cov nuj nqis uas koj tshuav ntawm kuv, kuv twb zam tas huv si rau koj, vim koj thov kuv. 33 Ua cas koj tsis hlub koj tus phooj ywg zoo li kuv tau hlub koj ?" 34 Ces tus vaj npau taws heev, nws muab tus tub txib tso rau luag tsim txom mus txog hnub nws them nws cov nuj nqis tas huv tib si. 35 Kuv Txiv nyob saum Ntuj kuj yuav ua ib yam li ntawd rau nej thiab, yog tias nej txhua tus tsis zam hauv nruab siab rau nej ib tug kwv tij.
19 1 Thaum Yes Xus hais cov lus ntawd tas, nws tso Nkas Lis Lais teb tseg, nws mus rau Yus Das teb, sab dej Yos Las Das tim ub.

TIM 18 LUB 8 HLI 2017

Hnub Rau Lis Piam Kaum Cuaj Nruab Xyoo A Nruab Lis Piam Xyoo I

Zaj Nyeem Ib: YOS XUAS 24: 1-13

1 Yos Xuas hu tas nrho cov xeem His Xas Lais tuaj sib sau nyob Xis Kes. Ces nws hu cov txwj laus His Xas Lais, cov thawj coj, cov txiav txim thiab cov tub tuav hauj lwm tuaj sawv nyob ntawm Tswv Ntuj xub ntiag. 2 Ces Yos Xuas hais rau tsoom sid sawv daws tias : " HUAB TAIS tsoom His Xas Lais tus Tswv Ntuj hais li no : ‘Thaum ub, nej cov yawg koob nyob sab dej tid. Yog Tes Las uas nws yog Has Nplas Has thiab Nas Hos nkawd txiv. Thaud, lawv teev lwm cov dab. 3 Kuv tau hu nej txiv Has Nplas Has tawm sab ntug dej tid los thiab tau coj nws mus hla tas nrho cov teb chaws Kas Nas Has. Kuv xav pub kom nws tsob noob huam vam coob tuaj ces kuv pub His Xas Has rau nws. 4 Kuv pub Yas Kos thiab Es Xas Ws rau His Xas Has. Kuv muab lub roob Xes Is rau Es Xas Ws nyob ua nws tug. Tiam sis Yas Kos thiab nws cov tub tsiv mus nyob Hais Nkws Tos teb lawm. 5 Ces kuv thiaj tau xa Mais Xes thiab As Loos nkawd mus thiab tau tso xwv txheej loj los raug Hais Nkws Tos teb raws li cov hwj huam kuv tau ua nyob hauv lawv thiab tom qab ntawd. 6 Thaum nej phaj txiv thiab nej los txog ntawm hiav txwv, mas cov Hais Nkws Tos caij tsheb caij nees tuaj caum nej txog ntawm lub Hiav Txwv Liab. 7 Ces nej cov txiv quaj hu txog HUAB TAIS, nws thiaj tso kev tsaus ntuj tuaj kem nej ntawm cov Hais Nkws Tos, thiab nws tso dej hiav txwv nphau los nyab lawv tuag tas . Nej qhov muag tau pom tej yam kuv ua nyob Hais Nkws Tos teb tas, nej tseem tau los nyob ntev xyoo nyob hauv teb chaws suab puam. 8 Ces kuv tau coj nej los txog hauv cov As Mos Lis lub teb chaws uas nyob sab dej Yos Las Das tim ub. Lawv sawv ua rog ntaus nej, tab sis kuv muab lawv rau hauv nej tes, kom nej tau lawv lub teb chaws los ua nej tug, thiab kuv tau ua kom lawv tawg tas. 9 Ces Npas Lav uas yog tus vaj Mos As thiab yog Xis Pos tub, kuj tau sawv ua rog rau His Xas Lais. Nws tso neeg mus hu Npas Las uas yog Pes Os tub, tuaj koom lus phem rau nej. 10 Tab sis kuv tsis kam mloog Npas Las, ces Npas Las tseem yuav tsum tau foom lus zoo rau nej thiab kuv tau cawm nej dim ntawm Npas Lav txhais tes. 11 Thaum nej hla dhau dej Yos Las Das los txog Yes Lis Kos lawm, cov neeg kav Yes Lis Kos ua rog rau nej. Lawv yog cov As Mos, cov Pes Lis Xis, cov Kas Nas Has, cov His Tis, cov Zis Nkas Sis, cov His Vis thiab cov Yes Npws Xis, tab sis kuv tau muab lawv tso rau nej tes tib si. 12 Kuv tau tso ib co nkawj ua nej ntej mus caum ob tug vaj As Mos khiav, ces nej tsis tau siv ntaj los siv hneev li. 13 Kuv tau muab ib lub teb chaws uas nej tsis tau khwv tsim rau nej; cov tsheej los tsis yog nej txhim; cov vaj txiv cawv thiab vaj txiv ntoo roj uas niaj hnub nej noj los tsis yog tau khwv cog."

NPN 136: 1-3, 16-18, 21-22+24

Txais: Huab Tais txoj kev khuv leej nyob mus li.

Nej ua HUAB TAIS tsaug, vim nws siab zoo,
nws txoj kev hlub nyob tas ib txhiab ib txhis.
Nej ua tus Tswv Ntuj kav tas tsoom tswv ntuj tsaug,
vim nws txoj kev hlub nyob tas ib txhiab ib txhis.
Nej ua tus HUAB TAIS kav tas tsoom huab tais tsaug,
vim nws txoj kev hlub nyob tas ib txhiab ib txhis.

Txais: Huab Tais txoj kev khuv leej nyob mus li.

Nws coj nws haiv neeg hla dhau teb chaws suab puam,
vim nws txoj kev hlub nyob tas ib txhiab ib txhis.
Nws ntaus cov vaj loj kom lawv qaug,
vim nws txoj kev hlub nyob tas ib txhiab ib txhis.
Nws tua tej vaj muaj hwj xyeej kom lawv tuag,
vim nws txoj kev hlub nyob tas ib txhiab ib txhis,

Txais: Huab Tais txoj kev khuv leej nyob mus li.

Nws muab lawv lub teb chaws los pub ua cuab tam,
vim nws txoj kev hlub nyob tas ib txhiab ib txhis,
ua cuab tam rau nws tus tub txib His Xas Lais,
vim nws txoj kev hlub nyob tas ib txhiab ib txhis.
nws rub peb dim ntawm yeeb ncuab,
vim nws txoj kev hlub nyob tas ib txhiab ib txhis.

Txais: Huab Tais txoj kev khuv leej nyob mus li.

As Les Lus Yas: 1 TXLN 2: 13

Txais: As les lus yas, as les lus yas.

Nej txais Tswv Ntuj lo lus txhob txais li yog neeg lo lus xwb ;
nej yuav txais kom raws li yeej yog Tswv Ntuj Lo Lus tiag tiag.

Txais: As les lus yas, as les lus yas.

Ntawv Moo Zoo: MT 19: 3-12

3 Ib co Fas Lis Xais los cuag Yes Xus, lawv xav sim nws, lawv hais rau nws tias : “Ib tug txiv neej puas muaj cai nrauj nws poj niam vim li cas los tau ? ” 4 Yes Xus teb tias : “Nej tsis tau nyeem tias, thaum chiv lub keeb, tus Tsim neeg, nws tsim kom muaj txiv neej thiab poj niam, 5 thiab nws hais tias : ‘Vim qhov ntawd, mas txiv neej yuav tso nws niam nws txiv tseg mus npuab nws poj niam, ob tug ntawd yuav ua ib lub cev nqaij xwb’ no lod? 6 Vim li ntawd, nkawd tsis yog ob leeg lawm, nkawd yog ib lub cev nqaij lawm xwb. Qhov uas Tswv Ntuj sau los ua ke, mas neeg yuav tsis txhob muab cais.” 7 Lawv teb rau Yes Xus tias : “Vim li cas Mais Xes ho qhia kom ua ib daig ntawv nrauj rau yus poj niam ces yus muab nws nrauj tau?" 8 Yes Xus hais rau lawv tias : “Yog vim nej lub siab twm xeeb dhau, ces Mais Xes thiaj tso lus kom nej nrauj tau poj niam. Tab sis txij thaum chiv lub keeb los, mas tsis yog li ntawd. 9 Kuv hais rau nej tias: leej twg nrauj nws poj niam, yog tsis yog vim kev sib yuav txhaum cai, thiab nws ho rov mus yuav dua lwm tus, mas nws yog ib tug muaj txij nkawm mus deev hluas. Hos tus uas mus yuav tus luag muab nrauj lawm los yog ib tug muaj txij nkawm mus deev hluas.”
10 Cov thwj tim hais rau Yes Xus tias: “Yog muaj li koj hais txog ntawm tus txiv neej thiab nws poj niam tiag, mas txhob yuav poj niam zoo dua." 11 Yes Xus hais rau lawv tias : “Tsis yog sawv daws yuav to taub cov lus no, tsuas yog cov uas Ntuj pub rau mas lawv thiaj to taub. 12 Muaj ib co neeg yuav tsis tau txij nkawm, vim lawv yeej yug los zoo li ntawd. Muaj ib co, vim neeg muab lawv sam lawm. Hos muaj ib co, yog lawv txhob txwm tsis yuav txij nkawm vim Ntuj lub Ceeb Tsheej. Leej twg txawj to taub, mas yeej meem cia nws to taub.”

TIM 19 LUB 8 HLI 2017

Hnub Xya Lias Piam Kaum Cuaj Nruab Xyoo A Nruab Lis Piam Xyoo I
Hwm LN John Eudes

Zaj Nyeem Ib: YOG XUAS 24: 14-29

Nyob Xis Kes, Yos Xuas hais rau cov His Xas Lais tias :
14 "Tsoom His Xas Lais, nyem no, nej yuav hwm HUAB TAIS thiab tsob hwb nws tiag tiag thiab tas nej lub siab lub ntsws. Nej muab cov dab uas nej phaj txiv teev nyob ntawm tus dej sab tid thiab nyob Hais Nkws Tos teb tso pov tseg, nej los tsob hwb HUAB TAIS. 15 Tab sis yog nej tsis zoo siab tsob hwb HUAB TAIS, mas nej cia li xaiv ib co dab uas nej xav tsob hwb hnub no. Saib nej puas yuav xaiv nej phaj txiv lawv cov dab uas lawv teev nyob sab dej tid, los nej puas xaiv cov As Mos Lis cov dab, uas nyem no nej nyob hauv lawv teb chaws ? Ntawm kuv thiab kuv tsev neeg mas peb yuav tsob hwb HUAB TAIS." 16 Ces tsoom sid teb tias : "Peb yuav tsis tso HUAB TAIS pov tseg mus teev lwm cov dab li ! 17 Vim HUAB TAIS peb tus Tswv Ntuj yog tus tau coj peb phaj txiv thiab coj peb tawm hauv Hais Nkws Tos teb los , tawm ntawm lub tsev muab peb yuam ua lawv qhev los. Nws tau ua hwj huam loj rau peb qhov muag pom xyeem. Nws tau pov hwm peb ntawm txhua txoj kev peb tau taug thiab txuag peb ntawm txhua haiv neeg uas peb tau hla hauv lawv. 18 HUAB TAIS tseem tau caum tas cov haiv neeg thiab cov As Mos Lis uas nyob hauv lub teb chaws no kom lawv khiav tawm ntawm peb hauv ntej. Peb kuj yuav tsob hwb HUAB TAIS thiab vim nws yog peb tus Tswv Ntuj."
19 Ces Yos Xuas hais rau tsoom sid tias : "Ntshai tsam nej yuav tsob hwb HUAB TAIS tsis tau, vim nws yog ib tug Tswv Ntuj ntshiab, nws yog ib tug Tswv Ntuj muaj khib, nws yuav tsis zam nej tej kev ua tsis zoo thiab nej tej txhaum rau nej, 20 yog tias nej tso HUAB TAIS pov tseg mus tsob hwb cov pej kum dab; thaum ntawd HUAB TAIS yuav tso nej tseg thiab yuav xa xwv txheej tuaj rau nej, nws yuav ua kom nej ploj tas txawm tias nws xub tau ua zoo rau nej lawm." 21 Tsoom sid teb rau Yos Xuas tias : "Yuav tsis muaj li koj hais, peb yuav tsob hwb HUAB TAIS." 22 Ces Yos Xuas hais rau tsoom sid tias : "Nej rov ua tim khawv zeem tias nej tau xaiv txoj kev tsob hwb HUAB TAIS rau nej." Lawv teb tias : "Peb ua tim khawv!" 23 Yos Xuas hais tias : "Ua li mas nej ntiab pej kum neeg cov dab uas nyob hauv nej tawm, thiab nej muab nej lub siab tig los rau HUAB TAIS His Xas Lais tus Tswv Ntuj." 24 Tsoom sid teb rau Yos Xuas tias : " HUAB TAIS peb tus Tswv Ntuj yog tus peb yuav tsob hwb; peb yuav mloog nws hais !"
25 Hnub ntawd Yos Xuas nrog tsoom sid cog lus. Nws tsa ib co txhooj thiab ib txog cai rau lawv coj nyob Xis Kes. 26 Yos Xuas sau cov lus ntawd tseg rau hauv phau ntawv hais txog Tswv Ntuj Txoj Cai; thiab nws muab ib lub pob zeb loj loj los teeb rau hauv tsob qab ntoo uas yog HUAB TAIS lub tsev ntshiab. 27 Yos Xuas hais rau tas tsoom sid tias : "Nej ntsia, lub pob zeb no ua tim khawv txiav txim rau peb vim nws tau hnov cov lus uas HUAB TAIS hais rau peb tas tib si thiab nws yuav ua tim khawv txiav txim rau nej, yog tias nej ua tsis ncaj rau nej tus Tswv Ntuj." 28 Ces Yos Xuas tso sawv daws nyias rov mus nyias vaj nyias tsev.
29 Thaum tej xwm no tshwm sim tuaj tas lawm, mas Yos Xuas uas yog Nuv tus tub thiab yog Huab Tais tus tub txib thiaj tuag, nws muaj ib puas kaum xyoo.

NPN 16: 1-2A+5, 7-8, 11

Txais: (5a) Huab Tais, koj yog kuv lub cuab tam.

Tswv Ntuj, thov koj txuag kuv, vim kuv tuaj nkaum hauv koj.
Kuv hais rau HUAB TAIS tias: " Koj yog kuv tus HUAB TAIS !”
Huab Tais, kuv lub cuab tam, kuv lub ntim,
Koj yog tus tuav rawv kuv txoj hmoo.

Txais: (5a) Huab Tais, koj yog kuv lub cuab tam.

Kuv cav lus zoo txog tus HUAB TAIS uas qhia kuv xav tswv yim,
Tab yog hmo ntuj kuv lub siab ntsws tseem txhib kuv.
Kuv cia HUAB TAIS nyob ntawm kuv xub ntiag tsis tseg,
Vim nws nyob ntawm kuv sab xis, kuv yuav tsis qaij tsis qaug

Txais: (5a) Huab Tais, koj yog kuv lub cuab tam.

Koj yuav qhia kuv taug txoj kev mus rau txoj sia,
koj yuav qhia kuv paub txog txoj kev zoo siab
puv npo nyob ntawm koj xub ntiag,
txog txoj kev nplij siab tsis txawj kawg nyob ntawm koj sab xis.

Txais: (5a) Huab Tais, koj yog kuv lub cuab tam.

As Les Lus Yas: MT 11: 25

Txais: As les lus yas, as les lus yas.

Kuv cav txog koj, Leej Txiv, Huab Tais kav lub ntuj lub teb,
koj tau qhia tej yam tob txog Ntuj Ceeb Tsheej rau cov neeg me paub.

Txais: As les lus yas, as les lus yas.

Ntawv Moo Zoo: MT 19: 13-15

13 Thaum ntawd, muaj neeg coj ib co me nyuam yaus tuaj rau Yes Xus kom Yes Xus tsa tes thov Ntuj rau lawv, tab sis cov thwj tim cem cov neeg ntawd.
14 Yes Xus thiaj hais tias : “Nej cia cov me nyuam yaus ntawd tuaj cuag kuv, nej txhob txwv lawv ; vim Ntuj lub Ceeb Tsheej yog cov neeg zoo li cov me nyuam no tug.”
15 Ces Yes Xus tsa tes rau saum cov me nyuam ntawd tas, nws mam mus ntxiv.

TIM 21 LUB 8 HLI 2017

Hnub Ob Lis Piam Nees Nkaum Nruab Xyoo A Nruab Lis Piam Xyoo I
Hwm LN Vaj Qhia Pis Yus X

Zaj Nyeem Ib: TXWJ LAUS TIV THAIV 2: 11-19

11 Cov His Xas Lais ua tsis ntxim HUAB TAIS siab, lawv mus tsob hwb cov dab Npas As. 12 Lawv tso HUAB TAIS lawv cov yawg koob tus Tswv Ntuj pov tseg; HUAB TAIS twb yog tus coj lawv tawm hauv Hais Nkws Tos teb los. Lawv mus teev lwm cov dab, mus nrog cov pej kum haiv neeg nyob ib ncig ntawm lawv teev lawv cov dab. Lawv mus khoov pe hawm cov dab ntawd, lawv ua HUAB TAIS npau taws. 13 Lawv tso HUAB TAIS tseg, lawv mus tsob hwb Npas As thiab As Tas Tes. 14 Ces HUAB TAIS thiaj npau taws rau cov His Xas Lais, nws tso lawv rau tub sab tes, tub sab thiaj tuaj lwg lawv; thiab nws tso lawv rau lawv cov yeeb ncuab uas nyob ib ncig ntawm lawv tes, ces lawv tiv tsis yeej cov yeeb ncuab ntawd li. 15 Thaum twg lawv sawv kev mus qhov twg mas HUAB TAIS txhais tes tsis pab lawv, nws ua kom lawv tau txoj hmoov phem raws li HUAB TAIS tau hais rau lawv thiab tau cog lus rau lawv lawm, ces lawv raug kev txom nyem loj kawg nkaus. 16 Ces HUAB TAIS thiaj li tso ib co Txwj Laus Tiv Thaiv sawv tuaj cawm cov His Xas Lais dim ntawm cov neeg tuaj lwg lawv tes. 17 Tab sis cov His Xas Lais kuj tsis mloog cov Txwj Laus Tiv Thaiv lus li thiab. Lawv tseem ntxeev siab mus teev thiab pe lwm cov dab; tsis ntev xwb, lawv twb ncaim ntawm lawv cov yawg koob txoj kev lawm, uas yog mloog HUAB TAIS cov lus qhia; lawv tsis ua li ntawd.
18 Thaum HUAB TAIS tsa cov Txwj Laus Tiv Thaiv tuaj pab lawv, mas HUAB TAIS nrog nraim tus Txwj Laus uas nyob lub sij hawm ntawd. Tas lub caij tus Txwj Laus tseem ua neej nyob, mas Huab Tais txuag cov His Xas Lais ntawm lawv cov yeeb ncuab, vim HUAB TAIS lub siab hlub lawv thiab tsis xav kom lawv nroo lawv quaj tias luag hiam lawv. 19 Tab sis thaum twg tus Txwj Laus Tiv Thaiv tuag lawm mas lawv rov qab tig mus ua phem li qub; lawv tseem ua phem dua lawv phaj txiv phaj yawg lawm thiab. Lawv mus teev lwm cov dab, mus tsob hwb thiab pe hawm lwm cov dab, lawv yeej ua siab tawv qhawv tsis kam tso lawv txoj kev ua phem thiab tus yam ntxwv tsis zoo ntawd pov tseg li.

NPN 106: 34-35, 36-37, 39-40, 43AB+44

Txais: (4a) Thov koj nco txog peb, Huab Tais, vim koj nyiam koj haiv neeg.

Lawv tsis rhuav lwm cov neeg kom ploj tas
raws li HUAB TAIS tau kom lawv ua.
Lawv tseem mus nrog lwm cov haiv neeg sib fim,
Thiab lawv xyaum ua raws li cov neeg ntawd.

Txais: (4a) Thov koj nco txog peb, Huab Tais, vim koj nyiam koj haiv neeg.

Lawv tsob hwb lwm haiv neeg cov mlom,
ces cov mlom ntawd yog ib rooj ntxiab cuab tau lawv.
Lawv muab lawv cov tub thiab
lawv cov ntxhais tua txi rau dab phem.

Txais: (4a) Thov koj nco txog peb, Huab Tais, vim koj nyiam koj haiv neeg.

Tej yam lawv ua ua kom lawv tsis dawb huv,
lawv tej hauj lwm ua kom lawv zoo li niam ntiav txiv ntiav.
HUAB TAIS lub siab npau taws rau nws haiv neeg,
ces nws tsis xav ntsia nws lub cuab tam.

Txais: (4a) Thov koj nco txog peb, Huab Tais, vim koj nyiam koj haiv neeg.

Ntau zaus, nws tau npo lawv dim,
tab sis lawv muaj ib lub tswv yim ua neeg ntxeev siab.
Txawm li ntawd los nws tseem hlub lawv thaum lawv txom nyem,
thaum nws hnov lawv lub suab quaj .

Txais: (4a) Thov koj nco txog peb, Huab Tais, vim koj nyiam koj haiv neeg.

As Les Lus Yas: MT 5: 3

Txais: As les lus yas, as les lus yas.

Cov muaj hmoov zoo yog cov pluag hauv nruab siab,
vim Ntuj lub Ceeb Tsheej yog lawv li.

Txais: As les lus yas, as les lus yas.

Ntawv Moo Zoo: MT 19: 16-22

16 Muaj ib tug neeg tuaj cuag Yes Xus, nws hais rau Yes Xus tias : “Xib Hwb siab zoo, kuv yuav ua tej yam zoo twg, kuv thiaj tau txoj sia nyob mus li ?” 17 Yes Xus teb rau nws tias : “Vim li cas koj nug kuv txog qhov zoo ? Tsuas muaj tib leeg xwb thiaj yog tus zoo, yog Tswv Ntuj. Yog koj xav muaj txoj sia, mas koj yuav ua raws li cov lus qhia.” 18 Tus ntawd hais tias : “Cov lus qhia twg ?” Yes Xus hais rau nws tias : “Koj txhob tua neeg, koj txhob zes luag txij luag nkawm, koj txhob ua tub sab, koj txhob ua tim khawv cuav, 19 koj hwm koj niam koj txiv, koj yuav nyiam tus nyob ze koj ib yam li koj nyiam koj.” 20 Tus tub hluas hais rau Yes Xus tias : “Kuv yeej ua raws li ntawd tas huv tib si txij thaum kuv yau los lawm. Tseem tshuav dab tsi kuv tsis tau ua?” 21 Yes Xus hais rau nws tias : “Yog koj xav kom koj ua zoo tshaj, mas koj rov mus muab txhua txhia yam uas yog koj tug muag, muab pub rau cov pluag, kom koj muaj ib lub cuab tam muaj nqis loj nyob saum ntuj, ces koj los raws kuv." 22 Tus tub hluas hnov cov lus no tas, nws rov mus tsev ib tug mluas mlob, vim nws muaj cuab yeej cuab tam ntau.

TIM 22 LUB 8 HLI 2017

Hnub Peb Lis Piam Nees Nkaum Nruab Xyoo A Nruab Lis Piam Xyoo I
Hwm txog Niam Mab Liab txoj kev ua Poj Vaj

Zaj Nyeem Ib: TLTT 6: 11-24A

11 HUAB TAIS tus Tshiab nqes los zaum hauv tsob qab ntoo qhib nyob Os Fas uas yog Yos As tus neeg As Npis Xes tsob. Nws tus tub Zes Des Oos tab tom ntaus nplej hauv lub zom cawv kom nws tau khiav nkaum ntawm cov Mas Dias. 12 HUAB TAIS tus Tshiab yees tawm los rau Zes Des Oos pom, nws hais tias : "Tub rog siab tawv muaj peev xwm! HUAB TAIS nrog koj nyob !" 13 Zes Des Oos teb rau nws tias : "HUAB TAIS ! Yog HUAB TAIS nrog peb tiag, tim li cas peb thiaj raug tas ib puas tsav yam zoo li no ? Nws cov hwj huam loj uas peb phaj txiv piav rau peb thaum lawv hais tias: ‘HUAB TAIS yog tus coj peb tawm ntawm Hais Nkws Tos teb los,’ nyob qhov twg? Nyem no nws tso peb pov tseg, nws cia peb poob rau hauv cov Mas Dias txhais tes lawm." 14 Ces HUAB TAIS tig los rau Zes Des Oos, nws hais tias : "Koj mus, koj siv koj lub zog mus cawm cov His Xas Lais ntawm cov Mas Dias tes. Kuv yog tus xa koj mus." 15 Zes Des Oos teb tias : " HUAB TAIS, kuv yuav ua li cas cawm tau His Xas Lais ? Kuv lub xeem yog xeem pluag tshaj nyob Mas Nas Xes teb, thiab kuv yog tus tsis muaj hwj chim tshaj cov nyob hauv kuv txiv tsev." 16 HUAB TAIS hais rau nws tias : "Kuv yuav mus nrog koj, ces koj yuav ntaus yeej cov Mas Dias, yam li lawv yog ib leeg xwb." 17 Zes Des Oos hais tias : "Yog kuv tau ua neeg xis koj siab, mas thov koj ua ib lub cim qhia kuv kom kuv paub tias yog koj hais lus rau kuv tiag. 18 Thov koj tsis txhob txav mus deb ntawm no, koj tos kom kuv rov tuaj cuag koj tso; kuv yuav nqa paj tshab tuaj txi rau koj, kuv yuav coj tuaj tso rau ntawm koj xub ntiag." Ces HUAB TAIS teb tias : "Kuv yuav nyob tos koj rov tuaj txog tso."
19 Zes Des Oos thiaj mus tom tsev. Nws tua ib tug tshis thiab nws yeem ib tawb hmoov nplej ua ib co mov tsis xyaw poov xab. Nws muab co nqaij tso rau hauv ib lub pob tawb, hos cov kua rau hauv ib lub lauj kaub. Ces nws nqa tuaj rau HUAB TAIS nyob hauv tsob qab ntoo qhib thiab muab fij rau nws. 20 Tswv Ntuj tus Tshiab hais rau Zes Des Oos tias : "Koj muab nqaij thiab muab cov mov tsis xyaw poov xab tso rau saum lub pob zeb no, thiab koj hliv cov kua rau." Zes Des Oos ua li ntawd tas, 21 ces HUAB TAIS tus Tshiab cev tus ntsis pas uas nws tuav ntawm nws tes mus chwv cov nqaij thiab cov ncuav mov. Hluav taws cia li cig hauv lub pob zeb tuaj kub cov nqaij thiab cov ncuav mov tas tib si. Ces HUAB TAIS tus Tshiab ploj ntais ntawm nws qhov muag lawm. 22 Zes Des Oos paub tias yog HUAB TAIS tus Tshiab tiag. Nws txawm hais tias : "Kuv tus HUAB TAIS Tswv Ntuj, aw ! Kuv txawm tau pom koj tus Tshiab tim ntsej tim muag kiag los !" 23 HUAB TAIS hais rau nws tias : "Koj nyob kaj siab lug ! Tsis txhob ntshai ! Koj yuav tsis tuag." 24 Zes Des Oos tsa ib lub thaj txi HUAB TAIS nyob ntawd, thiab nws hu qhov chaw ntawd ua "HUAB TAIS Kev Thaj Yeeb."

NPN 85: 9, 11-12, 13-14

Txais: (9b) Huab Tais tham txog kev thaj yeeb rau nws haiv neeg.

Kuv yuav hnov Tswv Ntuj tshaj tawm txog dab tsi;
Huab Tais, nws tshaj tawm txog kev thaj yeeb
rau nws haiv neeg thiab cov neeg ntseeg nws,
thiab rau cov tso siab tas nrho rau nws.

Txais: (9b) Huab Tais tham txog kev thaj yeeb rau nws haiv neeg.

Kev ua sia zoo thiab kev tseeb yuav los sib ntsib,
Kev ncaj ncees thiab kev thaj yeeb yuav los sib qawg.
Kev tseeb yuav txhawv tawm hauv ntiaj teb los,
kev ncaj ncees yuav dauv muag ntsia saum ntuj tuaj.

Txais: (9b) Huab Tais tham txog kev thaj yeeb rau nws haiv neeg.

HUAB TAIS yuav pub nws txoj kev nplua nuj,
ces peb cov av yuav ntsu qoob ntsu loo dua qub.
Kev ncaj ncees yuav taug kev ua nws ntej,
kev cawm yuav taug kev raws nws cov hneev taw.

Txais: (9b) Huab Tais tham txog kev thaj yeeb rau nws haiv neeg.

As Les Lus Yas: 2 KLN 8: 9

Txais: As les lus yas, as les lus yas.

Yes Xus Pleev tau ua neeg pluag txawm tias nws yog tus nplua nuj,
kom xwv nws txoj kev pluag ua kom nej nplua nuj tuaj.

Txais: As les lus yas, as les lus yas.

Ntawv Moo Zoo: MT 19: 23-30

23 Yes Xus thiaj hais rau nws cov thwj tim tias : “Kuv hais tseeb rau nej : ib tug neeg nplua nuj yuav ceeb laj nkag mus tau hauv Ntuj lub Ceeb Tsheej. 24 Kuv rov hais dua rau nej : ib tug ntxhuav yuav nkag hauv ib lub qhov koob, mas tseem yooj yim dua ib tug neeg nplua nuj yuav nkag mus hauv Ntuj lub Ceeb Tsheej.” 25 Cov thwj tim hnov cov lus ntawd, lawv yoob tas, lawv hais tias : “Yog li leej twg thiaj yuav tau txais kev cawm ?” 26 Yes Xus ntsia lawv, nws hais rau lawv tias : “Yog neeg xwb mas yeej tsis tau li. Tab sis, ntawm Tswv Ntuj, mas yuav ua tau tas ib puas tsav yam.”
27 Ces Pob Zeb teb rau Yes Xus tias : “Yog li, peb tau tso ib puas tsav yam tseg, peb los raws koj lawm, peb yuav tau dab tsi ?” 28 Yes Xus hais rau lawv tias : “Kuv hais tseeb rau nej cov uas los raws kuv : lub zim txwv uas txhua tsav txhua yam yuav rov plhis tshiab, mas Neeg Leej Tub yuav zaum saum nws lub theej kiab muaj hwj chim, ces nej kuj yuav zaum saum kaum ob lub theej kiab, txiav txim rau kaum ob xeem lub His Xas Lais thiab. 29 Txhua tus uas tau tso vaj tse, kwv tij, nkauj muam, niam txiv, poj niam, me tub me nyuam thiab tso liaj teb tseg, vim kuv lub npe, mas tus ntawd yuav tau txais ib puas npaug tshaj qhov nws tso tseg, thiab nws tseem yuav tau txoj sia nyob mus li los ua nws tug. 30 Muaj coob leej cov ua ntej yuav tuaj tom qab, hos cov tuaj tom qab yuav tau ua ntej.”

TIM 23 LUB 8 HLI 2017

Hnub Plaub Lis Piam Nees Nkaum Nruab Xyoo A Nruab Lis Piam Xyoo I

Hwm LN Rose nyob Lima

Zaj Nyeem Ib: TLTT 9: 6-15

6 Tas cov neeg tseem ceeb nyob Xis Kes thiab cov nyob Npes Mis Los tuaj sib sau ua ke thiab lawv mus tsa As Npis Mes Les ua vaj nyob ze tsob ntoo qhib ntawm tus pej thuam nyob Xis Kes. 7 Muaj neeg mus fi xov rau Yos Tas, ces Yos Tas nce mus nyob saum lub ncov roob Nkas Lis Xis. Nws qw nrov nrov rau lawv tias : "Cov neeg tseem ceeb nyob Xis Kes, nej mloog kuv hais! Tswv Ntuj thiaj yuav mloog nej. 8 Muaj ib hnub cov ntoo sawv kev mus, lawv xav mus pleev roj tsa ib tug vaj los kav lawv. Lawv hais rau tsob txiv ntoo roj tias : ‘Koj ua peb tus vaj !’ 9 Tsob txiv ntoo roj teb lawv tias : ‘Vim li cas kuv thiaj yuav tso kuv cov roj uas dab thiab neej siv pov tseg es mus nyob piav cev yuj yeev saum cov ntoo xwb ?’ 10 Ces cov ntoo mus hais rau tsob txiv ncuav pias tias : ‘Koj ua peb tus vaj mas !’ 11 Tsob txiv ncuav pias teb lawv tias : ‘Vim li cas kuv thiaj yuav tso kuv qhov qab zib thiab kuv cov txiv pov tseg es mus nyob piav cev yuj yeev saum cov ntoo xwb?’ 12 Cov ntoo txawm mus hais rau tsob txiv cawv tias : ‘Koj los ua peb tus vaj!’ 13 Tsob txiv cawv teb tias : Vim li cas kuv thiaj yuav tso kuv cov cawv uas txawj ua kom dab thiab neej zoo siab pov tseg es mus nyob piav cev yuj yeev nyob saum cov ntoo xwb?’ 14 Ces cov ntoo mus hais rau tsob pos tias : ‘Koj los ua peb tus vaj!’ Tsob pos teb tias : ‘Yog nej ua siab ncaj tsa kuv los ua vaj kav nej tiag mas nej yuav tsum los nkaum hauv kuv qhov ntxoov ntxoo. 15 Tsis li ntawd, mas hluav taws yuav tawm hauv tsob pos tuaj kub tas cov ntoo ciab nyob Lis Npaas.’”

NPN 21: 2-3, 4-5, 6-7

Txais: (2a) Huab Tais, tus vaj zoo siab nyob hauv koj lub zog.

HUAB TAIS, tus vaj zoo siab nyob hauv koj lub zog :
koj kev yeej ua rau nws zoo siab tas nrho.
Koj tau pub rau nws raws nraim nws lub siab ntshaw.
Koj tau mloog lo lus thov uas tawm ntawm nws di ncauj los.

Txais: (2a) Huab Tais, tus vaj zoo siab nyob hauv koj lub zog.

Koj tau foom koob hmoov zoo kawg nkaus rau nws;
koj muab ib lub mom teev kub yog tseem kub rau nws ntoo.
Nws thov koj kom nws tau txoj sia, koj muab rau nws,
koj pub nws nyob ntev niaj ntau xyoo tsis txawj kawg.

Txais: (2a) Huab Tais, tus vaj zoo siab nyob hauv koj lub zog.

Nws lub koob meej nto moo loj nyob hauv koj txoj kev yeej;
koj muab hwj chim muab kev ci ntsa iab rau nws.
Koj muab nws ua ib txoj koob hmoov zoo rau txheej dhau txheej;
Koj lub ntsej muag luag ntxhi ua kom nws zoo siab.

Txais: (2a) Huab Tais, tus vaj zoo siab nyob hauv koj lub zog.

As Les Lus yas: HES NPLAWS 4: 12

Txais: As les lus yas, as les lus yas.

Tswv Ntuj lo lus muaj sia thiab ua tau hauj lwm,
nws txawj tsom tau tej tswv yim thiab tej kev xav nyob hauv neeg nruab siab.

Txais: As les lus yas, as les lus yas.

Ntawv Moo Zoo: MT 20: 1-16

Yes Xus hais zaj paj lug no rau nws cov thwj tim tias:
1 Ntuj lub Ceeb Tsheej piv tau rau ib tug tswv teb uas thaum kaj ntug, nws tawm mus nrhiav tub zog tuaj ua nws daim teb txiv cawv. 2 Nws nrog cov tub zog hais haum ib hnub ib lub txiaj nyiag ua nqe zog, ces nws xa lawv mus tom nws daim teb txiv cawv lawm. 3 Ze cuaj teev, nws tawm mus ncig, nws rov pom ib co neeg nyob dag tom tshav puam. 4 Nws hais rau lawv tias : “Nej mus ua num tom kuv daim teb txiv cawv mas, kuv yuav muab nqi kom haum rau nej.” 5 Ces lawv kuj mus lawm. Kwv yees tav su, nws rov tawm mus ncig dua, thiab thaum hnub qaij peb teev nws kuj rov mus ua li qub dua. 6 Thaum ze li tsib teev yav yuav tsaus ntuj, nws rov tawm mus ncig, nws tseem pom ib co neeg nyob dag, nws hais rau lawv tias : “Vim li cas nej nyob dag tas hnub ntawm no tsis ua dab tsi li ?” 7 Lawv hais rau nws tias : “Vim tsis muaj neeg ntiav peb.” Tus tswv hais rau lawv tias : “Nej kuj mus ua num tom kuv daim teb txiv cawv thiab.” 8 Thaum tsaus ntuj, tus tswv teb hais rau nws tus tub ceev nyiaj tias : “Koj hu cov tub zog los, koj muab nyias tus nqe zog rau nyias, pib hu cov tuaj tom qab zuj zus los xaus rau cov xub tuaj.” 9 Cov tub zog uas tuaj thaum tsib teev los txog, lawv ib leeg tau ib lub txiaj nyiag. 10 Ces cov xub xub tuaj los txog, lawv xav tias lawv yuav tau txais nqi zog ntau dua, tab sis lawv ib leej kuj tau ib lub txiaj nyiag thiab xwb. 11 Thaum lawv los txais lawv tus nqi, lawv yws rau tus tswv teb tias : 12 “Cov tuaj tom qab ua num ib nyuag teev xwb, koj muab rau lawv ib yam li muab rau peb thiab, hos peb, mas peb kwv nra hnyav thiab tiv tshav ib hnub nkaus.” 13 Ces tus tswv hais rau cov xub tuaj ib tug tias : “Npawg, kuv tsis tau ua tsis ncaj rau koj : wb tsis tau hais haum tias ib hnub ib lub txiaj nyiag no lod ? 14 Txais koj tus nqi zog, koj cia li mus. Yog kuv xav muab rau tus tuaj tom qab no, ib yam li muab rau koj ne? 15 Kuv tsis muaj cai rho kuv tej nyiaj txiag raws li kuv siab nyiam lod ? Los yog koj khib vim koj pom tias kuv siab zoo ?" 16 Li ntawd, cov tuaj tom qab yuav tau ua ntej, hos cov ua ntej yuav tuaj tom qab zoo li no.

TIM 24 LUB 8 HLI 2017

Hnub Tsib Lis Piam Nees Nkaum Nruab Xyoo A Nruab Lis Piam Xyoo I

Hwm LN Bartholomew, ib tug Hauv Paus Xa Lus; Muaj coob leej hais tias Bartholomew thiab Nathanael (Nas Tas Nais) yog tib tug xwb.

Zaj Nyeem Ib: QYTN 21: 9B-14

Ib tug tshiab los hais rau kuv tias : “Koj los, kuv yuav coj koj mus saib tus Nkauj Nyab, uas yog Leej Yaj tus Poj Niam.” 10 Ces nws nqa hlo kuv lub tswv yim mus saum ib lub roob loj roob siab, nws muab lub tsheej Ntshiab Yes Lus Xas Les uas nqes saum ntuj, pem Tswv Ntuj los rau kuv saib. Lub tsheej muaj Tswv Ntuj lub hwj chim. 11 Nws ci ntsa iab xws li ib lub pob zeb muaj nqi kawg, xws li ib lub pob zeb dawb ci lam lug xws tsom iab. 12 Muaj ib lub ntsa zeb loj thiab siab xov lub tsheej. Lub ntsa zeb muaj kaum ob lub qhov rooj vag, muaj kaum ob tug Tshiab zov cov qhov rooj ntawd. Muaj ib co npe sau rau ntawm cov qhov rooj : yog cov tub hauv kaum ob lub xeem His Xas Lais cov npe. 13 Sab Toob Fab muaj peb lub qhov rooj, Pej Fab muaj peb lub qhov rooj, Naj Fab muaj peb lub qhov rooj, Xib Fab muaj peb lub qhov rooj. 14 Lub ntsa zeb xov lub tsheej txawb rau saum kaum ob txheej taw ntsa. Muaj kaum ob lub npe sau rau saum cov taw ntsa. Yog Leej Yaj kaum ob leeg Hauv Paus Xa Lus cov npe.

NPN 145: 10-11, 12-13, 17-18

Txais: (12) Huab Tais, koj cov phooj ywg tshaj tawm txog
koj lub Ceeb Tsheej muaj hwj chim ci ntsa iab.

HUAB TAIS, cia tas koj cov hauj lwm ua koj tsaug,
thiab cia cov uas nyiam koj cav txog koj.
Cia lawv qhuas txog koj lub Ceeb Tsheej muaj hwj chim
thiab piav txog koj lub hwj huam loj.

Txais: (12) Huab Tais, koj cov phooj ywg tshaj tawm txog
koj lub Ceeb Tsheej muaj hwj chim ci ntsa iab.

Cia lawv qhia rau neeg paub txog koj lub hwj huam loj
thiab koj lub Ceeb Tsheej muaj hwj chim ci ntsa iab.
Koj lub Ceeb Tsheej yog ib lub Ceeb Tsheej txais tas cov hlob nrog cov yau,
thiab koj txoj kev tswj kav yuav nyob mus txheej dhau txheej.

Txais: (12) Huab Tais, koj cov phooj ywg tshaj tawm txog
koj lub Ceeb Tsheej muaj hwj chim ci ntsa iab.

Huab Tais tej kev yog kev ncaj
nws tej dej num yog kev hlub.
Huab Tais nyob ze cov hu txog nws,
cov uas muaj lub siab hu txog nws tiag.

Txais: (12) Huab Tais, koj cov phooj ywg tshaj tawm txog
koj lub Ceeb Tsheej muaj hwj chim ci ntsa iab.

As Les Lus Yas: ZAM 1: 49B

Txais: As les lus yas, as les lus yas.

Las Npis, koj yog Tswv Ntuj Leej Tub,
koj yog cov His Xas Lais tus vaj.

Txais: As les lus yas, as les lus yas.

Ntawv Moo Zoo: ZAM 1: 45-51

45 Fis Lis Pos ntsib Nas Tas Nais, nws hais rau Nas Tas Nais tias : "Tus uas Mais Xes tau sau txog nyob hauv Txoj Cai, thiab cov Yaj Saub tau hais txog, mas peb ntsib lawm, yog Yes Xus, Yos Xes nyob Nas Xas Les tus tub." 46 Ces Nas Tas Nais hais rau Fis Lis Pos tias : "Puas yuav muaj ib yam zoo tawm hauv Nas Xas Les tuaj tau ?" Fis Lis Pos hais rau Nas Tas Nais tias : "Koj tuaj, koj yuav pom." 47 Yes Xus pom Nas Tas Nais tuaj, nws hais txog Nas Tas Nais, nws hais tias : "Nej saib, tus ntawd yog ib tug tseem His Xas Lais uas tsis zais siab li." 48 Nas Tas Nais hais rau Yes Xus tias: "Ua cas koj paub kuv ?" Yes Xus teb rau Nas Tas Nais tias : "Thaum Fis Lis Pos tsis tau hu koj, kuv twb pom koj nyob hauv tsob qab ntoo txiv ncuav pias lawm." 49 Nas Tas Nais teb rau Yes Xus tias : "Las Npis, koj yog Tswv Ntuj Leej Tub ! Koj yog His Xas Lais tus Vaj." 50 Yes Xus hais rau nws tias : "Yog vim kuv hais rau koj tias : Kuv pom koj nyob hauv tsob qab ntoo txiv ncuav pias, mas koj thiaj ntseeg. Koj yuav pom tej yam loj dua no." 51 Ces Yes Xus hais rau Nas Tas Nais tias : "Kuv hais qhov muaj tseeb tiag rau nej: Nej yuav pom ntuj qhib los, thiab pom Tswv Ntuj cov Tshiab nce mus thiab nqes los saum Neeg Leej Tub."

TIM 25 LUB 8 HLI 2017

Hnub Rau Lis Piam Nees Nkaum Nruab Xyoo A Nruab Lis Piam Xyoo I

Hwm LN Louis; LN Joseph Calasanz

Zaj Nyeem Ib: LUV 1: 1, 3-6, 14B-16, 22

1 Lub caij uas cov Txwj Laus Tiv Thaiv kav teb chaws, lub teb chaws tau tshaib plab ib ntus. Thaum ntawd muaj ib tug txiv neej nyob Npes Les Hes, Yus Das teb, nws coj nws poj niam thiab nws ob tug tub lawv tsiv mus nyob nram cov nras tiaj Mos As.
3 Tus txiv neej Es Lis Mes Lev uas yog Nos Es Mis tus txiv, tuag nyob ntawd. Tshuav Nos Es Mis nrog nws ob tug tub nyob xwb. 4 Ob tug tub ntawd yuav poj niam nyob hauv cov neeg Mos As. Ob tug poj niam ntawd ib tug hu ua Os Pas, ib tug hu ua Luv. Lawv nyob ntawd tau kaum xyoo. 5 Ces ob tug tub Mas Loos thiab Kis Lis Yoos nkawd kuj tuag thiab. Tshuav Nos Es Mis ib leeg xwb nws tsis muaj tub tsis muaj txiv lawm. 6 Nos Es Mis thiaj npaj yuav coj nws ob tug nyab rov ntawm lub tiaj Mos As los rau nws teb chaws, vim nyob ntawd nws hnov tias Tswv Ntuj tuaj xyuas nws haiv neeg thiab pub mov rau lawv noj lawm.
14 Ces Os Pas nwj nws niam pog, nws ua ib siab rov mus nrog nws neej nws tsav nyob, tshuav Luv nrog Nos Es Mis nyob xwb. 15 Nos Es Mis hais rau Luv tias : "Koj saib koj tus viv ncaus twb rov mus hauv nws haiv neeg thiab mus coj lawv cov dab qhuas lawm. Koj ua li nws thiab koj rov mus mog !" 16 Luv teb tias : "Koj tsis txhob ntiab kuv kom kuv tso koj tseg los kom kuv ncaim koj mus ! Koj mus qhov twg, kuv yuav nrog koj mus. Koj nyob qhov twg, kuv yuav nrog koj nyob. Koj haiv neeg yuav yog kuv haiv neeg. Koj tus Tswv Ntuj yuav yog kuv tus Tswv Ntuj.”
22 Ces Nos Es Mis coj nws tus nyab Mos As hu ua Luv nrog nws rov los. Nkawd rov ntawm lub tiaj Mos As los, nkawd los txog Npes Les Hes tab tom yog lub caij pib sau qib lawm.

NPN 146: 5-6AB, 6C-7, 8-9A, 9BC-10

Txais: (1b) Kuv tus plig, koj cav lus zoo txog HUAB TAIS !

Muaj hmoov zoo yog tus tau Yas Kos tus Tswv Ntuj nres nws,
Yog tus tso siab rau HUAB TAIS nws tus Tswv Ntuj,
uas yog tus tswv tsim lub ntuj lub teb,
tsim dej ntuj thiab ib puas tsav yam nyob hauv dej.

Txais: (1b) Kuv tus plig, koj cav lus zoo txog HUAB TAIS!

Nws txoj kev tseeb nyob mus ib txhiab ib txhis;
cov raug luag quab yuam, nws tsa lawv cai,
nws pub mov rau cov neeg tshaib noj;
HUAB TAIS tso cov neeg raug txim kom dim.

Txais: (1b) Kuv tus plig, koj cav lus zoo txog HUAB TAIS!

HUAB TAIS qhib cov dig muag qhov muag,
HUAB TAIS tsa cov khoov nkoos kom sawv ntseg,
HUAB TAIS nyiam cov neeg ncaj,
HUAB TAIS pov hwm cov pej kum neeg.

Txais: (1b) Kuv tus plig, koj cav lus zoo txog HUAB TAIS!

Nws txhawb tus ntsuag nos thiab tus poj ntsuam,
nws ua kom tus siab phem tau kev tws.
HUAB TAIS yuav ua vaj mus li;
Xis Yoos, koj tus Tswv Ntuj ua vaj
mus txheej dhau txheej ! As les lus yas!

Txais: (1b) Kuv tus plig, koj cav lus zoo txog HUAB TAIS !

As Les Lus Yas: NPN 25: 4B, 5A

Txais: As les lus yas, as les lus yas.

Kuv tus Tswv Ntuj, qhia koj txoj kev rau kuv taug,
thiab coj kuv mus nyob hauv koj txoj kev tseeb.

Txais: As les lus yas, as les lus yas.

Ntawv Moo Zoo: MT 22: 34-40

34 Cov Fas Lis Xais hnov tias Yes Xus teb rau cov Xas Dus Kais tws lus, ces lawv sib sau sab laj. 35 Lawv ib tug tuaj sim Yes Xus, nws yog ib tug kws lij choj, nws nug tias : 6 “Xib Hwb, nyob hauv Txoj Cai, lo lus qhia twg loj dua cov ?” 37 Yes Xus hais rau nws tias : “Koj yuav muab tas koj lub siab, tas koj tus ntsuj plig, tas koj lub tswv yim los nyiam Huab Tais Tswv koj tus Ntuj . 38 Lo lus no yog lo lus qhia loj tshaj cov thiab yog thawj lo lus qhia. 39 Lo lus qhia ob kuj zoo ib yam thiab : koj yuav nyiam tus nyob ze koj ib yam nkaus li koj nyiam koj. 40 Tas Txoj Cai thiab cov Yaj Saub puav leej xaus tas nrho rau ob lo lus qhia no."

TIM 26 LUB 8 HLI 2017

Hnub Xya Lis Piam Nees Nkaum Nruab Xyoo A Nruab Lis Piam Xyoo I

Zaj Nyeem Ib: LUV 2: 1-3, 8-11; 4:13-17

1 Nos Es Mis tshuav nws tus txiv ib tug kwv tij txheeb. Yog ib tug neeg muaj npe thiab yog Es Lis Mes Les xeem. Nws hu ua Npuag Oo. 2 Luv uas yog neeg Mos As hais rau Nos Es Mis tias : "Thov koj kheev kuv mus nkawg ntxaib nplej nyob hauv lawv tej teb, kuv mus hais yog leej twg kheev ces kuv mus khaws tom nws qub qab." Nos Es Mis teb tias : "Me ntxhais, koj mus mas." 3 Luv thiaj mus nkawg nplej lawv cov neeg hlais nplej qab. Nws txoj hmoo mus ncaj rau hauv Npuag Oo uas yog Es Lis Mes Les tsev neeg daim teb.
8 Npuag Oos hais rau Luv tias : "Me ntxhais, koj tsis txhob mus khaws nplej nyob hauv lwm daim teb mog ! Koj tsis txhob txav mus deb ntawm no, koj raws nraim kuv cov ntxhais txib. 9 Koj ntsia ntsoov lawv hlais nplej nyob qhov twg ces koj raws nraim lawv qab. Kuv txwv tsis kheev kuv cov tub txib ua phem rau koj. Yog koj nqhis dej mas koj mus hliv hauv cov plhuaj taub lawv ce tau lawm los haus." 10 Ces Luv txhos caug ntxua khoov ti av pe Npuag Oos tias : "Vim li cas koj thiaj ua zoo rau kuv thiab saib taus kuv? Kuv yog ib tug pej kum neeg xwb !" 11 Npuag Oos teb tias : "Vim kuv tau hnov luag tej hais txog koj rau kuv, lawv piav tej koj tau ua rau koj niam pog thaum koj tus txiv tuag lawm. Koj tso koj niam koj txiv thiab koj lub teb chaws tseg thiab koj tuaj nyob ib lub teb chaws uas koj tsis tau xub paub dua li.
4 13 Ces Npuag Oos yuav Luv los ua nws poj niam. Thaum nkawd tau los nyob ua ke lawm, HUAB TAIS pub kom Luv xeeb tub, ces Luv yug tau ib tug tub. 14 Cov poj niam tuaj hais rau Nos Es Mis tias : "Kom HUAB TAIS nto koob meej ! Vim hnub no Huab Tais tseem pub ib tug xeeb ntxwv rau koj; thov kom koj nws lub npe nrov nyob hauv haiv His Xas Lais. 15 Nws yuav nplij koj thiab yuav yug koj thaum koj yav laus. Nws niam yog koj tus nyab uas hlub koj, nws zoo tshaj koj muaj xya leej tub." 16 Ces Nos Es Mis puag nkaus tus me nyuam rau hauv nws xub ntiag. Thiab nws yog tus tu tus me nyuam hlob. 17 Cov poj niam nyob ib ncig tis npe rau tus me nyuam, lawv hais tias: "Ib tug tub yug los rau Nos Es Mis lawm.” Ces lawv tis npe rau tus me nyuam hu ua Os Npes. Os Npes yog Yes Xes txiv, ces Yes Xes yog Das Vis txiv.

NPN 128: 1B-2, 3, 4, 5

Txais: (4) Ntsia saib Huab Tais foom hmoov zoo li cas rau cov uas hwm nws.

Nej cov hwm HUAB TAIS, nej txoj hmoov zoo,
thiab nej cov taug raws nws txoj kev!
Vim nej yuav tau noj lub txiv ntawm nej tej hauj lwm,
nej yuav tau hmoov zoo thiab nws yuav nyiam nej.

Txais: (4) Ntsia saib Huab Tais foom hmoov zoo li cas rau cov uas hwm nws.

Kuj tus poj niam yuav zoo li ib txoj hmab txiv cawv txi txiv ncw
nyob rau hauv koj tej kaum vaj kaum tsev,
koj cov me nyuam zoo li ib co ntoo txiv roj
nyob ncig lees koj lub phaj tsum.

Txais: (4) Ntsia saib Huab Tais foom hmoov zoo li cas rau cov uas hwm nws.

Ntsia saib, tus neeg muaj txoj hmoov zoo
yog tus ntshai HUAB TAIS.

Txais: (4) Ntsia saib Huab Tais foom hmoov zoo li cas rau cov uas hwm nws.

HUAB TAIS nyob saum roob Xis Yoos foom koob hmoov rau nej;
thov kom nej tau pom Yes Lus Xas Les vam
meej niaj hnub hauv nej lub neej.

Txais: (4) Ntsia saib Huab Tais foom hmoov zoo li cas rau cov uas hwm nws.

As Les Lus yas: MT 23: 9B, 10B

Txais: As les lus yas, as les lus yas.

Nej tsuas muaj ib leeg txiv xwb, yog tus nyob saum ntuj;
nej tsuas muaj ib tug tswv xwb, yog Leej pleev.

Txais: As les lus yas, as les lus yas.

Ntawv Moo Zoo: MT 23: 1-12

1 Yes Xus qhia tsoom sid thiab nws cov thwj tim, 2 nws hais tias : “Cov Kws Ntawv Ntshiab thiab cov Fas Lis Xais lawv zaum saum Mais Xes lub rooj zaum, 3 yog vim li ntawd mas nej yuav khaws thiab nej yuav ua tas txhua yam lawv qhia rau nej, tab sis nej txhob ua raws li lawv ua, vim tias lawv tsuas hais xwb, lawv tsis ua raws li lawv hais. 4 Lawv pav tej lub nra hnyav hnyav ris tsis taus, lawv muab nog rau saum cov neeg xwb pwg, tab sis lawv twb tsis kam cev ib tug ntiv tes los kov li. 5 Lawv ua txhua tsav txhua yam kom neeg pom xwb. Yog li ntawd, lawv thiaj coj tej txws ntim Txoj Cai dav dav, thiab dai tej tw ntxhoo ntev ntev. 6 Thaum lawv mus noj nqaij haus cawv, lawv nyiam zaum thawj lub rooj. Nyob hauv cov tsev txoos, lawv nyiam zaum cov rooj pem hauv ntej. 7 Lawv nyiam kom luag hawm lawv tom tej tshav puam, nyiam hnov sawv daws hu lawv ua “Xib Hwb”. 8 Hos nej, mas nej txhob cia luag hu nej ua “Xib Hwb”, vim nej tsuas muaj ib tug Xib Hwb xwb, thiab nej sawv daws yog ib co kwv tij. 9 Nej txhob hu leej twg nyob ntiaj teb no ua “Txiv”, vim nej tsuas muaj ib leeg Txiv xwb, yog tus nyob saum ntuj. 10 Nej txhob cia luag hu nej ua “Thawj Coj”, vim nej tsuas muaj ib tug thawj coj xwb, yog Leej Pleev. 11 Tus loj dua cov nyob hauv nej, yuav ua nej tus tub txib. 12 Tus twg tsa nws siab, nws yuav raug muab txo kom qis; tus twg txo nws qis, yuav raug muab tsa kom siab.”

TIM 28 LUB 8 HLI 2017

Hnub Ob Lis Piam Nees Nkaum Ib Nruab Xyoo A Nruab Lis Piam Xyoo I

Hwm LN Augustine, ua Tswv Qhia thiab Kws Txuj Kev Ntseeg

Zaj Nyeem Ib: 1 TXLN 1: 1-5, 8B-10

1 Paj Lug thiab Xis Vas Nus thiab Tis Mos Tes, sau ntawv tuaj rau lub Koom Txoos nyob Tes Xas Los Nis, uas nej nyob hauv Leej Txiv Tswv Ntuj thiab nyob hauv Huab Tais Yes Xus Pleev. Thov kom lub txiaj ntsim thiab txoj kev thaj yeeb uas tuaj ntawm peb Txiv Tswv Ntuj thiab ntawm Huab Tais Yes Xus Pleev tuaj nyob hauv nej.
2 Peb ua Tswv Ntuj tsaug nraim txog nej sawv daws tas mus li, thiab peb nco txog nej tsis tseg nyob hauv peb zaj teev ntuj. 3 Peb nco ntsoov tias nej kub siab lug nyob hauv txoj kev ntseeg, nej rau siab ntso ua cov hauj lwm nyob hauv txoj kev nyiam, thiab nej ua siab tawv nyob ruaj nreb hauv txoj kev tso siab rau peb tus Huab Tais Yes Xus Pleev nyob ntawm Tswv Ntuj peb Leej Txiv xub ntiag. 4 Cov kwv tij uas Tswv Ntuj nyiad, peb paub tias nej yog cov Tswv Ntuj xaiv. 5 Peb coj lub Moo Zoo tuaj txog nej, tsis yog ib co lus qhuav xwb, tiam sis nws yog ib lub zog, nws muaj Leej Ntuj Plig Ntshiab, thiab yog ib qho ruaj khov tiag; raws li nej yeej paub lawm tias peb tau coj tus yeeb yam zoo li cas thaum peb nrog nej nyob kom tau ua piv txwv rau nej.
8b Nej txoj kev ntseeg txog Tswv Ntuj tau ri mus txog tas qhov txhia chaw lawm, ces peb tsis tau yuav tsum hais txog ntxiv. 9 Vim cov neeg ntawd yeej tham txog tias peb tau tuaj txog tim nej li cas, thiab nej ua li cas tig los ntseeg txog Tswv Ntuj, nej tso nej cov mlom pov tseg, nej los tsob hwb tus Tswv Ntuj muaj txoj sia thiab tus tseem, 10 nej tos ntsoov nws Leej Tub yuav rov saum ntuj los, yog tus uas nws tau tsa hauv cov neeg tuag sawv rov los, yog Yes Xus tus cawm peb dim ntawm txoj kev npau taws uas yuav tuaj yav tom ntej.

NPN 149: 1B-2, 3-4, 5-6A+9B

Txais: (4a) Huab Tais zoo siab nyob hauv nws haiv neeg.
los: As les lus yas

Nej hu ib zaj nkauj tshiab rau HUAB TAIS,
nej cav txog nws nyob hauv tsoom ntseeg lub txoos.
His Xas Lais yuav zoo siab nyob hauv tus uas tsim lawv,
Xis Yoos cov me nyuam yuav luag ntxhi nyob hauv lawv tus vaj.

Txais: (4a) Huab Tais zoo siab nyob hauv nws haiv neeg.
los: As les lus yas

Lawv yuav ua kev lom zem yoj cev cav txog nws lub npe,
lawv yuav hu nkauj cav txog nws nrog suab nruas thiab suab nkauj nog ncas.
Vim HUAB TAIS hlub nws haiv neeg,
thiab nws muab txoj kev yeej rau cov neeg me hnav ua zam.

Txais: (4a) Huab Tais zoo siab nyob hauv nws haiv neeg.
los: As les lus yas

Cov muaj lub siab ntseeg hom khaj nyob hauv txoj kev nto koob meej;
lawv yuav hu nkauj zoo siab hauv lawv tej chaw nyob;
lawv lub qa tsuas muaj qw suab cav txog Tswv Ntuj.
Qhov no yog cov uas ntseeg nws lub koob meej. As les lus yas.

Txais: (4a) Huab Tais zoo siab nyob hauv nws haiv neeg.
los: As les lus yas

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias, kuv cov yaj mloog kuv lub suab;
kuv paub lawv, lawv raws nraim kuv qab mus.

Txais: As les lus yas, as les lus yas.

Ntawv Moo Zoo: MT 23: 13-22

Yes Xus hais rau cov neeg thiab rau nws cov thwj tim tias:
13 “Cov Kws Ntawv Ntshiab thiab cov Fas Lis Xais zoo nraum daim tawv, nej txoj hmoov phem, vim nej muab Ntuj lub Ceeb Tsheej kaw tsis pub neeg nkag ! Nej tsis chaws mus hauv, nej kuj tsis pub kom cov xav mus, tau kev chaws mus hauv. [14 Cov Kws Ntawv Ntshiab thiab cov Fas Lis Xais zoo nraum daim tawv, nej txoj hmoov phem, vim nej noj tej poj ntsuam tug, thiab nej lam ua txuj teev ntuj ntev ntev kom neeg qhuas; vim li no nej yuav raug ib lub txim hnyav dua lwm tus.] 15 Cov Kws Ntawv Ntshiab thiab cov Fas Lis Xais zoo nraum daim tawv, nej txoj hmoov phem, vim nej hla hiav txwv hla teb chaws mus nrhiav kom tau ib tug neeg los hwm ntuj. Thaum nej tau ib tug lawd, nej ua kom nws tsim nyog mus hauv dab phem cov hluav taws tshaj nej ob npaug ntxiv. 16 Nej yog ib co coj kev dig muag, nej txoj hmoov phem, vim nej hais tias : ‘Yog tus twg tuav txog thaj chaw ntshiab los cog lus, mas nws tsis tas ua raws li nws lo lus los tau. Tab sis tus twg tuav txog cov kub hauv thaj chaw ntshiab los cog lus, mas nws yuav tsum ua raws li lo lus nws tau cog.’ 17 Neeg vwm thiab dig muag, dab tsi muaj nqes dua ? Cov kub los yog thaj chaw ntshiab uas ua kom cov kub ntshiab tuaj ? 18 Nej tseem hais tias : ‘Yog tus twg tuav txog lub thaj txi Ntuj los cog lus, mas nws tsis tas ua raws nws lo lus kuj tau. Tab sis yog tus twg muab cov txim saum thaj txi Ntuj los cog lus, mas nws yuav tsum ua raws li lo lus nws tau cog.’ 19 Neeg dig muag, qhov twg yog qhov loj dua ? Yog cov txim los yog lub thaj txi Ntuj uas ua kom cov txim ntawd ntshiab ? 20 Tus tuav txog lub thaj txi Ntuj los cog lus, kuj yog tuav txog lub thaj thiab tas txhia yam uas nyob saum lub thaj huv si. 21 Tus tuav txog thaj chaw ntshiab los cog lus, kuj yog tuav txog thaj chaw ntshiab thiab Tus nyob hauv thaj chaw ntawd. 22 Hos tus tuav txog lub ntuj los cog lus, kuj yog tuav txog Tswv Ntuj lub theej kiab thiab Tus zaum saum lub theej kiab ntawd tib si.”

TIM 29 LUB 8 HLI 2017

Hnub Peb Lis Piam Nees Nkaum Ib Nruab Xyoo A Nruab Lis Piam Xyoo I

Nco txog LN Zam Ntxuav Plig txoj kev Raug Txom Nyem

Zaj Nyeem Ib: 1 TXLN 2: 1-8

1 Kwv tij sawv daws, nej yeej paub tias peb tuaj tim nej, peb tsis tau nkim zog tuaj. 2 Nej kuj paub txog tias, peb xub tau raug luag hiam thiab raug luag tsawm nyob Fis Lis Pos ua ntej lawm. Tab sis, peb tau ua siab tawv qhawv nyob hauv peb tus Tswv Ntuj, peb tau tiv tej kev tawm tsam kev nyuaj los tshaj Tswv Ntuj lub Moo Zoo rau nej. 3 Thaum peb qhia nej, mas peb tsis yog xav ua tej yam cuav los tej yam qias, thiab peb kuj tsis yog lam dag kom ntxias tau nej xwb. 4 Tiam sis peb twb xub raug Tswv Ntuj sim peb tas lawm, nws pom peb tsim nyog tshaj lub Moo Zoo, ces peb tsuas tshaj li ntawd xwb; peb tsis nrhiav ua xis neeg siab, peb tsuas nrhiav ua xis Tswv Ntuj siab xwb, vim nws yog tus txiav txim rau peb lub siab. 5 Nej kuj paub tias, peb tsis yog neeg ua txuj lam hais ib co lus qhuas leej twg ib zaug, los peb tsis tau ua tej yam vim peb ntshaw ntau yam ; Tswv Ntuj yog peb tus tim khawv. 6 Peb tsis tau nrhiav koob meej nyob ntawm neeg, xws li nyob hauv nej, los nyob hauv lwm cov neeg. 7 Yog peb xav ua kom nej raug peb hnyav vim peb yog Leej Pleev cov Hauv Paus Xa Lus kuj tau, tab sis peb tsis ua. Thaum peb nrog nej nyob peb tau ua ua neeg me, peb tau hlub nej xws li leej niam hlub thiab tu nws cov me nyuam hauv nws xub ntiag. 8. Peb hlub nej npaum li ntawd peb thiaj txaus siab xav pub Tswv Ntuj lub Moo Zoo rau nej, thiab tseem xav pub peb txoj sia rau nej tib si, vim nej yog cov uas peb lub siab hlub tiag tiag.

NPN 139: 1-3, 4-6

Txais: (1) Huab Tais, koj tsom thoob kuv, koj paub kuv zoo.

HUAB TAIS, koj tsom thoob kuv, koj paub kuv :
koj paub thaum kuv sawv thiab thaum kuv zaum ;
koj nyob deb tsom paub tas tej kuv xav.
Koj saib nraim kuv thaum kuv mus kev los thaum kuv zaum,
koj paub txhua yam kuv ua.

Txais: (1) Huab Tais, koj tsom thoob kuv, koj paub kuv zoo.

Lo lus uas tsis tau nyob saum kuv tus nplaig,
HUAB TAIS, koj twb xub paub tas lawm.
Koj nyob tom kuv qab tom kuv hauv ntej, koj nyob ib ncig kuv,
koj tso koj txhais tes rau saum kuv.
Koj txoj kev paub txog koj zoo kawg nkaus,
tob dhau rau kuv , siab dua qhov kuv ncav tau!

Txais: (1) Huab Tais, koj tsom thoob kuv, koj paub kuv zoo.

As Les Lus yas: MT 5: 10

Txais: As les lus yas, as les lus yas.

Cov tau txoj hmoov zoo yog cov raug luag hiam vim txoj kev ncaj,
Ntuj lub Ceeb Tsheej yog lawv tug.

Txais: As les lus yas, as les lus yas.

Ntawv Moo Zoo: MK 6: 17-29

17 Hes Los xa neeg mus ntes Zam thiab muab saw hlau khi Zam rau hauv tsev loj faj, vim Hes Los Dias uas yog Hes Los tij laug Fis Lis Pos tus poj niam, tab sis Hes Los yuav los ua nws poj niam lawm. 18 Zam tau hais rau Hes Los tias : "Koj tsis muaj cai yuav koj tij laug tus poj niam." 19 Ces Hes Los Dias ntxub Zam tas siab nrho, nws xav muab Zam tua kawg, tab sis nws tua tsis tau. 20 Vim Hes Los ntshai Zam, thiab nws paub tias Zam yog ib tug neeg siab ncaj siab ntshiab, ces Hes Los txuag Zam. Thaum Hes Los hnov Zam hais lus, mas ua rau nws tsis paub xav li, tiam sis nws kuj ho nyiam mloog Zam thiab. 21 Muaj ib lub zoo sij hawm los txog, yog hnub tsuj xeeb Hes Los hnub yug. Hes Los ua ib roog qav caw cov nom tswv hauv nws lub tuam tsev, cov thawj tub rog, thiab cov nom loj hauv xeev Nkas Lis Lais tuaj koom. 22 Thaum ntawd, Hes Los Dias tus ntxhais chaws los dhia seev cev. Nws dhia tau ntxim Hes Los thiab cov qhua tuaj koom rooj qav ntawd siab kawg. Ces tus vaj hais rau tus ntxhais tias : "Koj thov saib koj xav yuav dab tsi, kuv yuav muab rau koj." 23 Ces tus vaj cog lus rau tus ntxhais tias : "Koj thov yam twg, mas kuv yuav muab rau koj, tab txawm yog ib nrab ntawm lub teb chaws kuv kav !" 24 Tus ntxhais tawm plaws mus nug nws niam tias : "Kuv yuav thov dab tsi ?" Leej niam hais tias : "Zam Ntxuav Plig lub taub hau." 25 Tam sim ntawd, tus ntxhais rov ntsuj los ntawm tus vaj, nws hais tias : "Kuv xav kom koj muab Zam Ntxuav Plig lub taub hau tso rau hauv ib lub phaj, los cev rau kuv tam sis no." 26 Tus vaj mluas kiag tu siab kawg, tab sis vim nws tau cog lus thiab vim muaj cov qhua, nws thiaj tsis xav thim nws lo lus. 27 Ces tus vaj txib ib tug zov keeb tam sim ntawd, kom mus nqa Zam lub taub hau los. 28 Tus zov keeb mus txiav Zam caj dab hauv tsev loj faj, nws nqa Zam lub taub hau txawb hauv ib lub phaj los cev rau tus ntxhais; ces tus ntxhais muab rau nws niam. 29 Zam cov thwj tim hnov li ntawd, ces lawv tuaj coj Zam lub cev mus tso rau hauv ib lub ntxa.

TIM 30 LUB 8 HLI 2017

Hnub Plaub Lis Piam Nees Nkaum Ib Nruab Xyoo A Nruab Lis Piam Xyoo I

Zaj Nyeem Ib: 1 TXLN 2: 9-13

9 Cov kwv tij, nej yuav nco ntsoov txog peb tej hauj lwm, thiab peb tej kev iab kev khwv. Peb tau ua hauj lwm nruab hnub thiab hmo ntuj, kom peb tsis txhob yog ib lub nra hnyav rau nej ib tug twg ris; tib txhij ntawd peb tseem tshaj Tswv Ntuj lub Moo Zoo rau nej thiab. 10 Nej yog cov tim khawv pom, thiab Tswv Ntuj kuj ua tim khawv pom tias peb tau coj tus yam ntxwv ntshiab thiab ncaj ncees, tus yam ntxwv tsis muaj chaw xyeej nyob hauv nruab nrab nej cov ntseeg. 11 Nej twb paub lawm tias, peb tau ua rau nej txhua leej xws li ib leeg txiv ua rau nws tej tub ki. 12 Peb tau ntuas nej sawv daws, tau txhawb nej lub siab kom loj, tau cob qhia nej tas zog, kom nej taug ib txog kev ua neej tsim nyog tus Tswv Ntuj uas hu nej los nyob hauv nws lub Ceeb Tsheej, thiab nyob hauv nws lub hwj chim.
13 Yog vim tej ntawd, mas peb ua Tswv Ntuj tsaug tsis tseg, vim thaum nej txais Tswv Ntuj Lo Lus uas peb tau qhia rau nej, mas nej tsis txais Lo Lus ntawd xws li yog neeg lo lus xwb, nej txais raws li nws yeej yog Tswv Ntuj Lo Lus tiag tiag. Niaj hnub no Lo Lus ntawd ua hauj lwm nraim nyob hauv nej cov uas ntseeg.

NPN 139: 7-8, 9-10, 11-12AB

Txais: (1) HUAB TAIS, koj tsom pom hauv kuv, koj paub kuv.

Kuv yuav mus lawm qhov twg thiaj nraim ntawm koj lub tswv yim?
Kuv yuav khiav lawm ces twg, thiaj nyob deb ntawm koj lub ntsej muag?
Yog kuv nce mus saum ntuj, koj twb nyob saud lawm !
Yog kuv nqes lawm puag ntuj txias teb tsaus, koj kuj nyob hauv thiab!

Txais: (1) HUAB TAIS, koj tsom pom hauv kuv, koj paub kuv.

Yog kuv ya raws lub caij kaj ntug ob phab tis mus,
yog kuv mus nyob puag sab dej ntuj kawg nkaus tim ub,
los tseem yog koj txhais tes coj kuv mus,
yog koj sab tes xis hwj kuv kom kuv nyob ruaj nreb.

Txais: (1) HUAB TAIS, koj tsom pom hauv kuv, koj paub kuv.

Yog kuv hais tias : "Cia qhov tsaus ntuj muab kuv zais,
los hmo ntuj tseem yuav ua kom pom kev nyob ncig kuv ."
vim qhov tsaus ntuj tsis dub tsis tsaus rau koj,
hmo ntuj pom kev nrig xws nruab hnub rau koj.

Txais: (1) HUAB TAIS, koj tsom pom hauv kuv, koj paub kuv.

As Les Lus Yas: 1 ZAM 2: 5

Txais: As les lus yas, as les lus yas.

Yog tus twg coj nraim Leej Pleev lo lus, mas
txoj kev nyiam Tswv Ntuj zoo tiav nyob hauv nws lawm.

Txais: As les lus yas, as les lus yas.

Ntawv Moo Zoo: MT 23: 27-32

27 “Tsoom Kws Ntawv Ntshiab thiab tsoom Fas Lis Xais zoo nraum daim tawv, nej txoj hmoov phem, nej zoo li ib co ntxa pleev hmoov zeb sib : sab nraud, zoo nkauj zoo saib, tab sis sab hauv, pob txha neeg tuag thiab kua lwj nyam puv nkaus. 28 Nej zoo ib yam li ntawd, tuaj sab nraud saib, nej zoo li neeg ncaj, tab sis, nej muaj kev dag thiab kev phem nyob puv nkaus sab hauv. 29 Tsoom Kws Ntawv Ntshiab thiab tsoom Fas Lis Xais zoo nraum daim tawv, nej txoj hmoov phem, nej txhim tsa cov yaj saub tej ntxa thiab tu cov neeg ncaj tej ntxa kom zoo nkauj, 30 nej hais tias : ‘Yog peb ua neej nyob lub zim txwv peb cov yawg koob nyob, mas peb yuav tsis nrog lawv koom tes hliv cov yaj saub tej roj ntsha.’ 31 Li ntawd, nej rov lees tias nej yeej yog cov neeg txo cov yaj saub txoj sia cov tub. 32 Ua li mas nej yeej meem ua phem kom txaus nkaus ntxiv rau nej cov yawg koob txoj kev phem.”

TIM 31 LUB 8 HLI 2017

Hnub Tsib Lis Piam Nees Nkaum Ib Nruab Xyoo A Nruab Lis Piam Xyoo I

Zaj Nyeem Ib: 1 TXLN 3: 7-13

7 Cov kwv tij, peb muaj kev tso siab rau nej nyob hauv tas peb tej kev txhawj xeeb thiab kev txom nyem vim nej txoj kev ntseeg. 8 Nyem no, peb rov muaj sia, vim nej nyob ruaj nreb hauv Huab Tais. 9 Peb yuav ua li cas ua Tswv Ntuj tsaug vim nej, vim tias nej ua kom peb muaj chaw zoo siab ntau nyob ntawm Tswv Ntuj xub ntiag ? 10 Nruab hnub hmo ntuj, peb thov Tswv Ntuj tsis tseg, kom peb tau rov tuaj pom nej lub ntsej muag, thiab kom peb tau kev qhia ntxiv rau nej txog tej yam uas nej tsis tau paub nyob hauv nej txoj kev ntseeg. 11 Thov kom Tswv Ntuj uas yog peb Txiv, thiab peb tus Huab Tais Yes Xus, qhib peb txoj hauv kev kom tuaj txog nej. 12 Thov kom Huab Tais ua kom nej hlob zuj zus tuaj thiab vam meej ntau nyob hauv txoj kev sib nyiam sib hlub, thiab txoj kev nyiam zeej tsoom, ib yam li peb nyiam nej. 13 Thov kom nws ua nej lub siab nyob ruaj nreb hauv txoj kev ntshiab tsis muaj chaw xyeej, nyob ntawm Tswv Ntuj peb Leej Txiv xub ntiag, tos txog hnub peb tus Huab Tais Yes Xus yuav rov los nrog tas nws tsoom Leej Ntshiab.

NPN 90: 3-5A, 12-13, 14+17

Txais: (14) Huab Tais, thov koj muab koj txoj kev hlub puv npo rau peb,
Ces peb yuav hu nkauj vim peb muaj kev zoo siab.

Koj cia neeg hloov rov mus ua plua av,
koj hais tias: “Me nyuam neeg, nej rov mus.”
Vim tias ib txhiab xyoo rau koj zoo li yog nag hmo xwb,
vim nws dhau tas lawm, los tsuas zoo li
ib lub caij zov keeb thaum hmo ntuj xwb.

Txais: (14) Huab Tais, thov koj muab koj txoj kev hlub puv npo rau peb,
Ces peb yuav hu nkauj vim peb muaj kev zoo siab.

Thov koj qhia peb txawj suav peb cov hnub nyoog kom zoo,
kom peb txawj muaj kev thoob tsib hauv nruab siab.
HUAB TAIS, thov koj tsuag tsuag rov qab los! Peb yuav tos hov ntev?
Thov koj khuv leej koj cov tub txib mas!

Txais: (14) Huab Tais, thov koj muab koj txoj kev hlub puv npo rau peb,
Ces peb yuav hu nkauj vim peb muaj kev zoo siab.

Sawv ntxov tsees, thov koj muab koj txoj kev nyiam puv npo rau peb,
ces peb yuav qw zoo siab hom khaj txhua hnub hauv peb lub neej.
Thov kom Huab Tais peb tus Tswv Ntuj txoj kev hlub yog peb tug,
Thov koj ua kom cov hauj lwm peb txhais tes ua vam meej tuaj,
kom cov hauj lwm peb txhais tes khwv ua vam meej!

Txais: (14) Huab Tais, thov koj muab koj txoj kev hlub puv npo rau peb,
Ces peb yuav hu nkauj vim peb muaj kev zoo siab.

As Les Lus Yas: MT 24: 42A, 44

Txais: As les lus yas, as les lus yas.

Nej yuav zov hmo nraim,
Vim nej tsis paub tias Neeg Leej Tub yuav los lub caij twg.

Txais: As les lus yas, as les lus yas.

Ntawv Moo Zoo: MT 24: 42-51

Yes Xus hais rau nws cov thwj tim tias:
42 “Nej yuav zov hmo nraim, vim nej tsis paub hnub twg nej tus Huab Tais yuav los. 43 Nej yeej paub tias : yog tus tswv tsev paub tias hmo ntuj lub sij hawm twg tub sab yuav tuaj, mas nws yuav zov hmo, tsis cia tub sab tuaj tho qhov tsev. 44 Nej kuj yuav ua li ntawd thiab, nej yuav npaj kom txhij, vim Neeg Leej Tub yuav los lub sij hawm uas nej tsis nco faj txog.
45 Leej twg yog tus tub txib pheej xeeb thiab xyuam xim, uas tus tswv tsev tsa nws ua tus saib cov neeg nyob hauv tus tswv lub tsev kom thaum txog caij, nws faib txhiam laj txhiam xws rau sawv daws noj ? 46 Tus tub txib uas tus tswv tsev rov los pom tab tom lis tej num li ntawd, yuav tau txoj hmoov zoo. 47 Kuv hais tseeb rau nej, tus tswv yuav tsa nws ua tus saib tus tswv lub cuab tam tas huv si. 48 Tab sis yog tus tub txib ntawd siab phem nws xav tias : ‘Kuv tus tswv yuav los lig.’ 49 Ces nws muab cov tub txib nrog nws nyob ntaus, nws mus nrog cov quav dej quav cawv noj haus, 50 mas nws tus tswv yuav rov los hnub uas nws tsis nco faj, thiab lub sij hawm uas nws tsis paub. 51 Ces tus tswv yuav rau txim hnyav rau nws, yuab ntiab nws mus nrog cov neeg zoo nraum daim tawv nyob; nyob ntawd, sawv daws yuav quaj vwm leg thiab tom hniav nkawv.”

TIM 1 LUB 9 HLIS 2017

Hnub Rau Lis Piam Nees Nkaum Ib Nruab Xyoo A Nruab Lis Piam Xyoo I

Zaj Nyeem Ib: 1 TXLN 4: 1-8

1 Cov kwv tij, Peb thov nej thiab txhib nej nyob hauv Huab Tais Yes Xus tias kom nej yuav tsum coj ib lub neej raws li nej tau kawm ntawm peb, thiaj ntxim Tswv Ntuj siab. Nej kuj coj ib lub neej zoo li ntawd lawm, tiam sis xav kom nej yeej meem coj kom zoo tshaj ntxiv mus xwb. 2 Nej twb paub cov lus uas peb sawv Huab Tais Yes Xus chaw qhia rau nej tas lawm. 3 Tswv Ntuj xav kom nej ua li no : kom nej ua neeg siab ntshiab, kom nej caiv txoj kev ua plees ua yi, 4 kom nej nyias txawj siv nyias lub cev raws txoj kev ntshiab thiab tsim txiaj. 5 Nyias yuav tsis txhob mloog nyias lub cev kev ntshaw qhov tsis huv, xws li cov neeg teev dab uas tsis paub Tswv Ntuj. 6 Hais txog tej yam no mas nej yuav tsis txhob muaj leej twg ua phem rau los ua noj nws ib tug kwv tij twg taub hau, vim Huab Tais yuav rau txim rau cov neeg ua phem, raws li peb twb tau hais rau nej thiab qhia tseeb rau nej ua ntej lawm.
7 Tswv Ntuj tsis tau hu peb kom mus nyob hauv txoj kev tsis huv, nws hu peb kom mus nyob hauv txoj kev ntshiab. 8 Li ntawd, yog leej twg tsis kam mloog tej no, mas tsis yog nws tsis kam mloog ib tug neeg, yog nws tsis kam mloog Tswv Ntuj, uas nws yog tus pub nws Leej Tswv Yim Ntshiab rau nej thiab.

NPN 97: 1+2B, 5-6, 10, 11-12

Txais: (12a) Cov neeg ncaj, nej cia li zoo siab nyob hauv HUAB TAIS.

HUAB TAIS ua vaj; kom lub ntiaj teb hom khaj,
kom tas cov pov txwv dhia zoo siab !
kev ncaj thiab txoj cai yog chaw txawb nws lub theej kiab.

Txais: (12a) Cov neeg ncaj, nej cia li zoo siab nyob hauv HUAB TAIS.

Cov toj roob yaj xws ciab ntab nyob ntawm HUAB TAIS xub ntiag,
ntawm tus HUAB TAIS kav tas ntiaj teb xub ntiag.
Yim txheej cuaj txheej ntuj tshaj nws txoj kev ncaj,
tas txhua haiv neeg pom nws lub hwj chim.

Txais: (12a) Cov neeg ncaj, nej cia li zoo siab nyob hauv HUAB TAIS.

HuabTais nyiam cov uas ntxub txoj kev phem;
Nws txuag cov neeg ntseeg txog nws txoj sia,
nws npo lawv dim ntawm cov neeg phem txhais tes.

Txais: (12a) Cov neeg ncaj, nej cia li zoo siab nyob hauv HUAB TAIS.

Qhov pom kev sawv los ziab tus neeg ncaj ;
Kev kaj siab sawv los ziab cov siab dawb.
Cov neeg ncaj, nej zoo siab nyob hauv HUAB TAIS,
nej ua nws tsaug vim nws txoj kev ntshiab.

Txais: (12a) Cov neeg ncaj, nej cia li zoo siab nyob hauv HUAB TAIS.

As Les Lus Yas: LK 21: 36

Txais: As les lus yas, as les lus yas.

Nej yuav ceev faj txhua lub sij hawm thiab nej yuav teev Ntuj tsis tseg,
nej thiaj yuav muaj zog sawv taus ntsug ntawm Neeg Leej Tub xub ntiag."

Txais: As les lus yas, as les lus yas.

Ntawv Moo Zoo: MT 25: 1-13

Yes Xus piav rau nws cov thwj tim tias:
1 “Ntuj lub Ceeb Tsheej yuav zoo xws li kaum leej ntxhais taws teeb tawm mus tos nraug vauv. 2 Nyob hauv lawv, muaj tsib leeg ruam, hos tsib leeg xyuam xim. 3 Cov ruam nqa teeb, tab sis tsis nqa roj nrog. 4 Hos cov xyuam xim nqa teeb thiab ntim roj rau hauv hwj nrog. 5 Nraug vauv los lig, ces lawv qaug dab ntub, sawv daws tsaug zog. 6 Thaum ib tag hmo, ib lub suab nthe tias : ‘Nraug vauv los txog lawm ! Nej tawm los txais nws !’ 7 Ces tas cov ntxhais hluas sawv los npaj teeb. 8 Cov ruam hais rau cov xyuam xim tias : ‘Nej pub ib qho roj rau peb mas, peb cov teeb tuag lawm.’ 9 Tab sis cov xyuam xim teb rau cov ruam tias : ‘Ntshai roj yuav tsis txaus rau nej thiab rau peb. Nej mus muas roj tom cov tub luam rau nej.’ 10 Thaum cov ntxhais ruam mus muas roj lawm, ces nraug vauv los txog. Cov uas tau npaj txhij tos, nrog nraug vauv chaws mus hauv chav tsev ua tshoob, ces luag xauv qhov rooj rau. 11 Thaum kawg, lwm cov ntxhais los txog thiab, lawv hais tias : ‘Huab Tais, Huab Tais, thov koj qhib qhov rooj rau peb.’ 12 Tab sis nraug vauv teb tias : ‘Kuv hais tseeb rau nej, kuv tsis paub nej yog leej twg !’ 13 Ua li mas nej yuav tsum zov hmo nraim, vim nej tsis paub hnub twg thiab lub sij hawm twg.”

TIM 2 LUB 9 HLIS 2017

Hnub Xya Lis Piam Nees Nkaum Ib Nruab Xyoo A Nruab Lis Piam Xyoo I

Reading 1 1 TXLN 4: 9-11

Cov kwv tij,
9 Hais txog txoj kev sib nyiam sib hlub xws li ib co kwv tij, mas tsis tas kom peb sau txog qhov ntawd rau nej, vim Tswv Ntuj twb tau qhia nej kom nej txawj ib leeg nyiam ib leeg lawm.
10 Nej yeej nyiam thiab hlub tas tsoom kwv tij nyob Mas Xes Dos Nias teb tib si lawm; tiam sis cov kwv tij, peb tseem xav txhib nej kom nej haj yam txawj ua zoo tshaj ntawd ntxiv thiab.
11 Yam li nej yuav muab siab rau ntshaw ua neeg thaj yeeb ; nej nyias yuav saib nyias li dej num, nyias yuav xuas nyias txhais tes mus ua hauj lwm, xws li peb tau qhia rau nej lawm.

NPN 98: 1, 7-8, 9

Txais: (9) Huab Tais tuaj kav lub ntiaj teb raws kev ncaj ncees.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej.,
nws sab npab ntshiab tau ua.

Txais: (9) Huab Tais tuaj kav lub ntiaj teb raws kev ncaj ncees.

Kom dej hiav txwv thiab tej yam uas nyob hauv ua nrov nroo ntws,
Kom lub ntiaj teb thiab tsoom neeg ua lom zem ntsuag qees;
Kom cov niam dej npuaj teg, kom cov roob qw zoo siab,

Txais: (9) Huab Tais tuaj kav lub ntiaj teb raws kev ncaj ncees.

nyob ntawm HUAB TAIS xub ntiag, vim nws tab tom tuaj,
nws tuaj tswj kav lub ntiaj teb.
Nws yuav tswj kav qab ntuj neeg raws kev ncaj,
Nws yuav tswj kav cov haiv neeg raws kev haum pheej.

Txais: (9) Huab Tais tuaj kav lub ntiaj teb raws kev ncaj ncees.

As Les Lus Yas: ZAM 13: 34

Txais: As les lus yas, as les lus yas.

Kuv muab ib lo lus qhia tshiab rau nej tias:
nej yuav sib nyiam sib hlub ib yam li kuv tau nyiam tau hlub nej.

Txais: As les lus yas, as les lus yas.

Ntawv Moo Zoo: MT 25: 14-30

Yes Xus hais rau nws cov thwj tim tias:
14 “Yog zoo li ib tug neeg uas yuav mus tawm rooj deb, nws hu nws cov tub txib los, nws muab nws lub cuab tam rau lawv ceev. 15 Nws muab tsib nras nyiaj rau thawj tug, muab ob nras rau tus ob, hos muab ib nras rau tus peb, muab raws li lawv lub peev xwm, ces nws mus tawm rooj tam sis ntawd lawm. 16 Tus uas tau txais tsib nras nyiaj, nws nqa cov nyiaj ntawd coj mus ntxeev, ces nws tau paj tsib nras ntxiv. 17 Tus tau txais ob nras kuj ua li ntawd thiab : nws tau paj ob nras ntxiv. 18 Hos tus tau txais ib nras xwb mus khawb ib lub qhov rau hauv av, nws muab tus tswv nras nyiaj coj mus faus rau hauv. 19 Ib lub sij hawm ntev loo tom qab, cov tub txib tus tswv rov los txog. Nws nrog lawv txheeb nws cov nyiaj. 20 Tus uas tau txais tsib nras nyiaj tuaj txog. Nws cev tsib nras ntxiv, nws hais tias : “Huab Tais, tsib nras nyiaj no yog koj muab rau kuv : hos ntawm no yog tsib nras uas kuv coj mus ntxeev tau paj ntxiv.” 21 Tus tswv hais rau nws tias : “Zoo kawg, tub txib siab zoo siab ncaj, thaum koj saib tej yam tsawg, koj ua ncaj. Kuv yuav tsa koj saib ntau yam. Koj los nyob hauv koj tus huab tais txoj kev zoo siab mog.” 22 Ces tus tau txais ob nras tuaj txog, nws hais tias : “Huab Tais, ob nras nyiaj no yog koj muab rau kuv : hos ntawm no yog ob nras uas kuv coj mus ntxeev tau paj ntxiv.” 23 Nws tus tswv hais rau nws tias : “Zoo kawg, tub txib siab zoo siab ncaj. Thaum koj saib tej yam tsawg li no, koj ua ncaj. Kuv yuav tsa koj saib ntau yam. Koj los nyob hauv koj tus huab tais txoj kev zoo siab mog.” 24 Tus tub txib uas tau txais ib nras nyiaj xwb tuaj txog, nws hais tias : “Huab Tais, kuv paub tias koj yog ib tug neeg siab heev. Koj hlais nplej hauv tej teb koj tsis tau tseb, koj sau qoob hauv tej chaw koj tsis tau pov noob rau. 25 Kuv ntshai, kuv thiaj coj koj nras nyiaj mus faus rau hauv av. Saib ntawm no, koj rov tau yam uas yog koj tug.” 26 Ces tus tswv teb rau nws tias : “Tub txib siab phem thiab tub nkeeg, koj twb paub tias kuv hlais nplej hauv tej qhov uas kuv tsis tau tseb, thiab kuv sau qoob hauv tej chaw uas kuv tsis tau pov noob rau. 27 Twb phim koj yuav nqa kuv cov nyiaj mus tso rau hauv cov tub ceev nyiaj. Thaum kuv rov los, kuv thiaj yuav tau kuv cov nyiaj nrog cov paj. 28 Nej rho nras nyiaj ntawm nws mus, nej muab rau tus uas muaj kaum nras lawm. 29 Vim tias tus uas twb muaj lawm tseem yuav tau txais ntxiv, ces nws yuav tau ntau ntxiv. Hos tus uas tsis muaj, tseem yuav raug luag thau qhov me me uas nws muaj tawm thiab. 30 Nej muab tus tub txib tsis tsim txiaj ntawd pov rau nraum zoov hauv qhov tsaus ntuj; nyob ntawd yuav muaj quaj vwm leg ntsuav thiab tom hniav nkawv.”

TIM 4 LUB 9 HLIS 2017

Hnub Ob Lis Piam Nees Nkaum Ob Nruab Xyoo A Nruab Lis Piam Xyoo I

Zaj Nyeem Ib: 1 TXLN 4: 13-18

13 Cov kwv tij, kuv tsis xav kom nej tsis paub dab tsi txog cov neeg uas mus pw tsaug zog lawd. Nej yuav tsis txhob tu tu siab xws li cov neeg uas tsis muaj kev vam kev tso siab li. 14 Yog peb ntseeg tias Yes Xus tuag thiab sawv rov los lawm, mas peb kuj ntseeg tias cov neeg uas mus pw tsaug zog nyob hauv Yes Xus lawd, Tswv Ntuj kuj yuav coj lawv mus nrog nws nyob thiab. 15 Peb yuav hais ib lo lus rau nej uas yog Huab Tais lo lus. Peb cov uas tseem ciaj nyob hnub Huab Tais yuav rov los txog, mas peb yuav tsis xub mus cuag Huab Tais ua ntej cov uas pw tsaug zog ntxov lawd. 16 Vim thaum ntawd, thaum txog caij teem, thaum hnov tus tuam Tshiab lub suab qw thiab hnov Tswv Ntuj lub puab nrov, mas Huab Tais yuav nqes saum ntuj los, ces cov neeg tuag nyob hauv Yes Xus Pleev yuav xub sawv rov los. 17 Ces peb cov uas tseem ciaj nyob thaum ntawd, peb cov uas seem, mam li yuav tau nrog lawv ua ke nce saum cov huab mus cuag Huab Tais nyob saum cov cua. Ces peb yuav tau mus nrog Huab Tais nyob mus li ib txhis. 18 Vim li ntawd nej yuav tsum siv cov lus no los rov sib pab sib txhawb ua siab loj.

NPN 96:1+3, 4-5, 11-12, 13

Txais: (13b) Huab Tais tuaj txiav txim rau lub ntiaj teb.

Nej hu ib zag nkauj tshiab rau HUAB TAIS,
tas cov teb chaws, nej hu nkauj rau HUAB TAIS;
Nej cav nws lub koob meej rau tsoom kuj cuab paub,
piav nws cov dej num txaus qhuas rau tsoom haiv neeg hnov.

Txais: (13b) Huab Tais tuaj txiav txim rau lub ntiaj teb.

Vim HUAB TAIS loj tas nrho, tsim nyog sawv daws cav txog nws,
nws zoo kawg nkaus, zoo tshaj ib tsoom dab tas huv si .
Tas tsoom dab uas lwm cov haiv neeg teev, tsis muaj nqi dab tsi.
Hos HUAB TAIS yog tus tsim yim txheej cuaj txheej ntuj.

Txais: (13b) Huab Tais tuaj txiav txim rau lub ntiaj teb.

Kom lub ntuj zoo siab thiab lub ntiaj teb hom khaj;
kom lub hiav txwv thiab txhua yam nyob hauv nrov nroo ntws;
kom cov tiaj nrag thiab txhua yam nyob hauv luag ntxhi!
Ces txhua tsob ntoo nyob hauv hav zoo yuav dhia zoo siab,

Txais: (13b) Huab Tais tuaj txiav txim rau lub ntiaj teb.

Nyob ntawm HUAB TAIS xub ntiag, vim nws tuaj lawm,
nws tuaj tswj kav lub ntiaj teb.
Nws yuav tswj ntiaj teb neeg raws kev ncaj
thiab txhua haiv neeg raws kev haum pheej. .

Txais: (13b) Huab Tais tuaj txiav txim rau lub ntiaj teb.

As Les Lus Yas: LK 4: 18

Txais: As les lus yas, as les lus yas.

Huab Tais lub Tswv Yim nyob saum kuv,
Nws xa kuv mus tshaj lub Moo Zoo rau cov pluag.

Txais: As les lus yas, as les lus yas.

Ntawv Moo Zoo: LK 4: 16-30

16 Yes Xus los txog Nas Xas Les, lub zos uas nws nyob hlob. Txog hnub Xas Npas Tos, nws mus hauv lub tsev txoos xws li nws ua kam, ces nws sawv mus nyeem ntawv. 17 Lawv cev tus Yaj Saub His Xais phau ntawv rau nws. Nws nthuav kauj ntawv, nws nrhiav tau nqe lus uas sau tias : 18 “Huab Tais lub Tswv Yim nyob saum kuv, vim nws pleev roj rau kuv kom kuv mus tshaj lub Moo Zoo rau cov pluag; nws xa kuv mus ceeb toom rau cov nyob txim tias lawv yuav dim, rau cov dig muag tias lawv yuav rov pom kev; nws xa kuv mus tso cov raug luag hiam kom lawv tau ua neeg twj lij, 19 nws xa kuv mus tshaj tias yog xyoo Huab Tais yuav pub txiaj ntsim.” 20 Yes Xus rov kauv phau ntawv, nws rov muab rau tus tub txib, ces nws zaum. Tas tsoom neeg uas nyob hauv lub tsev txoos ntsia ntsoov Yes Xus. 21 Ces Yes Xus pib hais rau lawv tias : “Hnub no, cov lus nyob hauv zaj Ntawv no tsheej xeeb raws li nej tau hnov lawm." 22 Tas cov neeg ntawd zeem tseeb tias nws hais lus zoo, lawv qhuas cov lus muaj txiaj ntsim tawm hauv nws lub ncauj los. Lawv hais tias : "Tus ntawd, tsis yog Yos Xes tus tub lod ?" 23 Ces Yes Xus hais rau lawv tias : "Paub ntsoov tias, nej yuav piv lus hais txog kuv li no : ‘Kws kho mob, koj rov kho koj mas ! Tas txhua yam uas luag piav tias tshwm sim nyob Kas Fas Naus, mas koj kuj ua ib yam li ntawd nyob hauv lub zos koj hlob no thiab mas !’ " 24 Yes Xus tseem hais ntxiv tias : "Kuv hais tiag rau nej, tsis muaj ib tug yaj saub uas luag yuav txais nws zoo hauv lub zos nws hlob. 25 Kuv hais raws qhov tseeb rau nej tias: lub caij Es Lias nyob, muaj coob tus poj ntsuam nyob His Xas Lais teb. Thaum ntuj kaw nag tau peb xyoos thiab rau hli, tas teb chaws tshaib plab loj kawg. 26 Tab sis Es Lias tsis raug xa mus pab cov poj ntsuam ntawd ib tug li, nws tsuas raug xa mus pab ib tug poj ntsuam nyob lub zos Xas Les Tas, nyob Xis Doos teb xwb. 27 Lub caij tus yaj saub Es Lis Xais nyob, muaj coob tus mob ruas nyob His Xas Lais teb, tab sis tsis muaj ib tug mob ruas His Xas Lais rov huv li, tsuas yog tus mob ruas Xis Lias hu ua Nas Maas thiaj rov huv xwb." 28 Tas cov neeg hauv lub tsev txoos hnov cov lus ntawd, mas lawv npau taws kawg. 29 Lawv sawv tsees, lawv ntiab Yes Xus tawm sab nroog nraud. Lawv coj Yes Xus mus txog ntawm ib qho ua qab tsuas saum lub roob uas lawv txhim lawv lub nroog, lawv xav thawb Yes Xus kom poob lawm hauv lub qab tsuas. 30 Tab sis Yes Xus hla plaws hauv nruab nrab lawv, nws taug nws kev mus lawm.

TIM 5 LUB 9 HLIS 2017

Hnub Peb Lis Piam Nees Nkaum Ob Nruab Xyoo A Nruab Lis Piam Xyoo I

Zaj Nyeem Ib: 1 TXLN 5: 1-6, 9-11

1 Cov kwv tij, tsis tas kuv yuav sau ntawv rau nej txog lub zim txwv thiab lub caij nyoog, 2 vim nej twb paub zoo lawm tias Huab Tais lub hnub nyoog yuav los txog xws li ib tug tub sab uas tuaj thaum hmo ntuj. 3 Thaum zeej tsoom hais zom zaws tias : ‘Peb tau nyob kaj lug thiab nyob nyab xeeb’, ces ib sij huam, txoj kev puas tsuaj yuav tuaj raug lawv, xws li tus poj niam cev hnyav uas ib sij huam nws cia li mob plab, ces lawv yuav tsis tau kev dim. 4 Tiam sis, cov kwv tij, ntawm nej mas nej tsis nyob hauv qhov tsaus ntuj, ces lub hnub nyoog ntawd yuav tsis tuaj rau nej xws li ib tug tub sab. 5 Nej sawv daws puav leej yog qhov pom kev cov me nyuam, thiab yog nruab hnub cov me nyuam. Peb tsis yog cov neeg maub hmo ntuj, los nyob hauv qhov tsaus ntuj. 6 Vim li ntawd, mas peb tsis txhob tsaug zog xws li luag tej, peb yuav zov hmo thiab peb yuav noj me haus tsawg.
9 Tswv Ntuj tsis muab peb tshwj tseg ua nws lub chaw npau taws, tiam sis nws tshwj zias peb cia kom peb tau txais txoj kev cawm neeg nyob hauv peb tus Huab Tais Yes Xus Pleev, 10 uas nws tuag pub rau peb, ces tab yog peb zov hmo, los peb tsaug zog, mas peb yuav tau nrog nws nyob muaj txoj sia. 11 Ua li mas, nej yuav rov sib pab ua siab loj, thiab sib txhawb mus rau txoj kev zoo, xws li nej twb ua lawm.

NPN 27: 1, 4, 13-14

Txais: (13) Kuv ntseeg tias kuv yuav tau pom Huab Tais qhov zoo
nyob hauv cov neeg ciaj sia lub teb chaws.

Huab Tais yog kuv qhov pom kev thiab kuv txoj kev cawm;
Kuv yuav ntshai leej twg?
Huab Tais yog kuv qhov chaw nkaum hauv kuv lub neej,
Kuv yuav tsis tau luag vim leej twg?

Txais: (13) Kuv ntseeg tias kuv yuav tau pom Huab Tais qhov zoo
nyob hauv cov neeg ciaj sia lub teb chaws.

Kuv tsuas thov ib yam ntawm Huab Tais; qhov kuv nrhiav yog:
kom tau nyob hauv Huab Tais tsev niaj hnub hauv kuv lub neej;
Kom kuv tau ntsia ntsoov Huab Tais txoj kev zoo
thiab tau pom nws lub tuam tsev.

Txais: (13) Kuv ntseeg tias kuv yuav tau pom Huab Tais qhov zoo
nyob hauv cov neeg ciaj sia lub teb chaws.

Kuv ntseeg hais tias kuv yuav tau pom Huab Tais txoj kev nplua mias
nyob hauv cov neeg ciaj sia lub teb chaws.
Nej ua siab loj tos ntsoov Huab Tias;
ua siab tawv qhawv tos ntsoov Huab Tais.

Txais: (13) Kuv ntseeg tias kuv yuav tau pom Huab Tais qhov zoo
nyob hauv cov neeg ciaj sia lub teb chaws.

As Les Lus Yas: LK 7: 16

Txais: As les lus yas, as les lus yas.

Ib tug yaj saub loj sawv nyob hauv peb,
yog Tswv Ntuj tuaj xyuas nws haiv neeg.

Txais: As les lus yas, as les lus yas.

Ntawv Moo Zoo: LK 4: 31-37

31 Yes Xus nqes mus nram Kas Fas Naus uas yog ib lub nroog nyob hauv xeev Nkas Lis Lais. Nws qhuab qhia lawv hnub Xas Npas Tos. 32 Sawv daws qhuas txog nws cov lus qhia, vim nws hais lus muaj hwj chim. 33 Nyob hauv lub tsev txoos ntawd, muaj ib tug neeg raug ib tug dab tsis huv. Nws qw nrov nrov tias : 34 "Yes Xus Nas Xas Les, koj xav ua dab tsis rau peb ? Puas yog koj tuaj rhuav peb ? Kuv paub koj yog leej twg : koj yog Tswv Ntuj tus Ntshiab." 35 Yes Xus cem nws tias : "Ua twj ywm ! Koj tawm ntawm nws mus." Ces dab tsis huv muab tus neeg thawb ntiag rau hauv av nyob ntawm sawv daws xub ntiag, nws tawm hauv tus neeg mus, tsis ua dab tsi phem rau tus neeg ntawd. 36 Tas lawv sawv daws ntshai, lawv sib hais zom zaws tias : "Lo lus ntawd muaj dab tsi ? Yog nws siv hwj huam thiab hwj chim yuam dab tsis huv, ces dab cia li tawm mus." 37 Ib lub moo qhuas txog Yes Xus thiaj li pib nrov mus rau txhua qhov chaw nyob ncig thaj tsam ntawd.

TIM      6     LUB      9       Hlis       2017

Hnub Plaub Lis Piam Nees Nkaum Ob Nruab Xyoo A Nruab Lis Piam Xyoo I

Zaj Nyeem Ib:       KLX 1:   1-8

1 Kuv, Paj Lug, tus uas Tswv Ntuj pom zoo tsa ua Yes Xus Pleev ib tug Hauv Paus Xa Lus thiab tus kwv Tis Mos Tes wb sau ntawv tuaj rau cov ntshiab thiab cov kwv tij ntseeg nyob hauv Leej Pleev nyob Kos Los Xais. 2 Thov kom nej tau txais txiaj ntsim thiab kev thaj yeeb tuaj ntawm Tswv Ntuj peb Leej Txiv tuaj.
3 Peb ua Tswv Ntuj, uas nws yog peb tus Huab Tais Yes Xus Pleev Leej Txiv tsaug tsis tseg thaum peb thov Ntuj rau nej. 4 Vim peb tau hnov hais txog nej txoj kev ntseeg txog Yes Xus Pleev thiab txog nej txoj kev nyiam tas tsoom ntshiab, 5 yog vim nej muaj ib qho cia siab tshwj zias tseg rau nej nyob saum ntuj lawm, uas nej twb xub tau hnov hais txog nyob hauv Lo Lus tseeb hauv lub Moo Zoo lawm. 6 Lub Moo Zoo ntawd tuaj nyob hauv nej thiab kuj tuaj nyob puv hauv lub ntiaj teb, nws txi txiv mus puv tas ntiaj teb ib yam li txi nyob hauv nej txij hnub uas nej tau hnov thiab to taub txog Tswv Ntuj lub txiaj ntsim raws li qhov tseeb los, 7 raws li Es Pas Fas tau qhia rau nej; nws yog peb tus kwv luag nrog peb ua dej num tsob hwb luag,  nws yog Leej Pleev ib tug tub Txib pheej xeeb. 8 Nws kuj yog tus ua rau peb pom tias nej muaj kev sib nyiam sib hlub nyob hauv Leej Tswv Yim thiab.

NPN       52:   10, 11

Txais:   (10) Kuv tso siab mus li rau Tswv Ntuj txoj kev khuv leej.  

kuv zoo li ib tsob txiv ntoo roj ntsuab
ntsuab nyob hauv Tswv Ntuj lub tsev,
kuv tso siab mus li rau Tswv Ntuj txoj
kev khuv leej neeg tsis muaj caij kawg.

Txais:   (10) Kuv tso siab mus li rau Tswv Ntuj txoj kev khuv leej.

Kuv yuav ua koj tsaug mus li rau qhov uas koj tau ua,
kuv yuav cav txog koj lub npe zoo tas nrho
nyob ntawm cov neeg ntseeg txog koj xub ntiag.

Txais:   (10) Kuv tso siab mus li rau Tswv Ntuj txoj kev khuv leej.

As Les Lus Yas:       LK  4:   18

Txais:   As les lus yas, as les lus yas.

Huab Tais  xa kuv mus tshaj lub Moo Zoo rau cov pluag
Thiab mus ceeb toom txog kev twj lij rau cov nyob txim.

Txais:   As les lus yas, as les lus yas.

Ntawv Moo Zoo:       LK  4:   38-44

38 Yes Xus tawm hauv lub tsev txoos los, nws mus hauv Xis Moos lub tsev. Thaum ntawd, Xis Moos niam tais tab tom mob kub cev heev. Lawv thov kom Yes Xus pab Xis Moos niam tais. 39 Yes Xus khoov mus rau saum niam tais, nws yuam tus mob kub cev, ces tus mob tso plhuav niam tais tseg. Niam tais sawv tsees tam sis ntawd, nws pib tsob hwb lawv.
40 Thaum lub hnub poob qho, cov uas muaj neeg raug ntau hom mob sawv daws coj lawv cov neeg mob tuaj rau Yes Xus. Ces Yes Xus tsa tes rau saum lawv ib leeg zuj zus, nws kho sawv daws zoo tas huv si. 41 Muaj ib co dab phem kuj tawm hauv coob leej mus, dab phem qw qw tias : "Koj yog Tswv Ntuj Leej Tub." Tab sis Yes Xus cem lawv, nws txwv tsis pub lawv hais lus, vim lawv paub tias nws yog Leej Pleev.
42 Thaum kaj ntug, Yes Xus tawm mus rau ib qho chaw tsis muaj neeg. Tsoom sid nrhiav nws, thaum lawv tuaj txog ntawm nws, lawv xav cheem Yes Xus kom txhob ncaim ntawm lawv mus. 43 Tab sis Yes Xus hais rau lawv tias : "Kuv yuav tsum mus tshaj lub Moo Zoo hais txog Tswv Ntuj lub Ceeb Tsheej rau lwm cov nroog thiab. Yog vim qhov ntawd, kuv thiaj raug xa tuaj." 44 Ces Yes Xus mus qhuab qhia rau hauv cov tsev txoos nyob Yus Das teb.

TIM 7 LUB 9 HLIS 2017

Hnub Tsib Lis Piam Nees Nkaum Ob Nruab Xyoo A Nruab Lis Piam Xyoo I

Zaj Nyeem Ib: KLX 1: 9-14

Cov kwv tij,
9 Txij hnub uas peb tau hnov hais txog nej los, mas peb thov Ntuj rau nej tsis tseg; peb thov kom nej muaj txoj kev paub txog tias Tswv Ntuj lub siab nyiam li cas puv npo nyob hauv nej, raws txoj kev thoob tsib thiab txoj kev to taub hauv sab ntsuj plig. 10 Kom nej taug ib txog kev ua neej kom phim nej yog neeg hwm Huab Tais, ces nej thiaj yuav ua tau xis Tswv Ntuj lub siab kawg nkaus, nej yuav ua tau ntau yam zoo uas yuav tawg paj txi txiv, thiab nej yuav hlob zuj zus nyob hauv txoj kev paub Tswv Ntuj. 11 Kom Tswv Ntuj lub hwj chim muaj zog tuaj nres nej, kom nej muaj ib lub siab nyob ruaj nreb, thiab ib lub siab ntev nyob hauv txhua yam. 12 Ua li mas, nej yuav zoo siab ua Leej Txiv tsaug, vim nws tau hu nej los nrog nws cov ntshiab koom txais ib txog hmoov nyob hauv qhov pom kev. 13 Nws tau rho peb tawm ntawm kev tsaus ntuj lub hwj huam los, thiab coj peb los nyob hauv nws Leej Tub nws nyiam lub Ceeb Tsheej. 14 Nyob hauv nws Leej Tub, peb tau txoj kev cawm, thiab txoj kev zam txhaum.

NPN 98: 2-3AB, 3CD-4, 5-6

Txais: (2) HUAB TAIS ua kom sawv daws paub txog nws txoj kev cawm.

HUAB TAIS ua kom sawv daws paub txog nws txoj kev cawm,
nws muab nws txoj kev ncaj rau cov haiv neeg pom.
Nws rov nco txog nws txoj kev ua zoo thiab
kev ua pheej xeeb rau tsev neeg His Xas Lais.

Txais: (2) HUAB TAIS ua kom sawv daws paub txog nws txoj kev cawm.

Tas npoo ntuj npoo ntiaj teb tau pom
peb tus Tswv Ntuj txoj kev cawm neeg.
Tas txhua teb chaws, nej zoo siab hu nkauj rau HUAB TAIS,
nej qw suab hu nkauj, nej cav txog nws.

Txais: (2) HUAB TAIS ua kom sawv daws paub txog nws txoj kev cawm.

Nej ntaus nkauj nog ncas cav txog Huab Tais,
nej ntaus nkauj nog ncas nrog tej zaj nkauj zoo mloog.
Nej tshuab hom ntxuag suab kub nyuj,
nej hu nkauj zoo siab ntawm tus Vaj Ntxwv HUAB TAIS xub ntiag.

Txais: (2) HUAB TAIS ua kom sawv daws paub txog nws txoj kev cawm.

As Les Lus Yas: MT 4: 19

Txais: As les lus yas, as les lus yas.

Huab Tais hais tias: Nej raws kuv mus,
Kuv yuav tsa nej ua cov tub puav neeg.

Txais: As les lus yas, as les lus yas.

Ntawv Moo Zoo: LK 5: 1-11

1 Muaj ib zaug, muaj ib pab neeg coob coob tuaj sib txiv nyob ncig Yes Xus mloog Tswv Ntuj Lo Lus; nws sawv ntsug nyob ze lub ntug pas dej Nkes Nes Xas Les. 2 Ces nws pom ob lub nkoj nres ntawm ntug dej, cov tub puav ntses nqes nkoj tas lawm, lawv tab tom ntxuav lawv cov vas. 3 Yes Xus nce mus hauv ib lub nkoj, yog Xis Moos lub, nws kom Xis Moos nquam nkoj mus deb ntawm ntug dej me ntsis. Yes Xus zaum hauv nkoj qhia tsoom sid. 4 Thaum Yes Xus hais lus tas lawm, nws hais rau Xis Moos tias : "Koj nquam nkoj mus lawm tom qhov dej tob, nej tso nej cov vas nqes mus puav ntses." 5 Xis Moos teb tias : "Xib Hwb, peb twb khwv ib hmos tsis tau dab tsi li. Tab sis yog vim koj hais, mas kuv yuav pov cov vas nqes mus." 6 Ces lawv pov vas, lawv puav tau ntses ntau kawg ua lawv cov vas ntuag kiag. 7 Lawv co tes rau lawv cov npawg nyob lwm lub nkoj kom tuaj pab. Cov npawg tuaj txog, sawv daws muab ntses ntim rau ob lub nkoj puv nkaus, ua nkoj yuav luag tog. 8 Xis Moos Pob Zeb pom li ntawd, nws txhos caug ntua pe Yes Xus, nws hais tias "Huab Tais, koj txav mus deb ntawm kuv, vim kuv yog ib tug neeg txhaum." 9 Xis Moos ntshai kawg, cov nrog Xis Moos ua ke puav leej ntshai, vim lawv puav tau ntses ntau. 10 Yas Kos thiab Zam, uas yog Ntxes Npes Dais ob tug tub, thiab yog Xis Moos ob tug npawg, nkawd kuj ntshai kawg. Yes Xus hais rau Xis Moos tias : "Koj txhob ntshai, txij no mus, koj yuav puav neeg." 11 Ces lawv nquam nkoj los rau tim ntug. Lawv tso tas ib puas tsav yam tseg, lawv raws Yes Xus mus.

TIM 8 LUB 9 HLIS 2017

Hnub Rau Lis Piam Nees Nkaum Ob Nruab Xyoo A nruab Lis Piam Xyoo I

Hwm Hnub Niam Mab Liab Yug Los

Zaj Nyeem Ib: Mis Kes 5: 1-4a

Huab Tais hais tias:
1 Npes Les Hes, Es Fas Tas, koj yog lub zos me dua cov tsis phim nyob hauv cov xeem Yus Das. Tus yuav kav His Xas Lais yuav tawm ntawm koj los rau kuv. Nws lub keeb yeej nyob puag thaum ntxov ub los lawm, nws los ntawm puag txheej thaud los. 2 Yog vim li ntawd mas Huab Tais yuav tso lawv pov tseg ib ntus, mus txog lub caij uas tus yuav yug me nyuam yug tau nws tus me nyuam lawm. Ces nws cov kwv tij seem yuav rov los nyob nrog His Xas Lais cov me nyuam. 3 Nws yuav sawv ruaj nreb, nws yuav zov nws pab yaj nog zaub, nyob hauv HUAB TAIS lub zog, nyov hauv Huab Tais nws tus Tswv Ntuj lub npe muaj hwj chim. Ces lawv yuav nyob ruaj vim thaum ntawd nws yuav nto moo loj mus txog tim npoo ntiaj teb, 4 thiab nws yuav yog txoj kev thaj yeeb.

Los: Los Mas 8: 28-30

Cov kwv tij,
28 Peb paub tias Tswv Ntuj nrog cov uas nyiam nws ua txhua yam hauj lwm kom lawv tau qhov zoo, raws li nws hu lawv thiab raws qhov nws npaj rau lawv. 29 Cov neeg uas nws ib txwm npaj hu lawv lawm, nws kuj pub txoj hmoov rau lawv kom lawv yoog tau raws li nws Leej Tub tus duab, ces nws Leej Tub thiaj ua tij, tus xub yug dua tas ib tsoom kwv coob coob. 30 Cov uas Tswv Ntuj ib txwm npaj hu, mas nws hu lawv; cov uas nws hu, mas nws ua kom lawv ncaj tuaj; cov uas nws ua kom ncaj tuaj, mas nws kuj muab koob meej rau lawv thiab.

NPN 13: 6ab, 6c

Txais: (HX 61: 10) Kuv txaus siab thiab zoo siab nyob hauv Huab Tais.

Vim kuv tso siab lug rau koj txoj kev khuv leej ,
Thov cia kuv lub siab zoo siab hlo nyob hauv koj txoj kev cawm.

Txais: (HX 61: 10) Kuv txaus siab thiab zoo siab nyob hauv Huab Tais.

Cia kuv hu nkauj cav txog HUAB TAIS tias:
“Nws tau ua zoo kawg rau kuv.”

Txais: (HX 61: 10) Kuv txaus siab thiab zoo siab nyob hauv Huab Tais.

As Les Lus yas

Txais: As les lus yas, as les lus yas.

Koj tau txoj hmoov zoo, Nkauj Dawb Huv Mab Liab,
Tsim nyog sawv daws qhuas koj;
Lub hnub uas pub txoj kev ncaj tawm hauv koj tuaj,
yog Leej Pleev peb tus Tswv Ntuj.

Txais: As les lus yas, as les lus yas.

Ntawv Moo Zoo: Mt 1: 1-16, 18-23

1 Phau ntawv qhia txog Yes Xus Pleev lub keeb, uas yog Das Vis leej tub thiab yog Has Nplas Has leej tub : 2 Has Nplas Has yug Is Xas Has, Is Xas Has yug Yas Kos, Yas Kos yug Yus Das thiab nws cov kwv tij. 3 Yus Das yug Fas Les thiab Ntxas Las ntawm Thas Mas los. Fas Les yug Es Xas Los, Es Xas Los yug As Las, 4 As Las yug As Mis Nas Das, As Mis Nas Das yug Nas As Xoos, Nas As Xoos yug Xas Moos, 5 Xas Moos yug Npuag Oos ntawm Las Has los, Npuag Oos yug Yos Npes ntawm Luv los, Yos Npes yug Yes Xes, 6 Yes Xes yug tus vaj Das Vis. Das Vis yug Xas Los Moos ntawm Us Lis tus poj niam los, 7 Xas Los Moos yug Los Npuag, Los Npuag yug As Npias, As Npias yug As Xas, 8 As Xas yug Yos Xas Fas, Yos Xas Fas yug Yos Las, Yos Las yug Os Xias, 9 Os Xias yug Yos Thas, Yos Thas yug As Kas, As Kas yug Es Xes Kias, 10 Es Xes Kias yug Mas Nas Xes, Mas Nas Xes yug As Mos, As Mos yug Yos Xias, 11 Yos Xias yug Yes Kos Nias thiab Yes Kos Nias cov kwv tij; thaum ntawd yog lub caij raug txim nyob Npas Npis Los. 12 Dhau lub caij raug txim nyob Npas Npis Los lawm, Yes Kos Nias yug Xas Las Thias, Xas Las Thias yug Ntxos Los Npas Npes, 13 Ntxos Los Npas Npes yug As Npis Yus, As Npis Yus yug Es Lias Kis, Es Lias Kis yug As Ntxos, 14 As Ntxos yug Xas Dos, Xas Dos yug As Khis, As Khis yug Es Lis Us, 15 Es Lis Us yug Es Lias Ntxas, Es Lias Ntxas yug Mas Thas, Mas Thas yug Yas Kos, 16 Yas Kos yug Yos Xes uas yog Mab Liab tus txiv. Mab Liab yug Yes Xus, uas luag hu nws ua Leej Pleev.
18 Yes Xus Pleev lub keeb chiv zoo li no : Mab Liab uas yog Yes Xus niam raug muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub. 19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm. 20 Thaum nws tab tom txiav siab li ntawd, Huab Tais tus Tshiab tawm los ua npau suav rau nws, thiab hais rau nws tias : "Yos Xes, Das Vis leej tub, koj txhob ntshai coj Mab Liab, koj tus poj niam, los nrog koj nyob. Yog Leej Ntuj Plig Ntshiab ua kom nws xeeb tub. 21 Nws yuav yug ib tug tub, koj yuav tis nws npe hu ua Yes Xus : vim nws yuav cawm nws haiv neeg ntawm lawv cov txhaum." 22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias : 23 Tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es, txhais tias : "Tswv Ntuj nrog peb nyob".

Los: MT 1: 18-23

18 Yes Xus Pleev lub keeb chiv zoo li no : Mab Liab uas yog Yes Xus niam, raug muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub. 19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm. 20 Thaum nws tab tom txiav siab li ntawd, Huab Tais tus Tshiab tawm los ua npau suav rau nws, thiab hais rau nws tias : "Yos Xes, Das Vis leej tub, koj txhob ntshai coj Mab Liab, koj tus poj niam, los nrog koj nyob. Yog Leej Ntuj Plig Ntshiab ua kom nws xeeb tub. 21 Nws yuav yug ib tug tub, koj yuav tis nws npe hu ua Yes Xus : vim nws yuav cawm nws haiv neeg ntawm lawv cov txhaum." 22 Tas ib puas tsav yam ntawd tshwm sim raws li lo lus uas Huab Tais kom tus yaj saub xub hais tseg tias : 23 “Tus ntxhais nkauj xwb yuav xeeb tub, nws yuav yug ib tug tub. Luag yuav tis nws npe hu ua Es Mas Nus Es,” txhais tias : ‘Tswv Ntuj nrog peb nyob.’

TIM 9 LUB 9 HLIS 2017

Hnub Xya Lis Piam Nees Nkaum Ob Nruab Xyoo A Nruab Lis Piam Xyoo I

Hwm LN Peter Claver

Zaj Nyeem Ib: KLX 1: 21-23

Cov kwv tij,
21 Yav thaud, nej yog ib co pej kum neeg thiab nej ua yeeb ncuab, vim nej lub tswv yim coj nej ua tej yam phem. 22 Nyem no, Leej Pleev ua kom nej los sib haum xeeb nyob hauv nws lub cev nqaij vim nws txoj kev tuag, kom nej ua tau ib co neeg ntshiab, tsis muaj qhov phem, tsis muaj chaw xyeej nyob ntawm nws xub ntiag. 23 Tiam sis yuav tsum yog nej ua siab tawv qhawv nyob hauv txoj kev ntseeg, nyob ruaj nreb khov kho, coj kom tus tus, txhob ncaim ntawm txoj kev tso siab uas nej tau hnov lub Moo Zoo qhia rau nej; lub Moo Zoo ntawd twb raug muab tshaj rau txhua leej txhua tus nyob hauv lub qab ntuj khwb no lawm. Kuv, Paj Lug, yog ib tug tsob hwb lub Moo Zoo ntawd.

NPN 54: 3-4, 6+8

Txais: (6) Tswv Ntuj nws yog tus pab kuv.

Tswv Ntuj, thov koj cawm kuv vim koj lub npe;
muab koj lub hwj huam los pab kuv kom kuv yeej.
Tswv Ntuj, thov koj mloog kuv zaj thov,
Thov mloog cov lus tawm ntawm kuv lub ncauj los.

Txais: (6) Tswv Ntuj nws yog tus pab kuv.

Nej ntsia, Tswv Ntuj yog tus tuaj pab kuv,
HUAB TAIS yog tus txheem kuv txoj sia.
Kuv zoo siab hlo cev ib co txim los txi koj,
HUAB TAIS, kuv cav txog koj lub npe
Vim nws muaj txoj kev ua zoo.

Txais: (6) Tswv Ntuj nws yog tus pab kuv.

As Les Lus Yas: ZAM 14: 6

Txais: As les lus yas, as les lus yas.

Huab Tais hais tias: Kuv yog Txoj Kev, yog Qhov Tseeb, thiab yog Txoj Sia.
Tsis muaj leej twg mus cuag Leej Txiv tau, yog nws tsis mus ntawm kuv mus.

Txais: As les lus yas, as les lus yas.

Ntawv Moo Zoo: LK 6: 1-5

1 Muaj ib hnub Xas Npas Tos, Yes Xus mus hla ib thaj teb npleg, nws cov thwj tim de tej hnab nplej los mos ntawm tes noj. 2 Muaj ib co Fas Lis Xas hais tias : "Vim li cas nej ua tej yam uas hnub Xas Npas Tos yuav tsum caiv ?" 3 Yes Xus teb rau lawv tias : "Nej tsis tau nyeem zaj piav txog qhov Das Vis tau ua thaum nws thiab nws cov neeg tshaib plab, es Das Vis nkag mus rau hauv Tswv Ntuj lub tsev, mus muab cov ncuav mov txi Ntuj uas tsuas kawg yog cov Leej Choj thiaj muaj cai noj xwb los noj, thiab nws tseem muab rau nws cov kwv luag noj thiab lod?" 5 Ces Yes Xus hais rau lawv tias : “Neeg Leej Tub yog tus tswv hnub Xas Npas Tos."

TIM 11 LUB 9 HLI 2017

Hnub Ob Lis Piam Nees Nkaum Peb Nruab Xyoo A Nruab Lis Piam Xyoo I

Zaj Nyeem Ib: KLX 1: 24–2:3

Cov kwv tij,
24 Nyem no, kuv zoo siab ris kev txom nyem kom tau pab nej, vim hais tias yog qhov twg tsis txaus nyob hauv Leej Pleev txoj kev txom nyem mas kuv yuav tau ntxiv rau nyob hauv kuv cev nqaij kom tau pab Leej Pleev lub Cev uas yog lub Koom Txoos. 25 Kuv tau los ua ib tug tub tsob hwb lub Koom Txoos, raws li Tswv Ntuj yeej npaj txoj hauj lwm ntawd rau kuv ua rau nej lawm, uas yog ua kom Tswv Ntuj lo lus txoj dej num tiav log rau nej, 26 yog ib yam txuj tob tob zais cia tau ntau niaj ntau tiam los lawm, nyem no kuj tshwm tawm los rau nws cov ntshiab paub. 27 Tswv Ntuj zoo siab ua kom cov ntshiab paub tias yuav tsum qhia txog tias yam txuj zais cia ntawd lub hwj chim loj npaum li cas rau cov neeg teev pej kum dab paub, qhov zais ntawd yog Leej Pleev nyob hauv nej, nws yog txoj kev tso siab tias yuav tau txais hwj chim. 28 Leej Pleev yog tus peb tshaj rau nej paub. Peb ntuas peb qhuab qhia txhua leej txhua tus raws li txoj kev thoob tsib, kom txhua leej txhua tus txawj ua neeg zoo txhij zoo txhua nyob hauv Leej Pleev. 29 Yog vim li no, kuv thiaj siv zog thiab tiv tej kev tawm tsam raws li Leej Pleev lub hwj huam ua hauj lwm nyob hauv kuv.
2 1 Kuv xav kom nej paub txog tias, kuv yuav tsum siv zog tiv kev tawm tsam npaum li cas los pab nej thiab pab cov nyob Laus Dis Xias, thiab pab ntau leej ntxiv, uas lawv qhov muag tseem tsis tau pom kuv dua ib zaug, 2 kom txhawb tau lawv lub siab, ces lawv yuav los sib koom nyob hauv txoj kev nyiam, hauv txoj kev muaj kev tso siab puv npo los ntawm kev to taub txog Tswv Ntuj cov txuj zais tob, uas yog Leej Pleev. 3 Leej Pleev yog tus uas muaj txhua tsav txhua yam kev thoob tsib kev paub kev txawj nplua mias zais rau hauv nws.

NPN 62: 6-7, 9

Txais: ( Hauv Tswv Ntuj kuv muaj kev cawm thiab kuv muaj koob meej.

Kuv tus plig, koj yuav nyob tiaj tus hauv Tswv Ntuj ib leeg,
Vim kuv txoj kev tso siab tuaj ntawm nws tuaj.
Nws ib leeg yog kuv lub tsua, yog tus cawm kuv,
yog kuv lub yeej ntsa zeb, kuv yuav tsis qaug.

Txais: ( Hauv Tswv Ntuj kuv muaj kev cawm thiab kuv muaj koob meej.

Nej, nws haiv neeg, nej yuav tso siab
rau nws txhua lub sij hawm!
Nej yuav qhib nej lub siab rau nws;
Tswv Ntuj yog peb qhov chaw nkaum.

Txais: ( Hauv Tswv Ntuj kuv muaj kev cawm thiab kuv muaj koob meej.

As Les Lus Yas: ZAM 10: 27

Txais: As les lus yas, as les lus yas.

Huab Tais hais tias, kuv cov yaj mloog kuv lub suab;
kuv paub lawv, lawv raws nraim kuv qab mus.

Txais: As les lus yas, as les lus yas.

Ntawv Moo Zoo: LK 6: 6-11

6 Tseem muaj ib hnub Xas Npas Tos, Yes Xus mus hauv lub tsev txoos, nws qhia sawv daws. Nyob ntawd, muaj ib tug neeg uas sab tes xis qhuav. 7 Cov Kws Ntawv Ntshiab thiab cov Fas Lis Xais nyas ntsia twj ywm saib Yes Xus puas yuav kho neeg mob hnub Xas Npas Tos, kom xwv lawv thiaj tau kev nrhiav lus rau Yes Xus. 8 Yes Xus twb paub qhov lawv xav lawm, ces nws txawm hais rau tus neeg qhuav tes tias : "Koj sawv, koj los sawv ntsug hauv nruab nrab." Ces tus qhuav tes sawv los. 9 Yes Xus hais rau lawv tias : « Kuv nug nej ib yam saib : hnub Xas Npas Tos, txoj cai puas kheev kom ua zoo los ua phem, kom cawm ib txog sia los txo ib txog sia? » 10 Ces Yes Xus ntsia ncig lees rau lawv sawv daws, nws hais rau tus qhuav tes tias : "Koj xyab tes." Tus neeg ntawd xyab tes, nws txhais tes cia li zoo hlo lawm. 11 Tab sis lawv npau taws kawg nkaus cuag li lawv vwm lawm, ces lawv sib tham saib lawv yuav ua li cas rau Yes Xus.