COV ZAJ NYEEM NRUAB LIS PIAM XYOO I 2016-2017

TIM 26 LUB 12 HLIS 2016

Hnub Ob – Hnub tom qab Yes Xus Yug Los Nruab Lis Piam Xyoo I

Hwm Leej Ntshiab Tes Fas Nos (Stephen), Thawj tus Tuag Ua tim Khawv

Zaj Nyeem Ib HAUJ LWM 6:8-10; 7:54-59

8 Tes Fas Nos yog ib tug neeg muaj txiaj ntsim thiab muaj hwj chim. Nws ua ib co hwj huam yees ntxwv thiab ib co cim loj kawg nyob hauv tsoom pej xeem. 9 Ces muaj ib co neeg tuaj ntawm lub Tsev Txoos uas hu ua cov Qhev Dim Txim lub ; lawv yog ib co neeg nyob Xis Les Nas tuaj, nyob As Les Xas Nrias tuaj, thiab ib co nyob Xis Lis Xias, thiab nyob As Xias tuaj. 10 Lawv nrog Tes Fas Nos sib cav. Tab sis lawv cav tsis yeej Tes Fas Nos, vim nws yog neeg thoob tsib, thiab yog Leej Ntuj Plig qhia nws hais. 54 Thaum lawv hnov cov lus no, mas lawv npau taws ceev kawg. Lawv zim hniav zog rau Tes Fas Nos. 55 Leej Ntuj Plig Ntshiab nyob puv hauv Tes Fas Nos lub siab. Tes Fas Nos tsa muag ntsia ntsoov rau saum ntuj. Nws pom Tswv Ntuj lub hwj chim thiab pom Yes Xus sawv nyob ntawm Tswv Ntuj sab xis. 56 Ces nws hais tias : "Kuv pom lub ntuj qhib lug, thiab pom Neeg Leej Tub sawv ntsug ntawm Tswv Ntuj sab xis." 57 Thaum ntawd, cov Yus Das nthe nrov nrov. Lawv pos pob ntseg. Sawv daws ua ib tsaug khiav mus nthos nkaus Tes Fas Nos. 58 Lawv thawb Tes Fas Nos mus rau sab nroog nraud, ces lawv txawb pob zeb tua nws. Cov tim khawv tso lawv tej khaub ncaws rau ntawm ib tug tub hluas ko taw. Tus hluas ntawd hu ua Xauv. 59 Thaum lawv tab tom txawb pob zeb tua Tes Fas Nos mas Tes Fas Nos hu txog Ntuj. Nws hais tias : "Huab Tais Yes Xus, thov koj txais kuv tus plig."

NPN 31:3CD-4, 6 + 8AB, 16BC + 17

Txais: (6) Huab Tais, kuv tso kuv tus ntsuj plig
rau hauv koj txhais tes.

Thov koj ua kuv lub tsua rau kuv tau chaw nkaum,
ua ib lub loog khov ruaj thaiv kuv.
Koj yog kuv lub tsua thiab kuv lub ntsa loog zeb;
vim koj saib koj lub npe, koj yuav coj kuv thiab qhia kev rau kuv.

Txais…

Kuv muab kuv tus ntsuj plig tso rau hauv koj txhais tes;
HUAB TAIS, tus Tswv Ntuj muaj kev pheej xeeb, koj yuav txhiv kuv;
Kuv yuav zoo siab thiab luag ntxhi vim koj txoj kev khuv leej.

Txais…

Thov koj cawm kuv dim ntawm kuv cov yeeb ncuab thiab cov tsim txom kuv.
Thov cia koj lub ntsej muag ci hob tuaj rau koj tus tub txib;
thov cawm kuv vim koj muaj lub siab zoo.

Txais…

As Les Lus Yas: NPN 118: 26A, 27A

Txais: As les lus yas, As les lus yas

Tus uas tuaj ntawm Huab Tais lub npe tuaj nto koob meej;
HUAB TAIS yog Tswv Ntuj, nws muab txoj kev pom kev rau peb.

Txais: As les lus yas, As les lus yas

Ntawv Moo Zoo: MT 10: 17-22

17 Nej ceev faj txog neeg : lawv yuav mus kom nej rau cov rooj txwj laus txiav txim, lawv yuav nplawm nej hauv cov tsev txoos. 18 Luag yuav coj nej mus rau cov nom thiab cov vaj vim kuv, kom nej ua tim khawv txog kuv nyob ntawm cov nom tswv thiab cov teev pej kum dab xub ntiag. 19 Thaum luag ntes nej, mas nej tsis txhob txhawj tias yuav hais li cas thiab yuav teb dab tsi. Lub sij hawm ntawd, Ntuj yuav muab cov lus teb rau nej. 20 Li ntawd, yuav tsis yog nej hais lus, yog nej Txiv tus Ntsuj Plig yuav hais tawm hauv nej los. 21 "Tus tij yuav muab tus kwv muag rau luag tua, leej txiv yuav mus kom nws tus me nyuam rau luag. Tej me nyuam yuav sawv tiv niam thiab txiv, thiab yuav muab nkawd tua. 22 Sawv daws yuav ntxub nej vim kuv lub npe. Tab sis, tus twg ua siab ntev nyiaj txog qhov kawg, mas nws yuav txais kev cawm.

TIM     27     LUB     12     HLIS      2016

Hnub Peb - hauv Thawj Yim Hnub Caij Yes Xus Yug Los, Nruab Lis Piam Xyoo I

Hwm LN Zam, Hauv Paus Xa Lus thiab Kws Sau Ntawv Moo Zoo (John, Apostle and evangelist)

Zaj Nyeem Ib:    1 ZAM  1:   1-4

1 Tej yam uas tau tshwm sim thaum lub hauv paus los, tej yam uas peb tau hnov, tej yam peb tau pom xyeem ntawm qhov muag, tej yam peb tau ntsia ntsoov, tej yam peb txhais tes tau kov, uas yog hais txog Leej Lo Lus pub txoj sia; 2 vim Txoj Sia tau tawm los lawm. Peb tau pom Txoj Sia lawm, peb ua tim khawv hais txog Txoj Sia no, thiab peb tuaj qhia kom nej paub txog Txoj Sia nyob mus li no; nws nyob ze Leej Txiv thiab nws kuj ho tawm los rau peb pom thiab. 3 Yam uas peb tau pom thiab tau hnov, mas peb tshaj rau nej paub, kom nej nrog peb koom ua ib lub siab. Peb txoj kev sib koom siab ntawd kuj yog nrog Leej Txiv thiab nws Leej Tub Yes Xus Pleev koom siab thiab. 4 Peb sau tas puas tsav yam no rau nej paub, kom nej muaj txoj kev zoo siab puv meem mias nyob hauv nej.

NPN  97:   1-2, 5-6, 11-12

Txais:  (12) Tus neeg ncaj,  koj yuav zoo siab nyob hauv Huab Tais!

HUAB TAIS yog vaj ntxwv, kom lub ntiaj teb zoo siab;
kom ntau lub pov txwv luag ntxhi.
Cov huab thiab qhov tsaus nyob ncig nws,
kev ncaj ncess thiab kev txiav txim yog lub taw
Ncej txheem nws lub theej kiab.

Txais…

Cov roob yaj tas xws li ciab ntab yaj nyob ntawm Huab Tais xub ntiag,
ntawm tus HUAB TAIS  kav tas lub ntiaj teb xub ntiag.
Lub ntuj tshaj txog nws txoj kev ncaj ncees,
tas txhua haiv neeg pom nws lub hwj chim.

Txais…

Qhov pom kev ci tawm tuaj kaj tus neeg ncaj,
kev zoo siab ci tuaj rau tus neeg siab zoo.
Cov neeg ncaj nej zoo siab nyob hauv HUAB TAIS,
nej ua tsaug rau nws lub npe ntshiab.

Txais…

As Les Lus Yas

Txais:  As les lus yas, As les lus yas

Tswv Ntuj peb cav txog koj,
peb qw xaiv koj ua peb tus Huab Tais;
npoj Hauv Paus Xa Lus muaj hwj chim cav txog koj.

Txais:  As les lus yas, As les lus yas

Ntawv Moo Zoo:     ZAM  20:   1A + 2-8

1 Thawj hnub pib lub lis piam, thaum sawv ntxov,  2 Mab Liab Mas Ntas Las khiav mus cuag Xis Moos Pob Zeb thiab lwm tus thwj tim uas yog tus Yes Xus nyiam. Nws hais rau nkawd tias : "Lawv nqa Huab Tais tawm hauv ntxa lawm, peb tsis paub xyov lawv coj nws mus tso qhov twg lawm." 3 Pob Zeb tawm plaws mus, lwm tus thwj tim kuj tawm plaws thiab, nkawd mus tom ntxa. 4 Nkawd ob leeg ua ke khiav mus, tab sis lwm tus thwj tim khiav nrawm dua Pob Zeb, nws khiav ua ntej, nws xub mus txog tom ntxa. 5 Nws khoov mus xauj, nws pom cov ntaub qhwv nyob ntawd, tab sis nws tsis chaws mus hauv. 6 Ces Xis Moos Pob Zeb lawv nws qab tuaj txog, Pob Zeb chaws mus hauv lub ntxa. Nws pom cov ntaub qhwv nyob ntawd, 7 hos daim ntaub qhwv taub hau kauv cia nyob lwm qhov, tsis xyaw cov ntaub qhwv. 8 Ces lwm tus thwj tim uas xub mus txog ntawm lub ntxa mam li chaws mus hauv. Nws pom ces nws ntseeg.

TIM      28     LUB     12     HLIS      2016

Hnub Plaub – hauv Yim Hnub Caij Yes Xus Yug Los Nruab Lis Piam Xyoo I

Hwm Cov Me Nyuam Tsis Txhaum, Tuag Ua Tim Khawv Pauv Yes Xus Chaw  

Zaj Nyeem Ib:     1 Zam 1:  5—2:2

Cov hmov tshua,
5 Lub xov uas peb tau hnov ntawm Yes Xus los, thiab peb tshaj rau nej paub, yog li no : Tswv Ntuj yog qhov pom kev, nyob hauv nws tsis muaj ib yam tsaus li. 6 Yog peb hais tias: “Peb nrog nws koom siab,” tab sis peb tseem mus taug txoj kev tsaus ntuj, mas peb dag xwb, peb tsis ua raws qhov tseeb. 7 Hos yog peb taug txoj kev pom kev, vim nws yeej nyob hauv qhov pom kev, mas peb thiab nej sawv daws muaj kev sib koom siab ua ke, ces nws Leej Tub Yes Xus cov ntshav ntxuav peb ntawm txhua yam txhaum kom peb dawb huv tuaj. 8 Yog peb hais tias: “Peb tsis muaj txhaum,” mas peb rov dag rau peb, qhov tseeb tsis nyob hauv peb li. 9 Yog peb lees peb cov txhaum, mas Tswv Ntuj uas yog tus pheej xeeb thiab tus siab ncaj yuav zam peb cov txhaum rau peb, thiab yuav ntxuav tas puas tsav yam phem ntawm peb pov tseg kom peb dawb huv tuaj. 10 Yog peb hais tias: “Peb tsis tau ua txhaum,” mas yog zoo li peb hais tias Tswv Ntuj yog tus dag. Tswv Ntuj lo lus tsis nyob hauv peb.
2   1 Kuv cov me nyuad, kuv sau tej yam no tuaj rau nej, kom nej tsis txhob ua txhaum. Txawm tias yog muaj ib tug twg tau ua txhaum lawm, los peb muaj ib tug pab peb cev lus thov Leej Txiv, yog Yes Xus Pleev, tus siab ncaj. 2 Nws yog tus tuag ua nqi txhiv peb ntawm peb cov txhaum; tsis yog txhiv peb xwb, nws tseem txhiv tas lub qab ntuj neeg ntawm lawv cov txhaum huv tib si.

NPN     124:  2-3, 4-5, 7CD-8

Txais:   (7) Peb tus ntsuj plig tau txais kev dim plaws
               xws li tus noog dim plaws ntawm tus cuab noog lub vas.  

Yog HUAB TAIS tsis txhob tuaj pab peb
thaum cov neeg tuaj tua peb,
mas ntshai lawv yeej muab peb nqos ciaj lawm
vim lawv npau taws heev rau peb cuag hluav taws kub.

Txais:   (7) Peb tus ntsuj plig tau txais kev dim plaws
           xws li tus noog dim plaws ntawm tus cuab noog lub vas.

Ntshai dej twb los nyab peb tas,
dej sab siv twb los tshoob peb tas ;
cov dej hlob twb tshoob peb mus lawm.

Txais:   (7) Peb tus ntsuj plig tau txais kev dim plaws
           xws li tus noog dim plaws ntawm tus cuab noog lub vas.

Lub vas ntuag rhe,
peb dim plaws lawm.
Peb qhov chaw vam khom yog nyob hauv HUAB TAIS lub npe;
nws yog tus tswv tsim lub ntuj lub teb.

Txais:   (7) Peb tus ntsuj plig tau txais kev dim plaws
           xws li tus noog dim plaws ntawm tus cuab noog lub vas.

As Les Lus Yas    (zaj Te Deum)

Txais:  As  les lus yas,as les lus yas.        

Peb cav txog koj, Tswv Ntuj,    
peb qw zeem koj ua Huab Tais;        
tsoom tub rog hnav dawb uas tuag ua tim khawv cav txog koj.

Txais:  As  les lus yas,as les lus yas.

Ntawv Moo Zoo:      MT 2:   13-18

13 Thaum cov kws hnub qub rov qab mus lawm, Huab Tais tus Tshiab tawm tuaj ua npau suav rau Yos Xes, nws hais tias :  "Koj sawv, koj coj tus me nyuam thiab nws niam khiav mus Hais Nkws Tos teb, koj yuav nyob ntawd mus txog thaum kuv rov tuaj qhia koj, vim Hes Los yuav nrhiav tus me nyuam tua." 14 Yos Xes sawv tsees los, nws coj tus me nyuam thiab leej niam, lawv khiav hmo ntuj mus Hais Nkws Tos teb. 15 Nws nyob Hais Nkws Tos teb mus txog hnub Hes Los tuag, kom thiaj muaj raws li lo lus Huab Tais tus yaj saub xub hais tseg tias : “Kuv hu kuv leej tub tim Hais Nkws Tos teb los.”
16 Thaum Hes Los pom tias cov kws hnub qub dag nws, ces nws npau taws ceev kawg.  Nws xa neeg mus tua cov me nyuam uas nyob Npes Les Hes thiab nyob ib ncig thaj tsam ntawd tas tib si, kom tua cov uas muaj ob xyoos rov hauv raws li lub caij cov kws hnub qub qhia rau nws. 17 Ces muaj raws li yaj saub Yes Les Mias tau hais tias : 18 “Yuav hnov ib lub suab nrov nyob Las Mas, yog ib lub suab quaj suab nyiav ntev loo : yog Las Nkes quaj nws cov me nyuam; tsis muaj neeg nplij tau nws, vim nws cov me nyuam tsis nyob tas lawm.”

TIM      29     LUB     12     HLIS      2016

Hnub Tsib hauv Thawj Yim Hnub Caij Yes Xus Yug Los Nruab Lis Piam Xyoo I

Hwm LN Tos Mas Becket

Zaj Nyeem Ib:  1  ZAM 2:    3-11

Cov zoo nyiad,
3 Qhov ua kom peb pom tias peb paub Yes Xus, yog qhov tias peb coj nws cov lus qhia. 4 Tus hais tias : “Kuv paub nws,” tab sis twb tsis coj nws cov lus qhia, mas tus ntawd yog ib tug neeg dag, qhov tseeb tsis nyob hauv nws.  5 Hos tus coj Yes Xus lo lus, mas txoj kev nyiam Tswv Ntuj zoo tiav log nyob hauv nws lawm. Yog peb ua li ntawd, mas peb thiaj paub tseeb tias peb nyob hauv nws. 6 Tus uas nws hais tias nws nyob hauv Yes Xus, mas nws yuav tsum coj ib tug yam ntxwv raws nraim li Yes Xus tau coj.
7 Cov zoo nyiad, qhov kuv sau tuaj rau nej, tsis yog ib lo lus qhia tshiab. Yog ib lo lus qhia qub qub, uas nej tau txais puag thaum lub hauv paus los lawm. Lo lus qhia qub ntawd, yog lo lus qhia uas nej twb tau hnov lawm. 8 Tsis kav, qhov kuv sau tuaj rau nej no, kuj yog ib lo lus qhia tshiab thiab. Yog ib qho tseeb uas nyob hauv Yes Xus thiab nyob hauv nej. Vim qhov tsaus ntuj dua lawm, ces qhov pom kev tseeb twb ci tuaj lawm. 9 Tus hais tias nws nyob hauv qhov pom kev, tab sis nws ntxub nws tus kwv tij, mas nws tseem nyob hauv qhov tsaus ntuj. 10 Tus nyiam nws tus kwv tij, mas nws nyob hauv txoj kev pom kev. Ces nyob hauv nws tsis muaj dab tsi yuav ua tau kom neeg ntog. 11 Hos tus ntxub nws tus kwv tij, nws nyob hauv qhov tsaus ntuj, thiab nws maub hauv qhov tsaus ntuj, nws tsis paub tias nws mus qhov twg, vim qhov tsaus ntuj npog kom nws qhov muag tsis pom kev.

NPN 96:    1-2A, 2B-3, 5B-6

Txais:  (11a) Kom lub ntuj zoo siab thiab kom lub ntiaj teb hom khaj!

Nej hu ib zaj nkauj tshiab rau HUAB TAIS,
tas lub ntiaj teb, nej hu nkauj rau HUAB TAIS,
nej hu nkauj rau HUAB TAIS, nej cav txog nws lub npe.

Txais…

Hnub dhau hnub, nej tshaj tawm txog nws txoj kev cawm seej.
Nej piav txog nws lub hwj chim rau cov haiv neeg,
nws tej hauj lwm txaus qhuas rau txhua teb chaws.

Txais…

HUAB TAIS tau tsim lub ntuj.
Lub hwj chim thiab lub meej mom ua nws ntej;
lub hwj huam thiab kev zoo nkauj nyob hauv nws lub tuam tsev.

Txais…

As Les Lus Yas:       LK 2:   32

Txais:  As les lus yas, As les lus yas

Ib qho pom kev tawm tuaj kaj cov pej kum haiv neeg,
hos lub koob meej yog koj haiv His Xas Lais tug.

Txais:  As les lus yas, As les lus ya

Ntawv Moo Zoo:    LK 2:  22-35

22 Thaum txog lub caij lawv yuav ua cov kab ke ntxuav cev raws li Mais Xes Txoj Cai, Mab Liab thiab Yos Xes nkawd coj Yes Xus mus pem Yes Lus Xas Les, kom tau cev tus me nyuam rau Huab Tais,  23 vim Huab Tais Txoj Cai sau tias: "Txhua tus me nyuam tub xub qhib leej niqm plab yug los, yuav tsum muab qee rau Huab Tais, " 24 thiab kom tau cev ib co txim rau Ntuj raws li Huab Tais Txoj Cai uas sau cia tias : muab ib nkawg nquab lwb rwg, los ob tug thav nquab dawb.
25 Thaum ntawd nyob Yes Lus Xas Les, muaj ib tug txiv neej hu ua Xis Mes Oos. Tus neeg ntawd yog neeg ncaj thiab nyiam teev Ntuj. Nws tos tus yuav tuaj nplij His Xas Lais. Leej Ntuj Plig Ntshiab nyob hauv nws. 26 Leej Ntuj Plig Ntshiab tshoj nws ces nws paub tias yog nws tsis tau pom Huab Tais tus Pleev, mas nws yuav tsis tuag. 27 Leej Ntuj Plig coj nws tuaj nyob hauv lub Tuam Tsev Teev Ntuj. Thaum Mab Liab thiab Yos Xes nkawd coj tus me nyuam mos Yes Xus tuaj ua cov kab ke raws Txoj Cai, 28 Xis Mes Oos txais tus me nyuam los rau hauv nws ob txhais npab, nws cav lus zoo txog Tswv Ntuj tias : 29 “Huab Tais, nyem no koj tso koj tus tub txib mus kaj lug, vim twb muaj raws li koj lo lus lawm, 30 kuv qhov muag twb tau pom koj txoj kev cawm neeg, 31 uas koj tau npaj nyob ntawm ib tsoom haiv neeg xub ntiag lawm, 32 uas yog qhov pom kev tawm tuaj kaj cov pej kum haiv neeg, thiab yog koj tsoom pej xeem His Xas Lais lub koob meej.” 33 Tus me nyuam niam thiab txiv qhuas cov lus nkawd hnov hais txog tus me nyuam kawg. 34 Ces Xis Mes Oos foom hmoov zoo rau lawv, nws hais rau Mab Liab, tus me nyuam niam tias : "Koj saib mus, tus me nyuam no yuav ua chaw rau ntau leej nyob His Xas Lais ntog thiab ntau leej sawv tuaj. Nws yog ib lub cim yuav ua kom sawv daws hais tsis sib haum, 35 kom xwv tej lus uas coob leej xav tuaj nruab siab tawm los rau sawv daws paub. Hos ntawm koj, mas ib rab ntaj yuav chob ntsia ntsees koj tus plig.”

TIM      30     LUB     12       HLIS      2016

Hnub Rau hauv Thawj Yim Hnub Caij Yes Xus Yug Los Nruab Lis Piam Xyoo I

Hwm Yim Neeg Nsthiab: Yes Xus, Mab Liab  thiab Yos Xes

  Tej xyoo uas muaj ib Hnub Chiv kem tim 25 lub 12 hlis thiab tim 1 lub 1 hlis xyoo tshiab mas lub Koom Txoos ua kev hwm Yim Neeg Ntshiab rau Hnub Chiv ntawd; tiam sis tej xyoo tsis muaj Hnub Chiv kem li xyoo no mas lub Koom Txoos ua kev hwm Yim Neeg Ntshiab rau tim 30 lub 12 hlis. Vim yog ib hnub nruab lis piam mas tsuas muaj ib zaj nyeem nrog rau Ntawv Moo Zoo xwb. Hauv no muaj 3 zaj nyeem rau peb xaiv nrog rau zaj Ntawv Moo Zoo.

Zaj Nyeem Ib:       NPES XIS LAS  3:   2-6, 12-14

2 Huab Tais ua kom leej txiv muaj koob meej nyob hauv nws cov me nyuam,
nws ua kom leej niam muaj cai nyob saum nws tej tub ki.
3 Tus hwm nws txiv yog nws them nws cov txim txhaum.
4 Tus cav txog nws niam lub koob meej nws zoo li tus neeg khaws ib txhab nyiaj cia.
5 Tus hwm nws txiv, nws yuav ntsib kev zoo siab nyob hauv nws cov me nyuam.
Thaum nws thov Ntuj, Ntuj yuav mloog nws lus thov.
6 Tus cav txog nws txiv lub koob meej yuav nyob ntev xyoo.
Tus mloog Huab Tais lus ua xis nws niam siab.
12 Me tub, koj cia li los pab koj txiv thaum nws yav laus,
Tsis txhob ua kom nws tau kev nyuaj siab hauv nws lub neej.
13 Tab txawm nws lub tswv yim tsis zoo, los koj ua siab ntev,
Tsis txhob ntxub nws, koj twb yog tus tab tom muaj zog ntsos.
14 Vim tias txoj kev ua zoo rau leej txiv mas Ntuj yuav nco ntsoov,
Thiab yuav muab ua ib qho chaw zam koj cov txhaum rau koj.

Los:     KLX  3:   12-21

Paj Lug sau ntawv tias:
12 Nej uas yog cov Tswv Ntuj xaiv, yog nws cov ntshiab, thiab cov nws nyiam tshaj, nej yuav tsum hnav ib lub siab hlub neeg, ib lub siab txawj ua zoo rau luag, ib lub siab txo hwj chim, ib tug cwj pwm tsis coj nchav nchav thiab ua siab ntev, nej yuav sib coj sib yoog thiab ib leeg zam rau ib leeg. Txawm yog nej ib leeg muaj lus tsis zoo siab rau lwm tus los, ib yam li Huab Tais twb zam rau nej lawm, nej kuj yuav zam rau nws thiab. 14 Qhov loj tshaj txhua yam yog nej yuav tsum muaj txoj kev sib nyiam sib hlub, uas yog txoj kev yuav ua kom sawv daws sib koom tau mus rau txoj kev zoo tshaj plaws.
15 Thov kom Leej Pleev txoj kev thaj yeeb tuaj kav nej lub siab; txoj kev thaj yeeb ntawd yog lub hom phiaj uas Ntuj hu nej los nyob koom ua ib lub cev. Li ntawd mas nej cia li coj ib lub neej ua Ntuj tsaug mog!
16 Thov kom Leej Pleev Lo Lus nyob puv nkaus hauv nej tas huv si. Nej yuav rov sib qhuab qhia, sib ntuas nyob hauv kev thoob tsib. Nej yuav muab tas nej lub siab lub ntsws los nco txog Tswv Ntuj txiaj ntsim, nej hu tej zaj nkauj paj nruag, tej zaj nkauj cav txog nws thiab seev tej zaj lus paj huam teev ntuj. 17 Txawm nej hais yam twg los ua yam twg, mas nej yuav tuav txog Huab Tais Yes Xus lub npe mus li, ces yog nej ua Leej Txiv Tswv Ntuj tsaug nyob hauv Yes Xus.
18 Cov poj niam, nej yuav mloog nej tus txiv lus, vim tsim nyog yuav ua li ntawd nyob hauv Huab Tais. 19 Cov txiv neej, nej yuav hlub nej tus poj niam, nej tsis txhob npau taws rau nws. 20 Cov me nyuam, nej yuav mloog nej niam nej txiv lus nyob hauv txhua yam : qhov no yog txoj kev zoo Huab Tais nyiam kom ua. 21 Cov ua niam ua txiv, nej tsis txhob cem nej cov me nyuam dhau kev cai, tsam lawv tsis qab siab ua dab tsi.

Los:      KLX  3:   12-17

Paj Lug sau ntawv tias:
12 Nej uas yog cov Tswv Ntuj xaiv, yog nws cov ntshiab, thiab cov nws nyiam tshaj, nej yuav tsum hnav ib lub siab hlub neeg, ib lub siab txawj ua zoo rau luag, ib lub siab txo hwj chim, ib tug cwj pwm tsis coj nchav nchav thiab ua siab ntev, nej yuav sib coj sib yoog thiab ib leeg zam rau ib leeg. Txawm yog nej ib leeg muaj lus tsis zoo siab rau lwm tus los, ib yam li Huab Tais twb zam rau nej lawm, nej kuj yuav zam rau nws thiab. 14 Qhov loj tshaj txhua yam yog nej yuav tsum muaj txoj kev sib nyiam sib hlub, uas yog txoj kev yuav ua kom sawv daws sib koom tau mus rau txoj kev zoo tshaj plaws.
15 Thov kom Leej Pleev txoj kev thaj yeeb tuaj kav nej lub siab; txoj kev thaj yeeb ntawd yog lub hom phiaj uas Ntuj hu nej los nyob koom ua ib lub cev. Li ntawd mas nej cia li coj ib lub neej ua Ntuj tsaug mog!
16 Thov kom Leej Pleev Lo Lus nyob puv nkaus hauv nej tas huv si. Nej yuav rov sib qhuab qhia, sib ntuas nyob hauv kev thoob tsib. Nej yuav muab tas nej lub siab lub ntsws los nco txog Tswv Ntuj txiaj ntsim, nej hu tej zaj nkauj paj nruag, tej zaj nkauj cav txog nws thiab seev tej zaj lus paj huam teev ntuj. 17 Txawm nej hais yam twg los ua yam twg, mas nej yuav tuav txog Huab Tais Yes Xus lub npe mus li, ces yog nej ua Leej Txiv Tswv Ntuj tsaug nyob hauv Yes Xus.

NPN      128:   1-2, 3, 4-5

Txais: (1) Cov uas hwm Huab Tais thiab taug nws tej kev lawv tau hmoov zoo.

Nej cov hwm HUAB TAIS, nej txoj hmoov zoo,
vim nej taug raws nws txoj kev!
Nej yuav tau noj lub txiv ntawm nej tej hauj lwm,
nej yuav tau hmoov zoo thiab nws yuav nyiam nej.

Txais: (1) Cov uas hwm Huab Tais thiab taug nws tej kev lawv tau hmoov zoo.

Kuj tus poj niam yuav zoo li ib txoj hmab txiv cawv txi txiv ncw
nyob rau hauv koj tej kaum vaj kaum tsev,
koj cov me nyuam zoo li ib co ntoo txiv roj
nyob ncig lees koj lub phaj tsum.

Txais: (1) Cov uas hwm Huab Tais thiab taug nws tej kev lawv tau hmoov zoo.

Nej saib, tus neeg muaj txoj hmoov zoo
yog tus ntshai HUAB TAIS.
HUAB TAIS nyob saum roob Xis Yoos foom koob hmoov rau koj,
kom koj tau pom Yes Lus Xas Les vam meej niaj hnub hauv koj lub neej.

Txais: (1) Cov uas hwm Huab Tais thiab taug nws tej kev lawv tau hmoov zoo.

As Les Lus Yas:       KLX  3:   15A, 16A
Txais:    As les lus yas, as les lus yas.

Thov kom Leej Pleev txoj kev thaj yeeb kav nej lub siab;
thov kom Leej Pleev lo lus nyob puv nkaus hauv nej tas huv si.

Txais:    As les lus yas, as les lus yas.

Ntawv Moo Zoo:      MT  2:   13-15, 19-23

13 Thaum cov kws hnub qub rov qab mus lawm, Huab Tais tus Tshiab tawm tuaj ua npau suav rau Yos Xes, nws hais tias : "Koj sawv, koj coj tus me nyuam thiab nws niam khiav mus Hais Nkws Tos teb, koj yuav nyob ntawd mus txog thaum kuv rov tuaj qhia koj, vim Hes Los yuav nrhiav tus me nyuam tua." 14 Yos Xes sawv tsees los, nws coj tus me nyuam thiab leej niam, lawv khiav hmo ntuj mus Hais Nkws Tos teb. 15 Nws nyob Hais Nkws Tos teb mus txog hnub Hes Los tuag, kom thiaj muaj raws li lo lus Huab Tais tus yaj saub xub hais tseg tias : “Kuv hu kuv leej tub tim Hais Nkws Tos teb los.”
19 Thaum Hes Los tuag lawm, Huab Tais tus Tshiab tawm los ua npau suav rau Yos Xes nyob Hais Nkws Tos teb. 20 Tus Tshiab hais tias : "Koj sawv, koj coj tus me nyuam thiab nws niam, nej rov mus rau His Xas Lais thaj av, vim cov neeg uas xav muab tus me nyuam tua, tuag lawm." 21 Ces Yos Xes sawv tsees los, nws coj tus me nyuam thiab leej niam rov los His Xas Lais teb. 22 Tab sis, Yos Xes hnov tias As Kes Los ua vaj hloov nws txiv Hes Los chaw kav Yus Das teb, ces Yos Xes ntshai mus Yus Das teb. Ntuj qhia nws hauv npau suav, nws thiaj tsiv mus nyob xeev Nkas Lis Lais. 23 Nws los nyob ruaj hauv ib lub zos hu ua Nas Xas Les, kom xwv muaj raws li cov yaj saub xub hais txog tias : “Luag yuav hu nws ua neeg Nas Xaus Les.”

TIM 31 LUB 12 HLIS 2016

Hnub Xya hauv Thawj Yim Hnub Lub Caij Yes Xus Yug Los Nruab Xyoo I
Xya hnub tom qab Yes Xus Yug

Hwm LN Vaj Qhia Sylvester I, tuag xyoo 335 AD

Zaj Nyeem Ib: 1 ZAM 2: 18-21

18 Cov me nyuad, twb txog lub zim txwv kawg lawm. Nej tau hnov hais tias tus tiv Leej Pleev yuav tuaj no, zaum no twb muaj ntau tus uas tiv Leej Pleev, lawv twb tuaj txog lawm; vim li ntawd peb thiaj paub tias txog lub zim txwv kawg lawm. 19 Cov neeg ntawd tawm hauv peb mus, tab sis lawv tsis yog peb cov neeg. Yog lawv nrog peb ua ib pab neeg tiag, mas lawv yeej tseem nrog peb ua ke. Lawv tawm mus kom sawv daws pom xyeem tias lawv tsis yog peb pab neeg. 20 Ntawm nej, mas nej tau txais cov roj ntawm tus Ntshiab los pleev nej, ces nej sawv daws muaj kev paub. 21 Kuv sau ntawv tuaj rau nej, tsis yog vim nej tsis tau paub qhov tseeb. Kuv sau tuaj, mas yog vim nej twb paub qhov tseeb lawm, thiab vim txhua yam lus dag yeej nyob tsis taus nrog qhov tseeb.

NPN 96: 1-2, 11-12, 13

Txais: (11a) Kom lub ntuj zoo siab thiab lub ntiaj teb hom khaj!

Nej hu ib zaj nkauj tshiab rau HUAB TAIS,
tas lub ntiaj teb, nej hu nkauj rau HUAB TAIS,
nej hu nkauj rau HUAB TAIS, nej cav txog nws lub npe.
Hnub dhau hnub, nej tshaj tawm txog nws txoj kev cawm seej.

Txais…

Kom lub ntuj zoo siab thiab lub ntiaj teb hom khaj;
kom lub hiav txwv thiab txhua yam nyob hauv nrov nroo ntws;
kom cov tiaj nrag thiab txhua yam nyob hauv luag ntxhi!
Ces txhua tsob ntoo nyob hauv hav zoo yuav dhia zoo siab ntawm HUAB TAIS xub ntiag.

Txais…

HUAB TAIS tuaj lawm,
nws tuaj kav lub ntiaj teb.
Nws yuav tswj ntiaj teb neeg raws kev ncaj
thiab txhua haiv neeg raws kev haum pheej. .

Txasi…

As Les Lus Yas ZAM 1:14A, 12A

Txais: As les lus yas, As les lus yas

Tswv Ntuj Lo Lus yug los ua neeg muaj nqaij tawv thiab nws tau nrog peb nyob.
Cov uas txais nws, nws pub kom lawv muaj peev xwm ua tau Tswv Ntuj cov me nyuam.

Txais: As les lus yas, As les lus yas

Ntawv Moo Zoo ZAM 1:1-18

1 Thaum lub hauv paus, Leej Lo Lus yeej nyob lawm. Leej Lo Lus nyob nrog Tswv Ntuj. Leej Lo Lus yog Tswv Ntuj. 2 Thaum lub hauv paus, nws nyob nrog Tswv Ntuj. 3 Tas ib puas tsav yam tshwm tawm los vim nws. Yog tsis muaj nws, yuav tsis muaj ib yam dab tsi tshwm tau los nyob. 4 Yam uas nws ua kom tshwm tawm los yog txoj sia; txoj sia ntawd yog qhov pom kwv kaj tib neeg. 5 Qhov pom kev ci hauv qhov tsaus ntuj, qhov tsaus ntuj roos tsis tau qhov pom kev.
6 Muaj ib tug neeg tuaj, yog Tswv Ntuj xa nws tuaj. Nws lub npe hu ua Zam. 7 Nws yog ib tug tim khawv tuaj ua pov thawj txog qhov pom kev, kom txhua leej txhua tus ntseeg vim nws. 8 Tus ntawd tsis yog qhov pom kev, tab sis nws tuaj ua tim khawv txog qhov pom kev. 9 Leej Lo Lus yog qhov pom kev tseeb, uas ci tuaj ziab txhua leej txhua tus, nws tuaj nyob hauv lub sim ceeb. 10 Nws nyob hauv lub sim ceeb uas yog nws ua kom tshwm tawm los, tiam sis lub sim ceeb tsis paub nws. 11 Nws los nyob hauv nws tsev neeg, tiam sis nws cov neeg tsis txais nws. 12 Tab sis cov neeg uas txais nws, mas nws pub hwj huam rau lawv kom los ua tau Tswv Ntuj cov me nyuam, yog cov uas ntseeg txog nws lub npe. 13 Cov ntawd lawv tsis yug ntawm roj ntsha los, tsis yog lub cev nqaij xav kom lawv yug los, thiab kuj tsis yog neeg lub siab xav kom lawv yug los. Lawv yug ntawm Tswv Ntuj los.
14 Leej Lo Lus tau xeeb los ua ib lub cev neeg, nws tau nrog peb nyob. Peb tau ntsia ntsoov nws lub hwj chim. Yog lub hwj chim uas Leej Tub twm zeej tau ntawm Leej Txiv los. Leej Tub muaj txiaj ntsim thiab qhov tseeb nyob puv hauv nws. 15 Zam ua tim khawv txog nws. Zam tshaj hais tias : "Tus no yog tus kuv hais txog tias: ‘Tus uas lawv kuv qab tuaj, nws mus ua kuv ntej lawm, vim nws yeej ib txwm nyob ua ntej kuv.’" 16 Peb puav leej tau txais qhov uas txhawv nphau nphwv hauv nws los : peb tau txais txiaj ntsim sis laub sis lug. 17 Vim tias txoj Cai yog Mais Xes muab, hos lub txiaj ntsim thiab txoj kev tseeb yog Yes Xus Pleev coj tuaj. 18 Tsis muaj leej twg tau pom Tswv Ntuj ib zaug li, tab sis Leej Tub Twm Zeej uas yog Tswv Ntuj thiab nyob nraim hauv Leej Txiv lub xub ntiag, nws ua kom peb paub Tswv Ntuj.

TIM      2     LUB     1     HLIS      2017

Hnub Ob Lis Piam Ob Caij Yes Xus Yug Los

Hwm LN Basil tus Loj thiab LN Gregory Nazianzen, ob tug Tswv Qhia

Zaj Nyeem Ib 1 ZAM 2:22-28

Zam sau ntawv tias:
22 Tus neeg dag yog leej twg ? Yog tus tsis kam lees tias Yes Xus yog Leej Pleev. Tus uas tsis lees Leej Txiv thiab Leej Tub ces yog tus tiv Leej Pleev. 23 Tus tsis lees Leej Tub, mas nws kuj tsis tau Leej Txiv li thiab, tus lees txais Leej Tub, mas nws kuj tau Leej Txiv thiab. 24 Ntawm nej, mas nej yuav cia qhov uas nej tau hnov txij thaum chiv lub hauv paus los nyob ruaj rau hauv nej. Yog qhov uas nej tau hnov txij lub hauv paus los nyob ruaj hauv nej, mas nej kuj yuav nyob hauv Leej Tub thiab Leej Txiv thiab. 25 Qhov uas nws tau cog lus tias nws yuav pub rau peb, yog txoj sia nyob mus li. 26 Kuv tau sau cov lus no rau nej los hais txog cov neeg xav coj nej mus rau qhov yuam kev. 27 Ntawm nej, mas cov roj pleev uas nej tau txais ntawm nws yeej nyob rawv hauv nej , ces tsis tas yuav muaj tus qhia nej, vim cov roj uas nws pleev nej txawj qhia txhua yam rau nej, thiab vim yog qhov tseeb, tsis yog cuav, mas nej yuav tsum nyob ruaj hauv nws raws li nws tau qhia rau nej.
28 Cov me nyuad, nyem no nej nyob hauv Leej Pleev mog. Kom thaum nws tshwm sim los mas peb thiaj yuav tso siab, peb thiaj yuav tsis txaj muag rau nws lub zim txwv nws rov los.

NPN 98:1, 2-3AB, 3CD-4

Txais: (3cd) Tas npoo ntuj npoo ntiaj teb tau
pom peb tus Tswv Ntuj txoj kev cawm neeg.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis, nws sab npab ntshiab
tau ua kom nws yeej.

Txais…

HUAB TAIS ua kom sawv daws paub txog nws txoj kev cawm neeg,
nws muab nws txoj kev ncaj rau cov haiv neeg pom.
Nws rov nco txog nws txoj kev ua zoo rau thiab hlub
tsev neeg His Xas Lais.

Txais…

Tas npoo ntuj npoo ntiaj teb tau pom
peb tus Tswv Ntuj txoj kev cawm neeg.
Tas txhua teb chaws, nej cia zoo siab hu nkauj rau HUAB TAIS,
nej qw suab seev nkauj, nej cav txog nws.

Txais…

As Les Lus Yas: HES NPLAWS 1:1-2

Txais: As les lus yas, As les lus yas

Yav tas los Tswv Ntuj hais lus rau peb
cov yawg koob nyob hauv cov yaj saub;
niaj hnub no, nws hais lus rau peb nyob hauv nws leej Tub.

Txais: As les lus yas, As les lus yas

Ntawv Moo Zoo: ZAM 1:19-28

19 Thaum cov Yus Das xa ib co leej choj thiab ib co les vis tuaj ntawm Yes Lus Xas Les mus nug Zam hais tias : "Koj yog leej twg ?" Mas Zam ua tim khawv zoo li no : 20 Zam lees, nws tsis zais, nws lees tias : "Kuv tsis yog Leej Pleev." 21 Lawv nug Zam tias : "Ua li koj yog leej twg ? Koj puas yog Es Lias ?" Zam hais tias : "Kuv tsis yog." "Koj puas yog tus Yaj Saub ?" Zam teb tias : "Tsis yog." 22 Lawv thiaj hais rau nws tias : "Koj yog leej twg ? Peb yuav tsum coj ib lo lus teb rov mus rau cov xa peb tuaj. Koj hais dab tsi txog koj ?" 23 Zam hais tias : "Kuv yog tus neeg nyob hauv teb chaws suab puam lub suab qw tias : ‘Nej ua kom Huab Tais txoj kev rov ncaj,’ raws li yaj saub His Xais tau hais tseg." 24 Cov uas lawv xa tuaj kuj muaj ib co Fas Lis Xais thiab. 25 Lawv nug Zam tias : "Koj tsis yog Leej Pleev, tsis yog Es Lias, thiab tsis yog tus Yaj Saub, vim li cas koj thiaj ua kab ke ntxuav ?" 26 Zam teb rau lawv tias : "Kuv ua kab ke ntxuav nyob hauv dej. Hos nyob hauv nej, muaj ib tug uas nej tsis paub, 27 tus ntawd yuav lawv kuv qab tuaj, kuv tsis tsim nyog daws nws txoj hlua khau."
28 Tej ntawd tshwm sim tuaj nyob Npes Tas Nias, nyob sab dej Yos Las Das tim ub, ntawm thaj chaw uas Zam ua kab ke ntxuav.

TIM 3 LUB 1 HLIS 2017

Hnub Peb Lis Piam Ob Caij Yes Xus Yug Los Nruab Lis Piam Xyoo I

Zaj Nyeem Ib: 1 ZAM 2: 29–3:6

29 Yog nej paub tias Leej Pleev siab ncaj, mas nej kuj yuav paub tias yog tus twg ua raws txoj kev ncaj, mas tus ntawd yug ntawm Leej Pleev los.
3 1 Nej saib saib, Leej Txiv txoj kev hlub peb loj npaum li no, nws pub kom peb hu ua Tswv Ntuj cov me nyuam – uas yeej yog tseeb li ntawd tiag ! Tos ntiaj teb neeg tsis paub peb los vim ntiaj teb neeg twb tsis paub nws. 2 Cov zoo nyiad, nyem no peb yog Tswv Ntuj me nyuam lawm. Qhov uas yav tom ntej peb yuav zoo li cas, tseem tsis tau muaj qhov qhia rau peb paub. Qhov peb paub yog qhov tias thaum Leej Pleev rov los, mas peb yuav zoo li Nws, vim nws zoo li cas peb yuav pom Nws zoo li ntawd. 3 Tus twg muaj txoj kev cia siab raws li no, mas nws yuav ua kom nws dawb huv tuaj ib yam li Leej Pleev yog tus dawb huv. 4 Tus twg ua txhaum, mas nws ua tsis haum txoj cai, vim kev txhaum yog kev ua tsis haum txoj cai. 5 Nej paub zoo tias Leej Pleev tau tshwm los, yog los tshem neeg cov txhaum pov tseg, thiab nyob hauv nws tsis muaj ib qho txhaum li. 6 Tus twg nyob rawv hauv Leej Pleev mas nws tsis ua txhaum, tus twg tsis tau pom thiab tsis tau paub Leej Pleev mas nws thiaj ua txhaum.

NPN 98: 1, 3CD-4, 5-6

Txais: (3cd) Tas npoo ntuj npoo ntiaj teb tau pom peb tus Tswv Ntuj txoj kev cawm neeg.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis, nws sab npab ntshiab
tau ua kom nws yeej.

Txais…

Tas npoo ntuj npoo ntiaj teb tau pom
peb tus Tswv Ntuj txoj kev cawm neeg.
Tas txhuam teb chaws, nej zoo siab hu nkauj rau HUAB TAIS,
nej qw suab hu nkauj, nej cav txog nws.

Txais…

Nej ntaus nkauj nog ncas cav txog HUAB TAIS
nej ntau nkauj nog ncas thiab hu tej zaj nkauj seev.
Nej tshuab puab tshuab hom nrov nrov,
nej hu nkauj zoo siab nyob ntawm tus Vaj Ntxwv HUAB TAIS xub ntiag.

Txais…

As Les Lus Yas: ZAM 1: 14A, 12A

Txais: As les lus yas, As les lus yas

Tswv Ntuj Lo Lus yuav ib lub cev neeg, nws tuaj nrog peb nyob.
Cov uas txais nws, nws pub kom lawv muaj peev xwm ua tau Tswv Ntuj cov me nyuam.

Txais: As les lus yas, As les lus yas

Ntawv Moo Zoo: ZAM 1: 29-34

29 Hnub tom qab, Zam pom Yes Xus tuaj ze ntawm nws, nws hais tias : "Nej ntsia Tswv Ntuj tus Yaj, tus daws qab ntuj neeg cov txhaum. 30 Tus ntawd yog tus uas kuv hais txog nws tias : Muaj ib tug neeg lawv kuv qab, nws yuav tuaj, nws twb huas kuv ntej lawm, vim nws xub nyob dua kuv. 31 Kuv tsis tau paub nws, tab sis kuv tuaj ua kab ke ntxuav nyob hauv dej kom xwv nws tawm los rau His Xas Lais paub nws." 32 Ces Zam ua tim khawv hais tias : "Kuv pom Leej Ntuj Plig nqes saum ntuj los xws li ib tug nquab los nyob rau saum nws. 33 Kuv tseem tsis tau paub nws, tab sis Tus xa kuv tuaj ua kab ke ntxuav hauv dej, nws hais rau kuv tias : ‘Tus uas koj yuav pom Leej Ntuj Plig nqes los nyob saum nws, mas nws yog tus ua kab ke ntxuav nyob hauv Leej Ntuj Plig Ntshiab.’ 34 Kuv tau pom, ces kuv ua tim khawv tias nws yog Tswv Ntuj tus Xaiv."

TIM      4     LUB     1     HLIS      2017

Hnub Plaub Lis Piam Ob Caij Yes Xus Yug Los Nruab Lis Piam Xyoo I

Hwm LN  Elizabeth Ann Seton, ua Leej Phauj

Zaj Nyeem Ib:         1 JN  3:    7-10

7 Cov me nyuad, nej txhob cia luag tej ua kom nej yuam kev. Tus ua raws txoj kev ncaj, mas nws lub siab ncaj ib yam li Leej Pleev uas yog tus ncaj. 8 Tus ua txhaum, nws tuaj ntawm dab phem tuaj, vim txij thaum lub hauv paus los, dab phem yog tus ua txhaum. Tswv Ntuj Leej Tub tawm tuaj rhuav dab phem cov hauj lwm. 9 Leej twg yug ntawm Tswv Ntuj los, nws tsis ua txhaum, vim Tswv Ntuj lub noob cog rau hauv nws. Nws ua txhaum tsis tau, vim nws yug ntawm Tswv Ntuj los. 10 Peb paub tias, cov twg yog Tswv Ntuj cov me nyuam, thiab cov twg yog dab phem cov me nyuam : Tus tsis ua raws txoj kev ncaj, mas nws tsis yog Tswv Ntuj tug; tus tsis nyiam nws tus kwv, nws kuj tsis yog Tswv Ntuj tug.

NPN       98:   1, 7-8, 9

Txais: (3cd) Tas npoo ntuj npoo ntiaj teb tau pom peb tus Tswv Ntuj txoj kev cawm neeg.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis, nws sab npab ntshiab
tau ua kom nws yeej.

Txais: (3cd) Tas npoo ntuj npoo ntiaj teb tau pom peb tus Tswv Ntuj txoj kev cawm neeg.

Kom dej hiav txwv thiab cov tsiaj uas nyob hauv ua nrov nroo ntws,
Kom lub ntiaj teb thiab tsoom neeg ua lom zem ntsuag qees;
Kom cov niam dej npuaj teg,
Kom cov roob nrog lawv qw zoo siab,

Txais: (3cd) Tas npoo ntuj npoo ntiaj teb tau pom peb tus Tswv Ntuj txoj kev cawm neeg.

HUAB TAIS tab tom tuaj,
nws tuaj tswj kav lub ntiaj teb.
Nws yuav tswj kav qab ntuj neeg raws kev ncaj,
Nws yuav tswj kav cov haiv neeg raws kev haum pheej.

Txais: (3cd) Tas npoo ntuj npoo ntiaj teb tau pom peb tus Tswv Ntuj txoj kev cawm neeg.

As Les Lus Yas:        HES NPLAWS  1:   1-2

Txais:    As les lus yas, as les lus yas.

Thaum ub, Tswv Ntuj hais lus rau peb cov yawg koob nyob hauv cov yaj saub.
Lub zim txwv no, Tswv Ntuj hais nws cov lus rau peb nyob hauv nws Leej Tub.

Txais:    As les lus yas, as les lus yas.

Ntawv Moo Zoo:        ZAM  1:    35-42

35 Hnub tom qab, Zam nrog nws ob tug thwj tim rov sawv ntsug nyob ntawd dua. 36 Nws ntsia Yes Xus hla tuaj mus, nws hais tias : "Neb ntsia Tswv Ntuj tus Yaj." 37 Ob tug thwj tim hnov Zam hais li ntawd, nkawd raws Yes Xus qab mus. 38 Yes Xus tig los, nws pom nkawd raws nws, ces Yes Xus hais rau nkawd tias : "Neb nrhiav dab tsi ?" Nkawd hais rau Yes Xus tias : "Las Npis, (uas txhais tias Xib Hwb), koj tsev nyob qhov twg ?" 39 Yes Xus hais rau nkawd tias : "Neb tuaj, ces neb yuav pom." Ces nkawd mus, nkawd pom qhov chaw Yes Xus nyob. Hnub ntawd, nkawd nrog Yes Xus nyob. Thaum kwv yees plaub teev hnub qaij, 40 As Nres, uas  yog Xis Moos Pob Zeb tus kwv, thiab yog ib tug ntawm ob tug thwj tim uas hnov Zam hais li ntawd thiab tau raws Yes Xus qab mus, 41 nws xub mus ntsib nws tus tij laug Xis Moos, nws hais rau Xis Moos tias : "Wb ntsib tus Mes Xias lawm," -lo lus no txhais tias Leej Pleev- 42 As Nres coj Xis Moos mus cuag Yes Xus. Yes Xus ntsia Xis Moos, nws hais tias : "Koj yog Xis Moos, Zam tus tub, koj lub npe yuav hu ua Kes Fas," -lo lus no txhais tias Pob Zeb.

TIM      5     LUB     1     HLIS      2017

Hnub Tsib Lis Piam Ob Caij Yes Xus Yug Los Xyoo A Nruab Lis Piam Xyoo I

Hwm LN John Neumann, Ua Tswv Qhia

Zaj Nyeem Ib:      1 Zam  3:   11-21

11 Lub moo uas txij thaum lub hauv paus los nej tau hnov, yog lub moo no : peb yuav ib leeg hlub ib leeg, 12 tsis txhob yoog raws li Kas Ees, uas nws mloog tus Phem, nws muab nws tus kwv tua. Vim li cas nws thiaj tua nws tus kwv? Yog vim nws ua cov hauj lwm phem, hos nws tus kwv ua cov hauj lwm ncaj. 13 Li ntawd, cov kwv tij, nej tsis txhob poob siab yog lub ntiaj teb neeg ntxub nej. 14 Peb paub tias, peb twb hla ntawm txoj kev tuag los nyob hauv txoj sia lawm, vim peb nyiam peb hlub peb cov kwv tij. Tus tsis nyiam tsis hlub, nws tseem nyob hauv txoj kev tuag. 15 Leej twg ntxub nws tus kwv tij, mas nws yog ib tug tua neeg. Nej twb paub tias, tsis muaj ib tug tua neeg yuav tau txoj sia nyob mus li nyob hauv nws. 16 Peb paub txog txoj kev nyiam kev hlub vim qhov no : yog qhov tias Yes Xus tau siv nws txoj sia los pab peb. Li ntawd peb kuj yuav tsum siv peb txoj sia los pab peb cov kwv tij. 17 Tus uas muaj txhua yam hauv lub ntiaj txawm peem, yog nws pom nws tus kwv tij nyob hauv txoj kev txom nyem, tab sis nws kaw nti nws lub siab lub ntsws rau nws tus kwv tij, mas txoj kev nyiam kev hlub Tswv Ntuj yuav ua li cas nyob tau hauv nws ?
18 Cov me nyuam, peb txhob muab peb lo lus thiab tus nplaig los nyiam xwb. Peb ua kiag tej yam hauj lwm los nyiam thiaj yog tseeb mog ! 19 Peb ua li ntawd, mas peb thiaj paub tias peb nyob hauv txoj kev tseeb. Peb lub siab yuav nyob tiaj tus nyob ntawm Tswv Ntuj xub ntiag. 20 Tab yog peb lub siab rov muab txim rau peb, los Tswv Ntuj loj tshaj peb lub siab, thiab nws paub tas puas tsav yam. 21 Li ntawd, cov zoo nyiad, yog peb lub siab tsis muab txim rau peb, mas peb tso siab lug mus nyob ze ntawm Tswv Ntuj.

NPN     100:   1B-2, 3, 4, 5

Txais:   (1) Tas lub ntiaj teb, nej zoo siab qw cav txog HUAB TAIS!

Tas lub ntiaj teb, nej zoo siab hu nkauj rau HUAB TAIS !
Nej xyiv fab hlo luag ntxhi tsob hwb HUAB TAIS ;
nej hu nkauj zoo siab chaws los ntawm nws xub ntiag !

Txais:   (1) Tas lub ntiaj teb, nej zoo siab qw cav txog HUAB TAIS!

Nej cia li lees tias HUAB TAIS yog Tswv Ntuj.
Nws tsim peb los, peb yog nws tug,
peb yog nws haiv neeg, yog pab yaj nws saib.

Txais:   (1) Tas lub ntiaj teb, nej zoo siab qw cav txog HUAB TAIS!

Nej chaws mus hauv nws cov rooj loog, nej ua nws tsaug,
Nej mus hauv nws cov tshav loog, nej cav txog nws ;
nej ua nws tsaug, nej foom lus zoo rau nws lub npe.

Txais:   (1) Tas lub ntiaj teb, nej zoo siab qw cav txog HUAB TAIS!

HUAB TAIS muaj lub siab zoo :
HUAB TAIS, nws ua zoo rau peb mus li,
nws ua ncaj rau peb txheej dhau txheej.

Txais:   (1) Tas lub ntiaj teb, nej zoo siab qw cav txog HUAB TAIS!

As Les Lus Yas    

Txais:    As les lus yas, as les lus yas.

Ib hnub ntshiab tawm tuaj rau peb lawm.    
Tuaj mas, cov haiv neeg, tuaj peb pe hawm Huab Tais.
Hnub no ib qho pom kev loj kawg tawm tuaj kaj lub ntiaj teb.  

Txais:    As les lus yas, as les lus yas.


Ntawv Moo Zoo:      Zam  1:   43-51

43 Hnub tom qab, Yes Xus npaj sawv kev mus Nkas Lis Lais, nws txawm ntsib Fis Lis Pos; nws hais rau Fis Lis Pos tias : "Koj los raws kuv." 44 Fis Lis Pos nyob Npes Xais Das, yog As Nres thiab Pob Zeb nkawd lub nroog. Fis Lis Pos ntsib Nas Tas Nais, nws hais rau Nas Tas Nais tias : "Tus uas Mais Xes tau sau txog nyob hauv Txoj Cai, thiab cov Yaj Saub tau hais txog, mas peb ntsib lawm. Yog Yes Xus, Yos Xes nyob Nas Xas Les tus tub." 46 Ces Nas Tas Nais hais rau Fis Lis Pos tias : "Puas yuav muaj ib yam zoo tawm hauv Nas Xas Les tuaj tau ?" Fis Lis Pos hais rau nws tias : "Koj tuaj ces koj yuav pom." 47 Yes Xus pom Nas Tas Nais tuaj, nws hais txog Nas Tas Nais, nws hais tias : "Nej saib, tus ntawd yog ib tug tseem His Xas Lais uas tsis zais siab li." 48 Nas Tas Nais hais rau Yes Xus tias: "Ua cas koj paub kuv ?" Yes Xus teb rau Nas Tas Nais tias : "Thaum Fis Lis Pos tsis tau hu koj, kuv twb pom koj nyob hauv tsob qab ntoo txiv ncuav pias lawm." 49 Nas Tas Nais teb rau Yes Xus tias : "Las Npis, koj yog Tswv Ntuj Leej Tub tiag ! Koj yog His Xas Lais tus Vaj." 50 Yes Xus hais rau nws tias : "Yog vim kuv hais rau koj tias : Kuv pom koj nyob hauv tsob qab ntoo txiv ncuav pias, mas koj thiaj ntseeg. Koj yuav pom tej yam loj dua no." 51 Ces Yes Xus hais ntxiv rau nws tias : "Kuv hais qhov muaj tseeb tiag rau nej: Nej yuav pom ntuj qhib los, thiab pom Tswv Ntuj cov Tshiab nce thiab nqes los saum Neeg Leej Tub."

TIM       6      LUB      1      HLIS       2017

Thawj Hnub Rau Lis Piam Ob Caij Yes Xus Yug Los Xyoo A Nruab Lis Piam Xyoo I

Hwm LN As Nres Bessette, ua Leej Tij

Zaj Nyeem Ib: 1 ZAM 5: 5-13

5 Leej twg thiaj yog tus yeej lub qab ntuj neeg? Yog tus uas ntseeg tias Yes Xus yog Tswv Ntuj Leej Tub. 6 Nws yog tus tau tuaj nyob hauv dej thiab nyob hauv ntshav, Yes Xus Pleev. Nws tsis tuaj nyob hauv dej xwb, nws tuaj nyob hauv dej thiab nyob hauv ntshav. Yog Leej Ntuj Plig ua tim khawv zeem li ntawd, vim Leej Ntuj Plig yog qhov tseeb. 7 Ces muaj peb tug no ua tim khawv txog : 8 muaj Leej Ntuj Plig, muaj dej thiab muaj ntshav. Peb tug no puav leej hais ib yam nkaus xwb. 9 Yog peb twb txais neeg cov lus zeem tseeb, mas Tswv Ntuj lo lus zeem tseeb tseem loj dua. Tswv Ntuj lo lus zeem tseeb yog qhov tias nws tau zeem tseeb txog nws Leej Tub. 10 Tus twg ntseeg txog Tswv Ntuj Leej Tub, mas nws tau lo lus zeem tseeb ntawd los nyob hauv nws lub siab lawm. Hos tus tsis ntseeg, mas Tswv Ntuj saib nws yog ib tug neeg dag, vim nws tsis ntseeg lo lus uas Tswv Ntuj zeem tseeb txog nws Leej Tub. 11 Tswv Ntuj lo lus ua tim khawv zeem tseeb yog li no : Tswv Ntuj pub txoj sia nyob mus li rau peb, txoj sia ntawd nyob hauv nws Leej Tub. 12 Tus twg tau Leej Tub, ces nws tau txoj sia, tus twg tsis tau Leej Tub, ces nws kuj tsis tau txoj sia. 13 Kuv sau tej no tuaj rau nej kom nej paub tias nej tau txoj sia nyob mus li, vim nej ntseeg txog Tswv Ntuj Leej Tub lub npe.

NPN 147: 12-13, 14-15, 19-20

Txais: (12a) Yes Lus Xas Les, koj cav txog Huab Tais.
Los: As les lus yas

Yes Lus Xas Les, koj cav txog koj tus Huab Tais,
Xis Yoos, koj qhuas txog koj tus Tswv Ntuj.
Vim nws tau ua kom koj cov las ntoo ntawm rooj vag khov tuaj.
Nws tau foom koob hmoov rau koj cov me nyuam uas nyob hauv koj.

Txais: (12a) Yes Lus Xas Les, koj cav txog Huab Tais.
Los: As les lus yas

Nws ua kom muaj kev thaj yeeb nyob hauv koj tus ciam teb.
Nws ua kom koj muaj cov mov qab dua cov los noj tsau npo.
Nws xa nws lo lus ceeb toom tuaj rau ntiaj teb,
nws lo lus khiav ceev nrooj tuaj.

Txais: (12a) Yes Lus Xas Les, koj cav txog Huab Tais.
Los: As les lus yas

Nws qhia nws tej lus rau Yas Kos
thiab nws tej kev cai tej kev txiav txim rau His Xas Lais.
Nws tsis tau ua li no dua rau lwm haiv neeg li,
nws tsis tau qhia nws tej kev cai rau lawv paub. As les lus yas.

Txais: (12a) Yes Lus Xas Les, koj cav txog Huab Tais.
Los: As les lus yas

As Les Lus Yas:        MK  9:   7

Txais:  As les lus yas, as les lus yas.

Lub ntuj qhib plho, Leej Txiv lub suab nthe nrov nroo ntws tias:
TRus no yog kuv  Leej Tub uas kub hlub. Nej mloog nws hais.

Txais:  As les lus yas, as les lus yas.

Ntawv Moo Zo:      MK  1:   7-11

7 Zam tshaj rau cov neeg tias : "Tus yuav lawv kuv qab tuaj, nws loj dua kuv; kuv tsis tsim nyog khoov daws nws txoj hlua khau. 8 Ntawm kuv, kuv tau muab dej los ntxuav nej, hos nws mas nws yuav ntxuav nej nyob hauv Leej Ntuj Plig Ntshiab.”  
9 Lub zim txwv ntawd, Yes Xus tuaj ntawm Nas Xas Les xeev Nkas Lis Lais tuaj mus txais kab ke ntxuav ntawm Zam, nyob hauv tus dej Yos Las Das. 10 Thaum Yes Xus tawm hauv dej los, ib ziag ntawd, Zam pom lub ntuj dua rhe, ces Leej Ntuj Plig nqes xws li ib tug nquab los rau saum Yes Xus. 11 Thiab muaj ib lub suab nrov saum ntuj tuaj hais tias : "Koj yog kuv leej Tub uas kuv Hlub kawg, koj yog kuv qhov chaw zoo siab."

Los:     Lk  3:   23-38

23 Thaum Yes Xus pib tshaj Lo Lus, nws muaj hnub nyoog ze peb caug xyoo. Sawv daws xav tias nws yog Yos Xes tub, yog Hes Lis tub,
24 Mas Thas tub, Les Vis tub, Mes Kis tub, Zas Nais tub, Yos Xes tub,
25 Mas Tas Thias tub, As Mos tub, Nas Hus tub, Es Lis tub, Nas Nkais tub,
26 Mas As tub, Mas Tas Thias tub, Xes Mes Ees tub, Zos Xes tub, Zos Das tub,
27 Yuas Nas tub, Les Xas tub, Zes Lus Npas Npes tub, Xis Las Thias tub, Nes Lis tub,
28 Mes Kis tub, As Dis tub, Kos Xas tub, Es Mas Das tub, Ej tub,
29 Yos Suas tub, Es Lis Xes tub, Yos Lis tub, Mas Thas tub, Les Vis tub,
30 Xis Mes Oos tub, Yus Das tub, Yos Xes tub, Zos Nas tub, Es Lias Kis tub,
31 Mes Les As tub, Mes Nas tub, Mas Tas Thas tub, Nas Thas tub, Das Vis tub,
32 Yes Xes tub, Aus Npev tub, Npaus As tub, Xas Las tub, Nas As Xoos tub,
33 As Mis Nas Das tub, As Das Mis tub, As Nis tub, Hes Xaws Loos tub, Fas Lev tub, Yus Das tub,
34 Yas Kos tub, His Xas Has tub, Has Nplas Has tub, Thas Las tub, Nas Khos tub,
35 Xes Lus tub, Las Nkaus tub, Fas Les tub, Es Npes tub, Xas Las tub,
36 Kais Naas tub, As Fas Xas tub, Xees tub, Nos Hes tub, Las Mev tub,
37 Mas Thus Xas Las tub, Hes Nov tub, Yas Les tub, Mas Les Lees tub, Kais Naas tub,
38 Es Naus tub, Xes Thes tub, As Das tub, Tswv Ntuj tub.

Los:      LK  3:   23, 31-34, 36, 38

23 Thaum Yes Xus pib tshaj Lo Lus, nws muaj hnub nyoog ze peb caug xyoo. Sawv daws xav tias nws yog Yos Xes tub, yog Hes Lis tub,
31 Mes Les As tub, Mes Nas tub, Mas Tas Thas tub, Nas Thas tub, Das Vis tub,
32 Yes Xes tub, Aus Npev tub, Npaus As tub, Xas Las tub, Nas As Xoos tub,
33 As Mis Nas Das tub, As Das Mis tub, As Nis tub, Hes Xaws Loos tub, Fas Lev tub, Yus Das tub,
34 Yas Kos tub, His Xas Has tub, Has Nplas Has tub, Thas Las tub, Nas Khos tub,
36 Kais Naas tub, As Fas Xas tub, Xees tub, Nos Hes tub, Las Mev tub,
37 Mas Thus Xas Las tub, Hes Nov tub, Yas Les tub, Mas Les Lees tub, Kais Naas tub,
38 Es Naus tub, Xes Thes tub, As Das tub, Tswv Ntuj tub.

TIM 7 LUB 1 HLIS 2017

Thawj Hnub Xya Lis Piam Ob Caij Yes Xus Yug Los Xyoo A Nruab Lis Piam Xyoo I

Hwm LN Raymond Peñafort

Zaj Nyeem Ib: 1 ZAM 5: 14-21

Cov kwv tij zoo nyiad: 14 Peb muaj kev tso siab lug nyob hauv Tswv Ntuj tias yog peb thov ib yam raws li Tswv Ntuj lub siab xav, mas nws yeej mloog peb. 15 Yog peb paub tias nws mloog peb thov txhua tsav txhua yam, mas peb kuj paub tias peb twb tau txhua yam uas peb thov los ua peb tug lawm. 16 Yog nej leej twg pom nws tus kwv tij ua ib qho txhaum , uas tsis yog ib qho loj phim raug kev tuag, mas nws yuav thov Ntuj rau nws tus kwv tij, ces Tswv Ntuj yuav pub txoj sia rau tus kwv tij ntawd, tiam sis yuav tsum tsis yog ib qho loj phim raug kev tuag. Vim muaj ib hom kev txhaum coj neeg mus rau qhov tuag : Kuv tsis hais kom thov Ntuj rau tus neeg ua qhov txhaum ntawd. 17 Tas puas tsav yam tsis zoo yeej yog kev txhaum, tab sis muaj ib hom txhaum uas tsis ua kom poob rau qhov tuag. 18 Peb paub zoo tias tus yug ntawm Tswv Ntuj los, mas nws tsis ua txhaum, vim tias tus yug ntawm Tswv Ntuj los mas Tswv Ntuj pov hwm nws, ces tus Phem kov tsis tau nws. 19 Peb paub zoo tias peb yog Tswv Ntuj tug, hos tas lub qab ntuj neeg raug tus Phem lub hwj huam tswj lawv. 20 Peb kuj paub tias Tswv Ntuj Leej Tub tuaj txog lawm, nws pub lub tswv yim txawj to taub rau peb kom peb mem tau tus uas yog tus Tseeb. Peb twb nyob hauv tus Tseeb lawm, yog hauv nws Leej Tub Yes Xus Pleev. Nws yog tus Tseem Tswv Ntuj, thiab yog txoj sia nyob mus li. 21 Cov me nyuad, nej ceev faj txog cov tswv ntuj cuav mog !

NPN 149: 1-2, 3-4, 5-6A + 9B

Txais: (4a) Huab Tais zoo siab nyob hauv nws haiv neeg.
los: As les lus yas

Nej hu ib zaj nkauj tshiab rau HUAB TAIS,
nej cav txog nws nyob hauv tsoom ntseeg lub txoos.
His Xas Lais yuav zoo siab nyob hauv tus uas tsim lawv,
Xis Yoos cov me nyuam yuav luag ntxhi nyob hauv lawv tus vaj.

Txais: (4a) Huab Tais zoo siab nyob hauv nws haiv neeg.
los: As les lus yas

Lawv yuav ua kev lom zem yoj cev cav txog nws lub npe,
lawv yauv hu nkauj cav txog nws nrog suab nruas thiab suab nkauj nog ncas.
Vim HUAB TAIS hlub nws haiv neeg,
thiab nws muab txoj kev yeej ua zam npua cov neeg me.

Txais: (4a) Huab Tais zoo siab nyob hauv nws haiv neeg.
los: As les lus yas

Cov muaj lub siab ntseeg hom khaj nyob hauv txoj kev nto koob meej;
lawv yuav hu nkauj zoo siab hauv lawv tej chaw nyob;
lawv lub qa tsuas muaj qw suab cav txog Tswv Ntuj.
Cov uas ntseeg nws lawv lub koob meej yog li no. As les lus yas.

Txais: (4a) Huab Tais zoo siab nyob hauv nws haiv neeg.
los: As les lus yas

As Les Lus yas: LK 7: 16

Txais: As les lus yas, as les lus yas.

"Ib tug yaj saub loj sawv los nyob hauv peb,
Tswv Ntuj tuaj xyuas nws haiv neeg

Txais: As les lus yas, as les lus yas.

Ntawv Moo Zoo: JN 2: 1-11

1 Peb hnub tom qab, muaj ib rooj tshoob hauv lub zos Kas Nas xeev Nkas Lis Lais. Yes Xus niam mus nrog lawv noj tshoob nyob ntawd. 2 Lawv caw Yes Xus thiab nws cov thwj tim mus noj tshoob thiab. 3 Thaum cawv tas lawm, Yes Xus niam hais rau Yes Xus tias : "Lawv tsis muaj cawv lawm." 4 Ces Yes Xus hais rau nws niam tias : "Niad, koj yuav kom kuv ua dab tsi? Kuv lub sij hawm tseem los tsis tau txog." 5 Yes Xus niam hais rau cov tub ce cawv tias : "Yes Xus kom nej ua yam twg, mas nej ua huv tib si mog." 6 Nyob ntawd, muaj rau lub hub zeb teem dej rau cov Yus Das siv raws li lawv tej kev cai ntxuav tes. Ib lub hub ntim tau peb los plaub thoob dej. 7 Yes Xus hais rau cov tub ce cawv tias : "Nej ce dej kom puv cov hub no." Ces lawv ce dej puv nkaus cov hub. 8 Yes Xus hais rau lawv tias : "Zaum no, nej ce cov dej no nqa mus rau txiv thiaj com." Ces lawv ce cov dej ntawd nqa mus. 9 Thaum txiv thiaj com saj cov dej txia ua cawv, mas nws tsis paub cov cawv los qhov twg los. Tab sis cov tub ce cawv paub lawm, vim lawv yog cov ce. Txiv thiaj com hu nraug vauv los. 10 Nws hais rau nraug vauv tias : "Sawv daws ce cov cawv qab los haus tso. Thaum cov neeg qaug cawv lawd, mam li ce cov qab tsis heev los haus. Hos koj li, koj muab cov cawv qab cia txog tav no." 11 Yes Xus thawj lub cim yog zoo li ntawd. Nws ua thawj lub cim ntawd nyob Kas Nas xeev Nkas Lis Lais; nws ua nws lub hwj chim tawm los zoo li ntawd, ces nws cov thwj tim ntseeg txog nws.

TIM       9      LUB      1      HLIS       2017

Hnub Ob Tom qab Huab Tais Tawm tuaj Xyoo A Nruab Lis Piam Xyoo I

Hwm Huab Tais Txais lub Cim Ntxuav – Ntawm no yog tso raws li nyob USA, tsis paub hais tias ntawm lub teb chaws neh nyob, puas yog hnub hwm Huab Tais txais lub Cim Ntxuav.

Zaj Nyeem Ib:     HX  42:   1-4, 6-7

1 Nej ntsia kuv tus tub txib uas kuv nres, tus kuv xaiv uas kuv nyiam tas siab. Kuv tau muab kuv lub tswv yim los roos nws. Nws yuav piav Txoj Cai rau cov kuj cuab. 2 Kuv tus tub txib yuav tsis nthe, tsis hais nrov, tsis ua suab ncha nyob ntawm tej kev hauv nroog. 3 Nws yuav tsis lov tus txhiav qaug, nws yuav tsis tshuab  tus nplaim teeb cig qauj les, nws yuav piav Txoj Cai raws nraim li qhov tseeb. 4 Kuv tus tub txib yuav tsis ntaus siab me yuav  tsis swb mus txog hnub nws tsa kev ncaj kav ntiaj teb. Cov pov txwv tos txog nws txoj kev qhuab qhia.
6 Kuv, HUAB TAIS, kuv tau hu koj nyob hauv txoj kev ncaj, kuv tau tuav koj tes, kuv tau puab koj, kuv tau muab koj los ua haiv neeg txoj kev cog lus, los ua lub teeb pom kev kaj cov kuj cuab, 7 kom tau qhib cov dig muag qhov muag, kom tau tso cov neeg kaw hauv tsev loj faj tawm los, thiab rho cov neeg nyob hauv qhov taub kom tawm hauv kev tsaus ntuj los.

los:     HL  10:   34-38

34 Ces Pob Zeb hais rau Kos Nes Lus  tsev neeg tias : "Nyem no, kuv paub tseeb tias Tswv Ntuj tsis kws leej twg cai. 35 Nyob hauv tas txhua haiv neeg, yog leej twg hwm nws thiab coj txoj kev ncaj, mas tus ntawd ntxim Tswv Ntuj siab. 36 Tswv Ntuj tau xa nws lo lus tuaj rau cov His Xas Lais. Nws tau xa lub Moo Zoo tias neeg yuav nyob thaj yeeb nyob hauv Yes Xus Pleev, uas yog sawv daws tus Huab Tais. 37 Nej twb tau hnov txog tej xwm uas tshwm sim tuaj nyob hauv tas xeev Yus Das lawm: yog hais txog Yes Xus nyob Naj Xas Les thaum nws nyuam qhuav pib hauj lwm nyob xeev Nkas Lis Lais, tom qab Zam tshaj kom sawv daws txais lub cim ntxuav lawm. 38 Nej tau hnov tias Tswv Ntuj tau pleev nws, tau muab Leej Ntuj Plig Ntshiab thiab muab hwj huam rau nws. Nws mus ncig teb ncig chaw ua zoo rau sawv daws; nws kho cov neeg poob hauv dab phem tes kom lawv zoo hlo, vim Tswv Ntuj nrog nws nyob.

NPN      29:   1-2, 3-4, 9-10

Txais:   (11b) Huab Tais yuav foom kev thaj yeeb rau nws haiv neeg.    

Nej uas yog Tswv Ntuj cov tub, nej cav txog Huab Tais,
Nej cav txog Huab Tais lub koob meej thiab lub zog loj;
Nej cav txog Huab Tais lub npe muaj hwj chim;
Nej pe hawm Huab Tais uas nws hnav kev ntshiab ci ntsa iab.

Txais:   (11b) Huab Tais yuav foom kev thaj yeeb rau nws haiv neeg.

Huab Tais lub suab nrov rau saum cov dej,
Huab Tais nyob saum ntau tus dej,
Huab Tais lub suab muaj hwj huam loj,
Huab Tais lub suab muaj hwj chim ci ntsa iab.

Txais:   (11b) Huab Tais yuav foom kev thaj yeeb rau nws haiv neeg.

Huab Tais lub hwj chim ua xob nthe nrov nroo ntws,
txhua leej nyob hauv nws lub tuam tsev hais tias: “Koj muaj koob meej!”
Huab Tais zaum saum theej kiab nyob siab dua cov dej nyab;
Huab Tais zaum saum theej kiab ua vaj mus tas ib txhiab ib txhis.

Txais:   (11b) Huab Tais yuav foom kev thaj yeeb rau nws haiv neeg.

As Les Lus Yas:        MK  9:   7

Txais:   As les lus yas, as les lus yas.

Lub ntuj qhib plho ces Leej Txiv lub suab nrov nroo ntws tias :
"Tus no yog kuv Leej Tub uas kuv nyiam ; nej mloog nws hais."

Txais:   As les lus yas, as les lus yas.

Ntawv Moo Zoo:       MT  3:   13-17

13 Lub zim txwv ntawd, Yes Xus tawm hauv xeev Nkas Lis Lais mus cuag Zam ntawm tus dej Yos Las Das, kom Zam ua kab ke ntxuav rau nws. 14 Zam tsis kam, Zam hais tias : "Kuv yog tus yuav tsum thov koj ntxuav kuv, tab sis, koj ho tuaj cuag kuv." 15 Yes Xus teb rau Zam tias : "Nyem no, cia ua li ntawd : wb thiaj tau ua raws txoj kev ncaj." Ces Zam ua raws li Yes Xus hais. 16 Yes Xus txais kab ke ntxuav tas, nws tawm hauv dej los tim ntug nqhuab tam sis ntawd. Ces ntuj qhib plho : nws pom Tswv Ntuj tus Ntsuj Plig nqes xws li ib tug nquab los rau saum nws. 17 Thiab ib lub suab nrov saum ntuj tuaj hais tias : "Tus no yog kuv Leej Tub uas kuv nyiam. Nws yog kuv qhov chaw zoo siab."

TIM      10      LUB      1     HLIS        2017

Hnub Peb Pib Lis Piam Ib Nruab Xyoo A Nruab Lis Piam Xyoo I    

Zaj Nyeem Ib:      HES NPLAWS  2:   5-12

5 Tswv Ntuj tsis tau muab lub sim ceeb fab lwm tiam uas peb hais txog zwm rau ib co Tshiab.
6 Muaj ib tug neeg tau sau lo lus zeem tseeb no :
“Neeg yog dab tsi koj thiaj nco txog nws? Neeg leej tub yog dab tsi, koj thiaj muab nws saib rau qhov siab ?
7 Koj tau tso nws qis dua cov Tshiab ib ntus. Koj muab hwj chim thiab koob meej rau nws ntoo.
8 Koj tso puas tsav puas yam rau hauv nws qab xib taws.” Vim Tswv Ntuj tso txhua yam zwm rau neeg leej tub, mas tsis muaj ib yam dab tsi uas yuav tsis zwm rau nws. Lub zim txwv no, peb tseem tsis tau pom meej tias txhua yam zwm rau nws.
9 Tiam sis peb pom tias Yes Xus, tus uas tau txo nws qis dua cov Tshiab ib me ntu, nws tau lub hwj chim thiab lub koob meej los ntoo, vim nws tau raug txom nyem txais txoj kev tuag. Tswv Ntuj lub txiaj ntsim ua kom nws yuav tsum saj txoj kev tuag, nws thiaj pab tau txhua tus neeg.
10 Vim tias tsim nyog kom tus tsim tas ib puas tsav yam, yog nws xav coj neeg coob mus txais koob meej, mas phim nws yuav cia tus Ntaus Thawj coj lawv mus tau kev cawm yuav tsum raug txom nyem kom nws muaj kev zoo txhij txhua.
11 Vim tus ua tau kom luag ntshiab tuaj thiab cov txais kev ntshiab, lawv puav leej tawm ntawm ib lub hauv paus los. Vim li ntawd, tus ua tau kom luag ntshiab thiaj tsis txaj muag hu cov txais kev ntshiab ua nws cov kwv.
12 Thiab nws hais tias : “Kuv yuav tshaj koj lub npe rau kuv cov kwv. Kuv yuav hu nkauj cav txog koj nyob hauv lub txoos.”

NPN     8:   2AB + 5, 6-7, 8-9

Txais: (7) Koj tsa koj tus Tub kav txhua yam koj txhais tes tsim los.  

HUAB TAIS, peb tus HUAB TAIS,
koj lub npe muaj hwj xyeej mus puv tas ntiaj teb.
Neeg yog dab tsi, koj thiaj nco txog
Neeg leej tub yog dab tsi, koj thiaj txhawj txog?

Txais: (7) Koj tsa koj tus Tub kav txhua yam koj txhais tes tsim los.

Koj muab neeg tso qis me me cov tshiab.
Koj muab koob meej thiab hwj chim rau neeg ntoo.  
Koj tsa neeg kav txhua yam koj txhais tes tsim los,
koj tso tas puas tsav yam rau hauv neeg qab xib taws.

Txais: (7) Koj tsa koj tus Tub kav txhua yam koj txhais tes tsim los.

Koj tso tas tej me yaj me nyuj huv tib si,
nrog tsoom tsiaj nyeg nyob nruab liaj nruab teb,
tej me noog ya saum ntuj, me ntses nyob hauv hiav txwv,
tas txhua hom tsiaj khiav raws tej hiav txwv.

Txais: (7) Koj tsa koj tus Tub kav txhua yam koj txhais tes tsim los.

As Les Lus Yas:       1 TXLN  2:   13

Txais:   As les lus yas, as les lus yas.

Nej txais Tswv Ntuj lo lus txhob txais li yog neeg lo lus ;
nej txais kom raws li yog Tswv Ntuj Lo Lus, vim yeej yog tiag tiag.

Txais:   As les lus yas, as les lus yas.

NTAWV MOO ZOO:      MK  1:   21-28
21 Yes Xus lawv mus hauv Kas Fas Naus. Hnub Xas Npas Tos, Yes Xus mus hauv lub tsev txoos, thiab qhuab qhia sawv daws. 22 Zeej tsoom qhuas nws cov lus qhia kawg, vim nws qhia lawv xws li yog neeg muaj peev xwm, tsis zoo li cov kws Ntawv Ntshiab. 23 Thaum ntawd kiag, nyob hauv lawv lub tsev txoos, muaj ib tug neeg raug ib tug dab tsis huv nthe nrov nrov, 24 nws hais tias: "Yes Xus Nas Xas Les, koj xav ua dab tsis rau peb ? Puas yog koj tuaj rhuav peb ? Kuv paub koj yog leej twg : koj yog Tswv Ntuj tus Ntshiab." 25 Yes Xus cem nws tias : "Ua twj ywm, koj cia li tawm hauv tus neeg no mus." 26 Dab tsis huv siv zog muab tus neeg ntawd nchos heev heev, nws nthe ib suab nrov nrov ces nws tawm hauv tus neeg mus. 27 Tas sawv daws ntshai kawg, lawv sib nug zom zaws tias : “Qhov ntawd yog dab tsi ? Yog ib txog kev qhuab qhia tshiab muaj peev xwm kawg. Tab yog dab tsis huv los nws tswj tau lawv, lawv mloog nws lus tib si!” 28 Ces ib sij huam, Yes Xus lub moo nto lug rau txhua qhov, mus thoob tas hauv xeev Nkas Lis Lais.

TIM      11     LUB     1     HLIS       2017

Hnub Plaub Lis Piam Ib Nruab Xyoo A Nruab Lis Piam Xyoo I

Zaj Nyeem Ib:      HES  NPLAWS  2:   14-18

14 Vim cov me nyuam koom ib co ntshav ib ce nqaij, li ntawd Yes Xus kuj nrog lawv koom, kom nws txoj kev tuag yeej tau tus tuav txoj kev tuag lub hwj huam, tus ntawd yog tus dab phem Xas Tas;
15 thiab kom nws cawm tau cov uas raug kev tuag muab lawv ua qhev nyob hauv txoj kev ntshai tuag tas lawv sid.
16 Yes Xus tsis ua hauj lwm cawm cov Tshiab, nws txoj hauj lwm yog tuaj cawm Has Nplas Has tsoom xeeb ntxwv.
17 Vim li no, nws thiaj yuav tsum yug los zoo ib yam nkaus li nws tsoom kwv, kom nws thiaj ua tau ib tug tuam Leej Choj uas khuv leej neeg thiab npuab Tswv Ntuj rau lawv, sawv lawv chaw nyob ntawm Tswv Ntuj, kom tau them tsoom pej xeem cov txim txhaum.
18 Vim nws tus kheej tau raug kev sim siab nyob hauv kev txom nyem, mas nws thiaj txawj pab tau cov raug kev sim siab thiab.

NPN       105:   1-2, 3-4, 6-7, 8-9

Txais:   (8a) Huab Tais nco ntsoov nws lo lus nws tau cog mus ib txhis.    
los:  As les lus yas.    

Nej ua HUAB TAIS tsaug, nej hu txog nws lub npe,
nej qhia nws cov hauj lwm nto koob meej rau cov haiv neeg paub.
Nej seev nkauj rau HUAB TAIS, nej ntaus paj nruag rau nws ;
nej piav txog nws cov hwj huam yees ntxwv tas tib si.

Txais:   (8a) Huab Tais nco ntsoov nws lo lus nws tau cog mus ib txhis.    
los:  As les lus yas.

Nej nrhiav koob meej rau nej nyob hauv nws lub npe,
cov uas muaj lub siab nrhiav Huab Tais, nej cia li zoo siab!
Nej nrhiav HUAB TAIS thiab nws lub zog,
nej nrhiav tsob hwb nws tsis tseg.

Txais:   (8a) Huab Tais nco ntsoov nws lo lus nws tau cog mus ib txhis.    
los:  As les lus yas.

Has Nplas Has tsoom xeeb ntxwv,  nws cov tub txib,
Yas Kos cov tub, cov uas nws tau xaiv,
Nws yog HUAB TAIS peb tus Tswv Ntuj,
Nws tej cai tswj tas qhov txhia chaw hauv lub ntiaj teb.

Txais:   (8a) Huab Tais nco ntsoov nws lo lus nws tau cog mus ib txhis.    
los:  As les lus yas.

Nws nco ntsoov mus li cov lus nws cog cia,
yog ib co lus cog ruaj rau txhiab tiam tub ki.
Yog cov lus nws tau nrog Has Nplas Has cog,
nws tau rov zeem tseeb rau His Xas Has.

Txais:   (8a) Huab Tais nco ntsoov nws lo lus nws tau cog mus ib txhis.    
los:  As les lus yas.

As Les Lus Yas:       ZAM  10: 27

Txais:   As les lus yas, as les lus yas.

Huab Tais hais tias, kuv cov yaj mloog kuv lub suab.
Kuv paub kuv cov yaj, lawv taug raws nraim kuv qab.

Txais:   As les lus yas, as les lus yas

Ntawv Moo Zoo:      MK  1:   29-39

29 Tam sim ntawd, Yes Xus tawm hauv tsev txoos los, nws nrog Yas Kos thiab Zam nkawd mus hauv Xis Moos thiab As Nres nkawd tsev. 30 Xis Moos niam tais mob kub cev, nws pw saum txaj. Tam sim ntawd, lawv tham txog tus niam tais rau Yes Xus paub. 31 Yes Xus txav los tuav niam tais txhais tes, tsa nws sawv. Tus mob kub cev cia li thim hlo. Ces nws tsob hwb lawv.
32 Yav tsaus ntuj, thaum lub hnub poob qho lawm, sawv daws coj tas nrho cov neeg mob thiab cov raug dab huv si tuaj rau Yes Xus. 33 Tas lub nroog sau nthwv tuaj nyob ua ke ntawm nws qhov rooj. 34 Yes Xus kho coob leej neeg uas muaj ntau hom mob zoo hlo, thiab nws tseem ntiab ntau tus dab tawm. Nws tsis pub cov dab hais lus li, vim lawv paub nws yog leej twg.
35 Thaum sawv ntxov ntxov tseem tsaus ntuj nti, Yes Xus sawv, nws tawm mus rau ib qho chaw tsis muaj neeg, ces nws teev Ntuj nyob ntawd. 36 Xis Moos thiab nws cov npawg caum Yes Xus qab mus. 37 Thaum lawv nrhiav tau Yes Xus, lawv hais rau nws tias : "Sawv daws nrhiav koj." 38 Yes Xus hais rau lawv tias : "Peb mus lwm qhov chaw, hauv cov zej zog nyob tsis deb ntawm no, kom kuv tau kev tshaj lo lus nyob ntawd thiab, yog vim li ntawd, kuv thiaj tuaj". 39 Ces Yes Xus mus thoob lub xeev Nkas Lis Lais, nws tshaj lo lus nyob hauv cov tsev txoos, thiab nws ntiab dab phem tawm.

TIM      12     LUB     1     HLIS       2017

Hnub Tsib Lis Piam Ib Nruab Xyoo A Nruab Lis Piam Xyoo I

Zaj Nyeem Ib:       HES NPLAWS  3:   7-14

7 Xws li Leej Ntuj Plig Ntshiab hais tias : “Hnub no, yog nej hnov Huab Tais lub suab,
8 mas nej tsis txhob ua nej lub siab txhav qhi xws li thaud, thaum muaj kev sib cav sib ceg lub caij uas muaj kev sim siab nyob teb chaws suab puam.
9 Nyob ntawd, nej cov yawg koob tau sim kuv ua kom nyuaj kuv, txawm tias lawv twb tau pom kuv tej hauj lwm.
10 Ua li ntawd tau plaub caug xyoo, kuv thiaj npau taws rau tiam neeg ntawd, kuv hais tias : ‘Lawv lub siab yeej niaj hnub yuam kev, thiab lawv yeej tsis paub kuv tej kev li.’
11 Ces kuv npau taws heev, kuv cog lus tias: ‘Lawv yuav tsis tau mus nyob hauv kuv lub chaw so.’ ”
12 Cov kwv tij, nej yuav ceev faj, tsam nyob hauv nej lam muaj ib tug neeg muaj lub siab phem tsis xav ntseeg, ces nws txav mus deb ntawm tus Tswv Ntuj muaj txoj sia.
13 Nej yuav niaj hnub sib pab sib txhawb thaum tseem yog ‘hnub no’, kom nej tsis txhob muaj ib tug twg ua nws lub siab txhav qhi tuaj vim kev txhaum dag ntxias nws.
14 Vim peb tau los koom nrog Leej Pleev lawm, tiam sis yuav tsum yog peb nyob ruaj nreb hauv peb txoj kev tso siab rau nws txij thaum pib mus txog thaum xaus.

NPN     95:   6-7C, 8-9, 10-11

Txais:  ( 8 ) Yog hnub no nej hnov nws lub suab, tsis txhob ua nej lub siab cam thawj.

Tuaj peb mus khoov pe hawm nws,
peb mus txhos caug ntawm tus HUAB TAIS tsim peb los xub ntiag.
Vim nws yog peb tus Tswv Ntuj,
peb yog haiv neeg nws zov, pab yaj nws coj.
 
Txais:  ( 8 ) Yog hnub no nej hnov nws lub suab, tsis txhob ua nej lub siab cam thawj.

Xav kom hnub no nej mloog nws lus suab hais:      
“Nej tsis txhob ua lub siab cam thawj li nyob Me Lis Npas,
lub caij uas nyob Mas Xas hauv teb chaws suab puam,
qhov chaw uas nej phaj txiv tau sim kuv;
lawv twb tau pom kuv tej hauj lwm los lawv tseem sim kuv thiab.”      

Txais:  ( 8 ) Yog hnub no nej hnov nws lub suab, tsis txhob ua nej lub siab cam thawj.

Tau 40 xyoo kuv ceeb laj nyiaj lawv phaj neeg ntawd kawg;    Forty years I was wearied of that generation;
kuv tau hais tias: “Haiv neeg no lub siab mus yuam kev,
lawv tsis paub kuv txoj kev li.”    
Vim li no kuv npau taws, kuv tau cog lus tias:          
“Lawv yuav tsis tau nkag los nyob hauv kuv lub chaw so li.”

Txais:  ( 8 ) Yog hnub no nej hnov nws lub suab, tsis txhob ua nej lub siab cam thawj.

As Les Lus Yas:       MT  4:   23

Txais:  As les lus yas, as les lus yas.

Yes Xus tshaj lub Moo Zoo txog Ntuj lub Ceeb Tsheej  
thiab nws kho txhua yam mob nyob hauv cov neeg zoo hlo.

Txais:  As les lus yas, as les lus yas.

Ntawv Moo Zoo:     MK  1:   40-45

40 Muaj ib tug neeg mob ruas tuaj cuag Yes Xus, nws thov Yes Xus, nws txhos caug taij tias : "Yog koj xav, mas koj yeej ua tau kom kuv rov huv tuaj."
41 Yes Xus hlub tus neeg ntawd, Yes Xus cev tes kov nws thiab hais rau nws tias : "Kuv xav. Koj rov huv tuaj mas."
42 Tam sis ntawd, tus mob ruas tso tus neeg ntawd tseg, nws cia li huv hlo tuaj.
43 Yes Xus txwv nws nruj nruj thiab kom nws rov mus tam sis ntawd.
44 Yes Xus hais rau nws tias : "Koj ua twj ywm, txhob qhia dab tsi rau leej twg li. Tiam sis koj mus thws koj lub cev rau tus leej choj saib, thiab mus cev paj tshab ua kab ke ntxuav koj raws li Mais Xes qhia; qhov ntawd yuav ua puav pheej rau lawv pom."
45 Tab sis tus neeg ntawd tawm plaws mus, nws cia li pib tshaj tej ntawd thiab mus hais rau txhua qhov. Ces Yes Xus tsis tau kev tab meeg mus hauv ib lub nroog li. Nws nyob sab nroog nraud, ntawm tej qhov chaw tsis muaj neeg. Neeg kuj tuaj tas qhov txhia chaw tuaj cuag nws tas li thiab.

TIM 13 LUB 1 HLIS 2017

Hnub Rau Lis Piam Ib Nruab Xyoo A Nruab Lis Piam Xyoo I

Hwm LN Hilary

Zaj Nyeem Ib: HES NPLAWS 4: 1-5, 11

1 Peb yuav tsum ntshai rwg tias txawm txoj kev cog lus tseem qhib lug rau peb mus hauv Tswv Ntuj lub chaw so, los tsam nej ib tug twg ho raug saib tsis tsim nyog mus.
2 Vim lo lus ntawd yeej hais rau peb ib yam li hais rau lawv cov thaud. Tab sis lo lus lawv tau hnov tsis pab lawv dab tsi, vim lawv tsis muaj kev ntseeg txog tej yam lawv hnov.
3 Peb cov uas ntseeg, mas peb yuav tau mus hauv lub chaw so, raws li Tswv Ntuj tau hais tias : “Kuv npau taws, kuv thiaj cog lus tias lawv yuav tsis tau mus nyob hauv kuv lub chaw so.” Tswv Ntuj tej hauj lwm yeej tiav tas puag thaum ntuj tsim teb raug lawm,
4 rau qhov muaj ntawv sau hais txog hnub xya li no tias : “Hnub xya, Tswv Ntuj so, nws tso hauj lwm tseg tas tib si.” 5 Thiab tseem muaj lwm qhov chaw hais tias : “Lawv yuav tsis tau mus nyob hauv kuv lub chaw so.”
11 Ua li mas peb kav tsij peem kom tau mus nyob hauv lub chaw so ntawd, kom tsis txhob muaj ib tug poob vim nws yoog lawv tus piv txwv tawv ncauj thaum ub.

NPN 78: 3 + 4BC, 6C-7, 8

Txais: (7b) Nej yuav nco ntsoov Huab Tais cov hauj lwm!

Tej yam uas peb tau hnov thiab paub,
tej yam uas peb cov yawg koob tau hais qhia rau peb,
peb yuav muab hais qhia rau cov tiam neeg tom ntej
txog tej yam txaus qhuas HUAB TAIS tau ua thiab txog nws lub zog.

Txais: (7b) Nej yuav nco ntsoov Huab Tais cov hauj lwm!

Lawv kuj yuav tsum tau qhia rau lawv tej me tub me nyuam
tias kom yuav tsum tso siab rau Tswv ntuj,
thiab nco ntsoov Tswv ntuj cov hwj huam
thiab coj raws nws tej lus qhia.

Txais: (7b) Nej yuav nco ntsoov Huab Tais cov hauj lwm!

Kom tsis txhob ua zoo li lawv cov yawg koob,
uas yog ib tiam neeg phem thiab ntxeev siab,
ib tiam neeg tsis muaj lub siab ruaj nreb,
los lub tswv yim npuab khov kho rau Tswv ntuj.

Txais: (7b) Nej yuav nco ntsoov Huab Tais cov hauj lwm!

As Les Lus Yas: LK 7: 16

Txais: As les lus yas, as les lus yas

Ib tug yaj saub loj sawv los nyob hauv peb,
Tswv Ntuj tau tuaj xyuas nws haiv neeg lawm.

Txais: As les lus yas, as les lus yas

Ntawv Moo Zoo: MK 2: 1-12

1 Ob peb hnub tom qab, Yes Xus rov los hauv Kas Fas Naus, sawv daws paub tias Yes Xus nyob hauv tsev. 2 Ces neeg tuaj sib sau coob coob ua ke, tsis tshuav chaw seem ntawm qhov rooj li. Yes Xus qhia Lo Lus rau sawv daws. 3 Muaj plaub leeg nqa ib tug tuag ceg tuaj rau Yes Xus. 4 Lawv tsis tau kev nqa tus tuag ceg los rau Yes Xus vim neeg coob dhau, ces lawv yaws lub ruv tsev ncaj qhov chaw Yes Xus nyob; lawv tho qhov saum ruv tsev, lawv dauv lub txaj uas tus tuag ceg pw nqes los. 5 Yes Xus pom lawv lub siab ntseeg, nws hais rau tus tuag ceg tias : "Me nyuad, koj cov txhaum daws tas lawm." 6 Muaj ib co kws Ntawv Ntshiab nrog tsoom neeg zaum nyob ntawd, lawv xav hauv nruab siab tias : 7 "Tus neeg ntawd hais dab tsi li ntawd ? Nws thuam Ntuj ! Leej twg thiaj daws txhaum tau ? Tsuas kawg Tswv Ntuj tib leeg xwb." 8 Tab sis Yes Xus lub tswv yim paub tam sis ntawd tias lawv xav qhov ntawd hauv siab, nws thiaj hais rau lawv tias : "Ua cas nej xav tej zaj zoo li no hauv nej siab ? 9 Lo lus twg yog lo hais yooj yim dua rau tus tuag ceg : Yog lo tias 'Koj cov txhaum daws tas', los yog lo tias : ‘Koj sawv, nqa koj lub txaj, koj mus’ ? 10 Ua li mas, kom nej paub tias Neeg Leej Tub muaj hwj huam daws txhaum tau nyob ntiaj teb no." Ces Yes Xus hais rau tus tuag ceg tias : 11 "Kuv hais rau koj, koj sawv, nqa koj lub txaj, koj rov mus tsev." 12 Tus tuag ceg sawv tsees. Nws nqa hlo nws lub txaj tam sim ntawd, nws hla sawv daws xub ntiag tawm mus. Cov neeg nyob ntawd yoob tas, lawv cav txog Tswv Ntuj, thiab lawv hais tias : "Peb tsis tau pom dua ib yam zoo li ntawd ib zaug li."

TIM      14     LUB     1     HLIS      2017

Hnub Xya Lis Piam Ib Nruab Xyoo A Nruab Lis Piam Xyoo I

Zaj Nyeem Ib  HES NPLAWS 4:12-16

12 Tswv Ntuj lo lus muaj sia, nws ua tau hauj lwm. Tswv Ntuj lo lus ntse dua ib rab ntaj ob sab ntse, nws txeem mus tau hauv kis uas cais tus ntsuj plig ntawm lub tswv yim, thiab kis uas cais cov pob qij txha ntawm cov paj hlwb; thiab nws txawj txiav txim rau tej zaj tswv yim thiab tej txoj kev ntshaw nyob hauv neeg nruab siab. 13 Tas puas tsav yam Ntuj tsim los, mas yeej tsis muaj ib yam uas Tswv Ntuj lo lus pom tsis tau. Txhua yam liab qab thiab qhib lug nyob ntawm nws xub ntiag; nws yog tus uas peb yuav tsum teb rau nws txog peb tej hauj lwm huv tib si. 14 Vim peb muaj Tswv Ntuj Leej Tub Yes Xus ua Tuam Leej Choj thiab ua Vaj, nws hla dhau yim txheej cuaj txheej ntuj, mas peb yuav nyob ruaj nreb khov kho hauv txoj kev ntseeg. 15 Peb tus Tuam Leej Choj tsis yog ib tug Leej Choj tsis txawj hlub peb cov neeg zog me, rau qhov nws tau raug txoj kev sim siab txhij txhua ib yam li peb; tsuas tshuav txoj kev txhaum xwb, nws thiaj tsis tau ua. 16 Li ntawd peb kav tsij tso siab lug mus kom txog lub theej kiab muaj txiaj ntsim, kom peb tau txais kev khuv leej, thiab lub txiaj ntsim los pab peb.

NPN  19:  8, 9, 10, 15

Txais:   (Zam 6:63c) Huab Tais, koj cov lus yog ntsuj plig thiab yog txoj sia.  

HUAB TAIS txoj cai zoo tas nrho,      
ua tau kom tus  ntsuj plig ciaj tuaj;    
HUAB TAIS cov cai lij choj tsim nyog mloog,  
ua tau kom tus neeg tsis ntse thoob tsib tuaj.    

Txais:   (Zam 6:63c) Huab Tais, koj cov lus yog ntsuj plig thiab yog txoj sia.

HUAB TAIS cov cai lij choj ncaj ncees,
ua kom lub siab zoo hlo ;  
HUAB TAIS lo lus qhia meej kawg,    
ua tau kom qhov muag pom kev.    

Txais:   (Zam 6:63c) Huab Tais, koj cov lus yog ntsuj plig thiab yog txoj sia.

Txoj kev hwm HUAB TAIS yog kev ntshiab,
yog txoj yuav nyob mus li;
HUAB TAIS cov txhooj yog qhov tseeb,
tas nrho nws cov txhooj ncaj ncees.    

Txais:   (Zam 6:63c) Huab Tais, koj cov lus yog ntsuj plig thiab yog txoj sia.

Thov kom cov lus kuv lub ncauj hais thiab tej yam
kuv lub siab xav tau zoo raws li koj nyiam,
HUAB TAIS, kuv lub tsua thiab tus cawm kuv.    

Txais:   (Zam 6:63c) Huab Tais, koj cov lus yog ntsuj plig thiab yog txoj sia.

As Les Lus Yas   LK 4:18

Txais:   As les lus yas, as les lus yas.  

Huab Tais xa kuv tuaj kom coj lub moo zoo tuaj rau cov pluag
thiab tshaj kev twj lij rau cov nyob hauv tsev loj faj.        

Txais:   As les lus yas, as les lus yas.

Ntawv Moo Zoo     MK 2:13-17

13 Yes Xus rov qab tawm mus taug ntug dej ntuj, tas tsoom sid tuaj ntsauv nws, ces nws qhuab qhia lawv. 14 Yes Xus mus ntxiv, ces nws pom Les Vis, uas yog As Fas Yos tub. Les Vis zaum ntawm rooj sau se, ces Yes Xus hais rau Les Vis tias : "Koj los raws kuv." Les Vis sawv tsees, nws raws Yes Xus mus. 15 Thaum Yes Xus noj mov hauv Les Vis tsev, mas muaj ib co sau se thiab ib co neeg txhaum coob nrog Yes Xus thiab cov thwj tim noj mov : vim cov sau se thiab cov neeg txhaum coob coob raws Yes Xus. 16 Cov kws Ntawv Ntshiab uas yog togFas Lis Xais pom Yes Xus nrog cov neeg txhaum thiab cov sau se noj mov, lawv hais rau cov thwj tim tias : "Vim li cas nws nrog cov sau se thiab cov neeg txhaum noj mov ?" 17 Yes Xus hnov, nws hais rau lawv tias : "Tsis yog cov neeg noj qab nyob zoo yuav vam txog kws kho mob, yog cov neeg mob. Kuv tsis tuaj hu cov neeg ncaj, kuv tuaj hu cov neeg txhaum."

TIM 16 LUB 1 HLIS 2017

Hnub Ob Lis Piam Ob Nruab Xyoo A Nruab Lis Piam Xyoo I

Nyob As Mes Lis Kas yog hnub nco txog tus yawg dub Martin Luther King

Zaj Nyeem Ib: HESNPLAWS 5: 1-10

1 Tsis hais tus Tuam Leej Choj twg, nws tsuas yog ib tug muab hauv zeej tsoom los tsa ua Leej Choj pab neeg nyob hauv txoj kev fim Tswv Ntuj xwb, kom nws pab cev paj tshab thiab txi Ntuj them txim txhaum. 2 Nws yog tus txawj hlub taus cov neeg tsis paub dab tsi thiab cov neeg yuam kev, vim tias nws kuj txawj ua txhaum ib yam nkaus li lawv. 3 Vim nws txawj ua txhaum, mas nws yuav tsum ua thaj txi Ntuj them nws cov txhaum, ib yam li nws txi Ntuj them tsoom sid cov txhaum. 4 Tsis muaj leej twg yuav rov muab nws tsa ua leej choj tau. Yog Tswv Ntuj hu nws mas nws thiaj ua leej choj tau, ib yam nkaus li Tswv Ntuj tau hu As Loos. 5 Leej Pleev los kuj ib yam, nws tsis tau rov muab hwj chim rau nws tus kheej kom nws raug tsa ua Tuam Leej Choj, nws txais lub hwj chim ntawd ntawm tus hais rau nws tias : “Koj yog kuv Leej Tub: Hnub no, kuv tau xeeb koj los.” 6 Tswv Ntuj tseem hais nyob lwm qhov tias : “Koj ua leej choj mus ib txhiab ib txhis, raws li Mes Kis Xes Des txoj cai.” 7 Leej Pleev, thaum nws ua neej nyob hauv nws lub cev nqaij, nws tau tsa suab quaj thov tus muaj peev xwm cawm tau nws ntawm txoj kev tuag; Leej Txiv mloog Leej Pleev lus thov, vim Leej Pleev yog tus hwm Leej Txiv zoo. 8 Txawm tias Leej Pleev twb yog tus Tub cag, tsis kav nws yuav tsum kawm txog txoj kev mloog lus nyob hauv nws txoj kev raug txom nyem. 9 Nyem no, Leej Pleev yog tus ua txhua yam zoo txhij zoo txhua lawm; nws yog lub hauv paus uas pub kev cawm nyob mus li rau cov neeg mloog nws lus. 10 Vim tias Tswv Ntuj tsa Leej Pleev ua Tuam Leej Choj raws li Mes Kis Xes Des txoj cai.

NPN 110: 1, 2, 3, 4

R. (4b) Koj yuav ua leej choj mus ib txhis raws txoj kev Mes Kis Xes Des tau rhawv.

HUAB TAIS hais rau kuv tus Huab Tais tias: “Koj zaum ntawm kuv sab xis
mus txog thaum kuv muab koj cov yeeb ncuab ua rooj rau koj tiag taw.”

R. (4b) Koj yuav ua leej choj mus ib txhis raws txoj kev Mes Kis Xes Des tau rhawv.

HUAB TAIS yuav ua kom koj tus cwj ua vaj muaj hwj chim nthuav mus deb txij ntawm Xis Yoos mus:
Koj yuav ua vaj nyob nruab nrab hauv koj cov yeeb ncuab.

R. (4b) Koj yuav ua leej choj mus ib txhis raws txoj kev Mes Kis Xes Des tau rhawv.

Koj tau lub hwj chim ua vaj ua koj tug txij hnub koj yug los, lub hwj chim ntshiab ci ntsa iab,
thaum koj tseem nyob hauv niam plab, thaum koj txoj kev hluas tseem zoo li lub hnub pib tawm tuaj.

R. (4b) Koj yuav ua leej choj mus ib txhis raws txoj kev Mes Kis Xes Des tau rhawv.

HUAB TAIS tau cog lus lawm, nws yuav tsis thim nws lo lus tias:
“Koj ua leej choj mus ib txhis raws li Mes Kis Xes Des txoj cai.”

R. (4b) Koj yuav ua leej choj mus ib txhis raws txoj kev Mes Kis Xes Des tau rhawv.

As Les Lus Yas: HES NPLAWS 4: 12

Txais: As les lus yas, as les lus yas.

Tswv Ntuj lo lus muaj sia thiab ua tau hauj lwm,
nws txawj tsom tau tej tswv yim thiab tej kev xav uas nyob hauv neeg nruab siab.

Txais: As les lus yas, as les lus yas.

Ntawv Moo Zoo: MK 2: 18-22

18 Zam cov thwj tim thiab cov Fas Lis Xais ua kam cov kab ke yoo mov, ces muaj neeg tuaj hais rau Yes Xus tias : "Vim li cas Zam cov thwj tim thiab cov Fas Lis Xais yoo mov, hos koj cov thwj tim tsis yoo ?"
19 Yes Xus hais rau lawv tias : “Thaum nraug vauv tseem nrog nws cov kwv luag nyob, lawv puas yoo mov tau ? Thaum lub caij lawv tseem muaj nraug vauv nrog lawv, mas lawv yoo tsis tau.
20 Tab sis, muaj ib hnub luag yuav coj nraug vauv ntawm lawv mus, ces hnub ntawd lawv yuav yoo mov.
21 Tsis muaj leej twg yuav ntxiv ib daig ntaub tshiab uas tsis tau nqws rau lub khaub tsho, vim daim ntaub tshiab yuav rub daim qub, ces haj yam yuav ntuag loj.
22 Kuj tsis muaj leej twg ntim cawv tshiab rau hauv ib co hnab tawv qub ; vim cov cawv yuav ua cov hnab tawv qub tawg, ces cawv yuav txeej tas, hos cov hnab tawv los kuj yuav puas tas. Vim li ntawd cawv tshiab mas ntim hnab tawv tshiab.”

TIM     17     LUB     1     HLIS  2017

Hnub Peb Lis Piam Ob Nruab Xyoo A Nruab Lis Piam Xyoo I

Hwm LN Aas Tos Nis (Anthony)

Zaj Nyeem Ib:      HES NPLAWS  6:   10-20

10 Tswv Ntuj tsis yog ib tug siab tsis ncaj ncees, es yuav cia li tsis nco qab tej yam nej tau ua, tsis nco nej txoj kev nyiam luag vim nws lub npe, nej cov uas tau pab thiab tseem pab cov ntshiab.
11 Peb tsuas xav kom nej txhua leej muaj lub siab kub lug pab kom txoj kev tso siab tsuas muaj loj tuaj mus txog hnub kawg xwb.
12 Peb tsis xav kom nej ua ib co neeg nkees qaug zog. Peb xav kom nej yoog cov uas lawv ntseeg thiab lawv lub siab nyob ruaj xwm yeem, ces lawv yuav tau txais raws li Tswv Ntuj cov lus cog.
13 Thaum Tswv Ntuj cog lus rau Has Nplas Has, nws tuav tsis tau ib tug loj dua nws lub npe, ces nws thiaj rov tuav nws lub npe los cog lus,
14 nws hais tias: “Kuv yuav foom hmoov zoo rau koj, thiab kuv yuav ua kom koj huam vam coob tas nrho.”
15 Vim Has Nplas Has tau ua siab ntev ua lub siab ruaj xwm yeem, mas nws thiaj tau pom raws li Tswv Ntuj cog lus. 16 Tej tib neeg cog lus, mas lawv tuav txog ib tug loj dua lawv lub npe los cog lus, thiab lawv muaj pov thawj cia, kom txhob muaj chaw sib cav ntxiv.
17 Yog li ntawd, Tswv Ntuj xav kom cov yuav txais lub cuab tam paub tias nws lo lus yeej tsis hloov li, mas nws thiaj tau siv txoj kev twv ntuj los cog lus.
18 Kom nyob hauv ob qho ruaj uas hloov tsis tau no, uas Tswv Ntuj dag tsis tau, kom peb muaj kev tso siab lug, peb cov uas twb nrhiav tau ib qho chaw nkaum lawm, kom peb tuav ruaj ruaj txoj kev cia siab uas Ntuj cev los rau peb.
19 Txoj kev tso siab yog zoo li tus nqe lauj nkoj ruaj thiab khov, tuav rawv peb tus plig kom nyob ruaj, thiab nws txeem mus dhau daim ntaub thaiv kem ntshiab mus rau sab hauv,  
20 uas Yes Xus yog tus ua peb ntej mus nyob hauv lawm, vim nws ua Tuam Leej Choj mus li, raws nraim Mes Kis Xes Des txoj cai.

NPN      111:   1-2, 4-5, 9 + 10C

Txais:  (5) Huab Tais yuav nco ntsoov nws lo lus nws tau cog mus tas ib txhis.
   los:  As les lus yas.

Kuv yuav ua HUAB TAIS tsaug tas kuv lub siab lub ntsws
thaum kuv nrog tsoom neeg siab ncaj ua ib pab thiab ua lub txoos.  
HUAB TAIS cov hauj lwm loj tas nrho,        
zoo ntxim siab kawg nkaus.      

Txais:  (5) Huab Tais yuav nco ntsoov nws lo lus nws tau cog mus tas ib txhis.
   los:  As les lus yas.
.
Nws cov hauj lwm txaus qhuas ua kom nws nto moo lug;
HUAB TAIS muaj lub siab zoo thiab khuv leej neeg.      
Nws muab txiam xws rau cov hwm nws tau noj,
nws yuav mco ntsoov mus li txog tias nws tau cog lus.      

Txais:  (5) Huab Tais yuav nco ntsoov nws lo lus nws tau cog mus tas ib txhis.
   los:  As les lus yas.
.
Nws tau xa kev cawm dim tuaj rau nws haiv neeg,    
nws yuav tsis hloov nws lo lus tas mus li ib txhis;
nws lub npe ntshiab thiab tsim nyog peb yuav hwm.      
Nws lub koob meej yuav nyob mus li ib txhis.     .

Txais:  (5) Huab Tais yuav nco ntsoov nws lo lus nws tau cog mus tas ib txhis.
   los:  As les lus yas.

As Les Lus Yas:       ES FES XOS  1:   17-18

Txais:   As les lus yas, as les lus yas.

Thov kom peb tus Huab Tais Yes Xus Pleev leej Txiv          
qhib peb lub qhov muag hauv peb lub siab kom pom kev,    
kom peb thiaj paub txog tias peb txoj kev tso siab
yog dab tsi thaum peb mloog Tswv Ntuj hu peb.  
   
Txais:   As les lus yas, as les lus yas.

Ntawv Moo Zoo:       MK  2:   23-28

23 Muaj ib zaug, yog hnub Xas Npas Tos, Yes Xus hla ib thaj teb, nws cov thwj tim txawm fawb ib txoj kev taug, lawv pib de tej hnab nplej.
24 Cov Fas Lis Xais hais rau Yes Xus tias : "Saib ! Vim li cas lawv ua tej yam txwv tsis pub ua hnub Xas Npas Tod ?" 25 Yes Xus hais rau lawv tias : "Nej tsis tau nyeem ib zaug txog qhov Das Vis tau ua thaum nws tsis muaj dab tsi noj, es nws thiab nws cov kwv luag tshaib plab lod ?
26 Nws mus hauv Tswv Ntuj lub tsev li cas, yog thaum lub caij As Npias Thas ua tuam leej choj, thiab nws noj cov ncuav mov txi Ntuj uas kawg yog cov leej choj thiaj noj tau xwb, nws tseem muab rau nws cov kwv luag noj thiab."  
27 Ces Yes Xus hais rau lawv tias : "Ntuj tsim hnub Xas Npas Tos rau tib neeg, tsis yog tsim tib neeg rau hnub Xas Npas Tos.
28 Li ntawd neeg Leej Tub kuj yog tswv kav hnub Xas Npas Tos thiab."

TIM     18     LUB     1     HLIS      2017

Hnub  Plaub Lis Piam Ob Nruab Xyoo A Nruab Lis Piam Xyoo I

Zaj Nyeem Ib:      HES NPLAWS  7:   1-3, 15-17

1 Mes Kis Xes Des, tus vaj kav Xas Les uas yog Tswv Ntuj nyob siab tus leej choj, nws tuaj ntsib Has Nplas Has thaum Has Nplas Has mus tua yeej cov vaj lawm thiab nws rov los tsev; ces nws foom hmoov zoo rau Has Nplas Has. 2 Has Nplas Has qee ib feem kaum ntawm puas tsav yam nws muaj pub rau Mes Kis Xes Des. Mes Kis Xes Des lub npe txhais tias ‘Vaj muaj txoj kev ncaj,’ thiab nws kuj ua vaj kav Xas Les, txhais tias tus Vaj muaj kev thaj yeeb!
3 Nws tsis muaj niam tsis muaj txiv, tsis muaj keeb kwm, nws lub neej tsis muaj hnub pib tsis muaj hnub xaus li. Vim li no, Mes Kis Xes Des zoo li Tswv Ntuj Leej Tub, nws ua leej choj mus ib txhiab ib txhis.
15 Tseem muaj ib qho qhia tseeb kawg, li no tias : Yog muaj lwm tus sawv ua leej choj tshiab raws Mes Kis Xes Des txoj kev,
16 mas nws tau ua leej choj tsis yog vim muaj lus qhia tseg tias nws caj ces keeb kwm yuav ua leej choj, nws tau ua leej choj yog los ntawm lub hwj huam muaj txoj sia uas rhuav tsis tau.
17 Vim muaj ib lo lus zeem tseeb txog tus ntawd hais tias : “Koj ua leej choj mus li raws nraim Mes Kis Xes Des txoj cai.”  

NPN     110:   1, 2, 3, 4

R. (4b) Koj yuav ua leej choj mus ib txhis raws txoj kev Mes Kis Xes Des tau rhawv.

HUAB TAIS hais rau kuv tus Huab Tais tias: “Koj zaum ntawm kuv sab xis
mus txog thaum kuv muab koj cov yeeb ncuab ua rooj rau koj tiag taw.”

R. (4b) Koj yuav ua leej choj mus ib txhis raws txoj kev Mes Kis Xes Des tau rhawv.

HUAB TAIS yuav ua kom koj tus cwj ua vaj muaj hwj chim nthuav mus deb txij ntawm Xis Yoos mus:
Koj yuav ua vaj nyob nruab nrab hauv koj cov yeeb ncuab.

R. (4b) Koj yuav ua leej choj mus ib txhis raws txoj kev Mes Kis Xes Des tau rhawv.

Koj tau lub hwj chim ua vaj ua koj tug txij hnub koj yug los, lub hwj chim ntshiab ci ntsa iab,
thaum koj tseem nyob hauv niam plab, thaum koj txoj kev hluas tseem zoo li lub hnub pib tawm tuaj.

R. (4b) Koj yuav ua leej choj mus ib txhis raws txoj kev Mes Kis Xes Des tau rhawv.

HUAB TAIS tau cog lus lawm, nws yuav tsis thim nws lo lus tias:
“Koj ua leej choj mus ib txhis raws li Mes Kis Xes Des txoj cai.”

R. (4b) Koj yuav ua leej choj mus ib txhis raws txoj kev Mes Kis Xes Des tau rhawv.

As Les Lus Yas:       MT  4:   23

Txais:  As les lus yas, as les lus yas.

Yes Xus tshaj lub Moo Zoo txog Ntuj lub Ceeb Tsheej  
thiab nws kho txhua yam mob nyob hauv cov neeg zoo hlo.      

Txais:  As les lus yas, as les lus yas.

Ntawv Moo Zoo:      MK  3:   1-6

1 Yes Xus rov mus hauv ib lub tsev txoos dua. Nyob ntawd, muaj ib tug neeg uas ib sab tes qhuav.
2 Ces lawv nyas ntshis ntsia saib Yes Xus puas yuav kho tus neeg qhuav tes ntawd hnub Xas Npas Tos, kom lawv tau kev liam rau Yes Xus.
3 Yes Xus hais rau tus neeg qhuav tes tias : "Koj los sawv hauv nruab nrab."
4 Thiab Yes Xus hais rau lawv tias : "Hnub Xas Npas Tos, txoj cai puas kheev kom ua qhov zoo los kom ua qhov phem, puas kom cawm ib txog sia los txo ib txog sia ?" Sawv daws nyob ntsiag to.
5 Yes Xus ntsia ib ncig npau taws vog, nws tu siab vim lawv lub siab txhav qhi, ces nws hais rau tus neeg qhuav tes tias : "Koj xyab tes." Ces nws xyab kiag tes, nws txhais tes rov zoo hlo.
6 Thaum cov Fas Lis Xais tawm mus, lawv mus nrog cov Hes Los Dias sab laj saib yuav ua li cas thiaj ua tau kom Yes Xus txhob nyob ntxiv.

TIM      19     LUB     1     HLIS      2017

Hnub Tsib Lis Piam Ob Nruab Xyoo A Nruab Lis Piam Xyoo I

Zaj Nyeem Ib  HES NPLAWS 7:25—8:6

7   25 Vim Leej Pleev ua Leej Choj mus li, nws muaj peev xwm cawm tau tas mus li cov neeg uas vam txog nws kom mus cuag tau Tswv Ntuj; nws muaj txoj sia mus li, ces nws thov Ntuj pab lawv. 26 Yeej tsim nyog kom peb yuav tsum muaj ib tug tuam Leej Choj zoo li ntawd, ib tug tuam Leej Choj ntshiab, tsis muaj chaw xyeej, tsis muaj ib yam tsuas nws, tsis nyob xyaw cov neeg txhaum, nws nyob siab dua cov txheej ntuj saud. 27 Tsis tas nws yuav niaj hnub tua tsiaj txi Ntuj mus them nws cov txim txhaum, li lwm cov leej choj, thiab them tsoom pej xeem cov txim txhaum. Nws txi Ntuj ib zaug xwb, yog thaum nws rov muab nws txi rau Ntuj. 28 Txoj Cai tsa ib co neeg muaj qhov tsis zoo ua leej choj, tiam sis Tswv Ntuj lo lus nws twv ntuj cog, uas los tom qab Txoj Cai, tsa Leej Tub ua tus leej choj zoo tas txhua yam mus ib txhiab ib txhis.
8   1 Lub ntsiab tseem ceeb uas peb tau hais txog, yog qhov no tias: Peb muaj ib tug Thawj Leej Choj zoo npaum li no,  uas zaum ntawm tus muaj hwj chim lub theej kiab phab xis, nyob saum cov txheej ntuj saud. 2 Nws tuav txoj kab xwm saib Kem Ntshiab, thiab saib lub tsev tsam phooj, uas yog lub tseem, uas Tswv Ntuj tsa, tsis yog tib neeg tsa. 3 Txhua tus thawj leej choj, mas yog luag tsa los ua leej choj cev paj tshab thiab txi Ntuj; ua li mas nws yuav tsum muaj tej yam paj tshab mus txi Ntuj. 4 Yog tias Yes Xus tseem nyob ntiaj teb no, mas nws tsis tau ua leej choj, vim twb muaj cov leej choj txi Ntuj raws Txoj Cai lawm. 5 Cov leej choj no lis txoj kab xwm teev hawm uas yog ib tug piv txwv, thiab ib tug qauv duab teev hawm xws li nyob saum ntuj xwb, vim thaum Mais Xes yuav tsa lub tsev tsam phooj, Tswv Ntuj tau qhia nws paub thiab hais rau nws tias : “Koj ntsia, koj yuav ua txhua yam raws li tus piv txwv kuv muab rau koj saib saum lub roob.” 6 Nyem no, Leej Pleev tau txais ib txog kab xwm siab dua, vim nws ua tus cev lus rau ib txog kev cog lus zoo dua, uas txawb rau saum ib co lus khov dua.

NPN   40:7-8A, 8B-9, 10, 17

Txais: (8a + 9a) Kuv nyob ntawm no, HUAB TAIS, kuv tuaj ua ywj koj lub siab.

Koj tsis ntshaw tsiaj los txhiam xws txi rau koj,
tiam sis koj muab pob ntseg rau kuv kom kuv cuab ntsej mloog lus.
Koj tsis xav tau tsiaj hlawv txi ntuj los tsiaj hlawv them txim txhaum,  
kuv thiaj hais tias: “Kuv nyob ntawm no, cia kuv tuaj.”      

Txais: (8a + 9a) Kuv nyob ntawm no, HUAB TAIS, kuv tuaj ua ywj koj lub siab.

Nyob hauv kauj ntawv muaj lus hais tseg rau kuv tias:
“Ua ywj koj siab, kuv tus Tswv Ntuj, yog yam ntxim kuv siab,    
koj txoj cai nyob rawv hauv kuv nruab plaw!”  

Txais: (8a + 9a) Kuv nyob ntawm no, HUAB TAIS, kuv tuaj ua ywj koj lub siab.

Kuv tau tshaj koj txoj kev ncaj rau tsoom neeg coob tuaj sib txoos paub,
kuv tsis tau kaw kuv lub qhov ncauj, HUAB TAIS, koj yeej paub.      

Txais: (8a + 9a) Kuv nyob ntawm no, HUAB TAIS, kuv tuaj ua ywj koj lub siab.

Thov kom txhua leej uas nrhiav koj
zoo siab hom khaj nyob hauv koj,
thiab kom cov uas nyiam koj txoj kev cawm
cav tsis tseg tias: “HUAB TAIS nto koob meej.”

Txais: (8a + 9a) Kuv nyob ntawm no, HUAB TAIS, kuv tuaj ua ywj koj lub siab.

As Les Lus Yas    2 TM 1:10

Txais:  As les lus yas, as les lus yas.

Peb tus Cawm Seej Yes Xus Pleev twb rhuav txoj kev tuag lawm,      
thiab nws ua kom txoj sia ci tawm tuaj nyob hauv lub Moo Zoo.                                                              

Txais:  As les lus yas, as les lus yas.

Ntawv Moo Zoo   MK 3:7-12

7 Yes Xus nrog nws cov thwj tim mus so nram ntug dej ntuj. Muaj ib pab neeg coob kawg nyob xeev Nkas Lis Lais raws nws, thiab tej pab nyob Yus Das teb los tuaj, 8 cov nyob Yes Lus Xas Les, nyob Is Dus Mias, nyob sab dej Yos Las Das tim ub, nyob ib ncig Tws Los thiab Xis Doos los tuaj coob kawg tuaj cuag Yes Xus, vim lawv tau hnov txog tas ib puas tsav yam nws ua. 9 Yes Xus hais kom cov thwj tim muab ib lub nkoj me rau nws nyob, kom lawv txhob tuaj txiv nws, vim neeg coob coob. 10 Yog vim nws kho ntau leej zoo, ces tas cov neeg uas muaj txiab muaj nkeeg sawv daws phoom kom tau kov Yes Xus. 11 Niaj zaus, cov dab tsis huv pom Yes Xus, lawv khoov ti av nyob ntawm nws xub ntiag, lawv qw tias : "Koj yog Tswv Ntuj Leej Tub !" 12 Yes Xus txwv lawv nruj tsis pub lawv hais kom muaj neeg paub nws.

TIM 20 LUB 1 HLIS 2017

Hnub Rau hauv Lis Piam Ob Nruab Xyoo A Nruab Lis Piam Xyoo I

Hwm LN Fabian thiab LN Sebastian

Zaj Nyeem Ib; HES NPLAWS 8: 6-13

6 Nyem no, Leej Pleev tau txais ib txog kab xwm siab dua, vim nws ua tus cev lus rau ib txog kev cog lus zoo dua, uas txawb rau saum ib co lus khov dua. 7 Yog tias txoj kev cog lus thawj zaug zoo tas tsis muaj chaw xyeej lawm, mas tsis tas yuav rov cog lus dua zaum ob. 8 Vim li ntawd Tswv Ntuj tau tsawm tseg rau lawv tias : “Yuav muaj ib hnub yav tom ntej, kuv yuav nrog His Xas Lais tsev neeg thiab Yus Das tsev neeg cog dua ib lo lus tshiab, 9 yuav tsis cog lus xws li kuv nrog lawv cov yawg koob cog lus thawj zaug, hnub uas kuv tuav lawv tes, coj lawv tawm hauv Hais Nkws Tos teb los. Vim thaum ntawd lawv nyob tsis ruaj hauv kuv lo lus cog, ces kuv kuj tsis quav ntsej lawv thiab,” Huab Tais hais li ntawd. 10 “Kuv yuav nrog His Xas Lais tsev neeg rov cog lus li no thaum dhau lub sij hawm ntawd lawm: Kuv yuav muab kuv cov kev cai lij choj cog rau hauv lawv lub tswv yim, kuv yuav muab txaug rau hauv lawv nruab siab. Kuv yuav ua lawv tus Tswv Ntuj, lawv yuav ua kuv haiv neeg. 11 Tsis tas yuav muaj leej twg qhia lwm tus, tsis tas nyias yuav hais rau nyias tus kwj tij tias :‘Koj yuav tsum paub Huab Tais.’ Vim tias tus hlob tus yau, sawv daws yuav paub kuv txhua. 12 Kuv yuav zam rau lawv qhov ua tsis zoo, kuv yuav tsis nco txog lawv cov txhaum ntxiv.” 13 Thaum Tswv Ntuj hais tias ‘Kev cog lus tshiab,’ mas lo lus ntawd ua kom thawj txoj kev cog lus qub tuaj. Tej yam uas pib qub thiab pib khaub seeb, mas tshuav tsis ntev yuav ploj mus.

NPN 85: 8 + 10, 11-12, 13-14

Txais: (11a) Kev siab zoo thiab kev tseeb yuav tuaj sib ntsib.

HUAB TAIS, thov muab koj txoj kev khuv leej rau peb pom,
Thiab muab koj txoj kev cawm neeg pub rau peb.
Cov neeg hwm HUAB TAIS tau nws txoj kev cawm nyob ze ze lawv,
nws lub hwj chim yuav nyob txawm hauv peb lub teb chaws.

Txais: (11a) Kev siab zoo thiab kev tseeb yuav tuaj sib ntsib.

Kev siab zoo thiab thiab kev tseeb yuav tuaj sib ntsib,
kev ncaj thiab kev thaj yeeb yuav los sib puag.
Kev tseeb yuav tawm hauv av los,
thiab kev ncaj yuav dauv muag ntsia saum ntuj tuaj.

Txais: (11a) Kev siab zoo thiab kev tseeb yuav tuaj sib ntsib.

HUAB TAIS yuav pub txoj kev vam meej,
hos peb lub teb chaws yuav ntsu qoob.
Kev ncaj yuav taug kev ua nws ntej,
kev cawm yuav taug raws nws txoj lw.

Txais: (11a) Kev siab zoo thiab kev tseeb yuav tuaj sib ntsib. .

As Les Lus Yas

Txais: As les lus yas, as les lus yas.

Tswv Ntuj nrog lub ntiaj teb rov sib haum nyob hauv leej Pleev,
nws muab lo lus nrhiav kev siv haum xeeb tso rau peb coj.

R. Alleluia, alleluia.

Ntawv Moo Zoo: MK 3: 13-19

13 Yes Xus nce mus saum lub roob, nws hais cov uas nws xav hu kom los ntawm nws. Ces lawv los nyob ze nws.
14 Nws tsa kaum ob leeg los ua nws cov kwv luag nrog nws nraim, kom nws tau xa lawv mus tshaj Lo Lus.
15 Nws pub kom lawv tau lub hwj huam kho mob thiab ntiab dab phem.
16 Pab Kaum Ob yog: Xis Moos uas Yes Xus tis nws npe hu ua Pob Zeb,
17 Yas Kos, Ntxes Npes Dais tub thiab Zam, Yas Kos tus kwv; Yes Xus tis nkawd npe hu ua Npuas Nes Nkes, txhais tias Yawm Xob cov tub;
18 thiab As Nres, Fis Lis Pos, Npas Tos Los Mas Yos, Mas Tais, Tos Mas, Yas Kos uas yog As Fas Yos tub, Thas Das Yos, Xis Moos tus Kas Nas Nias,
19 thiab Yus Das Kas Lis Yaus, tus muab Yes Xus muag.

TIM 21 LUB 1 HLIS 2017

Hnub Xya Lis Piam Ob Nruab Xyoo A Nruab Lis Piam Xyoo I

Hwm LN Agnes

Zaj Nyeem Ib: HES NPLAWS 9: 2-3, 11-14

2 Lawv tsa ib lub tsev tsam phooj uas yog thawj lub; nyob hauv muaj tus ncej txawb tswm ciab, lub rooj, thiab cov ncuav mov, hu ua chav Tsev Ntshiab.
3 Ces nyob dhau tom daim ntaub thaiv ob, yog lub tsev tsam phooj hu ua chav Tsev Ntshiab rau cov Ntshiab.
11 Thaum Leej Pleev tuaj, nws yog tus Tuam Leej Choj kav lub cuab tam tom ntej, nws hla ib lub tsev tsam phooj loj dua thiab zoo dua, uas tsis yog neeg txhais tes ua, tsis yog nyob hauv ntiaj teb no,
12 nws mus hauv chav Tsev Ntshiab rau cov Ntshiab ib zaug zwb, nws tsis nqa ntshav tshis los ntshav nyuj, nws muab kiag nws cov roj ntsha, ces nws mus muab tau kev cawm mus li lawm.
13 Yog tias ntshav tshis thiab ntshav nyuj thiab ib co hmoov xyuas nyuj, uas luag muab tsuag rau saum cov neeg tsis huv, ua tau kom cov tsis huv ntawd ntshiab tuaj, thiab kom lawv lub cev rov huv tuaj tiag,
14 mas Leej Pleev cov ntshav haj yam ua tau kom peb lub siab huv tuaj thiab kom peb dim tau ntawm peb cov hauj lwm txhaum los teev tus Tswv Ntuj muaj txoj sia, vim Leej Ntuj Plig tus nyob mus li ua kom Leej Pleev uas tsis muaj ib qho xyeej, rov muab nws txi rau Tswv Ntuj.

NPN 47: 2-3, 6-7, 8-9

Txais: (6) Tswv Ntuj nce saum nws lub theej kiab, muaj suab qw zoo siab,
muaj suab hom nrov rau Huab Tais.

Txhua haiv neeg, nej npuaj teg,
nej qw suab zoo siab rau Tswv Ntuj,
vim HUAB TAIS tus nyob siab, tus zoo tshaj,
yos tus vaj loj kav tas nrho lub ntiaj teb.

Txais: (6) Tswv Ntuj nce saum nws lub theej kiab, muaj suab qw zoo siab,
muaj suab hom nrov rau Huab Tais.

Tswv Ntuj nce saum nws lub theej kiab, muaj suab zoo sia
HUAB TAIS nce, muaj suab hom nrov.
nej hu nkauj cav txog Tswv Ntuj, nej cav txog nws,
nej hu nkauj cav txog peb tus vaj, nej cav txog nws.

Txais: (6) Tswv Ntuj nce saum nws lub theej kiab, muaj suab qw zoo siab,
muaj suab hom nrov rau Huab Tais.

Tus vaj kav tas lub ntiaj teb yog Tswv Ntuj,
nej hu nkauj cav txog nws.
Tswv Ntuj tswj cov haiv neeg,
Tswv Ntuj zaum saum nws lub rooj ntshiab.

Txais: (6) Tswv Ntuj nce saum nws lub theej kiab, muaj suab qw zoo siab,
muaj suab hom nrov rau Huab Tais.

As Les Lus Yas: HAUJ LWM 16: 14B

Txais: As les lus yas, as les lus yas.

Huab Tais, thov koj qhib peb lub siab
kom peb mloog koj leej Tub cov lus.

Txais: As les lus yas, as les lus yas.

Ntawv Moo Zoo: MK 3: 20-21

20 Yes Xus los hauv ib lub tsev, ces rov muaj neeg coob coob tuaj ntsauv lawv dua,
Yes Xus thiab nws cov thwj tim tsis xyeej noj mov li.
21 Yes Xus tsev neeg hnov li ntawd, lawv tawm mus coj nws,
vim lawv hais tias : "Nws tsis meej pem lawm."

TIM 23 LUB 1 HLIS 2017

Hnub Ob Lis Piam Peb Nruab Xyoo A Nruab Lis Piam Xyoo I

Hnub thov ntuj pab kom tej nom tswv tsa txoj cai tsis pub rho me nyuam.

Zaj Nyeem Ib: HES NPLAWS 9: 15, 24-28

15 Li ntawd mas Leej Pleev yog tus sawv peb cev rov cog lus dua tshiab, vim nws txoj kev tuag yog tus nqi them rau cov txim txhaum peb tau ua thaum peb tseem zwm rau txoj kev cog lus qub, kom cov neeg uas Ntuj hu, yuav tsum tau txais lub cuab tam nyob mus li raws li txoj kev cog lus.
24 Leej Pleev tsis tau chaws mus hauv ib lub tsev Ntshiab uas yog neeg txhais tes txhim, thiab yog ib lub ua piv txwv txog lub tseem xwb, nws yeej tau mus kiag saum ntuj lawm tiag tiag, ces zaum no nws thiaj sawv nyob ntawm Tswv Ntuj xub ntiag cev lus pab peb.
25 Leej Pleev kuj tsis tas yuav rov cev nws rau Tswv Ntuj ob peb zaug xws li tus tuam leej choj, uas niaj xyoo yuav tsum rov mus cev ib co ntshav uas tsis yog nws cov nyob hauv Kem Ntshiab.
26 Yog Leej Pleev tsuas ua li ntawd xwb, mas nws yuav tsum tau raug txom nyem ntau ntau zaus txij puag thaum ntuj tsim teb raug los lawm. Tab sis zaum no thaum txog lub zwj ceeb kawg, nws tau tawm los ib zaug xwb, los muab nws txi Ntuj rhuav kev txhaum pov tseg.
27 Ib yam li leej tib neeg tsuas tuag ib zaug xwb, dhau qhov tuag lawm, yog lub caij txiav txim.
28 Leej Pleev kuj ib yam li ntawd, nws rov muab nws txi Ntuj ib zaug xwb, kom nws tau them ib zeej tsoom cov txhaum. Ces nws yuav tawm rov los zaum ob, tsis yog los them txhaum lawm, yog tawm los rau cov neeg tos ntsoov nws kom tau muab kev cawm rau lawv.

NPN 98: 1, 2-3AB, 3CD-4, 5-6

Txais: (1a) Nej hu ib zaj nkauj tshiab rau Huab Tais,
vim nws tau ua tej yam txaus qhuas.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
thiab nws sab npab ntshiab tau ua.

Txais: (1a) Nej hu ib zaj nkauj tshiab rau Huab Tais,
vim nws tau ua tej yam txaus qhuas.

HUAB TAIS ua kom sawv daws paub txog nws txoj kev cawm,
nws muab nws txoj kev ncaj rau cov haiv neeg pom.
Nws rov nco txog nws txoj kev ua zoo rau
thiab hlub tsev neeg His Xas Lais.

Txais: (1a) Nej hu ib zaj nkauj tshiab rau Huab Tais,
vim nws tau ua tej yam txaus qhuas.

Tas npoo ntuj npoo ntiaj teb tau pom
peb tus Tswv Ntuj txoj kev cawm neeg.
Tas txhua teb chaws, nej zoo siab hu nkauj rau HUAB TAIS,
nej qw suab hu nkauj, nej cav txog nws.

Txais: (1a) Nej hu ib zaj nkauj tshiab rau Huab Tais,
vim nws tau ua tej yam txaus qhuas.

Nej ntaus nkauj nog ncas cav txog Huab Tais,
nej ntaus nkauj nog ncas nrog tej zaj nkauj zoo mloog.
Nej tshuab hom ntxuag suab kub nyuj,
nej hu nkauj zoo siab ntawm tus vaj ntxwv HUAB TAIS xub ntiag.

Txais: (1a) Nej hu ib zaj nkauj tshiab rau Huab Tais,
vim nws tau ua tej yam txaus qhuas.

As Les Lus yas: 2 TM 1: 10

Txais: As les lus yas, as les lus yas.

Peb tus Cawm Seej Yes Xus Pleev tau rhuav txoj kev tuag pov tseg,
thiab tau ua kom txoj sia ci tawm tuaj nyob hauv lub Moo Zoo.

Txais: As les lus yas, as les lus yas.

Ntawv Moo Zoo: MK 3: 22-30

22 Cov thoob xwm tuaj pem Yes Lus Xas Les tuaj, hais tias : "Nws raug dab Npes Ntxes Npus lawm,” thiab tseem hais tias: "Nws hu txog tus tuam thawj dab los ntiab dab tawm."
23 Yes Xus hu lawv los ntawm nws, ces nws ua paj lug hais rau lawv tias : "Xas Tas ua cas thiaj ntiab tau Xas Tad ?
24 Yog ib lub teb chaws rov ua kom nws sib tawg, mas lub teb chaws ntawd nyob tsis ruaj.
25 Yog ib tse neeg rov ua kom nws sib tawg, mas lub tsev ntawd yuav nyob tsis tau.
26 yog Xas Tas rov sawv tiv Xas Tas, mas nws yuav tawg tas, yuav nyob tsis tau ntxiv, nws yuav muaj hnub tag xwb.
27 Tsis muaj leej twg nkag tau mus hauv tus neeg muaj zog lub tsev, mus lwg nws lub cuab tam, yog tsis xub muab tus muaj zog khi tso, ces nws mam mus lwg tus muaj zog lub tsev.
28 Kuv hais tseeb rau nej, Ntuj yuav zam ib puas tsav yam txhaum rau neeg tej tub ki, tsis hais tej txhaum los tej lus thuam Ntuj lawv tau tsawm.
29 Tab sis tus twg thuam Leej Ntuj Plig Ntshiab, mas Ntuj yuav tsis zam rau nws ib zaug li : vim nws tau ua ib qho txhaum nyob mus li."
30 Vim lawv hais tias : "Nws raug ib tug dab tsis huv."