Teev Ntuj Noj Peb Caug muaj Txiv Plig ua lu Txoos.

Hu ib zaj nkauj qhib lub Txoos : Tswv Ntuj tsim peb los ua neeg A 16
Txais : Tswv Ntuj tsim peb los ua neeg, tau nrog luag noj sib luag hnav sib npaug, peb zoo siab hlo cev peb lub neej lub siab los nrog Yes Xus txi Ntuj ua Huab Tais tsaug

1 - Huab Tais, tas txhia tsav puas yam, huab cua tsiaj txhu qoob loo yog koj feem koj li, koj tso plhuav tuaj ntawm peb ntiag ua peb tug, peb nqa tes txaum yim luag lis ntxhi yuas !

2 - Huab Tais, peb kev kawm, qhia, tsim, tawg paj txi txiv vim muaj koj nres koj kav.
Koj cov ntxhais txib tub txuas ntaus tswv yim daws kev nyuaj ntxhov kom thim, peb ua ntaj teg tuaj hawm koj luag lis nyav yuas.

3 - Huab Tais, koj tso koj Leej Tub tuaj nyob yaj ceeb no, nws raug kev iab kev puas, vim nws yuav siab mloog koj lus. Koj pab nyuj nees nuam zoo siab hlo txais koj nra mloog koj hu yuas.

Txais : Tswv Ntuj tsim peb los ua neeg, tau nrog luag noj sib luag hnav sib npaug, peb zoo siab hlo cev peb lub neej lub siab los nrog Yes Xus txi Ntuj ua Huab Tais tsaug

Hu txog Leej Txiv thiab Leej Tub thiab Leej Ntuj Plig lub npe. Teb : Ua Li

TP nthuav tes dav thiab hais zaj no

Thov kom Leej Txiv Tswv Ntuj thiab Yes Xus Pleev peb tus Huab Tais zam thiab pub kev thaj yeeb rau nej.

Teb : Peb cav lus zoo txog Tswv Ntuj mus ib txhiab ib txhim.

Pov dej ntshiab rau saum cov ntseeg
Ua tau tas hauv cov txoos Txi Ntuj hnub Chiv, pib txij hnub rau tsaus ntuj mus
TP caw cov ntseeg kom npaj siab zoo li no:

Kwv tij neej tsa sawv daws, peb thov Tswv Ntuj foom koob hmoov rau cov dej no, peb yuav txais los ntxuav kom peb ntshiab huv, nco txog cov dej ntxuav sawv daws thaum sawv daws tau txais lub cim ntxuav:
Thov kom Tswv Ntuj txuag peb hauv Leej Ntuj Plig nws tau muab pub rau peb.

Yog dej tsis tau foom hmoov zoo, TP ua ntaj teg hais zaj thov ntuj foom hmoov zoo rau dej

Huab Tais Tswv Ntuj muaj hwj huam,
Koj yog tus pub kom peb lub cev thiab ntsuj plig ciaj sia, peb thov koj foom koob hmoov + rau cov dej no : peb yuav txais los ntxuav peb cov txhaum pov tseg, thov koj zam rau peb kom peb tsis nyog txais koj cov txiaj ntsim tiv thaiv txuag peb kom maiv dhau vij mob vij ntsaj tas txhia yam phem.
Huab Tais, koj khuv leej peb npaum luaj no ua kom cov dej ntshiab no txhawv los cawm peb lub cev thiab ntsuj plig, pub kom peb taug kev tuaj cuag tau koj thiab muaj lub siab ntshiab txav los ze koj.
Peb vam txog peb tus Huab Tais Yes Xus Pleev lo lus thov koj.

Ua Li

Mus pov dej rau tsoom ntseeg.

Nkauj Paj Nruag: Ps 50,
KOJ LUB SIAB ZOO

Txais: Koj lub siab zoo Huab tais koj zam rau kuv, koj lub siab hlub neeg Huab tais koj so kuv cov txhaum.

1-Kuv ua txhaum rau koj ib leeg xwb, muaj tej yam koj ntsia yog tsis zoo kuv twb ua lawm.
2-Kuv paub kuv cov txhaum kuv tsis zais kuv cia li lees,
Kuv cov txhaum nyob ntawd kuv xub ntiag tsis tseg.

Txais: Koj lub siab zoo Huab tais koj zam rau kuv, koj lub siab hlub neeg Huab tais koj so kuv cov txhaum.

3-Koj ntsia txij thaum kuv niam xeeb kuv los kuv siab dub,
Koj saib txij thaum kuv yug los kuv muaj txim.
4-Koj ntxuav kuv kom kuv dawb dua daus,
Koj muab koj cov dej los yaug kuv kom kuv ntshiab tuaj.

Txais: Koj lub siab zoo Huab tais koj zam rau kuv, koj lub siab hlub neeg Huab tais koj so kuv cov txhaum.

5-Kuv lub siab ntxhov hnyo kuv cov pob txha ntsoog lis ntxaws;
Koj hais tej lo lus zoo rau kuv, kuv lub siab yuav kaj.
6-Huab Tais, koj tsis txhob ntiab kuv mus deb ntawm koj xub ntiag,
Koj tsim ib lub siab huv lis si los cog rau kuv.

Txais: Koj lub siab zoo Huab tais koj zam rau kuv, koj lub siab hlub neeg Huab tais koj so kuv cov txhaum.

7- Koj cawm kuv mas kuv yuav paub txoj kev lom zem;
koj pub ib lub siab loj rau kuv mas kuv rov paub txoj kev kaj lug.
8-Kuv yuav qhia koj txoj kev zam rau cov neeg txhaum;
Cov neeg yuam kev yuav rov los cuag koj.

Txais: Koj lub siab zoo Huab tais koj zam rau kuv, koj lub siab hlub neeg Huab tais koj so kuv cov txhaum.

9-Kuv muab yam twg los txi koj los tsis xis koj lub siab;
Kuv hlawv yam twg rau koj los koj tsis yeem yuav.
10- Koj tsis luag ib tug neeg kho siab, koj tsis thuam ib tug neeg lwj plawv,
Qhov kuv yuav txi rau koj yog koj lub plab plaw lwj.

Txais: Koj lub siab zoo Huab tais koj zam rau kuv, koj lub siab hlub neeg Huab tais koj so kuv cov txhaum.

Huab Tais Tswv Ntuj muaj hwj huam,
Peb tuaj ntawm lub Thaj Txi Ntuj no, thov koj ntxuav peb cov txhaum pov tseg, peb thiaj tsim nyog chaws mus hauv nws lub Loog mus noj nws rooj qav mus ib txhiab ib txhis. Ua Li

Nyob pem ntuj… Tswv Ntuj nto meej nto moo, nyob yaj ceeb cov neeg siab dawb siab huv nyob kaj lug.-Huab Tais ua Tswv sim ceeb, peb cav lus_zoo txog koj.-Vaj kav lub ntuj,peb hawm koj.-Huab Tais leej txiv muaj hwj huam, peb nco koj txiaj ntsha txiaj ntsim.-Huab Tais Yes Xus Pleev,Huab Tais leej tub twm zeej, Yaj txi Tswv Ntuj, koj yog tus daws qab ntuj neeg txhaum, thov koj hlub peb.-Koj yog tus zaum ntawm Leej Txiv sab xis, thov koj txais peb lo lus vam txog.koj.-Yes Xus Pleev, koj tib leeg nrog Leej Ntuj Plig ua tus Huab Tais ntshiab. -Koj tib leeg yog tus Tswv Ntuj nyob siab tau Leej Txiv lub Hwj chim. Ua Li

Peb sawv daws thov Huab Tais,
Tswv Ntuj muaj hwj huam siab loj siab dav, tsis txhob cia peb tej dej num tav peb kev tuaj cuag koj Leej Tub. Ua kom peb lub siab lub ntsws txawj ntse npaj tos txais nws thiab npuab nws txoj sia ua ib ke.
Peb vam txog Yes Xus Pleev, koj Leej Tub peb tus Huab Tais Tswv Ntuj, nws nrog koj thiab Leej Ntuj Plig Ntshiab ua vaj mus txog thiab niag tim puas xyoo.
Teb: Ua li

Cov Zaj Nyeem 1 & 2

Tswv Ntuj Ntshiab, thov koj ntxuav kuv lub siab thiab lub ncuaj kom huv, kuv thiaj tsim nyog tshaj tau lub Moo Zoo
Huab Tais Ntuj nrog nej nyob
Teb : Huab Tais Ntuj nrog koj nyob
Peb mloog ib zag nyob hauv…
Teb : Huab Tais, peb cav txog koj lub koob meej.
Huab Tais Pleev,
Teb : Lub qab ntuj neeg cav txog koj.

Nthuav Tswv Ntuj cov lus qhuab qhia

Kuv ntseeg txog Tswv Ntuj,
Yog Leej Txiv muaj hwj huam tas nrho, yog tus tsim ntuj tsim teb. Kuv ntseeg txog Yes Xus Pleev, yog Tswv Ntuj Leej Tub ib leeg kheej, yog peb tus Huab Tais Leej Tswv Yim ntshiab ua kom nws xeeb los ua neeg. Nws yug ntawm Nkauj Xwb Mab Liab los. Lub caij Pis Las Tos ua nom, Yes Xus raug luag hiam thiab ntsia saum ntoo cuam. Nws tuag mus zwm av, mus txog ntuj txias teb tsaus. Hnub peb, nws sawv hauv cov tub tuag rov los. Nws nce mus saum ntuj, zaum ntawm Leej Txiv muaj hwj huam tas nrho phab xis.Nws yuav rov los txiav txim rau cov neeg ciaj neeg tuag.
Kuv ntseeg txog Leej Tswv Yim Ntshiab,
Ntseeg txog lub Koom Txoos Ntshiab cia rau lub qab ntuj neeg.
Ntseeg txog tsoom Leej Ntshiab sib koom Ntuj lub txiaj ntsim.
Ntseg txog kev daws txhaum;
Ntseeg txog leej neeg lub cev kev sawv rov los;
Ntseg txog muaj txoj sia nyob mus li. Ua Li

Ua Kab ke quas niaj quas xyoo
Ua Tswv Ntuj tsaug tej txiaj ntsim tau txais hauv lub xyoo laus thiab ua kab ke foom hmoov zoo rau qe thiab mov nplej tshiab thiab thov koob hmoov rau xyoo tshiab

Huab Tais Leej Txiv Tswv Ntuj muaj hwj huam,
Ib niag xyoos ntuj zeeg los mus dua toj, koj tau pub koj cov txiaj ntsim nplua mias tuaj rau peb, pov hwm pov yawm peb cov ua niam ua txiv, kwv tij neej tsa thiab phooj ywg muaj txoj sia, roos peb lub luag dej luag num ua qoob los puv txhab, muaj nyiaj puv nas, peb thiaj muaj noj muaj haus tsis tshaib tsis nqhis.
Vim muaj koj ua tus saib xyuas peb tej me nyuam, yog tus qhia lawv kawm txuj kawm ci, muab lub laj lim tswv yim kav lawv siab ntsws, coj lawv los ua txij ua nkawm, tsav lawv lub neej kom tsheej ib cuab ciaj ib yig. Peb yuav pauj tsis tau koj lub txiaj ntsim hlub neeg. Thov koj mloog peb lo lus qhuav no ua koj tsaug, pe koj thiab cav lus zoo qhuas koj yog peb tus Huab Tais Tswv Ntuj nto koob meej nyob mus li.
Huab Tais, peb tseem nco koj cov txiaj ntsim hauv lub xyoo laus, cev tes plhws koj haiv neeg, tshem puas tsav yam tsis dawb tsis huv paug siab paug ntsws, xyeeb zog dab phem xas tas kev iab kev daw, kev auv kev ntsawj vij mob vij ntsag, txiab nkeeg, plaub ntug, lus xaiv lus ncua, kev plees kev yis pov tseg ; ua ntaj teg yom thaiv koj haiv neeg maim dhau xas tas txoj xub ke.
Leej Txiv Tswv Ntuj, xyoo tshiab tawm tuaj, peb tseem yuav thov koj hlub peb tsis tseg, tig ntsej los mloog peb lo lus vam khaub zig koj. Vim koj yog tib neeg txoj sia, yog qhov pom kev lam lug li nkauj hnub, ci qab ntug ntsa kaj nrig sim ceeb kev tsaus ntuj li nraug hli. Thov koj foom lus koob lus hmoov rau peb txhua leej txhua tus, txhawb cov qe ntsuj qe plig thiab cov mov nplej tshiab no, ua txhiam xws huv li si yug peb lub cev ntaj ntsug thiab ntsuj plig, kom xwv peb noj mov poob plab hauj dej poob cev, muaj dag muaj zog, nquag plias nyob dhia rhwb rhees, nyob dawb nyob huv ; ntsuj plig hom khaj nyob nyab xeeb muaj ntsej muag luag ntxhi, pliaj plu luag nyav mus puv lub xyoo tshiab.
Peb vam txog peb tus Huab Tais Yes Xus lo lus thov koj. Ua Li


Lus Thov Ntuj
Kom tas lub sim ceeb neeg txawj nthuav kev sib haum xeeb, muaj kev phooj ywg hlob tuaj coj tau txhua haiv neeg los ua ib cuab ib yig, peb sawv daws cev peb tej lus hu Tswv Ntuj pab txhawb.

Tswv Ntuj, koj pom tas puas tsav yam, pom peb tib neeg kev ntshaw. Koj tig ntsej mloog peb lub suab hu. Thov koj pub rau peb thiab ua raws peb lub siab ntshaw. Peb nrog Leej Pleev, peb tus Huab Tais tsa ncauj thov ntawd koj. Ua Li

Peb cav lus zoo txog koj, Tswv kav lub sim ceeb, vim peb txais mov ntawm koj lub siab dav los. Cov mov no yog ntiaj teb av txi txiv yog neeg hauj lwm tsim. Peb muab los cev rau koj, kom nws txia ua cov mov pub txoj sia.

Teb : Tswv Ntuj, nto koob meej mus ib txhiab ib txhis.

Teev dej xyaw cov cawv no yog ua cim cog lus kom xwv peb nrog tus cawm lub qab ntuj neeg muaj Tswv Ntuj lub hwj chim.
Peb cav lus zoo txog koj, Tswv kav lub sim ceeb, vim peb txais cawv ntawm koj lub siab dav los. Cov cawv no yog ntoo txi txiv yog neeg hauj lwm tsim. Peb muab los cev rau koj, kom nws txia ua lub Ceeb Tsheej cov cawv.

Teb : Tswv Ntuj, nto koob meej mus ib txhiab ib txhis.
Huab Tais, koj twb pom peb tsis yog neeg muaj nuj nqes los peb thov koj txais thaj txi ntuj peb npaj rau ntawm koj xub ntiag no.

Huab Tais, koj ntxuav kuv lub siab, koj yaug kuv cov txhaum pov tseg.

Kwv tij sawv daws, peb thov kom pev Txiv Tswv Ntuj pom zoo txais peb Thaj Txi Ntuj.

Teb : Yog thaj tshaj Tswv Ntuj lub koob meej thiab cawm lub ntiaj teb neeg.

Huab Tais, peb tsuas muab tau rau koj yam koj tau pub rau peb : thov koj dauv muag ntsia cov txim peb cev rau koj no ; vim koj pub kom peb ua lub Thaj Txi Ntuj no, ua kom lub Thaj no npo peb los txais txoj sia nyob mus li. Peb vam txog Yes Xus Pleev, peb tus Huab Tais, lo lus thov koj.

Teb : Ua Li

Huab Tais Ntuj nrog nej nyob
Teb : Huab Tais Ntuj nrog koj nyob

Peb tsa peb lub siab nyob ze Huab Tais
Teb : Peb lub siab yuj plaws rau Huab Tais

Peb cag txog peb tus Huab Tais Tswv Ntuj mog
Teb : Tsim nyog peb yuav ua nws tsaug.

Leej Txiv Ntshiab muaj hwj huam nto moo lug nyob mus li,
Tsim nyog peb yuav ua koj tsaug mus thoob ntuj thoob teb, hauv peb tus Huab Tais Yes Xus Pleev. Vim nws twb nqes los hauv lub sim ceeb qhia koj lub siab khuv leej tib neeg tsis txawj tag. Nws twb tsheej xeeb rau peb pom xyeem, rhawv kab rhawv kev cawm seej hom cia leej tib neeg taug nws kab xuas nws lw tuaj cuag koj.
Peb tseem tos ntshis nws yuav rov tuaj muaj koob meej nto moo lug, taw qhia koj cov txiaj ntsha txiaj ntsim tseg cia pub rau peb.
Vim li ntawd, Leej Txiv, peb nrog cuaj Txheej Tshiab, yim txheej Ntshiab, tas peb txheej leej poj yawm txwv koob Plig Dawb Plig Huv zoo siab hom khaj qhuas koj lub koob meej mus li tias:

Faj Tim Huab Tais Ntshiab
Tswv Ntuj kav tsoom hnub qub,
koj nto koob meej puv lub Ntuj lub Teb,
koj muaj txoj sia mus li nyob txheej Ntuj saud.
Tus tuaj ntawm Huab Tais xub ntiag tuaj nto moo lug,
nws muaj txoj sia mus li nyob txheej Ntuj saud.

TP nrhab tes tsa siab siab

Tswv Ntuj kav lub ntuj lub teb, koj ntshiab tiag, tas lub sim ceeb cav lus zoo qhuas koj, vim koj yog tus pub txoj sia, tus muaj peev xwm ua txoj kev ntshiab txhawv tau los vim koj Leej Tub, peb tus Huab Tais Yes Xus Pleev, nrog Leej Ntuj Plig Ntshiab lub hwj huam. Koj niaj hnub coj koj haiv neeg koom ua ib pab ib pawg hauv yaj ceeb no los cev lub txim ntshiab no txi rau koj.

Tsa tes saum cov txim

Vim li ntawd, peb qhoo cev thov koj ua kom cov txim peb coj tuaj no ntshiab tuaj nrog Leej Ntuj Plig thiab txia ua peb tus Huab Tais Yes Xus Pleev lub cev + thiab cov ntshav vim nws tau hais kom peb ua.

Hmo nws yuav raug ntes, nws tuav lub mov, muab cev rau koj ua koj tsaug, nws foom hmoov rau, muab ntais thiab faib rau nws cov thwj tim, nws hais tias :
« Txais mus nej sawv daws noj, yog kuv lub cev puas ntsoog kom pab tau nej »

Noj hmo tas, nws tuav lub ntim, nws rov ua koj tsaug, nws foom hmoov rau, nws muab cev rau nws cov thwj tim, nws hais tias:

« Txais mus nej sawv daws haus, yog lub ntim rau kuv roj ntsha, ntshav cog lus tshiab nyob mus li, ntshav yuav ntws los daws nej thiab tsoom sid cov txhaum. Nej ua li ntawd mus nco ntsoov txog kuv »

Zaj nkauj : TCav txog Yes Xus lub txiaj ntsim

Txais: Thaum peb noj cov mov no
Thaum peb haus lub ntim no
Peb hawm peb tus Huab Tais uas peb ntseeg txog

Huab Tais Yes Xus, Peb nco txog koj txoj kev tuag
Peb cas txog koj kev sawv rov los
Peb tos txog koj yuav rov tuaj

Txais: Thaum peb noj cov mov no
Thaum peb haus lub ntim no
Peb hawm peb tus Huab Tais uas peb ntseeg txog

Peb ua thaj nco txog koj Leej Tub, kev raug hiam los cawm peb, nws txoj ke sawv muaj txoj sia tshiab thiab nce li ko tus ntaiv ntuj, peb tseem tos ntshis nws yuav rov tuaj zaum kawg, koj txais cov txim ntshiab peb cev rau koj ua koj tsaug.
Huab Tais, koj tig ntsia thiab lees koj lub Koom Txoos thaj txi ntuj, yog koj Leej Tub thaj, vim nws coj peb los npuab koj.
Thaum peb noj nws lub cev thiab haus nws cov ntshav thiab muaj Leej Ntuj Plig Ntshiab nrog peb, thov koj ua kom peb nrog Leej Pleev koom tib lub cev thiab ua tib lub siab.

Kom Leej Ntuj Plig Ntshiab pub peb ua nyog txim ntshiab cav koj lub koob meej, peb thiaj tsim nyog txais cov txiaj ntsim yuav tuaj ib hnug twg, ua ib ke nrog Nkauj Xwb Mab Liab, Tswv Ntuj Leej Niam, nrog cov Hauv Paus Xa Lus, cov tim khawv, tas tsoom leej Ntshiab sawv daws mloog peb lo lus vam khom.

Zim txwv no, Huab Tais, peb qhoo cev thov koj :
Lub thaj txi ntuj ntxim koj siab no coj peb los haum koj, pub kom lub ntiaj teb tau nyob nyab xeeb. Ua kom koj lub Koom Txoos muaj koj lub siab hlub thiab ntseeg khov ntseeg ruaj hauv lub sim ceeb : txuag koj leej tub txib Vaj Qhia Benoit, thiab peb leej Tswv Qhia…., tas tsoom Tswv Qhia, tsoom leej Choj, leej Tsob Hwb thiab tag koj haiv neeg koj txhiv los ua koj tug.
Leej Txiv siab zoo, thov koj tig ntsej mloog koj tsev neeg tuaj sib sau ntawm no lus vam khom, coj tag koj cov me nyuam ncaim npoj rov los ua ib ke npuab koj.

Huab Tais, peb thov koj rau peb cov neeg tso lub ntiaj teb no tseg, koj yog tus paub lawv kev ncaj ncees : thov koj txais lawv hauv koj lub Loog, tas sawv daws vam ntsoov yuav nrog koj muaj koob meej ua ke nyob mus li vim Leej Pleev, peb tus Huab Tais, lub ntiaj teb thiaj muaj koj koob hmoov zeeg tshaws tsis txawj tag.

Leej Txiv Tswv ntuj muaj hwj huam,
Yob vim Leej Pleev yog nrog Leej pleev, yog nyob hauv Leej pleev, koj thiaj nrog Leej Tswv Yim Ntshiab muaj koob meej nto moo lug mus txog txhiab niag tim pua xyoo.
Teb: Ua Li

Yog vim tus cawm peb nws hais qhia peb, peb thiaj muaj cuab kav hais tias:

Peb Txiv nyob saum Ntuj,
Koj lub npe ntshiab nto moo lug,
Koj lub Ceeb Tsheej los txog,
kom muaj raws li koj nyiam nyob ntiaj teb no li nyob saum ntuj.
Thov koj pub mov txaus peb noj hnub no,
koj zam txhaum rau peb zoo li peb zam rau luag,
koj txhob tso peb raug haub ntxias, koj npo peb dim ntawm yam phem.
Ua Li

Huab Tais, peb thov koj npo peb ntawm tas txhia yam phem. Koj pub peb nyob thaj yeeb tas peb sid, koj ua siab zoo nres peb, peb thiaj yuav dim ntawm txoj kev txhaum, yuav nyob nyab xeeb tsis raug kev ntxhov, vim peb tso siab tos txog hnub tus cawm peb Yes Xus Pleev rov tuaj.

Kev ua vaj, kev muaj hwj huam, kev nto koob meej yog koj tug must as ib txhiab ib txhis.

Huab Tais Yes Xus Pleev,
Koj hais rau koj cov hauv paus Xa Lus tias: kuv tso kuv txoj kev thaj yeeb rau nej, kuv pub kuv txoj kev thaj yeeb rau nej, koj tsis txhob ntsia peb cov txhaum, koj tsuas ntsia koj lub Koom Txoos kev ntseeg. Koj ua kom koj lub Koom Txoos nyob thaj yeeb thiab koom siab koom ntsws raws li koj siab nyiam, vim koj ua vaj mus txog txhiab niag tim puas xyoo.

Tswv Ntuj, ua nej siab kaj lug;

Teb : Tswv Ntuj, ua koj siab kaj lug

Yaj Txiv Tswv Ntuj,
Yaj ris qab ntuj neeg txhaum,
koj hlub peb cov ngjg txhaum.
Yaj txiv Tswv Ntuj,
Yaj tuag kom qab ntuj neeg ciaj,
koj tuaj yug peb txoj sia.
Yaj txiv Tswv Ntuj,
Yaj ua koj lub cev yog zoo tshuaj,
koj tuaj ua peb lub siab kaj lug.

Raws Leej Txiv siab thiab nrog Leej Ntuj Plig lub hwj huam, Huab Tais Yes Xus Pleev, koj tau tuaj yeem tuag kom lub ntiaj teb muaj txoj sia nyob mus li. Kuv thov kom koj lub cev thiab koj cov ntshav ua kom kuv dim ntawm kuv cov txhaum; koj txuag kuv kom kuv txawj coj koj cov lus qhia, kuv thiaj yuav tsis nrug deb ntawm koj mus.

Nej ntsia tus Yaj Txi Tswv Ntuj, nej ntsia tus ris qab ntuj neeg cov txhaum. Cov Tswv ntuj caw lawv tuaj noj Leej Yaj Rooj Qav lawv txoj hmoov zoo.

Teb Huab Tais, kuv tsis tsim nyog txais koj tuaj hauvkuv vaj tsev, thov koj hais ib los maas kuv lub siab yuav zoo hlo.

Thov kom Leej Pleev Lub Cev thiab cov Ntshav txuag kuv kom kuv tau txoj sia nyob mus li. Ua Li

Peb sawv daws thov Huab Tais,
Ua kom lub Thaj Txi Ntuj coj peb los ua ib ke tawg paj thiab txi txiv hauv peb : vim nws xub qhia peb hauv lub sim ceeb paub koj txoj kev hlub peb kom peb txais khaws taug koj lw thiab nyiam koj mus li. Peb vam txog Yes Xus peb tus Huab Tais Pleev.
Teb : Ua Li

Huab Tais Ntuj nrog nej nyob
Teb :Huab Tais Ntuj nrog koj nyob

Thov kom Huab Tais Leej Txiv thiab Huab Tais Leej Tub thiab Huab Tais Leej Ntuj Plig foom hmoov zoo rau nej.
Teb : Ua Li

Nej rov mus Yes Xus nrog nej nyob ua nej siab kaj lug
Teb : Peb ua Ntuj Tsaug

Zaj nkauj xaus lub txoos : Huab Tais Txhob Ncua Ntev A 14

Txais :
Huab Tais, txhob ncua ntev, koj tuai kaj cov neeg maub kev tsaus ntuj

1 - Nej ntsia tus Huab Tais cawm peb tuaj yuav txog. Nyem no txog lub zwj ceeb kawg, Tswv Ntuj tso nws Leej Tub tuaj. Nws tsa nws tus chij coj tas txhia haiv neeg. Nws muaj peev xwm hlob mus li, nws txoj kev thaj yeeb yuas ¬tsis kawg.

2 - Yes Lus Xas Les Ntshiab, koj tsa muag riaj cov hlua khi koj; tas zeej tsoom hwm Ntuj, nej sawv tsees npaj siab tos Huab Tais. Nej zam lub siab me, nej ntaus lub siab loj, nej ua thawj hlo, nej luag ntxhi mus ce Huab Tais cov dej tshuaj.

3 - Huab Tais koj tuaj ntxuav His Xas Lais tej txhaum, koj cev tes npo cov neeg khaub zig koj, koj tsa cov neeg tsis muaj txoj sia, koj sau tsoom pej xeem huab hwm nyob thoob qab ntuj los vij koj tus chij.

Txais :
Huab Tais, txhob ncua ntev, koj tuai kaj cov neeg maub kev tsaus ntuj