TUAV KEV HLUB KOM RUAJ

**Maiv Tooj** 9th August 2011, 9:04 am

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°1

TUAV KEV HLUB KOM RUAJ

Post Maiv Tooj 9th August 2011, 9:04 am

TUAV KEV HLUB KOM RUAJ

Tus sau : Yiv Yaj, Bangkok, Thaib teb.
Xov Tooj cua Zoo Tswv Zov Yaj

Ib tsoom phooj ywg Hmoob hmov tshua sawv daws ! Nod, yog thawj zaug uas kuv tuaj ntsib nej nyob hauv Liaj Luv Xa Moo. Kuv tau nyeem nej cov zaj nyob hauv Liaj Luv Xa Moo thiab Tseb Nplej, muaj ntau yam uas kuv pom tias muaj nuj nqis heev. Kuv xav faib tswv yim nrog nej sib koom, tab sis kuv kuj tsis paub tias yuav pib zoo li cas. Kuv tsuas xav hais ib lo lus rau peb tsoom Hmoob sawv daws tias : thov kom peb txhua tus nyias tuav nyias txoj kev hlub kom ruaj khov. Txawm tias kuv ho hais qhov twg tsis yog thiab hais tau siab me ntsis lawm los vam tias nej yuav zam txim pub rau kuv thiab. Vim kuv tsuas yog tham raws li qhov kuv pom thiab hnov xwb. Kuv tsis tau tuav ib tug npe los sis hais taw ntsees rau ib tug neeg twg. Xav tias yog ib qho peb sib pauv tswv yim thiab sib pab daws kho kom zoo rau peb Hmoob xwb.
Kuv yog ib tug ntxhais Hmoob nyob pem toj siab. Kuv nyob hauv lub xeev Nan uas yog sab toob fab pej hauv Thaib teb, nyob npuas lub xeev Xaignabouli Los Tsuas teb. Kuv tsev neeg tseem nyob pem toj siab ua liaj ua teb noj xws li ib tsev neeg Hmoob. Kuv tuaj kawm ntawv nyob hauv tuam ceeb Npaas Koj (Bangkok). Txoj kev ua lub neej nyob hauv nroog nws txawv lub neej nyob pem toj siab. Ua rau kuv pom ntau yam zoo thiab ntau yam tsis zoo. Qhov loj tiag yog txoj kev hlub nyob hauv yus lub cuab yim neej thiab ntawm yus tus kheej. Zim txwv no peb yuav ntsia pom tias teeb meem ntawm cov sib sau ua txij ua nkawm, nws muaj ntau zuj zus tuaj. Yam li ; sib nrauj sib tso thiab sib faib nyias nyob nyias tsis sib nrauj. Tej yam no raws li kuv xav mas yog los ntawm kev tsis sib nkag siab thiab tsis ua zoo xav ua ntej yuav sib sau los nyob ua ke. Thaum sib ntsib, sib pom, ces tsuas muab txoj kev nyiam thiab qhov zoo nkauj zoo nraug coj los ua thawj. Tsis tau xav zoo txog yav tom ntej tias lub neej yuav zoo li cas. Tej zaum nkawd ob leeg twb pib muaj sib khib ua ntej thaum tsis tau sib yuav lawm. Thaum sib yuav los nyob ua ke, tsis ntev pib muaj kev tsis sib nkag siab thiab pib dhuav. Nyem no hais txog kev sib nrauj, mas nws yooj yim heev. Vim peb tsis mloog cov laus hais thiab peb yoog raws lwm haiv neeg ntau. Thaum ub, yog ib nkawm niam txiv twg muaj teeb meem hais txog ntawm nkawd txoj kev hlub los sis lub cuab yim neej. Nkawd txawj sib zam thiab mloog tej hlob tej laus hais. Ces txawm tias lub neej ntsib teeb meem ntau zaus, tsis kav kev sib nrauj sib cais tsis tshua muaj. Nyem no, yog thaum ib nkawm niam txiv muaj teeb meem tsis sib nkag siab. Ces lawv ncaj qha mus kom rau cov nom kom muab lawv sib nrauj. Coob leej tsis nco tias : ua ntej yus yuav sib sau nyob ua ke, nws siv sij hawm sib nkag siab nyuab heev. Tab sis thaum sib nrauj, cas yooj yim ua luaj. Thaum sawv daws pom tias kev sib nrauj yooj yim, mas thiaj ua rau ib txhia neeg xav tias : kev sib yuav yog nyob tau ces nyob, nyob tsis tau ces nrauj xwb. Ib txhia tsis nco mloog niam mloog txiv, los mloog cov hlob lus lawm. Tej yam no cia li rais los ua ib qho uas Hmoob siv kam nyob hauv lub neej niaj hnub nyem no. Tab sis qhov tiag, Hmoob lub neej tsis yog zoo li no. Kuv xav hais ob peb nqe lus ua piv txwv li no :

Cov tub ntxhais uas nyuam qhuav sib ntsib.
Hais txog cov tub ntxhais uas nyuam qhuav sib ntsib tshiab tshiab, mas xav thov kom nej siv sij hawm los sib saib siab thiab sib tham kom nkag siab tiag tiag. Kev hlub txhawv los ntawm kev sib nkag siab, sib tham, sib fim thiab sib pauv tswv yim. Tsis hais yam dab tsi, neb ob leeg yuav tsum tham tau yam qhib siab lug tsis zais. Lub sij hawm yuav qhia rau yus paub tias : puas sib dhuav thiab puas yuav nyob ua ke tau. Yog ob leeg sib nkag siab zoo thiab sib hlub tiag lawm thiaj mam sib yuav. Txoj kev hlub thiaj yuav nyob nrog lub cuab yim neej mus ntev ntev.

Txhob ua neeg pob ntseg sib mloog luag hais.
Thaum ob tug neeg muaj kev sib hlub ua ke lawm, yuav ua li cas txoj kev hlub thiaj nyob ruaj khov ? Txhob ua neeg pob ntseg sib mloog luag tej hais. Yog tias yam ntawd yus tsis tau hnov thiab tsis tau pom ntawm qhov muag. Yuav tsum ua neeg xyuam xim txawj siv thiab txawj ntsuas tias : yam yus hnov ntawd, puas tseeb thiab puas tsim nyog ntseeg. Vim muaj qee yam tsis zoo raws li qhov yus tau hnov thiab yus txoj kev xav. Yog yus ua neeg pob ntseg sib, mas yus yuav poob rau txoj kev ntxias sai heev. Txhua yam yus hnov tab sis tsis tau pom, mas txhob maj ntseeg thiab yuav tsum xav kom zoo zoo. Txhob maj npau taws, txhob maj chim. Tsam tej yam ntawd yog qhov cuav ua kom yus txoj kev hlub tawg.

Thaum muaj teeb meem, yuav tsum txawj cheem yus lub siab.
Txhua yam teeb meem uas tshwm sim, nws muaj qhov tshwm sim tuaj thiab muaj qhov chaw daws. Yog paub tias muaj teeb meem lawm, txhob khiav nkaum. Yuav tsum tig los sib hais tim ntsej tim muag yam qhib siab hlo. Txhaum qhov twg kho qhov ntawd kom zoo tuaj. Txhob cia tej yam zais nyob nruab siab thiab txog qhov kawg tej yam ntawd ua kom yus sib ncaim. Vim kev zais siab tsis ua kom neeg txoj kev hlub loj hlob thiab ruaj khov.

Cov poj niam uas nyiam muab yus tus txiv hais rau luag tej, hais tias yus tus txiv tsis zoo li luag tej txiv.
Thov kom peb cov poj niam txhua tus paub tias : txiv neej yog hom neeg uas nyiam lub meej mom dua txhia yam. Qhov uas ib tug poj niam muab nws tus txiv mus tham rau lwm tus thiab thuam tias tsis zoo, mas tus poj niam ntawd yuav yog ib tug neeg nyob qis heev ntawm txhua tus txiv neej. Vim qhov nws tau ua yog ib yam rhuav ntsej muag. Nco ntsoov tias txiv neej tsis muaj ib tug twg yuav ntshai poj niam thiab tsis txaj muag, yog nws raug lwm tus thuam. Vim li ntawd, xav qhov zoo thiab muab qhov zoo los npog qhov phem. Yuav tau ua siab ntev uv kom dhau.

Txhob nug tias : koj yuav xaiv kuv, los yuav xaiv koj tus phooj ywg ?
Qhov ntawd yog ib lo lus txiav txim siab nyuab. Kom yus xav tias kev hlub ntawm tus neeg yus hlub thiab kev hlub ntawm phooj ywg nws sib txawv. Yuav tsum txawj faib tias qhov twg yog hlub, qhov twg yog phooj ywg. Ceev faj tsam thaum koj nug koj tus txiv tias : “Koj xaiv kuv, los xaiv phooj ywg ?”
Tsam thaum ntawd koj tus txiv los sis koj tus poj niam yuav teb tias : “Kuv xaiv phooj ywg, vim phooj ywg zoo dua koj”. Ces thaum ntawd koj yuav txaj muag thiab tu siab heev. Vim li ntawd, tsis hais yus tus txiv los sis yus tus hlub kuj xij. Yus yuav tsis muab lo lus ntawd los ua lus nug.

Thaum muaj phooj ywg tuaj hauv yus tsev.
Yog muaj phooj ywg tuaj haus dej haus cawv hauv yus tsev. Txawm tias qhov ntawd yog ib qho zoo thiab tsis zoo kuj xij, yus yuav tsum tau ua ib tug niam tsev kom zoo tshaj plaws. Kom tsim nyog lo lus luag tej laus xij hais tias : qhua tuaj qhua hlob, yuav tsum txais qhua pauj qhua kom zoo. Ua kom yus tus txiv thiab tej phooj ywg pom tias yus zoo tiag. Qee zaus thaum yus pom yus tus txiv nrog tej phooj ywg haus dej haus cawv, mas yus npau taws. Tsis xav ua rau noj. Tab sis yus yuav tsum ua siab ntev uv kom dhau. Txawm yuav khwv yus me ntsis kuj xij, zoo dua nws nrog phooj ywg tawm mus haus dej haus cawv sab nraud uas yus qhov muag tsis pom. Yog yus ua tau siab ntev li ntawd, mas tej phooj ywg kuj yuav qhuas yus tus txiv thiab qhuas yus. Luag yuav sov siab tuaj poog yus. Tab sis yog yus ua siab nqaim, yws taus thiab npau taws, mas zoo li yus rhuav yus tus txiv ntsej muag. Qhov ntawd yuav ua rau yus tus txiv xav tawm mus sab nraud kom deb ntawm yus.

Hwm thiab saib yus tus txiv los sis yus tus poj niam kom muaj nqis.
Ob leeg yuav tsum muaj kev ntseeg siab thiab tso siab tiag. Qhib siab sib tham txhob zais siab. Txhob nug txog ub no ntawm yus tus txiv, los sis yus tus poj niam ntau dhau. Vim kev nug yuav ua kom muaj kev dhuav.

Txhob ua xyem xyav thiab txhob xav tshaj qhov tseeb.
Kev ua xyem xyav thiab nug txhua zaus tias koj mus qhov twg, koj ua dab tsi ? Qee zaus yus mus hauj lwm los, yus sab sab nkees nkees. Twb xav kom muaj ib tug los hais lus zoo thiab ua lub zog txhawb nqa yus, tab sis tseem los nug kom yus npau taws ntxiv. Tej yam ntawd, kuj yog ib qho ua rau neeg dhuav sai. Yog yus xav ntau tshaj qhov tseeb lawm, yuav ua rau yus chim siab tas li. Kev xav ntau kuj ua rau neeg txias siab thiab sib tawg tau. Xav ntau ntau ua rau yus laus sai thiab.

Muab yus lub siab tso rau luag lub thiab muab luag lub siab tso rau yus lub. Xav rau luag thiab xav rau yus.
Txhob ua tus neeg xav tau ntau thiab qia dub. Nyiaj txiag ob leeg khwv, txawm leej twg ceev los yuav tsum faib thiab qhia ob leeg paub. Yuav tej yam tsim nyog thiab txuag ua ob leeg tug. Qee yam yuav tsum pom kev txhaum ntawm yus tus kheej thiab, txhob hais tias qhov twg los yus yog tus zoo thiab tsis muaj txhaum.

Txawj hais lo lus thov txim thiab txawj zam txim rau luag.
Qee nkawg txij nkawm uas sib faib sib nrauj, yog vim nyias yuav nyias siab thiab siab tawv dhau. Ib tug tsis kam hais thov txim rau ib tug. Peb ua neeg nyob, yog ib tug txawj hais thov txim lawm, ib tug ho zam txim pub. Ob leeg txawj thov txawj zam thiab sib uv. Ces kev hlub yeej nyob ntev tsis sib ncaim.

Qhuab qhia tej me nyuam, kom paub txuag siv.
Hais txog nuj nqis. Lo lus nuj nqis tsis muaj leej twg ntshaw thiab xav tau. Tab sis peb txhua tus yeej muaj nuj nqis. Ib yam li “kev hlub” yog ib yam zoo thiab mob siab tshaj. Mob tshaj riam chob, ntsim tshaj kua txob thiab iab tshaj tshuaj. Tab sis txhua leej txhua tus kuj xav tau thiab nrhiav kev hlub tas zog. Muaj coob leej lawv rov qab txo lawv txoj sia, yog los ntawm kev tshuav nuj nqis. Yog vim li ntawd, yus yuav tsum qhia tej me nyuam kom txawj txuag siv txhua yam. Kom cov me nyuam txhob xyaum ua neeg tiv nuj nqis. Yog peb pib cob qhia cov me nyuam thaum me me los mus, mas zoo dua cob thaum loj. Peb yuav qhia txog tej txiaj ntsim ntawm yam uas peb siv. Nyiaj txiag yuav siv li cas thiaj muaj txiaj ntsig ? Dej thiab hluav taws xob muaj txiaj ntsim dab tsi rau neeg ? Xyoob ntoo nroj tsuag muaj nuj nqis li cas ? Lub ntuj tshiab nyem no muaj ntau yam vam meej hais txog kev siv ntawm tib neeg. Yog peb tsis xyuam xim thiab tsis qhia tej me tub me nyuam kom txawj txuag txawj siv, tsis qhia kom lawv txhawj cheem lawv lub siab, mas tej yam ntawd kuj yuav ua kom peb ris nuj nqis. Yuav tsum qhuab qhia tej me nyuam kom xyaum coj tus yam ntxwv zoo. Tsis yog hais lus qhuab qhia xwb, yus yuav tsum tau ua kiag ib tug piv txwv zoo rau sawv daws ntsia. Kev txuag siv txhua yam hauv vaj hauv tsev, tsis yog tias yus txuag heev dhau ces cia li ua neeg cuaj khaum lawm. Thov txhob ua li ntawd thiab. Qhov loj mas yog peb txawj txuag siv thiab txawj cheem peb lub siab kom txaus, nws yuav pab peb zam dhau ntawm kev ris nuj nqis. Kuv tham los ntev lawm, ces hnub no kuv xaus li no xwb. Lwm zaus peb mam ho rov sib ntsib dua !