Leej Nthiab Maria Goretti
Niaj xyoo peb hwm leej ntshiab Maria Goretti rau lub 7 hli tim 6, vim hnub ntawd yog hnub nws tuag.Leej ntshiab Maria Goretti yug los xyoo 1890 lub 10 hli tim 16 nyob lb zos Corinaldo, Is Tas Lis teb. Nws niam nws txiv yog neeg txom txom nyem ua noj ua haus xwb. Vim txoj kev ua zog nrhiav noj nrhiav haus ces nws txiv coj lawv tsev neeg tsiv mus rau lub zos Ferriere. Nyob rau ntawd nws txiv mus koom nrog ob txiv tub lawv sawv daws sib pab ua zog ntawm ib tug tswv teb. Tus tub hluas nyob hauv ob txiv tub ntawd hu ua Alessandro; nws muaj 19 xyoos. Lawv ob yim neeg koom nyob ib lub tsev xwb, tiam sis nyias nyob nyias chav. Maria txoj hauj lwm yog zov me nyuam hauv tsev, ua pluas noj, ntxiv ntxhua, thiab tu vaj tu tsev. Nws niam nws txiv nkawd niaj hnub mus ua zog. Thaum Maria muaj 9 xyoos, nws txiv mob npaws heev heev ces nws tas sim neej lawm, tseg Maria lawv pab nus muag nrog lawv niam xwb. Lawv niam kuj tsis pom qab yuav mus lwm qhov, nws kuj tseem niaj hnub coj lawv ua zog li qub koom nrog ob txiv tub thiab.
Thaum Maria muaj 11 xyoos tawm, Alessandro txawm muaj lub siab xav ua phem rau Maria. Nws sim txhom Maria ob zaug, tiam sis Maria tsis kam nrog nws ua kev phem. Zaum peb, yog hnub tim 5 lub 7 hli 1902, Maria zaum ntawm theem ntaiv ntawm qhov rooj nkag lawm hauv tsev, tab tom ntxiv tsho, nws tus niam hluas yau tsaug zog hauv tsev. Nws niam thiab nws cov nus cov viv ncaus tab tom mus ua zog lawm. Thaum ntawd yog yav hnub qaij tav li peb teev tawm, Alessandro txawm los, nws cab Maria nkag mus rau hauv tsev, nws muab Maria txhom, tiam sis Maria tsis kam, Maria qw qw rau nws tias: “Txhob ua li ntawd! Ua li ntawd yog ua txhaum! Tswv Ntuj tsis xav kom ua li ntawd! Yog koj ua li ntawd mas koj yuav poob rau dab phem teb!” Alessandro pom tias Maria yeej tsis kam swb rau nws li, ces Alessandro nthos nkaus ib rab riam muaj ob sab hniav los nkaug Maria 14 zaug, ces nws khiav mus nkaum lawm. Maria tus niam hluas yau txawm tsim los, nws pheej quaj quaj, ces Alessandro txiv thiaj nce los xyuas saib yog vim li cas, nws thiaj pom Maria ntog rau hauv av hos ntshav los ntau ntau, nws txawm qw qw rau Maria niam, nws niam thiaj khiav poob plig tas los txog. Nws niam nug nws tias yog vim li cas, nws thiaj qhia tias twb yog Alessandro nkaug nws, vim nws tsis kam nrog Alessandro ua txhaum.
Nws niam coj nws mus tom tsev kho mob, tiam sis cov kws tshuaj kuj pab tsis tau nws, ces tim 6 lub 7 hli nws tuag thaum yav li 3 teev hnub qaij. Ua ntej nws yuav tuag, txiv plig nqa lub Cim Yug tuaj rau nws noj, Txiv plig nug nws: “Maria, thaum Yes Xus yuav tuag, nws twb zam txhaum rau tus tub sab nyob ntawm nws ib sab thiab rau cov neeg muab nws tsim txom. Koj ne, koj puas zam txhaum rau tus neeg nkaug koj thiab?” Nws teb tias: “Kuv zam! Kuv zam! Vim kuv nyiam Yes Xus mas kuv zam rau nws kawg, thiab kuv xav kom muaj ib hnub twg nws tau mus nrog kuv nyob saum ntuj!”
Maria tuag tas, cov neeg paub nws sawv daws yeej saib tias nws yog ib tug neeg dawb huv, uas nws yeem tuag vim txoj kev dawb huv. Xyoo 1950, vaj qhia Pius XII tsa nws ua leej ntshiab, muab nws tso ua ib tug qauv zoo rau cov hluas thiab cov me nyuam tau xyaum hais txog kev tsim txiaj kev dawb huv ntawm yus lub cev, vim lub caij peb nyob no, cov me nyuam thiab cov hluas sawv daws tsis saib txoj kev txuag yus lub cev kom dawb huv muaj nqes pes tsawg li lawm. Maria yog ib tug ntawm cov hluas dua cov uas lub Koom Txoos tau tsa ua leej nthsiab.