Nag hmo kuv tau sau ib zag, tiam sis nws tsis tawm ces kuv ho rov sau dua, tiam sis ntshai yuav txawv zaj qub lawm, vim kuv tsis tau muab copy cia.LUB HMOOV COV LEEJ NTSHIAB 
Hnub no yog tim 1 lub 11 hlis ntuj, nyob thoob ntiaj teb lub Koom Txoos Kas Tos Liv ua kev hwm tag ib tsoom leej ntshiab(All Saints Day/ La Toussaint). Yog vim li ntawd peb thiaj li nyeem cov zaj nyeem uas XH Npuag Tub muab tso rau hauv no peb tau nyeem. Cov leej ntshiab yog cov neeg uas lawv dhau mus nrog Tswv Ntuj nyob lawm. Thaum lawv ua neej lawv tau coj raws nraim li HT Yes Xus cov lus nyob hauv ntawv Moo Zoo hnub no. Lawv yog cov muaj lub siab lub tswv yim ua neeg pluag, txawm lawv muaj nyiaj muaj txiaj los nyiaj txiag tsis yog huab tais rau lawv, lawv siv lawv tej nyiaj txiag los tiam Tswv Ntuj thiab tiam luag kom tau tsob hwb Tswv Ntuj xwb. Lawv yog cov neeg siab zoo hlub thiab zam rau lwm leej lwm tus. Lawv yog cov neeg me tsis khav theeb tsis muab hlob, lawv lees paub lawv yog neeg txaug neeg txhaum, lawv vam Tswv Ntuj los pab lawv cawm lawv. Lawv tsis nrhiav kev txhaum rau leej twg, tsis ua kom muaj kev ntxub ntxaug nrog luag tej. Lawv yog cov neeg siab dawb siab huv, tsis nrhiav kev phem kev qhias nyob hauv ntiaj teb no. Lawv muab Tswv Ntuj saib tseem ceeb dua ntais, lawv ua kom haum li Tswv Ntuj txoj cai; txawm yuav muaj tus thuam lawv saib tsis taus los lawv ua tiag nyiaj kom dhau, tsis yeem ua kom neeg nyiam xwb tiam sis Tswv Ntuj tsis nyiam.
Hnub no peb hwm tas ib tsoom leej ntshiab. Muaj ib co leej ntshiab uas peb paub npe vim lub Koom Txoos tau tsa lawv ua leej ntshiab lawm. Tiam sis kuj muaj ib co uas peb tsis paub lawv npe vim lub Koom Txoos tsis tsa lawv ua leej ntshiab, tiam sis lawv kuj yog leej ntshiab ib yam nkaus thiab. Ces hnub no peb hwm tas nrho cov uas lawv tau raug tsa ua leej ntshiab thiab cov uas tsis tau tib si, vim lawv sawv daws yog ib co neeg zoo ib yam li peb, uas tau tawm tsam yeej ntiaj teb txoj kev phem thiab txoj kev haub kev ntxias, lawv thiaj tau mus nyob saum ntuj lawm.
Lub Koom Txoos xaiv tej tus neeg tshwj xeeb coj los tsa ua leej ntshiab, vim lub Koom Txoos pom hais tias cov neeg ntawd lub neej tsim nyog muab coj los ua qauv rau peb cov ntseeg sawv daws xyaum kom peb ua tau ib co neeg ntshiab ib yam li lawv thiab. Vim lub hom phiaj hauv peb lub neej ntiaj teb no yog xyaum ua neeg ntshiab kom thiaj tau mus pom Tswv Ntuj xwb.
Zoo xws li leej ntshiab Bernadette, uas tais Tooj thiab Maiv Paj Lug nkawd twb muab rau peb nyeem saum toj no. Nws yog ib tug neeg siab dawb siab huv nws thiaj tau pom Niam Mab Liab. Tsis tas li ntawd, thaum nws mus ua phauj lawm, nws ua neeg me tsis muaj koob nto npe dab tsi li. Cov phauj loj saib nws lub koom haum kuj tau ua ntau yam los tsim nws, tiam sis nws kuj tau ua ntsej muag luag ntxhi rau lawv, mloog lawv lus thiab saib lawv ua nws cov thawj. Nws kuj yog ib tug neeg muaj mob taug, tiam sis nws nyiaj tas puas tsav yam kev nyuaj, kev tsim txom, kev mob nkeeg los pab cov neeg txhaum vim nws nyiam HT Yes Xus. Leej ntshiab Bernadette yog ib tug tau ua qauv zoo rau peb xyaum.
Peb cov neeg ntiaj teb, muaj cov uas kub siab lug nyiam Tswv Ntuj. Thaum lawv tas sim neej lawv yog cov leej ntshiab nyob saum ntuj. Tiam sis peb kuj muaj ib co uas lawv kuj tau siv zog kawg, tiam sis lawv tseem dawb huv tsis tau txaus. Thaum lawv tas sim neej, lawv xub mus nyob rau teb chaws them txim (Purgatory/Purgatoire). Raws li peb to taub me me mas nyob rau teb chaws them txim cov neeg nyob txom nyem kawg, yuav luag npaum nyob hauv dab phem te los yog Ntuj Tawg (Hell/Enfer); yog lawv kev them txim. Tiam sis lawv muaj ib txog kev cia siab hais tias ib hnub tom ntej ub, lawv yuav tau mus nrog Tswv Ntuj nyob. Lawv ua tsis tau dab tsi los pab lawv tus kheej, tiam sis peb cov tseem nyob ntiaj teb, pab tau lawv. Yog peb nqa me me nyiaj mus thov txiv plig ua tej thaj txi ntuj pab lawv, yog peb ua kev yoo mov thiab thov ntuj tsis tseg rau lawv, mas peb yuav pab tau lawv dim sai mus nyob saum ntuj.
Yog vim li ntawd, tag kis tim 2 lub 11 hlis, peb cov Kas Tos Liv muaj ib hnub tshwj xeeb cia mus ua thaj txi ntuj thov ntuj pab rau cov uas tau tas sim neej lawm (All Souls Day/Jour des Morts). Yog peb muaj neeg tau ncaim mus lawm mas peb yuav tau nqa paj ntoos mus tu lawv lub ntxa thiab mus thov ntuj pab rau lawv. Yog peb muaj neeg tau ncaim lawm mas tsis txhob tos txog tim 2 lub 11 hlis li, yuav tsum tau nquag thov ntuj rau lawv thiab thov thaj txi ntuj pab rau lawv. Nyob hauv peb church ntawm no, hu ua Our Lady of Good Counsel, peb tus txiv plig muab ib phau ntawv los tso rau ntawm hauv ntej, ze ntawm ib sab thaj txi ntuj, kom sawv daws mus sau nyias cov neeg uas tau tas sim neej lawd npe rau hauv phau ntawv. Tas lub 11 hlis, txiv plig ua thaj txi ntuj thaum twg mas nws yuav thov ntuj pab rau sawv daws cov muaj npe nyob hauv.
Kuv tuaj piav me ntsis li no. Tej zaum nej twb paub tas lawm los muaj, tej zaum tej tus ho tsis paub los muaj. Muaj tej yam kuv ho paub tsis txog, nej paub los nej ho hais ntxiv rau, es peb sawv daws thiaj paub. Tej yam kuv ho hais yuam kev los nej hais qhia thiab.
Home
Yog koj tso siab rau Yesxus lub siab ntshiab, nws yuav ua koj siab kaj lug 
......peb tawm los taws tswm ciab tas ces peb mus noj su tom parck lolz! kuv tseem nco nco kuv niam cov ncej puab qaib nws ntim mus qhwv nrog nplooj tsawv tsw qab ntxiag nrog mov nplej nplaum tshiab dub....bellelu nws leej nkawm nrog kuv tus nus tus nyab thiab lawv cov me nyuam tib si.
