Saub Siab mus xyuas Saint Curé d'Ars 2010

LEEJ NTSHIAB SAINT CURE D'ARS 2010 (Jean-Marie Vianney)

Nyob zoo tsoom phoojywg Hmoob txhua leej txhua tus, hnub no kuv yuav coj nej mus ncig nyob Fab Kis qab Teb thaj chaw ntshiab nyob lub me nyuam zos hu li ARS. Ntawm no muaj tus Leej Ntshiab Saint Curé d'Ars lub cev nyob tau 150 xyoos uas tseem zoo nkauj li qub , ib tug leej ntshiab nyob thaj chaw twg, Tswv Ntuj kuj nyob thaj chaw ntawv.

Leej Ntshiab Curé d'Ars lub neej


Yug hnub tim 8 lub 5 hli ntuj 1786 nyob Dardilly, ze ntawm Lyon, Jean-Marie Vianney tsev neeg ua liaj ua teb, nws ua lub neej nco ntsoov txog thaum nws yau nws niam thiab nws txiv tu nws nyob hauv txoj kev hlub.

Lub caij tsov rog hauv fab kis ciam av ua rau nws thim xav, nws tau mus daws txhaum thawj zaug nyob lub tuam tsev muaj lub moo loj nyob ze nws lub zos. Yog ib tug Txiv Plig khiav tsov rog tuaj nyob nkaum hauv lawv lub zos daws Jean-Marie Vianney thawj zaug txhaum.

2 xyoos tom qab, Jean-Marie Vianney mus txais lub cim yug thawj zaug nyob hauv ib lub tsev tu tsiaj, vim caij tsov rog lawv teev ntuj hauv tej tsev ntau xwb. Thaum nws muaj 17 xyoo, nws txiav txim siab mloog Tswv Ntuj hu nws : << Kuv xav cawm kom tau cov ntsuj plig mus rau kuv tus Huab Tais siab zoo >>, nws hais li ntawv rau nws niam uas yog Marie Béluze. Tiam sis nws txiv yeej tsis kheev nws mus raws nws lub hom phiaj tom qab 2 xyoos dhau, vim hais tias tsis muaj neeg yuav pab nws txiv.

Thaum nws muaj 20 xyoo, nws mam li tau kev mus kawm ua Txiv Plig nrog tus Abbé Balley nyob lub zos d'Ecully. Txoj kev nyuaj siab pib tawm tuaj, vim hais tias lawv hu nws mus ua rog, nws nyuaj siab kawg nws thiaj tau mus ua Pèlerinage xyuas tus Leej Ntshiab Saint François lub ntxa. Thaum nws rov los txog nws raug nom tswv xa nws mus ua rog xuj lub teb chaws Espagne. Thaum ntawv nws mus lawm tiam sis nws tus thawj coj Abbé Balley yeej tsis tso nws tseg, Abbé Balley pab thov thiab ua ntawv tsis tseg rau nws kom nws rov tau los ua nws txoj hauj lwm uas Ntuj txib nws. Tsis ntev tom qab , Fab Kis thiaj tso cai rau nws rov los kawm tiav ua nws txoj hauj lwm Txiv Plig.

Jean-Marie Vianney tau txais lub cim tiag tes ua Txiv Plig xyoo 1815. Nws thiaj tau los ua vicaire rau lub zos Ecully.

Xyoo 1818, nws raug xa mus ua Txiv Plig hauv lub me nyuam zos ARS. Ntawm lub zos nws mus ua Txiv Plig, nws kuj mus qhib txhua tus qhov muag rau txoj kev ntseeg, nws mus coj tau coob leej ntau tus los ua neeg ntseeg. Nws kub siab thov ntuj thiab daws txhaum ib hnub nws nyob 17 xuaj moos daws neeg tej txhaum nkaus xwb.

Tsis ntev xwb, luag cav nws lub moo qhov txhia chaw, neeg tuaj saib tus Txiv Plig no coob kawg nkaus. Tej tus neeg tuaj daws txhaum hauv lawv lub siab, tej tus neeg kuj yog tuaj nrhiav Tswv Ntuj ntawm tus Txiv Plig d'Ars.

Nws tau tso ntiaj teb tseg hnub tim 4 lub 8 hli 1859. Nws tau ua ntau yam kev kaj siab thiab kev zoo pab coob leej ntau tus. Thaum nws ua Txiv Plig, nws kam sim khiav 3 zaug hauv nws lub zos mus kom deb deb , rau qhov dab ntxwj nyoog ntxias nws, nws xav hais tias nws ua tsis tau ib tug Txiv Plig zoo txaus pab neeg cov ntsuj plig. Tiam sis txhua zaus nws khiav, cov neeg hauv nws lub zos caum tau nws qab, lawv thov kom nws rov qab los nrog lawv nyob. Nws thiaj ua ib siab tsis khiav lawm, nws los txhawb nws lub tsev teev ntuj, nws rau siab ua nws txoj num rau Tswv Ntuj, nws niaj hnub daws txhaum tsis tseg pub zej zos. Thaum lawv muab nws lub cev zeem cia hauv av, neeg tuaj coob txog txhiab txhiab tus tib neeg tuaj saib nws lub cev ua zaum kawg. Muaj cov Txiv Tswv Qhia thiab coob tug Txiv Plig tuaj saib nws , vim nws yuav ua ib tug qauv zoo rau sawv daws.

Hnub tim 8 lub 1 hli ntuj xyoo 1905, tib lub xyoo Txiv Vaj Qhia Pie XI ( tsa Leej Ntshiab Sainte Thérèse de l'Enfant-Jésus ua ib Leej Ntshiab), thiab Tsa Jean-Marie Vianney ua Txiv Plig thawj coj ntawm txhua tus Txiv Plig hauv Fab Kis Teb. Xyoo 1925 Txiv Vaj Qhia Pie XI thiaj tuaj tsa nws ua Leej Ntshiab thiab tus thawj coj tag nrho rau cov Txiv Plig hauv qab ntuj khwb ntiaj teb. Txiv Vaj Qhia Zampajlug2 tuaj xyuas Leej Ntshiab Curé d'Ars xyoo 1986.

Niaj hnub nim no , ib xyoos hauv lub tuam tsev teev ntuj nyob Ars, muaj txog ntawm 4500000 millions tus pèlerins tuaj xyuas nws. Txij xyoo 1986 los, lawv thiaj tsim ib lub tsev qhia ua Txiv Plig nyob Ars: << Qhov twg muaj ib tug Leej Ntshiab dua kev, Tswv Ntuj kuj nrog lawv tuaj .>>