Kev Ntseeg yog dab tsi? FOI/ FAITH

KevNtseeg yog dab tsi?

1/Txhua tus neeg yeej muaj kev ntseeg raws li nws paub.

2/Kev Ntseeg tsis zoo sib xws rau txhua tus, vim nws tshwm sim rau yus raws li yus txoj hauv kev nrhiav thiab nyiam txoj kev ntseeg.

3/Txoj kev ntseeg muaj ntau yam sib txawv nyob hauv peb noob neej.

4/Txoj kev ntseeg yog ib qho tshwm sim nyob nrog noob neej kom nyiam ua qhov zoo,nyiam kev hlub thiab mus rau qhov pom kev.

5/Txoj kev ntseeg tob yog ib qho pom kev nyob hauv peb tus ntsuj plig ntshiab, nws yog txoj kev hlub nyob hauv noob neej thoob qab ntuj.

6/Txoj kev ntseeg yog yam ntshee na nyob hauv peb nruab nrog, ntshai ua txhaum , ntshaw qhov yog thiab qhov tseeb.

7/Txoj kev ntseeg yog lub zog nyob hauv txhua tus, ntseeg tias Tswv Ntuj muaj tseeb, Tswv Ntuj nyob ib ncig ntawm yus txhua hnub, nws yog tus kav tas txhua yam.

8/Txoj kev ntseeg yog ib qho pom kev uas yus paub tias Yesxus Pleev muaj tseeb, Yesxus Pleev nyob hauv yus .

9/Txoj kev ntseeg, tsa tus ntsuj plig nyob siab, qhia tib neeg pom deb ,nws kev ntseeg loj zus ,nws yuav pom ntau yam tshwm sim loj tuaj.

10/Txoj kev ntseeg muaj ntau lub ntsej muag qhia yus, xyaum nrhiav txoj kev ntseeg kom yus paub, nws yuav qhia tau yus paub raws txoj kev ntseeg thiab nws kuj yuav pab cheem yus thaum tsis yog.


Kev ntseeg yog ib yam qhia noob neej kom paub qhov tob nyob hauv yus. Ib txhia muaj kev ntseeg nyob hauv kev nom tswv, ib txhia muaj kev ntseeg nyob hauv kev ntseeg ntuj. Peb txhua tus nyias muaj nyias kev ntseeg ntau tsav ntau yam, tiam sis txoj kev ntseeg tsuas muaj tib txoj hau kev coj peb sawv daws mus rau qhov zoo thiab ntawm peb tus Huab Tais nyob siab, mus rau tus Huab Tais uas nyob nrog nraim peb, thiab tus nyob ncig peb thiab nws tsuas yog tib tug tseem Tswv Ntuj tsim txhua tsav txhua yam.

Yog yus xav txog lo lus nyob hauv txoj kev ntseeg, yus nrhiav tau txhua yam tseem ceeb nyob hauv kev ntseeg nws yog....Qhov tseeb.


Lub zog dab tsi ua kom hnoob neej txhob paub kev hlub tseeb thiab txhob muaj kev ntseeg?

Qhov uas noob neej tsis muaj kev hlub tob thiab txoj kev ntseeg loj mas nws yog :

_ daim ntaub npog noob neej qhov muag ntawm yaj ceeb thiab nruab yeeb
_ noob neej txoj kev ntshai
_ noob neej txoj kev ua xyem xyad
_ noob neej tsis muaj kev tso siab vim noob neej tsis paub nws tus kheej tseem ceeb npaum cas
_ noob neej tsis nyiam nws tus kheej tag
_ noob neej tsuas xav tau txhua yam nyob sab nraum luag los ua nws tug, tiam sis ho tsis yog nws li.
_ noob neej ua dab tsi mas ua kom dhau cai
_ noob neej txoj kev muab hlob.

Thaum twg noob neej paub qhov tseeb tias nws yog leej twg thiab nws paub tias Tswv Ntuj tsim nws los ua dab tsi , nws yuav muaj lub zog tshem tau daim ntaub npog ntawm nws qhov muag los mus ua ib daim ntaub pom kev deb thiab qhib nws lub siab loj tuaj mus rau txoj kev hlub thiab kev ntseeg tseeb.

Thaum twg noob neej nrhiav tau tus me nyuam nto moo lug nyob tob hauv nws, nws yuav tsis nug ntau yam los sis ncauj ntau rau lwm tus tias kev ntseeg yog dab tsi thiab nrhiav qhov twg thiaj tau kev ntseeg.

Noob neej tsuas khav ntawm ncauj rau luag li nws qhov muag pom xwb, tiam sis yam nws tsis pom mas nws thuam kawg nkaus.

Noob neej tsis to taub tias kev ntseeg tseeb yog nyob haud nws ob lub qhov muag tob tob pom.

noob neej TAG KIS yuav hloov, vim ib ncig ntawm nws hloov tag, thaum nws paub tias lub tshuab uas Tswv Ntuj tsim rau nws ,txawj nti ,txawj hais lus, txawj mus kev, thiab txawj noj hu tias " LUB CEV " nyob txawb ntawm nws xub ntiag kom nws tau sid raws li nws siab nyiam, nws yuav paub tias tus Tswv Ntawm lub tshuab yog leej twg , tsuas qiv rau nws siv ib ntus xwb , ces nws txawj hloov muaj kev ntseeg loj thiab tseeb, nws pom nws yog leej twg, lub tshuab yog dab tsi ,thiab tus Tswv uas kav lub tshuab.

Noob neej yog tus siv lub tshuab, lub tshuab muaj Tswv, yog noob neej tsis txuag lub tshuab ,thaum noob neej rov xa lub tshuab rau tus Tswv , yog nws muab ua puas , muab ua nqias neeg tas lawm ces tus Tswv yuav tsis zam rau nws.

Ib txhia noob neej, tsis paub qhov tseeb tias lub cev tsuas yog lub tshuab ua hauj lwm uas Tswv Ntuj qiv rau nws sid xwb, noob neej yeej tsis txuag , muab lub cev ua puas tas, Tswv Ntuj twb qiv lub cev rau noob neej los noob neej tseem muaj nqiv rau lwm tus siv yam li muab lub cev rau lwm tus siv ua dev ua npua. Noob neej tseem muaj cai tua lwm tus lub cev kom tuag mus, tsis pub luag siv rau ntiaj teb, vim noob neej xav tias lub cev ntawv yog tus neeg nws ntxub li, noob neej tsis txuag yam ua yog Tswv Ntuj li.

Yog tag kis mus , nej nrhiav tau qhov tseeb, nej nrhiav tau txoj kev ntseeg tseeb, nej paub nej yog leej twg lawm, nej yuav hwm nej tus kheej zoo dua qub, nej yuav hwm nej tus tij, nej yuav hwm nej tus muam, nej yuav hwm txhua tus neeg nej ntsib, vim txhua tus yog Tswv Ntuj li tag nrho, ces nej txoj kev ntseeg yuav loj zus, nej yuav pom deb dua qub, nej tsis yog pom tus neeg nyob ntawm nej hauv ntej hais lus rau nej, tab sis nej yuav pom tus Tswv nyob hauv tus neeg hais lus rau nej.

Tag kis mus nej yuav paub tias txhua yam kev nyuaj, kev khwv thiab kev tsaus ntuj hauv nej lub neej yuav los txuam rau qhov tseeb uas nej tab tom pom deb.

Nej ib txhia yuav hais tias, tej kev sau thiab qhia ntau npaum no ces tsuas yog ib phau ntawv nyeem xwb, txhua yam peb sau hauv nod tsis muaj tseeb, tab sis peb yuav teb rau nej tias : " Tsuas yog txoj kev tsis ntseeg thiaj ua tau rau nej ncaim deb ntawm tus Tswv tsim nej , txhua yam muaj tseeb, thiab yuav tseeb mus ib txhis."

Yog nej ntseeg, tag kis , txhua yam yuav hloov tag nrho!

Nyob zoo Maiv Paj Lug,

Wow...! Nws yuav txawj hais ua luaj li...!
Yog kawg, yog yus muaj txoj kev ntseeg Tswv Ntuj zoo tiag mas yus yuav nyiam yus tshaj qhov qub, ib yam li yus nyiam luag tej. Kev yus nyiam yus mas txhais tias yus yuav hwm yus, yus hwm yus mas yog yus tsuas ua tej yam zoo xwb, yus yuav txuag yus, tswj yus lub siab ntsws kom tus, hwm yus tus kheej txhais tias yus tsuas ua qhov zoo rau luag tej xwb, kom yus lub siab huv zoo li yus lub cev.

Yog yus muaj txoj kev ntseeg zoo mas yus yuav ntsia luag tej txawv qhov yus tsis muaj kev ntseeg lawm. Yus yuav hwm luag, yuav tssi thuam luag thiab nias luag cai. Yog yus hwm luag ces luag hwm yus, yog yus tsis hwm luag ces luag tsis hwm yus thiab.

Li no txoj kev Ntseeg txog Tswv Ntuj thiaj yog ib qho tseem ceeb heev ntawm leej neeg (Noob Neej).

Maiv Paj Lug, kuv ua nws tsaug rau nws kev thoob tsib hnub no.