nqua hu peb cov ntseeg Yes Xus.

Tsoom kwv tij hmoob. Peb cov ntseeg Yes Xus, tsis hais yam kev ntseeg twg peb yog ib co kwv tij txheeb txheeb ntag. peb yog koom ib tug pog, tug yawg yug los xwb.
peb yuav hais tsis tau tias koj li los sis kuv li txhiaj yog qhov tseeb. qhov tseeb nws yog Tswv Yes Xus tib leeg xwb. peb yuav hais tsis tau tias koj li los sis kuv li txhiaj muaj hauv paus hauv ntsis, qhov hauv paus hauv ntsis ntawd nws yog koj thiab kuv li txoj kev ntseeg ntag.
Qhov txawv ntawm txoj kev teev hawm thiab txoj cai yog los ntawm leej tib neeg ua tus tsim tsa xwb, peb sawv daws hwm ib tug tswv ntuj thiab mloog ib lo lus qhuab qhia.
yog li, phim peb yuav tau los sib hlub, koom tes, sib pab, sib khi ua kwv, ua tij, txav los nyob sib ze ntawm txoj kev ua pab, ua pawg, rau lub neej ntiaj teb.
Txhob hais koj pab, kuv pawg, txoj kev cai tswj hwm nyob ntawm koj nyiam thiab kuv nyiam. peb yuav tsis yuam, txoj kev teev hawm nyias ua li nyias ib txwm coj. koj yuav los sawv tsis tau kuv chaw thiab kuv yuav los sawv tsis tau koj cev ntawm txoj kab ke kev teev hawm. tab sis peb yuav los ua ib tug qauv zoo rau peb tsoom hmoob pom, kom muaj txoj kev sib hlub. qhia rau tsoom hmoob saib puas yuav coj tau peb haiv neeg hmoob mus rau txoj kev pom kev?. kom muaj txoj kev sib sau los cuag Tswv Ntuj, los kawm ntuj lo lus los tswj peb lub siab, lub ntsws, thiab sib pauv tswv yim los kho peb lub neej hmoob saib peb puas yuav mus ib ruam ntxiv xws li luag lwm haiv neeg. kom muaj txoj kev txo hwj chim, txoj kev sib zam, txoj kev hlub, txoj kev sib txhawb, txoj kev sib nreg. los nyob ua pab, ua pawg, uas tsis muaj dab qhuas ua tswv kav. peb txoj kev sib cais vim kev ua dab, ua qhua txhiaj muab peb cais ua ntau pab, ntau pawg uas tsis muaj kev koom tes. peb txhiaj muaj kev cov nyom los ntawm txoj kev ua dab, ua qhua. cov hais los saum no yog vim peb tsis muaj ntuj lo lus los coj peb lub neej. peb yim muaj tub txawj ntxhais ntse coob mas peb yim nrug mus deb. peb ntau leej hais tias yog vim lub xeem, tab sis kuv hais tias tsis yog lub xeem cais peb. luag lwm yam neeg uas muaj kev ntseeg coj yuav nyiam yog Dub, Dawb, Daj, luag muaj kev ntseeg coj luag lub neej, luag zoo li yog ib tse xwb. peb hmoob thaum peb sib sau zog ua ke tham lo lus xaus mas peb hais tias kom sib hlub, peb yeej muaj txoj kev hlub ntawd. tab sis peb txoj kev hlub ntawd nws tsis ciaj cag, vim peb tsis paub tswv ntuj, peb tsis muaj ntuj cov lo lus nyob nrog peb, peb tsis muaj lub hom phiaj rau sab ntswj plig. yog li, peb txoj kev hlub ntawd nws txhiaj yog ib txoj kev pauv zog xwb. peb txhiaj loj hlob tsis tau.
li ntawd, yam peb ua peb txhiaj xav kom yog peb li thiab peb noj, thiab peb tau mas txhiaj ua. nws tsis yog ib yam uas pom deb nrog txoj kev hlub uas yuav los txhawb yus pab, yus pawg los sis yus haiv neeg.
Peb hmoob thoob ntuj niaj hnub hais tias kom hmoob hlub hmoob, peb yeej muaj qhov ntshaw ntawd, tab sis peb txhua tus maim qhov ntawd, yog hmoob tsis muaj ib txoj kev ntseeg los coj hmoob mas qhov ntawd yuav tshwm sim tsis tau li. yog hnub twg hmoob tsis hais tias, tus txheeb yog tus thooj dab, koom qhua no lawm mas txhiaj yuav tos tias tseem tshuav ib hnub rau hmoob, yog hmoob tseem hais lo lus ntawd ces tsis muaj hnub ntawd lawm txhob tos. Tsoom kwv tij hmoob, peb cov uas twb los paub Tswv Ntuj lawd!, peb yuav kub siab los txav ze ze Yes Xus, taij yuav nws txoj kev hlub, txhob mus deb ntawm nws, peb txhiaj yuav coj tau peb haiv neeg mus rau txoj kev pom kev.
Kuv lus tham pem hais los xaus li no, thov Tswv Ntuj ua sawv daws siab kaj lug.
sis ntsib dua.

Txhiaj Sawm Tsab