TSA TUB TSOB HWB NKIAS TEEB YAJ thiab VAJ NTXOOV NRUAS Nkws Yas

TSA TUB TSOB HWB
NYOB LUB ZOS KAS KAUS (Cacao)
YAJ Nkias Teeb - VAJ Ntxoov Nruas
hnub tim 31 lub 8 hli 2008




NKAWV LUB NEEJ :

* YAJ Nkias Teeb :

Yug lub hnub tim 9 lub 4 hlis ntuj 1962. Nyob hauv lub Xeev Sayaboury, Los Tsuas teb.
Nws tau txais lub cim ntxuav thaum nws nyuam qhuav yug los lawm.
Thaum YAJ Nkias Teeb muaj lub hnub nyoog kwv yees li 10 xyoo tej, nws pib txais tej txoj hauj lwm nyob hauv lub KT : Xws li, pab tus leej Choj (enfant du coeur). YAJ Nkias Teeb niam thiab txiv YAJ Zam Nob, tsiv teb tsaws chaw coj nws tsev neeg THOJ Nam nyob Thaib Teb ib ntus, thiaj tau tsiv mus lub Xeev Nkws Yas.
Thaum mus txog rau teb chaws ntawd, YAJ Nkias Teeb muaj hnub nyoog kwv yees 15 xyoos tej. YAJ Nkias Teeb nrog nws tus poj niam hu ua THOJ Ntxhoo, nkawd sib qaws ua txij nkawm yog hnub tim 3 lub 7 hli ntuj 1982. Nws tus poj niam yog xeem THOJ nyob lub nroog Rennes Fab Kis teb. Nyem no, nkawd nkawm niam txiv muaj 5 leeg tub (tsis muaj ntxhais)
Cov me nyuam muaj hnub nyoog 18 rau 25 xyoos tas lawm.



* VAJ Ntxoov Nruas :

Yug los hnub tim 1 lub 1 hlis ntuj 1962. Nyob lub xeev Xeev Khuam Los Tsuas teb. VAJ Ntxoov Nruas tau txais lub Cim Ntxuav hnub tim 14/04/1979 nyob hauv lub zos Kas Kaus. VAJ Ntxoov Nruas nrog nws tus poj niam hu ua XYOOJ May nkawd tau sib qaws los ua txij nkawm yog hnub tim 18/12/1980. Tam sim no nkaud muaj 4 leej ntxhais hos 3 leeg tub, tus hlob muaj 27 xyoo hos tus yau muaj hnub nyoog 6 xyoo.
Tom qab thaum nws txais lub Cim Ntxuav tas, thiab yuav poj niam lawm, txij ntawd los nws kuj nquag pab lub Koom Txoos kawg.



NKAWD TEJ HAUJ LWM :

Tab txij li thaum cov qub XH ntau leej tau tso lawv tes dej num ua XH tseg lawm, tsis muaj coob leej sib pab lawm, thaum no ; lub Koom Txoos nyob Kas Kaus thiab Javouhey thiaj nrhiav cov neeg kub siab los pab lub KT, los sis pab cov Leej Chov.
Thaum ntawd, YAJ Nkias Teeb thiab VAJ Ntxoov Nruas nkawd thaij tuaj yeem los pab lub KT ntxiv mus. Ntshe yog cov xyoo ua ntej 1985 los sis 1986 tej ntawd. VAJ Ntxoov Nruas thiab YAJ Nkias Teeb nkawd ob leeg thiaj tau nkag ua tub Koom Tes.
Nkawd tau kawm cov txuj Ntuj (Théologies) tiav, nrog Txiv Plig Nyiaj Pov.
Nkawd ob leeg tau ua hauj lwm nrog TP Vam Tuam (Père Antoine) tau 4 lub xyoos.
Xyoo 2000 Txiv Tswv Qhia Louis SANKALE tau tsa nkawd ob leeg ua ob tug tub muaj cai nyeem ntawv Ntshiab (Lecture et Acolyte).

Nkawd kuj tau kawm thiab xyaum ntau yam 2 xyoos ntau nrog TP Tshaj Tswv (Père Jacque).

Xyoo 2007, tab txij li thaum tus Tub Tsob Hwb YAJ Zoov Ntxheb mus Amelikas teb tas lawm, cov hlob nyob hauv lub KT thiab tsoom ntseeg pom tau tias, yuav tsum muaj tej tus los ris ib lub npe kom hnyav thiaj ris tau sawv daws lub nra.
Nkawd ob leeg thiaj tuaj yeem ua ntawv mus thov Txiv Tswv Qhia Emmanuel LAFONT. Nkawd ob leeg tau kawm cov Txuj Ntuj ntxiv ib xyoos ntau nrog TP Henri Claude ASSELOS, thiab nrog tus TP Michel.
Zaum no thiaj txog lub caij tis tswb rau nkauj kom nkauj hlob, tis tswb rau lau kom hlob.

Tub Tsob Hwb tes hauj lwm :

Yog pab tus Tswv Qhia cov hauj lwm hauv lub nroog los hauv lub teb chaws rau cov neeg ntseeg. Pab tus TP nyob hauv yus lub zos. Nrog cov Tub Tsob Hwb thiab cov TP sab laj sau siab, ua tel lub hmoov loj teev ntuj ua ke.
Tej lub sij hawm yuav tau ua thaum tsis muaj TP lawm. Zoo li lub cim ntxuav cim cog lus, lub txoos rau cov tuag, ua dej foom hmoov zoo, thov ntuj rau cov neeg muaj mob. Faib lub cim yug rau sawv daws thiab lwm yam ntxiv.


Pawg ntseeg hauv zos :

Pawg ntseeg muaj ze 120 yim, muaj ib lub tsev teev ntuj, ib lub tsev rau TP nyob, ib lub tsev qhia kev nsteeg rau cov me nyuam. Thaj chaw txawm rau sau ib lub ncov roob. Pawg ntseeg muaj ib lub rooj tswb hwm 11 leeg nyob hauv.
Muaj 6 pab me nyuam kawm kev ntseeg hnub samedi thaum 17h ua lus hmoob thiab lus Fab Kis.
Hnub chiv sawv daws teev ntuj yav sawv ntxov thaum 7h30.
Tus TP hu ua Zam Xyooj nws saib lub zos Cacao thiab Régina, nws qhov chaw nyob yog nyob Cacao. TP Zam Xyooj ua thaj txi ntuj sib qua ib lis piam rau Cacao ib lis piam rau Régina. Thaum TP tsis nyob lawm ces yog ob tug Tub Tsob Hwb ua lub txoos tev ntuj rau cov tseeg. Niaj xyoo thaum lub caij yuav sau ntav muaj ib pab me nyuam txais lub cim yug thawj zaug. Hos ob xyoo twg mas muaj txais lub cim txhab zog ib zaug. Cov txais lub cim ntxuav thiab lub cim cog lus mas nyob ntawm muaj ces npaj raws li cov ntseeg thov.


Kev ntseeg yav tom ntej :

• Nyob Fab Kis teb twb muaj TP Cwj Vuam Chiv, puas xav hu peb cov hmoob ntseeg nyob thoob ntiaj teb tuaj sib sau ob peb hnub teev ntuj ua ke sib fim rau nram lub nroog niam Mab Liab tawm tuaj nyob Fab Kis teb.

• Xav kom hu ua peb haiv hmoob nyob qhov txhia chaws thoob ntiaj teb siv ib tug qauv kev teev ntuj thiab peb txoj kev lis kev cai hmoob.

• Cov TP hmoob thiab cov Tub Tsob Hwb hmoob puas sau siab ib los ob xyoo ib zaug.

• Nyob hauv nyias lub teb chaws cov thawj coj puas hu tau cov ntseeg sib sau ib xyoo ib zaug.

• Puas tau 4 - 5 xyoo tsoom ntseeg hmoob thoob ntiaj teb sib sau ib zaug.



YAJ Nkias Teeb tes hauj lwm hauv tsev neeg :

Kuv yog ib tug tub qoob qub loo, muaj ib daim av 30 ha, cog txiv hmab txiv ntoo, ib lub tsev hauv zos nrog zej zog nyob, tej me tuj me nyuam tseem kawm ntawv tsis tau tiav nyob nram nroog. Kuv poj niam wb ob leeg niaj hnub ua lub luaj qoob sawv ntxov txog tsaus ntuj. Ib lis piam wb sau wb tej qoob loo coj mus muag nram nroog ib los ob zaug nyob ntawm tej zaum muaj ntau los muaj tsawg. Wb cov qoob loo yog : txiv kab ntxwv, txiv qaub, txiv lwm tsib, txiv tsawb, dib, taub, zaub, taum thiab lwm yam...

Wb cov hauj lwm feem ntau yog xuas lub zog thiab ob txhais tes ua , zaum puav kuj xuas tsheb pab ua thiab. Lub teb chaws muaj ntuj nag ntau dua ntuj tshav, tej qoob loo yeej ua thawm xyoo.

Wb zoo siab tos txais kwv tij neej tsa ua xav tuaj saib peb teb chaws.

Ua tsaug.

Cacao, hnub tim 23/11/2008