Tus Txiv Plig nyob lub zos Kwm Nyab

**Maiv Tooj** 25th July 2010, 6:04 am

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°1

Tus Txiv Plig nyob lub zos Kwm Nyab

Post Maiv Tooj 25th July 2010, 6:04 am

Tus Txiv Plig nyob lub zos Kwm Nyab

Tus Leej Choj no siab zoo npaum lub ntuj ntsuab, siab dawb npaum cov me paj huab, ncaj npaum xib xub raws li nws txoj kev hlub. Nws nyiam thiab hlub cov Ntseeg npaum li nws tus kwv. Nws xav hais tias nyob hauv nws lub zos Kwm Nyab kawg sawv daws yuav nyob kaj lug xws saum Tswv Ntuj lub ceeb tsheej; yog sawv daws ib nyuag ua raws li nws cov lus uas nws tau qhia thiab coj.

Tiam sis tsis mus zoo li ntawd thiab tsis zoo li nws lub siab xav; tom Txiv Plig lub rooj Daws Txhaum rau sawv daws me kab laug sab cab sab yim cuaj txheej tsis muaj tus mus txog. Hnub Chiv sawv daws haus dej haus cawv sib yaum hais txog kev plees kev yi nraum toj nraum pes xwb. Hnub Hmoov Hla (Pâques) cov Cim Yug tsheej khob tsis muaj tus txais. Tus Leej Choj lub siab puas tsus, tsis muaj lub zog sawv tim lub thaj Txiv Ntuj. Nws thiaj niaj hnub thov Tswv Ntuj tias: “Tswv Ntuj! Thov koj pab kuv, kom kuv lawv kom tau kuv pab yaj los rau hauv nkuaj ua ntej uas kuv yuav ncaim lub ntiaj teb no mus”. Nws niaj hnub thov li ntawd Tswv Ntuj kuj mloog nws thov thiab.

Muaj ib hnub Tswv Ntuj thiaj caw nws mus pem Tswv Ntuj lub Ceeb Tsheej. Nws mus los txog, nws thiaj hu sawv daws tuaj thiab thiaj piav rau sawv daws tias: “Kwv tij neej tsa sawv daws! Hnub hmos kuv tau mus txog pem Tswv Ntuj; thaum mus txog pem Tswv Ntuj lub rooj loog kuv khob qhov rooj, Leej Ntshiab Pob Zeb tawm los qheb rau kuv. Nws hais rau kuv tias:” Ob! Ciav yog koj mab! Txiv Plig Mab Tee (nws lub npe hu ua Mab Tee ). Hmoov zoo kawg uas koj tuaj txog ntawm kod! Los hauv nov, koj xav tau dab tsi?”
Kuv thiaj teb rau nws tias: “Yawg Hlob Pob Zeb, koj yog tus tuav phau ntawv txheeb npe thiab tus yuam sij; thov koj pab muab los nthuav qhia kuv seb muaj pes tsawg tus neeg nyob hauv kuv lub zos Kwm Nyab los rau ntawm Tswv Ntuj lub Ceeb Tsheej no?

Tau kawg, kuv tsis muaj dab tsi zais, zaum ntawm ib sab no wb mam xyuas ua ke . Pob Zeb teb li ntawd. Pob Zeb rho phau ntawv thiab nthuav lub zos Kwm Nyab. Kwm…Kwm…Nyab ob nyob phab no. “Aub! Leej kwv Mab Tee, tu siab ntau phab ntawv no tseem dawb paug xwb, twb tsis tau muaj ib tug nyob hauv nov li”. Pob Zeb hais li, cas yuav tssi txaus ntseeg li, ua tib zoo saib maj Yawg Hlob Pob Zeb!

- Koj ho ua zoo xyuas thiab seb me kwv yog koj xav tias kuv lam hais. Kuv thiaj rov hais rau Pob Zeb tias: Kuv mam teev Ntuj tu siab rau cov txhaum pab rau kuv cov Ntseeg tas zog!
- Me kwv, tsis txhob xav yuam kev es muab koj lub siab lus ntsws nruab rov quav mog tsam koj ho ua mob thiab. Tsis yog tim koj, qhov tseeb nyaj lawv yuav nyob muaj ib qho chaw lawm, Pob Zeb teb li ntawd.
- Yawg Hlob Pob Zeb mas thov koj pab kuv kom kuv mus xyuas mus pom lawv. Qhov tsawg kawg nkaus mas kuv xav mus hais nyob zoo thiab mus hais lo puav lus hlub lawv. Pob Zeb teb tias:

“Tau xwb! Los mas leej kwv, rau nkawm khau no vim qhov uas koj yuav mus mas kev tsis zoo, muaj muaj zeb muaj pos li tseem kub kub thiab. Koj mus ncaj qha lawm tod…Tom qhov kev ua lauj tsib tod
Koj yuav pom ib lub qhov rooj nyiaj muaj tus ntoo cuam dub dub. Koj mus txog koj xuas sab xis khob lub qhov rooj ces lawv qhib rau koj”.
Nws hais li ntawd kuv thiaj muab nkawm khau rau zoj zeeg thiab thiaj mus . Kuv mus teb chaws ntawd kub kub kuv tej nqaij twb yuav siav, kuv tej ris tsho tsw kub nyhiab ntxiag, me pob zeb pob tsuas sib tsoo nrov nqaj to yuav tais yuav tais kuv. Me nab tshuab plig pleg taum nplaig liab vog, ib pliag ntev loo ces kuv mus txog lub qhov rooj li hais:

Tus Tshiab txawm ntub kiag qaub ncaug ntawm ntiv tes nthuav phau ntawv ib daig dhau ib daig. Ib me pliag nws thiaj xyu ib suab thiab hais rau kuv tias: “Cov neeg Kwm Nyab tsis pom ib tug npe nyob hauv no li”. Chim kuv dhau kuv seev tias:” Ab! Yes Xus, Mab Liab, Yos Xes! Ua cas tseem tsis muaj ib tug Ntseeg nyob hauv kuv lub zos tuaj qhov nov li thiab? Es lawv dua twg lawm os? Niag tshiab thiaj teb tias:”Haj tsis mus saum Ntuj Ceeb Tsheej tas lawm xwb los maj!” Kuv thiaj teb nws tias: Kuv twb mus xyuas saud tas los twb tsis nyob saud.”

-Aw! Lawv tsis nyob saud, tsis nyob qhov no ces kawg yog hauv …
-Hauv! Hauv! Hauv! Twg naj? Kuv nug li ntawd.

Nws thiaj teb kuv tias: “Hauv Ntuj txias teb tsaus, ntuj nqha teb nqhuab xwb!
Huab tais tus Tshiab, Niam Mab Liab e !!! Puas yog tiag los dag os???
Kuv yuav ua cas nrog nej mus pem Ceeb Tsheej yog kuv cov neeg tsis nyob ib leeg ped li? Yuav zoo ua tus dab tsi thiab os? Tus Tshiab thiaj rov hais rau kuv tias: “Kwv luag Mab Tee, koj nim muaj siab xav paub xav pom koj cov neeg ua luaj, taug txoj kev ntawd mus, dhia li dhia xwb nawb. Yog koj txawj dhia, koj dhia mus txog puag tod muaj ib lub rooj loog sab laug, koj mus nug tod luag yuav qhia koj. Kuv thiaj tawm mus ntxiv; ces tus Tshiab kaw kiag nws lub qhov rooj cia li qheb. Kuv cia li dhia dhia mus tsaus ntuj nti zoo li kuv qaug cawv, hos zoo li kuv nyob hauv dej ua yuj yees yuav ntog tom ub tom no. Kuv hws mas tawm ntws lug tsis so; tab sis mas ho tsis kub kuv ko taw thiaj tej ris tsho, vim muaj Pob Zeb nkawm khau uas nws muab rau kuv ntawd tiv lawm. Kuv mus mus, taws tom ntej taws tom qab; ib ntsis hov ntev kuv thiaj li pom ib lub rooj loog qheb lug tos neeg tsis kaw li. Tsis tau pom dua ib zaug li. Mus txog hauv mas yim cuaj lub qhov rooj qheb lug, hluav taws cog nroo ntws qhov txhia chaw, tsis muaj tus sau ntawv tsis muaj tus nug yus npe li. Kuv ib ce xob tag, plaub hau tsa tag, tsis paub ua zaj tag li, tsuas hnov tswv kub nyhiab ntxiag, tsw nqaij txhiab nqaij ci, tsw cuag hlawv plaub dev plaub nees xwb. Kuv tsuas hnov suab qw suab quaj, suab ntsaj suab nthe nrov nqaj to tsis muaj lub li.

- Tov! Toc! Toc!
- Yog leej twg?
- Kuv yog Txiv Plig nyob lub zos Kwm Nyab!
- Yog Txiv Plig lov?

Lub qhov rooj qheb kiag thiab hu tias: Los hauv nov tau, kuv muv txog yog ib lub teb chaws Them Txim tos mus pem Ceeb tsheej. Muaj ib tug yawg loj loj hnav ib lub tsho dawb dawb ci ci cuag hli, tuaj ob sab tis tsaus tsaus dub dub cuag ntaub npuag dub, ib rab yuam sij loj loj dawb paug dai ntawm nws txoj siv. Nws tab tom sau ntawv; nws phau ntawv tseem loj tshaj Pob Zeb phau thiab. Nws yog tus Tuam Thawj Tshiab zov lub Rooj Loog lub teb chaws Them Txim ntawd. Nws thiaj tsa muag thiab nug kuv tias:
“Koj xav tau dab tsi? Tswv Ntuj leej tub txib, kuv xav nug seb nyob ntawm no puas muaj kuv cov neeg Ntseeg hauv lub zos Kwm Nyab tuaj nyob qhov nod ? Vim kuv yog tus Coj lawv.
-Aws ! Koj yog tus Txiv Plig Mab Tee puas yog?
-Yog los mas!

Muaj ib niag yawg yog niag yawg zov qhov rooj los tsis paub, txawm tuav ib rab niag hmuv peb ceg los taum taum kuv thiab hais rau kuv tias: “Koj yuav nkag los los tsis nkag naj! Yuav los ces los kiag lawm tod txhob sawv ntawm qhov rooj!” Kuv thiaj teb tias: “Kuv tsis nkag, kuv yog Tswv Ntuj tus tub txib.”
-Aw! Koj yog Tswv Ntuj tus tub txib lov?

Niag yawg ntawd luag luag rau kuv thiab hais tias: “Koj yog Tswv Ntuj tus tub txib no koj yuav tuaj qhov nov ua dab tsi?”
Kuv thiaj teb tias: Kuv lam tuaj nug seb nyob qhov chaw no puas muaj kuv cov neeg nyob lub zos Kwm Nyab tuaj nyob hauv no?”
Niag Dab thiaj teb tias: “Niag neeg ruam e! Koj tsis paub tias koj cov neeg lub zos Kwm Nyab ces tuaj rau qhov nov tas huv si lawm xwb los moj! Koj ntsia saib Yawg Hluav Ncuav nyob tod, Yawg Ob Sij nyob tid, Yawg Zam Paj nyob nrad”. Kuv ntsia pom Yawg Kiag Kauv ib sij poob rau hauv lub cub tawg ho rov tawm tau los, rov poob dua. Hos Yawg taum Pauv thiab Yawg Zej ob tug tab tom noj qe hlau. Kuv ntsia mas pom tas nrho tus hlob tus yau tus laus tus hluas uas tau tso peb tseg tas lawm nyob lus zos no hu si. Lawv nyob ib co tsis muaj chaw tso pa, quaj qw ntsoo qees xwb; twb tsis paub kuv li. Kuv mus pom li no tas kuv thiaj rov qab los rau ntiaj teb no ua kua muag poob tsis tseg.

Hnub no kuv thiaj hu nej tuaj, hais rau nej paub. Yog nej cov no ho tseem xav mus nrog lawv nyob thiab no tsis pom qab hais li cas. Hos yog nej ho xav yuav mus pem Tswv Ntuj lub Ceeb tsheej no mas txij taig kis mus xwb nej tuaj Daws Txhaum huv si thiab hloov lub siab lub ntsws, hloov kev coj. Nej tuaj kuv yuav ua lub Cim Daws Txhaum rau nej.
Hnub Ib Daws rau cov laus,Hnub Ob daws rau cov me nyuam yaus, Hnub Peb daws rau cov hluas, cov hluas ma ntshe yuav ntev zog; kuv mam ua lub siab ntev ntev mloog lawv. Hnub Plaub civ txiv tsev, yuav ua kom luv thiab sai sai. Hnub Tsib rau civ niam tsev, yuav kom lawv tseg lawv cov lus xaiv. Hnub Rau pub rau tus yawg luam txhuv thiab cov Tub Luam uas lawv tssi tuaj teev Ntuj Hnub Chiv. Peb ua tas ces Hnub Xya, peb sawv daws zoo siab tuaj ua lub Thaj Txiv Ntuj ua ke.

Cov me kwv tij, nej twb paub lawm hais tias: Thaum Nplej siav yuav tsum sau los rau hauv txhab, thaum cub tau cawv yuav coj los haus. Hais rau nej sawv daws ua ntsuas cia tej khaub ncaws dub qias neeg hwv, yuav tsum ntxiv ntxhua thiab ntxua kom huv rau mog. Tswv Ntuj qhev rooj lug tos nej, nej yuav mus nrog Tswv Ntuj nyob pem nws lub teb chaws Tshav Ntuj Nrig….

Tsis yog qhov yus tsis muab rau Tswv Ntuj es muaj txhaum
tab sis yog qhov uas yus tsis kam muab.

Nov yog ib zaj kwv huam xwb, tsis yog ib zaj tseeb.
Txhais ntawm Fab Kis zaj “ Les Lettre de mon moulin » los.
Tej qhov txhais tsis raws lus Fab Kis vim tsis phim ; muab txhais li Hmoob lub tswv yim me ntsis.

Phau Xov Xwm Ntseeg Ntuj Sib Fi Txuj Lub 5hlis 1989

Tus txhais

Lis Phiab Xeeb Xais

**Maiv Paj Lug** 25th July 2010, 11:30 am

Maiv Paj Lug

Maiv Paj Lug: Tswv Cuab Hmong Catholique; Messages : 1234
Date d'inscription : 2009-08-17

Post n°2

Re: Tus Txiv Plig nyob lub zos Kwm Nyab

Post Maiv Paj Lug 25th July 2010, 11:30 am

WOW......Leej Twg hais tias zaj no tsis muaj tseeb no Maiv Tooj? nws yog ib zaj kwv huam xwb tiag, tab sis teb chaws them txim thiab teb chaws hluav taws muaj tseeb tseeb nrog Huab Tais Ntuj lub ceeb tsheej tib si. Koj zaj kwv huam no mas txhais tau zoo kawg li, kuv nyeem ua rau kuv ntshai, ua rau kuv luag, ua rau kuv zoo siab thiab chim siab, vim muaj ntau yam yus paub tsis tas thiab muaj tseeb , yog tias yus tsis moog cov Txiv Plig Qhuab Qhia , lamw hnub kawg yuav tau zoo kiag li zaj kwv huam hais ntag.

Ua tsaug ntau nawb, yog ib zaj zoo heev, zoo tiag tiag li lau! Kuv yuav tau muab nyeem rau kuv niam mloog.

Tus Txiv Plig nyob lub zos Kwm Nyab Maypa110

Pab kuv rov los cuag koj Huab Tais Yesxus

**Maiv Tooj** 26th July 2010, 9:48 am

Maiv Tooj

Maiv Tooj: Tswv Cuab Hmong Catholique; Messages : 5544
Date d'inscription : 2009-08-18

Post n°3

Re: Tus Txiv Plig nyob lub zos Kwm Nyab

Post Maiv Tooj 26th July 2010, 9:48 am

Nyob zoo Maiv Paj Lug,

Yog mas, kuv pom tias hais tau zoo heev es txawm tias tsis yog ib zaj uas tau muaj tseeb los mus los tus sau yeej sau kom raws li qhov tseeb ntawm txoj kev Ntseeg tiag. Kuv thiaj coj tuaj tso rau hauv nov. Tus txhais, nws kuj txhais tau zoo heev thiab. Peb ua nws tsaug.