Home
Yog koj tso siab rau Yesxus lub siab ntshiab, nws yuav ua koj siab kaj lug 
NTIAJ TEB NEEG KEV LWJ SIAB.
Lub neej nyob ntiaj teb no, tsis hais ib tug txiv neej los poj niam. Tuaj ua lub neej rau saum lub sim ceeb no. Nyob tsis muaj pes tsawg niaj, ntev tsis muaj pes tsawg xyoo. Ua neej nyob 70- 80 xyoo li xwb los, twb yuav rov mus cuag poj cuag yawm, tseem ua lub neej nrog teeb meem thiab kev tu siab mus tas lub neej, ua neeg lwj siab ntsuav.Yuav tshuaj xyuas saib yog tim dab tsi tiag!
Tus txiv neej puas tau ua rau nws poj niam muaj kev tu siab lwj siab?
Poj niam ne! Puas tau ua tej yam uas txaus tu siab rau tus txiv neej?
Ntawm cov me nyuam ne! Neb ob tug niam txiv puas tau ua rau lawv tau tu siab?
Cia saib cov lus duab tu siab nram no tso, peb mam rov tham dua.
Xws li:
1-Muaj ib nkawm niam txiv. Tus txiv yog neeg nquag muaj zog, nws hais rau nws poj niam tias: “Koj niam, koj lub hnub nyug tsis nchav npaum kuv. Cia kuv ua hawj lwm los yug peb cov niam txiv tub, tso koj mus kawm ntawv ntxiv. Thaum kawm tas koj yuav tau hauj lwm zoo, peb lub neej yuav raws tau luag lawm ces peb tsis txom nyem dua luag tej. Peb thiaj pab tau tsoom kwv tij fab kawm txuj thiab kev noj nyob kom xws li tej Mab Sua. Kom peb lub cuab yim neeg xws teb chaws, tsis ntshaw luag noj luag haus.” Tus poj niam kuj zoo siab hlo mus kawm txuj, Hnub nws kawm tiav kws txuj, nws hias rau tus txiv tias: “Kuv tsis yuav koj lawm, nej nyob nej. Vim tias koj tsis yog peb txheej neeg kuv tau txuj siab lawm koj thiab kuv wb tsis sib phim , peb yog peb ib txheej neeg muaj txuj. Nej yog txheej neeg qis qis. Kuv lub hwj chim siab dua koj lub mus lawm ntau theem, Koj txhob tu siab.”
Ua rau tus txiv neej no tu siab nrho. Noj yus zog, haus yus roj yus ntshav loj tiav txuj muab yus laim pov tseg li no, tsis xav ua neej nyob ntxiv rau lub sim ceeb no li lawm.
2-Muaj ib tug ntxhais mus ua neej. Nws yuav tau nws tus txiv, Niam tais yawm txiv lawv yog neeg muaj, phij cuam tau 60 txhiab nyiaj coj los ua neej. Tus txiv nws ua hauj lwm nyob hauv ib lub koom haum muag toob xib. Muaj ib hnub tsis paub muaj dab tsi, lawv muab nws ncaws tawm hauj lwm lawm. Nws tsis qhia rau nws poj niam paub, nws niaj hnub ntim su mus xws li mus hauj lwm. Tiam sis yog nws mus rho nws poj niam cov nyiaj mus twv txiaj pem Tsev twv txiaj. Ua ua nyiaj poob tas. Nws poj niam mam paub nug tias. Koj muab nyiaj rho mus ua dab tsi tas lawm? Tus txiv teb tias: “Thov txim, koj zam rau kuv thiab,lawv twb muab kuv ncaws tawm hauj lwm tau ntau lub hlis lawm. Kuv rho mus twv txiaj saib puas tau nyiaj los pab peb nod. Koj ho zam txim thiab.” Ua rau poj niam tu siab, Ua cas tawm hauj lwm ho tsis hais qhia paub.
3-Muaj dua ib tug txiv neej nws yuav tau nws poj niam tseem hluas, nkawd muaj thawj tug me nyuam tub xwb nws hais tias, nws tus hlob nyob tim Los Tsuas teb txom txom nyem heev cia nws nqa kaum txhiab nyiaj mus pab lawv ua tsev rau lawv nyob ces nws mam rov los.
Nws mus tau ib lub hlis ces nws xa xov los tias: “Koj niam koj txhob xav li cas, kuv yuav tau poj niam lawm. Kuv yuav tsis tau los sai qhia koj paub li no!”
Ua rau poj niam tu siab.
4- Muaj ib tug txiv neej, nws ua hauj lwm hmo ntuj. Muaj ib hnub nws mus ua hauj lwm. Nws tau ntog tus tswv saib hauj lwm coj nws mus rau tus Kws Tshuaj saib puas raug sab li cas. Saib tas kuj tsis muaj dab tsi txawv. Tab sis tus Thawj hais tias cia xa nws los mus so ib hnub tso. Lawv xa nws los txog thaum ob teev sawv ntxov. Nws poj niam coj ib tug hluas nraug tuaj nrog nws pw saum txaj. Ua rau txiv neej no tu siab.
5-Muaj ib tug txiv neej, nws yog tus tswv tsim tsheb, nws ua ib lub Tuam Txhab loj. Muaj ib hnub nws ua ib rooj mov loj los noj. Nws caw ntau lub Tuam Txhab tuaj noj mov ua ke qhuas txog cov tsheb nws tau tsim muaj ntawd. Nws hais rau nws poj niam tias: “Hmo no wb yuav noj hmo ua ke nyob tom peb lub chaw tsim tsheb muaj phooj ywg coob leej tuaj noj mov ua ke tod.”
Poj niam teb rau nws tias: “Koj mus koj, kuv cav tsis paub koj cov phooj ywg tsam kuv laj laj nyob txog lub caij tas, koj txhob tos kuv li od.”
Ua rau tus txiv tu siab lawm.
Tas nrho cov neeg muaj cuab tsa yim peb sawv daws muaj tej teeb meem zoo lo hais saum no los lawd.
Zaum no yog leej twg thiaj yog tus yuav pab tau peb daws tej kev muaj teeb meem tu siab lwj siab no?
Peb yuav mus saib thiab kawm His Xas Lais liv Xwm. Txij li -586 los mus txog -94 xyoo ua ntej Yes Xus uas cov His Xas Lais mus nyob txim nyob Npas Npis Los teb, Lub caij Tswv Ntuj tus tub txib Nes Hes Mis rov los txhim lub tsheej Yes Lus Xas Les.
Nes Hes Mis quaj rau tsoom His Xas Lais kev txom nyem tu sia luj siab.
Kev los kua muag muaj ob peb yam los kua muag:
a- Los kua muag zoo siab, yus sib twv yeej, los yus ua tau zoo txaus luag qhuas, los kua muag.
b-Los kua muag vim muaj tej yam txhawb ua rau qhov muag iab. Pa taws txhawb, kua txob qij dos txhawb, ntsim los mua muag.
c- Los kua muag muaj kev txom nyem, kev lwj siab tu siab.
d- Los kua muag thaum tau kev tws, yus swb luag tsis muaj kev mus lawd.
Thaum koj quaj, txog kev tu siab, lwj siab, swb luag, kev tws.
Cov kua muag no ntxuav kev txhaum, kev ruam kev tsis paub tab tsis paub cai, tej yam tsis huv hauv koj nruab siab nruab cev tawm mus kom dawb huv. Nws coj txuj ci, kev muaj tswv yim ua neeg thoob tsib to nrog tuaj cog rau koj kom muaj zog pom txoj hauv kev ua koj lub neej txuas mus ntxiv.
Zaj lus no Muaj ntau tus kws txuj yog neeg thoob tsib nyob Mis Kuj, Fuaj Kuj, Tsoob Kuj teb lawv twb hais los ntau ntau xyoo ua ntej lawm
Lawv cov lus no yeej raug raws li Tswv Ntuj cov lus nyob hauv cov ntawv ntshiab cog lus qub uas Ntuj hais thiab coj Haiv neeg His Xas Lais 2000 xyoo ua ntej Yes Xus yug los. Cov Yaj Saub coj Haiv neeg His Xas Lais ntawd.
Thaum koj quaj rau koj tsev neeg los quaj rau Ntuj, koj xav thov Ntuj daws koj tej teeb meem kev txom nyem, lwj siab, tu siab no. nrog kev yoo mov ua kev them txim txhaum. Kom koj muaj ib co txiaj ntsim tshiab tuaj hloov tej qub tswv yim tsis zoo kom koj rov muaj zog tuaj.
Yog peb cov txij nkawm muaj lub cuab lub yig no mus tsis zoo, peb yuav muab tham qhia rau Tswv Ntuj tias muaj teeb meem lawm Ntuj Koj pab daws pab kho peb lub cuab lub yim no. Koj yog tus nrog peb tsa peb lub cuab lub yim thiab koj tau foom hmoov zoo rau peb ua neej kom sib caum sib raws.
Thaum Tswv Ntuj tsim neeg. Nws tsim tau As Das Ntuj xub hais txog kev ua phooj ywg rau As Das.
Tswv Ntuj hais tias: “Tsis zoo rau Txiv neej nws nyob nws ib leeg li ntawd. Kuv yuav tsim ib tug kom phim nws.”
Muaj xya yam uas Tswv Ntuj tsim los nyob hauv ib yim neeg muaj lub cuab lub yig:
1-Muaj kev ua phooj ywg kom txhob nyob ua neeg twm zeej. Muaj tus hlub koj, nrog koj hais lus, tau pab koj, kom koj zoo siab, nws nplij koj lub caij koj nkees txhawb koj lub zog...
2-Muaj kev sib hlub txaus siab los nyob ua ke ua koj luag kom hnub hmo txhob ntev.
3-Txiv neej poj niam koom cev koom siab sib nyiam, cev yog ib lub, siab yog ib nploog. Koj tsis yuav kuv ces luag yuav. Kuv tsis yuav koj los luag yuav mus ua luag nplooj siab.
4- Lub hwj chim ua txij nkawm. Koj tsis muaj txig muaj nkawm koj hlob tsis tiav niam tiav txiv. Koj tsis yog txiv tsev los niam tsev. Koj txawm laus lawm los luag tsuas hu ua tub thiab ntxhais xwb. Vim koj tsis tau kav dua neeg los mus lawm ib zaug li.
5-Kom muaj kev sib pab. Ob leej tau sib pab ib sab yog txiv lwm sab yog niam neb nyob ruaj nyob khov tau kev sib ua luag, sib nres koj tuav nws lub hwj chim nws nres koj lub tswv yim. Pub rau luag zeej tsoom tau lub caw vam khom.
6-Muaj tub ki yog Tswv Ntuj foom hmoov zoo rau As Das Thiab EsVas tias, neb yuav huam vam mus kom puv lub ntiaj teb no. Ob leeg tau nrog Tswv Ntuj tsim neeg los nyob rau ntiaj teb no. kom tau nthuav txuj nthuav ci cob qhia kev sib haum xeeb.
7- Muaj kev sib pab. Ib leeg tsis xav khwv kev noj kev haus muaj ob leeg tsis nco nkees ib tug ua ib tug qhuas ob leeg ua noj tsis tas.
Muab xya yam no coj los xav dhos kiag li ntawv ntshiab cog lus qub hais uas Tswv Ntuj tau tsim neeg los rau ntiaj teb no, cov lus Ntuj tau foom los rau ob tug niam txiv hauv paus chiv keeb ntawm As Das thiab Es Vas nkawd
Yog lub cuab yim muaj teeb meem yuav muab tham qhia Ntuj tias kuv muaj teeb meem lawm koj pab daws.
Tsis yog tias thov Ntuj daws luag li kev teeb meem xwb. Koj yuav thov kom Ntuj pab koj daws koj li teeb meem ua ntej tso. Vim koj yog tus tsim kev mob siab rau koj tus poj niam los koj tus txiv thiab koj cov me nyuam lawm.
Koj yuav hais tias:
Kuv tau ua li no thiab li no rau kuv tus poj niam, los kuv tus txiv lawm. Thiab kuv cov me nyuam.
Koj daws koj li tas ces koj cog lus rau koj tus poj niam los koj tus txiv thiab cov me nyuam tias:
Kuv cog lus kuv yuav ua li no. rau nej. Txhob kom lawv cog lus li. Yog koj kom lawv cog lus mas tsis muaj chaw mus. Vim koj tos kom kuv hloov ua ntej. Lawv kuj tos kom koj hloov ua ntej. Tsis muaj leej twg xub hloov ua ntej li ces mus tsis taus. Luag yuav hloov tsis hloov los tsis tos li koj hloov, koj kho koj li xwb.
Cov niam txiv tau muaj teeb meem lawm nyias kho nyias. Nyias xyuas nyias cov. Kuv ua li no tsis yog lawm thiab li no mas tub qaug rau koj lawm. Kuv txiav txim siab kuv yuav hloov ua li no.
Tus tsis txhaum yuav zam txim rau vim nws twb hloov lawm. Txuas mus txhob hais qub lus ntxiv:
Thaum yus thov kom ua ib yam los hais ib cov lus nws tsis hais cia lwm zaus tso.
Txhob hais tias, Kuv kom koj ua los hais koj ho tsis ua tsis hais, ua cas Thaud koj ho hais rau niag pog ntawd. Ua li no nws rov muaj kev tu siab dua tuaj.
Koj yuav tshawb koj saib tshuav qhov twg tsis zoo ces kho qhov ntawd kom zoo xwb.
Kev lwj siab mob siab, tu siab. qee tus neeg tsis hais txiv neej los poj niam kuj lam coj li no thiab:
Lwm tus neeg cem yus, yus teb tsis taus, yus los tsev lam chim rau nws tus txiv los tus poj niam kuj muaj.
Tej tus mus tham pem hnov luag tham txog kev ua hluas. Tham hluas nkauj los tham hlua nraug cia li lam khib los txog tsev hais lus phem liam poj niam tham hluas nraug, los txiv tham hluas nkauj niaj hnub rhaub qub zaub noj thiaj mob plab, ua nrau kev tsis sib to taub muaj kev tu siab los muaj thiab.
Txiv neej poj niam luag yeej hais tias, ib tsu muaj peb lub ntxhib. Ib cog txhuv muaj peb lub quav tsuag. Ib txiv neej los ib tug poj niam yeej muaj peb tug hluas. Cov zoo nkauj los zoo nraug tseem muaj txog pua tus. Los luag twb tsis yuav, los yuav koj tib tug xwb nws twb xaiv koj lawm koj kuj tib yam li nws thiab. Yuav sib zam txim thiaj yog kev ncaj ncees.
Txiv neej muaj xya yam uas nws nyiam los nws tshaw:
1-Nws nyiam thiab ntshaw kom luag hwm nws...
2-Ntshaw kom saib thiab mloog nws ua tus thawj...
3-Nws nyiam, ntshaw kom poj niam tuav kev zoo
Nkauj rau nws....
4-Nws nyiam kom hais lus nrog kev hlub kom tsim
Nyog rau nws....
5-Nws nyiam kom poj niam txaus siab rau nws tus
Yam ntxwv, los nws tej hauj lwm....
6-Nws nyiam thiab ntshaw kom qhuas txog nws tus
Yam ntxwv nrog nws lub meej mom....
7-Nws xav kom poj niam paub tias nws muaj nqes
Dua poj niam....
Xya yam uas poj niam nyiam thiab ntshaw.
1-Poj niam nyiam thiab ntshaw, kom tus txiv muaj ib
Txoj kev ntseeg ruaj nyob hauv kev tab lub cuab
Lub yig khov hauv nws tus kheej....
2-Poj niam xav paub tias nws puas ua tau li tus txiv
Lub siab nyiam thiab nws ntshaw....
3-Poj niam nyiam qhov tias, tus txiv puas saib tias
poj niam nyob ntawd puas muaj nqes rau nws
thiab....
4-Poj niam xav kom tus txiv paub tias poj niam no
Lub zog tab dua tus txiv neej.....
5-Tus txiv neej puas txaus siab qee tej lub caij nrog
Poj niam tham daws teeb meem....
6-Tus txiv neej puas saib thiab nco tias poj niam
Nyob ze tus txiv txhua lub caij....
7-Poj niam nyiam thiab ntshaw kom tus txiv muab
Nws lub siab cog rau poj niam tib leeg xwb....
Nyob hauv xya yam txiv neej los poj niam nyiam no mas yeej mus raws nkaus li Tswv Ntuj 10 lo lus qhia lawm. Hauv Hmoob txuj ci, muaj hais tias:
“Tus txiv yog tus chiv, hos tus nyab yog tus pab.”
Ob tug niam txiv nyob ua txij nkawm. Tus txiv neej yuav hwm tej yam poj niam nyiam thiab ntshaw nyob hauv nws nruab siab.
Tus poj niam los kuj yuav tau hwm tej yam uas tus txiv neej ntshaw thiab nyiam.
Yuav saib tias txiv neej yog lub ntuj, hos poj niam yog lub teb. Ib lub zeb muaj ob txhib ua ke.
Txoj kev tsa cuab tsa yim Tswv Ntuj xub tim kom muaj tuaj ua ntej tshaj txhua yam.
Txiv neej yuav hwm poj niam me nyuam lub hwj chim muaj nuj nqes loj.
Tus poj niam kuj yuav hwm tus txiv thiab tej me nyua lub hwj chim ua qhov tseem ceeb.
Muaj tej zaum kev ua txhaum los ntawm tej yam me me los ces nce mus ua tej yam loj kom muaj kev tu siab lwj siab:
Ib tug poj niam deev hluas vim nws tus txiv tsis tham lus. Nyob tsheej hnub tsis tham ib lo lus li los muaj.
Ib tug txiv neej nws tham hluas nkauj vim nws poj niam tsis qhuas txog nws tus txiv lub meej mom thiab tsis hwm nws ua tus thawj. Tsis tsab zoo pub rau tus txiv neej.
Tej me nyuam mus ua Laib vim niam txiv tsis hwm me nyuam tej kev tso siab rau niam txiv, Niam txiv siv nyiaj muas ntau yam los mus ua si tsis saib me nyuam tej kev ntshaw ub ntshaw no, lawv tsis muaj kev xaiv. Yam lawv ntshaw yog nyiaj txiag....
Tas sawv daws koj tsis hwm yam lawv nyiam los luag ntshaw, thiaj tsis sib mloog nyias mus ua yam nyias ntshaw, thaum dhau txoj kab liab lawm sawv daws muaj kev tu siab lwj siab. tsis xav nyob ua ke.
Yog muaj teeb meem lawm yuav muab cev rau Ntuj quaj thov kom Ntuj pab daws rau koj, ua kev them txim yoo tej yam kom koj ua tau zoo dua tuaj
Koj cia li xav tias phem dhau lawm ces sib nrauj xwb.
Kev sib nrauj tsis yog qhov zoo.
Saib raws li cov teb chaws vam meej:
Mis kuj, Fuaj kuj teb chaws muaj xws li, cov txij nkawm hluas sib nrauj muaj 41%, cov sib yuav zaum ob lawv muaj kev sib nrauj 62 %. Cov rov sib yuav zaum peb muaj kev sib nrauj 73 %.
Tshuav pes tsawg leej neeg yog neeg zoo?
Koj muab nrauj mus yuav lwm tus los tsis zoo. Kav tsis ntev. Ua teeb meem rau tej me nyuam tub ki tsis muaj caj ces keeb kwm zoo. Ua rau tej muam phauj dab laug niam tais yawm txiv, poj yawm muaj kev sib tu siab. Nyias xav pab nyias tus. Sawv daws tsis pom ib yam, nias kws nyias tus txoj cai. Yog ib yam tsis zoo li. Muaj npaum li no ua cas thiaj yuav tsis muaj kev tu siab lwj siab no yom.
Kev kho: Nyias tshawb nyias tus kheej. Yam twg koj tau ua tsis zoo rau poj niam me nyuam, los ua rau tus txiv thiab cov me nyuam lawd. Koj daws koj li , lawv daws lawv li, koj rov cog lus rau koj tias koj yuav hloov qhov no thiab qhov no ua kom zoo rau poj niam me nyuam. Poj niam kuj tib yam.
Txob sib cog lus tias koj puas hloov, nws puas hloov. Cog lus rau luag mas koj tos kom nws hloov koj mam hloov tsis muaj leej twg xub hloov mas mus tsis taus li.
Peb rov mus saib ib daim duab zoo li no:
Muaj ib hnub ib tug poj niam hmoob yuav tau ib lub tsheb TOYOTA. Nws caij mus saib neej tsa rau ib lub zos deb li 2 teev kev. Nws mus txog nrab ke nws lub tsheb tuag mus tsis tau ntxiv lawm. Nws tawm los nres ntawm ntug kev tos. Ib pliag kuj muaj ib tug txiv neej tuaj txog nws kuj caij ib lub tsheb TOYOTA thiab.Tus poj niam co tes rau tias thov koj pab kuv thawb kuv lub tsheb rau tim ntug kev, kuv mam hu cov neeg paub kho tsheb tuaj cab mus kho. Tus txiv neej pab thawb rau tim ntug kev tas. Nws hais rau tus poj niam Hmoob ntawd tias, qhib koj lub tsheb taub hau saib. Tus poj Hmoob qhib tau, nws xauj ib pliag nws xuas tes ntswj ib qho tas, nws hais tias tsav koj lub tsheb mus tau lawm. Tus poj Hmoob sim na has ciaj lawm tiag. Tus poj niam Hmoob hais rau tus yawg ntawd tias: “ kuv tsis paub koj, koj nyob qhov twg tuaj kuv tsis paub ua koj tsaug li.” Tus txiv neej no teb tias: “ kuv yog tus tswv ua cov tsheb Toyota no.”
Ua li mas puas muaj ib yam ua tsis muaj neeg kho thiab daws tau.
Tswv Ntuj yog tus tsim peb sawv daws yog peb muaj teeb meem mas tshuav Ntuj tseem yog tus yuav daws tau. Peb yuav muaj kev tso siab kev vam thov kom Ntuj pab peb kho.
Lub neej peb ua no twb yog Ntuj muab pub dawb rau peb, thaum tsis zoo qhov twg coj mus rau Ntuj qhia rau peb, ces peb yuav pom kev thiab paub ua txuas ntxiv kom kawg.
Yaj Xib Hwb Zoov Ntxheb.
Leej tib neeg li kev tsa cuab tsa yim. Nws yog thawj lub hwj chim loj dua cov. Tas huv si nyob hauv txhua yam kab xwm ib ncig ntawm ib tug neeg.
Kuv twb sau zaj puav sib xws li no ua ntej lawm thiab.
Txoj kev ua txij nkawm, txiv neej rov yuav txiv neej. Poj niam rov yuav poj niam.
Hnub no kuv sau ib zaj hais txog Leej tib neeg tej kev mob nkeeg. Kuv tsis paub lwm haiv neeg lawv xav li cas! Hos peb haiv Hmoob feem coob lawv xav li no:
Muaj ob yam xav txog thiab tsim nyog qhuas:
Kawm txuj ci rau nruab cev, tsis zoo li kawm txuj ci nrog ntaub ntawv. Muaj qib muaj quas, kawm ua Dov Tawj, ua Ees ze Nyawj.
Kawm txuj ci rau nruab cev, tsis zoo li kawm txuj ci nrog ntaub ntawv. Muaj qib muaj quas, kawm ua Dov Tawj, ua Ees ze Nyawj.
Txoj cai tswj kav Haiv Hmoob los tau ntau tiam, yog plaub txoj cai no:
Kev tsim tsov rog rau neeg lub cev, thiab tus ntsuj plig. Nws tsis yog ib yam uas yuav zoo zoo ua!
-Muaj ib hnub poj niam wb tuaj dab ros. Wb nyob hauv tsev zov cov me nyuam xeeb ntxwv.
Hnub no tim 09/04/13. Kuv yuav sau tub ntsuag ib zaj kev txom nyem. Raws li nws tau piav rau kuv mloog. Coj los rau peb S.D. nyeem kom peb nco thiab hwm cov tub ntsoj ntxhais ntsuag. Txoj kev ua ntsoj ntsuag yeej tsis muaj leej twg xav tau.
Nyob hauv Haiv Hmoob, muaj ib co kws txuj muaj nuj nqis heev.Tau ntau pua xyoo los lawm,yog Hmoob pab kws txuj no, tuav Hmoob caj ces lub xeem kom sawv daws,sib koom ua Haiv neeg Hmoob nyob ruaj nreb. Raws li txoj kab lis kev cai Ntuj xeeb muaj hmoob los nyob ntiaj teb no.
Ib tug neeg ntseeg yuav muaj peb yam zoo nyob hauv nruab siab li no:
Tus neeg uas muaj lub neej nplua nuj tseeb nyob rau saum lub sim ceeb no. Mas nws yuav muaj peb yam no:
Vim li cas peb cov Kas Tos Liv ntseeg tias NIAM MAB LIAB yog TSWV NTUJ Niam? caws nej mus nias nyeem tau hauv no.
Leej Tshiab Mis Kas Ees thov koj pab tuav thiab saib xyuas peb lub Vas Sab Hmong Catholique ntawm no kom ruaj nrees.
