KAB KE THOV NTUJ LWM NYAB TSHIAB LOS TXOG NTAWM QHOV ROOJ.

KEV THOV NTUJ THAUM COJ NYAB LOS TXOG NTAWM QHOV ROOJ.

LUS PIAV: Rawv li peb Hmoob ib txwm coj uas Poj ua tseg Yawm ua cia mas thaum ib tug tub coj nyab tshiab los txog ntawm qhov rooj mas lawv yuav tsis pub tus Nyab cia li los hauv tsev, lawv yuav tau ua ib qho kab ke Lwm nyab ua ntej tas tso mas tus Nyab thiaj li nrog tus tub los tau hauv niam thiab txiv tsev. Peb Hmoob ib txwm ua mas lawv siv ib tug qaib los yog tsis muaj qaib mas lawv kuj siv ib tug tw taws los ua. Raw li hmoob kev cai mas thaum tus Tub yuav mus coj Nyab mas nws yuav xub hais qhia rau nws niam thiab txiv paub ua ntej. Niam thiab txiv thiaj li npaj nyob hauv tsev tos thiab npaj tej yam yuav siv rau lub caij tus tub coj nyab los txog.

Ua li peb cov coj kev cai ntseeg Yes Xus lawm peb ho yuav ua li cas thaum peb muaj tub coj Nyab tshiab los txog ntawm qhov rooj?
Peb kuj yuav ua me ntsis kab ke thov ntuj rau tus Tub thiab tus Nyab ua ntej nkawd yuav nkag los hauv niam thiab txiv tsev raws li yuav piav hauv qab no:

YUAV NPAJ KOM MUAJ 2 TUG TSWM CIAB THIAB IB HWJ DEJ NTSHIAB THIAB YUAV TAU NUG NKAWD 2-3 NQE LUS:

Nug: TUB thiab NYAB, hnub no (hmo no) neb tau sib coj sib raws los no, puas yog neb yuav sib yuav ua txij ua nkawm tiag los yog neb lam sib raws ua si xwb?

Teb: Wb yeej sib coj sib raws los ua txij nkawm tiag.

Nug: TUB thiab NYAB, ua li neb puas tau txiav siab meej tiag tias neb yuav sib sau los ua txij nkawm, sib nyiam sib hlub ua ib yim neej mus kom txog hnub kawg ?

Teb: Wb yeej txiav siab tias wb yuav sib nyiam sib hlub nyob ua ke mus kom txog hnub kawg.

TUS TOS TUB TOS NYAB ZES OB TUG TSWM CIAB THIAB UA NTOO CUAM LUB CIM:

"Hu txog Leej Txiv, Leej Tub, thiab Leej Ntuj Plig lub Npe, Ua li".

MUAB 2 TUG TSWM CIAB LWM SAUM TUS TUB THIAB NYAB NKAWD TAUB HAU 3 LWM THIAB HAIS COV LUS LI NO:

" Au..! Hnub no yog hnub dawb, hmo no yog hmo huv, kuv tau tub tau nyab los txog vaj txog tsev. Kuv hu txog Huab Tais Leej txiv, Huab Tais Leej Tub thiab Huab Tais Leej Ntuj Plig tuaj nrog kuv hlawv mob hlawv tsaj, hlawv vij sub vij sw,hlawv sub tawg sub ntsa,hlawv kev quaj kev nyiav, kua muag iab kua muag daw, hlawv hmab dawm tes hlua dawm taw, hlawv kev phem kev qias, kev sib cav sib ceg, sib ntaus sib tua, hlawv plaub hlawv ntug, hlawv xaiv hlawv lus, 120 tsav kev phem kev tsis zoo kom kub kom yaj ntshis ploj mus kom TUB thiab NYAB nkawd ntsej tsis hnov muag tsis pom no lau..".

MUAB 2 TUG TSWM CIAB RAU NKAWD THIAB KOM NKAWD LOS HAUV TSEV, CES HAIS COV LUS NTXIV LI NO:

" Au....! Txij hnub no lawm tod mas tseev kom TUB thiab NYAB nkawd ua neej mas tsuas muaj huam txhaij tsav vam, txheeb nyeej los pem pov, txheeb pov los vam sawm, nyob yaj los kib txoob, ua neej nyob muaj koob nto npe, sib nyiam sib hlub kom huam vam xws xub ntab nroo ntws xws xub muv. Khwv nyiaj los kom puv nas, khwv tsoos los kom puv phav. Noj tsis tshaij haus tsis nqhis. nyob ntshiab li dej huv li txhuv, txhiab tsis muaj mob pua tsis muaj nkeeg no nta lau...".

POV DEJ NTSHIAB RAU SAUM NKAWD, THIAB HAIS LI NO:

" Thov kom Huab Tais Leej Txiv, Huab Tais Leej Tub thiab Huab Tais Leej Ntuj Plig tso ib lo lus foom hmoov zoo los rau saum neb, Ua li ".

Wow......zoo heev li kav tsij tuaj sau ntxiv