THAM KWV HUAM TXOG THOV NTUJ

Nyob zoo phooj ywg,


Kuv yuav piav qhia rau nej tias thaum yus muaj kev nyuaj siab lawm, yuav tau tso siab rau ntuj thiab thov nws.


Xyoo 1998 yog lub caij ntuj so, lub 7-8 hlis ntawd.
Xyoo ntawd kuv niam tau mob yeev, tau mus phais caj dab. Lub sij hawm ntawd kuv tus nus ntxawg thiab tus niam hluas tsis khoom, nyias muaj nyias hauj lwm, nruab hnoob nkawv pheej ua kam lawm, yav tsaus ntuj mam los xwb ; tshuav kuv niam ib leeg nyob hauv tsev tsis muaj leej twg zov li. Ua ntej ob tug yuav mus, ob tug cia kaw qhov rooj tseg tsis xauv kom kuv tus niam laus hlob thiaj tau kev tuaj xyuas niam, yog nws khoom ; thiab cov kwv tij neej tsa thiaj tau kev tuaj xyuas.
SD. pheej mus xyuas kuv niam li ntawd, ces nws txawm thov kom SD tuaj teev ntuj rau nws. Muaj Ob niam txiv, yog cov neej tsa AsCas (protestant), niam kuj kom nkawv tuaj thiab. Txog hnub tuaj thov ntuj, cov KavTosLiv tuaj teev ntuj, ob tug ntawd tsis tuaj. Hnub tom qab nkawv mam tuaj teev ntuj rau niam.
Niam mas yeej nkees nkees tsis xav rua qhov muag li, yog muaj neeg tuaj saib nws, nws tsua rua kiag qhov muag ntsia ib plia, hu ib suab tias: tuaj los! Dua li, tab txawm neeg nyob zom zaws ntawd, tham zom zaws los, nws tsis tsaug zog, tab sis yeej tsis rua qhov muag saib leej twg li.
Thaum cov hmoob tuaj teev ntuj tas tau ob hnub, kuv ob tug kwv mus hauj lwm lawm, cia qhov rooj kaw li qub tsis xauv. Niam txawm hnov li muaj neeg tuaj, txawm los kiag rau ntawm nws lub rooj paim, nws thiaj tsa qhov muag ntsia, ua cas muaj ob tug txiv neej, zoo nkaus lis fabkis, hnav cev khaub ncaws tsho txuas tiab zoo li txiv plig cev, tus los zaum kiag ntawm npoo txaj hnav dub, hais tias tus ntawd yog KavTosLis tus, hos tus hnav dawb sawv ntawm rooj paim yog AsCas tus. Tus txiv neej hnav dub txawm hais lus hmoob rau niam tias: Koj kom wb tuaj xyuas koj es koj xav tau dab tsi?
Niam teb tias: yog kuv mob mob es xav kom nej thov ntuj rau kuv xwb.
Tus txiv neej teb tias: koj tsis txhob txhawj, wb mam thov ntuj rau koj.
Niam tias: ua li, ua tsaug.
Hos tus hnav dawb mas tsis hais ib lo lus li.
Niam nrog tus yawg ntawd tham ob peb los li no tas, nws txawm qe muag lawm. Nws xav tau tias ntshe yog nws mob mob es ob tug me nyuam mus thov kom txivplig tuaj xyuas nws. Ces hos xav tau tias, ua cas ob tug txiv plig FabKis ntawd ho txawj lus hmoob, twb tsis yog txiv plig NeejVaj. Thiab txiv plig NeejVaj tsis hnav li ntawd. Niam xav tau li, vim lub sij hawm ntawd Txiv plig NeejVaj nrog lawv nyob Bourges.
Thaum nws xav kiag tau li, nws mam xav tias yuav nug seb nkawv yog leej twg? Thiaj tsa kiag qhov muag rov mus ntsia ua cas tsis muaj neeg qhov twg? Kuj tsis hnov neeg mus kev, tawm hauv tsev mus rau nraum zoov, es yuav kaw qhov rooj. Qhov rooj kuj kaw nti, tsis muaj dab tsi.
Ib tsam yav hnub qaij, kuv tus niam hluas ua hauj lwm los, tus niam laus kuj tuaj, nws mam nug tias: nkawv puas tau mus thov kom txiv plig tuaj xyuas niam.
Ob tug teb tias tsi tau ; niam mam tham tej yam tshwm sim tuaj ntawd rau nkawv. Ces twb tau ib lispiam lawm kuv mus txog, niam kuj qhia kuv tib yam.