KEV THOOB TSIB & ZAJ NKAUJ SEEV

TP.Emilien Tardif hais tias thaum yus thov Ntuj rau ib tug neeg mob mas yus tsis txhob ntuas ntev ntev li ntuas dab thiab tsis txhob hais nuj neb tias: "Tswv Ntuj nyob ntawm koj pom zoo...seb koj puas pab..." Txhob hais li nov mas Tswv Ntuj yuav tsis kho tus mob rau yus. Yuav tsum hais khov khov thiab meej kiag tias: " Huab Tais Yes Xus koj pab kho tus mob nov kom zoo hlo". Hais li no xwb mas thiaj li khev.

11 Tab sis Leej Pleev tuaj lawm, nws yog tus Tuam Leej Choj kav lub cuab tam tom ntej.  
Nws tau hla ib lub tsev tsam phooj loj dua thiab zoo dua,
uas tsis yog neeg txhais tes ua, tsis yog lub sim ceeb no tug,  
12 nws tau chaws mus hauv thaj chaw Ntshiab ib zaug xwb thiab tau ua kom txhua
yam tiav log, nws tsis muab ntshav tshis los ntshav heev nyuj,
tiam sis nws hliv kiag nws roj ntsha los txhiv tau peb dim plaws tas mus li lawm.
13 Yog tias ntshav tshis thiab ntshav heev nyuj, los tshauv maum nyuj uas luag
muab tsuag rau saum cov neeg tsis huv, ua tau kom lawv ntshiab tuaj,
vim kho tau kom  lawv lub cev nqaij rov huv tuaj tiag,
14 mas Leej Pleev uas nws muaj leej Tswv Yim nyob mus li cob kom nws muab
nws tus kheej ua ib co txim dawb huv txi rau Tswv Ntuj, mas nws cov ntshav
haj yam ua tau kom peb lub siab huv tuaj thiab dim ntawm peb cov hauj lwm
pub kev tuag, kom peb los teev hawm tus Tswv Ntuj muaj txoj sia.
15 Yog vim li ntawd mas Leej Pleev thiaj yog peb tus sawv cev rov cog dua lus tshiab,
kom xwv vim twb muaj kev tuag them cov txhaum ua thaum lub caij cog qub lus lawm,
mas kom cov neeg uas Ntuj hu tau mus txais lub cuab tam nyob mus li raws li kev cog lus.

Padré Pio hais tias:
THAUM YUS THOV NTUJ RAU IB YAM DAB TSI MAS HAIS KIAG LUB NTSIAB XWB.
Xws li yog ib tug neeg muaj mob los tsuas hais tias:"Huab Tais KOJ kho tus neeg N... qhov mob kom zoo." Tsuas hais li no xwb txhob piav ntau ntau thiab txhob hais tias: "Txawm zoo me ntsis xwb los kuv zoo siab." Tswv Ntuj lub hwj huam loj tas nrho, yog yus ntshai tsam NWS tsis pub rau yus, yus hais me me ces Tswv Ntuj tsuas ua li yus hais xwb; vim yus tso siab tsis tag rau Tswv Ntuj.

Tswv Ntuj yog tus pom deb, nws pom yav dhau los, niaj hnub thiab tom ntej.
Nws twb yeej hais tias kom neeg sib hlub.
NWS twb paub tias Kev Hlub muaj zog tshaj puas tsav yam.
Kev Hlub txhawb yus ua tau tag puas tsav yam.
Kev Hlub yog lub pov haum zoo tshaj.
Kev Hlub yog lub zog loj tshaj.

Yog muaj kev hlub yus muaj siab khwv
Yus muaj siab khwv ces tau noj
Yus muaj noj ces vam meej
Yus vam meej ces muaj kev thaj yeeb
Yus muaj kev thaj yeeb ces tsis muaj mob
Yus tsis muaj mob ces noj qab nyob zoo
Yus noj qab nyob zoo ces kaj siab
Yus muaj kev kaj siab ces muaj kev sib hlub.

Neeg ntseeg = Ntseeg txog Tus Cawm = Ntseeg txog Yes Xus sawv rov los = Ciaj sia nyob hauv Yes Xus = (chrétien = christ =  croire en Jésus réssucité = vie en Jésus ).
. Ua neeg ntseeg, peb yuav coj lub neej kom txawv cov tsis tau paub Yes Xus, peb yuav muaj tus yam ntxwv kom lawv pom Tswv Ntuj txoj kev HLUB nyob hauv peb.
. Peb yuav rau siab teev Ntuj kom tsis txhob raug ntxias li thaum Yes Xus yuav raug ntes NWS ua.
. Peb yuav qheb peb lub siab rau Tswv Ntuj txoj kev HLUB ntws lug nplua mias.
.Txhob ua ib cov neeg ntseeg ntawm ncauj, lub siab xu das.
.Yog peb tsis teev Ntuj, peb tsis qheb peb lub siab rau txoj kev HLUB, Tswv Ntuj yuav tsis los nyob hauv peb, vim tsis muaj chaw rau NWS. Tswv Ntuj nyiam nyob hauv tus neeg pluag thiaj muaj chaw rau NWS, tus neeg nplua nuj muaj toob xib ntau tsis seem chaw rau Tswv Ntuj.
. Kev ncaim deb ntawm Tswv Ntuj yog kev txom nyem, kev sib tawg.

Txoj kev ntseeg Tswv Ntuj, ntseeg Yes Xus yog ib txoj kev dawb huv, kev tau zoo, kev thaj yeeb nyab xeeb. Tsis muaj txhaum, tsis muaj yuam kev, tsis muaj ntshai, tsis muaj yuav niaj hnub muab yus cuab tam los txi, los koob thiaj li yuav zoo. Tswv Ntuj txoj kev yog ib txoj kev HLUB, KEV NYIAM, KEV KHUV LEEJ. koj khwv tau li cas los yog khwv los rau koj siv, koj yuav xwb. Qhov Tswv Ntuj kom koj ua tsuas yog:

" - koj yuav xyaum ua ib tug neeg txawj hlub luag tej uas muaj kev txom nyem tsis hais siab ntsws los toob xib, tsis yog hlub luag ces koj yuav lauj koj teeg koj tug mus pub rau luag (yog koj ho pub tau los kuj zoo, koj pub tsis tau los koj khuv leej luag, tsis txhob thuam luag thaum luag txom nyem).
- Koj yuav ua tus neeg ncaj ncees, tsis tsa hwj chim muab hlob, khav theeb.
- Koj NTSEEG TSWV NTUJ COV LUS QHIA, UA RAWS LI TSWV NTUJ HAIS. UA NEEJ NYOB HAUV TXOJ KEV NYIAM KEV HLUB KEV NCAJ NCEES. TSIS MUS TEEV LWM HOM DAB TEEV LWM TXOJ KEV NTSEEG. KOJ YUAV TEEV HUAB TAIS NTUJ IB LEEG XWB.

Li nov xwb ces koj yuav ua neej huaj vam, tsis muaj yam twg tsav twg, koj thov Ntuj xwb ces koj yuav tau ( tsis yog yuav poob saum ntuj los rau koj tab sis yog lwm tus yuav muab rau koj thiab koj ua neej ncae tes, khwv me me los tau ntaus ntaus...), koj yuav ua neej tsis txob tsis txhawj, koj yuav tau lub neej hauv ntiaj teb nov zoo li nyob saum Ntuj.

Koj sim nrauj tag nrho txhua yam kev teev dab, kev ntseeg dab, nyuag khawv koob hwj huaj txhua yam, nyuag khi hlua pauv, hluas khawv koob los yog tej nyuag tshuaj hwj huaj li hmoob hais tias txiav peb riag, ...li ub li no tag nrho, koj ntseeg thiab teev Tswv Ntuj ib leeg xwb mas koj yuav pom Tswv Ntuj lub hwj huam nyob nrog koj tiag.

Huab Tais Yes Xus hais tias: Yog koj txoj kev ntseeg luaj lub noob zaub mas koj kom lub roob nov rhais mus nyob sab hiav txwv tod, lub roob kuj yuav txav mus." Kuv li vim kuv txoj ntseeg luaj tsis taus lub noob zaub, kuv xav kom luaj li lub noob zaub kawg tab sis ntshe tseem tshuav ntau yam uas kuv tsis tau paub txog ces thiaj li tsis luaj; tab sis kuv txoj kev ntseeg tej zaud yuav luaj li 1/1000 ntawm lub plua tshauv, vim kuv thov tau txiaj ntsim li kuv xav tau.

Kawg no kuv xav hais rau koj hais tias txhob sem lub caij mus teev tej qub kev cai lawm mog, Peb Hmoob ntseeg Yes Xus tshiab heev, kuv yog thawj pab neeg ntseeg uas TP. Nyiaj Pov xa XH. Xyooj Thoj thiab TP. Vaj Pov nkawd tuaj txiav dab ntag, thaum nkawd tuaj kuv yug lawm tab sis kuv tsis tau xeev xwm, tab sis kuv yeej pom tias Peb Hmoob Npam Naj Xees vam meej ib thawj heev txij li XH. Xyooj Thoj thiab TP. Vaj Pov tuaj txiav dab rau peb. Muaj Tswv Ntuj nrog peb, peb ua neej tsis txob tsis txhawj, khwv tau npaum li cas los tsis muab ua neeb ua yaig, tsis muab ua dab ua qhua li yav dhau los uas tsis kum siv tua ib tug tsiaj noj li, tsuas tshwj nrees cia ua neeb ua yaig ua dab ua qhua xwb...

Yog muaj Yes Xus lub NPE pab Peb Hmoob, peb thiaj li vam meej ib theem uas tsis tau muaj nyob hauv keeb kwm Hmoob los mus. Yog tsis muaj HT. Yes Xus ua TP. Nyiaj Pov siab kom tsim cov Ntawv Hmoob Thoob Teb nov rau Hmoob siv, Hmoob yuav tsis vam meej thiab nrog luag sib fi txuj thoob ntuj li niaj hnub no. Li nov, koj yuav txhob ua xyem xyav ntxiv lawm, Tswv Ntuj muaj caij, ib txhiab xyoo rau Tswv Ntuj zoo li ib hnub xwb, tab sis yus neeg txha plhaub mag, nqaij ciab zib yus tsuas nyob ib vuag dua xwb, yuav maj nroos tsam Tswv Ntuj muaj caij yus tsis muaj caij mog. Tswv Ntuj lub teb chaws yog ib lub teb chaws tshav ntuj nrig, tsis tshaib tsis nqhis, tsis khwv, yuav nyob luag ntxhi ib sid tsis txob tsis txhawj. Yuav rau siab ua txhua yam kom tau mus mog. Qhov ua txhua yam ntawd twb tsis nyuaj li tsuas yog: "1. koj ntseeg Tswv Ntuj tib leeg xwb, tsis ntxhob ntshai tsam tsis tau mus lob ub lob no ces thaum kawg Tswv Ntuj tsis pab ces twb ho tsis tau dab tsi li lawm. 2. Koj xyaum ua ib tug neeg muaj kev HLUB nyob hauv koj, txhob hais lus phem, txhob ntsia ntsoov luag qhov phem hais, txhob khav theeb ntshaw hwj chim. 3. Koj muaj li cas koj yuav zoo siab yuav li ntawd, txhob ua ib tug neeg siab hlob, muaj tsis muaj los ntshaw ntshaw cuag dab tsi. Kev ntshaw ntawd mas tab koj pluag pluag kob huam kiag los ua tau rau koj lub siab nplua nuj ces yog ib qhov txhaum loj uas Tswv Ntuj nyob tsis tau rau hauv koj, vim koj tsis muaj chaw rau NWS. Tswv Ntuj nyob hauv cov siab ntsws pluag, txhais tias muaj chaw rau NWS nyob xwb.

Yes Xus tu siab nrho daim ntaub thaiv lub tsev tsam phooj ntuag rhe thoob plaws nruab nrab txhais hais tias Yes Xus tuag los daws neeg lub keeb txhaum. Yes Xus ua tus choj tuam rau peb hla ncaj qha mus rau Tswv Ntuj, daim ntaub thaiv ntuag ces yog hais tias zaum no tsis muaj dab tsi los kem neeg thiab Tswv Ntuj lawm.