Jul
22/11
ZIM TXWV NO NTIAJ TEB TEEB MEEM LOJ
Last Updated on Tuesday, 26 July 2011 04:33
Written by zootswvzovyaj
Friday, 22 July 2011 05:46
Nyob Cob Tsib teb.
Nyob zoo ib tsoom kwv tij phooj ywg hmov thiab tshua sawv daws !
Hnub no kuv yuav tham 2 zag xov xwm rau nej mloog, xws li no :
Hais txog nqe 1 : Nyob Cob Tsib teb, cov neeg txom nyem tseem coob heev, mas yog li no :
Kwv tij, raws li hauv txoj cai Koom Tshaj, mas lub hom phiaj kuj mus li no tias : yuav pab txhawb nqa tas cov pej xeem huab hwm tib si kom lub neej zoo tuaj, yam li yuav txhim kho teb chaws kom xwv tsis txhob muaj ib cov pej xeem nplua nuj thiab ib co txom nyem, yuav tsum ua kom sawv daws muaj nyiaj thiab tau zoo tas huv tib si sib npaug zos. Tiam sis los txog tav no, mas txoj cai Koom Tshaj hauv ntau lub teb chaws, tej nom tswv kuj ua tsis tau raws li lawv tau cog lus tseg rau tsoom pej xeem thaum xub thawj.
Piv txwv li nyob hauv teb chaws Cob Tsib, txij li tej nom tswv tau siv txoj cai Koom Tshaj los kav lub teb chaws, kuj muaj ib cov pej xeem nplua nuj tuaj lawm tiag, tab sis tseem tshuav ib cov pej xeem txom nyem thiab pluag pluag li qub, mas ntshai tsam yav tom ntej tsoom pej xeem Cob Tsib yuav paub txog qhov no, ces lub teb chaws yuav muaj kev pauv ntxeev dua.
Mas tej zaus nej yuav xav nug tias : “Cov kws xov xwm uas tshaj tej lus no, puas yog cov pej kum neeg ?
Peb teb rau nej tias : “Tsis yog cov pej kum neeg tej lus, vim yog ib tsab xov xwm Cob Tsib tau tshaj tej lus li no tawm nyob hauv Cob Tsib teb.”
Vim Ii cas hais li no ? Rau qhov hnub tim 19 lub 7 hlis no, hauv tsab ntawv xov xwm Cob Tsib hu ua “KUS AAS DOI NIAN DAN”, uas yog tseem hwv Cob Tsib ua tus tswv, mas cov kws xov xwm tau tshaj tias : ”Ntawm ob pab neeg, yam li cov nplua nuj thiab cov pluag, mas ib tog nrug deb ntawm lwm tog zuj zus, ces ntshai tsam tsis ntev saum no peb lub teb chaws yuav raug ntau yam teeb meem zuj zus tuaj“.
Li ntawd mas kwv tij, hnub tim 10 lub 7 hlis no, tsab ntawv xov xwm Cob Tsib hu ua TIEN PHOOS, uas yog cov nom tswv Koom Tshaj uas tus tswv ntawm tsab xov xwm no kuj tau hais tias : “Los txog tav no mas yeej tsis tau muaj ib lub caij uas cov neeg nplua nuj thiab cov pluag yuav nrug deb npaum niaj hnub no ib zaug.”
Cov kws xov xwm tau tshaj tawm tias : “Ib lub hlis twg, cov neeg txom nyem tsuas tau tus nqe zog 370,000 nyiaj Dong, uas yog li 14 Dollars xwb. Hos cov neeg nplua nuj, mas lawv tau tus nqe zog ib hlis yog 3,500,000 nyiaj Dong, uas yog li 140 Dollars.
Yog muab xam los mus, xyoo 1995, cov neeg liaj neeg teb tau nyiaj hli tsawg dua cov neeg nplua nuj 7 npaug. Tab sis xyoo 2011 no, tsoom pej xeem uas txom nyem ntawd lawv tau nyiaj hli tsawg dua cov nplua nuj 10 npaug diam.
Tsis tas li ntawd, cov kws xov xwm tau tshaj lus ntxiv tias : “Xyoo 1985-1986, kwv yees muaj txog li 58% ntawm cov pej xeem huab hwm uas nyob hauv Cob Tsib teb, mas lawv yog neeg pluag, ces lawv khwv hnub noj hnub xwb. Tab sis xyoo 2011 no, mas tsuas muaj txog 13% ntawm cov pej xeem huab hwm thiaj tseem yog neeg pluag pluag li qub.”
Li ntawd, txij xyoo 1985 los txog lub zim txwv no, mas ib cov pej xeem Cob Tsib kuj tau dim ntawm kev pluag pluag, uas yog 45% ntawm cov pej xeem sawv daws lawm. Txhais tias 36 plhom tus neeg diam dim ntawm kev txom nyem, tab sis kuj tseem tshuav 10 plhom tus neeg uas lawv tseem txom nyem heev nyob Cob Tsib teb, mas cov neeg txom nyem no kuj tsis yog tsawg.
Kwv tij, nyob Cob Tsib teb, mas 20.000 nyiaj Dong tsuas pauv tau 1 Dollars xwb. Li ntawd cov txom nyem mus noj ib pluag mov, lawv yuav tsum siv li ntawm 10.000 nyiaj Dong, hos cov neeg nplua nuj lawv noj ib pluag mov mas twb yog li ntawm 50 Dollars tej, ces ob pab neeg no kev ua lub neej sib txawv deb heev.
Nyob hauv cov nroog Cob Tsib teb, mas cov neeg nplua nuj caij tej lub tsheb tus nqi kim txog li ntawm 500 plhom nyiaj Dong, uas yog 25.000 Dollars, hos cov caij tsheb kauj vab kuj tseem tshuav coob kawg nkaus.
Tsis tas li ntawd, tsoom pej xeem txom nyem lawv tseem nyob tej lub nyuag tsev nqeeb uas khaub khaub hlab. Tab sis cov neeg nplua nuj, mas muaj cov tub txib uas kwv phom ncig yeev tas hnub zov tus tswv tsev uas nplua nuj tsam muaj neeg phem nkag tuaj ua tub sab.
Cov neeg txom nyem, mas lawv tej me nyuam tsuas kawm ntawv txog li ntawm hnub nyoog 12 thiab 13 xyoos xwb, ces tso tseg lawm. Tsis tas li ntawd, cov kws qhia ntawv kuj tsis qhia zoo rau cov neeg txom nyem tej me nyuam, lawv tsuas qhia dog dig rau xwb. Yog vim qhov ntawd, ces yav tom ntej cov neeg txom nyem yeej yuav tsis dim ntawm kev pluag ib zaug li.
Hos ntawm cov neeg nplua nuj, mas lawv cov tub ntxhais kuj tau kev mus kawm ntawv hauv tej tsev kawm ntawv uas zoo thiab ib txhia kuj xa lawv tej me nyuam mus kawm txuj nyob txawv teb chaws, yam li mus kawm nyob Mes Kas teb thiab mus kawm nyob cov teb chaws Aws Los Pas.
Yog vim tseem muaj ib cov neeg txom nyem coob heev nyob Cob Tsib teb, ces ntau zaus cov neeg txom nyem no ib txhia thiaj li mus ua tub sab tub nyiag, kom lawv tsev neeg muaj dab tsi noj.
Kwv tij phooj ywg, ib pab tub rog Cob Tsib tau tshaj tawm rau hauv lawv tej ntawv xov xwm tias : “Peb yuav tsum lees tias, hauv peb lub teb chaws mas sawv daws kuj tsis sib koom siab koom ntsws, vim tsoom pej xeem uas nyob ntawm txheej qis qis, lawv tsis tau kev dim ntawm txoj kev txom nyem. Hos muaj tej pab nom tswv kuj kaus pej xeem paj hlwb, ces lawv nplua nuj zuj zus”.
Yog vim li no, mas kuj ntshai tsam muaj ib hnub cov neeg pluag pluag ntawd yuav sawv los tiv tseem hwv, rau qhov lawv kuj ntshaw txog ib lub neej noj qab nyob zoo, tab sis lawv xav luaj ntug xu luaj nyug lawm, ces cia saib yav tom ntej tseem hwv Cob Tsib yuav txhim kho lawv lub teb chaws kom vam meej mus zoo li cas.
Hais txog nqe 2 : Nyob Is Ntias teb, muaj 2-3 txhiab tus neeg txhob txwm yoo tshaib, mas yog li no :
Kwv tij, nyob hauv lub tuam ceeb Nis Us Des Lis, Is Ntias teb, mas lub 7 hli no txij ntawm hnub tim 25 txog hnub tim 27, tau muaj ib pab neeg coob coob txhob txwm yoo tshaib, kom tseem hwv hloov txoj cai uas hla tib neeg kev ywj pheej.
Cov neeg uas lawv yoo tshaib khaj cai thov kom tseem hwv hloov txoj cai no, mas lawv yog ib haiv neeg tsawg uas hu ua Dalit, uas txom txom nyem heev, vim tias txoj cai tshiab uas tseem hwv tsa los tau txwv cov Dalit no kom tsis txhob mus tso lawv tej me nyuam mus kawm ntawv rau lwm qhov, yuav tsum kawm nyob hauv cov tsev ntawv uas tseem hwv tso cai xwb. Hos cov neeg Is Ntias uas teev hawm kev cai Mawv Xis Lim, mas muaj cai mus kawm nyob tau txhua qhov tib si nyob ntawm lawv siab nyiam.
Txoj cai tshiab no, tseem txwv tsis pub cov Dalit mus rau hauv cov Mawv Xis Lim tej tsev teev hawm thiab cov His Ntus tej tsev teev hawm, nrog rau tsis pub mus rau hauv cov His Ntus thiab cov Mawv Xis Lim tej tsev pam tuag.
Tsis tas li ntawd xwb, hauv ntau lub zos thiab ntau lub nroog, mas tseem hwv kuj pub cov pej xeem kom lawv muaj dej huv rau lawv haus, tab sis tseem hwv tsis xa dej huv rau cov DALIT li. Mas ntau yam tseem hwv tau ua tsis ncaj los raug cov DALIT lub neej thiab txoj sia, cuag li cov DALIT yog ib cov neeg tsis huv, xws li cov neeg mob ruas, uas yus ntshai mus fim lawv tsam ho kis mob.
Cov neeg Dalit no, lawv tsis coj kev cai Mawv Xis Lim thiab kev cai teev hawm Mawv Xis Lim, lawv yog neeg ntseeg Ntuj.
Kwv tij, xyoo 1948, lub teb chaws Is Ntias rov coj dua lub neej twj lij uas tsis zwm rau cov Aas Kiv lawm, ces txij ntawm xyoo 1948 los mus, mas cov tseem hwv Is Ntias tau xaiv txoj cai MEEJ TSWV los kav lawv lub teb chaws. Tiam sis xyoo 1950, tseem hwv Is Ntias kuj txhim tsa dua ib txoj cai tshiab uas yuav siv los kav teb chaws, txoj cai ntawd hu ua “Yuav tsis xaiv tib neeg”, uas siv los kav tas cov pej xeem Is Ntias tib si.
Nyob hauv txoj cai ntawd, muaj tej qib lus meej pem tias : “Yuav tsis txhob xaiv neeg, kom tsoom pej xeem sawv daws sib fim tau. Tab txawm yug los nyob thaj tsam twg hauv Is Ntias teb, tsis hais poj niam los txiv neej, coj kev cai dab tsi los xij, yeej muaj cai mus fim lwm leej lwm tus tau ywj siab thiab muaj cai xa tej me nyuam mus kawm txuj nyob hauv lub tsev ntawv twg kuj tau ywj siab.”
Yeeb vim hauv txoj cai loj uas tseem hwv Is Ntias siv los kav tsoom pej xeem tau hais li no nyob hauv txoj cai tshiab ntawd. Tab sis los txog tav no mas cov DALIT kuj mus tsis tau rau lwm thaj tsam uas yog cov neeg Is Ntias teev hawm kev cai His Ntus thiab Mawv Xis Lim nyob li.
Yog vim li hais no, ces txij ntawm xyoo 1948 los mus, ib cov thawj coj hauv tej lub Koom Haum kuj tau sau ntau tsab ntawv mus thov rau tseem hwv, kom kho txoj cai kav teb chaws tias pub cov Dalit muaj cai ib yam li neeg Is Ntias thiab kom lawv txhob xaiv neeg, txhob cais neeg thiab txhob saib cov neeg Dalit qis qis. Tiam sis twb tau 60 xyoo los lawm, tseem hwv Is Ntias kuj ua ntsej lag muag dig tsis ntab ntw txog kev yuav kho txoj cai kom cov Dalit muaj kev ywj pheej ib yam li lwm pab neeg uas nyob thoob hauv Is Ntias teb.
Qhov kawg, ces cov thawj coj ntawm tej pab pawg neeg ntseeg, tsis hais cov Kav Tos Liv los cov Plos Tes Taas, los cov neeg uas coj kev cai Phus Thas, lawv sib koom siab hu lawv cov pej xeem kom mus sib koom mus yoo tshaib 2 hnub ntau nyob hauv lub tuam ceeb Nis Us Des Lis. Yog thawj thawj zaug uas lawv ua tej dej num txawv txav li no los pab txhawb nqa cov neeg Dalit.
Yog vim li no, ces hnub tim 25-27 lub 7 hli no, thiaj muaj ib cov neeg coob txog li ntawm ob peb txhiab leej mus sib pab yoo tshaib, thov kom tseem hwv kho txoj cai, kom tas nrho tsoom pej xeem Is Ntias muaj kev vaj huam sib npaug zog thiab kom sawv daws muaj cai ib yam nkaus, kom txhob saib cov haiv neeg Dilit qis qis li yav tag.
Li ntawd, peb vam tias tsis ntev tom ntej no, tseem hwv Is Ntias yuav los kho lawv txoj cai kav teb chaws, kom cov Dalit lub neej muaj kev ywj pheej ib yam li cov neeg Is Ntias huv tib si.
Zaj no Txiv Plig Txhiaj Foom ua nyob Mas Nis Las.
Haam Kub pab kho me ntsis nyob Lomsak.
Hnub tim 26 lub 7 hli xyoo 2011
This entry was posted on Friday, July 22nd, 2011 at 5:46 pm and is filed under Xov Xwm Hmoob. You can follow any responses to this entry through the RSS 2.0 feed. You can leave a response, or trackback from your own site.
Home
Yog koj tso siab rau Yesxus lub siab ntshiab, nws yuav ua koj siab kaj lug 
Vim li cas peb cov Kas Tos Liv ntseeg tias NIAM MAB LIAB yog TSWV NTUJ Niam? caws nej mus nias nyeem tau hauv no.
Leej Tshiab Mis Kas Ees thov koj pab tuav thiab saib xyuas peb lub Vas Sab Hmong Catholique ntawm no kom ruaj nrees.
