ZAJ THOV NTUJ RAU OB TUG TXWJ NKAWM.

1.Cov lus ntuas:
Txoj kev nyob ua txwj nkawm, yog ib lub txiaj ntsim mauj qab hau thiab tseem ceeb kawg nkaus li.  Nco ntsoov tias, txoj kev nyob ua txwj nkawm no.
Yog Tswv Ntuj txoj hauj lawm, tsim Noob Neej los nyob ntiaj teb no.  Hnub uas niam txiv tom ub tom no, ua tshoob ua kos rau neb.
Yog hnub uas Tswv Ntuj muab ntawv nyiaj keeb puaj txwm rau neb, los nyob ua txwj ua nkawm.  Yog hnub uas Tswv Ntuj, tau muab lub pov haum nyiaj pov haum kub thiab pov haum koob hmoov los pub rau neb.
Neb yuav sib hwm, sib hlub ua lub neej dawb huv nyob hauv Tswv Ntuj lub txiaj ntsim.   Nco ntsoov sib ua luag nyob hauv kev zoo siab, los kev tus siab.
Neb nco ntsoov tias:
Niam los muaj nqes, txiv los muaj nqes loj sib luag.  
-  Leej niam nws yog lub pov haum nyiaj pov haum kub nplua nuj thiab muaj peev xwm loj kawg.
Nws muaj peev xwm txais yus kwv tij neej tsa, los dab qhuas. Luag tuaj muaj npaum nplooj los noj tsis pluag yus.
- Tus txiv los muaj nuj nqes loj, nws yog lub pov haum koob hmoov pov hwm kom lub tsev neeg tsim txiaj yeej kev xaiv kev lus, rau kev muaj mob muaj nkeeg thiab ua neej nyob nto moo lug.
Nws roos tas tej kwv tij neej tsa txheeb ze, mus tas nrho lawm ib nceeg.  Kom tau nyob dawb nyob huv tshav ntuj mus lawm ib ncua kev deb.
Nres tsev neeg kom muaj koob muaj npe nrov ncha ntws lawm ib ntxee ntuj.  Nco ntsoov Hmoob lo lus tias:
Nkauj txhav qaib nraug txhav noog, thiaj yog ntawv nyiaj keeb puaj txwm raug tau pem ntuj los sib dhos. Thiaj yog daim ntawv nyiaj keeb puaj txwm pov haum nyiaj pov haum kub, los pov haum koob hmoov uas yog Qaum Ntuj foom pub los rau neb ua neej.
Dhau tej hais no lawm:
Neb yuav nco ntsoov, them neb tus nes tshoob nqes kos!  Tus nqes tshoob nqes kos no:
Yog neb yuav tau muab kev nyiam, kev hlub thiab kev sib pab los them. Neb yuav them mus kom tas ib sim neej.  Kom mus txog lub caij nyob mus kav laus, mas mam tas neb tus nqes tshoob nqes kos no.
2. Kuv yuav thov Ntuj tsom kav tsom kwm neb lub neej.
Peb sawv daws thov Huab Tais:
Yes Xus, Mab Liab, Yos Xes, uas nej yog tswv Ntuj yim neeg ntshiab. Thov txoj kev ua neeg siab ncaj ncees, nyob hauv kev zais ntshis hauv Tswv Ntuj lub koob meej.
Los tsom kwm rau nkawm tub nyab no,  Yes Xus Pleev, peb tso siab lug rau koj lub peev xwm.  Nrhuav txhua hom dab ncauj nplaig tsis huv, coj leej tib neeg cov ntsuj plig mus zwm rau kev tuag.
Leej Ntshiab Mis Kas, koj yog tus Tswv Ntuj tau pub hwj huam loj tas nho, kom muaj peev xwm ntiab tau tus dab ntxwj nyoog poob los rau ntiaj teb.
Leej Ntshiab La Fais, tus muaj peev xwm nrhuav cov dab nkauj dab nraug, tsis sib sum xeeb, kom nyob tsis taus ua ke.
Kuv thov kom Huab Tais Yes Xus Pleev pub txiaj ntsim rau neb, kev nyob ua txij ua nkawm, kom muaj kev sib nyiam sib hlub thiab sib raug zoo.  Nyob mus kav laus. Peb Vam txog peb tus  Huab Tais Pleev. Ua li.


Yaj Zoov Ntxheb X.H.

Zaj no siv los thov Ntuj, rau ob tug txwj nkawm, los ob pab neeg tsis sib haum xeeb nyob ua ke. Nkawd, los lawv nyob ua ke, tab sis, lawv cov siab ntsws tsis nyob ua ke. Nyias muaj nyias siab, ces thiaj muaj tus yeeb ncuab tsis huv. Los coj lawv kom muaj kev sib ncaim mus.
Yog ib zaj, uas peb yuav tau vam txog tsev neeg Ntshiab thiab tsoom Leej Ntshiab nrog peb thov Ntuj pab.
Xws li Yes Xus, Mab Liab, Yos Xes, Pob Zeb, Paj Lug thiab Tswv Ntuj tsoom Leej Ntshiab los tsoom tim khawv, tiv thaiv kev txom nyem. Raws li Leej Ntshiab Mas Ntos kes zaj thov Ntuj.
=>. Xib Hwb, los tus coj hais tias:
Peb sawv daws thov Huab Tais, Huab Tais Yes Xus Pleev, koj tib leeg yog Tswv Ntuj Leej Tub thiab yog ntiaj teb neeg tus Vaj.
Huab Tais Yes Xus, koj tau siv tas nrho, koj lub zog tuaj cawm lub ntiaj teb neeg. Cov Ntsuj Plig, nyob hauv txoj kev ua txhaum.
Peb vam txog Mab Liab Nkauj xwb, uas yog Tswv Ntuj Leej Niam, tus tsis lo txhaum. Peb vam txog Pob Zeb thiab Paj Lug, tas tsoom Leej Ntshiab nyob saum ntuj thiab tsoom tim khawv siab ntshiab, tiv thaiv kev txom nyem.
Sawv daws nrog peb lub suab seev thov koj, Tswv Ntuj thov kom muab koj lub hwj chim. Uas koj kav tas nrho, cov hwj chim kom muaj kev sis nyiam sis hlub, hauv koj Leej Tub Yes Xus Pleev lub hwj chim. Los rhuav kev sib ntxub sib mcaim tawm ntawm cov dab tsis huv, lub tswv yim mus!
Nws yog lub tswv yim, tuaj tshob, kom Koj tsoom tub ki lawv kev ua neej muaj kev puas ntsoog kom sib tawg mus.
Peb vam txog peb tus Huab Tais Pleev. Ua li.

Y.X.H. Z. N.