HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


Qhia Ntuj Kev Cai. - Page 2 Empty

Latest topics

» COV ZAJ NYEEM NRUAB LIS PIAM XYOO II 2021-2022
by Mim Today at 2:54 am

» COV ZAJ NYEEM Hnub Chiv 2021-2022 Xyoo C
by NrhiavTswvNtuj 16th June 2022, 7:06 am

» Tswv Ntuj txoj kev Khuv Leej Neeg.( Neuvaine à la Divine Miséricorde)
by Mim 16th April 2022, 8:18 am

» MOO QAIJ QAUG
by Maiv Tooj 7th April 2022, 2:51 am

» Txiv Tswv QhiaTxwj Choo Thoj nyob los tsuas
by Maiv Tooj 16th March 2022, 6:54 am

» Qhia Ntuj Kev Cai.
by Maiv Tooj 17th February 2022, 11:25 pm

» Zaj thov Ntuj rau cov neeg mob.
by Maiv Tooj 17th February 2022, 11:22 pm

» XH. Yaj Zoov Ntxheb lub Tsev THOOB TSIB
by Maiv Tooj 19th January 2022, 7:52 am

» Xib Hwb Thoj Xyooj lub neej
by Maiv Tooj 19th January 2022, 7:49 am

» COV ZAJ NYEEM RAU CAIJ YES XUS YUG LOS
by Mim 24th December 2021, 8:00 pm

» ZAJ THOV NTUJ RAU OB TUG TXWJ NKAWM.
by Maiv Tooj 10th December 2021, 6:10 am

» COV ZAJ NYEEM NRUAB LIS PIAM CAIJ TOS HUAB TAIS
by Mim 28th November 2021, 1:55 pm

Suav neeg tuaj saib, txij hnub 17/09/2010 los mus.


    Qhia Ntuj Kev Cai.

    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5480
    Date d'inscription : 2009-08-18

    Qhia Ntuj Kev Cai. - Page 2 Empty Re: Qhia Ntuj Kev Cai.

    Post  Maiv Tooj 5th September 2020, 7:01 pm



    Zaj 480 - DAB XAS TAS MUAJ IB CO THWJ TIM.

    Tus dab phem Xas Tas, mws tso ib co Thwj Tim coob kawg. Tuaj ua tej lub koob tsheej loj, nyob tos Neeg ntiaj teb txhua txoj kev sib tshuam.
    Kom tau ceeb tom thiab qhia Neeg, ua nws cov hauj lwm. Coj neeg ncaim mus taug cuaj ntsug kev khaub li kom txhua nrho txhua txoj!
    Kom Neeg nrhiav tsis tau txoj kev tseem ceeb los nrhiav tau tus zoo Niam zoo Txiv. Kom Neeg lam tau lam mus zeem txhua tus Dab Hauv Toj Hauv Pes, ua ib tug dab Tim Tswv uas yog dab Moj Zeej, los ua Neeg Niam Neeg txiv.
    1=>.Xas Tas tso ib co Thwj Tim, uas yog lub tswv yim phem. Tuaj coj thiab kav Neeg tej qhov muag, kom Neeg nyiam ntsia thiab xav pom tej yam phem, uas xis Neeg tej siab. los tej yam uas ntxim ntxub nyob rau lwm tus Neeg nruab siab.
    A->.Nws coj neeg lub qhov muag, kom neeg xav pom xav paub los xav ntsia. Twj ywm nyob rau neeg nruab siab, tsis qhia rau leej twg paub!
    Zoo li: Kev ua nyiam ua plees ua yi, los kev ntxub neeg thiab kev ua tub sab tub nyiag. Uas neeg ntshaw twj ywm nyob rau neeg tej nruab siab, tsis pub luag paub txog!
    Los neeg tseem tuam meej tuam pem coj li, neeg yog tus dawv huv thiab ncaj ncees. Tab sis lub paj tawg tau thiab lub txiv txi los, yog ib hauv tshuaj lom neeg txhua tus.
    Kom muaj kev sib ntxub, tsis sib raug zoo, cov lus uas cov thwj tim dab qhia no. Tsis muaj ib yam yuav ua tshuaj zoo kho neeg lub siab thiab neeg tus yam ntxwv kom zoo rau luag nyiam thiab luag hlub li!
    B->.Los Neeg tseem qhuas tias, nws yog tus zoo tshaj rau lwm tus yuav tau qhuas thiab kawm mus tias: Nws yog tus zoo tshaj, tsoom sid, nws tsis paub txog tias:
    Lub paj nws tawg los thiab lub txiv nws txi tau los no, yog hauv tshuaj iab tshuaj daw, uas neeg ntiaj teb ntxub. Uas lom neeg tuag thiab vwm mus, nws coj li yog neeg ruam thoj chim tsis paub kev ua tub qaug rau neeg thiab rau Ntuj.
    2=>. Xas Ta muaj dua ib co tswv yim ua Thwj Tim, tuaj coj Neeg tej pob tseg. Kom neeg xav hnov cov lus phem los cob qhia neeg txawj mus ua kev txhaum loj:
    A->. Kom pab thiab qhia tau tus neeg xav taug kev phem, txawj mus ua kev txhaum tub qaug rau Ntuj tej me nyuam. Kom nws zoo siab tau raws li nws kev ntshaw ua.
    Nyob ntawm nws tus kheej, mas nws tseem qhuas tias: Nws yog tus txawj thiab thoob tsib dua luag lwm tus! Nws cov txuj yog ib hom txuj siab, uas tsis muaj neeg paub thiab kawm tau!...
    B->. Qhov tseeb nyob hauv nws lub tswv yim, yog ib tug duab Moj Zeej. Tsis muaj ib yam zoo rau Ntuj pom, los zoo rau neeg saib li.
    Yam nws tau ua los ntawd, yog kev txhaum ua tub qaug Ntuj thiab kev khaum los raug neeg nkaus xwb. Nyob hauv nws tus kheej, nws tseem qhuas tias, nws muaj txuj ci siab uas neeg paub tsis txog hlo li thiab!
    Yam nws xav no, yog kev ploj kev tuag uas raug rau lwm tus neeg sab Ntsuj Plig. Uas tsis muaj kev tawm tau mus cob cuab rau txoj kev zoo li.
    3=>. Xas Tas tseem txib dua ib co thwj tim, tuaj kav rau neeg tej nruab siab. Kom tawm los nyob nrog, neeg tej ncauj lus! Kom neeg txawj txawj hais tej lo lus, tsis haum lwm tus neeg siab:
    A->.Kom cov neeg nyob ze nws, mas nws tau hais tej lus thuam los saib tsis taus lawv. Li uas lawv yog neeg ruam, tsis paub tab los tsis paub cai.
    Muaj tsawg leej neeg nyob ze nws, mas kom raug nws cem,los thuam, hais lus saib tsis taus. Kom muaj kev npau taws, muaj kev tu siab, kom pab neeg nyob ze nws. Tsis tau nyob kaj siab mus tas ib sim neej li.
    B->.Cov lus txawv ntawm nws lub ncauj los, mas lo twg los muaj zog cuag li ib hauv tshuaj iab tshuaj daw lom neeg. Kom tsis muaj ib lub siab, kaj nyob nrog nws li.
    Nyob hauv nws cov lus tawm los, mas iab tshaj yeeb thiab ntsim tshaj kua txob. Cov hnov nws cov lus, ntawm lawv pob ntseg, los pom nws lub ncauj hais lus. Mas yog zoo li hliv tshuaj lom neeg, rau lawv lub siab. Kom lawv tuag thiab yaj mus ploj ua pluav av kiag lawm xwb.
    4=>.Xas Tas cov Thwj Tim, uas Xas Tas xa tuaj ua koob tsheej tos neeg txhua txoj ke sib tshuam. Mas nws xa tuaj coob li coob, tuaj nyob tas nrho neeg ntiaj teb tej ncauj xub ke txhua txoj!
    Tsis hais leej twg li, txij tus ua Huab tais Neeg. Los ua tus thawj Pwm Tsav ua Txoov Tswv Tim li { Presidet}. kav teb chaws, mus thoob plaws rau cov xov nom tswv tswv me. Txheej siab los ti nkaus, rau tus ua pej xeem.
    Xas Tas npaj kom muaj, nyob txhua txoj hau kev ua neeg ntiaj teb yuav taug mus. Zoo li cuaj ntsug kev khaub lig, li Hmoob hais los. Kom neeg yuam kev txawm mus thiab los, nrhiav tsis tau tus zoo Niam zoo Txiv li tus yog Tswv Ntuj!
    Kom txhua tus neeg mus ntsib tau tib co Moj Zeej, tsis paub tias, yog neej los yog dab li. Muab zeem ua neeg niam neeg txiv txhua tua tus mus.
    Kom neeg nrhiav tsis tau, tus zoo niam zoo txiv, uas yog tus tseem Tswv Ntuj. Uas nws yog tus muaj kev nyiam kev hlub txhua tus me nyuam neeg nyob thoob lub qab ntuj no.
    5=>.Dab Xas Tas xa nws cov thwj Tim no tuaj, mas zoo li cov dab thwj tim no. Lawv muaj ib co tshuaj muab ntxw, tseem zoo tshaj thiab muaj kuab dua, li cov Hmoob hais tias, yog tshuaj muab ntxhw.
    Leej twg raug dab Xas Tas cov tshuaj muab ntxhw no lawm.
    Mas nws muaj zog cuag li kev ua nkauj ua nraug, uas nws muaj zoo tus dab swm nkauj nraug. Uas tso tseg tsis tau li ntag! Cov neeg raug tus dab Xas Tas muab tshuaj ntxhw los pleev rau nws, mas yog cov thawj neeg. Dab nyiam xub muab los pleev thiab hom lawv ua ntej, dual wm cov!
    Zoo li cov ua nom tswv loj, los thoob plaws rau cov xov nom me. Los mus mus ti nkaus rau, tus pej xeem nyiam ua neeg khav theeb thiab muab hlob los mus tib si!
    Ces sawv daws raug Dab Xas Tas tso nws cov thwj Tim, tuaj tos dawv daws kev tas nrho mus lawm ntag. Li ntawd, mas lub zwj ceeb no.
    Neeg thiaj vwm mus thoob plaws qab ntuj khwb no lawm, tej nom tswv los hais tsis sib haum. Nyias thiaj khav nyias ua neeg muaj peev xwm, hais tsis sib haum, rau txhua lub teb chaws thiab txhua pab txhua pawg.
    Thiaj hais tsis haum, muaj xaiv muaj lus. txog kev sib txeeb hwj chim kav ntiaj teb, thiaj muaj kev ua tsov rog sib ntaus sib tua.
    Neeg ntiaj teb nyob tsis muaj kev thaj yeeb. cov yuav tawg rog ua neeg thoj nam, los muaj coob. Cov khiav nws tus qub nom qub tswv los muaj ntau, mus nyob ua sab ua sua.
    Neeg tsis muaj chaw nyob los muaj mov noj thiaj hnov cha puv lub qab ntuj khwb no.
    6=>. Txoj kev haus dej haus cawv qaug, thiab haus yeeb haus tshuaj ua neeg vwm coj tsis tus. Muaj kev txom nyem siab ntsws, tsis hwm tej Nom Tswv txoj cai thiab tsis hwm neeg.
    Tua neeg sab nraud, los muab yus niam yus txiv tua. Los muab yus tej poj niam me nyuam tua, cuag li lawv yog ib co tsiaj tsiv nyaum. Muab tua tuag tas los tsis muaj lub siab nco tias yuav khuv xim li.
    Mas puav leej yog raug Xas Tas, cov dab thwj Tim uas Xas Tas tso tuaj tav neeg txhua txoj xub ke no. Kom neeg zeem thiab nrhiav tsis tau Tswv Ntuj yog tus zoo Niam zoo Txiv pov puag sawv daws ua Ntuj me nyuam, uas yog neeg zoo.

    Sacramento tim 3/8/2019.
    Yaj Zoov Ntxheb Xib Hwb.



    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5480
    Date d'inscription : 2009-08-18

    Qhia Ntuj Kev Cai. - Page 2 Empty Re: Qhia Ntuj Kev Cai.

    Post  Maiv Tooj 10th February 2021, 8:43 am



    Zaj 496 - KEV SIB KOOM UA KE THOV NTUJ.

    Thaum muaj ib pab neeg ib koom siab thov Ntuj ua ke, mas tus thawj yuav xub hais cov lus no:
    ->.Yes Xus, koj yog Tswv Ntuj Leej Tub, tuaj cawm seej nyob ntiaj teb no. Tswv Ntuj, koj yog tus pom thiab paub tas txhua yam peb neeg xav. { Kuv} Peb yog tus thov koj. Koj yog tus teb peb cov lus thov.
    Leej Tswv Yim Ntshiab, yog thawj feem nyob hauv peb lub neej thiab peb lub cuab tam, uas peb yuv txais nyob rau tiam tom ntej no.
    Leej Ntuj Plig, koj yog tus tsom kwm cov neeg, ua Tswv Ntuj thau txhiv los, ua Nws tug. Kom tau cav txog Tswv Ntuj lub Koob meej.
    Thov koj foom hmoov zoo rau peb, kom peb muaj Yes Xus lub peev xwm. Thov Yes Xus cov txiaj ntsim kho neeg mob txhua hom, los pub rau { tus} cov neeg mob nyob ntawm no. Peb vam txog peb tus Huab Tais Yes Xus Pleev. Ua li.

    Peb sawv daws thov Huab tais, Tswv Ntuj peb ntseeg thiab tso siab rau koj. Uas koj tau thov kom Leej Txiv, tso Leej Leej Tswv Yim Ntshiab. Tuaj tsa tsev nyob hauv cov neeg uas Leej Txiv Tswv Ntuj tau xaiv los ua Nws tug.
    Thov koj foom hmoov zoo nqes los, rau saum cov neeg uas koj tau xaiv lawv. Kom lawv tau yeej kev mob kev nkeeg raws li lawv tau tso siab rau koj.
    Kom lawv {Nws} tau nyob kaj siab lug.
    Peb vam txog peb tus Huab Tais Yes Xus Pleev.
    Ua li.

    Yaj Zoov Ntxheb Xis Hwb.



    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5480
    Date d'inscription : 2009-08-18

    Qhia Ntuj Kev Cai. - Page 2 Empty Re: Qhia Ntuj Kev Cai.

    Post  Maiv Tooj 10th February 2021, 8:45 am



    Zaj 497- KEV TXAIS YES XUS LUB CEV.




    Yog ib yam tseem ceeb thiab muaj nqes tas nrho, nyob hauv Zam ntawv Moo Zoo zaj 6: 35-38.
    Yes Xus hais tias: Kuv yog cov mov muaj txoj sia. Tus tuaj cuag kuv nws yuav tsis tshiab, tus ntseeg txog kuv, nws yuav tsis nqhis ib zaug li.
    Yes xus hais tias, peb pom Yes Xus, peb twb tsis ntseeg txog Yes Xus. Yes Xus hais rau peb ntxiv tias:
    Tas txhua yam uas kuv Txiv muab rau kuv, nws yuav rov los cuag kuv. Hos tus tuaj cuag kuv, mas kuv yuav tsis ntiab mws rau sab nraud.
    Vim kuv nqes saum ntuj los, nws tsis yog ua ywj kuv siab. Yog ua raws li tus xa kuv tuaj Nws lub siab.
    A=>.Thaum koj yuav mus txais Yes Xus lub cev, Koj yuav nco txog kev ua zoo rau Tswv Ntuj thiab kev ua zoo rau cov neeg nyob ze koj.
    B=>.Nco txog koj kev muaj mob muaj nkeeg, los kev tus siab, kev txom nyem txhua yam nyob hauv koj lub neej.
    C=>. Koj yuav ntseeg tseeb tias Yes Xus nyob hauv lub Cim Yug tiag. tso siab lug rau.
    D=>. Ua ntej koj yuav mus txais Yes Xus lub cev thiab Nws cov ntshav. Koj yuav xub hais ua ntej nyob hauv koj nruab siab tias:
    Kuv mus txais Yes Xus lub cev thiab Nws cov Ntshav, los kho kuv lub siab lub cev thiab kuv tej kev mob kev nkeeg. Txhua yam kom yaj ploj tas mus.
    E=>.Thov Yes Xus nyob hauv lub Cim Yug los daws kev tus siab thiab kev ntxub neeg kom koj txawj hlub txawj nyiam thiab txawj zam rau luag.
    F=>. Txais tas los ua Yes Xus tsaug Yes Xus, Koj ntseeg tias Yes Xus yuav ua txhua yam los pub rau koj. koj zoo siab nyob tos li koj thov ntawm Nws…

    Yaj Zoov Ntxheb X.H.



    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5480
    Date d'inscription : 2009-08-18

    Qhia Ntuj Kev Cai. - Page 2 Empty Re: Qhia Ntuj Kev Cai.

    Post  Maiv Tooj 18th February 2021, 8:27 am



    Zaj 499 - KWV HUAM HAIS TXOG KEV NTSEEG NTUJ.

    Zaj kwv huam hais txog ib tug neeg, nws hais tias, nws ntseeg Ntuj zoo, nws tsis muaj kev nyiam kev hlub los kev tso siab rau neeg. Uas yog tsoom neeg txheeb nruab ze nws.
    Thaum kawg nws yuav tau txais txiaj ntsim dab tsi! Hais txog txoj kev uas Tswv Ntuj niaj hnub pab yus! Peb sawv daws nyias muaj nyias ib pab neeg nyob ze yus.
    Sawv daws koom nyob ua pab ua pawg, niaj hnub sib pom. Koj saib kuv kuv ntsia koj, thaum muaj ib yam xwv txheej los txog, yus xav tias cia luag tuag.
    Yus muaj kev ntseeg Ntuj loj lawm, yus tso siab lug tias, Ntuj yuav pab yus ces yus tib leeg yuav yog tus muaj yeej nyob.
    Hais txog lub txiaj ntsim uas Tswv Ntuj niaj hnub pab rau peb tsoom neeg txhua tus. Uas yus tsis pom thiab tsis paub txog, mas zoo li no!
    Zaj kwv huam no muaj ib hnub, ces Ntuj los nag loj kawg. Cov neeg nyob koom zej koom zos, hais rau tus neeg nws hais tias:
    Nws muaj kev ntseeg loj ntawd tias,dej yuav nyab peb lub zos. Peb sawv daws khiav mus tsam dej nyab tuaj ces peb mus tsis tau qhov twg lawm.
    Tus muaj kev ntseeg loj ntawd hais tias: Nej mus nej, kuv li mas kuv muaj kev ntseeg Tswv Ntuj txaus kuv lawm.
    kuv yuav tos kom Tswv Ntuj tuaj pab kuv mas, kuv mam li khiav mus! Ces lub zej zog khiav tas txhua tus lawm.
    B. Ces dej nyab nce siab zuj zus tuaj lawm thiab dej twb nyab tuaj txog ib nta tsev lawm. Muaj ib pab neeg caij ib lub nkoj, khiav los ze ntawm nws nyob.
    Lawv hais rau nws tias, dej nyab loj heev lawm, koj yuav nyob tsis tau lawm. Nqes los peb thauj koj khiav mus, nws hais tias, nej kav tsij mus nej kuv yuav tos Tswv Ntuj tuaj pab kuv.
    Kuv tsis txhawj li os, ces pab ntawd mus dhau lawm. C. Zaum no dej loj thiab nce siab heev dua tuaj lawm thiab, nws tsis muaj chaw nyob lawm.
    Nws nce mus nyob saum ru tsev, muaj ib pab neeg cai ib lub dav hlau qav taub ya tuaj pom nws. lawv hais tias, muaj xwv txheej loj dhau lawm, peb dauv hlua los rau koj, nce los saum lub dav hlau no.
    Koj yuav nyob tsis tau saum ko ntxiv lawm, los peb coj koj hla mus! Nws kuj hais tib yam tias, nej mus nej lauj. kuv yuav nyob tos Tswv Ntuj tuaj cawm kuv kuv mam li los!
    D. Tsis ntev ces dej nyab tuaj thiab dej ntsawj nws lub tsev vau kiag lawm. Ces nws poob rau hauv dej ces nws tuag lawm.
    Nws tus Ntuj Plig mus txog saum ntuj, nws hais rau Tswv Ntuj tias:
    Kuv ntseeg koj tshaj, kuv tos kom koj tuaj cawm kuv. Koj tsis tuaj cawm kuv, ces kuv thiaj tuag, zaum no, kuv los txog lawm tswv Ntuj koj yuav muab dab tsi rau kuv raws li kuv txoj kev ntseeg thiab tso siab rau koj? Ces Tswv Ntuj hais tias: Koj paub kuv twb tso peb tug neeg tuaj cawm koj lawm, koj kuj tsis tso siab thiab mloog cov neeg kuv tau xa tuaj cawm koj.
    Cov neeg ntawd twb yog kuv txib lawv tuaj, kuj zoo li yog kuv tuaj cawm koj lawm ntag. Vim li cas koj hais tias, koj ntseeg txog kuv, koj ho tsis tso siab thiab mloog cov neeg uas, kuv xa tuaj cawm koj!
    Puas yog kuv ua tus Tswv Ntuj yog tus txhaum, los yog koj tsis ntseeg thiab tsi tso siab rau kuv!
    E. Peb ua neej nyob, Tswv Ntuj tsim peb txhua tus, Ntuj tsim peb zoo li Ntuj tus duab, yog peb yuav tseev kom peb pom kiag Tswv Ntuj mas peb mam ntseeg tias yog Tswv Ntuj tiag!
    Yes Xus twb qhia rau peb neeg ntiaj teb tias, Yog nej pom kuv thiab paub kuv ces nej twb tau pom thiab paub Leej Txiv Tswv Ntuj lawm. wb yog ib tug xwb.
    Tswv Ntuj lub tswv yim loj thiab dav tas nrho, Peb neeg lub tswv yim me me kawg, yog peb muaj kev ntseeg thiab kev nyiam kev tso siab.
    luaj li lub noob zaub, mas peb thiaj to taub thiab txais los txhais tau Tswv Ntuj zaj tswv yim. Yog peb tsis muaj kev ntseeg kev nyiam kev tso siab thiab kev mloog lus.
    Ces peb txhua tus yog kiag, tus neeg uas nws hais tias, nws muaj kev ntseeg loj txaus nws lawm. Txog hnub kawg ces peb yuav txais txoj kev uas tus neeg nws hais rau nws tus kheej tias:
    Nws muaj kev ntseeg loj, nws ua kom luag swb nws mus. Txog qhov kawg nws tuag mus, cov muaj txoj sia nyob, ho yog cov lawv sib mloog sib coj lawv sawv daws muaj txoj sia nyob ua ke.
    Nyob rau Yaj Ceeb, thiab nyob saum ntuj, vim lawv tsis muab hlob lawv tso siab rau Tswv Ntuj cov me nyuam ua ke faib Ntuj txiaj ntsim.
    Yaj Zoov Ntxheb X.H.



    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5480
    Date d'inscription : 2009-08-18

    Qhia Ntuj Kev Cai. - Page 2 Empty Re: Qhia Ntuj Kev Cai.

    Post  Maiv Tooj 10th March 2021, 10:25 am



    Zaj 503 - NTAWV VAJ PHAU 1, ZAJ 18: 20- 40 HAIS TIAS:

    Koj txhob lees ua ib tug Yaj Saub cuav, thiab los twv Ntuj, kev twv Ntuj mas tsis yog kev ua si. Thiab twv tsis nyog nrog Tswv Ntuj.
    Tus Vaj His Xas Lais hu ua As Kas, tau hu tsoom Yaj Saub ua tim khawv cuav. Tuaj sib sau nyob saum lub Roob Kas Mes, Tus Yaj Saub Es Lias txav los hais rau tsoom His Xas Lais tias:
    Nej yuav xuas ob txhais taw dhia ua neeg deeg pauv mus txog thaum twg?
    Nyiam no, kuv hais rau nej tias:
    Nej yuav saib, peb cov yawg koob yog tswv Ntuj tiag, mas nej raws Nws mus. Hos yog tus nej hu ua Npas Has no, yog Tswv Ntuj, mas nej yuav raws nws mus!
    Tas tsoom sid, teb tsis tau dab tsi meej rau Es Lias, ces Es Lias hais ntxiv tias:
    Tshuav kuv tib leeg ua Tswv Ntuj tus Yaj Saub xwb, hos Npas Has cov Yaj Saub cuav no, muaj 450 leej. Tsoom His Xas Lais nej coj ob tug thav nyuj tuaj, peb yuav ua ob lub thaj txi Ntuj!
    Cia cov Yaj Saub Npas Has, xaiv ib tug los txi rau lawv tus Npas Has. Yog Npas Has yog Tswv Ntuj ces nej raws Nws mus!
    Es Lias hais ntxiv tias: Kuv yuav npaj ib tug los txi rau peb tus Tswv Ntuj. Peb sawv daws yuav tsis rauv taws rau lub cub tawg uas yuav txi Ntuj.
    Cia lawv hu txog lawv tus Npas Has lub npe, Kuv kuj yuav hu txog peb tus Tswv Ntuj. Cia Tswv Ntuj tso hluav taws poob saum ntuj los, tus twg yog tus tseem Tswv Ntuj tiag.
    Ces tsoom His Xas Lais pom zoo, lawv ua li Es Lias hais. Ob pab Yaj Saub no, tsuas pub hu Tswv Ntuj lub npe xwb, tsis pub rauv taws rau saum lub thaj txi ntuj li.
    Ces lawv muab nyuj tua tas, lawv coj nyuj cov nqaij mus tso rau saum lub thaj txi Ntuj. Ces nyias hu nyias tus Tswv Ntuj, 450 tus Yaj Saub Npa Has.
    Lawv kim caug pe Npas Has lub thaj txi Ntuj, lawv qw thiab hu Npas Has lub npe nrov nrov mus txog tav su. Lawv hu npaum li cas, los zoo li Npas Has tsis nyob ntawd lawm.
    Zoo li Npas Has muaj chaw tawm rooj, mus rau lwm thaj chaw lawm. Los nws muaj chaw tab kaum mus lwm qhov lawm.
    Ntawm Es Lias, mas nws muab 12 lib pob zeb los teeb ua lub Thaj txi Ntuj. 12 lub pob zeb no, yog Yas Kos 12 leej tub sawv nyob hauv 12 lub xeem His Xas Lais.
    Ces Es Lias hais rau tsoom His Xas Lais tias: Yas Kos, tus Huab Tais, hais kom Yas Kos hu ua His Xas Lais no. Thaum Es Lias khawb tus kwj ncig tas, nws ntim tau ob kawm noob tso ncig lub thaj.
    Nws mam tso cov taws rau, nws mam muab cov tav nyuj los tso rau saum cov taws. Ces Es Lias kom lawv nqa 4 hub dej los ywg cov taws ntawd li 4 lwm, ua dej nyab tas nrho rau cov taws ntawd, thiab lub thaj txi Ntuj.
    Thaum txog lub caij lawm, tus Yaj Saub Es Lias hais tias: Huab Tais, uas koj yog Has Nplas tus Tswv Ntuj, yog His Xas Has tus Tswv Ntuj, His Xas Lais tus Tswv Ntuj.
    Koj ua kom tas tsoom His Xas Lais paub tias: Koj yog tus Tswv Ntuj nyob hauv Haiv His Xas Lais mas! Thiab koj ua kom lawv paub tias, kuv yog koj tus tub txib! Yog vim koj qhia kuv, kuv thiaj ua tej no!
    Es Lias hais rau Huab Tais tias: Huab Tais thov koj teb kuv, ces tsoom pej xeem nyob ntawm no thiaj yuav paub tias: Koj yog tus Tswv Ntuj ua kom lawv lub siab tig rov los cuag koj.
    Ces cov hluav taws cia li poob saum ntuj los hlawv tas nrho, cov nqaij nyuj thiab cov taws qus cov dej nyob hauv tus kwj ntawd qhuav tas nrho mus lawm.
    Ces tas tsoom sid poob siab nthav, tas sawv daws ntog khwb rwg rau hauv av. Ces Tsoom sid hais tias, yog Huab Tais tiag, yog tus tseem Tswv Ntuj tiag lawm.
    Ces Es Lias hais rau tsoom sid tias, nej ntes Npas Has cov Yaj Saub cuav. Lawv coj mus rau nram tus kwj deg, cov Yaj Saub Cuav no, thiaj tau raug txiav caj dab tas nyob nrad.
    Ntawv Vaj 1 zaj 18: 20-40 yog cov lus qhia peb tias. kev yuav twv Ntuj tsis yog ib yam kev yooj yim. Yus txhob lees ua ib tug Yaj Saub Cuav coj tsheej pab neeg yuam kev mus kom deb ntawm Tswv Ntuj txoj xub ke.
    Uas tsis nyog txoj kev coj luag lub cev thiab txoj sia kom tau ncaim mus deb uas yuav tsis tau kev mus ntsib tau Tswv Ntuj.
    Zaj lus no, yog Tswv Ntuj cov lus, nyob hauv Vaj phau ntawv 1. Kuv nthuav zaj lus no, los ua kev kawm paub tab thiab nyob hauv kev hais lus. Txhob ua tim khawv cuav los twv nrog Tswv Ntuj.
    Txoj kev ua tim khawv cuav yog ib txoj kev phem tshaj lwm yam huv tib si. Neeg ua tsis nyog thiab tsis tsim nyog ua kiag li.

    Sacramento hnub tim 24/3/2020.
    Yaj Zoov Ntxheb X.H.



    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5480
    Date d'inscription : 2009-08-18

    Qhia Ntuj Kev Cai. - Page 2 Empty Re: Qhia Ntuj Kev Cai.

    Post  Maiv Tooj 31st March 2021, 8:28 am



    Zaj 507 - NTHUAV LUB THAJ CAV TXIAJ NTSIM.

    Nyob hauv lub thaj cav txiaj ntsim no, txij lub paus mus txog lub ntsis, yog peb ua ib thaj cav txiaj ntsim loj thiab muaj qab hau kawg.
    Yog peb paub lub thaj cav txiaj ntsim no zoo, mas peb tau ua ib yam zoo tas nrho. Muab peb lub neej, txhua yam, los koom rau Tswv Ntuj txoj hlub,kev nyiam thiab kev zam.
    Peb yuav tau lub neej nyob kaj siab lug, ua neej nyob tshav ntuj nrig mus lis:
    Nyob hauv cov zaj peb ua nrog lub thaj cav txiaj ntsim no, peb sawv daws ua twb zoo mloog thawj zaj peb pib hais kom mus txog zaj kawg saib peb hais dab tsi rau Tswv Ntuj.
    1.Peb pib zaj kuv lees txhaum, nyob hauv peb lub neej niaj hnub peb coj, peb tsis nco qab tias, muaj Tswv Ntuj, peb tsis rau siab teev Ntuj.
    peb tso peb lub siab ua ywj fab ywj fwj mus dhau hnub dhau hmo, tsis nco txog ntuj, nyob hauv peb vaj peb tsev.
    Los peb muaj kev tsis sib hwm, muaj sib cav sib ceg, hais lus tsis sib tom thawj. Zoo li puav leej yog kev ua txhaum rau Ntuj thiab rau peb cov txheeb ze peb mus li xwb.
    Peb thiaj xub pib hais zaj kuv lees txhaum rau ntawm Tswv Ntuj thiab peb cov txheeb ze txhua tus.
    2. Thaum peb hais zaj kuv lees txhaum tas, peb thov kom Tswv Ntuj hlub peb sawv daws, uas peb yog neeg tsis paub tab los thov kom Tswv Ntauj zam rau peb.
    3.Peb lees txhaum tas, ces peb koom nrog Ntuj cov Tshiab thiab tsoom neeg siab dawb siab huv ua ke cav cav txog tswv Ntuj. Peb thiaj hais zaj nyob pem ntuj sib koom ua ke.
    4. Peb mam mus nyeem peb tsab ntawv Ntshiab, muab Tswv Ntuj cov lus qhuab qhia los ntuas peb sawv daws.
    Kuv yuav hais ib co lus nyob qis qis ze Hmoob tej qub lus los hais: Thaum peb nthuav cov lus nyob hauv cov ntawv Ntshiab no, mas ib yam li peb Hmoob ua neeb saib los kho peb cov neeg mob.
    Peb sawv daws yog ib pab txiv neeb. tus Xib Hwb thiab tus Leej Choj yog tus thawj txiv neeb. coj peb ua neeb.
    Thaum peb nthuav Ntuj cov lus, ces zoo li peb ua neeb los kho peb peb tej ntsuj plig. Kom sawv los mus raws Tswv Ntuj thiab kho peb lub cev kom yeej tej kev mob kev nkeeg. Uas dab phem coj peb mus zwm rau kev ua txhaum, kev ua txhaum yog kev raug dab
    Peb thiaj muaj lus ua kom peb muaj kev tu siab. Yog tej kev ua txhaum, coj kev phem kev tsis zoo los kis rau peb nruab siab nruab plawv, yog kev tsis ncaj ncees.
    Peb thiaj qaug mus ua neeg phem zwm rau dab, ces peb muab kev txhuam los ua peb tus phooj ywg zoo tshaj plaws.
    Ces peb thiaj sib faib, ua ob pab neeg sib txawv mus: Ib pab yog neeg raug dab. Hos ib pab yog pab raug neej, ob pab neeg no thiaj nyob tsis sib haum ua ke.
    Ces lawv thiaj muaj kev sib tawm tsam mus li, Peb yuav thov Ntuj kom Ntuj rhuav tshem kev raug dab thiab kev raug neej no mus.
    Kom ob pab neeg no, tau plhis tib si los ua Ntuj me nyuam zoo. Kom Tswv Ntuj tau muaj koob meej nyob mus li.
    5.Thaum peb tau mloog, Ntuj cov lus no, meej pem lawm. peb mam los hais zaj kuv ntseeg txog Tswv Ntuj. Peb zoo siab los cav thiab hais tias, peb zoo siab ntseeg txhua yam Tswv Ntuj tstaj tuaj rau peb hnov.
    Peb ntseeg cov lus Yes Xus qhia, ntseeg cov lus Leej Ntuj plig qhia kom lub Koom Txoos tshaj tawm raws li Leej Tswv Yim tshoj qhialos. Ntseeg Tswv Ntuj lub koom Txoos, ua Ntuj me nyuam nyob ua ke ntseeg txhua yam, muaj li Tswv qhia thaud, thiab los mus rau yav tom ntej.
    Peb thiaj hais cov lus thov Ntuj rau, tsoom ntseeg uas yog Ntuj cov tub ki nyob ntij teb no, uas muaj teeb meem niaj hnu no.
    Cov raug teeb meem nyob hauv Lub Koom Txoos… Cov ua nom ua tswv ua thawj neeg, coj peb xeem tsis paub qab hau cia li raug xwv txheej, muaj kev tu siab kev txom nyem…Cov neeg raug huab cua, los neeg tsim teeb meem rau lawv txhua txhua yam.
    6. Thaum cov neeg nqa cov ncuav mov thiab cawv los rau Leej Choj yuav coj los mus txi Ntuj. Yog lub caij, peb cev peb lub neej kev khwv ua noj ua haus los nrog lub thaj cav txiaj ntsim muab los ua tsaug.
    Cov mov thiab cov cawv no, taj peb tej kev iab kev khwv txhua yam. Uas peb niaj hnub khwv kom peb muaj noj muaj haus. Peb muab ib feem me me los ua paj tshab cev rau Tswv Ntuj.
    Kom tau coj mus pab tsoom neeg pluag. Tsoom neeg pluag yog peb sawv daws mus txog tus uas peb tsis paub lawv tib si.
    Peb yuav coj los mus pab rau peb lub tsev teev hawm, tej nuj nqi taws xob, nqis vaj tse puas, los hauj lwm rau cov khoom peb yuav yuav los pab peb lub tsev no txhua yam.
    Peb thiaj ib txhij cev nrog lub ncuav mov thiab ntim cawv coj los ua thaj txi ntuj. Tus txiv Leej Choj thiaj coj los tso rau saum lub thaj txi Ntuj. Nws hais zaj rub Yus Xus nqes los nyob hauv mov thiab cawv.
    7. Ua ntej yuav ua thaj txi Ntuj tiag, Leej choj xub coj peb sawv daws hais zaj Faj Tim Huab tais Ntshiab vim peb yuav ua thaj txi Ntuj nco txog Yes Xus tuaj nyob hauv mov thiab cawv.
    Ntuj cov Tshiab nyob saum ntuj thiab tsoom Leej ntshiab zoo li peb tsoom poj yawm txwv koob, nrog rau cov Leej Ntshiab ua neeg siab dawb siab huv. Li cov hauv paus xa lus thiab tsoom neeg ntseeg nyob ntiaj teb no, peb sib koom suab hu nkauj cav thiab qhuas txog Tswv Ntuj siab ntshiab ua ntej.
    +Ces Lej Choj ua thaj txi Ntuj nws hais Yes Xus cov lus uas Yes Xus qhia hais tias:
    +Qhov no yog kuv lub cev, nej yuav ua li no, kom tau nco ntsoov txog Kuv. Ces Yus Xus tuaj nyob hauv cov mov thiab cawv kom tau yug peb txoj sia nrog peb cov ntsuj plig.
    8. Thaum Leej Choj rub Yes Xus tuaj nyob hauv lub ncuav mov thiab cawv tas. Leej choj tshaj kom peb nrog Leej choj, tshaj Yes Xus kev tuag thiab kev sawv rov los. Kom peb zeem tseeb tias, muaj tiag.
    Thaib thov kom Tswv Ntuj cawm lub sim Ceeb, Vim Yes Xus tus ntoo cuam thiab Nws txoj kev sawv rov los. Tau txhiv leb los ua neeg twj lij.
    9.Ces Leej choj thov Ntuj, kom nco txog thawj pab neeg ntseeg. Txij lub hauv paus los: Yam li thov rau Vaj Qhia, Cov Tswv Qhia, cov leej Choj, cov Leej Tsob Hwb thiab tsoom Ntseeg txhua tus. Kom hlob loj hlob mus nyob hauv lub Koom Txoos, ua lub neej huaj vam mus thoob lub qab ntuj khwb. Kom txhua tus sib haum xeeb nrog Vaj Qhia….
    Thov kom Tswv Ntuj khuv leej sawv daws, kom tsim nyog muaj txoj sia nrog Nkauj Ntshiab Mab Liab, cov hauv paus xa lus thiab tsoom Leej ntshiab. Uas lawv tau ua xis Tswv Ntuj siab, kom sawv daws tau nrog lawv cav txog Leej Tswv Yim ntshiab lub koob meej mus txog txhiab niag tim puas xyoo.
    10. Peb rov los zeem Tswv Ntuj ua peb Leej txiv raws li Yes Xus qhia, ces Peb hais Zaj Peb txiv…
    11. Peb thov kom Yes Xus npo peb ntawm txhua yam kev phem kom txhob rov poob hauv txoj kev ua txhaum. kom Yes Xus pub kev thaj yeeb rau peb…. Ces peb sib Foom Yes Xus kev thaj yeeb, tias…
    Peb npaj siab txais Yes Xus lub cev. Peb thov txhua yam los rhuav kev phem mus tas lawm. Thov Yes Xus tuaj tsa tsev nyob hauv peb nruab siab.
    Yes Xus tuaj nrog peb nyob, Peb ua Yes Xus tsaug thiab caw Yes Xus nrog peb mus tsham peb lub vaj lub tsev.
    Peb taug kev mus tsev, yuav mus ncaj mus ncees, txhob lug kev mus nrog tej dab nkauj dab nraug, dab sib cav sib ntaus coj, cov dab ntawd mus txeem vaj txeem tsev.
    Peb caw Yes Xus nrog peb mus, peb txhob must sis ncaj ke, tsam peb tso Yes Xus pov tom kev. Ces peb yuav coj Yes Xus must sis txog tsev.
    Ces peb yuav co tau cov dab sib ntxub dab tsis sib haum xeeb mus txeem rau peb vaj peb tsev, ces peb yuav rov muaj kev sib tawm tsam nrov nroo ntws li qub nyob hauv peb tsev. Peb yuav rov ua lub neej, tsis muaj kev kaj siab, nyob tsaus ntuj nti.


    Yaj Zoov Ntxheb.



    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5480
    Date d'inscription : 2009-08-18

    Qhia Ntuj Kev Cai. - Page 2 Empty Re: Qhia Ntuj Kev Cai.

    Post  Maiv Tooj 31st March 2021, 8:30 am



    Zaj 508 - NTHUAV QHIA COV ZAJ TEEV NTUJ.

    Thaum peb hais cov zaj teev Ntuj hu nkauj nyob hauv lub thaj txi Ntuj. Yog peb xav kom peb tau ua ib thaj txi Ntuj Ntshiab huv, peb yuav muab siab raws li cov zaj teev Ntuj hu nkauj lub caij peb hais ntawd:
    1.Zaj kuv lees txhaum, vim li cas peb thiaj hais: …
    2. Huab Tais koj khuv leej yuas...
    3. Zaj thov Ntuj…
    4. Peb zaj nyeem yog dab tsis? Yog cov lus hnub no Tswv Ntuj ntuas peb sawv daws…
    5. Zaj kuv ntseeg, yog thauj lub rooj sab laj cov Hauv paus xa lus txiav kom ua li ntawd. Vim muaj neeg sib cav tias, {pob Zeb tog, los Paj Lug tog….
    6. Txais cov mov cov caw, los ua paj tshab thiab cev peb lub neej, peb tej hauj lwm los ua thaj txi Ntuj…
    7. Thaj Txi Ntuj Rub Yes Xus Xus, los nyob hauv mov thiab cawv. Yog yam muaj nqis uas Neeg muab los sam koob sam hmoov. { li neeg nyiam tua ib tug tsiaj los txi rau { N…}
    8. Hais peb zaj thov Ntuj:
    A. Thov Ntuj foom Hmoov zoo rau mov thiab cawv…
    B. Thov Ntuj txuag lub Koom Txoos zoo li Vaj Qhia….
    C.Thov Ntuj pov hwm coj peb nrog Tsoom Leej Ntshiab thiab nrog Yes Xus Leej Niam… { mam cev lub ncuav mov thiab lub ntim cawv Vim yog Tswv Ntuj thiab Yes Xus Pleev}…
    9. Nthuav qhia cov zaj hu Nkauj:
    A. Zaj Nyob Pem Ntuj, Yog Zaj Nkauj uas Ntuj cov Tshiab tuaj hu nkauj cav txog Tswv Ntuj thaum Yes Xus yug los.
    B. Zaj Faj Tim Huab Tais, Yog Yas Kos tus hu ua His Xas Lais, Nws khiav mus rau ib lub teb chaws nws ua npau suav pom tus ntaiv Ntuj. Uas Ntuj cov Tshiab nqis thiab nce lawv hu nkauj cav txog Tswv Ntuj…
    C. Zaj peb txiv nyob saum ntuj , yog Yes Xus qhia Nws cov Thwj Tim kom lawv paub teev Ntuj…
    10. Peb zaj nkauj paj nruag:
    A. Zaj qhib lub txoos teev Ntuj…
    B. Zaj xaus tab ntawv ib…
    C. Thiab zaj xaus lub thaj txi Ntuj…
    C. Yog tus Vaj Das Vis cov nkauj paj nruas cav txog Tswv Ntuj, lub Koom Txoos nyiam siv Das Vis cov zaj, nkauj paj nruag no los hais cav txog ....
    11. Zaj As Les Lus Yas. Lo lus As Les Lus Yas no yog hais tias sawv rov los no…
    12. Zaj koj nyob zoo Mab Liab.
    Koj nyob kaj lug Mab Liab.
    Thawj ntu yog Mab Liab tus Phauj Es Lis xas Npes hais qhuas txog Mab Liab uas yog Tswv Ntuj tus Ntshaistxib Ntuj xaiv los ua Yes Xus Leej Niam…
    Ntu ob yog tus Phauj Leej Ntshiab Npe Nas de hais thaum nws pom Mab Liab tawm nyob tim phab tsua los nws hais…
    Lub Koom Txoos tso cai tshaj kom neeg ntiaj eb hais txuas los mus. Kom tau vam txog Ntuj cov txiaj ntsim cawm lub qab ntuj neeg.


    Zoov Ntxheb X.H.






    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5480
    Date d'inscription : 2009-08-18

    Qhia Ntuj Kev Cai. - Page 2 Empty Re: Qhia Ntuj Kev Cai.

    Post  Maiv Tooj 21st May 2021, 7:53 am



    Zaj 515 - NTHUAV TXOG TSWV NTUJ KEV TSEEM CEEB.

    Tswv Ntuj yog tus tseem ceeb tiag, Tswv Ntuj yog tus tsim ntuj tsim teb, tsim kom muaj txhua yam raws txoj kev tseem ceeb.
    Txoj kev ntseeg txog Tswv Ntuj yog txoj kev tseem ceeb, tsis muaj kev dag raws li Ntuj 10 lo lus qhia. Nyob hauv ntawv Ntshiab. Ua Tswv Ntuj muab rau nws tus tub txib Mais Xes sau tseg nyob saum lub Roob Xis Nais.
    Nyob hauv His Xas Lais keeb kwm los, Yes Xus lub Koom Txoos uas Nws tsa nyob saum lub Pob Zeb, uas dab phem cov rooj loog yuav tsis yeej lub Pob Zeb no.
    =>.Tswv Ntuj yog tus muaj txuj ci, siab tshaj txhua tus dab, siab tshaj txhua tus Tim Tswv roob Tim Tswv hav, los Tim Tswv hauv toj hauv pes.
    Thiab Nws muaj hwj huam, loj tshaj txhua tus dab uas Hmoob ntseeg los tib si. Kuv yuav qhia kom peb sawv daws paub txog tias:
    Tas nrho txhua Haiv neeg los txhua pab neeg ntseeg txog Ntuj los ntseeg txog dab thiab cov Tim Tswv ub Tim Tswv no tib si!
    =>. Cov uas lawv muaj ib txoj kev ntseeg txog ib tus Huab Tais muaj lub npe hu ua Dab, los Tim Tswv ub Tim Tswv no, thiab Nws yog Tswv Ntuj.
    ->.Yog tus neeg twg ua neeg phem, los nws coj phem, ua tub sab tub nyiag, deev luag poj luag sev, los dag teb dag chaw. Ua txhaum hla Tswv Ntuj 10 lo lus qhia tib si mus, mas yog nws coj ib tug yam ntxwv qhia tau hais tias:
    Nws tus Huab Tais, yog tus Huab Tais ua phem li nws coj lawm ntag. Nws tus yam ntxwv, uas nws coj ntawd, yog yam nws tshaj tawm tias: Nws tus Tswv Ntuj los hom dab nws coj, mas phem kiag li ntawd lawm ntag no!
    ->. Hos tus neeg siab zoo, txawj hwm Ntuj hwm neeg, los hwm cov dab Tim Tswv zoo. Mas kuj txhais tau hais tias, nws tus Huab Tais, nws hwm thiab nws ntseeg ntawd, los nws teev, mas yog tus Huab Tais siab zoo lawm tiag!
    Peb cov neeg ntseeg txog Yes Xus lub npe, uas Yes Xus qhia peb hu Tswv Ntuj ua peb Txiv nyob saum ntuj.
    Peb yuav mloog thiab nco ntsoov, mloog Tswv Ntuj 10 lo lus qhia. Uas Ntuj tau qhia rau nws tus tub txib Mais Xes, nyob saum lub Roob Xis Nais. Kom coj los qhia rau Tsoom His Xas Lais thaum lawv nyob teb chaws suab puam ntawd.
    =>. Peb cov neeg ntseeg Ka Tau Liv, nyob saum lub Pob Zeb, uas Yes Xus tsa los kom dab phem cov rooj loog, yuav tsis yeej lub Pob Zeb no.
    Peb yuav ceev faj, Yog peb coj li ib tug neeg hla Tswv Ntuj 10 lo lus qhia no tas tib si mus lawm. Ces cuag li peb yog tus tshaj rau lub qab ntuj neeg no tias:
    Peb tus Tswv Ntuj, mas yog tus phem tshaj, lawm ntag. Nws coj peb ua kev phem kev qias. Cuag li nws 10 lo lus qhia tsis muaj qab hau li lawm.
    Cuag li yog Tswv Ntuj, Nws yog tus qhia kom peb hla Nws 10 lo lus qhia ntawd, mus tas nrho. Nws cov lus ntawd, tsis muaj nqes thiab tsis tsim txiaj dab tsi hlo li lawm.
    Tus uas nws txua tej kev phem kev qias no, mas hnub kawg nws yuav muab tus paj tshab txiaj ntsim dab tsi, los qhia nws tus Tswv Ntuj los nws tus Tim Tswv kav nws tus ntsuj plig tias:
    Nyob ntiaj teb, mas kuv yeej mloog koj lus thiab hwm koj os Tswv Ntuj los Tim Tswv!
    Zaj lus no, mas kuv kuj txhais tsis tau, lub ntsiab kom meej thiab zoo dua. Leej twg xav paub thiab xav to taub zoo, mas nws yuav Vam txog Leej Ntuj Plig pab nthuav thiab qhia rau nws, mas nws thiaj yuav paub thiab to taub zoo tau.

    Yaj Zoov Ntxheb Xib Hwb.



    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5480
    Date d'inscription : 2009-08-18

    Qhia Ntuj Kev Cai. - Page 2 Empty Re: Qhia Ntuj Kev Cai.

    Post  Maiv Tooj 8th July 2021, 7:45 am



    Zaj 525- THAUM YUS XAV UA IB ZAJ THOV NTUJ.

    Thaum yus xav ua ib zaj thov Ntuj, rau neeg muaj mob, los ua rau cov neeg muaj kev txhawj xeeb txog yam ub yam no.
    Mas zoo siv Tswv Ntuj cov lus nyob hauv ntawv Les Vis zaj, 26: 6-8. Los cuab yus zog.
    Tswv Ntuj muaj cov lus hais tias:
    =>.Tswv Ntuj yuav xa kev thaj yeeb tuaj rau peb teb chaws, peb tej chaw nyob los peb tej vaj tse. Kom peb muaj kev lom zem, tsis muaj leej twg yuav ua tau kev txhawj xeeb tuaj rau peb.
    Tswv Ntuj yuav ua kom cov tsiaj yaum ploj mus kom tas nyob peb teb chaws los ntawm peb tej chaw nyob mus tib si.
    Thiab Tswv Ntuj yuav pab kom peb muaj zog cawm, peb cov yeeb ncuab tawm mus. Yog peb muaj 5 leeg, mas peb yuav muaj peev xwm cawm yeej 100 leej.
    Hos yog peb muaj 100 leej, mas peb yuav muaj lub peev xwm caum yeej 10 000 leej.
    =>.Nyob hauv Tswv Ntuj zaj lus no, yog hais txog txhua hom yeeb ncuab tsis huv:
    Nws xav hais txog, Xas Tas thiab nws cov dab tsis huv txhua hom, uas tuaj ntxias neeg ua txhaum hla tas nrho Tswv Ntuj 10 lo lus qhia tib si mus.
    Los tej kev muaj mob nkeeg ua rau leej Tib Neeg muaj kev ntshai thiab txawj xeeb txog.
    Thiab yeej tas txhua yam kev ua phem ua qias, tawm ntawm neeg tej ncauj nplaig los. Uas tsis dawb huv thiaj ua kom neeg muaj kev tu siab.
    Thiaj xeeb muaj xaiv lus, nrog kev ua plaub ntug, los kev sib cav sib ceg sib tua. Muaj kev ploj tuag, rau ntawm neeg lub cev nqaij thiab neeg cov ntsuj plig. Tau tuag mus nrog kev ua txhaum.
    0=>. Mam muab los txuas rau zaj thov Ntuj mus…

    Sacramento
    tim 25/3/2020.
    {Yaj Zoov Ntxheb}



    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5480
    Date d'inscription : 2009-08-18

    Qhia Ntuj Kev Cai. - Page 2 Empty Re: Qhia Ntuj Kev Cai.

    Post  Maiv Tooj 23rd September 2021, 5:50 am



    Zaj 528 - TXIV VAJ QHIA FAAS NTSHIS KUS LUS TSHAJ TAWM.

    Kom lub Koom Txoos, nco ntsoov hu txog Ntuj 3 tug Tshiab. Zoo li Leej Ntshiab Miv Kas, Leej Ntshiab Las Fais thiab Leej Ntshiab Nkas Nplias.
    Yog 3 tug thawj, uas yog Ntuj 3 tug Tshiab, muaj hwj huam hwj chim no. Los pab peb tawm tsam, kom cov ntsuj plig dab phem tsis huv.
    Kom txhob ntxias tau, peb leej tib neeg, cov Ntsuj plig mus zwm tau rau dab phem kev haub kev ntxias, ua kev txhaum tub qaug rau Tswv Ntuj thiab tub qaug rau Tswv Ntuj tsoom tub kis txhua tus!
    Vim Leej Tib Neeg puav leej yog Tswv Ntuj tsoom tub ki koom nrog Tswv Ntuj koom ua ib cuab ib yig nyob hauv Yes Xus Pleev kev nyiam kev hlub thiab kev cawm.
    A.Leej Ntshiab Miv Kas, yog Tswv Ntuj tus thawj Tshiab, uas Tswv Ntuj pub hwj huam hwj chim rau nws. Kom muaj peev xwm ntiab thiab caum Ntxwj Nyoog kom poob los nyob rau ntiaj teb av no!
    Ces tsoom dab tsis huv no, cov lus tawm tuaj ntxias neeg kom hloov tas nrho, mus ua cov lus xyob txhiaj. Ua kom neeg tau siv nyiaj, los siv qaib noog, tsiaj txhu los teev tiam neej thiab dab.
    Mus rau txoj kev muab nyiaj thiab muab tsiaj txhu los pauj mus li rau neej thiab dab li no, mas yog koj mus thov ib lo lus rau ntawm neeg los yuav tau poob nyiaj.
    Thiab thov ib lo lus ntawm dab, los kuj yuav tau poob qaib qe, los tsiaj txhu mus li. Ces peb thiaj hu tau ua cov lus dab xyob txhiaj no!
    Ces nyiam no txhua hom dab leej tib neeg teev tiam no, thiaj yuav tsum siv nyiaj thiab siv tsiaj txhu los ua tas tib si, mus li peb tau pom neeg niaj hnub ua los no.
    B. Tus thawj Tshiab Las Fais, Yog Tswv Ntuj tus Tshiab. Uas Tswv Ntuj tso tuaj pab, cov neeg muaj kev tawm rooj mus tsam muaj kev txom nyem.
    Tswv Ntuj tso nws tuaj ua Leej Tib Neeg luag taug kev, thaum tus neeg taug kev muaj teeb meem, tau pab cawm siav.
    Leej Ntshiab Las Fais yog tus tuaj pab ua Tos Npias luag taug kev. Thaum Tsos Npis tso nws tus Tub Tos Npias mus nqa, Tos Npis cov nyiaj, uas yog nws cov qub txeeg qub teg, nyob nws qub teb qub chaw.
    Tswv Ntuj tso Las Fais, tuaj mus ua Tos Npias luag mus kev. Las Fais tau qhia Tos Npias mus txhom ib tug ntse loj nyob hauv dej.
    Kom Tos Npias, phais ntses lub tsib, thiab ntses daim siab nqa mus tau ua tshuaj. Thaum Tos Npias yuav nws poj niam, Las Fais qhia kom Tos Npias muab ntses daim siab hlawv.
    Ces cov dab txov neeg txoj sia, khiav tawm mus, ua tsis tau xwv txheej, kom neeg tau raug kev ploj tuag mus. Vim tus poj niam Tos Npias yuav ntawd, nws twb yuav 5 tug txiv lawm. Hmo ua tshoob tas mus pwv xwb tus txiv cia li tuag mus lawm,tas 5 tug li.
    Thaum Tos Npias nkawd rov los txog tsev, ces Las Fais qhia kom Tos Npias muab ntses lub tsib los pleev Tos Npias txiv Tos Npis lub qhov muag kom rov pom kev tuaj.
    C. Nkas Nplias, yog Tswv Ntuj tus thawj Tshiab, Ntuj txib tuaj xa moo rau Nkauj Xwb Mab Liab, Uas yuav raug ua Tswv Ntuj Leej Tub Niam.
    Nkas Nplias muaj Tswv Ntuj lub hwj huam, coj txoj kev ntshiab huv ua neeg siab dawb ncaj ncees. tuaj rau neeg Yaj Ceeb txhua leej txhua tus.
    Kom muaj lub siab ncaj ncees ua neeg nyob tab seeb txawj txais Ntuj Ntuj tes dej num. Nkas Nplias tuaj txhawb, Nkauj Xwb Mas Liab thiab Yos Xes nkawd.
    Kom txawj ua lub neej ntshiab huv, nyob hauv txoj kev ua lub neej zais ntshis, nrog txoj kev ncaj, rau Tswv Ntuj lub npe.
    D. Thaum peb xav thov Ntuj 3 tug tshiab no, los pab peb. Peb xav ua tej zaj teev Ntuj hu txog Ntuj Cov Tshiab tsis hias hu txog tus Leej Ntshiab twg li:

    => ZAJ THOV NTUJ:
    Leej Ntshiab Mis Kas, thov koj pab peb tawm tsam, tiv thaiv dab phem kev haub ntxias peb. Huab Tais Tswv Ntuj, Mis Kas yog koj tus thawj peeb zeej.
    Peb thov koj tso Miv Kas tuaj pab peb tawm tsam, tiv thaiv txhua hom dab xyob txhiaj. Tawm ntawm dab Xas Tas lub tswv yim, tuaj haub ntxias peb.
    Peb thov koj tso lus rau Miv Kas cawm txhua hom dab xyob txhiaj, mus rau ntuj txias teb tsaus. Muab lawv kaw rooj kom ntom nti. Txhua hom dab xav coj peb rhuav Tswv Ntuj 10 lo lus qhia ua tsis tau dab tsi. peb vam txog peb tus Huab Tais Pleev, Ua li…


    Yaj Zoov Ntxheb X.H.



    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5480
    Date d'inscription : 2009-08-18

    Qhia Ntuj Kev Cai. - Page 2 Empty Re: Qhia Ntuj Kev Cai.

    Post  Maiv Tooj 31st December 2021, 6:33 am



    Zaj 558- TXOJ KEV NTSEEG THIAB MLOOG NTUJ LUS.

    A ->.Nyob hauv txoj kev ntseeg, yog yus txawj xav. Mas cov neeg zoo, tsis yog cov uas lawv tau nyob kaj siab lug, Muaj tej yam tob dua li peb xav tau nyob hauv peb nruab siab!
    Pe yua paub tias; cov uas lawv tau nyob kaj siab lug, lawv tau yeej tas txhua yam. Ua kom lawv muaj yeej thiab nyob kaj siab lug, nyob hauv lawv lub neej.
    Mas muab piv li tus neeg muaj peev xwm, nws tau yeej txhua yam, mas feem ntau lawv tau hla tswv ntuj 10 lus qhia mus lawm.
    Lawv txawm tsis tau hla tas nrho, los lawv tau hla ib nrab saum cov lus qhia mus lawm. Zoo li lawv yeej lawv tus txij nkawm, los lawv tau yeej lawv niam lawv txiv thiab cov txheeb ze lawv mus lawd.
    Zoo li lawv twb tau ua tub qaug rau Ntuj cov me nyuam uas nrog lawv nyob thiab tau ua tub qaug rau Ntuj lawm. Lawv muaj lub ntsej muag plhu tuab, tsis paub kev txaj muag.
    B->. Cov neeg zoo uas nyob rau ntawm Tswv Ntuj sab, mas yog cov neeg raug kev txom nyem, vim lawv zam rau luag thiab ua kom haum tus neeg cem taus thiab yws taus nyob ze ntawd.
    Vim nws tuaj yeem mloog Tswv Ntuj lus, kom tau ua rau txhua tus neeg nyob ua ke muaj lub siab kaj. Thaum nws tau ua li hais no, nws twb tau cheem tus yeej luag, kom txhob hla tswv Ntuj cov lus qhia mus deb dhau lawm thiab.
    Nws tuaj yeem ua tus swb, kom Tswv Ntuj zam rau tus muaj peev xwm thiab pub txiaj ntsim los pab nws hloov nws tus kheej, kom nws tau zoo dua tuaj.
    Tus zam rau luag, mas nws tau ua lub neej nyob txom nyem heev. Yav tom ntej Ntuj yuav pub ib lub siab nyob kaj lug rau nws. Vim nws txoj kev ua siab ntev tiv kev nyuaj siab.
    C->. Cov uas xub tau txoj hmoov zoo nyob ntiaj teb no, lawv tsis muaj kev ceev faj txog lawv tus Ntsuj Plig. Lawv zoo li tus neeg zoo siab mus kawm cog tshuaj.
    Lawv mus khaws tau tsob tshuaj muaj kuab los cog, txog lub caij nws tus Ntsuj Plig yuav nce hauv toj mus thawj thiab. Ces nws nqa tau tsob tshuaj muaj kuab muaj taug ntawd nrog nws mus.
    Ces nws yuav hla tsis dhau lub rooj vag muaj rab hniav tuam tob. Zoo li tiam neeg no, uas lawv tau ua luam txhaum cai, lawv xav kom tau nuaj nyiaj ntau. Qhov kawv lawv raug muaj nyob txim rau tsev loj cuj, ces lawv twb poob qab lawm ntau ncua kev.
    D->. Lub caij uas neeg ntiaj teb hais tias; txog lub caij lub ntuj lub teb yuav kawg. Lo lus no,mas tsis muaj leej twg yuav paub txog qhov tseeb. Peb leej tib neeg nyias muaj nyias lub caij uas lub ntuj lub teb yuav kawg rau nws.
    Tsis hais tus neeg phem los tus neeg zoo li, muaj tej tus neeg zoo zoo kawg. Nws lub ntiaj teb cia li kawg rau tag kis los muaj. Hos tej tus neeg phem tas rho, nws raug neeg foom lus phem muaj khawv yeej khwv yws ntau kawg. Los nws lub ntuj lub teb tseem nyuav nyob ntev mus txog 120 xyoo los muaj.
    Yog Ntuj tib leeg thiaj paub txog, peb neeg ua neej nyob ntiaj teb no. Peb neeg siab kub heev, muaj tej tus neeg nws lub ntuj lub teb tsis tau kawg. Los peb tau muab nws yuam mus kom kawg, los ua tau nws yeej ua tau thiab.
    Zoo li nws muab phom los tua kom tuag, los nws muab thawb kom poob dej los poob tsua tuag mus. Ces yog Yus los luag tau muab nws yuam mus kom nws lub ntuj lub teb kawg mus.
    E->. Peb yuav mloog thiab hwm Tswv Ntuj txoj cai, peb uav tau xyaum ua siab ntev. Maj mam mus raws li Leej Ntuj Plig txoj kev cob qhia yus tus kheej, saib yus hloov thiab kho puas tau yus kom yus rov zoo tuaj.
    Kuv ntseeg tias; cov kev txhaum uas neeg ua yuam kev, mas Ntuj yuav zam tib si mus. peb nco txog tus tub sab uas luag muab nws ntsia rau saum ntoo cuam nrog Yes Xus ntawd.
    Nws hias ib lo lus rau Yes Xus tias; Yes Xus thaum kom mus txog koj lub teb chaws thov koj nco txog kuv thiab mog!
    Yes Xus teb meej thiab tseeb kawg tias:
    Kuv hais tseeb rau koj, hnub no kiag, koj yuav tau nrog kuv nyob pem kuv lub teb chaws tau nyob thaj yeeb thiab tshav ntuj nrig mus li!
    F->.Peb yuav paub thiab nco tias; Leej Ntuj Plig. Tus uas Yes thov kom Leej Txiv tso tuaj nrog peb nyob. Nws tuaj tsa tsev nyob hauv peb nruab siab.
    Nws yuav txib qee leej neeg tuaj hais lib lo lus qhuab qhia peb ib vuag, los hais ib lo lus qhia rau peb. Tej zaum yog yus tus txij nkawm, los yog yus niam, los yus txiv, los yus ib tug txheeb ze.
    Lawv tsis ua Yaj Saub, los yus yuav tau mloog thiab. Vim Leej Ntuj Plig qiv thiab siv lawv lub ncauj los qhia yus ib vuag mus xwb.
    Lawv tsuas hais raws li txoj kev tseeb thiab zoo xwb, Yog yus txawj mloog ces yus tau txais Leej Ntuj Plig los qhia ib zaug. Los kho thiab cheem yus txoj kev uas yus npaj siab ncaim ntawm Tswv Ntuj mus kom txhob mus deb dhau.
    Yus txhob mus xyaum mloog dab lus, muab luag nthe, vim yus tsis paub tias, Leej Ntuj Plig qiv luag lub ncauj los hais ib lo lus. Los yog dab txbob txwm siv dab lus los tshoj kom yus sib kev phem los tawm tam rau luag li.
    G->. Peb yuav paub tias; peb txoj kev tuaj nyob ntiaj teb no, mas peb muaj dej num ntau kawg. Peb yuav tau ua kom tiav log, thaum peb rov mus cuag peb tus Tswv. Peb thiaj nqa tau paj tshab mus qhia tus Tswv tias peb tau ua peb hauj lwm tiav, zoo npaub li cas.
    Thiab peb coj tau tej yam zoo npaum li cas los cob rau yus tus Tswv tau xa yus, tuaj nyob tiaj teb no. Ib yam li peb yuav hla mus ib lub teb chaws tshiab.
    Peb yuav npaj kom peb muaj daim ntawv hla teb chaws. Peb thiaj yuav tau mus pom luag txuj luag ci zoo li cas. Yog luag kom yus nthuav yus txuj ci, mas yus thiaj muaj txuj ci los nthuav pub rau luag saib.
    H->. Nco ntsoov, cov dab phem mas lawv nyiam tuaj cuam tshuam rau Neej tib neeg lub neej nyob ua txij ua nkawm kawg nkaws li.
    Dab phem nws paub zoo kawg, txoj kev ua txij mkawm uas Ntuj muab pub rau Noob Neej mas yog ib lub neej zoo. Muaj kev sib ua luag mus rau sab kev txom nyem thiab sab kev ua neej nyob kaj siab lug.
    Dab phem thiaj nyiam tuaj cuam tshuam kom Noob Neej muaj kev ntshaw ua txij ua nkawm nrog lwm tus tus neeg.
    Ua kom tsis paub dhuav, ces ua tshaj mus rau qhov ua tub qaug rau Ntuj thiab tub qaug rau tus txij nkawm uas yog yus daim ntawv nyiaj keeb puaj txwm uas yog Ntuj muab los rau yus ntawd. Kom tsis haum txoj kev txij nkawm ua Ntuj tsim ib tug txiv neej thiab ib tug poj niam los sib hlub ua ke.
    Ces Neeg muab txoj kev sib hlub hloov los ua txoj kev sib ntxub, Kom Leej tub neeg ua tsis tau yam zoo rau Ntuj thiab rau yus tus txij nkawm kom tau sib ua luag mus pub niaj puv xyoo.
    Yus muab rhuav mus ua txoj kev thuam Ntuj thiab saib tsis taus yam muaj nqi ua Ntuj tsim los pub rau neeg.
    Txhua yam zoo yus muab rhuav ua piam tseem tas, yus nqa ib co toob xib tsis yog leej twg li thiab tsis muaj qab hau mus qhia rau Ntuj xwb. kuj tsis yog yus li ua nrw ua nrees mus rau Ntuj saib.

    Sau nyob Sacramento
    Tim 22/7/2021.
    Yaj Zoov Ntxheb X.H,



    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5480
    Date d'inscription : 2009-08-18

    Qhia Ntuj Kev Cai. - Page 2 Empty Re: Qhia Ntuj Kev Cai.

    Post  Maiv Tooj 6th January 2022, 6:20 am



    Zaj 560- TUS NEEG MUAJ KEV TSO SIAB RAU NTUJ.


    Cov neeg tso siab rau Ntuj, mas yuav txhob ntaus siab me.
    Hais rau peb sawv daws paub, thaum peb yug los ua neeg nyob rau ntiaj teb no. Mas Tswv Ntuj tso ib tug Tshiab, tuaj nyob ze peb tus Ntsuj Plig. Kom nws tau coj peb tus Ntsuj Plig nyob ze Tswv Ntuj.
    Vim muaj lub txiaj ntsim uas Ntuj tso ib tug Tshiab tuaj nyob ze peb cov Ntsuj Plig! Mas thaum muaj ib tug neeg, uas nws tau ua neeg thoob tsib tuaj lawd.
    Cov dab tsis hu, caum hom neeg ntawd ntau dua cov. Dab tuaj ntxias thiab yuam cov thawj neeg tuav hauj lwm los tuav cov kab xwm loj no.
    Uas lawv yog cov hais lus qhuab qhia thiab ntuas neeg mus rau sab zoo. Mas cov dab tsis huv caum thiab nyob ze cov thawj neeg no, heev dua lwm cov.
    Cov dab tsis huv no, nyiam ntxias txhua hom neeg kom lawv nyiam ua cov kev txhaum hla Tswv Ntuj 10 lo lus qhia tas tib si mus!
    Kom yus muaj kev tu siab, rau Tswv Ntuj thiab tu siab rau neeg. Ces sawv daws muaj kev sib tu siab tsis sib raug zoo thiab tsis nco qab txog Ntuj los nco txog yus tsoom txheeb ze.
    Ces yus cia li ua ib tug neeg poob tseeb rau cov dab tsis huv ntawd, kev haub ntxias. Hais rau cov neeg ntseeg txog Tswv Ntuj nyob hauv Yes Xus lub npe.
    Thaum peb los ntseeg lawd, peb tau kawm Yes Xus zaj lus txaus pub lub Cim Ntxuav lawm. Hnub peb txais lub Cim ntxuav, mas peb tus Ntsuj Plig tau yug los tshiab dua nyob hauv Tswv Ntuj lub hwj chim lawm.
    Lub Koom Txoos Ka Tau Liv, uas Yes Xus tau tsa nyob saum lub pob zeb. Uas Yes Xus tau hais tias; dab phem cov rooj loog yuav tsis yeej lub pob zeb no.
    Mas hnub ntawd, lub Koom Txoos tau xaiv ib tug Leej Ntshiab, lub npe los pov hwm tus txais lub Cim ntxuav. Kom cov dab tsis huv txhob ntxias cov neeg ntseeg kom lawv tau mus ua kev txhaum hla Tswv Ntuj 10 lo lus qhia. Mas tsis hais, poj niam los txiv neej, tus laus los tus hluas, cov hlob los cov yau uas paub tab lawd.
    Kom sawv daws nco ntsoov tias; nyias muaj nyias ib tug Tshiab, nyob saum ntuj thiab ib tug Leej Ntshiab pov hwm nrog yus.
    Peb yuav vam txog Ntuj tus Tshiab thiab peb tus Leej Ntshiab pov hwm, kom nkawd pab peb lub caij peb thov Ntuj thiab cav txog Tswv Ntuj.
    Yog koj xav paub zaj lus no kom tseeb dua, mas koj mus saib ntawv Tos Npis, zaj 12: 6-21, hais tias:
    Thaum Tswv Ntuj tus Tshiab coj Tos Npis thiab nws tus tub Tos Npias, mus rau ib qho chaw xu kev me ntsis. Ces Ntuj tus Tshiab Las Fais hais rau nkawd tias:
    Neb yuav ua Ntuj tsaug thiab cav txog Nws; rau cov neeg tseem ciaj ua neej nyob ntiaj teb no, tau hnov thiab mloog. Tswv Ntuj tau ua zoo rau neb, neb yuav paub tias:
    Thaum neb teev ntuj, mas yog kuv nyeem neb cov lus nyob ntawm Tswv Ntuj xub ntiag rau Nws mloog thiab thaum neb ua hauj lwm zoo, mas kuj yog kuv cev neb tej yeeb koob muaj nqes rau Tswv Ntuj.
    Hos thaum neb muaj mob nkeeg los muaj kev txhawj xeeb thiab muaj kev ntxov siab. Mas yog Tswv Ntuj xa kuv tuaj pab nej thiab kho nej tib si!
    Kuv yog Ntuj tus Tshiab Las Fais, kuv nyob hauv Tswv Ntuj 7 Leej Tshiab nyob ntawm Tswv Ntuj lub hwj Chim, cia rau Tswv Ntuj txib.
    Ces Tos Npis thiab Tos Npias nkawd, hnov cov lus no ntawd ntshai, Las Fais. Ces Las Fais hais ib lo lus rau nkawd tias; neb nyob kaj lug hauv txoj kev cav txog Tswv Ntuj mog!
    Ces Las Fais cia li ploj kiag, ntawm nkawd xub ntiag mus lawm!
    Zaj lus no, yog ib zaj zoo pab peb lub caij peb teev Ntuj, los thov Ntuj thiab cav txog Tswv Ntuj. Tswv Ntuj txoj kev pab thiab hlub neeg, peb yuav ntseeg thiab tso siab rau lub caij peb thov Ntuj, los cav txog Tswv Ntuj, tus muaj lub siab nyiam thiab hlub neeg. Nws cia li muab hwj chim txiaj ntsim pub rau cov neeg vam txog Ntuj li hais no!
    Thawj lo lus thiaj xub hais ua ntej tias; tus ntseeg thiab tso siab rau Tswv Ntuj, txhob ntaus siab me.

    Yaj Zoov Ntxheb X.H.




    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5480
    Date d'inscription : 2009-08-18

    Qhia Ntuj Kev Cai. - Page 2 Empty Re: Qhia Ntuj Kev Cai.

    Post  Maiv Tooj 17th February 2022, 11:25 pm



    Zaj 563- PIAV LUB NEEJ ZWM RAU DAB LUB TSWV YIM.


    Txij li thaum ntuj tsim teb raug los, Tswv Ntuj tau tsim lub ntuj lub teb tiav lawd, Ntuj tau tsim Leej Tib Neeg ua tus kawg. Kom Neeg zoo li Ntuj tus duab, ces Ntuj tau tsa Leej Tib Neeg ua tus loj.
    Saib thiab kav txhua yam Ntuj tau tsim los nyob ntiaj teb no, kom tas txhua yam zwm rau Neeg, ua tus saib thiab txuag mus.
    Kom muaj txaus siv mus rau txhiab txhiab vam vam xyoo, mus tsis txawj kawg. Tus dab Ntxwj Nyoog, yog Ntuj ib tug Tshiab nyob ze Tswv Ntuj. Ntuj tso nws ua tus xa xov thiab los saib neeg Yaj Ceeb Neeg. Hloov Tswv Ntuj chaws, qhia txhua yam kom Neeg ua haum Tswv NTuj siab.
    Saib xyuas lub Sim Ceeb neeg, kev txhawj xeeb pub rau Neeg kev kaj siab los kev ntxhov siab. Kom Ntxwj Nyoog ua tus dab daws tso txhuam yam, kom neeg muaj kev thaj yeeb kev kaj siab.
    Ces Ntxwj Nyoog tau ntxeev siab rau Tswv Ntuj, nws xav ua tus tswv kav neeg, tsis xa moo rov mus rau Tswv Ntuj!
    Ces Tswv Ntuj thiaj hais kom Miv Kas, muab Ntxwj Nyoog caum ntiab los pov rau ntiaj teb. Dab txawm poob los rau ntiaj teb los dab yeej tsis kam swb li.
    Dab ntxias Noob neej, kom Noob Neej ua tub qaug rau Ntuj mus li, tiam dhau tiam! Ces dab thiaj yees yuav lub cev mus ua tus Zaj Nab, los ntxias ob tug niam txiv hauv paus Noob Neej kom noj lub txiv uas Ntuj txwv tsis pub noj.
    1.Ntxwj Nyoog thiaj siv Zaj Nab, lub cev uas muaj peev xwm los ntxias, thawj tug poj niam Ntuj tsim los, kom de lub txiv tsis hwm Ntuj los noj.
    Ces txij hnub ntawd los, neeg thiaj ntseeg tias; zaj yog tus muaj peev xwm loj. Nyob hauv Suav thiab Hmoob cov dab neeg, mas lawv ntseeg tias; zaj yog tus loj thiab muaj zog tas nrho.
    Cov laus tuag mus lawm, mas yuav rov mus thawj thiab ua neeg dua. Mas yuav tau mus nrhiav kom tau zoo looj mem Zaj, nyob nruab tiv txwv. Thaum mus thawj thiab dua, los ua neeg, mas thiaj yog neeg muaj peev xwm thiab muaj zog.
    Hais lus los luag yuav hwm thiab yuav ntshai, yog leej twg tsis hwm los tsis mloog, mas nws yuav muaj peev thiab muaj zog yuam los muab txo mus zoo li yog tsiaj txhu.
    Lub tswv yim no, mas Hmoob thiab Suav ntseeg kawg. Niaj hnub lub zim txwv no, tej neeg laus lawv tseem cav ncha ntws tias muaj tseeb.
    Neeg tseem ntseeg tias; zaj txawj ua kom dej tawv tau ua pas siab tuaj, los ua tau kom dej huam loj thiab zaj ua tau toj pob pes nphau los txhub kom cov tsis mloog tau ploj tuag mus!
    Vim zaj nyob tau nruab deg thiab nyob tau nruab tiv luaj tiv av, zaj yuav pheej toj roob hauv pes los ua teb tiaj teb tus yeej tau no!
    Nyob sab ntuj As Xias mas tseem neeg tseem ntseeg tias; yog qhov tseeb kawg li. Ntuj los nag ua rau av xoob muaj toj pob nphau. los tej laus yeej hais tias; yog zaj ua xwb, yog muaj neeg ua tub qaug rau zaj lawm.
    Dab lub tswv yim, mas dab tsis kam ua tus swb mus li ib zaug li. Txhua yam txawv tshwm sim los, mas kom tej laus hais tias; yog dab ua thiaj muaj tau li ntawd.
    2. Tab yog dab swb Ntuj mus lawm, los dab tsis kam swb rau leej tib neeg. Kom neeg txhob hais tau tias; dab tau swb Leej Tib Neeg mus lawm thiab.
    Tej laus thiaj hais lo lus tias; neej dab nyob ua ke, dab neeg nyob sis nce. Neej dab nyob ua pawg, dab neeg nyob sis xyaws.
    Txawm yog dab ua tsis tau dab tsi rau lub ntuj, los kom dab ua tau rau Ntuj tsoom tub ki, muaj kev kub ntxhov txog tej kev ua neej. Kom neeg tseeg thiab swb mus rau dab sab tas txhua yam.
    3. Thaum Ntuj pub tswv yim thoob tsib to nrog rau ib tug neeg twg, mas dab ceev nrooj los caum thiab raws qab qhia tswv yim, hloov qhov tseeb los ua yam cuav, kom tau hem neeg.
    Kom neeg ntseeg tias; yog dab ua, cov neeg ua phem dhau kev cai lawm, dab qhia tias; nws yuav poob mus rau kev txhaum thiab kev qhaum.
    Mas kom muaj tib si li, los ntawm kev ua txhaum los kev khaum los. Ces yog kev ua tub qaug dab thiaj raug khaum li ntawd mus!
    Thawj lub caij uas dab ntxias kom Neeg ntiaj teb ua kev txhaum ntau heev, neeg tseem phem qias neeg tshaj tej tsiaj muas lawd.
    Ces Ntuj yuav rhuav neeg kom ploj mus, yog lo lus uas neeg ntiaj teb hais kam los tias; dej nyob ntiaj teb ntawd.
    4. Lub caij ntawd, tshuav yawg Nom Hes, thiaj hwm Ntuj, ces Ntuj qia kom Yawm Nom Hes mus txua nkoj, Hmoob hais tias; Nom Hes mus zoj nruas daj, kom nruas daj ntab yees rau saum yaj no.
    Yawg Nom Hes thiaj tsim tau nkoj los, nws hu Noob tsiaj Noob Txhu nkag mus tas hauv lub nkoj lawm. Ces ntuj los nag, dej thiaj nyab Noob Neej tuag tu noob thoob qab ntuj khwb.
    Neeg ntiaj teb, Noob Neej Noob Tsav nyob mus tuag tas. Thiaj tshuav yawg Nom Hes tsev neeg, ua Noob Neej nyob rau ntiaj teb no.
    Yog lub zim txwv uas Hmoob hais cov zaj tshoob tias: Noob Neej Noob tsav tuag mus tu noob, tshuav Nkauj Mim thiab nraug Nus nkawd ob tib tug, mam rov los tsim Noob Neej Noob tsav dua tshiab.
    5. Nom Hes cov tub, muaj peb leeg, tus tub hlob hu ua Kag, nws muaj tsos nqaij daim tawv dub, pluav caj plaub hau caws
    Tus tub nrab hu ua Xeeb no, nws muaj tsos nqaij daim tawv daj, plaub hau dub ntev, npws loo thiab pliab ntswg.
    Tus tub ntxawg hu ua Yas Fes, nws muaj tsos nqaij daim tawv dawb, plaub hau daj txho, muaj cag siab ntshuas, qhov muag kaim zaj yees.
    Muaj raws li Hmoob hais tias: Ob niam txiv yug tau lub taub hwb los, ces txawj loj thiab hnov hais lus hauv tuaj.
    Nkawd muab chaws las los laum ib lub qhov, cov dub lawv yog tus tij, ces lawv xub tawm los, lawv tau so cov kauv hnyoov dub mus tas nrho lawm. lawv thiaj dub nciab li ntawd.
    Tus tub nrab nws yog tus kwv nrab cov kauv hnyoo, tseem tshuav lo daj lis. nws tawm los ces nws txawm yog tus daj lis thiab pliab ntswg.
    Hos tus tub ntxawg yog tus yau, thawm nws tawm los tom qab, ob tug ua tij twb muab lub qhov ntawd so huv si tas lawm. Nws tawm los ces nws tsis lo, ib qho kauv hnyoov li. Nws thiaj tawm los tug dawb paug lawm xwb, qhov muag kaim yees!
    6. Ntuj ua kom Nom Hes cov tub muaj kev sib ncaim mus puv tas ntiaj teb:
    Thaum dej nqhuab tas lawd, Nom Hes cov xeeb ntxwv tsim tus ntaiv pej thuam Npa Npes. Lawv hais tias; yog Ntuj rov tso dej los nyab ntiab teb, mas lawv yuav nce saum tus pej thuam no mus kom nto plaws rau saum ntuj.
    Lub tswv yim no, yog lub tswv yim tau twv thuam txog Tswv Ntuj lawm. Ces Ntuj ua kom lawv muaj ntau xeem lus sib txawv, ib pab hais lwm pab tsis paub.
    Ib tug hais tias; koj muab lub pob zeb rau kuv, ces nws cev ib tug ntoo rau. Muaj ntau yam tsis sib to taub li, ces lawv nyob tsis tau ua kev lawm.
    a-> Kag yog tus tub hlob, lawv cov tub sib raws mus nyob rau Afri Kas teb lawm.
    b-> Xeeb cov tub lawv sib coj tsiv los hla Indias teb los rau As Xias teb lawm. Lawv yog Hmoob, los Suav Zim pee, kaus Lim, Cob tsib, Los Tsuas, thaib thiab….
    c. Yas Fes cov xeeb ntxwv, lawv los nyob rau Aws Los Pas teb. Thiaj muaj tej lo lus tseem nyob ze ze kawg zoo li; Los tsuas hais tias; Naum no. Hmoob hais tias no; Fab Kis hais tias; chaud {sau} no. Los Tsuas hais tias; kub kub no, { hobn no,} Mes Kas hais tias; hot no thiab, muaj qee lo lus hais tsis tau txawv deb pes tsawg thiab.
    7. Rov tig los hais rau dab sab, mas dab yeej tsis tso Neej tseg li, dab yeej ua kom yeej Noob Neej mus li xwb. Nyob rau hauv lub ntiaj teb no, Ntuj tso tsawg leej tuaj ua Yaj Saub qhia, los dab tuaj txeeb mus ua dab tug tib si!
    a-> Ntuj tso Hmoob tus Siv Yis tuaj kho mob kho nkeeg los dab txeeb mus tib si! Dab tau dag tias: Dab muaj mob nkeeg ib yam li neej thiab, kom Siv Yis mus kho dab nyob rau dab teb.
    Neej lub ces mus tsis tau, yuav tau mooj los yees tus Ntsuj Plig mus xwb thiaj tau. Ces thaum Siv Yis tus Ntsuj Plig mus li ntawd lawm. Ces dab paub tias; Siv Yis pab tsis tau Neej lawm, ces dab ua kom Siv Yis poj niam me nyuam tuag tas nhho. Thaum Siv Yis poj niam tuag, ces muab Siv Yis tus tub yees ua nyuj tua rau Siv Yis poj niam lawm.
    Kom Siv poob ntees, ces Siv Yis muab nws cwj neeb cwj yaig pov tseg. Nws nce rov mus rau pem Nyiaj Yig Koo Tsua lawm. Kom Noob Neej mam mus khaws tus yeej huam los ua, ces neeg cov txuj no tau zwm rau dab ua dab tug tas nrho mus.
    Ces thiaj muaj dab Neeb dab tshuaj, Neej yuav nyiaj thiab noj nqaij. Hos dab yuav cov Ntsuj Plig thiab xyab ntawv. Ces Hmoob thiaj muaj dab neeb dab tshuaj tuaj. Ua los pauj rau dab tas rau dab yuav, thiaj pauj rau neej noj.
    8. Dab tsis yog saib ib txoj kev ntseeg xwb. Dab saib tas nrho txhua hom kev ntseeg:
    a-> Dab xub ua kom Hmoob cov kev ntseeg sib cais mus tsis sib haum los sib pab tsis tau ua ntej txhua hom dab qhuas, yog tsis zoo ib yam, mas pab tsis tau li, yog koj ua lawm ces yuav txhaum dab tuaj:
    Yus yuav tau muaj mob los raug kev txhaum ua kom yus raug kev khaum mus. Ua rau neeg tau dig muag, los ceg tawv, sav tes sav taw mus. Yuav tau thov dab kho, los pauj npaum ub npaum no rau dab. Tej zaum kuj zoo tej zaum, los zoo tsis tau li, vim raug kev txhaum loj dhau lawm.
    b-> Dab saib txhua hom kev ntseeg kom muaj kev sib ncaim mus ua ntau pab ntau pawg:
    ->Kev ntseeg txog Yes Xus, mas dab haj yam siv zog ua kom muaj kev sib ncaim loj heev, ua txog qhov, muaj kev sib tua ua tsov ua rog loj kawg rau keeb kwm kev ntseeg!
    -> Thaum Yes Xus yug los, muaj peb tug Vaj yog cov kws txawj saib hnub qaub. Pom ib lub hnub qub ua txawv tshaj, lub hnub qub no mas yeej muaj ib tug Vaj yug los tshiab nyob ntiaj teb no lawm.
    Ces peb tug Vaj raws qab tuaj kom tau pe hawm tus me nyuab Vaj tshiab no! Cov kws hnub qub raws lub hnub qub no, tuaj txog His Xas Lais teb. Lawv paub tseeb tias; yog Tus Vaj His Xas Lais lawm. Ces lawv nug txog tus me nyuam Vaj yug los tshiab no! Saib nyob qhov twg, lawv yuav mus pe hawm no! Dab ua kom Tus Vaj Hes Los no, rov taw tuam Ntuj, nws tsis paub tias; Leej twg yuav yog tus Vaj Tshiab yug los no.
    Ces nws xa tub rog mus muab cov me nyuam. Nyob Npe les hes, tus muaj nyuam qhuav yug los rau tus muaj 5 xyoo yog me nyuam tub. Ces muab lawv tua pov tseg kom tas nrho.
    Ces Ntuj xa ib tug Tshiab tuaj qhia, Yos Xes coj Mab Liab thiab Yes Xus mus rau Hais Nkws Tos teb lawm.
    Thaum tus Vaj Hes Los tuag tas, ces Yos Xes coj Mab Liab thiab Yes Xus los nyob rau Nas Xas Les. Yes Xus muaj 30 xyoo lawm, Yes Xus yuav mus tshaj Ntuj lus rau Neeg ntiaj teb paub.
    Dab rov tuaj ntxias Yes Xus peb zaug, hais txog peb zeb txia ua mov, thiab kom Yes Xus pe dab phem, thiab dhia saum ru tsev mus lawm hauv av. Ntuj cov Tshiab nyob saum ntuj lawv yuav nqa Yes Xus nyob hauv lawv ob txhais tes.
    Yes Xus hais rau dab phem tias; tus koj yuav pe pe hawm Tswv Ntuj. Ces Yes Xus ntiab tus dab phem no kom khiav mus!
    Yes Xus tshaj txoj kev cawm neeg tau 3 xyoos, lub caij Yes Xus yuav cawm neeg ntiaj teb. Dab phem tuaj ntxias Yes Xus tus thawj tim, hu ua Yus Das Kas Lis Yaus, kom nws muab Yes Xus muag 30 lub txiaj nyiag rau cov thawj Leej Choj.
    Kom tau muab Yes Xus tua nyob saum ntoo cuam khaub lig. Ces Yes Xus txoj kev txhiv ntiaj teb neeg lub txim raug kev txom nyem tuag nyob saum ntoo cuam khaub lig.
    9. Thaum Yes Xus Tsa Xis Moos ua lub pob Zeb txhim lub Koom Txoos ntseeg Ntuj nyob ntiaj teb no rau saum Pob Zeb.
    Yes Xus ho xaiv Paj Lug, los ua Yes Xus ib tug thwj Tim, hauv cov neeg hiam Tswv Ntuj lub Koom Txoos los ua Yes Xus ib tug Hauv Paus xa lus.
    Paj Lug nws tuaj ntsib cov thwj tim tas. Ces nws mus tsaj Ntuj lus, nyob hauv xov pov txwv. Dab Phem tuaj ntxias Paj Lug, cov neeg ntseeg kom lawv sib tawg mus ua ob pab.
    Leej Ntuj Plig coj Paj luag mus nrog cov Thwj tim li Pob Zeb thiab Zam lawv. Ces Lub Koom Txoos ua thawj lub rooj ncauj lus lus nyob Yes Lus Xas les kom cov ntseeg sib haum xeeb.
    Lawv thiaj sau zaj peb txiv nyob saum ntuj thiab zaj kuv ntseeg txog Tswv Ntuj. kom sawv daws sib haum xeeb nyob hauv zaj cav txiaj ntsim, uas lub Koom Txoos hu ua lub thaj txi Ntuj, txij hnub ntawd los txog niaj hnub no.
    Kom paub tias; Lub Koom Txoos tsis tau sib ncaim mus ua ob pab. Yog tom qab no, tus Vaj Los Mas hu ua Koos Taa Tee nws txais kev ntseeg tas, nws mus nyob Tus Ki teb. Ces lub Koom Txoos cov nrog tus Vaj Koos Taas Teev nyob, lawv xav txeej ua tus Vaj Qhia. cov nyob Tw Ki teb thiaj ncaim mus ua pib pab hu ua cov Os Tos Dov no.
    Lub Koom Txoos muaj ob pab, Cov Ka Tau Liv thiab cov Os Tos Dov. Los txog xyoo 500 Muaj tub tug Leej Choj sawv los tiv Lub Koom Txoos, nws hu ua Lws Tes. Nws ua tus thawj coj ib co neeg ncaim ntawm lub Koom Txoos uas Yes Xus tau tsa tseg nyob saum lub Pob Zeb ua dab phem cov rooj loog yuav tsis yeej lub Pob Zeb no.
    Kom muaj kev sib ncaim, ces muaj peb pab neeg nyob hauv lub Koom Txoos ntseeg txog Yes Xus sib ncaim mus lawm. Puav Leej yog Dab Phem lub tswv Yim tuaj tshob kom lub Koom Txoos piam sij mus.
    Ces thiaj muaj cov Protestan, Lo lus no txhais hais tias; lawv yog pab ncaim mus. Lo lus hais tias; Ka Tau Liv, txhais hais tias; Lub Koom Txoos cia rau lub qab Ntuj Neeg no.
    Tau ntau xyoo tom qab no, tus Vaj Aas Kiv tau ua txhaum hla Tswv Ntuj 10 lo lus qhia. Nws raug ntiab tawm hauv lub Koom Txoos Ka Tau Liv, ces nws yuam tas nrho cov Leej Choj Xib Hwb nyob hauv nws lub teb chaws ua dua ib pab ncaim.
    Yog pab uas nyiam no muaj cov txiv Leej Choj thiab niam Leej choj. Hmoob hu ua txig Plig los niam Plig. ntawd.
    10.Tos kuv hais tias; Dab phem tsis tso Leej Tib Neeg tseg li, vim dab tsi tiag? Sawv daws mus saib, txoj kev ua Koom Sam { luag hu ua Koos mi niv no!}
    Twb tog ib pab neeg ntseeg Ntuj tsim txoj cai ua Koom sam los hais tias; Ua Koom tshas ntawd, yog ib txoj kev cai hais tias; cov neeg ntseeg txog Yes Xus lawv tsim los, rau ib pab neeg ntseeg nyob ua ke tias:
    Sawv daws nyob ua ke lawm, yuav muaj txoj kev, uas sawv daws muaj vaj huam sib luag zos, ua Ntuj me nyuam nyob ua ke, nyob hauv txoj kev sib hlub.
    Cov thawj neeg thiab cov pej xeem muaj cai sib luag, sib npaug zos. Sib faib noj haus kom sib luag sib npaug.
    Dab phem qhia kom cov thawj neeg no, yuav txoj kev cai Koom Sam no, coj los ntxia Tib Neeg. Cov Thawj neeg lawv thiaj hais lus thiab coj tus yam ntawv kom zoo li zoo tau!
    Kom tau ua zoo, nyob sab nraud, tab sis nyob sab hauv nruab siab, mas yog dab kav thiaj cob qhia lawv! Kom tuaj loo dab phem sab xwb, leej twg tsis ua raws mas cov thawj neeg hais. Mas yuam loo thiab muab coj mus rau txim, los muab cov neeg tsis mloog ntawd xa mus rau dab teb kiag lawm xwb.
    Zaum no saib txoj cai no, twb yog cov neeg ntseeg tsim los kom muaj kev sis hlub sias nyiam. Nyiam no, leej twg nkag tau ua cov kev cai ua Koom tshaj no lawm.
    Mas lawv yog pab ntxub cov neeg ntseeg Ntuj tshaj plaws li, lawv paub tias; txoj kev ntseeg Ntuj yog Tswv Ntuj, kev sis nyiam sis hlub thiab sib zam loj tshaj lwm cov.
    Ces lawv thiaj cob kom cov ua Koom Tshaj no, ntxub thiab nyiam cov neeg ntseeg loj tshaj. Sawv daws thiaj hnov thiab pom, tej xwm tshwm sim nyob Cob Tsib teb.
    Ua luag ntiab cov neeg ntseeg khiav mus nyob rau nruab zoov nruab tsuag. Thiab tawm khiav mus rau lwm teb chaws.
    11. Ua cas Tswv Ntuj ho pov hwm sawv daws nyob kom vam meej mus li peb tau pom niaj hnub no!
    Lub hauv paus thaum lawv muaj kev sib ncaim, mas Yog Neeg mloog dab phem lub tswv yim. Cov kev sib naim no, mas muaj ua tsov rog sib ntaus sib tua tau 300 xyoo tsis muaj tus yeej tus swb li.
    Tos Ntuj Pov hwm sawv daws, vim muaj neeg ncaj ncees, neeg dawb huv nyob haub cov pab no sib npaug zos ua ke hauv tej pab pawg neeg no!
    Pab twg los yeej muaj cov Xib Hwb ncaj ncees nyiam ntuj thiab hlub neeg. Yog pab uas tus Xib Hwb tsis hwm Ntuj los cov ntseeg yog cov neeg dawb huv nyiam ntuj heev.
    Xib Hwb hla Ntuj tej lus tas nrho los tsoom neeg ntseeg ncaj ncees tsis kam hla. Ces nyiam no peb thuam tsis tau tias; nej pab tsis zoo, peb pab thiaj zoo xwb.
    Tus ntseeg thiab tso siab, mas Ntuj pab thiab hlub txhua tus. cov neeg phem tsis dawb huv mas Ntuj tib leeg thiaj yog tus paub tau neeg nruab siab.
    12. Nyiam no mus cov yuav ceev faj mas yog cov ua Xib Hwb. Yus lees ua Ntuj txoj hauj lwm yus yuav zwm rau Tswv Ntuj.
    Txhob cia yus lub siab mus zwm rau cov dab tsis huv, uas yeej ib txwm ntxias neeg ua kev txhaum kom ua tub qaug rau Ntuj thiab tub qaug rau neeg uas yog Ntuj me nyuam.
    Cov Xib Hwb tsis dawb huv yog cov nyiam sawv mus nyob rau Tswv Ntuj chaw, nws yuam los hem tsoom pej xeem kom mloog nws lus xwb. Cov coj li no, mas Dab phem muas tau nws lawm, yog neeg ua tsis haum nws siab.
    Ces nws muaj cai lawb ntiab tus neeg ntawd tawm mus. Nws yuav tib hom neeg uas raug dab muas tau xws li nws, ces lawv ua raws li tus Xib Hwb qhia, los Xib Hwb thiaj nyiam.
    Lo lus kawg, Dab nyiam caum raws cov Xiv Hwb tshaj li cov pej xeem ntseeg, yog dab muas tau ib tug Xib Hwb, mas dab yuav yuav zoo siab ua phov dim 7 hnub rau tus Xib Hwb ntawd. Dab muas tau ib tug pej xeem ntseeg mas ua dab kev lom zem rau nws ib hmos xwb.
    Dab ua Kom neeg muaj kev ntxhov siab txog txhua hom kev ntseeg, kom tsis sib raug zoo. Kom nyob muaj xaiv muaj lus, muaj kev sib cav sib ceg thiab kev sib thuam. Yog kev ua tub qaug rau Ntuj txhua yam, yog tus Xib Hwb tshaj qhia tawm los , ces cov pej xeem thiaj coj li ntawd.
    13. Txij no mus, mas dab tseem yuav ua kom neeg muaj kev kub ntxhov ntau yam dua mus! Yam li nws yuav ua kom muaj ntau tus Yaj Saub sawv los hais ub hais no.
    Thiab muaj ntau hom txiv Neeb txiv Yaig, sawv los sib tawm tsam tias: Kuv hom mas yog yam tseeb thiab zoo tshaj. Yog Niam Txiv pem Ntuj qhia los los tiag.
    Yuav muaj ntau tus Xib Hwb ntiab dab, mas dab yuav mloog thiab thim mob thim ntsaj mus, ua kom neeg pom kiag ntawm qhov muag los muaj! Kom neeg ntseeg tias; yog yam tseeb.
    Neeg los yuav vwm mus txog qhov neeg rov muaj neeg tua noj, li thaud tej laus hais; mauj dab neeg tseg cia tib si.

    Sacramento, USA.
    2021.
    Yaj Zoov Ntxheb X.H.




    Sponsored content


    Qhia Ntuj Kev Cai. - Page 2 Empty Re: Qhia Ntuj Kev Cai.

    Post  Sponsored content


      Current date/time is 28th June 2022, 10:41 am