Huab Tais Ntuj 10 lo lus qhia.

NTHUAV LO LUS QHIA 1 HAIS TIAS:
Koj yuav teev Huab Tais Ntuj ib leeg xwb thiab koj yuav nyiam Huab Tais Ntuj tshaj tas puas tsav yam.
A.Huab Tais Ntuj yog tus tsim kom muaj tas paus tsav yam nyob saum ntuj thiab nyob ntiaj teb no. Nyob saum ntuj, muaj lub hnub lub hli thiab cov hnub qub.
Muaj huab cua dej nag, nrog rau cov sab hnub sab hli ci tuaj ua qhov pom kev. Muaj cov kab xob laim, ua hluav taws txawj cig, ua kom kub hnyiab txawj yaj mus kom hloov tau ua lwm yam.
B. Nyob ntiaj teb, Huab Tais Ntuj tsim kom muaj av, muaj muaj toj zeb tsuas, muaj nroj tsuag, xyoob ntoo. Muaj neeg, muaj tsiaj nquab, tsiaj deg. Nyias hom muaj nyias hom noob, kom txawj hlob huam vam mus puv lub qab ntuj khwb.
Muaj nas, muaj noog, nrog txhua yam me kab me ntsuam. Hom kab loj, kab me uas qhov muag pom tau thiab pom tsis tau.
Kom lawv txawj ya nyob saum npoo av los nkag saum npoo av. Txawj quaj hloov lub caij lub nyoog,txawj nyob mus ua ib tom kab los ob tom kab. Zoo li txawj plhis mus ua ob tiam kab tshiab nyob.
Nyob saum ib nta ntuj, Huab Tais Ntuj cia huab cua thiab dej nyob ua ke. Uas neeg pom tsis tau ua ib lub zog loj tas nrho.
Tsis muaj lwm tus Huab Tais yuav ua tau tej yam hais no, mas thiaj tsim nyog cov hu ua neeg. Uas Huab Tais Ntuj pub kom muaj ib lub tswv yim nrog muaj tus Ntsuj Plig nyob tawm hauv lub cev.
Ua tau neeg zoo tshaj tej tsiaj txhua ntawd, muaj tswv yim txawj paub qhov phem qhov zoo. Thiab txawj paub tias. muaj Huab Tais Ntuj yog tus tsim los no. Thiaj yuav tsum teev thiab nyiam Huab Tais Ntuj tshaj tas puas tsav yam.
C. Leej Tib neeg yog tsav zoo tshaj ib puas tsav yam tsiaj, txhob mus teev tsiaj ntxhu, muab tsiaj saib loj li Huab Tais Ntuj.
Cov tsiaj loj muaj yam ntxwv hwv xyeej loj npaum li cas los lawv kawg yog tsiaj xwb. Cov neeg siab ncaj tswv yim zoo yug los ua neeg siab dawb.
Mas lawv muaj hwj chim loj dua cov tsiaj uas neeg ntseeg tias, tsiaj muaj hwm chim los muaj zog. Cov tsiaj ntawd lawv kawg muaj zog xwb lawv tsim tsis tau dab tsis zoo tshaj cov hu ua Leeh Tib Neeg.
Zoo li Zaj Nab,Ntxhwj Kuj Kum los tsov thiab dab tej no. Pov haum kaus ntxhw, kub twj kum tau hau nab. Pov haum zaj pov haum laum kiav tshoo. Cov muaj pov haum no, lawv tuag tas ib yam li cov me nyuam neeg uas tsis tau pom dua pov haum li thiab.
Ib tug tib neeg siab ncaj tswv yim zoo, nws txawj hwm Ntuj hwm neeg, siab ncaj nws kuj muaj hmoo zoo li cov neeg muaj pov hawm los ntawm cov tsiaj txhu no los.
Thawj lub pov haum zoo tshaj cov, yog tus neeg paub hwm Ntuj hwm neeg, ua nws muaj lub siab ncaj txawj hlub neeg, paub kev zam rau lug. Nws muaj lub pov hawm zoo tshaj cov.
Lub pov haum ntawd, yog Huab Tais Ntuj lub txiaj ntsim. Uas Tswv Ntuj pub kom nws txawj hwm Ntuj hwm neeg, ces nws tus Ntsuj Plig muaj Tswv Ntuj kev cawm kwv zam rau nws yog qhov tseem ceeb thiab tseeb tshaj.

Thawj lo lus nyob hauv Tswv Ntuj lo lus qhia yog zoo li ntawd. Nws yog thawj lub Pov haum. Tswv Ntuj thiaj Hais ua thawj lo lus qhia tia:
Koj yuav teev Huab Tais Ntuj ib tug xwb thiab koj yuav nyiam Huab Tais Ntuj tshaj tas puas tsav yam.
Lo lus kawg, yog peb ntseeg tias tej tsiaj txhu los lwm yam tsiaj thiab me kab me ntsaum hloov tau Qaum Ntuj. Mas peb ntseeg raws li tus ntsuj plig phem los qhia rau Noob Neej kom muab tej tsiaj no los hloov Tswv Ntuj lub npe thiab lub hwj Chim.
Kom Noob Neej tau ncaim 1 ntaum Qaum Ntuj, tus hu ua Huab Tais Ntuj no mus, kom Neeg tsis muaj Ntuj txiaj ntsim los cawm neeg. Kom neeg ua ib co neeg tu caj tus ces mus.

-< Yaj Zoov Ntxheb X.H.>-

-> Huab Tais Ntuj qhia kaum lo lus no:
1- Koj yuav teev Huab Tais Ntuj ib tug xwb, thiab koj yuav nyiam Huab Tais Ntuj tshaj tas puas tav yam.
2- Koj yuav hwm Huab Tais ntuj lub npe.
3- Koj yuav caiv Huab Tais Ntuj hnub.
4- Koj yuav hwm koj niam koj txiv.
5- Koj tsis txhob tua neeg.
6- Koj tsis txhob zes luag poj luag sev.
7- Koj tsis txhob ua tub sab tub nyiag.
8- Koj tsis txhob dag rau luag tej.
9- Koj tsis txhob tso koj lub siab ntshaw zes lua poj luag sev.
10-Koj tsis txhob tso koj lub siab ntshaw ua tub sab tub nyiag.

1. KOJ YUAV TEEV HUAB TAIS NTUJ IB TUG XWB,THIAB KOJ YUAV NYIAM HUAB TAIS NTUJ TSHAJ TAS PUAS TSAV YAM.
A. Ib tug neeg ntseeg Ntuj nws paub Ntuj, nws tsis nyiam teev Ntuj, nws lam yuav lub npe ua neeg ntseeg Ntuj xwb. Nws xyaw ntau yam tsis haum kev ntseeg rau,los nws ntseeg dab nrog, tsis muaj kev tso siab rau Ntuj.
Nws teev mlom tso siab rau tej lus tuaj ntawm neeg tuaj. zoo li tso siab rau cov khawv koob Hauj Sam ua rau pob zeb los tej qe hlau.Hais tias nws yog pov haum los pov khoos, tus ntseeg tej no kuj yog thuam Ntuj.
B. Tus neeg paub Ntuj,nws tsis muaj kev tso siab rau Ntuj,nws ntseeg tej dab neeg,los lam ntseeg tej saub cuav. thiab lam ntseeg tej lus tuaj ntawm tej neeg xav tau nruab los xwb, muab tej yam cuav tsis tseem ceeb los ua qhov tseeb, nws kuj zoo li tus neeg thuam Ntuj.
C. Txawm yog tus ntseeg Ntuj los ntseeg tej yam zoo tuaj ntawm tej tus neeg tuaj xwb los yuav tau hwm tus tsim ntuj tsim teb. Uas Nws tau xeeb kom muaj txhua yam zoo, uas pom muaj thiab tsim nuj nqi rau lub ntuj lub teb, thiab zoo rau neeg.

2. KOJ YUAV HWM HUAB TAIS NTUJ LUB NPE.
A. Koj ntseeg Ntuj los koj tsis ntseeg, koj txhob hais tias:
Ntuj tsis zoo, Ntuj tsis muaj qhov muag pom,Ntuj tsis txawj hlub neeg, Ntuj siab tsis zoo.
Ntuj ua siab ntev tas nrho rau sawv daws neeg, tsis hais Haiv neeg dab tsi li. Ntuj twb saib xyuas thiab pov hwm sawv daws li niaj hnub peb tau pom los no.
B. Txawm tus ntseeg thiab tsis ntseeg,los Ntuj ua siab ntev pab sawv daws. Ntuj maj mam tos saib neeg puas hloov siab los ua qhov zoo ib hnub twg.
Ntuj tsis muab txim sai rau leej twg li,neeg twb ua txhaum los Ntuj tseem zam rau neeg tos mus txog hnub neeg kam hloov siab los ua neeg zoo.
Ntuj tsis tau tso ib tug neeg twg pov tseg,uas tsis saib xyuas nws, rau neeg pom los paub. Peb yuav txhob lam ua neeg thuam Ntuj.
C. Huab Tais Ntuj tsis siab phem,tab txawm muaj tej tus neeg ntseeg Ntuj ua tsis ncaj ncees, los yog neeg hais neeg thiab neeg ua neeg xwb, liam tsis nyog tias Ntuj phem.
Txhob muab neeg zaj tswv yim me me los xav thiab neeg tej lus hais los piv puas rau Huab Tais Ntuj.

3. KOJ YUAV CAIV HUAB TAIS NTUJ HNUB.
A. Huab Tais Ntuj hnub yog hnub CHIV. Hnub Caiv, cov neeg ntseeg yuav muab thawj lub sij hawm los nco txog Huab Tais Ntuj thiab ua Ntuj tsaug.
Cov neeg ntseeg lawv muaj ib co kab kev mus teev Ntuj li ib lub sij hawm ntev li ib teev. Kuj muaj ib co neeg siv hnub caiv tsis ua hauj lwm no,los ua lwm yam.
B. Muaj ntau txhiab leej neeg, tsis hais cov ntseeg Ntuj los tsis ntseeg li. ib nrab so hnub caiv, tab sis lawv tsis paub tias vim li cas ho caiv.
Lawv nyiam hnub caiv no heev, lawv siv hnub caiv no los ua tej txoj hauj lwm tseem hnyav dua txoj hauj lwm lawv ua niaj hnub thiab.
C. Kuj muaj neeg zoo siab vim muaj Tswv Ntuj hnub caiv no, lawv tau siv los ua si ywj siab, cov siv los mus sib yaum ua kev txhaum kev khaum los muaj li thiab.
Lawv kuj ua tau tej yam tsis tsim nyog, ua yam tsis tshai tub qaug rau Ntuj li los muaj. Neeg zoo siab muaj Tswv Ntuj hnub caiv, neeg tau kev sib yaum mus haus dej haus cawv, los haus yeeb haus tshuaj, Kom tau kev ua txhaum.
Los sis yam li mus ua kev phem kev qias txhua yam, tsuav zoo neeg siab xwb. Yog txhob muaj neeg hais xwb, yog muaj neeg hais, mas neeg tseem muaj cai hais tias neeg txheej tshiab no txoj kab txoj kev mus li ntawd.
D. Kuj muaj tej neeg siv hnub caiv no mus ua tub sab tub nyiag, ua tej yam thxaum kev cai tub qaug rau neeg, txhaum rau Ntuj los muaj li thiab.
Uas yuav mus tshuam rau Huab Tais Ntuj tej lo lus nyob tom ntej no:
Yam li mus ua plees yi, los ua tub sab tub nyiag. Los dag rau tej lus hais dhau los lawd los muaj. Yam li tshuam rau kev thuam Ntuj, tsis hwm Ntuj hwm neeg.
4. KOJ YUAV HWM KOj NIAM KOj TXIV.
A. Lo lus hwm koj niam koj txiv no, duav tas nrho kev hwm Ntuj los hwm leej tib neeg txhua tus tib si nyob rau hauv.
Hwm cov ua niam ua txiv, hwm tus laus tus hluas, poj niam los txiv neej,tus hlob mus txog tus yau tas nrho, tsuav hu ua neeg no, mus thoob plaws lub qab ntuj khwb no.
B. Koj yuav hwm txhua yam uas Ntuj tau tsim los tib si, zoo li tej tsiaj txhu, cov tsiaj loj tsiaj me, nrog rau me kab noog rau tej xyoob ntoo, nroj tsuag,txhua nrho. Vim nws muaj nuj nqes rau leej tib neeg thiab lub ntuj lub teb.
C. Txhua yam no, zoo rau neeg siv, zoo rau neeg noj los zoo rau saib hnub xam nyoog, cim lub caij quas lub niaj xyoo. Tej kab nyias quaj muaj nyias caij,paj xyoob paj ntoo nws tawg paj muaj nws nyoog.

5. KOJ TXHOB TUA NEEG.
A. Lo lus hais tias, koj txhob tua neeg. muaj ntau yam tua neeg. Muab riam phom los tua neeg, los xuas qws ntaus kom neeg tuag.
Koj muab tshuaj los lom kom neeg tuag, muab neeg thawb kom poob dej, los ua kom poob qhov siab mus rau qhov qis kom tuag, Yam ua rau neeg tuag ces yog kev tua neeg tas tib si,ntaus me nyuam hauv plab los yog tua neeg.
B. Tus ntxub neeg xav kom luag tuag, tsis xav pom luag, tus neeg lub siab xav li no yog lub siab npaj tua neeg, los twb tua neeg lawm thiab.
C. Tus tsis kam pab neeg, tso luag pov tseg, ua rau neeg tuag tshaib, los ua rau neeg poob zoo tuag, los tso xwv txheej tuaj raug kom tuag,kuj yog kev tua neeg tib si lawm.

6. KOJ TXHOB ZES LUAG POJ LUAG SEV.
A. Kev zes luag poj luag sev, tsis yog hais rau sab txiv neej xwb. Poj niam sab mas kuj tsis txhob zes luag tub luag roog thiab. Tsuav yog tus nyiam ua kev phees kev yi ces puav leej yog neeg xav zes luag poj luag sev, los xav zes luag tub luag roog tib si lawm.
B. Kev tham hluas nkauj hluas nraug, uas tsis tau muaj tsw, los yog kev zes luag poj luag sev tib si, thiab zes luag tub luag roog. Vim tias tsis tau yog koj poj koj sev thiab koj tub koj roog, tseem yog luag li. Tej no suav tib si, ua kev zes luag poj luag sev lawm.

7. KOJ TXHOB UA TUB SAB TUB NYIAG.
A. Kev ua tub sab tub nyiag, tsis yog tus txhob txwm mus nyiag luag nyiaj los nyiag luag qoob loos, cuab tam los tsiaj txhu ntawd xwb, thiaj yog ua tub sab.
B. Tus neeg qeev ib tug neeg twg tej nyiaj mus siv,los tus qee luag tej qoob loo mus noj. qee luag teej luag tug mus siv yeej yog ua tub sab tib si lawm.
C. Tus hais lus kom luag yuam kev, tsis nco qab qee yam, khoom tso pov tseg ces nws tau dawb los nws yeej yog ua tub sab lawm thiab.

8. KOJ TXHOB DAG RAU LUAG TEJ.
A. Txoj kev dag yog ib yam tsis zoo kiag li,koj yuav tsum paub tias txoj kev dag,mas nws ua tau kom muaj ntau yam puas xwm mus.
Nws ua rau neeg yuam kev loj, mus txog rau muaj kev tuag,nws tau dag mus txog rau Ntuj kiag.
B. Kev dag ua rau tib neeg poob nyiaj ntau mus, thiab ua kom neeg muaj kev sib ntxub, thiab muaj xaiv muaj lus,ua yeeb ncuab mus tsis txawj tag li.
C. Kev dag tsis yooj yim li koj xav tias yuav lam dag,ces dag tau li. Koj dag muaj teeb meem loj tuaj, ces koj txaj muag. Koj tseem tau tsa tes siab kom rov tau dag Ntuj dua ib zaug ntxiv thiab.
D. Thaum kawg ces koj paub tias nws tsis zoo, los koj rov dag koj mus li, zoo li koj tsis muaj nqes ib qho nyob ntawm lub ntuj lub teb li.

9 thiab 10. KOJ TXHOB TSO KOJ LUB SIAB NTSHAW ZES LUAG POJ LUAG SEV. THIAB KOJ TXHOB TSO KOJ LUB SIAB NTSHAW UA TUB SAB TUB NYIAG.

A. Yog koj tso koj lub siab ntshaw ua, ces ib zaug dhau ib zaug. Ces koj yuav swb koj lub cev, ces koj lub cev yuav yuam koj kom ua kiag.

B. Neeg mas tsis sib thooj, muaj cov ua neeg siab ncaj thiab muaj nuj nqes, kuj muaj cov neeg siab phem,ua neeg phee yig. Tsis hais tus txiv neej los poj niam li, yeej muaj tus xav thiab coj,los nyiam li koj nyiam thiab.
Muaj lub siab nyiam ua ib nqag ua neeg zes lua poj luag sev,los sis nyiam zes luag tub luag roog los ua tub sab tub nyiag, nyiam nrog ko thooj siab.
Thiab coj ntaj koom hnab, hneev koom hlua, ua txij tog txij peg li.
C. Kev ua tub sab tub nyiag, yog koj ntshaw lawm, ua ntej koj yuav nyiag tej yam me, ntev mus koj swm lawm ces ko yuav nyiag tej yam loj, uas muaj kev tuag tsiv nraim nyob nrog koj ntawd ib sab.
D. Nyob hauv Huab Tais Ntuj 10 lo lus qhia no, muaj kev phem kev zoo sib npaug. Yog koj poob rau sab zoo ces yeej kiag. Hos koj poob rau sab phem ces kuj swb kiag mus.
Li ntawd mas Huab Tais Ntuj thiaj xub kom Mais Xes muab los qhia ntxov ntxov rau neeg paub. Cov neeg hloov siab los ntseeg Ntuj, mas lub Koom Txoos thiaj xub qhia ua tej thaum lawv yuav mus txog lub Cim Ntxuav, kom tau paub zoo.
E. Tus neeg ntseeg Ntuj tsis xyiv fab rau kev teev Ntuj, los tsis muaj kev tso siab rau Ntuj. Mas muaj ntau yam:
a. Nws kawm kev ntseeg tsis txaus, los nws tsis muaj siab kawm kom tas. los nws tsis xav ua ib tug neeg ntseeg zoo, los puas nws lam ntseeg vim muaj qee yam los cuam tshuam hauv nws lub neej lawm.
b. Nws los ua neeg ntseeg kom tau kev dim ntawm ib yam xwv txheej, kom tau kev dim ntawm kev khaum. Nws tsis paub kev ua dab,los nws xav sim Ntuj saib zoo li cas.

Yaj Zoov Ntxheb Xib Hwb.

Lo lus qhia 5 nyob hauv Tswv Ntuj 10 lo lus qhia hais tias, koj txhob tua neeg. Nws tsis yog ib lo lus ntiav ntiav li hais ntawd:
10 lo lus uas Tswv Ntuj kom Yawg Mais Xes, sau tseg rau neeg ntiaj teb neeg paub no. Mas yog ib zaj Tswv Yim tob tas nrho.
Lo lus hais tias, koj txhob tua neeg no, mas peb neeg ntiaj teb, peb tsuas pom qhov hais tias:
1.Tsuav yog koj txob xuas qws ntaus kom tuag, los muab riam hno kom tuag thiab txhob muab phom los tua kom tuag.
Koj tau siv cov cuab yeej no los tua neeg lawm, ces mam li yog koj tau tua neeg lawm tiag.
2. Nws tsis yog yuav ntiav ntiav li ntawd, yam li:
A. Txoj kev tua neeg, yog koj ntaus kom luag tau sav npab sav ceg, ua kom luag dig muag mus. Los ntaus luag taub hau, ua kom luag tau ruam los vwm mus. Kuj yog kev tua neeg lawm.
B. Yus cem los thuam thiab tsawm, kom luag tu siab siab mus, ces nws npau taws heev. Nws vwm nws mus txog qhov tuag. Kuj yog kev tua neeg.
C. Yus cia li ntxub luag, caiv los txiav tsis ua phooj ywg, tsis muaj kev raug zoo thiab hlub luag. Kuj yog kev tua neeg.
D. Lam tsis nyiam luag, xav tias luag yog neeg nplua nuj lawm. Ces cia li lam ntxub. Tsis pab luag cem luag mus cuab rau dab cuab rau tsov los hais nws yog niag dab. Kuj yog kev tus neeg.
E. Tus pom luag yog neeg muaj, los tsis nyiam, pom cov pluag los ntxub. Tsis hlub leej twg li, muaj dab tsi los tsis pab. Tus coj li no, kuj yog tua neeg.
F. Lam nyob lam tsis hwm luag, pheej xav thiab yws tias: Neeg phem cas tsis tuag mus, tseem yuav nyob kom hnyav av thiab. Nws kuj yog tus neeg xav tua neeg.
G. Tus neeg coj thiab hais li cob qib lus tau hais los saum no. Suav tau tias nws yog neeg xav muab luag tua. Nws tsis muaj peev xwm tua neeg lub cev tiag.
Tab sis yog nws tua luag tus ntsuj plig. Vim li cas ho hais tias, yog tua neeg! Peb yuav tsum to taub tias:
Cov neeg raug luag ntxub raug luag cem los ntaus thiab tsis nyian lawv. Mas peb twb paub thiab pom tias, muaj cov mus dai tuag, los mus dhia dej tuag
Thiab nws tu siab dhau ces nws cia li mob srauj tuag, los yoo mob tuag.
H. tej yam zoo li no, yus yuav tau xav tias, txhob ua tsam yus yog tus pheej muab luag cov ntsuj plig xa mus nyob rau dab teb tsis so.
I.Yog peb nyiam coj li hais no, mas neej plaub tsis tau tas. Dab plaub twb tuaj lawm thiab od.
J. Los lus kawg, Leej twg tau ua phem tshaj rau Qaum Ntuj tej me nyuam. Mas nws tau ua hauj lwm zoo heev rau tus thawj Ntsuj Plig Phem ntawd ntag.
Cov nyiam ua Hauj lwb rau sab Ntsuj Plig phem no. Mas Dab yuav ua tej lub Koob Tsheej loj kawg rau lawv.
Qee tus mas dab ua koob Tsheej 1 hnub 1 hmos rau. Tej tus, mas dab yuav ua 3 hnub 3 hmos rau nws. Tus ua hauj lwm rau dab ntau tshaj mas dab kuj yuav uaKoob tsheej rau nws txog li 3 hlis rau nws los muaj thiab.
K. Thaum Dab ua koob tsheej cav txog nws tas lawm, mas dab yuav qhib Dab lub Ceeb Tsheej rau nws mus nyob ib txhiab ib txhis.
Thaum dab xa nws mus lawd, dab yuav kaw rooj ntug ces nws yuav tsis pom muaj lub hnub lub hli. Tsis muaj qhov pom kev rau nws. Thiab yuav tsis pom cov ntsuj plig uas nws tau xa ua ntej mus nyob rau dab teb ntawd thiab. Vim nws tau ua ib txoj hauj lawm zoo heev rau dab ces pom tsis tau.
Sau nyob Sacramento, tim 12/4/2018.

-< Yaj Zoov Ntxheb X.H. >-