TXOJ KEB HLUB NYOB HAUV KEV NTSEEG.

1.Yog ib tug neeg ntseeg Ntuj, yog tsis txais txoj kev hlub, nqes saum ntuj los, nyob hauv nws nruab siab.  Mas nws txoj kev ntseeg tsis muaj qab hau dab tsi li.  Tab txawm yog nws muaj peev xwm, hais ib lo lus rau ib lub roob.
Kom lub roob ntawd, nws cia li tshais nws chaw mus nyob rau hauv lub plawv dej hiav txwv, los nws tsis yog cov lus muaj kev hlub nqes ntawm Tswv Ntuj los li.

2. Peb sawv daws twb pom thiab hnov cov xov xwm nyob rau lub teb chaws Los Tsuas los teb chaws Nyab Laj.  Peb pom lawv ntiab tej tsev neeg uas lawv xav nrhiav txoj kev hlub nqes ntawm Tswv Ntuj los cawm neeg tej Ntsuj Plig.
Thiab lub cev ntaj ntsug kom muaj lub siab kaj, xav ua lub neej muaj txoj kev hlub nrog koob hmoov txawj sib hlub nyob hauv Tswv Ntuj ntawd.  Uas muaj cov tseem hwv thiab tsoom txheeb ze, los ntawm caj hlav ces ncau los.
Raug lawv muab ntiab tawm hauv zos mus, coj lawv mus pov tseg rau nruab zoov, los tom tej kev deb tsis muaj neeg nyob.  Uas tsis muaj vaj tse, los muaj zej zog nyob, tsis paub mus nrhiav noj, vim nyob deb nroog lawm.
Tej Nom Tswv thiab tsoom txheeb ze ntawd, lawv tsuas muaj tib txoj kev ntseeg tias, lawv muaj peev xwm thiab ua kom tej tib neeg qhuas tias:  Lawv muaj peev xwm loj kawg.
Vim lawv tsis muaj txoj kev hlub nqes saum ntuj los li Yes Xus tau hais tias:  Lawv txoj kev muaj peev xwm ntawd, tsis muaj qab hau yuav coj koob hmoov los rau lawv ib qho li.

3.Lawv tsuas muaj tib txoj kev ntseeg tias, lawv yog neeg muaj peev xwm rau sab txawj ua phem rau Tswv Ntuj thiab Ntuj tsoom tub ki xwb.
Lawv muaj lub siab tawv li lub thoob hlau, cia sau ntiaj teb tej kev kem tsuab coj mus cia ua lawv tug tseg.  Lawv txoj kev nplua nuj, yog mus sau tas ntiaj teb neeg tej kev phem.  Nyob hauv kev kem tsuab tsis huv los ua lawv tug nkaus xwb.

4. Txoj kev sib hlub nqes saum ntuj los, nws kuj tsis yog hlub neeg.  kom luag zwm rau yus, kom tau ua yus qhev, yus txib tau luag ua txhua yam zoo rau yus.
Los kom luag zwm rau yus, ces yus xav siv luag lub cev los lub siab, los kom luag cia li mloog yus hais thiab ua txhua yam pub rau yus.
Muaj ntau tus Thawj neeg nyob hauv Yes Xus txoj kev ntseeg.  Lawv tau ua kev phem kev qias, ncha ntws rau lub ntiaj teb neeg tau hnov.
Txawm yog ib tug ttawj loj, los lawv yeej yog cov neeg, ua lawv muaj tus peev xwm ua kev phem kev qias xwb.  Lawv tsis tsis txais txoj kev hlub tseem ceeb nqes saum ntuj los. Ces lawv txoj kev ntseeg tsis muaj qab hau nyob nrog lawv lub hwj chim.
Txoj kev sib hlub tseem ceeb, yog pom thiab paub txog  luag kev txom nyem txhua yam muaj nyob rau luag nruab siab.  Luag tos ntshis, tej tus neeg txawj nplij luag lub siab, kom tau nyob tiaj tus, ua neeg nyob kaj lug yam tsis txhawj los yuav raug ntshai leej twg.
Yus yuav ua zoo li, yus yog luag ib tug neeg txheeb ze, xws li yus yog kiag luag niam luag txiv.  Los yog luag ib tug tij los kwv, tsis txhob npaj siab muab kev txhaum nog rau luag lwm tus ris thiab txhob mus qee luag teej luag tug los ua yus tug.
Yus hlub luag, vim luag tsis muaj kev thoob tsib, nyob hauv luag lub tswv nyim txaus. Luag thiaj tau tau txais kev txom nyem los ua lub neej poob tsag.
Kev hlub yam loj tshaj plaws, yog ua neeg siab dawb qhia yam tseeb thiab hlub luag mus rau sab ntsuj plig.  Ua los pub rau Tswv Ntuj, kom luag raug Ntuj nyiam yam txaus siab.
Txhob lam hlub ntawm lub ncauj, kom luag ncawg yus thiab tso siab rau yus, luag tos yus tsheej xyoo tsis pom tawg paj txi txiv li. Tej no, hais tsawg los sawv daws yeej paub ntau lawm…

5. Kev hlub, mas nws tsis nyob ntiav ntiav, li neeg xav nyob rau hauv neeg tej nruab siab!  Pom luag txom nyem kev noj haus los kev hnav.
Ces yus hais tej lo lus zoo rau luag tias, Kuv hlub koj heev kawg.  koj nyob es kaw qhov roo zoo zoo thiab rauv taws nte kom sov sov thiaj tsis muaj mob mog no xwb es yog lawm!
Koj tsis tau cev ib yam dab tsis rau luag li, yog pauv tau muab neb los sib pauv no, koj ho yuav xav li cas rau lo lus hlub ntawd.

6. Tshuav ib yam loj tshaj uas peb sawv daws tsis nco qab pom txog. Yog txoj kev hlub ntawm yus tus txij nkawm thiab yus tej tub ki.
Yus xav tias, tsuav yog khwv kom muaj mov txaus noj txwm hnub lawm, ces yog qhov zoo lawm. { Tsis xav hais tej lo lus, kom tau rhiab pob ntseg.} Muaj qee leej, mas lawv xav tias:
Tsuav yog pw vov pam ua ke lawm, ces yog hlub tas siab nrho lawm.  Qhov no, yog ib txoj kev hlub uas nyob ze ze, txoj kev hlub kom luag tau ua yus qhev no thiab od!
Kev hlub ntawm txij nkawm, yog yus yuav tau qhuas txog nws tses dej num.  Uas nws ua pub rau lub tsev neeg sawv daws kom muaj kev nyob kaj siab lug mus puag niaj puas xyoo.
Tsis hais koj, los kuv thiab tej tub ki li, ntshai tsis tau muaj neeg qhuas txog tias:   Ib xyoo ntuj zeeg, tsis muaj ntau, los zaum puav, mas yus los tseem tau thuam tias, cas ua nyuag nyob li no xwb, noj tsis qab los ua tsis zoo, tsis xis siab li, los twb muaj lawm.
Nco ntsoov tias, ib xyoo ntuj zeeg, yus tsev neeg txhua tus tau loj hlob los noj rog mus lawm ib thawj.  Los yus tsis nco qab pom tej lo lus hais qhuas txog tus txij nkawm no. Yog tus neeg to taub Ntuj lo lus nyiam, mas yuav nco ntsoov yeej tsim nyog qhuas thiab hwm tus txij nkawm zoo puav tam li yog lub zoo pov haum.
Tej tub ki muaj nyob puv vaj puv tsev, taub hau nyob txhij vuv cuag mag qos txawb tseg. Vim muaj leej twg thiab leej twg, nws kev txhawj xeeb thiab pov hwm sawv daws los.  Tsim nyog yuav hais los ua ib yam, los pauj txiaj ntsim.
Zaj no tsis yog kuv li lus, kuv tsuas yog tus sau xwb, nws yog Tswv Ntuj li lus tas nrho xwb.

Sacramento tim 16/2/2019.
Yaj Zoov Ntxheb Xib Hwb.