Cov ntsiab lus hauv peb txoj kev ntseeg

Peb muaj ib co nqe lus los yog ntsiab lus tseem ceeb uas peb ntseeg txog. Cov nqe lus ntawd yog zaj peb hu tias ‘Zaj Kuv Ntseeg…’ Lus Aas Kiv hu ua ‘The Creed.’ Peb hais zaj ntawd ua ib zaj teev ntuj. Niaj zaus peb tuaj teev ntuj hnub chiv, peb hais zaj ntawd thaum txiv plig nthuav Ntawv Nsthiab (homily) tas lawm. Muaj ob zaj ntseeg. Thaum peb teev ntuj nrog cov Mes Lis Kas, mas peb hais zaj ntev uas hu ua ‘Nicene Creed’. Nws yeej zoo ib yam li zaj luv uas peb hais ua lus Hmoob thiab, tiam sis nws piav ntau zog xwb. Zaj luv muaj lub npe hu tias ‘The Apostles’ Creed,’ txhais tias ‘Zaj Ntseeg raws cov Hauv Paus Xa Lus.’ Tos ho hu ua ‘Apostles’ Creed’ yog vim cov ntsiab lus ntawd yog cov thaum ub cov thwj tim tau qhia ces thiaj tau muab khaws coj los ua ib zag qhia rau sawv daws los txog niaj hnub no.

Hais zaj “Kuv Ntseeg…”

Kuv ntseeg txog Tswv Ntuj,
yog keej Txiv muaj hwj huam tas nrho, yog tus tsim ntuj tsim teb.
Kuv ntseeg txog Yes Xus Pleev,
Yog Tswv Ntuj leej Tub twm zeej, yog peb tus Huab Tais.
Leej Ntuj Plig ua kom nws xeeb los ua neeg.
Nws yug ntawm nkauj Ntshiab Mab Liab los.
Lub caij Pis Las Tos ua nom,
Yes Xus raug luag hiam thiab ntsia saum Ntoo Cuam.
Nws tuag mus zwm av, mus txog ntuj txias teb tsaus.
Hnub peb, Yes Xus sawv hauv cov tub taug rov los.
Nws nce mus lawm saum ntuj, zaum ntawm leej Txiv phab xis.
Nws yuav rov los txiav txim rau cov neeg ciaj neeg tuag.
Kuv ntseeg txog leej Ntuj Plig Ntshiab,
Ntseeg txog lub Koom Txoos Ntshiab cia rau lub qab ntuj neeg,
Ntseeg txog tsoom leej Ntshiab sib koom Ntuj lub txiaj ntsim,
Ntseeg txog kev daws txhaum,
Ntseeg leej neeg lub cev kev sawv rov los,
Ntseeg txog muaj txoj sia nyob mus li.
Ua li.

Piav ib nqe zuj zus tuaj:

Kuv ntseeg txog Tswv Ntuj …
Lo lus ‘ntseeg’ mas muaj ntau yam ntseeg. Xws li peb ntseeg tau tias ib tsam yuav tsaus ntuj, tag kis yuav kaj ntug. Peb ntseeg tau vim peb twb pom dua los, nws yeej muaj tas mus li zoo li ntawd tsis sav ib zaug. Peb kuj ntseeg tau tias, ‘kuv niam kuv txiv hlub kuv.’ Peb ntseeg tau, vim peb pom peb niam peb txiv tu peb, nplij peb, cob qhia peb, ua tas puas tsav yam kom peb tau yam zoo. Tsis tas li ntawd xwb, peb ntsuas tau los mloog tau nyob hauv peb nruab siab tias lawv hlub peb, thiab peb kuj hlub lawv.

Ntawm Tswv Ntuj mas, peb pom tsis tau, chwv tsis tau, hnov tsis tau nws lub suab hauv peb pob ntseg li, tiam sis muaj ib qho nyob hauv peb nruab siab ua kom peb ntseeg tias muaj Tswv Ntuj thiab nws hlub peb. Peb lub siab uas ntseeg Ntuj los yog peb txoj kev ntseeg Ntuj ntawd yog Tswv Ntuj muab cog rau hauv peb nruab siab. Thaum peb los ua neeg ntseeg, peb yuav tsum ntseeg ruaj nreb tsis txhob ua xyem xyav.

yog leej Txiv muaj hwj huam tas nrho, yog tus tsim ntuj tsim teb.
Niaj hnub no tej kws txuj mas lawv tsis hais tias yog Tswv Ntuj tsim lub ntuj lub ntiaj teb, los tsim tej tsiaj txhu, los tsim tib neeg. Lawv niaj hnub nrhiav tias, lub ntiaj teb yog pib li cas, neeg ne yog pib li cas tuaj. Vim neeg tiam no muaj txuj ci siab, ces neeg xav nrhiav kom tau ‘proof’ rau tas puas tsav yam uas muaj nyob ntiaj teb thiab nyob hauv lub qab ntuj no. Txawm cov kws txuj yuav nrhiav npaum li cas los lawv kuj hais tsis tau ib qho meej meej tseeb tseeb hais tias lub ntuj lub ntiaj teb yog muaj tuaj zoo li cas kiag, lawv hais tsis tau tias tej tsiaj muaj sia los yog tib neeg txoj sia yog pib chiv li cas los li, lawv tsuas yog kwv yees ntau, lawv tsuas yog hais ‘theories’ xwb. Tiam sis peb nyeem nyob hauv ntawv Ntshiab, mas tas puas tsav yam yog Tswv Ntuj tsim. Nws muaj peev xwm los yog muaj hwj huam loj tas nrho, nws tsis tau siv dab tsi los tsim li. Nws tsuas hais nws lo lus xwb ces cia li muaj tuaj. Tsuas yog neeg mas nws thiaj li muab av los puab thiab tshuab pa rau kom neeg ciaj sia tau. Ntawv Ntshiab tseem qhia hais tias “Tswv Ntuj tsim tib neeg kom zoo li nws.” Yog li peb zoo li Tswv Ntuj no yog zoo li cas? Vim Tswv Ntuj paub tas ib puas tsav yam, nws yog tus tsim tas ib puas tsav yam, thiab nws yog tus muaj txoj tseem kev hlub, mas tib neeg thiaj yog ib tug muaj kev cim xeeb tau, muaj kev txawj kev ntse txawj xav tswv yim, txawj nrhiav tsim tej yam tshiab, thiab muaj txoj kev hlub tob nyob hauv nws nruab siab.

Kuv ntseeg txog Yes Xus Pleev, yog Tswv Ntuj leej Tub twm zeej, yog peb tus Huab Tais.
Peb ntseeg hais tias Yes Xus yog Tswv Ntuj leej Tub. Tiam sis nws tsis yog yug ntawm leej Txiv los li peb tib neeg txawj yug los. Lub Koom Txoos qhia tias, Yes Xus yeej ib txwm nrog leej Txiv nyob los, nws tsis muaj hnub pib los yog hnub yug los li. Thaum Tswv Ntuj tsim lub ntuj lub teb, Yes Xus yeej nyob lawm, nws yeej yog tus tsim lub ntuj lub teb nrog Leej Txiv thiab. Tsis tas li ntawd xwb, tseem muaj ib tug ntxiv, yog leej Ntuj Plig Nsthiab. Leej Txiv thiab Leej Tub thiab Leej Ntuj Plig yog ib tug Tswv Ntuj xwb, tiam sis kuj ho yog peb leeg sib txawv thiab. Lawv peb leeg ntawd ua ke ua cov hauj lwm tsim Ntuj tsim teb, vim txawm lawv nyias muaj nyias, los lawv nyob ua ke rawv, tsis muaj caij sib ncaim li. Yog peb xav paub tias Tswv Ntuj zoo li cas, ces peb mus saib Yes Xus. Yog peb pom Yes Xus, ces peb pom Leej Txiv lawm. Yes Xus yeej hais li ntawd nyob hauv ntawv. (Zam 14: 7) Tswv Ntuj yog ib yam uas peb lub tswv yim neeg tsis duav, peb to taub tsis txog li, tiam sis yog ib qho uas peb yuav tsum ntseeg.

Leej Ntuj Plig ua kom nws xeeb los ua neeg; nws yug ntawm nkauj ntshiab Mab Liab los.
Peb tau nyeem zaj piav txog tus tshiab saum ntuj hu ua Nkas Nplias, tuaj hais rau Mab Liab tias, nws yuav xeeb ib tug tub. (Lus Kas 1: 30-38) Peb ntseeg tias, vim Yes Xus yug ntawm Mab Liab los, mas nws yog tseem neeg tiag, nws muaj ib lub cev nqaij thiab ib tug ntsuj plig ib yam li peb. Nws yug los ua ib tug mos liab, nws muaj ib tsev neeg, nws txawj hlob zuj zus los tiav txiv ib yam li peb. Tiam sis nws kuj yog tseem Tswv Ntuj thiab, vim tsis yog tib neeg ua kom nws xeeb los ua neeg, hos yog Tswv Ntuj lub hwj huam uas yog Leej Ntuj Plig Ntshiab ua kom nws xeeb los ua neeg. Vim li ntawd Yes Xus yog Tswv Ntuj Leej Tub, thiab peb hu tau tias Mab Liab yog Tswv Ntuj leej Niam vim Yes Xus yog Tswv Ntuj.

Lub caij Pis Las Tos ua nom, Yes Xus raug luag hiam thiab ntsia saum Ntoo Cuam.
Vim li cas Yes Xus thiaj tau raug txom nyem? Lub ntsiab ces yog vim nws hlub peb xwb. Vim nws qhia thiab nrhiav txoj kev ua zoo, ces cov neeg phem ntxub nws, lawv thiaj nrhiav kev txhaum rau nws ris. Yes Xus tau nyiaj tej kev txom nyem ntawd kom tau rhuav peb txoj kev phem kev txhaum pov tseg. Neeg tej txuj tej ci, tej nyiaj txiag cawm tsis tau peb ntawm peb txoj kev ua txhaum ua phem, tsuas yog Yes Xus txoj kev hlub peb raug tsim txom rau peb xwb thiaj cawm peb tau. Peb hais tau tias yog neeg txoj kev ua txhaum ua phem muab Yes Xus ntsia rau saum Ntoo Cuam.

Nws tuag mus zwm av, mus txog ntuj txias teb tsaus.
Peb ntseeg hais tias thaum Yes Xus lub cev nyob hauv qhov ntxa, mas nws tus ntsuj plig tau mus txog ntuj txias teb tsaus, uas yog qhov chaw cov neeg xub tau tas sim neej lawd mus nyob tos. Yes Xus tau mus cawm cov neeg uas tau ua ib lub neej zoo neej ncaj ncees kom lawv tau mus saum ntuj. Vim thaum Yes Xus tseem tsis tau tuag, mas cov neeg tas
sim neej lawd tsis muaj kev mus saum ntuj tau. Yes xus mus qhib lawv qhov rooj mas lawv thiaj mam tau kev los mus lawm saum ntuj.

Hnub peb, Yes Xus sawv hauv cov tub tuag rov los.
Nyob hauv ntawv, peb nyeem tias, thaum lawv muab Yes Xus lub cev mus zwm av, mas lawv yeej ntshai tsam muaj neeg tuaj muab nws lub cev thiab dag tias nws sawv rov los lawm, ces lawv thiaj tso tub rog zov rooj ntxas tib si. Tiam sis thaum Yes Xus cov phooj ywg nqa tshuaj tuaj qhwv nws lub cev, lawv tsis pom nws lawm. (Saib Mas Tais 28, 1-15) Yes Xus tau nyob tau plaub caug hnub, nws tshwm sim rau nws cov thwj tim pom thiab tau ua rau lawv paub meej tias nws yeej sawv rov los lawm tiag. Nws tau cog lus rau lawv tias nws yuav xa Leej Ntuj Plig tuaj pab lawv.
Lub Koom Txoos qhia hais tias, thaum Yes Xus tuag lawm thiab nws sawv rov los, mas nws lub cev tsis yog cia li
ciaj rov los zoo li lub cev qub, hos nws lub cev sawv rov los muaj hwj chim tsis zoo li lub qub lawm, vim nws txawj ploj, txawj mus tau qhov txhia chaw, txawj mus tau yav tom ntej yav tom qab.

Nws nce mus lawm saum ntuj, zaum ntawm leej Txiv phab xib.
Cov thwj tim tau ntsia ntsoov Yes Xus nce mus saum ntuj lawm. Tiam sis puas yog hais tias nws tsis pom peb tsis nyob ze peb li lawd? Thaum peb hais tias ‘nws mus zaum ntawm Leej Txiv phab xis,’ yog txhais tias nws nyob tas qhov txhia chaw ib yam li Leej Txiv Tswv Ntuj lawm. Yog li nws yeej pom peb thiab nrog peb nyob nraim txhua lub sij hawm txhua qhov txhia chaw. Peb nyob txog qhov twg, Yes Xus nrog peb rawv. Peb ua dab tsi, nws pom thiab paub. Txawm peb nyiag ua tej yam zais ntshis, nws yeej paub tag. Peb teev Ntuj, nws nyob ntawd. Peb nyeem Ntawv Ntshiab, yog nws hais lus rau peb.

Nws yuav rov los txiav txim rau cov neeg ciaj neeg tuag.
Peb ntseeg hais tias thaum lub caij ntiaj teb kawg,Yes Xus yuav yog peb tus tswv txiav txim. Nws paub yam phem yam zoo uas peb tau ua thaum peb ua neej nyob, nws yuav txiav txim rau txhua leej raws li peb tau ua. Xws li yog kuv tau coj ib tug neeg los ntseeg Yes Xus, tus neeg ntawd kuj ho tau coj ib tug los ob peb tug neeg los ntseeg, cov ntawd kuj tau mus coj lwm cov los ntseeg, ua li no mus ntau tiam. Thaum txog kuv hnub txiav txim, yam kuv tau ua ntawd thiab cov neeg los ntseeg ntawd yuav muaj nqes pab tau kuv. Lub Koom Txoos tsis xav kom peb niaj hnub nyuaj siab txog tias thaum twg lub ntiaj teb mam li kawg, qhov tseem ceeb rau peb mas yog qhov tias kom peb nyias yuav tsum npaj nyias tus kheej, thaum txog yus hnub kawg, yus thiaj tau mus nrog Yes Xus nyob xwb.

Kuv ntseeg txog Leej Ntuj Plig Ntshiab…
Lub Koom Txoos qhia tias, Leej Ntuj Plig Ntshiab yog ib leeg nyob hauv peb leeg Huab Tais. Lawv peb leeg ntawd
koom ua ib tug Tswv Ntuj xwb. Peb hais tsis tau tias muaj peb tug Tswv Ntuj. Peb hais tsis tau tias, leej Txiv yog ib tug Tswv Ntuj, leej Tub yog ib tug Tswv Ntuj, leej Ntuj Plig yog ib tug Tswv Ntuj, ces muaj peb tug Tswv Ntuj. Peb hais tsis tau li ntawd, tiam sis peb hais tau tias, leej Txiv yog Tswv Ntuj, leej Tub yog Tswv Ntuj, leej Ntuj Plig yog Tswv Ntuj, lawv peb leeg ntawd yog ib tug Tswv Ntuj xwb.
Peb yuav pom Leej Ntuj Plig nyob hauv tas puas tsav yam uas zoo, tej yam tsis dag tsis cuav, tej yam uas zoo nkauj zoo saib. Thiab nws kuj nyob hauv peb nruab siab. Nws yog lub zog uas ua kom yus xav ua neeg zoo coj ncaj thiab txawj hlub luag. Nws yog lub Tswv Yim uas qhia kom peb ntseeg txog Tswv Ntuj thiab ntseeg txog Yes Xus. Thaum peb
txais lub Cim Ntxuav, peb txais leej Tswv Yim Ntshiab lub hwj huam los nyob hauv peb.

ntseeg txog lub Koom Txoos Ntshiab cia rau lub qab ntuj neeg…
Lub Koom Txoos yog tas ib tsoom neeg ntseeg Yes Xus. Lo lus ‘cia rau lub qab ntuj neeg’ yog txhais lo lus ‘kas tos liv’ uas lub ntsiab yog ‘nyob thoob qab ntuj.’ Lub Koom Txoos Kas Tos Liv yog Yes Xus 12 tug Hauv Paus Xa Lus tau tsa muaj thaum lub hauv paus los. Vim Yes Xus tau hais rau Pob Zeb tias, “Koj yog Pob Zeb, kuv yuav tsa kuv lub Koom
Txoos rau saum lub pob zeb no,” mas Pob Zeb tau yog thawj tus hau thaum lawv nyuam qhuav pib. Cov los hloov Pob Zeb yog cov Vaj Qhia los txog niaj hnub no. Vaj Qhia nrog cov Tswv Qhia yog cov txiav txim rau peb txoj kev ntseeg, tias peb yuav ntseeg li cas thiab yuav coj li cas. Lub Koom Txoos txoj hauj lwm yog tshaj lub Moo Zoo rau tas ib tsoom neeg nyob ntiaj teb.

Cov Leej Ntshiab nyob saum ntuj Cov neeg ntseeg tseem ciaj nyob ntiaj teb Cov tau tas sim neej lawm, tiam sis tseem them txim nyob teb chaws them txim

ntseeg txog tsoom Leej Ntshiab sib koom Ntuj lub txiaj ntsim…
Cov Leej Ntshiab uas hais txog ntawm no yog tsoom neeg ntseeg Yes Xus uas tseem ciaj nyob thiab cov tau tas
sim neej lawm. Cov tau tas sim neej lawm, muaj ob pab. Pab ib, yog cov neeg ua neej dawb huv uas lawv tau ncaj qha mus nrog Tswv Ntuj nyob. Pab ob, yog cov uas yuav tsum tau mus them txim txhaum tas tso lawv mam tau mus nyob saum ntuj. Peb pab neeg no, cov tseem ciaj nyob, cov nyob saum ntuj, thiab cov nyob teb chaws them txim (purgatory), lawv sawv daws muaj kev sib faib sib koom Tswv Ntuj lub txiaj ntsim ntawm nws txoj kev cawm seej.

ntseeg txog kev daws txhaum…
Nyob hauv Koom Txoos Kas Tos Liv, peb muaj txoj kev daws txhaum nyob hauv lub Cim Daws Txhaum. Yog txiv plig
thiaj ua tau lub Cim Daws Txhaum xwb. Cov tsis tau txais lub cim tiag tes ua txiv plig tsis muaj lub hwj huam yuav daws txhaum tau. Txoj kev daws txhaum yog los ntawm qhov Yes Xus tau hais rau nws cov thwj tim tias, “Nej daws yam twg
nyob ntiaj teb no, yam ntawd kuj yuav daws nyob saum ntuj; nej khi yam twg nyob ntiaj teb no, yam ntawd kuj yuav khi nyob saum ntuj.” (Zam 20, 21-23) Yes Xus tau tso nws lub hwj huam daws txhaum tau ntawd rau nws cov thwj tim. Cov thwj tim kuj tau ua lub Cim Tiag Tes tso lub hwj huam ntawd rau cov uas los pauv lawv. Lawv tau ua li ntawd tiam dhau tiam los txog niaj hnub no. Cov txiv plig yog cov hloov cov thwj tim chaw. Lawv thiaj muaj cai daws txhaum tau.

ntseeg txog neeg lub cev yuav sawv rov los…
Vim Yes Xus lub cev tau sawv rov los lawm, peb cia siab hais tias muaj ib hnub twg peb lub cev kuj yuav sawv rov
los dua, muaj hwj chim, thiab yuav tau mus nrog Tswv Ntuj nyob nyob saum ntuj tas mus ib txhis.

thiab ntseeg txog kev muaj txoj sia nyob mus li.
Vim Yes Xus tau mus saum ntuj lawm, peb ntseeg tias muaj ib hnub twg peb kuj yuav tau mus saum ntuj, thiab yuav nyob tas mus li tsis txawj kawg. Peb tsis paub hais tias saum ntuj yuav zoo li cas tiag, tiam sis peb paub tau tias tas puas tsav yam yuav zoo tshaj nyob ntiaj teb no, vim nyob saum ntuj, peb yuav pom Yes Xus, yuav pom Tswv Ntuj thiab paub nws txoj kev hlub, yuav tsis muaj kev txom nyem kev quaj ntsuag li nyob ntiaj teb lawm.

Ua li (Amen).
Lo lus “Ua li,” yog txhais tias, “Xav kom muaj raws li ntawd.”
___________________________________________________________________________

Piav txog Tswv Ntuj Peb Leeg (Holy Trinity)


Tswv Ntuj yog ib tug zoo li cas?
Raws li daim duab saum no:
Leej Txiv (Father) yog Tswv Ntuj (God)
Leej Tub (Son) yog Tswv Ntuj (God)
Leej Ntuj Plig (Holy Spirit) yog Tswv Ntuj (God)

Tiam sis tsuas muaj ib tug Tswv Ntuj xwb, peb leeg ntawd koom ua ib tug Tswv Ntuj xwb.

Leej Txiv tsis yog Leej Tub, Leej Tub kuj tsis yog leej Txiv.
Leej Txiv tsis yog Leej Ntuj Plig, Leej Ntuj Plig kuj tsis yog Leej Txiv.
Leej Tub tsis yog Leej Ntuj Plig, Leej Ntuj Plig kuj tsis yog Leej Tub.

Lawv nyias muaj nyias, tiam sis peb hais tsis tau tias yog peb tug Tswv Ntuj, tsuas hais tau tias lawv yog ib tug Tswv ntuj xwb. Peb hu tsis tau tias peb tug Tswv Ntuj tiam sis peb hu tau tias Tswv Ntuj Peb leeg.

Ib lub Triangle yuav tsum muaj peb sab peb ces kaum, thiaj hu tau ua ib lub triangle. Yog muaj ib ces kaum thiab ob sab xwb hu tsis tau ua triangle. Ib yam li ntawd Tswv Ntuj (God) yuav tsum muaj peb leeg nyob hauv, tiam sis tsuas yog ib tug Tswv ntuj xwb.

XH Npuag Tub,

Ua koj tsaug rau koj cov lus zoo os. Kuv tuaj piav me ntsis raws li kuv paub. Koj twb yog ib tug tau kawm thiab paub ntau yam, koj tuaj piav raws li koj paub thiab. Ces peb tuaj sib qhia thiab tuaj kawm ua ke kom peb paub txog peb txoj kev ntseeg zoo dua xwb os. Qhov tseem ceeb tsis yog kom paub hauv lub hlwb xwb, yog kom peb yuav tsum xyaum coj xyaum ua kom tau raws li qhov peb paub thiab.